ཤེལ་རི་རྩེ་རྒྱལ་གྱི་བསང་མཆོད།
༄༅། ཤེལ་རི་རྩེ་རྒྱལ་ལ་བསང་མཆོད་འབུལ་བར་འདོད་པས་རང་ཉིད་ལྷར་གསལ་བའི་ངང་ནས་བསང་རྫས་རྣམས་བྱིན་གྱིས་བརླབས་ལ་འདི་སྐད་དོ།། ཀྱཻ་སྟོང་གསུམ་བྱེ་བ་ཕྲག་བརྒྱ་ཡི། །སྙིང་པོ་མི་མཇེད་འཇིག་རྟེན་ཁམས། །དེ་དབུས་གླིང་བཞིའི་མཆོག་གྱུར་པ། །བཅོམ་ལྡན་ཤཱཀྱའི་རྒྱལ་པོའི་ཞིང་། །འཛམ་གླིང་བོད་ཡུལ་མདོ་ཁམས་སྨད། །རྒྱལ་མོ་རོང་དང་ཉེ་བའི་ཆར། །ཤེལ་རི་རྩེ་རྒྱལ་ལ་བརྟེན་པའི། །དགེ་བསྙེན་རྡོ་རྗེ་དབང་ཕྱུག་རྒྱལ། །དཀར་གསལ་ཤེལ་མདོག་ཞལ་གཅིག་འཛུམ། །ཕྱག་གཉིས་མདུང་དར་ཞགས་པ་བསྣམས། །སྐུ་ལ་ཟ་འོག་ན་བཟའ་དང་། །དབུ་ལ་སྟག་ཞྭ་ཁྲ་བོ་གསོལ། །རྟ་དཀར་ཕུབ་སྔོན་ཆིབས་སུ་བཅིབས། །འཁོར་དུ་ཡུལ་ལྷ་མཚོ་སྨན་སོགས། །ཀླུ་གཉན་ས་བདག་མང་པོས་བསྐོར། །ཁྱེད་ཅག་འཁོར་བཅས་གནས་འདིར་གཤེགས། །དེ་རིང་རྣལ་འབྱོར་བདག་ཅག་གིས། །ལྷ་ཤིང་ཤུག་པ་འོམ་བུ་སོགས། །བཟང་ཤིང་སྣ་ཚོགས་རི་ལྟར་སྤུང་། །དམ་རྫས་ཕྱེ་མར་འབྲུ་སྨན་སྤོས། །སྟག་གཟིག་རས་མ་དར་སྣ་སོགས། །མཁོ་དགུའི་མཐུན་རྫས་ཅི་འབྱོར་བཤམས། །ཇ་ཆང་འོ་ཞོའི་ཕུད་ཀྱིས་བྲན། །བསང་གསུར་འདོད་ཡོན་ལྔ་ལྡན་གྱིས། །ས་དང་བར་སྣང་ཁྱབ་པ་འདིས། །ཁྱེད་ཅག་འདིར་ཚོགས་མགྲོན་རྣམས་ཀུན། །བསང་ངོ་མཆོད་དོ་དགྱེས་པར་མཛོད། །བཞེས་ནས་ས་ཕྱོགས་ཡུལ་ཁམས་འདིར། །ནད་མུག་འཁྲུགས་རྩོད་ཀུན་ཞི་ཞིང་། །འགྲོ་ཀུན་བདེ་སྐྱིད་དཔལ་གྱིས་སྐྱོང་། །ཁྱད་པར་བདག་ཅག་འཁོར་བཅས་ཀྱི། །ཅི་བསམ་དོན་ཀུན་འགྲུབ་པ་སོགས། །བཀྲ་ཤིས་དཔལ་གྱིས་འཚོ་བར་མཛོད། །ཅེས་པ་འདི་ནི་ཤིང་ཁྱིའི་ལོར་གཞི་བདག་འདིའི་ཉེ་འདབས་སུ་དབང་ཁྲིད་འགའ་ཞིག་འཆད་སྐབས་ཧཱུྃ་རལ་བདུད་འདུལ་དང་། ཡུལ་སྐྱོང་འདི་ཉིད་ཡིན་ནོ་སྙམ་པའི་མི་མིན་འགའ་ཞིག་ཉིང་འཁྲུལ་གྱིས་སྣང་བ་དང་། བླ་མ་ཐེག་མཆོག་སོགས་གྲྭ་སློབ་འགའ་ཞིག་གིས་ནན་ཏན་ཆེན་པོས་བསྐུལ་ངོ་མ་ལྡོག་ཙམ་དུ་དགེ་སྦྱོང་རྒན་པོ་འགྱུར་མེད་རྒྱལ་མཚན་བཟང་པོས་གང་ཤར་འཕྲལ་དུ་བྲིས་པ་དགེ་བར་གྱུར་ཅིག །སརྦ་མངྒ་ལཾ།