དགེ་སློང་རཱ་ག་ཨ་སྱའི་ཡང་གསང་རྣམ་ཐར་དུམ་བུ་ཆུང་ངུའི་དུས་ནས་ཕ་མེས་རྒྱུད་ལྷ་བརྟེན་པའི་ལོ་རྒྱུས།
༄༅། །དགེ་སློང་རཱ་ག་ཨ་སྱའི་ཡང་གསང་རྣམ་ཐར་དུམ་བུ་ཆུང་ངུའི་དུས་ནས་ཕ་མེས་རྒྱུད་ལྷ་བརྟེན་པའི་ལོ་རྒྱུས་བཞུགས་སོ།།
༄༅། །ན་མོ་གུ་རུ་བཛྲ་པཱ་ཎི་ཡེ། བླ་མ་གསང་བའི་བདག་པོ་ལ་ཕྱག་འཚལ། །འོག་མིན་འཐུག་པོ་བཀོད་པའི་ཞིང་ཁམས་ནས། །སངས་རྒྱས་རྣམ་པར་སྣང་མཛད་ཆེན་པོ་ཡི། །ཐུགས་ཀྱི་དགོངས་པ་སྟོང་ཉིད་བཅུ་དྲུག་ལས། །སེམས་དཔའ་བཅུ་དྲུག་སྤྲུལ་པ་དེ་ཡི་ནང་། །རྡོ་རྗེ་རིགས་ཀྱི་སེམས་དཔའ་སྐུ་མདོག་ལྗང་། །དེ་ཡི་སྟོབས་དང་རྫུ་འཕྲུལ་མཐའ་ཡས་པས། །དེ་ལ་སངས་རྒྱས་ཀུན་གྱི་ལེགས་སོ་གསུངས། །རྡོ་རྗེ་ལེགས་པ་ལྗང་ཁུ་སེ་གོལ་ཏོག །རྡོར་དབྱིངས་ལ་སོགས་དཀྱིལ་འཁོར་རྩ་བའི་ལྷ། །དེ་ཡི་སྤྲུལ་པ་སྲིན་ཡུལ་མ་ལ་ཡར། །ཕྱག་ན་རྡོ་རྗེའི་བཀའ་སྡོད་ཕོ་ཉ་
སྟེ། །གསང་སྔགས་དཀྱིལ་འཁོར་ཀུན་གྱི་སྲུང་མ་མཛད། །རྗེ་གཅིག་ཉག་གཅིག་རྡོ་རྗེ་སྲིན་པོ་དང་། །བཛྲ་ཐིག་ལེ་རྩལ་ཞེས་གསང་བའི་མཚན། །དེ་དང་དོན་གཅིག་རྟ་མགྲིན་ཐུགས་སྤྲུལ་ནས། །རྒྱ་གར་ནུབ་ཕྱོགས་ཕ་ཝང་ལོང་བུ་ན། །ཡི་དྭགས་བཙན་གྱི་རྒྱལ་པོའི་སྐུ་སྤྲུལ་པ། །ཐུབ་པའི་ཞལ་མཐོང་ཕྱག་ན་རྡོ་རྗེ་ཡིས། །དམ་བཏགས་དབང་བསྐུར་མགར་བ་ནག་པོར་གྲགས། །དེ་དང་དོན་གཅིག་གངས་ཅན་བོད་ཀྱི་ཡུལ། །གཙང་གི་ཤངས་དང་འོ་ཡུག་འདུས་མཚམས་སུ། །བཞུགས་ཚེ་གཙང་བཙན་མགར་དམར་རྡོ་རྗེ་ལེགས། །ཨོ་རྒྱན་ཆེན་པོ་པདྨ་འབྱུང་
གནས་ཀྱི། །གཏེར་ཁ་བརྒྱ་ཡི་སྲུང་མར་བསྐོས་པའི་ཕྱིར། །རང་རེ་གཏེར་ཆོས་ཉམས་སུ་ལེན་མཁན་རྣམས། །བཀའ་སྲུང་གཙོ་བོ་འདི་ཉིད་ཡིན་པར་གོ །ཁྱད་པར་པདྨ་ང་ཡི་རྗེས་འཇུག་དང་། །གཏེར་གྱི་བརྒྱུད་པ་རྣམས་ལ་སྐྱེས་བུ་འདི། །ལུས་དང་གྲིབ་བཞིན་སྡོང་གྲོགས་བྱེད་དོ་གསུངས། །ཆོས་རྗེ་དེ་བཞིན་གཤེགས་པས་མཁའ་སྤྱོད་པར། །ཁྱོད་ཀྱི་མི་རབས་མི་རྒྱུད་ཐམས་ཅད་ཀྱིས། །ཕྱག་བཞི་པ་དང་མ་མགོན་མགར་གསུམ་གྱི། །བསྐང་གསོ་སྔགས་རྒྱུན་ལ་སོགས་ཚུགས་པ་ན། །བཀྲ་ཤིས་དགེ་ལེགས་འབྱུང་ཞེས་ལུང་བསྟན་མཛད། །མཁའ་སྤྱོད་པ་ལ་མགར་བ་ནག་པོ་ཡིས། །ཁྱོད་ཀྱི་བརྒྱུད་པ་མི་རབས་བཅུ་གསུམ་བར། །གཏོར་མ་བྱིན་དང་བསྟན་པ་ངས་བསྲུང་ཞེས། །ཁས་བླངས་དམ་བཅའ་མཛད་ཅེས་ཡོངས་སུ་གྲགས། །དེ་ཡི་ཚ་བོ་དྲུང་པ་བྱ་བྲལ་པ། །ཕ་གཅིག་བུ་གཅིག་ཡིན་པས་མི་རྩ་ཕྲ། །ཕ་སྤུན་རྣམས་ལ་ཞེ་ཟོན་དགོས་པ་བྱུང་། །སྐྱེས་བུ་སྒྲུབ་ན་མི་རྒྱུད་འཕེལ་གསུངས་ཕྱིར། །སྒྲུབ་ཁང་ཕ་ཝང་ལོང་བུའི་དབྱིབས་སུ་བརྩེགས། །སྒྲུབ་གནས་སྒྲུབ་བརྟེན་ར་སྐྱེས་རྩེན་པ་ལ། །རྭ་ཅོ་སྐར་ཁུང་སུམ་བརྩེགས་ལྡན་པ་ཡི། །རྭ་ཅོ་རེ་ལ་མཐོ་བདུན་
ཡོད་པ་སྐྱེས། །གཡོག་པོ་ཅུང་ཞིག་སྤྱོད་པ་མ་གཙང་བར། །ར་དེས་བརྡུངས་པས་གཡང་ས་ཆེན་པོར་འཕངས། །གཡོག་པོ་ཆག་གྲུག་མ་བྱུང་མ་ཤི་བས། །རྟེན་རྫས་ར་དེས་གྲུབ་རྟགས་བཞག་པར་གྲགས། །སྲས་པོ་གཉིས་བྱུང་དཔའ་རྩལ་བཙན་དྲག་ལྡན། །མི་རྒྱུད་འཕེལ་བས་ཨ་ནུ་ཁལ་གཅིག་དང་། །བྲེ་བཞི་ཡོད་ཅེས་བྱ་བ་དེ་ནས་བྱུང་། །ཐམས་ཅད་ཀུན་ལ་དམ་ཅན་འཁོར་ཞེས་གྲགས། །དྲག་རིམ་རྣམས་ཀྱིས་གསོལ་ཁ་དར་ན་ཡང་། །ཕལ་ཆེར་རྣམས་ཀྱིས་མཛུབ་མགོ་མཆོད་པའང་མེད། །འོན་ཀྱང་དམག་ཇག་ལ་སོགས་གལ་ཆེན་དུས། །མངོན་རྒྱུག་འདྲ་བ་བྱུང་བའི་ལོ་རྒྱུས་མང་། །མཁའ་སྤྱོད་པ་ལ་ཁས་བླངས་དོན་ཡིན་སྐད། །མཁའ་སྤྱོད་པ་ཡི་མགར་དམར་ཞལ་གཟིགས་དུས། །ངོམ་པའི་ས་ཆ་ཐམས་ཅད་མགར་དམར་གྱི། །སྐུ་ཡིས་ཁྱབ་པ་གཅིག་ནི་ཞལ་གཟིགས་པས། །ངོམ་གྱི་ས་ཆ་འདི་ལ་དམ་ཅན་གནས། །ཕྱུག་པོ་རྣམས་དང་དྲག་རིམ་དུད་རྣམས་ཀྱིས། །དཀོར་བདག་དམ་ཅན་ཡིན་ཟེར་གསོལ་ཁ་དར། །ཆབ་མདོ་གླིང་སྟོད་ངོམ་བན་མང་བའི་ཕྱིར། །གླིང་སྟོད་པ་ལ་དམ་ཅན་ཡོད་ཅེས་གྲགས། །ངོམ་ནས་སྤུ་བོའི་ཕྱོགས་སུ་
འགྲིམ་སོང་ན། །དམ་ཅན་རྗེས་སུ་འབྲང་ཕྱིར་དངུལ་བཞུ་གནོད། །དེ་ཕྱིར་དམ་ཅན་མགྱོགས་སམ་གསོལ་ཀ་དགོས། །དེ་ཕྱིར་འདི་ནི་ཕ་མྱེས་རྒྱུད་ལྷ་ཡིན། །ཁོ་བོ་ལོ་གྲངས་བརྒྱད་དམ་དགུ་ཡི་དུས། །སྔགས་རྒན་བཀྲ་ཤིས་དབང་ཕྱུག་མཇལ་དུ་ཕྱིན། །བདག་ནི་སྔགས་པ་ཚད་ལྡན་བྱེད་བསམ་པས། །བཀའ་སྲུང་གཟའ་དང་དམ་ཅན་སུ་དགའ་ཞུས། །གཟའ་ནི་རྩུབ་དྲག་ཁྱོད་ཀྱིས་མི་ནོན་པས། །དམ་ཅན་གྱིས་དང་དགའ་གསུངས་ལུང་ཡང་བསྟན། །བྱིས་སྦས་དེ་ཙམ་ཞུ་ཤེས་བསམ་ཤེས་ཤིང་། །སྔགས་རྒན་དགུང་ལོ་བརྒྱད་ཅུ་ལོན་པ་དེས། །དོན་གཏམ་གསུངས་པ་དེ་ཡང་ངོ་མཚར་ཆེ། །དེ་ནས་རང་ལོ་བཅུ་དྲུག་ཙམ་གྱི་དུས། །གུ་རུ་ཞི་དྲག་རྟ་མགྲིན་ཕྱག་བཞི་པ། །དེ་དག་རྣམས་ཀྱི་བསྙེན་པ་ལེགས་པར་འགྲུབ། །ད་ནི་བདག་གིས་དམ་ཅན་སྒྲུབ་འདོད་ཅེས། །སློབ་དཔོན་ལ་ཞུས་སློབ་དཔོན་འདི་སྐད་གསུངས། །འདི་ཉིད་སྒྲུབ་པས་ལམ་འགྲོ་ཤིན་ཏུ་དཀའ། །རང་རེའི་སྐྱེས་སྤུན་སྡེ་ཕ་ཁྲོམ་ལོད་དེས། །རྟ་མགྲིན་ཡང་ཆུང་ནག་པོ་དུང་ཕྱུར་དང་། །བཛྲ་གུ་རུ་ལ་སོགས་དུང་གཉིས་ཐོན། །དེ་ནས་དམ་ཅན་མགར་ནག་བསྒྲུབས་པ་བྱས། །སྒྲུབ་པ་གྲོལ་ཁ་གློ་བུར་
རྐྱེན་ཞིག་གིས། །མཚམས་ལ་ཧར་འདོན་ཚུལ་དུ་འགྲོ་དགོས་བྱུང་། །སྐར་ཡིག་མ་བལྟས་མཚམས་གྲོལ་བསང་བཏང་བས། །ཉི་མ་ནག་ཆེན་དུས་དང་འཛོམས་ཟིན་པས། །དེ་ནུབ་གྲ་ཁྲི་ནང་དུ་བཞུགས་པ་ལ། །བུ་ཆུང་ཞིག་གིས་གཉའ་ལྟག་ཞོན་ནས་བྱུང་། །ཚ་བོ་རེད་བསམ་ཕར་ལ་འཕང་པ་ཡིས། །ཅོ་རོ་སྔོན་པོ་ཆེན་པོ་ཞིག་ཏུ་གྱུར། །ཁོང་གི་སྟེང་དུ་བརྡུང་བར་བྱུང་བ་ལ། །རྭ་ཅོ་ལ་འཇུས་གྲ་ཁྲིར་ཐོད་པ་གཏུག །ཅོ་རོའི་ང་བརྡུངས་ཁྱིམ་པ་འདིར་ཤོག་ཅེས། །བོས་པས་ཁྱིམ་ཁང་མི་རྣམས་དེར་སོང་བས། །ཅོ་རོ་མི་འདུག་ཁོ་རང་འཁྲུལ་པར་གོ །དེ་མ་ཐག་ཏུ་སོ་ནད་དྲག་པོའི་ཐེབས། །ལང་སྨན་སོ་བར་བརྟེན་པས་རྐྱེན་བྱས་ནས། །ཐུགས་ལ་མི་ཟིན་ཅལ་ཅོར་སྨྲ་བ་བྱུང་། །དེ་ནས་སྐྲངས་པ་འབྱམས་ནས་འདས་རྐྱེན་བྱུང་། །དེ་ཡི་ཚ་བོ་རྟ་མགྲིན་རྒྱལ་གྱིས་ཀྱང་། །རྒྱུན་དུ་རྔ་བརྡུང་བསྙེན་སྒྲུབ་འབད་པ་སྟེ། །དམ་ཅན་འདོན་ནི་མི་ཕོད་ནམ་བཏོན་དུས། །མཚན་མོ་ཁང་པ་ཇོ་འཁོར་ལྟ་བུར་འཁོར། །གཉིད་རྡོར་ཨོ་རད་ཤོར་བ་ཁོ་ན་བྱུང་། །ཁོང་གི་ཁུ་བོ་བཀྲ་ཤིས་དབང་ཕྱུག་དེས། །དམ་ཅན་སྒྲུབ་དགོངས་སྒབ་འདྲེ་མནན་པའི་དུས། །ཁོང་ཡང་གཞོན་
ནུ་ཡིན་པས་མནན་རོགས་བྱས། །མཆོད་རྟེན་ཞིག་གི་འོག་ནས་བརྐོ་བ་ལ། །ཡོལ་བ་བྲིས་ཤིང་མར་མེ་བལྟམས་ནས་བརྐོས། །གྲོང་པས་འབྱམས་པས་མཆོད་རྟེན་ཕད་འདུག་བསམ། །གྲོང་པའི་མི་ཀུན་མཚོན་ཆ་ཐོགས་ནས་བསྐོར། །འབྱམས་པ་མིན་པར་རིགས་ནས་ལོག་སོང་སྐད། །མ་དུམ་པ་ཡི་མི་གཅིག་ཡོད་པ་དེས། །ཁོ་ཡི་ལིང་ག་མནན་པ་རེད་བསམས་ནས། །ཕྱིར་ནངོས་མནན་པ་ཐམས་ཅད་ཡར་བཏོན་ཟིན། །དེ་དུས་ཨ་ནུ་བཀྲ་ཤིས་དབང་ཕྱུག་གིས། །སློབ་མ་བླ་མ་ཞིག་པོ་ཞེས་བྱ་བས། །མདངས་ནི་ང་ཡི་སྟེང་དུ་ཚེ་ཕོ་ཞིག །མཆོངས་ནས་བྱུང་བ་ལག་པས་རེག་པ་ཡིས། །སྤུ་ནི་གཅིག་ཀྱང་མི་འདུག་རྡོ་རེད་ཟེར། །ཡུ་གུ་ཚང་ལ་ཀ་ཆ་ཇེ་སྲབ་འགྲོ། །འཚོ་བ་དཀོན་པོ་འོང་བ་འདྲ་དོ་གསུངས། །བཀྲ་ཤིས་དབང་ཕྱུག་ལ་ནི་དེ་ལྟར་བྱུང་། །འདི་ཡི་སྒྲུབ་པ་ལམ་འགྲོ་དཀའ་གསུངས་ནས། །ང་ཡི་བསྙེན་པ་ཚན་ཆེན་མ་ཐོན་ཀྱང་། །ངེད་རང་གཉིས་ཀས་སྒྲུབ་དང་སྐྱོན་མེད་ཞུས། །འོ་ན་དང་པོ་སྒབ་འདྲེ་མནན་དགོས་པས། །མནོན་དུས་ཁྱི་དཀར་ལྤགས་པ་རྡེབ་དགོས་པས། །དེ་ཡང་མེད་པས་ཨེ་རྙེད་ལྟ་དགོས་གསུངས། །དགུན་སྒང་ཡིན་ཏེ་སྔ་དྲོའི་ལམ་ཞིག་ཏུ།
ཁྱི་དཀར་ཆེན་པོ་གཅིག་ནི་ཤི་འདུག་ཐོས། །ན་སོ་གཞོན་ཀྱང་གྲོགས་མེད་དེ་རུ་སོང་། །ཁྱི་དཀར་བཤས་ཏེ་ལྤགས་པ་མཉེས་ནས་ཕུལ། །བརྩོན་འགྲུས་ཆེ་གསུངས་སློབ་དཔོན་རབ་ཏུ་མཉེས། །སྒྲུབ་རྟེན་དམ་ཅན་སྐུ་འདྲ་རྐང་གང་ཙམ། །རང་གིས་ལག་གིས་བཞེངས་ནས་ཚོན་རྩི་གསོལ། །དེ་ནས་ང་རང་ཕ་ལྷན་མཚམས་བསྡམས་ནས། །ཞག་ནི་བདུན་ནམ་དགུ་ཙམ་ཞིག་གི་བར། །སྒབ་འདྲེ་མནན་པའི་སྔགས་དང་དམིགས་པ་བྱས། །དམར་ནག་གཉིས་ཀའི་སྒབ་འདྲེ་དུས་གཅིག་མནན། །ཁོང་ལ་ཐུབ་རྟགས་མང་ཞིག་བྱུང་འདུག་ཅིང་། །དུད་འགྲོ་ནག་པོ་ཆེན་པོ་ཞིག་འདུག་པར། །བདག་གིས་མདའ་ནི་དམ་པོ་བརྒྱབས་པ་རྨིས། །མནན་པ་གཞན་གྱིས་རློག་ན་མི་ཤེས་དོགས། །ཉེར་དགུའི་ནམ་ཕྱེད་རྐུན་མ་འགྲོ་བ་བཞིན། །ངེད་རང་དཔོན་སློབ་གཉིས་པོ་སོང་ན་ཡང་། །མནན་པའི་རྫས་ལ་མ་སྐྱེད་ཁུར་དགོས་པས། །མ་ཐེག་ཁུར་རོགས་ཨ་ཕ་ཇོ་རུ་ཁྲིད། །མི་དྲན་དགུ་དྲན་མི་དགོས་དགུ་དགོས་ཞེས། །ང་ལ་འབར་ཞིང་འབར་ཞིང་ཁུར་རོགས་བྱས། །གཞུང་ལྟར་མནན་པ་བཞི་ཙམ་སོ་སོར་བྱས། །དེ་ནས་གཞུང་ལྟར་སྒྲུབ་པ་ཞག་བདུན་ལ། །ཡན་ལག་
བཞི་སྔགས་ཞག་པོ་རེ་རེ་སྟེ། །འབོད་སྔགས་འབུམ་ཕྲག་གཅིག་དང་ཡན་ལག་བཞིའི། །སྔགས་ལ་ཁྲི་ཚོ་རེ་སྟེ་བཞི་ཁྲིའོ། །རྨི་ལམ་སྔགས་པ་འགའ་ཡི་གྲལ་ལ་བསྡད། །ང་ཡི་འོག་ནས་སྔགས་པ་ཞིག་ལངས་ནས། །ལུས་ལ་སྐྱེམས་ཕྱེ་མགོ་ལ་ཞྭ་ནག་གྱོན།།ལག་ན་རྡོ་རྗེ་ཐོགས་ཤིང་འཚམས་འདུག་པས། །དམ་ཅན་འདྲ་དོ་ཨ་ལ་ལ་སྨྲས་པས། །བཞད་ནས་བྱུང་བས་མཚལ་མདོག་སྨྲ་ར་ཅན། །མགར་དམར་དངོས་དང་འདྲ་བ་གཅིག་མཐོང་བས། །དེ་ནས་ཞག་བདུན་མགར་དམར་གཏེར་བུམ་བསྒྲུབས། །ལོ་ལེགས་བརྩེས་མ་བྱས་སོགས་བརྡའ་ཙམ་རྨིས། །དེ་དག་རང་ལོ་བཅུ་བདུན་དུས་ཡིན་ཏེ། །དེ་ནས་རྒྱུན་དུ་གཏོར་བསྔོས་གསོལ་ཀ་དང་། །གསུར་མཆོད་ལ་སོགས་མ་ཆག་རྒྱུན་ལྡན་ཏེ། །དེ་དུས་དུད་ཚང་ཞིག་ན་གཏོར་ཟློག་བཅས། །འདོན་པ་བཞག་ནས་ཇོ་རྒྱུན་བྱེད་སར་སོང་། །རྔ་དེ་ལན་གསུམ་དྲག་བརྡུང་བྱས་བྱུང་བས། །ཁྱི་ཡིས་མདོས་གཏོར་ཟོས་སྙམ་ངེད་རྣམས་རྒྱུག །རྔ་ཡང་ཡོ་འགུལ་མེད་པར་ཁྲིག་གེར་གདའ། །ཀུན་གྱི་དམ་ཅན་གྱིས་ནི་བརྡུང་ཟིན་ཟེར། །བཅུ་དགུའི་ལོ་ལ་དབུས་སུ་འགྲོ་ཤོམ་ཚེ། །སྐྱེས་བུའི་ལས་ཚོགས་དོན་འགྲུབ་མི་འགྲུབ་བརྟག །
འགྲུབ་པའི་རྟགས་བྱུང་ཕྱིས་ནས་ཐོག་ཏུ་བབ། །ཉེར་གཅིག་ལོ་ལ་གཙང་དུ་ཕྱིན་པའི་དུས། །མཆོག་གི་སྤྲུལ་སྐུའི་གཟིམས་གུར་སྒོ་དེ་རུ། །མི་གཞོན་གཅིག་ལ་དམ་ཅན་འབབ་ཅིང་སྣང་། །བྲང་ལ་གྲི་དང་མདུང་བཙུགས་རྒྱབ་ཏུ་ཕུད། །དེ་ནས་ལུང་བསྟན་མང་པོ་བྱེད་འདུག་སྟེ། །གཙང་སྐད་དམ་པས་ཧ་ཅང་མི་གོ་དོ། །ངས་ནི་སྔོན་དུས་སྒྲུབ་པ་ཚར་བ་དེས། །ང་ལ་ལུང་བསྟན་གསུངས་འོས་སྙམ་ནས་ཉན། །ཁོ་དེ་བྱ་ལོ་བ་ཁྱོད་ཉོན་ཟེར་བས། །རྟ་ཡིས་ཅི་ཞིག་བྱས་ནས་མ་ལེགས་སོང་། །ཟེར་ནས་མྱ་ངན་ཡོད་འདྲའི་ཚིག་གཅིག་ཟེར། །དེ་དུས་ཁམས་སུ་ཨ་ནུ་རྟས་བརྡབས་ནས། །ཞབས་ཆག་དེས་འདས་བྱས་པ་ཕྱིས་ནས་ཐོས། །གཞན་ཡང་དེ་དུས་ཆོས་རྗེའི་སྒར་ཆེན་ལ། །ལུང་བསྟན་གལ་ཆེན་འགའ་རེ་བྱས་ནས་སོང་། །ཐམས་ཅད་ཕྱིས་སུ་དེ་དག་སྟེང་དུ་བབ། །གུ་རུ་ཞི་དྲག་རྟ་མགྲིན་ཕྱག་བཞི་པ། །མགར་བ་དམར་ནག་བསྙེན་པ་ཁམས་ནས་ཚར། །འོན་ཀྱང་དབུས་སུ་འོང་ནས་ལོ་གསུམ་བཞིར། །མ་དག་མ་སོགས་སྤྱི་ཡི་གཏོར་བསྔོས་ནི། །འཚོགས་འདོན་ཡིན་ཕྱིར་ཆག་རྒྱུ་མེད་ན་ཡང་། །རང་གི་གཏོར་བསྔོས་གསོལ་ཁ་གསུར་མཆོད་ཆོག །གཞི་
ནས་ཨ་ནུ་རྟས་བརྡབ་ཇོ་རུ་ཤི། །དགྲ་ཕོག་ཡུལ་ཕུད་ངན་དགུ་བྱུང་འདུག་པས། །བསྙེན་སྒྲུབ་ཐོན་པའི་གཏོར་བསྔོས་གསོལ་ཀ་སོགས། །ཆག་པ་དེ་ཡང་རྟེན་འབྲེལ་མ་ལེགས་པས། །དེ་དུས་མ་ཤེས་དུས་ཕྱིས་ཡིད་ལ་ཤར། །དེ་ཕྱིར་ཕྱི་རབས་རྣམས་ཀྱི་ཡི་དམ་དང་། །ཆོས་སྐྱོང་སྒྲུབ་པ་ཐོན་པའི་གཏོར་བསྔོས་དང་། །གསོལ་ཁ་ལ་སོགས་སྐྱུར་བར་མི་བྱའོ། །དེ་ཡང་སྔགས་རྒན་བདག་གི་ཉམས་མྱོང་ཡིན། །དེ་ནས་རང་ལོ་ཉི་ཤུ་རྩ་གསུམ་དུས། །ཕ་ཡུལ་དུས་ལོག་བྱུང་བའི་སྐད་ཐོས་པས། །གསོལ་ཀ་བྱས་ནས་ང་ཡི་ནང་ཚང་རྣམས། །སྲུངས་ཤིག་བྱས་ནས་བཀའ་བསྒོ་བྱས་པའི་ནུབ། །རྨི་ལམ་གཟུགས་ནི་མ་མཐོང་སྒྲ་གྲག་པ། །ཁྱེད་ཀྱི་ནང་ཚང་དེ་རྣམས་ཝུ་གུ་ལུང་། །བསྐྱལ་ཡོད་སྐྱོན་ནི་ཡོད་ལེ་མེད་ཅེས་ཟེར། །ཨ་མར་ནོར་གཞི་ས་དང་བཅས་པ་ཀུན། །གསེར་འོད་རྒྱལ་གྱིས་བསུས་ནས་མ་སྐྱོན་ཟིན། །དེ་ནས་རྩ་བཞི་ལུག་གི་ལོ་དེ་ལ། །ཤག་ཏུ་གཏོར་མ་ཅུང་ཟད་བཅས་བྱས་ནས། །ནཱ་ག་ཀླུ་འདུལ་ལས་བྱུང་ཚར་རེ་དང་། །གཏོར་བསྔོས་གསུར་མཆོད་རྒྱུན་དུ་མ་ཆག་བྱས། །གསུར་མཆོད་བྱེད་པའི་མེ་ཡང་དཀོན་འདུག་པས། །ནུབ་ཏུ་རྒྱུན་དུ་མེ་བླང་
དགོས་པའི་ཕྱིར།། །མཆེད་གྲོགས་དྲུང་རིམ་ཀུན་འཕེལ་ཞེས་བྱ་བས། །ཤ་ཚ་བལྟས་ནས་ཨ་ག་མི་ཐོན་ཟེར། །འདི་ཡི་དམ་ཅན་སྒྲུབ་ཅིང་འདུག་གོ་ཟེར། །བན་ཆུང་འགའ་རེའི་སྐྲག་སྔངས་བཙོག་ལྟ་བྱས། །སྒྲུབ་རྟེན་མགར་དམར་མཐེ་བོང་ཙམ་ཞིག་བཞེངས། །མགར་ནག་ཐང་སྐུ་ཆུང་ངུ་ཞིག་བཞེངས་ནས། །རྒྱལ་ཚབ་པ་ལ་ཕྱག་ནས་ཞུས་ནས་བཤམས། །མགར་དམར་སྐུ་དེ་ཕྱག་ནས་ཞུ་བའི་ཕྱིར། །ཝ་པ་བླ་མས་བེ་གར་ཡིན་ནམ་གསུངས། །མ་ཡིན་མགར་དམར་ཡིན་ལགས་ཞུས་པའི་ཚེ། །དམ་ཅན་ཡི་དྭགས་རིགས་ཡིན་ལོངས་སྤྱོད་ཆུང་། །སྤྱག་བཙན་བརྟེན་ན་དགའ་རབ་ལོ་རྒྱུས་གསུངས། །ཀརྨ་པ་ཡི་དཀོར་བདག་དམ་ཅན་ཡིན། །ལོངས་སྤྱོད་ཆུང་བར་འདུག་གམ་ཧེ་ཧེ་ཞུས། །ཁོང་རྣམས་སྦྱིན་པའི་ཕར་ཕྱིན་རྫོགས་པ་ཡིན། །དེ་དང་མི་འདྲ་གསུངས་ཤིང་ཕྱག་ནས་མཛད། །ཁྱོད་ལ་དམ་ཅན་སྒྲུབ་སྐོར་ཅི་ཡོད་པ། །ཐམས་ཅད་ཁྱེར་ཤོག་ང་ལ་སྟོན་དང་གསུངས། །མགར་དམར་མ་བསྟན་མགར་ནག་སྐོར་རྣམས་བསྟན། །འདི་ཡི་ལུང་རྣམས་ཁྱོད་ཀྱིས་གང་ཐོབ་གསུངས། །ང་ཡི་ཡབ་རྒན་སྔགས་པ་ལས་ཐོབ་ཅིང་། །འདི་ཡི་སྒྲུབ་པ་
ཚར་བའི་ལོ་རྒྱུས་ཞུས། །དེ་དང་གཤིན་རྗེ་དམར་ཆུང་སྐོར་རྣམས་ཀྱིས། །ལུང་དང་ཕྱག་ཁྲིད་ཁོང་ལ་འབུལ་དགོས་གསུངས། །ལུང་དང་ཕྱག་ཁྲིད་དཔེའུ་རིས་བཅས་པ་ཕུལ། །ཁོང་ནི་བླ་མ་ཆེན་པོ་ཡིན་ན་ཡང་། །ཇ་མགྲོན་ལ་སོགས་མི་ནི་གང་མང་དུས། །ཆགས་མེད་ངེད་གཉིས་ཕར་བླ་ཚུར་བླ་ཡིན། །ཡང་ཡང་གསུངས་ཀྱང་གཞན་ཚོའི་ཧ་མ་གོ་ཁོང་གི་གཞན་མ་འགའ་ལ་སྤེལ་བ་ཐོས། །ལུང་རྒྱུན་དབུས་སུ་འཕེལ་བ་ཨེ་མ་ཧོ། །དེ་སྐོར་ཞག་པོ་བདུན་ཙམ་ཞིག་གི་བར། །འཐོར་བསྙེན་མགར་བ་དམར་ནག་གཉིས་ཀ་བཟླས། །དེ་ཚེ་དོན་མེད་འགྲམ་པ་ཐུ་མོ་ན། །ཉིན་གཅིག་ཡུད་ཙམ་འཐུམས་ནས་ན་ས་དེར། །སྣ་ནི་རློན་པ་ཆེན་པོ་གཏུག་ནས་བྱུང་། །དེ་མ་ཐག་ཏུ་ནད་དེ་ཕན་པར་གྱུར། །སྤྲེའུ་ནག་པོ་ཁང་རྩག་གཅིག་ཙམ་པ། །ང་ཡི་དྲུང་དུ་ལངས་ནས་འདུག་པར་མཐོང་། །བཙུན་པ་ཤིན་ཏུ་མཛེས་ཤིང་ཆོས་བཟང་སོགས། །མང་པོ་འགའ་ཡིས་ང་ལ་བལྟ་ཞིང་འདུག །ང་ཡི་མདུན་དུ་མགར་བ་མདོག་ནག་པ། །གཅིག་ནི་ཁ་དོག་དམར་ཞིང་སྨུག་པ་འདྲ། །ང་དང་པུས་མོ་གཏུག་ཅིང་འཛུམ་པ་དང་། །དར་ཚོན་སྣ་ལྔས་བརྒྱན་པའི་ར་སྐྱེས་ནི། །ཆུང་ངུ་རང་གི་མདུན་
དུ་འདུག་པ་རྨིས། །བདག་གི་མཆེད་གྲོགས་གཅིག་གིས་ཁོ་བོ་ལ། །ངག་འཁྱལ་མང་པོ་སྨྲས་པའི་དེ་ནུབ་ལ། །ར་སྐྱེས་དར་ཚོན་སྣ་ལྔའི་བརྒྱན་པ་ནི། །ཁོང་ལ་སྐྲག་དངངས་མང་པོ་བཏོན་འདུག་པས། །ད་ནི་ཁྱེད་ལ་ཅི་ཡང་མི་སྨྲ་ཟེར། །གཞན་ཡང་ང་ལ་ཁ་སྨྲས་གཤེ་སྐུར་སོགས། །བསམ་ངན་ངན་འདོད་བྱེད་པ་མང་བྱུང་ཚེ། །ངན་ལན་དམིགས་ངན་ལ་སོགས་མནན་ཐེང་སྟེ། །མི་དགེ་མི་ཤེས་གློ་བུར་ཤི་བ་སོགས། །བྱུང་གྲངས་ཤིན་ཏུ་མང་སྟེ་བྲི་མི་འཚལ། །དེ་དག་སྐྱེས་བུའི་དོན་ནི་ཡིན་ནམ་སྙམ། །དེ་མིན་དེ་འདྲ་འོང་དོན་མེད་དོ་སྙམ། །གཅིག་མིན་གཉིས་མིན་བཅུ་ཁ་ལོང་ཙམ་སྟེ། །མང་ཕྱིར་སྟབས་ཉེས་དུག་ཐུབ་མིན་ནམ་སྙམ། །དེ་ནས་ཁམས་སུ་ཕྱིན་ནས་བླ་མ་བྱས། །ནུབ་གཅིག་གསོལ་ཁ་ཆེན་པོ་བྱས་པའི་དུས། །ཁྱིམ་དུ་འོད་ནི་ཆེན་པོ་འཁྱུགས་སྙམ་བྱེད། །མུན་པ་ཤིན་ཏུ་ནག་པའི་དུས་འགའ་ལ། །ང་ཡི་སྒྲུབ་ཁང་རྩེ་དང་སྣེ་རྣམས་ལ། །མེ་ནི་སྐར་མདའ་འདྲ་བ་རྒྱངས་རིང་དུ། །འགྲོ་བ་རང་གཞན་འགའ་ཡིས་མཐོང་བར་སྣང་། །ཆོས་དབང་ཀུན་བཟང་དབུས་སུ་འགྲོ་ཁ་རུ། །གསོལ་ཁ་བཀའ་བསྒོ་ལ་སོགས་རྒྱས་པར་བྱས། །དབུས་
སུ་སླེབས་ཡོད་སྙམ་པའི་དུས་ཙམ་ལ། །བསྐྱལ་ནི་ཚར་ཡོད་ཟེར་བའི་སྒྲ་ཐོས་སྙམ། །དོན་མེད་ནུབ་གཅིག་ར་ཁྱུ་ཆེན་པོ་ཙམ། །ཕྱིར་ནངས་དབུས་ནས་ཆོས་དབང་ཡི་གེ་བསླེབས། །ཟླ་གཅིག་ཙམ་དུ་མགར་དམར་གཏེར་བུམ་བསྙེན། །སྐྱེས་ཕྲན་མཛེས་ཤིང་ཆས་གོས་བཟང་བ་འགའ། །ནོར་ཁྱུ་བསྡུ་ཤིང་ཤིང་བཀལ་རང་ཁྱིམ་བཀང་། །གཏེར་ཕྲན་ཐོན་དང་ཁྲོམ་ཚོགས་འདུ་བ་རྨིས། །ཞག་པོ་འགའ་ལ་ཇ་ཆད་བཀོལ་རྒྱུ་མེད། །ཡུལ་ཕྱོགས་ན་ཡང་ཇ་ཆད་ཚོལ་ཁུང་མེད། །གྲྭ་པ་ཞིག་གིས་གཏོར་སྒམ་ཁ་ཕྱེས་ནས། །ཕྱག་གསུམ་འཚལ་ནས་ཐལ་མོ་སྦྱར་བྱས་ནས། །དམ་ཅན་ལགས། ཇ་གཅིག་འཐུང་འདོད་ཐེབ་གཅིག་གནོང་ལགས་ཟེར། །དེ་ནུབ་བུ་ཆུང་རལ་པས་སོག་འདབ་ཁེབ། །མཛེས་པ་ཞིག་བྱུང་དེ་ཡི་གློ་ཁུག་ནས། །ཇ་བག་རྡོག་པོ་ཞིག་ནི་བྱིན་པ་རྨིས། །ཕྱིར་ནངས་ཇ་བག་རྨི་ལམ་དང་མཚུངས་པ། །ཕུལ་མི་བྱུང་བར་ཞིམ་པར་གཉིས་གསུམ་བཀོལ། །ཇོ་བོག་འདྲ་གྲགས་རང་ཡང་ཁེར་དགོད་ཤོར། །རང་གི་འགྲིམ་པ་ཕྱོགས་སུ་འགྲོ་ཁ་ཡང་། །གསོལ་ཀ་བཀའ་བསྒོ་ནན་ཏན་བྱས་པའི་དུས། །དོན་གྲུབ་མགོ་ཐོན་ཚུར་ལ་བསླེབ་ལ་ཁད། །བུ་ཆུང་མཛེས་པ་ཆས་གོས་
བཟང་བ་ཡི། །ཁ་སྐད་མང་པོ་བཤད་རྨིས་ལན་གྲངས་མང་། །གཞན་ཡང་རྒྱུས་མེད་སྙེམས་མེད་མི་འགའ་ཡིས། །རྒྱུས་མེད་རྒྱུས་གཏམ་འདྲ་བའི་རྨི་ལམ་དང་། །རང་གི་ཉེ་དུ་གྲྭ་འཁོར་འགའ་ཞིག་ལ། །མངོན་སུམ་འདྲ་བའི་རྨིས་ལྟས་ཡ་མཚན་དང་། །སྐྱེས་བུའི་བླ་རྟགས་རྨིས་པ་གྲངས་ལས་འདས། །སྒྲུབ་པ་སྙིང་གི་དུམ་བུ་ཞག་བདུན་བྱས། །ཉེ་འཁོར་རྣམས་ཀྱིས་དངོས་སུ་ར་སྐྱེས་མཐོང་། །བཙུན་པས་གུས་པས་ཤེལ་གཅིག་བྱིན་པ་དེ། །ཁྲོ་བོའི་ལྷ་ཁང་ཆུང་ངུ་ཞིག་ཏུ་གྱུར། །ཁྲོམ་ཚོགས་འགའ་ལ་དབང་བསྐུར་བྱས་པ་དང་། །ཚོང་དཔོན་ཆས་བཟང་ཁྱིམ་གང་ཚོང་རང་བྱེད། །སྐྱེས་ཕྲན་ཆས་བཟང་རང་གི་དྲུང་དུ་འདུག །ཞང་བློན་ཆས་བཟང་ཇ་མང་འབུལ་བྱེད་ཅིང་། །ངས་ནི་དེ་སྔོན་སུ་དང་གང་ལ་ཡང་། །ངན་པ་བྱེད་ནི་ནམ་ཡང་མ་མྱོང་ཟེར། །ཁྲོམ་ཚོགས་རབ་ཏུ་ཆེ་ལ་དབང་བསྐུར་བྱས། །རྨིས་ལྟས་ཕལ་ཆེར་གཞུང་དང་མཐུན་པར་བྱུང་། །ནུབ་གཅིག་ར་ཁྱུ་ཆེན་པོ་རྨིས་པ་ཡིས། །ཕྱིར་ནངས་དབུས་ནས་ཕྲིན་ལས་ཡི་གེ་བསླེབས། །འདོད་དོན་ཕྲིན་ལས་ཕྲན་བུ་ནམ་བཅོལ་ཚེ། །སྐྱེས་ཕྲན་དྲུང་དུ་འདུག་རྨིས་ཅི་བསམ་འགྲུབ། །ཡང་ནི་གསོལ་ཁ་རྒྱས་
པར་བྱེད་པའི་ཚེ། །རང་གི་གྲྭ་པ་ཡིན་པའི་བྱིས་སྦ་ཞིག །ར་སྐྱེས་རྒྱན་ལྡན་བྱུང་བ་དངོས་སུ་མཐོང་། །འུར་ལོང་འཇིགས་སྐག་ཆེན་པོ་བྱུང་དུས་ཤིག །གཏོར་མ་འཕངས་བས་འཁོར་གཡོག་རྨི་ལམ་ལ། །བུ་ཆུང་ལག་པར་ལྷག་དྲག་ཆགས་པ་གཅིག །སྐྱོན་མེད་བྱས་ཀྱང་མི་གོ་ཅི་ཡིན་ཞེས། །ཡུས་ཕོ་མང་པོ་བྱེད་ཅིང་སྐྱོན་མ་བྱུང་། །ཡང་ནི་དགྲ་འཇིགས་ཆེན་པོ་ཡོད་པའི་ཕྱིར། །འགྲིམ་པ་འགའ་ཞིག་བཏང་དུས་བཀའ་བསྒོ་བྱས། །ཁོང་ཚོ་ལམ་དུ་སྐྲག་ཅིང་ཐང་ཆད་ནས། །ཅུང་ཟད་གཉིད་པས་བུ་ཆུང་མིང་སྲིང་གཉིས། །འདུག་པས་སྐྱོན་མེད་འདི་འདྲ་སྐྲག་པ་ཞེས། །ཁྲེལ་བགད་བྱེད་པ་རྨིས་ཟེར་མགོ་ཐོན་བྱུང་། །སྐྱེས་བུའི་བྲིས་སྐུར་རབ་གནས་བྱས་པའི་དུས། །ནང་སྐོར་མི་ཡི་སྟེང་དུ་མངོན་སུམ་དུ། །ར་སྐྱེས་སྔོན་པོ་མཆོངས་བྱུང་སྐྲག་དངངས་བྱས། །གསོལ་ཀ་བསྐང་གསོ་བྱས་པའི་དུས་འགའ་ལ། །མདུན་དུ་རིལ་ཚེ་ནག་པོ་ཞིག་འདུག་པ། །ལན་གསུམ་ར་འཁྲབ་བྱས་ནས་ཆེན་པོ་གྱུར། །དྲུང་དུ་སྐྱེས་ཕྲན་འདུག་དང་སྐྱེས་ཕྲན་ནི། །གོས་དམར་ཅན་ཞིག་བདག་ལ་ལྟ་ཞིང་འདུག །ར་དམར་སྤུ་ཞོལ་ཅན་ཞིག་མདུན་དུ་བྱུང་། །མདུན་གྱི་ནམ་མཁར་སྐྱེས་ཕྲན་མགར་བ་
ནི། །འགྲེང་སྟེ་འདུག་པ་ཉམས་ཀྱི་སྐབས་འགར་མཐོང་། །རྨི་ལམ་རང་མདུན་མགར་བ་འཛུམ་ཞིང་འདུག །སྐྲག་འཇིགས་ཆེ་སར་གྲྭ་པ་གཅིག་སོང་དུས། །བཀའ་བསྒོ་བྱས་པས་ཉེ་གནས་རྨི་ལམ་དུ། །བུ་ཆུང་མཛེས་མ་མིང་སྲིང་གཉིས་བྱུང་ནས། །མ་ཟད་བར་དུ་སྐྱེལ་ཡོད་ཟེར་བ་རྨིས། །ཟེར་བ་བཞིན་དུ་མགོ་ཐོན་དོན་གྲུབ་གྱུར། །སྔོན་ཚེ་སློབ་དཔོན་རིང་ནས་སྒྲུབ་རྟེན་གྱི། །རྡོ་རྗེ་རྩེ་ལྔ་ལེགས་པོ་ཞིག་ཡོད་པ། །བོར་ཤོར་རྒྱ་ལམ་དཀྱིལ་དུ་ཟླ་གཅིག་ལུས། །ལམ་དཀྱིལ་ཡིན་ཡང་སུས་ཀྱང་མ་མཐོང་བར། །རང་གི་ཉེ་འཁོར་ཞིག་གིས་རྙེད་དེ་བྱུང་། །སྡུ་རེ་ལམ་ཁར་བོར་ནས་ཡུན་རིང་སོང་། །སུས་ཀྱང་མ་མཐོང་རང་དང་ཉེ་འཁོར་རྣམས། །འགྲོ་ཞོར་བུ་ཆུང་བསྒྱུར་ནས་འདུག་སྣང་བྱུང་། །བལྟས་པས་བུ་ཆུང་མི་སྣང་སྟ་རེ་རྙེད། །རང་གི་གཅུང་པོ་ཆོས་དབང་ཀུན་བཟང་དེ། །ཟ་དམ་གཤགས་སུ་གསོལ་ཀ་བྱས་པའི་ནུབ། །ཁང་པའི་ནང་དུ་འུར་སྒྲ་ཐུག་ཆོམ་བཅས། །བྱེ་མའི་ཆར་པ་དངོས་སུ་བབ་གྱུར་པས། །དམ་ཅན་དངོས་སུ་འགྲུབ་པའི་གྲགས་པ་ཐོབ། །དེ་དུས་ཡོད་པའི་དྲུང་རམ་པ་ཞིག་གིས། །དམ་ཅན་དབང་ལུང་ཞུ་ཕྱིར་རྐང་
གཏད་བྱོན། །ནུབ་གཅིག་གསོལ་ཁ་གསོལ་དམིགས་བྱས་པའི་ནུབ། །རྒྱལ་བའི་དབང་པོའི་དབོན་པོ་ནམ་མཁའ་དེ།། །ཆས་གོས་གཟབ་ཅིང་དགའ་ཞིང་དྲུང་དུ་བྱུང་། །རང་གི་ཆས་ཀ་ཞིག་རྣམས་བོར་བའི་ཚེ། །ཆས་ཀ་བོར་བ་རང་གིས་མ་ཚོར་ཀྱང་། །ཆས་ཀ་ཁྱེར་མི་དེ་ཡི་སྒོ་རྩ་རུ། །ར་ནི་དཀར་པོ་ཆེན་པོ་ར་མདུད་ཅན། །དངོས་སུ་བྱུང་བ་བྱིས་སྦས་མཐོང་གྱུར་ཏེ། །སྐྲག་ནི་ངུ་འབོད་བྱེད་ཅིང་བྱིས་སྦ་དེ། །ཡུན་རིང་མ་མགོར་ཚེ་ཡི་དུས་བྱས་སོ། །ཡང་ནི་རང་ལོ་སོ་བཞི་ལོན་པའི་དུས། །སྒྲུབ་པ་སྙིང་གི་དུམ་བུ་ཞག་བདུན་བྱས། །སྔགས་པ་བཙུན་གཟུགས་ཤིན་ཏུ་ཆེས་བཟང་གིས། །ཟན་དང་ར་ཤ་ཟ་ཞིང་འདུག་པ་ལ། །ར་དྲི་བྲོ་བའི་ཟན་ཞིག་བདག་ལ་བྱིན། །སྐྱེས་ཕྲན་དཔོན་ཐང་མཛེས་པ་མང་པོ་དང་། །བུད་མེད་རྒྱན་ལྡན་མཛེས་པ་བདག་ལ་བཅར། །དཔོན་ཕྲན་དར་མ་ཆས་བཟང་ཞིག་གིས་ནི། །རང་གི་ལས་ཀ་ལས་རོགས་བྱས་པའི་ཚེ། །ང་ཡིས་མ་ཐུབ་ཕ་བོང་ཆེན་པོ་ཞིག །ཁོ་ཡིས་གྱོད་བརྒྱབ་རྡུལ་བཞིན་བཤིགས་རོགས་བྱས། །ཞང་བློན་འཇིགས་རུང་དེ་ཡི་བཙུན་མོ་གཉིས། །དགའ་ཞིང་རང་དྲུང་འདུག་ནས་སྐད་ཆ་བཤད། །ཕྱུག་པོའི་བུ་གཅིག་ཇ་མར་ཇ་
ཞུས་བྱུང་། །བུད་མེད་རྒྱུན་ལྡན་ནས་དང་མར་མང་ཕུལ། །ཁྲོམ་ཆེན་ཡིག་དྲུག་བོ་དྷི་ཙིཏྟ་བསྐུལ། །མི་གཞོན་ཞྭ་དཀར་ཅན་གྱི་རྩྭ་སྔོན་དང་། །མི་འགས་ནས་ཐུམ་གཉིས་དང་ཁྲབ་གཅིག་ཕུལ། །སྔགས་ནི་དྲུག་ཁྲི་དྲུག་སྟོང་ཙམ་ཞིག་བཟླས། །སོ་ལྔ་ལོ་ལ་སྒྲུབ་པ་གཏེར་བུམ་གྱི། །གྷ་ན་ཅན་གྱི་སྔགས་དེ་ཞག་བདུན་བསྒྲུབས། །དང་པོ་ང་དང་སྤྲང་སོག་ངན་རྟགས་བྱུང་། །བསྐང་གསོལ་བཤགས་པ་མང་ཞིག་བྱས་པ་ཡིས། །ཚོང་དཔོན་གཞོན་ནུ་མཛེས་ཤིང་ཡིད་འོང་བས། །ཇ་བཀལ་དྲེལ་ཁྱུ་དེད་ནས་བྱུང་བ་དང་། །བཙུན་པས་གུས་ཤིང་ཕྱག་འཚལ་ནས་མང་ཕུལ། །ར་ཡི་ཁྱུ་ནི་ཆེན་པོ་རྨིས་པ་དང་། །ས་སྒང་ནས་ཡིན་ཟེར་བའི་བཙུན་པ་ཞིག །གོས་ཆེན་ལྗང་ཁུ་ཁ་དོག་ལེགས་པ་ཕུལ། །དངོས་སུ་འོད་འཁྱུག་མེ་སྟག་འཚུབས་པ་དང་། །དོན་མེད་འདུ་བ་ཤིན་ཏུ་ལེགས་པ་བྱུང་། །སྔགས་ནི་དྲུག་ཁྲི་བདུན་སྟོང་ཙམ་ཞིག་སོང་། །དེ་སྐོར་སྐྱེས་ཕྲན་ཞིག་གི་ཁྱོད་སྤྱན་གཉིས། །དབུས་གཙང་ཚུན་ལ་གྲོགས་ནི་སྒོ་སྐྱེལ་བྱས། །ཟེར་ནས་ཡུས་ཕོ་འགའ་རེ་བྱས་རྨིས་པས། །ཕྱིར་ནངས་ཚོང་པ་བྱུང་ནས་ཚོང་ལེགས་གྱུར། །དགྲ་འཇིགས་ཆེ་སར་འགྲོ་བའི་དོ་དགོང་
ལ། །གསོལ་ཁ་བཀའ་བསྒོ་ལ་སོགས་བྱས་པའི་ནུབ། །ཚོང་དཔོན་ཆས་བཟང་རྟ་སྔོན་ཞོན་པ་ཡི། །སྐྱོན་མེད་ང་དང་འགྲོགས་ནས་འགྲོའོ་ཟེར། །ཟེར་བ་བཞིན་དུ་སྐྱོན་མེད་མགོ་ཐོན་གྱུར། །གཞན་ཡང་ར་ཁྱུ་འུར་སྒྲ་དང་བཅས་པ། །སྐྱེས་ཕྲན་མཛེས་པའི་ཇ་ཞུས་བྱེད་པ་དང་། །བུ་ཆུང་མཛེས་པ་རང་གི་རུམ་དུ་འདུག །རྩེད་མོ་རྩེ་བ་གསོལ་ཁའི་དུས་འགའ་བྱུང་། །ཤིང་སྤྲེལ་རང་ལོ་སོ་དྲུག་ལོན་པའི་དུས། །སྒྲུབ་པ་སྙིང་གི་དུམ་བུ་ཞག་བདུན་བསྒྲུབས། །དཔོན་ཐུང་སྐྱེས་ཕྲན་དར་མས་ཇ་ཞུས་དང་། །རལ་གྲི་ཤིན་ཏུ་ལེགས་པ་གཉིས་ཕུལ་བ། །དགའ་ཞིང་རང་གི་བློ་ལ་བཏགས་པ་དང་། །ལོ་ཏོག་རབ་ཏུ་རྒྱས་ནས་འདུག་པ་དང་། །སྔགས་བཙུན་གཅིག་གིས་ལམ་བསྟན་གྱེན་དུ་སོང་། །ཇ་ཁག་མཆན་བཅུག་གྲྭ་པས་ཇ་འགའ་སྟེར། །བཙུན་པ་སྐྱེས་ཕྲན་ཤིན་ཏུ་མཛེས་པ་འགས། །ཞིམ་ཇི་ལན་གསུམ་དང་ནི་གུང་ཚིགས་དྲངས། །ཡུང་ཕོན་རྒྱབ་གཅིག་རང་ཕྱོགས་བཀལ་ནས་བྱུང་། །ཚོང་དཔོན་ཆེན་པོ་རབ་བརྗིད་ཆས་བཟང་དང་། །བུ་ཚ་ཆས་བཟང་མགོ་རས་གྱོན་པ་ནི། །བཅོ་ལྔ་ཙམ་ཞིག་དགའ་ཞིང་རང་མདུན་བྱུང་། །རང་ལ་མར་ཁུ་དྲངས་ནས་བྱུང་བ་དང་། །
དཔོན་ཕྲན་སྐྱེས་པ་དར་མ་ཆས་བཟང་གིས། །ཤ་བཙོས་ཞིམ་པོ་མང་པོ་དྲངས་བྱུང་དང་། །སྔགས་པ་གཅིག་དང་རང་ཉིད་གཉིས་པོ་ཡིས། །རྔ་བཟང་བརྡུངས་ཤིང་གྱེར་དབྱངས་བྱས་པ་དང་། །སྐྱ་ཚུ་ཅུང་ཟད་ཙམ་ཞིག་འདུག་པ་དེ། །ངེད་རང་དཔོན་སློབ་བཟའ་སྙམ་བསྒོས་པ་ཡིས། །ཉུང་དུ་མ་སོང་ཀུན་གྱིས་ཕོར་རེ་ཐོབ། །རང་གི་གྲྭ་ཕལ་གཏོར་མ་བཅའ་བཅོལ་བས། །ཕུགས་གཏོར་ཐམས་ཅད་ཆ་ཚང་རྒྱས་པ་དང་། །ལྗོན་ཤིང་གཅིག་ལ་སྐུ་རྒྱབ་གཏད་པ་ཡི། །ཛམ་བྷ་ལ་ཡི་སྐུ་དང་བྱམས་པའི་སྐུ། །བཞེངས་པ་ཆེ་གྲ་རེ་རེ་ཁང་རྩག་ཙམ། །ཆུང་གྲ་ལ་ཡང་མི་ཚད་ཆེ་ཤོས་ཙམ། །དེ་རྣམས་ཟན་ནི་དེ་ལས་བྱུང་སོང་བས། །དེ་ལ་ངོ་མཚར་དགའ་སྣང་བྱས་པ་རྨིས། །ཉམས་ཀྱི་སྣང་བར་སྒྲུབ་རྫས་དཀྱིལ་འཁོར་སོགས། །དེ་ཕྱོགས་འོད་དམར་ཐིག་ལེ་ཤར་སྙམ་བྱེད། །ལྷ་ཁང་ནང་དུ་རང་གི་ཡིན་སྙམ་པའི། །ཞི་ཁྲོ་ལ་སོགས་མཆོད་བཤམས་དཔག་མེད་བསྒྲིགས། །ཁྲོམ་ཚོགས་དཔག་ཏུ་མེད་པ་འདུ་བ་རྨིས། །དུས་ནི་ཤིན་ཏུ་ངན་པའི་སྐབས་ཤིག་སྟེ། །ཞག་བདུན་ཙམ་ལ་དངོས་པོའི་རྣམ་གྲངས་དགུ། །སྔགས་ནི་བདུན་ཁྲི་ལྔ་སྟོང་ལྷག་ཙམ་སོང་། །
དེ་ལྟར་རིང་ལོ་བཅུ་བདུན་ནས་བཟུང་སྟེ། །རང་ལོ་སུམ་ཅུ་སོ་དྲུག་བར་དག་ཏུ། །ན་སོ་གཞོན་པས་གཞོན་སྐྱོན་ལྟ་བུ་སྟེ། །སྐྱེས་བུའི་སྒྲུབ་པ་ལན་གྲངས་དྲུག་ཙམ་སོང་། །དེ་ནས་དམ་པ་ཆོས་ཀྱི་གནད་གསང་གོ །སྤྱན་རས་གཟིགས་སོགས་མཆོག་གྲུབ་མ་གཏོགས་པ། །བཀའ་སྲུང་སོགས་ཀྱི་སྒྲུབ་པ་བྱེད་འདོད་ཆུང་། །གཏོར་བསྔོས་དང་ནི་དུས་གཏོར་གསོལ་ཀ་དང་། །གནམ་ཆོས་ལ་སོགས་སྒྲུབ་ཐབས་གསར་པ་ཡི། །འབྲེལ་འཇོག་ཞོར་སྒྲུབ་ཅུང་ཟད་ཙམ་རེ་ལས། །གལ་ཆེན་རྩེ་གཅིག་བསྒྲུབས་པ་མ་བྱས་ཏེ། །ཤུགས་འབྱུང་རྟགས་མཚན་བྱུང་འགའི་བརྗེད་དེ་སོང་། །མི་འགྱུར་རྡོ་རྗེ་རང་སར་བཞུགས་པ་དེ། །དཔོན་པོའི་གཏད་དགོས་ཡར་ལ་མ་གཏོང་ཟེར། །བཏང་ན་བཀའ་བཀྱོན་འོང་བའི་ཚིག་ཀྱང་གདའ། །རང་གི་ལག་ནས་གཏད་དགོས་བྱུང་བ་ན། །ཨོ་རྒྱན་བཀའ་དང་འགལ་ཞིང་ཐུགས་ཀྱིས་ཁྲེལ། །ཡར་ལ་བཏང་ན་ཐར་རམ་ཅི་འགྱུར་སྙམ། །བཀའ་སྲུང་ལ་ཡང་གསོལ་ཁ་ལེགས་པོ་བྱས། །ཉམས་དང་རྨི་ལམ་འདྲེས་པའི་སྐབས་ཤིག་ན། །ང་ཡི་དྲུང་ནས་འཇའ་ནི་དཀར་པོ་ཞིག །སྤྲུལ་སྐུ་ཚང་གི་མཁར་སྒོར་ཟུག་ནས་གདའ། །ང་ཡིས་དྲུང་ནས་ར་
སྐྱེས་དཀར་པོ་དང་། །ནག་པོ་རྒྱན་ལྡན་གཉིས་ནི་འདུག་པ་ལ། །དེ་ནས་སྤྲུལ་སྐུ་ཡར་ལ་ཕེབས་བྱུང་བས། །ར་ནི་དཀར་པོ་ཁོང་གི་རྗེས་སུ་སོང་། །ནག་པོ་ང་ཡི་དྲུང་དུ་འདུག་སྣང་བྱུང་། །མགར་དམར་ཁོང་ལ་འཁོར་ཚན་ཆེ་བར་གོ །སྤྲུལ་སྐུ་ཡར་ཕེབས་དབུ་ཐོན་སྐྱོན་མ་བྱུང་། །དམ་ཅན་མདོས་ཤིག་གསར་དུ་བཅས་པའི་ཚེ། །ར་སྐྱེས་ཞོན་པའི་མགར་ནག་བཅུ་གསུམ་ཙམ། །མདུན་གྱི་བར་སྣང་ཁམས་སུ་འགྲོ་སྙམ་བྱེད། །དེ་སྔོན་བརྒྱ་རྩ་ལ་སོགས་བསགས་མ་མྱོང་། །གྲྭ་པ་རྣམས་ལ་གསོལ་ཁ་རྒྱས་པ་དེ། །ཚར་གྲངས་བརྒྱ་རྩ་གསོག་ནི་བཅུག་པའི་དུས། །སྐུ་ནི་མ་མཐོང་དམ་ཅན་གསུང་ཡིན་སྙམ། །གསོལ་ཁ་མང་པོ་བྱས་པས་ང་ཡང་དགའ། །བུམ་སྒྲུབ་མ་ཆད་ཙམ་ཞིག་ངས་བྱེད་ཟེར། །དེ་སྔོན་བུམ་སྒྲུབ་ལན་བཞི་བཙུགས་ན་ཡང་། །བུམ་སྒྲུབ་རྒྱུན་ཁྱེར་ཚུགས་པར་མ་གྱུར་པས། །ཕྱིར་ལོ་ཉིད་ནས་བུམ་སྒྲུབ་རྒྱུན་ཁྱེར་བཙུགས། །མང་དུས་བཅུ་ཁ་ཉུང་དུས་དྲུག་བདུན་ཙམ། །དེ་སྔ་ལོ་གྲངས་བརྒྱད་དང་ཕྱེད་ཀྱི་བར། །ཕོག་དང་ཇ་ཐུག་མ་ཆད་ལེགས་པར་ཚུགས། །ཞལ་ཐང་རབ་གནས་ཚུལ་དུ་ཞག་འགའ་ཞིག །གནམ་ཆོས་མགར་ནག་རྒྱུན་
བསྙེན་ཅུང་ཙམ་བྱས། །ཉམས་ཀྱི་སྣང་བ་མདུན་གྱི་བར་སྣང་ལ། །ཁྱེའུ་ལོ་ནི་བཅུ་དྲུག་ལོན་པ་ཙམ། །དགེ་ཡུ་གོས་ནི་སྐྱ་བོ་ཅན་ཞིག་དང་། །མགར་གཡོག་འདྲ་བའི་མི་ནི་ནག་པོ་གཅིག །ནག་དང་ཧྲེང་ངེ་ལངས་ནས་སྟངས་སྟབས་བྱེད། །ཚེ་སྒྲུབ་གནམ་ལྕགས་རྡོ་རྗེ་སྒྲུབ་པའི་དུས། །འཇའ་ཚོན་ལུགས་ཀྱི་གསོལ་ཁ་དེ་བཏོན་པས། །སྐུ་ནི་མ་མཐོང་དམ་ཅན་ཉིད་ཀྱིས་གསུངས། །རྟེན་འབྲེལ་ལེགས་པོ་དམ་ཚིག་ཡིན་ནོ་ཟེར། །གསོལ་ཁའི་ལུང་འདྲ་ཁང་ཆུང་སུམ་བརྩེགས་སྟེང་། །ཁྱེའུ་གོས་དཀར་ཅན་གྱིས་རྩེད་མོ་རྩེ། །སྐུ་ནི་མ་མཐོང་དམ་ཅན་ཉིད་ཀྱིས་གསུངས། །གནམ་ལྕགས་རྡོ་རྗེ་ཆོས་འདི་ཉམས་སུ་ལོངས། །ཡང་ན་གཏེར་སྒྲོས་འཆོལ་བར་མ་སྤེལ་ཟེར། །སྙིང་ཐང་མ་ཧཱ་ར་ཛའི་སྒར་འདུག་ཚེ། །རྨི་ལམ་མ་ཡིན་ཉམས་ཀྱི་སྣང་བ་ལ། །ལུས་ནི་མ་མཐོང་རང་གི་མདུན་དེ་ན། །དམ་ཅན་མགར་བ་ནག་པོའི་མགྲིན་པ་ཡན། །ཆེ་ཆུང་རྔ་ནི་འབྲིང་པོའི་ཚད་ཙམ་པ། །དབུ་ལ་འུག་ཞུ་འུག་པའི་ཞྭ་གསོལ་བ། །ཞལ་གདངས་མཆེ་གཙིགས་ཁྲོ་ཞལ་ཤིན་ཏུ་གསལ། །ཁོ་རང་སྐྲག་ཅིང་སྡུག་ནས་རྡུལ་ཙ་རེ། །མངོན་སུམ་ལྟ་བུར་གསལ་བར་མཐོང་བའི་ཚེ། །ཀརྨའི་ནང་རྟེན་
རྗེས་སུ་འོང་ཟིན་སྙམ། །ཚིག་གཅིག་ཟེར་བ་བརྗེད་ནི་མི་རུང་སྟེ། །ཕྱིར་ལོ་དེ་ཚོད་དུ་ག་དངོས་སུ་བྱུང་། །གཞན་ཡང་ངེས་པ་མེད་པའི་སྐབས་འགའ་ལ། །མཆོད་ཁང་ནང་ན་རྔ་རྡུང་འུར་ཆོམ་གྲག །སྒོ་ནི་ཕྱེ་འདན་ཡར་འགྲོ་མར་འགྲོ་བྱེད། །མི་ནི་འགའ་རེས་ར་སྐྱེས་བུ་ཆུང་སོགས། །དངོས་ཉམས་རྨི་ལམ་སྐྱེས་བུའི་བླ་རྟགས་མཐོང་། །ཀ་ཆ་ཕྲན་བུ་ཅུང་ཟད་ཅུང་ཟད་ཙམ། །ཁྱེར་བ་རྨི་ལམ་འཁྲུགས་སོགས་ལྟས་བྱུང་ནས། །འདི་བས་ཡོད་རེ་ཟེར་ཞིང་གཉེར་པར་གཏད། །སྐྱེས་བུ་ཆེན་པོ་ཀ་ཆར་སྤྱན་ཕྲ་བས། །ཆེན་པོ་ལས་ནི་ཆུང་ངུར་རྩ་ར་སྐྱེན། །ཟེར་བའི་ཁ་ངག་ཤིན་ཏུ་བདེན་འདྲ་བྱུང་། །རང་ལ་མ་དུམ་མ་དགའ་མེད་ན་ཡང་། །ཆགས་སྡང་དབང་གིས་རང་ལ་བསམ་ངན་དང་། །གཤེ་སྐུར་གྱོད་ཁ་སྡེབ་འདོད་བྱེད་རྣམས་ལ། །བསམ་ངན་མནས་ཐེང་བཟོད་པ་བསྒོམས་ན་ཡང་། །ཁོ་ལ་དོན་མེད་དམ་ཅན་ཆོ་འཕྲུལ་དང་། །ན་ཚ་ལ་སོགས་ངན་དགུ་བྱུང་ན་ཡང་། །དེ་དག་ཞིབ་པར་མི་སྨྲ་ཐེ་ཚོམ་ཡིན། །རེ་ཞིག་གཉེར་པ་སོགས་ཀྱི་རྨི་ལམ་ལ། །ངས་ནི་ཁབ་དང་སྐུད་པ་ཙམ་དེ་ཡང་། །ཉ་ར་འཚོ་སྐྱོང་འདི་ཙམ་བྱེད་པ་ལ། །ཁྱེད་ཚོའི་ཉ་ར་འཚོ་སྐྱོང་
མི་བྱེད་པར། །ཟེར་ནས་བུ་ཆུང་ཞིག་གིས་ཡུས་ཕོ་བྱེད། །དེ་ལྟར་སྐྱེས་བུ་སྒྲུབ་པའི་ལོ་རྒྱུས་སོགས། །ངོ་མཚར་ཆེ་རྒྱུ་མེད་པ་བྲི་དོན་མེད། །འོན་ཀྱང་རིགས་རྒྱུད་དང་ནི་རྗེས་འཇུག་རྣམས། །བཀའ་གདམས་གླེགས་བམ་ལ་སོགས་མཐོང་བ་དང་། །གྲུབ་མཐའ་གཞན་པའི་དགེ་བཤེས་འགའ་ཞིག་གིས། །སྔོན་ཚེ་རྒྱལ་བ་འབྲོམ་གྱི་ཞལ་ནས་ཀྱང་། །ལྷ་ངན་ཕལ་ཆེར་འདྲེ་བས་བཙོག་པ་སྟེ། །ཁེ་གར་དང་ནི་རྡོར་ལེགས་བརྟེན་པ་ཀུན། །མཆོད་བརྡ་ཉིད་ནས་རང་ཉིད་རྡུང་བྱེད་ཅིང་། །སྔོན་དུ་མཆོད་བསྟོད་བྱས་པ་ཐམས་ཅད་ཀུན། །མཆོད་བསྟོད་ནོངས་པ་ཞིག་གིས་འཇོམས་ཞེས་གསུངས། །རིག་འཛིན་ཆོས་ཀྱི་གྲགས་པའི་གཟིགས་སྣང་ལ། །སྐྱེས་བུའི་སྣོད་གཅིག་ཁྱེར་ནས་བྱུང་བ་ལ། །མདུན་དུ་བྱོས་པ་དེ་ནང་དཔོན་གཅིག་གདའ། །ཕོ་ལྷ་མ་དགའ་ངས་ནི་འདི་ཙམ་ཁྱེར། །ཟེར་བ་རང་གི་མི་ཡི་བླ་ཁྱེར་བའི། །ལྷ་ཁྱོད་འདྲ་བ་གསུངས་ནས་བཀའ་བཀྱོན་མཛད་པ་ཡི། །སྐྱེས་བུ་སྐྱེངས་ནས་མི་དེ་བཏང་བ་དང་། །ཀརྨ་པཀཱིར་རྒྱ་ནག་རྒྱལ་པོ་ཡིས། །ཆད་པ་མང་པོ་བཅད་པའི་དུས་དེ་ལ། །པཀྵིའི་མགྲིན་པར་དར་ནག་གིས་གཅུད་ནས། །ཁྱོད་ཀྱི་ཙིཏྟ་ང་ལ་གཏོད་ཅིག་
དང་། །མཚུར་ཕུའི་ནང་རྟེན་ནང་དུ་སྐྱེལ་ཞིག་ཟེར། །ཁོ་བོ་ད་རུང་ཤི་བའི་དུས་མ་བབ། །དམ་ཉམས་གསུངས་ནས་ཆོས་གོས་ཐུ་བས་བརྡུངས། །པཀཱི་ཞལ་ཚོམ་རྒྱ་ཡི་ཐག་པས་བཏགས། །མི་ནི་མང་པོས་འཐེན་ཀྱང་འགུལ་མ་ཐུབ། །རེ་ཤིག་མགྲིན་པ་བཀོག་ལ་ཁད་བྱུང་བས། །གཟིགས་པས་སྐྱེས་བུས་ཕར་ལ་འཐེན་ཅིང་གདའ། །དམ་ཉམས་གསུངས་ནས་བཀའ་བཀྱོན་ཆད་བྱས་པས། །རྒྱ་ནག་མཁར་སྒོ་ལིང་རྩེ་གཅིག་ལ་ནི། །སྐྱེས་བུས་མེ་སྦར་རྒྱ་མི་བརྒྱ་ཙམ་ཚིག །དེ་འདྲའི་ལོ་རྒྱུས་མང་པོ་རྣ་ཐོས་ཀྱིས། །འདི་ནི་ཐེའུ་རང་ཡིན་པས་ལྷར་མཆོད་ན། །ཐ་མ་རང་སྲོག་གཅོད་པར་འགྱུར་རོ་ཞེས། །ང་ལ་ཡང་ནི་སྨྲ་མཁན་མང་དུ་བྱུང་། །དེ་འདྲའི་རྐྱེན་བྱས་ལོག་ལྟ་སྐྱེ་ཉན་མཆིས། །ཀཾ་ཚང་དང་ནི་རྙིང་མའི་ཆོས་ལུགས་ཀྱིས། །སྔར་ནས་བཀའ་སྲུང་གཙོ་བོ་འདི་ཡིན་པས། །སློབ་དཔོན་རྒྱུད་ཀྱི་སྲུང་མ་སྐྱུར་ཐབས་མེད། །གཏེར་ཆོས་ཀུན་གྱི་སྲུང་མ་འདི་ཡིན་པས། །གཏེར་ཆོས་འདོན་ན་གཏེར་སྲུང་སྐྱུར་མི་རུང་། །ཁྱད་པར་རང་གི་དབོན་རྒྱུད་ཡིན་རྣམས་ཀྱིས། །ཕ་མྱེས་རྒྱུད་ལྷ་ཡིན་ཕྱིར་སྒྱུར་མི་རུང་། །འདི་ནི་ངོ་བོ་རྟ་མགྲིན་སྤྲུལ་པ་སྟེ། །ས་དང་ལམ་
གྱི་བར་ཆད་སེལ་བར་ནུས། །དེ་ཕྱིར་འབྲི་གུང་ཡང་ཟབ་ཆོས་སྐོར་ལས། །དམ་ཅན་བདག་བསྐྱེད་མཆོག་གྲུབ་སྐོར་ཀྱང་གསུངས། །མགར་དམར་ཕ་ནི་བདུད་ལ་མ་ནི་དམུ། །ཁོ་རང་བཙན་ཡིན་དྲག་རྩལ་ཆེ་བར་བཤད། །མགར་ནག་ཕ་ནི་བདུད་དང་སྲིན་པོ་སྟེ། །མ་ནི་སྲིན་མོའམ་ནི་སྨན་གྱི་རིགས། །ཁོ་རང་ཡི་དྭགས་བཙན་གྱི་རྒྱལ་པོར་བཤད། །ཐེའུ་རང་ཀུན་གྱི་སྡེ་དཔོན་ཡིན་ན་ཡང་། །ཁོ་རང་དངོས་ནི་ཐེའུ་རང་རིགས་མིན་ཏེ། །དཔེར་ན་སྔོན་བྱོན་བོད་ཀྱི་ཆོས་རྒྱལ་རྣམས། །བོད་རྣམས་ཀུན་གྱི་རྒྱལ་པོ་ཡིན་པའི་ཕྱིར། །བོད་ཀྱི་རྒྱལ་པོ་ཞེས་ནི་ཡོངས་གྲགས་ཀྱང་། །བོད་ཀྱི་རིགས་མིན་རྒྱ་གར་རྒྱལ་རྒྱུད་ཡིན། །དམ་ཅན་སྐྱེས་བུ་མགར་བ་དམར་ནག་ཀྱང་། །ཐེའུ་རང་ཀུན་གྱི་རྒྱལ་པོ་ཡིན་པའི་ཕྱིར། །ཐེའུ་རང་རྡོ་རྗེ་ལེགས་པ་ཟེར་ན་ཡང་། །ཐེའུ་རང་རིགས་མིན་བཙན་གྱི་རིགས་སུ་ངེས། །གོང་གི་རྣམ་རྟོག་དེ་འདྲར་སེམས་ཕྲེང་ཚེ། །གོང་དུ་བཤད་ལྟར་དམ་ཅན་ཉིད་ཡིན་གསུངས། །ངས་ནི་དེ་སྔ་སུ་དང་གང་ལ་ཡང་། །ངན་པ་བྱེད་ནི་མ་མྱོང་ཟེར་བ་དེ། །དེ་འདྲ་སེམས་ལ་འགྱུས་པ་དགོངས་པར་སྣང་། །དེ་ཕྱིར་བདག་གི་རྗེས་སུ་འཇུག་པ་རྣམས། །འདི་ཡི་ལས་
ཚོགས་མང་དུ་བསྒྲུབས་ན་ནི། །ཅུང་ཞིག་རྩུབ་ཅིང་ཆོ་འཕྲུལ་ཆེ་བར་སྣང་། །འོན་ཀྱང་གཟའ་དང་རྒྱལ་པོ་ལ་སོགས་དང་། །མི་འདྲ་ནང་དུ་འཇམ་ཞིང་འཁུ་ལྡོག་མེད། །གཏོར་བསྔོས་མ་ཆག་དུས་གཏོར་གསོལ་ཁ་གཟབ། །དེ་བྱས་བཀྲ་ཤིས་བསམ་པ་འགྲུབ་པར་སྣང་། །ངོམས་པའི་ཞལ་ངོ་ཤེས་རབ་རྣམ་རྒྱལ་དེ། །གཡོ་མདའ་གདན་ས་མཛད་པ་དེ་ཕྱིས་ནས། །གཡོ་མདའི་དཀོར་བདག་དམ་ཅན་གྱིས་བྱས་ནས། །སེ་ར་ཡུལ་དུ་ཁྱེར་ཀྱང་རྟགས་བྱུང་ཟེར། །སྐྱེས་བུ་འདི་ནི་གཞུང་བཟང་ཡུན་རིང་ཕྱིར། །གདན་ས་བར་དང་ས་སྒང་ལ་སོགས་ཀྱིས། །ཧོར་འདྲ་ཕ་མྱེས་རིང་ལ་བྱས་པ་ཡིས། །མི་རྒྱུད་རྣམས་ལ་དམ་ཅན་མགོན་ཟེར་ནས། །ཕན་པའི་རྟགས་བྱུང་གསོལ་ཀ་བྱེད་པ་མང་། །སྔར་དུས་སྔགས་པའི་སྒྲུབ་ཁང་འགའ་ཞིག་ལ། །དམ་ཅན་རྟགས་བྱུང་གསོལ་ཁ་དགོས་འདུག་ཟེར། །འཇིག་རྟེན་ལྷ་རྣམས་སྒྲུབ་མི་དེ་ཉིད་ལས། །མི་རྒྱུད་ཆོས་བརྒྱུད་རྣམས་ལ་འཁོར་ཚན་ཆེ། །ཟེར་བའི་ལོ་རྒྱུས་སྔར་ནས་དར་བ་ལྟར། །བདག་གིས་དམ་ཅན་དབང་ལུང་མ་བྱས་ཀྱང་། །བདག་གི་སློབ་མ་གྲྭ་པ་མང་ཞིག་ལ། །དམ་ཅན་འཁོར་ཞིང་མགོན་པའི་རྟགས་
བྱུང་ཐོས། །ཁྱོད་ནི་གང་གིས་འབྲེལ་བས་རྟག་ཏུ་སྐྱོངས། །གསུངས་པའི་དོན་དེ་ངེས་པ་ཅན་དུ་སྣང་། །དཔེར་ན་སྔོན་ཚེ་མི་ལ་རས་ཆེན་གྱིས། །ང་ལ་ཉམས་རྟོགས་སྐྱེ་བ་དཀའ་མོ་བྱུང་། །ཁྱེད་རྣམས་ཉམས་རྟོགས་སྐྱེ་བ་སླ་འདུག་པས། །ཁོ་བོས་སྒྲུབ་པ་དཀའ་ལས་ཆེར་བྱས་པས། །དེ་ཡི་བྱིན་རླབས་ཡིན་པར་འདུག་གོ་གསུངས། །དེ་ནས་བདག་གི་སྐྱེས་བུ་སྒྲུབ་པ་ལ། །སྒབ་འདྲེ་གནོན་སོགས་དཀའ་ཚེགས་ཆེན་པོ་དང་། །རྗེས་ནས་སྒབ་འདྲེའི་མནན་པ་ལན་མང་གསོས། །སྒྲུབ་པ་ལན་གྲངས་མང་ཞིག་བྱས་ན་ཡང་། །ཧ་ཅང་རྟགས་མཚན་གསལ་ཆ་མ་བྱུང་སྟེ། །དུས་ཕྱིས་ང་ཡི་གྲྭ་སློབ་ཕལ་ཆེར་ཞིག །དབང་ལུང་ཙམ་ཡང་ཐོབ་པར་མ་གྱུར་ན། །སྒྲུབ་པ་ལ་སོགས་ཐོན་པ་ལྟ་ཅི་སྨོས། །འོན་ཀྱང་སྐྱེས་བུ་ཆེན་པོའི་མགོན་པ་ཡིས། །རྟགས་མཚན་གསལ་ཆ་མང་པོ་བྱུང་འདུག་པ། །རང་གི་ཚེ་རབས་ལས་ལྷ་ཡིན་པའམ། །ལྷ་རྒྱུད་ཡོད་པའི་ལོ་རྒྱུས་མེད་ན་ཡང་། །ཕ་མྱེས་རྒྱུད་ལྷ་ཡིན་ནམ་ཟེར་བ་སོགས། །ལོག་ལྟ་མ་སྒོམ་ལོག་ལྟ་མ་སྨྲས་པར། །བན་རྒན་ང་ཡི་སློབ་བུ་ཡིན་པའི་ཕྱིར། །སློབ་དཔོན་རྒྱུད་ཀྱིས་སྲུང་མ་ཡིན་པ་ལ། །ཡིན་པར་ཤེས་བཞིན་གསོལ་ཁ་གཟབ་པ་
དང་། །བན་རྒན་ང་ཡང་སྐུ་དྲིན་ཆེ་སྙམ་པའི། །རྟགས་མཚན་བྱུང་དུས་བཀའ་དྲིན་དྲན་པར་མཛོད། །དེ་ཡིས་རྟེན་འབྲེལ་ལེགས་ཚོགས་འགྲུབ་པར་འགྱུར། །འདི་ནི་ཡང་གསང་རྣམ་ཐར་ཡིན་པའི་དོན། །གཞན་གྱིས་ཐོས་ན་ཐེའུ་རང་བསྒྲུབས་ཟིན་ཞེས། །ལོག་ལྟ་འཕེལ་ཕྱིར་ཤིན་ཏུ་ཡང་དུ་གསང་། །མངྒ་ལཾ།། །། ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།