དགེ་སློང་རཱ་ག་ཨ་སྱའི་ཡང་གསང་གི་རྣམ་ཐར་གཉིས་པ་ཡེ་ཤེས་སྐོར།
༄༅། །དགེ་སློང་རཱ་ག་ཨ་སྱའི་ཡང་གསང་གི་རྣམ་ཐར་གཉིས་པ་ཡེ་ཤེས་སྐོར་བཞུགས་པའི་དབུ་ཕྱོགས་ལགས་སོ།། །།
༄༅། །ན་མོ་གུ་རུ་དྷརྨ་ཤྭ་ར་ཡེ། ཐམས་ཅད་ཀུན་མཁྱེན་དཔལ་ལྡན་བླ་མ་ལ། །གུས་པས་ཕྱག་འཚལ་བྱིན་གྱིས་བརླབ་ཏུ་གསོལ། །སངས་རྒྱས་ཐམས་ཅད་མངོན་ཤེས་དྲུག་དང་ལྡན། །སེམས་དཔའ་ཕལ་ཆེར་མངོན་ཤེས་འགའ་ཟུང་མངའ། །དགྲ་བཅོམ་རྣམས་ཀྱི་མངོན་པར་ཤེས་པ་ནི། །ལྟ་བའི་འདུན་པ་བཏང་ཚེ་དོན་ཀུན་གཟིགས། །མ་བལྟས་ན་ནི་ཅི་ཡང་མི་ཤེས་སྐད། །དེ་དག་ཟག་མེད་མངོན་ཤེས་ཕྱག་གི་གནས། །ཕྱི་རོལ་པ་ཡི་དྲང་སྲོང་འགའ་རེ་ཡང་། །སྔ་ཕྱི་བསྐལ་པ་བརྒྱ་ཡི་མཐའི་ཚུན་ཤེས། །དེ་ནི་ཞི་གནས་ཁོ་ནའི་ཡོན་ཏན་ཏེ། །དེ་ལ་ཟག་བཅས་མངོན་
ཤེས་ཞེས་བྱའོ། །འཇིག་རྟེན་ལྷ་འདྲེ་འབྱུང་པོ་ཕལ་ཆེར་དང་། །གླང་པོ་ཆེ་དང་བྱ་རྒོད་བྱ་རོག་སོགས། །དུད་འགྲོ་འགའ་རེར་ལས་དབང་མངོན་ཤེས་ཡོད། །བྱང་ཆུབ་ཐོབ་ལ་ཕན་པ་མེད་པའི་ཕྱིར། །དེ་འདྲའི་མངོན་ཤེས་ངོ་མཚར་ཆེ་རྒྱུ་མེད། །དགོངས་འདུས་རྣར་སྒྲོགས་ཁྱེའུ་དཀར་པོ་དང་། །ཡེ་ཤེས་གྲགས་དང་སྟག་པའི་བུ་ཆུང་སོགས། །འཇིག་རྟེན་ཕྲ་བསྒྲུབས་བྱས་ནས་ལེགས་ཉེས་སོགས། །ལུང་བསྟན་བྱུང་རྣམས་མངོན་ཤེས་ཡིན་སྨྲ་བ། །དེ་འདྲའི་ཉེས་སྒྲིབ་ཤིན་ཏུ་ཆེ་བའི་ཕྱིར། །རྩ་རིགས་བཟང་ངམ་རྩ་རླུང་སྒོམ་མཁན་ལ། །ལས་ཀྱི་མཁའ་འགྲོས་
དངོས་ཉམས་ལུང་བསྟན་བྱུང་། །དང་པོ་ཐིག་ཅིང་ཐམས་ཅད་ཐོག་ཏུ་འགྲོ། །དེ་ནས་རེས་འགའ་བདེན་ཞིང་རེས་འགའ་རྫུན། །དེ་ནས་གཅིག་ཀྱང་མི་ཐིག་ལོག་པར་འགྲོ། །མི་རྣམས་ཀུན་གྱིས་བརྫུན་ལབ་ཟེར་ཞིང་འབར། །དེ་ནས་རིང་ཡང་ལྷ་ལ་ལོག་ལྟ་སྐྱེ།། །དེ་ལ་མཁའ་འགྲོ་བདུད་བབ་ཞེས་བྱ་སྟེ། །འཇིག་རྟེན་མཁའ་འགྲོས་ཉམས་ཚད་བྱེད་པ་ཡིན། །ལུང་བསྟན་བཟང་ཞིང་ཐིག་པར་དགའ་བ་མེད། །ལུང་བསྟན་ངན་དང་མི་ཐིག་སྡུག་སྣང་མེད། །རོ་སྙོམས་ལྟ་བའི་ཀློང་དུ་བསྒྱུར་ནུས་ན། །བར་ཆད་མི་བྱུང་ཉམས་རྟོགས་བོགས་སྐྱེད་འབྱུང་། །གསལ་ཉམས་མིག་གིས་རྒྱང་རིང་གཟུགས་མཐོང་དང་། །རྣ་བས་ཐག་རིང་ཅི་སྨྲས་སྐད་ཐོས་དང་། །གཞན་གྱི་ཡིད་ལ་ཅི་བསམ་ཤེས་འདྲ་བ། །སྐབས་རེར་བྱུང་ཞིང་རྒྱུན་དུ་མི་འབྱུང་བ། །གསལ་ཉམས་ཡིན་གྱི་མངོན་ཤེས་ག་ལ་ཡིན། །མངོན་ཤེས་ཡིན་སྐད་སྨྲས་ན་ཇོ་བརྫུ་ཆེ། །དགེ་སློང་རཱ་ག་སྐྱ་བདག་ལ་ནི། །ཟག་མེད་མངོན་པར་ཤེས་པ་ག་ལ་ཞིག །ཟག་བཅས་མངོན་ཤེས་ཙམ་ཡང་ཡོད་རེ་ཀན། །མེད་པར་ཡོད་ཅེས་མི་ཆོས་བླ་མའི་རྫུན། །སྨྲས་ན་བསྙེན་རྫོགས་སྡོམ་པ་འཆོར་བས་སྐྲག །བསྙེན་རྫོགས་སྡོམ་པ་བདག་གི་
སྙིང་ནོར་ཡིན། །འོན་ཀྱང་མཆོག་དམན་སྐྱ་སེར་མང་པོ་ཡིས། །གསོན་པོའི་ལེགས་ཉེས་གཤིན་པོའི་སྐྱེ་གནས་སོགས། །བརྟག་པ་ཞུ་མཁན་ཤིན་ཏུ་མང་བ་ལ། །གལ་ཆེན་ངོ་ཆེན་འགའ་རེ་ངོ་མ་ཆོག །ཡི་དམ་ལྷ་ལ་གསོལ་བ་དྲག་བཏབ་ནས། །ཉམས་དང་རྨི་ལམ་གསལ་ཆ་བྱུང་བ་འགའ། །མི་སྨྲ་ཁ་མེད་བྱུང་བའི་གཏམ་འཆལ་རྣམས། །ལ་ལས་མངོན་ཤེས་ཡོད་པའི་བསྟོད་ར་སྨྲས། །ལ་ལས་བརྫུན་དང་ཇོ་བརྫུ་ཆེ་ཞེས་འབར། །དེ་དོན་རང་གི་མཆེད་གྲོགས་རབ་འབྱམས་པ། །རང་ལ་དབང་ལུང་ཞུས་པའི་སློབ་མ་ཞིག །རང་ལ་ཉམས་ཚད་ཅོ་འདྲས་འདི་སྐད་གསུངས། །མིག་དང་རྣ་བའི་མངོན་ཤེས་ནི། །ཡང་དག་ལམ་ལ་སྒྲིབ་བྱེད་ཡིན། །གསུངས་ཕྱིར་མིག་དང་རྣ་བའི་མངོན་ཤེས་དག །ཡོད་ན་མི་ལེགས་ཤིན་ཏུ་ངན་ནོ་གསུངས། །འོ་ན་སྤྱན་རས་གཟིགས་དབང་འབྲོམ་སྟོན་གྱིས། །ཇོ་བོ་ཨ་ཏི་ཤ་ལ་བསྟོད་པ་ལས། །མ་ག་ཏ་ན་སློབ་མ་གྲུབ་པ་ཡིས། །སིལ་སྙན་བཀྲོལ་ཞིང་གསོལ་བ་བཏབ་པའི་སྐད། །བོད་དུ་གསན་ནས་འབྲོམ་ལ་སྦྱིན་པ་ལས། །རྣ་བའི་མངོན་ཤེས་མངའ་ལ་གསོལ་བ་འདེབས། །ཞེས་པ་འདི་ཡང་ཇོ་བསྟོད་མ་ཡིན་པ། །
ཇོ་བོ་རྗེ་ལ་སྐུར་འདེབས་ལགས་སམ་ཞུས། །དེ་ཡང་རང་ལ་མངོན་ཤེས་མེད་ཕྱིར་ཡིན། །ཡོད་ན་དེ་སྐད་སྨྲ་བའི་བབ་ཐོབ་མེད། །སྔར་དུས་ཁོ་བོའི་གྲོང་ཆོག་བྱེད་པའི་དུས། །དམ་ཅན་སྐྱེས་བུ་ཆེན་པོའི་ལས་ཚོགས་ཀྱིས། །ནད་པ་འཚོ་འཆི་བརྟག་པ་ལན་བདུན་བྱས། །རྗེས་ལ་རཏྣ་དྷ་ཛ་འདས་ཁའི་དུས། །ལན་མང་མ་གསལ་དེ་ནས་མི་དོགས་ཟེར། །ཕྱིར་ནུབ་རེད་ཛ་ད་ནི་མི་གདའ་ཟེར། །ནད་པས་ལྐོག་ཏུ་ཆང་བཏུང་ནད་ལོགས་ནས། །ཞག་གཉིས་ཙམ་ནས་ནད་པ་འཆི་སོང་ངོ། །བསམ་ཡས་ཆོས་སྐྱོང་ལ་སོགས་དབུས་གཙང་གི །ལུང་བསྟན་བྱེད་པའི་ལྷ་ནི་མང་ན་ཡང་། །ལ་མོ་ཚེར་གསེབ་ཙམ་ནི་མ་གཏོགས་པའི། །ཀུན་གྱིས་ཟེར་ཚད་ཐིག་ངེས་མེད་ཅེས་ཟེར། །འཇིག་རྟེན་ལྷ་ནི་མི་དང་འདྲ་བ་སྟེ། །ངོ་འཇོ་ངོས་དགའི་ཚིག་ཀྱང་འགའ་རེ་འབྱུང་། །སྡུག་དོགས་སེམས་གསོའི་ཚིག་ཀྱང་འགའ་རེ་འབྱུང་། །སྐུ་ཁོག་དེ་ལ་བཀའ་བཀྱོན་འབྱུང་དོགས་ནས། །བཙན་པོ་རྣམས་ལ་བསྟོད་པའི་ཚིག་ཀྱང་འབྱུང་། །ལ་མོ་ཆེར་གསེབ་ལུང་བསྟན་ཐིག་ན་ཡང་། །བརྡ་ཚིག་ཡིན་ཕྱིར་དོན་དེ་མ་བྱུང་བར། །མི་གོའི་ཕྱིར་ནི་དགོས་པ་མེད་པར་སྣང་། །དེ་ཕྱིར་འཇིག་རྟེན་ལྷ་ཡི་བརྟག་པ་
ནི། །ཁོ་བོས་ནམ་ཡང་བྱེད་པར་མ་མྱོང་ངོ། །ཡེ་ཤེས་ལྷ་ཡི་བརྟག་པ་གང་ཞེ་ན། །འཁོར་ལོ་བདེ་མཆོག་རྩ་བའི་རྒྱུད་ཆེན་ལས། །རྨི་ལམ་ལ་བརྟེན་རང་གཞན་སྐྱེ་གནས་ནི། །ལེགས་ཉེས་བརྟག་པའི་ལས་ཚོགས་གསུངས་པའི་དོན། །གྲུབ་ཆེན་སོ་སོའི་བཞེད་པ་གསུམ་ཙམ་སྣང་། །རྡོར་ཕྲེང་ལ་སོགས་དབང་ཆོག་ཐམས་ཅད་ལ། །སློབ་མ་སྟ་གོན་རྨི་ལམ་བརྟག་ཐབས་གསུངས། །མི་ཏྲ་ཛཱ་ཀིས་ཁྲོ་ཕུ་ལོ་ཙཱ་ལ། །གནང་བའི་མི་ཏྲའི་གསང་སྒྲུབ་ལས་ཚོགས་ལ། །སྤྱན་རས་གཟིགས་ཀྱི་རྨི་ལམ་བརྟག་པའི་ཐབས། །སྒྲུབ་པའི་འཁོར་ལོ་སྔགས་དང་རྫས་མཆོག་གསུངས། །འཇམ་དཔལ་དཔའ་བོ་གཅིག་སྒྲུབ་རྒྱུད་ཆེན་ལས། །རྨི་ལམ་ལ་བརྟེན་རང་གཞན་ལེགས་ཉེས་དང་། །སྐྱེ་བ་བརྟག་ཐབས་ལན་གྲངས་མང་དུ་གསུངས། །དེ་བཞིན་ཇོ་བོ་དཔལ་ལྡན་ཏི་ཤས། །ཐུབ་པའི་སྒོ་ནས་སྐྱེ་བ་བརྟག་ཐབས་གསུངས། །སྒམ་པོ་སྤྲུལ་སྐུ་བཀྲ་ཤིས་རྣམ་རྒྱལ་བས། །སྒྲོལ་དཀར་སྒོ་ནས་སྐྱེ་བ་བརྟག་ཐབས་གསུངས། །དེ་དག་རྣམས་ནི་གསར་མའི་ལུགས་ཡིན་ཏེ། །རྙིང་མའི་བླ་མ་དགོངས་པ་འདུས་པ་ལས། །རྨི་ལམ་བརྟག་ཐབས་ཤིན་ཏུ་རྒྱས་པར་གསུངས། །ཐུགས་རྗེ་
ཆེན་པོ་ཡང་གསང་བླ་མེད་དང་། །གསང་འདུས་ལ་སོགས་གཏེར་གཞུང་དུ་མ་ནས། །རྨི་ལམ་ལ་བརྟེན་རང་གཞན་ལེགས་ཉེས་དང་། །སྐྱེ་བ་བརྟག་པའི་ཐབས་ནི་མང་དུ་གསུངས། །དེ་དག་ཡི་དམ་སོ་སོའི་བསྙེན་སྒྲུབ་ཐེམ། །དབེན་པའི་གནས་སུ་གྲིབ་ལ་འཛེམ་པ་དང་། །གཙང་སྦྲ་ལྡན་ཞིང་ཤ་ཆང་སྒོག་བཙོང་སྤང་། །བྱིན་རླབས་ལྡན་པའི་རྟེན་བཤམས་མཆོད་གཏོར་འབུལ། །སེང་གེ་ཉལ་སྟབས་སེམས་གཞན་མ་ཡེངས་པར། །བརྟགས་པས་རབ་ནི་དངོས་སུ་སྨྲ་བ་དང་། །འབྲིང་ནི་ཉམས་སྣང་ཐ་ན་རྨི་ལམ་དུ། །ལུང་བསྟན་སྨྲའམ་ཡི་གེ་མཐོང་བ་དང་། །ཐ་མ་བརྡའ་རུ་བསྟན་པ་འབྱུང་བ་དང་། །དེ་ཡང་དོན་མང་དུས་གཅིག་མ་ཡིན་པར། །དོན་ནི་སྣ་རེ་བརྟགས་པས་གསལ་བར་བཤད། །ཁོ་བོའི་བརྟགས་པ་བྱས་པ་ཐམས་ཅད་ནི། །དེ་ལྟར་ཡིན་གྱི་ཐ་མར་རྨི་ལམ་མིན། །བདག་ལ་མངོན་པར་ཤེས་པ་མི་ལྡན་ཡང་། །ཡི་དམ་ལྷ་ནི་མངོན་ཤེས་ཡོད་པའི་ཕྱིར། །དེ་ལ་བརྫུན་སྨྲའི་ཉེས་པ་མི་འབྱུང་སྙམ། །མངོན་ཤེས་ཡོད་པའི་གྲུབ་ཆེན་རྣམས་ཀྱིས་ཀྱང་། །རྨི་ལམ་ལ་བརྟེན་ལུང་བསྟན་མཛད་སྲོལ་ཏེ། །ཀ་བཞི་སེང་ཆེན་རྨི་ལམ་ལ་བརྟེན་ཏེ། །མར་པས་
བུ་ཆེན་བཞི་ལ་ལུང་བསྟན་མཛད། །མི་ལའི་ཞལ་ནས་རས་ཆུང་རྡོར་གྲགས་ལ། །ཁྱོད་འོང་ནུབ་མོ་སེང་གེ་གཅིག་ལ་ནི། །ཁྱི་ནི་མང་པོས་བསྐོར་བ་གཅིག་རྨིས་པ། །བུ་ཁྱོད་འཇིག་རྟེན་འདི་ན་གྲགས་པ་ཆེ། །ཐམས་ཅད་ཟིལ་གྱིས་གནོན་པ་ཞིག་འོང་ནས། །མཆོག་གི་དངོས་གྲུབ་ཐོབ་པར་གྱུར་པ་དང་། །ཁྱི་ནི་འདྲེས་ཤིང་གཞུང་བཟང་སྙིང་ཉེ་ལྟར། །འཁོར་ནི་བུད་མེད་ཚོགས་ཀྱིས་བསྐོར་བའོ། །རྗེས་སུ་རྣལ་འབྱོར་ཕོ་མོའི་བསྟན་པ་དར། །དྭགས་པོ་ལྷ་རྗེ་བ་ཁྱོད་ཕྱིན་པའི་ནུབ། །བྱ་རྒོད་གཅིག་ལ་ཕྲུ་གུ་དཔག་མེད་བསྐོར། །ཐམས་ཅད་ནམ་མཁར་ལྡིང་ཞིང་སོང་ཙ་ན། །དེ་ལ་བྱ་འུར་རིམ་པ་ཞིག་བྲུལ་བ། །ཐམས་ཅད་བྱ་རྒོད་གྱུར་ཏེ་འཕུར་ཏེ་སོང་། །དེ་ལྟར་རིམ་པར་ལྔ་རུ་གྱུར་སོང་རྨིས། །ཁྱོད་ཉིད་འཁོར་བཅས་མཆོག་གི་དངོས་གྲུབ་ཐོབ། །དེ་རྗེས་རིམ་དྲུག་མཆོག་གི་དངོས་གྲུབ་ཐོབ། །དེ་རྗེས་འཕྲོ་ནི་ཆད་དོགས་ཡོད་དོ་གསུངས། །ཡང་ནི་ལྷ་རྗེ་བ་ཁྱོད་འོང་བའི་ནུབ། །ས་གཞི་མེ་ཏོག་སེར་ཆེན་གྱིས་གང་བའི། །ནང་ན་ཁྱོད་ཉིད་བཞུགས་ནས་འདུག་པ་རྨིས། །ཁྱོད་ཉིད་རྗེས་ལ་སེར་ཆག་བསྟན་པ་རྒྱས། །དེ་ལྟར་རྨི་ལམ་ལུང་བསྟན་དུ་མ་
ཡང་། །ལན་གསུམ་བར་དུ་རྗེ་བཙུན་རྨི་ལམ་གསུངས། །དེ་བཞིན་གཏེར་སྟོན་གུ་རུ་ཆོས་དབང་དང་། །རཏྣ་གླིང་པ་རིན་ཆེན་ཕུན་ཚོགས་སོགས། །རྨི་ལམ་ཡུལ་དུ་ཨོ་རྒྱན་ཆེན་པོ་ཡིས། །ལུང་བསྟན་བྱུང་ཚུལ་དག་སྣང་སྐོར་རྣམས་གསལ། །བདག་ཀྱང་དེ་དག་རྣམས་ཀྱི་རྗེས་འཇུག་ཕྱིར། །ཉམས་དང་རྨི་ལམ་ལུང་བསྟན་ཟུར་ཙམ་འགའ། །བྱུང་བ་ཡི་གེར་བཀོད་པ་འཐད་དམ་སྙམ། །དེ་ཡང་ཡི་གེ་ཉུང་བར་བྱ་བའི་ཕྱིར། །ཐམས་ཅད་ཚིགས་སུ་བཅད་དེ་བཀོད་པར་བྱ། །སྤྲུལ་སྐུ་མི་འགྱུར་རྡོ་རྗེའི་ངོས་འཛིན་ནི། །བྱས་ཚུར་རྒྱས་པར་དེ་ཡི་རྣམ་ཐར་གསལ། །སྒྲུང་མཁན་གཅིག་ལ་བྱིས་སྦ་ངོ་མཚར་ཅན། །གཅིག་ཡོད་དེ་ཡི་བརྟག་པ་བྱ་དགོས་ཟེར། །གཉིད་པ་མ་ཡིན་ཉམས་ཀྱི་སྣང་བ་ལ། །ས་རྡོ་རི་བྲག་རྣམས་ཀྱིས་མི་སྒྲིབ་པའི། །གཙང་དུ་པཎ་ཆེན་བཞུགས་པ་གསལ་པོར་མཐོང་། །དེ་མ་ཐག་ཏུ་པཎ་ཆེན་རང་མདུན་ཕེབས། །དེ་ནས་མི་སྣང་མདུན་གྱི་ནམ་མཁའ་ལ། །བླ་མ་པད་ཞྭ་སེར་པོ་ཆོས་གོས་ཅན། །སྐྱིལ་མོ་ཀྲུང་གིས་བཞུགས་པ་ལམ་མེར་མཐོང་། །དེ་ནས་མི་སྣང་སུ་ཡིན་མ་ཤེས་པས། །བ་སོ་བ་ཞེས་ཟེར་བའི་སྒྲ་ཞིག་གྲག །ཕ་དེས་བྱིས་སྦའི་བདག་པོ་
དགོས་ཟེར་ཡང་། །འདི་ནི་དགེ་ལུགས་བླ་མ་གཅིག་འདྲ་བས། །བདག་གིས་བདག་པོ་མི་སྤོབས་སྨྲས་ནས་བསྒྱུར། །དགེ་ལུགས་སུ་ཡིན་སྨྲ་དགོས་ནན་ཏན་ཆེ། །བླ་ཆེན་རྣམས་ལ་སྐུ་སྐྱེ་མང་པོ་དར། །རྔ་་སོ་བ་ཡི་ཕྱོགས་གཅིག་འདྲ་དོ་སྟེ། །འདི་ལ་བདག་པོ་འོང་ཤས་ཆུང་ཞེས་སྨྲས། །སྨྲས་པ་བཞིན་དུ་སྐུ་སྐྱེ་གཞན་ཞིག་བསྐོས། །བ་སོ་གོང་མའི་སྔོན་ལ་བ་སོ་བའི། །གདན་ས་ནོན་པའི་རབ་འབྱམས་ཁམས་ཆེན་ནི། །གཅིག་བྱུང་དེ་ཡི་སྐུ་སྐྱེ་ཡིན་པར་ཟེར། །དགོན་པ་གཞན་འགས་བདག་པོ་བྱེད་འདོད་ཀྱང་། །ཕ་དེ་ངན་པས་སུ་དང་འང་མ་འཆམས་ནས། །ཕ་ཡིས་ཁྲིད་ནས་ཀུན་ཏུ་འཆམས་བྱེད་ཅིང་། །རྗེས་གནང་ཞུ་མཁན་མང་དུ་ཡོད་ཙམ་བྱུང་། །ས་སྐྱ་པ་ཡི་སྐུ་སྐྱེ་ཡིན་ཟེར་བའི། །སྤྲང་ཕྲུག་གཅིག་ནི་སྒོ་རྩར་ཁྱེར་བྱུང་བ། །སྐུ་སྐྱེ་རེད་སོགས་ཅི་ཡང་མ་སྨྲས་ཤིང་། །རྨིས་བལྟས་བཟང་ཕྱིར་མར་གྲོག་གཅིག་བྱིན་པས། །ང་ཡིས་ཟེར་སྨྲས་མ་དེས་ཀུན་ལ་བསྒྲགས། །འོན་ཀྱང་ས་སྐྱ་པ་ཡི་བླ་མ་ཞིག །ཡིན་པའི་རྟགས་མཚན་སྔ་ཕྱིར་གསལ་བྱུང་བས། །རང་གི་ཉེར་གནས་ཡུན་རིང་བྱེད་དུ་བཅོལ། །ཁོ་ཁྱིམ་སྐུ་སྐྱེ་པདྨ་འོད་ཟེར་དང་། །སྒར་རྗེ་ཆོས་སྐྱོང་
རྒྱལ་པོའི་སྐུ་སྐྱེ་གཉིས། །བརྟགས་པ་བྱས་ཚེ་ལུང་བསྟན་བྱུང་ཚུལ་སོགས། །ལོ་རྒྱུས་སོ་སོར་བྲིས་ནས་གཏད་པ་ཡིས། །ངེས་ཤེས་སྐྱེས་ཤིང་དོན་ལྡན་བསྟན་ལ་ཕན། །གོ་འཇོ་བླ་མ་ཉེ་མ་སེང་གེ་ཡི། །སྐུ་སྐྱེ་བདག་པོ་མ་བྱས་འབྲུག་པས་ཁྱེར། །མ་འཕྲག་ནད་མང་འདས་ལ་ཁད་ཟེར་བས། །ཡི་དམ་གསོལ་བཏབ་ཡིན་མིན་བརྟག་པའི་ཚེ། །ཉི་མ་སེང་གེའི་སྐུ་སྐྱེ་ཡིན་ཟེར་བའི། །ལུང་བསྟན་བྱུང་སྨྲས་གདན་དྲངས་གདན་སར་འཁོད། །བདག་གི་སློབ་མར་གྱུར་ཞིང་རྟེན་འབྲེལ་འགྲིགས། །གཞན་ཡང་ལྷ་སྟེང་འཇའ་མོ་སྐུ་སྐྱེ་དང་། །བརྒྱན་པ་སྐུ་སྐྱེ་ཚ་རུ་སྐུ་སྐྱེ་གཉིས། །ཁམ་སྨྱོན་པ་ཡི་དབོན་པོའི་སྐུ་སྐྱེ་དང་། །སེ་བོ་བླ་མ་ཚང་གི་སྐུ་སྐྱེ་དང་། །ཚེ་འབྲོམ་སྐུ་སྐྱེ་ལ་སོགས་སྐུ་སྐྱེ་འགའ། །སྔོན་ནས་སྐུ་སྐྱེ་ཡིན་པར་གྲགས་འདུག་པས། །སྐུ་སྐྱེ་ཡིན་མིན་བདག་གིས་བརྟག་དོན་མེད། །སོ་སོར་གང་ལ་གང་འདོད་དབང་ལུང་བྱས། །ལར་ནི་བདག་ལ་མངོན་ཤེས་མེད་པའི་ཕྱིར། །དབུས་ན་ཐམས་ཅད་མཁྱེན་པ་པཎ་ཆེན་གཉིས། །འཇིང་དུ་བཞུགས་པའི་རྒྱལ་བ་ཡབ་སྲས་རྣམས། །ད་ལྟ་བཞུགས་པའི་གཏེར་སྟོན་རྣམ་གཉིས་སོགས། །མངོན་ཤེས་ཡོད་ངེས་རྣམས་ལ་ཞུས་སྨྲས་
ཀྱང་། །དེ་དག་རྣམས་ལ་འབུལ་བ་མི་འབྱོར་ཞིང་། །ས་ཐག་རིང་དང་ཡུལ་མཐོ་ཞུ་སྟབས་དཀའ། །ཁྱོད་ཀྱིས་སྨྲ་དགོས་ཟེར་མཁན་མང་དུ་བྱུང་། །ངོས་དགའ་བྱས་ནས་མིན་ལ་ཡིན་སྨྲས་ན། །དཀོར་མང་བསྡུ་བས་སྦྱིན་བདག་ཐམས་ཅད་བསླུ། །དེ་ཡི་ཉེས་པ་ངོས་འཛིན་མཁན་ལ་འོང་། །སྐུ་སྐྱེ་ཡིན་ལ་མིན་ཞེས་སྐུར་བཏབ་ན། །བྱང་ཆུབ་སེམས་དཔའི་འགྲོ་དོན་སྒོ་འགགས་པས། །བྱང་ཆུབ་སེམས་དཔར་སྐུར་པ་བཏབ་པ་ན། །ཁམས་གསུམ་སེམས་ཅན་བསད་ལས་སྡིག་ཆེ་གསུངས། །དེ་ཕྱིར་ངོས་འཛིན་ཡག་ཉེས་ཆེན་པོ་ཡིན། །ལར་ནི་མདོ་ཁམས་ཤར་གྱི་ཕྱོགས་འདི་ན། །སྐུ་སྐྱེའི་མིང་ནི་ཐོག་ཚད་ཐམས་ཅད་ལ། །ཀུན་གྱིས་དད་ཅིང་འབུལ་བ་མཛད་སྲོལ་དང་། །དེ་ཕྱིར་སྐུ་སྐྱེའི་མིང་ཐོག་ཤིན་ཏུ་མང་། །ལ་ལས་འདི་དག་ཕ་མའི་བརྫུན་སྨྲས་ཟེར། །ལ་ལས་འདི་དག་ཟ་འདྲེ་ཡིན་ནོ་ཟེར། །ལ་ལས་དུས་སྙིགས་བདུད་ཀྱི་ཆོ་འཕྲུལ་ཟེར། །ཀུན་ཀྱང་ཆུང་ངུའི་བྱིས་སྦ་ཡིན་ཟེར་དང་། །སེ་ར་གྲྭ་རིགས་ངོས་འཛིན་བྱེད་པ་སོགས། །རྟགས་མཚན་སྣ་རེ་ཀུན་ལ་བཤད་རྒྱུ་འདུག །ཁོ་བོའི་ལེགས་པར་དཔྱད་ན་འདི་ལྟ་སྟེ། །བསྟན་པ་སྤྱི་ཡི་བསྔོ་བ་ཐམས་ཅད་
ལ། །ཞིང་ཁམས་སྐྱེ་བའི་བསྔོ་བ་མི་དར་བ། །དལ་འབྱོར་མི་ལུས་ཐོབ་པར་ཤོག་ཟེར་བ། །ཁོ་ན་འདུག་པ་བསྔོ་སྨོན་མཐའ་བཙན་ཕྱིར། །འདས་ཚད་སྐུ་སྐྱེ་འོང་བ་དེས་ལེན་སྙམ། །བདག་ནི་འཁོར་བའི་སྡུག་བསྔལ་འདི་ལ་སྐྱག །ལན་གྲངས་གྲངས་མེད་སྐྱེ་ཞིང་འཆི་ལ་འཚེར། །དེ་ཕྱིར་བདག་དང་བདག་གི་རྗེས་འཇུག་རྣམས། །བདེ་བ་ཅན་དུ་སྐྱེ་བའི་སྨོན་ལམ་ཐོབ། །ད་རེས་ས་ཐོབ་མིན་པའི་དབང་གིས་ཡིན། །རབ་ཏུ་དགའ་བའི་ས་ཐོབ་ཡན་ཆོད་རྣམས། །ས་ཐོབ་འཇིགས་པ་ལྔ་དང་བྲལ་བའི་ཕྱིར། །འཁོར་བའི་སྡུག་བསྔལ་འདི་ལ་མི་སྐྲག་སྟེ། །འགྲོ་བའི་དོན་དུ་བསམ་བཞིན་སྐྱེ་བ་ལེན། །ཡུན་རིང་འགྲོ་དོན་མཛད་རྣམས་ཕྱག་གི་གནས། །དག་པའི་ཞིང་དུ་མངོན་པར་སངས་རྒྱས་ནས། །འགྲོ་བའི་དོན་དུ་ཆུ་ནང་ཟླ་བ་ལྟར། །སྤྲུལ་པ་བྱེ་བ་ཕྲག་བརྒྱ་འགྱེད་པ་རྣམས། །ཕལ་ཆེར་འགྲོ་བའི་སྐྱབས་གནས་དམ་པ་ལགས། །སྐྱེས་ཆེན་དམ་པའི་སྐུ་སྐྱེ་ཡིན་བརྫུས་ནས། །བསྟན་དང་འགྲོ་ལ་གནོད་ཚབས་ཆེན་པོ་རྣམས། །དེ་འདྲ་ལས་དབང་བདུད་ཀྱི་སྨོན་ལམ་སྟོབས། །གཅན་གཟན་རྒྱལ་པོ་སེང་གེ་ཤི་བའི་རོ། །བྱ་གཅན་སུས་ཀྱང་ཟ་བར་མི་འགྱུར་ཏེ། །རང་གི་
ཁོང་ནས་འབུ་ཁོལ་ཕུང་པོ་ཞིག །དེ་བཞིན་ཤཱཀྱ་སེང་གེའི་བསྟན་པ་ལ། །བོན་དང་མུ་སྟེགས་སྐྱེ་བོ་ལ་སོགས་པ། །ཕྱི་རོལ་གཞན་གྱིས་བཤིགས་པར་མི་ནུས་ཏེ། །ཐུབ་པའི་ཉན་ཐོས་གཟུགས་ཀྱིས་བཤིགས་གསུངས་པ། །དེ་དོན་ཡིན་པར་ཀུན་གྱི་ཐུགས་ལ་གསལ། །གསལ་ཡང་བྱ་ཐབས་མེད་པར་ལས་ཀྱིས་དབང་། །དེ་ལྟར་སྐུ་སྐྱེའི་རིགས་ལ་བཟང་དང་ངན། །རྣམ་གྲངས་མང་ཕྱིར་དབྱེ་གསལ་དཀའ་ན་ཡང་། །ཡི་དམ་ལྷ་ནི་མངོན་ཤེས་དྲུག་དང་ལྡན། །དེ་ཡི་ལུང་བསྟན་བྱུང་ན་མི་བསླུ་བསམ། །དེ་ཕྱིར་བརྟག་པ་འགའ་རེ་བྱེད་དགོས་བྱུང་། །འཇང་གྲྭ་བླ་མ་ཀརྨ་དར་རྒྱས་ཀྱིས། །སྐུ་སྐྱེ་ཡིན་མིན་བརྟག་པ་གྱིས་གསུངས་ནས། །བཀའ་ཤོག་རྟེན་བཅས་ནན་ཏན་ཆེན་པོ་བྱུང་། །བརྟགས་པ་བྱས་ཚེ་ཉམས་ཀྱི་སྣང་བ་ལ། །འཇང་གྲ་ཀརྨ་དར་རྒྱས་སྐུ་སྐྱེ་ཡིན། །ཞེས་པའི་ལུང་བསྟན་བྱུང་ཞིང་དེ་རྗེས་ཀྱང་། །ཉམས་ཀྱི་སྣང་བར་ཡི་གེ་མཐོང་བ་ལ། །བླ་མ་དར་རྒྱས་ཀྱིས་ནི་སྐུ་སྐྱེ་དེ། །ཡིན་ངེས་ཟེར་བ་འདུག་པར་མཐོང་བ་དང་། །རྨི་ལམ་བཀའ་ཤོག་གཅིག་ནི་གཏད་བྱུང་བ། །སྐུ་སྐྱེ་དེ་ཡི་ཡེ་ཤེས་སྤྲུལ་བརྒྱུད་ཀྱི། །བསྟོད་པ་སྐྱེས་རབས་འདྲ་བ་འགའ་གདའ་
བ། །དེ་ནུབ་གསལ་དེ་ཕྱིར་ནངས་བརྗེད་དེ་སོང་། །ཚིག་མཇུག་དོན་ཡོད་གྲུབ་པའི་སྤྲུལ་པ་ཡིན། །ཟེར་བ་གཅིག་ནི་གདའ་བ་དེ་ཡི་དོན། །སངས་རྒྱས་དོན་ཡོད་གྲུབ་པ་མ་ཡིན་ཏེ། །སྐུ་སྐྱེ་བྱོན་པའི་དོན་ནི་གྲུབ་པར་གོ །དེ་དོན་ཡི་གེ་གསལ་ཆ་རྒྱས་པར་བསྐུལ། །དེ་སྔོན་སྟག་ལུང་ཞབས་དྲུང་ལ་ཞུས་ཀྱང་། །གསལ་ཆ་ཅི་ཡང་མ་གསལ་ལུས་པར་སྣང་། །སྡེ་དགེ་གྲུབ་ཐོབ་པ་ཡི་སྐུ་སྐྱེ་ཞིག །ཡོད་ཀྱང་ཧ་ཅང་ངོས་འཛིན་གསལ་མ་བྱུང་། །རྒྱལ་བའི་དབང་པོའི་དྲུང་དུ་ཞུས་ན་ཡང་། །བདག་རྐྱེན་ཡག་པོ་གྱིས་ཤིག་གསུངས་ཙམ་ལས། །ཡིན་མིན་བཀའ་ཤོག་གསལ་པོ་མ་བྱུང་བས། །ཐེ་ཚོམ་ཁང་པ་ཞིག་ཏུ་བཀར་ནས་ཡོད། །ཡི་གེ་མི་འདོན་དཔེ་ཆ་བཀྲལ་བ་སོགས། །ཧ་ཅང་རྩུབ་དྲག་འཚོ་སྐྱོང་དཀའ་བར་ཡོད། །བརྟག་པ་གྱིས་ཟེར་ཁ་བཏགས་གསེར་ཐུམ་དང་། །རྟ་ཕོ་དང་བཅས་ཆ་འཕྲིན་གལ་ཆེན་བྱུང་། །ཉམས་ཀྱི་སྣང་བར་དགེ་སློང་གཞོན་ནུ་གཅིག །སྐུ་སྐྱེ་རེད་དེ་ཞེས་ཟེར་ཡང་ནི་ཐལ། །རྨི་ལམ་ས་སྐྱ་པ་ཡི་དགེ་སློང་འགས། །བླ་མ་གཞན་ལ་ཅུང་ཟད་གཤེ་ཞིང་གདའ། །ཨ་ཉོག་འདི་ལ་བལྟ་རོགས་གྱིས་དང་ཟེར། །བལྟས་པས་དུང་གི་མདོག་ཅན་གཅེར་བུ་ལ། །ངོ་
ལ་མེ་ལོང་ཆེན་པོ་བཀབ་ནས་གདའ། །མེ་ལོང་གསལ་བས་མཛེས་ཤིང་འཛུམ་པར་མཐོང་། །གཉིད་སད་རྨི་ལམ་སྐུ་སྐྱེ་དེ་ཡི་རྟགས། །དུང་མདོག་ཁ་སར་པཱ་ཎིའི་སྐུ་འདྲ་བ། །ཐུགས་རྗེ་ཆེན་པོའི་ཡང་སྤྲུལ་ཡིན་པའི་རྟགས། །མེ་ལོང་ཞལ་བཀབ་ངོས་འཛིན་མ་གསལ་རྟོགས། །རེད་དོ་བསམ་པ་ཡིད་ལ་གསལ་བར་ཤར། །དེ་ནས་གཉིད་པ་མ་ཡིན་ཡེངས་མི་སྐབས། །སྐུ་སྐྱེ་དེ་ཉིད་རང་མདུན་ཡོད་སྣང་བྱུང་། །ང་ཡི་མདུན་དུ་ཞོ་ནི་ཟོ་གང་དང་། །བཀྲ་ཤིས་རྫས་བརྒྱད་བཀྲམ་ནི་ཡོད་སྣང་ལ། །རིམ་བཞིན་སྐུ་སྐྱེ་དེ་ལ་འབུལ་རྒྱུ་ཡི། །བཀྲ་ཤིས་རྫས་བརྒྱད་ཚིགས་བཅད་ཡིན་སྣང་ལ། །བཀྲ་ཤིས་དང་པོའི་བཀྲ་ཤིས་པ། །སངས་རྒྱས་འཇིག་རྟེན་དུ་བྱོན་པ་ཡིན། །ཟེར་བ་དེ་ལ་གྱེར་དབྱངས་རིང་བ་ཞིག །བྱེད་པ་འཁྲུལ་པའི་སྣང་བ་དེ་ཡར་ནས། །གཉིད་པ་མིན་ཀྱང་གཉིད་ལས་སད་ལྟར་གྱུར། །ཚེས་བཅུར་བརྟགས་པ་བྱས་པའི་ཕྱིར་ནངས་ལ། །མ་གཉིད་ཐུགས་དམ་བྱེད་ཅིང་ཡོད་པའི་ཚེ། །སྐུ་སྐྱེ་དེ་ཉིད་དྲུང་དུ་ཡོད་སྣང་ལ། །པད་ཞྭ་བཟང་པོ་གོས་ཆེན་ལ་བཟོ་ནས། །སྐུ་སྐྱེ་དེ་ལ་བཀོན་ནི་དགོས་གྱུར་འདུག །པད་ཞྭ་བཟོ་རྒྱུའི་གོས་ཆེན་བདག་གིས་
གྲས། །དགེ་སློང་ཀརྨ་ཞེས་བྱར་གྲུབ་བཅུག་བསམ། །དེ་བ་མི་སྣང་འཇའ་ལྟར་ཡལ་བར་གྱུར། །དེ་དོན་ཡི་གེ་གསལ་བར་བྲིས་པ་དང་། །བླ་མ་ཀུན་བཟང་ཤེས་རབ་ཀྱིས་བསྐུལ་ནས། །སྐུ་སྐྱེ་དེ་ལ་བརྟན་བཞུགས་བྲིས་ནས་བསྐུར། །རྨི་ལམ་ལ་བརྟེན་སྐུ་སྐྱེ་ངོས་འཛིན་ནི། །བྱིས་པའི་ལོ་རྒྱུས་ཡོད་དམ་མེད་སྙམ་ན། །སྔོན་ཚེ་ཆོས་གྲགས་རྒྱ་མཚོའི་སྐུ་སྐྱེ་གཉིས། །གཅིག་ནི་ཀོང་པོ་གཅིག་ནི་ཁམས་སུ་འཁྲུངས། །སྒར་ཆེན་རྣམས་ཀྱིས་ཀོང་པོའི་དེ་དག་བདག །དེ་ཚེ་རྒྱལ་ཚབ་པ་ཡི་རྨི་ལམ་ལ། །ནུབ་ཀྱི་ཕྱོགས་སུ་སེང་གེ་གཅིག་འདུག་པ། །ཤར་གྱི་ཕྱོགས་ནས་འབྲུག་གཅིག་གྲག་པ་ཡིས། །ནུབ་ཀྱི་སེང་གེ་ཁྱི་རུ་གྱུར་པ་རྨིས། །དེ་ནས་ཁམས་ཀྱི་སྐུ་སྐྱེ་གདན་དྲངས་ནས། །ཁྲི་ལ་འཁོད་པ་མི་བསྐྱོད་རྡོ་རྗེ་ཡིན། །ཁོ་བོ་དེ་ལ་འགྲན་ཟླ་མ་མཆིས་ཀྱང་། །དེ་ཡི་རྗེས་འཇུག་ཡིན་པས་ཕྱོགས་མཐུན་ཙམ། །རྨི་ལམ་ལུང་བསྟན་འབྲས་བུ་ཡོད་དམ་མེད། །ཕྲན་ཚེགས་འགའ་རེ་རྣོ་ཚད་འདྲ་བས་གསལ། །སྔར་དུས་དུས་ནི་ཟང་ཟིང་ཆེ་སྐབས་སུ། །ལུང་པ་འདི་ལ་དགུ་གཏོར་སྒར་པ་ཡི། །གནོད་པ་འོང་དོགས་སྐྲག་འཇིགས་ཆེ་སྐབས་སུ། །ཀོང་པོ་མི་འོང་ཕར་ལོག་ངོས་
ནས་སོང་། །བསྡུ་གསོག་མི་ཐོན་བུད་མེད་གཅིག་གིས་ཟེར། །ཟེར་བ་བཞིན་དུ་དེ་དུས་མ་བྱུང་ངོ། །སྔར་དུས་སྒྲོལ་དཀར་བསྙེན་པའི་དུས་ཤིག་ལ། །ནུ་རས་སྐད་ཅིག་ཐམས་ཅད་དབང་བསྡུས་སོང་། །ཟེར་བའི་སྒྲ་ཞིག་ཐོས་པ་དེ་བཞིན་དུ། །རྒྱ་ནག་མཐའ་སོག་བཅས་པ་དབང་འདུས་སྐད། །བྱམས་པ་གླིང་གི་གུ་རུ་རྣམ་གཉིས་ལ། །རྒྱལ་པོ་ཡོན་མཆོད་བཀའ་བཀྱོན་བྱུང་བའི་དུས། །ཅིར་འགྱུར་བརྟག་པ་གྱིས་ཞེས་བརྟག་པའི་ཚེ། །ར་ཡ་མ་བཀོག་བར་དུ་ཁས་མི་ཉན། །ཟེར་བ་བྱུང་ལྟར་ཤནྟཾ་བྷ་དྲ་ནི། །རང་དབང་མེད་པར་དབུས་སུ་ཁྱེར་སོང་ངོ། །དེ་དུས་རང་གི་དབོན་པོ་རྩིས་ཆེན་སོགས། །མཉམ་དུ་འགྲོ་དགོས་མགོ་ནི་མི་ཐོན་དོགས། །བསྲུང་བའི་སྔགས་དམིགས་གཟབ་ཚེ་རྨི་ལམ་ལ། །ནུས་པའི་མཐུ་ཡིས་བར་ཆད་རྐྱེན་ངན་ཟློག །ཅེས་གསུངས་གསུངས་པ་བཞིན་དུ་མགོ་ཐོན་བྱུང་། །དེ་དུས་སརྦ་བེད་ཀྱི་སྐུ་ཆུས་བརྟག །ལྟ་ནི་ཕོད་པ་མེད་དོ་གསུངས་པ་ལྟར། །བཙན་དྲག་ཤིན་ཏུ་ཆེ་བ་ལོ་མང་སོང་། །རྨི་ལམ་རྣ་བས་ཐོས་ཤིང་ངག་གིས་སྨྲས། །བདུད་འདུལ་རྡོ་རྗེ་མི་འགྱུར་རྡོ་རྗེ་གཉིས། །ཨོ་རྒྱན་སྤྲུལ་པ་ཡིན་པར་ཁྱད་མེད་ཀྱང་། །དབང་དྲག་རྒྱ་
སྤྲུལ་སྐུ་འདི། །རང་གི་བླ་མ་ཡིན་ཕྱིར་ཀཿཐོག་ངོས། །སྤྲུལ་སྐུ་འདི་ལ་ལྷག་པར་དད་པར་འདུག །ཅེས་སོགས་བཞིན་དུ་ཀ༔ཐོག་ངོས་དེ་རུ། །དད་པ་ཆེ་ཞིང་གནམ་ཆོས་ཉམས་ལེན་དར། །སྔོན་ཚེ་ས་མོ་ཡོས་ཀྱི་ལོ་འགོ་ནས། །མགོན་པོའི་སྤྱི་མདོས་བཅས་པའི་དུས་ཆེན་ཚེ། །ཉམས་ཀྱི་སྣང་བར་ཡི་གེ་གཅིག་མཐོང་བ། །བཛྲ་དྷརྨ་དྷརྟུའི་བསྟན་པ་ནི། །ད་ནས་བཟུང་སྟེ་དར་བར་མི་གྱུར་ཏེ། །ན་ར་ཀན་འདི་བེར་ནག་ཅན་གྱི་མནའ། །ཟེར་བ་འདུག་ཅིང་ཡང་ནི་ཉམས་སྣང་ལ། །ད་ལོ་ནས་བཟུང་ཀརྨའི་བསྟན་པ་དར། །སང་ཕོད་ནས་ནི་རབ་གཅིག་དར་བ་དང་། །གནང་ཕོད་ནས་ནི་དར་ཞིང་རྒྱས་གསུངས་ལྟར། །རྒྱས་དམ་ཕྱོགས་སུ་ལོ་ངོ་ཕྱེད་དྲུག་ཙམ། །ཡབ་སྲས་ཐམས་ཅད་ཞལ་རྒྱས་བསྟན་པ་དར། །དེ་ཚེ་རྒྱལ་བའི་དབང་པོ་ཉིད་ཀྱིས་ཀྱང་། །ཡབ་སྲས་ཐམས་ཅད་ཞལ་རྒྱས་སྐུ་ཁམས་བཟང་། །བསྟན་པ་དར་བ་འདི་ག་ཡིན་གསུངས་སྐད། །བདག་གི་སྐྱབས་གནས་ལྷོ་པ་སྤྲུལ་པའི་སྐུ། །གདུལ་བྱ་ལོངས་སྤྱོད་ཤིན་ཏུ་ཆེ་བ་དང་། །ཆོས་སྐྱོང་འབབ་པ་འདི་ལ་ཕལ་ཆེར་སྐྲག །དད་པ་ཅུང་ཞིག་ཆུང་དུ་འགྲོ་ཟེར་བའི། །ལུང་བསྟན་ཐོས་ལྟར་འབྲི་གུང་
ཞབས་དྲུང་གི །སྤྲུལ་སྐུ་རིགས་ཀྱི་བདག་པོར་གྱུར་པ་དང་། །བཀའ་འགྱུར་བཞེངས་སོགས་གདུལ་བྱ་ཕྲིན་ལས་ཆེ། །འགའ་ཞིག་ཆོས་སྐྱོང་བསྟན་ལ་གཤེ་བའང་ཐོས། །ཡང་ནི་དཔོན་རིགས་བཙན་དྲག་གཏུམ་པོ་ཞིག །རང་ལ་མ་དགའ་འདུག་ཟེར་སྐྲག་པའི་ཚེ། །ཉམས་སྣང་མི་དོགས་ཟེར་བའི་སྒྲ་གྲག་པ། །གནོད་པ་མ་བྱུང་དེ་ཡང་ཐོག་ཏུ་བབ། །མ་ཧཱ་རཱ་ཛར་ཆེན་པོར་ཐམས་ཅད་ཞད། །རང་ལ་གནོད་དོགས་བརྟགས་པ་བྱས་པའི་ཚེ། །པདྨ་འབྱུང་གནས་བྱིན་རླབས་རྟེན། །འཇའ་ལྟར་ཤར་ཡང་སྐྱོན་མི་འོང་། །ཞེས་པའི་སྒྲ་ཐོས་བཞིན་དུ་ལོ་བརྒྱད་གྱུར། །དེ་ཡི་གནོད་པ་ཅུང་ཟད་མ་བྱུང་ངོ། །དེ་མོ་བ་ལ་རྒྱབ་ནས་ཐལ་ཟེར་བས། །སྒྲ་ཞིག་ཐོས་ནས་ལོ་ནི་འགའ་ཟུང་ནས། །དེ་མོ་སྤྲུལ་སྐུ་གློ་བུར་རྐྱེན་གྱིས་གཤེགས། །བཀའ་ཐང་སྡེ་ལྔ་ནང་ནས་ལུང་བསྟན་པའི། །སྤྱན་བཞི་རྒྱལ་པོ་ཟེར་བའི་རྒྱལ་པོ་དེ། །ནུ་རའི་རྒྱལ་རྒྱུད་རྒྱ་ནག་རྒྱལ་པོ་འདི། །ཡིན་མིན་བརྟག་ཚེ་ཉམས་རྨི་འདྲེས་པའི་སྐབས། །མི་རྩུབ་ཟེར་བའི་སྒྲ་ཞིག་ཐོས་པ་དང་། །དང་པོ་ཐང་སྐུ་འདྲ་བ་ཡིན་པ་ལ། །དེ་ནས་ཐང་སྐུ་མ་ཡིན་ཨོ་རྒྱན་དངོས། །ཆེ་ཆུང་ཁང་རྩག་ཙམ་པ་ཤིན་ཏུ་
གསལ། །འཇའ་ཤར་ལྟ་བུ་དང་བ་འདྲེན་པ་མཇལ། །སྤ་སྐྱ་ཁ་རུ་དགེ་ཁང་བྱེད་བཅོལ་ན། །ཆགས་སམ་མི་ཆགས་བརྟགས་པ་བྱས་པའི་ཚེ། །དགོན་ཆགས་ཟེར་བ་ཉམས་ཀྱི་སྐབས་ལ་ཐས། །ཨཱརྱ་དེ་ཝ་ལོ་ནི་འགའ་ཟུང་ལ། །ཇི་ལྟར་འགྱུར་ཞེས་བརྟགས་པ་བྱས་པའི་ཚེ། །བསྟན་པ་ཉི་མ་ཤར་ལྟར་འོང་ཟེར་དང་། །རང་གི་བསྲུང་བྱ་དམིགས་ཡུལ་གཅིག་ཡོད་པ། །གཙོ་ཆེ་རྩེ་མ་འོང་ཞེས་ཟེར་བ་ཡང་། །ལོ་འགའི་བར་དུ་དེ་ག་མངོན་དུ་གྱུར། །དེ་སོགས་ཕྲན་ཚེགས་བྲི་བར་མི་ལོང་སྟེ། །འདི་འདྲ་བྲི་བའི་དོན་ཆེན་མ་མཆིས་ཏེ། །སྔ་བཏང་དེ་དག་ཐོག་ཏུ་ཕེབས་པའི་ཕྱིར། །ཕྱི་བཏང་གཞན་ཡང་སྟེང་དུ་འགྲོའམ་སྙམ། །དེ་ལྟར་ཚད་ཕུ་དགོས་དོན་ཅི་ཞེ་ན། །སྔོན་བྱོན་གཏེར་ཁ་གསར་རྙིང་མང་པོ་ཡང་། །ཨོ་རྒྱན་བཀའ་ལ་འཁྲུལ་པ་མེད་མོད་ཀྱང་། །ལུང་བསྟན་བཟང་པོ་ཡོད་པ་འགའ་ཞིག་ཀྱང་། །རྟེན་འབྲེལ་མ་འགྲིགས་ངན་པར་གྱུར་པ་དང་། །ལུང་བསྟན་ངན་པ་འོང་རྒྱུ་འགའ་ཞིག་ཀྱང་། །རིམ་གྲོས་འགྱུར་ནས་སྐྱོན་མེད་བྱུང་བ་མང་། །དེ་ཕྱིར་འགའ་ཞིག་ཁྲིག་གེར་མ་བྱུང་ཡང་། །ཐམས་ཅད་བརྫུན་སྙམ་ལོག་ལྟ་བྱ་མི་རུང་། །སྔགས་པ་ཞིག་གི་བུ་གཅིག་ཚེ་
དུས་བྱས། །དེ་ཉིད་གར་སྐྱེས་ནན་ཏན་ཆེན་པོས་དྲིས། །མི་ཤེས་ཤི་ལོག་པ་ལ་དྲིས་བྱས་ཀྱང་། །ཁྱོད་ཀྱི་སྨྲ་དགོས་ཟེར་ནས་ཨུ་ཚུག་ཆེ། །བུ་དེ་ཚེ་སྔོན་ལས་སྒྲིབ་ཤིན་ཏུ་ཆེ། །གླང་བུ་དམར་པོ་རྐང་ལག་ཁྲ་རིས་ཅན། །དེ་འདྲ་གཅིག་ཏུ་སྐྱེ་བར་འདུག་གོ་སྨྲས། །དེ་ནས་འཕོས་ནས་སྐྱེ་གནས་ཇེ་མཐོའི་ཕྱིར། །དགེ་བསྐུལ་དགེ་བ་འགའ་རེ་ལུང་བསྟན་བྱས། །སྔགས་པའི་མ་ཇོ་བླ་མའི་མ་ཡུམ་ཞིག །ཤི་བས་བདག་ལ་འབུལ་བ་ཚན་ཆེན་བྱས། །འཕོ་བ་རྒྱང་འདེབས་གྱིས་ལ་ལུང་བསྟན་ཟེར། །ཕྱི་དབུགས་ཆད་མ་ཐག་ནས་འོག་སྒོར་འཕོས། །རེ་ཞིག་དམྱལ་བའི་གནས་སུ་སྐྱེ་ལྟས་མཐོང་། །ངན་སོང་སྦྱང་ཐབས་འགའ་རེ་ལུང་བསྟན་བྱས། །ལོ་གཉིས་ཙམ་ཞིག་སོང་ནས་ཡི་གེ་བརྒྱུད། །སྒྲིབ་སྦྱོང་དེ་དག་ཐམས་ཅད་ཚར་ཡོད་པས། །ད་ནི་གར་སྐྱེས་སྨྲ་དགོས་ནན་གྱིས་ཟེར། །ད་ནི་དམྱལ་བའི་གནས་ནས་ཡར་ཐར་ཏེ། །མི་རུ་སྐྱེ་དབང་ཡོད་དེ་སྐྱེ་འཚེར་ནས། །ཕག་མོའི་ཡང་འཁོར་མཁའ་འགྲོའི་གྲལ་དུ་ཡོད། །གསོན་པོ་རྣམས་ལ་སྲུང་སྐྱོབ་ནུས་པར་འདུག །ཐོག་མ་ཉིད་ནས་རིགས་བཟང་ཡིན་པར་གདའ། །ཅེས་སྨྲས་དེ་སྔོན་བླ་རྒན་གཅིག་གིས་
ཀྱང་། །མ་ཡུམ་འདས་ཁར་ཆོས་བཀའ་དགེ་ལས་ཆེ། །ཁྱད་པར་ཀུན་རིག་ཚན་ཆེན་དེ་ལ་བསྔོས། །དེ་ཉིད་གར་སྐྱེས་བརྟག་ཅེས་བཀའ་ཤོག་བྱུང་། །དེ་ནི་ཉེ་དུ་རྣམས་ལ་སེམས་ཆགས་ནས། །རང་གི་ཉེ་དུ་གཅིག་གི་བུ་མོར་སྐྱེས། །དེ་ནས་འཕོས་ནས་དགེ་བའི་ར་མདའ་བསླེབས།།དེ་ནས་ཡུལ་དེར་དཔོན་ཕྲན་གཅིག་གི་བུར། །སྐྱེ་བའི་ལྟས་མཐོང་སྨྲས་ནས་ཡི་གེར་བསྐུར། །ཡང་ནི་བླ་བརྒྱུད་ཡོད་པའི་བླ་མ་ཞིག །འདས་པ་གར་སྐྱེས་བརྟག་པ་བྱེད་དགོས་ཟེར། །བླ་མ་དེ་ཉིད་མི་རུ་སྐྱེས་ནས་ཀྱང་། །ད་ལྟའི་དད་པ་སྨོན་ལམ་རྟེན་འབྲེལ་གྱིས། །ཡབ་སྲས་ཞིག་གི་དྲུང་སྐོར་སྐྱེ་ལྟས་མཐོང་། །དཔོན་རྒན་ཡིག་དྲུག་མང་དུ་ཐོན་པ་ཡང་། །གདུང་རྒྱུད་བཟང་ཕྱིར་དག་པའི་ཞིང་ཁམས་སུ། །སྐྱེས་སོ་སྙམ་ནས་གར་སྐྱེས་ལུང་བསྟན་ཟེར། །ད་རུང་ཉོན་མོངས་སྒྲིབ་པ་ཆེ་ཟེར་བའི། །ལུང་བསྟན་བྱུང་ཕྱིར་སྨྲ་རྒྱུ་མ་རྙེད་ལུས། །དེ་བཞིན་སྐྱེ་གནས་བརྟག་པ་ཞུ་མི་མང་། །ལ་ལ་མ་གསལ་ལ་ལ་གསལ་ན་ཡང་། །བཤད་ཉན་མ་བྱུང་སྐྱུར་ནས་བཞག་དགོས་བྱུང་། །བླ་མ་དགེ་བཤེས་བགྲེས་པོ་ཞིག་འདས་པར། །བརྟག་པ་གྱིས་ཟེར་བརྟགས་པས་ཉམས་སྣང་ལ། །ནུབ་
ཕྱོགས་ནམ་མཁའི་མཐའ་ནི་ཕོ་ཟད་ན། །འཇའ་ཡི་གུར་ཁང་ཟླུམ་པོ་ཞིག་འདུག་པའི། །དབུས་ན་ཐིག་ལེ་དམར་པོ་ཆེན་པོ་ཞིག །མཐོང་བ་ཙམ་གྱིས་སེམས་ལ་དགའ་བདེ་སྐྱེས། །ལོ་འགའི་བར་དུ་བླ་མ་དེ་ཉིད་ལ། །བདེ་བ་ཅན་དུ་སྐྱེ་བའི་གདམས་ངག་བྱིན། །ཁོང་གི་ཉམས་ལེན་རྩེ་གཅིག་བྱས་པའི་རྟགས། །འདས་ཁ་ང་ཡི་ཆོས་གོས་འདི་ལ་སོགས། །འབུལ་བ་ཀརྨ་ཆགས་མེད་དྲུང་དུ་སྐྱོལ། །ང་ལ་ཁོང་ནི་བཀའ་དྲིན་ཆེ་གསུངས་སྐད། །ཁོང་གིས་བདེ་ཆེན་ཞིང་ཁམས་ཐོབ་བམ་སྙམ། །རང་ལོ་རེ་གཉིས་ལོན་པ་ལྕགས་ཁྱི་ལོར། །ཨ་མོ་གྱ་བརྒྱད་ལོན་པ་ཚེ་དུས་བྱས། །འཕོ་བ་ཐེབས་ཀྱང་ཐེབས་རྟགས་མ་གསལ་བས། །སྣ་བུག་ཆུ་སེར་འདྲ་ཞིག་ཐིགས་བྱུང་ཟེར། །ད་རུང་མི་ཡི་སྐྱེ་བ་ལེན་དགོས་པའི། །ལས་འཕྲོ་ཡོད་པ་འདྲ་སྙམ་བློ་མ་བདེ། །དང་པོ་ནུབ་པར་ཉམས་དང་རྨི་ལམ་མཚམས། །ད་རུང་བུ་མོ་མཛེས་མ་རིགས་བཟང་དུ། །སྐྱེ་དགོས་ཟེར་བའི་ལུང་བསྟན་གཅིག་ཀྱང་བྱུང་། །ཕྱིར་ནུབ་གཟུགས་ནི་གསལ་པོར་མ་མཐོང་བར། །སྐད་ངོ་ཤེས་པ་གྲྭ་ཁྲིའི་རྩ་རུ་བྱུང་། །ང་ལ་ཕྱག་དབང་གནོང་ཞེས་ཟེར་བ་ལས། །མོ་རང་ཤི་བ་ཡིན་པར་ངོ་
ན་བཞིན་ཕྱག་དབང་ཞུ་བའི་བག་ཆགས་རེད། །བསམ་ཞིང་ལག་པ་བསྐྱངས་ནས་ཕྱག་དབང་བྱས། །ཞག་བཅུ་ནུབ་པར་གསོན་དུས་དངོས་ལྟར་དུ། །ཨ་མ་མདུན་དུ་བྱུང་བ་ཤེ་བར་ངེས། །ཁྱོད་རང་བདེ་བ་ཅན་དུ་སོང་ཞིག་སྨྲས། །ཚེས་བཅུ་བླ་གླུད་ཟས་བསྔོ་རྒྱས་པའི་ནུབ། །ཨ་མ་སྔར་དུས་གཞོན་ནུའི་ལུས་དེ་ལ། །རྒྱན་དང་གོས་ཡང་གཞོན་ནུའི་དེ་དང་མཚུངས། །སྟེགས་ནི་མཐོན་པོའི་ཁ་ན་འདུག་པ་སྟེ། །དགའ་ཞིང་ཡར་ལ་ཡུད་དེ་སོང་བ་རྨིས། །བླ་གླུད་ཟས་བསྔོས་བླ་དེ་ཤིན་ཏུ་དགའ། །རང་གི་བསྒྲིགས་པའི་བླ་གླུད་ཟས་བསྔོ་དེར། །ཕན་ཡོན་ཆེན་པོ་གདའ་བའི་ངེས་ཤེས་ཐོབ། །བདུན་ཕྲག་ལྔ་ཙམ་འགྲོ་ལ་ཁད་ཀྱིས་དུས། །ཆོས་དབང་ཀུན་བཟང་སྐུ་ནི་པད་དབོང་འདྲ། །གསུང་ནི་སྐད་ངོ་ཤེས་པར་ཆོས་དབང་ཉིད། །ཨ་མ་ཨ་མ་ཟེར་ཞིང་ཚོར་ཞིང་རྒྱུག །བདག་གིས་ཅི་ཡིན་ཅི་ཡིན་སྨྲས་ན་ཡང་། །ཁ་ལེན་མི་བྱེད་ང་ལ་གཡུལ་དོ་བས། །ཆོས་དབང་བདེ་བ་ཅན་གྱི་ཞིང་ཁམས་ནས། །ཨ་མ་འདྲེན་ཕྱིར་འོང་བ་ཡིན་པར་ཤེས། །དེ་སྔོན་ནུབ་གཅིག་ལུང་བསྟན་སྒྲ་གྲག་པ། །བདེ་བ་ཅན་ནི་སྐྱེ་བར་ཐེ་ཚོམ་མེད། །ཟེར་བ་བྱུང་ཡང་ད་རུང་བར་ཆད་
མང་། །དེ་རྒྱབ་ཨ་མའི་གཟུགས་ནི་མ་མཐོང་ཡང་། །སྐད་ངོ་ཤེས་པར་ངུ་སྐད་ཨ་ཁ་ཁ། །བདེ་བ་ཅན་ན་སྐྱེ་ཁེས་ཉན་ལེ་མེད། །ཟེར་བ་སྐད་ཅིག་རྣ་བའི་ཡུལ་དུ་ཐོས། །བདུན་ཕྲག་དྲུག་ནུབ་བརྟགས་པ་བྱས་པའི་ནུབ། །རྒྱལ་བའི་དབང་པོའི་ཡུམ་དང་ལྕམ་སྲིང་གཉིས། །མ་ཇོ་ཡིན་སྙམ་རྒྱན་ལྡན་ཌཱཀྐི་མཇལ། །དེ་རྗེས་བུད་མེད་དཀར་མོ་ཤིན་ཏུ་མཛེས། །བལྟ་བས་ཆོག་མི་ཤེས་པ་ཞིག་དང་ནི། །མཁའ་འགྲོའི་རྟགས་མཚན་ཤིན་ཏུ་མང་བར་བྱུང་། །ནུབ་གཅིག་དགོན་པ་རྣམས་ནི་ཕལ་ཆེར་ལ། །ལྷ་མོ་ཟེར་བ་རེ་རེ་གདའ་ལེ་ཞེས། །ལྷ་མོའི་རིགས་གཅིག་ལ་ནི་སྐྱེ་སྐད་ཟེར། །མོ་རང་སྔོན་ནས་རིགས་བཟང་ཡིན་འདུག་པས། །གྲོགས་མོ་ཀུན་གྱིས་མི་བཏང་བཤོལ་བ་འདྲ། །དེ་ལྟར་དགོངས་ཞག་ནང་དུ་སྐྱེ་མ་ཐུབ། །ཨ་མ་དེ་ཡིས་ཡིག་དྲུག་དུང་ཕྱུར་ཐོན། །དཀོར་ཟོས་མ་གཏོགས་སྡིག་པ་ཅི་ཡང་མེད། །གསར་རྙིང་དབང་ནི་བརྒྱ་སྟོང་དུ་མ་ཐོབ། །བདག་གི་དགོངས་ཞག་བཟུང་ཞིང་བསྔོ་སྨོན་གཟབ། །ཨ་མ་བདེ་བ་ཅན་དུ་མ་ཕྱིན་ན། །བན་རྒན་ཆགས་མེད་བདག་གིས་སྐྱག་པ་ཟོས། །སྙམ་ནས་སེམས་ཡང་རབ་ཏུ་སྡུག་པར་གྱུར། །སླར་ཡང་
བསྔོ་སྨོན་དམིགས་པ་རྩེ་གཅིག་གཟབ། །ཤི་ནས་ཞག་གྲངས་བདུན་ཅུ་དོན་དྲུག་ལ། །བཅོ་ལྔ་ལྷ་ལས་བབ་པའི་དུས་ཆེན་ནུབ། །འགྲིམ་པ་མེད་ཅིང་ཐུགས་དམ་འཕེལ་བའི་སྐབས། །བརྟག་པ་བྱས་ཚེ་དེ་ནུབ་རྨི་ལམ་ལ། །བདེ་བ་ཅན་དུ་སྐྱེ་ངེས་ཟེར་བ་དང་། །ཐོ་རངས་རྨི་ལམ་མ་ཡིན་ཉམས་སྣང་ལ། །ཨ་མ་བདེ་བ་ཅན་དུ་ཕྱིན་ཚར་ནས། །སངས་རྒྱས་བྱང་ཆུབ་སེམས་དཔའ་རྣམས་ལ་ཡང་། །སྐོར་བ་མང་པོ་བསགས་ནས་ཡོད་ཟེར་བའི། །ལུང་བསྟན་བྱུང་ཡང་ད་རུང་ཞིང་ཁམས་དེར། །ལུས་ནི་བླང་ནི་ཚར་བ་ཡིན་ནམ་སྙམ། །དེ་ནས་ལྕགས་ཕག་ཟླ་བའི་ཚེས་ཁ་གསལ། །ཨ་མས་སྐྱེ་བ་བླངས་སམ་བརྟགས་པ་བྱས། །བདེ་ཆེན་ཞིང་གི་སྒྲུབ་ཐབས་དཔེ་ཆ་ཞིག །རང་གི་ལག་ཏུ་གདའ་བའི་རྨི་ལམ་མཐོང་། །སླར་ཡང་ཚེས་བདུན་ནུབ་པར་བརྟགས་པ་བྱས། །རྨི་ལམ་མ་ཡིན་ཉམས་ཀྱི་སྣང་བ་ལ། །བར་སྣང་མིག་ལམ་ཡི་གེ་མང་པོ་དོད། །གཞན་ཚོ་ཡིད་ལ་ཅི་ཡང་མ་ཟིན་ཏེ། །ཨ་མ་བདེ་བ་ཅན་དུ་སྐྱེས་ཚར་ནས། །ཞག་གསུམ་རེད་ཅེས་ཟེར་བ་གསལ་པོར་གདའ། །དེ་རུ་ལུས་བླང་ཚར་ནས་ཕྱིར་མི་ལྡོག །དེ་ཕྱིར་དེ་ཕྱིས་བློ་སེམས་བདེ་བ་བྱུང་། །
བདག་གི་བུ་ཆེན་ཡིན་པའི་ལྷ་རྗེ་ཞིག །གཅོང་ནད་ཅི་བྱས་མ་དྲག་འདུག་པ་ལ། །ད་ནི་ཅི་བྱ་དགོངས་པ་གནང་དགོས་ཟེར། །ད་ནི་ཕན་ཅིང་བདེ་བའི་རེ་བ་བསྐྱུར། །གཏོང་ལེན་དམིགས་པ་སྒོམ་ཞིང་ངོ་བོ་ལྟོས། །བདེ་བ་ཅན་དུ་སྐྱེ་བའི་སྨོན་ལམ་ཐོབ། །དེ་སྐད་སྨྲས་པས་དེ་འདྲ་ལོ་འགའ་བྱས། །ཤི་ཁ་ཐུགས་དམ་འདུག་ཤོམ་བྱས་འདུག་པ། །ཤི་ཁ་སྔས་མགོར་བླ་མ་ཞིག་ཕེབས་པས། །སྐྱེ་བོ་ཐུགས་དམ་འདུག་རྒྱུ་མེད་གསུངས་ནས། །ཁོ་ཡང་ཐེ་ཚོམ་ངང་དུ་ཚེ་དུས་བྱས། །དེ་ནས་ཐུགས་དམ་ཡང་ནི་མ་ཟིན་ཅིང་། །དེ་ཉིད་གར་སྐྱེས་བརྟག་པ་བྱེད་དགོས་ཟེར། །ཟླ་བ་དྲུག་བདུན་ཙམ་ལ་མ་གསལ་ཏེ། །ཡུན་རིང་བསྔོ་བ་སྨོན་ལམ་བྱས་པའི་མཐར། །ད་ནི་བདེ་བ་ཅན་དུ་སྐྱེས་ཡོད་དེ། །ད་རུང་མེ་ཏོག་ཁ་ནི་མ་བྱེ་ཞེས། །ལུང་བསྟན་བྱུང་བ་ཐེ་ཚོམ་སྐྱོན་དུ་གོ །མེ་ཏོག་ནང་དེར་བདེ་སྐྱིད་ལོངས་སྤྱོད་ལྡན། །སངས་རྒྱས་གསུང་ནི་ཐོས་པར་གྱུར་ན་ཡང་། །ལོ་གྲངས་ལྔ་བརྒྱར་སངས་རྒྱས་ཞལ་མི་མཐོང་། །དེ་ཕྱིར་ཞིང་དེར་སྐྱེ་བར་འདོད་པ་ཀུན། །སྐྱེའམ་མི་སྐྱེ་ཐེ་རྩོམ་སྤང་གལ་ཆེ། །མདོ་ནས་གསུངས་དང་ལུང་བསྟན་འདི་གཉིས་
མཚུངས། །རང་ཉིད་འདུག་པའི་ཡུལ་ཕྱོགས་འདི་ཉིད་ཀྱི། །དཔོན་པོ་ལོངས་སྤྱོད་ཆེན་པོ་ལྡན་པ་ཞིག །རང་ལ་དད་འདུན་ལྡན་ཞིང་དབང་ཡང་ཞུས། །པདྨ་འོད་འབར་ཐུགས་དམ་ཚག་མེད་དང་། །ཨོ་རྒྱན་སྟོང་སྐུ་ལ་སོགས་ལྷ་ཁང་བཞེངས། །དེ་ཉིད་གཞོན་ནུར་གློ་བུར་ནད་ཀྱིས་འདས། །བདག་ལ་འབུལ་བ་བཟང་པོ་ཚན་ཆེན་དང་། །བུམ་སྒྲུབ་པ་ལའང་ལོ་ཕོག་ཙམ་ཞིག་རྒྱབ། །གཞན་ཡང་རི་བཤུ་ལ་སོགས་དགེ་སྟོབས་ཆེ། །དེ་ཉིད་སྐྱེ་གནས་ལུང་བསྟན་བྱ་དགོས་ཟེར། །ང་ལ་མངོན་ཤེས་མེད་པས་ལུང་བསྟན་མེད། །འཇམ་དབྱངས་གསུངས་པའི་རྒྱ་ནག་རྩིས་གཞུང་ལས། །སྐྱེ་གནས་བཟང་ངན་སྐྱེ་སྒོ་ཆོད་ཐབས་སོགས། །འདི་ལྟར་འདུག་ཅེས་ཡི་གེ་བསྐུར་བ་ལ། །སྐྱེ་སྒོ་ཆོད་ན་ཐམས་ཅད་ཚར་ནས་ཡོད། །ད་ནི་གར་སྐྱེ་བརྟག་པ་བྱ་དགོས་ཟེར། །ཟླ་བ་དྲུག་བདུན་ཙམ་ལ་ཐག་མ་ཆོད། །དེ་ནས་ཡི་གེ་བསྐུར་བའི་དོན་རྩ་ནི། །དཔོན་པོའི་གདུང་རུས་འདི་ན་བསྐུར་བྱུང་དུས། །དཔོན་ཉིད་འདི་རུ་ཕེབས་ནས་བྱུང་གྱུར་ཏེ། །ང་ཡི་གཡས་ངོས་ཕུག་པ་འདི་ཡི་ནང་། །ཞག་གསུམ་ཙམ་ཞིག་བཞུགས་པའི་འཁྲུལ་སྣང་ཤར། །དེ་ཚེ་བསྔོ་སྨོན་དམིགས་པ་ཤིན་ཏུ་གཟབ། །
རབ་ན་བདེ་བ་ཅན་གྱི་ཞིང་ཁམས་སམ། །དེ་ལྟར་མིན་ཀྱང་ཟངས་མདོག་དཔལ་རི་རུ། །ཨོ་རྒྱན་དྲུང་དུ་ལུང་བསྟན་ཡང་ཡང་བྱས། །ཁོ་རང་བྱོན་ན་རང་དབང་ཆེ་འདུག་སྟེ། །ས་ཕྱོགས་འདི་ཡི་སྡེ་ལ་ཆགས་ཞེན་ཆེ། །ཞིང་ཁམས་དེ་དག་ས་ཐག་རིང་བ་སྟེ། །ཇི་ལྟར་བྱས་ཀྱང་འབྱོན་ཤེས་མི་ནུས་སྙམ། །ས་ཕྱོགས་འདི་རུ་འཁོར་ཞིང་སྒོ་རོ་རོ། །རྟ་ཡི་ལུང་པའི་སྨད་ཀྱི་ས་ཕྱོགས་སུ། །དུད་སྙོམས་ཤིག་གི་བུ་ལ་སྐྱེ་ཤོམ་བྱས། །འོན་ཀྱང་རྟེན་འབྲེལ་མ་འགྲིགས་ག་དལ་བོར། །ལོ་ངོ་ཙམ་ན་ལུས་ནི་མ་བླངས་པས། །ད་བར་ཡི་གེ་བསྐུར་རྒྱུ་མ་རྙེད་དོ། །ད་ནི་དབུས་གཙང་སྐྱི་ཤོད་སྡེ་ཕ་ཡི། །སྲས་སུ་འཁྲུངས་ནས་ཚེ་ལ་བར་ཆད་མེད། །སྦྱིན་པ་གཏོང་མཁན་ཡོན་བདག་ཕྱུག་པོར་གྱུར། །ཞེས་པའི་དོན་དེ་ཡི་གེ་བསྐུར་བྱས་པའི། །མ་དེས་སེམས་བདེ་མྱ་ངན་སང་ཞེས་ཐོས། །སྔ་ཕྱིས་དགེ་རྩ་རླབས་ཆེན་འགྲུབ་བོ་སྐད། །སྔོན་ཞིག་དགེ་སློང་སྔགས་འཆང་གཅིག་གིས་ནི། །ཁོང་གི་གཉེན་འདུན་ཚེ་འདས་གླེ་ཞིག །དགེ་རྩ་ཆེར་བྱས་ཆོ་ག་དཔག་མེད་བཏོན། །ད་རེས་ཁྱོད་ལ་འབུལ་བ་བྱང་ཞུས་ཡིན། །ཁོང་གིས་སྙིང་ལས་གཅེས་ཤིང་མི་བཟོད་པས། །དེ་ཉིད་
གར་སྐྱེས་བརྟག་པ་བྱེད་དགོས་ཟེར། །དེ་ཉིད་མི་ལུས་གཙང་མ་ཐོབ་གྱུར་ཏེ། །ང་ཡི་སློབ་མ་ཞིག་དང་འཕྲད་ནས་ཀྱང་། །ང་ཡི་ཆོས་ལུགས་སྔགས་ཆོས་ཉམས་ལེན་འགྱུར། །དེ་སྐད་སྔ་མོའི་དུས་ཤིག་སྨྲས་པ་དྲན། །ཐག་རིང་ཞིག་ནས་རང་ལ་དབང་ལུང་འགའ། །ཞུས་པའི་བླ་ཆེན་ཞིག་གིས་རྩ་བ་བྱས། །འདི་གཉིས་གར་སྐྱེ་བརྟགས་པ་བྱས་པ་དང་། །སྐྱེ་སྒོ་ཆོད་སོགས་ཡི་གེ་བསྐུར་ཞེས་ཟེར། །གཅིག་དེ་མ་གསལ་ནག་རྩིས་གཞུང་ལྟར་དུ། །སྐྱེ་སྒོ་ཆོད་པའི་དགེ་བསྐུལ་ཡི་གེ་དང་། །གཅིག་དེ་སྔོན་ཚེ་ལས་འཕྲོ་བཟང་པོ་སྟེ། །ད་རེས་ཚེ་འདིར་དགེ་མེད་སྡིག་མེད་རེད། །བདག་གི་བསྔོ་བ་སྨོན་ལམ་མཚམས་སྦྱར་ནས། །དག་པའི་ཞིང་ཁམས་ཐོབ་པར་འགྱུར་རམ་སྨྲས། །པདྨ་བཀའ་ཡི་ཐང་ཡིག་ཆེན་མོ་ལས། །ཚེ་ལོ་བཞི་བཅུ་པ་ལ་དགྲ་ཡི་བསྐལ་པ་འབྱུང་། །ཁྲིམས་ཞིག་གཡུལ་འཁྲུག་གནམ་ས་གོ་ལོག་འབྱུང་། །གསུངས་ལྟར་བཞི་བཅུ་ཁ་རལ་སུམ་ཅུར་ཉེ། །རྒྱལ་བ་ཡབ་སྲས་རྣམས་ཀྱང་འོ་བརྒྱལ་ཆེ། །བོད་ཀྱི་རྒྱལ་པོ་རྣམས་ཀྱང་མགོ་མཇུག་ལྡོག །སངས་རྒྱས་བསྟན་པ་ནང་འཁྲུག་དགྲ་གཤེད་འགྱུར། །འཇིག་རྟེན་བྱ་བ་སྤང་བའི་རི་ཁྲོད་པ། །གཉོམ་ཆུང་རྣམས་ཀྱང་
ལྷག་པར་འདུག་སྟབས་དཀའ། །ཟས་ནོར་ཡོད་ན་དགྲ་བོའི་གཡབ་མོར་ཆེ། །དཔོན་པོ་རྣམས་ཀྱང་མགོ་ཡི་ལུས་པོ་ཟ། །རྫུན་ཚིག་ཕྲ་མས་ཉེས་མེད་སྲོག་དང་ཕྲལ། །ཆགས་སྡང་ཕྲག་དོག་མཐོ་ནོན་རླུང་ལྟར་འཚུབ། །དབང་ལུང་ཞུས་ཀྱང་དམ་ཚིག་བསྲུང་མཁན་དཀོན། །མནའ་ཆད་མི་སྤངས་བསླུ་དང་མགོ་གཡོག་དར། །ཆེ་བཙུན་བཟང་དགུ་རྣམས་ནི་དུག་གིས་གསོད། །ཁས་ཉེན་དབང་ཆུང་རྣམས་ནི་ཏིལ་བཞིན་བཙིར། །ཕ་བུ་སྤུན་ཟླ་ཡིན་ཀྱང་བློ་གཏད་མེད། །འདི་འདྲའི་དུས་སུ་དཀོན་མཆོག་མ་གཏོགས་པ། །བློ་གཏད་ཕེར་བའི་སྐྱབས་གཞན་མི་འདུག་པས། །སྔ་ཕྱིར་ལྷ་མོ་འོད་ཟེར་ཅན་མ་ཡི། །བསྙེན་པ་ཡང་ནི་ལན་གྲངས་མང་ཞིག་བྱས། །གནམ་ཆོས་འོད་ཟེར་ཅན་མ་ལ་སོགས་པའི། །དགྲ་འཇིགས་ཞི་བའི་སྔགས་དམིགས་འབད་པའི་ཚེ། །རང་ཉིད་གན་རྐྱལ་ཉལ་བའི་ཉམས་སྣང་ལ། །ཕྱོགས་བཅུའི་ཞིང་ནས་ཕྱོགས་བཅུའི་སངས་རྒྱས་ཀྱིས། །ཕྱག་གཡས་བསྐྱངས་བའི་ཕྱག་ཀུན་ཡིན་སྙམ་པའི། །གསེར་མདོག་ཕྱག་གཡས་སྐྱབས་སྦྱིན་མཛད་པ་ཞིག །བདག་གི་སྙིང་ཁར་བཞག་པའི་སྣང་བ་བྱུང་། །མཁས་པ་ཟུར་མཁར་ཨ་བོ་
ཆོས་རྗེའི་ལུགས། །འཇམ་དཔལ་ཕ་རོལ་རྒོལ་འཇོམས་སྒྲུབ་པ་དང་། །ཞང་ཁྲོམ་ལུགས་ཀྱི་དམར་ཆུང་སྒྲུབ་པ་དང་། །གནམ་ཆོས་ལུགས་ཀྱི་ཀིང་ཀང་རིགས་བཅུ་གསུམ། །དགྲ་བཟློག་རྣམ་དགུ་ལ་སོགས་ལན་མང་བསྒྲུབས། །རྒྱབ་རེས་ནག་པོའི་སྒྲུབ་པ་བདུན་ཕྲག་བཞི། །དེ་དག་རྣམས་སུ་རྨིས་ལྟས་བྱུང་བ་རྣམས། །ཤིན་ཏུ་མང་ཕྱིར་བྲི་བར་མི་ལོང་སྟེ། །དངོས་སུ་གནམ་ངོ་འཐིབ་ཅིང་ཁ་ཆར་འབབ། །ས་ཡི་འོག་ནས་ས་འབྲུག་འདྲ་བ་ཡིས། །འུར་སྒྲ་དེར་སྒྲ་ཆེན་པོ་གྲག་པ་དང་། །རིག་པ་ཧུར་ཞིང་རང་ཉིད་ཉམས་འབར་ནས། །ཐུན་བརྡེགས་མཚོན་ཆ་འཐོར་ཞིང་མཆོངས་གྲབས་ཤོར། །ཉམས་སྣང་དགྲ་མེད་ཟེར་བའི་ལུང་བསྟན་དང་། །ཉམས་སྣང་ཡིད་ཀྱི་ཡུལ་དུ་ཤར་བ་ལས། །ལོ་གསུམ་དགྲ་མེད་ལོ་ནི་བཅུ་གསུམ་ལ། །དགྲ་ནི་མི་འོང་ལོ་ནི་ཉེར་ལྔ་ལའང་། །དགྲ་ནི་མི་འོང་མི་རབས་བཅུ་གསུམ་ལ། །དགྲ་ཆེན་མི་འོང་ཟེར་བ་གསལ་བར་བྱུང་། །རིག་སྔགས་བཟླས་པའི་ནུས་པ་བདེན་མཆིས་ནི། །བདག་གི་རིགས་རྒྱུད་དང་ནི་སློབ་མའི་བརྒྱུད། །བདག་གི་བརྒྱུད་པ་ངེས་པར་འཛིན་རྣམས་ལ། །གསོད་དང་བཅིང་དང་ཡན་ལག་བཅད་པ་དང་། །ཉེས་མེད་ཁྲིམས་
ལ་གཏུགས་དང་བཅོམ་པ་སོགས། །དགྲ་ཆེན་དག་ནི་འབྱུང་བར་མི་འགྱུར་སྙམ། །ཤོར་གོ་ཙམ་དག་ཅུང་ཟད་ཁ་སྨྲས་ནི། །ངེས་པ་མེད་དེ་དེ་ནི་མ་གཏོགས་སོ། །འདི་དོན་འཇམ་དཔལ་ཕ་རོལ་རྒོམ་འཇོམས་ཀྱི། །ཕན་ཡོན་ཉིད་དང་ལུང་བསྟན་མཐུན་པའི་ཕྱིར། །འདི་ལ་བདེན་པ་ཅུང་ཟད་ཡོད་དམ་སྙམ། །རྗེས་འཇུག་རྣམས་ལ་དབུགས་འབྱིན་འགྱུར་སྙམ་བྲིས། །ཡང་ན་རང་གིས་བརྩམས་ཆོས་བསྒྲིགས་ཆོག་སོགས། །སྔ་ཕྱིར་ཤིན་ཏུ་མང་བར་བྱས་པ་རྣམས། །རང་ཉིད་ཡོངས་གྲགས་དགེ་བཤེས་མ་ཡིན་པས། །དར་སྲོལ་གཞན་ཕན་ལ་སོགས་འབྱུང་བར་དཀོའ། །དར་སྲོལ་གཞན་ཕན་ཅུང་ཟད་མ་བྱུང་ན། །ཡིག་དྲུག་ཆག་པའི་རྒྱུ་ཡིན་དགོས་པ་མེད། །དར་སྲོལ་གཞན་ཕན་ཅུང་ཞིག་བྱུང་སྲིད་ན། །བསྟན་དང་འགྲོ་ལ་ཕན་ཕྱིར་དོན་དང་ལྡན། །དེ་ཕྱིར་རང་གི་ཆོས་རྒྱུད་བརྩམས་ཆོས་སོགས། །དར་ནུབ་ཅི་འགྱུར་བརྟགས་པ་བྱས་པའི་ཚེ། །རྫོགས་པའི་བྱང་ཆུབ་སེམས་བསྐྱེད་ལྡན་པས་བྲིས། །ཐ་མལ་སེམས་ཅན་སུས་ཀྱང་འདི་མི་ཐོན། །ཟེར་བའི་ལུང་བསྟན་ཚིག་དེ་གསལ་བར་ཐོས། །དེ་རྗེས་གཉིད་པ་མ་ཡིན་ཉམས་སྣང་ལ། །འདི་རྣམས་འགྲོ་དོན་རྒྱ་མཚོ་
ལྟ་བུར་འབྱུང་། །གྲུབ་མཐའ་ཕྱོགས་རིས་མེད་པ་ཀུན་ལ་དར། །ཞེས་པའི་ཡི་གེ་མིག་གིས་གསལ་བར་མཐོང་། །དེ་ཕྱིར་རྩོམ་དང་བསྒྲིགས་ཆོག་ལ་སོགས་པ། །མ་བསྒྱུར་རིམ་བཞན་ཅི་འགྲུབ་བྱས་པ་ཡིན། །གནམ་ཆོས་རྒྱལ་བ་རྒྱ་མཚོ་སྦ་ལྕག་མ། །ཞག་བདུན་ཙམ་ཞིག་སྒྲུབ་པ་བྱས་པའི་སྐབས། །རང་ལུས་ཡོན་ཏན་བརྒྱ་ཡིས་བརྒྱན་སྙམ་བྱེད། །རྡོ་རྗེ་ཕྲེང་བའི་དབང་བསྐུར་བཙུགས་ཤོམ་དང་། །ཊཱཀྐི་མཛེས་སྡུག་རྒྱན་གྱིས་བརྒྱན་པ་དང་། །ཁྲོམ་ཚོགས་མང་པོ་འདུ་ཞིང་འཚོགས་པའི་ཚེ། །རང་ཉིད་ལུས་ནི་གཅེར་བུར་འདུག་པ་ལ། །ལྷོ་པ་སྤྲུལ་སྐུ་རཱ་ག་ཨ་སྱ་གཉིས། །རྗེ་འབངས་རེ་རེའི་སྤྲུལ་པ་ཡིན་འདུག་པས། །གནས་མདོ་མཁར་ནི་བྱིན་རླབས་ཆེ་ཟེར་ནས། །མི་ཀུན་བསྟོད་ར་ཆེན་པོ་བྱེད་པ་རྨིས། །ཉམས་དང་རྨི་ལམ་འདྲེས་པའི་མཚམས་ཤེད་ན། །དྲིན་ཆེན་ཆོས་ཀྱི་དབང་ཕྱུག་ཡིན་པ་ལ། །ཡེ་ཤེས་སྙིང་པོ་ཡིན་རྒྱུ་འདྲ་ཞིག་གིས། །ལུང་བསྟན་དཔེ་ཆ་གཅིག་ནི་གནང་བ་ལ། །བདག་གི་བརྒྱུད་པ་བླ་རབས་བཅུ་གསུམ་འོང་། །དེ་ཡི་མིང་ཚོ་གསལ་བར་གདའ་ན་ཡང་། །མིང་ཚོ་བདག་གི་ཡིད་ལ་མ་ཟིན་ཏེ། །དེ་ནི་ཞལ་ནས་གསུངས་པ་ཡིན་བསམ་ཡང་། །
རང་གི་ཡིད་ཀྱི་ཡུལ་ལ་གསལ་བ་འདྲ། །འདི་རྣམས་དྲག་རིམ་རྣམས་ཀྱི་མིང་ཡིན་ཏེ། །འདི་ཡི་བར་མཚམས་བར་མཚམས་རྣམས་སུ་ནི། །མང་པོ་འོང་བ་རྣམས་ནི་མ་ངེས་ཟེར། །དཔེ་ཆ་དེ་ནི་ང་ཡིས་ཁྱེར་འོང་ཛ། །རང་གི་སློབ་བུ་འགའ་ཞིག་འདུག་པ་དེས། །དཔེ་ཆ་དེ་ནི་ང་ལ་སྟོན་དང་ཟེར། །ཁྱེད་རྣམས་ལ་ནི་བསྟན་པས་ཕན་པ་མེད། །འདི་ནི་ང་ཡི་དབོན་རྒྱུད་ཁོ་ན་ལ། །འོང་རྒྱུ་ཡིན་པར་འདུག་གོ་སྨྲས་པ་དང་། །བླ་བརྒྱུད་ཡིན་ཞེས་དཀོར་ནག་དཔག་མེད་བསྡུ། །ཚུལ་ཁྲིམས་མི་གཙང་རིམ་གཉིས་རྣལ་འབྱོར་མེད། །འཆི་བ་མི་དྲན་ཚེ་འདི་ཁོ་ན་བསྒྲུབས། །དཀོར་སྒྲིབ་མི་དྲན་ཅི་བྱུང་འཁང་ཞིང་འཁུ། །དཀོར་མང་སྡུད་པས་དགྲ་འདུལ་གཉེན་སྐྱོང་བྱེད། །དགེ་བའི་ཕྱོགས་ནི་ཅི་ཡང་ཐོན་པ་མེད། །ཐབ་ཁ་མགྲོན་འབོད་ཤ་ལྷུས་གཟུགས་དྲུད་མཁས། །དེ་འདྲ་བླ་བརྒྱུད་མང་བས་དགའ་རྒྱུ་མེད། །འོན་ཀྱང་འབྲི་སྟག་ས་སྐྱ་ལ་སོགས་པ། །བསྟན་པའི་གཞུང་ཆེན་དབོན་རྒྱུད་རྣམས་ཀྱིས་བཟུང་། །དེ་འདྲ་འོང་བའི་རེ་བ་མ་མཆིས་ཀྱང་། །དུས་ཀྱང་ཇེ་སྙིགས་བསྟན་པ་ཇེ་ཆེར་ཉམས། །རྒྱལ་བསྟན་ཉི་མ་ནུབ་རེའི་རྩེ་ལ་སོང་། །མི་དགེ་དར་བའི་གྲིབ་སོ་ཚུར་ཚུར་
ཉེ། །དེ་འདྲའི་སྐབས་སུ་དགེ་སློང་རྩ་བ་སྲུང་། །བསྐྱེད་རྫོགས་ཧ་གོ་བསྙེན་སྒྲུབ་མང་དུ་ཐེམ། །རྔ་ཡི་ཕྱི་དང་དྲིལ་བུའི་ནང་བརྡུང་མཁན། །བརྒྱུད་པ་མ་ཆད་རིམ་པར་མང་བྱོན་ན། །དུས་ལ་བབ་པའི་འགྲོ་དོན་ཆེན་པོར་རློམས། །ཅི་ཕྱིར་སྟོན་པས་གསུངས་པའི་མདོ་རྣམས་ལས། །བསྐལ་པ་བཟང་དུས་དགྲ་བཅོམ་ཐོབ་པ་ལས། །དུས་ངན་སྙིགས་མར་ཆོས་གོས་གྱོན་ཙམ་ཡང་། །ཕན་ཡོན་ཆེ་ཞིང་ངོ་མཚར་ཆེ་བར་བཤད། །བསྐལ་པ་བཟང་དུས་གྲུབ་པ་ཐོབ་པ་ལས། །དུས་ངན་སྙིགས་མར་གནས་འགྱུ་སྐྱོང་ཙམ་དགའ། །བྱུང་ན་འགྱུར་ཆེ་ངོ་མཚར་ཆེ་བར་བཤད། །དེ་ཕྱིར་འདི་རུ་ཉམས་མཚར་བྲིས་པ་སྟེ། །དེང་སང་བྲིས་ལ་ངོ་མཚར་མི་བྱེད་ཀྱང་། །མ་འོངས་དུས་ན་ངོ་མཚར་བྱེད་ཀྱང་སྲིད། །གནམ་ཆོས་འུར་ལེན་ཞག་གསུམ་སྒྲུབ་པའི་ཚེ། །ཉམས་ཀྱི་སྣང་བར་སངས་རྒྱས་བསྟན་པ་དང་། །དགེ་འདུན་རྣམས་ཀྱི་ཆེ་བ་འདོན་པ་དང་། །ད་རིས་ཕོ་བྱས་གོ་བཅད་ཟེར་བ་ཡིས། །ཡི་གེ་གསལ་པོར་མཐོང་བའི་སྣང་བ་བྱུང་། །ལྕགས་ཕོ་ཁྱི་ལོ་ས་གའི་བཅོ་ལྔའི་ཉིན། །དཔོན་སློབ་ཀུན་གྱིས་གསོ་སྦྱོང་རྒྱས་པར་བྱས། །ཐང་སྐུ་མཆོད་རྟེན་ཙཀ་ལི་ལ་སོགས་པ། །བཞེངས་པ་རྣམས་
ལ་བསྔོ་སྨོན་རྒྱ་ཡིས་གདབ། །བཅོ་ལྔའི་དུས་མཆོད་མཆོད་གཏོར་གཟབ་པར་བྱས། །རང་གི་རྗེས་འཇུག་རིགས་རྒྱུད་སློབ་བརྒྱུད་རྣམས། །ཅི་འདྲ་འོང་ཞེས་བརྟགས་པ་བྱས་པའི་ཚེ། །གཉིད་པ་མ་ཡིན་ཉམས་ཀྱི་སྣང་བ་ལ། །གང་གཱའི་ཉི་མ་ཤར་བ་ལྟ་བུའོ། །དྷཱ་ཛ་འདི་ནི་དབང་ཐང་ཅན་ཞིག་འོང་། །སུ་ཡིན་མི་ཤེས་མིང་ནི་མི་གསལ་བ། །ཟླ་བ་ཤར་བ་འདྲ་ཞིག་འོང་བ་དང་། །མཐར་གྱི་རྒྱུད་འཛིན་ཁྲི་ཕྲག་ཙམ་ཞིག་འོང་། །ཡིག་དྲུག་དུང་ཕྱུར་ཐོན་པ་བརྒྱ་ལྷག་འོང་། །ཟེར་བའི་ལུང་བསྟན་རྣ་བས་གསལ་བར་ཐོས། །དེ་སྔོན་གཞན་སྐྱོན་དོགས་པ་འགའ་ཞིག་གིས། །རང་ཉིད་ཚེ་མཇུག་འདི་ལ་ཅི་འགྱུར་བརྟག །དེ་ཚེ་གཉིད་པ་མ་ཡིན་ཉམས་སྣང་ལ། །ཡི་དམ་ཞལ་གཟིགས་སྐུ་གསུམ་འགྲུབ་ཟེར་བའི། །ལུང་བསྟན་ཚིག་དེ་གསལ་བར་ཐོས་པ་བྱུང་། །མངྒ་ལཾ།། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།