བླ་མ་དབོན་ཆུང་ནམ་མཁའི་དྲིས་ལན་དྲག་ལུའི་སྐྱེ་གནས་ལུང་བསྟན།
༄༅། །བླ་མ་དབོན་ཆུང་ནམ་མཁའི་དྲིས་ལན་དྲག་ལུའི་སྐྱེ་གནས་ལུང་བསྟན་ཡོད།།
༄༅། །ན་མོ་ཨ་མི་ཏ་བྷ་ཡེ། །དབོན་ཆུང་བླ་མ་ནམ་མཁའ་ཡིས། །དྲག་ལུར་རྟགས་མཚན་ཅི་བྱུང་ཞེས། །ཡང་ནས་ཡང་དུ་དྲིས་ན་ཡང་། །གསལ་པོ་མེད་ན་བཤད་མི་རུང་། །དགའ་ཕྱིར་ལེགས་པོ་བཤད་ན་ནི། །མི་ཆོས་བླ་མའི་རྫུན་ཡིན་པས། །འདུལ་ཁྲིམས་སྡོམ་པ་འཆོལ་བར་གསུངས། །དེ་ཕྱིར་ཡང་ཡང་བརྟགས་དཔྱད་བྱས། །འཕྲལ་དུ་མ་བཤད་དེ་ཡི་དོན། །བར་དོའི་རྣམ་ཤེས་མཐོང་བ་ལ། །ལྷ་ཡི་མིག་ནི་རྣམ་དག་པ། །ཐོབ་དགོས་དེ་མིན་དངོས་སུ་ནི། །བར་དོའི་རྣམ་ཤེས་མི་མཐོང་བར། །དམ་ཆོས་མངོན་པའི་གཞུང་ལས་བཤད། །ཉམས་དང་རྨི་
ལམ་ལ་སོགས་དང་། །རང་ཉིད་ཤི་བའི་སྣང་བ་ཡིས། །ཚེ་འདས་རྣམས་དང་འཕྲད་ན་ནི། །གསོན་དུས་གང་སྨྲས་ཚིག་རྣམས་དང་། །ཤི་ཁ་བྱུང་རབ་ལ་སོགས་པ། །ཡིད་ཆེས་དན་ཏིག་གཏམ་དང་བཅས། །ཆ་འཕྲེང་མང་པོ་བསྐུར་བ་ནི། །ཚེ་འདས་རྣམ་ཤེས་མ་ཡིན་ཏེ། །དྲི་ཟ་པི་ཤ་ཙི་དང་ནི། །དྲི་ཟ་ཁྱབ་བྱེད་ཅེས་བྱ་དང་། །གནོད་སྦྱིན་རྟོགས་འདོད་ཅེས་བྱ་དང་། །ཝ་ར་ཧི་ཏ་ཞེས་བྱ་དང་། །ཚེ་འདས་དེ་ཡི་ལུས་བཟུང་ནས། །དེ་ལྟར་སྨྲ་བ་ཡིན་པའི་ཚུལ། །ཚེ་འཕོས་ཇི་ལྟར་འགྱུར་བ་ཡི། །མདོ་ལས་ཐུབ་པས་རྒྱ་ཆེར་གསུངས། །ཤི་ནས་བདུན་
ཕྲག་ཕྱེད་བཞིའི་ཚུན། །ཚེ་འདས་གསོན་པོའི་ལུས་ལྟར་ཡོད། །དེ་ཡང་ཡིད་ལུས་རྨི་ལམ་འདྲ། །ཉི་ཟླ་མེད་ཀྱང་ཡིད་ལུས་ཀྱིས། །འོད་ཀྱིས་གསལ་བ་གཅིག་ཡོད་དེ། །བདུན་ཕྲག་ཕྱེད་བཞི་ཕར་འདས་ནས། །ཚེ་འདིའི་ལུས་འདི་ཇེ་ཇེ་བརྗེད། །ཕྱི་མ་གར་སྐྱེས་ལུས་འདི་ནི། །ཡིན་པའི་སྣང་བ་བྱུང་བ་ནི། །བར་དོའི་བཤད་པ་རྣམས་ནས་གསུངས། །དེ་ཕྱི་ཚེ་འདས་རྨིས་པ་ན། །དགའ་ཞིང་ལེགས་པར་བྱུང་བ་རྣམས། །ཚེ་འདིས་བླ་དེ་ཡིན་པ་སྟེ། །ཕ་མྱེས་བླ་ཡི་བསྲུང་བ་ཟེར། །ཚེ་འདས་རྨིས་པས་གོད་ཚགས་སོགས། །མི་དགའ་ཁ་སྨྲས་འབྱུང་བ་ནི། །ཟ་འདྲེའི་ཚེ་འདས་ལུས་བཟུང་ནས། །གསོན་ལ་མགོ་གཡོག་བྱེད་པ་ཡིན། །རྣལ་འབྱོར་རིག་པ་དྭངས་བ་ཡིས། །ཚེ་འདས་བཀུག་གཞུག་བྱང་བཞུས་དུས། །དངོས་སམ་ཉམས་སྣང་རྨི་ལམ་དུ། །ཁུག་པའི་རྟགས་དང་དྲངས་པའི་རྟགས། །འབྱུང་བར་ཐུགས་སྒྲུབ་གཞུང་ནས་གསུངས། །ཡི་དམ་ལྷ་ལ་གསོལ་བཏབ་ནས། །རང་གཞན་གར་སྐྱེ་བརྟག་པའི་ཐབས། །དཔའ་བོ་གཅིག་སྒྲུབ་རྒྱུད་ལ་སོགས། །གསར་རྙིང་ཀུན་ནས་རྒྱ་ཆེར་གསུངས། །འོན་ཀྱང་དེ་ལ་སླ་མོ་མེད། །རྟེན་ནི་བྱིན་རླབས་ཅན་བཤམས་
ནས། །མཆོད་པ་མཎྜལ་བརྒྱ་རྩ་ཕུལ། །ཕྱག་དང་སྐོར་བ་བརྒྱ་རྩ་བྱེད། །ཤ་ཆང་སྒོག་པ་ལ་ཕུག་སྤང་། །ཁྲུས་བྱས་སྤོས་བདུག་གོས་གསར་གྱོན། །མི་གཙང་ཟས་འཛེམ་ངག་བཅད་ནས། །སྔགས་བཟླས་གཞན་དུ་མ་ཡེངས་པར། །བྱས་པས་ཉམས་སམ་རྨི་ལམ་དུ། །རབ་ལ་ལུང་བསྟན་འབྱུང་བའམ། །ཐ་མ་བརྡ་ནི་སྟོན་པར་བཤད། །གལ་ཏེ་གསལ་བར་མ་གྱུར་ན། །མཆོད་པ་ཕྱག་དང་བསྐོར་བ་རྣམས། །སུམ་ལོག་བྱས་ན་གསལ་བར་གསུངས། །རང་རེ་ཧུབ་ལ་ཤ་ཚོད་བྱེད། །ཁྲུས་དང་ཕྱག་བསྐོར་མི་འཁྱོང་ཞིང་། །ངག་མི་གཅོད་པར་སྨྲ་བ་མང་། །དེ་ཕྱིར་གསལ་པོ་ག་ལ་འབྱུང་། །དེ་ཚོ་ཡིད་ལ་ཟུངས་མཛོད་དང་། །ལར་གྱི་གོ་བ་ཆེན་པོ་ཡོད། །དྲག་ལུ་འཆི་ཁ་ཟླ་གཅིག་གོང་། །ཐོ་རངས་ཉམས་སྣང་གསལ་བ་ལ། །དྲག་ལུ་དངོས་སུ་བདག་གིས་དྲུང་། །མཚམས་ཁང་ཉལ་བའི་དྲུང་དུ་བྱུང་། །ཁ་ངོ་ཅུང་ཟད་སྒྲེ་ལོག་ནས། །མིག་རྩ་དམར་དང་ཁྱུགས་སེ་གདའ། །ང་ཡི་མཚམས་ཁང་འདི་ན་ནི། །འོང་དོན་མེད་དེ་ཅི་ཡིན་བསམ། །དངོས་སུ་ཡིན་སྣང་བྱུང་བ་དེས། །བཟང་ངན་ཅི་ཡིན་མ་ཤེས་པས། །མ་སྨྲས་གསང་ནས་བསྡད་པ་
དང་། །དེ་དུས་བླ་ནི་འཁྱམས་པ་རེད། །དེ་ནས་ནད་དེ་ལོག་ནས་ཐལ། །དེ་ཕྱི་ནད་པ་གཞན་ཞིག་ཏུ། །ཕྱིན་ནི་བྱུང་རྨིས་བླ་འཁྱམས་རྟགས། །ངན་པའི་རྟགས་སུ་གོ་བར་གྱིས། །དྲག་ལུ་ཤི་ནས་འཕོ་བ་བཏབ། །ཞག་པོ་གཉིས་ཙམ་སོང་བའི་ནུབ། །དྲག་ལུ་ང་ཡི་གྲ་ཁྲི་རྩར། །ཕོ་ཁ་བསྔས་ནས་ང་ཡི་ངོར། །ལྟ་ཞིང་འདུག་པའི་སྣང་བ་ནི། །ཉམས་ཀྱི་སྣང་བ་གསལ་བར་བྱུང་། །ཕྱིས་སུ་ཚངས་བུག་ཡང་མོ་གདའ། །འཕོ་བ་ངེས་པར་ཐེབས་ནས་གདའ། །འཕོ་བ་ཁོ་ནའི་ནུས་པ་ཡིས། །ངན་སོང་གནས་སུ་མི་སྐྱེ་བར། །རབ་ཏུ་དག་པའི་ཞིང་ཁམས་སམ། །ཐ་མ་ལྷ་མའི་ལུས་ཐོབ་གསུངས། །འོན་ཀྱང་ལྷ་མི་མི་འདོད་པར། །བདེ་བ་ཅན་དུ་དམིགས་བྱས་པས། །དེ་ནི་ཞིང་ཁམས་བཟང་དྲག་པས། །སྒྲིབ་པ་མཐོ་མཐོ་མ་བྱང་བར། །འགྲོ་རྒྱུ་མེད་པར་ཡིན་པར་སྣང་། །བདུན་གཉིས་སྐབས་སུ་བརྟགས་པ་བྱས། །ཉམས་དང་རྨི་ལམ་འདྲེས་པའི་མཚམས། །སེར་སྣ་ཅན་ནི་ཡི་དྭགས་གནས་སུ་སྐྱེ། །དེ་ནས་བདེ་བ་ཅན་དུ་འགྲོ། །ཟེར་བའི་སྒྲ་ཞིག་ཐོས་པའི་ཚེ། །ཆུ་གཏོར་མང་དུ་བཏང་བཅུག་ཅིང་། །དྲུང་པ་ལ་སོགས་འབུལ་བ་བྱས། །དགེ་རྩ་བྱས་ཚད་
བསྡུས་ཏེ་བསྔོས། །ཞག་པོ་འགའ་ཟུང་ཡི་དྭགས་ཀྱི། །ཡུལ་དུ་བསྒྲོད་དགོས་བྱུང་བ་ནི། །ལོ་མང་ཐོགས་སྣང་བྱུང་ཡང་སྲིད། །དེ་ནས་བདུན་ཕྲག་ལྔ་ཙམ་དུས། །བརྟགས་པ་བྱས་ཚེ་ཉམས་རྨིས་མཚམས། །མི་རུ་སྐྱེ་ཉན་ཡོད་ཟེར་བའི། །སྒྲ་ཞིག་ཐོས་པ་དེ་ཡི་དོན། །རྗེས་ནས་རྨི་ལམ་གསལ་བ་ལ། །འབྲི་གུང་ཕྱོགས་སུ་བུད་མེད་ཀྱིས། །ལུས་ལ་ཞུགས་པར་གྱུར་པ་འདུག །དགོངས་ཞག་ཚང་ནས་བྱང་ཞུས་ནུབ། །བརྟགས་པ་བྱས་པས་གསལ་པོར་བྱུང་། །མི་རུ་སྐྱེས་ཀྱང་སྐྱེ་དགོས་པ་ཅི་ཡིན་ཏེ། །སིལ་སྙན་མང་པོ་སི་ལི་ལི། །རོལ་མོ་མང་པོ་དི་རི་རི། །ཞེས་པའི་སྒྲ་ཞིག་གྲག་པ་དེ། །རྗེས་ནས་དགེ་རྩ་རྒྱ་ཆེ་ཞིང་། །ཞི་ཁྲོ་ལ་སོགས་བྱིན་རླབས་ཀྱིས། །དཔའ་བོ་མཁའ་འགྲོ་ཡི་དམ་ལྷས། །ཞིང་ཁམས་བསུ་བའི་སུན་མ་ཡིས། །བུད་མེད་ལུས་ཀྱིས་བྱིས་སྦ་ཞིག །ཟླ་ཞིག་ཁྲག་རལ་གྱུར་ནས་ཀྱང་། །བདེ་ཆེན་ཞིང་ཁམས་བགྲོད་པ་ཡི། །རྟེན་འབྲེལ་འགྲིགས་པ་ཡིན་པར་བརྡ། །དགོངས་ཞག་རྫོགས་ནས་ཞག་དྲུག་ནུབ། །བཅོ་ལྔའི་ནུབ་པར་བརྟགས་པ་བྱས། །ཉམས་དང་རྨི་ལམ་འདྲེས་པའི་མཚམས། །ད་ཨ་ནུའི་སྤོབས་པ་དེ་
ལམ་དུ་འགྲོ་ལེ་ཡོད། །ཟེར་བའི་སྒྲ་ཞིག་ཐོས་པ་ཡི། །ད་ནི་བདེ་ཆེན་ཞིང་ཁམས་སུ། །སྐྱེས་ཏེ་ད་རུང་ཕྱིན་མ་ཚར། །བསམ་པ་རང་གི་སེམས་ལ་ཤར། །དེ་ནས་ཕུང་པོ་བཞུ་ཁ་ནུབ། །དྲག་ལུའི་རྟ་གཅིག་ཞོན་བྱས་ནས། །ད་ང་འགྲོ་རན་ཟེར་ནས་ཤར་ཕྱོགས་སུ། །ཐོགས་པ་མེད་པར་སོང་བ་རྨིས། །བླ་ནི་ཚེ་འདས་ལུས་བཟུང་ནས། །དུར་ས་དེ་ལ་གནས་སོ་ཞེས། །རྒྱ་ནག་རྩིས་ཀྱི་གཞུང་ལས་ནི། །གསུངས་པ་དེ་ཡང་བདེན་པར་སྣང་། །ས་འདེབས་ཚར་བའི་དུར་ས་ན། །བླ་དེ་འགྲོ་བར་ཡིན་པར་འདུག །དེ་ནས་རྒྱལ་ཟླའི་བཅོ་ལྔ་ལ། །བརྟགས་པ་བྱས་པས་ཉམས་སྣང་ལ། །ཡི་གེ་འབྲུ་ནི་ཡིད་ཡུལ་དུ། །ཡིག་འབྲུ་དམར་པོ་གཤར་ཡིག་ལ། །དྲག་ལུ་བདེ་བ་ཅན་དུ་སྐྱེས་ཚར། །ཞེས་པ་བྱུང་ཡང་སྨྲ་མ་སྤོབས། །དེ་ནས་བཅུ་བདུན་ནུབ་པར་ལ། །ཐལ་སོལ་ཁྱེར་བའི་གསེར་སྐྱེམས་བརྩམས། །དེ་ནུབ་ཐོ་རངས་རྨི་ལམ་ལ། །གཟུགས་མ་མཐོང་བས་མི་གཉིས་ཀྱིས། །ཁ་དལ་འདྲ་བ་བྱེད་ཅིང་གྲག །དྲག་ལུའི་རྟགས་དེ་ད་འོང་རན་ཟེར་བ་གྲག །གཅིག་གིས་རིན་པ་མི་ཚད་འཕྱིས་པ་ཡིན། ཟེར་བ་གྲག །དེ་ནས་ཕྱིར་ནུབ་བཅོ་བརྒྱད་ནུབ། །ཐུགས་རྗེ་
ཆེན་པོའི་བདག་མདུན་དང་། །གཏོར་བསྔོས་གསོལ་ཀ་བསྐང་བ་སོགས། །ཐམས་ཅད་ཤིན་ཏུ་རྒྱས་པར་བྱས། །མཆོད་པ་མཎྜལ་བཟང་བར་བཤམས། །ཁྲུས་དང་ཕྱག་འཚལ་བསྐོར་བ་བྱས། །དགོང་མོ་ངག་བཅད་རྩེ་གཅིག་ཏུ། །ད་རེས་རྟགས་ནི་གསལ་ན་རབ། །མ་གསལ་ཕྱིས་ནས་མི་བརྟགས་སྙམ། །ཐུགས་རྗེ་ཆེན་པོ་སྤྱན་རས་གཟིགས། །ཚེ་འདས་དྲག་ལུའི་རྣམ་ཤེས་དེ། །གར་སྐྱེས་གསལ་བའི་ལུང་བསྟན་གསོལ། །དེ་སྐད་རྩེ་གཅིག་གསོལ་བཏབ་པས། །སྔ་ཐུན་ཉམས་དང་རྨི་ལམ་མཚམས། །འཇིག་རྟེན་གྱི་ཁམས་བདེ་བ་ཅན། །ཞེས་པའི་སྒྲ་ཞིག་ཐོས་སྙམ་བྱེད། །ཕྱི་ཐུན་ཐོ་རངས་ཙམ་གྱི་དུས། །དྲག་ལུ་བདེ་བ་ཅན་དུ་སྐྱེས། །སྣང་བ་མཐའ་ཡས་གསུང་གི་དབང་ཐོབ། །ཏིང་ངེ་འཛིན་གྱི་དབང་བརྒྱ་རྩ་ཐོབ། །ཟེར་བ་གཅིག་གསལ་བར་བྱུང་ངོ། །ད་ནས་ཞིང་དེར་སྐྱེ་ངེས་པས། །ཉེ་དུ་རྣམས་ཀྱང་མྱ་ངན་མེད། །སྔ་ཕྱི་ལོ་ཤས་མ་གཏོགས་པ། །གཅིག་ཀྱང་མི་རྟག་འཆི་དགོས་ན། །གཏན་ནས་གཏན་དུ་བདེ་སྐྱིད་ཅིང་། །དེ་ནས་སངས་རྒྱས་ཐོབ་པའི་ཞིང་། །སྐྱེ་རྒས་ན་འཆི་མེད་པའི་ཞིང་། །ཕྱིར་མི་ལྡོག་པའི་ས་
ཐོབ་ཅིང་། །དྲག་ལུ་ཤི་བས་འཚིངས་བ་ཡིན། །མ་ཤི་རྗེས་ན་ལུས་པ་ཚོ། །ནམ་འཆི་གར་འགྲོ་ཅི་ཆ་ཡོད། །དམྱལ་བར་མི་འགྲོ་གདེང་ཅི་ཡོད། །ད་ལྟ་མེ་སྟག་མི་བཟོད་ན། །བསྐལ་པ་སྟོང་དུ་བཙོ་བསྲེག་གི །སྡུག་བསྔལ་མྱོང་ན་ཅི་འདྲ་ཁམས། །དེ་ཕྱིར་ད་ནི་མྱ་ངན་སྤོངས། །དབོན་ཆུང་ནམ་མཁའི་དྲིས་ལེན་འདི། །བརྩེ་སེམས་ཡོད་པ་རྣམས་ལ་སྟོན། །གཞན་ལ་བསྟན་པར་མི་བྱའོ། །རྟ་ལོ་སྟག་ཟླའི་བཅུ་དགུའི་ཉིན། །རཱ་ག་ཨ་སྱས་འཕྲལ་དུ་བྲིས།། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།