སེམས་ཅན་གྱི་འཇིག་རྟེན་བསྟན་པ།

དེ་ལའང་སེམས་ཅན་གྱི་འཇིག་རྟེན་དང་། སྣོད་ཀྱི་འཇིག་རྟེན་གཉིས་ལས་དང་པོ་ལའང་(ལས་གསོག་པ་པོ་སེམས་ཅན་བཤད་པ་ལ།) སེམས་ཅན་གྱི་དབྱེ་བ་དང་། ཁྱད་པར་གྱི་ཆོས་དང་། རྣམ་གཞག་གིས་རྒྱས་པར་བཤད་པ་གསུམ་ལས་དང་པོ་ལའང་ཁམས་གསུམ་དུ་དབྱེ་བ་ནི་བསོད་ནམས་མ་ཡིན་པའི་ལས་ཀྱིས་ཁྲིད་པའམ། དགའ་བར་མི་བྱེད་པའི་ཕྱིར་དམྱལ་བ་སྟེ། ན་ར་ཀ་ཞེས་བྱ་བ་ལ་ན་དགག་པ་དང་རཀ་དགའ་བ་ཡིན་པའི་ཕྱིར་རོ། །སློབ་དཔོན་འདུན་བཟང་ན་རེ་སྐྱབས་མེད་པས་ན་དམྱལ་བ་ཞེས་བྱའོ་ཞེས་ཟེར་རོ། །ཟས་སྐོམ་ཡིད་ལ་བཏགས་པའམ་དེར་སོང་བ་རྣམས་ཕྱིར་མི་ལྡོག་པས་སམ། སྐོམ་པ་དང་ལྡན་པས་ཡི་དྭགས་ཏེ་པྲེ་ཏ་ཞེས་བྱ་བའི་དོན་ཏོ། །དུད་ཅིང་འགྲོ་བས་ན་དུད་འགྲོ་སྟེ་ཏིཪྱག་ཞེས་བྱ་བའི་དོན་ཏོ། །འཇིག་རྟེན་པ་རྣམས་ཡིད་ཀྱི་བུ་ཞེས་ཟེར་ཞིང་ཡིད་ཤས་ཆེ་བས་མི་སྟེ་མནུ་ཥའི་དོན་ཏོ། །དེས་ན་བསྐལ་པ་དང་པོའི་མི་རྣམས་ཀྱང་ཡིད་ལས་སྐྱེས་ཞེས་བྱ་བར་སྒྲོགས་སོ། །རྣམས་ཞེས་པ་ནི་བཞིག་ལ་སྦྱར་རོ། །ལྷ་ནི་ཚངས་པའི་ལུས་ལས་སྐྱེས་པ་དང་། (བདུད་རྩི་ཟ་བས་སམ་ལུས་ལ་འོད་ཡོད་པས་སམ།) བདེ་བ་ལ་རོལ་པ་དང་། མཆོད་པར་འོས་པ་དང་། གཞལ་ཡས་ཁང་ནམ་མཁའ་ལ་ཡོད་པའི་ཕྱིར་ཏེ་དེ་བའི་དོན་ཏོ། །དེ་ཡང་རྒྱལ་ཆེན་(རིས་བཞི་)པ་དང་། སུམ་ཅུ་རྩ་གསུམ་པ་དང་། འཐབ་བྲལ་བ་དང་། དགའ་ལྡན་པ་དང་། འཕྲུལ་དགའ་བ་དང་། གཞན་འཕྲུལ་དབང་བྱེད་པ་སྟེ་དྲུག་གོ།
དེ་ལྟར་ན་དམྱལ་བ་ནས་ལྷ་དྲུག་གི་བར་སྣོད་དང་བཅས་པ་དག་ནི་འདོད་པའི་ཁམས་ཡིན་ཏེ། འདིར་སེམས་ཅན་རྣམས་ནི་(ཡུལ།) ཁམ་ཟས་དང་འཁྲིག་པ་ལ་འདོད་ཆགས་དང་བཅས་ཤིང་འདོད་ཡོན་ལྔས་འཚོ་བའི་ཕྱིར་དང་། (མཉམ་པར་མ་གཞག་པ་དང་འདོད་པའི་འདོད་ཆགས་རྒྱས་པར་འགྱུར་བའི་ཕྱིར་དང་།) སྣོད་ཀྱང་འདོད་པ་དང་ལྡན་པའི་སེམས་ཅན་གྱི་གནས་ཡིན་པའི་ཕྱིར་དང་། རང་གི་མཚན་ཉིད་འཛིན་པའི་ཕྱིར་ཏེ། ལུང་སིལ་བུ་ལས། འཇིག་རྟེན་སྣ་ཚོགས་གང་དེ་འདོད་པ་མིན། །སྐྱེས་བུའི་ཀུན་རྟོག་འདོད་ཆགས་འདོད་པ་ཡིན། །འཇིག་རྟེན་དག་ན་སྣ་ཚོགས་དེ་བཞིན་གནས། །འོན་ཀྱང་བརྟན་རྣམས་འདི་ལ་འདུན་པ་འདུ་ཞེས་གསུངས་པ་བཞིན་ནོ། །(འོ་ན་འདོད་པའི་སྤྲུལ་སེམས་ལའང་འདོད་པའི་འདོད་ཆགས་རྒྱས་པར་ཐལ་ལོ་ཞེ་ན། སྤྲུལ་པའི་དབང་གིས་སྤྲུལ་སེམས་ལའང་ཆགས་པའམ་འདོད་པ་ཁོ་ནའི་ཆོས་དྲི་རོ་སྤྲུལ་པ་སྟེ་ས་གཞན་གྱི་སྤྲུལ་སེམས་གྱིས་ས་གཞན་གྱི་སྤྲུལ་པ་བྱེད་པ་མེད་པའི་ཕྱིར་དང་མངན་སྤྲུལ་པ་བྱེད་པ་གཞན་ལས་ཐོས་པར་བྱེད་པས་ཆགས་པ་མེད་ཀྱང་བྱེད་པའམ་ཡང་ན་རང་གི་སྤྲུལ་པ་ཉམས་ན་དེ་ལ་ཆགས་པ་འབྱུང་བས་སོ། །དེ་ལ་དེ་རྒྱས་པར་མི་འགྱུར་རོ། །)དེ་རྣམས་ཀྱང་རྒྱས་པར་དབྱེ་ན་དམྱལ་བ་ལ་ཚ་དམྱལ་བརྒྱད་དང་། མི་ལ་གླིང་བཞིར་དབྱེ་བ་ལས་ནི་འདོད་པའི་ཁམས་དེ་ཉི་ཤུར་ཤེས་པར་བྱའོ། །གྲང་དམྱལ་དང་ཉེ་འཁོར་བ་རྣམས་ནི་ཚ་དམྱལ་གྱི་འཁོར་ལྟ་བུར་གནས་པའི་ཕྱིར་དང་། །ཉི་ཚེ་བ་ལ་གནས་ངེས་པ་མེད་པའི་ཕྱིར་མ་བགྲངས་སོ། །གླིང་ཕྲན་རྣམས་ཀྱང་གླིང་གི་འཁོར་ཡིན་པའི་ཕྱིར་རོ། །ལྷ་མ་ཡིན་ལ་སོགས་པ་རྣམས་ཀྱང་འདོད་ཁམས་ཡིན་མོད་ཀྱི་དེ་ནི་འདོད་པའི་འགྲོ་བ་ལྔར་འདུས་པར་འཆད་པར་འགྱུར་རོ། །
དེ་ལྟར་ན་ངན་སོང་གནས་བཅུ་དང་མཐོ་རིས་གནས་བཅུ་སྟེ་ཉི་ཤུའོ། །སའི་དངོས་གཞི་ལས་ནི་ཚ་དམྱལ་བརྒྱད། གྲང་དམྱལ་བརྒྱད། ཡི་དྭགས་དང་། ལྷ་མ་ཡིན་དང་། མིའི་གླིང་བཞི་གླིང་ཕྲན་བརྒྱད་དེ་བཅུ་གཉིས། རྒྱལ་ཆེན་རིས་བཞི་ལ་སོགས་པ་ལྷའི་རིས་དྲུག་སྟེ་གནས་གཞན་སུམ་ཅུ་རྩ་དྲུག་པོ་འདི་དག་ནི་འདོད་པའི་ཁམས་ཞེས་བྱའོ། །དུད་འགྲོ་ནི་ལྷ་དང་མི་དང་ལྷན་ཅིག་རྒྱུ་བ་ཉིད་ཡིན་པས་དེའི་ཕྱིར་དེ་དག་གི་གནས་གཞན་ལོགས་ཤིག་ཏུ་རྣམ་པར་མི་གཞག་གོ་ཞེས་བཤད་ཅིང་། སློབ་དཔོན་ཀླུ་སྒྲུབ་ཀྱིས་ཀྱང་ས་ལུ་ལྗང་པའི་འགྲེལ་པ་ལས། ཁམས་འགྲོ་སྐྱེ་འགྲོ་བྱེ་བྲག་གིས། །འདོད་སྲིད་རྣམ་པ་སུམ་ཅུ་དྲུག་ཅེས་པ་དང་མཐུན་པར་སུམ་ཅུ་རྩ་དྲུག་ཉིད་དུ་བཤད་དོ། །གཞན་དག་ནི་དམྱལ་བ་ལ་བཅོ་བརྒྱད་དང་། ཡི་དྭགས་དང་དུད་འགྲོ་ལ་གནས་ན་གནས་པ་དང་། ཁ་འཐོར་བ་གཉིས་གཉིས་སུ་ཕྱེ་བས་བཞི་དང་། མི་ལ་བཅུ་གཉིས་དང་། ལྷ་མ་ཡིན་(ལ་སྒྲ་གཅན་མགུལ་འཕྲེང་རབ་གནོན། ཐག་བཟང་རིས་ཏེ།) བཞི་དང་། ལྷ་དྲུག་སྟེ་(མཐོ་རིས་ཉེར་གཉིས། ངན་སོང་ཉེར་གཉིས་ཏེ་འདོད་པའི་གནས་གཞན།) བཞི་བཅུ་རྩ་བཞིའོ་ཞེས་ཟེར་རོ། །གཟུགས་ཀྱི་ཁམས་བཤད་པ་ནི་འདོད་པ་ལས་ཡོན་ཏན་དང་གནས་གཞན་གྱིས་གོང་མའི་གནས་བཅུ་བདུན་པོ་དག་ནི་གཟུགས་ཀྱི་ཁམས་ཀྱི་གནས་ཡིན་ཏེ། འདོད་པ་ལས་འདོད་ཆགས་དང་བྲལ་ཞིང་གཟུགས་ལ་འདོད་ཆགས་དང་བཅས་པའི་ཕྱིར་དང་། (སྙོམས་འཇུག་དང་དེའི་རྟེན་ལུས་ལ་གཟུགས་ཀྱི་འདོད་ཆགས་དང་བཅས་པའི་ཕྱིར་དང་བྱེད་པ་མེད་ལ།) རང་གི་མཚན་ཉིད་འཛིན་པའི་ཕྱིར་རོ། །གལ་ཏེ་གཟུགས་ཀྱི་ཁམས་ནི་བསམ་གཏན་བཞིས་བསྡུས་པའི་ཕྱིར་ཇི་ལྟར་བཅུ་བདུན་དུ་དབྱེ་ཞེ་ན། གཟུགས་ཀྱི་ཁམས་དེར་བསམ་གཏན་དང་པོ་གསུམ་པོ་སོ་སོའི་ས་སྟེ་རྒྱུ་སྙོམས་འཇུག་གི་སེམས་ནི་ཆུང་ངུ་དང་འབྲིང་དང་ཆེན་པོ་གསུམ་གསུམ་དུ་གོམས་པས་འབྲས་བུ་སྐྱེ་བའི་གནས་གཞན་ཡང་ཚངས་པའི་སྡེར་གཏོགས་པས་ཚངས་རིས་པ་དང་། ཚངས་པའི་མདུན་ན་རིག་བྱེད་འདོན་པ་ལྟར་གནས་པས་ཚངས་པའི་མདུན་ན་འདོན་དང་། ཚེ་དང་ཁ་དོག་ལ་སོགས་པ་ཁྱད་པར་འཕགས་ཤིང་ཚངས་པའི་གཙོ་བོ་ཡིན་པའི་ཕྱིར་ཚངས་ཆེན་ཏེ་བསམ་གཏན་དང་པོ་ལ་གསུམ་དང་། གོང་མ་བས་འོད་ཆུང་བས་འོད་ཆུང་དང་། འོད་ཚད་མེད་པས་ཚད་མེད་འོད་དང་། འོད་ཤིན་ཏུ་གསལ་བའི་ཕྱིར་འོད་གསལ་ཏེ་བསམ་གཏན་གཉིས་པ་ལ་གསུམ་དང་། གོང་མ་བས་སེམས་ཀྱི་བདེ་བ་ཆུང་བས་བདེ་ཆུང་དང་། བདེ་བ་ཚད་མེད་པ་དང་ལྡན་པའི་ཕྱིར་ཚད་མེད་བདེ་དང་། བདེ་བ་ཤིན་ཏུ་རྒྱས་པའི་ཕྱིར་བདེ་རྒྱས་ཏེ་བསམ་གཏན་གསུམ་པ་ལ་གསུམ་སྟེ། འདི་ལ་དགེ་ཆུང་ལ་སོགས་པར་བཤད་པ་ནི་ཀུ་ཤ་ལ་ཞེས་བྱ་བ་བདེ་བ་དང་དགེ་བ་གཉིས་ཀ་ལ་འཇུག་པས་ལོཙྪ་བ་རྣམས་ཀྱིས་དགེ་བར་བསྒྱུར་ཏེ། དོན་ནི་ཡིད་ཀྱི་ས་པའི་བདེ་བ་ཡིན་པའི་ཕྱིར་རོ། །
དེས་ན་བསམ་གཏན་དང་པོ་གསུམ་རེ་རེ་ལའང་གསུམ་གསུམ་པ་ཡིན་པའི་ཕྱིར་དང་། བསམ་གཏན་བཞི་པ་ནི་རྒྱུ་ཟག་བཅས་ཀྱིས་བསམ་གཏན་བཞི་པ་ཆུང་ངུ་འབྲིང་ཆེན་པོ་གསུམ་དང་། དེ་ཉིད་ཟག་མེད་དང་སྤེལ་མ་ཆུང་ངུ་དང་འབྲིང་དང་ཆེན་པོ་དང་ཤིན་དུ་ཆེན་པོ་དང་ཆེས་ཤིན་ཏུ་ཆེན་པོ་ལྔ་སྟེ་བརྒྱད་དུ་བསྒོམས་པའི་བྱེ་བྲག་གིས་འབྲས་བུ་གནས་གཞན་ཡང་འོག་གཞི་སྤྲིན་ལྟར་འདབ་ཆགས་པར་གནས་པ་མེད་པས་སྤྲིན་མེད་དང་། མི་གཡོ་བའི་བསོད་ནམས་ལས་སྐྱེས་པས་བསོད་ནམས་སྐྱེས་དང་། གཟུགས་ཀྱི་ཁམས་པའི་སོ་སོའི་སྐྱེ་བོ་རྣམས་ཀྱི་དགེ་བའི་འབྲས་བུ་ཤིན་ཏུ་ཆེ་ཤོས་ཡིན་པའི་ཕྱིར་འབྲས་བུ་ཆེ་ཞེས་བྱ་བ་སོ་སོའི་སྐྱེ་བོའི་གནས་གཞན་གསུམ་དང་། གནས་གཙང་མ་གོང་མ་དག་པས་དམན་པའི་ཕྱིར་མི་ཆེ་བ་དང་། ཉོན་མོངས་པས་གདུང་བ་མེད་པའི་ཕྱིར་མི་གདུང་བ་དང་། ཆོས་མཐོང་བ་བཟང་པའི་ཕྱིར་གྱ་ནོམ་སྣང་བ་དང་། ལྟ་བ་བཟང་པའི་ཕྱིར་ཤིན་ཏུ་མཐོང་བ་དང་། དེའི་གོང་ན་གནས་གཞན་མེད་པའི་ཕྱིར་འོག་མིན་ཞེས་བྱ་བ་འཕགས་པའི་གནས་གཞན་ལྔ་སྟེ་བརྒྱད་པ་ཡིན་པའི་ཕྱིར་རོ། །འཕགས་པའི་གནས་ལྔ་པོ་དག་ལ་སོ་སོའི་སྐྱེ་བོ་དང་མ་འདྲེས་པས་གཙང་མའི་རིས་ཞེས་ཀྱང་བྱའོ། །
འདི་ལ་ཁ་ཆེ་བྱེ་བྲག་ཏུ་སྨྲ་བ་ནི་འགྲེལ་པ་ལས། ཚངས་པའི་མདུན་ན་འདོན་ཁོ་ན་དག་ནི་ཚངས་པ་ཆེན་པོའི་གནས་ཆེས་མཆོག་ཏུ་གྱུར་པ་གཙོ་བོ་གཅིག་པ་གཅིག་སྤགས་པ་བཞིན་དུ་མངོན་པར་གྲུབ་ཀྱིས་གཞན་ནི་མེད་དོ་ཞེས་གྲག་གོ་ཞེས་འབྱུང་བས་མདུན་ན་འདོན་ལས་གནས་གཞན་ཐ་དད་པའི་ཚངས་ཆེན་མེད་པས་གནས་གཞན་བཅུ་དྲུག་ཏུ་འདོད་ལ། ཉི་འོག་པ་དང་མདོ་སྡེ་པ་ནི་གནས་གཞན་ལོགས་པ་ཡིན་པས་བཅུ་བདུན་ཡིན་ནོ་ཞེས་འདོད་དོ། །
ཐེག་ཆེན་པ་ནི་སའི་དངོས་གཞི་ལས། གནས་གཙང་མ་རྣམས་ལས་འདས་པ་ན་དབང་ཕྱུག་ཆེན་པོའི་གནས་ཡོད་དེ། བྱང་ཆུབ་སེམས་དཔའ་ས་བཅུ་ལ་གནས་པ་རྣམས་ཀྱིས་ས་བཅུ་ཡོངས་སུ་བསྒོམས་ནས་གང་དུ་སྐྱེ་བའོ་ཞེས་པ་དང་། ཟླ་གསང་ཐིག་ལེ་ལས། གཙང་མའི་གནས་ནི་རྣམ་སྤངས་ནས། །འོག་མིན་གནས་ནི་ཉམས་དགའ་བར། །ཡང་དག་སངས་རྒྱས་དེར་འཚང་རྒྱ། །སྤྲུལ་པ་པོ་ནི་འདིར་འཚང་རྒྱ། །ཞེས་གསུངས་པས་འོག་མིན་གྱི་སྟེང་ནའང་འོག་མིན་ཆེན་པོ་ཞེས་བྱ་བ་ཡོད་དེ། དེ་ནི་ལོངས་སྤྱོད་རྫོགས་པའི་སྐུའི་ཞིང་ཁམས་ཡིན་ལ། དེ་ཉིད་ལ་དབང་ཕྱུག་ཆེན་པོའི་གནས་ཞེས་བྱ་སྟེ། དབང་ཕྱུག་ཆེན་པོ་ཞེས་བྱ་བ་ནི་ཆོས་ཀྱི་སྤྲིན་ལ་ཆོས་ཀྱི་དབང་ཕྱུག་ཐོབ་པའི་ཕྱིར་རོ་ཞེས་སྟོད་འགྲེལ་ལས་བཤད་པའི་ཕྱིར་དང་། ས་བཅུ་པའི་བྱང་ཆུབ་སེམས་དཔའ་རྣམས་ལ་སངས་རྒྱས་རྣམས་ཀྱི་འོད་ཟེར་གྱིས་དབང་བསྐུར་བར་བཤད་པའི་ཕྱིར་རོ་ཞེས་བཞེད་དོ། །
མདོ་ལས། བསམ་གཏན་དང་པོ་ལ་ཚངས་རིས་དང་། ཚངས་ལྷ་ཉེ་ཕན་དང་། ཚངས་པ་ཀུན་འཁོར་དང་། ཚངས་ཆེན་དང་། གཉིས་པ་ལ་སྣང་བ་དང་། ཆུང་སྣང་དང་། ཚད་མེད་སྣང་བ་དང་། ཀུན་སྣང་དང་བ་དང་། གསུམ་པ་ལ་དགེ་བ་དང་། ཆུང་དགེ་དང་། ཚད་མེད་དགེ་བ་དང་། དགེ་རྒྱས་དང་། བཞི་པ་ལ་ཆེ་བ་དང་། ཚུང་ཆེ་དང་། ཚད་མེད་ཆེ་བ་དང་། འབྲས་བུ་ཆེ་བ་ཞེས་བསམ་གཏན་རེ་རེ་ལ་གནས་གཞན་བཞི་བཞིར་བཤད་པའི་དང་པོ་ནི་མདོར་བསྟན་དང་། གཞན་དག་ནི་མིང་གི་རྣམ་གྲངས་ཡིན་པར་སྣང་ངོ་། །སྒྲ་དོན་ནི་གཟུགས་མཆོག་དང་ལྡན་ཞིང་རང་གི་མཚན་ཉིད་འཛིན་པའི་ཕྱིར་རོ། །གཟུགས་མེད་པའི་ཁམས་བཤད་པ་ནི་གཟུགས་མེད་པའི་ཁམས་ན་ནི་(སྔར་བཤད་པ་ལྟར།) གནས་གཞན་ཐ་དད་པ་ནི་མེད་དོ། །ཅི་སྟེ་ན་གཟུགས་མེད་པའི་ཕྱིར་དང་། གནས་གཞན་ཐ་དད་པའང་གཟུགས་ཀྱིས་ཕྱེ་བའི་ཕྱིར་རོ། །འོན་ཀྱང་(ལུས་)གང་དུ་ཤི་བ་དེ་ཉིད་དུ་གཟུགས་མེད་པའི་ཏིང་ངེ་འཛིན་དང་(གང་ཐོབ་པ་དེ་)ལྡན་པ་ཉིད་དུ་སྐྱེའོ། །
འོ་ན་(མཐོང་པས་)རྣམ་པ་བཞིར་ཇི་ལྟར་འགྱུར་ཞེ་ན། སྔོན་རྒྱུ་ནམ་མཁའ་མཐའ་ཡས་དང་། རྣམ་ཤེས་མཐའ་ཡས་དང་། ཅི་ཡང་མེད་པ་དང་། འདུ་ཤེས་མེད་འདུ་ཤེས་མེད་མིན་སྐྱེ་མཆེད་ཀྱི་སྙོམས་འཇུག་བསྒོམས་པས་ཁམས་དེར་འབྲས་བུའི་སྙོམས་འཇུག་མི་འདྲ་བར་སྐྱེ་བའི་བྱེ་བྲག་ལས་ནི་ནམ་མཁའ་མཐའ་ཡས་ལ་སོགས་པ་རྣམ་པ་བཞིར་གཞག་གོ། མཚན་ཉིད་ནི་འདོད་གཟུགས་ལས་འདོད་ཆགས་དང་བྲལ་ཞིང་གཟུགས་མེད་ལ་འདོད་ཆགས་དང་བཅས་པའོ། །ཁམས་ཀྱི་དོན་ནི་སྔ་མ་བཞིན་ནོ། །སྒྲ་དོན་ནི་གནས་བརྒྱད་པར་འཆད་པར་འགྱུར་རོ། །གོས་དམར་བ་ལ་སོགས་པའི་སྡེ་པ་གཞན་ནི་གཟུགས་མེད་ནའང་གཟུགས་ཕྲ་བ་ཡོད་པར་འདོད་དེ། དེ་དག་གི་ལྟར་ན་དམན་པ་ལ་དགག་པའི་སྒྲ་སྦྱར་བ་ཡིན་ལ། གནས་གཞན་ཡང་འོག་མིན་གྱི་སྟེང་ན་ཡར་བརྩེགས་ཏེ་ཡོད་པར་ལྟའོ། །གལ་ཏེ་གཟུགས་མེད་ན་གཟུགས་ཅི་ཡང་མེད་པ་ལྟར་ན་སེམས་གང་ལ་བརྟེན་ཞེ་ན། གཟུགས་མེད་པའི་ཁམས་དེར་ནི་རིས་མཐུན་པ་དང་སྲོག་གི་དབང་པོ་ལ་སེམས་ཀྱི་རྒྱུད་ནི་བརྟེན་པར་འདོད་པ་ཡིན་ལ། ཡང་གི་སྒྲས་ནི་ལས་ལ་བརྟེན་པ་གསུང་ངོ་། །སློབ་དཔོན་རྒྱལ་པོའི་སྲས་ནི་ཡང་གི་སྒྲས་སོ་སོའི་སྐྱེ་བོ་དང་། མི་ལྡན་པ་དང་། ཐོབ་པ་དང་། སྐྱེ་བ་ལ་སོགས་པ་བསྡུའོ་ཞེས་འཆད་དོ། །
གལ་ཏེ་འདོད་གཟུགས་ནའང་དེ་དག་ལ་ཇི་ལྟར་མི་བརྟེན་ཞེ་ན། དེ་དག་ཏུ་གཟུགས་ཀྱི་འདུ་ཤེས་དང་མ་བྲལ་བས་སྲོག་ལ་སོགས་པ་སྟོབས་ཆུང་བའི་ཕྱིར་རོ། །གཟུགས་མེད་པའི་ཁམས་སུ་ནི་གཟུགས་ཀྱི་འདུ་ཤེས་དང་བྲལ་བའི་སྙོམས་པར་འཇུག་པའི་ཁྱད་པར་ལས་སྐྱེས་པས་སྔོན་གྱི་ལས་ཀྱིས་འཕངས་པའི་སྲོག་ལ་སོགས་པ་སྟོབས་ཆེ་བའི་ཕྱིར་དེ་ལ་སེམས་རྟེན་ལ་སེམས་ལའང་དེ་དག་བརྟེན་པ་ཡིན་ནོ་ཞེས་བྱ་བ་ནི་གྲུབ་པའི་མཐའོ། །མདོ་སྡེ་པ་ནི་སྔོན་གྱི་ལས་ཀྱི་སྟོབས་ཀྱིས་དེར་མིང་བཞིའི་ཕུང་པོ་འགྲུབ་ཀྱི་སྲོག་ལ་སོགས་པའི་རྫས་གཞན་ནི་མི་འདོད་དོ། །དེ་ལའང་གཟུགས་མེད་པའི་མིང་བཞིའི་ཕུང་པོ་རིལ་པོ་རྣམ་པར་སྨིན་པར་ཐལ་བའི་སྐྱོན་ཡོད་པའི་ཕྱིར་རྣལ་འབྱོར་སྤྱོད་པ་པས་མིང་བཞིའི་ཕུང་པོ་གཞན་ནི་ཀུན་གཞི་རྣམ་ཤེས་ལ་རྟེན་ལ། ཀུན་གཞི་ནི་སྔོན་གྱི་ལས་ལ་བརྟེན་པ་ཉིད་རིགས་པ་ཡིན་ནོ་ཞེས་འདོད་པ་ཡིན་ནོ། །(འདོད་པ་དང་གཟུགས་དང་མིང་བཞིའི་ཕུང་པོ་ལ་སྲེད་པས་སོ་སོར་བཅད་པས་ཁམས་གསུམ་ཡིན་ལ། འདོད་པ་ན་གནས་རིགས་དུ་མ་ཡོད་ཀྱང་ས་སོ་སོའི་སྲེད་པ་མི་འདྲ་བ་མེད་པས་སའང་གཅིག་གོ། གོང་མ་གཉིས་ནི་སྲེད་པ་མི་འདྲ་བ་བཞི་བཞིས་རིས་སུ་བཅད་པས་སའང་མི་འདྲ་བ་བཞི་བཞི་བྱུང་ངོ་། །)དེ་ལྟར་ན་ཁམས་གསུམ་དུ་རྣམ་པར་བཞག་པ་ཡིན་ནོ། །
འགྲོ་བ་ལྔར་བཤད་པ་ནི་ཁམས་གསུམ་པོ་བཤད་པ་གང་ཡིན་པ་དེར་ནི་དམྱལ་བ་དང་སོགས་པའི་སྒྲས་བཟུང་བ་དུད་འགྲོ་དང་ཡི་དྭགས་དང་ལྷ་དང་མི་སྟེ་འགྲོ་བ་ལྔ་ཡིན་པར་སྲིད་པ་བདུན་བསྟན་པའི་མདོ་ལ་སོགས་པ་ལས་རང་རང་གི་མིང་གིས་བསྟན་ཏོ། །(དེའང་འདོད་པར་བཞི་དང་ལྷའི་ཕྱོགས་གོང་མ་གཉིས་སུ་ནི་ལྷའི་ཕྱོགས་སོ། །)ཁྱད་པར་གྱི་ཆོས་ལ་གཉིས་ལས་དང་པོས་ནི་དེ་ལྟ་བུའི་འགྲོ་བ་ལྔ་པོ་གང་དག་ཡིན་པ་དེ་དག་གི་ངོ་བོ་ཡང་ཉོན་མོངས་པ་ཅན་བསྒྲིབས་པ་དང་མི་དགེ་བ་ཡང་མིན་ལ། ལུང་བསྟན་པ་དགེ་བ་ཡང་མིན་ཏེ། གལ་ཏེ་ཉོན་མོངས་ཅན་དང་དགེ་བ་ཡིན་ན་འཕགས་པ་དང་དགེ་རྩ་ཆད་པ་རྣམས་འགྲོ་བས་མ་བསྡུས་པར་འགྱུར་བའི་ཕྱིར་རོ། །ལ་ལར་དགེ་བ་དང་། ལ་ལར་ཉོན་མོངས་ཅན་དང་། ལ་ལར་མ་བསྒྲིབས་ལུང་མ་བསྟན་ཡིན་ནོ་ཞེས་བྱ་བའང་མི་རིགས་ཏེ། ཚེ་མ་བརྗེས་པར་འགྲོ་བ་རྣམ་པར་འཕོ་པར་ཐལ་བའི་ཕྱིར་རོ། །འགྲོ་བ་དེ་དག་སེམས་ཅན་ཞེས་བྱ་བ་ཡིན་ཀྱང་བར་སྲིད་ནི་མིན་ཏེ།
སྲིད་པ་བདུན་བསྟན་པའི་མདོ་ལས། སྲིད་པ་ནི་བདུན་ཏེ། དམྱལ་བའི་སྲིད་པ་དང་། དུད་འགྲོའི་སྲིད་པ་དང་། ཡི་དྭགས་ཀྱི་སྲིད་པ་དང་། ལྷའི་སྲིད་པ་དང་། མིའི་སྲིད་པ་དང་། ལས་ཀྱི་སྲིད་པ་དང་། སྲིད་པ་བར་མའོ། །ཞེས་བར་སྲིད་དམྱལ་བ་ལ་སོགས་པ་ལས་ཐ་དད་པར་གསུངས་པའི་ཕྱིར་དང་། གདགས་པ་ལས་ཀྱང་། སྐྱེ་གནས་བཞིས་ནི་འགྲོ་བ་ལྔ་བསྡུས་ཀྱི་འགྲོ་བ་ལྔས་ནི་སྐྱེ་གནས་བཞི་མ་བསྡུས་ཏེ། གང་ཞིག་མ་བསྡུས་ཤེ་ན། སྲིད་པ་བར་མའོ་ཞེས་གསུངས་ལ། ཆོས་ཀྱི་ཕུང་པོ་ལས་ཀྱང་། མིག་གི་ཁམས་གང་ཞེ་ན། འབྱུང་བ་ཆེན་པོ་བཞི་དག་རྒྱུར་བྱས་པའི་གཟུགས་དང་བ་གང་ཡིན་པ་དམྱལ་བ་པའམ། དུད་འགྲོའི་སྐྱེ་གནས་པ་འམ། ཡི་དྭགས་ཀྱི་ཡུལ་པའམ། ལྷའམ། མིའམ། བསྒོམས་པ་ལས་བྱུང་བའམ། སྲིད་པ་བར་མ་པའི་མིག་དང་། མིག་གི་དབང་པོ་དང་། མིག་གི་སྐྱེ་མཆེད་དང་། མིག་གི་ཁམས་སོ་ཞེས་སྲིད་པ་བར་མའི་མིག་དམྱལ་བ་ལ་སོགས་པ་ལས་ཐ་དད་པར་གསུངས་པའི་ཕྱིར་རོ། །དེའི་ཕྱིར་འགྲོ་བ་མ་བསྒྲིབས་ལུང་མ་བསྟན་དུ་གྲུབ་སྟེ། འགྲོ་བ་དེ་དག་འགྲུབ་པའི་རྒྱུ་ལས་ཀྱི་སྲིད་པ་ལས་ཐ་དད་པར་གསུངས་པའི་ཕྱིར་དང་། ལུང་སིལ་བུ་ལས། གནས་བརྟན་ཤཱ་རིའི་བུས་ཚེ་དང་ལྡན་པ་དམྱལ་བའི་ཟག་པ་རྣམས་མངོན་དུ་གྱུར་པ་ལས་དམྱལ་བ་མྱོང་བར་འགྱུར་བའི་ལས་རྣམས་བྱེད་ཅིང་སྩོགས་པར་འགྱུར་རོ། །ཚེ་དང་ལྡན་པ་ལུས་དང་ངག་དང་ཡིད་ཀྱི་དཀྱིལ་འཁོར་དང་སྐྱོན་དང་སྙིགས་མ་དེ་དག་གི་རྣམ་པར་སྨིན་པ་གཟུགས་དང་ཚོར་བ་དང་འདུ་ཤེས་དང་འདུ་བྱེད་དང་རྣམ་པར་ཤེས་པ་ནི་དམྱལ་བ་དག་ཏུ་སྨིན་པར་འགྱུར་ཏེ། རྣམ་པར་སྨིན་པ་གྲུབ་ནས་དམྱལ་བ་ཞེས་བྱ་བའི་གྲངས་སུ་འགྲོའོ། །ཚེ་དང་ལྡན་པ་དེ་ལ་ཆོས་དེ་དག་ལས་མ་གཏོགས་པ་དམྱལ་བ་མི་དམིགས་སོ་ཞེས་གསུངས་པའི་ཕྱིར་ཏེ། ལས་ཀྱིས་འཕངས་པའི་རྣམ་སྨིན་གྱི་ཕུང་པོ་ནི་འགྲོ་བར་བཤད་པའི་ཕྱིར་རོ། །(དེའང་རྣམ་སྨིན་ཁོ་ནར་འདོད་པ་དང་། རྒྱས་བྱུང་ཡོད་པར་འདོད་པ་ཡོད་དེ།) གལ་ཏེ་འགྲོ་བ་ལྔ་ཡིན་ན་མདོ་གཞན་དག་ལས་ལྷ་མ་ཡིན་དང་དྲི་ཟ་ལ་སོགས་པ་གང་དག་བཤད་པ་དེ་དག་གང་གིས་བསྡུས་ཤེ་ན། ལྷ་མ་ཡིན་ནི་དྲན་པ་ཉེར་གཞག་ལས་ཡི་དྭགས་ཀྱི་འགྲོ་བར་གཏོགས་པ་དང་། དུད་འགྲོའི་འགྲོ་བར་གཏོགས་པ་རྣམས་སོ། །དེ་ལ་དང་པོའི་བདུད་ཀྱི་རིས་ཀྱི་ཡི་དྭགས་རྣམས་དང་། ཡི་དྭགས་རྫུ་འཕྲུལ་ཆེན་པོ་རྣམས་སོ། །
གཉིས་པ་ནི་རྒྱ་མཚོའི་གཏིང་གི་ས་གཞི་ལ་གནས་པ་སྟེ་རི་རབ་ཀྱི་རྟེན་དཔག་ཚད་བརྒྱད་ཁྲི་བཞི་སྟོང་ཡོད་པའི་ས་འོག་ན་གནས་སོ་ཞེས་ཡི་དྭགས་དང་དུད་འགྲོར་འདུས་པར་གསུངས་ལ། སློབ་དཔོན་ཐོགས་མེད་ནི་ལྷ་དང་ལོངས་སྤྱོད་འགྲན་བཟོད་པ་དང་གཉེན་ཡང་སྡེབ་པའི་ཕྱིར་ལྷའི་ནང་དུ་འདུས་པར་བཞེད་དེ། ས་ལས། ལྷ་མ་ཡིན་རྣམས་ཀྱང་ལྷའི་འགྲོ་བས་བསྡུས་པ་ཁོ་ནར་ལྟ་བར་བྱའོ། །འོན་ཀྱང་དེ་དག་གཡོ་སྒྱུ་ཤས་ཆེ་བས་ལྷ་རྣམས་བཞིན་དུ་དཀར་པོའི་ཆོས་ཀྱི་སྣོད་དུ་མ་གྱུར་པས་དེའི་ཕྱིར་ཆེད་འགའ་མདོ་གཞན་དག་ལས་འགྲོ་བ་ཐ་དད་པར་བསྟན་ཏོ། །དེ་དག་ལྷ་ཉིད་ཡིན་ཡང་ལྷའི་ཆོས་ཡང་དག་པར་བླངས་ཏེ་གནས་པ་མ་ཡིན་པས་དེའི་ཕྱིར་ལྷ་མ་ཡིན་རྣམས་ཞེས་བྱའོ། །ཞེས་དམན་པ་ལ་དགག་པའི་སྒྲར་བཤད་དོ། །(སའི་སྟོད་འགྲེལ་ལས་སློབ་དཔོན་འདུན་བཟང་ལྷ་མ་ཡིན་ནི་བདེན་པ་མི་རྟོགས་པས་མི་མ་ཡིན་པ་ཞིག་ཏུ་ངེས་པས་ཡི་དྭགས་ཀྱི་འགྲོ་བར་གཏོགས་སོ་ཞེས་པ་ནི་རྟགས་མ་ངེས་པས་མི་རིགས་སོ་ཞེས་སུན་ཕྱུང་ངོ་། །)
སློབ་དཔོན་ཡོན་ཏན་འོད་ནི་ལྷ་དང་ཡི་དྭགས་ཀྱི་འགྲོ་བར་འདུས་པར་འདོད་དེ། ཕུང་པོ་ལྔ་པའི་རྣམ་བཤད་ལས། ལྷ་མ་ཡིན་གྱི་འགྲོ་བ་ནི་ལྷ་དང་ཡི་དྭགས་ཀྱི་འགྲོ་བར་འདུས་པའི་ཕྱིར་གུད་དུ་མ་སྨོས་སོ་ཞེས་བཤད་པའི་ཕྱིར་རོ། །ཁ་ཅིག་ནི་ཡབ་དང་སྲས་མཇལ་བ་ལས། སེམས་ཅན་ཚོགས་ཀྱི་འགྲོ་དྲུག་གང་བསྟན་པ་(སེམས་ཅན་དམྱལ་དང་དུད་འགྲོ་ཡི་དྭགས་དང་། །ལྷ་མིན་རིས་དང་མི་དང་ལྷ་ཡི་རྣམས། །མི་ཡི་སེང་གེས་ཀུན་རྫོབ་བཏགས་པ་མཛད། །ཚངས་པ་ལ་ལྟ་བ་དེ་འབྱུང་བའི་རྒྱུ་ནི་ཁོས་སྨོན་ལམ་བཏབ་མ་ཐག་དེ་དག་སྐྱེས་པས་ལན་ནོ། །)ཞེས་གསུངས་པའི་ཕྱིར་རིས་དྲུག་པ་ཡིན་པར་འདོད་དོ། །དྲི་ཟ་ནི་བར་སྲིད་དང་། ལྷའི་རོལ་མོ་བྱེད་པ་གཉིས་ལས་དང་པོ་ནི་འགྲོ་བས་མ་བསྡུས་ལ། ཕྱི་མ་ནི་ལྷ་ཡིན་ནོ། །གྲུལ་བུམ་དང་ལུས་སྲུལ་པོ་ནི་ཡི་དྭགས་ཤས་ཆེ་ལ་ལྷའི་སྡེར་གཏོགས་པ་དག་ཀྱང་ཡོད་དོ། །ཀླུ་དང་ནམ་མཁའ་ལྡིང་དང་མིའམ་ཅི་དང་ལྟོ་འཕྱེ་ཆེན་པོ་ནི་དུད་འགྲོའི་ནང་དུ་གཏོགས་སོ། །ཤ་ཟ་དང་སྨྱོ་བྱེད་དང་བརྗེད་བྱེད་དང་མ་མོ་དང་རྡུལ་ཁྲོད་ཀྱི་ཤ་ཟ་ལ་སོགས་པ་ནི་ཡི་དྭགས་སོ། །སྲིན་པོ་ནི་མིའི་བྱེ་བྲག་ཡིན་ལ། གནོད་སྦྱིན་དང་། ཕྱོགས་སྐྱོང་དང་། འཇིག་རྟེན་སྐྱོང་བ་དང་། བདུད་རྣམས་ནི་ཕལ་ཆེར་ལྷའི་སྡེར་གཏོགས་ལ། ཀླུ་དང་ཡི་དྭགས་སུ་གཏོགས་པའང་ཡོད་དོ། །རྣམ་ཤེས་གནས་བ་དང་སེམས་ཅན་གྱི་གནས་བཤད་པ་ནི་འགྲོ་བ་ལྔའི་ཁམས་གསུམ་པོ་འདིར་རྣམ་ཤེས་གནས་པ་བདུན་བཤད་དེ། མདོ་ལས། སེམས་ཅན་གཟུགས་ཅན་ལུས་ཐ་དད་ཅིང་འདུ་ཤེས་ཐ་དད་པ་དག་ཀྱང་ཡོད་དེ། འདི་ལྟ་སྟེ་མི་རྣམས་དང་ལྷ་ཁ་ཅིག་གོ། འདི་ནི་རྣམ་པར་ཤེས་པ་གནས་པ་དང་པོའོ་ཞེས་གསུངས་ཏེ། དེ་ལ་ལུས་དང་འདུ་ཤེས་ཐ་དད་པའི་སེམས་ཅན་ནི་(ངན་སོང་གསུམ་དང་།) མི་རྣམས་དང་། འདོད་པའི་ལྷ་རྣམས་དང་། བསམ་གཏན་དང་པོར་ཕྱིས་སྐྱེས་པ་རྣམས་ཏེ། ལུས་ཀྱང་ཁ་དོག་དང་རྟགས་དང་དབྱིབས་ཐ་དད་པའི་ཕྱིར་དང་། འདུ་ཤེས་ཀྱང་བདེ་བ་དང་སྡུག་བསྔལ་དང་བཏང་སྙོམས་ཐ་དད་པའི་ཕྱིར་རོ། །ཡང་མདོ་ལས། སེམས་ཅན་གཟུགས་ཅན་ལུས་ཐ་དད་ཅིང་འདུ་ཤེས་གཅིག་པ་དག་ཀྱང་ཡོད་དེ། འདི་ལྟ་སྟེ་ཚངས་རིས་ཀྱི་ལྷ་གང་དག་དང་པོར་བྱུང་བ་དེ་དག་གོ། འདི་ནི་རྣམ་པར་ཤེས་པ་གནས་པ་གཉིས་པའོ། །ཞེས་གསུངས་ཏེ། དེ་ལ་ལུས་ཐ་དད་ཅིང་འདུ་ཤེས་གཅིག་པ་ནི་བསམ་གཏན་དང་པོར་སྔར་སྐྱེས་པ་རྣམས་ཏེ། (སྨྲ་བ་དང་གོས་དང་ཚངས་ཆེན།) ལུས་ཆེ་བ་དང་(འཁོར།) ཆུང་བའི་ཕྱིར་དང་། འདུ་ཤེས་ནི་ཚངས་པ་ཆེན་པོ་ནི་འདི་དག་བདག་གི་འདོད་པ་ལས་བྱུང་ངོ་སྙམ་(དུ་རྒྱུ་འདིས་བྱེད་པར་མཚུངས་)ལ། དེའི་འཁོར་དུ་དང་པོར་སྐྱེས་པ་དེ་དག་ཀྱང་བདག་ཅག་ནི་ཚངས་པ་ཆེན་པོའི་འདོད་པ་ལས་བྱུང་ངོ་སྙམ་དུ་སེམས་པའི་ཕྱིར་རོ། །གལ་ཏེ་ཚངས་པའི་འཁོར་དུ་བྱུང་བ་དེ་དག་གིས་བདག་ཅག་ཚངས་པ་ཆེན་པོའི་སྨོན་པ་ལས་བྱུང་ངོ་ཞེས་ཇི་ལྟར་ཤེས་ཏེ། (དེ་དག་གིས་བསམ་གཏན་གཉིས་པ་ལ་སེམས་ཐོབ་ན་ཚངས་པ་ལ་དམིགས་པའི་ཚུལ་ཁྲིམས་དང་བརྟུལ་ཞུགས་མཆོག་འཛིན་སྤངས་བས་འབྱུང་བར་མི་རིགས་ལ། མ་ཐོབ་ན་དམན་པའི་ཡུལ་མཆོག་མ་ཡིན་པས་གཉིས་པའི་སྔོན་གྱི་གནས་དྲན་པར་མི་རིགས་པའི་ཕྱིར་རོ། །)དེ་དག་ནི་བསམ་གཏན་གཉིས་པ་ནས་ཤི་འཕོས་པ་ཡིན་ན་ས་དེ་ན་གནས་པའི་ཚེ་ཚངས་པ་ཆེན་པོ་སྨོན་ལམ་འདེབས་པ་མཐོང་ཡང་འོག་མར་སྐྱེས་པ་ན་དྲན་པ་མེད་པའི་ཕྱིར་ཏེ། དྲན་ན་ནི་ས་འོག་མ་པ་དག་གོང་མ་ལ་དམིགས་པར་ཐལ་བའི་ཕྱིར་རོ། །གོང་མ་ན་གནས་པ་དེའི་ཚེ་ཚངས་པ་ཆེན་པོའི་སྨོན་ལམ་ལས་བདག་ཅག་སྐྱེའོ་ཞེས་འཛིན་པའང་མ་ཡིན་ཏེ། དེ་ནི་ས་གོང་མའི་སེམས་ཅན་ཡིན་པའི་ཕྱིར་ཚངས་པ་ཆེན་པོ་ལ་དམིགས་པའི་རྒྱུ་མ་ཡིན་དུ་འཛིན་པ་མི་སྲིད་པའི་ཕྱིར་རོ། །སྲིད་ཀྱང་གོང་མའི་འདུ་ཤེས་ཡིན་པའི་ཕྱིར་རོ། །
ཁ་ཅིག་ན་རེ་བར་དོའི་ཚེ་སྔོན་ཀྱི་གནས་དྲན་པ་ཡིན་ནོ་ཞེས་ཟེར་བའང་རིགས་པ་མ་ཡིན་ཏེ། བར་དོ་ནི་དུས་ཐུང་བ་ཡིན་པས་ཚངས་པ་ཆེན་པོའི་ཡུན་རིང་པོར་གཅིག་བུར་གནས་པ་མི་མཐོང་བའི་ཕྱིར་དང་། མདོ་ལས། བདག་ཅག་གིས་སེམས་ཅན་འདི་ཚེ་རིང་ཞིང་དུས་རིང་པོར་གནས་པར་མཐོང་ལ་ཞེས་ཡུན་རིང་པོར་གནས་པ་མཐོང་བར་བཤད་པའི་ཕྱིར་རོ་ཞེ་ན། བསམ་གཏན་དང་པོར་སྐྱེས་པ་ན་ས་དེ་པའི་སྔོན་གནས་རྗེས་དྲན་སྐྱེས་ཐོབ་ཀྱིས་སྔོན་ཚངས་པ་ཆེན་པོ་སྨོན་ལམ་འདེབས་པ་དྲན་པའི་ཕྱིར་སྐྱོན་མེད་དེ། གཉིས་ཀའང་བསམ་གཏན་དང་པོའི་ས་པར་མཚུངས་བའི་ཕྱིར་རོ། །ཡང་ན་དེ་ལས་ཐོབ་པའི་ཕྱིར་རོ། །ཞེས་རྒྱལ་པོའི་སྲས་འཆད་དོ། །ཡང་མདོ་ལས། སེམས་ཅན་གཟུགས་ཅན་ལུས་གཅིག་ཅིང་འདུ་ཤེས་ཐ་དད་པ་དག་ཀྱང་ཡོད་དེ། འདི་ལྟ་སྟེ་འོད་གསལ་གྱི་ལྷ་རྣམས་སོ། །འདི་ནི་རྣམ་པར་ཤེས་པ་གནས་པ་གསུམ་པའོ་ཞེས་གསུངས་ཏེ། དེ་ལ་ལུས་ཐ་དད་ཅིང་འདུ་ཤེས་གཅིག་པ་ལས་བཟློག་པ་ལུས་གཅིག་ཅིང་འདུ་ཤེས་ཐ་དད་པ་ནི་བསམ་གཏནགཉིས་པའི་ལྷ་རྣམས་ཏེ། ལུས་ནི་འོད་ཀྱི་རང་བཞིན་དུ་གཅིག་པ་དང་ཁ་དོག་དང་དབྱིབས་དང་རྟགས་ཀྱང་འདྲ་བའི་ཕྱིར་དང། འདུ་ཤེས་ནི་དངོས་གཞིའི་ཡིད་བདེས་སྐྱོན་ཉེར་བསྡོགས་ཀྱི་བཏང་སྙོམས་མངོན་དུ་བྱེད་ལ། ཉེར་བསྡོགས་ཀྱི་བཏང་སྙོམས་ཀྱིས་སྐྱོན་དངོས་གཞིའི་ཡིད་བདེ་མངོན་དུ་བྱེད་པས་ཐ་དད་པའི་ཕྱིར་རོ། །དེ་ལྟ་ན་བསམ་གཏན་གསུམ་པ་རྣམས་ཀྱང་དེར་ཐལ་བར་འགྱུར་རོ་ཞེ་ན། མི་འགྱུར་ཏེ། ཡིད་བདེ་ནི་སེམས་གཡོ་བར་བྱེད་པས་མ་ཞི་བས་དེས་སྐྱོ་ལ། བདེ་བ་ནི་ཞི་བ་ཡིན་པས་དེས་མི་སྐྱོ་བའི་ཕྱིར་རོ། །མདོ་སྡེ་པ་ནི་མདོ་ལས་བསམ་གཏན་གཉིས་པར་སྐྱེས་ནས་རིང་དུ་ལོན་པ་འཇིག་ཆགས་ལ་མཁས་པ་རྣམས་ནི་བསྐལ་པ་འཇིག་པ་ན་དང་པོ་མན་ཆད་མེར་འབར་བས་འཇིགས་པ་མེད་པའི་ཕྱིར་དང་། དེར་སྐྱེས་ནས་རིང་པོ་མ་ལོན་པ་འཇིག་ཆགས་ལ་མི་མཁས་པ་རྣམས་ནི་འཇིགས་པ་དང་བཅས་པར་གསུངས་པའི་ཕྱིར་འདུ་ཤེས་ཐ་དད་པར་འདོད་དོ། །
འདི་ལ་མདོ་ལས་འོད་གསལ་གྱི་ལྷ་འབའ་ཞིག་སྨོས་པ་ནི་ཡ་མཐའ་གཟུང་བས་འོད་ཆུང་དང་ཚད་མེད་འོད་ཀྱང་མཚོན་པའི་ཕྱིར་ཏེ། དེ་ལྟ་མ་ཡིན་ན་དེ་དག་རྣམ་ཤེས་གནས་པ་བདུན་གྱིས་མ་བསྡུས་བར་འགྱུར་རོ། །མདོ་ལས། སེམས་ཅན་གཟུགས་ལུས་གཅིག་ཅིང་འདུ་ཤེས་གཅིག་པ་དག་ཀྱང་ཡོད་དེ། འདི་ལྟ་སྟེ་དགེ་རྒྱས་ཀྱི་ལྷ་རྣམས་སོ། །འདི་ནི་རྣམ་པར་ཤེས་པ་གནས་པ་བཞི་པའོ། །ཞེས་གསུངས་ཏེ། དེ་ལ་ལུས་དང་འདུ་ཤེས་གཉིས་ཀ་གཅིག་པ་ནི་བསམ་གཏན་གསུམ་པའི་ལྷ་རྣམས་ཏེ། ལུས་ནི་ཁ་དོག་དང་དབྱིབས་དང་རྟགས་འདྲ་བའི་ཕྱིར་དང་། འདུ་ཤེས་ནི་སེམས་བདེ་བར་འདྲ་བའི་ཕྱིར་རོ། །འདི་ལའང་མདོ་ལས་དགེ་རྒྱས་འབའ་ཞིག་སྨོས་པ་ནི་འོག་མ་གཉིས་ཀྱང་མཚོན་པའི་ཕྱིར་རོ། །(དེ་ལ་འདུ་ཤེས་དང་པོ་ནི་ཉོན་མོངས་ཅན་དང་། གཉིས་པ་ནི་སྙོམས་འཇུག་གི་དབང་གིས་དགེ་བ་དང་གསུམ་པ་ནི་རྣམ་སྨིན་སྐྱེས་ཀྱི་འདུ་ཤེས་སུ་གཅིག་པ་སྟེ། གཞན་དུ་བཏང་སྙོམས་ཀྱང་ཡོད་དོ་དེ་དག་ནི་གཟུགས་ཅན་གྱི་རྣམ་ཤེས་གནས་པ་བཞིན་ཡིན་ནོ། །)གཟུགས་(དེ་བཞིན་དུ།) ཅན་མ་ཡིན་པ་(ནམ་མཁའ་མཐའ་ཡས་དང་། རྣམ་ཤེས་མཐའ་ཡས་དང་ཅི་ཡང་མེད་པའི་སྐྱེ་མཆེད།) གསུམ་པོ་དག་ཀྱང་རྣམ་ཤེས་གནས་པ་ཡིན་ཏེ། མདོ་ལས། སེམས་ཅན་གཟུགས་ཅན་མ་ཡིན་པ་གང་དག་རྣམ་པ་ཐམས་ཅད་དུ་གཟུགས་ཀྱི་འདུ་ཤེས་ལས་ཡང་དག་པར་འདས་ཏེ་ནམ་མཁའ་མཐའ་ཡས་སོ་སྙམ་ནས་ནམ་མཁའ་མཐའ་ཡས་སྐྱེ་མཆེད་རྫོགས་པར་བྱས་ཏེ་གནས་པའང་ཡོད་དེ། འདི་ལྟ་སྟེ་ནམ་མཁའ་མཐའ་ཡས་སྐྱེ་མཆེད་དུ་ཉེ་བར་འགྲོ་བའི་ལྷ་དག་གོ། འདི་ནི་རྣམ་པར་ཤེས་པ་གནས་པ་ལྔ་པའོ། །སེམས་ཅན་གཟུགས་ཅན་མ་ཡིན་པ་གང་དག་རྣམ་པ་ཐམས་ཅད་དུ་ནམ་མཁའ་མཐའ་ཡས་སྐྱེ་མཆེད་ལས་ཡང་དག་པར་འདས་ཏེ་རྣམ་པར་ཤེས་པ་མཐའ་ཡས་སོ་སྙམ་ནས་རྣམ་ཤེས་མཐའ་ཡས་སྐྱེ་མཆེད་རྫོགས་པར་བྱས་ཏེ་གནས་པའང་ཡོད་དེ། འདི་ལྟ་སྟེ་རྣམ་ཤེས་མཐའ་ཡས་སྐྱེ་མཆེད་དུ་ཉེ་བར་འགྲོ་བའི་ལྷ་དག་གོ། འདི་ནི་རྣམ་པར་ཤེས་པ་གནས་པ་དག་པའོ། །སེམས་ཅན་གཟུགས་ཅན་མ་ཡིན་པ་གང་དག་རྣམ་པ་ཐམས་ཅད་དུ་རྣམ་ཤེས་མཐའ་ཡས་སྐྱེ་མཆེད་ལས་ཡང་དག་པར་འདས་ཏེ་ཅི་ཡང་མེད་དོ་སྙམ་ནས་ཅི་ཡང་མེད་པའི་སྐྱེ་མཆེད་རྗོགས་པར་བྱས་ཏེ་གནས་པ་དག་ཀྱང་ཡོད་དེ། འདི་ལྟ་སྟེ་ཅི་ཡང་མེད་པའི་སྐྱེ་མཆེད་དུ་ཉེ་བར་འགྲོ་བའི་ལྷ་དག་གོ། འདི་ནི་རྣམ་པར་ཤེས་པ་གནས་པ་བདུན་པའོ་ཞེས་འབྱུང་བའི་ཕྱིར་རོ། །དེ་ལྟར་ན་དེ་དག་ནི་རྣམ་ཤེས་གནས་པ་ཞེས་བྱ་སྟེ། དེ་དག་ཏུ་རྣམ་ཤེས་(སྲིད་པའི་ཚུལ་གྱིས་རྟེན་ཅིང་།) རྒྱས་པའི་ཕྱིར་རོ། །
གལ་ཏེ་སེམས་ཀྱི་གནས་གཞན་དག་ཀྱང་ཡོད་པ་མ་ཡིན་ནམ་ཅིའི་ཕྱིར་དེ་དག་ཁོ་ན་རྣམ་ཤེས་གནས་པར་བསྟན་ཞེ་ན། སྔར་སྨོས་པ་དེ་དག་གི་ལྷག་མ་ངན་སོང་གསུམ་དང་བསམ་གཏན་བཞི་པ་དང་སྲིད་རྩེ་བ་རྣམས་ནི་རྣམ་པར་ཤེས་པ་གནས་པ་མ་ཡིན་ཏེ། (ངན་སོང་གསུམ་ན་སྡུག་བསྔལ་དང་། བསམ་གཏན་བཞི་པ་ན་འདུ་ཤེས་མེད་པ་པ་རྒྱུ་འབྲས་དང་སྲིད་རྩེ་ན་འགོག་པའི་སྙོམས་འཇུག་གིས་)རྣམ་པར་ཤེས་པ་དེ་འཇོམས་པར་བྱེད་པ་དང་ལྡན་པའི་ཕྱིར་དང་། ངན་སོང་རྣམས་སུ་སྡུག་བསྔལ་གྱིས་འཇོམས་པའི་ཕྱིར་དང་། བསམ་གཏན་བཞི་པ་ན་འདུ་ཤེས་མེད་པ་བ་དང་འདུ་ཤེས་མེད་པ་བའི་སྙོམས་འཇུག་དང་། སྲིད་རྩེ་ན་འགོག་པའི་སྙོམས་འཇུག་གིས་རྣམ་ཤེས་འཇོམས་པའི་ཕྱིར་རོ། །
གཞན་ཡང་ངན་སོང་བ་ནི་དེར་གནས་པར་མི་འདོད་པར་གོང་དུ་བསྐྱོད་པར་འདོད་པའི་ཕྱིར་དང་། བསམ་གཏན་བཞི་པའི་སོ་སོའི་སྐྱེ་བོ་རྣམས་ནི་འདུ་ཤེས་མེད་པ་དང་། འཕགས་པ་རྣམས་ནི་གནས་གཙང་མར་བསྐྱོད་པར་འདོད་པའི་ཕྱིར། (དང་གནས་གཙང་བ་རྣམས་མྱང་འདས་སུ་བསྐྱོད་པར་འདོད་པའི་ཕྱིར།) དེ་དག་རྣམ་ཤེས་གནས་པ་མ་ཡིན་ཏེ། རྣམ་པར་ཤེས་པ་གནས་པ་ནི་གཞན་ན་གནས་པ་དེར་འགྲོ་བར་འདོད་པ་དང་དེར་གནས་པ་གཞན་དུ་བསྐྱོད་པར་མི་འདོད་པ་ཡིན་ན་དེ་དག་ནི་དེ་ལྟ་མ་ཡིན་པའི་ཕྱིར་དང་། (རྣམ་ཤེས་གནས་པ་ནི་སེམས་གསལ་ལ།) སྲིད་རྩེ་བ་སེམས་ཀྱི་རྒྱུ་བ་མི་གསལ་པའི་ཕྱིར་རོ་ཞེས་འཆད་དོ། །ཡང་སེམས་ཅན་གྱི་གནས་དགུ་བཤད་པ་གང་ཞེ་ན། སྔར་སྨོས་པའི་རྣམ་ཤེས་གནས་པ་བདུན་དང་། སྲིད་པའི་རྩེ་མོ་དང་འདུ་ཤེས་མེད་པའི་སེམས་ཅན་རྣམས་ནི་སེམས་ཅན་གྱི་གནས་དགུ་ཡིན་པར་མདོ་ལས་བཤད་(འདི་དག་ཏུ་སེམས་ཅན་རྣམས་རང་དགར་གནས་པས་སོ། །)དོ། །འདི་ལ་འདུ་ཤེས་མེད་པའི་སེམས་ཅན་སྨོས་པས་བསམ་གཏན་བཞི་པ་ཐམས་ཅད་གཟུང་སྟེ། འདུ་ཤེས་མེད་པའང་སེམས་ཅན་གྱི་གནས་མིན་ན་གཞན་ལྟ་ཅི་སྨོས་པའི་ཕྱིར་རོ། །སློབ་དཔོན་འདུན་བཟང་ནི་འདུ་ཤེས་མེད་པའི་སེམས་ཅན་མ་གཏོགས་པའི་བསམ་གཏན་བཞི་པ་གཞན་རྣམས་ནི་སེམས་ཅན་གྱི་གནས་མ་ཡིན་ཏེ། སྔར་རྣམ་ཤེས་གནས་པ་མ་ཡིན་པར་བཤད་པ་ལྟར་བསམ་གཏན་བཞི་པའི་སོ་སོའི་སྐྱེ་བོ་རྣམས་ནི་འདུ་ཤེས་མེད་པར་འཇུག་པར་འདོད་ལ། འཕགས་པ་ནི་སྤྲིན་མེད་པ་དང་བསོད་ནམས་སྐྱེས་པ་རྣམས་གནས་གཙང་མ་དང་གཟུགས་མེད་དུ་འཇུག་པར་འདོད་ཅིང་། གནས་གཙང་མ་པ་རྣམས་མྱང་འདས་སུ་འཇུག་པར་འདོད་པས་དེ་ན་གནས་འདོད་ཀྱི་བློ་མེད་ཅིང་། དེ་ནས་བསྐྱོད་པར་འདོད་པའི་བློ་དང་ལྡན་པའི་ཕྱིར་རོ། །
འོ་ན་སློབ་དཔོན་གྱིས་འགྲེལ་པ་ལས། གཞན་གང་ཞེ་ན། ངན་སོང་རྣམས་ཏེ་ཞེས་བཤད་པ་དང་འགལ་ལོ་ཞེ་ན། དེ་ནི་སྒོ་ཙམ་ཞིག་བཤད་པར་ཟད་དོ་ཞེས་འདོད་དོ། །གལ་ཏེ་ངན་སོང་རྣམས་སེམས་ཅན་གྱི་གནས་སུ་ཇི་ལྟར་མི་འགྱུར་ཞེ་ན། དེ་དག་ཏུ་ནི་སེམས་ཅན་སྔོན་གྱི་ལས་ཀྱིས་མི་འདོད་བཞིན་གནས་ཀྱི་རང་དགར་གནས་པ་མེད་པའི་ཕྱིར་སྔར་གྱི་དགུ་ལས་གཞན་ངན་སོང་བ་རྣམས་ནི་སེམས་ཅན་གྱི་གནས་མིན་པར་རིག་པར་བྱ་སྟེ། བཙོན་ར་དང་གཤེད་མ་ལ་སོགས་པ་སེམས་ཅན་གྱི་རང་དགར་དགའ་མགུར་གནས་པའི་གནས་མ་ཡིན་པ་བཞིན་ནོ། །ཡང་མདོ་གཞན་ལས། རྣམ་པར་ཤེས་པ་(འདོད་པར།) གནས་པ་གཟུགས་སུ་ཉེ་བར་འགྲོ་བ་དང་། (གཟུགས་སུ།) ཚོར་བ་དང་། (གཟུགས་མེད་དང་པོ་གསུམ་དུ།) འདུ་ཤེས་དང་(སྲིད་རྩེར།) འདུ་བྱེད་དུ་ཉེ་བར་འགྲོ་བའོ་ཞེས་རྣམ་པར་ཤེས་པའི་གནས་པ་དག་ནི་ཡང་བཞིར་གསུངས་ཏེ། (རྣམ་ཤེས་གནས་པ།) དེ་དག་ཀྱང་རིམ་པ་བཞིན་དུ་ཟག་པ་དང་བཅས་པའི་གཟུགས་ལ་སོགས་པའི་ཕུང་པོ་བཞི་ཡིན་ལ། དེ་ཡང་རང་གི་ས་པ་ཉིད་ཡིན་གྱི་ཟག་མེད་དང་། ས་གཞན་ནི་མ་ཡིན་ཏེ། ཟག་མེད་ནི་རྣམ་ཤེས་ཀྱི་གཉེན་པོ་ཡིན་པའི་ཕྱིར་དང་། ས་གཞན་ནི་ས་གཞན་གྱི་རྣམ་ཤེས་ཀྱི་རྟེན་དུ་མི་འཐད་པའི་ཕྱིར་རོ། །གལ་ཏེ་གཟུགས་ལ་སོགས་པ་ཁོ་ན་ཡིན་གྱི་རྣམ་ཤེས་མ་ཡིན་པ་ཅི་ཞེ་ན་རྣམ་ཤེས་ནི་རྣམ་པར་ཤེས་པའི་གནས་པར་མ་བཤད་དོ། །ཅི་སྟེ་ན། རྣམ་ཤེས་ནི་གནས་པ་པོ་(ཡིན་པས་རྣམ་ཤེས་ཀྱི་ངོ་བོ་)འབའ་ཞིག་(ནི་གནས་པ་མ་)ཡིན་པའི་ཕྱིར་དང་། གནས་པ་པོ་དང་གནས་ནི་ས་བོན་དང་ཞིང་ལྟར་བརྟེན་པ་དང་རྟེན་ཡིན་པའི་ཕྱིར་དང་། གཅིག་ལ་རྟེན་དང་བརྟེན་པ་འགལ་བའི་ཕྱིར་རོ། །
གལ་ཏེ་རྣམ་ཤེས་གནས་པ་བདུན་དང་གནས་པ་བཞི་པོ་དག་གང་གིས་གང་བསྡུས་ཤེ་ན། དེ་དག་གི་བསྡུ་བ་དཔྱད་ན་མུ་ནི་བཞི་ཡིན་ནོ། །འདི་ལྟར་བདུན་གྱིས་བསྡུས་ལ་བཞིས་མ་བསྡུས་པ་ནི་རྣམ་པར་ཤེས་པ་གནས་པ་བདུན་དུ་གཏོགས་པའི་རྣམ་ཤེས་སོ། །(དེ་ཡང་བདུན་ནི་ཕུང་པོ་ལྔའི་ངོ་བོ་ཡིན་པས་སོ། །)བཞིས་བསྡུས་ལ་བདུན་ཀྱིས་མ་བསྡུས་བ་ནི་ངན་སོང་གསུམ་དང་བསམ་གཏན་བཞི་པ་(ཟག་བཅས་)དང་སྲིད་པའི་རྩེ་མོ་བ་རྣམས་ཀྱི་རྣམ་ཤེས་ལས་གཞན་པའི་ཕུང་པོའོ། །གཉིས་ཀ་ཡིན་པ་ནི་རྣམ་པར་ཤེས་པ་གནས་པ་བདུན་དུ་(གཏོགས་ལ་རྣམ་ཤེས་སུ་མ་)གཏོགས་པའི་ཕུང་པོར་བཞིའོ། །གཉིས་ཀ་མ་ཡིན་པ་ནི་ངན་སོང་གསུམ་དང་བསམ་གཏན་བཞི་པ་དང་སྲིད་རྩེའི་རྣམ་ཤེས་དང་ཟག་པ་མེད་པའོ། །
ད་ནི་དེ་(སེམས་ཅན་)རྣམ་གཞག་གིས་རྒྱས་པར་བཤད་པ་ལ་སེམས་ཅན་གྱི་སྐྱེ་བ་དང་། གནས་པ་དང་། འཆི་བ་བཤད་པ་གསུམ་ལས། དང་པོ་ལའང་གང་དུ་འཇུག་པའི་སྐྱེ་བའི་གནས་ནི་འགྲོ་བ་ལ་སོགས་པའི་བྱེ་བྲག་གིས་ཐ་དད་པའི་ཁམས་གསུམ་པོ་བཤད་པ་གང་ཡིན་པ་དེར་ནི་སེམས་ཅན་སྐྱེ་བའི་གནས་བཞི་དག་ཏུ་རིག་པར་བྱའོ། །གང་ཞེ་ན་སྒོ་ང་ལས་སྐྱེ་བ་དང་། སོགས་པས་གཟུང་བ་(ནང་མའི་)མངལ་ནས་སྐྱེ་བ་དང་། (ཕྱིས་འབྱུང་བའི་དང་།) དྲོད་གཤེར་(རྒྱུན་ཆགས་)ལས་སྐྱེ་བ་དང་། (མཛེས་པར་སྐྱེ་བ།) རྫུས་ཏེ་སྐྱེ་བའི་སྐྱེ་གནས་(ཅིག་ཅར་ཡན་ལག་དང་ཉིད་ལག་སྐྱེ་བས་རྒྱུ་གཞན་གསུམ་ལ་མི་ལྟོས་)སོ། །དེ་དག་ནི་སེམས་ཅན་རྣམས་སྐྱེ་བའི་གཞི་ཡིན་པའི་ཕྱིར་གནས་སོ། །
སློབ་དཔོན་གང་སྤེལ་ནི་སྐྱེ་གནས་ཞེས་བྱ་བ་ནི་སེམས་ཅན་རྣམས་ཀྱི་རིགས་ཡིན་གྱི་སྐྱེ་བ་ནི་མ་ཡིན་ནོ། །དེས་ན་སྒོ་ང་ལས་སྐྱེས་པའི་སྐྱེ་གནས་ནི་སྒོ་ང་ལས་སྐྱེས་པའི་རིགས་ཞེས་བྱ་བའི་དོན་ཏོ། །དེ་བཞིན་དུ་སྐྱེ་གནས་གསུམ་ལའང་སྦྱོར་རོ། །འདི་དག་གི་རང་བཞིན་ཡང་རྗུས་སྐྱེས་ནི་ཕུང་པོ་བཞི་དང་ལྔའི་རང་བཞིན་ཡིན་ལ། །གཞན་གསུམ་ནི་ཕུང་པོ་ལྔའི་རང་བཞིན་ཡིན་ནོ། །ཐམས་ཅད་ཀྱང་རྣམ་སྨིན་དང་རྒྱས་པའི་རྒྱུད་ཀྱི་རང་བཞིན་ཡིན་ནོ་ཞེས་པ་དང་། སྐྱེ་གནས་ཐམས་ཅད་དུ་སྐྱེས་པ་རྣམས་ལ་འཕགས་པའི་ཆོས་ཐོབ་བའི་གོ་སྐབས་ཡོད་མོད་ཀྱི་འཕགས་པའི་ཆོས་ཐོབ་ཟིན་པ་རྣམས་ནི་སྒོ་ང་དང་དྲོད་གཤེར་སྐྱེས་ཀྱི་སྐྱེ་གནས་དག་ཏུ་མི་སྐྱེའོ་ཞེས་འཆད་དོ། །(སྐྱེ་གནས་དེ་དག་གང་བཟང་ཞེ་ན།) སྒོ་ང་ལས་སྐྱེ་བ་ནི་མངལ་ནས་ཀྱང་སྐྱེ་བའི་ཕྱིར་སྐྱེ་གནས་གཉིས་པ་སྟེ་འདི་ཁོ་ན་དམན་པ་ཡིན་ནོ། །དེ་བས་མངལ་ནས་སྐྱེ་བ་དང་། དེ་བས་དྲོད་གཤེར་ལས་སྐྱེ་བ་དང་། །དེ་བས་ཀྱང་རྫུས་ཏེ་སྐྱེ་བའི་སྐྱེ་གནས་བཟང་ངོ་། །འགྲོ་བ་གང་ན་སྐྱེ་གནས་དུ་ཞིག་ཡོད་ཅེ་ན། མི་དང་དུད་འགྲོ་རྣམས་ནི་སྐྱེ་གནས་རྣམ་པ་བཞི་ག་ལས་སྐྱེ་བ་ཡིན་ཏེ། དེ་ལ་རེ་ཞིག་མི་སྒོ་ང་ལས་སྐྱེ་བ་ནི་གནས་བརྟན་བྲག་དང་ཉེ་བའི་བྲག་དང་། རི་དྭགས་འཛིན་གྱི་མའི་(ས་ག་)བུ་སུམ་ཅུ་རྩ་གཉིས་དང་། རྒྱལ་པོ་ལྔ་ལེན་གྱི་(བཙུན་མོ་ལྷ་ཆེན་ལ་སྒོ་ང་ལྔ་བརྒྱ་སྐྱེས་པ། སྒྲོམ་དུ་བཅུག་ནས་ཆུ་ལ་བསྐུར་བ་ལས་)བུ་ལྔ་བརྒྱ་(བྱུང་བ་)རྣམས་ལྟ་བུའོ། །མངལ་ནས་སྐྱེ་བ་ནི་ད་ལྟར་གྱི་མི་རྣམས་ལྟ་བུའོ། །
དྲོད་གཤེར་ལས་སྐྱེ་བ་ནི་རྒྱལ་པོ་ང་ལས་ནུ་དང་། (དེའི་ཕྲག་པ་གཡས་ལས་སྐྱེས་པ་)མཛེས་པ་དང་། (དེའི་གཡོན་ལས་)ཉེ་མཛེས་དང་། (དེའི་བརླ་གཡས་ལས་)མཛེས་ལྡན་དང་། (དེའི་བརླ་གཡོན་ལས་)མཛེས་ཅན་དང་། (དེའི་བྲང་ལས་སྐྱེས་པ་)བུ་མོ་ཐི་པའི་ཕྲེང་བ་ཅན་དང་། (ཨ་སྨྲའི་སྡོང་པོ་ལས་སྐྱེས་པ་)ཨ་སྨྲ་སྐྱོང་མ་ལ་སོགས་པ་ལྟ་བུའོ། །རྫུས་ཏེ་སྐྱེ་བ་ནི་བསྐལ་པ་དང་(རྒྱལ་པོ་བསྙེན་གནས་པའི་སྤྱི་བོ་ལས་སྐྱེས་པ་)པོའི་མི་རྣམས་དང་། འཕགས་པ་ལྷ་དང་། མཚོ་སྐྱེས་ལ་སོགས་པ་བཞིན་ནོ། །དུད་འགྲོ་ལ་སྐྱེ་གནས་གཞན་དག་ནི་མངོན་དུ་གྱུར་ལ། རྫུས་ཏེ་སྐྱེ་བ་ནི་ཀླུ་དང་ནམ་མཁའ་ལྡིང་རྣམས་ལ་ཡོད་པར་(འདོད་དེ་སྟོང་སྤྱི་ཕུད་ཀྱི་འཇིག་རྟེན་གྱི་ཁམས་ན་ཀླུ་རིགས་སྟོང་རྒྱ་མཚོ་ཆེན་པོ་ན་གནས་སོ། །ནམ་མཁའ་ལྡིང་གི་རིགས་སྟོང་ཤིང་ཤལ་མ་ལི་ལ་གནས་སོ། །དེ་ལ་སྒོ་ང་ལས་སྐྱེས་པ་སྟོང་དང་མངལ་ནས་སྐྱེས་པ་སྟོང་དང་། དྲོད་གཤེར་ལས་སྐྱེས་པ་སྟོང་དང་། རྫུས་ཏེ་སྐྱེ་བ་སྟོང་རྣམས་སོ་ཞེས།) གདགས་པ་ལས་བཤད་དོ། །དམྱལ་བ་རྣམས་དང་ལྷ་རྣམས་དང་སྲིད་པ་བར་མ་རྣམས་ནི་རྫུས་ཏེ་སྐྱེ་བ་འབའ་ཞིག་ཡིན་ལ། ཡི་དྭགས་རྣམས་ནི་མངལ་ནས་སྐྱེ་བའང་ཡིན་ནོ། །འང་གི་སྒྲ་ནི་ཕལ་ཆེར་རྫུས་ཏེ་སྐྱེ་བ་ཡིན་ནོ་ཞེས་བསྡུ་བའོ། །མངལ་ནས་སྐྱེ་བ་ཡོད་པར་ནི་ཡི་དྭགས་མོའི་རྟོགས་པ་བརྗོད་པ་ལས་(ཡི་དྭགས་མོས།) བདག་གིས་མཚན་མོ་བུ་ལྔ་དང་། །དེ་བཞིན་ཉིན་མོ་གཞན་ལྔ་དག། བསྐྱེད་ནས་དེ་དག་ཟ་མོད་ཀྱི། །འོན་ཀྱང་བདག་ནི་ཚིམ་པ་མེད་ཅེས་གནས་བརྟན་མོའུ་དགལ་གྱི་བུ་ལ་སྨྲས་པས་ཤེས་སོ། །གལ་ཏེ་སྐྱེ་གནས་དག་ལས་རྫུས་སྐྱེས་བཟང་(དེ་ལྟ།) ན་སྲིད་པ་ཐ་མ་པའི་བྱང་ཆུབ་སེམས་དཔའ་སྐྱེ་བ་ལ་དབང་ཐོབ་པ་མངལ་ནས་སྐྱེ་བར་སྟོན་ཞེ་ན། དེ་ནི་(རིགས་བཟང་བར་རློམ་པའི་ཤཱཀྱ།) ཉེ་དུ་རྣམས་ཆོས་ལ་གཟུང་བའི་ཕྱིར་དང་། འཁོར་ལོས་བསྒྱུར་བའི་རིགས་སུ་ཤེས་ནས་གཞན་དེ་ལ་རིམ་གྲོ་བསྐྱེད་དུ་གཞུག་པའི་ཕྱིར་དང་། མི་རྣམས་ཕལ་ཆེར་མངལ་ནས་སྐྱེ་བ་དང་རྗེས་སུ་མཐུན་པར་མཛད་པའི་ཕྱིར་རམ། ཡང་ན་མིར་གྱུར་པ་དག་གིས་ཀྱང་གྲུབ་པ་འདི་འཐོབ་བོ་ཞེས་གདུལ་བྱ་རྣམས་སྤྲོ་བ་བསྐྱེད་པའི་ཕྱིར་རོ། །
གཞན་ཡང་(རིགས་དང་གདུང་མེད་ན།) མུ་སྟེགས་ཅན་གཅེར་བུ་པ་གཉེན་གྱི་བུ་ལ་སོགས་པ་དག་ཁ་ཟེར་བའི་སྒྱུ་མར་རྟོག་པ་སྤང་པ་དང་། སྐུ་གདུང་རིང་བསྲེལ་བཞག་པའི་ཕྱིར་རོ། (རྫུས་སྐྱེས་ཤི་བ་རྣམས་ཀྱི་ལུས་མི་གནས་པས་དེ་མི་རུང་བས་སོ་ཞེས་ཟེར་རོ། །)དེས་ན་སྐྱེ་གནས་ཐམས་ཅད་ཀྱི་ནང་ན་རྫུས་སྐྱེས་ཁོ་ན་མང་སྟེ། དེ་ནི་འགྲོ་བ་(ལྷ་དམྱལ་)གཉིས་དང་(གཞན་)གསུམ་གྱི་ཕྱོགས་དང་སྲིད་པ་བར་མ་པ་ཐམས་ཅད་ཡིན་པའི་ཕྱིར་རོ། །ད་ནི་གང་གིས་འཇུག་པའི་བར་སྲིད་ལའང་གསུམ་ལས་(དང་པོ་)ངོ་བོ་ནི་འདིར་ཕུང་པོ་(ལྔའི་རྒྱུན་)གང་ཞིག་(ཡུལ་གཞན་དུ་སྐྱེ་བར་བྱ་བའི་ཕྱིར་སྔར་གྱི།) འཆི་སྲིད་དང་གང་དུ་སྐྱེ་བའི་སྲིད་པ་གཉིས་ཀྱི་བར་དུ་འབྱུང་བ་དེ་ནི་སྲིད་པ་བར་མའོ། །དེ་ནི་བགྲོད་པར་བྱ་བའི་ཡུལ་རྣམ་པར་སྨིན་པའི་ཕུང་པོ་ཡོངས་སུ་རྫོགས་པར་མ་ཕྱིན་པའི་ཕྱིར་སྲིད་པ་བར་མ་ལ་བྱུང་བའི་སྲིད་པ་ཞེས་བྱ་བ་ནི་མིན་ཏེ། བྱུང་བ་ནི་སྔོན་དུས་ཀྱི་སྲིད་པ་ཡིན་པའི་ཕྱིར་རོ། །(དབྱེ་ན་ཁམས་ཀྱི་གཉིས་དང་། སས་ལྔ་དང་། གནས་གཞན་གྱི་སོ་བདུན་དང་། རབ་འབྲིང་གིས་སངས་རྒྱས་རང་རྒྱལ་འཁོར་ལོ་བསྒྱུར་བ་གསུམ་དེ་ལས་གཞན་དང་བཞི་ཡིན་ནོ་གསུང་ངོ་། །)གཉིས་པ་སྒྲུབ་བྱེད་ནི་ཕལ་ཆེན་པའི་སྡེ་པ་དག་ནི་འཆི་སྲིད་ནས་སྐྱེ་སྲིད་དུ་འཇུག་པའི་བར་ན་ནི་སྲིད་པ་མེད་དེ། དེས་ན་བར་ཆད་པ་ཁོ་ན་ལས་སྐྱེ་བའི་སྲིད་པར་འཇུག་སྟེ། བཅོམ་ལྡན་འདས་ཀྱིས་བྲམ་ཟེ་རྒན་པོའི་དབང་དུ་མཛད་ནས། བྲམ་ཟེ་ན་ཚོད་ཁྱེར་ཟིན་རྒ་བ་དང་། །ན་བ་ཡིན་ཏེ་གཤིན་རྗེའི་དྲུང་དུ་ཕྱིན། །བར་ན་ཁྱོད་ཀྱི་གནས་ཀྱང་ཡོད་མིན་ཞིང་། །ཁྱོད་ཀྱི་ལམ་རྒྱགས་ཀྱང་ནི་ཡོད་མ་ཡིན་ཞེས་སྲིད་པ་གཉིས་ཀྱི་བར་ན་གནས་མེད་པར་བཤད་པའི་ཕྱིར་དང་།
བདུད་སུན་འབྱིན་བྱེད་ཅེས་བྱ་བས་སངས་རྒྱས་འོད་སྲུང་གི་ཉན་ཐོས་མཁས་མགུ་ཞེས་བྱ་བའི་ཀླད་དུ་ཁུ་ཚུར་བསྣུན་པ་ལས་དེས་མ་རངས་པའི་སྐད་ཕྱུང་བ་དང་སྐད་ཅིག་དེ་ཉིད་ལ་རང་གི་ལུས་ཁོ་ནས་སེམས་ཅན་དམྱལ་བ་ཆེན་པོ་མནར་མེད་པར་ལྷུང་བར་བཤད་པའི་ཕྱིར་དང་། །གཞན་ཡང་མདོ་ལས། མཚམས་མེད་པ་ལྔའི་ལས་གང་དག་བྱས་ཤིང་བསགས་ནས་དེ་མ་ཐག་ཏུ་དམྱལ་བ་དག་ཏུ་སྐྱེའོ་ཞེས་གསུངས་པའི་ཕྱིར་ཞེས་འདོད་དོ། །དེ་ནི་འཐད་པ་མ་ཡིན་པས་སྐྱེ་བའི་སྲིད་པ་དེ་ནི་འཆི་སྲིད་དང་གཉིས་ཀྱི་བར་ཆད་པ་ལས་འབྱུང་བ་མིན་ཏེ་ཞེས་བྱ་བས་བར་སྲིད་ལས་བྱུང་བ་ཡིན་ནོ་ཞེས་བསྒྲུབ་པར་བྱའོ། །གང་གི་ཕྱིར་ཞེ་ན། ས་བོན་ལས་མྱུ་གུ་དང་དེ་ལས་སྡོང་བུ་ལ་སོགས་པ་བར་མ་ཆད་པར་འབྱུང་བའི་འབྲུའི་རྒྱུན་དང་རྒྱུན་གྱི་འབྲས་བུ་ཉིད་དུ་ཆོས་མཐུན་པའི་ཕྱིར་རོ། །འདི་ནི་རྟགས་དང་དཔེ་ཅིག་ཅར་དུ་སྟོན་པའི་ངག་སྟེ་འབྲུའི་རྒྱུན་བཞིན་ཞེས་བྱ་བ་ནི་དཔེའོ། །དེ་དང་ཆོས་མཐུན་པ་ནི་སྔ་མའི་ཕུང་པོའི་རྒྱུན་གྱི་འབྲས་བུ་ཡིན་པའོ་དེས་ན་གང་ཞིག་རྒྱུན་གྱི་འབྲས་བུ་ཡིན་པ་དེ་ནི་སྔ་མའི་རྒྱུན་མ་ཆད་པ་ལས་སྐྱེས་པའི་འབྲས་བུ་ཡིན་ཏེ་འབྲུའི་རྒྱུན་བཞིན་ནོ། །སྐྱེ་བའི་སྲིད་པའང་རྒྱུན་གྱི་འབྲས་བུ་ཡིན་ནོ་ཞེས་རྒྱུ་སྔོན་དུ་སོང་བ་ཉིད་དུ་སྒྲུབ་པའི་འབྲས་བུའི་རྟགས་ཡིན་ནོ། །
གལ་ཏེ་བར་མ་ཆད་པ་ཡིན་མོད་ཀྱི་བར་སྲིད་ནི་མི་འགྲུབ་སྟེ། འཆི་སྲིད་ཀྱི་རྗེས་ཉིད་དུ་སྐད་ཅིག་མ་གཞན་གྱིས་བར་མ་ཆད་པར་སྐྱེ་སྲིད་འབྱུང་བའི་ཕྱིར་རོ་ཞེ་ན། དེ་ནི་འཐད་པ་མ་ཡིན་ཏེ། འདི་ནས་ཤི་འཕོས་ནས་མནར་མེད་དང་ལྷའི་གནས་ལ་སོགས་པ་ཡུལ་ཐག་རིང་པོར་སྐྱེ་བ་རྣམས་ལ་སྐད་ཅིག་མ་ཙམ་ལ་འགྲོ་བ་མི་རིགས་པའི་ཕྱིར་རོ། །གང་དུ་ཤི་བའི་ཡུལ་དེ་ཉིད་དུ་ཡུལ་གཞན་དང་རིས་གཞན་གྱི་སྲིད་པ་འགྲུབ་པའང་མ་ཡིན་ཏེ། འགྲོ་བ་རྣམས་ཡུལ་ལ་སོགས་པ་འཆོལ་བར་ཐལ་བའི་ཕྱིར་རོ། །དེའི་ཕྱིར་འདི་ནས་ཤི་འཕོས་ནས་སྐྱེ་སྲིད་དུ་སྦྱོར་བའི་ཕུང་པོའི་རྒྱུན་ནི་བར་སྲིད་ཡིན་ནོ། །གལ་ཏེ་ཡུལ་དུས་ཀྱིས་བར་དུ་ཆོད་པ་ལས་ཀྱང་འབྲས་བུ་འབྱུང་བ་མཐོང་སྟེ། སྐྱེས་བུའི་བྱད་བཞིན་ལས་མེ་ལོང་ལ་སོགས་པར་གཟུགས་བརྙན་འབྱུང་བ་བཞིན་ནོ། །དེའི་ཕྱིར་རྟགས་འདི་མ་ངེས་པ་ཡིན་ནོ་ཞེ་ན། མེ་ལོང་གི་ནང་དུ་ནི་གཟུགས་བརྙན་གྱི་གཟུགས་མ་གྲུབ་པའི་ཕྱིར་འཁྲུལ་པའི་དཔེ་མ་ཡིན་(ཞིང་རྟགས་གྲུབ།) ཏེ། ཡུལ་གཅིག་ན་དུས་ལྷན་གཅིག་དུ་མེ་ལོང་དང་གཟུགས་བརྙན་གྱི་གཟུགས་གཉིས་མེད་པའི་ཕྱིར་རོ། །འདི་ལྟར་མེ་ལོང་ལས་ཐ་དད་པའི་གཟུགས་བརྙན་ནི་མ་གྲུབ་སྟེ། མེ་ལོང་གི་ཡུལ་ལས་ཐ་དད་པར་མ་དམིགས་པའི་ཕྱིར་དང་། མེ་ལོང་གི་ཡུལ་ན་ཡོད་ནའང་རྡུལ་ཕྲན་རྣམས་ཐོགས་བཅས་མ་ཡིན་པར་ཐལ་བའི་ཕྱིར་རོ། །མེ་ལོང་ཉིད་བྱད་བཞིན་གྱི་རྣམ་པ་ཅན་དུ་སྐྱེས་སོ་ཞེས་བྱ་བའང་མི་རིགས་ཏེ། ཟུར་ན་གནས་པས་ཀྱང་དེ་དེ་ལྟར་དུ་མཐོང་བར་ཐལ་བའི་ཕྱིར་རོ། །དེའི་ཕྱིར་གཟུགས་བརྙན་ནི་འགའ་ཞིག་གི་འབྲས་བུ་ཉིད་དུ་མ་གྲུབ་སྟེ། རྐྱེན་གྱི་སྟོབས་ཀྱིས་མེད་བཞིན་དུ་སྣང་བའི་ཕྱིར་སྒྲ་བརྙན་ལ་སོགས་པ་བཞིན་ནོ། །རྣམ་པ་གཅིག་ཏུ་ན་གཟུགས་བརྙན་གྲུབ་དུ་ཟིན་ཀྱང་རྒྱུན་གྱི་འབྲས་བུ་ཡིན་པའི་ཕྱིར་ཞེས་བྱ་བའི་རྟགས་དང་མི་འདྲ་བའི་ཕྱིར་ན་འཁྲུལ་བའི་དཔེ་མ་ཡིན་ཏེ། གཟུགས་བརྙན་ནི་བྱད་བཞིན་གྱི་རྒྱུན་གྱི་འབྲས་བུ་མིན་པའི་ཕྱིར་དང་། བྱད་བཞིན་དང་མེ་ལོང་གཉིས་ལས་འབྱུང་བའི་ཕྱིར་དང་། སྐྱེ་སྲིད་ནི་བར་སྲིད་ཀྱི་ཕུང་པོའི་རྒྱུན་གཅིག་པུའི་འབྲས་བུ་ཡིན་པའི་ཕྱིར་རོ། །དེས་ན་འདི་སྐད་དུ་གཟུགས་བརྙན་མ་གྲུབ་པའི་ཕྱིར་རམ། གྲུབ་ཀྱང་བྱད་བཞིན་གྱི་རྒྱུན་གྱི་འབྲས་བུ་མ་ཡིན་པའི་ཕྱིར་རྟགས་ཁྱད་པར་བ་མ་ཞུགས་པས་མ་ངེས་པའི་ཡུལ་མ་ཡིན་ནོ་ཞེས་བསྟན་པ་ཡིན་ནོ། སྐྱེ་སྲིད་བར་སྲིད་གཅིག་པུ་ལས་སྐྱེས་པ་ཞེས་བྱ་བ་ནི་གཙོ་བོའི་རྒྱུའི་དབང་དུ་མཛད་པ་ཡིན་ཏེ། མངལ་ནས་སྐྱེ་བ་དག་བར་དོ་དང་ཕྱིའི་ཁུ་ཁྲག་ལ་སོགས་པ་ལས་ཀྱང་སྐྱེ་བའི་ཕྱིར་དང་། ཁུ་ཁྲག་ལ་སོགས་པ་གཙོ་བོའི་རྒྱུ་ཡིན་ནོ་ཞེས་བྱ་བའང་རིགས་པ་མ་ཡིན་ཏེ། རྫུས་ཏེ་སྐྱེ་བ་རྣམས་ལ་དེ་མེད་ཀྱང་སྐྱེ་བའི་ཕྱིར་རོ། །དེས་ན་རིགས་པས་སྲིད་པ་བར་མ་ཡོད་པ་ཉིད་དུ་ཤེས་སོ། །
ལུང་གིས་བསྒྲུབ་པ་ནི་སྲིད་པ་བདུན་པའི་མདོ་ལས། སྲིད་པ་ནི་བདུན་ཏེ། དམྱལ་བའི་སྲིད་པ་དང་། དུད་འགྲོའི་སྲིད་པ་དང་། ཡི་དྭགས་ཀྱི་སྲིད་པ་དང་། ལྷའི་སྲིད་པ་དང་། མིའི་སྲིད་པ་དང་། ལས་ཀྱི་སྲིད་པ་དང་། སྲིད་པ་བར་མའོ་ཞེས་སྟོན་པའི་མགུར་ཉིད་ནས་དངོས་སུ་གསུངས་པའི་ཕྱིར་བར་སྲིད་ཡོད་པར་གྲུབ་བོ། །གལ་ཏེ་མདོ་དེ་མི་འདོན་ནོ་ཞེ་ན། འོ་ན་མངལ་དུ་འཇུག་པའི་མདོ་ལ་སོགས་པ་ལས། གནས་གསུམ་མངོན་དུ་གྱུར་པ་ལས་མའི་མངལ་དུ་བུ་འཆགས་པར་འགྱུར་ཏེ། གསུམ་གང་ཞེ་ན། མ་རུང་ཞིང་ཟླ་མཚན་དང་ལྡན་པ་དང་། ཕ་མ་ཆགས་པར་གྱུར་ཅིང་ཕྲད་པ་དང་། དྲི་ཟ་ཡང་ཉེ་བར་གནས་པར་གྱུར་ནའོ་ཞེས་དྲི་ཟ་གསུངས་ཤིང་དྲི་ཟ་ནི་སྲིད་པ་བར་མ་ཡིན་པའི་ཕྱིར་ཏེ། ཅི་སྟེ་དེ་ཡང་དྲི་ཟ་ཞེས་ནི་མི་འདོན་གྱི། ཕུང་པོ་ཞིག་པ(འི་མེད་དགག་གཅིག་གསར་དུ་)ཉེ་བར་གནས་པར་གྱུར་ནའོ་ཞེས་འདོན་ཏོ་ཞེ་ན། དེ་ལྟ་ན་རྔ་ལེན་གྱི་བུའི་མདོ་ལས། བཅོམ་ལྡན་འདས་ཀྱིས་བྲམ་ཟེ་རྔ་ལེན་གྱི་བུ་ལ། རྔ་ལེན་གྱི་བུ་ཁྱོད་ཀྱིས་མཆིས་བྲང་ལ་དྲི་ཟ་ཉེ་བར་གནས་པ་གང་ཡིན་པ་དེ་རྒྱལ་རིགས་སམ། བྲམ་ཟེ་འམ། རྗེའུ་རིགས་སམ། དམངས་རིགས་སམ། འོན་ཏེ་ཤར་ཕྱོགས་ནས་འོངས་པ་ཞིག་གམ། འོན་ཏེ་ལྷོ་དང་ནུབ་དང་བྱང་ནས་འོངས་པ་ཞིག་ཤེས་སམ་ཞེས་གསུངས་པའི་ཕྱིར་ཏེ། ཕུང་པོ་ཞིག་པ་ལ་རིགས་དང་ཕྱོགས་ཀྱི་བརྟག་པ་དང་། དེ་ནི་འོང་བར་ཡང་མི་འཐད་པའི་ཕྱིར་རོ། །ལུང་ཕྲན་ཚེགས་ལས། དགའ་བོ་ཕ་མ་ཆགས་བར་གྱུར་ཅིང་ཕྲད་པ་དང་། མ་ཡང་རུང་བར་གྱུར་ཅིང་ཟླ་མཚན་དང་ལྡན་པ་དང་། དྲི་ཟ་ཡང་ཉེ་བར་གནས་པར་གྱུར་ཅིང་འཇུག་པར་འདོད་ན་སྟེ། དགའ་བོ་དྲི་ཟ་ཞེས་བྱ་བ་དེ་ནི་སྲིད་པ་བར་མ་བའི་སེམས་ཅན་གྱི་ཚིག་བླ་དགས་ཡིན་ནོ་ཞེས་གསུངས་པའི་ཕྱིར་རོ། །འོན་ཏེ་དེ་ཡང་ཁོ་བོ་ཅག་མི་འདོན་ནོ་ཞེ་ན། འོ་ན་ཕྱིར་མི་འོང་བ་ལྔར་གསུངས་པའི་མདོ་ལས་ཤེས་ཏེ། བཅོམ་ལྡན་འདས་ཀྱིས་ཕྱིར་མི་འོང་བ་ནི་ལྔ་སྟེ། བར་མདོ་དང་། སྐྱེས་ནས་དང་། མངོན་པར་འདུ་བྱེད་པ་མེད་པ་དང་། མངོན་པར་འདུ་བྱེད་པ་དང་བཅས་པར་ཡོངས་སུ་མྱ་ངན་ལས་འདའ་བ་དང་། གོང་དུ་འཕོ་བའོ་ཞེས་གསུངས་པའི་བར་མ་དོར་མྱ་ངན་ལས་འདའ་བ་ནི་སྲིད་པ་བར་མ་ཡིན་པའི་ཕྱིར་རོ། །གལ་ཏེ་དེ་ཡང་ཁམས་བར་མའམ་བར་མ་དོ་ཞེས་བྱ་བའི་ལྷ་དག་ཅིག་ཡིན་ནོ་ཞེ་ན། དེ་ལྟ་ན་སྐྱེས་ནས་ལ་སོགས་པའང་ལྷ་དག་ཅིག་ཡིན་པར་ཐལ་བར་འགྱུར་རོ། །གཞན་ཡང་སྐྱེས་བུ་དམ་པའི་འགྲོ་བ་བདུན་བསྟན་པའི་མདོ་ལས་ཞོགས་མའི་མེ་ཆུང་དུ་མངོན་པར་གྲུབ་བཞིན་དུ་འཆི་བ་དང་། ལྕགས་ཀྱི་ཚྭ་ཚྭ་གནམ་དུ་ཡར་བཞིན་དུ་འཆི་བ་དང་། ལྕགས་ཀྱི་ཚྭ་ཚྭ་གནམ་དུ་ཡར་ནས་ས་ལ་མ་ལྷུང་བ་ཉིད་དུ་འཆི་བར་འགྱུར་བ་ལྟ་བུའི་དཔེ་གསུམ་གྱིས་མཚོན་ནས་བར་མ་དོར་མྱ་ངན་ལས་འདའ་བ་ལ་མྱུར་བ་དང་། མྱུར་བ་མ་ཡིན་པ་དང་། ཡུན་རིང་མོ་ཞིག་ན་ཡོངས་སུ་མྱ་ངན་ལས་འདའ་བ་གསུམ་དུ་ཕྱེ་ནས་སྐྱེས་ནས་མྱ་ངན་ལས་འདའ་བ་ལ་སོགས་པ་བཞི་སྟེ་སྐྱེས་བུ་དམ་པའི་འགྲོ་བ་བདུན་གསུངས་པའི་ཕྱིར་ཡང་གྲུབ་སྟེ། ཁམས་བར་མ་དོར་མྱུར་བ་ལ་སོགས་པ་ནི་སྐྱེས་ནས་མྱ་ངན་ལས་འདའ་བ་ལ་སོགས་པ་ཡིན་པའི་ཕྱིར་རོ། །
གཞན་ཡང་ཀྱང་ཞེས་པས་དེ་ལྟ་མ་ཡིན་ན་གཟུགས་མེད་དུའང་བར་མ་དོར་མྱང་འདས་གསུང་བར་འགྱུར་བ་ཞིག་ན་ཉན་ཐོས་ཀྱི་རྣམ་པར་བཤད་པའི་སྡོམ་གྱི་ཚིགས་སུ་བཅད་པ་ཉི་ཤུ་པ་ལས་སྤེལ་མ་མཛད་པས། བསམ་གཏན་དག་གིས་བཅུ་ཚན་བཞི། །གཟུགས་མེད་དག་གིས་བདུན་ཚན་གསུམ། །འདུ་ཤེས་ཀྱིས་ནི་དྲུག་ཚན་དུ། །མཛད་ནས་ཚོམས་སུ་ཡང་དག་བསྡེབས་ཞེས་བསམ་གཏན་རེ་རེ་ལ་གནས་གཞན་གསུམ་གསུམ་དང་། སྔར་བཤད་པའི་བར་མདོར་མྱ་ངན་ལས་འདའ་བ་ནས་གོང་དུ་འཕོ་བའི་བར་རྣམ་པ་ལྔ་དང་། འཆི་བ་མེད་པའི་དབྱིངས་ལ་སེམས་གཏོད་པ་དང་། སེམས་རྣམ་པར་གྲོལ་བ་ཞེས་བྱ་བ་བཅུ་བཅུ་དང་། གཟུགས་མེད་དང་པོ་གསུམ་ལ་བར་མ་དོར་མྱ་ངན་ལས་འདའ་བ་མ་གཏོགས་པ་བཞི་བཞི་དང་། གནས་གཞན་ཐ་དད་མེད་པའི་རིས་གཅིག་དང་། འཆི་བ་མེད་པའི་དབྱིངས་ལ་སེམས་གཏོད་པ་དང་། སེམས་རྣམ་པར་གྲོལ་བ་བདུན་བདུན་དང་། འདུ་ཤེས་མེད་འདུ་ཤེས་མེད་མིན་ལ་གོང་དུ་འཕོ་བ་མ་གཏོགས་པ་དྲུག་གསུངས་པས་ཀྱང་གྲུབ་སྟེ། དེ་ལ་འཆི་བ་མེད་པ་ནི་མྱ་ངན་ལས་འདས་པ་དང་། སེམས་རྣམ་པར་གྲོལ་བ་ནི་ཟག་པ་ལས་གྲོལ་བའི་ཡེ་ཤེས་ཏེ་ལྷག་བཅས་ལྷག་མེད་ཀྱི་མྱང་འདས་ཡིན་པར་མངོན་ནོ། །
དེས་ན་གཟུགས་ཁམས་སུ་བར་མདོར་མྱ་ངན་ལས་འདའ་བ་གསུངས་ལ། གཟུགས་མེད་དུ་མ་གསུངས་པའི་ཕྱིར་ཡང་བར་སྲིད་ཡོད་པར་ཤེས་སོ། །(རྣམ་པར་གཏན་ལ་དབབ་པ་བསྡུ་བ་ལས་ཀྱང་། ཤི་འཕོས་ནས་སེམས་དང་སེམས་བྱུང་རྟེན་མེད་པ་རྣམས་ནི་ཡུལ་གཞན་དུ་ཕྱིན་མི་སྲིད་པའི་ཕྱིར་དང་། རྣམ་པར་འཁྲུལ་བ་ཙམ་ཡིན་པས་བྲག་ཆ་ལྟ་བུར་མི་རུང་། མ་འགགས་པའི་ཕྱིར་གཟུགས་བརྙན་ལྟ་བུར་ཡང་མི་རུང་ངོ་། །མེད་པའི་ཕྱིར་དམིགས་པ་འཛིན་པ་ལྟ་བུར་ཡང་མི་རུང་སྟེ། གང་གི་ཕྱིར་དཔེ་དེ་དག་མི་རུང་བ་དེའི་ཕྱིར་བར་མདོའི་སྲིད་པ་ཡོད་པར་རིག་པར་བྱའོ་ཞེས་གསུངས་སོ། །)བྲམ་ཟེ་ལ་བར་ན་གནས་མེད་པར་བཤད་པ་ནི་སྐྱེ་བ་འདི་དང་ངན་སོང་གི་བར་ན་མཐོ་རིས་ཀྱི་གནས་མེད་པར་བཤད་པ་ཡིན་ལ། བདུད་སུན་འབྱིན་བྱེད་མེ་འབར་བཞིན་པའི་ལུས་ཀྱིས་དམྱལ་བར་སོང་བ་ནི་མཐོང་བའི་ཆོས་ལ་ལུས་འདི་ལ་མེ་འབར་ཏེ་ཤི་ནས་བར་སྲིད་ནས་དམྱལ་བར་སྐྱེ་བར་གསུངས་པ་ལ་དགོངས་པ་ཡིན་ནོ། །(དེ་ཡང་སྐྱེས་ནས་མྱོང་འགྱུར་སྐྱེ་བ་དེ་ཉིད་དུ་སྨིན་པ་མེད་པའི་ཕྱིར་རོ། །)མཚམས་མེད་པ་ལྔའི་ལས་གང་དག་བྱས་ཤིང་བསགས་ནས་དེ་མ་ཐག་ཏུ་དམྱལ་བ་དག་ཏུ་སྐྱེའོ་ཞེས་གསུངས་པ་ནི་སྐྱེ་བ་གཞན་གྱིས་བར་མ་ཆོད་པའི་དབང་དུ་མཛད་ནས་གསུངས་པའི་ཕྱིར་རོ། །
གསུམ་པ་ཁྱད་པར་གྱི་ཆོས་ལ་ཁྱད་པར་གྱི་ཆོས་རྒྱས་པར་བཤད་པ་དང་། །སྐྱེ་གནས་སུ་འཇུག་པའི་ཚུལ་གཉིས་ལས་དང་པོ་ནི་སྲིད་པ་བར་མ་དེ་ནི་སྔོན་དུས་ཀྱི་སྲིད་པ་འབྱུང་བར་འགྱུར་བའི་ཤ་ཚུགས་དང་ཆ་བྱད་ཅན་ཡིན་ཏེ། འབྱུང་བར་འགྱུར་བའི་སྔོན་དུས་ཀྱི་སྲིད་པ་དང་བར་སྲིད་གཉིས་འཕེན་པའི་ལས་གཅིག་ལས་སྐྱེས་པའི་ཕྱིར་རོ། །འོ་ན་ཁྱི་མོ་ལ་སོགས་པའི་མངལ་དུ་གནས་པ་དག་ཤི་སྟེ་དམྱལ་བའི་སྲིད་པ་བར་མ་གྲུབ་ན་མངལ་དང་དེ་ན་གནས་པ་གཞན་དག་ཀྱང་འཚིག་པར་འགྱུར་ཏེ། དེའི་སྔོན་དུས་ནི་མེ་འབར་བའི་རྣམ་པ་ཅན་ཡིན་ལ། བར་སྲིད་གང་དུ་ཤི་བ་དེ་ཉིད་དུ་འགྲུབ་པའི་ཕྱིར་རོ་ཞེ་ན་མི་འགྱུར་ཏེ། །རང་རང་གི་ལས་ཀྱིས་མཚམས་བཅད་པའི་ཕྱིར་དང་། སྲིད་པ་བར་མ་ཤིན་དུ་དང་བ་ཡིན་པས་བལྟར་མི་རུང་བ་བཞིན་དུ་རེག་ཏུའང་མི་རུང་བའི་ཕྱིར་རོ། །(དེའི་ཁ་དོག་ནི་ལུང་ཕྲན་ཚེགས་ལ་སོགས་པ་ལས་དམྱལ་བ་དང་དུད་འགྲོ་དང་ཡི་དྭགས་དང་འདོད་པའི་ལྷ་མི་དང་གཟུགས་ཁམས་པ་རྣམས་ཀྱི་བར་སྲིད་ནི་རིམ་པ་ལྟར་སྡོང་དུ་མ་འཚིག་པ་དང་དུ་བ་ཆུ་དང་གསར་ལྟ་བུ་དང་དཀར་པོར་གསུངས་ཤིང་།) ཡང་གལ་ཏེ་བར་སྲིད་གང་དུ་སྐྱེ་བར་འགྱུར་བའི་ཤ་ཚུགས་ཅན་ཡིན་ནོ། །
འོ་ན་འཛམ་བུའི་གླིང་ནས་འོག་མིན་དུ་སྐྱེ་བའི་བར་སྲིད་འཛམ་བུའི་གླིང་དུ་འགྲུབ་པའི་སྐབས་མེད་པར་འགྱུར་ཏེ། བར་སྲིད་ནི་གང་དུ་ཤི་བ་དེར་འགྲུབ་པ་ཡིན་པ་ལ་འོག་མིན་པའི་ལུས་དཔག་ཚད་ཁྲི་དྲུག་སྟོང་པ་ཡིན་པའི་ཕྱིར་དང་། གཟུགས་ཁམས་པའི་བར་སྲིད་ལུས་རྫོགས་པར་འགྲུབ་པའི་ཕྱིར་དང་། འཛམ་བུའི་གླིང་ལ་ནི་དཔག་ཚད་དྲུག་སྟོང་དང་ཕྱེད་དང་བཞི་ལས་མེད་པའི་ཕྱིར་རོ་ཞེ་ན། ནམ་མཁའ་ཡངས་ཤིང་རྟེན་འོད་ལྟར་དང་བས་འགར་ཡང་ཐོགས་པ་མེད་པའི་ཕྱིར་རོ། །ཞེས་སློབ་དཔོན་གང་སྤེལ་འཆད་དོ། །དེའི་ཕྱིར་ཀུན་ལས་བཏུས་ལས་ཀྱང་གང་དུ་སྐྱེ་བར་འགྱུར་པ་དེའི་བྱད་གཟུགས་སོ་ཞེས་བཤད་དོ། །དེའི་ཁ་དོག་ནི་ལུང་ཕྲན་ཚེགས་ལས། དེ་ཡང་ཁ་དོག་བཟང་པོ་དང་ངན་པ་རྣམ་པ་གཉིས་ཏེ། སེམས་ཅན་དམྱལ་བ་རྣམས་གྱི་སྲིད་པ་བར་མ་ནི་ཁ་དོག་ངན་པ་དཔེར་ན་སྡོང་པོ་འཚིག་པ་ལྟ་བུའོ། །དུད་འགྲོའི་སྐྱེ་གནས་སུ་སོང་བ་རྣམས་ཀྱི་སྲིད་པ་བར་མ་ནི་ཁ་དོག་དུ་བ་ལྟ་བུའོ། །ཡི་དྭགས་རྣམས་ཀྱི་ནི་ཁ་དོག་ཆུ་ལྟ་བུའོ། །མི་རྣམས་དང་ལྷ་རྣམས་ཀྱི་ནི་སྲིད་པ་བར་མ་ནི་ཁ་དོག་གསེར་ལྟ་བུའོ། །གཟུགས་ན་སྤྱོད་པའི་ལྷ་རྣམས་ཀྱི་ནི་དཀར་པོའོ་ཞེས་པ་དང་། ཀུན་ལས་བཏུས་ལས་ཀྱང་། མི་དགེ་བ་བྱེད་པའི་བར་མ་དོའི་སྲིད་པ་མངོན་པར་གྲུབ་པ་ནི་དཔེར་ན་ཕྱར་བ་ནག་པོའམ་མཚན་མོ་མུན་པ་མུན་ནག་ཏུ་སྣང་བ་ལྟ་བུའོ། །དགེ་བ་བྱེད་པ་ནི་དཔེར་ན་སྣམ་བུ་དཀར་པོའམ་ཟླ་བའི་འོད་དང་བཅས་པའི་མཚན་མོར་སྣང་བ་ལྟ་བུའོ་ཞེས་བཤད་དོ། །
འོ་ན་བྱང་ཆུབ་སེམས་དཔའ་དོན་ཐམས་ཅད་གྲུབ་པ་གླང་པོ་ཆེ་ཐལ་ཀར་མཆེ་བ་དྲུག་དང་ལྡན་པར་ཡུམ་གྱི་རྨི་ལམ་དུ་སྣང་བ་དང་། སློབ་དཔོན་ཆོས་ལྡན་རབ་འབྱོར་གྱིས་ཀྱང་། གླང་ཆེན་དཀར་པོ་མཆེ་བ་དྲུག་ལྡན་པ། །རྐང་བཞི་མཛེས་དང་ལྡན་པར་ཞལ་བཞེས་ནས། །དྲང་སྲོང་གནས་ཤེས་པ་ནི་ཇི་བཞིན་དུ། །ཡུམ་གྱི་ལྷུམས་ཀྱི་གནས་སུ་ཞུགས་པར་གྱུར། །ཞེས་གསུངས་པ་དང་འགལ་ལོ་ཞེ་ན། ཡུམ་གྱི་རྨང་ལམ་ནི་རྨི་ལམ་གྱི་རྣམ་པ་ཉིད་ཡིན་པའི་ཕྱིར་དང་། སློབ་དཔོན་རྟ་དབྱངས་ཀྱིས་ཀྱང་རྨི་ལམ་དང་རྗེས་སུ་མཐུན་པར་མཛད་པའི་ཕྱིར་ཏེ། དཔེར་ན་མ་ག་ངྷ་བཟང་མོའི་རྟོགས་པ་བརྗོད་པ་ལས། རྒྱལ་པོ་ཀྲི་ཀྲིས་གླང་པོ་ཆེ་ལུས་ཐོན་ནས་མཇུག་མ་སྐར་ཁུང་ལ་ཐོགས་པ་དང་། ཁྲོན་པས་སྐོམ་པ་མ་རྙེད་པའི་མིའི་རྗེས་བསྙགས་ནས་ང་ལ་འཐུང་ཞེས་ཟེར་བ་དང་། ཕྱེ་དང་མུ་ཏིག་མཉམ་པོར་བརྗེ་བ་དང་། ཙན་དན་གོར་ཤིར་ཤ་དང་ཤིང་ཕལ་པ་མཉམ་པོར་བརྗེ་བ་དང་། དགེ་འདུན་གྱི་ཀུན་དགའ་ར་བ་དང་སྐྱེད་མོས་ཚལ་ཆོམ་རྐུན་པས་ལོངས་སྤྱོད་པ་དང་། གླང་པོ་ཆེའི་ཕྲུག་གུས་སྤོས་ཀྱི་གླང་པོ་ཆེ་སྐྲོད་པ་དང་། སྤྲེའུ་ཞིག་རང་གི་རྒྱབ་མི་གཙང་པས་གོས་པར་གྱུར་པ་དེ་སྤྲེའུ་གཞན་ལ་བཀོད་པར་བྱེད་པ་དང་། སྤྲེའུ་གཅིག་གིས་གཅིག་ལ་དབང་བསྐུར་བ་དང་། མི་བཅོ་བརྒྱད་རས་ཡུག་གཅིག་ལ་བརྩད་པས་ཐམས་ཅད་ཀྱིས་རས་ཡུག་རེ་རེ་ཐོབ་ནས་གཅིག་ཤུལ་དུ་ལུས་པ་དང་། སྐྱེ་བོ་ཕལ་པོ་ཆེ་འཐབ་པ་ཞེས་བྱ་བ(གླང་པོ་ཁྲོན་པ་ཕྱེ་དང་ཙན་དན་ཚལ་། །གླང་ཕྲུག་སྤྲེལ་གཉིས་རས་ཡུག་འཐབ་མོས་ཞེས་པ།) འི་རྨི་ལམ་བཅུ་ཤཱཀྱའི་རྒྱལ་པོའི་ཉན་ཐོས་ཀྱི་རྣམ་པར་ཐར་པའི་མཚན་མ་ཉེ་བར་ཤར་བར་གསུངས་པ་བཞིན་ནོ། །དེའི་ཕྱིར་བྱང་ཆུབ་སེམས་དཔའི་བར་སྲིད་ཀྱང་གཞོན་ནུ་ཐོར་བུ་མཚན་དང་དཔེ་བྱད་ཀྱིས་བརྒྱན་པ་ཡིན་ལ། མི་གཞན་རྣམས་ཀྱིས་ནི་ལོ་ལྔའམ་དྲུག་གི་ཚད་དུ་ཡོད་ཅིང་། གཟུགས་ཁམས་པའི་ལྷ་རྣམས་ཀྱི་ནི་ལུས་རྫོགས་པ་དང། །ངོ་ཚ་ཤེས་པ་ཤས་ཆེ་བས་གོས་དང་བཅས་པ་ཡིན་ལ། བྱང་ཆུབ་སེམས་དཔའ་དང་། དགེ་སློང་མ་དཀར་མོ་ནི་འདོད་ཁམས་པ་ཡིན་ཡང་གོས་དང་བཅས་པ་ཡིན་ནོ། །འདོད་ཁམས་ན་སྲིད་པར་བར་མ་གཞན་དག་ནི་ངོ་ཚ་མེད་པ་ཤས་ཆེ་བས་གཅེར་བུ་ཡིན་ནོ། །དྲན་པ་ཉེར་གཞག་ལས་རབ་ཏུ་ཚ་བ་དང་མནར་མེད་ཀྱི་བར་སྲིད་ནི་ཚེ་ལོ་བརྒྱད་ཁྲི་བཞི་སྟོང་ཐུབ་པའི་བྱིས་པ་ལོ་བརྒྱད་ལོན་པའི་ཚད་དུ་གསུངས་སོ། །
གལ་ཏེ་སྲིད་པ་བར་མ་སྔོན་དུས་ཀྱི་སྲིད་པ་འབྱུང་བར་འགྱུར་བའི་རྣམ་པ་ཅན་ལ་ཡིན་ན་སྔོན་དུས་ཀྱི་སྲིད་པ་ཉིད་གང་ཞེ་ན། སྔོན་དུས་ཀྱི་སྲིད་པ་དེ་ནི་འཆི་བའི་སྲིད་པའི་སྔོན་རོལ་གྱི་སྲིད་པ་ཡིན་ཏེ། སྐྱེ་བའི་སྲིད་པའི་སྐད་ཅིག་མ་ཕན་ཆད་ཀྱི་ཉེར་ལེན་གྱི་ཕུང་པོ་ལྔའི་རྒྱུན་ཉིད་དོ། །དེས་ན་སྲིད་པ་བཞི་ལས་བར་སྲིད་དང་སྔོན་དུས་ཀྱི་སྲིད་པ་ནི་བཤད་ཟིན་ལས། སྐྱེ་བའི་སྲིད་པ་ནི་འགྲོ་བ་རྣམས་སུ་ཉིང་མཚམས་སྦྱོར་བའི་སྐད་ཅིག་མའོ། །སྔོན་དུས་ཀྱི་སྲིད་པ་ནི་དེ་ཕན་ཆད་སྐྱེས་ནས་མ་ཤིའི་བར་གྱི་ཕུང་པོ་ལྔའི་རྒྱུན་ནོ། །འཆི་བའི་སྐད་ཅིག་མ་ཐ་མ་ནི་འཆི་བའི་སྲིད་པ་ཡིན་ཏེ། གལ་ཏེ་སེམས་ཅན་གཟུགས་ཅན་དག་གི་ནང་དུ་སྐྱེ་ན་གང་གི་འོག་ཏུ་བར་སྲིད་འབྱུང་བའོ། །དེས་ན་སྐྱེ་སྲིད་དང་འཆི་སྲིད་གཉིས་ནི་སྐད་ཅིག་མ་དང་། སྲིད་པ་གཞན་གཉིས་ནི་རྒྱུན་ཡིན་ནོ། །དེ་ཡང་འདས་པ་ནི་བྱུང་བ་ཡིན་ལ། སྲིད་པ་བར་མ་ནི་འབྱུང་བར་འགྱུར་བའི་སྔོན་དུས་ཀྱི་སྲིད་པའི་ཆ་བྱད་ཅན་ཡིན་ནོ་ཞེས་ཤེས་པར་བྱའོ། །སྲིད་པ་བར་མ་དེ་ཡང་ལྷ་ལ་སོགས་པའི་སྲིད་པ་བར་མར་རེས་མཐུན་པ་དང་། ལྷའི་མིག་རྣམ་པར་དག་པ་བསྒོམས་པ་ལས་བྱུང་བ་རྣམས་ཀྱིས་མཐོང་གི་(བར་སྲིད་འདི་)ཤིན་ཏུ་དང་བས་སྐྱེས་ནས་ཐོབ་པ་ལ་སོགས་པ་གཞན་གྱིས་ནི་མ་ཡིན་ནོ། །དེའི་ཕྱིར་ཀུན་ལས་བཏུས་ལས་ཀྱང་སྐལ་པ་མཉམ་པའི་སེམས་ཅན་རྣམས་ཀྱང་མཐོང་ངོ་ཞེས་བཤད་དོ། །
དེ་ལ་ལྷའི་མིག་རྣམ་པར་དག་པ་ནི་དོན་རྒྱས་པའི་ཆོས་ཀྱི་རྣམ་གྲངས་ལས་འབྱུང་བའི་ཐེ་ཚོམ་དང་། ཡིད་ལ་མི་བྱེད་པ་དང་། ལུས་ཀྱི་གནས་ངན་ལེན་དང་། རྨུགས་པ་དང་གཉིད་དང་རྒོད་པ་དང་། བརྩོན་འགྲུས་བརྩམ་དྲགས་པ་དང་། སེམས་ཡ་ཡ་བོ་དང་། བག་ཚ་བ་དང་། འདུ་ཤེས་སྣ་ཚོགས་དང་། སྨྲ་བ་མང་པ་དང་། ཧ་ཅངསྒོམ་དྲགས་པ་ཞེས་བྱ་བའི་སྐྱོན་བཅུ་གཅིག་དང་བྲལ་བའོ། །ཁ་ཅིག་ན་རེ་རིས་མཐུན་པ་དང་། དེ་ཡང་ལྷའི་བར་སྲིད་ཀྱིས་འགྲོ་བ་ལྔ་གའི་བར་སྲིད་མཐོང་བ་ནས་མི་དང་ཡི་དྭགས་དང་དུད་འགྲོའི་བར་སྲིད་ཀྱིས་བཞི་དང་གསུམ་དང་གཉིས་དང་དམྱལ་བའི་བར་སྲིད་ཀྱིས་དམྱལ་བའི་བར་སྲིད་ཁོ་ན་མཐོང་བས་གོང་མ་གོང་མའི་སྲིད་པ་བར་མ་དང་(དམན་པའི་ཡུལ་མཆོག་མིན་པར་བསམ་པའོ། །)ལྷའི་མིག་རྣམ་པར་དག་པ་གསུམ་གྱིས་མཐོང་ངོ་ཞེས་ཟེར་རོ། །སྲིད་པ་བར་མ་དེ་ཡང་སྔོན་གྱི་ལས་ཀྱིས་བསྐྱེད་པའི་རྫུ་འཕྲུལ་གྱི་ཤུགས་ཆེན་པོ་དང་ལྡན་པས་ཤིན་ཏུ་མགྱོགས་པ་ཡིན་ནོ། །དེའི་ཕྱིར་འགྲེལ་པ་ལས་ཀྱང་། དེས་ན་འདི་ནི་སངས་རྒྱས་རྣམས་ཀྱིས་ཀྱང་དགག་པར་མི་སྤྱོད་དེ་ལས་སྟོབས་དང་ལྡན་པའི་ཕྱིར་རོ་ཞེས་བཤད་དོ། །དེ་ཡང་རྣམ་པར་སྨིན་པའི་སྙིང་པོ་དང་པོ་ཡིན་པའི་ཕྱིར་རོ། །སྲིད་པ་འཆོལ་བ་ཡིན་པའི་ཕྱིར་མིག་ལ་སོགས་པའི་དབང་པོ་གཟུགས་ཅན་ལྔ་པོ་ཀུན་ཚང་ཞིང་། རི་དང་བྲག་ལ་སོགས་པ་ལའང་ཐོགས་པ་མེད་པ་དང་ལྡན་པ་ཡིན་ཏེ། རྡོ་བ་དང་བྲག་སྲ་བ་ལ་སོགས་པའི་དཀྱིལ་ནའང་སྲིན་བུ་ལ་སོགས་པ་དམིགས་པའི་ཕྱིར་རོ། །འོན་ཀྱང་མའི་ལྟོ་དང་རྡོ་རྗེའི་གདན་ལ་ཐོགས་སོ་ཞེས་གྲག་གོ། དེ་ཉིད་ཀྱི་ཕྱིར་འགྲེལ་པ་ལས། སྲིད་པ་བར་མ་པ་ནི་ལྟོ་བ་བརྟོལ་ཏེ་འཇུག་པ་མ་ཡིན་གྱི་སྐྱེ་གནས་ཀྱི་སྒོ་ནས་འཇུག་སྟེ། དེ་ཉིད་ཀྱི་ཕྱིར་མཚེམ་ལས་གང་ཕྱིས་བྱུང་བ་དེ་ནི་ཕུ་བོ་ཞེས་བྱའོ། །གང་སྔར་བྱུང་བ་དེ་ནི་ནུ་བོ་ཞེས་བྱའོ་ཞེས་བཤད་དོ། །
ཁ་ཅིག་རིང་བ་ལའང་ཐོགས་པར་འཆད་པ་ནི་མི་རིགས་ཏེ་དྲན་པ་ཉེར་གཞག་ལས་འབྱུང་བ་ཕྲ་མོ་དེ་ལྟར་མེད་ཅིང་ཐོགས་པ་མེད་པས་གང་རི་རབ་ཕུག་ནས་འགྲོ་བའང་བདག་ཉིད་དང་རི་རབ་ལའང་གནོད་པ་མེད་ན་རི་གཞན་དག་ལ་ལྟ་སྨོས་ཀྱང་ཅི་དགོས་ཞེས་འབྱུང་བའི་ཕྱིར་རོ། །ཀུན་ལས་བཏུས་ལས་ཀྱང་། འགྲོ་བ་ལ་ཐགས་ཐོགས་མེད་དོ་ཞེས་འབྱུང་ངོ་། །དམྱལ་བ་ལ་སོགས་པ་འགྲོ་བ་གང་དུ་སྐྱེ་བར་འགྱུར་བའི་སྲིད་པ་བར་མ་གྲུབ་ན་ནི་ལྷ་ལ་སོགས་པའི་བར་སྲིད་གཞན་དུ་མི་བཟློག་ཏེ། ལས་ཀྱིས་འཕངས་པའི་རྣམ་པར་སྨིན་པ་གྲུབ་ཟིན་པའི་ཕྱིར་རོ། །
འོ་ན་ཤི་འཕོས་པའི་རྗེས་སུ་དགེ་བ་བྱེད་པ་རྣམས་དོན་མེད་པར་འགྱུར་རོ་ཞེ་ན། མི་འགྱུར་ཏེ། དམྱལ་བ་ལ་སོགས་པར་སྐྱེས་ཀྱང་སྡུག་བསྔལ་ཆུང་བ་དང་མྱུར་དུ་ཐར་བ་དང་། དེ་ནས་མཐོ་རིས་སུ་སྐྱེ་བ་ལ་སོགས་པའི་དོན་བྱེད་པའི་ཕྱིར་རོ། །ཀུན་ལས་བཏུས་ལས་ནི། ཅི་སྟེ་ན་ལྡོག་གོ། དེ་ན་གནས་པ་ཡང་ལས་གསོག་གོ་ཞེས་དམྱལ་བ་ལ་སོགས་པའི་སྲིད་པ་བར་མ་གྲུབ་ནས་མིའི་སྲིད་པ་བར་མར་འགྱུར་ཏེ་མིར་སྐྱེ་བ་ལ་སོགས་པའང་ཡོད་པར་བཤད་དེ། དེ་དག་གི་ལུགས་ལ་ནི་ཤི་འཕོས་པའི་དོན་གྱི་དགེ་བ་ནི་ཤིན་དུའང་འབྲས་བུ་དང་བཅས་པ་ཡིན་ནོ། །
འདོད་པའི་བར་སྲིད་དེ་ནི་སྐལ་པ་བཟང་ངན་གྱིས་དྲི་ཞིམ་པ་དང་མི་ཞིམ་པ་ཟ་བའི་ཕྱིར་དེ་ལ་དྲི་ཟ་ཞེས་ཀྱང་བྱའོ། །གཟུགས་ཀྱི་ལྷའི་བར་སྲིད་ནི་དྲི་ཟ་བ་མ་ཡིན་ཏེ། ཁམ་གྱི་ཟས་ལ་འདོད་ཆགས་དང་བྲལ་བའི་ཕྱིར་རོ། །འོ་ན་སྲིད་པ་བར་མ་པ་དེ་དུས་ཇི་སྲིད་ཀྱི་བར་དུ་གནས་ཤེ་ན། བཙུན་པ་དབྱིག་བཤེས་ན་རེ་ཞག་བདུན་དུ་གནས་ལ། གལ་ཏེ་དེའི་ཚེ་སྐྱེ་གནས་ཀྱི་ཚོགས་པ་མ་རྙེད་ན་དེ་ཤི་འཕོས་ནས་ཡང་སྲིད་པ་བར་མར་སྐྱེས་ནས་སྐྱེ་བའི་གནས་འཚོལ་བར་བྱེད་དོ་ཞེས་ཟེར་རོ། །ཀུན་ལས་བཏུས་ལས་ཀྱང་། རེ་ལྟར་ཐོགས་ན་ཞག་བདུན་གནས་ཏེ་དེ་ཚུན་ཆད་ཀྱིས་འཆི་འཕོའོ་ཞེས་བཤད་དེ། གཞན་དག་ནི་ཞག་བདུན་ཕྲག་བདུན་དུ་གནས་སོ་ཞེས་འདོད་དོ། །མདོ་སྡེ་པ་བཙུན་པ་ན་རེ་དེ་ལྟ་བུའི་ངེས་པ་ནི་མེད་དེ་ཇི་སྲིད་སྐྱེ་གནས་ཀྱི་ཚོགས་པ་མ་རྙེད་ཀྱི་བར་དུ་གནས་ལ། དེའི་ཚེ་འཕེན་པ་ལོགས་ཤིག་ན་མེད་དེ། རིས་མཐུན་པ་གཅིག་པའི་ཕྱིར་རོ། །དེ་ལྟ་མ་ཡིན་ན་དེའི་ཚེ་ཟད་པས་འཆི་སྲིད་དུའང་ཐལ་བར་འགྱུར་རོ་ཞེས་ཟེར་རོ། །བྱེ་བྲག་ཏུ་སྨྲ་བ་རྣམས་ནི་འདི་སྲིད་པ་འཚོལ་བ་ཡིན་པས་དུས་ཐུང་བར་གནས་ཏེ་སྐྱེ་བའི་གནས་སུ་འཇུག་གོ།
འོ་ན་སྐྱེ་བའི་གནས་མ་རྙེད་ན་ཇི་ལྟར་ཞེ་ན། གལ་ཏེ་དེར་ངེས་པར་སྐྱེ་བར་འགྱུར་བ་ཞིག་ཡིན་ན་ནི་དེའི་ལས་ཀྱིས་སྐྱེ་གནས་ཀྱི་ཚོགས་པ་(ཕ་མ་ལ་སོགས།) འདྲེན་ལ། འོན་ཏེ་དེར་སྐྱེ་བར་མ་ངེས་ན་ནི་དེ་ལས་གཞན་པའི་ཡུལ་དུ་སྐྱེ་བར་འགྱུར་རོ་ཞེས་ཟེར་རོ། །གཞན་དག་ན་རེ་དེ་དང་འདྲ་བའི་སྐྱེ་གནས་སུ་འཇུག་པར་འགྱུར་ཏེ་དབྱར་ལྟ་བུ་དུས་ངེས་པ་ཅན་བ་ལང་གི་སྲིད་པ་བར་མ་རང་གི་སྐྱེ་གནས་མ་རྙེད་པ་རྣམས་ནི་དུས་མ་ངེས་པ་བ་མིན་དང་། ཁྱི་རྣམས་ནི་ལྕེ་སྤྱང་དང་། རྟ་རྣམས་ནི་བོང་བུ་དང་། དོམ་རྣམས་ནི་དྲེད་རྣམས་སུ་སྐྱེའོ་ཞེས་ཟེར་རོ། དེ་ལ་ནི་འཕེན་པ་གཅིག་པའི་ཕྱིར་གང་དུ་སྐྱེ་བར་འགྱུར་བའི་བྱད་གཟུགས་ཅན་ཡིན་ནོ་ཞེས་པས་གནོད་པས་སྔ་མ་ཉིད་འཐད་པ་ཡིན་ནོ། །
གཉིས་པ་སྐྱེ་གནས་སུ་འཇུག་པ་ནི་སེམས་ཅན་དེ་(ལས་ལས་བྱུང་བའི་མིག་གིས་ཐག་རིང་ན་གནས་པའི་རང་སྐྱེ་བའི་གནས་མཐོང་སྟེ།) ཕོར་སྐྱེ་བར་འགྱུར་བ་ཡིན་ན་ནི་ཕ་ལ་སྡང་བ་དང་མ་ལ་(འཁྲིག་པ་བྱ་བར།) ཆགས་པའི་བློ་ནི་ཕྱིན་ཅི་ལོག་ཏུ་གྱུར་པས་མ་དེ་དང་རྩེ་བ་དང་དགའ་བར་བྱ་བར་འདོད་པས་འགྲོ་བར་བྱ་བའི་ཡུལ་དུ་མངོན་པར་འདོད་པའི་མངལ་དུ་འགྲོ་སྟེ། དེར་སོང་ནས་མའི་ལྟོ་གཡས་ཕྱོགས་སུ་ཁ་རྒྱབ་ཏུ་བསྟན་ཏེ་ཙོག་ཙོག་པོར་སྐྱེའོ། །འོན་ཏེ་མོར་སྐྱེ་བ་ཞིག་ཡིན་ན་མ་ལ་སྡང་བ་དང་། འོན་ཏེ་ཕ་ལ་ཆགས་པའི་བློ་ཕྱིན་ཅི་ལོག་ཏུ་གྱུར་པས་ཕ་དང་རྩེ་བ་དང་དགའ་བར་བྱ་བར་འདོད་པས་འགྲོ་བའི་ཡུལ་མའི་མངལ་དུ་སོང་སྟེ་མའི་ལྟོ་གཡོན་དུ་ཁ་མདུན་ཕྱོགས་སུ་བསྟན་ཏེ་འདུག་གོ། གལ་ཏེ་མ་ནིང་དུ་སྐྱེ་བ་ཡིན་ནའང་བར་སྲིད་ནི་ཕོ་མོ་གང་རུང་ཞིག་ཏུ་ཡོད་དེ། དབང་པོ་ཀུན་ཚང་བར་འདོད་པའི་ཕྱིར་རོ། །དེའི་ཕྱིར་མངལ་དུ་ཞུགས་པ་ན་ཕྱིས་མ་ནིང་གི་ལུས་འཛིན་ཅིང་ཕོ་མོའི་འདོད་ཆགས་གང་དང་ལྡན་པ་བཞིན་དུ་གནས་པར་འགྱུར་རོ། །དེའི་ཕྱིར་གདགས་པ་ལས། དེའི་ཚེ་དྲི་ཟ་ལ་སེམས་གཉིས་ལས་རྗེས་སུ་ཆགས་པ་དང་ལྔན་པའམ་ཁོང་ཁྲོ་བ་དང་ལྡན་པའི་སེམས་གང་ཡང་རུང་བ་ཞིག་མངོན་དུ་གྱུར་པ་ཡིན་ནོ། །ཞེས་པ་དང་། སློབ་དཔོན་གང་སྤེལ་གྱིས་ཀྱང་། འདི་ནི་རང་གི་རིགས་སུ་མངལ་སྐྱེས་སམ། །གལ་ཏེ་སྒོ་ང་ལས་སྐྱེས་འབྱུང་འགྱུར་ན། །དེའི་དུས་སུ་མ་དེ་དང་ནི་ཕ། །སྦྱོར་བ་མཐོང་ནས་དྲེགས་པས་རབ་དགར་འགྱུར། །རྩེ་དགས་དེ་དག་དྲུང་རྒྱུག་ཕ་ཡི་ནི། །ཁུ་ཆུ་དེ་མཐོང་ཀུན་དུ་རྨོངས་པ་ཡིས། །བདག་ཉིད་ཇི་བཞིན་དེ་ལ་ཆགས་འགྱུར་ཏེ། །མོ་ན་མོ་བཞིན་ཕོ་ན་ཕོ་བཞིན་ནོ། །ཞེས་བཤད་དོ། །དེ་ལྟར་མངལ་དུ་ཞུགས་པ་ན་བར་སྲིད་ཐོགས་མེད་འགགས་ནས་རྣམ་སྨིན་ཐོགས་བཅས་འགྲུབ་པར་འགྱུར་རོ། །གལ་ཏེ་ཕ་མའི་མི་གཙང་བ་ལས་དབང་པོ་རྣམས་སྐྱེ་ན་དེ་དག་ཉིད་ལས་སམ། འོན་ཏེ་དེ་དག་ལས་བྱུང་བའི་འབྱུང་བ་གཞན་ཞིག་ལས་ཡིན་ཞེ་ན། ཁ་ཅིག་ན་རེ་དེ་དག་ལས་སྐྱེ་སྟེ། ཁུ་ཁྲག་དབང་པོ་མེད་པ་འགགས་ནས་ནུར་ནུར་པོ་དབང་པོ་དང་བཅས་པ་སྐྱེ་བའི་ཕྱིར་ཏེ། མདོ་ལས། དགེ་སློང་དག་ཁྱེད་ཀྱིས་ནི་ཡུན་རིང་པོར་སྡུག་བསྔལ་དྲག་པ་ཚ་བ་རྩུབ་པ་ཉམས་སུ་མྱོང་ཞིང་དུར་ཁྲོད་བསྐྱེད་དོ། །ཁྲག་གི་ཐིགས་པ་བླངས་སོ་ཞེས་པ་དང་། ཡང་མདོ་གཞན་ལས་ཀྱང་། ཕ་མའི་ནུར་ནུར་པོ་མི་གཙང་བ་ལས་སྐྱེས་པ་ཞེས་གསུངས་པའི་ཕྱིར་རོ་ཞེས་ཟེར་རོ། །ཁ་ཅིག་ན་རེ་ཕ་མའི་མི་གཙང་བ་ལས་འབྱུང་བ་གཞན་ཞིག་སྐྱེ་ལ། དེ་ལས་ནི་དབང་པོ་དང་བཅས་པའི་ལུས་སྐྱེ་སྟེ་ལོ་མ་ལས་བྱུང་བའི་སྲིན་བུ་ལ་སོགས་པ་བཞིན་ནོ། །མདོའི་དོན་ནི་མི་གཙང་བ་ལ་བརྟེན་ནས་སྐྱེས་པ་ལ་དེ་སྐད་བརྗོད་པར་ཟད་དོ་ཞེས་ཟེར་རོ། །དེ་དག་ནི་སྐྱེ་གནས་དང་པོ་གཉིས་སུ་འཇུག་ཚུལ་ལོ། །འགྲེལ་པར་གཞན་ལ་ནི་ཅི་རིགས་པར་བརྗོད་པར་བྱའོ་ཞེས་ཟེར་ཏེ། དེ་ལ་རིགས་པ་ནི་འདི་ཡིན་པར་སྣང་ངོ་ཞེས་འབྱུང་བ་ནི་ཆོས་མངོན་པ་བའི་སློབ་དཔོན་དག་སྐྱེ་གནས་ཕྱི་མ་གཉིས་ལ་ནི་ཅི་རིགས་པར་བརྗོད་པར་བྱའོ་ཞེས་ཟེར་བའི་རིགས་པའི་དོན་སློབ་དཔོན་གྱིས་འཆད་པ་ནི་ལས་ཇི་ལྟ་བ་བཞིན་དུ་དྲི་དང་གནས་ལ་མངོན་པར་འདོད་ཅིང་སྲེད་པས་(སྐྱེ་གནས་སུ།) འཇུག་པ(ར་འདོད་པ་)ནི་(རིམ་པ་ལྟར།) སྐྱེ་གནས་(དང་པོ་གཉིས་ལས།) གཞན་དྲོད་གཤེར་སྐྱེས་དང་རྫུས་སྐྱེས་གཉིས་སུ་འཇུག་ཚུལ་ལོ། །གལ་ཏེ་དམྱལ་བར་མེ་འབར་བ་དང་གྲང་བའི་རེག་པ་ལ་མངོན་པར་འདོད་པ་ཇི་ལྟར་འབྱུང་ཞེ་ན། (འདིར་ཡང་།) བློ་ཕྱིན་ཅི་ལོག་ཏུ་གྱུར་པའི་ཕྱིར་ཏེ་རླུང་དང་ཆར་པ་ལ་སོགས་པས་སྡུག་བསྔལ་བདག་མེ་འབར་བར་འདོད་པ་དང་། ཉི་མ་དང་མེ་ལ་སོགས་པས་གདུངས་པ་དག་བསིལ་བར་འདོད་ནས་རྒྱུག་པའི་ཕྱིར་ཚ་བ་དང་གྲང་བའི་དམྱལ་བར་སྐྱེ་བ་ལེན་ནོ། །སྔོན་གྱི་སློབ་དཔོན་ཐོགས་མེད་ལ་སོགས་པ་ཁ་ཅིག་ནི་སྔར་སྲོག་གཅོད་ལ་སོགས་པ་བྱས་པའི་སེམས་ཅན་དག་རྨི་ལམ་ལྟར་མཐོང་སྟེ། དེ་དག་ལ་ཞུགས་པ་ན་དམྱལ་བར་སྐྱེ་སྟེ།
མདོ་ལས། ཇི་ལྟར་འགྱུར་བས་དེ་མྱོང་ལས། །སྔར་བྱས་པ་ནི་རྨི་ལམ་ལྟར། །སེམས་ཅན་དེ་འདྲ་མཐོང་གྱུར་ནས། །དམྱལ་བར་རབ་ཏུ་རྒྱུག་པར་འགྱུར། །ཞེས་གསུངས་སོ་ཞེས་ཟེར་རོ། །(འོ་ན་ཤའི་ཕུང་པོ་རི་རབ་ཙམ་ཡོད་ན་འབུ་རི་ཙམ་འགྲུབ་འགྱུར་གྱི་བར་སྲིད་དེ་དག་ཤ་དེ་མ་བྱུང་བར་དུ་གང་དུ་གནས་ཤེ་ན། དེ་མ་བྱུང་གི་བར་དུ་སྡོད་པ་ནི་མིན་ཏེ། འདི་ལྟར་སྲིན་བུར་གྱུར་པའི་བར་སྲིད་གྲངས་མེད་པ་ཡོད་དེ། དེ་དག་རང་སྐྱེ་བ་དང་མཐུན་པའི་དྲོད་གཤེར་གྱི་ཚོགས་པ་གང་དང་ཕྲད་པ་དེར་སྐྱེའི་དྲོད་གཤེར་གྱི་ཚོགས་པ་འདི་ཁོ་ན་ལས་སྐྱེ་བའི་ངེས་པ་མེད་པར་མངོན་ནོ། །)སྲིད་པ་བར་མ་དེ་དག་ལས་དམྱལ་བའི་སྲིད་པ་བར་མའི་དབྱིབས་ནི་གཤིན་རྗེའི་ཞགས་པས་བཏགས་ཏེ་སྤྱིའུ་ཚུགས་ཁོ་ནར་འཁྲིད་པ་ཡིན་ཏེ། ཡོངས་སུ་གདུང་བ་དང་བཅས་པ་དང་ཡོངས་སུ་གདུང་བ་མེད་པ་བསྟན་པའི་མདོ་ལས། ཡང་དག་སྡོམ་དང་བཀའ་ཐུབ་ཅན། །དྲང་སོང་རྣམས་ལ་སྐུར་འདེབས་པ། །དེ་དག་སྤྱིའུ་ཚུགས་དག་ཏུ་ནི། །དམྱལ་བ་ཁོ་ནར་ལྟུང་བར་འགྱུར་ཞེས་པ་དང་།
རིན་པོ་ཆེའི་ཕྲེང་བ་ལས་ཀྱང་། གཞན་ཡང་འདི་ནི་ལོག་གཟུང་ན། །བླུན་པོ་མཁས་པའི་ང་རྒྱལ་ཅན། །སྤོང་བས་མ་རུངས་བདག་ཉིད་ཅན། །མནར་མེད་པར་ནི་སྤྱིའུ་ཚུགས་འགྲོ། །ཞེས་གསུངས་པའི་ཕྱིར་རོ། །ཡི་དྭགས་དང་དུད་འགྲོའི་ནི་སྐས་ལ་འབབ་པ་ལྟ་བུའོ། །མིའི་ནི་ཐང་ལ་འགྲོ་བ་ལྟ་བུའོ། །(ཡི་དྭགས་ཀྱི་ནི་རྒྱབ་ཀྱིས་འགྲོ་བ་ཡང་བཤད་དོ། །)ལྷ་ཡི་ནི་སྟན་ལས་ལྡང་བ་ལྟ་བུར་གྱེན་དུ་འགྲོའོ། །གལ་ཏེ་བློ་ནི་ཕྱིན་ཅི་ལོག་གྱུར་པས། །རྩེ་དགས་འགྲོ་བའི་ཡུལ་དུ་འགྲོ། །ཞེས་གང་བཤད་པ་དེ་མངལ་དུ་འཇུག་པ་ཐམས་ཅད་ལ་དེ་ལྟར་ངེས་སམ་ཞེ་ན། མ་ངེས་ཏེ། འདི་ལ་རྣམ་པར་དབྱེ་བ་ཡོད་པས་མདོ་དང་ལུང་ཕྲན་ཚེགས་ལས། དགའ་བོ་མངལ་དུ་འཇུག་པ་ནི་བཞི་སྟེ་ཞེས་གསུངས་ཏེ། འདིར་གནས་པ་དང་འབྱུང་བ་འཇུག་པ་མ་ཡིན་ཡང་འཇུག་པ་གཙོ་བོ་ཡིན་པས་དེའི་མིང་གིས་བསྟན་ཏོ་ཞེས་སློབ་དཔོན་གང་སྤེལ་འཆད་དོ། །བཞི་གང་ཞེ་ན། དེ་ལ་གཅིག་ནི་མའི་མངལ་དུ་ཤེས་བཞིན་དུ་འཇུག་གོ། གནས་པ་དང་འབྱུང་བ་ནི་མི་ཤེས་པ་དག་གོ། གཞན་དག་ནི་འཇུག་པར་མ་ཟད་གནས་པ་ཡང་ཤེས་བཞིན་དུ་གནས་ལ་འབྱུང་བ་ནི་མི་ཤེས་པ་དག་གོ། ཡང་གཞན་དག་ནི་འཇུག་པ་དང་གནས་པ་ཤེས་བཞིན་དུ་བྱེད་པར་མ་ཟད་འབྱུང་བའང་ཤེས་བཞིན་དུ་འབྱུང་ངོ་། །ཡང་མངལ་དུ་འཇུག་པ་སྔ་མ་གསུམ་ལས་གཞན་དག་ནི་འཇུག་གནས་འབྱུང་བ་ཐམས་ཅད་ལ་རྨོངས་པ་དག་གོ། འདི་ལ་སྒོ་ང་ལས་སྐྱེས་པ་ནི་རྟག་ཏུ་འཇུག་གནས་འབྱུང་བ་ལ་རྨོངས་པ་ཁོ་ནའོ། །འདིར་སྐྱེས་པ་ཞེས་བརྗོད་པ་ནི་འབྱུང་འགྱུར་གྱི་མིང་གིས་བསྟན་པ་སྟེ་ཕྱེ་འཐག་ཅེས་ཟེར་བ་བཞིན་ནོ། །དེའི་ཕྱིར་གནས་བརྟན་བྲག་དང་ཉེ་བའི་བྲག་དང་ཡུལ་ལྔ་ལེན་གྱི་རྒྱལ་པོའི་བུ་སྒོང་སྐྱེས་ཀྱི་རང་རྒྱལ་རྣམས་ཀྱང་འཇུག་པ་ལ་སོགས་པ་ལ་རྨོངས་པ་ཡིན་ནོ། །དེས་ན་བློ་ཕྱིན་ཅི་ལོག་གིས་མངལ་དུ་འཇུག་པ་ནི་ཤེས་བཞིན་མ་ཡིན་པར་འཇུག་པ་རྣམས་ཀྱི་དབང་དུ་བྱས་པ་ཡིན་གྱི་ཐམས་ཅད་ལ་ནི་མ་ཡིན་ནོ། །
གཞན་ཡང་ཤེས་བཞིན་མ་ཡིན་པར་མངལ་དུ་འཇུག་པ་ནི་གཉིས་ལས་སེམས་ཅན་དབང་ཆུང་བར་གྲགས་པ་རྣམས་ནི་མའི་མངལ་དུ་འཇུག་པ་ན་རླུངས་ལངས་པའམ་ཆར་པ་འབབ་པའམ་གྲང་བའམ་ཡུལ་ངན་ནམ་སྐྱེ་བོ་ཕལ་པོ་ཆེའི་ཅ་ཅོ་འདོན་བསྙམ་བྱེད་ནས་རྩྭ་ཐིབས་པོའམ་ནགས་ཐིབས་པོའམ་རྩྭ་དང་ལོ་མའི་སྤྱིལ་པོ་དང་ཤིང་དྲུང་ངམ་རྩིག་པའི་དྲུང་དུ་འགྲོའོ་སྙམ་ནས་འཇུག་ལ། གནས་པ་དང་འབྱུང་བ་ནའང་དེ་དག་ཏུ་གནས་པ་དང་དེ་དག་ནས་འབྱུང་བའི་འདུ་ཤེས་དང་མོས་པ་ཕྱིན་ཅི་ལོག་འབྱུང་ངོ་། །སེམས་ཅན་དབང་ཆེ་བར་གྲགས་པ་རྣམས་ནི་འཇུག་པ་ན་ཀུན་དགའ་ར་བའམ་སྐྱེད་མོས་ཚལ་ལམ་ཁང་བཟང་དུ་འཇུག་པའམ། ཁང་པ་བརྩེགས་པའམ། ཁྲི་ལ་འཛེག་གོ་སྙམ་པ་དང་། གནས་པ་དང་འབྱུང་བ་ན་ཡང་དེ་དག་ཏུ་གནས་སོ། །དེ་དག་ནས་འབྱུང་ངོ་སྙམ་དུ་འདུ་ཤེས་དང་མོས་པ་ཕྱིན་ཅི་ལོག་འབྱུང་བའོ། །ཤེས་བཞིན་དུ་འཇུག་པ་ནི་མའི་མངལ་ཉིད་དུ་ཤེས་ནས་དེ་ཉིད་དུ་འཇུག་པ་དང་གནས་པ་དང་དེ་ཉིད་ནས་འབྱུང་བར་ཤེས་པས་ཕྱིན་ཅི་ལོག་གི་འདུ་ཤེས་དང་མོས་པ་མི་འབྱུང་བའོ། །གལ་ཏེ་སྔར་ཕ་མ་ལ་ཆགས་སྡང་གིས་མངལ་དུ་འཇུག་པར་བཤད་བཞིན་དུ་ཡང་འདིར་ནགས་ཐིབས་པོ་དང་ཀུན་དགའ་ར་བ་ལ་སོགས་པར་འཇུག་པའི་ཚུལ་གཞན་བཤད་ཅེ་ན། དེ་ནི་ཆགས་སྡང་གཉིས་ཁོ་ནས་འཇུག་པའི་ངེས་པ་མེད་ཀྱི་འོན་ཀྱང་རྩྭའི་ཐིབས་པོ་དང་ཀུན་དགའ་ར་བ་ལ་སོགས་པར་འདུ་ཤེས་པས་ཀྱང་འཇུག་པར་བསྟན་པའི་ཕྱིར་ཏེ། དེ་ལྟར་བཤད་ན་སྐྱེ་བའི་སྲིད་པ་ཉོན་མོངས་ཅན། རང་གི་ས་པའི་ཉོན་མོངས་ཀུན་ཞེས་པ་འདིའང་འཐད་པར་འགྱུར་རོ་ཞེས་སློབ་དཔོན་གང་སྤེལ་འཆད་དོ། །
ཁ་ཅིག་ན་རེ་སྔ་མ་ནི་རང་དང་རིང་པའི་གནས་སྐབས་སུ་ཡིན་ལ། འདི་ནི་རང་དང་ཉེ་བའི་གནས་སྐབས་སུ་ཡིན་ནོ་ཞེས་ཟེར་རོ། །ཡང་འཇུག་པ་ཤེས་ལ་ཕྱི་མ་ལ་གཉིས་མི་ཤེས་པ་དང་། དང་པོ་གཉིས་ཤེས་ལ་འབྱུང་བ་མི་ཤེས་པ་དང་། གསུམ་ག་ཤེས་པ་ཞེས་བྱ་བའི་མངལ་དུ་འཇུག་པ་ནི་གསུམ་དག་སྟེ། དེ་ལ་འཁོར་ལོས་བསྒྱུར་བའི་རྒྱལ་པོ་ནི་དང་པོ་དང་། རང་བྱུང་རང་རྒྱལ་དང་(རྗོགས་པའི་)སངས་རྒྱས་བཅོམ་ལྡན་འདས་གཉིས་ནི་གཉིས་པ་དང་གསུམ་པ་ཡིན་ནོ། །ཅིའི་ཕྱིར་ཞེ་ན། འཁོར་ལོས་བསྒྱུར་བ(འི་བར་སྲིད།) ནི་(བསོད་ནམས་ཀྱི།) ལས་རྒྱ་ཆེ་བའི་ཕྱིར་དང་། རང་སངས་རྒྱས་ནི་བསྐལ་པ་བརྒྱར་གོམས་(ཤིང་དངོས་པོ་དྲུག་ཤེས།) པའི་ཡེ་ཤེས་རྒྱ་ཆེ་བའི་ཕྱིར་དང་། སངས་རྒྱས་ནི་བསོད་ནམས་དང་ཡེ་ཤེས་གཉིས་ཀ་རྒྱ་ཆེ་བའི་ཕྱིར་ན་གོ་རིམ་བཞིན་དུ་སྦྱར་རོ། །(བསྒྱུར་རང་གཉིས་གནས་སྐབས་དེར་མ་ལ་སྲེད་པས་སེམས་ཉོན་མོངས་ཅན་ཡིན་ཡང་ཤེས་བཞིན་ནི་འདུ་ཤེས་དང་མོས་པ་ཕྱིན་ཅི་མ་ལོག་པ་ལ་བརྗོད་དོ། །)དེ་དག་འཇུག་པ་ན་སངས་རྒྱས་ལ་སོགས་པ་མ་ཡིན་ཀྱང་འབྱུང་བར་འགྱུར་བའི་མིང་གིས་བསྟན་པའོ། །སྒོ་ང་ལས་སྐྱེ་བ་དང་གང་ཟག་གསུམ་པོ་དེ་ལ་དམིགས་ཀྱིས་བསལ་བས་སྐྱེ་གནས་གཞན་དག་ལ་ནི་ཤེས་བཞིན་དུ་འཇུག་པ་ལ་སོགས་པ་བཞི་པོ་དེ་ཅི་རིགས་པར་ཡོད་དོ་ཞེས་བྱ་བ་འདི་ཤུགས་ལ་འཕངས་པ་ཡིན་ནོ། །གལ་ཏེ་རང་སངས་རྒྱས་ཀྱིས་འཇུག་གནས་གཉིས་ཤེས་པ་དང་སྒོང་སྐྱེས་རྟག་ཏུ་རྨོངས་པ་གཉིས་འགལ་ཏེ། ལྔ་ལེན་གྱི་རྒྱལ་པོའི་བུ་ལ་སོགས་པ་སྒོང་སྐྱེས་ཡིན་ཡང་རང་སངས་རྒྱས་ཡིན་པའི་ཕྱིར་རོ་ཞེ་ན། འཇུག་གནས་ཤེས་པ་ནི་རང་སངས་རྒྱས་བསེ་རུ་ལྟ་བུའི་དབང་དུ་བྱས་ནས་གསུངས་པ་ཡིན་ལ། སྒོང་སྐྱེས་དེ་དག་ནི་ཚོགས་ན་སྤྱོད་པ་ཡིན་པས་ཉེས་པ་མེད་དོ། །ཞེས་སློབ་དཔོན་གང་སྤེལ་འཆད་དོ། །ཡང་ན་འཇུག་གནས་ཤེས་པ་ནི་མངལ་སྐྱེས་ཀྱི་དབང་དུ་བྱས་པའོ། །(འཇུག་པ་མི་ཤེས་པ་ལ་གཞན་གཉིས་ཤེས་པ་མེད་དོ། །)ད་ནི་བར་དུ་གནས་པའི་ཚུལ་འཆད་པ་ན་ཇི་ལྟར་གནས་པའི་རྟེན་འབྲེལ་དང་། གང་གིས་གནས་པའི་ཟས་བཤད་པ་གཉིས་ལས་དང་པོ་ལ་གསུམ་གྱི་(དང་པོ་)མདོར་བསྟན་པ་ནི་ཆོས་འདི་ལས་ཕྱི་རོལ་པ་རྣམས་ནི་འཆི་སྲིད་ནས་སྐྱེ་སྲིད་དུ་ཉིང་མཚམས་སྦྱོར་བ་ནི་བར་སྲིད་མ་ཡིན་ཏེ། དེ་ནི་མི་རྟག་པར་ཁས་བླངས་པའི་ཕྱིར་རོ། །སྐྱེ་བ་གཞན་དུ་འཕོ་བའི་གང་ཟག་མི་རྟག་པ་ཡིན་ན་བདག་ཆད་པ་དང་ལས་བྱས་པ་ཆུད་ཟོས་པ་དང་མ་བྱས་པ་དང་ཕྲད་པར་ཐལ་བའི་སྐྱོན་ཡོད་དོ། །དེའི་ཕྱིར་བདག་རྟག་པ་ཉིད་སྐྱེ་བ་གཞན་དུ་འཕོ་བ་ཡིན་ནོ་ཞེས་ཟེར་རོ། །དེ་ལྟ་བུའི་སྲིད་པ་གཞན་དུ་འཕོ་བའི་བདག་རྟག་པ་ནི་མེད་དེ། སྐྱེ་སྲིད་ལ་སོགས་པ་ལས་གཞན་དུ་མ་དམིགས་པའི་ཕྱིར་དང་། དེ་དག་གི་བདག་ཉིད་ཡིན་ན་མི་རྟག་པར་ཐལ་བའི་ཕྱིར་ཏེ། དེ་ནི་མི་རྟག་པར་ཚད་མས་གྲུབ་པའི་ཕྱིར་རོ། །འདི་དགག་པ་རྒྱས་པར་ནི་གང་ཟག་དགག་པ་ཉིད་དུ་ཤེས་པར་བྱའོ། །
འོ་ན་འཆི་སྲིད་ནས་ཉིང་མཚམས་སྦྱོར་བ་དེ་གང་ཞེ་ན། གཟུགས་ལ་སོགས་པའི་ཕུང་པོ་ལྔའི་རྒྱུན་ཙམ་ཉིད་དོ། །དེ་ལ་ཙམ་ནི་ལྷག་པ་འགོག་པ་སྟེ། ཕུང་པོ་ཆོས་ཙམ་ལས་མ་གཏོགས་པའི་བདག་མེད་པའི་ཕྱིར་རོ། །ཇི་ལྟར་ཞེ་ན། སྐྱེ་བ་སྔ་མའི་ཉོན་མོངས་པ་དང་ལས་ཀྱི་མངོན་པར་འདུས་བྱས་པའི་སྲིད་པ་བར་མའི་ཕུང་པོའི་རྒྱུན་གྱིས་ན་སྐྱེ་བ་འདིའི་སྐྱེ་བའི་གནས་སུ་གྱུར་པའི་མངལ་དུ་འགྲོ་སྟེ་སྐྱེ་བའི་སྲིད་པར་མཚམས་སྦྱོར་རོ། །མངལ་དུ་འགྲོ་བས་ནི་དྲོད་གཤེར་ལ་སོགས་པའི་སྐྱེ་གནས་གཞན་དུ་འགྲོ་བའང་མཚོན་པར་བྱེད་དོ། །བར་སྲིད་ཉིད་སྐྱེ་སྲིད་དུ་འཕོ་བ་ནི་མ་ཡིན་ཏེ། བར་དོའི་ཕུང་པོ་ལ་བརྟེན་ནས་སྐྱེ་སྲིད་ཀྱི་ཕུང་པོ་ལྔ་སྐྱེ་བ་དང་། དེ་ལས་དུས་སྔ་མ་དང་། དེ་ལས་འཆི་བ་དང་། དེ་ལས་བར་དོ་དང་། དེ་ལས་སྐྱེ་སྲིད་དུ་ཉིང་མཚམས་སྦྱོར་བའི་ཕྱིར་ཏེ། དཔེར་ན་མར་མེ་སྐད་ཅིག་མ་ཡིན་ཡང་རྒྱུན་གྱིས་ཡུལ་གཞན་དུ་འགྲོ་བ་བཞིན་དུ་འདིར་ཡང་ཡིན་ནོ། །དེས་ན་བདག་རྟག་པ་མེད་ཀྱང་ཕུང་པོའི་རྒྱུན་མའི་མངལ་དུ་འཇུག་པ་མི་འགལ་ལོ། །དཔེ་འདིས་ནི་ཁ་ཐོན་ལས་ཕ་རོལ་པོ་ལ་རྟོགས་པ་སྐྱེ་བ་དང་། མེ་ལོང་ལས་གཟུགས་བརྙན་དང་། རྒྱ་ལས་འབུར་དང་། མེ་ཤེལ་ལས་མེ་དང་། སྐྱུར་བའི་རོ་ལས་འགྲམ་ཆུ་དང་། ས་བོན་ལས་མྱུ་གུ་འབྱུང་བ་ལ་སོགས་པ་རྟེན་ཅིང་འཕོ་བ་མེད་པའི་དཔེ་གཞན་ཡང་ཤེས་བར་བྱ་སྟེ།
འཕགས་པ་ཀླུ་སྒྲུབ་ཀྱིས། ཁ་ཐོན་མར་མེ་མེ་ལོང་རྒྱ། །མེ་ཤེལ་ས་ཐོན་སྐྱུར་དང་སྒྲས། །ཕུང་པོ་ཉིང་མཚམས་སྦྱོར་བ་ཡང་། །མི་འཕོ་བར་ཡང་མཁས་རྟོགས་བྱ། །ཞེས་གསུངས་སོ། །དོན་དེ་ཉིད་སྟོང་པ་ཉིད་ཆེན་པོའི་མདོ་ལས་ཀྱང་། ལས་ནི་ཡོད་དོ། །རྣམ་པར་སྨིན་པ་ནི་ཡོད་དོ། །ཆོས་སུ་བརྡར་བཏགས་པ་མ་གཏོགས་པ་གང་ཕུང་པོ་འདི་དག་འདོར་ཞིང་ཕུང་པོ་གཞན་དག་ཏུ་ཉིང་མཚམས་སྦྱོར་བར་བྱེད་པའི་བྱེད་པ་པོ་ནི་མི་དམིགས་སོ། །དེ་ལ་ཆོས་སུ་བརྡར་བཏགས་པ་ནི་འདི་ཡིན་ཏེ། འདི་ལྟ་སྟེ། འདི་ཡོད་པས་འདི་འབྱུང་ཞེས་བྱ་བ་ལ་སོགས་པ་དང་། ལུང་ཕྲན་ཚེགས་ལས། བྲམ་ཟེ་རྒྱ་ཤུག་གི་བུའི་དབང་དུ་མཛད་ནས། འདི་ན་བདག་གམ་སེམས་ཅན་མེད། །ཆོས་འདི་དག་ནི་རྒྱུ་དང་བཅས་ཞེས་བྱ་བ་དང་། ཁྱད་པར་དུ་འཕགས་པའི་བསྟོད་པ་ལས་ཀྱང་། ལུས་ལས་ལུས་གཞན་དག་ཏུ་ནི། །ཕྲ་བའི་སྲོག་ནི་འཕོ་ཞེས་གྲག། ཁྱོད་ཀྱི་ལུས་ལས་གཞན་གྱུར་པའི། །སྲོག་ཡོད་པ་ནི་མིན་ཞེས་གསུངས་ཞེས་པ་དང་། བྲམ་ཟེ་འགྲོ་བ་རྣམས་ཀྱི་རྒྱུ། །སྐྱེས་བུ་རྟག་པ་ཡིན་ཞེས་བསྒྲགས། །ཁྱོད་ཀྱིས་རྟག་པ་ཞེས་བྱ་བའི། །རྒྱུ་ནི་ཅི་ཡང་མེད་ཅེས་བསྟན། །ཞེས་པ་དང་། སེར་སྐྱ་དེ་ཉིད་རིག་པས་ནི། །གཙོ་ལས་འགྲོ་བ་སྐྱེ་བར་བཤད། །ཁྱོད་ཀྱིས་འགྲོ་བའི་སྐྱེ་བ་ནི། །ཉོན་མོངས་ལས་ལས་འབྱུང་བར་བསྒྲགས་ཞེས་གསུངས་སོ། །
གལ་ཏེ་བར་སྲིད་ལས་སྐྱེ་སྲིད་འབྱུང་ན་དེ་ལས་ཅི་འབྱུང་ཞེ་ན། སྔོན་གྱི་ལས་དང་ཉོན་མོངས་པས་ཇི་ལྟར་འཕངས་པ་བཞིན་ནུར་ནུར་པོ་དང་། མེར་མེར་པོ་དང་། ནར་ནར་པོ་དང་། འཁྲང་གྱུར་དང་། རྐང་ལག་འགྱུས་པ་སྟེ། མངལ་གྱི་གནས་སྐབས་ལྔ་དང་། དེ་ལས་སྐྱེ་མཆེད་དྲུག་དོད་པ་དང་། (དེ་ནས་མངལ་ནས་བྱུང་སྟེ།) བྱིས་པ་དང་གཞོན་ནུ་དང་དར་ལ་བབ་པ་དང་དར་ཡོལ་བ་དང་རྒས་པ་ཞེས་བྱ་བ་བཙས་པའི་གནས་སྐབས་ལྔའི་རིམ་གྱིས་ཕུང་པོ་ལྔའི་རྒྱུན་སྐྱེ་སྟེ། གནོད་སྦྱིན་དབང་པོས་ཞུས་པའི་མདོ་ལས། ཇི་ལྟར་རིམ་གྱིས་གོང་བུར་འགྱུར། །ཇི་ལྟར་ལུས་འདི་མངོན་འཕེལ་འགྱུར་ཞེས་གནོད་སྦྱིན་དབང་པོས་ཞུས་པའི་ལན་དུ་དང་པོར་ནུར་ནུར་པོ་ཡིན་ནོ། །ནུར་ནུར་པོ་ལས་མེར་མེར་སྐྱེ། །མེར་མེར་པོ་ལས་ནར་ནར་(པོ་)སྐྱེ། །ནར་ནར་པོ་ལས་འཁྲང་གྱུར་སྐྱེ། །འཁྲང་ལས་རྐང་ལག་འགྱུས་པ་དང་། །སྐྲ་སྤུ་སེན་མོ་ལ་སོགས་དང་། །དབང་པོ་གཟུགས་ཅན་རྣམས་དང་ནི། །མཚན་རྣམས་རིམ་གྱིས་སྐྱེ་བར་འགྱུར་ཞེས་གསུངས་པ་ལྟ་བུའོ། །འདི་དག་ལ་སའི་དངོས་གཞི་ལས་ནི། ནུར་ནུར་པོ་ལ་སོགས་པ་མངལ་ན་གནས་པའི་དུས་དང་། བཙས་ནས་འཁོགས་པའི་བར་སྤྱི་ལ་བཙས་པའི་དུས་དང་། །བཙས་ནས་འགྲོ་བ་དང་རྩེ་མི་ནུས་པ་མན་ཆད་བྱིས་པའི་དུས་དང་། དེ་དག་ནུས་ལ་འདོད་པ་སྤྱོད་མི་ནུས་པའི་བར་ལ་གཞོན་ནུའི་དུས་དང་། འདོད་པ་སྤྱོད་ནུས་ནས་ལོ་སུམ་ཅུ་མན་ཆད་ལང་ཚོའི་དུས་དང་། དེ་ནས་ལོ་ལྔ་བཅུ་མན་དར་ལ་བབ་པའི་དུས་དང་། དེ་ནས་ལོ་བདུན་ཅུ་མན་ཆད་རྒས་པའི་དུས་དང་། དེ་མན་ཆད་འཁོགས་པའི་དུས་སོ་ཞེས་(དུས་བརྒྱད་དུ།) བཤད་དོ། །
དེ་ལྟར་སྐྱེས་ནས་ཉོན་མོངས་པས་ལས་གསོག་ཅིང་ཡང་འཆི་སྲིད་དང་ཚེ་འདིར་བསགས་པའི་ལས་དང་ཉོན་མོངས་པ་རྣམས་ཀྱིས་འཇིག་རྟེན་ཕ་རོལ་ཀྱི་བར་སྲིད་དང་། དེ་ནས་ཡང་དེའི་སྐྱེ་བའི་སྲིད་པར་རིམ་གྱིས་སྐྱེ་བ་དག་ཏུ་འགྲོ་ལ། བདག་མེད་རྟོགས་པའི་ཡེ་ཤེས་ཀྱིས་སྲིད་པའི་རྩ་བ་མ་བཅད་པ་རྣམས་དེ་ནས་ཀྱང་འཆི་འཕོ་དང་སྐྱེ་བར་གཞོལ་བ་ཐུག་པ་མེད་པའི་ཕྱིར་སྲིད་པ་བཞིའི་འཁོར་ལོ་འཁོར་བ་ལ་ནི་ཐོག་མ་དང་ཐ་མའང་མེད་པ་ཡིན་ནོ། །(འཆི་བ་འབྱུང་བར་ཡང་མི་རྟག་པའི་ཚོམས་ལས། ཁ་ཅིག་མངལ་དུ་འཆི་འགྱུར་ཏེ། །དེ་བཞིན་ཁ་ཅིག་བཅས་པ་དང་། །དེ་བཞིན་ཁ་ཅིག་གོག་ཙམ་དང་། །དེ་བཞིན་ཁ་ཅིག་ཡོངས་རྒྱུག་དང་། །ལ་ལ་གཞོན་དང་ལ་ལ་རྒན། །དར་ལ་བབ་པར་གྱུར་པའི་མི། །རིམ་གྱིས་རབ་ཏུ་འཆིང་འགྱུར་ཏེ། །འབྲས་བུ་སྨིན་པ་ལྟུང་བ་བཞིན། །ཞེས་གསུངས་སོ། །)འདིར་སྐྱེ་བ་སྔ་མ་དང་ཕྱི་མ་སྒྲུབ་པའི་རིགས་པའང་ཤེས་པར་བྱ་སྟེ། རྣམ་འགྲེལ་དང་། ཀ་མ་ལ་ཤཱི་ལའི་ཚད་མའི་དེ་ཁོ་ན་ཉིད་བསྡུས་པའི་འགྲེལ་པ་ལ་སོགས་པར་རྒྱས་པར་བལྟའོ། །དེས་ན་ཁ་ཅིག་གིས་འཁོར་བ་ཐམས་ཅད་སྟོངས་པར་འགྱུར་རོ་ཞེས་ཟེར་བ་ནི་རིགས་པ་མ་ཡིན་ཏེ། སེམས་ཅན་ལ་མཐའ་ཡོད་པར་ཐལ་བ་ལས་བཟང་པོ་སྤྱོད་པ་ལས། ནམ་མཁའ་མཐར་ཐུག་གྱུར་པ་ཇི་ཙམ་པ། །སེམས་ཅན་མ་ལུས་མཐའ་ཡང་དེ་བཞིན་ཏེ་ཞེས་གསུངས་པའི་ཕྱིར་རོ། །འཁོར་བ་ལ་མཐའ་ཡོད་པར་འགྱུར་ཏེ། སྣོན་པ་མེད་ལ་འབྲིད་པ་ཡོད་པའི་ཕྱིར་དབུལ་པོའི་ནོར་བཞིན་ནོ་ཞེས་བྱ་བའང་རིགས་པ་མ་ཡིན་ཏེ། ཚད་མེད་པ་རྣམས་ནི་ཕྲི་ཡང་ཟད་པར་མི་འགྱུར་བའི་ཕྱིར་ཏེ་ནམ་མཁའ་ལ་སོགས་པ་བཞིན་ནོ། །དེའི་ཕྱིར་འཁོར་བ་ལ་ཐོག་མ་ནི་སྤྱི་དང་བྱེ་བྲག་ཐམས་ཅད་ལ་མེད་དེ། གང་ཐོག་མ་དང་བཅས་པའི་སེམས་ཅན་དེ་རྒྱུ་མེད་པར་ཐལ་བའི་ཕྱིར་དང་། རྒྱུ་མེད་ན་རེས་འགའ་བ་མ་ཡིན་པར་ཐལ་བའི་ཕྱིར་རོ། །མཐའ་མ་ནི་སྤྱི་ལ་མེད་ལ་བྱེ་བྲག་འགའ་ཞིག་ལ་ཡོད་དོ། །ཞེས་བྱ་བར་འདོད་དེ། ལུས་ཞིག་ཚོར་བ་བསིལ་བར་གྱུར། །འདུ་ཤེས་འགགས་ཤིང་འདུ་བྱེད་ཞི། །རྣམ་པར་ཤེས་པ་ནུབ་གྱུར་པ། །འདི་འདྲ་འདི་ནི་སྡུག་བསྔལ་མཐའ་ཞེས་གསུངས་པའི་ཕྱིར་རོ། །
འོ་ན་དགྲ་བཅོམ་པ་མྱ་ངན་ལས་འདའ་ཀ་མའི་སེམས་དེས་སེམས་ཕྱི་མ་སྐྱེད་ན་བྱེ་བྲག་ལའང་མཐའ་མེད་པར་འགྱུར་ལ། མི་བསྐྱེད་ན་དངོས་པོ་མེད་པར་འགྱུར་ཏེ། དོན་བྱེད་པས་སྟོང་པའི་ཕྱིར་རོ་ཞེ་ན། སྡེ་པ་དག་གིས་ནི་སེམས་ཀྱི་རྒྱུན་ཕྱི་མ་མི་བསྐྱེད་པའི་ཕྱིར་དང་། ཐམས་ཅད་མཁྱེན་པའི་ཡེ་ཤེས་ཀྱི་དམིགས་རྐྱེན་ལ་སོགས་པ་འགའ་ཞིག་བྱེད་པའི་ཕྱིར་སྐྱོན་གཉིས་ཀ་མེད་དོ་ཞེས་འདོད་དོ། །ཐེག་པ་གོང་མ་པ་དག་ནི་འཁོར་བ་ལས་གྲོལ་བའི་ཡེ་ཤེས་ཀྱི་རྒྱུན་ཕྱི་མ་བསྐྱེད་པའི་ཕྱིར་དང་། འཁོར་བའི་ནང་དུ་ཆུད་པའི་སེམས་ནི་མི་བསྐྱེད་པའི་ཕྱིར་སྐྱོན་དུ་གླེངས་པ་མེད་དོ་ཞེས་ལན་འདེབས་སོ། །
གཉིས་པ་རྒྱས་པར་བཤད་པ་ལ་གནས་སྐབས་པའི་རྟེན་འབྲེལ་དང་། ཀུན་ནས་ཉོན་མོངས་པ་གསུམ་དུ་བསྡུ་བ་དང་། རྒྱུ་དང་འབྲས་བུའི་དབྱེ་བ་དང་། མདོའི་དོན་བཤད་པ་དང་། རྒྱུན་ཆགས་པ་དང་། མཚོན་པའི་དཔེ་དྲུག་ལས་དང་པོ་ནི་དེ་ལྟར་ཕུང་པོའི་རྒྱུན་སྐྱེ་བ་སྔ་མ་དང་ད་ལྟར་བ་དང་ཕྱི་མའི་བདག་ཉིད་ཀྱིས་འཁོར་བའི་འཁོར་ལོ་གང་ཡིན་པ་དེ་ནི་རྟེན་ཅིང་འབྲེལ་བར་འབྱུང་བའི་ཡན་ལག་བཅུ་གཉིས་སུ་འགྱུར་རོ། །
དེ་ཡང་སྔོན་གྱི་མཐའ་དང་། ཕྱི་མའི་མཐའ་དང་། ད་ལྟར་གྱི་ཆ་འམ་སྡེ་ཚན་གསུམ་མོ། །དེ་ཡང་ཇི་ལྟར་ཞེ་ན། སྔོན་གྱི་མཐའ་མ་རིག་པ་དང་འདུ་བྱེད་གཉིས་དང་། ཕྱི་མའི་མཐར་སྐྱེ་བ་དང་རྒ་ཤི་གཉིས་དང་། བར་དུ་རྣམ་(མ་རིག་པ་ནས་རྒ་ཤིའི་བར།) ཤེས་དང་མིང་གཟུགས་དང་སྐྱེ་མཆེད་དྲུག་དང་རེག་པ་དང་ཚོར་བ་དང་སྲེད་པ་དང་ལེན་པ་དང་སྲིད་པའི་བར་སྟེ་བརྒྱད་དོ། །དེ་ཡང་འདོད་པའི་སྐྱེ་གནས་དང་པོ་གསུམ་གྱིས་བསྡུས་པའི་ཚེ་ཡོངས་སུ་རྫོགས་པ་དང་ལྡན་པ་ལ་དགོངས་པ་ཡིན་གྱི་རྫུས་སྐྱེས་དང་བར་མ་དོར་འཆི་བ་དང་ཁམས་གོང་མ་གཉིས་ལ་ནི་དེ་ལྟར་མ་ངེས་པའི་ཕྱིར་རོ། །དེ་ལྟ་བུ་དེ་དག་ཀྱང་གང་ཞེ་ན། མ་རིག་པ་ནི་སྐྱེ་བ་སྔོན་(ཚེ་སྔ་)མ་ལ་ཉོན་མོངས་པ་སྤྱོད་པའི་གནས་སྐབས་ཀྱི་ཕུང་པོ་ལྔ་(སྟེ་ཉོན་མོངས།) ཡིན་ནོ། །(མ་རིག་པ་ནི་འཕེན་བྱེད་ཡིན་པས་མཐོང་སྤང་ཡིན་ནོ་ཞེས་འདོད་ཀྱང་བདེན་པ་མ་མཐོང་བ་ལ་སྒོམ་སྤང་གི་མ་རིག་པས་ཀྱང་འཕེན་པ་དང་མཐོང་སྤང་རྫོགས་བྱེད་ཀྱི་ལས་སློང་བ་མི་འགལ། མཐོང་ནས་འཕེན་པ་ནི་འཁོར་བ་ལ་སྲེད་པ་ལོག་པའོ། །ཞེས་འཆད་དོ། །སློབ་དཔོན་ཐོགས་མེད་མཐོང་སྒོམ་གཉིས་ཀའི་སྤང་བྱར་འདོད་དོ། །)འདུ་བྱེད་དག་ནི་སྐྱེ་བ་སྔོན་(ཚེ་སྔ་)མ་ལ་(བསོད་ནམས་)དགེ་བ་ལ་སོགས་པའི་ལས་(གསུམ་)སྤྱོད་པའི་གནས་སྐབས་ཀྱི་ཕུང་པོ་ལྔ(སྟེ་ལས་སོ། །)འོ། །རྣམ་ཤེས་ནི་སྐྱེ་བ་འདིར་མའི་མངལ་དུ་ཉིང་མཚམས་སྦྱོར་བའི་སྐད་ཅིག་གིས་ཕུང་པོ་ལྔ་ཡིན་ནོ། །(རྣམ་ཤེས་དང་སྐྱེ་བ་གཉིས་སྐད་ཅིག་མ་རེ་རེ་ལ་གཞན་རྣམས་རྒྱུན་ཆགས་པ་ཡིན་ནོ། །)མིང་དང་གཟུགས་ནི་མཚམས་སྦྱར་བའི་སྐད་ཅིག་མ་དེ་ཕན་ཆད་ནས་གཟུང་ནས་སྐྱེ་མཆེད་དྲུག་དོད་ཚུན་ཆད་དེ་སྐྱེ་མཆེད་དྲུག་མ་དོད་ཀྱི་བར་ཏེ། (མངལ་གྱི་གནས་སྐབས་དང་པོ་བཞི་ཡིན་ནོ། །)དེ་ལ་མིང་ནི་ཚོར་བ་དང་འདུ་ཤེས་དང་འདུ་བྱེད་དང་ཡིད་ཀྱི་རྣམ་ཤེས་ཡིན་ཏེ། མིང་ལྟར་ཐོགས་པ་མེད་པའི་ཕྱིར་རོ། །གཟུགས་ནི་མེར་མེར་པོ་ལ་སོགས་པའོ། །(དོད་ནས་སྐྱེ་མཆེད་དྲུག་ཏུ་འཇོག་སྟེ།) སྐྱེ་མཆེད་དྲུག་པོ་དེ་ནི་ཡུལ་དང་དབང་པོ་དང་རྣམ་ཤེས་གསུམ་འདུས་ནས་ཡུལ་ལ་ལོངས་སྤྱོད་པ་ཚུན་ཆད་དེ་སྐྱེ་མཆེད་དྲུག་དོད་ནས་དབང་པོ་དང་ཡུལ་དང་རྣམ་ཤེས་གསུམ་མ་འདུས་ཀྱི་བར་གྱི་མིག་ལ་སོགས་པ་དོད་པའི་གནས་སྐབས་(སྟེ་མ་བཙས་ཀྱི་བར་རོ། །)སོ། །(གསུམ་འདུས་ནས་རེག་པར་འཇོག་སྟེ།) རེག་པ་ནི་གསུམ་འདུས་ནས་ཡུལ་ཡོངས་སུ་གཅོད་པ་ནས་གཟུང་སྟེ་བདེ་བ་དང་སྡུག་བསྔལ་དང་(སོགས་པ།) བཏང་སྙོམས་ཀྱི་རྒྱུ་ཡུལ་ཡིད་དུ་འོང་བ་དང་མི་འོང་བ་དང་བར་མ་ལ་བླང་དོར་ཤེས་ནུས་པ་ཚུན་ཆད་དོ། །དེ་ཡང་གསུམ་འདུས་ནས་ཚོར་བ་གསུམ་གྱི་རྒྱུ་ཡོངས་སུ་གཅོད་པར་མི་ནུས་པའི་བར་གྱི་ཕུང་པོ་ལྔའོ། །(སྟེ་སྡུག་བསྔལ་གྱི་རྒྱུར་ཤེས་ན་མེ་ལ་རེག་པའི་དུས་སོགས་སོ། །)ཚོར་(ཡུལ་ལོངས་སྤྱོད་ནུས་ནས་ཚོར་བར་འཇོག་སྟེ།) བ་ནི་ཚོར་བ་གསུམ་གྱི་རྒྱུ་སྤྱོད་ནུས་པ་དེ་ནས་བཟུང་ནས་འཁྲིག་པ་ལ་སྤྱོད་མི་ནུས་པ་ཚུན་ཆད་དེ་དངོས་སུ་མི་སྤྱོད་པའི་བར་གྱི་ཕུང་པོ་ལྔའོ། །(འཁྲིག་སྦྱོད་ནུས་ནས་སྲེད་པར་འཇོག་སྟེ།) སྲེད་པ་ནི་འདོད་ཡོན་གྱི་ལོངས་སྤྱོད་དང་འཁྲིག་པ་ལ་སྤྱོད་ཅིང་ཡུལ་འཚོལ་བ་ལ་མ་ཞུགས་ཀྱི་བར་གྱི་ཆགས་པ་ཅན་གྱི་ཕུང་པོ་ལྔའོ། །ཉེ་བར་ལེན་པ་ནི་སྲེད་པའི་ཡུལ་དུ་གྱུར་པའི་ལོངས་སྤྱོད་རྣམས་ཐོབ་པར་བྱ་བའི་ཕྱིར་ཡོངས་སུ་རྒྱུག་པའི་གནས་སྐབས་ཀྱི་ཕུང་པོ་ལྔའོ། །(དེ་ནི་ཞིང་ལས་དང་གཉེན་ཐབས་ལ་སོགས་པའི་དུས་ཀྱི་སྲིད་པ་ཕྱི་མའི་ལས་སློང་བྱེད་ཚོར་བའི་རྒྱུ་ལ་དམིགས་པའི་འདོད་ཆགས་ཀྱི་ཆར་གཏོགས་པའི་ཕུང་པོ་ལྔ་ཡིན་ནོ། །)དེ་ནས་དེ་ལྟར་རྒྱུག་པ་དེ་ཡང་སྲིད་སྐྱེ་བ་ཕྱི་མའི་བདེ་བ་དང་སྡུག་བསྔལ་ལ་སོགས་པའི་འབྲས་བུ་འབྱུང་བར་འགྱུར་བའི་རྒྱུ་ལས་དགེ་མི་དགེ་བྱེད་པའི་ཕུང་པོ་ལྔ་པོ་དེ་ཉིད་ནི་སྲིད་པ་ཡིན་ནོ། །འདི་ནས་ཤི་འཕོས་ནས་སྐྱེ་བ་ཕྱི་(བ་སྟེ་འཚོལ་བ་ལ་ཞུགས་ནས་ཐམས་ཅད་དུ་རྒྱུ།) མར་ཉིང་མཚམས་སྦྱོར་བ་དེ་ནི་སྐྱེ་བ་ཡིན་ལ།
འདི་ལ་རྣམ་ཤེས་ཀྱི་ཡན་ལག་(འགྲེལ་པ་ལས་འདི་ལ་རྣམ་པར་ཤེས་པའི་ཡན་ལག་གང་ཡིན་པ་དེ་ནི་ཚེ་གཞན་དུ་སྐྱེ་བ་ཡིན་ནོ་ཞེས་པ་དང་། འདི་ལ་ཡན་ལག་བཞི་པོ་མིང་དང་གཟུགས་དང་སྐྱེ་མཆེད་དྲུག་དང་རེག་པ་དང་ཚོར་བ་གང་དག་ཡིན་པ་དེ་དག་ཉིད་གཞན་དུ་རྒ་ཤི་ཡིན་ནོ་ཞེས་འབྱུང་བས།) གང་ཡིན་པ་དེ་ནི་ཚེ་གཞན་དུ་སྐྱེ་བ་ཡིན་ནོ། །ཞེས་འགྲེལ་པ་ལས་འབྱུང་ངོ་། །ཕྱི་མའི་གནས་སྐབས་ཀྱི་མིང་གཟུགས་ནས་ཚོར་བའི་བར་བཞི་ནི་(ཚེ་འདི་གཞལ་བའི་)རྒ་ཤི་ཡིན་ནོ། །དེ་ལྟ་བུའི་རྟེན་འབྲེལ་དེ་ཡང་སྐད་ཅིག་མ་དང་། རྒྱུན་ཆགས་པ་དང་། འབྲེལ་པ་ཅན་དང་། གནས་སྐབས་པ་དང་བཞིར་གསུངས་པ་ལས་དེ་ལྟར་བསྟན་པ་འདི་ནི་གནས་སྐབས་པའི་རྟེན་ཅིང་འབྲེལ་པར་འབྱུང་བར་འདོད་པ་ཡིན་ནོ། །ལོ་ཞེས་བྱ་བ་ནི་བྱེ་བྲག་ཏུ་སྨྲ་བའི་འདོད་པ་སྟེ་འདིའི་དཔྱད་པ་ནི་འོག་ཏུ་བྱའོ། །
གལ་ཏེ་ཕུང་པོ་ལྔ་པ་ཉིད་དུ་ཐམས་ཅད་ངེས་པ་ཡིན་ན་ཅིའི་ཕྱིར་མ་རིག་པ་ལ་སོགས་པར་བསྟན་ཞེ་ན། གནས་སྐབས་དེ་ན་མ་རིག་པ་གཙོ་བོ་ཡིན་པའི་ཕྱིར་ན་གཙོ་བོའི་མིང་གིས་ཡན་ལག་བསྒྲགས་པ་ཡིན་ཏེ་དཔུང་གི་ཚོགས་ཡན་ལག་བཞི་དང་ལྡན་པ་ལའང་རྒྱལ་པོ་བྱུང་ངོ་ཞེས་བརྗོད་པ་བཞིན་ནོ། །དེ་བཞིན་དུ་འདུ་བྱེད་ལ་སོགས་པ་ལའང་ཤེས་པར་བྱའོ། །དེ་ཉིད་ནི་འབྲེལ་བ་ཅན་དང་། རྒྱུན་ཆགས་པའི་རྟེན་འབྲེལ་ཡང་ཡིན་ཏེ། རྒྱུ་དང་འབྲས་བུར་འབྲེལ་བའི་ཕྱིར་དང་། ཚེ་གསུམ་པར་ཚད་མེད་པར་རྒྱུན་ཆགས་སུ་འབྱུང་བའི་ཕྱིར་རོ། །སྐད་ཅིག་མའི་རྟེན་འབྲེལ་ནི་སྲོག་གཅོད་པ་ལ་སོགས་པའི་ཚེ་ཀུན་ནས་སློང་བ་རྨོངས་པ་ནི་མ་རིག་པ་དང་། སེམས་པ་ལས་འདུ་བྱེད་དང་། ཡུལ་རིག་པ་རྣམ་ཤེས་དང་། དེ་དང་ལྷན་ཅིག་འབྱུང་བའི་ཕུང་པོ་བཞི་མིང་དང་གཟུགས་དང་། མིག་གི་དབང་པོ་ལ་སོགས་པ་སྐྱེ་མཆེད་དྲུག་དང་། གསུམ་འདུས་པ་རེག་པ་དང་། རེག་པ་ཉམས་སུ་མྱོང་བ་ཚོར་བ་དང་། ཤ་ལ་སོགས་པ་ལ་ཆགས་པ་སྲེད་པ་དང་། དེ་དང་མཚུངས་པར་ལྡན་པའི་ངོ་ཚ་མེད་པ་ལ་སོགས་པའི་ཀུན་ནས་དཀྲིས་པ་རྣམས་ལེན་པ་དང་། དེས་ཀུན་ནས་བསླང་བའི་ལུས་ངག་གི་ལས་ནི་སྲིད་པ་དང་། སྔར་མེད་པ་འབྱུང་བ་སྐྱེ་བ་དང་། ཡོངས་སུ་སྨིན་པ་རྒ་བ་དང་། དེ་ཞིག་པ་ཤི་བ་ཞེས་བྱ་བ་རྣམས་སྐད་ཅིག་མ་གཅིག་ལ་ཚང་བར་ཡོད་པའི་ཕྱིར་རོ། །གལ་ཏེ་སེམས་ཅན་མ་ཡིན་པར་སྟོན་པ་ས་བོན་ལས་མྱུ་གུ་ལ་སོགས་པ་འབྱུང་བའང་རྟེན་ཅིང་འབྲེལ་བར་འབྱུང་བ་མ་ཡིན་ནམ། སེམས་ཅན་དུ་སྟོན་པ་མ་རིག་པ་ལ་སོགས་པ་ཁོ་ན་ཅིའི་ཕྱིར་རྟེན་ཅིང་འབྲེལ་པར་འབྱུང་བར་གསུངས་ཤེ་ན། སྔོན་གྱི་མཐའ་དང་ཕྱི་མའི་མཐའ་དང་བར་གསུམ་པོ་དག་ལ་བདག་འདས་པའི་དུས་ན་བྱུང་བར་གྱུར་ཏོ། །མ་འོངས་པ་ན་འབྱུང་བ་འགྱུར་རོ། །ད་ལྟར་བདག་ཟས་ནི་འདི་ལྟ་བུ་ཞིག་ཟའོ། །གོས་ནི་འདི་ལྟ་བུ་ཞིག་གྱོན་ནོ་ཞེས་པ་དང་། ཅི་བདག་འདས་པ་ན་བྱུང་ངམ། མ་བྱུང་ངམ། མ་འོངས་པ་ན་འབྱུང་ངམ། མི་འབྱུང་ངམ། ད་ལྟར་གྱི་འདི་ཇི་ལྟ་བུ་ཞིག་སྙམ་དུ་ཐེ་ཚོམ་སྐྱེ་བས་དེ་ལྟ་བུའི་ཐེ་ཚོམ་དང་དེའི་རྒྱུ་བདག་ཏུ་རྨོངས་པ་རྣམ་པར་བཟློག་པའི་ཕྱིར་རོ། །
གཉིས་པ་ཀུན་ནས་ཉོན་མོངས་པ་གསུམ་དུ་བསྡུ་བ་ནི་རྟེན་འབྲེལ་དེ་དག་ལས་ཉོན་མོངས་པ་ནི་མ་རིག་པ་དང་སྲེད་པ་དང་ལེན་པ་གསུམ་མོ། །ལས་ནི་འདུ་བྱེད་དང་སྲིད་པ་གཉིས་སོ། །ལས་དང་ཉོན་མོངས་པའི་རྟེན་ཡིན་པའི་ཕྱིར་གཞི་ནི་རྣམ་ཤེས་ལ་སོགས་པ་(གཞན་)ལྔ་དང་སྐྱེ་བ་དང་རྒ་ཤི་གཉིས་ཏེ་བདུན་ནོ། །ཇི་ལྟར་ཡན་ལག་བདུན་པོ་གཞི་ཡིན་པ་དེ་བཞིན་དུ་འབྲས་བུའི་ཡན་ལག་ཀྱང་ཡིན་ནོ། །ལས་དང་ཉོན་མོངས་པ་དེ་དག་ནི་རྒྱུའི་ཡན་ལག་ཀྱང་ཡིན་པས་ཐམས་ཅད་ཀྱང་རྒྱུ་དང་འབྲས་བུའི་ཡན་ལག་གཉིས་སུ་འགྱུར་རོ། །དེའི་ཕྱིར་སློབ་དཔོན་ཀླུ་སྒྲུབ་ཀྱིས་ཀྱང་རྟེན་འབྱུང་ལས། བཅུ་གཉིས་ཆོས་ནི་གསུམ་དུ་འདུས། དང་པོ་བརྒྱད་པ་དགུ་ཉོན་མོངས། །གཉིས་དང་བཅུ་པ་ལས་ཡིན་ཏེ། །ལྷག་མ་བདུན་ཡང་སྡུག་བསྔལ་ཡིན་ཞེས་བཤད་དོ། །
དེས་ན་རྟེན་ཅིང་འབྲེལ་པར་འབྱུང་བ་ནི་རྣམ་པ་གཉིས་ཏེ། སྔོན་གྱི་མཐའ་པ་དང་། ཕྱི་མའི་མཐའ་པའོ། །དེ་དག་རེ་རེ་ལ་ཡང་རྒྱུ་དང་འབྲས་བུ་གཉིས་གཉིས་ཡོད་པ་ལས་མ་རིག་པ་དང་འདུ་བྱེད་ནི་སྔོན་གྱི་མཐའ་པའི་རྒྱུ་དང་། རྣམ་ཤེས་ནས་ཚོར་བའི་བར་ནི་འབྲས་བུ་ཡིན་ལ། སྲེད་ལེན་སྲིད་པ་གསུམ་ནི་ཕྱི་མའི་མཐའ་པའི་རྒྱུ་དང་། སྐྱེ་བ་རྒ་ཤི་ནི་འབྲས་བུ་ཡིན་ནོ། །ཀུན་ལས་བཏུས་ལས་ནི། འདུ་བྱེད་གང་ཡིན་པ་དག་དང་། རྣམ་པར་ཤེས་པ་གང་ཡིན་པ་དང་། སྲེད་པ་གང་ཡིན་པ་འདི་ནི་ལས་ཀྱི་ཀུན་ནས་ཉོན་མོངས་པར་བསྡུའོ་ཞེས་ཀུན་གཞི་རྣམ་ཤེས་ལས་ཀྱི་བག་ཆགས་འཛིན་པའི་ཆ་ནས་ལས་སུ་བཤད་དོ། །དེ་བཞིན་དུ་དེ་ཉིད་ལས། འཕེན་པའི་ཡན་ལག་དང་། འཕངས་པའི་ཡན་ལག་དང་། མངོན་པར་འགྲུབ་པར་བྱེད་པའི་ཡན་ལག་དང་། མངོན་པར་གྲུབ་པའི་ཡན་ལག་དང་བཞིར་བཤད་དེ། དེ་ལ་མ་རིག་པ་དང་འདུ་བྱེད་དང་རྣམ་ཤེས་གསུམ་ནི་འཕེན་པའི་ཡན་ལག་ཡིན་ཏེ། མ་རིག་པས་ཀུན་ནས་བསླང་བའི་ལས་ཀྱི་བག་ཆགས་སེམས་ལ་བསྒོས་ནས་མིང་གཟུགས་ལ་སོགས་པ་འཕེན་པའི་ཕྱིར་རོ། །མིང་གཟུགས་ནས་ཚོར་བའི་བར་བཞི་ནི་འཕངས་པའི་ཡན་ལག་ཡིན་ཏེ། དེ་དག་ནི་ལས་ཀྱི་བག་ཆགས་ལས་སྐྱེས་པས་རྣམ་ཤེས་ཀྱིས་དངོས་དང་སྔ་མ་གཉིས་ཀྱིས་བརྒྱུད་ནས་འཕངས་པའི་ཕྱིར་རོ། །སྲེད་ལེན་སྲིད་པ་གསུམ་ནི་མངོན་པར་འགྲུབ་པར་བྱེད་པའི་ཡན་ལག་ཡིན་ཏེ། སྐྱེ་བ་དངོས་སུ་འགྲུབ་པར་བྱེད་པའི་ཕྱིར་རོ། །སྐྱེ་བ་དང་རྒ་ཤི་གཉིས་ནི་མངོན་པར་གྲུབ་པའི་ཡན་ལག་ཡིན་ཏེ། སྲེད་ལེན་སྲིད་པ་གསུམ་ལས་གྲུབ་པའི་ཕྱིར་རོ། །
གསུམ་པ་རྒྱུ་དང་འབྲས་བུའི་དབྱེ་བ་ནི་གལ་ཏེ་རྟེན་ཅིང་འབྲེལ་བར་འབྱུང་བ་རྒྱུ་དང་འབྲས་བུར་འབྲེལ་བ་ལ་ཁྱད་པར་མེད་བཞིན་དུ་སྔོན་གྱི་མཐའ་པའི་རྒྱུ་ནི་གཉིས་སུ་བསྡུས་ཤིང་འབྲས་བུ་ནི་ལྔར་ཕྱེ་ལ། ཕྱི་མའི་མཐའ་པའི་རྒྱུ་ནི་གསུམ་དུ་ཕྱེ་ལ་འབྲས་བུ་ནི་གཉིས་སུ་བསྡུས་ཤེ་ན། སྔོན་གྱི་མཐའ་པའི་འབྲས་བུ་ནི་རྣམ་པ་ལྔར་ཕྱེ་ཞེ་ན། སྐྱེ་བ་སྔ་ཕྱི་གཉིས་ཀྱི་གོ་རིམ་བཞིན་དུ་རྒྱུ་དང་འབྲས་བུ་མདོར་བསྡུས་ཏེ་བསྟན་པ་ནི་བར་མ་འདིར་འབྲས་བུ་ལ་རྣམ་པ་ལྔར་ཕྱེ་བ་དང་རྒྱུ་ལ་གསུམ་དུ་ཕྱེ་བའི་རྗེས་སུ་དཔག་པ་ལས་ཕྱི་མའི་སྐྱེ་བ་དང་རྒ་ཤི་ཡང་རྣམ་པ་ལྔར་རྗེས་སུ་དཔག་པར་ནུས་ལ། སྔ་མའི་མ་རིག་པ་དང་འདུ་བྱེད་ཀྱང་རྣམ་པ་གསུམ་དུ་རྗེས་སུ་དཔག་པར་ནུས་པའི་ཕྱིར་རོ། །དེ་བཞིན་དུ་སྔ་མའི་རྒྱུ་དང་ཕྱི་མའི་འབྲས་བུ་མདོར་བསྡུས་ཏེ་བསྟན་པའི་རྗེས་སུ་དཔག་པ་ལས་བར་མའི་འབྲས་བུ་དང་རྒྱུ་མདོར་བསྡུ་བར་ཡང་རྗེས་སུ་དཔག་པར་ནུས་སོ། །དེའི་ཕྱིར་རྒྱུ་དང་འབྲས་བུ་མདོར་བསྡུ་བ་དང་དབྱེ་བ་རྒྱས་པར་རྟོགས་པའི་དོན་དུ་དེ་ལྟར་བསྟན་པ་ཡིན་གྱི་དོན་ལ་ནི་ཁྱད་པར་མེད་དོ་ཞེས་ཤེས་པར་བྱའོ། །གལ་ཏེ་དེ་ལྟ་ནའང་མ་རིག་པ་ལ་རྒྱུ་ཡོད་ཅིང་རྒ་ཤི་ལ་འབྲས་བུ་ཡོད་ན་ནི་རྟེན་ཅིང་འབྲེལ་པར་འབྱུང་བ་བཅུ་གཉིས་སུ་ངེས་པར་མི་འགྱུར་ལ། མེད་ན་མ་རིག་པ་རྒྱུ་མེད་པ་དང་། རྒ་ཤི་དོན་བྱེད་པས་སྟོང་པ་དང་། འཁོར་བ་ཐོག་མཐའ་ཅན་དུའང་འགྱུར་རོ་ཞེ་ན། བཤད་པ་ཉོན་མོངས་པ་སྲེད་པ་ལས་ཉོན་མོངས་པ་ལེན་པ་འབྱུང་བ་དང་། ཉོན་མོངས་པ་ལེན་པ་དང་མ་རིག་པ་ལས་བྱ་བ་སྟེ་ལས་སྲིད་པ་དང་འདུ་བྱེད་འབྱུང་བ་ཉིད་དོ། །ལས་སྲིད་པ་དང་འདུ་བྱེད་དེ་(བྱ་བ།) དེ་ལས་ནི་གཞི་འབྱུང་སྟེ། འདུ་བྱེད་ལས་རྣམ་ཤེས་དང་སྲིད་པ་ལས་སྐྱེ་བ་འབྱུང་བའི་ཕྱིར་རོ། །གཞི་དེ་དག་ལས་ཀྱང་གཞི་འབྱུང་སྟེ། རྣམ་ཤེས་ལས་མིང་དང་གཟུགས་ནས་རེག་པ་ལས་ཚོར་བ་འབྱུང་བའི་བར་དང་སྐྱེ་བ་ལས་རྒ་ཤི་འབྱུང་བའི་ཕྱིར་རོ། །གཞི་དེ་དག་ལས་ཀྱང་ཉོན་མོངས་པ་སྐྱེ་སྟེ། ཚོར་བ་ལས་སྲེད་པ་དང་། ཚོར་བའི་བར་ནི་རྒ་ཤི་ཡིན་ལ་སྲེད་པ་མ་རིག་པ་ཡིན་པས་རྒ་ཤི་ལས་མ་རིག་པ་འབྱུང་བའི་ཕྱིར་རོ། །དེ་ལྟ་ན་དེ་ལྟ་བུ་འདི་ནི་སྲིད་པའི་ཡན་ལག་བཅུ་གཉིས་ཀྱི་ལུགས་རྣམ་པར་བཞག་པ་ཡིན་པས། དེའི་ཕྱིར་སྐྱོན་གཉིས་ཀ་ལས་གྲོལ་ཏེ། མ་རིག་པའི་རྒྱུ་ནི་རྒ་ཤི་ཡིན་པའི་ཕྱིར་དང་། རྒ་ཤིའི་འབྲས་བུའང་མ་རིག་པ་ཡིན་པའི་ཕྱིར་རོ། །དེའི་ཕྱིར་སྔོན་དང་ཕྱི་མའི་མཐའ་མེད་པར་རྟེན་ཅིང་འབྲེལ་པར་འབྱུང་བ་ཡན་ལག་བཅུ་གཉིས་ཉིད་འཁོར་བ་ཡིན་ཏེ།
རྟེན་འབྱུང་ལས། གསུམ་པོ་དག་ལས་གཉིས་འབྱུང་སྟེ། །གཉིས་ལས་བདུན་འབྱུང་བདུན་ལས་ཀྱང་། །གསུམ་འབྱུང་སྲིད་པའི་འཁོར་ལོ་དེ། །ཉིད་ནི་ཡང་དང་ཡང་དུ་འཁོར། །འགྲོ་ཀུན་རྒྱུ་དང་འབྲས་བུ་སྟེ། །འདི་ལས་སེམས་ཅན་གཞན་ཅིའང་མེད་ཅེས་པ་དང་། རིན་པོ་ཆེའི་ཕྲེང་བ་ལས་ཀྱང་། ལམ་གསུམ་ཐོག་མཐའ་དབུས་མེད་པར། །འཁོར་བའི་དཀྱིལ་འཁོར་འགལ་མེ་ཡི། །འཁོར་ལོ་ལྟ་བུར་ཕན་ཚུན་གྱི། །རྒྱུ་ཅན་འདི་ནི་འཁོར་བར་འགྱུར། །ཞེས་འབྱུང་བའི་ཕྱིར་རོ། །དེ་ལྟར་ན་རྟེན་ཅིང་འབྲེལ་པར་འབྱུང་བའི་རྒྱུ་ནི་ལྔ་དང་འབྲས་བུ་ནི་བདུན་ཡིན་ནོ། །ཀུན་ལས་བཏུས་ལས་ནི། རྣམ་ཤེས་ནི་ས་བོན་གྱི་ཀུན་གཞི་ཡིན་པས་རྒྱུ་ཡིན་པའི་ཕྱིར་རྒྱུ་དྲུག་དང་འབྲས་བུ་དྲུག་ཏུ་བཤད་ལ། རྟེན་ཅིང་འབྲེལ་པར་འབྱུང་བའི་མདོའི་འགྲེལ་པར་ནི་མིང་གཟུགས་ལ་སོགས་པ་བཞི་ཡང་ས་བོན་གྱི་ཀུན་གཞི་ཡིན་པའི་ཕྱིར་རྒྱུ་བཅུ་དང་འབྲས་བུ་གཉིས་ཡིན་པར་བཤད་མོད་ཀྱི། འདིར་རྒྱུ་ནི་ལས་དང་ཉོན་མོངས་པ་ཡིན་ལ་འབྲས་བུ་ནི་སྡུག་བསྔལ་གྱི་གཞིའི་དབང་དུ་བྱས་པ་ཡིན་པས་ན་མིང་གཟུགས་ལ་སོགས་པ་ནི་གཞི་ཉིད་དུ་ངེས་པའི་ཕྱིར་རྒྱུའི་ཡན་ལག་མ་ཡིན་ནོ། །གལ་ཏེ་འབྲས་བུ་བསྐྱེད་པ་ཙམ་གྱིས་དེ་དག་རྒྱུའི་ཡན་ལག་ཏུ་སྨྲ་ན་ནི་སྐྱེ་བ་དང་རྒ་ཤིའང་དེ་ལྟར་ཐལ་བའི་ཕྱིར་རོ། །དེའི་ཕྱིར་སྔ་མ་ཁོ་ན་ལེགས་སོ། །གལ་ཏེ་ཉོན་མོངས་པའི་ཡན་ལག་ཏུ་མ་རིག་པ་དང་། སྲེད་ལེན་ཁོ་ན་སྨོས་ཀྱི་ཁོང་ཁྲོ་ལ་སོགས་པ་ཅིའི་ཕྱིར་མ་སྨོས་ཤེ་ན། མ་རིག་པ་ནི་ཉོན་མོངས་པ་ཐམས་ཅད་ཀྱི་རྩ་བ་ཡིན་པའི་ཕྱིར་དེ་སྨོས་ན་གཞན་དག་ཀྱང་མཚོན་པར་འགྱུར་བའི་ཕྱིར་ཏེ། དོན་ནི་སྐྱེ་བ་སྔ་མའི་ཉོན་མོངས་པ་ཐམས་ཅད་རྒྱུ་ཡིན་པའི་ཕྱིར་རོ། །སྲེད་ལེན་ནི་སྐྱེ་བའི་སྲིད་པར་ཉིང་མཚམས་སྦྱོར་བའི་གཙོ་བོ་ཡིན་པའི་ཕྱིར་དེ་དག་བསྟན་པས་གཞན་ཐམས་ཅད་ཀྱང་མཚོན་པའི་ཕྱིར་ཡིན་ནོ། །
བཞི་པ་མདོའི་དོན་བཤད་པ་ནི་མདོ་ལས། དགེ་སློང་དག་ཁྱེད་ལ་རྟེན་ཅིང་འབྲེལ་པར་འབྱུང་བ་དང་། རྟེན་ཅིང་འབྲེལ་པར་བྱུང་བའི་ཆོས་རྣམས་ཀྱང་བསྟན་པར་བྱའོ་ཞེས་གསུངས་པའི་དོན་ཅི་ཞེ་ན། བསྟན་བཅོས་ལས་ནི་གཉིས་ཀའང་འདུས་བྱས་ཀྱི་ཆོས་ཐམས་ཅད་ཀྱི་རྣམ་གྲངས་ཡིན་པར་ཁྱད་པར་ཅུང་ཟད་ཀྱང་མེད་པར་བཤད་མོད་ཀྱི་འོན་ཀྱང་གང་ལ་ལྟོས་ནས་རྒྱུ་ཡིན་པ་དེ་དེ་ལ་ལྟོས་ནས་འབྲས་བུ་མ་ཡིན་ལ། གང་ལ་ལྟོས་ནས་འབྲས་བུ་ཡིན་པ་དེ་དེ་ལ་ལྟོས་ནས་རྒྱུ་མ་ཡིན་པས་མདོ་ལས། དེ་ལྟར་གསུངས་པ་འདིར་ནི་རྟེན་ཅིང་འབྲེལ་པར་འབྱུང་བ་ནི་ཕྱི་མ་སྐྱེད་པའི་རྒྱུ་(འི་ཡན་ལག་ལྔ་)ཡིན་ཏེ་འདི་ལས་འབྲས་བུ་འབྱུང་བའི་ཕྱིར་རོ། །རྟེན་ཅིང་འབྲེལ་པར་བྱུང་བ་ནི་སྔ་མ་ལས་སྐྱེས་པའི་འབྲས་བུ་ཡིན་པར་འདོད་དེ། རྒྱུ་ལས་བྱུང་བའི་ཕྱིར་རོ། །ཅིའི་ཕྱིར་དེ་དག་ལ་རྟེན་ཅིང་འབྲེལ་པར་འབྱུང་བ་ཞེས་བྱ་ཞེ་ན། འདིར་སམ་སྐྲི་ཏའི་སྐད་ལ་པྲ་ཏཱི་ཏྱ་ས་མུད་པཱ་ད་ཞེས་འབྱུང་སྟེ། དེ་ལ་ཉེར་བསྒྱུར་པྲ་ཏི་ནི་ཕྲད་པ་དང་རྟེན་པའོ། །སྐད་ཀྱི་དབྱིངས་ཨི་ཏི་ནི་འགྲོ་བ་ཡིན་ཡང་ཉེར་བསྒྱུར་པྲ་ཏི་དང་འབྲེལ་བ་ན་ནས་དང་ཅིང་ལ་སོགས་པར་ཡོངས་སུ་འགྱུར་བའི་ཕྱིར་ཕྲད་ཅིང་ཞེས་བྱ་བ་ཡིན་ཏེ། སྒྲ་པ་དག་གིས། སྐད་ཀྱི་དབྱིངས་ནི་སྟོབས་ལྡན་ཡང་། །ཉེ་བར་བསྒྱུར་བས་ཟིལ་གནོན་འགྱུར། །གང་གཱའི་ཆུ་ནི་མངར་མོད་ཀྱི། །རྒྱ་མཚོའི་ཆུ་ཡིས་ཇི་བཞིན་ནོ། །ཞེས་བཤད་པ་ལྟ་བུའོ། །
སྐད་ཀྱི་དབྱིངས་པཱ་ད་ཡོད་པ་ཡིན་ཡང་ཉེར་བསྒྱུར་ས་མུད་གོང་ན་ཡོད་པ་ནི་འབྱུང་བ་ལ་འཇུག་པའི་ཕྱིར་རྒྱུ་རྐྱེན་དང་འབྲས་བུ་ཕྲད་ནས་ཡང་དག་པར་འབྱུང་བ་ཡིན་ནོ། །ཕྲད་པའི་དོན་ཡང་བར་མ་ཆད་པར་འབྱུང་བ་ཡིན་ལ། ཕྲད་ནས་འབྱུང་བའང་ཕྲད་པ་ཉིད་ཀྱི་ཚེ་འབྱུང་བ་ཡིན་ཏེ་ཁ་གདངས་ནས་ཉལ་ལོ་ཞེས་བརྗོད་པ་བཞིན་ནོ། །དེའི་ཕྱིར་བརྡ་སྤྲོད་པ་པས་མེད་པ་ཕྲད་པར་མི་རུང་བའི་ཕྱིར་དང་། ཡོད་པ་ཕྲད་ནའང་དེའི་རྗེས་ལ་འབྱུང་བ་མི་འཐད་དེ། གྲུབ་ཟིན་པའི་ཕྱིར་དང་། ཕྲད་ནས་འབྱུང་བའང་རིམ་གྱིས་པའི་སྒྲ་ཡིན་པའི་ཕྱིར་ཕྲད་ནས་འབྱུང་བའི་སྒྲ་ནི་སྐྱོན་དང་བཅས་སོ་ཞེས་སྨྲས་པའང་བསལ་བ་ཡིན་ནོ། །ཁ་ཅིག་གིས་འདིར་རྟེན་ཅིང་འབྲེལ་པར་འབྱུང་བའི་ས་མཚུངས་དཔྱད་མོད་ཀྱི། འདིའི་ལུགས་ནི་ཚེ་གསུམ་དང་ཆ་གསུམ་དུ་བསྟན་པ་ཉིད་ཀྱི་ཤུགས་ལ་ཤེས་པའི་ཕྱིར་དང་། རྣམ་པར་དཔྱད་པ་དེ་ཡང་གཞན་གྱི་ལུགས་ཡིན་པའི་ཕྱིར་བདག་གིས་མ་བྱས་སོ། །ཡང་མདོ་ལས། འདི་ཡོད་ན་འདི་འབྱུང་། འདི་སྐྱེས་པས་འདི་སྐྱེའོ་ཞེས་རྣམ་གྲངས་གཉིས་གསུངས་པ་ནི་མ་རིག་པ་ལ་སོགས་པ་འདི་ཡོད་ན་འདུ་བྱེད་ལ་སོགས་པ་འདི་འབྱུང་གི་མེད་ན་ནི་མི་འབྱུང་ལ། དེ་བཞིན་དུ་འདི་སྐྱེས་ན་འདི་སྐྱེའི་འདི་མ་སྐྱེས་ན་ནི་འདི་མི་སྐྱེའོ་ཞེས་ངེས་པར་གཟུང་བའི་དོན་དང་། མ་རིག་པ་འདི་ཡོད་ན་འདུ་བྱེད་འདི་འབྱུང་ལ། འདུ་བྱེད་འདི་སྐྱེས་པས་རྣམ་པར་ཤེས་པ་འདི་སྐྱེའོ། །ཞེས་བྱ་བ་ལ་སོགས་པ་ཡན་ལག་བརྒྱུད་པར་བསྟན་པའི་ཕྱིར་རམ། སྔོན་གྱི་མཐའ་འདི་ཡོད་ན་ད་ལྟར་གྱི་མཐའ་འདི་འབྱུང་ལ། ད་ལྟར་གྱི་མཐའ་འདི་སྐྱེས་པས་ཕྱི་མའི་མཐའ་འདི་སྐྱེའོ་ཞེས་ཚེ་བརྒྱུད་པ་གཉིས་བསྟན་པའི་ཕྱིར་རམ། དེ་དག་གཉིས་ཀ་ལྟར་ན་ཡང་དངོས་དང་བརྒྱུད་པའི་རྒྱུ་དང་འབྲས་བུར་བསྟན་པའི་ཕྱིར་ཏེ། མ་རིག་པའི་རྐྱེན་གྱིས་འདུ་བྱེད་ཅེས་བྱ་བ་ལ་སོགས་པ་ནི་རྒྱས་པར་བཤད་པ་ཡིན་ནོ། །རྣམ་པ་གཅིག་ཏུ་འདི་ཡོད་ན་འདི་འབྱུང་བས་ནི་སེམས་པ་མེད་པའི་རྒྱུ་ལ་ལྟོས་པ་དང་། འདི་སྐྱེས་པས་འདི་སྐྱེ་བས་ནི་མི་རྟག་པའི་རྒྱུ་ལ་ལྟོས་པ་དང་། མ་རིག་པའི་རྐྱེན་གྱིས་འདུ་བྱེད་ལ་སོགས་པས་ནི་ནུས་པའི་རྒྱུ་ལ་ལྟོས་པར་བསྟན་པའི་ཕྱིར་རོ། །རྣམ་པ་གཅིག་ཏུ་ན་ལྷན་ཅིག་པ་དང་དེ་མ་ཐག་པ་དང་འགགས་ནས་ཡུན་རིང་དུ་ལོན་པའང་རྒྱུར་འགྱུར་རོ། །ཞེས་བསྟན་པའི་ཕྱིར་འདི་ཡོད་ན་ཞེས་པ་ལ་སོགས་པ་གསུངས་པ་ཡིན་ནོ། །ཐམས་ཅད་ཀྱི་ལྟར་ནའང་རྒྱུ་མེད་པ་དང་བདག་རྟག་པ་ལ་སོགས་པ་མི་མཐུན་པའི་རྒྱུ་དགག་པའི་ཕྱིར་གསུངས་པ་ཡིན་ནོ། །
ལྔ་པ་རྒྱུན་ཆགས་པའི་རྟེན་འབྲེལ་འཆད་པ་ནི་མདོ་སྡེ་པ་ལ་སོགས་པ་ན་རེ་མ་རིག་པ་ལ་སོགས་པ་གནས་སྐབས་ཕུང་པོ་ལྔ་པ་ནི་མ་ཡིན་ཏེ། མདོ་ལས། མ་རིག་པ་གང་ཞེ་ན། སྨྲས་པ། སྔོན་གྱི་མཐའ་མི་ཤེས་པ་གང་ཡིན་པའོ་ཞེས་པ་ལ་སོགས་པ་མ་རིག་པ་ནི་མི་ཤེས་པའི་སེམས་ལས་བྱུང་བ་དང་། འདུ་བྱེད་ནི་སེམས་པ་ལ་སོགས་པ་ཁོ་ན་ལ་གསུངས་པའི་ཕྱིར་རོ། །མ་རིག་པ་ལ་སོགས་པ་གཙོ་ཆེ་བའང་མ་ཡིན་ཏེ། རྣམ་ཤེས་ཁོ་ན་གཙོ་ཆེ་བའི་ཕྱིར་དེ་འབའ་ཞིག་སྟོན་པར་ཐལ་བའི་ཕྱིར་རོ། །ཤས་ཆེ་བ་ལ་གཙོ་བོའི་སྒྲས་བརྗོད་ན་ཚེ་སྔ་མ་ལ་མ་རིག་པ་ཁོ་ན་ཤས་ཆེ་ལ་འདི་ལ་སྲེད་ལེན་ཁོ་ན་ཤས་ཆེ་བའི་ངེས་པ་མེད་པའི་ཕྱིར་དང་། རྣམ་ཤེས་དང་མིང་གཟུགས་ནི་འདོད་གཟུགས་ན་ཁྱད་པར་མེད་པར་ཡོད་པའི་ཕྱིར་རོ། །དེའི་ཕྱིར་དེ་ལྟར་བསྟན་བ་འདི་ནི་རྒྱུ་དང་འབྲས་བུའི་བྱེ་བྲག་འབའ་ཞིག་ཁོ་ན་སྟོན་པ་ཡིན་གྱི་འདུས་བྱས་ཀྱི་རྟེན་ཅིང་འབྲེལ་པར་འབྱུང་བའི་སྤྱི་སྟོན་པ་ནི་མ་ཡིན་ཏེ། ས་བོན་ལས་མྱུ་གུ་འབྱུང་བ་ལ་སོགས་པ་ཕྱིའི་རྟེན་ཅིང་འབྲེལ་པར་འབྱུང་བའང་མ་བསྡུས་པའི་ཕྱིར་རོ། །དེས་ན་མ་རིག་པ་དང་འདུ་བྱེད་ལ་སོགས་པ་སྒྲ་ཇི་བཞིན་པ་ཁོ་ན་ཡིན་པའི་ཕྱིར་དེ་བཤད་པར་བྱའོ་ཞེས་ཟེར་རོ། །
འོ་ན་མ་རིག་པ་ཞེས་བྱ་བའི་དོན་གང་ཡིན་ཞེ་ན། འདི་ལྟར་ཡང་དག་པར་རིག་པའི་དངོས་ཀྱི་མི་མཐུན་ཕྱོགས་སུ་གྱུར་པ་བདེན་པ་དང་ལས་དང་འབྲས་བུ་དང་དཀོན་མཆོག་ལ་སོགས་པ་མི་གསལ་བའི་སེམས་ལས་བྱུང་བ་ཆོས་གཞན་ཞིག་མ་རིག་པ་ཡིན་གྱི་དངོས་མེད་དང་བེམས་པོའང་དེར་འགྱུར་བས་རིག་པ་མེད་པ་དང་མ་ཡིན་པར་དགག་པ་ཙམ་ནི་མ་རིག་པ་མ་ཡིན་ཏེ་དཔེར་ན་མི་མཛའ་བ་དང་རྫུན་ཏེ་མི་བདེན་པ་དང་། སོགས་པའི་སྒྲས་གཟུང་བ་ཆོས་མ་ཡིན་པ་དང་དོན་མ་ཡིན་པ་དང་བྱ་བ་མ་ཡིན་པ་ལ་སོགས་པ་དགྲ་དང་རྫུན་དང་མི་དགེ་བ་དང་ལོག་པའི་དོན་དང་ངན་པའི་བྱ་བ་ལ་སོགས་པ་གོ་བ་བཞིན་ནོ། །གལ་ཏེ་མ་རིག་པ་རིག་པ་མེད་པ་ཙམ་མ་ཡིན་པར་གང་ལས་ཤེ་ན། མདོ་ལས། མ་རིག་པའི་རྐྱེན་གྱིས་འདུ་བྱེད་རྣམས་འབྱུང་ངོ་ཞེས་རྐྱེན་གྱིས་དངོས་པོར་བསྟན་པའི་ཕྱིར་དང་། གཞན་ཡང་མདོ་དག་ལས་མ་རིག་པའི་ཀུན་དུ་སྦྱོར་བ་དང་སོགས་པས་བསྡུས་པ་འཆིང་བ་དང་ཕྲ་རྒྱས་དང་ཆུ་བོ་དང་སྦྱོར་བ་ཞེས་བྱ་བའི་ཚིག་གིས་གསུངས་པའི་ཕྱིར་ཏེ། མེད་པ་ནི་དེ་དག་ཏུ་འོས་པ་མ་ཡིན་ནོ། །དེ་ལྟ་མོད་ཀྱི་གལ་ཏེ་ཤེས་རབ་ངན་པ་ནི་མ་རིག་པ་ཡིན་ཏེ་བུ་ངན་པ་ལ་བུ་མ་ཡིན་ཞེས་བརྗོད་པ་བཞིན་ནོ་ཞེ་ན། དེ་ནི་ཡང་དག་པ་མིན་ཏེ། ཤེས་རབ་ངན་པ་ནི་ལྟ་བ་ཡིན་པའི་ཕྱིར་དང་། ལྟ་བ་དང་མ་རིག་པ་རྩ་བའི་ཉོན་མོངས་པ་ཐ་དད་དུ་གསུངས་པའི་ཕྱིར་དང་། ཆུ་བོ་ལ་སོགས་པའང་ཐ་དད་དུ་གསུངས་པའི་ཕྱིར་རོ། །གལ་ཏེ་ལྟ་བ་མ་ཡིན་པའི་ཤེས་རབ་མ་རིག་པ་ཡིན་ནོ་ཞེ་ན། དེ་ཡང་མ་ཡིན་ཏེ། ལྟ་བ་ནི་མ་རིག་པ་དེ་དང་མཚུངས་པར་ལྡན་པར་བཤད་པའི་ཕྱིར་དང་། ལྟ་བའང་ཤེས་རབ་ཡིན་པས་ཤེས་རབ་ཀྱི་རྫས་གཉིས་མཚུངས་པར་ལྡན་པའང་མི་སྲིད་པའི་ཕྱིར་དང་།
མདོ་ལས། འདོད་ཆགས་ཀྱིས་ཉེ་བར་ཉོན་མོངས་པ་ཅན་དུ་གྱུར་པའི་སེམས་ནི་རྣམ་པར་མི་འགྲོལ་ལོ། །མ་རིག་པས་ཉེ་བར་ཉོན་མོངས་པ་ཅན་དུ་གྱུར་པའི་ཤེས་རབ་ནི་རྣམ་པར་མི་འདག་གོ་ཞེས་མ་རིག་པ་ནི་ཤེས་རབ་ཀུན་ནས་ཉེ་བར་ཉོན་མོངས་པར་བྱེད་པོ་ཉིད་དུ་བསྟན་པའི་ཕྱིར་དང་། ཤེས་རབ་རང་ཉིད་ནི་རང་ཉིད་ལ་ཉོན་མོངས་པར་བྱེད་པར་འགལ་བའི་ཕྱིར་རོ། །འདི་དག་གིས་ནི་བཙུན་པ་དཔལ་ལེན་མ་རིག་པ་ཉོན་མོངས་པ་སྤྱིའི་མིང་དུ་འདོད་པ་དང་། བཙུན་པ་ཆོས་སྐྱོབ་ངའོ་སྙམ་དུ་སེམས་ཅན་ལ་འཇུག་པ་དང་། སློབ་དཔོན་ཆོས་ཀྱི་གྲགས་པས། ཉེས་པའི་རྣམ་པ་མ་ལུས་པ། །འཇིག་ཚོགས་ལྟ་ལས་སྐྱེས་པ་ཡིན། །དེ་མ་རིག་ཅེས་འཇིག་ཚོགས་ལ་ལྟ་བ་མ་རིག་པར་བཞེད་པའང་གསལ་བར་ལྟའོ། །དེའི་རྗེས་ལ་མིང་དང་གཟུགས་ཀྱི་གཟུགས་ནི་བཤད་ཟིན་ལ། མིང་ནི་ཚོར་བ་ལ་སོགས་པ་གཟུགས་ཅན་མིན་པའི་ཕུང་པོ་བཞི་ཡིན་ཏེ། དེ་དག་ནི་(ལྷས་བྱིན་ཞེས་སོགས་ཀྱི།) མིང་གི་དབང་གིས་དོན་ལ་འཇུག་པའི་ཕྱིར་དང་། མིང་ལྟར་ཐོགས་པ་མེད་པའི་ཕྱིར་དེ་སྐད་དུ་བརྗོད་དོ། །དེའི་རྗེས་ལ་རེག་པ་ནི་མིག་གི་འདུས་ཏེ་རེག་པ་ནས་ཡིད་ཀྱི་འདུས་ཏེ་རེག་པའི་བར་དྲུག་སྟེ། དེ་དག་ཀྱང་(དབང་པོ་དང་ཡུལ་དང་།) མིག་གི་དབང་པོ་དང་གཟུགས་དང་མིག་གི་རྣམ་ཤེས་གསུམ་འདུས་ཏེ་ཡུལ་ཡོངས་སུ་གཅོད་པ་འབྱུང་བ་ཡིན་ནོ། །དེ་བཞིན་དུ་རྣ་བའི་འདུས་ཏེ་རེག་པ་ལ་སོགས་པ་ལའང་ཤེས་པར་བྱའོ། །འདི་ལ་སྔོན་གྱི་སློབ་དཔོན་ཁ་ཅིག་ནི་མདོ་ལས། དེ་ལྟར་ན་ཆོས་གསུམ་པོ་འདི་དག་འབྲེལ་ཞིང་འདུས་ལ་ཚོགས་པ་གང་ཡིན་པ་དེ་ནི་རེག་པ་ཡིན་ནོ་ཞེས་གསུངས་པའི་ཕྱིར་རེག་པ་གསུམ་འདུས་པ་ལ་བཏགས་པ་ཡིན་གྱི་གཞན་ནི་མེད་དོ་ཞེས་ཟེར་རོ། །ཁ་ཅིག་ནི་དྲུག་ཚན་དྲུག་གི་མདོ་ལས། ཆོས་ཀྱི་རྣམ་གྲངས་དྲུག་ཚན་དྲུག་གང་ཞེ་ན། ནང་གི་སྐྱེ་མཆེད་དྲུག་དང་། ཕྱིའི་སྐྱེ་མཆེད་དྲུག་དང་། རྣམ་པར་ཤེས་པའི་ཚོགས་དྲུག་དང་། རེག་པའི་ཆོགས་དྲུག་དང་། ཚོར་བའི་ཚོགས་དྲུག་དང་། སྲེད་པའི་ཚོགས་དྲུག་གོ་ཞེས་གསུངས་པའི་ཕྱིར་རེག་པ་ནི་གསུམ་འདུས་པ་ལས་བྱུང་བའི་ཡུལ་ཡོངས་སུ་གཅོད་པའི་སེམས་ལས་བྱུང་བ་གཞན་ཞིག་ཡིན་ཏེ། གལ་ཏེ་གསུམ་འདུས་པ་ཙམ་ཡིན་ན་ཕྱི་ནང་གི་སྐྱེ་མཆེད་བཅུ་གཉིས་དང་རྣམ་ཤེས་དྲུག་ལས་ལོགས་སུ་གསུང་པར་མི་རིགས་པའི་ཕྱིར་རོ་ཞེས་ཟེར་རོ། །རེག་པའི་ཚོགས་དྲུག་པོ་དེ་དག་ལས་མིག་གི་འདུས་ཏེ་རེག་པ་ལ་སོགས་པ་(དང་པོ་)ལྔ་ནི་ཐོགས་པའི་རེག་པ་ཡིན་ཏེ། ཐོགས་བཅས་ཀྱི་དབང་པོ་ལ་རྟེན་པའི་ཕྱིར་རོ། །དྲུག་པ་ཡིད་ཀྱི་འདུས་ཏེ་རེག་པ་ནི་ཚིག་བླ་དྭགས་ཀྱི་རེག་པ་ཞེས་བྱ་སྟེ། ཚིག་བླ་དྭགས་ནི་མིང་ཡིན་ལ། ཡིད་ནི་གཙོ་བོར་མིང་ལ་དམིགས་པས་ཡུལ་གྱིས་ཡུལ་ཅན་ལ་བཏགས་པའི་ཕྱིར་རོ། །
དེའི་ཕྱིར་མདོ་ལས་ཀྱང་། མིག་གི་རྣམ་པར་ཤེས་པས་ནི་སྔོན་པོ་རྣམ་པར་ཤེས་ཀྱི་སྔོན་པོའོ་ཞེས་བྱ་བར་ནི་རྣམ་པར་མི་ཤེས་སོ། །ཡིད་ཀྱི་རྣམ་པར་ཤེས་པས་ནི་སྔོན་པོའང་རྣམ་པར་ཤེས་ལ་སྔོན་པོའོ་ཞེས་བྱ་བར་ཡང་རྣམ་པར་ཤེས་སོ་ཞེས་གསུངས་སོ། །(ཡང་ན་ཚོགས་པ་སྔ་མས་ཕྱི་མ་སྐྱེད་པ་ཙམ་ལ་དུས་མཉམ་དུ་གཞག་གོ།) དེས་ན་ཐོགས་པའི་རེག་པ་ནི་རྟེན་གྱིས་རབ་ཏུ་ཕྱེ་བ་ཡིན་ལ། གཉིས་པ་ནི་དམིགས་པས་རབ་ཏུ་ཕྱེ་བ་ཡིན་ནོ། །ཁ་ཅིག་ན་རེ་སྒོ་ལྔའི་རྣམ་ཤེས་ནི་ཚིག་ལ་མ་ལྟོས་པར་དོན་ལ་འཇུག་གི་ཡིད་ཤེས་ནི་ཚིག་གི་དབང་དུ་བྱས་ནས་དོན་ལ་འཇུག་པས་ན་ཚིག་བླ་དྭགས་ཡིན་ལ་དེ་དང་མཚུངས་ལྡན་གྱི་རེག་པ་ལའང་ཚིག་བླ་དྭགས་ཀྱི་རེག་པ་ཞེས་བྱ་སྟེ། དེས་ན་འདི་ནི་མཚུངས་ལྡན་གྲོགས་ཀྱིས་རབ་ཏུ་ཕྱེ་བ་ཡིན་ནོ་ཞེས་ཟེར་རོ། །ཡང་རེག་པ་ནི་གསུམ་སྟེ། རིག་པའི་རེག་པ་དང་། མ་རིག་པའི་རེག་པ་དང་། དེ་གཉིས་ལས་གཞན་རིག་པའང་མ་ཡིན་མ་རིག་པའང་མ་ཡིན་པའི་རེག་པ་སྟེ། དེ་དག་ཀྱང་རིམ་པ་བཞིན་དུ་དྲི་མ་སྟེ་ཟག་པ་མེད་པའི་རེག་པ་དང་། ཉོན་མོངས་པ་ཅན་གྱི་རེག་པ་དང་། ལྷག་མ་དགེ་བ་ཟག་བཅས་དང་མ་བསྒྲིབས་ལུང་མ་བསྟན་དང་མཚུངས་པར་ལྡན་པའི་རེག་པའོ། །མ་རིག་པའི་རེག་པའང་གཉིས་ཏེ། གནོད་སེམས་དང་རྗེས་སུ་ཆགས་པ་དང་མཚུངས་པར་ལྡན་པའི་རེག་པའོ། །
ཡང་རེག་པ་ཐམས་ཅད་བསྡུ་ན་གསུམ་སྟེ། བདེ་བ་མྱོང་བར་འགྱུར་བ་དང་། དེ་ལ་སོགས་པ་སྡུག་བསྔལ་མྱོང་བར་འགྱུར་བ་དང་། བཏང་སྙོམས་མྱོང་བར་འགྱུར་བའི་རེག་པ་དང་གསུམ་ཡིན་ནོ། །དེ་ལྟར་ན་རེག་པ་བཅུ་དྲུག་གོ། དེའི་རྗེས་ལ་ཚོར་བ་ནི་(དབྱེ་ན།) རེག་པ་དེ་དག་ལས་བྱུང་བའི་ཚོར་བ་(ནི་མིག་གི་འདུས་ཏེ་རེག་པ་ལས་བྱུང་བ་ལ་སོགས་པ།) དྲུག་(ཡིན་པ།) སྟེ། མིག་གི་འདུས་ཏེ་རེག་པ་ལས་བྱུང་བའི་ཚོར་བ་ལ་སོགས་པའོ། །ཚོར་བའི་མཚན་ཉིད་ནི་བཤད་ཟིན་པའི་ཕྱིར་འདིར་དབྱེ་བ་ཙམ་ཞིག་སྨོས་སོ། །ཚོར་བ་དྲུག་པོ་དེ་དག་ལས་དང་པོ་ལྔ་ནི་དབང་པོ་གཟུགས་ཅན་ལ་རྟེན་པའི་ཕྱིར་ལུས་ཀྱི་ཚོར་བ་སྟེ། ལུས་ནི་གཟུགས་ལ་བརྗོད་པར་འདོད་པའི་ཕྱིར་རོ། །སེམས་ཀྱི་ཚོར་བ་ནི་མིག་ལ་སོགས་པ་ལས་གཞན་པའི་ཡིད་ལ་རྟེན་པ་སྟེ། དེ་ནི་བདག་པོའི་རྐྱེན་སེམས་ཙམ་ལ་རྟེན་པའི་ཕྱིར་རོ། །གལ་ཏེ་རེག་པ་ལས་ཚོར་བ་དུས་མཉམ་དུའམ་དེའི་རྗེས་སུ་འབྱུང་། དུས་མཉམ་པ་ནི་མ་ཡིན་ཏེ། གཉིས་ཀ་གྲུབ་པ་དག་ལ་བསྐྱེད་བྱ་སྐྱེད་བྱེད་གཉིས་མི་འཐད་པའི་ཕྱིར་རོ། །
དེའི་རྗེས་སུ་འབྱུང་བ་ཡིན་ན་རེག་པ་དང་ལྡན་པའི་སེམས་ལ་ཚོར་བ་མེད་པར་འགྱུར་ན། དེ་ལྟ་ནའང་ཚོར་བ་སེམས་ཀྱི་ས་མང་པོ་པ་མ་ཡིན་པར་འགྱུར་རོ་ཞེ་ན། བྱེ་བྲག་ཏུ་སྨྲ་བ་ནི་ལྷན་ཅིག་འབྱུང་བའི་རྒྱུ་ཡིན་པའི་ཕྱིར་དུས་མཉམ་དུ་འབྱུང་སྟེ་མར་མེ་ལས་འོད་དང་མྱུ་གུ་ལས་གྲིབ་མ་བཞིན་ནོ། །མདོ་ལས་ཀྱང་། མིག་དང་གཟུགས་རྣམས་ལ་བརྟེན་ནས་མིག་གི་རྣམ་པར་ཤེས་པ་དང་། གསུམ་འདུས་པའི་རེག་པ་དང་། ལྷན་ཅིག་སྐྱེས་པའི་ཚོར་བ་དང་། འདུ་ཤེས་དང་། སེམས་པ་སྐྱེའོ་ཞེས་གསུངས་པའི་ཕྱིར་རོ་ཞེས་འཆད་དོ། །མདོ་སྡེ་པ་ནི་རེག་པའི་རྗེས་སུ་ཚོར་བ་ཡིན་ཏེ། དུས་མཉམ་པའང་རྒྱུ་འབྲས་ཡིན་ན་ཕན་ཚུན་རྒྱུ་དང་འབྲས་བུར་འགྱུར་ན་མདོ་ལས། མིག་གི་འདུས་ཏེ་རེག་པ་ལ་བརྟེན་ནས་མིག་གི་འདུས་ཏེ་རེག་པ་ལས་བྱུང་བའི་ཚོར་བ་སྐྱེའི་མིག་གི་འདུས་ཏེ་རེག་པ་ལས་བྱུང་བའི་ཚོར་བ་ལ་བརྟེན་ནས་མིག་གི་འདུས་ཏེ་རེག་པ་སྐྱེ་བ་ནི་མ་ཡིན་ནོ་ཞེས་གསུངས་པའི་ཕྱིར་རོ། །ཚོར་བ་ལ་སོགས་པས་མང་པོ་པར་བཤད་པ་ནི་རྟོག་པ་དང་བཅས་ཤིང་དཔྱོད་པ་དང་བཅས་པའི་ས་དང་། རྟོག་པ་མེད་ལ་དཔྱོད་པ་ཙམ་གྱིས་དང་། རྟོག་པའང་མེད་དཔྱོད་པའང་མེད་པའི་ས་དང་། དགེ་བའི་ས་དང་། མི་དགེ་བའི་ས་དང་། ལུང་དུ་མ་བསྟན་པའི་ས་དང་སློབ་པའི་ས་དང་། མི་སློབ་པའི་ས་དང་། གཉིས་ཀ་མ་ཡིན་པའི་ས་ཐམས་ཅད་ན་ཡོད་པའི་ཕྱིར་ས་མང་པོ་པར་བཤད་ཀྱི་སེམས་ཐམས་ཅད་ལ་ཁྱབ་པ་ནི་མ་ཡིན་ནོ་ཞེས་འདོད་དོ། །འདི་ལ་བཙུན་པ་དཔལ་ལེན་ན་རེ་རེག་པ་དང་ལྡན་པའི་སེམས་ལ་རེག་པའི་སྐད་ཅིག་སྔ་མ་ལས་སྐྱེས་པའི་ཚོར་བ་ཡོད་པའི་ཕྱིར་ཚོར་བ་ལ་སོགས་པ་སེམས་ཐམས་ཅད་ལ་ཁྱབ་པ་མ་ཡིན་པར་མི་འགྱུར་རོ་ཞེས་ཟེར་བ་ནི་མ་ཡིན་ཏེ། སེམས་མེད་ལས་ལངས་མ་ཐག་པའི་སེམས་ལ་དེ་མེད་པར་འགྱུར་བའི་ཕྱིར་དང་། མིག་གི་རྣམ་ཤེས་ཀྱི་རྗེས་ཐོགས་ཉིད་དུ་རྣམ་ཤེས་གཞན་འབྱུང་བ་ལ་རེག་པ་དང་ཚོར་བ་མེད་པར་འགྱུར་ཏེ། གཞན་ལ་དམིགས་པའི་རྣམ་ཤེས་ཀྱིས་གཞན་ལ་དམིགས་པའི་རེག་པ་དང་ཚོར་བ་བསྐྱེད་པ་མི་རིགས་པའི་ཕྱིར་རོ། །དེའི་ཕྱིར་འདི་དག་སེམས་ཐམས་ཅད་ལ་ཁྱབ་པར་སྨྲ་ན་དུས་མཉམ་པའི་རྒྱུ་འབྲས་ཁས་བླང་བར་བྱའོ། །
ཡང་སེམས་ཀྱི་ཚོར་བ་དེ་ཉིད་(ངོ་བོ་ལས་ཡིད་བདེ་མི་བདེ་བཏང་སྙོམས་གསུམ་དང་དམིགས་པ་ལས་གཟུགས་སོགས་ཡུལ་དྲུག་ལ་དམིགས་པ་དང་། མཚུངས་ལྡན་ལས་ཡིད་དང་མཚུངས་པར་ལྡན་པས།) ཡིད་ཉེ་བར་རྒྱུ་བའི་བྱེ་བྲག་ལས་རྣམ་པ་དག་ནི་(ཡིད་བདེ་བའི་ཉེ་བར་རྒྱུ་བ་དྲུག། ཡིད་བདེ་བའི་ཉེ་བར་རྒྱུ་བ་དྲུག། བཏང་སྙོམས་ཀྱི་ཉེ་བར་རྒྱུ་བ་དྲུག་སྟེ། སྔར་དྲུག་ཏུ་དབྱེ་བ་ལ་ལྟོས་ནས།) ཡང་བཅོ་བརྒྱད་དུ་དབྱེ་ཞིང་། གང་ཞེ་ན། ཡིད་བདེ་བའི་ཉེ་བར་རྒྱུ་བ་དྲུག་དང་། ཡིད་མི་བདེ་བའི་ཉེ་བར་རྒྱུ་བ་དྲུག་དང་། བཏང་སྙོམས་ཀྱི་ཉེ་བར་རྒྱུ་བ་དྲུག་གོ། གལ་ཏེ་དེ་དག་ངོ་བོ་ཉིད་དམ། མཚུངས་ལྡན་ནམ། དམིགས་པ་གང་ལས་གཞག། དང་པོ་ལྟར་ན་ནི་ཡིད་བདེ་མི་བདེ་བཏང་སྙོམས་གསུམ་ཁོ་ནར་འགྱུར་ཞིང་། གཉིས་པ་ལྟར་ན་ནི་ཡིད་དང་མཚུངས་པར་ལྡན་པས་གཅིག་ཁོ་ནར་འགྱུར་ལ། གསུམ་པ་ལྟར་ན་ནི་ཡུལ་དྲུག་ལ་དམིགས་པའི་ཕྱིར་དྲུག་ཁོ་ནར་འགྱུར་རོ་ཞེ་ན། གསུམ་ག་ལས་གཞག་སྟེ། ངོ་བོ་ཉིད་ལས་ནི་ཡིད་བདེ་མི་བདེ་བཏང་སྙོམས་གསུམ་དང་། མཚུངས་ལྡན་ལས་ནི་ཡིད་ཀྱི་ཉེར་རྒྱུ་དང་། དམིགས་པ་ལས་ནི་གསུམ་པོ་རེ་རེ་འང་དྲུག་དྲུག་ཏུ་འགྱུར་ཏེ། གཟུགས་ལ་སོགས་པ་ཡུལ་དྲུག་ཡོད་པའི་ཕྱིར་རོ། །
དེ་དག་ཀྱང་བཅོ་ལྔ་ནི་གཟུགས་སོགས་ཡུལ་སོ་སོར་ངེས་པ་ལ་དམིགས་པའི་ཕྱིར་མ་འདྲེས་པ་ལ་དམིགས་པ་ཡིན་ལ། ཆོས་ལ་དམིགས་པའི་ཉེར་རྒྱུ་གསུམ་ནི་འདྲེས་པ་དང་མ་འདྲེས་པ་གཉིས་ཀ་ལ་དམིགས་པ་ཡིན་ནོ། །ཉེ་བར་རྒྱུ་བ་ནི་ཡིད་ལ་བརྟེན་ནས་ཚོར་བ་བདེ་བ་ལ་སོགས་པ་ཡུལ་ལ་རྒྱུ་བའི་ཕྱིར་རམ། ཚོར་བ་ལ་བརྟེན་ནས་ཡིད་ཡུལ་ལ་རྒྱུ་བའི་ཕྱིར་རོ། །ལུས་ཀྱི་ཚོར་བ་ནི་ཡིད་ཉེར་རྒྱུ་མ་ཡིན་ཏེ། ཡིད་ཉེར་རྒྱུ་ནི་རྟོག་བཅས་ཀྱི་ཡིད་ལ་རྟེན་པ་ཡིན་པ་ལ་ལུས་ཚོར་ནི་དབང་པོ་གཟུགས་ཁོ་ན་ལ་རྟེན་པའི་རྟོག་མེད་ཡིན་པའི་ཕྱིར་རོ། །བསམ་གཏན་གསུམ་པའི་བདེ་བའང་ཡིད་ཉེར་རྒྱུ་མ་ཡིན་ཏེ། བརྟན་པར་གནས་པའི་ཕྱིར་རོ། །(དེ་ཡང་བྱེ་བྲག་ཏུ་སྨྲ་བ་ཡིད་ལ་བརྟེན་ནས་ཚོར་བ་ཡུལ་ལ་རྒྱུ་བར་འདོད་ལ། མདོ་སྡེ་པ་ཚོར་བའི་དབང་གིས་ཡིད་ཡུལ་ལ་རྒྱུ་བར་འདོད་དོ། །)དེ་རྣམས་ཁམས་གང་ན་དུ་ཡོད་ཅེ་ན། འདོད་པ་ན་ནི་ཡིད་ཉེ་བར་རྒྱུ་བ་(བཅོ་བརྒྱད་པོ།) ཐམས་ཅད་ཡོད་དེ། དེ་དག་ཀྱང་འདོད་པ(འི་ཁམས།) རང་ཉིད་ལ་དམིགས་པའི་ཡུལ་ཅན་ཡིན་གྱི་གཟུགས་དང་གཟུགས་མེད་ས་(ཁམས་གོང་མ་གཉིས།) དམིགས་པ་ལ་ནི་བཅོ་བརྒྱད་མི་ཚང་བའི་ཕྱིར་རོ། །འདོད་པའི་ཡིད་ཉེར་རྒྱུའི་སྤྱོད་ཡུལ་ཏེ་དམིགས་པ་གཟུགས་ཅན་གྱི་ཁམས་པ་ཡིན་ན་ནི། དེ་ན་དྲི་རོ་མེད་པས་དེ་གཉིས་ལ་དམིགས་པ་དྲུག་མ་གཏོགས་པ་བཅུ་གཉིས་སོ། །འདོད་གཟུགས་ཀྱི་གོང་མ་གཟུགས་མེད་ནི་དེ་ན་ཡུལ་ལྔ་མེད་པས་ཆོས་ལ་དམིགས་པའི་འདོད་པའི་ཡིད་བདེ་མི་བདེ་བཏང་སྙོམས་གསུམ་གྱི་སྤྱོད་ཡུལ་དུ་འགྱུར་རོ། །དེ་དག་ནི་འདོད་པའི་དབང་དུ་བྱས་པ་ཡིན་ནོ། །
གཟུགས་ཁམས་ཀྱི་བསམ་གཏན་དང་པོ་དང་གཉིས་པ་གཉིས་ན་ནི་བཅུ་གཉིས་ཡོད་དེ། དེ་དག་ན་ཡིད་མི་བདེ་བ་དྲུག་མེད་པའི་ཕྱིར་རོ། །བཅུ་གཉིས་པོ་དེ་དག་ཀྱང་འདོད་པའི་ཁམས་ལ་ཡིད་འགྲོ་ཞིང་དམིགས་པ་རྣམས་ཡིན་གྱི་རང་དང་གོང་མ་ལ་དམིགས་པ་ནི་མ་ཡིན་ཏེ། །དེ་དག་ན་དྲི་རོ་མེད་པའི་ཕྱིར་རོ། །དེའི་ཕྱིར་གཟུགས་ཀྱི་ཁམས་རང་ལ་དམིགས་ན་བརྒྱད་དེ། དྲི་རོའི་མ་གཏོགས་པ་གཟུགས་དང་སྒྲ་དང་རེག་བྱ་དང་ཆོས་ལ་དམིགས་པའི་ཡིད་བདེ་དང་བཏང་སྙོམས་དག་ཡོད་པའི་ཕྱིར་རོ། །གཟུགས་མེད་པ་ནི་ཆོས་ལ་དམིགས་པའི་བདེ་བ་དང་བཏང་སྙོམས་གཉིས་ཀྱི་དམིགས་པ་ཡིན་ནོ། །བསམ་གཏན་གསུམ་པ་བཞི་པ་གཉིས་ན་ནི་(བཏང་སྙོམས་ཀྱི།) ཡིད་ཉེ་བར་རྒྱུ་བ་དྲུག་ཡོད་དེ་དེ་དག་ན་ཡིད་བདེ་མེད་པའི་ཕྱིར་དང་། སེམས་བདེ་ནི་ཡིད་ཉེར་རྒྱུར་མི་འགྱུར་བའི་ཕྱིར་བཏང་སྙོམས་ཀྱི་དྲུག་གོ། དྲུག་པོ་དེ་དག་གི་དམིགས་པ་ནི་འདོད་པའི་ཁམས་ཡིན་ཏེ། ཡུལ་དྲུག་ལ་དམིགས་པའི་བཏང་སྙོམས་དྲུག་ཡོད་པའི་ཕྱིར་རོ། །
གཟུགས་ཀྱི་ཁམས་རང་ཉིད་ནི་བཏང་སྙོམས་ཀྱི་ཉེར་རྒྱུ་བཞིའི་དམིགས་པ་ཡིན་ཏེ། དྲི་རོ་ལ་དམིགས་པ་གཉིས་མེད་པའི་ཕྱིར་རོ། །(གཟུགས་ཁམས་ཀྱི།) གོང་མ་གཟུགས་མེད་པ་ནི་ཆོས་ལ་དམིགས་པའི་བཏང་སྙོམས་ཀྱི་ཡིད་ཉེ་བར་རྒྱུ་བ་གཅིག་གི་དམིགས་པ་ཡིན་ནོ། །གཟུགས་མེད་པ་ནམ་མཁའ་མཐའ་ཡས་སྐྱེ་མཆེད་ཀྱི་ཉེ་བར་བསྡོགས་ན་ནི་བཏང་སྙོམས་ཀྱི་ཉེར་རྒྱུ་བཞི་ཡོད་དེ། དེ་ནི་ནམ་མཁའ་མཐའ་ཡས་སྐྱེ་མཆེད་དང་བསམ་གཏན་བཞི་པ་ལ་ཞི་བ་དང་རགས་པར་ལྟ་བ་ཡིན་པ་ན་དམིགས་པ་གཟུགས་ཁམས་(ཀྱི་བཞི།) པ་ལ་ཡིད་ཉེ་བར་འགྲོ་བའི་ཕྱིར་དང་། (བཞི་པ།) དེ་ནའང་ཡུལ་བཞི་ཡོད་པའི་ཕྱིར་རོ། །དེ་ཡང་ཡུལ་བཞི་པོ་སོ་སོ་ལ་དམིགས་པ་ལྟར་ན་བཞིར་འགྱུར་གྱི་གང་དག་གི་ལྟར་ན་ཡུལ་བཞི་པོ་བཟླུམས་ཏེ་དམིགས་པ་དེ་དག་གི་ལྟར་ན་ནི་དེ་ན་ཆོས་ལ་ཉེ་བར་རྒྱུ་བ་འདྲེས་པ་ལ་དམིགས་པ་གཅིག་ཁོ་ན་ཡོད་དོ། །གཟུགས་ཁམས་ལས་གོང་མ་གཟུགས་མེད་པར་འགྲོ་བ་ནི་ཉེར་བསྡོགས་ཡིན་ཡང་གཅིག་སྟེ། ཆོས་འབའ་ཞིག་ལས་མེད་པའི་ཕྱིར་རོ། །གཟུགས་མེད་ཀྱི་དངོས་གཞི་བཞི་ན་ཡང་ཡིད་ཉིད་ཉེ་བར་རྒྱུ་བ་གཅིག་སྟེ། དེ་དག་ནི་གཟུགས་མེད་དངོས་གཞི་དགེ་རྣམས་ཀྱི། །སྤྱོད་ཡུལ་ཟག་བཅས་འོག་མ་མིན་ཞེས་འབྱུང་བས་འདོད་གཟུགས་ལ་མི་དམིགས་པའི་ཕྱིར་དང་། རང་ས་ན་ཆོས་གཅིག་པུ་ལས་མེད་པའི་ཕྱིར་རོ། །དེའི་ཕྱིར་རང་ཡུལ་ཅན་ཞེས་སྨོས་སོ། །དེ་དག་ཐམས་ཅད་ཀྱི་དོན་བསྡུ་བ་ནི་ཡིད་ཉེ་བར་རྒྱུ་བ་བཅོ་བརྒྱད་པོ་དེ་དག་ཐམས་ཅད་ནི་ཟག་པ་དང་བཅས་པ་ཡིན་ཏེ། (སྲིད་པ་འཕེལ་བར་བྱེད་པའི་ཕྱིར་དང་། འཕགས་ལམ་ནི་སྲིད་པ་ལ་རྒྱབ་ཀྱིས་ལྟས་པའི་ཕྱིར།) དེ་དག་གི་ཡིད་ཡུལ་ལ་ཞེན་པ་དང་བཅས་པས་ཉེ་བར་རྒྱུ་བའི་ཕྱིར་རོ། །འདི་ནི་བྱེ་བྲག་ཏུ་སྨྲ་བའི་ལུགས་ཡིན་ལ། སློབ་དཔོན་ཟག་བཅས་ཐམས་ཅད་ཀྱང་ཡིད་ཉེར་རྒྱུ་མ་ཡིན་ཏེ། འདི་ནི་ཞེན་པ་ལ་རྟེན་པའི་བདེ་བ་ལ་སོགས་པ་ལ་བཤད་པས་ན་དེ་ནི་ཉོན་མོངས་པ་ཅན་ཁོ་ན་ཡིན་པའི་ཕྱིར་རོ། །ཞེས་འཆད་དོ། །གལ་ཏེ་རྟེན་འབྲེལ་སྟོན་པ་ན་འདིར་མ་རིག་པ་དང་མིང་དང་རེག་པ་དང་ཚོར་བ་རྣམས་ཁོ་ན་སྟོན་གྱི་གཞན་ནི་མ་ཡིན་ཞེ་ན། གཟུགས་དང་རྣམ་ཤེས་དང་སྐྱེ་མཆེད་དྲུག་ནི་ཁམས་བསྟན་པར་བཤད་ཟིན་པའི་ཕྱིར་དང་། འདུ་བྱེད་དང་སྲིད་པ་དང་སྲེད་ལེན་ནི་གནས་བཞི་པ་དང་ལྔ་པར་འཆད་པར་འགྱུར་བའི་ཕྱིར་(དེ་དག་གིས་ནི་རྒྱུན་ཆགས་པའི་རྟེན་འབྲེལ་བཤད་ཟིན་ཏོ། །)གཞན་དག་ནི་མ་བཤད་དོ། །
དྲུག་པ་རྟེན་འབྲེལ་མཚོན་པའི་དཔེ་བཤད་པ་ནི་རྟེན་ཅིང་འབྲེལ་པར་འབྱུང་བ་ཉོན་མོངས་པ་དང་ལས་དང་གཞི་གསུམ་དུ་བསྡུས་ནས་བསྟན་པའི་སྐབས་འདིར་ཉོན་མོངས་པ་རྣམས་ནི་ས་བོན་ལ་སོགས་པ་འདི་དག་དང་འདྲ་བ་ཡིན་ཏེ། ཇི་ལྟར་ཞེ་ན། དཔེར་ན་ས་བོན་ལས་སྡོང་བུ་ལ་སོགས་པ་འབྱུང་བ་བཞིན་དུ་ཉོན་མོངས་པ་ལས་ཀྱང་ཉོན་མོངས་པ་དང་ལས་དང་གཞི་རྣམས་འབྱུང་བའི་ཕྱིར་དང་། ཀླུ་གནས་པའི་མཚོ་མི་སྐམ་པ་བཞིན་དུ་ཉོན་མོངས་པའི་ཀླུ་གནས་པའི་སྐྱེ་བའི་མཚོ་ཡང་མི་སྐམ་པའི་ཕྱིར་དང་། ནགས་ཚལ་སོགས་རྩ་བ་ནས་མ་ཕྱུང་ན་བཅད་ཀྱང་སླར་སྐྱེ་བ་བཞིན་དུ་ཉོན་མོངས་པའི་རྩ་བ་མ་ཕྱུངས་ན་འགྲོ་བ་རྣམས་ཀྱི་སྐྱེ་བའང་སླར་སྐྱེ་བའི་ཕྱིར་དང་། ལྗོན་ཤིང་གི་དུས་དུས་སུ་མེ་ཏོག་དང་འབྲས་བུ་སྐྱེད་པ་བཞིན་དུ་ཉོན་མོངས་པས་ཀྱང་ལན་ཅིག་མ་ཡིན་པར་ཉོན་མོངས་པ་དང་ལས་དང་གཞིའི་མེ་ཏོག་དང་འབྲས་བུ་རྣམས་སྐྱེད་པའི་ཕྱིར་རོ། །དེ་བཞིན་དུ་འབྲས་ཀྱི་ཤུན་པ་བཞིན་དུ་འདོད་དེ་དཔེར་ན་ཤུན་པ་དང་བཅས་པའི་འབྲས་ཐུག་པོ་ཆེ་རྣམས་སྐྱེ་བར་ནུས་ཀྱི་ཤུན་པ་མེད་པར་སྐྱེ་མི་ནུས་པ་ལྟར་ཉོན་མོངས་པའི་ཐོབ་པའི་ཤུན་པ་དང་བཅས་པའི་ལས་ཀྱིས་སྲིད་པའི་མྱུ་གུ་བསྐྱེད་པའི་ཕྱིར་རོ། །དེ་བཞིན་དུ་ལས་ནི་ཤུན་པ་དང་བཅས་པའི་འབྲས་དང་འདྲ་སྟེ། ཉོན་མོངས་པའི་ཤུན་པ་དང་བཅས་པའི་ལས་ནི་སྲིད་པའི་མྱུ་གུ་སྐྱེད་པའི་ཉེར་ལེན་ཡིན་པའི་ཕྱིར་རོ། །དེ་བཞིན་དུ་སྨན་དང་ཡང་འདྲ་སྟེ། སྨན་གྱིས་ནད་གཅིག་བསལ་ནས་ནུས་པ་ཞི་བ་ལྟར་ལས་ཀྱིས་ཀྱང་རྣམ་པར་སྨིན་པ་གཅིག་ཕྱུང་ནས་གཉིས་པ་མི་འབྱིན་པའི་ཕྱིར་རོ། །དེ་བཞིན་དུ་མེ་ཏོག་འབྲས་བུའི་ཉེ་བའི་རྒྱུ་ཡིན་པ་བཞིན་དུ་ལས་ཀྱང་རྣམ་སྨིན་གྱི་ཉེ་བའི་རྒྱུ་ཡིན་པའི་ཕྱིར་རོ། །སྡུག་བསྔལ་གྱི་གཞི་(བདུན་པོ།) རྣམས་ནི་བཟའ་བ་དང་བཏུང་བ་གྲུབ་ཟིན་པ་ནི་ལོངས་སྤྱད་བྱ་འབའ་ཞིག་ཡིན་པ་བཞིན་དུ་ལོངས་སྤྱད་ནས་ཡང་(ས་བོན་དུ་མི་རུང་བས་ཉིང་།) མཚམས་མི་སྦྱོར་བའི་ཕྱིར་རོ། །(དེས་ན་རྣམ་སྨིན་ལས་ཚེ་རབས་གཞན་དུ་རྣམ་སྨིན་འབྱུང་བ་མེད་དེ། འབྱུང་ན་ནི་དགྲ་བཅོམ་ལའང་རྣམ་སྨིན་ཡོད་པས་འཁོར་བ་ལས་ཐར་བར་མི་འགྱུར་རོ། །དེ་ལྟར་སྲིད་པ་ལ་བཞི་ལས་མི་འདའ་བས་སོ། །)
གསུམ་པ་སྲིད་པ་བཞི་བཤད་པས་དོན་བསྡུ་བ་ནི་སྐྱེ་སྲིད་ལ་སོགས་པ་སྲིད་པ་བཞི་པོ་དེ་དག་ལས་གཅིག་ཏུ་སྐྱེ་བའི་སྲིད་པ་ནི་ཉོན་མོངས་པ་ཅན་ཁོ་ན་ཡིན་ཏེ། (ལས་ཀྱི་རྣམ་སྨིན་སྐྱེད་པ་ཉོན་མོངས་ལ་ལྟོས་པར་ཡང་ཡང་བཤད་དོ། །དེ་ཡང་ས་གཞན་གྱི་ཉོན་མོངས་ཀྱིས་ས་གཞན་གྱི་མཚམས་མི་སྦྱོར་བས་དེས་ན།) ཉོན་མོངས་པ་གང་གིས་ཤེ་ན། རང་གི་ས་པའི་ཉོན་མོངས་པ་ཀུན་གྱིས་སྐྱེ་བ་ལེན་པ་སྲིད་དེ། འོན་ཀྱང་ཀུན་དཀྲིས་ཆིག་རྐྱང་ཐུབ་པ་མ་རིག་པ་ཙམ་དང་མཚུངས་པར་ལྡན་པ་ཕྲག་དོག་དང་སེར་སྣ་དང་ཁྲོ་བ་དང་འཆབ་པ་བཞི་དང་སློབ་དཔོན་གང་སྤེལ་གྱིས་འགྱོད་པ་དང་ལྔ་བཤད་དེ་དེ་རྣམས་ཀྱིས་ནི་མ་ཡིན་ནོ། །དེ་བཞིན་དུ་བར་སྲིད་དུ་ཉིང་མཚམས་སྦྱོར་བའང་ཉོན་མོངས་ཅན་ཁོ་ནར་ངེས་སོ། །སྐྱེ་སྲིད་ལས་གཞན་བར་སྲིད་དང་སྔོན་དུས་ཀྱི་སྲིད་པ་དང་འཆི་བའི་སྲིད་པ་གསུམ་ནི་ཉོན་མོངས་པ་ཅན་དང་དགེ་བ་དང་མ་བསྒྲིབས་ལུང་མ་བསྟན་རྣམ་པ་གསུམ་མོ། །ཐེག་ཆེན་པ་ནི་སའི་དངོས་གཞི་ལས། དགེ་བའི་སེམས་དང་ལྡན་པར་འཆི་འཕོ་བ་ཇི་ལྟ་བུ་ཞེ་ན། ཁ་ཅིག་འཆི་བའི་ཚེ་དགེ་བའི་ཆོས་སྔོན་དུ་བསྟེན་པ་རྣམས་དྲན་ནམ་གཞན་གྱིས་དྲན་པར་བྱས་ཀྱང་རུང་སྟེ་དེའི་ཚེ་དད་པ་ལ་སོགས་པ་དགེ་བའི་ཆོས་གང་དག་སེམས་ལ་ཀུན་དུ་སྤྱོད་པ་དེ་དག་ཇི་སྲིད་དུ་འདུ་ཤེས་རགས་པ་འབྱུང་བའི་བར་དུའོ། །འདུ་ཤེས་ཆ་ཕྲ་མོ་རྒྱུ་བར་གྱུར་པའི་ཚེ་ནི་དགེ་བའི་སེམས་ལྡོག་ཅིང་ལུང་དུ་མ་བསྟན་པའི་སེམས་ཉིད་དུ་གནས་ཏེ། འདི་ལྟར་དེས་དེའི་ཚེ་སྔོན་གོམས་པར་བྱས་པའི་དགེ་བ་ལ་རང་གིས་བརྩལ་བར་ཡང་མི་ནུས་ལ་གཞན་དག་གིས་ཀྱང་དྲན་པར་བྱེད་མི་ནུས་སོ། །དེ་བཞིན་དུ་མི་དགེ་བ་ལའང་སྦྱར་རོ་ཞེས་པ་དང་། དོན་གསང་རྣམ་པར་ཕྱེ་བ་ལས་ཀྱང་། ཐེག་པ་ཆེན་པོ་ལས་ནི་འཆི་བའི་སེམས་ཐམས་ཅད་མ་བསྒྲིབས་ལ་ལུང་དུ་མ་བསྟན་པ་ཡིན་པར་བརྗོད་ན་ཞེས་འབྱུང་བས་འཆི་བའི་སྔོན་རོལ་གྱི་སེམས་གསལ་བའི་ཚེ་དགེ་མི་དགེ་འབྱུང་ཡང་འཆི་སེམས་ནི་ལུང་མ་བསྟན་ཁོ་ན་ཡིན་པར་བཞེད་དོ། །ཡང་སྲིད་པ་བཞི་པོ་དེ་དག་ལས་འདོད་གཟུགས་གཉིས་ན་ནི་བཞི་ག་ཡོད་ལ། གཟུགས་མེད་ན་ནི་གསུམ་སྟེ། དེ་ན་བར་སྲིད་མེད་པའི་ཕྱིར་རོ། །དེ་ཉིད་ཀྱི་ཕྱིར་ཀུན་ལས་བཏུས་ལས་ཀྱང་། བར་མ་དོའི་སྲིད་པ་ནི་འདོད་པའི་ཁམས་དང་གཟུགས་ཀྱི་ཁམས་སུ་སྐྱེ་བ་ནའོ། །གཟུགས་མེད་པ་ནས་ནི་འཕོ་བ་ནའོ་ཞེས་འབྱུང་སྟེ། དེ་ནི་གཟུགས་མེད་ནས་ཤི་ནས་ཁམས་འོག་མ་གཉིས་སུ་སྐྱེ་བའི་དབང་དུ་བྱས་པ་སྟེ། དེའི་བར་སྲིད་ནི་ཁམས་འོག་མ་གཉིས་སུ་གཏོགས་པའི་ཕྱིར་རོ། །
ད་ནི་གང་གིས་གནས་པའི་ཟས་བཤད་པ་ནི་འགྲོ་བ་རྣམས་ནི་ཟས་ཀྱིས་གནས་པ་ཡིན་ནོ་ཞེས་ཡང་དག་པར་ལྡན་པའི་ལུང་ལས། བཅོམ་ལྡན་འདས་ཉིད་ཀྱིས་མངོན་པར་མཁྱེན་ཅིང་མངོན་པར་རྫོགས་པར་སངས་རྒྱས་ནས་ཆོས་གཅིག་བཀའ་སྩལ་པ་འདི་ལྟ་སྟེ་སེམས་ཅན་ཐམས་ཅད་ཟས་ཀྱིས་གནས་པའོ་ཞེས་གསུངས་སོ། །ཟས་ཀྱང་བཞི་སྟེ། རགས་པ་དང་ཕྲ་བའི་ཁམ་གྱི་ཟས་དང་། རེག་པའི་ཟས་དང་། ཡིད་ལ་སེམས་པའི་ཟས་དང་། རྣམ་པར་ཤེས་པའི་ཟས་སོ། །དེ་དག་ལས་དང་པོ་ཁམ་གྱི་ཟས་ནི་(གོང་མ་གཉིས་འདོད་ཆགས་བྲལ་བས།) འདོད་པའི་ཁམས་ཁོ་ན་ན་ཡོད་དེ། དེ་ཡང་དྲི་(སྣ་ལྕེ་ལུས་གསུམ་གྱིས་ཁམ་དུ་བཅད་ཅིང་མིད་པས་དེ་དང་འདོད་པའི་)རོ་རེག་བྱའི་སྐྱེ་མཆེད་གསུམ་གྱི་བདག་ཉིད་དོ། །ཅི་སྟེ་ན། དེ་དག་སྣ་ལྕེ་ལུས་གསུམ་གྱིས་ཁམ་དུ་བཅད་ཅིང་མིད་ནས་ཟ་བའི་ཕྱིར་རོ། །ཁམ་ཟས་ལའང་ཕྲ་རགས་གཉིས་ལས་དང་པོ་ནི་བར་སྲིད་པ་དང་འདོད་ལྷ་དང་བསྐལ་པ་དང་པོའི་མི་རྣམས་ཀྱི་ཡིན་ཏེ། དྲི་ཟ་བའི་ཕྱིར་དང་། བྱེ་མ་ལ་ཏིལ་མར་བླུགས་པ་ལྟར་ཡན་ལག་གི་ནད་དུ་འཇུ་བས་རྒྱུ་མཐུན་མེད་པའི་ཕྱིར་རོ། །ཡང་ན་བྱིས་པ་དང་དྲོད་གཤེར་སྐྱེས་ལ་སོགས་པ་སེམས་ཅན་ཕྲ་མོ་རྣམས་ཀྱིས་ནི་ཕྲ་བ་དང་། དེ་དག་ལས་གཞན་ནི་རགས་པའོ། །དེ་བཞིན་དུ་ཁྲུས་དང་བསྐུ་མཉེ་ལ་སོགས་པ་གང་དག་མི་མིད་ལ་ལུས་གནས་པར་བྱེད་པ་དེ་དག་ཀྱང་ཟས་ཕྲ་མོ་ཡིན་ནོ། །འོ་ན་གྲིབ་མ་དང་ཉི་མ་དང་མེ་ལ་སོགས་ལ་ཡོད་པའི་རེག་བྱ་དེ་དག་ཇི་ལྟར་ཟས་ཡིན་ཞེ་ན། འདི་ནི་ཕལ་ཆེ་བའི་དབང་དུ་བྱས་པ་ཡིན་པས་དེ་དག་ནི་མ་ཡིན་ནོ་ཞེས་ཁ་ཅིག་འདོད་དོ། །(འདིས་ནི་སྐྱེ་མཆེད་གསུམ་ཕལ་ཆེར་ཟས་སུ་བསྟན་ལ་ཉི་གྲིབ་ལ་སོགས་པ་ཁ་ཅིག་ཁམ་དུ་བྱེད་པར་མི་སྟོན་ནོ། །)གལ་ཏེ་འབྲས་ཆན་ལ་སོགས་པ་ལ་ཡོད་པའི་གཟུགས་ཀྱི་སྐྱེ་མཆེད་ཀྱང་ཁམ་དུ་བྱས་ནས་མིད་པས་ཅིའི་ཕྱིར་ཁམ་ཟས་མ་ཡིན་ཞེ་ན། གཟུགས་ཀྱི་སྐྱེ་མཆེད་ནི་ཁམ་ཀྱི་ཟས་མ་ཡིན་ཏེ། ཟས་ནི་དབང་པོ་དང་དེའི་རྟེན་འབྱུང་བ་ལ་ཕན་འདོགས་པས་ཡིན་ན། གཟུགས་ཀྱི་སྐྱེ་མཆེད་དེས་རང་གི་དབང་པོ་མིག་ལ་མི་ཕན་པའི་ཕྱིར་དང་། དབང་པོའི་རྟེན་གྱི་འབྱུང་བ་ལའང་མི་ཕན་པའི་ཕྱིར་རོ། །དེ་མིད་པའི་ཚེ་རང་གི་དབང་པོ་དང་དེའི་རྟེན་གྱི་འབྱུང་བ་ལའང་ཕན་མི་འདོགས་ན་གཞན་གྱི་དབང་པོ་དང་འབྱུང་བ་ལ་ཇི་ལྟར་ཕན་འདོགས་པར་འགྱུར། གལ་ཏེ་བཀྲེས་པས་ཉེན་པ་ཟས་མཐོང་བ་ཙམ་གྱིས་ཀྱང་ཕན་པ་མ་ཡིན་ནམ་ཞེ་ན། ཟས་མཐོང་བ་ཙམ་གྱིས་ཡིད་བདེ་བ་ནི་བདེ་བ་མྱོང་བར་འགྱུར་བའི་རེག་པ་ཟས་སུ་བྱས་པ་ཡིན་གྱི་གཟུགས་ནི་མ་ཡིན་ཏེ། གལ་ཏེ་གཟུགས་མཐོང་བ་ཙམ་གྱིས་ཡིན་ན་འདོད་པ་ལས་འདོད་ཆགས་དང་བྲལ་བ་ཕྱིར་མི་འོང་དང་དགྲ་བཅོམ་པ་རྣམས་ཀྱིས་ཀྱང་ཟས་མཐོང་བ་ཙམ་གྱིས་ཚིམ་པར་འགྱུར་ན་འདོད་པའི་ཉོན་མོངས་ལས་རྣམ་པར་གྲོལ་བ་རྣམས་ལ་མི་ཕན་པའི་ཕྱིར། (ད་ལྟ་ཕང་རི་བ་དང་བྲལ་བའི་ཟས་མཐོང་བས་མི་ཕན་པའི་ཕྱིར།) དེའི་ཚེ་ཡང་སྲིད་པ་དང་བཅས་པའི་(སེམས་པའམ།) རེག་པ་(ཉོན་མོངས་ཅན།) ཁོ་ན་ཟས་སུ་འདོད་དོ། །(གང་སྤེལ་ན་རེ་གཟུགས་ཁམ་ཟས་མིན་ཏེ་ཕྲད་ནས་འཛིན་པའི་དབང་པོའི་ཡུལ་མ་ཡིན་པའི་ཕྱིར་སྒྲ་བཞིན་ནོ་ཞེས་གསུངས་པ་ཉིད་ལེགས་སོ། །གཞན་ཡིད་དང་ཆོས་གཟུགས་ཅན་མིན་ལ། དབང་པོ་ལྔ་འོད་ལྟར་དང་བ་དང་སྒྲ་ལ་རྒྱུན་མེད་པས་ཁམ་ཟས་མ་ཡིན་ཞེས་གསུང་ངོ་། །)
བྱེ་བྲག་ཏུ་སྨྲ་བ་རྣམས་ན་རེ་ཟས་ཀྱི་དོན་ནི་སྲིད་པ་གསོ་བར་བྱེད་པ་ཡིན་པས་རེག་པ་དང་སེམས་པ་དང་རྣམ་པར་ཤེས་པ་ནི་ཟག་བཅས་ཁོ་ན་ཟས་ཡིན་གྱི་ཟག་མེད་ནི་སྲིད་པ་ཟད་པར་བྱེད་པས་སྲིད་པའི་གཉེན་པོ་ཡིན་པའི་ཕྱིར་(རེག་སོགས་ཟག་མེད་གསུམ་ཡང་།) ཟས་མ་ཡིན་ནོ་ཞེས་ཟེར་རོ། །(དེས་ན་ཁམས་དང་སྐམ་བ་མི་མཉམ་པའི་ཟག་བཅས་ཀྱིས་རྒྱས་པར་བྱེད་ཀྱང་ཟས་མ་ཡིན་ནོ། །)དེ་དག་གི་ངོ་བོ་ནི་བཤད་ཟིན་ཏོ། །དེ་དག་ཁམས་གསུམ་པོ་དག་ན་ཡོད་དོ། །
འོ་ན་མདོ་ལས་ཟས་རྣམས་ནི་སེམས་ཅན་བྱུང་བ་རྣམས་གནས་པར་བྱེད་པ་དང་འཚོ་བར་བྱེད་པ་དང་། སྲིད་པ་འཚོལ་བ་རྣམས་ལ་ཕན་པར་བྱེད་པ་ཡིན་ནོ། །ཞེས་གསུངས་པའི་(ཕྱིར་དེའི།) བྱུང་བ་ནི་སྐྱེས་པ་ཡིན་ན་སྲིད་པ་འཚོལ་བ་གང་ཞེ་ན། ཡིད་ཀྱིས་རྫུས་ཏེ་སྐྱེས་པའི་ཕྱིར་ཕ་མའི་མི་གཙང་བ་ལ་མི་ལྟོས་པས་ཡིིད་ལས་བྱུང་བ་དང་། (སྔོན་དུས་སམ།) སྐྱེ་བའི་སྲིད་པ་འཚོལ་བའི་ངང་ཚུལ་ཅན་ཡིན་པའི་ཕྱིར་སྲིད་པ་འཚོལ་བ་དང་། ཟས་སུ་དྲི་ཕྲ་བ་ཟ་བའི་ཕྱིར་དྲི་ཟ་དང་། འཆི་བ་དང་སྐྱེ་བའི་བར་ན་གནས་པའི་ཕྱིར་སྲིད་པ་བར་མ་དང་། སྐྱེ་བ་ལ་མངོན་དུ་ཕྱོགས་པའི་ཕྱིར་མངོན་པར་འགྲུབ་པའི་སྲིད་པ་ཞེས་བྱ་བ་ནི་རྣམ་གྲངས་སུ་ལྟའོ། །དེས་ན་མདོ་ལས། མངོན་པར་འགྲུབ་པའི་ཀུན་སྦྱོར་སྤངས་ལ་སྐྱེ་བའི་ཀུན་སྦྱོར་མ་སྤངས་པ་ལ་སོགས་པ་མུ་བཞི་གསུངས་པའི་མུ་དང་པོ་ནི། ཕྱིར་མི་འོང་ཁམས་འོག་མ་གཉིས་ལས་འདོད་ཆགས་དང་བྲལ་བ་དང་། གཉིས་པ་བར་མ་དོར་མྱ་ངན་ལས་འདའ་བ་དང་། གསུམ་པ་དགྲ་བཅོམ་པ་དང་། བཞི་པ་དེ་དག་མ་གཏོགས་པ་(བདག་ཅག་ལ་སོགས་པ།) འོ། །ཡང་ན་བྱུང་བ་ནི་དགྲ་བཅོམ་པ་ཡིན་ལ། སྲིད་པ་འཚོལ་བ་ནི་སྲིད་པ་དང་བཅས་པ་རྣམས་སོ། །ཡང་ཅིའི་ཕྱིར་ཟས་བཞིར་བསྟན་ཞེ་ན། ཚེ་འདི་ལ་རྟེན་པ་སེམས་དང་སེམས་བྱུང་གི་གནས་ཏེ་རྟེན་དུ་གྱུར་པའི་དབང་པོ་དང་བཅས་པའི་ལུས་རྒྱས་པའི་དོན་དུ་ནི་ཁམ་གྱི་ཟས་དང་། རྟེན་པ་སེམས་དང་སེམས་བྱུང་དེ་དག་ཉིད་རྒྱས་པའི་དོན་དུ་རེག་པ་སྟེ། དེ་ལྟར་ན་འདིར་སྐྱེས་པའི་སྲིད་པ་གསོ་བར་བྱེད་པ་ལ་གཙོ་བོ་ཡིན་པས་མ་མ་ལྟ་བུའི་ཁམ་རེག་གི་ཟས་སྔ་མ་གཉིས་བསྟན་ཏོ། །སྲིད་པ་ཕྱི་མ་གཞན་འཕེན་པའི་ཕྱིར་སེམས་པའི་ཟས་དང་། ལས་ཀྱིས་འཕངས་པའི་རྣམ་ཤེས་ཀྱི་སྲིད་པ་ཕྱི་མ་མངོན་པར་འགྲུབ་པའི་དོན་དུ་རྣམ་པར་ཤེས་པ་སྟེ། དེ་ལྟར་ན་མ་སྐྱེས་པའི་སྲིད་པ་བསྐྱེད་པ་ལ་གཙོ་བོ་ཡིན་པས་ན་མ་ལྟ་བུའི་ཟས་ཕྱི་མ་གཉིས་ཏེ་གོ་རིམ་བཞིན་དུ་བསྟན་པས་ན་ཟས་བཞིར་ངེས་སོ། །འོན་ཀྱང་འདི་དག་ནི་གཙོ་ཆེ་བའི་དབང་དུ་བྱས་པ་ཡིན་གྱི་ཁམ་ཟས་དང་རེག་པས་ཀྱང་བརྒྱུད་ནས་སྲིད་པ་འཕེན་ཏེ། དེ་དག་ལས་ཉོན་མོངས་པ་དང་དེས་ལས་གསོག་པའི་ཕྱིར་དང་། མདོ་ལས་ཀྱང་། དགེ་སློང་དག་ཟས་བཞི་པོ་འདི་དག་ནི་ནད་དང་འབྲས་དང་ཟུག་རྔུའི་རྩ་བ་ཡིན་ནོ། །རྒ་ཤིའི་རྐྱེན་ཡིན་ཏེ་ཞེས་གསུངས་པའི་ཕྱིར་རོ། །
སེམས་པ་དང་རྣམ་པར་ཤེས་པས་ཀྱང་སེམས་ཅན་གནས་པར་བྱེད་དེ། མུ་གེས་ཉོན་མོངས་པར་བྱས་པ་དག་ཐལ་བའི་རྐྱལ་པ་ལ་ཕྱེའི་སེམས་པ་ཡོད་པ་དེ་སྲིད་དུ་མ་ཤི་བ་(དང་དབུ་པའི་ཕུང་པོ་ལ་ཐད་དུ་ཡོད་པ་དེ་སྲིད་དུ་མ་ཤི་བ་)ལ་རེ་བ་མེད་པ་ན་ཤི་བར་གྲགས་པའི་ཕྱིར་དང་། རྣམ་ཤེས་ཀྱིས་ཟིན་ན་ལུས་དང་དེ་ལ་བརྟེན་པའི་སེམས་ལས་བྱུང་བ་རྣམས་ཀྱང་རྒྱས་པའི་ཕྱིར་རོ། །(རྒྱ་མཚོ་འགྲམ་གྱི་སྒོར་མའི་སེམས་པས་མ་བརྗེད་པ་མི་འབྲུལ་ལ་བརྗེད་པ་འབྲུལ་ལོ་ཞེས་ཀྱང་གྲག་གོ། །སློབ་དཔོན་ན་རེ་དེ་ལྟ་ན་གཞན་གྱི་སེམས་པ་གཞན་གྱི་ཟས་སུ་ཐལ་བས་སྒོ་ངས་མ་དྲན་ན་མི་འབྲུལ་ལམ་མ་དྲན་ན་འབྲུལ་ལོ་ཞེས་སོ། །ཡང་དྲན་པ་ཉེར་གཞག་ལས་སྒོ་ང་ལས་སྐྱེས་པ་དང་ཆུ་སྲིན་ལ་སོགས་པ་རྣམས་ཡིད་ལ་སེམས་པའི་ཟས་དེས་འཚོ་བར་བྱེད་དོ། །གལ་ཏེ་མའམ་ཕ་མ་རང་གི་བུ་དྲན་ན་དྲན་པ་དེས་ཚིམ་པར་བྱེད་དོ། །དེ་ནས་ཡར་འཕེལ་བར་བྱེད་ཅིང་འཚོ་བར་བྱེད་ལ་ཟས་ཀྱི་བྱ་བ་ཡང་བྱེད་དོ་ཞེས་གསུངས། །)རྣམ་པར་གཏན་ལ་དབབ་པ་བསྡུ་བ་ལས་ནི་ཞུ་བས་ཞུ་བ་ལས་གྱུར་པ་དང་། ཡུལ་གྱི་ཡུལ་ལས་གྱུར་པ་དང་། རེ་བས་རེ་བ་ལས་གྱུར་པ་དང་། ཟིན་པས་ཟིན་པ་ལས་གྱུར་པ་ཞེས་བཤད་དེ། ལུས་རྒྱས་པ་དང་། ཚོར་བ་རྒྱས་པ་དང་། སེམས་རྒྱས་པ་དང་། སེམས་ལས་བྱུང་བའི་ཆོས་རྒྱས་པའི་ཕྱིར་རམ། ལུས་དྲན་པ་ཉེར་གཞག་ལ་སོགས་པ་ལ་འཇུག་པའི་ཕྱིར་བཞིར་ངེས་པར་འདོད་དོ། །(ཁམས་དང་ཟས་ལ་མུ་བཞི་རྩི་ན། མུ་དང་པོ་ཁམ་ཡིན་ལ་ཟས་མིན་པ་ནི་ཐོ་ལུམ་འབར་བ་ལ་སོགས་པ་ཟ་བ་དང་འཇུ་བའི་ཚེ་གཉིས་ཀ་ཕན་མི་འདོགས་པའོ། །ཟས་ཡིན་ཁམ་མིན་རེག་སོགས་གསུམ་མོ། །གཉིས་ཡིན་ནི་དབང་པོ་རྟེན་བཅས་རྒྱས་པར་འགྱུར་བའི་ཁམ་གང་ཡིན་པའོ། །གཉིས་མིན་ནི་སྒྲ་དང་ཚོར་བ་སྡུག་བསྔལ་མཚུངས་ལྡན་ཐམས་ཅད་དོ། །དེ་བཞིན་དུ་རེག་པ་དང་། ཟས་ལའང་མུ་བཞི་སྟེ། རེག་པ་ཡིན་ལ་ཟས་མིན་པ་རེག་པ་ཟག་མེད་དོ། །ཟས་ཡིན་རེག་མིན་ནི་སེམས་པ་སོགས་ཟས་གསུམ་མོ། །གཉིས་ཡིན་ནི་རེག་པ་ཟག་བཅས་སོ། །གཉིས་མིན་ནི་དེ་དག་མ་གཏོགས་པ་སྟེ་ཟས་གཞན་གསུམ་ལའང་མུ་བཞི་སྦྱར་རོ། །བྱེ་བྲག་སྨྲ་བ་དག་ཟས་ནི་ཟ་བ་དང་། འཇུ་པའི་ཚེ་གཉིས་སུ་བྱ་བ་བྱེད་པས། ཐུ་ལུམ་འབར་བ་ལ་སོགས་པའང་ཟས་ཡིན་ཏེ་ཟ་བའི་ཚེ་བཀྲེས་སྐོམ་འཇོམས་ནུས་པས་སོ། །བསྟན་བཅོས་ལས་རྒྱས་འགྱུར་གྱི་ཟས་ལ་དགོངས་སོ། །ཞེས་ཟེར་རོ། །)དེ་དག་གིས་ནི་གནས་པའི་ཚུལ་བཤད་ཟིན་ཏོ། །
ད་ནི་འཆི་བའི་ཚུལ་སྟོན་པ་ལ་འཆི་བའི་སེམས་དང་། ཚུལ་དང་། ཤི་ནས་ཇི་ལྟར་འགྱུར་བ་གསུམ་ལས་དང་པོ་ནི་(ལོག་ལྟས།) དགེ་བའི་རྩ་བ་ཆད་པ་དང་། དེ་(ཐེ་ཚོམ་མམ་ཡང་དག་ལྟ་བས།) མཚམས་སྦྱོར་བ་དང་། (མཉམ་གཞག་གིས་)ཁམས་དང་ས་ལས་འདོད་ཆགས་དང་བྲལ་བ་དང་། དེ་ལས་(ཚུལ་བཞིན་མིན་པས་ཡིད་བྱེད་ཀྱིས་)ཉམས་པ་དང་། (དབང་པོ་འགགས་པ།) འཆི་འཕོ་བ་དང་། བར་སྲིད་དང་སྐྱེ་སྲིད་དུ་སྐྱེ་བ་ལེན་པའི་སེམས་དྲུག་པོ་རྣམས་ནི་ཁ་ཅིག་རྟོག་བཅས་དང་ཁ་ཅིག་མཉམ་གཞག་དང་ཁ་ཅིག་མི་གསལ་བས་ཡིད་ཀྱི་རྣམ་པར་ཤེས་པ་ཁོ་ནར་འདོད་དོ་ཞེས་བྱ་བ་ནི་སྡེ་པ་དག་སྟེ། རྣལ་འབྱོར་སྤྱོད་པ་པ་ནི་སྐྱེ་བ་དང་འཆི་བའི་(སེམས་)ནི་ཀུན་གཞི་རྣམ་ཤེས་ཡིན་པར་འདོད་དོ། །ཆོར་བ་ནི་འཆི་འཕོ་བ་དང་སྐྱེ་བའི་བཏང་སྙོམས་ཉིད་ལ་ཡིན་པར་འདོད་དེ། ཚོར་བ་གཞན་དག་ནི་རྣམ་པ་གསལ་བའི་ཕྱིར་མི་འདོད་དོ། །དེའི་ཕྱིར་བསམ་གཏན་གསུམ་ན་ཉེར་བསྡོགས་ཁོ་ན་ལ་འཆི་སེམས་དང་སྐྱེ་སེམས་ཡོད་ཀྱི་དངོས་གཞི་དག་ན་ནི་མེད་དེ། བཏང་སྙོམས་མེད་པའི་ཕྱིར་རོ་ཞེས་སློབ་དཔོན་གང་སྤེལ་འཆད་དོ། །ཡིད་ཀྱི་རྣམ་ཤེས་དེ་ཡང་བློ་རྩེ་གཅིག་པའི་ཏིང་ངེ་འཛིན་ལ་སྙོམས་པར་འཇུག་བཞིན་པའི་མཉམ་གཞག་ལ་སྐྱེ་བ་དང་འཆི་བ་མེད་དེ། (མཉམ་གཞག་དང་།) རིས་མི་འདྲ་བའི་སེམས་མངོན་དུ་བྱས་པའི་ཕྱིར་དང་། ཏིང་ངེ་འཛིན་མངོན་པར་འདུ་བྱེད་པ་ལས་བྱུང་བའི་སྦྱོར་བྱུང་ཡིན་(པས་གསལ་)པའི་ཕྱིར་དང་། (ཤིན་ཏུ་སྦྱངས་པས།) ལུས་ལ་ཕན་འདོགས་(པས་གོང་མ་གཉིས་སུ་མཉམ་གཞག་གི་སེམས་ལ་དེ་དག་མེད།) པའི་ཕྱིར་རོ། །སེམས་མེད་(གསུམ་ལ་གནས།) པའི་ངང་ལའང་(འཆི་འཕོ་བ་དང་སྐྱེ་བ་)དེ་དག་མེད་དེ་(དེ་དག་ལ་གནས་པ་ལ་གནོད་པར་བྱ་བར་མི་ནུས་པའི་ཕྱིར་དང་།) འཆི་བ་དང་སྐྱེ་བ་ནི་སེམས་གཞན་དུ་འཕོ་བ་དང་ཉིང་མཚམས་སྦྱོར་བ་ཡིན་པ་ན་སེམས་མེད་པའི་ཕྱིར། །དེའི་ཕྱིར་འདུ་ཤེས་མེད་པའི་སེམས་ཅན་དག་སྐྱེ་བ་དང་འཆི་བ་ནའང་སེམས་འབྱུང་བར་བཤད་དོ། །(ཡང་ཉོན་མོངས་པ་མེད་པར་མི་སྐྱེ་བའི་ཕྱིར་རོ། །)གང་ཞིག་འཆི་བའི་སྲིད་པ་རྣམ་པ་གསུམ་དུ་བཤད་པ་དེ་ལས་དགྲ་བཅོམ་པ་མྱ་ངན་ལས་འདའ་བ་ནི་(འདོད་པ་ན་རྣམ་སྨིན་བཏང་སྙོམས་ཡོད་པར་འདོད་པ་ལྟར་ན་)སྤྱོད་ལམ་པ་དང་རྣམ་སྨིན་སྐྱེས་(གང་རུང་དང་མེད་པ་ལྟར་ན་སྤྱོད་ལམ་པའི།) སེམས་དགེ་བ་དང་ཉོན་མོངས་ཅན་དུ་ལུང་བསྟན་པ་མིན་པ་གཉིས་ལས་གང་རུང་ཡིན་ནོ་ཞེས་བྱ་བ་ནི་དམིགས་ཀྱིས་བསལ་བ་ཡིན་ཏེ། སེམས་གཉིས་པོ་དེ་སྟོབས་ཆུང་བས་སེམས་རྒྱུན་ཆད་པ་དང་མཐུན་པའི་ཕྱིར་དང་། གཞན་དག་ནི་སྟོབས་ཆེ་བའི་ཕྱིར་རོ། །སློབ་དཔོན་གང་སྤེལ་གྱིི་ཊཱི་ཀར་ཁ་ཅིག་ན་རེ་དགྲ་བཅོམ་པས་མི་དགེ་བ་(དང་ཉོན་མོངས་ཅན་)སྤངས་ཤིང་ཟག་མེད་གསལ་བས་དེ་ལས་མྱ་ངན་ལས་མི་འདའ་ལ། དགེ་བ་ཟག་བཅས་ནི་རྣམ་སྨིན་དང་བཅས་ཤིང་དགྲ་བཅོམ་ནི་མ་འོངས་པའི་རྣམ་སྨིན་ལ་རྒྱབ་གྱིས་ཕྱོགས་པ་ཡིན་པས་དགེ་བའི་སེམས་ལ་མྱ་ངན་ལས་འདའ་བ་མེད་དོ། །ཞེས་ཟེར་རོ། །གཞན་དག་ན་རེ་མཐར་གྱིས་འཁོར་བ་སྤོང་བ་ཡིན་ཏེ། འདོད་པ་ལས་འདོད་ཆགས་དང་བྲལ་བས་ནི་མི་དགེ་བ་དང་། སྲིད་རྩེ་ལས་འདོད་ཆགས་དང་བྲལ་བས་ནི་བསྒྲིབས་ལ་ལུང་མ་བསྟན་དང་། མྱ་ངན་ལས་འདའ་བའི་སེམས་མ་བསྒྲིབས་ལུང་མ་བསྟན་མངོན་དུ་གྱུར་པས་ནི་དགེ་བ་དང་། ལྷག་མེད་ཀྱི་དབྱིངས་སུ་ཞུགས་པས་ནི་མ་བསྒྲིབས་ལུང་མ་བསྟན་སྤོང་བའི་ཕྱིར་རོ་ཞེས་ཟེར་རོ་ཞེས་འབྱུང་ངོ་། །
གཉིས་པ་འཆི་བའི་ཚུལ་ནི་གལ་ཏེ་འཆི་བ་ན་ལུས་ཀྱི་ཕྱོགས་གང་དུ་རྣམ་ཤེས་འགག་ཅེ་ན། འོག་ངན་སོང་གསུམ་དང་མི་དང་ལྷར་འགྲོ་སྟེ་སྐྱེ་བ་དང་མི་སྐྱེ་བ་དགྲ་བཅོམ་པ་མྱ་ངན་ལས་འདའ་བ་རྣམས་རྫུས་སྐྱེས་ལ་ནི་འདི་ལྟར་མ་ངེས་པས་(ཅིག་ཅར་འཆི་ན་ཡིད་དང་ལུས་དབང་ཐམས་ཅད་ཅིག་ཅར་འགགས་པ།) རིམ་གྱིས་ཏེ་སྐྱེ་གནས་དང་པོ་གསུམ་འཆི་བ་ན་རིམ་པ་ལྟར་ངན་སོང་བ་རྐང་པ་དང་མི་ལྟེ་བ་དང་ལྷ་དང་དགྲ་བཅོམ་པ་ནི་སྙིང་གར་ཡིད་འཆི་འཕོའོ། །ཁ་ཅིག་ན་རེ་དགྲ་བཅོམ་པ་ནི་སྤྱི་བོ་ནས་འཕོའོ། །ཞེས་ཟེར་རོ། །དེ་ཡང་རྣམ་ཤེས་ནི་གཟུགས་མེད་ཅིང་བསྟན་མེད་ཡིན་པས་ཡུལ་ན་མི་གནས་མོད་ཀྱི། འོན་ཀྱང་འཆི་བ་ན་ལུས་ཀྱི་དབང་པོ་རྡོ་བསྲེགས་པ་ལ་ཆུ་བཏབ་པ་ཡལ་བར་འགྱུར་བ་ལྟར་ལུས་ཀྱི་རྐང་པ་ལ་སོགས་པར་ནུབ་པར་འགྱུར་བ་ལ་ཡིད་འཕོ་ཞེས་བྱའོ། །ཀུན་ལས་བཏུས་ལས་ནི་དགེ་བ་བྱེད་པའི་ལུས་ནི་ཐོག་མ་ཉིད་དུ་སྨད་གྲང་བར་འགྱུར་རོ། །མི་དགེ་བ་བྱེད་པའི་ལུས་ནི་སྟོད་གྲང་བར་འགྱུར་རོ་ཞེས་བཤད་དེ། འདིའི་ལྟར་ན་དྲོད་སྡུད་ཕྱོགས་མ་གཏོགས་པ་མཐར་ཐམས་ཅད་ཀྱི་སྙིང་ག་ནས་ཀུན་གཞི་འཕོ་བར་འདོད་དོ། །
གལ་ཏེ་འཆི་འཕོ་བ་ན་གནད་གཅོད་པ་དེ་དག་(རྒྱུ་)གང་(གིས་)ཞེ་ན། གནད་གཅོད་པ་ནི་(བད་ཀན་དང་མཁྲིས་པ་དང་རླུང་ཤས་ཆེ་ན་རིམ་པ་ལྟར།) ཆུ་དང་སོགས་པའི་སྒྲས་གཟུང་བ་མེ་དང་རླུང་གི་ཁམས་རྣམས་ལས་གང་ཡང་རུང་བ་ཞིག་དྲག་ཏུ་འཁྲུགས་པའི་སྟོབས་ཀྱིས་ལུས་ཀྱི་ཕྱོགས་འགའ་ཞིག་ཉམས་ནས་འཆི་བ་སྟེ། དེ་ཡང་མཚོན་ཆ་རྣོན་པོས་བཏབ་པ་ལྟར་ཚོར་བ་མི་བཟད་པས་ཉམས་པས་བཅད་པ་དང་འདྲ་བར་གཡོ་བ་མེད་པ་ཡིན་གྱི་འདྲེ་དང་གདོན་གྱིས་དངོས་སུ་ཤིང་དུམ་བུར་བྱེད་པ་ལྟར་གཅོད་པ་ནི་མ་ཡིན་ནོ། །གལ་ཏེ་སའི་ཁམས་ཀྱིས་ཅིའི་ཕྱིར་མི་གཅོད་ཅེ་ན། སེམས་ཅན་རྣམས་ལ་རླུང་དང་མཁྲིས་པ་དང་བད་ཀན་དག་ལས་སྐྱོན་བཞི་པ་མེད་པའི་ཕྱིར་རོ། །དེའི་ཕྱིར་རླུང་ཤས་ཆེ་ན་རླུང་དང་མཁྲིས་པ་ཤས་ཆེ་ན་མེ་དང་། བད་ཀན་ཤས་ཆེ་ན་ཆུ་དག་གིས་གཅོད་དོ། །ཁ་ཅིག་ན་རེ་སྣོད་ཀྱི་འཇིག་རྟེན་འཇིག་པ་དང་ཆོས་མཐུན་པས་སོ་ཞེས་ཟེར་རོ། །དགེ་བ་བྱེད་ཅིང་གཞན་གྱི་གནད་དུ་བསྣུན་པར་མི་བྱེད་པ་དང་ལྷ་ལ་སོགས་པ་ཅིག་ཅར་འཆི་བ་རྣམས་ནི་གནད་གཅོད་མེད་པར་འཆི་བའི་ཕྱིར་རོ། །ཞེས་སློབ་དཔོན་གང་སྤེལ་གྱིས་བཤད་པས་དེ་དག་གིས་མི་གཅོད་པ་དག་ཀྱང་སྲིད་དོ། །(ལྷ་དག་ནི་ནང་ན་གནད་འཆད་པ་མེད་ཀྱང་འདོད་པ་ན་ལྷའི་བུ་འཆི་བ་ལ་གོས་དང་རྒྱན་ལས་སྒྲ་ཡིད་དུ་མི་འོང་བ་འབྱུང་བ་དང་། ལུས་ཀྱི་འོད་སྔར་བས་ཆུང་བར་འགྱུར་བ་དང་། ཁྲུས་བྱས་པའི་ཆུའི་ཐིགས་པ་ལུས་ལ་འཆགས་པ་དང་། གཡོ་བའི་བདག་ཉིད་ཅན་ཡང་བློ་ཡུལ་གཅིག་ལ་གནས་པར་འགྱུར་བ་དང་། མིག་འབྱེད་འཛུམས་བྱེད་པར་འགྱུར་བ་སྟེ་མ་ངེས་པ་ཉེ་བའི་འཆི་ལྟས་ལྔ་དང་། གོས་དྲི་མ་ཅན་དུ་གྱུར་པ་དང་། མེ་ཏོག་ཕྲེང་རྙིངས་པར་འགྱུར་བ་དང་། མཆན་ཁུང་གཉིས་ནས་རྡུལ་འབྱུང་བ་དང་། ལུས་ལས་དྲི་ང་བ་འབྱུང་བ་དང་། ལྷའི་བུ་རང་གི་སྟན་ལ་མི་དགའ་བར་འགྱུར་བ་སྟེ་དེ་དག་བྱུང་ན་འཆི་བར་ངེས་པས། ངེས་པ་ཅན་གྱི་འཆི་ལྟས་ལྔ་འབྱུང་ཞིང་། སློབ་དཔོན་གང་སྤེལ་གྱི་ཊཱི་ཀ་ལས། ངེས་པ་ཅན་གྱི་འཆི་ལྟས་འདི་དག་ནི་ཐམས་ཅད་ལ་གདོན་མི་ཟ་བར་མི་འབྱུང་ལ། ཐམས་ཅད་ཀྱང་མི་འབྱུང་མོད་ཀྱིས་ལྷའི་འཆི་ལྟས་བསྡོམས་ནས་ལྔ་ཞེས་བརྗོད་དོ། །འཆི་ལྟས་དེ་དག་ནི་ལྷའི་ཞག་ལྔ་འབྱུང་ངོ་། །ཞེས་བཤད་དོ། །དེས་ན་ལུས་ཀྱི་སྡུག་བསྔལ་མནར་མེད་ཆེ་ཡང་སེམས་ཀྱི་སྡུག་བསྔལ་འཆི་ལྟས་བྱུང་བའི་ལྷ་ཆེ་སྟེ། དྲན་པ་ཉེར་གཞག་ལས། ལྷའི་ཡུལ་ནས་ལྟུང་བ་ན། །སྡུག་བསྔལ་རབ་ཏུ་སྐྱེ་བ་གང་། །དེའི་ཁྱད་པར་སེམས་ཅན་དམྱལ། །བཅུ་དྲུག་ཆར་ཡང་མི་ཕོད་དོ། །ཞེས་གསུངས་པས་སོ། །འཆི་ལྟས་ཕོག་ནས་ལྷའི་བུ་གཞན་གྱིས་རྒྱང་ནས་མེ་ཏོག་ཅན་གྱི་ཤིང་གི་ཡལ་ག་སྙིང་གར་བཞག་ནས། ལྷའི་བུ་ཁྱོད་འདི་ནས་ཤི་འཕོས་ནས་ལེགས་པར་སྤྱད་པ་མིའི་འཇིག་རྟེན་འཛམ་གླིང་དུ་སྐྱེ་བར་གྱུར་ཅིག། དེ་ཡང་དད་པའི་གཤོལ་གྱིས། བསོད་ནམས་ཀྱི་ཞིང་རྨེད་པར་གྱུར་ཅིག། ཅེས་བརྗོད་པ་ནི། སྲིན་བུ་བྱེ་ཚན་ལ་སྒྲེས་པ་ལྟར། །ཀྱེ་ཧུ་ཤིང་རྟ་སྣ་ཚོགས་ཚལ། །ཀྱེ་ཧུད་ཚེའུ་དལ་གྱིས་འབབ། །ཀྱེ་ཧུད་སྡུག་པའི་རྣམ་ཤེས་ལྷ། །སྨྲེ་སྔགས་འདོན་ཞིང་ས་ལ་ལྷུང་། །ཞེས་སྨྲེ་སྔགས་འདོན་ནོ། །)
གསུམ་པ་ཤི་ནས་ཇི་ལྟར་འགྱུར་བ་ནི་སེམས་ཅན་རྣམས་སྐྱེ་བ་དང་གནས་པ་དང་འཆི་བ་ན་མདོ་ལས། སེམས་ཅན་གྱི་ཚོགས་རྣམ་གསུམ་དུ་གསུངས་ཏེ། གང་ཞེ་ན་ཡང་དག་པ་ཉིད་དུ་ངེས་པའི་ཚོགས་དང་། ལོག་པ་ཉིད་དུ་ངེས་པའི་ཚོགས་དང་། མ་ངེས་པའི་ཚོགས་པ་ཞེས། དེ་ལས་འཕགས་པ་དང་མཚམས་མེད་པ་བྱེད་པ་དག་ནི་རིམ་པ་ལྟར་ཡང་དག་པ་དང་ལོག་པ་ཉིད་དུ་ངེས་པ་ཡིན་ཏེ། ངན་འགྲོ་མེད་པར་མཐོ་རིས་སུ་སྐྱེས་ནས་ཐར་པར་ངེས་པའི་ཕྱིར་དང་། ཤི་འཕོས་མ་ཐག་ཏུ་དམྱལ་བར་སྐྱེ་བར་ངེས་པའི་ཕྱིར་རོ། །ལྷག་མ་རྣམས་ནི་མ་ངེས་པ་ཡིན་ནོ། །དེ་དག་གིས་ནི་སེམས་ཅན་གྱི་འཇིག་རྟེན་བཤད་ཟིན་ཏོ།། །།