དགེ་སློང་རཱ་ག་ཨ་སྱའི་ཡང་གསང་གི་རྣམ་ཐར་དུམ་བུ་ལས་བཀའ་སྲུང་དཀོར་བདག་ལྷ་མོ་སྒྲུབ་པའི་ལོ་རྒྱུས།
༄༅། །དགེ་སློང་རཱ་ག་ཨ་སྱའི་ཡང་གསང་གི་རྣམ་ཐར་དུམ་བུ་ལས་བཀའ་སྲུང་དཀོར་བདག་ལྷ་མོ་སྒྲུབ་པའི་ལོ་རྒྱུས་བཞུགས་སོ།།
༄༅། །ན་མོ་གུ་རུ་པྲ་ཝ་ཀ་ར་ཡེ། ངོ་བོ་སེང་ལྡེང་ནགས་ཀྱི་སྒྲོལ་མ་སྟེ། །དེ་ཕྱིར་སྤྱན་རས་གཟིགས་ཀྱི་ལྕམ་གཅིག་མ། །ཞིང་སྐྱོང་མཁའ་འགྲོ་ལྷན་ཅིག་སྐྱེས་མ་སྟེ། །རྡོ་རྗེ་གཡུ་ཡི་སྒྲོལ་མ་དེ་ལ་བསྟོད། །འདི་ཉིད་ཚེ་རབས་ལས་ལྷ་ཡིན་པའི་ཕྱིར། །ཁྲི་སྲོང་སྲས་པོ་སད་ན་ལེགས་དེ་ཡིས། །དཀར་ཆུང་རྡོ་རྗེ་དབྱིངས་ཀྱི་ལྷ་ཁང་བཞེངས། །དེ་ཚེ་སློབ་དཔོན་པདྨ་འབྱུང་གནས་ཀྱིས། །ལྷ་ཁང་བཀའ་སྲུང་རྒྱལ་པོའི་དཀོར་བདག་ཏུ། །ལྷ་མོ་རྡོ་རྗེ་གཡུ་སྒྲོན་མ་འདི་བསྐོས། །རྒྱལ་པོའི་ལྷ་སྲས་སད་ན་ལེགས་དེ་ནི། །ས་གནས་སེམས་དཔའ་ཆེན་པོ་ཡིན་པར་བཤད། །དེ་ཡི་
སྐྱེ་རྒྱུད་སྤྲུལ་པ་དངོས་ཉིད་ནི། །ཁོ་བོ་ཡིན་པར་སྨྲ་བར་ག་ལ་སྤོབས། །འོན་ཀྱང་དེ་ཡི་བྱིན་གྱིས་བརླབས་པ་ཡིས། །ཡང་སྤྲུལ་ཆ་ཤས་ཙམ་ཞིག་ཡིན་པར་རློམ། །སློབ་དཔོན་ཆེན་པོའི་བཀའ་བསྒོས་དམ་བཞག་ཕྱིར། །ལྷ་མོ་འདི་ཉིད་འཁོར་བ་རྟེན་འབྲེལ་ཡིན། །གཙང་དུ་སོང་ཚེ་འདི་ཡི་བླ་རི་ནི། །ཇོ་མོ་གངས་དཀར་དེ་ཉིད་མཐོང་ཙམ་གྱིས། །ཡིད་སེམས་དགའ་ཞིང་དྭངས་བ་སྐྱེས་པར་གྱུར། །བསམ་ཡས་མཇལ་ཚེ་དེ་ཡི་སྒོ་དྲུང་ལ། །མ་མགོན་གཉིས་དང་མགར་བ་དམར་པོ་དང་། །ལྷ་མོ་འདི་ཡི་ལྡེར་སྐུ་ཆེན་པོ་འདུག །བསྟན་སྲུང་ཆེན་པོ་ཡིན་པའི་ངེས་ཤེས་
སྐྱེས། །རང་ལོ་རྩ་བཞིའི་ལོ་མཇུག་ཕ་ཡུལ་བསླེབས། །ཡབ་རྒན་ཨ་ནུ་མཁར་གྱི་རྩེ་མོ་ན། །སྔར་དུས་མཆོད་ཁང་ནང་གི་དཔེ་རྩེག་དེ། །དྲག་རིམ་དམག་མི་རྣམས་ཀྱིས་ཁྱེར་ཏེ་སོང་། །མང་མའི་གླེགས་ཐག་ཁྱེར་ཏེ་ཐམས་ཅད་རླགས། །ཚྭ་ཁང་སྒོག་པོའི་ནང་འདྲ་བྱས་འདུག་པ། །ཉི་མ་གཉིས་གསུམ་དཔེ་ཆ་དེ་རྣམས་བསྒྲིགས། །དེ་ཚེ་འཚོ་མཛད་རཏྣ་དྷ་ཛ་དེས། །ཁྱེད་ཉིད་ཕེབས་ཁ་བུ་མོ་རས་དཀར་ཅན། །ལྔ་ཡི་དཔེ་ཆ་དེ་ཚོ་བསྒྲིགས་པ་རྨིས། །ཁྱེད་ལ་ལྷ་མོ་ཞིག་ནི་འཁོར་འདུག་ཟེར། །དེ་མ་ཐག་ཏུ་དེ་ཡི་སྒྲུབ་ཐབས་ཀྱི། །དཔེ་ཆ་རྣམས་ཀྱང་རང་གི་ལག་ཏུ་བྱུང་། །གཏེར་སྟོན་ཆེན་པོ་དྲི་མེད་ཀུན་དགའ་ཡིས། །རང་གི་ཉམས་ལེན་བྱེད་འདོད་ཆེ་བ་ཡི། །དཔེ་ཆ་སྙེམ་མེད་ལག་ཏུ་བྱུང་བ་དེ། །མཁའ་འགྲོ་གཏད་རྒྱ་རྒྱུད་པ་ཡིན་ནོ་གསུངས། །དབང་ལུང་རྒྱུད་པ་མེད་པའང་མ་ཡིན་ཏེ། །དྲེགས་པའི་སྲོག་དབང་སྔོན་ནས་ཐོབ་པའི་ཕྱིར། །བཀའ་གཏད་ཀྱང་ནི་དེ་ལ་འདུས་པར་གོ །དྲེགས་པའི་ག་ཞུང་ནས་འདི་ཡི་སྲོག་དབང་ཐོབ། །ལུང་བཙན་སྒྲུབ་ཐབས་སྔར་ནས་ཐོབ་པ་དེས། །རཏྣའི་ལུགས་ཀྱི་འདི་ཡི་སྒྲུབ་ཐབས་ཐོབ། །འདི་ཡི་གཏོར་འབུལ་ཚིགས་སུ་བཅད་
པ་ནི། །ཐུགས་སྒྲུབ་བརྔན་བསང་ལ་སོགས་ཐོབ་ལ་འདུས། །སྒྲུབ་ཐབས་འདོན་ཆོག་རྣམས་ཀྱི་ལུང་དཀོན་ཡང་། །ཨོ་རྒྱན་སྐུ་འདྲར་པོ་ཏིའི་ལུང་དབང་ཞུས། །དེ་ནི་དང་པོ་དུས་ཡིན་ཕྱིས་ནས་རིམ་པ་ལྟར། །འབྲུག་པ་བླ་མ་ཚུལ་ཁྲིམས་རིན་ཆེན་ལ། །མཐུ་ཆེན་རྡོ་རྗེ་འཛིན་པས་མཛད་པ་ཞུས། །པཎ་ཆེན་ལུང་རིགས་ཉི་མའི་ཞལ་སྔ་ནས། །ཉིད་ཀྱིས་མཛད་པའི་བསྐང་གསོལ་རྒྱས་པ་དང་། །ལོ་རྒྱུས་བཀའ་གཏད་ཞལ་གདམས་བཅས་པ་ཐོབ། །སྟོང་ནག་བླ་མ་ཀརྨ་དབང་ཕྱུག་ལས། །རྒྱལ་བའི་དབང་པོ་དབང་ཕྱུག་རྡོ་རྗེ་ཡིས། །མཛད་པའི་སྒྲུབ་ཐབས་གསོལ་ཁ་རྒྱས་པར་ཐོབ། །ཆོས་སྒོ་བ་དང་སྟོང་ནག་པ་གཉིས་ཀྱི། །བཀའ་སྲུང་དཀོར་བདག་འདི་ཉིད་ཡིན་པར་སྣང་། །ཆུ་འཕུར་དབོན་པོ་ཐུབ་དབང་གསུང་རྒྱུན་ལས། །འབྲུག་ལུགས་བཀའ་སྲུང་གཙོ་བོ་ཡིན་ཚུལ་ཐོས། །ཞུ་འདོད་བྱས་ཀྱང་མ་གནང་བཀའ་རྒྱ་དམ། །འདི་ཡི་བཀྲ་ཤིས་ཤོ་ལོ་ཀ་གཅིག་གསུངས། །ཁོང་གིས་བཀའ་སྲུང་རྩིས་ཆེན་ཡིན་པར་སྣང་། །སྤྲུལ་སྐུ་དཀོན་མཆོག་ཕྲིན་ལས་རྣམ་རྒྱལ་ལས། །པདྨ་གླིང་པའི་ལུགས་ཀྱི་སྒྲུབ་ཐབས་ཐོབ། །དུས་ཕྱིས་གནམ་ཆོས་ཐུགས་ཀྱི་གཏེར་ཁ་
ལས། །སྒྲུབ་ཐབས་དྲུག་དང་དེ་ཡི་བཀའ་གཏད་དྲུག །མདོས་དང་ལས་བྱང་ལས་ཚོགས་བཅས་པ་ཐོབ། །དང་པོ་རང་ལོ་ཉེར་བདུན་ཙམ་གྱི་དུས། །དང་པོ་ཕྱི་སྒྲུབ་ཉིད་ཀྱི་དབུ་བཙུགས་པས། །དང་པོ་མི་སྡུག་གཟུགས་ཅན་བུད་མེད་གཅིག །མེ་མུར་མེ་ཐལ་གཞོང་གང་ངའི་མདུན་རྒྱབ། །མི་དགའི་སྨྲེ་སྔགས་མང་པོ་འདོན་ཞིང་ཐལ། །གཡོག་མོ་གྲོ་ཁེ་མ་དེ་ཡིན་པར་གདའ། །དེ་ནས་བསྐྱེད་རིམ་བརྟན་པོ་བསྒོམས་ཤིང་བཟླས། །དེ་རྗེས་བུད་མེད་རྒྱན་ལྡན་མཛེས་མ་འགས། །འཛུམ་ཞིང་གུས་འདུད་དང་བཅས་མདུན་དུ་བྱུང་། །སྔོན་མ་དེ་ནི་ཁོ་མོས་ཁྱིམ་མཚེས་ཏེ། །ངན་པ་ཞིག་ནི་ཡིན་ནོ་ཟེར་བ་རྨིས། །ཡང་ནི་བུད་མེད་བཞིན་བཟང་མཛེས་མ་ཞིག །རིན་པོ་ཆེ་ཡི་རྣ་ཚར་བདག་ལ་བྱིན། །གཡུ་ནི་བཀྲག་བཟང་སྤོབས་ཚེའི་ཚད་ཙམ་དང་། །རིན་ཆེན་ཤེལ་དཀར་བདག་ལ་བྱིན་པ་དང་། །གཡུ་ནི་རི་བོ་ཙམ་ཞིག་བདག་གིས་རྙེད། །ལྷ་མོ་དངོས་དེ་ཡིན་བསམ་བུད་མེད་གཅིག །བདག་ལ་ཆགས་པའི་ཚུལ་གྱིས་འོ་བྱེད་པ། །ཁྱོད་ལ་ཁ་རླངས་དུག་ནི་ཡོད་པའི་ཕྱིར། །ཁ་ཕྱིས་སྨྲས་པས་ཁ་ཕྱིས་འོ་བྱེད་རྨིས། །ཡང་ནི་ལྷ་མོའི་བསྐང་གསོལ་བྱས་པའི་དུས། །ནམ་མཁའི་
མཐོངས་སུ་འཇའ་ཚོན་སྣ་ལྔ་ཡི། །དབྱིབས་ནི་མཚན་མའི་དབྱིབས་འདྲ་ཞིག་གི་ནང་། །བུད་མེད་གཉིས་ཀྱི་ཞལ་ནི་ཆེ་ཆུང་གཉིས། །ཆེ་བ་སྟེང་མ་ཆུང་བ་འོག་ཏུ་སྟེ། །ཆེ་བའི་ངོ་ཡི་ཚད་ནི་མདའ་ཚད་ཙམ། །ཆུང་བ་བུད་མེད་དཀྱུས་མའི་ངོ་ཙམ་པ། །གཉིས་ཀ་ཤིན་ཏུ་མཛེས་ཤིང་འཛུམ་པའི་ཞལ། །རིན་ཆེན་རྒྱན་དང་ལྡན་པ་གསལ་བར་མཐོང་། །མངོན་སུམ་ཉམས་སྣང་གང་ཡིན་མོ་འབྱེད་དོ། །དགུན་སྒང་བརྔན་བསང་བྱས་པའི་དུས་ཤིག་ལ། །དེ་ནུབ་གཏོར་མ་ཐམས་ཅད་བཅས་བཞག་པས། །གཞན་རྣམས་ཐམས་ཅད་འཁེངས་ནས་རྡོ་ལྟར་གྱུར། །ལྷ་མོའི་གཏོར་མ་ད་ལྟ་བཅས་ལྟར་འདུག །ཡང་ནི་བུད་མེད་བཙུན་མའི་ཆ་ལུགས་ཅན། །མཆེ་བ་ཅུང་ཟད་ཡོད་པ་ཞིག་བྱུང་ནས། །བདག་ལ་དགའ་ཞིང་འཛུམ་པའི་རྨི་ལམ་བྱུང་། །དེ་དང་རྗེས་མཐུན་སིདྡྷི་འཕྲལ་དུ་བྱུང་། །ཕྱི་སྒྲུབ་ལན་གཉིས་ཞག་པོ་བཅུ་བདུན་དང་། །དེ་རྗེས་ནང་སྒྲུབ་ལན་གཅིག་ཞག་པོ་བདུན། །གསང་སྒྲུབ་ལན་གསུམ་ཞག་པོ་ཉེར་གཅིག་སྟེ། །སྔགས་ཀུན་བསྲེས་པས་བདུན་འབུམ་བཞི་ཁྲི་ལྷག །རང་ལོ་སོ་གཉིས་ལྕགས་འབྲུག་ལོ་ལ་སོང་། །ཡང་ནི་གསང་སྒྲུབ་ཞག་པོ་
བདུན་བྱས་ཚེ། །རང་ཉིད་གོས་བཟང་བུད་མེད་ཕྱག་འཚལ་དང་། །ཐུགས་སྒྲུབ་སྐོར་ཞིག་གཏེར་ནས་ཐོན་པ་དང་། །ཇ་ཞུས་བྱུང་དང་འོ་མ་སྟེར་བ་དང་། །བུད་མེད་རྒྱན་ལྡན་འགའ་རེ་བྱུང་བ་རྨིས། །བདུན་ཁྲི་དྲུག་སྟོང་ལྷག་ཙམ་བཟླས་པ་བྱས། །ཡམས་ནད་ཤིན་ཏུ་འཇིགས་པའི་ནད་བྱུང་ནས། །ནད་པའི་རིམ་གྲོ་བྱེད་ཅིང་འདུག་པའི་ཚེ། །བུད་མེད་རྒྱ་ལྡན་ཤིན་ཏུ་མཛེས་སྡུག་ཅིག །བཞད་ཅིང་བྱུང་བ་རང་གི་ཉམས་ལ་ཤར། །གཞན་མ་ཞིག་གིས་དངོས་སུ་མཐོང་བར་འདུག །ནད་པ་སོས་ཤིང་རང་ལ་སྐྱོན་མ་བྱུང་། །མཆེད་གྲོགས་གཅིག་ནི་ནད་ཀྱིས་ཐེབས་གྱུར་ཏེ། །འཆི་ལ་ཉེ་ཚེ་གཞན་ཀུན་སྐྲག་ནས་བྲོས། །བདག་གིས་ནད་གཡོག་རིམ་གྲོ་གཉིས་ཀ་བྱས། །ཉམས་སྣང་བུད་མེད་མཛེས་མ་ཤིན་ཏུ་བྱུང་། །ནད་པ་སོས་ཤིང་རང་ལ་ནད་མ་འགོས། །གཅོང་ཆེན་ནད་པ་ཞིག་གི་རིམ་གྲོའི་ཚེ། །བུད་མེད་རྒྱན་དང་ལྡན་པ་ཞིག་བྱུང་ནས། །ངོ་ནི་མི་དགའ་ཁྲོ་བའི་ཚུལ་སྟོན་ཅིང་། །ཁ་ནི་དགའ་ཚུལ་བཞད་པའི་རྣམ་འགྱུར་སྟོན། །རང་ལ་གྲོགས་དང་གདུལ་བྱ་ཆེར་བྱུང་སྟེ། །ནད་པ་མ་ཕན་ཡུན་རིང་མནར་བར་གྱུར། །ཡང་ནི་ནད་པའི་རིམ་གྲོ་བྱེད་དུས་ཤིག །
བུད་མེད་ཤིན་ཏུ་མི་སྡུག་པ་ཞིག་གིས། །མིག་ནི་བྱིས་སྦྱའི་ཁུ་ཚུར་ཙམ་བསྒྲད་དེ། །མིག་ལྡོག་འཁོར་ཞིང་མིག་ལོག་བྱེད་སྙམ་མཐོང་། །དེ་ཉིན་ཉིད་ནས་བདག་ལ་སོ་ནད་བྱུང་། །ནད་པ་དེ་ཡང་ཕན་པར་མ་གྱུར་ཏོ། །ཡང་ནི་བུད་མེད་རྒྱན་དང་ལྡན་པ་ཞིག །ལུས་ནི་དགྱེ་མ་རྒུ་ལ་འདུག་སྙམ་བྱེད། །སིདྡྷི་ཆེན་པོ་འཕྲལ་དུ་བྱུང་བར་གྱུར། །གཡུ་དང་བྱི་རུ་གཙབ་མས་བརྒྱན་པ་ཡི། །བུད་མེད་སྔོ་བསངས་འདུག་པ་ཉམས་ལ་ཤར། །བུད་མེད་མཛེས་མས་སེ་ཤིང་འབྲས་བུ་རྒྱས། །བྱིན་པ་རྨིས་པས་འབྲུ་ཡི་སིདྡྷི་བྱུང་། །ཞི་ཁྲོ་བླུགས་དུས་རྒྱལ་མཚན་རྩ་དེ་རུ། །བུད་མེད་ཕྲ་ལ་རིང་བ་ལངས་འདུག་པ།། །རང་གི་གྲྭ་པ་ཞིག་གིས་མཐོང་འདུག་པས། །དེ་ལ་སིདྡྷི་འདུ་བ་ལེགས་པར་བྱུང་། །རང་གི་གཅུང་པོ་དབུས་སུ་ཡོད་པའི་དུས། །བུད་མེད་རྒྱུན་ལྡན་ཡང་ཡང་རྨིས་པ་དང་། །ཁམས་སུ་ཕེབས་ནས་བུད་མེད་རྒྱན་ལྡན་མཛེས། །དར་དཀར་ན་བཟའ་ལྷབ་ལྷུབ་མནབས་པ་ཡིས། །འབྲས་ཟན་བྱིན་ཅིང་ང་ཡི་གཏོར་མ་ནི། །འདི་ལྟར་གྱིས་ཟེར་ལུང་བསྟན་གསལ་བར་བྱུང་། །གཡུ་བོ་ཆེ་ནི་རི་ཙམ་རྙེད་རྨིས་པས། །བེ་གའི་སིདྡྷི་ཆེན་པོ་དངོས་སུ་བྱུང་། །སློབ་
དཔོན་ང་ཡི་དྲུང་དུ་འདུག་པའི་ཚེ། །བྱི་རུའི་རྒྱན་གྱིས་ཕྱུག་པའི་བུད་མེད་གཅིག །དགོད་ཅིང་བྱུང་བ་རྨིས་པ་ཅི་ཡིན་གསུངས། །རྒྱུས་ནི་ཅི་ཡང་མེད་པའི་བླ་མ་ཞིག །ཁྱེད་ལ་ལྷ་མོའི་རིགས་ཤིག་འཁོར་འདུག་གསུངས། །གཞན་ཡང་རྒྱུས་མེད་མིག་མཐོང་མཁན་ཞིག་གིས། །ལྷ་མོ་འཁོར་ནི་གདའ་ཚུལ་གསལ་བར་ཟེར། །ཡམས་ནད་ཆེན་པོས་འཚེ་བ་བྱུང་བའི་ཚེ། །ཕྱི་སྒྲུབ་ཞག་པོ་བདུན་དུ་བྱས་པའི་ཚེ། །དང་པོ་ནུབ་པར་མཚན་ངན་ཡུགས་ས་བྱུང་། །གཉིས་པར་ཡ་མོ་ཤ་མདོག་ནག་མོ་ཅན། །བདག་གི་གྲོགས་ནི་བྱེད་ཅིང་འདུག་པ་དང་། །གསུམ་པར་ཁང་ནག་གདན་ས་ཞིག་འདུག་པ། །བུད་མེད་གཅིག་གིས་བཤིག་རོགས་བྱེད་པ་དང་། །བཞི་པར་བུད་མེད་སྲུག་བྱིན་རང་དྲུང་འདུག །བུད་མེད་གཅིག་གིས་རང་ལ་བསྟོད་ར་སྨྲས། །བཙུན་མ་གཞོན་ནུས་མར་མེ་བཟོ་རོགས་བྱེད། །ཁང་བཟང་ནང་དུ་སྟེགས་ནི་མཐོན་པོ་ལ། །རང་ཉིད་འདུག་ནས་རྔ་བཟང་བརྡུང་བ་དང་། །ནམ་ལངས་པ་དང་ཉི་མ་ཤར་བ་དང་། །བུད་མེད་རྒྱན་ཆ་ཕྱུག་ཅིང་གཟུགས་མཛེས་པ། །ཇ་ཞུས་དུང་ལྡོག་གསུམ་དང་གཡུ་ཆུང་ཕུལ། །བུད་མེད་མང་པོས་རང་གི་ཕྱོགས་ཀྱི་ནི། །ཁང་པ་ཞིག་
གསོས་བྱེད་ཅིང་ཞག་དྲུག་ནུབ། །བུད་མེད་གཅིག་གིས་རིམ་གྲོའི་ལུང་བསྟན་བྱས། །རྟ་ཞོན་རྒྱན་དུ་རྒྱུག་ཅིང་རང་ཉིད་ཀྱི། །ཐེར་དཀར་གསལ་པའི་ཤམ་ཐབས་བཅིང་བྱེད་ཅིང་། །ཁྲོམ་ལ་དབང་བསྐུར་བྱེད་གྲབས་བྱས་པ་ཡིས། །ས་ཆ་མཐོན་པོའི་མཁར་གྱི་རྩེར་འདུག་ནས། །ངོ་མི་ཤེས་པའི་ཡུལ་མཁར་མང་མཐོང་རྨིས། །ཉམས་སྣང་འོད་དམར་འཚུབས་ཤིང་མེ་སྟག་འཚུབས། །དངོས་སུ་ཟང་ཟིང་འདུ་བ་དངོས་སུ་བྱུང་། །དེ་ནས་མཁས་གྲུབ་ལུང་རིགས་ཉི་མ་ཡིས། །མཛད་པའི་བསྐང་གསོ་བསང་བཅས་ཞག་བདུན་བྱས། །གཡུ་རྡོག་གསུམ་རྙེད་དངོས་སུ་འདུ་བ་བཟང་། །དེ་ནས་ཞག་བདུན་ངག་མཚམས་བསྡམས་བྱས་ཏེ། །སྔགས་ཐུང་གཅིག་འབུམ་ཉི་ཁྲི་ལྷག་ཙམ་དང་། །སྔགས་རིང་གཅིག་སྟོང་ཙམ་ཞིག་བཟླས་པ་སྟེ། །ཞག་གསུམ་ནུབ་པར་ཉམས་ཀྱི་སྣང་བ་ལ། །རྒྱན་ཆ་དཔག་མེད་ལྡན་པའི་བུད་མེད་གཅིག །རང་མདུན་རང་ལ་མགོ་བསྟན་ཉལ་ནས་འདུག །ཞག་ལྔ་ནུབ་པར་རྟོག་ངོར་སྣང་བ་ལ། །བུད་མེད་རྒྱན་དང་ལྡན་པ་ཡང་ཡང་གསལ། །རྨི་ལམ་བུད་མེད་དཀར་མོ་མཛེས་མ་ཞིག །རང་ལ་ཆེད་དུ་ལྟ་ཞིང་ལྟ་ཞིང་བྱུང་། །རྒྱན་ལྡན་མཛེས་
མའི་ཉ་ཕྱིས་ལས་གྲུབ་པ། །དུང་དཀར་ཞིག་ནི་བདག་ལ་ཕུལ་བ་དང་། །མཛེས་མ་རྒྱན་ལྡན་གཉིས་ནི་བྱུང་བ་ཡི། །ཞིམ་ཇ་དྲངས་ཤིང་ཡུང་འགའ་ཕུལ་གྲབས་བྱས། །བུད་མེད་དུ་དང་མུན་ཆུ་རུབ་པ་སོགས། །ངན་རྟགས་བྱུང་བ་བསྐང་བཤགས་བཟློག་པས་ཞི། །བསྒྲུབས་པ་ཚར་ནས་ཞག་པོ་གཉིས་ཀྱི་ནུབ། །དཀྱིལ་འཁོར་ཟུར་དུ་གཡུ་ནི་ཕུག་རོན་ཙམ། །བཀྲག་བཟང་འདུག་པ་ཉམས་ཀྱི་སྐབས་ལ་མཐོང་། །དེ་མ་ཐག་ཏུ་མ་ཧཱ་སིདྡྷི་བྱུང་། །བུད་མེད་ལྗང་ཁུ་རྒྱན་དང་ལྡན་པ་ལ། །རྨ་བྱའི་མདོངས་ཀྱིས་དབུ་བརྒྱན་བྱས་པ་ཞིག །ཉམས་སྣང་རང་མདུན་སྟངས་སྟབས་བྱེད་པ་མཐོང་། །ཡམས་ནད་འཇིགས་ལས་ཐར་ཞིང་སིདྡྷི་བྱུང་། །ནུབ་གཅིག་ཤ་ཞོན་དྲུག་ཀར་རྐང་ཐང་སྔགས། །བཀོད་ནས་ཅུང་ཟད་བསྙེན་ནུབ་རྨི་ལམ་ན། །བུད་མེད་འོ་མའི་ཁ་དོག་མཛེས་ཤིང་ཞི། །གཡུ་ནི་ཁོ་ནའི་རྒྱན་ཆ་ཀླུབ་པ་ཞིག །རང་ལ་ཤིན་ཏུ་དགའ་བའི་རྣམ་འགྱུར་གྱིས། །རང་ལ་གསང་སྤྱོད་བྱེད་ཚུལ་སྟོན་པ་དང་། །ཆུ་ལུག་སྤྲེལ་ཟླའི་ཚེས་བཅུ་རྒྱས་པའི་ནུབ། །དཔོན་ཆེན་ཞིག་གི་ལྕམ་སྲིང་ཡིན་སྙམ་པའི། །མཛེས་སྡུག་རྒྱན་རྣམས་ཀུན་གྱིས་བརྒྱན་པ་ཞིག །རང་ལ་གསང་སྤྱོད་བྱེད་ཚུལ་
བསྟན་པའི་ཚེ། །རང་ཉིད་རྟ་མགྲིན་བསྐྱེད་རིམ་གསལ་བར་བསྒོམས། །མོ་ཉིད་འོད་དུ་ཞུ་ནས་གསང་སྒྲུབས་ནས། །ཡར་དྲངས་སྤྱི་བོའི་ཧཾ་ལ་བསྟིམ་པ་སོགས། །སྐྱེལ་ཟློག་དམིགས་པ་གསལ་བར་བྱས་པའི་ཚེ། །ཁོ་མོ་དཔོན་ཆེན་ཞིག་གི་ལྕམ་སྲིང་ཡིན། །དབང་དང་སྟོབས་ཆེན་ཁ་མགོན་བྱེད་ཟེར་བའི། །གསང་ཚིག་འགའ་རེ་སྨྲས་པའི་རྨི་ལམ་བྱུང་། །རང་ལོ་སོ་དྲུག་ལོན་པ་སྤྲེལ་ལོ་ལ། །ཞག་བདུན་མཚམས་བསྡམས་ཆོ་ག་དུས་བཞི་དང་། །ལུང་རིགས་ཉི་མས་མཛད་པའི་སྔགས་དེ་ལ། །དྲུག་ཁྲི་བཞི་སྟོང་ཐེམ་པར་བཟླས་པའི་ཚེ། །དཔོན་པོ་རྒན་མོའི་ཇ་ཞུས་དྲངས་པ་དང་། །དཔོན་རིགས་བཙུན་མ་རྒན་མོ་ཞིག་གིས་ནི། །འབྲུ་ནི་ཡ་ནི་བཅོ་ལྔ་ཙམ་ཞིག་ཕུལ། །ཇ་དར་ཕུལ་དང་ཇ་ནི་མང་པོ་བདག ་ཁྲབ་བྱང་གཡུ་ཆུང་མང་པོ་བདག་གིས་རྙེད། །གྲྭ་པས་གདན་མང་བཏིང་སྟེང་རང་ཉིད་འདུག །དཀྱིལ་འཁོར་སྟེང་ཕྱོགས་འོད་ཀྱི་ཐིག་ལེ་ནི། །དམར་པོ་ཤར་བ་ཉམས་ཀྱི་སྐབས་ལ་མཐོང་། །སྦྱིན་བསྲེགས་བླུགས་ཤིང་སྒྲུབ་ཐབས་ཟིན་བྲིས་བྱས། །དེ་ནུབ་དཀྱིལ་འཁོར་སྟེང་དུ་བུད་མེད་ནི། །གཡུ་ཡི་ཤས་ཆེ་རྒྱན་ཆ་དཔག་མེད་བརྒྱན། །རང་ལ་
གཟིགས་ནས་འདུག་པ་ཉམས་ལ་མཐོང་། །ཇ་སྡུམ་དར་ཁ་མང་པོ་མཚན་དུ་སྦས། །གུར་དཀར་ཕུབ་དང་མཚོ་ཆེན་སྐྱིལ་བ་རྨིས། །སྐབས་ཤིག་ཉམས་སྣང་མཛེས་མ་རྒྱན་ལྡན་མཐོང་། །མ་ཧཱ་སིདྡྷ་གདུལ་བྱའི་སྒོ་ཆེན་བྱེ། །ཐོ་རངས་ཉམས་སྣང་རྒྱན་ལྡན་མཛེས་མ་གཉིས། །མདུན་དུ་ག་རེ་གུ་རེའི་ལས་བྱེད་མཐོང་། །སིདྡྷི་བྱུང་ཞིང་ཁེ་དང་བཅས་པ་འགྲུབ། །ལག་མགོ་ཙམ་གྱི་གཡུ་བཟང་རྙེད་པ་དང་། །ཉམས་དང་རྨི་ལམ་ལྷ་མོ་ཆས་བཟང་བ། །ཅི་བསམ་འགྲུབ་ཅིང་ལོངས་སྤྱོད་འཕེལ་བ་ནི། །ཤིན་ཏུ་མང་བས་བྲི་བར་མི་ལོང་ངོ། །དེ་ལྟར་སྔོན་ཚེ་པདྨ་འབྱུང་གནས་ཀྱིས། །ཆོས་རྒྱལ་སད་ན་ལེགས་ཀྱི་དཀོར་བདག་ཏུ། །བཀའ་བསྒོ་མཛད་པས་བཀའ་ལ་མི་འདའ་ཕྱིར། །ལྷ་མོ་འདི་ནི་མངོན་ཤེས་ཐོགས་མེད་ཕྱིར། །ཁོ་བོ་སད་ན་ལེགས་ཀྱི་ཡང་སྤྲུལ་གྱི། །ཆ་ཤས་ཡིན་པ་ལྷ་མོས་མཁྱེན་པའི་ཕྱིར། །སྙིགས་དུས་དགེ་སློང་རཱ་ག་ཨ་སྱ་ཡི། །བཀའ་སྲུང་དཀོར་གྱི་བདག་མོར་གྱུར་པ་ཡིན། །དེ་ལྟར་བདག་གི་ཚེ་རབས་ལས་ལྷ་དང་། །གཞོན་ཚེ་སྒྲུབ་པ་ལན་གྲངས་མང་བའི་ཕྱིར། །འཇིག་རྟེན་ལྷ་ནི་སྒྲུབ་མཁན་དེ་ཉིད་ཀྱིས། །རྗེས་འཇུག་རྣམས་ལ་འཁོར་ཚན་ཆེ་
བའི་ཕྱིར། །བདག་གི་རྗེས་འཇུག་རིགས་རྒྱུད་སློབ་བརྒྱུད་དང་། །དམར་ཁྲིད་ལ་སོགས་ཉམས་སུ་ལེན་རྣམས་ལ། །ལྷ་མོ་འདི་ཡིས་སྡོང་གྲོགས་བྱེད་པར་ངེས། །གལ་ཏེ་དབང་ལུང་ལ་སོགས་མ་ཐོབ་ན། །འདི་ཡི་སྒྲུབ་པ་བྱེད་ནི་མི་རུང་ངོ། །གསོལ་མཆོད་བྱས་ན་སྐྱོན་མེད་ཡོན་ཏན་འབྱུང་། །ཅི་ཕྱིར་རིགས་རྒྱུད་ཆོས་བརྒྱུད་སྲུང་མ་ཡིན། །ས་སྨད་ཕྱོགས་སུ་འདི་ཡི་གནོད་ཟེར་བ། །རྣམ་རྟོག་བྱེད་པ་གཙོ་མོ་མ་ཡིན་ཏེ། །གོང་དུ་རྟགས་མཚན་བྱུང་བ་བཤད་པ་རྣམས། །འདི་ཡི་གཡོག་མོ་གྲོ་ཁེ་མ་དེ་ཡིན། །འདི་ཡི་ངོ་བོ་སྒྲོལ་མ་སྔོན་མོ་ཡིན། །བདེ་མཆོག་སོགས་ནས་གཤིན་རྗེ་མཆེ་བ་མོ། །རྡོ་རྗེ་མཁའ་འགྲོའི་རྒྱུད་ལསབཤད་པ་ཡི། །བོད་སྐྱོངས་ལྷན་ཅིག་སྐྱེས་མ་ཞེས་བྱ་སྟེ། །རྡོ་རྗེ་ཕག་མོའི་སྤྲུལ་པ་ཡིན་པར་བཤད། །འཇིག་རྟེན་འདས་ཀྱང་འཁོར་བའི་ཆ་ལུགས་འཛིན། །ཕྱི་མའི་ས་ལམ་བར་ཆད་སེལ་བར་ནུས། །འཇིག་རྟེན་ལྷ་འདྲེ་ཡིན་པར་འཛིན་མི་རུང་། །དཔལ་ལྡན་ལྷ་མོའི་མཚན་ནི་བརྒྱ་རྩ་ལས། །རྡོ་རྗེ་གཡུ་སྒྲོན་མ་ཞེས་གསལ་བར་གསུངས། །ཞི་ཁྲོ་ན་རཀ་དོང་སྤྲུགས་རྒྱུད་ཆེན་ལས། །མ་མོ་རྦོད་གཏོང་ལྷ་ཡི་ཕྱག་རབ་སྐབས། །རྡོ་རྗེ་གཡུ་
སྒྲོན་མ་ལ་ཕྱག་འཚལ་ལོ། །གསུངས་ཕྱིར་ཡེ་ཤེས་ལྷ་མོ་ཡིན་པར་ངེས།།དེ་ཕྱིར་དྲེགས་པའི་སྡེ་དཔོན་སུམ་ཅུ་ལས། །དྲེགས་ཆེན་བཅོ་བརྒྱད་ཀུན་གྱི་མིང་ལ་ནི། །ཕྱག་འཚལ་ལོ་ཞེས་དོང་སྤྲུགས་རྒྱུད་ན་མེད། །འདི་ལ་གནད་ཆེན་འདུག་པ་རིགས་པས་དཔྱོད། །རང་གི་རྗེས་འཇུག་ལོག་ལྟ་མི་སྐྱེ་ཞིང་། །ལྷ་ལ་བློ་གཏད་བྱེད་ཕྱིར་སྨྲས་པ་ཡིན། །དེ་ལྟར་བཀའ་སྲུང་དཀོར་གྱི་བདག་མོ་ལ། །བསྒྲུབས་པ་བྱས་ཤིང་སྒྲུབ་ཀྱང་ངོ་མཚར་ཆུང་། །དེ་ཉིད་ཡོན་ཏན་མི་མཐོང་སྐྱོན་དུ་མཐོང་། །དེ་ཕྱིར་ཤིན་ཏུ་ཡོངས་སུ་གསང་དགོས་པས། །ཡང་གསང་རྣམ་ཐར་གྲ་རུ་བཀོད་པ་སྟེ། །དགོས་ཆེད་རྗེས་འཇུག་རྣམས་ལ་ཕན་ཕྱིར་རོ། །མངྒ་ལཾ། དགེའོ།། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།