དགེ་སློང་རཱ་ག་ཨ་སྱའི་རང་ལོ་ལྔ་བཅུ་ནས་ང་དྲུག་བར་གྱི་ནང་གི་རྣམ་ཐར་ཐོར་བུ་འགའ་ཞིག
༄༅། །དགེ་སློང་རཱ་ག་ཨ་སྱའི་རང་ལོ་ལྔ་བཅུ་ནས་ང་དྲུག་བར་གྱི་ནང་གི་རྣམ་ཐར་ཐོར་བུ་འགའ་ཞིག་བཞུགས་པའི་དབུ་ཕྱོགས་ལགས་སོ།།
༄༅། །ན་མོ་གུ་རུ་དེ་བ་ཌཱཀྐི་ནི་ཧཱུྃ། བླ་མ་ཡི་དམ་དབྱེར་མེད་སྤྱན་རས་གཟིགས། །དྷརྨེ་ཤཱ་རིའི་ཞབས་ལ་ཕྱག་འཚལ་ལོ། །ངེས་པའི་དོན་ལ་རྨི་ལམ་འཁྲུལ་པ་སྟེ། །རྨི་ལམ་དག་སྣང་ཕྲན་བུ་རྨིས་པ་ལ། །མཆོག་ཏུ་འཛིན་དང་རློམ་སེམས་དགའ་ཚུལ་ནི། །བར་ཆད་འཇུག་པའི་སྔ་ལྟས་ཡིན་པ་སྟེ། །འོན་ཀྱང་ཁོ་བོས་རློམ་སེམས་དགའ་ཚུལ་མིན། །མེ་བུས་རྟགས་སུ་དུ་བ་འབྱུང་བའི་དཔེ། །གསང་སྔགས་རིག་སྔགས་ཟབ་མོ་སྒྲུབ་པའི་ཚེ། །དེ་ཡི་རྟགས་མཚན་རབ་དངོས་འབྲིང་དུ་ཉམས། །ཐ་མ་རྨི་ལམ་ཡུལ་དུ་འབྱུང་ངོ་གསུངས། །ཁོ་བོ་དབང་པོ་ཐ་མ་ཡིན་པའི་ཕྱིར། །
དངོས་སུ་ཡི་དམ་ལྷ་ཞལ་མཇལ་བ་མེད། །ཉམས་དང་རྨི་ལམ་འཁྲུལ་པའི་གནས་སྐབས་འགར། །སྒྲུབ་ཐབས་གཞུང་ནས་བཤད་དང་ཕྱོགས་མཐུན་ཙམ། །བྱུང་བ་ཡི་གེར་བྲི་དོན་མ་ལགས་ཀྱང་། །སྔོན་ཚེ་མི་འགྱུར་རྡོ་རྗེའི་བཀའ་མ་ཆོག །རང་གི་རྣམ་ཐར་བྲིས་པའི་མཇུག་དེ་ཡང་། །བྲི་དགོས་ཟེར་ནས་བླ་མ་ནམ་མཁས་བསྐུལ། །རྨི་ལམ་གང་རྨིས་ཡི་གེར་བཀོད་པ་ཡང་། །རྒྱུ་བ་ཚག་ཤིང་ཤོག་བུ་འཕང་ན་ཡང་། །མ་འོངས་རང་གི་རྗེས་སུ་འཇུག་རྣམས་ཀྱིས། །སྔགས་དང་བསྙེན་པ་ལ་སོགས་འབད་ན་ནི། །རྟགས་མཚན་འོང་རྒྱུ་ཡོད་སྙམ་སྤོབས་པ་སྐྱེ། །སྙིང་པོ་
བཟླས་པས་རྨིས་བལྟས་བྱུང་ན་ཡང་། །དེ་ལ་འབྲས་བུ་ཡོད་དམ་མེད་སྙམ་ན། །བཅོམ་ལྡན་ཤཱཀྱའི་དབང་པོ་ཉིད་ཀྱིས་གསུངས། །དཔུང་པ་བཟང་པོའི་ཞུས་པའི་རྒྱུད་ཆེན་ལས། །དེ་ལྟར་བཟླས་པས་གསང་སྔགས་ཉེ་གྱུར་ན། །མཚན་མོ་ཉལ་བའི་རྨི་ལམ་འདི་དག་མཐོང་། །ཁང་བཟང་ལྗོན་ཤིང་བྲམ་ཟེ་སེང་གེ་རྟ། །རི་བོང་ཤིང་རྟ་སྦར་ལྡན་སྤྲིན་དང་ཀླུ། །སྟག་དང་བསེ་དང་གླང་ཆེན་ཁྱུ་མཆོག་ལ། །རྨི་ལམ་ན་ནི་དགའ་བས་ཞོན་པ་དང་། །མེ་ཏོག་ཕྲེང་བ་དྲི་དང་གོས་རྣམས་དང་། །ཤ་ཆང་ཉ་དང་འབྲས་བུ་གླེགས་བམ་དང་། །ལྷ་ཡི་གཟུགས་དང་ཨུཏྤལ་དམར་པོ་དང་། །ཤིང་རྟ་གང་བའི་བ་ཞོན་བེའུ་ཕྲུག་ཅན། །གདུགས་དཀར་བསིལ་གཡབ་ལྷམ་དང་རལ་གྲི་དང་། །ལྔ་ཡབ་གསེར་གཡུ་ཅན་དང་ཕྲེང་བ་དང་། །ནོར་བུ་མུ་ཏིག་ཧྭ་ཕྱིས་དུང་དང་དངུལ། །བུད་མེད་གཟུགས་བཟང་བ་དང་བུ་མོ་དང་། །རིན་ཆེན་སྣ་ཚོགས་རྣམས་ཀྱིས་སྤྲས་པའི་རྒྱུན། །མལ་གཏན་དཀར་པོ་རྙེད་པ་བཏིང་བ་དང་། །ཐོ་རས་ཁ་ནི་ཆུ་བོ་ཆུ་རླུང་དང་། །འབབ་ཆུ་རྒྱ་མཚོ་དང་ནི་རྫིང་བུ་དང་། །ལུ་མ་དང་ནི་འཐུང་ངམ་རྒྱལ་རྨིས་དང་། །ཡང་ན་ཁྲིར་འདུག་ལུས་ཁྲུས་བྱེད་པ་དང་། །
ལྷ་ཁང་མཆོད་རྟེན་ནས་བཟུང་རྒྱལ་བའི་གཟུགས། །བྱང་ཆུབ་སེམས་དཔའ་རྣམས་དང་རང་སངས་རྒྱས། །ཟག་མེད་དགེ་འདུན་དགེ་སློང་དགེ་སློང་མའི། །དགེ་བསྙེན་རྣམས་དང་ས་བདག་ལྷ་རྣམས་དང་། །མཆོད་གནས་བྲམ་ཟེ་ཡིད་འོང་སྐྱེས་བུ་དང་། །མི་དང་མི་མཆོག་ཕྱུག་ཅིང་འབྱོར་པའི་བུ། །ཕ་མ་མཛའ་བཤེས་གཉེན་དང་གནོད་སྦྱིན་དང་། །གྲུབ་པའི་ལྷ་དང་ན་ཆུང་ཚོགས་དག་དང་། །ཅི་སྟེ་ཉི་མ་ཟླ་བ་ཟ་བ་དང་། །ས་ཡི་ནང་འགྲོ་ས་བོན་འཐུ་བ་དང་། །མེ་ལ་རྫི་ཤིང་ཤ་ནི་ཟ་བ་དང་། །ལུས་ཀྱི་ནང་དུ་བུད་མེད་ཞུགས་པ་མཐོང་། །རྨི་ལམ་བཟང་པོ་དེ་དག་མཐོང་བ་གང་། །དེ་དག་རིང་པོར་མི་ཐོག་འགྲུབ་པར་འགྱུར། །ཟླ་བ་གཅིག་དང་ཟླ་ཕྱེད་ཉིན་ཞག་དང་། །སྐད་ཅིག་གིས་ཀྱང་ཕྱིར་ཕྱིར་ཉེ་བར་འགྱུར། །ཅེས་དང་། དངོས་གྲུབ་ཉེ་ན་ཟློས་ལ་དགའ་བ་དང་། །སེམས་ནི་སྡིག་ལ་ནམ་ཡང་མི་དགར་འགྱུར། །བཀྲེས་སྐོམ་ཚ་གྲང་རླུང་དང་ངེལ་བ་དང་། །སྡུག་བསྔལ་དྲག་པོས་ཉན་པ་ཡང་མི་འགྱུར། །སྦྲང་བུ་ཤ་སྦྱང་སྲིན་བུ་གྲོག་སྦྱར་དང་། །སྡིག་སྤྲུལ་སྐང་བརྒྱ་པ་དང་སྦྲུལ་དང་འདྲེ། །ཤ་ཟ་སྲིན་པོ་དག་ཀྱང་དེ་དག་གིས། །ལུས་དང་
གྲིབ་མ་ལ་ཡང་མི་འགོང་ངོ། །ཚིག་ནི་བཟུང་བར་འོས་ཤིང་ཡིད་གཞུངས་ལ། །སྙན་ངག་དང་ནི་བྲི་བ་རྣམས་ལ་མཁས། །ཆོས་ལ་མངོན་དགའ་གཏེར་རྣམས་མཐོང་བ་དང་། །ལུས་ཀྱི་ནད་དང་དྲི་མ་མེད་པར་གྱུར། །སྐྱེ་བོའི་མཐོང་ངམ་ཐོས་པར་གྱུར་ཀྱང་རུང་། །མྱུར་དུ་མངོན་དགའ་ཡིད་དུ་འོང་བར་འགྱུར། །བུད་མེད་འདོད་ལྷའི་མདངས་ཕོག་པ་རྣམས་ཀྱིས། །འདོད་པའི་ལོངས་སྤྱོད་ཕྱིར་ནི་འབོད་པར་འགྱུར། །གང་ཚེ་མཁའ་ལས་ལྷ་དང་གནོད་སྦྱིན་དང་། །དྲི་ཟ་ལྷ་ཡི་བུ་མོའི་ལུས་དང་སྒྲ། །མིས་ནི་དག་པའི་ཡིད་ཀྱི་མཐོང་ཐོས་ནས། །དེ་ཚེ་ཤིན་ཏུ་ཉེ་བར་གྱུར་པ་ཡིན། །དེ་སྐད་གསུངས་ཤིང་གསང་སྔགས་རྙིང་མ་ཡི། །སྒྲུབ་གཞུང་རྣམས་ནས་སྒྲུབ་པ་བྱས་པའི་ཚེ། །སྒྲུབ་པ་ལམ་དུ་སོང་དང་མ་སོང་དང་། །འགྲུབ་དང་མ་འགྲུབ་རྨི་ལམ་བརྟག་པར་གསུངས། །ས་མོ་ཕག་ལོའི་ཆུ་སྟོད་ཟླ་བ་ནས། །ཐུགས་རྗེ་ཆེན་པོ་གསང་བ་འདུས་པ་ཡི། །སྒྲུབ་ཆེན་བུམ་སྒྲུབ་ལ་སོགས་བཙུགས་པའི་ཚེ། །དེ་དག་རྣམས་ཀྱི་གེགས་སེལ་རིམ་གྲོ་ལ། །ཞག་གསུམ་དྲག་པོའི་རྒྱལ་འགོང་འདུལ་ཐབས་ལ། །དམ་སྲི་འདུལ་བའི་སྦྱིན་སྲེག་ལ་སོགས་བྱས། །དེ་ཚེ་རྨིས་ལྟས་རྩུབ་
སློང་རབ་ཏུ་ཆེ། །དྲེད་ཀྱི་དེད་དང་རྦབ་ནི་གྱེན་དུ་བྱུང་། །རི་ཁྲོད་རྩིག་རྨིང་ཆུ་ཡིས་བསྐྱེལ་ལ་ཁད། །དེ་ནས་ཆུ་དེ་ཕར་ལ་བསྒྱུར་བ་དང་། །རྦབ་ལ་མགོ་དང་དྲིལ་བུ་བྱེད་བྱས་པས། །དེ་ནས་ཐབ་ཀྱང་མ་བྱུང་ཆག་གེར་བསྡད། །ཁྱི་གཅིག་ལ་ནི་གྲི་བརྒྱབ་བསད་པ་དང་། །མི་གསོད་ཁ་མེད་བྱུང་ཞེས་དཔའ་གཏམ་སྨྲས། །དེ་ལྟར་ཐུབ་རྟགས་ཙམ་ནི་བརྡའ་ཙམ་བྱུང་། །དེ་ནས་ཐུགས་རྗེ་ཆེན་པོ་གསང་འདུས་ཀྱི། །གསང་སྒྲུབ་སྒྲུབ་ཆེན་ཞིག་བདུན་བྱས་པའི་ཚེ། །རང་གི་རྐང་ལག་མི་གཙང་བ་མང་པོ། །འགོས་ནས་གདའ་བ་དག་པར་བཀྲུས་པ་རྨིས། །ཉམས་དང་རྨི་ལམ་འདྲེས་པའི་མཚམས་ཤེད་དུ། །བདུད་རྩི་བྷན་གང་བ་འཐུང་སྣང་བྱུང་། །དེ་ནས་མཚམས་ཀློད་ལྡོག་མཚམས་ཞག་བདུན་ལ། །གསང་འདུས་ནང་སྒྲུབ་སྤྲོས་མེད་ལུགས་ལྟར་བྱས། །འདི་སྐབས་རང་གི་གྲྭ་རིགས་རྟོགས་ལྡན་ཞིག །ཞབས་རྗེས་གཏེར་བྱུང་ཞབས་རྗེས་བཞག་པར་ཐོས། །དེ་ཡང་ངན་པ་མ་ཡིན་བཟང་པོ་སྟེ། །སྦས་པའི་ཚུལ་ཅན་ཡིན་པའི་རྨིས་ལྟས་བྱུང་། །རྨི་ལམ་མི་འགྱུར་རྡོ་རྗེ་མཇལ་བའི་ཚེ། །གསོལ་བ་བཏབ་པས་དབུ་གུག་མཛད་པའང་བྱུང་། །དཀར་གསུམ་འབུལ་
བ་མང་པོ་བྱེད་པའང་རྨིས། །དེ་ནས་མཚམས་གྲོལ་གསང་བ་འདུས་པ་ཡི། །རྒྱུན་བསྙེན་ཟླ་བ་གཅིག་ཏུ་བྱས་པའི་ཚེ། །སོག་ཟམ་བླ་མ་དཔུང་རེ་ནང་སོ་དང་། །འབྲི་གུང་ལྷོ་པ་སྤྲུལ་སྐུ་རྣམ་གཉིས་ཀྱིས། །རྟ་སོགས་གནང་སྦྱིན་བཀའ་ཤོག་དང་བཅས་ནས། །གསང་འདུས་སྒྲུབ་ཆེན་བུམ་སྒྲུབ་ལག་ལེན་དང་། །ཟིན་བྲིས་དབང་ལུང་རྫོགས་པར་ཞུ་ཕྱིར་བྱུང་། །དེ་ཕྱིར་གསང་འདུས་ཟིན་བྲིས་རྫོགས་པར་བརྩམས། །དབང་ལུང་རྣམས་ཀྱང་རྫོགས་པར་བྱས་པའི་ཚེ། །རྨི་ལམ་ཤེལ་དཀར་ཆེ་ལེགས་གྲུ་བཞི་དང་། །ཤེལ་དཀར་མཐོ་གང་ཙམ་ཞིག་རྙེད་པ་ནི། །ཟིན་བྲིས་རྣམས་ལ་འཁྲུལ་པ་མེད་པར་གོ །བཅོ་ལྔའི་ཟླ་བ་མཁའ་ལ་ཤར་བ་དང་། །ལྷ་ཁང་རྙིང་པ་ཞིག་གི་བར་སྣང་ལ། །འཇའ་གུར་ཆུང་ངུ་གསུམ་ནི་ཤར་བ་རྨིས། །སོག་ཟམ་དེ་རུ་བུམ་སྒྲུབ་གསུམ་ཚུགས་པའི། །རྟེན་འབྲེལ་ཡིན་པར་འདུག་སྙམ་དེ་སྐད་སྨྲས། །སྨྲས་བཞིན་དེ་རུ་དགེ་འདུན་བརྒྱ་ལྷག་གིས། །བུམ་སྒྲུབ་གཉིས་གསུམ་ཚུགས་པ་དེ་ཡི་ཚེ། །རིལ་བུ་འཕེལ་ཞིང་འཇའ་ཡི་ཀ་བ་ཟུག །བར་ཆད་མེད་ཅིང་འགྲོ་དོན་ཆེར་འཕེལ་བའི། །བླ་མ་ཆེན་པོ་དཔུང་རི་ནང་སོ་བས། །ཀརྨ་ཆགས་མེད་སྤྱན་
རས་གཟིགས་ཡིན་ཞེས། །གསུངས་ཤིང་ཐལ་སྦྱར་ཐུགས་འདུན་ཆེན་པོ་མཛད། །དེ་ཕྱོགས་སྐྱ་སེར་ཀུན་གྱིས་དེ་རྗེས་ཀྱང་། །དད་འདུན་ཆེ་ཞིང་འབུལ་བ་ལན་མང་བྱུང་། །ཟིན་བྲིས་དབང་ལུང་ཚར་ནས་བརྫངས་པའི་རྗེས། །རང་ཉིད་དཔོན་སློབ་བཅུ་གསུམ་མཚམས་བསྡམས་ནས། །གསང་འདུས་བུམོ་ཆུ་ཞག་གསུམ་སྒྲུབ་པའི་ཚེ། །དཀྱིལ་འཁོར་དྲུང་དུ་འཇའ་གུར་ཕུབ་འདུག་པ། །ཐུན་པ་ལ་ལ་ཞིག་གིས་མཐོང་བར་བྱུང་། །བདག་གི་རྨིས་བལྟས་བཀའ་སྲུང་རྣམས་ཀྱིས་རྟོགས། །བྱིས་སྦ་གོས་དཀར་གྱོན་གཉིས་མདུན་དུ་རྩེ། །མི་ཆེན་འཇིགས་པས་ཐུན་པའི་གཏམ་སྨྲས་ཤིང་། །ཟང་ཟིང་འབུལ་བ་དཔག་ཏུ་མེད་པ་བྱས། །བུ་མོ་རལ་པ་ཅན་གཉིས་མདུན་དུ་བྱུང་། །རྒྱ་གར་ཡུལ་དུ་རྣལ་འབྱོར་པ་ཞིག་གིས། །གཏོར་མ་བཅའ་རོགས་ངེད་གཉིས་ཀྱིས་བྱས་ནས། །འདི་རུ་གཏོར་མ་བཅའ་རོགས་ལ་འོང་ཟེར། །གཏོར་མ་བཅའ་རོགས་འགའ་རེ་བྱས་པ་དང་། །ཁྲོམ་ཆེན་ཡིག་དྲུག་བདག་གིས་བསྐུལ་བ་དང་། །བུད་མེད་མཛེས་མ་ཞིག་གིས་ཤིང་ཐོག་ནི། །ངོ་མི་ཤེས་པ་སྡེར་གང་བདག་ལ་ཕུལ། །ཟོས་པས་རོ་མཆོག་ཤིན་ཏུ་མངར་བ་སྣང་། །ཞོ་ནི་ཟོ་གང་
མདུན་དུ་འདུག་པ་དེ། །ལྷག་མེད་རང་གིས་བཏུང་སྣང་ཉམས་ལ་ཤར། །སྒྲུབ་ཡུན་ཐུང་བའི་རྟགས་ལ་ལེགས་པར་སེམས། །གསང་འདུས་ཚེ་སྒྲུབ་ཞག་འགའ་བསྙེན་པའི་ཚེ། །བྲག་ནི་འགའ་ཞིག་བསྐོས་པའི་ནང་དེ་ནས། །རྒྱ་ཡིག་རང་བྱོན་འགའ་ཞིག་བྱུང་བའི་རྗེས། །རྫི་ལུ་ཚེ་ཆུས་གང་བ་ཅིག་རྙེད་པས། །མདོག་ནི་དབྱིས་འདྲ་རོ་ནི་ཤིན་ཏུ་མངར། །རང་གིས་བཏུང་ཞིང་གཞན་ལ་བླུད་བྱས་པའི། །ཁ་བྱང་མེད་པའི་གཏེར་ཕྲན་ཅིག་ཡིན་སྙམ། །ཡང་ན་བཀའ་བརྒྱུད་གོང་མས་སྦས་པ་ཞིག །ཡིན་པར་ངེས་སྙམ་ཤིན་ཏུ་དགའ་བ་རྨིས། །ཞག་པོ་བཅུ་དྲུག་གསར་མའི་སྒྲོལ་དཀར་བསྙེན། །ཞྭ་དམར་བདུན་པ་ཉི་མ་རིང་ནས་ཕེབས། །ཡང་ནས་ཤོད་ནས་སྟེང་དུ་ཡར་ཕེབས་དང་། །རང་བྱུང་པ་ཡི་སྐུ་འདྲ་བྱིན་རླབས་ཅན། །སྐུ་མཚམས་རིང་བསྲེལ་མང་པོ་སྔར་བྱོན་པ། །ན་ཉིང་རྙིང་པ་འགའ་ཞིག་གོག་ཟིན་པས། །ད་ལོ་གསར་པ་ཞིག་ནི་བྱོན་པ་རྨིས། །མི་འགྱུར་རྡོ་རྗེ་རང་གིས་རུམ་པ་དང་། །སྤྲིན་གསེབ་ཤར་ཕྱོགས་ཉི་མ་ཤར་བ་དང་། །ནམ་མཁའི་དཀྱིལ་དུ་ཉི་མའི་དཀྱིལ་འཁོར་རྒྱས། །ཇ་ནི་ཞིམ་པོ་ནག་པོ་ལན་གཉིས་དྲངས། །དེ་ནས་ཞག་བདུན་ངག་མཚམས་སྒྲོལ་
དཀར་བཟླས། །བུད་མེད་དཀར་མོ་ཤ་རྒྱས་མཛེས་མ་ཞིག །ཞིམ་ཇ་བླུད་ཅིང་ཞོ་ནི་དཀར་ཡོལ་གང་། །བདག་ལ་དྲངས་རྨིས་མཁར་ནི་བཙན་པོའི་ནང་། །གོས་བཟང་མང་དུ་གྱོན་ནས་བདག་འདུག་ཚེ། །སྨྱོན་པ་འོང་དོགས་སྒོ་གཉིས་འདན་བུ་བརྒྱབས། །ས་བཙན་ཁང་པ་བཟང་པོ་ཉོ་ཤོམ་བྱས། །ཆུ་ཆེན་ལས་བརྒལ་ཚུར་ཁར་ཐར་བ་ཡིས། །ཐར་སྐད་ཀི་ཤར་བཏོན་ཞིང་རྒྱུག་པ་རྨིས། །གོང་འོག་བསྡོམས་པས་ཞག་པོ་ཉེར་ལྔ་སྟེ། །ཡིག་བཅུ་ཞི་བའི་ཤམ་བུ་བཏགས་པ་ལ། །འབུམ་ཕྲག་གཉིས་དང་གཅིག་ཁྲི་དྲུག་སྟོང་སོང་། །ཞག་བདུན་མཚམས་དང་ཞག་གསུམ་སྡོད་མཚམས་ལ། །འོད་ཟེར་ཅན་མའི་སྔགས་ཐུང་འབུམ་ཕྲག་གཅིག །ཉིན་གུང་སྔགས་རིང་གྲངས་ལ་མ་བཞག་བཟླས། །བུད་མེད་རྒྱུན་ལྡན་རབ་ཏུ་མཛེས་མ་ཡིས། །དངུལ་ལས་གྲུབ་པའི་མཆོད་རྟེན་གྲུ་གང་ཙམ། །དེ་ཡི་འཁོར་དུ་བདེ་གཤེགས་མཆོད་རྟེན་བརྒྱད། །དངུལ་ལས་གྲུབ་པའི་མཐོ་རེ་ཡོད་ཙམ་ཕུལ། །གུར་དཀར་གསར་མའི་ནང་དུ་རང་འདུག་ཚེ། །ཤར་ཕྱོགས་སྤྱིན་མེད་ཉི་མའི་དཀྱིལ་འཁོར་ཤར། །བུད་མེད་གཅིག་གིས་བདག་ལ་བསྐུར་བ་ཡིས། །དཀར་གསུམ་ཟས་
ལ་ལོངས་སྤྱོད་བྱས་པ་རྨིས། །ཉམས་དང་རྨི་ལམ་འདྲེས་པའི་མཚམས་ཤེད་ན། །རྒྱ་གར་གྲུབ་ཆེན་ཌོམྦྷི་ཧེ་རུ་ཀ །སྐུ་ཚད་མི་ལས་ཆེ་ཙམ་སྟག་ལ་ཆིབས། །སྣང་ལ་རང་བཞིན་མ་གྲུབ་འཇའ་ཚོན་ལྟར། །སྐུ་ཡི་རྣམ་པ་ཧ་ལམ་གསལ་བར་མཇལ། །བེར་ནག་ཅན་གྱི་དབང་ལུང་ཞུ་སྙམ་ཛ། །དེ་མ་ཐག་ཏུ་སད་ནས་མི་སྣང་གྱུར། །འགྱུར་མེད་རྡོ་རྗེས་ཞག་པོ་བརྒྱད་ཀྱི་བར། །གཅིག་འབུམ་ཉི་ཁྲི་བཞི་སྟོང་བཟླས་པའི་ཚེ། །སྤྲུལ་སྐུའི་གནས་སྒོ་མང་པོ་ཕྱེས་འདུག་ཀྱང་། །དཔེ་རྙིང་རིང་པོ་པར་མི་འདྲ་བ་དང་། །ཤོག་སེར་བམ་ཆག་འདྲ་བ་བཏོན་འདུག་པ། །སྟོད་ནི་ཅུང་ཞིག་དུས་ལ་བབ་པ་དང་། །སྨད་ཆ་མང་མ་དུས་ལ་མ་བབ་ཟེར། །ཕྱིས་སུ་བསམ་ཡས་གནམ་ཆོས་དུས་བབ་ཟིན། །ས་གཏེར་མི་ཐོན་པ་ཡི་རྟགས་སུ་གོ །སྤྲུལ་སྐུ་བདག་གི་རུམ་ན་བཞུགས་འདུག་ཅིང་། །ཉམས་ཀྱི་སྐབས་ལ་སྤྲུལ་སྐུས་བཏོན་སྙམ་པའི། །ཤོག་དྲིལ་དཀར་པོ་སྔོན་པོ་དམར་པོ་སོགས། །ཤོག་དྲིལ་རིང་པོ་མང་པོ་སྣང་བ་དེ། །མི་འགྱུར་རྡོ་རྗེ་ཉིད་ནི་ཡིན་སྙམ་ཞིང་། །སྐུ་ནི་ཁོང་རང་དངོས་ནི་མིན་པ་ཡི། །གཅིག་གིས་ཤོག་དྲིལ་དེ་རྣམས་ཀློག་འདུག་པས། །ཉམས་ཀྱི་སྐབས་ལ་གསལ་པོར་
མཐོང་བ་དེ། །ཕྱིས་སུ་བསམ་པས་སྐུ་སྐྱེ་ཕྱི་མ་ཡི། །གཏེར་ལ་སྤྱོད་པའི་རྟགས་མཚན་ཡིན་པར་གོ །བཅོ་ལྔའི་ནུབ་པར་སྤྱི་འབྱམས་གནས་བདག་ལ། །གཏོར་མ་ཕུལ་ཞིང་བཀའ་བསྒོ་བྱས་མ་ཐག །འབྲུག་སྒྲ་གློག་འོད་དྲག་པོ་གློ་བུར་བྱུང་། །གཏེར་སྲུང་ཤིན་ཏུ་གཉན་པའི་རྟགས་སུ་གོ །འོན་ཀྱང་སྤྲུལ་སྐུའི་གནས་སྒོ་ཐམས་ཅད་ཕྱེས། །པདྨ་རྒྱལ་པོའི་གཅིག་རྒྱུད་ཞག་གསུམ་བསྙེན། །སྐུ་ཡི་རྣམ་པ་གསལ་བར་མ་མཐོང་ཡང་། །མདུན་དུ་ཨོ་རྒྱན་དངོས་སུ་བཞུགས་པའི་དྲུང་། །རང་ཉིད་འདུག་སྟེ་གུ་རུ་རིན་པོ་ཆེ། །ཞེས་ཞུས་ཞུ་གནང་མང་པོ་བྱས་པ་རྨིས། །རང་ལ་རྒྱལ་པོའི་ལ་ཐོད་བཅིང་ཤོམ་དང་། །རང་ལ་གསོལ་ཞལ་བཞི་ནི་འདུག་པའི་ནང་། །དཀར་གསུམ་ཟས་ཀྱིས་བཀང་ནས་དྲངས་བྱུང་ཞིང་། །གཞན་ཡང་འདྲེན་མི་མང་དུ་ཡོད་པའི་ཕྱིར། །གསོལ་ཞལ་དལ་དུས་མེད་དོ་སྙམ་པ་དང་། །ཕ་རོལ་སྟོབས་འབྱོར་ལྡན་པའི་ནོར་མ་ནས། །གསོལ་ཞོ་འོང་ལེ་ཡོད་ཅེས་ཟེར་བ་ཐོས། །རྔ་རྡུང་གྱེར་དབྱངས་མགོན་པོ་བཏོན་པ་དང་། །རང་ལ་དྲིན་ཆེན་རྡོ་རྗེ་སློབ་དཔོན་དེ། །སྒྲུབ་ཐབས་རྒྱ་མཚོའི་དབང་རྣམས་རང་གཞན་ལ། །བསྐུར་ཤོམ་མཛད་ཅིང་འདི་
སྐད་གསུངས་པ་རྨིས། །བདག་གིས་རང་དང་གཞན་ནི་ཐམས་ཅད་ལ། །ཕན་ནི་ཐོགས་པ་ཞིག་ནི་བྱེད་དོ་གསུངས། །ཕྱིས་སུ་བསམ་པས་བདག་གི་དབང་ཆོག་ནས། །རྒྱས་བསྡུས་མང་པོ་བསྒྲིགས་པར་བྱས་པ་ཀུན། །གཞན་རྣམས་ཀུན་ལ་ཕན་ཐོགས་འོང་བར་གོ །ཆོས་ཀྱི་འཁོར་ལོ་བསྐོར་བའི་དུས་ཆེན་ལ། །བཏུག་ནས་ཞིག་གསུམ་མཚམས་ནི་བསྡོམས་པ་དང་། །གནམ་ཆོས་མ་ཎི་རིལ་བུ་བསྒྲུབས་བྱས་ཤིང་། །རྗེས་ནས་རྒྱུན་བསྙེན་ཟླ་བ་ཕྱེད་གཉིས་བྱས། །དག་སྣང་འགའ་རེ་བྱུང་སྟེ་ཕལ་ཆེར་བརྗེད། །མཁའ་ལ་སྤྲིན་མེད་ཉི་མའི་དཀྱིལ་འཁོར་ཤར། །ཁྲོམ་ཆེན་ཞིག་ལ་བདག་གིས་ཡིག་དྲུག་བསྐུལ། །ཀུན་གྱིས་འུར་འདོན་ཡུན་རིང་བྱས་སོང་རྨིས། །གནས་གཅིག་མཇལ་བ་ཨོ་རྒྱན་རང་བྱོན་སྐུ། །གསལ་པོ་མཇལ་བས་ངོ་མཚར་སྐྱེས་པ་རྨིས། །ལྡོག་མཚམས་ཞག་ལྔར་རྒྱུད་བདག་ཞི་བ་ལ། །གཅིག་འབུམ་གཅིག་ཁྲི་ཉིས་སྟོང་བསྙེན་ན་ཡང་། །རྩོམ་དང་བསྟབས་པ་མང་བས་རྟགས་མ་གསལ། །སྤྲུལ་སྐུའི་ཕྱག་ན་རྟེན་ཁེབས་གཅིག་བསྣམས་ནས། །གནས་ཆེན་ཁ་བྱང་འདྲ་བ་གལ་ཆེན་ཡིན། །ད་ལམ་སྤྲུལ་སྐུ་སྟོད་དུ་ཕེབས་པ་ལ། །སྟབས་ལེགས་ལྷོ་པ་མཇལ་
སོགས་ལེགས་པོ་འོང་། །ཟེར་སྣང་ཡིད་ལ་ཤར་བ་དངོས་ལྟར་བྱུང་། །ཞག་ལྔའི་ཕྱིར་ནངས་ཉམས་དང་རྨི་ལམ་སྐབས། །རང་ཉིད་གུ་རུ་པདྨ་རྒྱལ་པོ་ནི། །དམར་པོ་བེར་དམར་ལ་ཐོད་དམར་པོ་ཅན། །དངོས་སུ་གྱུར་ནས་གདའ་སྣང་ཧ་ལམ་གསལ། །གླ་བ་སྐྱེ་རུ་བདུད་འདུལ་རྡོ་རྗེ་མཇལ། །ཞག་ལྔར་དབང་ལུང་གནང་ཞིང་ཐུགས་བཏགས་བཟང་། །འོང་ཀ་ནང་པར་གོས་ཆེན་ལྗང་གུ་ཡིས། །ཕོད་ཀ་ཤིན་ཏུ་ལེགས་པ་བདག་གིས་གྱོན། །མགོ་ལ་སྔགས་ཞྭ་ནག་པོ་གཏེར་སྟོན་གྱིས། །མནབས་པ་དེ་འདྲ་བདག་གིས་གྱོན་རྨིས་པས། །ཕྱིར་ནངས་བདག་གིས་ལུང་བསྟན་དམ་རྫ་ས་གནང་། །ཚུལ་འོང་རྨ་ཚ་ལ་ལྐོག་ཞག་པའི་ནུབ། །གཉིད་པ་མ་ཡིན་ཉམས་ཀྱི་སྣང་བ་ལ། །བདུད་འདུལ་རྡོ་རྗེས་བདག་ལ་གནང་བ་ཡི། །མཁར་བའི་བུམ་ཆུང་ཚེ་ཆུའི་གང་བ་ཅིག །བདག་ལ་འདུག་པའི་ཕུད་དེ་སྤྲུལ་སྐུ་ལ། །འདྲེན་དགོས་བསམས་ཀྱང་སྤྲུལ་སྐུ་ཐག་རིང་ཡང་། །བདག་གི་ལག་པ་བསྐྱང་བས་སླེབས་འདུག་པས། །སྤྲུལ་སྐུ་མཁར་ན་བཞུགས་པ་ཞལ་གདངས་པའི། །ནང་དུ་བླུགས་པས་སྐུ་ལུས་ལྟེམས་སེ་གང་། །དེ་ནས་ང་རང་ཁ་ལ་བླུགས་པ་ཡིས། །བདག་
གི་ལུས་ཀྱང་ཚེ་ཆུས་ལྟེམས་སེ་གང་། །དེ་ནས་ཆོས་དབང་ཀུན་བཟང་ཐག་རིང་ཡང་། །བདག་གིས་ལག་པ་བསྐྱངས་བས་བསླེབས་འདུག་པས། །ཁ་ནི་ཡར་ལ་གདང་བྱུང་ནང་དུ་བླུགས། །ཆོས་དབང་ལུས་ཀྱང་ཆེ་ཤོས་ལྡེམས་སེ་གང་། །ད་རུང་ཚེ་ཆུ་ཟད་པར་མ་གྱུར་ཏོ། །རྫུ་འཕྲུལ་འདྲ་བའི་འཁྲུལ་སྣང་ངོ་མཚར་ཆེ། །དེ་རྗེས་སྤོམ་ནེ་བྲག་གི་གནས་ཆེན་དུ། །གཏེར་སྟོན་གཉིས་པོ་ཞལ་འཛོམ་བདག་གིས་འགྲུབ། །གནམ་ཆོས་ས་གཏེར་དབང་ལུང་གསན་རེས་མཛད། །དང་པོ་ཉི་མ་ཤར་ཞིང་དེ་མ་ཐག །ཟླ་བ་ཞིག་ཀྱང་ཤར་ནས་བྱུང་མ་ཐག །ནམ་མཁའི་དཀྱིལ་དུ་ཟླ་བ་རྒྱས་པ་རྨིས། །དེ་ནས་ཚུར་འོང་ལམ་དུ་ཞུགས་པའི་ནུབ། །བུད་མེད་རས་སྔོན་འདུང་མ་གྱོན་པ་དང་། །དབུས་ལུགས་མུ་ཏིག་ཀོ་ཟོའི་མགོ་རྒྱན་ཅན། །སྙན་གོང་ཨུཏྤལ་སྔོན་པོའི་ཅོད་པན་ཅན། །སྐུ་ཡི་ཚད་ནི་ཐང་ཤིང་ཆེ་ཤོས་ཙམ། །ཉམས་ཀྱི་སྐབས་ལ་གསལ་པོར་མཇལ་བ་ནི། །མ་གཅིག་ཡེ་ཤེས་མཚོ་རྒྱལ་ཡིན་ནམ་སྙམ། །གཞན་ཡང་བལྟ་བས་མི་ངོམ་མཛེས་པ་ཡི། །བུད་མེད་རྒྱན་ལྡན་མདུན་དུ་འདུག་པར་སྙམ། །དེ་ནས་ཚ་བ་དམར་ཐག་ལས་བྱང་དེ། །ཞག་པོ་བཅུ་དྲུག་མ་ཆག་
རྒྱུན་བསྙེན་བྱས། །དེ་ནས་དཀྱིལ་འཁོར་ལ་སོགས་རྒྱས་པར་བཤམས། །ཞག་བཅུར་མཚམས་བསྡམས་སྔགས་ནི་གསུམ་ཀ་ལ། །གཅིག་འབུམ་བཟླས་ཀྱང་རྟགས་ནི་མ་གསལ་ཞིང་། །བཀའ་སྲུང་རྒྱལ་པོའི་རྟགས་ཀྱིས་ཤེས་རྒྱུད་རྩུབ། །རྨི་ལམ་རང་གི་བྲང་ནི་བརྡུངས་རྨིས་པས། །ཕྱིས་སུ་སྤྲུལ་སྐུ་མི་དབང་རྟགས་སུ་གོ །ཚར་ནུབ་ཉམས་དང་རྨི་ལམ་མཚམས་ཤེད་ན། །ཚེ་ཚད་དགུ་བཅུ་གོ་དགུ་ཡིན་ཟེར་ཡང་། །བཀའ་སྲུང་རྒྱལ་པོའི་མགོ་གཡོག་ཡིན་ནམ་སེམས། །གནམ་ཆོས་མ་ཎི་ཨཱ་ཡུ་ཞག་བདུན་བསྙེན། །ཤར་ཕྱོགས་མངོན་དགར་ཚེས་བརྒྱད་ཟླ་ཤར་རྨིས། །དེ་ནས་འོད་ཟེར་ཅན་མ་ཞག་བདུན་ལ། །རྩོམ་པ་མང་ཞིང་ཞོར་ལ་བསྙེན་པའི་ཚེ། །བུ་མོ་གཞོན་ནུའི་རྩེ་དང་བུད་མེད་ནི། །རྒྱན་ལྡན་མཛེས་མ་རྒྱུན་དུ་བྱུང་བ་དང་། །གཟིག་ལ་སྐྲག་ནས་བྲོས་ཏེ་རྫོང་ནང་བསླེབས། །སྟག་ལ་སྐྲག་ནས་དཀྲོག་ཕྱིར་རྡོ་འཕངས་པས། །སྟག་དེ་མཐུར་དུ་རྒྱང་རིང་ལ་རྒྱབ་སོང་། །འཇིགས་སྐྲག་བྲལ་བའི་དགའ་སེམས་ཆེར་སྐྱེས་ནས། །ཉི་ཟླ་ཤར་སོགས་རྨིས་ལྟས་གཞུང་དང་མཚུངས། །དགོངས་གཏེར་བྱམས་པ་ཞག་གསུམ་བསྙེན་པའི་ཚེ། །ཁྲོམ་ལ་ཁྲིད་
བཙུགས་ཞོ་ནི་བཀྱེ་ཤོམ་རྨིས། །ཞག་གསུམ་རྡོ་རྗེ་མེ་འབར་གཅིག་འབུམ་དང་། །གཅིག་ཁྲི་ལས་སྔགས་ཁྲི་ནི་བཟླས་པ་དང་། །དང་པོའི་ནུབ་པར་ཉམས་སྣང་རང་གི་མདུན། །སྐྱེས་ཕྲན་དར་མ་ཞིག་ནི་འདུག་སྣང་བྱུང་། །ཞག་གཉིས་ནུབ་པར་དགྲ་བཟློག་ལས་ཚོགས་ཤིག །མི་གསལ་ཡད་ཡུད་སྣང་བས་ཐོས་པ་སྙམ། །མི་གཞོན་གོས་སྔོན་བཟང་པོ་གྱོན་པ་ཞིག །རང་གི་མདུན་དུ་བྱུང་བའི་སྣང་བ་བྱུང་། །ལྷ་འདི་རང་རྒྱུད་པ་ཞིག་ཡིན་པར་གོ །བསྒྲུབས་ནས་གཏོར་མ་ཕུལ་གལ་ཆེ་བར་གདའ། །ཞག་གསུམ་ནུབ་པར་རྟ་ཞོན་རྒྱུག་པ་དང་། །བྲག་ཕུག་ཤིན་ཏུ་མཐོ་ཞིང་བཙན་པའི་ནང་། །རང་དང་ལྷོ་པ་སྤྲུལ་སྐུ་རྣམ་པ་གཉིས། །སྐྱིལ་ཀྲུང་བཅས་ཏེ་བཞུགས་པའི་རྨི་ལམ་བྱུང་། །ཞག་གསུམ་དགྲ་ལས་རྒྱལ་བའི་སྔགས་དེ་ཉིད། །ལྔ་ཁྲི་གཅིག་སྟོང་བཟླ་ཚེ་རྨི་ལམ་དུ།། །སྦྲུལ་དང་བྱི་ལ་སྤུང་པའི་ཕུང་པོ་ནི། །སྦྲུལ་མགོ་ང་ལ་བསྐྱངས་ནས་ལྟ་འདུག་པ། །དེ་ནས་ཐམས་ཅད་ང་ལ་བྲོས་ནས་སོང་། །ནས་མང་བསྡུས་ནས་རང་གིས་བང་བ་བཀང་། །སྤྲུལ་སྐུའི་རྣམ་ཐར་ཡིན་སྙམ་ལོ་རྒྱུས་བཤད། །དེ་ནས་ཕྱག་རྡོར་དངོས་སུ་གྱུར་སྨྲས་པས། །ཕྱག་རྡོར་དངོས་སུ་གྱུར་སྙམ་
སྣང་བ་བྱུང་། །ཞག་པོ་སུམ་ཅུ་སོ་དྲུག་མཚམས་བསྡམས་ནས། །རྡོར་ཕྲེང་ནང་གི་འོད་ཟེར་ཅན་མ་བསྙེན། །ཞག་གསུམ་དུས་སུ་བུད་མེད་རྒྱན་མེད་གཅིག །ད་རུང་ང་ནི་མི་འོང་ཟེར་བ་རྨིས། །ཞག་བཅུའི་དུས་ཙམ་ཉི་མ་ནུབ་ནས་ཤར། །བུད་མེད་མཛེས་སྡུག་རྒྱན་གྱིས་བརྒྱན་པ་ཞིག །ཡིན་པར་སྙམ་ཡང་གཟུགས་ནི་མི་གསལ་ཞིང་། །མར་དཀར་པུ་ལུའི་གཟུགས་བྱས་གཉིས་ཕུལ་དང་། །ལྷོ་པའི་དྲུང་ན་ཆོས་དབྱིངས་མཚན་ཅན་ནི། །དུང་མདོག་རས་གོས་དཀར་པོ་མནབས་པ་མཇལ། །བྱང་ཤར་མཚམས་ནས་ཉི་མའི་དཀྱིལ་འཁོར་ཤར། །བུད་མེད་རྒྱན་ལྡན་འདུག་པ་མང་པོ་རྨིས། །སྔགས་གྲངས་བྱེ་བ་ལྷག་ཙམ་བཟླས་པ་ཡིས། །གནམ་ཆོས་བསྙེན་པ་འབུམ་ཙམ་བཟླས་པ་གཉིས། །རྟགས་མཚན་གནམ་ཆོས་གསལ་བས་ངོ་མཚར་སྐྱེས། །གནམ་ཆོས་རྒྱལ་བ་རྒྱ་མཚོ་སྦ་ལྕག་མ། །ཞག་བདུན་ཆིག་འབུམ་གཅིག་སྟོང་བཟླས་པ་ཡིས། །སྤྲེལ་ཟླའི་ཚེས་བཅུར་དང་པོར་དབུ་བཙུགས་ནུབ། །ཌཱ་ཀྐི་མཛེས་སྡུག་རྒྱུན་གྱིས་ཕྱུག་པ་དང་། །བདག་གིས་རྡོ་རྗེ་ཕྲེང་བའི་དབང་བཙུགས་ཤོམ། །དབང་ཞུ་རྣམས་ཀྱིས་འབུལ་ཁང་མང་པོ་བཟོས། །རང་ལུས་ཡོན་
ཏན་བརྒྱ་ཡིས་བརྒྱན་སྙམ་བྱས། །ཚར་ནུབ་མར་མེ་འཛིན་སོགས་ལྟས་བཟང་བྱུང་། །དེ་ཕན་གླང་ལོ་ཕན་ཆོད་ཡིན་པར་སྣང་། །དེ་ནས་ཆུ་སྟག་རང་ལོ་ང་བཞི་བར། །ཡང་ཟབ་གསང་བ་སྙིང་བྱང་འོད་དཔག་མེད། །ཞག་བདུན་གཉིས་འབུམ་ལྷག་ཙམ་སོང་བ་སྟེ། །རྨི་ལམ་ཨོ་རྒྱན་སྐུ་ཚབ་གཅིག་རྙེད་པས། །དད་པས་དགའ་བ་ཚད་མེད་སྐྱེས་པ་དང་། །བསེ་ཁྲབ་བསེ་རྨོག་རྟ་དམར་ཅན་གྱི་སྐུ། །ཆུང་དུ་བཀྲག་མདངས་ཅན་ཞིག་འདུག་པ་ནི། །དེ་ཡི་བཀའ་སྲུང་ཆོས་སྐྱོང་ཡིན་པར་སེམས། །ཁྲབ་བཟང་སྤྲུལ་སྐུའི་ཡིན་སྙམ་བདག་དྲུང་བཞག །བུད་མེད་རྒྱན་ཅན་མང་པོས་དབང་ཞུ་ཤོམ། །དཔལ་ལྡན་དུས་གསུམ་མཁྱེན་པ་ལ་སོགས་པའི། །བཀའ་བརྒྱུད་བླ་མ་མང་པོ་ན་བུན་ལྟར། །ལང་ལོང་རི་ངོས་ཁྱབ་པར་མཇལ་སྙམ་བྱུང་། །གནས་རི་འདྲ་བ་ཞིག་ནི་མཇལ་ཟིན་པས། །སྒྲོལ་མ་བཞེངས་པའི་སྐུ་ནི་གསལ་པོ་དང་། །ཕྱག་རྗེས་ལ་སོགས་འདྲ་བ་མང་པོ་འདུག །ཕྱག་རྗེས་མཛུབ་རྗེས་གསལ་བ་གྲུ་གང་ཙམ། །རྙེད་པ་རང་གི་རྗེས་ནི་ཡིན་སྙམ་བྱེད། །གསེར་རྒྱན་ལེགས་པོ་ཀ་བའི་ངོས་ལ་བཅིངས། །དེ་གཉིས་ལོ་ཡི་གྲངས་ཀ་ཡིན་ནམ་སེམས། །ཁྲོམ་ཆེན་ཞིག་ལ་
ཁྲོམ་དབང་བྱེད་ཤོམ་ཚེ། །ཉི་མ་ཕྱི་བས་བསྐུར་ལོང་མེད་དམ་ཟེར། །སྤྲིན་དེ་ཡར་ནས་ཉི་མ་དགོང་ཆེན་རེད། །བསྐུར་ལོང་ཡོད་ལེ་གདའ་སྨྲས་དགའ་བ་རྨིས། །ད་རུང་ཚེ་ནི་ཅུང་ཞིག་ཡོད་པར་གོ །དེ་སྐབས་རྟོགས་པའི་བོགས་ཀྱང་ཅུང་ཞིག་ཐོན། །ཡང་ནི་མ་ཎི་ཨཱ་ཡུ་ཞག་ལྔ་བསྙེན། །ཤར་ཕྱོགས་ནམ་མཁར་ཉི་མའི་དཀྱིལ་འཁོར་ནི། །འོད་ཟེར་ཆེན་པོ་འཕྲོ་བ་ཤར་བ་དང་། །མར་རྡོག་གསུམ་དང་ཞོ་ནི་ཅ་ནེ་གང་། །བྱི་ལ་གཅིག་གིས་འཐུང་གྲབས་འདུག་པ་ལ། །མ་ཤོར་ཐམས་ཅད་རང་གིས་བཏུང་བ་རྨིས། །ཞག་འགར་ཐུགས་རྗེ་ཆེན་པོའི་བསྙེན་སྒྲུབ་ལ། །གཅིག་ཁྲི་བཞི་སྟོང་ཙམ་ཞིག་སྔ་དྲོ་བསྙེན། །ཉམས་སྣང་སྤྲུལ་སྐུའི་མཁར་ལ་དཀར་རྩི་གསོལ། །དཀོན་མཆོག་ཐུགས་རྗེ་སྨྲས་ཤིང་དགའ་བ་དང་། །འོད་གསལ་ཟིན་སོགས་རྟགས་བཟང་ལེགས་པར་བྱུང་། །ཞག་བདུན་བླ་མ་དགོངས་པ་འདུས་པ་ཡི། །རང་སེམས་དབང་དུ་བྱ་ཐབས་དྲུག་ཁྲི་བསྙེན། །བྱིན་རླབས་ཅན་གྱི་བྷན་ཚང་གིས་བཀང་། །ཕྱེད་དེ་མར་ཐང་ཁྲི་པའི་ཞལ་དུ་བླུགས། །ཕྱེད་དེ་རང་གིས་བཏུང་ཡང་ཟད་མེད་རྨིས། །དེ་ནས་སྒྲུབ་རྫས་དཀྱིལ་འཁོར་ཧ་ལམ་འཛོམས། །ཞག་དགུའི་
བར་དུ་བདུན་ཁྲི་ལྔ་སྟོང་བཟླས། །སརྦ་པ་ཤོ་ཡིན་ཏེ་རྨིས་ལྟས་བཟང་། །མཛེས་མ་གཉིས་ཀྱིས་དགའ་ཞིང་ཇ་ཞུས་འདྲེན། །དེ་ཡི་གཟུགས་ནི་གསལ་བར་མ་མཐོང་ཡང་། །ལས་ཀུན་གྲུབ་མཛད་ཡེ་ཤེས་མཁའ་འགྲོ་མ། །ཁོ་བོ་སྙོམས་པར་འཇུག་ཅིང་མཆོད་པའི་རྫས། །བྱང་སེམས་དཀར་པོས་མོ་ཡི་ལུས་ཁེངས་རྒྱས། །ལུས་ཕྱིར་ལུད་པ་དམ་ཚིག་ཡིན་པའི་ཕྱིར། །རང་གི་བཏུང་དགོས་སྙམ་ཙ་མི་དགོས་ཟེར། །ད་ནི་དུས་ནི་ནམ་ནི་ནམ་དུ་ཡང་། །ཁོ་མོ་དྲན་པར་གྱིས་དང་དེས་ཆོག་ཟེར། །དེ་ཚེ་ལུས་སེམས་བདེ་བའི་སྣང་བ་སྐྱེས། །ས་སྐྱ་བདག་ཆེན་ཡིན་སྙམ་སྔགས་པ་ཞིག །གུས་འདུད་ནས་ཕུལ་ནས་འབྲུ་བདག་ལ་འཐོར། །རྔ་མོང་འགའ་དང་གླང་པོ་ཆེ་གསོད་ནས། །དེ་དག་ང་ལ་འབུལ་བའི་གྲབས་བྱེད་ཅིང་། །བུད་མེད་ཕྲུག་རིས་གྱོན་པ་ལྔ་བཅུ་ལྷག །འདུས་ཤིང་དཔོན་རིགས་གཅིག་དང་བཅས་པ་ཡི། །མི་ཤ་འདྲ་བ་ཤ་ཁོག་ཅིག་ཀྱང་འབུལ། །བུད་མེད་རྒྱན་ལྡན་ཞིག་ལ་ཆོས་འགའ་བཤད། །དེ་ནས་ཞག་འགར་ནོར་དབང་གཅིག་འབུམ་དང་། །གཅིག་ཁྲི་ལས་སྔགས་གཅིག་ཁྲི་ཐམ་པར་བཟླས། །རྨི་ལམ་འོད་གསལ་རང་ངོ་ཟིན་པ་དང་། །ངོ་མ་ཤེས་པའི་
སྡེ་ལ་ཆོས་ར་ནི། །འཛུགས་རྒྱུ་ཡིན་སྙམ་བགྱིད་པ་དངོས་ལྟར་གྱུར། །གནམ་ཆོས་ཁྱུང་དམར་ཞག་པོ་ལྔ་ཡི་བར། །ལྡོག་མཚམས་གཅིག་འབུམ་གཅིག་ཁྲི་གཅིག་སྟོང་བཟླས། །བྱིས་སྦ་བརྡུངས་དང་བུད་མེད་གཅིག་གིས་ནི། །སྤྱིར་བོར་མེ་བཙས་བསྲེགས་རྨིས་ཐུལ་རྟགས་ཏེ། །དེ་བཞིན་བུད་མེད་མང་པོས་དཀར་གསུམ་ཕུལ། །ཉམས་ཀྱི་སྣང་བར་རང་གི་ལུས་འདི་ནི། །དྲག་པོ་རྡོ་རྗེ་སྔོན་པོ་རྩེ་ལྔར་གྱུར། །དགོངས་གཏེར་བྱམས་པ་ཞིག་གསུམ་བསྙེན་པ་ནི། །གཅིག་འབུམ་སུམ་སྟོང་དགུ་བརྒྱ་བཟླས་པའི་ཚེ། །གནོད་བྱེད་ཐམས་ཅད་མནན་ཅིང་བཅིང་བ་ཡིན། །སྙམ་ནས་མདུད་པ་དམ་པོ་ཞིག་བརྒྱབ་སྟེ། །རཀྟའི་ཐིག་གཅིག་རྒྱབ་པའི་སྣང་བ་བྱུང་། །དགོངས་གཏེར་ཟབ་པའི་ངེས་ཤེས་ཆེན་པོ་སྐྱེས། །དེ་ནས་ཆུ་མོ་ཡོས་ཀྱི་ལོ་ལ་ནི། །ཚེས་བཅུ་ནས་བཟུང་ཞག་དྲུག་མཚམས་བསྡམས་ནས། །འོད་ཟེར་ཅན་མའི་སྲུང་སྔགས་གཅིག་འབུམ་དང་། །ཉིས་སྟོང་བཟླས་ཚེ་ཉམས་ཀྱི་སྣང་བ་ལ། །སངས་རྒྱས་ཀུན་གྱི་ཞིང་ནས་ཕྱོགས་བཅུ་ཡི། །སངས་རྒྱས་རྣམས་ཀྱིས་ཕྱག་ནི་བསྐྱངས་པ་ཡིན། །སྙམ་པའི་སངས་རྒྱས་ཕྱག་གཡས་སྐྱབས་སྦྱིན་ཞིག །རང་གི་
སྙིང་ཁར་བཞག་ནས་སྣང་བ་བྱུང་། །སྔ་ཕྱིར་ཕྱག་སྟོང་སྤྱན་སྟོང་བསྙེན་པ་དང་། །ར་ཛའི་སྲུང་སྔགས་བཏགས་པ་གཅིག་འབུམ་དང་། །གཉིས་ཁྲི་བཟླས་ཚེ་རྟ་ཞོན་གྱེན་རྒྱུག་རྨིས། །སྒྲོལ་མའི་སྤྲུལ་པ་བུ་མོ་སྔོ་བསངས་མ། །ཐལ་སྦྱར་ཕྱག་འཚལ་ཉེར་གཅིག་བཏོན་པ་དང་། །ང་ལ་ཁྲི་ནི་མཐོན་པོ་ཞིག་འདུག་པའི། །སྟེང་དུ་ང་ཡི་གདིང་བ་བཏིང་འདུག་རྨིས། །གནམ་ཆོས་ནཱ་ག་རཀ་ཞག་བཞི་བསྙེན། །གཅིག་འབུམ་ཉི་ཁྲི་གཅིག་སྟོང་ཙམ་ཞིག་བཟླས། །ཉམས་སྣང་རྒྱ་མཚོ་ཆེན་པོའི་ནང་ཉིད་དུ། །རྒྱ་མཚོ་ཆེན་པོའི་ནང་དུ་ཡོད་སྙམ་དང་། །བར་སྣང་ཉི་མའི་དཀྱིལ་འཁོར་ཚད་མེད་ཤར། །ལུས་ཀྱང་རབ་ཏུ་བདེ་བས་ངེས་ཤེས་སྐྱེས། །དེ་ནས་མ་ཎི་ཨཱ་ཡུ་ཞག་གསུམ་བསྒྲུབས། །གཅིག་འབུམ་བརྒྱད་སྟོང་བཟླས་ཚེ་ཉམས་སྣང་ལ། །ཚེ་ནི་ང་བརྒྱད་བསྲིང་ཞེས་ལུས་ལ་ནི། །གནོད་པའི་ནད་གདོན་སེལ་ཞེས་ཟེར་བ་ཐོས། །ཐོས་པ་བཞིན་དུ་ལུས་ཀྱང་དེ་བར་བདེ། །ཞག་བདུན་གསང་འདུས་ཟབ་པའི་མཐར་ཐུག་བསྒྲུབས། །གཅིག་འབུམ་བཞི་ཁྲི་དྲུག་སྟོང་ལྔ་བརྒྱ་བཟླས། །ཤར་ཕྱོགས་ནམ་མཁར་ཉ་རྒྱས་ཟླ་བ་ཤར། །བྱང་ཤར་སྤྲིན་མེད་ཉི་མའི་དཀྱིལ་འཁོར་ཤར། །ལོ་མ་ཅན་
མ་ཞག་གསུམ་གཅིག་འབུམ་དང་། །གཉིས་སྟོང་བཟླས་ཚེ་རྨི་ལམ་རྟགས་མཚན་ནི། །སྔ་དྲོ་རང་གི་སྒར་པས་ཐབ་བསང་བཏང་། །གཟུངས་ཀྱི་མིང་ཅན་བུད་མེད་རྒྱན་ལྡན་གྱིས། །བྷོ་དྷི་ཙིཏྟའི་ཕྲེང་བ་ལེགས་པོ་དང་། །ཕྱག་མདུད་མང་པོ་ཟངས་ཀྱི་གའུ་དང་། །སྲུང་བའི་འཁོར་ལོ་ཆེན་པོ་བྱིན་པ་རྨིས། །དེ་ནས་འུར་ལེན་གཅིག་འབུམ་ཞག་གསུམ་བསྙེན། །སངས་རྒྱས་བསྟན་དར་དགེ་འདུན་ཆེ་བ་སྟོན། །ད་རེས་ཕོ་བྱས་གོ་བཅད་ཟེར་བ་ཡི། །ཡི་གེ་གཅིག་ནི་བདག་ལ་གཏད་བྱུང་རྨིས། །རྡོ་རྗེ་སྒེག་པ་བསྔོ་བ་ཞག་ལྔ་དང་། །རྗེས་མ་ཟླ་གཅིག་རྒྱུན་བསྙེན་བྱས་པ་དང་། །ཤར་ཕྱོགས་སྤྲིན་གསེབ་ཟླ་བའི་དཀྱིལ་འཁོར་ཤར། །གོས་དཀར་གསར་པ་གྱོན་ནས་གྱེན་ལ་སོང་། །རྟ་ཞོན་གྱེན་རྒྱུག་རྫོང་བཙན་ནང་འདུག་རྨིས། །ཞག་གསུམ་མ་ཎི་ཨཱ་ཡུ་གཅིག་འབུམ་དང་། །གཅིག་ཁྲི་བཟླས་ཤིང་གྲྭ་པ་མང་མ་ཡིས། །བདག་གི་རིམ་གྲོར་ཚེ་གཟུངས་འབུམ་གཏེར་ཐོན། །དེ་ཚེ་རྨི་ལམ་ཇོ་བོའི་སྐུ་ཚད་ཀྱིས། །ཤཱཀྱ་མུ་ནེ་རང་ལ་ཕ་ཟོག་ཡོད། །ཇོ་བོ་བླུག་ཕུད་ཇོ་བོ་གྲུ་གང་ཙམ། །རང་ལ་ཕུལ་མི་བྱུང་བས་སེམས་རབ་དགའ། །ཚེ་ཚད་བརྟགས་པས་རང་གི་གྲིབ་
མ་ལ། །བལྟས་པས་ཉི་མ་ཕྱེད་ཙམ་རེད་པ་གསལ། །ནས་ནི་འབྲུ་བཟང་གཙང་མ་ཞིམ་པ་ཡི། །ཁལ་གཅིག་བདག་གིས་ཟ་རྒྱུར་ཕུལ་བྱུང་རྨིས། །རྡོ་རྗེ་སྒེག་པའི་སྔགས་ཐུང་འབུམ་བཟླས་པས། །ནམ་མཁའི་དབྱིངས་ནས་བྱ་ནག་གཅིག་བྱུང་བ། །སྣ་བུག་གཉིས་སུ་མིག་ནི་ཆེན་པོ་གདའ། །མི་རྣམས་དེ་ལ་ཐེ་ཚོམ་སྐྱེས་འདུག་པས། །འདི་ནི་དཔལ་ལྡན་དུས་ཀྱི་འཁོར་ལོ་ཡིན། །རྣལ་འབྱོར་པ་ཞིག་ཡིན་གྱི་ངན་པ་མིན། །སྨྲས་པ་དེ་མ་ཐག་ཏུ་བྱ་དེ་ཉིད། །གྲུབ་ཐོབ་ཆ་ལུགས་ཐོར་ཅོག་ཅན་དུ་གྱུར། །བདག་གི་ལག་ཏུ་དུས་ཀྱི་འཁོར་ལོ་ཡི། །དགྲ་ཟློག་དགྲ་ལས་རྒྱལ་ཐབས་ལིང་ཙེ་ཅན། །དཔེ་གཅིག་འདུག་པ་དེ་དོན་ངས་མ་ཤེས། །ཁོང་ལ་དྲིས་པས་ཁྱེད་ཚང་འདི་འདྲ་ལ། །མཁས་ཟེར་གསུངས་ཤིང་བདག་གི་བསླབས་པས་ཤེས། །མི་འགྱུར་རྡོ་རྗེ་བདུད་འདུལ་རྡོ་རྗེ་གཉིས། །ཨོ་རྒྱན་སྤྲུལ་པ་ཡིན་པ་ཁྱད་མེད་ཀྱང་། །སྤྲུལ་སྐུ་དབང་དྲག་རྒྱ་མཚོ་ཡིན་པ་དེས། །ཀཿཐོག་པ་རྣམས་རང་གི་བླ་མ་ཟེར། །ཁྱད་ཆེ་སྤྲུལ་སྐུ་ལ་ནི་དད་དོ་སྨྲས། །དེ་འདྲའི་སྐད་ཆ་རང་གི་ཐོས་སྙམ་བྱེད། །ཕྱིས་སུ་ལོ་མང་དེ་འདྲ་དངོས་སུ་གྱུར། །གཉིད་པ་མ་ཡིན་ཉམས་ཀྱི་སྣང་བ་ལ། །ནམ་
མཁའི་དཀྱིལ་དུ་སྤྲིན་གྱིའང་མི་སྒྲིབ་ཅིང་། །ཉི་མའི་དཀྱིལ་འཁོར་ཟེར་མང་ལྡན་པའང་མཐོང་། །གསང་འདུས་ཟབ་པའི་མཐར་ཐུག་ཞག་བདུན་བསྙེན། །ཁྲི་མཐོའི་སྟེང་དུ་སྤྲུལ་སྐུའི་ན་བཟའ་བཟང་། །རྣལ་འབྱོར་པ་ཡི་ཆ་ལུགས་ལྡན་པ་ལ། །པད་ཞྭ་དམར་པོ་གཡས་སུ་བཞག་པ་མཇལ། །ལོ་ལེགས་ནས་བརྡུང་འབྲུ་རྣམས་སྤྱང་པ་དང་། །ནས་ནི་དམར་པོ་ཤ་སྟག་ནས་ཕུང་ནི། །ཤིན་ཏུ་ཆེ་བ་མཐོང་བས་ཡིད་སེམས་དགའ། །དེ་དུས་སྔགས་ནི་གཅིག་འབུམ་བཟླས་པ་དེ། །དེ་རྗེས་ཞག་བཅུ་གསང་འདུས་ཟབ་མཐར་བསྙེན། །གཅིག་འབུམ་བཞི་ཁྲི་གཅིག་སྟོང་སོང་བ་སྟེ། །རྨི་ལམ་ངོམ་ཆུ་ཁག་གཉིས་རྒྱས་འདུག་པ། །གཞན་མ་རྣམས་ཀྱིས་མི་ཆོད་དཀའ་འདུག་སྟེ། །རང་གིས་འབོགས་པས་ཚེགས་མེད་ཚུར་ཁར་ཐར། །རྒྱལ་བའི་དབང་པོའི་ཆིབས་པ་སྒྲོལ་དཀར་མའི། །འོ་མ་ཡིན་སྙམ་རང་གི་ལག་མཐིལ་དུ། །ཐིགས་ཙམ་འདུག་པ་བདག་གིས་ལྡག་པ་རྨིས། །ཉམས་ཀྱི་སྣང་བར་དྲུག་ཅུ་རེ་ལྔ་བར། །ཁག་ཁུར་ཟེར་བ་ཡད་ཡུད་ཐོས་སྣང་བྱུང་། །དེ་ལྟར་ལོ་བདུན་སྒར་པ་བྱས་ནས་ཀྱང་། །ཕྱོགས་ཀུན་སོང་ཚེ་བར་སྐབས་བར་སྐབས་སུ། །སྒྲུབ་
ཕྲན་ཐོར་བུ་ཐོར་བུ་མང་དུ་བྱས། །ཕལ་ཆེར་ཡི་གེར་མ་བཀོད་བརྗེད་དེ་སོང་། །འགའ་ཞིག་ཤོག་རས་འགའ་ལ་བྲིས་འདུག་པ། །བླ་མ་ནམ་མཁས་བསྐུལ་ཕྱིར་ཕྱོགས་གཅིག་བསྒྲིགས། །རྨི་ལམ་འཁྲུལ་སྣང་ཡིན་སྙམ་བདེན་པ་མེད། །དེ་ཕྱིར་ཡི་གེར་བྲི་ལ་དགོས་པ་ཆུང་། །འོན་ཀྱང་མེ་བུས་རྟགས་ལ་དུ་བའི་དཔེ། །རབས་དངོས་འབྲིང་ཉམས་ཐ་མ་རྨི་ལམ་དུ། །སྒྲུབ་པ་བྱས་པའི་རྟགས་མཚན་འབྱུང་གསུངས་ཀྱང་། །ཁོ་བོ་དབང་པོ་རབ་ཏུ་མ་གྱུར་པས། །དངོས་ཀྱི་རྟགས་མཚན་ཅི་ཡང་མ་ཐོན་ཏེ། །ཉམས་དང་རྨི་ལམ་འཁྲུལ་པའི་སྣང་བ་ལ། །རྟགས་ཡིག་རྣམས་དང་ཕྱོགས་མཐུན་ཅུང་ཟད་ཙམ། །བྱུང་ཚུལ་ཡི་གེར་བྲི་བ་འདི་ཉིད་ནི། །མཆོག་འཛིན་རློམ་སེམས་སྐྱེས་པ་མ་ལགས་ཀྱང་། །ཅུང་ཟད་འདི་ལ་རློམ་སེམས་སྐྱེས་དྲན་ནས། །མཁས་པ་རྣམས་ཀྱིས་མཐོང་ན་ངོ་ཡང་ཚ།།འོན་ཀྱང་དེང་སང་ཐ་མར་རྨོངས་པ་འགས། །ད་ནི་དུས་སྙིགས་སེམས་ཅན་སྒྲིབ་པ་འཐུག །ལྷ་བསྒོམས་སྔགས་བཟླས་ཡུན་རིང་འབད་བྱས་ཀྱང་། །དངོས་སུ་རྟགས་མཚན་འོང་བ་ལྟ་ཅི་སྨོས། །གཞུང་ནས་བཤད་པའི་རྨི་ལམ་རྟགས་ཙམ་ཡང་། །འོང་རྒྱུ་མེད་ཕྱིར་འདི་དང་ཕྱི་མ་དང་། །སྔགས་
བཟླས་པ་ཡི་ཕན་ཡོན་གསུངས་པ་རྣམས། །ཐོབ་བམ་མི་ཐོབ་སྙམ་དུ་སེམས་ཞུམས་ནས། །སྒྱིད་ལུག་པ་རྣམས་དཔེ་ཆ་འདི་མཐོང་ནས། །སྙིགས་དུས་ཞག་འགའ་བསྙེན་པ་བྱས་པས་ཀྱང་། །རྨི་ལམ་རྟགས་མཚན་དེ་ལྟར་འོང་ཐུབ་ན། །བདག་གི་ཟླ་ཤས་ལྷ་བསྒོམས་སྔགས་བཟླས་ན། །ཅི་ཕྱིར་མི་འགྲུབ་སྙམ་དུ་སྤོབས་པ་སྐྱེ། །འདི་ཉིད་བྲིས་པའི་དགོས་པ་དེ་ཉིད་ཡིན། །རྟགས་མཚན་ལ་སོགས་གཞན་ལ་བསྒྲགས་པ་ན། །དེ་ཕྱིར་རྟགས་མཚན་མི་འོང་འགག་གསུངས་ཀྱང་། །ད་ནི་བདག་ལ་རྟགས་མཚན་འདོད་པ་མེད། །བྱུང་ནའང་རུང་ལ་མ་བྱུང་ན་ཡང་རུང་། །ཚེ་དང་སྒྲུབ་པ་མཉམ་པ་སེམས་ལ་བཅང་། །དག་སྣང་ཕྲན་བུ་ཙམ་གྱིས་བློ་མི་ཚིམ།།ངོ་བོ་རྗེན་པར་སྐྱོང་ལ་བློ་རྩེ་གཏད། །གོང་གི་ནང་གི་རྣམ་ཐར་དེ་ཡི་མཇུག །སྒྲུབ་པ་ཕྲན་ཚེགས་སྐོར་ཏེ་གཉིས་པའོ། །མངྒ་ལཾ།། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།