རྣལ་འབྱོར་རཱ་ག་ཨ་སྱའི་རྣམ་ཐར་ཡི་མུག་ཉི་ཤུ་རྩ་ལྔ་པ་ཞེས་བྱ་བའི་འཆལ་གཏམ།
༄༅། །རྣལ་འབྱོར་རཱ་ག་ཨ་སྱའི་རྣམ་ཐར་ཡི་མུག་ཉི་ཤུ་རྩ་ལྔ་པ་ཞེས་བྱ་བའི་འཆལ་གཏམ་ཞིག་ཡོད་དོ། །
༄༅། །ན་མོ་གུ་རུ་མ་ཧཱ་ཀ་རུ་ཎི་ཀ་ཡེ། བླ་མ་ཡི་དམ་དབྱེར་མེད་ཐུགས་རྗེ་ཅན། །འགྲོ་བའི་གཉེན་གཅིག་དེ་ལ་ཕྱག་འཚལ་ལོ། །སྡེ་སྣོད་འཛིན་པ་ཡོངས་རྫོགས་དགེ་བའི་བཤེས། །རབ་འབྱམས་གཞུང་ལུགས་སྨྲ་བ་ཡིད་འོང་བ། །ཐ་མལ་རྨོངས་པའི་བླུན་སྒོམ་བདག་འདྲ་ལ། །རྣམ་ཐར་དགོས་གསུངས་འཁྲུལ་ལམ་ཅོ་འདྲི་ལགས། །ཡོན་ཏན་ཡོད་པར་དགོངས་ནས་གསུངས་སྲིད་ན། །རྒྱ་མཚོའི་ཀློང་དུ་མེ་ཚོལ་ཇི་བཞིན་ནོ། །ཡོན་ཏན་མེད་ལ་ཡོད་ཅེས་བླ་མའི་རྫུན། །སྨྲས་ན་རང་གི་སྡོམ་གསུམ་རྩད་ནས་འཇིག །ཅུང་ཟད་ཙམ་ལ་སྒྲོ་བཏགས་བསྟོད་བྱས་ན། །ངན་པས་
རང་བསྟོད་མཁས་པས་ཁྲེལ་བའི་རྒྱུ། །འོན་ཀྱང་མཆེད་གྲོགས་རབ་འབྱམས་པ་ཡི་བཀའ། །བཅག་པར་མི་རུང་རྟེན་འབྲེལ་གནས་ཡོད་སྙམ། །རྫུན་ཚིག་མི་འདྲེས་དྲང་པོའི་ལོ་རྒྱུས་ཤིག །སྨྲས་ལ་ཕན་ཡོན་ཉེས་དམིགས་ཅི་ཡང་མེད། །གོ་རིམ་མེད་པར་གང་དྲན་འཆོལ་བར་སྨྲ། །ཨེ་མ་སྤྲང་ཕྲུག་རཱ་གའི་མིང་ཅན་བདག །སྐྱེས་པའི་ཡུལ་ནི་ངོམ་དུ་རུང་བའི་ཡུལ། །སྔོན་ཚེ་སྐྱེས་ཆེན་དུ་མ་བྱོན་པའི་ས། །གནས་རི་མེད་ཀྱང་གནས་ཀྱི་མིང་ལྡན་པ། །ས་གཞི་ཆོས་འབྱུང་འདྲ་བའི་དཀྱིལ་དུ་སྐྱེས། །བྱིན་གྱིས་བརླབས་པའི་ཕ་ནི་བྱ་རོག་གདོང་། །མ་ཡི་རྨི་ལམ་སྐབས་
སུ་བྱུང་ཞེས་ཐོས། །ལས་ཀྱི་ཕ་ནི་ཇོ་རུ་སྔོ་མདུང་ཞེས། །ཐ་མལ་བྲན་གྱི་ཁྱིམ་དུ་ཁོ་བོ་སྐྱེས། །ལུས་ཀྱི་ཕ་ནི་དཔོན་རིགས་ཨ་ནུ་ཞེས། །བོད་རྗེ་ཁྲི་སྲོང་ལྡེའུ་བཙན་གདུང་ལས་ཆད། །མཁའ་སྤྱོད་པ་སོགས་གྲུབ་ཐོབ་མང་པོ་དང་། །རྒྱ་ཧོར་རྒྱལ་པོའི་ལུང་དང་ལས་ཀ་བླངས། །ནུས་ལྡན་སྔགས་པ་བརྒྱུད་མར་བྱུང་བའི་རྒྱུད། །སྔགས་འཆང་པདྨ་དབང་དྲག་ཅེས་བྱ་ཡིན། །བཅུ་དགུ་ལོན་ཚེ་དྲུང་པ་ཚེར་ལུང་པས། །དབུས་སུ་སོང་དང་ལེགས་པོ་འོང་གསུངས་བརྫངས། །དྲུང་པས་གྲྭ་ཚང་མི་སྣ་གཉིས་པོ་ལ། །འདི་ནི་ཨ་ནུའི་བུ་ཡིན་གྲལ་བཞག་གྱིས། །གསུངས་པའི་བཀའ་བཀོད་ངོས་ཀྱིས་གནང་བར་མཛད། །རུས་རིགས་བཟང་པོར་སྐྱེས་པའི་རྣམ་ཐར་ཡིན། །འོན་ཀྱང་གྲལ་ཆེན་བཅུ་བཞིའི་ཐ་མར་བཞག །མདོང་མོའི་ཇ་འདྲེན་མ་ཤེས་ཡི་རེ་མུག །རང་ལོ་དྲུག་ནས་ཡི་གེ་བྲི་ཀློག་བསླབས། །ལོ་ངོ་བརྒྱད་ནས་གཏོར་བསྔོས་རྒྱུན་དུ་བྱས། །ལོ་ངོ་དགུ་ནས་མི་ཟས་དཀོར་ལ་འབགས། །རིག་པ་ཤེས་རབ་ཆེ་ཞེས་ཀུན་གྱིས་སྨོན། །རྒྱ་ཡིག་བོད་ཡིག་གཏེར་ཡིག་མང་པོ་དང་། །དཀར་རྩིས་ནག་རྩིས་ས་དཔྱད་གཏོ་ཆོག་རིགས། །མདོས་ཟློག་བསྐང་བའི་རིགས་དང་དྲག་སྔགས་
རིགས། །རི་མོ་འབུར་སྐུ་ཐིག་ཚ་གར་དང་དབྱངས། །དབང་བསྐུར་རབ་གནས་སྦྱིན་སྲེག་སྒྲུབ་ཐབས་རིགས། །རྒྱ་སྒྲ་བོད་སྒྲ་བཀླག་ཐབས་ལ་སོགས་པ། །རིག་གནས་ཆེ་ཕྲ་ཀུན་ལ་འབྲེལ་པ་བཞག །བློ་གསལ་དབང་རྣོན་བྱས་པའི་རྣམ་ཐར་ཡིན། །བློ་ངན་ཤེས་པ་མང་ཡང་སྐར་འཚོགས་བཞིན། །མཐར་ཕྱིན་གཅིག་ཀྱང་མ་བྱུང་ཡི་རེ་མུག །ཕ་རྒན་ཕན་ནས་ཡབ་སྲས་མན་ཆོད་ཀྱི། །འབྲི་སྟག་ཀར་འབྲུག་རྙིང་མ་དགེ་ལྡན་སོགས། །འབྲེལ་ཐོགས་བླ་མ་སུམ་ཅུ་སོ་བསྒྲུང་ལ། །གནས་སྐབས་སོ་སོར་དབང་ཁྲིད་གདམས་པ་ཞུས། །པོད་ཆུང་ཚད་ལ་གཞལ་ནས་ལྔ་བཅུ་ཙམ། །དེ་དག་ལུང་ཐོབ་ཙམ་རེ་མ་ཡིན་པར། །རང་གིས་བསྒྲུབས་ཤེས་གཞན་ལ་འཆད་ཀྱང་ཤེས། །མཁས་གྲུབ་བླ་མ་བསྟེན་པའི་རྣམ་ཐར་ཡིན། །འཇའ་ཚོན་སྙིང་པོ་མ་མཇལ་ཡི་རེ་མུག །བཅུ་གཅིག་ལོ་ལ་ཀུན་དྲིལ་ཟླ་གཅིག་བསྒྲུབས། །སྤོས་ཀྱི་དྲི་ལྡན་རོལ་མོའི་སྒྲ་གྲག་ཐོས། །དེ་ནས་བཟུང་སྟེ་རྒྱུན་དུ་ལོ་རེ་བཞིན། །ཟླ་རེ་ཟླ་གཉིས་ཟླ་བ་གསུམ་བཞི་རེ། །དབུས་སུ་སོང་ཚེ་མ་གཏོགས་བསྙེན་སྒྲུབ་བྱས། །རང་ལོ་སོ་བདུན་ལོན་པ་མན་ཆད་དུ། །སྒྲུབ་པ་ཆེ་ཕྲ་བརྒྱ་ཕྲག་བརྒལ་ཙམ་
ཐོན། །སོ་སོའི་གཞུང་ལྟར་རྨིས་ལྟས་ཐོན་ཙམ་བྱུང་། །དངོས་སུ་མ་འགྲུབ་ལྷ་མང་ཡི་རེ་མུག །ལོ་ལྔ་ལོན་དུས་འབྲུག་པའི་ཆོས་རར་ཕྱིན། །ཉན་མི་ཤེས་ཀྱང་གནས་འགྱུ་གསལ་པོར་འཕྲིག །ལོ་བདུན་ལོན་ཚེ་མི་ལའི་མགུར་འབུམ་བལྟས། །ཞི་གནས་དྲན་མེད་ངང་ལ་ཡུན་རིང་འབྱམས། །བཅུ་གཅིག་ལོ་ལ་ཡབ་ཀྱིས་གནས་འགྱུ་སྤྱད། །བཅུ་དྲུག་ལོ་ལ་དྲུང་པའི་ཁྲིད་ཆེན་ཐོབ། །མ་བརྗེད་ཙམ་རེ་རྒྱུན་ཏུ་གནས་འགྱུ་སྐྱོང་། །ཡུན་རིང་བོགས་སྐྱེད་མ་བྱུང་ཡི་རེ་མུག །མགོ་གཙང་བཅུ་དགུའི་ལོ་ལ་གཙུག་ཕུད་ཕུལ། །ཉི་ཤུར་དགེ་ཚུལ་དགེ་སློང་སྡོམ་པ་ཞུས། །སྡོམ་གསུམ་ཐོབ་ནས་རྩ་བའི་སྡོམ་པ་རྣམས། །མ་ཉམས་སྲོག་ལྟར་བསྲུང་བས་རང་ཡིད་ཆེས། །ཕྲ་ཞིབ་ལྟུང་བར་གསོ་སྦྱོང་བཤགས་བསྐང་འབད། །ད་ལྟ་སུམ་ལྡན་རྡོ་རྗེ་འཛིན་པར་རློམས། །སྡོམ་པ་དམ་ཚིག་གཙང་བའི་རྣམ་ཐར་ཡིན། །འོན་ཀྱང་དམ་ཚིག་ས་ཡ་འབུམ་སྡེ་སོགས། །ཕྲ་ཞིབ་ལྟུང་བའི་ཆར་རྒྱུན་ཡི་རེ་མུག །གྲྭ་ཚང་ཕྱིན་འདྲོག་ཐོ་རངས་ལྐོག་བསང་བཏང་། །ཡུད་ཙམ་གཉིད་པས་ཟངས་མཁར་ཀླུ་བཙན་དང་། །ཡུལ་ལྷ་དཀར་པོ་དབུས་མི་ཚོང་དཔོན་གཟུགས། །རྡོ་དཀར་ཞོན་ནས་དྲུང་དུ་བྱུང་བ་
མཐོང་། །དེ་སྐབས་རྨི་ལམ་སླ་ང་སྟེང་ངོས་ནས། །ཞིང་སྐྱོང་ཡབ་ཡུམ་གྱེན་དུ་བྱུང་བ་ལ། །ཡུམ་གྱི་སྐྱ་འཕོང་ཁོ་བོ་བསྐྱོན་པ་ཡི། །བདེ་སྟོང་འདྲེས་པའི་ཏིང་འཛིན་བཟང་པོ་སྐྱེས། །འདུ་ཁང་སྒོ་དེར་རང་བྱུང་རྒྱལ་མོ་ནི། །ཤིན་ཏུ་གསལ་བ་རྨི་ལམ་ཡུལ་དུ་མཇལ། །ཀླུ་མོའི་རྒྱལ་དུ་འཕགས་མོའི་ཚོགས་ཆུང་བྱས། །རྨི་ལམ་སྐྱ་པ་དཀར་སེར་དམར་ལྗང་གཤར། །ཕྱག་རྡོར་གསང་བ་བསྟན་པའི་རྒྱུད་ཀྱི་དཔེ། །ལེགས་པོ་བདག་ལ་བྱིན་རྨིས་རྟེན་འབྲེལ་ལེགས། །ར་སྒྲེང་མཇལ་དུས་ཧོར་གྱིས་འཇིགས་པ་ཆེ། །སྐྱ་མའི་རྟ་རྒྱུག་བྱས་པའི་རྗེས་སུ་རྒྱུག །ཐག་རིང་རྐང་པར་རྨ་ཡོད་སྐྱིད་པ་གྲུག །འགྲོ་རྒྱུ་མེད་ཀྱང་དེ་ཉིན་རྟ་དང་མཉམ། །གནས་ཀྱི་བྱིན་རླབས་རེད་སྙམ་དད་པ་འཕེལ། །ཉིན་པར་ཤོ་རྗེས་མི་དེས་གཉིད་ཡུལ་བཅའ། །དེ་རིང་སྐྱ་མའི་རྒྱུག་དང་བོང་མཉམ་པ། །གཡོ་ཅན་རེད་ཟེར་གྲོགས་དང་འབུལ་དཔོན་པས། །བཀའ་བཀྱོན་ཐུགས་སྣང་མཛད་པས་ཡི་རེ་མུག །བསམ་ཡས་མཇལ་དུས་རྟ་མགྲིན་སྐུ་དེ་ནི། །བྱི་རུ་མར་ཁུའི་ནང་ནས་བཏོན་འཕྲལ་འདྲ། །ཤངས་ཀྱི་རྩེ་ནས་མར་ཁུའི་ཐིགས་པ་ནི།།ན་རེ་ཐིགས་ལ་ཁད་དུ་འདུག་པ་མཐོང་། །
གྲོགས་རྣམས་ཀུན་ལ་དྲིས་པས་མ་མཐོང་ཟེར། །དབུས་གནས་རགས་རིམ་མཇལ་བའི་རྣམ་ཐར་ཡིན། །ཟམ་བུ་ཙཱ་རི་མ་མཇལ་ཡི་རེ་མུག །གྲྭ་ཚང་བསྡད་འཕྲལ་ནུབ་གཅིག་ཉལ་ཁ་རུ། །ཉོན་མོངས་རྟོག་པ་ངན་པ་གཅིག་སྐྱེས་ནས། །གཉིད་མ་ཐག་ཏུ་གཟུགས་མེད་སྒྲ་གྲག་པ། །དཔོན་སློབ་ཐམས་ཅད་མཁྱེན་པ་འདི་ཉིད་བྱམས་པ་དངོས་སུ་འཇིག་རྟེན་དུ་བྱོན་པ་ཡིན་ཀྱང་ད་ཁྱེད་གདུལ་བྱ་རྣམས་ཀྱི་སེམས་རྒྱུད་ལ་འདི་འདྲ་འཆར་ཞིང་འདུག །ཟེར་བས་དེ་ཕྱི་ཆོས་ཁྲིམས་པ་བས་ཀྱང་། །དཔོན་སློབ་གཟིགས་ཡོད་སྙམ་དུ་སྐྱག་པ་ཆེ། །བསྒྲིགས་དང་འགལ་བ་སྐད་ཅིག་ཙམ་མ་བྱས། །བསྒྲིགས་དང་བཅའ་ཁྲིམས་རང་དོན་ཡིན་པར་གོ །དགེ་འདུན་ཀུན་ལ་དག་སྣང་དཔག་མེད་སྦྱངས། །རང་ཉིད་ཀུན་གྱི་ཐ་མལ་ཡིན་པར་བསམ། །རིན་པོ་ཆེ་དང་སློབ་ཆུང་དགེ་རྒན་གཉིས། །ཕལ་ཆེར་ཁྱབ་རྐང་བཞི་རེ་རྟག་པར་བཟུང་། །འཛིན་ཆོས་ཁྱབ་འབྲིང་དཔོན་པོ་ཡུན་རིང་བྱས། །འཛིན་ཆོས་དཔེ་ལུང་དེ་ཡང་གུས་པས་ཉན། །ཁྲིད་ཅེས་བྱ་བ་ལོགས་ན་མེད་དོ་སྙམ། །གཞུང་བཞིན་གནས་ཆོག་སྨན་བླ་ཆོས་སྤྱོད་ཀུན། །ཁེར་འདོན་ཕེར་བ་བཟུང་ཞིང་ཆུ་ལེན་སྐབས། །རང་དོན་ཆོས་
སྤྱོད་ཕལ་ཆེར་རེས་མོས་བཏོན། །རིག་གཞུང་རྒྱ་མཚོ་འཇམ་དབྱངས་བཞེད་པ་གཉིས། །དབུ་ནས་ལྡེབ་བུ་འགའ་ཆེན་བློ་འཛིན་བྱས། །གཙང་དུ་ཚོགས་ཆེན་དབུས་སུ་དཔོན་སློབ་དྲུང་། །ནང་དོན་དབུ་ནས་སྐྱོར་བ་ཆད་མ་ཤོར། །བཀའ་བཅུ་སྲུང་མེད་མཉམ་དུ་ཚོགས་ལངས་དུས། །འཇམ་དབྱངས་དཀར་པོས་རྩོད་རྒྱལ་གདམས་པ་བྱས། །ཁོང་ཉིད་མཁས་ཀྱང་རྒྱལ་ཁ་བདག་གིས་ལོན། །གཙང་དུ་གཟས་འཛིན་ཉིན་པར་ངག་བཅད་ནས། །འཇམ་དབྱངས་དམར་པོའི་ཤེས་རབ་རིལ་བུ་བསྒྲུབས། །བཙུན་ཆུང་རྣམས་ཀྱིས་ཐོབ་ཤོར་བྱས་ནས་ཁྱེར། །རིལ་བུ་སུ་མང་ཤེས་རབ་ཆེ་བ་འདྲ། །བསྡུས་ར་རྐང་ཁྱབ་གོ་བ་ཆེ་བར་སྐྱེས། །ཐར་རྒྱན་ཡང་ནི་རྫོགས་ལ་ཁད་ཙམ་བཟུང་། །དབུ་མ་ཊིག་ཆུང་འགྲེལ་པ་དོན་གསལ་སོགས། །དཔེ་ལྟས་བྱས་ཤིང་ཁྱབ་རྐང་འགའ་རེ་བསླབས། །གྲྭ་པ་བསྒྲིགས་མཐུན་བྱས་པའི་རྣམ་ཐར་ཡིན། །འདུག་གཉུག་ཐུང་བས་མཁས་པའི་མིང་མ་ཐོགས། །སློབ་གཉེར་སླེབས་སྒོ་མ་བྱུང་ཡི་རེ་མུག །ཐམས་ཅད་མཁྱེན་པའི་དྲུང་ནས་ཕྱག་ཆེན་ཁྲིད། །བློ་སྦྱོང་གཉིས་དང་བྱང་སྡོམ་བསྡུས་པ་དང་། །ཕག་མོའི་དབང་གཉིས་བདེ་མཆོག་དབང་
བཞི་དང་། །སྒྲོལ་དཀར་སྨན་བླ་བྱམས་ཆོས་ལམ་རིམ་སོགས། །རྒྱལ་དབང་བཅུ་པའི་བླ་མའི་རྣལ་འབྱོར་དང་། །ཕྱག་ཆེན་ངོ་སྤྲོད་ཐུགས་རྗེའི་སྒོམ་ལུང་ཐོབ། །སླེབས་ཚོད་ལེགས་པས་སྐལ་བ་བཟང་པོར་སེམས། །ལས་འཕྲོད་བསོད་ནམས་ཆེ་བའི་རྣམ་ཐར་ཡིན། །འོན་ཀྱང་དཔོན་སློབ་ཞིང་བརྗེས་ཡི་རེ་མུག །མངའ་རིས་ཚུལ་ཁྲིམས་དབུ་མཛད་རྡུལ་བྲལ་དང་། །གསེར་ཟླ་དབོན་པོས་དོན་མེད་གནོད་པ་བསྐྱལ། །རིང་པོར་མ་ཐོགས་སྨྱོ་དང་ཧུར་ཐུམ་ཤི། །གཞན་ཡང་འགའ་རེས་ཕྲག་དོག་གནོད་པ་བྱས། །གནོད་པ་ཆེ་ཆུང་དང་མཚུངས་མི་དགེར་གྱུར། །ཕ་མྱེས་བཀའ་སྲུང་འཁོར་བའི་རྣམ་ཐར་ཡིན། །བདག་གིས་བསམ་ངན་གནོད་སེམས་མ་བཟུང་ཡང་། །བདག་ལ་བརྟེན་ནས་གཞན་གནོད་ཡི་རེ་མུག །བླ་མ་ལོ་རྒན་དྲུང་རམ་རྒྱལ་རོང་བ། །དྲུང་རམ་ཀུན་འཕེལ་ཡེར་པ་མཐར་ཕྱིན་ལ། །ལྐོག་ཏུ་རྙིང་མའི་དབང་ལུང་འགའ་རེ་ཕུལ། །དྲུང་རིམ་ཀུན་འཕེལ་དྲུང་རམ་འཕེལ་རྒྱས་དང་། །དགེ་སློང་ཡང་ཤེས་ཀརྨ་དབང་པོ་དང་། །དྲུང་རམ་ཤེས་རབ་སྨན་ལོ་ཆེ་བ་ལ། །རྒྱ་ནག་ལུགས་ཀྱི་རྩིས་འགའ་ཕར་ལ་བསླབས། །ཁམས་ཀྱི་ཡོན་ཏན་དབུས་གཙང་གྲྭ་སར་
སྤེལ། །ཡོན་ཏན་ཡར་ཁུར་བྱས་པའི་རྣམ་ཐར་ཡིན། །ཉམ་ཆུང་གྲགས་པས་ཀུན་གྱིས་མི་རྩིས་མེད། །ལྐུགས་པ་དགའ་ཕོར་མཐོང་བས་ཡི་རེ་མུག །གཉེར་པ་ཞལ་ངོ་བླ་མ་ཝ་རྒན་གཉིས། །ཁྱོད་ཀྱིས་དྲག་སྔགས་མང་པོ་ཤེས་འདུག་པས། །སྐུ་དགྲ་འགའ་རེ་མེད་པར་བྱེད་རོགས་དགོས། །གོས་ལག་ལ་སོགས་ཕན་ཐོགས་ཆེར་བྱེད་གསུངས། །བཙུན་ཆུང་དྲི་མེད་རྩིས་པས་དགྲ་གཅིག་ལ། །དྲག་སྔགས་བྱེད་རོགས་གྱིས་དང་ཁྱེད་ཉིད་ཀྱི། །གང་དགོས་བྱ་བ་རྒྱུན་དུ་ངས་བསྒྲུབ་ཟེར། །དེ་དག་རུང་ངམ་རྨི་ལམ་བརྟགས་པའི་ཚེ། །བྱས་ན་ཕ་རོལ་མྱུར་དུ་བརླག་འགྱུར་ཏེ། །རང་ལ་ལྟུང་བ་ཚབས་ཆེན་ཕོག་པའི་ཚུལ། །རྒྱལ་བའི་དབང་པོས་རྨི་ལམ་ཡུལ་དུ་བསྟན། །ཤིན་ཏུ་བཀྲེས་ཤིང་དགོས་མེད་ཨུས་ཐུག་ཀྱང་། །ཉེས་སྒྲིབ་བསམས་ནས་ལག་ཏུ་མ་བླངས་སོ། །རྒྱུ་འབྲས་རྣམ་སྨིན་འཛེམ་པའི་རྣམ་ཐར་ཡིན། །འོན་ཀྱང་ཁོང་རྣམས་མ་མཉེས་ཡི་རེ་མུག །དགེ་འདུན་ཁྲི་ཕྲག་མང་པོའི་ཚོགས་ཞལ་མཇལ། །དཀྱིལ་འཁོར་ཆེན་པོ་དུ་མའི་བུམ་ཆུ་བཏུང་། །སྐུ་གདུང་དྲུང་དུ་སོར་མོ་གཅིག་ཕུལ་ནས། །ཟླ་དྲུག་ཙམ་དུ་ཞི་གནས་ལྷུན་འཐུགས་སྐྱེས། །ཇོ་
བོའི་དྲུང་དུ་སོར་མོ་གཅིག་ཕུལ་ནས། །རྒྱ་ཆེན་སྤྱོད་རྒྱུད་ལུགས་ཀྱི་སེམས་བསྐྱེད་བླངས། །ལས་འབྲས་བཟང་པོ་བཞག་པའི་རྣམ་ཐར་ཡིན། །འོན་ཀྱང་བསྐོར་བ་མ་སོགས་ཡི་རེ་མུག །ཕ་ཡུལ་དུས་ལོག་བྱུང་ཐོས་སེམས་འཕྲེང་ཚེ། །རང་གི་མ་དང་ནུ་བོར་སྐྱོན་མེད་པ། །རྨི་ལམ་ཡུལ་དུ་ཆོས་སྐྱོང་ལུང་བསྟན་བྱུང་། །དབང་ཁྲིད་བཀའ་ལུང་ཉེ་བར་མཁོ་བ་རྣམས། །བླ་མ་ཝ་རྒན་དྲུང་ནས་ལྐོག་ཏུ་ཞུས། །ཀུན་རིག་མགོན་པོའི་དབང་བསྐུར་འཕོ་འདེབས་སོགས། །ཞོར་ལ་ལྐོག་ཏུ་བཟུང་ཞིང་ལྐོག་ཏུ་བསླབས། །འགྲོ་བར་འདོད་ཀྱང་དགོངས་པ་མ་བྱུང་ཚེ། །ཝ་རྒན་དྲུང་ནས་སྤྲུག་བཙན་བཀའ་གཏད་ཐོབ། །དེ་ནུབ་སྤྱག་བཙན་གསོལ་ཁ་བྱས་པ་ཡིས། །རྨི་ལམ་སྟག་ལུང་པ་ཡི་ཚོང་དཔོན་ནི། །ཆས་བཟང་རྟ་དྲེལ་འཁོར་གཡོག་མང་བ་ཞིག །ང་ནི་ཁམས་ཀྱི་ཕྱོགས་སུ་འགྲོ་བ་ཡིན། །ཁྱོད་ཀྱང་འགྲོ་ན་བདག་གིས་གྲོགས་བྱ་ཟེར། །དེ་ནས་རིང་པོར་མ་ཐོགས་དགོངས་པ་གནང་། །ཀོང་པོར་འཇའ་ཚོན་སྙིང་པོ་མཇལ་འདོད་ཀྱང་། །དེར་སོང་ཚེ་ལ་བར་ཆད་འབྱུང་བའི་ཚུལ། །རྨི་ལམ་མཐོང་བས་མ་སོང་བྱང་ནས་སོང་། །མེར་གཞུང་ཕྱིན་པས་རོགས་ངན་བརྒྱག་མ་
འཁྱོལ། །ཅི་བྱ་གཏོལ་མེད་ལྷ་གསོལ་བཀའ་བསྒོ་བྱས། །རྨི་ལམ་བདུད་རྩི་ཤེལ་མདོག་རོ་མངར་བ། །ཁྱོར་གང་བླུད་བྱུང་འཐུང་བས་ཕྱི་ཉིན་ལ། །ངོ་མི་ཤེས་པའི་གནས་བསྐོར་བ་ཞིག་གིས། །བརྒྱགས་མཐུད་འབུལ་ལྷུག་ཁྱིམ་བར་གྲྭ་པ་བྱས། །ལྷ་དང་སྲུང་མས་མ་བསླུས་རྣམ་ཐར་ཡིན། །འོན་ཀྱང་ཁོ་ལ་ཁ་མཆུ་ཡི་རེ་མུག །ཁམས་སུ་ཕྱིན་ནས་ལོ་གྲངས་བཅུ་གསུམ་བར། །ཤི་དགེ་གསོན་གནས་གྲོང་ཆོག་བླ་མ་བྱས། །འབུལ་བ་ཆེ་བར་བྱུང་ལ་གནང་སྦྱིན་མེད། །ཆུང་ལ་འཁོང་མེད་མ་ཕུལ་བདའ་སྙགས་མེད། །ལྡོམ་བུ་བཟང་བའི་གྲོང་ལ་ཆགས་པ་མེད། །མ་བྱུང་པ་ལ་སྡང་དང་མི་འགྲོ་མེད། །ཡོན་བདག་དབུལ་ཕོངས་དམན་ལ་ངོ་ཆུང་མེད། །མཐོ་དམན་ཡོན་ཏན་མཁས་ལ་ཆགས་སྡང་མེད། །ཆུང་ངུ་ནས་བཟུང་རྒས་བར་དཀོར་ཟོས་ཀྱང་།།མགོ་བསྐོར་ལོག་འཚོར་འགྲོ་བ་ཁམ་གང་མེད། །ཡོན་ཏན་ཆེ་ཞིང་ཕན་ཐོགས་ཆེ་བར་གྲགས། །རོ་སྙོམས་ལྡོམ་བུ་བྱས་པའི་རྣམ་ཐར་ཡིན། །དཀོར་ཕུད་ཐོབ་པ་ཆུང་བས་ཡི་རེ་མུག །རྩ་བརྒྱད་ལོ་ལ་ཡབ་རྒན་ཞིང་བརྗེ་བས། །དབང་ལུང་ལྷག་མ་ཞུས་ཟེར་རྨི་ལམ་བྱུང་། །ཕ་ཆོས་ཐམས་ཅད་ཞུ་ཝིག་
དག་ཐེར་བྱས། །ལོ་མཇུག་ཞིང་བརྗེས་ཞག་བདུན་ཐུགས་དམ་བརྟན། །གདུང་སྦྱངས་འཇའ་འོད་རིང་བསྲེལ་མེ་ཏོག་ཆར། །ཐུགས་ལྗགས་སྤྱན་དང་དུང་དཀར་སྐུ་གཟུགས་བྱོན། །ཆས་ཀ་གང་ཡོད་གཤེགས་རྫོངས་བློ་ཁ་ཚིམས། །སློབ་དཔོན་དྲིན་ལེན་སོད་པའི་རྣམ་ཐར་ཡིན། །འོན་ཀྱང་སྲས་པོ་ཚེ་ཐུང་ཡི་རེ་མུག །སོ་གཅིག་ལོ་ལ་བླ་སྒྲུབ་སྒྲོལ་དཀར་བསྙེན། །ཉམས་བཟང་ཉིན་པར་ཕལ་ཆེར་ཁོར་ཡུག་འདྲ། །ཆོས་དྲུག་ནང་གི་གཏུམ་མོ་ཟླ་གཅིག་བསྒོམས། །ཉམས་བཟང་རྣམ་རྟོག་སྒོམ་ཤར་ཟླ་གསུམ་ཙམ། །དྲུང་པའི་འདྲ་སྐུའི་དྲུང་དུ་ཚོགས་མཆོད་ཕུལ། །ཞག་གཅིག་སྤྱོད་ལམ་ཀུན་ཏུ་འབྲལ་མེད་འདྲ། །དྲུང་པའི་སྤྲུལ་སྐུས་བསྐོ་འཇའ་བཀའ་དབང་གནང་། །ཟླ་བ་བརྒྱད་དགུར་སྤྱོད་ལམ་ཕལ་ཆེར་དང་། །འདྲེས་པའི་བདེ་སྟོང་ཉམས་ལེན་སྐྱེད་ཆེར་བྱུང་། །ཁྲིད་ཆུང་གཉིས་བཙུགས་ཁྲོམ་དབང་བྱས་པའི་ཚེ། །བུམ་ཆུ་སུམ་ལོགས་ཙམ་དུ་འཕེལ་བར་བྱུང་། །སོ་ཞིག་བུད་པར་དུང་དཀར་འདྲ་བ་དང་། །རྩེ་ནས་རིང་བསྲེལ་བྱུང་བ་སིལ་བུར་ཡལ། །གཞན་ཡང་མཚམས་དང་གྲོང་ཆོག་བྱས་སྐབས་འགར། །རྨི་ལམ་དག་སྣང་ཕྲན་བུ་གྲངས་ལས་འདས། །
མར་མེ་གཏོར་མ་ཡོན་ཆབ་འཛིན་པ་དང་། །སྨྱོན་པ་ཐུལ་དང་ནད་པ་སོས་པ་དང་། །ཆར་པ་ཁུག་དང་སྲིའུ་སོས་པ་དང་། །བཀའ་བསྒོ་བསྲུང་སྐུད་ཙམ་རེས་གདོན་ཕྲན་བྲོས། །རི་མེར་མཆེད་པར་སྒྲོལ་མར་གསོལ་བཏབ་པས། །དེ་ནས་མཆེད་པར་མི་འགྱུར་ལན་འགར་བྱུང་། །འཕོ་བ་བཏབ་པར་སྐག་སྒྲ་གྲག་པ་དང་། །སྒྲུང་དང་ཁོལ་བུར་བྱི་དང་རླངས་པ་ཐོན། །འཕོ་བཏབ་རོ་ལ་འཇའ་ཚོན་ཡིག་འབྲུའང་བྱོན། །རྟགས་མཚན་ཅུང་ཟད་བྱུང་བའི་རྣམ་ཐར་ཡིན། །གྲོང་ཆོག་རྒན་པོ་རེད་པས་ཡི་རེ་མུག །སོ་བདུན་རང་ལོའི་ལོ་མཇུག་ནས་བཟུང་སྟེ། །བཅུ་གསུམ་ལོ་ལ་བསྒྲུབ་པའི་དམ་བཅའ་བཟུང་། །ངག་མཚམས་དམ་པར་ཐུགས་རྗེ་ཆེན་པོ་བསྒྲུབས། །ཉམས་དང་རྨི་ལམ་འཁྲུལ་པའི་གནས་སྐབས་འགར། །རྒྱ་བོད་གྲུབ་ཆེན་བཀའ་བརྒྱུད་བླ་མའི་ཚོགས། །ཡི་དམ་ལྷ་དང་མཁའ་འགྲོ་ཆོས་སྐྱོང་ཚོགས། །སྒྲུབ་དང་མ་སྒྲུབ་འབྲེལ་པ་ཡོད་དམ་མེད། །དུ་མ་མཐོང་ཞིང་རེས་འགའ་དབང་བསྐུར་ཅིང་། །ཆོས་གསུངས་རེས་འགར་བརྡ་ཡི་ཆོས་ཀྱང་བསྟན། །རྨི་ལམ་བསྐྱེད་རིམ་བསྒོམས་པས་རང་གི་ལུས། །ཡི་དམ་དངོས་སུ་གྱུར་ཅིང་གདོན་བཏུལ་སོགས། །
བསྐྱེད་རིམ་རྩེ་གཅིག་སྒོམ་པའི་རྣམ་ཐར་ཡིན། །བདུད་ཀྱིས་བསླུ་བ་ཡིན་དོགས་ཡི་རེ་མུག །བདེ་ཉམས་གསལ་ཉམས་མི་རྟོགས་ཉམས་མྱོང་སྐྱེས། །བར་དོ་དམྱལ་བ་ལ་སོགས་གནས་སྦྱོང་ཤར། །རྨི་ལམ་དྭགས་པོ་མཇལ་བས་རྐྱེན་བྱས་ནས། །སྔོན་གྱི་ཉམས་རྟོགས་ཐམས་ཅད་ཤུན་པར་བུད། །རང་སེམས་སྤྲོས་བྲལ་ངོ་བོ་རྗེན་པར་མཐོང་། །རྟོགས་ལྡན་མིང་ཐོགས་བྱས་ཀྱང་རུང་བ་ཙམ། །ངོ་བོ་རྗེན་པར་མཐོང་བའི་རྣམ་ཐར་ཡིན། །འོང་ཀྱང་མཉམ་རྗེས་མ་འདྲེས་ཡི་རེ་མུག །ཀུན་བྱང་སེམས་མ་ཉམས་དམ་དུ་བསྲུང་། །རྩ་རླུང་ཐིག་ལེའི་དམིགས་རིམ་འགའ་རེ་བསྒོམས། །བདག་ལུས་དབབ་ལྡོག་བཀྲམ་པ་ཚད་དུ་ལོང་། །བདེ་སྟོང་ཉམས་སྐྱེས་དགའ་བཞིའི་དོན་ཡང་རིག །རྩ་རླུང་ཐིག་ལེ་བསྒོམས་པའི་རྣམ་ཐར་ཡིན། །སེམས་རྟགས་བྱུང་ཡང་ལུས་རྟགས་དྲོད་མ་སྐྱེས། །རས་རྐྱང་ཐུབ་ཙམ་མ་བྱུང་ཡི་རེ་མུག །རྒྱལ་བའི་ཐུགས་དང་འགྲོ་དྲུག་སེམས་ཅན་སེམས། །རང་སེམས་ངོ་བོ་དབྱེར་མེད་སྟོང་པར་རྟོགས། །ཕྱི་ནང་སྣོད་བཅུད་འབྱུང་བཞི་ལ་སོགས་དང་། །བསྲེས་ནས་སྒོམ་ཚེ་དབྱེར་མེད་རོ་གཅིག་འདྲ། །ཕྱི་རོལ་ས་རྡོ་རི་བྲག་དངོས་པོ་ཀུན། །བཅོས་ནས་
བློས་བརྟག་བསྒོམས་པ་མ་ཡིན་པར། །ཤུགས་འབྱུང་ངོ་བོ་སྟོང་ལ་རང་བཞིན་གསལ། །དཔེར་ན་ཆུ་ཟླ་འཇའ་ཚོན་བཞིན་དུ་མཐོང་། །སྟོང་ཉིད་ལྟ་བ་རྟོགས་པའི་རྣམ་ཐར་ཡིན། །འོན་ཀྱང་གཞན་སྣང་རྫུ་འཕྲུལ་སྟོན་མ་ནུས། །ས་རྡོ་རྣམས་ཀྱང་སྲ་མཁྲེགས་དེ་ག་རང་། །སྟོང་སྒྲོབ་འུར་སྒོག་འདྲ་བས་ཡི་རེ་མུག །མཚམས་བསྡམས་ལོ་གསུམ་ལྷག་ཙམ་སོང་བ་ནས། །དངོས་སུ་མངོན་ཤེས་ཐོགས་པ་མ་མཆིས་ཀྱང་། །ཉམས་དང་རྨི་ལམ་འཁྲུལ་པའི་གནས་སྐབས་འགར། །སྔོན་གནས་སྐྱེ་བ་འགའ་ཞིག་དྲན་པ་སྙམ། །དུས་ཕྱིས་གནམ་ཆོས་ནང་གི་སྐྱེས་རབས་དང་། །གཏེར་རྙིང་འགའ་ཡི་ལུང་བསྟན་ཚིག་ཟུར་མཐུན། །བདུད་འདུལ་རྡོ་རྗེའི་ཤོག་སེར་ལུང་བསྟན་ལ། །ཅོག་རོ་ཀླུ་ཡི་རྒྱལ་མཚན་སྤྲུལ་པར་གསུངས། །དེ་ཕྱིར་ཟུར་ཙམ་འབྲིར་སྤོབས་འདི་ལྟ་སྟེ། །ཐུབ་པའི་ཞལ་མཐོང་འཕགས་པ་ཀུན་དགའ་བོའི། །སློབ་མར་གྱུར་པ་དགེ་སློང་དྷ་ཡི་མིང་། །ཀླུ་སྒྲུབ་སློབ་མ་རྒྱལ་རིགས་པཎྜི་ཏ། །ཛཱ་ཡེ་མངྒ་ལ་ཞེས་ཆོས་སྲིད་སྐྱོང་། །མངའ་བདག་ཁྲི་སྲོང་ལྡེའུ་བཙན་སྲས་ཐ་ཆུང་། །མཇིང་ཡོན་སད་ན་ལེགས་ཞེས་བོད་ཁམས་དབང་། །དུས་གསུམ་མཁྱེན་
པའི་ཕྱག་མཛོད་རབ་དགའི་མིང་། །གཡུང་སྟོན་ཆེན་པོའི་དབོན་པོ་རྒྱ་ནག་གིས། །རྒྱལ་པོའི་བླ་མཆོད་བྱེད་པ་གཡུང་ཆུང་བ། །ཀོང་པོའི་ཡུལ་དུ་གཏེར་ཕྲན་གནས་ཀྱི་སྒོ། །འབྱེད་པའི་ཆགས་ལམ་རྣལ་འབྱོར་ཤྭ་རིའི་མིང་། །ལྷ་སའི་ཕྱོགས་སུ་ཇོ་ཤཱཀ་རྣམ་གཉིས་ལ། མཆོད་པ་བཀུར་སྟི་འགྲུབ་པའི་ཚོང་དཔོན་ཞིག །གར་སྐྱེས་ཟུར་ཙམ་ཤེས་པའི་རྣམ་ཐར་ཡིན། །འོན་ཀྱང་ཁྲིམས་བཅད་ངག་འཁྱལ་རྣམ་སྨིན་གྱིས། །སྐབས་རེར་དམན་པའི་ལུས་གྱུར་ཡི་རེ་མུག །མཚམས་བསྡམས་ལོ་གྲངས་བཅུ་ཙམ་ལོན་པའི་དུས། །ཉམས་དང་རྨི་ལམ་རྟེན་འབྲེལ་ལ་བརྟེན་ནས། །དབང་དྲག་རྒྱ་མཚོའི་སྤྲུལ་སྐུར་ངོས་བཟུང་ནས། །དབང་ལུང་ཕུལ་ཅིང་བརྟན་བཞུགས་རྟེན་འབྲེལ་བསྒྲིགས། །སྐུ་ཚེའི་བར་ཆད་བསལ་ཅིང་གནམ་ཆོས་ནི། །ངོ་མཚར་པོད་ཆུང་བཅུ་བཞི་ཙམ་ཞིག་བྱུང་། །གནས་སྒོ་འགའ་ཟུང་ཕྱེས་ཤིང་རྟེན་འབྲེལ་འགྲིགས། །པད་འབྱུང་བསྟན་ལ་ཕན་པའི་རྣམ་ཐར་ཡིན། །འོན་ཀྱང་བར་ཆད་དབང་བཙན་བཟློག་དཀའ་བས། །ས་གཏེར་མི་ཐོན་སྐུ་ཚེའི་བར་ཆད་དོགས། །འགྲོ་བ་བསོད་ནམས་དམན་པས་ཡི་རེ་མུག །རྗེ་འབངས་ཤུད་པུ་དཔལ་སེང་སྐྱེ་བའི་མཐའ། །
གཏེར་སྟོན་མི་འགྱུར་རྡོ་རྗེ་འདི་ཉིད་དུ། །སྐྱེ་བ་ཀུན་ཏུ་འབྲལ་བ་མེད་པ་དང་། །ཕལ་ཆེར་བླ་སློབ་རེས་མོས་གྱུར་པ་དང་། །ད་རེས་གཏེར་བློན་ཆོས་ཀྱི་བདག་པོ་རུ། །ལུང་བསྟན་གསལ་ཞིང་ཆག་ཕྱི་གང་འགྲུབ་བྱས། །ཚེ་རབས་ལས་འཕྲོ་བཟང་བའི་རྣམ་ཐར་ཡིན། །འོན་ཀྱང་བར་ཆད་རྐྱེན་མང་ལམ་འགྲོ་དཀའ། །ཆོས་ལ་བར་ཆད་མང་བས་ཡི་རེ་མུག །སྤྲང་རྒན་བདག་ལ་བབ་ཐོབ་འོས་མེད་ཀྱང་། །ཚེ་རབས་དུ་མའི་སྨོན་ལམ་རྣམ་དག་པས། །སྦྱངས་པ་སྔོན་སོང་སྐལ་ལྡན་ལས་འཕྲོ་ཅན། །རང་ལ་ལྟོས་བཅས་སློབ་བུ་འགའ་རེ་མཆིས། །ལས་ཅན་སློབ་མ་འདུས་པའི་རྣམ་ཐར་ཡིན། །འོན་ཀྱང་བར་ཆད་དབང་གིས་ལམ་མི་འགྲོ། །འབྲས་མེད་ཐ་མལ་པར་གྱུར་ཡི་རེ་མུག །ཆེད་དུ་ཟས་ནོར་དོན་གཉེར་མ་ལགས་ཀྱང་། །མིག་འབྲས་གསལ་ཚེ་ལོ་ཤས་དབང་དང་ལུང་། །ཁྲིད་སོགས་གཞན་དོན་ཅི་འཕེལ་བྱེད་པར་སེམས། །དེ་ནས་ཚེ་མཇུག་ཅི་འདུག་སྒྲུབ་ལ་དྲིལ། །དཀོར་རྫས་ཀུན་ཀྱང་དགེ་ཕྱོགས་གང་འགྲུབ་བསམ། །དམ་ཆོས་བྱེད་སྙམ་ཡོད་པའི་རྣམ་ཐར་ཡིན། །འོན་ཀྱང་བསམ་ཚད་ཐོག་ཏུ་ག་ལ་ཁེལ། །རྐྱེན་དང་བར་ཆད་རྒོད་པས་ཡི་རེ་
མུག །ཉམས་དང་རྨི་ལམ་ལྷ་ཡི་ལུང་བསྟན་དང་། །རང་གིས་མཐོང་དང་གནམ་ཆོས་ལུང་བསྟན་དང་། །རང་གི་སྨོན་ལམ་ཚོགས་གཉིས་རྒྱུ་འབྲས་དང་། །མདོ་རྒྱུད་རྣམས་ནས་གསུངས་པ་གོ་བསྟུན་ཏེ། །འདི་ནས་འཕོས་ཚེ་བདེ་ཆེན་ཞིང་ཁམས་སུ། །མེ་ཏོག་པདྨར་བརྫུས་སྐྱེས་དགེ་སློང་གྱུར། །བློ་བདེ་ཅུང་ཟད་ཡོད་པའི་རྣམ་ཐར་ཡིན། །འོན་ཀྱང་འཆི་རྐྱེན་ཟུག་གཟེར་ཡི་རེ་མུག །རང་གིས་ཤེས་ཤིང་མཐོང་བ་མ་མཆིས་ཀྱང་། །གནམ་ཆོས་ནང་ནས་གསུངས་པའི་དོན་བསྡུ་ན། །བདེ་བ་ཅན་གྱི་བརྫུས་སྐྱེས་དགེ་སློང་དེའི། །རྣམ་ཤེས་དུམ་བུ་ལྔ་རུ་གྱེས་གྱུར་ཏེ། །སྨན་བླའི་དྲུང་དུ་སེམས་དཔའ་འགྲོ་ལ་གཟིགས། །པད་འབྱུང་དྲུང་དུ་རིག་འཛིན་རྨ་བྱའི་མགྲིན། །འོད་མཚན་དབང་པོ་བརྒྱད་པའི་དབོན་རིགས་ཤིག །མི་འགྱུར་རྡོ་རྗེས་རིགས་བརྒྱུད་དབོན་པོ་ཞིག །ཚེ་ལོ་དྲུག་བརྒྱའི་སྐབས་སུ་རྒྱ་གར་དུ། །དགེ་སློང་གནས་བརྟན་བཅུ་དྲུག་མཇལ་བ་གཅིག །དེ་ལྔ་མ་གཏོགས་འཁོར་བར་མི་སྐྱེ་སྟེ། །མཐར་ནི་ཞིང་དེར་དགེ་སློང་དེ་ཉིད་ནི། །པདྨ་ཆུ་སྐྱེས་དྲི་མེད་ཅེས་བྱ་བའི། །དེ་བཞིན་གཤེགས་པར་འགྱུར་བར་ལུང་བསྟན་ཅིང་། །འབྲེལ་ཐོགས་ཕལ་ཆེར་ཞིང་དེར་སྐྱེ་
བར་གསུངས། །མཐར་ཐུག་འབྲས་བུ་ཐོབ་པའི་རྣམ་ཐར་ཡིན། །ཐོབ་ཀྱང་སྡིག་ཆེན་འགའ་དང་འབྲེལ་པ་ཆེ། །སོ་སོས་བསགས་པའི་ལས་འབྲས་ཆུད་མི་ཟ། །འབྲེལ་ཐོགས་ཐམས་ཅད་སྐྱེ་འཆི་ཡི་རེ་མུག །གང་དྲན་ཆལ་ཆོལ་བྲིས་པའི་རྣམ་ཐར་འདི། །གཞན་གྱིས་མཐོང་ན་འུད་དང་ཟོབ་པོར་མཐོང་། །འཕྱ་བའི་སྐུར་འདེབས་མཚར་གཏམ་ལུང་པ་འགེངས། །དེ་ཕྱིར་གཞན་ལ་མ་བསྟན་སྦ་བར་ཞུ། །རྫུན་མེད་དྲང་པོའི་བསམས་པས་མགྱོགས་བྲིས་རེད། །བྲིས་ངན་ཐོབ་ཆ་མ་དག་ཡི་རེ་མུག །ཡི་མུག་ཉི་ཤུ་རྩ་ལྔའི་རྣམ་ཐར་འདི། །མཚམས་སྐབས་ཐུན་བར་ཞིག་གི་ཁོངས་ནས་ཕུལ། །འགྲོས་འགྲིམ་ནམ་འོང་ཆ་མེད་བསམ་པའི་ཕྱིར། །ཚེས་དྲུག་བཀའ་ཤོག་སླེབས་པས་དེ་ཡི་ཉིན། །རྫོགས་པར་བྲིས་པས་དགེ་ལེགས་འཕེལ་གྱུར་ཅིག །མངྒ་ལཾ།། ༈ གླེགས་བམ་འདི་ཉིད་བཞེངས་པ་དང་། །འཆང་དང་ཀློག་པའི་དགེ་བའི་མཐུས། །བདག་ཅག་མཆེད་གཉིས་འཁོར་བཅས་དང་། །འཚོ་བ་སྦྱོར་བའི་ཡོན་བདག་རྣམས། །ཚེ་
འདིར་བཀྲ་ཤིས་ཚེ་རིང་ཞིང་། །བདེ་སྐྱིད་ཕུན་སུམ་ཚོགས་པ་དང་། །ནམ་ཞིག་འདི་ནས་འཕོས་མ་ཐག །བདེ་བ་ཅན་དུ་སྐྱེ་ཕྱིར་བསྔོ། །ཞེས་པ་ ༧ ཨ་རཱ་གས་སོ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།
༈ ཤ་རི་རམ། ༈ རྩིབ་རུས་རྣམས་ལ་བཀྲ་ཤིས་རྟགས་བརྒྱད་བྱོན་པའོ།། ༈ ཚེམས། ༈ ཕྱི་ཚིགས་བར་མ་ལ་ཨོཾ།
༈ འགྲམ་རུས་གཡོན་པར་རྒྱལ་བ་རྒྱ་མཚོའི་ལྟ་ཚོགས། ཐུགས་རིན་པོ་ཆེའི་དབྱིབས། ༈ གདུང་གི་ཞུན་ལ་སྤྱན་རས་གཟིགས་འགྲོ་འདུལ་ཕྲུག་བཞི། ༈ ལྗགས། ༈ ཞབས་ཀྱི་རྐང་ལ་བདེ་མཆོག་ཡབ་ཡུམ་བྱོན།
༈ གུ་དྲག ༈ དབུ་བུམ་རིལ་ལ་བྱོན་པ་ཆེ་མཆོག ༈ གྲོ་ལོད། ༈ སྙིང་གི་དཀྱིལ་དུ་ཨོ་རྒྱན་བྱོན།