དུས་སྐབས་ཀྱི་དགོས་དོན་བྱེ་བྲག་ཏུ་བཤད་པ།
བར་དོ་གསུམ་གྱི་གནས་ལུགས་གཞི་ལམ་འབྲས་གསུམ་དུ་བསྡུས་ཏེ་བཤད་པ།
གཉིས་པ་དུས་སྐབས་ཀྱི་དགོས་དོན་བྱེ་བྲག་ཏུ་བཤད་པ་ལ། ལམ་ཕ་རོལ་ཏུ་ཕྱོགས་པའི་གང་ཟག་འཆི་ཁ་བེམ་རིག་བྲལ་བཞིན་པའི་དུས་མན་ཆད་ཀྱི་བར་དོ་ཕྱི་མ་གསུམ་ངོ་སྤྲོད་ཚུལ་བཤད་པ་འདི་ལ་གཉིས་ཏེ། དང་པོ་བར་དོ་དེ་གསུམ་གྱི་གནས་ལུགས་གཞི་ལམ་འབྲས་གསུམ་དུ་བསྡུས་ཏེ་བཤད་པ་དང་། གཉིས་པ་བྱེ་བྲག་སོ་སོའི་ངོ་སྤྲོད་རྒྱས་པར་བཤད་པའོ། །དེ་ལ་དང་པོ་བར་དོ་དེ་གསུམ་གྱི་གནས་ལུགས་གཞི་ལམ་འབྲས་གསུམ་དུ་བསྡུས་པ་སྦྱང་གཞི། སྦྱང་བྱ། སྦྱོང་བྱེད། སྦྱངས་འབྲས་བཞིར་ཕྱེ་ནས་གོ་བདེ་བར་བཤད་པ་འདི་ལ་གསུམ་སྟེ། སྦྱང་གཞི་གདོད་མའི་གནས་ལུགས་ཀ་དག་གི་ངོ་བོ། སྦྱང་བྱ་སེམས་ཡིད་ཀུན་གཞིའི་དྲི་མ། སྦྱོང་བྱེད་ལམ་ཁྲེགས་ཆོད་ཀྱི་གདམས་པ་ཉམས་སུ་བླངས་བས་འཆི་ཁ་བར་དོ་ནང་གསལ་ཀ་དག་གི་འོད་གསལ་ངོས་ཟིན་ན། སྦྱངས་འབྲས་འཆི་བ་ཆོས་ཀྱི་སྐུར་འཚང་རྒྱ་བ་དང་། སྦྱང་གཞི་ལྷུན་གྲུབ་ཕྱི་གསལ་ལྷུན་གྲུབ་ཀྱི་ཡེ་ཤེས་ལ། སྦྱང་བྱ་སྣང་རིག་གཉིས་འཛིན་གྱི་དྲི་མ། སྦྱོང་བྱེད་ལམ་ཐོད་རྒལ་གྱི་གདམས་ངག་ཉམས་སུ་བླངས་ནས། ཆོས་ཉིད་བར་དོ་ཕྱི་གསལ་ལྷུན་གྲུབ་ཞི་ཁྲོའི་རང་སྣང་ངོས་ཟིན་ན། སྦྱངས་འབྲས་བར་དོ་ལོངས་སྤྱོད་རྫོགས་པའི་སྐུར་འཚང་རྒྱ་བ་དང་། སྦྱང་གཞི་ལྷན་སྐྱེས་བདག་ཉིད་གཅིག་པའི་ཀུན་གཞི། སྦྱང་བྱ་ཀུན་བརྟགས་མ་རིག་འཁྲུལ་སྣང་སྲིད་པ་བར་དོའི་དྲི་མ། སྦྱོང་བྱེད་འཁོར་བ་རུ་ལོག་གིས་འདུན་པ་རྩེ་གཅིག་ཏུ་བསྒྱུར་བའི། སྦྱངས་འབྲས་སྐྱེ་སྲིད་སྤྲུལ་སྐུ་འགྲུབ་པའམ། ཡང་ན་རང་བཞིན་སྤྲུལ་པའི་ཞིང་དུ་དབུགས་དབྱུང་བའོ། །
བྱེ་བྲག་སོ་སོའི་ངོ་སྤྲོད་རྒྱས་པར་བཤད་པ།
བེམ་རིག་བྲལ་ནས་ཉིན་ཞག་གཅིག་གཉིས་སོང་ཚར་བའི་ཚེ་འདས་ཀྱི་དོན་བསྒྲུབ་པ།
བགེགས་བསྐྲད་པ།
གཉིས་པ་བྱེ་བྲག་སོ་སོའི་ངོ་སྤྲོད་རྒྱས་པར་བཤད་པ་ལ་བཞི་ཡོད་པས། དང་པོ་བེམ་རིག་བྲལ་ནས་ཉིན་ཞག་གཅིག་གཉིས་སོང་ཚར་བའི་ཚེ་འདས་ཀྱི་དོན་བསྒྲུབ་པ་དང་། གཉིས་པ་བེམ་རིག་བྲལ་ལ་ཁད་ཀྱི་འཆི་ཁ་མའི་འགྲོ་བ་ལ་གདམས་ངག་འབོག་ཚུལ། གསུམ་པ་བླ་མ་སོགས་གང་ཟག་མཆོག་ཐུགས་དམ་ཅན་རྣམས་འདས་ནས་ཞག་གཉིས་གསུམ་སོང་ཚར་བའི་ཐུགས་དམ་དཀྲོལ་ཚུལ་དང་། བཞི་བ་བླ་མ་སོགས་གང་ཟག་ཐུགས་དམ་ཅན་ལ་འདའ་ཀ་དངོས་ཀྱི་ཐུགས་དམ་གསལ་འདེབས་ཚུལ་དང་བཞི་ལས། དང་པོ་བེམ་རིག་བྲལ་ནས་ཉིན་ཞག་གཅིག་གཉིས་སོང་ཚར་བའི་ཚེ་འདས་ཀྱི་དོན་བསྒྲུབ་ཚུལ་བཤད་པ་འདི་ལ་ཡང་གཉིས་ཏེ། དང་པོ་རྟེན་གྱི་གང་ཟག་རབ་ཡིན་ན། ལྟ་བ་ཟབ་མོའི་ཏིང་ངེ་འཛིན་གསལ་འདེབས་སྐྱོར་དང་། འབྲིང་མཐའ་གཉིས་ཀྱིས་རང་རྒྱུད་ཀྱི་ཀུན་སློང་བཅོས་ཏེ། འཇིག་རྟེན་ཆོས་བརྒྱད་དང་ཁྱད་པར་གྲགས་འདོད་དང་ངོ་བསྲུང་། ཟས་ནོར་དོན་གཉེར་སོགས་ཀྱི་བློ་ངན་དང་མ་འདྲེས་པར་ཚེ་འདས་དེའི་གཙོར་བྱས་མར་གྱུར་མཁའ་ཁྱབ་ཀྱི་སེམས་ཅན་ཐམས་ཅད་ལ་བྱམས་པ་དང་སྙིང་རྗེ་བྱང་ཆུབ་ཀྱི་སེམས་ཁྱད་པར་ཅན་དང་ལྡན་པའི་ངང་ནས། བདག་རྒྱུད་བྱིན་རློབ་ཀྱི་ཆོ་ག་བློ་ལྡོག་རྣམ་བཞིའི་ངག་འདོན། བླ་མའི་རྣལ་འབྱོར་རྒྱས་བསྡུས་གང་རུང་། བདག་བསྐྱེད་ཐུགས་རྗེ་ཆེན་པོའི་བསྒོམ་བཟླས་དང་། མ་ཎི་ཅི་འགྲུབ་བཟླས་ནས། སྣང་གྲགས་རིག་གསུམ་ལྷ་སྔགས་ཡེ་ཤེས་ཀྱི་རོལ་བར་སད་པས་ཐ་མལ་གྱི་སྣང་ཞེན་འགོག་ནུས་ངེས་པར་བྱ། དེ་ནས་གཞན་དོན་ཕྲིན་ལས་ཀྱི་ཆོ་ག་ལ། རང་གི་མདུན་དུ་རྡོར་དྲིལ་ཊཱ་མ་རུ། བགེགས་སྡིག་སྦྱོང་བྱེད་ཀྱི་སྦྱང་ཆས་གུ་གུལ་ཡུངས། མེ་ཆུ་ཏིལ་གསུམ། ཟས་གཏད་ཀྱི་བཟའ་བཏུང་། འདོད་ཡོན་སོགས་ཉེར་མཁོའི་ཡོ་བྱད་ཐམས་ཅད་ཚོགས་པར་བྱས་ནས། ཐོག་མར་རྟེན། ཨོཾ་བཛྲ་ཀྲོ་དྷ་ཧྱ་གྷྲི་ཝ་ཧཱུཾ་ཕཊ༔གྱིས་བསངས། སྭ་བྷ་ཝས་སྟོང་པར་སྦྱངས། སྟོང་པའི་ངང་ལས་པད་ཟླའི་སྟེང་དུ་ནྲྀ་ལས་ཚེ་འདས་ཕུང་པོ་ཁམས་དང་སྐྱེ་མཆེད་ཐམས་ཅད་ཡོངས་སུ་རྫོགས་པ་གསོན་པོའི་རྣམ་པ་ཇི་ལྟ་བུར་གྱུར། རང་ཉིད་འཕགས་པ་ཐུགས་རྗེ་ཆེན་པོར་གསལ་བའི་ཐུགས་ཀའི་ཧྲཱིཿལས་འོད་ཟེར་ལྕགས་ཀྱུ་ལྟ་བུ་འཕྲོས་ཏེ། ཚེ་འདས་ཀྱི་རྣམ་པར་ཤེས་པ་རྒྱུད་ལྔ་རིགས་དྲུག་གང་ན་གནས་པ་དེ་ལ་ཕོག་པས་རྡོ་ཁབ་ལེན་གྱིས་ལྕགས་ཕྱེ་བླངས་པ་ལྟར་རང་དབང་མེད་པར་བཀུག་ནས་མདུན་གྱི་རྟེན་ལ་ཐིམ་པར་གྱུར། ཧཱུྃ། ང་ནི་འཕགས་པ་སྤྱན་རས་གཟིགས༔ ཐུགས་རྗེ་ཆེན་པོའི་ཐུགས་ཀ་ནས༔ སྙིང་རྗེ་ཆེན་པོའི་འོད་ཟེར་འཕྲོས༔ ཚེ་འདས་ཁམས་གསུམ་ལམ་རྒྱུད་ལྔ༔ རིགས་དྲུག་འཁོར་བ་གར་གནས་ཀྱང༔ སྐད་ཅིག་ཉིད་ལ་འདིར་ཁུག་ཅིག༔ ལྕགས་ཀྱུའི་རྒྱ་དང་བཅས་ཏེ། ན་མོ་རྗེ་བཙུན་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་ཀྱི་བཀའ་བདེན་པ་དང་སངས་རྒྱས་ཀྱི་བཀའ་བདེན་པ་དང་། ཆོས་ཀྱི་བཀའ་བདེན་པ་དང་། དགེ་འདུན་གྱི་བཀའ་བདེན་པ་དང་། གསང་སྔགས་རིགས་སྔགས་གཟུངས་སྔགས་སྙིང་པོ་ཕྱག་རྒྱ་ཏིང་ངེ་འཛིན་རྣམས་ཀྱི་བཀའ་བདེན་པ་དང་། ཆོས་ཉིད་རང་བཞིན་གྱིས་རྣམ་པར་དག་པ་དང་། ཆོས་ཅན་རྒྱུ་འབྲས་བསླུ་བ་མེད་པའི་བཀའ་བདེན་པ་དང་། ཁྱད་པར་དུའང་གནས་འོག་མིན་དག་པ་སྐུ་གསུམ་གྱི་ཞིང་ཁམས་ནས། ཆོས་སྐུ་ཀུན་ཏུ་བཟང་པོ་མན་ཆད་ད་ལྟའི་དྲིན་ཅན་རྩ་བའི་བླ་མ་ཡན་ཆད། རྒྱལ་བ་དགོངས་པའི་བརྒྱུད་པ། རིག་འཛིན་བརྡ་ཡི་བརྒྱུད་པ། གང་ཟག་སྙན་ཁུང་གི་བརྒྱུད་པའི་བླ་མ་རྒྱ་བོད་རིག་འཛིན་གྲུབ་ཐོབ་རྒྱ་མཚོའི་ཚོགས་དང་བཅས་པ་རྣམས་ཀྱི་བཀའ་བདེན་པ་དང་། ཞི་བ་ལྷུན་གྱིས་གྲུབ་པའི་དཀྱིལ་འཁོར་ནས། རྡོ་རྗེ་དབྱིངས་ཀྱི་ལྷ་ཚོགས་བཞི་བཅུ་རྩ་གཉིས། ཁྲོ་བོ་རོལ་བའི་དུར་ཁྲོད་ཆེན་པོ་ནས། འབར་བ་ཁྲག་འཐུང་ཁྲོ་བོའི་ལྷ་ཚོགས་ལྔ་བཅུ་རྩ་བརྒྱད་ལ་སོགས་པའི་ཡི་དམ་རྒྱུད་སྡེ་བཞི་དང་། ཐེག་པ་རིམ་པ་དགུའི་དཀྱིལ་འཁོར་གྱི་ལྷ་ཚོགས་འཁོར་དང་བཅས་པ་རྣམས་ཀྱི་བཀའ་བདེན་པ་དང་། མཁའ་སྤྱོད་གནས་ཡུལ་གྱི་དུར་ཁྲོད་ཆེན་པོ་ནས་རིག་ལྔའི་མཁའ་འགྲོ་ཤུགས་འགྲོ་འཁོར་མ་སྲིང་ཊཱཀྐི་རྒྱ་མཚོ་བྱེ་བ་འབུམ་འབུམ་གྱི་ལྷ་ཚོགས་སྤྲུལ་པ་ཡང་སྤྲུལ་ཕྱག་བརྙན་དང་བཅས་པ་རྣམས་ཀྱི་བཀའ་བདེན་པ་དང་། བཀའ་དང་དམ་ཚིག་གཉན་པོའི་ཕོ་བྲང་ནས། མགོན་པོ་ཕོ་རྒྱུད་ལྷ་མོ་མོ་རྒྱུད་ལ་སོགས་ཡེ་ཤེས་དང་འཇིག་རྟེན་ལས་གྲུབ་པའི་ཆོས་སྐྱོང་སྲུང་མ་དམ་ཅན་རྒྱ་མཚོའི་ཚོགས་དང་བཅས་པ་རྣམས་ཀྱི་བཀའ་བདེན་པ་དང་། བདེན་པ་ཆེན་པོའི་མཐུ་དང་ནུས་པ་བྱིན་གྱིས་བརླབས་པ་ལ་བརྟེན་ནས། དེང་འདིར་འཇིག་རྟེན་འདི་ནས་འཇིག་རྟེན་ཕ་རོལ་ཏུ་སོང་བའི་ཚེ་དུས་ལས་འདས་པ་ཆེ་གེ་མོ་ཞེས་བྱ་བའི་རྣམ་པར་ཤེས་པ་ས་འོག་ས་སྟེང་ས་བླ་འགྲོ་བ་རིགས་དྲུག་ལམ་རྒྱུད་ལྔ་སྲིད་པ་བར་མ་དོ་གང་ན་གནས་ཀྱང་སྐད་ཅིག་ཡུད་ཙམ་གཅིག་གིས་དམིགས་རྟེན་གཟུགས་ཕུང་འདི་ལ་ཁུག་ཅིག །ནྲྀ་ཡཾ་ཛཿ བཛྲ་ཨངྐུ་ཤ་ཡ་ཛཿ ལན་གསུམ། ཛཿཧཱུྃ་བཾ་ཧོཿ རྣམ་ཤེས་ཨ་ཐུང་གི་རྣམ་པས་སྤྱི་བོ་ནས་ཞུགས་ཏེ། སྙིང་ཀར་ཐིམ་པས་གསོན་དུས་ཀྱི་རྣམ་པ་ཇི་ལྟ་བུར་གྱུར། དེ་ནས་ རང་ཉིད་འཕགས་པའི་ཐུགས་ཀ་ནས་ཡི་གེ་ཧྲཱིཿདགུ་འཕྲོས་པས་འགྲོ་དྲུག་ཏུ་སྐྱེ་བའི་སྒོ་དགུ་བཀག་པར་བསམ་ཞིང་ཧྲཱིཿདགུ་བརྗོད། སྦྱང་ཆས། རཾ་ཡཾ་ཁཾ་གིས་བསངས། སྭ་བྷ་ཝས་སྦྱངས། སྟོང་པའི་ངང་ལས་རིན་པོ་ཆེའི་སྣོད་དུ་ལན་ཆགས་བགེགས་རྣམས་ཚིམ་པར་བྱེད་པའི་གཏོར་མ་ཁ་དོག་དྲི་རོ་ནུས་པ་བདུད་རྩིའི་རང་བཞིན་དུ་གྱུར། ཨོཾ་ཨཱཿཧཱུྃ་ཧོས་བྱིན་གྱིས་བརླབས། ཨོཾ་སརྦ་བྷུ་ཏ་ཨ་ཀཪྵ་ཡ་ཛ་ཛཿས་བགེགས་རྣམས་བཀུག ཨོཾ་སརྦ་བིགྞཾ་ན་མཿསརྦ་ཏ་ཐ་ག་ཏ་བྷྱོ་བྷི་ཤྭ། སོགས། གསུམ་གྱིས་མཐེབ་སྐྱུ་གཡས་སུ་བསྐོར། ཨོཾ་སུཾ་བྷ་ནི་སུཾ་བྷ་ཧཱུྃ། སོགས་ཀྱིས་ཏིང་ལོ། ཆངས་བུ་གཡོན་དུ་བསྐོར། དེ་ནས། རང་ཉིད་སྐད་ཅིག་གིས་དབང་ཆེན་ཁྲོ་བོ་རྟ་མགྲིན་ཁྲོ་གཏུམ་བཟོད་པར་དཀའ་བའི་གཟི་བརྗིད་བསྐལ་བའི་མེ་ལྟར་འབར་བར་གྱུར། ཨོཾ་ཧྲཱིཿབཛྲ་ཀྲོ་ཏ་ཧྱ་གྷྲྀ་ཝ་ཧུ་ལུ་ཧུ་ལུ་ཧཱུྃ་ཕཊཿ ཧཱུྃ༔ སྟོང་ཉིད་དབྱིངས་ལས་རང་ཤར་བའི༔ སྙིང་རྗེ་ཆེན་པོའི་སྐུར་བཞེངས་པ༔ བྱང་ཆུབ་མཆོག་གི་ལྷ་ཆེན་པོ༔ ཉོན་མོངས་བདུད་སྡེ་འདུལ་བའི་སྐུ༔ དབང་ཆེན་འབར་བའི་ཆོ་འཕྲུལ་གྱིསཿ ཐར་བའི་ལམ་ལ་འཚེ་བྱེད་བགེགས༔ ཟ་འདྲེ་སྲོག་གཅོད་རྡུལ་དུ་རློགས༔ ཞེས་བརྗོད། ན་མོ་རྗེ་བཙུན་རྩ་བ་དང་བཅས་པའི། སོགས་གོང་ལྟར། བདེན་པ་དང་། བདེན་པ་ཆེན་པོའི་མཐུ་དང་ནུས་པ་བྱིན་གྱིས་བརླབས་པ་ལ་བརྟེན་ནས་འཇིག་རྟེན་འདི་ནས་འཇིག་རྟེན་ཕ་རོལ་ཏུ་སོང་བའི་ཚེ་དུས་ལས་འདས་པ་ཆེ་གེ་མོ་ཞེས་བྱ་བ་གསོན་གྱི་དུས་སུ་ཚེ་གནས་པ་ལ་བར་དུ་གཅོད་ཅིང་གཤིན་གྱི་དུས་ན་སྡིག་པ་སྦྱོང་བ་དང་། ཚེ་གང་དུ་སྐྱེ་ཞིང་གང་དུ་གནས་པའི་ལུས་སྲོག་དང་དགེ་ལེགས་དང་། ཐར་བ་དང་། ཐམས་ཅད་མཁྱེན་པ་ཐོབ་པ་ལ་བར་དུ་གཅོད་པར་བྱེད་པའི་གདོན་བགེགས་སྤྱི་དང་། ཁྱད་པར་ཚེ་ལས་འདས་པའི་གཟུགས་དང་ཆ་བྱད་བཟུང་ནས་ཚེ་འདས་ཀྱི་ཤུལ་དུ་མཆིས་པའི་ཉེ་འབྲེལ་སོགས་འཇིག་རྟེན་པ་བསླུ་ཞིང་། གནོད་པར་བྱེད་པའི་གདོན་བགེགས་ཀྱི་རིགས་སུ་གྱུར་པ། དྲི་ཟ་འཆི་ཁ་མའི་ཡིད་ལ་ཉེ་བར་འཇུག་པ་ཞེས་བྱ་བ་དང་། དྲི་ཟ་པི་ཤ་ཙ་ན་ཞེས་བྱ་བ་དང་། དྲི་ཟ་ཁྱབ་བྱེད་ཅེས་བྱ་བ་དང་། གནོད་སྦྱིན་ཝ་ར་ཧིནྡྷ་ཀུན་ཏུ་གཏོགས་འདོད་ཅེས་བྱ་བ་དང་། གནོད་སྦྱིན་སྨྲ་འདོད་ཅེས་བྱ་བ་དང་། ཡི་དྭགས་གཤིན་རྗེའི་ཆད་པ་ཞེས་བྱ་བ་ལ་སོགས་པའི་གསོན་བདུད་གཤིན་ལྕགས་སྲོག་གཅོད། བླ་ཁྱེར་གྱི་གཤེད་མའི་ཚོགས་ཐམས་ཅད་གཏོར་མས་ལམ་བརྔན། ཏིང་ལོས་ལམ་སྒྲོན། ཆངས་བུ་ལམ་རྒྱགས་ཀྱི་ཚུལ་དུ་ཁྱེར་ལ་འདིར་མ་གནས་པར་གཞན་དུ་དེངས་ཤིག གལ་ཏེ་མི་འགྲོ་བའི་ཚོགས་རྣམས། ཁྲོ་མཚོན་མེ་དཔུང་འབར་བས་རྡུལ་ཕྲན་བཞིན་དུ་བརླག་པར་འགྱུར་ཏ་རེ། སུམ་བྷ་ནི། སོགས། དྲག་སྔགས་གུལ་ཡུངས་སོགས་དང་བཅས་པས་བསྐྲད། ཨོཾ་བཛྲ་རཀྵ་རཀྵ་ཧཱུྃ། སོགས་ཀྱི་སྲུང་འཁོར་བསྒོམ་ལ།
ངོ་སྤྲོད་པ།
སྐད་གདངས་མཐོན་པོས། འོ། འཇིག་རྟེན་འདི་ནས་འཇིག་རྟེན་ཕ་རོལ་ཏུ་སོང་བའི་ཚེ་དུས་ལས་འདས་པ་ཆེ་གེ་མོ་ཁྱོད་སེམས་མ་ཡེངས་བར་ལེགས་པར་ཉོན་ཅིག །ཅེས་ལན་གསུམ་བོས་ལ། ད་ལྟ་ཁྱོད་ལ་འཇིག་རྟེན་ཚེ་འདིའི་སྣང་བ་ནུབ་སྟེ་ཕྱི་མའི་འདུ་ཤེས་འཆར་བའི་འཆི་བ་མི་རྟག་པ་ཞེས་བྱ་བ་དེ་བྱུང་བ་ཡིན་ནོ། །དེ་ཡང་ཁྱོད་ཉིད་གཅིག་པུ་ཁོ་ན་ལ་འཆི་བ་མི་རྟག་པ་འདི་ལྟར་དུ་བྱུང་བ་ནི་མ་ཡིན། སྤྱིར་འདུས་བྱས་ཀྱི་མཚན་ཉིད་ཐམས་ཅད་ནི་མི་རྟག་པ་ཁོ་ན་ཡིན་ཏེ། སངས་རྒྱས་བཅོམ་ལྡན་འདས་ཀྱི་ཞལ་ནས། དགེ་སློང་དག་འདུས་བྱས་ཐམས་ཅད་ནི་མི་རྟག་པའོ། །ཞེས་དང་། ཆེད་དུ་བརྗོད་པའི་ཚོམ་ལས། ཀྱེ་མ་འདུས་བྱས་ཐམས་ཅད་མི་རྟག་སྟེ། སྐྱེས་ནས་འཆི་བའི་ཆོས་ཅན་ཡིན། །ཞེས་སོ། །བྱེ་བྲག་ཏུ་བརྟན་པ་ཕྱི་སྣོད་ཀྱི་འཇིག་རྟེན་ཞེས་འབྱུང་བ་རིམ་བརྩེགས་རི་གླིང་ཁོར་ཡུག་གསེར་རི་རོལ་མཚོ་ལྕགས་རི་མུ་ཁྱུད་དང་བཅས་པ་སྲ་ཞིང་མཁྲེགས་པ་འདི་རྣམས་ཀྱང་མི་རྟག་སྟེ། ཨོ་རྒྱན་ཆེན་པོས། ཕྱི་སྣོད་འཇིག་རྟེན་མེ་ཆུ་རླུང་གིས་འཇིག །ཅེས་དང་། གཡོ་བ་ནང་བཅུད་ཀྱི་སེམས་ཅན་སྔོན་དུས་ཀྱི་འཁོར་ལོས་བསྒྱུར་བའི་རྒྱལ་པོ་རྣམས་དང་། དེང་དུས་ཀྱི་རྒྱལ་ཕྲན་རྣམས་མན་ཆད་ནས་འབུ་སྲིན་སྲོག་ཆགས་ཕྲ་མོ་ཡན་ཆད་ཀྱི་འགྲོ་བ་སེམས་ཅན་མཆོག་དམན་བར་གསུམ་སྤྱི་དང་། དེ་དག་གི་དོན་དུ་བྱོན་པའི་སངས་རྒྱས་བྱང་སེམས་བླ་མ་མཁན་སློབ་དགེ་འདུན་འདུས་པ་ལ་སོགས་པ་ཐམས་ཅད་ཀྱང་མི་རྟག་སྟེ། ཀུན་མཁྱེན་ཆོས་རྗེས། ནང་བཅུད་འདུས་བྱས་མི་རྟག་འཕོ་ཞིང་འགྱུར། །ཞེས་སོ། །དེ་བཞིན་དུ་བརྟན་གཡོའི་ཁམས་འདིའི་ནམ་ཟླ་དབྱར་དགུན་སྟོན་དཔྱིད་ལོ་ཟླ་ཞག་དུས་འདི་རྣམས་ཀྱང་མི་རྟག་སྟེ། ཨོ་རྒྱན་ཆེན་པོས། ན་ནིང་ད་ལོ་ནམ་ཟླ་སྟོད་སྨད་དང་། །ཞག་དང་ཉིན་མཚན་སྐད་ཅིག་དུས་མི་རྟག། ཅེས་གསུངས་པ་ལྟར། ཁྱད་པར་དུ་འཇིག་རྟེན་གྱི་ཁམས་འདི་ཉིད་དུ་དེ་སྔོན་སྐྱེས་ཚད། ད་ལྟ་སྐྱེས་ནས་ཡོད་པ། ད་གཟོད་སྐྱེ་འགྱུར་རྣམས་དང་བཅས་པའི་འགྲོ་བ་རབ་འབྲིང་ཐ་གསུམ་ཐམས་ཅད་ཀུན། ད་ལྟ་ཁྱོད་རང་ལྟར་ཅིས་ཀྱང་འཆི་ངེས་པ་དང་། ནམ་འཆི་ཆ་མེད་པ་དང་། འཆི་བ་ལ་ཅིས་ཀྱང་མི་ཕན་པ་གསུམ་འདྲ་ངེས་པ་ཅན་ཡིན་ཏེ། དང་པོ་ཅིས་ཀྱང་འཆི་ངེས་པའི་རྒྱུ་མཚན་ནི། ཆེད་དུ་བརྗོད་པའི་ཚོམ་ལས། འདི་ལྟར་སྐྱེས་པ་ཐམས་ཅད་ཀྱི༔ མདུན་ན་གནས་པ་འཆི་བ་ཡིན༔ ཞེས་སོ། །གཉིས་པ་ནམ་འཆི་ཆ་མེད་པ་ནི། སྤྱོད་འཇུག་ལས། སང་དང་འཇིག་རྟེན་ཕྱི་མ་གཉིས། །སྔོན་དུ་གང་སྔ་གཏོལ་མེད་པས། །སང་གི་ཚེས་ལ་མི་འབད་པར། །ཕྱི་མའི་དོན་དུ་འབད་པར་རིགས། །ཞེས་སོ། །གསུམ་པ་འཆི་བ་ལ་ཅིས་ཀྱང་མི་ཕན་པའི་ཚུལ་ནི། པདྨ་བཀའ་ཡི་ཐང་ཡིག་ལས། སྨན་པའི་རྒྱལ་པོ་དངོས་སུ་བྱོན་གྱུར་ཀྱང༔ ཚེ་ཡི་འཕེན་ཟད་སྲོག་ལ་མཐུད་མི་ཤེས༔ དབང་པོ་ཆེ་ཡི་ཁྲིམས་ལ་གཏུག་ཏུ་མེད༔ མི་ལག་རེག་པས་ར་མདའ་བྱ་རྒྱུ་མེད༔ ངག་ནུས་ཅན་གྱིས་མཐུ་གཏད་བརྡེག་ཏུ་མེད༔ མི་ཕངས་ནོར་གྱིས་བསླུ་མ་གཏང་དུ་མེད༔ སྡར་མ་ཡུལ་ཕྱོགས་གཞན་ལ་བྲོས་སུ་མེད༔ སྨྲ་ཚན་ཅན་གྱིས་ཡུས་ཤགས་འདེབས་སུ་མེད༔ ཅེས་གསུངས་པས་དཔེར་ན་ཉི་མ་རིའི་ཕག་ཏུ་བཞུད་འགྲོ་བ་ལ་མཐོ་དམན་དྲག་ཞན་སུས་ཀྱང་བཤོལ་ཐབས་མེད་པ་དང་འདྲའོ། །དེར་མ་ཟད་རང་རེ་རྣམས་ཀྱི་ཡུལ་འདིས་མཚོན་པའི་འཇིག་རྟེན་གྱི་ཁམས་ཐམས་ཅད་དུ་སྐྱེས་པའི་འགྲོ་བ། བརྩིགས་པའི་ཁང་ཁྱིམ། འདུས་པའི་མཛའ་བཤེས། བསགས་པའི་ནོར་ཟས་ཐམས་ཅད་གཅིག་ཀྱང་རྟག་པ་མེད་པའི་ཚུལ་ནི། འདུལ་བ་ལུང་ལས། སྐྱེས་པའི་ཐ་མ་འཆི། བརྩིགས་པའི་ཐ་མ་འཇིག འདུས་པའི་ཐ་མ་བྲལ། བསགས་པའི་ཐ་མ་འཛད། ཅེས་གསུངས་པའི་མཐའ་བཞིའི་ནང་ནས་ད་ལྟ་ཁྱོད་རང་ལ་སྐྱེས་པའི་མཐའ་མ་འཆི་བ་མི་རྟག་པ་ཞེས་བྱ་བ་དེ་བྱུང་ནས། བླ་མའི་གདམས་ངག་གསལ་འདེབས་དགོས་པའི་དུས་ལ་བབ་པ་ཡིན། གསལ་འདེབས་པའི་ཚུལ་ལའང་། གྲུབ་མཐའ་གསར་རྙིང་སོ་སོའི་བཀའ་སྲོལ་མང་དུ་ཡོད་ཀྱང་། རང་ལུགས་རྫོགས་ཆེན་གྱི་གདམས་པ་གང་ཟག་དབང་པོ་འབྲིང་རྣམས་བར་དོར་གྲོལ་ཚུལ་རྣམས་བཤད་ན། ཁྱོད་ཁར་སང་ཁར་ཉིན་འཆི་ནད་དེས་ཐེབས་པ་ཡན་ཆད་ནས། སྔར་དང་པོ། མ་ཡི་མངལ་ནས་སྐྱེ་བ་ཚུན་ཆད་ལ། སྐྱེ་གནས་བར་དོ་ཟེར་བ་ཡིན། འཆི་ནད་ཀྱིས་ཐེབས་ནས་ནང་དབུགས་ཆད་པ་ཡན་ཆད་ལ་འཆི་ཁ་བར་དོ་ཟེར་བ་ཡིན། ནང་དབུགས་ཆད་ནས་ལྷུན་གྲུབ་ཀྱི་སྣང་བ་འཆར་དུས་ཀྱི་བར་ལ་ཆོས་ཉིད་བར་དོ་ཟེར་བ་ཡིན། ལྷུན་གྲུབ་ཀྱི་སྣང་བ་ནུབ་ནས་ཕྱི་མའི་སྐྱེ་སྲིད་འཛིན་པ་ཚུན་ཆད་ལ་སྲིད་པ་བར་དོ་ཟེར་བ་ཡིན། བར་དོ་དེ་བཞིའི་ནང་ནས་ཕྱི་མ་གསུམ་པོ་འདི་ངོ་སྤྲོད་ཚུལ་ནི། འབྱུང་འཁྲུགས་འཆི་ཁའི་བར་དོ་གསལ་བཏབ་ནས་ངོ་སྤྲོད་དང་འཕོ་བའི་གདམས་པ་སྟོན་པ་དང་། ལྷུན་གྲུབ་ཆོས་ཉིད་ཀྱི་བར་དོ་གསལ་བཏབ་ནས་སྒྲ་འོད་ཟེར་གསུམ་ཐམས་ཅད་རང་སྣང་ཡིན་པར་ངོ་སྤྲད་ནས་ཡིད་ཆེས་ངེས་ཤེས་བསྐྱེད་པ་དང་། ལུགས་འབྱུང་སྲིད་པའི་བར་དོ་གསལ་བཏབ་ནས་འདུན་པ་ཁོ་ནས་བདེ་འགྲོ་ཐོབ་པའི་གདམས་ངག་འབོགས་པ་ཡིན།
འབྱུང་འཁྲུགས་འཆི་ཁའི་བར་དོའི་ངོ་སྤྲོད།
དེ་ལ་དང་པོ་འབྱུང་ཁྲུགས་འཆི་ཁའི་བར་དོ་གསལ་འདེབས་པ་འདི་ལ་སྤྱི་དང་བྱེ་བྲག་གི་ཚུལ་གཉིས་ཡོད་པའི་དང་པོ་སྤྱིར་ནི། ཞི་ཁྲོའི་བར་དོའི་རྩ་ཚིག་ལས། ཀྱེ་མ་བདག་ལ་འཆི་ཁ་བར་དོ་འཆར་དུས་དེར༔ ཀུན་ལ་ཆགས་སེམས་ཞེན་འཛིན་སྤངས་བྱས་ནས༔ གདམས་ངག་གསལ་བའི་ངང་ལ་མ་ཡེངས་འཇུག༔ རང་རིག་སྐྱེ་མེད་ནམ་མཁའི་དབྱིངས་སུ་འཕོ༔ འདུས་བྱས་ཤ་ཁྲག་ལུས་དང་བྲལ་ལ་ཁད༔ མི་རྟག་འཆི་བ་ཡིན་པར་ཤེས་པར་བྱ༔ ཞེས་གསུངས་པ་ལྟར་རོ༔ གཉིས་པ་བྱེ་བྲག་ཏུ་ཕྱེས་ན། འོ་སྐོལ་སེམས་ཅན་འདིའི་འཆི་ལུགས་ལ་རྣམ་གྲངས་མང་དུ་ཡོད་ཀྱང་། མདོར་བསྡུས་ན་གཉིས་ཏེ་དུས་མ་ཡིན་པར་འཆི་བ་དང་། དུས་ལ་བབས་ཏེ་འཆི་བའོ། །དང་པོ་དུས་མ་ཡིན་པར་འཆི་བའི་རྐྱེན་གློ་བུར་དུ་བྱུང་བ་འགའ་ལ་ཐིམ་རིམ་སོགས་ངེས་པ་ཅན་ཞིག་ཡོང་མ་ཁོམ་པར་བཤད་པ་དང་། གཉིས་པ་དུས་ལ་བབས་ཏེ་འཆི་བ་ཚེ་དང་ལས་དང་བསོད་ནམས་གསུམ་ག་ཟད་པ་རྣམས་ལ་འབྱུང་བ་ལྔ་དང་། ཡུལ་ལྔའི་ཐིམ་ཚུལ། རླུང་ལྔའི་བྲོས་ཚུལ། སྣང་བའི་སྡུད་ཚུལ་སོགས་གོ་རིམ་ངེས་པ་ཅན་དུ་འབྱུང་ཞིང་། སྣང་མཆེད་ཐོབ་གསུམ་ཉེར་ཐོབ་དང་གཞིའི་འོད་གསལ་རྣམས་ཀྱང་རིམ་པར་འཆར་བར་གསུངས་པའི་ཚུལ་དེ་དག་གི་དོན་ཤེས་པར་བྱས་ནས་དང་པོ་དུས་མིན་གློ་བུར་དུ་འཆི་བ་དང་། ལམ་ལ་གོམས་འདྲིས་མེད་པའི་སོ་སོའི་སྐྱེ་བོ་རྣམས་ལ་བཙན་ཐབས་སུ་འཕོ་བ་གདབ་པ་གལ་ཆེ་སྟེ། ཨོ་རྒྱན་ཆེན་པོས། གང་ཞིག་རྟོག་པའི་ཡེ་ཤེས་ཆེ༔ ཚེ་འདིར་ཉམས་འོག་མ་ཆུད་ན༔ བཙན་ཐབས་འཕོ་བས་མཚམས་སྦྱོར་བྱ༔ དེས་ནི་འགྲུབ་འགྱུར་གདོན་མི་ཟ༔ ཞེས་གསུངས་པ་ལྟར་འཕོ་བ་ཐེབས་ངེས་པ་བྱས་ན་ཡུལ་དེ་ཉིད་ལ་ཕན་ཐོགས་རྒྱ་ཆེན་པོ་འབྱུང་བར་གསུངས་སོ། །གཉིས་པ་དུས་བབས་ཀྱིས་འཆི་བ་དང་། ལམ་བསྒོམས་ནས་གོམས་འདྲིས་ཡོད་པ་རྣམས་ལ་གདམས་པའི་གསལ་འདེབས་དང་ངོ་སྤྲོད་གལ་ཆེ་བ་ནི། རྫོགས་པ་ཆེན་པོ་ངེས་དོན་འདུས་པའི་རྒྱུད་ལས། སྐྱེ་ཤི་གཉིས་ཀྱི་བར་དོ་རུ༔ ཆོས་སྐུའི་ངོ་སྤྲོད་མ་ཤེས་ན༔ མ་རིག་མུན་པ་སངས་སུ་མེད༔ སྒྲོན་མེ་མེད་པའི་མུན་ཁུང་འདྲ༔ ཞེས་གསུངས་པ་དེའི་དོན་ཞིབ་ཏུ་བཀྲོལ་ན། ཡེ་ཤེས་རོལ་བ་ལས། དང་པོ་ས་ནི་ཆུ་ལ་ཐིམ། །ཆུ་ཡང་མེ་ལ་ཐིམ་གྱུར་ཏེ། །མེ་ནི་རླུང་ལ་ཐིམ་མ་ཐག །རླུང་ནི་རྣམ་པར་ཤེས་ལ་ཐིམ། །རྣམ་ཤེས་བཟུང་བ་འདི་ཉིད་ནི། །འོད་གསལ་བར་དུ་འཇུག་པར་འགྱུར། །ཞེས་གསུངས་པ་འདི་ལ་ཚིག་གི་བརྗོད་ཚུལ་མི་འདྲ་བ་མང་དུ་ཡོད་ཀྱང་། འོད་གསལ་རྫོགས་པ་ཆེན་པོའི་ལུགས་ཐུན་མོང་མ་ཡིན་པའི་ཚུལ་མདོར་བསྡུས་ཏེ་བཤད་ན། འབྱུང་བ་ལྔ་དང་ཡུལ་ལྔའི་ཐིམ་ཚུལ། རྟོག་པའི་འགགས་ལུགས། མི་རྟོག་ཡེ་ཤེས་ཀྱི་འཆར་ཚུལ། དེ་ངོས་ཟིན་ནས་གྲོལ་ཚུལ་དང་བཞི་ཡོད་པ་ལས། དང་པོ་འབྱུང་བ་ལྔ་དང་ཡུལ་ལྔའི་ཐིམ་ཚུལ་ནི། ཤའི་ཁམས་ས་ལ་༼ལྟེ་བ་ས་ཡི་འཁོར་ལོའི་རྩ་མདུད་ཞིག་དུས་༽ཐིམ་པས་ལུས་ཀྱི་འགུལ་བསྐྱོད་དཀའ་ཞིང་ལྡང་མི་ནུས། གཟུགས་ཀྱི་ཁམས་སྒྲ་ལ་ཐིམ་པས་མིག་གིས་གཟུགས་མི་གསལ། ཁྲག་གི་ཁམས་ཆུ་ལ་༼སྙིང་ཁ་ཆུའི་འཁོར་ལོའི་རྩ་མདུད་ཞིག་དུས་༽ཐིམ་པས་ཁ་ཆུ་དང་སྣ་ཆུ་རྣམས་ལུད་ཅིང་སྐམ། སྒྲའི་ཁམས་དྲི་ལ་ཐིམ་པས་རྣ་བས་སྒྲ་མི་ཐོས་སྐད་འགགས། དྲོད་ཀྱི་ཁམས་མེ་ལ་༼མགྲིན་པ་མེའི་འཁོར་ལོའི་རྩ་མདུད་ཞིག་དུས་༽ཐིམ་པས་ལུས་ཀྱི་དྲོད་མཐའ་ནས་དབུས་སུ་སྡུད། དྲིའི་ཁམས་རོ་ལ་ཐིམ་པས་སྣས་དྲི་མི་ཚོར་དྲིའི་ཚོར་བ་འགགས། དབུགས་ཀྱི་ཁམས་རླུང་ལ་༼རྒྱང་གནས་རླུང་གི་འཁོར་ལོའི་རྩ་མདུད་ཞིག་དུས་༽ཐིམ་པས་དབུགས་ཁུག་པ་བཞི་དང་རྐྱང་བ་གཅིག་གིས་ཧ་འདོན། རོ་ཡི་ཁམས་རེག་ལ་ཐིམ་པས་ལྕེས་རོ་མྱོང་བའི་ཚོར་བ་འགགས། རླུང་གི་ཁམས་རྣམ་པར་ཤེས་པ་ལ་༼སྤྱི་བོར་ནམ་མཁའི་འཁོར་ལོ་ཞིག་དུས་༽ཐིམ་པས་རྩ་ཕྲན་གྱི་ཁྲག་རྣམས་སྲོག་རྩར་འདུས་ཏེ་ཁྲག་ཐིག་དང་པོར་བརྒྱབ་པས་མིག་སྐྱ་ལོག་གེ་འགྲོ། ཁྲག་ཐིག་གཉིས་བརྒྱབ་དུས་མགོ་ཁུག་པ་དང་ཧ་ཞེས་དབུགས་མདའ་གང་ཕྱིར་འགྲོ། ཁྲག་ཐིག་གསུམ་བརྒྱབ་དུས་ཨིག་ཅེས་ཟེར་ཞིང་དབུགས་ཁྲུ་གང་ཕྱིར་སོང་ནས་ཕྱི་དབུགས་ཆད་ཀྱང་ནང་དབུགས་མ་ཆད་པའི་བར་དེར་རིག་པ་སྙིང་གི་དཀྱིལ་དུ་ཁྲག་ཐིག་གིས་བརྒྱལ་ནས་དྲན་རྟོག་གང་ཡང་མེད་པར་འགྲོ། རེག་བྱའི་ཁམས་རྟོག་མེད་ཀྱི་ཆོས་ལ་ཐིམ་པས་ལུས་ཀྱིས་རེག་བྱ་མི་ཚོར་མདངས་ཉམས། བཟང་རྟོག་དང་ངན་རྟོག་གི་ཚོར་བ་དང་བྲལ། དེ་ནས་རྩ་མདུད་རྣམས་གྲོལ་བས་རྣམ་པར་ཤེས་པའི་ཁམས་ནམ་མཁའ་ལ་ཐིམ་པའི་སྐབས་འདིར། སྐད་ཅིག་བཞི་ལ་སྟོང་གཞིའམ། སྣང་བ་དང་། མཆེད་པ་དང་། ཐོབ་པ་དང་། ཉེར་ཐོབ་བཞིའི་འོད་གསལ་རྣམ་པ་བཞི་འཆར་ཏེ། འདི་ལ་བླ་མ་འགའ་ཞིག་གིས་རྣམ་པར་ཤེས་པ་སྣང་བ་ལ་ཐིམ་པ་དང་། སྣང་བ་མཆེད་པ། མཆེད་པ་ཐོབ་པ། ཐོབ་པ་ཉེར་ཐོབ་ལ་ཐིམ་པར་བཤད་པས། རྩ་དབུ་མའི་སྤྱི་བོར་ཕ་ལས་ཐོབ་པའི་སྲོག་འཛིན་གྱི་བྱང་སེམས་དཀར་ཆ་ཧཾ་ཡིག་གི་དབྱིབས་ཅན། རྐྱང་མའི་ནུས་པས་བཟུང་བ་དེ་ཐུར་དུ་བབ་པས་སྟོང་མའི་སྣང་བའི་འོད་གསལ་ཞེས་དཀར་ལམ་གྱི་སྣང་བ་ཤར་བའི་ཚེ་ཞེ་སྡང་ལས་གྱུར་བའི་རྟོག་པ་སུམ་ཅུ་སོ་གསུམ་འགགས། དབུ་མའི་མར་སྣར་མ་ལས་ཐོབ་པའི་མཉམ་གནས་ཀྱི་དྭངས་མ་རཀྟ་ཨ་ཐུང་གི་དབྱིབས་ཅན་རོ་མའི་ནུས་པ་བཟུང་བ་གྱེན་དུ་ལོག་པའི་སྟོང་ཆེན་མ་མཆེད་པའི་འོད་གསལ་ཞེས་དམར་ལམ་གྱི་སྣང་བ་ཤར་བའི་ཚེ། འདོད་ཆགས་ལས་གྱུར་བའི་རྟོག་པ་བཞི་བཅུ་འགགས། དེ་གཉིས་ཀྱི་བར་དུ་རྣམ་པར་ཤེས་པ་གྱད་སྟོབས་ཅན་གྱིས་སེ་གོལ་ལན་བདུན་གཏོགས་པའི་ཡུད་ཙམ་ཞིག་འཐུམ་ནས་ཤིན་ཏུ་སྟོང་པའམ། ཐོབ་པའི་འོད་གསལ་ཞེས་ནག་ལམ་པའི་སྣང་བ་ཤར་བའི་ཚེ། གཏི་མུག་ལས་གྱུར་པའི་རྟོག་པ་བདུན་འགགས། དེའི་མཐར་ཀུན་རྟོག་བརྒྱད་ཅུའི་དྲི་མ་དང་བྲལ་བས་ཐམས་ཅད་སྟོང་པའམ། ཉེ་བར་ཐོབ་པའི་འོད་གསལ་ཞེས་ཟབ་གསལ་གཉིས་སུ་མེད་པའི་ཡེ་ཤེས་སྤྲོས་བྲལ་གྱི་ཏིང་ངེ་འཛིན་འཆར་བར་འགྱུར་རོ། །འདིའི་དུས་སུ་ལམ་ཞུགས་ཀྱི་རྣལ་འབྱོར་བ་དབང་པོ་འབྲིང་གི་རབ་འཆི་ཁ་བར་དོར་གྲོལ་རྒྱུའི་རིགས་ཅན་ཡིན་ན། དབང་པོའི་རིམ་པ་ལྟར་གྲོལ་ཚུལ་རབ་འབྲིང་ཐ་མ་གསུམ་ཡོད་པའི་འབྲིང་གི་རབ་ཀྱི་རབ་རྣམས་ནི་སྙིང་སྡུག་གི་མཛའ་བོ་མཐོང་བ་ལྟར་དགའ་སྤྲོ་དང་བཅས་ཏེ་གྲོལ་བ་དང་། འབྲིང་གི་རབ་ཀྱི་འབྲིང་རྣམས་ནི་མེ་ལོང་ལ་རང་གི་བྱད་གསལ་བ་མཐོང་བ་ངོས་ཟིན་པ་ལྟར་རང་སྣང་དུ་ངོ་ཤེས་ནས་གྲོལ་བར་འགྱུར་བས། དེ་དག་གི་ཚུལ་ཡང་། སྔར་གྱི་དུས་བཞི་ནང་གསལ་ངོ་བོ་ཀ་དག་ཁྲེགས་ཆོད་གནས་ལུགས་ཀྱི་ལྟ་བ་ཟབ་མོ་ཉམས་སུ་བླངས་ནས་གོམས་འདྲིས་སོགས་ཡོད་ན། སྔར་གོམས་པའི་མྱོང་བའི་གཞི་ལ་གནས་པའི་འོད་གསལ་མ་ལྟ་བུ་དང་། ཕྱིས་བར་དོའི་འོད་གསལ་བུ་ལྟ་བུ་གཉིས་འོད་གསལ་མ་བུ་འདྲེས་ནས་བར་དོ་མེད་པར་ཡར་གྱི་ཟང་ཐལ་དུ་འགྲོ་བར་འགྱུར་ཏེ། དེའི་ཚུལ་ནི་ཆགས་མེད་རིན་པོ་ཆེས། ངོ་བོ་རྗེན་པར་རྟོགས་པ་དེ། །རྒྱུན་དུ་མ་ཡེངས་སྐྱོང་ནུས་ན། །ཕྱི་དབུགས་ཆད་ནས་ནང་དབུགས་གནས། །གཞི་ཡི་འོད་གསལ་ཤར་བའི་ཚེ། །ཆུ་ཉིད་ལ་ནི་ཆུ་བཞག་ལྟར། །ཉམས་ལེན་ཟིན་ན་དེའི་ཐོག་ཏུ། །ཞག་བདུན་ལ་སོགས་གནས་པ་ནི། །འཆི་བ་ཆོས་སྐུར་སངས་རྒྱས་ཏེ། །བར་དོའི་སྣང་བ་དེ་ལས་མེད། །ཡར་གྱི་ཟང་ཐལ་ཡིན་པར་གསུངས། །ཞེས་དང་། གཞན་ཡང་དུས་འཁོར་རྩ་རྒྱུད་ལས། འོད་གསལ་དེ་ལ་སེམས་ཟིན་ན། །ཉོན་མོངས་དགྲ་ཡི་དཔུང་རྣམས་འཇོམས། །འོད་གསལ་བ་ལ་རྒྱུན་དུ་གནས། །བར་དོའི་གྲོང་ཁྱེར་དེས་མི་མཐོང་། །ཞེས་གསུངས་པ་ལྟར། འཆི་བ་འོད་གསལ་ཆོས་ཀྱི་སྐུར་འཚང་རྒྱ་བ་ཡིན་ནོ། །འབྲིང་གི་རབ་ཀྱི་ཐ་མ་ལས་ཁབ་མིག་ཏུ་སྐུད་པ་འཛུད་པ་ལྟ་བུ་ནི། འཆི་ཁའི་དུས་སུ་བླ་མ་འམ། མཆེད་གྲོགས་དམ་ཚིག་དང་ལྡན་པས་འཆི་ཁ་བར་དོ་དང་། ཆོས་ཉིད་བར་དོའི་གདམས་པ་བསྟན་ནས། དེས་གྲོལ་བའམ། ཡང་ན་འཕོ་བའི་གདམས་པ་ཟབ་མོ་བཏབ་པས་གྲོལ་བར་འགྱུར་བ་ཡིན་པས་དེ་དག་གི་དོན་རྣམས་མ་ནོར་བར་ཤེས་པར་གྱིས་ཤིག #div4 ལྷུན་གྲུབ་ཆོས་ཉིད་ཀྱི་བར་དོའི་ངོ་སྤྲོད།
གཉིས་པ་ཆོས་ཉིད་བར་དོ་ནི། ཀྱེ། འཇིག་རྟེན་འདི་ནས་འཇིག་རྟེན་ཕ་རོལ་ཏུ་སོང་བའི་ཚེ་དུས་ལས་འདས་པ་ཆེ་གེ་མོ། ཁྱོད་མ་ཡེངས་པར་ལེགས་པར་ཉོན་ཅིག གོང་གི་འཆི་ཁ་བར་དོའི་སྐབས་ཀྱི་འབྱུང་བ་ལྔ་དང་ཡུལ་ལྔའི་ཐིམ་ཚུལ། རྟོག་པའི་འགགས་ལུགས། མི་རྟོག་ཡེ་ཤེས་ཀྱི་འཆར་ཚུལ་རྣམས་ངོས་མ་ཟིན་ན། འོད་གསལ་འོད་གསལ་དུ་ངོ་མ་ཤེས་པའི་སྐྱོན་གྱིས་སླར་ཡང་གཏི་མུག་གི་རྟོག་པ་བདུན་པོ་བསླངས་ནས་ཉེར་ཐོབ་མུན་པ་ལྟ་བུ་འཆར། དེ་བཞིན་དུ་འདོད་ཆགས་ཀྱི་རྟོག་པ་བཞི་བཅུ་བསླངས་ནས་མཆེད་པ་ཉི་འོད་ལྟ་བུ་དང་། ཞེ་སྡང་གི་རྟོག་པ་སོ་གསུམ་བསླངས་ནས། སྣང་བ་ཟླ་འོད་ལྟ་བུ་འཆར། དེ་ནས་ཁྱབ་བྱེད་རླུང་གི་རྣམ་པར་ཤེས་པའི་ཕུང་པོ་སྒོ་དགུ་པོ་གང་རུང་ནས་མེ་སྟག་ཡར་བ་ལྟར་ཕྱིར་ཐོན་པ་ཆོས་ཉིད་བར་དོ་ཡིན། དྲན་མེད་དུ་བརྒྱལ་ནས་རླུང་བར་སྣང་ལ་བུན་གྱིས་ཡལ། ལུས་གདོས་བཅས་སུ་ལིང་གིས་སོང་། རྣམ་པར་ཤེས་པ་མེ་སྟག་ཡར་བ་ལྟར་གྱུར་བ་སྒོ་དགུ་གང་རུང་ནས་ཕྱིར་ཐོན་ཏེ་སྒོ་གསུམ་གྱེས་པའི་ཚེ། དུས་མ་འགྱུར་སྣང་བ་འགྱུར་བའི་སྐབས་ཡིན་པས་ཕྱི་ས་རྡོ་རི་བྲག་རྩི་ཤིང་ནགས་ཚལ། ཉི་མ་ཟླ་བ་ལ་སོགས་འཇིག་རྟེན་ཚེ་འདིའི་སྣང་བ་ཐམས་ཅད་ནི་ནུབ། དབུགས་ཕྱི་ནང་གི་འགྲུལ་ཐག་ནི་ཆད། རང་གི་དབང་པོ་རྣམས་ཀྱི་ཆ་ལ་དངོས་པོར་སྣང་བ་ནི་མེད། ཡོད་སྙམ་པའི་ཤེས་པ་ཅུང་ཟད་ནི་འབྱུང་། གདོས་བྱས་ཀྱི་ལུས་དངོས་མི་སྣང་བར། རང་ཉིད་འོད་ལུས་སུ་གནས་པའི་མདངས་མིག་གཉིས་ནས་འོད་ཀྱི་ཟེར་དུང་གི་ཐག་པ་བརྐྱང་བ་ལྟ་བུ་ཕྱིར་ཤར་བ་ལ་བརྟེན་ནས་དག་པའི་ཡེ་ཤེས་ལྷུན་གྲུབ་ཆོས་ཉིད་འོད་གསལ་གྱི་བར་དོ་ཞེས་སྒྲ་འོད་ཟེར་གསུམ་གྱི་སྣང་བ་འཆར་བ་ཡིན། ཞི་ཁྲོའི་བར་དོའི་རྩ་ཚིག་ལས། ཀྱེ་མ་བདག་ལ་ཆོས་ཉིད་བར་དོ་འཆར་དུས་འདིར༔ ཀུན་ལ་དངངས་སྐྲག་འཇིགས་སྣང་སྤངས་བྱས་ནས༔ གང་ཤར་རང་སྣང་རིག་པ་ངོ་ཤེས་འཇུག༔ བར་དོའི་སྣང་ཚུལ་ཡིན་པར་ཤེས་པར་བྱ༔ དོན་ཆེན་འགགས་ལ་ཐུག་པའི་དུས་གཅིག་འོང༔ རང་སྣང་ཞི་ཁྲོའི་ཚོགས་ལ་མ་འཇིགས་ཤིག༔ ཅེས་གསུངས་པའི་རང་སྣང་ཆོས་ཉིད་ཀྱི་བར་དོ་ནས་འཆར་སྒོ་སྣ་ཚོགས་འོང་བ་འདིའི་སྣང་ལུགས་ལ་རྣམ་པ་བཞི་སྟེ། གཞི་སྣང་འོད་གསལ་གྱི་སྣང་བ་དང་། ཟུང་འཇུག་ཚོམ་བུའི་སྣང་བ་དང་། ཡེ་ཤེས་བཞི་སྦྱོར་གྱི་སྣང་བ་དང་། ལྷུན་གྲུབ་རིན་པོ་ཆེའི་སྣང་བ་དང་བཞི་ཡོད་པ་ལས། དང་པོ་གཞི་སྣང་འོད་གསལ་གྱི་སྣང་བ་དང་། གཉིས་པ་ཟུང་འཇུག་ཚོམ་བུའི་སྣང་བ་དང་གཉིས་དོན་གཅིག་ཡིན་ཏེ། ཚོམ་བུའི་སྣང་བའི་འཆར་གཞི་ནི་ནང་གསལ་ངོ་བོ་ཀ་དག་ཁྲེགས་ཆོད་ཀྱི་གནས་ལུགས་འོད་གསལ་ཆོས་སྐུ་དེ་ཡིན་ལ། དེ་འཆར་བའི་ཚོམ་བུ་ནི་ཕྱི་གསལ་རང་བཞིན་ལྷུན་གྲུབ་ཐོད་རྒལ་གྱི་ཡེ་ཤེས་ཡིན་པས། དེ་གཉིས་ཟུང་དུ་འཇུག་དེ་འཆར་བས་ཟུང་འཇུག་ཅེས་པའི་སྒྲ་དོན་ཡང་དེ་ཡིན་ནོ། །ཡང་སེམས་ཉིད་སྟོང་པའི་ཆ་ལས་ངོ་བོ་ཀ་དག་ཆོས་སྐུའི་འོད་གསལ་བཞི་གོང་དུ་སོང་ནས། སྣང་བའི་ཆ་ལས་རང་བཞིན་ལྷུན་གྲུབ་གཟུགས་སྐུའི་འོད་གསལ་ལྔ་པ་སྐབས་འདིར་གཞི་སྣང་འོད་གསལ་གྱི་སྣང་བ་རུ་འཆར་བ་ཡིན། །ཇི་ལྟར་འཆར་བའི་ཚུལ་ནི་ཉེར་ཐོབ་ཀྱི་ཡེ་ཤེས་སྐད་ཅིག་བཞི་བའི་རྗེས་དེ་ཉིད་ལ་འཆར་ཏེ། གསང་འདུས་གཉིས་མེད་རྣམ་རྒྱལ་གྱི་རྒྱུད་ལས། ལྔ་པ་སྤྲིན་མེད་ནམ་མཁའ་ལ། །མི་རྟོག་ཡེ་ཤེས་མཐའ་དབུས་མེད། །ཅེས་གསུངས་པའི་དང་པོ། ནམ་མཁའ་འོད་གསལ་ལ་ཐིམ་པའམ། ཉེར་ཐོབ་ཀྱི་ཡེ་ཤེས་འོད་གསལ་ལ་ཐིམ་པའི་ཚེ། གཞི་སྣང་འོད་གསལ་གྱི་སྣང་བའམ་ནང་ཆོས་ཉིད་རང་གསལ་གྱི་ཞིང་ཁམས་རྣམ་པར་དག་པ་ཞེས་བྱ་བ་སྣང་བ་ཐམས་ཅད་འོད་ལྔའི་སྣང་བ་རང་ས་ན་གསལ་བ་ལ་ཟེར་ཕྲོམ་འཕྲོ་བ་དང་བཅས་མེ་རེ་རེ་འཆར་བ། དཔེར་ན་སྟོན་ཁ་ནམ་མཁའ་སྤྲིན་མེད་པ་དང་། ཕྱིའི་རྒྱ་མཚོ་ཆེན་པོ་མཐོང་བ་ལྟ་བུ་གསལ་ལ་མི་རྟོག་པའི་ཡེ་ཤེས་རྒྱ་ཆད་ཕྱོགས་ལྷུང་མེད་པ་མཐའ་དང་མུ་ལས་འདས་པར་སྣང་བ་དེ་ནི། ཡེ་ཤེས་ཀྱི་འཆར་གཞི་སྔར་གྱི་འོད་གསལ་ཆོས་སྐུ་དེ་ཡིན་ལ། དེ་ཉིད་སྟོང་པའི་ངོ་བོ་ནི་ཡུམ་ཀུན་ཏུ་བཟང་མོ། གསལ་བའི་ཆ་ནི་སྟོན་པ་ཤེས་རིག་གི་རྒྱལ་པོ་འོད་མི་འགྱུར་བ་ཡིན་པས། དེའི་ཚེ་སྣང་བ་མཆེད་པ་དེ་རྣམས་རང་སྣང་དུ་ངོས་བཟུང་སྟེ། རང་ངོ་ཤེས་ཤིང་བརྟན་པ་ཐོབ་པར་གྱིས་ཤིག །ངོ་ཤེས་ན་དེ་མ་ཐག་ཏུ་གྲོལ་ཞིང་འདི་མན་ཆད་ཀྱི་བར་དོའི་འཁྲུལ་སྣང་རྣམས་མི་འཆར། ངོ་མ་ཤེས་ན་རང་སྣང་དགྲར་སྡང་བས་ཡང་ནས་ཡང་དུ་འཁྲུལ་ཏེ་དངངས་སྐྲག་འཇིགས་གསུམ་གྱི་སྣང་བ་ཤར་ནས་བར་དོ་ཕྱི་མ་རྣམས་ཀྱི་སྡུག་བསྔལ་འབྱུང་བ་ཡིན། དེའི་དུས་སུ་སྔར་ཀ་དག་ཁྲེགས་ཆོད་དང་། ཁྱད་པར་ལྷུན་འགྲུབ་ཐོད་རྒལ་གྱི་ལམ་ལ་ཞུགས་པའི་གང་ཟག་དབང་པོ་འབྲིང་གི་འབྲིང་པོ་ཆོས་ཉིད་བར་དོར་གྲོལ་རྒྱུའི་རིགས་ཅན་ཡིན་ན། དེ་ལའང་། དབང་པོའི་རིམ་པ་ལྟར་གྲོལ་ལུགས་རབ་འབྲིང་ཐ་མ་གསུམ་ཡོད་པས། དེ་ཡང་བདག་རྐྱེན་གྱིས་རང་སྣང་དུ་ངོ་ཤེས་པ་དང་། གཞན་སྟོབས་ཀྱིས་གདམས་ངག་གསལ་བཏབ་པས་དེ་ཉིད་ངོ་འཕྲོད་པ་བྱུང་ན། འབྲིང་གི་རབ་རྣམས་སྤྱི་གཞི་སྣང་འོད་གསལ་གྱི་སྣང་བ་ཤར་བ་རང་སྣང་སྟོང་པའི་རང་མདངས་སུ་ངོ་ཤེས་པས་བུམ་པ་ཆག་པའི་ནང་གི་ནམ་མཁའ་དང་དབྱེར་མེད་གཅིག་ཏུ་འདྲེས་པ་ལྟར་དབྱིངས་རིག་མ་བུ་འདྲེས་ནས། གྲོལ་བ་ཐོབ་པར་འགྱུར་བ་ཡིན་པས་དེའི་དོན་ངོ་ཤེས་ཤིང་བརྟན་པ་ཐོབ་པར་གྱིས་ཤིག །གྲོལ་བའི་དུས་དེ་ལས་འདས་ན། གཉིས་པ་འོད་གསལ་ཟུང་འཇུག་ལ་ཐིམ་པའི་ཚེ། ཟུང་འཇུག་ཚོམ་བུའི་སྣང་བ་ཞེས་ཞི་ཁྲོའི་ལྷ་ཚོགས་སྒྲ་འོད་ཟེར་གསུམ་དང་བཅས་པ་དབང་པོའི་རིམ་པ་ལྟར་འཆར་ལུགས་གཉིས་སུ་འཆར་བར་གསུངས་པས། དེའི་ཚུལ་ནི། གང་ཟག་དབང་པོ་འབྲིང་གི་འབྲིང་རྣམས་ལ་ཁྲོ་བོ་གཙོ་བོར་གྱུར་བའི་ཞི་ཁྲོའི་ལྷ་ཚོགས་ཡོངས་རྫོགས་སྒྲ་འོད་ཟེར་གསུམ་དང་བཅས་པ་ཅིག་ཆར་དུ་དུས་གཅིག་ལ་འཆར་བའི་ཚེ་རང་སྣང་སྟོང་བའི་རང་གཟུགས་བདེན་མེད་སྒྱུ་མ་ལྟ་བུར་ངོ་ཤེས་པས་སེང་གེའི་གསོབ་མཐོང་བའམ། ལམ་འཕྲང་གི་དགྲ་རང་གི་གྲོགས་སུ་ཤེས་པས་འཇིགས་པ་མེད་པ་ལྟར་རང་སྣང་དུ་ངོ་ཤེས་ན། གྲོལ་བ་ཐོབ་པར་འགྱུར་བ་ཡིན་པས་དེ་དག་གི་དོན་ངེས་ཤིང་བརྟན་པ་ཐོབ་པར་གྱིས་ཤིག །འབྲིང་གི་ཐ་མ་རྣམས་ལ། འབྲས་ཀྱི་ལྗང་བུ་ལྟར་རིགས་ལྔའི་ཚོམ་བུའི་དཀྱིལ་འཁོར་སོགས་ཞི་ཁྲོའི་ལྷ་ཚོགས་རྣམས་ཞག་རེ་རེ་བཞིན་དུ་རིམ་པ་ལྟར་འཆར་ནས་འོང་བ་རྣམས་ངོས་ཟིན་ན་གྲོལ་བར་གསུངས་པ་དེའི་ཚུལ་ནི། གོང་དུ་བཤད་པའི་གཞི་རིག་པའི་ངོ་བོ་དེ་ཉིད་ཀྱི་རང་རྩལ་ལས། ཕྲ་བ་ཡེ་ཤེས་ཀྱི་རླུང་ལྔའི་བྱེད་ལས་ཀྱི་འོད་ལྔ་བྱུང་སྟེ། དེ་ཡང་ཁྱབ་བྱ་གཉུག་མའི་ཕུང་པོ་ལྔ་ལ། ཁྱབ་བྱེད་སངས་རྒྱས་ཀྱི་རིགས་དང་། སྐུ་དང་ཞིང་ཁམས་ཐམས་ཅད་རང་ཆས་སུ་ཡོད་པའི་གནད་ཀྱིས་རིགས་ལྔའི་ཚོམ་བུའི་དཀྱིལ་འཁོར་ནམ་མཁའ་གང་བར་འཆར་ཏེ། དེ་ཡང་ཞག་དང་པོ་ལ། སྟོན་ཁའི་ནམ་མཁའ་སྤྲིན་མེད་པ་ལྟ་བུའི་འོད་མཐིང་ཁའི་གུར་ཁྱིམ་དུ་རྣམ་པར་སྣང་མཛད་ཀྱི་ཚོམ་བུའི་དཀྱིལ་འཁོར་འཆར་རོ། །དེ་བཞིན་དུ་ཞག་ལྷག་མ་བཞི་ལ་འོད་དཀར་པོའི་གུར་ཁྱིམ་དུ་མི་བསྐྱོད་པ། སེར་པོ་ལ་རིན་ཆེན་འབྱུང་ལྡན། དམར་པོ་ལ་སྣང་བ་མཐའ་ཡས། ལྗང་གུ་ལ་དོན་ཡོད་གྲུབ་པ་རྣམས་དེ་ཐམས་ཅད་རང་རང་གི་སེམས་དཔའ་སེམས་མས་བསྐོར་བ་དང་། དེ་བཞིན་དུ་སྤྲུལ་སྐུ་ཐུབ་པ་དྲུག སྒོ་བ་སྒོ་མ་བྱ་བྱེད་གཉིས་དང་བཅས་པའི་ཞི་བ་བཞི་བཅུ་རྩ་གཉིས་ཀྱི་ལྷ་ཚོགས་རྣམས་རིམ་པ་བཞིན་དུ་འཆར་ནས་འོང་ངོ་། །དེ་དག་ཀྱང་སྙིང་ནང་གི་གདངས་ལས་ཕྱིར་ཤར་བའི་འོག་མིན་རྡོ་རྗེ་དབྱིངས་ཀྱི་དཀྱིལ་འཁོར་དུས་དེར་སྣང་བ་ཡིན་པས་རང་སྣང་དུ་ངོ་ཤེས་ཤིང་བརྟན་པ་ཐོབ་པར་གྱིས་ཤིག དེ་ནས་ཞི་བའི་ལྷ་དེ་རྣམས་ཀྱི་རང་རྩལ་ཆོ་འཕྲུལ་ལས། མདུན་གྱི་ནམ་མཁར་དག་པ་རིག་འཛིན་གྱི་ལྷ་ཚོགས་དང་ཁྲག་འཐུང་འབར་བའི་ཁྲོ་བོ་ལྔ་བཅུ་རྩ་བརྒྱད་སྒྲ་འོད་ཟེར་གསུམ་དང་བཅས་པ་ཡང་། རིམ་པ་ལྟར་འཆར་ཏེ་སྒྲ་ནི་འབྱུང་བའི་རང་སྒྲ་ལྡིར་ཆེ་བ་འབྲུག་སྟོང་དུས་གཅིག་ལ་གྲགས་པའམ། རི་རབ་འབུམ་ཉིལ་བ་ལྟ་བུའི་འུར་སྒྲ་དང་ཐུག་ཆོམ། འོད་ནི་རིག་པའི་རང་གདངས་ཁ་དོག་སྣ་ལྔ་གསལ་ལ་འཚེར་བ་དང་། འོད་ཀྱི་གསེབ་ན་ཟེར་ཕྲ་མོ་སོས་ཀའི་ཐང་ལ་སྨིག་རྒྱུ་འགྱུ་བ་ལྟར་ཕྲིག་ཕྲིག་པ་མེ་རེ་རེ་འཆར་རོ། །དེའི་ཀློང་ན་ཞི་ཁྲོའི་ལྷ་ཚོགས་རྣམས་ཀྱང་། སྐུ་ཆེ་བ་ནམ་མཁའ་དང་མཉམ་པ། འབྲིང་བ་རི་རབ་ཙམ་ཆུང་བ་རང་ལུས་བཅོ་བརྒྱད་བརྩེགས་པ་ཙམ་ཡོད་པ་བལྟར་མི་བཟོད་བསམ་གྱིས་མི་ཁྱབ་པ་ནམ་མཁའ་གང་བར་འཆར་ནས་འོང་བ་དེ་དག་རྣམས་ཀྱང་རང་སེམས་ཀྱི་སྣང་བརྙན་ཕྱི་རོལ་དུ་འཆར་བ་ཡིན་པས་མ་འཇིགས་མ་དངངས་མ་སྐྲག་པར། སྔར་ཁྱོད་སྐྱེ་གནས་བར་དོ་ན་ཡོད་དུས་བླ་མ་རྣམས་ཀྱིས་ཞི་ཁྲོའི་དབང་བསྐུར་བའི་ཚེ་ལྷ་ངོ་སྤྲད་པའི་ཡི་དམ་གྱི་ལྷ་དེ་རྣམས་ཡིན་པས་ངོ་ཤེས་ཤིང་བརྟན་པ་ཐོབ་པར་གྱིས་ཤིག འདི་དག་གི་དུས་སུ་འཇུག་གྲོལ་མཐར་ཕྱིན་གསུམ་གྱི་གདམས་པའི་གནད་དྲན་དགོས་པ་ནི། ཨོ་རྒྱན་པདྨའི་སྙན་རྒྱུད་རྡོ་རྗེའི་ཚིག་རྐང་ལས། འཇུག་དང་གྲོལ་དང་མཐར་ཕྱིན་ཞེས་བྱ་བས༔ དུས་གསུམ་གནད་ཀྱི་གདམས་པ་དྲན་བྱས་པའི༔ ཆོས་ཉིད་མར་ཐིམ་མ་པང་བུ་རྒྱུག་འདྲ༔ དེ་དག་དབང་འབྲིང་ལོངས་སྐུར་གྲོལ་བྱེད་ལམ༔ ཞེས་གསུངས་པའི་གནད་གསུམ་གྱི་ནང་ནས་འཇུག །ཤེས་པའི་གནད་འདི་ལ་གཉིས་ཏེ། དང་པོ་རང་གི་སྙིང་ཁ་ནས་འོད་ཀྱི་ཟེར་ཐག་ཚོན་སྐུད་སྦྲེལ་མ་ལྟ་བུ་ལྷ་རྣམས་ཀྱི་ཐུགས་ཀར་ཟུག་པ་ནི་རིག་པ་འོད་ལ་ཕར་འཇུག་པའི་གནད་ཅེས་བྱ་བ་ཡིན་པས་འདིའི་དུས་སུ་ཐེ་ཚོམ་མེད་པར་སྔར་འདྲིས་ཀྱི་མི་ཕྱིས་མཐོང་བ་ངོ་ཤེས་ཏེ་སྒྲོ་འདོགས་ཆོད་པ་ལྟར་སྔར་གྱི་དོན་རྣམས་ངོས་ཟིན་པར་གྱིས་ལ་ཤེས་པ་གང་དུའང་མི་འཕྲོ་བར་རང་བཞིན་གྱི་བསམ་གཏན་ལ་གནས་པར་གྱིས་ཤིག །དེར་ལྷ་གང་དུ་ངོ་ཤེས་ཀྱང་དེར་གྲོལ་བ་ཐོབ་པ་ཡིན། གྲོལ་བ་དེ་ཐོབ་ནས་སླར་ཚོམ་བུའི་དཀྱིལ་འཁོར་རྣམས་ཚུར་འདུས་ནས་རང་གི་སྙིང་ཀར་ཐིམ་པར་འགྱུར་བས་དེ་འོད་རིག་པ་ལ་ཚུར་འཇུག་པའི་གནད་ཅེས་བྱ་བ་ཡིན་པས་འདིའི་དུས་སུ་མ་པང་དུ་བུ་འཇུག་ལྟ་བུའི་གདམས་ངག་དྲན་པར་གྱིས་དང་། དེས་སྔར་གོམས་པའི་གདོད་མའི་འོད་གསལ་མ་ལྟ་བུ་དང་། ཕྱིས་ཤར་བའི་རང་བྱུང་གི་འོད་གསལ་བུ་ལྟ་བུ་གཉིས་འོད་གསལ་མ་བུ་འདྲེས་ནས་གྲོལ་བ་ཐོབ་པར་འགྱུར་བ་ཡིན་པས་དེའི་དོན་ངོ་ཤེས་ཤིང་བརྟན་པ་ཐོབ་པར་གྱིས་ཤིག འཇུག་པའི་དུས་འདིར་བསམ་གཏན་གྱི་ཞག་ལྔར་གནས། ཞག་དེ་ཡང་ད་ལྟའི་ཉིན་ཞག་གི་ངེས་པ་འདི་ཉིད་མ་ཡིན། བསམ་གཏན་གྱི་ཞག་ཡིན་པས་དེའི་ཚུལ་ནི་རང་ཉིད་ལ་སྔར་གསོན་པོའི་དུས་སུ་གནས་པ་ཏིང་ངེ་འཛིན་གྱིས་ཡུལ་སྣང་བ་རྟོག་པ་སྔ་མ་འགགས། ཕྱི་མ་མ་ཤར་བའི་བར་ཅི་ཙམ་གནས་པའི་ཐུན་ཚོད་དེ་ལ་བསམ་གཏན་གྱི་ཞག་ཅེས་མིང་བཏགས་པས། སྔར་གསོན་དུས་བསམ་གཏན་ལ་གོམས་འདྲིས་ཆེན་པོ་ཡོད་པ་རྣམས་ལ་ཡུན་རིང་དུ་འཆར་བས་སྐབས་འདིར་རང་ངོ་ཤེས་པ་དང་གྲོལ་བ་ཐོབ་པ། དུས་མཉམ་དུ་འོང་བར་འགྱུར་བ་ཡིན། གོམས་འདྲིས་ཆེར་མེད་ན་ཡུད་ཙམ་རེ་ལས་མི་བརྟན་པས་ངོ་མ་ཤེས་ན་བར་དོ་ཕྱི་མ་རྣམས་འཆར་བར་འགྱུར་བ་ཡིན་པས་དེའི་ཕྱིར་འཇུག་པ་རྣམས་ཤེས་པའི་གནད་གཉིས་པོ་དེ་ཡང་། ངོ་ཤེས་ཤིང་བརྟན་པ་ཐོབ་པར་གྱིས་ཤིག གྲོལ་བའི་དུས་དེ་ལས་འདས་ན། གསུམ་པ་ཟུང་འཇུག་ཡེ་ཤེས་ལ་ཐིམ་པའི་ཚེ། ཆོས་དབྱིངས་མེ་ལོང་མཉམ་ཉིད་སོར་རྟོག་སྟེ། ཡེ་ཤེས་བཞི་སྦྱོར་གྱི་སྣང་བ་སྟེང་དུ་འོད་ཟླུམ་རྨ་བྱའི་གདུགས་ལྟ་བུ་དང་བཅས་པ་འཆར་བ་ནི་རྡོ་རྗེ་སེམས་དཔའི་ཁོང་གསེང་གི་ལམ་ཞེས་བྱ་བ་སྟེ། དེ་ཡང་རང་རིག་གི་རྩལ་སྣང་ཕྱི་རོལ་དུ་ཤར་བ་ཡིན་པས་ངོ་ཤེས་ཤིང་བརྟན་པ་ཐོབ་པར་གྱིས་ཤིག འདིའི་དུས་སུ་གནད་གསུམ་ལས་གྲོལ་བ་ལུས་ཀྱི་གནད་ཅེས་བྱ་བ་སྣང་བ་དེ་ཀུན་རང་སྣང་ཡིན་པར་ཐག་ཆོད་ན་ཕུང་པོ་ལྔའི་བདག་ཏུ་འཛིན་པ་རང་སར་དེངས་ཏེ་ལུས་གདོས་བྱས་དང་བྲལ་བའི་འོད་ལུས་སུ་གྲོལ། རིག་པ་དྲི་མ་མེད་པ་ཉོན་མོངས་པ་ལས་གྲོལ། དེ་ལས་ཕྱི་ནང་མེད་པའི་གཟུང་འཛིན་ལས་གྲོལ་བས་དེ་གསུམ་ནི་གྲོལ་བ་གསུམ་ཞེས་བྱ་བ་དེ་ཡིན་པས། སྐབས་འདིར་མི་འགྱུར་བ་གསེར་གྱི་ཐུར་མ་ལྟ་བུའི་གདམས་ངག་དགོས་པས་དེ་དྲན་ནས་ངོ་ཤེས་ཤིང་བརྟན་པ་ཐོབ་པར་གྱིས་ཤིག ༼དེ་ཡང་སྙིང་ནང་དུ་ཆུ་ཞུགས་པ་གསེར་གྱི་ཐུར་མས་ཡིད་གཞུངས་ཏེ་འདྲེན་པ་ལྟར་འོད་སྣང་གི་སྣམ་བུ་ལ་མ་ཡེངས་པར། རང་སྣང་དུ་ཤེས་ནས་བལྟ་བ་རྒྱུན་གྱི་ཏིང་ངེ་འཛིན་སྐྱེའོ། །༽བཞི་བ་ཡེ་ཤེས་ལྷུན་གྲུབ་རིན་པོ་ཆེར་ཐིམ་པའི་ཚེ་ཡེ་ཤེས་ཀྱི་སྣང་བ་དེ་དག་སྟེང་གི་འོད་ཟླུམ་ལ་འདུས་ནས་ལྷུན་འགྲུབ་སྐུ་གསུམ་གྱི་རོལ་བར་འཆར་བས་ཆོས་སྐུ་ཀ་དག་གི་སྣང་བ་ནམ་མཁའ་སྤྲིན་མེད་པ་ལ་འོད་ལྔའི་མུ་ཁྱུད་ཀྱིས་བསྐོར་བ་ལྟ་བུ་ལ། དག་པ་ལོངས་སྐུ་དང་། སྤྲུལ་སྐུའི་ཞིང་ཁམས་དང་དཀྱིལ་འཁོར། མ་དག་པ་འགྲོ་དྲུག་གི་སྣང་བ་སྣ་ཚོགས་སྐད་ཅིག་ལ་འཆར་བས། འདིའི་དུས་སུ་ཤར་ལུགས་དྲུག་སྒོ་གཉིས་དང་བརྒྱད་ལ། ལྷུན་གྲུབ་ཀྱི་སྣང་བའི་འཆར་ལུགས་བརྒྱད་དུ་གསུངས་པས། སྐབས་འདིར་གནད་ལུགས་གསུམ་ལས་མཐར་ཕྱིན་པ་ངོ་ཤེས་པའི་གནད་འདིར་དགོས་པས་ངོ་ཤེས་ན་དབྱིངས་སུ་གྲོལ། མ་ཤེས་ན་འཁོར་བར་འཁྱམས་པའི་ལམ་ཁ་བྲག་ལྟ་བུ་ཡིན་པས། ཁྱོད་རང་གི་རང་སྣང་གི་འཆར་ཚུལ་འདི་རྣམས་ངོས་ཟིན་པར་གྱིས་ལ། འདི་ནས་གཞན་དུ་མ་ཡེངས་མ་འཁྲུལ་བར་ཕྱིར་མི་ལྡོག་པ་དཔག་ཆེན་གྱི་མདའ་༼ཕྱིར་མི་ལྡོག་པ་གྱད་རྩལ་བོ་ཆེས་མདའ་འཕང་བའི་མངལ་ནས་སྐྱེས་པའི་བུ་ལྟར་༽འཕང་བ་ལྟ་བུའི་གདམས་ངག་གི་དོན་དྲན་ནས་ངོ་ཤེས་ཤིང་བརྟན་པ་ཐོབ་པར་གྱིས་ཤིག །ངོ་ཤེས་ན་འདིའི་དུས་སུ་ཁྱོད་ལ་དབང་པོ་ལ་སོགས་པ་མངོན་པར་ཤེས་པ་དྲུག་གམ་རྒྱས་པར་དབྱེ་ན་རེ་རེ་ལ་དྲུག་ཚན་དྲུག སྐུ་གསུང་ཐུགས་ཀྱི་མངོན་པར་ཤེས་པ་གསུམ་ཚན་གསུམ་རྣམས་རྗེས་སུ་དྲན་པ་གསུམ་ལ་བརྟེན་ནས། ལྷུན་གྲུབ་ཏུ་ངོ་ཤེས་ནས་གདེང་ཐོབ་པའི་ལྷུན་གྲུབ་ཀྱི་འཆར་སྒོ་བརྒྱད། རང་རིག་གི་ཀློང་དུ་ཐིམ་ལུགས་བརྒྱད་དུ་ཐིམ་པའི་མངོན་པར་ཤེས་པ་རྣམས་དང་མི་བརྗེད་པའི་གཟུངས་དང་། ཏིང་ངེ་འཛིན་རྣམས་ཐོབ་པས་སྔར་ཐོབ་པའི་ཆོས་རྣམས་ཐམས་ཅད་རྒྱུད་ལ་དུས་གཅིག་ཏུ་འཆར། དེ་བཞིན་དུ་མ་ཐོས་པའི་ཆོས་རྣམས་ཀྱང་རྒྱུད་ལ་འཆར་བར་འགྱུར་བའི་ཆོས་ཉིད་ཀྱི་བར་དོ་ཞེས་བགྱི་བ་རྒྱུན་གྱི་ཏིང་ངེ་འཛིན་རྒྱུད་ལ་རང་བཞིན་གྱིས་འཆར་བའི་ནང་གསལ་འཕོ་འགྱུར་མེད་པ་གདོད་མའི་དབྱིངས་སུ་མངོན་པར་བྱང་ཆུབ་པ་ནི་ལྷུན་གྲུབ་ལོངས་སྐུའི་བར་དོ་ལ་གྲོལ་བ་ཐོབ་པ་ཞེས་ཁྱོད་ཀྱི་མཐར་ཐུག་འབྲས་བུའི་གྲོལ་པ་འདི་ཡིན་པས་ངོ་ཤེས་ཤིང་བརྟན་པ་ཐོབ་པར་གྱིས་ཤིག ༼དེ་ལྟར་ཆོས་ཉིད་བར་དོའི་སྣང་བ་བཞི་པོ་དེ་དག་གང་དུ་གྲོལ་ཡང་དེ་མན་ཆད་ཀྱི་སྣང་བ་ནི་མེད་དོ། །དེ་ཡང་དབང་པོ་གསུམ་གྱི་རབ་སྐད་ཅིག་གསུམ་ལ་གྲོལ། འབྲིང་ཞག་ལྔ་ནས་གྲོལ་ཞིང་བརྟན་པ་ཐོབ། ཐ་མ་སྐད་ཅིག་ཉི་ཤུ་རྩ་གཅིག་ལ་བརྟན་པ་ཐོབ་ངེས་པ་ཡིན་ནོ། །
ལུགས་འབྱུང་སྲིད་པའི་བར་དོའི་ངོ་སྤྲོད།
གསུམ་པ་སྲིད་པ་བར་དོའི་གསལ་འདེབས་ལུགས་ལའང་གཉིས་ཏེ། ཐུན་མོང་མ་ཡིན་པ་རྫོགས་ཆེན་རང་ལུགས་ཀྱི་གདམས་པ་རང་བཞིན་སྤྲུལ་སྐུའི་ཞིང་དུ་དབུགས་དབྱུང་ཚུལ་ནི། ལོགས་སུ་བྲིས་པ་ལྟར་ཤེས་དགོས། སྐྱེ་བོ་ཕལ་བ་དང་། ལམ་ཐུན་མོང་པར་ཞུགས་པའི་གང་ཟག་རྣམས་ལ་གོ་སླ་ཞིང་ཕན་ཐོགས་རྒྱ་ཆེན་པོར་འགྱུར་བའི་ཕྱིར། འདི་ལྟར་དུ་གསལ་འདེབས་པར་བྱའོ། །༽ཀྱེ་འཇིག་རྟེན་འདི་ནས་འཇིག་རྟེན་ཕ་རོལ་དུ་སོང་བའི་ཚེ་དུས་ལས་འདས་པ་ཆེ་གེ་མོ་ཁྱོད་མ་ཡེངས་པར་ལེགས་པར་ཉོན་ཅིག ད་རེས་གོང་དུ་བཤད་པའི་ཆོས་ཉིད་བར་དོའི་འོད་གསལ་ཤར་བ་དེ་རྣམས་རང་སྣང་དུ་ངོ་མ་ཤེས་པར་འཇིགས་ཤིང་སྐྲག་པའི་རྐྱེན་གྱིས་སྲིད་པ་བར་དོའི་བག་ཆགས་སད་བྱེད་བྱས་ནས། རླུང་སེམས་ཕྲ་བའི་འབྱུང་བཞི་དང་བཅས་པ་དེ་རྣམས་ཀྱི་རྒྱུ་རྐྱེན་ལས། ལུགས་འབྱུང་གི་རྟེན་འབྲེལ་བརྒྱད་ཀྱི་རྨི་ལམ་རྨིས་པ་ལྟར་སྲིད་པ་བར་དོའི་ཡིད་གཟུགས་གྲུབ་པར་འགྱུར་བས་དེའི་ཚུལ་ནི་དོན་ཐིག་འགྲོ་བ་ཀུན་གྲོལ་གྱི་རྒྱུད་ལས། སྔོན་འབྱུང་སྲིད་པའི་ཤ་གཟུགས་ཅན༔ དབང་པོ་ཀུན་ཚང་ཐོགས་མེད་རྒྱུ༔ ལས་ཀྱི་རྫུ་འཕྲུལ་ཤུགས་དང་ལྡན༔ རིགས་མཐུན་ལྷ་མིག་དག་གིས་མཐོང༔ ཞེས་གསུངས་པའི་དོན་ནི། སྔར་ལྟར་ཤ་ཁྲག་གི་ལུས་དངོས་སུ་གྲུབ་པ་མེད་ཀྱང་། རྣམ་སྨིན་གྱི་དབང་གིས་རྨི་ལམ་གྱི་ལུས་ལྟ་བུ་བྱིས་པ་ལོ་བརྒྱད་པ་ཙམ་གྱི་ལུས་ལྟར་ཤ་སྙི་ཞིང་སྲན་མི་བཟོད་པ་མིང་བཞིའི་ཕུང་པོ་ཡིད་ལུས། ༼ཀློང་ཆེན་པས། གཟུགས་མེད་རང་གི་ཤེས་པ་ཀུན་གཞིའི་ངང་། །ཞེས་དང་། ཚོར་བ། འདུ་ཤེས། འདུ་བྱེད། རྣམ་ཤེས། མིང་བཞིའི་ཕུང་པོར་སེམས་ཀྱི་རྒྱུད་བརྟེན་ནས་ཞེས་གསུངས་པས། གང་དུ་ཤི་བའི་ས་དེ་ན། ཚོར་བ། འདུ་ཤེས། འདུ་བྱེད་རྣམ་པར་ཤེས་པའི་ཁམས་ཀུན་གཞི་ལ་ཐིམ་པའི་ཆ་བཞི་ལ་མིང་བཞིའི་ཕུང་པོ་ཞེས་བྱ་སྟེ། ཡིད་ཀྱི་ལུས་ལ་སེམས་ཀྱི་རྒྱུད་བརྟེན་པའི་མིང་བཞིའི་ཕུང་པོ་ཞེས་བྱའོ། །༽ཞེས་བག་གྲང་ལ་ཚིག་པ་ཟ་ཞིང་། ཤིན་ཏུ་སྐྱོ་བ་ལུས་དངོས་དང་བྲལ་བའི་རྐྱེན་གྱིས་ས་གཅིག་ཏུ་སྡོད་དབང་མེད་པར་ཡད་ཡུད་ཕྱད་ཕྱོད་དུ་འཁྱམས་ནས་རྒྱུག་པ་སྲིད་པ་བར་དོར་ཞག་བཞི་བཅུ་ཞེ་དགུར་གནས་དགོས་པའི་ཕྱེད་ཡན་ཆད་ལ་སྔ་མའི་བག་ཆགས་དང་བྱད་གཟུགས་ཕྱེད་མན་ཆད་ལ་ཕྱི་མའི་བག་ཆགས་དང་བྱད་གཟུགས་ཀྱི་སྣང་བ་འཆར་བར་གསུངས་ཀྱང་སྔར་གོམས་པའི་བག་ཆགས་ཀྱིས་སྔ་མའི་བྱད་གཟུགས་འཛིན་པ་མང་ངོ་། །དེ་ཡང་ལས་མཐུན་འདོད་ཡོན་ལ་སྤྱོད་པའི་དབང་པོ་ཀུན་ཚང་བར་ཡོད་པས་སྔར་བས་དྲན་པ་བདུན་འགྱུར་གྱིས་གསལ་བ། གང་དུ་སྐྱེ་འགྱུར་གྱི་མའི་མངལ་དང་རྡོ་རྗེ་གདན་གཉིས་མ་གཏོགས་པའི་རི་ར་བ་རྩིག་པ་ལ་སོགས་ཐོགས་བཅས་ཀྱི་དངོས་པོ་གང་ལའང་ཐོགས་མེད་དུ་རྒྱུ་ཞིང་ལས་ཀྱི་རྫུ་འཕྲུལ་གྱི་ཤུགས་དང་ལྡན་པ། རང་དང་རིགས་མཐུན་པའི་ནང་ཕན་ཚུན་དང་། ལྷ་མིག་ཅན་རྣམས་ཀྱིས་མཐོང་ཞིང་གཞན་གྱིས་མི་མཐོང་བ་སོགས་མཚན་ཉིད་དེ་ལྟ་བུ་དང་ལྡན་པའི་བར་དོའི་རྟགས་ནི་འགྲོ་བའི་ལམ་བཞི་ཡ་ང་བའི་གཡང་ས་གསུམ། འཇིགས་པའི་སྒྲ་བཞི། ངེས་པའི་རྟགས་ལྔ། མ་ངེས་པའི་རྟགས་དྲུག གར་སྐྱེས་ལས་ཀྱི་མཐོང་སྣང་སྣ་ཚོགས་ལ་སོགས་རང་སྣང་འཁྲུལ་བའི་སྣང་ཚུལ་གྱི་འཇིགས་སྐྲག་སྡུག་བསྔལ་བསམ་གྱིས་མི་ཁྱབ་པ་འཆར་བར་འགྱུར་རོ། །དེའི་དུས་སུ་བདག་རྐྱེན་དང་གཞན་རྐྱེན་ཅི་རིགས་པ་དག་གིས་བསྐུལ་ནས་རྗེས་དྲན་དྲུག་ལ་སོགས་ལ་བརྟེན་པའི་གདམས་ངག་གསལ་ཐེབས་ན་བཟང་པོའི་བག་ཆགས་སད་དེ་འདུན་པ་ཁོ་ནས་བདེ་འགྲོ་ཐོབ་པའི་དུས་ཡིན་ཏེ། ཞི་ཁྲོའི་བར་དོའི་རྩ་ཚིག་ལས། ཀྱེ་མ་བདག་ལ་སྲིད་པ་བར་དོ་འཆར་དུས་འདིར༔ འདུན་པ་རྩེ་གཅིག་སེམས་ལ་བཟུང་བྱས་ནས༔ བཟང་པོ་ལས་ཀྱི་འཕྲོ་ལ་ནན་གྱིས་མཐུད༔ མངལ་སྒོ་བཀག་ནས་རུ་ལོག་དྲན་པར་བྱ༔ སྙིང་རུས་དག་སྣང་དགོས་པའི་དུས་གཅིག་ཡིན༔ མིག་སེར་སྤང་ལ་བླ་མ་ཡབ་ཡུམ་བསྒོམ༔ ཞེས་གསུངས་པ་དང་། གཞན་ཡང་དོན་ཐིག་འགྲོ་བ་ཀུན་གྲོལ་ཀྱི་རྒྱུད་ལས། དེ་ཚེ་འཁོར་བ་རུ་ལོག་པ༔ རབ་ཀྱིས་སྒྱུ་མ་ལྟ་བུར་བལྟ༔ འབྲིང་གིས་བསྐྱེད་རྫོགས་ཟུང་འཇུག་བསྒོམ༔ ཐ་མས་སྐྱབས་འགྲོ་འཕོ་བ་སྦྱོང༔ ཞེས་གསུངས་པས། ལམ་ཞུགས་ཀྱི་གང་ཟག་དབང་པོ་འབྲིང་གི་ཐ་མ་སྲིད་པ་བར་དོར་གྲོལ་ཚུལ་འདི་ལའང་། དབང་པོའི་རིམ་པ་ལྟར་གྲོལ་ལུགས་རབ་འབྲིང་ཐ་མ་གསུམ་ཡོད་པའི་འབྲིང་གི་ཐ་མའི་རབ་ཀྱིས་བར་དོའི་འཁྲུལ་སྣང་ཐམས་ཅད་བདེན་མེད་སྒྱུ་མར་ཤེས་པའི་ངང་ནས་འཁོར་བ་ཞེན་ལོག་གི་མངལ་སྒོ་འགག་སྟེ་བཟློག །འབྲིང་གི་ཐ་མའི་འབྲིང་གིས་བསྐྱེད་རྫོགས་ཟབ་མོའི་དམིགས་པས་བཟློག འབྲིང་གི་ཐ་མའི་ཐ་མ་རྣམས་ཀྱིས་སྐྱབས་འགྲོ་སེམས་བསྐྱེད་འཕོ་བ་ལ་སོགས་པའི་སྒོ་ནས་མངལ་སྒོ་ངན་པ་རྣམས་སྤངས་ཏེ། བཟང་པོ་བདམས་ནས་རུ་ལོག་གི་གདམས་ངག་དྲན་དགོས་པ་དེའི་ཚུལ་ནི། ད་ལྟ་ཁྱོད་རང་འགྲོ་བ་རྒྱུད་ལྔའི་ལམ་ཁ་བྲག་གི་འདུས་མདོ། །ཡར་འགྲོ་མར་འགྲོ་གཉིས་ཀྱི་ས་མཚམས་ན་ཡོད་པའི་སྐབས་འདིར་རྟ་ཁ་སྲབ་ཀྱིས་བསྒྱུར་བ་ལྟར་འདུན་པའི་སེམས་རྐྱེན་གྱིས་བསྒྱུར་ཤིན་ཏུ་སླ་བས། དེའི་ཕྱིར་ཁྱོད་མ་ཡེངས་མ་འཁྲུལ་བར་བར་དོའི་སྣང་ཚུལ་འདི་རྣམས་ཐམས་ཅད་བདེན་མེད་སྒྱུ་མར་ཤེས་པའི་ངང་ནས་བླ་མ་དང་དཀོན་མཆོག་གསུམ་ལ་སྐྱབས་འགྲོ། ཕ་མ་སེམས་ཅན་ལ་སེམས་སྙོམས། མར་ཤེས་དྲིན་དྲན། དྲིན་གཟོ། བྱམས་པ་བསྒོམ་པ་སོགས་དང་། དེ་རྣམས་ཀྱི་སྡུག་བསྔལ་ལ་དམིགས་ནས་སྙིང་རྗེ་བསྒོམ་པ་སོགས་དང་། དེ་དག་གི་དོན་ཕྱིར། སངས་རྒྱས་ཐོབ་འདོད་ཀྱི་བྱང་སེམས་བསྒོམ་པ་སོགས་ཀུན་སློང་རྣམ་པར་དག་པའི་རྣམ་སྨིན་བརྒྱད་ལྡན་ནམ། མཐོ་རིས་ཡོན་ཏན་བདུན་ལྡན་དལ་འབྱོར་གྱི་ལུས་རྟེན་གཅིག་བླངས་ཏེ། བསྟན་པ་དང་སེམས་ཅན་གྱི་དོན་རླབས་པོ་ཆེ་སྒྲུབ་ནུས་པ་ཞིག་བྱ་སྙམ་པའི་ངང་ནས། གང་དུ་སྐྱེ་འགྱུར་གྱི་ཕ་མ་འདུ་འཕྲོད་ཀྱི་སྣང་བ་མཐོང་བའང་བླ་མ་ཡི་དམ་དབྱེར་མེད་ཡབ་ཡུམ་གྱི་རྣམ་པར་བསྒོམ་པའི་མངལ་དུ་རང་ཉིད་སེམས་བསྐྱེད་ཀྱི་འཕེན་ཤུགས་དྲག་པོ་ཞུགས་ཏེ། མངལ་སྒོ་བཀག་ནས་སྤྲོས་བྲལ་སྟོང་པ་ཉིད་ཀྱི་ངང་ལ་མཉམ་པར་འཇོག་པ་སོགས་དག་པའི་རྩལ་སྦྱོང་གྱིས་ཤིག །དེ་ལྟར་གལ་སྲིད་རང་སྟོབས་ཀྱིས་གྲོལ་བར་མ་ནུས་ནའང་ཁྱོད་ཀྱི་ཤུལ་དུ་མཆིས་པའི་ཉེ་དུ་འདི་རྣམས་ཀྱི་བླ་མ་དང་དཀོན་མཆོག་གསུམ་ལ་མཆོད་པ་དང་། སྐྱེ་བོ་ལ་སྦྱིན་གཏོང་། མདོ་སྡེ་ཟབ་མོ་ཀློག་འདོན། བླ་མ་དགེ་བའི་བཤེས་གཉེན་མཚན་ལྡན་རྣམས་ཀྱིས་རྡོ་རྗེ་ཐེག་པའི་རྒྱུད་སྡེ་དུ་མའི་དཀྱིལ་འཁོར་ལ་བརྟེན་ནས་ཁྱོད་ཀྱི་དོན་བསྒྲུབ་པས་ཁྱོད་ལ་ཕན་ཐོགས་རྒྱ་ཆེན་པོ་འབྱུང་ཞིང་། གཞན་སྟོབས་ཀྱིས་གྲོལ་བར་འགྱུར་ངེས་པ་ཡིན་པས་དེའི་ཕྱིར་ཁྱོད་ཤི་བ་ལ་སྡུག་བསྔལ་ཅི་ཡང་མི་འཚལ། ཁྱད་པར་ངེད་ཅག་དཔོན་སློབ་རྣམས་ཀྱིས་ཀྱང་། འཕགས་པ་ཐུགས་རྗེ་ཆེན་པོའི་ལྷ་སྔགས་ཏིང་ངེ་འཛིན་བསྒོམས་ནས་བྱམས་པ་དང་། སྙིང་རྗེ་བྱང་ཆུབ་ཀྱི་སེམས་ཁྱད་པར་ཅན་དང་ལྡན་པའི་ངང་ནས། རྟེན་བསྐྱེད་འགུགས། བགེགས་སྡིག་སྦྱང་བ། བར་དོའི་ངོ་སྤྲོད་སྡིག་བཤགས་སྒྲིབ་སྦྱང་། ཟས་གཏད་ཡོན་འབུལ། ལམ་སྟོན་འཕོ་བ་ལ་སོགས་ཟབ་ལམ་གྱི་གདམས་པ་ཁྱད་པར་ཅན་གྱི་སྒོ་ནས་ཁྱོད་ཀྱི་དོན་ཆེན་སྒྲུབ་པ་ཡིན་པས་ཁྱོད་རང་གིས་ཀྱང་བར་དོའི་སྣང་ཚུལ་བདེན་མེད་སྒྱུ་མ་ལྟ་བུར་ཤེས་པའི་ངང་ནས་མར་གྱུར་མཁའ་མཉམ་གྱི་སེམས་ཅན་ཐམས་ཅད་ལ་བྱམས་པ་དང་སྙིང་རྗེ་དེ་རྣམས་ཀྱི་དོན་དུ་བྱང་ཆུབ་ཐོབ་འདོད་ཀྱི་སེམས་བསྐྱེད་རྒྱ་ཆེན་པོ་དང་ལྡན་པའི་ངང་ནས་དམིགས་པ་འདི་བཞིན་དུ་མཛོད་ཅིག །
སྡིག་པ་བཤགས་པའི་ཆོ་ག
ཁྱོད་རང་གི་མདུན་གྱི་ནམ་མཁར་རྩ་བརྒྱུད་བླ་མ་རྣམས་དང་། ཀུན་ཏུ་བཟང་པོ། རིགས་ལྔའི་སངས་རྒྱས། རྡོ་རྗེ་འཆང་ཆེན། རྫོགས་ཆེན་སྟོན་པ་བཅུ་གཉིས། སངས་རྒྱས་རབས་བདུན། སྨན་བླ་མཆེད་བརྒྱད། ལྟུང་བཤགས་ཀྱི་ལྷ་སངས་རྒྱས་སུམ་ཅུ་རྩ་ལྔ། སྐལ་བཟང་སངས་རྒྱས་སྟོང་ལ་སོགས། ཕྱོགས་བཅུ་དུས་གསུམ་གྱི་སངས་རྒྱས་རྣམས་ལ་ཉེ་བའི་སྲས་བརྒྱད་ལ་སོགས། བྱང་ཆུབ་སེམས་དཔའ་སེམས་མ་དཔག་ཏུ་མེད་པས་བསྐོར་བ་སྤྲིན་དཔུང་གཏིབ་པ་བཞིན་དུ་བཞུགས་པའི་མོས་པ་གྱིས་ལ་དེ་རྣམས་ཀྱི་སྤྱན་སྔར་ཁྱེད་རང་གི་གཙོར་བྱས་པའི་སེམས་ཅན་ཐམས་ཅད་འཁོད་པར་བསམ་པའི་མདུན་གྱི་ནམ་མཁར་བླ་མ་སངས་རྒྱས་བྱང་སེམས་སོགས་བཞུགས་པ་རྟེན་གྱི་སྟོབས་དང་། ཕྱག་འཚལ་སྐྱབས་འགྲོ་སྨོན་ལམ་རྣམས་གཉེན་པོ་ཀུན་ཏུ་སྤྱོད་པའི་སྟོབས། སྔར་བྱས་ཀྱི་ལས་ངན་ལ་འགྱོད་སེམས་དྲག་པོ་བྱེད་པ་རྣམ་པར་སུན་འབྱིན་པའི་སྟོབས། ཕྱིན་ཆད་སྲོག་ལ་བབ་ཀྱང་སྡིག་པའི་ལས་སྤོང་སྙམ་པ་སོར་ཆུད་པའི་སྟོབས་ཏེ། སྟོབས་བཞི་པོ་དེ་དག་རང་རྒྱུད་ལ་ཚངས་བར་བརྟེན་བཞིན་པའི་ངང་ནས་བླ་མ་དང་གདམ་ངག་ལ་ཡིད་རབ་ཏུ་སྤྲོ་ཞིང་དོན་དུ་གཉེར་བ་དངས་བའི་དད་པ། ལས་རྒྱུ་འབྲས་ལ་ཐེ་ཚོམ་མེད་པ་ཡིད་ཆེས་ཀྱི་དད་པ། བསྒྲུབ་བྱའི་འབྲས་བུ་སེམས་ཅན་གྱི་དོན་དུ་སངས་རྒྱས་ཀྱི་གོ་འཕང་མྱུར་དུ་ཐོབ་པར་འདོད་པའི་དད་པ་སྟེ། དད་གསུམ་བརྟན་པོའི་ཡིད་ཀྱིས་མོས་གུས་གདུང་ཤུགས་དྲག་པོས་ཁ་ཙམ་དང་ཚིག་ཙམ་མ་ཡིན་པར་སྙིང་གི་དཀྱིལ་དང་། རུས་པའི་གཏིང་ནས་བཟོད་མེད་དུ་འབར་བ་མཆི་མ་འཁྲུགས་པ་ཙམ་དུ་བསྐྱེད་ལ། ངག་དངས་བའི་སྒོ་ནས་ཕྱག་འཚལ་སྐྱབས་འགྲོ་སྨོན་ལམ་རྣམས་རྗེས་ཟློས་བྱེད་པའི་མོས་པ་དང་། ལུས་གུས་པའི་སྒོ་ནས་ཐལ་མོ་སྦྱར་དེ་རང་གི་ལུས། ཞིང་གི་རྡུལ་སྙེད་ཀྱི་གྲངས་དང་མཉམ་པར་སྤྲུལ་ཏེ་མཁའ་ཁྱབ་ཀྱི་སེམས་ཅན་ཐམས་ཅད་དང་ལྷན་ཅིག་ཏུ་ནམ་མཁར་བཞུགས་པའི་ལྷ་ཚོགས་རྣམས་ལ་ཕྱག་འཚལ་བའི་མོས་པ་མཛོད་ཅིག །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དཔལ་གདོད་མའི་མགོན་པོ་ཆོས་སྐུ་རྒྱལ་བ་ཀུན་ཏུ་བཟང་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ངེས་པ་ལྔ་ལྡན་ལོངས་སྐུ་རྒྱལ་བ་རིགས་ལྔ་འཁོར་དང་བཅས་པ་རྣམས་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྫོགས་ཆེན་སྟོན་པ་བཅུ་གཉིས་འཁོར་དང་བཅས་རྣམས་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམ་པར་གཟིགས་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གཙུག་ཏོར་ཅན་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཐམས་ཅད་སྐྱོབ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འཁོར་བ་འཇིགས་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གསེར་ཐུབ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་སྲུང་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དཔལ་རྒྱལ་བ་ཤཀྱ་ཐུབ་པ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བྱམས་པ་མགོན་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྨན་གྱི་བླ་བཻཌཱརྱ་འོད་ཀྱི་རྒྱལ་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཚན་ལེགས་པར་ཡོངས་བསྒྲགས་དཔལ་གྱི་རྒྱལ་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་པོ་ཆེ་དང་ཟླ་བ་དང་པདྨས་རབ་ཏུ་བརྒྱན་པ་མཁས་པ་གཟི་བརྗིད་སྒྲ་དབྱངས་ཀྱི་རྒྱལ་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གསེར་བཟང་དྲི་མེད་རིན་ཆེན་སྣང་བརྟུལ་ཞུགས་གྲུབ་པའི་རྒྱལ་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མྱ་ངན་མེད་མཆོག་དཔལ་གྱི་རྒྱལ་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཆོས་བསྒྲགས་རྒྱ་མཚོའི་དབྱངས་ཀྱི་རྒྱལ་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཆོས་རྒྱ་མཚོའི་མཆོག་གི་བློས་རྣམ་པར་རོལ་བ་མངོན་པར་མཁྱེན་པའི་རྒྱལ་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་མི་འཁྲུག་པའི་རྒྱལ་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ངན་སོང་ཐམས་ཅད་ཡོངས་སུ་སྦྱོང་བའི་རྒྱལ་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་དཔག་མེད་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་གཙུག་ཏོར་ཅན་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བསྐལ་བ་བཟང་པོའི་སངས་རྒྱས་སྟོང་རྩ་གཉིས་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །བྱང་ཆུབ་སེམས་དཔའ་སེམས་དཔའ་ཆེན་པོ་འཇམ་པའི་དབྱངས་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། ། བྱང་ཆུབ་སེམས་དཔའ་སེམས་དཔའ་ཆེན་པོ་ཕྱག་ན་རྡོ་རྗེ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །བྱང་ཆུབ་སེམས་དཔའ་སེམས་དཔའ་ཆེན་པོ་ས་ཡི་སྙིང་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །བྱང་ཆུབ་སེམས་དཔའ་སེམས་དཔའ་ཆེན་པོ་སྒྲིབ་པ་རྣམ་པར་སེལ་བ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའི་སྙིང་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །སྔ་རབས་འདས་པའི་སངས་རྒྱས་དང་བྱང་ཆུབ་སེམས་དཔའ་རྣམས་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །ད་ལྟར་བཞུགས་པའི་སངས་རྒྱས་དང་བྱང་ཆུབ་སེམས་དཔའ་རྣམས་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །ཕྱི་རབས་འབྱོན་པའི་སངས་རྒྱས་དང་བྱང་ཆུབ་སེམས་པ་རྣམས་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །ཕྱོགས་བཅུའི་ཞིང་ཁམས་རབ་འབྱམས་རྒྱ་མཚོ་མུ་མཐའ་མེད་པ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་གཅིག་བཅུ་བརྒྱ་སྟོང་ཁྲི་འབུམ་བྱེ་བ་ས་ཡ་དུང་ཕྱུར་གང་གཱའི་ཀློང་གི་བྱེ་མ་སྙེད་ཀྱི་གྲངས་དང་ངེས་པར་མཉམ་པ་རྣམས་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །ཁྱེད་རྣམས་ལ་མཁྱེན་པའི་ཡེ་ཤེས། བརྩེ་བའི་ཐུགས་རྗེ། མཛད་པའི་ཕྲིན་ལས་སྐྱོབ་པའི་ནུས་མཐུ་བསམ་གྱིས་མི་ཁྱབ་པ་མངའ་བ་ལགས་པས་ཆེ་གེ་མོའི་ཐོག་དྲངས་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་ཀྱི་མདུན་ནས་བསུ་མ་མཛད་དུ་གསོལ། རྒྱབ་ནས་སྐྱེལ་མ་མཛད་དུ་གསོལ། འཇིགས་པའི་མུན་ནག་ཆེན་པོ་ལ་ཡེ་ཤེས་ཀྱི་སྒྲོན་མེ་འབར་བར་མཛད་དུ་གསོལ། ལས་ཀྱི་རླུང་དམར་དྲག་པོ་ཐུགས་རྗེས་ཤུགས་ཀྱིས་བཟློག་པར་མཛད་དུ་གསོལ། གཡང་ས་ཆེན་པོ་བདེ་བའི་ལམ་ལ་བསྒྱུར་བར་མཛད་དུ་གསོལ། གཤིན་རྗེ་དང་བར་དོའི་འགྲོ་བ་ཐམས་ཅད་སེམས་དཔའ་དང་སེམས་མའི་གྲོགས་སུ་བསྒྱུར་བར་མཛད་དུ་གསོལ། སྒྲ་འོད་ཟེར་གསུམ་ཀྱི་འཇིགས་སྐྲག་ཐམས་ཅད་རང་བྱུང་རིག་པའི་རང་རྩལ་དུ་ངོ་སྤྲད་པར་མཛད་དུ་གསོལ། རིགས་བརྒྱ་ཞི་ཁྲོའི་ལྷ་ཚོགས་ཐམས་ཅད་སྐྱོབ་པའི་ལྷ་དང་ལྷ་མོར་སྟོན་པར་མཛད་དུ་གསོལ། རིགས་དྲུག་གི་སྐྱེ་སྒོ་ངན་པ་ཆོད་པར་མཛད་དུ་གསོལ། འཁོར་བ་སྡུག་བསྔལ་གྱི་རྒྱ་མཚོ་ཆེན་པོ་ལས་སྒྲོལ་བར་མཛད་དུ་གསོལ། སྐུ་གསུམ་དག་པའི་ཞིང་ཁམས་རྣམས་སུ་འདྲེན་པར་མཛད་དུ་གསོལ། ཞེས་བརྗོད། དེ་ནས། བཤགས་ཡུལ་རྣམས་ཀྱི་སྐུ་ལས་བདུད་རྩི་སྣ་ལྔ་འོད་ཟེར་དང་བཅས་པ་བྱུང་ནས། ཁྱོད་རང་གི་ལུས་ངག་ཡིད་གསུམ་ལ་ཐིམ་པས་སྡིག་སྒྲིབ་བག་ཆགས་དང་སྡུག་བསྔལ་ཐམས་ཅད་མུན་ཁུང་དུ་སྒྲོན་མེ་བཏེགས་པ་བཞིན་དུ་སངས་ཀྱིས་དག་པའི་མོས་པ་མཛོད། ཅེས་སྡིག་པ་བཤགས་པའི་ཆོ་ག་བྱེད་དུ་བཅུག་ལ།
ཡང་དག་པའི་དོན་ངོ་སྤྲོད་པ།
དེ་ནས་ཡང་དག་པའི་དོན་ངོ་སྤྲོད་པའི་ཕྱིར། འདི་སྐད་ཅེས་བྱ་སྟེ། དེ་ལྟར་ཁྱོད་ཀྱིས་སྡིག་པ་བཤགས་པའི་ཆོ་ག་བྱས་ནས། ད་གནས་ལུགས་ཀྱི་དོན་ངོ་སྤྲོད་པར་བྱེད་པ་ལ་རྣམ་རྟོག་གཞན་གྱིས་མ་ཡེངས་བར་ཉོན་ཅིག །བཅོམ་ལྡན་འདས་ཀྱིས་ལང་ཀར་གཤེགས་པའི་མདོ་ལས། བག་ཆགས་ཀྱིས་ནི་དཀྲུག་པའི་སེམས། །དོན་དུ་སྣང་བ་རབ་ཏུ་བྱུང་། །དོན་ཡོད་མ་ཡིན་སེམས་ཉིད་དེ། །ཕྱི་རོལ་དོན་མཐོང་ལོག་པ་ཡིན། །ཞེས་དང་། ས་བཅུ་བའི་མདོ་ལས། །ཀྱེ་རྒྱལ་བའི་སྲས། ཁམས་གསུམ་པོ་འདི་ནི་སེམས་ཙམ་མོ། །ཞེས་གསུངས་པས་ཕྱི་སྣོད་ཀྱི་འཇིག་རྟེན་དང་། ནང་བཅུད་ཀྱི་སེམས་ཅན་སྣ་ཚོགས་སུ་སྣང་བ་འདི་ཐམས་ཅད་ཐོག་མ་མེད་པ་ནས་བག་ཆགས་ངན་པ་གོམས་པའི་དབང་གིས་མེད་བཞིན་དུ་སྣང་བ་ཡིན་ལ། ཁྱད་པར་དུ་ཁྱོད་ལ་བར་དོའི་གནས་སྐབས་འདིར་བདེ་སྡུག་བཟང་ངན་འཇིགས་སྐྲག་ལ་སོགས་པ་གང་སྣང་བ་ཐམས་ཅད་སེམས་འཁྲུལ་བའི་དབང་གིས་མེད་པ་ལ་ཡོད་པར་བཟུང་ནས་ཉམ་ཐག་པར་བྱེད་པ་ཡིན་པས། འདི་རྣམས་ལ་བདེན་པར་འཛིན་པར་མ་བྱེད་སྒྱུ་མའི་རྟ་གླང་ལྟར་ཤེས་པར་གྱིས། ཕྱི་རོལ་གཟུང་བའི་ཡུལ་རྣམས་བདེན་པར་མ་གྲུབ་པ་དེ་བཞིན་དུ་ནང་འཛིན་པའི་སེམས་ཀྱང་བདེན་པར་གྲུབ་པ་མེད་དེ། བརྒྱད་སྟོང་པ་ལས། སེམས་ལ་སེམས་མ་མཆིས་པ་སྟེ། སེམས་ཀྱི་རང་བཞིན་ནི་འོད་གསལ་བའོ། །ཞེས་དང་། དཀོན་མཆོག་བརྩེགས་པ་ལས། འོད་སྲུང་སེམས་ནི་ནང་ན་ཡང་མེད། ཕྱི་རོལ་ན་ཡང་མེད། གཉིས་ཀའི་བར་ན་ཡང་མེད་ཅིང་། མི་དམིགས་སོ། །ཞེས་པ་ལ་སོགས་པ་གསུངས་པས། སེམས་ཀྱི་གནས་ལུགས་ལ་བལྟས་ན་ལུས་ཀྱི་ཕྱི་ནང་བར་གསུམ་གང་དུ་ཡང་གནས་པ་མེད། དེའི་ངོ་བོ་རང་གཟུགས་སུ་གྲུབ་པ་མེད། མདོར་ན་སངས་རྒྱས་ཀྱིས་ཀྱང་གཟིགས་པ་དང་བྲལ་བ་རང་བཞིན་འོད་གསལ་ནམ་མཁའ་ལྟར་ཤེས་པར་གྱིས། གཞན་ཡང་སྤྱོད་འཇུག་ལས། ཉོན་མོངས་ཤེས་བྱའི་སྒྲིབ་པ་ཡི། །མུན་པའི་གཉེན་པོ་སྟོང་པ་ཉིད། །མྱུར་དུ་ཐམས་ཅད་མཁྱེན་འདོད་པས། །དེ་ནི་ཅིའི་ཕྱིར་སྒོམ་མི་བྱེད། །ཅེས་དང་། སྡུད་པ་ལས། ཤེས་རབ་ཕ་རོལ་ཕྱིན་འདི་སུ་ཡིས་ལེགས་ཐོབ་པས། །རིང་པོར་མི་ཐོགས་རྒྱལ་བའི་བྱང་ཆུབ་མཆོག་རེག་འགྱུར། །ཞེས་གསུངས་པས། གཟུང་འཛིན་བདེན་མེད་དུ་རྟོགས་པའི་ཡེ་ཤེས་དེ་གོམས་པར་བྱས་པས་སྒྲིབ་གཉིས་ཀྱི་མུན་པ་མཐའ་དག་བཅོམ་སྟེ། ས་དང་ལམ་གྱི་ཡོན་ཏན་གོང་འཕེལ་དུ་གྱུར་ནས་མི་གནས་པའི་མྱ་ངན་ལས་འདས་པའི་གོ་འཕང་ཐོབ་པར་འགྱུར་བས། མཚན་འཛིན་གྱི་སྤྲོས་པ་ཐམས་ཅད་ཆོད་ལ་ཆོས་ཐམས་ཅད་ཀྱི་ཡིན་ལུགས་སྤྲོས་པ་ཐམས་ཅད་དང་བྲལ་བ་དེ་རྒྱུན་དུ་བསྒོམ་པར་གྱིས། དེ་ལྟར་བསྒོམས་ཀྱང་སྔོན་གྱི་བག་ཆགས་ངན་པའི་དབང་གིས་འཇིགས་སྐྲག་ལ་སོགས་པའི་འཁྲུལ་སྣང་བྱུང་ན། དེ་ཉིད་སྐུ་བཞིར་ངོ་སྤྲོད་པར་བྱེད་པའི་གདམས་ངག་འདི་ལྟར་ཉམས་སུ་ལོངས་ཤིག །དེ་ཡང་འཁྲུལ་སྣང་དེ་དང་པོ་གང་ནས་སྐྱེ་བ་བལྟས་ནས། ཡུལ་ཕྱོགས་ལ་སོགས་གང་ནས་སྐྱེ་བ་མེད་པའི་སྐྱེ་མེད་ཆོས་སྐུ་ཡིན། མ་སྐྱེས་པ་དེ་ལས་འགག་རྒྱུ་མེད་པས་འགག་མེད་ལོངས་སྐུ་ཡིན། སྐྱེ་འགག་གཉིས་མེད་ཀྱི་བར་དུ་གནས་པ་མེད་པ་དེ་གནས་མེད་སྤྲུལ་སྐུ་ཡིན། དེ་གསུམ་དབྱེར་མེད་པ་དེ་ངོ་བོ་ཉིད་ཀྱི་སྐུ་དེ་སངས་རྒྱས་རྣམས་ཀྱིས་བརྙེས་པས། འབྲས་དུས་ཀྱི་སྐུ་བཞི་དང་མཚུངས་པ་དེ་ཉིད་ཁྱེད་རང་ལ་རང་ཆས་སུ་ཡོད་པ་དེ་ངོ་ཤེས་ཤིང་བརྟན་པ་ཐོབ་པར་གྱིས་ཤིག ངོ་ཤེས་པ་དང་འཁྲུལ་སྣང་རང་སར་གྲོལ་བ་དུས་མཉམ་དུ་འོང་བར་འགྱུར་བ་ཡིན་ནོ། །ད་ཁྱོད་ཀྱི་ཤུལ་དུ་མཆིས་པའི་ཉེ་དུ་བརྩེ་བ་རྣམས་ཀྱིས་བཟའ་བཏུང་གོས་ནོར་ལ་སོགས་མཁོ་དགུའི་ལོངས་སྤྱོད་བསྔོ་རྒྱུ་འདི་རྣམས་ཁྱོད་རང་ལྷར་གསལ་བའི་ངང་ནས་འདོད་ཡོན་རྣམས་ཚོགས་ཀྱི་འཁོར་ལོར་བྱིན་གྱིས་བརླབས་ནས་རོལ་དགོས་པ་ཡིན་པས། དེའི་སླད་དུ་དམིགས་པ་འདི་བཞིན་དུ་མཛོད་ཅིག །བདག་ཉིད་འཕགས་པ་ཐུགས་རྗེ་ཆེན་པོར་གསལ་བའི་ཐུགས་ཀ་ནས་འོད་ཟེར་འཕྲོས་ཏེ། ཁྱེད་རང་ལ་ཕོག་པས་དབྱེར་མེད་དུ་འདྲེས་ནས་མི་དམིགས་སྟོང་པ་ཉིད་ཀྱི་ངང་དུ་གྱུར། ཨོཾ་མ་ཧཱ་ཤུ་ནྱ་ཏ་ཛྙཱ་ནའི་སྔགས་ཀྱིས་སྦྱངས། སྟོང་པའི་ངང་ལས་རིན་པོ་ཆེའི་ཁྲི་རྐང་པདྨ་ཉི་ཟླ་བརྩེགས་པའི་གདན་གྱི་སྟེང་དུ་ཁྱེད་རང་སྐད་ཅིག་གིས་བཅོམ་ལྡན་འདས་དཔལ་རྡོ་རྗེ་སེམས་དཔའ་སྐུ་མདོག་དཀར་གསལ་ཞལ་གཅིག་ཕྱག་གཉིས། གཡས་རིག་སྟོང་རྡོ་རྗེ་ཐུགས་ཀར་འཛིན་ཅིང་། གཡོན་སྣང་སྟོང་དྲིལ་བུ་དཀུ་ལ་བརྟེན་པ། ཞབས་གཡས་བརྐྱང་གཡོན་བསྐུམ་རོལ་པའི་སྟབས་སུ་བཞུགས་པ། དབུ་སྐྲ་ཐོར་ཚུགས་གྱེན་དུ་བཅིངས་པའི་ལྷག་མ་ཐུར་དུ་གྲོལ་བ། རིན་པོ་ཆེའི་རྒྱན་སྣ་ཚོགས་དང་། དར་གྱི་ན་བཟའ་སོགས་ལོངས་སྤྱོད་རྫོགས་སྐུའི་ཆ་ལུགས་ཅན། སྣང་སྟོང་འཇའ་འོད་ཀྱི་ཀློང་ནས་མཚན་དཔེའི་གཟི་བྱིན་མཆོག་ཏུ་འབར་བར་གསལ་བའི་སྙིང་གར་ཞི་བ་བཞི་བཅུ་རྩ་གཉིས། སྤྱི་བོར་ཁྲག་འཐུང་ལྔ་བཅུ་རྩ་བརྒྱད། མགྲིན་པར་དག་པ་རིག་འཛིན་གྱི་ལྷ་ཚོགས། གཞན་ཡང་རྩ་དང་བ་སྤུའི་ཀློང་ཐམས་ཅད་དུ་རྩ་གསུམ་རྒྱལ་བ་རབ་འབྱམས་ཏིལ་གྱི་གོང་བུ་ལྟར་གསལ་བའི་གཙོ་འཁོར་ཐམས་ཅད་ཀྱི་དཔྲལ་བར་ཨོཾ། མགྲིན་པར་ཨཱཿ ཐུགས་ཀར་ཧཱུྃ་གིས་མཚན་པ་དང་། བདག་ཉིད་ལྷར་གསལ་བའི་ཐུགས་ཀ་ནས་ཀྱང་། འོད་ཟེར་ཁ་དོག་ལྔ་ལྡན་ལྕགས་ཀྱུ་ལྟར་འཕྲོས་པས། གནས་འོག་མིན་རང་བཞིན་དག་པ་སྐུ་གསུམ་གྱི་ཞིང་ཁམས་རབ་འབྱམས་ན་བཞུགས་པའི་རྒྱལ་བ་སྲས་དང་སློབ་མར་བཅས་པ་ཐམས་ཅད་སྒྱུ་འཕྲུལ་ཞི་ཁྲོའི་ལྷ་ཚོགས་ཀྱི་རྣམ་པར་ཁ་ཆར་བུ་ཡུག་འཚུབ་པ་ལྟར་བྱོན་ནས་ཁྱོད་རང་ལྷར་གསལ་བ་ལ་སིབ་སིབ་ཐིམ་པའི་མོས་པ་མཛོད། ཨོཾ་ཨཱཿཧཱུྃ་བྷོ་དྷི་ཙིཏྟ་མ་ཧཱ་སུ་ཁ་ཛྙཱ་ན་སོགས་ཞི་ཁྲོའི་རྩ་སྔགས་མཐར། བཛྲ་ས་མ་ཡ་ཛ་ཛཿས་སྤྱན་དྲངས་པ་རྣམས་ཛཿཧཱུྃ་བཾ་ཧོཿ དམ་ཚིག་པ་དང་གཉིས་སུ་མེད་པར་གྱུར་པར་བསམ། ཨོཾ་བཛྲ་ཨརྒྷཱཾ་པ་ཏྱཾ་ནས་ཤཔྟ་པྲ་ཏིཙྪ་ཡེ་སྭཱ་ཧཱཿས་སྤྱིར་མཆོད་ལ། ལག་གཉིས་རྡོར་དྲིལ་དང་བཅས་ཕྱག་རྒྱ་བཅའ་བཞིན་པས། ཧཱུྃ༔ ཀུན་བཟང་རིགས་ལྔ་སེམས་དཔའ་ཡབ་ཡུམ་དང༔ ཐུབ་དྲུག་སྒོ་བ་ཁྲོ་རྒྱལ་ཡབ་ཡུམ་བཅུ༔ གནས་ཡུལ་མ་མོ་དབང་ཕྱུག་སྒོ་སྲུང་སོགས༔ དམ་པ་རིགས་བརྒྱའི་ཚོགས་ལ་ཕྱག་འཚལ་བསྟོད༔ ཅེས་བསྟོད་ལ། དེ་ནས་འདོད་ཡོན་རྣམས། ཨོཾ་བཛྲ་ཨ་མྲི་ཏས་བསངས། ཨོཾ་སྭ་བྷ་ཝས་སྦྱངས། སྟོང་པའི་ངང་ལས་རིན་པོ་ཆེ་ལས་གྲུབ་པའི་སྣོད་ཡངས་ཤིང་རྒྱ་ཆེ་བ་རྣམས་ཀྱི་ནང་དུ། འདོད་ཡོན་གྱི་དངོས་པོ་འདི་རྣམས་གཟུགས་སྒྲ་དྲི་རོ་རེག་བྱ་ཕུན་སུམ་ཚོགས་པ་ལ་སོགས་ལྷ་མིའི་དཔལ་འབྱོར་མཁོ་དགུའི་ལོངས་སྤྱོད་བསམ་གྱིས་མི་ཁྱབ་པ་འབྱུང་བའི་ནུས་པ་ཅན་དུ་གྱུར། ཨོཾ་སརྦ་བིད་པཱུ་ར་སོགས། སྔགས་རྒྱ་ཏིང་ངེ་འཛིན་དང་བཅས་པས། ཨོཾ་བཛྲ་སྥ་ར་ཎ་ཁཾ། ཞེས་པས་དཔག་ཏུ་མེད་པར་སྤེལ་ལ་འབུལ་ཚིག་ནི། ཁ་དོག་དབྱིབས་ལེགས་ཡིད་འོང་རྒྱན་ཕྲེང་ལྡན། །ཕྱོགས་དུས་ཀུན་ན་གཟུགས་མཆོག་ཅི་མཆིས་པ། །མོས་བློས་རྟེན་གྱི་ལྷ་ལ་གཟུགས་བསྔོས་པས། །བཞེས་ཤིག་བླ་མེད་བྱང་ཆུབ་མྱུར་ཐོབ་ཤོག། ཨོཾ་སརྦ་ཏ་ཐཱ་ག་ཏ་རུ་པ་ཀ་མ་གུ་ཎ་པཱུ་ཛི་ཏི་ཨཱ་ཧཱུྃ༔ དེ་བཞིན་དུ། ཕྱོགས་དུས་ཀུན་ན་ཟིན་དང་མ་ཟིན་པའི། །ཡོན་ཏན་ཚིག་མཆོག་སྒྲ་སྙན་ཅི་མཆིས་རྣམས། །མོས་བློས་རྟེན་གྱི་ལྷ་ལ་སྒྲ་བསྔོས་པས། །བཞེས་ཤིག་བླ་མེད་བྱང་ཆུབ་ཐོབ་པར་ཤོག །ཨོཾ་སརྦ་ཏ་ཐཱ་ག་ཏཱ་ཤཔྟ་ཀ་མ་གུ་ ཎ་པཱུ་ཛི་ཏི་ཨཱ་ཧཱུྃ༔ ཕྱོགས་དུས་ཀུན་ན་ཙན་དན་སྦྲུལ་སྙིང་དང་། །ཨ་ཀར་ནག་སོགས་དབང་པོ་ཚིམ་བྱེད་རྣམས། །མོས་བློས་རྟེན་གྱི་ལྷ་ལ་དྲི་བསྔོས་པས། །བཞེས་ཤིག་བླ་མེད་བྱང་ཆུབ་ཐོབ་པར་ཤོག །ཨོཾ་སརྦ་ཏཱ་ཐ་ག་ཏ་གྷནྡྷེ་ཀ་མ་གུ་ཎ་པཱུ་ཛི་ཏི་ཨཱ་ཧཱུྃ༔ ཕྱོགས་དུས་ཀུན་ན་རོ་དང་བཅུད་ལྡན་པའི། །ལུས་སེམས་བརྟས་བྱེད་རོ་མཆོག་ཅི་མཆིས་རྣམས། །མོས་བློས་རྟེན་གྱི་ལྷ་ལ་ཟས་བསྔོས་པས། །བཞེས་ཤིག་བླ་མེད་བྱུང་ཆུབ་ཐོབ་པར་ཤོག །ཨོཾ་སརྦ་ཏ་ཐཱ་ག་ཏཱ་ར་ས་ཀ་མ་གུ་ཎ་པཱུ་ཛི་ཏི་ཨཱ་ཧཱུྃ༔ ཕྱོགས་དུས་ཀུན་ན་འཇམ་མཉེན་འཁྲིལ་ཆགས་པའི། །རེག་བྱའི་ཁྱད་པར་ལུས་སེམས་ཚིམ་བྱེད་རྣམས། །མོས་བློས་རྟེན་གྱི་ལྷ་ལ་གོས་བསྔོས་པས། །བཞེས་ཤིག་བླ་མེད་བྱང་ཆུབ་ཐོབ་པར་ཤོག། ཨོཾ་སརྦ་ཏ་ཐཱ་ག་ཏཱ་སྤར་ཤེ་ཀ་མ་གུ་ཎ་པཱུ་ཛི་ཏེ་ཨ་ཧཱུཾཿ ཞེས་བརྗོད། འདི་དག་གི་སྐབས་སུ་ཤེས་པར་བྱ་བའི་གནད་གལ་པོ་ཆེ་ནི། གཟུགས་ཀྱི་སྐབས་སུ་ཁང་ཁྱིམ་གནས་མལ་རྟ་ནོར་ར་ལུག་བླ་མ་སོགས་ལ་རྡོར་དྲིལ་མཆོད་ཆ་སོགས་བླ་ཆས། སྐྱེ་བོ་ལ་གོ་མཚོན་བུད་མེད་ལ་འཕང་ཆ་རིན་ཆེན་རྒྱན་ཆས། བྱིས་པ་ལ་རྩེད་ཆས་སོགས་རང་རང་ལ་སྔར་གསོན་དུས་ཅི་དགོས་པའི་ཡོ་བྱད། སྒྲའི་སྐབས་སུ། དྲང་དོན་དང་ངེས་དོན་གྱི་ཆོས་སྒྲ་གླུ་བྲོ་གར་འབུད་དཀྲོལ་གྱི་རོལ་མོ། བསྟོད་ཚིག་གཏམ་སྙན། དྲིའི་སྐབས་སུ་ག་བུར་ཛ་ཏི་ཙནྡན་སྦྲུལ་གྱི་སྙིང་པོ་ལ་སོགས་ཙནྡན་དཀར་དམར་ཨ་ཀ་རུ་དཀར་ནག་གུར་གུམ། སྤང་སྤོས་ཆུ་སྤོས་སོགས་དྲི་བཟང་སྣ་ཚོགས་པའི་ཕྱེ་མ་ཕུར་མ། སྦྱར་སྤོས་ཀྱི་རིང་བུ། རོའི་སྐབས་སུ་དཀར་གསུམ་མངར་གསུམ་ཤ་མར་ཐུད་ཟན་ཇ་ཆང་འོ་ཞོ་སོགས་བཟའ་བཏུང་སྣ་ཚོགས། རེག་བྱའི་སྐབས་སུ་དར་དང་ཟ་འོག །རས་ཕྲུག་རྣམས་ཕྱི་ལྤགས་རིགས་སྣ་ཚོགས། ཞྭ་གོས་སྐ་རགས། ལྷྭམ་སྟན་ལ་སོགས་པ་དམིགས་དགོས་པའོ། །ཚེ་འདས་མཆོག་དམན་སུ་ཡིན་ཡང་དྲི་ཟར་གཏོགས་པས་ཆོ་ག་རྣམ་དག་གི་སྒོ་ནས་བསྔོས་པའི་དྲི་ཙམ་ལས་གཞན་ཅི་ཡང་སྤྱོད་དབང་མེད་པའི་རོ་ཡི་རྩར་རམ་ཇི་ལྟར་འོས་པའི་སར། མེ་བཏང་ལ་ཟས་རྣམས་ཀྱི་གསུར་དུད་གཟབ་གཟབ་གཏོང་བ་གལ་ཆེའོ། །ལར་འདོད་ཡོན་བསྔོས་པ་ཚེ་འདས་ཀྱིས་ཐོབ་མི་ཐོབ་ཆོས་བཤད་གོ་མི་གོ། ཕན་ཐོགས་མི་ཐོགས་ཐམས་ཅད་ནི། འཕོ་འདེབས་དང་ཆོ་ག་མཁན་རྣམས་ཀྱི་སེམས་བསྐྱེད་ཆེ་ཆུང་སྡོམ་པ་དང་དམ་ཚིག་གཙང་མི་གཙང་བསྐྱེད་རྫོགས་ཀྱི་དམིགས་རིམ་གསལ་ཐེབ་མི་ཐེབ། ཡོན་བདག་རྣམས་ཀྱིས་ཀྱང་མཆོད་སྦྱིན་བྱེད་རྒྱུའི་ཟས་ནོར་ལོངས་སྤྱོད་ལ་རློམ་སེམས་དང་སེར་སྣའི་དྲི་སོང་མ་སོང་དད་པ་ཆེ་ཆུང་སོགས་ལ་རག་ལས་པས་འདི་དག་སྐབས་སུ་ཡོན་མཆོད་ཐམས་ཅད་ཀྱིས་ཆགས་སྡང་མཁོན་འཁྲུགས་སོགས་ཉོན་མོངས་པ་དུག་ལྔ་དུག་གསུམ་གྱི་དབང་དུ་མ་སོང་བར་བསམ་སྦྱོར་བྱ་བྱེད་ཐམས་ཅད་སེམས་ཅན་གྱི་དོན་དུ་ཚེ་འདས་བྱང་གྲོལ་ལ་དགོད་དོན་ཁོ་ནའི་ཆེད་དུ་དམིགས་དགོས། ཨོ་རྒྱན་ཆེན་པོས། དམིགས་པ་རྣོན་པོ་རྣལ་འབྱོར་བའི་མཚོན་ཆ་ཡིན༔ ཞེས་གསུངས་པས་ཆོ་ག་ཆོས་སྤྱོད་རྣམ་དག་འདོན་དང་། བཅའ་བཤམས་དང་། དམིགས་རིམ་རང་གི་རྒྱུད་ལ་འབྱོར་ཚོད་གཡོ་སྒྱུ་མེད་པ་རེ་ངེས་པར་དགོས་སོ།། འཇིག་རྟེན་འདི་ནས་འཇིག་རྟེན་ཕ་རོལ་ཏུ་སོང་བའི་ཚེ་དུས་ལས་འདས་པ་ཆེ་གེ་མོ་ཁྱོད་ཀྱི་མིག་གི་ཡུལ་དུ་གཟུགས་མཛེས་པ། རྣ་བའི་ཡུལ་དུ་སྒྲ་སྙན་པ། སྣའི་ཡུལ་དུ་དྲི་ཞིམ་པ། ལྕེའི་ཡུལ་དུ་རོ་མངར་བ། ལུས་ཀྱི་ཡུལ་དུ་རེག་བྱ་འཇམ་པ་ལ་སོགས་པ་འདོད་པའི་ཡོན་ཏན་ཐམས་ཅད་ལ་མ་ཆགས་མ་ཞེན་པའི་སྒོ་ནས་ལོངས་སྤྱོད་པའི་སྐལ་བ་དང་ལྡན་པར་གྱུར་ཅིག དེ་ནས་ལམ་སྦྱང་བསྟན་པ་ནི། དཀོན་མཆོག་རིན་ཆེན་དཔལ་ཞིང་དུ། །དཀོན་མཆོག་རིན་ཆེན་ལས་བྱུང་བ། །དཀོན་མཆོག་རིན་ཆེན་འོད་ཟེར་གྱིས། །རིན་ཆེན་ཕྲེང་བ་རྣམ་དག་པ། །ཚོགས་ཀྱི་ལམ་དང་སྦྱོར་བའི་ལམ། །མཐོང་བའི་ལམ་དང་བསྒོམ་པའི་ལམ། །བླ་ན་མེད་པའི་ཁྱད་པར་ལམ། །བྱང་ཆུབ་བར་ཆད་མེད་པའི་ལམ། །རྣམ་པར་གྲོལ་བའི་ལམ་དག་ལ། །བརྟེན་ནས་སྡིག་པ་ཀུན་སྦྱངས་ནས། །འཕགས་པའི་ལམ་དེར་གྲོལ་བར་ཤོག ཨོཾ་རཏྣེ་རཏྣེ་༼དཀོན་མཆོག་རིན་ཆེན་༽མ་ཧཱ་༼ཆེན་པོ་༽རཏྣེ་༼དཀོན་མཆོག་རིན་ཆེན་༽རཏྣ་སམ་བྷ་ཝེ་༼འབྱུང་བ།༽ རཏྣེ་ཀེ་རཏྣེ་༼དཀོན་མཆོག་རིན་ཆེན་བཀྲམ༽རཏྣ་མ་ལ་བྷེ་ཤུདྡྷེ༼རིན་ཆེན་ཕྲེང་བ་རྣམ་དག་པ།༽ ཤྭ་དྷ་ཡ་སརྦ་པ་པཾ་༼སྦྱོངས་ཤིག་སྡིག་པ་ཐམས་ཅད་གྲོལ། །༽ཧཱུྃ་ཊ་ཋཿ ཞེས་བརྗོད། ཡང། པདྨ་འདམ་གྱིས་མ་གོས་ལྟར། །སྲིད་གསུམ་དྲི་མས་མ་གོས་པའི། །སྲིད་པའི་པདྨོ་ལས་བྱུང་བ། །བདེ་བ་ཅན་དུ་སྐྱེ་བར་ཤོག །ཨོཾ་པདྨེ་པདྨེ། ༼པདྨ་ལས་བྱུང་བ་༽པདྨ་པདྨ་སཾ་བྷ་ཝེ། ༼ཆེན་པོ་བདེ་བ་ཅན་དུ་སོང་ཞིག་༽མ་ཧཱ་སུ་ཁ་༼འདི་ན་མི་སྣང་བདེ་བ་ཅན་དུ་སོང་དུ་གསོལ།༽ བ་ཏི་གཙྪནྟུ་སྭཱ་ཧཱ། ཞེས་བརྗོད།
ཟབ་ལམ་འཕོ་བའི་གདམས་པ།
འཇིག་རྟེན་འདི་ནས་འཇིག་རྟེན་ཕ་རོལ་ཏུ་སོང་བའི་ཚེ་དུས་ལས་འདས་པ་ཆེ་གེ་མོ་ཁྱོད་ལ་ད་ནི་མ་བསྒོམ་པར་སངས་རྒྱས་པའི་ཆོས་དྲུག་གི་ནང་ཚན། སྡིག་པོ་ཆེ་བཙན་ཐབས་སུ་འཚང་རྒྱ་བ་དང་། ལེ་ལོ་ཅན་འཆི་ཁར་གྲོལ་བའི་གདམས་ངག་ཁྱད་པར་ཅན་སྟེང་སྒོ་རྣམ་པར་གྲོལ་བའི་ཆོས་ཟབ་མོ། ཟབ་ལམ་འཕོ་བའི་གདམས་པ་འབོག་པའི་སྐབས་སུ་བབ་པ་ཡིན། འདི་ལ་སྤྱི་དོན་རྣམ་པ་བཞི་ཡོད་དེ། འཕོ་དགོས་པའི་རྒྱུ་མཚན། གང་དུ་འཕོས་པའི་ཕན་ཡོན། མ་འཕོས་པའི་ཉེས་སྐྱོན། འཕོ་བ་དངོས་ཀྱི་ངོ་བོ་ཇི་ལྟར་བྱ་བའི་ཚུལ་རྣམས་ལས། དང་པོ་འཕོ་བ་དགོས་པའི་རྒྱུ་མཚན་ནི། སློབ་དཔོན་པདྨའི་ཞལ་ནས། སྒོ་དགུ་འཁོར་བའི་སྐར་ཁུང་ཅན༔ སྒོ་གཅིག་ཐར་བ་བྱང་ཆུབ་ལམ༔ སྒོ་དགུ་བཀག་ནས་སྒོ་གཅིག་དབྱེ༔ རྣམ་པར་ཤེས་པ་དེར་འཕོས་ན༔ འགྲོ་དྲུག་གནས་ནས་རྒྱང་གིས་འཕགས༔ མཆོག་གི་དངོས་གྲུབ་ཐོབ་པར་འགྱུར༔ ཞེས་སོ། །གཉིས་པ་གང་དུ་འཕོས་པའི་ཕན་ཡོན་ནི། མཁའ་འགྲོ་མ་ཀུན་ཏུ་རྟོགས་པའི་རྒྱུད་ལས། རྣམ་ཤེས་རླུང་ལ་ཞོན་ནས་ནི། །སྟེང་གི་ལམ་ལ་འཕོ་གྱུར་ན། །སྡིག་ལ་གོམས་པའི་གང་ཟག་ཀྱང་། །མཐོ་རིས་དག་ཏུ་སྐྱེ་བ་མང་། །མགྲོན་པོ་ལམ་དུ་ཞུགས་པའི་མི། །གྲོགས་ཀྱིས་བསྒྱུར་བ་ཇི་བཞིན་ནོ། །ཞེས་དང་། རྒྱུད་རྡོ་རྗེ་གདན་བཞི་ལས། བུ་ག་དགུ་ཡི་སྟེང་ཕྱོགས་སུ། །འཕྲལ་དུ་ཡིད་ཀྱིས་འཕོ་བྱས་པ། །ཉིན་བཞིན་བྲམ་ཟེ་གསོད་པ་དང་། །མཚམས་མེད་ལྔ་པོ་བྱེད་པ་དང་། །ཆོམ་རྐུན་ལས་ཀྱིས་ལོངས་སྤྱོད་པ། །འདི་ཡི་ལམ་གྱིས་གྲོལ་འགྱུར་ཏེ། །སྡིག་པས་གོས་པར་མི་འགྱུར་རོ། །ཞེས་དང། ཉེས་པ་ཀུན་གྱིས་གོས་པ་ན། །འཕོ་བའི་སྦྱོར་བ་སྦྱར་བས་གྲོལ། །སྡིག་པས་ཀུན་ནས་མི་གོས་ཏེ། །འཁོར་བའི་ཕ་རོལ་མཆོག་ཏུ་འགྲོ། །ཞེས་དང་། གཞན་ཡང་ཇི་སྐད་དུ། དགེ་སྦྱོར་ཐམས་ཅད་གཞུ་དང་འདྲ། །འཕོ་བ་ཐེབས་པ་མདའ་དང་འདྲ། །ཞེས་སོ། །གསུམ་པ་མ་འཕོ་བའི་ཉེས་སྐྱོན་ནི། ཇི་སྐད་དུ། རྣམ་ཤེས་རླུང་ལ་རྟ་བྱས་ནས། །འོག་གི་ལམ་ལ་ཕྱིན་གྱུར་ན། །ཆོས་ལ་གོམས་པའི་གང་ཟག་ཀྱང་། །ངན་སོང་གནས་སུ་ལྟུང་བ་མང་། །ཞེས་སོ། །བཞི་བ་འཕོ་བ་དངོས་ཀྱི་ངོ་བོ་ཇི་ལྟར་བྱ་བའི་ཚུལ་ལ། གྲུབ་མཐའ་གསར་རྙིང་དང་རྒྱུད་སྡེ་གོང་འོག་བཀའ་མ་གཏེར་མ་དག་སྣང་མ་སོ་སོའི་ལུགས་སྲོལ་ལ། ཕྱི་འདུས་བྱས་རྫས་ཀྱི་འཕོ་བ་དང་། ནང་བསྐྱེད་རིམ་གསལ་འདེབས་ཀྱི་འཕོ་བ་དང་། གསང་བ་རླུང་རིག་ཁ་སྦྱོར་ལ་བརྟེན་ནས་འཕོ་བ། དེ་ཁོ་ན་ཉིད་ཆོས་ཉིད་དོན་གྱི་འཕོ་བ། ཆོས་སྐུ་ལྟ་བ་རྒྱས་འདེབས་ཀྱི་འཕོ་བ། ལོངས་སྐུ་བསྐྱེད་རྫོགས་ཟུང་འཇུག་གི་འཕོ་བ། སྤྲུལ་སྐུ་ཚད་མེད་སྙིང་རྗེའི་འཕོ་བ་སོགས་བྱེད་ལས་དང་། བསྐྱེད་རྫོགས་རྟེན་ཅན་དང་། རྟེན་མེད་ཀྱི་འཕོ་ཚུལ་སོགས་མང་དུ་ཡོད་ཀྱང་། ད་ལམ་འདིར་ནི་ཆོས་རྒྱལ་ཁྲི་སྲོང་ལྡེའུ་བཙན་གྱི་བློན་པོ་ཉི་མའི་དོན་ཕྱིར། ཨོ་རྒྱན་ཆེན་པོས་སངས་རྒྱས་འོད་དཔག་མེད་ལ་ཞུས་ནས་བློན་པོ་ལ་གནང་སྟེ་གཏེར་དུ་སྦས་པ། ཕྱིས་ཉི་ཟླ་སངས་རྒྱས་ཀྱིས་གཏེར་ནས་དྲངས་ཏེ། རིམ་པར་སྤེལ་བས། ཟབ་ལམ་འཕོ་བའི་གདམས་པ་འཇག་ཚུགས་མ་ཞེས་ནང་བསྐྱེད་རིམ་གསལ་འདེབས་ཀྱི་འཕོ་བ་འདི་ཉིད་གསལ་འདེབས་པའི་སྐབས་སུ་བབ་པ་ཡིན་པས། འདི་ལ་གསུམ་སྟེ། འཕོ་བྱ། འཕོ་བྱེད། འཕོ་ཡུལ་རྣམས་ལས། དང་པོ་འཕོ་བྱ་ནི། ད་ལྟའི་ཁྱོད་རང་གི་རྣམ་པར་ཤེས་པའི་ངོ་བོ་དྲན་བསམ་བདེ་སྡུག་སྣ་ཚོགས་པའི་འཆར་གཞི་སྐད་ཅིག་ཀྱང་སྡོད་དབང་མེད་པ་འདི་ཡིན། འཕོ་བྱེད་ནི་ངེད་ཅག་སློབ་དཔོན་རྣམས་ཀྱིས་སྟོང་ཉིད་ཟུང་འཇུག་དང་ལྡན་པའི་ངང་ནས་ཟབ་ལམ་འཕོ་བའི་གདམས་ངག་ཟབ་མོ་འབོག་པ་ཡིན། འཕོ་ཡུལ་ནི། ནུབ་ཕྱོགས་བདེ་བ་ཅན་གྱི་ཞིང་གི་གཙོ་བོར་སངས་རྒྱས་འོད་དཔག་ཏུ་མེད་པ་དེ་ཉིད་ཀྱི་ཐུགས་ཀར་འདུན་པ་རྩེ་གཅིག་ཏུ་གཏད་དེ་འཕོ་དགོས་པ་ཡིན། དེའི་སླད་དུ་ཁྱོད་རང་གིས་བདག་ཏུ་བཟུང་བའི་ཡུལ་དང་ས་ཆ་གནས་མལ་ཁང་ཁྱིམ་ཉེ་འབྲེལ་འཁོར་འབངས་ཟས་ནོར་ལོངས་སྤྱོད། གཅེས་པའི་རྒྱུ་ལུས་དང་བཅས་པ་འདི་རྣམས་ཐམས་ཅད་བླ་མ་དང་སངས་རྒྱས་འོད་དཔག་མེད་པ་འཁོར་དང་བཅས་པ་རྣམས་ལ་ཕྱག་རྟེན་མཎྚལ་གྱི་ཚུལ་དུ་ཕུལ། ཚེ་སྔ་མའི་སྤྱོད་ཡུལ་གྱི་ཆགས་ཞེན་འཁྲི་བ་ཐམས་ཅད་རྦད་ཀྱིས་བཅད་ནས། ཡིད་གཞན་དུ་མ་ཡེངས་པར་འདུ་ཤེས་བརྒྱད་དང་ལྡན་པ་ཞིག་ངེས་པར་དགོས་པའི་ཚུལ་ནི། དང་པོ་ཁྱོད་རང་གི་ལུས་འདི་ཉིད་གཞན་ལ་གཡར་བོའི་གནས་ཁང་ལྟ་བུའི་འདུ་ཤེས། རྣམ་པར་ཤེས་པ་ད་ལྟ་འགྲོ་རྒྱུའི་མགྲོན་པོ་ལྟ་བུའི་འདུ་ཤེས། རླུང་ནི་རྟ་གླང་ལ་སོགས་ཞོན་པའི་འདུ་ཤེས། རྩ་དབུ་མ་ལ་འགྲོ་བའི་ལམ་གྱི་འདུ་ཤེས། སྤྱི་གཙུག་ཚངས་བུག་ནི་སྒོ་ཡི་འདུ་ཤེས། ཧིཀ་ནི་སྐྱེལ་མའི་འདུ་ཤེས། ཟབ་ལམ་འཕོ་བ་བརྒྱུད་པའི་བླ་མ་རྣམས་དང་བདེ་ཆེན་དཔའ་བོ་དཔའ་མོ་རྣམས་བསུ་མའི་འདུ་ཤེས། ནུབ་ཕྱོགས་བདེ་བ་ཅན་གྱི་ཞིང་ཁམས་དེ་ཉིད་ལ་དཔེར་ན་ཚོང་པ་རང་ཁྱིམ་དུ་འགྲོ་བ་ལྟ་བུའི་འདུ་ཤེས་རྣམས་བསྒོམས་ནས། དམིགས་པ་འདི་ལྟར་དུ་མཛོད་ཅིག །ཁྱོད་རང་གི་ལུས་འདི་ཉིད། རྗེ་བཙུན་རྡོ་རྗེ་རྣལ་འབྱོར་མ་དྭངས་གསལ་འོད་ཀྱི་སྐུ་ཅན་དར་དམར་པོའི་གུར་ཕུབ་པའམ། ཕྲུ་མ་ལ་ཕུས་བཏབ་པ་ལྟ་བུ་ཕྱི་བལྟས་ནང་གསལ་དུ་བསྒོམ་པའི་མིག་དང་རྣ་བ་ཁ་སྣ་ལ་སོགས་ངན་འགྲོའི་སྒོ་དགུ་བོ་ཧཱཾ་ཡིག་དམར་པོ་མགོ་ཕྱིར་བསྟན་པ་རེ་རེས་བཀག་པའི་མོས་པ་མཛོད། ལུས་ཀྱི་དབུས་དྲང་པོར་ཁང་སྟོང་དཀྱིལ་དུ་ཀ་བ་བཙུགས་པ་ལྟ་བུ་རྩ་ཨ་ཝ་དྷུ་ཏི་སྦོམ་ཕྲ་མདའ་སྨྱུག་འབྲིང་པོའི་ཚད་ཙམ་པ་མཚན་ཉིད་བཞི་དང་ལྡན་པ། ཡར་སྣེ་སྤྱི་གཙུག་ཚངས་བུག་ཏུ་ཟུག་པ། ཁ་ཕྱེ་ནས་ཧད་པོར་ཡོད་པ། མར་སྣེ་ལྟེ་འོག་སོར་བཞིའི་འོག་ཏུ་བསླེབས་པའི་གཡས་སུ་རོ་མ་དམར་མོ། གཡོན་དུ་རྐྱང་མ་དཀར་པོ་གསུམ་ཁྲག་དང་ཆུ་སེར་གྱི་དྲི་མས་མ་གོས་པ། ལུས་ཀྱི་དབུས་སུ་སྲོག་ཤིང་བསླངས་པ་ལྟར། དྲང་ཐ་ལེར་ཡོད་པ་ལ་འཁོར་ལོ་བཞིས་བརྟེན་པའི་སྙིང་ཁའི་ཐད་དུ། རླུང་གི་དཀྱིལ་འཁོར་ཡངས་ཤིང་གཡོ་བའི་སྟེང་དུ། ཁྱོད་རང་གི་རྣམ་པར་ཤེས་པའི་ངོ་བོ་རླུང་སེམས་དབྱེར་མེད་མི་ཤིགས་པའི་ཐིག་ལེ་དཀར་ལ་དམར་བའི་མདངས་ཅན། བྱ་མ་སར་གྱི་སྒོ་ང་ལྟ་བུ་སྣུམ་ལ་འདྲིལ་བ་གསལ་ལ་འཚེར་བ། །འཕར་ལམ་ལམ་བྱེད་པ་ཞིག་གསལ་ཐོབ། རྩ་དབུ་མའི་ཡར་སྣེ་སྤྱི་གཙུག་ཚངས་པའི་བུ་ག་རྒྱ་མཐོངས་ཁ་ཕྱེ་བ་ལྟ་བུ་དཀར་སེང་ངེ་ཡོད་པའི་སྟེང་གི་ནམ་མཁར་སྣ་ཚོགས་པདྨ་འདབ་མ་སྟོང་དང་ལྡན་པའི་ཟེའུ་འབྲུར་རྨ་བྱས་བཏེགས་པའི་རིན་པོ་ཆེའི་ཁྲི་དང་པདྨ་ཉི་ཟླ་བརྩེགས་པའི་གདན་ལ་སྐྱབས་གནས་ཀུན་འདུས་རྩ་བའི་བླ་མ་དང་དབྱེར་མེད་པའི་བཅོམ་ལྡན་འདས་མགོན་པོ་འོད་དཔག་ཏུ་མེད་པ་སྐུ་མདོག་དམར་གསལ་ཞལ་གཅིག་ཕྱག་གཉིས་མཉམ་བཞག་གི་ཕྱག་རྒྱས་ལྷུང་བཟེད་བདུད་རྩིས་བཀང་བ་བསྣམས་པ། སྐུ་ལ་ཆོས་གོས་རྣམ་གསུམ་གསོལ་ཞིང་། ཞབས་གཉིས་རྡོ་རྗེ་སྐྱིལ་མོ་ཀྲུང་གིས་བཞུགས་པ། དབུ་ལ་གཙུག་ཏོར་ཞབས་ལ་འཁོར་ལོ་ལ་སོགས་མཚན་བཟང་དཔེ་བྱད་ཀྱིས་སྤྲས་པ། གཟི་བྱིན་མཚུངས་པ་མེད་པ་འོད་ཟེར་མཐའ་ཡས་པར་འཕྲོ་ཞིང་མཐོང་ཐོས་དྲན་རེག་གི་འགྲོ་བ་ཐམས་ཅད་འཁོར་བའི་སྡུག་བསྔལ་ལས་སྒྲོལ་ནུས་པའི་བདག་ཉིད་ཅན་དུ་བཞུགས་པའི་མཐར་ཟབ་ལམ་འཕོ་བ་བརྒྱུད་པའི་བླ་མ་རྣམས་དང་མཆོག་གསུམ་སྐུ་གསུམ་རྩ་གསུམ་ཆོས་སྐྱོང་སྲུང་མ་སོགས་རྒྱལ་བ་སྲས་དང་སློབ་མར་བཅས་པས་བསྐོར་ནས་བཞུགས་པ་ཐམས་ཅད་ཀྱང་། རྩ་བའི་བླ་མ་གཅིག་པུའི་ཡེ་ཤེས་ཀྱི་རྣམ་རོལ། སྐྱོན་ཀུན་ཟད། ཡོན་ཏན་ཀུན་ཚང་། སྐྱབས་གནས་ཀུན་འདུས་ཀྱི་ངོ་བོ་སྐུ་མཚན་དཔེའི་གཟི་བྱིན་འོད་དུ་འབར་བ། གསུང་གྲགས་སྟོང་ཆོས་ཉིད་ཀྱི་རང་སྒྲ་སྒྲོག་པ། ཐུགས་ཟབ་གསལ་གཉིས་མེད། ཏིང་ངེ་འཛིན་གྱི་སྒོ་འབུམ་ཕྲག་ཏུ་འགྱེད་པ། ཡོན་ཏན་བསམ་གྱིས་མི་ཁྱབ་པའི་རྣམ་རོལ་འཁོར་འདས་ཀྱི་དཔལ་དུ་འབར་ཞིང་། ཕྲིན་ལས་རྒྱུན་མི་ཆད་པའི་ཐུགས་རྗེས་སྲིད་མཚོར་གནས་པའི་འགྲོ་བ་ཀུན་ལ་ཡེ་ཤེས་ཀྱི་འཇུག་པ་སྐད་ཅིག་ཀྱང་མ་གཡེལ་བའི་བདག་ཉིད་ཅན་དུ་བཞུགས་ཏེ། དམིགས་ཡུལ་ཁྱེད་རང་རྣམས་ལ་བརྩེ་བའི་ཐུགས་ཀྱིས་དགོངས། དགྱེས་པའི་ཞལ་གྱིས་ཕྱོགས། འཛུམ་པའི་སྤྱན་གྱིས་གཟིགས་ཏེ། ཁྱེད་རང་རྣམས་བདེ་ཆེན་དག་པའི་ཞིང་དུ་འདྲེན་པའི་དེད་དཔོན་དུ་བྱོན་པར་བསྒོམ་ལ་སྐྱབས་གནས་བསླུ་བ་མེད་པ་དེ་དག་གི་ཐུགས་རྗེ་དང་ཡོན་ཏན་རྗེས་སུ་དྲན་པའི་ངང་ནས། ལུས་གུས་པའི་སྒོ་ནས་ཐལ་མོ་སྦྱར་ཏེ་ཡིད་ཁྱེད་ཤེས་ཀྱི་དད་པ་དང་མོས་གུས་སྙིང་གི་དཀྱིལ་དང་རུས་པའི་གཏིང་ནས་བཟོད་མེད་དུ་འབར་བ་མཆི་མ་འཁྲུགས་པ་ཙམ་དུ་བསྐྱེད་ལ། ངག་གདུང་ཤུགས་དྲག་པོས་ཁ་ཙམ་དང་ཚིག་ཙམ་མ་ཡིན་པར་སྨྲེ་སྔགས་ཀྱི་དམིགས་རིམ་དང་གསོལ་འདེབས་འདི་དག་བྱེད་པའི་མོས་པ་མཛོད་ཅིག ། ན་མོ་གུ་རུ། ཚེ་འདས་རྗེ་བཙུན་རྡོ་རྗེ་རྣལ་འབྱོར་མ། །དྭངས་གསལ་སྒྲིབ་མེད་འོད་སྐུར་ཡོངས་རྫོགས་པའི། །སྒོ་དགུར་མར་མེ་ལྟར་འབར་ཧཱུྃ་ཡིག་ལས། །འོད་འཕྲོས་ལུས་ཀུན་ཁྱབ་ཅིང་བརྟན་པར་བཀག །དེ་དབུས་སྙིང་པོ་སྲོག་ཤིང་དབུ་མའི་རྩ། །རོ་རྐྱང་འཁོར་ལོ་བཞི་དང་བཅས་པ་ཡི། །སྙིང་ཀར་རླུང་དཀྱིལ་ཡངས་ཤིང་གཡོ་བའི་སྟེང་། །རྣམ་ཤེས་ཐིག་ལེ་འོད་མདངས་ལྡན་པར་གྱུར། །སྤྱི་བོར་པད་ཟླར་རྩ་བའི་བླ་མ་དང་། །དབྱེར་མེད་སངས་རྒྱས་འོད་དཔག་མེད་མགོན་ལ། །བརྒྱུད་ལྡན་བླ་མ་རྣམས་དང་ཕྱོགས་དུས་ཀྱི། །རྒྱལ་བ་རབ་འབྱམས་མ་ལུས་ཀུན་གྱིས་བསྐོར། །བདག་གཞན་མར་གྱུར་མཁའ་མཉམ་འགྲོ་ཀུན་ལ། །བྱམས་བརྩེའི་ཐུགས་ཀྱིས་དགོངས་བཞིན་བཞུགས་པར་གསལ། །ཨེ་མ་ཧོ། སངས་རྒྱས་འོད་དཔག་མེད་ལ་ཕྱག་འཚལ་ལོ། །ཨོ་རྒྱན་པདྨ་འབྱུང་གནས་ལ་གསོལ་བ་འདེབས། །གཏེར་སྟོན་ཉི་ཟླ་སངས་རྒྱས་ལ་གསོལ་བ་འདེབས། །མཚུངས་མེད་ནམ་མཁའ་རྒྱལ་མཚན་ལ་གསོལ་བ་འདེབས། །རྟོགས་ལྡན་སངྒ་བྷ་དྲ་ལ་གསོལ་བ་འདེབས། །ཕ་རྒོད་དྲི་མེད་བློ་གྲོས་ལ་གསོལ་བ་འདེབས། །ཆོས་རྗེ་སངས་རྒྱས་རྒྱལ་མཚན་ལ་གསོལ་བ་འདེབས། །མཚུངས་མེད་མ་ཏིའི་མཚན་ཅན་ལ་གསོལ་བ་འདེབས། །ཡོངས་འཛིན་ཕུན་ཚོགས་རྣམ་རྒྱལ་ལ་གསོལ་བ་འདེབས། །འདྲེན་མཆོག་ཀརྨ་ཆོས་རྒྱལ་ལ་གསོལ་བ་འདེབས །སྔགས་འཆང་པདྨ་དབང་དྲག་ལ་གསོལ་བ་འདེབས། །ཐུགས་ཆེན་ཀརྨ་ཆགས་མེད་ལ་གསོལ་བ་འདེབས། །གྲུབ་ཐོབ་པདྨ་རིག་འཛིན་ལ་གསོལ་བ་འདེབས །འདྲེན་མཆོག་ནམ་མཁའ་འོད་གསལ་ལ་གསོལ་བ་འདེབས། །འགྱུར་མེད་ཐེག་མཆོག་བསྟན་འཛིན་ལ་གསོལ་བ་འདེབས། །པདྨ་ཀུན་གྲོལ་རྣམ་རྒྱལ་ལ་གསོལ་བ་འདེབས། །ངེས་དོན་བསྟན་འཛིན་བཟང་པོ་ལ་གསོལ་བ་འདེབས། །ནམ་མཁའ་ཚེ་དབང་ཆོས་གྲུབ་ལ་གསོལ་བ་འདེབས། །དྲིན་ཆེན་རྩ་བའི་བླ་མ་ལ་གསོལ་བ་འདེབས། །ཟབ་ལམ་འཕོ་བ་འབྱུང་བར་བྱིན་གྱིས་རློབས། །མྱུར་ལམ་འཕོ་བས་མཁའ་སྤྱོད་བགྲོད་པར་བྱིན་གྱིས་རློབས། །ཚེ་འདས་འདི་ནས་ཚེ་འཕོས་གྱུར་མ་ཐག །བདེ་བ་ཅན་དུ་སྐྱེ་བར་བྱིན་གྱིས་རློབས། །ཞེས་དང་། འོ་འཇིག་རྟེན་འདི་ནས་འཇིག་རྟེན་ཕ་རོལ་ཏུ་སོང་བའི་ཚེ་དུས་ལས་འདས་པ་ཆེ་གེ་མོ་ཁྱོད་ད་ལྟ་སྔར་གྱི་ཡུལ་དང་ཁང་ཁྱིམ་སོགས་ལ་བརྟེན་པའི་འཕེན་པ་ནི་རྫོགས། མཛའ་བའི་གཉེན་བཤེས་དང་འགྲོགས་པའི་འབྲེལ་བ་ནི་ཆད། བསགས་པའི་ཡོ་བྱད་ལ་སྤྱོད་པའི་ལས་ནི་ཟད། སྔ་མའི་སྤྱོད་ཡུལ་ཐམས་ཅད་བག་ཆགས་རྨི་ལམ་གྱི་ཡུལ་ཙམ་དུ་ལུས། ཚེ་གཅིག་ཏུ་འབད་རྩོལ་གྱིས་བསགས་པའི་ནོར་རྫས། གཅེས་པར་བསྐྱང་པའི་སྒྱུ་ལུས་དང་བཅས་པ་ཐམས་ཅད་ཤུལ་དུ་བཞག་ནས། ཁྱོད་རང་གཅིག་པུ་གཅེར་བུ་ལག་སྟོང་སྒྲེན་མོར་བར་དོར་འཁྱམས་ནས་འགྲོ་དགོས་པའི་དུས་ལ་བབས་འདུག་པས། སྐབས་འདིར་སྙིང་ཀར་བསྒོམ་པའི་ཐིག་ལེ་དེ་ཉིད་ལ་རིག་པ་རྩེ་གཅིག་ཏུ་གཏོད་ལ། ངེད་ཀྱིས་ཧིཀ་དང་ཕཊ་ཀྱི་སྒྲ་དྲག་པོར་བརྗོད་པའི་ཚེ། ཐིག་ལེ་དེ་ཉིད་ནམ་མཁའི་སྐར་མདའ་ཡར་བ་ལྟར་རྩ་དབུ་མའི་ལམ་ལ་བརྒྱུད་དེ་སོང་བ་སྤྱི་གཙུག་ཚངས་བུག་ནས་ཐོན་ཏེ་སངས་རྒྱས་འོད་དཔག་མེད་ཀྱི་ཐུགས་ཀར་ཐིམ་ནས་ཐུགས་ཡིད་དབྱེར་མེད་དུ་འདྲེས་མ་ཐག་ཏུ་འོག་མིན་མཁའ་སྤྱོད་བདེ་ཆེན་དག་པའི་ཞིང་དུ་གཤེགས་ཤིག ཧིཀཿ ཧིཀཿ ཧིཀཿ ཅེས་ཅི་མང་དང་། ཕཊཿ ཕཊཿ ཕཊཿ ཅེས་ཅི་མང་བརྗོད། དེ་ནས་ཡང་། སངས་རྒྱས་འོད་དཔག་མེད་ལ་ཕྱག་འཚལ་ལོ། །ཨོ་རྒྱན་པདྨ་འབྱུང་གནས་ལ་གསོལ་བ་འདེབས། །དྲིན་ཆེན་རྩ་བའི་བླ་མས་ཐུགས་རྗེས་ཟུངས། །རྩ་བ་བརྒྱུད་པའི་བླ་མས་ལམ་སྣ་དྲོངས། །ཟབ་ལམ་འཕོ་བ་འབྱུང་བར་བྱིན་གྱིས་རློབས། །མྱུར་ལམ་འཕོ་བས་མཁའ་སྤྱོད་བསྒྲོད་པར་བྱིན་གྱིས་རློབས། ། ཚེ་འདས་འདི་ནས་ཚེ་འཕོས་གྱུར་མ་ཐག །བདེ་བ་ཅན་དུ་སྐྱེ་བར་བྱིས་གྱིས་རློབས། །ཞེས་དང་། ཡང་གོང་གི། འོ་འཇིག་རྟེན་འདི་ནས་སོགས་འཕོ་དམིགས་ཚིག་ལྷུག་དེ་འདོན། ཧིཀཿདང་ཕཊཿཅི་མང་བརྗོད་ལ། སླར་ཡང་། སྣང་གྲགས་རིག་གསུམ་ལྷ་སྔགས་ཆོས་སྐུའི་ངང་། །སྐུ་དང་ཡེ་ཤེས་རོལ་བར་འབྱམས་ཀླས་པའི། ཟབ་གསང་རྣལ་འབྱོར་ཆེན་པོའི་ཉམས་ལེན་ལ། །དབྱེར་མེད་ཐུགས་ཀྱི་ཐིག་ལེར་རོ་གཅིག་ཤོག། ཅེས་བརྗོད་ཅིང་། ཧིཀ་དང་ཕཊཿསྒྲ་ཅི་མང་བརྗོད། དེ་ནས། སངས་རྒྱས་འོད་དཔག་མེད་ཀྱི་འཁོར་རྣམས་གཙོ་བོར་ཐིམ། གཙོ་བོ་མི་དམིགས་པའི་ངང་དུ་འཇོག་པའམ། །ཡང་ན་ནུབ་ཕྱོགས་བདེ་བ་ཅན་དུ་གཤེགས་པར་བསམ་ལ། ཀྱེ་མ་ཚེ་འདས་རྣམ་ཤེས་རྟེན་དང་བཅས། །འོད་བུན་ནེ་སངས་རྒྱས་ཐུགས་ཀར་འཕོ། །ཀློང་དབྱེར་མེད་ཕྱམ་གཅིག་སངས་རྒྱས་ནས། །སྐུ་བདེ་ཆེན་ཞིང་གི་རྒྱན་དུ་ཤོག །ཅེས་བརྗོད་ཅིང་། ཕཊཿསྒྲ་མང་དུ་བྱེད། དེ་ནས་བསྔོ་སྨོན་གྱི་རིམ་པ་རྒྱས་བསྡུས་ཅི་རིགས་སྐབས་དང་བསྟུན་རྗེས། གཤིན་སྒབ་བཅད་པ་ནི། དྲིལ་བུ་བསིལ་ཞིང་མེ་ཏོག་འཐོར་ལ། ཧཱུྃ་ཧྲཱིཿ ཕྱོགས་བཅུའི་རྒྱལ་བ་རྣམས་ཀྱི་ཐུགས་རྗེ་དང་། །བདག་ཅག་ལྷག་བསམ་དག་པའི་བདེན་སྟོབས་ཀྱིས། །རྒྱུ་སྦྱོར་ཡོན་བདག་མི་ནོར་འཁོར་བཅས་ལ། །བཀྲ་ཤིས་དཔལ་འབར་བདེ་ལེགས་ཕུན་ཚོགས་ཤོག །ཅེས་བརྗོད། དེ་ནས་བདག་བསྐྱེད་མཆོད་བསྟོད། བསྡུ་རིམ། བསྔོ་སྨོན། ཤིས་བརྗོད། མདོར་བསྡུས་བྱ་བའམ། ཡང་ན་མི་དམིགས་པར་བཞག་ཀྱང་ཆོག་གོ །
གཉིས་པ་བེམ་རིག་བྲལ་ལ་ཁད་ཀྱི་འཆི་ཁ་མའི་འགྲོ་བ་ལ་གདམས་ངག་འབོག་ཚུལ།
གཉིས་པ་བེམ་རིག་བྲལ་མ་ཁད་ཀྱི་འཆི་ཁ་མའི་འགྲོ་བ་ལ་གདམས་ངག་འབོག་ཚུལ་ནི། འཆི་ངེས་པའི་ནད་པའི་རྩར་སླེབ་ན། དང་པོ་མ་བསྒོམས་པར་སངས་རྒྱས་པའི་ཆོས་དྲུག་ལས། བཏགས་གྲོལ་ཡོད་ན་སྙིང་ཁར་འདོགས། མཐོང་གྲོལ་མིག་ལམ་དུ་སྟོན། གཟུངས་སྔགས་ཟབ་མོ་དང་། སངས་རྒྱས་ཀྱི་མཚན་ཕན་ཡོན་ཅན། བཏགས་གྲོལ་ཐོས་གྲོལ་རྣམས་རྣ་ལམ་དུ་བསྒྲགས། བདུད་རྩི་སྨན་སྒྲུབ་དང་རིལ་བུ་སོགས་དམ་རྫས་མྱོང་གྲོལ་ཁོང་དུ་བླུད། འཕོ་བ་རིལ་བུ་ཡོད་ན་སྦྱངས་ཏེ་སྤྱི་བོར་བྱུགས། སྡིག་སྒྲིབ་བྱས་བྱེད་ཡི་རང་རྣམས། བཤགས་སྡོམ་བྱེད་དུ་གཞུག དབང་བསྐུར་དུས་སྐྱབས་སེམས་ནས་བཟུང་སྡོམ་པ་སྦྱིན་ལེན་སོགས་དབང་དོན་རྣམས་ཚིག་དོན་གོ་ངེས་པ་བྱ། དེ་ནས་ཕྱི་དབུགས་མ་ཆད་ཙམ་གྱི་དུས། རོའི་ལུས་གནད་ཙོག་པུའམ། གཞོགས་གཡས་ཕབ་པར་བཤད་ཀྱང་། དབུགས་མ་ཆད་པ་ནས་ལུས་གནད་བཅོས་ཐུབ་ན་མ་གཏོགས། ཕྱི་དབུགས་ཆད་ཁ་ཕུང་པོ་ལ་བཟོ་བཅོས་ཐུག་རེག་མི་རུང་། ཉེ་འཁོར་དུ་སྨྲེ་སྔགས་དང་ཀུ་ཅོའི་སྒྲ་མཚམས་སྦྱོར་ངན་པའི་རྐྱེན་མེད་ཅིང་། འཇམ་སེམས་བདེ་བར་བྱ། དམ་ཉམས་དང་སྡིག་ཅན་སོགས་ཀྱང་རོའི་ཉེ་འཁོར་དུ་མི་བཞག་ཁྱད་པར་རྟེན་ལ་ཕྱོགས་ནས་ཚེ་འདས་ཀྱི་སྙིང་ནས་བརྩེ་བའི་ཉེ་དུ་རྣམས་ཀྱིས་ངུ་སྐད་དང་འབོད་སྐད་ཆེན་པོ་མི་བྱེད། ངེས་པར་དབུགས་དང་བྲལ་དུས་གསལ་འདེབས་ཤིན་ཏུ་སླ་བའི་ཡིད་ལ་འདྲེས་པར་བྱ། བླ་མས་ཀྱང་ནོར་དོན་དུ་གཉེར་བའི་ཁོང་སྲན་མེད་པར་བྱམས་སྙིང་རྗེས་འཕོ་བ་བཏབ་ན། ཕན་ཡོན་བསམ་ལས་འདས་པས། དང་པོ་སྐྱབས་འགྲོ་སེམས་བསྐྱེད་དང་། སངས་རྒྱས་ཀྱི་མཚན་གང་ཤེས་མང་བར་བསྒྲགས། ལུས་ཀྱི་དྲོད་མཐའ་ནས་རིམ་བཞིན་བསྡུས་ཏེ། བོལ་གོང་གི་རྩ་ཆད་ནས་སྐེ་རྩ་ཆད་ལ་ཉེ་བའི་དུས་ཡིན་ན། སྔས་མགོར་ཕྱོགས་ནས་འདུག་ལ་སྐྲ་མཚམས་ནས་སོར་བརྒྱད་ཀྱི་མཚམས་ཀྱི་སྤྱི་གཙུག་དྲང་པོ་ནས། སྐྲ་ཉག་ཆ་ཤས་བསྒྲིམས་ནས་འཐེན་ལ་བཞག སྐད་ཆེ་ཆུང་མཚམས་ལ་རན་པས་ཁོའི་མིང་ནས་བོས་ཏེ། འོ་རིགས་ཀྱི་བུའམ་བུ་མོ་ཆེ་གེ་མོ་ཁྱོད་ད་ལྟ་ལུས་སེམས་བྲལ་ནས་འཆི་བའི་དུས་ལ་བབ་འདུག་པས་འཆི་བ་འདི་ངོ་ཤེས་པར་གྱིས་ཤིག ཁྱོད་རང་ཚེ་འདིའི་ལུས་དང་ཁང་ཁྱིམ་ནོར་རྫས་ཡོ་བྱད་གྲོགས་དང་གཉེན་འཁོར་ལས་དང་བྱ་བྱེད་ཀྱི་འཕྲོ་སོགས་ཅི་དང་ཅི་ལྟ་བུ་ཡོད་ཀྱང་། ཆགས་ཞེན་དང་འཛིན་པ་གཏན་ནས་མ་བྱེད། དེ་དག་ལ་ཆགས་ཞེན་བྱས་ཀྱང་ཐར་བའི་ལམ་གྱི་གེགས་དང་བར་ཆད་དུ་འགྱུར་བ་མ་གཏོགས། ཕན་པ་ཅི་ཡང་མེད་པའི་བློ་ལིངས་ཀྱིས་ཐོངས་ལ་ཁོ་ཐག་རྦད་ཀྱིས་ཆོད་པར་གྱིས་ཤིག འཆི་བ་མི་རྟག་པ་འདི་ཁྱོད་གཅིག་པུའི་སྟེང་དུ་བྱུང་བ་མ་ཡིན། སྟོང་འཁོར་ལོས་བསྒྱུར་བའི་རྒྱལ་པོ་མན་ཆད་ནས། མདང་སྐྱེས་ཀྱི་བུ་ཆུང་ཡན་ཆད་ལ་འབྱུང་ངེས་པ་ཅན་ཡིན་པས་འདི་ལ་འཇིགས་འཚེར་དང་སྡུག་བསྔལ་མ་བྱེད་འཆི་ཁ་བླ་མ་དང་གདམས་ངག་ཟབ་མོ་འདི་ལྟ་བུ་དང་ཕྲད་ནས་འཆི་བ་ནི་ལས་དང་སྐལ་བར་ལྡན་པའི་བསོད་ནམས་ཅན་ཡིན་པས། སེམས་གཞན་དུ་མ་ཡེངས་པར། དགའ་སྤྲོ་དང་བཅས་པའི་ངང་ནས་དམིགས་པ་འདི་ལྟར་དུ་སྒོམས་ཤིག ཁྱོད་རང་གི་ལུས་འདི་ཉིད་རྗེ་བཙུན་རྡོ་རྗེ་རྣལ་འབྱོར་མའི་སྐུའི་རྣམ་པ་ཁོང་པའི་ནང་ན། ཤ་ཁྲག་རུས་པ་ནང་ཁྲོལ་སོགས་ཅི་ཡང་མེད་པ་སྟོང་སེང་ངེ་ཡོད་པར་བསྒོམ་པའི་དབུས་དྲང་པོར་རྩ་དབུ་མ་ཁོང་སྟོང་སྦ་མཁར་ཙམ་ཕྱི་གསལ་ནང་གསལ་ཀ་བ་བཙུགས་པ་ལྟ་བུའི་ཡར་སྣེ་སྤྱི་གཙུག་ཚངས་བུག་ཁ་ཕྱེས་ནས་དཀར་སེང་ངེ་ཡོད་པའི་སྟེང་། གྲུ་གང་ཙམ་གྱི་ནམ་མཁར་པདྨ་དང་ཉི་ཟླའི་གདན་ལ་ཁྱེད་རང་གི་གང་ལ་མོས་ཤིང་དད་པའི་རྩ་བའི་བླ་མ་དེ་ཉིད། ༼ཆོས་སྐུ་རྡོ་རྗེ་འཆང་ངམ་། ཨོ་རྒྱན་རིན་པོ་ཆེ་འམ། ༽སངས་རྒྱས་འོད་དཔག་མེད་ཀྱི་ཆ་ལུགས་སུ་འཇའ་འོད་འཁྱིལ་ལེར་བཞུགས་པར་སྒོམ་ལ་དད་པ་མོས་གུས་རྩེ་གཅིག་ཏུ་གྱིས་ཤིག དབྱངས་སྙན་པོས། ན་མོ་གུ་རུ། བདེ་ཆེན་འཁོར་ལོ་དོན་གྱི་འོག་མིན་ནས། །སངས་རྒྱས་ཀུན་ལས་ལྷག་པའི་ཐུགས་རྗེ་ཅན། །རྒྱལ་བ་ཀུན་འདུས་རྩ་བའི་བླ་མ་ཉིད། །མཚན་དཔེའི་གཟི་འབར་སྣང་སྟོང་འོད་སྐུར་བཞུགས། །བདག་གཞན་འགྲོ་བའི་ལུས་སྲོག་ལོངས་སྤྱོད་ཀུན། །ཁྱེད་ལ་མཆོད་པར་འབུལ་ལོ་དགྱེས་བཞིན་བཞེས། །ཚེ་རབས་ཐོག་མེད་ནས་བསགས་སྡིག་སྒྲིབ་རྣམས། །མི་གསང་མི་སྦེད་གནོང་འགྱོད་དྲག་པོས་བཤགས། །ཕྱིན་ཆད་མི་བགྱི་སེམས་ལ་དམ་བཅའ་འཛིན། །ཚད་མེད་ཐུགས་རྗེ་མྱུར་མགྱོགས་ལྕགས་ཀྱུ་ཡིས། །སྡུག་བསྔལ་ཉམ་ཐག་བུ་འབངས་དྲང་དུ་གསོལ། །དལ་འབྱོར་མི་ལུས་འཆི་བདག་བདུད་ཀྱིས་བཅོམ། །ཚེ་འདིའི་སྣང་བ་ནུབ་པའི་མཐའ་ལ་ཐུག །བར་དོའི་འཇིགས་སྐྲག་འཆར་ལ་ཉེ་བ་ཡི། །ཉམ་ཐག་བུ་ལ་ཐུགས་རྗེས་བསྐྱབ་ཏུ་གསོལ། །འདི་ནས་ལུས་སེམས་སོ་སོར་བྲལ་མ་ཐག །བར་དོའི་འཇིགས་སྐྲག་འཁྲུལ་སྣང་མི་འཆར་བར། །གསལ་སྟོང་འཛིན་མེད་རིག་པ་རྗེན་པ་འདི། །རྗེ་བཙུན་བླ་མའི་ཐུགས་དང་དབྱེར་མེད་པར། །ཆོས་དབྱིངས་སྐྱེ་མེད་ཀློང་དུ་གྲོལ་བར་ཤོག །ཅེས་བརྗོད་ཅིང་། ངེད་ཀྱིས་ཧིཀ་དང་ཕཊཿཀྱི་སྒྲ་བརྗོད་པའི་ཚེ་ཁྱེད་རང་གི་རྣམ་པར་ཤེས་པའི་ངོ་བོ་ཐིག་ལེ་དེ་ཉིད་ནམ་མཁའི་སྐར་མདའ་ཡར་བ་ལྟར་དབུ་མའི་ནང་ནས་ཡར་བརྒྱུད་དེ། རྩ་བའི་བླ་མའི་ཐུགས་ཀར་ཐིམ་ནས་ཐུགས་ཡིད་དབྱེར་མེད་དུ་འདྲེས་པའི་མོས་པ་གྱིས་ཤིག ཅེས་དམིགས་པ་ལ། ཧིཀཿདང་ཕཊཿསྒྲ་མང་དུ་བརྗོད། སླར་ཡང་རྒྱས་པར་སྤྲོ་ན། ཀྱེ་མ་ཀྱེ་ཧུད་མི་རྟག་སོགས། མཚམས་འདི་ནས་ཤོག་ལྡེབ་འགའ་ཆད། མཆན།
གང་ཟག་མཆོག་རྣམས་འདས་ནས་ཞག་གཉིས་གསུམ་སོང་ཚར་བའི་ཐུགས་དམ་དཀྲོལ་ཚུལ།
གསུམ་པ་བླ་མ་སོགས་གང་ཟག་ཐུགས་དམ་ཅན་འདས་ནས་ཞག་གཉིས་གསུམ་སོང་ཚར་བའི་ཐུགས་དམ་དཀྲོལ་ཚུལ་ནི་རྟེན་གྱི་གང་ཟག་རབ་འབྲིང་ཐ་མ་གསུམ་ལས། སྐབས་འདིར་འབྲིང་པོ་རང་ལུགས་རྫོགས་ཆེན་གྱི་ལམ་ལ་གནས་ཤིང་། གྲོལ་འབྲས་ཕྲ་མོ་ཐོབ་པ་ཞིག་གི་དབང་དུ་བྱས་པ་ཡིན་པས་ཐོག་མར། སེམས་བསྐྱེད་སོགས་བདག་རྒྱུད་བྱིན་རློབ་ཀྱི་ཆོ་ག་དང་། དགོས་ཆས་ཉེར་མཁོ་རྣམས་གོང་ལྟར་ལ་ཁྱད་པར་གདུང་མདུན་དུ་ཆུ་གཉིས་སྔོན་དུ་འགྲོ་བའི་ཉེར་སྤྱོད་མཎྜལ་འདོད་ཡོན་སྣ་བདུན། རྟགས་རྫས་རིགས་མ་བཅུ་དྲུག་གི་ཙཀླི་སོགས། མཆོད་རྫས་ཅི་འབྱོར་བཤམས་ལ། མདུན་གྱི་སྐུ་གདུང། ཧྱ་གྷྲི་ཝས་བསངས། སྭ་བྷ་ཝས་སྟོང་པར་སྦྱངས། མདུན་གྱི་རྟེན་སྣང་རང་བཞིན་སྟོང་པའི་ངང༔ སེང་ཁྲི་པད་ཉི་ཟླ་སྟེང་ཧཱུཾ་ཡིག་ལས༔ འོད་འཕྲོས་འཕགས་མཆོད་སེམས་ཅན་སྡིག་སྒྲིབ་སྦྱངས༔ ཚུར་འདུས་ཡོངས་གྱུར་བླ་མ་རྡོ་རྗེ་སེམས༔ དཀར་གསལ་ཞལ་གཅིག་ཕྱག་གཉིས་རྡོར་དྲིལ་བསྣམས༔ དར་གྱི་ན་བཟའ་རིན་ཆེན་རྒྱན་ཆས་སོགས༔ ལོངས་སྤྱོད་རྫོགས་སྐུ་མཚན་དཔེའི་གཟི་བྱིན་ལྡན༔ ཞབས་གཉིས་གཡས་བརྐྱང་གཡོན་བསྐུམ་རོལ་སྟབས་བཞུགས༔ གནས་གསུམ་ཡིག་འབྲུ་གསུམ་དང་བདག་ཉིད་ཀྱི༔ ཐུགས་སྲོག་ཧཱུྃ་གི་འོད་ཟེར་འཕྲོ་འདུ་ཡིས༔ དམིགས་ཡུལ་རང་བཞིན་གནས་ནས་སྤྱན་དྲངས་བསྟིམ༔ ན་མོ་སྐུ་གསུམ་དཀོན་མཆོག་རྩ་གསུམ་སྲུང་མ་ཡི༔ བྱིན་རླབས་ཐུགས་རྗེ་ནུས་པའི་བདེན་སྟོབས་ཀྱིས༔ འཇིག་རྟེན་འདི་ནས་ཞི་བར་གཤེགས་པ་དེ༔ འཁོར་འདས་སྲིད་ཞིའི་ཞིང་ཁམས་གར་བཞུགས་ཀྱང་། སྤྱན་དྲངས་རྟེན་དང་དབྱེར་མེད་བརྟན་པར་གྱུར༔ ཨོཾ་གུ་རུ་བཛྲ་དྷ་ར་ཨེ་ཧྱ་ཧི་བཛྲ་ས་མཱ་ཛཿ སྤྱན་དྲངས། ཛཿཧཱུྃ་བཾ་ཧོཿ ས་བརྟན་པར་བྱས། དེ་ནས་བགེགས་གཏོར་བརླབས་བསྔོས་ནས། བདེན་སྟོབས་བརྗོད་པའི་བར་སྔར་བཞིན་ལས། བདེན་པ་ཆེན་པོའི་མཐུ་དང་ནུས་པ་བྱིན་གྱིས་བརླབས་པ་ལ་བརྟེན་ནས་དགེ་བའི་བཤེས་གཉེན་རྡོ་རྗེ་འཛིན་པ་འདིའི་ཐར་པ་དང་ཐམས་ཅད་མཁྱེན་པའི་ས་དང་ལམ་ལ་བར་དུ་གཅོད་པའི་བགེགས་དང་ལོག་པར་འདྲེན་པའི་ཚོགས་ཐམས་ཅད་གཏོར་མ་འདིས་ལམ་བརྔན་སོགས་བརྗོད་ཅིང་། གུལ་ཡུངས་དང་བཅས་པས་བསྐྲད་ནས་བསྲུང་འཁོར་བསྒོམ། དེ་ནས་མེ་ལོང་ཁྲུས་བུམ་བཅས་ཐོགས་ལ། གང་འདིར་ཕྱོགས་བཅུ་དུས་གསུམ་གྱི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་འཕྲིན་ལས་ཐམས་ཅད་ཀྱི་ངོ་བོར་གྱུར་པ་ཆོས་ཀྱི་ཕུང་པོ་སྟོང་ཕྲག་བརྒྱད་ཅུ་རྩ་བཞིའི་འབྱུང་གནས་འཕགས་པའི་དགེ་འདུན་ཐམས་ཅད་ཀྱི་མངའ་བདག་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་དང་། ཕྱོགས་བཅུའི་རྒྱལ་བ་སྲས་དང་བཅས་པ་རྣམས་ལ་སྐུ་ཁྲུས་དམ་པ་གསོལ་བར་བགྱིའོ། །ཁྲུས་ཀྱི་ཁང་པ་ཤིན་ཏུ་དྲི་ཞིམ་པ། །ཤེལ་གྱི་ས་གཞི་གསལ་ཞིང་འཚེར་བ་ལྟར། །རིན་ཆེན་འབར་བའི་ཀ་བ་ཡིད་འོང་ལྡན། །མུ་ཏིག་འོད་ཆགས་བླ་བྲེ་བྲེས་པ་དེར། །དེ་བཞིན་གཤེགས་པ་རྣམས་དང་དེ་སྲས་ལ། །རིན་ཆེན་བུམ་པ་མང་པོ་སྤོས་ཀྱིས་ཆུས། །ཡིད་འོང་ལེགས་པར་གང་བའི་གླུ་དང་ནི། །རོལ་མོ་བཅས་པ་དུ་མས་སྐུ་ཁྲུས་གསོལ། །ཇི་ལྟར་བལྟམས་པ་ཙམ་གྱིས་ནི། །ལྷ་རྣམས་ཀྱིས་ནི་ཁྲུས་གསོལ་ལྟར། །ལྷ་ཡི་ཆུ་ནི་དག་པ་ཡིས། །དེ་བཞིན་བདག་གིས་སྐུ་ཁྲུས་གསོལ། །ཨོཾ་སརྦ་ཏ་ཐཱ་ག་ཏཱ་ཨ་བྷཱི་ཥི་ཀ་ཏེ་ས་མ་ཡ་ཤྲཱི་ཡེ་ཧཱུྃ༔ འདི་ནི་ཁྲུས་མཆོག་དཔལ་དང་ལྡན། །ཐུགས་རྗེའི་ཆུ་ནི་བླ་ན་མེད། །བྱིན་རླབས་ཡེ་ཤེས་ཆུ་ཡིན་ཏེ། །ཅི་འདོད་དངོས་གྲུབ་བསྩལ་དུ་གསོལ། །ཕར་ཕྱིན་དྲུག་གི་ཁྲུས་རྒྱས་བསྡུས་གང་རིགས་སོགས་དང་ཞེས། འདི་ནི་སྦྱིན་པའི་རང་བཞིན་ཆུ། །སེར་སྣའི་དྲི་མ་སྦྱངས་མཛད་ཅིང་། །གཏོང་བ་དྲི་ཡིས་ལེགས་བགོས་ཆུ། །ཁྲུས་ལེགས་མཛད་ལ་སྐུ་ཁྲུས་གསོལ། །འདི་ནི་ཚུལ་ཁྲིམས་རང་བཞིན༴ ཁྲིམས་འཆལ་དྲི་མ༴ ཚུལ་ཁྲིམས་དྲི་ཡིས༴ ཁྲུས་ལེགས་མཛད་ལ༴ འདི་ནི་བཟོད་པའི༴ ཁོང་ཁྲོའི་དྲི་མ༴ བཟོད་པ་དྲི་ཡི་ལེགས༴ ཁྲུས་ལེགས༴ འདི་ནི་བརྩོན་འགྲུས་རང་བཞིན༴ ལེ་ལོའི་དྲི་མ༴ བརྩོན་འགྲུས་དྲི་ཡིས༴ ཁྲུས་ལེགས༴ འདི་ནི་བསམ་གཏན༴ རྣམ་གཡེང་དྲི་མ༴ བསམ་གཏན་དྲི་ཡིས༴ ཁྲུས་ལེགས༴ འདི་ནི་ཤེས་རབ༴ ཤེས་འཆལ༴ ཤེས་རབ་དྲི་ཡིས༴ ཁྲུས་ལེགས་མཛད༴ རྒྱལ་བའི་སྐུ་གསུང་ཐུགས་མཆོག་ལ། །ཉོན་མོངས་སྒྲིབ་པ་མི་མངའ་ཡང་། །བདག་ཅག་སྒོ་གསུམ་སྒྲིབ་སྦྱང་ཕྱིར། །གཙང་མ་ཆབ་ཀྱིས་སྐུ་ཁྲུས་གསོལ། །དེ་དག་སྐུ་ལ་མཚུངས་པ་མེད་པའི་གོས། །གཙང་ལ་དྲི་རབ་བགོས་པས་སྐུ་ཕྱི་འོ། །ཨོཾ་ཧཱུྃ་ཏྲཱྃ་ཧྲཱིཿཨཱ༔ ཀ་ཡ་བི་ཤྭ་དྷ་ན་ཡེ་སྭཱ་ཧཱ༔ སྐུ་ཕྱི་བྱ། སྣ་ཚོགས་དབང་པོའི་གཞུ་ལྟར་རབ་བཀྲ་ཞིང་། །གང་ལ་རེག་ན་བདེ་བའི་རྒྱུར་འགྱུར་བའི། །གོས་བཟང་རིན་ཆེན་བདག་བློ་སྦྱང་ཕྱིར་འབུལ། །བཟོད་པ་དམ་པའི་གོས་ཀྱིས་བརྒྱན་པར་ཤོག །ཨོཾ་བཛྲ་ཝཥྚ་ཡེ་སྭཱ་ཧཱ། གོས་འབུལ། དེ་ནས་སྐད་གདངས་མཐོན་པོས། འོ་འཇིག་རྟེན་འདི་ནས་འཇིག་རྟེན་ཕ་རོལ་དུ་ཞི་བར་གཤེགས་པ་ཁྱོད་ལ་བར་དོའི་འཆར་ཚུལ་ངོ་སྤྲོད་གསལ་འདེབས་ཀྱི་ཚུལ་དུ་བརྗོད་པ་འདི་ལ་ལེགས་པར་གསན་པར་ཞུ། དེ་ཡང་ཁྱེད་ཉིད་གཅིག་པུ་ཁོ་ན་འདི་ལྟར་ཞི་བར་གཟིམ་པ་ནི་མ་ཡིན། སྤྱིར་འཁོར་བའི་མཚན་ཉིད་ཐམས་ཅད་མི་རྟག་པ་ཁོ་ན༴ ཞེས་པ་ནས་བཟུང་འཆི་ཁ་བར་དོ་དང་། ཆོས་ཉིད་བར་དོའི་ངོ་སྤྲོད་གཉིས་གོང་མ་ལྟར་ལ། དེ་ནས་སྲིད་པ་བར་དོར་དབང་པོ་ཐ་མ་རང་བཞིན་སྤྲུལ་སྐུའི་ཞིང་དུ་དབུགས་དབྱུང་ཚུལ་ལོགས་སུ་བྲིས་པ་ལྟར་ངོ་སྤྲོད་གསལ་འདེབས་རྒྱས་པར་བྱ་ཞིང་། དེ་དག་གི་མཇུག་གི་དགོས་ཆས་བྱེ་བྲག་པ་རྣམས་དམིགས་ཕྱེད་པར་བྱ། ཁྱད་པར་རྟེན་ལྷར་བསྐྱེད་ནས་མཆོད་བསྟོད་མཇུག་ཏུ། མཆོད་རྫས་རྣམས། ཧྱ་གྷྲྀ་ཝས་བསངས། སྭཱ་བྷ་ཝས་སྦྱངས། སྟོང་པའི་ངང་ལས་བྷྲུཾ་ལས་བྱུང་བའི་རིན་པོ་ཆེའི་སྣོད་ཟབ་ཅིང་རྒྱ་ཆེ་བའི་ནང་དུ། ཨོཾ་ལས་མཆོད་རྫས་དང་། འདོད་ཡོན་རྣམས་ཁ་དོག་དྲི་རོ་རེག་བྱ་ནུས་པ་ཕུན་སུམ་ཚོགས་པ་ལྷ་མིའི་དཔལ་འབྱོར་མཁོ་དགུའི་ལོངས་སྤྱོད་གང་ཡང་མ་ཚང་བ་མེད་པ་བསམ་གྱིས་མི་ཁྱབ་པ་ཀུན་ཏུ་བཟང་པོའི་མཆོད་སྤྲིན་དུ་གྱུར། ཨོཾ་བཛྲ་ཨརྒྷཾ་སོགས་ནས། ཤཔྟ་ཨཱཿཧཱུྃ༔ གིས་བྱིན་གྱིས་བརླབས་ལ། ན་མཿསརྦ་ཏ་ཐཱ་ག་ཏ་བྷྱོ་བི་ཤྭ༴ སོགས་ནམ་མཁའ་མཛོད་ཀྱི་སྔགས་རྒྱ་དང་། ཨོཾ་སརྦ་བིད་པཱུ་ར་པཱུ་ར་སོགས། འདོད་ཡོན་སྤེལ་བའི་སྔགས་ཀྱིས་བསམ་གྱིས་མི་ཁྱབ་པར་སྤེལ་ལ། རབ་འབྱམས་རྒྱ་མཚོ་དཔག་མེད་ན། །མཆོད་ཡོན་ཞབས་བསིལ་ཇི་སྙེད་ཡོད་པ་དང་། །བདག་གིས་གུས་པར་བཤམས་པ་འདི། །ཇི་སྙེད་རྒྱལ་བ་སྲས་དང་བཅས། །དེ་སྙེད་རྣམས་ལ་བདག་འབུལ་ན། །ཐུགས་རྗེ་མངའ་བ་ཁྱེད་རྣམས་ཀྱིས། །ཅི་བདེ་བར་ནི་བཞེས་ནས་ཀྱང་། །སེམས་ཅན་དོན་ཀུན་མཛད་དུ་གསོལ། །ཨོཾ་སརྦ་ཏ་ཐཱ་ག་ཏཱ་ཨརྒྷཾ་པ་ཏྱཾ་པྲ་ཏིཙྪ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། དེ་བཞིན་དུ་མེ་ཏོག་བདུག་སྤོས་དང་། པུཥྤེ་དྷུཥྤེ། སྣང་གསལ་དྲི་ཆབ་དང་། ཨ་ལོ་ཀེ་གྷནྡྷེ། ཞལ་ཟས་རོལ་མོ་དང་། ནཻ་ཝི་དྱ་ཤཔྟ་སོགས་སྦྱར། ཁ་དོག་དབྱིབས་ལེགས། སོགས། འདོད་ཡོན་ལྔ་གོང་བཞིན་གྱི་མཐར་གསུར་དུད་རྒྱས་པར་བྱེད། ཧྲཱིཿ འཁོར་ལོ་རིན་ཆེན་ཆོས་ཀྱི་འཁོར་ལོ་བསྐོར༔ ནོར་བུ་རིན་ཆེན་དགོས་འདོད་ཐམས་ཅད་སྐོང་༔ བཙུན་མོ་རིན་ཆེན་ཕ་རོལ་ཕྱིན་བཅུ་ལྡན༔ ཁྱིམ་བདག་རིན་ཆེན་ཆབ་སྲིད་རབ་ཏུ་སྤེལ༔ གླང་པོ་རིན་ཆེན་བདུད་ཀྱི་དཔུང་ཚོགས་འཇོམས༔ རྟ་མཆོག་རིན་ཆེན་འཁོར་བའི་ཕ་རོལ་སྒྲོལ༔ དམག་དཔོན་རིན་ཆེན་ཉོན་མོངས་གཡུལ་ངོ་བཟློག༔ རིན་ཆེན་སྣ་བདུན་ཡོངས་རྫོགས་མཆོད་པར་འབུལ༔ ཨོཾ་ཙཀྲ་རཏྣ་པཱུ་ཛི་ཏེ་ཨཱཿཧཱུྃ། ཨོཾ་མ་ཎི་རཏྣ༴ ཨོཾ་ཝ་ཏི་རཏྣ༴ ཨོཾ་མ་ཧ་ཏ་རཏྣ༴ ཨོཾ་ཧསྟི་རཏྣ༴ ཨོཾ་ཨ་ཤྭ་རཏྣ༴ ཨོཾ་ཁཏྒ་རཏྣ༴ ཞེས་རྒྱལ་སྲིད་སྣ་བདུན་སྔགས་ཕྱག་རྒྱ་དང་བཅས་པ་བྱ། ཧཱུྃ༔ རིན་ཆེན་གདུགས་མཛེས་གསེར་གྱི་ཡུ་བ་ཅན༔ དྲི་མེད་གསེར་ཉ་གཡུ་ཡི་གཤོག་པས་མཛེས༔ འདབ་བཟང་ངད་ལྡན་སྣ་ཚོགས་པདྨོའི་ཚལ༔ རིན་ཆེན་གཡས་འཁྱིལ་དཀར་ཟླུམ་སྒྲ་དབྱངས་ཅན༔ བདུད་རྩིའི་བུམ་བཟང་དཔག་བསམ་ཁ་རྒྱན་སྤྲས༔ ཡིད་བཞིན་གཏེར་འབྱུང་ཁོང་གསེང་དཔལ་བེའུ༔ མི་ནུབ་ཆོས་ཀྱི་རྒྱལ་མཚན་རབ་ཏུ་བརྟན༔ སྲིད་པའི་དྲ་བ་འཇོམ་པའི་འཁོར་ལོ་སོགས༔ བཀྲ་ཤིས་རྟགས་བརྒྱད་ཡོངས་རྫོགས་མཆོད་པར་འབུལ༔ ཨོཾ་སརྦ་ཏ་ཐཱ་ག་ཏཱ་ཚ་ཏྲཾ་ཀ་པཱུ་ཛི་ཏེ་ཨཱཿ་ཧཱུཾ༔ དེ་བཞིན་དུ། ལཉྩ། ཀ་མ་ལ། ཤངྐ། སཾ་བྷ། ཤྲི་ཝ་ར། ས་དྷྭ་ཛ། ཙཀྲ། ཧྲཱིཿ སྒྲུབ་རྫས་ཡུངས་དཀར་རྒྱལ་པོས་བགེགས་ཚོགས་འཇོམས༔ རྫས་མཆོག་བིལ་བས་ཡོན་ཏན་ཐམས་ཅན་རྒྱས༔ རྩ་མཆོག་དུརྺས་གདོན་གྱི་གནོད་པ་སྐྱོབ༔ ལི་ཁྲིའི་མཚལ་ཆེན་འགྲོ་བ་དབང་དུ་སྡུད༔ གྷི་ཝཾ་སྨན་གྱིས་ཉོན་མོངས་ནད་ཀུན་སེལ༔ བཅུད་ལྡན་ཞོ་ཡིས་དབང་པོའི་གཟི་མདངས་བསྐྱེད༔ གསལ་བྱེད་མེ་ལོང་མ་རིག་མུན་པ་སེལ༔ ཆོས་དུང་གཡས་འཁྱིལ་གསུང་དབྱངས་དྲུག་ཅུ་སྒྲོག༔ བཀྲ་ཤིས་རྫས་བརྒྱད་ཡོངས་རྫོགས་མཆོད་པ་འབུལ༔ ཞེས་དང་། པད་སྐོར་ཕྱག་རྒྱ་དང་བཅས་ཏེ། ཨོཾ་མདྒ་ལཾ་ཤྲཱི་པ་ཤཾ་པཱུ་ཛི་ཏེ་ཨཱཿཧཱུྃ༔ དེ་བཞིན་དུ། བིལྺ། ཨ་པྲ་ཏི་ཧ་ཏ། ཧྲི་པ་ཤཾ། གྷི་ཝཾ། དྷ་རི་ཏ། ཨ་དྷཪྴ། སྭ་བྷ་ལ། ཞེས་བསྒྱུར་བས་མཆོད། དེ་ནས་རྒྱས་པར་སྤྲོ་ན། ཀུན་ཏུ་དགའ་བ་ཉམས་བཞིའི་རྣམ་འགྱུར་ཅན༔ རྡོ་རྗེ་པི་ཝཾ་གླིང་བུ་རྔ་ཐབས་བཟུང༔ ཡིད་འཕྲོག་འཇོ་སྒེག་ལྡན་པའི་ལང་ཚོ་མ། །ནམ་མཁའ་རབ་འབྱམས་གང་བའི་འཁོར་ལོར་མཆོད། །ཨོཾ་ཨཱཿབཛྲ་བི་ཎེ་ཧཱུཾ། ཨོཾ་ཨཱཿབཛྲ་ཝཾ་སེ་ཏྲཾ། ཨོཾ་ཨཱཿབཛྲ་མྲྀ་ཏེ་གི་ཧྲཱིཿ ཨོཾ་ཨཱཿབཛྲ་མུ་རན་ཛེ་ཨཱ༔ མཆོག་ཏུ་དགའ་བ་ཉམས་བཞིའི་རྣམ་འགྱུར་ཅན། །རྡོ་རྗེ་སྒེག་བཞད་གླུ་དང་གར་མཁན་མ། །ཡིད་འཕྲོག་འཇོ་སྒེག་ལྡན་པའི་ལང་ཚོ་མ། །ནམ་མཁའ་རབ་འབྱམས་གང་བའི་འཁོར་ལོར་མཆོད། །ཨོཾ་ཨཱཿབཛྲ་ལཱ་སྱ་ཧཱུྃ། ཨོཾ་ཨཱཿབཛྲ་མ་ལྱ་ཏྲཾ། ཨོཾ་ཨཱཿབཛྲ་གཱིརྟི་ཧྲཱིཿ ཨོཾ་ཨཱཿབཛྲ་ནིརྟི་ཨཱ༔ ཁྱད་པར་དགའ་བ་ཉམས་བཞིའི་རྣམ་འགྱུར་ཅན། །མེ་ཏོག་བདུག་སྤོས་སྣང་གསལ་དྲི་ཆབ་མ། །ཡིད་འཕྲོག་འཇོ་སྒེག་ལྡན་པའི་ལང་ཚོ་མ། །ནམ་མཁའ་རབ་འབྱམས་གང་བའི་འཁོར་ལོར་མཆོད། །ཨོཾ་ཨཱཿབཛྲ་པུཥྤེ་ཧཱུྃ༔ ཨོཾ་ཨཱཿབཛྲ་དྷུ་པེ་ཏྲཾ། ཨོཾ་ཨཱཿབཛྲ་ཨཱ་ལོ་ཀེ་ཧྲཱི༔ ཨོཾ་ཨཱཿབཛྲ་གྷནྡྷེ་ཨཱཿ ལྷན་སྐྱེས་དགའ་བ་ཉམས་བཞིའི་རྣམ་འགྱུར་ཅན། །གཟུགས་རེག་རོ་དང་ཆོས་དབྱིངས་རྡོ་རྗེ་མ། །ཡིད་འཕྲོག་འཇོ་སྒེག་ལྡན་པའི་ལང་ཚོ་མ། །ནམ་མཁའ་རབ་འབྱམས་གང་བའི་འཁོར་ལོར་མཆོད། །ཨོཾ་ཨཱཿབཛྲ་རུ་པ་ཧཱུྃ། ཨོཾ་ཨཱཿབཛྲ་ར་ས་ཏྲཱཾ། ཨོཾ་ཨཱཿབཛྲ་སྤརྴེ་ཧྲཱི། ཨོཾ་ཨཱཿབཛྲ་དྷརྨ་དྷརྟུ་ཨཱཿ ཞེས་རྡོ་རྗེའི་རིག་མ་བཅུ་དྲུག་གི་མཆོད་འབུལ་ཚིགས་བཅད་སྔགས་རྒྱ་དང་བཅས་པ་བྱའོ། །བསྟོད་པ་ནི། དཔལ་སངས་རྒྱས་ཐམས་ཅད་འདུས་པའི་སྐུ། །རྡོ་རྗེ་འཛིན་པའི་ངོ་བོ་ཉིད། །དཀོན་མཆོག་གསུམ་གྱི་རྩ་བ་སྟེ། །བླ་མ་རྣམས་ལ་ཕྱག་འཚལ་བསྟོད། །བླ་མའི་སྐུ་ནི་རྡོ་རྗེའི་སྐུ། །མཛེས་ཤིང་བལྟ་བས་ཆོག་མི་ཤེས། །བསམ་གྱིས་མི་ཁྱབ་ཡོན་ཏན་འདྲེན། །བླ་མའི་སྐུ་ལ་ཕྱག་འཚལ་བསྟོད། །བླ་མའི་གསུང་ནི་ཚངས་པའི་དབྱངས། །འགགས་མེད་སེང་གེའི་སྒྲ་དང་ལྡན། །མུ་སྟེགས་རི་དྭགས་སྐྲག་མཛད་པའི། །བླ་མའི་གསུང་ལ་ཕྱག་འཚལ་བསྟོད། །བླ་མའི་ཐུགས་ནི་ནམ་མཁའ་འདྲ། །བདེ་གསལ་མི་རྟོག་སྟོང་པའི་ངང་། །རྣམ་ཐར་གསུམ་ལ་ལེགས་གནས་པའི། །བླ་མའི་ཐུགས་ལ་ཕྱག་འཚལ་བསྟོད། །སྐུ་འགྱུར་བ་མེད་པ་བླ་མའི་སྐུ། །གསུང་འགགས་པ་མེད་པ་བླ་མའི་གསུང་། །ཐུགས་འཁྲུལ་བ་མེད་པ་བླ་མའི་ཐུགས། །བླ་མའི་སྐུ་གསུང་ཐུགས་ལ་ཕྱག་འཚལ་བསྟོད། །བསྟོད་པར་འོས་པ་ཐམས་ཅད་ལ། །ཞིང་རྡུལ་ཀུན་གྱི་གྲངས་སྙེད་ཀྱི། །ལུས་བཏུད་པ་ཡི་རྣམ་པ་ཀུན། །མཆོག་ཏུ་དད་པས་ཁྱེད་ལ་བསྟོད། །ཅེས་བསྟོད་ལ། ལམ་སྦྱང་བསྟན་ནི། དཀོན་མཆོག་རིན་ཆེན་དཔལ་ཞིང་དུ། །དཀོན་མཆོག་རིན་ཆེན་ལས་བྱུང་བ། །དཀོན་མཆོག་རིན་ཆེན་འོད་ཟེར་གྱིས། །རིན་ཆེན་ཕྲེང་བ་རྣམ་དག་པ། །ཚོགས་ཀྱི་ལམ་དང་སྦྱོར་བའི་ལམ། །མཐོང་བའི་ལམ་དང་བསྒོམ་པའི་ལམ། །བླ་ན་མེད་པའི་ཁྱད་པར་ལམ། །བྱང་ཆུབ་བར་ཆད་མེད་པའི་ལམ། །རྣམ་པར་གྲོལ་བའི་ལམ་དག་ལ། །བརྟེན་ནས་སྡིག་པ་ཀུན་སྦྱངས་ནས། །འཕགས་པའི་ལམ་དེར་གྲོལ་བར་ཤོག །ཨོཾ་རཏྞེ་རཏྞེ་མ་ཧཱ་རཏྞེ་རཏྣ་སཾ་བྷ་ཝེ། རཏྣ་ཀི་ར་ཎེ། རཏྣ་མཱ་ལཱ་བི་ཤཱུདྡྷེ། ཤོ་དྷ་ཡ་སརྦ་པཱ་པཾ་ཧཱུྃ་ཏྲཱ་ཊ། ཞེས་བརྗོད། པདྨ་འདམ་གྱིས་མ་གོས་ལྟར། །སྲིད་གསུམ་དྲི་མས་མ་གོས་པའི། །སྲིད་པའི་པདྨོ་ལས་བྱུང་བ། །བདེ་བ་ཅན་དུ་སྐྱེ་བར་ཤོག །ཨོཾ་པདྨེ་པདྨེ། པདྨ་སམ་བྷ་ཝེ། མ་ཧཱ་སུ་ཁ་བ་ཏི་གཙྪནྟུ་སྭཱ་ཧཱ། ཞེས་གོང་ལྟར་བྱ་དེ་ནས། འོ་འཇིག་རྟེན་འདི་ནས་འཇིག་རྟེན་ཕ་རོལ་ཏུ་ཞི་བར་གཤེགས་པ་ཁྱེད་ལ། ད་ནི་མ་བསྒོམས་པར་སངས་རྒྱས་པའི་ཆོས་དྲུག་གི་ནང་ཚན། ཞེས་སོགས་ནས། དབྱེར་མེད་ཐུགས་ཀྱི་ཐིག་ལེར་རོ་གཅིག་ཤོག ཅེས་པའི་བར་སྔར་ལྟར་དང་། དེ་ནས། འོད་དཔག་མེད་གཤེགས་གསོལ། བསྔོ་སྨོན་ཤིས་བརྗོད། བདག་བསྐྱེད་ཀྱི་རྗེས་ཆོག་རྣམས་བྱས་པས་དོན་འགྲུབ་བོ། །ལར་གང་ཟག་རབ་སངས་རྒྱས་ཀྱི་སྤྲུལ་པ་སེམས་ཅན་གྱི་དོན་དུ་བསམ་བཞིན་དུ་བྱོན་པ་རྣམས་ལ་འབྱུང་བའི་ཐིམ་རིམ་རྣམས་རྫོགས་ནས། ཀ་དག་གཞོན་ནུ་བུམ་སྐུར་འུབ་ཆུབ་སྟེ་བར་དོ་མེད་པར་ཡར་གྱི་ཟང་ཐལ་དུ་གྲོལ་ངེས་པ། སྐྱེས་ཆེན་དམ་པ་གཞན་རྣམས་ཀྱི་ངོ་སྤྲོད་གསལ་འདེབས་སོགས་ལ་ལྟོས་མི་དགོས། དེ་ལྟ་བུ་ལ་འཕོ་ལུང་སོགས་བྱེད་མི་རུང་བར་བཤད། འབྲིང་ཚེ་འདིར་ཁྲེགས་ཆོད་དང་ཐོད་རྒལ་གྱི་ལམ་ཉམས་སུ་བླངས་པས། འོད་གསལ་སྐྱེལ་མ་ལྟ་བུ་དང་། བར་དོའི་འོད་གསལ་བསུ་མ་ལྟ་བུ་གཉིས་མ་བུ་འཕྲད་པ་ལྟར་མཚམས་སྦྱོར་བས། སྲིད་པ་བར་དོར་འཁྱམས་མི་དགོས་ངེས་པ་རྣམས་ལའང་། འདའ་ཀ་མའི་ཉམས་ལེན་གསལ་འདེབས། ཆོས་ཉིད་བར་དོའི་འོད་གསལ། སྣང་བཞིའི་ངོ་སྤྲོད་བྱས་ན་བོགས་འདོན་གྱི་ཚུལ་དུ་འགྲོ་བ་ཡིན། འཕོ་བའི་གདམས་པ་མི་དགོས། ངོ་སྤྲོད་རྣམས་གྲུབ་ནས་བསྔོ་སྨོན་ཤིས་བརྗོད་བྱས་པས་ཆོག དེ་བཞིན་དུ་གནས་ལུང་རིགས་དྲུག་གནས་འདྲེན་སོགས་ཀྱང་མི་དགོས། ༈ ཡང་ཡུལ་ཤིན་ཏུ་གཉན་པ་རང་གི་རྩ་བའི་བླ་མ་ལྟ་བུ་ལུང་རྟོགས་ཡོན་ཏན་གྱིས་ཕྱུག་ཅིང་། སྙིགས་མའི་སེམས་ཅན་གྱི་དོན་དུ་རྒྱལ་བའི་མཛད་པ་ཉེ་བར་སྒྲུབ་པ། ཐ་མལ་གཟུང་འཛིན་གྱི་སྣང་བ་བདེན་མེད་སྒྱུ་མར་ཤར་ནས། སྣང་གྲགས་རིག་གསུམ་ལྷ་སྔགས་ཆོས་ཉིད་དུ་ཤེས་པའི་རྣལ་འབྱོར་པའམ། དེ་ལས་ཀྱང་རྟོགས་པ་ཆེར་མཐོ་བ་གཉིས་མེད་ཡེ་ཤེས་ཆེན་པོ་མངོན་དུ་གྱུར་པའི་བླ་མ་རྣམས་དཀྱིལ་འཁོར་གྱི་གཙོ་བོ་དང་དབྱེར་མེད་དུ་མོས་ནས་མཆོད་བསྟོད་ཚོགས་བསྐང་། དབང་བཞི་བདག་འཇུག་གི་ཚུལ་དུ་བླངས་ཏེ་ཐུགས་ཡིད་བསྲེ་བ་དང་། བསྔོ་སྨོན་སོགས་ཀྱང་དེར་མཐུན་དུ་བྱེད་དགོས་ཀྱང་། དེ་ལྟ་བུའི་གང་ཟག་ནི། དེང་སང་དུས་དབང་གིས་ཤིན་ཏུ་དཀོན་པར་སྣང་བས། དེ་དག་གི་གནད་རྣམས་ཞིབ་ཏུ་ཤེས་པར་བྱའོ། །ལར་གོང་དུ་བཤད་པའི་ཚུལ་དངོས་གསལ་ཅན་ཡིན་ན་མ་གཏོགས། གཞན་བླ་དཔོན་ལྟ་བུ་དང་། མིང་གཟུགས་ཙམ་འཛིན་བླ་མ་ཕལ་བ་དང་། བཙུན་པ་ཕལ་བ་རྣམས་ལ། བདག་ཉིད་གྲུབ་མ་ཐག་རྟེན་ཕུང་པོ་ནྲྀ་ལས་ཚེ་འདས་ཁོ་རང་གི་གཟུགས་སུ་བསྐྱེད། རྣམ་ཤེས་འགུགས་པ་དང་། བགེགས་སྡིག་སྦྱོང་བྲབ་དང་། མཆོག་དམན་བར་གསུམ་འཆི་བའི་རང་བཞིན་ཡིན་ཚུལ་གྱིས་འཆི་བ་ལ་སྡུག་བསྔལ་མི་འཚལ་ཞེས་དབུགས་དབྱུང་། འཆི་ཁ་བར་དོ་དང་། ཆོས་ཉིད་འོད་གསལ་བར་དོའི་ངོ་སྤྲོད་ཉུང་བསྡུས་ཤིག་ལས་རྒྱས་པ་མི་དགོས། སྲིད་པ་བར་དོའི་ངོ་སྤྲོད་རྒྱས་པ་བྱ། རྫོགས་ཆེན་ཁྲེགས་ཆོད་ཐོད་རྒལ་ཟུང་འཇུག་གི་ཁྲིད་ལ་གོ་མྱོང་རྟོགས་གསུམ་བཟང་པོ་ཡོད་པ་རྣམས་ལ། སྲིད་པ་བར་དོར་རང་བཞིན་སྤྲུལ་སྐུའི་ཞིང་དུ། དབུགས་དབྱུང་ཚུལ་གྱི་ངོ་སྤྲོད་རྒྱས་པར་བྱེད། རྫོགས་ཆེན་ཀ་དག་དང་། ལྷུན་འགྲུབ་ཀྱི་ཁྲིད་མ་ཐོབ་པ་དང་། ལམ་ཐུན་མོང་པའི་གང་ཟག་རྣམས་ལ། སྐྱེ་གནས་བདམས་པ། མིག་སེར་སྤངས་ཚུལ། སྐྱེ་སྲིད་སྤྲུལ་སྐུ་འགྲུབ་པའི་འདུན་པ་གཏོད་ཚུལ། མངལ་སྒོ་དགག་པའི་དམིགས་པ་རྣམས་འབོགས། མདུན་གྱི་ནམ་མཁར་ཚོགས་ཞིང་གསལ་བཏབ་ནས་སྟོབས་བཞིའི་བཤགས་པ། སྐུ་བཞིའི་ངོ་སྤྲོད། འདོད་ཡོན་ཟས་གཏད་འཕོ་བ་དང་བཅས་པ་རྒྱས་པར་བྱ་ཞིང་། ཚེ་འདས་ཞེས་པའི་ཚབ་ཏུ། ཞི་བར་གཤེགས་པ་ཞེས་བརྗོད་པ་ཙམ་ལས། གཞན་ཚེ་འདས་སྔ་མའི་སྐབས་ཇི་ལྟ་བ་བཞིན་བྱས་ན་དམིགས་ཡུལ་ལ་ཕན་ཐོགས་ཤིན་ཏུ་ཆེ་བར་གསུངས་སོ། །
གང་ཟག་ཐུགས་དམ་ཅན་ལ་འདའ་ཀ་དངོས་ཀྱི་ཐུགས་དམ་གསལ་འདེབས་ཚུལ།
བཞི་བ་བླ་མ་སོགས་གང་ཟག་ཐུགས་དམ་ཅན་ལ་འདའ་ཀ་དངོས་ཀྱི་ཐུགས་དམ་གསལ་འདེབས་ཚུལ། རྟེན་གྱི་གང་ཟག་ལས། རྐྱེན་གྱི་ཀུན་ནས་བསླངས་ཏེ་འཆི་ནད་དངོས་ཀྱི་ཐེབས་པའམ། རིང་བའི་འཆི་ལྟས་ཐར་ཐོར་བྱུང་ཚེ་འཆི་བ་བརྟག་བསླུ་རྒྱུད་སྡེ་རྣམས་ནས་གསུངས་པ་ལྟར་ཡང་ཡང་བྱ། དེས་ཀྱང་མ་བཟློག་པར་ངེས་པར་དབུགས་དང་བྲལ་རན་དུས། བདག་རྐྱེན་གཞན་རྐྱེན་གང་རུང་གིས་བསྐུལ་ན་གསལ་ཐེབས་ཤིན་ཏུ་སླ་བའི་ཕྱིར། ལུས་ཀྱི་འབྱུང་བཞིའི་ཐིམ་རིམ་རྣམས་རིམ་གྱིས་འབྱུང་ཞིང་། དྲོད་མཐའ་ནས་བསྡུས་ཏེ། བོལ་གོང་གི་རྩ་ཆད་ནས་རྦ་རླབས་གཉིས་མ་ཆད་པའི་གོང་ནས་ལྡེམ་བསྐྱོད་སོགས་མེད་པའི་ས་རུ། མཁྲེགས་ཤིང་འཇམ་པའི་གདན། ཕྱི་ངོས་ཨེན་ཙམ་མཐོ་བའི་སྟེང་དུ། རང་དབང་དུ་གྱུར་ན་ལུས་ཚུགས་རྒྱལ་བ་ཀློང་ཆེན་པ་ཞི་བར་གཟིམ་དུས་ལྟར། ཆོས་སྐུ་སེང་གེའི་འདུག་སྟངས་བྱ་བའམ། སྐུ་གསུམ་གྱི་འདུག་སྟངས་ཅི་རིགས་དང་རྣམ་སྣང་ཆོས་བདུན་རང་བཞིན་གྱི་སྐྱིལ་ཀྲུང་སོགས་བྱ། ཡང་ན་ཨོ་རྒྱན་ཆེན་པོས། མགོན་པོ་མྱ་ངན་འདས་གཟིམ་ལྟརཿ འདོད་པའི་ཕྱོགས་སུ་ཉལ་བར་བྱཿ ཞེས་གསུངས་པ་འདི་ལ་ལྔ་སྟེ། མགོ་བྱང་དུ་བསྟན། རྐང་པ་ལྷོར་བརྐྱང་། གཞོགས་གཡས་འོག་ཏུ་གཞུག ལག་པ་གཡས་སྔས་སུ་བཅུག གཡོན་དཔྱི་མགོར་བརྐྱང་སྟེ་འདའ་བར་བྱ་འོ། །ད་ལྟའི་བསྟན་པའི་བདག་པོ་དཔལ་རྒྱལ་བ་ཤཱཀྱ་ཐུབ་པ་དང་། རྗེ་བླ་མ་ཙོང་ཁ་པ་ཆེན་པོས་ཀྱང་ལུས་ཚུགས་འདི་ལྟར་མཛད་ནས་གཤེགས་པ་ཡིན། དེ་ལྟར་མ་བྱུང་ཚེ་གཞན་ལ་བཅོལ་ཏེ། ལུས་ཚུགས་དྲང་པོར་བཞུགས་སུ་བཅུག ཨོལ་གདན་ཅུང་ཞིག་དང་མགུལ་ཆིངས་ཅིག་ཅར་དུ་ཡོངས་བར་བྱེད། སྡིག་ཅན་དང་དམ་སེལ་གྱི་རིགས་རིང་དུ་བསྐྲད། སྨྲེ་སྔགས་དང་ཀུ་ཅོའི་སྒྲ་གང་ཡང་མེད་པར་བྱ། རླུང་རྣམ་པར་ཤེས་པ་ལ་ཐིམ་ཞིང་། རིག་པ་སྙིང་དབུས་སུ་ཁྲག་ཐིག་གིས་བརྒྱལ་སྐབས་འདིར། རིག་པ་ངོས་མ་ཟིན་པ་མིན་ནའང་ཅུང་ཞིག་འཐུམ་ཉམས་ཡོད་པས་ཤིན་ཏུ་དྲང་པོར་མི་འགྲོ་བས་རྣ་བ་ནས་མཆུ་གཏད་ལ་མཚན་ནས་བོས་ཏེ། འོ་ཁྱེད་ལ་འབྱུང་ལྔའི་ཐིམ་རིམ་དང་སྣང་མཆེད་ཐོབ་གསུམ་རྣམས་རིམ་པར་འཆར་བའི་སྐབས་ལ་བབས་འདུག་པས་ཐུགས་དམ་ལས་མ་ཡེངས་མ་འཁྲུལ་བར་མཛད་ནས་རིག་པའི་རང་ངོ་སྐྱོངས་ལ་འཆི་བ་འོད་གསལ་ཆོས་སྐུའི་ངང་ལ་འཇོག་པར་ཞུ་ལགས། ཞེས་ལན་གཉིས་གསུམ་ཙམ་གསལ་བར་བརྗོད་ལ་གྲིབ་དང་མི་གཙང་བ་སོགས་མིན་པ་ཞིག་གིས་དཔྲལ་བ་ནས་བརྟེན་ཅིང་ལུས་ཚུགས་བཅོས་དགོས་པ་རྣམས་ལ་ཨེན་ཙམ་བཅོས་ན། ནང་དབུགས་ཆད་ནས་རྣམ་པར་ཤེས་པ་འོད་གསལ་ལ་ཐིམ་པར་ཉེ་བའི་དུས་རྩ་མདུད་རྣམས་གྲོལ་ནས་ཤེས་པ་ཇེ་གསལ་ལ་ཡོང་བས་ལུས་ཚུགས་ཇེ་དྲང་དུ་འགྲོ་བས་དེ་ཕྱིན་ཆད་ཐུགས་དམ་ཅན་རྣམས་ལ་ཐུགས་དམ་མ་གྲོལ་བར་དུ་སྒུལ་བསྐྱོད་སོགས་མི་རུང་སྟེ། རྡོ་རྗེ་འཆང་གི་དུས་གནད་ངེས་པ་ལས། ཡར་མར་ཟང་ཐལ་གཉིས་པོ་མ་གཏོགས་པཿ གང་ཟག་ཕལ་ཆེར་བར་དོ་མ་གྲོལ་བརཿ རྣམ་ཤེས་རྟེན་ལ་འཁོར་ཞེས་རྒྱུད་ལས་གསུངསཿ འོན་ཀྱང་ནད་གཅོད་དབང་གིས་མ་ངེས་ཏེཿ ཞག་བདུན་ལྔ་གསུམ་བར་དུ་མི་བསྲེགས་ཏེ༔ ཉམས་ལེན་འཕྲོ་ཅན་སྐྱེས་བུའི་ཕུང་པོ་ནིཿ ཉིན་ཞག་ཕྲུགས་གཅིག་བར་དུ་བསྒུལ་མི་བྱཿ མཐར་ཡང་དྲོད་ཡལ་བར་དུ་མི་རེག་གནདཿ ཅེས་སོ། །སྐབས་འདིར་གནས་ལུགས་ཀྱི་དཔའ་གདེངས་བརྟན་པོ་ཡོད་ཀྱང་། ངོ་སྤྲོད་ལམ་གྱི་གེགས་སེལ་ཡིན་པས་གསལ་འདེབས་རྣམས་རབ་རྩ་བའི་བླ་མའམ། འབྲིང་གིས་མཆེད་གྲོགས་དགོངས་ཉམས་ཅན། ཐ་མའང་དམ་ཚིག་གཙང་ལྡན་བརྡ་གསལ་བོར་ཐེབ་པ་ཞིག་གིས། འོ་རིགས་ཀྱི་བུ་ཆེ་གེ་མོ་སོགས་ཞེས་མིང་ནས་བོས་ཏེ། ཁྱེད་ཚེ་དུས་ལས་འདས་པ་ཡིན་ནོ། །ཞེས་ལན་གསུམ་བོས་ཏེ། དེ་ཡང་ཁྱེད་ཉིད་གཅིག་པུ་ལ་སོགས། འཆི་ཁ་དང་། ཆོས་ཉིད་སྲིད་པ་བར་དོ་གསུམ་གྱི་སྣང་ཚུལ་གང་ཟག་དབང་པོ་འབྲིང་བར་དོར་གྲོལ་ཚུལ་གྱི་གདམས་པ་འདིའི་རབ་འབྲིང་ཐ་མ་གསུམ་དང་། ཡང་དེ་གསུམ་ལའང་གསུམ་རེར་དབྱེ་བས་དགུ་ཡོད་པ། དེ་ལྟར་རང་རང་སོ་སོའི་དབང་པོའི་རིམ་པ་ལྟར་ངོ་སྤྲོད་དང་། འཕོ་ལུང་སོགས་དགོས་མི་དགོས་དམིགས་ཕྱེད་པར་བྱས་ཏེ། དམིགས་ཡུལ་དེ་ལ་ཕན་ཐོགས་ངེས་པ་ཞིག་དགོས།