བདེ་མཆོག་དང་རྡོ་རྗེེ་རྣལ་འབྱོར་མའི་འཕོ་བ་མཁའ་སྤྱོད་བདེ་ལམ།

བདེ་མཆོག་དང་རྡོ་རྗེེ་རྣལ་འབྱོར་མའི་འཕོ་བ་མཁའ་སྤྱོད་བདེ་ལམ་བཞུགས།

ན་མོ་ཙཀྲ་སཾ་བ་ར་ཡེ། འདིར་འཁོར་ལོ་བདེ་མཆོག་ལ་བརྟེན་པའི་འཕོ་བའི་ཉམས་ལེན་པཎ་ཆེན་ཐམས་ཅད་མཁྱེན་པས་མཛད་པ་གཞིར་བྱས་ཏེ་འཇུག་པ་བདེ་བར་དགོད་པར་བྱ་བ་ལ། སྐྱབས་སེམས་སོགས་སྔོན་དུ་བཏང་ནས། །རང་གི་སྤྱི་བོར་སྣ་ཚོགས་པད་ཉིའི་སྟེང་། །བླ་མ་ཀུན་འདུས་འཁོར་ལོ་སྡོམ་པ་ནི། །ཉིན་བྱེད་འབུམ་གྱིས་འཁྱུད་པའི་དབང་སྔོན་ལྟར། །རབ་བརྗིད་རྣམ་ཐར་སྒོ་བཞི་དག་པའི་ཞལ། །རྟེན་འབྲེལ་བཅུ་གཉིས་དག་པའི་ཕྱག་བཅུ་གཉིས། །དང་པོ་གཉིས་ཀྱིས་རྡོ་རྗེ་ཕག་མོ་ལ། །འཁྱུད་ཅིང་སྙོམས་པར་འཇུག་པའི་གནས་གསུམ་དུ། །རྡོ་རྗེེ་གསུམ་མཚན་ཧཱུཾ་ཡིག་འོད་ཟེར་གྱིས། །རང་བཞིན་གནས་ནས་རྒྱལ་བ་ཀུན་གྱི་དངོས། །བཅོམ་ལྡན་བདེ་མཆོག་ཡབ་ཡུམ་ཡེ་ཤེས་པ། །སྤྱན་དྲངས་ཛཿཧཱུཾ་བཾ་ཧོཿས་དབྱེར་མེད་གྱུར། །ཧེ་རུ་ཀ་དཔལ་བདག་ཉིད་ཆེ། །རྣམ་དག་རྡོ་རྗེ་དབང་ཕྱུག་མ། །རྗེས་ཆགས་ཆགས་པ་ཆེ་རྣམས་ཀྱི། །རྡོ་རྗེ་ཕག་མོ་བཅས་ལ་འདུད། །དངོས་བཤམས་ཡིད་ཀྱིས་སྤྲུལ་པ་ཡི། །ཕྱི་ནང་གསང་བའི་མཆོད་ཚོགས་འབུལ། །སྡིག་ལྟུང་ཐམས་ཅད་སོ་སོར་བཤགས། །དགེ་ཚོགས་ཀུན་ལ་རྗེས་ཡི་རང་། །འགྲོ་ལ་ཆོས་འཁོར་བསྐོར་བར་བསྐུལ། །མྱ་ངན་མི་འདའ་རྟག་བཞུགས་གསོལ། །འདིས་མཚོན་དགེ་ཀུན་བདེ་མཆོག་གི །གོ་འཕང་དམ་པ་ཐོབ་ཕྱིར་བསྔོ། །རང་ལུས་དབུས་སུ་དབུ་མ་མདའ་སྨྱུག་ཙམ། །མར་སྣ་ལྟེ་འོག་ཡར་སྣ་ཚངས་བུག་ཟུག ། །སྙིང་ཀར་རང་སེམས་ཧཱུཾ་སྔོན་ནས་འབྲུ་ཙམ། །འཕར་ཞིང་འཕུར་ལ་ཁད་པ་ཉིད་དུ་གྱུར། །སྐྱབས་གནས་ཀུན་འདུས་བདེ་མཆོག་ཡབ་ཡུམ་ལ། །གསོལ་བ་འདེབས་སོ་རྗེས་བཟུང་བྱིན་གྱིས་རློབས། །མཆོག་ཐུན་དངོས་གྲུབ་མ་ལུས་སྩལ་དུ་གསོལ། །དག་པ་མཁའ་སྤྱོད་གནས་སུ་དྲང་དུ་གསོལ། །ཞེས་པ་ལན་ཉེར་གཅིག་རེ་བརྗོད་པའི་མཐར། ༈ དེ་ལྟར་གསོལ་བས་རྗེ་བཙུན་ཐུགས་ཀ་ནས། །འོད་ཟེར་ལྕགས་ཀྱུ་ལྟ་བུ་གློག་འཁྱུག་བཞིན། །རང་གི་སྤྱི་བོར་དྷཱུ་ཏིའི་ནང་བརྒྱུད་དེ། །རྣམ་ཤེས་ཧཱུཾ་ལ་བཏབ་ནས་གྱེན་དུ་དྲངས། །ཞེས་བརྗོད་ཅིང་འོག་རླུང་གྱེན་དུ་འཐེན་པ་དང་མཉམ་དུ་ཧིཀ་ཞེས་བརྗོད་དེ་ཧཱུཾ་ཡིག་ཚངས་པའི་བུ་གར་མགོ་ཉུག་ཙམ་རེ་བྱས་ནས། ཀ་ཞེས་བརྗོད་ཅིང་སླར་སྙིང་ཀར་འདེབས། དེ་ལྟ་བུ་ལན་ཉེར་གཅིག་རེ་བྱས་ནས། ཡང་གསོལ་འདེབས་ནས་བསྐྱར་ཏེ་ཉེར་གཅིག་པ་ལན་ཅི་ནུས་བྱས་ནས་མཐར་རྗེ་བཙུན་ཡབ་ཡུམ་སྤྱི་བོ་ནས་སྙིང་ཁར་བྱོན་ནས་ཧཱུཾ་ཡིག་ལ་ཐིམ་པར་བསམ་ཞིང་། རང་གི་སེམས་དང་བླ་མ་ལྷག་པའི་ལྷ་གསུམ་དབྱེར་མེད་དུ་མོས་པ་ཤུགས་དྲག་བྱའོ། །དེ་ནི་སྦྱོང་བའི་དབང་དུ་བྱས་པ་ཡིན་ལ། རང་འཆི་བའི་ཚེ་འདེབས་ན་འཕེན་པ་ལས་འབེབས་པ་མི་བྱེད་དེ་ཡང་ལན་རེ་གཉིས་ཙམ་གྱིས་མི་ཆོག་གི འཆི་བའི་དུས་ཀྱི་བར་ལན་མང་དུ་བྱ་དགོས་སོ། །དེའི་ཚེ་སྔར་གྱི་གསོལ་འདེབས་ཀྱི་མཐར་ཏུ། །རྗེ་བཙུན་ཉིད་ཀྱི་ཐུགས་ཀར་ཐིམ་གྱུར་ཏེ། མཁའ་སྤྱོད་གནས་གཤེགས་རྣམ་ཤེས་ཐུགས་ཀ་ནས། ཕྱིར་འཐོན་མཁའ་སྤྱོད་རིག་པ་འཛིན་པར་གྱུར། ཧིཀ་ཕཊ་ཅེས་དམིགས་པ་དང་བཅས་བརྗོོད་ཅིང་བསྔོ་སྨོན་བྱའོ། །མངྒལཾ། །༈ ན་མོ་བཛྲ་ཝཱ་ར་ཧི་ཡེ། འདིར་རྡོ་རྗེ་རྣལ་འབྱོར་མ་ལ་བརྟེན་པའི་མཁའ་སྤྱོད་ཀྱི་འཕོ་བའི་ཉམས་ལེན་ཞིག་བཤད་པར་བྱ་སྟེ། དེ་ཡང་ནཱ་རོ་ཆོས་དྲུག་དང་ནི་གུ་ཆོས་དྲུག་ནས་འབྱུང་བ་ལྟར་རྗེ་དགེ་འདུན་རྒྱ་མཚོ་དང་པཎ་ཆེན་གོང་མ་སོགས་ཀྱིས་བཤད་པའི་རྗེས་སུ་འབྲང་ནས་འཆད་པ་ལ། བདེ་མཆོག་གི་རྣལ་འབྱོར་བ་ལྟ་བུ་ཞིག་གིས་སྐྱབས་འགྲོ་སེམས་བསྐྱེད་སོགས་སྔོན་དུ་བཏང་ནས། རང་ཉིད་བདེ་མཆོག་ཏུ་སྒོམ་པའི་རྒྱུན་ཡིན་ན་དེས་ཆོག་ལ། མིན་ན། །རང་ཉིད་སྐད་ཅིག་གིས་བདེ་མཆོག་ཞལ་གཅིག་ཕྱག་གཉིས་པ་རྡོ་རྗེ་དང་དྲིལ་བུ་འཛིན་པར་གྱུར། རང་གི་ལུས་ཀྱི་ནང་སྒལ་ཚིགས་ལ་ཉེ་བར་རྩ་དབུ་མ་མདའ་སྨྱུག་ཙམ་མར་སྣ་ལྟེ་འོག་སོར་བཞི་ནས་ཟུག་ཅིང་། ཡར་སྣ་ཚངས་བུག་དང་ཁད་ཆད་དུ་ཡོད་པ། རང་གི་གསང་གནས་སུ་ཆོས་འབྱུང་ཟུར་གསུམ་པ་ཕྱི་དཀར་ལ་ནང་དམར་བའི་ནང་དུ་རླུང་དཀྱིལ་གཡོ་བ་གཞུ་ལྟ་བུ། དྷཱུ་ཏིའི་མར་སྣའི་བུག་པའི་ནང་དུ་རང་གི་སེམས་ཉིད་ཨ་དཀར་པོ་འོད་ཀྱི་རང་བཞིན་ཅན་འཕར་ལ་ཁད་འཕུར་ལ་ཁད་པ་ཞིག་ཏུ་གྱུར། རང་གི་སྤྱི་བོར་པད་ཟླའི་གདན་ལ་རྗེ་བཙུན་རྡོ་རྗེ་རྣལ་འབྱོར་མ་སྐུ་མདོག་དཀར་མོ་གྲི་གུག་དང་ཐོད་པ་འཕྱར་སྟབས་སུ་འཛིན་པ། ཞབས་གཉིས་རང་གི་རྒྱབ་ནས་ཕྲག་པ་ལ་བཀལ་བ། ཐོད་བསྐམ་ལྔའི་དབུ་རྒྱན་དང་བསྐམ་པོ་ལྔ་བཅུའི་དོ་ཤལ་ཅན། ཕྱག་རྒྱ་ལྔས་བརྒྱན་པ། དབུ་སྐྲ་སིལ་བུས་སྐུ་སྟོད་ཁེབས་ཤིང་ནུ་འབུར་རྒྱས་པ། གཅེར་མོའི་གཟུགས་ཅན་གསང་བའི་ཆུ་སྐྱེས་དམར་སིང་ངེ་བ་རང་གི་ཚངས་བུག་གི་ཐད་དུ་གནས་པ། དེའི་སྤྱི་བོར་ༀ། མགྲིན་པར་ཨཱཿ ཐུགས་ཀར་ཧཱུཾ། ཐུགས་ཀའི་ཧཱུཾ་ལས་འོད་ཟེར་འཕྲོས། མཁའ་སྤྱོད་ཀྱི་གནས་ནས་བསྒོམས་པ་དང་འདྲ་བའི་རྡོ་རྗེ་རྣལ་འབྱོར་མའི་ཡེ་ཤེས་པ་སྤྱན་དྲངས། ཛཿཧཱུཾ་བཾ་ཧོཿ སླར་ཡང་ཐུགས་ཀའི་ཧཱུཾ་ལས་འོད་ཟེར་འཕྲོས་པས་དབང་གི་ལྷ་རྣམས་སྤྱན་དྲངས། ཁྱེད་རྣམས་ཀྱིས་མངོན་པར་དབང་བསྐུར་དུ་གསོལ་ཞེས་གསོལ་བ་བཏབ་པས། དེ་རྣམས་ཀྱིས་བུམ་པའི་ཆུས་སྤྱི་བོ་ནས་དབང་བསྐུར། སྐུ་གང་དྲི་མ་དག །ཆུ་ལྷག་མ་ཡོངས་སུ་གྱུར་པ་ལས་རྣམ་སྣང་གིས་དབུ་བརྒྱན་པར་གྱུར། རང་གི་ཐུགས་ཀ་ནས་སྤྲོས་པའི་མཆོད་པའི་ལྷ་མོ་རྣམས་ཀྱིས་མཆོད་པར་གྱུར། ༀ་བཛྲ་ཝ་ར་ཧི་ཨརྒྷཾ་ནས། ཤཔྟ་པྲ་ཏཱི ཙྪ་ཧཱུཾ་སྭཱཧཱའི་བར་གྱིས་མཆོད། ནང་མཆོད་ཡོད་ན་འབུལ། རྒྱལ་ཀུན་ལྷན་ཅིག་སྐྱེས་པའི་དངོས། །སྒྱུ་མའི་གར་རོལ་ལྷ་མོའི་གཟུགས། །གནས་གསུམ་མཁའ་འགྲོ་ཡོངས་ཀྱི་གཙོ། །རྡོ་རྗེ་རྣལ་འབྱོར་མ་ལ་འདུད། །ཅེས་བསྟོད་ནས། དུས་གསུམ་རྒྱལ་བ་མ་ལུས་བསྐྱེེད་མཛད་ཡུམ། །གསོལ་བ་འདེབས་སོ་རྗེ་བཙུན་རྣལ་འབྱོར་མ། །ཐུགས་རྗེས་གཟིགས་ཤིག་རྒྱལ་བ་ཀུན་གྱི་ཡུམ། །དག་པ་མཁའ་སྤྱོད་གནས་སུ་འཁྲིད་དུ་གསོལ། །བླ་མ་ཀུན་འདུས་རྡོ་རྗེ་རྣལ་འབྱོར་མ། །དག་པ་མཁའ་སྤྱོད་གནས་སུ་འཁྲིད་དུ་གསོལ། །མཆོག་གསུམ་ཀུན་འདུས་རྡོ་རྗེ་རྣལ་བྱོར་མ། །དག་པ་མཁའ་སྤྱོད་གནས་སུ་ཁྲིད་དུ་གསོལ། །ཡི་དམ་ཀུན་འདུས་རྡོ་རྗེ་རྣལ་འབྱོར་མ། །དག་པ་མཁའ་སྤྱོད་གནས་སུ་འཁྲིད་དུ་གསོལ། །མཁའ་འགྲོ་ཀུན་འདུས་རྡོ་རྗེ་རྣལ་འབྱོར་མ། །དག་པ་མཁའ་སྤྱོད་གནས་སུ་འཁྲིད་དུ་གསོལ། །ཞེས་ལན་བདུན་ནམ། ཉེར་གཅིག་ལྟ་བུ་རེ་བརྗོད་ཅིང་མཐར་འོག་རླུང་གྱེན་དུ་འཐེན་པ་དང་འོག་རླུང་གཡོས། སྤྱི་བོའི་རྗེ་བཙུན་རྣལ་འབྱོར་མའི་ཐུགས་ཀ་ནས་འོད་ཟེར་ལྕགས་ཀྱུ་ལྟ་བུ་ཞིག་བྱུང་སྟེ། རང་སེམས་ཨ་ཡིག་ལ་ཟུག་ནས་གྱེན་དུ་དྲངས། ཧིག་ཅེས་བརྗོད་པས་དེ་ཉིད་ཧྲིལ་གྱིས་སོང་ནས་ཚངས་བུག་ལ་རེག་ཙམ་བྱས་ནས་འོག་རླུང་ལྷོད་པ་དང་སླར་མར་འབེབས། དེ་ལྟར་ལན་མང་དུ་བྱས་ན་འབྱོངས་པའི་རྟགས་འབྱུང་། ཡང་ན་སྦྱོང་བའི་ཚེ། དག་པ་མཁའ་སྤྱོད་གནས་སུ་འཁྲིད་དུ་གསོལ། །ཞེས་པ་ཟབ་ལམ་འཕོ་བ་འབྱོངས་པར་བྱིན་གྱིས་རློབས། །ཞེས་བསྒྱུར་ཡང་རུང་། མཐར་རྗེ་བཙུན་མ་དང་དེའི་ཐུགས་ཀ་ནས་ཡེ་ཤེས་ཀྱི་བདུད་རྩིའི་རྒྱུན་འབབས་ཨ་ཡིག་ལ་ཐིམ་པར་བསམ་མོ། །དེ་ནི་སྦྱོང་བའི་དབང་དུ་བྱས་ལ། རང་འཆི་བར་ངེས་པའི་ཚེ། ཧིག་ཕཊ་ཅེས་བརྗོད་པས། རྣམ་ཤེས་ཨ་ཡིག་ཏུ་གསལ་བ་དེ་ཉིད་ཚངས་བུག་ནས་རྒྱངས་ཀྱིས་འཐོན། རྗེ་བཙུན་མའི་གསང་གནས་དམར་སིང་ངེ་བའི་ནང་དུ་ཞུགས་ནས་ཐུགས་ཀར་ཐིམ་པས་རྗེ་བཙུན་མ་མཁའ་སྤྱོད་དུ་གཤེགས། རྣམ་ཤེས་ཐུགས་ཀ་ནས་ཕྱིར་འཐོན་མཁའ་སྤྱོད་ཀྱི་རིག་པ་འཛིན་པར་གྱུར་པར་བསམས་ལ་བསྔོ་སྨོན་བྱའོ། །དེ་ལྟ་བུ་ལན་རེ་གཉིས་ཙམ་གྱིས་མི་ཆོག་པས། འཆི་བའི་དུས་བྱེད་པའི་བར་བྱ་ཞིང་། གཞན་ལ་འདེབས་པ་དང་ཁ་བསྒྱུར་ཚུལ་ཤེས་པར་བྱས་ནས་བྱའོ། །འདིའི་འཕོ་བ་ལ་རླུང་སྟོབས་ཀྱིས་འཕོ་བ་དང་། འདུན་སྟོབས་ཀྱིས་འཕོ་བ་གཉིས་བཤད་པའི་ཕྱི་མའི་དབང་དུ་བྱས་ལ། རླུང་སྟོབས་ཀྱིས་འཕོ་ནུས་ན་རང་གང་འདོད་པར་འཕོ་ནུས་ལ། འདུན་སྟོབས་ལ་དེ་ཙམ་མི་ནུས་ཀྱང་ཕན་ཆེའོ། །ཅེས་པ་འདི་གཉིས་ཀ་དམ་པའི་མན་ངག་བཞིན་ཤཱཀྱ་བཙུན་བཤད་སྒྲུབ་མིང་ཅན་གྱིས་རེ་གཉིས་ལ་ཕན་འདོད་ཀྱི་འདུན་པས་ཅོ་ནེའི་དགོན་ཉིད་དུ་སྦྱར་བའི་ཡི་གེ་པ་ནི་ཏཱ་ཡི་ལ་ལུང་བློ་བཟང་དོན་གྲུབ་བོ།། །།མངྒ་ལཾ།། །།