བླ་མ་ཞིང་གཤེགས་ཆོས་དབང་ཀུན་བཟང་གི་ལོ་རྒྱུས་རྣམ་ཐར་ངུ་བྲོ་དགོད་འཆོར།
༄༅། །བླ་མ་ཞིང་གཤེགས་ཆོས་དབང་ཀུན་བཟང་གི་ལོ་རྒྱུས་རྣམ་ཐར་ངུ་བྲོ་དགོད་འཆོར་ཞེས་བྱ་བ་བཞུགས་སོ།།
༄༅། །ན་མོ་གུ་རུ་ལོ་ཀེ་ཤྭ་ར་ཡེ། །ཡི་དམ་སྤྱན་རས་གཟིགས་དབང་ཞབས་ལ་འདུད། །བླ་མ་ཆོས་དབོང་ཀུན་བཟང་ལོ་རྒྱུས་ནི། །ཡེ་ཤེས་སྤྲུལ་རྒྱུད་འཇིག་རྟེན་ལས་རྒྱུད་དང་། །རྒྱུ་འབྲས་བསླུ་མེད་མདོ་རྒྱུད་དང་མཚུངས་ཚུལ། །ཚེ་འདིར་རྣམ་ཐར་འདས་དུས་རྟགས་མཚན་དང་། །ཕྱི་མའི་ལུང་བསྟན་ཆོས་ཀྱི་ཕན་ཡོན་དང་། །ས་བཅད་རྣམ་པ་བདུན་དུ་བསྡུས་ནས་བཤད། །དང་པོ་ཡེ་ཤེས་སྤྲུལ་རྒྱུད་བཤད་པ་ནི། །སྤྲུལ་པ་ལ་ཡང་སྐྱེ་རྒྱུད་སྤྲུལ་པ་དང་། །ཡང་སྤྲུལ་ཉིང་སྤྲུལ་དང་ནི་སུམ་སྤྲུལ་དང་། །བྱིན་གྱིས་བརླབས་པའི་སྤྲུལ་པ་དང་ནི་དྲུག །དེ་ཡང་བླ་མ་ཆོས་དབང་
ཀུན་བཟང་འདི། །ཨོ་རྒྱན་ཆེན་པོས་བྱིན་རླབས་སྤྲུལ་པ་སྟེ། །ཅི་ཕྱིར་ལུང་བསྟན་ཆེན་པོ་བཀའ་རྒྱ་མར། །མདོར་ན་ཨོ་རྒྱན་ངས་བསྟན་ཆོས་རྣམས་ལ། །གཞུང་བཞིན་སུ་དང་སུ་ཡིས་སྤྱོད་པ་ཀུན། །ཐམས་ཅད་ང་ཡི་སྤྲུལ་པ་ཡིན་པར་ངེས། །ཕྱི་རབས་ཀུན་གྱིས་ཐེ་ཚོམ་ཡིད་གཉིས་སྤོངས། །གུས་པས་བཀུར་སྟི་ཕུ་དུད་འབྲེལ་པ་ཐོགས། །ཞེས་གསུངས་གུར་དྲག་རཏྣའི་ལུགས་འདི་ཡིས། །བོད་གཞུང་སྒྲུབ་པ་གཅིག་ཀྱང་མ་ལུས་པ། །ལེགས་པར་ཐེམ་མཁན་ཆོས་དབང་ཀུན་བཟང་ལས། །བྱུང་རབ་གཞན་ནི་རྣ་བས་ཐོས་པ་མེད། །དངོས་ཀྱི་སེམས་རྒྱུད་སྔོན་ཚེ་བོད་
ཡུལ་དུ། །ཨོ་རྒྱན་བྱོན་དུས་ཞལ་མཐོང་སྨོན་ལམ་བཏབ། །ཅི་ཕྱིར་ཐུགས་རྗེ་ཆེན་པོ་གསང་འདུས་ཀྱི། །ཞལ་གདམས་གསལ་བའི་སྒྲོན་མེ་ཞེས་བྱ་ནས། །སྙིགས་དུས་གཏེར་ལ་མོས་པའི་སྐལ་ལྡན་རྣམས། །དེང་སང་གུ་རུའི་ཞལ་མཐོང་སྨོན་ལམ་བཏབ། །ཐམས་ཅད་ལས་ཅན་ཡིན་པས་དགའ་བ་བསྒོམས། །ཁོ་མོའི་ཚིག་འདི་རིན་ཆེན་གསེར་བས་དཀོན། །དེ་སྐད་མཁའ་འགྲོ་ཡེ་ཤེས་མཚོ་རྒྱལ་གསུངས། །ཆོས་དབང་ཀུན་བཟང་རཏྣའི་གཏེར་ཆོས་ལ། །ཤིན་ཏུ་དད་ཅིང་སྙིང་དང་མིག་ལྟར་འཆང་། །ཁྱད་པར་གསང་འདུས་བུམ་སྒྲུབ་བཙུགས་པའི་ཚེ། །ཆོས་དབང་ཀུན་བཟང་ཉིད་ཀྱི་མནལ་ལམ་དུ། །མཁའ་འགྲོའི་འཛབ་དབྱངས་ལུང་བསྟན་བྱུང་བ་ཡིན། །དེ་བཞིན་དགོངས་འདུས་ལུང་བསྟན་བཀའ་རྒྱ་མར། །དེ་ནས་བརྒྱུད་མར་རིམ་བཞིན་བཀའ་རྒྱ་མར། །ལས་ཅན་བསྟན་པ་འཛིན་པའི་བཤེས་གཉེན་འབྱུང་། །གང་ཡང་མི་འགྱུར་བརྡའ་རྟགས་གསུམ་དང་ལྡན། །ལུས་ལ་ལྟ་སྨེ་སྙིང་ཁར་ཤ་མཚན་རྣམས། །སྨེ་བ་དཀར་དམར་ཐིག་ལེས་སྤྱས་དང་གཅིག །ངག་ནི་བསྙེན་འགྱུར་སྔགས་ཀྱི་རྩོལ་བ་ཅན། །ཡང་ན་མགྲིན་པར་ཤ་མཚན་ཐིག་ལེའམ། །པདྨ་ལས་བྱུང་པདྨའི་
མིང་ལྡན་གཉིས། །ཡིད་ནི་རྩེ་གཅིག་གདུང་ཤུགས་ང་ཉིད་དྲན། །ཕུར་ཚུགས་འདི་མིན་ཡིད་ལ་མི་བྱེད་གསུམ། །དེ་གསུམ་གསུམ་འཛོམ་མཆོག་ཡིན་གཉིས་འཛོམ་འབྲིང་། །གཅིག་འཛོམ་ཐོ་མ་གང་ཡང་ལས་ཅན་ཏེ། །ལ་ལས་རང་ཉིད་རྩེ་གཅིག་ཉམས་ལེན་བརྩོན། །དོན་འབྲས་འགྲུབ་ནས་གཞན་དོན་རླབས་ཆེན་སྐྱོང་། །ལ་ལས་འཕྲད་གྲོལ་གཞན་དོན་སྐྱོང་བར་འགྱུར། །ལ་ལས་རང་གཞན་དོན་གཉིས་ལྷན་ཅིག་སྐྱོང་། །དེ་རྣམས་མ་ངེས་གང་ཡང་སྤྲུལ་པའི་སྐུ། །རྒྱལ་བའི་དགོངས་པས་ཡོངས་ཟིན་ཨེ་མ་ཧོ། །ཅེས་གསུངས་ལྟར་དུ་ཆོས་དབང་ཀུན་བཟང་ཡང་། །ལས་ཅན་བསྟན་འཛིན་སྐྱེས་བུ་ཡིན་པའི་ཕྱིར། །ལྟེ་སྨེ་སྙིང་སྨེ་སྨེ་བ་དཀར་དམར་ཡོད། །ངག་སྙན་གདངས་དབྱངས་རིག་པ་ཤིན་ཏུ་མཁས། །རྟག་ཏུ་སྔགས་ཀྱི་བཟླས་པར་ཤིན་ཏུ་བརྩོན། །ཨོ་རྒྱན་རྗེ་ལ་རྩེ་གཅིག་དད་པར་ལྡན། །བརྡའ་རྟགས་དེ་གསུམ་ཚང་ཕྱིར་ལས་ཅན་ཡིན། །ཡས་བབས་དོན་གྱི་དགོངས་པ་དང་བསྟུན་ན། །བཅོམ་ལྡན་དཔལ་ཆེན་གུ་རུ་དྲག་པོ་ཡི། །ཕྲིན་ལས་སྤྲུལ་པ་ཡཀཱ་མེ་དབལ་ཏེ། །ཡཀཱ་མེ་དབལ་སྐུ་ཡི་སྤྲུལ་པ་ནི། །བླ་མ་ཆོས་དབང་ཀུན་བཟང་ཡིན་
པ་སྟེ། །གཏེར་སྟོན་མི་འགྱུར་རྡོ་རྗེ་སྐུ་ཕྲ་དུས། །གནམ་ཆོས་ཐུགས་ཀྱི་གཏེར་ཁ་འདོན་པའི་སྐབས། །ཉིན་རེ་བཞིན་དུ་ཨོ་རྒྱན་རིན་པོ་ཆེ། །ཡི་དམ་སོ་སོའི་སྐུ་རུ་སྤྲུལ་ནས་འབྱོན། །ཡི་དམ་སོ་སོའི་སྒྲུབ་ཐབས་གསུངས་པའི་སྐབས། །བླ་མ་ཆོས་དབང་ཀུན་བཟང་འདི་ཉིད་ནི། །ངན་པ་ཡིན་ནམ་ཐ་མལ་སེམས་ཅན་ཡིན། །ལས་ཅན་ཡིན་ནམ་སྤྲུལ་པའི་ཆར་གཏོགས་ཡིན། །དེ་སྐད་ཞུས་ཞེས་རཱ་ག་ཨ་སྱས་བསྐུལ། །སྤྲུལ་སྐུའི་གུར་དྲག་གཟིགས་དུས་དེ་ཞུས་པས། ཨོྃ༔ ན་མོ་གུ་རུ་ཀྲོ་དྷ་ཡེ། །ཐ་མལ་མ་ཡིན་ལྷ་སྤྲུལ་ཡིན། །ཡཀྴ་མེ་དབལ་སྐུ་སྤྲུལ་ཡིན། །འཇམ་དབྱངས་ཕྱག་མཚན་བྱུང་བ་དེ། །རྒྱ་ནག་རྒྱལ་པོ་ཡིན་པའི་དོན། །འཇམ་དབྱངས་སྤྲུལ་པ་མ་ཡིན་ནོ། །ཟེར་ཕོག་ཙམ་ཞིག་ཡིན་ཡང་སྲིད། །འཇམ་དབྱངས་སྤྲུལ་པ་བརྡ་ཡིག་ཡིན། །གུ་རུ་དྲག་པོས་དངོས་སུ་གསུངས་པ་དེ། །སྤྲུལ་སྐུ་དགུང་ལོ་བཅུ་གཉིས་པ། །མེ་སྤྲེལ་སྦྲུལ་ཟླའི་བཅུ་བདུན་ལའོ། །མངྒ་ལཾ།། ཡེ་ཤེས་སྤྲུལ་རྒྱུད་བཤད་པའི་ལེའུ་སྟེ་དང་པོའོ།། །།མི་འགྱུར་རྡོ་རྗེ་དགུང་ལོ་བཅུ་གཅིག་དུས། །ཉིད་ཀྱི་སྐྱེས་རབས་ཉིས་བརྒྱ་ལྷག་ཙམ་བྱུང་། །ཁྱི་དང་འབུ་སྲིན་སྤྲེའུ་ལ་
སོགས་ལ། །ཕལ་ཁྱེར་སྐྱེ་བ་མང་པོར་ལྷུགས་པར་གསུངས། །དེ་དུས་བླ་མ་ཆོས་དབང་གར་སྐྱེས་ཞུས། །དེ་ནི་ཡེ་ནས་མི་དྲན་ཡང་ཡང་གསུངས། །ནན་གྱིས་ཞུས་པས་བློ་མ་གཅིག་སྐྱེས་དྲན། །དེ་ནས་ངས་ནི་ཅི་ཡང་མི་དྲན་ཞིང་། །མི་དྲན་དུས་སུ་ལུང་བསྟན་སྒྲ་བྱུང་སྟེ། །སྒྲ་དེ་ཡང་ནི་འདི་ལ་མི་གྲག་གོ །གལ་ཆུང་མིན་ཀྱང་མི་ཤེས་པ་ཡིན་ནོ། །རྫུན་སྨྲས་ལ་ནི་ཉེས་སྒྲིབ་ཆེ་ལེ་གསུངས། །འོ་ན་རྨི་ལམ་བརྟག་པ་མཛོད་ཞུས་པས། །རྨི་ལམ་པོ་ཏིའི་སྟེང་ན་རལ་གྲི་ནི། །བསླངས་ཏེ་བཞག་པ་གཅིག་ནི་མདུན་དུ་གདའ། །ཆོས་དབང་བརྟག་པའི་དོན་ཡིན་ཟེར་རྨིས་གསུངས། །འོ་ན་འཇམ་དབྱངས་སྤྲུལ་པ་ཡིན་ནམ་ཞུས། །འཇམ་དབྱངས་སྤྲུལ་པ་ཡང་ནི་མ་རེད་གསུངས། །དེ་རྗེས་མ་ཎི་ཤར་ལ་ཆོས་དབང་གིས། །གཟིམས་ཁང་འགེབས་པ་ཐག་བཅད་འགེབས་ཤོམ་ཚེ། །སྤྲུལ་སྐུས་དངོས་སུ་ལྷ་འདྲེ་ཀུན་གཟིགས་སྐབས། །མ་ཎི་ཤར་གྱི་གཞི་བདག་ལྷ་འདྲེ་རྣམས། །འགྲོ་ཤོམ་བྱེད་ཅིང་རུ་བ་སྐྱ་ཤོམ་དང་། །ཚིག་ནི་འདི་འདྲ་ཟེར་ཞིང་འདུག་གསུངས་ནས། །རྒྱ་སྐད་འདྲ་བ་ཕྲེང་གཅིག་ཙམ་ཞིག་གསུངས། །རྒྱ་སྐད་འདྲ་བའི་སྔགས་དེ་ཅི་རེད་
ཞུས། །སྔགས་དང་རྒྱ་སྐད་མ་རེད་ལྷ་འདྲེའི་སྐད། །གནམ་ས་གཉིས་ཀྱི་བདག་པོས་འདུག་བཅུག་ལེ་མེད། །ཡུལ་འབུད་ནས་འགྲོ་ཟེར་བ་རེད་གསུངས། །ཆོས་དབང་ཀུན་བཟང་བྱ་བྲལ་གཉོམ་ཆུང་འདི། །གནམ་སའི་བདག་པོ་ཡིན་ནམ་ཧེ་ཧེ་ཞུས། །ད་རེས་བྱ་བྲལ་གཉོམ་ཆུང་ཡིན་ཞེས་འདྲ། །ཚེ་རབས་སྔ་མ་ཞིག་ལ་རྒྱ་ནག་གི །རྒྱལ་པོ་གཅིག་ལ་སྐྱེ་ནི་མྱོང་ཟིན་པས། །བརྟག་པ་ལ་ཡང་རལ་པོད་འོང་བ་དང་། །ལྷ་འདྲེའི་ཟེར་བ་དེ་ཡི་དོན་རེད་གསུངས། །གཞི་བདག་ཡུལ་བུད་ས་ཡི་བཅུད་ཤོར་བས། །མ་འགྲོ་གསུངས་ལ་གཏོར་མ་བྱིན་ཅིག་ཞུས། །གཞི་བདག་འདི་ནི་ནག་ཕྱོགས་ཡིན་འདུག་པས། །བཤུལ་གཞུང་གཟེར་བའི་ནད་ནི་བཏང་ཟེར་གསུངས། །དེ་ནས་བདག་གིས་རྒྱལ་པོའི་གདན་གཅོད་ཚུལ། །ས་རིལ་རྡོ་རིལ་བླངས་ནས་དམིགས་པས་གཟེར། །རྨིས་ལྟས་རྟགས་དང་མཚན་མ་སྣ་ཚོགས་བྱུང་། །གཟིམས་ཁང་བྱས་ན་རུང་ངམ་མི་རུང་གིས། །རཱ་ག་ཨ་སྱས་རྨི་ལམ་བརྟགས་པ་བྱས། །འདི་ནི་རྩྭ་རི་མཚོ་དཀར་གནས་ལག་ཡིན། །ཟེར་བའི་རྨི་ལམ་ལུང་བསྟན་གསལ་བར་བྱུང་། །ཞག་ལྔའི་དགོང་མོ་དངོས་སུ་རླང་ཐོག་དང་། །སེར་ཕྲན་བྱུང་བའི་སྣ་ལ་སྤྲུལ་
སྐུས་གཟིགས། །བནྡེ་ལག་གཡས་ལྕགས་ཀྱི་ཕུར་པ་ཐོགས། །གཡོན་པས་རྡོ་བ་ཟུར་གསུམ་ལག་ཏུ་ཐོགས། །ཁ་ན་ཙིཏྟ་ཟ་བ་གཅིག་བྱུང་ནས། །ཁྱོད་ནི་སུ་ཡིན་བྱས་པས་བནྡེ་དེས། །ང་ནི་ཕ་ཐོ་ཁང་པ་འགེབ་ས་ཡི། །གཞི་བདག་ཡིན་ནོ་བྱས་པས་སྤྲུལ་སྐུ་ཡིས། །འོ་ན་ཁྱོད་ཀྱི་ཁང་པ་འགེབས་པའི་དུས། །ཆོ་འཕྲུལ་མ་སྟོན་གནོད་པ་མ་བྱེད་ཅིག །བླ་མ་ཚོ་དང་བནྡེ་ཚོ་ལ་ཡང་། །གནོད་པ་མ་བྱེད་ཁྱོད་རང་སྡོད་ཨེ་ཁོ། །གསུངས་པས་འོ་ཡ་ཟེར་ནས་ཁས་བླངས་ཏེ། །ཤིང་ལེབ་སྟེང་ན་ཀུ་ཤ་ཆུན་གཅིག་བཞག །དེ་སྟེང་ཤོག་དུམ་སྟེང་ལ་ཡི་གེ་ཙ། །སེར་པོ་བྲིས་པའི་སྲོག་སྔགས་ཕུལ་ནས་སོང་། །གཞི་བདག་འདི་ནི་སྤྲུལ་སྐུས་ལན་མང་གཟིགས། །ཁོ་ཉིད་དང་པོ་ཆོས་ལ་མི་དགའ་ཞིང་། །སེམས་ཅན་རྣམས་ལ་གནོད་འཚེ་བྱེད་པ་ཡི། །ནག་ཕྱོགས་གཅིག་ནི་ཡིན་པར་འདུག་ན་ཡང་། །ད་ནི་དམ་ལ་ཐོགས་ཤིང་སྲོག་སྙིང་ཕུལ། །གནོད་པ་མི་བྱེད་སྲོག་སྙིང་ཕུལ་བྱུང་གསུངས། །དེ་ཕྱིར་རཱ་ག་ཨ་སྱས་ས་རྡེལ་བསྐྱལ། །ཁོ་ཡི་བསང་ཡིག་རྒྱས་པ་བྲིས་ན་ཡང་། །ཞིང་གཤེགས་དེ་ཡིས་འདོན་སོགས་མ་མཛད་དོ། །དཀར་ཕྱོགས་ཉིད་ལ་འགྱུར་ཕྱིར་
གནས་དེ་རུ། །ཆོས་དབང་ཀུན་བཟང་ཉིད་དང་ཉེ་གནས་སོགས། །དེ་རུ་འདུག་པའི་མི་ནི་འགའ་ཞིག་གིས། །གནས་བདག་ཡིག་དྲུག་འདོན་པ་ཐོས་མཁན་མང་། །ཆོས་དབང་ཀུན་བཟང་འདས་རྗེས་བུམ་སྒྲུབ་ནི། །བཙུགས་ཁ་ཕ་རི་ཚུ་རིའི་རི་བྲག་ཀུན། །ཁྲོམ་ཆེན་བཞིན་དུ་ཡིག་དྲུག་འུར་དི་རི། །འདོན་པ་བདག་ཉིད་རཱ་ག་ཨ་སྱ་ཡིས། །གཉིད་པ་མ་ཡིན་དངོས་སུ་ཐོས་པ་ཡིན། །དེ་ཕྱིར་ད་ནི་གནས་བདག་བཟང་པོའོ། །རྒྱ་ནག་རྒྱལ་པོར་སྐྱེས་པའི་ལོ་རྒྱུས་དང་། །ཞོར་བྱུང་གཟིམས་ཁང་ལོ་རྒྱུས་དང་བཅས་པ། །འཇིག་རྟེན་ལས་རྒྱུད་ལེའུ་དང་པོ་ཡིན། །མི་འགྱུར་རྡོ་རྗེ་དགུང་ལོ་བཅུ་གཅིག་ཙམ། །རང་གཞན་སྐྱེ་བ་མང་པོ་དྲན་པའི་སྐབས། །ཆོས་དབང་ཀུན་བཟང་སྐྱེ་བ་སྔ་མ་ཞིག །བླ་བྲན་ཞིག་ཏུ་སྐྱེ་བ་བླངས་པའི་དུས། །ཡི་དམ་གུ་རུ་དྲག་པོ་བསྒྲུབས་པ་ཡིས། །མཐུ་རྩལ་ནུས་པ་ཆེན་པོ་ཡོད་པར་གྱུར། །དེ་དུས་གུ་དྲག་སྒྲུབ་མཁན་སྔགས་པ་ཞིག །བླ་མ་དེ་དང་མ་དུམ་མཐུ་འདྲེན་བྱས། །མཐུ་རྟགས་བྱུང་བས་སྔགས་པ་ཤི་ཁ་ལ། །སྔགས་པ་དེ་ཡིས་སྨོན་ལམ་ལོག་པར་བཏབ། །སྔགས་པ་ད་ལྟ་འདྲེ་ལ་སྐྱེས་འདུག་པས། །བླ་མ་ཆོས་དབང་ཀུན་བཟང་འདི་
ཉིད་ལ། །རྒྱུན་དུ་འདྲེ་དེས་གནོད་པ་བྱེད་འདུག་གསུངས། །བླ་མ་ནུས་པ་ཅན་དུ་སྐྱེས་པའི་རབས། །འཇིག་རྟེན་ལས་རྒྱུད་ལེའུ་གཉིས་པའོ།། །།ཞིང་གཤེགས་བླ་མ་ཆོས་དབང་ཀུན་བཟང་དེས། །ཐུགས་རྗེ་ཆེན་པོའི་སྒྲུབ་པ་ཡུན་རིང་སྐབས། །ཉམས་དང་མནལ་ལམ་འདྲེས་པའི་སྐབས་ཤིག་ལ། །གཟུགས་ནི་མི་སྣང་བར་སྣང་ཁམས་ནས་ནི། །ཁྱོད་ནི་རྟ་དཔོན་མཁུར་ལུགས་མ་ཡི་སྐྱེ་བ་ཡིན། །ཞེས་པའི་ལུང་བསྟན་གསལ་བར་བྱུང་བ་དང་། །སྐུ་མཚམས་བསྡམས་ནས་ལོ་ངོ་བདུན་ཙམ་དུས། །ཆོས་དབང་ཉིད་ཀྱི་ནུབ་གཅིག་མནལ་ལམ་དུ། །ཟོར་གཅིག་ཉིད་ལ་རྩེ་བསྟན་འཕངས་གདའ་བས། །ཞབས་དྲུང་བཀྲ་ཤིས་དཔལ་གྲུབ་ཕེབས་བྱུང་ནས། །ཡཱ་ཁྱོད་ལ་སྔར་རི་བོ་ཆེ་པའི་བྱད་ཁ་རྙིང་པ་ཞིག་འདུག་སྟེ་ད་སྐྱོན་རང་མེད་མོད། ཅེས་གསུངས་སེམས་གསོ་འདྲ་བའི་གསུང་གཅིག་བྱུང་། །དེ་འདྲ་དོན་དེ་ཅུང་ཟད་རྒྱས་བཤད་ན། །མར་ཐང་ཆོས་རྗེ་མཁར་དྲུང་ཞེས་བྱ་བ། །རྡོ་རྗེ་འཇིགས་བྱེད་སྤྲུལ་པ་ཡིན་པ་དང་། །སྟག་ལུང་ངག་དབང་གྲགས་པའི་སྐུ་སྐྱེ་ཡིན། །འཁྲུངས་དུས་ཚེས་བཅུའི་ཉི་མ་རྩེ་ཤར་འཁྲུངས། །འདས་དུས་ཚེས་བཅུའི་ཉི་མ་
ནུབ་དུས་འདས། །གཏེར་སྟོན་ལས་འཕྲོ་གླིང་པའི་ཆོས་བདག་ཡིན། །དེ་ཕྱིར་ཨོ་རྒྱན་སྤྲུལ་པ་ཡིན་པར་གྲགས། །དེ་ཡི་གཉེར་པ་རྟ་དཔོན་མཁུར་ལུགས་མ། །རི་བོ་ཆེ་པའི་ཁྲིམས་སྲིད་རང་དབང་ཆེ། །གདུང་རྒྱུད་ཆད་དོགས་མཁར་དྲུང་རྗེ་མོ་བསུས། །མཁར་དྲུང་མི་འབབ་དབང་མེད་རལ་གྲི་བཏོན། །པདྨ་རྒྱལ་པོ་མཚོ་སྐྱེས་རྡོ་རྗེ་སོགས། །སྲས་གསུམ་འཁྲུངས་ཤིང་ས་མཚམས་མཁར་ལས་སོགས། །རྟ་དཔོན་ཚེ་སྟོད་ཆག་ཕྱི་ལེགས་པར་འགྲུབ། །ཚེ་སྨད་རྗེ་མོ་འབག་པས་བཀའ་བཀྱོན་ཕོག །གཉེར་པ་ཕུད་པས་ཕ་ཡུལ་ཁྱུང་པོར་སོང་། །ཕ་སྡེ་ནང་བསྡུམ་མར་ཐང་དགྲ་ཡ་བྱས། །ཇག་རྐུན་སྐྱེས་ནས་རི་བོ་ཆེ་པ་ཡིས། །སྡེ་རྣམས་འདུག་སྟབས་དཀའ་བས་མཁར་དྲུང་ཁྲོས། །དམག་ཆེན་ཁྱུང་པོར་སོང་བས་ཁྱུང་པོ་བརྒྱལ། །མར་ཐང་ཆུས་ཉེས་མི་ནི་ཚན་ཆེར་ཤི། །ཁྲག་གཏར་མཁན་ཡང་མ་ལུས་ཟེར་བ་བྱུང་། །དམག་སྒར་གཏོར་ནས་མཁར་སྲུང་རྐང་ལ་ཐར། །དེ་ནས་རི་བོ་ཆེ་པས་ཐོད་ནག་བསྒྲུབ། །གསར་མའི་ལུགས་ཀྱིས་མཐུ་གཏད་ཅི་བྱས་ཀྱང་། །བོན་པོ་སྲུང་ཁ་བཟང་བས་རྟོགས་མ་ཐོན། །ཐོགས་ནས་ནི་ཕུར་སྒྲུབ་ཕྱག་ལེན་བླངས། །རྗོད་ནས་རྔོད་
པ་ཤཱཀྱ་བཀྲ་ཤིས་དང་། །སོག་ཟམ་འབྲང་བུ་ནང་སོ་ཡིན་པ་ཡི། །དྲུང་པ་མདོ་སྡེ་རྒྱ་མཚོ་སྤྱན་དྲངས་ནས། །རི་བོ་ཆེ་རུ་ཕུར་སྒྲུབ་ལ་སོགས་པ། །རྙིང་མ་བཙུགས་ཤིང་དགྱེས་རྡོར་པ་ཀུན་གྱིས། །ཕྱེད་དེ་དེ་ཕྱིར་རྙིང་མར་འགྱུར་བར་མཛད། །མཁར་དྲུང་ཉིད་ཀྱིས་གཤིན་རྗེ་ཀིང་ཀང་གིས། །དགྲ་མནན་ཆེན་པོ་ཁ་ལ་རྒྱས་འདེབས་བསྒྲུབས། །ཨ་ཝ་གླང་མགོས་དངོས་སུ་ཁ་གདང་བྱུང་། །དེ་ཡི་ནང་དུ་རྟ་དཔོན་ལིངྒ་འཕངས། །དེ་ནས་རྟ་དཔོན་མཐུ་རྟགས་བྱུང་ནས་ཤི། །མི་རྒྱུད་རྣམས་ལ་ཚེ་ནི་རིང་སྲོལ་མེད། །ཁྱུང་པོ་ནང་འཁྲུག་མར་ཐང་འདུག་བདེ་བྱུང་། །དེ་ནས་མཁར་དྲུང་རྙིང་མ་ལ་དད་ནས། །ཨོ་རྒྱན་སྐུ་འདྲ་གུ་དྲག་གསེར་སྐུ་གཉིས། །ལྷ་ཁང་ནང་དུ་རྩག་རེའི་ཚད་ཙམ་དང་། །ཨོ་རྒྱན་སྐུ་འདྲ་བརྒྱ་དང་རྩ་བརྒྱད་བཞེངས། །གཏེར་ཆོས་མཐའ་དག་རྙིང་མའི་རྒྱུད་འབུམ་བཞེངས། །དགྱེས་རྡོར་ལྔ་བརྒྱ་ཡོད་པའི་ཕྱེད་དེ་ནི། །དེང་སང་བར་དུ་རྙིང་མ་བྱེད་པར་འགྱུར། །ཀཿཐོག་དང་ནི་རི་བོ་ཆེ་གཉིས་པོ། །རྙིང་མའི་བསྟན་པའི་ཆེ་ཤོས་ཡིན་ནོ་ཞེས། །མངའ་རིས་དབུས་གཙང་ཀུན་ན་གྲགས་ཆེ་ཞིང་། །ཨོ་རྒྱན་བསྟན་ལ་ཤིན་ཏུ་ཕན་པ་ནི། །རྟ་དཔོན་
མཁུར་ལུགས་མ་ཡིས་རྐྱེན་བྱས་ནས། །རྐྱེན་ངན་དགེ་བའི་བསྐུལ་མར་བྱུང་བ་ཡིན། །སྐྱེས་རབས་འདི་ནི་ངན་ངན་འདྲ་ན་ཡང་། །ངན་པ་མ་ཡིན་ཨོ་རྒྱན་བསྟན་ལ་ཕན། །བདུད་སྤྲུལ་ཕན་ཕན་འདྲ་ཡང་བསྟན་ལ་གནོད། །བྱང་ཆུབ་སེམས་དཔའ་གནོད་གནོད་འདྲ་ན་ཡང་། །སངས་རྒྱས་བསྟན་ལ་ཕན་པ་ཡིན་ནོ་ཞེས། །དགོངས་འདུས་འདྲ་མིན་ཤན་འབྱེད་ནང་ནས་གསུངས། །དེ་ཕྱིར་རྟ་དཔོན་བྱང་ཆུབ་སེམས་དཔར་ངེས། །འཇིག་རྟེན་ལས་རྒྱུད་ལེའུ་གསུམ་པའོ།། །།དེ་ནས་རྟ་དཔོན་གར་སྐྱེ་ཤེས་དཀའ་ཡང་། །རྗེས་དཔག་ཚད་མའི་རིགས་པས་ཤེས་པ་སྟེ། །དཔེར་ན་དུ་བ་མཐོང་བས་མེ་ཤེས་བཞིན། །རྟ་དཔོན་རེ་ཞིག་མནར་མེད་དམྱལ་བར་སོང་། །ཚ་དམྱལ་བརྒྱད་ཀྱི་སྡུག་བསྔལ་ཐམས་ཅད་མྱོང་། །མཁར་དྲུང་སྐུ་ཚེའི་སྨད་དང་དེ་ཡི་སྲས། །པདྨ་རྒྱལ་པོ་སྐུ་ཚེ་ཐུང་བ་དང་། །མཚོ་སྐྱེས་རྡོ་རྗེ་སྐུ་ཚེ་རིང་བ་དང་། །སྤྲུལ་སྐུ་པདྨ་རྒྱལ་པོའི་ཁྲི་མནན་ཞིང་། །དེ་རྗེས་ཆོས་རྗེ་གྲགས་པ་འཁྲིར་འཁོད་པ། །བླ་རབས་ཕྱེད་ལྔ་ཙམ་ཞིག་སོང་བ་སྟེ། །ལོ་གྲངས་བཞི་བཅུ་ཞེ་ལས་མ་སོང་ཡང་། །བསྐལ་པ་མང་པོར་དམྱལ་བར་བསྡད་སྣང་བྱུང་། །དེ་ཚེ་གཡུལ་ཆེན་གཏུག་
ནས་མི་བསད་དང་། །བླ་མར་དམ་ཚིག་ཆག་པའི་སྡིག་སྒྲིབ་རྣམས། །མཐོ་ཁོག་ཙམ་ཞིག་བྱང་བར་གྱུར་པ་ནས། །དམྱལ་བའི་ཚེ་ཚད་ཚང་ནི་མི་དགོས་སོ། །དམ་ཚིག་ཆགས་པའི་བླ་མ་དེ་བཟང་ན། །དེ་ཡི་ཐུགས་རྗེས་འདྲེན་པ་ཆོས་ཉིད་དེ། །གང་ལ་གནོད་པ་བྱས་ཀྱང་བདེར་འབྲེལ་བ། །བདེ་བའི་འབྱུང་གནས་དེ་ལ་ཕྱག་འཚལ་ལོ། །ཞེས་གསུངས་དེ་བཞིན་དམ་ཆོས་དགོངས་གཅིག་ལས། །མནར་མེད་དམྱལ་བར་རྡོ་རྗེ་ཡི། །སྒྲ་སྦྱར་སློབ་དཔོན་མཐུས་ནི་མྱུར་ཐར་འགྱུར། །ཞེས་གསུངས་དེ་བཞིན་རྡོ་རྗེ་འཇིགས་བྱེད་ཀྱི། །སྤྲུལ་པ་མཁར་དྲུང་ཉིད་ཀྱིས་དྲངས་པ་སྟེ། །དེ་ཡི་རྟགས་མཚན་ཆོས་དབང་ཀུན་བཟང་གིས། །རྡོ་རྗེ་འཇིགས་བྱེད་བསྙེན་པ་མ་བྱས་ཀྱང་། །རྡོ་རྗེ་འཇིགས་བྱེད་མེ་ཡི་སྤུ་གྲི་ཡི། །སྐུ་གཟུགས་གདུང་རུས་ལ་ནི་བྱོན་པར་སྣང་། །འདི་འདྲ་སྐྱེས་རབས་ངན་པར་མི་སེམས་ཏེ། །ཤཱཀ་ཐུབ་དམྱལ་བར་ལྕགས་བསྲེགས་ཤིང་རྟ་ནི། །འདྲེན་པའི་གྱད་དུ་སྐྱེས་པའི་ལོ་རྒྱུས་བཞིན། །སར་གནས་བྱང་ཆུབ་སེམས་དཔའ་རྣམས་ལ་ནི། །བཟང་འབྲེལ་མཆོག་ཡིན་འབྲེལ་པ་མེད་པ་ནི། །ངན་འབྲེལ་ཐོགས་ནའང་འཁོར་བ་མཐའ་ཅན་ཡིན། །འཇིག་
རྟེན་ལས་རྒྱུད་ལེའུ་བཞི་པའོ།། །།དེ་ནས་ཡུལ་ནི་ངོམ་སྟོད་གནས་ཀྱི་མདོ། །ཕ་ནི་ཇོ་རུ་སྔོ་མདུང་ཞེས་བྱ་བ། །དམངས་རིགས་ཤ་སྔོ་ཁ་འཚགས་ཞེ་སྡང་ཆེ། །ངོ་དང་བྲང་རྣམས་དྲེད་བཞིན་སྤུ་ཡིས་ཁེངས། །མ་ནི་ཆོས་སྐྱོང་སྐྱིད་ཅེས་བྱ་བ་ཡིན། །བུ་མོ་ཆུ་བྱི་ལོ་པ་གཅིག་ཏུ་སྐྱེས། །མིང་ནི་བོ་ལུ་མ་ཞེས་བྱ་བར་བཏགས། །ལོ་ངོ་གཉིས་ལོན་འགྲོ་ཐུབ་སྨྲ་ཤེས་ཚེ། །རྣ་བའི་རྩ་བར་རྨ་མཛེ་བྱུང་ནས་ཤི། །དེ་དུས་ཕུ་དེར་འབྲུག་པ་རིན་པོ་ཆེ། །ཀརྨ་བསྟན་འཕེལ་ཁྲིད་ཆེན་བཙུགས་ཡོད་པས། །བླ་མཆན་རྟོགས་ལྡན་ལྷུན་གྲུབ་རབ་རྒྱས་སོགས། །མཆེད་གྲོགས་འགའ་ཟུང་འཕོ་འདེབས་མཛད་པའི་དུས། །ཡོན་བདག་འདིར་ལྟོས་འཕོ་བ་ཐེབས་སོང་གསུངས། །སྤྱི་བོའི་སྐྲ་ནི་ཆུན་གཅིག་ལི་བར་སྣང་། །དེ་དུས་མིང་པོ་རཱ་ག་ཨ་སྱ་བདག །བྱིས་སྦ་ལོ་ལྔ་ལོན་པའི་དུས་ཡིན་པས། །ལྟ་རུ་སོང་བས་བུ་མོའི་རོ་དེ་ནི། །ལུས་པོ་ཐམས་ཅད་ཟིལ་པ་ཕྲོལ་མེར་སོང་། །སྤྱི་བོའི་གཙུག་ནས་རླངས་པ་ཇ་རླང་ཙམ། །ཡར་ལ་ཕྱུར་ཕྱུར་འགྲོ་བ་མཐོང་ན་ཡང་། །གཞན་གྱིས་དེ་འདྲ་མཐོང་སྐད་མི་འདུག་གོ །དེ་ནས་བུ་མོའི་རོ་དེ་བསྐྱར་ཚར་ནས། །ཨ་ནུ་སྔགས་འཆང་པདྨ་དབང་དྲག་
གིས། །མཚར་པོ་ཉི་ཐིག་འདི་ལ་ལྟོས་དང་གསུངས། །ཀུན་གྱིས་བལྟས་ཀྱང་མཐོང་རྒྱུ་མ་བྱུང་སྟེ། །མ་ཀི་ཉི་ཐིག་འདི་ཡི་སྣེ་མོ་ན། །ཡི་གེ་ཨ་ཡིག་དཀར་པོ་ཆེན་པོ་ཞིག །ཨ་ཡི་རྐང་པ་མ་རིའི་ཤིང་གདན་ལ། །ཟུག་ནས་གདའ་བས་ཀུན་གྱིས་ལྟོས་ཤིག་གསུངས། །ནང་མི་ཀུན་གྱི་མཐོང་རྒྱུ་མ་བྱུང་བས། །ཕྱི་ནས་ཁང་པ་འདི་ལ་ལྟོས་ཤོག་གསུངས། །ཕྱི་རུ་རྒྱུག་པས་ལ་ལས་མཐོང་བ་ལ། །ཁང་པ་ལ་ནི་འཇའ་གཅིག་ཟུག་གདའ་ཟེར། །དེ་བས་ཨ་དེ་ཕར་ཕར་བུད་སོང་གསུངས། །དེ་ནས་འཇའ་ཡང་མེད་པར་ཡར་སོང་ངོ། །བུ་མོ་དེ་ཡང་རིགས་བཟང་ཡིན་པ་འདྲ། །ཨ་དེ་བུ་མོའི་རྣམ་ཤེས་ཡིན་འདུག་གསུངས། །བུ་མོའི་རོ་དེ་ཝ་ཡིས་བཏོན་ནས་ནི། །དེ་ལ་བྱ་རྒོད་མང་པོ་འབབས་ཟིན་ཏེ། །འཇའ་ཟུག་གདའ་ཞེས་ཟེར་ཏེ་བདེན་ཤས་ཆུང་། །ཐོད་པ་མཁའ་འགྲོ་རྣམས་ཀྱིས་གདན་དྲངས་བས། །རྒྱ་གར་ཡུལ་དུ་སོང་ཞེས་རང་གྲོལ་མ། །འགའ་རེས་སྨྲས་པ་ཐོས་ཀྱང་ཅི་ཆ་ཡོད། །རཱ་ག་ཨ་སྱ་ལྕམ་དུ་སྐྱེས་པ་ནི། །བོ་ལུ་མ་ཞེས་བྱ་བར་གྱུར་པའོ། །དེ་དུས་ཨ་མ་མྱ་ངན་ཆེ་བའི་ཕྱིར། །སྐྱེ་སྒོ་ཆོད་ལ་ཐུགས་རྗེ་ཆེན་པོ་ཡི། །ཞལ་ཐང་གཅིག་ཀྱང་
ཨ་ནུས་ཕྱག་བྲིས་མཛད། །སེམས་ནད་མ་བྱེད་ཁྱེད་ཀྱི་བུ་མོ་ལ། །བུ་གཅིག་འོང་ཡོད་དེ་བས་ཅི་དགོས་གསུངས། །འཇིག་རྟེན་ལས་རྒྱུད་ལེའུ་ལྔ་པའོ།། །།དེ་ནས་རིང་པོར་མི་ཐོག་ཨ་མ་ཡང་། །མྱ་ངན་སེམས་ནད་ཆེ་བའི་སྐབས་དེ་རུ། །བུང་བ་ཆེན་པོ་མཐེ་བོང་ལས་ཆེ་བ། །གཅིག་བྱུང་རྒྱུན་དུ་ཨ་མའི་མགོ་ནས་འཕུར། །ནང་ནུབ་ཐབ་ཀའི་གཉའ་ཡི་ཐལ་བའི་ནང་། །འཕུར་མ་ལྷབ་ལྷབ་བྱེད་ཅིང་འདུག་པ་ལས། །གཞན་ནི་གང་དུའང་མི་འགྲོ་ཨ་མ་ཡི། །མགོ་ལ་སྐོར་བ་བྱེད་ཅིང་འཕུར་བར་བྱེད། །དེ་ནི་རྒྱུན་དུ་ལོ་ངོ་ཙམ་གཅིག་བསྡད། །ཨ་མས་ང་ཡི་བུ་མོ་ཡིན་ཟེར་ནས། །མེ་ལ་འབྲུལ་དོགས་ལི་ལིས་གསོད་དོགས་བྱེད། །མོའུ་འགལ་བུ་ཡིས་མ་ནི་དྲངས་པའི་དུས། །རིམ་པར་སྐྱེ་བ་ཇེ་དྲག་འདྲེན་པ་ལས། །བཙན་ཐབས་འདྲེན་པར་དཀའ་བའི་ལོ་རྒྱུས་ལྟར། །དམྱལ་བ་ལས་ཐར་བུ་མོ་ཚེ་ཐུང་ཞིང་། །དེ་ནས་འབུ་སྲིན་བུང་བའི་ལུས་གྱུར་པ། །འཇིག་རྟེན་ལས་རྒྱུད་ལེའུ་དྲུག་པའོ།། །།དེས་ན་ཀུན་རྫོབ་དོན་དམ་གཉིས་པོ་འདི། །འགལ་འགལ་འདྲ་ཡང་མི་འགལ་ཟུང་དུ་འཇུག །དོན་དམ་ཡས་བབས་དོན་གྱི་དགོངས་པ་ལས། །འགྲོ་དྲུག་ཡི་དམ་
ལྷ་ཡི་ཡང་སྤྲུལ་དུ། །དགོངས་པ་འདུས་པའི་རྒྱུད་ལས་གསུངས་པ་དང་། །མི་རྣམས་ཤ་མདོག་དཀར་སེར་དམར་ལྗང་སྔོ། །རྒྱལ་བ་རིགས་ལྔའི་རིགས་སུ་ངེས་པ་ནི། །ཕ་རྒྱུད་གསང་འདུས་རྒྱུད་ལས་གསུངས་པ་ལྟར། །བླ་མ་ཆོས་དབང་ཀུན་བཟང་དེ་ཉིད་ནི། །ངེས་པའི་དོན་ལ་གུ་རུ་དྲག་པོ་ཡི། །ཕྲིན་ལས་སྤྲུལ་པ་ཡཀཱ་མེ་དབལ་གྱི། །སྤྲུལ་པ་ཡིན་ཅིང་ཐ་མལ་སེམས་ཅན་མིན། །དཔེར་ན་བསྐལ་བཟང་སངས་རྒྱས་སྟོང་རྩ་ཡང་། །སྤྱན་རས་གཟིགས་ཀྱིས་སྤྱན་སྟོང་སྤྲུལ་པ་སྟེ། །འོན་ཀྱང་བཅོམ་ལྡན་ཤཱཀྱ་ཐུབ་པ་ཡང་། །དམྱལ་བར་སྐྱེས་དང་རི་བོང་ཆུ་སྲིན་སོགས། །མ་དག་སྐྱེ་བ་དུ་མ་བླང་ཚུལ་བསྟན། །དེ་བཞིན་བླ་མ་ཆོས་དབང་ཀུན་བཟང་ཡང་། །ཨོ་རྒྱན་ཆེན་པོའི་ཞལ་མཐོང་སྨོན་ལམ་ཐེབ། །འཇམ་པའི་དབྱངས་ཀྱིས་བྱིན་རླབས་ཅུང་ཟད་ཞུགས། །དེ་ཡི་ནུས་པས་རྒྱ་ནག་རྒྱལ་པོར་གྱུར། །རྒྱལ་པོ་དབང་ཆེ་གཞན་ལ་བརྙས་ཆོས་བྱས། །བསྟན་པའི་སྦྱིན་བདག་དགེ་འདུན་རྟེན་མཆོད་བསྐུར། །དེ་གཉིས་ལས་འབྲས་བླ་མ་གཉོམ་ཆུང་ལ། །གུར་དྲག་འགྲུབ་པའི་ནུས་མཐུ་ཅན་དུ་གྱུར། །སྐྱེ་བ་དེ་གཉིས་ཚོགས་ཀྱང་བསགས་པ་དང་། །རྒྱལ་
པོར་སྐྱེས་པའི་རྒྱུ་མཐུན་འབྲས་བུ་ཡིས། །མོར་ཐང་རྟ་དཔོན་བཙན་དྲག་ཅན་དུ་གྱུར། །དེ་ཡི་གཡུལ་གཏུག་མི་མང་བསད་པ་དང་། །བླ་མ་ཉིད་ལ་དམ་ཚིག་ཆག་པ་ཡིས། །རྣམ་སྨིན་འབྲས་བུ་མནར་མེད་དམྱལ་བར་ལྷུང་། །བླ་མ་མཁར་དྲུང་ས་ཐོབ་སེམས་དཔའ་དེས། །བསྒྲལ་བས་མ་དྲངས་ན་ནི་དམ་ཚིག་ཉམས། །དེ་ཕྱིར་ཡུན་རིང་མ་འགོར་ཡར་ལ་དྲངས། །འོན་ཀྱང་བླ་མའི་མ་ཇོ་འབགས་པ་དེས། །ཕོ་ལུས་མ་ཐོབ་བུ་མོའི་ལུས་སུ་གྱུར། །སྔོན་ཚེ་སྲོག་བཅད་མང་བའི་དབང་གི་འབྲས། །བུ་མོ་ཡུན་རིང་མ་ཐོག་ཤི་བར་གྱུར། །རྩ་བའི་བླ་མ་བསོད་ནམས་བཀྲ་ཤིས་ལ། །ཚེ་སྨད་མ་དད་སྐུར་པ་བཏབ་པ་ཡིས། །རྣམ་སྨིན་དུད་འགྲོ་བུང་བའི་ལུས་སུ་གྱུར། །དེ་ལྟར་མི་དགེའི་ལས་འབྲས་རེ་རེས་ཀྱང་། །ལུས་ངན་ལྔ་བརྒྱ་བརྒྱུད་མར་ལེན་དགོས་ཀྱང་། །འཕོ་བ་ཐེབས་པའི་བྱིན་རླབས་ནུས་པ་ཡིས། །ད་རེས་མི་ལུས་ཆོས་དང་ལྡན་པར་སྐྱེས། །སྔོན་ཚེ་རྒྱ་ནག་དང་ནི་མར་ཐང་གིས། །དཔོན་དུ་གྱུར་པའི་རྒྱུ་མཐུན་འབྲས་བུ་ཡི། །ད་རེས་ཀུན་གྱིས་འཇིག་རྟེན་མཁས་ཟེར་བས། །གང་སྨྲས་ཚིག་ལ་རྩི་འཇོག་ཡོད་པ་བྱུང་། །སྔོན་ཚེ་སྔགས་པ་མཐུ་ཡིས་བསྒྲལ་
བ་ཡིས། །སྔགས་པའི་སྨོན་ལམ་ངན་པའི་ལས་འབྲས་ཀྱིས། །གྲིབ་ཁ་རྡར་ཞིང་སྲིའུ་ལྟར་དུ་བརྩེད། །ནུས་པ་ཅན་གྱིས་མཐུ་གཏད་ཞབས་སོང་ནས། །སྐྱེ་བ་བདུན་བརྒྱུད་བར་དུ་གནོད་གསུངས་ལྟར། །ཆོས་རྗེ་མཁར་པས་མཐུ་གཏད་ཤེས་ཚད་བྱས། །དེ་ཡི་འབྲས་བུ་སྐྱེ་བ་ད་རེས་འདིར། །སུ་ལ་གནོད་མ་བསྐྱལ་ཡང་བྱད་ཁས་གནོད། །རྒྱ་ནག་རྒྱལ་པོར་སྐྱེས་དུས་རྒྱ་འཇང་ཁྲིམས། །ཅུང་ཟད་བཀའ་བཀྱོན་ཕོག་པའི་མི་རྣམས་ལ། །ཉེར་སྦྱོང་བཙུགས་ཞེས་ཤིང་ལྕགས་ཕྲའུ་ཡིས། །སྟོང་ཕྲག་གྲངས་ཀ་བརྡུངས་ནས་ཤི་ལ་ཁད། །མ་ཤི་ཙམ་རེ་བྱེད་པའི་སྲོལ་ཡོད་པས། །དེ་ཡི་རྣམ་སྨིན་ཚེ་འདིར་ནད་མང་ཞིང་། །ལོ་རེ་བཞིན་དུ་མ་ཤི་ཙམ་རེ་ན། །སྔོན་ཚེ་ཨོ་རྒྱན་ཞལ་མཐོང་སྨོན་ལམ་གྱིས། །སྔོན་དང་ད་རེས་སྐྱེ་བ་གཉིས་དེ་ལ། །གུ་རུ་དྲག་པོའི་སྒྲུབ་པ་ཡོངས་སུ་ཐེམས། །བླ་མར་སྐྱེས་དུས་སྡོམ་པ་སྲུང་བའི་འབྲས། །ད་རེས་མི་ལུས་ཤེས་རིག་བཀྲ་བ་ཐོབ། །རྒྱལ་པོར་གྱུར་དང་དཔོན་གྱི་ཚེ་སྟོད་ལ། །བསྟན་པ་དགེ་འདུན་ཆག་ཕྱིར་བསྙེན་བཀུར་བས། །ད་རེས་བསྟན་དང་མཇལ་ཞིང་དམ་ཆོས་སྤྱོད། །རྟ་དཔོན་སྐྱེས་དུས་གཡུལ་གཏུག་མི་མང་
བསད། །རྣམ་སྨིན་ལྷག་མས་ད་རེས་ཚེ་ཐུང་གྱུར། །ལས་ཀྱི་འབྲས་བུ་ཕྲ་ཞིབ་དགེ་སྡིག་འབྲས། །ཤ་རིའི་བུ་དང་མོའུ་འགལ་བུ་ལ་སོགས། །མངོན་ཤེས་ལྔ་ཐོབ་རྣམས་ཀྱིས་མི་ཤེས་ཏེ། །རྫོགས་པའི་སངས་རྒྱས་ཁོ་ནའི་སྤྱོད་ཡུལ་གསུངས། །དེ་ཕྱིར་བདག་གིས་ཤེས་པ་ག་ལ་སྲིད། །འོན་ཀྱང་རྗེས་དཔག་ཚད་མས་གསལ་བ་སྟེ། །ཆུ་སྐྱལ་ལ་ནི་ཆུ་ཤེས་ཇི་བཞིན་དུ། །ཐུབ་པས་གསུངས་པའི་མདོ་འདུལ་མངོན་པའི་གཞུང་། །དེ་དག་རྣམས་ལ་དཔང་པོ་བྱས་ནས་བཤད། །གལ་ཏེ་འགལ་དང་འཁྲུལ་པ་གྱུར་སྲིད་ན། །ཀུན་མཁྱེན་རྒྱལ་བ་རྣམས་ཀྱི་དྲུང་དུ་བཤགས། །སྐྱེ་བ་མང་པོའི་བཟང་ངན་ལས་ཀྱི་ལྷག །ད་རེས་སྐྱེ་བ་གཅིག་ལ་སྨིན་པའི་ཚུལ། །མཐོང་ཆོས་མྱོང་གྱུར་ལས་འབྲས་ཞེས་བྱ་སྟེ། །དེ་ནི་སུས་ཀྱང་བཅོས་སུ་མེད་པའི་ཕྱིར། །ཐུབ་པས་གཟུངས་སྔགས་ཀུན་གྱི་ཕན་ཡོན་ལའང་། །ལས་ཀྱི་རྣམ་པར་སྨིན་པ་མ་གཏོགས་སོ། །གསུངས་ཕྱིར་ཚེ་སྒྲུབ་ཚེ་དབང་ལ་སོགས་ཀྱིས། །ཚེ་ཡང་བསྲིང་བར་ནུས་པར་མ་གྱུར་ཏེ། །འོན་ཀྱང་ཞེ་དྲུག་སྟག་ལོར་ཐུ་མོར་བསྐུང་། །དེ་ལོ་འདས་རྒྱུ་ཡིན་པར་འདུག་པའང་། །ལོ་ངོ་ལྔ་བར་རིམ་གྲོས་བསྲིང་བར་སྣང་། །དེ་དོན་
གནམ་ཆོས་ཐུགས་ཀྱི་གཏེར་ཁ་ལས། །གླང་ལོ་རྒྱབ་བར་སྐུ་ཚེ་བརྟན། །དེ་ནི་ཆོས་དབང་ཀུན་བཟང་ངོ། །དེ་སྐད་ལུང་བསྟན་བྱ་ལོར་བྱུང་། །གླང་ལོ་རྒྱབ་ཅེས་གསུངས་པ་དེ། །ལོ་སྐོར་རྒྱབ་མ་ཡིན་སྙམ་ཡང་། །ཕག་གི་ལོ་ནས་བཅུ་སྐོར་རྫོགས། །དེ་ཕྱིར་སྟག་ལོ་ཡིན་པར་སྣང་།། ཨོཾ༔ ཧེ་ཧེ་ལགས། རྣམ་འཇོམས་ཁྲི་མཇུག་སྔགས་འདི་སྦྱར། ཨོ་རི་འབེ་ཏེ། རོ་འབེ་ཏེ། མ་མ་ཀུ་རུ་ཡེ་སྭཱ་ཧཱ། ལོ་མ་ཅན་ནི་ཁྲི་ཙམ་བཟླས། །དེ་བཞིན་སྔོན་གྱིས་སྨྲས་རྣམས་བྱ། །སྔོན་དུས་སྨྲས་པ་དེ་བཞིན་ནོ། །དེ་བས་བྱ་ཐབས་ཅི་མ་མཆིས། །དེ་སྐད་མགོན་པོ་ཕྱག་དྲུག་པ། །སྤྲུལ་སྐུའི་ཞལ་གཟིགས་ཆོས་གསུང་སྐབས། །ཆོས་དབང་ཀུན་བཟང་དུས་རྒྱུན་དུ། །ན་བ་འདི་ལ་ཕན་པ་ཡི། །སྔགས་དང་གདམས་པ་གནོང་ཞུས་པས། །ཕྱག་དྲུག་མགོན་པོའི་དངོས་སུ་གསུངས།། ཨོྃ༔ ན་མོ་ལོ་ཀེ་ཤྭ་ར་ཡེ། ཆོས་དབང་ལ་ནི་ནད་སྣ་གསུམ། །དུག་རྒྱུ་ཚད་རྒྱུ་བད་ཀན་རྒྱུ། །དུག་རྒྱུ་ལ་ནི་རྣམ་འཇོམས་ཁྲི། །ཚེ་དཔག་མེད་ཀྱང་ཁྲི་བརྗོད་དོ། །ཚད་རྒྱུ་ལ་ནི་ལོ་ཅན་སྟོང་། །ཁམས་བཟློག་བྱས་ན་ཕན་པའོ། །བད་ཀན་ལ་ནི་ཚེ་དཔག་ཁྲི། །ཐུབ་པ་གཅིག་
ཁྲི་གཅིག་སྟོང་བརྗོད། །དེ་ཡིས་ནད་དེ་སེལ་བར་འགྱུར། །ལོ་རེ་རེ་རེ་ཙམ་ན་སྲིད། །གཏན་ནས་ནད་དེ་ཕན་མི་འགྱུར། །དེ་ནི་སྔོན་ལས་ཡིན་པའི་སྟབས། །ཞེས་པ་ཆོས་དབང་ཀུན་བཟང་འདི། །རྒྱུན་དུ་ན་བ་ཅིས་ཕན་ཞུས། །དེ་ཚེ་ཐུགས་རྗེ་ཆེན་པོ་ནི། །འགྲོ་འདུལ་ཞལ་གཟིགས་དངོས་སུ་གསུངས། །ཁམས་བཟློག་སྤར་ཁའི་སྐག་ཟློག་ཡིན། །ལོ་ཅན་ལོ་མ་ཅན་ཡིན་གསུངས། །མེ་སྤྲེལ་སྦྲུལ་ཟླའི་བཅུ་བཞི་ལའོ།། ཨོྃ༔ ན་མོ་ཤཱཀྱ་མུ་ནེ་ཡེ། དྷརྨ་ཏ་ལ་བདག་གི་འཁོར། །པ་ཤང་ཡེ་ནས་ཨཱ་ཡུ་རིང་། །ལ་ན་ཤིན་ཏུ་རྒྱུག་ནུས་འབྱུང་། །འོ་འོ་ཨཱ་ཡུ་རིང་བ་ལ། །མེ་སྤྲེལ་སྦྲུལ་ཟླའི་ཚེས་དགུ་ལ། །ཆོས་དབང་ཀུན་བཟང་ཚེ་རིང་ཐུང་། །མི་འགྱུར་རྡོ་རྗེ་ལ་ཞུས་པས། །དེ་མ་ཐག་ཏུ་ནམ་མཁའ་ནས། །ཤཱཀྱ་ཐུབ་པ་བཞེངས་ཐབས་ཅན། །ཕྱག་གཡས་པད་སྟེང་པོ་ཏི་དང་། །གཡོན་པས་དྲིལ་བུ་འཛིན་པ་གཟིགས། །དེ་ཡི་ཞལ་ནས་གསུངས་པའོ། །མེ་སྤྲེལ་དབོ་ཟླའི་བཅོ་ལྔ་ལའོ། །དེ་ལྟར་རིམ་གྲོ་གསུངས་པ་ཀུན། །གནམ་ཆོས་ལུགས་ཀྱི་རྣམ་འཇོམས་དང་། །ཚེ་དཔག་ལོ་མ་ཅན་དང་ནི། །ཁམས་ཀྱི་སྐག་ཟློག་ལ་སོགས་པ། །ཆོས་དབང་ཉིད་ཀྱི་
འདོན་དགོས་ཏེ། །གཞན་གྱིས་བཏོན་པས་མི་ཕན་ཀྱང་། །བླ་མ་ཆོས་དབང་ཀུན་བཟང་ཉིད། །སྐྱེ་བ་སྔོན་ནས་ནམ་དུ་ཡང་། །ད་ལྟའི་གཏེར་སྟོན་རྣམ་གཉིས་དང་། །འབྲེལ་པ་གཅིག་ཀྱང་མེད་འདུག་པའི། །སྤྲུལ་སྐུས་ཀྱང་ནི་ཆོས་དབང་གི །སྐྱེས་རབས་མང་པོ་མི་དྲན་ཅིང་། །ཆོས་དབང་ཀུན་བཟང་ཉིད་ཀྱིས་ཀྱང་། །ལོག་ལྟ་གཤེ་སྐུར་མེད་ན་ཡང་། །དེང་སང་གཏེར་སྟོན་རྣམ་གཉིས་ལ། །སྙིང་ནས་དད་པ་མེད་པའི་ཕྱིར། །གནམ་ཆོས་ས་ཆོས་གཏེར་གསར་རིགས། །འདོན་ཅིང་ཐུགས་དམ་ལྟ་ཅི་སྨོས། །གནམ་ཆོས་བྱུང་ནས་ལོ་བཅུ་གཅིག །པོ་ཏི་བཅུ་གསུམ་ཡོད་པ་འདི། །པོ་ཏི་ལག་ཏུ་ལེན་མ་མྱོང་། །དད་པ་མེད་ཀྱང་མཚར་འདོད་ཀྱི། །དཔེ་ལྟས་ཙམ་ཡང་བྱེད་སྲོལ་མེད། །གཏེར་སྟོན་གཉིས་པོའི་ལོ་རྒྱུས་དང་། །རྣམ་ཐར་བཤད་ན་གཉེམ་སྣང་བྱེད། །དེ་ཡིས་རྟེན་འབྲེལ་མ་ལེགས་པས། །རྟགས་ཅིག་བདག་གིས་རྨི་ལམ་གསལ། །ཁོང་དང་ང་འཐབ་ང་མ་དགའ། །ཁྱོད་ཀྱིས་གནམ་ཆོས་ལོག་ལྟ་བྱས། །ང་དང་དམ་ཚིག་ཆག་སྨྲས་རྨིས། །དེ་ནས་དེ་ཡི་ལོ་རྒྱུས་བཤད། །འོ་ན་ཐམས་ཅད་ཞུའོ་ཟེར། །གནམ་ཆོས་དཔེ་བླངས་འདས་
ཁ་དུས། །བླངས་ནས་དེ་ཡི་དབང་འགའ་བྱས། །དེ་ནུབ་ཆོས་དབང་ནད་ཕན་ནས། །སྒོ་ནི་ཕྱི་ནས་ཡར་ལྟ་ཞིང་། །གནམ་ཆོས་པོ་ཏི་ལ་བལྟས་ནས། །ཡཱ་ང་འདྲེས་ཚར་ནས་གདའ། །ཟེར་བ་རྨིས་པས་འཕྱིས་ཐལ་ནས། །དེ་བས་ཕན་པ་མེད་པར་གོ །བདུད་འདུལ་རྡོ་རྗེ་ཕེབས་སྐབས་སུ། །ཆོས་དབང་ཀུན་བཟང་བསྙུང་ཡོད་པས། །ཐུགས་དམ་དགོངས་པ་ཞུས་པ་ལ། །བསྙུང་ཞེན་འདྲ་འདས་གྲོངས་མི་འོང་གསུངས། །དེ་ཡང་ལོ་ལྔ་ཐིག་པར་བྱུང་། །འོན་ཀྱང་བདུད་འདུལ་གཏེར་ཁ་ལས། །དད་པ་མེད་པས་ལྟ་མི་འདོད། །ཞུ་དང་ཉམས་ལེན་ལྟ་ཅི་སྨོས། །ལས་འབྲེལ་མེད་པའི་དོན་ཡིན་ཀྱང་། །ཚེ་འདི་ཕྱི་མ་བར་དོ་གསུམ། །ཨོ་རྒྱན་མ་གཏོགས་རེ་ས་མེད། །བསྒྲུབ་རྒྱུ་མཆོད་རྒྱུ་བསྙེན་སྒྲུབ་རྒྱུ། །ཨོ་རྒྱན་ཁོ་ན་བྱེད་བཞིན་དུ། །ཨོ་རྒྱན་ཉིད་ཀྱི་སྐུ་ཚབ་ཏུ། །ཨོ་རྒྱན་ཉིད་ཀྱི་ཕོ་ཉ་བ། །སྙིགས་དུས་ཨོ་རྒྱན་ཁོ་རང་གིས། །སྔོན་དུས་གཏེར་ཁ་མང་པོ་ནས། །ལུང་བསྟན་གསལ་བ་ཤེས་བཞིན་དུ། །དེ་ལ་མི་དད་ཐེ་ཚོམ་གྱིས། །གནམ་ཆོས་ས་ཆོས་གསར་པ་ལ། །མི་དགའ་འདྲེས་དོགས་བྱེད་པ་འདི། །རྟེན་འབྲེལ་ཆེན་པོ་འཁྱུག་འདུག་སྟེ། །
བྱ་ཐབས་ཅི་ཡང་མ་རྙེད་དོ། །དེ་དོན་གོང་གི་ལུང་བསྟན་ལས། །ཧེ་ཧེ་ལགས། གསུངས་པ་ཡང་དད་པ་མེད་པ་ཡིས། །གསུངས་བཞིན་མི་བྱེད་ཟེར་བའི་དན། །ཐུབ་པ་བཞེངས་པ་ཞལ་གཟིགས་ནས། །འོ་འོ་ཨཱ་ཡུ་རིང་བ་ལ། །གསུངས་པ་སྐུ་ཚེ་མི་རིང་བའི། །རྟག་ཏུ་མི་སྐྱ་གཏམ་གྱིས་ཚུལ། །ཡིན་པར་འདུག་པ་སླ་ནས་གོ །གལ་ཏེ་རིམ་གྲོ་རྣམས་བྱས་ཀྱང་། །ལོ་རེ་རེ་ཙམ་ཕན་སྲིད་ཀྱང་། །གཏན་ནས་ནད་དེ་ཕན་མི་འགྱུར། །དེ་ནི་སྔོན་ལས་ཡིན་པའི་སྟབས། །གསུངས་པ་སྔོན་དུ་བཤད་པ་ཡིས། །ལས་འབྲས་གཡུལ་གཏུག་ཚབས་ཆེའི་དོན། །ལས་འབྲས་བསླུ་བ་མེད་པ་དང་། །མཐོང་ཆོས་མྱོང་དགོས་ལས་དེ་ལ། །སུས་ཀྱང་བཅོས་རྒྱུ་མེད་པའི་ཚུལ། །ཐུབ་པས་སྡེ་སྣོད་རྣམས་སུ་གསུངས། །དེ་ཕྱིར་བླ་མ་ཆོས་དབང་ཡང་། །མཚམས་སྒྲུབ་ཐུགས་དམ་རེམ་པ་དང་། །དབང་བརྒྱ་མང་དུ་ཞུས་པ་དང་། །ལོ་དུས་བཞིན་དུ་སྐུ་རིམ་ནི། །རྒྱ་ཆེན་བྱས་ཀྱང་མ་ཕན་དང་། །དེ་བཞིན་ལྷ་རྗེ་མང་པོ་ཡིས། །བཅོས་ཀྱང་ཕན་རྒྱུ་མ་བྱུང་བས། །ཚེ་སྔོན་སྲོག་བཅད་མང་བའི་སྐྱོན། །ལྷ་དང་བཀའ་སྲུང་མཁའ་འགྲོ་ལའང་། །བྱིན་རླབས་མེད་
ཅེས་ལོག་ལྟ་དང་། །དེ་བཞིན་སྨན་དཔྱད་རིམ་གྲོ་ལ། །བདེན་པ་མེད་ཅེས་སྨད་མི་རུང་། །ལས་འབྲས་བསླུ་མེད་དེ་མཐོང་ནས། །སྡིག་པ་ཆུང་ཡང་འཛེམ་པར་བྱ། །ཆོས་དབང་འདས་པས་ཡི་མུག་ནས། །ཉ་མཚམས་བརྒྱད་སོགས་བཀའ་སྲུང་གི །གསོལ་ཀ་རྒྱས་པ་སྐྱུར་བསམ་ཚེ། །ཉམས་དང་རྨི་ལམ་འདྲེས་པའི་སྐབས། །རང་གིས་བསོད་ནམས་ཀྱིས་མ་ཕེར་བ་ཡིན། །བཀའ་སྲུང་རྣམས་ཀྱིས་མ་ཕེར་པ་སྤུ་ཙམ་ཡང་མེད། །ཟེར་བའི་ལུང་བསྟན་གསལ་བར་བྱུང་། །དེ་ཡན་ཆོས་དབང་ཀུན་བཟང་གིས། །སྐྱེ་བ་སྔ་མའི་ལོ་རྒྱུས་ཏེ། །མདོ་རྒྱུད་དགོངས་པ་དང་མཚུངས་པར། །ལས་འབྲས་བསླུ་བ་མེད་པ་ཡི། །སྤྱི་ཡི་ས་བཅད་གསུམ་པའོ།། ༈ །།དེ་ནས་བླ་མ་ཆོས་དབང་ཀུན་བཟང་གི །སྐྱེ་བ་འདི་ཡི་རྣམ་ཐར་བཤད་ན་ཡང་། །ས་བཅད་ལ་སོགས་བྱས་ན་མང་ན་ཡང་། །མདོར་བསྡུས་ཙམ་ཞིག་གོ་བདེའི་ཚིག་གིས་བརྗོད། །མི་འགྱུར་རྡོ་རྗེ་སྐུ་ན་ཕྲ་བའི་སྐབས། །རཱ་ག་ཨ་སྱས་ང་ཡི་སྲིང་མོ་ནི། །བོ་ལུ་མ་ཞེས་བྱ་བ་ཤི་བ་དེ། །བུང་བའི་ལུས་བླང་དེ་ཡི་སྐྱེ་བ་དེ། །བླ་མ་ཆོས་དབང་ཀུན་བཟང་ཡིན་ནམ་སྙམ། །ཨ་ནུས་གསུངས་དང་རང་གྲོལ་འགའ་རེས་སྨྲས། །
དེ་ཉིད་རེད་དམ་མ་རེད་གསུངས་དགོས་ཞུས། །སྤྲུལ་སྐུ་སྐུ་ན་ཆུང་ཡང་བསམ་པ་རྒནཾ། །ཆོས་དབང་ཀུན་བཟང་བླ་མ་ཆེན་པོར་བརྩི། །བུ་མོ་འབུ་སོགས་ཡིན་གསུངས་མ་བདེ་ནས། །ཐུགས་བསམ་བཏང་ཞིང་ཞལ་ཡང་སྐྱེངས་ཚུལ་མཛད། །ཡིན་མིན་ཅི་ཡང་མི་གསུང་བཞད་ཅིང་བཞུགས། །མ་གསུང་གནད་ཀྱིས་དོན་ལ་ཡིན་པར་གོ །དེ་ནས་སྐྱེ་བ་འདི་ཡི་རྣམ་ཐར་ལ། །སྐྱེ་བའི་ཡུལ་དང་རིགས་རུས་ཡབ་དང་ཡུམ། །བྱིས་སྦའི་སྐབས་དང་བསྟན་ལ་ཞུགས་པའི་ཚུལ། །ཐོས་བསམ་སྦྱངས་དང་བླ་མ་བསྟེན་པའི་ཚུལ། །ཉམས་སུ་བླངས་དང་དེ་ཡི་རྟགས་མཚན་རྣམས། །འགྲོ་དོན་མཛད་དང་བསོད་ནམས་ཚོགས་བསགས་ཚུལ། །འདས་པའི་རབས་དང་དེ་ཡི་རྟགས་བྱུང་ཚུལ། །དེ་ལྟར་ས་བཅད་སྐབས་དོན་བཅུ་གཉིས་སོ། །སྐྱེ་བའི་ཡུལ་ནི་རྫོགས་པའི་སངས་རྒྱས་ཀྱི། །ལུང་བསྟན་གདོང་དམར་བོད་ཀྱི་ཡུལ་ཞེས་པར། །མདོ་ཁམས་གླིང་ཁྲི་བར་མ་ངོམ་གྱི་ཡུལ། །དེ་ཡི་སྟོད་ཆ་གནས་མདོ་ཞེས་བྱ་སྟེ། །རིན་པོ་ཆེ་པ་དཀོན་མཆོག་དཔལ་འབྱོར་གྱིས། །ཆོས་དབང་ཀུན་བཟང་ཉིད་ལ་གསུང་གླེང་དུས། །ཁྱོད་ཀྱི་ཕ་ཡུལ་དེ་ལ་ཅི་མིང་གསུངས། །གནས་མདོ་
མིང་ཞེས་ཞུས་པས་ཕུ་དེ་རུ། །གནས་གཅིག་ཡོད་པ་འདྲ་བ་ཡོད་དམ་གསུངས། །གནས་མདོའི་ས་ཡི་མིང་རེད་ཞུས་པའི་ཚེ། །ཁྱོད་རང་རྣམས་ཀྱི་ངོ་མ་ཤེས་པ་ཡིན། །གནས་གཅིག་ཡོད་པའི་དོན་ཡིན་གསུངས་པ་ལྟར། །ཆུ་བོ་གསེར་ལྡན་དལ་གྱིས་འབབས་པའི་འགྲམ། །ལམ་འཕྲེང་གྲུ་གསུམ་དབུས་ནི་ས་གྲུ་གསུམ། །ཤིང་གསུམ་རྡོ་གཉན་གསུམ་དང་གནམ་གྲུ་གསུམ། །རང་བྱུང་ཕག་མོའི་དཀྱིལ་འཁོར་འདྲ་བ་ཡི། །ལྟེ་བ་འདྲ་བའི་གཏན་ཟུག་ཕ་ཝང་རྩར། །མེ་མོ་སྦྲུལ་ལོ་ཆོ་འཕྲུལ་ཟླ་བ་ཡི། །ཡར་ངོའི་ཚེས་བརྒྱད་ནམ་མཁའ་ལངས་དུས་འཁྲུངས། །དེ་ཕྱིར་མིང་ལ་ནམ་ལངས་ཞེས་བྱར་བཏགས། །ལས་ཀྱི་ཕ་ནི་དམངས་རིགས་ཇོ་རུ་སྟེ། །དེ་ཡི་ཁྱིམ་སྐྱེས་དེ་ཡི་བུ་རུ་འཛིན། །ལུས་ཀྱི་ཕ་ནི་རིག་སྔགས་འཆང་བ་ཡི། །ཨ་ནུ་པདྨ་དབང་དྲག་ཡིན་པ་སྟེ། །ཇོ་རུ་ནད་ཕོག་ཤི་ལ་ཁད་ཀྱི་དུས། །ཨ་ནུ་ཡུལ་བུད་ཤག་ནས་འགྲོ་ཁ་ལ། །ནམ་ལངས་འགྲོ་དགོས་གསུངས་པས་ང་མི་འགྲོ། །ང་ཡི་ཕ་རྒན་འཆི་ལ་ཁད་ཞུས་པས། །ཁྱོད་ཀྱི་ཕ་ནི་ཇོ་རུ་གཏན་ནས་མིན། །ཁྱོད་ཀྱི་ཕ་ནི་ཁོ་བོ་ཡིན་ངེས་པས། །ཁྱོད་མ་སོང་ན་ང་ཡང་འགྲོ་ཐབས་མེད། །ང་མ་སོང་ན་རིན་རྒྱལ་
འགྲོ་ཐབས་མེད། །རིན་རྒྱལ་མ་ཐར་ན་ནི་རི་བོ་ཆེས། །རིན་རྒྱལ་སྐེ་གཅོད་མིག་བྲུལ་བྱེད་རྒྱུར་སྣང་། །གསུངས་པས་ཨ་ནུ་ཕ་བྱས་ཇོ་རུ་སྒྱུར། །སོང་བའི་ཤུལ་དུ་ཇོ་རུ་ཚེ་དུས་བྱས། །ཨ་ནུ་པད་དབང་དེ་ཡི་ཡབ་བཙན་ཕྱུག །ད་ལྟ་ཁོ་བོ་ཡབ་ལ་ཤ་མཚན་ནི། །ལྟག་པར་རུས་འབུར་ཤ་མཚན་ཡོད་པ་དང་། །སྐུ་ནི་གཡས་འཁྱིལ་རྣམས་ནི་ཆོས་དབང་ལ། །གསལ་བར་འདུག་པ་ཡང་ནི་བདག་གིས་མཐོང་། །དེ་ཕྱིར་རིགས་ནི་རྒྱལ་རིགས་ཡིན་པ་སྟེ། །ངོམ་པ་སྡོང་ཚང་ལྷ་གདོང་དཀར་པོ་ཞེས། །རྒྱ་གར་མང་པོས་བཀུར་བའི་རྒྱལ་པོ་ནི། །འཁོར་ལོས་སྒྱུར་བའི་རྒྱལ་པོ་སྡེ་ལྔ་དང་། །དེ་ཡིས་རྒྱུད་ལས་ཤཱཀྱའི་རིགས་གསུམ་གྱིས། །ཤཱཀྱ་ལི་ཙ་བྱི་ཡི་རིགས་གྱུར་པའི། །གཉའ་ཁྲི་བཙན་པོ་སོགས་ཀྱི་རྒྱལ་པོ་བཞི། །དེ་རྒྱུད་སྲོང་བཙན་ཁྲི་སྲོང་ལ་སོགས་པ། །ཆོས་རྒྱལ་མེས་དབོན་སྤྲུལ་པའི་རྒྱལ་པོའི་རྒྱུད། །བཙན་པོ་འོད་སྲུང་ནས་བཟུང་མངའ་རིས་བྱུང་། །དེ་ཡི་རྒྱུད་པ་ཁམས་སུ་བྱོན་པ་ལས། །སྤོམ་ར་གདོང་ཞེས་ངོམ་སྨད་ས་ཆ་བཟུང་། །དེ་རྒྱུད་དྲག་ནག་རྒྱ་ནག་ལས་ཀ་བླངས། །དེ་རྒྱུད་མཁའ་སྤྱོད་པ་ཞེས་སྒ་ལོ་ཡིན། །སྐུ་སྐྱེ་སྐུ་ལུས་མ་བཞག་མཁའ་
སྤྱོད་གཤེགས། །དེ་སྲས་སྒམ་པོ་པ་དང་བྱ་བྲལ་པ། །དྲུང་ཆེན་གོང་འོག་གསུམ་གྱི་གྲུབ་ཐོབ་སྟེ། །ལྷ་རྒོད་རྒྱལ་དང་དབང་ཕྱུག་རྒྱལ་མཚན་དང་། །མགོན་པོ་རྒྱལ་དང་བཙན་ཕྱུག་པད་དབང་སྟེ། །དེ་རྣམས་སྔགས་ཀྱི་ཉམས་ལེན་བརྩོན་པ་དང་། །རྟེན་དང་རིང་བསྲེལ་བྱོན་པ་ཤ་སྟག་གོ། །དེ་ཕྱིར་བླ་མ་ཆོས་དབང་ཀུན་བཟང་ཡང་། །རྟེན་ཤུགས་ཆེ་བར་བྱོན་པ་གདུང་རྒྱུད་དོན། །དེ་མིན་ཐུགས་དམ་རིམ་དང་མཚམས་སྒྲུབ་ལ། །མི་ཚེ་བསྐྱལ་བའི་བླ་མ་འགའ་ཞིག་གིས། །གདུང་བཞུ་བ་ལ་རཱ་ག་ཨ་སྱ་བདག །ཕྱིན་ཀྱང་རྟེན་དེ་འོས་ཙམ་ལས་མི་འབྱོན། །གསང་བ་བྱིན་རླབས་ཕ་ནི་བྱ་རོག་གདོང་། །ཡིན་པ་ཨ་མ་རེ་ནེ་དགོན་སོང་དུས།།བུ་གཉིས་འོང་བའི་རྨིས་ལྟས་གསལ་བ་དང་། །མི་སྔོན་བྱ་རོག་མཆུ་ཅན་གཅིག་བྱུང་ནས། །གོས་རྒྱབ་རེ་ཚལ་བཀོག་ནས་དོར་རྨིས་སྐད། །མ་ཡི་མིང་ནི་རི་བཟའ་ཆོས་སྐྱོང་སྐྱིད། །སྐྱེ་བའི་ཡུལ་དང་ཡབ་ཡུམ་རིགས་དང་རུས། །མདོར་བསྡུས་བརྗོད་པས་ས་བཅད་གསུམ་ཚང་ངོ། །དེ་ནས་བྱིསྦའི་དུས་སུ་བ་གཅིག་གིས། །མིག་ཡ་རྭ་ཅོ་བརྒྱབ་ནས་མིག་ལོང་བས། །ནམ་ལངས་བ་ལོང་ཞེས་བྱ་རེ་ཞིག་ཐོགས། །དེ་ནས་ལོ་གྲངས་ལྔ་
འམ་དྲུག་གི་དུས། །རཱ་ག་ཨ་སྱས་བྲིས་པའི་ཁྲོ་བོའི་སྐུ། །སབ་མའི་ངོས་སུ་ཡོད་པ་དེ་ཉིད་ལ། །མེ་ལྕེ་ལྷབ་ལྷབ་འབར་བ་དངོས་སུ་མཐོང་། །དེ་ནས་ལོ་གྲངས་བརྒྱད་དམ་དགུ་ཡི་དུས། །རཱ་ག་ཨ་སྱས་སྐྱེས་བུའི་བསྙེན་སྒྲུབ་ལ། །ཟླ་བ་གཅིག་ཙམ་དམར་ནག་གཉིས་ཀ་བསྒྲུབས། །སྒྲུབ་རྟེན་སྐུ་འདྲ་མཆོད་ཁང་ནང་དུ་བཤམས། །ནུབ་གཅིག་གསོལ་ཀ་རྒྱས་པར་བྱས་པའི་རྗེས། །བྱིས་སྦ་ནམ་ལངས་རང་གིས་མཆན་དེར་ཉལ། །ནམ་ཕྱེད་ཙམ་ལ་ཨ་ཕོ་ཨ་ཟད་ཟེར། །གཅེར་བུར་ལངས་ནས་ང་ཡི་རུམ་དུ་བྲོས། །ཅི་ཡིན་སྨྲས་པས་ཡ་ཀི་མདུན་འདི་ན། །དམ་ཅན་མགར་དམར་སྐུ་འདྲ་དེ་འདྲ་བ། །སྐུ་འདྲ་མ་རེད་ཆེ་ཆུང་མི་བས་ཆེ། །བེར་དམར་གསོལ་ཞིང་སེངྒེ་གཡུ་རལ་ཆིབས། །བེར་དམར་སྟག་རལ་གཟིག་ཤུབས་བསེ་ཐེབ་ཅན། །ཕྱག་གཡས་གསེར་གྱི་རྡོ་རྗེ་སེར་ཆ་ལེ། །ནམ་མཁར་ཕྱར་ཞིང་གཡོན་པས་ཀ་པཱ་ལར། །མི་སྙིང་རེད་བསམ་སྙིང་གཅིག་སྨུག་ལུམ་མེ། །འཛིན་པ་རྨི་ལམ་མ་ཡིན་དངོས་སུ་མཐོང་། །ཡུན་རིང་བལྟས་པས་ཕྱག་གཡས་རྡོ་རྗེ་དེ། །སེངྒེའི་སྔ་རུ་གོང་དུ་བཞག་བྱས་ནས། །ཕྱག་གཡས་སྦྱར་བས་གཡོན་གྱི་སྙིང་དེ་ལ། །ཨ་
ལོག་ལྟ་བུར་བཅད་ནས་ལན་གསུམ་གསོལ། །བཅད་ཀྱང་སྙིང་དེ་ཟད་རྒྱུ་མེད་པར་སྣང་། །དེ་ནས་གསེར་གྱི་རྡོ་རྗེ་སྔར་ལྟར་བསྣམས། །ང་ལ་གཟིགས་ཏེ་བཞད་ནས་བྱུང་བའི་ཚེ། །ཞལ་མདོག་དཀར་པོ་དུང་གི་མདོག་ལྟར་གྱུར། །བཞད་མོ་ཚར་ནས་དམར་པོ་ཁྲག་མདོག་ལྟར། །དེ་ནས་མི་སྣང་ཡལ་ནས་སོང་བ་དང་། །སྐྲག་ནས་བྱུང་བས་བྲོས་པ་ཡིན་ནོ་ཟེར། །བྱིས་སྦའི་སྐབས་སུ་ཁྲོ་སྐུར་མེ་འབར་དང་། །རྡོ་རྗེ་ལེགས་པ་དངོས་སུ་ཞལ་གཟིགས་པ། །ཐ་མལ་མ་ཡིན་ལས་ཅན་ཡིན་པའི་རྟགས། །ལོ་བཅུ་ལོན་ནས་ཡི་གེ་བསླབ་ན་ཡང་། །རིགས་པ་རྣོ་ཞིང་སྤྱང་གྲུང་ཆེ་བ་ལ། །ཡི་གེ་འདོན་པར་ཤིན་ཏུ་འཚེར་བའི་ཕྱིར། །ལོབ་པར་དཀའ་བ་རཱ་ག་ཨ་སྱ་ཡིས། །མཚམས་ཁུང་བུག་སྒོར་བཞག་ནས་ཤིང་ལྕགས་ཀྱིས། །རྒྱབ་རྡེག་བྱེད་ཅིང་དྲག་ཏུ་བཅུག་དགོས་བྱུང་། །དེ་ནི་ཚེ་སྔོན་བུང་བར་སྐྱེས་པ་ཡི། །རྒྱུ་མཐུན་འབྲས་བུས་བློ་ནི་རླུག་པར་སེམས། །དེ་ནས་ཡི་གེ་ཆོབ་ཙམ་ལོབ་པ་དང་། །རཱ་ག་ཨ་སྱ་དབུས་སུ་སོང་བའི་ཤུལ། །ཨ་ནུ་སྔགས་འཆང་ཀརྨ་དོན་ཡོད་པས། །ཆག་ཕྱིར་ཁྲིད་པས་སྔགས་ཆོས་ཆོབ་ཙམ་དང་། །རྙིང་མའི་འདོན་ཆའི་དབང་ལུང་འགའ་རེ་ཐོབ། །གཏོར་
ཆོག་ལ་སོགས་ཤེས་པ་ཙམ་དུ་གྱུར། །དྲུང་པའི་སྒར་གཞིས་རྨོ་ཡི་གཟིམས་ཁང་དུ། །ཤག་ཤོག་བསྡད་པས་བླ་མ་དབུས་བྱོན་དེས། །མཆེད་ཡ་ཡིན་ཞེས་ཆེ་བཀུར་བྱས་པར་སྣང་། །བྱིསྦའི་སྐབས་དེ་ས་བཅད་བཞི་པའོ།། ༈ །།དེ་ནས་རཱ་ག་ཨ་སྱ་དབུས་ནས་བསླེབས། །ནམ་ལངས་ལོ་གྲངས་བཅུ་དྲུག་བཅུ་བདུན་ཙམ། །ཉིན་མཁར་གཟིམས་ཁང་དྲུང་པའི་གཟིམ་མལ་གྱི། །འདྲ་སྐུ་བྱིན་རླབས་ལྡན་པ་དེ་ཡི་དྲུང་། །བྱིསྦ་དབང་རྒྱལ་འབུམ་དང་མཆེད་གྲོགས་གཉིས། །རཱ་ག་ཨ་སྱས་ཐེག་པ་ཐུན་མོང་གི །སྐྱབས་གསུམ་འཛིན་པའི་དགེ་བསྙེན་སྡོམ་པ་དང་། །ཚངས་པར་སྤྱོད་པའི་དགེ་བསྙེན་སྡོམ་པ་ཕོག །དབང་རྒྱལ་འབུམ་ལ་ཀརྨ་དོན་གྲུབ་དང་། །ནམ་ལངས་ལ་ནི་ཀརྨ་དར་རྒྱས་བཏགས། །སྤྲེལ་ལོའི་མཇུག་ནས་ཕག་ལོའི་མཇུག་གི་བར། །རཱ་ག་ཨ་སྱའི་ཆག་ཕྱི་བྱས་པ་སྟེ། །དེ་ཚེ་ཀར་ལུགས་དབང་ལུང་མཐོ་ཁོག་དང་། །ཟབ་མོ་ལྟ་རྒྱུད་ལུགས་ཀྱི་སེམས་བསྐྱེད་ཐོབ། །འཕོ་ལུང་སྦྱངས་པས་རྟགས་ནི་ཐོན་པ་དང་། །སེམས་ངོ་སྤྲོད་པས་གནས་འགྱུ་སྲུང་ཕྱོགས་ཤེས། །སྒྲོལ་དཀར་འཇམ་དཀར་རྒྱུན་བསྙེན་བྱས་པ་ཡིས། །ཤེས་རབ་རྩ་
ཁ་བྱེ་སྟེ་མེ་ལྟར་འབར། །ཀུན་རིག་ཆོས་སྤྱོད་ཉེར་མཁོ་ལ་སོགས་པ། །བློ་འཛིན་རྣམས་ཀྱང་དཀའ་ཚེགས་མེད་པར་ཟིན། །གཏོར་བཟོ་ཡིག་རིས་ལྷ་རིས་འདག་སྐུ་དང་། །བཟོ་ཚེམ་ས་རྩིས་མདོས་བཟློག་བསྐང་གསོ་སོགས། །བརྡའ་བསྟན་ཙམ་གྱིས་ཤེས་པར་གྱུར་པ་ཡིན། །ཀུན་གྱིས་བླ་མར་རེད་ཐོག་གདའ་ཞེས་ཟེར། །དེ་ནས་ཕག་ལོའི་ལོ་འཇུག་བཅུ་དགུ་དུས། །སྟག་ལུང་སྒར་པ་མཉམ་དུ་དབུས་སུ་བྱོན། །ངོ་ཤེས་མེད་ཅིང་ཁ་སར་སྣ་རྒོད་རེད། །སྒར་དཔོན་རྣམས་ཀྱི་ཆག་ཕྱི་དཔོན་ནད་ཆེ། །ལམ་དུ་དམར་བཤལ་ནད་བྱུང་འཆི་ལ་ཁད། །སྒར་རྗེས་སླེབ་པར་དཀའ་ཡང་རྟ་ལ་བསྐྱོན། །རྐུན་དོགས་བྱེད་དུས་ཁྲབ་གྱོན་བསྲུང་དགོས་པར། །བྲང་ལ་མདའ་ཕོག་ན་ཡང་མ་སྐྱོན་ཏེ། །ནོར་ནད་བྱུང་བའི་ནོར་བསྲུང་བཅུག་ན་ཡང་། །དཀའ་ལས་ཆེ་དྲག་སྡིག་སྒྲིབ་དག་གམ་སྙམ། །དེ་ཚེ་གཞི་ན་རཱ་ག་ཨ་སྱ་ཡིས། །སྐུ་རིམ་གསོལ་ཀ་ཡང་ཡང་གཟབ་བྱས་པས། །སྐྱེས་པ་བུད་མེད་ཆས་བཟང་མང་པོ་ཡིས། །འཆམས་གོས་མ་རལ་གདོང་ལ་གཟར་བྱས་ནས། །ངེད་ཚོས་བསྐྱལ་ནི་ཚར་ཡོད་ཟེར་བ་རྨིས། །དེ་དུས་ཙམ་ལ་གདན་ས་ཆེན་པོ་ཡི། །ཟ་དམ་རྡོ་རྗེའི་སྤོ་ལ་སླེབས་པར་
སྣང་། །དེ་ཕྱིར་ཕྱོགས་སུ་འགྲོ་བ་རྣམས་ལ་ཡང་། །སྐུ་རིམ་གསོལ་ཁས་ཕན་པའི་ངེས་ཤེས་ཐོབ། །དེ་ནས་བྱི་གླང་སྟག་ཡོས་ལོ་ཕྱེད་བཞིར། །ཉིན་བྱེད་གླིང་གི་གྲྭ་ས་འགྲིམས་པའི་ཚེ། །ཤེས་རབ་ཆེ་ཞིང་ཀུན་དང་མཐུན་པ་སྟེ། །ཁམས་པ་ཆགས་མེད་མཆེད་ཡ་ཡིན་ནོ་ཞེས། །མཆེད་གྲོགས་རྣམས་ཀྱིས་བརྩི་སྲོལ་ཆེ་བར་བྱས། །རིན་པོ་ཆེ་པ་དཀོན་མཆོག་དཔལ་འབྱོར་ལས། །ཐར་རྒྱན་ལ་སོགས་སྤྱི་ཁྲལ་ལུང་འགའ་ཐོབ། །སློབ་ཆུང་དྲུང་རམ་ཀརྨ་རྒྱས་པ་དང་། །དགེ་རྒན་དྲུང་རམ་ཀརྨ་འཇིགས་མེད་ཀྱིས། །བསྡུས་གྲྭ་རྟགས་བསལ་འབྱེད་པ་ཙམ་ཞིག་བསླབས། །དེ་ནས་ཁམས་སུ་འོང་དགོས་གལ་ཆེ་དེའི། །མཚན་ཉིད་སྐྱུར་ནས་སྔགས་ཆོས་བསླབ་ཆོག་པའི། །དགོངས་པ་ཞུས་པས་ངོ་ཆེན་བྱས་ནས་གནང་། །རིན་སྤུང་ཞབས་དྲུང་བགྲེས་གཞོན་གཉིས་ཀ་དང་། །མགོན་བླ་བློ་ལྡན་བསྟན་ནམ་གཉིས་པོ་ལ། །བེར་ནག་ཅན་དང་འཁོར་ལྔ་ཡོངས་རྫོགས་ཀྱི། །གདང་དབྱངས་རྔ་རྡུང་དབང་ཕྱུག་རྡོ་རྗེ་ཡི། །ཕྱག་ཁྲིད་ཇི་བཞིན་ནོར་འཁྲུལ་མེད་པ་དང་། །ཞྭ་དམར་དྲུག་པའི་ཕྱག་ཁྲིད་མ་འཆུགས་པའི། །ཕྱག་བཞི་པ་དང་ཞིང་སྐྱོང་ཚེ་རིང་མའི། །གདང་དབྱངས་
རྔ་བརྡུང་ཤིན་ཏུ་མཁས་པར་བསླབས། །དེ་དག་གྲ་ཡིག་རྣམས་ཀྱང་རིན་སྤུངས་པས། །ཕྱག་བྲིས་མཛད་ནས་གནང་པས་ཐུགས་བཏགས་བྱུང་། །བླ་མ་བཞག་བླ་སྐུ་སྐྱེས་ཐུགས་ལ་བཏག ཁོང་ལ་སངས་རྒྱས་འཕེལ་གདུང་ཡོད་པ་ལ། །ང་ཡི་ཇོ་ཇོ་ཀརྨ་ཆགས་མེད་ལ། །མཇལ་དར་བྱེད་རྒྱུས་རིང་བསྲེལ་གནོང་ཞུས་པས། །ཁྱེད་རང་མཆོད་པ་ཤོམ་ལ་གསོལ་བ་ཐོབ། །བླ་མ་བཟང་ན་རིང་བསྲེལ་འཕེལ་ནས་འོང་། །གསུང་ལྟར་བྱས་པས་འཕྲལ་དུ་གསུམ་འཕེལ་བས། །གཅིག་གནོང་གཉིས་པོ་གནོང་ཁས་མ་ཉན་ཏེ། །ཟ་དམ་གཉེར་ཆེན་གྱིས་ནི་རྟེན་འདི་ལ། །མཆོད་པ་རྒྱ་ཆེན་ཕུལ་ནས་གསོལ་བཏབ་ཀྱང་། །རིང་བསྲེལ་གཏན་ནས་འཕེལ་དུ་མ་ཉན་པར། །ཁྱོད་ལ་མཆོད་པའང་འབུལ་རྒྱུ་ཆེར་མེད་པས། །རིང་བསྲེལ་འཕེལ་བ་ངོ་མཚར་ཆེ་ཞེས་གསུངས། །དེ་དུས་རྒྱལ་བའི་དབང་པོའི་མིང་གནང་ཞིང་། །རྒྱལ་ཚབ་པ་ཡི་བསྙེན་རྫོགས་བཞེས་མ་གྲུབ། །སྐུ་མདུན་སི་ཏུ་ཞིང་ནི་རྗེས་ཚར་བས། །རཏྣའི་གཏེར་ཁ་ཨོ་རྒྱན་ལུང་བྱང་ལས། །གཉགས་ཆེན་ཛཱ་ནའི་སྐུ་ཡི་སྤྲུལ་པ་རུ། །ལུང་བསྟན་ཆོས་རྗེ་མར་ཐང་གདུང་རྒྱུད་པ། །ཀརྨ་གྲགས་པ་རྒྱལ་མཚན་དཔལ་བཟང་
པོའི། །ཞྭ་དམར་དྲུག་པའི་སྡོམ་རྒྱུན་བཟང་ཟེར་ནས། །ཀར་ལུགས་ཀུན་གྱིས་དེ་དུས་བསྙེན་རྫོགས་ཞུས། །དེ་སྐབས་རབ་བྱུང་ངུར་སྨྲིག་འཛིན་པར་གྱུར། །མིང་ནི་ཆོས་སྐྱོང་རྡོ་རྗེའི་ཕྱག་བྲིས་ཏེ། །ཆོས་དབང་ཀུན་བཟང་ཞེས་ནི་བཏགས་པ་ཡིན། །ཆོས་དབང་ཞེས་པ་ཆོས་ཀྱི་དབང་ཕྱུག་གི །མཚན་ལ་གྲ་ནས་བཏགས་པ་སྲོལ་ཡིན་ཏེ། །ཀུན་བཟང་ཞེས་པ་རྫོགས་ཆེན་ཉམས་ལེན་གྱི། །རྟེན་འབྲེལ་དེ་ཡི་དུས་སུ་འགྲིགས་པར་སྣང་། །རྒྱལ་ཚབ་གྲགས་པ་མཆོག་དབྱངས་མཚུར་ཕུར་མཇལ། །ལྷ་ས་བསམ་ཡས་ར་སྒྲེང་སྟག་ལུང་སོགས། །དབུས་གནས་ཆེ་རིམ་རྣམས་ཀྱང་མཇལ་བ་དང་། །ལྷོ་བྲག་གསས་མཁར་དགུ་ཐོག་མཇལ་སོང་བས། །དེ་རུ་རྒྱལ་དབང་ཆོས་དབྱིངས་རྡོ་རྗེ་ཡིས། །ཞབས་བསྐོར་གསོག་པའི་སྐབས་སུ་མཇལ་མ་ཐག །འབྱོན་བརྡོ་ཨེན་ཙམ་བཞུགས་ནས་ཆོས་དབང་ལ། །སྤྱན་ནི་འབུར་ཚུགས་ལྟ་སྟངས་མཛད་ནས་གཟིགས། །དེ་མ་ཐག་ཏུ་དབང་མེད་དད་པ་སྐྱེས། །བ་སྤུ་གྱེན་ལང་མཆི་མ་ཆར་ལྟར་བབས། །ལུས་པོ་རྔུལ་ཞིང་ཧྲིལ་ཧྲིལ་སིག་སིག་འདར། །བྱིན་འབེབས་གཞུང་ལས་གསུངས་པའི་རྟགས་རྣམས་བྱུང་། །དེ་ནས་བཟུང་སྟེ་
དད་པ་འགྱུར་མེད་ཐོབ། །དེ་དུས་བྱིན་རླབས་ཞུགས་པ་ཡིན་པར་སྣང་། །ཨ་ནུའི་གཤེགས་རྫོགས་དཔལ་ཆེན་སྒྲ་ལོ་ཡི། །ཕྱག་བཟོ་ཙན་དན་དཀར་པོའི་མགོན་པོའི་སྐུ། །བསྐུར་བ་སླེབས་ཤིང་ཉིན་བྱེད་གླིང་པ་ཡི། །དེ་ཕྱིར་ཡར་གྱི་ཐུགས་བཏགས་བཟང་བར་མཛད། །དེ་ནས་གྲྭ་ཚབ་ཕྲིན་ལས་བཏང་བ་བསླེབས། །རྗེས་གནང་འགའ་ཟུང་བཟུང་ནས་ཕ་ཡུལ་གྱི། །གནས་བསྐོར་འགའ་དང་བསྡེབས་ནས་ཁམས་སུ་བྱོན། །དེ་དུས་རང་ལོ་ཉི་ཤུ་རྩ་གསུམ་སྟེ། །རྗོད་དུ་ནད་པ་ཞིག་གིས་དབང་ཞུས་ཏེ། །འགྲོ་དོན་ཐོགས་མ་དེ་ནས་བྱུང་བ་སྟེ། །གནས་སྐོར་ཆ་ལུགས་གོས་བཅས་ཞན་པ་དང་། །ས་ཆ་རྒྱུས་མེད་མི་ཡི་དབང་ཞུ་བ། །དེ་ཡི་རྟེན་འབྲེལ་ལེགས་ཤིང་མཚར་ཞེས་ཟེར། །དེ་ནས་ལམ་ན་ཇག་པ་མང་པོ་ཡིས། །གནས་བསྐོར་བཅོམ་ནས་འགྲོ་སྟབས་དཀའ་ཟེར་ནས། །དམ་ཅན་ཇག་ཆིངས་ལྕགས་རྡོར་མ་མཛད་ནས། །གསོལ་ཁ་བཀའ་བསྒོ་བྱས་ཤིང་འོང་བ་ཡིས། །ཉིན་གཅིག་གྲོ་ཚུགས་མ་མགོ་བསྡུ་བརྡོ་ལ། །ཇོག་པ་མི་མགོ་མང་པོ་མདའ་གཞུ་ཅན། །བྱུང་བས་ས་གསལ་གབ་ས་བྲོས་ས་མེད། །མེ་དེ་བསད་ནས་ཁོང་རྣམས་ཉལ་བསྡད་པས། །ཇག་པ་རྣམས་
ཀྱིས་ལམ་གཉའ་ཁོང་རྣམས་ལ། །བལྟ་ཞིང་ཐལ་ཡང་མ་མཐོང་མིག་བསྒྲིབས་ནས། །ཉེ་ཞོ་མ་བྱུང་ཁོང་རྣམས་ཐར་བ་དེ། །སྐྱེས་བུ་ཡང་ལ་ངེས་ཤེས་སྐྱེས་ཞེས་ཟེར། །དེ་སྔོན་དབུས་སུ་བཞུགས་ཚེ་དབུས་གཙང་དུ། །འབུར་ནག་བྱུང་སྟེ་ཐམས་ཅད་ཁ་དན་སྐབས། །གཞི་ན་རཱ་ག་ཨ་སྱས་ཆོས་དབང་གི །སྐུ་རིམ་ཞག་བདུན་ཐུན་པ་མི་བདུན་གྱིས། །སྒྲོལ་དཀར་སྔགས་ལ་འུར་འདོན་བྱས་པའི་ཚེ། །བར་ཆད་སྐྱོབས་རྟགས་རྨི་ལམ་གསལ་བ་ལྟར། །བར་ཆད་མ་བྱུང་ཡོས་ལོ་བྱ་གྲགས་དུས། །མཆེད་གཉིས་ཞལ་འཛོམ་རིང་བསྲེལ་མཇལ་དར་གདའ། །རྟེན་ལ་ཞུགས་ཤིང་རབ་ཏུ་བྱུང་བ་དང་། །གྲྭ་ས་འགྲིམ་ཞིང་བསླབས་སྦྱངས་བྱས་པའི་ཚུལ། །ས་བཅད་ལྔ་པ་དེ་ཡིས་ཚང་བའོ།། ༈ །།དབུས་སུ་འགྲོ་དུས་ཡར་ལམ་སོག་ཟམ་དུ། །ཞབས་དྲུང་བཀྲ་ཤིས་དཔལ་གྲུབ་ཞལ་སྔ་ནས། །མི་འཁྲུགས་པ་ཡི་དབང་གཅིག་ཐོབ་པ་དང་། །སྒྲོགས་ར་སྐུ་སྐྱེར་ཚེ་དབང་འབྲེལ་པ་ཐོབ། །ཁམས་སུ་བསླེབས་ནས་རཱ་ག་ཨ་སྱ་ཡིས། །རིམ་པར་དབང་ལུང་བུམ་པ་གང་བྱོ་བྱས། །དེ་ཚེ་ཆོས་དབང་ཉིད་ཀྱིས་བྲག་བཤིགས་ནས། །རཱ་ག་ཨ་སྱས་མཚམས་ཁང་
བཟོས་པ་ནི། །མི་ལས་མར་པའི་གསས་མཁར་བཞེངས་པ་བཞིན། །དཀའ་ལས་ཆེན་པོ་བསམ་པ་བཟང་པོ་བྱས། །དེ་ཚེ་ཚེ་གཟུངས་ཁྱུང་དམར་འབུམ་ཐེར་ཐོན། །དེ་ནས་ལོ་ངོ་བདུན་སྟེ་ཧྲིལ་ལྔའི་བར། །ལྡོམ་བུ་གྲོང་ཆོག་ཅུང་རེ་བྱས་མོད་ཀྱིས། །ཕར་ཁྱེར་མཚམས་བསྡམས་གསར་རྙིང་སོ་སོ་ཡི། །སྒྲུབ་པ་ཁོ་ན་རྟགས་ཐོན་བྱེད་དུ་བཅུག །དེ་སྐབས་ཚེར་ལུང་སྤྲུལ་སྐུ་དགུང་ལོ་ཡང་། །བཅུ་པའི་དུས་སུ་ངོམ་དུ་ཕེབས་པ་སྟེ། །རི་ཁྲོད་འདི་རུ་གདན་འདྲེན་བྱས་པའི་སྐབས། །ཆོས་དབང་ཉིད་ཀྱིས་གཞན་ནས་བསླུས་པ་ཡི། །དགྱེས་རྡོར་འབུམ་སྐུ་ཤིན་ཏུ་ཁམས་ཆེ་བ། །མར་པའི་ཁྲག་རིལ་རྔོག་པའི་རིང་བསྲེལ་དང་། །ཨ་གཉན་དམ་པའི་རིང་བསྲེལ་སོགས་ཡོད་པ། །རཱ་ག་ཨ་སྱས་འབུལ་བར་འདོད་ན་ཡང་། །ཆོས་དབང་ཉིད་ཀྱིས་འབུལ་བར་མི་སྤྲོ་སྟེ། །དྲུང་པས་སྐུ་སྐྱེ་མི་འབྱོན་གསུངས་པར་གདའ། །སྐུ་སྐྱེ་ཡིན་ངེས་ཨེ་ཡིན་ཅི་ཆ་ཟེར། །དེ་ནས་དྲུང་པའི་གཟིགས་དཀར་ཁང་པ་ཡི། །སྐུ་སྨད་མུན་ཁུང་ནང་དུ་སྦས་པ་དེ། །སྤྲུལ་སྐུ་མགྱོགས་པར་བྱོན་ནས་ངོས་འཛིན་མཛད། །ཕྱིར་ནངས་ཐུགས་རྗེ་ཆེན་པོའི་དབང་གནང་སྐབས། །བླ་མ་ཆོས་དབང་ཀུན་བཟང་གཟིགས་སྣང་
ལ། །སྤྲུལ་སྐུའི་སྐུ་སྨད་བྱམས་བཞུགས་མཛད་པ་དེ། །སྤྲུལ་སྐུ་ཉིད་ཀྱི་སྐུ་སྨད་ཡིན་པ་ལ། །རྐེད་པ་ཡན་དེ་རྡོ་རྗེ་འཆང་ཆེན་པོ། །སྐུ་མདོག་མཐིང་ག་གཙང་མཐིང་མདོག་ལྟ་བུ། །དབུ་རྒྱན་སྙན་ཆ་མགུལ་རྒྱན་ལོངས་སྤྱོད་རྫོགས། །ཕྱག་གཉིས་རྡོ་རྗེ་དྲིལ་བུ་ཐུགས་ཀར་བསྣོལ། །དབང་དེ་མ་ཚར་བར་དུ་དེ་ལྟ་བུ། །མིག་གིས་ཡང་ཡང་བལྟས་ཀྱང་དངོས་སུ་མཐོང་། །དེ་ནས་འགྱུར་བ་མེད་པའི་དད་པ་ཐོབ། །བུམ་སྐུ་ནང་རྟེན་རྣམས་ཀྱང་ཕྱག་ཏུ་བཏང་། །འབུལ་སྣ་ཆག་ཕྱི་བྱས་པ་ཐུགས་ལ་འཕྲོད། །ཕྱག་རྡོར་གཤེད་དམར་ཚེ་དབང་རྣམས་ཀྱང་ཐོབ། །དུས་ཕྱིས་རང་ལོ་བཞི་བཅུ་ཙམ་གྱི་དུས། །རྗེ་འབངས་སོག་པོ་ལྷ་དཔལ་སྤྲུལ་པའི་སྐུ། །ལྷོ་པ་དཀོན་མཆོག་ཕྲིན་ལས་རྣམ་རྒྱལ་ལ། །ཚེ་སྒྲུབ་གནམ་ལྕགས་རྡོ་རྗེ་རྫོགས་པར་ཞུས། །ལྷོ་པ་སྤྲུལ་སྐུས་ཐུགས་ལ་བཏགས་པར་མཛད། །སི་ཏུ་སྐུ་སྐྱེ་ལན་གཉིས་མཇལ་བ་དང་། །རྗེས་རེས་ངེད་ཅག་སྤུན་གཉིས་ན་བ་ལ། །ཐུགས་དམ་སྐྱབས་འཇུག་ཞུས་དུས་སི་ཏུ་ཡིས། །ད་རེས་མི་སྐྱོན་གསུངས་ནས་དགོངས་པ་མཛད། །མཁས་གྲུབ་ཆེན་པོ་ལུང་རིགས་ཉི་མ་ལ། །ཐུགས་རྗེ་ཆེན་པོ་རྒྱལ་བ་རྒྱ་མཚོ་
དང་། །ཡང་གསང་བླ་མེད་ཕྱག་དྲུག་མགོན་པོ་སོགས། །དབང་ལུང་འགའ་ཡི་འབྲེལ་པ་དད་པ་ཐོབ། །ཟུར་མང་ཁྲི་པ་དཀོན་མཆོག་བསྟན་འཛིན་ལས། །རས་ཆུང་ཚེ་སྒྲུབ་དབང་ལུང་ཆ་ཚང་དང་། །དམ་ཚིག་རྒྱ་མཚོའི་ལུང་སོགས་འབྲེལ་པ་ཐོབ། །ཝ་པ་སྐུ་སྐྱེ་རིག་འཛིན་རྒྱ་མཚོ་ལ། །འཇའ་ཚོན་གཏེར་ཁའི་དབང་ལུང་ཚན་ཆེར་ཐོབ། །རང་གི་ཇོ་ཇོ་རཱ་ག་ཨ་སྱ་ལ། །རྒྱ་ཆེན་སྤྱོད་རྒྱུད་བྱང་ཆུབ་སེམས་བསྐྱེད་དང་། །དགོངས་འདུས་རྡོར་ཕྲེང་སྒྲུབ་ཐབས་རྒྱ་མཚོ་དང་། །སྦྱོང་རྒྱུད་དཀྱིལ་འཁོར་བཅུ་གཉིས་ལ་སོགས་པ། །དཔག་པར་དཀའ་བའི་དབང་ལུང་རྒྱ་མཚོ་ཐོབ། །སྔ་ཕྱི་ལན་གྲངས་མང་དུ་བསྙུང་བ་ལ། །ཚེ་དབང་ལ་སོགས་རྗེས་གནང་ལ་སོགས་པ། །དབང་བསྐུར་ཁྲི་ནི་ར་ཆེན་ལྷག་གམ་སྙམ། །དེ་དག་བར་སྐབས་ཕྱག་ཆེན་རྫོགས་ཆེན་དང་། །རྩ་རླུང་གཅོད་ཁྲིད་ལ་སོགས་ངོ་སྤྲོད་དང་། །གེགས་ཆེན་བོགས་འདོན་རིམ་པར་གྲངས་ལས་འདས། །བླ་མ་བསྟེན་ཅིང་ཐོས་བསམ་བྱས་པ་ཡི། །ས་བཅད་དྲུག་པ་ཐོ་ཙམ་དེ་ཡིས་ཚང་།། ༈ །།དེ་ལ་སྔ་སོར་སྒྲུབ་པ་བྱས་པའི་ཚུལ། །ཆོས་དབང་ཀུན་བཟང་ཉིད་ཀྱིས་བྲིས་འདུག་པ། །ཡི་དམ་དབང་དྲག་པདྨའི་སྒྲུབ་
པའམ་བསྙེན་སྒྲུབ་ཐོན་ཚུལ་གྱི་ཐོ་ཡིག་མི་བརྗེད་པའི་ཡི་གེ་ཡོད་དོ་ཨང་། ༄༅། །ན་མོ་བུདྡྷ་ཡ། སྣང་བ་མཐའ་ཡས་ཐུགས་རྗེ་ཆེན་པོ་དང་། །པདྨ་འབྱུང་གནས་ཡེ་ཤེས་མཚོ་རྒྱལ་མ། །རཏྣ་གླིང་པ་ཚེ་དབང་གྲགས་པ་སོགས། །བརྒྱུད་པའི་བླ་མ་རྣམས་ལ་ཕྱག་འཚལ་ལོ། །ཐུགས་རྗེ་ཞི་བ་ཁྲོས་པ་དྲག་པོ་རྩལ། །སྲིད་གསུམ་དབང་དུ་སྡུད་མཛད་མཁའ་འགྲོ་མ། །ཕྱི་ནང་བར་ཆད་སེལ་མཛད་ཆོས་སྐྱོང་ཚོགས། །བཀའ་སྲུང་གཏེར་བདག་བཅས་ལ་ཕྱག་འཚལ་ལོ། །འདིར་བརྒྱུད་པའི་བླ་མ་རྣམས་ཀྱི་ཐུགས་རྗེའི་འོད་ཟེར་ལ་བརྟེན་ནས། བདག་གིས་རྡོ་རྗེ་དྲག་པོ་རྩལ་གྱི་བསྙེན་སྒྲུབ་བྱས་ཚུལ་ནི། ཐོག་མར་ཀུན་དྲིལ་ཡིད་བཞིན་ནོར་བུ་ལ། བདུན་གསུམ་བསྒྲུབས་པ་བྱས། བསྙེན་པ་འབུམ་ཚོ་བདུན་སོང་། འཐོར་བསྙེན་ཁན་པས་བྱེ་བ་གཅིག །གུར་དྲག་གི་གསང་སྒྲུབ་ཟླ་བ་ཕྱེད་གསུམ་བྱས། སྤོག་ཆོག་ལན་གསུམ་བྱས་ནས་བསྙེན་པ་བྱེ་བ་གཉིས་ཐོན། དྲག་པོའི་ཧཱུཾ་སྒྲུབ་ཞག་བཅུ་ལ་བསྙེན་པ་འབུམ་ཚོ་བཞི་དང་ཁྲི་ཚོ་དྲུག་སོང་། ཚེ་དཔག་མེད་ལ་བདུན་ཕྲག་གཅིག་ལ་བསྙེན་པ་འབུམ་ཚོ་གཅིག་ཁྲི་ཚོ་བཞི་སོང་། དྲག་པོའི་ནང་སྒྲུབ་ཟླ་བ་གཅིག་ལ་བསྙེན་
པ་བྱེ་བ་གཅིག་སོང་། ཕྱི་སྒྲུབ་ཟླ་བ་གཅིག་དང་ཞག་བདུན་ལ་བསྙེན་པ་བྱེ་བ་གཅིག་སོང་། ཡང་གསང་བླ་མེད་དོན་གྱི་སྙིང་པོ་ལ་ཟླ་བ་གཅིག་དང་ཞག་བཅུ་ལ་བསྙེན་པ་འབུམ་ཕྲག་བདུན། །ལས་སྦྱོར་གྱི་བསྙེན་པ་འབུམ་ཚོ་གསུམ། དངོས་གྲུབ་ཉེ་བ་ཁྲི་ཚོ་གཅིག །ཐམས་ཅད་སྦྲེལ་བས་བྱེ་བ་གཅིག་དང་ཁྲི་ཚོ་གཅིག་སོང་། སྡིག་པའི་དགོས་སྒྲུབ་ཞག་གསུམ་ལ། བསྙེན་པ་ཁྲི་ཚོ་གཅིག་དང་སྟོང་ཚོ་ལྔ། འཇམ་དཔལ་སྐུའི་སྒྲུབ་པ་ཞག་བདུན་ལ་བསྙེན་པ་འབུམ་གཅིག་དང་ཁྲི་ཚོ་ལྔ་སོང་། ་རྟ་མགྲིན་གསུང་གི་སྒྲུབ་པ་ཞག་བདུན་ལ་བསྙེན་པ་འབུམ་ཕྲག་གཅིག་དང་ཁྲི་ཚོ་བཞི་ཐོན། ཕྱག་རྡོར་ཐུགས་ཀྱི་སྒྲུབ་པ་ཞག་བདུན་ལ་བསྙེན་པ་འབུམ་ཚོ་གཅིག་དང་ཁྲི་ཚོ་གཅིག་སོང་། མཁའ་འགྲོའི་གསང་སྒྲུབ་ཞག་བདུན་བྱས། བསྙེན་པ་འབུམ་ཕྲག་གཅིག་དང་ཁྲི་ཕྲག་གཉིས་སྟོང་ཕྲག་གཉིས་ཐོན། ཡཀྵ་མེ་དབལ་གྱི་དགོས་བསྒྲུབས་ཞག་བརྒྱད་བྱས། བསྙེན་པ་སུམ་འབུམ་ཉི་ཁྲི་གཅིག་སྟོང་ཐོན། ཡང་ཁྱུང་ནག་ཡོན་ཏན་གྱི་སྒྲུབ་པ་ཞག་བརྒྱད་བྱས། བསྙེན་པ་འབུམ་ཚོ་གསུམ་ཐོན། སྲིད་གསུམ་ཟིལ་གནོན་ཟླ་བ་གཅིག་དང་། ཞིག་གསུམ་ལ་བསྙེན་པ་བྱེ་བ་གཅིག་ཐོན། ཡང་ཨ་རྩིག་
འཐོར་བསྙེན་བྱེ་བ་གཅིག་སོང་། ཁྱུང་དམར་མེ་ཕྲེང་ཐོག་རྒོད་འཐོར་བསྙེན་འབུམ་ཚོ་གཅིག །མདོར་ན་དྲག་པོའི་སྒྲུབ་པ་འདི་རྣམས་མི་ཚིག་གིས་བར་མ་ཆོད། མེ་ཉི་སྤངས་ནས་སྙིང་རུས་ཀྱི་ངང་ནས་འབད་པ་ཡིན་ནོ། །འདི་རྣམས་ཀྱི་དུས་སུ་ཡང་སྤྱིར་སྙིགས་མའི་དུས་དང་ཁྱད་པར་དུ་བདག་དབང་པོ་ཐ་མའི་ཡང་མཐའ་ཡིན་ན་ཡང་། རྟོགས་དང་རྟེན་འབྲེལ་སོ་སོའི་གཞུང་ནས་བཤད་པའི་ཟུར་ཙམ་གྱིས་སྒྲུབ་པ་ལ་སྤྲོ་བ་སྐྱེ་བ་ཙམ་བྱུང་། འདི་ལྟར་བསྒྲུབས་པའི་དགེ་ཚོགས་གང་མཆིས་དེས། །ནམ་ཞིག་ཚེ་ཡི་འཕེན་པ་ཟད་ནས་ཀྱང་། །བེམ་པོ་དང་ནི་རིག་པ་བྲལ་བའི་ཚེ། །པདྨ་འབྱུང་གནས་རྒྱལ་བ་འོད་དཔག་མེད། །སྐྱབས་མེད་བདག་གི་ལམ་སྣ་དྲང་དུ་གསོལ། །རྡོ་རྗེ་དྲག་པོ་རྩལ་གྱིས་རྒྱབ་ནས་བསྐྱོར། །རིག་འཛིན་མཁའ་འགྲོའི་ཚོགས་ཀྱིས་མཐའ་ནས་བརྟེན། །ཡང་དག་བདེ་ཆེན་ཞིང་དུ་བསྐྱལ་ནས་ཀྱང་། །རྒྱལ་བ་འོད་དཔག་མེད་མགོན་དེ་ཉིད་ཀྱི། །སྐུ་གསུང་ཐུགས་དང་དབྱེར་མེད་རོ་གཅིག་ཤོག །དཀོན་མཆོག་གསུམ་དང་རྩ་བ་གསུམ་ལ་སོགས། །བདེན་པར་སྨྲ་བ་རྣམས་ཀྱིས་བདེན་ཚིག་གིས། །སྨོན་ལམ་དེ་ནི་མྱུར་དུ་འགྲུབ་གྱུར་ཅིག །སྨོན་
ལམ་འདི་ཚེ་ཐུང་བའི་རྟེན་འབྲེལ་རེད་གདའོ།། ༈ ཡང་སྒྲོལ་དཀར་བྱེ་བ་གཅིག་སོང་ངག་མཚམས་ཡིན། འཐོར་བསྙེན་བྱེ་བ་གཅིག་དང་གཉིས་ཐོན། ཡང་ངག་མཚམས་བྱས་པའི་ཚེ། སྒྲ་པ་བྱབ་པའི་མཐར་ཐུག་འབུམ་ཕྲག་གཅིག །སེང་གདོང་མ་འབུམ་ཕྲག་གསུམ། ནཱ་ག་རཀཱ་འབུམ་ཕྲག་བདུན། འཐོར་བསྙེན་ཚེ་གཟུངས་འབུམ་ཚོ་གཅིག །དུར་ཁྲོད་བདག་པོ་འཐོར་བསྙེན་ཁན་པས་འབུམ་ཚོ་ལྔ། ཛམ་དམར་བྱེ་བ་གཅིག །སྨེ་བརྩེགས་འབུམ་ཚོ་གཅིག །ཡི་གེ་དྲུག་པ་བྱེ་བ་བཞི་སོང་། འདི་རྣམས་རང་ལོ་ཉེར་བརྒྱད་ངོ་ལོན་ཚུན་གྱི་ཐོ་ཡིག་ཡིན། མངྒ་ལཾ། བཀྲ་ཤིས་ཤོག །ཅེས་པ་ཆོས་དབང་ཀུན་བཟང་ཉིད་ཀྱི་སྔ་མོ་ནས་ཡི་གེ་བྲིས་ནས་གདའོ། །རྒྱབ་སོར་མཚམས་ཡུན་རིང་བསྡད་རྗེས་ནི། རང་ལོ་ཞེ་བདུན་ལྕགས་མོ་ཡོས་ལོ་ཡི། དགུན་ཟླ་ར་བའི་ཕག་ཟླའི་ཚེས་བཞི་ཉིན་ཞག་དུས། མཚམས་ལོ་དྲུག་ལ་ཟླ་བ་བཞི་ཆག །བཟླས་པ་ཡིག་དྲུག་བྱེ་བ་ང་བརྒྱད། ཚེ་སྒྲུབ་བྱེ་བ་བཅུ་བདུན། ཡོངས་བསྡོམས་དུང་ཕྱུར་གཅིག་དང་བྱེ་བ་གསུམ། གཏོར་མ་འབུམ་ཕྲག་གཅིག་དང་ཁྲི་ཕྲག་གསུམ་དང་སྟོང་ཕྲག་བཞི་གྲུབ་པ་ཡིན་ནོ། །ཟེར་བ་འདི་གླེགས་ཤིང་ལ་བྲིས་
གདའོ། །འདས་ཁ་དྲིས་པས། ཡང་གཏོར་མ་ཚར་གྲངས་ཁྲི་ཚོ་དྲུག་དང་སྟོང་ཚོ་བདུན། ཛམ་དམར་དང་རྣམ་སྲས་ཆུ་སྦྱིན་ཁྲི་ཚོ་དོན་དྲུག །རྣམ་སྲས་མདུང་དམར་ཅན་འབུམ་ཕྲག་གཅིག་དང་དྲུག་ཁྲི། ཚེ་སྒྲུབ་གསང་འདུས་བཞི་འབུམ་དགུ་ཁྲི། བཟློག་པའི་རིགས་ཐམས་ཅད་ཀྱི་སྔགས་ལ་སུམ་ཁྲི། རྒྱལ་བ་རྒྱ་མཚོ་ལྷ་ལྔའི་སྔགས་རིང་ཐུང་བསྲེ་མ་ལ་དུང་གཅིག་ལ་བྱེ་བ་ཉེར་ལྔ་ཆག་ཐམས་ཅད་བསྡོམས་པས་དུང་གཅིག་དང་བྱེ་བ་ཉེར་གཅིག་ཐོན་ཡོད་ཅེས་འདས་ཁ་གསུངས་སོ། །དེ་ལྟར་སྔ་ཐོག་སྐུ་ན་གཞོན་པ་དང་། །སྐུ་ལུས་བདེ་བས་གུ་རུ་དྲག་པོ་ཡི། །པོད་གཞུང་སྒྲུབ་པ་ཐམས་ཅད་བྱས་པའི་སྐབས། །ཐིག་རྩ་མཁས་ཕྱིར་སོ་སོའི་དཀྱིལ་འཁོར་ཡང་། །གཞུང་བཞིན་རྡུལ་ཚོན་བཀོད་ནས་བྲི་བ་དང་། །ཕུར་པ་ལ་སོགས་སྒྲུབ་རྫས་སོ་སོར་འཛོམས། །ངག་མཚམས་འཁོར་ཡུག་སྟན་དྲོད་མ་ཡལ་བར། །དེ་དུས་ཕལ་ཆེར་དགུན་སྒང་དུས་ལ་ཐུགས། །གོས་ཟས་སྲབ་ཀྱང་ལུས་གནད་སང་ངེར་བྱས། །རྣ་བ་སད་ནས་ཕྱིས་སུ་པགས་པ་བརྗེས། །ཐུན་དྲུག་བཟུང་ནས་མཆོད་བསྟོད་བསྐང་གསོ་དང་། །གཏོར་འབུལ་སྤྲོས་བཅས་རོལ་མོ་དབྱངས་དང་བཅས། །དེ་འདྲ་གཞན་
གྱིས་འཁྱོངས་མཁན་མེད་པ་འཁྱོངས། །རང་ལོ་བཞི་བཅུ་ཞེ་གཉིས་ནས་བཟུང་སྟེ། །ལོ་གྲངས་བཅུ་གསུམ་མཚམས་ཀྱི་དམ་བཅའ་མཛད། །དེ་སྔོན་ཟླ་གསུམ་རྒྱལ་བ་རྒྱ་མཚོ་ཡི། །ལྷ་དགུ་བསྙེན་པ་ཟླ་གསུམ་བྱས་སྐབས་སུ། །རིན་རྒྱལ་འདས་ལ་ཉེ་བས་མཚམས་གྲོལ་ནས། །དཀྱིལ་འཁོར་དེ་ཉིད་སྟེང་ནས་དབང་བསྐུར་བས། །ལྷ་དགུ་བར་ཆད་དབང་དུ་ཤོར་གསུངས་ནས། །དེ་ཕྱིས་ལྷ་ལྔ་ཁོ་ནའི་ཐུགས་དམ་མཛད། །མཚམས་ཀྱི་དང་པོ་ལྷོ་པ་སྤྲུལ་སྐུའི་དྲུང་། །ཚེ་སྒྲུབ་ལོ་བཞུགས་ཁས་ལེན་བྱས་གདའ་བས། །ལོ་གཅིག་བར་དུ་གནམ་ལྕགས་རྡོ་རྗེ་ཡི། །ཕྱི་ནང་གསང་བ་ཡང་གསང་སྒྲུབ་པ་མཛད། །དེ་ནས་ལོ་བདུན་ངོ་དང་བརྒྱད་ཀྱི་བར། །རྒྱལ་བ་རྒྱ་མཚོ་ལྷ་ལྔ་གཙོ་འཁོར་བསྒྲུབ། །བར་སྐབས་ལོ་རེ་ཟླ་རེ་ཟླ་གཉིས་ཙམ། །སྐུ་གསུམ་སྒྲུབ་པའི་བླ་མ་སྤྲུལ་སྐུ་དང་། །བདེ་མཆོག་སྙན་བརྒྱུད་ཕྱི་སྒྲུབ་ཟླ་གཅིག་བསྙེན། །རྒྱུན་དུ་སུ་རུ་པ་དང་གཏོར་མ་ནི། །བརྒྱ་རྩ་མ་ཆག་གཙང་སྦྲ་དོ་དམ་དང་། །སྔགས་གྲངས་བཞག་པའི་དུང་གི་ཕྲེང་བ་སོགས། །གཏོར་མ་བཏང་ཚུལ་དེ་ཉིད་ནང་ལྟར་མཛད། །ཚེས་བཅུ་དང་ནི་དགུ་གཏོར་གཉིས་པོ་ཡང་། །དོ་དམ་བཅའ་འདོན་ཞིབ་
ལ་རྒྱས་པ་དང་། །ལོ་རེ་བཞིན་དུ་ཕྱག་བཞི་པ་དང་ནི། །དམ་ཅན་མདོས་ཀྱང་ཆག་མེད་བཅའ་བ་དང་། །མར་ངོ་རེ་ལ་གཏོར་ཟློག་རེ་རེ་མཛད། །ལོ་ཤས་གཅིག་ལ་འཁྲུལ་འཁོར་མ་ཆག་དང་། །དུས་རྣམས་ཀུན་ཏུ་ཉམས་ལེན་ཕྱག་ཆེན་དང་། །ཐོད་རྒལ་རྣམས་ལ་ཐུགས་དམ་གཡེལ་བ་མེད། །རྒྱུན་དུ་བདེ་སྨོན་མ་ཆག་གཡར་དམ་བཅས། །དགེ་བ་གང་སྒྲུབ་རྣམས་ཀྱི་མཇུག་ཉིད་དུ། །བདེ་ཆེན་ཞིང་དུ་སྐྱེ་བའི་བསྔོ་སྨོན་གདབ། །ཉལ་ཁ་ལུས་སྦྱིན་རྒྱས་པ་ཆག་མེད་ཡིན། །དེ་ཡིས་ས་བཅད་བདུན་པ་ཚང་བའོ།། ༈ །།དེ་ནས་སྒྲུབ་པའི་རྟགས་དང་མཚན་མ་ནི། །སྒྲུབ་གཞུང་སོ་སོའི་རྟགས་ཡིག་དང་མཚུངས་པའི། །རྨིས་ལྟས་ཡ་མཚན་དཔག་མེད་བྱུང་འདུག་པ། །སྒྲུབ་པ་ཐོན་པའི་འཕྲལ་དུ་ཇོ་ཇོ་ལ། །རཱ་ག་ཨ་སྱས་བདག་གིས་བཤད་ན་ཡང་། །ངེས་ཀྱང་མ་བྲིས་ཁོང་གི་བྲི་སྲོལ་མེད། །ད་ནི་བརྗེད་ཅིང་ཡིད་ལ་མི་འདུག་ཅིང་། །ཧ་ཅང་མང་བས་བྲི་མུ་མེད་པའང་ཡིན། །ད་ལྟ་བདག་གི་ཡིད་ལ་ཡོད་པ་ཡིས། །ཆེ་ལོང་ཙམ་ཞིག་འདི་རུ་བྲི་བ་ནི། །སྤྱིར་ནི་སྒྲུབ་པ་བྱས་པ་ཕལ་ཆེར་ལ། །མར་མེ་འཛིན་དང་ཡོན་ཆབ་གཏོར་མ་འཛིན། །བག་
དྲོ་བྱིན་ཆགས་དད་པ་དག་སྣང་ཆེ། །ངེས་འབྱུང་སྐྱེ་དང་དད་གུས་དབང་མེད་ཀྱིས། །ཨོ་རྒྱན་དྲན་པས་མཆི་མ་འཁྲུགས་པ་བྱུང་། །ཁྱད་པར་གུ་དྲག་སྒྲུབ་པ་ཡུན་རིང་སྐབས། །རྔ་དང་རྔ་ལྕག་མེད་འབར་ཚྭ་ཚྭ་འཕྲོ། །ཕྲེང་བར་མེ་སྟག་ཚྭ་ཚྭ་ཡང་ཡང་འཕྲོ། །དཀྱིལ་འཁོར་ནང་དུ་དགུན་སྒང་ཆང་ཕུད་ལ། །རླངས་པ་གནམ་ལ་ཐུག་པར་འཕྱུར་བ་དང་། །ཉམས་དང་རྨི་ལམ་མ་ཡིན་མངོན་སུམ་དུ། །ནུབ་གཅིག་བཅོམ་ལྡན་སངས་རྒྱས་སྨན་གྱི་བླ། །སྐུ་མདོག་སྔོན་པོ་ནམ་མཁའ་དང་བའི་མདོག །དབུ་ལ་གཙུག་ཏོར་མཛོད་སྤུ་དཀར་པོ་ཅན། །ཕྱག་གཡས་ཨ་རུ་ར་ནི་ལོ་མར་བཅས། །ཕྱག་གཡོན་ལྷུང་བཟེད་ལྟེ་བའི་ཐད་ན་འཛིན། །སྐུ་ལ་ཆོས་གོས་གོས་ཆེན་གསེར་མདོག་མནབས། །ཞབས་གཉིས་རྡོ་རྗེ་སྐྱིལ་ཀྲུང་པད་ཟླའི་སྟེང་། །ཆེ་ཆུང་ཁང་རྩག་ལས་ནི་མཐོ་བ་གཟིགས། །མིག་ནི་འཁྲུལ་ལམ་སྙམ་ནས་ཕྱིས་ནས་བལྟས། །ཡུན་རིང་བར་དུ་མངོན་སུམ་གསལ་བར་མཇལ། །རྒྱལ་བ་གཅིག་བསྒྲུབས་ཀུན་གྱིས་ངང་གསུངས་པས། །གུར་དྲག་སྒྲུབ་པས་སྨན་བླ་འོང་སྲིད་ཀྱང་། །སྨན་བླ་དར་ལིང་དམར་པོའི་ཆོས་གོས་ཡིན། །ཆོས་གོས་སེར་པོ་བྱུང་བས་ཡིད་མ་ཆེས།། །རྒྱལ་འགོང་
ཆོ་འཕྲུལ་ཡིན་ནམ་བསམ་པའི་ཚེ། །ཕྱིར་ནུབ་ཐོ་རངས་སྔར་ནུབ་འདྲ་བ་ཡིས། །སྨན་ལྷ་དངོས་ལྟར་ཤིན་ཏུ་གསལ་བ་ལ། །ཆོས་གོས་དར་ལིང་དམར་པོ་ཡིན་པ་གཅིག །དངོས་སུ་ཡུན་རིང་མཇལ་བ་དེ་ཕྱིས་ནས། །སྨན་དང་སྨན་ཡིག་སྨན་ཁུག་ལ་ཡང་བརྩོན། །མཚམས་ལ་བཞུགས་རྗེས་ཚེས་བརྒྱད་དུས་མཆོད་ལ། །སྨན་ལྷའི་ཆོ་ག་མ་ཆག་བྱེད་པ་ལ། །མར་མེ་བརྒྱ་དང་ལྷ་བཤོས་སྤོས་ཐུར་དང་། །དུང་ཆོས་དྲི་ཆབ་བརྒྱད་སོགས་དཀའ་གནད་མཛད། །གདུང་རྟེན་ལའང་སྨན་ལྷ་བཞེངས་པས་གྲུབ། །སྔ་སོར་གྲོང་ཆོག་མཛད་པའི་སྐབས་ཤིག་ཏུ། །ནུབ་གཅིག་མ་གཅིག་ལབ་ཀྱི་སྒྲོན་མ་དེ། །དབུ་རྒྱན་ཐོར་ཚུགས་རིས་དཀར་རལ་ག་ཅན། །འཁོར་ཡང་དེ་འདྲ་ལྔ་ཙམ་གྱིས་བསྐོར་ནས། །ཌཱ་དྲིལ་བཀྲོལ་ཞིང་སིལ་ཆོམ་དང་བཅས་བྱོན། །ཆོས་དབང་ཀུན་བཟང་རྣམ་ཤེས་སྤར་ཚུལ་བྱས། །ཕུང་པོ་དེ་ཉིད་གྲི་ཁུག་གིས་བཤས་ནས། །ལྤགས་པ་དེ་ལ་ལྤགས་པ་བཞི་རེད་ནས། །ཤིན་ཏུ་ཆེ་བས་ཕྱོགས་བཞིར་ཡོལ་བ་བྲེས། །དེ་ཡི་མདུན་དུ་མཁའ་འགྲོ་དེ་རྣམས་དང་། །བླ་མ་ཆོས་དབང་ཀུན་བཟང་ཉིད་ཀྱང་བཞུགས། །ཤ་ཁྲག་རྣམས་ལ་ཕུང་པོ་
མཆོད་སྦྱིན་བྱས། །དེ་ནས་ལྤགས་པ་ཐང་ཁུགས་ལྟར་བསྡུས་ནས། །ཆོས་དབང་ཀུན་བཟང་ཉིད་ཀྱི་ལུས་སུ་གྱུར། །ལུས་སྦྱིན་དེ་ལྟར་གྱིས་གསུངས་མ་གཅིག་ནི། །འཁོར་བཅས་མི་སྣང་འཇའ་ལྟར་ཡལ་བ་ཡིས། །རྨི་ལམ་གསལ་པོ་མདའ་རིས་རག་མོར་བྱུང་། །དེ་ཕྱིན་ལུས་སྦྱིན་རང་དང་གཞན་ལའང་བྱས། །ལུས་སྦྱིན་འགྲིགས་ཆོག་དཔེ་ཡང་བརྩོམས་པར་མཛད། །དབུས་ནས་ཕྱིན་ནས་ཡུན་རིང་མ་སོང་སྐབས། །བདག་གིས་བྱས་པའི་ཟིན་བྲིས་ལ་བརྟེན་ནས། །སྒར་ལུགས་མགོན་པོའི་ཆོ་ག་དུས་གསུམ་དང་། །ཕྱག་བཞི་པ་ཡི་དགྱེས་པའི་གཏོར་སྒྲུབ་ནི། །ཞག་བདུན་བྱས་པས་སྒྲུབ་གཏོར་དེ་ཉིད་ལ། །བདུད་རྩི་བབས་ཏེ་གཞི་ཡི་སྟེང་དུ་ཞིམ། །དེ་ཕྱིས་མགོན་པོ་བྱིན་རླབས་ཆེ་གསུངས་ནས། །མདོས་ཀྱང་ལོ་དུས་ཆག་མེད་བཅའ་བ་དང་། །ཉིད་ཀྱི་གཟིམས་ཁང་བཀབ་ནས་ལོ་མང་པོར། །ཕོ་རོག་འཁོར་ཞིང་རེས་འགའ་བྱ་རོག་དེ། །ཕར་ཐད་བྲག་གི་ནང་དུ་ནུབ་མོའང་ཉལ། །དེ་ནི་མགོན་པོའི་རྒྱུད་ནས་གསུངས་དང་མཚུངས། །སྐབས་ཤིག་བསྙུང་དུས་སྒྲོལ་དཀར་དབང་བརྒྱ་བྱས། །ཁོ་རང་རྨི་ལམ་ནམ་མཁར་སྒྲོལ་དཀར་ནི། །འཇའ་འོད་ལས་གྲུབ་མཇལ་ཕྱིར་
ཐང་སྐུའང་བྲིས། །གདུང་རྟེན་ལའང་སྒྲོལ་དཀར་བཞེངས་པ་འགྲུབ། །དུར་ཁྲོད་བདག་པོ་ཞག་བདུན་སྒྲུབ་པའི་ཚེ། །ཉམས་དང་རྨི་ལམ་འདྲེས་པའི་སྣང་བ་ལ། །ཀི་སྒྲ་བཤིར་སྒྲ་གཅར་མོ་བྱུང་ཙམ་ན། །མཚམས་ཁང་སྟེང་དུ་དུར་ཁྲོད་བདག་པོ་ནི། །ཡབ་ཡུམ་ཀེང་རུས་ལུས་ཅན་མངོན་རྟོགས་ལྟར། །བོང་རིང་སྤྲིན་ལ་ཐུག་གདའ་བསམ་པ་གཉིས། །ཞལ་ནས་བཤུད་པ་དྲག་པོ་བྱེད་འདུག་པ། །རླུང་འཚུབ་གཅིག་ལ་འགྱུར་ནས་དེ་མ་ཐག །རཱ་ག་ཨ་སྱ་གྲོང་ཆོག་ལྡོམ་བུ་དུས། །སོག་པོས་སྐྲག་པ་ཆེན་པོ་ཡོད་པ་ལ། །རླུང་འཚུབ་དེ་ངོས་ཕྱོགས་སུ་སོང་རྨིས་གསུངས། །དེ་སྐོར་མགོ་ཐོན་བར་ཆད་མེད་པར་བྱུང་། །དེ་སྐོར་རཱ་ག་ཨ་སྱ་གྲོང་ཆོག་ལ། །འབྲོག་པ་གཅིག་གི་ས་རུ་སོང་བ་ལ། །རྐུན་དོགས་ཆེ་ཞིང་རྟ་གཅིག་ལས་མེད་པ། །ཅོག་བུའི་སྒོ་རྩར་བཏགས་ནས་ཉལ་བ་ལ། །ཐོ་རངས་གཉིད་སད་རྟ་ལ་བལྟས་ཙམ་ན། །བ་མོ་ནང་དུ་རྟ་དེ་བཏགས་ཚུགས་ལ། །ལངས་ནས་གདའ་བས་ཡུད་ཙམ་སོང་བ་དང་། །རྟ་ཡི་རྐང་པའི་རྨིག་པའི་མཚམས་དེ་ནས། །སིར་སྒྲ་དང་བཅས་མེ་ལྕེ་འབར་བྱུང་བ། །རྟ་ཡི་ལག་པའི་འོག་བར་ཐམས་ཅད་ཁྱབ། །སྤུ་ལ་
མ་ཐུག་ཙམ་རེ་རྟ་ཡི་འོག །དཔེར་ན་མེ་ཞགས་བརྒྱབ་པ་ལྟ་བུ་བྱུང་། །རྟས་ཀྱང་ཚོར་བས་རེ་ཞིག་འགྲོགས་ཤོམ་བྱས། །དེ་ནས་མེ་དེ་ཡར་ནས་སོང་བ་དང་། །ས་ལ་བསྣམ་ཞིང་རྐང་ལག་ཡང་ཡང་བརྡབ། །དེ་དུས་ཆོས་དབང་ཀུན་བཟང་མཚམས་ལ་ཡོད། །རྟ་ནི་གཅིག་པུ་དེ་ལས་མེད་པའི་ཕྱིར། །རྐུན་དོགས་ཆེ་ཕྱིར་རྟ་དེ་ཤོར་དོགས་ནས། །དེ་ནུབ་ཁོང་གི་དུར་ཁྲོད་བདག་པོ་ལ། །རྦད་བསྐུལ་བཀའ་བསྒོ་གཏོར་འབུལ་བྱས་པར་གདའ། །ད་ནི་ང་ཡི་ནུ་བོ་འདི་ལ་ཡང་། །ངག་ནུས་ཤིག་ནི་གདའ་བསམ་ངེས་ཤེས་སྐྱེས། །ཡང་ནི་བཀའ་སྲུང་ལྷ་སྨན་འདི་ཉིད་ཀྱིས། །སྒྲུབ་པ་ཞག་པོ་བདུན་ནི་མཛད་པའི་ཚེ། །དངོས་སུ་རྩིག་པའི་གསེང་ནི་ཐམས་ཅད་ནས། །བུང་བའི་སྐད་ཙམ་ཙིར་སྒྲ་སྒྲོག་པ་དང་། །རྨི་ལམ་ཕོ་བྲང་མཁར་ནི་མཐོན་པོའི་རྩེར། །སྙག་གི་ཁང་པ་ཡོད་པའི་ནང་དུ་ཕྱིན། །དེ་ན་ལྷ་སྨན་གཙོ་འཁོར་ལྔ་པོ་ནི། །གཙོ་མོ་ཁྲི་ནི་མཐོན་པོའི་སྟེང་དུ་བཞུགས། །ལྔ་ཀ་མཛེས་མ་ལྟ་བས་ཆོག་མི་ཤེས། །སྐུ་ལ་ལྔ་ཀས་བཀྲ་ཤིས་ཁ་བཏགས་ནི། །དངུལ་མདོག་མ་ཡི་ཕོད་ཁ་རེ་རེ་མནབས། །དབུས་མོ་བཞིན་དུ་མུ་ཏིག་ཀོ་ཟོ་སོགས། །མུ་ཏིག་ཁོ་ནས་རྒྱན་ཆ་མང་པོས་
བརྒྱན། །ཁོང་ལ་ལྟ་ཞིང་འཛུམ་ནས་དགའ་དགའ་བྱས། །ང་ཡི་གཏོར་མ་འདི་ལྟར་བཅས་ན་ནི། །ང་དགའ་བཀྲ་ཤིས་བདེ་ལེགས་འབྱུང་གསུངས་ནས། །འབྲས་དཀར་ཟན་ལ་གཏོར་མ་བཅས་ནས་བསྟན། །འོག་ཏུ་ཟླུམ་པོ་ཟོ་ཞབས་འདྲ་བའི་སྟེང་། །ཀོང་བུའི་གཟུགས་འདྲ་པདྨ་འདབ་བཞིའི་བྱས། །དེ་སྟེང་ལྕོག་རྡོག་འདྲ་བའི་ཟླུམ་པོ་བཞག །དེ་ཡི་རྩེ་དང་ལྟོ་བར་མེ་ཏོག་བརྒྱན། །འོག་གདན་ཟླུམ་པོའི་སྟེང་ནས་འཁོར་བཞི་པོ། །ལྷ་བཤོས་རྩེ་ཏོག་འདྲ་བ་བཞི་བཞག་པ། །པདྨ་འདབ་བཞི་མཚམས་ཀྱི་ཧར་བར་ནས། །གཙོ་བོའི་ཕྱེད་ཙམ་སླེབས་པ་དཀར་ཐིག་བརྒྱན། །དེ་འདྲ་རྨི་ལམ་ལུང་བསྟན་གསལ་བྱུང་བས། །ལོ་ཤས་གཅིག་ལ་གཏོར་མ་དེ་བཅས་པས། །དེ་ཚེ་བཀྲ་ཤིས་བདེ་ལེགས་བྱུང་བ་སྟེ། །ཕྱིས་ནས་ཆོས་སྒོ་བ་ཡི་ལུགས་བྱས་སོ། །གྲུ་པ་ཚང་གིས་སྐུ་རིམ་ལ་བྱོན་ནས། །ཚུར་ལམ་འོང་བས་དཔོན་ཚང་བྱད་ཁ་ཆེ། །དེ་ཡི་སློང་ནི་ཡིན་ནམ་སྙམ་པ་ཡིས། །ལམ་དུ་དཔུང་པ་གཡས་ལ་གྲིབ་ཞིག་ཕོག །རི་ཁྲོད་བསླེབས་ནས་ཐུ་སྟེ་ཟུག་གཟེར་ཆེ། །རླུང་ལོག་ལ་ནི་འགྲོ་ལ་ཁད་པ་བྱུང་། །དེ་མ་ཐག་ཏུ་སི་ཏུ་རིན་པོ་ཆེ། །བསོད་ནམས་རྣམ་རྒྱལ་
སྒྲུབ་རྟེན་ཡིན་ངེས་པའི། །རཱ་ཧུ་ལ་ཡི་གསེར་ཐང་འཇིགས་པ་དེ། །ཆོས་དབང་ཀུན་བཟང་ཉིད་ཀྱི་ཞབས་སུ་བཏིང་། །ཡི་དམ་དྲག་པོའི་ང་རྒྱལ་བརྟན་པོ་ཡིས། །ཞལ་ཐང་དེ་སྟེང་ཨོང་རྡེབ་འགའ་མཛད་པས། །དེ་མ་ཐག་ཏུ་བསྙུངས་གཞི་རབ་གཅིག་ཕན། །དེ་ནས་རུབ་རྒྱུ་ཉི་མ་མདུང་གང་ལ། །ཆག་མེད་མཛད་ཅིང་ཕྱག་རྡོར་ཅུང་ཟད་བསྙེན། །དེ་སྐོར་གྲོང་ཆོག་གཅིག་ལ་བྱོན་པའི་སར། །ཐོ་རངས་མ་གཉིད་འདོན་པ་བྱེད་བསམ་ཚེ། །དྲང་སྲོང་ཆེན་པོ་གཟའ་མཆོག་རཱ་ཧུ་ལ། །སྐུ་མདོག་དུད་ཁ་དབུ་དགུ་ཕྱག་བཞི་པ། །སྤྱི་བོའི་གཙུག་ན་བྱ་རོག་དབུ་དང་བཅུ། །ཕྱག་བཞི་ཆུ་སྲིན་རྒྱལ་མཚན་རལ་གྲི་དང་། །མདའ་གཞུ་སྦྲུལ་ཞགས་སྐུ་ལུས་སྤྱན་གྱིས་གང་། །སྐུ་སྨད་ཁང་པས་སྒྲིབ་སོང་མ་མཐོང་སྟེ། །སྐུ་སྟོད་དེ་ནི་ཡུན་རིང་མངོན་སུམ་མཐོང་། །དེ་ཕྱིར་དྲང་སྲོང་སྐུ་ཡང་ཕྱག་བཟོ་མཛད། །དེ་མདུན་རྟེན་གཏོར་བཅས་ནི་བཞག་པ་ལ། །གསར་བུའི་ལྟས་ན་འཕྲལ་དུ་ན་བ་དང་། །རྩེག་སྒྲ་ལ་སོགས་གཉེན་ཆ་ཆེ་བར་བྱུང་། །རྟ་གཉིས་རྐུན་མས་ཁྱེར་དུས་ཕྲིན་ལས་ཀྱིས། །རྟེན་གཏོར་དེ་ཉིད་ཁྱེར་ནས་འཕང་ཟིན་པས། །རྐུན་མ་ཡོད་ཕྱོགས་སེར་བ་དྲག་པོ་བརྒྱབ། །ར་
མདའ་བ་རྣམས་སེར་བས་གནོད་པོ་བྱུང་། །རྐུན་མ་འགྲོ་ས་མ་རྙེད་ཞག་གཉིས་ལུས། །རྟ་གཉིས་སྒྱུར་བས་ར་མདའ་ལོན་ནས་སྣང་། །ས་སྨད་རྒྱ་འགྲོགས་ཕྱོགས་སུ་ཕེབས་པའི་དུས། །དུད་ཚང་རིམ་གྲོལ་གཟའ་ཡི་མདོས་བཅས་ཚེ། །ནོར་རྣམས་ཕྱིར་ལ་བསྡུས་ནས་ཤོག་ཅིག་གསུངས། །དེ་ནས་གཟའ་མདོས་ཡར་ལ་ཕུལ་ཙམ་གྱིས། །མདོས་སྣ་གཏད་པའི་བྲག་དེ་ཉིལ་ནས་ཀྱང་། །ངོམ་ཆུ་ལ་ཐུག་ལམ་ཡང་འགག་སོང་བས། །བླ་མ་དེ་ལ་དགོངས་པ་ཡོད་ཟེར་དང་། །ནུས་པ་ཆེ་བར་ཐམས་ཅད་ཧ་ལས་གྱུར། །དེ་རྗེས་དུས་ཕྱིས་བླ་མ་སྤྲུལ་སྐུ་ཡིས། །བསྒྲུབས་པ་བྱས་ཚེ་ནུབ་གཅིག་རྨི་ལམ་དུ། །ཆོས་སྐྱོང་རཱ་ཧུ་ལ་ནི་མངོན་རྟོགས་ལྟར། །བྱུང་ནས་ཁོང་ཉིད་མཆན་ཁུང་དུ་བཅུག་ནས། །མཐུན་མཐུན་བྱས་ནས་ཤོད་ནས་ཁང་ཐོག་ཁྱེར། །དེ་ཚེ་རང་ཉིད་ཕྱག་རྡོར་བསྒོམས་པ་ཡིས། །དངོས་སུ་གྱུར་ནས་གཟའ་ཡི་སྙིང་ཁར་ཞུགས། །དྲག་ཏུ་གཟིར་བས་དམ་ལ་ཐོགས་གྱུར་ཏེ། །གནོད་པ་མི་བྱེད་བསྟན་པ་བསྲུང་བ་ཡི། །ཁས་བླངས་དམ་བཅའ་ཐ་ཚིག་ཕུལ་བར་གྱུར། །དེ་ཕྱིར་ཟླ་རེའི་ནང་དུ་གཏོར་འབུལ་རེ། །མ་བྱིན་ན་ནི་མི་དགའི་རྟགས་འབྱུང་ཞིང་། །
རང་བཞིན་ཤུགས་ལ་འཁོར་བར་གྱུར་པ་དང་། །འདས་དུས་ལའང་གྲིབ་གཞི་ཞད་མ་བྱུང་། །ཐུགས་དམ་ལ་ནི་གྲིབ་གཞི་བསྐྱར་དོགས་པས། །སྲུང་འཁོར་བཏགས་དང་དམིགས་པ་ལ་སོགས་པ། །ཨེ་དགོས་བླ་མོ་དོན་གྲུབ་ཀྱིས་གསུངས་ནས། །ཁས་ལེན་བྱུང་གདའ་ཨུ་དོགས་བསམས་ནས་བསྒྱུར། །ཚད་ཕུ་འདྲ་བས་གྲིབ་གཞི་མ་བསྐྱར་རོ། །རཱ་ཧུ་ལ་ཡིས་གནོད་པ་མི་བྱེད་ཅིང་། །བསྟན་པ་བསྲུང་ཞེས་སྨྲས་པའི་ཁས་ལེན་ནི། །ཕྱག་རྡོར་སྤྲུལ་པ་ཆོས་རྗེ་གཡའ་བཟང་བ། །ཨོ་རྒྱན་ཐུགས་སྤྲུལ་བླ་མ་ཁོང་དང་གཉིས། །དེ་མིན་བྱུང་རབ་རྣམ་ཐར་མཐོང་ཐོས་མེད། །འདི་ནི་གུ་དྲག་བསྒྲུབས་པ་ཀུན་ཐེམ་པའི། །གྲུབ་རྟགས་བླ་ན་མེད་པ་ཡིན་པ་སྟེ། །རྗེས་འཇུག་རིགས་རྒྱུད་གྲྭ་རིས་ཀུན་གྱིས་ཀྱང་། །མཆོད་བསྟོད་བྱས་ན་ལྷ་འདྲེའི་ཐ་ཚིག་བརྟེན། །གནོད་པ་ཆུང་ཞིང་མགོན་སྐྱབས་སྡོང་གྲོགས་བྱེད། །གཟའ་ཡི་བསྙེན་སྒྲུབ་བྱེད་ནི་མ་མྱོང་སྟེ། །ཉི་མ་མདུང་གང་དགུ་མཐའ་དགུ་ཕུད་པ། །དེ་ཉིད་ཞི་བའི་སྒྲུབ་པར་སོང་བ་འདྲ། །གཟའ་འདི་རྟགས་མཚན་ཤིན་ཏུ་གསལ་བྱུང་གསུངས། །སྔ་ཐོག་རྟ་ཉུང་རྟ་དྲེལ་གོད་མང་སྐབས། །ལོ་དུས་བཞིན་དུ་ཞིག་གསུམ་རྡོ་བྲང་དུ། །
འབྱོན་ནས་རཱ་ག་ཨ་སྱས་མཛད་པ་ཡི། །རྟ་གཟུངས་ཆོ་ག་ཚར་མང་བསགས་པ་དེས། །རྟ་གོད་ཆོད་ཅིང་དྲེལ་ཕྲུག་རྟེའུ་མང་སོས། །དེ་ནས་དཔེ་དེ་སྔགས་པ་གཅིག་ལ་ནི། །དཔེ་ནི་གཅོད་རྒྱུ་གཡར་བས་རྟ་གོད་ལངས། །དེ་ཕྱིར་དཔེ་འདི་མི་སྤེལ་བཀའ་རྒྱ་མཛད། །དེ་ཉིད་གཏོར་བསྔོས་ཐུགས་དམ་འགའ་མཛད་པའི། །ཉིན་གཅིག་ཉི་ཤར་ཉི་མའི་དཀྱིལ་འཁོར་ལ། །རེ་མནྟ་ཡིས་ཆིབས་ནས་བྱོན་པ་གཅིག །མངོན་སུམ་ཉིད་དུ་གསལ་བར་ཞལ་གཟིགས་ནས། །དེ་ཕྱིར་རྔོག་ཆག་བརྒྱ་ཁ་བུད་པ་འཛོམས། །མ་ཐོང་ནང་དུ་ཕེབས་སྐབས་སྐུ་རྒྱལ་གྱི། །བསང་དང་གསོལ་ཁ་མཛད་པའི་དེ་ནུབ་ལ། །རྨི་ལམ་སྐུ་རྒྱལ་བཙན་གཟུགས་བགྲེས་པོ་བྱོན། །ཡུལ་འདིར་རི་དྭགས་བདའ་སོགས་གང་གནོད་བྱས། །ང་ཡང་རྒུད་ནས་ཡོད་ཟེར་ཕྱག་འཚལ་རྨིས། །སྐུ་རྒྱལ་འདི་ནི་བཙན་མགོན་བེག་རྩེ་དང་། །གནོད་སྦྱིན་ཤན་པ་དམར་ནག་ཡིན་པར་བཤད། །གར་མཁན་མཆོག་སྟེ་ས་བརྒྱད་སེམས་དཔའ་ཡིན། །དེ་ཡིས་ཕྱག་ནི་འཚལ་ཞིང་གུས་འདུད་པ། །ཡཀཱ་མེ་དབལ་སྤྲུལ་པ་ཡིན་པའི་དོན། །དབྲོ་བོར་ཕེབས་དུས་དེ་ཡི་ཡོན་བདག་ཚོར། །བཀག་ནགས་མ་ཐུ་གསུངས་པས་
མ་ཐུས་ཏེ། །ཕྱིར་ལོ་ཕེབས་དུས་ཉམས་དང་རྨི་ལམ་མཚམས། །བཀག་ནགས་གྲིབ་ནས་རི་དང་མཉམ་པ་ཡི། །ནག་པོ་ཆེན་པོ་གཟུགས་དངོས་མི་གསལ་བ། །གཅིག་གིས་ཁོང་ལ་ཕྱག་ནི་འཚལ་བྱུང་བ། །བཀག་ནགས་བཀག་རོགས་བྱས་པས་དགའ་བ་དང་། །དེ་ཡང་མེ་དབལ་སྤྲུལ་པའི་རྟགས་སུ་ངེས། །དམ་ཅན་བསྙེན་སྒྲུབ་སོགས་ནི་མ་མཛད་དེ། །གསོལ་ཀ་ལ་ནི་བརྩོན་པར་མཛད་སྐབས་སུ། །ནུབ་གཅིག་ཉམས་དང་རྨི་ལམ་འདྲེས་པའི་མཚམས། །མགར་ནག་མངོན་རྟོགས་དང་བཅས་ཞལ་གཟིགས་ཏེ། །དེ་ཚེ་དེ་ལ་བསྟོད་པ་འདི་མཛད་པའོ།། ༈ ཧཱུྃ། དམ་ཅན་རྡོ་རྗེ་ལེགས་པ་ཁྱོད། །སྐུ་མདོག་སྨུག་ནག་འབར་བ་ལ། །ཞལ་གདངས་ལྗགས་འདྲིལ་མཆེ་བ་གཙིགས། །དམ་ཉམས་དགྲ་བོ་ཟས་སུ་ཟོ། །སྤྱན་གསུམ་སྡང་མིག་རབ་ཏུ་བསྒྲད། །སངས་རྒྱས་བསྟན་པའི་བྱ་ར་གྱིས། །ཕྱག་གཡས་རྡོ་རྗེའི་དབྱུག་པ་ཕྱིར། །སྡང་དགྲ་གནོད་བྱེད་ཚེ་སྲོག་གཅོད། །གཡོན་པས་སྤུད་པའི་གཡབ་མོ་འཛིན། །ཉམས་པའི་དགྲ་བོའི་བླ་ཚེ་སྦྱད། །སངས་རྒྱས་བསྟན་པ་སྲུང་བ་དང་། །རྣལ་འབྱོར་བདག་གི་ཕྲིན་ལས་སྒྲུབས། །ཞེས་འདོད་གསོལ་དང་བཅས་
ཏེ་བསྟོད་པའོ། །བསྟོད་པ་འདིར་ཡང་ཕྱིར་ནངས་མ་བརྗེད་པས། །མཚར་འདོད་ཡི་གེར་བྲིས་ནས་བཞག་འདུག་གོ །སྐབས་ཤིག་ཆབ་མདོར་བྱུང་དུས་ཐོ་རངས་ཤིག །གཉིད་པ་མ་ཡིན་ཉམས་ཀྱི་སྣང་བ་ལ། །མགོན་ཁང་རྩེ་ནས་འཇིགས་བྱེད་མ་ཧེའི་ཞལ། །སྐུ་མདོག་སེར་མོ་ཞལ་གཅིག་ཕྱག་གཉིས་པ། །སྐུ་ལུས་མགོན་ཁང་ཉིད་དང་མཉམ་པར་མཐོང་། །དེ་མཐོང་དེ་ཕྱིར་ལེགས་ཤིང་དགེ་བར་བྱུང་། །ལོ་གཅིག་དབྱིས་དོ་མཚོ་ནག་ཁ་དེ་ན། །ངེད་ཅག་སྤུན་གཉིས་མཉམ་དུ་ཆར་འབོད་བྱས། །ཞག་བདུན་དེར་བསྡད་དྲག་ལས་འགའ་བྱས་སྐབས། །བླ་མ་ཆོས་དབང་ཀུན་བཟང་རྨི་ལམ་ལ། །དགེ་བསྙེན་ཆེན་པོའི་ཕོ་བྲང་ནང་དུ་ཕྱིན། །ལྕགས་ཀྱི་སྒོ་ཕོག་ལ་སོགས་ཡོད་པ་ཡི། །ཕོ་བྲང་ལོངས་སྤྱོད་ལ་སོགས་ཡོད་པའི་དབུས། །དགེ་བསྙེན་ཚོང་དཔོན་གོས་སྔོན་ཅན་དུ་སྤྲུལ། །དགའ་དགའ་བྱས་ཤིང་བ་སོ་ལས་གྲུབ་པའི། །ཐམ་ཁ་ཆེན་པོ་བརྒྱད་ནི་ཕུལ་བ་ལས། །གཅིག་དེ་ཆག་ཤོར་བདུན་དེ་ཁྱེར་འོང་རྨིས། །དེ་ཕྱིར་ལོ་མང་བདེ་སྐྱིད་ལྡན་པ་སྟེ། །ལྷ་འདྲེ་རྣམས་ནི་ཤིན་ཏུ་གཞུང་བཟང་བས། །གསོལ་མཆོད་བྱས་ན་གྲྭ་རིས་རིགས་རྒྱུད་ལ། །
དགེ་བསྙེན་འདིས་ཀྱང་སྡོང་གྲོགས་བྱེད་དམ་སྙམ། །འདི་ལ་ལེགས་པར་དཔྱད་ན་རྟེན་འབྲེལ་ཆེ། །དེ་བས་རྗེས་མ་སྐུ་མཚམས་བསྡམས་བྱས་ནས། །གནམ་ལྕགས་རྡོ་རྗེ་ལོ་གཅིག་བསྙེན་པ་ལ། །བྱེ་བ་བཅོ་ལྔ་ཙམ་ནི་སོང་བ་འདྲ། །དེ་ཚེ་རྨི་ལམ་བུམ་པ་ཆེན་པོ་གཅིག །འདུག་པའི་ནང་ན་ཚེ་དཔག་བཞུགས་པ་མཇལ། །རང་ལུས་རྩ་གསུམ་འཁོར་ལོ་བཞི་པོ་རྣམས། །མེ་ལོང་གཟུགས་ལྟར་རང་གི་མཐོང་བ་ཡིས། །ལྟེ་བའི་རྩ་མདུད་ནང་དུ་ཚེ་བུམ་ནི། །བདུད་རྩིས་ཁེངས་པ་མཐོང་བའི་རྨི་ལམ་བྱུང་། །གསང་འདུས་དང་པོ་ཅུང་ཟད་སྒྲུབ་པ་ནི། །རྒྱུན་བསྙེན་ཕྲེང་སྐོར་མ་ཆག་ཙམ་རེ་ལ། །ཚེ་སྒྲུབ་བཏོན་ཚད་གནམ་ལྕགས་རྡོ་རྗེ་ཡིན། །དེས་ཀྱང་གསང་འདུས་ཟབ་པའི་གནད་གོ་མཛད། །དེ་ནས་རྒྱལ་བ་རྒྱ་མཚོ་ཁོ་ནའི་ཚེ། །ནུབ་གཅིག་ཉམས་དང་རྨི་ལམ་འདྲེས་མཚམས་སུ། །ནུབ་ཕྱོགས་ངོས་ནས་ནམ་མཁའ་ཁྱབ་པ་ཡི། །མགོན་པོ་བེར་ནག་ཅན་ཞིག་གསལ་བར་མཇལ། །ནུབ་གཅིག་ཨོ་རྒྱན་ཆེན་པོ་དངོས་ལྟ་བུ། །ཤིན་ཏུ་གསལ་བ་རྨི་ལམ་ཡུལ་དུ་མཇལ། །ཕྱིར་ཉིན་དགའ་སྟོན་ཚོགས་འཁོར་བཤམས་པའི་ཚེ། །ཨ་མས་ཁ་ལྟས་ངན་པས་རྟེན་འབྲེལ་འཆུག །དེ་ལ་
རྣམ་རྟོག་ཆེན་པོ་མཛད་དོ་སྐད། །བདུད་འདུལ་རྡོ་རྗེར་ལི་མ་འབུལ་རྒྱུ་བསྐུར། །ཕྱག་ཏུ་ཐེང་ནུབ་རྨི་ལམ་ནམ་མཁའ་ནས། །ཨོ་རྒྱན་ཆེན་པོ་ཞི་མ་ཁྲོ་ཡི་སྐུ། །ཤིན་ཏུ་ཟིལ་ཆེ་གཟི་བརྗིད་འབར་བ་མཇལ། །དེ་ལྟར་ཨོ་རྒྱན་མཇལ་བ་ལན་གཉིས་ཡིན། །ཟུར་མང་སྙན་བརྒྱུད་བདེ་མཆོག་བསྙེན་པའི་ཚེ། །ཆོས་དབྱིངས་རྡོ་རྗེ་མངོན་སུམ་ལྟ་བུར་མཇལ། །ལྟ་ན་སྡུག་པའི་བུད་མེད་མང་པོ་ཡིས། །དངོས་གྲུབ་རྫས་དང་བདུད་རྩི་ཡང་ཡང་དྲངས། །ཁྱད་པར་ཡེ་ཤེས་ཌཱཀྐིའི་མཚན་རྟགས་ཅན། །མི་ལས་འདས་པའི་ལྷ་མོ་གཅིག་བྱུང་ནས། །ཤེས་བཞིན་རྩ་རླུང་ཉམས་ལེན་དམིགས་རིམ་བཅས། །སྦྱོར་བ་བྱས་པས་དགའ་བཞིའི་ཡེ་ཤེས་ནི། །རྒྱུད་ནས་བཤད་ལྟར་ངོ་ཡི་ཟིན་པ་སོགས། །རྨིས་ལྟས་ཡ་མཚན་ངོ་མཚར་དུ་མ་དང་། །དངོས་སུ་རྟོགས་པ་ལའང་བོགས་ཆེ་བས། །དེ་ཕྱིས་བདེ་མཆོག་ལྷ་ལྔ་ཐུགས་དམ་མཛད། །མཚམས་ལ་བཞུགས་ནས་ལོ་ནི་གཅིག་གཉིས་དུས། །ནུབ་གཅིག་དངོས་སུ་སྟེང་ནས་མནན་ནས་བྱུང་། །སུ་ཡིན་སྙམ་ནས་ལག་པས་ཉུལ་ཙམ་ན། །བུད་མེད་ནུ་མ་ཆེན་མོ་ཅན་ཞིག་འདུག །ང་ནི་རབ་བྱུང་བླ་མ་ཡིན་པ་ལ། །བརྙས་བཅོས་
ནག་མོས་སྟེང་ནས་མནན་བྱུང་བར། །དུམ་རྒྱུ་ཡུ་མེད་ཁ་མཆུ་མི་བྱེད་རེ། །སྨྲས་ཤིང་མནའ་བསྐྱར་ཡར་ལ་ལོང་བསམ་ཛ། །བུད་མེད་འཕུར་ནས་མཐོང་ཁ་ནང་ནས་སོང་། །གཅེར་བུ་མགོ་ལ་ཐོར་ཅོག་ཅན་གཅིག་གདའ། །དེ་ཉིད་ལྷ་འདྲེ་གང་ཡིན་མ་འབྱེད་ཀྱང་། །དེ་སྔོན་རྫོགས་ཆེན་ཐོབ་ཀྱང་ཉམས་ལེན་མེད། །དེ་ནས་བཟུང་སྟེ་རྫོགས་ཆེན་ཉམས་ལེན་འདོད། །འོད་དང་ཐིག་ལེ་འཕེལ་ཚེ་རྟགས་མཚན་ཐོན། །དེ་ཕྱིར་དེ་ཡི་རྫོགས་ཆེན་བཀའ་སྲུང་མཆོག །སྔགས་སྲུང་ཨེ་ཀ་ཙ་ཏི་ཡིན་པར་སྣང་། །ཕྱག་ཆེན་ཉམས་ལེན་གཙོ་བོ་ཡིན་པ་ལ། །བདག་ལ་རྟོགས་འབུལ་ཡང་ཡང་བྱས་པ་སྟེ། །མཚམས་ལ་བསྡད་ནས་ལོ་དྲུག་དུས་ཙམ་ལ། །སྤྲོས་བྲལ་ངོ་བོ་མཐོང་ངེས་བྱུང་ནས་གདའ། །འདས་ཁའི་སྔར་ལོའི་དུས་ནས་སྣང་སེམས་གཉིས། །དབྱེར་མེད་ཉམས་ཀྱི་རོ་གཅིག་དངོས་རྟོགས་ཏེ། །བསྐྱེད་རྫོགས་ཟུང་དུ་འཇུག་ངེས་བྱུང་ནས་གདའ། །རྫོགས་ཆེན་ཉིན་མཚན་མེད་པར་མིག་གིས་ནི། །འགྱུར་ལྡོག་ལྟ་སྟངས་ཙམ་ཞིག་བྱས་པ་ནས། །ཉི་ཟེར་མི་དགོས་སྣོད་བཅུད་ཐམས་ཅད་ཀུན། །འཇའ་འོད་ཐིག་ལེ་ཐིག་ཕྲན་ཁྲ་ཆེམ་མེ། །མིག་བཙུམ་སྨིན་མཚམས་ཐད་དུ་
བལྟས་པ་ན། །ཐིག་ལེ་བཅོ་ལྔའི་ཟླ་ལྟར་དཀར་བ་དང་། །མཐིང་ག་ལ་སོགས་དུས་རྣམས་ཀུན་ཏུ་མཐོང་། །ཐིག་ལེའི་ནང་དུ་ཀུན་ཏུ་བཟང་པོ་དང་། །རིགས་ལྔའི་སངས་རྒྱས་ཞི་ཁྲོའི་ལྷ་རྣམས་ནི། །དང་པོ་ཞལ་སྤྱན་མི་གསལ་ཁ་དོག་གསལ། །ཕྱིས་ནས་སྤྱན་ཞལ་རྒྱན་དང་ཆ་ལུགས་རྫོགས། །གྲངས་མེད་དཔག་ཏུ་མེད་པ་དངོས་སུ་མཇལ། །དེ་ཕྱིས་རྫོགས་ཆེན་ཟབ་པའི་ངེས་ཤེས་ཐོབ། །སེམས་ངོ་དང་བསྲེས་ཁྲེགས་ཆོད་ཟུང་དུ་མཇུག །རིག་པ་ཚད་ལ་ཕེབས་པར་གྱུར་ནས་ནི། །དེ་ནས་མ་སྒོམ་ན་ཡང་ཆོག་གསུངས་ལྟར། །རེ་ཞིག་སངས་རྒྱས་མཁའ་འགྲོ་སྐུ་མདོག་དཀར། །དེ་ལ་མཁའ་འགྲོ་སྡེ་བཞིའི་འཁོར་གྱིས་བསྐོར། །ཀུན་ཀྱང་སྣང་ལ་རང་བཞིན་མ་གྲུབ་པ། །སྐུ་ནི་རི་བོ་ཙམ་དུ་ཆེ་བར་གཟིགས། །དེ་ཕྱིས་དགོངས་འདུས་མཁའ་འགྲོའི་ལས་བྱང་དེ། །ཚེས་བཅུ་ནམ་བྱུང་འདོན་ཅིང་ཚོགས་ཀྱང་མཛད། །གཉིད་དུ་སོང་མ་ཐག་ཀྱང་འཇའ་འོད་དང་། །ཐིག་ལེ་ཐིག་ཕྲན་ཁྲ་ཆེམས་འགྲོ་འདུག་པས། །དེ་ཕྱིར་ཐོད་རྒལ་ལྟ་བ་མ་མཛད་ཀྱང་། །མ་བལྟས་ན་ཡང་ཕ་ཆེར་འཆར་རོ་གསུངས། །གཏོར་མ་འབུམ་གཏེར་ཐུགས་དམ་མཛད་པའི་སྐབས། །
ཡི་དྭགས་ཆུ་སྦྱིན་ཐེབས་ཙེར་ཆུ་བླུགས་པས། །དོར་བར་མ་བྱས་ཟག་པ་མེད་པ་ལ། །ཆུ་དེ་མི་སྣང་ཐེབས་རྩེ་སྐམ་པོ་རེད། །ཡི་དྭགས་ཀྱིས་ནི་དངོས་སུ་འཐུང་བ་ནི། །ལན་གྲངས་འགའ་རེ་བྱུང་བ་མཚར་རོ་གསུངས། །མགོན་པོས་མདོས་ཆེན་བཅའ་དུས་ལ་སོགས་པ། །དགུན་ལ་ནང་མཆོད་བདུད་རྩི་ཁོལ་བ་དང་། །འཕྱུར་ཞིང་གཞི་ཐོག་མང་དུ་འབོ་བ་ནི། །ལན་གྲངས་གཉིས་གསུམ་ཙམ་ཞིག་བྱུང་བ་ཡིན། །དེ་ལྟར་ཉམས་ལེན་སྒྲུབ་པའི་རྟགས་མཚན་ནི། །ཁོ་རང་གསུངས་པ་ཕལ་ཆེར་བརྗེད་ན་ཡང་། །རིགས་རིམ་ཡིད་ལ་གང་ཡོད་བྲིས་པ་སྟེ། །ས་བཅད་བརྒྱད་པ་དེ་ཡིས་ཚང་བའོ།། །དེ་ནས་འགྲོ་དོན་བསོད་ནམས་བསགས་ཚུལ་གཉིས།།འདས་པའི་རབ་དང་དེ་ཡི་རྟགས་རྣམས་ལས། །བླ་མ་ཆོས་དབང་ཀུན་བཟང་དེ་ཉིད་ནི། །ཉེར་བཞིའམ་ཉེར་ལྔའི་དུས་ཙམ་ལ། །མཆེད་གྲོགས་རིབ་མདའ་བླ་མ་བརྩོན་འགྲུས་ཀྱིས། །ཞིང་སྐྱོང་དང་ནི་དམ་ཅན་མགར་ནག་གི །དབང་ལུང་ཞུ་ཟེར་དེ་ནུབ་གཏོར་མ་བཅས། །རྨི་ལམ་ཟ་དམ་མགོན་ཁང་ནང་དེ་ནས། །གཡག་ནག་གཉིས་དང་རྭ་སྐྱེས་རུ་མདུད་ཅན། །བྱུང་ནས་ཁོང་ལ་བརྡུང་ཤོམ་སྐྲག་སྔངས་ཆེ། །མི་ནི་འཕྲུག་
སྔོན་གྱོན་པ་གཅིག་གིས་བཤུགས། །ཁྱོད་རང་འདུག་ཚུགས་ན་ནི་སྡོད་གཅིག་ཟེར། །ཕྱིར་ནངས་དབང་གཏོར་བཤིག་ནས་དབང་ལུང་བཤོལ། །དེ་ཕྱིར་དབང་ལུང་ཆོས་སྒོ་དོགས་པར་མཛད། །རཱ་ག་ཨ་སྱ་ལོ་གྲངས་བཅུ་གསུམ་ལ། །མཚམས་བསྡམས་ཚེ་ན་མཚམས་གཡོག་ལ་དམིགས་ནས། །ལོ་རེ་ཟླ་བ་རེ་རེ་མཚམས་བསྡམས་པ། །དེ་མན་རྒྱུན་དུ་ལྡོམ་བུ་གྲོང་ཆོག་སྟེ། །རེ་ཆམ་སྒོམ་གསུམ་སྡེ་ནི་ཕལ་ཆེར་གྱིས། །སྐུ་རིམ་རྐྱེན་བཟློག་མཁས་འདུག་བྱས་ནི་འབོད། །ཕན་ཐོགས་ནུས་པ་བྱིན་རླབས་ཆེ་བར་གྲགས། །ཚེ་འདས་དོན་ལ་བཟང་མཐོང་བྱེད་ནས་འབོད། །དེ་ཕ་ཕེབས་ན་འགྱོད་པ་མེད་དོ་ཟེར། །དེ་ཚེ་ཚེ་འདས་མང་པོའི་འཕོ་འདེབས་དུས། །འཕོ་བ་ཐེབས་རྟགས་གསལ་པོ་བྱུང་གྲངས་མང་། །འཕོ་བ་ཐེབས་ན་འགྲོ་དོན་ཆེ་ཤོས་ལགས། །ཤི་བསྔོ་གསོན་བསྔོ་ཤི་ཤོག་གསོན་ཤོག་མང་། །དེ་དག་ནམ་ཞིག་བྱང་ཆུབ་རྒྱུར་འབྱུང་བས། །དེ་ཡང་འགྲོ་དོན་རྣམ་གྲངས་ཆེ་ཤོས་ཡིན། །དངུལ་བཟང་བསོད་ནམས་རྡོ་རྗེའི་རིགས་རྒྱུད་པ། །བླ་བརྒྱུད་མ་ཆད་ཡོངས་གྲགས་བླ་ཆེན་ཏེ། །རི་པ་བག་ཡོད་ཁུ་དབོན་དཔོན་སློབ་འགའ། །འབུལ་བ་ཆེན་པོ་
བསྣམས་ནས་ཕེབས་བྱུང་བ། །རཱ་ག་ཨ་སྱ་ངག་མཚམས་དམ་པ་ཡིས། །བླ་མ་ཆོས་དབང་ཀུན་བཟང་ལ་ཞུས་ཏེ། །གཤིན་རྗེ་ཁྲོ་ཆུའི་དབང་ལུང་ཡོངས་རྫོགས་དང་། །ཀིང་ཀང་དམར་ནག་གུར་དྲག་ཡོངས་རྫོགས་གནང་། །རི་པས་ཁྲོ་ཆུ་བསྒྲུབས་པས་ནུས་པ་ཐོན། །ཁམས་ཕྱོགས་ཁྱབ་པའི་གྲགས་པ་ཆེན་པོ་བྱུང་། །ཟུར་རིའི་གྲྭ་པ་ཀར་ཤོད་སྤྲུལ་སྐུ་ཡིས། །གཡོ་རུའི་རྒྱལ་བ་རྒྱ་མཚོའི་ཞལ་ཐང་བཞེངས། །ཡོན་ལ་རྒྱུ་ནི་དངོས་པོ་མི་ལེན་ཏེ། །ཐུགས་རྗེ་ཆེན་པོ་གསང་བ་འདུས་པ་ཡི། །དབང་ལུང་འདོད་ཟེར་དེ་ཞོར་དུས་གཅིག་ལ། །བླ་མ་ཕྲིན་ལས་དང་ནི་གཉིས་ཀ་ལ། །ཐུགས་རྗེ་ཆེན་པོ་ཡོངས་རྫོགས་དབང་ལུང་གནང་། །བླ་མ་རྟོགས་ལྡན་ཙཱ་རི་པ་ཞེས་པས། །འབུལ་བ་བསྣམས་ནས་ཁྲོས་མ་ཞུ་རུ་བྱུང་། །དེ་ལ་ཁྲོས་མའི་དབང་ལུང་གཅོད་སོགས་གནང་། །བླ་མ་དགེ་སློང་ལྟ་སྒོམ་ལྷུན་གྲུབ་ལ། །ནད་བྱུང་སྐུ་རིམ་ཅིས་ཀྱང་མ་ཕན་པར། །ནཱ་ག་ཀླུ་འདུལ་གནང་ནས་སྒྲུབ་པས་བདེ། །དེ་ལ་པདྨ་འོད་འབར་དབང་ལུང་རྫོགས། །དེ་ཡི་ལོ་གསུམ་ཕྱོགས་གསུམ་བསྒྲུབས་པ་ཐེམ། །བླ་མ་རྟོགས་ལྡན་པདྨ་རིག་འཛིན་ལ། །ལས་བཞིའི་སྦྱིན་སྲེག་དཀྱིལ་འཁོར་ཐིག་རྩ་
བསླབས། །ཆོས་འབྲེལ་ལུང་འབྲེལ་ཅུང་ཟད་གནང་བ་ཡིན། །དེ་བཞིན་བླ་མ་གྲགས་པ་དབང་ལྡན་དང་། །བླ་མ་ཡང་དག་ལ་སོགས་སྔ་ཐོག་གིས། །རཱ་ག་ཨ་སྱས་བུ་ཆེན་ཕལ་ཁྱེར་གྱིས། །ཆོས་དབང་ལའང་དབང་འབྲེལ་ལུང་འབྲེལ་ཞུས། །སྔགས་འཆང་ཚེ་རིང་འབུམ་དང་བསོད་ནམས་འབུམ། །ཕ་བུ་གཉིས་ལ་ཁྲོ་ཆུའི་དབང་ལུང་གནང་། །ཚེ་སྒྲུབ་གནམ་ལྕགས་རྡོ་རྗེའི་དབང་ལུང་སོགས། །རཱ་ག་ཨ་སྱ་བདག་གིས་ཞུས་པ་ཡིན། །མི་འགྱུར་རྡོ་རྗེ་འཁྲུངས་ནས་ཆུང་ངུའི་དུས། །ཞལ་ཡང་གྲག་མི་ཐུབ་དུས་བསྙུང་བའི་ཚེ། །མཚན་ལ་བླ་མ་ཆོས་དབང་གདན་འདྲེན་བྱུང་། །ཐུ་བས་མཚན་ལ་བྱོན་ནས་ཡུམ་སྲས་ལ། །བྱབ་ཁྲུས་རྗེས་གནང་འགའ་རེ་བྱས་ཞེས་གསུངས། །གཞན་ཡང་སྔགས་འཆང་མང་པོར་དབང་ལུང་དང་། །མི་ནི་ཆེ་འབྲིང་བར་མ་མང་པོ་ལ། །རྗེས་གནང་དང་ནི་ཚེ་དབང་བརྒྱ་རྩ་སོགས། །མདོས་ཟློག་ཞི་ཁྲོ་ཀུན་རིག་ལ་སོགས་པ། །དེ་ཡང་བླ་མ་སྤྱི་ཡི་ཕྱག་སྲོལ་ལྟར། །བླ་མིང་ཐོག་ནས་སྐུ་མཚམས་མ་བསྡམས་པར། །ལོ་གྲངས་ཉི་ཤུའི་བར་དུ་འགྲོ་དོན་མཛད། །རྣམ་སྲས་དམར་སེར་མགར་བ་དམར་ནག་དབང་། །ཉིད་
ཀྱི་ཀརྨ་དོན་ཡོད་ལ་ཐོབ་པའི། །ཆུང་ངུའི་དུས་ཀྱི་ལུང་ཡིག་བརྗེད་ཐོར་གསལ། །ལུང་ནི་རྒྱས་པར་བདག་གིས་བྱས་བསམ་སྟེ། །ཁོང་གིས་མི་སྤེལ་བཀའ་རྒྱ་དམ་པ་ཡི། །རྣམ་སྲས་དམར་སེར་མགར་བ་དམར་ནག་དང་། །ལྷ་སྨན་དང་ནི་ལྔ་ཡི་དབང་ལུང་རྣམས། །འདས་རྒྱུའི་དབྱར་ཁ་བླ་མ་རྒྱལ་མཚན་དང་། །ནམ་མཁའ་པདྨ་འགྲོ་དོན་གསུམ་པོ་ལ། །བརྒྱུད་པ་གཏད་པའི་ཚུལ་དུ་གནང་གྲུབ་པ། །དེ་ནི་རྟེན་འབྲེལ་ཤིན་ཏུ་ལེགས་པ་བྱུང་། །གཅིག་བརྒྱུད་ངེས་པའི་ཧཱུྃ་ནག་སྙིང་ཐིག་ལ། །བླ་མ་རྒྱལ་མཚན་ཉིད་ལ་གནང་གྲུབ་འདུག །བརྒྱུད་པ་གཏད་པ་འདས་རྒྱུ་ཤེས་ན་ཡང་། །དེ་བས་བྱེད་རྒྱུ་མེད་པ་ལྟ་བུར་སྣང་། །འབྲི་སྟག་ས་སྐྱ་གཏེར་སྟོན་གདུང་རྒྱུད་སོགས། །འདས་ཁ་གཅིག་བརྒྱུད་གདམས་པ་གནང་བ་དང་། །བཀའ་སྲུང་རྩིས་ཆེན་བཀའ་བབས་བརྒྱུད་པ་གཏད། །བཀའ་སྒོ་དམ་བཞག་མཛད་པ་ཕྱག་སྲོལ་ལགས། །འགྲོ་དོན་བྱས་པའི་ས་བཅད་བརྒྱད་པའོ།། །།ལོ་གྲངས་བཅུ་གསུམ་མཚམས་གཡོག་བྱས་པའི་ཚེ། །ང་ལ་སྤྱན་ཡའི་འདུ་ཤེས་མི་བྱེད་པར། །རྩ་བའི་བླ་མ་ཡིན་ལ་ཡིན་བཞིན་བསྒོམས། །ལྡོམ་བུ་གྲོང་ཆོག་མཚམས་རྒྱུགས་ཡིན་པར་
སེམས། །དེ་བྱས་མཚམས་ལ་བསྡད་དང་ཕན་ཡོན་མཉམ། །ཡང་ཡང་སྨྲས་པས་དེ་དོན་ཡིད་བཞག་ནས། །ཅི་རྙེད་བདག་གི་བུག་སྒོར་སྤྱན་ལམ་ཕབ། །བདག་གིས་བྲན་ནས་ཟས་རྣམས་གཏོར་བསྔོས་དང་། །ཆས་ཀ་གཞན་རྣམས་མཎྜལ་ལ་དམིགས་ཕུལ། །རྐང་བཞི་པ་རྣམས་བསྐང་རྫས་དམིགས་ནས་ཕུལ། །ཤི་གསོན་འབྲེལ་ཐོགས་རྣམས་ལ་བསྔོ་བ་བྱས། །དེ་ཕྱིར་ཁོང་ལ་དཀོར་སྒྲིབ་ཅུང་ཟད་མེད། །ལ་ཆེན་ཁྱེད་གཉིས་རུ་མགོ་གཅིག་པའི་ཕྱིར། །དགེ་ཕྱོགས་གང་འགྲུབ་ངེད་རང་མཆེད་གཉིས་དང་། །བློ་སེམས་གཅིག་པའི་གྲྭ་སློབ་ཐམས་ཅད་དང་། །འཚོ་བ་མཐུན་རྐྱེན་སྦྱོར་བའི་ཡོན་བདག་སོགས། །ཀུན་གྱིས་ཐོབ་ངེས་གཅིག་གི་སྒེར་ཟོག་མིན། །ཆོས་ཀྱི་ཕན་ཡོན་ནམ་མཁའ་ལྟ་བུ་སྟེ། །ཤ་ཐུད་བཞིན་དུ་བགོས་པས་ཆུང་མི་འགྲོ། །བླ་མ་དབོན་པོ་གཉེར་པ་གྲྭ་འཁོར་སོགས། །བློ་སེམས་གཅིག་པ་ཀུན་གྱིས་ཚང་མ་ཐོབ། །དེ་ཕྱིར་སྔ་ཕྱིར་བསོད་ནམས་ཚོགས་རྫོགས་ཐབས། །ཚེ་དཔག་རིགས་ལྔ་འོད་དཔག་སྟོང་གིས་བསྐོར། །རཱ་ག་ཨ་སྱ་རྨི་ལམ་དང་བསྟུན་པའི། །བདེ་ཆེན་ཞིང་བཀོད་གནས་འདུས་ཐང་ཀ་དང་། །རྣམ་སྲས་སེར་པོ་སྐྱ་བརྒྱད་
ཐོག་མར་བཞེངས། །ཚེ་དཔག་སྟོང་སྐུ་ཨོ་རྒྱན་སྟོང་སྐུ་དང་། །སྨན་བླ་གནས་འདུས་བདེ་ཆེན་ཞིང་བཀོད་གསུམ། །བླ་མ་ཡི་དམ་ཆོས་སྐྱོང་ཀུན་འདུས་གསུམ། །ས་སྐུའི་ཐུབ་དབང་གསེར་དངུལ་གསོལ་བ་སྟོང་། །ཚེ་དཔག་གསང་འདུས་ལ་སོགས་གཏོར་མགྲོན་གྱི། །ཞལ་ཐང་ཆེ་བ་བཅུ་གསུམ་ཕྱིར་དར་གསུམ། །འོད་དཔག་མེད་དང་ཐུགས་རྗེ་ཆེན་པོ་ཡི། །མདོ་རྒྱུད་བསྡུས་པའི་དངུལ་བྲིས་པོ་ཏི་གཅིག །བཀའ་ཐང་རྣམ་ཐར་གསེར་ཕྲེང་གཉིས་པོ་ནི། །དངུལ་གྱིས་བཞེངས་པའི་གླེགས་བམ་ཆེ་བ་གཅིག །སྨན་མདོ་རྒྱལ་བ་རྒྱ་མཚོའི་རྒྱུད་གཉིས་པོ། །དངུལ་གྱིས་བྲིས་པའི་གླེགས་བམ་ཆུང་བ་གཉིས། །དཔེ་ཕྲན་ཟ་མ་ཏོག་དང་རྒྱུད་ལ་སོགས། །ཐུགས་རྗེ་ཆེན་པོའི་ཆོས་སྐོར་པོ་ཏི་གཉིས། །འདུལ་བའི་གཞི་གསུམ་མི་ཏྲ་པོ་ཏི་གཅིག །འདོན་ཆའི་པོ་ཏི་ཆེ་ཞིང་རིང་བ་རྣམས། །སྔ་ཕྱིར་བྲིས་པ་བརྒྱད་དགུ་ཙམ་ཞིག་དང་། །གནམ་ཆོས་པོ་ཏི་བཅུ་གསུམ་ཆ་གསུམ་དང་། །གསང་འདུས་ཐུགས་སྒྲུབ་གཞུང་པོད་ཆེ་བ་གཉིས། །འཇའ་ཚོན་སྐོར་གྱི་པོ་ཏི་སྔ་ཕྱི་བདུན། །རྒྱལ་བ་རྒྱ་མཚོ་གཅིག་ཤེས་ཀུན་གྲོལ་སོགས། །ཀར་ལུགས་ཆོས་སྐོར་པོ་ཏི་གཉིས་ཙམ་ཞིག །བུམ་སྒྲུབ་ཕོ་བྲང་
ཆ་གཉིས་ཟངས་བུམ་སོགས། །སྒྲུབ་ཆེན་ཆ་ལག་ཡོངས་སུ་རྫོགས་པ་དང་། །ཞི་ཁྲོའི་ཕོ་བྲང་ཆ་གཉིས་ཆེས་དཀར་བཅས། །སྨན་བླའི་ཕོ་བྲང་དབུས་གཙང་སྲོལ་ཡོད་ལྟར། །དེ་སྔ་ལོ་གྲངས་ཕྱེད་བརྒྱད་ཚེ་འབར་བཙུགས། །བུམ་སྒྲུབ་ལན་བཞི་དགོངས་འདུས་ལན་གསུམ་དང་། །ཐུགས་སྒྲུབ་དང་བཅས་སྒྲུབ་ཆེན་ལན་བརྒྱད་བཙུགས། །སྒྲུབ་ཕྲན་འུར་འདོན་ལན་གྲངས་དུ་མ་སྟེ། །ཇ་མར་ནས་སོགས་ཕལ་ཆེར་དེ་ལ་བཏང་། །རི་བཤུ་མང་ཇ་སྔ་ཕྱི་ལན་མང་པོ། །བླ་མ་རྣམས་ལ་འབུལ་བ་ཅི་འབྱོར་གཟབ། །དགོན་པ་འགའ་ལ་དགོན་གསོས་སྤྱི་འབུལ་སོགས། །ལ་ཆེན་དགེ་བའི་ཕྱོགས་ལ་ཅི་ཐེང་བྱས། །དེ་དག་ཐམས་ཅད་མཆེད་གཉིས་དབོན་པོ་བཞི། །གཉེར་པ་གཉིས་དང་གྲྭ་མང་བཅས་པ་ཡིས། །ཀུན་གྱི་བློ་སེམས་གཅིག་ལས་གྲུབ་པ་ཡིན། །དགེ་རྩ་ཡང་ནི་དེ་བཞིན་སྤྱི་སོར་ཐོབ། །འོན་ཀྱང་བླ་མ་ཆོས་དབང་ཀུན་བཟང་ཉིད། །མདོ་རྒྱུད་རྒྱ་ཆེན་ཐུགས་སྦྱང་མ་མཛད་པས། །ཐེག་ཆེན་སེམས་བསྐྱེད་དེ་ཡིས་སྙིང་མ་ཚིམ། །གཞན་གྱི་དགེ་བ་རང་གིས་མི་ཐོབ་ཅིང་། །རང་གིས་བྱས་པའི་དགེ་བ་ཆུད་མི་ཟ། །རྒྱུ་དང་རྒྱུ་བའི་རྩ་བ་འདེད་དགོས་
པས། །ཐེག་དམན་སེམས་བསྐྱེད་དེ་ཉིད་ཐུགས་ལ་འཆང་། །ཁོང་རང་སྒེར་ཟོག་ངོས་བསྐལ་ལ་དམིགས་ནས། །ཐུགས་རྗེ་ཆེན་པོ་རིགས་ལྔ་སངས་རྒྱས་སྟོང་། །ཨོ་རྒྱན་བརྒྱ་རྩ་གཏེར་སྟོན་གླིང་པ་བརྒྱད། །ཚེ་འབར་ཀོང་བུ་ཆེན་པོ་གཉིས་དང་ནི། །རྒྱལ་བ་རྒྱ་མཚོའི་ཞལ་ཐང་ཆེ་བ་གཉིས། །ཡི་དམ་དཀྱིལ་འཁོར་ཐང་ཀ་བཅུ་གསུམ་ཙམ། །དཀྱིལ་འཁོར་ཐིག་རྩ་ཆོས་དབང་ཉིད་ཀྱིས་མཛད། །གཏོར་མགྲོན་ཞལ་ཐང་ཆུང་བ་བཅུ་གསུམ་དང་། །གཏོར་མགྲོན་ཙཀ་ལི་གོང་ཤམ་ལྡན་པའི་ཕྲེང་། །འོད་དཔག་པར་སྐུ་ཚོན་གསོལ་སྤྱན་འབྱེད་ཅན། །སྟོང་ཕྲག་གཅིག་དང་སྒྲུབ་པའི་ཆ་ལག་དང་། །གདོང་ལྔ་ལ་སོགས་ཞལོ་དང་ཁྱུང་གི་སྐུ། །ཕྱི་རབས་རྣམས་ཀྱིས་མ་ཕྱི་ཉན་པ་ཡི། །སྨན་རཀ་སྣོད་སོགས་སྤུས་གཙང་མང་པོ་དང་། །བླ་མ་ཉིད་ཀྱི་སྐུ་ཚད་ཨོ་རྒྱན་གྱི། །ལྡེར་སོ་གསེར་ནི་འཐུག་པོས་གཡོགས་པ་དང་། །ལུས་ཚད་མཆོད་རྟེན་དངུལ་གྱིས་གཡོགས་པ་སོགས། །བླ་མ་ཆོས་དབང་ཀུན་བཟང་ཁོ་རང་གིས། །ཕྱག་བཟོ་རྒྱུ་བ་འོ་བརྒྱལ་ཆེན་པོ་མཛད། །དེ་བཞིན་ཚེས་བཅུའི་འགྲིགས་ཆོག་པོ་ཏི་དང་། །དགོངས་འདུས་སྐར་མཛོད་ཞི་བརྔན་བསང་གསོལ་བསྐོར། །དར་ནག་
གཉིས་དང་ཆོས་གོས་པད་ཞྭ་སོགས། །ཉིད་ཀྱིས་བདག་བཟུང་ཁྱད་པར་བ་རྣམས་དང་། །རཱ་ག་ཨ་སྱས་སྒར་ཆས་སྒྲུབ་ཆེན་ཆས། །དབང་དཔེ་ཙཀ་པོད་པོ་ཏི་དྲུག་བདུན་སོགས། །ཕལ་ཆེར་ཉིད་ཀྱིས་ཞལ་ཆོས་མཛད་ནས་བཞེངས། །དེ་དག་ལ་བསྟན་ལོ་བདུན་འགྲོ་དོན་བྱུང་། །དཀོར་རྫས་རྒྱུ་ཡི་དངོས་པོ་ཕལ་ཆེར་བ། །དགེ་སོགས་བསོད་ནམས་བསགས་པའི་ཕྱིར་བཏང་བ། །དེ་ཡིས་ས་བཅད་དགུ་པོ་ཐོ་ཙམ་ཚང་།། །།འདས་པའི་རབ་དང་དེ་ཡི་རྟགས་བྱུང་ཚུལ། །མ་འདས་གོང་ནས་འདས་རྟགས་བྱུང་ཚུལ་རྣམས། །འཆི་རྟགས་ཡིན་པས་ལྟས་ངན་གྲ་རུ་བསྒང་། །འདས་རྗེས་རྟགས་རྣམས་བར་དོ་རྣམ་གསུམ་ལ། །གྲོལ་བའི་རྟགས་དེ་བཟང་པོའི་རྟགས་སུ་བཤད། །དང་པོ་འཆི་རྟགས་ངན་པ་ཚེ་ཐུང་རྟོགས། །བླ་མ་ཆོས་དབང་ཀུན་བཟང་དེ་ཉིད་ནི། །དགུང་ལོ་ཉེར་བཞིའམ་ཉེར་ལྔ་ལོན་དུས་ཙམ། །ནུབ་གཅིག་གློ་བུར་བསྙུངས་ནས་འདས་ལ་ཁད། །ལྷ་རྗེ་རིན་རྒྱལ་མཁས་པས་མི་སྐྱོན་ཟེར། །དགུན་སྒང་ས་སྐམ་ནེམ་ཐིག་མེད་པ་ལ། །གསོལ་སྨན་འདྲེན་པའི་སྨན་ཆུ་གསོལ་ཞལ་དུ། །བགྲང་ནས་ཡོད་པས་གནམ་ནས་ཆུ་ཟག་ནས། །སྨན་
ཆུ་ནང་དུ་སོང་བས་གསོལ་མ་ཉན། །རཱ་ག་ཨ་སྱར་རྣམ་རྟོག་ཆེན་པོ་བྱུང་། །རྨི་ལམ་བརྟགས་པས་བླ་མ་གཞོན་ནུ་གཅིག །འདས་ནས་འདུག་པའི་ཐུགས་དམ་བསྐུལ་མ་དང་། །གདུང་བཅས་བདག་གིས་བྱས་པ་ཞིག་རྨིས་པས། །དེ་ཕྱིར་རྒྱུན་དུ་རྣམ་རྟོག་ལངས་དོགས་ནས། །ཁོ་རང་སོགས་ལ་སྨྲ་བར་མ་བྱས་ཀྱང་། །ང་བས་སྔོན་ལ་ཆོས་དབང་ཨེ་མི་འདས། །བསམ་པ་འདི་ནི་མ་བརྗེད་ཡང་ཡང་དྲན། །དེ་དུས་སྙུང་གཞི་དེ་ཉིད་མྱུར་དུ་ཕན། །སྟག་ལོ་ནས་བཟུང་ལོ་རེ་མ་ཆག་པར། །ཆོས་དབང་སྙུང་བའི་རྐྱེན་བྱས་མང་ཇ་དང་། །ཀརྨར་ཟླ་རེར་མི་མགོ་བཞི་ལྔ་ཙམ། །བསྐང་གསོ་ཡང་ནི་ལན་གྲངས་འགའ་རེ་ཚུགས། །འབུམ་ཚར་ཡང་ན་དྲུག་ཅུ་རྩ་རེ་སོགས། །ཁྱད་པར་སྦྲུལ་ལོའི་དཔྱིད་ཀར་ཚབས་ཆེན་སྙིང་། །ལྷ་རྗེ་རྣམས་ཀྱིས་རྩ་ཡང་ཆད་འདུག་ཟེར། །རཱ་ག་ཨ་སྱས་ཚེ་དབང་བརྒྱ་རྩ་དང་། །འབུམ་ཚར་བཅུ་བདུན་སྟེབས་གཅིག་སྟོན་པའི་སྐབས། །སྡིག་སྒྲ་དང་བཅས་མེ་ཁང་ཀྲམ་ཞིག་ཆག །དབྱར་དུས་སྦྲུལ་ཡང་ཁྱིམ་ན་ཕྱིན་འདུག་པས། །བཀའ་བརྒྱད་མདོས་ཆེན་གསར་བསྒྲིགས་བྱས་པ་བཅས། །དེ་ཡིས་སྦྲུལ་ལོའི་སྐུ་སྐག་འགྱུར་ཙམ་བྱུང་། །རྟ་
ལོའི་ལོ་སར་ནང་དུ་འདས་རྒྱུ་ཡིན། །སྦྲུལ་ལོའི་དབྱར་དང་སྟོན་སོའི་སྐབས་རྣམས་ནས། །རཱ་ག་ཨ་སྱས་རྨིས་ལྟས་ལོག་གྱུར་ནས། །ཁང་པ་ཆེན་པོ་ཅིག་གིས་ནང་ན་ནི། །ཅོག་པུ་གཅིག་ནི་ཕུབ་ནས་གདའ་བའི་ནང་། །རང་གི་བུ་ཆེན་བླ་མ་གཅིག་འདས་གདའ། །སྒོ་དེར་སོང་བས་སྐྱེས་པ་བུད་མེད་འགས། །ཐུགས་དམ་ཡུན་རིང་མ་བཞུགས་ཟེར་ཞིང་འཕྱ། །ཉིན་གཅིག་གུང་ཚིགས་ཚར་འགྲོགས་ཅུང་ཟད་འཐུམ། །གཉིད་པ་མ་ཡིན་ཉམས་ཀྱི་སྣང་བ་ལ། །ངེད་ཚང་བླ་མ་འདས་ཟེར་སྒྲ་ཞིག་གྲག །ནུབ་གཅིག་རྨི་ལམ་ཐན་བྱ་རྣ་བ་ཅན། །དབུས་ཀྱི་རོང་ན་ཡོད་པ་དེ་ཕྱིན་བྱུང་། །ཞྭ་དམར་སྤྲུལ་སྐུ་ཞིང་ནི་བརྗེ་ཁ་ལ། །བྱ་འདི་ཉིན་བྱེད་གླིང་དུ་བྱུང་བ་ཡིན། །ཐན་ཡིན་མི་ལེགས་སྨྲས་པ་རྨིས་པ་དང་། །རྒྱུན་དུ་བྱ་རོག་འཁོར་བ་ད་ལོ་མེད། །བྱ་རོག་ཁྲ་བོ་གྲྭ་པ་འགའ་རེས་མཐོང་། །ཁྱིམ་སྐྱིལ་ཞ་ལ་འཁྲང་སོར་སྤང་ཤ་རྡོལ། །དངོས་སུ་རཱ་ག་ཨ་སྱ་རང་ཉིད་ཀྱི། །སྙིང་གི་ཐད་ཀྱི་པགས་པ་དེ་ཉིད་ལ། །ཚེར་མ་བཙུགས་འདྲའི་ཚགས་ཀྱུ་ལན་མང་བྱུང་། །ནུབ་འགའ་གཉིད་མི་ཕེབས་པར་བྱ་ཡལ་སོང་། །འོན་ཀྱང་དེ་ཚེ་སེམས་ཀྱི་ཆོ་འཕྲུལ་ཡིན། །སྙམ་དུ་ལྟ་
བའི་ངང་དུ་བཞག་ལ་བྱས། །རྣམ་རྟོག་བསླང་བ་དེ་ཉིད་འདྲེ་ཡིན་སྙམ། །མ་སྨྲས་གསང་ཞིང་གཉེར་པ་དབོན་པོ་ལ། །ལྡོམ་བུ་འཁོར་བའི་འབུམ་བརྒྱས་ཁ་ཨེ་ཁང་། །ལན་འགའ་སྨྲས་ཀྱང་ཇ་ནས་རྒྱ་རེས་ཤོར། །བླ་མ་ཆོས་དབང་ཀུན་བཟང་ཁོ་རང་ཡང་། །ཉི་མ་ཕྱི་དྲོ་རེད་པ་ཁོ་ན་རྨིས། །ཁྱད་པར་ཨོ་རྒྱན་སྐུ་ཚད་བཞེངས་པའི་སྐབས། །ཐུགས་སྒྲུབ་དཀྱིལ་འཁོར་བྲིས་པ་མ་ཡིན་པ། །བློས་བསླང་འདྲ་བ་ཆེན་པོ་དངོས་སུ་ཕྱིན། །དང་པོ་ལྷོ་ཡི་སྒོ་ནས་ནང་དུ་ཞུགས། །དཀྱིལ་འཁོར་ལྷ་ཚོགས་དངོས་སུ་མཇལ་ཚར་ནས། །ཤར་གྱི་སྒོ་ནས་ཕྱིར་ལ་འོང་བ་རྨིས། །ལྷོ་སྒོ་ཚེས་འདས་འཇུག་པའི་སྒོ་ཡིན་པས། །ངན་ནམ་སྙམ་པའི་རྣམ་རྟོག་གཅིག་ཀྱང་བྱུང་། །སྐུ་འདྲ་གསེར་གྱིས་རང་གཡོགས་བྱས་པ་དེས། །ལྷོ་ཕྱོགས་སེར་པོ་ཡིན་པའི་དོན་ཡིན་ནམ། །བཟང་ངན་ཅི་ཞེས་རྡུལ་བྱང་བསྐུར་ནས་བྱུང་། །ངན་པར་གོ་ཡང་རཏྣ་ཐོད་ཕྲེང་རྩལ། །ལྷོ་ན་བཞུགས་པས་སྐྱོན་ནི་མེད་དམ་སྟེ། །གང་ལྟར་དག་སྣང་བཟང་པོ་རེད་ཅེས་སྤྲིང་། །དེ་ནས་ཟུག་ཟེར་བསྙུང་གཞི་མ་ཕོག་ཀྱང་། །ཡི་ག་ཇེ་འགགས་ཀེང་རུས་ལྟར་སོང་ཟིན། །དྲག་ལུ་འདས་རྗེས་རཱ་ག་ཨ་སྱ་བདག །ཁང་པའི་སྟེང་དུ་
འབུར་ཤུན་མང་པོ་བརྩེགས། །ཁྲི་མཐོན་སྟེང་དུ་བསྡད་ནི་གདའ་བ་ལ། །ཁྲི་དེ་ལོགས་ནས་ང་ཡང་མགོ་འཇུག་ལོགས། །ཤོད་དུ་བྲུལ་སྟེང་ཁྲི་དང་འབུལ་ཀུན་ཡང་། །ང་ཡི་སྟེང་དུ་ཐམས་ཅད་བྲུལ་བྱུང་རྨིས། །དེ་ནི་གཉེར་པ་ལ་ཡང་བཤད་པ་ཡིན། །བླ་མ་འདས་དུས་ཟླ་བ་གསུམ་བཞི་ནས། །ལུང་པ་འདི་ནང་ཤི་ཕོ་གསོན་པོ་ཡི། །འདུ་ཚོགས་ཤིན་ཏུ་ཆེ་བ་ཐམས་ཅད་ཀྱང་། །ནང་འཛིང་བྱུང་བ་འདྲ་བ་ཐམས་ཅད་ཀྱང་། །ངུ་འབོད་ཕོ་ཤར་བྱེད་པ་ཡང་ཡང་རྨིས། །དེ་ནས་ལོ་འཇུག་མགོ་ཟླའི་ཟླ་མཇུག་ལ། །བྱད་ཟློག་ཁྲོ་ཆུའི་སྒྲུབ་ཆེན་བྱེད་ན་ཡང་། །ཀླུ་གདོན་ཐུལ་བའི་རྟགས་ཤིག་མ་གཏོགས་པ། །སྲུང་བའི་རྟགས་ནི་གསར་པོར་མ་བྱུང་ཞིང་། །ཆོས་དབང་གཟིམས་ཁང་ཐད་ཀྱི་ནམ་མཁའ་ལ། །ཚེས་བརྒྱད་ཟླ་བ་གཅིག་ནི་ཤར་གདའ་བ། །ཇོ་འཁོར་བཞིན་དུ་འཁོར་ཞིང་འདུག་པ་རྨིས། །དེ་ནས་ལོ་སར་རྒྱལ་ཟླའི་ཉི་ཤུ་སྐོར། །ལོ་རིམ་མདོས་བཅས་བླ་མ་བསྙུང་ཡོད་ཟེར། །དམིགས་རྟེན་མཎྜི་ཁ་གང་བསྐུར་བྱུང་བས། །བརྟགས་པ་བྱས་ནུབ་ཀརྨ་ཡིན་བསམ་པའི། །ལྷ་ཁང་གཅིག་གི་ནང་དུ་སླེབས་ཙམ་ན། །ཀརྨ་པ་ཡི་སྐུ་ཀུན་མགོ་འཇུག་
ལོག །ཐམས་ཅད་སྤྱི་བོར་ས་ལ་བཙུགས་ནས་གདའ། །བདག་གིས་མང་པོ་ཡར་ལ་སླར་བཞག་པས། །དེ་མ་ཐག་ཏུ་མགོ་འཇུག་ལོགས་ཏེ་ཐལ། །མཆོད་བཤམས་གོང་དུ་བདག་གིས་མི་རྩེབ་སར། །སངས་རྒྱས་སྐུ་ནི་གཙུག་ཏོར་ཡོད་པ་འགའ། །དེ་དག་ཐམས་ཅད་མགོ་འཇུག་ལོགས་གདའ་བས། །ང་ནི་རྩེབ་ས་མ་རེད་ཐབས་མེད་སྙམ། །དཀོར་གཉེར་དགེ་སློང་འདྲ་བ་ཞིག་འདུག་པར། །འདི་འདྲ་སྔར་དུས་བྱུང་རབ་ཨེ་ཡོད་སྨྲས། །དབང་ཕྱུག་རྡོ་རྗེ་འདས་ཁ་བྱུང་ཟེར་བས། །འོ་ན་རྒྱལ་བའི་དབང་པོ་འདས་རྒྱུ་རེད། །སྨྲས་ནས་ང་རང་ངུས་པའི་རྨི་ལམ་བྱུང་། །དེ་དགོང་ཆོས་དབང་ཐུ་བྱུང་ཕེབས་དགོས་ཟེར། །རྨི་ལམ་ངན་པས་དེ་རིང་མི་འགྲོ་སྨྲས། །ཕྱིར་ནུབ་སོང་བ་ཤ་ཞུ་རུས་སྐམ་ནས། །འདི་ལ་མི་ནི་འོང་བ་མི་འདུག་སྙམ། །འོན་ཀྱང་ཚེ་དབང་ལ་སོགས་གང་དྲགས་བྱས། །ཅེས་ཀྱང་མི་ཕན་ཐབས་སྡུག་བྱུང་བ་རྣམས། །གཅོད་ཀྱིས་འདུལ་ཞིང་འདུལ་བྱ་ཡིན་གསུང་ཕྱིར། །གཅོད་ཚོགས་ཞག་ལྔ་བྱས་པའི་རྨི་ལམ་ལ། །གཅོད་ཚོགས་འདི་ཡིས་བསོད་ནམས་ཚོགས་རྫོགས་པས། །ཕན་ཡོན་དཔག་ཏུ་མེད་ཅེས་ལུང་བསྟན་བྱུང་། །ཆུ་ཡི་མཐའ་གཏད་འབྱུང་བའི་མཐའ་
གཏད་བྱས། །ཚད་པ་རེད་ཕྱིར་མེ་ཡི་མཐའ་གཏད་བསྐྱུར། །དེ་དགོང་ཤི་སོས་བརྟགས་པ་བྱས་པའི་ཚེ། །ཅི་མི་སྐྱ་འཆི་ཟེར་བའི་སྒྲ་ཞིག་གྲག །འོན་ཀྱང་དེ་ཉིད་སྨྲས་ཤས་མ་ནུས་ཤིང་། །ད་རུང་འཆི་བསླུ་རིགས་གསུམ་གྲིབ་སེལ་བྱས། །ངེད་གཉིས་དངོས་སུ་འཛིངས་མོ་མ་བྱུང་ཡང་། །རྨི་ལམ་ཁྱེད་ཀྱིས་གནམ་ཆོས་མི་དད་པས། །འཇིག་རྟེན་ངོས་ནས་འོ་ཅག་སྤུན་ཡིན་ཡང་། །ཆོས་དུས་ང་དང་དམ་ཚིག་ཆག་སྨྲས་ནས། །ང་རང་སྡུག་དྲག་ཐལ་བ་འགམ་ཤོམ་བྱས། །དེ་ནས་ཁོང་སྐྱུར་ང་རང་མཁར་ནང་དུ། །འགྲོ་སྙམ་བུད་ནས་འོང་བ་རྨིས་པ་ཡི། །རྟེན་འབྲེལ་རྨི་ལམ་ངན་པ་ཨེ་འགྱུར་གྱིས། །གནམ་ཆོས་དབང་ནི་མང་དུ་བྱས་ན་ཡང་། །དེ་བས་ཕན་ཐོགས་མེད་པའི་རྟགས་ཀྱང་བྱུང་། །ང་ལ་རལ་པ་རིང་པོ་འདུག་པ་དེ། །ཝལ་སེ་གོག་ནས་ཕ་ཟད་སོང་བ་རྨིས།། །བསོད་ནམས་འགའ་མེད་ལོ་བར་བསོད་ནམས་སྐྱེས། །ད་ནི་འགྲིབ་ཟེར་བ་ཡི་སྒྲ་ཞིག་ཐོས། །རྒྱུ་རྣམས་གཏོར་དགོས་འོང་བའི་རྟགས་སུ་གོ །ཤི་ཡང་དེ་བས་ལྷག་ནི་མེད་བསམས་ནས། །བྱང་ཆུབ་སེམས་བསྐྱེད་རྒྱས་པར་འབོགས་པ་དང་། །ཐུགས་སྒྲུབ་རྒྱལ་བ་རྒྱ་མཚོའི་དཀྱིལ་འཁོར་
དབང་། །རྗེས་གནང་གང་ཟབ་སྟོང་དང་གཅིག་བརྒྱ་བསྐུར། །དུས་ཀྱི་འཆི་བ་བཟློག་པར་མ་ནུས་ཀྱང་། །ང་རང་འགྱོད་མེད་བློ་ཁ་རྫོགས་པར་བྱུང་། །འདས་རྟགས་འཆི་རྟགས་ལྟས་ངན་བྱུང་ཚུལ་ནི། །བྲི་བའི་དགོས་པ་ཆེན་པོ་མི་འདུག་ཀྱང་། །མཐོང་བ་པོ་ཡིས་རང་རེ་མི་རིག་དཔེ། །དགོངས་པ་རྨི་ལམ་ཙམ་ཡང་མ་འདུག་ཅེས། །ཕལ་ཆེར་ཀུན་གྱིས་འཕྱ་བའི་གནས་འགྱུར་བར། །ཤེས་ཀྱང་བྱེད་ཐབས་ཅི་ཡང་མི་གདའ་ན། །སྨན་དང་སྲུང་བ་རིམ་གྲོས་མ་ཕན་ནས། །བྱེད་པ་ཟད་པ་འདི་ནི་གོ་བར་གྱིས། །མདོ་རྒྱུད་ཀུན་ནས་དུས་ཀྱི་འཆི་བ་ལ། །བཟློག་ཐབས་མེད་པར་གསུངས་པ་དེ་ལགས་སོ། །དེ་ནས་འདས་རྟགས་བཟང་པོའི་རྟགས་བཤད་པ། །མ་ནིང་གཏོར་དབང་བརྒྱ་རྩ་བྱེད་པའི་སྐབས། །ཆོས་དབང་གཉིད་པ་མ་ཡིན་འཁྲུལ་སྣང་ལ། །ད་ལྟ་ང་ཡི་ལག་འདིར་རྡོ་རྗེ་དང་། །དྲིལ་བུ་བཞག་བྱུང་དེ་ནི་ལེགས་སམ་གསུངས། །སུན་མའི་རྟགས་འདྲ་མིན་ན་ལེགས་ཏེ་སྨྲས། །ནུབ་མོ་གཉིད་མེད་རྒྱུན་དུ་ཙོག་པུའི་སྐབས། །ཡུད་ཙམ་འཐུམ་པ་འདྲ་བའི་སྣང་བ་ལ། །ནམ་མཁའི་དབྱིངས་ནས་འོད་ཟེར་སྔོན་པོ་གཅིག །བྱུང་བས་ང་བཏུམ་ནམ་མཁའི་དབྱིངས་སུ་
ཁྱེར། །དེ་མ་ཐག་ཏུ་གནམ་ས་བར་སྣང་ཀུན། །འཇའ་འོད་ཐིག་ལེ་ཐིག་ཕྲན་ཁྲ་ཆེམ་གང་། །དེ་དང་སེམས་ངོ་དབྱེར་མེད་གཅིག་ཏུ་འདྲེས། །བླ་མས་ངོ་སྤྱོད་མཛད་པ་འདི་རེད་བསམ། །དེ་འདྲ་བྱུང་བ་ལེགས་སམ་ཅི་ཡིན་གསུངས། །དག་སྣང་རེད་པས་ལེགས་སམ་སྨྲས་ན་ཡང་། །དེ་རྣམས་ཞིང་ཁམས་བགྲོད་པའི་རྟགས་སུ་གོ །སུན་བཟློག་དཔའ་བོ་གདན་བཞུགས་གྱིས་དང་གསུངས། །བྱས་པས་ཐང་དཀར་གཅིག་གིས་གཟིམས་ཁང་ཐད། །མ་ཟད་འདི་རུ་ལྡིང་ཞིང་འཕུར་བྱུང་བས། །དེ་ཡི་ནུབ་མོ་ཐོ་རངས་ཞིང་བརྗེས་སོ། །འདས་ཁ་ཞལ་ཆེམས་རྩ་ཚིག་གཅིག་གཉིས་གསུངས། །ངེད་རྣམས་མི་དོགས་ཁྱེད་རང་མ་ཡེངས་ཞེས། །གསལ་འདེབས་འདས་ལ་ཁད་ནས་མང་དུ་བྱས། །འཕོ་བ་བྱས་ན་ལེགས་པོ་ཡིན་མོད་ཀྱང་། །ས་ཆའི་སྲོལ་ལ་ཐུགས་དམ་མ་བཞུགས་ན། །ཡོན་བདག་དད་ལོག་གྲ་རིས་ངོ་མྱ་བས། །ཞག་བདུན་བར་དུ་བཞུགས་དགོས་ཞུས་པ་ཡིས། །འདས་ནུབ་ཐེ་བའི་ཞག་དྲུག་ཉི་མ་བདུན། །དེ་ཡི་བར་དུ་འདུག་པར་དམ་བཅའ་བྱས། །ཉིན་བདུན་ཉིན་པར་འོད་དཔག་མེད་བྱོན་པས། །དེ་ལ་ངོས་མ་ཟིན་ན་རེ་མེད་པས། །དེ་
ཉིན་ངོ་སྤྲོད་གྱིས་ཞེས་ཡང་ཡང་གསུངས། །བཅུ་དྲུག་ཆེད་པའི་བཅུ་བདུན་ཐོ་རངས་འདས། །གདུང་བཅས་ཐུགས་དམ་བསྐུལ་མ་བྱས་ནས་ནི། །འགྲོགས་དོགས་སྤྱོད་ལམ་གཟབ་པ་ཞག་གསུམ་བྱས། །བྱ་ཁྱུ་འགྲོགས་དང་ཁྱི་འཛིང་ཁྱི་ཁ་འུར། །དེ་འདྲ་བྱུང་ན་འགྲོགས་དོགས་ཆེ་བའི་ཕྱིར། །ཞག་གསུམ་ཉི་མ་དྲོས་བཞི་འཕོ་བའི་དུས། །འཕོ་བའི་དམིགས་པ་གསལ་འདེབས་རྒྱས་པར་བྱས། །དེ་དང་འགྲོགས་ཀྱང་སྐྱོན་མེད་བཞུགས་ཀྱང་ལེགས། །སྙམ་ནས་པད་ཞྭ་སྙན་དར་གསོལ་བ་དང་། །མཆོད་བཤམས་མཆོད་པ་མར་མེ་སྤོས་སོགས་བཤམས། །གྲྭ་མང་མདུན་ཚོགས་རྒྱལ་བ་རྒྱ་མཚོ་བཏང་། །གདུང་ཞལ་ལྟ་མི་ཀུན་ལ་ཞལ་བསྟན་ཀྱང་། །བཞུགས་ཆད་དུས་བར་གྲོལ་རྟགས་མ་བྱུང་ཞིང་། །བཀྲག་མདངས་གསོན་པའི་དུས་བས་བཟང་བ་དང་། །མཁུར་ཤ་འཐེན་ཀྱང་སྔ་ལྟར་རང་བ་དང་། །སྤྱན་འབྲས་འབུར་ཞིང་ཤངས་ཀྱང་མ་རྡིབ་འབུར། །དཔྲལ་བའི་རྩ་ཡང་ལངས་བ་ཀུན་གྱིས་ཤེས། །ཞག་དྲུག་ཉི་མ་བདུན་གྱི་དུས་ཀྱི་ཚེ། །ཉི་མའི་རྣ་ཚར་སོགས་ནི་མ་ཡིན་པར། །དམར་སེར་ཤས་ཆེ་ཁ་དོག་ལྔ་ལྡན་པའི། །འཇའ་ཚོན་ཟླ་གམ་གསལ་པོར་སྔ་དྲོར་
བསྡད། །ཕྱིར་ནངས་ཞག་བདུན་ཉིན་ཡང་དེ་ལྟར་བྱུང་། །དེ་སྐོར་དཔལ་རི་རྩེ་ཡི་རི་ཁྲོད་ན། །སྦས་པའི་རྣལ་འབྱོར་རྫོགས་ཆེན་པ་གཅིག་ཡོད། །དེ་ཡི་དངོས་སུ་མིག་གིས་མཐོང་ཚུལ་རྣམས། །རྫོགས་ཆེན་ཆོས་ཀྱི་རྒྱུས་ཡོད་མ་གཏོགས་པ། །གཞན་ལ་སྨྲས་ན་རྫུན་དང་འུད་དུ་མཐོང་། །ཆོས་དབང་བསྙུངས་ནས་ཡོད་པས་དུས་དེ་ལ། །བར་སྣང་སྤྲིན་ནི་དཀར་པོ་འདྲ་བའི་གསེབ། །མཁའ་འགྲོ་དཀར་མོ་སྐུ་འབྲས་ཆུང་ངུ་འགས། །མང་པོས་གར་སྟབས་བྱེད་པ་མཐོང་འདུག་གོ །མཁའ་འགྲོའི་ཞིང་ཁམས་གནས་སུ་བསུ་བའི་ལྟས། །འདས་དུས་གཟིམས་ཁང་ཐད་ཀྱི་ནམ་མཁའ་ལ། །འོད་ནི་སྨུག་པོ་མཆོང་མདོག་ཀ་བ་ཙམ། །ཁྱུག་ཁྱུག་འཁྱུག་པའི་རྩེ་མོ་དཀར་ཡོལ་འདྲའི། །འོད་ཀྱི་པདྨ་དཀར་པོ་གཅིག་གི་སྟེང་། །མི་ནི་དཀར་པོ་ཤ་མདོག་གསལ་དྭངས་ལ། །སྐུ་སྨད་པདྨའི་སྦུབས་སུ་ནུབ་པ་ཞིག །ཇེ་མཐོར་ནམ་མཁའི་དབྱིངས་སུ་འཇའ་ལྟར་ཡར། །དེ་ནི་རྫོགས་ཆེན་རྒྱུད་ནས་གསུངས་པ་ཡི། །རྡོ་རྗེ་སེམས་དཔའི་སྣ་ཐག་ལམ་ཞེས་པ། །ཆོས་སྐུ་ཐོབ་པའི་རྟགས་ནི་དངོས་སུ་སྣང་། །ཐུགས་དམ་གྲོལ་ཉིན་ནམ་མཁའི་དབྱིངས་དེ་ནས། །བླ་མ་པཎ་ཞྭ་
དམར་པོ་མནབས་པ་ཞིག །ནུབ་ཕྱོགས་ནམ་མཁའི་དབྱིངས་སུ་ཏ་ལེར་ཐལ། །དེ་ནི་བདེ་ཆེན་ཞིང་ཁམས་བགྲོད་པའི་རྟགས། །འདས་ནས་བདུན་ཕྲག་གསུམ་ལ་ཉེ་བའི་སྐབས། །རཱ་ག་ཨ་སྱས་ཆོས་དབང་རྣམ་ཤེས་བཀུག །བར་དོའི་ངོ་སྤྲོད་རྣམས་ནི་བྱེད་པའི་དུས། །ཆར་མུན་སེར་བ་འདྲ་བའི་ནག་པོ་ཡིས། །མི་ནི་དཀར་པོ་གཅིག་ནི་དེད་ནས་བྱུང་། །ངོ་སྤྲོད་ཚར་བས་མུན་པ་སེར་བ་ཡལ། །མི་དཀར་དེ་ཡང་འཇའ་ལྟར་ཡར་ནས་སོང་། །དེ་ལྟར་དངོས་སུ་མཐོང་སྣང་སྣ་ཚོགས་དང་། །བླ་མས་ཉིན་བཞིན་ངོ་སྤྱོད་མཛད་ལུགས་ཀྱིས། །ང་རང་ཤི་ནས་བར་དོར་འཁྱམས་པ་སྟེ། །ཡིན་ནམ་སྙམ་ཞིང་ཐེ་ཚོམ་སྐྱེས་སོ་སྐད། །ཐུགས་དམ་གྲོལ་ནས་ད་རུང་ཞག་གསུམ་བར། །ཤ་བཀྲག་ཅུང་ཞིག་ཉམས་ཤིང་ཨ་འབྲས་ལ། །ཅུང་ཞིག་ཀོ་ཁོ་བྱུང་ཙམ་མ་གཏོགས་པར། །ད་རུང་གཞན་ལྟར་རོ་ངོ་མ་བཅས་པས། །གདུང་ཞལ་རྗེས་མ་རྣམས་ཀྱང་མགུ་བར་བྱུང་། །གདུང་བཅས་བཤིག་ནས་གནས་ཡིག་སྦྱར་དུས་ཀྱང་། །བསྐྱོར་སོགས་མི་དགོས་ཀྲོག་གེ་ཚུགས་ཐུབ་སྐད། །གདུང་ནི་བཞུས་ཉིན་སྔ་དྲོའི་ནམ་མཁའ་ལ། །སྤྲིན་འཇའ་མང་པོ་མཐོང་ཟེར་ངས་མ་མཐོང་། །དེ་ནུབ་རཱ་ག་ཨ་
སྱས་ཉམས་རྨིས་མཚམས། །དབུ་བུམ་རིལ་ཡོད་ཟེར་བའི་སྒྲ་ཞིག་བར་སྣང་ཁམས་ནས་གྲག །ཞགོ་གསུམ་གདུང་སྒོ་ཐེལ་གྱིས་མནན་པས་བཞག །བུམ་ཧྲིལ་ཞིག་འཆོར་བསམས་ནས་སྨྲ་མ་ཕོད། །དེ་བས་དབུ་ནི་བུམ་ཧྲིལ་མ་ཞིག་པར། །མི་རྣམས་འགའ་ལ་རྟེན་ཞལ་སྟོན་རྒྱུ་རྙེད། །དེ་དུས་མ་རིག་ཕྱིས་སུ་བལྟས་པ་ཡིས། །དཔྲལ་ཟུར་གཡོན་དུ་འབུར་དུ་དོད་པ་ཡི། །ཐོར་བརྩེགས་ཨོ་རྒྱན་ཡི་གེ་ཕྲེང་གཅིག་ཙམ། །འདུག་པ་རྣམ་བཅུ་དབང་ལྡན་ཡིན་ནམ་སྨྲས། །དེ་ནི་ཁོ་བོ་ངོ་མཚར་སྐྱེ་བ་བྱུང་། །ཚེམས་རྣམས་མ་ཆག་ཧྲུགས་སེ་བྱོན་འདུག་པ། །ལ་ལ་བཅག་པའི་སོ་རྐང་ནང་དེ་ན། །ཡུངས་ཀར་ལྟ་བུའི་རིང་བསྲེལ་གསུམ་བཞི་རྙེད། །དེ་ཡང་དང་པོ་མི་གདའ་མུས་ཀྱིས་རྙེད། །འཇིགས་བྱེད་མེ་ཡི་སྤུ་གྲིའི་སྐུ་གཅིག་ནི། །སྐུ་ཡི་རྣམ་པ་རུ་ཅོ་དང་བཅས་པ། །ཧ་ལམ་གསལ་བ་གཅིག་ནི་མ་གཏོགས་པ། །འབྱོན་འོས་ལྷ་ཡི་སྐུ་ནི་མ་བྱོན་ནོ། །ཨ་ཡིག་སྔོན་པོ་གསུམ་ཙམ་གསལ་བ་དང་། །ཧཱུྃ་ཡིག་དཀར་སྔོ་གཉིས་ནི་ཧ་ལམ་གསལ། །ལན་ཛའི་ཨོ་དང་ཡི་གེ་དབུ་ཅན་གྱི། །དབྱངས་གསལ་ཚང་མ་མིན་པའི་ཡིག་འབྲུ་འགའ། །བྲིས་པ་ལྟ་བུ་ཤིན་ཏུ་གསལ་པོ་
དང་། །བུམ་པ་ནོར་བུ་ཤིན་ཏུ་གསལ་པོར་གདའ། །ཤ་རི་རམ་དུ་གྲགས་པའི་རུས་པ་ནི། །སྲ་ཞིང་ལྕགས་ཆོད་པ་ནི་འགའ་བྱུང་དང་། །ཐུགས་ལྗགས་སྤྱན་གསུམ་ཡང་ནི་སྟོན་རྒྱུ་རྙེད། །བདུན་ཕྲག་གཉིས་ཉིན་ཁོ་རང་གཟིམས་ཁང་དུ། །དགོངས་རྫོགས་ལ་དམིགས་བུམ་སྒྲུབ་བཙུགས་ཤོམ་ནས། །ཉེར་དགུའི་ནུབ་མོ་དཀྱིལ་འཁོར་སྤོས་པའི་ནུབ། །བླ་མ་ཞི་གནས་དེར་བཞུགས་རྨི་ལམ་དུ། །ནམ་མཁར་འོད་དཔུང་འཁྲིགས་པའི་དཀྱིལ་དབུས་ནས། །མི་དཀར་རྟ་དཀར་ཁྲ་རྨོག་དཀར་པོ་ཅན། །དེ་རྒྱབ་བུད་མེད་མཛེས་མ་རྒྱན་བཟང་ཞིག །དེ་གཉིས་བར་སྣང་ཁམས་ལ་བྱུང་བ་ལ། །མི་འགས་གཏེར་སྲུང་སྨྱོ་ཁ་རེད་ཟེར་བའི། །སྨྱོ་ཁ་མི་འདྲ་མཁའ་རི་འདྲ་དོ་བསམ། །དེ་འདྲ་བྱུང་བ་ཅི་ཡིན་ཟེར་བ་ནི། །བུམ་སྒྲུབ་བཀའ་སྲུང་མཁའ་རི་ལྕམ་དྲལ་གཉིས། །དམ་ཚིག་དབང་གིས་བྱོན་པ་ཡིན་པར་འདུག །འདས་ནས་བདུན་ཕྲག་ལྔ་ནི་འགྲོ་ལ་ཁད། །སྦོ་ཟླའི་བཅུ་དགུར་ལྷ་བཟོ་བ་ཕེབས་ནས། །ཉི་ཤུའི་ཉིན་པར་གདུང་རྟེན་སྤྱན་རས་གཟིགས། །བཞེངས་པའི་དབུ་བཙུགས་སྲོག་ཤིང་བཙུགས་པའི་ཉིན། །ནམ་ལངས་ནས་ནི་མུན་ཆུ་མ་སྨུག་བར། །ནམ་མཁའ་གཡའ་
དག་སྤྲིན་ནི་ལྕོང་སྒོང་མེད། །རླུང་དང་སེར་བུ་མེད་པའི་ཡུ་མི་འགུལ། །ཆོས་སྐུ་ཐོབ་པའི་ཕྱི་རྟགས་ངོ་མཚར་བྱུང་། །འདས་ནས་བདུན་ཕྲག་དྲུག་པ་བདུན་པའི་སྐབས། །གདུང་རྟེན་བཞུགས་པའི་མཆོད་བཀྱག་བཟོ་བའི་ཕྱིར། །རི་ཁྲོད་གཡས་བསྐོར་རྒྱབ་ནས་ས་བརྐོས་པས། །རྡོ་ཡི་དུང་དཀར་རང་བྱོན་ཁྲུ་གང་དང་། །རལ་གྲི་རང་བྱོན་སོར་བཞི་ཙམ་ཞིག་རྙེད། །དེ་ནི་ངོ་མཚར་ཤིན་ཏུ་ཆེ་བ་དང་། །རི་ཁྲོད་འདི་ཡང་རིན་པོ་ཆེ་པ་ཡིན། །གསུངས་པ་དེ་བཞིན་གནས་གཅིག་ཡིན་པར་གོ །གདུང་རྟེན་རྒྱལ་བ་རྒྱ་མཚོ་སྨན་གྱི་ལྷ། །ཚེ་དཔག་གསུམ་ནི་མི་ཚད་ཆེ་སྡད་ཙམ། །དགོངས་ཞག་ནང་དུ་ཆེ་བཟོ་ཧ་ལམ་འགྲུབ། །སླར་ཡང་སྒྲོལ་དཀར་མི་ཚད་ལས་ཆེ་བ། །དགོངས་ཞག་ཚར་ཉིན་སྲོག་ཤིང་ཚུགས་པར་བྱས། །འདས་རྟགས་འདས་ཚུལ་ས་བཅད་བཅུ་པའོ།། །།དེ་ལྟར་འདས་རྟགས་བྱུང་བ་ལ། །ཕན་ཡོན་དགོས་པ་ཅི་ཞེ་ན། །ཡིད་ཆེས་སྐྱེས་ཕྱིར་ལུང་འདྲེན་ནི། །གསར་མའི་བཀའ་གདམ་གླེགས་བམ་ནས། །ཇོ་བོ་རྗེ་ཡིས་བཀའ་བསྩལ་པ། །རྣལ་འབྱོར་སྤྱོད་པའི་དབུ་མ་པ། །དབུ་མའི་དབྱིངས་སུ་དབུ་མར་འགྲོ། །ཤི་ལྟས་ནམ་
མཁའ་དྭངས་བ་ཡིན། །ཚུལ་ཁྲིམས་གཙང་མའི་མེ་ཏོག་འབབས། །བྱང་ཆུབ་སེམས་ལ་རིང་བསྲེལ་འཛག །བསྐྱེད་རིམ་ཅན་ལ་ལྷ་སྐུ་འབྱོན། །ཁྲིམས་གཙང་ཕུང་པོ་གཙང་ན་སྟེ། །ལྷ་རྣམས་ཀུན་གྱིས་བསུ་བར་བྱེད། །ཕྱིར་མི་ལྡོག་པ་དུང་འཁྱིལ་ཏེ། །འཁོར་བ་མི་སྤངས་སེམས་དཔའ་ལ། །ཐུགས་དང་ལྗགས་ནི་འབྱོན་པར་བཤད། །སྤྱིར་ནི་དམ་པ་གཤེགས་པ་ལ། །ལྷ་ཡི་སྔ་ལྟས་འཇའ་འོད་འབྱུང་། །གནས་ལུགས་སྔ་ལྟས་སྤྲིན་མེད་ཡིན། །ཅེས་གསུངས་དེ་ནི་དགོངས་འདུས་ཀྱི། །རྩ་བའི་རྒྱུད་ཆེན་པད་སྡོང་བརྩེགས་པ་ལས། །གདོས་བཅས་ལུས་དང་བྲལ་བའི་ཚེ། །རྡུལ་བྲལ་མཁའ་ལ་འོད་ཟེར་འཇའ། །ཡིག་འབྲུ་སྐུ་གདུང་རིང་བསྲེལ་སོགས། །སྐུ་གསུམ་ཐོབ་རྟགས་ཡང་འབྱུང་འགྱུར། །ཞེས་གསུངས་སྐུ་རྒྱུད་ཤེལ་གྱི་རི་བོ་ལས། །གཞིར་སྣང་དག་པ་ཆོས་ཀྱི་དབྱིངས། །ལྷག་མེད་དབྱིངས་སུ་མྱ་ངན་འདས། །སྒྲ་དང་འོད་དུ་བཅས་ནས་ཀྱང་། །སྐུ་གསུམ་ཞིང་དུ་མངོན་འབྱུང་བ། །གདུལ་བྱ་རྣམས་ལ་ལྷག་མ་བཅས། །གདུང་དང་རིང་བསྲེལ་བཞག་ནས་ཀྱང་། །གཞན་ཕན་ཐབས་ཀྱིས་འགྲོ་བ་རྣམས། །རིམ་གྱིས་འདྲེན་པར་དེས་བྱེད་དོ། །ཞེས་
གསུངས་མཁའ་འགྲོ་སྙིང་ཐིག་ལས། །དེ་ཉིད་འདས་ཚེ་གདུང་བཞུ་བས། །འཇའ་འོད་ཟེར་དང་དུད་པའི་རྟགས། །གདུང་རིགས་ལྔའམ་གཅིག་འབྱུང་སྟེ། །རྣལ་འབྱོར་ཕྱིར་མི་ལྡོག་པའི་རྟགས། །རིགས་ལྔའི་གདུང་སྟེ་སྐུ་ཡང་འབྱུང་། །དེ་རྣམས་སྐུ་ཐོབ་རྟགས་ཡིན་ཏེ། །གསུང་ཐོབ་རྟགས་སུ་མེ་འོད་སྒྲ། །འཇའ་ཚོན་ནམ་མཁའ་དྭངས་གསལ་ལ། །ངེས་པར་གསུང་ཐོབ་རྟགས་ཡིན་ནོ། །གདུང་ཚད་ངེས་པ་མེད་པར་གསུངས། །སྐུ་གདུང་འབར་བའི་རྒྱུད་ཆེན་ལས། །རིགས་ལྡན་མྱ་ངན་འདས་པ་ལ། །འདི་ཡི་ལྷག་མ་ཟག་བཅས་ཀྱི། །ཕུང་པོ་རྗེས་ཤུལ་བསྲེགས་སྦྱངས་པས། །དེ་ལ་སྐུ་ནི་རྣམ་གཉིས་ཏེ། །ཞི་བའི་སྐུ་དང་ཁྲོ་བོའི་སྐུ། །རྣམ་པ་གཉིས་ཀྱི་གཟུགས་སུ་ཡང་། །སུ་ཞིག་རྣལ་འབྱོར་ལྡན་པ་ལ། །འདི་གཉིས་འབྱུང་བར་འགྱུར་བ་སྟེ། །འདི་ནས་བར་དོ་མེད་པར་ཡང་། །ངོ་བོ་ཀ་དག་ཆེན་པོ་ཡི། །གདེང་དང་ལྡན་པར་འདིས་འགྱུར་རོ། །གལ་ཏེ་ཁྲོ་བོའི་སྐུ་བྱུང་ན། །འདིས་ནི་ཆོས་ཉིད་བར་དོ་ལ། །སྐད་ཅིག་ཉིད་ནི་བཅོ་ལྔ་ལ། །གྲོལ་བར་འགྱུར་རོ་མཁའ་འགྲོ་མ། །རིང་བསྲེལ་ཉིད་ནི་ཁྲ་མོ་སྟེ། །ཏིལ་གྱི་འབྲུ་དང་རྡུལ་ཆ་
ཙམ། །འདི་ནི་འབྱུང་བས་བཤིགས་པར་ནུས། །འདི་ནི་སྤྲུལ་པའི་ཞིང་ཁམས་སོ། །ཞེས་གསུངས་རྟགས་གྲོལ་རྒྱུད་ལས་ཀྱང་། །སྤྲིན་མེད་ནམ་མཁའ་དྭངས་བར་འགྱུར། །ནམ་མཁའ་གཡའ་དག་འབྱུང་བར་འགྱུར། །རླུང་དང་སེར་བུ་འབྱུང་མི་འགྱུར། །རིང་བསྲེལ་ཕྲ་ཞིང་མང་བར་འགྱུར། །འཇའ་དང་རིང་བསྲེལ་ཕྲ་མོ་མང་།།འཇའ་འོད་རིང་བསྲེལ་དཔག་མེད་འབྱུང་། །འཇའ་ཚོན་ཁ་དོག་སེར་གསལ་དང་། །འཇའ་ཚོན་ཁ་དོག་དམར་གསལ་འབྱུང་། །ཞེས་སོགས་མང་དུ་གསུངས་པ་དང་། །ཐུགས་རྗེ་ཆེན་པོ་དོན་ཏིག་གཞུང་ལས་ཀྱང་། །སྐྱེས་བུ་དེ་ཉིད་འཆི་འཕོའི་དུས་ཉིད་དུ། །ཕྱི་རྟགས་ཆོས་སྐུའི་མཚོན་པ་སྤྲིན་མེད་མཁའ། །ལོངས་སྐུ་འཇའ་འོད་སྤྲུལ་སྐུ་མེ་ཏོག་འཆར། །དེ་དག་སྐྱེ་བ་ལྔ་ཡི་རིགས་ལྔ་ཡི། །ཞིང་དུ་སྐྱེས་ནས་སངས་རྒྱས་ཐོབ་པའི་རྟགས། །སྤྲུལ་སྐུའི་རྟགས་སུ་སྤྲུལ་པ་སྣང་བ་དང་། །དེ་དག་སྐྱེ་བ་གཅིག་གིས་སྐུ་གསུམ་འགྲུབ། །ཐུགས་ལྗགས་སྤྱན་ཚེམས་ལ་སོགས་འབྱོན་པ་དང་། །ལོངས་སྐུའི་སྐུ་དང་ཕྱག་མཚན་ཡིག་འབྲུ་འབྱོན། །སྤྲུལ་སྐུའི་རྟགས་སུ་རིང་བསྲེལ་ཕྲ་ཞིང་མང་། །དེ་དག་ངེས་པར་བར་དོར་མངོན་སངས་རྒྱས། །ཞེས་
གསུངས་མ་གཅིག་གྲུབ་པའི་རྒྱལ་མོ་ཡིས། །ཐུགས་རྗེ་ཆེན་པོ་རྒྱལ་བ་རྒྱ་མཚོ་ལས། །མཁའ་སྤྱོད་ཁྲིད་པར་བྱེད་ཚེ་རྟགས་དང་འཇའ་འོད་ནི། །སྐུ་གདུང་རིང་བསྲེལ་ཤ་རིལ་འབྱུང་འགྱུར་ཏེ། །ཐེ་ཚོམ་ཡོད་པ་མ་ཡིན་ནོ་ཞེས་གསུངས། །དེ་ལྟར་གཞུང་ནས་བཤད་དང་མཐུན་ཚུལ་ནི། །ཞི་ཁྲོའི་གཞུང་ནས་བཤད་པ་ཇི་ལྟ་བར། །ཐུགས་དམ་འོད་གསལ་ཟིན་པའི་རྟགས་ལ་ནི། །བར་དོ་ལོངས་སྐུ་ཐོབ་པའི་རྟགས་གསུམ་ནི། །ནང་རྟགས་ཤ་བཀྲག་ཡུན་རིང་མ་ཡལ་དང་། །གསང་རྟགས་ཨ་ཡིག་ཧཱུྃ་ཡིག་འབྱོན་པ་དང་། །ཕྱི་རྟགས་ནམ་མཁའ་སྤྲིན་མེད་གཡའ་དག་ནས། །གདུང་རྟེན་མགོ་ཚུགས་སྲོག་ཤིང་ཚུགས་དུས་འབྱུང་། །བར་དོ་ལོངས་སྐུ་ཐོབ་པའི་རྟགས་གསུམ་ནི། །ཕྱི་རྟགས་འཇའ་ནི་ཐུགས་དམ་གྲོལ་ཉིན་འབྱུང་། །ནང་རྟགས་སྐུ་དང་ཡིག་འབྲུ་ཕྱག་མཚན་འབྱོན། །སྤྲུལ་སྐུ་ཐོབ་རྟགས་དབུ་ནི་བུམ་ཧྲིལ་དང་། །རིང་བསྲེལ་སིལ་བུ་གསུམ་བཞི་ཙམ་ཞིག་འབྱོན། །སྤྲུལ་སྐུ་ཞེས་པ་སྐུ་སྐྱེ་མ་ཡིན་ཏེ། །རང་བཞིན་སྤྲུལ་སྐུའི་ཞིང་ཁམས་ཞེས་བྱ་བ། །བདེ་བ་ཅན་དུ་བརྫུས་སྐྱེས་ཡིན་པར་གསུངས། །ཕྱིར་མི་ལྡོག་རྟགས་དུང་དཀར་ཞེས་གསུངས་པ། །
གདུང་རྟེན་བཞག་པའི་མཆོད་བཀྱག་ས་བརྐོས་པར། །རྡོ་ཡི་དུང་དཀར་རྙེད་པར་ཆ་མཐུན་ནོ། །སྤྲུལ་སྐུའི་རྟགས་སུ་སྤྲུལ་པ་སྣང་ཞེས་པ། །བླ་མ་ནམ་མཁར་བྱོན་པ་མཐོང་བ་དང་། །མི་དཀར་ཡར་སོང་ནམ་མཁར་ཡར་མཐོང་བ། །དེ་དག་སྤྲུལ་པ་སྣང་བ་ཞེས་བྱའོ། །གདུང་ནི་བཞུས་ཉིན་མེ་ཏོག་ཆར་པ་དང་། །ཡོན་བདག་དད་ཅན་འགའ་རེས་མཐོང་ཟེར་ཡང་། །ཨེ་བདེན་མི་ཤེས་རང་གིས་མ་མཐོང་ངོ། །མེ་ཏོག་ཆར་བབས་ཟེར་བ་སྨྲ་མི་སྤོབས། །དེ་བཞིན་གསར་མའི་གྲོང་ཁྱེར་སྒྲོལ་འཁོར་ནས། །འཇའ་འོད་ནམ་མཁའ་དྭངས་གསལ་བ། །ངེས་པར་ཐུགས་ཐོབ་རྟགས་སུ་ཡིན། །གདུང་ཚད་ངེས་པ་མེད་པར་གསུངས། །རིང་བསྲེལ་ཕྲ་མོ་མང་པོ་འབྱུང་། །ཞེས་གསུངས་ལུང་འདྲེན་དེ་དག་ལ། །ཤེས་རབ་ཅན་གྱིས་དཔྱད་པ་ན། །ཆོས་ལ་སྤྲོ་བ་བསྐྱེད་པ་ཡིན། །ཆོས་བྱས་མི་འཆི་གསུངས་པ་མེད། །དེ་ནས་ཕྱི་མའི་སྐྱེ་བ་ལུང་བསྟན་ནི། །བླ་མ་ཆོས་དབང་ཀུན་བཟང་དེ་ཉིད་ནི། །མཚམས་ལ་བཞུགས་ནས་ལོ་ངོ་ལྔ་དྲུག་དུས། །ཡིག་འབྲུ་གསལ་པོ་བར་སྣང་ཁམས་སུ་མཐོང་། །བྱ་ལོ་ཨོ་ཚེ་ཕུར་ཧུ་ལུ་རཱི་ཡེ་སྭཱ་ཧཱ། །ཀོང་པོའི་ཡུལ་གྱི་སྟོབས་དང་གཟི་
བརྗིད་ནི། །ཞེས་པའི་གནམ་ཡིག་གསལ་པོར་མཐོང་བ་དང་། །ང་བརྒྱད་ཐུབ་ཅེས་ཟེར་བའི་སྒྲ་ཞིག་ཐོས། །དེ་དོན་བླ་མ་ཉིད་ཀྱང་ཧ་གོ་ནས། །ང་བདེ་བ་ཅན་དུ་ཞྭ་དམར་བ་སངས་མ་རྒྱས་བར་དུ་མི་ཕྱིན་པ་འདྲ་གསུངས་སྐད། ཞྭ་དམར་བ་ནི་བྱམས་པ་ཡིན་པར་བཤད། །བླ་མ་ཆོས་དབང་ཀུན་བཟང་འདས་ནས་ནི། །ཞག་བདུན་ཐུགས་དམ་གྲོལ་བའི་ནུབ་མོ་ལ། །རཱ་ག་ཨ་སྱས་གར་སྐྱེས་བརྟགས་པ་བྱས། །ཉམས་དང་རྨི་ལམ་འདྲེས་པའི་མཚམས་དེ་ལ། །གདུག་རྩུབ་བཙན་དྲག་ཅན་དུ་སྐྱེ། །ཞེས་པའི་སྒྲ་ཞིག་བར་སྣང་ཁམས་ནས་གྲག །ཕར་ལ་བལྟས་པས་གཟིམས་ཁང་ཆེན་པོའི་ནང་། །གོས་འབོལ་ལྔ་དྲུག་བརྩེགས་པའི་ཁྲི་ཡི་སྟེང་། །གོས་ཆེན་སེར་པོའི་བེར་གཉིས་སྟོང་པར་གདའ། །བླ་མ་ཆོས་དབང་ཀུན་བཟང་སྐྱེ་བ་ནི། །ཁྲི་འདིའི་བདག་པོ་འོང་རྒྱུ་རེད་དོ་བསམ། །ང་རང་ཡིད་ཀྱིས་གསལ་པོར་ཤེས་པར་བྱུང་། །གོང་གིས་སྔགས་དེའི་དོན་ཅི་ཞེ་ན། །ཨོ་ཞེས་བྱ་བ་བཀྲ་ཤིས་པའི་དོན། །ཚེ་ཕུར་ཞེས་པ་ཚེ་ཕུར་སྲོག་ཕུར་ཏེ། །བྱིས་སྦ་དེ་ནི་མི་འཆི་ཚར་ཐུབ་བོ། །ཧུ་ལུ་ཞེས་པ་བོད་སྐད་ཞུགས་ཅིག་ཡིན། །རྣོ་ཡེ་ཞེས་པ་མི་ཡི་སྙིང་པོ་སྟེ། །སྭཱ་ཧཱ་
ཞེས་པ་གཞི་ཚུགས་ཟེར་བར་འཇུག །བྱ་ལོ་ཞེས་པ་བྱ་ཡི་ལོ་པར་སྐྱེ། །ང་བརྒྱད་ཐུབ་ཅེས་བྱ་བ་དེ་བར་དུ། །བར་ཆད་མེད་པར་ངེས་པར་ལུང་བསྟན་ཏོ། །དེ་ནས་དེ་དོན་རྒྱས་པར་བཀྲོལ་བ་ནི། །བླ་མ་ཆོས་དབང་ཀུན་བཟང་དེ་ཉིད་ནི། །གུ་དྲག་ལ་སོགས་དྲག་པོའི་བསྒྲུབས་པ་ཐེམ། །ཅི་ཐུབ་ཅི་ནུས་ལྷ་བྲི་རྟེན་བཞེངས་བྱས། །སངས་རྒྱས་བསྟན་དང་བླ་མའི་ཆོས་ལུགས་ལ། །ཞེན་ཆེ་རུས་ཆེ་དད་པ་ཆེ་བ་དང་། །ཚེ་འདིར་བསྟན་པའི་ཆག་ཕྱི་འགྲོ་བའི་དོན། །བྱེད་བསམ་བྱེད་འདོད་མང་སྟེ་ལོང་མ་བྱུང་། །དེ་དག་རྣམས་ལ་སེམས་ཐོག་ཡོད་པ་དང་། །ཚེ་རབས་སྔ་མར་བླ་དྲག་གདུག་རྩུབ་ཅན། །ལན་གཉིས་སྐྱེས་པའི་རྒྱུ་མཐུན་འབྲས་བུ་ཡིན། །ཀོང་པོའི་ཡུལ་དུ་བླ་བརྒྱུད་དམ་དཔོན་གྱི་རྒྱུད། །རྟ་ལོར་འདས་ནས་རྟ་ལོ་ལུག་ལོ་གཉིས། །ལུས་མི་ལེན་པར་ཟངས་མདོག་དཔལ་རི་དང་། །ཨོ་རྒྱན་ཡུལ་སོགས་དཔའ་བོ་མཁའ་འགྲོ་ཡི། །ཚོགས་གྲལ་འགྲིམ་ནས་སྤྲེལ་ལོར་ལྷུམས་སུ་ཞུགས། །བྱ་ལོ་ཤར་མ་ཐག་ཏུ་སྐུ་འཁྲུངས་ཏེ། །ན་སོར་ཕྱིན་ནས་བླ་མ་མཁས་པར་འགྱུར། །དགོན་སྡེ་ཆེན་པོའི་སྡེ་བདག་བླ་མར་འགྱུར། །ཁྲིམས་ཁ་ཚ་ཞིང་བཙན་དྲག་གདུག་རྩུབ་ཆེ། །སྡེ་
མཚམས་རྣམས་སུ་དམག་ཇག་དམོད་མོ་སྣང་། །མངའ་འོག་མནར་ཆེ་ལྐོག་ཏུ་འབར་ཤ་སྡིར། །དགུང་ལོ་ཡང་ནི་ལྔ་ཅུ་ང་བརྒྱད་ཐུབ། །དེ་རུ་སྐྱེས་ན་བྱམས་པ་མ་བྱོན་པར། །མི་ནས་མིར་སྐྱེ་དགེ་སྡིག་གཉིས་ཀ་ལས། །ཚབས་ཆེན་བསགས་ཤིང་སྐྱེ་རྒས་ན་འཆི་མྱོང་། །བྱམས་པའི་བསྟན་ལ་བྱམས་པ་ཞལ་མཇལ་ནས། །ཆོས་ཐོས་དེ་ནས་བདེ་བ་ཅན་དུ་སྐྱེ། །བདག་ལ་མངོན་པར་ཤེས་པ་མི་ལྡན་ཡང་། །འདས་གསོན་མཆེད་གཉིས་སྔ་ཕྱིར་བྱུང་བ་ཡིས། །ཡི་དམ་ལྷ་ཡི་ལུང་བསྟན་དཔྱད་པས་གོ །དེ་ཡང་གཞན་གྱིས་ལུགས་ལ་བཟང་པོ་སྟེ། །ས་ཐོབ་བྱང་ཆུབ་སེམས་དཔའ་རྣམས་ལ་ནི། །སྐྱེ་རྒས་ན་འཆི་འཁོར་བའི་སྡུག་བསྔལ་ནི། །རྨི་ལམ་སྒྱུ་མར་རིག་པས་མི་སྐྲག་སྟེ། །འགྲོ་བའི་དོན་ལ་བསམས་ཤིང་མི་ལུས་ལེན། །ས་ཐོབ་མིན་པས་མི་ལུས་གྲངས་མང་ན། །སྡིག་པ་བསགས་པས་ངན་སོང་འགྲོ་ཉེན་ཆེ། །སྐྱེ་འཆིའི་ཕྲེང་བ་གྲངས་བགྲང་སུ་མི་ནུས། །དེ་བས་སྡུག་བསྔལ་ཀུན་བྲལ་བདེ་བའི་ཡུལ། །བདེ་བ་ཅན་དུ་མ་སྐྱེས་བློ་མི་བདེ། །བསམས་ནས་དགོངས་རྫོགས་དགེ་བ་བསྒྲུབས་པ་ལ། །ཁྲབ་དགུ་དྲེལ་བརྒྱད་རྟ་ནི་དྲུག་ཅུ་ལྔ། །རྒྱུ་ཡི་དངོས་པོ་
མཐོ་ཐོག་ཕལ་ཆེར་བཏང་། །མཆོད་ཆ་དཔེ་ཆ་གསེར་སྐུ་སྒར་ཆས་ཀྱང་། །ཤི་གསོན་ནོར་བགོས་འདྲ་བ་བྱས་ནས་བཏང་། །རྒྱལ་བ་རྒྱ་མཚོ་སྟོང་ཆོག་ལྷག་ངེས་དང་། །ཀུན་རིག་ཞི་ཁྲོ་མ་ཎི་བུམ་སྒྲུབ་དང་། །རི་བཤུ་མང་ཇ་གདུང་རྟེན་བཞེངས་གྲབས་སོགས། །དཔའ་རྩལ་བསྒྲུབས་ནས་བློ་མཉམ་དགོངས་རྫོགས་འགྲུབ། །དེ་ནས་དགེ་བ་ཐམས་ཅད་གཅིག་བསྡུས་ཏེ། །དམྱལ་བ་ཡི་དྭགས་དུད་འགྲོ་ལྷ་མ་ཡིན། །མི་དང་ལྷ་རུ་སྐྱེ་བའི་སྒོ་ཆོད་ནས། །སྐྱེ་བ་གཞན་གྱིས་བར་མཚམས་མི་ཆོད་པར། །བདེ་བ་ཅན་དུ་མྱུར་དུ་སྐྱེ་བ་ཡི། །བསྔོ་བ་སྨོན་ལམ་གནས་པར་དམིགས་པ་གཟབ། །ཐུགས་དམ་གྲོལ་ནས་ཞག་གཅིག་སོང་ཙམ་ནས། །ཉམས་དང་རྨི་ལམ་འདྲེས་པའི་སྣང་བ་ལ། །བདག་གི་དྲུང་དེར་ཆོས་དབང་ཀུན་བཟང་གིས། །དཀར་ཡོལ་ནང་དུ་ཆང་ཞིག་གསོལ་ཞིང་གདའ། །འདས་ཁ་གསོལ་འདོད་ཆེ་ཡང་གསོལ་ས་མེད། །སེམས་ཐོག་རེད་བསམ་ཕྱིར་ནངས་ཚོགས་འཁོར་བྱས། །ཞག་པོ་གཉིས་གསུམ་ཚོགས་ཆང་འདོད་ཡོན་བསྔོས། །དེ་སྐོར་གདུང་མཇལ་གདུང་འབུལ་འགའ་བྱུང་སྐབས། །ཁོང་རང་ལུས་ནི་ཅི་ཡང་མ་མཐོང་སྟེ། །གདུང་འབུལ་འདི་ཚོ་ལ་བསྔོ་བ་
གཅིག་དགོས་ལེ་གདའ། །ཟེར་བའི་སྒྲ་ཞིག་ཉམས་ཀྱི་སྐབས་སུ་ཐོས། །དེ་ནས་གདུང་འབུལ་བྱས་པ་ཐམས་ཅད་དང་། །རྒྱུ་བ་རོགས་ལྡན་མེ་ཤིང་ཆུ་ལེན་སོགས། །འཕྲལ་དུ་བླ་མའི་དགོངས་པ་རྫོགས་པ་དང་། །ཕུགས་སུ་རང་རང་སོ་སོ་འཆི་བའི་ཚེ། །བདེ་བ་ཅན་དུ་སྐྱེ་བའི་སྨོན་ལམ་གཟབ། །གདུང་བཞུས་ནུབ་པར་ཉམས་ཀྱི་སྣང་བ་ལ། །དབུ་བུམ་ཧྲིལ་ཡོད། ཟེར་བའི་སྒྲ་ཞིག་གྲག་པ་དེ་ལྟར་གདའ། །དེ་ནས་གནམ་གང་བདུན་ཕྲག་གཉིས་ཀྱི་ནུབ། །ཆོས་དབང་རྣམ་ཤེས་གར་སོང་བརྟོགས་པ་བྱས། །མ་ཟད་མེས་ན་བསྡད་ནས་གདའ། །ཟེར་བའི་སྒྲ་ཞིག་ཉམས་ཀྱི་སྐབས་ལ་ཐོས། །དད་ཞན་ཆེ་ཕྱིར་མ་ཟད་འཇང་ཡུལ་དུ། །རྒྱལ་བ་ཡབ་སྲས་མདུན་དུ་རྣམ་ཤེས་འཁོར། །དེ་རུ་ཡུན་རིང་ཡེངས་ན་མི་ཡི་ལུས། །ལེན་དོགས་ཉིན་བཞིན་བདེན་བདར་རྣམ་ཤེས་བཀུག །བླ་མ་ཆོས་ལུགས་རྣམས་ལ་མ་ཆགས་ཤིག །རྒྱལ་བ་ཡབ་སྲས་འཇང་ན་བཞུགས་པ་དེ། །དངོས་ནི་མ་ཡིན་སྤྲུལ་པ་ཙམ་དུ་ཡིན། །དངོས་དེ་བདེ་བ་ཅན་དུ་བཞུགས་ནི་ཡོད། །འཛམ་གླིང་འདི་རུ་དུས་ངན་སྙིགས་མར་ཐུག །ཚེ་ཐུང་ནད་མང་བར་ཆད་རྐྱེན་ངན་མང་། །
བསྟན་པ་ཡར་ལ་མི་དར་ནུབ་ལ་ཁད། །བསྟན་པའི་ཆག་ཕྱི་འགྲོ་དོན་འོང་དུས་མིན། །ངེད་ཅག་གསོན་པོ་རྣམས་ཀྱང་མི་རྟག་སྟེ། །ཁྱེད་རང་ལྟར་དུ་མྱུར་དུ་འཆི་རན་པས། །ཅི་དང་གང་ལའང་མ་ཆགས་མ་ཞེན་པར། །བདེ་བ་ཅན་དུ་ད་ལྟ་མྱུར་དུ་བྱོན། །བར་དོ་འདི་ན་འདུག་ཡུན་རིང་བ་ན། །འཁྲུལ་སྣང་མང་ཞིང་ཚེ་སྔོན་ལས་ངན་སྙགས། །ངན་སོང་ཐར་མེད་གནས་སུ་ལྟུང་ཉེན་ཡོད། །དེ་བས་མ་ཡེངས་བདེ་བ་ཅན་དུ་བྱོན། །འོད་དཔག་མེད་པ་སྙིང་ལ་དུང་ངེ་སྒོམས། །ཞིང་ཁམས་དེ་རུ་སྐྱེ་བ་ལེན་ཐུབ་ན། །དེ་ནས་སྡུག་བསྔལ་མེད་ཅིང་ལྷུང་དོགས་མེད། །ང་དང་གྲྭ་སློབ་རྣམས་ལ་སེམས་མ་ཆགས། །རྫུ་འཕྲུལ་སྟོབས་ཀྱིས་འབྱོན་ནས་ལྟ་བས་ཆོག །རྔ་ཡབ་གླིང་གི་སྤྲུལ་སྐུ་ཨོ་རྒྱན་དང་། །ཡབ་སྲས་སོགས་ལ་མཇལ་དུ་འོང་བས་ཆོག །དེ་ཕྱིར་དང་པོ་བདེ་བ་ཅན་དུ་གཤེགས། །དེ་དོན་ངོ་སྤྲོད་རྒྱས་པ་ཡང་ཡང་དང་། །དམིགས་པའི་སྒོ་ནས་ཞིང་དེར་ཡང་ཡང་འཕངས། །དེ་ནས་བུམ་བསྒྲུབས་ཚུགས་ནས་ཞག་བདུན་སོང་། །གསང་འདུས་རིགས་དྲུག་གནས་འདྲེན་རྒྱས་པ་བྱས། །བདུན་ཚིགས་གསུམ་པ་ཚེས་བདུན་ནུབ་མོ་ལ། །ཆོས་དབང་རྣམ་ཤེས་གར་སོང་
བརྟགས་པ་བྱས། །ཉམས་དང་རྨི་ལམ་འདྲེས་པའི་སོ་མཚམས་ལ། །བཅོམ་ལྡན་སྣང་བ་མཐའ་ཡས་ལམ་སྣ་དྲོངས། །དོན་ཡོད་གྲུབ་པ་ཞེས་པའི་སྒྲ་ཞིག་བར་སྣང་ཁམས་ནས་གྲག །དེ་ནས་བློ་བདེ་ལམ་སྣ་ཟིན་ཟི་སམ། །དེ་ནས་བདུན་ཚིགས་བཞི་པ་བཅུ་བཞིའི་ཉིན། །ཞི་ཁྲོ་བླུགས་ནས་རིགས་དྲུག་གནས་འདྲེན་དང་། །བྱང་བུ་ཡང་ནི་དེ་ཉིན་བཞུ་བར་བྱས། །དེ་ནུབ་ཆོས་དབང་ཀུན་བཟང་གར་སྐྱེས་བརྟགས། །ཉམས་དང་རྨི་ལམ་འདྲེས་པའི་ས་མཚམས་ལ། །བདེ་བ་ཅན་དུ་སོང་ཚར། ད་ནི་བར་དོ་ན་མེད། ཟེར་བའི་ལུང་བསྟན་ཚིག་གཉིས་གསལ་བར་ཐོས། །ལུང་བསྟན་དེ་དག་བྱེད་མཁན་སུ་ཞེ་ན། །སྤྱན་རས་གཟིགས་དང་འཇམ་དབྱངས་གཉིས་པོ་ནི། །གང་རུང་ཡིན་གྱི་གཞན་ནི་མིན་ངེས་པའི། །རྒྱུ་མཚན་ཡོད་དེ་བཤད་ནི་མི་རུང་ངོ། །བླ་མ་ཆོས་དབང་ཀུན་བཟང་ཁོ་རང་ཡང་། །འདས་རྒྱུའི་ལོ་ནི་གཉིས་གསུམ་གོང་ཙམ་ནས། །བདེ་བ་ཅན་དུ་སྐྱེ་འདོད་ལྷག་པར་ཆེ། །བདེ་སྨོན་རིགས་གཉིས་ཚིག་མེད་བསྔོ་བའང་མཛད། །དེ་དུས་བར་སྣང་གནམ་ཡིག་དོད་པ་ལ། །ཚེའི་རིག་འཛིན་ཞེས་པ་གསལ་པོ་མཐོང་ནས་འདུག་པ་དང་། ཞི་བ་ལྷུན་
གྲུབ་རྒྱས་པ་ཐོད་ཕྲེང་རྩལ། །ཞེས་པའི་ལུང་བསྟན་སྒྲ་ཞིག་ཐོས་འདུག་པས། །འདས་ཁའི་མཚམས་སྦྱོར་བཟང་ཞིང་འདས་མཆོད་དང་། །ངོ་སྤྲོད་གསལ་འདེབས་རྟེན་འབྲེལ་ལེགས་འགྲིགས་ན། །བདེ་བ་ཅན་དུ་སྐྱེ་ཡང་ཐུབ་སྲིད་དེ། །དེ་རུ་སྐྱེས་ནས་འཆི་བ་མེད་པའི་ཕྱིར། །ཚེ་ཡི་རིག་འཛིན་ཟེར་བ་དེ་ཡིན་ལ། །དེ་རུ་སྐྱེས་ན་ཉོན་མོངས་དུག་ལྔ་ཞི། །ནད་དང་སྡུག་བསྔལ་ཀུན་ཞི་གཅིག་ཀྱང་མེད། །ཞི་བ་ལྷུན་གྱིས་གྲུབ་པ་དེ་ཡིན་ལ། །མངོན་ཤེས་ལྔ་ལྡན་རྫུ་འཕྲུལ་ཐོགས་པ་མེད། །ས་ལམ་ཡོན་ཏན་ཡེ་ཤེས་རིམ་པར་རྒྱས། །དཔེར་ན་པདྨ་ཐོད་ཕྲེང་རྩལ་དང་མཚུངས། །ཨོ་རྒྱན་དང་མཚུངས་པདྨའི་སྦུབས་ནས་འཁྲུངས། །རྒྱས་པ་ཐོད་ཕྲེང་རྩལ་ཞེས་དེ་ཡི་དོན། །དེ་ལྟར་བརྟག་པ་གསལ་བས་སེམས་བདེ་ཡང་། །བདེ་བ་ཅན་དུ་སྐྱེ་རྒྱུའི་གང་ཟག་དེས། །མི་སྐྱེ་དོགས་ཀྱིས་ཐེ་ཚོམ་ཆེ་བ་ན། །མེ་ཏོག་པདྨའི་སྦུབས་སུ་སྐྱེས་ཚར་ཡང་། །ལོ་གྲངས་ལྔ་བརྒྱར་མེ་ཏོག་ཁ་མི་བྱེ། །མེ་ཏོག་ནང་དེར་བདེ་སྐྱིད་ཕུན་སུམ་ཚོགས། །བདེ་བ་ཅན་དུ་པདྨའི་སྦྱབས་ཞུགས་ཀྱང་། །སངས་རྒྱས་གསུང་ཐོས་ཆོས་ནི་ཐོས་ན་ཡང་། །ཞལ་མ་མཐོང་བས་ཡིད་སེམས་མི་དགའ་བ། །འབྱུང་བར་
བཤད་པ་དེ་འདྲ་འོང་དོགས་ནས། །བདུན་ཕྲག་ལྔ་པ་ཉི་ཤུ་གཅིག་ཉིན་ལ། །ཐུགས་སྒྲུབ་རིགས་དྲུག་གནས་འདྲེན་བྱས་ནས་བརྟགས། །དེ་ནུབ་ཧ་ཀྱང་གསལ་པོར་མ་བྱུང་སྟེ། །སྔོན་ཚེ་རང་གིས་མཐོང་ཐོས་མེད་པ་ཡི། །བདེ་བ་ཅན་གྱི་སྨོན་ལམ་མང་པོ་ཞིག །བདག་གིས་རྨི་ལམ་ཡུལ་དུ་བཏོན་པ་རྨིས། །བདེ་བ་ཅན་དུ་པདྨའི་སྦུབས་ཞུགས་ཀྱང་། །དེ་རུ་སྐྱེ་བ་ལེན་ཡང་མ་ཚར་བསམ། །བདེ་སྨོན་རིགས་གཉིས་ཐུགས་དམ་བསྔོ་བ་གཟབ། །དེ་ནས་བདུན་ཕྲག་དྲུག་པ་ཉེར་བརྒྱད་ཉིན། །དགོངས་འདུས་ལུགས་ཀྱི་བྱང་བུ་ཕྱིར་ལྡོག་བྱས། །དེ་ནུབ་བརྟགས་པ་བྱས་པའི་ཉམས་སྣང་ལ། །ད་རུང་དཀོར་སྒྲིབ་དང་སྒྲིབ་པ་གཅིག་གདའ། །ཞེས་པའི་ལུང་བསྟན་སྒྲ་ཞིག་གསལ་པོར་ཐོས། །དེ་ནས་སྒྲིབ་སྦྱང་མི་འཁྲུགས་པ་ལྷག་པས། །བདུན་ཕྲག་རྗེས་མའི་རིགས་ལ་དེ་རང་བྱས། །ཚེས་ལྔ་དགོངས་ཞག་ཚང་བའི་ཉིན་པར་ལ། །གྲྭ་མང་ཞི་ཁྲོ་བླུགས་ཤིང་རང་ཉིད་ཀྱིས། །དགོངས་རྫོགས་ལ་དམིགས་ཐུགས་རྗེ་ཆེན་པོ་ནི། །ཕྱག་སྟོང་སྤྱན་སྟོང་སྒྲུབ་པ་འཇའ་ཚོན་ལུགས། །བྱས་ནས་ཞག་པོ་ཉེར་གཅིག་ཚང་བའི་ཕྱིར། །དེ་ཡི་སྒོ་ནས་བྱང་བུ་བཞུས་ནས་ཀྱང་། །
དེ་ནུབ་བརྟགས་པས་རྟོགས་ནི་ཅི་ཡང་མེད། །ཕྱིར་ནངས་ནམ་ལངས་ཞོགས་ཇ་བཏུང་བའི་རྗེས། །གཉིད་པ་མ་ཡིན་ཉམས་ཀྱི་སྣང་བ་ལ། །དང་པོར་བར་སྣང་གནམ་ཡིག་མང་པོ་དོད། །དེ་ནས་མི་སྣང་ལུང་བསྟན་ཚིག་འདི་ནི། །ཤིན་ཏུ་གསལ་བ་རྣ་བས་ཐོས་པ་བྱུང་། །མེ་ཏོག་པདྨའི་སྦུབས་ན་སྐྱེས་ཚར་ནས། །དེ་རིང་སངས་རྒྱས་འོད་དཔག་མེད་དང་མཇལ། །དེ་སྐད་ཐོས་པས་འདས་པའི་སེམས་ནད་སངས། །དེ་ནས་དགོངས་ཞག་ཚར་ནས་ཞག་པོ་གཉིས། །ཚེས་དྲུག་ནུབ་པར་ཉམས་ཀྱི་སྣང་བ་ལ། །བླ་མ་ཆོས་དབང་ཀུན་བཟང་དེ་ཉིད་ནི། །མ་འདས་མ་བསྙུངས་དུས་དང་འདྲ་བ་ཡིས། །གོས་བཅས་ཞལ་ངོ་ཆོས་དབང་ཁོང་རང་དངོས། །ང་ཡི་མདུན་དེར་མངོན་སུམ་བཞིན་དུ་གདའ། །ཆོས་དབང་འདིས་ཚར་གདུང་ཡང་བཞུས་ཚར་དྲན། །ཡིད་མ་ཆེས་ནས་ཁྱེད་སུ་ཡིན་ཞེས་སྨྲས། །ང་ནི་ཆོས་དབང་ཀུན་བཟང་གི་བླ་ཡིན་ཟེར། །ཁྱོད་ག་ན་འདུག་ལེ་ཡིན་སྨྲས་པས། ང་ཤོད་ན་ཉལ་ཟེར། དེ་སྔ་བླ་དེ་ང་ཡི་མཚམས་ཁང་ན་ཡོད་ཟི་བསམ། །ཆོས་དབང་ཀུན་བཟང་གི་རྣམ་ཤེས་གར་ཡོད་སྨྲས་པས། བདེ་བ་ཅན་ན་ཐལ་ཟེར། འཇམ་པའི་དབྱངས་ཀྱིས་
གསུངས་པའི་རྒྱ་ནག་རྩིས་གཞུང་ལས། །སྤྱིར་ནི་མི་ལ་བླ་སྲོག་རྣམ་ཤེས་གསུམ། །སྲོག་ནི་གཤེད་མ་འདྲེ་ཡིས་བཅད་པའི་དུས། །རྣམ་པར་ཤེས་པ་ལས་ཀྱི་རྗེས་སུ་འབྲངས། །བླ་ནི་དུར་ས་དཀར་རྩི་དེ་ལ་འཁོར། །དུར་ས་བཟང་ན་བླ་དགའ་མགོན་སྐྱོབ་ནུས། །དུར་ས་ཡིན་ན་བླ་རྒུད་ན་ཚ་འོང་། །ཕ་མཚུན་མཆོད་པའང་བླ་དེ་མཆོད་པ་ཡིན། །ཚེ་འདས་རྨིས་ན་ལེགས་པོ་འོང་བ་རྣམས། །བླ་དེ་ཡིན་གྱི་ཚེ་འདས་དངོས་མིན་གསུངས། །དཀར་རྩི་ཐལ་སོལ་ནང་གཞུག་བྱས་པ་འདིས། །བླ་ནི་མཆོད་ཁང་ཉིད་ལ་འཁོར་འོངས་པས། །བླ་ནི་རྨིས་གྲངས་མང་ན་འོངས་སྲིད་དེ། །བླ་ཡིན་བླ་མ་མིན་པར་ཤེས་པར་གྱིས། །ཚེ་འཕོས་ཇི་ལྟར་འབྱུང་བའི་མདོ་སྡེ་ལས། །དྲི་ཟ་པི་ཤ་ཙི་དང་ཁྱབ་བྱེད་དང་། །གནོད་སྦྱིན་ཝ་ར་ཧི་དང་རྟོགས་འདོད་དང་། །ཟ་འདྲེའི་འཆི་ཁ་དེ་ཡི་དབུགས་ལེན་ནི། །རོ་དེ་བདག་བཟུང་དེ་ནས་ཚེ་འདས་དེ། །ལུས་པོ་མངོན་སུམ་འདྲ་བའི་ལུས་བཟུང་ནས། །ཆ་འཕྲིན་བསྐུར་ཞིང་གསོན་དུས་གང་བྱས་དང་། །རྒྱུ་དང་སེ་ར་གར་ཡོད་ཅི་སྨྲས་སོགས། །དན་ཏིག་ཅན་གྱི་ཕྱི་འཕྲེང་བཀུར་བ་ནི། །ཕལ་ཆེར་ཟ་འདྲེ་དེ་དག་བསླུ་བ་
སྟེ། །ཚེ་འདས་རྣམ་ཤེས་མིན་པར་ཐུབ་པས་གསུངས། །དེ་ཕྱིར་རང་གྲོལ་ཤི་ལོག་ལ་སོགས་ཀྱིས། །ཆ་ཕྲིན་ཐེབས་སོ་ཟེར་ཡང་ཡིད་མི་གཏད། །ལ་ལས་སྐུ་སྐྱེ་ཨེ་ཡོང་ཟེར་རོ་སྐད། །ས་ཐོབ་ན་ནི་དངོས་དེ་ཞིང་ཁམས་བཞུགས། །འགྲོ་བའི་དོན་ལ་སྤྲུལ་པ་འབྱོན་པ་སྟེ། །ས་ཐོབ་པ་ལ་ཡུན་རིང་ཐོག་གམ་སྙམ། །སྤྲུལ་པ་མིན་པའི་སྐུ་སྐྱེ་འབྱོན་དོགས་ན། །དགོངས་རྫོགས་གང་དྲག་བྱས་པ་གོང་དུ་གསལ། །ཆོས་དབང་འདས་ནས་ཟླ་ངོ་དྲུག་པའི་དུས། །ཀརྨ་སྐྱབས་ཀྱིས་ད་རུང་ཆོས་དབང་ཉིད། །བདེ་བ་ཅན་དུ་སྐྱེ་ངེས་ཡིན་ནམ་མིན། །ད་རུང་ལན་གཅིག་བརྟག་པ་བྱེད་དགོས་ཟེར། །ཆུ་སྟོད་ཟླ་བའི་ཡར་ངོའི་ཚེས་པ་བཞི། །ཐུབ་པས་ཆོས་འཁོར་བསྐོར་བའི་དུས་ཆེན་ཉིད། །བདེ་བ་ཅན་དུ་སྐྱེ་ངེས་ཡིན་ནམ་མིན། །དུས་མཆོད་ཐམས་ཅད་ཤིན་ཏུ་རྒྱས་པར་བྱས། །བླ་མ་ཆོས་དབང་ཀུན་བཟང་རྣམ་ཤེས་དེ། །གང་དུ་སྐྱེ་ཞེས་བརྟག་པའི་གདམས་པ་བྱས། །ཡི་དམ་ལྷ་ལ་གསོལ་བ་དྲག་ཏུ་བཏབ། །དེ་ནུབ་རྨི་ལམ་ཅི་ཡང་མ་བྱུང་སྟེ། །ཕྱིར་ནངས་ཉམས་ཀྱི་སྣང་བར་རྨི་ལམ་མིན། །མདུན་གྱི་བར་སྣང་ཡི་གེ་ཕྲེང་གཅིག་དོད། །ཆོས་དབང་བདེ་བ་ཅན་དུ་སྐྱེས་ནས་ཟླ་བ་
གསུམ་ལྷག་ཙམ་རེད། ཟེར་བའི་ཡི་གེ་གསལ་བར་མཐོང་ན་ཡང་། །དངོས་མིན་ཉམས་སྣང་ཡིན་པས་ཡིད་མ་ཆེས། །ཞོགས་ཇ་འཐུང་ནས་མགོ་ནི་བཏུམ་ནི་བསྡད། །ཉམས་དང་རྨི་ལམ་མ་ཡིན་མངོན་སུམ་དུ། །ཆོས་དབང་ཀུན་བཟང་བདེ་བ་ཅན་དུ་སྐྱེས་ངེས་ཐག་ཆོད་ཡིན། ཟེར་བའི་སྒྲ་ཞིག་བར་སྣང་ཁམས་ནས་གྲག །འདི་རྣམས་ཡི་དམ་ལྷ་ལ་གསོལ་བཏབ་ཅིང་། །གསར་རྙིང་རྒྱུད་སྡེ་ཀུན་ནས་གསུངས་པ་ཡི། །སྐྱེ་བ་བརྟག་པ་ཞེས་བྱའི་ལས་ཚོགས་ཏེ། །ཡི་དམ་ལྷ་ཡི་ལས་ཚོགས་ཡིན་མོད་ཀྱིས། །རང་གི་རྨི་ལམ་དང་ནི་མཐོང་བ་དང་། །ལྷབ་ཁ་མིན་ཞིང་མངོན་ཤེས་ཡོད་པ་མིན། །དེ་ཡིས་སྤྱི་དོན་ཕྱི་མའི་ལུང་བསྟན་རྫོགས། །སྤྱི་དོན་ས་བཅད་ལེའུ་དྲུག་པའོ།། །།དེ་ནས་ཆོས་ཀྱི་ཕན་ཡོན་བཤད་པ་ནི། །བདག་གི་བུ་ཆེན་བླ་མ་ཕྲིན་ལས་ལ། །ཨ་མ་ཆོས་སྐྱོང་སྐྱིད་ནི་ཉེ་ཆེ་བས། །འདི་ལྟར་རྒྱུན་དུ་མ་བྱོན་མཚམས་ལའང་བཞུགས། །ཞུས་པའི་དོན་ལ་ཀུ་རེ་ཡིན་སྲིད་དེ། །ཁུང་ནང་འཛུལ་ནས་བསྡད་པའི་མཐའ་འདི་ཡིན། །བླ་མ་ཆེ་བའང་མཚམས་གྲོལ་འགྲོ་དོན་གྱིས། །མཚམས་ལ་འདུག་ནས་ཅི་བྱེད་ཟེར་ནས་བྱོན། །དེ་བཞིན་སློབ་
མ་གྲྭ་པ་ཕལ་ཆེར་ཡང་། །ལ་ལས་བསམ་ཞིང་ལ་ལས་ངག་ནས་བཏོན། །བླ་མ་ཆོས་དབང་ཀུན་བཟང་ཞིང་གཤེགས་དེས། །ཚེ་སྒྲུབ་ལོ་བཞུགས་བྱས་ཤིང་རྒྱུན་དུ་བསྙེན། །ཚེ་དབང་སྔ་ཕྱིར་སྟོང་ཡང་ཨེ་མི་སོང་། །ཚེ་དཔག་སྟོང་སྐུ་ཚེ་ཐར་ཚེ་འབར་བཙུགས། །དེ་ཡིས་མ་ཕན་ཚེ་སྒྲུབ་རྫུན་དུ་གདའོ། །གུར་དྲག་པོད་གཞུང་ཡོངས་རྫོགས་བསྒྲུབས་པ་ཐེམ། །ཁྲོ་ཆུ་སེང་གདོང་ནཱ་ག་རཀྵ་དང་། །ཁྱུང་དམར་ལ་སོགས་བསྙེན་སྒྲུབ་ཚད་དུ་ལོང་། །ཚེས་བཅུ་དགུ་གཏོར་མདོས་བཟློག་རྒྱུན་བསྙེན་རེམ། །སྲུང་ཟློག་རླུང་འཁོར་ཆུ་འཁོར་སྲུང་འཁོར་མང་། །མང་ཇ་རི་བཤུ་གསུང་རབ་དེ་ཙམ་བཏོན། །སྲུང་ཟློག་རིམ་གྲོ་ཟེར་བ་རྫུན་དུ་གདའ། །མཚམས་དང་སྒྲུབ་པ་ཉམས་ལེན་དེ་ཙམ་བཟང་། །གཏོར་མ་སུ་རུ་པ་ལ་དེ་ཙམ་བཏང་། །ཚེ་ཐུང་ནད་མང་འདས་ཁ་ཆུ་མ་ཐར། །ཆོས་ཀྱི་ཕན་ཡོན་བཤད་པ་རྫུན་དུ་གདའ། །རྒྱུན་དུ་བསྐང་གསོ་གསོལ་ཀ་དེ་ཙམ་གཟབ། །བཀྲ་མི་ཤིས་པར་གཅིག་རྗེས་གཅིག་མ་བསླེབས། །བཀའ་སྲུང་ཆོས་སྐྱོང་མགོན་སྐྱོབ་རྫུན་དུ་གདའ། །སྡིག་ལ་བརྩོན་ཞིང་གསང་ཐུབ་ཙམ་མེད་པ། །ཕལ་ཆེར་ཚེ་རིང་ནད་མེད་བདེ་བར་གདའ། །དྲག་ལུ་འདས་དུས་
ས་རྩིས་གསུང་རིམ་གཟབ། །དགོངས་ཞག་ཚར་ལོང་མེད་པར་ན་ཚ་བརྒྱུད། །གཏོ་རྩིས་སྲུང་རིམ་ཟེར་བ་རྫུན་དུ་གདའ། །ལྷ་རྗེས་རྩ་ཆུ་ཇེ་བདེ་ཇེ་ཡག་ཟེར། །མོ་མ་ཀུན་གྱིས་མི་འདས་ཁག་ཁུར་ཟེར། །རྩ་ཆུ་མོ་པྲའི་རྟེན་འབྲེལ་རྫུན་དུ་གདའ། །སྔར་ནས་དབང་བསྐུར་རྩིས་ན་ཁྲི་ཚོ་ལྷག །འདས་ཁ་དབང་ནི་སྟོང་དང་གཅིག་བརྒྱ་སོང་། །དབང་གིས་བར་ཆད་སེལ་བ་རྫུན་དུ་གདའ། །གསར་རྙིང་འཆི་བསླུ་རིགས་གསུམ་གྲིབ་སེལ་གསུམ། །རྟེན་འབྲེལ་བཅོས་ཀ་མ་བྱས་གཅིག་ཀྱང་མེད། །སུན་བཟློག་གསུམ་སོགས་ཟབ་ཁྱད་རྫུན་དུ་གདའ། །བསྙུང་གྲངས་མང་དུ་བསྡུས་པའི་གསོལ་ལྷག་སྨན། །སྡེར་མ་ཆེན་པོར་བླུགས་པས་ཕྱུར་གྱིས་གང་། །སྨན་གྱིས་ནད་ཕན་ཟེར་བ་རྫུན་དུ་གདའ། །རྐྱེན་བཟློག་ཕན་ཡོན་གཅིག་ཀྱང་མི་བདེན་ལྟར། །ཕྱི་མའི་ཕན་ཡོན་འདི་དང་མི་འདྲའམ། །བསམས་ཤིང་སྡུག་དྲག་ཡི་མུག་ག་ཆད་ནས། །ཆོས་དང་དཀོན་མཆོག་ལྷ་དང་སྲུང་མ་ལ། །རེ་འཁང་ཆེན་པོའི་ལོག་ལྟ་སེམས་ལ་ཞུགས། །དགའ་རབ་དབང་ཕྱུག་དངོས་སུ་ཕྱིན་པ་འདྲ། །ལོག་ལྟ་འདི་ནི་མི་དགེ་བཅུ་ཡི་ནང་། །ལྗིད་ཤོས་བཙོག་ཤོས་ཡིན་ཏེ་བར་ཆད་ཆེ། །
མི་དགེ་བཅུ་པོ་གཞན་རྣམས་ཚབ་ཆེ་ཡང་། །དཀོན་མཆོག་གསུམ་ལ་དད་ན་བཤགས་པར་སླ། །དཀོན་མཆོག་བློ་ལོག་སྡིག་པ་བཤགས་ཐབས་མེད། །ཆོས་ལ་བློ་གཏད་མཚམས་དང་སྒྲུབ་པ་སོགས། །ཚེ་རིང་ནད་མེད་ཁོ་ནའི་དོན་དུ་མིན། །རིགས་དྲུག་སྡུག་བསྔལ་འདི་ལས་ཨེ་ཐར་ཡིན། །ཚེ་འདིའི་བསྲུང་རིམ་སྨན་དཔྱད་དབང་བསྐུར་སོགས། །ལས་ཀྱི་རྣམ་པར་སྨིན་པ་མ་གཏོགས་སོ། །གསུང་ཕྱིར་རྣམ་སྨིན་ནད་ལ་ཕན་མ་གསུངས། །ཕྱི་མའི་ཕན་ཡོན་དེ་ལྟར་སོང་མ་སོང་། །འཇའ་དང་རིང་བསྲེལ་རྟགས་མཚན་རྣམས་ལ་ལྟོས། །ལོ་བརྒྱད་མཚམས་བསྡམས་ཐུགས་དམ་བྱས་པ་ཡིས། །མ་ཕན་ཟེར་བའི་ཧམ་པ་ཨ་ལ་ལ། །སྐྱེ་འཆི་དབང་ཐོབ་སར་གནས་སེམས་དཔའ་ཆེ། །ཞྭ་ནག་ལྔ་པ་སུམ་ཅུ་སོ་གཉིས་འདིས། །བརྒྱད་པ་དགུ་པ་ཞེ་བརྒྱད་སྟེང་དུ་འདས། །ཐམས་ཅད་མཁྱེན་པ་དགུང་ལོ་སུམ་ཅུ་ཙམ། །ཞལ་སྔ་གོང་མ་སོ་དགུ་ཙམ་ལ་འདས། །རྗེ་བཙུན་སངས་རྒྱས་དབོན་དེ་ཞེ་བདུན་འདས། །གྲུབ་ཆེན་རྨ་སེ་ཞེ་བདུན་སྟེང་ན་འདས། །སི་ཏུ་ནོར་བུ་བསམ་འཕེལ་བཅུ་གསུམ་འདས། །དཔའ་བོ་སྤྲུལ་སྐུ་གོང་མ་བཅུ་གསུམ་ཙམ། །རིམ་གྲོ་བྱས་པའི་ཡུས་དེ་
ཨ་ལ་ལ། །ཞྭ་དམར་དྲུག་པ་ལོ་གཅིག་བསྙུངས་བའི་ཚེ། །སྡེ་པ་གཙང་པ་ཆོས་རྗེ་སྒར་ཆེན་གཉིས། །ཕྱག་ཟོག་ཕལ་ཆེར་སྐུ་རིམ་ཁོ་ནར་བཏང་། །ནོར་བུ་རྒྱན་པ་དཔག་བསམ་དབང་པོ་དང་། །ཡུ་མོ་སྤྲུལ་སྐུའི་སྐུ་རིམ་གང་དྲག་བྱས། །རྒྱལ་བའི་དབང་པོ་སི་ཏུ་རྒྱལ་ཚབ་པ། །ཞབས་དྲུང་དཔའ་བོའི་ཅི་དགོངས་བསྲུང་རིམ་བྱས། །ཕན་པ་མེད་དོ་ཞབས་དྲུང་དཔའ་བོ་དང་། །ཞྭ་དམར་བ་གཉིས་ཟླ་གཅིག་ནང་དུ་འདས། །དེ་དག་ནུས་པ་བྱིན་རླབས་མེད་པ་དང་། །བསྲུང་རིམ་བདེན་པ་མེད་པ་མ་ལགས་ཏེ། །དུས་ཀྱི་འཆི་བ་བཟློག་ཐབས་མེད་དོ་ཞེས། །མདོ་རྒྱུད་ཀུན་ནས་གསུངས་པ་དེ་ཡིན་ནོ། །དུས་མིན་འཆི་བ་བསྲུང་རིམ་སྨན་དཔྱད་ཀྱིས། །ཕན་པའི་ལག་བླངས་ངེད་རང་རྣམས་ལ་མང་། །དེ་ཡང་བླ་མ་ཆོས་དབང་ཀུན་བཟང་ཉིད། །མེ་དབལ་སྤྲུལ་པའི་ཆར་རྟོགས་རིགས་བཟང་ཡང་། །རྒྱུ་འབྲས་རྟེན་འབྲེལ་བསླུ་མེད་དབང་བཙན་ཏེ། །ད་རེས་ཆོས་སྒོར་མ་ཞུགས་སྡིག་སྤྱོད་ན། །དགེ་བ་མཐར་རྫོགས་ནད་མེད་ཚེ་ཡང་རིང་། །ཤི་ནས་མནར་མེད་དམྱལ་བའི་གནས་སུ་འགྲོ། །བན་དེ་མ་བྱས་སྒོམ་པ་བྱས་ན་ནི། །མཁས་ཤིང་ངག་ནུས་ཆེན་པོ་ཐོབ་པ་
འབྱུང་། །སྔོན་ལས་དགྲ་དང་ཁ་མཆུ་མང་པོའི་མནར། །མཐུ་གཏད་སེར་འབོད་རྫས་ངན་མི་ཚེ་བསྐྱལ། །ཕྱི་མ་ལྷ་འདྲེ་གདུག་པ་ཅན་དུ་སྐྱེ། །དེ་ནི་ཚེ་སྔོན་རྟ་དཔོན་ལ་སྐྱེས་པའི། །རྒྱུ་མཐུན་འབྲས་བུ་ཚེ་འདིར་རྣམ་སྨིན་ནོ། །བླ་མ་རེད་ནས་ཚེ་སྒྲུབ་ཕྱག་རྫོགས་དང་། །རྒྱལ་བ་རྒྱ་མཚོ་དེ་ཙམ་མ་བསྒྲུབས་ནས། །དཀོར་མང་བསྡུས་ཤིང་ལྷ་བྲི་རྟེན་བཞེངས་ནས། །འདིས་ཁ་མཚམས་སྦྱོར་དེ་ཙམ་མ་ལེགས་ན། །གོང་དུ་བཤད་ལྟར་ཀོང་པོའི་བླ་མར་སྐྱེ། །ཆོས་དང་སྒྲུབ་པ་ཉམས་ལེན་བྱིན་རླབས་ཀྱིས། །དེ་དབང་མ་སོང་འདིས་ཁ་ཐམས་ཅད་འཇོམས། །སྔས་ཞབས་རྡོ་ལེབ་སེམས་ལ་ཟུག་རྔུ་མེད། །དེ་ཡང་མཁའ་འགྲོ་ཆོས་སྐྱོང་ཐུགས་རྗེ་ཡིན། །དཀོར་ཟས་དགྲ་ལ་མ་ཤོར་ཆུད་ཟོས་མེད། །དགོངས་རྫོགས་འགྲུབ་པས་བཀའ་སྲུང་བཟང་བ་ཡིན། །ངེད་རང་མ་ཤི་རྗེས་ན་ཡོད་པ་ཚོ། །རྟེན་འབྲེལ་འདི་ཙམ་ཨེ་འགྲིགས་ཅི་ཆ་ཡོད། །འཆི་བའི་སྡུག་བསྔལ་བར་དོའི་འཇིགས་སྐྲག་ནི། །གཞོན་ཤི་རྒས་ཤི་ཁྱད་པར་མེད་པར་གསུངས། །ལས་ངན་གང་ཡོད་ཚེ་འདི་ལ་སྨིན་ནས། །གཏན་དུ་བདེ་བའི་ཞིང་ཁམས་བགྲོད་པ་ན། །དེ་ནི་ཆོས་བྱས་འབྲས་བུ་མཆོག་
ཡིན་པས། །ངན་སོང་གསུམ་སོགས་མི་བཟད་འཁོར་བ་ཡི། །མི་ཁོམ་འཇིག་རྟེན་རྣམས་སུ་སྐྱེ་གྱུར་ལས། །གང་དེ་ཚེ་འདི་ཉིད་ལ་རབ་སྨིན་ནས། །ལན་གྲངས་གཞན་དུ་མྱོང་བར་མ་གྱུར་ཅིག །གསུངས་པའང་འདི་ལྟར་འོང་བའི་སྨོན་ལམ་ལགས། །དེ་ཕྱིར་བླ་བླ་གྲྭ་གྲྭ་ཐམས་ཅད་ཀྱིས། །ཆོས་དང་དཀོན་མཆོག་ལྷ་དང་བཀའ་སྲུང་ལ། །ལོག་ལྟ་མ་བྱེད་ལྷག་པར་དད་གུས་བསྐྱེད། །མཚམས་སྒྲུབ་སྔགས་བསྙེན་སྲུང་ཟློག་བསྐང་གསོ་དང་། །གསོལ་མཆོད་ལ་སོགས་ངེས་ཤེས་བསྐྱེད་ཅིང་མཛོད། །འདི་ནི་གེགས་སེལ་གདམས་ངག་གནད་ཆེན་པོ། །གལ་ཏེ་འདི་ཉིད་ཡིད་ལ་མ་བཞག་ན། །འདི་ཕྱི་གཉིས་ཀའི་དོན་རྩ་འཆུག་ངེས་སོ། །དེ་ལྟར་ཆོས་ཀྱི་ཕན་ཡོན་བཤད་པ་ནི། །འོས་ཐུ་ཤེས་རབ་བཟོ་ཡི་བཤད་པའང་མིན། །གཙོ་ཆེར་མདོ་རྒྱུད་རྣམས་ལ་དཔང་པོ་བྱས། །སྔར་ནས་སྔ་ཕྱིར་ལན་གྲངས་མང་པོ་ལ། །བླ་མ་ཆོས་དབང་ལས་འཕྲོ་བཟང་ངན་རྣམས། །བརྡ་རུ་བྱུང་དང་ཚིགས་སུ་ལུང་བསྟན་དང་། །བསྟུན་ནས་ད་རེས་དགོས་པ་ཆེར་བྱུང་བས། །རྗེན་པུར་བུད་ནས་གོ་བདེ་གསལ་བར་བྲིས། །དེ་ལྟར་རྩོམ་ནི་དགོས་དོན་གང་ཞེ་ན། །ཤཱཀྱའི་དགེ་
ཚུལ་པདྨ་རབ་དགའ་ཡིས། །ཆོས་དབང་བསྙུང་གྲངས་མང་བར་བསྙུང་གཡོག་བྱས། །བེད་ཆོད་ཟེར་ནས་བླ་མས་ཐུགས་རྩིས་ཆེ། །ཐུགས་འདྲིས་ཆེ་ཕྱིར་ཁོ་རང་སེམས་གནད་ཆེ། །ལོ་རྒྱུས་འབྲི་དགོས་ཟེར་ནས་ཤོག་བུ་གཏད། །བྲི་ཡང་མ་འདོད་བསྒྱུར་ནས་བཞག་པའི་ཚེ། །དགོངས་ཞག་བདུན་ཚིགས་བཞི་པའི་དུས་ཙམ་ལ། །ཆེ་བརྗོད་རྣམ་ཐར་བྲིས་ཞེས་ཟེར་བའི་བརྡ། །བླ་མ་ཆེ་བས་ཆེ་བ་འདོན། །ཟེར་བའི་ཚིག་དེ་ཉམས་སྣང་སྐབས་སུ་ཐོས། །དེ་ཕྱིར་དུས་གསུམ་རྣམ་ཐར་བྲིས་པའི་ཞོར། །གྲྭ་རིས་སློབ་མ་རྣམས་ཀྱི་ལོག་ལྟ་རྣམས། །སེལ་བའི་གེགས་སེལ་གསལ་བར་བཀོད་པ་འདི། །བཀའ་རྒྱ་མེད་པས་གྲྭ་པ་ཀུན་གྱིས་ལྟོས། །ཕྱི་མི་སུ་ལ་བསྟན་ཀྱང་ཉེས་སྐྱོན་མེད། །རྟོག་དཔྱོད་ལྡན་ན་ཆོས་དང་ཉམས་ལེན་ནི། །ཀུན་ལ་ཕན་པའི་གནད་འགགས་ཟབ་མོ་ཡོད། །རིགས་རྒྱུད་ཆོས་རྒྱུད་ཡུལ་ཕྱོགས་བཅས་པ་ལ། །དུས་རྣམས་ཀུན་ཏུ་བདེ་ལེགས་འཕེལ་བ་དང་། །འབྲེལ་ཐོགས་ཐམས་ཅད་བདེ་ཆེན་ཞིང་ཁམས་སུ། །སྐྱེས་ནས་བླ་མ་ཉིད་དང་མཇལ་བར་ཤོག། །བྷ་ཝནྟུ།།