དགེ་སློང་རཱ་ག་ཨ་སྱའི་རྣམ་ཐར་ལས་ཡེ་ཤེས་སྤྲུལ་རྒྱུད་དང་འབྲེལ་པ་ཡང་གསང་གི་རྣམ་ཐར།
༄༅། །དགེ་སློང་རཱ་ག་ཨ་སྱའི་རྣམ་ཐར་ལས། ཡེ་ཤེས་སྤྲུལ་རྒྱུད་དང་འབྲེལ་པ་ཡང་གསང་གི་རྣམ་ཐར་བཞུགས་པའི་དབུ་ཕྱོགས་ལགས་སོ།།
ན་མོ་ལོ་ཀི་ཤྭ་ར་ཡེ། བླ་མ་ཡི་དམ་དབྱེར་མེད་ཐུགས་རྗེ་ཅན། །འཕགས་མཆོག་སྤྱན་རས་གཟིགས་ལ་ཕྱག་འཚལ་ནས། །རིག་འཛིན་ཆེན་པོ་མི་འགྱུར་རྡོ་རྗེ་ཡི། །གསུང་མི་བཅག་ཕྱིར་རང་གི་ལོ་རྒྱུས་འགའ། །རང་གིས་ཤེས་ཤིང་དྲན་པ་མ་མཆིས་ཀྱང་། །གནམ་ཆོས་ས་གཏེར་རྣམས་ལས་བྱུང་བ་དང་། །ཚད་ལྡན་སྐྱེས་ཆེན་འགའ་ཡིས་གསུངས་པ་དང་། །རང་གི་ཉམས་དང་རྨི་ལམ་འཁྲུལ་སྣང་ལ། །ཇི་ལྟར་བྱུང་ཚུལ་བསྟུན་ཏེ་འདིར་བརྗོད་བྱ། །འདི་ནི་ཡང་གསང་རྣམ་ཐར་ཞེས་བྱ་སྟེ། །དད་ལྡན་རང་ལ་བླ་མར་འཛིན་རྣམས་ལས། །གཞན་ལ་བསྟན་ན་འབར་
ཤས་ལུང་པ་འགེང་། །དེ་ཕྱིར་བཀའ་རྒྱས་བཏབ་སྟེ་ཡོངས་སུ་གསང་། །ཤི་བའི་འོག་ཏུ་བསྟན་ཀྱང་འགལ་བ་མེད། །དགོས་པ་ཆོས་རྒྱུད་རྣམས་ཀྱིས་སྤྲོ་བ་འཕེལ། །དེ་ལ་རྒྱལ་བ་ཀུན་གྱི་ཡབ་གཅིག་པོ། །ཐུགས་རྗེ་ཆེན་པོ་འཕགས་པ་སྤྱན་རས་གཟིགས། །དེ་ཡི་སྤྲུལ་པ་ཕྱོགས་བཅུ་དུས་གསུམ་གྱི། །སངས་རྒྱས་བྱང་སེམས་ཐམས་ཅད་ཡིན་པ་སྟེ། །ཅི་ཕྱིར་གསང་བ་འདུས་པའི་རྒྱུད་ཆེན་ལས། །ཕྱོགས་བཅུའི་སངས་རྒྱས་མ་ལུས་པ། །ཐུགས་རྗེ་ཆེན་པོར་མ་གྱུར་མེད། །ཅེས་གསུངས་དེ་རྣམས་བདག་གི་སྐྱབས་གནས་ལགས། །དགོངས་འདུས་སྐུ་རྒྱུད་ཤེལ་གྱི་རི་
བོ་ལས། །འགྲོ་དྲུག་སེམས་ཅན་ཐམས་ཅད་མ་ལུས་པ། །ཡེ་ཤེས་ལྷ་ཡི་ཡང་སྤྲུལ་ཡིན་པར་བཤད། །དགོངས་པ་བདེ་གཤེགས་སྙིང་པོས་ཁྱབ་པར་དགོངས། །དགོས་པ་བྱང་ཆུབ་བསྒྲུབ་ལ་སྤོབས་པ་བསྐྱེད། །དེ་ནི་ཡང་སྤྲུལ་ཞེས་བྱའི་དོན་ཡིན་ནོ། །ངོ་མཚར་མི་ཚེ་སེམས་ཅན་ཐམས་ཅད་ཡིན། །དེ་ལ་དགོངས་ནས་ཕ་རྒྱུད་གསང་འདུས་ལས། །མི་རྣམས་ཤ་མདོག་དབྱེ་བས་རྒྱལ་བ་ནི། །རིགས་ལྔའི་རིགས་སུ་ངེས་པའི་རྒྱུད་ལུང་བྱུང་། །དེ་བཞིན་གདུལ་བྱ་འདུལ་བྱེད་དབྱེར་མེད་ལ།་།དགོངས་ནས་ཞེ་སྡང་ཆེ་བ་རྡོ་རྗེའི་རིགས། །དེ་སོགས་དུག་ལྔ་རིགས་ལྔའི་རིགས་སུ་གསུངས། །དེ་ལས་སྤྲུལ་པ་ངོ་མཚར་ཆེ་བ་སྟེ། །དེ་ཡང་བྱིན་གྱིས་བརླབས་པའི་སྤྲུལ་པ་དང་། །སྐྱེ་རྒྱུད་དངོས་དང་དེ་ཡི་སྤྲུལ་པའོ། །སྐྱེ་རྒྱུད་དེ་ནི་དངོས་ཉིད་གཅིག་རྒྱུད་དེ། །ས་ཐོབ་པ་ལ་སྐྱེ་རྒྱུད་མང་པོ་འགྱུར།་།དུས་མཉམ་སྐུ་ཡི་བཀོད་པ་མང་པོ་ཡང་། །དེ་དག་སོ་སོར་སྐྱེ་བ་རྒྱུད་མར་ལེན། །མཐར་ཐུག་གཅིག་ཏུ་ཐིམ་ནས་སངས་རྒྱས་སོ། །ཡང་ན་སོ་སོར་སངས་རྒྱས་མཛད་པ་སྟོན། །སྤྲུལ་པ་དང་པོའི་ས་ཐོབ་ཉིས་བརྒྱ་སྟེ། །རིམ་བཞིན་ཇེ་མང་ས་བཅུའི་སེམས་དཔའ་ལ། །བྱེ་བ་ཕྲག་བརྒྱ་ཆ་
གཉིས་སྐད་ཅིག་འགྱེད། །བྱིན་གྱིས་བརླབས་པའི་སྤྲུལ་པ་བྱ་བ་ནི། །སོ་སོའི་སྐྱེ་བོ་ཐ་མལ་པ་ཡིན་ཡང་། །ལྷ་དང་བླ་མའི་བྱིན་རླབས་ཞུགས་པ་ན། །ཆུ་ལ་ཆུ་བཞག་བཞིན་དུ་དབྱེར་མེད་འདྲེས། །བྱིན་རླབས་འགྲོ་དོན་མཉམ་པར་འགྱུར་བ་བཤད། །དེ་ནས་བྱ་བྲལ་རཱ་ག་ཨ་སྱའི་བདག །ཐུགས་རྗེ་ཆེན་པོས་བྱིན་གྱིས་བརླབས་པ་ཡི། །སྤྲུལ་པ་ཙམ་དུ་ལུང་དུ་བསྟན་པ་ནི། །གནམ་ཆོས་ཐུགས་གཏེར་སྙན་བརྒྱུད་ཟབ་མོའི་སྐོར། །ཐུགས་རྗེ་ཆེན་པོ་རྣོ་སྤུ་ཞེས་བྱ་བའི། །ཆོས་བདག་ལུང་བསྟན་ཉིད་ལས་འདི་སྐད་དོ། །ཨེ༔ བརྡ་ཡིག ཨེ་མ་འདི་ཡིས་ཆོས་བདག་ནི༔ ཨ་ཡི་མིང་ཅན་རི་ནི་འདི་སྐད་དོ༔ རྒྱལ་ཞེས་བྱ་བའི་རྩ་བ་དེར་འདུག་གོ༔ སློབ་ནི་དཔོན་མ་གཉིས་ཀ་ཡིན༔ ཐུགས་རྗེ་ཆེན་པོའི་ཡང་སྤྲུལ་ཡིན༔ སྔོན་དུས་བསྐལ་པ་དང་པོ་ལ༔ ཆོས་འདིའི་བདག་པོར་གྱུར་ཅིག་ཅེས༔ སྨོན་ལམ་རྒྱ་ཡིས་བཏབ་པ་ཡིན༔ རྒྱ་ལ་དམ་ལ་མ་འདའ་ཅིག༔ ས་མ་ཡ༔ རྒྱ་རྒྱ་རྒྱ་༔ ཞེས་དང་། དེ་ཡི་འགྲེལ་བ་གསལ་བྱེད་ལས༔ དྷཾ༔ ན་མོ་ལོ་ཀེ་ཤྭ་ར་ཡེ༔ ཨ་ཡི་མིང་ཅན་རྒྱལ་ཙ་ནི༔ རཱ་ག་ཨ་སྱ་ཡིན་སྐད་དོ༔ ཞེས་
དང་༔ ཡང་ནི་ཐུགས་རྗེ་ཆེན་པོ་ཡི༔ གཙོར་བྱས་རྩ་བ་དྲུག་ཅེས་པ༔ ལྷ་ཚོགས་བཅུ་གཉིས་སྒྲུབ་ཐབས་ལས༔ ཐུགས་རྗེ་ཆེན་པོའི་སྤྲུལ་པ་ནི༔ འགྲོ་བ་འདྲེན་ཕྱིར་སྐུ་སྤྲུལ་པ༔ བླ་མ་ཀརྨ་ཆགས་མེད་ཉིད་ཆོས་འདིའི་བདག་པོ་ཉིད་ཡིན་ནོ༔ ས་མ་ཡ༔ རྒྱ་རྒྱ་རྒྱ༔ ཁ་ཐཾ༔ གུ་ཧྱ༔ ཞེས་གསུངས༔ དེ་བཞིན་བྷ་ཁ་སྤྲུལ་སྐུ་ཞེས་བྱ་བ༔ བེ་རོ་ཙཱ་ནའི་སྤྲུལ་པ་ཡོངས་གྲགས་དེས༔ སྲིད་པ་ཐ་མའི་བྱང་ཆུབ་སེམས་དཔའ་ཞེས༔ ས་བཅུའི་སེམས་དཔའ་ཡིན་པའི་གསུང་སྒྲོས་ནི༔ ཉིད་ཀྱི་བཀའ་ཤོག་ཙནྡན་དམར་པོ་ཡི༔ ཕྱག་ཕྲེང་དང་བཅས་ཡི་གེར་འདི་ལྟར་གནང་༔ ༢ བསྐལ་མང་སྨོན་ལམ་རྒྱ་མཚོའི་མཐུ་ལས་ནི། །སླར་ཡང་སྲིད་མཐའི་སེམས་དཔའ་གང་ཁྱོད་ཉིད། །འགྲོ་བའི་ཁུར་ཆེན་དག་ལས་སྐྱོ་ངལ་བྲལ། །བསྐལ་བཟང་སྐྱེས་མཆོག་དམ་པ་གང་དེའི་དྲུང་། །དེང་སྐུ་གསེར་གྱི་ལྷུན་པོ་ལྟར་བརྟན་པ། །ཟབ་གསལ་ཡེ་ཤེས་འཁོར་ལོ་ཟུང་འཇུག་ཏུ། །དབྱེར་མེད་འཁོར་མོར་འཇུག་པའི་ཁྱོན་ཉིད་དུ། །ལྷམ་མེར་བཞུགས་པ་མདངས་བརྒྱའི་པདྨོ་རྒྱས། །ཞེས་སོགས་གསུངས་ཤིང་ཟླ་མེད་འགྲོ་བའི་མགོན། །རྗེ་འབངས་སོག་པོ་ལྷ་དཔལ་སྤྲུལ་པའི་སྐུ། །ལྷོ་
པ་སྤྲུལ་སྐུའི་བཀའ་ཤོག་གནང་བ་ལས། ༢ འཕགས་པ་འཇིག་རྟེན་དབང་ཕྱུག་ངུར་སྨྲིག་གི །ཟློས་གར་བསྒྱུར་བ་རྡོ་རྗེ་འཛིན་པའི་དྲུང་། །ཞེས་སོགས་བསྟོད་སྔགས་རྒྱ་ཆེར་མཛད་པ་དང་། །སྐྱོན་བྲལ་ཚེ་མཚམས་ཀརྨ་དོན་དམ་པས། །བུམ་སྒྲུབ་རུ་རྩིའི་རིལ་བུ་མང་བསྐུར་ནས། །སྐྱོན་གྱིས་མ་གོས་སྐུ་མདོག་དཀར། །རྫོགས་སངས་རྒྱས་ཀྱིས་དབུ་ལ་བརྒྱན། །དེ་ཡི་ཕྲིན་ལས་མཛོད་སོགས་དང་། །པདྨ་ལྷུན་གྲུབ་ཅེས་བྱའི་རྫོ་གས་ཆེན་པ། །སེང་གདོང་མ་ཡི་ཞལ་གཟིགས་ལུང་བསྟན་དང་། །གནམ་ཆོས་ཅུང་ཟད་ཡོད་ཅིང་མངོན་ཤེས་ཀྱང་། །གང་ཟེར་བདེན་པ་ཡིན་པར་གྲགས་པ་དེས། །བདག་ལ་བརྟན་བཞུགས་ཡི་གེ་བསྐུར་བའི་ནང་། །ལ་ལའི་གང་འདུལ་ཐབས་མཁས་ཐུགས་རྗེས་ཀྱང་། །ཤ་བ་རི་སྤྲུལ་ཀརྨའི་མཚན་ཅན་ལ། །གསོལ་བ་འདེབས་སོ་སྐུ་ཚེ་བརྟན་གྱུར་ཅིག །ཅེས་སོགས་གནམ་ཆོས་ལུང་དང་བླ་མ་རྣམས། །གསུང་སྒྲོས་ཕལ་ཆེར་མཐུན་པར་བྱུང་བ་དང་། །བདུད་འདུལ་རྡོ་རྗེའི་གཏེར་གྱི་ལུང་ལས་ནི། །ལྡན་མ་རྩེ་མང་སྤྲུལ་པར་ལུང་བསྟན་པ། །ཝ་པ་སྐུ་སྐྱེ་རིག་འཛིན་རྒྱ་མཚོ་ཡི། །རྨི་ལམ་ཁྱེད་དང་འབྲེལ་པ་ཡོད་ཚུལ་
མཐོང་། ཁྱེད་ནི་སྤྱན་རས་གཟིགས་ཡིན་སྙམ་པ་ཡོད། །ཟེར་ཞིང་གནམ་ཆོས་ལུང་བསྟན་མཐོང་བའི་ཚེ། །ང་རང་བསམ་དང་མཐུན་པར་འདུག་གོ་ཟེར། །དེས་ན་བདག་ནི་ཐུགས་རྗེ་ཆེན་པོ་ཡི། །བྱིན་རླབས་ཞད་ཙམ་ཞུགས་པ་སྤྲུལ་པའི་ཆ། །ཐུགས་རྗེ་ཆེན་པོའི་སྤྲུལ་པའི་སྤྲུལ་པ་ནི། །ཆོས་རྒྱལ་སད་ན་ལེགས་ཀྱི་སྐྱེ་རྒྱུད་ཀྱི། །ཆ་ཤེས་ཟེར་མ་ཙམ་དུ་རློམ་པ་སྟེ། །ཅི་ཕྱིར་གནམ་ཆོས་ཐུགས་ཀྱི་གཏེར་ཁ་ལས། །སྔོན་ཚེ་རྒྱལ་སྲས་སད་ན་ལེགས། །དེ་ནས་སྐྱེ་བ་འགའ་རྒྱུད་ནས། །སད་ན་ལེགས་ཀྱི་སྐྱེས་མཐའ་སྟེ། །སྔགས་འཆང་རཱ་ག་ཨ་སྱ་ཉིད། །སྔོན་ཚེ་བསྐལ་པ་གྲངས་མེད་ནས། །མི་འབྲལ་འབྲལ་མེད་དམ་ཚིག་ལྡན། །འབྲལ་བ་མེད་པ་དེ་ཡི་འཐུས། །གནམ་ཆོས་ཐུགས་གཏེར་བདག་ཉིད་སོགས། །ཞེས་སོགས་གསུངས་ཕྱིར་དེ་ཡི་དོན་བཤད་པ། །བཀའ་གདམས་གླེགས་བམ་ནང་ནས་འབྱུང་བ་སྟེ། །རྒྱ་གར་པཎ་ཆེན་དྷི་པཾ་ཀ་ར་ཡི། །ཕྱག་གིས་ཐལ་མོ་སྦྱར་ནས་འབྲོམ་སྟོན་ལ། །སྤྱན་རས་གཟིགས་ཞེས་ལན་མང་གསུངས་པའི་ཚེ། །འབྲོམ་གྱི་སྐུ་ལས་རིགས་གསུམ་མགོན་པོ་དང་། །སྒྲིབ་སེལ་ཀུན་ཏུ་བཟང་རྣམས་རིམ་པར་སྤྲུལ། །འབྲོམ་
ཉིད་སྤྱན་རས་གཟིགས་དངོས་ཡིན་ཚུལ་དང་། །བོད་ཀྱི་ཆོས་རྒྱལ་གཉའ་ཁྲི་ཐོ་ཐོ་རི། །སྲོང་བཙན་ཁྲི་སྲུང་ཁྲི་རལ་ལྔ་པོ་ནི། །ངོ་བོ་སྤྱན་རས་གཟིགས་དབང་དངོས་ཡིན་པ། །སེམས་དཔའ་ལྔ་ཡིས་བསྐུལ་ནས་བོད་དུ་བྱོན། །དེ་ཕྱིར་སེམས་དཔའ་སོ་སོའི་སྤྲུལ་པར་གྲགས། །དེ་མིན་བོད་ཀྱི་ཆོས་རྒྱལ་ཐམས་ཅད་ནི། །སྤྱན་རས་གཟིགས་ཀྱི་ཡང་སྤྲུལ་ཡིན་པར་གསུངས། །ཁྱད་པར་ཆོས་རྒྱལ་སད་ན་ལེགས་དེ་ནི། །ཆོས་ཀྱི་རྒྱལ་པོ་ཁྲི་སྲོང་ལྡེའུ་བཙན་གྱི། །དཔུང་ཟུར་གཡོན་ལས་སྤྲུལ་པ་ཡིན་ཞེས་བཤད། །དེ་ཡི་སྤྲུལ་པ་སྐྱེ་རྒྱུད་མང་པོ་ཞིག །འབྱུང་བ་བཀའ་ཐང་སྡེ་ལྔ་ནས་གསུངས་ཤིང་། །ཁྱད་པར་ལུང་བསྟན་ཆེན་པོ་བཀའ་རྒྱ་མར། །སད་ན་ལེགས་ཀྱི་སྐྱེ་རྒྱུད་ལུང་བསྟན་ལས། །འཇིང་ཡོན་ལེགས་པའི་བློ་གྲོས་ནི། །འདས་དང་མ་འོངས་ད་ལྟ་ལ། །བསྐལ་པ་མང་པོའི་གོང་རོལ་དུ། །ཀླུ་རིགས་སྒྲོན་མའི་སྤྱན་ལམ་དུ། །དབང་གི་རྒྱལ་པོར་ཕུལ་བའི་མཐུས། །འཁོར་ལོས་སྒྱུར་རྒྱལ་ལུས་བླངས་པ། །འདིར་སྐྱེ་བརྗོད་ལས་འདས་ན་ཡང་། །བསྐལ་པ་མང་པོ་སྔོན་གྱི་གོང་། །སྟོང་གསུམ་འདི་ཡི་ཤར་ཕྱོགས་སུ། །ཞིང་ཁམས་འོད་ཟེར་མཐའ་ཡས་སུ། །
རྒྱལ་པོ་ལག་ན་བེ་ཅོན་ཞེས། །གསེར་གྱི་འཁོར་ལོས་སྒྱུར་བར་འཁྲུངས། །དེ་སོགས་སྔ་རབས་འདས་པའི་དུས། །འཁོར་ལོས་སྒྱུར་བའི་རྒྱལ་པོ་ཡི། །ཆོས་ཀྱི་རྒྱལ་སྲིད་སྐྱོང་ནས་ནི། །འགྲོ་ལ་ཕན་ཕྱིར་སེམས་དཔར་བྱོན། །ད་རུང་མངའ་བདག་གདུང་རྒྱུད་འཛིན། །སྨོན་ལམ་དག་པས་ང་དང་འཕྲད། །དམ་པའི་ཆོས་ཀྱི་གདུང་རྒྱུད་འཛིན། །མ་འོངས་སྙིགས་མའི་དུས་སུ་ཡང་། །སྐྱེ་རྒྱུད་མང་པོ་ཤཱཀྱའི་ཞིང་། །སྤྲུལ་པ་མང་པོ་ཡང་དང་ཡང་དུ་ནི། །ལན་གཅིག་འཁོར་གྱི་འདུས་པ་སྐྱོངས། །འགྲོ་བ་རྣམས་ཀྱང་ཐབས་ཀྱིས་འདུལ། །ཐ་མ་བདེ་ཆེན་ཞིང་ཁམས་སུ། །མངོན་པར་རྫོགས་པར་སངས་རྒྱས་ནས། །ཐུགས་རྗེས་འགྲོ་བ་འདྲེན་པར་འགྱུར། །ཞེས་གསུངས་ལུང་དང་རྗེས་མཐུན་པར། །རྣལ་འབྱོར་རཱ་ག་ཨ་སྱ་བདག །རྩེ་གཅིག་དམ་དུ་མཚམས་བཅད་ནས། །ཐུགས་རྗེ་ཆེན་པོ་སྒྲུབ་པའི་ཚེ། །ཉམས་རྨིས་དག་སྣང་མང་ལགས་ཀྱང་། །དངོས་སུ་མ་མཇལ་ཡིད་མ་ཚིམ། །སྒྲུབ་པ་ལོ་གསུམ་སོང་མཚམས་དུས། །ཆོ་འཕྲུལ་ཆེན་པོའི་ཡར་ངོ་ལ། །སྒྲིབ་སྦྱང་སྦྱིན་སྲེག་ཆག་མེད་བླུག །བཅོ་ལྔའི་སྔ་དྲོ་ཏིལ་ནག་གི །སྦྱིན་སྲེག་ཤིན་ཏུ་མང་བྱས་པས། །
ཐང་ཆད་ཡུད་ཙམ་འཐུམ་པ་ལ། །ཉམས་དང་རྨི་ལམ་འདྲེས་པའི་མཚམས། །ནམ་མཁའི་དབྱིངས་སུ་བྲག་འདྲ་བའི། །ནོར་བུ་རིན་ཆེན་གཟུགས་ཤིག་སྣང་། །དེ་ཡི་འོད་ཀྱིས་སྣང་སྲིད་ཀུན། །ཤིན་ཏུ་གསལ་བའི་སྣང་བ་ཤར། །དེ་ཚེ་སྐྱེ་བ་དྲན་ཚུལ་ནི། །སྔོན་ཚེ་གངས་ཅན་བོད་ཀྱི་ཡུལ། །ཆོས་རྒྱལ་ཁྲི་སྲོང་ལྡེའུ་བཙན་གྱི། །སྲས་གསུམ་ཐ་ཆུང་སད་ན་ལེགས། །ཆོས་སྤྱོད་རྒྱལ་པོ་ཆེན་པོ་དེ། །ང་རང་ཡིན་པར་འདུག་པ་ལ། །འཁོར་བར་འཁྱམས་པ་ངོ་མ་ཤེས། །དེ་དུས་བོད་ཡུལ་སྤྱི་རྗེ་ལ། །ད་ལྟ་ང་འདྲ་འོང་བ་ཨང་་། །སྙམ་ནས་མཆི་མ་ཆར་ལྟར་འབབ། །དེ་ཚེ་ནམ་མཁའི་དབྱིངས་ཤོད་ནས། །ཐུགས་རྗེ་ཆེན་པོ་སྤྱན་རས་གཟིགས། །སྐུ་ནི་གསལ་པོར་མ་མཐོང་ཡང་། །སྙན་པའི་གསུང་གིས་ལུང་བསྟན་པ། །ཁྱོད་དང་ང་གཉིས་དབྱེར་མེད་དེ། །དོན་དམ་དབྱིངས་སུ་གཅིག་གསུངས་པས། །ལུས་སེམས་ཐམས་ཅད་བདེ་བས་ཁྱབ། །བདེ་བའི་ངོ་བོ་སྟོང་པར་རྟོགས་། །བདེ་སྟོང་འདྲེས་པའི་ངང་དེ་ལ། །གཉིད་དང་ཉམས་ཀྱི་སྣང་བ་ལ། །སད་ཀྱང་བདེ་སྟོང་ངང་ལ་སོང་། །དེ་དུས་སྤྲུལ་སྐུ་མ་ཕེབས་ཤིང་། །ལུང་བསྟན་ལ་སོགས་མ་
མཐོང་ཕྱིར། །རྨི་ལམ་འཁྲུལ་པ་ཡིན་སྙམ་ནས། །བདེན་ཞེན་ཅི་ཡང་མ་སྐྱེས་ཏེ། །མཚར་རོ་སྙམ་པ་ཞིག་བྱུང་ངོ་། །དེ་ནས་སྒྲུབ་པ་ལོ་བཅུ་སོང་། །སྤྲུལ་སྐུ་མཇལ་ནས་མཉམ་དུ་བཞུགས། །དེ་ཚེ་མི་འགྱུར་རྡོ་རྗེ་དང་། །གསུང་གླེང་མང་དུ་བྱས་པའི་སྒྲོས། །སྤྲུལ་སྐུ་ཞང་པོའི་ཡུལ་བཞུགས་ཤིང་། །དགུང་ལོ་བདུན་ཙམ་ཡིན་པའི་སྐབས། །གནས་མདོ་བླ་མ་ཟེར་བ་ཐོས། །ཀརྨ་ཆགས་མེད་ཟེར་བ་ཡི། །མིང་ཡང་མི་ཤེས་པ་ཡི་དུས། །ནུབ་ཅིག་རྨི་ལམ་ཡུལ་དུ་ནི། །མི་གཞོན་མགོ་རས་ཀོང་སྐད་ཅན། །མཛེས་ཤིང་ཡིད་འོང་ཞིག་བྱུང་ནས། །བླ་མ་ཀརྨ་ཆགས་མེད་ནི། །སྲོང་བཙན་སྒམ་པོ་ཡིན་ནོ་ཟེར། །དེ་རྗེས་ནུབ་ཅིག་རྨང་ལམ་ན། །ཁྱོད་དང་ང་གཉིས་མཇལ་གདའ་ཛ། །དང་པོ་ཁྱོད་རེད་དེ་ནས་ནི། །ཐུགས་རྗེ་ཆེན་པོ་སྤྱན་རས་གཟིགས། །དཀར་པོ་ཞལ་གཅིག་ཕྱག་གཉིས་པ། །ཕྱག་གཡས་མཆོག་སྦྱིན་གཡོན་པདྨ། །དབུ་རྒྱན་དར་དང་རིན་ཆེན་བརྒྱན། །པདྨ་ཟླ་བའི་གདན་ལ་བཞུགས་། །དེ་འདྲ་ཞིག་ཏུ་གྱུར་སོང་རྨིས། །ཁྱེད་ནི་སྤྱན་རས་གཟིགས་ཡིན་ཏེ། །དེ་མིན་ང་ཡི་སློབ་དཔོན་དུ། །མི་འོང་ཞེས་ནི་སྤྲུལ་སྐུས་གསུངས། །ཡང་ན་དགུང་ལོ་བཅུ་ཡི་
མཇུག །འདིར་ཕེབས་ཡུན་རིང་མ་སོང་དུས། །མཆོད་ཁང་ནང་དུ་བྱོན་པ་ཡི། །སྲིག་སྲིག་ཟེར་བའི་སྒྲ་རིང་གྲག །སྒྲ་དེ་ཇེ་ཐུང་སོང་བ་ལ། །ལེགས་པར་ཉན་པས་ཚིག་འདི་བྱུང་། །བླ་མ་ཀརྨ་ཆགས་མེད་ནི། །ཁྲི་སྲོང་ལྡེའུ་བཙན་ཡིན་ཟེར་གྲག །ཡང་ནི་བདག་དང་སྤྲུལ་སྐུ་གཉིས། །གྲ་ཁྲི་རྗེ་ནས་འདུག་དགོས་གསུངས། །དེ་ལྟར་བྱས་ཚེ་འདི་གསུངས་སོ། །ཁྱེད་ལ་བལྟས་པས་དང་པོ་ནི། །ཨོ་རྒྱན་པདྨ་རེད་ནི་གདལ། །ཁྱེད་ཀྱི་ལུས་སུ་མ་མཐོང་ངོ་། །དེ་ནས་བལྟས་ཛ་ཁྱེད་རང་གདའ། །དེ་འདྲ་ནུབ་གཅིག་ལན་གསུམ་བྱུང་། །ཨོ་རྒྱན་དང་ནི་སྤྱན་རས་གཟིགས། །གཅིག་ལེ་ཨེ་ཡིན་གསུང་བྱུང་བས། །སྣང་བ་མཐའ་ཡས་སྤྱན་རས་གཟིགས། །པདྨ་འབྱུང་གནས་ངོ་བོ་གཅིག །སྲོང་བཙན་སྒམ་པོ་ཁྲི་སྲོང་གཉིས། །སྤྱན་རས་གཟིགས་ཀྱི་སྤྲུལ་པ་རུ། །བཀའ་གདམ་གླེགས་བམ་ནང་ནས་བཤད། །བོད་ཀྱི་མཁས་བཙུན་ཐམས་ཅད་ནི། །ཐུགས་རྗེ་ཆེན་པོའི་སྤྲུལ་པའམ། །བྱིན་གྱིས་བརླབས་པ་ཤ་སྟག་ཏུ། །ཇོ་བོ་ཡབ་སྲས་གཉིས་ཀྱིས་གསུངས། །འོན་ཀྱང་སྤྱན་རས་གཟིགས་དབང་གི །སྤྲུལ་པ་ང་ནི་ག་ལ་ཡིན། །བདག་གིས་ཐུགས་རྗེ་ཆེན་པོ་ཡི། །
སྒྲུབ་པ་ཡུན་རིང་བྱས་པ་དེས། །བྱིན་རླབས་ཅུང་ཟད་ཞུགས་པ་སྲིད། །ལས་དག་པ་ཡི་སློབ་མ་ཡིས། །བླ་མ་ཡི་དམ་ལྷར་མཐོང་བ། །སློབ་མའི་སྣང་བ་དག་པ་ཡིན། །བླ་མ་དེ་ནི་ཡི་དམ་གྱི། །ལྷ་དེ་ཡིན་པའི་ངེས་མེད་ཞུས། །ཡང་གཅིག་སྤྲུལ་སྐུས་འདི་སྐད་གསུངས། །མདང་ནི་ང་ཡི་རྨི་ལམ་ལ། །ཁྱེད་ནི་མགར་བློན་རིག་པ་ཅན། །རེད་ནས་གདའ་བས་མི་འགའ་ཡིས། །མགར་བློན་རིག་པ་ཅན་ཟེར་ནས། །བོས་པས་ཁྱོད་ཀྱིས་ཨ་བྱེད་རྨིས། །ཞེས་གསུངས་མགར་བློན་རིག་ཅན་ཡང་། །ཐུགས་རྗེ་ཆེན་པོའི་གསུང་སྤྲུལ་དུ། །ལུང་བསྟན་རྣམས་ནས་གསལ་བ་ཡིན། །ཕྱིས་དུས་ལྷོ་པ་སྤྲུལ་སྐུས་ཀྱང་། །འབྲི་གུང་ཞབས་དྲུང་ཁྲི་པ་དང་། །ཁྱོད་རང་ངོ་བོ་གཅིག་པ་འདྲ། །སད་ནའི་སྐྱེས་རྒྱུད་རེད་ཕྱིར་གསུངས། །མི་གཅིག་ཞུས་ན་ངག་འཁྱལ་བྱས། །ཞབས་དྲུང་དེ་ཡིས་ལྷོ་པ་ལ། །དགོངས་འདུས་དབང་ལུང་ཕྱག་ལེན་རྣམས། །ང་ལ་མ་འཕྲོད་ཁ་མེད་ཀྱིས། །དོ་དམ་ཆེན་པོ་མཛད་འདུག་ཅིང་། །ལྷོ་པ་སྤྲུལ་སྐུ་ཉིད་ཀྱིས་ཀྱང་། །ང་ལ་ཟོང་བསྐུར་ལྟ་བུ་ཡིན། །ཆོས་ནི་བདག་པོར་འཕྲོད་ཡོད་པས། །རང་གཞན་དོན་གཉིས་མཛོད་གསུངས་པས། །རྟེན་
འབྲེལ་གནད་འདྲ་ཡོད་དམ་སྙམ། །ཡང་ནི་ཉིན་ཞིག་སྤྲུལ་སྐུ་ཁང་ཐོག་བཞུགས། །ང་ནི་ཤོད་དུ་ཡོད་པའི་དུས། །ཁྱོད་ཀྱི་སྐད་དེ་སྔོན་གྱི་དུས། །རྒྱལ་པོ་ཁྲི་སྲོང་ལྡེའུ་བཙན་གྱི། །སྲས་གསུམ་ཡོད་པའི་ཐ་ཆུང་བ། །དེ་ཡི་སྐད་དེ་འདྲ་འདུག་བསམ། །ཁང་ཐོག་བྱུང་ནས་བྱི་ལ་ལ། །ཕར་ལ་བརྒྱབས་ནས་ཐལ་དུས་ཀྱང་། །ཁྲི་སྲོང་ལྡེའུ་བཙན་བུ་ཆུང་བ། །དེ་ཡི་སྐད་དེ་འདྲའོ་བསམ། །ཁྱེད་ཀྱི་ངོ་ལ་བལྟས་པས་ཀྱང་། །ཁྲི་སྲོང་ལྡེའུ་བཙན་བུ་ཆུང་བ། །དེ་ཉིད་རེད་དོ་བསམ་པར་བྱུང་། །རྒྱལ་པོ་དེ་ཉིད་ང་ཡིས་ནི། །ངོ་ཤེས་དྲན་པའི་སྣང་བ་བྱུང་། །དེ་ནི་ཅི་ཡིན་ཨང་གསུངས་སོ། །ཡང་ནི་སྤྲུལ་སྐུས་གཟིགས་སྣང་ལ། །ཆོས་རྒྱལ་སད་ན་ལེགས་དེ་ཉིད། །སྐུ་ལ་འཕྲུག་སྔོན་ན་བཟའ་གསོལ། །དབུ་ལ་རིས་དཀར་ཐོད་ཅན་མནབ། །སྙན་ལ་གསེར་གཡུའི་པདྨ་བརྒྱན། །ཕྱག་ན་ཌ་རུ་འཁྲོལ་ཞིང་བྱོན། །དེ་ནས་ཁྱེད་ལ་ཐིམ་པ་ལྟར། །ཁྱེད་ཉིད་ཡིན་པར་འདུག་སྙམ་གསུངས། །དེ་ལྟར་སྤྲུལ་སྐུས་གསུངས་པ་དང་། །སྔོན་གྱི་གཏེར་རྙིང་ཚིག་ཟུར་དང་། །གནམ་ཆོས་ནང་གི་ལུང་བསྟན་དང་། །རང་གི་ཉམས་རྨིས་དྲན་སྣང་རྣམས། །མཐུན་ཕྱིར་
ཆོས་རྒྱལ་སད་ན་ལེགས། །དེ་ཡི་སྤྲུལ་པའི་ཟེར་ཙམ་ཞིག །བདག་ཉིད་ཡིན་སྙམ་རློམ་པ་སྐྱེས། །ཡང་ནི་སྤྲུལ་སྐུ་ཡར་ཕེབས་རྗེས། །རང་དང་སྤྲུལ་སྐུའི་སྐུ་རིམ་ལ། །བཅོམ་ལྡན་གཤིན་རྗེའི་གཤེད་པོ་ཡི། །སྒྲུབ་ཆེན་རང་དང་གྲྭ་པ་འགས། །སྔགས་ལ་འུར་འདོན་བྱས་དུས་སུ། །ཆོས་རྒྱལ་ཁྲི་སྲོང་ལྡེའུ་བཙན་གྱི། །སྤྲུལ་པ་ཉེར་གཅིག་བྱུང་བ་ཡི། །གཅིག་ནི་ཞབས་དྲུང་དཔའ་བོ་རེད། །སད་ན་ལེགས་ནི་ཁྲི་སྲོང་གི །དཔུང་པ་གཡོན་ལས་སྤྲུལ་པར་བཤད། །དེ་ཡི་སྐྱེ་རྒྱུད་སྤྲུལ་པ་ཞིག །རང་ཉིད་ཡིན་པར་འདུག་པས་ན། །གཉིས་ཀའི་སྤྲུལ་གཞི་ཆོས་ཀྱི་རྒྱལ། །ཁྲི་སྲོང་ལྡེའུ་བཙན་ཡིན་པར་སྣང་། །བསམ་ཞིང་རང་ཉིད་སད་ན་ལེགས། །ཡིན་པའི་ངེས་ཤེས་བརྟན་པོ་ཞིག །རྨི་ལམ་ཡུལ་དུ་དྲན་པར་བྱུང་། །ཡང་ནི་མི་འགྱུར་རྡོ་རྗེ་ཉིད། །དགུང་ལོ་བཅུ་གཅིག་བཞེས་པའི་སྐབས། །ལུག་ཟླའི་བཅུ་དགུའི་ཉིན་ཕྱེད་དུས། །ཁྱེད་ནི་སྤྱན་རས་གཟིགས་དབང་གི །སྤྱན་གྱིས་སྤྲུལ་པ་རེད་དོ་གསུངས། །རྒྱུ་མཚན་ཅི་ལགས་ཞུས་པ་ཡིས། །ད་ཅི་སྔ་དྲོ་ནམ་མཁའི་དཀྱིལ། །ཐུགས་རྗེ་ཆེན་པོ་སྐུ་མདོག་དཀར། །ཕྱག་བཞི་དང་པོ་ཐལ་མོ་སྦྱར། །འོག་གཉིས་ཤེལ་ཕྲེང་
པད་དཀར་འཛིན། །ཞབས་གཉིས་སྐྱིལ་ཀྲུང་པད་ཟླར་བཞུགས། །འོད་ཟེར་ཉི་མ་ལྟར་འབར་བ། །དེ་འདྲ་གཅིག་ནི་དངོས་སུ་མཇལ། །དེ་ཡི་སྤྱན་དེ་བཙུམ་ཐལ་ཛ། །སྐུ་མདོག་དམར་པོ་རེད་ནས་ཐལོ། །དེ་ནས་སྤྱན་གྱིས་གཟིགས་བྱུང་བས། །ཐུགས་རྗེ་ཆེན་པོའི་སྤྱན་གཉིས་དེ། །བླ་མ་ཁྱེད་རང་རེད་ནི་གདའ། །དེ་ཚེ་ཐུགས་རྗེ་ཆེན་པོ་ཡིས། །ང་ཡི་མིག་ནི་གཅིག་པོ་འདི། །ཀརྨ་ཆགས་མེད་ཡིན་ནོ་གསུངས། །དེ་སྔ་ངས་ནི་ལྷ་མང་པོ། །མཇལ་ཡང་གསུང་ནི་སྒྲགས་མ་མྱོང་། །དེ་རིང་བསྒྲགས་པ་ཅི་ཡིན་ཨང་། །དེ་སྔ་ཕན་ཆད་བླ་མ་ཁྱེད། །སྤྱན་རས་གཟིགས་ཀྱི་ཅི་ཞིག་རེད། །བསམ་སྟེ་ཅི་ཡིན་རང་མ་ཤེས། །དེ་རིང་ཁྲིགས་སེ་ཐལ་ཞེས་གསུངས། །དེ་ལྟར་རྒྱུ་མཚན་འགའ་མཆིས་ཀྱང་། །རང་ཉིད་ཐུགས་རྗེ་ཆེན་པོ་ཡི། །སྤྲུལ་པ་ཡིན་བསམ་རློམ་སེམས་མེད། །སྒྲུབ་པ་ཡུན་རིང་བྱས་པའི་མཐུས། །ཅུང་ཟད་བྱིན་རླབས་ཞུགས་སམ་སེམས། །དེ་བཞིན་ལུང་བསྟན་བཀའ་རྒྱ་མར། །མདོར་ན་ཨོ་རྒྱན་ངས་བསྟན་ཆོས་རྣམས་ལ། །གཞུང་བཞིན་སུ་དང་སུ་ཡིས་སྤྱོད་པ་ཀུན། །ཐམས་ཅད་ང་ཡི་སྤྲུལ་པ་ཡིན་པར་ངེས། །ཕྱི་རབས་
ཀུན་གྱིས་ཐེ་ཚོམ་སོམ་ཉི་སྤོངས། །གུས་པས་བཀུར་སྟི་ཕུ་དུད་འབྲེལ་པ་ཐོགས། །ཞེས་གསུངས་དོན་ནི་དབང་བཞིས་ལེགས་སྨིན་ཅིང་། །བསྐྱེད་རྫོགས་ཟུང་དུ་འཇུག་པའི་རྣལ་འབྱོར་པ། །ལམ་དུས་པདྨ་འབྱུང་གནས་ཡིན་ལ་དགོངས། །དགོས་པ་འགྲོ་རྣམས་དང་བ་འདྲེན་ཕྱིར་གསུངས། །དེ་ཕྱིར་སྔགས་འཆང་རཱ་ག་ཨ་སྱ་བདག །དབང་གིས་ལེགས་སྨིན་ཚུལ་བཞིན་པད་འབྱུང་གི །གཏེར་ཆོས་རྣམས་ལ་ཉམས་ལེན་བགྱིད་བཞིན་པ། །ཡིན་ཕྱིར་སྤྲུལ་སྐུས་ནུབ་ཅིག་ལན་གསུམ་དུ། །ཁོ་བོ་པད་འབྱུང་སྐུར་མཐོང་དེ་ལྟར་ལགས། །བདག་ནི་པད་འབྱུང་སྤྲུལ་པ་ཡིན་ཟེར་བ། །གཏམ་ནི་གཏན་ནས་མིན་ནོ་གོ་བར་བྱོས། །འོན་ཀྱང་གཏེར་རྙིང་ལུང་བསྟན་འགའ་ཞིག་ལས། །དེང་སང་དུས་སྤྱོད་གསལ་བར་ལུང་བསྟན་སྐབས། །འོད་ཟེར་ཕོག་པ་སྟོང་ཚོ་ལྔ་འབྱུང་གསུངས། །དེ་ནས་བདག་ཀྱང་ཨོ་རྒྱན་ཆེན་པོ་ཡི། །འོད་ཟེར་ཕོག་ཙམ་ཡིན་ནམ་ཡང་ཡང་སེམས། །ཅི་ཕྱིར་ཞེ་ན་སྤྲུལ་སྐུའི་ཆག་ཕྱི་སོགས། །ཕྱོགས་འདིར་རྙིང་མའི་བསྟན་ལ་ཅུང་ཟད་ཕན། །དབང་ལུང་རྒྱུན་ཡང་རྒྱ་ཆེར་འཕེལ་ཞིང་རྒྱས། །ཐུགས་རྗེ་ཆེན་པོ་གསང་འདུས་ཞལ་གདམས་མཇུག །མ་འོང་
ས་གཏེར་ལ་མོས་པའི་གང་ཟག་རྣམས། །དེང་སང་གུ་རུའི་ཞལ་མཐོང་སྨོན་ལམ་བཏབ། །ཐམས་ཅད་ལས་ཅན་ཡིན་པས་དགའ་བ་སྒོམས། །ཁོ་མོའི་ཚིག་འདི་རིན་ཆེན་གསེར་བས་དཀོན། །གསུངས་ཕྱིར་བདག་ནི་གཏེར་ལ་མོས་འདུན་ཆེ། །གུ་རུའི་ཞལ་མཐོང་བ་ཡི་འབུ་སྲིན་འདྲ། །ཡིན་ནམ་སྙམ་དུ་སྐྱེ་བ་བརྟག་པ་ཡིས། །ལས་སྦྱོར་རྨི་ལམ་བརྟག་པ་བྱས་པའི་ཚེ། །བྲིས་མ་ཐག་པའི་རྒྱ་ཡིག་གླེགས་བམ་དང་། །མཚོ་ཆུང་ལ་སོགས་ཀླུ་ཡི་རྟགས་འདྲ་བ། །ཀླུ་ཡི་རྒྱལ་མཚན་ཡིན་པའི་རྟགས་འགའ་བྱུང་། །རང་གི་བུ་ཆེན་པདྨ་རིག་འཛིན་པས། །སྤྱི་བོར་བདུད་འདུལ་རྡོ་རྗེ་མཇལ་བའི་དུས། །ང་ཡི་བླ་མ་ཆོས་བདག་ཡིན་མིན་སོགས། །ཞུས་དུས་ལོ་ཙཱ་ཀླུ་ཡི་རྒྱལ་མཚན་གྱི། །སྤྲུལ་པ་ཐུགས་རྗེ་ཆེན་པོའི་ཆོས་བདག་ཞིག །དེ་ཕྱོགས་འོང་བར་བཤད་པས་ཡིན་ནམ་གསུངས། །ཞེས་ཟེར་བདག་གིས་རྒྱལ་བ་རྒྱ་མཚོ་ཡི། །འགྲེལ་པ་པོ་ཏི་གཅིག་ནི་བརྩམས་པའི་དུས། །གཙུག་ལག་ཁང་ནི་གསར་པ་ངོ་མཚར་བ། །ནང་དུ་བོད་དུ་བཀའ་དྲིན་ཆེ་ཚད་ཀྱི། །ལོ་པཎ་ཐམས་ཅད་ལོག་བྲིས་བྱས་པ་རྣམས། །ཐམས་ཅད་པཎ་ཞྭ་དམར་པོ་ཁོ་ན་ལ། །ཆོས་གོས་ངུར་སྨྲིག་
གསོལ་ཞིང་དང་བ་འདྲེན། །དེ་ནང་བདག་གི་སྐུ་ཡང་ལོ་ཙཱ་བའི། །ཚུལ་དུ་ལེགས་པར་བཞེངས་ནས་གདའ་བ་ལ། །བདག་གིས་ད་ལྟ་ལོ་ཙཱ་མི་ཤེས་ཀྱང་། །ང་ཡི་སྐུ་ཡང་ལོ་པཎ་གྲྭ་འདི་ལ། །མི་བྲི་ཁ་མེད་ཅིག་ནི་ཡིན་འདུག་སྙམ། །དུས་ཕྱིས་བདུད་འདུལ་རྡོ་རྗེ་མཇལ་བའི་ཚེ། །ཁྱེད་རང་ཚེ་སྒྲུབ་ཚ་བ་དམར་ཐག་གིས། །ཆོས་བདག་ཡིན་གསུངས་དེ་ཡི་དབང་ལུང་གནང་། །དམ་རྫས་རིལ་བུ་ཨ་རྒྱ་ཅན་འདི་ནི། །ཆོས་བདག་ལས་ཅན་བཅུ་གསུམ་ལ་སྤྱོད་གསུངས། །གདའ་བ་ཡིན་ནོ་ཁྱོད་ལ་སྦྱིན་གསུངས་གནང་། །རིག་འཛིན་དེ་ཡི་བསམ་ཡས་རྡོ་རྗེ་ཡི། །ཀློང་སྒྲོམ་ནས་བཏོན་ཆོས་བདག་ལུང་བསྟན་ལས། །ད་ལྟ་ཀླུ་ཡི་རྒྱལ་མཚན་ཁྱོད། །མ་འོངས་མདོ་ཁམས་མཐིལ་ནས་ཀརྨའི་མཚན། །མདུན་རྒྱབ་སྐུ་གསུམ་ལྷུན་གྲུབ་སྨེ་བས་བརྒྱན། །སྐལ་ལྡན་དེ་ལ་ཟབ་ཆོས་འདི་འཕྲོད་ན། །ཚེ་ཚད་མཐར་ཕྱིན་འགྲོ་དོན་བསྟན་པ་འཕེལ། །ཞེས་པའི་ལུང་བསྟན་འདི་ཉིད་ཡིན་ནོ་གསུངས། །ངེད་རང་རྣམ་པ་ལུས་ནི་ཐ་དད་ཀྱང་། །སེམས་ནི་དབྱེར་མེད་ཕྱི་མའི་དུས་སུ་ཡང་། །དག་པའི་ཞིང་དུ་འཚོགས་པར་འགྱུར་རོ་གསུངས། །ཁྱེད་ནི་སྨོན་ལམ་འབྲེལ་པས་སྤྲུལ་སྐུ་
ཡི། །ཆག་ཕྱི་འགྲུབ་པ་ཡིན་ཏེ་རྗེ་འབངས་རྣམས། །གཅིག་གིས་གཏེར་ཐོན་ཚེ་ན་གཞན་རྣམས་ཀྱིས། །དམ་ཆོས་སྤེལ་བའི་གྲོགས་ནི་ཡིན་ནོ་གསུངས། །དེ་ཕྱིར་བདག་ནི་གངས་ཅན་བསྟན་པའི་མིག །ཀླུ་ཡི་རྒྱལ་མཚན་དངོས་ནི་ག་ལ་ཡིན། །འོན་ཀྱང་གཏེར་ལུང་གཏེར་སྟོན་གསུང་ཐུན་པས། །དེ་ཡི་བྱིན་རླབས་སྤྲུལ་པའི་ཆ་ཤས་ཙམ། །ཡིན་ནམ་སྙམ་པའི་རློམ་སེམས་ཞུགས་པར་གྱུར། །སྔོན་ཚེ་ལྷ་མོའི་བསྙེན་སྒྲུབ་མ་བྱས་དུས། །རྨི་ལམ་དཔལ་ལྡན་ལྷ་མོ་ཞལ་མཐོང་ཞིང་། །ཐུགས་རྗེ་ཆེན་པོའི་སྒྲུབ་པ་བྱས་པའི་སྐབས་། །རེ་མ་ཏི་ནི་ཅུང་ཟད་མ་བསྙེན་ཀྱང་། །ཐོ་རངས་ཉམས་དང་རྨི་ལམ་འདྲེས་པའི་སྐབས། །དཔལ་ལྡན་ལྷ་མོ་རེ་མ་ཏི་དེ་ནི། །མངོན་སུམ་ལྟ་བུར་གསལ་བར་མཇལ་བ་ཡང་། །དེང་དུས་བཟང་ངན་ཅི་ཡིན་མ་ཤེས་ཀྱང་། །ད་ནི་བསམ་པས་ཀླུ་ཡི་རྒྱལ་མཚན་དེ། །དཔལ་ལྡན་ལྷ་མོའི་བཀའ་བབ་ཡིན་འདུག་པས། །མེ་ལྕེ་འབར་མ་ལ་སོགས་ལྷ་མོ་ཡི། །རྒྱུད་དང་མན་ངག་སྔ་འགྱུར་ཕལ་ཆེར་ནི། །ཁོང་གིས་བསྒྱུར་བའི་རྟེན་འབྲེལ་ཡིན་ནམ་བསམ། །དེ་བཞིན་ཞི་ཁྲོའི་བསྙེན་པ་མ་བྱས་ཀྱང་། །རྨི་ལམ་ཁྲག་འཐུང་འབར་བ་ལྔ་
བཅུ་བརྒྱད། ནམ་མཁའི་འཇའ་ཚོན་ལྟ་བུར་མཇལ་བ་ཡང་། །ཀླུ་ཡི་རྒྱལ་མཚན་སྐྱེས་མཐའ་ཀརྨ་གླིང་། །དེ་ཡི་བྱིན་རླབས་ཆ་ཤས་ཞུགས་སམ་སེམས། །ཁྲག་འཐུང་བདུད་འདུལ་རྡོ་རྗེར་འདི་སྐད་ཞུས། །ཁྱེད་ཀྱིས་གཏེར་ནས་ཀླུ་ཡི་རྒྱལ་མཚན་གསུངས། །གནམ་ཆོས་ལས་ནི་སད་ན་ལེགས་ཡིན་གསུངས། །ཅི་ཡིན་ཞུས་པས་ཐུགས་རྒྱུད་གཅིག་ཡིན་གསུངས། །ཕུ་ཡིན་མདའ་ཡིན་ཁུ་ཡིན་ཡེ་ཡིན་ཞེས། །མང་དུ་སྨྲ་བ་མི་མཚུངས་འུད་འདྲ་ཡང་། །རྒྱལ་བ་ཐམས་ཅད་ཡེ་ཤེས་ཀློང་དུ་གཅིག །སངས་རྒྱས་ཐམས་ཅད་ཆོས་སྐུ་གཅིག་པ་སྟེ། །ཡེ་ཤེས་ལྷ་ནི་གཅིག་འགྲུབ་ཐམས་ཅད་འགྲུབ། །གཅིག་གིས་བྱིན་བརླབས་ཀུན་གྱི་བྱིན་རླབས་འཇུག །དེ་ལྟར་ཤེས་ན་འགལ་བ་ཅི་ཡང་མེད། །དེ་ཕྱིར་ད་དུང་འཁྲུལ་གཏམ་འགའ་བརྗོད་པ། །བདག་ནི་ཟ་དམ་གྲྭ་ས་འགྲིམ་པའི་དུས། །ནུབ་ཅིག་རྨི་ལམ་འཁྲུལ་པའི་སྣང་བ་ལ། །གཟིམས་ཆུང་སྤོས་ཞལ་ཉི་མ་ཤར་བའི་ནང་། །རང་གི་ལུས་འདི་རྒྱལ་དབང་བཅུ་པ་ཡི། །སྐུ་ནི་དངོས་སུ་གྱུར་ཅིང་འདུག་པ་ལ། །སྐུ་ལ་གོས་བེར་སེར་པོ་གསར་པ་མནབས། །རང་ཉིད་རྒྱལ་དབང་དངོས་ཡིན་སྙམ་ཞིང་འདུག །དེ་ཚེ་ཕ་ཡུལ་ཡོད་པའི་དཔོན་
རིགས་ཤིག །ང་ལ་མཇལ་ཞིང་ཐལ་སྦྱར་པུས་བཙུགས་འདུག །ཁོ་ལ་སྔར་དང་མི་འདྲ་མིག་གསུམ་འདུག །དེ་དུས་ཙམ་ལ་ཁོ་ཉིད་ཤི་འདུག་སྟེ། །བླ་དྲག་ཡིན་ཕྱིར་བཙན་དུ་སྐྱེས་འདུག་སྙམ། །དུས་རྣམས་ཕལ་ཆེར་ཡིད་ལ་མ་དྲན་པར། །ཆོས་དབྱིངས་རྡོ་རྗེ་མཁྱེན་ཞེས་བྱ་བའི་ཚིག །ཁ་ནས་ཐོལ་ཐོལ་འོང་བ་ཞིག་ཡོད་པས། །དེ་ཡི་བྱིན་རླབས་ཅུང་ཟད་ཞུགས་པར་སེམས། །ཡང་ནི་སྒྲུབ་པ་བྱས་པའི་མཚམས་ཁུང་དུ། །རྨི་ལམ་ཡུལ་དུ་བལ་བོད་སོ་མཚམས་སུ། །རང་ཉིད་རྗེ་བཙུན་མི་ལ་ཡིན་སྙམ་ཞིང་། །གཅེར་བུར་རས་གོས་ཧྲུལ་པ་གྱོན་ནས་འདུག །སློབ་མ་རྟོགས་ལྡན་རས་གོས་ཅན་མང་པོ། །ལ་ལས་བལ་པོར་ལྡོམ་བུར་འགྲོའོ་ཟེར། །ལ་ལས་ལ་ཕྱིར་ལྡོམ་བུར་འགྲོ་གྲབས་བྱེད། །དེ་ཚེ་བདག་གིས་རྫོངས་བ་མགུར་མ་ཞིག །བྱས་ཤིང་དེ་དག་དྲོན་པའི་སྣང་བ་བྱུང་། །དེ་ཕྱིར་རྗེ་བཙུན་ཆེན་པོའི་བྱིན་རླབས་ཀྱང་། །ཅུང་ཟད་ཞུགས་པའི་རྟགས་ཤིག་ཡིན་ནམ་སེམས་། །ཡང་ནི་གངས་ཅན་བསྟན་པའི་རྒྱན་གྱུར་པ། །མཚུར་ཕུ་འཇམ་དབྱངས་ཆེན་པོ་ཞེས་བྱ་དེ། །ང་རང་ཡིན་པར་འདུག་གོ་སྙམ་པ་ཞིག །རྨི་ལམ་ཡུལ་དུ་དྲན་པའི་སྣང་བ་
བྱུ་། །ཡང་ནི་རྨི་ལམ་འཁྲུལ་པའི་སྣང་བ་ལ། །དྲུང་ཆེན་ཀུན་དགའ་རྣམ་རྒྱལ་དེ་ཉིད་དང་། །རང་གཉིས་ངོ་བོ་དབྱེར་མེད་གཅིག་ཏུ་མཐོང་། །དེ་ཚེ་དྲུང་པའི་རྨོ་ཡི་གཟིམས་ཁང་དུ། །རྟོགས་ལྡན་མ་ཕམ་པ་དང་གསུང་གླེང་དང་། །སྐུ་ལུས་ན་བཟའ་སོགས་ཀྱང་གསལ་པོ་རུ། །མཐོང་ཞིང་དྲན་པའི་སྣང་བ་གསལ་པོ་ཤར། །དེ་ཕྱིར་ཕ་རྒན་དེས་ཀྱང་བྱིན་གྱིས་བརླབས། །བཀའ་དྲིན་ཆེའོ་དཔལ་ལྡན་བླ་མ་རྣམས། །གསང་སྔགས་རྙིང་མའི་བླ་མ་སྙིང་ཐིག་དང་། །གསར་མའི་ཕ་རྒྱུད་གསང་འདུས་རྒྱུད་ཆེན་ལས། །རང་ཉིད་སངས་རྒྱས་བྱང་སེམས་སྐུར་གྱུར་དང་། །དེ་བཞིན་རང་ལ་ཐིམ་ཞིང་འཕྲོ་བ་དང་། །སངས་རྒྱས་བྱང་སེམས་རྣམས་ཀྱིས་རང་ཉིད་ལ། །མཆོད་བསྟོད་བཀུར་སྟི་བྱེད་པ་རྨིས་པ་སོགས། །བསྐྱེད་རིམ་འབྱོངས་རྟགས་བྱིན་རླབས་ཞུགས་རྟགས་སུ། །གསུང་ཕྱིར་འདི་རུ་བདག་གིས་བཀོད་པ་ཡིན། །མི་ལ་དང་ནི་ཀརྨ་པ་ལ་སོགས། །ང་ཡིན་ཟེར་བ་མིན་པས་གོ་བར་གྱིས། །དེ་དོན་རིག་འཛིན་མི་འགྱུར་རྡོ་རྗེ་ལ། །གནམ་ཆོས་ཐུགས་ཀྱི་གཏེར་ཁ་རྡོལ་བའི་སྐབས། །ཡི་དམ་ལྷ་ཡི་ཞལ་གཟིགས་རྒྱུན་ཆད་མེད། །དེ་ཚེ་ཐེ་ཚོམ་གནད་རྣམས་དྲི་ཆོག་དུས། །
འདི་ལྟར་འཁྲུལ་པའི་རྨིས་ལྟས་མི་མཚམས་པ། །བར་ཆད་བདུད་ཀྱི་བསླུ་སེམས་ཅི་ལྟར་ལགས། །ཡི་དམ་ཞལ་གཟིགས་བྱུང་ཚེ་དྲིས་ཞུས་པས། །རྒྱལ་བ་རྒྱ་མཚོ་ཞལ་གཟིགས་ནས་གསུངས་པ། །ཀླུ་ཡི་རྒྱལ་མཚན་སྤང་བུ་གོས་ཁུར་དང་། །འཇམ་དབྱངས་ཆེན་པོ་ཆོས་དབྱིངས་རྡོ་རྗེ་དང་། །ཀུན་དགའ་རྣམ་རྒྱལ་གྲགས་པ་མཆོག་དབྱངས་གིས། །རྗེས་བཟུང་སྤྲུལ་པ་བྱིན་རླབས་ཞུགས་པ་ཡིན། །ཞེས་དང་ཁ་སར་པཱ་ཎི་ཡིས། །མི་ལ་དྭགས་པོའི་སྤྲུལ་ཟེར་ཡིན། །ཞེས་སོགས་ལུང་དུ་བསྟན་པར་མཛད། །དེ་ལྟར་ཡང་གསང་གུད་སྦས་རྣམ་ཐར་འདི། །མི་ཆོས་བླ་མས་རྫུན་སྨྲས་སྡོམ་པ་འཆོར། །དེ་ཕྱིར་རྫུན་མེད་དྲང་པོར་སྨྲ་བའི་ཚིག །སྤྲུལ་སྐུའི་བཀའ་ཡིས་བསྐུལ་ཕྱིར་མདོར་བསྡུས་བྲིས། །གསང་བ་བསྒྲགས་པའི་ཉེས་པ་མཆིས་སྲིད་ན། །རྩ་བ་གསུམ་གྱི་ལྷ་ལ་བཟོད་པར་གསོལ། །དགེ་བ་མཆིས་ན་བདག་ལ་འབྲེལ་ཐོགས་ཀུན། །བདེ་ཆེན་དག་པའི་ཞིང་དུ་སྐྱེ་ཕྱིར་བསྔོ་། །རང་ལོ་ང་གཉིས་ལྕགས་ཕོ་བྱི་བའི་ལོ། །ས་ག་ཟླ་བའི་ཚེས་བཅུའི་སྐོར་ལ་བྲིས། །རེ་ཞིག་རྫོགས་སོ།། །།མངྒ་ལཾ།། །།