གཉེར་པ་ཆོས་འཕེལ་དུས་གསུམ་གྱི་ལོ་རྒྱུས།
༄༅། །གཉེར་པ་ཆོས་འཕེལ་དུས་གསུམ་གྱི་ལོ་རྒྱུས་གསལ་བར་ཡོད། །
༄༅། །ན་མོ་གུ་རུ་ལོ་ཀེ་ཤྭ་ར་ཡེ། འགྲོ་དྲུག་འདྲེན་མཛད་འཕགས་པ་སྤྱན་རས་གཟིགས། །རྒྱལ་བ་རྒྱ་མཚོའི་ཞབས་ལ་ཕྱག་འཚལ་ལོ། །སྤྲུལ་པའི་སྐུ་མཆོག་མི་འགྱུར་རྡོ་རྗེ་དེ། །དགུང་ལོ་བཅུའམ་བཅུ་གཅིག་ཙམ་གྱི་དུས། །ཕྱག་རྡོར་ཐུགས་ཀྱི་སྒྲུབ་པ་མཛད་པའི་ཚེ། །མདངས་ནི་ང་ལ་མིག་གསུམ་གདའ་བ་རྨིས། །རྟེན་འབྲེལ་གྱིས་ལ་དཔྲལ་བར་མིག་བྲིས་གསུངས། །དཔྲལ་བར་ཡེ་ཤེས་སྤྱན་གཅིག་བྲིས་པ་དང་། །སྟེང་འོག་ཕྱོགས་མཚམས་ཀུན་ནས་ཕྱག་རྡོར་སྐུ། །ཆར་བཞིན་བབས་ནས་ཉིད་ལ་ཐིམ་པར་གཟིགས། །དེ་ནས་བཟུང་སྟེ་ལོ་ནི་གསུམ་གྱི་བར། །སྔོན་
གནས་རྗེས་སུ་དྲན་པའི་མངོན་ཤེས་ཐོབ། །བསྐལ་པ་སྟོང་ཕྲག་ཚུན་ཆད་རང་དང་གཞན། །གར་སྐྱེ་ཁར་སང་དེ་རིང་བཞིན་དུ་དྲན། །སྔོན་དུས་བསྐལ་པ་བདུན་བརྒྱ་བརྒྱད་ཀྱི་དུས། །རྗེ་ཉིད་ལུག་ཏུ་སྐྱེ་བ་བཞེས་པའི་ཚེ། །རིགས་མཐུན་ལུག་ཁྱུ་རྣམས་ལ་ཆོས་བཤད་ཤེས། །དེ་དུས་ལུག་ཕོ་ཐུག་རེ་གཅིག་ཡོད་པ། །ད་ལྟ་སློབ་དཔོན་རཱ་ག་ཨ་སྱ་སྟེ། །དེ་དུས་ལུག་རྫི་དེ་ཡི་སྐྱེ་བ་ནི། །གཉེར་པ་ཆོས་འཕེལ་འདི་ཉིད་ཡིན་ནོ་གསུངས། །སེམས་དཔའ་རྣམས་ནི་གང་ལ་གང་འདུལ་ཏེ། །དུད་འགྲོ་ཁྱུ་ཡི་ནང་ན་སྤྲུལ་པ་རེ། །འབུ་སྲིན་རྣམས་ལ་དམ་ཆོས་སྟོན་པའི་ཕྱིར། །
བུང་བར་སྤྲུལ་ནས་དམ་ཆོས་འཆད་པའི་ཚུལ། །ཟ་མ་ཏོག་གི་མདོ་ལས་ཐུབ་པས་གསུངས། །དེ་ཕྱིར་ཆོས་འཕེལ་ལུག་རྫིར་གྱུར་པའི་ཚེ། །ལུག་ཁྱུའི་ནང་ན་བྱང་ཆུབ་སེམས་དཔའ་བཞུགས། །འདི་ལ་བསམ་ན་དུད་འགྲོ་རྣམས་ལ་ཡང་། །བཤའ་བསད་རྡེག་རྩོགས་ཡོད་པར་འདུག་ལགས་སམ། །སྔོན་འདས་བསྐལ་པ་བརྒྱ་དང་བརྒྱད་ཀྱི་དུས། །རྗེ་ཉིད་རྒྱལ་བུ་ཞེས་བྱའི་མི་ལ་སྐྱེས། །དམ་ཆོས་ཐོབ་འདོད་དྲང་སྲོང་གཅིག་ལ་ནི། །གསེར་དངུལ་རྟ་ལུག་ལ་སོགས་དཔག་མེད་ཕུལ། །དཀའ་བ་དཔག་མེད་སྤྱད་ནས་ཆོས་ཞུས་ཏེ། །ལུག་དེའི་སྐྱེ་བ་ཆོས་འཕེལ་ཡིན་ནོ་གསུངས། །འདི་ལ་བསམ་ན་འབུལ་བ་བྱས་པ་ཡིས། །དུད་འགྲོ་རྣམས་ཀྱང་བསྐལ་པ་བཟང་བ་སྟེ། །འབུལ་མི་དེ་ཡི་དགེ་བའི་གྲོགས་པོ་དང་། །འབུལ་བ་དེ་ཡི་འཁོར་དུ་སྐྱེ་བའོ། །སྔོན་འདས་བསྐལ་པ་བརྒྱ་དང་གཉིས་ཀྱི་དུས། །རྗེ་ཉིད་ཧྲ་ཧྲེ་བྱ་བའི་མི་ལ་སྐྱེས། །དེ་མདུན་སྤྲུལ་པའི་རྒྱ་གཅིག་མཁའ་ལས་བབས། །རྒྱ་དེར་ཤི་ཚད་མཐོ་རིས་ཐོབ་པ་སྟེ། །རྒྱལ་པོའི་བཙུན་མོ་ཁྲོས་ནས་རྒྱ་བཅད་པས། །དེ་མ་ཐག་ཏུ་སྦྲེལ་ནས་མོ་རང་བཏུམ། །ཤི་ནས་མི་ལུས་ཕུན་སུམ་ཚོགས་པ་སྐྱེས། །བཙུན་མོ་དེ་ནི་
ཆོས་འཕེལ་ཡིན་ནོ་གསུངས། །རྒྱུ་དེར་རྒྱབ་ཚད་སེམས་ཅན་མང་པོ་དྲངས། །དེ་བཞིན་དེང་སང་རོང་སྐོར་ལམ་དུ་ཡང་། །ཤི་བ་ཐམས་ཅད་མཐོ་རིས་ཐར་ལམ་ཐོབ། །སྔོན་འདས་བསྐལ་པ་བརྒྱ་དང་གཅིག་གི་དུས།།རྗེ་ཉིད་རྒྱལ་པོའི་དམག་དཔོན་གཅིག་ཏུ་སྐྱེས། །རྒྱལ་པོའི་ཐུགས་ཕོག་བྱུང་ནས་ཀྱང་། །དམག་དཔོན་རྟ་དང་བཅས་པ་བསད། །འཇའ་ཟུག་མེ་ཏོག་ཆར་པ་བབས། །རྒྱལ་པོ་འགྱོད་ནས་གདུང་འབུམ་བཞེངས། །ཕྱག་སྐོར་བྱས་ཚད་ཐར་ལམ་ཐོབ། །བཤགས་པ་བྱས་ནས་རྟེན་བཞེངས་པས། །རྒྱལ་པོ་དེ་ཡང་གྲོལ་བར་གྱུར། །འདི་ལྟར་སྔོན་དུ་སྡིག་བྱས་ཀྱང་། །འགྱོད་ཅིང་བཤགས་ན་སྡིག་པ་བྱང་། །དེ་དུས་རྟ་དེའི་སྐྱེ་བ་ནི། །གཉེར་པ་ཆོས་འཕེལ་ཡིན་ནོ་གསུངས། །སྔོན་འདས་བསྐལ་པ་སོ་གསུམ་དུས། །རྗེ་ཉིད་བྱིས་སྦ་ཆུང་ངུ་ནས། །བྱང་ཆུབ་སེམས་དང་ལྡན་གྱུར་ཀྱང་། །བར་ཆད་དབང་གིས་གློ་བུར་འདས། །སྦྲང་རོ་གཡང་གཞི་འདྲ་བར་སོང་། །ཞང་པོ་མྱ་ངན་ཆེར་སྐྱེས་ནས། །གཡང་གཞི་དེ་ལ་མཆོད་པ་བྱས། །ནོར་ཕྱུགས་འཕེལ་བའི་དངོས་གྲུབ་འབྱུང་། །ཞང་པོ་ཆོས་འཕེལ་ཡིན་ནོ་གསུངས། །དེ་ལྟར་བྱང་
ཆུབ་སེམས་དཔའ་ཡི། །གདུང་རུས་སྐུ་མཚལ་དབུ་ལོ་སོགས། །དད་གུས་གདུང་པས་མཆོད་བྱས་ན། །ནོར་བུ་བསམ་འཕེལ་ཅི་བཞིན་དུ། །དགོས་འདོད་འབྱུང་བ་ཤེས་པར་བྱ། །སྔོན་འདས་བསྐལ་པ་བཞི་ཡི་དུས། །རྗེ་ཉིད་སྟག་ལི་ཞེས་བྱ་བའི། །ཡིག་བྲིས་ཀུན་ལ་མཁས་པར་གྱུར། །ཆོས་འཕེལ་དེ་ཡི་རྟར་སྐྱེས་པ། །མཚན་ནི་མངྒའི་མཚན་ཅན་གྱིས། །རཱ་ག་ཨ་སྱ་བླ་མར་གྱུར། །དེ་ལ་བྲིས་པས་རྟ་དེ་ཕུལ། །དྲུང་ཡིག་བྱས་ཤིང་ཉམས་ཁྲིད་ཞུས། །འདི་ལྟར་དབང་ཡོན་ཕུལ་བ་དེ། །སངས་རྒྱས་ཀུན་ལ་ཕུལ་བ་དང་། །མཉམ་པར་རྫོགས་ཆེན་རྒྱུད་ནས་བཤད། །བསྐལ་པ་འདི་ཡི་སྔོན་མ་ལ། །དགེ་སློང་རཱ་ག་ཨ་སྱ་ནི། །བླ་མ་མངོན་ཤེས་ཅན་དུ་སྐྱེས། །ཆོས་འཕེལ་དེ་ཡི་གྲྭ་པར་སྐྱེས། །སྤྲུལ་པའི་སྐུ་ཉིད་དེ་ཡི་དུས། །རྟེའུ་རིག་པ་ཅན་དུ་གྱུར། །སེ་ར་དཔྱད་ཆ་གང་རྙེད་རྣམས། །ཁ་ཡིས་བཟུང་ནས་བླ་མར་ཕུལ། །ཨེ་མ་སྐྱེས་བུ་དམ་པ་རྣམས། །དུད་འགྲོའི་ལུས་སུ་གྱུར་ན་ཡང་། །བླ་མ་མཆོད་ཤེས་ངོ་མཚར་ཆེ། །དུས་གསུམ་སངས་རྒྱས་ཀུན་མཆོད་པས། །བླ་མའི་བ་སྤུ་ཉག་མཆོད་ལྷག །དུད་འགྲོར་སྐྱེས་ཀྱང་དེ་ཡི་དོན། །ཐུགས་ལ་མ་བརྗེད་
སེམས་པའི་རྟགས། །ལུས་ནི་ལོག་པར་ལྟུང་ན་ཡང་། །སེམས་ནི་ལོག་པར་མི་ལྟུང་ངོ། །དེ་སྐད་གསུངས་པས་དོན་ལགས་སོ། །བསྐལ་པ་བཟང་པོ་འདི་ཆགས་ནས། །རྗེ་ཉིད་མཛོ་རུ་སྐྱེ་བ་བཞེས། །སྟོང་ཉིད་སྙིང་རྗེའི་དོན་སྒོམ་ཤེས། །དེ་དུས་རཱ་ག་ཨ་སྱ་ནི། །རྟ་ཡི་ལུས་སུ་གྱུར་པ་སྟེ། །བྱང་ཆུབ་སེམས་དཔའི་རིགས་ཅན་རྣམས། །དམན་པའི་ལུས་སུ་གྱུར་ན་ཡང་། །བྱང་ཆུབ་སེམས་དང་མི་འབྲལ་ཞིང་། །གཞན་ཕན་ཅུང་ཟད་འགྲུབ་པ་སྟེ། །བཅོམ་ལྡན་ཤཱཀྱ་ཐུབ་པ་ཡང་། །རི་བོང་དང་ནི་ཆུ་སྲིན་སོགས། །མ་དག་སྐྱེ་བ་མང་དུ་བཞེས་ནས་ཀྱང་། །འབྲེལ་ཐོགས་རིམ་གྱིས་འདྲེན་པར་མཛད་པ་ལྟར། །སྔོན་འདས་སྐྱེ་བ་བརྒྱད་དུ་ཆོས་འཕེལ་ཡང་། །སྤྲུལ་སྐུ་ཉིད་ལ་འབྲེལ་པ་ཐོབ་པའི་ཕྱིར། །ད་རེས་གནམ་ཆོས་ཐུགས་ཀྱི་གཏེར་ཁ་འདི། །གུ་རུ་དྲག་པོའི་ཆོས་བདག་གྲ་རུ་ཐེ། །གནམ་ཆོས་དྲག་པོའི་ཞལ་ཐང་གཅིག་ཀྱང་བཞེངས། །སྤྲུལ་སྐུ་ཉིད་ལ་མི་ཕྱེད་དད་པ་ཐོབ། །དེ་ལྟར་གཉེར་པའིཀུ་སྔོན་འདས་སྐྱེ་བ་བརྒྱད། །བདག་གིས་ཤེས་ཤིང་དྲན་པ་མ་ལགས་ཏེ། །སྤྲུལ་སྐུའི་སྐྱེས་རབས་ནང་ནས་བཏུས་ཏེ་བཀོད། །འདི་དག་རྣམས་ལ་ཐེ་
ཚོམ་མི་བྱ་སྟེ། །བྱང་ཆུབ་སེམས་དཔའ་རྣམས་ཀྱི་བསྐལ་པ་གཅིག །རྗེས་སུ་དྲན་པ་ནས་བཟུང་བོསྐལ་པ་ནི། །བརྒྱ་སྟོང་མང་པོ་རྗེས་སུ་དྲན་འགྱུར་ཞིང་། །ཐུབ་པས་མདོ་ལས་གསུངས་པར་ཡིད་ཆེས་བྱ། ༈ །དེ་ནས་གཉེར་པ་ཆོས་འཕེལ་ནི། །ངོམ་དུ་རུང་བའི་ས་ཡི་སྨད། །ལྕགས་ཕོ་སྤྲེའུ་ལོ་ལ་སྐྱེས། །བཅུ་དགུའི་བར་དུ་སྐྱེ་བོ་སྟེ། །སྤུ་ནག་བྱ་དང་རི་བོང་སོགས། །སྡིག་པ་ཡང་ནི་མང་ཞིག་འདྲེས། །ཡི་གེ་འཛིན་རྩོད་ཙམ་ཞིག་ཤེས། །ཉི་ཤུ་ལོན་ཚེ་བླ་མ་མཇལ། །མཇལ་རྟེན་སྲན་མ་ཞོ་གཅིག་ཁྱེར། །འོང་བས་སྲན་མ་ཆུ་ལ་ཤོར། །སྣོད་སྟོང་ཁྱེར་ནས་བླ་མ་མཇལ། །སྐྱབས་སྡོམ་ཚངས་སྤྱོད་དགེ་བསྙེན་ཞུས། །དབང་ལུང་ཁྲིད་སོགས་རིམ་པར་ཐོབ། །མཆོད་གཡོག་མཁས་ཤིང་རམ་འབུ་ཁྱོག །ཡི་དམ་འཐོར་སྙན་འགའ་རེ་བསགས། །སོ་སོའི་རྨིས་ལྟས་ཐོན་ཙམ་བྱུང་། །གཅོད་ལ་ཤིན་ཏུ་མོས་འདུག་པས། །གཅོད་ཁྲིད་བྱས་ནས་ཞག་འགའ་ལ། །ཉེ་ལོགས་གཉན་ས་གཅོད་བཅུག་པས། །ཚར་སློང་ལེགས་པར་འགྲིགས་པ་བྱུང་། །ལོ་མང་ལུས་སྦྱིན་ཆག་མེད་དང་། །གནས་འགྱུ་བསྲུང་བདེ་ཙམ་ཞིག་ཤེས། །ཚོང་དང་འགྲོ་འདུག་མཆོད་
གཡོག་སོགས། །བླ་མའི་ཆགས་ཕྱིར་གོ་ཆོད་བྱུང་། །ཀུན་རིག་རྒྱལ་བ་རྒྱ་མཚོ་སོགས། །ཉེར་མཁོའི་ཆོ་ག་ཆོས་སྤྱོད་ཟིན། །མདོས་བཟློག་བསྐང་བ་ཞི་ཁྲོ་སོགས། །ལག་ལེན་འདོན་བསྒྲིགས་ཐམས་ཅད་ཤེས། །ཇོ་མཇལ་དབུས་གནས་འཁོར་བྱུང་བས། །ཆུང་དུས་མཆོད་འབྲུ་བསགས་པ་ཡིས། །ཤམ་ཐབས་ལེགས་པོ་ཁུག་འདུག་པས། །བླ་མ་མཆེད་ལ་ཞུ་རྟེན་ཕུལ། །དེ་སྔ་གྲྭ་པ་ལོ་མང་བྱས། །ཆགས་ཕྱི་ལེགས་པར་འགྲུབ་པ་ཡིན། །ད་ནི་རི་ཁྲོད་གཅིག་ན་འདུག་འདོད་ཟེར། །དེ་ཚེ་བླ་མ་ཆོས་དབང་ཀུན་བཟང་གིས། །གྲུ་པ་བློ་གཙང་འདི་འདྲ་རྙེད་པར་དཀའ། །འདི་ཉིད་རྒྱུན་དུ་གཉེར་པ་བྱེད་དགོས་ཟེར། །དེ་ནས་རྒྱུན་དུ་གཉེར་པ་བྱས་པའི་ཚེ། །རྟ་སོགས་ཉུང་ཞིང་མུ་གེ་བྱུང་བའི་དུས། །ནས་ཚོལ་ཚོང་ལ་རྐང་ཐང་འགྲོ་མང་བས། །ལུས་ཀྱང་རིད་ཅིང་འཆི་ལ་ཁད་འདྲར་གྱུར། །སྔ་ཕྱི་གཟིམས་ཁང་ཁང་ལས་མང་པོའི་ཚེ། །མི་ལས་མར་པའི་ཁང་ལས་བྱས་པ་ལྟར། །ལུས་ཀྱི་སྒོ་ནས་དཀའ་བ་དཔག་མེད་སྤྱད། །ཆུང་ཚེ་མཆོད་འབྲུ་བསགས་པའི་རྩ་བ་ཡིས། །བླ་མའི་བཀའ་འབུམ་པོ་ཏི་བཞི་ཙམ་བཞེངས། །དེ་འཕྲོ་ཕལ་ཆེར་བུམ་སྒྲུབ་ཁ་
འདེབས་བྱས། །དགེ་ཚུལ་ཞུས་ནས་མཐའ་རུ་ཕྱིན་པ་དང་། །བཞི་བཅུའི་ལོ་ལ་རྫོགས་ཆེན་ཁྲིད་ཞུས་ནས། །ཛམ་གཏོར་གཏོར་མ་བརྒྱ་རྩ་ཆག་མེད་དང་། །ནངས་ནུབ་རྒྱུན་དུ་རྫོགས་ཆེན་ཉམས་ལེན་བསྐྱོངས། །ཆོས་ཉིད་མངོན་སུམ་མཐོང་ཞིང་ཉམས་སྣང་འཕེལ། །འཇའ་འོད་ཐིག་ལེ་ཐིག་ཕྲན་ལུག་གུ་རྒྱུད། །ཉིན་མཚན་མེད་པར་འོད་གསལ་ཐིག་ལེ་མཆེད། །ཀུན་བཟང་རྡོ་རྗེ་སེམས་དཔའ་སྣང་མཐའ་ཡས། །པདྨ་འབྱུང་གནས་ལ་སོགས་ཞི་བའི་ལྷ། །སེམས་དཔའ་སེམས་མ་ལྷ་དང་རིག་འཛིན་ཚོགས། །ཆེ་མཆོག་གྲོ་ལོད་ལ་སོགས་ཁྲག་འཐུང་ལྷ། །འཇིགས་པའི་གཟུགས་ཅན་ཕྲ་མེན་མགོ་བརྙན་ཚོགས། །གཅིག་ཏུ་མ་ངེས་རྣམ་པ་སྣ་ཚོགས་པ། །བརྗོད་ཀྱིས་མི་ལང་བརྒྱ་སྟོང་དུ་མའི་ཚོགས། །ལན་གཅིག་མ་ཡིན་ཕལ་ཆེར་དུས་རྒྱུན་དུ། །རབ་རིབ་མ་ཡིན་རྒྱན་དང་ཆ་ལུགས་གསལ། །ཉམས་དང་རྨི་ལམ་མ་ཡིན་མངོན་སུམ་དུ། །ཤིན་ཏུ་གསལ་བར་མཇལ་འདི་ཨེ་མ་ཧོ། །དེ་ལྟར་མཇལ་ཡང་ཆགས་ཞེན་འཛིན་པ་མེད། །ཕྱག་ཆེན་སྤྲོས་བྲལ་ཆེན་པོའི་རྟོགས་པ་སྐྱེས། །ཁྲེགས་ཆོད་ཟུང་འཇུག་གསལ་སྟོང་འཛིན་མེད་ངང་། །ཉི་མ་ལྟ་བུ་ཟླ་བ་ལྟ་བུ་དང་། །
སྐར་མདའ་ལྟ་བུ་གློག་འོད་ལྟ་བུ་དང་། །འོད་ཟེར་འཕྲོ་འདུ་རྣམ་པ་སྣ་ཚོགས་པ། །བརྗོད་ཀྱིས་མི་ལོངས་སྒྱུ་མ་ལྟ་བུར་མཐོང་། །བདག་གིས་དེ་སྔོན་རྫོགས་ཆེན་མང་བཙུགས་ཀྱང་། །རྟོགས་པ་ཁོ་ལས་མཐོ་བ་མ་བྱུང་སྟེ། །རྫོགས་ཆེན་ཁྲིད་ཡིག་རྣམས་དང་གོ་བསྟུན་ན། །རིག་པ་ཚད་ལ་ཕེབས་པ་ཡིན་པར་སྣང་། །འདི་ནས་མ་བསྒོམ་ན་ཡང་ཆོག་པ་སྟེ། །བར་དོ་མེད་པར་རྫོགས་ཆེན་རྒྱུད་ཀུན་མཐུན། །སྔོན་ཚེ་ཇོ་བོ་རྗེ་ཡི་སློབ་མ་གཉིས། །གཅིག་གིས་མཚམས་བསྡམས་རྩེ་གཅིག་བསྒྲུབས་པ་བྱས། །གཅིག་གིས་བླ་མའི་ཆགས་ཕྱི་བྱས་པ་གཉིས། །ཆགས་ཕྱི་བྱས་པ་རྟོགས་པ་མཐོ་འོ་སྐད། །ཇོ་བོ་རྗེ་ཡི་བ་སྤུའི་ཆ་ཤས་ཀྱང་། །ཁོ་བོས་དོ་བའི་རེ་བ་གར་ཡོད་དེ། །བདག་འདྲ་ཐ་མལ་སོ་སྐྱེའི་བླ་མ་ཡང་། །སློབ་མས་དད་གུས་ཆགས་ཕྱི་བསྒྲུབས་པ་ན། །སངས་རྒྱས་ཐམས་ཅད་དེ་ལ་ཐུགས་མཉེས་ཤིང་། །དབང་ལུང་ཆོས་ཀྱི་དྲིན་ལན་གཞལ་བར་དཀའ། །དམ་ཆོས་ཤོ་ལོ་ཀ་གཅིག་ཐོབ་པའི་ཕྱིར། །ཐུབ་པས་སྐུ་ལ་ལྕགས་འཛེར་སྟོང་བཏབ་གསུངས། །དེ་བཞིན་བདག་ལ་བྱིན་རླབས་མ་མཆིས་ཀྱང་། །གཉེར་པས་དད་གུས་ཆགས་ཕྱི་བསྒྲུབས་པ་དེས། །
ཕྱག་རྫོགས་ཟུང་འཇུག་རྟོགས་པ་དེ་ཙམ་སྐྱེས། །རྩ་བའི་བླ་མ་མཆེད་གྲོགས་དགེ་འདུན་སྡེ། །དེ་ལ་ཁ་ཙམ་མིན་པའི་དད་གུས་ཀྱིས། །ཇ་མ་ཐབ་གཡོག་ཤིང་ཐུ་ཆུ་ལེན་དང་། །བརྔོ་བརྟག་ཚོང་དང་འགྲོ་འདུག་ལ་སོགས་པ། །བྱས་ཚད་རང་གི་སྒྲིབ་སྦྱོང་མཆོག་ཏུ་གྱུར། །ཕན་ཡོན་རྒྱ་གར་རྒྱ་ནག་བསྐོར་དང་མཉམ། །དེ་ཡང་འོས་ཚོད་མ་ཡིན་མྱོང་བས་འགྲུབ། །རྒྱ་གར་ལ་སོགས་ཐག་རིང་གནས་བསྐོར་དང་། །ལོ་མང་མཚམས་སྒྲུབ་བྱེད་པ་མང་མཐོང་ཡང་། །ཁྲེགས་ཆོད་ཟུང་འཇུག་རྫོགས་ཆེན་ཉམས་རྟོགས་ལ། །ཁོ་འདྲ་ཡོད་པ་སུ་ཡང་མ་མཐོང་ངོ། །ཕྱི་རབས་གྲྭ་པ་རྣམས་ཀྱིས་ཡིད་ལ་ཞོག །བླ་མ་དང་ནི་གྲྭ་མང་ཆགས་ཕྱི་ལ། །སངས་རྒྱས་བསྟན་ལ་ཨེ་ཕན་ཁོ་ན་ཡིས། །ཁ་ཙམ་མིན་པའི་བསམ་པ་བཟང་བ་དེས། །ཆོས་སྐྱོང་རྣམས་དང་དམ་ཚིག་གཅིག་གྱུར་ཏེ། །ཆོས་སྐྱོང་གང་གིས་བསྙེན་སྒྲུབ་མ་བྱས་ཀྱང་། །མགོན་པོའི་བླ་རྟགས་བྱ་རོག་དངོས་སུ་འཁོར། །ཤ་དུམ་མཐེབ་ཀྱུ་བྱིན་པ་ལག་ནས་ལེན། །གྲྭ་པ་གཞན་དག་འགྲོ་ཚེ་འབྲོས་པར་བྱེད། །རྨི་ལམ་རྣམ་སྲས་དམར་པོ་གསལ་བར་མཇལ། །རཱ་ཧུ་ལ་དང་རྡོར་ལེགས་བརྟན་མ་ཡིས། །དངོས་སུ་སྤྲུལ་
པའི་རྨི་ལམ་ཡང་ཡང་གསལ། །གཉེར་པ་ཡིན་ཕྱིར་ཅི་བྱེད་དབང་ཆེ་ཡང་། །རང་གི་ཁ་ཟས་རྒྱབ་གོས་མ་གཏོགས་པར། །ན་དུས་བདུད་བཟློག་བྱ་བའི་རྟེན་གཅིག་གམ། །ཤི་དུས་རོ་གོས་པྲ་ཙམ་མི་སྣང་སྟེ། །ཞེན་པ་ནང་ནས་ལོག་པའི་ཞེན་ལོག་དང་། །བྱ་བ་ནང་ནས་ཐེང་པའི་བྱ་བཏང་སྟེ། །རང་དོན་མེད་པར་དགེ་འདུན་སྤྱི་དོན་དུ། །སེར་སྣ་གསོག་འཇོགས་ཆེ་ཡང་བྱ་བཏང་མཆོག །མི་བསྐྱོད་རྡོ་རྗེའི་གསུངས་དང་མཐུན་པར་སྣང་། །དེ་ནས་ཞེ་བརྒྱད་ལོན་པ་ལུག་གིས་ལོར། །སང་ཕོད་ཁྱོད་ཉིད་ཤིན་ཏུ་སྐག་ཆེ་བས། །ཚེ་སྒྲུབ་གཅིག་ལ་ཐུགས་དམ་བྱ་དགོས་སྨྲས། །གསང་འདུས་ཆོ་ག་བརྒྱ་ཚར་ཕྱེད་གཉིས་ཙམ། །བཏོན་ཚེ་ཚེ་ཆང་རུལ་བའི་ལྷུ་བ་ལ། །མེ་ཏོག་པདྨ་འདབ་བརྒྱད་གསལ་བར་བྱོན། །དེ་ཡང་ལོ་བདུན་གོང་ཙམ་སྒར་པ་ནི། །ན་བུན་དགེ་བསྙེན་མཚོ་ཁར་འདུག་པའི་ཚེ། །སྙི་བའི་དོན་ལ་གནས་ཚང་ཡུལ་མི་འཛིངས། །གཉེར་པས་སང་ནི་སྒར་པ་འདུག་རེ་ཞེས། །མཚོ་ཁར་མནའ་ནི་ཆེན་པོ་གཉིས་གསུམ་སྐྱལ། །ཕྱིར་ནངས་དུམ་དང་ཞུ་བཤགས་བྱས་པ་ཡིས། །སྒར་པ་མ་བཀྱག་དེ་རུ་ཞག་མང་བསྡད། །གཉེར་པས་མཚོ་ཁར་མནའ་
དེ་ཟོས་པར་སོང་། །དམ་ཚིག་ལྡན་པ་དགེ་བསྙེན་ཆེན་པོ་རྣམས། །མནའ་ཟོས་མི་དེའི་སྲོག་དབུགས་མ་བདག་ན། །ཁོང་རང་རྣམས་ཀྱང་དམ་ཚིག་ཉམས་པའི་ཕྱིར། །ཅི་ལ་བབས་ཀྱང་གནོད་པ་བསྐྱེལ་དགོས་པས། །སྔོན་ཚེ་གཉེན་ཆེན་ཐང་ལྷའི་ལོ་རྒྱུས་ལྟར། །དེ་ཕྱིར་གཉེར་པར་ཀླུ་ཡི་གནོད་པ་ཆེ། །རྟ་ལོའི་མཇུག་ཏུ་གཉེར་པའི་པང་དུ་ནི། །སྦྲུལ་ནག་འདོམ་གང་ཙམ་ཞིག་འཁྱིལ་ནས་བྱུང་། །ཁ་དང་འགྲིམ་པ་རྣམས་ཀྱང་སྦྲུལ་གྱིས་ལྡག །སྐག་འཇིགས་རྣམ་རྟོག་མ་བྱས་ཉམས་ལེན་བསྐྱོངས། །བྱམས་དང་སྙིང་རྗེ་བསྒོམས་པས་འཇའ་ལྟར་ཡལ། །ཁྱུང་དང་ནཱ་ག་རཀྟ་ལ་སོགས་པའི། །འཐོར་བསྙེན་ཅུང་ཟད་བྱས་པས་སྐྱོན་མ་བྱུང་། །དེ་ནས་ལུག་གི་ལོ་ཡི་ལོ་མཇུག་ལ། །བསིལ་ཁང་འོག་ཏུ་སྦྲུལ་ཆེན་གདུང་མ་ཙམ། །ཁ་དོག་སྔོ་བཀྲ་གཅིག་ནི་འཁྱིལ་ནས་གདའ། །རྣམ་རྟོག་མ་བྱས་འཁྲུལ་པ་ཡིན་ནོ་བསམ། །དེ་ཡི་སྟེང་དུ་གཅིན་སྟུག་ཆབ་བསིལ་བཏང་། །དེ་དུས་བླ་ནི་ཁྱེར་བ་ཡིན་པ་འདྲ། །དེ་ནས་བཟུང་སྟེ་འཆི་ནད་ཕོག་པར་གྱུར། །དྲུང་པའི་དྲུང་ནས་ཚེ་དབང་བརྒྱ་རྩ་དང་། །ཀརྨ་ལྷ་སྟེང་མང་ཇ་མདོ་མང་བཏོན། །ང་རང་ཟོས་པའི་དཀོར་འདིས་ཞུ་ན་ཆོག །
བླ་མའི་རྒྱུ་ཡིས་ང་ཡི་རིམ་གྲོ་ནི། །བྱས་ཀྱང་ང་ཡི་རིམ་གྲོ་འོང་རྒྱུ་མེད། །དེ་བས་ཐུགས་ནི་སྐབས་དུས་དབང་གནོང་ཟེར། །དེ་ནས་དབང་སྣ་སུམ་བརྒྱ་ལྔ་བཅུ་བསྐུར། །རང་གི་སྐུ་ནི་ཐོར་ཅོག་འདུག་པ་དེ། །སྒར་སེ་གོག་ནས་ཁོ་ལ་གཏད་པ་རྨིས། །ཁོ་ཤི་གཤེགས་རྫོངས་རྒྱུ་གཏོར་དགོས་པའི་རྟགས། །ཡང་གཅིག་འཁྲུལ་པའི་རྨི་ལམ་རྫུན་པོ་ཆེ། །བསམ་ཡས་ལྷུན་གྱིས་གྲུབ་པའི་གཙུག་ལག་ཏུ། །ང་རང་ཨོ་རྒྱན་པདྨ་ཡིན་སྣང་གདའ། །རྒྱལ་པོ་ཁྲི་སྲོང་ལྡེའུ་བཙན་འདས་འདུག་པས། །སྲས་ཀུན་ཆུང་བས་རྒྱལ་སྲིད་མི་ཟིན་དོགས། །ང་རང་ཐུགས་ནད་ཆེན་པོ་མཛད་ཅིང་གདའ། །དེ་ནས་དེ་ཚོ་མ་རེད་འཁྲུལ་པ་རེད། །བསམ་ཡས་མ་རེད་རི་ཁྲོད་འདི་རང་རེད། །ཨོ་རྒྱན་མ་རེད་ཆགས་མེད་ང་རང་རེད། །རྒྱལ་པོ་མ་རེད་གཉེར་པ་ཤི་བ་རེད། །གཉེར་པ་མེད་ན་མགོ་བཅའ་མེད་བསམ་ཛ། །རེ་སྐོར་གཤེགས་རྫོགས་རྣམས་ཀྱང་འཕྲལ་དུ་གྲུབ། །གཉེར་པ་མེད་ཀྱང་མ་གནོད་ཚེ་ཟིན་པས། །དབོན་པོ་གྲྭ་པ་རྣམས་ཀྱིས་རྒོད་པོ་བྱས། །བསམ་ཀྱིན་ཡོད་བརྡ་དེ་ནས་གཉིད་སད་དོ། །དེ་ནས་ཤི་བར་ཤེས་ཀྱང་ཁོ་ལ་གསང་། །འཆི་རྟགས་མ་བྱུང་ད་རུང་ཨེ་སོས་
རེ། །གལ་ཏེ་ཤི་ཡང་ངོས་རིས་དགེ་རྩ་རྣམས། །རྒྱལ་མཚན་ཧ་ཁོག་གོ་བས་བྱེད་འོང་ཕྱིར། །མ་ཆགས་མ་ཞན་བདེ་བ་ཅན་དུ་སོང་། །དེ་སོགས་ཁ་ད་ངོ་སྤྲོད་བྱས་པའི་ཚེ། །མ་ཤི་ན་ཡང་ཁྱེད་ཀྱི་ཆགས་ཕྱི་བསྒྲུབ། །ཤི་ཡང་ཆགས་ཞེན་སྐག་འཇིགས་ང་ལ་མེད། །རྫོགས་ཆེན་རྒྱུད་སྡེ་འདི་དག་བཀའ་བདེན་ན། །ང་ནི་འཁོར་བར་མི་འཁྱམས་ཐག་ཆོད་འདུག །ང་ཡིས་ཟོས་པའི་དཀོར་འདིས་ཞུ་ན་ཆོག །བླ་མའི་དཀོར་གྱིས་ང་ཡི་ཆོས་བྱས་ཀྱང་། །མི་ཁ་ཆོད་འདྲ་དགོས་ན་མ་གཏོགས་པ། །ང་ལ་ཕན་གནོད་མེད་པས་དགའ་སྡུག་མེད། །ཁྱེད་རང་རྗེས་ན་བཞུགས་པས་བློ་སེམས་དྲོ། །བར་དོའི་ངོ་སྤྲོད་ལམ་སྟོན་མཛོད་ཅིག་ཟེར། །མི་ཚེ་གཅིག་ལ་བླ་མའི་གཡོག་བྱས་ནས། །ཁ་ཟས་རྒྱབ་གོས་མ་གཏོགས་སྒེར་ཟོག་མེད། །ན་ཚེ་རིམ་གྲོ་ཤི་ནས་དགེ་རྩ་ཡང་། །བླ་མ་ཚང་ན་རེ་བ་མེད་པ་ནི། །ཆོས་ཀྱི་རིན་ཐང་གནད་གསང་གོ་རྟགས་ཏེ། །མར་པ་ལོཙྪའི་གསུས་དང་མཐུན་པར་སྣང་། །ཟབ་ཆོས་ཤོ་ལོ་ཀ་གཅིག་ཡོན་ལ་ཡང་། །སྟོང་གསུམ་རིན་ཆེན་བཀང་ཡང་དྲིན་མི་འཁོར། །དབང་བསྐྱར་གཅིག་ཙམ་བསྐུར་བའི་ཡོན་ལ་ཡང་། །ལུས་ངག་ཡིད་ཀྱི་སུམ་
ཆ་བླ་མའི་གཡོག །ཆ་གཅིག་རང་གི་བྱ་བ་བསྒྲུབ་དགོས་པར། །རྒྱུད་སྡེ་རྣམས་ལས་གསུངས་པའི་དོན་རྟོགས་རྟགས། །ཁོ་འདྲའི་གྲྭ་པ་འཇིག་རྟེན་འདི་ན་དཀོན། །ཁོ་ལ་དཀོར་སྒྲིབ་ཅུང་ཟད་མེད་བསམ་སྟེ། །ཡུན་རིང་ན་གཉུགས་རིང་བས་ཀེང་རུས་འདྲ། །ཧ་ཅང་ཟུག་གཟེར་ཆེ་བས་སྙིང་རྗེ་ནས། །འདི་ལ་འདི་ཙམ་འོང་བ་ཅི་ཡིན་ཨང་། །བསམས་ཤིང་ཉལ་ཚེ་ཉམས་དང་རྨི་ལམ་མཚམས། །ཧ་ཅང་ཞིམ་ཇ་མང་དུ་བཏུང་བ་དེས། །དཀོར་སྒྲིབ་ཅུང་ཟད་ཡོད་པ་སྦྱངས་བ་ཡིན། །ཟེར་བའི་སྒྲ་ཞིག་བར་སྣང་ཁམས་ནས་གྲག །དེ་ལ་བདག་ཀྱང་སྐྲག་ཅིང་འཇིགས་པར་བྱུང་། །དགེ་འདུན་སྤྱི་ཡི་དཀོར་ལས་ལྷག་པ་ཡི། །ཅུང་ཟད་ཟོས་ཀྱང་འཇུ་བར་དཀའ་བ་ཡི། །ལོ་རྒྱུས་མང་པོ་ཐོས་པས་བདེན་པར་སྣང་། །དེ་ནས་ཕྱི་དབུགས་ཆད་པར་ཉེ་བ་ན། །ནམ་མཁར་བལྟས་ནས་ཐལ་མོ་སྦྱར་བྱས་ནས། །མིག་ནི་ཕྱེ་བཙུམ་མེད་པར་དབུགས་སོང་སྟེ། །འཕོ་བ་བཏབ་ཀྱང་ཐེབས་རྟགས་མ་གསལ་བར། །རྫོགས་ཆེན་རྒྱུད་གཞུང་རྣམས་ནས་གསུངས་པ་ལྟར། །རྡོ་རྗེ་སེམས་དཔའ་སྣ་ཐག་འོད་ལམ་ལ། །རྣམ་ཤེས་མིག་ནས་འཕོས་པར་གྱུར་རམ་སེམས། །དེ་
ཉིད་ཡིན་མིན་ཕུང་པོ་བསྲེགས་ན་གསལ། །འོན་ཀྱང་སྤར་ཁས་མ་ཚུད་མཆོད་རྟེན་བྱས། །ལ་ལས་དེ་ལ་འཇའ་ཚོན་ཟུག་པར་མཐོང་། །དེ་ཡང་རྟགས་མཚན་གཞུང་དང་མཐུན་པ་ཡིན། །གཉེར་པ་ཆོས་འཕེལ་ཚེ་འདིའི་ལོ་རྒྱུས་སོ། །ཕྱི་རབས་བླ་ཕྲན་གྲྭ་པ་བྱེད་པ་ཀུན། །སྡོམ་པ་གཙང་ཞིང་ཉམས་རྟོགས་བཟང་བ་དང་། །ཆགས་ཕྱི་འགྲུབ་ཅིང་མི་ཁ་བྱམས་པ་དང་། །འཆི་ཁ་ཆགས་ཞེན་འཁྲི་བ་ཅུང་ཟད་མེད། །ཕྱི་མ་འཁོར་བར་མི་འཁྱམས་དཔའ་གདེང་ཆེ། །འདི་ལྟར་ཉམས་སུ་ལོངས་ཤིག་སྐལ་ལྡན་ཀུན། །ཚེ་འདིར་ལྟོགས་སྒུར་སྲུ་འཁྱམས་མི་དགོས་ཤིང་། །དཀའ་སྤྱད་སྙིང་རུས་བསྒྲུབ་པ་མ་བྱས་ཀྱང་། །ཡི་དམ་ལྷ་ཚོགས་དཔག་མེད་ཞལ་མཐོང་ཞིང་། །ཕྱག་རྫོགས་ཟུང་འཇུག་རྟོགས་པའི་གདིང་ཐོབ་ནས། །ཕྱི་མ་དག་པའི་ཞིང་དུ་འགྲོ་ཆོག་པ། །བླ་མའི་བཀའ་བཞིན་སྒྲུབ་པའི་ཡོན་ཏན་ཡིན། །ཕྱི་རབས་བླ་ཕྲན་གྲྭ་པ་བྱེད་པ་ཀུན། །འདི་བཞིན་ཉམས་སུ་བླངས་ན་ལེགས་པར་སྣང་། །བློ་རྒྱུ་དྲང་ན་འདི་ལ་དཀའ་རྒྱུ་མེད། །ཕྱི་རབས་གྲྭ་པ་ཀུན་གྱིས་ཉམས་སུ་ལོངས། །དེ་ནས་བདུན་གཅིག་ཙམ་གྱི་རྨི་ལམ་ལ། །དྲེལ་གཅིག་གཡང་ལ་ཤོར་ལ་ཁད་བྱུང་བས། །བླ་མ་
ཆོས་དབང་ང་ཡིས་རོགས་བྱས་ནས། །གཉིས་ཀས་འཐེན་པས་གཡང་ལ་མ་ཤོར་རྨིས། །དེ་ནས་བདུན་གཉིས་སྐབས་སུ་བརྟགས་པ་བྱས། །ཁོ་ཉིད་འཁོར་བར་གནས་ཀྱང་མྱ་ངན་འདས། །ཞེས་པའི་སྒྲ་ཞིག་མཁའ་ལས་གསལ་བར་ཐོས། །བར་དོ་གང་དུ་བསྡད་ནས་ཡོད་བསམས་པས། །དབྱིས་དོའི་མཚོ་ཁ་དེ་ན་ཡོད་དོ་ཟེར། །བླ་དེ་ཀླུ་བདུད་ཀྱིས་བཟུང་མ་བཏང་འདུག །དེ་ལ་དམིགས་པ་དྲག་ཏུ་གཏོད་བྱས་པས། །ཉེར་གཅིག་སོང་བའི་ཉམས་སྣང་རྨི་ལམ་ལ། །དམིགས་པ་དར་གཅིག་གཏད་པས་ཁོ་ཚིམས་ནས། །ཆོས་འཕེལ་བདེ་བ་ཅན་དུ་སོང་ཟེར་བའི། །སྒྲ་དེ་ཤིན་ཏུ་གསལ་བར་རྣ་བས་ཐོས། །དེ་རྗེས་ཕྱིས་ཞིག་བརྟགས་པ་བྱས་པའི་ཚེ། །ལྷ་མོ་བཞི་ཡིས་ཆོས་འཕེལ་ལམ་སྣ་དྲོངས། །བདེ་བ་ཅན་དུ་ཕྱིན་ཚར་ཟེར་བའི་སྒྲ། །དེ་ཡང་ཁོ་བོས་ཤིན་ཏུ་གསལ་བར་ཐོས། །དེ་ནས་ལོ་མཇུག་མགོ་ཟླའི་བཅུ་དྲུག་ནུབ། །ཕྱག་བསྐོར་མཎྜལ་ཕུལ་ནས་གསོལ་བ་བཏབ། །ང་ལ་དྲིན་ཆེན་གཉེར་པ་ཆོས་འཕེལ་དེ། །སྐྱེ་གནས་མཐོ་དམན་ང་ལ་རེ་བའང་། །ང་ལ་མངོན་ཤེས་མེད་པས་དེ་མི་ཤེས། །ཚེ་འདིར་སྡིག་ལྟུང་ཆེན་པོ་མ་བྱས་ཀྱང་། །
ཕྲ་ཞིབ་ཉེས་བྱས་ལྟུང་བའི་ཆར་རྒྱུན་བབས། །ཚེ་སྔོན་སྡིག་ལྟུང་ཅི་ཡོད་ཆ་མི་ཆོད། །བླ་མ་ཨོ་རྒྱན་ཡི་དམ་སྤྱན་རས་གཟིགས། །མཁའ་འགྲོ་རྡོ་རྗེ་ཕག་མོ་ཁྱེད་གསུམ་པོ། །ཡེ་ཤེས་སྤྱན་ལྡན་སྣང་སྲིད་ས་ལེར་གཟིགས། །ང་ཡི་གཉེར་པ་ཆོས་འཕེལ་གར་སྐྱེས་པའི། །ལུང་བསྟན་བསླུ་མེད་གསལ་པོར་བསྟན་དུ་གསོལ། །དེ་སྐད་གསོལ་བ་བཏབ་ནས་ཉལ་བའི་ཚེ། །རྨི་ལམ་སྐབས་སུ་ཕྲེང་ཡིག་གཅིག་གཏད་བྱུང་། །དེ་ལ་བལྟས་པས་གཉེར་པ་ཆོས་འཕེལ་ཉིད། །བདེ་བ་ཅན་དུ་སྐྱེས་པའི་ལོ་རྒྱུས་ནི། །ཤིན་ཏུ་ཞིབ་ཅིང་རྒྱས་པ་གཅིག་འདུག་སྟེ། །དེ་ནུབ་ཡིད་ལ་གསལ་ཡང་ཕྱིར་ནངས་བརྗེད། །ནམ་ལངས་གཉིད་སད་བློ་ཡང་མ་བདེ་ཛ། །གཉིད་པ་མ་ཡིན་ཉམས་ཀྱི་སྣང་བ་ལ། །སྔས་མགོར་སྐུ་གསུང་ཐུགས་རྟེན་བཞུགས་ཕྱོགས་ནས། །ཆོས་འཕེལ་ཐུགས་དམ་ལ་ཡང་མ་བཞུགས། བདེ་བ་ཅན་དུ་བྱོན་སོང་། ཟེར་བའི་ལུང་བསྟན་གསལ་པོ་ཐོས་པ་བྱུང་། །སྤྲང་པོ་བདག་ལ་མངོན་ཤེས་མི་སྲིད་ཀྱང་། །ཡི་དམ་ལྷ་ལ་མངོན་ཤེས་ཡོད་ངེས་པས། །ད་ནི་སེམས་ནད་དགོས་པར་མི་འདུག་བསམ། །ཚེ་རིང་གཟུང་གིས་ཕྱག་རྟེན་དང་བཅས་ནས། །གཉེར་པའི་སྐྱེ་གནས་ཡི་
གེར་བྲི་དགོས་ཞེས། །མྱ་ངན་གདུང་སེམས་ཆེན་པོ་བྱེད་འདུག་པས། །ཁྱོད་རང་གཉེར་པའི་སེམས་ནད་དགོས་པ་མེད། །ཁྱོད་རང་འཁོར་བར་འཁྱམ་དོགས་སེམས་ནད་ཀྱིས། །དེང་སང་བྲི་ལུང་མི་འདུག་རྗེས་སོར་བྲི། །དེ་སྐད་སྨྲས་པའི་དོན་ཡང་དེ་ལྟར་ལགས། ༈ །ཨེ་མ་ཧོ། དེང་སང་ལྔ་བརྒྱ་ཐ་མའི་དུས། །བསྟན་པ་རྟགས་ཙམ་འཛིན་ལ་ཉེ། །མི་ཚེ་དགུན་ཉི་ལས་ཀྱང་ཐུང་། །ནད་མུག་མཚོན་གསུམ་རླུང་ལྟར་འཚུབ། །དལ་འབྱོར་མི་ལུས་ཐོབ་ན་ཡང་། །ཕལ་ཆེར་སྟོང་ལོག་བྱས་པ་མང་། །སྟོང་ལོག་བྱས་པས་མི་ཆོག་པར། །སྡིག་པའི་ཁུར་པོ་ཁུར་ནས་འགྲོ། །ཡུངས་སྒྲོ་ཐུར་དུ་བྱོས་པ་བཞིན། །དམྱལ་བ་དམྱལ་ཁམས་བཅོ་བརྒྱད་དུ། །ཆར་དྲག་བབས་པ་བཞིན་དུ་མང་། །ཆོས་སྒོར་ཞུགས་པ་ཕལ་ཆེར་ཡང་། །དཀོར་གྱིས་འཁྲིབས་ནས་ཚུལ་ཁྲིམས་འཆལ། །ཕལ་ཆེར་ཀླུ་ཡི་རིགས་སུ་སྐྱེ། །ཆོས་པ་འགའ་ཞིག་ང་རྒྱལ་ཆེ། །བདག་བསྟོད་གཞན་སྨོད་ཕྲག་དོག་བྱེད། །སྟོབས་ཆེན་ཡི་དྭགས་གནས་སུ་སྐྱེ། །ཆོས་པ་རྣམ་དག་འགའ་ཞིག་ཀྱང་། །སྨོན་ལམ་འདེབས་ལུགས་ནོར་བ་དེས། །སྐྱེ་བ་བརྒྱ་སྟོང་མི་ལུས་བརྒྱུད། །ཡང་སྐྱེ་
ཡང་འཆི་ཟད་མཐའ་མེད། །དགེ་རྩ་རླབས་ཆེན་བྱེད་པའང་འགའ། །འདོད་པའི་དབང་གིས་ལྷར་སྐྱེས་ཏེ། །མཐར་ནི་ལྟུང་བའི་སྡུག་བསྔལ་མྱོང་། །བདེ་བ་ཅན་དུ་སྐྱེས་པ་རྣམས། །རྫུས་སྐྱེས་སྤྲུལ་པའི་སྐུ་ཐོབ་སྟེ། །ལུས་ལ་མཚན་དང་དཔེ་བྱད་ལྡན། །མངོན་ཤེས་རྫུ་འཕྲུལ་ཐོགས་པ་མེད། །བཀྲེས་སྐོམ་ནད་དང་རྒས་པ་མེད། །དགོས་འདོད་ཅི་བསམ་ལྷུན་གྱིས་གྲུབ། །འཇིགས་སྐྲག་སྡུག་བསྔལ་ལ་སོགས་པ། །ཞིང་དེར་རྣ་བས་ཐོས་པ་མེད། །བསྐལ་པ་བྱེ་བ་ཁྲག་ཁྲིག་ཏུ། །སངས་རྒྱས་མཇལ་ཞིང་ཆོས་ཉན་ཏེ། །ཏིང་ངེ་འཛིན་གྱིས་རྩལ་སྦྱངས་བས། །སྡིག་སྒྲིབ་ལྷག་མ་ཀུན་བཅོམ་སྟེ། །དེ་ནས་འཕོས་མ་ཐག་ཏུ་ནི། །མངོན་པར་རྫོགས་པར་སངས་རྒྱས་ནས། །འབད་མེད་ལྷུན་གྱིས་གྲུབ་པ་ཡིན། །འགྲོ་དོན་འཁོར་བ་ཇི་སྲིད་འབྱུང་། །དེ་དོན་འོད་མདོ་ཞིང་བཀོད་སོགས། །མདོ་རྒྱུད་རྣམས་ལས་རྒྱ་ཆེར་གསུངས། །གཉེར་པ་ཆོས་འཕེལ་ཞེས་བྱ་སྟེ། །ཡོན་ཏན་རྒྱ་ཆེན་མི་ཤེས་ཤིང་། །ཟླ་མཚམས་ཙམ་ཡང་མ་ཐེམ་སྟེ། །དཀའ་སྤྱད་དཀར་ཕྱོགས་གཅིག་ཀྱང་མེད། །བྱེ་ཆུང་ཉི་ཤུ་ཁ་མི་ལོང་། །དྲོ་བར་གྱོན་ཅིང་བརྒྱག་ཚད་ཟ། །དེ་འདྲའི་ངང་ལ་འདུག་པ་
ལ། །ཞིང་ཁམས་དེ་ལྟར་སྐྱེ་ཐུབ་པ། །བླ་མ་བཟང་ཕྱིར་མ་ཡིན་ཏེ། །རང་དོན་མེད་ཅིང་བླ་མ་དང་། །དགེ་འདུན་སྤྱི་ཡི་དོན་བསམ་ཞིང་། །རྫོགས་པ་ཆེན་པོ་བསྒོམས་པ་དང་། །སྨོན་ལམ་འདེབས་ལུགས་ལེགས་པ་ཡིན། །འདི་ཙམ་སུ་ཡིས་བྱས་ཀྱང་འགྲུབ། །དེ་ཕྱིར་ཕྱི་རབས་བླ་ཕྲན་གྱིས། །གྲྭ་པ་ཀུན་ལ་གཏམ་སྙན་ཆེ། །གདམས་ངག་ཟབ་མོའི་གནད་མེད་ཅིང་། །ལས་འཕྲོ་ཁོ་ནའི་རྗེས་འབྲངས་ནས། །བསྐལ་པ་བྱེ་བ་དུ་མར་ཡང་། །རིགས་དྲུག་རེས་མོས་འཁོར་བ་ལས། །ཕྱིར་མི་ལྡོག་པའི་ཞིང་ཁམས་སུ། །སྐྱེ་བར་འགྱུར་བ་ག་ལ་སྲིད། །གནད་འདི་ཀུན་གྱིས་གོ་བར་གྱིས། །དགེ་སློང་རཱ་ག་ཨ་སྱ་ཡིས། །བླ་མ་མང་པོ་བསྟེན་པ་དང་། །ཐོས་བསམ་རྒྱ་ཆེར་བྱས་པ་ཡི། །འབྲས་བུ་གནད་གསང་ཟབ་མོ་རྙེད། །བླ་མ་གྲགས་པ་དབང་ལྡན་དང་། །ཉེ་གནས་དགེ་ཚུལ་མ་ཕམ་དང་། །དབོན་པོ་ལྷ་རྗེ་དྲག་ལུ་དང་། །བླ་མ་ཆོས་དབང་ཀུན་བཟང་དང་། །གཉེར་པ་དགེ་ཚུལ་ཆོས་འཕེལ་དང་། །སློབ་བུ་སྔགས་འཆང་རྟ་མགྲིན་མགོན། །བདེ་ཆེན་ཞིང་དུ་སྐྱེས་པ་ཡིས། །རྟགས་མཚན་མཐོང་བས་བློ་སེམས་བདེ། །བླ་མ་ཆོས་ལྡན་རབ་
འབྱོར་དེ། །དགའ་ལྡན་གནས་སུ་སྐྱེས་སམ་སྙམ། །ཡབ་རྒན་ཨ་ནུ་པད་དབང་དང་། །སྔགས་འཆང་ཚེ་གཟུངས་ཞེས་བྱ་དང་། །བལ་པོ་ཡིས་ལྷ་གསུམ་པོ་དེ། །རྔ་ཡབ་གླིང་དུ་སྐྱེ་རྟགས་མཐོང་། །ཨོ་རྒྱན་མཇལ་ཕྱིར་བློ་སེམས་བདེ། །དེ་མན་འབྲེལ་ཐོགས་སྦྱིན་བདག་འགའ། །ལ་ལས་མི་ལུས་ཐོབ་པ་དང་། །ལ་ལ་ངན་འགྲོར་སོང་བ་ཡིས། །ཉམས་དང་རྨི་ལམ་ལྟས་མཐོང་བས། །སེམས་ཉིད་སྐྱོང་ཞིང་སྙིང་རྗེ་སྐྱེས། །སྦྱིན་པའི་འབྲས་བུས་མི་བསླུ་བས། །ནམ་ཞིག་བདེ་ཆེན་ཞིང་ཁམས་སུ། །བདག་ཉིད་ཁོ་ནས་འདྲེན་པར་ཤོག །ཞིང་འདིའི་བསྐལ་པ་མ་རྫོགས་པར། །བདེ་བ་ཅན་གྱི་ཞག་གཅིག་སྟེ། །འཁོར་བ་མཐའ་མེད་ལ་བསམ་ན། །སངས་རྒྱས་སྟོང་གི་མཇུག་ཙམ་དུ། །བདེ་བ་ཅན་དུ་སྐྱེ་ཐུབ་ན། །ལམ་ཐག་ཉེ་མོ་ཡིན་པར་སྣང་། །རཱ་ག་ཨ་སྱས་སྨྲས་པ་ལྟར། །དགེ་སློང་བརྩོན་འགྲུས་ཞེས་བྱས་བྲིས། །ཕྱི་རབས་གྲྭ་ཕས་དོན་གོ་ནས། །ཞིང་ཁམས་དེ་རུ་བགྲོད་པར་ཤོག །མངྒ་ལཾ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།