དགེ་སློང་རཱ་ག་ཨ་སྱའི་རྣམ་ཐར་གྱི་སྤྱི་དོན་དང་མདོ་རྒྱུད་ཀྱི་ལུང་དང་མི་འགལ་བར་སྤྱོད་པའི་རྣམ་ཐར་མཁས་རྣམས་དགྱེས་པའི་སྒྲ་སྙན།
༄༅། དགེ་སློང་རཱ་ག་ཨ་སྱའི་རྣམ་ཐར་གྱི་སྤྱི་དོན་དང་མདོ་རྒྱུད་ཀྱི་ལུང་དང་མི་འགལ་བར་སྤྱོད་པའི་རྣམ་ཐར་མཁས་རྣམས་དགྱེས་པའི་སྒྲ་སྙན་བཞུགས།།
ན་མོ་ཤཱཀྱ་མུ་ནེ་ཡེ། །མདོ་རྒྱུད་མན་ངག་ལུང་རྣམས་ཐམས་ཅད་ལས། །ཐོག་མར་བླ་མ་བསྟེན་དགོས་གསུངས་པ་སྟེ། །འཕགས་པ་སྡུད་པ་ལས་ཀྱང་འདི་སྐད་དུ། །སློབ་མ་བཟང་པོ་བླ་མར་གུས་ལྡན་དེ་དག་གིས། །བླ་མ་མཁས་པ་རྣམས་ལ་རྟག་ཏུ་བསྟེན་པར་བྱ། །ཅི་ཕྱིར་ཞེ་ན་མཁས་པའི་ཡོན་ཏན་དེ་ལས་འབྱུང་། །ཞེས་གསུངས་དེ་ལ་བསྟེན་ལུགས་རྣམ་པ་གཉིས། །རྒྱལ་བ་འབྲོམ་དང་གཙང་པ་རྒྱ་རས་དང་། །རྒྱལ་བ་ཡབ་སྲས་ལ་སོགས་བཞེད་པ་ལ། །མདོ་རྒྱུད་རྣམས་ནས་རྒྱ་ཆེར་གསུངས་པ་ལྟར། །མཚན་ཉིད་ལྡན་ཞིང་སྐྱོན་བྲལ་ཡོན་ཏན་ལྡན། །དེ་འདྲའི་བླ་
མ་གཅིག་གམ་འགའ་ཟུང་ཙམ། །བསྟེན་ན་རྒྱུད་པ་གཙང་ཞིང་དམ་སེལ་མེད། །ཕ་མང་བུ་བཞིན་རུས་པ་མི་གཏོང་བར། །རང་རང་བསྟན་པའི་རྐང་ནི་ཟིན་པ་ཡིན། །བླ་མ་མང་ལ་ངན་པ་འགའ་བསྟེན་པས། །གདམས་ངག་སྤྱང་པོའི་རྩམ་པ་ལྟ་བུ་འོང་། །འཕྱོན་མའི་བུ་བཞིན་ཆོས་རྒྱུད་རྐང་མི་ཟིན། །རྒྱུད་པ་ཐག་རུལ་བྲིང་རུལ་མཐུད་འདྲར་འོང་། །རྒྱུད་པ་གཞན་དང་ཆོས་རྒྱུད་གཞན་གྱིས་བསླད། །བར་ཆད་ལྡང་ཞིང་ས་ཟིན་མི་འོང་གསུངས། །དེ་བཞིན་དམ་པའི་ཞི་བྱེད་གཞུང་ལས་ཀྱང་། །དམ་ཉམས་རྒྱུད་པ་འདྲེས་ཁྱེར་རྒྱུད་པ་དང་། །རང་བཟོའི་རྒྱུད་པ་
གསུམ་པོས་མ་བསླད་དགོས། །དེས་བསླད་མཆོག་གི་དངོས་གྲུབ་མི་ཐོབ་སྟེ། །འབད་པས་འགྲུབ་ན་བྱིན་རླབས་སྣ་རེ་དང་། །སྲིང་ངེ་བ་རྣམས་བྱུང་དུ་རུང་བར་གསུངས། །མི་བསྐྱོད་ཞབས་ཀྱིས་བླ་མ་གང་རེད་ཀྱི། །བླ་མ་བྱས་ཀྱང་བླ་མའི་གོ་མི་ཆོད། །གསོལ་བ་ཁྱི་བཏབ་ཕག་བཏབ་དགོས་པ་མེད། །བླ་མ་མིན་པ་བླ་མར་མ་བཅོས་པ། །བླ་མ་ཡིན་པ་བླ་མར་བྱོན་པ་ཡི། །སངས་རྒྱས་མཉན་པ་འདྲ་ཞིག་དགོས་དོ་གསུངས། །འགྲོ་བའི་མགོན་པོ་ས་སྐྱ་པཎྜི་ཏས། །ཐུན་མོང་དངོས་གྲུབ་བླ་མ་ཀུན་གྱིས་སྩོལ། །མཆོག་གི་དངོས་གྲུབ་མཚན་ཉིད་ལྡན་པ་ཡི། །རྩ་བའི་བླ་མ་མིན་པས་མི་སྩོལ་གསུངས། །འོ་ན་མཚན་ལྡན་བླ་མ་སྙིགས་དུས་དཀོན། །མཚན་ལྡན་མ་རྙེད་ཇི་ལྟར་བྱ་ཞེ་ན། །དུས་ཀྱི་འཁོར་ལོ་དོན་དམ་རྙེད་པ་ལས། །འདོད་པའི་དངོས་གྲུབ་སློབ་དཔོན་ཞལ་གྱི་རྗེས་འབྲང་བར། །མ་ལུས་རྡོ་རྗེ་ཐེག་པར་ཐམས་ཅད་མཁྱེན་པས་གསུངས། །དེ་བཞིན་སློབ་མ་མཁས་པ་རྣམས་ལ་བླ་མ་གསེར་བཞིན་དུ། །ལེགས་པར་བརྟགས་ན་སྡིག་པ་ཅུང་ཟད་ཡོད་མ་ཡིན། །སྙིགས་དུས་དབང་གིས་བླ་མའི་སྐྱོན་དང་ཡོན་ཏན་འདྲེས། །རྣམ་པ་ཀུན་ཏུ་སྡིག་པ་མེད་པ་ཡོད་མ་
ཡིན་། །གང་ཞིག་ཡོན་ཏན་ལྷག་པ་ཡང་ནི་ལེགས་བསྐྱེད་ནས། །བུ་རྣམས་ཀྱིས་ནི་དེ་ལ་བསྟེན་པར་འགྱུར་བའོ། །ཞེས་གསུངས་བླ་མའི་སྐྱོན་དང་ཡོན་ཏན་གཉིས། །ཅུང་ཟད་ཡོན་ཏན་ཆ་ཆེ་བསྟེན་རུང་གསུངས། །དེ་བཞིན་གུ་རུ་པདྨ་འབྱུང་གནས་ཀྱིས། །དཔེར་ན་བུང་བས་མེ་ཏོག་ལེགས་ཉེས་ལ། །བརྟག་པར་མི་བྱེད་ཀུན་གྱི་བཅུད་འཇིབ་ལྟར། །གདམས་ངག་ཚོལ་དུས་བླ་མ་མི་བརྟག་པར། །ཀུན་གྱི་ཡོན་ཏན་གང་འདུག་ལེན་པ་ནི། །བུང་བ་ལྟ་བུའི་སྤྱོད་པ་ཡིན་གསུངས་ནས། །རྫ་མཁན་རྒན་མོ་ལ་ཡང་ཕྱག་འཚལ་ནས། །རྫ་དང་ཇོ་མོ་དཀར་ཡོལ་བསླབ་པར་མཛད། །དེ་བཞིན་པཎ་ཆེན་ཇོ་བོ་ཨ་ཏི་ཤས། །བླ་མ་བརྒྱ་དང་ལྔ་བཅུ་བསྟེན་གསུངས་པས། །དེ་དག་ཁྱེད་ལས་ལྷག་གམ་ཞེས་ཞུས་པས། །ང་ཡི་ཡོན་ཏན་བརྒྱ་ཡི་ཆ་ཙམ་དང་། །སྟོང་གི་ཆ་ལས་མེད་པའང་ཡོད་དོ་གསུངས། །མཆོག་གྱུར་མེ་ཏྲི་པ་དང་གསེར་གླིང་པ། །དེ་གཉིས་ཡོན་ཏན་བསམ་གྱིས་མི་ཁྱབ་གསུངས། །གྲུབ་ཐོབ་ཆེན་པོ་ཐང་སྟོང་རྒྱལ་པོས་ཀྱང་། །བླ་མ་ལྔ་བརྒྱ་ལྷག་ཙམ་བསྟེན་པ་ལས། །ཡུགས་ས་མོ་དང་བཙུན་ལོག་ཡ་ཕོ་སོགས། །དེ་དག་ལ་ཡང་དབང་དང་
གདམས་ངག་ཞུས། །རྔོག་ལོ་ཆེན་པོ་ལ་སོགས་བཀའ་གདམས་པས། །གང་ཟག་སྐྱོན་གྱིས་ཆོས་ལ་མི་གོས་ཏེ། །དཔེར་ན་ཡུར་ཆུ་ཞིང་ཏུ་ཕྱིན་གྱུར་ན། །ཡུར་བ་གཙང་དང་མི་གཙང་ཁྱད་པར་མེད། །དེ་བཞིན་ཆོས་དེ་སློབ་མས་ཐོབ་པ་ན། །རྒྱུད་རིམ་བཟང་ངན་ཁྱད་པར་མེད་ཅེས་བཤད། །དེ་ལྟར་བླ་མ་བསྟེན་ལུགས་རིགས་གཉིས་ལས། །དགེ་སློང་རཱ་ག་ཨ་སྱ་བདག་གིས་ནི། །བུང་བ་ལྟ་བུའི་སྤྱོད་པ་དེ་བྱས་ཏེ། །འོད་མཚན་ཅོད་པན་འཆང་བ་མན་ཆད་ནས། །རང་གི་ཡབ་རྒན་རྣལ་འབྱོར་ཡན་ཆད་ཀྱི། །ཆོས་འབྲེལ་ཞུས་པའི་བླ་མ་བཞི་བཅུ་ཙམ། །ལ་ལ་སུམ་ལྡན་རྡོ་རྗེ་འཛིན་པར་གྱུར། །ལ་ལར་ལུང་ཞུས་ལ་ལར་དབང་འབྲེལ་ཞུས། །ལ་ལར་ཁྲིད་དངམན་ངག་གདམས་པ་དང་། །ལ་ལར་རིག་གནས་ཕྲན་བུ་ཡན་ཆད་བསླབ། །གྲུབ་ཐོབ་གཙང་པ་རྒྱ་རས་ཞལ་སྔ་ནས། །དག་སྣང་དེ་ཚོ་ཆོས་མཛད་ཡོངས་ལ་སྦྱང་། །གསོལ་བ་དེ་དཔལ་ལྡན་འབྲུག་པ་ལ་འདེབས། །ཞེས་གསུངས་ལྟར་དུ་གཅིག་ཆོག་བླ་མ་རྗེ། །འོད་མཚན་འཆང་བ་སྤྱི་བོའི་རྒྱན་དུ་བཀོད། །མི་བསྐྱོད་ཞབས་ཀྱི་གསུངས་ལས་བྱུང་བ་ལྟར། །གསོལ་བ་ཁྱི་བཏབ་ཕག་བཏབ་མ་བྱས་ཀྱང་། །དབང་
འབྲེལ་ཐོབ་པའི་བླ་མ་ཐམས་ཅད་ལ། །ཡི་དམ་དེ་ཉིད་དངོས་སུ་དག་སྣང་སྦྱངས། །ལུང་དང་མན་ངག་ལ་སོགས་བྱིན་པ་རྣམས། །སར་གནས་སེམས་དཔའ་ཙམ་དུ་མོས་པར་བྱས། །ལུས་ངག་ཡིད་དང་ཟང་ཟིང་ལ་སོགས་པ། །ཇི་ལྟར་འོས་དང་འབྱོར་པའི་བཀུར་སྟི་བགྱིད། །ཉིད་རྣམས་གཟིགས་ངོར་ཅི་ཡོད་མི་ཤེས་ཀྱང་། །རང་གི་ངོས་ནས་ཡེ་ཤེས་སྤྱན་ལྡན་པའི། །མཁའ་འགྲོ་ཆོས་སྐྱོང་ཐུགས་མི་ཁྲེལ་བར་བྱས། །ད་དུང་ཇི་སྲིད་འཚོ་ཡི་བར་དུ་ནི། །ནམ་ཞིག་རྣམ་མཁྱེན་བྱང་ཆུབ་མ་ཐོབ་བར། །དགེ་བའི་བཤེས་གཉེན་བསྟེན་ལ་ཆོག་ཤེས་མེད། །རྙེད་དང་བཀུར་སྟི་དང་ནི་རིམ་གྲོ་ཡིས། །དགེ་བའི་བཤེས་རྣམས་མཉེས་པར་བྱེད་པར་སྨོན། །དགེ་བའི་བཤེས་གཉེན་བསྟེན་པའི་སརྒ་ཏེ་དང་པོའོ།། །།དེ་ཡང་བྱང་ཆུབ་སེམས་དཔའི་སྡེ་སྣོད་ལས། །ཐོས་པས་ཆོས་རྣམས་ཤེས་པར་འགྱུར། །ཐོས་པས་སྡིག་ལས་ལྡོག་པར་འགྱུར། །ཐོས་པས་དོན་མེད་སྤངས་བར་འགྱུར་། །ཐོས་པས་མྱ་ངན་འདས་པ་ཐོབ། །ཅེས་གསུངས་ཕྱིར་ན་ཐོས་པ་གལ་ཆེ་བས། །དེ་ལ་ཡང་ནི་བཤད་ལུགས་གཉིས་སྣང་སྟེ། །ཀུ་ས་ལི་དང་པཎྜི་ཏ་ཡི་ལུགས། །དང་པོ་
ཀུ་ས་ལི་ཡི་ལུགས་ལ་ནི། །ཤེས་བྱ་རེ་རེའི་མཐའ་ཡང་ཆོད་མིན་ཏེ། །དཔེར་ན་ནམ་མཁའ་འདོམ་གྱིས་འཇལ་དང་འདྲ། །ཚེ་ལ་ལོང་མེད་ནམ་འཆི་ངེས་པ་མེད། །མཚན་ལྡན་བྱིན་རླབས་རྟོགས་པར་ལྡན་པ་ཡི། །བླ་མ་གཅིག་བསྟེན་གདམས་ངག་སྣ་གཅིག་བསྒོམ། །གེགས་སེལ་བོགས་འདོན་གསོལ་འདེབས་ཁོ་ནས་ཆོག །དེ་ལྟར་འབད་ན་སྒོམ་བྱུང་ཤེས་རབ་འབར། །གཅིག་ཤེས་ཀུན་ལ་མཁས་ཤིག་འབྱུང་བར་བཤད། །དེ་ནི་དབང་རྟུལ་དད་པའི་རྗེས་འབྲང་ཡིན། །པཎྜི་ཏ་ཡི་ལུགས་ནི་འདི་ལྟ་སྟེ། །རིག་པའི་གནས་ལྔ་ཀུན་ལ་མ་སྦྱངས་ན། །འཕགས་པ་ཡིན་ཀྱང་ཐམས་ཅད་མཁྱེན་མི་ཐོབ། །དེ་ཕྱིར་བྱང་ཆུབ་སེམས་དཔའ་རྣམས་ཀྱིས་ནི། །མི་བསླབ་པ་ཡི་ཤེས་བྱ་ཡོད་པ་མིན། །ཐོས་པས་ཕྱི་ཡི་སྒྲོ་འདོགས་མ་བཅད་ན། །ལམ་རྒྱུས་མེད་ལ་མཚན་འགྲོས་བྱེད་པ་ལྟར། །གེགས་དང་གོལ་ས་ལོག་པའི་ལམ་དུ་གོལ། །བྱང་ཆུབ་སྒྲུབ་པའི་ཐབས་ཀྱང་མི་ཤེས་པར། །འབེན་མ་མཐོང་བའི་མདའ་དང་མུན་ནག་རྡོ། །མཚུངས་པར་དགྲ་གཉེན་སུ་ཕོག་ཆ་མ་མཆིས། །དེ་ཕྱིར་ཐོག་མར་ཐོས་བསམ་བྱ་དགོས་གསུངས། །ལུགས་དེ་གཉིས་པོ་གང་ལེགས་ཞེ་ན་ནི། །བདག་གི་
འདྲེན་པ་ཐམས་ཅད་མཁྱེན་པ་ཡིས། །བྱུང་ན་དབང་རྣོན་ཆོས་ཀྱི་རྗེས་འབྲང་ལེགས། །ཞལ་ནས་གསུངས་པ་བདག་གིས་དངོས་སུ་ཐོས། །བདག་ཀྱང་ཆོས་ཀྱི་རྗེས་འབྲང་བྱ་སྙམ་ནས། །ཡི་གེ་ཀློག་དང་འབྲི་བའི་འདེབ་ཁ་དང་། །སུམ་རྟགས་ལ་སོགས་བོད་སྒྲའི་འབྲེལ་པ་བཞག །ལན་ཚ་བྲི་དང་ཨོ་རྒྱན་ཡི་གེའི་རིགས། །མཚམས་སྦྱོར་རྐང་ལྔ་པ་སོགས་ཡན་ཆད་ཡང་། །འབྲི་ཐུབ་གོ་བ་བག་ཙམ་ཡོད་པ་དང་། །སྔགས་ཀྱི་སྒྲ་གྲོགས་བཀླག་ཐབས་མང་པོ་སོགས། །སྒྲ་ཡི་རིག་པ་ལ་ཡང་འབྲེལ་པ་བཞག །སྙན་ངག་ཚིག་རྒྱན་མིང་གི་མངོན་བརྗོད་སོགས། །དོགས་པ་བཅད་ཅིང་འབྲེལ་པ་ཅུང་ཟད་བཞག །བསྡུས་ར་རྒྱུ་འབྲས་རྫས་ལྡོག་སྤྱི་བྱེ་བྲག །རྐང་ཁྱབ་ཚིག་འཁྲི་གཉིས་ཀར་འབྲེལ་པ་བཞག །རིག་གཞུང་རྒྱ་མཚོ་འཇམ་དཔལ་བཞེད་པ་གཉིས། །ཅུང་ཟད་བཟུང་ཞིང་དེ་བཞིན་དབུ་ཕར་དང་། །འདུལ་བ་མངོན་པ་སོགས་ལ་འབྲེལ་པ་བཞག །གཞུང་ཚིག་ཕལ་ཆེར་རྟགས་གསལ་བཀོད་པ་དང་། །རིགས་ལུང་བཏང་ན་ལག་མ་ཐོགས་ཙམ་གྱི། །འབྲེལ་པ་ཅུང་ཟད་ཙམ་རེ་བཞག་པ་ཡིན། །གསོ་རིག་རྒྱུད་བཞི་བྱེ་རིལ་ཉམས་ཡིག་སོགས། །བལྟས་ཤིང་སྤྱད་ཚེ་
གོ་བ་མི་ཐོབ་མེད། །སྔོ་སྨན་རྣམས་ལ་སྡུམ་ཁྲིད་ལན་གཅིག་བྱས། །རི་མོ་འབུར་སྐུ་རྣམས་ཀྱང་ཆོབ་ཙམ་བསླབས། །ལྷ་ཡི་ཐིག་རྩ་དཀྱིལ་འཁོར་ཐིག་རྩ་དང་། །ཐབ་ཐིག་མཆོད་རྟེན་ཐིག་ལ་འབྲེལ་པ་བཞག །གཤིན་རྩིས་གསོན་རྩིས་བག་རྩིས་བཙས་ཀླུང་རྩིས། །རྒྱུ་ལྡོག་ཐེབ་ལྡོག་ས་རིས་མང་ཞིག་བསླབས། །མདོས་ཟློག་བསྐང་བ་ལྷ་གསོལ་སྲི་མནན་དང་། །གླུད་མདོས་དཀར་མདོས་མན་ངག་བཅོས་མང་བསླབས། །མདོར་ན་རིག་གནས་ཆེ་ཕྲ་ཕལ་ཆེར་ལ། །འབྲེལ་པ་སྣ་རེ་ངེས་པར་བཞག་པ་ཡིན། །འགྲོ་མགོན་ས་སྐྱ་པཎྜི་ཏ་ཡིས་གསུངས། །བློ་ངན་ཤེས་པ་མང་ན་ཡང་། །རྒྱུ་སྐར་བཞིན་དུ་གསལ་མི་ནུས། །མཐར་ཕྱིན་གཅིག་གིས་འཇིག་རྟེན་གསལ། །གསུང་ཕྱིར་དགེ་བཤེས་ཚད་ལྡན་ལ་ལ་ཡིས། །གཅིག་ལ་མཐའ་རུ་ཕྱིན་པར་བྱ་དགོས་གསུངས། །དེ་ཡི་ལུགས་ལ་གང་ཡིན་གཞུང་གཅིག་གི །གཞུང་དེ་བློར་བཟུང་དེ་ཡི་ཊཱིཀྐ་དང་། །སྤྱི་དོན་བློར་བཟུང་དེ་ནས་དགེ་རྒན་གྱི། །ངག་ཁྱབ་ལ་བརྟེན་སྦྱོར་བ་བཀོད་པ་དང་། །དེ་ནས་འབྱམས་བཤད་ངག་བསླབས་མཐར་ཕུད་དེ། །པོ་ཏི་མགོ་མཇུག་བགྲོ་གླེང་ལ་ཕན་ནས། །རང་ལུགས་གཞན་ལུགས་ཁྱེར་སོ་
སེམས་ལ་བཅངས། །རང་ལུགས་བདེན་པའི་ལུང་རིགས་ཕུགས་སུ་ཁུར། །གཞན་ལུགས་བཅོམ་པའི་རིགས་པ་རྣོ་ངར་ཕྱུང་། །དེ་ནས་དེ་ཡི་མཐའ་རྒྱ་གཅོད་པའི་ཕྱིར། །གཞན་ལུགས་དེ་ཡི་འགྲེལ་ཆེན་ཀུན་ལ་ལྟ། །ཀཾ་ཚང་མཁས་པ་འཛམ་གླིང་ཡོངས་གྲགས་དེས། །ཚད་མ་རྣམ་འགྲེལ་ཁོ་ནའི་འགྲེལ་ཆེན་ལ། །པོ་ཏི་སུམ་ཅུ་སོ་གཉིས་བློར་བཟུང་སྐད། །དེ་འདྲ་བྱས་ན་མཁས་པའི་གྲངས་སུ་འགྲོ། །དེ་མིན་གཞུང་འགྲེལ་བློ་ལ་མེད་པ་རུ། །གོ་བ་བཟང་ཡང་གོ་བའི་རོ་ཡིན་པས། །གྲྭ་ས་ཐུབ་པའི་མཁས་མིང་མི་ཐོགས་ཤིང་། །སློབ་དཔོན་ངག་ཁྲིད་རིགས་ལུང་མ་འགྲིམ་པའི། །དཔེ་ལྟས་བྱས་པས་གོ་ཤེས་ཆེ་ན་ཡང་། །ཁ་ནག་ཡིག་ནག་ཨ་མཆོད་ཡོན་ཏན་ཞེས། །མཚན་ཉིད་ལུགས་ཀྱིས་ཡོན་ཏན་རྩིས་མེད་དོ། །ཡང་ནི་དགེ་བཤེས་ལ་ལའི་བཤད་པ་ལ། །རིག་གནས་རེ་རེ་ཙམ་ཡང་མཐའ་ཆོད་པ། །སངས་རྒྱས་མ་ཐོབ་བར་དུ་ཡོད་མི་སྲིད། །དཔེར་ན་ཡི་གེ་ཁོ་ནའི་མཐའ་ལ་ཡང་། །ཡིག་རིགས་དྲུག་ཅུ་རྩ་བཞི་ཡོད་པར་གསུངས། །དེ་ལ་མ་འདུས་གཏེར་ཡིག་དཔག་ཏུ་མེད། །འཛམ་བུ་གླིང་འདིར་སྐད་རིགས་མི་གཅིག་པ། །སྟོང་དང་རྩ་བརྒྱད་ཚད་
ཙམ་ཡོད་པའི་ཕྱིར། །དེ་དག་སོ་སོར་རྩ་ཡི་ཟུག་ཚུལ་རེད། །རྩ་མདུད་སོ་སོའི་གཟུགས་སུ་ཡི་གེ་ཡོད། །དེ་ལྟར་ཡི་གེ་ཉིད་ཀྱང་མཐའ་ཡས་ན། །རིག་གནས་གཞན་རྣམས་དེ་བས་ལྟ་ཅི་སྨོས། །མཐའ་གཅོད་འདོད་པ་ནམ་མཁའ་འདོམ་འཇལ་འདྲ། །མཐའ་མ་ཆོད་ཀྱང་མཁས་པར་བྱ་སྙམ་ན། །རྒྱ་བོད་ཀུན་དུ་དབུ་མའི་མཁས་མཆོག་ཏུ། །ཉི་མ་ཟླ་བ་ལྟ་བུར་ཡོངས་གྲགས་པ། །ཟླ་བ་གྲགས་པས་དབུ་མའི་མཐའ་མ་ཆོད། །ནམ་མཁའ་ཟད་པས་འདབ་ཆགས་ལྡོག་པར་མི་འགྱུར་གྱི། །འདི་ནི་རང་མཐུ་ཟད་པས་ལྡོག་པར་འགྱུར་དེ་བཞིན། །ཞེས་སོགས་དབུ་མ་འཇུག་པ་ཉིད་དུ་གསུངས། །བོད་ལ་མཁས་པ་ཀུན་མཁྱེན་བུ་རོང་གཉིས། །ལྕགས་སྨྱུག་བཅུ་དྲུག་རེ་རེ་མ་ཟད་བར། །ས་རིས་བྲིས་ཀྱང་མཐའ་ནི་མ་ཆོད་སྐད། །དེ་ཕྱིར་མཁས་དང་མཐའ་ནི་ཆོད་པའི་དུས། །ཐམས་ཅད་མཁྱེན་པ་མ་ཐོབ་བར་དུ་མེད། །ཐམས་ཅད་མཁྱེན་པ་ཐོབ་པར་བྱེད་པའི་རྒྱུ། །ད་ལྟ་རིག་གནས་ཀུན་ལ་འབྲེལ་བཞག་ཅིང་། །སྨོན་ལམ་བཏབ་ན་ཀུན་མཁྱེན་རྒྱུར་འགྱུར་ཞིང་། །རིག་གནས་ཀུན་ལ་འབྲེལ་པ་བཞག་པར་བྱ། །དེ་ལྟར་བཞེད་པ་གཉིས་ལ་ཕྱི་མ་ཡི། །ལུགས་སུ་བྱས་
ནས་རཱ་ག་ཨ་སྱ་བདག །རིག་གནས་ཀུན་ལ་འབྲེལ་པ་བཞག་པ་ཡིན། །དེ་ནས་རྒྱལ་བའི་བསྟན་ལ་རིམ་པར་ཞུགས། །སྡོམ་པ་གསུམ་ཡང་རིམ་བཞིན་ལེགས་པར་ཞུས། །དཀྱིལ་འཁོར་དྲུག་ཅུ་རེ་བགྲངས་དབང་ཞུས་ཤིང་། །བརྡ་དབང་རྗེས་གནང་བཀའ་གཏད་མི་གཅིག་པ། །སྣ་ཁ་སུམ་བརྒྱ་དྲུག་ཅུ་ལྷག་ཙམ་ཐོབ། །ཤོག་ཚད་ཁ་གྲས་ཡིག་ཕྲེང་བདུན་པ་ལ། །ཤོག་གྲངས་སུམ་བརྒྱ་ཙམ་ལ་ཆགས་བཞག་ན། །པོ་ཏི་བརྒྱད་ཅུ་གྱ་གྲངས་ཙམ་ཞིག་གི །ཀློག་ལུང་ཐོབ་ཅིང་ཞལ་ཁྲིད་མང་དུ་ཡོད། །ཉམས་ཁྲིད་སྣ་ཁ་བདུན་བརྒྱ་ཙམ་ཞིག་ཐོབ། །མདོ་མང་རྒྱུད་འབུམ་བུ་སྟོན་ཆོས་འབྱུང་དང་། །དཔའ་བོའི་ཆོས་འབྱུང་བཀའ་ཆེམས་རྒྱལ་རབས་དང་། །མདོར་ན་ས་དགེ་རྙིང་མ་བཀའ་བརྒྱུད་དང་། །བོན་ལུགས་ལ་སོགས་གྲུབ་མཐའ་ཕྱོགས་མེད་ཀྱི། །བཤད་དང་སྒྲུབ་པ་རྣམ་ཐར་ལ་སོགས་ཆོས། །གང་ལའང་ཕྱོགས་རིས་མེད་པར་ལྟ་རྟོག་བགྱིས། །རྒྱུན་དུ་ཡིད་ལ་འཇག་པ་དཀའ་ན་ཡང་། །ལྟ་ཚེ་དོན་དེ་མི་གོ་འགའ་ཡང་མེད། །ཐམས་ཅད་གནད་འགག་གཅིག་ཏུ་འབབ་པར་གོ །ད་རུང་རྣམ་མཁྱེན་བྱང་ཆུབ་མ་ཐོབ་བར། །ཐོས་པས་ངོམ་པ་མེད་དེ་ཐོས་པ་
བསག །ཐོས་པས་ཕྱི་ཡི་སྒྲོ་འདོགས་བཅད་པ་ཡི། །རྣམ་ཐར་འདི་ནི་ས་གཉིས་པའོ།། །།འགའ་ཞིག་གོ་བ་མེད་ན་ཡང་། །ཐོས་པའི་ཕན་ཡོན་བསམས་ནས་ཉན་པ་ཡོད་། །དེས་ཀྱང་ཕྱི་མ་ཐོས་པའི་ཕན་ཡོན་ཐོབ། །འོན་ཀྱང་ཐོས་པའི་དོན་དེ་མ་གོ་ན། །ཉམས་སུ་ལེན་རྒྱུའི་ལམ་དེ་མི་ཤེས་པས། །ཐོས་པའི་དོན་དེ་བསམ་གཞིག་གོ་བ་ལན། །དགོས་ཕྱིར་བདག་ལ་གོ་བ་སྐྱེས་པའི་ཚུལ། །བྲི་བར་མི་ལོངས་རྩ་ཚིག་ཟུར་ཙམ་ནི། །དལ་འབྱོར་མི་ལུས་རིན་ཆེན་ཐོབ་དཀའ་ཞིང་། །ནམ་འཆི་ཆ་མེད་འཆི་བའི་དུས་བབ་ན། །སུས་ཀྱང་བཟློག་ཏུ་མེད་པར་སྙིང་ནས་གོ །ཤི་ནས་གར་འགྲོ་ལས་དབང་གཙོ་ཆེ་ཞིང་། །ལས་ནི་དགེ་བས་མཐོ་རིས་བདེ་བ་ཐོབ། །མི་དགེའི་ལས་ཀྱིས་ངན་འགྲོའི་སྡུག་བསྔལ་དང་། །མི་གཡོའི་ལས་ཀྱིས་གོང་མའི་ལྷར་སྐྱེ་ཞིང་། །གང་དུ་སྐྱེས་ཀྱང་སྡུག་བསྔལ་འཁོར་ལོ་འཁོར། །དེ་ལས་སྐྱོབ་ནུས་བླ་མ་དཀོན་མཆོག་གསུམ། །དེ་ལ་བློ་གཏད་སྐྱབས་སུ་འགྲོ་དགོས་སོ། །ངན་སོང་སྤངས་ནས་མཐོ་རིས་བདེ་སྐྱིད་རྣམས། །ཐོབ་ཕྱིར་སྡིག་སྤངས་དགེ་ལ་འབད་པ་ནི། །འཇིག་རྟེན་ལྷ་མིའི་ཐེག་པ་ཡིན་པར་གོ །འཁོར་བའི་བདེ་བ་འབྲས་
ཆེན་དུག་འདྲེས་བཞིན། །འཕྲལ་དུ་བདེ་ཡང་ཕུགས་སུ་གནོད་པ་སྐྱེད། །ཚངས་དང་བརྒྱ་བྱིན་འཁོར་ལོས་སྒྱུར་རྒྱལ་ལའང་། །འདོད་པ་མེད་པར་རང་ཉིད་ཐར་འདོད་པ། །དམན་པ་ཉན་ཐོས་ཐེག་པ་ཡིན་པར་གོ །དེ་ཡང་གཞན་དྲིང་མི་འཇོག་རང་སྟོབས་ཀྱིས། །འབྲས་བུ་ཐོབ་འདོད་རང་རྒྱལ་ཐེག་པར་གོ །རང་ཉིད་ཁོ་ན་ཐར་བས་ཕན་མེད་དེ། །སེམས་ཅན་ཐམས་ཅད་ཕ་མར་མ་གྱུར་མེད། །དེ་དག་ཐམས་ཅད་བདེ་ལ་འགོད་པའི་ཕྱིར། །བྱང་ཆུབ་མཆོག་ཏུ་རང་གི་སེམས་བསྐྱེད་ནས། །ཕ་རོལ་ཕྱིན་པ་བཅུ་ལ་ཉམས་བླངས་པས། །གྲངས་མེད་གསུམ་ལ་མངོན་པར་སངས་རྒྱས་པ། །ཐེག་ཆེན་བྱང་ཆུབ་སེམས་དཔའི་ལམ་དུ་གོ །བྱང་ཆུབ་སེམས་དཔས་གཞན་དོན་བྱེད་པ་ལ། །འགྲོ་ལ་གང་ཕན་ཐམས་ཅད་བསྒྲུབས་དགོས་པས། །རིག་གནས་ཐམས་ཅད་གང་ཡང་བསླབ་དགོས་སོ། །ཆོས་ཀྱི་འབྱུང་གནས་སྟོན་པ་སངས་རྒྱས་ལ། །མུ་སྟེགས་པ་ཡིས་སྐུར་པ་མང་བཏབ་པས། །ཤཱཀ་ཐུབ་ཚད་མའི་སྐྱེས་བུར་བསྒྲུབ་ཕྱིར་དང་། །རྒྱུ་འབྲས་མེད་དང་ཕྱི་མ་མེད་པ་སོགས། །མུ་སྟེགས་ལྟ་ལོག་རིགས་པས་ཚར་བཅད་ནས། །ཡང་དག་མཆོག་གི་ལམ་ལ་
གཞུག་པའི་ཕྱིར། །ཚད་མའི་བསྟན་བཅོས་གསུངས་པ་ཡིན་པར་གོ །བོད་དུ་མུ་སྟེགས་དངོས་ནི་མེད་ན་ཡང་། །དེ་དང་ཆ་མཐུན་ལྟ་གྲུབ་ལོག་པ་རྣམས། །སུན་འབྱིན་ཡང་དག་ལམ་ལ་གཞུག་པའི་ཕྱིར། །ཚད་མ་བསླབ་པའི་དགོས་པ་ཡིན་པར་གོ །ཚད་མའི་ཕྱོགས་མཐུན་བསྟན་ཆོས་བསྡུས་སྒྲ་ནི། །རིགས་པའི་སྒོ་ཕྱེས་མཁས་རྣམས་ཐུགས་དགྱེས་ཤིང་། །གང་ཡང་སྤོབས་པོར་མི་ལུས་བསྡར་ཤ་གཅོད། །མ་རྟོགས་པ་དང་ལོག་རྟོག་ཕྱོགས་རྟོགས་འཇོམས། །འཁྲུལ་མེད་གོ་བ་རྣམ་དག་བསྐྱེད་པའི་ཕྱིར། །བསྡུས་ར་འདི་ནི་ཐམས་ཅད་གསལ་བ་ཡི། །མིག་དང་འདྲ་བར་བདག་གིས་གོ་བ་རྙེད། །འཁོར་བ་དང་ནི་མྱ་ངན་འདས་པའི་ལམ། །ཕྱི་སྣོད་འཇིག་རྟེན་ནང་བཅུད་སེམས་ཅན་དང་། །རྒྱུ་དང་འབྲས་བུ་རྣམ་མཁྱེན་བྱང་ཆུབ་བར། །སྡུག་བསྔལ་བདེན་པ་ཞེས་བྱ་ངན་སོང་གསུམ། །ཀུན་འབྱུང་བདེན་པ་ཉོན་མོངས་བརྒྱད་ཁྲིའི་ཚོགས། །འགོག་པའི་བདེན་པ་ཉོན་མོངས་སྤང་པའི་འབྲས། །ལམ་གྱི་བདེན་པ་རྣམ་མཁྱེན་ལ་སོགས་པ། །འཕགས་པ་བཞི་པོ་སོ་སོའི་ཡོན་ཏན་ཏེ། །དེ་དག་རྒྱས་པར་བཤད་པ་མངོན་པར་མཛོད། །འདི་ནི་འཇིག་རྟེན་མིག་དང་འདྲ་བར་གོ །
གཞི་ཡི་ཤེར་ཕྱིན་ཆོས་དབྱིངས་བྱང་ཆུབ་སེམས། །ལམ་གྱི་ཤེར་ཕྱིན་བསྒོམ་བྱའི་ཉམས་ལེན་ཆོས། །འབྲས་བུའི་ཤེར་ཕྱིན་ཐོབ་བྱ་རྣམ་ཀུན་མཁྱེན། །གཞི་ནི་ཀུན་ཁྱབ་བདེ་གཤེགས་སྙིང་པོ་ཅན། །ཀུན་ལ་གནས་པའི་ངེས་པ་རྙེད་བྱས་ནས། །བྱང་ཆུབ་སེམས་བསྐྱེད་ས་བཅུ་ལམ་ལྔ་བགྲོད། །ཀུན་ཏུ་འོད་ཀྱི་ས་ལ་བྱང་ཆུབ་ནས། །མཛད་པ་བཅུ་གཉིས་འགྲོ་བའི་དོན་བསྒྲུབས་ནི། །བསྟན་ཆོས་མངོན་རྟོགས་རྒྱན་གྱི་བརྗོད་བྱ་སྟེ། །དུས་གསུམ་རྒྱལ་བའི་གཤེགས་ལམ་ཡིན་པར་གོ །ཡོད་དང་མེད་དང་ཡོད་མེད་གཉིས་ཀ་དང་། །གཉིས་ཀ་མིན་པའི་མཐའ་དང་རྟག་ཆད་སོགས། །མཐའ་བཞི་ལ་སོགས་སྤངས་བ་དབུ་མའི་ལམ། །ལུང་དང་རིགས་པས་སྣོད་བཅུད་སྟོང་པ་ཉིད། །གཏན་ལ་འབེབས་ནས་དེ་དོན་ཉམས་ལེན་ཐབས། །མདོ་ལུགས་ལྟ་བའི་རྩེ་མོ་ཡིན་པར་གོ །སྡོམ་པ་མ་ཐོབ་པ་རྣམས་ཐོབ་པའི་ཐབས། །ཐོབ་པའི་སྡོམ་པ་མི་ཉམས་བསྲུང་བའི་ཐབས། །གལ་ཏེ་ཉམས་ན་ཕྱིར་ལ་འཆོས་པའི་ཐབས། །གསོ་སྦྱོང་དགག་དབྱེ་ལ་སོགས་གཞི་གསུམ་པོ། །འདུལ་བ་མདོ་རྩ་ནས་གསུངས་གཞི་བཅུ་བདུན། །ཤཱཀ་ཐུབ་བསྟན་པ་དངོས་གཞི་སྟོན་པའི་
ཚབ་། །བཅོམ་ལྡན་དངོས་སུ་བཞུགས་དང་མཚུངས་པར་གོ །དེ་དག་རྒྱུ་ཡི་ཐེག་པ་ཞེས་བྱ་སྟེ། །ལམ་ཐག་རིང་ཞིང་དཀའ་ཚེགས་ཆེ་བ་སྟེ། །ཐབས་མང་དཀའ་ཚེགས་ཆུང་ཞིང་ལམ་ཉེ་བ། །འབྲས་བུ་མྱུར་དུ་ཐོབ་པས་འབྲས་བུའི་ཆོས། །དེ་ལ་རྒྱུད་སྡེ་བཞི་རུ་གསུངས་པ་ལས། །སྨྱུང་གནས་ལ་སོགས་གཙང་སྦྲ་གཙོར་བྱེད་ཅིང་། །ཡི་དམ་མདུན་དུ་བསྒོམས་ནས་རྗེ་འབངས་ཚུལ། །བསྒྲུབས་པས་ཚེ་འདིར་ལས་ཚོགས་འགའ་རེ་དང་། །འབྲས་བུ་སྐྱེ་བ་དྲུག་ཅུས་སངས་རྒྱས་འགྲུབ། །དེ་ནི་ཀྲྀ་ཡའི་རྒྱུད་དུ་བདག་གིས་གོ །གཙང་སྦྲ་སྤྱོད་ཅིང་རང་ཉིད་དམ་ཚིག་སེམས། །ཡེ་ཤེས་སེམས་དཔའ་མདུན་དུ་བསྒོམས་པ་ཡིས། །རྗེ་བློན་ཚུལ་དུ་སྒྲུབ་པ་སྤྱོད་པའི་རྒྱུད། །འབྲས་བུ་སྐྱེ་བ་དྲུག་ཅུ་རེ་གཉིས་ཀྱིས། །གོ་འཕང་ཐོབ་པའི་ལམ་ཡང་བདག་གིས་གོ །ལུས་ངག་སྤྱོད་པ་གཙོ་བོར་མི་སྟོན་ཅིང་། །བདག་གི་རྣལ་འབྱོར་ཏིང་འཛིན་གཙོ་བོར་སྒོམ། །རང་ཉིད་དམ་ཚིག་པ་ལ་ཡེ་ཤེས་ལྷ། །བསྟིམ་ཞིང་ཕྱག་རྒྱ་བཞི་ཡིས་རྒྱས་བཏབ་བསྒྲུབ། །ཞག་རེ་བཞིན་དུ་ཡེ་ཤེས་གཤེགས་སོགས་བྱ། །དེ་ལྟར་སྐྱེ་བ་བཅུ་དྲུག་བསྒྲུབས་པ་ཡིས། །སངས་རྒྱས་འགྲུབ་པ་རྣལ་འབྱོར་རྒྱུད་དུ་གོ །རང་
གི་ཕུང་པོ་ཁམས་དང་སྐྱེ་མཆེད་རྣམས། །རིགས་ལྔ་ཡུམ་ལྔ་སེམས་དཔའ་ཡབ་ཡུམ་སོགས། །ཡི་དམ་ལྷ་ཡི་ངོ་བོར་ངོ་སྤྲད་དེ། །ཡིན་ལ་ཡིན་པར་ཤེས་པའི་བསྐྱེད་རིམ་ནི། །སྦྱང་གཞི་དུག་ལྔ་ཕུང་ལྔ་ལ་སོགས་པ། །སྦྱོང་བྱེད་རིགས་ལྔ་དངོས་སུ་ངོ་ཤེས་པས། །བསྐྱེད་རྫོགས་ཟུང་འཇུག་ངང་ནས་བསྙེན་སྒྲུབ་ནི། །ཡན་ལག་བཞིའམ་དྲུག་གིས་སྒྲུབས་པ་ན། །འདིའམ་བར་དོར་སྐྱེ་བ་རྗེས་ནས་ནི། །སངས་རྒྱས་འགྲུབ་པ་མ་ཧཱ་ཡོ་ག་ཞེས། །ཕ་རྒྱུད་དགོངས་པ་ཡིན་པར་བདག་གིས་གོ །རྩ་དང་རླུང་དང་ཐིག་ལེ་ཐམས་ཅད་ནི། །ཡི་དམ་ལྷ་ཡི་ངོ་བོར་ཤེས་བྱས་ནས། །གཏུམ་མོ་འབར་འཛག་རྩ་རླུང་བསྒོམས་པ་ཡིས། །ཚེ་གཅིག་རྡོ་རྗེ་འཆང་གི་སྐུ་འགྲུབ་པ། །ཨ་ནུ་ཡོ་ག་ཞེས་བྱ་མ་རྒྱུད་ཀྱི། །དགོངས་པ་ཡིན་པས་ཟབ་པའི་ཐབས་ལམ་དུ། །གོ་ཞིང་རང་གི་སེམས་ཉིད་འདི་ཉིད་ནི། །ཀུན་བཟང་དང་པོའི་སངས་རྒྱས་ཉིད་ཡིན་པར། །ངོ་སྤྱད་མ་བཅོས་རང་སར་མཉམ་བཞག་པས། །ཚེ་འདིའམ་ནི་བར་དོར་ཆོས་སྐུ་ཐོབ། །ཨ་ཏི་ཡོ་ག་གཉིས་མེད་རྒྱུད་དུ་གོ །དེ་ཡང་ཙཀྵས་སཱུརྱའི་དཀྱིལ་འཁོར་ལ། །ལེགས་པར་བལྟ་ཞིང་ཐིག་ལེ་ཐིག་ཕྲན་སོགས། །
ཉམས་སུ་བླང་བས་སྣང་བཞི་མཐར་ཕྱིན་ནས། །ཟླ་དྲུག་འོད་ཕུང་འབར་བ་རྫོགས་ཆེན་གྱི། །ཟབ་ཁྱད་ཡིན་པ་དེ་ཡང་བདག་གིས་གོ །གལ་ཏེ་བསྒོམས་པས་ཚེ་འདིར་མ་གྲོལ་ན། །གསེབ་ལམ་འཕོ་བས་ཞིང་ཁམས་བགྲོད་པ་དང་། །གལ་ཏེ་འཕོ་བ་ཐེབས་པར་མ་གྱུར་ན། །བར་དོའི་ཆོས་ཀྱི་འཁྲུལ་པ་གཅོད་པ་དང་། །ཉིན་མོ་འཁྲུལ་པའི་དབང་དུ་མ་ཤོར་ཡང་། །གཉིད་ཀྱིས་དགེ་སྦྱོར་བར་ཆད་མི་འོང་ཐབས། །འོད་གསལ་བཟུང་དང་རྨི་ལམ་སྦྱོང་བ་སོགས། །ཟབ་ཆོས་ཀུན་གྱི་དགོངས་པར་བདག་གིས་གོ །ཕྱི་ནང་སྣོད་བཅུད་འཁོར་འདས་ཐམས་ཅད་ནི། །གདོད་ནས་རྣམ་དག་འགྱུར་མེད་ཆོས་ཀྱི་དབྱིངས། །དེ་ཡི་ངང་ལ་འགག་མེད་རྟེན་འབྲེལ་རྩལ། །རྒྱུ་འབྲས་བསླུ་མེད་མི་འགག་ཟུང་འཇུག་པ། །ཀུན་རྫོབ་བདེན་པ་དོན་དམ་བདེན་པ་གཉིས། །དབྱེར་མེད་ཟུང་དུ་འཇུག་པ་བདག་གིས་གོ །སེམས་ཉིད་ལྷན་ཅིག་སྐྱེས་པ་ཆོས་ཀྱི་སྐུ། །སྣང་བ་ལྷན་ཅིག་སྐྱེས་པ་ཆོས་སྐུའི་འོད། །ངོ་བོ་སྟོང་པ་འགྱུར་མེད་ཆོས་ཀྱི་སྐུ། །རང་བཞིན་གསལ་བ་ལྷུན་གྲུབ་ལོངས་སྤྱོད་རྫོགས། །འགག་མེད་ཅིར་ཡང་སྣང་བ་སྤྲུལ་པའི་སྐུ། །མདོ་སྔགས་དགོངས་པའི་ཞེ་ཕུགས་བདག་གིས་གོ །
རང་ལུས་གདོད་ནས་ཡི་དམ་ལྷ་ཡི་སྐུ། །རྩ་ཐིག་རླུང་གསུམ་དཔའ་བོ་ཌཱཀིའི་ཚོགས། །བླ་མེད་སྔགས་ཀྱི་ཁྱད་ཆོས་བདག་གིས་གོ །ཡེ་ཤེས་བསྒྱུར་བྱ་སེམས་ཉིད་གདོད་ནས་དག །དབྱིངས་རིག་རྣམ་དག་རྡོ་རྗེའི་ལུ་གུ་རྒྱུད། །རྫོགས་པ་ཆེན་པོའི་ཁྱད་ཆོས་བདག་གིས་གོ །དེ་ལྟར་ཐོབ་པའི་དོན་ལ་རྩེ་གཅིག་ཏུ། །སོ་སོར་རྟོག་པའི་ཤེས་རབ་ཀྱིས་དཔྱད་པས། །ཆོས་རྣམས་མ་འདྲེས་ཤ་མོང་སུལ་བཞིན་དུ། །ཧ་ལམ་པ་ཞིག་གོ་འདི་ཐོས་པའི་དོན། །ཐོས་དོན་བསམ་པའི་སརྒ་གསུམ་པའོ།། །།དེ་ལྟར་གོ་ཡང་ཉམས་སུ་མ་བླངས་ན། །ནད་པ་སྨན་རྒྱལ་ཐོགས་ནས་ཤི་བའམ། །རྒྱ་མཚོའི་འགྲམ་དུ་སྐོམ་དྲིལ་ཤི་དང་མཚུངས། །ཐོས་དོན་སྒོམ་པས་ལག་ཏུ་བླངས་ཚུལ་ནི། །ལྷ་མིའི་བདེ་བ་སྙིང་པོ་མེད་རིག་པས། །མངོན་མཐོའི་ཆེད་དུ་བདག་གིས་ཆོས་མ་བྱས། །རང་དོན་ཁོ་ནས་ཐེག་པ་དམན་མཐོང་བས། །ཉན་རང་ཐོབ་ཕྱིར་བདག་གིས་ཆོས་མ་བྱས། །སྐྱབས་གནས་དཀོན་མཆོག་གསུམ་ལ་བློ་བཀལ་ནས། །བསམ་པ་བྱང་ཆུབ་མཆོག་ཏུ་སེམས་བསྐྱེད་ནས། །ལག་ལེན་ཕར་ཕྱིན་དྲུག་ལ་ཅི་ནུས་འབད། །དེ་ཡང་དགེ་བཤེས་སྤྱི་ཡི་ལུགས་ལ་
ནི། །ཚེ་སྟོད་ཐོས་བསམ་ཁོ་ནས་མཐའ་རྒྱ་གཅོད། །ཚེ་སྐེད་རྩེ་གཅིག་སྒྲུབ་ཚེ་རང་ཚུགས་བཟུང་། །ཚེ་མཇུག་གཞན་ཕན་འགྲོ་དོན་མཛད་པ་ཡིན། །འོན་ཀྱང་མཉམ་མེད་དྭགས་པོ་ལྷ་རྗེའི་ལུགས། །ཐོས་བསམ་སྒོམ་གསུམ་སྦྲག་མར་བྱེད་པ་ནི། །མ་ནོར་བ་ཡི་ཆོས་ནི་ཡིན་གསུངས་ཤིང་། །ཕ་རྒན་ཡང་དགོན་པ་ཡི་ཞལ་ནས་ཀྱང་། །རྟ་མཆོག་བཟང་པོས་ཆས་ནི་ཟ་བ་ལྟར། །བཅའ་ལྡད་མིད་གསུམ་དུས་གཅིག་བྱ་གསུངས་ལྟར། །བདག་གིས་བཀའ་བརྒྱུད་དེ་ཡི་ལུགས་སུ་བྱས། །བདག་དང་སེམས་ཅན་ཀུན་གྱིས་བདེ་བ་འདོད། །བདེ་བའི་རྒྱུ་ནི་ལོངས་སྤྱོད་དག་ལས་འབྱུང་། །ལོངས་སྤྱོད་འབྱུང་བའི་རྒྱུ་ནི་སྦྱིན་པ་སྟེ། །དེ་ཕྱིར་སྦྱིན་པ་ལ་ཡང་འབྲེལ་པ་བཞག །དེ་ལ་ཟང་ཟིང་མི་འཇིགས་ཆོས་དང་བྱམས། །ཟང་ཟིང་སྦྱིན་པ་ཁྱིམ་པ་ལ་གསུང་གི། །རབ་ཏུ་བྱུང་ལ་སྟོན་པས་ཆེར་མ་གསུངས། །རབ་བྱུང་ལོངས་སྤྱོད་གང་ཡོད་དཀོར་ཡིན་པས། །དཀོར་ནི་རབ་བྱུང་མིན་པས་མི་འཇུ་བས། །མི་འཇུ་བ་ལ་སྦྱིན་པར་བྱས་ན་ནི། །འབྲས་ཆེན་དུག་འདྲེས་བཀྲེས་ལ་བྱིན་པ་ལྟར། །འཕྲལ་དུ་ཕན་ཕན་འདྲ་ཡང་ཕུགས་སུ་གནོད། །དེ་ཕྱིར་རྒྱ་གར་ཡུལ་དང་བོད་དུ་ཡང་། །སྔོན་
བྱོན་བཀའ་གདམས་པ་ཡི་བཤེས་གཉེན་རྣམས། །འབྲས་ཚོད་ཧུབ་ལྷག་ལ་སོགས་དགེ་འདུན་གྱི། །ལྷག་མ་ཐམས་ཅད་སྤྲང་པོར་མི་སྦྱིན་པར། །བྱ་ཁྱིས་འཐུང་དོགས་དོང་དུ་བླུགས་ནས་སྦ། །དེ་འདྲའི་ལོ་རྒྱུས་ཐོས་ཕྱིར་སྤྲང་ལོང་སོགས། །ཞོན་རྒྱུའི་རྟ་བྱིན་བཀལ་པའི་ཁལ་མ་བྱིན། །ཟ་རྒྱུའི་མི་ཆོག་ཁུར་རྒྱུའི་ཆས་ཀ་བྱིན། །གྱོན་རྒྱུའི་གོས་དང་བཏིང་རྒྱུའི་གདན་བྱིན་སོགས། །སྐད་ངན་ལྷང་ལྷང་འབོད་པ་ཐོས་ན་ཡང་། །མ་ཐོས་པ་ལྟར་བྱེད་པ་དེ་ཡི་དོན། །འོན་ཀྱང་ཉམ་ཐག་བཀྲེས་སྐོམ་སྐྱབས་མེད་ལ། །ནན་གྱིས་བསླངས་ལ་ཅུང་ཟད་མ་བྱིན་པར། །ཡིད་ཆད་བཅུག་པ་བྱང་སེམས་ལྟུང་བར་གསུངས། །དེ་ཕྱིར་ཉམ་ཐག་རྣམས་ལ་གང་འོས་ཀྱི། །ཟས་སྐོམ་ལག་ཡང་ཆུག་ཅེས་འཁོར་ལ་བགོས་། །བླ་མ་སངས་རྒྱས་བྱང་སེམས་ཡི་དམ་ལྷ། །མཁའ་འགྲོ་ཆོས་སྐྱོང་ལ་སོགས་མཆོད་པ་དང་། །དགེ་འདུན་རྣམས་ལ་བསྙེན་བཀུར་བྱེད་པ་ཡང་། །ཞིང་སའི་མཆོག་དམན་ཡོད་པ་མ་གཏོགས་པ། །དོན་ལ་སྦྱིན་པ་ཡིན་པར་གཅིག་པའི་ཕྱིར། །བླ་མར་འབུལ་དང་དགོན་སྡེར་བཏང་བ་ལ། །རང་ལ་གང་ཡོད་འཕང་སེམས་མེད་པར་བྱས། །དེ་ཡང་ཕྱོགས་
རིས་བྱེད་ནས་བཏང་བ་ལ། །དེ་ནི་སྦྱིན་པ་རྣམ་དག་མིན་གསུང་ཕྱིར། །གྲུབ་མཐའ་ཕྱོགས་མེད་ཀུན་ལ་འབྲེལ་པ་བཞག །ཐ་ན་སེར་གོས་གྱོན་པ་འགའ་ཟུང་ཙམ། །ཚུར་ལ་བྱོན་ཡང་གང་འོས་བཀུར་སྟི་གཟབ། །སྔར་ཞིག་གཏོར་མ་བརྒྱ་རྩ་ལོ་གསུམ་དུ། །ཆག་མེད་བྱས་ཤིང་དེ་རང་མ་གཅོག་ཀྱང་། །ཉ་མཚམས་བརྒྱ་དང་ཉེར་གསུམ་ཆག་མེད་དང་། །རྒྱུན་དུ་བསྡུས་པོ་སུ་རུ་ཆག་མེད་བྱས། །རྒྱུན་དུ་གསང་སྔགས་ནང་གཏོར་མཆོད་གཏོར་དང་། །ཚེས་བཅུ་ཉ་མཚམས་བརྒྱད་དང་ཉི་ཤུ་དགུ། །བཅུ་དགུ་ཉི་ཤུ་བརྒྱད་དང་ཉི་ཤུ་གསུམ། །དུས་ཀྱི་མཆོད་པ་རྣམས་ཀྱང་མ་ཆག་པ། །ཤ་ཆང་ལ་སོགས་འབྱོར་པ་ནམ་བྱུང་དུས། །ཚོགས་ཀྱི་འཁོར་ལོ་རྒྱས་པ་ཡང་ཡང་བྱས། །ཐ་ན་ཇ་མར་ཤ་ཐུད་ལ་སོགས་དང་། །བཟའ་བར་རུང་བའི་ལོངས་སྤྱོད་གང་བྱུང་བ། །རྩ་བ་གསུམ་ལ་གཏོར་མ་བསྔོ་བའམ། །སྲོང་བཙན་སྒམ་པོའི་ཞལ་གདམས་ཇི་བཞིན་དུ། །ཐུགས་རྗེ་ཆེན་པོས་མགྲོན་རིགས་བཞི་ལ་བསྔོས། །བདག་གཞན་ཚོགས་གཉིས་རྫོགས་པའི་བསྔོ་སྦྱངས་བགྱིད། །གསང་བའི་སྦྱིན་པ་སངས་རྒྱས་སྐྱེས་རབས་ལས། །སྟག་མོ་ལུས་སྦྱིན་ལ་སོགས་གསུངས་པའི་དོན། །ས་
ཐོབ་པ་ཡི་གང་ཟག་མ་གཏོགས་པ། །དངོས་སུ་དེ་ལྟར་ལུས་སྦྱིན་མི་རུང་གསུངས། །ཡིད་ཀྱིས་སྦྱིན་ན་བསོད་ནམས་མཉམ་གསུངས་ཕྱིར། །རེས་འགའ་སྤྲོས་བཅས་ལུས་སྦྱིན་རྒྱས་པ་བཏང་། །ཕལ་ཆེར་ཀུ་ས་ལུ་ཡི་ཚོགས་གསོག་དང་། །དཀར་འགྱེད་དམར་འགྱེད་དམིགས་ཐུན་རྒྱུན་དུ་བྱས། །འདི་དག་ཟང་ཟིང་སྦྱིན་པར་འབྲེལ་བཞག་ཙམ། །ཟང་ཟིང་སྦྱིན་པ་རབ་ཏུ་བྱུང་བ་ལ། །ཧ་ཅང་བྱ་བར་མ་གསུངས་དེ་ཡི་ཕྱིར། །དང་པོའི་ས་ལ་གནས་པའི་སེམས་དཔའ་རྣམས། །ཟང་ཟིང་སྦྱིན་པ་རླབས་ཆེན་མཛད་པའི་ཕྱིར། །འཁོར་ལོས་སྒྱུར་བའི་རྒྱལ་པོར་སྐྱེ་བར་གསུངས། །དེ་ནས་མི་འཇིགས་པ་ཡི་སྦྱིན་པ་ནི། །རང་ལ་སྟོབས་འབྱོར་མེད་ཅིང་བྱ་ཐབས་ཟད། །འོན་ཀྱང་ཆོས་རྣམས་འདུན་པ་གཙོ་ཆེའི་ཕྱིར། །གཟའ་ནད་ཀླུ་ནད་བརྒྱལ་ནད་སྨྱོ་འབོག་དང་། །ནོར་ནད་མི་ནད་གདོན་ཤས་ཆེ་བ་དང་། །ཐན་པ་སད་སེར་བཙའ་དང་འབུ་སྲིན་སོགས། །སུ་ཞིག་བཙན་ཡང་སྐྱོབ་པར་མི་ནུས་པ། །འདི་དག་རང་ལ་སྐྱབས་གནས་ཞུ་བའི་ཚེ། །ཟང་ཟིང་ཡོན་དང་ལྷ་རྟེན་རྩོད་པ་དང་། །ཡོན་ལ་འདི་དགོས་ཟེར་ནས་སྔ་གཏམ་དང་། །མ་བྱིན་བརྡ་བསྙགས་ཁ་མཆུ་འདྲ་
བའམ། །ཡང་ན་ཁྲོས་ནས་ཕྱིན་ཆད་མི་འགྲོ་སོགས། །དེ་འདྲ་བྱས་ན་འཇིག་རྟེན་ཐ་མལ་པ། །བྱིན་པའི་ཡོན་དེ་གྲིབ་ཟས་དཀོན་མཆོག་གླུད། །ཡི་དྭགས་རྣམས་ལ་མི་འཁུའི་དམ་ཚིག་སྟེ། །ཁྲོ་གཏུམ་གདོན་ལ་རྡུང་བཏགས་དམ་ཚིག་ཉམས། །འདྲེ་མཆུ་བཅིངས་དང་དམིགས་ངན་དམྱལ་བའི་རྒྱུ། །ཡིན་ཕྱིར་དེ་འདྲའི་བསམ་པ་བདག་གིས་སྤངས། །ཀྱེ་མ་ཚེ་སྔོན་ལས་ངན་རྒྱུ་བྱས་ཏེ། །འཕྲལ་རྐྱེན་ལྷ་འདྲེ་གདུག་པས་གེགས་བྱས་ཏེ། །འབྲས་བུ་ནད་གདོན་སྡུག་བསྔལ་མི་བཟོད་པར། །འཇིག་རྟེན་ཕུང་ཕྱིར་བཙའ་སད་སེར་བ་འབུ། །འདི་འདྲ་སྐྱབས་གཞན་རེ་ས་མ་རྙེད་པར། །ཕན་པར་རེ་ནས་བདག་ལ་སྐྱབས་ཞུ་བ། །གདོན་དང་ནད་པ་ལྷ་འདྲེ་ཐམས་ཅད་ནི། །ཚེ་རབས་དུ་མའི་ཕ་མ་དྲིན་ཆེན་ཡིན། །ནད་པ་ནད་ཀྱིས་ཉེ་བས་སྙིང་རེ་རྗེ། །གདོན་བགེགས་སྡིག་དང་འདྲེས་པས་སྙིང་རེ་རྗེ། །ལོ་ཉེས་མུ་གེ་དབུལ་ཕོངས་སྙིང་རེ་རྗེ། །ལྷ་སྲིན་ལས་ངན་བསགས་སོ་སྙིང་རེ་རྗེ། །གདོན་དང་ལྷ་འདྲེ་སྡིག་དང་ཕྲལ་བ་དང་། །ནད་པ་དབུལ་ཕོངས་ནད་དང་མུ་གེ་ལས། །ཐར་པའི་ཕྱིར་དུ་བསམས་ནས་སེམས་བསྐྱེད་དེས། །གདོན་བགེགས་འདུལ་དང་ཆར་འབེབས་སེར་བ་
ཟློག །དེ་ལ་གཏང་རག་བཀུར་སྟི་བྱུང་བ་ཡང་། །རྒྱུ་མ་སོང་བར་རྐྱེན་མི་བཟློག་གསུངས་ལྟར། །ཁོང་རང་རྣམས་ཀྱི་རིམ་གྲོར་འགྱུར་བ་དང་། །ཡོན་དང་ལྷ་རྟེན་མེད་པར་གདོན་དྲག་པོ། །ཕྱེ་བཅིང་གཟའ་ཚོགས་རྡུང་བཏགས་བྱས་པ་ན། །འཁུ་ལྡོག་འབྱུང་བར་གསུངས་ཕྱིར་ཡོན་ཡང་ལེན། །དེ་ཡང་ཚོགས་དང་བསྐང་གསོལ་ལ་སོགས་པ། །ཡི་དམ་ལྷ་དང་ཆོས་སྐྱོང་མཆོད་པར་བྱས། །གལ་ཏེ་གཏང་རག་ཅུང་ཟད་མ་བྱུང་ཞིང་། །ཕན་ཐོགས་ཟེར་བའི་ཁ་བཟང་ཙམ་མེད་ཀྱང་། །རང་འདི་མི་འཇིགས་སྐྱབས་ཀྱི་སྦྱིན་པར་བསྒོམས། །འཁང་དང་བརྡ་བསྙག་ཁྲོ་དང་ཞེ་བཞག་སྤངས། །བདག་དང་ཡོན་བདག་ལྷ་འདྲེ་གདོན་ལ་སོགས། །བླ་མེད་བྱང་ཆུབ་ཐོབ་ཕྱིར་བསྔོ་སྨོན་བྱས། །གཞན་ཡང་དངོས་སུ་དཔོན་རིགས་ལ་སོགས་ཀྱིས། །ཆད་པ་གཅོད་དང་སྐེ་མིག་ལ་སོགས་པ། །རང་གིས་བླ་ཐབས་ཕན་ཐབས་འདུག་ན་ནི། །གང་ཕན་བྱས་ཤིང་ཕན་ཐབས་མི་འདུག་ན། །མ་བྱས་པ་ལ་ལྟུང་བ་མེད་པར་གསུངས། །དེ་ལྟར་མི་འཇིགས་སྐྱབས་ཀྱི་སྦྱིན་པ་ལ། །འབྲེལ་པ་ཅུང་ཟད་བཞག་པའི་རྣམ་ཐར་ཡིན། །རབ་ཏུ་བྱུང་ལ་ཐུབ་པས་གསུངས་པ་ཡི། །ཟང་ཟིང་
སྦྱིན་ལས་འབུམ་འགྱུར་ཁྱད་འཕགས་པ། །ཆོས་ཀྱི་སྦྱིན་པའི་ཕན་ཡོན་མཐའ་ཡས་གསུངས། །དེ་ལ་ཡང་ནི་བསམ་པ་གཙོ་ཆེ་ཞིང་། །རྣམ་པར་དག་དང་མ་དག་ཡོད་པས་ན། །རང་གིས་མ་ཐོབ་གཞན་ལ་དབང་ལུང་བྱེད། །འདི་ནི་སེམས་ཅན་བསླུ་བའི་སྦྱོར་བ་ཉིད། །མི་ཆོས་བླ་མའི་རྫུན་ཏེ་སྡོམ་པ་འཆོར། །ཡི་དམ་ལྷ་གཅིག་བསྙེན་སྒྲུབ་མ་ཐེམ་པར། །དབང་བསྐུར་གསང་སྔགས་སྦོམ་པོའི་ལྟུང་བར་འགྱུར། །རང་ཉིད་ཉམས་ལེན་གདེང་དང་མི་ལྡན་པར། །ཉམས་ཁྲིད་འཆད་ཅིང་རང་ཉིད་ཉམས་རྟོགས་ནི། །མཐོན་པོ་ཡོད་སྐད་མི་ཆོས་བླ་མའི་རྫུན། །རང་ཉིད་རྟོགས་པ་ཧ་ཅང་མི་མཐོ་ཡང་། །བྱང་ཆུབ་སྒྲུབ་པའམ་ལམ་དེ་སྐྱོན་མེད་པར། །འཆད་མི་ཤེས་བཞིན་གཞན་ལ་ཆོས་འཆད་པ། །བདུད་ཀྱི་ལས་ཏེ་ལོང་བས་ལོང་བ་ཁྲིད། །འདི་དག་རྣམས་ལ་ཕན་ཡོན་ལྟ་ཅི་སྨོས། །བླ་མ་གཏི་མུག་ཅན་གྱིས་ཆོས་བཤད་ན། །ཁམས་གསུམ་སེམས་ཅན་བསད་དང་མཉམ་པར་གསུངས། །དེ་ཕྱིར་འདི་འདྲ་བདག་གིས་མ་བྱས་སོ། །ཉམས་རྟོགས་ལྡན་ཞིང་བསྙེན་སྒྲུབ་ཐེམ་པ་དང་། །ཅི་བཞིན་འཆད་ཤེས་དབང་ལུང་རྒྱུན་ཡོད་ཀྱང་། །ཟས་ནོར་ཨེ་རྙེད་བསམས་པས་འགྲོ་དོན་ནི། །བྱས་
ཀྱང་རྣམ་ཐར་མ་དག་ཆོས་བཙོང་བའི། །རིན་དེ་ཟོས་པའི་ལས་ངན་ངན་སོང་རྒྱུ། །དེ་ཕྱིར་ཟས་ནོར་ཨེ་རྙེད་ངས་མ་བསམས། །མ་བསམ་ན་ཡང་མཎྜལ་འབུལ་བ་དང་། །གཏང་རག་ལོངས་སྤྱོད་རྒྱ་ཆེར་བྱུང་དུས་ཀྱང་། །ཆོས་ལ་ཆེ་བ་མེད་ན་ཆོས་ཤི་བའི། །རོ་དང་འདྲ་ཕྱིར་ཆེ་བ་དགོས་གསུངས་དང་། །ཤོ་ལོ་ཀ་གཅིག་འཆད་པའི་ཡོན་དུ་ནི། །སྟོང་གསུམ་གསེར་གྱིས་བཀང་ཡང་དྲིན་མི་འཁོར། །དུས་གསུམ་སངས་རྒྱས་ཐམས་ཅད་མཆོད་པ་བས། །རྡོ་རྗེ་སློབ་དཔོན་བ་སྤུའི་ཁུང་གཅིག་ལ། །ཏིལ་མར་བྱུག་པ་བསོད་ནམས་ཆེ་གསུངས་ཕྱིར། །ཁོ་རང་རྣམས་ཀྱི་བསོད་ནམས་ཚོགས་རྫོགས་ཕྱིར། །རང་གིས་བསྔོ་བ་སྨོན་ལམ་རྒྱས་བཏབ་བོ། །གལ་ཏེ་དབང་ཡོན་ཆོས་བཤད་མཎྜལ་སོགས། །ཡོད་ཀྱང་མི་འབུལ་ཁ་རྐྱང་ལབ་ན་ཡང་། །བརྡ་བསྙགས་ཟུར་རྗེས་ཁོང་ཁྲོ་ཞེ་བཞག་སྤངས། །ཆོས་ཀྱི་སྦྱིན་པའི་ཕན་ཡོན་ཡིད་ལ་བཀོད། །འཁོར་གསུམ་ཡོངས་དག་བསྔོ་བའི་རྒྱ་ཡིས་གདབ། །ཁྲོམ་དབང་ཡིན་ཀྱང་ཉུང་དབང་དབོག་པ་དང་་། །རེས་འགའ་ཁྲོམ་ཆོས་ལ་ལ་དཀའ་དོགས་པ། །འབུལ་བ་ཆེ་ཆུང་ཁྱད་པར་མ་ཡིན་ཏེ། །གསང་སྔགས་བཀའ་རྒྱ་དོགས་པ་ཡོད་པའི་
དབང་། །ཀུན་ལ་བསྒྲགས་ན་ཐུགས་ཀྱི་དམ་ཚིག་གིས། །ཚེ་འདིར་ཅི་བསམ་མི་འགྲུབ་བཀྲ་མི་ཤིས། །ཉམས་རྟོགས་མི་འཕེལ་ཕྱི་མ་མནར་མེད་རྒྱུ། །དེ་ལས་ཐར་ནས་སྨོན་པ་ལྔ་བརྒྱར་སྐྱེ། །དེ་སོགས་ཉེས་ལྟུང་དག་ལ་སྐྲག་པའི་ཕྱིར། །ལ་ལ་བཀའ་རྒྱ་དོགས་པར་བྱེད་པ་ཡིན། །མཎྜལ་བཟང་ན་ཟབ་དགུ་ཡོད་སྤྲུགས་ནས། །སྣོད་དང་ལྡན་དང་མི་ལྡན་མི་བརྟགས་ནི། །ཆོས་དང་ཆོས་མཐུན་དབང་ལུང་མི་སྦྱིན་ན། །ཆོས་བདག་སྲུང་མས་བཀའ་ཆད་འབྱུང་བ་དང་། །ཡེ་ཤེས་སྤྱན་ལྡན་རྣམས་ཀྱིས་ཐུགས་ཁྲེལ་དོགས། །དེ་ཕྱིར་འབུལ་བ་ཆེ་ཞིང་ངོ་ཆེ་ཡང་། །དྲག་སྔགས་དང་ནི་ཟབ་ལམ་ལ་སོགས་པ། །ཧ་ཀྱང་བཀའ་རྒྱ་ཆེ་བ་སྦ་བ་དང་། །ཉམས་སུ་ལེན་ཅིང་སྣོད་དང་ལྡན་པ་ལ། །དར་ཁ་གང་ཙམ་མེད་ཀྱང་ཅི་ནུས་སྟོན། །ཁྱད་པར་སྔགས་རྒྱུད་ལ་སོགས་སེར་མོ་བ། །ཕ་ཆོས་ཡིན་ཟེར་བཀའ་ཆད་ལུང་སྡུམ་འདོན། །དབང་ལུང་ཞུ་ཕྱིར་ཉིན་ལམ་འགྲོ་མི་ནུས། །རབ་ཏུ་བྱུང་བ་ཚད་ལྡན་འགའ་ཞིག་ཀྱང་། །དབང་ལུང་མཐོ་ལ་མི་ཐོབ་དམར་མི་ཞུ། །ཆོ་ག་བསྐང་གསོ་ཆོས་སྤྱོད་ལ་སོགས་པ། །དབང་ལུང་མེད་ཀྱང་རང་ལུགས་ཡིན་ཞེས་འདོན། །དེ་དག་གསང་སྔགས་
ལོག་པར་བསྒྲུབས་པ་སྟེ། །མནར་མེད་དམྱལ་བའི་ས་བོན་མ་འཆུག་པ། །ཆོས་ལ་བརྟེན་ནས་སྡིག་པ་བསོགས་རྣམས་ལ། །ཕན་སེམས་ཆེན་པོས་དཀའ་ཚེགས་ངལ་དུབ་ལ། །མ་བལྟས་ཕྱོགས་ཀུན་ཅི་ནུས་ཉུག་ནས་ཀྱང་། །དབང་ལུང་མན་ངག་སྒོ་སྐྱེལ་བྱེད་པ་འདི། །བདག་གིས་ཆོས་ཀྱི་སྦྱིན་པ་ཆེན་པོར་སེམས། །སྐྱེ་བོ་མི་ནག་རྒན་རྒོན་ཐམས་ཅད་ལ། །སྐྱབས་སྡོམ་བསྙེན་གནས་སྨྱུང་གནས་སྡོམ་པ་དང་། །ཐུགས་རྗེ་ཆེན་པོའི་དབང་དང་སྒོམ་ལུང་དང་། །སྨན་བླའི་དབང་དང་དེ་ཡི་མཚན་ནས་བརྗོད། །དམིགས་པ་སྤྱོད་ཅིང་ཡིག་དྲུག་ཁས་ལེན་དང་། །ཉམས་ཁྲིད་སྐབས་སུ་གང་བབས་འཆད་པ་དང་། །ན་རཀ་དོང་སྤྲུགས་གསང་འདུས་སངས་རྒྱས་སྟོང་། །སྒྲུབ་ཆེན་དབང་ཁྲིད་སྦྲག་མར་བྱེད་པ་སོགས། །བདག་གིས་བསམ་པའི་བཟོ་རྒྱ་མི་ཞེན་པས། །རྣམ་དག་ཆོས་ཀྱི་སྦྱིན་པ་ཡིན་སྙམ་བགྱིད། །དེ་ནི་བྱམས་པའི་སྦྱིན་པར་འབྲེལ་བཞག་ཚུལ། །དེ་ལ་གཡོ་སྒྱུ་དང་ནི་བྱམས་པ་དངོས། །རང་ལ་འཁོར་ཞིང་རང་གིས་ཐུབ་ཚོད་པ། །རང་ལ་སྐྲག་ཅིང་སྐྱིད་སྡུག་རང་ལ་རེ། །དེ་དག་རྣམས་ལ་བྱམས་པར་མི་བྱེད་ཅིང་། །སྡང་དུ་སྟོན་ཅིང་སྡུག་བསྔལ་
འདོན་བྱེད་ཅིང་། །སེམས་ཅན་ཀུན་ལ་བྱམས་པ་བསྒོམ་པར་གསུངས། །དེ་ནི་གཡོ་སྒྱུ་བྱམས་པའི་གོ་མི་ཆོད། །བུ་དང་ཆུང་མ་གཉེན་འདུན་ལ་བྱམས་ཤིང་། །གཉེན་བཤེས་མཛའ་གྲོགས་མིན་ལ་སྙིང་རིང་ཞིང་། །མ་བྱམས་སྡང་བ་བྱམས་པ་གོ་ལོག་སྟེ། །དེ་འདྲའི་བྱམས་པ་སྤྱང་ཁུ་ལ་ཡང་ཡོད། །དེ་ཕྱིར་གཡོ་སྒྱུ་གོ་ལོག་བྱམས་པ་སྤོངས། །ལ་ལས་བྱམས་དང་སྙིང་རྗེ་ཡོད་ཟེར་ཞིང་། །ཕ་དང་མ་ལ་མི་བྱམས་སྡང་བ་ནི། །བྱམས་དང་སྙིང་རྗེ་ཕྱོགས་འགོ་མ་གོའི་རྟགས། །སྙིང་རྗེ་དང་པོ་ཉིད་ནས་སྐྱེ་དཀའ་བས། །བྱམས་པོ་བསྒོམས་པས་སྙིང་རྗེ་སྐྱེ་སླ་ཞིང་། །བྱམས་པ་སྒོམ་པའི་རྟེན་དང་རྩ་བ་ནི། །རང་གི་ལུས་འདི་སྐྱེད་པའི་མ་ཡིན་པས། །འདི་ལ་བྱམས་པ་ཚད་མེད་བསྒོམས་བྱས་ལ། །དེ་ལ་གོམས་ནས་སེམས་ཅན་ཐམས་ཅད་ཀུན། །ཚེ་རབས་མང་པོའི་མ་རྒན་ཡིན་གསུངས་པས། །སེམས་ཅན་ཀུན་ལ་བྱམས་པ་བསྒོམ་པར་བྱ། །ཕ་དང་མ་ལ་བཀུར་སྟི་བྱས་པ་དང་། །ས་བཅུའི་སེམས་དཔར་བཀུར་སྟི་བྱས་པ་དང་། །ཕན་ཡོན་མཉམ་པར་བཤད་པའི་དོན་གོ་བས། །ཨ་མ་ཁ་མང་གྲྭ་པ་ཀུན་དང་འཁོན། །མོ་ཁྲིམས་ཡོད་སར་བུད་མེད་མི་མཛེས་པས། །མར་ལ་གྲོང་
དུ་ཞོག་སྐྱེས་ཟེར་མཁན་མང་། །འོན་ཀྱང་ན་སོ་རྒས་པས་ལས་མི་ཐུབ། །བྲན་གཡོག་བཞག་པས་མི་ཐུབ་ཚུར་ལ་རྒོལ། །ཕྱིར་ལ་མི་འདུག་ཉིན་བཞིན་རི་ཁྲོད་འོང་། །ནངས་ནུབ་ལ་ཐུར་མི་འཇོག་རྐང་པ་ན། །དེ་བས་བརྙས་ཤིང་མི་མཛེས་འདུག་ན་ཡང་། །རི་ཁྲོད་བཞག་པས་དགེ་སྦྱོར་ནུས་ན་རབ། །མི་ནུས་ན་ཡང་ཟ་ཞིང་ཉལ་བཅུག་པ། །ཕ་དང་མ་ལ་བྱམས་ཤིང་སྲི་ཞུ་ནི། །སྐྱེས་བུ་དམ་པ་རྣམས་ཀྱིས་བསྔགས་པའོ། །དེ་བཞིན་དབོན་རིགས་གྲྭ་པ་གསར་རྙིང་སོགས། །རང་ལ་རེ་ཞིང་ལྟོས་པ་ཐམས་ཅད་ལ། །ཧ་ཅང་དགོས་པ་གནད་ཆེན་མ་གཏོགས་པ། །སྡང་དུ་མི་སྟོན་དཔོན་ནད་མི་བྱེད་པར། །རང་རང་ཟུར་དེར་འདུག་འཇུག་ལུས་ངག་ཡིད། །ཁ་ཞེ་མེད་པར་བྱམས་པ་འདི་ཉིད་ཀྱང་། །རང་ལ་དཔག་པའི་བྱམས་པའི་སྦྱིན་པའོ། །འོན་ཀྱང་མི་དགེ་བསྟན་ལ་གནོད་པ་དང་། །རང་གཞན་གནོད་པའི་བྱ་བ་ངན་པ་ལ། །བྱམས་དྲག་ཇི་མི་སྙམ་པ་བྱེད་བཅུག་ན། །བྱམས་པ་གོ་ལོག་བྱང་སེམས་ལྟུང་བ་ཡིན། །དེ་ཕྱིར་མོ་ཁྲིམས་ཆང་ཁྲིམས་འཛིང་རྩོད་སོགས། །བྱེད་མི་འཇུག་པར་ཐབས་ཀྱིས་བཅིལ་བ་ཡིན། །ལ་ལས་དབུས་གཙང་ཆོས་སྡེའི་སྲོལ་བཞིན་
དུ། །བཅའ་ཡིག་ཆད་པ་མདོ་སྒྲུབ་མཐུ་གཏོར་བཞེས། །སྲོལ་ནི་ཡོད་བཞིན་བྱེད་དགོས་གསུངས་ན་ཡང་། །ཆོས་བཤད་པ་འདིས་གྲོལ་བར་མ་གྱུར་ན། །བཅའ་ཁྲིམས་བྱས་ཀྱང་བག་དོགས་སྐྲག་ཛབ་བེ། །རྒྱུན་དུ་ཆོས་མཐུན་སློབ་གཉེར་དམར་ན་ཡང་། །ལན་རེ་དཀོར་རྟགས་ལངས་ནས་འཛིང་རྩོད་འཆོར། །དེ་ལ་མདོ་སྒྲུབ་བརྒྱབས་ནས་ཕུད་པ་འཚེར། །འོན་ཀྱང་བཅའ་ཡིག་སྒྲིགས་དང་འགལ་ན་ནི། །ཕུད་མི་འདོད་ཀྱང་ཕུད་དགོས་འོང་རབ་གདའ། །རང་སེམས་ཕྱི་མའི་དོན་ཞིག་མ་བསམས་ན། །ཁྲིམས་བསྡམས་སྡོམ་པ་གཙང་ཡང་སྐག་ངོ་ཙམ། །སྒྲིགས་དང་བྲལ་ནས་བནེ་ལོག་མ་རག །དེ་འདྲ་མཐོང་ཕྱིར་བཅའ་ཁྲིམས་མི་བྱེད་པར། །ཆོས་བཤད་བྱེད་འདི་བྱམས་པའི་སྦྱིན་པ་ཡིན། །ཁྱད་པར་དགྲ་གཉེན་བར་མ་ཐམས་ཅད་དང་། །གནོད་བྱེད་གདོན་བགེགས་གཙོར་བྱས་སེམས་ཅན་ཀུན། །གནས་སྐབས་མཐར་ཐུག་བདེ་དང་ལྡན་པ་དང་། །བདེ་བའི་རྒྱུ་ནི་དགེ་ལས་སྤྱོད་པར་ནི། །གྱུར་ཅིག་སྙམ་དུ་ཁ་ཞེ་མེད་པར་བསྒོམས། །རང་གི་བདེ་སྐྱིད་དགེ་རྩ་ཅི་མཆིས་པ། །སེམས་ཅན་ཀུན་ལ་སིབ་ཀྱིས་ཕར་བསྟིམས་ནས། །སེམས་ཅན་ཐམས་ཅད་བདེ་བ་ཚད་མེད་
དང་། །ལྡན་པར་ཡང་ནས་ཡང་དུ་སྒོམ་བྱེད་པ། །འདི་ནི་བྱམས་པའི་སྦྱིན་པ་འབྲེལ་ཐོབ་ཙམ། །དེ་དག་སྦྱིན་པ་རྣམ་པ་བཞི་པོ་ལ། །རང་ཡང་ཅི་ནུས་འབད་ཅིང་གཞན་ཡང་བསྐུལ། །སེམས་ཅན་ཐམས་ཅད་བདེ་ལ་འགོད་འདོད་པ། །འདི་ནི་སྦྱིན་པའི་ཕ་རོལ་ཕྱིན་པ་ལ། །ཅུང་ཟད་འབྲེལ་བཞག་སརྒ་བཞི་པ་ཡིན།། །།དེ་ལྟར་ཟང་ཟིང་སྦྱིན་པས་ལོངས་སྤྱོད་དང་། །ཆོས་ཀྱི་སྦྱིན་པས་ཤེས་རབ་ལྡན་པ་དང་། །མི་འཇིགས་སྦྱིན་པས་བར་ཆད་མེད་པ་དང་། །བྱམས་པའི་སྦྱིན་པས་སྐྱེ་འགྲོ་བྱམས་པ་སོགས། །སྐྱེ་བར་ཕན་ཡོན་མཐའ་ཡས་བདེ་མྱོང་ཞིང་། །མཐར་ཐུག་རྫོགས་བྱང་རྒྱུ་རུ་འགྱུར་ན་ཡང་། །ཚུལ་ཁྲིམས་མེད་ན་ལུས་བཟང་མི་ཐོབ་ཅིང་། །གཞན་གྱིས་སྦྱིན་པའི་ཡོན་སྦྱང་མི་ནུས་པས། །དེ་ནས་སྟོན་པས་ཚུལ་ཁྲིམས་གསུངས་པར་སྣང་། །དེ་ལ་སྡོམ་པའི་ཚུལ་ཁྲིམས་དགེ་ཆོས་སྡུད། །སེམས་ཅན་དོན་བྱེད་ཚུལ་ཁྲིམས་རྣམ་གསུམ་ལས། །སྡོམ་པའི་ཚུལ་ཁྲིམས་བསྲུངས་ན་གཞན་གཉིས་ཀྱང་། །ཤུགས་ཀྱིས་འགྲུབ་ལ་དེ་གཉིས་མ་བསྲུངས་ན། །གསུམ་པོ་མཉམ་དུ་སྡོད་པར་གསུངས་པའི་ཕྱིར། །བདག་གིས་སྡོམ་པའི་ཚུལ་ཁྲིམས་
བསྲུངས་བར་བྱས། །དེ་ལ་སོ་ཐར་བྱང་སྡོམ་སྔགས་སྡོམ་གསུམ། །སོ་ཐར་ཐེག་པ་ཆེ་ཆུང་གཉིས་ཀ་ལ། །སོ་སོར་ཞུ་ལུགས་ཡོད་པ་ལ་ལས་བཞེད། །འོན་ཀྱང་བཀའ་བརྒྱུད་ལུགས་ལ་གཅིག་ཡོད་ཀྱང་། །བསམ་པའི་ཁྱད་ཀྱིས་སོ་སོར་འགྱུར་གསུངས་ལྟར། །བདག་གིས་སོ་ཐར་སྡོམ་པ་བསྲུང་བ་ནི། །རྣམ་མཁྱེན་བྱང་ཆུབ་དོན་དུ་གཉེར་བའི་ཕྱིར། །ཐེག་པ་ཆེན་པོའི་སོ་ཐར་ཉིད་དུ་ངེས། །སྐྱབས་འགྲོའི་བསླབ་བྱ་དགུ་དང་དགེ་བསྙེན་གྱི། །བསླབ་བྱ་ལྔ་པོ་དེ་བཞིན་དགེ་ཚུལ་གྱི། །བསླབ་བྱ་བཅུ་དང་བསྙེན་པར་རྫོགས་པ་ཡི། །ཁྲིམས་ནི་ཉིས་བརྒྱ་ལྔ་བཅུ་རྩ་གསུམ་རྣམས། །རྩ་བ་རྣམས་ནི་ཉམས་མེད་སྲོག་ལྟར་བསྲུངས། །ཕྲ་ཞིབ་ཚོར་བ་འགའ་ཞིག་གསོ་སྦྱོང་དང་། །ཕྱིན་ཆད་ཆུ་ལོན་དམ་བཅའ་བརྟན་པར་བྱ། །མ་ཚོར་ཕྲ་ཞིབ་འགའ་རེ་བྱུང་དོགས་པས། །དགེ་འདུན་སྡེ་ལ་ཕུན་ཚོགས་གསོ་སྦྱོང་དང་། །མ་འཛོམས་དུས་བཟང་གསོ་སྦྱོང་བྱིན་རླབས་དང་། །ཕལ་ཆེར་ཞི་གནས་གསོ་སྦྱོང་བྱས་པ་དང་། །དེང་སང་ཁྲིམས་ལྡན་དགེ་སློང་ཡིན་པར་བརློམས། །བྱང་སྡོམ་དཀར་ནག་ཆོས་བཞི་བླང་དོར་གཟབ། །རྒྱལ་པོའི་ལྟུང་བ་ལྔ་དང་བློན་པོའི་ལྔ། །ལས་དང་སོ་
སོའི་ལྟུང་བ་བརྒྱད་དང་ནི། །སྡོམ་པ་ཉི་ཤུ་ལ་སོགས་ལེགས་པར་བརྟག །སྨོན་འཇུག་རྩ་བའི་སྡོམ་པ་འཆུག་མེད་བསྲུང་། །ཕྲ་ཞིབ་མ་ཚོར་ཉམས་པར་འགྱུར་སྲིད་པས། །དུས་བཟང་ཕལ་ཆེར་བྱང་སྡོམ་བྱས་པ་དང་། །རྒྱུན་དུ་ཉུང་འདུས་བླངས་ཤིང་བློ་སྦྱོང་བསྒོམས། །དེ་ལྟར་བྱས་ན་བྱང་ཆུབ་སེམས་དཔར་བརློམས། །སྔགས་སྡོམ་དབང་བཞི་ཡོངས་སུ་རྫོགས་ཐོབ་པས། །རྩ་ལྟུང་བཅུ་བཞི་དང་ནི་སྦོམ་པོ་བརྒྱད། །རྙིང་མའི་རྩ་བ་སྐུ་གསུང་ཐུགས་དང་ནི། །ཡན་ལག་ཉེར་ལྔ་དམ་ཚིག་ཉེར་བརྒྱད་སོགས། །རྩ་བ་མ་ཉམས་དམ་པར་བསྲུངས་བྱས་ཤིང་། །ཕྲ་ཞིབ་ཚོར་བར་ཉམས་བསམ་མེད་ན་ཡོང་། །མ་ཚོར་ཉམས་དོགས་བསྐང་བཤགས་ཡིག་བརྒྱ་དང་། །སྐབས་སུ་ཡི་དམ་བདག་འཇུག་ལེན་པར་བྱས་། །དེ་ལྟར་སྔགས་པ་དམ་ཚིག་ཅན་དུ་བརློམས། །དེ་ལྟར་སྡོམ་པ་གསུམ་ལྡན་བསྲུང་བ་ལ། །གཞན་ལུགས་ཆུ་སྣོད་ཆུ་དང་ཟླ་གཟུགས་དཔེ། །སོ་ཐར་ཤོར་ན་གསུམ་ཁ་ཤོར་བར་འདོད། །ལ་ལས་སྡོམ་གསུམ་གནས་འགྱུར་ངོ་བོ་གཅིག །སུམ་ལྡན་དེ་ནི་སྔགས་པ་ཁོ་ནར་འདོད། །བཀའ་བརྒྱུད་བཞེད་པ་གཏོང་ཐོབ་ཐ་དད་ཅིང་། །ཉི་ཟླ་སྐར་གསུམ་བཞིན་
དུ་སོ་སོ་སྟེ། །ནང་ཐུག་བྱུང་ན་གོང་མ་གཙོ་ཆེ་གསུངས། །འོན་ཀྱང་ནང་ཐུག་གདམས་གས་གོས་མ་མྱོང་། །སྤྱོད་པ་འདུལ་བ་ཉིད་ལ་ཆག་བཞག་ནས། །རྩ་བ་བཞི་ནི་འཆུགས་མེད་དམ་པར་བསྲུང་། །གྲོང་ཆོག་ལོ་གྲངས་བཅུ་གསུམ་བྱེད་པའི་ཚེ། །ཆང་གི་ཉེས་པས་གཞན་གྱི་གཞི་བྱེད་ཕྱིར། །ཚོགས་ཆང་མ་བཏུང་སོར་མོས་ལྕེ་ལ་བཞག །གདན་གཅིག་ཆབ་ལེན་ལྷམ་ཕུད་མཐར་ཐོན་བྱས། །དེ་ཡང་མཛེས་ཆོས་མི་སྡུན་མ་ཡིན་པར། །སོ་སོའི་ཕན་ཡོན་དགོས་ཆེད་མཐོང་བ་དང་། །བསྟན་པའི་ཞབས་འདྲེན་མི་འོང་ཕན་རབ་གོ །དེ་ནས་བསྙེན་པར་རྫོགས་པའི་དོན་གོ་ནི། །དགེ་སྦྱོང་ཆོས་བཞི་ཉམས་སུ་ལེན་དགོས་པས། །གྲོགས་མཆེད་སློབ་དཔོན་སློབ་མ་ཡོན་བདག་དང་། །གཞན་ཕྱོགས་འཛིན་པའི་བཙུན་པ་ལ་ལ་ཡི། །ཁྲོ་ཚུལ་སྟོན་ཡང་མ་ཁྲོས་ཕར་ལ་བསྟུན། །བསྟུན་ཀྱང་ཁྲོ་ཚུལ་སྟོན་ལ་བཏང་སྙོམས་བཞག །དེ་ནི་ཁྲོ་ལ་སླར་མི་ཁྲོ་བའོ། །དེ་བཞིན་སྔ་རབས་འདྲེས་ཞུགས་གྱུར་རྣམས་ལ། །ཡིད་བཟུང་མེད་པས་སྔར་འདྲིས་འགྲོ་བར་བྱས། །རང་ལ་ལྐོག་ཤ་གཤེ་སྐུར་བྱས་པ་འགའ། །ཐོས་ལ་ལན་དུ་གཤེ་སྐུར་ཚིག་མ་སྨྲས། །ཁོང་ཁྲོ་མ་བསྒོམས་གང་འོས་ལེགས་
སོགས་བརྗོད། །དེ་ནི་གཤེ་ལ་སླར་མི་གཤེ་བའི་དོན། །དངོས་སུ་ཐོས་དང་ལྐོག་ཏུ་ལབ་པ་ཡི། །ཇོ་རུའི་བུ་དང་ཆུང་དུས་སྒོམ་ཆུང་དང་། །གྲྭ་སར་ཡུན་ཐུང་ཡོན་ཏན་ཕས་བསླབ་སོགས། །ཐོས་ཀྱང་དེ་ལན་མཚང་ནས་བྲུ་བ་ནི། །དངོས་སམ་ལྐོག་ཏུ་ལབ་པར་མ་བྱས་ཏེ། །མཚང་བྲུ་བ་ལ་སླར་མི་བྲུ་བའོ། །དངོས་སུ་རྡུང་བཙོག་བྱེད་པ་མ་བྱུང་ཡང་། །བེ་རེ་རྒྱལ་པོ་ཧ་ཅང་ཆོས་ཆེ་བས། །སེར་ཚོགས་མང་པོ་བསད་པས་ཁ་མ་གང་། །གསོད་རྒྱུ་མ་རྙེད་གཤེགས་མ་རྟོགས་ལྡན་དུ། །བརྫུས་ནས་འགྲོ་ཞིང་འདུག་ཟེར་སྐྲག་འཇིགས་ཆེ། །རིན་རྒྱལ་གྱིས་ཀྱང་རྟེན་མཁར་འདྲ་བའི་ནང་། །ལག་མདུང་རྣོན་པོ་འདོན་རྒྱུ་ཡོད་པ་ཞིག །ཞིང་སྐྱོང་རྟེན་རྫས་ཕྱག་མཁར་གྱིས་ཟེར་ཕུལ། །དེ་དོན་གོ་ནས་འདི་ལྟར་བསམ་ཞིང་སྨྲས། །བདག་གིས་མི་ལུས་ཐོབ་པའི་དོན་གོ་ལ། །ཞྭ་དམར་རྗེ་ལས་དགེ་སློང་སྡོམ་པ་ཐོབ། །མ་ཐར་ན་ཡང་མི་ནི་གསོད་ཐབས་མེད། །སྡོམ་པ་ཤོར་ནས་ལོ་འགའ་ཚེ་རིང་བས། །སྡོམ་པ་གཙང་བའི་ངང་ལ་ཤི་ན་དགའ། །ཞེས་སྨྲས་ལག་མདུང་མགུལ་ནས་དུམ་བུར་བཀྲིག །ལག་ཏུ་ཉིན་གཅིག་ཙམ་ཡང་མ་བཟུང་ངོ་། །དེ་ནི་རྡེག་ལ་སླར་མི་རྡེག་
པའོ། །སོ་སོར་ཐར་པའི་དོན་གྱི་རྩ་བ་ནི། །གཞན་ལ་གནོད་པ་གཞིར་བཅས་སྤངས་དགོས་པས། །སུ་ལའང་བདག་གིས་གནོད་པ་མ་བྱས་ཤིང་། །རྟ་རྣར་ཡེལ་པའི་མདུན་དུ་ཁྱད་པར་དུ། །བདག་དང་བརྒྱུད་པར་བཅས་པས་ཚེ་རབས་ཀུན། །སུ་ལའང་གནོད་པར་མི་འགྱུར་སྨོན་ལམ་བཏབ། །གཞན་ལ་གནོད་པའི་གཞི་རུ་འགྱུར་བ་ཡི། །རྫུན་དང་ཕྲ་མ་ཟེར་རྫོས་སྤངས་བ་དང་། །དྲག་སྔགས་གནམ་ལྕགས་ཐོག་ལྟར་ཚན་ཆེ་བའི། །དུག་མདའ་བཞིན་དུ་རྣོ་མྱུར་མང་ཤེས་ཀྱང་། །ཤིན་ཏུ་སྦས་ནས་སུ་ལའང་མ་བསྟན་ཏོ། །ཁྱད་པར་གནམ་ཆོས་དྲག་སྔགས་བཀའ་རྒྱས་གདམས། །ལས་ཚོགས་ངན་བྱེད་ཀུན་ལ་རྒྱ་ཡིག་བཀོད། །གཞན་གནོད་གཞིར་བཅས་སྤངས་བའི་རྣམ་ཐར་ཡིན། །བྱང་ཆུབ་སེམས་བསྐྱེད་སྡོམ་པ་བླངས་བའི་ཕྱིར། །དགེ་རྩ་ཐམས་ཅད་འགྲོ་བ་སྤྱི་ལ་བསྔོས། །ལུས་ངག་ཡིད་ཀྱི་བྱ་བ་ཐམས་ཅད་ཀུན། །དངོས་སམ་བརྒྱུད་ནས་གཞན་དོན་ཁོ་ནར་དམིགས། །རང་དོན་ཁོ་ནའི་བྱ་བ་ནམ་ཡང་མེད། །ཚེ་རིང་བཀྲ་ཤིས་དཔལ་འབྱོར་སྒྲུབ་པ་ཡང་། །འགྲོ་བའི་དོན་དུ་བྱང་ཆུབ་བསྒྲུབ་ཕྱིར་ཡིན། །ཕན་ལན་དྲིན་མི་ཁུར་དང་གནོད་པ་སྐྱེལ། །ཞེ་ནས་དམོད་དང་
དོ་བསྡོའི་དགྲ་བྱུང་ན། །ཚེ་འདིར་ཕན་པའི་སྐལ་བ་ཟད་ན་ཡང་། །མ་འོངས་བདག་ཉིད་ཁོ་ནས་སངས་རྒྱས་སར། །འཇོག་པའི་སེམས་བསྐྱེད་སྨོན་ལམ་མཚམས་སྦྱོར་དང་། །གཞན་ཕན་གཞིར་བཅས་བསྒྲུབས་པའི་རྣམ་ཐར་ཡིན། །གསང་སྔགས་རྡོ་རྗེ་ཐེག་པའི་སྒོར་ཞུགས་ནས། །ལུས་ལྷ་ངག་སྔགས་སེམས་ནི་ཏིང་ངེ་འཛིན། །ཕལ་ཆེར་འབྲལ་མེད་སྣང་སྲིད་ཐམས་ཅད་ཀུན། །ལྷ་དང་ལྷ་མོར་རྒྱས་བཏབ་དག་སྣང་སྦྱངས། །ལྟ་བ་རྫོགས་ཆེན་ཨ་ཏིའི་དོན་གོ་ཡང་། །སྤྱོད་པ་ཕྲ་ཞིབ་དག་ལ་ལེགས་པར་གཟབ། །ཤ་སྤངས་གྲོང་ཆོག་བྱེད་ཚེ་ལོ་བཅུ་གསུམ། །ནད་ལ་དགོས་ན་མ་གཏོགས་ཚོགས་ཤ་ཡང་། །གྲོང་ཆོག་སྤངས་ནས་བསྔོས་ཤ་མི་འོང་ཕྱིར། །རྒས་པ་གསོ་ཕྱིར་ཚོགས་ཤ་བརྟེན་པར་བྱས། །དེ་ནས་དགེ་བའི་ཆོས་སྡུད་ཚུལ་ཁྲིམས་ནི། །ཕལ་ཆེར་ཐོས་པའི་སྐབས་སུ་འདུས་མོད་ཀྱང་། །ཆོ་ག་ཆོས་སྤྱོད་མཎྜལ་ཡིག་བརྒྱ་དང་། །ཚ་ཚ་ཇོ་དར་མ་ཎི་བརྐོ་བ་དང་། །སྐུ་གསུང་ཐུགས་རྟེན་བཞེངས་པ་ལ་སོགས་པ། །དགེ་བའི་ཆོས་ནི་གང་དང་གང་ལ་ཡང་། །འབྲེལ་པ་སྣ་རེ་མ་བཞག་འགའ་ཡང་མེད། །དེ་ནས་སེམས་ཅན་དོན་བྱེད་ཚུལ་ཁྲིམས་
ནི། །ཆོས་ཀྱི་སྦྱིན་པའི་སྐབས་སོགས་གསལ་ལྟར་ལས། །འདི་ནས་བཟུང་སྟེ་ཇི་སྲིད་འཁོར་བའི་བར། །ལུས་ངག་ཡིད་གསུམ་འགྲོ་དྲུག་དོན་དུ་བསྔོས། །འགྲོ་དྲུག་དོན་དུ་བྱང་ཆུབ་མཆོག་བསྒྲུབ་ཅིང་། །དེ་བསྒྲུབས་ནས་ཀྱང་ཞི་བར་མི་གཞོལ་ཏེ། །འཕགས་པ་སྤྱན་རས་གཟིགས་དབང་ཇི་བཞིན་དུ། །གང་ལ་གང་འདུལ་སྤྲུལ་པ་དཔག་མེད་ཀྱིས། །ནམ་མཁའི་མཐར་ཐུག་གྱུར་པའི་འགྲོ་བ་རྣམས། །བླ་མེད་རྫོགས་བྱང་མཆོག་ལ་འགོད་པ་ཡི། །སེམས་བསྐྱེད་སྨོན་ལམ་རྒྱ་ཆེར་བཏབ་པའོ། །འདི་ལྟར་སྡོམ་པ་གསུམ་ལྡན་ཚུལ་ཁྲིམས་ལ། །འགྲོ་ཀུན་འགོད་པར་འདོད་པའི་བསམ་པ་དང་། །ཚུལ་ཁྲིམས་བསྔགས་པ་བརྗོད་པར་བྱེད་པ་དང་། །རང་གི་ཚུལ་ཁྲིམས་མཆོག་འཛིན་སྤངས་བ་ནས། །གཞན་གྱི་ཁྲིམས་འཆལ་འཚང་ནས་མི་བྲུ་བ། །འདི་ནི་ཚུལ་ཁྲིམས་ཕ་རོལ་ཕྱིན་པ་ལ། །འབྲེལ་པ་བཞག་འདི་སརྒ་ལྔ་པ་ཡིན།། །།དེ་ལྟར་སྦྱིན་དང་ཚུལ་ཁྲིམས་ལྡན་ལགས་ཀྱང་། །བཟོད་པའི་གོ་ཆ་དག་དང་མི་ལྡན་ན། །སྦྱིན་དང་ཚུལ་ཁྲིམས་དགེ་བ་བསྐལ་པ་བརྒྱར། །བསགས་པ་ཁོང་ཁྲོ་གཅིག་གིས་འཇོམས་པར་བཤད། །དེས་ན་ཁོང་ཁྲོ་ཞེ་གནག་ཡིད་འཛིན་པ། །
སྡིག་པའི་ནང་ནས་སྟོབས་ལྡན་སྡིག་པར་བཤད། །དེ་ཕྱིར་བདག་གིས་བཟོད་པ་བསྒོམས་པར་བྱས། །བཟོད་པ་ལ་ཡང་རྣམ་པ་གཉིས་ཡིན་ཏེ། །དཀའ་བ་དང་ལེན་གནོད་པར་ཅི་མི་སྙམ། །ཐོས་བསམ་བྱེད་ཚེ་སློབ་གཉེར་དཀའ་ཚེགས་ཀྱང་། །རང་གི་སྒྲིབ་སྦྱོང་བསྟན་པའི་དོན་དུ་བསམ། །བླ་མ་མཇལ་དང་གནས་རི་མཇལ་བ་དང་། །དབང་ལུང་སྤེལ་ཕྱིར་སྒར་པའི་དཀའ་ཚེགས་དང་། །སྒྲུབ་པ་སྒྲུབ་ཆེན་ལ་སོགས་དཀའ་ཚེགས་དང་། །དབང་ལུང་ཁྲིད་སོགས་གཞན་ཕན་དཀའ་ཚེགས་དང་། །ཕྱག་དང་སྐོར་བ་ལུས་ཀྱི་དཀའ་ཚེགས་དང་། །ངག་བཅད་བཟླས་བརྗོད་འདོན་པའི་དཀའ་ཚེགས་དང་། །དགོང་བཅད་གདན་གཅིག་དཀར་ཕྱོགས་ཤ་ཆང་བཅད། །ཟས་ཀྱི་བཅད་ཁྲིག་འཁྱོངས་དཀའི་དཀའ་ཚེགས་དང་། །དེ་སོགས་ཆོས་ཕྱོགས་དཀའ་ལས་གང་བྱུང་བར། །སྒྲིབ་པའི་ཕྱགས་ཤིང་ཡིན་བསམ་དང་དུ་བླངས། །འགྱོད་པ་མེད་ཅིང་འཚེར་བ་མེད་པ་རུ། །དགའ་སྤྲོ་དང་བཅས་དང་དུ་ལེན་པ་ནི། །དཀའ་བ་དང་དུ་ལེན་པའི་བཟོད་པའོ། །གནོད་ལ་ཅི་མི་སྙམ་པའི་བཟོད་པ་ནི། །རང་དང་ཆོས་རྒྱུད་གཅིག་དང་མི་གཅིག་པའི། །བླ་མ་དང་ནི་སྔགས་པ་འགའ་
རེ་ཡིས། །ལ་ལས་ཆགས་སྡང་ལ་ལས་ལོག་རྟོག་སྡུས། །ངག་མནན་ཀླུ་གཏད་བྱད་ཁ་བསྟན་བྱུང་བ། །ཉམས་དང་རྨི་ལམ་དག་ཏུ་གསལ་མཐོང་ཞིང་། །དངོས་སུ་དེ་དག་ལུས་ལ་ན་ཚ་དང་། །མི་བདེའི་གནོད་པ་སྣ་ཚོགས་བྱུང་ན་ཡང་། །རང་སྲུང་ཟློག་པ་ཙམ་རེ་མ་གཏོགས་པ། །ངན་ལན་མནན་པ་དྲག་སྔགས་མ་བྱས་སོ། །འོན་ཀྱང་ཡེ་ཤེས་ལྷ་ཡི་དྲང་ཤན་གྱིས། །ཁོང་རྣམས་མ་ལེགས་སོང་ཡང་ང་མ་ལན། །རང་གི་ཡབ་རྒན་དཀར་རྩི་བསྐུང་བ་དེ། །རྒྱུས་ཡོད་སྔགས་པས་ཁྱེར་ནས་སེར་བསྲུངས་བྱས། །དེ་ཡིས་མ་ལེགས་ན་ཚ་གོད་ཁ་ལྡང་། །དེ་ལ་ངན་སྨྲ་མ་སྨྲས་བཏང་སྙོམས་བཞག །བདག་གིས་གཏོར་ཁ་བསྟན་དང་ཟོར་ཟློག་སོགས། །བྱས་པས་སྨོན་པ་འགའ་རེ་ཐུལ་བ་དང་། །ཞག་རེ་ཙམ་གྱིས་སྲོག་རླུང་ཕན་པ་དང་། །སྲུང་སྐུད་ཙམ་གྱིས་སྲོག་རླུང་ཕན་པ་སོགས། །བྱུང་ཚེ་གྲུབ་མཐའ་མི་གཅིག་བླ་མ་ཡིས། །སུས་ཀྱང་ཕན་ཐོགས་དཀའ་བའི་སྨྱོ་འབོག་ནད། །ཁོ་ནི་ཕྱིན་པ་ཙམ་གྱིས་ཕན་ཐོགས་པ། །ཁོ་རང་དམ་སྲི་དོམ་ར་ཅན་བསྒྲུབས་ནས། །ཁོ་རང་ཟ་ཁ་ཕྱེ་བ་རེད་ཟེར་ནས། །ཀུན་ལ་གྲགས་པའི་བཅའ་ནི་བཀྲམ་འདུག་ཀྱང་། །རང་དང་ཆོས་རྒྱུད་བཅས་ལ་
གནོད་འདུག་པས། །དེ་ནི་སྒྲུབ་རེ་ཞེས་པའི་མནའ་དང་ངག །ལྡོམ་བུའི་ཞོར་ལ་མི་མང་ཀུན་ལ་བྱས། །དེ་མིན་དེ་སྐད་སྨྲ་མཁན་རྣམས་ལ་ནི། །དམིགས་ངན་བསམ་ངན་དྲག་སྔགས་མ་བྱས་སོ། །དེ་བཞིན་ཡོན་བདག་གྲྭ་སློབ་ལ་སོགས་པ། །རང་གིས་གདོན་གྱི་ཁ་ནས་མངོན་སུམ་བླངས། །སྡིག་འཕྲོ་བཅད་ནས་མི་གྲལ་ལྷ་གྲལ་དུ། །བཙུད་པ་འགའ་རེས་དྲིན་དུ་མི་གཟོ་ཞིང་། །ལོག་པར་སྒྲུབ་དང་ལྐོག་སྨྲ་ངན་འདོད་བྱེད། །དེ་འདྲ་ལ་ཡང་བཏང་སྙོམས་བཞག་པ་ལས། །ངན་ལན་བསམ་པ་ངན་པ་མ་བྱས་སོ། །མདོར་ན་རང་ལ་མཐོ་དམན་སུ་ཡིན་ཡང་། །གནོད་པ་བྱེད་དང་གཤེ་སྐུར་བཏག་བསྐུ་དང་། །ངན་དུ་སྨྲ་དང་ངན་འདོད་ཚིག་ངན་དང་། །ཁ་གནོད་ཚིག་འཁྱལ་འཕེན་པ་ལ་སོགས་པ། །མང་དུ་ཐོས་དང་རང་གིས་མཐོང་ན་ཡང་། །ངན་ལན་བླངས་ན་དྲག་སྔགས་མང་ཤེས་པས། །འཕྲལ་དུ་ཆད་པས་གཅོད་ན་སླ་ན་ཡང་། །བཏང་སྙོམས་བཞག་པ་མ་གཏོགས་ངན་མ་བྱས། །དེ་ལྟར་རང་གིས་བཟོད་པ་ཉམས་བླངས་ཤིང་། །གཞན་ཡང་དེ་ལ་བསྐུལ་བར་བྱ་བ་དང་། །འགྲོ་ཀུན་བཟོད་པ་གཉིས་ལ་འགོད་འདོད་ཅིང་། །བཟོད་པའི་བསྔགས་
པ་གཞན་ལ་བརྗོད་པ་འདི། །བཟོད་པའི་ཕ་རོལ་ཕྱིན་པ་སྒོམ་པ་ལ། །འབྲེལ་བ་བཞག་པའི་སརྒ་དྲུག་པ་ཡིན།། །།དེ་ནས་བརྩོན་འགྲུས་དག་དང་མ་དག་གཉིས། །མ་དག་བརྩོན་འགྲུས་མཐར་ལྟུང་གོལ་བ་སྟེ། །ཧ་ཅང་བརྩོན་འགྲུས་ཆེ་དྲག་ལུས་ངག་དུབ། །ཁམས་ཉོག་ནད་ལྡང་ཡུན་རིང་དགེ་སྦྱོར་ཆག །ལྗི་ཤིག་གཉིས་པོ་སུ་མགྱོགས་བྱས་པའི་ཚེ། །གཏམ་རྒྱུད་བཞིན་དུ་ཧ་ཅང་མི་བརྩོན་ཀྱང་། །རྒྱུན་དུ་དལ་བར་མ་བསྡད་ལུས་ངག་ཡིད། །ཐོས་བསམ་སྒོམ་དང་འཆད་རྩོད་རྩོམ་པ་དང་། །ཚོགས་བསགས་སྒྲིབ་སྦྱོང་མ་གཏོགས་བྱ་རྒྱུ་མེད། །སློབ་གཉེར་དུས་ལ་སློབ་གཉེར་བརྩོན་འགྲུས་དང་། །ཉམས་ལེན་བྱེད་ཚེ་སྒྲུབ་པའི་བརྩོན་འགྲུས་བརྩམས། །ལོ་གསུམ་བར་དུ་སྔས་ཀྱང་སྤངས་བར་བྱས། །དུས་མཆོད་རྣམས་དང་རྒྱུན་གྱི་ཐུགས་དམ་རྣམས། །རྒྱས་བསྡུས་མ་གཏོགས་ནམ་ཡང་ཆག་མེད་བགྱིད། །སྒྲུབ་ཆེན་སྒྲུབ་ཕྲིན་མཁོ་བའི་ཡོ་བྱད་བསགས། །དེ་འདྲ་དགོས་ཏེ་མ་འཛོམ་ཟེར་བ་དང་། །དེ་འདྲ་དགོས་ཏེ་མ་ཐོན་ཟེར་བ་མེད། །ཡི་དམ་ཆོས་སྐྱོང་རང་གི་གཏོར་མགྲོན་གྲ། །བསྙེན་པ་མ་ཐོན་ཟེར་བ་འགའ་མ་མཆིས། །སྒྲུབ་ཆེན་སྒྲུབ་ཕྲན་ཞོར་སྒྲུབ་ཡན་
ཆད་ཀྱི། །སྒྲུབ་པ་ཉིས་བརྒྱ་ལྷག་ཙམ་ཨེ་སོང་ཙམ། །དེ་དག་སོ་སོའི་རྫས་དང་ཡོ་བྱད་དང་། །སྲོག་འཁོར་དམ་སྲི་མནན་སོགས་རྣམ་མང་པོ། །མ་ཐོན་རང་གར་བྱས་པ་འགའ་ཡང་མེད། །ཆུང་དུས་གཏོ་ཆོག་བྱས་པ་ཡན་ཆད་ནས། །ད་ལྟ་སྒྲུབ་ཆེན་དབང་སྒྲུབ་མན་ཆད་ཀྱི། །མདོས་ཟློག་བསྐང་གསོ་རྗེས་གནང་བྱབ་ཁྲུས་ཡིན། །དལ་ཁོམ་རྒྱས་བསྡུས་སྐབས་དང་བསྟུན་མོད་ཀྱི། །ཆ་ལག་མ་ཚང་གྱི་ནར་བྱས་པ་མེད། །ཞི་ཁྲོའི་སྒྲུབ་ཆེན་སྐུ་གསུམ་སྒྲུབ་པ་སོགས། །ཕྱག་ལེན་འཆུགས་མེད་སྤྲོས་པ་རྒྱས་པ་བས། །སླ་ཆོས་དེས་ཆོག་ཁོབ་ལས་བྱས་པ་མེད། །བཀའ་སྲུང་ཆོས་སྐྱོང་སྲུང་མའི་རྟེན་རྫས་དང་། །རྟེན་གཏོར་རྒྱུན་གཏོར་རྟག་གཏོར་ཐུན་གཏོར་སོགས། །སོ་སོའི་གཞུང་དང་མཐུན་པར་བྱས་པ་བས། །གཏོར་ཆོག་ཙམ་གྱིས་རྒྱུན་བསྙེན་བྱེད་པ་ལ། །བསྙེན་སྒྲུབ་ཐེམ་ཞེས་འདོད་བཟོ་བྱས་པ་མེད། །དབང་དང་ལུང་དང་སྒྲུབ་པ་ལག་ཁྲིད་ལ། །མ་གོམས་པ་བྱུང་རྩད་བརྡར་མ་བཅད་པར། །ཤེས་ལོ་ཐོབ་ལོ་ཙམ་དུ་བཞག་པ་མེད། །སྒྲུབ་པ་གང་ཡང་རྨིས་རྟགས་མ་ཐོན་པར། །གྲངས་ཁ་ཐེམ་ཞེས་བསྐྱུར་ནས་བཞག་པ་མེད། །རྒྱུད་དང་རྒྱ་གཞུང་སྒྲུབ་
སྐོར་ལས་ཚོགས་ལ། །གལ་ཆེན་བྱས་ནས་རྩད་བཅད་དྲུང་རྣོ་བས། །གཏོར་ཆོག་དབང་ལུང་ཙམ་ཞིག་ཐོབ་པ་ལ། །བསྙེན་པ་བྱས་ཤིང་ལྷ་རུ་བཟུང་བ་མེད། །ཐོབ་པའི་དབང་ལུང་རྒྱུད་པ་དག་མ་དག །ཕྱག་ལེན་འཆུག་དང་མ་འཚུགས་མ་བརྟག་པར། །ཐོས་པ་ཙམ་གྱིས་ཆོག་པར་བྱས་པ་མེད། །སྔར་ཐོབ་ཁྲིད་རྣམས་དེ་ཡི་དཔེ་བཙལ་ནས། །རང་གིས་རང་ལ་ཁྲིད་ནི་བཙུགས་བྱས་ནས། །ངེས་ཤེས་ཅུང་ཟད་ཐོབ་པར་མ་བྱས་པའི། །སྔར་ཐོབ་དེས་ཆོག་བྱས་ནས་བསྐྱུར་བ་མེད། །དེ་ལྟར་བརྩོན་འགྲུས་རང་གིས་རྩོམ་བྱེད་ཅིང་། །གཞན་ཡང་དེ་ལ་འགོད་ཅིང་བསྔགས་པ་བརྗོད། །འགྲོ་ཀུན་བརྩོན་འགྲུས་ཉིད་ལ་བཀོད་འདོད་པས། །འདི་ནི་བརྩོན་འགྲུས་ཕ་རོལ་ཕྱིན་པ་ལ། །འབྲེལ་པ་བཞག་པའི་སརྒ་བདུན་པའོ།། །།དེ་ལྟར་བརྩོན་འགྲུས་བརྩམས་པར་བྱས་ན་ཡང་། །ནང་དུ་བསམ་གཏན་བསྒོམས་པར་མ་བྱས་ན། །ཉོན་མོངས་དུག་གསུམ་མགོ་བོ་མི་ནོན་པས། །སྟོན་པས་དེ་ནས་བསམ་གཏན་བསྒོམ་པར་གསུངས། །བསམ་གཏན་འདི་ལ་རྣམ་པ་མང་བཤད་ཀྱང་། །བསྒོམ་བྱ་ཕལ་ཆེར་བསམ་གཏན་ཁོངས་སུ་འདུས། །གོང་དུ་བསྟན་བཞིན་བྱམས་པ་སྒོམ་
པ་དང་། །བྱང་ཆུབ་སྒྲུབ་པའི་ས་བོན་ཆུ་ལུད་དང་། །འབྲས་བུ་ཕུན་སུམ་ཚོགས་པ་དང་འདྲ་བས། །མེད་ཁ་མེད་ཕྱིར་སྙིང་རྗེ་བསྒོམས་པར་བྱས། །སྙིང་རྗེ་ཡང་ནི་རྣམ་པ་གསུམ་ཡོད་དེ། །སེམས་ཅན་དམིགས་དང་ཆོས་ལ་དམིགས་པ་དང་། །དམིགས་པ་མེད་པའི་སྙིང་རྗེ་རྣམ་གསུམ་ལས། །ཐོག་མར་བསྒོམ་བྱ་སེམས་ཅན་དམིགས་པ་སྟེ། །སེམས་ཅན་ཐམས་ཅད་ཕ་མ་ཤ་སྟག་སྟེ། །ལ་ལ་དམྱལ་བར་བཙོ་སྲེག་བཟོད་གླགས་མེད། །ལ་ལ་ཡི་དྭགས་བཀྲེས་སྐོམ་མེ་ལྟར་འབར། །ལ་ལ་དུད་འགྲོ་མུན་གླིང་བླུན་རྨོངས་འཐིབ། །དེ་སོགས་སེམས་ཅན་ཐམས་ཅད་སྙིང་རྗེ་བས། །དེ་དག་ཀུན་གྱི་སྡུག་བསྔལ་རྒྱུ་བཅོས་པ། །རང་ལ་སིབ་སིབ་བསྟིམས་པས་སེམས་ཅན་ཀུན། །སྡུག་བསྔལ་ཀུན་དང་བྲལ་བར་ནན་གྱིས་བསྒོམ། །དེ་ལྟར་བདག་བས་གཞན་གཅེས་མ་བསྒོམས་ན། །སངས་རྒྱས་ཐོབ་པའི་ཐབས་ནི་མེད་པར་གསུངས། །དེ་ཡང་ཡིད་ཀྱིས་དེ་ལྟར་བརྗེ་བ་ལས། །དངོས་སུ་ས་ཐོབ་མིན་པ་མི་རུང་གསུངས། །དེ་ཕྱིར་དངོས་སུ་བདག་གཞན་རྗེ་དཀའ་ཡང་། །ནད་པ་གདོན་ཅན་གྲིབ་ཅན་འགའ་རེ་ལ། །དེ་ལྟར་བསྒོམས་པས་ནད་པ་ཅི་ན་བའི། །
ཕྱོགས་མཐུན་པོ་དེ་རང་ཉིད་ན་བ་ནས། །ནད་པ་ནད་ལས་གྲོལ་བ་རེ་མང་བྱུང་། །སྨྱོ་འབོག་ལ་སོགས་གདོན་ལ་གཟིར་བ་ན། །ནད་པར་ཕན་ཀྱང་གདོན་གྱིས་ལེ་ལན་བརྡ། །རང་ལ་གོད་ཁ་ཁ་སྨྲས་འོང་འདུག་ཀྱང་། །འོང་བ་ཤེས་བཞིན་དེ་འདྲ་མང་དུ་བྱས། །ཆར་པ་དྲག་འབོད་སེར་བའི་གདོང་ཟློག་སོགས། །བྱས་ཚེ་རང་ལ་གནོད་པ་བྱུང་ན་ཡང་། །བཟོད་པར་བྱས་ནས་གཞན་ཕན་བློ་ཡིས་བྱས། །སྔ་སོར་གྲོང་ཆོག་ལོ་མང་བྱེད་སྐབས་སུ། །ཡོན་བདག་ཕྱུག་དང་དབང་ཡོད་ལ་ལ་ཡི། །ངོ་ཆེན་སྔོན་ལ་འོང་དགོས་ཟེར་ན་ཡང་། །སྙོམས་ཆུང་དབུལ་པོ་གལ་ནི་ཆེ་བར་བྱས། །དེ་ཚེ་དབང་ཡོད་རྒྱུ་ཡོད་ཕྱུག་པོ་རྣམས། །མི་དགའི་རྣམ་འགྱུར་བསྟན་ཡང་བཟོད་པར་བྱས། །བསྙེན་སྒྲུབ་མ་ཐེམ་ཡི་དམ་ཆོས་སྐྱོང་ཚོགས། །དབང་ལུང་སུ་འདོད་རྣམས་ལ་སྤེལ་བའི་ཚེ། །རང་ལ་གནོད་ཅིང་བཀའ་སྲུང་མི་དགའ་ཡང་། །གཞན་ལ་ཕན་ཆེར་འདུག་པས་བཟོད་པར་བྱས། །རང་དོན་ཚེ་མཚམས་བྱས་ན་ལེགས་འདུག་ཀྱང་། །དབང་ལུང་ཆོས་གསུམ་དགེ་བའི་ཕན་ཡོན་སོགས། །གཞན་ཕན་བསམས་ནས་ལོ་འགའ་མཚམས་ཡང་བྱས། །གཅོད་ཚོགས་བསྒྲིག་པར་ཨེ་རུང་བརྟག་པའི་ཚེ། །
བསྒྲིགས་ན་ཁྱེད་རང་ཚེ་ལ་གནོད་ན་ཡང་། །གཞན་ལ་ཕན་ཐོགས་དཔག་མེད་འབྱུང་གསུངས་པས། །ཕན་ཐོགས་ཆེ་ན་བདག་ཚེ་ཐུང་ཡང་བཟོད། །བསམས་ནས་གཞན་ཕན་བློ་ཡིས་བསྒྲིགས་པར་བྱས། །རེས་འགའ་རང་དབང་མེད་པར་སེམས་ཅན་ལ། །སྙིང་རྗེའི་དབང་གིས་མཆི་མ་འཁྲུགས་པ་དང་། །འཕོ་འདེབས་དུས་འགའ་སྙིང་རྗེ་དྲག་པོ་ཡིས། །བསྐྱེད་ཀྱང་མ་ཕན་མཆི་མ་འཁྲུགས་པ་བྱུང་། །ཆོས་ལ་དམིགས་པའི་སྙིང་རྗེ་སྐྱེ་ཚུལ་ཡང་། །སྣོད་བཅུད་ཀུན་དང་སྐྱེ་འགྲོའི་བདེ་སྡུག་སོགས། །རྣམ་པ་སོ་སོར་བཀྲ་ཡང་ངོ་བོ་སྟོང་། །དཔེར་ན་ཆུ་ནང་ཟླ་གཟུགས་ལྟ་བུར་མཐོང་། །ཀྱེ་མ་འདི་ལྟར་དངོས་པོ་མ་གྲུབ་པར། །སྒྱུ་མ་རྨི་ལམ་ལྟ་བུར་འདུག་པ་ལ། །མ་རྟོགས་བདག་གཞན་བདེ་སྡུག་སྣ་ཚོགས་སུ། །བཟུང་བའི་འགྲོ་བ་འདི་དག་ཐམས་ཅད་ནི། །དོན་མེད་འཁྲུལ་ནས་སྡུག་བསྔལ་དཔག་མེད་པ། །སྨྱོན་པ་ལྟ་བུར་འདུག་སྙམ་སྙིང་རྗེ་སྐྱེས། །དམིགས་པ་མེད་པའི་སྙིང་རྗེ་དངོས་དེ་ནི། །འཕགས་ཆེན་རྣམས་ཀྱི་སྤྱོད་ཡུལ་ཡིན་མོད་ཀྱི། །ཉམས་ལེན་སྟོང་ཉིད་རྩི་དང་མ་བྲལ་ངང་། །སེམས་ཅན་ཀུན་ལ་སྙིང་རྗེ་བསྒོམ་པ་ནི། །སྟོང་ཉིད་སྙིང་རྗེའི་སྙིང་པོ་
ཅན་ཞེས་པ། །འདི་ནི་བྱང་ཆུབ་བླ་ན་མེད་པའི་ལམ། །ཡིན་པར་གོ་ནས་ཡང་ཡང་བསྒོམས་པར་བྱས། །འདི་ནི་སྙིང་རྗེ་བསྒོམས་པའི་རྣམ་ཐར་ཡིན། །དེ་བཞིན་འགྲོ་ཀུན་བདེ་བ་མཆོག་དང་ནི། །ནམ་ཡང་འབྲལ་བ་མེད་ན་དགའ་བ་དང་། །དེ་ལྟར་བྱམས་དང་སྙིང་རྗེ་དགའ་བ་ལ། །ཕྱོགས་རིས་མེད་པར་ཀུན་ལ་སེམས་སྙོམས་པ། །ཚངས་པའི་གནས་བཞི་ཐུན་མགོ་རྣམས་སུ་བསྒོམས། །དེ་ནི་ཞེ་སྡང་གཉེན་པོར་བྱམས་སྙིང་རྗེ། །འབྲེལ་པ་ཅུང་ཟད་བཞག་པའི་རྣམ་ཐར་ཡིན། །རང་དང་གཞན་གྱི་ལུས་ལ་ལེགས་བརྟགས་ན། །ཕྱི་ཡི་བཞིན་དང་པགས་པའི་མདོག་ལེགས་ཀྱང་། །ནང་ནི་མི་གཙང་ཁྲག་དང་ཆུ་སེར་དང་། །མཁྲིས་པ་བད་སྣབ་བཤང་གཅི་སྲིན་བུས་གང་། །ནང་ན་ཀེང་རུས་རྩ་དང་རྒྱུད་པས་འབྲེལ། །བྱ་རྒོད་ཟོས་པའི་རོ་དང་ཁྱད་པར་མེད། །འདི་ལ་ཆགས་པ་སྐྱེ་བ་འཁྲུལ་ཚབས་ཆེ། །དེ་ལྟར་འདོད་ཆགས་གཉེན་པོར་མི་སྡུག་པ། །སྒོམ་ལ་ལན་འགའ་འབྲེལ་བ་བཞག་པར་བྱས། །སངས་རྒྱས་སྐྱེས་རབས་མཛད་པ་བཅུ་གཉིས་དང་། །རྟེན་འབྲེལ་བཅུ་གཉིས་ལུགས་འབྱུང་སྲིད་འཁོར་ལོ། །ལུགས་ལྡོག་ཐར་པའི་འཁོར་ལོ་འཕགས་ལམ་བརྒྱད། །
ཡིད་ལ་རྩེ་བ་གཏི་མུག་གཉེན་པོ་སྟེ། །རྟེན་འབྲེལ་སྒོམ་ལ་རེ་འགའི་འབྲེལ་པ་བཞག །བསྐྱེད་རིམ་ཆ་རྣམས་བསམ་གཏན་ཡིན་པས་ན། །སྦྱང་གཞི་སྦྱོང་བྱེད་ལེགས་པར་སྦྱར་ཤེས་པས། །བདག་བསྐྱེད་ཡི་དམ་ལྷ་ཡི་དཀྱིལ་འཁོར་དང་། །མདུན་བསྐྱེད་མོས་པ་བློར་བཟུང་བསྒོམས་པར་བྱས། །དུག་ལྔ་སོ་སོ་རིགས་ལྔ་སོ་སོ་ཡི། །ལྷ་རུ་བསྒོམས་ཤིང་བསྔོ་སྨོན་རྒྱས་འདེབས་སོགས། །བསྒྱུར་བའི་ལམ་ལ་འབྲེལ་པ་བཞག་པར་བྱས། །རྡོ་རྗེ་ལུས་ཀྱི་གནས་ཚུལ་ཤེས་བྱས་ནས། །སྟོང་ར་གསལ་བཏབ་བུམ་ཆེན་རླུང་ལ་སྦྱངས། །འབར་འཛག་གཏུམ་མོའི་དམིགས་པ་བསྒོམས་པར་བྱས། །རྡོ་རྗེའི་བཟླས་དང་འབྱུང་འཇུག་གནས་དང་གསུམ། །རང་ལུས་ཐུབས་ལྡན་རྡོ་རྗེ་རྦ་རླབས་སོགས། །ཡེ་ཤེས་བཙན་ཐབས་ལམ་ཡང་བསྒོམས་པར་བྱས། །ཉི་མར་བལྟས་ནས་དབྱིངས་རིག་སྒྲོན་མ་དྲུག །ཨ་ཏི་ཐོད་རྒོལ་ཅུང་ཟད་བསྒོམས་པར་བྱས། །མཚན་བཅས་ཤིང་བུ་རྡེལ་བུ་མར་མེ་དང་། །མཚན་མེད་སངས་རྒྱས་སྒོ་ལ་སེམས་འཛིན་ལ། །མཚན་མེད་རྣམ་རྟོག་བཀག་ནས་རང་བབས་སུ། །གནས་པའི་ཞི་གནས་ཀྱང་ནི་བསྒོམས་པར་བྱས། །ཁྱད་པར་ཞི་གནས་
རྣམ་རྟོག་མ་བཀག་པར། །ལྷོད་དེ་བཞག་པས་གནས་ཉམས་རྒྱ་མཚོ་བཞིན། །སྐྱེ་བ་དེ་ཡང་ཉམས་སུ་མྱོང་བར་བྱས། །ནམ་མཁའ་མཐའ་ཡས་རྣམ་ཤེས་མཐའ་ཡས་དང་། །ཡོད་མིན་མེད་མིན་ཅི་ཡང་མེད་པ་སོགས། །ཕྱི་རོལ་པ་དང་ཕྱོགས་མཐུན་བསམ་གཏན་བཞི། །ཉམས་ཀྱི་སྣང་བར་ཅུང་ཟད་རྟོགས་པར་བྱས། །དེ་ཡང་ཕྱི་རོལ་པ་དང་ནང་པའི་ལམ། །ཁྱད་པར་ཁྱེར་སོ་དག་ཀྱང་འབྱེད་པར་བཤད། །དེ་ལྟར་བསམ་གཏན་དག་ལ་འབྲེལ་བཞག་ཅིང་། །གཞན་ལ་སྟོན་ཅིང་དེ་ཡི་བསྔགས་པ་བརྗོད། །འགྲོ་ཀུན་བསམ་གཏན་མཆོག་ལ་འགོད་འདོད་པ། །འདི་ནི་བསམ་གཏན་ཕ་རོལ་ཕྱིན་པ་ལ། །འབྲེལ་པ་བཞག་པའི་སརྒ་བརྒྱད་པའོ།། །།དེ་ལྟར་སྦྱིན་པ་ཚུལ་ཁྲིམས་བཟོད་པ་དང་། །བརྩོན་འགྲུས་བསམ་གཏན་ལྔ་ལ་སྤྱོད་ན་ཡང་། །ཤེས་རབ་ཕ་རོལ་ཕྱིན་པས་མ་ཟིན་ན། །ནམ་ཡང་འཁོར་བའི་གནས་ནས་མི་ཐར་ཏེ། །འཁོར་བའི་རྩ་བ་བདག་ཏུ་འཛིན་པ་སྟེ། །དེ་ཉིད་འཇོམས་ལ་བདག་མེད་ཤེས་རབ་དགོས། །ལོང་བ་བརྒྱ་ཕྲག་མིག་ལྡན་མི་གཅིག་གིས། །ཁྲིད་ནས་འདོད་པའི་ས་རུ་ཕྱིན་པ་ལྟར། །ཕར་ཕྱིན་ལྔ་བོ་ཤེས་རབ་ཕར་ཕྱིན་གྱིས། །ཟིན་
ན་རྫོགས་པའི་སངས་རྒྱས་ས་རུ་སླེབས། །དེ་ལྟར་གསུངས་ཕྱིར་བདག་གིས་ཤེས་རབ་བསྒོམས། །དེ་ལ་ཐུན་མོང་ཐུན་མོང་མིན་པ་གཉིས། །ཐུན་མོང་ཤེས་རབ་ཐོས་བསམ་གཉིས་པོ་སྟེ། །དེ་ཚུལ་གོང་དུ་བསྟན་པས་འདིར་མ་བརྗོད། །ཐུན་མོང་མིན་པའི་ཤེས་རབ་སྒོམ་པའི་ཐབས། །ཀུ་ས་ལི་དང་པཎྜིཏ་ཡི་ལུགས། །དཔྱད་སྒོམ་འཇོག་སྒོམ་གཉིས་སུ་ཡོད་པ་ལས། །པཎྜི་ཏ་ཡིས་དཔྱད་བསྒོམ་བྱ་བའི་ཚུལ། །ཕྱི་ནང་སྣོད་བཅུད་ཆོས་རྣམས་ཐམས་ཅད་པ། །སྟོང་ཞིང་བདག་མེད་མཐའ་བཞིའི་དྲི་མ་བྲལ། །དེ་ཚུལ་རྒྱལ་བའི་མདོ་རྒྱུད་ལུང་ལས་བྱུང་། །པཎྜི་ཏ་པ་རྣམས་ཀྱིས་རིགས་པས་གྲུབ། །རྟག་པ་མ་ཡིན་ཆད་པ་མ་ཡིན་ཞིང་། །ཡོད་པ་མ་ཡིན་མེད་པ་མ་ཡིན་ལ། །བདག་སྐྱེ་མ་ཡིན་གཞན་ལས་སྐྱེ་བ་མིན། །གཉིས་སྐྱེ་མ་ཡིན་གཉིས་ཀ་མིན་སྐྱེ་མིན། །ངོ་བོ་སྟོང་པ་དོན་དམ་བདེན་པ་སྟེ། །རྣམ་པ་གསལ་བ་ཀུན་རྫོབ་རྟེན་འབྲེལ་ཆོས། །དེ་གཉིས་མི་འགལ་ཟུང་དུ་འཇུག་པ་ཡི། །ལུང་དང་རིགས་པས་གོ་བ་བསྐྱེད་བྱས་ནས། །དེ་ལྟར་བསྒོམ་བྱ་དེ་ཉིད་ཤེས་བྱས་ཏེ། །དེ་ནས་དེ་ཡི་དོན་ལ་མཉམ་བཞག་པ། །དེ་ལ་ཡང་ནི་ལན་འགའ་འབྲེལ་པ་བཞག །
རྒྱུན་དུ་ཀུ་ས་ལི་ཡི་འཇོག་སྒོམ་ནི། །ཆུ་ཆད་པ་ཡི་རན་ཐག་ཇི་བཞིན་དུ། །དུས་གསུམ་སྤྲོས་པ་བཅད་ནས་མཉམ་པར་བཞག །དེ་ཚེ་དང་པོ་རང་གི་སེམས་ཉིད་དེ། །ངོ་བོ་སྟོང་ལ་རང་བཞིན་གསལ་བ་དང་། །རྣམ་པ་འགག་མེད་སྐུ་གསུམ་རང་ཆས་མཐོང་། །དེ་ལ་གཟུགས་དང་ཁ་དོག་དངོས་པོ་དང་། །ངོས་བཟུང་མེད་པའི་གང་ཟག་བདག་མེད་དེ། །བསྒོམ་དུ་མེད་པའི་ངང་ལ་བསྒོམས་པར་བྱས། །དེ་ནས་ཕྱི་རོལ་སྣོད་བཅུད་ཐམས་ཅད་ཀུན། །ངོ་བོ་སྟོང་ལ་རང་བཞིན་གསལ་བ་དང་། །སྟོང་གསལ་གཉིས་པོ་མི་འགལ་ཟུང་འཇུག་པ། །ཆོས་ཀྱི་བདག་མེད་དག་ཀྱང་སྒོམ་པར་བྱས། །དེ་ལྟར་སྟོང་ཉིད་གཤིས་དང་མ་བྲལ་བར། །མ་རྟོགས་འགྲོ་ལ་ཤུགས་འབྱུང་སྙིང་རྗེ་ཡི། །སྟོང་ཉིད་སྙིང་རྗེ་ཟུང་འཇུག་བསྒོམས་པར་བྱས་། །སྟོང་ཉིད་ངང་ལ་སྣ་ཚོགས་རིག་པའི་རྩལ། །ནམ་མཁའི་འཇའ་བཞིན་ཡི་དམ་དཀྱིལ་འཁོར་ལྷ། །སྤྲོ་དང་བསྡུ་དང་དབང་བསྐུར་བྱིན་རླབས་སོགས། །བསྐྱེད་རྫོགས་ཟུང་འཇུག་དག་ཀྱང་བསྒོམས་པར་བྱས། །དེ་ལྟར་ཤེས་རབ་ཕ་རོལ་ཕྱིན་པ་ལ། །རང་གིས་ཉམས་ལེན་གཞན་ལ་སྟོན་པ་དང་། །དེ་ཡི་བསྔགས་པ་བརྗོད་ཅིང་འགྲོ་བ་ཀུན། །དེ་ལ་
འགོད་པར་འདོད་པའི་བློ་སྐྱེད་པ། །ཤེས་རབ་ཕར་ཕྱིན་བསྒོམས་པའི་སརྒ་དགུ།། །།དེ་ལྟར་ཕར་ཕྱིན་དྲུག་ལ་སྤྱད་ན་ཡང་། །དད་པ་མེད་ན་བྱིན་རླབས་མི་འབྱུང་བས། །དད་པ་ལ་ཡང་རྣམ་པ་གསུམ་ཡིན་ཏེ། །འདོད་དང་ཡིད་ཆེས་དང་བའི་དད་པའོ། །བདག་དང་འགྲོ་ཀུན་སངས་རྒྱས་ཐོབ་འདོད་པ། །སྐོམ་པས་ཆུ་ལ་གདུང་བ་འདྲ་ཞིག་བྱས། །མདོ་རྒྱུད་ཚད་ལྡན་པད་འབྱུང་གཏེར་བཀའ་དང་། །བཀའ་བརྒྱུད་གོང་མའི་གསུང་ལ་ཐེ་ཚོམ་མེད། །ཡིད་ཆེས་ནད་པས་སྨན་བཞིན་རྒྱུན་དུ་བསྟེན། །བཟང་དང་ངན་དང་གཙང་དང་མི་གཙང་བའི། །སེར་གོས་གྱོན་ཚད་ཐམས་ཅད་སངས་རྒྱས་བསྟན། །དགེ་འདུན་གྲངས་སུ་ཐེ་སྙམ་དག་སྣང་བྱས། །དབུ་ཐུག་ལ་སོགས་འོས་པའི་བསྙེན་བཀུར་བགྱིད་རང་དང་མཉམ་དང་ཅུང་ཟད་དམན་རྣམས་ལ། །དང་བ་ཕྱག་ལེན་གང་འོས་ཆེ་བཀུར་བྱས། །སྙིང་པོ་མེད་ཀྱང་ཆེ་འགྱིང་མཁན་རྣམས་ལ། །ཕྱག་འཚལ་ཕྱག་དབང་ཞུ་སོགས་ཞུམ་ཞུམ་བྱས། །སྔོན་བྱོན་ལ་ལ་སྐྱབས་སུ་འཛིན་བྱེད་ཀྱང་། །ལ་ལས་བདུད་སྤྲུལ་ངན་པར་འཛིན་རྣམས་ལའང་། །དེ་དག་གནས་སྐབས་སྨོན་ལམ་བཟང་ངན་ཙམ། །ཡོད་
སྲིད་ན་ཡང་ས་གནས་སེམས་དཔར་ངེས། །སྐྱེ་རྒྱུད་བཟང་ངན་ལ་སོགས་བཤད་ཐོས་ཀྱང་། །བཤད་ལུགས་ཐེག་པ་ཆེ་ཆུང་ཁྱད་པར་ཏེ། །ཐེག་དམན་ལུགས་ལ་ལྷས་སྦྱིན་བདུད་པོ་སྟེ། །དེ་ལས་ངན་པ་འཇིག་རྟེན་ཁམས་ན་མེད། །ཐེག་ཆེན་པདྨ་དཀར་པོའི་མདོ་ལས་ནི། །ལྷས་སྦྱིན་ཐུབ་པས་བྱང་ཆུབ་སྒྲུབ་པའི་གྲོགས། །རེས་འགའ་སྟོན་པའི་སློབ་དཔོན་དག་ཏུ་གྱུར། །བྱང་ཆུབ་སེམས་དཔའ་སྐྱེས་མཆོག་ཡིན་པ་སྟེ། །དེ་ལ་སྨོད་ན་ངན་སོང་ལྟུང་བའི་རྒྱུ། །མ་འོངས་བསྐལ་པ་བརྒྱ་ནས་སངས་རྒྱས་ཏེ། །བདེ་གཤེགས་ལྷ་ཡི་རྒྱལ་པོར་འགྱུར་ལུང་བསྟན། །དེ་བཞིན་བདུད་པོ་མ་ཏྲཾ་རུ་ཊ་ཡང་། །ད་ལྟ་དཔལ་ལྡན་མགོན་པོ་ནག་པོ་སྟེ། །མ་འོངས་ཐལ་བའི་དབང་པོར་སངས་རྒྱས་གསུངས། །ད་ལྟ་བདུད་རྒྱལ་དགའ་རབ་དབང་ཕྱུག་ཀྱང་། །འདོད་རྒྱལ་དམར་པོ་ཞེས་བྱ་སྒྲུབ་ཐབས་མང་། །དེ་ཡང་སྟོན་པས་བྱང་ཆུབ་ལུང་བསྟན་ཐོབ། །རྟ་མགྲིན་ཡང་གསང་ཁྲོས་པའི་རྒྱུད་ལས་ནི། །གཟའ་དང་རྒྱལ་པོ་རྟ་མགྲིན་སྤྲུལ་པར་གསུངས། །མུ་སྟེགས་མ་ཁོལ་སྐྱེ་བ་ཀརྨ་པ། །ཉི་མ་དངོས་གྲུབ་སྐྱེ་བ་བོད་དུ་ནི། །ཀླུ་ཡི་དབང་པོ་འབྲུག་པ་རྒྱལ་དབང་རྗེ། །དེ་ལྟར་སྐྱེས་རབས་ངེས་པ་
མི་གདའ་བས། །ཤཱཀ་ཐུབ་པད་འབྱུང་ལ་སོགས་དེ་རྣམས་ལ། །བཟང་ངན་འབྲེལ་ཐོགས་ཐམས་ཅད་དོན་ལ་ནི། །ས་གནས་སེམས་དཔའ་ཡིན་པར་ངེས་འདུག་སྙམ་། །དེ་ཕྱིར་སུ་ལའང་ལོག་ལྟ་ཆེན་པོ་མེད། །ཐམས་ཅད་ཀུན་ལ་དང་བའི་དད་པ་བགྱིད། །དད་པའི་ནོར་ལ་འབྲེལ་པ་བཞག་ཚུལ་ལོ། །ཚུལ་ཁྲིམས་ནོར་དང་ཐོས་པའི་ནོར་གཉིས་ནི། །གོང་དུ་བསྟན་པས་འདི་རུ་མི་དགོས་སོ། །གཏོང་བའི་ནོར་ནི་སྦྱིན་པའི་སྐབས་ལྟར་ལས། །ཁྱད་པར་དག་དང་མ་དག་བསམ་པའི་ཁྱད། །ཡོན་བདག་རྣམས་ལ་བཟའ་བཏུང་སྲུང་མདུད་དང་། །གནང་སྦྱིན་ལ་སོགས་བྱས་པས་ཐམས་ཅད་མགུ། །ཡོན་བདག་མང་དུ་ཨེ་འགྱུར་བསམ་པ་དང་། །ཤ་ལྷུ་གཟུགས་དྲུད་ཟེར་བའི་དཔེ་བཞིན་དུ། །ཅུང་ཟད་བཏང་ནས་ཆེན་པོ་འོང་འདོད་དང་། །བཏང་བྱུང་ཕོ་སྒོ་བཟང་བའི་དྲག་འདོད་ཀྱིས། །བཏང་ནས་རྙེད་པས་རྙེད་པ་ཚོལ་བ་ཞེས། །འཚོ་བ་མ་དག་ཉམས་སྒྲིབ་སོགས་པས་ན། །བདག་གིས་དེ་འདྲའི་བསམ་པ་འཆང་བ་མེད། །བྱང་ཆུབ་སེམས་དཔས་འགྲོ་དོན་བྱེད་པ་ལ། །སྦྱིན་པའི་གཡབ་མོས་གཡབ་ནས་དབང་བསྡུས་ཏེ། །རིམ་པར་བྱང་ཆུབ་ལམ་ལ་འགོད་
པ་ནི། །ཐབས་ལ་མཁས་པའི་སྤྱོད་པ་ཡིན་པར་གསུངས། །དེ་གཉིས་བྱེད་ལུགས་འདྲི་ཡང་བསམ་པའི་ཁྱད། །ཉེ་དུ་ཤི་ལ་མ་ཕུལ་མི་ཁ་ལྡང་། །ཕུལ་ན་ཧ་ཅང་ཆེས་སྙམ་སེར་སྣ་ཤོར་། །སེར་སྣ་ཡོང་བས་དགེ་བ་ལམ་མི་འགྲོ། །དེ་བཞིན་མཐོན་པོ་ཕྱུག་དང་རིགས་རུས་ཅན། །བླ་མར་མཇལ་རྟེན་ཆུང་ན་ངོ་ཚ་དང་། །མཉམ་མཉམ་གཞན་གྱིས་འཕྱ་དོགས་ཆེ་བ་ཕུལ། །རྒྱུད་ལ་དཔྱད་པས་སེར་སྣ་ཞོར་ལ་འཆོར། །སེར་སྣ་འགྱོད་སེམས་ཡིད་ལ་འཕྲེང་བ་དེས། །ཕུལ་བའི་སྦྱིན་འབྲས་དག་ཀྱང་ཆུང་བར་འགྱུར། །དེ་ཕྱིར་དེ་དག་སོ་སོར་གནང་སྦྱིན་རེ། །བྱས་ན་སེམས་དགའ་སེར་སྣ་མི་འཆོར་བས། །གང་ཕུལ་དགེ་བ་དེ་ནི་ལམ་དུ་འགྲོ། །གཤེ་བར་མི་བྱེད་དབང་ཞུའི་དམ་ཚིག་ཐུབ། །དབུལ་ཞིང་ཕོངས་དང་ས་ཐག་རིང་བ་ལ། །ལམ་ཆས་བྱིན་པས་མགུ་ཞིང་ཕན་ཐོགས་ཆེ། །སེམས་ཅན་མགུ་བར་བྱས་ན་སངས་རྒྱས་བརྙེས། །དེ་ཕྱིར་གནང་སྦྱིན་གཏོང་སྒོ་ཅུང་ཟད་བྱས། །དེ་བཞིན་ཁ་མཆུ་ལ་སོགས་བསྡུམ་པ་ལ། །ཕན་ཐོགས་འདུག་ན་གཏོང་སྒོ་ལག་མ་བསྐུམ། །གཏོང་བའི་ནོར་ལ་འབྲེལ་པ་བཞག་ཚུལ་ལོ། །ཤེས་རབ་ནོར་ནི་ཤེས་རབ་ལེའུར་གསལ། །སྔར་འདྲིས་
ཆེ་བའི་མི་ནི་ལ་ལ་ཡིས། །ངོ་ལོག་ཕྱར་ཁ་གནོད་འཚེ་བྱེད་ན་ཡང་། །ཁྲེལ་གཞུང་བཟུང་ནས་ཧ་ཅང་གནོད་མ་བསྐྱལ། །དབོན་རིགས་ཉེ་དུ་རྩ་ལག་ཐམས་ཅད་ལ། །ཧ་ཅང་དཀོར་ལ་བག་མེད་བྱིན་ན་ནི། །ཟ་མཁན་ཁྲོ་ཆུ་འཐུང་བའི་དམྱལ་བ་དང་། །ཡི་དྭགས་ལུས་ངན་མང་དུ་ལེན་པ་དང་། །སྦྱིན་མཁན་རྔ་མོང་དག་ཏུ་སྐྱེ་གསུངས་པས། །ཧ་ཅང་འདོད་པ་ཚིམས་པར་མ་བྱིན་ཀྱང་། །འབྲེལ་ཐག་བཅད་ན་ཁྲེལ་མེད་གཞུང་མེད་པས། །ཅི་ལྟར་འོས་པའི་ཕན་ཐོགས་ཅུང་ཟད་བྱས། །གྲྭ་པ་འགའ་རེས་བསྟན་པ་བཤིགས་པ་དང་། །བཀའ་བཅགས་དམ་ཚིག་བཀྲལ་བར་བྱས་པ་ལ། །སྤྱི་ཡི་སྲོལ་བཞིན་མདོ་སྒྲུབ་གཏོར་བཤམས་སོགས། །བྱས་ན་ཕྱི་མཐའ་ཕན་ཟེར་བྱུང་ན་ཡང་། །སྔར་འདྲིས་ཅན་ལ་ཁྲེལ་གཞུང་དགོས་བསམས་ནས། །ཅི་ཡང་མ་བྱས་བཏང་སྙོམས་ངང་ལ་བཞག །ཁྲེལ་ཡོད་ནོར་ལ་འབྲེལ་པ་བཞག་ཚུལ་ཡིན། །མི་ལ་རས་པའི་མགུར་ལས་གསུངས་པ་ལྟར། །གསང་རྡོར་མཐོང་དང་ཕྱིན་ཙམ་ཤོར་བ་ལ། །ངོ་ཚ་བྱེད་དེ་ངོ་ཚ་དེ་མ་ཡིན། །རབ་ཏུ་བྱུང་ནས་ཚུལ་ཁྲིམས་མ་འཆལ་ཀྱང་། །བུད་མེད་རྣམས་དང་མཛའ་བཤེས་སྒེས་མཐུན་དང་། །
ཆོས་མིན་ལོག་པར་སྤྱོད་ན་ངོ་ཚ་བས། །བུད་མེད་གཞོན་ནུ་ཐོ་ཕྱིར་མི་བརྟེན་ཞིང་། །རི་ཁྲོད་ཁྱིམ་དུ་བུད་མེད་མི་བཞག་ཅིང་། །ཐག་རིང་འགྲིམས་པ་ལན་རེ་བྱུང་ན་ཡང་། །རོ་ཡིས་མནན་པ་ཙམ་དུ་གནོད་སྣང་ཆེ། །གྲྭ་པ་རྣམས་ཀྱང་དེ་དང་འབྲེལ་དོགས་པས། །ཀུ་རེ་ཐབས་ཀྱིས་བསྒགས་ནས་ཧོབ་བཅིལ་བྱས། །རང་ལ་དད་འདུན་འབུལ་བ་བཟང་ན་ཡང་། །བུད་མེད་རིགས་ལ་ཁྲོས་པའི་ཚུལ་དུ་བསྡད། །ཆང་འཐུང་བ་དང་སྤྱོད་ལམ་རྩིང་བ་དང་། །ཆབ་ལེན་ལྷམ་ཕུད་བརྗེད་དང་རྩེ་ཀྱུ་སོགས། །བག་མེད་ཐམས་ཅད་བཙུན་པའི་ངོ་ཚར་གོ །ངོ་ཚ་དེ་དག་རབ་ཏུ་བསྲུང་བ་དང་། །འཇིག་རྟེན་ངོ་ཚ་མ་དང་བུ་སྲིང་ཕྱོགས། །དེ་ལ་ཚིགས་པའི་གཏམ་གླེང་ཇི་ལྟར་འཛེམ། །དེ་ལྟར་ངོ་ཚའི་ནོར་ལ་འབྲེལ་པ་བཞག །དེ་ལྟར་འཕགས་པའི་ནོར་བདུན་མི་ཕྱུག་ཀྱང་། །མེད་པའི་དབུལ་པོ་ཙམ་ཡང་མིན་པར་སེམས། །འཕགས་ནོར་བདུན་གྱི་སརྒ་བཅུ་པའོ།། །།དེ་ནས་བཀའ་བརྒྱུད་ཉམས་ཁྲིད་ཞུས་པའི་དོན། །མོས་གུས་སྒོམ་གྱི་མགོ་བོ་ཞེས་གསུངས་པས། །རིགས་ཀྱི་བདག་པོ་རྒྱལ་བ་ཟུང་གཅིག་དང་། །ཚད་ལྡན་བླ་མ་འབྲེལ་ཐོབ་ཐམས་ཅད་དང་། །
རྒྱ་བོད་རིག་འཛིན་གྲུབ་ཐོབ་ཐམས་ཅད་པ། །གཅིག་བསྡུས་རྡོ་རྗེ་འཆང་གི་སྐུ་རུ་བསྒོམས། །གསོལ་བ་བཏབ་ཅིང་དབང་བཞི་རྒྱུན་དུ་བླངས། །ཅི་མཛད་ཡེ་ཤེས་རོལ་པར་ཤེས་པ་དང་། །གང་གསུང་རྡོ་རྗེའི་གསུང་དུ་ངེས་པ་སྐྱེས། །རྩ་བའི་བླ་མ་དཀོན་མཆོག་ཀུན་འདུས་ཏེ། །ཐུགས་ནི་སངས་རྒྱས་གསུང་ནི་དམ་པའི་ཆོས། །སྐུ་ནི་དགེ་འདུན་ཡོན་ཏན་མཁའ་འགྲོའི་ཚོགས། །ཕྲིན་ལས་ཆོས་སྐྱོང་ཐམས་ཅད་ཡིན་པར་གོ །འབྲེལ་ཐོགས་དགེ་བའི་བཤེས་གཉེན་ཐམས་ཅད་ཀྱང་། །གནས་སྐབས་སྣང་ཚུལ་ཇི་ལྟར་སྣང་ན་ཡང་། །སྦས་པའི་རྣལ་འབྱོར་དོན་གྱི་གྲུབ་ཐོབ་སྟེ། །སྤྱོད་ལམ་རྩིང་དང་མི་འཛེས་འདུག་ན་ཡང་། །ངེས་མེད་རྣལ་འབྱོར་མཆོག་གི་སྤྱོད་པར་ལྟ། །བོད་ཀྱི་རྣལ་འབྱོར་ཆོས་གཡུང་ཞེས་བྱ་བས། །ཆོས་མིན་བསྟན་ན་བླ་མ་བདུད་གསུངས་ཕྱིར། །ཆོས་མི་མཐུན་དང་རང་གིས་མི་ལྕོགས་པའི། །བཀའ་བསྩལ་བྱུང་ཡང་ཚིག་གིས་ཕྱེ་བར་བྱས། །མི་ནུས་པ་ལ་ཚིག་གིས་སྦྱང་གསུངས་དོན། །རྙེད་དང་བཀུར་སྟི་སྒྲུབ་པའི་མཆོད་པ་ནི། །ཇི་ལྟར་འོས་པས་བསྟེན་པར་བྱས་པའོ། །ཞེན་ལོག་སྒོམ་གྱི་རྐང་པར་གསུངས་པའི་དོན། །འདི་ལ་
དག་དང་མ་དག་གཉིས་སུ་མཐོང་། །ཁོག་ན་འདོད་པ་ཆེ་ཡང་མི་འདོད་སྨྲས། །སྐྱེས་པའི་ཡུལ་དུ་སྤྱོད་ངན་རྩིས་ཆུང་བས། །ཕ་ཡུལ་སྤང་ཞེས་རྒྱུས་མེད་ཡུལ་དུ་འདུག །འདུལ་བྱ་མི་འབྱུང་དུས་སུ་མི་ལེན་ཟེར། །མཇལ་མི་མེད་པའི་དུས་སུ་སྐུ་མཚམས་བསྡམས། །དེ་ནས་དད་འདུན་འབུལ་ཞབས་བྱུང་ཙ་ན། །འདུལ་བྱ་དུས་བབ་ཡིན་ཞེས་ཆོག་ཤེས་མེད། །འགྲོ་དོན་གང་ཆེ་ཟེར་ནས་རྒྱལ་ཁམས་བསྐོར། །གྲོང་ཆོག་འབོད་མཁན་མེད་ཚེ་ཐེམ་པ་སྤང་། །ཚེ་མཇུག་འབོད་མི་བྱུང་བས་གྲོང་ཆོག་འབྱམས། །དེ་འདྲ་བྱ་བཏང་བྱང་མར་རྩི་འདུག་ཀྱང་། །དེ་འདྲ་ཞེན་པ་ཕྱི་ནས་ལོག་པར་སྣང་། །རྒྱལ་བ་མི་བསྐྱོད་རྡོ་རྗེས་གསུངས་པ་ལྟར། །བདག་ནི་ཞེན་པ་ནང་ནས་ཅུང་ཟད་ལོག །རྗེ་བཙུན་མར་པ་ལོ་ཙཱའི་གསུང་བཞིན་དུ། །མི་རྩིས་ཆུང་བའི་རང་ཡུལ་དགེ་སྦྱོར་འཕེལ། །ཆགས་ཞེན་མ་ཡིན་ཡུལ་གཞན་འགྲོ་ཤོམ་མང་། །བཅོམ་ལྡན་ཐུབ་པས་འདུལ་བ་ལས་གསུངས་ལྟར། །མཐའ་གཉིས་སྤངས་བའི་བསོད་སྙོམས་བདག་གིས་བརྟེན། །སྡུག་བསྔལ་མཐའ་ནི་དཀའ་ཐུབ་གཟིར་བ་སྤངེས། །འདོད་པའི་མཐའ་སྟེ་ཆོག་མི་ཤེས་པ་སྤངས། །ང་རང་སེམས་ལ་རྐང་བཞི་འཚགས་
འདོད་མེད། །སྔ་ཐོག་གྲྭ་པ་གོ་ཆོད་མེད་པའི་དུས། །དུད་འགྲོ་གང་བྱུང་གང་ཁུག་རེ་དང་བརྗེས། །ཞག་འགའ་མ་ཚོང་ན་ཡང་གནོད་སྣང་ཆེ། །ཀུན་གྱིས་ཚོང་ཕམ་འདི་འདྲ་བྱེད་ཟེར་ཡང་། །ཕམ་པར་ཤེས་ཏེ་གང་ཁུག་བྱེད་པ་ནི། །དུད་འགྲོ་འཚགས་མི་འདོད་པས་ལན་པ་ཡིན། །མི་ལེན་ཀ་མེད་འགའ་རེ་མ་གཏོགས་པ། །ཞིང་ཡང་ཕུལ་མི་བྱུང་སྟེ་མ་བླངས་སོ། །ཁྲལ་ཞིང་གཏེ་ཁྲལ་མི་དགོས་ཟེར་ན་ཡང་། །སོ་ནམ་མི་འདོད་རྨོ་བར་མ་བྱས་སོ། །ལན་གཅིག་ང་ཡི་ཁ་ལ་མི་ཉན་ནས། །ཚྭ་ཞིག་བླངས་ནས་རྒྱ་རུ་སོང་བ་ནས། །ང་རང་རྒྱ་འགྲོས་ཚྭ་ལེན་གཏན་ནས་འཚེར། །དེ་བཞིན་དོམ་དང་ཤེ་ཡང་ངས་མི་འདོད། །དུས་གསུམ་མཁྱེན་པའི་ཞལ་ཆེམས་ཇི་བཞིན་དུ། །སེར་གོས་ཆ་ཚང་ལྷུང་བཟེད་ཆོས་གོས་དང་། །དཔེ་ཆ་གླེགས་བམ་འགའ་ཟུང་མ་གཏོགས་པ། །ཆགས་ཞེན་བདག་ཏུ་འཛིན་པ་འགའ་ཡང་མེད། །སྒར་ཆས་རྟ་ཁལ་བྲ་ང་ལ་སོགས་པ། །གྲྭ་པ་འགའ་ཟུང་ཡོད་པའི་འདུ་རྟེན་དང་། །ལོ་ཤས་གཞན་དོན་བྱ་བའི་ཉེར་མཁོ་དང་། །བླ་མ་དགོན་སྡེ་སོགས་ལ་བཏང་རྒྱུ་སྟེ། །ང་རང་འདི་ཡིན་བསམ་པའི་བདག་བཟུང་མེད། །ལ་ལས་གསེར་
དངུལ་ཚོན་རྩི་དར་རས་དང་། །ནོར་གཡུ་ལ་སོགས་དངོས་གཙང་ཅུང་ཟད་རེ། །ཉ་ར་བྱས་ན་གནང་སྦྱིན་ལ་སོགས་པ། །མཁོ་དགོས་གཉེར་ཚང་ནང་ནས་ལེན་དཀའ་ཟེར། །འོན་ཀྱང་གང་ལ་སྲེད་པ་མེད་པའི་ཕྱིར། །ཅུང་ཟད་ཙམ་ཡང་འཚགས་པར་མ་བྱས་སོ། །འབུལ་བ་ཆེ་ཕྲ་སྣ་ཚོགས་ཅི་བྱུང་ཡང་། །དཔེ་ཆ་བྱུང་ན་མ་གཏོགས་ཐམས་ཅད་དང་། །ཆེ་ཆུང་བཟང་ངན་རྟོག་པ་མི་འཇུག་ཅིང་། །གར་སོང་ཅི་བྱས་རྩད་རྗེས་མི་གཅོད་ཅིང་། །བླ་མ་དགོན་སྡེའི་བཏང་ཕྱུང་མ་གཏོགས་པ། །ཕར་བཏང་ཀུན་ལ་ཆེ་ཆུང་བློ་མི་འཇུག། །འགའ་རེ་ཕྲོག་བརླག་སོང་ཡང་སེར་སྣ་མེད། །ཆོས་ཕྱོགས་ཐེངས་ན་བློ་སེམས་དགའ་བ་ཙམ། །དེ་བཞིན་ཞྭ་གོས་སྒ་བཅས་ལ་སོགས་པ། །ཤུགས་འབྱུང་བཟང་ན་ཆོས་ཀྱི་ཆེ་བ་ཙམ། །ངན་ངོན་རེད་ཀྱང་ཡག་འདོད་འཕྱོར་སྣང་མེད། །ཐུབ་པས་མདོ་སྡེ་རྒྱ་ཆེ་རོལ་པ་ལས། །ཡོད་ཀྱང་མི་ཟ་དཀའ་ཐུབ་བྱེད་པ་ནི། །ཕྱི་རོལ་མུ་སྟེགས་པ་ཡི་ལམ་དུ་གསུངས། །ཡོད་པས་མི་ཆོག་འཚོལ་ཕྱིར་སྡིག་བསགས་པ། །དེ་ནི་སྐྱེ་བོ་ཐ་མལ་པ་ཡི་ལུགས། །ཤུགས་ཀྱིས་བྱུང་ན་གསེར་སྲང་སྟོང་རི་བའི། །ཟས་ཀྱང་དགེ་སློང་རྣམས་ཀྱིས་ལོངས་སྤྱོད་བྱ། །གསེར་སྲང་
འབུམ་ཕྲག་རི་བའི་གོས་ཀྱང་གྱོན། །མ་རྙེད་ཚོལ་ཕྱིར་སྡིག་པ་བསགས་པ་དང་། །དགེ་སྦྱོར་ཆག་པར་མི་བྱ་གང་རྙེད་ཀྱི། །ཟས་སྐོམ་ངན་ངོན་ལུས་འཚོ་ཙམ་ལ་བརྟེན། །གོས་ཀྱང་རོ་གོས་ལ་སོགས་མ་འཁྱོག་ཙམ། །དེ་བཞིན་ཤཱཀྱ་ཐུབ་པའི་ལུགས་སུ་གསུངས། །དཔེར་ན་བདག་ཀྱང་ཡོད་བཞིན་མི་ཟ་བའི། །དཀའ་ཐུབ་བཅུད་ལེན་ལ་སོགས་མ་བྱས་པར། །གང་བྱུང་བསྐྱེད་རིམ་བདག་བསྐྱེད་ལྷ་ལ་མཆོད། །ད་རུང་ལོ་ཤས་འགྲོ་དོན་བྱེད་པའི་ཚེ། །ཟང་ཟིང་དཀོན་མཆོག་མཆོད་ཕྱིར་མ་གཏོགས་པ། །ང་རང་ཆེད་དུ་གོས་དང་ཕོར་བ་ཙམ། །ཆིབས་པ་གཅིག་ཙམ་མ་གཏོགས་བདག་བཟུང་མེད། །གུར་དང་སྒར་ཆས་སྒྲུབ་ཆེན་ཆོས་ལ་སོགས། །གྲྭ་པ་དགེ་འདུན་སྤྱི་ཡི་དོན་ཡིན་ནོ། །དགེ་འདུན་ཟེར་བའི་མང་པོ་མེད་ན་ཡང་། །བཞི་སྡེ་ཡན་ཆད་དགེ་འདུན་ཡིན་པར་གསུངས། །བར་ཆད་རྐྱེན་གྱི་དབང་དུ་མ་ཤོར་ན། །གྲུ་པ་ཁ་གྲངས་མང་པོ་མེད་ན་ཡང་། །འདི་ཡི་ནང་ནས་བླ་མ་མང་པོ་དང་། །ཆོས་པ་གྲྭ་ཐུབ་མང་པོ་འོང་རེ་ཡོད། །ཡེངས་མེད་སྒོམ་གྱི་དངོས་གཞིར་གསུངས་པའི་དོན། །ད་རུང་སྒོམ་མེད་ཀློང་དུ་མ་ཕེབས་པས། །དྲན་རྫིས་ཡང་དང་ཡང་
དུ་གསལ་བཏབ་ཅིང་། །མ་བཅོས་སོ་མ་ལྷུག་པ་རང་བབ་ངང་། །འདི་བསྒོམ་གཏད་སོ་མེད་པར་རང་ལུགས་བཞག །དེ་ལྟར་སྒོམ་གྱི་འགོ་རྐང་བར་གསུམ་ལ། །འབྲེལ་པ་བཞག་པའི་སརྒ་བཅུ་གཅིག་པ།། །།དེ་ནས་བྱང་ཆུབ་སེམས་དཔའ་ཐམས་ཅད་ཀྱིས། །འགྲོ་དོན་སྒོ་མོ་བསྡུ་བའི་དངོས་པོ་བཞི། །མཁོ་བ་སྦྱིན་དང་སྙན་པར་སྨྲ་བ་དང་། །འཇིག་རྟེན་དོན་མཐུན་གདུལ་བྱའི་དོན་སྤྱོད་པ། །འདོད་པ་ཅན་ལ་མི་མཁོ་མེད་ན་ཡང་། །གསོད་པའི་ཕྱིར་དུ་དུག་མཚོན་མི་སྦྱིན་ཞིང་། །ཡོད་ཀྱང་མི་ཆོག་འདོད་ཆེན་ལ་མི་སྦྱིན། །བྲི་བར་འདོད་ཀྱང་ཤོག་བུ་མེད་པ་ལ། །འཕྲལ་དུ་ཕན་བྱ་ཉམས་སུ་ལེན་ངེས་པ། །དེ་ལ་ཤོག་བུ་ཅུང་ཟད་སྦྱིན་པར་བྱས། །ཆོས་ཞུ་འདོད་ཀྱང་ཆོས་རྒྱགས་ཆད་པ་ལ། །ཆོས་རྒྱགས་མཐུད་མ་ཅུང་ཟད་བྱིན་ཅེས་སྨྲས། །ཐག་རིང་ནས་འོང་བཀྲེས་ཤིང་སྐོམ་པ་ལ། །གང་འོས་ཟས་སྐོམ་ངོམ་པར་བྱིན་ཅེས་སྨྲས། །སྒྲུབ་པ་རྩེ་གཅིག་བྱེད་པའི་རྒྱགས་ཆད་ནས། །རྒྱགས་མཐུད་གང་འོས་བག་རེ་བྱིན་པར་སེམས། །བྲིས་མི་ཤིས་པར་དཔེ་ཆ་འདོད་པ་ལ། །ཉམས་སུ་ལེན་ཅིང་རང་ལ་ཐོབ་ཡོད་ན། །ཕན་ཐོགས་ངེས་པའི་དཔེ་ཆ་སྦྱིན་པར་
སེམས་། །བླ་མ་གསར་པ་མཆོད་ཆ་མི་འཛོམ་ལ། །ཐེབ་ཡོད་ན་ནི་གང་འོས་སྦྱིན་པར་སེམས། །རང་གི་སློབ་མ་ཆོས་དང་མཐུན་པ་ལ། །རི་ཁྲོད་ལ་སོགས་ཡུལ་གཞན་འགྲོ་བའི་ཚེ། །མེད་ན་མ་གཏོགས་དཔེ་ཆ་མཆོད་ཆ་སོགས། །གང་འོས་ཐབས་མི་ཆོག་ཙམ་སྦྱིན་པར་འདོད། །དབུལ་པོའི་ཕྲུ་གུ་བརྗེ་བྱེད་པ་ལ། །ཡོད་ན་སེར་ཆས་གོས་རྣམས་སྦྱིན་པར་འདོད། །གཉོམ་ཆུང་བྱ་བྲལ་ཆོས་རྒྱགས་མེད་པ་ལ། །ཆོས་ར་ཚེ་ལ་ཟས་སྐོམ་སྦྱིན་པའོ། །སྙན་པར་སྨྲ་བ་མཚང་ནས་མི་བརྗོད་དེ། །གནོང་ལ་ཕོག་པའི་མིང་ངན་ནས་མི་འབོད། །ཚུལ་ཁྲིམས་འཆལ་དང་གྲུབ་མཐའ་ངན་པ་སོགས། །སྐྱོན་དེ་མི་སྨྲ་གང་འོས་ལེགས་ཕྱོགས་ནས། །སྐབས་སུ་གང་བབས་སེམས་ལ་གང་ཕན་བཤད། །སྡིག་ཅན་རྣམས་ལ་ངན་དུ་མི་བརྗོད་ཅིང་། །སྡིག་པ་དེ་ཉིད་བཤགས་པའི་གདམས་པ་བཤད། །ཉམས་ཆག་ལྟུང་བ་ཅན་ལ་མི་སྨད་ཅིང་། །ཉེས་ལྟུང་དེ་ཉིད་བསྐང་དང་བཤགས་ཐབས་འབད། །གང་དང་གང་ལའང་སྐྱོན་ནས་མི་གླེང་ཞིང་། །ཡོན་ཏན་ངོས་ནས་བསྟོད་ཅིང་རིམ་པ་ལྟར། །དམ་པའི་ཆོས་ལ་བློ་ཁ་གང་འགྱུར་བྱས། །དེ་ནི་སྙན་པར་སྨྲ་བའི་ཚུལ་ཡིན་
ལ། །འཇིག་རྟེན་དོན་དང་མཐུན་པར་བྱ་བ་ནི། །དང་པོ་བྱོན་དུས་ཆག་ཕེབས་བྱོན་ཞུ་དང་། །ཡུལ་ཕྱོགས་སྐད་ཆ་ལོ་ཡི་ལེགས་ཉེས་འདྲི། །འགྲོ་ཁ་ཐུགས་དམ་གོང་འཕེལ་བདེ་མོ་གྱིས། །འདི་དག་རྣམས་ལ་གང་ཡིན་མི་གདའ་ཡང་། །འཇིག་རྟེན་པ་དང་མཐུན་ཕྱིར་བརྗོད་པར་བྱས། །འཁྲུག་པ་བསྡུམ་པ་འགྲོ་དོན་ཆེ་ན་ཡང་། །སྙིགས་དུས་ཆད་མི་བཙན་ཞིང་མནར་མི་བརྩི། །མགོ་གཡོགས་བྱེད་པའི་རྗེ་ལ་བླ་མ་བཞག །སྐྱེས་ལྷག་མང་པོ་རྔན་གསོད་རྩ་བར་འགྱུར། །ཡང་ན་སྡེ་ཤོག་མང་པོ་དགྲ་ཞབས་འགྲོ། །དེ་ཕྱིར་སྡེ་ཆེན་ཁ་མཆུ་ཡོད་ན་དང་། །འདྲས་རུ་འཛིང་རྩ་ཆེན་པོ་ཡོད་པ་ཡི། །ཁ་མཆུ་བར་ལ་མི་ཐེ་དེ་ཡི་དོན། །འཛིང་རྩ་མེད་ཀྱང་རྣམ་རྟོག་ཀླད་ལ་རྩོད། །མེ་སྟག་ཆུང་ཡང་རི་ཆེན་མཆེད་པའི་དཔེ། །ཕན་ཚུན་རང་ལ་རྩི་འཇོག་བྱེད་སྣང་ན། །ཟང་ཟིང་རྒྱུ་བཏང་ཆོས་ཕྱོགས་དབང་བསྐུར་ནས། །ཕན་ཚུན་བདེ་བར་བྱས་ཤིང་བྱེད་ཀྱང་འདོད། །དེ་བཞིན་ཉེ་དུ་ཡོན་བདག་སྔར་འདྲིས་མི། །གནས་ཚང་དཔོན་རིགས་ལ་སོགས་སོ་སོ་ལ། །འཇིག་རྟེན་སྤྱི་ཡི་སྲོལ་ལ་ཡོད་པ་ལྟར། །སོ་སོར་བཏང་བྱུང་ཟས་སྐོམ་ལ་སོགས་པ། །འོས་ཤིང་འཚམས་པས་སོ་སོར་མགུ་
བར་བྱས། །རས་པ་ཞི་བ་འོད་ཀྱི་གསུང་བཞིན་དུ། །འཇིག་རྟེན་མི་ཡི་ཆོས་དང་མཐུན་པའོ། །གདུལ་བྱའི་དོན་སྤྱོད་ཅེས་པའི་དོན་འདི་ནི། །སྨན་པ་རྣམས་ལ་སྨན་བླའི་དབང་ལུང་བཏོན། །ཨ་མཆོད་རྣམས་ལ་སོ་སོའི་ཆོས་སྤྱོད་དང་། །ལྷ་མོ་ལྔ་སོགས་དེར་མཁོའི་དབང་ལུང་བཏོན། །སྒོམ་པ་རྣམས་ལ་ཞི་དྲག་རྟ་མགྲིན་དང་། །མགོ་གསུམ་རྡོ་རྗེ་མཆུ་སོགས་གང་ཕན་བཏོན། །སྐུ་དྲག་སྐུ་ཚེ་ཐུང་དོགས་ཚེ་དབང་དང་། །གཅོད་པར་གཅོད་ཀྱི་ལུང་དང་གཅོད་དབང་སྟེ། །བྱད་ཁ་ཆེ་ལ་གདུགས་དཀར་སེང་གདོང་མ། །ནད་པའི་ནད་ལ་སྤར་ཁ་གང་ཕན་དང་། །གཟའ་ནད་ཅན་ལ་ཕྱག་རྡོར་གཟའ་དུག་བཀྲུ། །རྒྱལ་ནད་ཅན་ལ་དམིགས་པ་ཞི་དྲག་དབང་། །འཆི་ལ་ཁད་ལ་ཀུན་རིག་མི་འཁྲུགས་པ། །བསྙེན་སྒྲུབ་འདོད་ལ་དབང་ལུང་ལག་ཁྲིད་བཅས། །རྙིང་མར་གོ་ཤས་ཆེ་ལ་བཀའ་དགོངས་ཕུར། །སེམས་ངོ་སྲུང་ཕྱོགས་ཤེས་ལ་བོགས་འདོན་བྱེད། །ཁྲིད་གར་སླེབས་མ་མྱོང་ལ་གནས་འགྱུ་སྤྱད། །སྤྱི་ལ་སྐྱབས་སེམས་བསྙེན་གནས་ཡིག་དྲུག་ལུང་། །བསྟན་ལ་ཞུགས་འདོད་རྣམས་ལ་སྡོམ་པ་འབོགས། །སེམས་བཟང་གོ་ཤས་ཆེ་ལ་སེམས་བསྐྱེད་རྒྱས། །
གསར་དུ་བླ་མ་བྱེད་ལ་དབང་རྗེས་གནང་། །དབང་ལུང་རྒྱ་ཆེ་འདོད་ལ་འགྲོ་གང་ཆེ། །བསྔོ་བ་བྱང་བུ་འདོད་ལ་གང་འདོད་དེ། །བསྟབ་པ་ལུས་སྦྱིན་འདོད་ལ་དེ་ཉིད་རེ། །གདམས་ངག་ཕྲན་བུ་འདོད་པ་ཕན་བྱའི་སྔགས། །མདོར་ན་མཐུ་གཏད་ངན་རྗེས་མ་གཏོགས་པ། །སྦ་སྲི་མེད་པར་གང་ལ་གང་འདོད་པ། །འཚེར་བག་སུན་སྣང་མེད་པར་ལྷུག་པར་སྟོན། །དེ་ལྟར་བསྡུ་བའི་དངོས་པོ་བཞི་པོ་ཡི། །དཔལ་འབྱོར་རྒྱས་པ་བདག་ལ་མེད་མོད་ཀྱང་། །འབྲེལ་པ་བཞག་པའི་སརྒ་བཅུ་གཉིས་པ།། །།དེ་ལ་མཁས་པའི་བྱ་བ་རྣམ་གསུམ་ལས། །ཐོས་བསམ་སྒོམ་གསུམ་བྱས་པའི་ལག་རྗེས་ཏེ། །འཆད་དང་རྩོད་དང་རྩོམ་དང་རྣམ་གསུམ་ལ། །རྗེ་བཙུན་མི་ལ་རས་པའི་གསུང་ལས་ནི། །བསླབ་པའི་ཆོས་རྣམས་ཐམས་ཅད་བརྗེད་ན་ཡང་། །མ་བསླབ་ཆོས་རྣམས་ཁོག་ནས་རྡོལ་གསུངས་ལྟར། །གཞོན་དུས་བཟུང་བའི་ཆོ་ག་ཆོས་སྤྱོད་སོགས། །གཞུང་དང་བཤད་པ་རྒྱ་ཆེར་བརྗེད་ན་ཡང་། །རྒྱལ་བའི་གསུང་རབ་དོན་དང་མི་འགལ་བའི། །ཆོས་བཤད་ཟླ་བ་ཁ་སྦྲེལ་བྱས་ན་ཡང་། །ཟད་པ་མེད་ཅིང་བསམ་བློ་གཏོང་མི་དགོས། །སྒོམ་བྱུང་ཤེས་རབ་དངོས་ནི་སྐྱེ་དཀའ་
ཡང་། །ཕྱོགས་མཐུན་ཙམ་ཞིག་ཡིན་ནམ་སྙམ་པ་ཡོད། །དེ་ཡང་ཆབ་ཆོབ་ས་ཟིན་རྡོ་ཟིན་མིན། །མདོ་དང་སྔགས་དང་མདོ་སྔགས་ཟུང་འཇུག་དང་། །བཀའ་མ་གཏེར་མ་ཐེག་པ་ཆེ་དང་ཆུང་། །གང་ལ་བཤད་ཀྱང་གཞན་ལ་མ་འདྲེས་པར། །རང་རང་མགོ་རྐང་ཚ་ཚང་བཤད་པར་ཤེས། །ཏུག་གུ་ཕྲེང་དང་བཀང་བཀང་ཀྲད་ཀྲད་མིན། །རྒྱས་དང་བསྡུས་དང་རྒྱས་བསྡུས་རན་པ་སོགས། །ཅི་ལྟར་འདོད་བཞིན་འཕྲལ་དུ་ཡིད་ལ་འཆར། །དེ་ནི་སྒོམ་ཆེན་ལུགས་ཀྱི་བཤད་པ་སྟེ། །པཎྜི་ཏ་ཡི་དཔེ་ཁྲིད་ལྟར་བྱེད་ན། །གཞུང་གི་རྩ་ཚིག་ལག་ཏུ་བཟུང་ནས་ཀྱང་། །དེ་ལ་འགྲེལ་པ་བརྒྱབས་ནས་བཤད་ན་ཡང་། །སྒོམ་ཕྱོགས་སྒྲུབ་པའི་ཕྱོགས་ཀྱི་གཞུང་ཆེ་ཆུང་། །གང་ལ་ཡང་ནི་འགྲེལ་པ་བློ་ནས་ཕོག །སྔར་ནས་མི་དགོས་འཕྲལ་དེར་ཡིད་ལ་ཤར། །རྒན་མོའི་མཛུབ་ཁྲིད་ལྟར་དུ་བཤད་པ་ལ། །གསུང་རབ་ཆོས་ཀྱི་སྐད་ཀྱིས་མི་སྒྲིབ་པར། །ཐ་མལ་སྐྱེ་བོས་གོ་བར་སླ་བ་ཡི། །ཟབ་ཆོས་སེམས་ལ་ཕན་ངེས་འཆད་པར་ཤེས། །རྟོགས་འབུལ་བྱེད་མཁན་མཐོ་དམན་སུ་བྱུང་ཡང་། །དཔེ་རྒྱུད་ཁྲིད་ཡིག་སོགས་ལ་མ་ལྟོས་པར། །འཕྲལ་དུ་བློ་ནས་གེགས་སེལ་བོགས་འདོན་
ཤེས། །ཁྱད་པར་བསྙེན་སྒྲུབ་ལས་སྦྱོར་རིམ་པ་རྣམས། །སྔར་མ་མཐོང་བའི་དཔེ་ཞིག་མཐོང་ན་ཡང་། །ཕྱག་ལེན་གནད་དང་མན་ངག་འཕྲལ་དེར་ཤེས། །ཡི་དམ་སོ་སོའི་དབང་ཀ་རྗེས་གནང་ལའང་། །མི་གོ་བ་དང་མི་ཁོམ་མ་གཏོགས་པར། །སྤྱི་བཤད་མིན་པར་སོ་སོའི་ལོ་རྒྱུས་དང་། །ཕན་ཡོན་འཕྲལ་དུ་སྤྲོ་བ་སྐྱེ་བར་བཤད། །དེ་དག་འཆད་ལ་འབྲེལ་པ་བཞག་པའོ། །དབུས་གཙང་ས་སྐྱ་ར་བ་སྟོད་པ་དང་། །དགེ་ལུགས་ར་བ་སྨད་པ་ཞེས་བྱ་དང་། །བྱམས་པ་གླིང་གི་བོ་དོང་གྲྭ་ཚང་པ། །དགེ་ལུགས་དྭགས་པོ་གྲྭ་ཚང་ཞེས་བྱ་དང་། །ཀར་ལུགས་འོག་མིན་གླིང་དང་ལེགས་བཤད་གླིང་། །གསུང་རབ་རྒྱ་མཚོའི་གླིང་པ་ལ་སོགས་པ། །བགྲོ་གླེང་ཅུང་ཟད་འབྲེལ་པ་བཞག་པ་ཡིན། །ཉིན་བྱེད་གླིང་པའི་རང་དང་མཉམ་པ་དང་། །རང་བས་ལྷག་དང་རང་བས་ཞན་པ་ཡི། །དགེ་འདུན་མང་པོར་བགྲོ་གླེང་འབྲེལ་པ་ཡོད། །ཁྱད་པར་སར་གནས་སེམས་དཔའ་ཆེན་པོ་པ། །སྒོ་མོ་བསམ་གཏན་དཔལ་གྱི་སྐུ་སྐྱེ་དེས། །བདག་ནི་ངག་འཇམ་དེ་ཕྱིར་ང་དང་རྩོད། །ཁམས་སུ་འོང་ཁ་མཚན་ཉིད་སློབ་གཉེར་བསྐྱུར། །སྔགས་སོགས་སློབ་གཉེར་ལྐོག་ཏུ་བྱས་པ་དེས། །ཆོས་
ཁྲིམས་པ་དེས་ང་ལ་ངན་ཡིན་ནམ། །སློབ་གཉེར་འདྲ་འདྲ་མཉམ་མཉམ་མ་གཏོགས་པ། །འཚོག་མང་སྐབས་སུ་བསླང་ར་མེད་པ་ལ། །ཉིན་ཞིག་ཡིད་ལ་མེད་པར་ང་དང་ནི། །མངའ་རིས་བཀའ་བཅུ་སྲུང་མེད་ཅེས་བྱ་བ། །ང་ཡི་ཚད་པ་མེད་པ་མཉམ་དུ་བླངས། །འཚོགས་ཆེན་དབུས་སུ་ཉིན་ཞིག་བགྲོ་གླེང་དགོས། །ཉིན་ཞིག་ཕར་བཏང་རང་གིས་ལན་རྒྱབ་ཅིང་། །ཉིན་ཞིག་ཚུར་བཏང་གཅིག་གིས་ལན་རྒྱབ་པ། །ཐུག་ཚུལ་གསོལ་ཚེ་འཚོགས་པས་ཉན་སྲོལ་ཡོད། །བདག་གིས་ཁོང་གི་ཁ་ཡ་འོང་ས་མེད། །དེ་ཕྱིར་བདག་གིས་འཇམ་དབྱངས་དཀར་པོ་ཡི། །རྩོད་པ་རྒྱལ་བའི་སྔགས་དང་དམིགས་པ་བྱས། །ཁོང་ནི་ཕམ་ཤིང་འཁོར་གསུམ་ང་ཡིས་ལོན། །དྲུང་རམ་པ་དང་གྲོགས་མཆེད་འགའ་རེ་ཡིས། །འཁོར་གསུམ་ལོན་གསུངས་ང་ལ་ལེགས་པོ་མཛད། །ཁམས་སུ་ཕྱིན་ནས་སྐར་མདའི་ཆོས་རྗེ་ནི། །སོ་དང་ཨ་ཀླུ་རེ་ཆུང་རབ་འབྱམས་གསུམ། །སྟག་ཉིན་བཀའ་བཅུ་ཐར་པ་ཞེས་བྱ་དང་། །འབར་གྱི་ཆོས་རྗེ་གླིང་སྟོད་ཆོས་རྗེ་དང་། །འབྲུག་ལུགས་རབ་འབྱམས་པ་ཞིག་ལ་སོགས་པ། །མཚན་ཉིད་དགེ་བཤེས་སུ་དང་མཇལ་བ་ལ། །བགྲོ་གླེང་ཐལ་སྐོར་འགའ་
རེ་འབྲེལ་བ་བཞག །མཚན་ཉིད་མིན་ཡང་ཡོན་ཏན་གང་ཆེ་ལ། །རྩོད་རིགས་འདྲ་བའི་རྒོལ་འབོད་ཁོ་ན་བྱས། །ཡོན་ཏན་ཆེ་བ་རྣམས་ནི་ཐུགས་དགྱེས་མགུ། །ཡོན་ཏན་མེད་པ་ལ་ལས་ཁྲོ་ཚུལ་བསྟན། །རྩོད་རིགས་ལ་ནི་འབྲེལ་པ་བཞག་ཚུལ་ཡིན། །དེ་ནས་རྩོམ་ལ་འབྲེལ་པ་བཞག་ཚུལ་ནི། །བསམ་བཞིན་རྩོམ་པ་ཤུགས་འབྱུང་མགུར་གྱི་ཚུལ། །རྒྱལ་བ་རྒྱ་མཚོའི་བདག་བསྐྱེད་དོན་འགྲེལ་ནི། །གླེགས་བམ་ཧ་ཅང་ཁ་ནི་གྲིམ་པ་ཙམ། །གནམ་ཆོས་རྫོགས་ཆེན་འབྲེལ་པ་པོད་ཆེན་གཅིག །ཀུན་རིག་དཀའ་བའི་གནད་རྣམས་བཀྲོལ་བ་དང་། །ལས་བཞིའི་སྦྱིན་སྲེག་ཕག་མོའི་ཟིན་བྲིས་དང་། །སྐུ་གསུམ་སྒྲུབ་པ་བུམ་སྒྲུབ་ཟིན་བྲིས་སོགས། །དེ་དག་རྣམས་ནི་བསམ་བཞིན་བརྩམས་པ་ཡིན། །མ་བསམ་ཤུགས་འབྱུང་མགུར་སྣ་འགའ་དང་ནི། །ཀ་བསྟོད་སྐོར་དང་རྟགས་ཡིག་ཟིན་བྲིས་སྐོར། །དེ་དག་རྣམས་ལ་པོད་ཆེན་འོང་བར་སེམས། །རྒྱ་བོད་གྲུབ་ཐོབ་བཀའ་བརྒྱུད་གོང་མ་ཡི། །རྣམ་ཐར་དོན་བསྡུས་དད་པའི་རྟེན་རྣམས་དང་། །རྗེས་གནང་མང་པོའི་ལོ་རྒྱུས་མང་དུ་མཆིས། །ཞལ་གདམས་མགུར་དང་སྨོན་ལམ་ལ་སོགས་པ། །སོ་སོར་དོན་གཉེར་མཁན་ལ་སྦྱིན་དང་
བསྐུར་། །ཕྱོགས་གཅིག་མེད་ཀྱང་པོད་ཆེན་ཙམ་གྱི་སྡོས། །སྐུ་གསུམ་སྒྲུབ་པ་ཕག་མོ་ཁྲོ་ཆུ་སོགས། །ཟིན་བྲིས་ལ་བརྟེན་བསྙེན་སྒྲུབ་ཐོན་པ་མང་། །དེ་ཚེ་རྟགས་མཚན་ངོ་མཚར་ཡིད་ཆེས་གྱུར། །ཤུགས་འབྱུང་ཡིད་ལ་གང་དྲན་རྩོམ་པ་ལ། །མདོ་རྒྱུད་མན་ངག་དོན་དང་མི་འགལ་བའི། །མགུར་དང་ཞལ་གདམས་སྨོན་ལམ་ལ་སོགས་ནི། །ཇི་ལྟར་བྲིས་ཀྱང་ཆུ་ལྟར་ཟད་པ་མེད། །རྩོམ་ལ་འབྲེལ་པ་བཞག་པའི་རྣམ་ཐར་ཏེ། །མཁས་པའི་བྱ་བ་འཆད་རྩོད་རྩོམ་གསུམ་སྟེ། །འབྲེལ་པ་བཞག་པའི་སཟླ་བཅུ་གསུམ་པ།། །།དེ་ལྟར་བསྡུ་དངོས་བཞི་དང་འཆད་རྩོད་རྩོམ། །བྱས་པའི་ལག་རྗེས་སློབ་མ་ཐོན་དགོས་པས། །དེ་ལ་ཡང་ནི་རྣམ་པ་མང་བ་སྟེ། །དབང་ལུང་མཎྜལ་ཚུལ་དུ་ཕུལ་བ་དང་། །མཉམ་པོར་ཕན་ཚུན་གདམས་པ་སྤེལ་རེས་དང་། །རང་གིས་ཐོན་པའི་སློབ་མ་མིན་ན་ཡང་། །རང་ལ་འབྲེལ་པ་ཐོབ་པའི་སློབ་མ་དང་། །རང་གི་རྩ་བའི་གྲྭ་པ་མིན་ན་ཡང་། །རང་ལ་དྲིན་ཐོབ་རང་ལ་བླ་མར་འཛིན། །རང་གིས་བཤད་པ་ཉམས་སུ་ལེན་པ་དང་། །རང་གི་རྩ་བའི་གྲྭ་པ་ཡིན་ན་ཡང་། །རང་རྒྱུད་མི་འཛིན་གཞན་རྗེས་འབྲངས་བ་
དང་། །རང་གི་རྩ་བའི་གྲྭ་པས་རང་རྒྱུད་འཛིན། །དེ་སོགས་རྣམ་གྲངས་མང་བའི་སྲོལ་འདུག་པས། །དེ་དག་སོ་སོར་ཟུར་ཙམ་བཤད་པ་ནི། །འོ་བྲན་གདུང་བརྒྱུད་བླ་མ་ཝ་རྒན་ལ། །ཀིང་ཀང་དམར་ནག་ལ་སོགས་ལུང་འགའ་ཕུལ། །དྲུང་རམ་ཀུན་འཕེལ་དྲུང་རམ་འཕེལ་རྒྱས་དང་། །དྲུང་རམ་ཤེས་རབ་ཀརྨ་དབང་པོ་དང་། །དགེ་སློང་ཡང་ཤེས་དགེ་ཚུལ་མཐར་ཕྱིན་དང་། །སོག་པོ་དབུ་མཛད་དང་ནི་དགུ་པོ་ལ། །དབང་ལུང་གདམས་ངག་རྩིས་སོགས་བསླབ་པ་ཡི། །འབྲེལ་པ་ཐོགས་པའི་སློབ་མ་སྔ་ཤོས་ཏེ། །དབུས་སུ་གྲྭ་ས་འགྲིམས་པའི་དུས་ཡིན་ནོ། །ཁམས་སུ་ཕྱིན་ནས་ལོ་གྲངས་བཅུ་གསུམ་བར། །འབྲེལ་པ་ཐོགས་དང་རྩ་བའི་སློབ་མ་ནི། །རང་གི་ནུ་བོ་ཆོས་དབང་ཀུན་བཟང་དང་། །ཕྲིན་ལས་གཉིས་ནི་རྩ་བའི་བླ་མ་བྱུང་། །བཀའ་ཆེན་རྣམ་དག་བཀའ་བཅུ་མཁའ་མཉམ་དང་། །དྲུང་རམ་ཡིད་འོང་དགེ་བཤེས་བརྩོན་འགྲུས་བཞི། །གྲྭ་ས་གཅིག་དང་མཆེད་གྲོགས་ཡིན་པ་ལ། །དབང་ལུང་ཕུལ་ཞིང་དབང་དང་རྗེས་གནང་བསླབས། །བདག་གིས་དྲིན་ཐོབ་འགྲོ་དོན་བྱུང་བའོ། །འབྲུག་པ་དབུ་མཛད་ཕྲིན་ལས་དགེ་བ་དང་། །དྲག་པ་དབང་ལྡན་ཆོས་
ལྡན་རབ་འབྱོར་དང་། །ཟུར་མང་ཀུན་དྲག་ཀརྨ་རིན་ཆེན་དང་། །ཨ་གྲོ་བློ་གྲོས་ལ་སོགས་དྲུང་པའི་འཁོར། །བླ་མ་གུ་རུ་ཀུན་དགའ་ཉི་མ་དང་། །སྐྱོ་ཐུ་བླ་མ་དང་ནི་དཔལ་བཟང་གཉིས། །བླ་མ་པདྨ་པདྨ་དབང་དྲག་བཅས། །བདག་ལ་དབང་ལུང་མང་དུ་ཞུས་པའོ། །དེ་ནས་ལོ་གྲངས་བཅུ་གསུམ་མཚམས་བསྡམས་ཚེ། །ལོ་གསུམ་མཚམས་ཀྱི་ཁས་ལེན་བྱེད་པ་ལ། །ཉི་མ་གཉིས་གསུམ་ཙམ་ལ་མཚམས་ཁུང་དུ། །ངག་བཏང་དབང་ལུང་ཉེར་མཁོ་བྱེད་པ་ལ། །སེམས་ངོ་ཉམས་ཁྲིད་སྙིང་ནས་འདོད་པ་ལ། །དམིགས་པ་རྡུལ་བྱང་ངོས་ནས་སྤྱོད་ནས་ནི། །བདུན་ཕྲག་རེ་ཟུང་ཙམ་རེ་ཁྲིད་སྐྱོང་བ། །མཚམས་ཁུང་ཉིད་ནས་སློབ་མ་ཐོན་པ་ནི། །པདྨ་རིག་འཛིན་ལོ་དྲུག་མཚམས་བསྡམས་ནས། །རྟོགས་པ་སྐྱེས་ཤིང་འགྲོ་དོན་ནུས་པ་བྱུང་། །དོན་གྲུབ་ལོ་གསུམ་མཚམས་བསྡམས་བླ་མ་བྱུང་། །མཐར་ཕྱིན་ལོ་གསུམ་མཚམས་བསྡམས་བླ་མ་བྱུང་། །སྤྲུལ་སྐུ་མི་འགྱུར་རྡོ་རྗེ་ངོས་འཛིན་དང་། །ཁྲི་འདོན་བྱས་ཤིང་མཚམས་ཁུང་ནང་དུ་བཙུད། །དབང་ལུང་ཕུལ་ཞིང་ལོ་ནི་གསུམ་བར་དུ། །སྒྲུབ་པ་མཉམ་དུ་བྱས་པས་གནམ་ཆོས་རྡོལ། །ངོ་མཚར་ཡ་མཚན་པད་
འབྱུང་བསྟན་པའི་སྲོག །གནས་སྒོ་མང་ཕྱེས་འགྲོ་བའི་བླ་མར་གྱུར། །ཡང་དག་ལོ་གསུམ་མཚམས་བསྡམས་བླ་མ་བྱུང་། །ལྟ་སྒོམ་ལྷུན་གྲུབ་ལོ་གསུམ་མཚམས་བསྡམས་ནས། །རྨི་ལམ་ཡུལ་དུ་བདག་གིས་ཇ་བྱིན་པས། །ཇ་ལ་ཟད་རྒྱུ་མེད་པ་བྱུང་ཟེར་ཞིང་། །རེ་ཞིག་ལུས་ཀྱང་བདེ་ཞིང་བླ་མ་བྱུང་། །ཨོ་རྒྱན་རིག་འཛིན་ལོ་གསུམ་མཚམས་བསྡམས་ཀྱང་། །བླ་མ་མ་བྱུང་སྔགས་པ་ནུས་ལྡན་བྱུང་། །ཀརྨ་རྣམ་རྒྱལ་ལོ་གསུམ་མཚམས་བསྡམས་པས། །ཉམས་རྟོགས་འཕེལ་ཞིང་བླ་མ་བྱུང་སོང་ངོ་། །སྐྱོ་ཐུ་བླ་མར་བར་ཆད་འགའ་བྱུང་ནས། །ཡུལ་དུ་མི་སྡོད་འཁྱམས་འདོད་ཟེར་བྱུང་བས། །མཚམས་ལ་བཞུགས་ན་ལེགས་པའི་ཞལ་གདམས་དང་། །ཕྱག་ཆེན་སྔོན་འགྲོ་དང་ནི་དངོས་གཞི་དང་། །སྐུ་གསུམ་སྒྲུབ་པའི་ཟིན་བྲིས་བསྐུར་བ་ཡིས། །ལོ་དགུར་མཚམས་བསྡམས་ཐུགས་དམ་འཕེལ་བ་དང་། །སྒྲུབ་པ་ཆེ་དང་མཉམ་ཞིང་འདས་རྟགས་བཟང་། །བཀའ་བཅུ་མཁའ་མཉམ་ལོ་ནི་ཉེར་དགུ་ཙམ། །ལོ་རེ་ཟླ་ཕྱེད་ཙམ་ལ་ལྡོམ་བུ་བྱས། །དེ་མིན་རྟག་ཏུ་སྐུ་མཚམས་ཐུགས་དམ་འཕེལ། །ད་ནི་ཚེ་དང་སྒྲུབ་པ་མཉམ་པར་ངེས། །དགེ་སློང་བཀྲ་ཤིས་ཟླ་བ་ལྔ་དྲུག་ཙམ། །ཕག་མོའི་
ཟིན་བྲིས་ཉམས་བླང་ལམ་སྣ་ཟིན། །ཞལ་གདམས་ཡི་གེ་བསྐུར་བ་ལ་བརྟེན་ནས། །སེམས་ངོ་འཕྲོད་དང་བོགས་སྐྱེད་བྱུང་བ་ནི། །མང་པོ་བྱུང་བར་འདུག་སྟེ་བྲིར་མི་ལོངས། །དམིགས་པ་བསྟབ་པ་ལ་སོགས་བྱས་པ་ཡིས། །ཁོ་རང་ཚོ་ལ་དེ་རྟགས་རྨིས་ལྟས་དང་། །བཅས་ཏེ་ནད་གདོན་ཞི་བ་འགའ་བྱུང་སྣང་། །ཆར་རྫས་བཀྲམ་ཞིང་བཀའ་སྒོ་དམིགས་པ་ལ། །བརྟེན་ནས་ཆར་པ་ཁུག་པ་ལན་མང་བྱུང་། །རི་པ་བག་ཡོད་ཟླ་གསུམ་མཚམས་བསྡམས་ནས། །ཁྲོ་ཆུའི་ཟིན་བྲིས་ཉམས་སུ་བླངས་བ་ཡིས། །ནུས་པ་ཆེ་བའི་གྲགས་ནི་ཆེན་པོ་ཐོབ། །བར་སྒོ་དབོན་པོ་ལ་ཡང་བླ་མ་བྱུང་། །བླ་མ་མཆེད་གྲོགས་ཡོན་བདག་ལ་སོགས་ཀྱིས། །ཐུགས་དམ་སྐྱབས་མཇུག་དམིགས་རིམ་དགོས་ཟེར་ནས། །རྒྱུན་དུ་བྱས་རྣམས་བདེ་ཞིང་ལེགས་པར་གྱུར། །དེ་ནི་མཚམས་ཀྱི་ཁུང་ནས་འགྲོ་དོན་དང་། །སློབ་མ་ཐོན་པོ་བྱུང་བའི་རྣམ་ཐར་ཡིན། །དེ་ནས་ཁྱི་ཡི་ལོ་ལ་མཚམས་གྲོལ་ནས། །བྱི་བའི་ལོ་ཡི་ཕྱེད་བར་འགྲོ་དོན་ནི། །ཕྱི་ཡི་རྣམ་ཐར་ནང་དུ་གསལ་ལྟར་ལས། །ཁྱད་པར་འགྲོ་བའི་སྐྱབས་གཅིག་བསྟན་པའི་རྒྱན། །རྗེ་འབངས་སོག་པོ་ལྷ་དཔལ་སྤྲུལ་པའི་སྐུ། །ལྷོ་པ་
སྤྲུལ་སྐུར་གསང་འདུས་དབང་དང་ལུང་། །ཆོས་ནི་མཎྜལ་ཚུལ་དུ་ཡར་ཕུལ་ནས། །ཁོང་གིས་སོག་ཟམ་སྤྱང་རི་ནང་སོ་ལ། །གནང་ནས་བུམ་སྒྲུབ་གསར་དུ་བཙུགས་ནས་ཀྱང་། །དགེ་འདུན་འཚོགས་པ་བརྒྱ་དང་བཅུ་ཙམ་གྱིས། །ཡིག་དྲུག་དུང་ཕྱུར་གཉིས་ཙམ་སྟབས་ཅིག་འགྲུབ། །རིལ་བུ་འཕེལ་ཞིང་འཇའ་ཡི་ཀ་བ་ཡང་། །ཀུན་གྱིས་མཐོང་བ་ངོ་མཚར་ཡིད་ཆེས་གྱུར། །འདིས་ནི་གསང་འདུས་བསྟན་པ་སླར་ཡང་གསལ། །འབའ་རོམ་བཀའ་བརྒྱུད་ཆོས་ཀྱི་མཛོད་འཛིན་པ། །ཤོར་ཕུ་དགེ་བཤེས་བསྙུང་བའི་སྐུ་རིམ་ལ། །དབང་ཀ་འགའ་ཟུང་བརྟན་བཞུགས་ལ་སོགས་ཕུལ། །འཕྲལ་དུ་བདེ་བའི་དྲག་སྐྱེད་མ་བྱུང་ཡང་། །རིམ་གྱིས་བདེ་ཞིང་འབའ་རོམ་བཀའ་བརྒྱུད་ཀྱི། །ཆོས་རྒྱུད་མི་འཆད་ཙམ་གྱི་རྟེན་འབྲེལ་འགྲིགས་། །སྟོང་ནག་བླ་མ་ཀར་མ་དབང་ཕྱུག་ལ། །དག་སྣང་དབང་འབྲེལ་ཕན་ཚུན་ཞུ་རེས་བྱས། །ཆོས་ཀྱི་རྒྱལ་པོ་རིན་ཆེན་རྣམ་རྒྱལ་དང་། །ཚང་སར་བླ་མ་སྐུ་མཆེད་ཁུ་དབོན་དང་། །དཀྱིལ་ཚ་བླ་མ་ཚབ་ཤི་བླ་མ་དང་། །ཁོར་ཁོ་བླ་མ་མགོན་པོ་བླ་མ་དང་། །འཇངས་གྲ་བསམ་གཏན་རྒྱ་མཚོ་ངེས་འབྱུང་བ། །ཀརྨ་ཡེ་ཤེས་ཀརྨ་ལེགས་གྲུབ་པ། །རེ་པ་
ཡང་དག་དབོན་པོའི་བླ་མ་གཅིག །སྟོང་ནག་སྐུ་སྐྱེ་འཇའ་མོ་སྐུ་སྐྱེ་དང་། །ཚེ་འབྲོམ་སྐུ་སྐྱེ་དགེ་བཤེས་ལྷ་མཛེས་དང་། །ཆུ་བར་བླ་མ་ཆུ་བར་དགེ་སློང་དང་། །ས་སྐྱ་པ་ཡི་བླ་མ་དགེ་སློང་གཉིས། །དགའ་ལྡན་པ་ཡི་དགེ་སློང་དགེ་ཚུལ་འགའ། །འབྲུག་པའི་བླ་མ་དགེ་འཕེལ་ཞེས་བྱ་དང་། །སྟག་ལུང་བྱ་བཏང་མངོན་དགའ་ཞེས་བྱ་དང་། །མངའ་རིས་གྲུབ་ཐོབ་ཨོ་རྒྱན་ཞེས་བྱའི་མིང་། །ཁ་བ་དཀར་པོའི་རྟོགས་ལྡན་རས་རྐྱང་བ། །ཝ་པ་སྐུ་སྐྱེ་བླ་མ་ཡབ་སྲས་གསུམ། །གླིང་རུ་དགེ་སློང་སོ་རག་དགེ་སློང་གཉིས། །དེ་དག་དབང་བསྐུར་ཆོས་བཤད་བྱེད་པ་ཡི། །ལ་ལ་གོ་ས་ཆེན་པོར་བཞུགས་པ་དང་། །ལ་ལ་དབང་ཀ་རྗེས་གནང་བྱེད་ཙམ་གྱི། །བླ་མའི་མཚན་ཐོགས་རྣམས་ལ་བདག་གིས་ནི། །དབང་ལུང་ཕུལ་བའི་འབྲེལ་ཐོགས་སློབ་མའོ། །བླ་མིང་མེད་ཀྱང་བླ་མ་འདྲ་བ་ཡི། །རྟོགས་ལྡན་དང་ནི་དབོན་པོ་དགེ་སློང་དང་། །དགེ་ཚུལ་ལ་སོགས་རབ་ཏུ་མང་བ་སྟེ། །དབང་ལུང་འབྲེལ་ཐོགས་ཙམ་ནི་དཔག་མེད་ཀྱང་། །ཕལ་ཆེར་བདག་གིས་མིང་དོན་མི་ཤེས་སོ། །ཆེ་ལོང་ཀརྨ་རི་གླིང་ལྷ་སྟེང་དང་། །རེ་ནེ་དགོན་པ་སོ་རག་གསའ་འགུས་པ། །མི་
གཡེལ་ཉང་ཆེན་སྟེང་པ་ཡོར་མིག་པ། །ཙོང་མདའ་དགོན་པ་ལ་གོང་དགོན་པ་དང་། །རྟ་རྣ་དགོན་པ་དང་ནི་དྲུང་པ་ཡི། །རྒྱབ་རེས་འདུག་པའི་གྲྭ་པ་ཐམས་ཅད་དང་། །དེ་དག་ནང་དུ་བླ་མིང་མ་ཐོགས་ཀྱང་། །རྟོགས་པར་ལྡན་པའི་དགེ་བཤེས་ཚད་ལྡན་མང་། །སྐྱབས་སྡོམ་ཚངས་སྤྱོད་དགེ་བསྙེན་བྱས་ནས་ཀྱང་། །སྔ་ཕྱིར་གསར་དུ་སྐྲ་ཕུད་བླངས་བ་ནི། །དེ་སྔ་ཕན་ལ་དྲུག་ཅུ་རེ་ལྷག་ཙམ། །རབ་བྱུང་དགེ་ཚུལ་བསྒྲུབས་པ་དྲུག་ཅུ་རེ། །བསྙེན་པར་རྫོགས་པ་བསྒྲུབས་པ་བཅུ་བདུན་བྱུང་། །འབོ་ཇོ་མན་ཆད་ཆབ་མདོ་ཡན་ཆད་དུ། །ས་ཁོལ་ཅུང་ཟད་ལུས་སྲིད་མ་གཏོགས་པ། །གར་ཕྱིན་རྔ་རྡུང་ཕྲེང་ཐོགས་སྔགས་པ་ནི། །བདག་གི་སློབ་མར་མ་གྱུར་སྲིད་ཙམ་སྟེ། །ལ་ལས་ཐོབ་པའི་ཞི་དྲག་རྟ་མགྲིན་སོགས། །ཟླ་མཚམས་འགའ་ཟུང་ཐོན་པ་གྲངས་མང་ཞིང་། །ཕལ་ཆེར་རྒྱུན་བསྙེན་གཏོར་བསྔོས་མདོས་ཟློག་བྱེད། །གྲངས་ནི་མང་བས་ཡིད་ལ་མ་ངེས་སོ། །བཙུན་མ་འདི་དག་མཐར་ཐོན་དཀའ་འདུག་པས། །སྐྲ་ཕུད་མ་ལེན་ཟེར་མཁན་འགའ་བྱུང་ཡང་། །ཉམས་ལས་མ་ཐོབ་ཉེས་པ་ཆེ་གསུངས་ཕྱིར། །རྒན་པ་རྣམས་ལ་ཚངས་སྤྱོད་དགེ་བསྙེན་མ། །གཞོན་ནུ་ཁ་མཆུ་མེད་
ཅིང་ཞེ་ཐག་པས། །ཆོས་འདོད་རྣམས་ལ་སྣ་འགའི་དགེ་བསྙེན་མའི། །སྡོམ་ལུང་བྱིན་འདི་ཐབས་མཁས་འགྲོ་དོན་ཡིན། །ཁ་གྲངས་མང་བས་དུ་ཡོད་མ་ཤེས་སོ། །ཁྲིད་ཀྱི་དུས་སུ་གནས་འགྱུ་གསར་འཕྲོད་དང་། །སྔར་ནས་ཤེས་ལ་བོགས་སྐྱེད་ཐོན་པ་དང་། །ཉམས་རྟོགས་སྐྱེས་ལ་ས་མཚམས་ཕྱེ་བ་དང་། །ཉམས་ལ་ཞེན་པའི་ཉམས་དེ་བཤིགས་པ་དང་། །ཉམས་ཞིག་ཐེ་ཚོམ་སྐྱེས་ལ་ངོ་སྤྱོད་དང་། །བསྙེན་སྒྲུབ་འདོད་ལ་ཕྱག་ལེན་ངག་ཁྲིད་དང་། །ས་རྩིས་ལ་སོགས་ནོར་འཁྲུལ་བསལ་བ་དང་། །སྡིག་ཆེན་འགའ་ཞིག་ཆོས་ལ་བློ་འགྱུར་དང་། །གཞན་ལུགས་སྐུ་ཆོས་མཐོ་བ་ལ་ལ་ཡིས། །ལྐོག་ཏུ་དབང་འབྲེལ་ཆོས་འབྲེལ་ཞུ་བ་དང་། །མཚམས་དང་བསྙེན་སྒྲུབ་དམ་བཅའ་འབུལ་བ་དང་། །སྐྱེ་བོ་སྡིག་ཆེན་སྡིག་པ་སྤངས་བ་དང་། །ནད་དང་གདོན་གྱིས་ཉེན་ནས་བསྙེན་སྒྲུབ་དང་། །ཆར་འབེབས་སེར་སྲུང་མདོས་ཟློག་བསྐང་བ་དང་། །དབང་བསྐུར་ཆོ་ག་རྒྱུན་བསྙེན་སྒྲུབ་པའི་སྐོར་། །གཅོད་ཚོགས་རོ་བཤའ་མཐའ་གཏད་ལ་སོགས་པ། །ཕན་བྱ་སྣ་ཚོགས་ལག་ཁྲིད་ངག་ཁྲིད་སོགས། །གང་ལ་གང་ཕན་འགྲོ་དོན་དགའ་རབ་བྱུང་། །གཞན་དོན་བྱས་པའི་
ལག་རྗེས་སློབ་མའི་ཚོགས། །ཐོན་པའི་སགྲྭ་འདི་ནི་ཐ་མའོ།། །།དེ་ལྟར་རྣམ་ཐར་སྤྱི་ཡི་དོན་བཤད་འདི། །དཔེ་ལྟར་བྱས་ཤིང་གཞན་དང་མ་བསྟུན་པར། །འཕྲལ་དུ་གང་དྲན་ཐོལ་བྱུང་བྲིས་པའི་ཕྱིར། །མདོ་རྒྱུད་ལུང་དང་འགལ་ན་བཟོད་པར་གསོལ། །སེམས་ཅན་ལགས་པས་འཁྲུལ་པ་ལོས་འོང་བས། །དེ་ལ་ཐུགས་ཁྲེལ་མ་གནང་བཟོད་པ་བཞེས། །དགེ་བ་མཆིས་ན་མ་རྒན་སེམས་ཅན་ཀུན། །བླ་མེད་རྫོགས་བྱང་མྱུར་ཐོབ་ཕྱིར་དུ་བསྔོ། །འདི་ནི་རང་ལོ་ཕྱེད་དང་ང་གསུམ་པ། །ལྕགས་ཕོ་བྱི་བའི་ལོ་ཡི་དབྱར་འབྲིང་བ། །ས་ག་ཟླ་བའི་ཡར་ཚེས་བརྒྱུད་ནས་བརྩམས། །མཚམས་ཁུང་བསྙེན་པ་ཡང་ནི་མ་ཤོར་བར། །སྣོན་གྱི་ཟླ་བའི་དམར་པོའི་ཚེས་བཅུ་ལ། །གླེགས་བམ་ལེགས་པར་ཚར་བར་བྲིས་པའོ། །མངྒ་ལཾ།། །། ༧ ཁམས་སྟོད་སྒོམ་སྡེ་ནང་ཆེན་འབང་སྒང་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།