དགེ་སློང་རཱ་ག་ཨ་སྱའི་རང་ལོ་ང་དྲུག་ནས་རེ་གསུམ་བར་གྱི་ཕྱི་ཡི་རྣམ་ཐར་ཧྲག་བསྡུས་སྙན་ངག་བསྟོད་པ་དང་བཅས་ཁེངས་སྐྱུང་མེད་པའི་དྲངས་གཏམ།
༄༅། །དགེ་སློང་རཱ་ག་ཨ་སྱའི་རང་ལོ་ང་དྲུག་ནས་རེ་གསུམ་བར་གྱི་ཕྱི་ཡི་རྣམ་ཐར་ཧྲག་བསྡུས་སྙན་ངག་བསྟོད་པ་དང་བཅས་ཁེངས་སྐྱུང་མེད་པའི་དྲངས་གཏམ་བཞུགས་པའི་དབུ་ཕྱོགས།
༄༅། །ན་མོ་གུ་རུ་ལོ་ཀེ་ཤྭ་ར་ཡེ། །དགེ་སློང་རཱ་ག་ཨ་སྱ་བདག །རང་ལོ་ང་དྲུག་ལོ་ཡི་མཇུག།མགོ་ཡི་ཟླ་བའི་ཉེར་གསུམ་ཉིན། །རང་ལ་བཀའ་དྲིན་ཆེ་བ་ཡི། །སློབ་དཔོན་ཀརྨ་དོན་ཡོད་ཀྱིས། །འདས་པའི་དུས་མཆོད་ལ་དམིགས་ནས། །བུམ་སྒྲུབ་རྒྱུན་ཁྱེར་མགོ་བཙུགས་ནས། །ཚེ་མཚམས་བྱེད་པའི་དམ་བཅའ་ཡིས། །ཕུགས་གཏོར་རྣམས་ཀྱང་ཚང་བར་བཅས། །གཏོར་བསྔོ་རྒྱས་པར་བྱས་པའི་ནུབ། །ཉམས་ཀྱི་སྣང་བར་ཤར་ལྷོ་ཡི། །ནམ་མཁར་ཉི་མའི་དཀྱིལ་འཁོར་མཐོང་། །དེ་ནུབ་དངོས་སུ་མར་མེ་འཛིན། །དེ་ནས་སྒྲུབ་པ་བྱས་ཚུལ་དང་། །སྒྲུབ་
པའི་རྟགས་མཚན་རྨིས་ལྟས་སོགས། །འདི་རུ་མི་བཀོད་ལོགས་སུ་གསལ། །ཁོ་བོ་མཚམས་ནི་བསྡམས་མ་ཐག །རང་གི་ཉེ་གནས་མ་ཕམ་དེ། །ལོ་མང་གོང་ནས་འཆི་ལྟས་མང་། །ད་ལོ་སྐག་ཀྱང་ཆེ་བ་སྟེ། །ཕ་ཡུལ་ཕྱོགས་སུ་འགྲོ་ཟེར་བ། །ཁོ་ལ་སྐག་ཆེན་ཡོད་པར་ཤེས། །རེ་ཞིག་མ་འགྲོ་བྱས་ནས་བཤོལ། །ཞག་འགའ་སོང་ནས་ནད་ཀྱིས་ཐེབས། །ཀརྨར་བསྐང་གསོ་འཛུགས་པ་དང་། །སྲུང་ཟློག་མཚོན་ཆ་འཁོར་ལོ་དང་། །ལྷ་མོའི་རིམས་ཟློག་སོགས་བྱས་ཀྱང་། །མ་ཕན་ཚེ་ལས་འདས་གྱུར་པ། །ཞབས་དྲུང་མདུན་དུ་རྟ་གཅིག་ཕུལ། །ཟླ་གཅིག་
ཙམ་དུ་ཕྱིར་ལྡོག་དང་། །བྱང་བུ་བསྔོ་སྨོན་བདག་གིས་བགྱིས། །གྲངས་མང་མགོན་པོའི་མདོས་ཆེན་དང་། །རང་གིས་གཏོར་ཟློག་ལ་སོགས་བྱས། །ཆོ་འཕྲུལ་ཆེན་པོའི་ཡར་ངོ་ལ། །གྲྭ་མང་དཔོན་སློབ་ཉི་ཤུ་ཡིས། །ཚེ་སྒྲུབ་གསང་འདུས་ནང་སྒྲུབ་བཙུགས། །ཉི་མ་དགོང་ཆེན་རེད་པ་དང་། །ང་ཡི་ཁང་པ་ལ་གནོད་པའི། །ས་ཞག་རྐོ་བ་འདྲ་བ་བཤུས། །ག་ཤེད་འགྲོ་དགོས་སྐག་ཡིན་ཟེར། །ལྷམ་ཞིག་བདག་ལ་བཀོན་ཤོམ་ལ། །དེ་མ་ཐག་ཏུ་ལྷམ་མེད་སོང་། །རང་ཉིད་གྱེན་དུ་སོང་བ་དང་། །བུད་མེད་རྒྱན་ལྡན་འབུལ་བ་བཤོམ། །ཚར་ནུབ་གུར་དྲག་བྱིན་འབེབས་དེ། །འཆམས་གོས་ལ་སོགས་ཡོད་སྣང་གིས། །བྲོ་གར་བྱས་པས་བྱིན་ཕབ་ནས། །ཡིད་ལ་མི་ཟིན་པ་འདྲ་བྱུང་། །ཇ་འདྲའི་དམར་སེར་དྲངས་བྱུང་དང་། །སྙེ་མ་སྒྲོ་གང་ཕུལ་བྱུང་དང་། །ཐུགས་རྗེ་ཆེན་པོའི་ལྡེར་སྐུ་ནི། །ཕྱག་བརྒྱད་གསེར་གྱིས་བྱུག་པ་ཞིག །རང་གི་ལག་ཏུ་གདའ་བ་དང་། །རྟ་ཞོན་ག་ཤེད་འགྲོ་དགོས་ཟེར། །མི་འགྲོ་འདུག་པའི་དམ་བཅའ་བྱས། །ལར་ནི་རྐྱེན་ཁ་ཡོད་རྟགས་མང་། །སྔགས་གསུམ་ཆིག་འབུམ་སུམ་སྟོང་བཟླས། །ཞག་བདུན་བསྒྲུབས་པ་ཚར་བའི་
ནུབ། །ནམ་མཁའ་འཇའ་ཡིས་གང་གདའ་ཟེར། །སྦྲུལ་ལོ་དེ་ལ་མཚམས་ཀྱང་དམ། །དེ་ཡི་ལོ་མཇུག་དྲག་ལུ་འདས། །འཕོ་འདེབས་བྱང་བུ་བསྔོ་སྨོན་དང་། །གཤེགས་རྫོངས་རྣམས་ཀྱང་ལེགས་པར་གྲུབ། །རྟ་ལོའི་དཔྱིད་ལ་ཆོས་དབང་བསྙུངས། །རིམ་གྲོ་སྨན་དཔྱད་གཟབ་ན་ཡང་། །དུས་ཀྱི་འཆི་བ་ག་ལ་བཟློག །རྟ་དྲེལ་ཁྲབ་སོགས་གཙོར་བྱས་པའི། །རི་བཤུ་དགོངས་རྫོ་གས་ལེགས་པར་གྲུབ། །གདུང་རྟེན་རྒྱལ་བ་རྒྱ་མཚོ་ཡིས། །ལྡེར་སྐུ་མི་ཚད་ལས་ཆེ་བ། །གསེར་གྱིས་བརྗིབ་གཡོགས་བྱས་པ་འགྲུབ། །དེ་ཚེ་མཚམས་ཡང་མ་བཀྲོལ་བར། །རྡོག་མཚམས་ཁོ་ནས་གཤེགས་རྫོངས་གྲུབ། །ཚེ་དཔག་མེད་དང་སྨན་བླ་གཉིས། །མི་ཚད་ལས་ནི་ཆེ་བ་ཙམ། །གསེར་གྱིས་བརྗིབ་གཡོགས་བྱས་པ་དང་། །དེ་བཞིན་སྒྲོལ་མ་དཀར་མོའི་སྐུ། །མི་གཞོན་ལངས་བའི་ཚད་ཙམ་པ། །དངུལ་གྱིས་བརྫིབ་གཡོགས་བྱས་པ་བཞེངས། །བདུད་འདུལ་རྡོ་རྗེའི་སྐུ་ཞབས་ནས། །ཤོག་ཕུད་ཁུག་སོར་བཞི་ཡོད་པ། ༈ །ཟབ་གསང་རྡོ་རྗེ་ཆེན་པོའི་དྲུང་དུ། །དེ་ནས་མཐོ་དམན་སོར་བཞི་བཞག །ཞུ་བ། དེར་གནས་དུས་བཟང་པོ་འཚོ་ལས་ཆེ། འདི་
ཕྱོགས་བྲལ་བ་ཡང་། །དམ་ཉམས་སྒང་དྲུང་གི་སྦྱོར་གྱི་རྐྱེན། སྒྱུ་མ་ལུས་ཀྱི་རྫུན་ཁང་འདི། བརྡེབ་ལ་ཉེ་རུ་གནས། དུས་ངན་སྙིགས་མ་རྩུབ་འགྱུར་དུས་འདིར། དུས་ཀྱི་འཕོ་འཆུགས་གང་འདྲ་འོང་ཆ་མེད་པས། ཉིད་སྐུ་རིམ་གཉིས་ཀྱི་ངོས་ནས། བཅད་རྒྱ་དམ་པར་སྐུ་མཚམས་ལ་བཞུགས་ན་ཨེ་ཐད་སྙམ། ཞེས་པའི་ཡི་གེ་སྟོང་མིན་དམ་རྫ་ས་ཁྱད་འཕགས་སོ་སོའི་རྟེན་འབྱར་དང་བཅས་ཞུ་ཡིག །ཅེས་པ་ཞུ་ཡིག་བཀའ་ཤོག་ཐེལ་དམར་མནན་པ་ཕེབས། དེ་ཕྱིར་མཚམས་ཀྱང་དམ་སྟེ་འདུག་པའི་སྐབས། །ལུག་ལོའི་དཔྱིད་སོས་སྤྲུལ་སྐུ་བསྙུང་བ་ཐོས། །སྔ་ཕྱིར་སྲུང་ཟློག་དམིགས་རིམ་གཟབ་ན་ཡང་། །སྙིགས་དུས་འགྲོ་བ་བསོད་ནམས་དམན་པའི་མཐུས། །སྤྲུལ་པའི་སྐུ་ཡི་དཀྱིལ་འཁོར་དབྱིངས་སུ་བསྡུས། ཟླ་ཤས་ཙམ་ལ་དགོངས་རྫོགས་ཆོ་ག་དང་། །གདུང་རྟེན་གུ་རུ་དྲག་པོའི་སྐུ་འདྲ་བཞེངས། །སྣང་མཐའི་ལྡེར་སོ་མི་ཚད་ལས་ཆེ་བ། །དེ་ནས་གསེར་གྱིས་བརྫིབ་གཡོགས་བྱས་པ་དང་། །བདེ་གཤེགས་མཆོད་རྟེན་བརྒྱད་པོ་མདའ་ཚད་ཙམ། །དེ་ནི་དངུལ་གྱིས་བརྗིབ་གཡོགས་བྱས་པ་བཞེངས། །དབོན་པོ་རྒྱལ་མཚན་དཔོན་སློབ་འགའ་ཞིག་བཅོས། །སྨུག་
སང་ཕེབས་ནས་གདུང་བཞུས་འདས་མཆོད་དང་། །སྒར་གཞིས་ཚུར་ལ་གདན་འདྲེན་དོ་དམ་བྱས། །དེ་ནས་མཚམས་ཀྱང་བསྡམས་པའི་ལུགས་བྱས་ནས། །བུག་སྒོ་ཆོས་བཤད་དབང་ལུང་བཀའ་བསྒོ་སོགས། །ཤིན་ཏུ་ཆོས་སྒོ་དོགས་པའི་ལུགས་སུ་བྱས། །དེ་ནས་ཀཿཐོག་དགོན་དང་དགོན་ལག་དང་། །འབྲི་ཆུ་རྒྱུད་དང་གླིང་ཚང་གོ་འཇོའི་ཕྱོགས། །ཚ་བ་སྟོད་སྨད་དགེ་རྒྱས་འབྲོང་པ་སོགས། །ཐག་རིང་ཚུགས་མ་མང་པོའི་སོ་རྣམས་ནས། །རབ་བྱུང་བསྙེན་རྫོགས་དགེ་ཚུལ་ཞུ་མི་དང་། །དབང་འབྲེལ་ཆོས་འབྲེལ་གནམ་ཆོས་ཞུ་མི་དང་། །རེས་འགའ་ཉུང་ངུ་རེས་འགའ་མང་པོ་འཚོགས། །རྒྱུན་ཆད་མེད་པ་འདྲ་བ་བྱུང་རྣམས་ལ། །ཕྱག་རྟེན་ཡོད་མེད་སོགས་ལ་མ་ལྟོས་པར། །གང་ལ་གང་ཕན་དབང་ལུང་ཁྲིད་ལ་སོགས། །བུག་སྒོ་ཆོས་བཤད་ཚུལ་དུ་རེ་འདོད་བཀང་། །གོ་འཇོ་སྐུ་སྐྱེ་པདྨ་འོད་ཟེར་བ། །དཔོན་སློབ་ཉི་ཤུ་རྩ་ལྷག་དང་བཅས་པས། །ཇ་ཡི་འབུལ་བ་ཇ་རྩིག་ལོང་བ་སོགས། །འབུལ་ཆེན་བཀྱགས་ཤིང་གནམ་ཆོས་ཡོངས་རྫོགས་ཞུས། །དྲག་རིམ་རྣམས་ཀྱིས་བསྙེན་རྫོགས་སྒྲུབ་པ་དང་། །མང་མ་རྣམས་ཀྱང་རབ་བྱུང་དགེ་ཚུལ་བྱས། །རྒྱ་
བན་དབོན་པོ་སློབ་མ་མང་པོ་དང་། །སངས་རྒྱས་རིན་ཆེན་ཚང་གི་དབོན་པོ་རྣམས། །དེ་དག་རྣམས་ལ་དགེ་ཚུལ་དགེ་སློང་དང་། །སོ་སོར་འདོད་ཆོས་དབང་ལུང་མང་དུ་སྤེལ། །སྟག་ར་སྤྲུལ་སྐུ་སློབ་དཔོན་མང་པོར་བཅས། །སྐྱེལ་པོ་མགོ་དང་སྐྱ་ཐང་ལ་སོགས་ཀྱིས། །གོ་འཇོའི་བླ་མ་མང་པོ་ཕེབས་པ་དང་། །སྒྲོ་བྲག་བླ་མ་སྒྲིས་སྣ་བླ་མ་དང་། །བླ་ཚང་བླ་མ་འཁྲུལ་ཞིག་དབོན་པོ་སོགས། །ཕྱོགས་ཕྱོགས་ཀུན་ནས་བླ་མགོ་མང་པོ་རྣམས། །རིམ་པར་ཕེབས་ལ་སོ་སོར་དབང་ལུང་བྱས། །ཁྱད་པར་ལུག་དང་སྤྲེལ་གྱི་ལོ་མཚམས་ལ། །དྲུང་པ་སྒྲུབ་བརྒྱུད་བསྟན་པ་རྣམ་རྒྱལ་གྱིས། །སྒར་ཆེན་བབ་ཅིང་ཟླ་བ་གཅིག་གི་བར། །ཉིན་རེ་ཁྲོམ་ལ་ཆོས་ཐུན་རེ་རེ་གནང་། །དེ་མན་མཚམས་ཁང་ནང་དུ་མཉམ་དུ་བཞུགས། །བདག་ལ་ཚེ་དབང་བརྒྱ་རྩ་གནང་བ་དང་། །ཉིད་ཀྱི་དབང་ལུང་ཕྱག་ཁྲིད་འགའ་རེ་གསན། །བདག་རང་བློ་ཁ་ཤིན་ཏུ་རྫོགས་པ་བྱུང་། །དེ་ནས་དྲུང་པ་ཕེབས་ནས་མཚམས་བསྡམས་ཛ། །ཏའུ་ཡུལ་ནས་པདྨ་བློ་གྲོས་པའི། །བླ་མ་ཨོ་རྒྱན་ནོར་བུ་ཞེས་བྱ་བ། །བདུད་འདུལ་རྡོ་རྗེའི་བུ་ཆེན་མཆོག་གྱུར་ཅིང་། །སྣ་གར་རྩེ་པའི་བླ་མར་གྱུར་པ་ཡི། །ཉེ་བར་འཁོར་
གྱི་སྤྲུལ་པ་ཡིན་ཏེ་བྱོན། །ནན་ཞུས་ཆེ་ཕྱིར་ཉིན་གཉིས་མཚམས་ཀློད་ནས། །བུག་སྒོར་ཆོས་བཤད་དབང་ལུང་ཉིན་གཉིས་བྱས། །ཁོང་ལ་འགྱུར་མེད་རྡོ་རྗེའི་གཏེར་གསར་ནི། །ཚེ་དབང་ཉུང་ངུ་ཞིག་གི་འབྲེལ་པ་ཞུས། །འབྲི་ཆུ་རྒྱུད་ནས་བྱོན་པའི་བླ་མ་ནི། །སངས་རྒྱས་རྡོ་རྗེ་དཔོན་སློབ་མང་པོ་བཅས། །འབུལ་བ་ཆེན་པོ་བསྣམས་ནས་བྱོན་པ་ལ། །གནམ་ཆོས་ཡོངས་སུ་རྫོགས་པའི་དབང་ལུང་དང་། །སོ་སོའི་འདོད་ཆོས་ཟླ་གཅིག་ཙམ་ལ་བྱས། ཁོང་ནི་དབང་རྒྱ་ལུང་རྒྱ་ཆེ་འདུག་པས། །ཚུར་ལའང་དབང་ལུང་འབྲེལ་པ་མང་དུ་ཞུས། །ཛྷཱ་ན་ཏ་པས་དམ་ཆོས་སྒོ་སྐྱེལ་དཔེ། །ཆོས་ཀྱི་དངོས་གྲུབ་ཆེན་པོ་ཡིན་པར་སེམས། །དེ་སྔོན་བླ་མ་བརྩོན་འགྲུས་རྒྱ་མཚོ་བ། །བུག་སྒོར་ཕེབས་ནས་རི་ཆོས་བརྩམ་དགོས་ཟེར། །བདག་ནི་ཚད་ལྡན་བྱ་བཏང་མ་ཡིན་པས། །རི་ཆོས་བརྩམས་པའི་བབ་འཐོབ་མེད་སྨྲས་པས། །ཁྱོད་རང་ཡུན་རིང་སྐུ་མཚམས་མཛད་པ་དེས། །མྱོང་བ་གང་ཡོད་གསུང་དང་དེས་ཆོག་ཟེར། །འཕྲལ་དུ་གང་དྲན་མགུར་གྱི་ཚུལ་དུ་སྨྲས། །དེ་ལ་པོད་ཁ་ཤིན་ཏུ་ཆེ་བ་བྱུང་། །དཔེ་རྒྱུན་ལུང་རྒྱུན་ཀཿཐོག་ཕྱོགས་སུ་དར། །མཚམས་དང་སྒྲུབ་པ་བྱེད་
པའི་གང་ཟག་ལ། །འདི་ཉིད་ཕན་ཐོགས་བཞག་པ་ཆེའམ་སྙམ། །དེ་སྔོན་མགོན་པོའི་བསྐང་ཟློག་སྦྲགས་མ་དང་། །རྟ་མགྲིན་ལས་རིམ་བདུན་མའི་གཏོར་ཟློག་དང་། །མཚོན་ཆ་འཁོར་ལོ་ཕུར་པའི་གཏོར་ཟློག་དང་། །ཁྲོ་ཆུའི་གཏོར་ཟློག་ལ་སོགས་བསྒྲིགས་པ་རྣམས། །རྒྱ་ཆེར་འཕེལ་ཞིང་ཕན་ཐོགས་ཆེ་བར་གྲགས། །ཀུན་རིག་ཟིན་བྲིས་ཕག་མོའི་ཟིན་བྲིས་ལ། །བརྟེན་ནས་བསྙེན་སྒྲུབ་བྱས་པ་འགའ་རེ་བྱུང་། །རྒྱལ་བ་རྒྱ་མཚོའི་བདག་བསྐྱེད་བཤད་པ་ནི། །པོད་ཁ་ཤིན་ཏུ་ཆེ་བ་ཡོད་པ་དང་། །རྫོགས་རིམ་སྐོར་ལ་པོ་ཏི་ཆུང་བ་གཅིག །ཡོད་པ་དཔེ་རྒྱུན་འགའ་རེ་འཕེལ་བ་བྱུང་། །མཐར་ཕྱིན་ཐབས་མཁས་གཉིས་ཀྱིས་ནན་ཏན་དུ། །ཞུས་ཤིང་ཕྱག་དང་མཎྜལ་མང་ཕུལ་བས། །རྒྱལ་བ་རྒྱ་མཚོ་ལྷ་དགུ་ལྷ་ལྔ་གཉིས། །སྒྲུབ་སྐོར་ཟིན་བྲིས་པོད་ཆུང་གཅིག་བརྩམས་པ།།གྲྭ་པ་རྣམས་ཀྱིས་སྒྲུབ་པ་འགའ་བྱས་པས། །བར་ཆད་མེད་ཅིང་རྟགས་མཚན་ཐོན་པར་བྱུང་། །མགུར་དང་ཞལ་གདམས་བསྟན་བཅོས་དམ་དུམ་སོགས། །པོ་ཏི་འགའ་ཟུང་ཙམ་དུ་ཡོད་པ་རྣམས། །ཀཐོག་གོ་འཇོའི་ཕྱོགས་སུ་འགའ་ཟུང་འཕེལ། །དངོས་སུ་མ་མཇལ་ཡིག་འབྲེལ་བྱུང་བ་ལ། །
གསོལ་འདེབས་ཞལ་གདམས་ལ་སོགས་བསྐུར་བ་ཡིས། །དེ་ཕྱིར་བློ་སེམས་ཆོས་སུ་འགྱུར་བ་དང་། །གནས་འགྱུ་གསར་དུ་འཕྲོད་པ་མང་ཞིག་བྱུང་། །དེ་ནས་རང་ལོ་རེ་གཅིག་བྱ་ཡི་ལོ། །ལོ་ནི་གསར་རྙིང་མཚམས་སུ་བབ་པའི་ཚེ། །ནུབ་གཅིག་རྨི་ལམ་འཁྲུལ་པའི་སྣང་བ་ལ། །ངོམ་ཆུ་ཆུ་དམར་རྒྱས་ཏེ་ལུང་པ་བཀབ། །ཆུ་ཡི་ཟེགས་མ་སྐྱ་མིར་གྱུར་ཏེ་རྒྱུག །བདག་ནི་རང་གི་མཁར་གྱི་སྟེང་དུ་འདུག་ཆུ་དེ་ང་ལ་འཁོར་ཁ་སྟོན་ཞིང་འཁྱིལ། །དེ་ཚེ་རྨི་ལམ་ཡིན་པའང་ངོ་ཤེས་ཤིང་། །ཆུ་དམར་འདི་འདྲ་དགྲ་ངོ་ཡིན་མོད་ཀྱང་། །འཁོར་བ་རང་ལ་སྟོན་འདུག་སྐྱོན་མེད་སྨྲས། །དེ་མ་ཐག་ཏུ་ཁོ་བོ་སོག་པོ་ནི། །མང་པོའི་དཀྱིལ་དུ་བསླེབས་ནས་འདུག་པ་དང་། །བདག་གི་གཡོན་དུ་གླིང་རྗེ་གེ་སར་ནི། །སྐྱེས་ཕྲན་གཟུགས་ནི་མཛེས་པ་ལངས་ཏེ་འདུག །མདུན་དུ་ཁྲབ་རྨོག་གོ་མཚོན་སྤུང་སྟེ་གདལ། །དེ་ཚེ་གེ་སར་ཞལ་ནས་འདི་སྐད་གསུངས། །འདི་ནི་དགྲ་བླའི་གོ་མཚོན་སྣ་དགུ་ཡིན། །ང་ཡི་འདི་ཚོ་ཚང་ནི་ཨེ་གདའ་ཟེར། །མེ་ལོང་སྟོན་དང་དེ་ནང་གསལ་ཞེས་སྨྲས། །མེ་ལོང་ཆེན་པོ་ཕུབ་ཙམ་བསྟན་ནས་བྱུང་། །དེ་ནང་རཏྣ་ལུགས་ཀྱི་གུར་དྲག་སྐུ། །
འཇའ་ཚོན་ལྟ་བུ་གསལ་བར་ཤར་ནས་བྱུང་། །དེ་འདྲ་རྨིས་ལྟས་ཅི་ཡིན་མ་ཤེས་ཛ། །མཚོ་སྔོན་འགྲམ་ནས་མཁའ་འགྲོ་འབྱོན་ཞིང་ཡོད། །ཟེར་བའི་སྐད་ཆ་གསལ་པོར་ཐོས་ནས་བྱུང་། །དེ་ནས་ཟླ་བ་འགའ་ཟུང་སོང་མཚམས་ནས། །རྨི་ལམ་སོག་པོ་མཁའ་འགྲོའི་དམག་ཡོད་ཟེར། །ཅི་ཙམ་ཡོད་སྨྲས་ལྔ་བརྒྱ་ཙམ་ཡོད་ཟེར། །ལྔ་བརྒྱ་ཙམ་ནི་མང་པོ་མིན་སྨྲས་པས། །དེ་ནི་ཧྲག་བསྡུས་ཡིན་གྱིས་ཞིབ་པར་ན། །འདི་ཡི་དམག་ནི་རྩི་རྩི་མེད་ཅེས་ཟེར། །དེ་དང་རྗེས་མཐུན་སོག་པོ་མཁའ་འགྲོའི་དམག །སྟོད་དུ་གཤར་ཞིང་ཡོད་ཟེར་འུར་སྐད་ཆེ། །དེ་ནས་ཟླ་བ་གཅིག་ཙམ་སོང་བའི་ཚེ། །ནུབ་གཅིག་ཉམས་དང་རྨི་ལམ་འདྲེས་པའི་མཚམས། །སོག་པོ་འོང་ཞིང་ཡོད་ཅེས་ཟེར་བ་ཐོས། །སྙེམ་མེད་ཕྱིར་ནངས་སོག་པོའི་མི་བཟང་བསླེབས། །རྒྱལ་པོའི་བཀའ་ཤོག་གསུང་འཕྲིན་བཅས་པ་བྱུང་། །གནས་མདོ་བླ་མས་ངེས་རྒྱུ་ལ། དེ་སྔོན་ང་དང་འཕྲད་དགོས་རྒྱུར་འདུག་ཀྱང་མ་བྱུང་། ད་ལམ་བསྲུང་བ་བཅའ་བའི་ཆས་དང་། ཆོས་སྐྱོང་གི་བླ་རྡོ་སྲོག་འཁོར་དཔེ་ཆ་མཆོད་ཆ་རྟེན་གསུམ་ཡོད་ཚད་ཁྱེར་ལ་ཅི་མྱུར་སྙིང་ཐང་དུ་སླེབས་པར་གྱིས་ཟེར་བའི་ཐེལ་དམར་མནན་པའི་བཀའ་ཤོག་
དང་། མི་བཟང་གཉིས་དང་ཟུར་མང་མི་སྣའི་སྐད། །བླ་མ་ཀུན་གྱིས་གསེར་སྐུ་མཆོད་ཆ་སོགས། །གང་ཡོད་མནའ་ཐོན་གཟིགས་འབུལ་བྱས་ནས་ཀྱང་། །གང་དྲག་རྒྱལ་པོས་བཞེས་ཤིང་ཡོད་དོ་ཟེར། །བདག་ནི་མཚམས་བསྡམས་ལུས་ཀྱང་མི་བདེ་བས། །རྒྱུ་གཏོང་དགོངས་པ་ཞུ་རོགས་གྱིས་སྨྲས་པས། །ངེད་ཚོས་དགོངས་པ་ཞུ་རོགས་ག་ལ་ཕོད། །མི་འབྱོན་ན་ནི་མི་སྣ་ཇེ་མང་ཟེར། །མི་སྣ་མང་པོ་བྱུང་ན་སྡེ་ལ་གནོད། །ཅི་དྲག་སྙམ་དུ་རྨི་ལམ་བརྟགས་པ་བྱས། །སོང་ན་སྐྱོན་མེད་ལེགས་པའི་ཡོན་ཏན་བྱུང་། །མཚམས་གྲོལ་འགྲོ་བར་ཆས་ཚེ་ཁྲོམ་མང་འདུས། །ཕྱིན་ཆད་ང་དང་འཕྲད་རྒྱུ་མེད་སྙམ་ནས། །ཀུན་ཀྱང་སྐྲག་ཅིང་མཆིལ་མ་འདོན་མཁན་མང་། །སྐྲག་ནི་མི་དགོས་ང་ལ་སྐྱོན་མེད་སྨྲས། །ཚུགས་མ་གར་རྒྱབ་རྣམས་སུ་ཁྲོམ་མང་འདུས། །གཟན་ཤིང་འབུལ་བ་མང་བྱུང་དབང་ཡང་བསྐུར། །ལམ་དུ་བུད་མེད་རྒན་མོ་རལ་པ་ཅན། །རྣལ་འབྱོར་མ་ཡི་ཆ་ལུགས་བྱས་པ་ཅིག །འཁར་བ་ལ་བརྟེན་འཁྱོལ་ཞིང་མདུན་དུ་བྱུང་། །མོ་ལ་རྨིས་ལྟས་རྟགས་མཚན་ལེགས་པོ་བྱུང་། །རྒྱལ་པོ་ལ་ནི་མཇལ་ཁ་ལེགས་པོ་འོང་། །སྐྱོན་མེད་སྐག་མི་དགོས་
ཞེས་ནན་གྱིས་ཟེར། །གནས་མདོ་བླ་མ་ཨེ་བྱུང་ཨེ་བྱུང་ཞེས། །རྒྱལ་པོའི་ཡང་ཡང་གསུངས་ཤིང་བྱ་ར་བྱས། །སྒར་དུ་སླེབས་མ་ཐག་ཏུ་མཇལ་ཁ་བྱུང་། །སྡེ་དཔོན་ཆེན་པོ་གཞན་དང་བླ་མ་གཞན། །འབུལ་བ་ཁྱེར་ནས་ཐམས་ཅད་གྲབ་བསྡད་ཀྱང་། །ཞག་གྲངས་དུ་མར་མཇལ་ཁ་མི་འོང་སྣང་། །རྒྱལ་པོའི་ལུགས་གཉིས་བཀའ་གསུང་གང་གནང་ལ། །དེ་ཡིན་དེ་ཡིན་ཞུ་བ་མ་གཏོགས་པ། །དེ་མིན་ཟེར་བ་སུས་ཀྱང་ཞུ་མི་སྤོབས། །བདག་གིས་ཡིན་པ་མིན་པ་དྲང་གཏམ་ཞུས། །ལ་ལ་ཐུགས་ལ་ཕོག་པར་གྱུར་འདུག་ཀྱང་། །བདག་ལ་བཀའ་བཀྱོན་ཅི་ཡང་མ་གནང་ངོ། །སྐུ་རིམ་བཀའ་བརྒྱད་ལྷ་མོ་བརྒྱ་རྩ་བཅས། །རྐང་པ་ན་ནས་ཁོ་བོ་ཁུར་དགོས་ཀྱང་། །ཉིན་བཞིན་རྒྱལ་པོའི་མདུན་ནས་འབོད་མཁན་བྱུང་། །ཆོས་ཀྱི་དྲི་བ་མང་པོ་མཛད་བྱུང་བ། །དེ་དོན་བཤད་པས་རྒྱལ་པོ་ཐུགས་དགྱེས་ནས། །ཕྱག་ཀྱང་མ་འཚལ་གསུངས་ཤིང་ཞྭ་ཕུད་མཛད། །ནུབ་རེ་བཞིན་དུ་བརྟག་པ་གྱིས་གསུངས་ནས། །ཁ་བཏགས་སྤོས་ཆག་ལ་སོགས་ལན་མང་གནང་། །ཉིན་རེ་བཞིན་དུ་གུང་ཚིགས་འདྲེན་པ་དང་། །ཐུགས་ནང་གཙང་བའི་མཐུན་གཏམ་མང་དུ་གསུངས། །མཐུ་དང་དུག་
གིས་གནོད་པ་བསྲུང་བའི་དབང་། །སྔར་ཡང་ཐོབ་སྟེ་ཁྱོད་ལ་ཞུ་འདོད་གསུངས། །དེ་འདྲའི་དབང་ནི་ཁོ་བོས་མི་ཤེས་ཞུས། །ཀརྨའི་ནང་རྟེན་ཕྱག་སྟོང་སྤྱན་སྟོང་གི །ལོ་རྒྱུས་ཡི་གེར་བྲི་དགོས་གསུངས་ནས་བྲིས། །དེ་ནས་གསེར་གསོལ་ན་བཟའ་གཟབ་ནས་ཀྱང་། །དམག་ལ་ཇ་སྐྱེས་བསྐོར་བ་བསགས་བཅུག་ཐལ། །རྒྱལ་པོའི་སྲས་མོ་བསྙུང་བའི་སྐུ་རིམ་ལ། །ཚེ་ཐར་བརྒྱ་རྩ་ཚེ་གཟུངས་འབུམ་ཐེར་སོགས། །བདག་གིས་ཞུས་ལྟར་འཕྲལ་དུ་བསྒྲུབས་ནས་སོས། །རྒྱལ་པོ་དཔོན་བློན་སྤྱི་ཡི་སྐུ་རིམ་ལ། །ཚེ་དཔག་ལྷ་དགུ་གསེར་སྐུ་མི་ཚད་ཙམ། །བཞེངས་ན་ལེགས་ཞུས་དེ་ཡང་བཞེངས་ཆད་མཛད། །དེ་ཚེ་གྲྭ་ཚང་གྲྭ་པ་འགའ་ཞིག་གིས། །རྒྱལ་པོ་འདི་ལ་དགེ་བ་ཁས་ལེན་སོགས། །དེ་འདྲ་བྱེད་མཁན་སུ་ཡང་འོང་མ་མྱོང་། །ཟེར་ནས་གྲྭ་ཚང་དགེ་འདུན་འགའ་ཞིག་གིས། །ཁ་བཏགས་བཞག་ནས་བརྟག་པ་ཞུ་བ་དང་། །རྒྱལ་མོའི་ཕྱག་གཡོག་སོག་མོའི་དབང་ཞུ་དང་། །བོད་སོག་ཀུན་གྱིས་གཟིམས་གུར་བསྐོར་བ་དང་། །ཕྱག་འཚལ་བྱིན་རླབས་ཞུ་སོགས་དད་གུས་བྱས། །ཨུར་ཞིང་རྒྱལ་མོའི་སྡེ་སོག་བོད་སོག་གིས། །ཟང་ཟིང་འབུལ་བ་དཔག་ཏུ་མེད་
པ་བྱུང་། །རྟ་ནི་གང་གདའ་སོག་པོ་རྣམས་ཀྱིས་བཟུང་། །མཚན་ལ་རྐུན་མས་ཁྱེར་སོགས་དཀའ་འདུག་སྟེ། །བདག་ལ་ཀུན་གྱིས་རྩེས་འཇིག་ཚར་འདུག་པས། །དེ་དན་འགྲིམ་པ་ཀུན་གྱིས་ཤེས་གྱུར་ནས། །རྟ་ཀུན་ང་ཡི་ནག་ཚང་དྲུང་དུ་བཏགས། །རྒྱལ་པོའི་སྒར་དུ་ཚེར་ལུང་དྲུང་པ་དང་། །གནས་མདོ་བླ་མ་ངོ་སོ་མཐོ་ཟེར་བའི། །གཏམ་སྙན་ཁྱབ་པས་ཡོན་བདག་རྣམས་ཀྱང་དགའ། །གཏེར་སྟོན་བྱང་ཆུབ་གཏེར་ཤོག་མཇལ་ཁ་གནང་། །དེ་ནུབ་གཉིད་པ་མ་ཡིན་ཉམས་སྣང་ལ། །བཀའ་བརྒྱད་དཔེ་ཆ་གསར་པ་བམ་ཆག་གཅིག །བདག་གི་ལག་ཏུ་བཞག་ནས་བྱུང་བ་དེ། །གཏེར་སྟོན་དེ་ཡི་གཏེར་གསར་ཡིན་པར་འདུག །བདག་གིས་ཉམས་ལེན་དགོས་རྒྱུ་ཡིན་པར་གོ །དེ་ནས་མི་སྣང་འཇའ་ལྟར་ཡལ་བ་བྱུང་། །རྒྱལ་པོའི་གཏེར་སྟོན་ཡང་ནི་ཕ་ཀིར་བཞུགས། །བསམ་འགྲུབ་དགོན་ལ་ལྟད་མོ་ལྟ་ཕྱིར་དང་། །ཁོང་གི་སྐུ་རིམ་ཆག་ཕྱི་དགོས་ཕྱིར་དང་། །བསམ་འགྲུབ་གཞུང་ནས་འགྲོ་དགོས་གསུངས་ན་ཡང་། །རྐང་པ་ན་ཞེས་དགོངས་པ་ཞུས་པས་གནང་། །རྟ་དྲེལ་ཇ་སོགས་གནང་སྦྱིན་ཆེན་པོ་མཛད། །དེ་སྐབས་ནང་ཆེན་པ་དང་ལྷ་འབྲོང་དང་། །སྐྱོ་བྲག་པ་དང་
ཁྲ་ལེབ་དབོན་པོ་སོགས། །སྐྱ་སེར་མང་པོས་དབང་ཡང་མང་པོ་ཞུས། །དེ་སྐབས་ཀརྨའི་དམ་ཅན་སྐྱེས་བུ་ཡི། །བཞིན་གྱི་དཀྱིལ་འཁོར་ཉམས་ཀྱི་སྐབས་སུ་མཐོང་། །ཚིག་འགའ་ཟེར་ཏེ་སྨྲ་བར་རུང་བ་མིན། །སྒར་དེ་རྫ་ཆུའི་དཀྱིལ་གྱི་དོ་ཁུག་རེད། །སྤྱི་འབྱམས་གནས་ཀྱི་རྩ་བ་རེད་པ་དང་། །ལྷ་འདུ་ཀླུ་འཚོགས་ཤིན་ཏུ་མང་བ་དེས། །ཉམས་དང་རྨི་ལམ་འཁྲུལ་པའི་སྣང་བ་ལ། །ངོ་མཚར་མཐོང་སྣང་དཔག་ཏུ་མེད་པ་བྱུང་། །ནུབ་གཅིག་འགྲོ་འདུལ་ཐུགས་རྗེ་ཆེན་པོ་ཡི། །གསེར་སྐུ་ཇོ་བོའི་ཚད་ཙམ་འདུག་པ་དེ། །གཞན་ལ་ཞལ་སྟོན་རྟེན་དབང་བྱེད་འདུག་ཚེ། །དེ་ཡི་འཁོར་གྱི་བྱང་ཆུབ་སེམས་དཔའི་སྐུ། །བཞེངས་སྐུ་ཁྱེ་འུ་ལོ་བརྒྱད་ཙམ་པ་འགའ། །མི་བཞིན་ཕར་འབྱོན་ཚུར་འབྱོན་བྱེད་པ་རྨིས། །ཕྱིར་ནངས་རྟེན་བཤད་བདག་གིས་བྱེད་དགོས་གསུངས། །བོད་སོག་བླ་དཔོན་ཐམས་ཅད་ཚོགས་པའི་དབུས། །གདོང་གྲལ་མགོ་དེར་ཁོ་བོས་བཞུགས་གདན་བཏིང་། །ཚངས་སར་པ་དང་སྐྱོ་བྲག་པ་ལ་སོགས། །ཐོབ་ཆ་ཆེན་པོ་ཡོད་པའི་བླ་མ་རྣམས། །གྲལ་དུ་བསྒྲིགས་པ་གྲལ་གྱི་གོང་དེ་ན། །རྒྱལ་པོའི་བཀའ་ཡིས་ཁོ་བོ་བཞག་པ་
བྱས། །དེ་ནས་ཁོ་བོས་རྟེན་བཤད་བྱས་པའི་ཚེ། །རྒྱལ་པོའི་གཙོར་བྱས་བོད་སོག་ཐམས་ཅད་མགུ། །མཁས་ཤིང་ཡོན་ཏན་ཆེ་བའི་གྲགས་པ་ཐོབ། །དེ་ནས་ནང་ཆེན་ནོར་བུ་འདས་སར་ཕྱིན། །ཞི་ཁྲོ་བྱང་བུ་སྐུ་རིམ་ལ་སོགས་བྱས། །དེ་རུ་མཚོ་སྔོན་འགྲམ་གྱི་སོག་པོ་འགའ། །འདུག་པས་ཕྱག་དབང་ཞུས་ཤིང་གུས་ཚུལ་བསྟན། །ནང་ཆེན་རྒྱལ་པོའི་འབུལ་ཆེན་བཀྱག་པ་དང་། །ཡར་ལམ་མར་ལམ་ཕྱོགས་རིས་སྡེ་ཀུན་གྱིས། །འབུལ་བ་བཟང་བ་རྟ་ཁྱུ་ཁལ་མ་སོགས། །ཤིན་ཏུ་མང་བས་ཐམས་ཅད་རྗེ་ཁེངས་ནས། །རྒྱལ་པོའི་བློ་སེམས་བསྒྱུར་བ་ཐུབ་བམ་ཟེར། །དེ་ནས་རི་ཁྲོད་ཉིད་དུ་སླེབས་པ་དང་། །ཀཐོག་པ་ཡི་བནྡེ་ལྔ་ཙམ་ལ། །གཏེར་སྟོན་བྱང་ཆུབ་ཉིད་ཀྱིས་བཀའ་ཤོག་བསྐུར། །ཆོས་བདག་ཡིན་ཀྱང་དེ་སྔ་སྟབས་མ་འགྲིགས། །གཏེར་ཆོས་འདི་དག་ཉམས་ལེན་གྱིས་ཟེར་ནས། །གཏེར་ཆོས་ལེས་ཁ་གསུམ་དང་ཁ་བཏགས་དང་། །གྲུ་མང་མང་ཇ་གྱིས་གསུངས་ཛ་ཁག་བསྐུར། །ཕར་ལ་ཡིག་འབྲེལ་ཙམ་ཡང་མེད་པ་ལ། །འདི་ལྟར་བསྐུར་བ་གནད་ཆེན་ཡིན་པར་གོ །དེ་ནས་ཞག་པོ་འགའ་ཞིག་སོང་ཙམ་ན། །རྒྱལ་པོར་ཆོས་སྐྱོང་དེ་ཡི་ལུང་བསྟན་
ནས། །གཏེར་ནས་བྱུང་བའི་མན་ངག་ཐམས་ཅད་ནི། །གནས་མདོ་བླ་མ་དེ་ཡིས་སེམས་ལ་གསལ། །དེ་ཕྱིར་དེ་ལ་དམ་ཅན་མདོས་ལ་སོགས། །སྐུ་རིམ་སྒྲུབས་ཞེས་ལུང་བསྟན་བྱུང་འདུག་པས། །རྟ་དང་འཁོར་དྲུག་གཉིས་སོགས་འབུལ་བ་བསྐུར། །བཀའ་ཤོག་སྔོན་དང་མི་འདྲ་ཆེ་བཀུར་ནི། །གོང་དུ་ཤོག་ཕུད་འཁྱུད་གང་ཡོད་པ་བཞག །གྲུབ་ཆེན་ཀརྨ་ཆགས་མེད་ཀྱི་སྙན་དུ། །དེ་ནས་མཐོ་དམན་སོར་བཞི་བཞག་བྱས་ནས། །ཕུལ་བ། དེང་སྐུ་འཚོ་བཞེས་གསེར་ལྟར་བཟང་བ་ནས། ཞེས་སོགས་ཆེ་བཀུར་དང་བཅས་བཀའ་ཤོག་ཕེབས། །དེ་རྗེས་རང་གི་འདོད་ཞུས་བྱས་པ་ལྟར། །རང་ཉིད་ཚེ་མཚམས་བྱེད་ནས་འདུག་པ་ལ། །སུས་ཀྱང་དབང་ཡོད་གདན་འདྲེན་མི་བྱེད་ཅིང་། །དད་ལྡན་རྣམས་ཀྱིས་འབུལ་བ་ཚུར་ལ་སྐྱེལ། །དབོན་པོ་རྣམས་ནི་ཡུལ་འབྲོག་ཐམས་ཅད་དུ། །ལྡོམ་བུ་བྱེད་ལ་སུས་ཀྱང་མ་བཀག་ཅིག །གནས་མདོ་བླ་མ་ངེད་ཀྱི་སྲུང་ཁ་བ། །ཡིན་པའི་སྟབས་ཡིན་ཟེར་ནས་བཀའ་ཤོག་ནི། །གསེར་ཐམ་ཆེན་པོས་མནན་པ་ཞིག་ཀྱང་གནང་། །དེ་རྗེས་གཏེར་སྟོན་ཀློང་གསལ་སྙིང་པོ་དེས། །ཁོང་གི་གཏེར་ཆོས་ཀུན་གྱི་དབང་ལུང་
ནི། །མཁའ་འགྲོ་གཏད་རྒྱ་བརྒྱུད་པའི་ཕྱག་སྲོལ་ལྟར། །གཞན་ལ་སྤེལ་བར་གྱིས་ཞེས་གསུངས་པ་ནི། །བཀའ་ཤོག་བདག་གི་གྲྭ་པར་གཏད་པའི་ནུབ། །ཉམས་ཀྱི་སྣང་བར་ཤར་ཕྱོགས་ནམ་མཁའ་ནས། །དཔེར་ན་ཉ་རྒྱས་ཟླ་བ་ཤར་བ་བཞིན། །ཐུགས་རྗེ་ཆེན་པོ་འགྲོ་འདུལ་ཕྱག་བཞི་པ། །ཤར་ཕྱོགས་ནམ་མཁའ་ཁྱབ་པར་གསལ་བར་མཇལ། །དེ་མ་ཐག་ཏུ་རང་ལུས་སྤྱན་རས་གཟིགས། །རྒྱལ་བ་རྒྱ་མཚོ་དེ་བས་ཆུང་ཙམ་པ། །གྱུར་ནས་ས་ཡི་སྟེང་དུ་འདུག་པར་མཐོང་། །དེ་ཕྱིར་གཏེར་གསར་དེ་ལ་ངེས་ཤེས་བསྐྱེད། །དེ་ནས་གཏེར་སྟོན་ལ་ཡང་ཞུ་ཡིག་ཕུལ། །དེ་རྗེས་གཏེར་སྟོན་བཀའ་ཤོག་གནང་བ་ལ། །ཤོག་ཕུད་མཐོ་བསྐྱང་གང་བཞག་ནས། །ཧཱིཿ དུས་གསུམ་ཕྱོགས་བཅུའི་བདེ་གཤེགས་ཐམས་ཅད་ཀྱི། །རླབས་ཆེན་མཛད་པའི་ཕྲིན་ལས་མ་ཆག་པའི། །མཚུངས་མེད་བླ་མ་ཚེ་དབང་གཡུང་དྲུང་ཁྲིར། །བསྐལ་པ་རྒྱ་མཚོར་བཞུགས་པར་གསོལ་བ་འདེབས། །འོད་དཔག་མེད་མགོན་འཆི་མེད་ཚེ་ཡི་བདག །སྣང་བརྙན་ཞིང་དེར་བསྟན་འགྲོའི་དོན་སླད་དུ། །ཇི་སྲིད་འགྲོ་རྣམས་ཀུན་མཁྱེན་མངོན་རྫོགས་པར། །དེ་སྲིད་རྡོ་རྗེའི་ཁྲི་ལ་བརྟན་བཞུགས་གསོལ། །ཞེས་པའི་
མགོན་པོ་དེའི་ཞབས་ཀྱི་པདྨོར་དྲི་མ་མེད་པའི་དྲུང་དུ། དེའི་བར་དུ་མཐོ་དམན་སོར་ལྔ་བཞག །ཞུ་བ། ཡིད་བཞིན་ལྷུན་པོས་དབང་གི་བསྟན་འགྲོ་འབད་མེད་དུ་སྐྱོངས་བའི་མདངས་བཀའ་ཤོག་རྟེན་བཅས་ཉམས་མེད་དུ་འབྱོར་བ་བཀའ་དྲིན་གྱི་དཔལ་དུ་ཆེ། འདིར་ཡང་ནད་མེད་དུ་གནས་ཤིང་། ཡང་གསང་མཁའ་འགྲོའི་གནད་མཛོད་ཀྱི་སྨིན་གྲོལ་རིམ་གཉིས་ཆ་ལག་དང་བཅས་པ་དབང་བཞི་དོན་གྱིས་ཕུལ་བའི་ལོངས་སྤྱོད་ཅིང་། འགྲོ་བ་མ་ལུས་པ་སྐྱོན་མེད་བདེ་ཆེན་ཞིང་དུ་སྐྱེལ་མ་ཟིན་གྱི་བར་དེ་སྲིད་དུ་བཞུགས་པར་ཞུ་ཞུ། །སླར་བསླབ་དོན་གནང་འོས་ཀྱང་རྒྱུད་བསྐུལ་ཙམ་བཀྲ་ཤིས་ཁ་བཏགས་དམ་རྫས་ཇ་འཁོར་གྱིས་འདེགས་ཏེ་རི་ཁྲོད་ནས་ཞུ་ཡིག །སྐབས་ཤིག་རྒྱལ་པོའི་བླ་མཆོད་ས་རིས་པས་ཞལ་གདམས་དགོས་གསུངས་འདུག་པས་ཡི་གེ་བསྐུར། མཉེས་ནས་ཡིག་ལེན་སྙན་ངག་བསྟོད་པ་བཅས། །ཕ་མ་གཉིས་ཀྱི་བྱུང་རྟེན་བསྐུར་བྱུང་ངོ། །དེ་ནས་བྱ་ལོའི་ལོ་མཇུག་དེ་ཉིད་དུ། །རྫ་ཁོད་བླ་མ་ཀརྨ་འདུལ་བ་ཕེབས། །ཐུགས་བཞེད་བཞིན་དུ་དབང་ལུང་འདོད་ཆོས་ཕུལ། །བླ་མ་འདི་ལ་དབང་འབྲེལ་ཞིག་ཞུས་ན། །ལོ་བདུན་བར་ཆད་སེལ་ཞེས་ལུང་
བསྟན་བྱུང་། །ཁོང་གིས་ལོ་གྲངས་ཉེར་ལྔ་ངག་མཚམས་བསྡམས། །གུར་དྲག་དུང་དང་གསང་འདུས་དུང་འགྲུབ་འདུག །དེ་ཕྱིར་དབང་འབྲེལ་ལུང་འབྲེལ་འགའ་ཞིག་ཞུས། །རྒྱལ་བ་རྒྱ་མཚོའི་དབང་ལུང་ཞུ་འདོད་གསུངས། །དེ་ནི་བཀའ་རྒྱ་དམ་པས་མི་འོང་ཞུས། །ཁོང་གིས་ཡི་གེ་བདུན་པ་དུང་ཐོན་པས། །དེ་ནི་དབང་ཡོན་འབུལ་གྱིས་གནང་དགོས་གསུངས། །རྒྱལ་བ་རྒྱ་མཚོའི་དབང་ལུང་རྫོགས་པར་ཕུལ། །དེ་སྐབས་བསྙེན་རྫོགས་ཞུ་བའི་མི་འགའ་བྱུང་། །བདག་གིས་མཁན་པོ་ཁོང་གིས་སློབ་དཔོན་མཛད། །དེ་དུས་གསོ་སྦྱོང་ཞིག་ཀྱང་བྱས་པ་ཡིས། །འདི་རུ་སངས་རྒྱས་བསྟན་པའི་སྙིང་པོ་ནི། །ཉི་མ་ཁོལ་ཤར་རེད་གསུངས་ཤིན་ཏུ་མཉེས། །ཁོང་ཉིད་བདག་ལ་དད་འདུན་ཆེར་སྐྱེས་པས། །སྔ་ཕྱིས་ཕྱག་དཔེ་རྟེན་རྣམས་གང་ཡོད་པ། །ཕལ་ཆེར་རིམ་བཞིན་བདག་ལ་འབུལ་རྒྱུ་བསྐུར། །ཐུགས་རྗེ་ཆེན་པོ་ཕྱག་རྫོགས་ཟུང་འཇུག་གི །དམར་ཁྲིད་གླེགས་བམ་ཆེན་པོ་གཅིག་རྩོམ་པ། །དངོས་གཞི་བརྩམས་ཚར་རྒྱབ་ཆོས་མ་ཐོན་སྐབས། །གོ་འཇོ་བླ་མ་མང་པོ་ཕེབས་བྱུང་བ། །སྔར་ཡང་མཇལ་ཟིན་དབང་ལུང་མང་པོ་ཐོབ། །ད་ནི་ཐག་རིང་འདི་ན་ཅི་ཕྱིར་
འོང་། །སྨྲས་པས་ཁྱེད་ཀྱི་རྣམ་ཐར་ནང་དེ་ན། །གུ་རུ་སྲིན་ཞོན་ཞལ་ནི་གཟིགས་པའི་དུས། །བྱུང་བའི་གདམས་ངག་གཅིག་ནི་ཡོད་འདུག་པ། །དེ་ཉིད་ཞུ་ནི་འདོད་པས་གནང་དགོས་ཟེར། །རྟེན་འབྲེལ་འགྲིགས་པས་དེ་ཡི་ཁྲིད་ཀྱང་བཙུགས། །དཔེ་ཆ་ཡང་ནི་འཕྲལ་དེར་ཆོད་ནས་བྱུང་། །བླ་མ་སྨན་བླས་གོ་འཇོར་ཁྲིད་དེ་ཉིད། །ལན་འགའ་བཙུགས་པས་བར་ཆད་མེད་པ་དང་། །ཕན་ཐོགས་ཆེ་བའི་སྐད་ཀྱང་རྗེས་ནས་ཐོས། །ཡང་དག་གིས་ཀྱང་དཔེ་བཅད་ལུང་ཞུས་ནས། །ལ་གོང་ཕྱོགས་སུ་ཁྲིད་དེ་ལན་གཉིས་བཙུགས། །བར་ཆད་མེད་ཅིང་ཕན་ཐོགས་ཆེ་འོ་སྐད། །ཁྲིད་དཔེ་དེ་ཉིད་གླེགས་བམ་ཆེ་ན་ཡང་། །ལོ་གསུམ་ནང་དུ་དཔེ་ཆ་དྲུག་བདུན་འཕེལ། །དེ་ཡི་ཁྲིད་ཀྱང་འགའ་རེ་ཚུགས་སོ་སྐད། །སྐབས་ཤིག་ཆོས་རྒྱལ་རིན་ཆེན་རྣམ་རྒྱལ་ཕེབས། །དཔོན་སློབ་རྣམས་ལ་ཞག་གཅིག་དབང་བསྐུར་བྱས། །ཨ་ནུ་དཀར་ལུའི་དོ་དམ་རོགས་བྱས་ནས། །དཔོན་པོ་རྒྱལ་མཚན་ཉིད་ཀྱིས་རྩ་བ་བཟུང་། །རྟ་ནོར་དྲགས་རིམ་བརྒྱ་ཚར་ཆོས་ཡོན་བརྒྱབས། །རྒྱས་འབྲིང་རྣམ་གསུམ་བསྐལ་བཟང་དང་བཅས་པ། །བེཊཱར་མཐིང་ཤོག་ནམ་མཁའ་དངས་འདྲའི་
ངོས། །རིན་ཆེན་དངུལ་གྱི་རྒྱུ་སྐར་ལྟར་བཀྲ་བ། །པདྨ་རཱ་གའི་མདོག་མཚུངས་གླེགས་ཤིང་དང་། །སྐུ་རེག་རྒྱ་སྐག་དང་བཅས་ལེགས་པར་གྲུབ། །གཞན་ཡང་གཏོར་མགྲོན་ལྷ་གྲངས་ཞལ་ཐང་དང་། །འོད་དཔག་སྟོང་སྐུ་ཚེ་དཔག་སྟོང་སྐུ་དང་། །ཨོ་རྒྱན་སྟོང་སྐུ་ལ་སོགས་ཞལ་ཐང་འགའ། །འབུར་དོད་ཞལ་གསེར་གསོལ་བའི་ཐུབ་པ་སྟོང་། །གསེར་དངུལ་ཞལ་ལ་གསོལ་བའི་ཨོ་རྒྱན་སྟོང་། །འོད་དཔག་མེད་པའི་སྐུ་འདྲ་སྟོང་ལྷག་བཞེངས། །ཚོན་བཀྲ་བྱས་པའི་མི་ནི་ལངས་བའི་ཚད། །མགོན་པོ་ཚེ་དཔག་མེད་པའི་སྐུ་འདྲ་དང་། །གཞན་ཡང་མི་ཚད་ཚོན་བཀྲ་བྱས་པ་ཡི། །ཚེ་དཔག་མེད་པ་ཆོས་ལོངས་སྤྲུལ་སྐུ་གསུམ། །མདའ་ཚད་ཙམ་གྱི་གར་དབང་རྡོ་རྗེ་འཆང་། །འཇིག་རྟེན་དབང་ཕྱུག་སེམས་དཔའ་རིན་ཆེན་མང་། །དེ་དག་རྣམས་ཀྱི་ལྡེར་སོ་ལེགས་པར་བཞེངས། །ཁྱི་ལོ་ཕག་ལོ་གཉིས་ཀྱི་ལོ་མཚམས་སུ། །དྲུང་པ་བདེ་ལེགས་སྙིང་པོ་རྣམ་གཉིས་ཕེབས། །ཟླ་བ་ཕྱེད་དང་གཉིས་ཀྱི་བར་མཚམས་སུ། །མཚམས་ཁང་ནང་དུ་བཞུགས་མལ་མཉམ་དུ་མཛད། །ཉིན་རེ་ཁྲོམ་ལ་ཆོས་ཐུན་འགའ་ཡང་མཛད། །དྲུང་པས་བདག་ལ་ཚེ་དབང་བརྒྱ་རྩ་མཛད། །བདེ་ལེགས་སྙིང་
པོའི་བཀའ་དབང་འགའ་ཞིག་གནང་། །དྲུང་པ་གོང་མའི་ཁྲིད་ཆེན་ལྗགས་ལུང་དང་། །མགོན་པོའི་རྒྱུད་ལུང་ལ་སོགས་མང་དུ་གནང་། །མ་འོངས་སངས་རྒྱས་བདེ་གཤེགས་མོས་པའི་མཚན། །ཨོ་རྒྱན་ཆེན་པོའི་བླ་མ་ཤྲཱི་སེང་། །དེ་ཡི་སྤྲུལ་པ་ཚེར་ལུང་སྤྲུལ་སྐུ་དང་། །རྒྱ་གར་པཎ་ཆེན་སྤྱི་ཏི་ཛྙཱ་ན་དང་། །སངས་རྒྱས་མཉན་པའི་སྤྲུལ་སྐུ་བདེ་ལེགས་སྙིང་། །ས་གནས་སེམས་དཔའ་ཆེན་པོ་དེ་ཉིད་ཀྱི། །བླ་མར་བྱེད་པ་བདག་གིས་མི་སྤོབས་ཀྱང་། །ཆོས་ནི་བདག་པོའི་ཕྱག་ཏུ་སྤྱད་པའི་ཕྱིར། །གཅིག་ཤེས་ཀུན་གྲོལ་དབང་ནི་བཞི་བཅུ་ཙམ། །གུ་རུ་ཞི་དྲག་ཁྲོ་ཆུ་ཀིང་ཀང་དབང་། །ཚེ་དབང་བརྒྱ་རྩ་ལ་སོགས་ཕུལ་བར་བྱས། །བཀའ་གདམས་གླེགས་བམ་ཕ་ཆོས་བུ་ཆོས་དང་། །ཁྲོ་ཀིང་ལ་སོགས་དབང་ཡང་མང་དུ་ཕུལ། །དེ་ནས་དྲུང་པ་སར་སྒང་ཕེབས་པའི་ཚེ། །བདེ་ལེགས་སྙིང་པོར་སྒྲུབ་ཐབས་རྒྱ་མཚོའི་དབང་། །རྟ་མགྲིན་ནཱ་ག་ཀླུ་འདུལ་དབང་བརྒྱ་ཕུལ། །བདག་ནི་མི་ལུས་ཐོབ་ཅིང་ཆོས་སྒོར་ཞུགས། །དབང་ལུང་མང་དུ་ཐོབ་པ་དོན་དང་ལྡན། །ཆོས་རྣམས་བདག་པོའི་ཕྱག་ཏུ་འཕྲོད་པ་དང་། །ཁོང་རྣམས་སྣོད་བཟང་འགྲོ་དོན་ཆེ་བའི་ཕྱིར། །ཇི་སྲིད་
སངས་རྒྱས་བསྟན་པ་གནས་ཀྱི་བར། །བདག་གིས་ཕུལ་བའི་དབང་རྒྱུན་ལུང་རྒྱུན་རྣམས། །ཆད་པར་མི་འགྱུར་བསྟན་ལ་ཕན་སྙམ་ནས། །དང་པོའི་ས་ཐོབ་ཙམ་དུ་དགའ་བ་སྐྱེས། །དེ་ནས་ལྕགས་མོ་ཕག་ལོ་ཤར་བའི་ཚེ། །ལྷ་ཐོག་ཀརྨ་ཚེ་བརྟན་དཔོན་གཡོག་བྱུང་། །སོ་སོའི་འདོད་ལྟར་དབང་ལུང་འགའ་རེ་བྱས། །ཁོང་ལ་མགོན་པོའི་ཡུལ་ལྷ་བཙན་རིགས་ཤིག །ཡོད་པའི་སྐུ་མདོག་ཕྱག་མཚན་བརྟག་པ་གྱིས། །དེ་བཞིན་གྲུ་གུའི་ལྷ་བྲག་དཀར་པོ་དང་། །རེ་ཕོ་མཆེད་བརྒྱད་གནས་བདག་བརྟག་པ་གྱིས། །དེ་དག་རྣམས་ཀྱི་བསང་དང་གསོལ་ཀ་དང་། །ཡེ་བརྫུ་མདོས་ཆོག་གསར་རྩོམ་བྱེད་དགོས་ཟེར། །དེ་དག་གསལ་ན་རྗེས་ནས་བསྐུར་འོང་སྨྲས། །བརྟགས་པ་བྱས་ཚེ་ཉམས་སྐབས་སྐད་ཅིག་ལ། །བཙན་དེའི་ཆ་ལུགས་ཧ་ལམ་པ་ཞིག་མཐོང་། །གྲུ་གུ་ལྷ་བྲག་གནས་ཕྲན་སྟོང་རྩ་གཉིས། །གྲ་གཅིག་ཡིན་པའི་རྟགས་ཤིག་གསལ་བའི་ཕྱིར། །བསང་དང་གསོལ་ཁ་མཆོད་སོགས་བརྩམས་ནས་བསྐུར། །སྔགས་པ་ཚད་ལྡན་འབྱུང་བའི་ལྟས་ཀྱང་མཐོང་། །དེ་ནས་ཀཐོག་ངོས་ནས་གཏེར་གསར་གྱི། །པོ་ཏི་དྲུག་ཙམ་གསར་དུ་བསླེབས་བྱུང་དང་། །དུས་མཉམ་
རྒྱབ་ནས་གཏེར་སྟོན་བཀའ་ཤོག་དང་། །དམ་རྫས་བསླུ་མེད་མང་པོ་དུས་མཉམ་ཕེབས། །དེ་ཡང་རྟེན་འབྲེལ་ཤིན་ཏུ་ལེགས་པར་སེམས། །བཀའ་ཤོག་ཤོག་ཕུད་མཐོ་གང་ལྷག་ཙམ་ལ། །ཧཱི༔ རྒྱལ་བ་ཀུན་དངོས་ཡོངས་འདུས་རྡོ་རྗེ་འཛིན། །གང་འདུལ་ཕྲིན་ལས་ཆགས་མེད་དེད་དཔོན་མཆོག །ཡོན་ཏན་མི་ཟད་རྒྱན་གྱི་འཁོར་ལོར་བཅས། །བསྐལ་བརྒྱར་རྡོ་རྗེའི་ཁྲི་ལ་བཞུགས་གསོལ་འདེབས། །ཞེས་བདག་ཉིད་ཆེན་པོའི་ཞབས་དྲུང་དུ། དེ་ནས་མཐོ་དམན་འཁྱུད་གང་ཙམ་བཞག་ནས། ཞུ་བ། འགྲོ་བ་རྗེས་སུ་འཛིན་པའི་ཐུགས་རྗེའི་བཞིན་མདངས་བཅས་རྡོ་རྗེའི་ཁྲི་ལ་འཚོ་བཞེས་ཀྱི་དཔལ་མཆོག་ནི། བཀའ་དྲིན་གྱི་ཉི་མ་ཤར་བཞིན་བཀའ་ཤོག་རྟེན་བཅས་ཉམས་མེད་དུ་སྤྱི་བོར་ཕེབས་ཤིང་ཐུགས་ལ་བཏགས་པ་དང་འབྲུ་གསལ་བཞིན། བསྔོ་སྨོན་རྒྱས་འདེབས་སོགས་ཞུས་ཡོད་ལགས། རྩ་གསུམ་ཞལ་གདམས་དྲྭ་བ་ཤེལ་གྱི་མེ་ལོང་ལས། རྡོ་རྗེ་རིན་ཆེན་པདྨ་ཀརྨའི་མིང་། །རང་རང་ལས་ཀྱི་སྤྱོད་པའི་སྒྲ་དང་བཅས། །བཅུད་འཛིན་རྣ་བའི་དབང་པོར་བབ་པའི་ཚེ། །བཅུད་འདི་ལས་ལ་དབང་ཕྱིར་སོ་སོར་སྤྱོད། །ཅེས་དགོངས་པའི་གཏད་རྒྱུ་ཕུལ་བའི་རྟགས་
མཚན་རིམ་བཞིན་ངེས་པའི་ཕྱིར། སྙན་བརྒྱུད་ཐུགས་རྗེ་ཆེན་པོ་ལས། ཐུགས་རྗེ་ཆེན་པོ་ང་ཡི་སྲས། །རྡོ་རྗེ་རིན་ཆེན་པད་དཀར་མིང་། །སོ་སོའི་ལས་ཀྱི་ལོངས་སྤྱོད་བཅས། །སྨོན་ལམ་དབང་གིས་དུས་འདིར་འཛོམས། །ཞེས་གསུངས་བཞིན་ཀུན་བཟང་ཤེས་རབ་རྒྱུད་སོང་ནས་དཔེ་ཆ་འཕྲོས་གང་བྱུང་ངམ་དགོངས་ཀློང་ཡངས་པའི་མཁའ་མཉམ་མཐར་བདེ་ཞི་བར་མྱུར་དུ་སྐྱོལ་བར་ཞུ་ལགས། ཞེས་དམ་རྫས་སོ་སོ་དང་བཅས་ཞུ་ཡིག །ཅེས་པའི་བཀའ་ཤོག་བརྟན་བཞུགས་བཅས་པ་ཕེབས། དེ་རྗེས་ཟླ་བ་འགའ་ཞིག་སོང་ཙམ་ན། །བླ་མ་ཀུན་བཟང་ཤེས་རབ་དཔོན་སློབ་ཕེབས། །དཔོན་སློབ་རྣམས་ལ་དབང་ནི་འགའ་ཞིག་དང་། །རི་ཆོས་གླེགས་བམ་བཞེངས་འདུག་ལུང་ཡང་བྱས། །དོན་བརྒྱུད་གཏེར་སྟོན་ཉིད་ཀྱི་གཏེར་ཆོས་རྣམས། །བཀའ་གཏད་ལན་གསུམ་གནང་བྱུང་དེས་མཐུས་ཏེ། །ཚིག་རྒྱུན་དབང་ལུང་ཀུན་བཟང་ཤེས་རབ་ལ། །ཞུ་འདོད་ཞུས་པས་ལུང་ནི་ཕུལ་ཆོག་གི །དབང་ནི་ཁོང་གིས་བྱེད་པ་མི་སྤོབས་གསུངས། །དེ་ཚེ་ཉེ་གནས་དགེ་སློང་སྦྱིན་པ་ཡིས། །མཚམས་ཁང་འདི་རུ་བླ་མ་ཕེབས་པ་ཡང་། །ཁོ་རང་ལ་ཡང་ཨེ་དགའ་རུང་མི་རུང་། །བརྟག་པ་
མཛོད་ཟེར་བརྟགས་པ་བྱས་པ་ཡིས། །རྩེ་མ་འོང་ཞེས་ཟེར་བའི་སྒྲ་ཞིག་གྲག །དེ་ནས་ཕྱིར་ནངས་དབང་ལུང་ཞུ་ཁ་ཡི། །ཐོ་རངས་ཉམས་སྣང་རང་གི་མདུན་དེ་ན། །བུད་མེད་མཐིང་མདོག་གཅེར་བུ་གཅིག་གིས་ནི། །གར་སྟབས་བསྒྱུར་ཞིང་འདུག་པའི་མཐོང་སྣང་བྱུང་། །བཀའ་སྲུང་ཨེ་ཀ་ཙ་ཏི་ཡིན་ནམ་སྙམ། །དེ་ནས་བླ་མ་དཔོན་སློབ་དྲག་རིམ་ཀུན། །སྤྱི་བོར་བདུད་འདུལ་རྡོ་རྗེ་མཇལ་དུ་ཕེབས། །དཔོན་སློབ་ཞབས་ཕྱི་འགའ་ཞིག་ལུས་པ་ལ། །ཞག་བདུན་ཁྲིད་དང་དགེ་ཚུལ་སྡོམ་པ་ཕོག །གཏེར་གསར་དབང་ལུང་དམ་ཆོས་སྒོ་སྐྱེལ་ནི། །ལན་གཅིག་བྱུང་བ་ཨོ་རྒྱན་ཐུགས་རྗེ་དང་། །བཀའ་སྲུང་རྣམས་ཀྱི་ཕྲིན་ལས་ཡིན་པར་གོ །ཀཿཐོག་གྲྭ་པ་འགའ་ཞིག་ཁ་ངག་ལ། །ཀརྨ་ཆགས་མེད་ཚེ་མཚམས་སྤྲུལ་སྐུ་སོགས། །ཨོ་རྒྱན་དྲུང་དུ་དབང་ལུང་མཉམ་དུ་ཐོབ། །དབང་ལུང་མི་དགོས་གཏེར་ཆོས་ཐེང་བས་ཆོག།དེ་སྐད་གཏེར་སྟོན་ཉིད་ཀྱིས་གསུངས་ཞེས་ཟེར། །དེ་འདྲ་ཅལ་སྒྲོག་གཏམ་ནི་ཡིན་སྙམ་ཡང་། །གཏེར་སྟོན་ཉིད་ཀྱིས་ཀུན་བཟང་ཤེས་རབ་ལ། །གནང་བའི་བཀའ་ཤོག་འདུག་པ་འདི་ལྟ་སྟེ། །བླ་མ་ཀུན་བཟང་ཤེས་རབ་ཨོ་རྒྱན་དཔོན་སློབ་
ཀྱིས་དབང་རྣམས་ཀྱི་གྲལ་དང་། རྗེ་བེ་རོ་ཙཱ་ན་རྒྱལ་མོ་ཚ་བའི་རོང་ནས་ཡར་ཕེབས། རྗེ་འབངས་ཐམས་ཅད་ཐེ་ཚོམ་གྱི་དྲི་མ་དག་པའི་སྐབས་སུ་རྗེ་འབངས་ཉེར་ལྔའི་འཁོར་བཅས་ལ་མན་ངག་གི་ཞལ་གདམས་རེ་རེ་གནང་དུས་སུ། རྒྱལ་བ་བྱང་ཆུབ་ཅེས་པ་འདུག་ཅིང་བེ་རོ་ཙཱ་ནའི་ཞལ་གདམས་ལའང་དབང་སྐལ་འདུག །འདིར་ཡང་ཡེ་ཤེས་རབ་འབར་ལུང་བྱང་ལས། སེང་གེ་གསུམ་དང་ཤེས་རབ་རྣམ་པ་གསུམ། ཞེས་ཤེས་རབ་གཅིག་ཡིན་པའི་རྟགས་བྱུང་ཞིང་ཡེ་ཤེས་རབ་འབར་དཔེ་བཅུ་བཤོས་པའི་སྐབས་སུ། ཀརྨ་ཆགས་མེད་དང་། ཚེ་མཚམས་སྤྲུལ་སྐུ་དང་། ཀུན་བཟང་ཤེས་རབ་གསུམ་ཀློང་གསལ་རྡོ་རྗེ་སྙིང་པོའི་ཡི་དམ་རྩ་གསུམ་ལ་དབང་བའི་རྟགས་མཚན་འགའ་བྱུང་བ་དང་། ཡང་ཕྱིར་འོང་བའི་སྐབས་ལམ་ཐོག་ཏུ་བི་མ་ལའི་སྙིང་ཐིག་གི་ཆོས་བདག་དང་། ཁྱད་པར་རིལ་བུ་བསྒྲུབས་ན་སྐུ་ཚེ་ལ་ཕན་པའི་བརྟག་པ་གསལ་ཆ་བྱུང་བའི་ཕྱིར། ཕྱོགས་ཀྱི་ཆར་ཁོ་བོའི་སྐུ་ཚབ་ཡིན་པའི་ཕྱིར། མཛད་པའི་ཚུལ་དེ་བཞིན་མཛོད་ཅིག །བདག་ལ་ཁྱད་པར་མེད་ཀྱང་པདྨའི་བཀའོ། །ཞེས་པ་འདུག་ཕྱིར་མཛེས་ཆོས་ངོ་འཇོག་སོགས། །མིན་པར་ཆོས་བདག་ལུང་ཟིན་ཡིན་པར་
གོ །གཏེར་སྟོན་ཉིད་ཀྱིས་ཞལ་ནས་ཆོས་བདག་རྣམས། །མིན་ལ་ཡིན་སོགས་བརྫུན་ཚིག་མཛེས་ཆོས་སོགས། །ཁོ་བོའི་ནམ་ཡང་སྨྲས་པ་མེད་དོ་ཞེས། །དེ་དོན་ཡང་ཡང་ཞལ་ནས་གསུངས་སོ་སྐད། །དེ་སྔོན་བླ་མ་ཕྲིན་ལས་ཕེབས་པའི་ཚེ། །རྡོར་ཕྲེང་དབང་འདིར་རང་ཚང་བཀའ་བབ་ཡིན། །འདི་ཡི་གབ་འཁྲུགས་རྣམས་ཀྱང་འབྱེད་དཀའ་བས། །འདི་ལ་བལྟས་ཆོག་ཁྱེར་བདེ་མཛད་དགོས་ཟེར། །འདི་ནི་བསྟན་པ་སྤྱི་ཡི་གཞུང་ཆེན་ཏེ། །དེ་ཡི་བཀའ་བབ་རང་རེ་ག་ལ་ཡིན། །ཡོངས་གྲགས་དགེ་བཤེས་ཆེན་པོ་མ་ཡིན་པ། །བདག་འདྲ་བྱ་བྲལ་རྨོངས་པས་བསྒྲིགས་ན་ཡང་། །སུས་ཀྱང་མི་བྱེད་འཕྱ་རྟེན་ཡིན་ནོ་སྨྲས། །བླ་མ་ཆེན་པོ་རྣམས་ཀྱིས་མཛད་པ་ཡང་། །རང་རང་རྗེས་འཇུག་མིན་ལ་དར་བ་མེད། །ཁྱེད་ཀྱི་སློབ་བུ་སློབ་ཕྲན་མང་བའི་ཕྱིར། །དེ་དག་རྣམས་ལ་ཕན་ཐོགས་ཆེའོ་ཟེར། །དེ་དུས་ཁས་མ་བླངས་ཀྱང་དེ་རྒྱབ་ཞིག །མར་མེ་བརྒྱ་རྩ་ཚོགས་བརྒྱ་མཎྜལ་བརྒྱ། །སྟོང་ཕྱག་འབུམ་འགྱུར་ཟླ་བའི་ནང་དུ་བྱས། །དངུལ་དང་ཤོག་བུ་ཚན་ཆེར་མཎྜལ་ཕུལ། །བརྟགས་པ་བྱས་པས་གཞན་ཕན་འབྱུང་ལྟས་མཐོང་། །དེ་ཕྱིར་རྡོར་ཕྲེང་རྡོག་དཀྱིལ་
བསྒྲིགས་ཆོག་བྱས། །རང་གི་བུ་ཆེན་པདྨ་རིག་འཛིན་དང་། །མཆིམས་ཕུར་ལོ་གསུམ་ཙཱ་རིར་ལོ་གསུམ་བསྒྲུབས། །ཙཱ་རིའི་སྐོར་ལམ་ཞབས་རྗེས་གཉིས་བཞག་པ། །ཀུན་ཀྱང་དད་ཅིང་སློབ་མ་མང་དུ་འདུས། །ཆེས་ཀ་རྣམས་གཏོར་རྒྱ་གར་འབྱོན་ཤོམ་ཚེ། །འབུལ་ཕུད་ཡིན་ཟེར་རྒྱ་སིལ་བཟང་པོ་དང་། །ཡོལ་བ་གསེར་སྐུ་རྒྱ་ནག་མ་གཉིས་དང་། །ཙཱ་རི་སིནྡྷུ་རྡོ་རྗེ་གདན་གྱི་རྩྭ། །བྱིན་རླབས་རྟེན་སོགས་འབུལ་བ་མང་པོར་བཅས། །རྟོགས་ལྡན་གཉིས་བཏང་ཞུ་ཡིག་བརྟན་བཞུགས་ནི། །ན་མོ་གུ་རུ་བྷེ། བཀྲ་ཤིས་ཐོག་མའི་ཆོས་དབྱིངས་རྣམ་དག་འཕྲུལ། །དཔལ་ལྡན་སྐུ་ཡི་འོད་གསལ་དཀྱིལ་འཁོར་རྒྱས། །ངོ་མཚར་མཛད་བཟང་ཟིལ་སྟོང་འཁོར་མོར་འགྱེད། །དཔལ་ལྡན་ཀུན་བཟང་བླ་མ་མཆོད་གྱུར་ཅིག ༧ །གང་དེའི་ཞབས་རྡུལ་པདྨོའི་དྲུང་། །ཅོད་པན་འདུད་དེ་གསོལ་བ་ནི། །སྐུ་ཚེ་ཞེས་པ་རླུང་ཡིན་པས། །རླུང་ནི་ཡེ་ནས་རང་དག་པས། །སྐྱེ་འཆི་གདོད་ནས་མེད་པའི་དོན། །ཁྱེད་ཀྱང་ཡིན་ལ་རྟོགས་བཞིན་དུ། །དུས་གསུམ་འགྱུར་མེད་ཞབས་བརྟན་གསོལ། །སྒྱུ་མའི་ངོས་སྣང་མ་མཇལ་བས། །སྤྲུལ་པའི་རོལ་པ་མི་གཡོ་འཚལ། །ཅེས་པ་ཞུ་ཡིག་གཏམ་སྙན་
དང་བཅས་པ་ཕེབས། །རྟོགས་ལྡན་དེ་གཉིས་དབང་ལུང་དགེ་ཚུལ་བསྒྲུབས། །འབྲི་ཆུ་རྒྱུད་དུ་བཞུགས་པའི་བླ་མ་ནི། །གཏེར་རྙིང་རྣམས་ལས་ལུང་བསྟན་གསལ་བ་ཡི། །རིག་འཛིན་བུདྡྷ་བཛྲ་ཞེས་བྱ་བ། །བཀའ་ཤོག་རྟེན་བཅས་བརྟན་བཞུགས་གནང་བ་ནི། །རྒྱལ་བ་རྒྱ་མཚོའི་དགོངས་པ་ཡོངས་རྫོགས་ཤིང་། །རྒྱལ་བ་རྣམས་ཀྱི་ཕྲིན་ལས་བསྒྲུབ་པའི་ཕྱིར། །རྒྱལ་བསྟན་ཉིན་མོར་བྱེད་པའི་དོན་ཆེད་དུ། །རྒྱལ་སྲས་ཀརྨ་ཆགས་མེད་བརྟན་བཞུགས་གསོལ། །སྲིད་པ་ཇི་སྲིད་བར་དུ་བཞེས་པའི་དོན། །འགྲོ་གྲོལ་སྟོན་སླད་མཚན་ལྡན་བླ་མ་མཆོག །སྐུ་གསུང་ཐུགས་ཡོན་ཕྲིན་ལས་ཞིང་འདིར་ཡང་། །གཡུང་དྲུང་འཇིག་པ་མི་མངའ་བཞུགས་གསོལ་འདེབས། །རྩ་གསུམ་ཆོས་སྐྱོང་སྲུང་མའི་མཐུ་བྱིན་གྱིས། །རེས་མཐུན་མཐར་སྲོག་གསོ་བ་འདོད་འཇོའི་མ། །ཟབ་གཏེར་གཏེར་འཛིན་ཀརྨ་ཆགས་མེད་ཀྱི། །སྐུ་ཚེ་རབ་བསྟན་ཕྲིན་ལས་རྒྱས་གྱུར་ཅིག །ཀཿཐོག་པ་ཡི་རིང་ལུགས་འཛིན་པ་ཡིས། །བླ་མ་བཀྲ་ཤིས་བློ་གྲོས་ཞེས་བྱ་བས། །འབུལ་བ་སུམ་རྩག་དང་བཅས་བརྟན་བཞུགས་ནི། ༈ ན་མོ་གུ་རུ་ཝེ། དཔལ་ལྡན་ཡེ་ཤེས་འཁོར་ལོའི་གཟི་བྱིན་ཀུན་
ཏུ་འབར་བའི་འཕྲུལ། །དག་པ་རབ་འབྱམས་རྒྱལ་བའི་ཞིང་ཀུན་རྣམ་པར་མཛེས་པའི་དཔལ། །རྒྱལ་བ་ཀུན་གྱི་མཁྱེན་བརྩེའི་གོང་བུ་རིག་འཛིན་པདྨ་རྒྱལ། །དད་བརྒྱའི་འདབ་སྟོང་ཀུན་ཏུ་གཡོ་བས་ཕྱག་འཚལ་མཆོད་ཚོགས་འབུལ། །འགྲོ་ཀུན་ཆོས་བཟོད་མ་ཐོབ་དེ་སྲིད་དུ། །མགོན་ཁྱོད་རྫུ་འཕྲུལ་རྐང་པ་བཞི་ཁྲིའི་སྟེང་། །འགྲོ་ཁམས་ཉིན་མོར་ཡར་འདོགས་མཛད་སླད་དུ། །མྱ་ངན་མི་འདའ་བཞུགས་པར་གསོལ་བ་འདེབས། །སྔར་འདས་རྒྱལ་བས་མ་ཐུལ་ད་དུས་འགྲོ། །ཁྱེད་ཀྱིས་བྱམས་པའི་ཕྱག་གིས་མི་འཛིན་ན། །དམུས་ལོང་ལྟ་བུའི་འགྲོ་རྣམས་སུ་ལ་རེ། །དེ་ཕྱིར་བསྐལ་བརྒྱར་བཞུགས་པར་གསོལ་བ་འདེབས། །འདི་དག་སྐབས་སུ་བུག་སྒོ་ཆོས་བཤད་ཀྱིས། །དབང་ལུང་ཁྲིད་སོགས་ཞུ་མཁན་ཤིན་ཏུ་མང་། །སྐྲ་ཕུད་རབ་བྱུང་བསྙེན་རྫོགས་ཞུ་མཁན་མང་། །བར་སྐབས་རྣམས་སུ་ཐལ་ཐོལ་མང་ཞིག་བྱུང་། །གསར་དུ་སློབ་དང་སྔར་གྱི་སྔགས་པའི་རྒྱུན། །དབང་ལུང་ཞུ་དང་སྔགས་ཡོན་གསར་སློབ་མཁན། །མང་དུ་བྱུང་བ་རྣམས་ལ་ཕན་པའི་ཕྱིར། །ས་རྩིས་རྡུང་དང་གཏོ་ཆོག་ལ་སོགས་ཀྱིས། །ཁྱེར་བདེར་འགྲིགས་ཆོག་མང་དུ་བྱས་པ་ནི། །ཡིག་དྲུག་
ཆག་པའི་རྐྱེན་དུ་གྱུར་ན་ཡང་། །ད་ནི་དུས་སྙིགས་ལྷ་སྲིན་ཁ་དར་བས། །མི་རྣམས་ཀུན་ལ་ན་ཚ་ཇེ་རྒོད་འོང་། །དེ་དུས་རིམ་གྲོ་མི་བྱེད་ཀ་མེད་ཀྱང་། །སྔགས་པ་རྣམས་ཀྱིས་ཇི་བཞིན་ཤེས་པ་ཉུང་། །སློབ་དཔོན་མི་བསྟེན་ཕྱག་ལེན་ཅི་དྲན་བྱེད། །མགོ་མེད་མཇུག་མེད་དཔེ་འདོན་རྔ་སྒྲོག་བརྡུངས། །ཡོན་བདག་རྣམས་ཀྱིས་རྐྱེན་ཟློག་དེ་ལ་རེ། །དེ་དག་རྣམས་ལ་ཕན་པའི་སེམས་བསྐྱེད་ནས། །སློབ་དཔོན་མི་དགོས་དཔེ་ཆས་ཆོག་པ་བཀོད། །ཕྱི་རབས་སྔགས་ཆུང་རྣམས་ལ་བཞག་པ་ཆེ། །རྫ་ཡི་བླ་མ་ཀརྨ་འདུལ་བ་དེས། །སྐུ་རྟེན་སངས་རྒྱས་སྟོང་གཟུགས་ཁྲི་ར་ཅན། །གསུང་རྟེན་རྒྱས་འབྲིང་རྣམ་གསུམ་བསྐལ་བཟང་དང་། །གྲྭ་ཏོག་གསེར་གསུམ་རྣམས་ལ་བརྒྱ་ཚར་རེ། །ཐུགས་རྟེན་བྱང་ཆུབ་མཆོད་རྟེན་མི་ཚད་གཉིས། །མདའ་ཚད་གསུམ་སོགས་གྲུབ་ནས་ཡོད་པ་རྣམས། །དེ་དག་ཞུ་བའི་རྟེན་དུ་མཎྜལ་ཕུལ། །གུ་རུ་དྲག་པོའི་ལས་བྱང་འབྲུ་འགྲེལ་དང་། །ཐུགས་རྗེ་ཆེན་པོའི་དམར་ཁྲིད་དོན་བསྡུས་དང་། །མགུར་དང་ཞལ་གདམས་དགོས་གསུངས་བཀའ་ཤོག་བྱུང་། །གུར་དྲག་འབྲུ་འགྲེལ་ཤིན་ཏུ་གཉན་ན་ཡང་། །ཁོང་གིས་ངག་བཅད་གུར་དྲག་
དུང་བཟླས་ཤིང་། །གུར་དྲག་འགྲུབ་པའི་བཀའ་ཡི་རིག་འཛིན་དུ། །གཏེར་གཞུང་ཉིད་ནས་ལུང་བསྟན་དོན་གྱིས་གསལ། །དེ་ཕྱིར་བཀའ་གསུང་མ་བཅག་བྲི་བར་བྱས། །ཁོང་གིས་བསྒྲུབས་ཚར་ད་ནི་མི་དགོས་ཀྱང་། །མ་འོངས་གསར་པ་རྣམས་ལ་ཕན་པར་གོ །དེ་བཞིན་བླ་མ་སངས་རྒྱས་རྡོ་རྗེ་ཡིས། །གནམ་ཆོས་དགོངས་གཏེར་དབང་སྣ་མང་པོ་ཡིས། །དབང་སྒྲུབ་ལོ་རྒྱུས་དབང་དང་བཅས་པ་རྣམས། །བསྒྲིགས་ཆོག་མཛོད་ཅེས་གསུང་གིས་བསྐུལ་བ་ཡང་། །མཁས་པ་ཁོང་འདྲར་བསྒྲིགས་ཆོག་མི་དགོས་ཀྱང་། །དགེ་བཤེས་གསར་བུ་རྣམས་ལ་ཕན་སྙམ་བསྒྲིགས། །སྔོན་དུ་མི་འགྱུར་རྡོ་རྗེའི་གནམ་ཆོས་ལ། །རླུང་ཁྲིད་རྩ་ཚིག་ལྡེབ་མ་དྲུག་བདུན་བྱུང་། །དོན་ནི་ཟབ་ཀྱང་བཤད་འཚོང་མི་འདུག་པས། །དེ་ཡི་འབྲེལ་བ་ཁྲིད་ཡིག་རྩོམས་ཤིག་གསུངས། །བདག་གིས་བརྩམས་པའི་ཁྲིད་ཡིག་དེ་ཉིད་ཀྱིས། །སྤྲུལ་སྐུ་ཉིད་ཀྱིས་ལན་མང་ཁྲིད་བཙུགས་པ། །དེ་ལ་བདུན་བས་མང་ནས་མི་ཚུད་ཀྱང་། །བདག་ལ་དེ་ཡི་དབང་ལུང་ཐོབ་པ་རྣམས། །བདུན་ལ་མི་བརྩི་མང་པོ་ཚུད་དོ་སྐད། །དེ་ཕྱིར་དབང་ལུང་ཞུ་མཁན་མང་དུ་བྱུང་། །སྤྲུལ་སྐུ་ཉིད་ཀྱི་རླུང་ཁྲིད་བཙུགས་པ་
ནི། །ཞག་ནི་གསུམ་ལྔ་བདུན་ནས་དྲོད་སྐྱེ་ཞིང་། །ཞག་བཅུ་ནས་ནི་རས་རྐྱང་ཆུ་རས་ཐུབ། །དེ་ལས་བསྲིང་བའི་ཁྲིད་ཀྱང་མི་མཛད་སྐད། །རས་རྐྱང་ཐུབ་པ་བརྒྱ་ཤར་ཙམ་ཞིག་བྱུང་། །སློབ་མ་དྲག་རིམ་རྣམས་ཀྱིས་ཁྲིད་དེ་བཙུགས། །ཟླ་བ་རེ་ནས་ཕལ་ཆེར་ཆུ་རས་ཐུབ། །དྲག་རིམ་རས་རྐྱང་ལྔ་རེ་སྐམ་ཐུབ་ཟེར། །རླུང་ཁྲིད་དཔེ་ཆ་བདག་གིས་བྲིས་པ་དེ། །ཚུར་ལ་བསྐུར་རྗེས་སྤྲུལ་སྐུ་ཞིང་བརྗེས་འདུག །བདག་ལ་རླུང་ཁྲིད་ཞུ་ཟེར་མང་དུ་བྱུང་། །བདག་གིས་རས་རྐྱང་བྱས་པ་མ་འགྲུབ་སྟེ། །གཞན་ལ་བཙུགས་པས་ཕན་ནམ་མི་ཕན་སྙམ། །སྤྲུལ་སྐུ་འདིས་ཁ་ཁྲིད་དཔེ་བསྐུར་བ་དེ། །རྒྱུད་པ་གཏད་པ་ཡིན་པར་གོ་ནས་བཙུགས། །དྲག་རིམ་ཞག་པོ་ལྔ་ནས་དྲོད་སྐྱེས་ཤིང་། །ཞག་བཅུ་ཙམ་ནས་གཟན་རྐྱང་ཐུབ་པ་དང་། །བདུན་གསུམ་ཙམ་ནས་ཆུ་རས་བསྐམས་པ་བྱུང་། །དྲུང་པས་གཟིགས་པས་ཐུགས་དགྱེས་ངེས་ཤེས་མཛད། །དེ་ཕྱིར་ལོ་མང་རླུང་ཁྲིད་མང་དུ་བཙུགས། །རྟགས་ཐོན་རང་གཞན་ཐམས་ཅད་ངེས་ཤེས་སྐྱེས། །དེ་བཞིན་གནམ་ཆོས་འཕོ་ལུང་རྩ་ཚིག་ལ། །སྤྲུལ་སྐུའི་བཀའ་བཞིན་ཁོ་བོས་ཁྲིད་ཡིག་བརྩམས། །སྤྲུལ་སྐུ་ཉིད་ནི་སྨོས་ཀྱང་ཅི་
དགོས་ཏེ། །ཁྲིད་ཡིག་དེ་ཡིས་འཕོ་ལུང་བཙུགས་ཚད་ལ། །ཞག་གསུམ་ཙམ་ནས་སྤྱི་བོ་སྐྱང་པ་དང་། །ཁྲག་དང་ཆུ་སེར་ཐོན་སོགས་རྟགས་མཚན་ཐོན། །འཕོ་ལུང་དེ་ཉིད་མང་དུ་བཙུགས་མཁན་རྣམས། །ཞག་རེའམ་ནི་ཇ་ཡུན་ཙམ་ཉིད་ནས། །རྟགས་མཚན་ཐོན་པ་མང་དུ་བྱུང་འདུག་པས། །གནམ་ཆོས་ཟབ་པར་ཀུན་ལ་ཡོངས་སུ་གྲགས། །དེ་བཞིན་གནམ་ཆོས་བདེ་ཆེན་ཞིང་སྒྲུབ་ཀྱི། །འདོན་ཆ་སྒྲུབ་ཐབས་ཟིན་བྲིས་བདག་གིས་བཀོད། །དེ་ལ་སྒྲུབ་པ་བྱེད་པ་འགའ་བྱུང་བས། །ཉམས་དང་རྨི་ལམ་འོད་དཔག་མེད་མགོན་ནི། །མཇལ་སོགས་རྟགས་མཚན་ཐོན་པ་མང་དུ་བྱུང་། །སྔར་དུས་ལྷ་མོ་བརྒྱ་རྩ་བསྒྲིགས་པ་དེ། །བཅས་པས་ནད་མུ་འཕྲལ་དུ་ཆད་པ་དང་། །ལྷ་མོའི་རྟགས་མཚན་ཐོན་པ་འགའ་ཞིག་བྱུང་། །དེ་བཞིན་དགོངས་འདུས་ཀླུ་སྨན་རིལ་བུ་བསྒྲུབས། །དེ་ཉིད་གཞན་ལ་བྱིན་དང་བསྐུར་བ་ཡིས། །འདོད་བཞིན་ཆར་པ་འབེབས་པ་ལན་མང་བྱུང་། །བདུད་འདུལ་རྡོ་རྗེ་ལ་སོགས་གཏེར་ལུང་ལས། །ལོ་ཉེས་རིམ་པར་མུ་གེ་འབྱུང་གསུངས་པས། །དེ་ལ་ཕན་ཕྱིར་སྙིང་གཏེར་གསར་དུ་བསྒྲིགས། །དེ་ལ་ནང་ཆེན་རྒྱལ་པོའི་ལེགས་སོ་གསུངས། །ཡུལ་ཕྱོགས་
རྣམས་སུ་བུམ་པ་སྦ་རྒྱུ་བསྐུར། །སྦས་ཕྱོགས་རྣམས་སུ་ཆར་ཆུ་དུས་སུ་བབ། །ལོ་ཏོག་སྐྱེ་འཁྲུངས་བཟང་ཞེས་ལེགས་པར་ཐོས། །དུས་ཕྱིས་ལྷ་སྲིན་ཁ་དར་སེར་བ་རྒོད། སྔགས་པ་རྣམས་ཀྱིས་སེར་བ་མ་ཐུབ་ཀྱང་། །སྔར་གྱི་ཕ་མྱེས་བཞག་པ་སེར་གླ་ཟ། །སེར་བའི་ཁག་ཁུར་རི་ཁྲོད་པ་ཚོས་དགོས། །སེར་བ་མ་ཐུབ་རི་ཁྲོད་ཆགས་ཐབ་དཀའ། །ཁོང་རྣམས་སྐྲག་ནས་ང་ལ་རྒྱབ་རྟེན་ཞུ། །བདག་གིས་སེར་སྲུང་བྱེད་པ་མ་ཡིན་ཀྱང་། །གཞི་བདག་རྣམས་ལ་ལན་རེ་བཀའ་བསྒོ་ཙམ། །རྡོ་རྗེ་མཆུ་འམ་བསྔགས་པའི་རྡོ་དཀར་ནི། །རེ་ཟུང་ཙམ་རེ་བསྐུར་བར་བྱས་པ་ཡིས། །དེ་འདྲ་དེ་སྔོན་ལོ་གྲངས་བཅུ་བཞི་ལྔར། །སོང་སྟེ་དེ་སྔ་སེར་བའི་དགྲ་མ་བྱུང་། །ཁོ་བོ་ངག་ནུས་ཆེ་བ་མ་ལགས་ཏེ། །ཨོ་རྒྱན་ཆེན་པོའི་རྗེས་སུ་ཞུགས་པའི་མཐུས། །ལྷ་འདྲེ་རྣམས་ཀྱིས་རྩིས་འཇོགས་བྱེད་པར་མངོན། །དེ་བཞིན་སྲིའུ་ཅིས་ཀྱང་མ་སོས་ནས། །བདག་ལ་སྐྱབས་ཞུ་ཟེར་བ་འགའ་རེ་བྱུང་། །སྲིའུ་ཅི་བཞིན་གསོ་བ་མི་འཁྱོངས་ཀྱང་། །བསྲུང་བ་སྣ་རེ་བཏགས་དང་དམིགས་རིམ་ཙམ། །ཡུན་རིང་བསྒོམས་པས་ཕན་ཐོགས་ཟེར་བ་དང་། །ལེགས་སོ་གཏང་རག་བྱེད་
པའང་འགའ་རེ་བྱུང་། །བསྟབ་པ་ཞུ་དང་བརྟག་པ་ཞུ་མཁན་མང་། །ལོ་གྲངས་ཤེས་ན་འཇམ་དབྱངས་གསུངས་བཞིན་དང་། །མི་ཤེས་ཨོ་རྒྱན་དམ་པ་རྒྱ་གར་གྱི། །གསུངས་པའི་རྟེན་འབྲེལ་བརྟག་པའི་གཞུང་བཞིན་དུ། །རིམ་གྲོ་ལ་སོགས་ལུང་བསྟན་བྱེད་པ་ཡིན། །མགོ་སྐོར་རྫུན་ཚིག་སྨྲས་པ་ཅིག་ཀྱང་མེད། །བྱང་ལུང་གནང་དགོས་ཟེར་བ་འགའ་བྱུང་བས། །བདག་ལ་མངོན་ཤེས་མེད་ཕྱིར་མི་ཤེས་སྨྲས། །སྐྱེ་གནས་སྐྱེ་སྒོ་ཆོད་སོགས་དྲིས་བྱུང་ཚེ། །འཇམ་དབྱངས་གསུངས་པའི་ཤེས་རབ་ལས་རྩིས་དང་། །རིགས་པས་དཔྱད་ན་འདི་ལྟར་འདུག་གོ་ཞེས། །དགེ་བསྐུལ་འོང་བར་འདུག་ཕྱིར་མཚམས་པར་སྨྲས། །དེ་ཡང་མངོན་ཤེས་མེད་སྨྲས་དག་འཐར་ནས། །མི་ཆོས་བླ་མའི་རྫུན་དུ་མི་འགྱུར་བྱས། །རྒྱུན་དུ་རྒྱལ་བ་རྒྱ་མཚོའི་བདག་བསྐྱེད་དང་། །གསར་རྙིང་གནམ་ཆོས་བཅས་པའི་གཏོར་བསྔོས་དང་། །བཀའ་སྲུང་རྣམས་ཀྱི་གཏོར་བསྔོས་ཆག་མེད་དེ། །ཉ་མཚམས་བརྒྱད་གསུམ་གཏོར་མ་བཏང་བ་དང་། །དགོང་མོ་བཀའ་སྲུང་གསོལ་ཁ་རྒྱས་པ་རྣམས། །ཚེས་བརྒྱད་སྔ་དྲོ་སྒྲོལ་དཀར་བཅུ་གཅིག་ཞལ། །ཆོ་ག་རྒྱས་པ་སྨན་བླ་བསྡུས་པ་གཏོང་། །ཚེས་བཅུའི་སྔ་དྲོ་
ཐུགས་ཁྲིད་འདོན་ཆ་དང་། །ཚེ་སྒྲུབ་གསང་འདུས་གནམ་ལྕགས་རྡོ་རྗེ་དང་། །ཚ་བ་དམར་ཐག་རྩེ་གསུམ་མཆོད་ཕྲེང་དང་། །མེ་ཏོག་ཕྲེང་མཛེས་བཀའ་ཕུར་བསྡུས་པ་གཉིས། །གནམ་ཆོས་གུ་རུ་ཞི་དྲག་མ་ནིང་གསུམ། །ལས་བྱང་དེ་རྣམས་སྤྱི་སོར་ཚོགས་མཆོད་དང་། །རྟ་ནག་དྲེགས་པ་བཙན་རྒོད་ཁ་མོ་ཆེ། །ཆོ་ག་རང་གིས་ཅུང་ཞིག་བསྡུས་པ་དང་། །བཀའ་བརྒྱད་བཀའ་སྲུང་ཕུར་སྲུང་བསྟོད་བསྐུལ་དང་། །བཀའ་བརྒྱད་ཟློག་པ་འཇའ་ཚོན་པ་ཡི་ལུགས། །གསང་འདུས་ཆད་མདོ་བརྟན་སྐྱོང་རྗེས་ཆོག་བཅས། །ནུབ་མོ་ཉལ་ཁ་རིག་འཛིན་བྱིན་འབེབས་བྱས། །བཅོ་ལྔ་སྔ་དྲོ་གནས་ཆོག་རྒྱས་པ་དང་། །དེ་ཞོར་བྱང་སྡོམ་རྒྱས་པ་ལེན་པར་བྱས། །དེ་ཉིན་གསོ་སྦྱོང་བྱིན་བརླབ་བྱ་བའམ། །ཡང་ན་ཞི་གནས་གསོ་སྦྱོང་ཐུན་རེ་སྒོམས། །བཅུ་དགུ་ཉི་ཤུ་དགུ་གཉིས་འདྲ་བ་ལ། །ཕྱག་བཞི་པ་ཡི་ཆོ་གིས་ཁོག་ཕུབ་ནས། །ཆོས་སྐྱོང་སྤྱི་ཡི་གཏོར་ཆོག་མདོར་བསྡུས་དང་། །གསོལ་སྤྱང་བསྐང་སྤུང་སྤྱི་ཡི་ཚོགས་མཆོད་གཅིག །གཞི་བདག་གཏོར་མ་བཟློག་སྤུང་བཅས་པ་འདོན། །ཁྱད་པར་བཅུ་དགུའི་སྔ་དྲོ་གཏུམ་ཆུང་དང་། །ནཱ་ག་རཀཱའི་གཏོར་ཆོག་འདོན་པ་ཡིན། །
དེ་བཞིན་ཉེར་དགུའི་སྔ་དྲོ་གཏུམ་ཆུང་དང་། །ཁྲོ་ཆུ་དུག་གདོང་ལས་བྱང་འདོན་པ་ཡིན། །གནམ་གང་སྔ་དྲོ་སྨན་བླའི་ཆོ་ག་འདོན། །དགུ་གསུམ་ཕྱི་དྲོར་དྲང་སྲོང་གཏོར་ཆུང་འབུལ། །ཚེས་དགུ་བཅུ་གཅིག་ཉེར་བཞི་ཉི་ཤུ་དྲུག །ལྷ་མོའི་དུས་ཆེན་ཡིན་པས་གཏོར་འབུལ་བྱས། །དེ་དག་རྣམས་སུ་དུས་གཏོར་བཅའ་དགོས་པས། །མཆོད་གཡོག་རྣམས་ཀྱིས་འཁྱོང་བར་དཀའ་བ་དང་། །འབྲོག་པ་ཡིན་ན་ཁྱེད་ཚང་དུས་གཏོར་འདི། །བཅའ་རྒྱུ་རྙེད་པར་མི་འདུག་དྲུང་པས་གསུངས། །གཞན་ཡང་ཉེར་གསུམ་ཉིན་པར་སློབ་དཔོན་དང་། །སྤྲུལ་སྐུ་དང་ནི་ཆོས་དབང་དུས་མཆོད་ལ། །གསང་འདུས་བུམ་སྒྲུབ་ཆོ་ག་རྒྱས་པ་དང་། །ཞི་ཁྲོའི་ལས་བྱང་ཚོར་གྲོལ་སྙིང་པོ་དང་། །ནོར་ལྷ་སྤྱི་གཏོར་གཡང་འགུགས་བཅས་པ་དང་། །རེ་མན་དང་ཤན་པ་ལུང་བཙན་བཅས། །གསང་འདུས་ཚོགས་དང་བཀའ་སྲུང་བསྡུས་པ་དང་། །ཆད་མདོ་བརྟན་སྐྱོང་རྗེས་ཆོག་བཅས་པ་བྱ། །དེ་ཉིན་གཏོར་མ་ཚར་གཅིག་གཏོང་བ་ཡིན། །ཉི་ཤུ་བརྒྱད་ལ་ཡབ་སྲས་དུས་མཆོད་དང་། །བླ་མ་མཆོད་སོགས་འདོན་ཆོག་རྒྱས་པ་དང་། །ཐུགས་རྗེ་ཆེན་པོ་ངན་སོང་རང་གྲོལ་དང་། །ཚེ་རིང་མ་
དང་འཇམ་དཔལ་ཀིང་ཀང་འདོན། །རྒྱལ་བ་རྒྱ་མཚོའི་སྒོ་ནས་ཚོགས་མཆོད་དང་། །ཡི་དམ་ཆོས་སྐྱོང་སྤྱི་ཡི་གཏོར་འབུལ་དང་། །ཕྱག་བཞི་པ་དང་ཞིང་སྐྱོང་ཚེ་རིང་མའི། །གཏོར་འབུལ་གཞི་བདག་དཀར་གཏོར་དང་བཅས་ཕུལ། །དེ་ལྟར་ཟླ་གཅིག་ནང་དུ་ཉི་མ་བདུན། །བཅའ་རྒྱུ་འདོན་རྒྱུ་གཉིས་ཀ་མང་བ་དང་། །མར་ངོའི་ཚེས་བཅུ་ཉི་ཤུ་ལྔ་ཡི་ཉིན། །བཅའ་ནི་མི་ཐུབ་ཕུགས་གཏོར་གསོ་བ་དང་། །སྙན་བརྒྱུད་མཆོག་གི་བླ་མའི་རྣལ་འབྱོར་དང་། །སྙན་བརྒྱུད་བདེ་མཆོག་ཕྱི་སྒྲུབ་འདོན་བྱས་ནས། །ཕྱི་སྒྲུབ་ཞི་བ་པདྨ་འོད་འབར་དང་། །རཏྣ་ལུགས་ཀྱི་གུ་དྲག་ལས་བྱང་དང་། །འཇའ་ཚོན་ལུགས་ཀྱི་དྲག་སེང་གཉིས་ཀ་འདོན། །དེ་ལྟར་རྒྱུན་ཁྱེར་དང་ནི་དུས་མཆོད་མང་། །ལོ་མང་བར་དུ་མཚམས་ནི་བསྡམས་བྱས་ནས། །བསྙེན་པ་ཐོན་རྒྱུ་མེད་པ་དེ་ཡིས་ལན། །དུས་མཆོད་དེ་དག་འགྱུར་ནི་ཆེ་བའི་ཕྱིར། །འདི་རུ་བྲི་བར་མི་ལོང་རྒྱ་ཆེའོ། །དེ་ལྟར་ལོ་གྲངས་དྲུག་བདུན་མཚམས་བསྡམས་ཀྱང་། །ངག་མཚམས་དམ་པོ་བྱེད་རྒྱུ་མ་བྱུང་སྟེ། །བུག་སྒོ་ཆོས་བཤད་དབང་ལུང་ཁྲིད་ཞུ་མང་། །འོན་ཀྱང་ཨོ་རྒྱན་ཆེན་པོ་རྡོ་རྗེའི་གསུང་། །ཆུ་ཆེན་འགྲམ་གྱི་ས་ཡིས་
འགག་གཅིག་ཏུ། །མཉན་པས་རྟེན་བཅའ་གྲུ་སྐྱ་མང་དུ་འཚགས། །ཕར་ཀར་འགྲོ་མི་གང་བྱུང་གྲུ་ལས་ཕུད། །དེ་ཡི་གྲུ་གླས་མཉན་པ་འཁོར་བཅས་འཚོ། །དེ་བཞིན་དབང་ལུང་ཁྲིད་ཀྱིས་ཕྱུག་པའི་མི། །གར་ཡང་མི་འགྲོ་གནས་གཅིག་མཚམས་བསྡམས་ནས། །དབང་ལུང་ཁྲིད་སོགས་དོན་གཉེར་གང་བྱུང་རྣམས། །སོ་སོའི་རེ་བ་བསྐང་བར་བྱེད་པ་ནི། །མཉན་པ་ལྟ་བུའི་འགྲོ་དོན་ཡིན་པར་གསུངས། །ད་དུང་ད་ལོ་སང་ལ་དེ་ལྟར་བགྱིད། །སང་ཙམ་འཆི་འམ་ཚོད་འཛིན་མི་འདུག་ཀྱང་། །དེ་ནས་ཚེ་དང་སྒྲུབ་པ་མཉམ་མོ་བསམ། །མངྒ་ལཾ།། །། ༧ ཁམས་སྟོད་སྒོམ་སྡེ་ནང་ཆེན་འབང་སྒང་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།