འཕོ་བའི་གདམས་པ་བདེ་བ་ཅན་དུ་བསྒྲོད་པའི་ཤིང་རྟ།
༄༅། མྱུར་ལམ་ཟབ་མོ་འཕོ་བའི་གདམས་པ་བདེ་བ་ཅན་དུ་བསྒྲོད་པའི་ཤིང་རྟ་ཞེས་བྱ་བ་བཞུགས།
༄༅། འོ་ནམ་མཁའ་དང་མཉམ་པའི་སེམས་ཅན་ཐམས་ཅད་ཀྱི་དོན་དུ་རྣམ་མཁྱེན་རྫོགས་པའི་སངས་རྒྱས་ཀྱི་གོ་འཕང་རིན་པོ་ཆེ་ཐོབ་པར་བྱ། དེའི་ཆེད་དུ་མྱུར་ལམ་ཟབ་མོ་འཕོ་བའི་གདམས་པ་འདི་ཉིད་ཞུས་ནས་དོན་ཚུལ་བཞིན་དུ་ཉམས་སུ་ལེན་པར་བགྱིའོ་སྙམ་པའི་ཐུགས་བསྐྱེད་མཛད་ནས་གསན་འཚལ། གང་གསན་པར་བྱ་བའི་ཆོས་ཀྱི་རིམ་པ་ནི། འོ་སྐོལ་གྱི་སྟོན་པ་བཅོམ་ལྡན་འདས་རྒྱལ་བ་ཡང་དག་པར་རྫོགས་པའི་སངས་རྒྱས་རྣམས་ཀྱིས་རང་ཅག་གདུལ་བྱའི་སེམས་ཅན་ཐམས་ཅད་ཀྱི་དབང་པོ་དང་ཁམས་དང་བསམ་པ་དང་མཐུན་པའི་ཆོས་ཀྱི་རྣམ་གྲངས་བསམ་གྱིས་མི་ཁྱབ་པ་ཞིག་གསུངས་པ་ཐམས་ཅད་ཀྱི་ནང་ནས། མ་བསྒོམས་པར་སངས་རྒྱས་པའི་ཆོས་དྲུག་ཡོད་པའི་དེའི་ནང་ཚན། སྡིག་པོ་ཆེ་བཙན་ཐབས་སུ་འཚང་རྒྱ་བ་དང་། ལེ་ལོ་ཅན་འཆི་ཁར་གྲོལ་བའི་གདམས་ངག་ཁྱད་པར་ཅན་སྟེང་སྒོ་རྣམ་པར་གྲོལ་བའི་ཆོས་ཟབ་མོ་ཟབ་ལམ་འཕོ་བའི་གདམས་པ་ཞེས་བྱ་བ་དེ་འབོག་པའི་སྐབས་སུ་བབས་པ་ཡིན། འདི་ལ་སྤྱི་དོན་རྣམ་པ་གསུམ་སྟེ། སྔོན་འགྲོ་དངོས་གཞི་རྗེས་ཀྱི་བྱ་བའོ། །དང་པོ་སྦྱོར་བ་སྔོན་འགྲོ་འཕོ་ལུང་འདི་ཉིད་ཀྱི་གོ་དོན་བཤད་པ་གསུམ་སྟེ། འཕོ་ལུང་འདི་ཉིད་ཞུས་ནས་སྦྱང་དགོས་པའི་རྒྱུ་མཚན། མ་སྦྱངས་པའི་ཉེས་སྐྱོན། སྦྱངས་པའི་ཕན་ཡོན་རྣམས་ལས། དང་པོ་ཞུས་ནས་སྦྱང་དགོས་པའི་རྒྱུ་མཚན་ནི། ཨོ་རྒྱན་ཆེན་པོས། གང་ཞིག་རྟོགས་པའི་ཡེ་ཤེས་ཆེཿ ཚེ་འདིར་ཉམས་འོག་མ་ཚུད་ནཿ བཙན་ཐབས་འཕོ་བའི་མཚམས་སྦྱོར་བྱཿ དེས་ནི་འགྲུབ་འགྱུར་གདོན་མི་ཟཿ ཞེས་གསུངས་པ་ལྟར་རོ། །གཉིས་པ་མ་སྦྱངས་པའི་ཉེས་སྐྱོན་ནི། མཁའ་འགྲོ་མ་ཀུན་ཏུ་རྟོགས་པའི་རྒྱུད་ལསཿ རྣམ་ཤེས་རླུང་ལ་རྟ་བྱས་ནསཿ འོག་གི་ལམ་ལ་འཕོས་གྱུར་ནཿ ཆོས་ལ་གོམས་པའི་གང་ཟག་ཀྱངཿ ངན་སོང་གནས་སུ་ལྟུང་བ་མངཿ མགྲོན་པོ་ལམ་དུ་ཞུགས་པའི་མིཿ གྲོགས་ཀྱིས་བསྒྱུར་བ་ཅི་བཞིན་ནོཿ ཞེས་དང་། གསུམ་པ་ཞུས་ནས་སྦྱངས་པའི་ཕན་ཡོན་ནི། རྒྱུད་རྡོ་རྗེའི་གདན་བཞི་ལས། བུ་ག་དགུ་ཡི་སྟེང་ཕྱོགས་སུཿ འཕྲལ་དུ་ཡིད་ཀྱིས་འཕོ་བྱེད་པཿ ཉིན་བཞིན་བྲམ་ཟེ་གསོད་པ་དངཿ མཚམས་མེད་ལྔ་པོ་བྱེད་པ་དངཿ ཆོམ་རྐུན་ལས་ཀྱིས་ལོངས་སྤྱོད་པཿ འདི་ཡི་ལམ་གྱིས་གྲོལ་གྱུར་ཏེཿ སྡིག་པས་གོས་པར་མི་འགྱུར་རོཿ ཞེས་དང་། ཉེས་པ་ཀུན་གྱིས་གོས་པ་ནིཿ འཕོ་བའི་སྦྱོར་བ་སྦྱར་བས་གྲོལཿ སྡིག་པས་ཀུན་ནས་མི་གོས་ཏེཿ འཁོར་བའི་ཕ་རོལ་མཆོག་ཏུ་འགྲོཿ ཞེས་དངཿ དགེ་སྦྱོར་ཐམས་ཅད་གཞུ་དང་འདྲཿ འཕོ་བ་ཐེབས་པ་མདའ་དང་འདྲཿ ཞེས་སོ། །གཉིས་པ་འཕོ་ལུང་འདིའི་དངོས་གཞི་ཇི་ལྟར་སྦྱང་བའི་ཚུལ་ལ་གསུམ་སྟེ། འཕོ་བར་བྱ་བ་དང་། འཕོ་བར་བྱེད་པ་དང་། འཕོ་བའི་ཡུལ་རྣམས་སོ། །དེ་ལ་དང་པོ་འཕོ་བར་བྱ་བ་ནི། རང་ཅག་རྣམས་ཀྱི་སེམས་ཞེས་མི་དྲན་དགུ་དྲན་དགེ་སྡིག་བདེ་སྡུག་ཐམས་ཅད་ཀྱི་བྱེད་པོ་ལས་རླུང་དང་འགྲོགས་ནས་ཡོད་པ་འདི་ལ་ཟེར་བ་ཡིན། གཉིས་པ་འཕོ་བར་བྱེད་པ་ནི། རང་སྟོབས་གཞན་སྟོབས་གང་རུང་གིས་ལམ་ཟབ་མོ་བསྐྱེད་རྫོགས་ཟུང་འཇུག་གི་གདམས་པ་ལ་སོགས་ཤིན་ཏུ་ཟབ་པའི་མན་ངག་ཁྱད་པར་ཅན་གྱི་གནད་དང་ལྡན་པས་འཕོ་བ་ཡིན། གསུམ་པ་གང་དུ་འཕོ་བའི་ཡུལ་འདི་ལ། སངས་རྒྱས་ཆོས་སྐུ་དང་ལོངས་སྐུ་དང་སྤྲུལ་སྐུ་སོགས་ཀྱི་ཞིང་ཁམས་ཡོན་ཏན་ཁྱད་པར་ཅན་དང་ལྡན་པ་མང་དུ་ཡོད་ཀྱང་། ད་ལམ་འདིར་ནི་མདོ་རྒྱུད་མན་ངག་ཐམས་ཅད་དང་། ས་དགེ་རྙིང་གསུམ་སོགས་གྲུབ་མཐའ་ཀུན་གྱིས་ཞལ་མཐུན་པར་ཡིད་ལ་སྨོན་པ་ཙམ་གྱིས་དོན་མྱུར་དུ་འགྲུབ་པའི་ཞིང་ཁམས་ཁྱད་འཕགས་བླ་ན་མེད་པ་ནུབ་ཕྱོགས་བདེ་བ་ཅན་གྱི་ཞིང་ཡིན་པས་དེར་འཕོ་བའི་འདུན་པ་གཏད་དགོས། ཇི་ལྟར་འཕོ་བའི་ཚུལ་འདི་ལའང་། གསང་སྔགས་རྙིང་མ་དང་གསར་མ། བཀའ་མ་དང་གཏེར་མ་དག་སྣང་སོགས་སོ་སོའི་ལུགས་སྲོལ་གྱི། ཕྱི་འདུས་བྱས་རྫས་ཀྱི་འཕོ་བ་དང་། ནང་བསྐྱེད་རིམ་གསལ་འདེབས་ཀྱི་འཕོ་བ་དང་། གསང་བ་རླུང་རིག་ཁ་སྦྱོར་ལ་བརྟེན་ནས་འཕོ་བ་དང་། དེ་ཁོ་ན་ཉིད་ཆོས་ཉིད་དོན་གྱི་འཕོ་བ་དང་། གཞན་ཡང་ཆོས་སྐུ་ལྟ་བ་རྒྱས་འདེབས་ཀྱི་འཕོ་བ་དང་། ལོངས་སྐུ་བསྐྱེད་རྫོགས་ཟུང་འཇུག་གི་འཕོ་བ། སྤྲུལ་སྐུ་ཚད་མེད་སྙིང་རྗེའི་འཕོ་བ་སོགས་བྱེད་ལས་དང་བསྐྱེད་རྫོགས་རྟེན་ཅན་དང་རྟེན་མེད་ཀྱི་འཕོ་ཚུལ་སོགས་མང་དུ་ཡོད་ཀྱང་། ད་ལམ་འདིར་ནི་ཆོས་རྒྱལ་ཁྲི་སྲོང་ལྡེའུ་བཙན་ལ་བློན་པོ་ཉི་མ་ཞེས་བྱ་བ་ཞིག་ཡོད་པ་དེ་ཉིད་ཀྱི་དོན་དུ་ཨོ་རྒྱན་ཆེན་པོ་ནས་སངས་རྒྱས་འོད་དཔག་མེད་ལ་ཞུས་ནས་བློན་པོ་ལ་གནང་། བློན་པོས་ཞག་གསུམ་དུ་བསྒོམས་པས་དགོས་དོན་ཐམས་ཅད་གྲུབ། དེའི་དུས་སུ་བློན་པོས་གསེར་དངུལ་ཉི་ཟླ་འདྲ་བ་ཕྱག་རྟེན་དུ་ཕུལ་བའི་རྟེན་འབྲེལ་གྱིས་མ་འོངས་པའི་དུས་ན་ཆོས་འདིའི་འགྲོ་དོན་འབྱུང་བར་དགོངས་ནས་སློབ་དཔོན་ཉིད་ཀྱི་སྲིན་མཛུབ་ལ་སྐུ་མཚལ་ཕྱུང་སྟེ་ཤིང་ཏ་ལའི་ལོ་མར་ཡི་གེར་བྲིས་པ་གསེར་དངུལ་སོགས་རིན་པོ་ཆེ་སྣ་ལྔའི་སྒྲོམ་དུ་བཅུག་ནས་གཏེར་དུ་སྦས་པ། ཕྱིས་བློན་པོ་ཉི་མའི་སྤྲུལ་པ་གཏེར་སྟོན་ཉི་ཟླ་སངས་རྒྱས་ཞེས་དགུང་ལོ་བརྒྱ་དང་ཉི་ཤུར་བཞུགས་པའི་སྔགས་འཆང་ཆེན་པོ་དེ་ཉིད་ཀྱིས་གཏེར་ནས་གདན་དྲངས་ཏེ་རིམ་པར་སྤེལ་བའི་ཟབ་ལམ་འཕོ་བའི་གདམས་པ་འཇག་ཚུགས་མ་ཞེས། ནང་བསྐྱེད་རིམ་གསལ་འདེབས་ཀྱི་འཕོ་བ་འདི་ཉིད་འབོག་པའི་སྐབས་སུ་བབས་པ་ཡིན། འདི་ཞུ་བའི་སླད་དུ་ཁྱོད་རང་གིས་བདག་ཏུ་བཟུང་བའི་ཡུལ་དང་ས་ཆ་གནས་མལ་ཁང་ཁྱིམ་ཉེ་འབྲེལ་འཁོར་འབངས་ཟས་ནོར་ལོངས་སྤྱོད་གཅེས་པའི་སྒྱུ་ལུས་དང་བཅས་པ་འདི་རྣམས་ཐམས་ཅད་བླ་མ་དང་སངས་རྒྱས་འོད་དཔག་མེད་པ་འཁོར་བཅས་རྣམས་ལ་ཕྱག་རྟེན་མཎྜལ་གྱི་ཚུལ་དུ་ཕུལ་ལ། ཆགས་ཞེན་གྱི་འཁྲི་བ་ཐམས་ཅད་རྦད་ཀྱིས་བཅད་ནས་འདུ་ཤེས་བརྒྱད་དང་ལྡན་པ་ཞིག་ངེས་པར་དགོས་པས། དེའི་ཚུལ་ནི། ཁྱོད་རང་གི་ལུས་འདི་ཉིད་ལ་གཞན་ལ་གཡར་པོའི་གནས་ཁང་ལྟ་བུའི་འདུ་ཤེས། རྣམ་པར་ཤེས་པ་འདི་ནི་མི་འདུག་འགྲོ་རྒྱུའི་འགྲོན་པོ་ལྟ་བུའི་འདུ་ཤེས། རྩ་དབུ་མ་ལ་འགྲོ་བའི་ལམ་གྱི་འདུ་ཤེས། རླུང་ནི་རྟ་མཛོ་སོགས་ཞོན་པའི་འདུ་ཤེས། ཧིཀ་ནི་སྐྱེལ་མའི་འདུ་ཤེས། སྤྱི་གཙུག་ཚངས་བུག་ནི་སྒོ་ཡི་འདུ་ཤེས། སྤྱི་བོའི་བླ་མ་སངས་རྒྱས་འོད་དཔག་ཏུ་མེད་པ་བདེ་ཆེན་དཔའ་བོ་དཔའ་མོའི་ཚོགས་དང་བཅས་པ་རྣམས་ལ་བསུ་མའི་འདུ་ཤེས། ནུབ་ཕྱོགས་བདེ་བ་ཅན་གྱི་ཞིང་ཁམས་དེ་ཉིད་ལ་ས་མཐར་སོང་བའི་ཚོང་པ་དོན་ཐམས་ཅད་གྲུབ་པའི་ཚེ་རང་ཁྱིམ་དུ་ལྡོག་ནས་འགྲོ་བ་ལྟ་བུའི་ཡུལ་གྱི་འདུ་ཤེས་ཏེ། འདུ་ཤེས་བརྒྱད་དང་ལྡན་པའི་ངང་ནས་ཡིད་གཞན་དུ་མ་ཡེངས་པར་དམིགས་པ་འདི་ལྟར་དུ་མཛོད་ཅིག ན་མོ་གུ་རུ། སྦྱིན་བདག་རྗེ་བཙུན་རྡོ་རྗེ་རྣལ་འབྱོར་མ།། ཞེས་པ་ནས། བྱམས་བརྩེའི་ཐུགས་ཀྱིས་དགོངས་བཞིན་བཞུགས་པར་གྱུར། ། གྱི་བར་དང་། དེ་ནས། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མགོན་པོ་འོད་དཔག་ཏུ་མེད་པ་ལ་ཕྱག་འཚལ་ལོ་མཆོད་དོ་སྐྱབས་སུ་མཆིའོ། །ཞེས་ལན་གསུམ་བརྗོད། དེ་ནས། ཨེ་མ་ཧོ། སངས་རྒྱས་འོད་དཔག་མེད་ལ་ཕྱག་འཚལ་ལོ། །ཞེས་སོགས་གསོལ་འདེབས་ཆེ་ཆུང་གཉིས་དང་། སྤྲོ་ན་ཀློང་ཆེན་སྙིང་ཐིག་གི་འཕོ་ལུང་གསོལ་འདེབས་རྣམས་འདོན། གསོལ་འདེབས་རྣམས་ཀྱི་མཇུག་ཏུ། ངེད་ཀྱིས་ཧིཀ་དང་ཕཊ་ཀྱི་སྒྲ་བརྗོད་པའི་ཚེ་ཁྱེད་རང་རྣམས་ཀྱི་སྙིང་ཁའི་རྣམ་པར་ཤེས་པའི་ངོ་བོ་ཐིག་ལེ་དེ་ཉིད་ནམ་མཁའི་སྐར་མདའ་ཡར་བ་ལྟར་རྩ་དབུ་མའི་ལམ་ནས་རྒྱངས་སེ་སོང་བ་སྤྱི་གཙུག་ཚངས་བུག་ནས་ཐོན་ཏེ་སངས་རྒྱས་འོད་དཔག་མེད་ཀྱི་ཐུགས་ཀར་ཐིམ་ནས་ཐུགས་ཡིད་དབྱེར་མེད་དུ་འདྲེས་པའི་ངང་ལ་དར་གཅིག་མཉམ་པར་བཞག སླར་ཡང་ཀ་ཞེས་བརྗོད་པས་ཚེ་མར་ཧྲི་ལི་ལི་བབས་ཏེ་སྙིང་ཁར་རང་སར་གནས་པའི་མོས་པ་བརྟན་པོ་མ་ཡེངས་པར་གྱིས་ཤིག ཧིཀ་ཀ ཧིཀ་ཀ ཧིཀ་ཀ །ཞེས་མང་དུ་བརྗོད། དེས་དངོས་གཞིའི་ལས་རྣམས་གྲུབ་བོ། །གསུམ་པ་རྗེས་ཀྱི་རིམ་པ་ལ་གསུམ་སྟེ། བསྡུ་རིམ་དང་། བསྔོ་སྨོན། ཤིས་བརྗོད་དོ། །དེ་ལ་དང་པོ་བསྡུ་རིམ་ནི། དེ་ནས་སྤྱི་བོའི་ལྷ་རྣམས་ཀྱི། ཞེས་པ་ནས། མཐར་ནི་བླ་མ་ཚེ་དཔག་མེད། །འོད་ཞུ་སྦྱིན་བདག་སྙིང་ཁར་ཐིམ། །ཐུགས༴ཞེས་པ་ནས། རྡོ་རྗེའི་གོ་ཆས་གཏམས་པར་གྱུར།། གཉིས་པ་བསྔོ་སྨོན་ནི། བསོད་ནམས་འདི་ཡིས་ཐམས་ཅད་གཟིགས་པ་ཉིད།། སོགས་དང་། དགེ་བ་འདི་ཡིས་སྐྱེ་བོ་ཀུན།། སོགས་བརྗོད། གསུམ་པ་ཤིས་བརྗོད་ནི། འཇིག་རྟེན་འདྲེན་པའི་གཙོ་བོ་ཚེ་དཔག་མེད།། སོགས་དང་། བྲག་ཕུག་མ་ར་ཏི་ཀའི་ཀེའུ་ཚང་དུ།། སོགས་དང་། འཆི་མེད་ཚེ་ཡི་དཔལ་ལ་དབང་འབྱོར་ཞིང་།། སོགས་དང་། དཔོན་སློབ་མི་འབྲལ་ལྷན་ཅིག་གནས། །སྐུ་ཚེ་མི་འགྱུར་སྲ་ཞིང་བརྟན། །ཇ་ཆང་བཞེས་སྤྲོ་རྒྱུན་མི་འཆད། །སྐྱིད་ལ་ཆོས་འཕེལ་བཀྲ་ཤིས་ཤོག །བསྟན་པའི་དཔལ་གྱུར་བླ་མའི་ཞབས་པད་བརྟན། །སོགས་བཀྲ་ཤིས་པའི་ཚིགས་སུ་བཅད་པ། ཅི་རིགས་བརྗོད་དོ། །ཞེས་པ་འདི་ནི་རང་སློབ་རྡོ་རྗེའི་རིག་འཛིན་དད་དམ་ཡང་དག་པ་དང་ལྡན་པའི་བླ་མ་ནམ་མཁའ་ལྷུན་གྲུབ་ལ་ཉེ་བར་མཁོ་བའི་ཆེད་དུ་ཤཱཀྱའི་དགེ་སྦྱོང་འགྱུར་མེད་རྒྱལ་མཚན་བཟང་པོས་མགྱོགས་པར་སྨྲས་པའི་དགེ་བས་འདི་དང་འབྲེལ་ཐོགས་ཐམས་ཅད་ནུབ་ཕྱོགས་བདེ་བ་ཅན་དུ་སྐྱེ་བའི་རྒྱུར་གྱུར་ཅིག སརྦ་མངྒ་ལཾ།