གང་ཟག་ཐུགས་དམ་ཅན་ལ་འདའ་ཀ་དངོས་ཀྱི་ཐུགས་དམ་གསལ་འདེབས་ཚུལ།
བཞི་བ་བླ་མ་སོགས་གང་ཟག་ཐུགས་དམ་ཅན་ལ་འདའ་ཀ་དངོས་ཀྱི་ཐུགས་དམ་གསལ་འདེབས་ཚུལ། རྟེན་གྱི་གང་ཟག་ལས། རྐྱེན་གྱི་ཀུན་ནས་བསླངས་ཏེ་འཆི་ནད་དངོས་ཀྱི་ཐེབས་པའམ། རིང་བའི་འཆི་ལྟས་ཐར་ཐོར་བྱུང་ཚེ་འཆི་བ་བརྟག་བསླུ་རྒྱུད་སྡེ་རྣམས་ནས་གསུངས་པ་ལྟར་ཡང་ཡང་བྱ། དེས་ཀྱང་མ་བཟློག་པར་ངེས་པར་དབུགས་དང་བྲལ་རན་དུས། བདག་རྐྱེན་གཞན་རྐྱེན་གང་རུང་གིས་བསྐུལ་ན་གསལ་ཐེབས་ཤིན་ཏུ་སླ་བའི་ཕྱིར། ལུས་ཀྱི་འབྱུང་བཞིའི་ཐིམ་རིམ་རྣམས་རིམ་གྱིས་འབྱུང་ཞིང་། དྲོད་མཐའ་ནས་བསྡུས་ཏེ། བོལ་གོང་གི་རྩ་ཆད་ནས་རྦ་རླབས་གཉིས་མ་ཆད་པའི་གོང་ནས་ལྡེམ་བསྐྱོད་སོགས་མེད་པའི་ས་རུ། མཁྲེགས་ཤིང་འཇམ་པའི་གདན། ཕྱི་ངོས་ཨེན་ཙམ་མཐོ་བའི་སྟེང་དུ། རང་དབང་དུ་གྱུར་ན་ལུས་ཚུགས་རྒྱལ་བ་ཀློང་ཆེན་པ་ཞི་བར་གཟིམ་དུས་ལྟར། ཆོས་སྐུ་སེང་གེའི་འདུག་སྟངས་བྱ་བའམ། སྐུ་གསུམ་གྱི་འདུག་སྟངས་ཅི་རིགས་དང་རྣམ་སྣང་ཆོས་བདུན་རང་བཞིན་གྱི་སྐྱིལ་ཀྲུང་སོགས་བྱ། ཡང་ན་ཨོ་རྒྱན་ཆེན་པོས། མགོན་པོ་མྱ་ངན་འདས་གཟིམ་ལྟརཿ འདོད་པའི་ཕྱོགས་སུ་ཉལ་བར་བྱཿ ཞེས་གསུངས་པ་འདི་ལ་ལྔ་སྟེ། མགོ་བྱང་དུ་བསྟན། རྐང་པ་ལྷོར་བརྐྱང་། གཞོགས་གཡས་འོག་ཏུ་གཞུག ལག་པ་གཡས་སྔས་སུ་བཅུག གཡོན་དཔྱི་མགོར་བརྐྱང་སྟེ་འདའ་བར་བྱ་འོ། །ད་ལྟའི་བསྟན་པའི་བདག་པོ་དཔལ་རྒྱལ་བ་ཤཱཀྱ་ཐུབ་པ་དང་། རྗེ་བླ་མ་ཙོང་ཁ་པ་ཆེན་པོས་ཀྱང་ལུས་ཚུགས་འདི་ལྟར་མཛད་ནས་གཤེགས་པ་ཡིན། དེ་ལྟར་མ་བྱུང་ཚེ་གཞན་ལ་བཅོལ་ཏེ། ལུས་ཚུགས་དྲང་པོར་བཞུགས་སུ་བཅུག ཨོལ་གདན་ཅུང་ཞིག་དང་མགུལ་ཆིངས་ཅིག་ཅར་དུ་ཡོངས་བར་བྱེད། སྡིག་ཅན་དང་དམ་སེལ་གྱི་རིགས་རིང་དུ་བསྐྲད། སྨྲེ་སྔགས་དང་ཀུ་ཅོའི་སྒྲ་གང་ཡང་མེད་པར་བྱ། རླུང་རྣམ་པར་ཤེས་པ་ལ་ཐིམ་ཞིང་། རིག་པ་སྙིང་དབུས་སུ་ཁྲག་ཐིག་གིས་བརྒྱལ་སྐབས་འདིར། རིག་པ་ངོས་མ་ཟིན་པ་མིན་ནའང་ཅུང་ཞིག་འཐུམ་ཉམས་ཡོད་པས་ཤིན་ཏུ་དྲང་པོར་མི་འགྲོ་བས་རྣ་བ་ནས་མཆུ་གཏད་ལ་མཚན་ནས་བོས་ཏེ། འོ་ཁྱེད་ལ་འབྱུང་ལྔའི་ཐིམ་རིམ་དང་སྣང་མཆེད་ཐོབ་གསུམ་རྣམས་རིམ་པར་འཆར་བའི་སྐབས་ལ་བབས་འདུག་པས་ཐུགས་དམ་ལས་མ་ཡེངས་མ་འཁྲུལ་བར་མཛད་ནས་རིག་པའི་རང་ངོ་སྐྱོངས་ལ་འཆི་བ་འོད་གསལ་ཆོས་སྐུའི་ངང་ལ་འཇོག་པར་ཞུ་ལགས། ཞེས་ལན་གཉིས་གསུམ་ཙམ་གསལ་བར་བརྗོད་ལ་གྲིབ་དང་མི་གཙང་བ་སོགས་མིན་པ་ཞིག་གིས་དཔྲལ་བ་ནས་བརྟེན་ཅིང་ལུས་ཚུགས་བཅོས་དགོས་པ་རྣམས་ལ་ཨེན་ཙམ་བཅོས་ན། ནང་དབུགས་ཆད་ནས་རྣམ་པར་ཤེས་པ་འོད་གསལ་ལ་ཐིམ་པར་ཉེ་བའི་དུས་རྩ་མདུད་རྣམས་གྲོལ་ནས་ཤེས་པ་ཇེ་གསལ་ལ་ཡོང་བས་ལུས་ཚུགས་ཇེ་དྲང་དུ་འགྲོ་བས་དེ་ཕྱིན་ཆད་ཐུགས་དམ་ཅན་རྣམས་ལ་ཐུགས་དམ་མ་གྲོལ་བར་དུ་སྒུལ་བསྐྱོད་སོགས་མི་རུང་སྟེ། རྡོ་རྗེ་འཆང་གི་དུས་གནད་ངེས་པ་ལས། ཡར་མར་ཟང་ཐལ་གཉིས་པོ་མ་གཏོགས་པཿ གང་ཟག་ཕལ་ཆེར་བར་དོ་མ་གྲོལ་བརཿ རྣམ་ཤེས་རྟེན་ལ་འཁོར་ཞེས་རྒྱུད་ལས་གསུངསཿ འོན་ཀྱང་ནད་གཅོད་དབང་གིས་མ་ངེས་ཏེཿ ཞག་བདུན་ལྔ་གསུམ་བར་དུ་མི་བསྲེགས་ཏེ༔ ཉམས་ལེན་འཕྲོ་ཅན་སྐྱེས་བུའི་ཕུང་པོ་ནིཿ ཉིན་ཞག་ཕྲུགས་གཅིག་བར་དུ་བསྒུལ་མི་བྱཿ མཐར་ཡང་དྲོད་ཡལ་བར་དུ་མི་རེག་གནདཿ ཅེས་སོ། །སྐབས་འདིར་གནས་ལུགས་ཀྱི་དཔའ་གདེངས་བརྟན་པོ་ཡོད་ཀྱང་། ངོ་སྤྲོད་ལམ་གྱི་གེགས་སེལ་ཡིན་པས་གསལ་འདེབས་རྣམས་རབ་རྩ་བའི་བླ་མའམ། འབྲིང་གིས་མཆེད་གྲོགས་དགོངས་ཉམས་ཅན། ཐ་མའང་དམ་ཚིག་གཙང་ལྡན་བརྡ་གསལ་བོར་ཐེབ་པ་ཞིག་གིས། འོ་རིགས་ཀྱི་བུ་ཆེ་གེ་མོ་སོགས་ཞེས་མིང་ནས་བོས་ཏེ། ཁྱེད་ཚེ་དུས་ལས་འདས་པ་ཡིན་ནོ། །ཞེས་ལན་གསུམ་བོས་ཏེ། དེ་ཡང་ཁྱེད་ཉིད་གཅིག་པུ་ལ་སོགས། འཆི་ཁ་དང་། ཆོས་ཉིད་སྲིད་པ་བར་དོ་གསུམ་གྱི་སྣང་ཚུལ་གང་ཟག་དབང་པོ་འབྲིང་བར་དོར་གྲོལ་ཚུལ་གྱི་གདམས་པ་འདིའི་རབ་འབྲིང་ཐ་མ་གསུམ་དང་། ཡང་དེ་གསུམ་ལའང་གསུམ་རེར་དབྱེ་བས་དགུ་ཡོད་པ། དེ་ལྟར་རང་རང་སོ་སོའི་དབང་པོའི་རིམ་པ་ལྟར་ངོ་སྤྲོད་དང་། འཕོ་ལུང་སོགས་དགོས་མི་དགོས་དམིགས་ཕྱེད་པར་བྱས་ཏེ། དམིགས་ཡུལ་དེ་ལ་ཕན་ཐོགས་ངེས་པ་ཞིག་དགོས།