དགེ་སློང་རཱ་ག་ཨ་སྱའི་ཁྲིད་རིམ་ཉམས་རྟོགས་དང་འབྲེལ་བའི་དེ་ཁོ་ན་ཉིད་ཀྱི་རྣམ་ཐར་གཉིས་པ།
༄༅། །དགེ་སློང་རཱ་ག་ཨ་སྱའི་ཁྲིད་རིམ་ཉམས་རྟོགས་དང་འབྲེལ་བའི་དེ་ཁོ་ན་ཉིད་ཀྱི་རྣམ་ཐར་གཉིས་པ་བཞུགས་སོ།།
༄༅། །ན་མོ་མ་ཧཱ་མུ་དྲ་ཡེ། །བན་རྒན་རཱ་ག་ཨ་སྱ་བདག །འགྲོ་དོན་བྱ་བར་སེམས་བསྐྱེད་ནས། །ལོ་འགའ་སྒར་པ་བྱས་ནས་སོང་། །སྐབས་སུ་སྐབས་སུ་མཚམས་ཀྱང་བསྡམས། །དབང་ལུང་ཁྲིད་ཀྱི་ཆར་པ་ཕབ། །འདུ་ཚོགས་རྣམ་གཡེང་ངང་ལ་འབྱམས། །མི་ལ་བཤད་པའི་ཁྲིད་རིམ་རྣམས། །རང་གི་ཉམས་སུ་མ་བླངས་ན། །སྒྲུང་མཁན་སྒྲུང་དང་འདྲ་འོ་སྙམ། །དལ་འབྱོར་ལྡན་པའི་མི་ལུས་འདི། །བསྐལ་པ་བརྒྱ་སྟོང་མང་པོར་ཡང་། །ལན་རེ་ཙམ་ལས་མི་ཐོབ་སྙམ།།དེ་ཡང་ངེས་ཤེས་དྲག་པོ་སྐྱེས། །ཐོབ་དཀའི་མི་ལུས་རིན་ཆེན་ལ། །ད་རེས་བེད་གཅིག་གཅོད་
དགོས་སྙམ། །མ་རྒན་འགྲོ་དྲུག་སེམས་ཅན་ལ། །ཕན་ཐོགས་ཅུང་ཟད་ཐུབ་ན་ཡང་། །མི་ལུས་དོན་ལྡན་ཡིན་ནོ་སྙམ། །ཐ་མལ་སྐྱེ་བོ་རྣམས་ལ་ཡང་། །སྐྱབས་སྡོམ་བསྙེན་གནས་སྨྱུང་གནས་དང་། །སངས་རྒྱས་མཚན་སྒྲོགས་དབང་ལུང་སོགས། །རྒྱ་ཆེར་སྟེར་བར་བྱེད་པ་འདི། །བྱས་པ་དོན་ལྡན་ཡིན་ནོ་སྙམ། །རང་ཉིད་སྡོམ་པ་དམ་ཚིག་ལྡན། །དགེ་བསྙེན་མ་དང་དགེ་བསྙེན་དང་། །དགེ་ཚུལ་དང་ནི་བསྙེན་རྫོགས་ཀྱི། །སྡོམ་པ་མང་པོ་འབོགས་པ་འདི། །བན་རྒན་བདག་གི་རོ་སྒོག་ལ། །བེད་གཅོད་ཆེན་པོ་གྲུབ་བོ་སྙམ། །གཞན་ཡང་ཡོན་ཏན་ཤེས་
པ་ཡི། །སེར་མོ་བ་ནི་མང་པོ་ཡིས། །ཆོ་ག་བསྐང་ཟློག་ཤེས་ན་ཡང་། །དབང་ལུང་ཐོབ་པར་མི་འདུག་པས། །དབང་ལུང་མ་ཐོབ་སྔགས་བསྒྲུབས་ན། །སྔགས་ལོག་དམྱལ་བའི་ས་བོན་ཏེ། །དེ་དག་རྣམས་ལ་དབང་ལུང་དང་། །གང་ལ་གང་དགོས་སྤེལ་བ་འདི། །བདག་གིས་ཐོབ་དཀའི་མི་ལུས་ལ། །བེད་གཅོད་ལེགས་པོ་བྱུང་ངོ་སྙམ། །ཆོས་འདོད་སྐྱ་སེར་མང་པོ་ལ། །འཕོ་ལུང་ཕྱག་རྫོགས་དམར་ཁྲིད་སོགས། །ཟབ་ཆོས་མང་པོའི་ཁྲིད་བཙུགས་པ། །འདི་ཡང་བདག་ལུས་དོན་ལྡན་ཡིན། །ཉི་མ་ཤར་ནས་མ་ནུབ་བར། །དབང་ལུང་བཀའ་བསྒོ་ཆོས་བཤད་སོགས། །ཕལ་ཆེར་བར་མཚམས་མེད་པ་དེས། །རང་གི་ཐུགས་དམ་ཆག་ན་ཡང་། །གཞན་ལ་ཕན་ཐོགས་ནུས་པ་ན། །ཐུགས་དམ་གཙོ་བོ་དེ་ཡིན་སྙམ། །ཐུབ་པ་ཤིང་ཐུར་སྐྱེས་པའི་དུས། །སེངྒེའི་ཁ་ནང་རུས་པ་ཞིག །ཟུག་པ་ཕྱུངས་རོགས་བྱས་ཙམ་ལས། །འགྲོ་དོན་ཅི་ཡང་མ་འགྲུབ་སྙམ། །བསམ་པ་སེམས་བསྐྱེད་རྣམ་དག་ཕྱིར། །ངོ་མཚར་སྐྱེས་རབས་གྲ་རུ་བྲིས། །དེ་དག་དོན་ལ་རྗེས་དཔག་ན། །བདག་གིས་དབང་བསྐུར་སེམས་བསྐྱེད་ཅིང་། །དབང་ལུང་ཁྲིད་ཀྱི་འགྲོ་དོན་འདིས། །མི་
ལུས་ཐོབ་པ་དོན་ལྡན་བསམ། །རང་ལུས་ཆད་ཅིང་དུབ་པ་དང་། །གཅོང་ནད་བདེ་དུས་མེད་ན་ཡང་། །དེ་དག་རྣམས་ལ་བཟོད་པ་བསྒོམས། །ཆད་ན་ཆད་ལ་ན་ན་ན། །བེམ་སྒོག་འདི་ཉིད་མ་བསྒྱུར་ཚུན། །དབང་ལུང་ཁྲིད་སོགས་འཕེལ་ཐུབ་ན། །ལུས་ལ་སྙིང་པོ་ལོན་པ་ཡིན། །བསམས་ཤིང་སྙིང་རུས་བྱས་པ་ཡིན། །འབུལ་བ་མཎྜལ་ལ་སོགས་ཀྱི། །ངོ་མ་ཆོག་པའི་དོན་ཡང་མིན། །དབང་ལུང་ཁྲིད་ཀྱི་ཆར་པ་ཕབ། །ས་དྲོས་རྡོ་དྲོས་རེད་ཟེར་བའི། །སྙན་གྲོགས་འདོད་པ་གཏན་ནས་མིན། །ན་སོ་རྒས་ཤིང་ནད་གཞི་མང་། །ཕོ་བ་བཙན་པོའི་མི་དང་འདྲ། །ཅི་ལྟར་གཟབ་ཀྱང་ཁོ་ལ་ཕོག །ལུས་པོ་བདེ་དུས་ཞག་གཅིག་མེད། །གདན་གཅིག་དགོང་བཅད་དཀའ་འདུག་སྟེ། །རྒྱུན་དུ་སྙིང་རུས་བསྐྱེད་དེ་བྱས། །ལུས་ལ་སྙིང་པོ་ལོན་པ་ཡིན། །ཅུང་ཟད་ད་ལམ་ནངས་ནུབ་དུས། །ཆོ་ག་མངོན་རྟོགས་རྒྱུན་བསྙེན་སོགས། །སྔར་ནས་སྐད་ཅིག་མི་དལ་བ། །ལྕེ་ཡོད་སྨྲ་ཤེས་ལུས་འདི་དཀོན། །ད་རེས་སྙིང་པོ་ལེན་དགོས་བསམ། །ཉ་མཚམས་བརྒྱད་གསུམ་ཚེས་བཅུ་དང་། །དགུ་གཏོར་ལ་སོགས་བཅའ་འདོན་དཀའ། །དབང་ལུང་ཐོབ་ཅིང་བསྙེན་
སྒྲུབ་ཐེམ། །དུས་བཟང་རྣམས་སུ་འདི་བྱས་པས། །དགེ་བ་འབུམ་འགྱུར་དཔག་མེད་གསུངས། །ལུས་ངག་སྙིང་པོ་ལེན་པའི་ཕྱིར། །འདི་དག་སྒྱུར་འདག་མེད་པར་བསམས། །ཁྲོམ་པ་གཞན་ལ་བཤད་པ་ཡི། །དལ་འབྱོར་རྙེད་པར་དཀའ་བའི་དོན། །རང་གི་ཉམས་སུ་བླང་ཚུལ་ཡིན། ༈ །སྤྱིར་དུ་འདུས་བྱས་རྣམས་མི་རྟག །སྣོད་ཀྱི་འཇིག་རྟེན་མི་རྟག་ཚུལ། །དེ་ཡང་ཡིད་ལ་ཡང་ཡང་གསལ། །བཅུད་ཀྱི་སེམས་ཅན་མི་རྟག་ཚུལ། །ཡང་ཡང་དྲན་པས་སྐྱོ་ཤས་ཆེ། །ཅི་དང་གང་ལའང་སྙིང་པོ་མེད། །བསམ་ཞིང་ཁེ་དྲག་སྟོབས་འབྱོར་སོགས། །གང་ཡང་འདོད་པ་མེད་པ་བྱུང་། །ངེས་པར་འཆི་བ་ཐག་ཆོད་ཚེ། །དུས་ཀྱི་འཆི་བ་བཟློག་ཐབས་མེད། །ཚེ་ལ་ལོང་མེད་འཆི་རྐྱེན་མང་། །ནམ་འཆི་ནམ་འཆི་བསམ་པ་དེ། །རྒྱུན་ཏུ་ཡིད་ལ་དུང་ངེ་ཡོད། །དེ་ཕྱིར་ཚེ་ཡི་བརྟག་པ་དང་། །འཆི་བ་བརྟག་པར་བྱེད་པའི་ཐབས། །ཟླ་རེ་ལ་ཡང་ལན་མང་ཤོར། །བདག་ནི་མི་རྟག་མྱུར་དུ་འཆི། །དེ་ཚེ་དམ་ཆོས་མ་གཏོགས་པ། །ཅིས་ཀྱང་མི་ཕན་མི་སྐྱོབ་ཅིང་། །དེ་ཡང་བཤད་ཆོས་མ་ཡིན་པས། །འཆི་ཆོས་གདམས་པ་ཟབ་མོ་ལ། །ཉམས་ལེན་རྡོ་རུས་གཏུག་
དགོས་སྙམ། །རྒྱུན་དུ་འཆི་བ་སྙིང་ལ་གཟེར། །དེ་ཕྱིར་བློ་སྣ་ཐུང་དུ་སོང་། །ས་ཕྱོགས་གང་དང་གར་ཕྱིན་ཀྱང་། །ད་རེས་ཙམ་ཞིག་མ་གཏོགས་པ། །ཕྱོགས་འདིར་ཁོ་བོ་མི་ཕྱིན་སྙམ། །སྐྱོ་ཤས་རང་བཞིན་ཤུགས་ཀྱིས་སྐྱེས། །ཡོན་བདག་ལ་སོགས་འགའ་ཞིག་གིས། །རྗེས་སོར་མཇལ་སོགས་ཟེར་བའི་དུས། །ཅི་ཆ་སྙམ་པ་ཡིད་ལ་ཤར། །ལར་ནི་ཚེ་ལ་ལོང་མེད་ཅིང་། །སྙིགས་དུས་བར་ཆད་རྐྱེན་མང་བས། །ལོ་ཤས་ཙམ་མམ་ཟླ་ཤས་ཙམ། །མི་ཚེ་ཞག་པོ་འགའ་ཙམ་ལ། །དམ་ཆོས་ཅི་འགྲུབ་མ་འབད་ན། །ཕྱིས་ནས་འགྱོད་ཀྱང་ཕན་མེད་སྙམ། །ལུས་སེམས་ཀློད་ཅིང་དལ་འདྲ་ཡང་། །སེམས་ནི་བརྩོན་འགྲུས་ལྕགས་ཀྱིས་བྲབ། །འཆི་བ་མི་རྟག་པ་ཡི་དོན། །ཁྲོམ་ལ་བཤད་པའི་དོན་དེ་དག །རང་གིས་ཉམས་སུ་བླང་ཚུལ་ཡིན། ༈ །སྟོང་ཉིད་གོ་བ་ཡོད་ན་ཡང་། །རྒྱུ་འབྲས་ཆེད་དུ་མ་བསད་པར། །དགེ་རྩ་ཕྲན་བུ་རྣམས་ཀྱང་འགྲུབ། །གཏོར་མ་བསྡུས་པ་སུ་རུ་བྷ། །གསུར་མཆོད་ཕུད་མཆོད་རྒྱུན་ཁྱེར་དང་། །བཟའ་བཏུང་ནང་གི་ཚོགས་འཁོར་དང་། །འབུལ་བ་བཟའ་བཏུང་ཚོགས་རྣམས་ཀུན། །སྐད་ཅིག་དྲན་རྫོགས་
ཏིང་འཛིན་གྱིས། །ནམ་མཁའ་བར་སྣང་ཐམས་ཅད་ཀུན། །ཐུགས་རྗེ་ཆེན་པོ་སྒྲོལ་དཀར་སོགས། །གང་བར་དམིགས་ནས་སྔགས་བསྔོས་བྱས། །འབྲུ་དང་སྐམ་དཔྱོད་བྱུང་ཚད་ཀུན། །མཎྜལ་སྔགས་དམིགས་བྱས་ནས་ཕུལ། །གོ་མཚོན་གང་ཞིག་བྱུང་ཚད་ཀུན། །བསྐང་བའི་རྫས་སུ་དམིགས་བྱས་ནས། །ཡི་དམ་ཆོས་སྐྱོང་རྣམས་ལ་ཕུལ། །ལ་ཆེན་དཀོར་རྫས་མཐོ་ཐོག་རྣམས། །དཀོན་མཆོག་ཕྱོགས་སུ་ཅི་ཐེང་བྱས། །རྒྱུན་གྱི་ཇ་ཐུག་ཕོག་ལ་སོགས། །གྲྭ་པ་ཐམས་ཅད་དགེ་སློང་དང་། །དགེ་ཚུལ་སྡོམ་ལྡན་ཁོ་ནའི་ཕྱིར། །དགེ་འདུན་བསྙེན་བཀུར་ཡིན་པར་དམིགས། །བཀའ་གདམས་དགེ་བའི་བཤེས་གཉེན་གྱི། །ལ་ལའི་དཀོར་རྫས་མེ་ལ་སྦར། །གསུངས་ལྟར་ཚེ་འབར་བཙུགས་པ་ལྟར། །ཀུན་གྱི་མཆོད་མེ་ཅི་འགྲུབ་བྱས། །ལ་ལའི་དཀོར་རྫས་མཁར་དུ་བརྩེགས། །གསུངས་ཕྱིར་མཆོད་ཁང་གཉིས་གསུམ་ཙམ། །བྲིས་སྐུ་འབུར་སྐུ་གང་བ་བཞེངས། །ལ་ལས་དཀོར་རྫས་དཀོན་མཆོག་ནི། །སོ་ཅན་ཞལ་དུ་ཐོང་གསུངས་ལྟར། །ཕྱོགས་རིས་མེད་པའི་བླ་མ་དང་། །དགེ་འདུན་སྡེ་ནི་མང་པོ་ལ། །སྐབས་ཐོག་དགོས་པའི་དུས་བྱུང་ཚེ། །མང་ཇ་འབུལ་
བ་ལན་མང་བྱས། །དབུལ་ཕོངས་སྡིག་པ་བྱེད་པ་འགའ། །སྡིག་འཕྲོ་གཅོད་པར་ཁས་བླངས་བཅུག །གནང་སྦྱིན་ཅུང་རེས་སྡིག་འཕྲོ་ཆོད། །ཕྱོགས་སུ་སོང་ཚེ་ཡིག་དྲུག་ནི། །དུང་གི་ཁ་བཀང་མི་ཐེ་བའི། །བྱེ་བ་རེ་ནས་བསགས་པ་ཡིས། །དུང་ཕྱུར་བརྒྱ་ལྷག་བྱུང་ངམ་སེམས། །གཞན་ཡང་མར་མེ་ཚེ་ཐར་དང་། །ཇོ་དར་བསྙེན་གནས་ངག་བཅད་སོགས། །དགེ་བ་ཁས་ལེན་དཔག་མེད་བྱུང་། །རྒྱས་འབྲིང་རྣམ་གསུམ་ལྡེར་སོ་དང་། །སྐུ་གསུང་ཐུགས་རྟེན་མང་ཞིག་འགྲུབ། །འབུམ་བརྒྱ་ལ་སོགས་ཀློག་འདོན་དང་། །དགེ་བའི་བྱ་བ་ཅི་འགྲུབ་འབད། །དཔོན་སློབ་གྲྭ་རིགས་བཅས་པ་ཡིས། །སྤྱོད་པ་འདུལ་བའི་ཆོས་དང་བསྟུན། །རྒྱུ་འབྲས་བསླུ་བ་མེད་པའི་དོན། །ཁ་ཙམ་མིན་པར་སྙིང་ལ་འཆང་། །གཞན་ལ་བཤད་པའི་རྒྱུ་འབྲས་དོན། །རང་གིས་ཉམས་སུ་བླང་ཚུལ་ཡིན། །འཁོར་བ་སྡུག་བསྔལ་རྒྱ་མཚོ་འདི། །རྒྱ་ཆེན་གཏིང་ཟབ་ཐར་བར་དཀའ། །སྐྱེ་རྒ་ན་འཆི་རྦ་ཀློང་འཁྲུགས། །དམྱལ་བ་ཆུ་སྲིན་འཇིགས་སུ་རུང་། །ཡི་དྭགས་པར་གྱི་ཁ་སོས་འཐམ། །དུད་འགྲོ་ཉ་མིག་དེ་མིག་འཇིགས། །དེ་ལས་ཇི་ལྟར་བྱས་ན་ཐར། །ངན་
སོང་གསུམ་གྱི་སྡུག་བསྔལ་དེ། །རྣ་བས་ཐོས་ཀྱང་བ་སྤུ་གཟིངས། །ཐོག་ཏུ་བྱུང་ན་ཇི་ལྟར་བཟོད། །མཐོ་རིས་ལྷ་མིའི་བདེ་སྐྱིད་ཀྱང་། །དུག་དང་འདྲེས་པའི་ཁ་ཟས་ལྟར། །ཡུད་ཙམ་བདེ་སྟེ་སྡུག་བསྔལ་རྒྱུ། །ལྷ་མིའི་བདེ་སྐྱིད་ཐོབ་ན་ཡང་། །རྨི་ལམ་བཟང་པོ་བྱུང་བ་ལྟར། །ཤི་བའི་ནང་པར་གཅིག་ཀྱང་མེད། །མི་ལུས་ཁོ་ན་ལེན་ཆོག་ཀྱང་། །སྐྱེ་འཆིའི་ཕྲེང་བ་བགྲང་བ་བཞིན། །དུས་དང་བསྟན་པ་ཇེ་ཆེར་འགྲིབ། །དེ་ཕྱིར་འཁོར་བའི་བདེ་སྐྱིད་ལ། །བཅོས་ནས་སྒོམ་པ་མ་ཡིན་པར། །རང་ཤུགས་ཞན་པ་གཏིང་ནས་ལོག །འཁོར་བ་འདི་ལ་ཕྱི་ཕྱག་འཚལ། །བྱ་རྒོད་རྙི་ལས་ཐར་བ་བཞིན། །ཆགས་ཞེན་འཁྲི་བ་ཀུན་ཆོད་ནས། །བྱ་རྒོད་ནམ་འཕང་གཅོད་པ་ལྟར། །བདེ་བ་ཅན་གྱི་ཞིང་ཁམས་སུ། །འགྲོ་བ་འདི་ལ་ཐེ་ཚོམ་མེད། །དེ་ལྟར་འགྲོ་བས་ཆོག་པ་ཡི། །ལྷ་སྔགས་སྒྲུབ་པ་ཟབ་མོ་དང་། །འདི་ཡི་རྒྱུ་རུ་འགྱུར་བ་ཡི། །དགེ་བའི་རྩ་བ་གང་དགོས་དང་། །བསྔོ་བ་སྨོན་ལམ་རྒྱས་འདེབས་རྣམས། །རང་གི་ཐུགས་དམ་གཙོ་བོ་དང་། །གཞན་ལ་ཟབ་ཆོས་སྙིང་པོར་བཤད། །མདོ་རྒྱུད་མན་ངག་བླ་མའི་གསུང་། །ཐོས་རྒྱ་ཆེ་བའི་འབྲས་བུ་སྟེ། །འཁོར་
བའི་ཉེས་དམིགས་བཤད་པ་རྣམས། །རང་གིས་ཉམས་སུ་བླང་ཚུལ་ཡིན། །དགེ་བ་ཆེ་ཕྲ་ཐམས་ཅད་ལ། །སོ་སོར་ཕན་ཡོན་མང་ན་ཡང་། །རྟ་ཁ་སྲབ་ཀྱིས་སྒྱུར་བ་ལྟར། །བསྔོ་བ་སྨོན་ལམ་གནད་ཆེ་བས། །ངོ་མཚར་ཆུ་རྣམས་རོ་གཅིག་ལྟར། །ཐམས་ཅད་མ་ལུས་གཅིག་བསྡུས་ནས། །གེགས་དང་བར་ཆད་མེད་པ་དང་། །བདེ་སྐྱིད་ཕུན་སུམ་ཚོགས་པའི་ངང་། །བླ་མེད་བྱང་ཆུབ་ཐོབ་པའི་ཕྱིར། །བདེ་བ་ཅན་གྱི་ཞིང་ཁམས་སུ། །སྐྱེ་བའི་རྒྱུ་རུ་བསྔོ་བར་བྱས། །འདི་ཡང་མདོ་ཡི་དགོངས་པ་སྟེ། །སྐྱེ་བར་ངེས་པ་ཐུབ་པས་གསུངས། །འཁོར་བ་སྡུག་བསྔལ་རྒྱ་མཚོ་ལས། །སྐྱབས་གནས་སྐྱབས་མཛད་དཀོན་མཆོག་གསུམ། །དེ་ཡང་ཕྱི་ནང་གསང་བ་གསུམ། །རྩ་བའི་བླ་མ་དབྱེར་མེད་ལ། །ཅི་མཛད་ཁྱེད་ཤེས་བློ་སྙིང་གཏད། །མི་བསླུ་ངེས་པའི་ངེས་ཤེས་ཐོབ། །བླ་མ་རིགས་བདག་དབྱེར་མེད་པའི། །འབྲལ་མེད་སྤྱི་བོའི་རྒྱན་དུ་བཀོད། །འགྲོ་དྲུག་སེམས་ཅན་མ་ལུས་པ། །ཚེ་རབས་མང་པོའི་ཕ་དང་མ། །ཡིན་པར་གསུངས་པ་ངེས་ཤེས་ཐོབ། །དགེ་རྩ་ཆེ་ཕྲ་ཅི་འགྲུབ་ཀྱང་། །འགྲོ་བ་སེམས་ཅན་ཀུན་དོན་དུ། །ཡིན་པའི་སེམས་བསྐྱེད་རྩིས་
བཟུང་སྟེ། །བྱམས་དང་སྙིང་རྗེའི་གཏོང་ལེན་གྱི། །དམིགས་པ་ཆོས་ཀྱི་སྙིང་པོར་གོ །རང་གི་ཉམས་ལེན་སྙིང་པོ་དང་། །གཞན་ལ་ནན་ཏན་ཆེན་པོས་བཤད། །རིགས་དྲུག་སྡུག་བསྔལ་དྲན་པའི་ཚེ། །ཤུགས་འབྱུང་སྙིང་རྗེ་ཆེན་པོ་སྐྱེས། །ནད་པ་རྩིས་ཆེན་ཐུ་བ་ལྟར།།ཅི་དྲག་གང་དྲག་བསམ་ན་ཡང་། །གཏོང་ལེན་དམིགས་པ་བསྒོམས་པ་བས། །བྱ་རྒྱུ་ཅི་ཡང་མ་རྙེད་དོ། །བྱང་བུ་མང་པོ་བཞུ་བ་དང་། །འཕོ་བ་རྒྱང་འདེབས་བྱེད་པའི་དུས། །སྐྱོ་ཤས་སྙིང་རྗེ་དྲག་པོ་སྐྱེ། །དབང་མེད་མཆི་མ་ཆར་ལྟར་བབ། །སྐད་མཇུག་ཤོར་ནས་ངུ་སྐད་ཀྱིས། །འདོན་པ་མི་ཐོན་ཆད་འདྲ་བ། །དེ་འདྲ་ལན་གྲངས་འགའ་རེ་བྱུང་། །ས་ཕྱོགས་ཀུན་ཏུ་འགྲོ་བའི་ཚེ། །བདག་གིས་མིག་གི་མཐོང་བ་ཡི། །མི་ནོར་འབུ་སྲིན་ཡན་ཆད་ཀུན། །བདེ་ཆེན་ཞིང་དུ་འདྲེན་པ་ཡི། །བསྔོ་བ་སྨོན་ལམ་རྒྱ་ཆེན་གདབ། །གོས་དུམ་ཆབ་བསིལ་ལ་སོགས་པ། །སྔར་ནས་འདོད་མཁན་མང་བྱུང་བ། །དེ་འདྲ་བབ་ཐོབ་མེད་སྙམ་ནས། །སྔ་ཐོག་མ་བྱིན་ཤིན་ཏུ་བཀབ། །དེ་ནས་འདོད་མཁན་ཇེ་མང་སོང་། །བཀག་ཀྱང་མི་ཁོག་རྩོད་འདུག་པས། །བདག་གི་གོས་དུམ་སྐྲ་སེན་དང་། །དྲི་ཆུ་ལ་སོགས་
ཐམས་ཅད་ཀུན། །མི་དང་དུད་འགྲོ་ལ་སོགས་པ། །སུ་ཡིས་འབྲེལ་པ་ཐོབ་ཚད་ཀུན། །ནམ་ཞིག་བདེ་ཆེན་ཞིང་ཁམས་སུ། །བདག་གིས་སྤྲུལ་པས་འདྲེན་པར་ཤོག །གནས་སྐབས་ནད་པ་ལ་སོགས་ཀྱི། །ནད་གདོན་བར་ཆད་ཐམས་ཅད་ཞི། །སྲུང་བའི་མཆོག་ཏུ་འགྱུར་བར་ཤོག །དེ་ལྟར་སེམས་བསྐྱེད་སྨོན་ལམ་བཏབ། །དྲི་ཆུ་མང་པོ་ཁྱེར་སོང་ཚེ། །ཡིད་ཀྱི་བདུད་རྩི་འཁྱིལ་པ་དང་། །སྨེ་བརྩེགས་མང་པོ་ཐིམ་པར་དམིགས། །དབང་དང་མདོས་ཆོག་གཏོར་ཆོག་སོགས། །འགྲིགས་ཆོག་རྩོམ་ཆོས་བྲིས་པའི་ཚེ། །མདོ་སྔགས་བསྟན་པ་ནམ་གནས་བར། །དེ་དག་མི་ནུབ་འཕེལ་ཞིང་རྒྱས། །གནས་སྐབས་ཕན་ཐོགས་བདེ་ལེགས་འཕེལ། །ཕྱི་མ་བདེ་ཆེན་ཞིང་ཁམས་སུ། །སྐྱེ་བའི་སེམས་བསྐྱེད་སྨོན་ལམ་བཏབ། །དེ་བཞིན་བདག་ཉིད་མཐོང་བ་དང་། །ཐོས་དང་རེག་དང་འབྲེལ་ཐོགས་ཀུན། །བདག་གིས་སྤྲུལ་པ་ཡང་སྤྲུལ་གྱིས། །བདེ་ཆེན་ཞིང་དུ་འདྲེན་པ་ཡི། །སེམས་བསྐྱེད་སྨོན་ལམ་ཡང་ཡང་བྱས། །དེ་དག་སྐྱབས་འགྲོ་སེམས་བསྐྱེད་རྣམས། །གཞན་ལ་བཤད་པའི་དོན་དེ་ཡང་། །རང་གིས་ཉམས་སུ་བླང་ཚུལ་ཡིན། །སྐྱེ་བ་འདི་དང་གཞན་དག་
ཏུ། །སྡུག་བསྔལ་འབྱུང་བར་བྱེད་པའི་རྒྱུ། །སྡིག་སྒྲིབ་ཉེས་ལྟུང་ཡིན་པར་བཤད། །བཤད་པ་གོ་ཙམ་མ་ཡིན་པར། །དེ་ལ་ངེས་ཤེས་སྙིང་ནས་སྐྱེས། །རྡོར་སེམས་སྒོམ་བཟླས་ཡིག་བརྒྱ་དང་། །ཤྲིཡིག་བཞི་ལྡན་གདམས་པ་སོགས། །རྒྱུན་ཏུ་ཉམས་ལེན་མཐིལ་པོར་བྱས། །སྐབས་སུ་ཞི་གནས་གསོ་སྦྱོང་དང་། །བསྐང་བ་བཤགས་པ་ལ་ཡང་འབད། །དཀོར་གྱི་སྒྲིབ་པ་ཆེ་དོགས་པས། །དཀོར་སྦྱོང་སྔགས་དམིགས་རྣམས་ཀྱང་བྱས། །ཚེ་འདས་རྣམས་ཀྱི་སྒྲིབ་སྦྱང་ཐབས། །སྐད་ཅིག་དྲན་རྫོགས་བླ་མེད་ལུགས། །གསར་རྙིང་མང་པོའི་སྒོ་ནས་བྱས། །ལུས་པོ་མི་བདེ་གཅོང་ནད་ཕྱིར། །ཕྱག་དང་སྐོར་བ་མ་ནུས་ཀྱང་། །སྐབས་སུ་ཅུང་ཟད་བྱས་པའི་ཚེ། །དེ་དག་འབུམ་འགྱུར་འོང་བ་ཡི། །གཟུངས་སྔགས་བརྗོད་ཅིང་བྱས་ནས་ཀྱང་། །འབུམ་ཐེར་ཡིན་པའི་ངེས་ཤེས་བསྐྱེད། །དེ་ལ་ཐེ་ཚོམ་མེད་པ་ན། །འབུམ་ཐེར་སོང་བར་ཐུབ་པའི་དཀའ། །དུས་ཆེན་ལ་སོགས་འགྱུར་ཆེ་དུས། །སྒྲིབ་སྦྱང་གཟུངས་རིང་རྣམས་ཀྱང་བཟླས། །འབུམ་ཐེར་འོང་བའི་ངེས་ཤེས་བསྐྱེད། །ཚེ་འདིར་སྡིག་ལྟུང་བྱས་པ་ཡིས། །འགྱོད་དགོས་ཡོད་པ་མེད་ན་ཡང་། །ཚེ་རབས་བསྐལ་པ་
གྲངས་མེད་ནས། །སྡིག་ལྟུང་དཔག་མེད་བསགས་པ་རྣམས། །བཙན་དུག་ཁོང་དུ་ཤོར་བ་ལྟར། །གནོང་འགྱོད་དྲག་པོ་སྙིང་ནས་བྱས། །ད་ནི་ཚེ་མཇུག་ཅི་གདའ་བར། །དམ་ཆོས་སྙིང་ནས་སྒྲུབ་པ་ལས། །སྡིག་ལྟུང་བསག་རེ་ཞེ་དམ་བཅས། །ད་ནི་བདག་གི་བྱ་བ་ལ། །ཚོགས་བསགས་སྒྲིབ་སྦྱང་གཉིས་པོ་ལས། །བསྒྲུབ་རྒྱུའི་བྱ་བ་གཞན་མེད་སྙམ། །སྒྲིབ་སྦྱང་གཞན་ལ་བཤད་པ་རྣམས། །རང་གིས་ཉམས་སུ་བླང་ཚུལ་ཡིན། །དཀོན་མཆོག་ཀུན་འདུས་བླ་མ་རྗེ། །འོད་དཔག་མེད་པའི་སྐུར་གྱུར་ནས། །མདུན་གྱི་ནམ་མཁར་ལམ་མེར་གསལ། །སྐྱེ་བ་འདི་དང་གཞན་དག་ཏུ། །བདེ་སྐྱིད་འབྱུང་བར་བྱེད་པའི་རྒྱུ། །བསོད་ནམས་བསག་ནི་དགོས་པར་བཤད། །བཤད་ཙམ་མ་ཡིན་སྙིང་ནས་རྟོགས། །ལུས་དང་ལོངས་སྤྱོད་དགེ་རྩར་བཅས། །བླ་མ་འོད་དཔག་མེད་པའི་དྲུང་། །མཎྜལ་ཕྱི་ནང་གསང་གསུམ་ཕུལ། །རེས་འགའ་མཎྜལ་ཁོ་ན་ལ། །བརྒྱ་ཚར་རེ་ཙམ་བསགས་པར་བྱས། །རྒྱུན་ཁྱེར་དང་ནི་དུས་མཆོད་དུས། །དངོས་འབྱོར་མཆོད་པ་ཅི་འབྱོར་བཤམས། །ཡིད་ཀྱིས་དཔག་ཏུ་མེད་པར་སྤྲུལ། །དག་དང་མ་དག་ཞིང་ཀུན་ན། །
མཆོད་པར་འོས་པ་ཅི་མཆིས་པ། །ཐམས་ཅད་བློ་ཡིས་བླངས་ཏེ་ཕུལ། །བདེ་སྐྱིད་ཐམས་ཅད་འདོད་པ་ལ། །དཀོན་མཆོག་གསུམ་ལ་མཆོད་པར་བྱས། །གསུངས་ལྟར་ལག་ལེན་ཐེབས་པར་བྱས། །དེ་ལྟར་མཎྜལ་ཆོས་ཐུན་ཡང་། །གཞན་ལ་བཤད་ལྟར་རང་གིས་བྱས། །ཉམས་དང་རྟོགས་པ་སྐྱེ་བ་ལ། །བླ་མའི་བྱིན་རླབས་འཇུག་དགོས་ཤིང་། །བླ་མའི་བྱིན་རླབས་འཇུག་པའི་རྫས། །དད་པ་མོས་གུས་མེད་ཐབས་མེད། །ཕྱོགས་བཅུའི་སངས་རྒྱས་བཟང་ལགས་ཀྱང་། །ཞལ་ཟུར་ཙམ་ཡང་མི་མཇལ་ན། །ཟབ་ཆོས་ཐོབ་པ་ག་ལ་ཞིག །བཀའ་དྲིན་ཐོབ་པའི་བླ་མ་དེ། །སངས་རྒྱས་ཀུན་ལས་བཀའ་དྲིན་ཆེ། །བཀའ་དྲིན་ཐོབ་པ་མང་ལགས་ཀྱང་། །མོས་བློས་ཡར་ཞལ་མ་ཡིན་པར། །བཅོམ་ལྡན་མགོན་པོ་འོད་དཔག་མེད། །མི་ཡི་པགས་པས་དྲིལ་བ་དེ། །དྲིན་ཆེན་དྷརྨཱ་ཤྭ་ར་ཡིན། །དྲན་པ་ཙམ་གྱིས་སྣང་བ་འགྱུར། །བཅོས་ནི་ནམ་ཡང་མ་དགོས་པར། །དཀོན་མཆོག་ཀུན་འདུས་བློ་ཐག་ཆོད། །མི་འབྲལ་སྤྱི་བོའི་གཙུག་གི་བརྒྱན། །རིགས་བདག་ཡིན་ལ་ཡིན་ལྟ་བུ། །འབྲལ་མེད་བསྒོམས་ཤིང་གསོལ་བ་གདབ། །བྱིན་གྱིས་བརླབས་པའི་རྟགས་མཚན་
མཐོང་། །བདག་ནི་སྔོན་ནས་སྐལ་པ་བཟང་། །འོད་དཔག་མེད་མགོན་སྤྲུལ་པའི་སྐུ། །རྩ་བའི་བླ་མར་བསྟེན་རྒྱུ་རྙེད། །དེ་ཕྱིར་སྐུ་དངོས་བསྒོམས་ཀྱང་ལེགས། །བདག་གི་རྗེས་འཇུག་གྲྭ་རིས་སོགས། །རྒྱལ་མཆོག་དེ་དང་དེ་འདྲ་བ། །བླ་མར་བསྟེན་རྒྱུ་མ་རྙེད་ཅིང་། །རཱ་ག་ཨ་སྱ་བདག་འདྲ་བ། །སོ་སོའི་སྐྱེ་བོའི་དགེ་བཤེས་དག །རྩ་བའི་བླ་མར་བསྟེན་དགོས་པའི། །བླ་མའི་མུ་གེ་བྱུང་སྲིད་ན། །དེ་འདྲ་སྐུ་དངོས་མི་སྒོམ་པར། །ངོ་བོ་དེ་ལ་དབྱེར་མེད་པར། །འོད་དཔག་མེད་དང་ཨོ་རྒྱན་གྱི། །སྐུ་རུ་སྒོམ་པ་མན་ངག་ཡིན། །གསོལ་བ་ཁྱི་བཏབ་ཕག་བཏབ་ཀྱི། །སངས་ནི་རྒྱ་བར་མི་འགྱུར་ཞིང་། །བརྐོས་ཕོར་རི་མོ་མེད་པ་ན། །ཚ་ཚར་དོད་པར་མི་འགྱུར་གསུངས། །འོ་ན་བླ་མ་སྒོམ་དོན་མེད། །སངས་རྒྱས་བསྒོམས་པས་ཆོག་བསམ་ན། །ཏི་རུའི་ནང་དུ་ཇ་ཡོད་ཀྱང་། །མཆུ་དེ་འགགས་ན་ཕོར་བའི་ནང་། །ཇ་དེ་བླུག་ཏུ་མི་ཉན་ལྟར། །སངས་རྒྱས་རྣམས་ཀྱིས་བྱིན་བརླབས་ཀྱང་། །བླ་མ་མེད་ན་འཇུག་ཐབས་མེད། །དེ་དོན་ཤེས་པ་གལ་ཆེའོ། །བླ་མ་ཡི་དམ་དབྱེར་མེད་པའི། །ངེས་ཤེས་དྲག་པོ་སྙིང་ནས་སྐྱེས། །བླ་མ་
མཆོད་པའི་དུས་མཆོད་བཟུང་། །བླ་སྒྲུབ་མཚན་སྔགས་མང་དུ་བཟླས། །གཏོར་བསྔོས་བྱས་པའི་ནང་ན་ཡང་། །དྲིན་ཐོབ་བླ་མའི་མཚན་དང་སྔགས། །མེད་ན་བློ་ཁ་ཚིམས་མ་གྱུར། །ཞག་པོ་རེ་རེའི་ནང་ན་ཡང་། །བླ་མ་དྲན་ཞིང་བླ་མའི་དྲུང་། །འགྱུ་བ་བརྒྱ་ཕྲག་ཙམ་ཡང་འཕྲོ། །ཕ་མ་སྤུན་ཟླ་མཐུན་གྲོགས་སོགས། །སུ་བས་བླ་མ་གཅེས་པར་བཟུང་། །རྒྱལ་བ་མཆོག་དེ་ལྟ་ཅི་སྨོས། །དབང་ལུང་འབྲེལ་ཐོབ་བླ་མ་རྣམས། །རྨི་ལམ་ཡུལ་དུ་རྨིས་ན་ཡང་། །དངོས་སུ་མཇལ་འདྲའི་དགའ་ཚུལ་དང་། །དད་པ་དག་སྣང་མ་གཏོགས་པ། །རྒྱལ་འགོང་ཡིན་དོགས་ཞེ་ལ་མེད། །དབང་ལུང་འབྲེལ་བ་ཐོབ་ཚད་ལ། །བཅོས་མིན་དད་གུས་དཀའ་ན་ཡང་། །དབང་ཐོབ་པ་ཡི་ཡི་དམ་དེ། །དངོས་ཡིན་སྙམ་པའི་ངེས་ཤེས་བསྐྱེད། །བླ་མའི་རྣལ་འབྱོར་བསྒོམ་པའི་ཚུལ། །ཁྲོམ་ལ་ཇི་ལྟར་བཤད་པ་ལྟར། །རང་གིས་ཉམས་སུ་བླང་ཚུལ་ཡིན། །དབང་ལུང་ཁྲིད་སོགས་རྣམ་གཡེང་ཆེ། །ཞི་གནས་འཐུག་པོ་སྐྱེ་དཀའ་ཡང་། །བསྐྱེད་རིམ་ཞི་གནས་དོན་གཅིག་ཕྱིར། །རང་ལུས་ཡི་དམ་ལྷ་ཡི་སྐུ། །གསལ་སྟོང་ནམ་མཁའི་འཇའ་ཚོན་བཞིན། །ཐུགས་སྲོག་ས་བོན་
སྔགས་འཁོར་དང་། །འོད་ཟེར་སྤྲོ་བསྡུ་སྣ་ཚོགས་ཀྱིས། །ཕྲིན་ལས་རབ་འབྱམས་སྒྲུབ་པ་དང་། །གཞན་ཡང་དམིགས་པའི་འཕྲོ་འདུ་ཡིས། །ཚེས་འདས་སྒྲིབ་སྦྱང་གནས་སྤར་དང་། །གསོན་པོའི་སྲུང་ཟློག་རྐྱེན་སེལ་སོགས། །བསྒོམ་རྒྱུའི་རྩ་བ་དེ་ལགས་པས། །རྒྱུན་དུ་འབྲེལ་བ་མེད་འདྲར་སེམས། །རྣམ་གཡེང་ཆེ་ཡང་དེ་མི་ཤོལ། །སྔར་ནས་གོམས་འདྲིས་ཆེ་དྲག་པས། །རང་དབང་ཐོབ་པ་འདྲ་བ་ཡོད། །དེ་དག་ཅི་ལྟར་བསྒོམ་པའི་ཚུལ། །ཐུན་རེ་ལ་ཡང་རྣམ་གྲངས་མེད། །འདི་རུ་བྲི་བར་ག་ལ་འོང་། །མདོ་བས་སྔགས་འདི་ལམ་ཉེ་བས། །བསྐྱེད་རིམ་ཁོ་ནའི་དོན་ཡིན་པས། །འདི་ནི་ཤིན་ཏུ་གལ་ཆེན་ཡིན། །ཞི་གནས་དང་ནི་བསྐྱེད་རིམ་གྱིས། །དམིགས་ཐུན་གཞན་ལ་བཤད་པ་རྣམས། །རང་གིས་ཉམས་སུ་བླངས་ཚུལ་ཡིན། །ལྷག་མཐོང་ཤེས་རབ་བསྐྱེད་པའི་ཐབས། །འདི་ལ་ཐུན་མོང་ཁྱད་པར་གཉིས། །ཐུན་མོང་སྤྱི་ཡི་ལྷག་མཐོང་ནི། །ཆོས་ཀུན་རྣམ་འབྱེད་ཤེས་རབ་སྟེ། །བན་རྒན་རཱ་ག་ཨ་སྱ་བདག །སློབ་གཉེར་རྒྱ་ཆེན་མ་བྱས་ཏེ། །བྱང་ཕྱོགས་རྒྱུད་ཀྱི་པཎྜི་ཏ། །ཡི་དམ་ལྷ་ཡི་མཚན་གསོལ་བ། །འཇམ་དབྱངས་བླ་མ་ཆོས་ཀྱི་ནི། །
སྣང་བ་ཅན་ཞེས་བྱ་བ་དེར། །རྩེ་གཅིག་གསོལ་བ་བཏབ་པ་དེས། །ཐུགས་རྗེས་སྤྱན་ཟུར་གཡོས་པའི་མཐུས། །དབང་དང་སྒྲུབ་པ་ལས་ཚོགས་སྐོར། །ཁྲིད་དང་ཆོ་ག་མདོས་བཟློག་སོགས། །མཐོང་བ་ཙམ་གྱིས་དེ་ཡི་དོན། །ཤེ་མོང་སུལ་བཞིན་ཡིད་ལ་འཆར། །རྒྱས་བསྡུས་འབྲིང་དང་སྤྲོས་མེད་སོགས། །བཀའ་ལ་རས་གཅོད་མ་ཡིན་པར། །ཇི་ལྟར་བྱས་ཀྱང་ཁྲིགས་སེ་ཤེས། །བཤད་ཀྱང་བསམ་བློ་བཏང་མི་དགོས། །ཞལ་གདམས་ཉམས་མགུར་བརྟན་བཞུགས་དང་། །གསོལ་འདེབས་སྨོན་ལམ་ལ་སོགས་པ། །ཉམས་ལ་རྩོམ་འདོད་མ་སྐྱེས་པར། །བསམ་བློ་བཏང་ཡང་ཅི་མི་དྲན། །རྩོམ་འདོད་ཉམས་ཤིག་སྐྱེས་པའི་དུས། །ཤུགས་འབྱུང་བསམ་བློ་མ་བཏང་བར། །ཚིག་གཅིག་བྲིས་ན་དེ་མཚན་དྲན། །ཐག་ཐོག་མེད་པ་ཆུ་འབབ་འདྲ། །བྲི་བསྣོག་མི་དགོས་འགལ་འཁྲུལ་མེད། །རྩོམ་འདོད་ཆེ་ཞིང་གལ་ཆེ་དུས། །བྲིས་པ་གསུམ་བཞི་གཡས་གཡོན་འདུག །ཚིག་དོན་མི་འདྲ་སོ་སོར་རྩོམ། །རྗེས་སོར་བལྟས་ཀྱང་འགལ་འཁྲུལ་མེད། །དེ་ལྟར་ཆོས་བཤད་བྱེད་པའི་དུས། །བསམ་བློ་མ་བཏང་ཤུགས་འབྱུང་ལ། །བཤད་ན་ཟད་མེད་ཆུ་བོ་འདྲ། །ཝོར་
ལོགས་མི་དགོས་རིམ་པར་འབྱེད། །མདོ་རྒྱུད་འགལ་བའི་བླུན་གཏམ་མིན། །གྲུབ་མཐའ་ཀུན་མཐུན་བཤད་ཀྱང་ཤེས། །ཁྲོམ་ཚོགས་དགེ་བཤེས་མང་ན་ཡང་། །ཡ་ང་བག་ཚ་རྡུལ་ཙམ་མེད། །གྲུབ་མཐའ་མི་གཅིག་ང་རྒྱལ་ཅན། །དེ་འདྲ་རྣམས་དང་འཕྲད་པའི་ཚེ། །ཁོང་གི་འདོད་བཞད་ཆོས་ལུགས་རྣམས། །ཕར་ལ་བཤད་པས་སྤོབས་པ་ཞུམ། །ཁོང་གི་གྲུབ་མཐའ་དེ་ཉིད་ལ། །མདོ་རྒྱུད་ཚད་ལྡན་གཞན་དག་དང་། །ཅུང་ཟད་མི་མཐུན་ཡོད་པ་རྣམས། །འདི་དག་དོན་ནི་ཅི་ཡིན་ཞེས། །དྲིས་པས་དཔའ་ཞུམ་བླ་ཆག་གྱུར། །དབང་ལུང་ཞུ་མཁན་བྱུང་རྣམས་ལ། །དེ་ལ་ཅི་མཁོ་ཅི་ཕན་རྣམས། །ཚུར་ལ་ཞུ་དགོས་མ་ཟེར་ཡང་། །ཁྱེད་ལ་ཅི་དགོས་བྱས་ནས་བྱིན། །སོ་སོར་རྟོགས་པའི་ཡེ་ཤེས་ནི། །ཇི་ལྟ་བ་བཞིན་མ་རྟོགས་ཀྱང་། །ཆོས་ཀུན་རྣམ་འབྱེད་ཤེས་རབ་ནི། །ཅུང་ཟད་ཙམ་ཞིག་སྐྱེ་བ་འདི། །སྒོམ་བྱུང་ཤེས་རབ་ཡིན་དཀའ་སྟེ། །བླ་མའི་བྱིན་རླབས་ཡིན་པར་སེམས། །ཐུན་མོང་མིན་པའི་ལྷག་མཐོང་ནི། །རང་སེམས་ངོ་བོ་མཐོང་བ་དེ། །དེ་ནི་སྔར་ནས་མཐོང་བར་རློམ། །ཞི་ལྷག་ཟུང་འཇུག་ཉམས་ལེན་ལ། །བསྐྱེད་རིམ་ཞི་
གནས་དོན་གཅིག་ཅིང་། །བསྐྱེད་རྫོགས་ཟུང་དུ་འཇུག་པ་འདི། །ཞི་ལྷག་ཟུང་འཇུག་ཡིན་པར་གོ །དེ་ཉིད་སྤྱོད་ལམ་ཐམས་ཅད་དུ། །འབྲལ་མེད་ཨེ་ཡོང་ནན་ཏན་བྱས། །ཡེངས་སྐབས་བརྗོད་སྐབས་མང་ན་ཡང་། །ཡེངས་དང་མ་ཡེངས་ཁྱད་མེད་པར། །ངོ་བོ་འགྱུར་བ་མེད་པར་རྟོགས། །གསལ་ཆ་ཐོན་དང་མ་ཐོན་ཙམ། །མ་རྟོགས་ཡེངས་དང་མ་ཡེངས་དང་། །སྒོམ་དང་མ་བསྒོམས་ཁྱད་མེད་པའི། །ངེས་ཤེས་རྟོགས་པ་གདེང་ནས་སྐྱེས། །བསྒོམ་འདོད་འགྱུར་བུས་མ་བཅིངས་ཤིང་། །སྣང་བ་གུ་ཡངས་ཕྱལ་བར་བསྐྱོངས། །ཁྲོམ་ཚོགས་འདུ་ལོང་ཆེ་བའི་སྐབས། །ལྷག་པར་ཉམས་རྟོགས་གསལ་ཞིང་བརྟན། །དུས་དེར་བྱང་ཡིག་མང་པོའི་དུས། །བསྔོ་བ་བྱེད་པའི་ཚེ་ཉིད་ནས། །ཏིང་ངེ་འཛིན་གྱིས་བྱང་ཞུས་ཚར། །ཤི་བསྔོ་གསོན་བསྔོ་མང་པོའི་ཚེ། །ཉམས་ལེན་མཉམ་བཞག་སྟོང་ཉིད་ངང་། །འཁོར་གསུམ་ཡོངས་དག་བསྔོ་བ་བྱས། །ཁྲོམ་ཆེན་དབང་དང་ཁྲིད་ཀྱི་དུས། །གཞན་རྒྱུད་བྱིན་གྱིས་བརླབ་པའི་ཕྱིར། །ཁྲོམ་དང་ཉམས་ལེན་བསྲེས་ཤིང་བསྒོམས། །བདག་གཞན་དབྱེར་མེད་རྟོགས་པ་སྐྱེས། །ས་རྡོ་རི་བྲག་སྐྱེ་འགྲོ་ཀུན། །རྣམ་པ་
གསལ་ཡང་ངོ་བོ་སྟོང་། །ཆུ་ནང་ཤར་བའི་ཟླ་བ་བཞིན། །སྣང་སྟོང་ཟུང་འཇུག་རྟོགས་པ་སྐྱེས། །མི་ཆེན་དཔོན་ཆེན་མང་པོ་དང་། །སྐུ་སྐྱེ་བླ་བརྒྱུད་ལ་སོགས་པ། །ཐོབ་ཆ་ཆེན་པོ་ཡོད་རྣམས་ཀྱིས། །གུས་འདུད་བཀུར་སྟི་བྱེད་པའི་ཚེ། །ང་རྒྱལ་རང་ཆེ་མ་སྐྱེས་ཤིང་། །ལེགས་སོ་དགའ་འོ་སྙམ་པ་ཡིས། །རྣམ་རྟོག་འབུར་འཇོམས་ངོ་བོར་བལྟས། །རྟ་ནད་ནོར་ནད་ཁྱི་སྨྱོན་དང་། །ཇག་རྐུན་ཆུ་རྒོད་གཅན་སྤྱང་སོགས། །གནོད་འཚེ་དོགས་པའི་ཟུག་རྔུའི་ཚེ། །ངོ་བལྟས་ཉམས་ལེན་ཐོག་ཏུ་བཞག །བསྐྱེད་རྫོགས་ཉམས་ལེན་མི་བཤོལ་བར། །དེ་དག་སྲུང་ཟློག་དམིགས་རིམ་གཟབ། །དངོས་རྟགས་དེ་དག་གནོད་པ་ནི། །ནམ་མཁའ་དྭངས་ཤིང་མེ་ཏོག་རྒྱས། །གདུལ་བྱ་ལོངས་སྤྱོད་ལྷུན་གྱིས་གྲུབ། །གུ་ཡངས་སྣང་བ་བདེ་བའི་ཚེ། །རྒྱ་ཡན་མ་བཏང་ངོ་བོ་བསྐྱོངས། །འགྲོ་རེས་ངལ་དུབ་ཁ་ཆར་བབ། །ལམ་ངན་རྔབ་གཡང་ཇག་རྐུན་དོགས། །ལུས་པོ་ངལ་དུབ་སེམས་འཁྲུགས་ཚེ། །ངོ་བོར་བལྟས་པའི་རོ་སྙོམས་བྱས། །རེས་འགའ་ཚད་པ་ལ་སོགས་པས། །གློ་བུར་རང་ཉིད་ནད་ཀྱིས་ཐེབས། །ཁམས་ཉོབ་ལུས་པོ་མ་བདེ་ཞིང་། །
སང་ཉིན་ནས་ནི་ཆོས་ར་སོགས། །དབང་དང་ཆོས་བཤད་ལ་སོགས་པ། །ཐུབ་པ་མི་འདྲ་བསམ་པའི་དུས། །གྲྭ་པ་རྣམས་ཀྱང་སྐྲག་གྱུར་ནས། །རེ་ཞིག་སྐུ་ཁམས་མ་གསིང་བར། །དབང་དང་བཀའ་བསྒོ་ལ་སོགས་པ། །མ་མཛད་ཟེར་ནས་བཀག་པའི་དུས། །གཅོད་དང་རོ་སྙོམས་གསལ་བཏབ་ནས། །གདོན་ཆེན་གྲིབ་ཆེན་མང་པོ་ལ། །དབང་དང་བྱིན་རླབས་བཀའ་བསྒོ་དང་། །ཧཱུཾ་ཤི་ཕཊ་འགྱེལ་དྲག་དམིགས་བཏང་། །ཁྲོམ་དབང་ཆོས་ལུང་ལ་སོགས་ཀྱང་། །མ་ཚིག་སྔར་མུས་ལྟར་དུ་བྱས། །ཕྱིར་ནངས་ཙམ་ནས་རང་ཉིད་བདེ། །དེ་འདྲ་བྱུང་བ་ལན་གྲངས་མང་། །དེ་ལྟར་ལོ་གྲངས་བདུན་གྱི་བར། །འགྲོ་དོན་སྒར་པ་བྱས་ཚེ་ཡང་། །དགུན་སྨད་ནས་བཟུང་སུས་བུད་བར། །མཚམས་བསྡམས་སྒྲུབ་ཆེན་སྒྲུབ་ཕྲན་སོགས། །སྒྲུབ་པ་མང་པོ་བྱས་པ་དེ། །དེ་དག་ཀུན་གྱི་ཚེ་ན་ཡང་། །འདོན་པ་བཅའ་ཚོགས་སྔགས་ལ་སོགས། །མི་གཅིག་རྣམ་གྲངས་མང་ན་ཡང་། །གཙོ་བོར་བསྐྱེད་རྫོགས་ཟུང་འཇུག་གི །ཉམས་ལེན་ངང་ལ་གཞུང་ཤིང་བྱས། །དེ་ལྟར་ལོ་བདུན་འགྲོ་དོན་ལ། །བར་ཆད་མེད་ཅིང་ལམ་དུ་སོང་།།དེ་ལྟར་གཞན་ལ་བཤད་པ་རྣམས། །
སྔོན་ནས་རང་གིས་ཉམས་བླངས་ཤིང་། །བཤད་ཚེ་ཉིད་ནས་སྒོམ་མོད་ཀྱི། །ཆོས་ནི་གང་ལ་བལྟས་ན་ཡང་། །ནན་ཏན་ཉམས་སུ་མ་བླངས་ན། །གོ་ཞིང་བཤད་པ་མཁས་ན་ཡང་། །འབྲས་བུ་ཐོབ་པར་མི་འགྱུར་བསམ། །དེ་ནས་མཚམས་ཀྱང་དམ་བཅའ་བཟུང་། །མེ་འབར་སྔོན་དུ་དུ་བ་ལྟར། །དངོས་ཉམས་རྨི་ལམ་རྩུབ་ཆ་ཆེ། །ཞག་འགའ་ཙམ་ཞིག་སོང་བའི་ཚེ། །རང་གི་ཉེ་གནས་མ་ཕམ་དེ། །རིམས་ངན་དྲག་པོས་འཕྲལ་དུ་གུམ། །རིམས་ནད་འཕྲོ་དོགས་སྲུང་ཟློག་དང་། །ཁོ་ཡི་སྒྲིབ་སྦྱང་སྔགས་དམིགས་འབད། །རིམས་ནད་སུ་ལའོང་མ་འཕྲོས་ཤིང་། །ཉེ་གནས་བདེ་ཆེན་ཞིང་ཁམས་སུ། །སྐྱེས་པའི་རྟགས་མཚན་གསལ་བར་མཐོང་། །རང་ཡང་ལག་པ་ན་བ་སོགས། །སྨན་དང་བཅོས་ཀ་མ་བདེ་ཡང་། །སྔགས་དམིགས་བྱས་པས་རིམ་པར་བདེ། །ལོ་ངོ་ཙམ་ཞིག་མཚམས་བསྡམས་ཤིང་། །ཐུགས་དམ་དགེ་སྦྱོར་འཕེལ་བར་བྱུང་། །དེ་ནས་དེ་ཡི་ལོ་མཇུག་ན། །དབོན་པོ་འཚོ་མཛད་དྲག་ལུ་དེ། །ལོ་མང་གོང་ནས་ནད་ཀྱིས་ཐེབས། །སྨན་དང་རིམ་གྲོ་བཅོས་ཀ་སོགས། །ཅིས་ཀྱང་མ་ཕན་ཚེ་དུས་བྱས། །ཁྲིད་རིམ་ཀུན་གྱི་རྩ་བ་
ནི། །འཆི་བ་མི་རྟག་བསྒོམ་དགོས་ཤིང་། །དུས་ཀྱི་འཆི་བ་འབྱུང་བ་ལ། །ཅིས་ཀྱང་བཟློག་ཐབས་མེད་གསུངས་པ། །བཤད་པ་ཙམ་ནི་མ་ཡིན་པར། །མངོན་སུམ་ངོ་སྤྲོད་གསལ་བར་བྱུང་། །དེ་ནས་རྟ་ལོའི་དཔྱིད་སོས་ལ། །བླ་མ་ཆོས་དབང་ཀུན་བཟང་འདས། །ཕ་མ་གཅིག་པའི་སྤུན་ཟླ་སྟེ། །ཡིད་ལ་དྲན་ནས་མ་འདས་པར། །མིག་ལོག་རྗེ་རེས་ཙམ་ཡང་མེད། །ཆོས་ཕྱོགས་རང་དང་སྐྱ་བཀའ་ཕེར། །འཇིག་རྟེན་ཆོས་འཛིན་ཁོ་རང་ཡིན། །ང་བས་ཁོང་ཉིད་ལོ་མང་གཞོན། །དེ་ཉིད་གློ་བུར་འདས་པ་ལ། །སེམས་སྡུག་ཡོད་དམ་མེད་པ་ནི། །མི་རྣམས་ཀུན་གྱིས་ཤེས་ལྟར་ཡིན། །འོན་ཀྱང་སྔོན་ཚེ་རྟོགས་ལྡན་ཞིག །རོ་གཅིག་རྟོགས་ནས་ལོ་གསུམ་སོང་། །ད་ལོ་བས་ནི་སྡུག་ཆེ་བ། །མ་བྱུང་ཟེར་ནས་ངུས་སོ་སྐད། །དེ་ལྟར་བྱས་ན་སྐྱག་རེ་མེད། །བསམས་ནས་སྡུག་མཁན་ངོ་བོར་བལྟས། །མཆི་མ་ཐིགས་གཅིག་ཤོར་བ་མེད། །དེ་ནས་ལུག་ལོའི་སོས་ཁ་ལ། །མི་འགྱུར་རྡོ་རྗེ་ཞིང་བརྗེས་ཏེ། །ཨོ་རྒྱན་ཆེན་པོའི་བསྟན་པའི་བདག །སྙིགས་དུས་འགྲོ་བའི་སྐྱབས་དང་མགོན། །བདུད་དང་ལྷ་འདྲེའི་ཁ་གནོན་ཏེ། །བདག་གི་སྙིང་དང་མིག་ལས་གཅེས། །
གཏེར་ཁ་བརྒྱ་རྩ་འདོན་མ་རག །བར་ཆད་རྐྱེན་གྱིས་གཤེགས་པ་དེ། །བསམས་ཤིང་སྡུག་བསྔལ་བྱས་པ་ན། །སྙིང་ཡང་གས་ན་མི་འཆི་འམ། །ཡིད་བཞིན་ནོར་བུ་རྙེད་ནས་བོར། །གསེར་གྱི་ཉི་ཟླ་ས་བོན་ནུབ། །སྤྱིར་དུ་འགྲོ་བའི་བསོད་ནམས་ཟད། །སྒོས་སུ་བདག་ལ་སྡུག་རེས་བབ། །འོན་ཀྱང་སྡུག་མཁན་ངོ་བོར་བལྟས། །མཆི་ཐིགས་ཙམ་ཡང་མ་ཤོར་ཞིང་། །གཞན་མ་འགའ་ལ་འོང་སྲོལ་ལྟར། །སེམས་རླུང་སྟོད་འཚངས་ལ་སོགས་པ། །ཞད་ཙམ་ལྡང་བར་མ་གྱུར་ཏོ། །དེ་ལྟར་སྡུག་བསྔལ་ཆེན་པོ་ཀུན། །ཕྱག་རྒྱ་ཆེན་པོའི་ངོ་བོར་ཤར། །རྐྱེན་ངན་བྱུང་དུས་མི་ཐེག་ན། །ལྟོ་འགྲངས་ལུས་སེམས་བདེ་བའི་དུས། །སྟོང་སྐད་མཐོ་བས་ཅི་ལ་ཕན། །སྤྲེལ་ལོར་གཉེར་པ་ཆོས་འཕེལ་འདས། །དེ་སོགས་གྲྭ་པ་མང་ཞིག་རྣམས། །རིམ་པར་ཚེ་ཡི་དུས་བྱས་ཚེ། །སྙིང་རྗེ་ཕན་སེམས་ཆེ་ན་ཡང་། །འཆི་བ་བཟློག་ཐབས་མི་འདུག་པས། །ཡུན་རིང་བསྔོ་བ་སྨོན་ལམ་དང་། །སྒྲིབ་སྦྱང་གནས་སྤར་སྔགས་དམིགས་ལ། །འབད་པ་མ་གཏོགས་བྱ་ཐབས་སྡུག །བྱ་ལོར་མ་ཧཱ་ར་ཛའི་དྲུང་། །རང་དབང་མེད་པར་འགྲོ་དགོས་བྱུང་། །གྲྭ་
སློབ་ཡོན་བདག་ཐམས་ཅད་ཀུན། །བཀའ་བཀྱོན་ཡོང་དོགས་ཤིན་ཏུ་སྐྲག །སྟོང་དམག་མང་པོའི་དབང་བསྒྱུར་བའི། །སྟོབས་ལྡན་སྡེ་དཔོན་མང་པོ་ཡང་། །སྐྲག་ནས་ཀུམ་ཀུམ་བྱེད། །སྔར་ནས་འདྲིས་པའི་བློན་པོ་རྣམས། །ལྷག་པར་སྐྲག་འཇིགས་ཆེ་བར་འདུག །ཀུན་ཀྱང་བྱེད་ལུགས་བཞིན་ཤོར་ཚེ། །སྐྱག་མཁན་སེམས་ཀྱི་ངོ་བོར་བལྟས། །སྐྲག་ཅིང་འཇིགས་པའི་སྣང་བ་བྲལ། །དེ་ཚེ་རང་གིས་དཔུང་རོགས་དང་། །ཞུ་སྣ་ཁྲིད་པའི་དཔོན་གཅིག་གིས། །བདག་ལ་སྐྲག་སྣང་མེད་པ་དེ། །སྐྱིད་མེད་སྡུག་ཟད་རེད་སྙམ་ནས། །དེ་ཡི་ལུགས་ཀྱི་ཚིག་ཀྱང་ཟེར། །དེ་ནས་སླར་ཡང་མཚམས་བསྡམས་ནས། །ནང་ནུབ་ཐུགས་དམ་དགེ་སྦྱོར་དང་། །ཉིན་གུང་ཕལ་ཆེར་བུག་སྒོ་ནས། །བུག་སྒོར་ཆོས་བཤད་དབང་ལུང་འཕེལ། །དེ་ཚེ་བླ་མ་སྒོམ་ཆེན་སོགས། །ཁྲིད་རིམ་མང་པོ་ཐོབ་པ་དང་། །ལོ་མང་རྩེ་གཅིག་མཚམས་བསྡམས་ནས། །བསྒོམས་པས་སྒོམ་ཡུས་ཆེ་རྣམས་ལ། །མཐོ་མཐོ་རྟོགས་པའི་ས་མཚམས་ཕྱེས། །འབྲིང་ལ་ངོ་མཐོང་ངོ་བོ་སྤྱད། །གཞན་ལ་གང་ལ་གང་དགོས་ཀྱི། །གེགས་སེལ་བོགས་འདོན་མགུ་བར་བྱས། །ཆོས་ཞུ་གསར་པ་རྣམས་
ལ་ཡང་། །གནས་འགྱུའི་ངོ་བོ་འཕྲོད་ངེས་དང་། །རྫོགས་པ་ཆེན་པོའི་ཐོད་རྒལ་བསྟན། །ཐོད་རྒལ་བསྟན་པའི་ཐོན་པོ་ལ། །ལྷ་ཞལ་མཐོང་བ་མང་དུ་བྱུང་། །འཕོ་ལུང་བཙུགས་པ་རྣམས་ལ་ཡང་། །ཞག་རེ་ཞག་གཉིས་ཞག་གསུམ་ཕན། །མི་འགྱང་རྟགས་ནི་ཐོན་པ་བྱུང་། །གཏུམ་མོའི་ཁྲིད་རིམ་ལན་བཞིར་བཙུགས། །མགོ་རྒྱལ་ཟླ་བ་ལྷག་པའི་ནང་། །དྲག་རིམ་ཞག་ནི་ལྔ་བདུན་ལ། །གཟན་གོས་རྐྱང་པས་དྲོས་པ་དང་། །ལ་ལ་ཞག་ནི་བཅུ་ལྷག་ནི། །གཅེར་བུ་ཆུ་རས་སྐམ་པར་ནུས། །ཕལ་ཆེར་ཞག་པོ་ཉེར་གཅིག་ལས། །མི་འགྱང་གཅེར་བུ་གོས་མེད་པར། །ཆུ་རས་སྐམ་པར་ནུས་པ་དང་། །ལ་ལས་རས་གོས་མ་འཛོམས་པར། །གཟན་གོས་ཆུར་སྦམ་སྐམ་པར་ནུས། །གསར་དུ་དམར་ཁྲིད་བརྩོམས་པ་དང་། །སློབ་མ་འགའ་རེའི་ཕྱོགས་ཕྱོགས་སུ། །ཁྱེར་ནས་ཁྲིད་བཙུགས་འགྲོ་དོན་འཕེལ། །ཁྲོམ་ལ་འཛིངས་རྩོད་ནད་མུག་སོགས། །མེད་ཅིང་ཉམས་རྟོགས་སྐྱེ་བ་དང་། །དགེ་བསྐུལ་མང་པོ་འགྲུབ་བོ་སྐད། །རང་ཉིད་མཚམས་ཀྱི་སྐབས་དེར་ཡང་། །ནད་པ་རྣམས་ལ་བརྟག་པ་དང་། །དམིགས་ཐུན་ཞུ་མཁན་ཤིན་ཏུ་མང་། །དེ་
ཚེ་བསྐྱེད་རྫོགས་ཟུང་འཇུག་དང་། །ནད་གདོན་སེལ་བའི་སྔགས་དམིགས་རྣམས། །ཐུན་རེ་རྫུན་ཆད་མིན་པར་བྱས། །དེ་བཞིན་བསྔོ་བ་བྱང་བུ་སོགས། །ཚེ་འདས་མིང་ཡིག་མང་པོ་ལ། །སྒྲིབ་སྦྱང་གནས་འདྲེན་སྔགས་དམིགས་བྱས། །ནད་པ་དང་ནི་ཚེ་འདས་ལ། །སྔགས་དང་དམིགས་པ་ཅི་བྱས་ཀྱང་། །དེ་ལ་རིག་པ་གཏད་ནས་ཀྱང་། །ཉམས་ལེན་ངོ་བོ་སྐྱོང་བྱས་ལ། །རང་གི་ཉམས་རྟོགས་དེ་ཉིད་དང་། །ཁོ་ཉིད་དབྱེར་མེད་འདྲེས་འགྲོ་བས། །དེ་ཉིད་ཕན་ཐོགས་ཆེ་འམ་སྙམ། །དེ་ལྟར་ལོ་བདུན་སྒར་པ་དང་། །ལོ་གཅིག་ངག་མཚམས་དམ་པོ་དང་། །ལོ་བདུན་ལྡོག་མཚམས་ལྷོད་དེ་བས། །བུག་སྒོར་ཆོས་བཤད་བྱས་པའི་ཚེ། །སྤྱིར་ནི་རྣམ་གཡེང་ཇེ་ཆེར་འཕེལ། །ཟང་ཟིང་དཀོར་རྫ་ས་ཆར་ལྟར་བབ། །དེ་ནས་ཉམས་རྟོགས་བོགས་སྐྱེད་ཆུང་། །དེ་ཁོ་ན་ཉིད་ཀྱི་རྣམ་ཐོར་མཇུག །བྲི་རྒྱུ་ཅི་ཡང་མི་གདའ་སྟེ། །དབོན་པོ་པདྨ་ནམ་མཁའ་ཡིས། །བྲིས་དགོས་ཟེར་ནས་ནན་ཏན་བྱས། །དེ་ཕྱིར་འཕྲལ་དུ་གང་དྲན་ཙམ། །ཆེ་ལོང་ངག་ནས་སྨོས་པ་ལྟར། །མུ་པ་དགེ་སློང་དད་པ་ཡིས། །འཕྲལ་དུ་བུག་སྒོར་བསྡད་ནས་བྲིས། །ད་ནི་གནམ་ལོ་འདི་ཡི་མཇུག །སྨིན་
དྲུག་ཟླ་བའི་ཚེས་གཅིག་ནས། །རྩེ་གཅིག་ངག་མཚམས་བསྡམས་ནས་ཀྱང་། །ཉམས་ལེན་ངོ་བོ་སྐྱོང་བ་ལ། །རྩེ་གཅིག་དྲིལ་བར་དམ་བཅའ་དེ། །དེ་ཚེ་ཉམས་དང་རྟོགས་པ་ལ། །བོགས་སྐྱེད་ཨེ་ཡོང་རེ་བ་ཆེ། །བྱུང་ཡང་ལག་པས་བྲི་མི་ཐེབ། །ངག་མཚམས་དམ་པས་མེད་ཐབས་མེད། །ཡི་གེར་བཀོད་པ་འོང་ཤས་ཆུང་། །རང་ལོ་ལྔ་བཅུ་ང་གཉིས་ནས། །རེ་བཞི་ནག་པའི་ཡར་ཚེས་བར། །ཉམས་རྟོགས་སྐྱེས་ཚུལ་རྣམ་ཐར་ནི། །དེ་དག་ཙམ་ལས་མ་མཆིས་སོ། །མངྒ་ལཾ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།