དགེ་སློང་རཱ་ག་ཨ་སྱའི་ཡང་གསང་རྣམ་ཐར་གྱི་དུམ་བུ་བཀའ་སྲུང་སྒྲུབ་པའི་སྐོར་གྱི་རྟགས་ཡིག
༄༅། །དགེ་སློང་རཱ་ག་ཨ་སྱའི་ཡང་གསང་རྣམ་ཐར་གྱི་དུམ་བུ་བཀའ་སྲུང་སྒྲུབ་པའི་སྐོར་གྱི་རྟགས་ཡིག་བཞུགས་སོ། །
༄༅། །ན་མོ་གུ་རུ་རཏྣ་སཾ་བྷ་ཡེ། སྔ་རབས་འདས་པའི་སངས་རྒྱས་རིན་ཆེན་མང་། །མ་འོངས་སངས་རྒྱས་བདེ་གཤེགས་རིན་ཆེན་གདུགས། །ད་ལྟ་རྣམ་པར་སྣང་མཛད་ཐུགས་ལས་སྤྲུལ། །གྲངས་མེད་བསྐལ་པའི་སྔོན་ནས་སངས་རྒྱས་ཀྱང་། །བསྟན་འགྲོའི་དོན་དུ་ས་བརྒྱད་སེམས་དཔའི་ཚུལ། །མདོ་རྒྱུད་ཀུན་ནས་རྒྱ་ཆེར་བསྔགས་པའི་ལྷ། །མགོན་ཆེན་སྡེ་བཞིའི་ནང་ནས་མཆོག་གྱུར་པ། །མགོན་པོ་རྣམ་ཐོས་སྲས་ལ་ཕྱག་འཚལ་ལོ། །ཕྱི་ལྟར་གསེར་མདོག་རྒྱ་ཆེར་ཀུན་ལ་གྲགས། །ནང་ལྟར་ལྗང་ཆུང་ཀླུ་ཡི་དེད་དཔོན་མཆོག།གསང་བ་གོ་ཆས་མྱུར་མགྱོགས་དབང་གི་ལྷ། །
མདུང་དམར་ཅན་དེས་བདག་དང་རྗེས་འཇུག་སྐྱོབས། །འདི་ཉིད་བསྙེན་དང་བསྒྲུབས་པ་བྱས་པའི་ཚུལ། །བཤད་པར་མི་རུང་དམ་ཚིག་ཡིན་ན་ཡང་། །རང་གི་རིགས་རྒྱུད་དང་ནི་ཆོས་ཀྱི་བརྒྱུད། །རང་གི་རྒྱུད་པ་ངེས་པར་འཛིན་པ་རྣམས། །རང་གི་བཀའ་བབ་ཆོས་སྐྱོང་གང་ཡིན་པ། །ངོ་ཤེས་དེ་ལ་གསོལ་མཆོད་རྩོན་བྱེད་ན། །རྗེས་འཇུག་བདེ་ལེགས་དཔལ་ལ་སྤྱོད་ཕྱིར་བརྗོད། །དེ་ཡང་བན་རྒན་རཱ་ག་ཨ་སྱ་བདག །སྔོན་ཚེ་ཆོས་རྒྱལ་ཁྲི་སྲོང་ལྡེའུ་བཙན་གྱི། །སྲས་གསུམ་ཡོད་པའི་ཐ་ཆུང་སད་ན་ལེགས། །དེ་ཡི་སྤྲུལ་པ་ཡང་སྤྲུལ་ཆ་ཤས་ཙམ། །ཡིན་པར་བཤད་
ཅིང་ཡིན་པར་རློམ་པའི་ཕྱིར། །རྣམ་སྲས་འདི་ནི་ཚེ་རབས་ལས་ལྷར་སེམས། །ཅི་ཕྱིར་ཆོས་རྒྱལ་སད་ན་ལེགས་དེ་ཡིས། །ནག་པོ་རྒྱ་ཡི་ཡུལ་དུ་དམག་དྲངས་ཚེ། །རྒྱ་ནག་རྒྱལ་པོའི་དགྲ་བླ་རྣམ་ཐོས་སྲས། །ཡིན་ཕྱིར་བོད་ཀྱི་དམག་གིས་མི་ཐུབ་དགོངས། །སློབ་དཔོན་ཆེན་པོ་པདྨ་འབྱུང་གནས་ཀྱིས། །བོད་ཀྱི་རྒྱལ་པོ་སད་ན་ལེགས་དེ་ཡི། །དགྲ་བླར་རྣམ་ཐོས་སྲས་འདི་བསྐོས་པར་མཛད། །དེ་ཚེ་བསམ་ཡས་རྒྱལ་པོའི་གླིང་དེ་རུ། །རྣམ་སྲས་སྐྱ་བརྒྱད་ལྡེར་སོ་བཞེངས་པ་ཡང་། །ད་ལྟའང་ལེགས་པོར་བཞུགས་པ་བདག་གིས་མཇལ། །དེ་དུས་བོད་ཀྱི་རྒྱལ་པོ་གཡུལ་ལས་རྒྱལ། །རྒྱ་ནག་ལས་སྒོ་ཟི་ལིང་མཁར་སྔོན་གྱི། །མཁར་སྒོ་སུམ་ཅུ་སོ་གཉིས་བོད་ཀྱིས་ཐོབ། །ལོ་མང་བར་དུ་བོད་ཀྱིས་དབང་བར་གྱུར། །དེ་ཚེ་ལོ་རྒྱུས་སྔོན་དུ་མི་ཤེས་ཀྱང་། །སྔོན་ལས་དབང་གི་གཞོན་ནུ་ཆུང་ངུ་ནས། །རྣམ་སྲས་འདི་ལ་མོས་འདུན་ཆེ་བར་བྱུང་། །དབང་ཕྱུག་རྒྱལ་མཚན་ཡན་ཆད་གནས་མདོ་པ། །བཙན་དྲག་ཆེ་ཞིང་ལོངས་སྤྱོད་ཕྱུག་པའི་ཕྱིར། །ལྷ་ཁང་གསུམ་དང་འབུམ་སོགས་བཞེངས་ཆོས་མང་། །དེ་ནས་བཟུང་སྟེ་མི་རབས་གཉིས་གསུམ་ལ། །ཇེ་ཇེ་རྒུད་ནས་དབུལ་ཞིང་
ཕོངས་པར་གྱུར། །མཁར་གྱི་བདེ་དྲ་རྣམས་ནི་རྩིབ་རུས་འདྲ། །ལྷ་ཁང་སྟེང་དུ་ཀུ་ཤ་ངང་གཡིང་ངེ། །དེ་འདྲ་མཐོང་ཚེ་དོན་མེད་འགྲིམ་པས་ཀྱང་། །ཆ་སྒྲ་སྒྱེབ་ཅིང་རྟ་རྒྱུག་བཏང་བར་བྱེད། །རྟ་ཕྱུགས་མི་སོས་རེ་རེ་ཡོད་ཀྱང་ཤི། །བུ་ལོན་མི་དགོས་སར་ནི་ཁབ་ཙམ་མེད། །ཕ་ཞིང་ཕལ་ཆེར་རྣམས་ཀྱང་ཐ་བར་ལུས། །ཡབ་རྒན་ཨ་ནུ་པདྨ་དབང་དྲག་གིས། །གྲོང་ཆོག་བྱེད་པའི་དྲིན་ལས་དུད་བུག་ཙམ། །དེ་དུས་ཁོ་བོ་རཱ་ག་ཨ་སྱ་ནི། །ལོ་ནི་བཅུ་བཞི་བཅོ་ལྔ་ཙམ་ཡིན་ཏེ། །ན་སོ་གཞོན་ཡང་བསམ་མནོ་རྒན་ཟིན་པས། །ཡབ་གཅིག་སྔགས་རྒན་ཉིད་ལ་འདི་སྐད་ཞུས། །རཏྣའི་རྣམ་སྲས་མདུང་དམར་ཅན་འདི་ཡི། །དབང་ལུང་ཐོབ་ཅིང་ཡིག་ཆ་གསལ་འདུག་པས། །འདི་ཡི་བསྙེན་པ་ཅིས་ཀྱང་མཛད་དགོས་ཞུས། །ང་ཡི་ཁུ་བོ་བཀྲ་ཤིས་དབང་ཕྱུག་གིས། །དབང་ལུང་ཡོད་པས་འདི་ནི་སྒྲུབ་དགོངས་ནས། །སྲོག་འཁོར་ཐམས་ཅད་གཟབ་པར་བྲིས་ན་ཡང་། །སྒྲུབ་རྫས་གྲི་སྙིང་མ་རྙེད་སྒྲུབ་པ་བཤོལ། །ཉིན་གཅིག་ཛོ་ནག་སྲོག་གཟུངས་བཏོན་ཅིང་བསྡད། །རྒ་འུ་གཅིག་ལས་མེད་པ་རྟོད་བཞག་པས། །ཁོང་གིས་མ་གཟིགས་དེ་ཚེ་སྤྱང་ཀིས་བསད། །
ཁོང་ལ་མ་ཇོ་རྗེ་མོས་རབ་ཏུ་འབར། །དེ་ནས་ལོག་ལྟ་སྐྱེས་པ་འདྲ་ཞིག་གིས། །རྣམ་སྲས་འདོན་པའི་སྤྲོས་པ་མེད་དོ་སྐད། །འོན་ཀྱང་ཁྱོད་ཀྱིས་ང་ནི་འདུག་མི་བཅུག །ཡང་ཡང་བསྐུལ་བོ་རྣ་ཅོ་ཚ་འདུག་ཅིང་། །ཟླ་གཅིག་ཙམ་ཞིག་སྒྲུབ་པ་བྱེད་ཆོག་པས། །དམ་སྲི་མནོན་སོགས་དཀའ་ལས་ཆེ་འདུག་པས། །རོགས་ལྡན་མཆོད་གཡོག་ཁྱོད་རང་གྱིས་ཤིག་གསུངས། །རྣམ་སྲས་སྒབ་འདྲེ་པེ་དཀར་ཡིན་འདུག་པས། །འདི་ཉིད་མནན་པས་ནོན་དཀའ་སྐྲག་གོ་གསུངས། །ཁྱེད་ཀྱིས་གུར་དྲག་བསྙེན་སྒྲུབ་མཐར་ཕྱིན་པས། །འདི་ལ་མི་སྐྲག་མནན་གྲོགས་ངས་བྱེད་ཞུས། །དེ་ནས་པེ་དཀར་ཤེས་པ་དཀར་པོ་དང་། །འབི་ཙི་ཏྲེའུ་གཉིས་ཀའི་མནན་པ་ལ། །རྟགས་ཐོན་མཛད་ནས་བདག་གིས་མནན་རོགས་བྱས། །མདའ་མཁན་ཞིག་ནི་དགྲ་ཡིས་བསད་པ་ཡི། །སྙིང་དེ་བདག་ནི་ན་སོ་ཆུང་བ་དང་། །རོགས་ནི་གཅིག་ཀྱང་མེད་དེ་མ་སྐྱག་བླངས། །གྲི་སྙིང་བླངས་ནས་སྒྲུབ་པའི་རྫས་སུ་ཕུལ། །དེ་ནས་ཁོང་གིས་ཟླ་གཅིག་སྒྲུབ་པ་ཐེམ། །སྒྲུབ་པ་དེ་གྲོལ་མཚམས་ནི་གྲོལ་བའི་ཉིན། །ཉིད་ཀྱི་སྲས་པོ་རཏྣ་དྷ་ཛ་ལ། །བེ་རི་རྒྱལ་པོས་བསོད་ནམས་ཁ་བཏགས་དང་། །འུ་ཟི་འཁོར་
དྲུག་གཞན་ཡང་ཇ་མང་པོ། །གནང་བ་སླེབས་པ་རྟེན་འབྲེལ་འགྲིགས་ཞེས་གསུངས། །ཁ་བཏགས་དེ་ལ་རྣམ་སྲས་སྐྱ་བརྒྱད་བྲིས། །བསང་རྣམས་བྱེད་ཚེ་དེ་ཉིད་བསང་དར་ཕྱར། །དེ་ཕྱིན་ཁོང་གིས་ལས་བྱང་ཆག་མེད་གསུངས། །དེ་ཕྱིར་སྒབ་ཟོས་ལོ་ལེགས་ཞིང་རྣམས་དུལ། །ཚ་བོ་ལྔ་པོ་ཉེ་ཞོ་མེད་པར་ཚར། །སྲས་པོ་ཆེ་བ་རྡོ་ཁར་སོང་བ་འཁོར། །དངུལ་སྲང་དྲུག་ཅུ་ལ་སོགས་རྒྱུ་ཟོག་གདའ། །དེ་ཕྱིར་ཚོད་ཀའི་མངའ་ཐང་ཇེ་ཆེར་འཕེལ། །ཁོང་གི་བུ་ཆེན་སྔགས་པ་གཉིས་ཡོད་པས། །ཁོང་གཉིས་ཀྱིས་ཀྱང་སྒྲུབ་པ་བྱེད་འདོད་ཟེར། །ཁོང་གཉིས་ཞོར་ལ་ངས་ཀྱང་དབང་ལུང་ཐོབ། །དེ་ནས་སྔགས་འཆང་ཚེ་དབང་བཀྲ་ཤིས་དེ། །གུ་རུ་ཞི་དྲག་རྟ་མགྲིན་ཕྱག་བཞི་པ། །ཚེ་དཔག་གསང་འདུས་ལ་སོགས་སྒྲུབ་པ་ཐེམ། །མི་ནོར་འཛོམས་ཤིང་ནད་མེད་སྐྱིད་པའི་སྐབས། །དང་པོ་རྣམ་སྲས་སྒབ་འདྲེ་ཞག་བདུན་མནན། །དེ་ནས་རྣམ་སྲས་མདུང་དམར་ཟླ་གཅིག་བསྒྲུབས། །བདུན་གསུམ་ཡོལ་ནས་མཚམས་ཀྱང་གྲོལ་ལ་ཁད། །བཙུན་གཟུགས་གོས་རོད་ངན་གཅིག་དེར་བྱུང་ནས། །རྣམ་སྲས་སྒྲུབ་གཏོར་མགོ་མཇུག་ཟློག་པ་རྨིས། །སྲིང་མོ་རྩིས་ཆེན་མི་ལ་
བྱིན་པ་ཞིག །གློ་བུར་ནད་ཐེབས་འཆི་ཁ་ཐུག་ཤོག་ཟེར། །མཚམས་དེ་ཧར་འདོན་བྱེད་ནས་འགྲོ་དགོས་བྱུང་། །དེ་ནས་ཟླ་གཅིག་ཙམ་ལས་མ་འགོར་བར། །སྔགས་པའི་ཆུང་མ་གཞོན་མཛེས་བཟང་མོ་ཞིག །ཡོད་པ་གློ་བུར་ཞག་གསུམ་ནད་ཀྱིས་ཤི། །དེ་ནས་བུ་མོ་ཆུང་ངུ་ཞིག་ལས་མེད། །ནུ་མོ་བཞག་པ་རབས་ཆད་བུ་མ་བྱུང་། །སྔགས་པ་ཁོ་རང་ཞྭ་ནས་གདན་ལ་འབྱར། །སྔོན་དུས་དུད་ནི་ཕྱུག་པོ་བརྒྱག་པ་སྟེ། །ཕྱིས་ནི་མུ་གེའི་ནད་ཀྱིས་མ་གུམ་ཙམ། །སྒབ་འདྲེ་མནན་ཀྱང་མ་ནོན་སྐྱོན་རེད་ཟེར། །དེ་ནས་དེ་ཡི་མཆེད་གྲོགས་སྔགས་པ་དེས། །དེ་ལ་རྣམ་རྟོག་བྱས་ནས་སྒྲུབ་པ་བཤོལ། །དེ་དག་འདི་རུ་བཤད་དོན་ཅི་ཞེ་ན། །རྣམ་སྲས་སྒྲུབ་པ་འདོད་མཁན་མང་འདུག་སྟེ། །སྒབ་འདྲེ་བེ་གར་ཡིན་པས་འཇིགས་དྲག་པས། །སུ་མ་ཡིན་གྱིས་སྒྲུབ་པ་བྱེད་པ་ནི། །ཡག་ཉེས་ཆེ་བའི་ལག་བླངས་དེ་ལྟར་རོ། །དེ་དོན་གནོད་སྦྱིན་ལུས་ངན་པོ་ཡི་མདོར། །སྔོན་ཚེ་འཁོར་ལོས་སྒྱུར་བའི་རྒྱལ་པོའི་སྲས། །ནོར་བུ་སྦྱིན་པས་སྦྱིན་པ་རྒྱ་ཆེར་བཏང་། །དེ་ལ་མི་རྣམས་དགའ་ནས་བསྟོད་པ་བྱེད། །ཆུང་བ་མི་སྡུག་སྦྱིན་ནི་ཀུན་ལ་གནོད། །དེ་ལ་མི་རྣམས་མི་དགའ་ལྐོག་ཏུ་
འབར། །དེ་ཚེ་ནུ་བོས་ཕུ་བོར་ཕྲག་དོག་སྐྱེས། །ཁྱོད་ཀྱིས་སྦྱིན་པ་གཏོང་ནས་ཅི་འདོད་ཟེར། །བདག་ནི་མ་འོངས་ཤཱཀྱའི་བསྟན་པ་ལ། །གནོད་སྦྱིན་རྒྱལ་པོ་ནོར་ལྷར་གྱུར་ནས་ཀྱང་། །འགྲོ་བའི་དབུལ་ཕོངས་སེལ་བར་འདོད་དོ་གསུངས། །དེ་ཚེ་ནུ་བོས་གནོད་སྦྱིན་སྲོག་གི་བདག །ཤེས་པ་དཀར་པོ་ཞེས་བྱར་གྱུར་ནས་ཀྱང་། །རྣམ་སྲས་སྒྲུབ་མཁན་དེ་ཡི་ཚེ་སྲོག་དང་། །བསོད་ནམས་དབང་ཐང་བརླག་པའི་སྨོན་ལམ་བཏབ། །ནོར་བུ་སྦྱིན་ནི་རྒྱལ་ཆེན་རྣམ་ཐོས་སྲས། །སེར་དམར་ལྗང་གསུམ་ངོ་བོ་གཅིག་པ་ཡིན། །ཤེས་པ་དཀར་པོ་པེ་དཀར་ཡིན་པར་བཤད། །གཞན་ཡང་འབི་ཙི་དང་ནི་ཏྲེའུ་གཉིས། །གནོད་སྦྱིན་བསེ་གདོང་བཙན་དང་གསུམ་པོ་ནི། །ཁྱད་པར་མདུང་དམར་ཅན་གྱི་སྒབ་འདྲེ་ཡིན། །དེ་དག་མནན་ཐབས་བཀར་ཐབས་འགའ་གསུངས་ཀྱང་། །ཨོ་རྒྱན་ཆེན་པོས་མ་འོངས་ལུང་བསྟན་ལས། །དུས་ངན་སྙིགས་མ་འོངས་ཚུལ་ལུང་བསྟན་སྐབས། །ཁེ་གར་རྒྱལ་པོའི་བསྟན་པ་དར་གསུངས་ཕྱིར། །མནན་ཀྱང་དུས་ཀྱི་དབང་གིས་ནོན་པར་དཀའ། །དེ་དག་ཤིན་ཏུ་བཤད་དོན་ཅི་ཞེ་ན། །བསྙེན་སྒྲུབ་མ་ཐོན་གདེང་དང་མི་ལྡན་པས། །གསར་བུའི་
ཁེ་བས་ཉེས་ཆེ་བྱེད་དོགས་ཡིན། །སྒྲུབ་པ་མི་བྱེད་གསོལ་མཆོད་ཙམ་ལ་ནི། །ཧ་ཅང་སྒབ་འདྲེས་གནོད་པ་མ་ཡིན་ཕྱིར། །རྣམ་སྲས་གཏོར་ཆོག་སྒྲུབ་ཐབས་ཀུན་ལ་དར། །དེ་ནས་དབུས་སུ་སོང་སོགས་ལོ་གྲངས་མང་། །དབུས་ནས་ཕྱིར་ཕྱིན་བླ་མ་བྱས་ནས་ཀྱང་། །རང་ལོ་ཉི་ཤུ་རྩ་བདུན་ཙམ་གྱི་དུས། །རང་གི་སློབ་དཔོན་ཀརྨ་དོན་ཡོད་ལ། །སྔར་ནས་དམར་སེར་གཉིས་ཀའི་དབང་ལུང་ཐོབ། །རང་ཉིད་བུ་རུ་འཛིན་ཅིང་གྲྭ་པ་ཡིན། །མཎྜལ་ཕྱག་རྟེན་དགོས་རྒྱུ་མེད་པ་དང་། །དགོས་ཀྱང་རང་ནོར་ཅི་ཡང་མེད་པ་དེས། །སྟོང་ཞུས་བྱས་ན་རྟེན་འབྲེལ་མི་ལེགས་སྙམ། །ད་ནི་རང་ལ་ལྡོམ་བུ་གྲོང་ཆོག་ཡོད། །ནས་ནི་སྔོན་མོ་འབྲུ་བཟང་ཞོ་དྲུག་དང་། །དར་དང་རིན་ཆེན་རྟེན་འབྲེལ་འགའ་ཙམ་བཅས། །སེར་དམར་གཉིས་ཀྱི་དབང་ལུང་ཞུ་ཝིག་བྱས། །ཕྱི་རབས་ནོར་ལྷའི་དབང་ལུང་ཞུ་བ་ཀུན། །སྟོང་ཞུས་བྱས་ན་དངོས་གྲུབ་མི་འབྱུང་བ། །གནད་ཆེན་ཡིན་ནོ་འདི་ཡང་ཡིད་ལ་ཟུངས། །དང་པོ་རང་གིས་གང་ཕུལ་དངོས་པོ་དེ། །ཐོག་མར་འབྱུང་ཞེས་རྒྱུད་ནས་གསུངས་པ་ལྟར། །ཐོག་མར་བདག་ལ་ནས་ཀྱི་འབུལ་བ་ནི། །ཨ་ཟེད་བསམ་པ་ལན་གྲངས་དུ་མར་བྱུང་། །དང་
པོ་ཤེས་པ་དཀར་པོའི་མནན་པ་ལ། །ཞག་གྲངས་བཅུ་གཉིས་ངག་མཚམས་བྱས་ཏེ་བཟླས། །དང་པོ་བཙུན་གཟུགས་ལྷ་ཆ་ལ་སོགས་པ། །རྒྱལ་འགོང་ཆོ་འཕྲུལ་ཤིན་ཏུ་ཆེ་བ་བྱུང་། །དེ་ནས་བྱི་ལ་ནག་པོ་གཅིག་བཟུང་ནས། །དོང་ནི་རིང་པོ་བྲུས་པའི་ནང་དུ་བཅུག །དོང་ཁ་གཡའ་མས་བཅད་དེ་བཞག་པ་རྨིས། །འབི་ཙི་ཏྲིའུ་མནན་པ་ཞག་དྲུག་བཟླས། །རང་གི་ལག་གཡས་བྱི་ལ་ནག་པོ་ཞིག །གཡོན་ན་བྱ་གླག་ནག་པོ་གཉིས་བཟུང་ནས། །སྐེ་ནས་བརྫིས་ཏེ་གཉིས་ཀ་བསྒྲལ་བ་རྨིས། །དེ་ནས་ལས་ཀྱི་མཐའ་སྡུད་མནན་པ་བྱས། །དེ་རྗེས་ཕྱིས་ཀྱང་ལན་གྲངས་གཉིས་གསུམ་ལ། །མནན་པའི་ཁ་གསོས་མནན་པ་ཡང་ཡང་ཝིག །ནུས་པ་ཅན་གྱི་མནན་པ་ལེགས་འགྲུབ་ནས། །རབ་ལ་མི་རབས་བཅུ་གསུམ་འབྲིང་ལ་བདུན། །ཐ་མའང་མི་རབས་གསུམ་ལ་མི་གནོད་པ། །ཡིན་པར་སྔགས་རྒན་རྣམས་ཀྱིས་གསུང་རྒྱུན་ཐོས། །དེ་ཕྱིར་བདག་གི་དངོས་སློབ་ཡིན་པ་རྣམས། །མནན་པ་མ་གྲུབ་ན་ཡང་སྐྱོན་ཆུང་ཞིང་། །མནན་ཀྱང་ལམ་དུ་མི་འགྲོ་དོགས་པ་མེད། །འདི་ཡང་གནད་ཆེན་ཡོད་ཕྱིར་བྲིས་པ་ཡིན། །དེ་ནས་དང་པོ་རྣམ་སྲས་སེར་ཆེན་གྱི། །སྙིང་
པོ་འབྲུ་བཞི་རྒྱུན་བསྙེན་སྟོང་རེ་དང་། །ནོར་ལྷ་གསེར་གཟུངས་ཞག་བདུན་བཟླས་པའི་ཚེ། །དཔོན་རིགས་ཆས་བཟང་གཟི་བརྗིད་ལྡན་པ་ཡི། །ཟླ་ཁྲོམ་སྡེར་གཅིག་བདག་ལ་བྱིན་པ་རྨིས། །དེ་ནས་དམར་པོ་རྩ་བའི་སྒྲུབ་པ་ལ། །ཟླ་བ་གཅིག་དང་ཞག་བདུན་ངག་མཚམས་བྱས། །བདུན་གཉིས་སོང་དུས་གོས་ཆེན་འབྲུག་རིས་ཅན། །དེ་ལ་དྲུབ་པའི་རྒྱལ་མཚན་གཅིག་དང་ནི། །མདའ་དར་དམར་པོ་བརྟག་པའི་མདུང་དར་གཉིས། །ཆེ་ཆུང་རིང་ཐུང་མདའ་ཚད་རིང་ཤོས་ཙམ། །བུད་མེད་གཅིག་གིས་བདག་ལ་བྱིན་པ་དེ། །རང་གི་གཡས་ཕྱོགས་བླངས་ནས་བཞག་པ་རྨིས། །དབང་ལུང་ཞུ་སའི་རང་གི་སློབ་དཔོན་གྱིས། །སྣམ་བུ་ལས་བྱས་ཁྲི་ནི་མཐོན་པོ་བརྩེགས། །རྒྱབ་ཡོལ་དང་བཅས་བདག་ལ་གནང་བ་དང་། །བདག་གིས་ས་བསྐོས་ཟངས་ཀྱི་གཏེར་ཆེན་བུད། །སྟོང་ཕྲག་ཉི་ཤུའི་བར་དུ་ཟད་མེད་གཏེར། །དཔོན་ཆེན་ཕྲུ་གུ་གོས་སྔོན་གྱོན་པ་ཞིག །བདག་གི་དྲུང་དུ་དགའ་ཞིང་འདུག་པ་དང་། །རས་ཡུག་ལ་སོགས་འབུལ་ནོར་མང་བྱུང་རྨིས། །ཡང་ནི་ཞག་པོ་བཅུ་བདུན་ངག་མཚམས་བསྡམས། །གསང་བསྒྲུབས་བྱས་ཚེ་མི་ཆེན་སྐུ་ཕ་མང་། །བཙུན་ཆེན་གཅིག་གིས་
མར་ནི་སྦྲ་ལོག་ཙམ། །འགའི་སྣང་བདག་ལ་ཀོ་འབོག་ཙམ་ཞིག་བྱིན། །དཔོན་རིགས་དར་མས་ཇ་བག་གཉིས་ཙམ་ཕུལ། །བུད་མེད་མཛེས་མས་གུས་འདུད་ཇ་ཞུས་དྲངས། །རང་ཉིད་ཁྲི་ལ་འདུག་དང་རྟ་ཞོན་རྨིས། །དང་པོ་སྒྲུབ་ལ་ཞུགས་པའི་ནུབ་མོ་ནས། །དངོས་སུ་དཀྱིལ་འཁོར་སྟེང་དུ་འོད་དམར་འཁྱུག །གསང་སྒྲུབ་བཞི་འབུམ་བརྒྱད་ཁྲིའི་བསྙེན་པ་བྱས། །དེ་རྗེས་སྒྲུབ་པ་ཡུན་རིང་བྱ་སྙམ་ཡང་། །སྒྲུབ་པ་གཅིག་ལ་ཡུན་ནི་རིང་བ་བས། །སྤོག་ཆོག་ལན་མང་ཝིག་ན་དགའ་སྙམ་པས། །དམར་པོ་རྩ་བའི་སྒྲུབ་པ་ཉིད་ལ་ཞུགས། །དཀྱིལ་འཁོར་ལྡིང་ཁྲི་འོག་ཏུ་འོད་དམར་པོ། །ཁྲུ་གང་ཙམ་ཞིག་ཁྱུག་ཁྱུག་བྱེད་པ་མཐོང་། །རྨི་ལམ་བཙུན་ཆེན་སྡེ་ཕ་རང་དྲུང་བྱུང་། །འོ་མ་དྲངས་དང་བདག་ཉིད་རྟ་ཞོན་རྒྱུག །རང་ཉིད་རྣམ་ཐོས་སྲས་དངོས་ཡིན་སྙམས་ཤིང་། །རང་གི་ཕྱོགས་མཚམས་བརྒྱད་ནས་གནོད་སྦྱིན་བརྒྱད། །ཡིན་སྙམ་མི་གཞོན་གོས་སྔོན་གྱོན་སྐྱ་ཅན། །བརྒྱད་ཀྱིས་རང་ལ་ཕྱག་ནི་འཚལ་བ་རྨིས། །ལོ་ལེགས་སྙེ་མ་བཏུས་དང་བཙུན་ཆེན་གྱིས། །དར་དམར་བྱིན་རྨིས་དེ་ནས་ཞག་པོ་གཅིག །ལས་སྔགས་གཅིག་ཁྲི་དྲུག་བརྒྱ་བཟླས་པ་བྱས། །དེ་
ནས་ངག་ནི་མ་བཏང་སྒྲུབ་པ་སྤོག །བཙུན་ཆེན་ཆོས་བཟང་རྣམ་སྲས་མིང་ཅན་གྱིས། །བདག་ལ་གུས་པས་བསྐོར་བ་བྱས་པ་དང་། །རྟ་སྔོན་ཞོན་ནས་གྱེན་ལ་རྒྱུག་པ་དང་། །དམག་དང་སོག་པོ་ཚོང་པ་ཁྲོམ་ཚོགས་འདུ། །བདག་གི་དྲུང་དུ་མི་གཞོན་ཤིན་ཏུ་མཛེས། །ཤ་རྒྱས་གསུས་ཆེ་མགོ་བོ་ཨ་བད་ཅན། །གཉིས་ཀྱིས་ཁྲོབ་གྱོན་ཕྱེད་དཀྱིལ་བྱས་འདུག་པ། །རེས་འགའ་ལྕགས་ཁྲབ་སྔོ་དང་ཙེར་ཙེར་བ། །རེས་འགའ་བསེ་ཀྲབ་སེར་དང་ཙེར་ཙེར་བ། །གཞན་ཡང་མི་ཆེན་བཙུན་ཆེན་མང་པོ་དང་། །ཇ་ནས་ཕུལ་དང་དབང་བསྐུར་བྱས་སོགས་རྨིས། །དེ་ལྟར་བདུན་གསུམ་རྫོགས་ནས་ཞག་གཅིག་ལ། །ལས་སྔགས་གཅིག་ཁྲི་གཅིག་སྟོང་བཟླས་པ་བྱས། །དེ་ནས་ངག་ནི་མ་བཏང་སྒྲུབ་པ་ཝིག །སོག་པོའི་རྒྱལ་པོས་རིན་ཆེན་ཟངས་ལྕགས་གནང་། །རང་ཉིད་སྟེགས་མཐོ་ཁར་འདུག་དབང་བསྐུར་བྱས། །མུ་ཏིག་མཛེས་དང་གཡུ་ཆུང་མཛེས་པ་གསུམ། །རང་གི་ལག་པ་གཡོན་པའི་སྲིན་ལག་ལ། །འདི་ཉིད་ཞུ་བའི་སློབ་དཔོན་དེ་ཡི་བརྟག །རང་གི་དུང་ནི་རང་གི་གྲོགས་པོས་བུས། །སྐད་བཟང་བྱུང་ཞིང་ཞོ་མར་ཁྱེར་ཤོག་འབོད། །རང་གིས་རྔ་བརྡུང་ཁྲོམ་ལ་ཕྱག་དབང་
གཤར། །རི་ལ་མེ་ཆེན་མཆེད་དང་དམག་ཚོགས་གཤར། །གོས་ཡུག་དམར་པོ་ཆེ་ཞིང་ལེགས་པ་ལ། །རྣམ་སྲས་སྐྱ་བརྒྱད་སྐུ་ནི་ཐག་གྲུབ་སྟེ། །གཙོ་འཁོར་དགུ་པོ་གོས་ཆེན་གསེར་ཀྱུ་མ། །བདག་གིས་རྙེད་པས་དགའ་ཞིང་བཤམས་པ་དང་། །ཚོང་དཔོན་ཆས་བཟང་གོས་སྔོན་གྱོན་པ་ཞིག །བྱུང་བའི་རྟ་ཁ་བདག་གིས་བླངས་པ་རྨིས། །དེ་ལྟར་ཞག་པོ་ཉེར་གཅིག་སྒྲུབ་པ་རྫོགས། །ཞིག་གཅིག་ལས་སྔགས་གཅིག་ཁྲི་བཞི་སྟོང་ལྷག །ཕྱིར་ནངས་གསང་རྟེན་ཀློག་ནས་ནང་གཞུག་གཟབ། །གསང་རྟེན་གཉིས་པོ་གཅིག་ཏུ་བྱིན་གྱིས་བརླབས། །ངག་ནི་མ་བཏང་ལྟར་ཡང་སྒྲུབ་པ་སྤོག །དཔོན་ཕྲན་ཞིག་དང་ཁྲོམ་ནི་མང་པོ་འགས། །དར་དང་ནས་སོགས་མང་དུ་ཕུལ་བ་དང་། །དཔོན་ཆེན་ཕྱུག་པོ་ཆས་བཟང་རང་དྲུང་འདུག །གསང་རྟེན་ཀློག་པ་ཅུང་ཞིག་མ་ལེགས་རྟོགས། །དགེ་བསྙེན་ཆེན་པོས་ཕར་ལ་ཕྱག་འཚལ་དང་། །རྟ་ཡི་ཕྲ་སོགས་མི་ཆུན་རྟགས་ཀྱང་བྱུང་། །དེ་ནས་བསྐང་བཤགས་ཀྱང་ནི་ཚར་རེ་སྦྱར། །རང་ལ་རྒྱལ་མཚན་མང་པོ་འདུག་པ་དང་། །དཔོན་ཕྲན་ཞིག་གིས་རྒྱལ་མཚན་བརྒྱ་ཁྱེར་བྱུང་། །ཉེར་གཅིག་སྒྲུབ་པ་རྫོགས་ནས་ཞག་གཅིག་ལ། །
ལས་སྔགས་གཅིག་ཁྲི་གཅིག་སྟོང་བཟླས་པ་བྱས། །ངག་ནི་མ་བཏང་སླར་ཡང་སྒྲུབ་པ་སྤོག །ཚོང་དཔོན་ཆས་བཟང་གོས་སྔོན་ཅན་བྱུང་དང་། །ལུང་པའི་སྨད་ནས་འདི་ཡན་བླ་མ་ནི། །ཆེ་ཤོས་ཡིན་ཟེར་བདག་མིང་གླེང་བ་ཐོས། །ཚོང་དཔོན་ཆོས་བཟང་བྱུང་ནས་ཕྱག་འཚལ་དང་། །གྲོང་ཁྱེར་ཕྱུག་པོའི་དཀྱིལ་ན་བདག་འདུག་ཅིང་། །རི་ངོས་ཐམས་ཅད་ནོར་གྱིས་གང་བ་དང་། །དྲེལ་ནི་དྲུག་ཅུ་ཙམ་ཞིག་ཡོད་པའི་ཁྱུ། །ཚོང་དཔོན་བཅས་པ་བདག་གི་དྲུང་དུ་བྱུང་། །དབུས་ཀོང་གཉིས་པོ་བསྡོམ་པ་ཡིན་སྙམ་པའི། །དྲེལ་དཀར་སྐྱ་སྐང་འདྲེས་པ་ཚོགས་པའི་ཚོགས། །ཇོ་དར་མང་པོས་མདུང་དར་བྱས་པ་ཡི། །ཤོ་སྣ་བོང་བུར་བཀལ་ནས་ཁལ་མང་པོ། །བདག་ཉིད་གཟུར་ཀྱང་ང་ཡི་ཕྱི་བཞིན་བྱུང་། །རང་གི་བླ་མས་ཇ་ནི་མང་པོ་གནང་། །སྐྱེས་ཕྲན་ཞིག་གིས་གུས་པར་ཇ་བག་ཕུལ། །སྐྱེས་ཕྲན་ཞིག་གིས་ཇ་ཁག་གོར་མོ་ནི། །ཙོ་ཆུང་ཙམ་ཞིག་བདག་ལ་ཕུལ་བ་དང་། །རྒྱལ་བའི་དབང་པོ་བདག་གི་ཡུལ་དུ་ཕེབས། །སྡེ་ལ་བདག་གིས་རྩྭ་ཤིང་བསྡུས་སྨྲས་པས། །ཐང་ཆེན་གང་བའི་རྩྭ་ཤིང་བསྡུས་བྱུང་ཡང་། །ད་རུང་མི་ཆོག་བདག་གིས་བསྡུ་དགོས་སྨྲས། །ཇ་ཞུས་བྱས་པའི་
གསོལ་འཕྲོ་བདག་ལ་གནང་། །ནམ་ལངས་ཉི་མ་ཤར་ཞིང་རྟ་སྔོན་པོ། །བཟང་པོ་ཞོན་ཞིང་མེ་ཤེལ་བཟང་བ་རྣམས། །བདག་གི་ཡོབ་དོ་ལ་ནི་བརྒྱབ་བྱེད་ཅིང་། །གཡག་དང་མཛོ་མོ་འདྲེས་པའི་སུམ་བརྒྱ་ཙམ། །རང་གི་ཡིན་སྙམ་འཚོ་སྐྱོང་བྱེད་པ་རྨིས། །འཚོ་རོགས་རྡོ་རྗེ་ཕག་མོ་ཡོད་སྙམ་བྱེད། །རྡོ་རྗེ་ཕག་མོས་མཛོ་མོ་དེ་རྣམས་ཀུན། །ཚུར་ལ་རྒྱབ་ཤོག་ཟེར་ནས་འབོད་པ་བྱས། །སྐུ་ཡི་སྤྲུལ་པ་མཛོ་མོ་དཀར་མོ་འབུམ། །གསུང་གི་སྤྲུལ་པ་མཛོ་མོ་དམར་མོ་འབུམ། །ཐུགས་ཀྱི་སྤྲུལ་པ་མཛོ་མོ་སྨུག་མོ་འབུམ། །སྨྲས་ཤིང་རང་ལ་དེ་རྣམས་ཡོད་སྙམ་བྱེད། །རང་གི་ཕྲེང་བའི་དཀྱིལ་དུ་མེ་ཤེལ་སྣང་། །མིག་ལ་གཟར་ནས་ཉི་མར་བལྟས་པ་ཡིས། །ཉི་མ་ཤར་དྲོས་ཙམ་གྱི་ཉི་རེད་སྣང་། །དྲེལ་ནི་ཕྲ་དང་ཕར་ལ་ཕྱག་འཚལ་སོགས། །བཀའ་གཉན་མི་ཆུན་ལྟས་ཀྱང་འགའ་རེ་བྱུང་། །རང་གི་ཡིན་སྙམ་ཁང་བཟང་ཉམས་དགར་བཞུགས། །རྒྱལ་རིགས་མི་ཆེན་གོས་སྔོན་ཅན་དང་ནི། །དགེ་བཤེས་བཙུན་ཆེན་སྐྱ་སྒང་མང་པོ་འདུག །དྲེལ་བདུན་རང་གི་ཡིན་སྙམ་སྒ་སྟན་བྱས། །ནས་ཡ་གཉིས་དང་རྩྭ་སྒྲོ་གཤིབ་པའི་ཁྲི། །དེ་ཡི་སྟེང་དུ་ཁོ་བོ་འདུག་པའི་ཚེ། །ཁྲི་ནི་
གྲུབ་ཐོབ་ཨོ་རྒྱན་པ་ཡི་ཁྲི། །ཡིན་པས་རྩྭ་ཕོན་ཅིག་གི་མཐོ་དམན་མེད། །སྨྲས་ཤིང་དེ་ལྟར་ཡིན་སྙམ་བྱེད་པ་དང་། །རང་ཁྱིམ་ཁང་བཟང་བཙན་པོའི་ནང་ཞུགས་རྨིས། །དེ་ལྟར་སྒྲུབ་པ་ཞག་གྲངས་ཉེར་གཅིག་རྫོ་གས། །ཞག་གཅིག་ལས་སྔགས་གཅིག་ཁྲི་གཅིག་སྟོང་བཟླས། །དེ་ནས་ངག་ནི་མ་བཏང་སྒྲུབ་པ་སྤོག །རྟ་སྔོན་ཁྱུ་གཅིག་བདག་གི་དྲུང་དུ་འདུག །ཞག་བདུན་བར་དུ་གཅུན་པའི་དམིགས་པ་བྱས། །སྔགས་པ་ལ་སོགས་འགའ་རེ་གྲལ་འགྲིགས་པའི། །ང་རང་ཡུལ་བུད་གྲལ་མགོར་བསྡད་པ་རྨིས། །དེ་ནས་མཁུ་ལྡོག་རྟགས་ནི་ཆུང་སོང་ཡང་། །སྒྲུབ་པ་ཞུད་རྟགས་རྟ་ཤི་ཆུས་ཁྱེར་རྨིས། །དེ་ནས་བསྐང་གསོལ་མང་དུ་བྱས་པ་དང་། །ནོར་ཕྱུགས་མང་པོ་འཚོ་སྐྱོང་བདག་གིས་བྱས། །སྡེ་དཔོན་བུག་སྒོར་བྱུང་ནས་ཆོས་བཤད་བྱས། །ཆུ་བོ་ཡ་མུ་ན་ཡི་གླིང་དེར་ནི། །དང་པོ་བྲིས་པའི་བཀོད་པ་འདྲ་བ་ལ། །ཕྱིས་ནས་བྲིས་པ་མ་ཡིན་མངོན་སུམ་ཉིད། །ཐ་མ་ཆུ་དང་ལྕགས་རིས་བསྐོར་བ་ཡི། །གྲོང་ཁྱེར་བརྗོད་ཀྱི་མི་ལང་པ་ཞིག་མཐོང་། །བལ་པོའི་ཡུལ་ཕྱིན་སྙམ་པའི་གྲོང་ཁྱེར་ནི། །དཔག་ཏུ་མེད་པའི་དབུས་ན་རྒྱལ་པོ་འདས། །རྒྱལ་བུ་སྐྱེས་མ་ཐག་ནས་ཁྲི་མནན་འདུག །
དེ་ཡི་བཙུན་མོས་བསྙེན་བཀུར་བཟང་པོ་དང་། །དེ་ཡི་བུ་མོ་ཤི་བའི་གོས་ཡིན་སྙམ། །སྦྱར་མ་རྩེས་ཞྭ་བཟང་པོ་བདག་ལ་ཕུལ། །བདག་གི་ནོར་ཁང་ཁང་པར་རྒྱ་ཆེན་ཚར། །ད་ནི་དགོན་པ་རྒྱ་ཆེན་བྱེད་དགོས་སྙམ། །དང་པོ་ཟ་དམ་ཙམ་གྱི་རི་ཞིག་སྣང་། །རི་རབ་ཡིན་སྙམ་དེ་ཡི་རྩེ་ལ་འཛེགས། །དེ་སྟེང་མཁར་ནི་འདྲ་བ་ཞིག་འདུག་པ། །སུམ་བརྩེགས་ཡིན་སྙམ་དེ་ཡི་སྟེང་དུ་སོང་། །གླང་ཆེན་ཡིན་སྙམ་མི་གསལ་ཙམ་ཞིག་ཞོན། །ལག་ཏུ་དཀར་པོ་གཅིག་བཟུང་ནམ་མཁར་གཡུགས། །འདི་ཡན་འཐབ་བྲལ་ལྷ་ཡི་གནས་ཡིན་ཏེ། །འཐབ་བྲལ་མན་ཆད་འཇིག་རྟེན་ཐམས་ཅད་ཀྱིས། །རྒྱལ་པོ་ང་རང་ཡིན་སྨྲས་ཡིན་སྣང་ཤར། །གཞན་ཡང་དགེ་བཤེས་རིན་ཆེན་ཁྲི་མདུན་དུ། །རྐང་དང་ཐིག་ལེ་ཡིན་སྙམ་ཞོ་ཕོར་བཏུང་། །མི་མང་ཚོགས་དང་ཇ་དར་འབུལ་བ་དང་། །ཇ་ཞུས་བྱེད་པའི་རྨི་ལམ་ལན་འགའ་རྨིས། །དེ་ལྟར་བསྙེན་སྔགས་ཉི་ཤུ་རྩ་ལྔ་པ། །ངག་བཅད་འཁོར་ཡུག་གདན་དྲོད་མ་བྲལ་བ། །འབུམ་ཕྲག་ཉེར་དྲུག་ཐོན་པའི་ནུབ་པར་ལ། །བསྐང་གསོ་ཚར་ནི་བཅུ་གསུམ་བཏོན་བྱས་ཏེ། །གཟུགས་ནི་ཅི་ལྟར་འདུག་པ་མ་མཐོང་བར། །ངེད་རྣམས་འགའ་ལ་
འདོན་པའི་ཚིག་སྤྱོད་ནས། །རྒྱལ་ཆེན་འཁོར་བཅས་མཆོད་པའི་བྱིན་རླབས་ཀྱིས། །བདག་སོགས་གང་དུ་གནས་པའི་ས་ཕྱོགས་དེར། །ནད་དང་དབུལ་ཕོངས་འཐབ་རྩོད་ཞི་བ་དང་། །ཆོས་དང་བཀྲ་ཤིས་འཕེལ་བར་མཛད་དུ་གསོལ། །ཞེས་པའི་ཚིག་དེ་བསླབས་ནས་བྱུང་བར་རྨིས། །ཞག་གཅིག་ལས་སྔགས་གཅིག་ཁྲི་བརྒྱད་བརྒྱ་བཟླས། །དེ་ནུབ་དཔོན་ཆེན་གོས་དམར་ཅན་ཞིག་ལ། །སྐྱ་པ་མང་པོས་བསྐོར་ནས་བྱུང་བར་རྨིས། །དེ་ནས་ངག་ནི་མ་བཏང་ཞག་བཅུ་བཞིར། །བསྙེན་སྔགས་མ་དྲག་དངོས་གྲུབ་སྔགས་གསུམ་སྦྲེལ། །གཅིག་འབུམ་གཅིག་ཁྲི་སུམ་སྟོང་དྲུག་བརྒྱ་བཟླས། །བཙུན་ཆེན་སྐྱེས་ཕྲན་སྐྱ་པ་མདུན་དུ་བྱུང་། །རྣམ་སྲས་སེར་ཆེན་སེང་གེ་ལ་ཆིབས་པ། །ཕྱག་ན་རྒྱལ་མཚན་ཐོགས་པ་ཅི་ལྟར་ཞིག །མཇལ་སྣང་མཇལ་བ་ཡིན་ནོ་བསམས་ཤིང་འདུག །མཇལ་ལུགས་ཅི་འདྲ་ཡིན་སོགས་མ་གསལ་ལོ། །ཁྲོམ་དང་སློབ་དཔོན་སོགས་ལ་དབང་བསྐུར་བྱས། །བམ་པོ་འགའ་རྙེད་རྟ་ཞོན་གྱེན་རྒྱུག་རྨིས། །རྒྱལ་བའི་དབང་པོ་དངོས་ཉིད་ཡིན་སྙམ་པའི། །བེར་མནབས་པད་ཞྭ་གསོལ་བའི་བླ་ཆེན་ཞིག །ང་ཡི་ལུས་ལ་ཁྱོད་ཀྱིས་རྩིས་ཆེན་འདུག །ང་ཡི་ལུས་
འདི་རིན་པོ་ཆེ་ཡིན་ཞེས། །ཁྱོད་ཀྱིས་ཟེར་བ་རྟེན་འབྲེལ་བཟང་ངོ་གསུངས། །དེ་ལ་བདག་ཡིད་དགའ་བས་བགྲོ་གླེང་ཕུལ། །འགྲོ་ལ་ཕན་བདེའི་རྩ་བ་སངས་རྒྱས་བསྟན་པ་ཡིན། །བསྟན་པའི་རྩ་བ་ཉམས་ལེན་སྒྲུབ་པ་ཡིན། །སྒྲུབ་པ་དེ་ཉིད་ཤེས་ཕྱིར་ཐོས་བསམ་དགོས། །དེ་ཕྱིར་རྟེན་འབྲེལ་ཁྱོད་ལ་འབྲེལ་བ་བྱ། །ཉན་ཐོས་ཞི་བ་ཚོལ་རྣམས་ཀུན་ཤེས་ལ་སོགས་པ། །ཕར་ཕྱིན་བགྲོ་གླེང་བདག་གིས་བྱས་པ་རྨིས། །དེ་ནས་ངག་ནི་མ་བཏང་ཞག་བདུན་བར། །བསྙེན་སྔགས་མ་བཏགས་དངོས་གྲུབ་ལས་སྦྱོར་སྔགས། །བཞི་འབྲེལ་གཅིག་འབུམ་གཅིག་ཁྲི་ཉིས་སྟོང་བཟླས། །མཆེད་གྲོགས་གཟི་བརྗིད་རབ་འབར་དགའ་ཞིང་བྱུང་། །ཤིན་ཏུ་བཀྲག་བཟང་མཆོད་ཁང་ཞིག་གི་ནང་། །ཁྲི་བཟང་སྟེང་དུ་བླ་མ་ཆེན་པོ་ནི། །དབུ་ལ་དར་གདུགས་ངུར་སྨྲིག་གསོལ་བ་མཇལ། །རྒྱལ་འགོང་ཡིན་དོགས་རལ་གྲི་ཕྱར་ནས་སྡིག །སླར་ཡང་སྣུམ་བག་ཆགས་ཤིང་གཟི་བརྗིད་ལྡན། །གཡོན་དུ་ཨོ་རྒྱན་གསེར་ཐང་ལྔ་སྒྲིག་སྣང་། །འགོང་པོ་མིན་པ་ཐག་ཆོད་བླ་མ་དེས། །ཤངས་ནས་འཇུས་ཏེ་དངོས་གྲུབ་བྱིན་ཅིག་སྨྲས། །ཚེས་བརྒྱད་ལས་བཞིའི་སྦྱིན་བསྲེགས་བྱས་ནས་
ཀྱང་། །དེ་ནས་ངག་བཏང་ཟླ་ལྔ་ཞག་ལྔ་སོང་། །ངག་མཚམས་བསྡམས་པར་མིན་ཀྱང་དགེ་བར་བྱུང་། །ཡང་ན་ཞག་པོ་བཅུ་བཞི་ངག་མཚམས་བསྡམས། །གསང་སྒྲུབ་བཞི་འབུམ་བཟླས་ནས་གློ་བུར་གྲོལ། །ལས་སྦྱོར་འཐོར་བསྙེན་སུམ་ཁྲི་ཐེམ་པར་བསྙེན། །ཡང་ནི་ཞག་བདུན་ངག་མཚམས་བསྡམས་ནས་ཀྱང་། །ན་ན་ཁ་དེའི་ཤམ་བུ་བཏགས་པ་ལ། །བདུན་ཁྲི་དྲུག་སྟོང་བཟླས་ཚེ་རྨི་ལྟས་ནི། །ཆོས་གོས་བཟང་ཞིང་རྟ་བཟང་ཞོན་ནས་རྒྱུག །ནས་རྡུང་བྱེད་པར་སྟན་བཟང་སྟེང་དུ་འདུག །རིན་པོ་ཆེ་སོགས་གྲྭ་ཚང་ཐམས་ཅད་ནི། །ཆོས་གོས་བཟང་ནང་རང་འདུག་དགའི་བ་རྨིས། །གནས་ཆེན་པ་དང་ཚོང་དཔོན་ཆས་བཟང་དང་། །ཁྱིམ་བདག་ཕྱུག་པོའི་ད་ལོ་ལོ་ཉེས་ཀྱང་། །སྐྱོན་མེད་རྒྱ་ཤོད་ཁ་ལུང་གཉིས་པོ་ཡི། །ས་བོན་འཕེལ་འགྲིབ་ཙམ་ཞིག་ཡིན་ནོ་ཟེར། །བླ་ཆེན་འགའ་དང་དགེ་སློང་མང་པོ་འགས། །རང་དང་མཉམ་དུ་གུང་ཚིགས་མཛད་འདུག་པ། །ཁོང་རྣམས་གསོལ་རྒྱུ་མེད་ཅིང་བཀྲེས་འདུག་པས། །ང་ལ་མང་པོ་འདུག་པས་འབབ་ཀྱང་བྱིན། །རྒྱ་དངུལ་སྲང་བཞི་འདུག་པ་ཚགས་བྱས་རྨིས། །ཡང་ནི་ཞིག་པོ་བཅུ་བཞི་ངག་མཚམས་བསྡམས། །གསང་
སྒྲུབ་ཉིས་འབུམ་ཉི་ཁྲི་ལྷག་ཙམ་བཟླས། །སྡེ་པ་ཆས་བཟང་བདག་ལ་བཀུར་སྟི་བྱས། །ཁྱིམ་བདག་ཚོང་དཔོན་ཆས་བཟང་ཕྱུག་པོ་ཡི། །ཇ་ཁག་གཉིས་དང་ནས་ཡ་གསུམ་ཙམ་ཕུལ། །བུད་མེད་གཅིག་གིས་འོ་མ་ཟོ་གང་དང་། །མལ་སྐྱལ་ཅིག་སོགས་མར་འགའ་ཕུལ་བ་རྨིས། །དངོས་དང་རྟོག་ངོར་གང་ཡིན་མི་འབྱེད་པའི། །འོད་དམར་འཁྱུག་དང་གུ་གུལ་དྲི་མ་འཚུབས། །ཡང་ནི་ཞག་བཞིར་ངག་མཚམས་བསྡམས་ནས་ནི། །བཱ་སུའི་ཤམ་བུ་ལྔ་ཁྲི་བསྙེན་པའི་ཚེ། །སྨྱུག་མའི་ནགས་ཚལ་ཆེན་པོ་ཞིག་འདུག་པ། །ཕལ་ཆེར་དར་དམར་ཁ་འབྲེལ་ཙམ་རེ་བཏགས། །དམར་དང་སྤུང་སྤུང་མཛེས་པར་འདུག་པ་མཐོང་། །ཁང་བཟང་ནང་དུ་གོས་ཆེན་རྒྱལ་མཚན་དང་། །ཀ་རྒྱན་ལ་སོགས་མཆོད་བཤམས་ཡོད་པའི་སར། །བདག་གིས་མགོན་པོའི་མདོས་ཆེན་བཅས་པ་དང་། །གོས་ཡུག་དམར་པོའི་ཀ་རྒྱན་བཟོ་ཤོམ་དང་། །ཁྲོམ་ཚོགས་དཔག་ཏུ་མེད་པ་འདུ་བ་རྨིས། །ཡང་ནི་ཞག་བདུན་སྔགས་དེ་ངག་མཚམས་བྱས། །བརྒྱད་ཁྲི་བཞི་སྟོང་ལྷག་ཙམ་བསྙེན་པའི་ཚེ། །སྡེ་པ་ཆེན་པོ་ཇ་གནང་ཁྲོམ་ཚོགས་ལ། །བུམ་ཆུ་སྐྱུར་སིལ་ཁུ་བས་དབང་བསྐུར་བྱས། །རང་གི་འཐུ་
བར་རྒུན་འབྲུམ་སྡེར་དོ་བླུགས། །གཟན་ཤམ་དམར་པོ་བཞི་ཙམ་གྱོན་ཤོམ་དང་། །རང་ནོར་དྲུག་ཅུ་ཙམ་ཞིག་གྱེན་དེད་དང་། །ཤིན་ཏུ་བསྙེན་སྐབས་ན་ན་ཁ་དེའི་ཕུལ། །ཡར་ངོའི་རིང་ལ་སྦྱིན་སྲེག་བཅུ་ཚར་ཞིང་། །བཅོ་ལྔ་ནུབ་པར་རིལ་བུ་སུམ་བརྒྱ་བསྲེགས། །གོང་འོག་བསྡོམས་པས་སུམ་འབུམ་བཞི་ཁྲི་ལྷག །ཡང་ནི་བཅུ་བཞི་ངག་མཚམས་བསྡམས་བྱས་ཏེ། །བཱ་སུའི་ཤམ་བུ་སྦྱར་བ་དེ་བསྙེན་པས། །དཔོན་ཆེན་བཙུན་པས་ཆོས་ཀྱི་དོས་གཅིག་གཟོབ། །རྨི་ལམ་ཉམས་སྣང་གང་ཡིན་མི་འབྱེད་པར། །ཚོང་དཔོན་ཆས་བཟང་རང་གི་དྲུང་དུ་བྱུང་། །ནུབ་གཅིག་དཀྱིལ་འཁོར་དེ་ལ་ཕྱག་འཚལ་ནས། །གཙང་སྟོད་རྒྱལ་པོ་ཡིན་སྙམ་དཔོན་ཆེན་ཞིག །དཔོན་རིགས་ཆས་བཟང་བརྒྱ་ཕྲག་བསྐོར་འདུག་པ། །དེ་ལ་བདག་གིས་དཔོན་ཕྱག་གཅིག་འཚལ་ནས། །འཁོར་རྣམས་དཔོན་ཕྱག་མི་ཤེས་འདུག་ཟེར་འཕྱ། །དཔོན་དེས་འདི་ཡིས་ང་ལ་དཔོན་ཕྱག་སོགས། །དགོས་ལེ་མིན་ཞེས་བདག་ལ་བསྟོད་པ་བྱས། །ལོ་ཐོག་ཤིན་ཏུ་ལེགས་པ་བརྔ་འདུག་པས། །ཕ་རི་དེ་ནས་དཔོན་རིགས་བུ་ཆུང་ཞིག །བམ་སྤྱང་མགྱོགས་ཆུག་ཟེར་ནས་འབོད་དོ་བས། །བདག་གིས་བམ་སྤུང་
མང་པོ་མྱུར་བར་བྱས། །རང་གི་ཡིན་སྙམ་ཅང་ཤེས་ལྔ་དྲུག་བསྡུས། །རྩྭ་སྔོ་བཟང་སར་ནོར་ཁྱུའི་དཀྱིལ་དུ་ཕྱིན། །མཛོ་ལ་རྩི་དཀར་བཀལ་ནས་རང་ཁྱིམ་ཕྱིན། །གཉེར་ཁང་འཇིགས་པར་གཉེར་ཆེན་པས། །ཞིམ་ཇེ་དྲངས་ཚེ་རང་ཉིད་ནི། །མི་སྣ་ཁམས་ཆེ་ཡིན་སྣང་བྱས། །དཔོན་རིགས་དག་ལ་དབང་བསྐུར་ཞིང་། །བུད་མེད་སོགས་ཀྱི་ཇ་འདྲེན་མང་། །མཛོ་འུ་སྣ་དག་བཅས་པ་དང་། །གཞན་ནས་འཕྲོག་པའི་ཀ་ཆ་འགའ། །རང་ལ་འབུལ་གྲབས་བྱེད་པ་རྨིས། །གཅིག་འབུམ་གཅིག་ཁྲི་ལྷག་ཙམ་སོང་། །གོང་འོག་བསྡོམས་པའི་སྔགས་དེ་ལ། །གཉིས་འབུམ་ལྔ་ཁྲི་ལྔ་སྟོང་ལྷག །མར་ངོ་ཆུ་སྦྱིན་གཉིས་རེ་དང་། །གནམ་གང་རིལ་བུ་བདུན་བརྒྱ་བསྲེགས། །ཉེར་གཅིག་སྦྱིན་བསྲེགས་རྒྱས་པར་བྱས། །ཡང་ནི་ཞག་བརྒྱད་གསང་སྒྲུབ་ལ། །བསྙེན་པ་གཅིག་འབུམ་གཅིག་སྟོང་དང་། །ལས་སྦྱོར་གཅིག་ཁྲི་ངག་མཚམས་ཚེ། །ཁྲི་ནི་རིང་ཞིང་མཐོ་བའི་སྟེང་། །རང་ལ་ཆོས་འབྲེལ་ཡོད་པ་ཡི། །སློབ་དཔོན་ཆོས་བཟང་མང་པོ་བཞུགས། །བདག་ཀྱང་ཁྲི་ཟུར་དེར་བསྡད་པས། །མ་བཅག་བདག་ནི་ཐང་ལ་བྲུལ། །བདག་གིས་འཁང་ར་འགའ་བྱས་
པས། །ཁོང་རྣམས་མ་ཟད་དེར་ནུབ་ནས། །ང་ལ་ཁྲི་ནི་ཡག་མོ་གཡར། །རང་ཉིད་ཁྲི་ཁ་དེ་རུ་བསྡད། །མི་ཆེན་མང་པོ་རང་དྲུང་འདུག།ངོ་མི་ཤེས་པ་དཔོན་ཆེན་ཞིག །རྟ་ཁྲིད་ཐབ་ཁར་བསྐོར་བ་བྱེད། །ཁྲབ་ཆེན་འདྲ་བའི་སྐྱ་ཕ་ཞིག །དེ་རྗེས་རང་ཡང་རྟ་ཞོན་རྒྱུག །བཙུན་པས་ཞིམ་ཇ་མར་ཁུ་བསྲེས། །རང་གི་ཕོར་པར་མ་ཤོང་བྱོས། །ཕྱུག་པོའི་སྐྲ་ཕུད་ཇ་ཞུས་དང་། །འབྲི་ཁྲབ་ལ་སོགས་འབུལ་ལོ་ཟེར། །ཅ་ནེ་གསར་པ་ཆེན་པོ་བཏང་། །བཙུན་ཆུང་མཛེས་པས་ཇ་ཞུས་མིང་། །ཁང་བཟང་ནང་ཕྱིན་ནས་མང་སྤྱོད། །ལྷ་ཁང་ལོགས་བྲིས་གསེར་འོད་འབར། །དངོས་སུ་ན་ན་ཁ་དྷེ་འདུག །དེ་ནས་ངག་ནི་མི་བཏང་བར། །ཁ་དྷེའི་ཤམ་བུ་བཏགས་པར་བྱས། །གནས་ཆེན་ཁང་ཐོག་ཁྲོམ་ཆེན་འདུས། །རྡོར་དྲིལ་ཐོགས་ནས་དབང་ཆེན་བགྱིས། །དབང་སྒྲུབ་དབང་ནི་བསྐུར་ཤོམ་དང་། །རྩི་བཅུད་སྙིང་པོ་ཀོ་འབོགས་ཙམ། །སྐྱེས་ཕྲན་བཙན་པོའི་འབུལ་ཤོམ་བྱེད། །བོད་རྗེའི་གདུང་རིགས་དགའ་ཞིང་གུས། །བྱི་རུའི་རྒྱན་ཆ་ཆས་བཟང་དང་། །སྦྱར་ལེན་ཆེན་པོའི་ཞགས་པ་དང་། །གཡུ་དང་མུ་མེན་འགའ་རེ་ཕུལ། །གཟན་གསར་དཀར་སེར་དམར་གསུམ་
དང་། །གོས་བཟང་མང་སྤྱག་འབོགས་ཏོ་ནི། །སེར་པོ་བྱས་འདུག་དེ་ཕུད་ནས།།གཟིམ་ཞུ་གྱོན་གྲབས་བྱས་པ་དང་། །ཡུངས་ཀར་བཏབ་པ་སྒོ་ང་རྒྱས། །ལོ་ཏོག་ལྗང་ལྡེབ་ལེགས་པ་དང་། །སྲུག་ཟན་ཆེན་པོ་མདུན་དུ་དྲངས། །ལོ་ལེགས་གསེབ་ཕྱིན་བརྔ་རན་ཟིན། །ཁང་པ་རྩྭ་ནི་སྐྱ་སྔོས་གང་། །དཔོན་རིགས་ཆས་བཟང་དགའ་ཞིང་འདུག །ལོ་ལེགས་ཚར་མ་ཆེན་པོ་ཚར། །སྙེ་མ་བླངས་ཏེ་འབྲུ་རྒྱས་མཐོང་། །ཉིས་འབུམ་གཅིག་སྟོང་ཞག་ཉེར་གཅིག །རིལ་བུ་སྟོང་དང་ཉིས་བརྒྱ་བསྲེགས། །བུད་མེད་རྒྱན་ལྡན་ཕྱག་འཚལ་དང་། །རྟ་ནི་མང་པོ་བདག་བྱས་དང་། །དེ་ལྟར་ཤམ་བུ་དེ་ཉིད་ལ། །སུམ་འབུམ་ངེས་པར་སོང་བའོ། །ཡང་ནི་ཞག་བདུན་ངག་མཚམས་བསྡམས། །དེ་ཉིད་དྲུག་ཁྲི་བཞི་སྟོང་བཟླས། །འཐོར་བསྙེན་བཞི་ཁྲི་དང་བསྡོམས་པས། །བཞི་འབུམ་བཞི་སྟོང་ཐེམ་པ་སྟེ། །བཟང་ཇའི་ཁོག་གཟུགས་ཆུང་ངུ་ཞིག །བུག་དཀར་སྒོ་ནས་དངོས་སུ་བླངས། །ཇ་གདར་འགའ་ཞིག་ཚགས་བྱས་དང་། །མར་དཀར་ཕུལ་དང་སྡེར་ཆེན་གཉིས། །ཁ་མཆུ་བདག་གི་བར་བྱས་དུམ། །མར་ངོ་དམར་པོའི་ཆུ་སྦྱིན་བཏང་། །དུས་ངན་
མུག་ཆེན་སྐབས་ཡིན་ཏེ། །ཞིག་དྲུག་སྟེང་ནས་ཁ་དྷེ་འདུ། །གནམ་གང་རིལ་བུ་བཞི་བརྒྱ་བསྲེགས། །ཡར་ངོར་བརྒྱ་རེ་ཆག་མེད་བསྲེགས། །དེ་དག་དམར་པོ་ཁོ་ན་འོ། །དེ་དག་རྣམས་ཀྱི་བར་སྐབས་སུ། །འཐོར་བསྙེན་འབུམ་ཕྲག་མང་ཞིག་སོང་། །དེ་སྔོན་དེ་ཡི་བར་མཚམས་སུ། །ཞག་པོ་བཅོ་ལྔ་ངག་མཚམས་བྱས། །རྣམ་སྲས་སེར་པོ་འབྲུ་བརྒྱད་ཀྱི། །གསང་གཏོར་སྒྲུབ་པའི་རྨིས་ལྟས་ནི། །བཙུན་པ་ཞིག་གིས་འབྲུ་ཕུལ་དང་། །ཁྱེ་འུ་གཞོན་ནུའི་ཇ་ཞུས་དང་། །བུད་མེད་རྒྱན་ལྡན་འོ་མ་དྲངས། །ཡུལ་དཔོན་གུས་པས་དྲུང་འདུག་དང་། །ཁྲོམ་དང་བུད་མེད་ནས་མང་ཕུལ། །བུད་མེད་གུས་འདུག་རྔ་བརྡུང་དང་། །ནམ་མཁར་འོད་དམར་འཁྱུག་པ་དང་། །ནགས་ཚལ་དཔག་ཏུ་མེད་པ་ལ། །ནམ་མཁའ་བར་སྣང་གང་བ་ཡིས། །མེ་ཆེན་རབ་ཏུ་མཆེད་པ་དང་། །ཁང་བཟང་ནང་དུ་བདེ་གནས་དང་། །འདུ་བ་ཡང་ནི་བག་ཙམ་སྟེ། །བདུན་འབུམ་བདུན་སྟོང་ལྷག་ཙམ་སྟེ། །ཡང་ནི་ཞག་བདུན་ངག་མཚམས་བསྡམས། །རྣམ་སྲས་སེར་ཆེན་མན་ངག་དང་། །གསང་སྒྲུབ་གསེར་གཡུའི་དབྱེ་བ་བསྙེན། །སྔགས་ནི་དྲུག་ཁྲི་ཉིས་སྟོང་བཟླས། །བསོད་ནམས་མིང་ཅན་
དཔོན་ཆེན་འདི། །གོས་སྔོན་ཅན་དང་བཙུན་ཆེན་བྱུང་། །དཔོན་རིགས་ཁྱེའུར་ཆོས་བཤད་བྱས། །ཚོང་དཔོན་ཕྱུག་པོའི་རང་ཉིད་ལ། །བསྐུར་བའི་བ་མན་ཞིག་འདུག་པ། །མཚར་སྣང་བྱས་ཤིང་དེ་ལ་བལྟས། །རང་དང་ཐབས་གཅིག་ཡིན་པ་ལ། །མི་འགས་གསོལ་ཇ་ཡིན་ཟེར་ནས། །ཐུམ་པོ་འགའ་དང་ཇ་མར་འགའ། །སྐྱེས་པ་བུད་མེད་འགའ་རེ་ཡི། །ཁྱེར་བྱུང་རང་གི་དྲུང་དུ་བཞག །ཇ་ཁག་གསུམ་དང་ཇ་སིལ་འགའ། །ཉོས་པ་ཡིན་སྙམ་ཚག་བྱས་རྨིས། །ཤིན་ཏུ་གོད་ནས་ཆེ་སྐབས་ཏེ། །རྟེན་འབྲེལ་འདུ་བར་ལེགས་པར་བྱུང་། །འཐོར་བསྙེན་དྲུག་ཁྲི་བདུན་སྟོང་དང་། །གསུམ་ཀ་བསྡོམས་པས་འབྲུ་བརྒྱད་ལ། །བརྒྱད་འབུམ་དྲུག་ཁྲི་ལྷག་ཙམ་སོང་། །སེར་པོའི་སྒྲུབ་པ་ལན་གསུམ་སྟེ། །རྗེས་ནས་ཁ་གསོ་ལན་གཅིག་སྟེ། །གནམ་ཆོས་དང་ནི་གཏེར་གསར་གྱིས། །སྦྲེལ་བའི་སྒྲུབ་པ་ཞག་འགའ་ཙམ། །དེ་མིན་སྒྲུབ་པ་དེ་རྣམས་ཀུན། །རང་ལོ་སོ་དྲུག་ཕན་ཆོད་དེར། །ན་སོ་གཞོན་པའི་གཞོན་སྐྱོན་གྱིས། །གཞོན་སྙིང་ཁྲག་ལང་འདྲ་བར་སོ། །དེ་ནས་བཟུང་སྟེ་ཚེ་འདི་ཡི། །དཔལ་འབྱོར་མངའ་ཐང་འདོད་པ་ཆུང་། །འདི་ལས་ཕྱི་མ་
གལ་ཆེ་ཞིང་། །དེ་ཡང་ཐེག་དམན་མ་ཡིན་པར། །བླ་མེད་བྱང་ཆུབ་ཐོབ་འདོད་པའི། །ཐུགས་རྗེ་ཆེན་པོ་ལ་སོགས་པའི། །མཆོག་སྒྲུབ་རྣམས་ལ་འབད་པར་བྱས། །སྔོན་གྱི་ལོ་རྒྱུས་འདི་ལྟ་སྟེ། །ས་སྐྱ་གྲགས་པ་རྒྱལ་མཚན་གྱིས། །ཚོགས་བདག་སྒྲུབ་ནས་ཞལ་གཟིགས་ཏེ། །ཁོང་ལ་དངོས་གྲུབ་ཀྱང་མ་བྱུང་། །དངོས་གྲུབ་ཚ་བོའི་དུས་འབྱུང་གསུངས། །ཚ་བོ་ཆུང་བ་ཆོས་རྒྱལ་འཕགས། །རྒྱ་ནག་རྒྱ་པོའི་བླ་མར་གྱུར། །ནུབ་མ་གཅིག་གི་དབང་ཡོན་ལ། །བོད་ཡུལ་ཁྲི་སྐོར་བཅུ་གསུམ་ཕུལ། །སྔགས་འཆང་རེ་ནི་སྐྱབས་ཞེས་པ། །རཏྣའི་གཏེར་ཁ་ལས་བྱུང་བའི། །དབང་ཕྱུག་ལན་བརྒྱད་རྟགས་ཐོན་བསྒྲུབས། །ཁོང་རང་ཉིད་ལ་དངོས་གྲུབ་ནི། །ཅུང་ཟད་ཙམ་ཡང་མ་བྱུང་སྟེ། །བུ་གཉིས་ཡོད་པ་གནས་ཆེན་པས། །ཕྱུག་ཅིང་བཙན་དྲག་ལྡན་པ་བྱུང་། །དགེ་སློང་ཞིག་གིས་འཛམ་དཀར་བསྒྲུབས། །ཁོང་ལ་དངོས་གྲུབ་མ་བྱུང་སྟེ། །ཚ་བོའི་རིང་ན་གནས་ཆེན་པ། །བཀའ་འགྱུར་བཞེངས་པའི་ཡོན་བདག་བྱུང་། །དེ་བཞིན་ནོར་ལྷའི་རིགས་རྣམས་ཀུན། །དངོས་གྲུབ་སྒྲུབ་མཁན་དེར་མི་འབྱུང་། །རིགས་རྒྱུད་དམ་ནི་སློབ་བརྒྱུད་ལ། །དངོས་གྲུབ་འབྱུང་བ་ཡིན་
ནོ་ཞེས། །སྔར་ནས་ཀུན་གྱི་སྨྲ་སྲོལ་སྣང་། །དེ་ཕྱིར་བདག་གི་རིགས་རྒྱུད་དང་། །ཆོས་བརྒྱུད་ངེས་པར་འཛིན་རྣམས་ཀྱིས། །སྒྲུབ་པ་ལ་སོགས་མ་ཐོན་ཀྱང་། །རྣམ་སྲས་སེར་དམར་གཉིས་པོ་ལ། །ལས་བྱང་རྒྱུན་ཁྱེར་མ་ཆག་དང་། །ཉ་མཚམས་བརྒྱད་དང་ནམ་སྐབས་དུས། །བསྐང་གསོལ་མཆོད་པ་གཟབ་བྱས་ན། །ཁ་དབང་ལག་ཞྭ་མི་འབྱུང་ཞིང་། །དཔལ་འབྱོར་ལོངས་སྤྱོད་ཤུགས་ཀྱིས་འཕེལ། །ཕྱི་རབས་ང་ཡི་རྗེས་འཇུག་ལ། །བན་རྒན་བཞག་པ་མི་ཆུང་སྙམ། །གལ་ཏེ་དཔལ་འབྱོར་ཆེ་སྲིད་ན། །དཀོན་མཆོག་མཆོད་ལ་བློ་སྟོབས་བསྐྱེད། །དེ་ཡང་རིགས་རྒྱུད་ཆོས་བརྒྱུད་ལ། །ཆགས་ཞེན་ཆེ་བའི་རྨོངས་གཏམ་མིན། །བཅོམ་ལྡན་ཤཱཀྱ་ཐུབ་པ་དེ། །རྫོགས་སངས་རྒྱས་པ་མ་སྔ་ན། །འཁོར་ལོས་སྒྱུར་རྒྱལ་ལྔ་བརྒྱ་རུ། །སྐྱེ་བའི་བསོད་ནམས་བསགས་ཚར་བ། །རྫོགས་སངས་རྒྱས་སྔ་མ་མཁོ་བས། །ཉིད་ཀྱི་རྗེས་འཇུག་ཉན་ཐོས་རྣམས། །འཚོ་བ་ཕུལ་བའི་ཆེད་དུ་བསྔོས། །དེ་ཕྱིར་ཚུལ་ཁྲིམས་ལེགས་བསྲུངས་ན། །མུ་ཏིག་འབྲས་གཉིས་མཉམ་བརྗེ་ནི། །བྱེད་པའི་མུ་གེ་བྱུང་གྱུར་ཀྱང་། །ཐུབ་པའི་རྗེས་འཇུག་རབ་བྱུང་རྣམས། །
འཚོ་བས་ཕོངས་པར་མི་འགྱུར་གསུངས། །དེ་བཞིན་ང་ཡི་རྗེས་འཇུག་རྣམས། །རྒྱལ་བ་རྒྱ་མཚོའི་ཟིན་བྲིས་སོགས། །ང་ཡིས་བཤད་པའི་ཆོས་དེ་དག །ཇི་ལྟ་བ་བཞིན་ཉམས་བླངས་ན། །འཚོ་བས་ཕོངས་པར་མི་འགྱུར་སྙམ། །དེ་ཡང་ཚེ་གཅིག་ལུས་གཅིག་ལ།། །བླ་མེད་བྱང་ཆུབ་སྒྲུབ་པ་ནི། །ནོར་ལྷ་ལ་སོགས་མི་བསྒྲུབ་སྟེ། །བསྒྲུབས་ན་ཟང་ཟིང་ལོངས་སྤྱོད་འཕེལ། །དེ་ལ་ཡེངས་ཤིང་ཆགས་པ་ཡིན། །བྱང་ཆུབ་སྒྲུབ་པའི་གེགས་སུ་འགྱུར། །ལྷ་ཡི་བུ་ཡི་བདུད་ཡིན་གསུངས། །དེ་ཕྱིར་འབྲུག་ལུགས་ཕལ་ཆེར་ནི། །ཛམ་ལྷའི་ཆུ་སྦྱིན་མི་མཛད་སྐད། །གནོད་གནས་དབང་པོའི་རྟོགས་བརྗོད་ལ། །སྔོན་ཚེ་བཅོམ་ལྡན་ཤཱཀ་ཐུབ་ཀྱང་། །དང་པོ་ཤིང་ཐུན་དབུལ་པོར་སྐྱེས། །ཛམ་བྷ་ལ་སྒྲུབ་རྒྱལ་པོར་གྱུར། །སྦྱིན་བཏང་སྦྱིན་པའི་ཕར་ཕྱིན་རྫོགས། །རབ་ཏུ་དགའ་བའི་ས་ཐོབ་གྱུར། །དེ་བཞིན་སངས་རྒྱས་ཐམས་ཅད་ཀྱང་། །དང་པོ་ཛམ་བྷ་ལ་བསྒྲུབས་པས། །ལོངས་སྤྱོད་ལྡན་ཞིང་སྦྱིན་པ་བཏང་། །སྦྱིན་པའི་ཕ་རོལ་ཕྱིན་པ་རྫོགས། །དེ་ཡི་དང་པོའི་ས་ཐོབ་པས། །ཛམ་ལྷ་སངས་རྒྱས་ཀུན་གྱི་ཡབ། །འདི་མཆོད་སངས་རྒྱས་ཀུན་མཆོད་འགྱུར། །
མདོར་ན་ཡབ་ནི་རྣམ་ཐོས་སྲས། །ཡུམ་ནི་ལྷ་མོ་ནོར་རྒྱུན་མ། །སྲས་ནི་ཛམ་ལྷ་རིགས་དགུ་སྟེ། །རིགས་དགུ་ཐམས་ཅད་ངོ་བོ་གཅིག །དེ་རྣམས་དོན་ལ་སངས་རྒྱས་དངོས། །ནོར་ལྷའི་སྐུ་རུ་བཞེངས་ཙམ་སྟེ། །ཐུན་མོང་དངོས་གྲུབ་བསྒྲུབས་ན་ཡང་། །མཆོག་གི་དངོས་གྲུབ་ཞོར་ལ་འགྲུབ། །དེ་ཕྱིར་ལྷ་བུའི་བདུད་ཡིན་སོགས། །སྐུར་པ་འདེབས་པ་མི་རུང་སྟེ། །ཛམ་ལྷའི་ཆུ་སྦྱིན་མ་བཏང་ན། །ང་ཡི་ཉན་ཐོས་མིན་ནོ་ཞེས། །ཐུབ་པའི་དབང་པོས་བཀག་པ་མཛད། །དེ་ཕྱིར་ཞག་བདུན་ངག་མཚམས་བཅད། །ཛམ་དཀར་གཅིག་འབུམ་བརྒྱད་ཁྲི་ལྷག །བསྙེན་ཚེ་ཁྱིམ་བདག་ཕྱུག་པོ་ཞིག །སྣུམ་བག་ལྡན་པ་སྒྲོ་བ་གང་། །ཁྱེར་ནས་བདག་ལ་འབུལ་རྒྱུ་བྱུང་། །རྔ་བཟང་བརྡུང་དང་སིལ་ཆལ་རྡེབ། །ཤིན་ཏུ་སྐད་སྙན་དྲིལ་བུ་འཁྲོལ། །ཆར་པ་བབ་སོགས་རྨིས་ལྟས་བྱུང་། །ཡང་ནི་ཛམ་དཀར་གསང་སྒྲུབ་ལ། །གཙོ་བོ་མ་ཡིན་ཞོར་བསྒྲུབས་བྱས། །ཆར་དྲག་ཆེན་པོ་བབ་པ་དང་། །རང་མདུན་རི་ཡི་སྟེང་ནས་ནི། །ཆེར་པའི་ཆུ་ཕྱར་སྔོ་སི་ལི། །ཆུ་ཆེན་ཙམ་དུ་རང་མདུན་བབ། །རྟ་དྲེལ་མང་པོ་བདག་བྱེད་དང་། །ལོ་ཏོག་ལེགས་རྒྱས་སྙེ་མ་
བཏུས། །རང་ཉིད་རྒྱལ་པོར་གྱུར་བསམ་རྨིས། །ཡང་ནི་ཛམ་དཀར་ཞོར་བསྙེན་ནི། །ལྔ་བརྒྱ་ཙམ་རེ་ཆག་མེད་དང་། །གཏོར་བསྔོས་ཆུ་སྦྱིན་མ་ཆག་ཙམ། །རྣམ་པར་མི་རྟོག་པ་ཡི་སྔགས། །ནུབ་མོ་ཕྲེང་སྐོར་ཙམ་བཟླས་སྐབས། །བླ་ཆེན་དཔོན་སྐྱ་མང་པོ་བྱོན། །རང་ལ་གུས་ཚུལ་ཕྱག་རྩེ་སྤྱོད། །བྱས་ཤིང་ཁྲབ་སོགས་དགུ་ཚན་གནང་། །དངོས་སུ་རིམ་གྱིས་རྟེན་འབྲེལ་བཟང་། །འདི་ཉིད་ཟབ་པའི་ངེས་ཤེས་ཐོབ། །ཞག་གྲངས་ཉེར་གཅིག་ཕྱི་སྒྲུབ་དང་། །དེ་ནས་ནང་སྒྲུབ་ཞག་བདུན་དང་། །དེ་ནས་གའུ་རྒྱས་པར་བཅས། །ཟླ་བ་གཅིག་གི་བར་དུ་ནི། །ཕྲེང་སྐོར་གཉིས་གསུམ་མོ་ཆག་པར། །ཆུ་སྦྱིན་གཏོར་བསྔོས་བཅས་པ་བྱས། །རྨི་ལམ་ཕལ་ཆེར་ཡང་ཡང་བབ། །ལྷ་ཁང་ཞིག་གི་གློ་འབུར་ན། །བདག་གིས་བཞེངས་པ་ཡིན་བསམ་པའི། །ཛཾ་དཀར་འདག་སྐུ་མདའ་ཚད་ཙམ། །ཤིན་ཏུ་བྱོན་ལེགས་གཙོ་འཁོར་ལྔ། །དེ་དྲུང་མགར་དམར་སྐུ་དང་བཅས། །སྦས་ནས་བཞག་འདུག་མཇལ་བ་དང་། །དེ་མ་ཐག་ཏུ་ཚུར་འོང་པས། །འབྲུ་དང་རིན་ཆེན་ཟངས་ལྕགས་ཀྱིས། །ཆར་པ་བབ་པ་ཡིན་སྙམ་བྱས། །རྟ་གཅིག་བཙོང་བའི་རིན་ཡིན་སྙམ། །སྲུག་དང་
འབྲུ་མང་བདག་པོ་བྱས། །དེ་ནས་ཛམ་ནག་ཞོར་སྒྲུབ་ལ། །ཡི་གེ་བཅུ་པ་སྟོང་རེ་ཙམ། །ངག་མཚམས་ངག་ནས་ཞོར་བསྒྲུབས་ཡིན། །དེ་ནས་ཞག་བཅུར་ངག་མཚམས་བསྡམས། །ཡི་གེ་བཅུ་པ་སུམ་འབུམ་ལྷག །དྲེལ་ཕྲུག་བྱུང་དང་དྲེལ་འཚོ་དང་། །རྟ་སྔོན་ཞོན་དང་རྟ་སྒ་བདག །དྲེལ་ཕྲུག་བདག་བྱས་རུམ་པ་དང་། །དཔོན་ཆེན་ཕྱུག་པོ་ཆས་བཟང་ནི། །རང་གི་དྲུང་དུ་ཡང་ཡང་བྱུང་། །རང་ཉིད་འཁོར་བཅས་ཆས་གོས་བཟང་། །རྩེ་ཞྭ་སེར་པོ་གྱོན་ཕྱིན་པས། །སྡེ་ཆེན་དཔོན་ཆེན་ཆས་བཟང་ཞིག །བྱུང་བས་དབུ་གཏུག་དགའ་དགའ་མཛད། །བྲག་དཀར་བཙན་པོའི་སྟེང་ཉིད་དུ། །སྤང་ནི་ཤིན་ཏུ་སྐྱིད་པའི་སྟེང་། །རང་གི་གཟིམས་ཁང་གསར་པ་བྱས། །རང་ཉིད་རྩེ་ཞྭ་གོས་ཀུན་བཟང་། །ཟླ་གམ་སེར་པོ་བཟང་པོ་གྱོན། །རྟ་ཞོན་རྟ་ནི་བཟང་པོ་གསུམ་བཞི་དེད། །བླ་ཆེན་ཞིག་དང་འགྲོགས་འོང་བས། །སྐྱ་འོང་གོས་ལག་གང་ས་ནས། །ཁོང་བས་ང་རང་བཟང་འདུག་སྙམ། །གདན་གཅིག་བཏིང་བའི་སྟེང་དུ་ནི། །རང་ཉིད་ཆས་གོས་ཤིན་ཏུ་བཟང་། །པད་ཞྭ་སྔོན་པོ་དྲུང་དུ་བཞག །ལུང་ཐང་ཕྲེང་བ་གཉིས་ཀྱང་གནང་། །བླ་ཚུགས་བཟུང་སྟེ་
འདུག་པ་ལ། །བུད་མེད་ཆོས་བཟང་གཉིས་བྱུང་ནས། །རིང་ལ་གུས་པས་ཕྱག་འཚལ་ནས། །དངོས་སུ་སྒྲུབ་ཁང་གཡས་གཡོན་དུ། །འཇའ་ཚོན་ལན་གསུམ་ཤར་བ་བྱུང་། །དེ་ནས་ངག་ནི་མ་བཏང་བས། །ཞག་གསུམ་ཉི་མ་བཞི་ཡི་བར། །ཡི་གེ་ལྔ་པ་བསྙེན་པ་བྱས། །ཕྱུག་པོ་ཤིས་པའི་མིང་ལྡན་པའི། །གོས་ཡུག་དམར་པོ་བཟང་པོ་ཕུལ། །ཁལ་ནི་དྲུག་བདུན་འགྲོ་ཙམ་གྱིས། །ཕྱི་ནས་འབོམ་གྱི་གཟུགས་ཅན་གྱི། །ནང་ནི་སྟག་སྒོ་འདྲ་བ་ཡིས། །རང་གི་ཡིན་སྙམ་ནས་ཀྱིས་བཀང་། །བུད་མེད་མང་པོས་ནས་ཕུལ་བ། །བསྔོ་བའི་རྒྱས་འདེབས་ལེགས་པར་བྱས། །ནས་ཐུམ་ལྔ་དྲུག་ཙམ་ཞིག་དང་། །གཞན་ཡང་ཐུམ་པོ་མང་པོ་འགའ། །རང་གི་ཡིན་སྙམ་བཀལ་གྲབས་བྱས། །བོང་བུ་ཤིང་བཀལ་མང་པོ་རྨིས། །དངོས་རྟགས་རི་བོང་ར་དང་འདྲ། །ཡི་གེ་ལྔ་པ་གཅིག་འབུམ་ལྷག །ཆུ་སྦྱིན་ལ་སོགས་ཟླ་ཁ་བསྐང་། །ཡང་ནི་གཞུང་ལྟར་ཞག་པོ་གསུམ། །ཀློང་གསལ་ཛམ་ལྷའི་སྒྲུབ་པ་ཡི། །གསང་སྒྲུབ་ཛམ་ནག་ཞག་གསུམ་བསྙེན། །རང་གི་ཁྱིམ་ཕུག་མཆོད་བཏེག་ཙར། །ཕུག་པ་འདྲ་བ་ཅིག་གི་ནང་། །མཚོ་ནི་སྒྲུབ་ཁང་མལ་ཙམ་ཞིག །འཕེལ་འགྲིབ་མེད་
པའི་ཁྲོན་ཆུང་སྣང་། །དེ་ཉིད་སྐད་ཅིག་ཙམ་ལ་ཆེར། །མི་ཤོང་ཙམ་དུ་ལུད་ནས་ཀྱང་། །ཡུར་བ་གཅིག་ནས་འབབ་པ་ལ། །ཆུ་ཡི་ཁ་དོག་སྔོན་པོ་སྟེ། །དེ་ནང་ཁྲུང་ཁྲུང་དཀར་མོ་འགའ། །གཤོག་སྒྲ་དང་བཅས་འཕུར་འབབ་བྱེད། །རང་ལ་ཇ་ཞུས་བྱུང་བའང་རྨིས། །དེ་ནས་ཞག་གཅིག་སྤོག་ཆོག་བྱས། །ཆུ་ཆེན་གཅིག་ལ་གཟིངས་བཅས་དང་། །རྟ་བཟང་ཞོན་ནས་རྒྱུག་པ་དང་། །རྨི་ལྟས་གཞན་ཡང་ཤིན་ཏུ་བཟང་། །སྒྲུབ་སྔགས་གཅིག་ཁྲི་བཞི་སྟོང་ལྷག །སྤོག་ཆོག་ལྔ་སྟོང་ལྷག་ཙམ་བཟླས། །མངྒ་ལཾ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།