རྣམ་ཐར་གྱི་ཐལ་ཕྲེང་།
༄༅། །བི མོ ཀྟ སྟ སྟི སི རྒྱ ཤྩ ཤི ར ས ཤ ནི སཾ བི ཧ ར ཏི སྨ།།
༄༅། །རྣམ་ཐར་གྱི་ཐལ་ཕྲེང་ཡོད་པའི་དབུ་ཕྱོགས་ལེགས་པར་བཞུགས་ལགས་སོ།།
ན་མོ་མཉྫགྷོ་ཥ་ཡེ། །ལོ་ཡི་རྒྱལ་པོ་བྱི་བའི་ལོ། །རྩི་ཐོག་རྒྱས་པ་དབྱར་གྱི་དུས། །དུས་བཟང་ཡར་ངོའི་ཚེས་བཅུ་ལ། །སྤྲིན་དཀར་འཛུམ་པའི་ལྷ་ལམ་ནས། །སཱུརྱ་མཛེས་པའི་ཞལ་རས་ངོམས། །བཻཌཱུར་མཛེས་པའི་སྤང་ལྗོངས་ལ། །འདབ་བརྒྱད་པདྨའི་ཚལ་ཆེན་རྒྱས། །ལྗོན་ཤིང་ཡལ་གའི་རྔ་ཡབ་ནི། །ལྷ་མོ་སྒྲོལ་མས་ཅུང་ཟད་གཡོབ། །རྐང་དྲུག་སྙན་པའི་གླུ་དབྱངས་སྒྲོག །བསམ་གཏན་ཁང་བུའི་བ་གམ་ན། །འཇམ་ཞིང་བདེ་བའི་གདན་གྱི་སྟེང་། །དགེ་སློང་ཀརྨ་ཆགས་མེད་དེ། །རང་གི་རྣམ་ཐར་གླེགས་བམ་གཅིག །བརྩམས་ཚར་འཛུམ་དང་མུ་ལེ་
བཞུགས། །དེ་ཚེ་རང་ལས་མི་ཞན་པའི། །དགེ་ཚུལ་ཀརྨ་སློབ་ལམ་ཞེས། །མཚན་ཉིད་གྲྭ་ས་འགྲིམ་པ་ཞིག །བྱུང་ནས་རྣམ་ཐར་དེ་ལ་བལྟས། །མ་མགུ་ཁྲེལ་བགད་འགའ་རེ་བྱས། །དགེ་སློང་དེ་ལ་འདི་སྐད་ཟེར། །ཧེ་ཧེ་དགེ་སློང་བགྲེས་པོ་ཁྱེད། །མདོ་རྒྱུད་ལུང་དང་མི་མཐུན་པ། །དངོས་སྟོབས་རིགས་པས་མ་གྲུབ་པ། །འབྲེལ་མེད་དྲན་ཚད་གླེགས་བམ་བྲི། །འདི་འདྲ་གཏན་ནས་མི་འཐད་ཕྱིར། །ལུང་གིས་ལུང་དགག་བཏང་རྒྱུ་ཡོད། །རིགས་པའི་གནོད་བྱེད་འཕེན་རྒྱུ་ཡོད། །རྒྱ་གར་ཡུལ་གྱི་ཕྱག་ལེན་ལྟར། །འབྲེལ་མེད་བསྟན་བཅོས་འདི་འདྲ་
བ། །མེ་སྦྱོར་ཁྱི་ཡི་མཇུག་མར་ཆིངས། །མཁས་པས་མཐོང་ན་ངོ་ཡང་ཚ། །བཟང་པོས་མཐོང་ན་ཐུགས་ཀྱང་ཁྲེལ། །བླུན་པོས་བཏོན་ན་ཁ་ཡང་ན། །སྣག་ཤོག་འདི་ཙམ་རྒྱུ་གྱོང་ལ། །ལག་པ་ན་བས་རྒྱུ་དེ་གྱོང་། །ཡིག་དྲུག་ཆག་པ་བར་ཆད་ཆེ། །ཉམས་ལེན་བཤོལ་བ་བདུད་ཀྱི་ལས། །ཟེར་ནས་ཕར་རྒྱུག་ཚུར་རྒྱུག་བྱས། །དེ་ཚེ་དགེ་སློང་དེས་སྨྲས་པ། །ཁྱེད་དགེ་ཚུལ་གྲྭ་ས་མཐོང་ལགས་ན། །ལུང་དང་རིགས་པས་ཕྱུག་ལགས་ན། །ལུང་རིགས་སྐྱོན་དེ་བཏང་མཛོད་དང་། །ང་ལ་བློ་སྐྱེད་འོང་ཤས་ཁ། །ཟེར་བས་དགེ་ཚུལ་དེ་ཉིད་ཀྱིས། ཞྭ་མོ་སྤྱི་བོར་ལེབ་ཞྭ་བྱས། །ཕྲེང་བ་ཤད་ཤད་མང་དུ་བྱས། །ཟླུམ་ཁྱེར་ཕྲག་གོང་གཡོན་དུ་བཀལ། །སྐེད་པ་ལྡེམ་ལྡེམ་ཁྱུག་ཁྱུག་གིས། །བགྲོ་གླེང་ཁྱབ་པ་འདི་ལྟར་རོ། །ཁྱོད་ཀྱི་རྣམ་ཐར་ངན་པ་རང་བསྟོད་ཡིན་པར་ཐལ། རྣམ་ཐར་ཕལ་ཆེར་སློབ་མས་བརྩམས་པ་ཡིན་པ་གང་ཞིག །རང་གི་རྣམ་ཐར་རང་གིས་རྩོམ་པ་མེད་པའི་ཕྱིར། ཟེར་ནས་ཕྲེང་བ་ལག་པ་གཡོན་ལ་དཀྲིས། ལག་པ་ཚག་སྒྲ་ཐོན་པ་ཞིག་བརྡབས་པ་དང་མཉམ་དུ། ཀི་ཧ་ཞེས་རྣ་གདོང་བཀའ་བའི་ཐལ་སྐད་ཅིག་དང་། རྡོག་སྡེབ་ཁང་སྐུབ་ཕུད་ལེ་ཁད་ཅིག་བྱས་སོ།
དགེ་སློང་གིས་ལན་བཏབ་པ། རྟགས་གཉིས་པ་མ་གྲུབ་སྟེ། གྲུབ་ཆེན་ཀརྨ་པ་སེམས་དཔའ་རང་བྱུང་རྡོ་རྗེ་སོགས་མཁས་གྲུབ་དུ་མས་རང་རང་གི་རྣམ་ཐར་རྩོམ་པའི་ཕྱིར། ཟེར་ནས་ལག་པ་རྡེབ་པ་ཙམ་ཞིག་དང་ཀི་ཤར་ཆུང་བ་གཅིག་བྱས་སོ། །དེ་ནས་རིམ་བཞིན་དུ་དགེ་ཚུལ་གྱིས་རིགས་ལུང་བཏང་། དགེ་སློང་གིས་ལན་བཏབ་སྟེ། རང་གི་རྣམ་ཐར་རང་གིས་བརྩམས་པ་མི་འཐད་པར་ཐལ། དེ་ལ་རྒྱུ་མཚན་མེད་པའི་ཕྱིར་ཟེར་བས། རྟགས་མ་གྲུབ་སྟེ། དེ་ལ་རྒྱུ་མཚན་ཡོད་དེ་ནང་གི་རྟགས་མཚན་དང་ཉམས་རྟོགས་འཆར་ཚུལ་སློབ་མ་ལ་རྒྱུས་མེད་པས་རང་གིས་མ་བརྩམས་ན་མི་གསལ་བའི་ཕྱིར་སྨྲས་སོ། །འོ་ན་ཁྱོད་ཀྱི་རྣམ་ཐར་བརྩམས་པ་མི་འཐད་པར་ཐལ། སྐྱེས་བུ་དམ་པ་དང་གོ་ས་ཆེན་པོ་རྣམས་ལ་རྣམ་ཐར་ཡོད་ཀྱིས་ཁྱོད་ལྟ་བུ་བྱ་བྲལ་ཁུ་ཚུར་ཙམ་པ་ཞིག་ལ་རྣམ་ཐར་རྩོམ་པ་དོན་མེད་པའི་ཕྱིར་ཟེར་རོ། །རྟགས་མ་གྲུབ་སྟེ། སྤྲུལ་སྐུ་མི་འགྱུར་རྡོ་རྗེའི་བཀའ་མི་བཅག་པའི་ཕྱིར་བརྩམས་པ་གང་ཞིག །བླ་མའི་བཀའ་བཅག་པ་ལྟུང་བ་ཆེན་པོར་བཤད་པའི་ཕྱིར་སྨྲས། འོ་ན་ཡང་ལྡེབ་མ་འགའ་ཟུང་གིས་ཆོག་པར་ཐལ། ཁྱོད་ལ་གླེགས་བམ་ལོང་བའི་རྣམ་ཐར་མི་
འཐོབ་པའི་ཕྱིར། རྟགས་མ་གྲུབ་སྟེ། སྤྲུལ་སྐུས་ཤོག་ལྡེབ་སུམ་བརྒྱ་གླེགས་བམ་དུ་བྱས། འདིའི་ནང་ན་བྲིས་གསུངས་ཕྱིར་བཀའ་མི་བཅག་པའི་ཕྱིར་འོ་ན་ཕྱི་ཡི་རྣམ་ཐར་ཐ་མལ་བན་རྐྱང་ཞིག་གི་ལོ་རྒྱུས་ལས་མེད་པ་འདིས་སྤྲུལ་སྐུའི་དགོངས་པ་མི་འགྲུབ་པར་ཐལ། སྙན་ངག་གིས་བཅིངས་ནས་རྣམ་ཐར་ལེགས་པོ་ཞིག་དགོས་པའི་ཕྱིར་ཟེར་རོ། །རྗེ་མི་བསྐྱོད་ཞབས་ཀྱིས། དོན་ཏིལ་འབྲུ་ཙམ་ལ་སྒོ་ཏ་ལའི་ལོ་མ་ཙམ་བཏགས་ནས་རང་བསྟོད་བྱས་པ་ཟོབ་དང་མི་ཆོས་བླ་མའི་རྫུན་དུ་བྱས་པ་གང་ཞིག །དྲང་པོའི་ལོ་རྒྱུས་བྲིས་པ་ལ་ཉེས་ལྟུང་མེད་པའི་ཕྱིར། འོ་ན་ཁྱོད་རང་གིས་བྲི་བ་མི་འཐད་པར་ཐལ། ཁྱོད་རང་གི་སློབ་བུ་པདྨ་རིག་འཛིན་དང་ཡང་དག་སོགས། རྩོམ་ཤེས་ཤིང་བྲིས་ལེགས་པ་ཞིག་ལ་རྩོམ་འཇུག་པ་འཐད་པའི་ཕྱིར། ཟེར་བ་ལ། རྟགས་མ་གྲུབ་སྟེ། རྒྱལ་བ་གཡུང་སྟོན་པས། སློབ་མས་བརྩམས་པའི་རྣམ་ཐར་ཕལ་ཆེར་ཡང་། །བསྟོད་ར་ཆེ་བས་བླ་མ་ཟོབ་པོར་བཏང་། །ཞེས་གསུངས་པ་དང་མཚུངས་དགོངས་པའི་ཕྱིར་སྨྲས་སོ། །འོ་ན་ཡང་ཁྱོད་ཀྱིས་འདི་བརྩམས་པ་མ་ལེགས་པར་ཐལ། བར་སྐབས་སུ་སྙན་ངག་གི་མཛེས་རྒྱན་རེ་མི་འདུག་པའི་ཕྱིར་ཟེར་བ་ལ།
རྟགས་མ་གྲུབ་སྟེ། སྙན་ངག་མཁན་ལ་བཀག་པ་མེད། །བྱི་བ་ལ་ནི་གླང་ཆེན་བཞིན། །ཞེས་གསུངས་པ་གང་ཞིག །སྙན་ངག་བྱས་ན་དྲང་པོའི་གཏམ་ཨེ་ཡིན་དང་། བསྟོད་རྒྱུ་མེད་པ་ལ་སྙན་ངག་གིས་བསྟོད་པ་གང་ཡིན་འབྱེད་དཀའ་བའི་ཕྱིར། སྨྲས། དེ་མི་འཐད་པར་ཐལ་ཏེ་དེ་གཉིས་མཁས་པ་རྣམས་ཀྱིས་འབྱེད་པའི་ཕྱིར། །ཟེར་བ་ལ་རྟགས་མ་གྲུབ་སྟེ། མཁས་གྲུབ་ཚད་ལྡན་སུས་ཀྱང་སྤྲང་པོ་ང་ཡི་རྣམ་ཐར་མི་གཟིགས་པ་གང་ཞིག །རང་ལ་དད་པའི་གྲྭ་སློབ་ཕལ་ཆེར་སྙན་ངག་མི་གོ་མཁན་མང་བའི་ཕྱིར། སྨྲས། །འོ་ན་ཁྱོད་ཀྱི་རྣམ་ཐར་གྱི་སྤྱི་དོན་འདི་མི་འཐད་པར་ཐལ། འདི་ན་མདོ་སྔགས་ཀྱི་ལམ་ཕལ་ཆེར་ཚང་བར་འདུག་པ་གང་ཞིག །འདི་ཐམས་ཅད་ཁྱོད་ཀྱིས་རྟོགས་དཀའ་ཞིང་འཁྲུལ་པའི་ཆ་འགའ་རེ་ཡོད་པའི་ཕྱིར། ཟེར་བ་ལ། མ་ཁྱབ་སྟེ། འཁྲུལ་པའི་ཆ་བག་རེ་ནི་ས་བཅུ་རྒྱུན་གྱི་མཐའ་ཚུན་ལ་ཡོད་པར་བཤད། བྱང་ཆུབ་སེམས་དཔའ་རྣམས་ལ་ཡང་། །འཁྲུལ་པ་ཡེ་ཤེས་དུམ་བུར་གནས། །ཞེས་གསུངས་པ་ལྟར་རྒྱ་གཞུང་ཚད་ལྡན་རྣམས་ལ་ཡང་། འཁྲུལ་པའི་ཆ་ཅུང་ཟད་རེ་ཡོད་པར་བཞེད་མཁན་ཡོད་པ་གང་ཞིག །བོད་གཞུང་ལ་ཡང་དེ་དང་
འདྲ་བས་ང་དེ་བས་མི་ལྷག་པའི་ཕྱིར་རོ། །སྨྲས་སོ། །ཁྱོད་ཀྱི་ནང་གི་རྣམ་ཐར་མི་འཐད་པར་ཐལ། རྨི་ལམ་ཤས་ཆེའི་ལྷ་མཐོང་འདྲེ་མཐོང་འདྲ་བ་དེ་དག་བདུད་དང་དམ་སྲིས་བསླུས་པ་ཡིན་པ་གང་ཞིག །རྨི་ལམ་མཆོག་འཛིན་ཆེ་བ་བར་ཆད་ཀྱི་རྒྱུ་ཡིན་པའི་ཕྱིར་ཟེར་རོ། །རྟགས་དང་པོ་མ་གྲུབ་སྟེ། བདུད་དང་དམ་སྲིས་བསླུས་པ་ཡིན་ན། འཕྲལ་དུ་བཀྲ་མི་ཤིས་པའམ། བློ་ཆོས་སུ་མི་འགྲོ་བར་འགྱུར་བ་ལས། དེ་ལྟར་མ་བྱུང་བའི་ཕྱིར། རྟགས་གཉིས་པ་མ་གྲུབ་སྟེ། དེ་དག་ལ་བདག་གིས་དགའ་བྲོད་དང་མཆོག་འཛིན་ཆེན་པོ་མེད་པའི་ཕྱིར་སྨྲས་སོ། །ཁྱོད་ཀྱི་གསང་བའི་རྣམ་ཐར་མི་འཐད་པར་ཐལ། ཁྱེད་རང་གི་མི་དྲན་པར་གཞན་གྱིས་གསུངས་པའི་སྐྱེས་རབས་བྲི་མི་རུང་བ་གང་ཞིག །ཁྱོད་རང་གིས་རྨི་ལམ་དྲན་སྣང་བྱུང་ཐོབ་བྲི་མི་གཏུབ་པའི་ཕྱིར་ཟེར་རོ། །རྟགས་དང་པོ་མ་གྲུབ་སྟེ། རྒྱལ་བ་སྟག་ལུང་བཀྲ་ཤིས་དཔལ་གྲུབ་སོགས་ཀྱིས་གཞན་གྱིས་གསུངས་པའི་སྐྱེས་རབས་བྲི་བར་མཛད་པའི་ཕྱིར། །རྟགས་གཉིས་པ་མ་གྲུབ་སྟེ། པཎྜི་ཏ་སྨྲི་ཏིའི་སྐྱེ་བ་འདས་ལོག་ཀུ་སུ་ལུ་པ་དང་། ཆེ་ཚང་སངས་རྒྱས་ཡེ་ཤེས་པས་ཀྱང་རྨི་ལམ་དུ་དྲན་པའི་སྐྱེས་རབས་བྲིས་འདུག་པའི་ཕྱིར་སྨྲས། འོ་
ན་ཡང་གསང་གི་རྣམ་ཐར་མི་འཐད་པར་ཐལ། ཁྱོད་ས་ཐོབ་ཡིན་ནོ་སྤྲུལ་པ་ཡིན་ནོ་སོགས། ཟེར་བ་ལ་ང་རྒྱལ་སྐྱེས་ན་བདུད་ཀྱི་བར་ཆད་ཡིན་པས། བྱང་ཆུབ་སེམས་དཔའ་ཡིན་ཀྱང་སངས་རྒྱས་ཐོབ་པ་ལ་རིང་དུ་གྱུར་པའི་ཕྱིར། ཟེར་བས། རྟགས་མ་གྲུབ་སྟེ། དེ་དག་གཏེར་ཡིག་ཚད་ལྡན་ནས་བྱུང་བས་བདུད་ཀྱི་ལུང་བསྟན་མིན་པར་ངེས་པ་ནི་གང་ཞིག །བདག་ང་རྒྱལ་སྐྱེས་ན་ནི་ས་ཐོབ་གྲུབ་པ་ཐོབ་ཟིན་སྙམ་ནས་དགེ་སྦྱོར་སྒྱུར་ཞིང་མེད་པས་བར་ཆད་མིན་པར་ངེས་པའི་ཕྱིར་སྨྲས། འོ་ན་དེ་ཁོ་ནའི་རྣམ་ཐར་མི་འཐད་པར་ཐལ། ཁྱོད་ཁྲིད་སྟོན་མཁན་ཡིན་པ་ལ་རོ་གཅིག་ཆེན་པོ་རྟོགས་ཟེར་རྒྱུ་ཙམ་མི་འདུག་པས་ངོ་ཚ་བའི་ཕྱིར་ཟེར་བ་ལ། རྟགས་མ་གྲུབ་སྟེ། བོད་དུ་རོ་གཅིག་རྟོགས་པ་ཕྱེད་གསུམ་ཟེར་བ་ཡང་གདའ། །བདག་རྟོགས་པ་མི་མཐོ་ཡང་བྱང་ཆུབ་ཀྱི་ལམ་གེགས་མེད་སྟོན་ཤེས་པ་ནི་གང་ཞིག །ངེས་པ་མཚམས་མི་འབྱེད་པའི་མཐོན་པོ་སུ་དང་དེ་སྔ་ནི་མ་ཐུག་པའི་ཕྱིར། །སྨྲས། ཁྱོད་ཀྱིས་གནམ་ཆོས་ལ་ལུང་བསྟན་པ་མི་འཐད་པར་ཐལ། དེ་ཚོ་ཐོག་ཏུ་མ་བབ་ན་ཁྱོད་ངོ་ཚ་བའི་ཕྱིར། ཟེར་བ་ལ། རྟགས་མ་གྲུབ་སྟེ། བར་ཆད་མ་བྱུང་ན་དེ་འདྲ་
འབྱུང་བའི་ལས་དབང་ཡོད་པ་སྟེ། བར་ཆད་རྐྱེན་དབང་དུ་ཤོར་ན་སྔར་ཡང་ལུང་བསྟན་སྟེང་དུ་མ་སོང་བ་མང་བས། ང་དང་ང་ཡི་ལུང་བྱང་ལ་ཡང་དེ་བས་མི་ལྷག་པའི་ཕྱིར་སྨྲས། ཁྱོད་ཀྱི་རྣམ་ཐར་འདི་བྱ་རོག་སོ་བརྟག་གི་བསྟན་བཅོས་ལྟར་དགོས་པ་མེད་པ་ཐལ། ཕྱིའི་རྣམ་ཐར་འདི་མཐོང་བ་ལ་དགོས་པ་མེད་པ་གང་ཞིག །ནང་གི་རྣམ་ཐར་ལའང་དགོས་པ་མེད། གསང་བའི་རྣམ་ཐར་ལ་ཡང་དགོས་པ་མེད་པའི་ཕྱིར། ཟེར་བ་ལ། རྟགས་དང་པོ་མ་གྲུབ་སྟེ། དབུལ་ཕོངས་ཉམ་ཆུང་མི་རྩིས་ཆུང་བ་ཞིག་ཡིན་ཀྱང་། བློ་ཆོས་དང་མཐུན་ན་ཀུན་གྱིས་བཀུར་བར་གོ་བའི་ཕྱིར། རྟགས་གཉིས་པ་མ་གྲུབ་སྟེ། དུས་སྙིགས་ཀྱང་བསྙེན་སྒྲུབ་ནུས་ན་བྱིན་རླབས་རྟགས་མཚན་ཅུང་ཟད་འོང་སྙམ་དུ་སྤྲོ་བ་སྐྱེ་བའི་ཕྱིར། རྟགས་གསུམ་པ་མ་གྲུབ་སྟེ། ལས་རྒྱུ་འབྲས་ལ་ཡིད་ཆེས་ཤིང་སྡིག་ཕྲ་མོ་ལ་འཛེམ་པའི་གནད་ཡོད་པའི་ཕྱིར། སྨྲས་སོ། །འོ་ན་གསང་བ་དང་ཡང་གསང་གི་རྣམ་ཐར་མི་འཐད་པར་ཐལ། ཁྱོད་སད་ན་ལེགས་དང་ཀླུའི་རྒྱལ་མཚན་སོགས་ཀྱི་སྤྲུལ་པ་ཡིན་ན་ཁོ་ཐབས་འདི་བས་དྲག་ཙམ་འོང་འོས་པ་གང་ཞིག །ཁྱོད་སྟོང་ཉིད་མངོན་སུམ་དུ་རྟོགས་ན་ས་དང་པོའི་ཡོན་ཏན་ཆ་ཙམ་ཡང་ཁྱོད་ལ་
མི་འདུག་པའི་ཕྱིར། ཟེར་བ་ལ། རྟགས་དང་པོ་མ་གྲུབ་སྟེ། སངས་རྒྱས་བྱ་ཤིང་རྟ་མོ་དང་ཆུ་སྲིན་དུ་སྐྱེས་དུས་ཀྱང་འགྲོ་དོན་ཧ་ཅང་མི་ཆེ་བའི་ཕྱིར། རྟགས་གཉིས་པ་མ་གྲུབ་སྟེ། རྣལ་འབྱོར་པ་ལུས་རྒྱ་ཁྱུང་གི་སློང་རྒྱ་སེང་གེའི་མངལ་རྒྱ་ཞེས། ཡོན་ཏན་རྣམས་བར་དོར་འཆར་བ་ཕྱག་རྫོགས་ཀྱི་བཞེད་པ་ཡིན་པ་གང་ཞིག །བྱམས་པའི་མདོ་ལས། དགེ་སློང་མ་ཕམ་པ་ས་བཅུ་པ་ལ་ཡོན་ཏན་དང་རྟགས་ཅི་ཡང་མེད་པར་ཀུན་གྱིས་འཕྱས་པར་བཤད་པའི་ཕྱིར། ཁྱོད་ཀྱི་ཡང་གསང་དེ་ཁོ་ནའི་རྣམ་ཐར་མི་འཐད་པར་ཐལ། དང་པོ་ལ་མེད་པ་གང་ཞིག །གཉིས་པ་ལ་ཡང་མེད་པའི་ཕྱིར་ཟེར་རོ། །རྟགས་དང་པོ་མ་གྲུབ་སྟེ། རང་ལ་དབང་ལུང་ཐོབ་པ་རྣམས། ཁུངས་བཙུན་སྙམ་ནས་ཉམས་སུ་ལེན་པའི་ཕྱིར། རྟགས་གཉིས་པ་མ་གྲུབ་སྟེ། ཉམས་རྟོགས་སྐྱེ་ལུགས་ལ་གོ་བ་འཆར་བའི་ཕྱིར་སྨྲས། འོ་ན་འདི་གཞན་ལ་སྟོན་མི་རུང་བར་ཐལ། ཁྱོད་རང་གི་རྟགས་མཚན་འགགས་པ་གང་ཞིག །མ་དད་པ་འཕྱ་བཞད་སྐུར་པ་འདེབས་པའི་ཕྱིར། དེ་བདེན་ཀྱང་ང་ནི་རྟགས་ལ་རེ་བ་དང་དོགས་པ་མེད། སྐུར་འདེབས་ལ་ཡང་འཚེར་བག་དང་ཟུག་རྔུ་མེད། འོན་ཀྱང་
དད་པ་ཡོད་ཀྱང་དབང་གི་འབྲེལ་བ་མེད་པ་ལ་སྟོན་མི་རུང་ཟེར་བ་བདེན་བདེན་ཧེ་ཧེ། དེ་ནས་དགེ་ཚུལ་དགེ་སློང་གཉིས་པོ་དུམ་ནས་ཐ་དད་མེད་པར་འདུག་གོ །ཞེས་པ་སྣོན་ཟླའི་ཉེར་ལྔ་ལའོ། །མངྒ་ལཾ།།