སྐྱབས་གནས་རཱ་ག་ཨ་སྱའི་དགུང་ལོ་རེ་ལྔ་ཚུན་གྱི་རྣམ་ཐར་གྱི་མཇུག་དད་པའི་མྱུ་གུ་ཐར་པའི་ལམ་སྟོན།
༄༅། །སྐྱབས་གནས་རཱ་ག་ཨ་སྱའི་དགུང་ལོ་རེ་ལྔ་ཚུན་གྱི་རྣམ་ཐར་གྱི་མཇུག་དད་པའི་མྱུ་གུ་ཐར་པའི་ལམ་སྟོན་ཅེས་བྱ་བ་བཞུགས་སོ། །
༄༅། །ན་མོ་གུ་རུ་རཏྣ་ཡེ། །སད་ན་ལེགས་དང་ཀླུ་ཡི་རྒྱལ་མཚན་སོགས། །སྤྲུལ་པའི་འོད་ཟེར་ལས་སྤྲུལ་འགྲོ་བའི་མགོན། །བསྟན་པའི་གསལ་བྱེད་གདུལ་བྱའི་དཔལ་གྱུར་པ། །འདྲེན་མཆོག་བླ་མ་དམ་པའི་ཞབས་ལ་འདུད། །བདག་སོགས་གདུལ་བྱར་གྱུར་པའི་འགྲོ་བ་རྣམས། །སྙིགས་དུས་མགོན་དང་སྐྱབས་གཞན་མི་འདུག་པས། །ཐུགས་རྗེའི་སྤྱན་གྱིས་གཟིགས་ཤིག་གུ་རུ་རྗེ། །བླ་མེད་མཆོག་གི་དངོས་གྲུབ་བསྩལ་དུ་གསོལ། །དམ་པ་དེ་ཡི་མཛད་ཕྲིན་རྣམ་པར་ཐར། །རྒྱས་པ་ཕྱི་ནང་གསང་བ་ཡང་གསང་སོགས། །ཉིད་ཀྱིས་མཛད་པ་དེ་ཡི་གླེགས་བམ་
འཇུག །དོན་གཉེར་འགའ་ཡི་ཆེད་དུ་བདག་གིས་འདིར། །ཅུང་ཟད་བཀོད་པ་ལྷ་དང་བླ་མ་ཡིས། །བཀའ་གནོང་བྱིན་གྱིས་བརླབ་པར་མཛད་དུ་གསོལ། །དེ་ནས་དགུང་ལོ་རེ་ལྔ་གླང་ལོ་ནས། །རྩེ་གཅིག་བསྒྲུབ་པའི་དམ་བཅའ་མཛད་དགོངས་ནས། །ཕྱི་མཚམས་བཅད་ནས་ནང་མཚམས་མ་བསྡམས་སྐབས། །བདག་སོགས་རྩ་གྲྭ་རྒྱུན་ཏུ་འདུག་རྣམས་ལ། །རཏྣ་ལུགས་སོགས་གཏེར་ཁ་གོང་འོག་གིས། །དབང་ལུང་ཅུང་ཟད་འཕྲོ་མ་གང་ལུས་དང་། །མི་འགྱུར་རྡོ་རྗེའི་གནམ་ཆོས་ཡོངས་རྫོགས་ཀྱི། །དབང་ལུང་བཀའ་གཏད་ཡོངས་སུ་རྫོགས་པ་དང་། །ཉིད་ཀྱིས་
མཛད་པའི་རི་ཆོས་གླེགས་བམ་དང་། །ཐུགས་རྗེ་ཆེན་པོའི་དམར་ཁྲིད་རྒྱས་བསྡུས་སོགས། །ཉིད་ཀྱི་མཛད་ཆོས་ཡོངས་སུ་རྫོགས་པ་ཡི། །དབང་ལུང་མ་ལུས་ཡོངས་སུ་རྫོགས་པར་མཛད། །སླར་ཡང་ཕྱི་མཚམས་ནང་མཚམས་ལེགས་བཅད་ནས། །རྩེ་གཅིག་སྒྲུབ་པའི་ངང་ལས་མ་གཡོས་ཤིང་། །དགོངས་པ་གཏད་ནས་ཞལ་བཀོད་གནང་བ་ལྟར། །གོང་དུ་རྒྱས་འབྲིང་རྣམ་གསུམ་བཞེངས་པའི་སྟེང་། །འདུལ་བའི་སྡེ་སྣོད་གླེགས་བམ་བཅུ་གཉིས་དང་། །མདོ་ཡི་སྡེ་ལ་གླེགས་བམ་སུམ་ཅུ་དང་། །དམ་ཆོས་དཀོན་མཆོག་བརྩེགས་པའི་གླེགས་བམ་ལྔ། །ཤེས་རབ་ཁྲི་པ་གླེགས་བམ་བཞི་དང་ནི། །དམ་ཆོས་ཕལ་པོ་ཆེ་ལ་གླེགས་བམ་བཞི། །གསར་མའི་རྒྱུད་འབུམ་གླེགས་བམ་བཅོ་བརྒྱད་དེ། །རྒྱལ་བས་ཇི་ལྟར་གསུང་པའི་དམ་པའི་ཆོས། །ལོ་པཎ་སྐྱེས་མཆོག་རྣམས་ཀྱི་བཀའ་དྲིན་གྱིས། །གངས་ཅན་ལྗོངས་འདིར་ཅི་བཞིན་འགྱུར་བ་ཡི། །བཀའ་འགྱུར་མ་ལུས་ཡོངས་སུ་རྫོགས་པར་གྲུབ། །གཞན་ཡང་རྟ་མཆོག་རོལ་པའི་པོ་ཏི་གཉིས། །གུ་རུའི་བཀའ་ཐང་རྒྱས་པའི་པོ་ཏི་གཅིག །ཆེ་རྒྱུད་གུར་དྲག་རྒྱུད་སོགས་པོ་ཏི་གཅིག །དེ་ལྟར་དམ་ཆོས་གླེགས་བམ་དེ་
དག་ཀྱང་། །བེཟླུར་མཐོན་མཐིང་ལྟ་བུའི་ཤོག་བུ་ལ། །རིན་ཆེན་གསེར་དངུལ་རྒྱུ་སྐར་བཀྲ་བ་འདྲ། །པདྨ་རཱ་གའི་མདོག་མཚུངས་གླེགས་ཤིང་ལ། །ལེ་བརྒན་དར་གྱིས་མདོག་མཚུངས་གླེགས་ཐག་བཅས། །རབ་ཏུ་གནས་པ་དང་བཅས་ལེགས་པར་གྲུབ། །གཞན་ཡང་ཚེ་དཔག་ཞལ་ཐང་སྟོང་སྐུ་གཉིས། །དེ་བཞིན་སྨན་བླའི་ཞལ་ཐང་སྟོང་སྐུ་གཅིག འོད་མདོ་ཞིང་བཀོད་ཚེ་རྒྱུད་བཀའ་ཐང་དང་། །པདྨ་དཀར་པོ་ཚེ་མདོ་གནམ་ཆོས་སོགས། །སོ་སོ་ནས་གསུང་ཞིང་བཀོད་བཅུ་གསུམ་བཅས། །གཟའ་སྐར་བཟང་པོའི་ཡར་ཚེས་བཅོ་ལྔ་ལ། །རབ་ཏུ་གནས་པའི་ཆོ་ག་དང་བཅས་གྲུབ། །དེ་ལྟར་རྩེ་གཅིག་སྒྲུབ་ལ་གཞོལ་བའི་ཚེ། །ཞལ་གཟིགས་ལུང་བསྟན་ལ་སོགས་མཐའ་ཡས་ཀྱང་། །གཞན་ལ་ཤིན་ཏུ་གསང་བར་མཛད་པ་ལས། །བདག་ལ་ཅུང་ཟད་སྐབས་འགར་གསུངས་པ་ནི། །ཆུ་ཕོ་བྱི་བའི་ལོ་འཇུག་རྨི་ལམ་དུ། །བདག་ནི་གཟིམས་མལ་འདི་རུ་བཞུགས་འདུག་པས། །ཞྭ་དམར་སྤྲུལ་སྐུ་ཁོ་བོའི་པང་དུ་བྱོན། །བདག་གིས་ལངས་ནས་ཕྱག་འཚལ་སྙམ་ལགས་ཀྱང་། །ལངས་རྒྱུ་གཏན་ནས་མ་རྙེད་པ་ཞིག་བྱུང་། །དེ་བརྡ་སྤྲུལ་སྐུ་བྱོན་ནས་མི་སྣང་
བའི། །ཞྭ་དམར་སྤྲུལ་སྐུ་ངོམ་གཤིས་ཕེབས་ཡོད་ཀྱང་། །བདག་གིས་མཇལ་ནི་ཐུབ་པ་མི་འདུག་གསུངས། །གླང་ལོར་ཞྭ་དམར་སྤྲུལ་སྐུ་ཡར་ཕེབས་ཀྱང་། །ཕྱག་དང་མཎྜལ་རྒྱང་ནས་ཕུལ་བ་ལས། །འཇལ་མ་ཕོད་པས་དེ་ག་མངོན་དུ་གྱུར། །དེ་རྗེས་རྒྱལ་བའི་དབང་པོ་དབུས་བཞུགས་ཚེ། །ནུབ་ཕྱོགས་ཁ་ཊཾ་གཅིག་ནི་བཙུགས་འདུག་པས། །དེ་ཡི་དབུས་ཀྱི་རྭ་དེ་ཆག་འདུག་རྨིས། །རྒྱལ་བའི་དབང་པོ་ཞིང་ཁམས་བརྗེ་བ་འདྲ། །གསུངས་ནས་བདག་ལ་བཀའ་བཀོད་གནང་བ་ལྟར། །ཟླ་བ་འགའ་ཟུང་སོ་ནས་མངོན་དུ་གྱུར། །ཡང་ནི་དྲུང་པ་སྐུ་ཁམས་བདེ་དུས་ཤིག །དམག་ནི་བརྒྱ་ཕྲག་ཙམ་གྱིས་བསྐོར་འདུག་པས། །འདི་ལ་ཇི་ལྟར་བྱས་ན་ཕན་སྨྲས་པས། །རྟ་ནི་བརྒྱ་ཙམ་བཏང་ན་ཨེ་ཕན་བསམ། །ཟེར་བའི་སྒྲ་ཞིག་རྣ་བར་གྲག་བྱུང་བས། །ཁྱེད་ཚང་སྐུ་རིམ་རྟ་ནི་བརྒྱ་ཙམ་གྱི། །འགྲོ་སྒོ་བྱེད་དགོས་སྐག་ཅིག་ཡོད་དམ་སྨྲས། །སྐུ་རིམ་འབད་ཀྱང་ཕན་པར་མ་གྱུར་ཏོ། །ཡང་ནི་སྟག་ལོར་སྐབས་ཤིག་རྨི་ལམ་དུ། །ང་ཡི་རྣ་བའི་རྩེ་མོ་དུང་ལེབ་ཙམ། །རི་བོ་ཆེ་པ་ཞིག་གིས་བཅད་འདུག་པས། །སྔར་ནས་ཁྱེད་ཚོ་རྨ་མེད་ཡིན་ནོ་ཞེས། །ཀོ་ལོང་ཆེན་པོས་ཁ་ངན་མང་པོ་
སྨྲས། །ཡང་ནི་རང་གི་སྐྲ་ནི་བྱེར་སོང་རྨིས། །གསུངས་ནས་ཞག་པོ་འགའ་ཡང་མ་ལོན་དུས། །ངང་པ་ཐང་ནས་པདྨ་ཆུ་ཡིས་ཁུར། །ཁོང་དང་ས་དེའི་ཀླུ་གཉིས་སྔར་ཞིག་ནས། །ཅུང་ཟད་འགྲས་པར་ཡོད་པའི་དོན་རེད་གསུངས། །དེ་ཕྱིར་ཡུལ་དེས་ཀླུ་ལ་དགོངས་པ་གཏད། །དགོངས་ཞག་ཚེ་ལ་དགེ་རྩ་བསྔོ་སྨོན་གཟབ། །དེ་ནས་སྐྱེ་གནས་བརྟགས་པ་བྱས་པའི་ཚེ། །ཀླུ་གདོན་གྱིས་ནི་མ་བཏང་བ་ཡི་རྟགས། །བྱུང་གསུང་ཁྱུང་དམར་སྦྱིན་སྲེག་དྲག་པོ་མཛད། །དེ་ནས་ཀླུ་དེ་ཅུང་ཟད་ཉམས་ཐུབ་གསུངས། །སླར་ཡང་སྐྱེ་གནས་བརྟགས་པ་བྱས་པའི་ཚེ། །པདྨ་དག་པའི་ཞིང་དུ་སྐྱེས་པ་ཡི། །སྒྲ་ཞིག་གསལ་པོར་རྣ་བར་གྲག་ནས་བྱུང་། །ད་ནི་ཁྱེད་ཀུན་མྱ་ངན་མ་བྱེད་གསུངས། །ཡང་ནི་བཀའ་འགྱུར་བཞེངས་པའི་སྐབས་ཤིག་ལ། །ཁོ་བོ་ན་ནས་བཀའ་འགྱུར་ལུས་སྙམ་ཚེ། །ཁོང་གིས་རྨི་ལམ་བཀའ་འགྱུར་དཀར་ཆག་ནི། །གསར་པ་ཁྱོད་ཀྱིས་ང་ལ་གཏད་བྱུང་རྨིས། །ཁྱོད་ཀྱིས་བཀའ་འགྱུར་མཐའ་ནི་འགྲུབ་གསུངས་པས། །གོང་དུ་སྨོས་ལྟར་མཐའ་རུ་ཕྱིན་པར་གྱུར། །ཡང་ནི་ཉིད་ཀྱི་དབོན་རིགས་གཞོན་ནུ་གཅིག །གློ་བུར་དྲག་པོས་གཡང་ལྷུང་ཤི་བའི་
ཚེ། །ཕ་ཟོག་ནང་རྟེན་ལ་སོགས་ཕུལ་ནས་ཀྱང་། །ང་ཡི་བུ་དེ་ཐུགས་རྗེས་འཛིན་དགོས་ཞེས། །མ་དེས་མྱ་ངན་ཆེན་པོ་བྱེད་པ་ལ། །སྒྲིབ་སྦྱང་བསྔོ་སྨོན་ལ་སོགས་གཟབ་ནས་ཀྱང་། །དེ་སྐབས་རྨི་ལམ་བརྟགས་པ་མཛད་པའི་ཚེ། །སྲོད་ཐུན་བདག་གིས་རྨི་ལམ་བུ་ཆུང་ཞིག །མེ་ཡི་ནང་དུ་བསྲེག་ལ་ཁད་འདུག་པ། །བདག་གིས་བསྲེག་ཏུ་མ་བཅུགས་བཤུག་པ་དང་། །ཕྱིས་ཐུན་སྨར་ཁམས་དཔོན་རིགས་གཅིག་གི་བུར། །སྐྱེ་བར་འདུག་པ་ཁོང་གིས་གཟིགས་གྱུར་པས། །མ་ཁྱོད་ད་ནི་མྱ་ངན་མ་བྱེད་གསུངས། །དེ་སོགས་གཞན་གྱི་སྐྱེ་གནས་མཐོ་དམན་དང་། །རྐྱེན་ཁག་ཡོད་མེད་ལ་སོགས་གསལ་ན་ཡང་། །གཞན་ལ་ཅུང་ཟད་ཙམ་ལས་གསུངས་པ་མེད། །དེ་ཕྱིར་འདིར་ཡང་ཟུར་ཙམ་ལས་མ་སྨོས། །དེ་ནས་མེ་སྦྲུལ་ལོ་མགོའི་རྨི་ལམ་དུ། །ཞྭ་དམར་པས་ནི་ཁྱེད་ཉིད་མ་བྱུང་གསུངས། །ཐུགས་དགོངས་མི་མཉེས་ཚུལ་དུ་མཛད་འདུག་ཅེས། །ཟེར་བའི་སྒྲ་ཞིག་གསལ་བར་གྲག་བྱུང་བས། །འོད་དཔག་མེད་དང་ཞྭ་དམར་གཉིས་པོ་ནི། །ངོ་བོ་གཅིག་པར་འོད་དཔག་མེད་པ་ཡི། །ཞིང་དེར་ང་རང་མྱུར་དུ་ཕྱིན་པའི་བརྡ། །ཡིན་ནམ་སྙམ་ཞེས་བདག་ལ་གསུངས་པ་
དང་། །ཡང་ནི་སྐབས་ཤིག་དུས་ཀྱང་སྙིགས་མར་སོང་། །གཞན་ཕན་འགྲོ་དོན་འོང་བར་མི་འདུག་ཅིང་། །ཁྱེད་རང་སྤུན་ཚོ་ཁ་ཉ་མ་རེད་སྐབས། །བདག་ཀྱང་ད་ནི་ཤི་ན་ལེགས་སོ་སྙམ། །ཡང་ཡང་གསུངས་པས་ཟླ་བ་འགའ་ཡི་སོ། །ཆོ་འཕྲུལ་ཟླ་བའི་ཡར་ཚེས་བཅུ་གཉིས་ལ། །ཞབས་སོགས་ཅུང་ཟད་སྐང་པ་བསྙུང་གཞི་བྱུང་། །དེ་ཚེ་ལྷ་རྗེ་ལ་སོགས་ངེད་ཅག་གིས། །ཁྱེད་ཉིད་དགུང་ལོ་མཐོ་ཕྱིར་བསྙུང་གཞི་འདིའི། །ཅི་བྱེད་ཚོད་མེད་སྐུ་རིམ་གང་དྲག་ཞིག །བཀའ་བཀོད་གནོང་དང་མྱུར་དུ་བྱེད་དོ་ཞུས། །དེ་ཚེ་ཉིད་ཀྱིས་ཞལ་ནས་གསུངས་པ་ནི། །ད་ལོ་ང་ལ་ཁོ་བོ་མི་དོགས་ཏེ། །སང་ཕོད་ནས་ནི་ཅིས་ཀྱང་ཕན་མི་འགྱུར། །སྐུ་རིམ་བྱེད་ན་ཚེ་མདོ་གང་འགྲུབ་ཐོན། །ཅེས་གསུངས་དེ་ཕྱིར་ཆེ་མདོ་འབུམ་ཐེར་དང་། །སྒྲོལ་མ་འབུམ་གཏེར་ཕྱེད་གཉིས་གདུགས་དཀར་ནི། །ཁྲི་རྫོགས་གཉིས་དང་བཀའ་འགྱུར་ལན་གྲངས་གཉིས། །ཚེ་དཔག་སྟོང་ཆོག་གཉིས་དང་འཆི་བསླུ་དང་། །ཕྱོགས་ཀྱིས་རི་བཤུ་ལན་གཉིས་ཆབ་མདོ་སོགས། །དགོན་པ་ཆེ་རིམ་རྣམས་ལ་ནོར་འགྱེད་ནི། །ལན་གཉིས་བྱས་ཤིང་གཞན་ཡང་སྐུ་རིམ་ནི། །གང་དྲག་རྒྱུན་ཆད་མེད་པ་
ལྟ་བུར་བྱས། །དེ་ནས་སྤྲུལ་གྱི་ལོ་འཇུག་སྟོན་གྱི་དུས། །འཕགས་པ་ལྷ་ཉིད་གདན་འདྲེན་བྱེད་ཞུས་པས། །འཕགས་པ་ལྷ་ནི་སྤྱན་རས་གཟིགས་སྤྲུལ་ཡིན། །གདན་འདྲེན་ཐུབ་ན་ང་ཡང་འདུན་པ་ཆེ། །གསུངས་པས་མྱུར་དུ་སྤྱན་འདྲེན་སྙན་གསན་ཕུལ། །དེ་སྐབས་ཡང་ནི་ཁོང་གིས་རྨི་ལམ་དུ། །ཁོང་གི་མདུན་དུ་དགེ་བཤེས་ཆས་བཟང་ཞིག །བདག་ལ་དགྱེས་ཚུལ་དང་བཅས་བྱོན་པ་རྨིས། །དེ་ཉིད་ཁོང་གི་བཀའ་སྲུང་ཡིན་འདུག་པའི། །ཁོང་ནི་འདི་རུ་ཕེབས་པའི་བརྡ་རེད་གསུངས། །དེ་ནས་རྒྱུན་ཡང་རིང་པོར་མ་འགོར་བར། །སྤྲུལ་པའི་སྐུ་ཡི་སྒར་ཉིད་འདི་རུ་ཕེབས། །ཚེ་དབང་ལ་སོགས་བཀའ་དབང་མང་པོ་དང་། །ལུགས་གཉིས་ཐུགས་བརྟག་ཤིན་ཏུ་ཆེ་བར་མཛད། །བླ་མ་དགུང་ལོ་ཡང་ནི་མཐོ་བ་ཚུན། །བསྙུང་གཞི་གཏན་ནས་དྲག་རང་མ་ཐུབ་ཀྱང་། །ལྷ་རྗེ་ལ་སོགས་སྐུ་རིམ་གང་དྲག་གྱིས། །ད་རུང་འཕྲལ་དུ་དོགས་ཤས་ཅུང་ཞེས་གསུངས། །སྤྲུལ་སྐུ་ཉིད་ལ་མཎྜལ་རྟེན་དུ་ནི། །རྟེན་དང་མཆོད་ཆ་རྟ་དྲེལ་གོ་ཁྲབ་དང་། །མཛོ་ནོར་གོས་དར་ལ་སོགས་འབུལ་བ་ནི། །བརྒྱ་འབུལ་གཅིག་དང་སྣ་གྲངས་ང་བདུན་ཕུལ། །དེ་སྐོར་ཡོན་བདག་ཀུན་གྱིས་
མཇལ་དགོས་ཟེར། །སྤྲུལ་སྐུ་ཉིད་ལ་ཅི་བྱེད་དགོངས་ཞུས་ཕུལ། །སྤྲུལ་སྐུའི་ཞལ་ནས་དེ་ག་ཆོག་འདུག་གསུངས། །དེ་ཕྱིར་བསྙུང་གཞི་ཤིན་ཏུ་ཐུ་བའི་སྐབས། །ཡོན་བདག་རྣམས་ཀྱིས་ཁྱེད་དང་མཇལ་དགོས་ཟེར། །འོན་ཀྱང་ཁྱེད་ཀྱི་བསྙུང་གཞི་ཐུ་བའི་སྐབས། །སྐུ་ལུས་ཀྱིས་ཀྱང་འཁྱོང་བར་མི་འདུག་ཞུས། །ང་ལ་ཅེས་ཀྱང་གནོད་པར་མི་འབྱུང་བས། །མཇལ་འདོད་འདུག་ན་མཇལ་དུ་འདུག་པས་ཆོག །གསུང་ཕྱིར་རང་གིས་གྲྭ་སློབ་མཐོ་དམན་དང་། །ངོམ་སྟོད་ཨ་ནུ་རྣམས་ཀྱིས་གཙོར་བྱས་པའི། །ཡོན་བདག་སེར་སྐྱ་མཐོ་དམན་ཀུན་གྱིས་མཇལ། །དེ་སྐབས་ཁོང་གི་དཔོན་རིགས་མི་གཅིག་ལ། །སྤྱན་གྱིས་གཟིགས་ནས་ཁྱོད་ཀྱི་ཕ་རྒན་དེ། །སྔར་ནས་འབྲུག་ལུགས་ཆོས་ལ་དད་པ་ཆེ། །ཕྱིས་ནས་བདེ་སྨོན་ལ་སོགས་འབད་བཅུག་ཀྱང་། །བདེ་བ་ཅན་དུ་སྐྱེ་བར་མ་གྱུར་ཏེ། །འབྲུག་ལུགས་དད་པ་ཆེ་བ་དེ་ཡིས་ཕྱིར། །མངའ་རིའི་ཕྱོགས་སུ་འབྲུག་པའི་རྟོགས་ལྡན་ནི། །གཞན་ལ་ཁྲིད་སྟོན་ནུས་པ་ཞིག་ཏུ་སྐྱེས། །དེ་ནས་ཚེ་འཕོས་སྐྱེ་བ་ཕྱི་མ་ལ། །བདེ་བ་ཅན་དུ་སྐྱེའམ་སྙམ་མོ་གསུངས། །གཞན་ཡང་གྲྭ་སློབ་མཐོ་དམན་ཐམས་ཅད་ལ། །རང་རང་
རྟོགས་པའི་ས་མཚམས་དང་བསྟུན་ནས། །གེགས་སེལ་བོགས་འདོན་སྐབས་སུ་གང་བབས་དང་། །རྒྱུ་འབྲས་ཆོས་ལ་བླང་དོར་གལ་ཆེ་ཞིང་། །སྒྲུབ་ལ་བརྩོན་པའི་ཞལ་གདམས་ནན་ཏན་མཛད། །གྲྭ་སློབ་ཀུན་གྱིས་སྒྲུབ་པའི་དམ་བཅའ་དང་། །རང་རང་སྒྲུབ་ཚོད་དགེ་བ་ཁས་ལེན་ཞུས། །ཕལ་པ་རྣམས་ལ་བྱང་བུ་བསྔོ་སྨོན་མཛད། །དགེ་རྩ་ཁས་ལེན་བྱེད་པ་མང་དུ་བྱུང་། །དེ་ནས་ས་ཕོ་རྟ་ཡི་ལོ་མགོ་ལ། །ད་ལོ་ནས་ནི་ཇི་ལྟར་བྱས་གྱུར་ཀྱང་། །མི་ཕན་ཟེར་བའི་སྒྲ་ཞིག་གྲག་བྱུང་བས། །དེ་མ་ཐག་ཏུ་བདག་གི་སེམས་ཀྱང་དགའ། །དེ་ཉིད་འཆི་ལྟས་ཡིན་པར་འདུག་གོ་གསུངས། །དེ་ཚེ་ཉེ་གནས་པདྨ་ཐབས་མཁས་ཀྱིས། །རྗེ་ཉིད་ཞིང་ཁམས་གཤེགས་པར་འདུག་ལགས་ན། །སྤྱིར་དུ་མ་རྒན་སེམས་ཅན་ཐམས་ཅད་དང་། །སྒོས་སུ་བདག་སོགས་གྲྭ་རིགས་ཐམས་ཅད་ལ། །དད་པའི་རྟེན་ཏུ་ལན་གཅིག་ཕེབས་པར་ཞུ། །དེ་སྐད་ཞུས་ཚེ་ཉིད་ཀྱིས་ཞལ་ནས་ཀྱང་། །དེང་སང་དུས་ནི་སྙིགས་མར་གྱུར་པའི་སྐབས། །སེམས་དཔའ་རྣམས་ཀྱང་འགྲོ་དོན་དཀའ་འདུག་ན། །ང་ནི་འདི་རུ་འོང་སྨོས་མ་བྱེད་གསུངས། །ཞེས་ཀྱང་ཞིང་འདིར་སྤྲུལ་སྐུ་མི་འབྱོན་ན། །དངོས་སུ་བཞུགས་
དང་མཚུངས་པའི་དགོངས་གཏད་ཞུ། །སེམས་ཅན་ཀུན་གྱི་བར་ཆད་སེལ་བ་དང་། །དུས་བབས་ཚེ་ན་བདེ་ཆེན་ཞིང་ཁམས་སུ། །རྗེ་ཉིད་བཞུགས་པའི་མདུན་དུ་འདྲེན་པར་ཞུ། །གཞན་ཡང་ཉིད་ཀྱི་གྲྭ་རིགས་ཆེ་ཕྲ་དང་། །རིགས་རྒྱུད་ཆོས་རྒྱུད་རྣམས་ལ་ཁྱད་པར་དུ། །ཚེ་འདིར་བཀྲ་ཤིས་བདེ་སྐྱིད་ལྡན་ནས་ཀྱང་། །ཕྱི་མ་བདེ་ཆེན་ཞིང་དུ་འདྲེན་པ་དང་། །ཁ་ལག་འབྲེལ་ཚད་ཐུགས་རྗེས་འཛིན་པར་ཞུ། །སྒོས་སུ་བདག་སོགས་རྒྱུན་དུ་འདིར་འདུག་རྣམས། །ད་ནི་རེ་ས་གཞན་དུ་མེད་ངེས་པས། །ཅི་ལྟར་མཛད་ཀྱང་རྗེ་བཙུན་ཁྱེད་རང་དགོངས། །ལྷག་པར་སྒྲུབ་གནས་འདིར་ཡང་བཀྲ་ཤིས་ཤིང་། །ཡུན་དུ་གནས་པའི་དགོངས་གཏད་མཛད་དགོས་ཞུས། །དེ་ཚེ་ཁྱེད་རྣམས་མོས་གུས་མ་ཆུང་དང་། །ང་ནི་འདི་རུ་བཞུགས་ལས་ལྷག་ཙམ་གྱི། །ཐུགས་རྗེ་བྱིན་རླབས་འབྱུང་ཞེས་ཞལ་གྱིས་བཞེས། །ཡང་ནི་རྗེ་ཉིད་གཤེགས་པའི་དུས་ཚིགས་དང་། །ཡར་མར་ཚེས་བཅུ་དགུ་གཏོར་དུས་མཆོད་སྐབས། །རྗེ་ཉིད་དེ་དུས་ངེས་པར་འབྱོན་དགོས་ཞུས། །ཉིད་ཀྱིས་ཞལ་ནས་དུས་མཆོད་སྐབས་རྣམས་སུ། །འདུན་པ་རྩེ་གཅིག་གཏོད་དང་འབྱོན་ནོ་གསུངས། །ཉིད་ཀྱི་སྐུ་
གདུང་རྟེན་ལ་གང་བཞེངས་དང་། །གདུང་མཆོད་ལ་ཡང་ཇི་ལྟར་བྱེད་ཞུས་པས། །གདུང་མཆོད་རྒྱལ་བ་རྒྱ་མཚོ་ཐོན་དང་ལེགས། །སྐུ་རྟེན་འབྲུ་གསུམ་རྒྱལ་བ་སྤྱི་སྒྲུབ་ལྟར། །རྣམ་པ་ཨོ་རྒྱན་ཆ་ལུགས་ཡིན་པ་ལ། །ངོ་བོ་བདག་དང་དབྱེར་མེད་འགྱུར་རོ་གསུངས། །གསུང་རྟེན་ལ་ནི་མན་ངག་རྙིང་དགོངས་རྒྱུད། །ཚེ་སྒྲུབ་རྒྱུད་དང་ཐུགས་རྗེ་ཆེན་པོའི་རྒྱུད། །དེ་སོགས་དངུལ་གྱིས་གླེགས་བམ་གཅིག་དང་ནི། །ཁྲོ་བོའི་གཞུང་པོད་ལེགས་པ་གཅིག་བཞེངས་གསུངས། །ཐུགས་རྟེན་ལ་ནི་བདེ་གཤེགས་སྐུ་གདུང་བརྒྱད། །ཁྲུ་གང་ཡན་ཆད་དངུལ་གྱིས་བྱུགས་པ་བཞེངས། །ང་ཡི་རྟེན་དང་རིང་བསྲེལ་ལ་སོགས་པ། །བྱུང་ཚད་གདུང་རྟེན་དེ་དག་ནང་དུ་ཞོག །རབ་གནས་ལ་སོགས་ལེགས་པར་བྱས་ནས་ཀྱང་། །ལྷ་ཁང་འདི་ལ་སྐོར་ལམ་བདེ་བ་ཞིག །ཐོན་ན་གཞན་ལ་ཕན་ཐོགས་འབྱུང་ངོ་གསུངས། །དེ་ནས་ཟླ་བ་གཅིག་གཉིས་ཙམ་ཞིག་ལ། །སྙུང་གཞི་དྭངས་སམ་ཉམས་པའི་ཚུལ་ཡང་བྱུང་། །དེ་ནས་འགྲོ་དོན་སྨར་ཁམས་ཕྱོགས་སུ་བྱོན། །ཐབས་མཁས་ཀྱང་ནི་ཉེ་སྐོར་ལྡོམ་བུར་སོང་། །བསྙུང་གཡོག་ངེད་ཅག་འགའ་ཟུང་ལས་མེད་སྐབས། །ཉིད་ཀྱི་ཞལ་ནས་ད་ནི་རྒྱལ་མཚན་
ཁྱོད། །ཀ་གདོང་འདི་རུ་སྒོ་ཁྲི་ཅིག་བཙུགས་ནས། །དེ་ཡི་སྟེང་དུ་ཁ་གང་ཞིག་ཀྱང་ཐེང་། །དེ་ཡི་སྟེང་དུ་ཅོག་ཕུ་ཞིག་ཕུབ་དང་། །ང་ནི་ཐུགས་དམ་འདུག་པའི་སྟངས་ཤིག་བྱེད། །གསུངས་ཀྱང་བསྙུང་གཞི་ཧ་ཅང་མི་ཐུ་ཕྱིར། །དེ་འདྲ་བྱེད་ནས་དགོས་པ་མེད་དོ་ཞུས། །དེ་འདྲ་བྱེད་པས་སྐྱོན་ནི་ཅི་ཡོད་གསུངས། །དེ་ཡང་བདག་ལ་འདས་པའི་བརྡ་བསྟན་འདུག །སྐབས་ཤིག་ས་གཡོས་ཆེན་པོ་བྱུང་བ་ནས། །རིམ་གྱིས་བསྙུང་གཞི་ཐུ་བའི་རྣམ་པ་བྱུང་། །སྤྲེལ་གྱི་ཟླ་མཐའ་ནས་བཟུང་སྐབས་འགའ་ལ། །ཐབས་མཁས་འོང་ནི་ཨུ་གདའ་ཡང་ཡང་གསུངས། །དེ་སྐོར་བསྙུང་གཞི་ཧ་ཅང་མི་ཐུ་ཡང་། །དེ་ནི་འདས་པའི་བརྡ་རུ་འདུག་གོ་སྙམ། །འབོད་དུ་བཏང་ཡང་སླེབས་ནི་མ་ཐུབ་པར། །བྱ་ཟླའི་ཚེས་གཅིག་སྤྲུལ་པའི་དཀྱིལ་འཁོར་བསྡུས། །ཆར་པ་དཀོན་ཞིང་གནམ་ཡང་གཡེར་བའི་སྐབས། །འཕྲལ་དུ་གདུང་ཆར་ཡུལ་ཀུན་ཁྱབ་པར་བབས། །དགོངས་པ་སྤྲོས་བྲལ་ཆོས་སྐུའི་ངང་ལ་བཞུགས། །དགེ་འདུན་བརྒྱ་ཕྲག་ཕྱེད་དང་གཉིས་ཙམ་གྱིས། །གདུང་མཆོད་ཚེས་པ་བཅུ་བདུན་བར་དུ་གཟབ། །དེ་ནས་རྒྱུད་སྡེ་བཞི་དང་འབྲེལ་བ་ཡི། །དཀྱིལ་འཁོར་བཞི་ཡི་
སྒོ་ནས་མཆོད་པ་ཕུལ། །ཀུན་རྫོབ་འབྱུང་བའི་མེ་ལས་འདས་པ་ཡི། །ཡེ་ཤེས་ལྔ་ཡི་མེ་ཡིས་གདུང་སྦྱངས་སྐབས། །སྤྲིན་དཀར་བཀྲ་ཤིས་རྟགས་བརྒྱད་རྣམ་པ་དང་། །འཇའ་ཚོན་སྣ་ལྔ་ལ་ལས་མཐོང་བ་བྱུང་། །རྟེན་མཆོད་གོ་ཁྲབ་རྟ་དྲེལ་གོས་དར་དང་། །ནོར་སོགས་སེ་ར་ཧྲག་རིམ་གྲངས་ཀ་ནི། །སྟོང་ཕྲག་གཅིག་ལས་ལྷག་ཙམ་གདུང་མཆོད་ཕུལ། །གདུང་ལ་བྱོན་པའི་རྟེན་ནི་འདི་ལྟ་སྟེ། །དབུ་ནི་བུམ་རིམ་དབུ་ཀླད་ངོ་མཚར་བྱོན། །བུམ་ཧྲིལ་ངོས་དེར་ཆེ་མཆོག་གུར་དྲག་དང་། །རྡོ་རྗེ་གྲོ་ལོད་སྐུ་སོགས་གསལ་བར་བྱོན། །ལྗགས་ཀྱི་དབང་པོ་པདྨའི་འདབ་ལྟར་བྱོན། །དེ་ཡི་དཀྱིལ་དུ་ཨ་ཡིག་གཟུགས་ཀྱང་སྣང་། །ཐུགས་ནི་རིན་པོ་ཆེ་ཡི་དབྱིབས་ལྟར་བྱོན། །ཚེམས་རྣམས་མེ་ཡིས་མ་ཉམས་སིལ་བུར་བྱོན། །འགྲམ་རུས་གཡོན་པར་རྒྱལ་བ་རྒྱ་མཚོ་ནི། །ལྷ་ལྔ་གཙོ་འཁོར་ལྔ་པོ་གསལ་བར་བྱོན། །ཕྱག་གི་ཚིགས་བར་ཨོཾ་ཡིག་དཀར་པོ་ནི། །ཤིན་ཏུ་གསལ་བ་བྲིས་པ་ལྟ་བུར་སྣང་། །རྩིབ་མའི་ངོས་ལ་དུང་དཀར་གཡས་འཁྱིལ་སོགས། །བཀྲ་ཤིས་རྟགས་བརྒྱད་གཟུགས་རྣམས་ཕལ་ཆེར་བྱོན། །ཞབས་ཀྱི་རྐང་ལ་བདེ་མཆོག་ལྷན་སྐྱེས་ནི། །ཕག་མོ་ཡུམ་དང་བཅས་པ་
གསལ་བར་བྱོན། །གདུང་གི་ཞུན་ལ་སྤྱན་རས་གཟིགས་དབང་སྐུ། །ཞལ་གཅིག་ཕྱག་གཉིས་འབུར་དོད་གསལ་བར་བྱོན། །གདུང་རུས་ཕལ་ཆེར་ཤ་རི་རམ་དུ་བྱོན། །དད་ལྡན་འགའ་རེའི་ལག་ཏུ་རིང་བསྲེལ་བྱོན། །དེ་ནས་ཉིད་ཀྱིས་ཞལ་བཀོད་ཡོད་པ་ལྟར། །ཨོ་རྒྱན་སྐུ་ཉིད་མི་ཚད་ལས་འདས་པ། །རིན་ཆེན་གསེར་གྱིས་འཇིམ་གཡོགས་བྱས་ཏེ་བཞེངས། །མན་ངག་རྙིང་དགོངས་རྒྱུད་དང་ཚེ་དཔག་རྒྱུད། །པདྨ་རྒྱལ་པོའི་རྒྱུད་དང་ཟབ་པའི་རྒྱུད། །དོན་ཡོད་ཞགས་པའི་རྒྱུད་དང་གུ་རུ་ཡི། །བཀའ་ཐང་སྡེ་ལྔ་དངུལ་གྱིས་ལེགས་པར་བཞེངས། །ཞི་ཁྲོའི་གཞུང་པོད་གཤར་བྲིས་ལེགས་པར་འགྲུབ། །ཐུགས་རྟེན་སྐུ་གདུང་བརྒྱད་པོ་མདའ་ཚད་ལྷག །ཡང་ནི་བྱང་ཆུབ་མཆོད་རྟེན་རྩག་ཚད་ཙམ། །རིན་ཆེན་དངུལ་གྱིས་གཡོགས་པ་ལེགས་པར་བཞེངས། །སྐུ་ཚབ་མཆོད་རྟེན་སོ་སོའི་ནང་གཞུག་ལ། །གོང་དུ་སྨོས་པའི་རྟེན་ནི་བྱོན་ཚད་དང་། །སྤུ་རི་རྒྱ་གར་ལི་མ་ཁམས་ཆེ་བ། །ཐུབ་པའི་རིང་བསྲེལ་ནང་གཞུག་ལྡན་པ་གཅིག །ཆོས་ཀྱི་དབང་ཕྱུག་སྐུ་འདྲ་བྱིན་རླབས་ཅན། །རྒྱལ་བའི་དབང་པོས་ཕྱག་བླུག་མཛད་པ་གཅིག །ཀརྨ་པ་ཡིས་ཕྱག་བཟོ་
མཛད་པ་ཡི། །ཙནྡན་རྡོ་རྗེ་ཕག་མོའི་འདྲ་སྐུ་གཅིག །ཆོས་ཀྱི་དབང་ཕྱུག་སྐུ་འདྲ་ཁམས་ཆེན་གཅིག །གདུང་ཚྭ་འོད་དཔག་པར་སྐུ་སྟོང་ཕྲག་གཅིག །དེ་བཞིན་གདུང་ཚྭ་ཆུང་ངུ་སྟོང་ཕྲག་གཅིག །གཞན་ཡང་གུར་དྲག་ཕྱག་རྡོར་ཕྱག་བཞི་དྲུག །པར་སྐུ་རྣམས་ནི་བརྒྱ་ཕྲག་འགའ་ཟུང་དང་། །ཉིད་ཀྱི་པད་ཞྭ་ཆོས་གོས་རྣམ་སྦྱར་དང་། །ཞྭ་ཁྲ་རྡོར་དྲིལ་སྐུ་ཆས་ཆབ་ཚང་དང་། །གནམ་ཆོས་མ་ཡིག་ཉིད་ཀྱིས་ཕྱག་བྲིས་ལ། །པོ་ཏི་བཅུ་གསུམ་ཡོངས་སུ་རྫོགས་པ་དང་། །སོ་སོར་ཟུང་འཇུག་རྒྱས་པ་ཆ་ཚང་རེ། །གནོད་སྦྱིན་འཁོར་ལོ་ལ་སོགས་གང་འོས་པའི། །ནང་གཞུག་ཁྱད་འཕགས་ཤིན་ཏུ་མང་བར་བཞུགས། །དེ་ནས་ཐ་སྐར་ཟླ་བའི་ཚེས་བཅུ་ལ། །ཉིད་ཀྱིས་མཛད་པའི་ཆོ་ག་རྒྱས་པ་ལྟར། །རབ་ཏུ་གནས་པ་དང་བཅས་ལེགས་པར་གྲུབ། །ཞལ་བཀོད་གནང་ལྟར་སྐོར་ལམ་བདེ་བར་བྱས། །སྐུ་ཚབ་ཉིད་ལ་འབུམ་ཐེར་གྲངས་རྩིས་པས། །བརྒྱ་ཕྲག་བརྒྱད་ཅུའི་འབུམ་ཕྲག་འོང་འདུག་པས། །དེ་ཕྱིར་རྒྱུན་ཆད་མེད་ལྟར་སྐོར་མི་བྱུང་། །དུས་ངན་སྙིགས་མའི་སེམས་ཅན་མང་པོ་ཡིས། །ནད་གདོན་སེལ་སོགས་ཕན་ཐོགས་ཆེ་བར་བྱུང་། །འདི་ཡང་འགྲོ་དོན་སྒོ་ཞིག་ཡིན་ནམ་
སྙམ། །བདག་ནི་ཤེས་རབ་ཆུང་ཞིང་བློ་དམན་པས། །ཉིད་ཀྱིས་རྣམ་ཐར་ཚུལ་བཞིན་རྟོགས་དཀའ་བས། །བསྐལ་མང་གོང་ནས་ཚོགས་གཉིས་བསྐྲུན་པའི་མཐུས། །མཛད་ཕྲིན་རྣམ་དཀར་ཆུ་གཏེར་ཡངས་པ་ནས། །ངང་མའི་མཆུ་ཡིས་ཐིགས་གཅིག་བླངས་པ་ལྟར། །སྒྲོ་སྐུར་སྤངས་ཏེ་ཚུལ་བཞིན་བཀོད་པ་ཡང་། །དོན་མེད་རང་འདོད་བྱས་པ་མ་ལགས་ཏེ། །ཉིད་ལ་དད་འདུན་ཤིན་ཏུ་ཆེ་བ་ཡི། །གོ་འཇོ་ཀཿཐོག་ཕྱོགས་ཀྱི་བླ་མ་འགས། །ཉིད་ཀྱི་རྣམ་ཐར་གླེགས་བམ་འཇུག་དེ་ནི། །ཁྱོད་ཀྱིས་བྲིས་ཞེས་ཡང་ཡང་བསྐུལ་བྱུང་བས། །ཉིད་ཀྱིས་གསུང་སོགས་རྟགས་མཚན་བྱུང་བ་རྣམས། །འདིར་ནི་མ་གསང་དྲང་པོར་སྨྲས་པ་ལ། །ནོངས་པ་མཆིས་ན་ཉིད་ཀྱི་སྐུ་གསུང་ཐུགས། །རྩ་གསུམ་དཀྱིལ་འཁོར་ལྷ་ཚོགས་རྣམས་ལ་བཤགས། །ཚེ་འདིར་བར་ཆད་རྐྱེན་དུ་མི་འགྱུར་ཞིང་། །ཕྱི་མ་སྒྲིབ་པར་ཡང་ནི་མ་གྱུར་ཅིག །དགེ་བས་མ་གྱུར་མཁའ་མཉམ་སེམས་ཅན་ཀུན། །བླ་མེད་རྫོགས་པའི་སངས་རྒྱས་ཐོབ་པར་ཤོག །ཅེས་པ་འདི་ནི་རྗེ་ཉིད་ཀྱི་དབོན་དུ་གྱུར་པ་བྷིཀཱུ་པྲ་ཝ་དྷ་ཛས་སྦྱར་བའོ། །མངྒ་ལཾ།།