བྱང་ཆུབ་ལམ་རིམ་ཆེན་མོའི་དོན་གྱི་སྙིང་པོ་བསྡུས་པ་རྗེའི་དགོངས་གསལ་དགྱེས་བྱེད་མཆོད་སྤྲིན།

བྱང་ཆུབ་ལམ་རིམ་ཆེན་མོའི་དོན་གྱི་སྙིང་པོ་བསྡུས་པ་རྗེའི་དགོངས་གསལ་དགྱེས་བྱེད་མཆོད་སྤྲིན་ཞེས་བྱ་བ་བཞུགས།

ན་མོ་གུ་རུ་མཉྫུ་གྷོ་ཥཱ་ཡ། ལྷ་མིའི་འདྲེན་མཆོག་མཉམ་མེད་ཟས་གཙང་སྲས། །བྱམས་བརྩེའི་བདག་ཉིད་རྗེ་བཙུན་མི་ཕམ་མགོན། །རྒྱལ་ཀུན་མཁྱེན་རབ་དབང་ཕྱུག་འཇམ་པའི་དབྱངས། །སངས་རྒྱས་བྱང་སེམས་གསུམ་ལ་གུས་ཕྱག་འཚལ། །འཛམ་གླིང་རྒྱན་གྱུར་ཀླུ་སྒྲུབ་ཐོགས་མེད་དང་། །མཁས་མཆོག་དབྱིག་གཉེན་འཕགས་གྲོལ་གསེར་གླིང་པ། །ཇོ་བོ་ཡབ་སྲས་པོ་ཏོ་གླང་ཤར་སོགས། །བཀའ་གདམས་བརྒྱུད་པའི་བླ་མ་རྣམས་ལ་འདུད། །སྐྱེས་བུ་གསུམ་གྱི་ལམ་གྱི་རིམ་པ་ཉིད། །རྒྱལ་དང་ཤིང་རྟ་ཆེན་པོའི་བཞེད་པ་བཞིན། །གསལ་མཛད་ཆོས་ཀྱི་རྒྱལ་པོ་ཙོང་ཁ་པ། །ཡབ་སྲས་བརྒྱུད་པར་བཅས་ལ་གུས་པས་འདུད། །རྒྱལ་བ་གཉིས་པའི་གསུང་རབ་ཀུན་གྱི་གཙོ། །བྱང་ཆུབ་ལམ་གྱི་རིམ་པ་ཞེས་གྲགས་པའི། །ལེགས་བཤད་འདི་ལ་རང་སྐལ་བསྡུས་དོན་ཞིག །འཆད་ལ་ཡིད་ནི་ཀུན་ནས་སྤྲོ་བར་གྱུར། །དེ་ལ་འདིར་བྱང་ཆུབ་ལམ་རིམ་ཆེན་མོ་ཞེས་ཡོངས་སུ་གྲགས་པ་འདིའི་ས་བཅད་དང་བསྟུན་པའི་བསྡུས་དོན་གྱི་དགོངས་འགྲེལ་ཇི་ལྟར་འཚམས་པ་ཞིག་བཤད་པར་བྱ་སྟེ། དེ་ཡང་། ཕུན་ཚོགས་དགེ་ལེགས་བྱེ་བས་བསྐྲུན་པའི་སྐུ། །ཞེས་སོགས་ཀྱི་ཚིགས་བཅད་དང་པོས་སྟོན་པ་དང་། གཉིས་པས་བྱམས་འཇམ་དབྱངས་དང་། །གསུམ་པས་ཤིང་རྟ་ཆེན་པོ་གཉིས་དང་། བཞི་པས་ཇོ་བོ་ཆེན་པོ་དང་། ལྔ་པས་ལམ་རིམ་བརྒྱུད་པའི་བླ་མ་རྣམས་ལ་ཐུན་མོང་དུ་ཕྱག་བྱས་ཏེ། དེང་དུས་རྣལ་འབྱོར་བརྩོན་རྣམས་ཐོས་པ་ཉུང་། །ཞེས་སོགས་ཚིགས་བཅད་གསུམ་གྱིས་ལམ་རིམ་རྩོམ་པའི་དགོས་པ་ཀུན་སློང་དང་བཅས་པའི་དམ་བཅའ་དང་ཉན་པར་བསྐུལ་བ་རྣམས་སྟོན་ནོ། །དེ་ནས་འདིར་རྒྱལ་བའི་གསུང་རབ་ཐམས་ཅད་ཀྱི་གནད་བསྡུས་པ་ཞེས་པ་ནས། སངས་རྒྱས་ཀྱི་སར་འཁྲིད་པའི་ཚུལ་ནི་གང་བཤད་པར་བྱ་བའི་ཆོས་སོ་ཞེས་པའི་བར་གྱིས་བཤད་བྱའི་ཆོས་ངོས་བཟུང་ངོ་། །དེ་ལྟར་ན་བྱང་ཆུབ་ལས་གྱི་རིམ་པའི་ཁྲིད་ལ་བཞི་ཞེས་སོགས་ཀྱིས་མཛད་པ་པོའི་ཆེ་བ། ཆོས་གྱི་ཆེ་བ། ཆོས་ལ་ཉན་བཤད་ཇི་ལྟར་བྱ་བ། སློབ་མ་ཇི་ལྟར་བཀྲི་བའི་རིམ་པ་རྣམས་འཆད་ཅིང་། དང་པོ་མཛད་པ་པོ་ནི། གདམས་ངག་འདི་སྤྱིིར་རྗེ་བཙུན་བྱམས་པས་མཛད་པའི་མངོན་རྟོགས་རྒྱན་གྱི་གདམས་ངག་ཡིད་ལ། ཁྱད་པར་དུ་འདིའི་གཞུང་ནི་བྱང་ཆུབ་ལམ་གྱི་སྒྲོན་མ་ཡིན་པས། དེ་མཛད་པ་པོ་ཡང་འདིའི་མཛད་པ་པོའོ། །ཞེས་པས་གདམས་ངག་འདི་མཛད་པ་པོ་དག་མདོར་བསྟན་གྱི་ཚུལ་དུ་ངོས་བཟུང་ངོ་། །འདི་ཅུང་གོ་མི་བདེ་བའི་རྐྱེན་གྱིས་བཤད་ཚུལ་མི་འདྲ་བ་སྣང་ཡང་དོན་ནི་འདི་ལྟར་ཡིན་པར་སེམས་ཏེ། གདམས་ངག་འདི་ཞེས་པ་ནི་སྐྱེས་བུ་གསུམ་གྱི་ལམ་གྱི་རིམ་པའི་གདམས་ངག་འདིའོ། །དེ་ནི་འབྱུང་ཁུངས་ཀྱི་དབང་དུ་བྱས་ན་སྤྱིར་རྗེ་བཙུན་བྱམས་པས་མཛད་པའི་མངོན་རྟོགས་རྒྱན་ལས་རིགས་ཅན་གསུམ་གྱི་ལམ་གྱི་རིམ་པ་རྒྱས་པར་བཤད་པ་དེ་ལ་བརྟེན་ནས་ཡིན་པས་རྒྱན་གྱི་གདམས་ངག་ཡིན་ལ། ཁྱད་པར་དུ་བདག་གིས་འཆད་པའི་ལམ་གྱི་རིམ་པ་འདིའི་ཁུངས་བྱ་རྒྱུའི་གཞུང་དངོས་ནི་ཇོ་བོས་མཛད་པའི་བྱང་ཆུབ་ལམ་གྱི་སྒྲོན་མ་ཡིན་པས་འདི་ཡང་མངོན་རྟོགས་རྒྱན་གྱི་གདམས་ངག་ཡིན་ཏེ། དེ་ཡང་མངོན་རྟོགས་རྒྱན་དེ་མཛད་པ་པོ་བྱམས་པ་ཡང་ལམ་སྒྲོན་གྱི་མན་ངག་སྐྱེས་བུ་གསུམ་གྱི་ལམ་གྱི་རིམ་པ་འདིའི་མཛད་པ་པོ་ཡིན་ནོ་ཞེས་པའོ། །དེ་ཡང་སློབ་དཔོན་ཆེན་པོ་དཱི་པཾ་ཀཱ་ར་ཤྲཱི་ཛྙཱ་ན་ཞེས་སོགས་ཀྱིས་མཛད་པ་པོ་ཇོ་བོའི་ཁྱད་ཆོས་འཆད་དེ། དེའི་ཆེ་བ་ལ་གསུམ། རིགས་ཕུན་སུམ་ཚོགས་པར་སྐྱེ་བ་བཞེས་ཚུལ། རྟེན་དེ་ལ་ཡོན་ཏན་བརྙེས་ཚུལ། བརྙེས་ནས་བསྟན་པ་ལ་བྱ་བ་མཛད་ཚུལ་ལོ། །དང་པོ་ནི་རྒྱ་གར་ཟ་ཧོར་རྒྱལ་པོ་དགེ་བ་དཔལ་དང་བཙུན་མོ་དཔལ་མོ་འོད་ཟེར་ཅན་གཉིས་ཀྱི་སྲས་སུ་སྐུ་འཁྲུངས་པའི་སྐོར་དང་། གཉིས་པ་ནི། རིགས་པའི་གནས་སྔ་ལ་སྦྱངས་ཤིང་བླ་མ་རཱ་ཧུ་ལ་གུཔྟ་ལ་དབང་རྫོགས་པར་ཞུས་ཏེ་དགུང་ལོ་ཉེར་དགུའི་བར་དུ་ཁྱིམ་པའི་རྟེན་ཅན་དུ་བཞུགས། ཉེར་དགུའི་མཇུག་ལ་བླ་མ་ཤྲཱི་ལ་རཀྵི་ཏའི་དྲུང་དུ་རབ་བྱུང་ཞུས་ཏེ་མཚན་ནི་དཔལ་མར་མེ་མཛད་ཅེས་བཏགས། བླ་མ་དྷརྨཱ་རཀྵི་ཏ་སོགས་ལས་ནང་རིག་པའི་སྡེ་སྣོད་ཐམས་ཅད་གསན་ནས་དོན་ཐུགས་སུ་ཆུད། གསེར་གླིང་པ་ལ་བསྟེན་ནས་བྱང་ཆུབ་ཀྱི་སེམས་ཐུགས་རྒྱུད་ལ་འཁྲུངས། ཀླུ་སྒྲུབ་དང་ཐོགས་མེད་ནས་བརྒྱུད་པའི་གདམས་པ་མ་ལུས་པ་གསན་ཏེ་ཞི་ལྷག་གི་ཏིང་ངེ་འཛིན་དང་བསྐྱེད་རྫོགས་ཀྱི་རྟོགས་པ་བརྟན་པོ་བརྙེས་ཤིང་། སྒྲོལ་མ་ལ་སོགས་པ་ཡི་དམ་གྱི་ལྷ་མང་པོས་ཞལ་གཟིགས་སོ། །གསུམ་པ་བསྟན་པ་ལ་བྱ་བ་མཛད་པ་ལ་གཉིས། རྒྱ་གར་དུ་མཛད་ཚུལ་དང་། བོད་དུ་མཛད་ཚུལ་ལོ། །དང་པོ་ནི། རྡོ་རྗེའི་གདན་དུ་མུ་སྟེགས་ཀྱི་སྨྲ་བ་ངན་པ་ལན་གསུམ་དུ་ཆོས་ཀྱིས་ཕམ་པར་མཛད་ནས་བསྟན་པ་བཟུང་ཞིང་། རང་སྡེའི་སྡེ་བ་གོང་འོག་ཐམས་ཅད་ཀྱིས་བཀུར་ཏེ་མ་རྟོགས་པ་དང་ལོག་པར་རྟོག་པའི་དྲི་མ་བསལ་ནས་རྒྱལ་བའི་བསྟན་པ་རྒྱས་པར་མཛད་དོ། །གཉིས་པ་བོད་དུ་མཛད་ཚུལ་ལྷ་བླ་མ་ཁུ་དབོན་གྱིས་རྒྱ་བརྩོན་སེང་དང་ནག་ཚོ་ལོཙྪ་བ་གཉིས་རྒྱ་གར་དུ་བཏང་སྟེ་སྤྱན་དྲངས་ནས། བསྟན་པ་ལ་དག་ཐེར་མཛད་པར་གསོལ་བ་བཏབ་པ་ལ་བརྟེན་ནས་ལམ་སྒྲོན་འདི་བརྩམས་པ་སོགས་ཀྱི་སྒོ་ནས་བསྟན་པ་དར་བར་མཛད་དོ། །ཇོ་བོ་ལ་རྒྱ་གར་དང་བོད་ན་སློབ་མ་ཁྱད་པར་ཅན་མང་ཡང་གཙོ་བོ་ནི་སྒྲོལ་མས་ལུང་བསྟན་པའི་འབྲོམ་སྟོན་རིན་པོ་ཆེའོ། །སྐབས་འདིར་ནི་རྗེའི་ཆེ་བ་བརྗོད་པར་འོས་ཀྱང་གཞན་དུ་བརྗོད་ཟིན་ཅིང་མང་བར་དོགས་ནས་བཞག་གོ །གཉིས་པ་ཆོས་ཀྱི་ཆེ་བ་ནི། སྤྱིར་ཇོ་བོས་མཛད་པའི་གཞུང་མང་དུ་ཡོད་ཀྱང་རྩ་བ་ལྟ་བུ་ཡོངས་སུ་རྫོགས་པ་ནི་ལམ་སྒྲོན་ཡིན་ཏེ། ཞེས་པ་ནས། ལུགས་གཞན་ལས་ཁྱད་པར་དུ་འཕགས་པའོ་ཞེས་པའི་བར་གྱིས་ལམ་སྒྲོན་གྱི་བརྗོད་བྱའི་ཁྱད་ཆོས་བསྟན་ནས་གཞུང་དེའི་གདམས་ངག་གི་ཆེ་བ་ལ་བཞི། བསྟན་པ་ཐམས་ཅད་འགལ་མེད་དུ་རྟོགས་པའི་ཆེ་བ། གསུང་རབ་ཐམས་ཅད་གདམས་ངག་ཏུ་འཆར་བའི་ཆེ་བ། རྒྱལ་བའི་དགོངས་པ་བདེ་བླག་ཏུ་རྙེད་པའི་ཆེ་བ། ཉེས་སྤྱོད་ཆེན་པོ་རང་འགགས་སུ་འགྲོ་བའི་ཆེ་བའོ་ཞེས་ཆེ་བ་བཞི་བཤད་པའི་དོན་བསྡུས་ཏེ་བརྗོད་ན། དང་པོ་ནི། སངས་རྒྱས་ཀྱིས་གདུལ་བྱ་མཆོག་དམན་སྣ་ཚོགས་པའི་བློ་དང་བསྟུན་ནས་གསུང་རབ་བརྗོད་བྱ་མི་འདྲ་བ་དུ་མ་བསྟན་ཀྱང་། དེ་ཐམས་ཅད་གདུལ་བྱ་མངོན་མཐོ་དང་ངེས་ལེགས་ལ་འགོད་པའི་ཆེད་དང་། མཐར་སངས་རྒྱས་འཐོབ་པའི་ཐབས་སུ་གོ་བར་བྱ་སྟེ་དེ་ཡང་ཁ་ཅིག་ནི་ལམ་གྱི་གཙོ་བོ་དང་། ཁ་ཅིག་ནི་ལམ་གྱི་ཡན་ལག་ཅི་རིགས་སུ་འགྱུར་རོ། །འོ་ན་ཐེག་དམན་གྱི་སྡེ་སྣོད་རྣམས་སངས་རྒྱས་འཐོབ་པའི་ཐབས་སུ་ཇི་ལྟར་འགྱུར་ཞེ་ན། འགྱུར་ཏེ་ཐེག་དམན་གྱི་སྡེ་སྣོད་ལས་ནི་ཐེག་པ་ཆེ་ཆུང་གཉ ིས་ཀའི་ཐུན་མོང་བའི་ལམ་གྱི་རིམ་པ་མང་དུ་བཤད་པས་འཚང་རྒྱ་བའི་ཐབས་སུ་འགྱུར་ཞིང་། ཐུན་མོང་མ་ཡིན་པ་ཞི་བ་ཙམ་ཞིག་དོན་དུ་གཉེར་བ་སྟོན་པ་རྣམས་ནི་དེའི་གདུལ་བྱའི་རྒྱུད་སྨིན་པར་བྱས་ནས། མཐར་ཐེག་ཆེན་དུ་འཇུག་པའི་རྐྱེན་དུ་འགྱུར་བས་ཀྱང་འཚང་རྒྱ་བའི་ཐབས་སུ་འགྱུར་རོ། །དེའི་ཕྱིར་རྒྱལ་བའི་གསུང་རབ་ཐམས་ཅད་ཀྱང་སངས་རྒྱས་སྒྲུབ་པའི་ཐབས་ཀྱི་གཙོ་བོ་དང་ཡན་ལག་ཅི་རིགས་སུ་འདུའོ། །དོན་བསྡུ་བ་ན་དེ་ལྟར་ན་གདམས་ངག་འདིས་མདོ་སྔགས་ཀྱི་གནད་ཐམས་ཅད་གང་ཟག་གཅིག་འཚང་རྒྱ་བའི་ལམ་དུ་བསྡུས་ནས་འཁྲིད་པས་ན་འདི་ནི་བསྟན་པ་ཐམས་ཅད་འགལ་མེད་དུ་རྟོགས་པའི་ཆེ་བ་དང་ལྡན་ནོ་ཞེས་གསུངས་པ་ལྟར་རོ། །སྐབས་འདིའི་བསྟན་པ་ཞེས་པ་ནི་སངས་རྒྱས་ཀྱི་བསྟན་པ་ཞེས་པའི་དོན་མིན་གྱི། ཆོས་བསྟན་པ་ཞེས་པའི་དོན་ཡིན་པར་ཤེས་དགོས་སོ། །གཉིས་པ་གསུང་རབ་ཐམས་ཅད་གདམས་ངག་ཏུ་འཆར་ཚུལ་ནི། སྤྱིར་རྒྱལ་བའི་གསུང་རབ་རྣམས་དང་། མཁས་པ་མཆོག་རྣམས་ཀྱིས་མཛད་པའི་གཞུང་ཆེ་བ་རྣམས་ཀྱང་གདམས་ངག་ཡིན་མོད། ད་ལྟའི་གང་ཟག་གིས་རང་སྟོབས་ཀྱིས་དེ་རྣམས་གདམས་ངག་ཏུ་གོ་མི་ནུས་པས་གཞུང་འདི་ལྟ་བུ་ལ་བརྟེན་ནས་དེ་རྣམས་འཚང་རྒྱ་བའི་ཐབས་སམ་གདམས་ངག་ཏུ་འཆར་ཞིང་གོ་ནུས་པ་ཡིན་ཏེ། དོན་བསྡུར་གདམས་པ་འདིས་བཤེས་གཉེན་བསྟེན་ཚུལ་ནས་ཞི་གནས་དང་ལྷག་མཐོང་གི་བར་གསུང་དགོངས་འགྲེལ་དང་བཅས་པའི་ལམ་གྱི་གནད་ཐམས་ཅད་ཚང་བར་བསྡུས་ནས། དེ་དག་ཐམས་ཅད་ལ་འཇོག་སྒོམ་དགོས་པ་རྣམས་ལ་འཇོག་སྒོམ་དང་དཔྱད་སྒོམ་དགོས་པ་རྣམས་ལ་སོ་སོར་རྟོགས་པའི་ཤེས་རབ་ཀྱིས་དཔྱད་དེ་ཉམས་སུ་ལེན་པའི་རིམ་པར་དྲིལ་ནས་འཁྲིད་པས་ན་གསུངས་ཐམས་ཅད་གདམས་ངག་ཏུ་འཆར་རོ་ཞེས་གསུངས་པ་ལྟར་རོ། །གསུམ་པ་རྒྱལ་བའི་དགོངས་པ་བདེ་བླག་ཏུ་རྙེད་ཚུལ་ནི། གསུང་རབ་དགོངས་འགྲེལ་དང་བཅས་པ། ཐོས་བསམ་གྱིས་འཇུག་བྱའི་མཆོག་ཡིན་ཀྱང་། དེ་དག་ནས་འབྱུང་བའི་ཚིག་དོན་རྒྱ་ཆེ་ཞིང་འཐོར་བས་བདེ་བླག་ཏུ་འཇུག་མི་ནུས་ཤིང་ཞུགས་ཀྱང་ངེས་དཀའ་ལ། གཞུང་འདི་ལྟ་བུ་ལ་བརྟེན་ནས་དེ་རྣམས་ཀྱི་དོན་གྱི་གཙོ་བོའི་གནད་རྣམས་དགོངས་པ་ཇི་ལྟ་བ་བཞིན་ངེས་ནུས་པར་འགྱུར་རོ། །དེ་ཡང་དོན་བསྡུར་གདམས་པ་འདིས་བཀའ་དང་བསྟན་བཅོས་ཀྱི་གནད་ལ་ངེས་པ་བདེ་བླག་ཏུ་སྟེར་བར་འགྱུར་ཏེ་དེའི་ཚུལ་ནི་སྐབས་རྣམས་སུ་རྒྱས་པར་སྟོན་པར་འགྱུར་རོ་ཞེས་གསུངས་པ་ལྟར་རོ། །དེས་ན་བཀའ་བརྒྱུད་པའི་བླ་མ་འགའ་ཞིག་གིས་དབེན་པར་བསམ་གཏན་ཙམ་བསྒོམ་གྱི། ཐོས་བསམ་མང་པོ་མི་དགོས་སོ་ཞེས་གསུངས་པ་ནི་གཞུང་འདི་དག་གི་ཕྱོགས་སྔ་ཡིན་ནོ། །བཞི་པ་ཉེས་སྤྱོད་ཆེན་པོ་རང་འགགས་སུ་འགྲོ་ཚུལ་ནི། རྒྱལ་བའི་གསུང་རབ་རྣམས་འཚང་རྒྱ་བའི་ཐབས་ཀྱི་གདམས་པར་མ་གོ་བའི་རྐྱེན་གྱིས་འགའ་ཞིག་འཚང་རྒྱ་བའི་གེགས་སུ་བཟུང་ནས་སྐུར་བ་འདེབས་ཤིང་སྤངས་ན་ཆོས་སྤོང་བར་འགྱུར་བས་སྡིག་ཤིན་ཏུ་ཆེའོ། །དེ་ལས་སྔར་བཤད་པ་ལྟར་ངེས་པ་རྙེད་པ་ཙམ་གྱིས་ཉེས་སྤྱོད་དེ་དག་རང་འགགས་སུ་འགྲོ་སྟེ། བཀའ་དང་གཞུང་ཆེ་བ་གཞན་དག་ཀྱང་སངས་རྒྱས་སྒྲུབ་པའི་ཐབས་སུ་ཤེས་ནས་གུས་པ་སྐྱེ་བར་འགྱུར་བའི་ཕྱིར་རོ། །གསུམ་པ་ཆོས་ལ་ཉན་བཤད་ཇི་ལྟར་བྱ་བ་ལ་གསུམ། ཉན་པའི་ཚུལ། བཤད་པའི་ཚུལ། མཇུག་ཏུ་ཐུན་མོང་དུ་བྱ་བའོ། །དང་པོ་ལ་གསུམ། ཆོས་ཐོས་པའི་ཕན་ཡོན། ཆོས་དང་ཆོས་སྨྲ་བ་ལ་རིམ་གྲོ་བསྐྱེད་དེ་ཉན་པའི་ཚུལ་དངོས་སོ། །དང་པོ་ནི། ཐོས་པའི་ཚོམས་ལས། ཐོས་པས་ཆོས་རྣམས་ཤེས་པར་འགྱུར། ཞེས་སོགས་ཀྱིས་ཐོས་པ་དགོས་ཚུལ་དང་དེའི་ཕན་ཡོན་བཤད་པ་རྣམས་སོ། །གཉིས་པ་རིམ་གྲོ་བསྐྱེད་པ་ནི། སའི་སྙིང་པོའི་མདོ་ལས། གཅིག་ཏུ་དད་ཅིང་གུས་པས་ཆོས་མཉན་གྱི། །དེ་ལ་འཕྱ་ཞིང་སྐུར་པ་མི་བྱའོ། །ཆོས་སྨྲ་བ་ལ་མཆོད་པར་བྱ་བ་ནི། །སངས་རྒྱས་འདྲ་བར་དེ་ལ་འདུ་ཤེས་བསྐྱེད། །ཅེས་སོགས་ཀྱིས་ཆོས་སྨྲ་བ་ལ་མཆོད་ཅིང་བཀུར་སྟི་བྱེད་དགོས་པ་སྟོན་པ་ལྟར་རོ།། གསུམ་པ་ཉན་ཚུལ་དངོས་ལ་གཉིས། སྣོད་ཀྱི་སྐྱོན་གསུམ་སྤོང་བ་དང་། འདུ་ཤེས་དྲུག་བསྟན་པའོ། །དང་པོ་ནི། སྣོད་ཁ་སྦུབ་ལྟ་བུ་དང་། ནང་མི་གཙང་བ་ལྟ་བུ་དང་། ཞབས་རྡོལ་བ་ལྟ་བུའི་སྐྱོན་གསུམ་སྤོང་དགོས་ཏེ། དེ་ཡང་ཆོས་ལ་རྣ་བ་མི་གཏོད་པ་དང་། ཀུན་སློང་སྐྱོན་ཅན་དང་། ཚིག་དོན་ཡིད་ལ་མི་འཛིན་པར་བརྗེད་པ་རྣམས་སྤོང་དགོས་པའོ། །འདུ་ཤེས་དྲུག་བསྟེན་པ་ནི། རང་ལ་ནད་པ་ལྟ་བུ་དང་། ཆོས་སྨྲ་བ་ལ་སྨན་པ་ལྟ་བུ་དང་། ཆོས་ལ་སྨན་ལྟ་བུ་དང་། དོན་ཉམས་སུ་ལེན་པ་ལ་ནད་གསོ་བ་ལྟ་བུ་དང་། དེ་བཞིན་གཤེགས་པ་ལ་སྐྱེས་བུ་དམ་པའི་འདུ་ཤེས་དང་། ཆོས་ཀྱི་ཚུལ་ཡུན་རིང་དུ་གནས་པའི་འདུ་ཤེས་རྣམས་བསྟེན་དགོས་པའོ། །དེ་ཡང་རང་ལས་ཉོན་དང་སྡུག་བསྔལ་གྱི་ནད་ཀྱིས་བཏབ་པ་དང་། སྨན་པའི་སྨན་གྱིས་ནད་སེལ་བ་ལྟར་ཆོས་སྨྲ་བ་སྨན་པ་ལྟ་བུས་སྨན་ལྟ་བུའི་ཆོས་བསྟན་ནས་ནད་དེ་དག་སེལ་བ་དང་། དེ་བཞིན་གཤེགས་པ་ནི་ཚད་མའི་སྐྱེས་བུ་བླང་དོར་མི་སླུ་བར་སྟོན་པ་ཡིན་པས་དེའི་གསུང་ལྟར་སྟོན་པའི་བཤེས་གཉེན་ཡང་སྐྱེས་བུ་དམ་པ་དང་། ཆོས་ལ་ཉན་བཤད་བྱས་པས་སྟོན་པའི་ཆོས་ཀྱི་ཚུལ་ཡུན་རིང་དུ་གནས་པར་འགྱུར་བའི་འདུ་ཤེས་འཇོག་དགོས་པ་སྟེ། དེ་དག་ནི་ཆོས་ཉན་བཤད་བྱས་པ་དོན་ཡོད་པར་སྒྲུབ་པའོ། །གཉིས་པ་ཆོས་བཤད་པའི་ཚུལ་ལ་བཞི། ཆོས་བཤད་པའི་ཕན་ཡོན། སྟོན་པ་དང་ཆོས་ལ་རིམ་གྲོ་བསྐྱེད་པ། བསམ་སྦྱོར་ཇི་ལྟ་བུས་བཤད་པ། ཡུལ་གང་ལ་བཤད་པ་དང་མི་བཤད་པའི་ཁྱད་པར་རོ། །དང་པོ་ནི། རྙེད་བཀུར་གྲགས་འདོད་དང་། ཟང་ཟིང་ལ་མི་བལྟ་བར་ཆོས་བསྟན་པ་ལ་ཕན་ཡོན་བཅུ་ཡོད་པར་ལྷག་བསམ་བསྐུལ་བ་ལས་བཤད་ཅིང་གཞན་ཡང་མང་ངོ་། །གཉིས་པ་ནི། ཆོས་སྟོན་པ་པོས་ཆོས་དང་སྟོན་པའི་བཀའ་དྲིན་དྲན་ནས་བཀུར་ཞིང་གུས་པ་བསྐྱེད་པའོ། །གསུམ་པ་བསམ་སྦྱོར་ལ་བསམ་པ་ནི། །གོང་དུ་བཤད་པའི་འདུ་ཤེས་དྲུག་བསྟེན་ཅིང་གཙོ་བོར་སངས་རྒྱས་ཐོབ་པའི་ཆེད་དུ་བསམས་ནས་བྱ་བ་ཡིན་ལ། སྦྱོར་བ་ནི་གཙང་སྤྲ་དང་ལྡན་པས་ཡིད་དང་མཐུན་པའི་གནས་སུ་ཁྲི་སྟན་ལ་འཁོད་ནས་བདུད་ཚར་གཅོད་པའི་སྔགས་འདོན་པའམ་ཤེར་སྙིང་ཚར་གསུམ་མམ་གཅིག་བྱས་ནས་ང་རྒྱལ་སྤངས་ཏེ་ཕན་འདོད་ཀྱིས་བཞིན་མདངས་གསལ་བས་དཔེ་དང་གཏན་ཚིགས་དུ་མས་སྐབས་བསྟུན་གྱིས་བཤད་པར་བྱ་བའོ། །བཞི་པ་ནི། ཆོས་ཉན་པའི་སྣོད་དུ་མི་རུང་བ་སྤྱི་དང་། ཆོས་ཀྱི་ཆེད་དུ་མ་གསོལ་བ་དང་། མ་གུས་པ་དང་། འདུལ་བ་ནས་བཤད་པ་ལྟར་རྟ་གླང་སོགས་ཞོན་པ་དང་ལྷམ་གྱོན་པ་དང་མཚོན་ཐོགས་པ་སོགས་ལ་མི་བཤད་ཅིང་། ཉལ་བ་ལའང་བཤད་དུ་མི་རུང་ཡང་ནད་པ་ལྟ་བུ་ལ་རུང་བ་ནི་དམིགས་བསལ་ཏེ་དོན་གཉེར་ཆེ་ཞིང་དད་ཅིང་གུས་པ་ཆེ་བ་སོགས་ལ་བཤད་པར་བྱའོ། །གསུམ་པ་མཇུག་ཏུ་ནི། ཉན་བཤད་བྱས་པའི་དགེ་བ་རྣམས་རྫོགས་བྱང་དུ་བསྔོ་བར་བྱའོ། །བཞི་པ་གདམས་པ་དངོས་ཀྱིས་སློབ་མ་ཇི་ལྟར་བཀྲི་བ་ལ་གཉིས། ལམ་གྱི་རྩ་བ་བཤེས་གཉེན་བསྟེན་པ་དང་། བསྟེན་ནས་བློ་ཇི་ལྟར་སྦྱང་བའོ། །དང་པོ་ལ་གཉིས། ངེས་པ་བསྐྱེད་པའི་ཕྱིར་ཅུང་ཟད་སྤྲོས་ཏེ་བཤད་པ་དང་། སྐྱོང་ཚུལ་མདོར་བསྡུས་ཏེ་བསྟན་པའོ། །དང་པོ་ནི། ཇི་སྐད་དུ། མན་ངག་ཐམས་ཅད་བསྡུས་པའི་འགོ་ནི་བཤེས་གཉེན་དམ་པ་མི་བཏང་བ་ཡིན་ཞེས་འབྱུང་བ་ལྟར་ཐོག་མར་བཤེས་གཉེན་བསྟེན་དགོས་ཤིང་འདི་ལ་དྲུག ། བརྟེན་བྱ་དགེ་བའི་བཤེས་གཉེན་གྱི་མཚན་ཉིད། རྟེན་བྱེད་སློབ་མའི་མཚན་ཉིད། དེས་དེ་ཇི་ལྟར་བསྟེན་ཚུལ། བསྟེན་པའི་ཕན་ཡོན། མ་བསྟེན་པའི་ཉེས་དམིགས། དེ་དག་གི་དོན་བསྡུ་བའོ། །དང་པོ་ནི། སྤྱིིར་མདོ་སྔགས་ཀྱི་གཞུང་རྣམས་ལས་མང་དུ་བཤད་ཀྱང་། སྐབས་འདིའི་དགེ་བའི་བཤེས་གཉེན་ནི། མདོ་སྡེའི་རྒྱན་ལས་བཤེས་གཉེན་དུལ་བ་ཞི་བ་ཉེར་ཞི་བ། །ཡོན་ཏན་ལྷག་པ་བརྩོན་བཅས་ལུང་གིས་ཕྱུག །དེ་ཉིད་རབ་ཏུ་རྟོགས་པ་སྨྲ་མཁས་ལྡན། །བརྩེ་བའི་བདག་ཉིད་སྐྱོ་བ་སྤངས་ལ་བསྟེན། །ཞེས་གསུངས་པ་ལྟར་ཆོས་བཅུ་ལྡན་ཞིག་བསྟེན་པར་བྱའོ། །དེའི་དོན་བསྡུ་ན་དུལ་བ་ཚུལ་ཁྲིམས་ཀྱི་བསླབ་པ། ཞི་བ་ཏིང་ངེ་འཛིན་གྱི་བསླབ་པ། ཉེ་བར་ཞི་བའི་ཤེས་རབ་ཀྱི་བསླབ་པ། ལུང་གི་ཡོན་ཏན་གྱིས་ཕྱུག་པ། དེ་ཁོ་ན་ཉ ིད་ཀྱི་དོན་མངོན་སུམ་དུ་རྟོགས་པའམ་ཐོས་བསམ་གྱིས་ཤེས་པ། སློབ་མ་ལས་ཡོན་ཏན་ལྷག་པ། ཇི་ལྟར་བཀྲི་བའི་ལམ་གྱི་རིམ་པ་སྨྲ་བ་ལ་མཁས་པ། བརྩེ་བ་སྙིང་རྗེ་ཆེན་པོ་དང་ལྡན་པ། ཡང་ཡང་འཆད་པ་ལ་སྐྱོ་ངལ་མེད་པ། གཞན་དོན་ལ་བརྩོན་འགྲུས་མཛད་པ་སྟེ་བཅུ་དང་ལྡན་པའོ། །གཉིས་པ་བསྟེན་བྱེད་སློབ་མ་ནི། བཞི་བརྒྱ་པ་ལས། གཟུར་གནས་བློ་ལྡན་དོན་གཉེར་བའི། །ཉན་པོ་སྣོད་ཅེས་བྱ་བར་བཤད། །སྨྲ་བོ་ཡོན་ཏན་རྣམ་གཞན་དུ། །མི་འགྱུར་ཉན་པ་པོ་ལའང་མིན། །ཞེས་གསུངས་པ་ལྟར་ཆོས་གསུམ་ལྡན་ཞིག་སྟེ། དེ་ནི་ཕྱོགས་ལྷུང་མེད་པའི་གཟུ་བོར་གནས་པ་བློ་གྲོས་དང་ལྡན་པ། ཆོས་དོན་དུ་གཉེར་བའི་ཉན་པ་པོ་སྣོད་དུ་རུང་བའོ། །དེ་གསུམ་མ་ཚང་ན་ཆོས་སྨྲ་བ་པོའི་ཡོན་ཏན་རྣམས་ཉན་པ་པོ་ལ་རྣམ་པ་གཞན་དུ་མི་འགྱུར་བ་སྟེ་ཡོན་ཏན་དུ་སྣང་བར་འགྱུར་ལ། དེར་མ་ཟད། སྨྲ་བ་པོ་ལ་ཡང་ཉན་པ་པོའི་ཡོན་ཏན་རྣམས་ཡོན་ཏན་དུ་སྣང་ཞིང་སྐྱོན་དུ་སྣང་བར་མི་འགྱུར་རོ། །དེའི་སྟེང་དུ་ཆོས་དང་ཆོས་སྨྲ་བ་ལ་གུས་པ་དང་ཡིད་གཏོད་པ་གཉིས་བསྣན་ཏེ་ལྔར་ཡང་རུང་ངོ་། །གསུམ་པ་དེས་དེ་ཇི་ལྟར་བསྟེན་ཚུལ་ལ་གཉིས། བསམ་པ་དང་སྦྱོར་བས་བསྟེན་པའོ། །དང་པོ་ལ་གསུམ། བསམ་པ་སྤྱིར་བསྟན་པ། རྩ་བ་དད་པ་སྦྱང་བ། བཀའ་དྲིན་དྲན་ཏེ་གུས་པའི་ཚུལ་ལོ། །དང་པོ་ནི། སྡོང་པོ་བཀོད་པ་ལས། སེམས་དགུས་བཤེས་གཉེན་བསྟེན་པར་བཤད་པའི་དོན་བསྡུ་ན། རང་ཉིད་བླ་མའི་དབང་དུ་གཏོང་བ་བུ་མཛངས་པ་ལྟ་བུའི་སེམས། དེ་སུས་ཀྱང་མི་ཕྱེད་པ་རྡོ་རྗེ་ལྟ་བུའི་སེམས། བླ་མའི་བྱ་བ་འཁུར་བཟོད་པ་བ་ལྟ་བུའི་སེམས་དང་། སྡུག་བསྔལ་བྱུང་ཡང་མི་བསྒུལ་པ་ཁོར་ཡུག་ལྟ་བུའི་སེམས། ངན་ལས་ཀྱང་སྒྲུབ་པ་བྲན་ལྟ་བུའི་སེམས། ང་རྒྱལ་ཆུང་བ་ཕྱག་དར་པ་ལྟ་བུའི་སེམས། བླ་མའི་ཁུར་ཆེ་བ་རྣམས་འཛིན་པ་ཐེག་པ་ལྟ་བུའི་སེམས། བླ་མས་གཤེ་ཡང་མི་ཁྲོ་བ་ཁྱི་ལྟ་བུའི་སེམས། བླ་མའི་བྱ་བ་ལ་མི་སྐྱོ་བ་གྲུ་ལྟ་བུའི་སེམས་རྣམས་ཀྱིས་བསྟེན་པའོ། །གཉིས་པ་རྩ་བ་དད་པ་སྦྱང་བ་ནི། དཀོན་མཆོག་ཏ་ལ་ལས། དད་པ་སྔོན་དུ་མ་ལྟར་བསྐྱེད་པ་སྟེ། །ཡོན་ཏན་ཐམས་ཅད་སྲུང་ཞིང་འཕེལ་བར་བྱེད། ཞེས་སོགས་དང་། ཆོས་བཅུ་པ་ལས། དད་པ་ཐེག་པའི་མཆོག་ཡིན་ཏེ། །དེ་ཕྱིར་བློ་དང་ལྡན་པའི་མིས། །དད་པའི་རྗེས་སུ་འབྲང་བ་བསྟེན། །དད་པ་མེད་པའི་མི་དག་ལ། །དཀར་པོའི་ཆོས་རྣམས་མི་སྐྱེ་སྟེ། །ཞེས་སོགས་ཀྱི་ལུང་དྲངས་ནས་སྒྲུབ་པ་ལྟར་ཡིན་ལ། དད་པ་ལ་སྤྱིར་དཀོན་མཆོག་གསུམ་དང་ལས་འབྲས་དང་བདེན་བཞིའི་བླང་དོར་ལ་དད་པ་སོགས་མང་ཡང་སྐབས་འདིར་ནི་བླ་མ་ལ་དད་པའོ། །དད་པའི་སྟོབས་ཀྱིས་བླ་མ་ལ་ཇི་ལྟར་བལྟ་བ་ནི། འདུས་པའི་རྩ་རྒྱུད་དང་། ལག་ན་རྡོ་རྗེ་དབང་བསྐུར་བའི་རྒྱུད་སོགས་ལས་སངས་རྒྱས་དང་འདྲ་བའི་འདུ་ཤེས་འཇོག་པར་བཤད་ཅིང་། རྒྱུད་ཕྱི་མ་དེ་ལས། སློབ་དཔོན་གྱི་ནི་ཡོན་ཏན་བཟུང་། །སྐྱོན་ནི་ནམ་ལང་བཟུང་མི་བྱ། །ཡོན་ཏན་བཟུང་ན་དངོས་གྲུབ་འཐོབ། །སྐྱོན་རྣམས་བཟུང་ན་དངོས་མི་འགྲུབ། །ཞེས་གསུངས་ཏེ། རང་གི་བླ་མ་ཡིན་ཕྱིར་ཡོན་ཏན་ཆེ་ཆུང་གང་ཡིན་ཀྱང་སྐྱོན་བརྟགས་ཤིང་བཟུང་ན་དངོས་གྲུབ་ཀྱི་གེགས་སུ་འགྱུར་བས་སྐྱོན་མཐོང་ཡང་དེའི་ངོས་ནས་སྨད་པ་གཏན་མི་བྱ་སྟེ་ཉེས་དམིགས་ཆེ་ལ། ཡོན་ཏན་ཆུང་ཡང་དེའི་ངོས་ནས་བསྟོད་ན་ཕན་ཡོན་ཆེན་པོར་འགྱུར་རོ། །གསུམ་པ་བཀའ་དྲིན་རྗེས་སུ་དྲན་པའི་དོན་བསྡུ་ན། དགེ་བའི་བཤེས་གཉེན་ནི་བདག་ངན་སོང་ལས་སྐྱོབ་པ། འཁོར་བའི་སྡུག་བསྔལ་ལས་ཐར་བར་བྱེད་པ། ཐར་པ་དང་ཐམས་ཅད་མཁྱེན་པའི་ལམ་ལེགས་པར་སྟོན་པར་བྱེད་པ་སྟེ་མདོར་ན་ཉེས་པའི་སྐྱོན་འགོག་ཅིང་ཡོན་ཏན་ཐམས་ཅད་སྤེལ་བར་བྱེད་པའོ་སྙམ་དུ་བཀའ་དྲིན་ཡིད་ལ་དྲན་ཅིང་ཚིག་གིས་བརྗོད་པར་བྱའོ།། གཉེས་པ་སྦྱོར་བས་བསྟེན་ཚུལ་ལ་གསུམ་ལས། དང་པོ་ནི། བླ་མ་ལྔ་བཅུ་པ་ལས། འདིར་མང་སྨོས་པ་ཅི་ཞིག་དགོས། །བླ་མ་དགྱེས་བྱེད་གང་ཡིན་བྱ། །མི་མཉེས་བྱེད་ཀུན་སྤངས་ནས་ནི། །དེ་དང་དེ་ལ་འབད་དེ་ བརྟག །དངོས་གྲུབ་སློབ་དཔོན་རྗེས་འབྲང་ཞེས། །རྡོ་རྗེ་འཛིན་པ་ཉིད་གསུང་པར། །ཤེས་ནས་དངོས་པོ་ཐམས་ཅད་ཀྱིས། །བླ་མ་ཡོངས་སུ་མཉེས་པར་བྱ། །ཞེས་དང་། དེ་བྱིན་སངས་རྒྱས་ཐམས་ཅད་ལ། །རྟག་ཏུ་ཕུལ་བ་ཉིད་དུ་འགྱུར། །ཞེས་དང་། ཅུང་ཟད་ཡིད་འོང་གང་དང་གང་། །ཤིན་ཏུ་ཁྱད་པར་གྱུར་པ་ཉིད། །དེ་དང་དེར་ནི་བླ་མར་དབུལ། །ཞེས་གསུངས་པ་ལྟར་ཟང་ཟིང་གི་མཆོད་པ་བྱ་དགོས་སོ། །སློབ་མའི་ངོས་ནས་ཚོགས་གསོག་པའི་ཐབས་མཆོག་ཡིན་པ་དེ་ལྟར་དགོས་ཀྱང་བླ་མའི་ངོས་ནས་དེ་ལ་མ་བལྟོས་པ་ཞིག་དགོས་སོ། །གཉིས་པ་ནི། ཁྲུས་དང་སྐུ་མཉེ་དྲིལ་ཕྱིས་བསྙུན་གཡོག་དང་བསུ་སྐྱེལ་སོགས་བྱེད་པའོ། །གསུམ་པ་ནི། ཇི་ལྟར་གདམས་པའི་སྒྲུབ་པའི་མཆོད་པས་མཉེས་པར་བྱ་སྟེ་དེ་ནི་གཙོ་བོ་ཡིན་ནོ། །སྤྱིར་བླ་མའི་བཀའ་ཐམས་ཅད་སྒྲུབ་དགོས་ཀྱང་ཆོས་མིན་ཕྱོགས་ལ་བསྐུལ་ན་ནི་བཤད་སྦྱངས་བྱས་ཏེ་མི་འཇུག་གོ །བཞི་པ་བསྟེན་པའི་ཕན་ཡོན་ནི། སངས་རྒྱས་འགྲུབ་པ་དང་རྒྱལ་བ་རྣམས་དགྱེས་པ་དང་ཆོས་དང་བཤེས་གཉེན་གྱིས་མི་ཕོངས་པ་དང་ངན་སོང་དུ་མི་འགྲོ་བ་དང་ལས་སྒྲིབ་འདག་པ་དང་ཉོན་མོངས་པས་མི་ཐུབ་པ་དང་ལུང་རྟོགས་ཀྱི་ཡོན་ཏན་རྣམས་འཕེལ་ཞིང་ཚོགས་རྫོགས་ནས་མྱུར་དུ་འཚང་རྒྱ་བ་རྣམས་ཏེ་སྡོང་པོ་བཀོད་པ་ལས་བཤད་དོ། །སའི་སྙིང་པོའི་མདོ་ལས། བླ་མ་ལ་མཆོད་ན་སངས་རྒྱས་དཔག་ཏུ་མེད་པ་ལ་མཆོད་པའི་ཕན་ཡོན་ཀྱང་ཟིལ་གྱིས་གནོན་པར་བཤད་དེ་དོན་ཆེའོ། །ལྔ་པ་མ་བསྟེན་པའི་ཉེས་དམིགས་ནི། བླ་མར་བཀུར་ནས་མ་བསྟེན་ན་ཚེ་འདིར་ནད་དང་གདོན་དུ་མས་འཚེ་བ་དང་ཕྱི་མར་ངན་འགྲོར་ལྷུང་བ་དང་ཆོས་ཀྱིས་ཕོངས་པ་སོགས་འབྱུང་ངོ་། །བླ་མ་ལ་སྨད་ན་ནི་ཉེས་པ་ཤིན་ཏུ་ཆེ་སྟེ། ལག་ན་རྡོ་རྗེ་དབང་བསྐུར་བའི་རྒྱུད་ལས། མཚམས་མེད་ལ་སོགས་མི་བཟད་པ། །དམྱལ་བ་གང་དག་ངས་བཤད་པ། །དེ་རྣམས་ཀྱི་ནི་གནས་སུ་བརྗོད། །དེར་ནི་བསྐལ་པ་མཐའ་ཡས་སོ། །དེ་ལྟ་བས་ན་རྣམ་ཀུན་ཏུ། །དེ་ལ་ནམ་ཡང་བརྙས་མི་བྱ། །ཞེས་དང་། བླ་མ་ལྔ་བཅུ་པ་ལས། ནམ་ཡང་སློབ་དཔོན་དག་གི་ནི། །ཀུན་ཏུ་སེམས་དཀྲུག་མི་བྱ་སྟེ། །གལ་ཏེ་རྨོངས་པས་བྱས་གྱུར་ན། །དམྱལ་བར་ངེས་པར་འཚེད་པར་འགྱུར། །མནར་མེད་ལ་སོགས་འཇིགས་རུང་བའི། །དམྱལ་བ་བསྟན་པ་གང་ཡིན་པ། །སློབ་དཔོན་ལ་ནི་སྨོད་པ་རྣམས། །དེར་ནི་གནས་པར་ཡང་དག་བཤད། །ཅེས་གསུངས་པ་ལྟར་རོ། །རང་གི་བླ་མ་ལ་མ་དད་ན་ཡོན་ཏན་གསར་དུ་མི་སྐྱེ་ཞིང་སྐྱེས་པ་རྣམས་ཀྱང་ཉམས་པར་འགྱུར་བར་བཤད་ཅིང་། གཞན་ཡང་། སློབ་དཔོན་ལ་ནི་གང་བརྙེས་པ། དེས་ནི་སངས་རྒྱས་ཀུན་བརྙས་པས། །རྟག་ཏུ་སྡུག་བསྔལ་འཐོབ་པར་འགྱུར། །ཞེས་གསུངས་པ་ལྟ་བུ་མང་ངོ་། །དྲུག་པ་དེ་དག་གི་དོན་བསྡུ་བ་ནི། དེ་ལྟར་བླ་མའི་རྣལ་འབྱོར་ཞེས་ཡོངས་སུ་གྲགས་པའི་གདམས་པ་སྔར་བཤད་པ་ལྟར་གོ་དགོས་ཤིང་། སྙིང་ཐག་པ་ནས་ཆོས་ཞིག་བྱེད་ན་ནི་ལམ་མ་ནོར་བར་སྟོན་པའི་བཤེས་གཉེན་ཚུལ་བཞིན་ཡུན་རིང་དུ་བསྟེན་པ་ལ་འབད་པར་བྱའོ། །དེའི་ཚེ་བླ་མ་བསྟེན་ཚུལ་མ་ལོག་པ་གལ་ཆེ་སྟེ་ལོག་ན་ཁེ་མི་ཐོན་པར་གྱོང་འབྱུང་ལ། བསྟེན་ཚུལ་ལེགས་ན་དངོས་གྲུབ་ཐམས་ཅད་ཀྱི་རྩ་བར་འགྱུར་ཞེས་བཤད་པ་ལྟར་རོ། །གཉིས་པ་སྐྱོང་ཚུལ་མདོར་བསྡུས་ཏེ་བསྟན་པ་ལ་གཉིས། སྐྱོང་ཚུལ་དངོས་དང་། དེ་ལ་ལོག་རྟོག་དགག་པའོ། །དང་པོ་ལ་གསུམ་ལས་ཐུན་གྱི་ངོ་བོ་ལ་སྔོན་དུ་ཇི་ལྟར་བྱ་བ་ལ། དང་པོ་སྦྱོར་པའི་ཆོས་ནི་དྲུག་སྟེ། གནས་ཁང་བྱི་དོར་བྱས། སྐུ་གསུང་ཐུགས་ཀྱི་རྟེན་བཀྲམ། མཆོད་པ་བཤམས། སྟན་ལ་སྐྱིལ་ཀྲུང་བྱས་ཏེ་སྐྱབས་འགྲོ་སེམས་བསྐྱེད་སོགས་རྒྱུད་དང་འདྲེས་ངེས་ཞིག་བྱ། ད་ལྟའི་ཕྱག་ལེན་ལ་ཚོགས་ཞིང་རྣམས་སྤྱན་དྲངས་ནས་མདུན་གྱི་ནམ་མཁར་བཞུགས་པར་བཤད་པ་ལྟར་ཡང་རུང་མོད། ལམ་རིམ་འདིའི་དངོས་བསྟན་ལྟར་ན་མདུན་གྱི་ནམ་མཁར་རྒྱ་ཆེན་སྤྱོད་པ་དང་ཟབ་མོ་ལྟ་བརྒྱུད་ཀྱི་བླ་མ་རྣམས་དང་། གཞན་ཡང་སངས་རྒྱས་བྱང་སེམས་ཉན་རང་བཀའ་སྡོད་བཅས་དཔག་ཏུ་མེད་པ་བཞུགས་པར་བསམས་ཏེ། བཟང་སྤྱོད་ནས་འབྱུང་བ་ལྟར་ཡན་ལག་བདུན་པ་བྱ་བར་གསུངས་སོ། །ཡན་ལག་བདུན་གྱི་ཕྱག་དང་མཆོད་པ་དང་བསྐུལ་བ་དང་གསོལ་པ་གདབ་པ་དང་ཡི་རང་བ་དང་ལྔ་མཐུན་རྐྱེན་ཚོགས་གསོག་པའི་ལན་ལག་ཡིན་ལ། བཤགས་པ་ནི་འགལ་རྐྱེན་སྒྲིབ་པ་སྦྱོར་བའི་ཡན་ལག་དང་། བསྔོ་བ་ནི་དེ་དག་གི་དགེ་བ་མི་ཟད་པར་བྱེད་པའི་ཡན་ལག་གོ །དེ་ནས་མཎྜལ་འབུལ་ཞིང་འདིར་མི་གསལ་ཡང་གཞན་ནས་ལམ་རིམ་གསོལ་འདེབས་རྒྱས་བསྡུས་གང་རུང་བྱ་བར་བཤད་པ་ལྟར་ཡང་ལེགས་སོ། ཁྱད་པར་དུ་བཤེས་གཉེན་ལ་མ་གུས་པ་སོགས་ཕྱིན་ཅི་ལོག་གི་བློ་སྣ་ཐམས་ཅད་འགག་པ་དང་། གུས་པ་སོགས་ཕྱིན་ཅི་མ་ལོག་པའི་བློ་སྣ་མཐའ་དག་རྒྱུད་ལ་སྐྱེ་བའི་གསོལ་གདབ་དྲག་ཏུ་བྱའོ། །གཉིས་པ་ཐུན་གྱི་དངོས་གཞི་ལ་ཇི་ལྟར་བྱ་བ་ལ་གཉིས། སྤྱིའི་སྐྱོང་ཚུལ་དང་། སྐབས་འདིའི་སྐྱོང་ཚུལ་ལོ། །དང་པོ་ནི། ཐོག་མར་གང་བསྐྱང་བར་བྱ་བའི་དམིགས་པ་རྣམས་ཀྱི་གྲངས་དང་གོ་རིམ་ངེས་ངེས་བྱས་ཏེ། ཇི་ལྟར་ངེས་པར་བྱས་པ་དེ་ལས་གཞན་དུ་མི་གཏོང་བར་བྱའོ་སྙམ་པའི་འཕེན་པ་དྲག་པོ་ཞིག་བཏང་ལ། ཇི་ལྟར་ངེས་པར་བྱས་པ་དེ་དྲན་ཤེས་དང་ལྡན་པས་བསྐྱང་བར་བྱ་སྟེ། གང་ཟིན་ཟིན་ནས་དམིགས་པ་བསྐྱངས་ན་གནད་དུ་འགྲོ་དཀའོ།། གཉིས་པ་སྐབས་འདིའི་སྐྱོང་ཚུལ་ནི། བླ་མ་བསྟེན་པའི་ཕན་ཡོན་དང་མ་བསྟེན་པའི་ཉེས་དམིགས་རྣམས་བསམ་ཞིང་། དེ་ནས་རང་ལ་བཀའ་དྲིན་ཆེ་བའི་ཚུལ་བསམས་ཏེ་སྙིང་ཐག་པ་ནས་གུས་པ་ཆེན་པོ་བསྐྱེད་པར་བྱའོ། །གསུམ་པ་མཇུག་ཏུ་བསྔོ་སྨོན་ཁྱད་པར་ཅན་རྣམས་བྱའོ། །དེ་ལྟར་ཐུན་བཞི་ལ་སོགས་པ་བྱ་སྟེ་ཧ་ཅང་དམ་དྲགས་པ་དང་ཧ་ཅང་ལྷོད་པ་གཉིས་ཀ་སྤངས་ཏེ་གྲིམ་ལྷོད་རན་པ་གནད་ཆེའོ། །གཞན་ཡང་ཐུན་མཚམས་སུ་ནི་སྤྱིར་མང་ཡང་སྐབས་འདིར་འདིའི་གཞུང་རྣམས་ལ་ལྟ་རྟོག་བྱེད་པ་གལ་ཆེ་སྟེ་བསྐྱེད་འབྱུང་ཞིང་ཚོགས་གསོག་སྒྲིབ་སྦྱོང་གི་སྐོར་ལ་འབད་པར་བཤད། སྐབས་འདིར་དབང་པོའི་སྒོ་སྡོམ་པ་དང་། ཤེས་བཞིན་དུ་སྤྱོོད་པ་དང་། ཟས་ཀྱི་ཚོད་རིག་པ་དང་། མི་ཉལ་བ་དང་། ཉལ་བའི་ཚེ་ཇི་ལྟར་བྱ་བ་དང་ལྔ་བཤད་པའི་དོན་རྒྱས་པར་བཤད་ན་མང་དུ་འགྱུར་བས་བསྡུ་ན་གང་སྡོམ་པ་ནི་མིག་ནས་ཡིད་ཀྱི་བར་དབང་པོ་དྲུག་གོ །དེ་གང་གིས་སྡོམ་པའི་ཐབས་ནི་དབང་པོའི་སྒོ་སྡོམ་པའི་ཆོས་རྣམས་ཤེས་ཤིང་མི་བརྗེད་པར་དྲན་པར་བྱེད་ཅིང་སྐྱོང་བའོ། །གང་ལས་སྡོམ་པ་ནི་ཟག་བཅས་ཀྱི་ཡུལ་ཡིད་དུ་མི་འོང་ལས་སྡོམ་པའོ། །ཇི་ལྟར་བསྡམ་པ་ལ་ཡུལ་དང་དབང་པོ་ལ་བརྟེན་ནས་སྐྱེས་པའི་རྣམ་ཤེས་དྲུག་གི་མསྔུག་ཏུ་ཡིད་ཀྱི་ཤེས་པ་ཡུལ་གཟུགས་སྒྲ་སོགས་ཡིད་དུ་འོང་མི་འོང་པ་དྲུག་ལ་ཆགས་སྡང་སྐྱེ་བར་འགྱུར་བ་འབད་པས་འགོག་པའོ། །དེ་ཡང་གང་ལ་བལྟ་བ་དང་ཉན་པ་སོགས་བྱས་ན་ཉོངས་མོངས་སྐྱེ་བར་འགྱུར་བའི་ཡུལ་དེ་རྣམས་ལ་དབང་པོ་མི་གཏོང་བར་འགོག་པའི་དོན་ནོ། །དེའི་ཚེ་བལྟ་བྱ་མིན་པའི་ཡུལ་ལ་ཞེན་པས་ལྟ་བ་དང་ཡིད་ལ་བྱེད་པའི་མཚན་མར་འཛིན་པ་དང་། ཆགས་སྡང་སྐྱེ་བའི་ཡུལ་ཡིད་ཀྱིས་འཛིན་པ་དང་ཐོས་ནས་དེ་དག་ལ་ཞེན་པས་རྟོག་པའི་མངོན་རྟགས་སུ་འཛིན་པ་སྤོང་ངོ་། །ཤེས་བཞིན་དུ་སྦྱོད་པ་ལ་གཉིས་ཏེ་གང་ལ་སྤྱོད་པའི་གཞི་དང་། དེ་ལ་སྤྱོད་པའི་ཤེས་བཞིན་ནོ། །དང་པོ་ལ་གཉིས་ཏེ་རྒྱུ་བའི་ལས་ལྔ་དང་སྤྱོད་བའི་ལས་ལྔའོ། །དེ་དག་མིང་ཙམ་གྱིས་བརྗོད་པར་བྱ་སྟེ། དང་པོ་ནི། གྲོང་སོགས་སུ་འགྲོ་བའི་ལུས་ཀྱི་ལས་དང་། མིག་གིས་ཡུལ་ལ་ལྟ་བའི་ལས་དང་། ཡན་ལག་དང་ཉིང་ལག་བརྐྱང་བསྐུམ་གྱི་ལས་དང་། ཆོས་གོས་དང་ལྷུང་བཟེད་བཅང་བའི་ལས་དང་། བསོད་སྙོམས་ཟ་འཐུང་གི་ལས་སོ། །གཉིས་པ་ལ་ལྔའི་དང་པོ་ལུས་ཀྱི་འགྲོ་འདུག་གི་ལས་དང་། ངག་གི་སྨྲ་བརྗོད་ཀྱི་ལས་དང་། ཡིད་ཀྱི་བསམ་པའི་ལས་དང་། ངལ་གསོ་བའི་ལས་དང་། ཉིན་མཚན་དུ་ཉལ་མི་ཉལ་བའི་ལས་ཏེ་བཅུ་པོ་དེ་རྣམས་སོ། །གཉིས་པ་ནི། བཅུ་པོ་དེ་ལ་ཤེས་བཞིན་དུ་སྤྱོད་པ་ནི་ཤེས་བཞིན་ནོ། །དེ་ལ་བཞི་སྟེ་དང་པོ་ནི་སྔར་གྱི་བཞི་བཅུ་པོ་གང་ལ་རྣམ་པ་གང་གིས་ཇི་ལྟར་རྟོག་པའོ། །གཉིས་པ་ནི། ཕྱོགས་གང་དང་གང་དུ་རྣམ་པ་གང་གིས་ཇི་ལྟར་བརྟག་པར་བྱ་བ་དེ་ལྟར་རྟོག་པའོ། །གསུམ་པ་ནི། དུས་གང་གི་ཚེ་རྣམ་པ་གང་གིས་ཇི་ལྟར་བརྟག་པར་བྱ་བའི་དུས་དེའི་ཚེ་དེ་ལྟར་རྟོག་པའོ། །བཞི་པ་ནི། ལས་གང་ལ་རྣམ་པ་གང་གིས་ཇི་ལྟར་བརྟག་པར་བྱ་བའི་ལས་དེ་ལ་དེ་ལྟར་རྟོག་པའོ། །མདོར་ན་དེ་དག་ལ་དྲན་ཤེས་བསྟེན་པར་བྱའོ། །གསུམ་པ་ཟས་ཀྱི་ཚོད་རིག་པ་ལ་བཞི་སྟེ། ཧ་ཅང་ཉུང་བ་དང་། ཧ་ཅང་མང་བ་མ་ཡིན་པ་དང་། ཟས་འཇུ་བ་དང་འཕྲོོད་པའོ། །འདིར་ཟས་སྤྱད་པ་ལས་བྱུང་བའི་ཉེས་དམིགས་དང་། ཞུ་བ་ལས་བྱུང་བའི་ཉེས་དམིགས་གཉ ིས་དང་། ཟས་ཚོལ་བ་ལས་བྱུང་བའི་ཉེས་དམིགས་ལྔ་གསུངས་པ་རྣམས་ཀྱང་ཤེས་པར་བྱའོ། །བཞི་པ་ཉིན་མོ་ཧྲིལ་པོར་མི་ཉལ་བར་དགེ་སྦྱོར་ལ་འཇུག་པའོ། །ལྔ་པ་ནི། མཚན་མོ་ནམ་གྱི་ཐུན་པར་ལ་ཉལ་ཞིང་ཐུན་སྟོད་སྨད་ལ་མི་ཉལ་བར་དགེ་སྦྱོར་ལ་བརྩོན་པ་དང་། ཉལ་བའི་ཚེ་སངས་རྒྱས་ཀྱིས་གནང་བའི་ཉལ་ཚུལ་གློ་གཡས་པ་ཕབ་སྟེ་དྲན་ཤེས་དང་ལྡན་པར་ཉལ་བའོ། །གཉིས་པ་སྐྱོང་ཚུལ་དེ་ལ་ལོག་རྟོག་དགག་པ་ནི། ཁ་ཅིག་ལམ་སྒོམ་པའི་ཚེ་འཇོག་སྒོམ་ཁོ་ན་བྱ་སྟེ། རྟོག་པ་རྣམས་ནི་མཚན་འཛིན་ཡིན་པས་དཔྱད་ནས་བསྒོམ་པར་བྱར་མི་རུང་ངོ་ཟེར། དེ་ནི་ཤིན་ཏུ་མི་འཐད་དེ། སྒོམ་པ་ལ་དཔྱད་ནས་སྒོམ་པ་དང་འཇོག་སྒོམ་གཉིས་ཡོད་པའི་ཕྱིར་ཏེ། འདི་ལྟར་དད་པ་དང་དལ་འབྱོར་རྙེད་དཀའ་བ་དང་ཚད་མེད་བཞི་དང་སྐྱབས་འགྲོ་དང་སེམས་བསྐྱེད་དང་ལས་འབྲས་དང་མི་རྟག་པ་དང་སྡུག་བསྔལ་སྒོམ་པ་ལྟ་བུ་རྣམས་ལ་དཔྱད་ནས་སྒོམ་པ་གཙོ་ཆེ་ཞིང་། སེམས་གནས་དངོས་གཞིའི་སྐབས་ལྟ་བུ་ལ་འཇོག་སྒོམ་གཙོ་ཆེ་བའི་ཕྱིར་རོ། །རྟོག་པ་གང་ཡིན་མཚན་འཛིན་དུ་འདོད་པ་ནི་གཞུང་ཆེན་པོ་རྣམས་ལ་མ་སྦྱངས་ཤིང་དོན་མི་ཤེས་པའི་བླུན་གཏམ་མོ། །མདོར་ན་ཐོག་མར་ཐོས་བསམ་གྱིས་དཔྱད་ནས་བསྐྱང་བའི་དཔྱད་སྒོམ་བྱས་ནས་མཐར་འཇོག་སྒོམ་བྱེད་དགོས་པ་མང་དུ་འབྱུང་བས། འདིར་མཚོན་ཙམ་སྟེ་བདག་གིས་སྐབས་འདིའི་ལམ་རིམ་གྱི་དགོངས་པར་བསམས་ནས་གཞན་དུ་བཤད་ཟིན་ཏོ། །གཉིས་པ་བསྟེན་ནས་བློ་ཇི་ལྟར་སྦྱང་བའི་རིམ་པ་ལ་གཉིས། དལ་བའི་རྟེན་ལ་སྙིང་པོ་ལེན་པའི་ཕྱིར་དུ་བསྐུལ་བ་དང་། སྙིང་པོ་ཇི་ལྟར་ལེན་པའི་ཚུལ་ལོ། །དང་པོ་ལ་གསུམ། དལ་འབྱོར་ངོས་བཟུང་བ་དང་། དེ་དོན་ཆེ་བར་བསམ་པ་དང་། རྙེད་དཀའ་བར་བསམ་པའོ། །དང་པོ་ལ་གཉིས། དལ་བ་དང་། འབྱོར་བའོ། དང་པོ་ནི། བཤེས་སྤྲིངས་ལས། ལོག་པར་ལྟ་བ་འཛིན་དང་དུད་འགྲོ་ཉིད། །ཡི་དྭགས་ཉིད་དང་དམྱལ་བར་སྐྱེ་བ་དང་། །རྒྱལ་བའི་བཀའ་མེད་པ་དང་མཐའ་ཁོབ་ཏུ། །ཀླ་ཀློར་སྐྱེ་བ་ལེན་ཞིང་ལྐུགས་པ་ཉིད། །ཚེ་རིང་ལྷ་ཉིད་གང་ཡང་རུང་བར་ནི། །སྐྱེ་བ་ཞེས་བགྱི་མི་ཁོམ་སྐྱོན་བརྒྱད་པོ། །ཞེས་གསུངས་པ་ལྟར་རོ། །དེ་ཡང་ངན་སོང་གསུམ་དང་། ལྷ་ཚེ་རིང་པོ་དང་། མཐའ་ཁོབ་ཏུ་སྐྱེས་པ་དང་། དབང་པོ་མ་ཚང་བ་དང་། །ལོག་ལྟ་ཅན་དང་། སངས་རྒྱས་མ་བྱོན་པའི་ཡུལ་དུ་སྐྱེས་པ་བརྒྱད་དོ། །དེ་རྣམས་ནི་ཆོས་སྒྲུབ་པའི་རྟེན་དུ་མི་ཁོམ་པའམ་མི་རུང་བས་དེ་སྐད་ཅེས་བྱའོ། །དེ་ནི་གཙོ་ཆེ་བའི་དབང་དུ་བྱས་ཀྱི། གཞན་ལྷ་ཚེ་རིང་པོ་དང་། ངན་སོང་དང་། དབང་པོ་མ་ཚང་བ་ལྟ་བུར་སྐྱེས་པའི་ནང་ན་ཆོས་ལ་དད་པ་དང་། དེ་དག་ཏུ་སྐྱེས་པའི་བྱང་ཆུབ་སེམས་དཔའ་ཡང་ཡོད་པར་བཤད་པས་ཁྱད་པར་ཤེས་དགོས་སོ། །ལྷ་ཚེ་རིང་པོ་ནི་ཚངས་ཆེན་དང་། འདུ་ཤེས་མེད་པའི་ལྷ་དང་། གཟུགས་མེད་གྱི་ལྷ་འགའ་དང་། རྟག་ཏུ་གཡེང་བའི་འདོད་པའི་ལྷ་རྣམས་སོ། །དབང་པོ་མ་ཚང་བ་ནི་ཐོག་མ་ཉིད་ནས་དབང་པོ་མ་ཚང་བ་ལྟ་བུ་ལ་དགོངས་ཀྱི། །ཕྱིས་རྐྱེན་གྱིས་དབང་པོ་མ་ཚང་བར་སོང་བ་ལ་ངེས་པ་མེད་དོ། །གཉིས་པ་འབྱོར་པ་ལ་གཉིས་ལས། རང་འབྱོར་ལྔ་ནི། མི་ཉིད་དབུས་སྐྱེས་དབང་པོ་ཚང་། །ལས་མཐའ་མ་ལོག་གནས་ལ་དད། །ཅེས་འབྱུང་བ་ལྟར་སྤྱིར་མི་ཡིན་པ། ཡུལ་དབུས་སུ་སྐྱེས་པ་ནི་འཁོར་རྣམ་བཞི་ཡོད་པའི་ཡུལ་དུ་སྐྱེས་པའོ། །དབང་པོ་ཚང་བ་ནི་གླེན་ལྐུགས་སུ་མ་སོང་ཞིང་ཡན་ལག་དང་ཉིང་ལག་རྣམས་ཚང་བའོ། །ལས་མཐའ་མ་ལོག་པ་ནི་མཚམས་མེད་ལྟ་བུ་མ་བྱས་པའོ། །གནས་ལ་དད་པ་ནི་སྡེ་སྣོད་གསུམ་ལ་དད་པའོ། །ལྔ་པོ་དེ་རང་རྒྱུད་ཀྱིས་བསྡུས་པས་རང་འབྱོར་ཞེས་བྱའོ། །གཞན་འབྱོར་ལྔ་ནི། སངས་རྒྱས་བྱོན་དང་དམ་ཆོས་སྟོན། །བསྟན་པ་གནས་དང་དེ་རྗེས་འཇུག །གཞན་ཕྱིར་སྙིང་ནི་བརྩེ་བའོ། །ཞེས་པ་ལྟར། སངས་རྒྱས་དངོས་སུ་བྱོན་པའི་གནས་འཕགས་ཡུལ་ལྟ་བུ་དང་། སངས་རྒྱས་སམ་ཉན་ཐོས་ཀྱིས་དམ་ཆོས་སྟོན་པ་དང་། ལུང་རྟོགས་ཀྱི་བསྟན་པ་གནས་པ་དང་། ཆོས་གནས་པའི་རྗེས་སུ་འཇུག་ཅིང་སྒྲུབ་པ་དང་། རང་ལ་སྦྱིན་བདག་ལྟ་བུས་དད་པ་དང་བརྩེ་བས་ཆོས་ཀྱི་མཐུན་རྐྱེན་སྟེར་བ་སྟེ་ལྔའོ། །དེ་རྣམས་ནི་གཞན་རྒྱུད་ལ་ཡོད་ཅིང་ཆོས་སྒྲུབ་པའི་ཆ་རྐྱེན་ཡིན་པ་གཞན་འབྱོར་རོ། །ཕྱོགས་འདི་ནི་ས་ཚིགས་ཀྱིས་ཕྱེ་བའི་ཡུལ་དབུས་མིན་ཡང་ཆོས་ཚིགས་ཀྱིས་ཕྱེ་བའི་དབུས་ཡིན་པས་མི་འགལ་ཞིང་། ཐུན་མོང་བའི་སྣང་ངོར་སངས་རྒྱས་དངོས་སུ་མ་བྱོན་ཡང་སངས་རྒྱས་ཀྱི་གདུང་འཚོབ་མང་དུ་བྱོན་པས་སངས་རྒྱས་མ་བྱོན་པའི་གནས་ཡིན་པའི་སྐྱོན་མེད་དོ། །གཉིས་པ་དལ་འབྱོར་དོན་ཆེ་ཚུལ་བསམ་པ་ནི། བསྡུས་དོན་ལས། དལ་བའི་རྟེན་འདི་ཡིད་བཞིན་ནོར་ལས་ལྷག །ཅེས་གསུངས་པ་ལྟར་ཏེ། རྟེན་འདི་ལ་དོན་ཆེན་པོ་ཐར་པ་དང་ཐམས་ཅད་མཁྱེན་པའི་གོ་འཕང་སྒྲུབ་ཏུ་ཡོད་པས་ཡིད་བཞིན་གྱི་ནོར་བུ་ལས་ལྷག་སྟེ། ལྷག་ཚུལ་ནི་ཡིད་བཞིན་གྱི་ནོར་བུས་ལས་གནས་སྐབས་ཀྱི་དགོས་འདོད་འབྱུང་ཡང་། མཐར་ཐུག་གི་དོན་མི་འབྱུང་ལ། དལ་འབྱོར་གྱི་རྟེན་འདི་ལ་དེ་བསྒྲུབས་ན་འབྱུང་བས་སོ། །དེ་ལྟ་བུའི་རྟེན་རྙེད་ནས་དོན་མེད་དུ་མི་བཏང་སྟེ། སློབ་དཔོན་དཔའ་བོས། ཡིད་བཞིན་ནོར་བུ་ལས་ལྷག་པའི། །ཡོན་ཏན་ཀུན་གྱི་མི་རྣམས་ནི། །སུ་ཞིག་འདིར་དེ་འབྲས་མེད་བྱེད། །ཅེས་དང་། སྤྱོོད་འཇུག་ལས། འདི་འདྲའི་དལ་རྟེན་རྙེད་གྱུར་ནས། །བདག་གིས་དགེ་གོམས་མ་བྱས་ན། །འདི་ལས་བསླུས་པ་གཞན་མེད་དེ། །འདི་ལས་རྨོངས་པ་གཞན་མེད་དོ། །ཞེས་དང་། མི་ཡི་གྲུ་ལ་བརྟེན་ནས་ནི། །སྡུག་བསྔལ་ཆུ་བོ་ཆེ་ལས་སྒྲོལ། །གྲུ་འདི་ཕྱི་ནས་རྙེད་དཀའ་བས། །རྨོངས་པ་དུས་སུ་གཉིད་མ་ལོག །ཅེས་གསུངས་པ་ལྟར་དོན་ཆེ་བ་ལ་སྙིང་པོ་ལེན་འདོད་བསྐྱེད་པར་བྱའོ། །གསུམ་པ་རྙེད་དཀའ་བ་བསམ་པ་ནི། ངན་འགྲོ་ནས་ངན་འགྲོར་སྐྱེ་བ་དང་། བདེ་འགྲོ་ནས་ངན་འགྲོར་སྐྱེ་བ་ས་ཆེན་པོའི་རྡུལ་ལྟར་མང་ལ། དེ་གཉིས་ནས་བདེ་འགྲོར་སྐྱེ་བ་ནི་ཐུབ་པའི་ཕྱག་སེན་གྱི་རྩེ་མོས་བླངས་པའི་རྡུལ་ལྟར་ཉུང་བར་བཤད་དོ། །གལ་ཏེ་བདེ་འགྲོ་ནས་ངན་འགྲོར་སྐྱེ་བ་དེ་ཙམ་མི་མང་སྙམ་ན། བཞི་བརྒྱ་པ་ལས། ཕལ་མོ་ཆེ་ཡི་མི་རྣམས་ནི། །དམ་པ་མ་ཡིན་ཕྱོགས་ཡོངས་འཛིན། །དེས་ན་སོ་སོའི་སྐྱེ་བོ་ཀུན་། །ཕལ་ཆེར་ངེས་པར་ངན་འགྲོར་འགྲོ །ཞེས་གསུངས་པ་ལྟར་བདེ་འགྲོ་མིར་སྐྱེས་ཀྱང་སྡིག་པའི་ལས་བྱེད་པ་ཤིན་ཏུ་མང་བས་ངན་འགྲོར་སྐྱེ་བ་མང་ངོ་། །རྙེད་དཀའ་བ་དེ་ཡང་གསུམ་དུ་བསྡུས་ན་ངོ་བོའི་སྒོ་ནས་དང་། རྒྱུའི་སྒོ་ནས་དང་། དཔེའི་སྒོ་ནས་རྙེད་དཀའ་བའི་ཚུལ་ལོ། །དང་པོ་ནི་བདེ་འགྲོ་ལས་ངན་འགྲོ་མང་སྟེ། ངན་འགྲོ་གཞན་གཉིས་ཀུན་གྱིས་མ་མཐོང་ཡང་། དུས་འགྲོ་བྱིངས་ན་གནས་པ་ནི་རྒྱ་མཚོའི་ནང་ན་ཆང་གི་སྦང་མ་ལྟར་ཚོགས་ཤིང་འདུས་ལ། ས་སྟེང་ན་དུད་འགྲོའི་རིགས་ནི་མི་ལ་བལྟོས་ནས་ཤིང་ཏུ་མང་སྟེ། དབྱར་དུས་ཀྱི་འབུ་སྲིན་གྲངས་མེད་པ་ལྟ་བུའོ། །རྒྱུའི་སྒོ་ནས་རྙེད་དཀའ་ཚུལ་ནི། སྤྱིར་བདེ་འགྲོར་སྐྱེ་བ་རྣམས་ནི་དགེ་བའི་ལས་ཀྱིས་ཡིན་པས་དགེ་བ་ཞིག་ངེས་པར་སྒྲུབ་དགོས་ལ། དེ་ཡང་ཚུལ་ཁྲིམས་སོགས་དགེ་བ་སྣ་གཅིག་བྱེད་པ་ལ་ངེས་པར་བལྟོས་སོ། །ཁྱད་པར་དུ་དལ་འབྱོར་གྱི་རྟེན་འཐོབ་པའི་རྒྱུར་ཚུལ་ཁྲིམས་རྣམ་པར་དག་པས་གཞི་བཟུང་། སྦྱིན་སོགས་ཀྱིས་གྲོགས་བྱས། སྨོན་ལམ་དྲི་མ་མེད་པས་མཚམས་སྦྱར་བ་ཞིག་དགོས་ན་དེ་ལྟ་བུ་དཀོན་པས་བདེ་འགྲོའི་རྟེན་རྙེད་དཀའ་བར་བསམ་མོ། །དཔེའི་སྒོ་ནས་ཀྱང་རྙེད་དཀའ་ཚུལ་ནི། དེ་ལ་དཔེ་གཞན་ཡོད་ཀྱང་འདིར་གསེར་དངུལ་ལ་སོགས་པའི་རིན་པོ་ཆེ་རིན་ཐང་ཆེ་བ་རྙེད་དཀའ་ཞིང་རྩྭ་ཤིང་དང་ཟོང་ཕལ་བ་རྙེད་སླ་བ་ལྟར། ལུས་ཁྱད་པར་ཅན་འཐོབ་དཀའ་ཞིང་ལུས་དམན་པ་རྙེད་སླ་བར་བསམ་པར་བྱའོ། །གཉིས་པ་སྙིང་པོ་ཇི་ལྟར་ལེན་ཚུལ་ལ་གཉིས། ལམ་སྤྱིའི་རྣམ་གཞག་ལ་ངེས་པ་བསྐྱེད་པ་དང་། །སྙིང་པོ་ལེན་ཚུལ་དངོས་སོ། །དང་པོ་ལ་གཉིས། སྐྱེས་བུ་གསུམ་གྱི་ལམ་གྱི་རིམ་པའི་གཞུང་དུ་གསུང་རབ་ཐམས་ཅད་འདུ་ཚུལ་དང་། སྐྱེས་བུ་གསུང་གྱི་སྒོ་ནས་རིམ་པར་འཁྲིད་པའི་རྒྱུ་མཚན་བསྟན་པའོ། །དང་པོ་ནི། སངས་རྒྱས་ཀྱིས་ཆོས་གསུངས་པ་ཐམས་ཅད་སེམས་ཅན་རྣམས་མངོན་མཐོ་དང་ངེས་ལེགས་ལ་འགོད་པའི་ཆེད་ཡིན་ཞིང་། མངོན་མཐོ་བསྒྲུབ་པ་ལས་བརྩམས་ཏེ་ཇི་སྙེད་གསུངས་པ་ཐམས་ཅད་ནི་སྐྱེས་བུ་ཆུང་ངུ་དངོས་སམ་དེ་དང་ཐུན་མོང་བའི་ཆོས་སྐོར་དུ་འདུ་ལ། ངེས་ལེགས་ལ་གཉིས་ཏེ་འཁོར་བ་ལས་གྲོལ་བ་ཙམ་གྱི་ཐར་པ་དང་སངས་རྒྱས་ཀྱི་གོ་འཕང་གཉིས་ཀྱི་དང་པོ་ཉན་རང་གི་ཐེག་པ་ལས་བརྩམས་ཏེ་ཇི་སྙེད་གསུངས་པ་རྣམས་ནི་སྐྱེས་བུ་འབྲིང་དངོས་སམ་དེ་དང་ཐུན་མོང་བའི་ཆོས་སྐོར་དུ་འདུ་ཞིང་། སངས་རྒྱས་ཐོབ་པའི་ཆེད་དུ་སྔགས་དང་ཕ་རོལ་ཏུ་ཕྱིན་པའི་ཐེག་པའི་ཆོས་སྐོར་ཇི་སྙེད་ཅིག་གསུངས་པ་ཐམས་ཅད་ནི་སྐྱེས་བུ་ཆེན་པོའི་ཆོས་སྐོར་དུ་འདུའོ། །སྐྱེས་བུ་གསུམ་ཡང་ལམ་སྒྲོན་ལས། གང་ཞིག་ཐབས་ནི་གང་དག་གིས། །འཁོར་བའི་བདེ་བ་ཙམ་དག་ལ། །རང་ཉིད་དོན་དུ་གཉེར་བྱེད་པ། །སྐྱེས་བུ་དེ་ནི་ཐ་མར་ཤེས། །སྲིད་པའི་བདེ་ལས་རྒྱབ་ཕྱོགས་ཤིང་། །སྡིག་པའི་ལས་ལས་ལྡོག་བདག་ཉིད། །གང་ཞིག་རང་ཞི་ཙམ་དོན་གཉེར། །སྐྱེས་བུ་དེ་ནི་འབྲིང་ཞེས་བྱ། །རང་རྒྱུད་གཏོགས་པའི་སྡུག་བསྔལ་གྱིས། །གང་ཞིག་གཞན་གྱི་སྡུག་བསྔལ་ཀུན། །ཡང་དག་ཟད་པར་ཀུན་ནས་འདོད། །སྐྱེས་བུ་དེ་ནི་མཆོག་ཡིན་ནོ། །ཞེས་གསུངས་ཏེ་འདིས་འཇིག་རྟེན་ཕྱི་མའི་བདེ་བ་ཙམ་གཙོ་བོར་དོན་དུ་གཉེར་བ་དེ་སྐྱེས་བུ་ཆུང་ངུ་དང་། དེའི་སྟེང་དུ་སྲིད་པ་འཁོར་བའི་སྡུག་བསྔལ་ལས་ཐར་བའི་ཐབས་དང་དེ་དང་དོན་དུ་གཙོ་བོར་དོན་དུ་གཉེར་བ་ཞིག་སྐྱེས་བུ་འབྲིང་དང་། སེམས་ཅན་ཐམས་ཅད་ཀྱི་སྡུག་བསྔལ་ཟད་པར་བྱ་བའི་ཕྱིར་སངས་རྒྱས་ཀྱི་གོ་འཕང་ཐོབ་པར་འདོད་ནས་ཕྱིན་དྲུག་དང་རིམ་གཉིས་ལ་སློབ་པ་ཞིག་སྐྱེས་བུ་ཆེན་པོར་བཤད་པ་ལྟར་རོ། །སྤྱིར་སྐྱེས་བུ་ཆུང་ངུ་ལ་ནི་ཕལ་བ་གཞན་ཡོད་ཀྱང་འདིར་སྐྱེས་བུ་ཆུང་ངུ་དངོས་ནི་སྔ་མ་ལ་བལྟོས་ཏེ་ཁྱད་པར་ཅན་ནོ། །འདི་ལ་ལམ་མ་ཞུགས་ཀྱིས་ཁྱབ་སྟེ། མངོན་མཐོ་ཙམ་དོན་དུ་གཉེར་བ་ཡིན་གྱི། ཐར་པ་དོན་དུ་གཉེར་བ་མ་ཡིན་པའི་ཕྱིར་རོ། །སྐྱེས་བུ་འབྲིང་དང་ཆེན་པོ་ལ་ནི་ཁ་ཅིག་ལམ་ཞུགས་ཀྱིས་ཁྱབ་པར་བཞེད་ཀྱང་། ལམ་མ་ཞུགས་ནའང་ཡོད་པར་སེམས་ཏེ། འཁོར་བ་ལས་ཐར་འདོད་དང་སངས་རྒྱས་གཙོ་བོར་དོན་དུ་གཉེར་བའི་རིགས་ཅན་གཉིས་དེ་ན་ཡོད་པའི་ཕྱིར་རོ། །གལ་ཏེ་འབྲིང་དང་ཆེན་པོའི་ལམ་ཞེས་ཐ་སྙད་བྱེད་པའི་ཕྱིར་ལམ་ཞུགས་སོ་སྙམ་ན། དེ་ལྟ་ན་སྐྱེས་བུ་ཆུང་ངུའི་ལམ་ཞེས་པའི་ཐ་སྙད་ཡོད་པས་དེ་ཡང་ལམ་ཞུགས་སུ་ཐལ་ཞིང་། བདེ་འགྲོ་དང་ངན་འགྲོའི་ལམ་གཉིས་ཀྱང་ལམ་དུ་ཐལ་བར་འགྱུར་ན་དེ་ནི་འདོད་པར་དཀའོ། །གཉིས་པ་སྐྱེས་བུ་གསུམ་གྱི་ལམ་གྱི་སྒོ་ནས་འཁྲིད་པའི་རྒྱུ་མཚན་ལ་གཉིས། དེའི་སྒོ་ནས་འཁྲིད་པའི་དོན་དང་། འཁྲིད་པའི་རྒྱུ་མཚན་དངོས་སོ། །དང་པོ་ནི། དེ་ལྟར་སྐྱེས་བུ་གསུམ་དུ་བཤད་ཀྱང་ལམ་གཞན་གཉིས་སྐྱེས་བུ་ཆེན་པོའི་ལམ་གྱི་ཡན་ལག་ཏུ་འདུ་བས་དེའི་ཆ་ཤས་ཡིན་ལ། འོང་ཀྱང་སྐྱེས་བུ་ཆུང་ངུ་དང་འབྲིང་གི་ལམ་དངོས་ལ་འཁྲིད་པ་མིན་གྱི། དེ་གཉིས་དང་ཐུན་མོང་བའི་ལམ་འགའ་ཞིག་སྐྱེས་བུ་ཆེན་པོའི་ལམ་ལ་འཁྲིད་པའི་སྔོན་འགྲོར་འཁྱེར་བ་ཡིན་ནོ། །གཉིས་པ་དེ་ལྟར་འཁྲིད་པའི་རྒྱུ་མཚན་ལ་གཉིས། དངོས་དང་། དགོས་པའོ། །དང་པོ་ནི། བྱང་ཆུབ་ཀྱི་སེམས་ནི་ཐེག་ཆེན་ལམ་གྱི་འཇུག་སྒོ་ཡིན་པས། བྱང་ཆུབ་ཀྱི་སེམས་སྐྱེ་བའི་སྔོན་དུ་དེའི་རྒྱུད་སྦྱོང་དགོས་ཤིང་། དེ་ཡང་སྐྱེས་བུ་ཆུང་ངུའི་སྐབས་སུ་ངན་སོང་གི་སྡུག་བསྔལ་བསམ་པ་དང་། སྐྱེས་བུ་འབྲིང་གི་སྐབས་སུ་བདེ་འགྲོའི་སྡུག་བསྔལ་བསམས་པ་ལ་བརྟེན་ནས་རྒྱུད་སྨིན་ཏེ། སྐྱེས་བུ་ཆེན་པོའི་སྐབས་སུ་ཡང་དེ་ལྟར་བསམས་པ་ན་བྱང་ཆུབ་ཀྱི་སེམས་སྐྱེ་བའི་རྒྱུ་བྱམས་སྙིང་རྗེ་གཉིས་སྐྱེ་བའི་རྒྱུ་ཁྱད་པར་ཅན་དུ་འགྱུར་བའི་ཕྱིར་རོ། །དེས་ན་སྐྱེས་བུ་ཆུང་འབྲིང་དང་ཐུན་མོང་བའི་ལམ་ལ་སྦྱོང་བ་ནི། བྱང་ཆུབ་ཀྱི་སེམས་སྐྱེ་བའི་ཐབས་དམ་པ་ཡིན་པར་ཤེས་པར་བྱའོ། །དེར་མ་ཟད། དེ་གཉིས་ཀྱི་སྐབས་སུ་སྐྱབས་འགྲོ་དང་ལས་འབྲས་དང་བསགས་སྦྱང་བྱེད་པ་རྣམས་ཀྱང་སེམས་དེ་སྐྱེ་བའི་རྒྱུར་འགྲོ་ཞིང་། དེའི་སྟེང་དུ་གོ་རིམ་གྱི་དབང་དུ་བྱས་ནས་ཐོག་མར་སྨོན་སེམས་ཆོ་གས་བཟུང་སྟེ། དེའི་བསླབ་བྱ་རྣམས་དང་། ཕྱིན་དྲུག་སོགས་སྤྱོད་པ་ལ་སློབ་འདོད་བསྐྱེད། དེ་ནས་འཇུག་སེམས་ཆོ་གས་བླངས་ཏེ་བསླབ་བྱ་ལ་ཅི་ནུས་སུ་སློབ་ཅིང་བྱང་སེམས་ཀྱི་སྡོམ་པའི་རྩ་ལྟུང་སྲུང་། བསླབ་བྱ་ཕྱིན་དྲུག་དང་བསླབ་གསུམ་སྤྱི་དང་ཞི་ལྷག་ལ་སློབ་པའི་རིམ་པ་རྣམས་འཆད་པར་འགྱུར་རོ། །དེ་ནས་སྔགས་ལམ་ལ་འཇུག་པར་བྱ་སྟེ། འདི་ཉིད་ལས། དེ་ལྟར་ལམ་ཐུན་མོང་བ་རྣམས་ཀྱིས་རྒྱུད་སྦྱངས་ནས་ནི་ངེས་པར་གསང་སྔགས་ལ་འཇུག་དགོས་ཏེ། དེ་ལ་ཞུགས་ན་མྱུར་དུ་ཚོགས་རྫོགས་པར་འགྱུར་བའི་ཕྱིར་རོ་ཞེས་གསུངས་སོ། །གཉིས་པ་དགོས་པ་ནི། གལ་ཏེ་སྐྱེས་བུ་ཆུང་འབྲིང་གི་ཆོས་སྐོར་རྣམས་སྐྱེས་བུ་ཆེན་པོའི་ལམ་གྱི་ཡན་ལག་ཡིན་ན་སྐྱེས་བུ་ཆེན་པོའི་ལམ་རིམ་གྱི་ཐ་སྙད་བྱས་པས་ཆོག་གི ཆུང་འབྲིང་དང་ཐུན་མོང་བའི་ལམ་རིམ་གྱི་ཐ་སྙད་བྱ་ཅི་དགོས་ཞེ་ན། དེ་ལ་དགོས་པ་གཉིས་ཡོད་དེ། ཆུང་འབྲིང་དང་ཐུན་མོང་བའི་ལམ་ལ་བློ་མ་སྦྱང་བར་སྐྱེས་བུ་ཆེན་པོར་རློམ་པ་འགོག་པ་དང་། བློ་རབ་འབྲིང་ཐ་མ་གསུམ་ལ་ཕན་ཁྱད་ཆེ་བའི་ཕྱིར་རོ། །ཕན་ཁྱད་ཆེ་ལུགས་ནི། འོག་མ་གཉིས་ལ་མ་འཁྲིད་པར་དང་པོ་ཉིད་ནས་ཆེན་པོ་ལ་འཁྲིད་ན་ཆེན་པོའི་ལམ་ཇི་བཞིན་མི་སྐྱེ་ལ། འོག་མ་ནས་རིམ་གྱིས་འཁྲིད་ན་ལམ་འོག་མ་སྐྱེ་བར་མ་ཟད་གོང་མ་ལ་ཡང་མཚན་ཉིད་ཚང་བ་སྐྱེ་ཞིང་། གཞན་དུ་ན་འོག་མ་དོར་བས་གོང་མ་མི་སྐྱེ་སྟེ་གང་ཡང་མེད་པར་འགྱུར་བའི་ཕྱིར་རོ། །གཉིས་པ་སྙིང་པོ་ལེན་ཚུལ་དངོས་ལ་གསུམ། སྐྱེས་བུ་ཆུང་ངུ་དང་ཐུན་མོང་བའི་ལམ་དང་། འབྲིང་དང་ཐུན་མོང་བའི་ལམ་དང་། སྐྱེས་བུ་ཆེན་པོའི་ལམ་གྱི་རིམ་པ་ལ་བློ་སྦྱང་བའོ། །དང་པོ་ལ་གསུམ། ཆུང་ངུའི་བསམ་པ་སྦྱང་བ་དངོས། བསམ་པ་དེ་སྐྱེས་པའི་ཚད། དེ་ལ་ལོག་རྟོག་བསལ་པའོ། །དང་པོ་ལ་གཉིས། འཇིག་རྟེན་ཕྱི་མ་དོན་གཉེར་གྱི་བློ་བསྐྱེད་པ་དང་། ཕྱི་མར་བདེ་ཐབས་བསྐྱེད་པའོ། །དང་པོ་ལ་གཉིས། འཇིག་རྟེན་འདིར་ཡུན་རིང་དུ་མི་གནས་པས་འཆི་བ་རྗེས་སུ་དྲན་པ་དང་། ཕྱི་མར་ཇི་ལྟར་འགྱུར་བའི་འགྲོ་བ་གཉིས་ཀྱི་བདེ་སྡུག་བསམ་པའོ། །དང་པོ་ལ་བཞི། འཆི་བ་དྲན་པ། དེ་བསྒོམས་པའི་ཕན་ཡོན། བློ་དེ་ཇི་ལྟར་བསྐྱེད་པ། འཆི་བ་དྲན་ཚུལ་དངོས་སོ། །དང་པོ་ནི། རྟག་འཛིན་ཕྱིན་ཅི་ལོག་གིས་རྟག་པར་བཟུང་ནས་ཆོས་དོན་གཉེར་ལ་འཇུག་ཏུ་མི་སྟེར་བས། དེའི་གཉེན་པོར་མི་རྟག་པ་བསྒོམ་དགོས་ཤིང་། དེ་ལ་ཕྲ་རགས་གཉིས་ལས་རགས་པའི་མི་རྟག་པ་འཆི་བ་ལ་མི་འཆི་སྙམ་པ་འདིས་གནོད་དོ། །སྤྱིིར་འཆི་བ་ཞིག་འོང་སྙམ་པ་ཀུན་ལ་ཡོད་ཀྱང་ཉི་མ་རེ་རེ་བཞིན་དེ་རིང་མི་འཆི། དེ་རིང་ཡང་མི་འཆི་སྙམ་པ་ནི་འཆི་ཀ་ཚུན་ཆད་ལ་འབྱུང་ཞིང་། དེའི་གཉེན་པོ་ཡིད་ལ་མི་བྱེད་པར་ཚེ་འདིར་འདི་དང་འདི་ལྟ་བུ་དགོས་སོ་སྙམ་སྟེ་ཚེ་འདི་ཙམ་གྱི་ཆེད་དུ་གཙོ་བོར་འབད་དོ། །བློ་དེས་ཕྱི་མའི་མངོན་མཐོ་དང་ངེས་ལེགས་སྒྲུབ་པ་ལ་བློ་འཇུག་ཏུ་མི་སྟེར་བས་དོན་ཆེན་པོ་ལས་ཉམས་པར་འགྱུར་བའི་ཕྱིར་དེའི་གཉེན་པོར་མི་རྟག་པ་བསྒོམ་པར་བྱའོ། །གཉིས་པ་བསྒོམས་པའི་ཕན་ཡོན་ནི། དེ་ལྟར་བསྒོམས་ནས་བློ་དེ་ཉིད་ཀྱིས་བསྐུལ་ཏེ་ཕྱི་མའི་མངོན་མཐོ་དང་ངེས་ལེགས་སྒྲུབ་པ་ལ་འཇུག་པར་འགྱུར་བས་དོན་ཆེན་པོ་རྙེད་ཅིང་། ལེགས་ཚོགས་ཐམས་ཅད་ཀྱི་རྩ་བ་ཚུགས་པར་འགྱུར་རོ། །གསུམ་པ་འཆི་བ་རྗེས་སུ་དྲན་པ་ཇི་ལྟ་བུ་ཞིག་བསྐྱེད་པ་ནི། གཉེན་ལྟ་བུ་འཆི་བ་ལ་སྐྲག་པ་ནི་ལམ་ལ་མ་སྦྱངས་པ་དག་ལའང་འོང་བས་དེ་འདིར་བསྐྱེད་པ་མིན་ཞིང་། ལས་ཉོན་གྱི་དབང་གིས་སྐྱེས་པའི་མཐར་འཆི་ལ་ཤི་ནས་ལས་ཀྱི་གཞན་དབང་ཅན་ཡིན་པས། ངན་སོང་དུ་འགྲོ་ཞིང་འཁོར་བའི་གནས་སུ་སྡུག་བསྔལ་ཆེན་པོ་མྱོང་བར་འགྱུར་བས་དེ་ལ་སྐྲག་པ་ཡིན་ནོ། །སྐྲག་པ་ཙམ་གྱིས་མི་ཆོག་པས་མི་སྐྲག་པའི་ཐབས་ཞིག་བྱ་དགོས་ཤིང་། དེ་ཡང་ལུས་ལོངས་སྤྱོད་སོགས་དང་ངེས་པར་འབྲལ་བར་འགྱུར་བའི་ཕྱིར་མི་རྟག་པའོ་སྙམ་དུ་ཡང་ཡང་བསམ་པ་གནད་ཆེ་སྟེ། དེ་ལྟར་བསྒོམས་ན་དེ་དག་ལ་སྲེད་ཞེན་དྲག་པོ་ལྡོག་པར་འགྱུར་ཞིང་། ཕྱི་མའི་དོན་སྒྲུབ་པ་ལ་འཇུག་པས་འཆི་བ་ལ་མི་སྐྲག་པ་ཡིན་ནོ། །བཞི་པ་འཆི་བ་རྗེས་སུ་དྲན་པ་ཇི་ལྟར་བསྒོམ་པ་ནི། རྩ་བ་གསུམ། རྒྱུ་མཚན་དགུ། ཐག་བཅད་པ་རྣམ་པ་གསུམ་གྱིས་བསྒོམ་པར་བྱའོ། །དང་པོ་ལ་གསུམ། ངེས་པར་འཆི་བ། ནམ་འཆི་ཆ་མེད་པ། འཆི་བའི་ཚེ་ཆོས་མ་གཏོགས་གང་གིས་ཀྱང་མི་ཕན་པའོ། །དང་པོ་ལ་རྒྱུ་མཚན་གསུམ་ལས། དང་པོ་ནི། ལུས་ཇི་འདྲ་ཞིག་བླངས་ཀྱང་འཆི་ཞིང་ཡུལ་གང་དུ་བསྡད་ཀྱང་འཆི་བ་དང་། དུས་གསུམ་གྱི་སེམས་ཅན་རྣམས་འཆི་བས་འཇོམས་པ་ལ་ཁྱད་པར་མེད་པ་དང་བྲོས་པས་མི་ཐར་ཞིང་སྨན་དང་སྔགས་ལ་སོགས་པས་བཟློག་ཏུ་མེད་པའོ། །གཉིས་པ་ནི། ཚེ་ལ་བསྣོན་མ་མེད་ཅིང་འབྲིད་བྱེད་པར་མ་ཆད་དུ་ཡོད་པ་སྟེ། དེ་ཡང་ལོ་ཅི་ཙམ་ཐུབ་པའི་བར་ལ་ལོ་ཟླ་བ་ཞག་དང་སྔ་དྲོ་ཕྱི་དྲོ་སོགས་སོང་ནས་ཚེ་རིམ་གྱིས་འགྲིབ་ཅིང་། དེ་ལ་ནི་བསྣོན་མ་གསར་དུ་འོང་བ་མེད་དེ། དཔེར་ན། ཐག་གི་སྐུད་པ་རེ་རེ་ནས་རིམ་གྱིས་དྲངས་ནས་བཏགས་པས་གཏིང་ལ་གཏུགས་པ་ལྟར་འགྱུར་བ་དང་། བསད་བྱ་འཁྲིད་པའི་ཚེ་གོམ་པ་རེ་རེ་ནས་འཆི་བ་ལ་ཉེ་བ་དང་འབབ་ཆུ་དྲག་ཏུ་རིམ་གྱིས་འབབ་པ་ནི་སླར་མི་ལྡོག་པ་དང་། ཕྱུགས་རྫིས་ཕྱུགས་རྣམས་ཀྱང་རིམ་གྱིས་གནས་སུ་ཕྱིན་པར་བྱེད་པ་དང་། ཉི་མའི་གྲིབ་སོ་རིམ་གྱིས་འཕེལ་འགྲིབ་འཛད་པ་ལྟར་ཚེ་ཟད་ནས་འཆིའོ། །གསུམ་པ་ནི། གསོན་པའི་ཚེ་ཆོས་བྱ་ལོང་མེད་པར་འཆི་བ་དང་། བྱ་ལོང་ཡོད་ཀྱང་བྱེད་པའི་ཆ་རྐྱེན་མ་འཛོམས་པ་དང་། ནད་སོགས་ཀྱི་དབང་གིས་ཆོས་སྒྲུབ་པའི་མཐུ་མེད་པ་དང་། གཞན་གྱི་དབང་དུ་སོང་ནས་ཆོས་སྒྲུབ་མི་ནུས་པ་དང་། གཉིད་དང་བྱ་བ་གཞན་གྱིས་བྲེལ་བས་ལོང་མེད་པའི་ཚུལ་བསམས་ཏེ། ད་ལྟ་ཉིད་ནས་ཆོས་བྱ་དགོས་པར་ཐག་བཅད་དོ། །རྩ་བ་གཉིས་པ་ནས་འཆི་ངེས་མེད་བསམས་པ་ནི། དེ་རིང་ནས་ལོ་བརྒྱ་ཚུན་ལ་འཆི་བར་ངེས་ཀྱང་དེའི་བར་གྱི་ཉིན་ཞག་གང་ལ་འོང་བར་མ་ངེས་པས། དེ་རིང་རང་འཆི་བའི་ངེས་པ་མེད་སྙམ་པ་དང་། འཆི་བདག་ནམ་འོང་མི་ཤེས་པས། འོང་ན་འགྱོད་བཞིན་དུ་འཆི་དགོས་པ་དང་། སང་དང་འཇིག་རྟེན་ཕྱི་མ་གཉིས་སྔོན་དུ་གང་འོང་མི་ཤེས་པས་འཆི་གྲབ་བྱེད་དགོས་སོ། །འདི་ལ་རྒྱུ་མཚན་གསུམ་གྱི་དང་པོ་ནི། སྤྱིར་འཛམ་བུའི་གླིང་པའི་ཚེ་ལ་ངེས་པ་མེད་པ་ནི་སྔོན་ཚེ་ལོ་དཔག་མེད་ཐུབ་ཅིང་། མ་འོངས་པ་ན་ཚེ་ལོ་བཅུ་པ་ལ་ཐུག་པའི་བར་འབྱུང་བ་དང་། ཚེ་ཚད་རེ་བཤད་ཀྱང་དེ་ལྟར་ཐུབ་པའི་ངེས་པ་མེད་པ་དང་། ལོ་ཟླ་དང་ཞག་སྔ་མ་ལ་ཡོད་ཀྱང་ཕྱི་མ་ལ་མེད་པ་དང་། སྔ་དྲོ་ཡོད་ཀྱང་ཕྱི་དྲོ་མེད་པ་དང་། ལ་ལ་མངལ་དང་བཙས་མ་ཐག་པ་དང་། བྱིས་པ་དང་། དར་ལ་བབ་པ་དང་། རྒས་ནས་འཆི་བའི་དུས་ངེས་པ་མེད་པར་བསམ་པ་སོགས་སོ། །རྒྱུ་མཚན་གཉིས་པ་འཆི་རྐྱེན་མང་ཞིང་གསོན་རྐྱེན་ཉུང་བར་བསམ་པ་ལ། ལུས་སྲོག་ལ་གནོད་པ་མང་སྟེ་མི་དང་མི་མ་ཡིན་གྱི་གནོད་པའི་རིགས་དང་། གཅན་གཟན་སོགས་ཀྱི་གནོད་པ་དང་། གཡང་དུ་ལྷུང་བ་དང་། མེ་ཆུ་སོགས་ཕྱིའི་འབྱུང་བའི་གནོད་པ་དང་། ནང་འབྱུང་བ་འཁྲུགས་པའི་ནད་དང་། གསོན་རྐྱེན་དུ་བྱས་པའི་བཟའ་བཏུང་མ་འཕྲོད་པ་དང་། གནས་ཁང་རྡིབ་པའི་སོགས་འཆི་རྐྱེན་མང་ཞིང་གསོན་རྐྱེན་ཉུང་བར་བསམ་པས་སོ། །རྒྱུ་མཚན་གསུམ་པ་ལུས་ཉམས་ཆུང་བས་འཇིག་པར་སླ་སྟེ། མཚོན་དང་རྡོ་ཤིང་སོགས་དང་ཚེར་མ་ལྟ་བུ་ཕྲན་ཚེགས་ཀྱི་གནོད་པས་ལུས་སྲོག་འཇིག་པར་འགྱུར་བ་དང་། མ་འོངས་པ་ན་རི་དང་རྒྱ་མཚོ་ས་གཞི་དང་བཅས་པའི་སྣོད་བཅུད་ཐམས་ཅད་འཇིག་པར་འགྱུར་ན་གཞན་ལྟ་ཅི་སྨོས་པར་བསམས་ལ་ཆོས་བྱ་བར་ཐག་བཅད་བྱའོ། །རྩ་བ་གསུམ་པ་འཆི་བའི་ཚེ་ཆོས་མ་གཏོགས་གཞན་གྱིས་མི་ཕན་པའི་ཚུལ་བསམ་པ་ལ་རྒྱུ་མཚན་གསུམ་ལས་དང་པོ་ནི། འཆི་བའི་ཚེ་ལས་དཀར་ནག་གཉ ིས་མ་གཏོགས་གཉེན་བཤེས་དང་གྲོགས་ཉེ་དུ་འཁོར་སོགས་རྗེས་སུ་མི་འབྲང་བས་མི་ཕན་པ་དང་། གཉིས་པ་ནི། ནོར་ལོངས་སྤྱོད་སོགས་རྡུལ་ཕྲན་ཙམ་ཡང་འཁྱེར་མི་ཐུབ་པས་མི་ཕན་པ་དང་། གསུམ་པ་ནི་རང་གི་ལུས་ཀྱང་འཇོག་དགོས་པས་མི་ཕན་པའི་ཚུལ་བསམས་ནས་ད་ལྟ་ཉིད་ནས་ཕྱི་མ་ལ་ཕན་པའི་ཆོས་བྱ་བར་ཐག་གཅོད་བྱའོ། །དེ་ལྟར་མི་རྟག་པའི་ཚུལ་བསམ་པའི་སྐབས་སུ་ལུང་མང་དུ་གསུངས་ཀྱང་། མཚོན་ཙམ་ནི། ཚོམས་ལས། གང་ཡང་སངས་རྒྱས་རང་སངས་རྒྱས། །སངས་རྒྱས་རྣམས་ཀྱི་ཉན་ཐོས་ཀྱང་། །སྐུ་ལུས་འདི་ནི་སྤོང་མཛད་ན། །སྐྱེ་བོ་ཕལ་པ་སྨོས་ཅི་དགོས། །ཞེས་དང་། གང་དུ་གནས་ཀྱང་འཆི་བས་མི་ཚུགས་པའི། །ས་ཕྱོགས་དེ་ནི་ཡོད་པ་མ་ཡིན་ཏེ། །བར་སྣང་ལ་མེད་རྒྱ་མཚོའི་ནང་ན་མེད། །རི་བོ་རྣམས་ཀྱི་གསེབ་ཏུ་ཞུགས་ནའང་མིན། །ཞེས་དང་། སྐྱེས་པ་བུད་མེད་མང་པོ་དང་། །དར་ལ་བབ་པའང་འཆི་འགྱུར་ན། །དེ་ལ་མི་འདི་གཞོན་ཞེས་ཏེ། །གསོན་པའི་གདེངས་བྲོོད་ཅི་ཞིག་ཡོད། །ཁ་ཅིག་མངལ་དུ་འཆི་བར་འགྱུར། །དེ་བཞིན་ཁ་ཅིག་བཙས་པའི་སར། །དེ་བཞིན་ཁ་ཅིག་གོག་ཙམ་ན། དེ་བཞིན་ཁ་ཅིག་ཡོངས་རྒྱུགས་ན། །ལ་ལ་རྒན་དང་ལ་ལ་གཞོན། །ལ་ལ་དར་ལ་བབ་པའི་མི། །རིམ་གྱིས་རབ་ཏུ་འགྲོ་འགྱུར་ཏེ། །འབྲས་བུ་སྨིན་པ་ལྟུང་བ་བཞིན། །ཞེས་དང་། རིན་ཆེན་འཕྲེང་བ་ལས། འཆི་བདག་རྐྱེན་གྱི་ནང་གནས་པ། །རླུང་དམར་ནང་འདུག་མར་མེ་བཞིན། །ཞེས་དང་། འཆི་བའི་རྐྱེན་ནི་མང་བ་སྟེ། །གསོན་པའི་རྐྱེན་ནི་ཉུང་ཟད་ཅིག །ཅེས་དང་། བཤེས་སྤྲིངས་ལས། ས་དང་ལྷུན་པོ་རྒྱ་མཚོ་ཉི་མ་བདུན། །འབར་བས་བསྲེགས་པས་ལུས་ཅན་འདི་དག་ཀྱང་། །ཐལ་བ་ཡང་ནི་ལུས་པར་མི་འགྱུར་ན། །ཤིན་ཏུ་ཉམས་ཆུང་མི་ལྟ་སྨོས་ཅི་འཚལ། །ཞེས་གསུངས་ཤིང་། མདོར་ན་མདོ་ལས་འདུས་བྱས་ཐམས་ཅད་མི་རྟག་ཅེས་བཤད་པ་ལྟར་རོ། །ཤི་ནས་ལས་གཉིས་མ་གཏོགས་གཞན་ཕྱིར་མི་འབྲང་བ་ནི། ཀཱ་ནི་ཀའི་སྤྲིང་ཡིག་ལས། འཆི་བདག་གིས་ནི་དྲངས་པ་ན། །དགེ་དང་མི་དགེ་མ་གཏོགས་པར། །འགྲོ་བ་ཐམས་ཅད་ཕྱིར་ལོག་ནས། །འགའ་ཡང་ཁྱོད་ཀྱི་རྗེས་མི་འབྲང་། །ཞེས་དང་། ཡང་། ཤི་བའི་རྗེས་སུ་ལུས་དང་དྲི་མ་བཞིན། །དཀར་དང་ལས་འབྲས་ཕྱི་བཞིན་འབྲང་བ་ལ། །ཞེས་གསུངས་པ་ལྟར་རོ། །གཉིས་པ་འཇིག་རྟེན་ཕྱི་མ་ཇི་ལྟར་འགྱུར་བའི་འགྲོ་བའི་སྡུག་བསྔལ་བསམ་པ་ནི། ཤི་ནས་འགྲོ་བ་གཉིས་གང་རུང་དུ་སྐྱེ་བར་ངེས་ཤིང་མི་དགེ་བའི་དབང་གིས་ངན་འགྲོར་སྐྱེས་ན་ཇི་ལྟར་འགྱུར་སྙམ་དུ་ཐོག་མར་དེའི་སྡུག་བསྔལ་བསམ་པར་བྱ་སྟེ། མགོན་པོ་ཀླུ་སྒྲུབ་ཀྱིས། རབ་ཏུ་ཚ་ཞིང་གྲང་བ་ཡི། །དམྱལ་བ་ཉི་མ་གཅིག་བཞིན་དྲན། །བཀྲེས་སྐོམ་དག་གིས་རིད་པ་ཡི། །ཡི་དྭགས་དག་ཀྱང་དྲན་པར་བྱ། །རྨོངས་པའི་སྡུག་བསྔལ་རབ་མང་བའི། །བྱོལ་སོང་བལྟ་ཞིང་དྲན་པར་བྱ། །དེ་རྒྱུ་རྣམ་སྤངས་བདེ་རྒྱུ་སྤྱད། །ཐོབ་དཀའ་འཛམ་གླིང་མི་ཡི་ལུས། །དེ་ཐོབ་དུས་སུ་ངན་སོང་རྒྱུ། །རབ་ཏུ་བསྒྲིམས་ཏེ་བཅད་པར་བྱ། །ཞེས་གསུངས་པ་ལྟར་རོ། །འཁོར་བ་དང་ངན་སོང་གི་སྡུག་བསྔལ་དྲན་པ་ནི་གནད་ཆེ་སྟེ། རང་ཉིད་སྡུག་བསྔལ་གྱིས་གཟིར་བའི་ཚུལ་བསམས་ཏེ་ང་རྒྱལ་ཟློག་པ་དང་། སྡུག་བསྔལ་རྣམས་མི་དགེ་བའི་འབྲས་བུར་ཤེས་ནས་མི་དགེ་བ་སྤོང་བ་དང་། མི་དགེ་བ་སྤོང་བའི་དགེ་བས་བདེ་བ་སྟེར་བས་དགེ་བ་སྒྲུབ་པ་ལ་དགའ་བ་དང་། རང་ཉམས་ལ་དཔགས་ནས་གཞན་ལ་སྙིང་རྗེ་སྐྱེ་བ་དང་། ངན་སོང་གི་འཇིགས་པས་སྐྱབས་འགྲོ་རྣམ་དག་སྐྱེ་བ་དང་། འཁོར་བ་ལས་ཐར་འདོད་དང་ཐར་པ་དོན་གཉེར་གྱི་བློ་རྣམ་དག་སྐྱེ་བ་རྣམས་སོ། །དེ་ལྟར་ན་ངན་འགྲོའི་སྡུག་བསྔལ་བསམ་པ་ལ་གསུམ། དམྱལ་བ་དང་། དུད་འགྲོ་དང་། ཡི་དྭགས་ཀྱི་སྡུག་བསྔལ་བསམ་པའོ། །དང་པོ་ལ། དམྱལ་བ་ཆེན་པོ་དང་། ཉེ་འཁོར་བའི་དམྱལ་བ་དང་། གྲང་བའི་དམྱལ་བ་དང་། ཉེ་ཚེ་བའི་དམྱལ་བའོ། །འདི་རྣམས་རྒྱས་པར་བཤད་ན་མང་བས་བསྔུས་ཏེ་བརྗོད་ན། དང་པོ་ནི། འདི་ནས་དཔག་ཚད་སུམ་ཁྲི་ཉིས་སྟོང་གི་འོག་ན་ཡང་སོས་ཡོད་ལ། དེ་ནས་དཔག་ཚད་བཞི་སྟོང་བཞི་སྟོང་གིས་ཆོད་པ་ན་དམྱལ་བ་གཞན་བདུན་ཡོད་པའི་དང་པོ་ཡང་སོས་ན། སེམས་ཅན་དེ་དག་འདུས་པ་ན་ལས་ཀྱི་དབང་གིས་བྱུང་བའི་མཚོན་གྱིས་ཕན་ཚུན་གཅིག་གིས་གཅིག་ལ་བསྣུན་ནས་གསོད་པར་བྱེད་དོ། །དེ་ནས་ས་ལ་འགྱེལ་བ་དང་ནམ་མཁའ་ལས་ཁྱོད་རྣམས་སོས་པར་གྱུར་ཅིག་ཅེས་སྒྲ་འབྱུང་ངོ་། །ཡང་ལངས་པ་ན་སྔར་ལྟར་མཚོན་བསྣུན་པར་བྱེད་པའི་ཚུལ་གྱིས་སྡུག་བསྔལ་དཔག་མེད་མྱོང་བར་འགྱུར་རོ། །ཐིག་ནག་ཏུ་དེར་སྐྱེས་པའི་སེམས་ཅན་རྣམས་དམྱལ་བའི་སྲུང་མས་བཟུང་ནས་ལུས་ལ་ཐིག་སྣ་ཚོགས་བཏབ་སྟེ་དེ་བཞིན་དུ་མཚོན་གྱིས་གཤག་པར་བྱེད་དོ། །བསྡུས་འཇོམས་ན་སེམས་ཅན་དེ་དག་ཚོགས་ཤིང་འདུས་པ་ན་དམྱལ་སྲུང་རྣམས་ཀྱིས་དེད་དེ། རི་ར་ལུག་སོགས་ཀྱི་གདོང་པ་ལྟ་བུའི་བར་དུ་འཚིར་ཞིང་དབང་པོའི་སྒོ་ནས་ཁྲག་གི་རྒྱུན་འབབ་པོ། །ཡང་ལྕགས་ཀྱི་འཁྲུལ་འཁོར་དུ་བཅུག་ནས་བཙིར་ཞིང་ལྕགས་ཀྱི་ས་གཞི་ལ་བརྡུང་གཅོད་བྱེད་དོ། །ངུ་འབོད་ནི། སེམས་ཅན་དེ་དག་ལྕགས་ཀྱི་ཁང་པར་བཅུག་སྟེ་མེ་འབར་བས་སྲེག་པར་བྱེད་ཅིང་ངུའོ། །ངུ་འབོད་ཆེན་པོ་ནི། ལྕགས་ཁང་ཉིས་རིམ་དུ་བཅུག་ནས་སྲེག་པར་བྱེད་དེ་ཆེར་དུའོ། །ཚ་བ་ན། སེམས་ཅན་དེ་དག་དམྱལ་སྲུང་རྣམས་ཀྱིས་བཟུང་ནས་ཚ་བའི་ལྕགས་ཟངས་ཆེན་པོའི་ནང་དུ་བཅུག་ནས་ཉ་བཞིན་དུ་སྲེག་པར་བྱེད་ཅིང་། ལྕགས་ཀྱི་གསལ་ཤིང་མེ་འབར་བ་འཕོངས་སུ་ཕུག་སྟེ་སྤྱི་བོར་འབྱིན་པ་དང་ཁ་སྣ་སོགས་ནས་མེ་ལྕེ་འབར་བ་དང་། ལྕགས་ཀྱི་ས་གཞི་ལ་གཞག་སྟེ་ཐོ་བ་མེ་འབར་བས་བརྡུང་ཞིང་དམྱལ་བར་བྱེད་དོ། །རབ་ཏུ་ཚ་བ་ན། ལྕགས་ཀྱི་གསལ་ཤིང་རྩེ་གསུམ་པ་འཕོངས་སུ་བཅུག་ནས་རྩེ་མོ་ཕྲག་པ་གཡས་གཡོན་དང་སྤྱི་བོ་ནས་འབྱིན་ཅིང་ཁ་སོགས་ནས་མེ་འབར་བར་བྱེད་པ་དང་། ལྕགས་གླེགས་ཚ་བས་ལུས་དཀྲི་བ་དང་འགྱུར་བྱེད་སྐོལ་བའི་ལྕགས་ཟངས་འབར་བའི་ནང་དུ་མགོ་མཇུག་བཟློག་ནས་བཅུག་སྟེ་མཚེད་པར་བྱེད་ཅིང་། ཀེང་རུས་འབའ་ཞིག་ཏུ་གྱུར་པ་ཕྱིར་ཕྱུང་ནས་ལྕགས་སྲེགས་ཀྱི་ས་གཞི་ལ་འགྲེམ་མོ། །དེ་ནས་སླར་ཤ་པགས་སྐྱེས་པ་དང་ཡང་ནང་དུ་འཇུག་གོ །མནར་མེད་ནི། ཕྱོགས་བཞིའི་ལྕགས་ཀྱི་ས་གཞི་འབར་བ་ལས་མེ་ལྕེ་འབར་བའི་ཤུགས་མཆེད་ཅིང་འོང་ནས། སེམས་ཅན་དེ་དག་གི་ཤ་པགས་རུས་གསུམ་རིམ་གྱིས་བཤིག་ནས་རྐང་ལ་ཐུག་པར་བྱེད་ཅིང་ལུས་ཐམས་ཅད་མར་མེ་བཞིན་དུ་འབར་རོ། །ཡང་ལྕགས་ཀྱི་ཞིབ་མའི་ནང་དུ་མེ་མདག་འབར་བར་འཁྲབ་ཏུ་འཇུག་ཅིང་། ལྕགས་ཀྱི་རིར་འཛེག་ཏུ་འཇུག་པ་དང་། ལྕེ་ལ་ལྕགས་ཀྱི་ཕུར་པ་འདེབས་པ་དང་། ཕུར་བ་བཏབ་སྟེ་ཀོ་བ་ལྟར་རྐྱང་བ་དང་ལྕགས་ཀྱི་ཐུ་ལུམ་འབར་བ་ཁར་འཇུག་ཅིང་། ཟངས་ཞུན་དམར་པོ་ཁ་ནང་དུ་བླུགས་པས་ཁོག་པ་འཚིགས་ནས་རོ་སྨན་ནས་འབྱུང་བར་བྱེད་དོ། །སྡུག་བསྔལ་དེ་ཡུན་ཅི་ཙམ་མྱོང་བ་ནི། མི་ལོ་ལྔ་བཅུ་ལ་རྒྱ་ཆེན་རིགས་བཞི་པའི་ལྷའི་ཞག་གཅིག །དེ་སུམ་ཅུ་ལ་ཟླ་བ་གཅིག །དེ་བཅུ་གཉིས་ལ་ལོར་བྱས་པའི་ལོ་ལྔ་བརྒྱ་ནི་རྒྱ་ཆེན་རིགས་བཞི་པའི་ཚེ་ཚད་ཡིན་ལ། དེ་ཐམས་ཅད་བསྡོམས་པ་ལ་ཞག་གཅིག་དང་དེ་སུམ་ཅུ་ལ་ཟླ་བ་དང་དེ་བཅུ་གཉིས་ལ་ལོར་བྱས་པའི་ལོ་ལྔ་བརྒྱ་ནི་དམྱལ་བ་ཡང་སོས་པའི་ཚེ་ཚད་དོ། །མི་ལོའི་དབང་དུ་བྱས་ན་མི་ལོ་བྱེ་བ་ཕྲག་འབུམ་དྲུག་ཁྲི་ཉིས་སྟོང་ཐུབ་ཅིང་། ཐིག་ནག་སོགས་ནི་བརྒྱད་འགྱུར་གྱིས་རིང་ངོ་། །དེ་བཞིན་དུ་མི་ལོ་བརྒྱ་དང་ཉིས་བརྒྱ་དང་བཞི་བརྒྱ་དང་བརྒྱད་བརྒྱ་དང་སྟོང་དྲུག་བརྒྱ་རྣམས་ནི་རིམ་པ་བཞིན་དུ་སུམ་ཅུ་རྩ་གསུམ་པ་ནས་གཞན་འཕྲུལ་དབང་བྱེད་པའི་བར་གྱི་ལྷའི་ཞག་རེ་ཡིན་ལ། ཚེ་ཚད་ནི་ལྷའི་ལོ་སྟོང་དང་ཉིས་སྟོང་དང་བཞི་སྟོང་དང་བརྒྱད་སྟོང་དང་ཁྲི་དྲུག་སྟོང་རེ་ཐུབ་བོ། །དེ་དག་ནི་རིམ་པ་བཞིན་ཐིག་ནག་ནས་ཚ་བའི་བར་གྱི་ཞག་རེར་བྱས་པའི་རང་ལོ་སྟོང་ནས་ཁྲི་དྲུག་སྟོང་རེ་ཐུབ་ཅིང་། མནར་མེད་པའི་ཚེ་ཚད་ནི་བར་བསྐལ་གཅིག་གོ །ཉེ་འཁོར་བ་ནི་དམྱལ་བ་བརྒྱད་པོ་རེ་རེ་ལ་ཡང་ངོས་སུ་སྒོ་བཞི་རེ་ཡོད་ལ། དེ་དག་གི་ཕྱི་རོལ་ཏུ་ཡང་ལྕགས་ཀྱི་ར་བས་བསྐོར་ཞིང་ངོས་བཞིར་སྒོ་བཞི་རེ་ཡོད་ཅིང་། སྒོ་རེ་རེར་ཡང་མེ་མུར་གྱི་འོབས་དང་རོ་མྱགས་ཀྱི་འདམ་དང་སྤུ་གྲིའི་ལམ་དང་ཆུ་ཀླུང་རབ་མེད་བཞི་བཞི་ཡོད་དོ། །མེ་མུར་གྱི་འོབས་སུ་ལྷུང་ནས་ཤ་པགས་རུས་གསུམ་བཤིགས། །རོ་མྱགས་ཀྱི་འདམ་དུ་ལྷུང་ནས་མགོ་མན་བྱིངས་ཏེ་འདུག །སྤུ་གྲི་གཏམས་པས་རྐང་ལག་སོགས་གཅོད། ཆུ་བོ་རབ་མེད་དུ་ལྷུང་ནས་སྲན་མ་འཚེད་པ་བཞིན་དུ་འཚེད་དོ། །སྤུ་གྲི་གཏམས་པའི་འཕྲོ་ན་ལུས་གཅོད་འབིག་བྱེད་པའི་རལ་གྲིའི་ལོ་མའི་ནགས་ཚལ་དང་། ཤལ་མ་ལིའི་སྡོང་པོ་སོགས་མང་ངོ་། །གྲང་དམྱལ་བརྒྱད་ནི་ཚ་དམྱལ་བརྒྱད་ཀྱི་ཐད་སོ་དཔག་ཚད་ཁྲིའི་ཕ་རོལ་ན་ཡོད་ཅིང་། འདི་ནས་དཔག་ཚད་སུམ་ཁྲི་ཉིས་སྟོང་གི་འོག་ན་ཆུ་བུར་ཅན་ཡོད་ལ། དེ་ནས་དཔག་ཚད་ཉིས་སྟོང་ཉིས་སྟོང་གིས་ཆོད་པ་ན་གཞན་བདུན་ཡོད་དོ། །དེ་ལ་ཆུ་བུར་ཅན་ནི། ལྷག་པ་ཆེན་པོ་བཏབ་པས་ལུས་ལ་ཆུ་བུར་ཆེན་པོ་བྱུང་བའོ། །ཆུ་བུར་བརྡོལ་བ་ནི་ལྷག་པར་གྲང་ནས་ཆུ་བུར་བརྡོལ་བའོ། །སོ་ཐམ་པ་ནི་གྲང་ནས་སོ་ཐམ་ཐམ་བྱེད་པའོ། །ཀྱི་ཧུད་ཟེར་བ་དང་། ཨ་ཆུ་ཟེར་བ་ནི་གྲང་བས་ཁ་ནས་ཚིག་དེ་ལྟར་བརྗོད་པའོ། །ཨུད་པལ་ལྟར་གས་པ་ནི་ཁ་དོག་སྔོན་པོ་ཁ་ལྔའམ་དྲུག་ཏུ་གས་པའོ། །པདྨ་ལྟར་གས་པ་ནི་ཁ་དོག་དམར་པོ་ཁ་བཅུའམ་དེ་ལས་ལྷག་གས་པའོ། །པདྨ་ཆེན་པོ་ལྟ་བུ་ནི་དམར་ཞིང་ཁ་བརྒྱའམ་དེ་ལས་ལྷག་གས་པའོ། །དེ་དག་ནི་སའི་དངོས་གཞི་ནས་བཤད་པ་ལྟར་རོ། །དེ་དག་གི་ཚེ་ཚད་ནི་སའི་དངོས་གཞིར་ཚ་དམྱལ་བརྒྱད་ཀྱི་ཕྱེད་ཕྱེད་དུ་བཤད་ཅིང་། མཛོད་ལས། ཡུལ་མ་ག་དྷའི་ཏིལ་སྦྱང་ཁལ་བརྒྱད་ཅུ་པ་ཞིག་ཏིལ་གྱིས་གང་བའི་ནང་ནས་ལོ་བརྒྱ་བརྒྱ་ནས་ཏིལ་རེ་ཕྱུང་བས་ཐམས་ཅད་ཟད་པའི་ཚད་ནི་ཆུ་བུར་ཅན་གྱི་ཚེ་ཚད་ཡིན་ལ། གཞན་རྣམས་ཉི་ཤུ་ཉི་ཤུས་འཕར་ཞིང་རིང་བར་བཤད་དོ། །ཉེ་ཚེ་བའི་དམྱལ་བ་ནི། ཚ་དམྱལ་དང་གྲང་དམྱལ་གྱི་འཁོར་ན་ཡོད་ཅིང་། མི་ཡུལ་ནའང་ཡོད་པར་བཤད་དོ། །དེ་དག་ཏུ་སྡུག་བསྔལ་མྱོང་བའི་ཡུན་ནི་སྤྱིར་གོང་གི་ཚེ་ཚད་བཤད་པ་ལྟར་ཡིན་ལ་བྱེ་བྲག་ཏུ་མྱོང་བའི་ལས་དེ་མ་ཟད་ཀྱི་བར་དང་། ལས་ཟད་ན་ནི་བར་སྐབས་སུ་ཡང་ཐར་པར་འགྱུར་རོ། །དེ་དག་ཏུ་སྐྱེ་བའི་རྒྱུ་ནི་མི་དགེ་བ་ཡིན་ཞིང་དེ་སྦྱོང་བའི་ཐབས་ལ་འབད་དགོས་ཏེ། བཤེས་སྤྲིངས་ལས། སྡིག་ཅན་དབུགས་འབྱུང་འགག་པ་ཙམ་ཞིག་གིས། དུས་ཀྱི་བར་དུ་ཆོད་རྣམས་དམྱལ་བ་ཡི། །སྡུག་བསྔལ་གཞལ་ཡས་ཐོས་ནས་རྣམ་སྟོང་དུ། །མི་འཇིགས་གང་ལགས་རྡོ་རྗེའི་རང་བཞིན་ནོ། །ཞེས་གསུངས་པས་སོ། །དེ་རྣམས་ཀྱི་ནང་ནས་མནར་མེད་ཀྱི་སྡུག་བསྔལ་ཤིན་ཏུ་ཆེ་སྟེ། དེ་ཉིད་ལས། བདེ་བ་ཀུན་གྱི་ནང་ན་སྲེད་ཟད་པ། །བདེ་བའི་བདག་པོ་བགྱིད་པ་ཇི་ལྟ་བར། །དེ་བཞིན་སྡུག་བསྔལ་ཀུན་གྱི་ནང་ན་ ནི། །མནར་མེད་དམྱལ་བའི་སྡུག་བསྔལ་རབ་མི་བཟད། །ཅེས་གསུངས་པ་ལྟར་རོ། །གཉིས་པ་དུད་འགྲོའི་སྡུག་བསྔལ་བསམ་པ་ནི། དུད་འགྲོ་རྣམས་ལས་མཐུ་ཆེ་བས་ཆུང་བ་གསོད་པ་དང་ཆུང་བས་ཆེ་བའི་ལུས་འབུག་ཅིང་ཟ་བ་དང་། ལྷ་མིའི་ལོངས་སྤྱོད་པའི་ཡོ་བྱད་དུ་གྱུར་ཏེ་བཀོལ་ཞིང་རྡེག་པ་དང་གསོད་པར་བྱེད་དོ། །དུད་འགྲོའི་གནས་ཀྱི་རྩ་བ་ནི་རྒྱ་མཚོ་སྟེ་དེའི་ནང་དུ་དུད་འགྲོའི་རིགས་དཔག་ཏུ་མེད་ཅིང་། མིའི་ཡུལ་ན་ཡོད་པ་རྣམས་ནི་དུད་འགྲོ་ཁ་ཐོར་རོ། །གཅིག་གིས་གཅིག་ཟ་བ་ནི་སྟག་སེང་ལ་སོགས་པ་གཅན་གཟན་རྣམས་ཀྱིས་གཞན་གསོད་ཅིང་ཟ་བ་དང་། ཆུ་སྲིན་ཆེན་པོས་ཉ་ལ་སོགས་པའི་ཕུང་པོ་ཁྱུད་མི་དབྱེད་ཅིང་བྱ་རྒོད་ལ་སོགས་པས་གཞན་གསོད་ཅིང་ཟ་བའོ། །དེར་མ་ཟད། མིས་ཀྱང་ཤ་དང་ལྤགས་པ་སོགས་ཀྱི་ཆེད་དུ་གསོད་ཅིང་ཟ་བར་བྱེད་དོ། གཞན་ཁུར་འགེལ་བ་དང་ཞིང་རྨོ་བ་དང་སྤུ་འབྲེག་པ་སོགས་མང་ངོ་། །ཚེ་ཚད་ནི་ཀླུ་ལྟ་བུ་བསྐལ་པར་གནས་པ་ཡོད་ཅིང་གཞན་ལ་ངེས་པ་མེད་དོ། །གསུམ་པ་ཡི་དྭགས་ཀྱི་སྡུག་བསྔལ་བསམ་པ་ནི། སེར་སྣ་ཤས་ཆེ་བས་ཡི་དྭགས་སུ་སྐྱེ་ཞིང་བཀྲེས་ཤིང་སྐོམ་པ་དང་། པགས་པ་དང་ཤ་ཁྲག་བསྐམས་ནས་སྡོང་དུམ་མེས་འཚིག་པ་ལྟ་བུ་དང་། གདོང་སྐྲས་ཁེབས་ཤིང་ཁ་ཤིན་ཏུ་བསྐམས་པའོ། །འདི་ལ་ཕྱིའི་སྒྲིབ་པ་ཅན་ནི་ཆུའི་རིགས་མཐོང་སྟེ་བཏུང་བར་འདོད་དེ་སོང་བ་ན། རལ་གྲི་དང་མདུང་སོགས་ལག་ན་ཐོགས་པའི་སྐྱེས་བུས་ཆུ་དེ་འཐུང་དུ་མི་སྟེར་ཞིང་། ཆུ་ཡང་རྣག་དང་ཁྲག་ཏུ་མཐོང་ནས་འཐུང་མི་འདོད་པར་འགྱུར་རོ། ། ནང་གི་སྒྲིབ་པ་ཅན ་ནི་ལྦ་བ་ཅན་ཁ་ཁབ་མིག་ཙམ་དང་མགྲིན་པ་རྟ་རྔ་ཙམ་དང་བསུས་པ་ཤིན་ཏུ་ཆེ་བ་ཡུལ་ལྗོངས་ཙམ་སྟེ། ཟས་ཁར་མི་ཤོང་ཞིང་ཤོང་ཀྱང་མགྲིན་པར་མི་ཐར་ལ་ཐར་ཡང་བསུས་པ་མི་ཁེངས་ཤིང་ཁོང་པར་སླེབ་ཀྱང་འཚིག་ཅིང་འབར་རོ། །ཟས་སྐོམ་ཉིད་ལ་སྒྲིབ་པ་ཡོད་པ་ནི། རང་ཤ་བཅད་དེ་ཟ་བ་དང་མི་གཙང་བའི་རིགས་བཟའ་བཏུང་བྱེད་དགོས་ཤིང་གཙང་མ་ལ་ལོངས་སྤྱོད་པར་མི་ནུས་སོ། །ལས་ཀྱི་དབང་གིས་དགུན་ཉི་མ་གྲང་ཞིང་དཔྱིད་དུས་སུ་ཟླ་བའི་འོད་ཕོག་ན་ཚ་བར་འགྱུར་རོ། །དེ་དག་གི་རྩ་བའི་གནས་ནི་འཛམ་བུའི་གླིང་འདིའི་འོག་དཔག་ཚད་ལྔ་བརྒྱས་བཅད་པ་ན་ཡོད་ཅིང་གཞན་ནི་དེ་ལས་འཕྲོས་པའོ། །གཞུང་ཆེ་བ་དག་ལས་གཤིན་རྗེའི་རིགས་འདི་རྣམས་ཀྱང་ཡི་དྭགས་སུ་བསྡུས་ནས་བཤད་དོ། །ཚེ་ཚད་ནི་མི་རྣམས་ཀྱི་ཟླ་བ་གཅིག་ལ་ཡི་དྭགས་ཀྱི་ཞག་གཅིག་ཏུ་བྱས་པའི་རང་ལོ་ལྔ་བརྒྱ་ཐུབ་པར་གསུངས་སོ། །ངན་འགྲོ་ན་སྡུག་བསྔལ་དེ་ལྟར་ཡོད་ཚུལ་བསམས་ཤིང་དེ་ལྟ་བུ་རང་གིས་མྱོང་བར་འགྱུར་ན་བཟོད་པར་དཀའོ་སྙམ་དུ་ཡང་ཡང་ཡིད་ལ་བཤར་བསྒོམ་བྱའོ། །དེ་ནས་དེ་དག་ཏུ་མི་སྐྱེ་བའི་ཐབས་སྐྱབས་སུ་འགྲོ་བ་དང་། མི་དགེ་བ་སྤོང་ཞིང་དགེ་བ་སྤྱི་དང་སྡིག་སྦྱོང་གི་སྐོར་སོགས་ཚོགས་གསོག་སྒྲིབ་སྦྱོང་ལ་རྒྱུན་དུ་འབད་པ་ནི་དགོས་སོ། །གཉིས་པ་འཇིག་རྟེན་ཕྱི་མར་བདེ་བའི་ཐབས་བསྟན་པ་ལ་གཉིས། བསྟན་པ་འཇུག་པའི་སྒོ་དམ་པ་སྐྱབས་འགྲོ་སྦྱོང་བ་དང་། བདེ་ལེགས་ཐམས་ཅད་ཀྱི་རྩ་བ་ཡིད་ཆེས་ཀྱི་དད་པ་བསྐྱེད་པའོ། །དང་པོ་ལ་བཞི། སྐྱབས་སུ་འགྲོ་བའི་རྒྱུ། སྐྱབས་སུ་འགྲོ་བའི་ཡུལ། སྐྱབས་སུ་སོང་བའི་ཚུལ། སྐྱབས་འགྲོའི་བསླབ་བྱའི་རིམ་པའོ། །དང་པོ་ནི། མྱུར་དུ་འཆི་བ་དང་ཤི་བའི་འོག་ཏུ་གང་དུ་སྐྱེ་བ་ལ་རང་དབང་མེད་ཀྱི། ལས་ཀྱི་གཞན་དབང་ཅན་ཡིན་པས་དེས་ཇི་ལྟར་འཕངས་པ་བཞིན་སྐྱེའོ། །དེ་ཡང་ངན་འགྲོར་སྐྱེ་བའི་རྒྱུ་མི་དགེ་བ་ནི་མང་དུ་བྱས་ཤིང་བྱེད་བཞིན་པ་ཡིན་ལ། དགེ་བ་ནི་ཕྲན་ཚེགས་ཙམ་རེ་མ་གཏོགས་མ་བྱས་ཤིང་། བྱས་པ་དག་ཀྱང་ཁོང་ཁྲོ་ལྟ་བུས་བཅོམ་པ་མང་ལ། མ་བཅོམ་ཡང་ཕྱི་མའི་དོན་དུ་མ་སོང་བར་ཚེ་འདི་ཙམ་གྱི་ཆེད་དུ་གྱུར་ཏོ། །དེས་ན་ངན་འགྲོར་འགྲོ་བ་གདོན་མི་ཟ་བས་དེ་ལས་སྐྱོབ་པའི་སྐྱབས་ནི་དཀོན་མཆོག་གསུམ་ཡིན་གྱི། འཇིག་རྟེན་པའི་ལྷ་མཐུ་བོ་ཆེ་རྣམས་ཀྱང་མིན་ན་འགང་འགོང་གི་རིགས་གཞི་བདག་ལྟ་བུ་ལྟ་ཅི་སྨོས་པས་དེའི་ཕྱིར་དཀོན་མཆོག་གསུམ་ལ་སྐྱབས་སུ་འགྲོ་དགོས་སོ། །གཉིས་པ་སྐྱབས་སུ་འགྲོ་བའི་ཡུལ་ལ་གཉིས། ཡུལ་ངོས་བཟུང་བ་དང་། སྐྱབས་སུ་འོས་པའི་རྒྱུ་མཚན་ནོ། །དང་པོ་ནི། སྐྱབས་འགྲོ་བདུན་ཅུ་པ་ལས། སངས་རྒྱས་ཆོས་དང་དགེ་འདུན་ནི། །ཐར་པ་འདོད་པ་རྣམས་ཀྱི་སྐྱབས། །ཞེས་གསུངས་པ་ལྟར་རོ། །གཉིས་པ་སྐྱབས་སུ་འོས་པའི་རྒྱུ་མཚན་ལ་བཞི་ལས། སངས་རྒྱས་ནི་རང་ཉིད་འཇིགས་པ་མེད་པའི་གོ་འཕང་བརྙེས་པ་དང་། གདུལ་བྱ་འདུས་པའི་ཐབས་ལ་མཁས་པ་དང་། ཐུགས་རྗེ་ཆེན་པོ་དང་ལྡན་པ་དང་། ཟང་ཟིང་གི་མཆོད་པ་ཙམ་གྱིས་མི་བརྙེས་ཤིང་སྒྲུབ་པའི་མཆོད་པས་མཉེས་པའོ། །དེས་ན་དེ་ཉིད་ཀྱིས་བསྟན་པའི་དམ་པའི་ཆོས་དང་དེ་སྒྲུབ་པའི་དགེ་འདུན་ཡང་སྐྱབས་སུ་འོས་སོ། །གསུམ་པ་སྐྱབས་སུ་སོང་པའི་ཚུལ་ལ་བཞི་སྟེ། ཡོན་ཏན་ཤེས་པ་དང་། ཁྱད་པར་ཤེས་པ་དང་། ཁས་བླངས་པ་དང་། གཞན་དུ་མི་སྨྲ་བའོ། །དང་པོ་སྐྱབས་ཀྱི་ཡོན་ཏན་དྲན་པ་སྟེ་སངས་རྒྱས་དང་ཆོས་དང་དགེ་འདུན་གྱི་ཡོན་ཏན་དྲན་པའོ། །དེ་དག་ཀྱང་བསྡུ་ན། སངས་རྒྱས་བཅོམ་ལྡན་འདས་ནི་སྐུ་མཚན་དཔེ་གསལ་རྫོགས་ཀྱིས་སྤྲས་ཤིང་མཐོང་ན་མི་མཐུན་པ་མེད་པ་དང་། གསུང་ནི་ཡན་ལག་དྲུག་ཅུ་དང་ལྡན་ཞིང་འགྲོ་བ་རྣམས་ཀྱི་སྐད་དང་མཐུན་པར་འཇུག་པ་དང་། ཐུགས་ཤེས་བྱ་མཐའ་དག་སྐད་ཅིག་གཅིག་ལ་མངོན་སུམ་དུ་གཟིགས་ཤིང་། ཀུན་ལ་ཉེ་རིང་མེད་པའི་བརྩེ་བ་ཆེན་པོ་དང་ལྡན་པའོ། །སྐུ་གསུང་ཐུགས་ཀྱི་འཕྲིན་ལས་ནི་ལྷུན་གྱིས་གྲུབ་པ་དང་རྒྱུན་མི་ཆད་པ་དང་རིས་སུ་ཆད་པ་མེད་པར་འཇུག་པའོ། །གདུལ་བྱའི་ངོས་ནས་བཀྲིར་རུང་ན་སངས་རྒྱས་ཀྱིས་མི་བཀྲི་བ་མེད་དེ། ཇི་སྐད་དུ། ཁྱོད་ཀྱིས་གང་ལས་འགྲོ་བ་དག །མ་དྲངས་རྒུད་པ་དེ་གང་མཆིས། །གང་དང་འཇིག་རྟེན་མ་སྤྲད་པའི། །ཕུན་ཚོགས་དེ་ཡང་གང་ཞིག་མཆིས། །ཞེས་གསུངས་པ་ལྟར་རོ། །མདོར་ན་སྒོ་སྣ་ཚོགས་ནས་སངས་རྒྱས་ཀྱི་ཡོན་ཏན་དྲན་ནས་མོས་པ་བྱ་སྟེ་སངས་རྒྱས་དང་འཕྲད་པ་དང་། ཚོགས་རྫོགས་ཤིང་སྒྲིབ་པ་སྦྱོང་བ་དང་ལམ་རྒྱུད་ལ་སྐྱེ་བ་སོགས་ཕན་ཡོན་མང་ངོ་། །ཆོས་ཀྱི་ཡོན་ཏན་ནི་སངས་རྒྱས་ཀྱི་ཡོན་ཏན་ཐམས་ཅད་ཀྱང་ཆོས་ལས་བྱུང་བས་ཆོས་ཀྱི་ཡོན་ཏན་ཡིན་ལ། ལམ་གྱི་བདེན་པས་སྐྱོན་འགོག་ཅིང་འགོག་པའི་བདེན་པ་ནི་སྐྱོན་ཞི་བ་དང་། ལུང་གི་ཆོས་ཀྱིས་རྟོགས་པའི་ཆོས་རྣམས་ལེགས་པར་སྟོན་པའོ་སྙམ་དུ་བསམ་པ་དང་། དགེ་འདུན་གྱི་གཙོ་བོ་ནི་འཕགས་པའི་དགེ་འདུན་རྣམས་ཡིན་ལ། དེ་དང་སོ་སྐྱེའི་དགེ་འདུན་གཞན་དག་ཀྱང་། ཆོས་སྨྲ་བ། ཆོས་སེམས་པ། ཆོས་ཀྱི་ཞིང་། ཆོས་འཛིན་པ། ཆོས་ལ་བརྟེན་པ། ཆོས་ལ་མཆོད་པ། ཆོས་ཀྱི་བྱ་བ་བྱེད་པ་སོགས་ཀྱི་སྒོ་ནས་ཡོན་ཏན་དྲན་པའོ། །གཉིས་པ་ཁྱད་པར་ཤེས་པ་ནི་དཀོན་མཆོག་གསུམ་ནང་ཕན་ཚུལ་གྱི་ཁྱད་པར་ཤེས་པ་སྟེ། རྒྱུད་བླ་མ་ལས་འབྱུང་བ་ལྟར་ཡིན་ལ། བསྡུ་བ་ལས་འབྱུང་བ་ནི། སངས་རྒྱས་ནི་མངོན་པར་རྫོགས་པ་བྱང་ཆུབ་པའི་མཚན་ཉིད་ཅན་ཆོས་ནི་དེའི་འབྲས་བུ་དང་། དགེ་འདུན་ནི་མན་ངག་གིས་ཡང་དག་པར་སྒྲུབ་པའི་མཚན་ཉིད་ཅན་ནོ། །འཕྲིན་ལས་ནི་ལུང་སྟོན་པ་དང་། ཉོན་མོངས་པ་དང་སྡུག་བསྔལ་སྤོང་བ་དང་། མངོན་པར་སྤྲོ་བ་ཅན་ནོ། །དེ་ལ་མོས་པ་ནི་བསྙེན་བཀུར་པ་དང་། མངོན་དུ་བྱ་བ་དང་། འགྲོགས་པ་ལ་གུས་པའོ། །སྒྲུབ་པ་ནི། མཆོད་པ་དང་རིམ་གྲོ་དང་། རྣལ་འབྱོར་གྱིས་གོམས་པར་བྱ་བ་དང་། ལོངས་སྤྱོད་ཐུན་མོང་གིས་སྒྲུབ་པའོ། །རྗེས་སུ་དྲན་པ་ནི་གསུམ་པོ་སོ་སོའི་ཡོན་ཏན་དྲན་པའོ། །བསོད་ནམས་འཕེལ་བ་ནི་ཆོས་དང་། ཟང་ཟིང་གི་དབང་དུ་བྱས་ཏེ་གཉིས་ཀྱི་དང་པོ་ནི། སངས་རྒྱས་དང་ཆོས་གཉིས་དང་། གཉིས་པ་ནི་དགེ་འདུན་གྱི་དབང་དུ་བྱས་པའོ། །གསུམ་པ་ཁས་བླངས་པ་ནི། སངས་རྒྱས་ལ་སྐྱབས་སྟོན་པའི་སྟོན་པ། དམ་པའི་ཆོས་ལ་སྐྱབས་དངོས། དགེ་འདུན་ལ་སྐྱབས་སྒྲུབ་པའི་གྲོགས་སུ་བཟུང་བའི་སྒོ་ནས་སྐྱབས་སུ་འགྲོ་བའོ། །བཞི་པ་གཞན་དུ་མི་སྨྲ་བ་ནི། ཕྱི་ནང་གི་སྟོན་པ་དང་བསྟན་པའི་ཁྱད་པར་ཤེས་ནས་དཀོན་མཆོག་ལ་སྐྱབས་སུ་འཛིན་གྱི། དེ་དག་དང་མི་མཐུན་པའི་སྟོན་པ་སོགས་ལ་སྐྱབས་སུ་མི་འཛིན་ཏེ། སངས་རྒྱས་ནི་སྐྱོན་ཟད་ཅིང་ཡོན་ཏན་རྫོགས་ལ། གཞན་གྱི་སྟོན་པ་ནི་དེ་ལས་ལྡོག་པར་ཤེས་པའོ། །བསྟན་པ་ཡང་རྒྱལ་བའི་བསྟན་པ་ནི་ལམ་བདེ་ཞིང་འབྲས་བུ་བདེ་བ་དང་། ལས་ཉོན་དང་འཁོར་བ་འགོག་ཅིང་ཐར་འདོད་མི་སླུ་བས་གཅིག་ཏུ་དགེ་ལ། གཞན་གྱི་བསྟན་པ་ནིི་དེ་དག་ལས་ལྡོག་པར་ཤེས་པ་སྟེ། དེས་རྗེས་སུ་སློབ་པ་དག་གི་ཁྱད་པར་ཡང་ཤེས་སོ། །བཞི་པ་བསླབ་བྱ་ལ་གཉིས་ཏེ་བསྡུ་བ་ནས་འབྱུང་བ་དང་། མན་ངག་ལས་འབྱུང་བའོ། །དང་པོ་ལ་བཞི་ཚན་གཉིས་ལས་བསྡུ་ན། སངས་རྒྱས་ཀྱི་རྗེས་སུ་སློབ་པའི་སྐྱེས་བུ་དམ་པ་བསྟེན་པ་དང་། ལུང་དང་རྟོགས་པའི་དམ་ཆོས་ཚུལ་བཞིན་ཡིད་ལ་བྱེད་པ་དང་། ཆོས་ཀྱི་རྗེས་སུ་མཐུན་པའི་ཆོས་སྒྲུབ་པ་དང་། མྱང་འདས་དོན་དུ་གཉེར་བའི་གང་ཟག་རྣམས་གྲོགས་སུ་འཛིན་པ་བཞི་དང་། དབང་པོ་མི་རྒོད་པ་དང་། བསླབ་པའི་གཞི་བླང་བ་དང་། སེམས་ཅན་ལ་སྙིང་བརྩེ་བ་དང་། དུས་གསུམ་དུ་དཀོན་མཆོག་མཆོད་པ་སྟེ་བཞིའོ། །གཉིས་པ་མན་ངག་ལས་འབྱུང་བ་ལ་གཉིས་ཏེ་སོ་སོ་དང་། ཐུན་མོང་བའོ། །དང་པོ་ལ་གཉིས། དགག་པ་དང་། སྒྲུབ་པའི་བསླབ་བྱའོ། །དང་པོ་ལ་གསུམ། སངས་རྒྱས་ལ་སྐྱབས་སུ་སོང་ནས་འཇིག་རྟེན་པའི་ལྷ་རྣམས་ལ་སྐྱབས་སུ་མི་འགྲོ་བ་དང་། ཆོས་ལ་སྐྱབས་སུ་སོང་ནས་སེམས་ཅན་ལ་གནོད་འཚེ་སྤོང་བ་དང་། དགེ་འདུན་ལ་སྐྱབས་སུ་སོང་ནས་མུ་སྟེགས་ཅན་དང་མི་འགྲོགས་པའོ། །དང་པོ་ནི་འཇིག་རྟེན་པའི་ལྷ་ལ་ཕུགས་ཀྱི་སྐྱབས་སུ་བཟུང་ནས་སྐྱབས་སུ་མི་འགྲོ་བ་ཡིན་གྱི། འཕྲལ་གྱི་མཐུན་རྐྱེན་སྒྲུབ་པའི་ཆེད་དུ་རེ་བལྟོས་བྱེད་པ་མི་འགལ་ཏེ། ནད་ཀྱིས་བཏབ་པས་སྨན་པ་ལ་རེ་བལྟོས་བྱེད་པ་བཞིན་ནོ། །གཉིས་པ་ནི། སེམས་ཅན་གང་ཡིན་ཡང་འཆི་བ་དང་རྡེག་པ་དང་མི་ཐེག་བཞིན་དུ་འགེལ་པ་སོགས་གནོད་པའི་རིགས་སྤོང་བའོ། །གསུམ་པ་ནི། དཀོན་མཆོག་ལ་ཡིད་མི་ཆེས་ཤིང་མི་གུས་པ་དག་དང་བློ་མཐུན་པར་མི་བྱེད་པའོ། །གཉིས་པ་སྒྲུབ་པའི་བསླབ་བྱ་ལ་གསུམ་ལས། སངས་རྒྱས་ཀྱི་སྐུ་གཟུགས་རྒྱུ་ངན་དང་བཟོ་མི་ལེགས་པ་ལ་དཔྱས་མི་འདོགས་ཤིང་འོ་བརྒྱལ་སར་མི་འཇོག་ཅིང་བརྙས་ཐབས་ཐམས་ཅད་སྤོང་བ་དང་། ཆོས་ཚིགས་བཅད་གཅིག་ཡན་ཆད་ལ་ཡང་མ་གུས་པ་སྤོང་ཞིང་། གླེགས་བམ་འོ་བརྒྱ ལ་སར་མི་འཇོག་པ་དང་ལྷམ་དང་སྦྲགས་ནས་འཁུར་བ་སོགས་གཏན་མི་བྱ་བ་དང་། དགེ་འདུན་དངོས་དང་རབ་བྱུང་གི་རྟགས་ཙམ་འཛིན་པ་ལ་མ་གུས་པར་མི་བྱ་བའོ། །གཉིས་པ་ཐུན་མོང་བའི་བསླབ་བྱ་ལ་མང་བ་ལས་དཀོན་མཆོག་གསུམ་གྱི་ཁྱད་པར་དང་དེའི་ཡོན་ཏན་རྗེས་སུ་དྲན་ནས་སྐྱབས་སུ་འགྲོ་བ་དང་། བཀའ་དྲིན་དྲན་ནས་མཆོད་པ་ལ་བརྩོན་པ་སྟེ། དེ་ལ་མཆོད་པ་དང་། བྱེད་པའི་བསམ་པའོ། །དང་པོ་ལ་བཅུ་སྟེ་བསྡུ་ན། སངས་རྒྱས་ཀྱི་སྐུ་ལ་མཆོད་པ། མཆོད་རྟེན་ལ་མཆོད་པ། དེ་དག་ལ་མངོན་སུམ་དུ་མཆོད་པ། མངོན་སུམ་མ་ཡིན་པའི་མཆོད་པ། རང་གི་ལག་གིས་མཆོད་པ། གཞན་ལ་མཆོད་དུ་འཇུག་པ། རྙེད་དང་བཀུར་སྟིའི་མཆོད་པ། རྒྱ་ཆེ་བའི་མཆོད་པ། ཉོན་མོངས་ཅན་མ་ཡིན་པའི་མཆོད་པ། སྒྲུབ་པའི་མཆོད་པའོ། །དེའི་སྔ་མ་དགུ་ནི་ཟང་ཟིང་གི་མཆོད་པ་གཙོ་ཆེ་ལ། སྒྲུབ་པའི་མཆོད་པ་ནི་ཚད་མེད་བཞི་དང་ཆོས་ཀྱི་སྡོམ་པ་བཞི་དང་སྐྱབས་འགྲོ་དང་ཕར་ཕྱིར་རྗེས་སུ་དྲན་པ་དང་སྟོང་ཉིད་ལ་སེམས་མི་རྟོག་པར་གནས་པ་དང་ཚུལ་ཁྲིམས་ལ་སྡོམ་སེམས་བྱེད་པ་དང་ཕྱིན་དྲུག་དང་བསྡུ་བཞི་ལ་བརྩོན་པ་རྣམས་ལ་བཤད་དོ། །ཟང་ཟིང་གི་མཆོད་པ་རང་ལ་མེད་ན་གཞན་གྱིས་མཆོད་པ་ཐམས་ཅད་ལ་ཡི་རང་བས་ཁྱབ་པར་བྱས་ན་ཚེགས་ཆུང་ངུས་ཚོགས་རྫོགས་པར་འགྱུར་ཞིང་། ཕྱོགས་བཅུ་ན་བདག་པོས་བཟུང་བ་དང་མ་བཟུང་བའི་མེ་ཏོག་ལ་སོགས་པའི་མཆོད་པ་ཐམས་ཅད་ཀྱང་འབུལ་བར་བྱས་ནའང་དེ་བཞིན་དུ་འགྱུར་རོ། །གཉ ིས་པ་བྱེད་པའི་བསམ་པ་ལ་དྲུག་སྟེ། ཡོན་ཏན་གྱི་ཞིང་གོང་ན་མེད་པའོ་སྙམ་པ་དང་། ཕན་འདོགས་པ་གོང་ན་མེད་པའོ། །སེམས་ཅན་ཐམས་ཅད་ཀྱི་མཆོག་གོ །ཤིན་ཏུ་དཀོན་པའོ། །འཇིག་རྟེན་དུ་གཅིག་ཁོ་ན་འབྱུང་བའོ། །ཕུན་ཚོགས་ཐམས་ཅད་ཀྱི་གཞིའོ་སྙམ་དུ་བསམས་ཏེ་མཆོད་པའོ། །མདོར་ན་རྟེན་གཅིག་ལ་མཆོད་པའི་ཚེ་ཐམས་ཅད་ཀྱི་ཆོས་ཉིད་གཅིག་པར་བསམས་ཏེ་དུས་གསུམ་གྱི་སངས་རྒྱས་སྲས་བཅས་སོགས་མཆོད་ཡུལ་ཐམས་ཅད་ལ་མཆོད་པར་མོས་ན་ནི་ཕན་ཡོན་ལྷག་པར་ཆེའོ། །དེ་ལྟར་སྐྱབས་སུ་སོང་བའི་ཕན་ཡོན་ལ་གཉིས་ཏེ། བསྡུ་བ་དང་། མན་ངག་ལས་འབྱུང་བའོ། །དང་པོ་ལ་བཞི་ཚན་གཉིས་ལས། བསྡུ་ན་བསོད་ནམས་རྒྱ་ཆེན་པོ་འཐོབ་པ་དང་། མཆོག་ཏུ་དགའ་བ་འཐོབ་པ། ཏིང་ངེ་འཛིན་འཐོབ་པ། ཤེས་རབ་ཀྱི་བསླབ་པ་འགྲུབ་པ་སྟེ་བཞི་དང་། བསྲུང་བ་ཆེན་པོ་དང་ལྡན་པ། སྒྲིབ་པ་འདག་པ། སྐྱེས་བུ་དམ་པའི་གྲངས་སུ་འགྲོ་བ། སྟོན་པ་དང་ཚངས་པར་མཚུངས་པར་སྤྱོད་པ་དང་ལྷ་རྣམས་དགའ་བ་སྟེ་བཞི་འབྱུང་ངོ་། །གཉིས་པ་མན་ངག་ལས་འབྱུང་བ་ནི། ནང་པ་སངས་རྒྱས་པར་ཆུད་པ། སྡོམ་པའི་རྟེན་བྱེད་པ་། སྒྲིབ་པ་མཛད་པ། ཚོགས་གསོག་པ། མི་མ་ཡིན་གྱིས་མི་ཚུགས་པ། བསམ་པ་འགྲུབ་པ། མྱུར་དུ་འཚང་རྒྱ་བའོ། །དཀོན་མཆོག་གསུམ་སྲོག་གི་ཕྱིར་ཡང་མི་གཏོང་ཞིང་བཞད་གད་ཙམ་གྱི་ཕྱིར་ཡང་གཏོང་བའི་ཚིག་གི་མ་སྨྲའོ། །དཀོན་མཆོག་ལ་ཡིད་མ་ཆེས་ན་ནི་སྐྱབས་འགྲོ་གཏོང་ལ། དཀོན་མཆོག་མཆོད་པ་སོགས་མི་བྱེད་ན་ནི་བསླབ་བྱ་དང་འགལ་ཞིང་། ལྷ་གཞན་དང་སྟོན་པ་གཞན་ལ་མཆོད་པ་སོགས་བྱེ་ནའང་བསླབ་བྱ་དང་འགལ་བར་འགྱུར་རོ། །དེས་ན་དཀོན་མཆོག་གསུམ་ལ་སྐྱབས་གནས་ཡང་དག་ཏུ་འཛིན་ཅིང་། ངན་འགྲོའི་འཇིགས་པ་སོགས་ལས་སྐྱོབ་པའི་ནུས་པ་དཀོན་མཆོག་གསུམ་ལ་ཡོད་པར་ཡིད་ཆེས་པའི་སྒོ་ནས་བློ་བཀལ་ཏེ་རེ་བལྟོས་འཆའ་བ་ནི་སྐྱབས་སུ་འགྲོ་བའི་ཚུལ་དངོས་སོ། །གསུམ་པ་བདེ་ལེགས་ཐམས་ཅད་ཀྱི་རྩ་བ་ཡིད་ཆེས་ཀྱི་དད་པ་བསྐྱེད་པ་ལ་གསུམ། ལས་འབྲས་སྦྱིར་བསམ་པ་དང་། བྱེ་བྲག་ཏུ་བསམ་པ་དང་། བསམ་ནས་འཇུག་ལྡོག་བྱ་ཚུལ་ལོ། །དང་པོ་ལ་གཉིས། དངོས་དང་། སོ་སོར་ཕྱེ་སྟེ་བསམ་པའོ། །དང་པོ་ལ་བཞི། ལས་ངེས་པ་དང་། འཕེལ་ཆེ་བ་དང་། ལས་མ་བྱས་པ་དང་མི་ཕྲད་པ་དང་། ལས་བྱས་པ་ཆུད་མི་ཟ་བའོ། །དང་པོ་ནི། སྐྱེ་འཕགས་གང་ཡིན་ཀྱང་རྣམ་སྨིན་བདེ་བ་ཆེ་ཆུང་གང་བྱུང་ཡང་དགེ་བའི་འབྲས་བུ་དང་། སྡུག་བསྔལ་གང་བྱུང་ཡང་མི་དགེ་བའི་འབྲས་བུ་སྟེ། མི་དགེ་བ་ལས་བདེ་བ་དང་དགེ་བའི་ལས་ལས་རྣམ་སྨིན་སྡུག་བསྔལ་འབྱུང་བ་མེད་དོ། །དེ་ལྟར་མགོན་པོ་ཀླུ་སྒྲུབ་ཀྱིས་རིན་ཆེན་ཕྲེང་བར། མི་དགེ་བ་ལས་སྡུག་བསྔལ་ཀུན། །དེ་བཞིན་ངན་འགྲོ་ཐམས་ཅད་དོ། །དགེ་ལས་བདེ་འགྲོ་ཐམས་ཅད་དང་། །སྐྱེ་བ་ཀུན་ཏུ་བདེ་བ་དག །ཅེས་གསུངས་སོ། །བདེ་སྡུག་རྣམས་རྒྱུ་མེད་པ་ལས་མ་བྱུང་ཞིང་གཙོ་བོ་དང་དབང་ཕྱུག་སོགས་མི་མཐུན་པའི་རྒྱུ་ལས་མ་བྱུང་ལ། དགེ་མི་དགེ་ལས་སྤྱི་དང་བྱེ་བྲག་ལས་བྱུང་ངོ་། ལས་སོ་སོའི་འབྲས་བུ་བདེ་སྡུག་སོ་སོར་མ་འཆོལ་བ་ནི་གྲོ་ནས་སོགས་སོ་སོའི་འབྲས་བུ་མ་འཆོལ་བར་འབྱུང་བ་བཞིན་ཏེ། ཚུལ་དེ་ལྟ་བུས་ལས་འབྲས་མི་བསླུ་བ་ལ་ངེས་པ་རྙེད་པ་ནི་ནང་པ་སངས་རྒྱས་པ་ཐམས་ཅད་ཀྱི་ཡང་དག་པའི་ལྟ་བ་ཡིན་ཞིང་ཕན་ཡོན་ཀྱང་ཆེ་སྟེ། མདོ་ལས། འཇིག་རྟེན་པ་ཡི་ཡང་དག་ལྟ། །མི་གང་སུ་ལ་ཡོད་གྱུར་པ། །དེ་ནི་བསྐལ་པ་སྟོང་རྣམས་སུ། །ངན་འགྲོ་འགྲོ་བར་མི་འགྱུར་རོ། །ཞེས་གསུངས་པའི་ཕྱིར་རོ། །ལས་འཕེལ་ཆེ་བ་ནི། ལས་དགེ་མི་དགེ་ཆུང་ངུ་ལས་ཀྱང་འབྲས་བུ་བདེ་སྡུག་ཤིན་ཏུ་ཆེན་པོ་འབྱུང་བའི་འཕེལ་ཀ་འདྲ་བ་ཕྱིའི་རྒྱུ་འབྲས་ལ་མེད་དོ། །ལས་མ་བྱས་པ་དང་མི་ཕྲད་པ་ནི། བདེ་སྡུག་མྱོང་བའི་རྒྱུ་ལས་མ་བྱས་ན་དེའི་འབྲས་བུ་གཏན་མི་མྱོང་ངོ་། །ལས་བྱས་པ་ཆུད་མི་ཟ་བ་ནི། འདུལ་བ་ལུང་ལས། ལུས་རྣམས་བསྐལ་པ་བརྒྱར་ཡང་ནི། །ཆུད་མི་ཟ་བའང་ཚོགས་དང་དུས། །རྙེད་ན་ལུས་ཅན་རྣམས་ལ་ནི། །འབྲས་བུ་སྨིན་པ་དག་ཏུ་འགྱུར། །ཞེས་གསུངས་ཏེ་བཤགས་པ་སོགས་ཀྱི་རྐྱེན་མེད་ན་འབྲས་བུ་ཆེ་ཆུང་གང་ཡིན་ཀྱང་དུས་ལ་བབ་པ་ན་འབྱུང་ངོ་། །གཉིས་པ་སོ་སོར་ཕྱེ་སྟེ་བསམ་པ་ལ་གཉིས། ལས་ལམ་བཅུ་གཙོ་བོར་བསྟན་པ་དང་། ལས་དང་འབྲས་བུ་བཤད་པའོ། །དང་པོ་ནི། སྤྱིར་དགེ་མི་དགེའི་ལས་ཀྱི་དབྱེ་བ་མང་ཡང་གནད་ཆེ་བ་རྣམས་བཅུར་བསྡུས་ནས་གསུངས་ཏེ། མཛོད་ལས། དེ་ལས་ཆེ་ལོང་བསྡུས་ནས་ནི། །དགེ་དང་མི་དགེ་ཅི་རིགས་པར། །ལས་ཀྱི་ལམ་ནི་བཅུ་གསུངས་སོ། །ཞེས་གསུངས་པ་ལྟར་རོ། །གཉིས་པ་ལ་གསུམ། ནག་པོའི་ལས་འབྲས་དང་། དཀར་པོའི་ལས་འབྲས་དང་། ལས་ཀྱི་དབྱེ་བ་གཞན་བསྟན་པའོ། །དང་པོ་ལ་གསུམ། ལས་ལམ་དངོས་དང་། ལྕི་ཡང་དང་། དེ་དག་གི་འབྲས་བུའོ། །དང་པོ་ནི། བསྔུ་ན་གཞི་དང་། བསམ་པ་དང་སྦྱོར་བ་དང་མཐར་ཐུག་བཞི་སྟེ་དེ་ལ་སྲོག་གཅོད་ཀྱི་གཞི་ནི་སེམས་ཅན་ནོ། །བསམ་པ་ལ། གསུམ་ལས། འདུ་ཤེས་ནི་གཞི་སེམས་ཅན་ལྟ་བུ་ལ་སེམས་ཅན་དུ་འདུ་ཤེས་པ་དང་དེ་མིན་པར་འདུ་ཤེས་པ་དང་། སེམས་ཅན་མིན་པ་ལ་དེར་འདུར་ཤེས་པ་དང་དེ་ཡིན་པར་འདུ་ཤེས་པ་བཞི་སྟེ། འདུ་ཤེས་དང་པོ་དང་གསུམ་པ་ནི་འཁྲུལ་ཞིང་གཉིས་པ་དང་བཞི་པ་ནི་མ་འཁྲུལ་བའོ། །ནོར་ནས་བསད་པ་ལ་དངོས་གཞིའི་ལྟུང་བ་མེད་ཀྱང་གང་རུང་ཡང་གསོད་སྙམ་དུ་ཀུན་སློང་སྤྱི་ལ་ཞུགས་པ་ཡོད་ན་འདུ་ཤེས་འཁྲུལ་ཡང་དངོས་གཞིའི་ལྟུང་བ་སྐྱེད་དོ། །ཚུལ་འདི་ལྷག་མ་དགུ་ལ་ཡང་ཅི་རིགས་པར་ཤེས་པར་བྱའོ། །ཉོན་མོངས་པ་ནི་དུག་གསུམ་གང་རུང་ངོ་། །རྒྱུའི་ཀུན་སློང་ནི་གསོད་པར་འདོད་པའོ། །སྦྱོར་བ་ལ་སྦྱོར་པ་པོ་ནི་རང་གཞན་གང་རུང་དང་སྦྱོར་བའི་ངོ་བོ་ནི་མཚོན་ནམ་དུག་གམ་སྔགས་ལ་སོགས་པ་གང་རུང་གིས་བྱས་པའོ། །མཐར་ཐུག་ནི་དེའི་རྐྱེན་གྱིས་རང་གི་སྔར་ཤི་བའོ། །གཉིས་པ་མ་བྱིན་པར་ལེན་པའི་གཞི་ནི་གཞན་གྱིས་བཟུང་བའི་རྫས་སོ། །བསམ་པ་ལ་གསུམ་ལས་འདུ་ཤེས་དང་ཉོན་མོངས་ནི་སྔར་ལྟར་རོ། །ཀུན་སློང་ནི་མ་བྱིན་པར་ལེན་པར་འདོད་པའོ། །སྦྱོར་བ་པོ་ནི་སྔར་ལྟར་ལ་སྦྱོར་བའི་ངོ་བོ་ནི་མཐུས་འཕྲོག་པ་དང་བརྐུ་བ་གང་བྱས་ཀྱང་འདྲའོ། །མཐར་ཐུག་ནི་ཐོབ་བློ་སྐྱེས་པའོ། །གསུམ་པ་ལོག་གཡེམ་གྱི་གཞི་ནི་བགྲོད་བྱ་མིན་པའི་བུད་མེད་དང་སྐྱེས་པའི་ཡན་ལག་མིན་པ་དང་གནས་མིན་པ་དང་དུས་མིན་པ་སྟེ་བཞིར་བཤད་ཅིང་། ཁྱད་པར་ཕྱེ་ན་མང་ཡང་བསྡུ་ན་བུད་མེད་དང་སྐྱེས་པ་སོགས་གང་ལ་བརྟེན་ནས་ས་བོན་འབྱིན་པའི་གཞིའོ། །བསམ་པ་ལ་གསུམ་ལས་འདུ་ཤེས་ནི་འཁྲུལ་མ་འཁྲུལ་འདྲ་མི་འདྲ་གཉིས་སོ། །ཉོན་མོངས་ནི་སྔར་ལྟར་དང་། ཀུན་སློང་ནི་མི་ཚངས་པར་སྤྱོད་འདོད་པའོ། །སྦྱོར་བ་ནི་དེའི་ཆེད་དུ་འབད་པའོ། །མཐར་ཐུག་ནི་ས་བོན་བྱུང་བའོ། །བཞི་པ་བརྫུན་དུ་སྨྲ་བའི་གཞི་ནི། ཕ་རོལ་པོ་དོན་གོ་བའི་སེམས་ཅན་ནོ། །བསམ་པ་ལ་གསུམ་ལས་འདུ་ཤེས་ནི། ཕན་འདོད་ཡིན་ན་མ་གཏོགས་མཐོང་བ་ལ་མ་མཐོང་བ་དང་མ་མཐོང་བ་ལ་མཐོང་ཞེས་འདུ་ཤེས་བསྒྱུར་བ་སོགས་སོ། །ཉོན་མོངས་པ་ནི་དུག་གསུམ་གང་རུང་ངོ་། །ཀུན་སློང་ནི་འདུ་ཤེས་བསྒྱུར་ཏེ་སྨྲ་བར་འདོད་པའོ། །སྦྱོར་བ་ནི་སྨྲ་བའམ་མི་སྨྲ་བས་དང་དུ་ལེན་པ་སོགས་སོ། །མཐར་ཐུག་ནི་ཕ་རོལ་པོས་དོན་དེ་གོ་བའོ། །ལྔ་པ་ཕྲ་མའི་གཞི་ནི་མཐུན་མི་མཐུན་པའི་སེམས་ཅན་ནོ། །བསམ་པ་ལ་གསུམ་ལས་འདུ་ཤེས་དང་ཉོན་མོངས་སྔར་ལྟར་རོ། །ཀུན་སློང་ནི། སེམས་ཅན་མཐུན་པ་དབྱེ་བ་དང་མི་མཐུན་པ་མི་འདུམ་པར་འདོད་པའོ། །སྦྱོར་བ་ནི་དབྱེ་བར་བྱེད་པའི་ཚིག་བརྗོད་པའོ། །མཐར་ཐུག་ནི་འབྱེད་པར་བྱེད་པའི་ཚིག་དོན་གོ་བའོ། །དྲུག་པ་ཚིག་རྩུབ་ཀྱི་གཞི་ནི་མནར་སེམས་སྐྱེ་བའི་ཡུལ་གྱི་སེམས་ཅན་ནོ། །བསམ་པ་ལ་འདུ་ཤེས་དང་ཉོན་མོངས་ནི་སྔར་བཞིན་ནོ། །ཀུན་སློང་ནི་ཚིག་རྩུབ་སྨྲ་བར་འདོད་པའོ། །སྦྱོར་བ་ནི་བདེན་མི་བདེན་གང་ཡང་རུང་བས་སྐྱོན་བརྗོད་ཀྱི་ཚིག་དོན་དྲག་པོ་སྨྲ་བའོ། །མཐར་ཐུག་ནི་དེ་ལྟར་སྨྲས་པའི་དོན་དེས་གོ་བའོ། །བདུན་པ་ངག་ཀྱལ་གྱི་གཞི་ནི་དགོས་པ་མེད་པའི་དོན་ནོ། །བསམ་པ་ལ་འདུ་ཤེས་ནི་བརྗོད་འདོད་པའི་དོན་དེ་ལ་དེར་འདུ་ཤེས་པས་བྱུང་རྒྱལ་དུ་སྨྲ་བའོ། །ཉོན་མོངས་སྔར་ལྟར་དང་། ཀུན་སློང་ནི་མ་འབྲེལ་ཞིང་གང་བྱུང་དུ་སྨྲ་བར་འདོད་པའོ། །སྦྱོར་བ་ནི་ངག་ཀྱལ་སྨྲ་བར་རྩོམ་པའོ། །མཐར་ཐུག་ནི་སྨྲས་ཟིན་པའོ། །འདི་གཞི་བདུན་དང་ལྡན་ཏེ་འཐབ་རྩོད་མཚང་འདྲུ་སོགས་དང་། བསྟན་བཅོས་ངན་པ་འདོན་པ་སོགས་དང་། སྨྲེ་ངག་སྣ་ཚོགས་འདོན་པ་དང་། རྩེ་དགོད་དང་དགའ་མགུར་སྤྱད་པ་སྨྲ་བ་དང་། འདུ་འཛིའི་གཏམ་དང་། ར་རོ་བ་དང་སྨྱོས་གཏམ་བྱེད་པ་དང་། ལོག་པའི་འཚེ་བས་སྨྲ་བའོ། །བརྒྱད་པ་བརྣབ་སེམས་ཀྱི་གཞི་ནི་གཞན་གྱི་ཡོ་བྱད་དོ། །བསམ་པ་ལ་འདུ་ཤེས་ནི་དེ་ལ་དེར་འདུ་ཤེས་པའོ། །ཉོན་མོངས་ནི་སྔར་ལྟར་དང་། ཀུན་སློང་ནི་བདག་གིར་བྱ་བར་འདོད་པའོ། །སྦྱོར་བ་ནི་བསམ་དོན་དེ་ལ་རྩོལ་བར་བྱེད་པའོ། །མཐར་ཐུག་ནི་དེ་བདག་གིར་གྱུར་ན་སྙམ་པའོ། །འདི་ལ་ལྔ་ཚང་དགོས་ཏེ། རང་གི་ལོངས་སྤྱོད་ལ་ལྷག་པར་ཆགས་པའི་སེམས་དང་། གསོག་འདོད་ཆེ་བའི་སེམས་དང་། གཞན་ནོར་ལ་རྟོག་ཅིང་རོ་མྱང་འདོད་ཆེ་བའི་སེམས་དང་། གཞན་གྱི་ནོར་དེ་དང་དེ་བདག་གིར་གྱུར་ཅིག་སྙམ་པའི་འཁུ་སེམས་དང་། ངོ་ཚ་དང་ཉེས་དམིགས་ལ་མི་འཛེམ་པའི་སེམས་དང་ལྡན་པ་སྟེ་མདོར་བསྡུས་པའོ། །དགུ་པ་གནོད་སེམས་ཀྱི་གཞི་དང་འདུ་ཤེས་དང་ཉོན་མོངས་གསུམ་ནི་ཚིག་རྩུབ་ཇི་ལྟ་བ་བཞིན་ནོ། །ཀུན་སློང་ནི་བརྡེག་པ་སོགས་བྱ་བར་འདོད་པའོ། །སྦྱོར་བ་ནི་བསམ་པ་དེ་ལ་སྦྱོར་བ་བྱས་པའོ། །མཐར་ཐུག་ནི་བརྡེག་པར་བྱ་བ་སོགས་སུ་ཐག་བཅད་པའོ། །འདི་ལའང་ལྔ་ཚང་དགོས་ཀྱི་མ་ཚང་ན་མི་རྫོགས་ཏེ། ལྔ་ནི་བསྡུ་ན་གནོད་པར་བྱེད་པའི་རྒྱུ་བསམས་ཏེ་ཞེ་སྡང་གི་སེམས་དང་། དེ་ལ་མི་བཟོད་པའི་སེམས་དང་། ཡང་ཡང་དྲན་པའི་ཁོན་འཛིན་གྱི་སེམས་དང་། བསད་བརྡེག་སོགས་བྱས་ན་ཅི་མ་རུང་སྙམ་པའི་འཁུ་སེམས་དང་། ཉེས་དམིགས་ལས་འབྱུང་བ་མི་ཤེས་པས་ཟིལ་གྱིས་ནོན་པའི་སེམས་དང་ལྡན་པའོ། །སྦྱིར་གནོད་སེམས་ཙམ་ལ་ནི་ངེས་པ་མེད་དེ་ཡུལ་དེ་ལ་གནོད་འདོད་ཀྱི་བསམ་པ་ཇི་སྙེད་སེམས་པ་ཐམས་ཅད་གནོད་སེམས་སུ་འགྱུར་ཞིང་། འདི་ཤི་ན་སྙམ་པ་དང་ཆོས་དང་ལོངས་སྤྱོད་ཉམས་ན་སྙམ་པ་དང་། ངན་སོང་དུ་སྐྱེས་ན་སྙམ་པ་རྣམས་ཀྱང་གནོད་སེམས་སུ་འགྱུར་རོ། །བཅུ་པ་ལོག་ལྟའི་གཞི་ནི་ཡོད་པའི་དོན་ནོ། །བསམ་པ་ལ་འདུ་ཤེས་ནི་དོན་དེ་ལ་བདེན་པར་འདུ་ཤེས་པའོ། །ཉོན་མོངས་ནི་སྔར་བཞིན་དང་། ཀུན་སློང་ནི་སྐུར་བ་འདེབས་འདོད་པའོ། །སྦྱོར་བ་ནི་བསམ་དོན་དེ་ལ་སྦྱོར་བ་རྩོམ་པའོ། །དེ་ལ་བཞི་སྟེ་རྒྱུ་དང་འབྲས་བུ་དང་བྱེད་པ་དང་ཡོད་པའི་དངོས་པོ་ལ་སྐུར་པ་འདེབས་པའོ། །དེ་བཞི་ནི་རིམ་པ་བཞིན་ལེགས་སྤྱད་དང་ཉེས་སྤྱད་མེད་དོ་ཞེས་དང་། དེ་གཉིས་ཀྱི་རྣམ་སྨིན་མེད་དོ་ཞེས་དང་། ས་བོན་འདེབས་པ་དང་འཛིན་པའི་ཕ་མ་མེད་དོ་ཞེས་དང་། ཡོད་པའི་དངོས་པོ་འཇིག་རྟེན་སྔ་ཕྱི་མེད་དོ་ཞེས་དང་། སེམས་ཅན་བརྫུས་སྐྱེས་མེད་དོ་ཞེས་དང་། དགྲ་བཅོམ་པ་སོགས་མེད་དོ་ཞེས་པ་ལྟ་བུའོ། །མཐར་ཐུག་ནི་སྐུར་པ་བཏབ་བའོ། །འདི་ལ་ཡང་སེམས་ལྔ་ཚང་དགོས་ཀྱི་མ་ཚང་ན་མི་རྫོགས་སོ། །ལྔ་ནི་བསྡུ་ན་ཤེས་བྱ་ལེགས་པར་མི་ཤེས་པའི་རྨོངས་སེམས་དང་། སྡིག་ལ་དགའ་བའི་དྲག་ཤུལ་གྱི་སེམས་དང་། ལོག་པར་ཞུགས་པའི་སེམས་དང་། སྦྱིན་སོགས་ཀྱི་སེམས་བསྐྱེད་ལ་སྐུར་འདེབས་ཀྱི་སེམས་དང་། ཉེས་དམིགས་མི་ཤེས་པའི་སེམས་སོ། །གཉིས་པ་ལྕི་ཡང་བསྟན་པ་ལ་གཉིས་ལས་དང་པོ་ལ་ལྔ་སྟེ་བསམ་པས་ལྕི་བ་དང་། སྦྱོར་བས་ལྕི་བ་དང་། གཉེན་པོ་མེད་པས་ལྕི་བ་དང་། ལོག་པར་ཞེན་པས་ལྕི་བ་དང་། གཞི་ལས་ལྕི་བའོ། །དང་པོ་ནི། དུག་གསུམ་དྲག་པོས་བྱེད་པའོ། །གཉིས་པ་ནི་སྲོག་གཅོད་པ་ལ་དགའ་བས་བྱས་པ་ལྟ་བུའོ། །གསུམ་པ་ནི། དགེ་ཕྱོགས་ལ་མི་འཇུག་པས་བྱེད་པའོ། །བཞི་པ་ནི་ཕྱུགས་ཀྱི་མཆོད་སྦྱིན་གཏོང་བ་ལྟ་བུའོ། །ལྔ་པ་ནི་ཕ་མ་དང་བླ་མ་ལྟ་བུ་དང་དུད་འགྲོ་ཡིན་ཡང་བོང་ཆེ་བ་གསོད་པ་ལྟ་བུའོ། །མི་དགེ་བ་གཞན་རྣམས་ལ་ཡང་གཞི་མ་གཏོགས་ཇི་ལྟར་རིགས་པར་སྦྱར་རོ། །གཞན་ཡང་མི་དགེ་བ་བཅུ་སོ་སོ་ལ་ལྕི་ཡང་གཉིས་གཉིས་ཡོད་ཀྱང་། སྤྱིིར་ལུས་ངག་གི་བདུན་སྔ་མ་སྔ་མ་ཕྱི་མ་ཕྱི་མ་ལས་ལྕི་ཞིང་། ཡིད་ཀྱི་གསུམ་ནི་སྔ་མ་སྔ་མ་ལས་ཕྱི་མ་ཕྱི་མ་ལྕི་བར་བཤད་དོ། །སའི་དངོས་གཞི་ལས་ནི་ལྕི་བར་ཚུལ་དྲུག་གསུངས་སོ། །གཉིས་པ་ལ་ལས་སྟོབས་ལྡན་བསྡུ་ན་བཞི་སྟེ། ཞིང་གི་སྒོ་ནས་སྟོབས་ཆེ་བ་དང་། རྟེན་གྱི་སྒོ་ནས་དང་། དངོས་པོའི་སྒོ་ནས་དང་། བསམ་པའི་སྒོ་ནས་སྟོབས་ཆེ་བའོ། །དང་པོ་ནི། དཀོན་མཆོག་དང་བླ་མ་དང་ཕ་མ་ལྟ་བུ་ལ་ཕན་གནོད་གང་བྱས་ཀྱང་སྟོབས་ཆེའོ། །གཉིས་པ་ནི། སྡིག་པ་ལ་འགྱོད་སེམས་དང་ལྡན་པས་བྱས་པ་ཡང་ལ། འགྱོད་སེམས་མེད་པར་དགའ་བར་བྱས་ན་ལྕེའོ། །གསུམ་པ་ནི། དངོས་པོ་གྱ་ནོམ་པ་དང་ཆོས་ཀྱི་སྦྱིན་པ་ནི་ཕན་ཡོན་ལྷག་པར་ཆེའོ། །བཞི་པ་སངས་རྒྱས་ཐོབ་འདོད་ཀྱིས་བསམ་པས་མཆོད་པ་ལྟ་བུ་བསོད་ནམས་ལྷག་པར་ཆེའོ། །གསུམ་པ་དེ་དག་གི་འབྲས་བུ་ལ་གསུམ་སྟེ། རྣམ་སྨིན་གྱི་འབྲས་བུ་དང་། རྒྱུ་མཐུན་དང་། བདག་པོའམ་དབང་གི་འབྲས་བུའོ། །དང་པོ་རྣམ་སྨིན་གྱི་འབྲས་བུ་ནི། ལས་ལམ་བཅུ་པོ་རེ་རེ་ལ་ཡང་གཞི་དུག་གསུམ་ཆུང་འབྲིང་ཆེན་པོ་གསུམ་ལ་བརྟེན་པས་གསུམ་གསུམ་མོ། །དེ་ལ་བཅུ་པོ་ཆེན་པོ་རེ་རེས་ཀྱང་དམྱལ་བ་དང་འབྲིང་གིས་ཡི་དྭགས་དང་ཆུང་ངུས་དུད་འགྲོར་སྐྱེ་བར་བཤད་དོ། །རྒྱུ་མཐུན་ནི་སྲོག་གཅོད་སོགས་བཅུའི་འབྲས་བུ་རིམ་པ་བཞིན་དུ་ཚེ་ཐུང་བ་དང་དབུལ་བ་དང་ཆུང་མ་བསྲུངས་པ་དང་སྐུར་བ་མང་བ་དང་མཛའ་དབྱེ་བ་དང་ཡིད་དུ་མི་འོང་བའི་སྒྲ་ཐོས་པ་དང་ཚིག་གཞན་གྱིས་མི་ཉན་པ་དང་ཆགས་སྡང་རྨོངས་གསུམ་ཆེ་བར་འགྱུར་རོ། །མིར་སྐྱེས་ཀྱང་སྲོག་གཅོད་ལ་དགའ་བ་སོགས་ནི་བྱེད་པ་རྒྱུ་མཐུན་གྱི་འབྲས་བུ་སྟེ་གཞན་ཡང་མང་ངོ་། །བདག་པོའམ་དབང་གི་འབྲས་བུ་ནི་མི་དགེ་བ་བཅུའི་འབྲས་བུ་རིམ་པ་བཞིན་དུ་ཕྱི་སྣོད་ཀྱི་འཇིག་རྟེན་གྱི་བཟའ་བཏུང་འབྲས་བུ་སོགས་མཐུ་ཆུང་བ་དང་འབྲས་བུ་ཉུང་བ་དང་ཐན་སེར་ཆེ་བ་དང་འདམ་རྫབ་དང་ལྗིན་སོགས་མང་བ་དང་ཞིང་ལས་སོགས་མི་འཕེལ་བ་དང་། ས་ཕྱོགས་འབར་འབུར་དང་བགྲོད་དཀའ་བ་སོགས་དང་ཚེར་མ་དང་རྡོ་དང་གྱོ་མོ་མང་བ་དང་། ལྗོན་ཤིང་ལ་འབྲས་བུ་སོགས་མི་ཆགས་པ་དང་ཕུན་ཚོགས་རྣམས་རིམ་གྱིས་འགྲིབ་ཅིང་མི་འཕེལ་བ་དང་། གནོད་པ་དང་ནད་སྣ་ཚོགས་དང་སྟག་ལ་སོགས་པས་འཚེ་བ་དང་འབྱུང་ཁུང་བཟང་པོ་རྣམས་ནུབ་པར་འགྱུར་བ་སོགས་ཏེ་གཉིས་རེ་ཕྱོགས་གཅིག་ཏུ་མདོར་བསྡུས་པའོ། །གཉིས་པ་དཀར་པོའི་ལས་འབྲས་བསམ་པ་ལ་གཉིས་ཏེ། ལས་དང་འབྲས་བུའོ། །དང་པོ། མི་དགེ་བ་བཅུ་ལས་ལྡོག་པའི་དགེ་བ་བཅུ་སྒྲུབ་པའི་སྒོ་གསུམ་གྱི་ལས་སོ། །འདི་རྣམས་ལ་གཞི་དང་བསམ་པ་དང་སྦྱོར་བ་དང་མཐར་ཐུག་རྣམས་ཅི་རིགས་པར་སྦྱར་བར་བྱ་སྟེ། མཚོན་ན་སྲོག་གཅོད་སྤོང་བ་ལྟ་བུའི་གཞི་ནི་སེམས་ཅན་ནོ། །བསམ་པ་ནི་ཉེས་དམིགས་ཤེས་ནས་སྲོག་གཅོད་སོགས་སྤོང་འདོད་པའོ། །སྦྱོར་བ་ནི་སྲོག་གཅོད་སོགས་མི་བྱེད་ཅིང་བསྡམས་པའི་འདུ་བྱེད་དོ། །མཐར་ཐུག་ནི་ཡང་དག་པར་བསྡམས་པའི་སྒོ་གསུམ་གྱི་ལས་སོ། །གཉིས་པ་འབྲས་བུ་ལ་གསུམ་ལས་རྣམ་སྨིན་ནི། ལས་ཆུང་འབྲིང་ཆེན་པོས་མི་དང་འདོད་ལྷ་དང་ཁམས་གོང་མའི་ལྷ་སོགས་སུ་སྐྱེའོ། །རྒྱུ་མཐུན་དང་བདག་པོའི་འབྲས་བུ་གཉིས་ནི་མི་དགེ་བ་ལས་ལྡོག་སྟེ་སྦྱར་རོ། །གསུམ་པ་ལས་ཀྱི་དབྱེ་བ་གཞན་བསྟན་པ་ལ། འཕེན་རྫོགས་ཀྱི་དབྱེ་བ་ནི། འཕེན་བྱེད་དགེ་བས་འཕངས་ཀྱང་རྫོགས་བྱེད་མི་དགེ་བས་རྫོགས་པ་ཡོད་དེ། མིར་སྐྱེས་ཀྱང་དབང་པོ་མ་ཚང་བ་དང་ཚེ་ཐུང་ཞིང་ནད་མང་བ་དང་དབུལ་ཞིང་ཕོངས་པ་ལྟ་བུའོ། །འཕེན་བྱེད་མི་དགེ་བས་འཕངས་ཀྱང་རྫོགས་བྱེད་དགེ་བས་རྫོགས་པ་ཡོད་དེ། དུད་འགྲོར་སྐྱེས་ཀྱང་བདེ་བར་གནས་པ་དང་ཀླུ་དང་ཡི་དྭགས་འགའ་ཞིག་ཀྱང་དཔལ་འབྱོར་དང་ལྡན་པ་ལྟ་བུའོ། །འཕེན་བྱེད་དགེ་བས་འཕངས་ཤིང་རྫོགས་བྱེད་ཀྱང་དགེ་བས་རྫོགས་པ་ནི་ལྷ་རྣམས་དང་། འཕེན་བྱེད་མི་དགེ་བས་འཕངས་ཤིང་རྫོགས་བྱེད་ཀྱང་མི་དགེ་བས་རྫོགས་པ་ནི་དམྱལ་བ་པ་ལྟ་བུའོ། །གཞན་ཡང་མྱོང་བར་ངེས་མ་ངེས་ཀྱི་ལས་ནི། བསམ་བཞིན་དུ་བྱས་པ་དང་བསགས་པའི་ལས་ནི་མྱོང་ངེས་ཀྱི་ལས་དང་། མ་བསམ་པ་དང་བསམས་ཀྱང་མ་བསགས་པའི་ལས་ནི་མྱོང་བར་མ་ངེས་པའི་ལས་སོ། །བྱས་པའི་ལས་ནི་ལུས་ངག་གིས་དངོས་སུ་བྱས་པའི་ལས་རྣམས་སོ། །བསགས་པའི་ལས་ནི་ཤེས་བཞིན་དུ་མ་ནོར་བར་རྒྱུན་ཆགས་སུ་བྱས་པ་ལྟ་བུ་སྟེ་རྣམ་པ་བཅུ་ཡོད་ལ། རྨི་ལམ་དུ་བྱས་པ་དང་མ་བསམ་པར་བྱས་པ་དང་ནོར་ནས་བྱས་པ་སོགས་བཅུ་ནི་མ་བསགས་པའི་ལས་སོ། །གཞན་ཡང་བསགས་ལ་མ་བྱས་པ་དང་། བྱས་ལ་མ་བསགས་པ་དང་། མ་བྱས་ཤིང་མ་བསགས་པ་གསུམ་དང་། མཐོང་ཆོས་ཚེ་འདི་ལ་མྱོང་བ་དང་། ཚེ་གཉིས་པ་ལ་མྱོང་བ་དང་། ཚེ་གསུམ་པ་ཕན་ལ་མྱོང་བའི་ལས་གསུམ་མོ། །སྨིན་ཚུལ་གོ་རིམ་གཙོ་ཆེ་བའི་དབང་དུ་བྱས་ན། གང་ལྕི་བ་དེ་ཐོག་མར་སྨིན། ལྕི་ཡང་མཉམ་ན་འཆི་བའི་ཚེ་གང་མངོན་དུ་གྱུར་པ་དེ་ཐོག་མར་སྨིན། དེ་ཡང་འདྲ་ན་གོམས་པ་ཤེས་ཆེ་བ་དེ་ཐོག་མར་དང་། དེ་ཡང་འདྲ་ན་ཐོག་མར་བྱས་པ་དེའི་འབྲས་བུ་སྔོན་ལ་སྨིན་པར་བཤད་དོ། །གཉིས་པ་བྱེ་བྲག་ཏུ་བཤད་པ་ནི། རྣམ་མཁྱེན་བསྒྲུབ་པ་ལ་རྟེན་མཚན་ཉིད་ཚང་བ་ཞིག་དགོས་པས་འདི་ལ་གསུམ། །རྣམ་སྨིན་གྱི་ཡོན་ཏན། རྣམ་སྨིན་གྱི་འབྲས་བུ། རྣམ་སྨིན་གྱི་རྒྱུའོ། །འདི་དག་བསྡུ་ན་དང་པོ་ལ་བརྒྱད་དེ། ཚེ་ཕུན་སུམ་ཚོགས་པ་རིང་བ། ཁ་དོག་ཕུན་སུམ་ཚོགས་པ་གཟུགས་དང་ཁ་དོག་སོགས་བཟང་བ། རིགས་ཕུན་སུམ་ཚོགས་པ་བཀུར་བའི་རིགས་སུ་སྐྱེས་པ། དབང་ཕྱུག་ཕུན་སུམ་ཚོགས་པ་འཁོར་དང་ལོངས་སྤྱོད་ཆེ་བ། གཞན་གྱིས་ཡིད་རྟོན་པའི་ཚིག་བཙུན་པ། ཡོན་ཏན་གྱི་སྒོ་ནས་གྲགས་པ་དང་སྙན་པ་ཆེ་བ། ཕོ་ཉིད་དུ་སྐྱེས་པ། ནད་མེད་ཅིང་གནོད་པ་ཆུང་བའི་སྟོབས་དང་ལྡན་པའོ། །རྣམ་སྨིན་གྱི་འབྲས་བུ་ལ་བརྒྱད་དེ། རང་དགེ་བ་མང་པོ་བྱེད་པ། གདུལ་བྱ་དགའ་ནས་འདུ་བ། གཞན་བསྒོ་བ་ལས་མི་འདའ་བ། སྦྱིན་པས་བསྡུས་ཏེ་སྨིན་པར་བྱེད་པ། སྙན་པར་སྨྲ་བ་སོགས་ཀྱིས་སྡུད་ཅིང་སྨིན་པར་བྱེད་པ། གཞན་གྱིས་བྱས་པ་བཟོ་ཞིང་བསྒོ་བ་ལ་ཉན་པ། ཤེས་རབ་ཆེ་ཞིང་འཁོར་དུ་མི་འཇིགས་པ་སོགས་དང་། རང་གཞན་གྱི་དོན་ལ་མི་སྐྱོ་ཞིང་སྤྲོ་ཤུགས་ཆེ་བའོ། །རྣམ་སྨིན་གྱི་རྒྱུ་ལ་བརྒྱད་དེ། གཞན་ལ་མི་འཚེ་བའི་བསམ་པའི་རིགས་བསྟེན་པ། མར་མེ་སོགས་གྱི་སྣང་བ་དང་གོས་སྦྱིན་པ། ང་རྒྱལ་ཆུང་ཞིང་བླ་མ་སོགས་ལ་གུས་པ། སློང་བ་ལ་སྦྱིན་པ་སྟེར་བ། ངག་གི་མི་དགེ་བ་བཞི་སྤོང་བ། དཀོན་མཆོག་མཆོད་ཅིང་ཕྱི་མར་ཡོན་ཏན་འབྱུང་བའི་སྨོན་ལམ་འདེབས་པ། སྐྱེས་པའི་ཡོན་ཏན་ལ་དགའ་ཞིང་བུད་མེད་ཀྱི་དངོས་པོ་ལ་མི་དགའ་བ་དང་གཞན་གྱི་དབང་པོ་གཅོད་པ་ལས་ཐར་པར་བྱེད་པ། གཞན་གྱིས་མི་ནུས་པའི་གྲོགས་བྱེད་པའོ། །གསུམ་པ་འཇུག་ལྡོག་བྱ་བའི་ཚུལ་ལ་གཉིས། སྤྱིིར་བསྟན་པ་དང་། སྟོབས་བཞིའི་བཤགས་པའོ། །དང་པོ་ནི། ལས་གཉིས་ལས་འབྲས་བུ་བདེ་སྡུག་གཉིས་མི་ནོར་བར་འབྱུང་བར་བསམ་ཞིང་། ལས་འབྲས་ལ་ཡིད་ཆེས་ཀྱི་དད་པ་བསྒོམ་པ་དང་། ཁྱད་པར་དུ་མི་དགེ་བའི་ལས་འབྲས་བུ་ལ་སྡུག་བསྔལ་འབྱུང་བའི་ཚུལ་བསམས་པ་ནི་གནད་དུ་ཆེའོ། །གཉིས་པ་སྟོབས་བཞི་བྱ་ཚུལ་ལ་ལྟུང་བ་ཕྱིར་བཅོས་ནི། གྲུབ་ན་སྡོམ་པ་གསུམ་སོ་སོ་ནས་འབྱུང་བ་ལྟར་བྱ་ཞིང་། སྡིག་བཤགས་ནི་སྟོབས་བཞིས་བྱ་སྟེ། རྟེན་གྱི་སྟོབས་ནི་སྐྱབས་འགྲོ་སེམས་བསྐྱེད་དོ། །སུན་འབྱིན་པའི་སྟོབས་ནི་ཉེས་པ་རྣམས་མཐོལ་བཤགས་བྱེད་པའོ། །གཉེན་པོ་ཀུན་ཏུ་སྤྱོད་པའི་སྟོབས་ནི་ཉེས་པའི་གཉེན་པོ་བསྐྱེད་པ་སྟེ་དེ་ལ་མདོ་སྡེ་ཟབ་མོ་འདོན་པ་དང་། སངས་རྒྱས་བྱང་སེམས་ཀྱི་མཚན་བརྗོད་པ་དང་། གཟུངས་སྔགས་བཟླ་བ་དང་སྟོང་ཉིད་སྒོམ་པར་བྱེད་པ་སོགས་མང་ངོ་། །སླར་ལྡོག་པའི་སྟོབས་ནི་ཉེས་པ་དེ་ལྟ་བུ་ཕྱིན་ཆད་མི་བྱེད་པར་དམ་བཅའ་བའོ། །དེ་ལྟར་རྒྱུན་ཏུ་བྱས་ན་ནི་སྡིག་པའི་ཚོགས་རྣམས་རིམ་གྱིས་དག་པར་འགྱུར་ཞིང་མྱོང་ངེས་ཀྱི་ལས་ཀྱང་འདག་པར་གསུངས་སོ། །འོན་ཀྱང་སྔོན་གྱི་རྣམ་པར་སྨིན་པ་ནི་གང་ལ་ཡང་མ་གཏོགས་སོ་ཞེས་གསུངས་པ་ཡང་ཤེས་དགོས་སོ། །གཉིས་པ་དེ་སྐྱེས་པའི་ཚད་ནི། འཇིག་རྟེན་ཕྱི་མ་དོན་གཉེར་གྱི་བློ་བཅོས་མིན་དུ་སྐྱེས་པའོ། །གསུམ་པ་དེ་ལ་ལོག་རྟོག་བསལ་པ་ནི། ཁ་ཅིག་ལུས་ལོངས་སྤྱོད་ཕུན་སུམ་ཚོགས་པ་ནི་འཁོར་བ་ཡིན་པས་དེ་དོན་དུ་གཉེར་བ་མི་རིགས་སོ་སྙམ་ན། དེ་ནི་མ་ཡིན་ཏེ། སངས་རྒྱས་ཀྱི་གཟུགས་སྐུ་དང་ཞིང་གི་འབྱོར་པ་རྣམས་ནི་འཁོར་བས་མ་བསྡུས་ཞིང་། གནས་སྐབས་སྐོམ་སེལ་བྱེད་ཆུའི་དོན་དུ་སྣོད་འཚོལ་བ་ལྟར། དམ་པའི་ཆོས་སྒྲུབ་པའི་ཆེད་དུ་གནས་སྐབས་ཀྱི་མངོན་མཐོའི་རྟེན་ཁྱད་པར་ཅན་ཐོབ་དགོས་པའི་ཕྱིར་རོ། །དེ་དག་ནི་སྐྱེས་བུ་ཆུང་ངུ་དང་ཐུན་མོང་བའི་ལམ་གྱི་རིམ་པ་ལ་ཇོ་སྦྱོང་བའི་སྐོར་རོ། །དེ་ལྟར་བསམས་ཏེ་ངན་འགྲོ་ལས་ཐར་ནས་བདེ་འགྲོ་ཐོབ་ཀྱང་དེ་ཙམ་གྱིས་ཆོག་པར་མི་འཛིན་པར་ཐར་པ་དོན་གཉེར་གྱི་ཇོ་བསྐྱེད་དགོས་པས་སྐྱེས་བུ་འབྲིང་དང་ཐུན་མོང་པའི་ལམ་གྱི་རིམ་པ་ལ་ཇོ་སྦྱང་བ་ལ་བཞི། བསམ་པ་སྦྱང་བ། དེ་སྐྱེས་པའི་ཚད། དེ་ལ་ལོག་རྟོག་བསལ་བ། ཐར་ལམ་གྱི་རང་བཞིན་བཤད་པའོ། །དང་པོ་ལ་གཉིས། ཐར་པ་དོན་གཉེར་གྱི་བློ་ངོས་བཟུང་བ་དང་། དེ་བསྐྱེད་པའི་ཐབས་སོ། །དང་པོ་ནི། ལས་དང་ཉོན་མོངས་པའི་འཆིང་བ་ལས་གྲོལ་བའི་འགོག་པ་ནི་ཐར་པ་ཡིན་ལ། དེ་ཐོབ་པར་འདོད་པའི་བློ་ནི་ཐར་པ་དོན་གཉེར་གྱི་བློའོ། །གཉིས་པ་བསྐྱེད་པའི་ཐབས་ནི། ཉེར་ལེན་གྱི་ཕུང་པོ་སྡུག་བསྔལ་གྱི་རང་བཞིན་ཅན་གྱི་ཉེས་དམིགས་མཐོང་ནས་དེ་ལ་སྐྱོ་བ་བསྐྱེད་དགོས་ཏེ། གཞན་དུ་ན་ཞི་བ་དོན་གཉེར་གྱི་བློ་ཇི་ལྟར་བ་བཞིན་མི་སྐྱེ་བའི་ཕྱིར་ཏེ། བཞི་བརྒྱ་པ་ལས། གང་ལ་འདིར་སྐྱོ་ཡོད་མིན་པ། །དེ་ལ་ཞི་གུས་ག་ལ་ཡོད། །ཅེས་གསུངས་པའི་ཕྱིར་རོ། །དེས་ན་འདི་ལ་གཉིས། སྡུག་ཀུན་གཉིས་ཀྱི་སྒོ་ནས་བསམ་པ་དང་། ཡན་ལག་བཅུ་གཉིས་ཀྱི་སྒོ་ནས་བསམ་པའོ། །དང་པོ་ལ་གཉིས། སྡུག་བདེན་འཁོར་བའི་ཉེས་དམིགས་དང་། ཀུན་འབྱུང་འཁོར་བའི་འཇུག་རིམ་མོ། དང་པོ་ལ་གཉིས། སྡུག་བདེན་ཐོག་མར་གསུངས་པའི་དགོས་པ་དང་། སྡུག་བསྔལ་བསྒོམ་ཚུལ་དངོས་སོ། །དང་པོ་ནི། སྡུག་བདེན་དང་པོར་གསུངས་པའི་དགོས་པ་གང་ཞེ་ན། ཡོད་དེ། ཐོག་མར་རང་ལྟ་བུ་སྡུག་བསྔལ་གྱི་རྒྱ་མཚོར་ལྷུང་བར་མཐོང་བ་ལ་སྡུག་བསྔལ་ངོས་ཟིན་དགོས་ཤིང་སྡུག་བསྔལ་ལ་སྡུག་བསྔལ་དུ་ཤེས་དགོས། ཤེས་ན་སྡུག་བསྔལ་ལས་ཐར་འདོད་སྐྱེ་ཞིང་། དེའི་ཚེ་སྡུག་བསྔལ་ཟློག་དགོས་པར་མཐོང་སྟེ་དེའི་རྒྱུ་མ་ཟློག་ན་འབྲས་བུ་སྡུག་བསྔལ་མི་ལྡོག་པར་ཤེས་ནས། དེའི་རྒྱུ་ཇི་ལྟ་བུ་ཞིག་སྙམ་ན་ཀུན་འབྱུང་བདེན་པ་རྒྱུར་ཤེས་པའི་འབྱུང་བས་སྡུག་བདེན་སྔོན་དང་། དེའི་འོག་ཏུ་ཀུན་འབྱུང་བདེན་པ་བསྟན་ཏེ་གོ་རིམ་མོ། །ཀུན་འབྱུང་ནི་ཟག་བཅས་ཀྱི་ལས་དང་ཉོན་མོངས་པ་གཉིས་ཏེ། དེ་གཉིས་ཟློག་ནུས་པར་མཐོང་བ་ན་འབྲས་བུ་སྡུག་བསྔལ་འགགས་པའི་འགོག་པ་ཐོབ་ནུས་སུ་གོ་ནུས་པས་ཀུན་འབྱུང་གི་འོག་ཏུ་འགོག་བདེན་བསྟེན་ནོ། །དེ་ནས་དེ་ཐོབ་བྱེད་ཀྱི་ཐབས་སུ་ལམ་བདེན་བསྟེན་དགོས་པར་ཤེས་པར་འགྱུར་པས་ལམ་བདེན་ཐ་མར་བསྟན་ཏེ། དཔེར་ན་ཐོག་མར་ནད་ཤེས་ཤིང་ནད་དེ་གང་ལས་བྱུང་བ་དང་ནད་དེ་ཞི་བའི་བདེ་བ་ཐོབ་པའི་ཆེད་དུ་སྨན་བསྟེན་པ་འབྱུང་བ་བཞིན་ནོ། །དེ་ལྟར་བྱམས་པའི་རྒྱུད་བླ་མ་ལས། ནད་ནི་ཤེས་བྱ་ནད་ཀྱི་རྒྱུ་ནི་སྤང་བྱ་ལ། །བདེར་གནས་ཐོབ་བྱ་སྨན་ནི་བསྟེན་པར་བྱ་བ་ལྟར། །སྡུག་བསྔལ་རྒྱུ་དང་དེ་འགོག་པ་དང་དེ་བཞིན་ལམ། །ཤེས་བྱ་སྤང་བྱ་རིག་པར་བྱ་ཞིང་བསྟེན་པར་བྱ། །ཞེས་གསུངས་པ་ལྟར་རོ། །གཉིས་པ་སྡུག་བདེན་བསམ་པ་ལ་གཉིས། འཁོར་བ་སྤྱིའི་སྡུག་བསྔལ་དང་། སོ་སོའི་སྡུག་བསྔལ་བསམ་པའོ། །དང་པོ་ལ་གསུམ་སྟེ་སྡུག་བསྔལ་བརྒྱད་དང་དྲུག་དང་གསུམ་མོ། །དང་པོ་སྡུག་བསྔལ་བརྒྱད་ནི། སྐྱེ་བའི་སྡུག་བསྔལ། རྒ་བའི་སྡུག་བསྔལ། ན་བའི་སྡུག་བསྔལ། འཆི་བའི་སྡུག་བསྔལ་བཞི་དང་། མི་སྡུག་པ་དང་འཕྲད་པ། སྡུག་པ་དང་བྲལ་བ། འདོད་པ་བཙལ་ཀྱང་མ་རྙེད་པ། ཉེ་བར་ལེན་པའི་ཕུང་པོ་ལྔ་སྡུག་བསྔལ་གྱི་རང་བཞིན་དུ་བསམ་པ་བཞི་སྟེ་བརྒྱད་དོ། །དང་པོ་ལ་ལྔ་སྟེ། སྐྱེ་བ་སྡུག་བསྔལ་དང་ལྡན་པ་ནི། མངལ་དང་སྒོ་ང་ལས་སྐྱེ་བའི་ཚེ་སྡུག་བསྔལ་དྲག་པོ་དང་བཅས་ཏེ་སྐྱེ་བའོ། །གནས་ངན་ལེན་གྱི་སྡུག་བསྔལ་ནི། ཉོན་མོངས་པའི་ཕྱོགས་དང་མཐུན་པའི་ལས་སུ་མི་རུང་བ་སོགས་གནས་ངན་ལེན་དང་བཅས་པའོ། །སྡུག་བསྔལ་གྱི་གནས་སུ་གྱུར་པ་ནི། སྐྱེ་བ་ཡོད་ན་ན་རྒ་འཆི་བ་སོགས་ཀྱི་སྡུག་བསྔལ་ཀུན་འབྱུང་བའོ། །ཉོན་མོངས་ཀྱི་གནས་སུ་གྱུར་པ་ནི། སྐྱེས་ནས་ཡུལ་སྣ་ཚོགས་ལ་བརྟེན་ནས་ཉོན་མོངས་པ་སྣ་ཚོགས་བསྐྱེད་པའོ། མི་འདོད་བཞིན་དུ་འབྲལ་བ་ནི། སྐྱེས་པ་ལ་བརྟེན་ནས་མི་འདོད་བཞིན་དུ་ལུས་སྲོག་དང་བྲལ་ཏེ་འཆི་བའོ། །རྒ་བའི་སྡུག་བསྔལ་ལ་ཡང་ལྔ་སྟེ། རྒ་བས་གཟུགས་རིམ་གྱིས་ཡོངས་སུ་ཉམས་པ་དང་། མཐུ་སྟོབས་ཡོངས་སུ་ཉམས་པ་དང་། དབང་པོ་ཡོངས་སུ་ཉམས་པ་དང་། ལོངས་སྤྱོད་ཡོངས་སུ་ཉམས་པ་དང་། ཚེ་རིམ་གྱིས་ཡོངས་སུ་ཉམས་པར་འགྱུར་བའོ། །ན་བའི་སྡུག་བསྔལ་ལ་ལྔ་སྟེ། ལུས་ཀྱི་རང་བཞིན་འགྱུར་ཞིང་ཉམས་པ་དང་། སྡུག་བསྔལ་དང་ཡིད་མི་བདེ་བ་ལ་ཤས་ཆེར་གནས་པ་དང་། ལོངས་སྤྱོད་གྱི་ཟས་ཆུ་མི་འཕྲོད་ཅིང་ཡི་གར་མི་འོང་བ་དང་། མི་འདོད་བཞིན་དུ་སྤྱད་དགོས་པ་དང་། སྲོག་དབང་དང་འབྲལ་བར་འགྱུར་བའོ། །འཆི་བའི་སྔུག་བསྔལ་ལ་ཡང་ལྔ་སྟེ། ལོངས་སྤྱོད་ཕུན་ཚོགས་དང་འབྲལ་བ། གཉེན་སོགས་རྩ་འཇིངས་སྡུག་པ་དང་འབྲལ་བ། འཁོར་གཡོག་དང་འབྲལ་བ། ལུས་དང་འབྲལ་བ། འཆི་བའི་ཚེ་སྡུག་བསྔལ་དང་ཡིད་མི་བདེ་བ་དྲག་པོ་མྱོང་བའོ། །མི་སྡུག་པ་དང་ཕྲད་པའི་སྡུག་བསྔལ་ལ་ཡང་ལྔ་སྟེ། དགྲ་སྡང་བ་དང་ཕྲད་པ། དེས་གནོད་པ། གཏམ་ངན་གྱིས་འཇིགས་པ། ཉམ་ང་བཞིན་དུ་འཆི་བས་འཇིགས་པ། ངན་འགྲོར་སོང་དོགས་པའི་འཇིགས་པ་རྣམས་སོ། །སྡུག་པ་དང་བྲལ་བའི་སྡུག་བསྔལ་ལ་ཡང་ལྔ་སྟེ། ཕངས་པའི་གཉེན་སོགས་དང་འབྲལ་བ་དང་། དེའི་ཆེད་དུ་སྨྲེ་ངག་འདོན་པ་ད ང་། ལུས་ལ་གནོད་པ་དང་། ཡིད་ལ་གདུང་བ་དང་། ལོངས་སྤྱོད་འཇིག་པའོ། །འདོད་པ་བཙལ་ཀྱང་མ་རྙེད་པའི་སྡུག་བསྔལ་ལ་ཡང་ལྔ་སྟེ། དེ་དག་ནི་སྡུག་པ་དང་བྲལ་བ་དང་འདྲ་ལ། དེའི་ངོ་བོ་ནི་སོ་ནམ་དང་ཚོང་སོགས་གང་བསྒྲུབས་པའི་འདོད་པའི་དོན་དེ་མ་འགྲུབ་པའི་སྡུག་བསྔལ་ལོ། །མདོར་ན་ཉེ་བར་ལེན་པའི་ཕུང་པོ་ལྔ་སྡུག་བསྔལ་བའི་དོན་ལ་ཡང་ལྔ་སྟེ། མངོན་པར་འགྲུབ་པའི་སྡུག་བསྔལ་གྱི་སྣོད་དང་། མངོན་པར་གྲུབ་པའི་སྡུག་བསྔལ་གྱི་སྣོད་དང་། སྡུག་བསྔལ་གྱི་སྡུག་བསྔལ་དང་། འགྱུར་པའི་སྡུག་བསྔལ་དང་། འདུ་བྱེད་ཀྱི་སྡུག་བསྔལ་གྱི་སྣོད་དུ་གྱུར་པའོ། །དེ་ཡང་ཕུང་པོ་འདི་ལ་བརྟེན་ནས་ཕྱི་མའི་སྡུག་བསྔལ་རྣམས་འདྲེན་པ་དང་། ན་འཆི་སོགས་ཀྱི་རྟེན་དུ་གྱུར་པ་དང་། དེ་གཉིས་ཀྱི་གནས་ངན་ལེན་རྗེས་སུ་འབྲེལ་བ་གཉིས་དང་། ཉེར་ལེན་གྱི་ཕུང་པོ་གྲུབ་ཙམ་ནས་འདུ་བྱེད་ཀྱི་སྡུག་བསྔལ་གྱི་རང་བཞིན་དུ་སྐྱེས་པ་ལྔའོ། །གཉིས་པ་སྡུག་བསྔལ་དྲུག་བསམ་པ་ལ་དྲུག་ནི། ངེས་པ་མེད་པ་དང་། ངོམས་མི་ཤེས་པ་དང་། འདོར་བ་དང་། ཉིང་མཚམས་སྦྱོར་བ་དང་། མཐོ་དམན་དུ་འགྱུར་བ་དང་། གྲོགས་མེད་པའི་ཉེས་པའོ། །དེ་དག་ཀྱང་རིམ་པ་བཞིན་དུ་འཁོར་བར་འཁོར་བའི་ཚེ་དགྲ་གཉེན་འགྱུར་ནས་ངེས་པ་མེད་པ་ནི། ཕྱི་མར་ཚེ་འདིའི་ཕ་བུ་དང་མ་བུ་མོ་དང་གཉེན་དགྲ་དང་དགྲ་གཉེན་དང་མ་ཆུང་མ་དང་ཆུང་མ་མར་འགྱུར་བ་སོགས་དང་། འཁོར་བའི་ཕུན་ཚོགས་འདི་མ་མྱོང་བྱ་བ་མེད་ཅིང་མི་གཙང་བ་དང་ས་ལུད་ཟོས་པ་སོགས་མང་བ་དང་། འགྲོ་བ་རྣམས་སུ་སྐྱེས་ནས་ཤི་བའི་རུས་པ་རྣམས་བསགས་ན་རི་རབ་ལྟ་བུར་འགྱུར་ཞིང་། སྐྱེ་བ་དང་མ་བརྒྱུད་པའི་མཐའ་མེད་པ་དང་། ཚངས་པ་དང་བརྒྱ་བྱིན་དང་འཁོར་ལོས་བསྒྱུར་བའི་རྒྱལ་པོར་གྱུར་ནས་སླར་བྲན་གྱི་ཡང་བྲན་དུ་འགྱུར་ཞིང་མཐོ་རིས་དང་ངན་སོང་དུ་སྤེལ་མར་སྐྱེ་བ་དང་། ཤི་ནས་འཇིག་རྟེན་ཕ་རོལ་ཏུ་ལས་གཉིས་མ་གཏོགས་གྲོགས་གཞན་འཁྲིད་ས་མེད་པ་རྣམས་སོ། །གསུམ་པ་སྡུག་བསྔལ་གསུམ་བསྒོམ་པ་ལ། སྡུག་བསྔལ་གྱི་སྡུག་བསྔལ་ནི། མཚོན་དང་ནད་སོགས་ལ་བརྟེན་ནས་ལུས་སེམས་ཀྱི་སྟེང་ཚོར་བ་སྡུག་བསྔལ་དྲག་པོ་བྱུང་བ་ལྟ་བུའོ། །འགྱུར་བའི་སྡུག་བསྔལ་ནི། བསྡད་ན་བདེ་བ་ལྟར་སྣང་ཡང་བསྡད་དྲགས་ན་སྡུག་བསྔལ་བ་དང་ལངས་ཏེ་སོང་བས་བདེ་བ་ལྟར་སྣང་ཡང་སོང་དྲགས་ན་སྡུག་བསྔལ་བ་དང་། ཟོས་འཐུང་བྱས་ན་བདེ་བ་ལྟར་སྣང་ཡང་ཧ་ཅང་མང་ན་སྡུག་བསྔལ་བ་དང་། ཚ་བའི་ཚེ་གྲང་ན་བདེ་བ་ལྟར་སྣང་ཡང་གྲང་ཆེ་ན་སྡུག་བསྔལ་དུ་འགྱུར་བ་སོགས་སོ། །འདུ་བྱེད་ཀྱི་སྡུག་བསྔལ་ནི་སྡུག་བསྔལ་ཐམས་ཅད་ལ་ཁྱབ་ཅིང་སྡུག་བསྔལ་གཞན་གཉིས་ཀྱི་གཞི་ཡིན་པ་ཉེར་ལེན་གྱི་ཕུང་པོ་འདི་གྲུབ་ཙམ་ནས་སྡུག་བདེན་གྱི་རང་བཞིན་དུ་གྱུར་པ་སྟེ། མདོར་ན་དེ་ལྟ་བུའི་སྡུག་བསྔལ་རྣམས་བསམས་ཏེ་འཁོར་བ་ལ་ཡིད་འབྱུང་བསྐྱེད་པར་བྱའོ། །འདི་དག་གི་སྐབས་སུ་ཉེ་བར་ལེན་པའི་ཕུང་པོ་ལྔ་ཞེས་འབྱུང་བ་ནི་གཟུགས་ཚོར་ལ་སོགས་པའི་ཕུང་པོ་ལྔ་སྟེ་ཉེ་བར་ལེན་པ་ནི་ལས་ཉོན་གཉིས་ཡིན་པས་དེ་ལས་བྱུང་བའི་ཕུང་པོ་ལྔ་ལ་ཉེར་ལེན་གྱི་ཕུང་པོ་ཞེས་བརྗོད་དེ། དཔེར་ན་རྩྭ་ལས་བྱུང་བའི་རྩྭའི་མེ་ཞེས་བརྗོད་པ་བཞིན་ནོ། །གཉིས་པ་སོ་སོའི་སྡུག་བསྔལ་བསམ་པ་ལ་དྲུག་ལས་ངན་སོང་གསུམ་གྱི་སྡུག་བསྔལ་ནི་བཤད་ཟིན་ཅིང་། མིའི་སྡུག་བསྔལ་གོང་ལྟར་རྣམ་གྲངས་མང་ཡང་བསྡུ་ན་བཀྲེས་ཤིང་སྐོམ་པ་དང་ཚ་གྲང་གི་རེག་པ་དང་ཚོལ་འགྲོ་དང་ངལ་བའི་སྡུག་བསྔལ་སོགས་དང་། སྐྱེ་རྒ་ན་འཆི་སོགས་ཀྱི་སྡུག་བསྔལ་ནི་སྔར་ལྟར་རོ། །ལྷ་མ་ཡིན་གྱི་སྡུག་བསྔལ་ནི། དེ་དག་ཕྲག་དོག་གིས་དབང་དུ་གྱུར་ཏེ་ལྷ་རྣམས་ཀྱི་དཔལ་འབྱོར་མཐོང་ནས་མི་བཟོད་པ་སྐྱེ་ཞིང་། དེ་ལ་བརྟེན་ནས་ལྷ་དང་འཐབ་པ་ན་ལུས་གཅད་དྲལ་སོགས་ཀྱི་སྡུག་བསྔལ་དུ་མ་མྱོང་བར་འགྱུར་རོ། །ལྷའི་སྡུག་བསྔལ་བསམ་པ་ལ་གཉིས་ལས། འདོད་ལྷ་ལ་སྡུག་བསྔལ་གསུམ་སྟེ། འཆི་འཕོ་ལྟུང་བའི་སྡུག་བསྔལ་དང་། སྤ་སྐོང་པའི་སྡུག་བསྔལ་དང་། བཅད་དྲལ་གསོད་པ་དང་སྤྱུག་པའི་སྡུག་བསྔལ་ལོ། །དང་པོ་ནི། འདོད་ལྷ་རྣམས་འཆི་བའི་ཚེ་འཆི་ལྟས་ལྔ་མཐོང་ནས་ཆེས་སྡུག་བསྔལ་བར་འགྱུར་རོ། །འཆི་ལྟས་ལྔ་ནི། ལུས་ཀྱི་མདོག་མི་སྡུག་པ་དང་། སྟན་ལ་མི་དགའ་བ་དང་། རྒྱན་གྱི་མེ་ཏོག་རྙིང་པ་དང་། གོས་ལ་དྲི་མ་ཆགས་པ་དང་། ལུས་པ་རྔུལ་འབྱུང་བ་རྣམས་སོ། །འོག་ཏུ་ལྟུང་བའི་སྡུག་བསྔལ་ནི། ཤི་ནས་དགེ་བའི་ལས་ཟད་ན་ནི་དམྱལ་བ་ཡི་དྭགས་དུད་འགྲོ་རྣམས་སུ་སྐྱེ་བར་འགྱུར་རོ། །སྤ་སྐོང་བ་ནི། བསོད་ནམས་ཆུང་བའི་ལྷ་རྣམས་ཀྱིས་བསོད་ནམས་ཆེ་བའི་ལྷའི་ལོངས་སྤྱོད་ཀྱི་དཔལ་འབྱོར་རྒྱ་ཆེན་པོ་མཐོང་ནས་སྤ་ཞུམ་ཞིང་སྡུག་བསྔལ་སུ་འགྱུར་རོ། །བཅད་གཏུབ་སོགས་ཀྱི་སྡུག་བསྔལ་ནི་ལྷ་མིན་དང་འཐབ་པ་ན་ལུས་བཅད་གཏུབ་དང་གསོད་པའི་སྡུག་བསྔལ་འབྱུང་ངོ་། །དེ་ཡང་མགོ་བཅད་ན་འཆི་ལ་ཡན་ལག་བཅད་ནའང་ཕྱིར་སྐྱེའོ། །ལྷ་སྤྱུག་པ་ནི་ལྷ་སྟོབས་དང་ལྡན་པ་འཁྲུགས་ན་སྟོབས་ཆུང་བ་རྣམས་སྐྲོད་པར་བྱེད་པའོ། ཁམས་གོང་མའི་ལྷ་ལ་སྡུག་བསྔལ་དེ་དག་མེད་ཀྱང་སྒྲིབ་པ་དང་བཅས་པས་འཆི་བ་དང་། གནས་པ་ལ་དབང་མེད་པར་འཆི་བའི་སྡུག་བསྔལ་དང་ལྡན་ཏེ། འདུ་བྱེད་ཀྱི་སྡུག་བསྔལ་ནི་ཁམས་གསུམ་ན་ཡོད་དོ། །དེ་ལྟར་འཁོར་བ་སྤྱི་དང་བྱེ་བྲག་གི་སྡུག་བསྔལ་བསམས་ནས་འཁོར་བ་ལས་ཡིད་འབྱུང་བར་བྱའོ། །འདིར་འཁོར་པ་པོ་གང་ཡིན་པ་དེ་རྒྱུ་རྐྱེན་གང་གིས་འཁོར་བ། གནས་གང་དུ་འཁོར་བ། ཚུལ་ཇི་ལྟར་འཁོར་བ། དེ་ལྟར་འཁོར་བའི་སྡུག་བསྔལ་རྣམས་ཀྱི་ཁྱད་པར་ཕྱེད་དགོས་སོ། །གཉིས་པ་ཀུན་འབྱུང་འཁོར་བའི་འཇུག་རིམ་བསམ་པ་ལ་གསུམ། ཉོན་མོངས་སྐྱེ་ཚུལ། ལས་གསོག་ཚུལ། འཆི་འཕོ་དང་ཉིང་འཚམས་སྦྱོར་ཚུལ་ལོ། །དང་པོ་ནི། འཁོར་བ་འགྲུབ་བྱེད་ལ་ལས་ཉོན་གཉིས་ཡོད་ཀྱང་ཉོན་མོངས་གཙོ་བོ་ཡིན་ཏེ། ཉོན་མོངས་མེད་ན་སྔར་བསགས་ཀྱི་ལས་མང་དུ་ཡོད་ཀྱང་རླན་དང་ས་སོགས་མེད་ན་ས་བོན་ལས་མྱུ་གུ་མི་འབྱུང་བ་ལྟར། ལྷན་ཅིག་བྱེད་རྐྱེན་ཉོན་མོངས་མེད་པའི་ལས་ཀྱིས་སྡུག་བསྔལ་གྱི་མྱུ་གུ་མི་འགྲུབ་ཅིང་། ཉོན་མོངས་ཡོད་ན་ནི་ལས་སྔར་བསགས་པ་མེད་ཀྱང་གསར་དུ་བསགས་པས་སྡུག་བསྔལ་གྱི་ཕུང་པོ་ཕྱི་མ་འགྲུབ་པར་འགྱུར་བའི་ཕྱིར་རོ། །དེའི་ཕྱིར་ཉོན་མོངས་ཤེས་ནས་དེའི་གཉེན་པོ་བསྟེན་པ་གལ་ཆེ་བས་འདི་ལ་བཞི། ཉོན་མོངས་ངོས་བཟུང་བ། སྐྱེ་པའི་རིམ་པ། ཉོན་མོངས་ཀྱི་རྒྱུ། ཉོན་མོངས་པའི་ཉེས་དམིགས་སོ། །དང་པོ་ནི། སེམས་རྒྱུད་མ་ཞི་བར་བྱེད་པ་དང་དེའི་རིགས་སུ་གནས་པ་སྟེ་སྤྱིིའི་མཚན་ཉིད་དོ། །སོ་སོའི་མཚན་ཉིད་ལ་ཉོན་མོངས་བཅུ་ལས་འདོད་ཆགས་ནི་ཕྱིའམ་ནང་གི་ཡུལ་ཡིད་དུ་འོང་བ་ལ་དམིགས་ན་རྗེས་སུ་ཆགས་པའི་སེམས་བྱུང་སྟེ། རས་ལ་སྣུམ་ཞུགས་པ་བཞིན་དུ་དམིགས་པ་ལ་ཞེན་ཅིང་བྲལ་དཀའ་བའོ། ཁོང་ཁྲོ་ནི་སེམས་ཅན་དང་སྡུག་བསྔལ་དང་མཚོན་དང་ཚེར་མ་སོགས་སྡུག་བསྔལ་བསྐྱེད་པའི་གནས་ལ་དམིགས་ནས་མནར་སེམས་བྱེད་པ་སྟེ་ཡུལ་དེ་ལ་ཞེ་སྡང་བའོ། །ང་རྒྱལ་ནི་འཇིག་ལྟ་ལ་བརྟེན་ཏེ་ཕྱི་ནང་གི་མཐོ་དམའ་དང་བཟང་ངན་ལ་དམིགས་ནས་སེམས་ཁེངས་པ་སྟེ་མཐོ་བའི་རྣམ་པ་ཅན་ནོ། །མ་རིག་པ་ནི་དཀོན་མཆོག་དང་བདེན་བཞི་དང་ལས་འབྲས་ལ་རྨོངས་པའི་ཉོན་མོངས་ཅན་ནོ། །ཐེ་ཚོམ་ནི། བདེན་བཞི་དང་དཀོན་མཆོག་དང་ལས་འབྲས་ལ་དམིགས་ནས་ཡོད་དམ་མེད་བདེན་ནམ་མི་བདེན་སྙམ་པའོ། །འཇིག་ལྟ་ནི། ཉེ་བར་ལེན་པའི་ཕུང་པོ་ལ་དམིགས་ནས་ང་དང་ངའི་ཞེས་བདག་དང་བདག་གིར་ལྟ་བའི་ཤེས་རབ་ཉོན་མོངས་ཅན་ནོ། །མཐར་ལྟ་ནི་འཇིག་ལྟས་བཟུང་བའི་བདག་དེ་ལ་དམིགས་ནས་རྟག་པ་ཐེར་ཟུག་དང་འདི་ནས་ཕྱི་མར་ཉིང་འཚམས་སྦྱོར་བར་མེད་པའི་ཆད་པར་ལྟ་བའི་ཤེས་རབ་ཉོན་མོངས་ཅན་ནོ། །ལྟ་བ་མཆོག་འཛིན་ནི་འཇིག་ལྟ་ལོག་ལྟ་མཐར་ལྟ་གསུམ་གང་རུང་དང་དེ་དག་ལས་བྱུང་བའི་ཕུང་པོ་ལ་དམིགས་ནས་མཆོག་ཏུ་འཛིན་པའི་ཤེས་རབ་ཉོན་མོངས་ཅན་ནོ། །ཚུལ་ཁྲིམས་དང་བརྟུལ་ཞུགས་མཆོག་འཛིན་ནི། ཚུལ་ཁྲིམས་ངན་དང་ལུས་ངག་གི་བརྟུལ་ཞུགས་དང་དེ་ལས་བྱུང་བའི་ཕུང་པོ་ལ་དམིགས་ནས་དག་གྲོལ་དུ་ལྟ་བའི་ཤེས་རབ་ཉོན་མོངས་ཅན་ནོ། །ལོག་ལྟ་ནི ཚེ་སྔ་ཕྱི་དང་ལས་འབྲས་སོགས་མེད་པར་ལྟ་བ་དང་དབང་ཕྱུག་དང་གཙོ་བོ་སོགས་རྒྱུར་འཛིན་པའི་ཤེས་རབ་ཉོན་མོངས་ཅན་ནོ། །གཉིས་པ་སྐྱེ་བའི་རིམ་པ་ནི། མ་རིག་པའམ་འཇིག་ལྟ་ཉོན་མོངས་ཀྱི་རྩ་བ་སྟེ་དེ་ལ་བརྟེན་ནས་ཉོན་མོངས་གཞན་རྣམས་སྐྱེ་བར་འགྱུར་ཏེ། རྣམ་འགྲེལ་ལས། བདག་ཡོད་ན་ནི་གཞན་དུ་ཤེས། བདག་གཞན་ཆ་ལས་འཛིན་དང་སྡང་། །འདི་དག་དང་ནི་ཡོངས་འབྲེལ་པས། །ཉེས་པ་ཐམས་ཅད་འབྱུང་བར་འགྱུར། །ཞེས་མ་རིག་པའམ་འཇིག་ལྟས་བདག་ཏུ་ཞེན་པ་ལ་བརྟེན་ནས། ཆགས་སྡང་སོགས་སྐྱེ་ཞིང་ལྟ་ངན་རྣམས་ཀྱང་འབྱུང་བར་གསུངས་སོ། །གསུམ་པ་ཉོན་མོངས་སྐྱེ་བའི་རྒྱུ་ནི་དྲུག་སྟེ། རྟེན་ནི་ཉོན་མོངས་པའི་བག་ལ་ཉལ། དམིགས་པ་ནི་ཉོན་མོངས་སྐྱེ་བར་འགྱུར་བའི་ཡུལ། འདུ་འཛི་ནི་གྲོགས་ངན་ལ་བརྟེན་པ། བཤད་པ་ནི་ལོག་ཆོས་ཉན་པ། གོམས་པ་ནི་སྔོན་ཉོན་མོངས་པ་ལ་འདྲིས་པའི་རྐྱེན། ཡིད་བྱེད་ནི་སྡུག་མི་སྡུག་དང་རྟག་མི་རྟག་སོགས་སུ་ཚུལ་བཞིན་མ་ཡིན་པ་ཡིད་ལ་བྱེད་པའོ། །བཞི་པ་ཉེས་དམིགས་ནི་ཉོན་མོངས་པས་ཚེ་འདི་དང་ཕྱི་མ་ལ་གནོད་པའི་རྒྱུ་ཐམས་ཅད་བྱེད་དེ། མདོ་སྡེའི་རྒྱན་ལས། ཉོན་མོངས་རྣམས་ཀྱིས་བདག་འཛོམས་སེམས་ཅན་འཇོམས་ཤིང་ཚུལ་ཁྲིམས་འཇོམས། །ཞེས་སོགས་གསུངས་ཤིང་ཁུངས་གཞན་ཡང་མང་དུ་འབྱུང་ངོ་། །གཉིས་པ་ལས་གསོག་ཚུལ་ལ་གཉིས། བསག་བྱའི་ལས་ངོས་བཟུང་བ་དང་། དེས་ཇི་ལྟར་གསོག་པའི་ཚུལ་ལོ། །དང་པོ་ལ་གཉིས་ཏེ་སེམས་པའི་ལས་དང་། བསམ་པའི་ལས་སོ། །དང་པོ་ནི། རང་དང་མཚུངས་ལྡན་གྱི་སེམས་ཡུལ་རྣམས་ལ་གཡོ་ཞིང་སྐུལ་བར་བྱེད་པའི་སེམས་བྱུང་ཡིད་ཀྱི་ལས་སོ། །གཉིས་པ་ནི། དེས་ཀུན་ནས་བསླངས་པའི་ལུས་ངག་གི་ལས་ཏེ། མཛོད་ལས། ལས་ནི་སེམས་པ་དང་དེས་བྱས། །སེམས་པ་ཡིད་ཀྱི་ལས་ཡིན་ ཏེ། །དེས་བསྐྱེད་ལུས་དང་ངག་གི་ལས། །ཞེས་གསུངས་པ་ལྟར་རོ། །བྱེ་བྲག་སྨྲ་བས་ལས་ལ་རིག་བྱེད་དང་རིག་བྱེད་མ་ཡིན་པ་གཉིས་སུ་བྱས་ནས་གཉིས་ཀ་གཟུགས་ཅན་དུ་འདོད་ཅིང་། སློབ་དཔོན་དབྱིག་གཉེན་གྱིས་དེ་བཀག་ནས་ལུག་ངག་གི་རིག་བྱེད་དང་མཉམ་དུ་འཇུག་པའི་སེམས་པ་ལ་བཞེད་དོ། །སྤྱིིར་ལས་ལ་དགེ་མི་དགེ་ལུང་མ་བསྟན་གསུམ་ཡོད་ལ། འདིར་དགེ་བའི་ལས་ལ་ཟག་བཅས་ཟག་མེད་གཉིས་དང་ཡང་བསོད་ནམས་དང་བསོད་ནམས་མ་ཡིན་པ་དང་མི་གཡོ་བའི་ལས་གསུམ་ཏེ། །དང་པོ་ནི། འདོད་པའི་སས་བསྡུས་པའི་དགེ་བའི་ལས་དང་། གཉིས་པ་ནི། མི་དགེ་བ་དང་། གསུམ་པ་ནི། ཁམས་གོང་མའི་སས་བསྡུས་པའི་དགེ་བ་ཟག་བཅས་ཀྱི་ལས་སོ། །ཟག་མེད་ཀྱི་ལས་ནི་ཁམས་གསུམ་གྱིས་མ་བསྡུས་པའི་འཕགས་རྒྱུད་ཀྱི་ལས་ཞིག་གོ །གཉིས་པ་ལས་གསོག་ཚུལ་ནི། སྦྱིར་སྐྱེ་འཕགས་གཉིས་ཀས་ཟག་བཅས་ཀྱི་དགེ་བའི་ལས་གསོག་པ་ཡོད་ལ། མི་དགེ་བའི་ལས་ནི་སོ་སྐྱེ་དང་རྒྱུན་ཞུགས་དང་ཕྱིར་འོང་གིས་གསོག་པ་ཡོད་ཀྱང་བདེ་འགྲོ་དང་ངན་འགྲོར་འཕེན་བྱེད་ཀྱི་ལས་ནི་འཕགས་པས་མི་གསོག་གོ །དེ་ཡང་ཇི་སྲིད་དུ་གང་ཟག་གི་བདག་ཏུ་འཛིན་པའི་དབང་དུ་འགྲོ་བ་དེ་སྲིད་དུ་འཁོར་བར་འཕེན་བྱེད་ཀྱི་ལས་གསོག་ལ། བདག་མེད་པའི་དེ་ཁོ་ན་ཉིད་མངོན་སུམ་དུ་རྟོགས་པ་ཁ་ཅིག་འཁོར་བར་སྐྱེ་བ་སྲིད་ཀྱང་འཕེན་བྱེད་ཀྱི་ལས་གསར་དུ་མི་གསོག་གོ །དེས་ན་འཕེན་བྱེད་ཀྱི་ལས་གསོག་པ་ཐམས་ཅད་ནི་སོ་སྐྱེའོ། །སོ་སྐྱེའི་རྒྱུད་ཀྱི་སྦྱིན་སོགས་ཀྱི་དགེ་བ་ངེས་འབྱུང་དང་བྱང་ཆུབ་ཀྱི་སེམས་དང་བདག་མེད་རྟོགས་པའི་ཤེས་རབ་དང་བསྔོ་བ་ཁྱད་པར་ཅན་གྱིས་ཟིན་ན་མ་གཏོགས་མ་ཟིན་པའི་དགེ་མི་དགེའི་ལས་ཐམས་ཅད་ཀྱང་འཁོར་བའི་རྒྱུར་འགྱུར་བར་གསུངས་ཏེ་ཤེས་དགོས་སོ། །གསུམ་པ་འཆི་འཕོ་བ་དང་ཉིང་འཚམས་སྦྱོར་བ་ལ་ལྔ། འཆི་བའི་རྐྱེན། འཆི་བའི་སེམས། དྲོད་སྡུད་ཚུལ། བར་དོ་འགྲུབ་ལུགས། སྐྱེ་སྲིད་དུ་སྐྱེ་བ་ལེན་ཚུལ་ལོ། །དང་པོ་ལ་ཚེ་ཟད་ནས་འཆི་བ་དང་། བསོད་ནམས་ཟད་ནས་འཆི་བ་དང་། ཡ་ང་བ་མ་སྤངས་པར་འཆི་བ་གསུམ་དང་། དུས་ཀྱིས་འཆི་བ་དང་། དུས་མིན་དུ་འཆི་བ་གཉིས་དང་། དུས་མིན་དུ་འཆི་བ་ལ་ནི་རྣམ་གྲངས་ཤིན་ཏུ་མང་པོ་ཞིག་ཡོད་དོ། །གཉིས་པ་འཆི་སེམས་ལ་གསུམ་ལས། དགེ་སེམས་དང་བཅས་ནས་འཆི་བ་དང་། སྡིག་སེམས་དང་ལྡན་པས་འཆི་བ་དང་། ལུང་མ་བསྟན་གྱི་སེམས་ཀྱིས་འཆི་བའོ། །འོན་ཀྱང་ཕྱི་དབུགས་ཆད་པ་ན་ལུང་མ་བསྟན་གྱི་སེམས་སུ་འགྱུར་གྱི་དགེ་སྡིག་གཉིས་མི་དྲན་ནོ། །གསུམ་པ་དྲོད་བ སྡུ་ཚུལ་ནི་དགེ་བ་བྱེད་པ་རྣམས་ནི་དྲོད་སྨད་ནས་སྡུད་ཅིང་མི་དགེ་བ་བྱད་ཆེ་བ་རྣམས་ཀྱི་དྲོད་སྟོད་ནས་སྡུད་དོ། །གང་ལྟར་ནའང་མཐར་སྙིང་གར་བསྡུད་ཅིང་དེ་ནས་རྣམ་ཤེས་འཕོ་བར་འགྱུར་རོ། །བཞི་པ་བར་དོ་འགྲུབ་ལུགས་ནི་རྣམ་ཤེས་སྙིང་ག་ནས་སྤྱི་གཙུག་དང་སྨིན་འཚམས་མིག་རྣ་བ་སྣ་ཁ་ལྟེ་བ་ཆུ་ལམ་བཤང་ལམ་སྟེ་སྒོ་དགུ་པོ་གང་རུང་ནས་ཕྱིར་འཐོན་པ་དང་བར་དོ་འགྲུབ་པར་འགྱུར་རོ། །བར་དོའི་བཤད་པ་མང་བས་གཞན་རྣམས་ནི་བཞག་ཅིང་སྐྱེ་བའི་རྐྱེན་རྙེད་ན་ནི་བདུན་ཕྲག་དང་པོ་ལ་སྐྱེ་སྲིད་དུ་འགྲོ་ལ། མ་རྙེད་ན་བདུན་ཕྲག་བདུན་ཚུན་ཆད་དུ་བར་དོར་གནས་སྲིད་ཀྱི། དེ་ཕན་ཆད་དུ་མི་གནས་ཏེ་སྐྱེ་བའི་རྐྱེན་ངེས་པར་རྙེད་པར་འགྱུར་བའི་ཕྱིར་རོ། །དེའི་ཕྱིར་ལོར་སོང་ཡང་ཚེ་འདས་ཀྱི་བྱད་གཟུགས་ཁ་ཅིག་ལ་སྣང་བ་ནི་མི་མ་ཡིན་གྱི་འཕྲུལ་ལོ། །ལྔ་པ་སྐྱེ་སྲིད་དུ་འགྲོ་ཚུལ་ནི། མངལ་དུ་སྐྱེ་ན་རང་དང་རིགས་མཐུན་པའི་སེམས་ཅན་མཐོང་ནས་རྩེ་བ་སོགས་བྱ་འདོད་ནས་སོང་བ་ན་སྐྱེ་གནས་སུ་འགྲོ་སྟེ། དེའི་ཚེ་ཕ་མ་གཉིས་ཉལ་པོ་བྱེད་པ་སྒྱུ་མ་བཞིན་དུ་མཐོང་བ་ན་ཆགས་སྡང་སྐྱེས་ནས་ཉིང་འཚམས་སྦྱོར་བར་འགྱུར་ཏེ་རྒྱས་པར་ནི་མངལ་དུ་འཇུག་པའི་མདོ་ན་གསལ་དེར་ཤེས་པར་བྱའོ། །དྲོད་གཤེར་ལས་སྐྱེ་ན་དྲི་འདོད་པ་དང་། བརྫུས་ཏེ་སྐྱེ་ན་གནས་འདོད་ཅིང་། ཚ་དམྱལ་དུ་སྐྱེ་ན་དྲོ་བ་དང་། གྲང་དམྱལ་དུ་སྐྱེ་ན་བསིལ་བ་འདོད་ནས་དེར་སྐྱེ་ཞིང་། སྒོ་ང་ལས་སྐྱེ་བ་ནི་མངལ་སྐྱེས་དང་འདྲ་བར་བཤད་དོ། །གཉིས་པ་ཡན་ལག་བཅུ་གཉིས་ཀྱི་སྒོ་ནས་བསམ་པ་ལ་བཞི། ཡན་ལག་གི་དབྱེ་བ། དེའི་བསྡུ་བ། ཚེ་དུ་ལ་རྫོགས་པ། དོན་བསྡུ་བའོ། །དང་པོ་ལ་བཅུ་གཉིས་ལས་དང་པོ་ནི་མ་རིག་པ་སྟེ་དེ་ལ་ལས་འབྲས་ལ་རྨོངས་པ་དང་ཡང་དག་པའི་དོན་ལ་རྨོངས་པ་གཉིས་ལས་འདིར་ཕྱི་མའོ། །ལས་འབྲས་ལ་རྨོངས་པས་ནི་ངན་འགྲོར་འགྲོ་བའི་ལས་གསོག་ལ། དེ་ཁོ་ན་ཉིད་ལ་རྨོངས་པས་ནི་འགྲོ་བ་གཉ ིས་ཀར་འགྲོ་བའི་ལས་གསོག་གོ །འདུ་བྱེད་ནི་ལས་ཡིན་ལ་དེ་ལ་ནི་འགྲོ་བ་གཉིས་སུ་འཕེན་བྱེད་ཀྱི་ལས་གཉིས་སོ། །བདེ་འགྲོར་འཕེན་བྱེད་ལ་འདོད་པ་དང་ཁམས་གོང་མར་འཕེན་བྱེད་གཉིས་སོ། །རྣམ་པར་ཤེས་པ་ལ་སྤྱིར་དྲུག་ཡོད་ཀྱང་འདིར་ཡིད་ཀྱི་རྣམ་ཤེས་སོ། །དེ་ཡང་ལས་གཉིས་ཀྱི་བག་ཆགས་བསྒོ་བའི་གཞི་ནི་རྒྱུ་དུས་ཀྱི་རྣམ་ཤེས་ཡིན་ལ། བསྒོས་ནས་ཕྱི་མར་ཉིང་འཚམས་སྦྱར་བའི་རྣམ་ཤེས་ནི་འབྲས་དུས་ཀྱི་རྣམ་ཤེས་ཏེ་དེ་གཉིས་བསྡོམས་པ་ལ་རྣམ་པར་ཤེས་པ་ཞེས་བྱའོ། །དེའི་ཚེ་མི་དགེ་བའི་ལས་ཀྱི་བག་ཆགས་བསྒོ་ཆེ་ན་ངན་འགྲོ་དང་དགེ་བའི་ལས་ཀྱི་བག་ཆགས་བསྒོས་ན་བདེ་འགྲོར་སྐྱེ་བར་འགྱུར་ལ། མི་གཡོ་བའི་ལས་ཀྱི་བག་ཆགས་བསྒོས་ན་ནི་ཁམས་གོང་མར་སྐྱེའོ། །མིང་གཟུགས་ལ་མིང་ནི་ཚོར་བ་འདུ་ཤེས་འདུ་བྱེད་རྣམ་ཤེས་ཏེ་དེ་བཞི་ལ་མིང་གི་ཐ་སྙད་མཛད་ཅིང་། གཟུགས་ནི་དེའི་སྐབས་ཀྱི་མེར་མེར་པོ་ལ་སོགས་པའོ། །སྐྱེ་མཆེད་དྲུག་ནི་མིང་གཟུགས་དེ་རིམ་གྱིས་འཕེལ་ནས་མིག་རྣ་བ་སོགས་ཀྱི་སྐྱེ་མཆེད་རྣམས་འགྲུབ་སྟེ། ལུས་དང་ཡིད་ཀྱི་སྐྱེ་མཆེད་ནི་མེར་མེར་པོའི་དུས་སུ་ཡོད་དོ། །བརྫུས་ཏེ་སྐྱེ་ན་ནི་དབང་པོ་རྣམས་ཅིག་ཅར་འགྲུབ་པས་དེ་ལྟ་བུའི་རིམ་པ་མེད་ལ། སྒོང་སྐྱེས་དང་དྲོད་སྐྱེས་ལ་ནི་ཕལ་ཆེར་མངལ་སྐྱེས་དང་འདྲའོ། །རེག་པ་ནི་ཡུལ་དང་དབང་པོ་དང་རྣམ་ཤེས་གསུམ་འདུས་ནས་ཡུལ་གསུམ་ཡོངས་སུ་གཅོད་པའོ། །ཚོར་བ་ནི་རེག་པས་གཅད་པ་ལྟར་ཚོར་བ་བདེ་སྡུག་བཏང་སྙོམས་གསུམ་ཅི་རིགས་མྱོང་བའོ། །སྲེད་པ་ནི་ཚོར་བ་བདེ་བ་ལ་མི་འབྲལ་བ་དང་སྡུག་བསྔལ་ལ་འབྲལ་བར་ཞེན་པའོ། །ལེན་པ་ལ་བཞི་སྟེ་འདོད་པ་ཉེ་བར་ལེན་པ་དང་། ལྟ་བ་ཉེ་བར་ལེན་པ་དང་། ཚུལ་ཞུགས་ཉེ་བར་ལེན་པ་དང་། བདག་ཏུ་སྨྲ་བ་ཉེ་བར་ལེན་པའོ། །སྲིད་པ་ནི་སྔར་གྱི་འདུ་བྱེད་ཀྱི་ལས་རྣམ་ཤེས་ལ་བསྒོས་ནས་སྲེད་ལེན་གཉིས་ཀྱིས་གསོས་བཏབ་ཏེ་ཡང་སྲིད་ཕྱི་མ་འདྲེན་པ་ལ་མཐུ་ཅན་དུ་གྱུར་པའི་ལས་སྟེ། སྲིད་པ་ཞེས་པ་ནི་རྒྱུ་ལ་འབྲས་བུའི་མིང་གིས་བཏགས་པའོ། །སྐྱེ་བ་ནི་སྐྱེ་གནས་བཞིར་དང་པོར་ཉིང་འཚམས་སྦྱར་བའོ། །རྒ་ཤིའི་རྒ་བ་ནི་ཕུང་པོ་སྨིན་ཅིང་གཞན་དུ་འགྱུར་བ་ཡིན་ལ། །ཤི་བ་ནི་ཕུང་པོའི་རིས་མཐུན་དོར་བ་སྟེ་དེ་གཉིས་གཅིག་ཏུ་བསྡུས་ནས་རྒ་ཤི་ཞེས་བྱའོ། །གཉིས་པ་བསྡུ་བ་ནི། འཕེན་པའི་ཡན་ལག་དང་འཕངས་པའི་ཡན་ལག་དང་འགྲུབ་པའི་ཡན་ལག་དང་གྲུབ་པའི་ཡན་ལག་གོ །དང་པོ་ནི། མ་རིག་པ་དང་འདུ་བྱེད་དང་རྣམ་ཤེས་གསུམ་མོ། །གཉིས་པ་ནི་མིང་གཟུགས་སྐྱེ་མཆེད་རེག་ཚོར་ཏེ་བཞིའོ། །གསུམ་པ་ནི་སྲིད་ལེན་སྲིད་པ་གསུམ་མོ། །བཞི་པ་ནི་སྐྱེ་བ་དང་རྒ་ཤི་གཉིས་སོ། །བཞི་ལས་གང་འཕངས་ན་འབྲས་དུས་ཀྱི་རྣམ་ཤེས་ནས་ཚོར་བའི་བར་ཕྱེད་དང་ལྔའོ། །གང་གིས་འཕངས་ན་མ་རིག་པ་ལ་བརྟེན་པའི་འདུ་བྱེད་ཀྱིས་སོ། །ཇི་ལྟར་འཕངས་ན་རྒྱུ་དུས་ཀྱི་རྣམ་ཤེས་ལ་ལས་ཀྱི་བག་ཆགས་བསྒོས་པའི་ཚུལ་གྱིས་སོ། །འཕངས་པའི་དོན་ནི་འགྲུབ་བྱེད་ཀྱིས་འབྲས་བུ་དེ་དག་འགྲུབ་རུང་དུ་བྱས་པའོ། །འགྲུབ་བྱེད་དང་གྲུབ་པ་ལ་གསུམ་སྟེ། གང་གིས་འགྲུབ་པར་བྱེད་ན་སྲེད་པའི་རྐྱེན་ཅན་གྱིས་ལེན་པའོ། །གང་འགྲུབ་པར་བྱེད་ན་སྐྱེ་བ་དང་རྒ་ཤིའོ། །ཇི་ལྟར་འགྲུབ་པར་བྱེད་ན་འདུ་བྱེད་ཀྱིས་རྣམ་ཤེས་ལ་བསྒོས་པའི་ལས་ཀྱི་བག་ཆགས་དེ་ནུས་པ་མཐུ་ཅན་དུ་བྱས་པའི་ཚུལ་གྱིས་སོ། །དེ་ལྟར་ན་འདིར་འགྱུར་དེ་མ་རིག་པའི་དབང་གིས་ལས་བསགས་ཏེ་ལས་ཀྱི་བག་ཆགས་རྣམ་ཤེས་ལ་བསྒོས་ནས་བདེ་འགྲོ་དང་ངན་འགྲོ་གང་འགྲུབ་རུང་དུ་བྱས་པ་དེ། སྲེད་ལེན་གཉིས་ཀྱིས་གསོས་བཏབ་ནས་ནུས་པ་མཐུ་ཅན་དུ་གྱུར་ཏེ་ཉིང་འཚམས་སྦྱར་ནས་སྐྱེ་སོགས་འགྲུབ་པར་འགྱུར་བའོ། །འོན་ཀྱང་མདོ་ལས་གོ་རིམ་འདི་དང་མི་འདྲ་བར་བཤད་པ་ནི་རྟེན་འབྲེལ་ཚར་གཞན་གྱི་དབང་དུ་མཛད་པའོ། །གསུམ་པ་ཚེ་དུས་རྫོགས་ཚུལ་ནི། ཚེ་གཉིས་དང་གསུམ་ལའང་རྫོགས་པ་ཡོད་ཅིང་འཕེན་བྱེད་དང་འཕངས་པའི་འབྲས་བུའི་བར་དུ་བསྐལ་པ་བགྲང་བ་ལས་འདས་པས་ཆོད་པའང་སྲིད་དོ། །མྱུར་ན་མ་རིག་པ་དང་འདུ་བྱེད་དང་རྒྱུ་དུས་ཀྱི་རྣམ་ཤེས་ཏེ་ཕྱེད་དང་གསུམ་དང་སྲེད་ལེན་སྲིད་པ་གསུམ་ཚེ་དེ་ལ་རྫོགས་ལ། དེའི་ལྷག་མ་རྣམས་ཚེ་གཉིས་པ་ལ་རྫོགས་པར་འགྱུར་རོ། །ཡུན་རིང་ཡང་ཚེ་གསུམ་པ་ལས་མི་འགྱང་སྟེ་འགྲུབ་བྱེད་དང་གྲུབ་པ་གཉིས་དང་འཕེན་བྱེད་གསུམ་ལ་ཚེ་རིང་དགོས་པས་ཚེ་གསུམ་སྟེ། འཕངས་པའི་ཡན་ལག་རྣམས་གྲུབ་པའི་ཡན་ལག་ཏུ་འདུས་བའི་ཕྱིར་དང་། འཕེན་འགྲུབ་ཀྱི་བར་དུ་བསྐལ་པ་དུ་མས་ཆོད་པ་ནི་རྟེན་འབྲེལ་གཞན་གྱི་ཚེ་ཡིན་གྱི། རྟེན་འབྲེལ་ཚར་གཅིག་གི་དབང་དུ་བྱས་པ་དེའི་ཚེ་མ་ཡིན་པའི་ཕྱིར་རོ། །བཞི་པ་དོན་བསྡུ་བ་ནི། སྔར་བཤད་པ་ལྟར་ཀུན་འབྱུང་ལས་ཉོན་གྱི་དབང་གིས་འཁོར་བ་འགྲུབ་ཚུལ་དང་། ཁྱད་པར་དུ་ཡན་ལག་བཅུ་གཉིས་ཀྱི་སྒོ་ནས་འཁོར་བར་འཁོར་ཚུལ་ལེགས་པར་ཤེས་ཏེ་གོམས་པར་བྱེད་པ་ནི་རྒྱུ་མེད་དང་མི་མཐུན་པའི་རྒྱུ་ལས་འབྱུང་བར་ལྟ་བའི་ལོག་ལྟ་ཐམས་ཅད་སེལ་ཞིང་། རྒྱལ་བའི་གསུང་གི་གཅེས་མཛོད་ཀྱི་དོན་རིག་ནས་འཁོར་བ་ལ་སྐྱོ་ཤེས་བསྐྱེད་པ་དང་། གོམས་པར་བྱས་ན་འཕགས་པའི་གོ་འཕང་ཐོབ་པར་བྱེད་པའི་ཐབས་དམ་པའོ། །གཉིས་པ་ངེས་འབྱུང་གི་བསམ་པ་དེ་སྐྱེས་པའི་ཚད་ནི། དེ་ལྟར་སྡུག་ཀུན་གཉིས་དང་ཡན་ལག་བཅུ་གཉིས་ཀྱི་སྒོ་ནས་འཁོར་བའི་མཚན་ཉིད་ཞིབ་ཏུ་ཤེས་ཏེ། འཁོར་བ་ལས་ཐར་འདོད་དང་ཞི་བ་ལ་ཐོབ་བློ་སྐྱེས་ཙམ་ནས་ངེས་འབྱུང་ཁྱད་པར་ཅན་སྐྱེས་པར་འཇོག་གོ སྐྱེས་པ་ཙམ་གྱིས་མི་ཆོག་གི་ཡིད་ལ་རིང་དུ་གོམས་པར་བྱས་ཏེ་བཙོན་ར་ནས་ཐར་བར་འདོད་པ་ལྟ་བུའི་འཁོར་བ་ལས་ཐར་འདོད་ཀྱི་བློ་བསྐྱེད་དེ་གོམས་པ་བརྟན་པར་བྱ་དགོས་སོ། །གསུམ་པ་དེ་ལ་ལོག་རྟོག་སེལ་ཚུལ་ནི། ཁ་ཅིག་འདི་སྙམ་དུ་འཁོར་བ་ལ་སྐྱོ་ཤས་དྲག་པོ་བསྐྱེད་པ་ནི་ཉན་རང་ལ་མཛེས་ཀྱི། བྱང་ཆུབ་སེམས་དཔའ་ནི་འཁོར་བར་སྐྱེ་བ་ལེན་དགོས་པས་དེ་ལ་སྐྱོ་བ་བསྐྱེད་མི་དགོས་སོ་སྙམ་ན། དེ་ནི་མི་འཐད་དེ། བྱང་ཆུབ་སེམས་དཔའ་སྙིང་རྗེ་དང་སྨོན་ལམ་གྱི་དབང་གིས་འཁོར་བའི་གནས་སུ་སྐྱེ་བ་འཛིན་དགོས་ཀྱང་། ལས་ཉོན་གྱི་དབང་གིས་འཁོར་བར་སྐྱེ་བ་ལེན་པ་ངེས་པར་འགོག་དགོས་པའི་ཕྱིར་ཏེ། ལས་ཉོན་གྱི་དབང་གིས་འཁོར་བར་སྐྱེ་དགོས་པ་བྱུང་ན་གཞན་དོན་ཁྱད་པར་ཅན་ལྟ་ཅི། རང་དོན་ཡང་ལེགས་པར་མི་ནུབ་པའི་ཕྱིར་རོ། །དེའི་ཕྱིར་ན་བྱང་ཆུབ་སེམས་དཔའ་རྣམས་ཀྱིས་ཀྱང་འཁོར་བར་སྐྱེ་བ་ལེན་པ་ལ་སྐྱོན་དུ་བལྟས་ནས་འགོག་པ་ཡིན་ནོ། །འཁོར་བ་ལ་ཡོན་ཏན་དུ་བལྟས་ན་ནི་འཁོར་བ་དོན་དུ་གཉེར་བར་འགྱུར་དགོས་ན་དེ་ནི་ཤིན་ཏུ་མི་རིགས་ཏེ། དེ་ལྟར་ན་ཐར་བ་དོན་དུ་གཉེར་བ་ནི་འཁོར་བ་དོན་དུ་གཉེར་བའོ་ཞེས་འདོད་དགོས་ན་དེ་ནི་ཕྱིན་ཅི་ལོག་ཏུ་སྨྲ་བར་འགྱུར་བའི་ཕྱིར་རོ། །བཞི་པ་ཐར་བར་བགྲོད་པའི་ལམ་གྱི་རང་བཞིན་བཤད་པ་ལ་གཉིས། རྟེན་ཇི་ལྟ་བུས་འཁོར་བ་བཟློག་པ་དང་། ལམ་ཇི་ལྟ་བུས་བཟློག་པའོ། །དང་པོ་ནི། གོང་དུ་བརྗོད་པ་ལྟར་དལ་འབྱོར་ཚང་བའི་རྟེན་ཐོབ་པའི་དུས་སུ་བཟློག་པར་བྱ་དགོས་སོ། །དེ་ཡང་ཁྱིམ་པ་དང་རབ་ཏུ་བྱུང་བའི་ཕྱོགས་གཉིས་ལས་རབ་བྱུང་གི་རྟེན་ནི་མཆོག་ཏུ་གྱུར་པའོ། །གཉིས་པ་ནི་བསླབ་པ་རིན་པོ་ཆེ་རྣམ་པ་གསུམ་སྟེ། དེའི་གྲངས་ངེས་ལ་གསུམ་ལས། སེམས་འདུལ་བ་ལ་སེམས་གཡེང་བར་མི་བྱེད་པ་ནི་ཚུལ་ཁྲིམས་དང་། སེམས་མཉམ་པར་འཇོག་པ་ནི་ཏིང་ངེ་འཛིན་དང་། སེམས་རྣམ་པར་གྲོལ་བར་བྱེད་པ་ནི་ཤེས་རབ་ཀྱི་བསླབ་པའོ། །འབྲས་བུ་ལ་ཚུལ་ཁྲིམས་ཀྱི་འབྲས་བུ་ནི་བདེ་འགྲོ་ཡིན་ལ། ཏིང་ངེ་འཛིན་གྱི་འབྲས་བུ་ནི་ཁམས་གོང་མ་གཉིས་སུ་སྐྱེ་བ་དང་། ཤེས་རབ་ཀྱི་བསླབ་པའི་འབྲས་བུ་ནི་ཐར་བའོ། །སྤང་བྱ་ལ་བལྟོས་ནས་རིམ་པ་ལྟར་ཉོན་མོངས་སུན་འབྱིན་པ་དང་མགོ་གནོད་པ་དང་རྩད་ནས་གཅོད་པའོ། །གོ་རིམ་ནི་ཚུམ་ཁྲིམས་ལ་བརྟེན་ནས་སེམས་མཉམ་པར་འཇོག་པ་དང་། དེ་ལ་བརྟེན་ནས་སེམས་ཀྱིས་ཡང་དག་པའི་དོན་མཐོང་བ་གསུམ་མོ། །བསླབ་གསུམ་གྱི་རང་བཞིན་ལ་ཚུལ་ཁྲིམས་ཀྱི་བསླབ་པ་ལ་ཡན་ལག་དྲུག་སྟེ། ཚུམ་ཁྲིམས་དང་ལྡན་པ་དང་སོ་སོར་ཐར་པའི་སྡོམ་པས་བསྡམས་པ་དང་ཆོ་ག་དང་སྤྱོད་ཡུལ་ཕུན་ཚོགས་དང་ལྡན་པ་གཉིས་དང་ཁ་ན་མ་ཐོ་བ་ལ་འཇིགས་པར་ལྟ་བ་དང་བསླབ་བའི་གཞི་ཡང་དག་པར་བླངས་པའོ། །ཏིང་ངེ་འཛིན་ལ་ནི་སེམས་ཀྱི་གནས་བསམ་གཏན་བཞི་ལ་གནས་པར་བྱེད་པ་དང་། ཤེས་རབ་ཀྱི་བསླབ་པ་ལ་ནི་མི་རྟག་ལ་སོགས་བཅུ་དྲུག་ཤེས་ནས་གོམས་པར་བྱེད་དགོས་པའོ། །བཅུ་དྲུག་ནི་སྡུག་བསྔལ་བདེན་པ་ལ་མི་རྟག་སྡུག་བསྔལ་སྟོང་པ་བདག་མེད་པའི་རྣམ་པ་བཞི་དང་། ཀུན་འབྱུང་བདེན་པ་ལ་རྒྱུ་ཀུན་འབྱུང་རབ་སྐྱེ་རྐྱེན་གྱི་རྣམ་པ་བཞི་དང་། འགོག་བདེན་ལ་འགོག་པ་ཞི་བ་གྱ་ནོམ་ངེས་འབྱུང་གི་རྣམ་པ་བཞི་དང་། ལམ་བདེན་ལ་ལམ་སྒྲུབ་པ་རིག་པ་ངེས་འབྱིན་གྱི་རྣམ་པ་བཞི་སྟེ་བཅུ་དྲུག་གོ །དེ་རྣམས་ལེགས་པར་ཤེས་པའི་ཤེས་རབ་ནི་ཤེས་རབ་ཀྱི་བསླབ་པའོ། །དེ་ཡང་ཐོག་མར་ཚུལ་ཁྲིམས་ཀྱི་བསླབ་པ་ལ་གོམས་པར་བྱས་པས་ཏིང་ངེ་འཛིན་གྱི་བསླབ་པ་ལ་སློབ་ཅིང་དེ་ནས་ཤེས་རབ་ཀྱི་བསླབ་པ་ལ་འཇུག་དགོས་ཏེ་འཆད་པར་འགྱུར་རོ། །དེ་དག་ནི་སྐྱེས་བུ་འབྲིང་དང་ཐུན་མོང་བའི་ལམ་གྱི་སྐོར་རོ། །གསུམ་པ་སྐྱེས་བུ་ཆེན་པོའི་ལམ་གྱི་རིམ་པ་ལ་བློ་སྦྱོང་བ་ལ་གསུམ་ཐེག་ཆེན་ལམ་གྱི་འཇུག་སྒོ་ཐེག་ཆེན་སེམས་བསྐྱེད་དུ་བསྟན་པ་དང་། སེམས་དེ་ཇི་ལྟར་བསྐྱེད་པ་དང་། སྤྱོད་པ་ལ་སློབ་པའི་ཚུལ་ལོ། །དང་པོ་ནི། རྒྱལ་བས་ཐེག་ཆེན་ལ་སྔགས་དང་ཕ་རོལ་ཏུ་ཕྱིན་པའི་ཐེག་པ་གཉིས་བཤད་ཅིང་དེ་གཉིས་གང་དུ་འཇུག་ཀྱང་འཇུག་སྒོ་ནི་བྱང་ཆུབ་ཀྱི་སེམས་ཁོ་ན་ཡིན་ཏེ། དེ་རྒྱུད་ལ་སྐྱེས་པ་ན་ཡོན་ཏན་གཞན་གང་ཡང་མ་སྐྱེས་ཀྱང་ཐེག་ཆེན་པར་འཇོག་པ་ཡིན་ལ། དེ་དང་བྲལ་བའམ་དེ་གཏན་མ་སྐྱེས་ན་ནི་ཡོན་ཏན་གཞན་ཅི་ཡོད་ཀྱང་ཐེག་ཆེན་པར་འཇོག་མི་ནུས་པའི་ཕྱིར་རོ། །བྱང་ཆུབ་ཀྱི་སེམས་རྒྱུད་ལ་ནམ་སྐྱེས་བ་ན་རྒྱལ་བའི་སྲས་ཞེས་བརྗོད་པ་ཐོབ་སྟེ། སྤྱོད་འཇུག་ལས། བྱང་ཆུབ་སེམས་སྐྱེས་གྱུར་ན་སྐད་ཅིག་གིས། འཁོར་བའི་བཙོན་རར་བསྡོམས་པའི་ཉམ་ཐག་རྣམས། །བདེར་གཤེགས་རྣམས་ཀྱི་སྲས་ཞེས་བརྗོད་བྱ་ཞིང་། །ཞེས་དང་། དེ་རིང་སངས་རྒྱས་རིགས་སུ་སྐྱེས། །སངས་རྒྱས་སྲས་སུ་ད་གྱུར་ཏོ། །ཞེས་གསུངས་པའི་ཕྱིར། དེ་ཡང་ལམ་དངོས་ལ་ཞུགས་པའི་དབང་དུ་མཛད་ཀྱི། ཐེག་པ་ཆེན་པོ་གཉིས་ཀྱི་རིགས་ཅན་དུ་འགྱུར་བ་ནི་ལམ་དུ་ཞུགས་མ་ཞུགས་པ་ནའང་ཡོད་དོ། །དེ་ལ་སྟོང་ཉིད་རྟོགས་པའི་ཤེས་རབ་ནི་ཐེག་པ་གསུམ་གྱི་བྱང་ཆུབ་ཀྱི་ཐུན་མོང་བའི་རྒྱུ་ཡིན་ལ། བྱང་ཆུབ་ཀྱི་སེམས་ནི་སངས་རྒྱས་ཀྱི་ཐུན་མོང་མ་ཡིན་པའི་རྒྱུ་ཡིན་ཏེ། དཔེར་ན་ཆུ་ལུད་དྲོད་གཤེར་ནི་འབྲས་བུ་ནས་ཀྱི་རྒྱུ་ཐུན་མོང་བ་དང་། ནས་ཀྱི་ས་བོན་ནི་དེའི་རྒྱུ་ཐུན་མོང་མ་ཡིན་པ་ལྟ་བུ་དང་། མ་ནི་བུའི་རྒྱུ་ཐུན་མོང་བ་དང་ཕ་ནི་བུའི་རིགས་ངེས་པའི་རྒྱུ་ཐུན་མོང་མ་ཡིན་པ་བཞིན་ནོ། །སྟོང་ཉིད་རྟོགས་པའི་ཤེས་རབ་ཐེག་པ་གསུམ་གྱི་བྱང་ཆུབ་ཀྱི་ཐུན་མོང་བའི་རྒྱུར་འགྱུར་ཚུལ་ནི། དེ་རིགས་ཅན་གསུམ་གང་གི་བསམ་པས་ཟིན་ན་ནི་དེ་དང་དེའི་བྱང་ཆུབ་ཐོབ་པའི་རྒྱུར་འགྱུར་ཞིང་། ཐེག་ཆེན་སེམས་བསྐྱེད་ནི་ཉན་རང་གི་རིགས་ཅན་ལ་མེད་པས་ཐེག་ཆེན་གྱི་ཁྱད་ཆོས་སུ་གྱུར་པ་ཡིན་ནོ། །གཉིས་པ་སེམས་དེ་བསྐྱེད་པའི་ཚུལ་ལ་བཞི་ལས། རྒྱུ་གང་ལ་བརྟེན་ནས་སྐྱེ་བ་དང་། སེམས་སྦྱོང་བའི་རིམ་པ་དང་། དེ་སྐྱེས་པའི་ཚད་དང་། ཆོ་གས་བཟུང་བའི་ཚུལ་ལོ། །དང་པོ་ལ་གསུམ། རྐྱེན་བཞི་དང་། རྒྱུ་བཞི་དང་། སྟོབས་བཞི་ལ་བརྟེན་ནས་སྐྱེ་བའོ། །དང་པོ་རྐྱེན་བཞི་ནི། སངས་རྒྱས་བྱང་སེམས་ཀྱི་མཐུ་བསམ་གྱིས་མི་ཁྱབ་པ་མཐོང་བ་དང་ཐོས་པའི་རྐྱེན་གྱིས་བསྐྱེད་པ་དང་། ཐེག་ཆེན་གྱི་སྡེ་སྣོད་ཉན་ནས་མོས་ཏེ་བསྐྱེད་པ་དང་། སྙིགས་དུས་སུ་བསྟན་པ་ནུབ་ཏུ་ཉེ་བ་ན་བདག་གིས་ནི་ཕན་ཡོན་ཆེ་བའི་སེམས་དེ་བསྐྱེད་པར་བྱ་སྙམ་པ་དང་། དུས་དེ་ལྟ་བུར་སེམས་དེ་བསྐྱེད་པ་རྙེད་དཀའོ་སྙམ་སྟེ་བསྐྱེད་པའོ། །གཉིས་པ་རྒྱུ་བཞིན་ནི། རིགས་ཕུན་སུམ་ཚོགས་པ་དང་། དགེ་བའི་བཤེས་གཉེན་གྱིས་ཟིན་པ་དང་། སེམས་ཅན་ལ་སྙིང་བརྩེ་བ་དང་། འཁོར་བའི་དཀའ་སྤྱད་ལ་མི་སྐྱོ་བ་བཞི་སྟེ་དེ་ལ་བརྟེན་ནས་སྐྱེ་བའོ། །སྟོབས་བཞི་ནི་རང་དབང་གིས་སངས་རྒྱས་འདོད་པ་རང་གི་སྟོབས་དང་། གཞན་གྱི་དབང་གིས་དེ་འདོད་པ་གཞན་སྟོབས་དང་། སྔོན་གོམས་པའི་དབང་གིས་ད་ལྟ་སངས་རྒྱས་བྱང་སེམས་ཀྱི་བསྔགས་པ་ཐོག་པ་ཙམ་གྱིས་སྐྱེ་བ་རྒྱུའི་སྟོབས་དང་། ཆོས་ཉན་པ་ལ་སོགས་པའི་དགེ་བ་ལ་རིང་དུ་གོམས་པའི་སྟོབས་བཞི་ལ་བརྟེན་ནས་སྐྱེ་བའོ། །འོན་ཀྱང་སངས་རྒྱས་ཐོབ་འདོད་དང་བྱམས་སྙིང་རྗེ་གཉིས་ནི་སྐྱེ་བའི་རྒྱུའི་གཙོ་བོ་ཡིན་ནོ། །དེ་ཡང་བྱང་ཆུབ་ཀྱི་སེམས་ཀྱི་ཕན་ཡོན་དྲན་ནས་བསྐྱེད་དགོས་ཤིང་། ཕན་ཡོན་ནི་སྡོང་པོ་བཀོད་པའི་མདོ་ལས་རྒྱ་ཆེར་བཤད་ཅིང་། དཔལ་བྱིན་གྱིས་ཞུས་པའི་མདོ་ལས་ཀྱང་། བྱང་ཆུབ་སེམས་ཀྱི་བསོད་ནམས་གང་། །དེ་ལ་གལ་ཏེ་གཟུགས་མཆིས་ན། །ནམ་མཁའི་ཁམས་ནི་ཀུན་བཀང་སྟེ། །དེ་ནི་དེ་བས་ལྷག་པར་འགྱུར། །ཞེས་སོགས་གསུངས་པ་ལྟ་བུ་སྟེ་གཞན་ཡང་ཁུངས་མང་ངོ་། གཉིས་པ་སེམས་དེ་སྦྱང་བའི་རིམ་པ་ལ་ཇོ་བོ་ནས་བརྒྱུད་པ་དང་ཞི་བ་ལྷ་ནས་བརྒྱུད་པ་གཉིས་ལས། དང་པོའི་ལུགས་ནི་རྒྱུ་འབྲས་བདུན་སྟེ་རྫོགས་པའི་སངས་རྒྱས་སེམས་བསྐྱེད་ལས་བྱུང་། འབྲས་བུ་དེ་རྒྱུ་ལྷག་བསམ་ལས་དང་དེ་སྙིང་རྗེ་དང་དེ་བྱམས་པ་དང་དེ་དྲིན་གཟོ་བ་དང་དེ་དྲིན་དྲན་པ་དང་དེ་མར་དྲན་པ་ལས་འབྱུང་སྟེ་རྒྱུ་འབྲས་བདུན་ནོ། །འདི་ལ་གཉིས། རིམ་པ་ལ་ངེས་པ་བསྐྱེད་པ་དང་། རིམ་ཅན་དུ་སྦྱང་བ་དངོས་སོ། །དང་པོ་ལ་གཉིས། ཐེག་ཆེན་ལམ་གྱི་རྩ་བ་སྙིང་རྗེར་བསྟན་པ་དང་། རྒྱུ་འབྲས་གཞན་རྣམས་དེའི་རྒྱུ་འབྲས་སུ་འགྱུར་ཚུལ་ལོ། །དང་པོ་ལ་སྙིང་རྗེ་ཆེན་པོ་ནི་ཐོག་ཐ་བར་གསུམ་དུ་གལ་ཆེ་སྟེ། ཐོག་མར་སེམས་ཅན་རྗེས་སུ་འཛིན་པར་འདོད་ཅིང་དེའི་ཁུར་འཁྱེར་བ་ལ་ནི་སྙིང་རྗེ་ངེས་པར་དགོས་པའི་ཕྱིར་ཏེ། སྙིང་རྗེ་ཡོད་ན་བྱང་ཆུབ་ཀྱི་སེམས་སྐྱེ་ཞིང་གཞན་རྗེས་སུ་འཛིན་པའི་ཁུར་འཁྱེར་བར་སྤྲོོ་ལ། སྙིང་རྗེ་དམན་ན་གཞན་དོན་བྱེད་པ་ལ་མི་སྦྲོ་བས་བྱང་ཆུབ་ཀྱི་སེམས་ཀྱང་མི་སྐྱེ་བའི་ཕྱིར། བར་དུ་གལ་ཆེ་སྟེ་སེམས་ཅན་གྱི་དོན་དུ་རྒྱལ་སྲས་ཀྱི་སྐྱོད་པ་མཐའ་ཡས་པ་ལ་སློབ་པར་བྱེད་འདོད་འབྱུང་བ་ལ་སྙིང་རྗེ་དགོས་པའི་ཕྱིར་ཏེ། སྙིང་རྗེ་མེད་ན་སེམས་ཅན་སྡུག་བསྔལ་ལས་སྐྱོབ་འདོད་མི་འབྱུང་བས་སྤྱོད་པ་ཁྱད་པར་ཅན་ལ་སློབ་འདོད་མི་འབྱུང་ལ། དེ་ཡོད་ན་ལྡོག་སྟེ་འབྱུང་བའི་ཕྱིར། ཐ་མར་གལ་ཆེ་སྟེ། སངས་རྒྱས་ནས་ཀྱང་ཐུགས་རྗེ་ཆེན་པོས་ཀུན་ནས་བསླངས་ཏེ་གཞན་དོན་རྣམས་མཛད་པར་འགྱུར་བ་ཡིན་གྱི། དེ་མེད་ན་གཞན་དོན་ཡལ་བར་འདོར་བའི་ཉན་རང་ལྟར་འགྱུར་བའི་ཕྱིར་རོ། །སྙིང་རྗེ་ཆེན་པོ་ནི་ཐོག་ཐ་བར་གསུམ་དུ་གལ་ཆེ་བ་དཔལ་ལྡན་ཟླ་བས་བཤད་ཅིང་། སྙིང་རྗེའི་ཕན་ཡོན་དང་བསྔགས་པ་ནི་བློ་གྲོས་མི་ཟད་པས་བསྟན་པའི་མདོ་དང་། ཆོས་ཡང་དག་པར་སྡུད་པའི་མདོ་ལས་རྒྱས་པར་གསུངས་པ་ལྟར་རོ། །གཉིས་པ་ནི། སེམས་ཅན་སྡུག་བསྔལ་དང་བྲལ་འདོད་ཀྱི་སྙིང་རྗེ་བརྟན་པོ་ཞིག་སྐྱེ་བ་ལ་སེམས་ཅན་དེ་ཡིད་འོང་གི་རྣམ་པ་ཅན་དུ་བསམ་དགོས་ཤིང་། དེ་ཡང་ཐོག་མར་མར་བསྒོམ་པ་དང་དེའི་དྲིན་དྲན་པ་དང་དྲིན་གཟོ་བ་གསུམ་ནི་ཡིད་འོང་དུ་སྒྲུབ་བྱེད་ཡིན་ལ། དེ་ལས་བྱམས་པ་དང་དེ་སྙིང་རྗེ་ཁྱད་པར་ཅན་སྐྱེ་བར་འགྱུར་རོ། །སྙིང་རྗེ་དང་བྱང་ཆུབ་ཀྱི་སེམས་ཀྱི་བར་དུ་ལྷག་བསམ་བཅུག་པ་ནི་བྱམས་སྙིང་རྗེ་ཙམ་ཞིག་ནི་ཉན་རང་ལ་ཡང་ཡོད་ལ། སེམས་ཅན་ཐམས་ཅད་སྡུག་བསྔལ་ལས་སྐྱོབ་འདོད་དང་བདེ་བ་ལ་འགོད་འདོད་ཀྱི་ཁུར་འཁྱེར་བ་ནི་ཉན་རང་ལ་མེད་པས་འདིར་དེ་ལྟ་བུའི་བྱམས་སྙིང་རྗེ་དང་ལྡན་པའི་ལྷག་བསམ་བསྐྱེད་པ་ཡིན་ནོ། །གཉིས་པ་རིམ་ཅན་དུ་སྦྱང་བ་ལ་གསུམ། །གཞན་དོན་དོན་གཉེར་དང་། བྱང་ཆུབ་དོན་གཉེར་གྱི་བློ་སྦྱང་བ་དང་། སྦྱངས་པའི་འབྲས་བུ་སེམས་བསྐྱེད་ངོས་བཟུང་བའོ། །དང་པོ་ལ་གཉིས། བློ་དེ་སྐྱེ་བའི་གཞི་དང་། བློ་དེ་བསྐྱེད་ཚུལ་ལོ། །དང་པོ་ལ་གཉིས། སེམས་ཅན་ལ་སེམས་སྙོམས་པར་བསྒྲུབ་པ་དང་། སེམས་ཅན་ཡིད་འོང་གི་རྣམ་པ་ཅན་དུ་བསྒྲུབ་པའོ། །དང་པོ་ནི། སེམས་ཅན་ལ་ཆགས་སྡང་གིས་རིས་སུ་གཅོད་པ་བཀག་ནས་ཕྱོགས་རིས་མེད་པའི་བཏང་སྙོམས་བསྒོམ་པར་བྱ་སྟེ། ཆགས་སྡང་གིས་མི་འདོད་པ་དུ་མ་བསྐྱེད་པས་ཆགས་སྡང་བྱ་བར་མི་རིགས་པའི་ཕྱིར་ཏེ། སེམས་ཅན་རྣམས་དགྲ་གཉེན་ཡིན་ན་ཡིན་མཉམ་དང་མིན་ན་མིན་སྙམ་དུ་མཚུངས་པའི་ཕྱིར་ཏེ། སེམས་ཅན་ལས་སྔོན་རང་གི་དགྲ་གཉེན་དུ་མ་གྱུར་པ་མེད་པའི་ཕྱིར་རོ། །ཚུལ་དེ་ལྟར་བསམས་ན་ཆགས་སྡང་གཉིས་ཀ་ལྡོག་པར་འགྱུར་རོ། །བཏང་སྙོམས་བསྒོམས་པས་ཆགས་སྡང་གི་རང་རོང་རྣམས་ཞི་བར་འགྱུར་ཞིང་ཞིང་ས་ལེགས་པར་དུལ་བ་ལྟར་ཡིད་དུ་འོང་བའི་ཆུ་ཡིས་རྒྱུད་བརླན་ཏེ་སྙིང་རྗེ་ཆེན་པོ་བདེ་བླགས་ཏུ་སྐྱེ་བར་བཤད་པས་གནད་ཆེའོ། །འདི་ལ་གསུམ། མར་བསྒོམ་པ་ནི་འཁོར་བ་ཐོགས་མ་མེད་པ་ནས་ལུས་འདི་མ་བླངས་བྱ་བ་ནི་ཅི་ཡང་མེད་པས་མ་ལ་སོགས་པའི་གཉེན་དུ་མ་གྱུར་པའང་མེད་དོ། །དྲིན་དྲན་པ་ནི་མར་གྱུར་ནས་ཕན་སྣ་ཚོགས་བཏགས་ཤིང་གནོད་པ་དུ་མ་ལས་སྐྱོབ་པས་དྲིན་ཤིན་ཏུ་ཆེ་སྟེ་རྒྱས་པར་ནི་འདིར་མི་བརྗོད་དེ་ལམ་རིམ་སོགས་ནས་ཤེས་པར་བྱའོ། །དེ་ནི་ཐོག་མར་ཚེ་འདིའི་མ་དང་དེ་ནས་ཕ་དང་གཉེན་དང་འཛའ་བོ་དང་བར་མ་དང་དགྲ་རྣམས་ལའང་རིམ་གྱིས་སྦྱར་ནས་བསམ་པར་བྱའོ། །དྲིན་དུ་གཟོ་བ་ནི་དེ་ལྟ་བུའི་མ་རྣམས་ནི་སྐྱེ་ཤི་འཕོས་ནས་ངོ་མ་ཤེས་པས་མར་གྱུར་པས་ཕན་བཏགས་ཚུལ་མ་ངེས་པ་མ་གཏོགས། ངེས་ན་ཕན་བཏགས་པའི་ལན་དུ་དྲིན་གཟོ་དགོས་ཏེ། ཕན་བཏགས་པའི་ལན་དུ་དྲིན་མི་གཟོ་ན་ནི་མ་རབས་སུ་འགྱུར་བའི་ཕྱིར་རོ། །དེའི་ལན་དུ་དྲིན་གཟོ་དགོས་པས་གཟོ་ཚུལ་ནི། འཁོར་བའི་ཕུན་ཚོགས་ཀྱིས་ཕན་འདོགས་དགོས་ཀྱང་། དེ་མི་གཙོ་སྟེ་འཁོར་བའི་ཕུན་ཚོགས་ཀྱིས་མ་བསླུས་པ་མེད་པའི་ཕྱིར་རོ། །དེས་ན་ཞི་བ་མྱང་འདས་ཀྱི་བདེ་བ་ལ་འགོད་པར་བྱའོ་སྙམ་པའི་བྱམས་པ་དང་། སྡུག་བསྔལ་ཐམས་ཅད་ལས་སྐྱོོབ་པར་བྱའོ་སྙམ་པའི་སྙིང་རྗེས་ཕན་འདོགས་དགོས་སོ། །དེ་ལྟ་བུའི་དོན་རྫོགས་པར་བྱེད་པ་ནི་ད་ལྟ་མི་ནུས་པས་འཚང་རྒྱ་དགོས་ཀྱང་། དེའི་ཚེ་མར་གྱུར་པའི་སེམས་ཅན་རྣམས་ནི་ངན་སོང་དང་འཁོར་བར་སྡུག་བསྔལ་སྣ་ཚོགས་ཀྱིས་གཟིར་བས་ན་སྡུག་བསྔལ་དེ་ལས་སྐྱོབ་ཅིང་ཐར་བར་བྱེད་པ་ནི་བུ་བདག་ལ་རེ་དགོས་པས་བདག་གིས་ཀྱང་དོན་དེ་བསྒྲུབ་དགོས་ཏེ། དེ་བདག་གིས་མི་བསྒྲུབ་ན་སུས་བསྒྲུབ་སྙམ་དུ་དྲིན་གཟོ་བའི་བསམ་པ་སྦྱང་བར་བྱའོ། །གཉིས་པ་བློ་དེ་བསྐྱེད་པའི་ཚུལ་དངོས་ལ་གསུམ་ལས། དང་པོ་ནི། བྱམས་པ་བསྒོམ་པར་བྱ་སྟེ་དེའི་དམིགས་པ་ནི་བདེ་བ་འདོད་པའི་སེམས་ཅན་ནོ། །རྣམ་པ་ནི་བདེ་བ་དང་ལྡན་ན་ཅི་མ་རུང་སྙམ་པ་དང་བདེ་བ་དང་ལྡན་པར་གྱུར་ཅིག་སྙམ་པ་དང་བདེ་བ་དང་ལྡན་པར་བྱའོ་སྙམ་པའོ། །ཕན་ཡོན་ནི། ཏིང་འཛིན་རྒྱལ་པོ་ལས། བྱེ་བ་ཁྲག་ཁྲིག་དཀྲིགས་པའི་ཞིང་དག་ནི། །མཆོད་པ་རྣམ་པ་དཔག་མེད་ཇི་སྙེད་པ། །སྐྱེས་མཆོག་རྣམས་ལ་དེ་ཡིས་རྟག་མཆོད་པ། །བྱམས་པའི་སེམས་ཀྱི་གྲངས་དང་ཆར་མི་ཕོད། ཅེས་དང་། རིན་ཆེན་ཕྲེང་བ་ལས། རྫིའུ་སུམ་བརྒྱའི་ཁ་ཟས་དག །ཉིན་རེ་དུས་གསུམ་སྦྱིན་པས་ཀྱང་། བྱམས་པ་ཡུད་ཙམ་ཐང་གཅིག་གི །བསོད་ནམས་དག་ལ་ཆར་མི་ཕོད། །ཞེས་པ་ནས། གལ་ཏེ་གྲོལ་བར་མ་གྱུར་ཀྱང་། །བྱམས་ཆོས་ཡོན་ཏན་བརྒྱད་འཐོབ་པོ། །ཞེས་གསུངས་པ་ལྟར་རོ། །བསྒོམ་ཚུལ་ནི་སེམས་ཅན་སྡུག་བསྔལ་གྱིས་མནར་ཚུལ་བསམས་ན་སྙིང་རྗེ་སྐྱེ་བ་ལྟར་སེམས་ཅན་བདེ་བས་ཕོངས་ལུགས་ཡང་ཡང་བསམས་ན་ནི་བྱམས་པ་སྐྱེའོ། །སྔོན་ལ་བདེ་བ་དང་ལྡན་འདོད་དང་དེ་ནས་བདེ་བ་ལ་འགོད་འདོད་རིམ་ཅན་དུ་བྱ་ཞིང་། གོ་རིམ་ནི་ཐོག་མར་གཉེན་ནས་བསྒོམ་པ་སོགས་སྙིང་རྗེ་དང་འདྲའོ། །གཉ ིས་པ་སྙིང་རྗེའི་དམིགས་པ་ནི་སྡུག་བསྔལ་ཅན་གྱི་སེམས་ཅན་དང་། རྣམ་པ་ནི་སྡུག་བསྔལ་དང་བྲལ་ན་སྙམ་པ་དང་བྲལ་བར་གྱུར་ཅིག་སྙམ་པ་དང་བྲལ་བར་བྱའོ་སྙམ་པའོ། །དེ་ལ་སོ་སོར་མ་ཕྱེ་བར་བསྒོམས་ན་སྐྱེ་བ་འབྱུང་ཡང་སོ་སོར་ཕྱེ་སྟེ་བསྒོམས་ན་ནི་རྣམ་དག་སྐྱེ་ཞིང་བརྟན་པར་འགྱུར་རོ། །བསྒོམ་ཚུལ་ནི་སེམས་ཅན་རྣམས་སྡུག་བསྔལ་སྣ་ཚོགས་ཀྱིས་གཟིར་ཚུལ་སྔར་བཤད་པ་ལྟར་བསམ་པའོ། །འདི་ནི་ཐོག་མར་རང་སྟེང་དུ་བསམ་པར་བྱས་ན་ནི་གནད་དུ་འགྲོ་ལ། གཞན་དུ་ན་དེ་ཙམ་གནད་དུ་མི་འགྲོའོ། །སྙིང་རྗེ་ཆེན་པོ་སྐྱེས་པའི་ཚད་ནི། མས་བུ་སྡུག་བསྔལ་གྱིས་གཟིར་བ་ལས་ཐར་འདོད་སྐྱེ་བའི་ཚོད་ཙམ་དུ་སྐྱེ་དགོས་པར་བཤད་ཀྱང་། དེའི་ཚེ་མ་ལ་སྡུག་བསྔལ་འབྱུང་བ་ལྟར་སྙིང་རྗེ་སྒོམ་པ་པོ་ལ་གདུང་བ་ངེས་པར་སྐྱེ་མི་དགོས་ཏེ་དགོས་ན་སངས་རྒྱས་ལའང་སྡུག་བསྔལ་འབྱུང་བར་ཐལ་བའི་ཕྱིར་རོ། །དེས་ན་མས་བུ་སྡུག་བསྔལ་ལས་ཐར་ན་སྙམ་པ་དེ་ཚིག་ཙམ་མ་ཡིན་པར་སྙིང་ཐག་པ་ནས་ཡིན་པ་དེ་བཞིན་དུ་སྙིང་རྗེ་དེ་ཡང་ཚིག་ཙམ་མམ་བཅོས་མ་ཙམ་མ་ཡིན་པར་སྙིང་ཐག་པ་ནས་སྐྱེ་དགོས་པའི་དོན་ཏེ། བྱམས་པ་ཆེན་པོ་སྐྱེས་པའི་ཚད་ཀྱང་དེས་ཤེས་པར་བྱའོ། །གསུམ་པ་ལྷག་བསམ་ནི། བྱམས་པ་དང་སྙིང་རྗེ་སྦྱོང་བའི་སྐབས་སུ་ཅུང་སོང་ཡང་འདིར་ནི་དམིགས་ཀྱིས་བསལ་ཏེ་བདེ་བས་ཕོངས་ཤིང་སྡུག་བསྔལ་གྱིས་གཟིར་བའི་སེམས་ཅན་འདི་དག་བདེ་བ་དང་ལྡན་པ་དང་སྡུག་བསྔལ་ལས་ཐར་བར་བདག་གིས་བྱའོ་སྙམ་པ་སྟེ་ཐ་ན་ཚིག་ཙམ་གྱིས་ཀྱང་སྦྱང་བར་བྱའོ། །གཉིས་པ་བྱང་ཆུབ་དོན་དུ་གཉེར་བའི་བློ་སྦྱང་བ་ནི། གཞན་དོན་ལ་བྱང་ཆུབ་དགོས་པར་མཐོང་ནས་དེ་ཐོབ་འདོད་བསྐྱེད་པ་ཡང་ཡིན་མོད་འདིར་དེ་ཙམ་མིན་པས་སངས་རྒྱས་ཀྱི་སྐུ་གསུང་ཐུགས་ཀྱི་ཡོན་ཏན་རྣམས་དྲན་ནས་བདག་གིས་དེ་ཐོབ་འདོད་བསྐྱེད་པ་སྟེ་གཞན་དོན་ལ་བྱང་ཆུབ་ཐོབ་དགོས་བར་མ་ཟད། རང་དོན་དུའང་རྫོགས་བྱང་ཐོབ་དགོས་པ་ལ་ངེས་པ་དྲང་བར་བྱའོ། །གསུམ་པ་སྦྱངས་པའི་འབྲས་བུ་སེམས་བསྐྱེད་ངོས་བཟུང་བ་ནི། སྤྱིའི་མཚན་ཉིད་ནི་མངོན་རྟོགས་རྒྱན་ལས། སེམས་བསྐྱེད་པ་ནི་གཞན་དོན་ཕྱིར། །ཡང་དག་རྫོགས་པའི་བྱང་ཆུབ་འདོད། ཅེས་གསུངས་པ་ལྟར། གཞན་དོན་དུ་ཡང་དག་པར་རྫོགས་པའི་བྱང་ཆུབ་ལ་དམིགས་ཤིང་རང་གི་གྲོགས་རྫོགས་བྱང་དོན་གཉེར་གྱི་འདུན་པ་དང་མཚུངས་པར་ལྡན་པའི་ཐེག་ཆེན་གྱི་གཙོ་བོ་སེམས་ཡིད་ཀྱི་རྣམ་རིག་ཁྱད་པར་ཅན་ཞིག་སྟེ། དབྱེ་ན་ནི་སྨོན་སེམས་དང་འཇུག་སེམས་གཉིས་སོ། །དེ་གཉིས་ཀྱི་ཁྱད་པར་ལ་བཞེད་ཚུལ་མི་མཐུན་པ་འགའ་རེ་ཡོད་ཀྱང་། དཔེར་ན་གྲོང་ཁྱེར་དུ་འགྲོ་བ་ལ་སྔོན་དུ་དེར་འགྲོ་འདོད་ཀྱི་བསམ་པ་སྐྱེས་པ་ལྟ་བུ་དང་། གྲོང་ཁྱེར་དུ་འགྲོ་བའི་དུས་ཀྱི་གོམ་པ་འདེགས་འཇོག་གི་བྱ་བས་ཟིན་པའི་སྐབས་ཀྱི་བསམ་པ་བཞིན་དུ། ཐོག་མར་སངས་རྒྱས་སུ་གྱུར་ཅིག་སྙམ་ནས་བསྐྱེད་པའི་ཐེག་ཆེན་སེམས་བསྐྱེད་ནི་སྨོན་པ་སེམས་བསྐྱེད་དང་། དེ་ནས་འཇུག་སྡོམ་བཟུང་བ་ནས་སེམས་དེ་འཇུག་པ་སེམས་བསྐྱེད་དུ་འགྱུར་ཏེ། སྤྱོད་འཇུག་ལས། འགྲོ་བར་འདོད་དང་འགྲོ་བ་ཡི། །བྱེ་བྲག་ཇི་ལྟར་ཤེས་པར་ལྟར། །དེ་བཞིན་མཁས་ནས་འདི་གཉིས་ཀྱི། །བྱེ་བྲག་རིམ་བཞིན་ཤེས་པར་བྱ། །ཞེས་དང་། སྒོམ་རིམ་དང་པོ་ལས། དེ་ལ་འགྲོ་བ་མཐའ་དག་ལ་ཕན་པའི་ཕྱིར་སངས་རྒྱས་སུ་གྱུར་ཅིག་ཅེས་གང་ཐོག་མར་དོན་དུ་གཉེར་བ་དེ་ནི་སྨོན་པའི་སེམས་སོ། །གང་ཕན་ཆད་སྡོམ་པ་བཟུང་སྟེ་ཚོགས་རྣམས་ལ་ཞུགས་པ་དེ་ནི་ཞུགས་པའི་སེམས་སོ། །ཞེས་གསུངས་པ་ལྟར་རོ། །གཉིས་པ་ཞི་བ་ལྷའི་གཞུང་ལྟར་སྦྱར་བ་ལ་གསུམ་སྟེ། །བདག་གཞན་བརྗེ་མ་བརྗེའི་ཕན་ཡོན་དང་ཉེས་དམིགས་དང་། བདག་གཞན་བརྗེ་བའི་བསམ་པ་གོམས་ན་བསྐྱེད་ནུས་པ་དང་། བསྒོམ་ཚུལ་དངོས་བཤད་པའོ། །དང་པོ་ནི། སྤྱོད་འཇུག་ལས། འཇིག་རྟེན་བདེ་བ་ཇི་སྙེད་པ། །དེ་ཀུན་གཞན་བདེ་འདོད་ལས་བྱུང་། །འཇིག་རྟེན་སྡུག་བསྔལ་ཇི་སྙེད་པ། །དེ་ཀུན་རང་བདེ་འདོད་ལས་བྱུང་། །མང་དུ་བཤད་ལྟ་ཅི་དགོས་ཏེ། །བྱིས་པ་རང་དོན་བྱེད་པ་དང་། །ཐུབ་པ་གཞན་གྱི་དོན་མཛད་པ། །འདི་གཉིས་ཀྱི་ནི་ཁྱད་པར་ལྟོས། །བདག་བདེ་གཞན་གྱི་སྡུག་བསྔལ་དང་། །ཡང་དག་བརྗེ་བར་མ་བྱས་ན། །སངས་རྒྱས་ཉིད་དུ་མི་འགྲུབ་ཅིང་། །འཁོར་བ་ན་ཡང་བདེ་བ་མེད། །ཅེས་གསུངས་པ་ལྟར་བསམ་པར་བྱའོ། །གཉིས་པ་བློ་དེ་གོམས་ནས་བསྐྱེད་ནུས་ཏེ། དཔེར་ན། སྔར་རང་དང་མི་མཛའ་བ་ཆེན་པོ་འཇིགས་པ་ཞིག་ཡིན་ཡང་ཕྱིས་དེ་དང་མཐུན་པར་བྱས་པ་ན་མཛའ་བ་ཆེན་པོར་འགྱུར་བ་དང་། སྔར་རང་ལ་གཅེས་ཤིང་མཛའ་བ་ཞིག་ཀྱང་རྐྱེན་གཞན་གྱིས་མི་མཛའ་བར་འགྱུར་སྲིད་ཅིང་བློས་ཀྱང་དེ་ལྟར་འཛིན་པ་བཞིན་དུ། བདག་ལ་གཞན་དང་གཞན་ལ་བདག་བཞིན་དུ་བལྟ་བ་ནི་ཡང་ཡང་གོམས་ན་སྐྱེ་བར་འགྱུར་ཏེ། དེ་ཉིད་ལས། འདི་ལྟར་གོམས་པའི་མཐུ་ཡིས་ནི། །གང་གི་མི་ཐོས་འཇིགས་པ་ཡང་། །དེ་ཉིད་མེད་ན་དགར་མི་འགྱུར། །ཞེས་གསུངས་པ་ལྟར་རོ། །གཞན་གྱི་ལུས་བདག་གི་ལུས་མིན་པས་རང་གི་ཡིན་པའི་བློ་འདྲ་བ་ཇི་ལྟར་བྱ་སྙམ་ན། དེ་ནི་སྤྱོད་འཇུག་ལས་གསུངས་པའི་དོན་བསྡུ་ན་རང་གི་ལུས་འདི་ནི་རང་ལས་གཞན་ཕ་མའི་ས་བོན་ལས་གྲུབ་པ་ཡིན་ཡང་། དེ་ལ་གོམས་པའི་དབང་གིས་ངར་འཛིན་སྐྱེ་བ་ལྟར་གཞན་གྱི་ལུས་ལའང་རང་གི་ལུས་བཞིན་གཅེས་འཛིན་གོམས་པར་བྱས་ན་ནི་སྐྱེའོ། །གསུམ་པ་བསྒོམ་ཚུལ་དངོས་ནི། འདིར་བདག་ཉིད་གཞན་དང་གཞན་བདག་ཉིད་དུ་བསྒོམ་པ་མིན་གྱི། རང་གཅེས་འཛིན་དང་གཞན་གཅེས་འཛིན་གྱི་བློ་གཉིས་གོ་ས་བརྗེ་བ་སྟེ་དེ་ཡང་གཞན་ལ་རང་ལྟར་གཅེས་པར་འཛིན་ཅིང་། རང་ལ་གཞན་ལྟར་ཡལ་བར་འདོར་བའི་བློ་བསྐྱེད་པའོ། །དེའི་དོན་ནི་རང་སྡུག་བསྔལ་ཡང་བཟོད་དེ། སེམས་ཅན་སྡུག་བསྔལ་བར་མ་གྱུར་ཅིག་སྙམ་པའོ། །དེའི་ཕྱིར་ཡང་གཞན་གྱི་སྡུག་བསྔལ་རང་གིས་ལེན་པ་དང་། རང་གི་བདེ་དགེ་གཞན་ལ་གཏོང་བ་ལ་བློ་སྦྱོང་བ་ཡིན་ནོ། །བདག་གཞན་གཉིས་ཀྱང་བལྟོས་ནས་འཇོག་གི་ངོ་བོ་ཉིད་ཀྱིས་མིན་ཏེ། དཔེར་ན་ཕར་རི་དང་ཚུར་རིའི་བློ་ལྟ་བུ་དང་རང་ལ་དབང་བའི་བུད་མེད་དང་། དངོས་པོ་རྣམས་གཞན་གྱི་ལག་ཏུ་སོང་བ་ན་གཞན་གྱི་ཡིན་པའི་འདུ་ཤེས་སྐྱེ་བ་ཡིན་ནོ། །དེ་ལྟར་ཡང་བསླབ་བཏུས་ལས། བདག་དང་གཞན་ཉིད་བལྟོས་པ་སྟེ། ཕ་རོལ་ཚུ་རོལ་ཇི་བཞིན་བརྫུན། །ཞེས་གསུངས་པ་ལྟར་རོ། །འདིར་གཏོང་ལེན་གཉིས་ཀྱི་ཚེ་རླུང་ལ་བསྐྱོན་པའི་འཕྲུལ་འདེགས་ཞིག་མཛད་པའི་ལག་ལེན་སྣང་བ་ནི་ཕུན་སུམ་ཚོགས་པའི་ཡན་ལག་ཏུ་མཛད་པ་ཡིན་གྱི། གཞུང་གི་དངོས་བསྟན་ལ་མི་འབྱུང་བས་མ་བྱས་ཀྱང་ཆད་ལྷག་ཏུ་མི་འགྱུར་རོ། །གང་ལྟར་ཡང་རང་གི་ལུས་ལོངས་སྤྱོད་དགེ་རྩ་རྣམས་གཞན་ལ་གཏོང་བའི་བློ་དང་། གཞན་གྱི་སྡུག་བསྔལ་ཐམས་ཅད་རང་ལ་ལེན་པའི་དམིགས་རྣམ་ལ་གོམས་པར་བྱ་དགོས་སོ། །བདག་གཞན་བརྗེ་བའི་བློ་སྦྱོང་བ་འདི་བྱམས་སྙིང་རྗེ་གཉིས་སྦྱོང་ཚུལ་ཡིན་ཏེ་བདེ་དགེ་གཞན་ལ་གཏོང་བ་ནི་བྱམས་པ་དང་། སྡུག་བསྔལ་རང་གིས་ལེན་པ་ནི་སྙིང་རྗེ་སྦྱོང་བ་ཡིན་པའི་ཕྱིར་རོ། །མདོར་ན་བྱང་ཆུབ་ཀྱི་སེམས་སྐྱེ་བའི་རྒྱུའི་གཙོ་བོ་མེད་དུ་མི་རུང་བ་ནི་བྱམས་སྙིང་རྗེ་གཉིས་ཡིན་ལ། དེ་སྐྱེ་བའི་དམིགས་པ་ནི་སེམས་ཅན་ཡིན་པས་སེམས་ཅན་ལ་ཕན་བདེ་སྒྲུབ་འདོད་ངེས་པར་ཤེས་ཤིང་། སྒྲུབ་ཚུལ་མང་ཡང་སྐབས་འདིར་བྱམས་སྙིང་རྗེ་གཉིས་ཀྱི་སྒོ་ནས་སྡུག་བསྔལ་སེལ་བ་དང་བདེ་བ་སྦྱིན་པའི་སྒོ་ནས་བྱ་བ་ཡིན་ཏེ། དེ་ལྟར་གོམས་པ་ལས་ལྷག་བསམ་དང་བྱང་ཆུབ་ཀྱི་སེམས་བདེ་བླག་ཏུ་སྐྱེ་བར་འགྱུར་རོ། །གསུམ་པ་སེམས་དེ་སྐྱེས་པའི་ཚད་ནི་བྱམས་སྙིང་རྗེ་གཉིས་སྐྱེས་པའི་ཚད་བཤད་པའི་སྐབས་སུ་འདིས་ནི་བྱང་ཆུབ་ཀྱི་སེམས་སྐྱེས་པའི་ཚད་ཀྱང་ཤེས་པར་བྱའོ་ཞེས་གསུངས་ཏེ་དེ་ཙམ་དུ་མི་གསལ་ཡང་། བྱམས་སྙིང་རྗེ་ལྷག་བསམ་གསུམ་ལ་བཅོས་མིན་གྱི་མྱོང་བ་ཐོན་པའི་མཇུག་ཏུ་མཚན་ཉིད་བཤད་པ་ལྟ་བུའི་སེམས་བསྐྱེད་དངོས་སུ་སྐྱེ་བར་འགྱུར་རོ། །བཞི་པ་སྨོན་སེམས་ཆོ་གས་བཟུང་བའི་སྐོར་མང་བས་བསྡུ་ན་མ་ཐོས་པ་ཐོབ་པར་བྱེད་པ། ཐོབ་པ་མི་ཉམས་པར་སྲུང་བ། ཉམས་ན་ཕྱིར་བཅོས་པ་གསུམ། དང་པོ་ལ་གང་ལས་བླང་བའི་ཡུལ། གང་གིས་ལེན་པའི་རྟེན། ཇི་ལྟར་བླང་བའི་ཆོ་ག་དང་གསུམ། དང་པོ་ནི། བྱང་སེམས་ཀྱི་སྡོམ་པ་དང་ལྡན་པའི་བླ་མའི་དྲུང་དུ་ལེན། གཉིས་པ་ནི། སེམས་བསྐྱེད་སྐྱེ་བའི་རྟེན་དུ་རུང་བས་ལེན། གསུམ་པ་ཆོ་ག་ལ་སྦྱོར་དངོས་མཇུག་གསུམ་གྱི་དང་པོ་སྦྱོར་བ་ལ་སྐྱབས་སུ་འགྲོ་བ་དང་ཚོགས་བསག་པ་དང་། བསམ་པ་སྦྱོང་བ་ལ་གསུམ། དང་པོ་ལ་རྟེན་དང་མཆོད་རྫས་བཤམས་པ། གསོལ་བ་དང་སྐྱབས་སུ་འགྲོ་བ། བསླབ་བྱ་བརྗོད་པ་གསུམ་ནི་ལམ་རིམ་ལྟར་རོ། །གཉིས་པ་ཚོགས་བསག་པ་ནི་བླ་མ་དང་རྟེན་གྱི་དྲུང་དུ་ཡན་ལག་བདུན་པ་བྱའོ། །བསམ་པ་སྦྱང་བ་ནི། བྱམས་པ་དང་སྙིང་རྗེའི་དམིགས་རྣམ་གསལ་གདབ་པའོ། །གསུམ་པ་དངོས་གཞིའི་ཆོ་ག་ནི་བླ་མའི་དྲུང་དུ་འཁོད་བ་ལ་ཕྱོགས་བཅུ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་བདག་ལ་དགོངས་སུ་གསོལ་ཞེས་སོགས་ལྟར་ལན་གསུམ་བྱའོ། །གསུམ་པ་མཇུག་ཏུ་སྨོན་སེམས་ཀྱི་བསླབ་བྱ་རྣམས་བརྗོད་པར་བྱའོ། །གཉིས་པ་མི་ཉམས་པར་བསྲུང་བ་ལ་བསླབ་བྱ་བརྗོད་དགོས་ཤིང་། དེ་ལ་ཚེ་འདིར་མི་ཉམས་པ་དང་། སྐྱེ་བ་གཞན་དུ་མི་ཉམས་པའི་བསླབ་བྱའོ། །དང་པོ་ལ་བཞི་སྟེ། སེམས་བསྐྱེད་ཀྱི་ཕན་ཡོན་དྲན་པ། སེམས་བསྐྱེད་གོང་དུ་འཕེལ་བའི་ཆེད་དུ་ཉིན་མཚན་དུ་ལན་དྲུག་ཏུ་བསྐྱེད་པ། སེམས་ཅན་བློས་མི་སྤང་བ། ཚོགས་གཉིས་བསག་པ་ལ་བསླབ་པའོ། །དང་པོ་ནི། སྔར་ཕྱོགས་ཙམ་བཤད་ཅིང་གཞན་ཡང་མང་ངོ་། །གཉིས་པ་ནི་ཆོ་ག་རྒྱས་པ་མ་གྲུབ་ན་ནི་སངས་རྒྱས་ཆོས་ཚོགས་མ་ལན་གསུམ་གསུམ་བརྗོད་ཅིང་བཟུང་ངོ་། །གསུམ་པ་སེམས་ཅན་བློས་མི་སྤང་བ་ནི། སེམས་ཅན་རྣམས་བློས་ནམ་ཡང་མི་འདོར་བ་སྟེ་སེམས་ཅན་གཅིག་གིས་རང་ལ་མི་འཐད་པའི་ལོག་བསྒྲུབ་བྱས་པ་ཡིན་ནའང་། རེ་ཞིག་ལྟ་བུ་དམིགས་བསལ་མ་གཏོགས་ད་ནས་འདིའི་དོན་གཏན་ནས་མི་བྱའོ་སྙམ་དུ་མི་བསམ་སྟེ་བསམས་ན་སེམས་ཅན་བློས་སྤངས་པས་སེམས་བསྐྱེད་ཉམས་ཤིང་གཏོང་པར་ཡང་འགྱུར་རོ། །བཞི་པ་ནི་བསོད་ནམས་དང་ཡེ་ཤེས་ཀྱི་ཚོགས་གཉིས་ལ་བསླབ་པའོ། །གཉིས་པ་སྐྱེ་བ་གཞན་དུ་ཉམས་པར་བསྲུང་བ་ལ་གཉིས། ནག་པོའི་ཆོས་བཞི་སྤོང་བ་དང་། དཀར་པོའི་ཆོས་བཞི་བསྒྲུབ་པའོ། །དང་པོ་ལ་བཞི་ལས། དང་པོ་བླ་མ་དང་མཁན་སློབ་ལྟ་བུ་ལ་བརྫུན་གྱིས་དབུ་སྐོར་ནས་བསླུ་བའོ། །གཉིས་པ་ནི། གཞན་འགྱོད་དུ་མི་རུང་བའི་གནས་ལ་འགྱོད་དུ་བཅུག་པའོ། །གསུམ་པ་ནི་བྱང་སེམས་ཀྱི་སྐྱོན་བརྗོད་དེ་བསྔགས་པ་མ་ཡིན་པ་སྨྲ་བའོ། །བཞི་པ་ནི། སེམས་ཅན་ལ་གཡོ་སྒྱུ་སྣ་ཚོགས་བྱེད་པའོ། །གཉ ིས་པ་དཀར་ཆོས་བཞི་ལས། དང་པོའི་ཡུལ་ནི་སེམས་ཅན་རྣམས་སོ། །བྱ་བ་ནི་ཤེས་བཞིན་དུ་གནོད་སེམས་ཀྱིས་བརྫུན་མི་སྨྲ་བའོ། །གཉིས་པ་ནི། སེམས་ཅན་ལ་གཡོ་སྒྱུ་མི་བྱེད་པ་སྟེ་འདི་ནི་ནག་ཆོས་བཞི་པའི་གཉེན་པོ་ཡང་ཡིན་ནོ། །གསུམ་པ་ནི། སེམས་ཅན་ཐམས་ཅད་ལ་བཇགས་པ་སྟོན་པ་དང་འདྲ་བའི་འདུ་ཤེས་བསྐྱེད་ཅིང་བཇགས་པ་བརྗོད་པའོ། །དཀར་ཆོས་བཞི་པོ་འདིར་རིམ་པ་ལྟར་ནག་ཆོས་བཞིའི་གཉེན་པར་བཤད་པའོ། །གསུམ་པ་ཉམས་ན་ཕྱིར་བཅོས་པ་ནི། སེམས་ཅན་ཇོས་སྤངས་པ་ལྟ་བུས་སེམས་བསྐྱེད་ཉམས་ན་བཤགས་སྡོམ་བྱ་ཞིང་སླར་ཇ་མ་སློབ་དཔོན་གྱི་དྲུང་དུ་ལེན་པར་བྱའོ། །འདི་དག་ནི་སྨོན་སེམས་ཆོ་གས་ལེན་པའི་སྐོར་ཡིན་ལ། འསྔུག་སེམས་ཆོ་གས་ལེན་ཚུལ་རྒྱས་པ་ནི། རྗེས་བྱང་སའི་ཚུལ་ཁྲིམས་ཀྱི་ལེའུའི་རྣམ་བཤད་དུ་གསུངས་པ་ལྟར་ཡིན་ཞིང་། བསྡུས་པ་ནི། དཀོན་མཆོག་གསུམ་ལ་བདག་སྐྱབས་མཆི། །ཞེས་སོགས་ཡོངས་རྫོགས་དང་། ཇི་ལྟར་ཇོན་གྱི་བདེ་གཤེགས་ཀྱིས། །ཞེས་སོགས་གསུངས་པ་ལྟར་ཡིན་ཏེ་གཞན་ཡང་མང་ངོ་། །གསུམ་པ་སྤྱོད་པ་ལ་སློབ་ཚུལ་ལ་གསུམ། སློབ་དགོས་པའི་རྒྱུ་མཚན་ཐབས། ཤེས་རེ་རེ་ཙམ་གྱིས་མི་ཆོག་པ། སློབ་པའི་རིམ་པ་བཤད་པའོ། །དང་པོ་ནི། དེ་ལྟར་སེམས་བསྐྱེད་ནས་སྤྱོད་པ་ལ་བསློབ་དགོས་ཏེ་སྦྱོད་པ་ལ་མ་བསླབ་པར་སེམས་བསྐྱེད་པ་ཙམ་གྱིས་འཚང་རྒྱ་བ་མི་སྲིད་པའི་ཕྱིར་རོ། །གཉིས་པ་ནི། སངས་རྒྱས་སྒྲུབ་པའི་ཚུལ་ལ་ཐབས་ཤེས་ཚང་ལ་མ་ནོར་བ་ཞིག་དགོས་ཏེ། མ་ཚང་ཞིང་ནོར་ན་ནི་འབྲས་བུ་སངས་རྒྱས་འགྲུབ་པ་མི་སྲིད་པའི་ཕྱིར་ཏེ། དཔེར་ན། འབྲས་བུ་ནས་ཀྱི་མྱུ་གུ་རྫོགས་པར་འབྱུང་བ་ལ་རྒྱུ་རྐྱེན་གཉིས་ཀ་ཚོགས་དགོས་ཤིང་མ་ཚང་ན་མི་འབྱུང་བ་བཞིན་ནོ། །དེ་བཞིན་དུ་སངས་རྒྱས་བསྒྲུབ་པའི་རྒྱུ་ལ་ནི་ཐབས་ཤེས་གཉིས་ཀ་དགོས་ཏེ། དེ་གཉིས་གང་རུང་རེ་རེ་བས་མི་ཆོག་པའི་ཕྱིར་ཏེ། དཔེར་ན། བུ་བསྐྱེད་པ་ལ་ཕ་མ་གཉིས་དགོས་ཤིང་རེ་རེ་བ་ཙམ་གྱིས་མི་ཆོག་པ་བཞིན་ནོ། །འདིར་ཐབས་ཤེས་གཉ ིས་ཇི་ལྟ་བུ་ཞིག་ལ་འཇོག་པའི་ཚུལ་ཡོད་དེ། བྱང་ཆུབ་ཀྱི་སེམས་ཀྱིས་ཟིན་པའི་ཕར་ཕྱིན་དང་པོ་ལྔ་ནི་ཐབས་ཡིན་ལ། ཕར་ཕྱིན་ཐ་མ་ནི་ཤེས་རབ་ཡིན་པའི་ཕྱིར་རོ། །སངས་རྒྱས་བསྒྲུབ་པ་ལ་ཐབས་ཤེས་དེ་གཉིས་ཀ་ཚང་དགོས་ཏེ། སངས་རྒྱས་ཀྱི་གོ་འཕང་ནི་ཚོགས་གཉིས་ཀྱིས་ཐོབ་དགོས་ཤིང་དེ་ལ་ཐབས་ཀྱིས་གཟུགས་སྐུ་དང་ཤེས་རབ་ཀྱིས་ཆོས་སྐུ་བསྒྲུབ་དགོས་པའི་ཕྱིར་ཏེ། བསོད་ནམས་ཀྱི་ཚོགས་ཀྱིས་གཟུགས་སྐུ་དང་ཡེ་ཤེས་ཀྱི་ཚོགས་ཀྱིས་ཆོས་སྐུ་བསྒྲུབ་དགོས་པའི་ཕྱིར་ཏེ། རིན་ཆེན་འཕྲེང་བ་ལས། གཟུགས་ཀྱི་སྐུ་ནི་མདོར་བསྡུ་ན། རྒྱལ་པོ་བསོད་ནམས་ཚོགས་ལས་འཁྲུངས། །ཆོས་ཀྱི་སྐུ་ནི་མདོར་བསྡུ་ན། །རྒྱལ་པོ་ཡེ་ཤེས་ཚོགས་ལས་འཁྲུངས། །ཞེས་གསུངས་པའི་ཕྱིར། གསུམ་པ་བསླབ་བྱ་ལ་སློབ་པའི་རིམ་པ་ཉིད་བཤད་པ་ལ་གཉིས། ཐེག་པ་ཆེན་པོ་སྤྱི་དང་། རྡོ་རྗེའི་ཐེག་པ་ལ་སློབ་པའི་ཚུལ་ལོ། །དང་པོ་ལ་གསུམ། བསླབ་པ་ལ་སློབ་འདོད་སྦྱང་བ་དང་། སྡོམ་པ་བཟུང་བ་དང་། བཟུང་ནས་ཇི་ལྟར་བྱ་བའི་ཚུལ་ལོ། །དང་པོ་ནི། བསླབ་བྱ་ལ་སློབ་པའི་ཕན་ཡོན་རྣམས་ཤེས་ནས་སློབ་འདོད་སྦྱང་དགོས་ཤིང་། དེའི་སྔོན་དུ་བསླབ་བྱ་རྣམས་ཉན་ནས་ཤེས་དགོས་ཏེ། དེ་ལ་མང་ཡང་གཞུང་འདི་དང་། བྱང་སའི་ཚུལ་ཁྲིམས་ཀྱི་ལེའུ་ནས་བཤད་པ་དེ་དག་ཉན་ཅིང་ཤེས་དགོས་པའི་ཕྱིར། གཉིས་པ་བཟུང་བ་ནི། ཚུལ་ཁྲིམས་ཀྱི་ལེའུའི་རྣམ་བཤད་ནས་འབྱུང་བའི་ཆོ་ག་ལྟར་ལེན་དགོས་སོ། །གསུམ་པ་ལ་གསུམ། གང་ལ་བསླབ་པའི་གཞི་དང་། དེར་བསླབ་པ་གཞན་འདུ་ཚུལ་དང་། དེ་ལ་ཇི་ལྟར་བསླབ་པའི་རིམ་པའོ། །དང་པོ་ནི། སྦྱིར་བསླབ་པའི་དབྱེ་བ་མཐའ་ཡས་ཀྱང་རིགས་བསྡུ་ན་ཕྱིན་དྲུག་སྟེ་བསླབ་པའི་གཞིའི་སྡོམ་པ་ཆེན་པོའོ། །གཉིས་པ་ལ་གཉིས། གྲངས་ངེས་དང་། གོ་རིམ་མོ། དང་པོ་ནི། བཅོམ་ལྡན་འདས་ཀྱིས་ཕྱིན་དྲུག་གི་རྣམ་གཞག་གསུངས་པའི་དགོངས་དོན་རྒྱལ་ཚབ་བྱམས་པས་དགོངས་པ་བཞིན་བཀྲལ་བ་འདི་ལ་དྲུག ། མངོན་མཐོ་ལ་བལྟོས་པའི་གྲངས་ངེས། དོན་གཉིས་སྒྲུབ་པ་ལ་ལྟོས་པའི་གྲངས་ངེས། གཞན་དོན་སྒྲུབ་པ་ལ་བལྟོས་པའི་གྲངས་ངེས། །ཐེག་ཆེན་སྡུད་པ་ལ་བལྟོས་པའི་གྲངས་ངེས། བསླབ་གསུམ་ལ་བལྟོས་པའི་གྲངས་ངེས། སངས་རྒྱས་ཀྱི་ཆོས་འགྲུབ་པའི་གཞིའི་གནས་ཀྱི་གྲངས་ངེས་སོ། །དང་པོ་ནི། ལམ་སྒྲུབ་པའི་མངོན་མཐོའི་རྟེན་ཁྱད་པར་ཅན་ཐོབ་པའི་ཚེ་ཕྱིན་དྲུག་ལ་འབད་དགོས་ཏེ། རྟེན་དམན་པའི་ཐོག་ལམ་བསྒྲུབ་པའི་ས་ཆོད་ཆུང་བར་འགྱུར་ཞིང་། རྟེན་ཁྱད་པར་ཅན་ལ་ཕྱིན་དྲུག་སོགས་ཀྱི་སྤྱོད་པ་བསྒྲུབས་ན་ས་ཆོད་ཆེ་བའི་ཕྱིར་རོ། །གཉིས་པ་ནི། རང་གཞན་གྱི་དོན་སྒྲུབ་པར་བྱེད་པ་ལ་ཕྱིན་དྲུག་དགོས་ཏེ། ཐོག་མར་ཟང་ཟིང་གི་སྦྱིན་པས་གཞན་ལ་ཕན་འདོགས་དགོས་ཤིང་། དེ་ལ་གནོད་པ་སྤོང་བའི་ཚུལ་ཁྲིམས་དང་། གནོད་ལན་མི་འཇལ་བའི་བཟོད་པ་དང་། དགེ་ཕྱོགས་ལ་སྤྲོ་བའི་བརྩོན་འགྲུས་དང་། དགེ་བའི་དམིགས་པ་ལ་སེམས་རྩེ་གཅིག་པའི་བསམ་གཏན་དང་། སེམས་རྣམ་པར་གྲོལ་བར་འགྱུར་བའི་ཤེས་རབ་དགོས་པའི་ཕྱིར། གསུམ་པ་གཞན་དོན་རྫོགས་པར་བསྒྲུབ་པ་ལ་ཕྱིན་དྲུག་དགོས་ཏེ། དེ་ཡང་ཐོག་མར་ཟང་ཟིང་གིས་ཕོངས་པ་སེལ་ཞིང་གནོད་བྱེད་ལ་བཟོད་པ་དང་བརྩོན་འགྲུས་བརྩམས་པ་དང་བསམ་གཏན་ལ་བརྟེན་པའི་རྫུ་འཕྲུལ་གྱིས་གཞན་འདུན་པར་བྱས་ཏེ་ཤེས་རབ་ཀྱིས་ཐེ་ཚོམ་བཅད་ནས་གྲོལ་བར་བྱེད་དགོས་ཤིང་། དེས་ནི་རང་གཞན་གཉིས་ཀའི་དོན་སྒྲུབ་པར་འགྱུར་རོ། །བཞི་པའི་གྲངས་ངེས་ནི། ཐེག་ཆེན་ཐམས་ཅད་སྡུས་པ་ལ་ཡང་ཕྱིན་དྲུག་དགོས་ཏེ། ལོངས་སྤྱོད་ལ་མི་ཟད་པ་དང་བསླབ་པ་ལེན་པ་དང་སྡུག་བསྔལ་དང་ལེན་བྱེད་པ་དང་དགེ་ཕྱོགས་ལ་བརྩོན་པ་དང་། ཞི་ལྷག་གི་རྣལ་འབྱོར་བསྒྲུབ་དགོས་པའི་ཕྱིར་རོ། །ལྔ་པའི་གྲངས་ངེས་ནི། བསླབ་གསུམ་རྫོགས་པ་ལ་ཕྱིན་དྲུག་དགོས་ཏེ། ལོངས་སྤྱོད་ལ་མི་བལྟ་བའི་སྦྱིན་པ་ཡོད་ན་དེ་ལ་བརྟེན་པའི་ཚུལ་ཁྲིམས་དང་མི་གཤེ་བའི་བཟོད་པ་རྣམས་འབྱུང་སྟེ་ཚུལ་ཁྲིམས་ཀྱི་འཁོར་ཡིན་ལ། བསམ་གཏན་ནི་ཏིང་ངེ་འཛིན་གྱི་བསླབ་པ་དང་། ཤེས་རབ་ནི་ཤེས་རབ་ཀྱི་བསླབ་པ་སྟེ། བསླབ་པ་གསུམ་ལ་འབད་པ་ནི་བརྩོན་འགྲུས་ཡིན་པའི་ཕྱིར་རོ། །དྲུག་པའི་གྲངས་ངེས་ནི། སངས་རྒྱས་ཀྱི་ཆོས་རྣམས་འགྲུབ་པའི་གཞིའི་གནས་ལ་ཡང་ཕྱིན་དྲུག་དགོས་ཏེ། ཕར་ཕྱིར་དང་པོ་བཞིས་བསམ་གཏན་གྱི་ཕར་ཕྱིན་འགྲུབ་ཅིང་། ལྷག་མཐོང་གིས་དེ་ཁོ་ན་ཉིད་རྟོགས་ནས་གྲོལ་བར་འགྱུར་བའི་ཕྱིར་རོ། །དེའི་ཕྱིར་དེ་དྲུག་ཀ་ལའང་ཕྱིན་དྲུག་དགོས་ཤིང་འབྱུང་ངོ་། །གཉིས་པ་གོ་རིམ་ལ་གསུམ་ལས་སྐྱེ་བའི་རིམ་པ་ནི་སྔ་མ་སྔ་མ་ལ་བརྟེན་ནས་ཕྱི་མ་ཕྱི་མ་སྐྱེ་ཞིང་། དམན་མཆོག་ནི་སྔ་མ་སྔ་མ་དམན་ལ་ཕྱི་མ་ཕྱི་མ་མཆོག་དང་། ཕྲ་རགས་ནི་སྔ་མ་རགས་ཤིང་ཕྱི་མ་ཕྲ་སྟེ། མདོ་སྡེའི་རྒྱན་ལས། སྔ་མ་ལ་བརྟེན་ཕྱི་མ་སྐྱེ། །དམན་དང་མཆོག་ཏུ་གནས་ཕྱིར་དང་། །རགས་པ་དང་ནི་ཕྲ་བའི་ཕྱིར། །དེ་དག་རིམ་པར་བསྟན་པ་ཡིན། །ཞེས་གསུངས་སོ། །གསུམ་པ་དེ་ལ་སློབ་པའི་རིམ་པ་ལ་གཉིས། སྤྱོད་པ་སྤྱི་ལ་སློབ་ཚུལ་དང་། ཁྱད་པར་དུ་ཕར་ཕྱིན་ཐ་མ་གཉིས་ལ་སློབ་ཚུལ་ལོ། །དང་པོ་ལ་གཉིས། རང་རྒྱུད་སྨིན་བྱེད་ཕྱིན་དྲུག་དང་། གཞན་རྒྱུད་སྨིན་བྱེད་བསྡུ་བཞི་ལ་བསླབ་ཚུལ་ལོ། །དང་པོ་ལ་སྦྱིན་པ་ནས་ཤེས་རབ་ཀྱི་བར་དྲུག་གོ །དང་པོ་སྦྱིན་པ་ལ་བཞི། སྦྱིན་པའི་ངོ་བོ། དེ་བསྐྱེད་པའི་ཐབས། སྦྱིན་པའི་རབ་དབྱེ། དེ་དག་གི་དོན་བསྡུ་བའོ། །དང་པོ་ནི། གཏོང་བའི་སེམས་དང་དེས་ཀུན་ནས་བསླངས་པའི་ལུས་ངག་གི་ལས་སོ། །གཉིས་པ་ནི། བདོག་པའི་དངོས་པོ་ཐམས་ཅད་གཞན་ལ་གཏོང་བའི་བསམ་པ་སྙིང་ཐག་པ་ནས་བསྐྱེད་སྟེ། དེ་ལས་འཛིན་པའི་ཉེས་དམིགས་དང་བཏང་བའི་ཕན་ཡོན་བསམ་དགོས་ཤིང་། དངོས་པོ་རྣམས་མཛད་པའི་མཐའ་ཅན་ཡིན་པའི་ཕྱིར་འདི་བཏང་པ་ལས་སྙིང་པོ་ལེན་སྙམ་དུ་ཡང་ཡང་གོམས་པར་བྱའོ། དངོས་པོ་དངོས་སུ་གཏོང་མི་གཏོང་གང་ཡིན་ཡང་གཞན་ལ་གཏོང་བའི་བསམ་པ་སྦྱོང་བ་དང་། དགེ་རྩ་ཆེ་ཆུང་གང་ཡིན་ཀྱང་སེམས་ཅན་ཐམས་ཅད་དང་ཁྱད་པར་མེད་པར་གནས་སྐབས་དང་མཐར་ཐུག་ལ་ཕན་པར་བསམས་ནས་བསྔོས་ན་སེམས་ཅན་རེ་རེ་ལ་བརྟེན་པའི་བསོད་ནམས་མང་པོ་འཐོབ་སྟེ། རིན་ཆེན་ཕྲེང་བ་ལས། སེམས་ཅན་ཁམས་ནི་ཚད་མེད་ལ། །ཕན་འདོད་དེ་ནི་དེ་འདྲའོ། །ཞེས་གསུངས་པའི་ཕྱིར་རོ། །ད་ལྟ་ནི་ལུས་དངོས་སུ་གཏོང་མི་ནུས་ཀྱང་ལུས་ལོངས་སྤྱོད་དགེ་རྩ་དང་བཅས་པ་གཞན་ལ་གཏོང་བའི་བསམ་པ་ཡང་ཡང་སྦྱོང་དགོས་ཤིང་སྦྱངས་ན་ཕན་ཡོན་ཀྱང་ཆེ་བར་བཤད་དོ། །གསུམ་པར་རབ་དབྱེ་བ་གསུམ། རྟེན་ཐམས་ཅད་ཀྱིས་ཇི་ལྟར་བྱ་བ་དང་། རྟེན་སོ་སོ་ལ་བལྟོས་པའི་རབ་དབྱེ་དང་། སྦྱིན་པ་རང་གི་ངོ་བོའི་དབྱེ་བའོ། །དང་པོ་ནི། དམ་པ་དྲུག་ལྡན་དང་ཕར་ཕྱིན་དྲུག་ལྡན་དུ་བྱ་སྟེ། དང་པོ་ནི་རྟེན་དམ་པ་དང་། དངོས་པོ་དམ་པ་དང་། ཆེད་དུ་བྱ་བ་དམ་པ་དང་། ཐབས་མཁས་དམ་པ་དང་། བསྔོ་བ་དམ་པ་དང་། རྣམ་པར་དག་པ་དམ་པའོ། དང་པོ་ནི། སེམས་བསྐྱེད་ཀྱིས་ཀུན་ནས་བསླངས་ཏེ་བྱེད་པའོ། །གཉིས་པ་ནི། སྦྱིན་བྱའི་དངོས་པོ་ཕུན་སུམ་ཚོགས་པའོ། །གསུམ་པ་ནི། སེམས་ཅན་ཐམས་ཅད་ལ་ཕན་པའི་ཆེད་དུའོ། །བཞི་པ་ནི། སྟོང་ཉིད་རྟོགས་པའི་ཤེས་རབ་ཀྱིས་ཟིན་པའོ། །ལྔ་པ་ནི། རྫོགས་བྱང་དུ་བསྔོ་བའོ། །དྲུག་པ་ནི། སྒྲིབ་གཉིས་སྤོང་བར་བྱེད་པའོ། །གཉིས་པ་ཕར་ཕྱིན་དྲུག་ལྡན་ནི་འོག་ནས་ཐུན་མོང་དུ་འཆད་པར་འགྱུར་རོ། །གཉིས་པ་ནི། སྤྱིིར་ཟང་ཟིང་གི་སྦྱིན་པ་ནི་ཁྱིམ་པས་བྱ་དགོས་ཤིང་། ཆོས་ཀྱི་སྦྱིན་པ་ནི་རང་བྱུང་གིས་བྱ་དགོས་པར་གསུངས་ཀྱང་། དགེ་སྦྱོར་ལ་མི་གནོད་ན་ནི་རབ་བྱུང་གིས་ཀྱང་ཟང་ཟིང་གི་སྦྱིན་པ་བྱ་དགོས་སོ། །གསུམ་པ་སྦྱིན་པའི་ངོ་བོ་ལ་གསུམ་སྟེ། ཆོས་དང་། མི་འཇིགས་པ་དང་། ཟང་ཟིང་གི་སྦྱིན་པའོ། །དང་པོ་ནི། དམ་པའི་ཆོས་ལེགས་པར་སྟོན་པ་དང་རིག་གནས་གཞན་སྟོན་ཅིང་བསླབ་པའི་གཞི་འཛིན་དུ་འཇུག་པའོ། །གཉིས་པ་ནི། རྒྱལ་པོ་དང་ཆོས་རྐུན་དང་སེདྒེ་དང་སྟག་སོགས་ཀྱི་འཇིགས་པ་དང་མེ་ཆུ་སོགས་ཀྱི་འཇིགས་པ་ལས་སྐྱོབ་པའོ། །གསུམ་པ་ལ་གཉིས་ལས། ཟང་ཟིང་དངོས་སུ་གཏོང་བའི་སྦྱིན་པ་དང་། བསམ་པ་ཙམ་གྱི་སྦྱིན་པའོ། །དང་པོ་ལ་གསུམ། ཟང་ཟིང་གཏོང་བའི་ཚུལ། མི་ནུས་ན་ཇི་ལྟར་བྱ་བ། སྦྱིན་པའི་གེགས་ཀྱི་གཉེན་པོ་བསྟེན་པའོ། །དང་པོ་ལ་བཞི། གང་ལ་གཏོང་བའི་གཞི། གཏོང་བའི་བསམ་པ། ཇི་ལྟར་གཏོང་བའི་སྦྱོར་བ། གཏོང་རྒྱུའི་དངོས་པོའོ། །དང་པོ་ནི། དགྲ་གཉེན་བར་མ་ཐམས་ཅད་དང་ཡོན་ཏན་ལྡན་མི་ལྡན་དང་འབྱོར་མི་འབྱོར་གཉིས་དང་ཁྱད་པར་དུ་ཕོངས་པའི་སེམས་ཅན་ནོ། །གཉིས་པ་ལ་སྤྱིི་དང་བྱེ་བྲག་གཉིས་ལས། དང་པོ་ནི། སངས་རྒྱས་ཐོབ་པའི་ཆེད་དུ་བསམ་པ་དགོས་པ་ལ་དམིགས་པ་དང་། རང་གི་རྫས་ལ་གཞན་གྱི་རྫས་ལྟར་བསམ་པ་དངོས་པོ་ལ་དམིགས་པ་དང་། གཏོང་བའི་ཡུལ་འདི་རྣམས་བདག་གི་སྦྱིན་པ་རྫོགས་པར་བྱེད་པའོ་སྙམ་པ་ཞིང་ལ་དམིགས་པ་སྟེ་གསུམ་མོ། །གཉིས་པ་བསམ་པ་བྱེ་བྲག་པ་ནི། གནོད་བྱེད་ལ་བྱམས་པ་དང་སྡུག་བསྔལ་བ་ལ་སྙིང་རྗེ་དང་ཡོན་ཏན་ཅན་ལ་གུས་པའི་བསམ་པས་སྦྱིན་པའོ། །དམན་པ་ལྟ་བུ་ལ་སྦྱིན་པ་སྟེར་བའི་ཚེ་བརྩེ་བ་ལྡན་པའི་སྒོ་ནས་བྱིན་ན་ཕན་ཡོན་ཆེ་ཞིང་། སྦྱིན་ཡུལ་ལ་གནོད་པའི་སྦྱིན་པ་ནི་ཕན་ཡོན་ཆུང་བར་བཤད་དོ། །གཞན་ཡང་ལྟ་ངན་མེད་པ་དང་། ཁེངས་པ་མེད་པ་དང་། སྙན་གྲགས་ལ་མི་རེ་བ་དང་། ཞུམ་པ་མེད་པ་དང་། ཕྱོགས་རིས་མེད་པ་དང་། ལན་ལ་མི་རེ་བ་དང་། ལོངས་སྤྱོད་ཀྱི་རྣམ་སྨིན་ལ་མི་བལྟ་བའི་བསམ་པ་དང་ལྡན་དགོས་སོ། །གསུམ་པ་སྦྱོར་བ་ལ་གཉིས་ལས། ཇི་ལྟ་བུས་མི་གཏོང་བ་ནི་སྟེར་ཡང་མྱུར་པོར་མི་སྟེར་བ་དང་སྡུག་བསྔལ་བར་བྱས་ནས་སྟེར་བ་དང་མི་འོས་པའི་ལས་བྱེད་དུ་བཅུག་ནས་སྟེར་བ་དང་དྲིན་བགྲང་གིན་སྟེར་བ་སོགས་མདོར་ན་ཆོས་ཚུལ་དང་མི་མཐུན་པའི་རིགས་ཀྱིས་སྟེར་བ་མི་བྱེད་དོ། །ཇི་ལྟ་བུས་གཏོང་བ་ནི་བཞིན་མདངས་འཛུམ་པ་རང་རང་གི་ལག་གིས་དང་གཞན་ལ་མི་གནོད་ཅིང་དགའ་བར་འགྱུར་བའི་སྦྱོར་བས་སྟེར་བའོ། །འབྲས་བུ་ནི། ཕྱི་མ་ལ་ལོངས་སྤྱོད་ཆེ་བར་འགྱུར་བ་དང་བསོད་ནམས་ཀྱི་ཚོགས་རྫོགས་པར་འགྱུར་བ་སོགས་མང་ངོ་། །བཞི་པ་དངོས་པོ་ལ་གཉིས། དངོས་པོ་མདོར་བསྟན་པ་དང་། རྒྱས་པར་བཤད་པའོ། །དང་པོ་ནི། དངོས་པོ་དེ་བྱིན་ན་འཕྲལ་ཕུགས་གཉིས་ཀའམ་གང་རུང་ལ་ཕན་ན་ལེགས་ཤིང་སྦྱིན་ལ་འཕྲལ་དུ་ཕན་ཡང་ཕུགས་སུ་གནོད་ན་མི་སྦྱིན་ནོ། །གཉིས་པ་ཕྱི་ནང་གི་དངོས་པོ་གཏོང་མི་གཏོང་གཉིས་ལས། དང་པོ་ལ་ནང་གི་དངོས་པོ་མི་གཏོང་བའི་ཚུལ་ཤེས་ན་གཏོང་བ་ཡང་ཤེས་པར་འགྱུར་བས་འདི་ལ་གསུམ་ལས། དུས་ཀྱི་སྒོ་ནས་མི་གཏོང་བ་དང་། དགོས་པའི་སྒོ་ནས་མི་གཏོང་བ་དང་། སློང་བ་པོའི་སྒོ་ནས་མི་གཏོང་བའོ། །དང་པོ་ནི། བྱང་སེམས་ཀྱིས་དུས་ལ་བབས་ན་ལུས་ལ་སོགས་པ་ཐམས་ཅད་གཏོང་དགོས་མོད། སྙིང་རྗེ་ཆེན་པོའི་བསམ་པ་མ་རྒྱས་ཀྱི་བར་ལུས་ལྟ་བུ་བཏོང་པར་མི་བྱའོ། །གཉིས་པ་ནི། ལུས་གཏོང་ཡང་དགོས་པ་ཆུང་ངུའི་ཕྱིར་མི་གཏོང་ངོ་། །གསུམ་པ་ནི། མི་མིན་བདུད་རིགས་སོགས་ཀྱིས་ཐོ་འཚམ་པས་སློང་བ་ལ་མི་སྦྱིན་ནོ། །དེ་ལྟ་བུའི་དགག་བྱ་མེད་ན་ལུས་ལྟ་བུའང་སྦྱིན་པར་བྱའོ། །གཉིས་པ་ཕྱིའི་དངོས་པོ་གཏོང་མི་གཏོང་བཤད་པ་ལ་གཉིས་ལས། ཕྱིའི་དངོས་པོ་མི་གཏོང་བ་དང་། གཏོང་བའི་ཚུལ་ལོ། །དང་པོ་ལ་ལྔ་སྟེ། དུས་ཀྱི་སྒོ་ནས་དང་། ཡུལ་གྱི་སྒོ་ནས་དང་། རྟེན་གྱི་སྒོ་ནས་དང་། དངོས་པའི་སྒོ་ནས་དང་། དགོས་པའི་སྒོ་ནས་སྦྱིན་དུ་མི་རུང་བའི་ཚུལ་ལོ། །དང་པོ་ནི། དཔེར་ན། ཕྱི་དྲོའི་དུས་སུ་རབ་བྱུང་བསྙེན་རྫོགས་ལྟ་བུ་ལ་ཕྱི་དྲོའི་ཁ་ཟས་མི་སྟེར་བ་ལྟ་བུའོ། །གཉིས་པ་ནི། སྡོམ་བརྩོན་ལ་ཆང་དང་སྒོག་བཙོང་མི་ཤ་དང་མི་གཙང་བས་བསྒོས་པའི་ཟས་སྐོམ་དང་མི་འཕྲོད་པའི་རིགས་མི་སྟེར་བའོ། །གསུམ་པ་ནི། གླགས་འཚོལ་བ་དང་ཚོང་བར་འདོད་པ་ལ་གླེགས་བམ་ཡང་མི་སྦྱིན་པ་སོགས་མང་ངོ་། །བཞི་པ་ནི། གཞན་ལ་ཚེ་འདི་དང་ཕྱི་མར་གནོད་པའི་རྐྱེན་དུ་འགྱུར་བར་ཤེས་སམ་དོགས་ན་དུག་དང་མཚོན་ལ་སོགས་པ་མི་སྦྱིན་ནོ། །ལྔ་པ་ནི། གཞན་ལ་འདི་ཕྱི་གང་རུང་དུ་གནོད་པར་འགྱུར་བ་གང་ཡིན་ཀྱང་མི་སྦྱིན་ནོ། །གཉིས་པ་གཏོང་བའི་ཚུལ་ནི་བཞིན་མདངས་འཛུམ་པ་སོགས་ཀྱི་སྒོ་ནས་སྔར་བཤད་པའི་དགག་བྱ་དེ་ལྟ་བུ་མེད་པ་དང་བསྟུན་ནས་སྦྱིན་ཞིང་། དུས་གཅིག་ཏུ་སློང་བ་པོ་དུ་མ་བྱུང་བའི་ཚེ་ཀུན་ལ་འདང་བ་མེད་ན་སྔར་འོང་བ་ལ་སྦྱིན་ལ། ཟང་ཟིང་ཡིན་ན་དབུལ་འབྱོར་གཉིས་ལས་དབུལ་པ་ལ་སྦྱིན་པ་དང་གཞན་ལ་ཐབས་ཀྱིས་གོ་བར་བྱའོ། །གླེགས་བམ་ཡིན་ན་དད་ཅིང་རྣམ་དཔྱོད་དང་ཤེས་འདོད་ཆེ་བ་ལྟ་བུ་ལ་སྦྱིན་ནོ། །གཉིས་པ་གཏོང་མི་ནུས་ན་ཇི་ལྟར་བྱ་བ་ནི། དངོས་པོ་འདི་དག་གིས་བདག་འདོར་ཞིང་འཛད་པར་འགྱུར་བ་འདི་ལ་སེར་སྣ་ཀུན་ཏུ་བསྟེན་ན་ཉེས་དམིགས་ཆེའོ་སྙམ་དུ་བསམས་ཏེ་གཏོང་བ་ལ་བློ་ཁ་ཕྱོོགས་པར་བྱེད་ལ། གལ་ཏེ་མི་ནུས་ན་ནི་ཐབས་ཀྱིས་བཤད་སྦྱངས་བྱས་ནས་མི་སྟེར་ན་མ་གཏོགས། ཚིག་རྩུབ་པོས་བཟློག་ཏུ་མི་རུང་ངོ་། །སྦྱིན་ནུས་མི་ནུས་གང་ཡིད་ཀྱང་རང་གི་ཡོ་བྱད་ཐམས་ཅད་ནི་སངས་རྒྱས་བྱང་སེམས་སོགས་ལ་འབུལ་ཞིང་དེ་དག་གི་ཡིན་པའི་འདུ་ཤེས་བསྐྱེད་ན་ཕན་ཡོན་ཆེ་བ་དང་ཐབས་ལ་མཁས་པར་གསུངས་སོ། །གསུམ་པ་སྦྱིན་པའི་གེགས་ཀྱི་གཉེན་པོ་བསྟེན་པ་ལ་གེགས་ནི་བཞི་སྟེ། མ་གོམས་པ་དང་། རྒུད་པ་དང་། ཆགས་པ་དང་། འབྲས་བུ་མ་མཐོང་བའོ། །དང་པོའི་གཉེན་པོ་ནི་སྔོན་སྦྱིན་པ་ལ་མ་གོམས་པས་སྦྱིན་པ་གཏོང་མི་ནུས་པ་ཡིན་པས་ད་ལྟ་གོམས་པའི་ཆེད་དུ་སྦྱིན་པ་སྦྱིན་པའོ། །གཉིས་པའི་གཉེན་པོ་ནི་སྔོན་སྦྱིན་པ་མ་བཏང་བས་ད་ལྟ་དབུལ་བར་གྱུར་ལ་དེའི་ཕྱིར་ད་ལྟ་ཅུང་ཟད་ཡོད་པ་འདི་སྦྱིན་པར་བཏང་བར་བྱའོ་སྙམ་པའོ། །གསུམ་པའི་གཉེན་པོ་ནི་སྔོན་ནས་ད་བར་ཡོ་བྱད་ལ་ཆགས་པའི་རྐྱེན་གྱིས་སྡུག་བསྔལ་བར་གྱུར་པས་དེའི་ཕྱིར་ཆགས་པ་སྤངས་ཏེ་དངོས་པོ་དེ་སྦྱིན་པར་བྱེད་པའོ། །བཞི་པ་ནི་སྦྱིན་པ་བཏང་བ་ལ་འབྲས་བུ་ལོངས་སྤྱོད་དང་བྱང་ཆུབ་ཀྱང་འབྱུང་བར་བསམས་ཏེ་བཏང་བའི་དགེ་བ་རྫོགས་བྱང་དུ་བསྔོ་བའོ། །གཉིས་པ་བསམ་པ་ཙམ་གྱི་སྦྱིན་པ་ནི། བསམ་པ་ཐག་པ་ནས་སྦྱིན་བྱའི་དངོས་པོ་སྣ་ཚོགས་པ་དཔག་ཏུ་མེད་པ་རྟོག་པས་སྦྲུལ་ནས་སེམས་ཅན་རྣམས་ལ་སྦྱིན་པར་མོས་པའི་བསམ་པ་གོམས་པར་བྱེད་དོ། །བཞི་པ་དེ་དག་གི་དོན་བསྡུ་བ་ནི། སེམས་བསྐྱེད་པ་གཞིར་བྱས་ཏེ་ས་མཐོན་པོའི་སྦྱིན་པ་སྟེར་དཀའ་བ་རྣམས་སྨོན་ཡུལ་དུ་བྱེད་པ་དང་། སེར་སྣའི་གཉེན་པོ་བསྟེན་ཅིང་གཏོང་བའི་བློ་ཇེ་རྒྱས་སུ་འགྱུར་བའི་ཚུལ་ལ་འབད་ཅིང་བྱང་ཆུབ་ཏུ་སྨོན་པ་དང་བསྔོ་བ་དམ་པའོ། །གཉིས་པ་ཚུལ་ཁྲིམས་ཀྱི་ཕར་ཕྱིན་ལ་ལྔ། ཚུལ་ཁྲིམས་ཀྱི་ངོ་བོ། །དེ་ལ་འཇུག་པའི་ཐབས། ཚུལ་ཁྲིམས་ཀྱི་རབ་དབྱེ། བསྒྲུབ་པའི་ཚེ་ཇི་ལྟར་བྱ་བ། དོན་བསྡུ་བའོ། །དང་པོ་ནི། གཞན་ལ་གནོད་པ་གཞི་དང་བཅས་པ་ལས་ཡིད་ཕྱིར་ཕྱོགས་པའི་སྤོང་སེམས་ནི་ཚུལ་ཁྲིམས་སོ། །གཉིས་པ་ནི། ཚུལ་ཁྲིམས་མ་བསྲུང་ན་ངན་འགྲོར་ལྟུང་བར་འགྱུར་བས་ཚུལ་ཁྲིམས་བསྲུང་པ་ལ་འབད་དགོས་ཤིང་། ཚུལ་ཁྲིམས་ཀྱི་ཕན་ཡོན་ལ་ནི་མངོན་མཐོ་ངེས་ལེགས་གཉིས་ཏེ་གཞན་དུ་ཤེས་པར་བྱའོ། །གསུམ་པ་རབ་དབྱེ་ལ་གསུམ་སྟེ། སྡོམ་པའི་ཚུལ་ཁྲིམས་དང་། དགེ་བ་ཆོས་སྡུད་དང་། སེམས་ཅན་དོན་བྱེད་ཀྱི་ཚུལ་ཁྲིམས་སོ། །དང་པོ་ནི། ཀུན་སློང་དང་བཅས་པའི་དབང་དུ་བྱས་ན་མི་དགེ་བ་བཅུ་སྤོང་བའི་སྤོང་བ་བཅུ་ཡིན་ལ། རང་གི་ངོ་བོའི་སྒོ་ནས་ནི་ལུས་ངག་གི་བདུན་ནོ། །སྡོམ་པའི་དབང་དུ་བྱས་ན་ཁྱིམ་པ་དང་རབ་བྱུང་གི་སྡོམ་པ་དངོས་དང་དེ་དག་དང་ཐུན་མོང་པའི་སྤོང་སྡོམ་རྣམས་ནི་ཚུལ་ཁྲིམས་སོ། །གཉིས་པ་དགེ་བ་ཆོས་སྡུད་ནི། ཕྱིན་དྲུག་སོགས་ཀྱི་དགེ་བ་ལ་དམིགས་ནས་མ་སྐྱེས་པ་བསྐྱེད་པ་དང་སྐྱེས་ཟིན་གནས་པ་དང་གོང་དུ་སྤེལ་བར་བྱེད་པའོ། །གསུམ་པ་སེམས་ཅན་དོན་བྱེད་ནི། དོན་བྱ་བ་བཅུ་གཅིག་གི་སྒོ་ནས་སེམས་ཅན་དེ་དང་དེའི་དོན་ཇི་ལྟར་རིགས་པར་སྒྲུབ་པར་བྱེད་པའོ། །དེ་དག་གི་རྣམ་གཞག་རྒྱས་པར་ནི་རྗེས་བྱང་སའི་ཚུལ་ཁྲིམས་ཀྱི་ལེའུའི་རྣམ་བཤད་དུ་རྒྱས་པར་བཤད་དེ་ངོ་མཚར་ཆེ་བར་སྣང་ངོ་། །བཞི་པ་ཇི་ལྟར་བསྒྲུབ་པ་ནི། དམ་པ་དྲུག་ལྡན་དང་ཕར་ཕྱིན་དྲུག་ལྡན་དུ་བསྒྲུབ་པར་བྱ་སྟེ་དམ་པ་དྲུག་ལྡན་ནི་སྔར་ལྟར་རོ། །ལྔ་པ་དོན་བསྡུ་བ་ནི། སྦྱིན་པའི་རྟེན་སེམས་བསྐྱེད་གཞིར་བཟུང་ནས་ཚུལ་ཁྲིམས་སོགས་ལ་འཇུག་ཅིང་སེམས་ཅན་ཀུན་ལ་གནོད་པ་ལས་ལྡོག་པ་དགོས་ལ། ས་མཐོན་པོའི་ཚུལ་ཁྲིམས་རྣམས་ཉམས་སུ་ལེན་པའི་སྨོན་ལམ་དང་ཁྱད་པར་དུ་མི་དགེ་པ་བཅུ་ལ་སོགས་པ་བཅས་རང་གི་ཁ་ན་མཐོ་བ་རྣམས་ལ་ཉིད་རེ་བཞིན་སྡོམ་སེམས་མང་དུ་བྱའོ། །གསུམ་པ་བཟོད་པའི་ཕར་ཕྱིན་ལ་ལྔ། ངོ་བོ་དང་། འཇུག་ཐབས་དང་། རབ་དབྱེ་དང་། བསྒྲུབ་ཚུལ་དང་། དོན་བསྡུ་བའོ། །དང་པོ་ནི་། གནོད་པ་ལ་ཇི་མི་སྙམ་པ་དང་སྡུག་བསྔལ་དང་དུ་ལེན་པ་དང་ཆོས་ལ་ངེས་པར་སེམས་པ་ལ་མོས་པ་ཤིན་ཏུ་བརྟན་པ་གང་རུང་ངོ་། །གཉིས་པ་ནི། བཟོད་པའི་ཕན་ཡོན་དང་མི་བཟོད་པའི་ཉེས་དམིགས་བསམས་པའི་སྒོ་ནས་བྱེད་པའོ། །དེ་ལ་ཕན་ཡོན་མང་དུ་ཡོད་ཀྱང་བསྡུ་ན་དགྲ་མི་མང་བ་དང་ཡིད་བདེ་བར་གནས་པ་དང་དགེ་རྩ་མི་འཇིག་པ་དང་གཟུགས་བཟང་བར་འགྱུར་བ་དང་། ལྷ་མིའི་གོ་འཕང་ཐོབ་ཅིང་སངས་རྒྱས་སུ་འགྱུར་བ་སོགས་སོ། །ཉེས་དམིགས་ནི་སྤྱོད་འཇུག་ལས། ཞེ་སྡང་ལྟ་བུའི་སྡིག་པ་མེད། །ཞེས་དང་། ཁྱད་པར་དུ་བྱང་སེམས་སོགས་ཡུལ་མཆོག་ལ་ཁྲོས་ན་ཉེས་དམིགས་ཤིན་ཏུ་ཆེ་སྟེ། དེ་ཉིད་ལས། ལེགས་སྤྱད་གང་ཡིན་དེ་ཀུན་ཀྱང་། ཁོང་ཁྲོ་གཅིག་གིས་འཇོམས་པར་བྱེད། །ཅེས་གསུངས་ཤིང་། དབུ་མ་འཇུག་པ་ལས། མི་བཟོད་པ་ཡིས་མྱུར་དུ་ངན་འགྲོར་སྒྱུར་བར་བྱེད། །ཅེས་གསུངས་པ་ལྟ་བུ་མང་བས་ཉེས་པ་ཤིན་ཏུ་ཆེ་བའི་ཚུལ་བསམས་ཏེ་བཟོད་པ་སྒོ་དུ་མ་ནས་བསྒོམ་པར་བྱའོ། །གསུམ་པ་རབ་དབྱེ་ལ་གསུམ། གནོད་བྱེད་ལ་ཇི་མི་སྙམ་པ་དང་། སྡུག་བསྔལ་དང་ལེན་དང་། ཆོས་ལ་ངེས་སེམས་ཀྱི་བཟོད་པའོ། །དང་པོ་བསྐྱེད་པ་ལ་གཉིས། གནོད་པ་བྱས་པ་ལ་མི་བཟོད་པ་དགག་པ་དང་། གནོད་བྱེད་འབྱོར་རྒུད་ལ་དགའ་མི་དགའ་དགག་པའོ། །དང་པོ་ལ་གཉིས། བདེ་བའི་གེགས་དང་སྡུག་བསྔལ་བར་བྱས་པ་མི་བཟོད་པ་དགག་པ་དང་། བཀུར་སྟི་སོགས་ཀྱི་གེགས་བྱས་པ་སོགས་ལ་མི་བཟོད་པ་དགག་པའོ། །དང་པོ་ལ་གཉིས། ཁྲོ་མི་རིགས་པ་དང་། བརྩེ་རིགས་པར་བསྟན་པའོ། །དང་པོ་ལ་གསུམ། ཡུལ་དང་ཡུལ་ཅན་དང་རྟེན་ལ་བརྟགས་ནས་དགག་པའོ། །འདི་དག་རྒྱས་པར་བཤད་ན་མང་བར་འགྱུར་བས། མཚོན་ཙམ་ཞིག་བརྗོད་པར་བྱ་སྟེ། དང་པོ་ནི། གནོད་བྱེད་ཀྱི་ཡུལ་ལ་ཁྲོ་མི་རིགས་ཏེ། གནོད་བྱེད་ཀྱིས་གནོད་པ་བྱེད་པ་དེ་གནོད་བྱེད་ལ་རང་དབང་མེད་པའི་ཕྱིར་ཏེ། དེས་གནོད་པ་བྱེད་པ་དེ་ཉོན་མོངས་པའི་དབང་གིས་ཡིན་པས་རང་དབང་མེད་བར་སོང་བའི་ཕྱིར་ཏེ། དངོས་རྒྱུ་ལ་ཁྲོ་ན་ནི་དབྱུག་པ་སོགས་ལ་ཁྲོ་མི་དགོས་པ་དང་། དང་པོའི་རྒྱུ་ལ་ཁྲོ་ན་ཉོན་མོངས་ལ་ཁྲོ་དགོས་ཤིང་རང་གིས་སྔོན་བྱས་པའི་ལས་ལའང་ཁྲོ་རིགས་པའི་ཕྱིར་ཏེ། དེས་གནོད་པ་ཉོན་མོངས་དང་རང་གི་ལས་ཀྱིས་ཀྱང་བསྐྱེད་པའི་ཕྱིར་རོ་སྙམ་དུ་བསམ་མོ། །ཡུལ་ཅན་ལ་བརྟགས་ན་ཁྲོ་མི་རིགས་ཏེ། གནོད་བྱེད་ལ་ཁྲོ་བ་ནི་ཚོར་བ་སྡུག་བསྔལ་གྱི་རྒྱུ་ཡིན་པས་ད་ལྟ་སྡུག་བསྔལ་ཆུང་ངུ་དེ་ཙམ་ཡང་མི་བཟོད་ན་ངན་འགྲོའི་སྡུག་བསྔལ་ཆེན་པོ་ཇི་ལྟར་བཟོད་སྙམ་དུ་ཁྲོ་བ་དགག་དགོས་པའི་ཕྱིར་ཏེ། མི་འགོག་ན་ཕྱི་མ་ལ་ཁོང་ཁྲོའི་རྣམ་སྨིན་སྡུག་བསྔལ་ཆེས་བཟོད་པར་དཀའ་བ་འབྱུང་བའི་ཕྱིར་སྙམ་དུ་བསམ་མོ། །རྟེན་ལ་བརྟགས་ན་ཁྲོ་མི་རིགས་ཏེ། ལུས་འདི་སྡུག་བསྔལ་འབྱུང་བའི་གཞི་ཡིན་པའི་ཕྱིར་ཏེ། འདི་ཐོག་ལ་མི་འཕྲོད་པའི་རྐྱེན་ཅི་བྱུང་ཡང་སྡུག་བསྔལ་བསྐྱེད་པའི་ཕྱིར་སྙམ་དུ་བསམས་ཏེ་ལུས་ལ་སྐྱོན་དུ་བལྟའོ། །གཉིས་པ་བརྩེ་བར་བྱ་རིགས་པ་ནི། གནོད་བྱེད་ལ་མི་ཁྲོ་བར་མ་ཟད་བརྩེ་བར་བྱར་རིགས་ཏེ། སེམས་ཅན་ཐམས་ཅད་ལས་རང་གི་ཕ་མར་མ་གྱུར་པ་མེད་པས་དཔེར་ན་ཕ་མ་གདོན་གྱིས་ཟིན་ནས་རང་ལ་གནོད་པ་བྱས་བྱུང་ན་དེའི་གནོད་ལན་མི་བྱེད་པར་བརྩེ་བར་བྱ་བ་བཞིན་ཡིན་པའི་ཕྱིར་ཏེ། གནོད་བྱེད་ཀྱང་ཉོན་མོངས་པའི་གདོན་གྱིས་ཟིན་ནས་དབང་མེད་པའི་ཕྱིར་སྙམ་དུ་བསམ་པར་བྱའོ། །གཉིས་པ་ནི། བཀུར་སྟི་དང་བསྟོད་པ་སོགས་ཀྱི་གེགས་བྱས་པ་ལ་ཁྲོ་མི་རིགས་ཏེ། བཀུར་སྟི་དང་བསྟོད་པ་སོགས་ལ་ཆགས་ནས་ཁྲོ་བ་ནི་ངན་འགྲོར་ལྟུང་བའི་རྒྱུ་ཡིན་པའི་ཕྱིར། སྨོད་ཅིང་བརྙས་པ་སོགས་ལའང་ཁྲོ་མི་རིགས་ཏེ། དེ་དག་ལ་བརྩི་བ་མེད་པར་མི་དགའ་ཞིང་ཁྲོ་བའང་ངན་འགྲོའི་རྒྱུ་ཡིན་པའི་ཕྱིར་སྙམ་དུ་བསམ་མོ། །གཉིས་པ་ནི། དགྲ་འབྱོར་བ་ལ་མི་དགའ་ཞིང་རྒུད་པ་ལ་དགའ་མི་རིགས་ཏེ། སེམས་ཅན་གཞན་ལ་རང་གི་བསོད་ནམས་ཀྱི་མཐུས་བྱུང་བའི་འབྱོར་བ་ལ་མི་བཟོད་པའི་ཕྲག་དོག་ནི་རང་ཉིད་དམན་པར་སྐྱེ་བའི་རྒྱུ་ཡིན་ཕྱིར་དང་སེམས་ཅན་ཐབས་ཅད་ལ་གཏན་བདེ་སྦྱིན་པར་དམ་བཅས་པ་དང་དེའི་འབྱོར་བ་ལ་ཕྲག་དོག་བྱེད་པ་ཆེས་ཤིན་ཏུ་འགལ་པའི་ཕྱིར་རོ། དགྲ་ལ་སྡུག་བསྔལ་བྱུང་ན་དགའ་བ་གཏན་མི་རུང་སྟེ་དེ་ལ་དགའ་བས་རང་ལ་མི་ཕན་ཅིང་གནོད་པའི་ཕྱིར་ཏེ། བློ་དེ་ལྟ་བུས་སྙིང་རྗེ་ཉམས་ཤིང་ངན་འགྲོར་ལྟུང་བར་འགྱུར་བའི་ཕྱིར་ཏེ། དེ་ལྟ་བུ་ནི་བསམ་པ་ངན་པ་ཆེན་པོ་ཡིན་པའི་ཕྱིར་སྙམ་དུ་བསམས་པ་ལ་ཁྲོ་བ་དགག་པར་བྱའོ། །གཉིས་པ་སྡུག་བསྔལ་དང་ལེན་གྱི་བཟོད་པ་ལ་གསུམ། རྒྱུ་མཚན་དང་། བསྐྱེད་པའི་ཐབས་དང་། གཞིའི་སྒོ་ནས་རྒྱས་པར་བཤད་པའོ། །དང་པོ་ནི། སྡུག་བསྔལ་ཆེ་ཆུང་གང་བྱུང་ཡང་ལམ་དུ་འཁྱེར་ཤེས་དགོས་ཏེ། འཁྱེར་མི་ཤེས་ན་སེམས་ཁྲེལ་གྱི་སྡུག་བསྔལ་ལྷག་མ་བསྣན་ནས་སྡུག་བསྔལ་ཆེ་བར་འགྱུར་བའི་ཕྱིར་རོ། །གཉིས་པ་ལ་གཉིས། སྡུག་བསྔལ་ལ་གཅིག་ཏུ་མི་དགའ་བ་དགག་པ་དང་། སྡུག་བསྔལ་དེ་དང་དུ་བླང་བར་འོས་པའོ། །དང་པོ་ནི། སྡུག་བསྔལ་དེ་ལ་གཅིག་ཏུ་མི་དགའ་བ་བྱར་མི་རིགས་ཏེ། དེ་བཅོས་སུ་ཡོད་ན་ནི་འཆོས་པ་ལས་འཇུག་པར་རིགས་ཤིང་བཅོས་སུ་མེད་ན་ནི་མི་དགའ་བར་བྱས་ཀྱང་སྡུག་བསྔལ་བ་ལས་ཕན་པ་མི་འབྱུང་བའི་ཕྱིར་རོ། །གཉིས་པ་ལ་གསུམ། སྡུག་བསྔལ་གྱི་ཡོན་ཏན་བསམ་པ་དང་། དེ་ལ་བཟོད་པའི་ཡོན་ཏན་བསམ་པ་དང་། གོམས་ན་མི་དཀའ་བའོ། །དང་པོ་ནི། སྡུག་བསྔལ་ལ་ཡོན་ཏན་ལྔ་ཡོད་དེ། སྡུག་བསྔལ་ཡོད་ན་ངེས་འབྱུང་སྐྱེ་བ་དང་། དྲེགས་པ་འཇིག་པ་དང་། སྡིག་ལ་འཛེམ་པ་དང་། དགེ་བ་བསྒྲུབ་པ་ལ་དགའ་བ་དང་། གཞན་ལ་སྙིང་རྗེ་སྐྱེ་བ་རྣམས་འབྱུང་བའི་ཡོན་ཏན་ཡོད་པའི་ཕྱིར། གཉིས་པ་ལ་གཉིས། དོན་ཆེ་བའི་ཕན་ཡོན་དང་། སྡུག་བསྔལ་གཞན་ཟློག་པའི་ཕན་ཡོན་ནོ། །དང་པོ་ནི། སྡུག་བསྔལ་ཅི་བྱུང་ཡང་དང་དུ་བླང་བར་རིགས་ཏེ། སྔོན་དགོས་པ་ཆུང་ངུ་དང་འདོད་པ་ཅུང་ཟད་རེའི་ཕྱིར་དུའང་སྡུག་བསྔལ་ཆེན་པོ་དང་རྒྱུན་རིང་བ་དང་མང་པོ་མྱོང་བར་གྱུར་ཀྱང་དོན་མེད་ཅིང་། ད་རེས་སྡུག་བསྔལ་འདི་སྔོན་ལས་ཀྱི་འབྲས་བུ་ངན་པ་འཛད་པའི་རྒྱུར་འགྱུར་བས་ངེས་པར་དང་དུ་བླང་འོས་པའི་ཕྱིར་རོ། །དེར་མ་ཟད། སེམས་ཅན་གཞན་ཀུན་གྱི་སྡུག་བསྔལ་རྣམས་ཀྱང་འདི་ཐོག་ཏུ་ལེན་རིགས་ཏེ་བླངས་ན་ནི་ཕན་ཡོན་དཔག་མེད་འབྱུང་བའི་ཕྱིར་རོ། །གཉིས་པ་ནི། སྡུག་བསྔལ་འདི་མྱོང་བ་ལ་མི་འདོད་པ་མེད་ཅིང་དང་དུ་བླངས་ན་ཕྱི་མའི་སྡུག་བསྔལ་དཔག་མེད་ཀྱང་བཟློག་པར་འགྱུར་ཏེ། སྡུག་བསྔལ་ཆུང་ངུ་འདིས་སྤྱིར་འཁོར་བའི་སྡུག་བསྔལ་མང་པོ་དང་ངན་སོང་གི་སྡུག་བསྔལ་དཔག་ཏུ་མེད་པ་མྱོང་འགྱུར་རྣམས་དག་པར་འགྱུར་བའི་ཕྱིར་ རོ། །མདོར་ན་སངས་རྒྱས་ཐོབ་པའི་ཆེད་དུ་དམིགས་ནས་གནོད་པ་ལ་ཇི་མི་སྙམ་པ་དང་། སྡུག་བསྔལ་དང་ལེན་གྱི་བཟོད་པ་བསྒོམ་པར་བྱ་སྟེ། སྡུད་པ་ལས། སེམས་དམྱལ་དུད་འགྲོ་གཤིན་རྗེའི་འཇིག་རྟེན་སྡུག་བསྔལ་མང་། །འདོད་པའི་ཡོན་ཏན་རྒྱུ་ཡིས་དབང་མེད་གནོད་མྱོང་ན། །བྱང་ཆུབ་ཆེད་དུ་ཅི་ཕྱིར་དེ་བཟོད་མི་བྱ་སྙམ། །ཞེས་པ་ནས། འཇིག་རྟེན་སྡུག་བསྔལ་ཇི་སྙེད་བདག་གིས་བཟོད་སྙམ་པ། །བྱང་ཆུབ་སེམས་དཔའ་བཟོད་པའི་ཕ་རོལ་ཕྱིན་ལ་གནས། །ཞེས་གསུངས་པ་ལྟར་བསམ་མོ། །དེས་ན་སྡུག་བསྔལ་འདི་ནི་བདག་ལ་ཕན་འདོག་པའོ་སྙམ་དུ་བསམ་མོ། །གསུམ་པ་ནི། སྡུག་བསྔལ་དང་ལེན་འདི་གོམས་ན་མི་དཀའ་སྟེ། སྔོན་ནས་གོམས་པའི་དབང་གིས་སེམས་ཅན་ཀུན་གྱིས་ཀྱང་སྡུག་བསྔལ་ལ་བདེ་བར་འདུ་ཤེས་བྱེད་པ་ལྟར། སྡུག་བསྔལ་དང་ལེན་གོམས་ན་བདེ་བའི་འདུ་ཤེས་འབྱུང་བའི་ཕྱིར་རོ། །གསུམ་པ་གཞིའི་སྒོ་ནས་བཤད་པ་ལ་བརྒྱད་དེ། གནས་ལ་བརྟེན་པ་དང་། འཇིག་རྟེན་གྱི་ཆོས་དང་། སྤྱོད་ལམ་དང་། ཆོས་ཡོངས་སུ་འཛིན་པ་དང་། སློང་མོས་འཚོ་བ་དང་། མངོན་པར་བརྩོན་པས་དུབ་པ་དང་། གཞན་དོན་བྱེད་པ་དང་། འཕྲལ་གྱི་བྱ་བ་རྣམས་ཏེ་དེ་དག་ལ་བརྟེན་ནས་སྡུག་བསྔལ་བྱུང་བ་རྣམས་དང་དུ་ལེན་དགོས་པའི་ཕྱིར་རོ། །གསུམ་པ་ཆོས་ལ་ངེས་སེམས་ཀྱི་བཟོད་པ་བསྐྱེད་པ་ལ་མོས་པའི་ཡུལ་ལ་བརྒྱད་དེ། དང་བའི་ཡུལ་དཀོན་མཆོག་གསུམ་དང་། མངོན་དུ་བྱ་བའི་ཡུལ་བདག་མེད་པའི་དེ་ཁོ་ན་ཉིད་དང་། འདོད་པའི་ཡུལ་སངས་རྒྱས་བྱང་སེམས་སོགས་ཀྱི་མཐུ་ཆེན་པོ་དང་། བླང་དོར་གྱི་ཡུལ་ལེགས་ཉེས་རྒྱུ་འབྲས་དང་བཅས་པ་གཉིས་དང་། བསྒོམ་པའི་ཡུལ་ཐོབ་བྱའི་བྱང་ཆུབ་ཐོབ་བྱེད་དང་བཅས་པ་དང་། ཐོས་བསམ་གྱི་ཡུལ་གསུང་རབ་ཡན་ལག་བཅུ་གཉིས་ལྟ་བུ་དང་། མོས་པའི་ཡུལ་ནི་ཡུལ་དེ་དག་ཇི་ལྟར་ཡིན་པ་ལ་ངེས་པ་རྙེད་པ་སྟེ་དེ་རྣམས་ལ་ཡང་ཡང་སེམས་པ་དགོས་པའི་ཕྱིར་རོ། །བཞི་པ་བསྒྲུབ་ཚུལ་ནི་དམ་པ་དྲུག་ལྡན་དང་ཕར་ཕྱིར་དྲུག་ལྡན་གྱིས་བྱའོ། །ལྔ་པ་དོན་བསྡུ་བ་ནི། སེམས་བསྐྱེད་གཞིར་བཟུང་སྟེ་ས་མཐོན་པོའི་བཟོད་པ་ཆེན་པོ་རྣམས་སྨོན་ཡུལ་དུ་བྱེད་ཅིང་། ལས་དང་པོ་པའི་བཟོད་པ་རྣམས་ལ་ནུས་པ་ཅི་ཐུབ་ཀྱིས་བསླབ་བར་བྱའོ། །བཞི་པ་བརྩོན་འགྲུས་ཀྱི་ཕར་ཕྱིན་ལ་ལྔ། བརྩོན་འགྲུས་ཀྱི་ངོ་བོ། འཇུག་པའི་ཐབས། དབྱེ་བ། ཇི་ལྟར་བསྒྲུབ་པ། དོན་བསྡུ་བའོ། །དང་པོ་ནི། དགེ་བའི་དམིགས་པ་ལ་སེམས་མངོན་པར་སྤྲོ་བའོ། །གཉིས་པ་ནི། བརྩོན་འགྲུས་བརྩམས་པའི་ཕན་ཡོན་དང་མ་བརྩམས་པའི་ཉེས་དམིགས་སེམས་པ་སྟེ། དེ་ཡང་མདོར་བསྡུ་ན་བརྩོན་འགྲུས་བྱས་པའི་ཕན་ཡོན་ཡོད་དེ། སྤྱིར་ཆོས་དང་འཇིག་རྟེན་གྱི་བྱ་བ་གང་བྱེད་ཅིང་འབྱུང་བ་ལ་བརྩོན་འགྲུས་དགོས་ཤིང་། ཁྱད་པར་དུ་ཕྱི་མའི་དོན་ཁྱད་པར་ཅན་འགྲུབ་པ་ལ་བརྩོན་འགྲུས་དགོས་པའི་ཕྱིར་ཏེ། དཔལ་ལྡན་ཟླ་བས། ཡོན་ཏན་མ་ལུས་བརྩོན་འགྲུས་རྗེས་འགྲོ་ཞིང་། །ཞེས་གསུངས་པས་མཚོན་ཏེ་མང་ལ། བརྩོན་འགྲུས་མེད་པའི་ལེ་ལོ་ཆེན་པོ་ཅན་ལ་ནི་དོན་གཉིས་གང་ཡང་འབྱུང་དཀའ་བའི་ཕྱིར་ཏེ། དྲན་པ་ཉེར་གཞག་ལས། གང་ལ་ལེ་ལོ་གཅིག་ཡོད་པ། །དེ་ལ་ཆོས་ཀུན་མེད་པ་ཡིན། །ཞེས་གསུངས་པ་ལྟར་རོ། །གསུམ་པ་དབྱེ་བ་ལ་གཉིས། དབྱེ་བ་དངོས་དང་། བསྐྱེད་པའི་ཐབས་སོ། །དང་པོ་ལ་གསུམ་སྟེ། གོ་ཆ་དང་། དགེ་བ་ཆོས་སྡུད་དང་། སེམས་ཅན་དོན་བྱེད་ཀྱི་བརྩོན་འགྲུས་སོ། །དང་པོ་ནི། སེམས་ཅན་རེ་རེའི་སྡུག་བསྔལ་སེལ་བའི་ཕྱིར་དུའང་བསྐལ་པ་ཆེན་པོ་གྲང་མེད་པའི་བར་དམྱལ་བར་གནས་དགོས་ཀྱང་སངས་རྒྱས་ཐོབ་པའི་ཆེད་དུ་མི་སྐྱོ་ན་དུས་ཐུང་དང་སྡུག་བསྔལ་ཆུང་ངུས་ལྟ་ཅི་སྨོས་སྙམ་པ་ལྟ་བུའི་སེམས་ཀྱི་གོ་ཆ་ཆེན་པོ་བགོ་བ་སྟེ། དེ་ལྟ་བུའི་གོ་ཆ་དང་ལྡན་ན་མྱུར་དུ་འཚང་རྒྱ་བར་འགྱུར་བ་ཡིན་གྱི། སེམས་ཅན་གྱི་དོན་རྒྱ་ཆེན་པོ་དང་ཡུན་རིང་དུ་བསྒྲུབ་པ་ལ་ཞུམ་ཞིང་སྒྱིད་ལུག་སྟེ་མྱུར་དུ་འཚང་རྒྱ་བར་འདོད་ན་མྱུར་དུ་འཚང་མི་རྒྱ་བར་མ་ཟད་ཆེས་ཡུན་རིང་དུ་འགྱུར་བར་གསུངས་པའི་ཕྱིར་རོ། །གཉིས་པ་དགེ་བ་ཆོས་སྡུད་ནི། ཕྱིན་དྲུག་ཡང་དག་པར་འགྲུབ་པར་འགྱུར་བའི་ཕྱིར་བརྩོན་པའོ། །གསུམ་པ་སེམས་ཅན་དོན་བྱེད་ནི། དོན་བྱ་བ་བཅུ་གཅིག་ལ་ཇི་ལྟར་རིགས་པར་བརྩོན་པའོ། །གཉིས་པ་བརྩོན་འགྲུས་བསྐྱེད་པའི་ཐབས་ལ་བཞི། འགལ་རྐྱེན་མི་མཐུན་ཕྱོགས་སྤོང་བ་དང་། བརྩོན་འགྲུས་བྱེད་པ་ལྷུར་ལེན་པ་དང་། དེ་ལས་ལུས་སེམས་ལས་རུང་དུ་བྱ་ཚུལ་ལོ། །དང་པོ་ལ་གཉིས། ལམ་བསྒྲུབ་ནུས་པར་མཐོང་ཡང་མི་འཇུག་པ་དང་། དེ་བདག་འདྲ་བས་མི་ནུས་སོ་སྙམ་ནས་ཞུམ་སྟེ་མི་འཇུག་པའོ། །དང་པོ་ལ་གཉིས་ཏེ་དབྱེ་བ་དང་། སྤོང་ཐབས་སོ། །དང་པོ་ལ་གཉིས་ཏེ། ཕྱི་བཤོལ་གྱི་ལེ་ལོ་དང་། བྱ་བ་དམན་པ་ལ་ཆགས་པའི་ལེ་ལོའོ། །གཉིས་པ་དེ་སྤོང་བའི་ཐབས་ནི། འདི་ལ་གསུམ་སྟེ་ལུས་འདི་མྱུར་དུ་འཇིག་པ་དང་ཤི་ནས་ངན་འགྲོར་ལྟུང་བ་དང་སླར་རྟེན་བཟང་པོ་རྙེད་དཀའ་བར་བསམ་པའོ། །གཉིས་པ་སྤོང་ཚུལ་ནི་དོན་ཆུང་བའི་བྱ་བ་ལ་ཆགས་ནས་དོན་ཆེ་བའི་བྱ་བ་འདོར་བ་ནི་མི་རིགས་ཏེ། ཕྱི་མར་སྡུག་བསྔལ་བསྐྱེད་པའི་རྒྱུ་བྱ་བ་དམན་པ་ལ་ཆགས་ནས་བསམ་བཞིན་དུ་དེ་ལ་གཙོ་བོར་འབད་པ་ནི་རང་ཉིད་བསླུ་བ་ཡིན་པའི་ཕྱིར་སྙམ་དུ་བསམས་ལ་དགག་པར་བྱའོ། །གཉིས་པ་ནི། བྱ་དཀའ་བ་དེ་ལྟ་བུ་བདག་གིས་མི་ནུས་སོ་སྙམ་ནས་སྒྱིད་ལུག་པར་མི་བྱ་སྟེ་དེ་དགག་དགོས་པའི་ཕྱིར་འདི་ལ་གསུམ། ཐོབ་བྱ་དང་། ཐོབ་བྱེད་དང་། གནས་ལ་སྒྱིད་ལུག་པའོ། །དང་པོ་ནི། སངས་རྒྱས་ཐོབ་དཀའོ་སྙམ་ནས་ཞུམ་པར་མི་བྱ་སྟེ། སངས་རྒྱས་བཅོམ་ལྡན་འདས་ཀྱིས་བརྩོན་འགྲུས་བྱས་ན་སྦྲང་བུ་ཡན་ཆད་ཀྱིས་ཀྱང་སངས་རྒྱས་ཐོབ་ནུས་པར་གསུངས་པས། བདག་ལ་བརྩོན་པ་མེད་པ་མ་གཏོགས་བརྩོན་འགྲུས་དང་ལྡན་ན་བདག་གིས་ཀྱང་སངས་རྒྱས་བསྒྲུབ་ནུས་སོ་སྙམ་དུ་སྤྲོ་བ་ཆེར་བསྐྱེད་ཅིང་། དུས་གསུམ་གྱི་སངས་རྒྱས་ཐམས་ཅད་ཀྱང་སྔོན་བདག་ཅག་ལྟ་བུ་ཡིན་པ་ཞིག་གིས་དེ་བསྒྲུབ་ནས་སངས་རྒྱས་པ་ཡིན་པས། བདག་གིས་ཀྱང་བསྒྲུབ་པ་ལ་བརྩོན་ན་བསྒྲུབ་ནུས་སོ་སྙམ་སྟེ་ཞུམ་པ་དགག་དགོས་པའི་ཕྱིར་རོ། །གཉིས་པ་ནི། སངས་རྒྱས་བསྒྲུབ་པའི་ཐབས་ལ་བྱ་དཀའ་བ་མང་པོ་དགོས་པས་བདག་གིས་དེ་ལྟ་བུ་མི་ནུས་སོ་སྙམ་དུ་ཞུམ་པར་བྱར་མི་རིགས་ཏེ། བྱ་དཀའ་བའི་གནས་རྣམས་ལ་ཡང་ཆུང་ངུ་ལ་རིམ་གྱིས་གོམས་ན་ཆེ་བ་རྣམས་ཀྱང་བྱ་ནུས་པར་འགྱུར་པའི་ཕྱིར་ཏེ། ཇི་སྐད་དུ། གོམས་ན་སླ་བར་མི་འགྱུར་པའི། །དངོས་དེ་འགའ་འང་ཡོད་མ་ཡིན། །ཞེས་གསུངས་པའི་ཕྱིར། གསུམ་པ་ནི། སངས་རྒྱས་བསྒྲུབ་པ་ནི་འཁོར་བར་གནས་ཏེ་སེམས་ཅན་གྱི་དོན་བྱས་ནས་བསྒྲུབ་དགོས་པས་འཁོར་བའི་སྡུག་བསྔལ་མི་བཟོད་དོ་སྙམ་ན་དེ་ཡང་མི་རུང་སྟེ། བྱང་སེམས་རྣམས་འཁོར་བའི་གནས་སུ་བཞུགས་ནས་སེམས་ཅན་གྱི་དོན་སྒྲུབ་པར་མཛད་ཀྱང་འཁོར་བ་རང་བཞིན་མེད་པ་སྒྱུ་མ་ལྟ་བུར་རྟོགས་པ་ལ་བརྟེན་ནས་ལུས་སེམས་ལ་སྡུག་བསྔལ་མེད་ཅིང་བདེ་དགའ་འབྱུང་བའི་ཕྱིར་ཏེ། ཇི་སྐད་དུ། གཞན་དོན་འཁོར་བར་གནས་ཀྱང་ནི། །སྙིང་རྗེ་ཅན་ལ་ཅི་སྟེ་སྐྱོ། ཞེས་དང་། འཕགས་པས་ན་དང་རྒ་བ་དང་། །འཆི་བའི་སྡུག་བསྔལ་རྩད་ནས་སྤངས། །ཞེས་གསུངས་པ་ལྟར་རོ། །གཉིས་པ་མཐུན་རྐྱེན་ལ་བཞི། མོས་པ་དང་། བརྟན་པ་དང་། དགའ་བའི་སྟོབས་དང་། དོར་བའི་སྟོབས་སོ། །དང་པོ་ནི། ལས་རྒྱུ་འབྲས་ལ་ཡིད་ཆེས་ཀྱི་ངེས་པ་རྙེད་ནས་སྤང་བླང་བྱེད་པར་མོས་ནས་བརྩོན་པའོ། །གཉིས་པ་ནི། གང་བསྒྲུབ་པ་ལ་རྩོམ་པའི་བརྩོན་འགྲུས་དེ་སླར་མི་ལྡོག་པར་མཐར་ཕྱིན་པར་བྱེད་པའོ། །གསུམ་པ་ནི། དང་པོ་འཇུག་པའི་ཚེ་དགའ་བཞིན་དུ་འཇུག་ཅིང་ཞུགས་ནས་འཕྲོ་གཅོད་མི་འདོད་པ་དང་མི་ཁོམས་པར་སྤྲོ་བར་འཇུག་པའོ། །བཞི་པ་ནི། ཧ་ཅང་བརྩམས་དྲག་ན་ཡིད་སུན་ཅིང་ལུས་སེམས་དུབ་པར་གྱུར་ན་རེ་ཞིག་ངལ་འཚོ་བར་བྱ་སྟེ་གྲིམ་ལྷོད་གཉིས་ཀ་དང་བྲལ་བར་བྱས་ལ་བསྐྱང་བར་བྱའོ། །བཞི་པ་དེ་ལས་ལུས་སེམས་ལས་རུང་དུ་འགྱུར་ཚུལ་ནི། དེ་ལྟར་བརྩོན་འགྲུས་ཆུ་བོའི་རྒྱུན་བཞིན་དུ་བསྐྱངས་པས་གོམས་ན་ལུས་སེམས་དགེ་བ་ལ་བཀོལ་དུ་མི་རུང་པའི་འཚེར་སྣང་ཐམས་ཅད་བཟློག་ནས་དགེ་བ་ལ་སྤྲོ་ཤུགས་ངང་གིས་འབྱུང་བས་དོན་ཐམས་ཅད་བདེ་བླག་ཏུ་འགྲུབ་པར་འགྱུར་རོ། །བཞི་པ་བསྒྲུབ་པའི་ཚེ་དམ་པ་དྲུག་ལྡན་དང་ཕར་ཕྱིར་དྲུག་ལྡན་གྱི་སྒོ་ནས་བྱའོ། །ལྔ་པ་དོན་བསྡུ་བ་ནི། སེམས་བསྐྱེད་པ་གཞིར་བྱས་ཏེ་བརྩོན་འགྲུས་ཆེན་པོ་བྱ་དཀའ་བ་རྣམས་སྨོན་པའི་ཡུལ་དུ་བྱས་ནས་སྦྱོང་ཞིང་། ལས་དང་པོ་པའི་སྐབས་སུ་བྱ་ནུས་པའི་བརྩོན་འགྲུས་རྣམས་ལ་རྩལ་ཅི་ཡོད་ཀྱི་སྒོ་ནས་འབད་ཅིང་བསྒྲུབ་པར་བྱའོ། །ལྔ་པ་བསམ་གཏན་གྱི་ཕར་ཕྱིན་ལ་ལྔ། བསམ་གཏན་གྱི་ངོ་བོ། །འཇུག་ཐབས། དབྱེ་བ། བསྒྲུབ་པའི་ཚེ་ཇི་ལྟར་བྱ་བ། དོན་བསྡུ་བའོ། །དང་པོ་ནི། དམིགས་པ་ལས་གཞན་དུ་མི་གཡེང་བར་གནས་པའི་དགེ་སེམས་རྩེ་གཅིག་པའོ། །གཉིས་པ་ནི། བསམ་གཏན་བསྒོམས་པའི་ཕན་ཡོན་དང་མ་བསྒོམས་པའི་ཉེས་དམིགས་སེམས་པ་སྟེ་ཞི་གནས་ཀྱི་སྐབས་སུ་འཆད་དོ་། །གསུམ་པ་དབྱེ་བའི་སྒོ་གཞན་ཡོད་ཀྱང་བྱེད་ལས་ཀྱིས་དབྱེ་བ་གསུམ་སྟེ། ལུས་སེམས་བདེར་གནས་ཀྱི་བསམ་གཏན་དང་། ཡོན་ཏན་མངོན་པར་བསྒྲུབ་པའི་བསམ་གཏན་དང་། སེམས་ཅན་གྱི་དོན་བྱེད་པའི་བསམ་གཏན་ནོ། །དང་པོ་ནི། ལུས་སེམས་ཀྱི་ཤིང་སྦྱངས་བསྐྱེད་པའི་བསམ་གཏན་ནོ། །གཉིས་པ་ནི། མངོན་ཤེས་རྫུ་འཕྲུལ་སོགས་བསྐྱེད་པ་དང་། གསུམ་པ་ནི། དོན་བྱ་བ་བཅུ་གཅིག་གི་སྒོ་ནས་དོན་བསྒྲུབ་པའི་བསམ་གཏན་ནོ། །བཞི་པ་བསྒྲུབ་པའི་ཚེ་དམ་པ་དྲུག་ལྡན་དང་ཕར་ཕྱིན་དྲུག་ལྡན་དུ་བྱས་ནས་བསྒྲུབ་པར་བྱའོ། །ལྔ་པ་དོན་བསྡུ་བ་ནི། སེམས་བསྐྱེད་གཞིར་བཟུང་བ་ནི་སེམས་ཅན་ཐམས་ཅད་ཟག་མེད་ཀྱི་བསམ་གཏན་ལ་འགོད་པའི་ཕྱིར་དུ་སྐུལ་བྱེད་ཡིན་པས་དེ་བརྟན་པར་བྱ་ཞིང་། ས་མཐོན་པོའི་བསམ་གཏན་རྣམས་སྨོན་ཡུལ་དུ་བྱས་ནས་སྐྱོང་བ་དང་། སེམས་རྩེ་གཅིག་པའི་ཏིང་ངེ་འཛིན་ལ་ཅི་ནུས་སུ་སློབ་པའི་བརྩོན་པ་མི་གཏོང་བར་བྱས་ཏེ་འབད་དགོས་སོ། །དྲུག་པ་ཤེས་རབ་ཀྱི་ཕར་ཕྱིན་ལ་བསླབ་པ་ལ་ལྔ། ཤེས་རབ་ཀྱི་ངོ་བོ། །དེ་བསྐྱེད་པའི་ཐབས། ཤེས་རབ་ཀྱི་དབྱེ་བ། བསྒྲུབ་པའི་ཚེ་ཇི་ལྟར་བྱ་བ། དེ་དག་གི་དོན་བསྡུ་བའོ། །དང་པོ་ནི། བརྟགས་པའི་དངོས་པོ་ལ་ཆོས་རབ་ཏུ་རྣམ་པར་འབྱེད་པའི་བློའོ། །གཉིས་པ་ནི། ཤེས་རབ་བསྐྱེད་པའི་ཕན་ཡོན་དང་མ་བསྐྱེད་པའི་ཉེས་དམིགས་སེམས་པ་སྟེ། ཕན་ཡོན་ནི་མགོན་པོ་ཀླུ་སྒྲུབ་ཀྱིས། མཐོང་དང་མ་མཐོང་ཡོན་ཏན་འདི། །ཀུན་གྱི་རྩ་བ་ཤེས་རབ་ཡིན། །ཞེས་དང་། སློབ་དཔོན་དཔའ་བོས། སྦྱིན་ལ་སོགས་པའི་བསོད་ནམས་འདི་དག་ནི། །ཤེས་རབ་མགོན་བཅས་ལྷག་པར་མཐུ་ལྡན་གྱུར། །ཞེས་པ་ལྟ་བུ་སྟེ་མང་ལ། མདོར་ན་བླང་དོར་གྱི་གནས་རྣམས་ལེགས་པར་འབྱེད་པ་དང་། ཐར་པ་དང་ཐམས་ཅད་མཁྱེན་པའི་གོ་འཕང་བསྒྲུབ་པ་ཡང་ཤེས་རབ་ལ་རག་ལས་ཞིང་དེ་གཙོ་བོ་ཡིན་ལ། ཤེས་རབ་བཟང་པོ་མེད་ན་ལེགས་ཉེས་འབྱེད་མི་ནུས་པས་བླང་དོར་གང་ཡིན་མི་ཤེས་པའི་རྨོངས་པའི་དབང་དུ་གྱུར་ཏེ་ཉེས་སྐྱོན་ཐམས་ཅད་བསྐྱེད་པར་བྱེད་དོ། །ཤེས་རབ་བསྐྱེད་པའི་རྒྱུའི་གཙོ་བོ་ནི་ཐོས་པ་ཡིན་ཏེ། ཚོམས་ལས། ཐོས་པས་ཆོས་རྣམས་ཤེས་པར་འགྱུར། །ཞེས་དང་། བསྟེན་འོས་བླ་མ་རིམ་གྲོ་བསྙེན་བཀུར་ཏེ། །ཤེས་རབ་བསྒྲུབ་ཕྱིར་ཐོས་པ་བཙལ་བར་བྱ། །ཞེས་གསུངས་པ་ལྟར་རོ། །བསྒོམས་ནའང་ཐོས་པ་དགོས་ཏེ། སློབ་དཔོན་དཔའ་བོས། ཐོས་ཉུང་དམུས་ལོང་བསྒོམས་པའི་ཚུལ་མི་ཤེས། །དེ་མེད་དེ་གོ་ཅི་ཞིག་བསྒོམ་པར་བྱ། །དེ་བས་ཐོས་ལ་བརྩོན་བྱ་དེ་རྒྱུ་ལས། །བསམས་བཞིན་བསྒོམས་པས་ཤེས་རབ་ཡངས་པ་འབྱུང་། །ཞེས་གསུངས་པའི་ཕྱིར་རོ། །གསུམ་པ་ཤེས་རབ་ཀྱི་དབྱེ་བ་ལ་གསུམ་སྟེ། །དོན་དམ་རྟོགས་པ་དང་། ཀུན་རྫོབ་རྟོགས་པ་དང་། སེམས་ཅན་གྱི་དོན་བྱ་བ་ཤེས་པའི་ཤེས་རབ་བོ། །དང་པོ་ནི། བདག་མེད་པའི་དེ་ཁོ་ན་ཉིད་དོན་སྤྱིའི་སྒོ་ནས་རྟོགས་པ་དང་མངོན་སུམ་དུ་རྟོགས་པའོ། །གཉིས་པ་ནི། རིག་པའི་གནས་ལྔ་ལ་མཁས་པའི་ཤེས་རབ་སྟེ། མདོ་སྡེའི་རྒྱན་ལས། རིག་པའི་གནས་ལྔ་དག་ལ་མཁས་པར་མ་བྱས་ན། །འཕགས་མཆོག་གིས་ཀྱང་ཐམས་ཅད་མཁྱེན་ཉིད་མི་འགྱུར་ཏེ། །ཞེས་གསུངས་པ་ལྟར་རོ། །གསུམ་པ་ནི། སེམས་ཅན་གྱི་དོན་ལེགས་པར་བསྒྲུབ་ཤེས་པའི་ཤེས་རབ་བོ། །བཞི་པ་བསྒྲུབ་པའི་ཚེ་དམ་པ་དྲུག་ལྡན་དང་ཕར་ཕྱིར་དྲུག་ལྡན་དུ་བྱ་སྟེ་དམ་པ་དྲུག་ནི་གོང་དུ་བརྗོད་ཟིན་ལ། ཕར་ཕྱིན་དྲུག་ལྡན་དུ་བྱ་ཚུལ་ནི་ཕྱིན་དྲུག་རེ་རེ་ལ་དྲུག་དྲུག་འབྱུང་སྟེ། སྦྱིན་པའི་སྐབས་སུ་གཞན་ལ་གནོད་པ་སྤོང་བ་དང་ཉན་རང་གི་ཡིད་བྱེད་སྡོམ་པ་ཚུལ་ཁྲིམས་ཡིན་ལ། གཞན་གྱིས་གནོད་པ་ལ་བཟོད་ཅིང་ཆོས་ཟབ་མོ་ལ་བཟོད་པ། སྦྱིན་པའི་ཆེད་དུ་ལེགས་པར་འབད་པ་བརྩོན་འགྲུས། ཐེག་དམན་དང་མ་འདྲེས་པའི་སེམས་རྩེ་གཅིག་པས་དགེ་བ་རྫོགས་བྱང་དུ་བསྔོ་བ་བསམ་གཏན །སྦྱིན་བྱ་དང་སྦྱིན་པ་པོ་དང་ལེན་པ་པོའི་འཁོར་གསུམ་རྣམས་རང་བཞིན་མེད་པ་སྒྱུ་མ་ལྟ་བུར་ཤེས་པ་ནི་ཤེས་རབ་བོ། །དེ་བཞིན་དུ་ཤེས་རབ་ཀྱི་བར་སྐབས་ཐོབ་ཀྱིས་སྦྱར་བ་བྱ་སྟེ། ཚུལ་ཁྲིམས་ནས་ཤེས་རབ་ཀྱི་བར་ལ་གནས་ནས་གཞན་དེ་དག་ལ་འགོད་པ་ནི་དེ་དག་གི་སྦྱིན་པ་ཡིན་ལ། གཞན་རྣམས་སྦྱིན་པ་ལ་བཤད་པ་ལྟར་སྦྱར་ནས་ཤེས་པར་བྱའོ། །ལྔ་པ་དོན་བསྡུ་བ་ནི། སེམས་བསྐྱེད་གཞིར་བཟུར་སྟེ་ས་མཐོན་པོའི་ཤེས་རབ་ཀྱི་ཕར་ཕྱིན་རྣམས་ནི་སྨོན་ཡུལ་དུ་བྱ་ཞིང་། གཞན་ཤེས་རབ་གསུམ་བསྐྱེད་པ་དང་གནས་པ་དང་འཕེལ་བའི་ཐབས་ལ་འབད་པར་བྱའོ། །མདོར་ན་ཕྱིན་དྲུག་འདི་དཀར་ཆོས་ཐམས་ཅད་ཀྱི་རྒྱ་མཚོ་ཉམས་ལེན་གྱི་གནད་རྣམས་བསྡུས་པའི་སྡོམ་པ་ཆེན་པོ་ཡིན་པས་འབད་པས་བསྒྲུབ་པར་བྱའོ། །གཉིས་པ་གཞན་རྒྱུད་སྨིན་བྱེད་ཀྱི་བསྡུ་བཞི་ལ་ལྔ། བསྡུ་བཞིའི་ངོ་བོ། བཞིར་བཞག་བའི་རྒྱུ་མཚན། བསྡུ་བཞིའི་བྱེད་ལས། དེ་ལ་བརྟེན་དགོས་པ། ཅུང་ཟད་རྒྱས་པར་བཤད་པའོ། །དང་པོ་ལ་བཞི་ལས། སྦྱིན་པ་ནི་སྔར་དང་འདྲ་ལ། སྙན་པར་སྨྲ་པ་ནི་གདུལ་བྱ་ལ་ཕར་ཕྱིན་ལེགས་པར་སྟོན་པ་དང་། དོན་སྤྱོད་པ་ནི་བསྟན་པའི་དོན་བཞིན་དུ་སྤྱོད་དུ་འཇུག་པ་དང་། དོན་མཐུན་པ་ནི་གཞན་དོན་གང་ལ་སྦྱར་བ་དེ་ལ་རང་ཡང་གནས་ནས་སྤྱོད་པའོ། །གཉིས་པ་བཞིར་འཇོག་པའི་རྒྱུ་མཚན་ནི། གདུལ་བྱ་དགེ་བ་ལ་སྦྱོར་བའི་ཆེད་ཐོག་མར་ཟང་ཟིང་གི་སྦྱིིན་པས་བསྡུ་དགོས་ཤིང་། དེ་ནས་སྙན་པར་སྨྲ་བས་ཆོས་བཤད་ནས་ཐེ་ཚོམ་བཅོད། དོན་དེ་ལྟར་ཤེས་པར་བྱས་ཏེ་དགེ་བ་བསྒྲུབ་པ་ལ་འཇུག །རང་གིས་མ་བསྒྲུབས་ན་ཁྱེད་རང་དོན་འདི་མི་བསྒྲུབ་འདུག་ཅེས་ཟེར་འོང་བས་རང་གིས་ཀྱང་དོན་དེ་དང་དེ་ལེགས་པར་བསྒྲུབ་པ་ལ་འཇུག་པའི་སྒོ་ནས་བྱ་བའོ། །གསུམ་པ་བྱེད་ལས་ནི། སྦྱིན་པས་ཆོས་ཉན་པའི་སྣོད་དུ་རུང་བར་བྱེད། སྙན་པར་སྨྲ་བས་ནི་བསྟན་བྱའི་ཆོས་ལ་མོས་པར་བྱེད་དུ་འཇུག །དོན་སྤྱོད་པས་ནི་བསྟན་པ་ལྟར་སྒྲུབ་པར་བྱེད། དོན་མཐུན་པས་ནི་མི་ལྡོག་པར་སྒྲུབ་པར་བྱེད་པའོ། །བཞི་པ་ནི། བསྡུ་བཞི་ལ་བརྟེན་དགོས་ཏེ། འཁོར་བསྡུས་ནས་ཆོས་ལ་འཇུག་པའི་ཐབས་ཀྱི་མཆོག་ཡིན་པའི་ཕྱིར་ཏེ། མདོ་སྡེའི་རྒྱན་ལས། འཁོར་སྡུད་པ་དང་ལྡན་པ་རྣམས། །ཚུལ་འདི་ལ་ནི་ཡང་དག་བསྟེན། །ཀུན་གྱི་དོན་ཀུན་འགྲུབ་བྱེད་པའི། །ཐབས་བཟང་ཡིན་པར་རབ་ཏུ་བསྔགས། །ཞེས་གསུངས་པའི་ཕྱིར། སྦྱིན་པ་ལ་ཆོས་དང་ཟང་ཟིང་གི་སྦྱིན་པ་གཉིས་ཡོད་ཅིང་། སྙན་པར་སྨྲ་བ་ལ་གཉིས་ལས་འཇིག་རྟེན་གྱི་ཚུལ་དང་མཐུན་པའི་སྙན་སྨྲ་ནི་ཁྲོ་གཉེར་མེད་ཅིང་བཞིན་མདངས་འཛུམ་པའི་སྒོ་ནས་ཁམས་འདྲི་བ་སོགས་བྱེད་པ་དང་། ཆོས་ཀྱི་སྙན་སྨྲ་ནི་ཕན་པ་དང་བདེ་བའི་ཆོས་སྟོན་པའོ། །དོན་སྤྱོད་པ་ལ་གཉིས་ཏེ་སེམས་ཅན་མ་སྨིན་པ་སྨིན་པར་བྱེད་པ་དང་། སྨིན་པ་རྣམས་གྲོལ་བར་བྱེད་པའོ། །དོན་མཐུན་པ་ནི་ཕ་རོལ་པོ་གང་ལ་དགོད་པ་དེ་དང་མཚུངས་པའམ་དེ་ལས་ལྷག་པར་རང་གནས་པར་བྱེད་པ་སྟེ། མདོར་ན་གཙོ་བོར་གཞན་དོན་ལ་དམིགས་ནས་བྱེད་དགོས་སོ། །དེ་དག་ནི་སེམས་བསྐྱེད་ནས་སྤྱོད་པ་ཕྱིན་དྲུག་སོ་སོ་དང་བསྡུ་བཞི་ལ་སློབ་པའི་སྐོར་བསྡུས་པའོ། །གཉིས་པ་ཁྱད་པར་དུ་ཕར་ཕྱིན་ཐ་མ་གཉིས་ལ་བསླབ་པ་སྟེ་འདི་ལ་དྲུག །ཞི་ལྷག་གཉིས་བསྒོམས་པའི་ཕན་ཡོན། དེ་གཉིས་ཏིང་ངེ་འཛིན་ཀུན་གྱི་སྡུད་བྱེད་དུ་བསྟན་པ། དེ་གཉིས་ཀྱི་ངོ་བོ་ཞི་ལྷག་གཉིས་ལ་བསྒོམ་དགོས་པའི་རྒྱུ་མཚན། གོ་རིམ་ངེས་ཚུལ། སོ་སོའི་བསླབ་ཚུལ་ལོ། །དང་པོ་ནི་ཞི་ལྷག་གཉིས་བསྒོམས་པའི་འབྲས་བུའམ་ཕན་ཡོན་ཡོད་དེ། ཐེག་པ་གསུམ་གྱི་ཡོན་ཏན་ཐམས་ཅད་ཞི་གནས་དང་ལྷག་མཐོང་དངོས་སམ་རྗེས་སུ་མཐུན་པའི་འབྲས་བུ་ཡིན་པའི་ཕྱིར་ཏེ། མདོ་དགོངས་འགྲེལ་ལས། དགེ་བའི་ཆོས་འཇིག་རྟེན་པ་དང་འཇིག་རྟེན་ལས་འདས་པ་ཐམས་ཅད་ཀྱང་ཞི་གནས་དང་ལྷག་མཐོང་གི་འབྲས་བུ་ཡིན་པར་རིག་པར་བྱའོ། །ཞེས་གསུངས་པའི་ཕྱིར། དེ་ཡང་ཞི་ལྷག་དངོས་ཀྱི་འབྲས་བུ་ཡིན་པའི་ངེས་པ་མེད་ཀྱང་། དམིགས་པ་རྩེ་གཅིག་པ་ཡན་ཆད་ཀྱི་ཏིང་ངེ་འཛིན་རྣམས་ཞི་གནས་ཀྱི་ཕྱོགས་སུ་འདུ་ཞིང་། ཇི་ལྟ་ཇི་སྙེད་པའི་དོན་སོ་སོར་འབྱེད་པའི་ཤེས་རབ་རྣམས་ལྷག་མཐོང་གི་ཕྱོགས་སུ་འདུ་བས་དེ་ལ་དགོངས་པའོ། །གཉིས་པ་ནི། ཞི་ལྷག་གཉིས་ཏིང་ངེ་འཛིན་ཀུན་གྱི་སྡུད་བྱེད་དུ་འགྱུར་ཏེ། དཔེར་ན་སྡོང་པོ་ལ་ཡལ་ག་དང་ལོ་མ་སོགས་དུ་མ་ཡོད་ཀྱང་། དེ་དག་གང་ལ་འདུས་ཤིང་གནས་པའི་གཞི་ནི་རྩ་བ་ཡིན་པ་ལྟར་ཐེག་པ་ཆེ་ཆུང་གི་ཏིང་ངེ་འཛིན་མཐའ་ཡས་པ་ཞིག་གསུངས་པ་ཐམས་ཅད་ཀྱང་གང་དུ་འདུ་བའི་གནད་དམ་པ་ནི་ཞི་ལྷག་གཉིས་ཡིན་པའི་ཕྱིར་ཏེ། དགོངས་འགྲེལ་ལས། ཏིང་ངེ་འཛིན་རྣམ་པ་དུ་མ་བསྟན་པ་གང་ཡིན་པ་དེ་ཐམས་ཅད་ཞི་གནས་དང་ལྷག་མཐོང་གིས་བསྡུས་པར་རིག་པར་བྱའོ། །ཞེས་གསུངས་པའི་ཕྱིར། གསུམ་པ་ཞི་ལྷག་གི་ངོ་བོ་ལ་གཉིས་ལས་ཞི་གནས་ཀྱི་ངོ་བོ་ནི། དམིགས་རྟེན་གང་ཡང་རུང་བ་ལ་དམིགས་ནས་གཞན་དུ་མི་གཡེང་བར་དྲན་པ་རྒྱུད་ཆགས་སུ་བྱས་སྟོབས་ཀྱིས་ལུས་སེམས་ཤིན་ཏུ་སྦྱངས་པའི་དགའ་བདེ་སྐྱེས་པའི་ཏིང་ངེ་འཛིན་ནོ། །ལྷག་མཐོང་གི་ངོ་བོ་ནི། ཞི་གནས་དེ་ཉིད་ལ་གནས་པའི་ངང་ནས་དམིགས་པ་ལ་རྣམ་པར་དབྱོད་པའི་ཤེས་རབ་པོ། །བཞི་པ་ཞི་ལྷག་གཉིས་ཀ་བསྒོམ་པའི་རྒྱུ་མཚན་ཡོད་དེ། དཔེར་ན་མར་མེ་གསལ་བ་དང་རླུང་གིས་མི་བསྐྱོད་པ་གཉིས་ཚོགས་ན་གཟུགས་ཤིན་ཏུ་གསལ་བར་མཐོང་ལ། མི་གསལ་བའམ་རླུང་གིས་བསྐྱོད་ན་གཟུགས་གསལ་བར་མི་མཐོང་བ་དེ་བཞིན་དུ། དེ་ཁོ་ན་ཉིད་ཀྱི་དོན་ལྟ་བུ་ཕྱིན་ཅི་མ་ལོག་པར་ངེས་པའི་ཤེས་རབ་དང་སེམས་མི་གཡོ་བར་གནས་པ་གཉིས་དང་ལྡན་ན་ནི་དེ་ཁོ་ན་ཉིད་གསལ་བར་མཐོང་གི དེ་གཉིས་དང་མི་ལྡན་ན་ནི་དེ་ཁོ་ན་ཉིད་ཀྱིི་དོན་གསལ་བར་མི་མཐོང་བའི་ཕྱིར་རོ། །དེས་ན་གཉིས་ཀ་ཚོགས་པ་དགོས་སོ། །ཞི་ལྷག་གཉིས་མ་ཐོབ་གོང་དུའང་བདག་མེད་པའི་དེ་ཁོ་ན་ཉིད་ཀྱི་དོན་མཐོང་བ་ཡོད་མོད་ཀྱང་། དེ་ནི་རླུང་གིས་བསྐྱོད་པའི་མར་མེ་བཞིན་དུ་སེམས་ཧ་ཅང་གཡོ་བས་བདག་མེད་པའི་དོན་སྤྱི་ཡང་ལེགས་པོར་མི་གསལ་ཤིང་། གང་གི་ཚེ་ཞི་གནས་འགྲུབ་པ་ན་གཡོ་བའི་སྐྱོན་དེ་བཟློག་ནས་དོན་སྤྱི་གསལ་བར་འགྱུར་ཞེས་བཤད་པ་ལྟར་རོ། །དེས་ན་ཞི་ལྷག་མ་ཐོབ་གོང་དུ་དེ་ཁོ་ན་ཉིད་ཀྱི་དོན་ལ་དཔྱོད་བྱེད་ཀྱི་རིགས་པས་ཅི་ཙམ་དཔྱད་ཀྱང་ཉོན་མོངས་པ་མངོན་འགྱུར་འགོ་མནོན་པ་དང་ཐར་པའི་བག་ཆགས་འཇོག་ནུས་པ་འོང་ཡང་ཉོན་མོངས་སྡོད་མི་ནུས་ཏེ། །ཉོན་མོངས་རྩད་ནས་འཇོམས་བྱེད་ཀྱི་གཉེན་པོ་རྫོགས་པ་ནི་ལྷག་མཐོང་ཡིན་ཞིང་དེ་ཡང་ཞི་གནས་ལ་བརྟེན་དགོས་པའི་ཕྱིར་རོ། །ལྔ་པ་གོ་རིམ་ནི། སྤྱོད་འཇུག་ལས། ཞི་གནས་རབ་ཏུ་ལྡན་པའི་ལྷག་མཐོང་གིས། །ཉོན་མོངས་རྣམ་པར་འཇོམས་པར་ཤེས་བྱས་ནས། །ཐོག་མར་ཞི་གནས་བཙལ་བྱ་དེ་ཡང་ནི། །ཞེས་གསུངས་པ་ལྟར། སྔོན་དུ་ཞི་གནས་བསྒྲུབས་ཏེ་དེ་ནས་ལྷག་མཐོང་བསྒོམ་པ་ཡིན་ཏེ། ཞི་གནས་ལ་གནས་བཞིན་པའི་ངང་ནས་དམིགས་རྟེན་ལ་ཡང་ཡང་དཔྱད་པ་ལས་ལྷག་མཐོང་སྐྱེ་བ་ཡིན་གྱི་དེའི་སྔོན་དུ་འབྱུང་བ་མ་ཡིན་པའི་ཕྱིར་རོ། །དྲུག་པ་སོ་སོའི་བསླབ་ཚུལ་ལ་གསུམ། ཞི་གནས་དང་། ལྷག་མཐོང་དང་། དེ་གཉིས་ཟུང་འབྲེལ་ལ་བསླབ་ཚུལ་ལོ། །དང་པོ་ལ་གསུམ། ཞི་གནས་ཀྱི་ཚོགས། ཞི་གནས་བསྒོམ་ཚུལ། ཞི་གནས་གྲུབ་ཚད་དོ། །དང་པོ་ལ་དྲུག ། མཐུན་པའི་ཡུལ་ན་གནས་པ། འདོད་པ་ཆུང་བ། ཆོས་ཤེས་པ། བྱ་བ་མང་པོ་ཡོངས་སུ་སྤོང་བ། ཚུལ་ཁྲིམས་དག་པ། འདོད་པའི་རྣམ་རྟོག་སྤོང་བའོ། །དང་པོ་ནི། མདོ་སྡེའི་རྒྱན་ལས། བློ་ལྡན་གང་དུ་བསྒྲུབ་པའི་ཡུལ། །ལེགས་པར་རྙེད་དང་གནས་བཟང་དང་། ས་བཟང་བ་དང་གྲོགས་བཟང་དང་། རྣལ་འབྱོར་བདེ་བའི་ཡོ་བྱད་ལྡན། །ཞེས་གསུངས་པ་ལྟར་རོ། །གཉིས་པ་ནི། ཡོ་བྱད་བཟང་པོ་དང་མང་པོ་ལ་ལྷག་པར་མི་ཆགས་པ་དང་། གསུམ་པ་ནི། ཡོ་བྱད་ངན་ངོན་ཙམ་གྱིས་ཀྱང་ཆོག་ཤེས་པ་དང་། བཞི་པ་ནི། ཁེ་ཚོང་སོགས་དང་ཁྱིམ་པ་དང་རབ་ཏུ་བྱུང་རྣམས་དང་ཧ་ཅང་འདྲིས་ཆེ་བ་སོགས་ཀྱི་གཡེང་བ་སྤོང་བ་དང་། ལྔ་པ་ནི། སྡོམ་པ་གཉིས་ཀྱི་བཅས་རང་གི་ཁ་ན་མ་ཐོ་བ་རྣམས་སྲུང་བར་བྱེད་པ་དང་། དྲུག་པ་ནི། ཟག་བཅས་ཀྱི་དངོས་པོ་ཡིད་དུ་འོང་མི་འོང་ཐམས་ཅད་འཇིག་པའི་ཆོས་ཅན་ཡིན་པར་ཤེས་ནས་ལྷག་པར་མི་ཞེན་པའོ། །འདི་དྲུག་ནི་ཏིང་ངེ་འཛིན་སྐྱེ་བར་འགྱུར་པའི་རྒྱུ་རྐྱེན་ནམ་ཚོགས་པ་ཡིན་པས་གལ་ཆེའོ། །གཉིས་པ་ཞི་གནས་བསྒོམ་ཚུལ་ལ་གཉིས། སྦྱོར་བ་དང་། དངོས་གཞིའོ། །དང་པོ་ནི། སྦྱོར་བའི་ཆོས་དྲུག་དང་སྐྱེས་བུ་གཉིས་ཀྱི་དམིགས་རྣམ་གྱིི་ངོ་བོ་རྣམས་ཀྱང་བསྐྱང་བར་བྱའོ། །གཉིས་པ་ལ་གཉིས། སྤྱོོད་ལམ་ཇི་འདྲ་བ་དང་། བསྒོམ་པའི་རིམ་པའོ། །དང་པོ་ལུས་ཀྱི་སྤྱོད་ལམ་ནི་སྟན་བདེ་བ་ལ་ལུས་ཀྱི་ཀུན་སྤྱོད་བརྒྱད་དང་ལྡན་པར་བྱ་སྟེ། དེ་ཡང་རྐང་པ་གཉིས་རྡོ་རྗེའི་སྐྱིལ་ཀྲུང་ངམ་སྐྱིལ་ཀྲུང་ཕྱེད་པ་གང་རུང་དང་། མིག་ཧ་ཅང་མི་དབྱེ་མི་ཟུམ་པར་སྣ་རྩེར་གཏད་པ་དང་། ལུས་ཀྱི་སྤྱིི་ནི་དྲང་པོར་སྲོང་བ་དང་། ཕྲག་པ་གཉིས་ཐད་ཀར་མཉམ་པ་དང་། མགོ་བོ་ནི་མི་མཐོ་མི་དམའ་ཞིང་མི་ཡོ་བར་དྲང་བོ་དང་། སོ་མཆུ་ནི་རང་ལུགས་སུ་ཐ་མལ་པར་བཞག་པ་དང་། ལྕེ་ནི་ཡ་སོའི་དྲ྄ུང་དུ་དང་། དབུགས་ནི་དལ་བུས་རྒྱུ་བར་བྱའོ། །གཉིས་པ་བསྒོམ་པའི་རིམ་པ་བཤད་པ་ལ་གཉིས། ཏིང་ངེ་འཛིན་སྐྱོན་མེད་སྐྱེ་ཚུལ་དང་། སྐྱེ་བའི་རིམ་པའོ། །དང་པོ་ལ་གསུམ་། དམིགས་པ་ལ་གཏོད་པའི་སྔོན་དུ་ཇི་ལྟར་བྱ་བ་དང་། གཏོད་པའི་དུས་སུ་ཇི་ལྟར་བྱ་བ་དང་། གཏད་པའི་འོག་ཏུ་ཇི་ལྟར་བྱ་བའོ། །དང་པོ་ནི། ཐོག་མར་ལེ་ལོ་འགོག་ཅིང་ཏིང་ངེ་འཛིན་གྱི་ཡོན་ཏན་མཐོང་བའི་དད་པ་ཡང་ཡང་བསྒོམ། དེ་ནས་ཏིང་ངེ་འཛིན་དེ་དོན་དུ་གཉེར་བའི་འདུན་པ་དྲག་པོ་བསྐྱེད་ཅིང་། དེ་ནས་ཏིང་ངེ་འཛིན་ལ་རྒྱུན་ལྡན་དུ་འཇུག་པའི་བརྩོན་འགྲུས་བྱས་ཏེ་ཤིན་སྦྱངས་ཀྱི་བདེ་བ་དང་ལྡན་པའི་ཞི་གནས་འགྲུབ་པ་ན་དགེ་སྦྱོང་གང་བྱེད་ཀྱང་སྐྱོ་ངལ་མི་འབྱུང་ངོ། །གཉིས་པ་ལ་གཉིས། དམིགས་པའི་གཞི་ངོས་བཟུང་བ་དང་། དེ་ལ་སེམས་ཇི་ལྟར་གཏོང་བའི་ཚུལ་ལོ། །དང་པོ་ལ་གཉིས། དམིགས་པ་སྤྱིིའི་རྣམ་གཞག་དང་། སྐབས་འདིའི་དམིགས་པའོ། །དང་པོ་ལ་གསུམ་། དམིགས་པ་དངོས་དང་། གང་ཟག་གང་གིས་གང་ལ་དམིགས་པ་དང་། དམིགས་པའི་རྣམ་གྲངས་སོ། །དང་པོ་ལ་བཞི་སྟེ། ཁྱབ་པའི་དམིགས་པ་དང་། སྤྱད་པ་རྣམ་སྦྱོང་གི་དམིགས་པ་དང་། མཁས་པའི་དམིགས་པ་དང་། ཉོན་མོངས་རྣམ་སྦྱོང་གི་དམིགས་པའོ། །དང་པོའི་དམིགས་པ་ནི་ཕུང་སོགས་ཀྱི་ཆོས་ཐམས་ཅད་དོ། །གཉིས་པའི་དམིགས་པ་ནི་འདོད་ཆགས་ཅན་གྱིས་མི་སྡུག་པ་དང་ཞེ་སྡང་ཅན་གྱིས་བྱམས་པ་དང་གཏི་མུག་ཅན་གྱིས་རྟེན་འབྲེལ་དང་ཁམས་ཀྱི་རབ་དབྱེ་སོགས་ལ་དམིགས་ནས་བསྒོམ་པའོ། །གསུམ་པ་མཁས་པའི་དམིགས་པ་ནི་ཕུང་ཁམས་སྐྱེ་མཆེད་རྟེན་འབྲེལ་གནས་དང་གནས་མ་ཡིན་པ་ལྔ་སྟེ། ཆོས་དེ་དག་ལ་བདག་བཀག་ནས་སྒོམ་པ་ཡིན་ལ། བཞི་པ་ནི། དེ་དག་དང་མི་རྟག་སོགས་བཅུ་དྲུག་ཉོན་མོངས་པ་སྦྱོང་པའི་ཆེད་དུ་དམིགས་ནས་བསྒོམ་པའོ། །གཉིས་པ་གང་ཟག་གང་གིས་གང་ལ་དམིགས་པ་བསྡུ་ན། ཆགས་སོགས་གང་ཤས་ཆེ་ན་དེ་དང་དེའི་གཉེན་པོ་ཐུན་མོང་མ་ཡིན་པ་རྣམས་བསྒོམ་པར་བྱ་བ་སྟེ། འདོད་ཆགས་ཆེ་ན་མི་སྡུག་པ་བསྒོམ་པ་ནས་ང་རྒྱལ་ཅན་གྱིས་ཁམས་ཀྱི་རབ་དབྱེ་ལ་དམིགས་ནས་བསྒོམ་པའོ། །གསུམ་པ་རྣམ་གྲངས་ནི། གང་ལ་སེམས་བཟུང་བའི་ཏིང་ངེ་འཛིན་ལ་ཤར་བའི་རྣམ་པ་དང་སྣང་བ་དང་གཟུགས་བརྙན་ནམ་དོན་སྤྱིའོ། །གཉིས་པ་སྐབས་འདིའི་དམིགས་པ་ནི། སྤྱིར་སྔར་སྨོས་པ་ལྟར་དམིགས་རྟེན་མང་པོ་ཞིག་ཡོད་ཀྱང་སྐབས་འདིར་ནི་དགོས་པ་དུ་མའི་ཆེད་དུ་སངས་རྒྱས་ཀྱི་སྐུ་གཟུགས་ལ་དམིགས་ནས་བསྒོམ་པར་བྱ་སྟེ། དེ་ཡང་ཏིང་འཛིན་རྒྱལ་པོ་ལས། གསེར་གྱི་ཁ་དོག་ལྟ་བུའི་སྐུ་ལུས་ཀྱིས། །འཇིག་རྟེན་མགོན་པོ་ཀུན་ཏུ་མཛེས་པ་སྟེ། །དམིགས་པ་དེ་ལ་གང་གི་སེམས་འཇུག་པ། །བྱང་ཆུབ་སེམས་དཔའ་དེ་མཉམ་གཞག་ཅེས་བྱ། །ཞེས་གསུངས་པའི་ཕྱིར་རོ། །དེ་ཡང་སྔོན་དུ་སྟོན་པའི་བྲིས་འབུར་གྱི་སྐུ་བྱོན་ལེགས་པ་ཞིག་བཙལ་ཏེ་བལྟ་ཞིང་ཡིད་ཡུལ་དུ་འཆར་བ་ལ་གོམས་སུ་གཞུག །དེ་ནི་བྲིས་འབུར་གྱི་རྣམ་པ་ཙམ་དུ་མི་བསམ་པར་སངས་རྒྱས་དངོས་ཀྱི་སྐུའི་རྣམ་པ་ཅན་དུ་འཆར་བ་ལ་བསླབ་བོ། །སྐུའི་ཆ་ཕྲ་རགས་གཉིས་ལས་དང་པོ་རགས་པ་དང་ཕྱིས་ཕྲ་བ་ལ་དམིགས་རྟེན་བྱ་དགོས་ལ། དེའི་ཚེ་ཐོག་མར་དམིགས་པ་གཅིག་ཁོ་ན་ལ་དམིགས་རྟེན་བྱས་ནས་བསྒྲུབ་པར་བྱའི། །དམིགས་པ་མི་འདྲ་བ་མང་པོ་སྤོས་ན་ཏིང་ངེ་འཛིན་སྐྱེ་བའི་གེགས་སུ་འགྱུར་ཏེ། སློབ་དཔོན་དཔའ་བོས། དམིགས་པ་གཅིག་ལ་བརྟན་ཚུལ་དུ། །ཡིད་ཀྱི་བསམ་པ་བརྟེན་པར་བྱ། །དམིགས་པ་མང་པོ་བརྒྱུད་པ་ལས། །ཡིད་ནི་ཉོན་མོངས་འཁྲུགས་པར་འགྱུར། །ཞེས་གསུངས་སོ། །དམིགས་རྟེན་རྙེད་པའི་ཚད་ནི། དབུ་ནས་ཞབས་ཀྱི་བར་རིམ་པ་བཞིན་དུ་ལན་འགའ་རེ་གསལ་གདབ། དེའི་མཐར་སྐུའི་སྤྱི་ཡིད་ལ་བྱས་པ་ན་ཡིད་ངོར་ཡན་ལག་རགས་པ་རྣམས་ཆ་ཕྱེད་ཙམ་ཞིག་འཆར་ཐུབ་པ་བྱུང་ན་དེ་ཙམ་ཞིག་གིས་ཆོག་ཤེས་བྱས་ནས་སེམས་བཟུང་དགོས་ཏེ། ལྷག་པ་འདོད་ནས་གཞན་དང་གཞན་གསལ་བཏབ་ན་ཅུང་ཟད་གསལ་དུ་འགྲོ་སྲིད་ཀྱང་སེམས་གནས་པའི་གེགས་སུ་འགྱུར་བས་མི་བྱའོ། །དེ་ཡང་རྣམ་པ་ཤར་བའི་སྟེང་དུ་སེམས་བཟུང་དགོས་ཤིང་། དེའི་ཚེ་སྐུའི་སྤྱི་དང་ཆ་ཤས་གང་གསལ་བ་དེ་ལ་སེམས་བཟུང་སྟེ་མི་གསལ་བར་སོང་ན་ཡང་སྤྱི་ལ་བཟུང་ངོ་། །དེ་ལ་དབྱིབས་ཆེ་ཆུང་དང་ཁ་དོག་མི་འདྲ་བ་དང་གྲངས་མི་འདྲ་བ་དང་བཞུགས་སྟངས་མི་འདྲ་བ་ཤར་བྱུང་བ་རྣམས་ཀྱི་རྗེས་སུ་མི་འབྲང་བར་ཐོག་མར་གང་གསལ་བཏབ་པ་ལྟར་དམིགས་ནས་བྱའོ། །གཉིས་པ་དེ་ལ་སེམས་ཇི་ལྟར་གཏོད་པའི་ཚུལ་ལ་གསུམ། སྐྱོན་མེད་པའི་ལུགས་གཞག་པ་དང་། སྐྱོན་དང་བཅས་པའི་ལུགས་བསལ་བ་དང་། ཐུན་གྱི་ཚད་བསྟན་པའོ། །དང་པོ་ནི། འདིར་བསྒྲུབ་པར་བྱ་བའི་ཏིང་ངེ་འཛིན་ནི་ཁྱད་པར་གཉིས་དང་ལྡན་པ་ཞིག་ཡིན་ཏེ། སེམས་ཤིན་ཏུ་གསལ་བའི་གསལ་ཆའི་ངར་དང་ལྡན་པ་དང་། དམིགས་པ་ལ་རྩེ་གཅིག་ཏུ་གནས་པའི་མི་རྟོག་པའི་གནས་ཆ་དང་ལྡན་པའོ། །དེ་ལྟ་བུའི་གསལ་ཆའི་དལ་ཐོན་པ་ལ་ནི་བྱིང་བས་བར་དུ་གཅོད་ལ། རྩེ་གཅིག་པའི་མི་རྟོག་པ་ལ་ནི་རྒོད་པས་བར་དུ་གཅོད་པའི་ཕྱིར་བྱིང་རྒོད་གཉིས་ནི་ཏིང་ངེ་འཛིན་རྣམ་དག་འགྲུབ་པའི་གེགས་ཀྱི་གཙོ་བོར་འོང་བ་ཡིན་ནོ། །དེ་གཉིས་ཀྱི་ངོས་བཟུང་འོག་ཏུ་སྟོན་ལ་འདིར་ཞི་གནས་འགྲུབ་པའི་མཐུན་རྐྱེན་གྱི་ཏིང་ངེ་འཛིན་བསྐྱེད་ཚུལ་ནི། སེམས་རྩེ་ཅིག་གི་དམིགས་པ་ལ་གཡེང་བར་མི་བྱེད་པ་ཞིག་དང་། གཡེངས་མ་གཡེངས་ལྟ་བའི་ཤེས་པ་གཉིས་དགོས་པའི་དང་པོ་ནི་དྲན་པ་དང་གཉིས་པ་ནི་ཤེས་བཞིན་ཡིན་ནོ། །དྲན་པ་ཉམས་ན་དམིགས་པ་སྟོར་བ་ཡིན་པས་དྲན་པ་ནི་རྩ་བ་དང་ཤེས་བཞིན་ནི་ཡན་ལག་གོ །སྤྱིར་དྲན་པ་ནི་ཀུན་བཏུས་ལས། དྲན་པ་གང་ཞེ་ན་འདྲིས་པའི་དངོས་པོ་ཡེ་བརྗེད་པ་མེད་པ་སྟེ་རྣམ་པར་མི་གཡེང་བའི་ལས་ཅན་ནོ་ཞེས་གསུངས་པ་ལྟར་ཏེ། དོན་བསྡུ་ན་དམིགས་རྟེན་གང་ཤར་བ་དེ་ཉིད་མ་བརྗེད་པར་འཛིན་པ་ཞིག་གོ །ཤེས་བཞིན་ནི་དྲན་པས་བཟུང་བའི་དོན་བརྗེད་མ་བརྗེད་བྱ་ར་བྱེད་པ་སྟེ་བརྗེད་ནའང་སླར་དམིགས་པ་ལ་གཏོད་པར་བྱེད་པའོ། །དེ་ལྟར་ཡང་དབུ་མ་སྙིང་པོ་ལས། ཡིད་ཀྱི་གླང་པོ་ལོག་འགྲོ་བ། དམིགས་པའི་ཀ་བ་བརྟན་པོ་ལ། །དྲན་པའི་ཐག་པས་དམ་བཅིངས་ནས། །ཤེས་རབ་ལྕགས་ཀྱུས་རིམ་དབང་བྱ། །ཞེས་གསུངས་སོ། །གཉིས་པ་སྐྱོན་དང་བཅས་པའི་ལུགས་བསལ་ཚུལ་ནི་འདིར་མི་བརྗོད་དོ། །གསུམ་པ་ཐུན་གྱི་ཚད་བསྟན་པ་ནི། འོ་ན་དྲན་པས་དམིགས་པ་ལ་བཏགས་པ་དེ་ཡུན་ཅི་ཙམ་གྱི་བར་དུ་འཇོག་སྙམ་ན། འདི་ལ་སྔོན་གྱི་སློབ་དཔོན་ཁ་ཅིག་དང་པོ་ཡུན་ཐུང་ལ་གྲངས་མང་བར་བྱ་སྟེ་ཡུན་རིང་དྲགས་ན་སུན་ནས་བྱིང་རྒོད་སྐྱེ་བར་བཞེད་པ་ལྟར་རམ། ཆུ་ཚོད་གཅིག་དང་གཉིས་སོགས་ཅི་ཙམ་ནུས་པ་དེ་སྲིད་དུ་འཇོག་པའོ། །གསུམ་པ་དམིགས་པ་ལ་གཏད་པའི་འོག་ཏུ་ཇི་ལྟར་བྱ་བ་ལ་གཉིས། བྱིང་རྒོད་བྱུང་བའི་ཚེ་ཇི་ལྟར་བྱ་བ་དང་། བྱིང་རྒོད་དང་བྲལ་བའི་ཚེ་ཇི་ལྟར་བྱ་བའོ། །དང་པོ་ལ་གཉིས། བྱིང་རྒོད་ངོས་མི་ཟིན་པའི་གཉེན་པོ་བསྟེན་པ་དང་། ངོས་ཟིན་ཀྱང་དེ་སྤོང་བའི་ཕྱིར་དུ་མི་རྩོལ་བའི་གཉེན་པོ་བསྟེན་པའོ། །དང་པོ་ལ་གཉིས། བྱིང་རྒོད་ངོས་བཟུང་བ་དང་། དེ་རྟོགས་པའི་ཤེས་བཞིན་བསྐྱེད་ཐབས་སོ། །དང་པོ་རྒོད་པ་ནི། ཡུལ་སྡུག་པ་ལ་དམིགས་ཏེ་སེམས་རྣམ་པར་མ་ཞི་ཞིང་ཕྱིར་འཕྲོ་བ་འདོད་ཆགས་ཀྱི་ཆར་གཏོགས་ཡུལ་ལ་སྲེད་པའི་རྣམ་པས་འཇུག་པའི་སེམས་བྱུང་ངོ་། །དེ་ལྟར་ཡིན་གྱི་ཉོན་མོངས་གཞན་དང་ཡུལ་གཞན་གྱི་དབང་གིས་སེམས་ཕྱིར་གཡེངས་ཤིང་འཕྲོ་བ་ནི་འདིའི་རྒོད་པ་མིན་ནོ། །བྱིང་བ་ནི། གང་ལ་དམིགས་པའི་འཛིན་སྟངས་ལྷོད་ནས་དམིགས་པ་ཤིན་ཏུ་གསལ་བ་མེད་པའི་སེམས་བྱུང་ངོ་། །དེ་ལྟར་ཡིན་གྱི་གསལ་དྭངས་གང་ཡང་མེད་པའི་སེམས་རྨུགས་པ་ནི་བྱིང་བ་མིན་ནོ། །གཉིས་པ་བྱིང་རྒོད་རྟོགས་པའི་ཤེས་བཞིན་བསྐྱེད་པའི་ཐབས་ནི། དྲན་པ་རྒྱུན་ལྡན་དུ་བསྐྱེད་ནུས་ན་དམིགས་པ་བརྗེད་ནས་གཡེངས་ཏེ་འགྲོ་བ་དགག་ནུས་པས། བྱིང་རྒོད་སྐྱེས་པ་ཡང་ལྡོག་པར་འགྱུར་ཞིང་བྱིང་རྒོད་ཀྱང་རིག་པར་སླ་ལ། སྔར་ལྟར་དྲན་པ་བསྟེན་བཞིན་པའི་ངང་ནས་དེ་ལས་གཞན་དུ་འཕྲོ་མི་འཕྲོ་ལ་བྱ་ར་ཐུ་རེ་ནས་བྱས་ནས་སེམས་འཛིན་པ་ནི་ཤེས་བཞིན་སྐྱོང་བའི་གནད་དམ་པའོ། །གཉིས་པ་མི་རྩོལ་པའི་གཉེན་པོ་བསྟེན་པ་ནི། བྱིང་རྒོད་གཉིས་བྱུང་མ་ཐག་འགོག་པའི་རྩོལ་བ་མི་བསྟེན་པ་ནི་སྐྱོན་ཤིན་ཏུ་ཆེ་བས། དེའི་གཉེན་པོར་འདུ་བྱེད་པའི་རྩོལ་བ་བསྒོམ་པར་བྱའོ། །འདི་ལ་གཉིས། རྩོལ་བའི་སེམས་པ་ངོས་བཟུང་ཞིང་བྱིང་རྒོད་འགོག་ཚུལ་དང་། བྱིང་རྒོད་སྐྱེ་བའི་རྒྱུ་ངོས་བཟུང་བའོ། །དང་པོ་ནི། སེམས་དགེ་མི་དགེ་ལུང་མ་བསྟན་གང་རུང་ལ་གཡོ་ཞིང་སྐུལ་བར་བྱེད་པའི་སེམས་བྱུང་ནི་རྩོལ་བའམ་སེམས་པ་ཡིན་ཏེ། བྱིང་རྒོད་བྱུང་ན་སྤོང་བ་ལ་མངོན་པར་འདུ་བྱེད་པའི་སེམས་པ་དེ་དགོས་སོ། །སྤོང་ཚུལ་ལ་སེམས་བྱིང་བ་ནི་སེམས་ནང་དུ་བསྡུས་དྲག་ནས་དམིགས་པའི་འཛིན་སྟངས་ཤོར་བ་ཡིན་པས། དེའི་གཉེན་པོར་སངས་རྒྱས་ཀྱི་སྐུ་གཟུགས་ལྟ་བུ་དགའ་བའི་ཡུལ་ཡིད་ལ་བྱ་བའམ་ཉི་འོད་ལ་སོགས་པའི་སྣང་བ་ཡིད་ལ་བསམ་ཞིང་དམིགས་པའི་འཛིན་སྟངས་དམ་པར་བྱས་ལ་བསྐྱང་ངོ་། །དེ་ཡང་ཕན་ཡོན་དང་ཡོན་ཏན་མཐོང་ནས་སེམས་གཟེངས་སྟོད་པ་ནི་བྱིང་བ་ལྡོག་པར་བྱེད་པའི་ཐབས་དམ་པའོ། །གཉིས་པ་བྱིང་རྒོད་སྐྱེ་བའི་རྒྱུ་ལ་མང་སྟེ་འདོད་ཡོན་ལ་རྟོག་པ་དང་རྨུགས་པ་དང་གཉིད་དང་སེམས་མུན་པའི་རྣམ་པ་ཅན་ལ་སོགས་པའོ། །ཁྱད་པར་དུ་རྒོད་པ་ནི་འདོད་ཡོན་ལ་སེམས་པ་འདོད་ཆགས་ཀྱི་ཆར་གཏོགས་པས་དེའི་གཉེན་པོར་མི་སྡུག་པ་དང་མི་རྟག་ལ་སོགས་ཡིད་འབྱུང་བའི་བློ་བསྐྱེད་དགོས་ཤིང་། བྱིང་བ་ནི་སེམས་བསྡུས་དྲག་པ་དང་བཟའ་བཏུང་མང་བ་དང་ཉིད་རྨུགས་སོགས་ཀྱི་རྒྱུ་ལས་བྱུང་བ་སྟེ་དེ་རྣམས་འགོག་པའི་ཐབས་སུ་སེམས་གཟེངས་བསྟོད་ཅིང་དཀོན་མཆོག་གི་ཡོན་ཏན་དྲན་པ་དང་། བྱང་ཆུབ་ཀྱི་སེམས་ཀྱི་ཕན་ཡོན་བསྒོམ་པ་དང་དལ་འབྱོར་རྙེད་དཀའ་བ་སོགས་བསམ་པར་བྱའོ། །གཉིས་པ་བྱིང་རྒོད་དང་བྲལ་བའི་དུས་སུ་ནི། བྱིང་རྒོད་དང་བྲལ་ཏེ་སེམས་དམིགས་པ་ལ་མཉམ་པ་ཉིད་དུ་འཇུག་པའི་ཚེ་འདུ་བྱེད་པའམ་རྩོལ་བ་ཏིང་ངེ་འཛིན་གྱི་སྐྱོན་ཡིན་པས། དེའི་གཉེན་པོར་བཏང་སྙོམས་བསྒོམ་པར་བྱ་སྟེ། ཧ་ཅང་རྩོལ་ལྷོད་གཉིས་ཀ་སྤངས་ཏེ་སེམས་དམིགས་པ་ལ་མཉམ་པ་ཉ ིད་དུ་གནས་ཤིང་རྣལ་དུ་འབབ་པ་དང་རང་གི་རང་གིས་འཇུག་པ་ལ་གོམས་པར་བྱའོ། །ཞི་གནས་བསྒོམ་པའི་ཚེ་ཉེས་པ་ལྔ་སྤོང་ཞིང་འདུ་བྱེད་བརྒྱད་བསྟེན་དགོས་ཏེ། དབུ་མཐའ་ལས། ཉེས་པ་ལྔ་སྤོང་འདུ་བྱེད་བརྒྱད། བསྟེན་པའི་རྒྱུ་ལས་བྱུང་པའོ། །ལེ་ལོ་དང་ནི་གདམས་ངག་རྣམས། །བརྗེད་དང་བྱིང་དང་རྒོད་པ་དང་། །འདུ་མི་བྱེད་དང་འདུ་བྱེད་དེ། །འདི་དག་ཉེས་པ་ལྔར་འདོད་དོ། །གནས་དང་དེ་ལ་གནས་པ་དང་། །རྒྱུ་དང་འབྲས་བུ་ཉིད་དུའོ། །དམིགས་པ་བརྗོད་པར་མ་གྱུར་དང་། །བྱིང་དང་རྒོད་པ་རྟོགས་པ་དང་། །དེ་སྤོང་མངོན་པར་འདུ་བྱེད་དང་། །ཞི་ཚེ་རྣལ་དུ་འཇུག་པའོ། །ཞེས་པ་ལྟར་ཏེ། ལེ་ལོ་དང་གདམས་ངག་བརྗེད་པ་དང་། བྱིང་རྒོད་དང་། འདུ་བྱེད་དང་། འདུ་མི་བྱེད་དེ་ཉེས་པ་ལྔ་དང་། དད་པ་དང་འདུན་པ་དང་རྩོལ་བ་དང་ཤིན་ཏུ་སྦྱངས་པ་དང་དྲན་པ་དང་བྱིང་རྒོད་རྟོགས་པའི་ཤེས་བཞིན་དང་འདུ་བྱེད་སེམས་དང་བཏང་སྙོམས་རྣམས་ནི་འདུ་བྱེད་བརྒྱད་དོ། །གཉིས་པ་དེ་ལ་བརྟེན་ནས་སེམས་གནས་སྐྱེ་བའི་རིམ་པ་ལ་གསུམ། སྐྱེ་བའི་རིམ་པ་དངོས་དང་། དེ་སྟོབས་དྲུག་གིས་འགྲུབ་ལུགས། དེ་ལ་ཡིད་བྱེད་བཞི་ཡོད་ཚུལ་ལོ། །དང་པོ་ལ་སེམས་གནས་དགུ་སྟེ། སེམས་འཇོག་པ་དང་། རྒྱུན་དུ་འཇོག་པ་དང་། བླན་ཏེ་འཇོག་པ་དང་། ཉེ་བར་འཇོག་པ་དང་། དུལ་བར་བྱེད་པ་དང་། ཞི་བར་བྱེད་པ་དང་། རྣམ་པར་ཞི་བར་བྱེད་པ་དང་། རྩེ་གཅིག་ཏུ་བྱེད་པ་དང་། མཉམ་པར་འཇོག་པའོ། །དང་པོ་ནི། ཕྱི་རོལ་ཏུ་གཡེང་བ་ལས་སེམས་བསྡུས་ཏེ་ནང་དུ་དམིགས་པ་ལ་གཏོད་པ་དང་། གཉིས་པ་ནི། གཏད་པ་དེ་ཉིད་ལ་དམིགས་ནས་རྒྱུན་དུ་འཇོག་པ་དང་། གསུམ་པ་ནི། གཡེང་བར་གྱུར་ན་ཤེས་པར་བྱས་ནས་སླར་དམིགས་པ་ལ་གཏོད་པ་དང་། བཞི་པ་ནི། སེམས་གཡེང་བ་སྤངས་ནས་དམིགས་པ་ལ་གཏོད་ཅིང་གོང་འཕེལ་དུ་བྱེད་པ་དང་། ལྔ་པ་ནི། ཏིང་ངེ་འཛིན་གྱི་ཡོན་ཏན་བསམས་ནས་སེམས་དགའ་བར་བྱེད་པ་དང་། དྲུག་པ་ནི། རྣམ་གཡེང་ལ་སྐྱོན་དུ་བལྟས་ཏེ་ཏིང་ངེ་འཛིན་ལ་མི་དགའ་བ་ཞི་བར་བྱེད་པ་དང་། བདུན་པ་ནི། ཆགས་རྨུགས་ཡིད་མི་བདེ་བ་དང་གཉིད་སོགས་བྱུང་བ་རྣམས་ཉེ་བར་ཞི་བར་བྱེད་པ་དང་། བརྒྱད་པ་ནི། འབད་མེད་དུ་འཇུག་པའི་ཕྱིར་དུ་བརྩོན་པར་བྱེད་པ་དང་། དགུ་པ་ནི། སེམས་མཉམ་པར་གྱུར་པ་ན་བཏང་སྙོམས་སུ་བྱེད་པ་རྣམས་ནི་སྔ་མ་ལས་ཕྱི་མ་སྐྱེ་བར་འགྱུར་བའོ། །གཉིས་པ་དེ་ལ་སྟོབས་དྲུག་གིས་འགྲུབ་ལུགས་ནི་དེ་ལ་དྲུག་སྟེ། ཐོས་པའི་སྟོབས་དང་། དེ་བཞིན་དུ་བསམ་པ་དང་དྲན་པ་དང་ཤེས་བཞིན་དང་བརྩོན་འགྲུས་དང་འདྲིས་པའི་སྟོབས་སོ། །དེ་དག་གིས་སེམས་གང་འགྲུབ་པ་ནི། ཐོས་པའི་སྟོབས་ཀྱིས་འཇོག་པའི་སེམས་འགྲུབ། བསམ་པས་རྒྱུན་ཏུ་འཇོག་པ་དང་། དྲན་པས་བླན་ཏེ་འཇོག་པ་དང་ཉེ་བར་འཇོག་པ་གཉིས་འགྲུབ། ཤེས་བཞིན་གྱིས་དུལ་བར་བྱེད་པ་དང་ཞི་བར་བྱེད་པ་གཉིས་འགྲུབ། བརྩོན་འགྲུས་ཀྱིས་རྣམ་པར་ཞི་བར་བྱེད་པ་དང་རྩེ་གཅིག་ཏུ་བྱེད་པ་གཉིས་འགྲུབ། འདྲིས་པའི་སྟོབས་ཀྱིས་མཉམ་པར་འཇོག་པའི་སེམས་འགྲུབ་བོ། །སེམས་གནས་དགུ་པའི་སྐབས་སུ་རྩོལ་བ་མ་བྱས་ཀྱང་སེམས་ཏིང་ངེ་འཛིན་ཏུ་ཧྲིལ་ཧྲིལ་འགྲོ་ཡང་། ད་དུང་ཞི་གནས་དངོས་གཞི་མ་ཐོབ་པ་ནི་འཆད་པར་འགྱུར་རོ། །གསུམ་པ་དེ་ལ་ཡིད་བྱེད་བཞི་ཡོད་དེ། བསྒྲིམས་ཏེ་འཇུག་པ་དང་ཆད་ཅིང་འཇུག་པ་དང་ཆད་མེད་དུ་འཇུག་པ་དང་ལྷུན་གྱིས་གྲུབ་པར་འཇུག་པའོ། །དེ་ལ་སེམས་གནས་དང་པོ་གཉིས་ཀྱི་ཚེ་བསྒྲིམས་ཏེ་འཇུག་པའི་ཡིད་བྱེད་དང་། དེ་ནས་སེམས་གནས་ལྔའི་སྐབས་སུ་ཆད་ཅིང་འཇུག་པའི་ཡིད་བྱེད་དང་། བརྒྱད་པའི་སྐབས་སུ་ཆད་པ་མེད་པར་འཇུག་པའི་ཡིད་བྱེད་དང་། སེམས་གནས་དགུ་བའི་སྐབས་སུ་རྩོལ་མེད་ལྷུན་གྱིས་གྲུབ་པའི་ཡིད་བྱེད་འཇུག་གོ །དེ་ལྟར་འགྲུབ་པ་དང་འཇུག་པའི་རྒྱུ་མཚན་སོགས་ནི་མང་བས་བཞག་གོ །གསུམ་པ་ཞི་གནས་འགྲུབ་པའི་ཚུལ་ལ་གསུམ། ཞི་གནས་གྲུབ་མ་གྲུབ་ཀྱི་མཚམས་དང་། ཞི་གནས་ལ་བརྟེན་ནས་ལམ་བགྲོད་ཚུལ་སྤྱིར་བསྟན་པ་དང་། ཁྱད་པར་དུ་འཇིག་རྟེན་པའི་ལམ་བགྲོད་ཚུལ་ལོ། །དང་པོ་ལ་གཉིས། དངོས་ཀྱི་དོན་དང་། དེའི་འཕྲོས་སོ། །དང་པོ་ནི། སེམས་གནས་དགུ་པ་འདི་ཐོབ་པ་ལ་ཤིན་སྦྱངས་ཐོབ་མ་ཐོབ་གཉིས་ཡོད་ཅིང་། ཤིན་སྦྱངས་མ་ཐོབ་ན་འདོད་སེམས་རྩེ་གཅིག་པའི་ཏིང་ངེ་འཛིན་ཞི་གནས་རྗེས་མཐུན་པ་ཡིན་གྱི་ཞི་གནས་དངོས་མིན་ནོ། །དེས་ན་ཞི་གནས་ཐོབ་པ་ལ་ཤིན་སྦྱངས་ཐོབ་དགོས་ཤིང་དེ་ལ་ལུས་སེམས་ཤིན་སྦྱངས་གཉིས་ཡོད་དེ། ཀུན་ལས་བཏུས་ལས། ཤིན་ཏུ་སྦྱངས་པ་གང་ཞེ་ན་ལུས་དང་སེམས་ཀྱི་གནས་ངན་ལེན་རྣམས་ཀྱི་རྒྱུན་གཅོད་པའི་ཕྱིར་ལུས་དང་སེམས་ལས་སུ་རུང་བ་ཉིད་དེ་ཞེས་གསུངས་པ་ལྟར་རོ། །ལུས་དང་སེམས་ཀྱི་གནས་ངན་ལེན་ནི་ལུས་སེམས་དགེ་བའི་བྱ་བ་བསྒྲུབ་པ་ལ་ཇི་ལྟར་འདོད་པ་བཞིན་བཀོལ་དུ་མི་རུང་བ་ཡིན་ལ། ལུས་སེམས་ཤིན་སྦྱངས་གཉིས་ཀྱིས་ནི་གནས་ངན་ལེན་དེ་དང་བྲལ་ཏེ་དགེ་བ་ལ་ཤིན་ཏུ་བཀོལ་བའི་ལས་རུང་དུ་བྱེད་དོ། །དེ་ལ་ལུས་ཤིན་སྦྱངས་ནི་ལུས་ཀྱི་རེག་བྱ་ཁྱད་པར་ཅན་ཞིག་ཡིན་གྱི་ཤེས་པ་མིན་ནོ། །ཤིན་སྦྱངས་གཉིས་ཀྱི་ནང་ནས་སེམས་ཤིན་སྦྱངས་སྔོན་དང་ལུས་ཤིན་སྦྱངས་རྗེས་སུ་སྐྱེ་ཞིང་། སེམས་ཤིན་སྦྱངས་ཙམ་སྐྱེས་པའི་ཚེ་ཞི་གནས་མ་ཐོབ་ཅིང་། དེ་ནས་ལུས་ཤིན་སྦྱངས་ནས་སྐྱེས་པའི་རྗེས་དེ་ནས་ཞི་གནས་ཐོག་མར་ཐོབ་པར་འཇོག་གོ །དེ་ཡང་སྔར་གྱི་སེམས་གནས་དགུ་པའི་མཇུག་ཏུ་སེམས་ཤིན་སྦྱངས་ཐོབ་པ་ན་སེམས་ལས་སུ་མི་རུང་བ་ལོག་ནས་སེམས་ཤིན་ཏུ་བཀོལ་བདེ་བ་དང་། དེ་ནས་ལུས་ཤིན་སྦྱངས་ཐོབ་པ་ན་ལུས་ལས་སུ་མི་རུང་བ་ལོག་སྟེ་ལུས་ཤིན་ཏུ་བཀོལ་བདེ་བ་དང་ལྡན་པར་འགྱུར་རོ། །དེ་ཡང་རྫོགས་པའི་དབང་དུ་མཛད་ཀྱི་ཆ་ཕྲ་མོ་རེ་ནི་དེའི་སྔོན་ནས་ཀྱང་འབྱུང་ངོ་། །སེམས་ཤིན་སྦྱངས་སྔོན་དང་ལུས་ཤིན་སྦྱངས་རྗེས་སུ་སྐྱེ་བའི་རིམ་པ་ནི། །ཏིང་ངེ་འཛིན་གྱིས་ཡིད་ལ་དགའ་བ་ཁྱད་པར་ཅན་སྐྱེས་པ་ན་སེམས་ལས་སུ་རུང་བའི་ཤིན་སྦྱངས་སྐྱེས་པའི་མཐུས་ལུས་ལ་ལུས་ཤིན་སྦྱངས་སྐྱེ་བའི་རྒྱུར་འགྱུར་བའི་རླུང་རྒྱུ་བས་རླུང་དེ་ལུས་ཀྱི་ཆ་ལ་ཁྱབ་པར་བརྒྱུས་པའི་སྟོབས་ཀྱིས་ལུས་ཀྱི་གནས་ངན་ལེན་རང་བྲལ་བའི་ལུས་ཤིན་སྦྱངས་སྐྱེ་བར་འགྱུར་རོ། །ཤིན་སྦྱངས་སྐྱེ་བའི་སྔ་ལྟས་ནི་གང་ཟག་དེའི་ཀླད་པ་ལྕི་བམ་པ་སྙམ་བྱེད་པ་འབྱུང་སྟེ་མི་བདེ་བའི་ལྕི་བ་ནི་མིན་ནོ། །ཞི་གནས་དངོས་སུ་ཐོབ་པའི་དུས་ནི་ལུས་ཤིན་སྦྱངས་ཐོག་མར་ཐོབ་པའི་ཚེ་ལུས་ལ་བདེ་བའི་ཉམས་ཆེན་པོ་སྐྱེས་པ་ལ་བརྟེན་ནས་སེམས་ལ་ཡང་དགའ་བ དེའི་ཉམས་ཆེན་པོ་འབྱུང་ངོ་། །ཉམས་རགས་པ་དེས་སེམས་གཡོ་བས་སེམས་དགའ་ཡལ་ཡལ་འབྱུང་སྟེ་དེའི་ཚེ་ཞི་གནས་ཅུང་མ་ཐོབ་ཅིང་། དེ་ནས་དགའ་ཡལ་ཡལ་དེ་ལོག་ནས་སེམས་དམིགས་པ་ལ་མི་གཡོ་བར་ལྷན་ནེར་གནས་པ་བྱུང་བ་ན་ཞི་གནས་ཐོག་མར་ཐོབ་པ་ཡིན་ནོ། །གཉིས་པ་དེ་ལ་བརྟེན་ནས་ལམ་བགྲོད་ཚུལ་སྤྱིར་བསྟན་པ་ནི། སྤྱིར་ཞི་གནས་ཙམ་ནི་ཕྱི་རོལ་པ་ལ་ཡང་ཡོད་པས་ལམ་དངོས་ཡིན་པའི་ངེས་པ་མེད་ཀྱང་། ཐེག་པ་གསུམ་གྱི་འཕགས་པའི་མཉམ་གཞག་གི་ལམ་ཐམས་ཅད་ཞི་ལྷག་ཟུང་འབྲེལ་ལ་བརྟེན་ནས་ཐོབ་པ་ཡིན་པས། དེ་ལྟ་བུའི་ཞི་གནས་བསྐྱེད་ནས་ལྷག་མཐོང་བསྒོམས་ཏེ་ཞི་ལྷག་ཟུང་འབྲེལ་གྱི་རྣལ་འབྱོར་གྱིས་ལམ་བགྲོད་པ་ཡིན་ནོ། །དེ་ཡང་བདག་མེད་རྟོགས་པའི་ལྟ་བ་དང་འབྲེལ་དགོས་ཀྱི། བདག་མེད་རྟོགས་པའི་ལྟ་བ་དང་བྲལ་བའི་ཞི་ལྷག་ཟུང་འབྲེལ་ནི་ཕྱི་རོལ་པ་ལའང་ཡོད་ཀྱང་དེས་འདོད་པའི་ཉོན་མོངས་མངོན་འགྱུར་བ་ཙམ་མགོ་ནོན་སྲིད་ཀྱི། ཉོན་མོངས་ཀྱི་ས་བོན་གཏན་ནས་སྤོང་མི་ནུས་སོ། །གསུམ་པ་འཇིག་རྟེན་པའི་ལམ་བགྲོད་ཚུལ་ལ་གཉིས། ཞི་རགས་ཀྱི་རྣམ་པ་ཅན་གྱི་ལམ་བགྲོད་བའི་སྔོན་དུ་ཞི་གནས་འཐོབ་དགོས་པ་དང་། ཞི་གནས་ལ་བརྟེན་ནས་འདོད་པ་ལ་ཆགས་བྲལ་བྱེད་པའི་ཚུལ་ལོ། །འདི་དག་ལ་མཚོན་ཙམ་ནི། དང་པོ་ནི། མཚན་ཉིད་སོ་སོར་རིག་པའི་སྒོ་ནས་ཞི་རགས་ཀྱི་རྣམས་ཅན་གྱི་ལམ་བསྒོམ་པས་ནི་སྔར་ཞི་གནས་དེ་ལྟ་བུ་ཞིག་ཐོབ་དགོས་ཏེ། མཚན་ཉིད་སོ་སོར་རིག་པ་ནི་བསམ་གཏན་དང་པོའི་ཉེར་བསྡོགས་ལྷག་མཐོང་གིས་བསྡུས་ཤིང་། དེ་ནི་ཞི་གནས་སྔོན་དུ་སོང་བ་ལ་བརྟེན་ནས་བསྒྲུབ་དགོས་པའི་ཕྱིར་རོ། །གཉིས་པ་ནི། སྔར་བཤད་པའི་ཞི་གནས་དེ་ལྟ་བུ་ཙམ་ཞིག་བསྒོམས་ཀྱང་ཉོན་མོངས་སྤོང་མི་ནུས་པས་དེ་ལ་བརྟེན་ནས་བདེན་པའི་རྣམ་པ་ཅན་དང་ཞི་རགས་ཀྱི་རྣམ་པ་ཅན་གྱི་ལམ་གཉིས་ཀྱི་སྒོ་ནས་འདོད་པ་ལ་འདོད་ཆགས་དང་བྲལ་བར་བྱེད་དགོས་པའི་ཕྱིར་རོ། །འོན་ཀྱང་ཟག་མེད་བདེན་པའི་རྣམ་པ་ཅན་གྱི་ལམ་མ་བསྒོམ་ན་ནི་ཞི་རགས་ཀྱི་རྣམ་པ་ཅན་ཙམ་བསྒོམས་ཀྱང་གོང་སས་བསྡུས་པའི་ཉོན་མོངས་གཏན་ནས་སྤོང་མི་ནུས་ཏེ། ཞི་རགས་ཀྱི་རྣམ་པ་ཅན་ནི་ཕྱི་རོལ་པའི་རྣལ་འབྱོར་པས་ཀྱང་བསྒོམ་པར་བྱེད་པའི་ཕྱིར་རོ། །མདོར་ན་ཞི་གནས་ཙམ་གྱིས་མི་ཆོག་པས་ལྷག་མཐོང་བསྐྱེད་དགོས་ཤིང་། དེ་ཡང་བདག་མེད་རྟོགས་པའི་ལྷག་མཐོང་དགོས་ཏེ་འཆད་པར་འགྱུར་རོ། །གཉིས་པ་ལྷག་མཐོང་བསྒོམ་ཚུལ་འཆད་པ་ལ་བཞི། ལྷག་མཐོང་གི་ཚོགས་བསྟེན་པ་དང་། ལྷག་མཐོང་གི་རབ་དབྱེ་དང་། བསྒོམ་ཚུལ་དང་། གྲུབ་ཚད་དོ། །དང་པོ་ནི། ཤིང་རྟ་ཆེན་པོ་གཉིས་ནས་བརྒྱུད་པའི་གསུང་རབ་ཀྱི་དྲང་ངེས་ལ་མཁས་པའི་བཤེས་གཉེན་བསྟེན་ནས་གཞུང་ལུགས་ལ་ཉན་ཏེ་ཐོས་བསམ་གྱིས་དེ་ཁོ་ན་ཉིད་རྟོགས་པའི་ལྟ་བ་བསྐྱེད་པ་ནི་རྒྱུ་ཚོགས་མེད་དུ་མི་རུང་བ་ཡིན་ནོ། །འདི་ལ་གསུམ། དྲང་ངེས་ཀྱི་གསུང་རབ་ངོས་བཟུང་བ་དང་། ཀླུ་སྒྲུབ་ཀྱི་དགོངས་པ་འགྲེལ་ཚུལ་ཇི་ལྟར་བྱུང་བ་དང་། ལྟ་བ་གཏན་ལ་འབེབས་པའི་ཚུལ་ལོ། །དང་པོ་ནི། དེ་ཁོ་ན་ཉིད་ཀྱི་དོན་རྟོགས་པར་འདོད་པ་རྣམས་ཀྱིས་ནི་རྒྱལ་བའི་གསུང་རབ་ལ་བརྟེན་དགོས་ཤིང་། གསུང་རབ་ཀྱང་གདུལ་བྱའི་དབང་གིས་དོན་སྣ་ཚོགས་པ་ཡིན་པས་ངེས་པའི་དོན་གྱི་གསུང་རབ་ལ་བརྟེན་ནས་དེ་ཁོ་ན་ཉིད་རྟོགས་པར་བྱ་དགོས་སོ། །དེ་ལ་ཤིང་རྟ་ཆེན་པོ་གཉིས་ཀྱིས་ཕྱེ་བའི་དྲང་ངེས་ལ་མི་འདྲ་བ་ཡོད་ཀྱང་། འདིར་བློ་གྲོས་མི་ཟད་པས་བསྟན་པའི་མདོ་ལས་དྲང་ངེས་ཕྱེ་བའི་རྗེས་སུ་འབྲང་དགོས་ཏེ། ཀླུ་སྒྲུབ་ཀྱིས་མདོ་འདིར་དྲང་ངེས་ཕྱེ་བ་ལྟར་བཞེད་ཅིང་རྗེ་ཉིད་ཀྱང་འདིའི་རྗེས་སུ་འབྲང་བའི་ཕྱིར་རོ། །གཉིས་པ་ཀླུ་སྒྲུབ་ཀྱི་དགོངས་པ་འགྲེལ་ཚུལ་ཇི་ལྟར་བྱུང་བ་ནི། སློབ་དཔོན་འཕགས་པ་ལྷ་ནི་སངས་རྒྱས་བསྐྱངས་དང་ལེགས་ལྡན་འབྱེད་དང་ཟླ་བ་གྲགས་པ་དང་ཞི་འཚོ་ལ་སོགས་པ་དབུ་མ་པ་ཆེན་པོ་རྣམས་ཀྱིས་འཕགས་པ་དང་འདྲ་བར་ཡིད་ཆེས་པའི་གནས་སུ་མཛད་ལ། སློབ་དཔོན་དེ་དག་ནི་འཕགས་པའི་རྗེས་སུ་འབྲང་བ་ཡིན་ཞིང་ཇོ་བོ་ཆེན་པོས་ཡང་ལུགས་དེ་གཙོ་བོར་མཛད་དོ། །བདག་ཅག་གི་ཕ་རྒན་རྗེ་རིན་པོ་ཆེ་ཉིད་ཀྱིས་རྗེ་བཙུན་འཇམ་དབྱངས་ཀྱི་དྲིན་ལ་བརྟེན་ནས་འཕགས་པའི་དགོངས་པ་ཐམས་ཅད་ཐུགས་སུ་ཆུད་ཅིང་། སློབ་དཔོན་ཟླ་བའི་ལུགས་ཉིད་གཞིར་བཞག་ནས་དགོངས་པ་འགྲེལ་བར་མཛད་དོ། །གསུམ་པ་ལྟ་བ་གཏན་ལ་འབེབས་པའི་ཚུལ་ལ་གཉིས། དེ་ཁོ་ན་ཉ ིད་ལ་འཇུག་པའི་རིམ་པ་དང་། གཏན་ལ་དབབ་ཚུལ་དངོས་སོ། །དང་པོ་ནི། ཆོས་རྣམས་གདོད་ནས་རང་བཞིན་གྱིས་གྲུབ་པས་སྟོང་པའི་དེ་བཞིན་ཉིད་ནི་དེ་ཁོ་ན་ཉིད་དོ། །དེ་ཁོ་ན་ཉིད་དེ་མཐོང་བའི་སྒྲིབ་བྱེད་ཀྱི་གཙོ་བོ་ནི་ལྷན་སྐྱེས་ཀྱི་མ་རིག་པ་དང་འཇིག་ལྟ་སྟེ། དེ་གཉིས་ཀྱིས་ཇི་ལྟར་བཟུང་བའི་ཞེན་ཡུལ་མེད་པར་རྟོགས་ནས་བདག་མེད་པའི་དོན་རྟོགས་པར་འཇོག་གོ །དེ་ཡང་ཚིག་གསལ་ལས། བདག་ནི་ཡོད་པ་མ་ཡིན་ན། །བདག་གི་ཡོད་པར་ག་ལ་འགྱུར། །ཞེས་གསུངས་པ་ལྟར། བདག་ལ་རང་བཞིན་མེད་པར་རྟོགས་པའི་ཚེ་བདག་གི་ཕུང་པོ་ལའང་རང་བཞིན་མེད་པར་རྟོགས་པར་འགྱུར་རོ། །འོན་ཀྱང་གང་ཟག་རང་བཞིན་མེད་པར་རྟོགས་པའི་བློ་དེ་ཉིད་ཀྱིས་གཞན་ལ་བལྟོས་མེད་དུ་ཕུང་པོ་རང་བཞིན་མེད་པར་རྟོགས་པར་འགྱུར་བ་ཡིན་གྱི། གང་ཟག་དང་ཕུང་པོ་རང་བཞིན་མེད་པར་རྟོགས་པའི་བློ་གཉིས་གཅིག་མིན་ནོ། །གཉིས་པ་གཏན་ལ་དབབ་པ་དངོས་ལ་གསུམ། རིགས་པའི་དགག་བྱ་ངོས་བཟུང་བ་དང་། དེ་འགོག་པ་ཐལ་རང་གིས་བྱེད་པ་དང་། དེ་ལ་བརྟེན་ནས་ལྟ་བ་རྒྱུད་ལ་བསྐྱེད་པའི་ཚུལ་ལོ། །དང་པོ་ལ་གསུམ། དགག་བྱ་ངོས་ཟིན་དགོས་པའི་རྒྱུ་མཚན་དང་། ངོས་མ་ཟིན་པའི་གཞན་ལུགས་དང་། རང་ལུགས་ཀྱི་དགག་བྱ་ངོས་འཛིན་ཚུལ་ལོ། །དང་པོ་ནི། མི་འདི་མི་འདུག་སྙམ་པ་ལ་མེད་རྒྱུའི་མི་དེ་ཤེས་པ་སྔོན་དུ་འགྲོ་དགོས་པ་ལྟར། བདག་མེད་པ་དང་རང་བཞིན་མེད་པའི་དོན་ངེས་པ་ལའང་མེད་རྒྱུའི་བདག་དང་རང་བཞིན་དེ་ལེགས་པར་ངོས་ཟིན་དགོས་ཏེ། དགག་བྱའི་སྤྱི་ལེགས་པར་མ་ཤར་བར་དེ་བཀག་པའི་མེད་དགག་ལེགས་པར་ངེས་མི་ནུས་པའི་ཕྱིར་ཏེ། །སྤྱོད་འཇུག་ལས། བཏགས་པའི་དངོས་ལ་མ་རེག་པར། །དེ་ཡི་དངོས་མེད་འཛིན་མ་ཡིན། །ཞེས་གསུངས་པའི་ཕྱིར་རོ། །དེ་ལ་དགག་བྱའི་ཁྱད་པར་མི་འདྲ་བ་མང་ཡང་མདོར་བསྡུས་པའི་རྩ་བ་ནས་བཀག་ན་དགག་བྱ་གཞན་ཐམས་ཅད་ལེགས་པར་འགྱུར་རོ། །དེ་ཡང་ཧ་ཅང་ཚོད་མ་ཟིན་པར་དགག་ཐལ་ཆེས་ན་ནི་རྟེན་འབྲེལ་ལ་གནོད་པས་ཆད་མཐར་ལྟུང་ལ། དགག་བྱའི་ལྷག་མ་ལུས་ན་དེའི་འཛིན་པས་གྲོལ་དུ་མི་སྟེར་བའི་ཕྱིར་དགག་བྱ་འགོག་ཚོད་ཟིན་དགོས་སོ། །གཉིས་པ་ངོས་མ་ཟིན་པའི་གཞན་ལུགས་འགོག་པ་ལ་གཉིས། དགག་བྱ་ང ོས་འཛིན་ཧ་ཅང་ཁྱབ་ཆེས་པ་དང་། ཁྱབ་ཆུང་བའོ། །དང་པོ་ལ་གཉིས། འདོད་པ་བརྗོད་པ་དང་། དེ་མི་འཐད་པར་བསྟན་པའོ། །དང་པོ་ནི། དབུ་མའི་དོན་སྨྲ་བ་ཁ་ཅིག་ན་རེ། སྐྱེ་བ་ལ་སོགས་པ་དེ་ཁོ་ན་ཉིད་དུ་གྲུབ་མ་གྲུབ་དཔྱོད་པའི་རིགས་པས་ནི་གཟུགས་ནས་རྣམ་མཁྱེན་གྱི་བར་གྱི་ཆོས་ཐམས་ཅད་བཀག་པ་ཡིན་ཏེ། ཀུན་ལ་རིགས་པས་དཔྱད་ན་བརྟག་བཟོད་པ་རྡུལ་ཙམ་ཡང་མེད་པའི་ཕྱིར་དང་། ཡོད་མེད་སོགས་མུ་བཞི་པོ་ཐམས་ཅད་བཀག་ཅིང་དེར་མ་འདུས་པའི་ཆོས་མེད་པའི་ཕྱིར་རོ། །གཞན་ཡང་འཕགས་པའི་དེ་ཁོ་ན་ཉིད་གཟིགས་པའི་ཡེ་ཤེས་ཀྱིས་སྐྱེ་འགག་དང་བཅིངས་གྲོལ་སོགས་མེད་པར་གཟིགས་པའི་ཕྱིར་སྐྱེ་སོགས་མེད་དེ། ཡོད་ན་ནི་དེས་གཟིགས་དགོས་པའི་ཕྱིར་རོ། །གལ་ཏེ་སྐྱེ་སོགས་ཡོད་ན་དོན་དམ་དཔྱོད་བྱེད་ཀྱི་རིགས་པས་དཔྱད་བཟོད་དམ་མི་བཟོད། བཟོད་ན་ནི་བདེན་དངོས་སུ་འགྱུར་ལ། མི་བཟོད་ན་ནི་རིགས་པས་ཇི་ལྟར་མ་ཁེགས། དེ་བཞིན་དུ་སྐྱེ་སོགས་ཚད་མས་གྲུབ་བམ་མ་གྲུབ། གྲུབ་ན་འཕགས་པའི་དེ་ཁོ་ན་ཉིད་རྟོགས་པའི་ཡེ་ཤེས་ཀྱིས་སྐྱེ་སོགས་མེད་པར་གཟིགས་པ་དང་འགལ་ལ། ཐ་སྙད་པའི་མིག་ཤེས་ནི་ཚད་མ་མིན་པས་དེས་གྲུབ་པ་མི་འཐད་ཅིང་། ཚད་མས་མ་གྲུབ་ན་ནི་རིགས་པ་དང་འགལ་བས་ཡོད་པ་ཡང་མི་འཐད་དོ། །གལ་ཏེ་སྐྱེ་སོགས་དོན་དམ་པར་མེད་ཀྱང་ཀུན་རྫོབ་ཏུ་ཡོད་པར་འདོད་ན་ནི་མི་འཐད་དེ། འཇུག་པ་ལས། རིགས་དེས་ཐ་སྙད་དུ་ཡང་རིགས་མིན་ན། །ཞེས་གསུངས་པའི་ཕྱིར། གལ་ཏེ་མུ་གཞན་གསུམ་ལས་མི་སྐྱེ་ཡང་གཞན་ལས་སྐྱེ་དགོས་ན་དེ་ཡང་མི་འཐད་དེ། འཇུག་པ་ལས། གཞན་ལས་སྐྱེ་བ་འཇིག་རྟེན་ལས་ཀྱང་མེད། །ཅེས་གསུངས་པའི་ཕྱིར། དེ་ཕྱིར་སྐྱེ་བ་སོགས་ལ་དོན་དམ་གྱི་ཁྱད་པར་མ་སྦྱར་བར་སྤྱིར་དགག་གོ་ཞེས་ཟེར་རོ། །གཉིས་པ་དེ་མི་འཐད་པར་བསྟན་པ་ལ་གཉིས། ལུགས་དེས་དབུ་མའི་ཁྱད་ཆོས་བཀག་པར་བསྟན་པ་དང་། གནོད་བྱེད་བརྗོད་པ་རྣམས་ལྟར་སྣང་དུ་བསྟན་པའོ། །དང་པོ་ལ་གསུམ། དབུ་མའི་ཁྱད་ཆོས་ངོས་བཟུང་བ་དང་། དེས་དེ་ཇི་ལྟར་བཀག་ཚུལ་དང་། དེ་ལ་དབུ་མ་པས་ཇི་ལྟར་ལན་བཏབ་པའོ། །དང་པོ་ནི། རིགས་པ་དྲུག་ཅུ་པ་ལས། དགེ་བ་འདི་ཡིས་སྐྱེ་བོ་ཀུན། །ཞེས་སོགས་གསུངས་པ་ལྟར་འབྲས་བུའི་སྐབས་སུ་ཐོབ་བྱ་དམ་པ་ཆོས་གཟུགས་ཀྱི་སྐུ་གཉིས་ཡིན་ལ། དེ་ཐོབ་བྱེད་ཀྱི་རྒྱུར་ལམ་དུས་སུ་ཚོགས་གཉིས་ཟུང་འབྲེལ་དུ་གསོག་དགོས་ཤིང་། དེ་ཡང་གཞི་དུས་སུ་ཀུན་རྫོབ་པའི་རྒྱུ་འདི་ལས་འབྲས་བུ་འདི་འབྱུང་བའི་རྒྱུ་འབྲས་ཀྱི་འབྲེལ་བ་ལ་ངེས་པ་སྙིང་ཐག་པ་ནས་འདྲོངས་པ་དང་། ཆོས་རྣམས་ལ་རང་གི་ངོ་བོས་གྲུབ་བའི་རང་བཞིན་རྡུལ་ཙམ་ཡང་མེད་པ་ལ་ངེས་པ་རྙེད་པ་ལ་བལྟོས་སོ། །དེ་ལྟ་བུའི་གཞི་དུས་ཀྱི་བདེན་པ་གཉིས་ཀྱི་རྣམ་གཞག་ལེགས་པར་ངེས་ན་རང་བཞིན་མེད་པ་ལ་སྐྱེ་འགག་དང་བཅིངས་གྲོལ་སོགས་འཁོར་འདས་ཀྱི་རྣམ་གཞག་ཐམས་ཅད་འཐད་ལྡན་དུ་འཇོག་ཤེས་ཀྱི། གཞན་དུ་ན་རིགས་པའི་དགག་བྱ་འགོག་ཚུལ་ལེགས་པར་མ་ཤེས་པའི་དབང་གིས་ཡོད་ན་རང་བཞིན་གྱིས་ཡོད་དགོས་པ་དང་། རང་བཞིན་གྱིས་མེད་ན་མེད་པའོ་སྙམ་པའི་ལོག་རྟོག་རྣམས་སྐྱེ་བར་འགྱུར་རོ། །གཉིས་པ་ལུགས་དེས་ཁྱད་ཆོས་དེ་ཇི་ལྟར་བཀག་ཚུལ་ནི། མགོན་པོ་ཀླུ་གྲུབ་ཀྱི་ལུགས་ལ་རང་བཞིན་གྱིས་གྲུབ་པས་སྟོང་པ་ལ་བྱ་བྱེད་ཐམས་ཅད་བཞག་ཆོག་པ་ལ། ཁྱེད་ཀྱི་ལུགས་དེས་རང་བཞིན་མེད་ན་མེད་པའོ་སྙམ་དུ་བཟུང་ནས་དགག་བྱ་ལ་དོན་དམ་གྱི་ཁྱད་པར་མ་སྦྱར་བར་སྤྱིར་སྐྱེ་འགག་སོགས་འགོག་པ་འདིས་ཁྱད་ཆོས་དེ་བཀག་པ་ཡིན་ནོ། །གསུམ་པ་དེ་ལ་དབུ་མ་པས་ལན་ཇི་ལྟར་བཏབ་ལའི་ཚུལ་ལ་མང་བས་བསྡུ་ན་དངོས་སྨྲ་བ་རྣམས་ཀྱིིས། དངོས་པོ་རང་བཞིན་གྱིས་སྟོང་ན་བྱ་བྱེད་ཐམས་ཅད་མི་རུང་བར་བཟུང་ནས་རང་བཞིན་གྱིས་གྲུབ་པར་འདོད་ཅིང་རང་བཞིན་མེད་པར་སྨྲ་བ་ལ་རྒོལ་བ་ཡིན་ལ། དེ་ཡང་དངོས་པོ་རང་བཞིན་གྱིས་མེད་ན་མེད་དགོས་སོ་ཞེས་རྒོལ་བའི་ལན་དུ་མགོན་པོས་དབུ་མ་རྩ་བ་ཤེས་རབ་ལས། གལ་ཏེ་འདི་ཀུན་མི་སྟོང་ན། །འབྱུང་བ་མེད་ཅིང་འཇིག་པ་མེད། །འཕགས་པའི་བདེན་པ་བཞི་པོ་རྣམས། །ཁྱོད་ལ་མེད་པར་ཐལ་བར་འགྱུར། །ཞེས་དང་། གང་ལ་སྟོང་པ་ཉིད་རུང་བ། །དེ་ལ་ཐམས་ཅད་རུང་བར་འགྱུར། །གང་ལ་སྟོང་ཉིད་མི་རུང་བ། །དེ་ལ་ཐམས་ཅད་རུང་མི་འགྱུར། །ཞེས་སོགས་ཀྱིས་རང་བཞིན་གྱིས་སྟོང་པའི་ཕྱོགས་ལ་བྱ་བྱེད་ཐམས་ཅད་འཐད་ཅིང་རུང་ལ། རང་བཞིན་གྱིས་མི་སྟོང་པའི་ཕྱོགས་ལ་ལས་འབྲས་ལ་སོགས་པའི་བྱ་བྱེད་ཐམས་ཅད་མི་འཐད་པའི་ཚུལ་བཤད་པའི་དོན་གཞུང་འདི་དང་དཔལ་ལྡན་ཟླ་བས་ཚིག་གསལ་དུ་རྒྱས་པར་བཤད་པ་ལྟར་རོ། །གཉིས་པ་འགོག་བྱེད་ཀྱི་རིགས་པ་རྣམས་ལྟར་སྣང་དུ་བསྟན་པ་ལ་བཞི། རིགས་པས་དཔྱད་བཟོད་མི་བཟོད་དང་། ཚད་མས་གྲུབ་མ་གྲུབ་དང་། མུ་བཞིའི་སྐྱེ་བ་ཡིན་མིན་དང་ཡོད་མེད་སོགས་ཀྱི་མུ་བཞི་འགོག་པ་གནོད་བྱེད་དུ་མི་རུང་བར་བསྟན་པའོ། །འདི་དག་རྒྱས་པར་བཤད་ན་མང་བས་བསྡུ་ན། དང་པོ་རིགས་པས་དཔྱད་བཟོད་མི་བཟོད་ཀྱི་བརྟག་པ་དེ་མི་འཐད་དེ། ཁྱོད་ཀྱིས་རིགས་པས་དཔྱད་བཟོད་མི་བཟོད་པ་དང་རིགས་པས་གནོད་པ་གཉིས་གཅིག་ཏུ་འཁྲུལ་པའི་ཕྱིར་ཏེ། ཀུན་རྫོབ་ཀྱི་སྐྱེ་འགག་སོགས་དོན་དམ་དཔྱོད་བྱེད་ཀྱི་རིགས་པས་དཔྱད་མི་བཟོད་ཀྱང་གནོད་པ་མ་ཡིན་པའི་ཕྱིར་ཏེ། དེ་དག་ནི་དོན་དམ་དཔྱོད་བྱེད་ཀྱི་རིགས་པས་མི་རྙེད་ཀྱང་ཐ་སྙད་དཔྱོད་བྱེད་ཀྱི་རིགས་པའི་རྙེད་དོན་ཡིན་པའི་ཕྱིར་རོ། །གཉིས་པ་ཚད་མས་གྲུབ་མ་གྲུབ་ཀྱི་བརྟག་པ་དེ་ཡང་མི་འཐད་དེ། ཏིང་ངེ་འཛིན་རྒྱལ་པོ་དང་འཇུག་པ་ལས། མིག་ཤེས་སོགས་ཚད་མ་མིན་ཞེས་བཤད་པ་ནི་འཇིག་རྟེན་པའི་མིག་རྣ་བ་སོགས་ཀྱི་ཤེས་པ་རྣམས་ནི་དེ་ཁོ་ན་ཉིད་མཐོང་བའི་ཚད་མ་མིན་ཞེས་པའི་དོན་ཡིན་གྱི། གཟུགས་སྒྲ་སོགས་མཐོང་བའི་ཚད་མ་མིན་ཞེས་པའི་དོན་མིན་པའི་ཕྱིར་རོ། །གལ་ཏེ་འཇིག་རྟེན་པའི་མིག་ཤེས་སོགས་དེ་དག་གཟུགས་སྒྲ་སོགས་ལ་ཚད་མ་ཡིན་ན་དེ་ལ་འཁྲུལ་ལམ་མ་འཁྲུལ། འཁྲུལ་ན་ནི་དེ་ལ་ཚད་མ་ཡིན་པར་འགལ་ལ། མ་འཁྲུལ་ན་ཤེས་པ་དེ་རྣམས་ལ་གཟུགས་སྒྲ་སོགས་རང་གི་མཚན་ཉིད་ཀྱིས་གྲུབ་པར་སྣང་དགོས་པས་དེ་ལའང་ཚད་མར་ཐལ་ལོ་སྙམ་ན་སྐྱོན་མེད་དེ། ཤེས་པ་དེ་རྣམས་རང་གི་སྣང་ཡུལ་རང་མཚན་ལ་འཁྲུལ་ཅིང་དེ་ལ་ཚད་མ་མིན་ཡང་སྤྱིར་ཚད་མར་མི་འགལ་བའི་ཕྱིར་རོ། །གསུམ་པ་མུ་བཞིའི་སྐྱེ་བ་ཡིན་མིན་གྱི་བརྟག་པ་དེའང་མི་འཐད་དེ། རང་བཞིན་གྱིས་སྐྱེ་ན་བདག་གཞན་སོགས་མུ་བཞི་པོ་གང་རུང་ལས་སྐྱེ་དགོས་ནའང་། རང་བཞིན་གྱིས་མི་སྐྱེ་བར་བརྟེན་ནས་སྐྱེ་བས་མུ་བཞི་གང་རུང་དུ་སྐྱེ་བ་འགོག་པ་ཡིན་པའི་ཕྱིར་རོ། །དེས་ན་བརྟེན་ནས་སྐྱེ་བ་ཉིད་ཀྱིས་མཐའ་བཞི་དང་བྲལ་བའི་ཚུལ་གྱིས་སྐྱེ་བར་གྲུབ་བོ། །བཞི་པ་ཡོད་མེད་སོགས་ཀྱི་མུ་བཞི་འགོག་པའི་ཚུལ་དེ་ཡང་མི་འཐད་དེ། དབུ་མའི་གཞུང་ནས་དངོས་པོ་ཡོད་པ་དང་མེད་པ་དང་གཉིས་ཀ་མ་ཡིན་པ་བཀག་པའི་དོན་ནི་དེ་དག་ལ་རང་བཞིན་འགོག་པ་ཡིན་གྱི། ཁྱེད་ལྟར་ཡོད་པ་ཡང་མ་ཡིན། མེད་པ་ཡང་མ་ཡིན། གཉིས་ཀ་ཡང་མ་ཡིན། གཉིས་ཀ་མིན་པ་ཡང་མ་ཡིན་ཞེས་པའི་དོན་མིན་པའི་ཕྱིན་ཏེ། དེ་ལྟར་སྨྲ་བ་ལ་ཁས་བླངས་དངོས་འགལ་དུ་འགྱུར་བའི་ཕྱིར་ཏེ། དེའི་ཚེ་གཉིས་ཀ་མིན་ཞེས་སྨྲས་མ་ཐག་གཉིས་ཀ་མིན་པ་མིན་ཞེས་གཉིས་ཀ་ཡིན་པར་ཁས་བླངས་པའི་ཕྱིར་རོ། །འདི་དག་ལས་ཁ་ཅིག་ཁོ་བོ་ཅག་གིས་ཡོད་མེད་སོགས་གང་དུའང་ཁས་མི་ལེན་པས་ཁས་ལེན་དང་དམ་བཅའ་མེད་པའི་ཕྱིར་སྐྱོན་མེད་དོ་ཞེ་ན། དེ་ཡང་མི་འཐད་དེ། དེ་ལྟར་ནའང་ཁས་ལེན་དང་དམ་བཅའ་ཡོད་པར་འགྱུར་བའི་ཕྱིར་ཏེ། ཁས་ལེན་དང་དམ་བཅའ་མེད་པར་ཁས་བླངས་ཤིང་དམ་བཅས་པ་དེ་ཉིད་ཁས་ལེན་དང་དམ་བཅའ་ཡིན་པའི་ཕྱིར་རོ། །རྗེས་འདི་དག་གི་སྐབས་སུ་དབུ་མའི་རང་ལུགས་འཇོག་ཚུལ་ལུང་དང་རིགས་པ་དུ་མས་བསྒྲུབས་པ་རྣམས་ནི་དེ་ཉིད་དུ་ཤེས་པར་བྱའོ། །གཉིས་པ་དགག་བྱ་ངོས་འཛིན་ཁྱབ་ཆུང་བ་ནི། ཁ་ཅིག་ན་རེ་དགག་བྱ་ནི་རང་བཞིན་ཡིན་ལ་དེ་ཡང་ཁྱད་པར་གསུམ་དང་ལྡན་པ་སྟེ་ངོ་བོ་རྒྱུ་རྐྱེན་གྱིས་མ་བསྐྱེད་པ་དང་གནས་སྐབས་གཞན་དུ་མི་འགྱུར་བ་དང་རྣམ་འཇོག་གཞན་ལ་མི་བལྟོས་པའོ་ཞེས་ཟེར་རོ། །དེ་ནི་མི་འཐད་དེ། ཆོས་ཉིད་ལྟ་བུ་ལ་ཁྱད་པར་དེ་གསུམ་ཡོད་པས་དེ་དག་གི་སྟེང་དུ་བདེན་གྲུབ་མི་ཁེགས་པར་ཐལ་ཞིང་། འདུས་བྱས་ཀྱི་སྟེང་དུ་ཁྱད་པར་དེ་གསུམ་བཀག་པ་རང་བཞིན་གྱིས་སྟོང་པའི་དོན་ཡིན་ན་ནི་དངོས་སྨྲ་བ་རྣམས་ཀྱིས་ཀྱང་རང་བཞིན་མེད་པའི་དོན་ངེས་པར་འགྱུར་བ་དེའི་འདོད་པའང་མ་ཡིན་པའི་ཕྱིར་རོ། །རང་བཞིན་ཁྱད་པར་གསུམ་ལྡན་དེ་འདྲ་ནི་མགོན་པོ་ཀླུ་སྒྲུབ་ཀྱིས་ཀྱང་ཞལ་གྱིས་བཞེས་པ་ཡིན་ཏེ། ཆོས་རྣམས་རང་བཞིན་གྱིས་སྟོང་པའི་དེ་བཞིན་ཉིད་དེ་རང་བཞིན་ཁྱད་པར་གསུམ་ལྡན་དུ་ལུང་རིགས་ཀྱིས་བསྒྲུབ་པའི་ཕྱིར་རོ། །གསུམ་པ་རང་ལུགས་ཀྱི་དགག་བྱ་ངོས་བཟུང་བ་ལ་གསུམ། དངོས་ཀྱི་དགག་བྱ་དང་། དེ་གཞན་ལ་སྦྱོར་མི་སྦྱོར་དང་། དོན་དམ་གྱི་ཁྱད་པར་སྦྱོར་མི་སྦྱོར་རོ། །དང་པོ་ནི། སྤྱིར་དགག་བྱ་ལ་ལམ་གྱི་དགག་བྱ་དང་རིགས་པའི་དགག་བྱ་གཉིས་ཡོད་པའི་དང་པོ་ནི་ཉོན་མོངས་པའི་སྒྲིབ་པ་དང་ཤེས་བྱའི་སྒྲིབ་པ་རྣམས་ཏེ་ཤེས་བྱ་ལ་ཡོད་པའོ། །གཉ ིས་པ་རིགས་པའི་དགག་བྱ་ལ་ཕྲ་རགས་གཉིས་ལས། རགས་པ་ནི་སྒྲ་རྟག་པ་དང་སྤྱིི་གཙོ་བོ་ལ་སོགས་ལྟ་བུའོ། །ཕྲ་བ་ལའང་དབུ་མ་པ་གཉིས་ཀྱི་ལུགས་ལ་མི་འདྲ་བ་ཡོད་ཀྱང་། ཕྱི་ནང་གི་ཆོས་རྣམས་རང་བཞིན་གྱིས་གྲུབ་པར་འཛིན་པའི་ལྷན་སྐྱེས་ཀྱི་མ་རིག་པས་ཇི་ལྟར་བཟུང་བའི་ཞེན་ཡུལ་ནི་འདིར་དགག་བྱ་མཐར་ཐུག་ག །མ་རིག་པ་དེས་ཆོས་རྣམས་ཀྱི་སྟེང་དུ་རང་བཞིན་ཡོད་པར་སྒྲོ་འདོགས་ཤིང་སྒྲོ་འདོགས་ཚུལ་ནི་ཆོས་གང་ལའང་གཞན་ལ་རག་མ་ལས་པར་རང་གི་ངོ་བོས་ཡོད་པར་འཛིན་པ་ཞིག་སྟེ། དེས་ཇི་ལྟར་བཟུང་བའི་ཞེན་ཡུལ་དེ་ལ་བདག་གམ་རང་བཞིན་ཞེས་ཐ་སྙད་མཛད་དོ། །རང་བཞིན་དེ་གང་ཟག་གི་སྟེང་དུ་མེད་པ་ནི་གང་ཟག་གི་བདག་མེད་དང་མིག་རྣ་བ་སོགས་ཀྱི་སྟེང་དུ་མེད་པ་ནི་ཆོས་ཀྱི་བདག་མེད་དོ། །དགག་བྱའི་རང་བཞིན་ལ་ཕྲ་རགས་མེད་ཀྱང་ཁྱད་གཞིའི་གནད་ཀྱིས་གང་ཟག་གི་སྟེང་དུ་བདག་མེད་ངེས་སླ་ཞིང་མིག་རྣ་སོགས་ཆོས་ཀྱི་སྟེང་དུ་ངེས་དཀའ་སྟེ་ཁྱད་པར་རོ། །གཉིས་པ་དེ་གཞན་ལ་སྦྱོར་མི་སྦྱོར་ནི། རི་བོང་གི་རྭ་ལྟ་བུ་གཏད་མེད་པ་རྣམས་ནི་མེད་དེ་ཞེས་བརྗོད་པས་ཆོག་གི་ཁྱད་པར་དེ་སྦྱོར་མི་དགོས་ལ། ཡུལ་འགའ་ཞིག་ན་ཡོད་ཀྱང་ཡུལ་དེར་མེད་ན་ནི་དེར་མེད་ཅེས་བརྗོད་ཀྱི་ཁྱད་པར་དེ་སྦྱར་མི་དགོས་སོ། །གཞན་སྡེ་དང་དངོས་སྨྲ་བའི་ཐུན་མོང་མ་ཡིན་པའི་སྒྲོ་བཏགས་རྣམས་འགོག་པ་ན་དམིགས་བསལ་མ་གཏོགས་དགག་བྱའི་ཁྱད་པར་མ་སྦྱར་བར་འགོག་ཏུ་རུང་ངོ་། །དབུ་མ་པས་ཐ་སྙད་དུ་ཡོད་པར་འདོད་པ་ཇི་ལྟ་བ་ཞིག་ཡིན་ཀྱང་འགོག་པ་ན་དགག་བྱའི་ཁྱད་པར་སྦྱར་ནས་འགོག་དགོས་སོ། །དགག་བྱའི་རྣམ་གྲངས་ལ་བདེན་པར་གྲུབ་པ་དང་། རང་བཞིན་གྱིས་གྲུབ་པ་དང་། རང་གི་མཚན་ཉིད་ཀྱིས་གྲུབ་པ་དང་། རང་གི་ངོ་བོས་གྲུབ་པ་དང་། དེ་ཁོ་ན་ཉིད་དུ་གྲུབ་པ་དང་། ཡང་དག་པར་གྲུབ་པ་དང་། དོན་དམ་པར་གྲུབ་པ་སོགས་ཏེ་དེ་དག་གང་རུང་ཞིག་སྦྱར་བ་བྱུང་ན་དེས་ཆོག་གོ །གསུམ་པ་དགག་བྱ་ལ་དོན་དམ་སྦྱོར་མི་སྦྱོར་ནི་དབུ་མ་གཉིས་ལ་ཁྱད་པར་མེད་ལ། འོན་ཀྱང་རང་རྒྱུད་པས་ནི་དོན་དམ་པར་གྲུབ་པ་དང་བདེན་པར་གྲུབ་པ་དང་ཡང་དག་པར་གྲུབ་པ་དང་དེ་ཁོ་ན་ཉིད་དུ་གྲུབ་པ་རྣམས་མི་འདོད་ཀྱང་། རང་གི་མཚན་ཉིད་ཀྱིས་གྲུབ་པ་དང་རང་བཞིན་གྱིས་གྲུབ་པ་བཞེད་དེ་ཁྱད་པར་རོ། །གཉ ིས་པར་དགག་བྱ་འགོག་པ་དེ་ཐལ་རང་གང་གིས་བྱེད་བཤད་པ་ལ་གཉིས། ཐལ་རང་གི་དོན་ངོས་བཟུང་བ་དང་། དེ་གཉིས་གང་གི་རྗེས་སུ་འབྲང་ནས་ལྟ་བ་རྒྱུད་ལ་བསྐྱེད་པའོ། །དང་པོ་ལ་གཉིས། གཞན་ལུགས་དགག་པ་དང་། རང་ལུགས་བཞག་པའོ། །དང་པོ་ལ་དེ་བརྗོད་པ་དང་དགག་པ་གཉིས་ཡོད་ཅིང་། རང་ལུགས་ཀྱི་སྐབས་སུ་རང་རྒྱུད་སུན་བྱུང་བ་དང་། རང་ལ་མི་མཚུངས་པ་གཉིས་དང་། དང་པོ་ལ་ཆོས་ཅན་གཞི་མ་གྲུབ་པའི་ཕྱོགས་ཀྱི་སྐྱོན་དང་། དེས་གཏན་ཚིགས་ཀྱང་མ་གྲུབ་པ་གཉིས་དང་། དང་པོ་ལ་འདོད་པ་བརྗོད་པ་དང་། དེ་དགག་པ་གཉིས་དང་། དགག་པ་ལ་ཡང་དོན་མི་འཐད་པ་དང་། དཔེ་མི་འཐད་པ་གཉིས་སོགས་ཡོད་ཀྱང་མང་བས་བཞག་གོ །གཉིས་པ་ལ་དེ་གཉིས་གང་གི་རྗེས་སུ་འབྲང་ནས་ལྟ་བ་རྒྱུད་ལ་བསྐྱེད་པ་ནི། དབུ་མ་པ་ལ་གཉིས་ཡོད་པ་ལས་གང་གི་རྗེས་སུ་འབྲང་སྙམ་ན། འདིར་ནི་ཐལ་འགྱུར་བའི་ལུགས་དཔལ་ལྡན་ཟླ་བས་གསལ་བར་མཛད་པའི་རྗེས་སུ་འཇུག་དགོས་པར་རྗེ་ཉིད་ཀྱིས་བཞེད་པ་ལྟར་རོ། །གསུམ་པ་དེ་ལ་བརྟེན་ནས་ལྟ་བ་རྒྱུད་ལ་བསྐྱེད་པའི་ཚུལ་ལ་གསུམ། གང་ཟག་གི་བདག་མེད་དང་། ཆོས་ཀྱི་བདག་མེད་གཏན་ལ་དབབ་པ་དང་། ལྟ་བ་གོམས་པས་སྒྲིབ་པ་སྤོང་ཚུལ་ལོ། །དང་པོ་ལ་གསུམ། བདག་རང་བཞིན་མེད་པ་གཏན་ལ་དབབ་པ་དང་། དེས་བདག་གི་བ་རང་བཞིན་མེད་པར་འགྲུབ་པ་དང་། རིགས་པས་དེ་དག་གཞན་ལའང་སྦྱོར་ཚུལ་ལོ། །དང་པོ་ལ་གཉིས། དཔེ་དགོད་པ་དང་། དོན་ལ་སྦྱར་བའོ། །དང་པོ་ནི། མདོ་ལས། ཇི་ལྟར་ཡན་ལག་ཚོགས་རྣམས་ལ། །བརྟེན་ནས་ཤིང་རྟར་བརྗོད་པ་ལྟར། །དེ་བཞིན་ཕུང་པོ་རྣམས་བརྟེན་ནས། །ཀུན་རྫོབ་སེམས་ཅན་ཞེས་བྱའོ། །ཞེས་གསུངས་སོ། །འདི་ལ་བཞི། ཤིང་རྟ་རང་བཞིན་མེད་པའི་བཏགས་ཡོད་དུ་བསྟན་པ། དེ་ལ་རྩོད་པ་སྤང་བ། མིང་གི་སྒོ་ནས་གྲུབ་ཚུལ། དེ་ལ་བརྟེན་ནས་ལྟ་བ་མྱུར་དུ་རྙེད་པའི་ཕན་ཡོན་ནོ། །དང་པོ་ནི། འཇུག་པ་ལས། ཤིང་རྟ་རང་ཡན་ལག་ལས་གཞན་འདོད་མིན། །གཞན་མིན་མ་ཡིན་དེ་ལྡན་ཡང་མིན་ཅིང་། །ཡན་ལག་ལ་མིན་ཡན་ལག་དག་དེར་མིན། །འདུས་པ་ཙམ་མིན་དབྱིབས་མིན་ཇི་བཞིན་ནོ། །ཞེས་ཤིང་རྟ་དང་བདག་ཕུང་དཔེ་དོན་དུ་སྦྱར་ནས་གསུངས་སོ། །དེ་ཡང་ཤིང་རྟ་རང་བཞིན་གྱིས་གྲུབ་ན་གཅིག་དང་ཐ་དད་སོགས་རྣམ་པ་བདུན་དུ་བཙལ་ན་རྙེད་དགོས་པ་ལས་བདུན་པོ་དེ་དག་གང་དུ་ཡང་མ་གྲུབ་པས་རང་བཞིན་གྱིས་མེད་དོ། །འདི་དག་ཀྱང་བསྡུས་ཏེ་བརྗོད་ན་ཤིང་རྟ་དེ་རང་གི་ཡན་ལག་རྣམས་དང་རང་བཞིན་གཅིག་མིན་ཏེ། གཅིག་ན་ཡན་ལག་དུ་མ་ཡོད་པ་དེ་བཞིན་དུ་ཤིང་རྟ་ཡང་དུ་མར་འགྱུར་ཞིང་། ཡང་ན་ཤིང་རྟ་གཅིག་ཡིན་པ་ལྟར་ཡན་ལག་རྣམས་ཀྱང་གཅིག་ཏུ་འགྱུར་རོ། །ཤིང་རྟ་དེ་རང་གི་ཡན་ལག་རྣམས་དང་ངོ་བོ་ཉིད་ཀྱིས་སོ་སོ་བའང་མིན་ཏེ། ཡིན་ན་བུམ་པ་དང་ཀ་བ་ཐ་དད་ཡན་གར་དུ་མཐོང་བ་ལྟར་ཤིང་རྟ་དང་དེའི་ཡན་ལག་སོ་སོར་དམིགས་དགོས་པ་ལས་མ་དམིགས་པའི་ཕྱིར་རོ། །རྟེན་དང་བརྟེན་པའི་ཕྱོགས་གཉིས་ནི་མཁར་གཞོང་ལ་ཞོ་གནས་པ་ལྟར་ཤིང་རྟ་དེ་རང་གི་ཡན་ལག་རྣམས་ཀྱི་རྟེན་དུ་མེད་ཅིང་། རེ་ལྡེ་ལ་ལྷས་སྦྱིན་གནས་པ་ལྟར་ཤིང་རྟ་དེ་རང་གི་ཡན་ལག་རྣམས་ལ་བརྟེན་ནས་ངོ་བོ་ཉིད་ཀྱིས་མེད་དེ། ཡོད་ན་ཕན་ཚུན་མ་བལྟོས་པར་ཡོད་དགོས་པའི་ཕྱིར། ལྡན་པའི་ཕྱོགས་ཀྱང་མི་འཐད་དེ། འདི་ལྟར་ལྷས་སྦྱིན་ནོར་དང་ལྡན་པ་བཞིན་དུ་ངོ་བོ་ཐ་དད་པའི་ཚུལ་དུ་མི་ལྡན་ཅིང་། ལྷས་སྦྱིན་རྣ་བ་དང་ལྡན་པ་བཞིན་དུ་ངོ་བོ་གཅིག་པའི་ཚུལ་དུ་ངོ་བོ་ཉིད་ཀྱིས་མི་ལྡན་པའི་ཕྱིར་ཏེ། ངོ་བོ་ཐ་དད་པའི་ཚུལ་གྱིས་ལྡན་ན་ཡན་ལག་ལ་མ་བལྟོས་པར་ཤིང་རྟ་འཛིན་དགོས་ན་དེ་མི་འཛིན་པའི་ཕྱིར་དང་། སྤྱིར་ཐ་སྙད་དུ་ཤིང་རྟ་ཡན་ལག་རྣམས་དང་ངོ་བོ་གཅིག་ཏུ་ལྡན་པར་འདོད་ཀྱང་། འདིར་ནི་རང་བཞིན་གཅིག་པའི་ལྡན་ཚུལ་ཡིན་པ་འགོག་པའི་ཕྱིར་རོ། །ཕྱོགས་ལྷག་མ་གཉིས་ནི། ཤིང་རྟའི་ཡན་ལག་ཤིང་རྟ་མིན་ཡང་ཡན་ལག་ཚོགས་པ་ཙམ་ཤིང་རྟའོ་སྙམ་ན་དེ་ནི་མི་འཐད་དེ། དེ་ལྟ་ན་ཡན་ལག་རྣམས་ཕྲལ་ནས་གསིལ་བུར་གནས་པ་ལའང་ཤིང་རྟ་ཡོད་དགོས་ན་དེ་མ་མཐོང་བའི་ཕྱིར། དཔེར་ན་ཁང་པ་བཤིག་པའི་ཤིང་ཚོགས་པ་ཙམ་ལ་ནི་ཁང་པ་མེད་པ་བཞིན་ནོ། །གཞན་ཡང་ཤིང་རྟའི་ཡན་ལག་ཚོགས་པ་ཙམ་ཞིག་ཤིང་རྟ་མི་རིགས་ཏེ། ཡན་ལག་ཚོགས་པ་ནི་ཤིང་རྟའི་གདགས་གཞི་ཡིན་པས་གདགས་གཞི་བཏགས་ཆོས་སུ་མི་འཐད་པའི་ཕྱིར་རོ། །གལ་ཏེ་ཚོགས་པ་ཙམ་ཤིང་རྟར་མི་འདོད་ཀྱི་ཡན་ལག་བསྒྲིགས་པའི་དབྱེ་བས་ཁྱད་པར་བ་དེ་ཤིང་རྟར་འཇོག་གོ་སྙམ་ན། དེ་ཡང་མི་འཐད་དེ། བསྒྲིགས་མ་བསྒྲིགས་གང་གི་དབྱིབས་ཤིང་རྟར་མི་རིགས་པའི་ཕྱིར་ཏེ། ཤིང་རྟ་ནི་དབྱིབས་དང་ལྡན་པའི་དབྱིབས་ཅན་ཡིན་པས་དབྱིབས་ཅན་ནི་དབྱིབས་སུ་མི་འཐད་པའི་ཕྱིར་རོ། །གཉིས་པ་དེ་ལ་རྩོད་པ་སྤང་བ་ནི། དངོས་སྨྲ་བ་དག་ན་རེ། དེ་ལྟར་རྣམ་པ་བདུན་དུ་བཙལ་ནས་ཤིང་རྟ་མ་རྙེད་ན་ཤིང་རྟ་མེད་དགོས་ན་དེ་ཡང་མི་རུང་སྟེ། འཇིག་རྟེན་ན་ཤིང་རྟ་ལོངས་ཤིག་ཉོས་ཤིག་ཆོས་ཤིག་ཅེས་སོགས་ཀྱི་ཐ་སྙད་མཐོང་བའི་ཕྱིར་རོ་ཞེ་ན། སྐྱོན་དེ་མི་འཇུག་སྟེ། ཤིང་རྟ་ནི་རྣམ་པ་བདུན་གྱི་རིགས་པས་དཔྱད་ན་མི་རྙེད་ཀྱང་རིགས་པ་དེས་ཤིང་རྟ་མེད་པར་རྙེད་པ་མིན་པས་ཤིང་རྟ་ནི་ཐ་སྙད་དུ་ཡོད་པར་འདོད་པའི་ཕྱིར་ཏེ། འཇུག་པ་ལས། དེ་ནི་དེ་ཉིད་དུ་འམ་འཇིག་རྟེན་དུ། །རྣམ་པ་བདུན་གྱིས་འགྲུབ་འགྱུར་མིན་མོད་ཀྱི། །རྣམ་དཔྱད་མེད་པར་འཇིག་རྟེན་ཉིད་ལས་འདི། །རང་གི་ཡན་ལག་བརྟེན་ནས་འདོགས་པ་ཡིན། །ཞེས་གསུངས་པའི་ཕྱིར། གལ་ཏེ་ཤིང་རྟའི་ཡན་ལག་རྣམས་ཤིང་རྟ་ལ་བལྟོས་སམ་མི་བལྟོས། བལྟོས་ན་ཤིང་བཤིགས་པའི་ཚེ་ཡང་ཤིང་རྟའི་ཡན་ལག་རྣམས་མཐོང་བས་ཇི་ལྟར་བྱ་སྙམ་ན། ལན་ནི་འདི་ལྟར་གསུངས་ཏེ་ཤིང་རྟ་ཞིག་པའི་ཡན་ལག་ལ་དེའི་ཡན་ལག་གོ་སྙམ་པ་ནི་སྔོན་ཤིང་རྟ་མཐོང་བའི་འབྲེལ་བའི་དབང་གིས་དེར་འཛིན་པ་ཡིན་གྱི། དེ་ཤིང་རྟ་དང་མ་འབྲེལ་བས་ཤིང་རྟའི་ཡན་ལག་མིན་ནོ། །རིགས་པ་འདིས་མི་དང་དུད་འགྲོ་ཤི་བའི་ཕུང་པོ་རྣམས་ནི་མི་དང་དུད་འགྲོའི་ཕུང་པོ་ཡིན་པའང་ཁེགས་སོ། །མི་བལྟོས་ན་ཤིན་ཏུ་མི་འཐད་དེ། ཡན་ལག་ཅན་དང་ཡན་ལག་དང་ཆ་དང་ཆ་ཅན་རྣམས་ཀྱང་ཕན་ཚུན་བལྟོས་པར་རིགས་པས་གྲུབ་པའི་ཕྱིར་རོ། །གསུམ་པ་མིང་གི་ཁྱད་པར་གྱི་སྒོ་ནས་གྲུབ་ཚུལ་ནི། ཐ་སྙད་དུ་ཤིང་རྟ་རང་གི་ཡན་ལག་རྣམས་ལ་བལྟོས་ཏེ་ཡན་ལག་ཅན་དང་ཆ་ཤས་ཅན་དང་ཚོགས་པ་ཅན་ལ་སོགས་པར་འཇོག་པ་ཡིན་ནོ། །བཞི་པ་དེ་ལ་བརྟེན་ནས་ལྟ་བ་མྱུར་དུ་རྙེད་པའི་ཕན་ཡོན་ནི། དེ་ལྟར་ཤིང་རྟ་ལ་རྣམ་པ་བདུན་གྱི་དཔྱོད་པ་དེ་ལ་བརྟེན་ནས་རང་བཞིན་མེད་པའི་དོན་གྱི་གཏིང་མྱུར་དུ་དཔོག་པར་འགྱུར་བར་གསུངས་ཤིང་མདོར་ན་ཤིང་རྟ་དང་སྦྱར་ནས་བཤད་པའི་ལྟ་བའི་རྣམ་གཞག་འདི་ལ་ཡོན་ཏན་གསུམ་ཡོད་དེ། སྒྲོ་འདོགས་ཀྱི་རྟག་ལྟ་དགག་སླ་བའི་ཡོན་ཏན་དང་། རྟེན་འབྲེལ་མི་འཐད་སྙམ་པའི་ཆད་ལྟ་དགག་སླ་བ་དང་། རང་བཞིན་མེད་པ་ལ་བྱ་བྱེད་འཐད་པར་རྟོགས་སླ་བའི་ཡོན་ཏན་རྣམས་འབྱུང་ངོ་། །གཉིས་པ་དོན་ལ་སྦྱར་བ་ལ་གཉིས། རང་བཞིན་མེད་ཚུལ་དོན་ལ་སྦྱར་བ་དང་། མིང་གི་སྒོ་ནས་གྲུབ་ཚུལ་དོན་ལ་སྦྱར་བའོ། །དང་པོ་ལ་བཞི། བདག་ཕུང་གཅིག་པ་དགག་པ་དང་། ཐ་དད་པའི་ཕྱོགས་དགག་པ་དང་། དེས་ལྷག་མ་རྣམས་ཀྱང་ཁེགས་ཚུལ་དང་། དེ་ལ་བརྟེན་ནས་གང་ཟག་སྒྱུ་མ་ལྟ་བུར་འཆར་ཚུལ་ལོ། །དང་པོ་ནི། སྤྱིར་ཆོས་ལ་གཅིག་དང་ཐ་དད་གཉིས་སུ་ཁ་ཚོན་ཆོད་ན་ནི་བྱེ་བྲག་རང་གི་ངོ་བོས་གྲུབ་པའི་གཅིག་དང་ཐ་དད་ལ་ཡང་ཁ་ཚོན་ཆོད་པར་འགྱུར་བས་བདག་ནི་ཕུང་པོ་དང་ངོ་བོས་གྲུབ་པའི་གཅིག་གམ་ཐ་དད་པ་ག །ང་ཡིན་སྙམ་དུ་དཔྱད་པར་བྱའོ། །འདི་ལ་ཐོག་མར་རང་བཞིན་ཀྱིས་གཅིག་ཡིན་པ་ལ་གནོད་བྱེད་བསྟན་པར་བྱ་སྟེ། འདི་ལ་གསུམ། བདག་ཁས་ལེན་པ་དོན་མེད་དུ་འགྱུར་བ་དང་། བདག་མང་པོར་འགྱུར་བ་དང་། སྐྱེ་འཇིག་ཅན་དུ་འགྱུར་བའོ། །དང་པོ་ནི། བདག་ཕུང་ནི་གཅིག་ཏུ་མི་རུང་སྟེ། གཅིག་ཡིན་ན་བདག་ཕུང་པོའི་རྣམ་གྲངས་ཙམ་དུ་འགྱུར་བའི་ཕྱིར་ཏེ། ཟླ་བ་ལ་རི་བོང་ཅན་དུ་བརྗོད་པ་ལྟར་འགྱུར་རོ། །དེ་ལྟར་འགྱུར་ན་ནི་མི་འཐད་དེ། བདག་དང་ཕུང་པོའི་ཐ་སྙད་སོ་སོར་བྱེད་པ་མཐོང་བའི་ཕྱིར་རོ། །གཉིས་པ་ནི། བདག་ཕུང་པོ་དང་རང་བཞིན་གཅིག་ཏུ་གྲུབ་ན་སྐྱོན་གཞན་ཡང་ཡོད་དེ། ཕུང་པོ་ཡང་དུ་མ་ཡོད་པ་ལྟར་བདག་ཀྱང་དུ་མ་ཡོད་པར་འགྱུར་ཞིང་། ཡང་ན་བདག་གཅིག་ཡིན་པ་ལྟར་ཕུང་པོ་རྣམས་ཀྱང་གཅིག་ཏུ་འགྱུར་རོ། །གསུམ་པ་ནི། བདག་སྐད་ཅིག་གིས་སྐྱེ་འཇིག་བྱེད་ན་སྐྱོན་ཅི་ཡོད་སྙམ་ན་སྐྱོན་གསུམ་ཡོད་དེ། སྐྱེ་བ་དྲན་པ་མི་འཐད་པ་དང་། ལས་བྱས་པ་ཆུད་ཟོས་པ་དང་། ལས་མ་བྱས་པ་དང་འཕྲད་པའི་སྐྱོན་ཡོད་པའི་ཕྱིར་ཏེ། དང་པོ་ནི། འདི་ལྟར་རང་གི་ངོ་བོས་གྲུབ་པའི་བདག་སྐད་ཅིག་གིས་སྐྱེ་འཇིག་བྱེད་ན་བདག་སྔ་ཕྱི་རྣམས་ནི་འབྲེལ་མེད་དུ་གྱུར་པས་ངའི་སྐྱེ་བ་སྔོན་མ་ནི་འདིའོ་ཞེས་མི་དྲན་པར་འགྱུར་པའི་ཕྱིར་ཏེ། ལྷས་བྱིན་གྱིས་རང་མཆོད་སྦྱིན་གྱི་སྐྱེ་བ་བླངས་པ་མི་དྲན་པ་བཞིན་ནོ། །གཉིས་པ་ལས་བྱས་པ་ཆུད་ཟ་བའི་ཉེས་པ་ཡོད་དེ། ལས་བྱེད་པ་པོ་དང་ལས་གཉིས་རང་གི་མཚན་ཉིད་ཀྱིས་གྲུབ་བཞིན་དུ་ཞིག་ན་ནི་སྔར་བསགས་པའི་ལས་ཀྱི་འབྲས་བུ་མྱོང་བ་མི་འགྱུར་བའི་ཕྱིར་ཏེ། གཉིས་ཀའང་འབྲེལ་མེད་དུ་སོ་སོར་ཞིག་པའི་ཕྱིར་རོ། །སྤྱིར་ལས་བྱེད་པ་པོ་དང་ལས་གཉིས་ཀའང་ཞིག་ཀྱང་འབྲས་བུ་འབྱིན་པ་མི་འགལ་ཞིང་། རང་བཞིན་གྱིས་གྲུབ་ན་བལྟོས་པར་མི་རུང་བས་ཞིག་ཟིན་ནས་ཕྱིས་འབྲས་བུ་བསྐྱེད་མི་ནུས་པའི་རིགས་པ་སྟེ་འོན་ཀྱང་རྟོགས་དཀའ་བའི་གནས་སོ། །གསུམ་པ་ལས་མ་བྱས་པ་དང་འཕྲད་པའི་ཉེས་པ་ཡོད་དེ། འདི་ཡང་རང་བཞིན་གྱིས་གྲུབ་པའི་གང་ཟག་ཞིག་གིས་ལས་བསགས་ནས་ཁོ་རང་ཞིག་ནས། ཕྱིས་རང་བཞིན་གྱིས་གྲུབ་པའི་གང་ཟག་གཞན་ཞིག་གིས་ལས་དེའི་འབྲས་བུ་མྱོང་བར་འདོད་པ་ཡིན་པས་གང་ཟག་གཞན་གྱིས་བསགས་པའི་འབྲས་བུ་ལ་ལོངས་སྤྱོད་པར་འགྱུར་བའི་ཕྱིར་རོ། །འདི་ལ་སྔ་ཕྱི་གཉིས་རྒྱུད་གཅིག་ཡིན་པས་སྐྱོན་དེ་མེད་སྙམ་ན་མི་འཐད་དེ། རང་གི་མཚན་ཉིད་ཀྱིས་གྲུབ་ན་ནི་རྒྱུད་ཐ་ད ད་དུ་འགྱུར་དགོས་པས་རྒྱུད་གཅིག་པ་མི་རུང་བའི་ཕྱིར་ཏེ། འཇུག་པ་ལས། གང་དག་རང་མཚན་ཉིད་ཀྱིས་སོ་སོ་པ། །དེ་དག་རྒྱུད་གཅིག་གཏོགས་པ་རིགས་མ་ཡིན། །ཞེས་གསུངས་པ་ལྟར་རོ། །འདི་ཡང་རང་བཞིན་གྱིས་གྲུབ་པ་ལ་བལྟོས་འབྲེལ་མི་རུང་བའི་རིགས་པའོ། །མདོར་ན་བདག་ཕུང་གཉིས་གཅིག་ཡིན་པའི་ཕྱོགས་ལ་ལས་བྱ་བྱེད་ཐམས་ཅད་འཐད་པར་མི་འགྱུར་བའི་གནོད་བྱེད་ཀྱི་སྐོར་ཤིན་ཏུ་མང་སྟེ་བཞག་གོ །གཉིས་པ་ཐ་དད་པའི་ཕྱོགས་དགག་པ་ནི། སྦྱིར་བདག་ཕུང་གཉིས་ངོ་བོ་གཅིག་ལ་ལྡོག་པ་ཐ་དད་ཙམ་ཡིན་པས་ཐ་དད་ཙམ་འགོག་པ་མིན་ཡང་རང་བཞིན་གྱིས་ཐ་དད་པའི་ཕྱོགས་འགོག་པ་སྟེ། དེ་ཡང་བདག་ཕུང་རང་བཞིན་གྱིས་ཐ་དད་ན། བདག་ནི་ཕུང་པོའི་མཚན་ཉིད་སྐྱེ་འཇིག་གནས་གསུམ་དང་མི་ལྡན་པར་འགྱུར་ཏེ་རྟ་དང་བ་ལང་བཞིན་ནོ། །བདག་ནི་ཕུང་པོའི་མཚན་ཉིད་སྐྱེ་འཇིག་སོགས་ལས་ལོགས་ཞིག་ཏུ་ངོ་བོ་ཐ་དད་དུ་ཡོད་པ་མིན་ཏེ། ཕུང་པོ་སྐྱེ་འཇིག་བྱེད་པ་ན་བདག་ཀྱང་སྐྱེ་འཇིག་བྱེད་པར་འཇོག་པའི་ཕྱིར་རོ། །གཞན་ཡང་ངོ་བོས་ཐ་དད་ན་ལུས་སེམས་གཉིས་སོ་སོར་ངོས་བཟུང་དུ་ཡོད་པ་ལྟར་བདག་ཕུང་གཉིས་ངོ་བོ་ཐ་དད་པའི་ཚུལ་གྱིས་བཟུང་དུ་ཡོད་དགོས་ན་དེ་ལྟར་བཟུང་དུ་མེད་དེ། རྩ་བ་ཤེས་རབ་ལས། བདག་ནི་ཉེ་བར་ལེན་པ་ལས། །གཞན་དུ་འཐད་པ་ཉིད་མ་ཡིན། །གལ་ཏེ་གཞན་ན་ལེན་མེད་པར། །བཟུང་ཡོད་རིགས་ན་བཟུང་དུ་མེད། །ཅེས་གསུངས་པའི་ཕྱིར་རོ། །དེ་ལྟ་ནའང་ཤིང་རྟ་བཞིན་དུ་བདག་ཀྱང་ཕུང་པོ་ལ་བརྟེན་ནས་ཐ་སྙད་དུ་འཇོག་པ་ནི་མདོ་དང་འཇུག་པའི་ལུང་གིས་འགྲུབ་བོ། །བཞི་པ་དེ་ལ་བརྟེན་ནས་གང་ཟག་སྒྱུ་མ་ལྟ་བུར་འཆར་ཚུལ་ནི། །དཔེར་ན་སྒྱུ་མའི་རྟ་གླང་ནི་རྟ་གླང་དུ་སྣང་ཡང་དེར་མ་གྲུབ་པར་ངེས་ནུས་པ་ལྟར། གང་ཟག་སོགས་ཐ་སྙད་པའི་ཤེས་པ་ལ་བསྙོན་མེད་དུ་སྣང་བ་དང་། དེ་ཉིད་རང་བཞིན་གྱིས་སྟོང་པར་རིགས་ཤེས་ཀྱིས་ངེས་པ་ལ་བརྟེན་ནས་སྣང་ཡང་སྣང་བ་ལྟར་ངོ་བོས་མ་གྲུབ་པའི་སྒྱུ་མའམ་བརྫུན་སྣང་དུ་ངེས་པ་སྐྱེ་བར་འགྱུར་རོ། །འདི་ལ་སྣང་བ་ནི་རིགས་ཤེས་ཀྱིས་མི་འགྲུབ་ཅིང་རང་བཞིན་མེད་པ་ཐ་སྙད་པའི་ཚད་མས་མི་འགྲུབ་པས་རིགས་ཤེས་དང་ཐ་སྙད་པའི་ཚད་མ་གཉིས་ཀ་དགོས་པ་ཡིན་ནོ། །གཞན་ཡང་བདེན་པར་མ་གྲུབ་པར་ངོས་ཟིན་ཀྱང་ཐ་སྙད་པའི་བློ་ལ་བདེན་པར་སྣང་བ་འབྱུང་ཞིང་དེའི་ཚེ་འདི་ནི་སྒྱུ་མ་བཞིན་སྣང་བ་སྟེ་སྣང་བ་ལྟར་དུ་གྲུབ་པ་མེད་སྙམ་དུ་སེམས་པ་ནི་སྒྱུ་མ་ལྟ་བུའི་འཆར་ཚུལ་དུ་ཡང་འགྱུར་རོ། །གཟུགས་བརྙན་དང་སྒྱུ་མའི་རྟ་གླང་དང་རྨི་ལམ་གྱི་མི་སོགས་དེ་དག་ཏུ་སྣང་ཡང་དེར་མ་གྲུབ་པ་ནི་ཐ་སྙད་པའི་ཚད་མས་ངེས་ནུས་ཀྱང་། ཕུང་སོགས་བདེན་པར་སྣང་ཡང་བདེན་པར་མ་གྲུབ་པ་ནི་དབུ་མའི་གྲུབ་མཐའ་ལ་ཞུགས་པ་མིན་པ་གཞན་གྱིས་ངེས་མི་ནུས་ཏེ། སྔ་མ་རྒ་ཤིར་ཕྱི་མ་ཕྲ་བའི་དབང་གིས་ཡིན་པའི་ཕྱིར་རོ། །གསུམ་པ་རིགས་པ་དེ་རྣམས་ཆོས་གཞན་ལ་སྦྱོར་ཚུལ་ནི། ཇི་ལྟར་ཤིང་རྟ་དང་བདག་ཕུང་ལ་བཤད་པའི་རིགས་པ་དེ་བཞིན་དུ་བུམ་པ་དང་ཀ་བ་དང་སྣམ་བུ་སོགས་ཆོས་ཐམས་ཅད་ལ་སྦྱར་ནས་རང་བཞིན་གྱིས་གྲུབ་པ་འགོག་ཅིང་རང་བཞིན་མེད་པར་གཏན་ལ་དབབ་པར་བྱ་སྟེ། སྡུད་པ་ལས། བདག་ཅི་འདྲ་བར་དེ་འདྲར་སེམས་ཅན་ཐམས་ཅད་ཤེས། །སེམས་ཅན་ཐམས་ཅད་ཅི་འདྲ་དེ་འདྲར་ཆོས་ཀུན་ཤེས། །ཞེས་གསུངས་པའི་ཕྱིར་། གཉིས་པ་ཆོས་ཀྱི་བདག་མེད་གཏན་ལ་དབབ་པ་ནི། གང་ཟག་ལས་གཞན་པའི་དངོས་པོ་ལ་ཆོས་ཞེས་བྱ་ཞིང་། དེ་རང་བཞིན་གྱིས་སྟོང་པར་གཏན་ལ་འབེབས་ཚུལ་མང་ཡང་། འཇུག་པར་ནི། བདག་ལས་མ་ཡིན་གཞན་ལས་མིན། །ཞེས་སོགས་ཀྱི་དགོངས་པར་མཛད་ནས་མུ་བཞི་སྐྱེ་འགོག་གི་རིགས་པ་གསུངས་ཤིང་། དེ་ཡང་བདག་དང་གཞན་བདག་གཞན་གཉིས་ཀ་དང་གཉིས་ཀ་མིན་པའི་རྒྱུ་མེད་ཀྱི་མཐའ་བཞི་ལས་སྐྱེ་བ་འགོག་པ་སྟེ་འདི་ལ་བཞི་ལས། བདག་ལས་སྐྱེ་བ་ཐལ་འགྱུར་གྱིས་འགོག་པའི་དོན་བསྡུས་ཏེ་བརྗོད་ན། རྒྱུ་འབྲས་རང་བཞིན་གཅིག་པའི་སྐྱེ་བ་ནི་བདག་སྐྱེ་ཡིན་པས་དེ་འགོག་ཚུལ་ལ། མྱུ་གུ་ནི་རང་དང་རང་བཞིན་གཅིག་པའི་ས་བོན་གྱི་བདག་ཉིད་ལས་སྐྱེ་བ་མི་འཐད་དེ། སྐྱེ་བ་དོན་མེད་པ་ཉིད་དུ་འགྱུར་བའི་ཕྱིར་ཏེ། སྐྱེ་བ་ནི་གང་དུ་སྐྱེ་བ་དེའི་བདག་ཉིད་ཐོབ་པར་བྱ་བའི་ཕྱིར་ཡིན་ཞིང་། མྱུ་གུས་ནི་རང་གི་བདག་ཉིད་ཐོས་ཟིན་པས་སླར་སྐྱེ་མི་དགོས་པའི་ཕྱིར་རོ། །སྐྱེས་ཟིན་པའི་ས་བོན་སླར་སྐྱེ་ན་ནི་ཡང་ཡང་སྐྱེ་དགོས་པས་ཐུག་མེད་དུ་སྐྱེ་བར་འགྱུར་དགོས་ན་དེ་ནི་མི་རིགས་སོ། །གལ་ཏེ་བདག་ལས་མི་སྐྱེ་ཡང་གཞན་ལས་སྐྱེའོ་སྙམ་ན་དེ་ཡང་མི་འཐད་དེ། གཞན་ལས་སྐྱེ་བའི་བསམ་དོན་ནི་རང་བཞིན་ཐ་དད་པའི་ས་བོན་ལས་སྐྱེ་བར་འདོད་པ་ཡིན་ལ། རང་བཞིན་འབྲེལ་མེད་ཐ་དད་པའི་ས་བོན་ལས་སྐྱེ་བ་མེད་པའི་ཕྱིར་ཏེ། སྐྱེ་ན་མེ་ལྕེ་ལས་མུན་པ་སྐྱེ་བར་ཐལ་ཞིང་རྒྱུ་ཡིན་མིན་ཀུན་ལས་འབྲས་བུ་ཡིན་མིན་ཀུན་སྐྱེ་བར་འགྱུར་བའི་ཕྱིར་ཏེ། རང་གི་ངོ་བོས་གྲུབ་པ་ལ་རྒྱུ་འབྲས་སོ་སོར་ངེས་པ་མི་རུང་བའི་ཕྱིར་རོ། །གལ་ཏེ་བདག་གཞན་གཉིས་རེ་རེ་ལས་སྐྱེ་བ་མིན་གྱི་བདག་གཞན་གཉིས་ཀ་ཚོགས་པས་སྐྱེ་སྟེ། དཔེར་ན་རྫ་བུམ་ནི་འཇིམ་པ་ལས་སྐྱེ་བས་བདག་ལས་སྐྱེ་ལ། རྫ་མཁན་སོགས་ལས་སྐྱེ་བས་གཞན་ལས་སྐྱེའོ་སྙམ་ན། དེ་ཡང་མི་འཐད་དེ། སྔར་བདག་གཞན་རེ་རེ་ལས་སྐྱེ་བ་འགོག་པའི་རིགས་པ་དེ་ཉིད་ཀྱིས་ཁེགས་པའི་ཕྱིར། གལ་ཏེ་སྔ་མ་གསུམ་ལྟར་མིན་གྱི་རྒྱུ་མེད་ལས་སྐྱེ་བ་ཡིན་ཞིང་དེ་ཡང་ཚེར་མའི་རྣོ་བ་དང་སྲན་མའི་ཟླུམ་པ་དང་པདྨ་དང་རྨ་བྱའི་མདོངས་ཀྱི་ཁ་དོག་སོགས་གཞན་གྱིས་བྱས་པར་མ་མཐོང་བས་རྒྱུ་མེད་ངོ་བོ་ཉིད་ཀྱིས་སྐྱེའོ་སྙམ་ན། དེ་ནི་ཤིན་ཏུ་མི་འཐད་དེ། དེ་ལྟར་ན་འཇིག་རྟེན་དུ་འབྲས་བུ་སྣ་ཚོགས་འདོད་ནས་རྒྱུ་སྣ་ཚོགས་སྒྲུབ་པ་ལ་འབད་པ་ཐམས་ཅད་དོན་མེད་པར་འགྱུར་བའི་ཕྱིར་རོ། །ཚེར་མའི་རྣོ་བ་སོགས་ལ་རྒྱུ་མེད་པ་མིན་ཏེ། དེ་ནི། གང་ཡོད་ན་ནི་གང་འབྱུང་བ། །དེ་ནི་རྒྱུ་ཞེས་རབ་ཏུ་བརྗོད། །ཞེས་གསུངས་པ་ལྟར། ས་བོན་སྔ་མ་རྣམ་པར་འགྱུར་བ་ནི་འབྲས་བུ་ཕྱི་མའི་རྒྱུ་ཡིན་པའི་ཕྱིར་དང་། རྨ་བྱའི་མདོངས་སོགས་ཀྱང་རྒྱུ་ས་བོན་སྔོན་མ་འགྱུར་བ་དང་སེམས་ཅན་རང་གི་ཐུན་མོང་མ་ཡིན་པའི་ལས་ཀྱིས་བསྐྱེད་པ་ཡིན་ཕྱིར། གཞན་དུ་ན་བྱ་རོག་སོགས་ཐམས་ཅད་ལ་རྨ་བྱའི་མདོངས་ཡོད་པར་འགྱུར་རོ། །དེ་དག་ནི་སྐབས་འདིའི་དོན་བསྡུས་ཏེ་བཤད་པ་ཡིན་ལ་དེ་ལྟར་མཐའ་བཞིའི་སྐྱེ་བ་བཀག་པ་ལ་བརྟེན་ནས་དངོས་པོ་རྣམས་ལ་རང་བཞིན་གྱིས་སྐྱེ་བ་མེད་པར་ངེས་པར་འགྱུར་བ་ཡིན་ཏེ། འཇུག་པ་ལས། གང་གི་ཕྱིར་ན་བདག་དང་གཞན་དང་གཉིས་ཀ་ལས་སྐྱེ་དང་། །རྒྱུ་ལ་མ་བལྟོས་ཡོད་པ་མིན་པས་དངོས་རྣམས་རང་བཞིན་བྲལ། །ཞེས་གསུངས་པའི་ཕྱིར། ཡང་རྩ་ཤེ་ལས། རྟེན་ཅིང་འབྱུང་བ་གང་ཡིན་པ། །དེ་ནི་ངོ་བོ་ཉིད་ཀྱིས་ཞི། །ཞེས་དང་། འཇུག་པ་ལས། དེ་ཕྱིར་རྟེན་འབྱུང་རིགས་པ་འདི་ཡིས་ནི། །ལྟ་ངན་དྲ་བ་མཐའ་དག་གཅོད་པར་བྱེད། །ཅེས་གསུངས་པ་ལྟར་རྟེན་འབྲེལ་གྱི་རྟགས་ལ་བརྟེན་ནས་སྐྱེ་སོགས་རང་བཞིན་མེད་པར་ངེས་ནུས་ན་ནི་ལེགས་པས་མྱུ་གུ་ལ་མཚོན་ན། མྱུ་གུ་ནི་རང་གིས་ངོ་བོ་ཉིད་ཀྱིས་གྲུབ་པ་མེད་དེ། རང་གི་རྒྱུ་རྐྱེན་ལ་བརྟེན་ནས་འབྱུང་བའི་ཕྱིར། དཔེར་ན་གཟུགས་བརྙན་བཞིན་ཞེས་གཞན་གྲགས་ཀྱི་རྗེས་དཔག་བྱའོ། །དེ་ཡང་བྱད་བཞིན་གྱི་གཟུགས་བརྙན་སྣང་བ་ལ་བྱིས་པ་ཆུང་ངུས་སྣང་ཚུལ་ལྟར་བདེན་པར་འཛིན་གྱི། བློ་ལ་སྣང་བའི་བརྫུན་སྣང་ཙམ་དུ་མི་འཛིན་ལ། བརྡ་བྱང་རྣམས་ཀྱིས་ནི་སྣང་བ་དེ་སྣང་བ་ལྟར་མ་གྲུབ་པར་ཤེས་པས་བརྫུན་པའི་སྣང་བ་ཙམ་དུ་འཛིན་ནོ། །དེ་བཞིན་དུ་རང་གཞན་ལ་སྣང་བའི་ཆོས་འདི་རྣམས་ནི་བློ་ལ་སྣང་བའི་དབང་གིས་བཞག་པ་ཙམ་ཡིན་པ་ལ། དེ་ལྟར་མ་ངེས་པར་རང་གི་ངོ་བོའི་སྒོ་ནས་ཡུལ་སྟེང་དུ་རང་དབང་གིས་སྡོད་ཚུལ་ཡོད་པར་འཛིན་པ་ནི་རང་བཞིན་སྒྲོ་བཏགས་ཚུལ་ཡིན་ལ། དེ་ནི་རྟེན་འབྱུང་གི་རིགས་པས་འགོག་པ་ཡིན་ཏེ། བཞི་བརྒྱ་པ་ལས། གང་ལ་བརྟེན་ནས་འབྱུང་ཡོད་པ། །དེ་ནི་རང་དབང་མི་འགྱུར་རོ། །འདི་ཀུན་རང་དབང་མེད་པ་སྟེ། །དེས་ན་བདག་ནི་ཡོད་མ་ཡིན། །ཞེས་གསུངས་པའི་ཕྱིར། དེ་ལྟར་རང་དབང་གིས་གྲུབ་ན་རྒྱུ་རྐྱེན་ལ་རག་མ་ལས་པར་འབྱུང་དགོས་ན་རྒྱུ་རྐྱེན་གཞན་ལ་རག་ལས་པའི་ཕྱིར་རང་དབང་གིས་གྲུབ་པའི་བདག་མེད་དོ་སྙམ་དུ་བསྒོམ་པར་བྱ་སྟེ། མདོ་ལས། རྐྱེན་ལ་རག་ལས་གང་དེ་སྟོང་པར་བཤད། །གང་ཞིག་སྟོང་ཉིད་ཤེས་དེ་བག་ཡོད་ཡིན། །ཞེས་གསུངས་པའི་ཕྱིར་རོ། །གསུམ་པ་ལྟ་བ་དེ་དག་གོམས་པས་སྒྲིབ་པ་སྤོང་ཚུལ་ནི། དེ་ལྟར་བདག་མེད་པའི་དོན་རྟོགས་ཤིང་གོམས་པར་བྱས་པས་བདག་འཛིན་གྱི་མ་རིག་པ་ལྡོག་ལ། དེ་ལྡོག་པས་ལས་དང་སྲེད་པ་དང་ལེན་པ་དང་སྐྱེ་བ་སོགས་བཟློག་ནས་གྲོལ་བར་འགྱུར་ཏེ། རྩ་བ་ཤེས་རབ་ལས། ལས་དང་ཉོན་མོངས་རྣམ་རྟོག་ལས། །དེ་དག་སྤྲོས་ལས་སྤྲོས་པ་ནི། །སྟོང་པ་ཉིད་ཀྱིས་འགག་པར་འགྱུར། །ཞེས་དང་། ལས་དང་ཉོན་མོངས་ཟད་ལས་ཐར། །ཞེས་གསུངས་པའི་ཕྱིར་རོ། །གཉིས་པ་ལྷག་མཐོང་གི་རབ་དབྱེ་ལ་རྣམ་པ་བཞི་དང་གསུམ་དང་དྲུག་གི་བསྒོམ་ཚུལ་གསུམ་སྟེ། དང་པོ་བཞི་ནི་རྣམ་པར་འབྱེད་པ་དང་རབ་ཏུ་རྣམ་པར་འབྱེད་པ་དང་ཡོངས་སུ་རྟོག་པ་དང་ཡོངས་སུ་དཔྱོད་པའོ། །དེའི་དང་པོ་ནི་ཇི་ལྟ་བ་ལ་དམིགས་པ་དང་གཉིས་པ་ནི་ཇི་སྙེད་པ་ལ་དམིགས་པ་སྟེ། དེ་རེ་རེ་ལའང་རྟོག་དཔྱོད་གཉིས་རེ་འབྱེད་པའོ། །རྣམ་པ་གསུམ་ནི་མཚན་མ་ལས་བྱུང་བ་དང་ཡོངས་སུ་འཚོལ་བ་ལས་བྱུང་བ་དང་སོ་སོར་རྟོག་པ་ལས་བྱུང་བའོ། །རྣམ་པ་དྲུག་ནི་དོན་དང་དངོས་པོ་དང་མཚན་ཉིད་དང་ཕྱོགས་དང་དུས་དང་རིགས་པ་ཡོངས་སུ་འཚོལ་བའོ། །འདི་དག་ནི་མཚོན་ཙམ་ཞིག་བརྗོད་ན། དང་པོ་ནི་ཚིག་འདིའི་དོན་འདིའོ་ཞེས་ཚོལ་བའོ། །གཉིས་པ་ནི། འདི་ནི་ནང་དང་འདི་ནི་ཕྱིའི་དངོས་པོའོ་ཞེས་དང་། གསུམ་པ་ནི། འདི་ནི་རང་གི་མཚན་ཉིད་དོ་འདི་ནི་སྤྱིའི་མཚན་ཉ ིད་དོ་ཞེས་དང་། བཞི་པ་ནི། འདི་ནི་ལེགས་པའི་ཕྱོགས་དང་འདི་ནི་ཉེས་པའི་ཕྱོགས་སོ་ཞེས་དང་། ལྔ་པ་ནི། འདས་མ་འོངས་ད་ལྟའི་དུས་སུ་འདི་ལྟར་བྱུང་ཞིང་འབྱུང་བ་དང་འདི་ལྟར་ཡོད་དོ་ཞེས་དང་། དྲུག་པ་ནི། རིགས་པ་བཞི་སྟེ་བལྟོས་པའི་རིགས་པ་ནི་འབྲས་བུ་རྣམས་ནི་རྒྱུ་རྐྱེན་ལ་བལྟོས་པ་ཤེས་པ་དང་། བྱ་བ་བྱེད་པའི་རིགས་པ་ནི་མེས་བསྲེག་ཆུས་གཤེར་བར་བྱེད་པ་སོགས་ཤེས་པ་དང་། འཐད་པས་བསྒྲུབ་པའི་རིགས་པ་ནི་རྒྱུ་མཚན་ཡང་དག་གིས་ཚད་མ་དང་མི་འགལ་བར་བསྒྲུབ་ཤེས་པ་དང་། ཆོས་ཉིད་ཀྱི་རིགས་པ་ནི། མེ་ཚ་བ་དང་ཆུ་གཤེར་བ་དང་ས་སྲ་བ་དང་རླུང་གཡོ་བ་ལྟ་བུ་འཇིག་རྟེན་ལ་གྲགས་པའི་ཆོས་ཉིད་དང་བསམ་གྱིས་མི་ཁྱབ་པའི་ཆོས་ཉིད་དྲན་པར་བྱེད་པའོ། །གསུམ་པ་ལྷག་མཐོང་བསྒོམ་ཚུལ་ལ་གཉིས། གཞན་ལུགས་དགག་པ་དང་། རང་ལུགས་བཞག་པའོ། །དང་པོ་ལ་བཞི་ཡོད་པའི་ཚུལ་རྒྱས་པར་བཤད་ན་མང་བས་བསྡུ་ན། དང་པོ་ནི། ཁ་ཅིག་ན་རེ། བདག་མེད་པའི་ལྟ་བ་མ་རྙེད་ཀྱང་སེམས་ཅི་ཡང་མི་རྟོག་པར་བཟུང་ན་ཡིན་ལུགས་ཀྱི་དོན་བསྒོམ་པར་འགྱུར་ཏེ། ཡིན་ལུགས་སྟོང་པ་ཉིད་དེ་འདི་ཡིན་འདི་མིན་གྱི་ངོས་བཟུང་བྲལ་བས་དེ་དང་མཐུན་པར་འགྱུར་རོ་ཞེས་ཟེར། དེ་ནི་མི་འཐད་དེ། ཁྱེད་ཀྱི་ལུགས་དེ་ནི་ལྟ་བ་མ་རྙེད་ཀྱང་ལྟ་བ་བསྒོམ་པར་འདོད་པ་ཡིན་པས་ལྟ་བ་མ་རྙེད་པའི་ཚོད་འཇོག་གིས་ལྟ་བ་བསྒོམ་པར་མི་འགྱུར་ཞིང་། ཅི་ཡང་མི་རྟོག་པ་ཙམ་གྱིས་ལྟ་བ་བསྒོམ་པར་འགྱུར་ན་ནི་བརྒྱལ་བ་དང་གཉིད་འཐུག་པོ་ལོག་པའི་བླུན་རྨོངས་ཐམས་ཅད་ཀྱིས་སྟོང་ཉིད་བསྒོམ་པར་འདོད་དགོས་པར་འགྱུར་ན་དེ་ནི་ག་ལ་རིགས། ཁྱེད་ལྟར་ན་རྒྱལ་བས་སྟོང་ཉིད་ཀྱི་དོན་འཚོལ་ཚུལ་རྒྱས་པར་བཤད་པ་འདི་དག་གིས་ཅི་ཞིག་བྱ་སྟེ། སྟོང་ཉིད་ཀྱི་དོན་ཤེས་མི་དགོས་པར་བླུན་པོ་ལྟར་སེམས་ནང་དུ་བསྡུས་ནས་ཅི་ལའང་མི་བསམ་པ་ནི་སྟོང་ཉིད་བསྒོམ་ཚུལ་དུ་འདོད་འདུག་པའི་ཕྱིར། མདོར་ན་ཁྱེད་ཀྱི་དེ་ཧྭ་ཤང་གི་ལུགས་དང་དབྱེ་བ་མེད་པས་མི་རིགས་པས་སོ། །འཕགས་པ་ལྷས། ཡུལ་ལ་བདག་མེད་མཐོང་ན་ནི། །སྲིད་པའི་ས་བོན་འགག་པར་འགྱུར། །ཞེས་དང་། རྣམ་འགྲེལ་ལས། འདི་ཡུལ་སུན་དབྱུང་མེད་པ་ནི། །དེ་སྤོང་བ་ནི་ནུས་མ་ཡིན། །ཞེས་གསུངས་པ་ལྟར། བདག་མེད་པའི་དོན་རྟོགས་ནས་བདག་འཛིན་གྱི་ཞེན་ཡུལ་སུན་འབྱིན་པ་དགོས་ཀྱི། བདག་མེད་ཀྱི་དོན་མ་ངེས་པའི་ཡིད་ནང་དུ་གནས་པའི་ཙམ་འཇོག་ཙམ་གྱིས་བདག་འཛིན་གཏན་སྤོང་བར་མི་ནུས་སོ། །གཉིས་པ་ནི། ཁ་ཅིག །དེ་ལྟར་མི་འདོད་ཀྱང་བདག་མེད་པའི་ལྟ་བ་རྙེད་ཕྱིན་ཆད་གང་ཟག་དེས་མི་རྟོག་པར་བཞག་པ་ཐམས་ཅད་སྟོང་ཉིད་བསྒོམ་པར་འགྲོའོ་ཞེས་ཟེར། དེ་ཡང་མི་འཐད་དེ། དེ་ལྟར་ན་དེས་མི་རྟག་པར་བསྒོམ་པ་དང་བྱང་ཆུབ་ཀྱི་སེམས་བསྒོམ་པ་སོགས་ཀྱང་སྟོང་ཉིད་བསྒོམ་པར་ཐལ་བའི་ཕྱིར་རོ། །ལུགས་གསུམ་པ་ནི་སྔ་མ་གཉིས་ལྟར་མི་འདོད་ཀྱི་སྟོང་ཉིད་རྟོགས་པའི་ཤེས་རབ་ཀྱིས་དཔྱད་པ་ཚར་གཅིག་བྱས་པའི་འོག་ཏུ་མི་རྟོག་པར་གང་བཞག་ཐམས་ཅད་སྟོང་ཉིད་བསྒོམ་པའོ་ཞེས་ཟེར། འདི་ཡང་ཅུང་མི་འཐད་དེ། གཉིད་ལོག་ཁར་ལྟ་བའི་དཔྱད་པ་བྱས་ཏེ་གཉིད་འཐུག་པོ་ལོགས་པའི་མི་རྟོག་པ་ལ་ནི་སྟོང་ཉིད་བསྒོམས་པ་འབྱུང་དཀའ་བའི་ཕྱིར་དང་། དཔྱད་པ་སྔོན་དུ་སོང་ཡང་བསྒོམ་པའི་ཚེ་དྲན་པ་བརྗོད་ན་ཡང་སྟོང་ཉིད་ཀྱི་དོན་བསྒོམ་པ་མི་འོང་བའི་ཕྱིར། ལུགས་བཞི་པ་ནི། སྔ་མ་གསུམ་ལྟར་མི་འདོད་ཀྱི་སྟོང་ཉིད་ལ་ངེས་པ་དྲངས་ཏེ་དེའི་དོན་ལ་སེམས་བཟུང་ནས་མི་དཔྱོད་པར་འཇོག་པ་དེ་ཁོ་ན་ཉིད་ཕྱིན་ཅི་མ་ལོག་པར་བསྒོམ་པའོ་ཞེས་ཟེར། འདི་ཅུང་ལེགས་མོད་འོན་ཀྱང་ལྟ་ཐོག་ཏུ་འཇོག་བསྒོམ་ཁོ་ན་བྱེད་པར་འདོད་པར་སྣང་བས་དེ་ནི་མི་རིགས་ཏེ། ཚུལ་དེས་ཞི་གནས་འགྲུབ་སྲིད་ཀྱི་ལྷག་མཐོང་མི་འགྲུབ་པའི་ཕྱིར་ཏེ། ལྷག་མཐོང་ལ་དཔྱད་བསྒོམ་ངེས་པར་དགོས་པའི་ཕྱིར་རོ། །གཉིས་པ་རང་གི་ལུགས་ལ་གསུམ། འཇོག་སྒོམ་དང་དཔྱད་སྒོམ་གཉིས་ཀ་དགོས་པའི་རྒྱུ་མཚན། དེ་ལ་རྩོད་པ་སྤོང་བ། སྐྱོང་ཚུལ་གྱི་གནད་བཤད་པའོ། །དང་པོ་ནི། ཞི་གནས་གྲུབ་ནས་ལྷག་མཐོང་བསྒོམ་པའི་ཚེ་དཔྱད་སྒོམ་དང་འཇོག་སྒོམ་སྤེལ་ནས་བྱེད་དགོས་ཀྱི། དཔྱད་སྒོམ་འབའ་ཞིག་བྱས་ན་སྔར་གྱི་ཞི་གནས་འཇིག་པར་འགྱུར་བས་མི་རུང་ཡང་། དཔྱད་སྒོམ་མང་དུ་བྱས་པས་ལྷག་མཐོང་འགྲུབ་པ་ན་ཞི་ལྷག་ཟུང་འབྲེལ་དུ་འགྱུར་ཞིང་། དེ་ཡང་བདག་མེད་པའི་དོན་རྟོགས་པའི་ལྷག་མཐོང་སྐྱེ་བའི་རྒྱུར་ནི་བདག་མེད་ལ་མཉམ་པར་བཞག་པའི་ཞི་གནས་པ་སྔོན་དུ་འགྲོ་དགོས་སོ། །གཉིས་པ་རྩོད་སྤོང་ནི། གལ་ཏེ་ལྷག་མཐོང་བསྐྱེད་པའི་ཚེ་སོ་སོར་དཔྱོད་དགོས་ན་ནི་དེ་ལས་མི་རྟོག་པའི་ཡེ་ཤེས་ཇི་ལྟར་སྐྱེ་སྟེ་རྒྱུ་འབྲས་གཉིས་མཐུན་དགོས་པའི་ཕྱིར་རོ་སྙམ་ན། བདེན་ཡང་མཐའ་གཅིག་ཏུ་མ་ངེས་ཏེ་སོ་སྐྱེ་ལ་རྣམ་པར་མི་རྟོག་ཡེ་ཤེས་ཟག་མེད་མེད་ཀྱང་ཟག་བཅས་ཀྱི་རྟོག་པའི་ཡེ་ཤེས་གོམས་པ་ལས་འ ཕགས་པའི་མི་རྟོག་པའི་ཡེ་ཤེས་ཟག་མེད་སྐྱེ་བའི་ཕྱིར་ཏེ། ཟག་མེད་ཀྱི་ཡེ་ཤེས་ནམ་སྐྱེས་པ་ན་རྒྱུ་ཟག་བཅས་ཀྱི་ཡེ་ཤེས་དེ་ཉིད་འགྱུར་ནས་ཟགས་མེད་དུ་འགྲོ་བའི་ཕྱིར་ཏེ། དཔེར་ན། རྩུབ་ཤིང་དང་རྩུབ་བརྟེན་གྱི་ཤིང་གཉིས་དྲུད་པ་ལས་མེ་བྱུང་སྟེ་ཤིང་གཉིས་བསྲེག་པའི་ཚུལ་དང་འདྲ་བར་བཤད་ཅིང་། གཞན་ཡང་ས་བོན་ལས་མྱུ་གུ་སྔོན་པོ་དང་བུད་ཤིང་ལས་མེ་དང་མེ་ལས་དུ་བ་དང་སྡོང་པོ་ལས་མེ་ཏོག་དང་བུད་མེད་ལས་སྐྱེས་པ་འབྱུང་བ་སོགས་རྒྱུ་འབྲས་མི་འདྲ་བ་དུ་མ་ཡོད་དོ། །གསུམ་པ་སྐྱོང་ཚུལ་གྱི་གནད་བསྡུས་པ་ནི། སྔར་བཤད་པ་ལྟར་ངེས་དོན་གྱི་ལྟ་བ་རྙེད་པ་དེས་བདག་མེད་པའི་དོན་ལ་སོ་སོར་རྟོག་པའི་ཤེས་རབ་ཀྱིས་མང་དུ་དཔྱད་ནས་མཐར་དེའི་དོན་ལ་ངེས་པའི་ཤུགས་བསྐྱེད་དེ་མི་འཕྲོ་བར་འཛིན་པའི་འཇོག་སྒོམ་དང་དཔྱད་སྒོམ་སྤེལ་ནས་བྱའོ། །དཔྱད་སྒོམ་མང་བས་གནས་ཆ་ཆུང་ངུ་སོང་ན་འཇོག་སྒོམ་བྱས་ཏེ་གནས་ཆ་སོར་གཞུག་ཅིང་། མ་དཔྱད་ན་ནི་སྒྲོ་འདོགས་ལ་དེ་ཙམ་མི་གནོད་པས་དཔྱད་སྒོམ་མང་དུ་བྱས་ཏེ་ཞི་ལྷག་ཆ་མཉམ་པར་བསྒྲུབ་པོ། །བཞི་པ་ལྷག་མཐོང་གྲུབ་པའི་ཚད་ནི། དེ་ལྟར་སོ་སོར་རྟོག་པའི་ཤེས་རབ་ཀྱིས་དཔྱད་ནས་བསྒོམ་སྟོབས་ཀྱིས་སྔར་བཤད་པ་ལྟ་བུའི་ཤིན་སྦྱངས་ཀྱི་བདེ་བ་མ་སྐྱེས་ཚུན་ལྷག་མཐོང་རྗེས་མཐུན་པ་ཡིན་ལ། ཤིན་སྦྱངས་ནམ་སྐྱེས་པ་ནས་ལྷག་མཐོང་མཚན་ཉིད་པར་འགྱུར་རོ། །ཤིན་སྦྱངས་ཙམ་ནི་སྔར་ནས་ཀྱང་ཡོད་པས་དེ་ཙམ་མིན་གྱི། དཔྱད་སྒོམ་བྱས་པའི་སྟོབས་ཀྱིས་དྲངས་པའི་ཤིན་སྦྱངས་ཐོབ་པའོ། །གསུམ་པ་ཞི་ལྷག་ཟུང་དུ་འབྲེལ་བའི་ཚུལ་ནི། ཟུང་ནི་གཉིས་ཡིན་པས་ཞི་ལྷག་གཉིས་ཀ་ཐོབ་དགོས་ཤིང་། དེ་ཡང་ལྷག་མཐོང་ཐོབ་པ་ནས་བཟུང་སྟེ་ཟུང་འབྲེལ་དུ་འགྱུར་རོ། །འདི་ལ་ཡང་ཡིད་བྱེད་བཞི་འོང་བར་གསུངས་པས་ཡིད་བྱེད་བཞི་པ་སྔར་བཤད་པ་ལྟར་སྐྱེས་པའི་ཚེ་ན་ཟུང་འབྲེལ་དུ་འགྲོའོ། །ལམ་སྤྱིའི་དོན་བསྡུ་བ་ཅུང་ཟད་བརྗོད་ན། ཐོག་མར་ལམ་གྱི་རྩ་བ་བཤེས་གཉེན་བསྟེན་ནས་དལ་འབྱོར་ལ་སྙིིང་པོ་ལེན་འདོད་བསྐྱེད་དེ་དལ་འབྱོར་གྱི་སྐོར་བསྒོམ། དེ་ནས་ཚེ་འདི་ཙམ་དོན་དུ་གཉེར་བའི་བློ་མ་ལོག་ན་འཇིག་རྟེན་ཕྱི་མ་ལ་དོན་གཉེར་དྲག་པོ་མི་འབྱུང་བས། ལུས་ཐོབ་པ་མི་རྟག་པ་དང་ཤི་ནས་ངན་འགྲོར་འཁྱམ་ཚུལ་བསམས་ལ་དེའི་འཇིགས་སྐྱོབ་དཀོན་མཆོག་གསུམ་ལ་སྐྱབས་སུ་འགྲོ་བ་དང་དེའི་བསླབ་བྱ་ལ་འབད། དེ་ནས་ལས་འབྲས་ལ་ཡིད་ཆེས་ཀྱི་དད་པ་བསྐྱེད་དེ་དགེ་མི་དགེ་བཅུ་ལ་འཇུག་ལྡོག་དང་བཤགས་པའི་སྐོར་བྱས་ཏེ་སྐྱེས་བུ་ཆུང་ངུའི་སྐོར་ལ་བློ་སྦྱོང་། དེ་ནས་འཁོར་བ་སྤྱིི་དང་བྱེ་བྲག་གི་ཉེས་དམིགས་བསམས་ནས་འཁོར་བ་སྤྱི་ལས་བློ་ཅི་ལྡོག་བྱ་ཞིང་། འཁོར་བའི་རྒྱུ་ལས་ཉོན་ངོས་བཟུང་སྟེ་སྤོང་འདོད་བསྐྱེད་ཅིང་འཁོར་བ་ལས་གྲོལ་ཐབས་བསླབ་གསུམ་དང་སོ་ཐར་ལ་འབད་དེ་སྐྱེས་བུ་འབྲིང་གི་ཆོས་སྐོར་བ་རྣམས་ལ་བློ་སྦྱོང་། དེ་ནས་རང་ཉིད་སྲིད་མཚོར་ལྷུང་ནས་སྡུག་བསྔལ་གྱིས་གཟིར་བ་ལྟར་མ་གྱུར་པའི་སེམས་ཅན་རྣམས་ཀྱང་དེ་འདྲ་བར་མཐོང་ནས། བྱམས་སྙིང་རྗེའི་རྩ་བ་ཅན་གྱི་བྱང་ཆུབ་ཀྱི་སེམས་བསྐྱེད་དེ་སྤྱོད་པ་ཕྱིན་དྲུག་དང་བསྡུ་བཞི་ལ་བསླབ་ཅིང་། ཁྱད་པར་དུ་ཕར་ཕྱིན་ཐ་མ་གཉིས་ལ་ནན་ཏན་དུ་བྱས་ནས་བསླབ་དགོས་སོ། །གཉིས་པ་ཁྱད་པར་དུ་རྡོ་རྗེ་ཐེག་པ་ལ་བསླབ་ཚུལ་ནི། དེ་ལྟར་ཐུན་མོང་བའི་ལམ་ལ་སྦྱངས་ནས་རྡོ་རྗེ་ཐེག་པ་ལ་འཇུག་པར་བྱ་སྟེ། ལམ་དེ་ནི་ཆོས་གཞན་ལས་དཀོན་པ་དང་ཚོགས་མྱུར་དུ་རྫོགས་པར་བྱེད་པའི་ཕྱིར་རོ། །དེ་ཡང་དབང་གི་སྒོར་ཞུགས་ནས་བླ་མ་བསྟེན་ཏེ་དམ་ཚིག་སྲུང་བ་ལ་འབད་ཅིང་རང་གིས་གང་ཉམས་སུ་ལེན་པའི་རིམ་གཉིས་སོགས་ལ་འབད་པར་བྱའོ། །འདི་དག་གི་སྐོར་ནི་སྔགས་རིམ་ཆེན་མོ་སོགས་ལས་ཤེས་པར་བྱ་སྟེ་འདིར་ནི་མཚོན་ཙམ་ཞིག་སྨྲས་སོ། །དེ་ནས་མཇུག་ཏུ། ཐུབ་པའི་གསུང་རབ་རབ་འབྱམས་རྣམས་ལ་བལྟ་བའི་མིག་གཅིག་གཅིག་གིས་ཀྱང་། །ཞེས་སོགས་ཚིགས་བཅད་གཅིག་གིས་གཞུང་བརྩམས་པ་འདི་བླ་མ་དང་ལྷག་པའི་ལྷའི་དྲིན་ཡིན་པར་བཤད་ཅིང་། དེ་ནས་ཚིགས་བཅད་རྣམས་ཀྱིས་རིམ་པ་བཞིན་དུ་ལམ་རིམ་གྱི་བརྒྱུད་པའི་བླ་མ་དང་། ལམ་རིམ་གྱི་ཁྱད་ཆོས་དང་། ཇོ་བོས་ལམ་རིམ་སྤེལ་ཚུལ་དང་། ཕྱིས་ཅུང་ཟད་ཉམས་པ་ན་རྗེ་ཉིད་ཀྱིས་འདི་སླར་དར་བར་མཛད་ཚུལ་དང་། ནོངས་པའི་ཉེས་པ་འཆགས་ཤིང་དགེ་བ་བསྔོ་བ་དང་སྨོན་ལམ་ཁྱད་པར་ཅན་གདབ་པའི་སྐོར་རོ། །དེ་ནས་རྒྱལ་བའི་གསུང་རབ་ཐམས་ཅད་ཀྱི་གནད་བསྡུས་པ་མན་གྱིས་བསྐུལ་བ་པོ་གང་ཡིན་དང་སྔོན་གྱི་དམ་པ་གང་གི་གཞུང་ལ་བརྟེན་ནས་མཛད་པ་དང་། རང་གིས་བླ་མ་གང་གི་དྲིན་ལ་བརྟེན་ནས་གནས་གང་དུ་མཛད་པའི་ཚུལ་རྣམས་བཤད་དོ།། །།སྨྲས་པ། རྒྱལ་བ་ཀུན་འདུས་རྗེ་བཙུན་ཙོང་ཁ་པས། །རྒྱལ་བའི་གསུང་རབ་ཀུན་གྱི་གནད་བསྡུས་ཏེ། །རྒྱལ་སྲས་འཇུག་ངོགས་སྐྱེས་བུ་གསུམ་གྱི་ལམ། །རྒྱལ་བའི་དགོངས་པ་ཇི་བཞིན་བཤད་འདི་མཚར། །ཡབ་རྗེ་བླ་མའི་གསུང་ངག་ཉི་འོད་ཀྱིས། །གསུང་རབ་དགོངས་དོན་འདབ་བརྒྱ་འཛུམ་བྱས་ཚེ། །ཐར་འདོད་བུང་བའི་ཚོགས་རྣམས་ཕྱོགས་ཀུན་ནས། །འདུས་ཏེ་དགའ་བའི་དབྱངས་སྙན་སྒྲོགས་བཞིན་འཇུག །དེ་སླད་བླ་མའི་ལེགས་བཤད་རྟ་ལྗང་ཅན། །དངོས་སུ་བཞུགས་བཞིན་བླང་དོར་གནས་གང་ཡང་། །གསལ་བར་མི་ནུས་མེ་འཁྱེར་རྩོམ་པས་ཅི། །འོན་ཀྱང་དགོངས་པ་འགྲེལ་ལ་སྤྲོ་བས་བྱས། །ཚུལ་འདིར་འབད་པའི་ལེགས་བཤད་མཆོད་པའི་སྤྲིན། །རྗེ་བཙུན་བླ་མ་མཉེས་ཕྱིར་གུས་འབུལ་ཞིང་། །མ་བཤད་ལོག་པར་བཤད་པའི་ཉེས་པ་ཀུན། །བླ་མ་ཉིད་དང་མཁས་པའི་སྤྱན་སྔར་འཆགས། །དེ་ལས་ཐོབ་པའི་དགེ་ཚོགས་གདྒཱའི་རྒྱུན། །ཇི་སྙེད་མཆིས་ཀུན་དུས་གསུམ་བསགས་པ་ཡི། །དགེ་ལེགས་ཆུ་ཀླུང་གཞན་དང་ལྷན་ཅིག་ཏུ། །ཀུན་མཁྱེན་རྒྱ་མཚོ་ཆེན་པོར་འཇུག་ཕྱིར་བསྔོ། །ཞེས་རྗེ་ཐམས་ཅད་མཁྱེན་པ་ཙོང་ཁ་པ་ཆེན་པོས་མཛད་པའི་བྱང་ཆུབ་ལམ་རིམ་ཆེན་མོའི་དོན་གྱི་སྙིང་པོ་བསྡུས་པ་རྗེའི་དགོངས་པ་ཀུན་གསལ་དགྱེས་བྱེད་མཆོད་སྤྲིིན་ཞེས་བྱ་བ་འདི་ནི། སྔར་སྔགས་རིམ་ཆེན་མོའི་དོན་བསྡུས་ཞིག་བྲིས་པའི་དུས་སུ་འབྲི་བའི་འདུན་པ་ཤར་ཡང་། དཔེ་གཞན་མང་པོ་ཞིག་བརྩམས་ཏེ་པར་དུ་བརྐོ་བར་ཞུགས་པའི་རྐྱེན་གྱིས་མ་ཐུབ་པས་ད་བར་དུ་ལུས་ཀྱང་། ཕྱིས་ཅོ་ནེའི་ས་སྐྱོང་ཆེན་པོ་འཇམ་དབྱངས་ནོར་བུའི་སྐུ་ཞབས་ནས་འདི་ལྟ་བུ་ཞིག་གྱིས་དང་ཁོ་བོས་མཐུན་རྐྱེན་བྱའོ་ཞེས་གསུང་གིས་བསྐུལ་བ་ལ་བརྟེན་ནས། མདོ་སྔགས་ཀྱི་གཞུང་མང་དུ་ཐོས་ཤིང་ཁྱད་པར་དུ་རྗེའི་གསུང་ལ་རིགས་པའི་སྒོ་ནས་དད་པ་ཐོབ་པ་ཤཱ ཀྱའི་དགེ་སློང་ཁྲི་ཟུར་གྲགས་པ་བཤད་སྒྲུབ་ཅེས་བྱ་བས་རང་ལོ་དོན་གཉིས་པ་མེ་སྟག་ལོར་ཅོ་ནའི་དགོན་ཉིད་དུ་ལམ་རིམ་ཆེན་མོའི་དོན་གྱི་སྙིང་པོ་རྣམས་མཐར་ཆགས་སུ་བསྡུས་ནས་སྦྱར་བའི་ཡི་གེ་པ་ནི་ཏཱ་ཡི་ལ་ལུང་བློ་བཟང་དོན་གྲུབ་བོ། །འདིའི་དགེ་བས་ཚེ་རབས་ཐམས་ཅད་དུ་རྗེ་ཉིད་ཀྱིས་འབྲལ་མེད་རྗེས་སུ་འཛིན་པར་གྱུར་ཅིག །མདྒ་ལཾ།། །།