སྤྲུལ་སྐུ་མི་འགྱུར་རྡོ་རྗེའི་ནང་གི་རྣམ་ཐར་སྤྱི་དོན་གསུམ་པ་གནམ་ཆོས་དང་དགོངས་གཏེར་གྱི་གཏེར་འབྱུང་།
༄༅། །སྤྲུལ་སྐུ་མི་འགྱུར་རྡོ་རྗེའི་ནང་གི་རྣམ་ཐར་སྤྱི་དོན་གསུམ་པ་གནམ་ཆོས་དང་དགོངས་གཏེར་གྱི་གཏེར་འབྱུང་བཞུགས་སོ།།
༄༅། །ན་མོ་གུ་རུ་པྲ་ཝ་ཀཱ་ར་དྷེ་ཝ་ཌཱཀྐི་ནཱི་དྷརྨ་སིདྷི་སརྦ་ཧཱུཾ། གང་གི་རྡོ་རྗེའི་གསུང་ནི་གཞོམ་མེད་ནཱ་དའི་སྒྲ་སྟེ་ལྷ་ཡི་རྔ་ལྟར་འདུ་མི་མཛད་པར་ཡང་། །ནམ་མཁའི་མཐའ་མཉམ་འགྲོ་བ་སོ་སོའི་སྐད་དུ་སྐལ་པར་མཚམས་པའི་ཆོས་སྒྲ་སྒྲོག་མཛད་གསུང་རྡོ་རྗེ། །སྨྲ་བའི་སེང་གེ་སྨྲ་བའི་སྐྱེས་མཆོག་ཡན་ལག་དྲུག་ཅུའི་དབྱངས་ལྡན་ཟབ་ཆོས་ཀུན་གྱི་འབྱུང་གནས་གཏེར། །ཕྱོགས་བཅུ་དུས་བཞིའི་རྒྱལ་བ་ཀུན་གྱི་གསུང་གི་གསང་བའི་མཛོད་འཛིན་གསུང་གི་དབང་ཕྱུག་པདྨའི་རྒྱལ་ལ་ཕྱག་འཚལ་ལོ། །ཨ་ཡིག་བརྗོད་མེད་བརྗོད་པ་ཀུན་གྱི་གཞིར་གྱུར་ཤེས་རབ་ཕ་རོལ་ཕྱིན། །འཕགས་བཞི་
བསྐྱེད་ཡུམ་ཨཱ་ལི་ཀཱ་ལི་སྒྲ་དང་ཡི་གེ་ཀུན་གྱི་བདག །བླ་མེད་གསང་སྔགས་ཀུན་གྱི་གསང་བའི་མཛོད་འཆང་དབྱིངས་ཀྱི་ཊཱ་ཀི་མ། །གངྒའི་བདག་མོ་དབྱངས་ཅན་ལྷ་མོ་མཚོ་རྒྱལ་མ་དེས་བདག་སྐྱོངས་ཤིག །པད་འབྱུང་ཐུགས་རྗེའི་ལྷ་ལམ་ཁྱོན་ཡངས་པར། །སྨོན་ལམ་ལས་འཕྲོའི་ཆུ་འཛིན་རབ་ཏུ་འཁྲིགས། །ཟབ་ཆོས་སྙན་བརྒྱུད་དབྱར་རྔ་འདི་བསྒྲགས་ནས། །སྨིན་གྲོལ་དབང་ལུང་ཁྲིད་ཀྱིས་ཆར་ཕབ་པས། །སྐལ་མེད་ལོག་ལྟ་པྲ་ཏའི་རིགས་ཅན་རྣམས། །བདུད་རྩི་མེ་རུ་མཐོང་ནས་མི་བཟོད་འབར། །འོན་ཀྱང་སྐལ་ལྡན་ཆར་འདོད་རྨ་བྱའི་ཚོགས། །དད་པའི་སྤུ་ལོང་
གཡོ་ཞིང་གར་སྟབས་བསྒྱུར། །ཨེ་མ་ཧོ། སྔོན་མེད་གསར་བྱུང་གནམ་ཆོས་དགོངས་པའི་གཏེར། །བྱུང་ཚུལ་གཏེར་འབྱུང་ཆེན་མོ་འདིར་འཆད་ཀྱིས། །གང་དག་མུ་སྟེགས་རིགས་ལས་ཚེ་འཕོས་པའི། །དམ་ཆོས་བཤད་ན་ལུག་བས་བླུན་པ་ལ། །མི་དགེ་སྤྱོད་ན་དྲན་རྒྱ་འདྲེ་བས་སྤྱང་། །བཟླས་བརྗོད་བྱེད་ལ་ལྐུགས་པའི་ངང་ཚུལ་ལ། །སྐུར་པ་འདེབས་ན་གྲེ་ལྕེ་ནེ་ཚོ་འདྲ། །དད་མེད་དགེ་རྩ་ཆད་རྣམས་ཕྱིར་དེངས་ཤིག །ཕྱོགས་ཞེན་ཨ་འཐས་ལོག་ལྟས་རང་རྒྱུད་རེངས། །རང་ཕྱོགས་ཁྱི་སྐྱག་རྙེད་ཀྱང་དེར་དུ་བཏུམ། །གཞན་ཕྱོགས་སངས་རྒྱས་སྐུ་ལའང་ཐལ་བ་གཏོར། །ཕྲག་དོག་མེ་འབར་སྐུར་འདེབས་དུད་པ་ཅན། །དེ་དག་འདི་ལ་མ་ཉན་རྣ་བ་ཁོབ། །ཉམས་ལེན་དད་པ་མེད་ཀྱང་གཟིགས་རྒྱ་ཅན། །ཕྱོགས་ཞེན་བྲལ་ཞིང་རྣམ་དཔྱོད་ཤེས་རབ་ཅན། །བློ་སེམས་དྲང་ཞིང་གཟུ་བོར་གནས་པ་རྣམས། །འདི་ལ་གསོན་ལ་ཡིན་མིན་རིགས་པས་དཔྱོད། །ཆེད་དུ་གཏེར་ཆོས་དང་དུ་མི་ལེན་ཀྱང་། །མདོ་རྒྱུད་རྒྱ་ཆེན་རྣམས་ལ་སྦྱངས་པ་ཅན། །ཐུབ་བསྟན་གཞུང་བསྲང་བསྟན་པ་སྤྱི་ཡི་བདག །ལུང་དང་རིགས་པས་ཕྱུག་པའི་བཤེས་གཉེན་རྣམས། །མོད་རྒྱུད་ལུང་འདྲེན་
འདི་དག་འབྲེལ་མི་འབྲེལ། །པད་འབྱུང་ཐུགས་རྗེའི་ཚད་བཟུང་ཡོད་དམ་མེད། །དེ་དག་དགོངས་པས་དཔྱོད་ལ་ཞལ་ཚོན་ཆོད། །གདེང་ནས་མོས་ཀྱང་རང་ཚུགས་ཤོར་དོགས་ཅན། །ཟབ་ཆོས་འདོད་ཀྱང་ཞུས་ན་སྨྲ་བབ་དོགས། །ཆེ་ཚུགས་ཨང་འདིར་སྒྲོག་གིས་བཅིངས་བ་རྣམས། །འདི་ཚུལ་ཐོས་ཀྱང་སྙན་གྱི་རྒྱབ་ཏུ་སྐྱུར། །ཟབ་པར་ཤེས་ཀྱང་ཆོས་རྒྱུད་འཆུགས་དོགས་ཀྱིས། །གྲྭ་སློབ་རྣམས་ལ་ལྐོག་ཏུ་ཐེ་ཚོམ་བསླངས། །མགུ་ཡང་མ་མགུ་བ་ཡི་རྣམ་འགྱུར་ཅན། །དེ་དག་ངག་འཁྱལ་རྣམ་སྨིན་ཐུགས་ལ་ཞོག །རང་སྐྱོན་ལྟ་ན་དམུས་ལོང་ངང་ཚུལ་ལ། །གཞན་སྐྱོན་ལྟ་ན་མིག་རྩ་ཁྲ་ལས་རྣོ། །ལྕེ་ལ་གླང་དོར་ལྔ་བརྒྱའི་ལས་འཕྲོ་ཅན། །ཡིན་རུང་མིན་རུང་མཐོ་རུང་དམའ་རུང་བ། །ཀུན་ལ་ངག་འཁྱལ་སྐུར་འདེབས་ཆར་འབེབས་མཁན། །དེ་དག་བཅོས་སུ་མེད་དེ་སྙིང་རྗེའི་གནས། །འོན་ཀྱང་འབྲེལ་པ་སྣ་གཅིག་ཐོབ་པ་སྟེ། །མ་འོངས་པ་ན་འདི་ཡི་གདུལ་བྱར་ངེས། །རང་རྒྱུད་མཛེ་ཕོ་འདྲ་ཡང་བཅོས་སེམས་མེད། །གཞན་ལ་ལེགས་པའི་ཡོན་ཏན་མཐོང་ཐོས་ན། །རང་ལ་གནོད་དོགས་བུ་ཤིའི་མ་བཞིན་སྡུག །ལྷ་མིན་སྐྱེ་བའི་ལས་འཕྲོ་ཅན་རྣམས་
ནི། །འདི་ཡིས་ཁྱེད་ལ་འདི་ཕྱི་གང་དུ་ཡང་། །མི་གནོད་ངེས་པར་རང་སེམས་རྣལ་དུ་ཕོབ། །པད་འབྱུང་གསུང་ལ་ཡིད་ཆེས་དད་གུས་ལྡན། །ཟབ་མོའི་གཏེར་ལ་མོས་གུས་གདུང་ཤུགས་ཅན། །བརྒྱུད་པ་ཉེ་བའི་བྱིན་རླབས་མྱུར་འདོད་རྣམས། །པུས་མོ་ལྷ་ང་སར་ཚུགས་ཐལ་མོ་སྦྱོར། །གང་འབྱོར་མཎྜལ་ཕུལ་ལ་རྩེ་གཅིག་ཉོན། །དེ་ལ་སྤྱིར་ཆོས་ཞེས་པ་ནི་འཁོར་འདས་ཐམས་ཅད་ཡིན་པར་མཚན་ཉིད་པ་རྣམས་བཞེད་ལ། འདིར་ནི་འཆད་བྱ་དམ་པའི་ཆོས་སོ། །དམ་པའི་ཆོས་ཐམས་ཅད་གནམ་ཆོས་དང་ས་ཆོས། བཀའ་མ་དང་གཏེར་མ་ཞེས་བཞིར་འདུས་པར་མ་གཅིག་ལབ་ཀྱི་སྒྲོན་མས་གསུངས་པ་ལས། འདིར་གནམ་ཆོས་དང་གཏེར་མ་འཆད། སྤྱིར་གཏེར་མ་ལ་རྣམ་གྲངས་མཐའ་ཡས་པ་ཞིག་དབྱེར་ཡོད་ཀྱང་། མདོར་བསྡུས་ན་གནམ་ཆོས་ཐུགས་ཀྱི་གཏེར་ཁ་དང་། ས་གཏེར་དང་། དགོངས་གཏེར་གསུམ་དུ་འདུས་པ་སྟེ། ཆོས་ཡང་དག་པར་སྡུད་པའི་མདོ་ལས། བྱང་ཆུབ་སེམས་དཔའ་བསམ་པ་ཕུན་སུམ་ཚོགས་པ་ལ་ལ་ནི། གལ་ཏེ་སངས་རྒྱས་མི་བཞུགས་ན་ཡང་། ནམ་མཁའི་དཀྱིལ་དང་རྩིག་པ་དང་། ཤིང་རྣམས་ལས་ཆོས་འབྱུང་ངོ་། །བྱང་ཆུབ་སེམས་དཔའ་
བསམ་པ་དག་པ་ལ་ལ་ནི། རང་གི་ཡིད་ཀྱི་སྤྱོད་པ་ཉིད་ལས་གདམས་པ་དང་རྗེས་སུ་བསྟན་པ་ཐམས་ཅད་འབྱུང་ངོ་། །ཞེས་གསུངས་སོ། །མདོ་དེའི་དོན་ཡང་ཅི་ལྟར་ཞེ་ན། མདོ་སྡེ་ཆེན་པོ་ཆོས་ཡང་དག་པར་སྡུད་པ་ལས། བཅོམ་ལྡན་འདས་ཀྱིས་བཀའ་བསྩལ་པའོ། །དེ་ལ་བྱང་ཆུབ་སེམས་དཔའ་ལས་དང་པོ་པ་དང་། ཚོགས་ལམ་ཆེ་འབྲིང་ཆུང་གསུམ། སྦྱོར་ལམ་དྲོད་རྩེ་མོ་བཟོད་པ་ཆོས་མཆོག་རྣམས་ལ་གནས་པའི་བྱང་ཆུབ་སེམས་དཔའ་སོ་སོའི་སྐྱེ་བོས་ནི་གཏེར་མི་ཐོན་ཏེ། དེ་སྟོན་པ་བཅོམ་ལྡན་འདས་དངོས་སུ་མི་བཞུགས་པ་དང་། འཇའ་ལུས་ཐོབ་པའི་རིག་འཛིན་རྣམས་དངོས་སུ་མཇལ་བའི་སྐལ་བ་མེད་པའོ། །བྱང་ཆུབ་སེམས་དཔའི་བསམ་པ་ཕུན་སུམ་ཚོགས་པ་ནི་ས་དང་པོ་ཡན་ནས་བཅུ་པའི་བར་ཏེ། ས་དང་པོ་ཐོབ་ནས་སྟོང་ཉིད་མངོན་སུམ་དུ་རྟོགས་པས་བསམ་པ་ཕུན་སུམ་ཚོགས་པའོ། །དེས་གཏེར་དེ་དག་ཐོན་པའི་སྐལ་བ་ཡོད་དེ། ས་དང་པོ་ནས་སངས་རྒྱས་དངོས་སུ་མི་བཞུགས་ཀྱང་སྐད་ཅིག་རེར་ཡང་སངས་རྒྱས་བརྒྱ་ཕྲག་མང་པོའི་ཞལ་མཐོང་ཞིང་ཆོས་ཉན་པའི་ནུས་པ་ཐོབ་པའི་ཕྱིར་རོ། །ལ་ལ་ནི་ཞེས་པས་དེ་ལྟ་བུའི་འཕགས་པའི་གང་ཟག་ལ་ནི་འབྱུང་
གི །གཞན་ལ་ནི་མ་ཡིན་ཞེས་པའི་དོན་ནོ། །གལ་ཏེ་སངས་རྒྱས་མི་བཞུགས་ན་ཡང་། ཞེས་པ་དེ་ལྟར་ས་ལ་གནས་པའི་བྱང་ཆུབ་སེམས་དཔའ་ནི། ཕལ་ཆེར་སངས་རྒྱས་འབྱུང་བ་དང་འཕྲད་དེ་སངས་རྒྱས་ལས་དངོས་སུ་ཆོས་ཐོས་མོད་ཀྱིས། སེམས་ཅན་ལ་སྙིང་བརྩེ་བའི་ཕྱིར་སངས་རྒྱས་མི་བཞུགས་པའི་དུས་ན་ཡང་བསམ་བཞིན་དུ་མིར་སྐྱེས་ཏེ། དེའི་ཚེ་དེ་ལ་ཆོས་ཀྱིས་ཕོངས་པར་མི་འགྱུར་ཏེ། ཆོས་ཀྱིས་ཕོངས་པའི་ལས་སྒྲིབ་ཀྱང་མེད་ལ། བསྟན་པ་དང་སེམས་ཅན་ལ་ཕན་པའི་སྨོན་ལམ་དང་སེམས་བསྐྱེད་བསམ་པ་རྣམ་པར་དག་པའི་མཐུས་གཏེར་ཆོས་རྣམས་འབྱུང་བར་ངེས་པའོ། །དེ་ཡང་ནམ་མཁའི་དཀྱིལ་དང་། ཞེས་པ་གནམ་ཆོས་ཐུགས་ཀྱི་གཏེར་ཁ་འདི་ལྟ་བུ་འབྱུང་བར་བསྟན། ནམ་མཁའ་ཞེས་པ་དང་གནམ་ཞེས་པ་དོན་གཅིག་མིང་གི་རྣམ་གྲངས་ཡིན་པར་བ་གླང་རྫིས་ཀྱང་ཤེས་སོ། །རྩིག་པ་དང་ཤིང་རྣམས་ལས། དེ་ཡང་རྩིག་པ་དང་ཞེས་པས་གཙུག་ལག་ཁང་དང་། ཤིང་ཞེས་པས་ཀ་བ་དང་བྱང་ཆུབ་ཤིང་དྲུང་སོགས། རྣམས་ཞེས་པས་ཆུ་དང་བྲག་སོགས་རྣམ་གྲངས་གཞན་མང་དུ་འབྱུང་བར་བསྟན། ཆོས་འབྱུང་ངོ་། །ཞེས་པ་དེ་རྣམས་སྤྱིར་སོར་བཞག་པའི་
ཚིག་སྟེ། དེ་དག་གོ་བདེ་བར་བཀོད་ན། བྱང་ཆུབ་སེམས་དཔའ་བསམ་པ་རྣམ་པར་དག་པ་ལ་ལ་ནི། མདོའི་སྟོན་པ་སངས་རྒྱས་ཤཱཀྱ་ཐུབ་པ་དང་། སྔགས་ཀྱི་སྟོན་པ་སངས་རྒྱས་པདྨ་འབྱུང་གནས་སྐུ་དངོས་སུ་འཛམ་བུའི་གླིང་འདིར་མི་བཞུགས་ཀྱང་། དེ་ལ་ཆོས་ཀྱིས་ཕོངས་པར་མི་འགྱུར་ཏེ། ནམ་མཁའི་དཀྱིལ་ནས་གནམ་ཆོས་ཐུགས་ཀྱི་གཏེར་ཁ་འབྱུང་ངོ་། །རྩིག་པ་སྟེ་གཙུག་ལག་ཁང་དང་ཤིང་གི་ཀ་བ་ལ་སོགས་པ་རྣམས་ལས་ཆོས་འབྱུང་ངོ་། །ཞེས་བྱ་བའི་དོན་ནོ། །དེ་ནས་དགོངས་གཏེར་གྱི་དོན་ཡང་། ཆོས་ཡང་དག་པར་སྡུད་པའི་མདོ་ཡི་ལུང་དོན། བྱང་ཆུབ་སེམས་དཔའ་བསམ་པ་དག་པ་ཞེས་པ་ནི་སོར་གནས་ཀྱི་སེམས་དཔའ་ཡིན་མོད་ཀྱི། ལ་ལ་ནི་ཞེས་པའི་དོན་སར་གནས་ཀྱི་བྱང་ཆུབ་སེམས་དཔའི་ནང་ནས་ཀྱང་། གཏེར་ལ་དབང་ཞིང་ཐོན་པ་ནི་ཉུང་ལ། གཏེར་གྱི་ནང་ནས་ཀྱང་དགོངས་གཏེར་ཐོན་པ་ནི་ལ་ལ་སྟེ་འགའ་ཟུང་ཙམ་ལས་མི་འབྱུང་སྟེ་དཀོན་པར་བསྟན་ནོ། །རང་གི་ཡིད་ཀྱི་སྤྱོད་པ་ཉིད་ལས། བྲག་དང་རྩིག་པ་ལས་བཏོན་པ་མ་ཡིན། ཞལ་གཟིགས་ནས་གསུངས་པ་མ་ཡིན། སྔོན་གྱི་བཀའ་བསྟན་ཆོས་ལ་བརྟེན་ནས་བརྩམས་པ་མ་
ཡིན། ཉམས་ལ་གང་ཤར་ངག་ཏུ་བརྗོད་པའི་ཉམས་མགུར་ལྟ་བུ་མ་ཡིན། གྱ་ཚོམ་དུ་གང་དྲན་ངག་ཏུ་བརྗོད་པས་གདམས་ངག་ཏུ་བྱུང་བ་མ་ཡིན། རང་གར་གང་སྨྲས་ཀྱི་ལ་ཉེ་བརྟག་པ་བྱི་སྦའི་ངག་ལྟ་བུ་མ་ཡིན་པར། གདམས་པ་དང་ཞེས་པས་སྨིན་བྱེད་དབང་གི་གདམས་པ་དང་། གྲོལ་བྱེད་ལམ་གྱི་གདམས་ངག་དང་། རྗེས་སུ་བསྟན་པ་ཞེས་པས་ལུང་བྱང་དང་། ཐམས་ཅད་འབྱུང་ངོ་། །ཞེས་པས་མདོར་ན་དམ་པའི་ཆོས་ཐམས་ཅད་ལམ་ཚང་ལ་མ་ནོར་བ་ཐམས་ཅད་འབྱུང་ཞེས་པའི་དོན་ཡིན་ནོ། །དེ་ལྟར་གནམ་ཆོས་ཐུགས་ཀྱི་གཏེར་ཁ་དང་། སའི་གཏེར་དང་། དགོངས་པའི་གཏེར་གསུམ་གྱི་ནང་ནས། ཐོག་མར་གནམ་ཆོས་ཀྱི་གཏེར་འབྱུང་འཆད་དེ། དེ་ལ་ཡང་ངོ་བོ་དང་ངེས་ཚིག་དང་རྒྱུ་རྐྱེན་དང་དབྱེ་བ་དང་ལྔའོ། །དེ་ལ་གནམ་ཆོས་ཀྱི་ངོ་བོ་ནི་སངས་རྒྱས་ཐམས་ཅད་ཀྱི་གསུང་གི་གསང་བ་བསམ་གྱིས་མི་ཁྱབ་པ་དེ་ཉིད་ཡིན་ཏེ། གསང་བ་བསམ་གྱིས་མི་ཁྱབ་པའི་མདོ་ལས། བཅོམ་ལྡན་འདས་སངས་རྒྱས་ནས་མྱ་ངན་ལས་འདས་ཀྱི་བར་དུ་ལྕེ་རྐན་གྱི་རྩོལ་བ་ལས་བྱུང་བའི་སྒོ་ནས་ཡི་གེ་འབྲུ་གཅིག་ཀྱང་མ་གསུངས་སོ། །འདིའི་རྒྱུ་མཚན་དབུགས་དབྱུང་རྔུབ་མི་མངའ་ཞིང་རྣམ་པར་མི་རྟོག་
པས་སོ། །དེ་ལྟར་ཡིན་ཀྱང་སེམས་ཅན་གྱི་བསམ་པ་དང་མཐུན་པར་སྐད་མཐའ་ཡས་པས་ཐེག་པ་མ་ལུས་པ་ཐམས་ཅད་སེམས་ཅན་གྱི་བསམ་པ་བཞིན་སྟོན་པའི་སྒྲ་འབྱུང་སྟེ༔ ནམ་མཁའ་ཇི་སྲིད་ཁྱབ་པར་གསུང་གི་སྒྲས་ཁྱབ་ཅིང་ཆོས་སྟོན་པ་ཡིན་ཏེ། བྱ་རྒོད་ཕུང་པོའི་རི་ལ་བྱམས་པ་ལ་བསྟེན་ནས་དབྱངས་ཀྱི་དཀྱིལ་འཁོར་ཡོངས་སུ་དག་པ་ཞེས་བྱ་བའི་ཆོས་སྟོན་པའི་ཚེ། མོའུ་འགལ་གྱི་བུས་གསུང་གི་མཐའ་དཔོག་པར་འདོད་ནས་འཇིག་རྟེན་གྱི་ཁམས་འོད་ཟེར་རྒྱལ་མཚན་དུ་ཕྱིན་པ་ན། དེ་བཞིན་གཤེགས་པ་འོད་ཟེར་རྒྱལ་མཚན་གྱིས་བཀའ་བསྩལ་པ། འཇིག་རྟེན་གྱི་ཁམས་གངྒཱའི་ཀླུང་དགུ་བཅུ་རྩ་དགུའི་བྱེ་མ་སྙེད་ནས་ཁྱོད་འདིར་འོང་ངོ་། །ནམ་མཁའ་ཇི་ཙམ་པ་དེ་ཙམ་དུ་དེ་བཞིན་གཤེགས་པའི་གསུང་གིས་ཁྱབ་བོ། །ཞེས་གསུངས་སོ། །དེ་ལྟར་སངས་རྒྱས་ཀྱི་གསུང་གིས་ནམ་མཁའ་ཇི་སྲིད་ཁྱབ་པས། བྱང་ཆུབ་སེམས་དཔའི་བསམ་པ་དག་པས་ཐོས་པ་ནི་གནམ་ཆོས་ཀྱི་ངོ་བོ་ལགས་སོ། །ངེས་ཚིག་ནི་ས་ལས་བཏོན་པ་མ་ཡིན་པར་ནམ་མཁའ་ནས་བྱུང་བས་གནམ་ཆོས་ཞེས་བྱ་སྟེ། ཆོས་ཡང་དག་པར་སྡུད་པའི་མདོ་ལས། བྱང་ཆུབ་སེམས་དཔའ་བསམ་པ་ཕུན་སུམ་ཚོགས་
པ་ལ་ནམ་མཁའ་ནས་ཆོས་འབྱུང་བར་གསུངས་སོ། །གནམ་ཆོས་འོང་བའི་རྒྱུ་ནི་བྱང་ཆུབ་སེམས་དཔའ་ས་ལ་གནས་པ་དེས་གཏེར་ལ་སྤྱོད་པའི་སྨོན་ལམ་རྣམ་པར་དག་པ་སྔོན་དུ་སོང་བ་སྟེ། སྨོན་ལམ་དང་ལས་འཕྲོ་ལྡན་ཚུལ་སོ་སོའི་སྐྱེས་རབས་སོགས་ལས་ཤེས་སོ། །རྐྱེན་ནི་ཡི་དམ་ལྷ་ཡི་བསྒྲུབས་པ་བྱས་པས་བག་ཆགས་སད་པ་སྟེ། གསར་རྙིང་གི་སྒྲུབ་ཐབས་ཆེ་ཕྲ་ཐམས་ཅད་ནས། སྒྲུབ་པ་འགྲུབ་པའི་རྟགས་རབ་མངོན་སུམ། འབྲིང་ཉམས་སྣང་། ཐ་མ་རྨི་ལམ་དུ་ཡི་དམ་ལྷའི་ཞལ་མཐོང་བ། དབང་བསྐུར་བ། ཆོས་འཆད་པ། ལུང་སྟོན་པ་འབྱུང་བར་གསུངས་སོ། །དབྱེ་བ་ནི། བླ་མ་ཡི་དམ་མཁའ་འགྲོའི་ཚོགས་ཞལ་གཟིགས་ནས་དེས་གསུངས་པ་དང་། ཞལ་མ་མཐོང་ཡང་ཆོས་ཀྱི་སྒྲ་གྲག་པ་དང་། ནམ་མཁའ་ལ་གནམ་ཡིག་ཡི་གེ་ཤར་བ་དང་། ནམ་མཁའ་ནས་གླེགས་བམ་བབ་པ་དང་། སྤྲུལ་པའི་ཡི་གེ་བབ་པ་དང་རྣམ་གྲངས་ལྔར་དབྱེའོ། །དེ་དག་སོ་སོའི་མཚན་གཞི་གང་ཞེ་ན། གཞན་རྣམས་འོག་ཏུ་འཆད་ལ། ནམ་མཁའ་ནས་གླེགས་བམ་གྱི་ཆར་བབ་ཚུལ་ནི། ཡུལ་ཝཱ་རཱ་ཎ་སཱིར་བྱ་རྒྱུད་རྣམས་བབ། ་ཡུལ་དྷ་ར་དྷ་ཛ་ཞེས་རི་མ་ལ་ཡ་དང་ཉེ་བ་ན་སྤྱོད་རྒྱུད་
རྣམས་བབ། རྣལ་འབྱོར་རྒྱུད་རྣམས་རི་བོ་མ་ལ་ཡར་བབ། མ་ཧཱ་ཡོ་གའི་རྒྱུད་རྣམས་རྒྱལ་པོ་ཛའི་ཁང་ཐོག་ཏུ་བབ། ཨ་ནུ་ཡོ་གའི་རྒྱུད་རྣམས་སིང་ག་ལའི་ནགས་ཚལ་དུ་བབ། ཨ་ཏི་ཡོ་གའི་རྒྱུད་རྣམས་ཨོ་ནའི་ཡུལ་དྷ་ན་ཀོ་ཤའི་མཚོ་གླིང་དུ་བབ་བོ། །དེས་ན་རྒྱུད་ཐམས་ཅད་གནམ་ཆོས་ལགས་སོ། །དེ་ལྟར་རྒྱ་གར་དུ་རྒྱུད་རྣམས་ཀྱི་གླེགས་བམ་ཆར་དུ་བབ་པའི་ལོ་རྒྱུས་འདི་ལ་གསར་མ་བ་ཁ་ཅིག་ཐེ་ཚོམ་པ་ལ། དུས་ཕྱིས་གསར་མའི་ལོ་ཙཱ་བ་འགའ་ཞིག་རྒྱ་གར་དུ་ཕྱིན་པས། །ཤི་ན་ལེནྡྲའི་གཙུག་ལག་ཁང་དུ་སྔར་གྱི་ལོགས་རིས་རྙིང་པ་ལ་གླེགས་བམ་གྱི་ཆར་བབ་ལུགས་ཀྱི་བཀོད་པ་བྲིས་གདའ་བ་མཐོང་ནས་ཐེ་ཚོམ་ཆོད་པར་བྱུང་བའི་ལོ་རྒྱུས་ཆོས་འབྱུང་འགའ་ཞིག་ལས་གསུངས་སོ། །སྤྲུལ་པའི་ཡི་གེ་བྱུང་ཚུལ་ཡང་། རྗེ་བཙུན་མར་པས་རྡོ་རྗེ་གདན་དུ་སངས་རྒྱས་ཀྱི་ཚེམས་ཆེ་བ་མཇལ་བ་ན། དེའི་སྙན་དར་གསེབས་ནས་སྔར་མེད་པའི་ཤོག་དྲིལ་དར་དམར་པོས་དྲིལ་བ་གཅིག་རྙེད། མཆོད་པ་བྱས་ནས་ཕྱེས་པ་ན་ཤིང་ཏ་ལའི་ལོ་མ་ལ་ལི་ཁྲིས་བྲིས་པ་གཅིག་འདུག །པཎྜི་ཏ་ཀུན་ལ་བསྟན་ཀྱང་མ་ཤེས། སིང་ག་ལའི་པཎྜི་ཏ་གཅིག་གིས་འདི་སིང་ག་ལའི་སྒྲ་ཡིག་ཏུ་
འདུག་ཟེར་བས། ་སིང་ག་ལའི་ཡུལ་དུ་བྱོན་པས་སྒྲ་རང་བཞིན་གྱིས་ཤེས་ནས་གཟིགས་པ་ན། བསྐྱེད་རིམ་ལྷན་ཅིག་སྐྱེས་མ་དང་རྫོགས་རིམ་རླུང་སེམས་གཉིས་མེད་ཡིན་པར་གདའ། དེས་ན་ཕག་མོའི་བསྐྱེད་རྫོགས་འདི་ཡང་སྤྲུལ་པའི་ཡི་གེ་གནམ་ཆོས་ལགས་སོ། །ཡང་ཇོ་བོ་རྗེ་དང་འབྲོམ་ཁུ་རྔོག་རྣམས་ཡེར་པ་སོགས་ན་སྐྱེས་རབས་སོགས་ཆོས་ཀྱི་གླེང་མོ་མང་དུ་བྱུང་རུང་ཡི་གེར་མ་འཁོད། ཕྱིས་རྔོག་ལོ་ཙཱ་བ་ཆེན་པོ་ནས་དེ་དུས་ཇོ་འབྲོམ་གྱི་ཞུ་གནང་སྐབས་སྐྱེས་རབས་སོགས་ཆོས་ཟབ་ལ་རྒྱ་ཆེ་བ་མང་པོ་གསུངས་པ་ཡིན་ཏེ། ང་རྒས་པས་དྲི་མ་ཐུབ་ད་ཡིད་ལ་ཐར་ཐོར་ལས་མི་འདུག་དགོངས་ནས་ཐུགས་རབ་ཏུ་སྐྱོ་སྟེ་གསང་ཕུའི་ནགས་ན་ཕར་སྐྱོ་བསང་ལ་བཞུད་ཙམ་ན། དགེ་སློང་གུར་གུམ་གྱི་མདོག་འདྲ་བ་ཞིག་གིས་ཚིག་གཅིག་ཆད་ལྷག་མེད་པར་སྤྲུལ་པའི་གླེགས་བམ་གནང་བ་དེ་ལ་བཤུས་པ་བཀའ་གདམས་གླེགས་བམ་དུ་གྲགས་པ་སྟེ། བཀའ་གདམས་གླེགས་བམ་ཡང་གནམ་ཆོས་ལགས་སོ། །ཞལ་མ་མཐོང་ཡང་ནམ་མཁའ་ནས་ཆོས་ཀྱི་སྒྲ་གྲག་པ་ནི། ཏེ་ལོ་ཤེས་རབ་བཟང་པོ་དེ་ཨོ་རྒྱན་གྱི་ཡུལ་ནས་འཕུར་ཏེ་ཤར་ཟ་ཧོར་ནོར་བུའི་དགོན་པ་ན་བྱོན་པའི་ལམ་དུ་ནམ་མཁའ་ནས། གཟུགས་
མེད་པའི་ཆོས་ཀྱི་སྒྲ་གྲག་པ་ཕྱིས་ཡི་གེར་བཀོད་པ་ལ། ལུས་མེད་མཁའ་འགྲོའི་ཆོས་སྐོར་དགུ་ཞེས་གྲགས་ཏེ། ལུས་མེད་མཁའ་འགྲོའི་ཆོས་སྐོར་དགུ་པོ་ནི་གནས་ཆོས་ཉིད་དུ་ངེས་སོ། །ནམ་མཁའ་ནས་གནམ་ཡིག་ཤར་བ་ནི། །རིག་འཛིན་འཇའ་ཚོན་སྙིང་པོའི་ཤོག་སེར་གཅིག་གི་རྒྱབ་ན། གཞོས་ཟེར་བའི་ཡི་གེ་གཅིག་འདུག་པས་དེ་མ་ཆོད་པར་ཨོ་རྒྱན་ལ་གསོལ་བ་བཏབ་པས། ནམ་མཁའི་སྤྲིན་ལ་དང་པོ་གཞོས་ཟེར་བ་གཅིག་དོད། དེ་ནས་དེ་ཞིག་ནས་གཞོན་ནུ་བློ་གྲོས་ཟེར་བ་གཅིག་རེད་སོང་བ་གཟིགས་པས་ཡི་གེ་དེ་ཤེས་ཤིང་། དེ་ཆོས་བདག་གཅིག་གི་མིང་ཡིན་པར་གོ་སྐད། ཡང་འཇའ་ཚོན་སྙིང་པོ་སྤྱི་བོར་ཕེབས་སྐབས་གནས་པོ་ཞིག་ལ། ཁྱེད་སྤུ་བོའི་བླ་མ་ཨོ་རྒྱན་བསྟན་འཛིན་འདི་སུ་ཡིས་སྤྲུལ་པ་ཡིན་གསུངས། བླ་མ་བཟང་པོ་ནི་ཡིན་སུ་ཡི་སྤྲུལ་པ་ཡིན་མི་ཤེས་ཞུས་པས། ཡུད་ཙམ་དབུ་བཏུམ་ནས་ནམ་མཁའ་ལ་གཟིགས་ནས། འདི་རྨ་ཐོག་རིན་ཆེན་གྱི་སྤྲུལ་པ་ཡིན་པར་འདུག །ད་ལྟ་གནམ་ཡིག་དོད་བྱུང་གསུངས་སྐད། དེ་ལྟར་རྣམ་གྲངས་དབྱེ་བ་ལྔ་ལས། དེ་རེ་རེ་ལ་ཡང་དངོས་སུ་བྱུང་བ། ཉམས་སྣང་ལ་བྱུང་བ། རྨི་ལམ་བྱུང་བ་ལྔར་དབྱེ་
བས་རྣམ་གྲངས་ལྔ་གསུམ་བཅོ་ལྔའོ། །དེ་ལ་འདིར་བཤད་བྱ་ནི་ཡི་དམ་ལྷའི་ཞལ་གཟིགས་ནས་དེས་གསུངས་པའི་གནམ་ཆོས་ཡིན་ཏེ། དེ་ལ་ཡང་རྨི་ལམ་དུ་བྱུང་ཚུལ། ཉམས་སྣང་ལ་བྱུང་ཚུལ། དངོས་སུ་བྱུང་ཚུལ་དང་གསུམ་སྟེ། དེ་དག་གོ་རིམ་ངེས་པ་ཅན་མེད་ཀྱང་། དང་པོ་རྨི་ལམ་དུ་བྱུང་ཚུལ་འཆད་དེ། དེ་ལ་ཡང་མདོའི་ལུང་། རྒྱུད་ཀྱི་ལུང་། རིག་འཛིན་གོང་མ་ལ་བྱུང་ཚུལ་རྣམས་ད་ལྟ་སྤྲུལ་སྐུ་མི་འགྱུར་རྡོ་རྗེ་ལ་ཇི་ལྟར་བྱུང་ཚུལ་དང་གསུམ་ལས། དང་པོ་རྨི་ལམ་དུ་ཆོས་འབྱུང་བར་མདོ་ནས་གསུངས་ཚུལ་ལ་ཡང་གསུམ་སྟེ། བསྐལ་པ་སྔོན་འདས་དུས་བྱུང་ཚུལ། བསྟན་པ་འདི་ལ་སྟོན་པ་ཞལ་བཞུགས་དུས་བྱུང་ཚུལ། སྟོན་པ་འདས་ནས་ཀྱང་མ་འོངས་པ་ན་འབྱུང་བར་ལུང་བསྟན་པ་དང་གསུམ་མོ། །དང་པོ་ནི་གསང་བ་བསམ་གྱིས་མི་ཁྱབ་པའི་མདོ་ལས། སྔོན་སྟོན་པ་རྒྱལ་བུ་བློ་གྲོས་ལྡན་དུ་གྱུར་པའི་གཉིད་ལོག་པའི་རྨི་ལམ་ན་ཚིགས་སུ་བཅད་པ་གཉིས་ཐོས་ནས་བཟུང་སྟེ། སེམས་ཅན་བརྒྱད་སྟོང་བྱང་ཆུབ་ཀྱི་ལམ་ལ་བཀོད་དོ། །སེམས་ཅན་བཞི་ཁྲི་ཉིས་སྟོང་བདེ་འགྲོའི་ལམ་ལ་བཀོད་པའི་སྔོན་བྱུང་གི་ལོ་རྒྱུས་རྒྱས་པར་གསུངས་སོ། །གཉིས་པ་ནི་གསེར་འོད་དམ་པ་
མདོ་སྡེའི་དབང་པོའི་རྒྱལ་པོ་ལས། དེ་ནས་བྱང་ཆུབ་སེམས་དཔའ་མཛེས་པའི་ཏོག་གཉིད་ལོག་པའི་རྨི་ལམ་ན། གསེར་གྱི་རྔ་ཀུན་ཏུ་སྣང་བ་འདི་ལྟ་སྟེ་ཉི་མའི་དཀྱིལ་འཁོར་འདྲ་བ་ཞིག་མཐོང་ངོ་། །ཕྱོགས་ཐམས་ཅད་ན་ཡང་སངས་རྒྱས་བཅོམ་ལྡན་འདས་གྲངས་མེད་དཔག་ཏུ་མེད་པ་དག་ནི་རིན་པོ་ཆེའི་ཤིང་དྲུང་ན། རིན་པོ་ཆེ་བེཌཱུརྱའི་ཁྲི་རྣམས་ལ་བཞུགས་ཤིང་། འཁོར་བརྒྱ་སྟོང་དུ་མས་ཡོངས་སུ་བསྐོར་ཏེ། མདུན་གྱིས་བལྟས་ནས་ཆོས་སྟོན་པར་མཐོང་ངོ་། །དེ་ནས་སྐྱེས་བུ་བྲམ་ཟེའི་གཟུགས་ལྟ་བུ་ཞིག་རྔ་དེ་བརྡུང་བ་མཐོང་སྟེ་རྔའི་སྒྲ་དེ་ལས་བསྟན་པའི་ཚིགས་སུ་བཅད་པ་འདི་ལྟ་བུ་དག་བྱུང་བ་ཐོས་སོ། །དེ་ནས་བྱུང་ཆུབ་སེམས་དཔའ་མཛེས་པའི་ཏོག་སད་མ་ཐག་ཏུ་བསྟན་པའི་ཚིགས་སུ་བཅད་པ་འདི་དག་རྗེས་སུ་དྲན་ནོ། །རྗེས་སུ་དྲན་ནས་ཀྱང་དེའི་མཚན་མོ་ཟད་པ་དང་། རྒྱལ་པོའི་ཁབ་ཀྱི་གྲོང་ཁྱེར་ནས་བྱུང་སྟེ། སྲོག་ཆགས་སྟོང་ཕྲག་དུ་མ་དང་ལྷན་ཅིག་ཏུ་བྱ་རྒོད་ཕུང་པོའི་རི་ག་ལ་བ་དང་། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་ལན་གསུམ་བསྐོར་བ་བྱས་ནས་ཕྱོགས་
གཅིག་ཏུ་འདུག་གོ །ཕྱོགས་གཅིག་ཏུ་འདུག་ནས་བྱང་ཆུབ་སེམས་དཔའ་མཛེས་པའི་ཏོག་གིས་བཅོམ་ལྡན་འདས་ག་ལ་བ་དེར་ལོགས་སུ་ཐལ་མོ་སྦྱར་བ་བཏུད་ནས། རྨི་ལམ་ན་རྔའི་སྒྲ་ལས་བསྟན་པའི་ཚིགས་སུ་བཅད་པ་གང་དག་ཐོས་པ་དེ་དག་གསོལ་ཏོ། །ནུབ་གཅིག་གཡེལ་བ་མེད་པར་ཡང་། བདག་གི་རྨི་ལམ་རྨིས་པ་ནི། །མཛེས་པའི་རྔ་ཆེན་མཐོང་བ་སྟེ། །ཐམས་ཅད་དུ་ནི་གསེར་གྱི་འོད། །ཉི་མ་ཇི་ལྟར་བཞིན་དུ་འབར། །ཀུན་ཏུ་རྣམ་པར་ལྡིང་བ་སྟེ། །ཕྱོགས་བཅུ་རྣམས་སུ་སྣང་བར་གྱུར། །ཀུན་ཏུ་རིན་ཆེན་ཤིང་དྲུང་ན། །རིན་ཆེན་བཻཌཱུཪྻ་དག་གིས། །ཁྲི་ལ་སངས་རྒྱས་རྣམས་བཞུགས་ཏེ། །སྟོང་ཕྲག་དག་ནི་དུ་མ་ཡི། །འཁོར་དབུས་མདུན་གྱིས་བལྟས་པ་མཐོང་། །བྲམ་ཟེའི་གཟུགས་ནི་འདྲ་བ་ཞིག །རྔ་ཆེན་རབ་ཏུ་བརྡུང་བར་མཐོང་། །དེ་ཡིས་དེ་ལ་བརྡུངས་བ་དང་། །ཚིགས་སུ་བཅད་པ་འདི་དག་བྱུང་། །གསེར་འོད་དམ་པའི་རྔ་ཆེན་སྒྲ་ཡིས་ནི། །ཞེས་པ་ནི། དེ་ལྟར་སངས་རྒྱས་སྟོང་གི་གན་ནས་དགེ་བ་བྱས་པ་ཡིན། ཞེས་པའི་བར་ཤོ་ལོ་ཀ་བརྒྱ་རྩ་བརྒྱད་ཙམ་བྱུང་ཚུལ་ཞུས་པས། དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་གསན་ནས།
བྱང་ཆུབ་སེམས་དཔའ་མཛེས་པའི་ཏོག་ལ་འདི་སྐད་ཅེས་བཀའ་བསྩལ་ཏོ། །ལེགས་སོ་ལེགས་སོ་རིགས་ཀྱི་བུ་ཁྱོད་ཀྱི་རྨི་ལམ་ན་གསེར་གྱི་རྔ་ལས། དེ་བཞིན་གཤེགས་པ་ཡང་དག་པའི་ཡོན་ཏན་བསྔགས་པ་དང་། སྡིག་པ་བཤགས་པ་འདི་དག་གང་གིས་ཐོས་པ་དེ་དག་ཐམས་ཅད་ཀྱང་བསོད་ནམས་ཀྱི་ཕུང་པོ་རྒྱ་ཆེན་པོ་དང་ལྡན་པ་དང་། སྐྱེ་བོ་མང་པོ་ལ་ཕན་པ་དང་། བདེ་བས་ཚིམ་པར་བྱེད་དེ། སྡིག་པ་ཐམས་ཅད་འབྱང་བར་འགྱུར་བར་ཤེས་པར་གྱིས་ཤིག །འདི་ལྟ་བུའི་སྤྱོད་པ་ཁྱད་པར་ཅན་དང་ལྡན་པ་འདི་དག་ནི། ཐམས་ཅད་ཀྱང་སྔོན་འདས་པའི་དུས་ན་དེ་བཞིན་གཤེགས་པ་དག་ལ། བསྟོད་པ་དང་སྨོན་ལམ་རྒྱ་ཆེན་པོ་བཏབ་པའི་རྒྱུད་དང་། དེ་བཞིན་གཤེགས་པའི་བྱིན་རླབས་ཀྱི་དེ་དག་ཐོས་པར་གྱུར་པ་ཡིན་ནོ། །ཞེས་བཀའ་བསྩལ་ནས། དེ་ནས་འདུས་པ་དེ་དག་ཐམས་ཅད་བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །གསེར་འོད་དམ་པ་མདོ་སྡེའི་རྒྱལ་པོས་རྨི་ལམ་བཤད་པའི་ལེའུ་སྟེ་བཞི་པའོ།། །།ཞེས་འབྱུང་སྟེ་བཅོམ་ལྡན་འདས་ཀྱི་གསུང་དེ་དག་རྨི་ལམ་དུ་ཐོས་པས་གནམ་ཆོས་ཀྱི་ཕན་ཡོན་དགོས་ཆེད་དང་། དེ་ཐོས་པའི་
རྒྱུ་རྐྱེན་དང་བཅས་པ་གསལ་བར་བསྟན་པ་ལགས་སོ། །འོ་ན་དེ་ནི་སྟོན་པ་ཞལ་བཞུགས་པའི་དུས་སངས་རྒྱས་ཀྱི་མཐུས་རྨི་ལམ་དུ་གནམ་ཆོས་དེ་ལྟར་བྱུང་ཡང་། སྟོན་པ་དངོས་སུ་ཞལ་མི་བཞུགས་ནས་རྨི་ལམ་གྱི་གནམ་ཆོས་སོགས་མི་འབྱུང་ངོ་ཞེ་ན། དམ་ཆོས་དཀོན་མཆོག་བརྩེགས་པའི་རྨི་ལམ་བསྟན་པའི་མདོ་ལས། བཅོམ་ལྡན་འདས་ཀྱིས་བྱང་ཆུབ་སེམས་དཔའ་རྡོ་རྗེ་རབ་འཇོམས་ལ་བཀའ་བསྩལ་པ། རྡོ་རྗེ་རབ་འཇོམས་དེ་ལ་བྱང་ཆུབ་སེམས་དཔའ་གང་གི་རྨི་ལམ་ན་དེ་བཞིན་གཤེགས་པས་བཀའ་བསྩལ་པ་མཐོང་ན། བྱང་ཆུབ་སེམས་དཔའ་དེ་ནི་གལ་ཏེ་གཟུངས་ཐོབ་པར་གྱུར་པ་ཞིག་གམ། མངོན་པར་ཤེས་པ་ཐོབ་པར་གྱུར་པ་ཞིག་གམ། བདེན་པའི་བྱིན་རླབས་འགྲུབ་པར་གྱུར་པ་ཞིག་ཡིན་ན་ནི། ས་བརྒྱད་པར་ལུང་བསྟན་པར་འགྱུར་བར་ལྟའོ། །ཡོན་ཏན་དེ་དག་ཐོབ་ཏུ་ཉེ་བ་ཞིག་ཡིན་ན་ནི། ས་དང་པོ་ནས་བདུན་པོ་དག་ལས་གང་ཡང་རུང་བར་ལྟའོ། །ཞེས་དང་། རྡོ་རྗེ་རབ་འཇོམས་གཞན་ཡང་བྱང་ཆུབ་སེམས་དཔའ་གང་གི་རྨི་ལམ་ན། སྔོན་མ་ཐོས་པའི་ཆོས་དག་ཐོས་ན། བྱང་ཆུབ་སེམས་དཔའ་དེ་ནི་སངས་རྒྱས་མང་པོ་ལ་བསྙེན་བཀུར་བྱས་པ་ཆོས་སྨྲ་བའི་གང་ཟག་མང་
པོ་ལ་ཡང་བསྙེན་བཀུར་བྱས་པ་ཡིན་པར་རིག་པར་བྱ་སྟེ། བྱང་ཆུབ་སེམས་དཔའ་དེ་ནི་ས་བདུན་པོ་དག་ལས་གང་ཡང་རུང་བར་བལྟའོ། །དེས་ནི་ཇི་སྐད་སྨྲས་པ་དེ་བཞིན་དུ་བྱས་ཏེ། དེས་ན་མྱུར་བ་ཉིད་དུ་བྱང་ཆུབ་ཏུ་ངེས་པར་འབྱུང་བར་འགྱུར་རོ། །ཞེས་དང་། རྡོ་རྗེ་རབ་འཇོམས་བྱང་ཆུབ་སེམས་དཔའི་མཚན་མ་བརྒྱ་རྩ་བརྒྱད་པོ་དེ་དག་གིས་ནི་གང་ཟག་བྱང་ཆུབ་སེམས་དཔའི་ཐེག་པ་ཡིན་པར་རིག་པར་བྱ་ཞིང་ཤེས་པར་བྱའོ། །ཞེས་རྨི་ལམ་གྱི་མཚན་མ་བརྒྱ་རྩ་བརྒྱད་གསུངས་ནས། དེ་ནས་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་བཀའ་བསྩལ་ཏོ། །གང་ལ་མཚན་མ་དེ་དག་ཡོད་གྱུར་པ། །དེ་ནི་བདག་ཉིད་ཆེ་བར་ཐེ་ཚོམ་མེད། །སྤྱོད་པ་ཅུང་ཟད་ཙམ་ཞིག་རྟོགས་གྱུར་ཀྱང་། །ཡོན་ཏན་ཤེས་པས་ཉེས་པ་མ་བསྐྱེད་གཅིག །རྒྱ་མཚོ་ཆེན་པོ་ལས་ནི་མེ་འབར་ཞིང་། །མེ་ཡི་དབུས་ནས་ཆུ་ནི་བྱུང་གྱུར་ཀྱང་། །གང་ལ་མཚན་མ་གཅིག་ཙམ་ཡོད་གྱུར་པ། །དེ་ནི་བྱང་ཆུབ་ཕྱིར་ལྡོག་ངས་མ་མཐོང་། །ཞེས་གསུངས་ཏེ། དེ་དག་གིས་མ་འོངས་པ་ན་བྱང་ཆུབ་སེམས་དཔའི་རིགས་ལ་རྨི་ལམ་གནམ་ཆོས་འབྱུང་ཚུལ་དང་། དེ་བྱུང་བ་སར་གནས་སེམས་དཔར་
ངེས་ཚུལ་བསྟན་ཏེ། རྨི་ལམ་ན་དེ་གཞིན་གཤེགས་པས་བཀའ་བསྩལ་པ་མཐོང་ན། ཞེས་གསུངས་པ་ལྟར་མི་འགྱུར་རྡོ་རྗེས་ཀྱང་རྨི་ལམ་དུ་བཅོམ་ལྡན་འདས་ཀུན་ཏུ་བཟང་པོ་དང་། དེ་བཞིན་གཤེགས་པ་སྨན་གྱི་ལྷས་བཀའ་བསྩལ་པ་མཐོང་བ་ལགས་སོ། །མངོན་པར་ཤེས་པ་ཐོབ་པ་ཞིག །ཅེས་པ་ལྟར་མངོན་ཤེས་དྲུག་གི་ནང་ནས་སྔོན་གནས་རྗེས་སུ་དྲན་པའི་མངོན་ཤེས་ཐོབ་པའོ། །ས་བརྒྱད་པར་ལུང་བསྟན་པར་འགྱུར་བར་ལྟའོ། །གསུངས་པ་ལྟར་བཻ་རོ་ཙཱ་ན་ས་བརྒྱད་པུར་ལུང་བསྟན་པ་ཡིན་པས་དེ་དང་ཐུགས་རྒྱུད་གཅིག་པའོ། །གང་གི་རྨི་ལམ་ན་སྔོན་མ་ཐོས་པའི་ཆོས་དག་ཐོས་ནས། ཞེས་པ་ལྟར་སྔོན་ས་སྟེང་དུ་མ་གྲགས་པའི་དབང་དང་སྒྲུབ་ཐབས་གདམས་པ་མང་དུ་སྤྲུལ་སྐུ་འདིས་ཐོས་པའོ། །དེ་ནི་སངས་རྒྱས་མང་པོ་ལ་བསྙེན་བཀུར་བྱས་པ་ཞེས་སོགས་ཀྱི་ཆེ་བའི་ཡོན་ཏན་བསྟན་ཏོ། །དེས་ནི་ཇི་སྐད་སྨྲས་པ་བཞིན་དུ་བྱས་ཏེ། ཞེས་པས་རྨི་ལམ་དུ་བྱུང་བའི་གནམ་ཆོས་དེ་ཉམས་སུ་ལེན་དགོས་པར་བསྟན། དེས་ན་མྱུར་བ་ཉིད་དུ་བྱང་ཆུབ་ཏུ་ངེས་པར་འབྱུང་བར་འགྱུར་རོ། །ཞེས་པས་དེ་ཉམས་སུ་བླང་ན་རྣོ་ཞིང་ཟབ་པར་བསྟན། གང་ལ་མཚན་མ་དེ་དག་ཡོད་གྱུར་པ། །དེ་ནི་
བདག་ཉིད་ཆེ་བར་ཐེ་ཚོམ་མེད། །འདི་ལྟར་རྨི་ལམ་དུ་གནམ་ཆོས་ཟབ་ལ་རྒྱ་ཆེ་བ་བྱུང་བའི་གང་ཟག་དེ་ནི། བདག་ཉིད་ཆེན་པོ་སྟེ་ས་ཆེན་པོ་ལ་བཞུགས་པའི་བྱང་ཆུབ་སེམས་དཔའ་ཡིན་པར་བསྟན། སྤྱོད་པ་ཅུང་ཟད་ཙམ་ཞིག་རྟོགས་གྱུར་ཀྱང་། །ཡོན་ཏན་ཤེས་པས་ཉེས་པ་མ་བསྐྱེད་ཅིག །ཅེས་པ་འཕྲལ་དུ་སྤྱོད་ལམ་རྩིང་བ་དང་། །ཉོན་མོངས་ཧྲག་པ་ལྟར་འདུག་ཀྱང་། དེ་སར་གནས་ཀྱི་སེམས་དཔའ་ཆེན་པོ་མིན་པར་མི་འགྱུར་ཏེ། སྔོན་བཅོམ་ལྡན་འདས་ཀྱི་དྲུང་དུ་དགེ་སློང་མ་ཕམ་པ་བསྐལ་བཟང་གི་སངས་རྒྱས་བྱམས་པར་འགྱུར་བར་གསུངས་པ་ན་དགེ་སློང་དག་ན་རེ། དགེ་སློང་མ་ཕམ་པ་ནི་ཉོན་མོངས་པ་མ་སྤང་། ཡོན་ཏན་གྱི་ཚོགས་ཅི་ཡང་མ་ཐོབ་པ་ཐ་མལ་པར་སྣང་ན། ཇི་ལྟར་བསྐལ་བཟང་གི་རྒྱལ་བ་ལྔ་པར་འགྱུར། ཞེས་གླེང་པ་ན་བཅོམ་ལྡན་འདས་ཀྱིས་དགེ་སློང་མ་ཕམ་པ་ལོ་བཅུ་གཉིས་ནས་ཚེ་འཕོས་ཏེ་དགའ་ལྡན་དུ་ལྷ་རྣམས་ལ་ཆོས་སྟོན་ཅིང་། མ་འོངས་པ་ན་རྒྱལ་བ་བྱམས་པར་འགྱུར་ཚུལ་བྱམས་པ་ལུང་བསྟན་གྱི་མདོར་རྒྱ་ཆེར་གསུངས་པ་ལྟ་བུ་སྟེ། གནམ་ཆོས་རྨི་ལམ་དུ་བྱུང་བའི་གཏེར་སྟོན་གྱི་ཡོན་ཏན་ཡང་དཔག་པར་དཀའ་བར་ཤེས་པས། གཤེ་
སྐུར་སོགས་ཀྱི་ཉེས་པས་རང་ཉིད་ངན་སོང་དུ་ལྟུང་བའི་ཉེས་པ་མ་བསྐྱེད་ཅིག །དེ་ཅིའི་ཕྱིར་ཞེ་ན་རྒྱ་མཚོ་ཆེན་པོ་ལས་མེ་འབར་ཞིང་། མེའི་དབུས་ནས་ཆུ་འབྱུང་བ་ནི་སྲིད་ཀྱང་། གང་ལ་རྨི་ལམ་དུ་གནམ་ཆོས་ཐོས་པ་ལ་སོགས་པ། བྱང་ཆུབ་སེམས་དཔའ་ཡིན་པའི་མཚན་མ་གཅིག་ཙམ་ཡོད་པར་གྱུར་པ། དེས་ན་བླ་ན་མེད་པའི་བྱང་ཆུབ་ལས་ཕྱིར་ལྡོག་ངས་མ་མཐོང་། ཞེས་པ་བཅོམ་ལྡན་འདས་ཐམས་ཅད་མཁྱེན་པ་དེས་མ་གཟིགས་ཞེས་པའོ། །དེས་མདོ་ལས་རྨི་ལམ་དུ་གནམ་ཆོས་འབྱུང་བར་གསུངས་པའི་ལུང་དེ་སོང་ནས། གཉིས་པ་རྒྱུད་ནས་རྨི་ལམ་དུ་གནས་ཆོས་འབྱུང་བའི་ལུང་ནི། ཕ་རྒྱུད་གསང་བ་འདུས་པའི་རྩ་རྒྱུད་ཆེན་པོ་ལས། དེ་ལ་འདི་ནི་རྨི་ལམ་ཆེན་པོའི་དམ་ཚིག་གི་གནས་ཏེ། བྱང་ཆུབ་ཡེ་ཤེས་མཆོག་ཐོབ་པས། །སངས་རྒྱས་འོད་ནི་བཟང་པོར་མཐོང་། །ཞེས་སོགས་ནས། ཕྱོགས་བཅུའི་སངས་རྒྱས་ཐམས་ཅད་ཀྱང་། །ཞིང་ན་བཞུགས་པ་ངེས་པར་མཐོང་། །ཐུགས་ནི་དགྱེས་པར་གྱུར་ནས་ཀྱང་། །ཆོས་མཛོད་ཡིད་དུ་འོང་བ་སྩོལ། །ཞེས་དང་། སངས་རྒྱས་བྱང་ཆུབ་སེམས་དཔའ་ཡིས། །དེས་ནི་མངོན་པར་དབང་བསྐུར་མཐོང་། །ཞེས་སོགས་ནས། རྡོ་
རྗེ་ལས་བྱུང་སྣ་ཚོགས་པའི། །རྨི་ལམ་དྲི་མ་མེད་མཐོང་ན། །སྐུ་གསུང་ཐུགས་ཀྱི་རྡོ་རྗེ་ལས། །སྐྱེས་པ་བླ་མེད་འགྲུབ་པར་འགྱུར། །ཞེས་དང་། དེ་ལ་འདི་ནི་རྨི་ལམ་རྣམ་པར་དཔྱད་པའི་དམ་ཚིག་གི་སྙིང་པོའོ། །ཞེས་སོ། །དེ་ཡང་བྱང་ཆུབ་ཐོབ་པར་བྱེད་པའི་རྒྱུ་ས་དང་པོ་ཡན་ཆད་ཀྱི་ཡེ་ཤེས་མཆོག་ཐོབ་པས། སྤྲུལ་སྐུ་མི་འགྱུར་རྡོ་རྗེས་ཀྱང་། སངས་རྒྱས་ཀུན་ཏུ་བཟང་པོ་ལ་སོགས་པའི་སྐུའི་འོད་ཟེར་བཟང་པོར་འཕྲོ་བ་དང་བཅས་པ་རྨི་ལམ་དུ་མཐོང་། བདེ་བ་ཅན་ལ་སོགས་པའི་ཞིང་ན་བཞུགས་པ་ཡང་ངེས་པར་མཐོང་། ཐུགས་ནི་དགྱེས་པར་གྱུར་ནས་ཀྱང་། གནམ་ཆོས་ཐུགས་ཀྱི་གཏེར་ཁའི་ནང་ནས་ཆོས་ཀྱི་མཛོད་ཡིད་དུ་འོང་བ་དབང་ལུང་གདམས་པ་འགའ་ཞིག་སྩལ། ཀུན་ཏུ་བཟང་པོ་ལ་སོགས་པ་སངས་རྒྱས་བྱང་ཆུབ་སེམས་དཔའ་ཡི། ཚེ་དབང་མངོན་ཤེས་དྲུག་གི་དབང་ལ་སོགས་མངོན་པར་དབང་བསྐུར་བ་མཐོང་། རྨི་ལམ་ནག་ནོག་དང་མི་གསལ་བའི་དྲི་མ་མེད་པ་ཚིག་ཟུར་ཙམ་མ་ཉམས་པར་ཡི་གེར་བཀོད་པ་ལ་ཆགས་ཐོགས་ཅུང་ཟད་མེད་པ་མཐོང་བའི་ཕྱིར་ན། སངས་རྒྱས་ཐམས་ཅད་ཀྱི་སྐུ་གསུང་ཐུགས་ཀྱི་རྡོ་རྗེ་ལས་སྐྱེས་པའི་བླ་ན་མེད་པའི་
བྱང་ཆུབ་འགྲུབ་པར་འགྱུར་བའི་མངོན་རྟགས་ཡིན་པའོ། །དེ་བཞིན་དུ་རྒྱུད་ཀྱི་དོན་མན་ངག་གི་སྒྲུབ་སྡེ་ཆེན་པོ་རྣམས་ནས་ཀྱང་། གནམ་ཆོས་སྙན་བརྒྱུད་ཀྱི་སྐོར་འབྱུང་བའི་ལུང་ནི། མངའ་བདག་ཉང་གི་གཏེར་ཁ་བཀའ་བརྒྱུད་སྒྲུབ་ཆེན་གྱི་གཞུང་ལས། ཐ་མ་རྨིས་ལྟས་སུ་འོང་སྟེ། སངས་རྒྱས་བྱང་ཆུབ་སེམས་དཔས་བདག་ལ་དབང་བསྐུར་ཞིང་རིག་འཛིན་རྣམས་ཀྱིས་མཆོད་པ་དང་། ཞེས་དང་། གུ་རུ་ཆོས་དབང་གི་གཏེར་ཁ་ཞི་ཁྲོ་གསང་བ་ཡོངས་རྫོགས་ཀྱི་སྒྲུབ་ཆེན་གཞུང་ལས། སྒྲུབ་པ་འདི་ཉིད་དམ་ཆོས་སྒྲུབ་པ་གང་ཡང་རུང་སྟེ། བསྙེན་པའི་སྐབས་སུ་རྩ་བརྒྱུད་ཀྱི་བླ་མ་རྣམས་དང་ཡང་ཡང་མཇལ་ཞིང་ལུང་སྟོན་ཆོས་འཆད་པ་རྨིས་པ་དང་། ཞེས་སོགས་དང་། གུར་དྲག་བདེར་གཤེགས་འདུས་པའི་རྟགས་ཡིག་གཞུང་ལས། རྨི་ལམ་དག་ཏུ་བླ་མ་མཁའ་འགྲོའི་ཚོགས། །ཞལ་སྟོན་ཆོས་འཆད་ལུང་སྟོན་བྱེད་པ་དང་། །རང་ཉིད་རུས་རྒྱན་ཐོགས་ནས་ནམ་མཁར་འཕུར། །ལྷ་ཡི་ཡུལ་སོགས་ཨུ་རྒྱན་ཡུལ་དུ་ཕྱིན། །ཞིང་ཁམས་བཀོད་པ་ཁྱད་འཕགས་མཐོང་བ་ནི། །ཨུ་རྒྱན་པདྨ་འགྲུབ་པའི་མཚན་མ་ཡིན། །ཞེས་དང་། བདེར་འདུས་ཀྱི་སྒྲུབ་གཞུང་ལས། ཐ་མ་རྨི་ལམ་ན།
སློབ་དཔོན་པདྨ་འབྱུང་གནས་དང་། །ཞལ་མཇལ་གདམས་པ་གསུངས་པ་དང་། །བྱིན་རླབས་ལུང་སྟོན་བྱེད་པ་འབྱུང་། །ཞེས་དང་། གུར་དྲག་རཏྣ་ལུགས་ཀྱི་འཇམ་དཔལ་སྐུ་སྤྲུལ་ལས། ཐ་མ་རྨི་ལམ་དུ་ཞལ་མཐོང་། ཞེས་དང་། མདོར་ན་གསར་རྙིང་གི་སྒྲུབ་ཐབས་ཐམས་ཅད་ནས། ཐ་མ་རྨི་ལམ་དུ་ལྷ་ཞལ་མཇལ་ནས། དབང་བསྐུར་ཆོས་གསུང་ལུང་སྟོན་པ་འབྱུང་བར་གསུངས་པ་ལྟར། སྤྲུལ་སྐུ་མི་འགྱུར་རྡོ་རྗེ་ལ་ཡང་། སྐབས་རེར་རྨི་ལམ་དུ་གནམ་ཆོས་འགའ་ཞིག་བྱུང་བ་ལགས་སོ། །དེ་ནས་སྔོན་གྱི་རིག་འཛིན་གོང་མ་རྣམས་ལ་ཡང་རྨི་ལམ་དུ་གནམ་ཆོས་བྱུང་ཚུལ་ནི། རྗེ་བཙུན་མར་པ་སྔོན་རེས་རྒྱ་གར་ནས་ཚུར་བྱོན་དུས་གཉོས་ལོ་ཙཱ་བས་ཕྱག་དཔེ་ཆུར་འཕངས་པས་ཐུགས་ལ་ཡོད་པ་ཚོ་ཡང་ཕལ་ཆེར་བརྗེད་ནས་ཐུགས་མུག་སྟེ། བལ་ཡུལ་ལི་ཤོ་ཀ་རའི་གྲོང་དུ་ནུབ་གཅིག་རྨི་ལམ་ན་ཞིང་སྐྱོང་གི་ཌཱཀི་མ་གཉིས་བྲམ་ཟེའི་ཆ་བྱད་དུ་སྤྲུལ་ནས་སྤྱན་དྲངས་ཏེ། ལྷོ་དཔལ་གྱི་རི་ལ་ཕྱིན་ནས། བྲམ་ཟེ་ཆེན་པོའི་ཞལ་མངོན་སུམ་དུ་མཇལ་ཏེ། ཕྱག་ཆེན་ཡི་གེ་བཞི་པ་དང་། ན་མོ་སྟོང་ཉིད་སྙིང་རྗེ་དབྱེར་མེད་པའི། །རྒྱུན་མི་འཆད་པ་གཉུག་མའི་དོན། །ཞེས་
སོགས་དོ་ཧ་རྡོ་རྗེའི་གླུ་གསན་པས། ད་དཔེ་ཆ་མེད་ཀྱང་དོན་ཐམས་ཅད་ཡིད་ལ་འདུག་དགོངས་ནས་བོད་དུ་བྱོན་ནས། སློབ་མ་ཐུགས་ཟིན་པ་རྣམས་ལ་ཡང་། རྨི་ལམ་དུ་བྱུང་བའི་གནམ་ཆོས་དེ་དག་གནང་བར་མཛད་དོ། །བདེར་གཤེགས་ཕག་མོ་གྲུ་པ་དེ་གཙང་ལ་སྟོད་དུ་ཕེབས་སྐབས། ཞག་གསུམ་ལ་གཟིམས་མ་སད་པར་ཞལ་ནས་འབག་འབུག་གསུངས་ཤིང་གཟིམས་སྐད། དེར་རྨི་ལམ་དུ་དམ་པ་སངས་རྒྱས་མཇལ་ནས་ཞི་བྱེད་སྐོར་གསུམ་གྱི་དབང་ལུང་གནང་ནས། ཞི་བྱེད་རྨང་ལམ་མར་གྲགས་སོ། །གྲུབ་ཐོབ་སྐྱེར་སྒང་པ་དེ་རྨང་ལམ་དུ་ཨུ་རྒྱན་ཡུལ་དུ་བྱོན་པ་ན་སློབ་དཔོན་པདྨ་དང་མཇལ། ད་ལྟ་བོད་ན་བེ་ཀར་དཀར་པོ་འདྲེའི་གནོད་པ་དར་བར་ཡོད་པས་རྟ་མགྲིན་གྱི་སྒྲུབ་ཐབས་བྱ་སླ་ལ་བྱིན་རླབས་ཆེ་བ་ཞིག་གནང་དགོས་ཞུས་པས། སློབ་དཔོན་ཉིད་རྟ་མགྲིན་གྱི་སྐུར་བཞེངས་ནས་དབང་ལུང་སྒྲུབ་ཐབས་མན་ངག་རྣམས་གནང་ནས། ང་སྔོན་བོད་དུ་ལྷ་འདྲེ་འདུལ་དུ་འོང་དུས། རྟ་མཆོག་རོལ་པའི་རྒྱུད་རྔོག་མ་ལེ་བརྒན་ཁོལ་དུ་ཕྱུང་བའི་རྒྱུད་ལས་བཏུས་པ་ཞིག །གཙང་གི་སྙེ་མོ་བྲག་ཏུ་སྦས་པ་ད་ལྟ་སྔགས་པ་ཞིག་གིས་གཏེར་ནས་ཐོན་འདུག་པས་དེ་ལ་ཡང་ཞུས་གསུངས་ནས་ལུང་
བསྟན། དེ་དུས་པདྨ་ལས་འབྲེལ་རྩལ་གྱིས་རྟ་མགྲིན་ཡང་གསང་ཁྲོས་པ་གཏེར་ནས་ཐོན་པ་དང་དུས་མཚུངས་པས་ཞུ་རུ་བྱོན་ནས་ཞུས། སླར་ཡང་རྨང་ལམ་དུ་ཨུ་རྒྱན་མཇལ་བས་རྟ་མགྲིན་གྱི་ཆོས་སྐོར་ཚང་བར་ཨེ་འདུག་ཞུས་པས། ད་རུང་ལུས་ལ་འདོགས་པའི་འཁོར་ལོ་སོགས་འགའ་ཞིག་མ་ཚང་བར་འདུག་གསུངས། སླར་གཏེར་སྟོན་གྱི་དྲུང་དུ་བྱོན་ནས་བདག་ལ་རྟ་མགྲིན་གྱི་ཆོས་སྐོར་ཚང་བར་གནང་དགོས་ཞུས་པས། ཁྱོད་ལ་མ་ཚང་བར་འདུག་སུས་ཟེར་གསུངས། བདག་ལ་ཨུ་རྒྱན་གྱིས་ལུང་བསྟན་པ་ལགས་ཞུས་པས། སྣོད་ལྡན་ཆོས་བདག་ཏུ་མཁྱེན་ནས་ཚང་བར་གནང་། དེས་ན་ཨུ་རྒྱན་ཉིད་ལས་ཐོབ་པ་བཀའ་མ་དང་། གཏེར་སྟོན་ལས་ཐོབ་པས་བཀའ་གཏེར་གཉིས་ཀ་ཡིན་ཞེས་ལོ་རྒྱུས་ལས་བྱུང་ཡང་། རྟ་མགྲིན་འདི་གཉིས་མི་གཅིག་ཡང་གསང་ཁྲོས་པ་ཞལ་གསུམ་ཕྱག་དྲུག་ཡུམ་འཁྱུད་པ་དཀྱིལ་འཁོར་ཚང་མ། སྒོ་སྲུང་གདོང་མོ་མཆེད་བཞི། བཀའ་སྲུང་སྲོག་བདག་འོད་ཀྱི་སྐྱེས་བུ་མཆེད་ལྔ་དང་གཟའ་དང་གདོང་མོ་ཡོད་ཅིང་རྒྱུད་སྒྲུབ་ཐབས་གླེགས་བམ་ཆེ་བར་ཡོད་པས་རྟ་བོད་དུ་གྲགས་ལ། རྨི་ལམ་དུ་ཐོབ་པ་ལ་ཞལ་གསུམ་རྟ་དབུ་གསུམ། ཕྱག་དྲུག་
ཞབས་བརྒྱད་པ་གཙོ་རྐྱང་ཡུམ་མེད་པ་སྟེ། བཀའ་སྲུང་བེག་རྩེ་ཡིན་རྟ་མགྲིན་གསང་སྒྲུབ་དམར་པོ་སྐྱེར་སྒང་ལུགས་སུ་གྲགས། གཏེར་མ་དེའི་གཏེར་གནས་ཀྱང་ལུང་བསྟན་པ་དང་ཅུང་ཟད་མི་མཐུན་ཏེ། ཡེར་པའི་སེ་བ་རྫོང་ནས་སྟོན་པར་སྣང་། འོན་ཀྱང་རྨི་ལམ་དུ་ཐོབ་པའི་གནམ་ཆོས་དེ་ལ་བརྟེན་ནས་སྐྱེར་སྒང་པས་སྨོན་པ་བརྒྱད་ཅུ་ཙམ་བཏུལ་བས་ཟབ་པའི་སྒྲ་སྐད་ཐོས༔ ས་སྐྱ་འབྲི་སྟག་ཀར་འབྲུག་ཐམས་ཅད་ཀྱི་རྗེས་གནང་གི་གྲར་བཞུགས། སེ་རའི་དགོན་པ་ན་ཀླུ་བདུད་མཁར་ནག་གནས་པའི་ཚེར་ཕུང་ཞིག་ཡོད་པས། མཚན་མོ་སྒྲོག་གླེང་སྐབས་སུ་བཙུན་ཆུང་མང་པོ་དངོས་སུ་ཁྱེར་བས། རྟ་མགྲིན་སྐྱེར་སྒང་ལུགས་གྲུབ་པའི་རྣལ་འབྱོར་པ་ཞིག་གིས་ཚེར་ཕུང་དེ་བཅིངས་ནས་རྟ་མགྲིན་འདི་སྐུ་གཅིག་བཞེངས་པས་གནོད་པ་མ་བྱུང་། རྟ་མགྲིན་དེའི་བཀའ་སྲུང་བེག་རྩེ་ཡིན་པས་ཤིན་ཏུ་གཉན། སྔར་དུས་ལོག་བྱུང་སྐབས་དགོན་རྣམས་དམག་མིའི་བཤིགས་བཅོམ་བྱས་དུས། རྟ་མགྲིན་ཁང་དེ་རློག་པས་མི་ཞིག་ཁྲག་སྐྱུགས་ཏེ་ཤི་བས། རྟ་མགྲིན་ཁང་ལ་གནོད་པ་མ་བྱུང་། འབྲས་སྤུང་སྤྲུལ་སྐུ་ཐམས་ཅད་མཁྱེན་པ་ན་རིམ་རྣམས་ཀྱིས་རྟ་མགྲིན་འདི་ལ་ཐུགས་དམ་མཛད་པས། དགེ་ལུགས་
ཕྱོགས་ལ་ཡང་རྟ་མགྲིན་འདི་དང་བཀའ་སྲུང་བེག་རྩེ་གཉིས་དར་སྲོལ་ཆེ་བར་བྱུང་། གཞན་ཡང་འདིའི་བསྙེན་པ་བྱས་ན་བད་ཀན་དང་བརྒྱལ་ནད་སོགས་ཕན་པར་ཡོངས་སུ་གྲགས་པར་བསྙེན་པ་བྱེད་པ་མང་དུ་བྱུང་སྟེ། འདི་ནི་རྨི་ལམ་དུ་བྱུང་བའི་གནམ་ཆོས་ཁོ་ན་ཡིན་ནོ། །ལ་ལ་དག་ན་རེ་ཞལ་གཡས་སྔོན་པོ་དང་། ཞབས་བརྒྱད་སོགས་རྨི་ལམ་དུ་ནོར་རམ་རྒྱུད་གཞུང་གང་དང་མི་མཐུན་ཟེར་མོད། འོན་ཀྱང་དེང་སང་རྩོད་མེད་ཀྱི་གདམས་པ་ཟབ་མོར་ཡོངས་སུ་གྲགས་སོ། །ཡང་སྐྱེ་མེད་ཞང་འགྲོ་བའི་མགོན་པོ་དེ་ཚེས་དགུའི་ནུབ་མོ་རྨི་ལམ་དུ་ཉི་ཟེར་ལ་འཇུས་ནས་སུམ་ཅུ་རྩ་གསུམ་གྱི་ལྷའི་གནས་གཟིགས། སྐུ་ཧེ་རུ་ཀར་སྤྲུལ་ནས་ཚངས་པའི་གནས་ཕྱེད་ངས་དབང་ངོ་བྱས་པས། གཟའ་དགུའམ་བཅུའི་ཁྱེའུ་དར་གྱི་ཅོད་པན་ཅན་དུ་བྱས་ནས། གཟའི་སྲུང་བའི་གདམས་པ་ཕུལ་བས་གནམ་ཆོས་ཞང་གི་བཀའ་འབུམ་དུ་བཞུགས་པ། ཚད་ལྡན་དུ་མཛད་ནས། རྗེ་མི་བསྐྱོད་ཞབས་ཀྱིས་བཀའ་འབུམ་དུ་བཀོད་པར་སྣང་ངོ་། །གཞན་ཡང་འབྲུག་ལུགས་ལ། གསང་སྤྱོད་རྣལ་ལམ་མ་ཞེས་བྱ་བ་དང་། བཀའ་བརྒྱུད་ལུགས་ཀྱིས་སེམས་བསྐྱེད་རྨི་ལམ་མ་སོགས་ཟབ་ཆོས་བླ་ན་
མེད་པར་བརྩི་བ་རྣམས་ཀྱང་རྨི་ལམ་དུ་ཐོབ་པའི་གནམ་ཆོས་ལགས་སོ། །གུ་རུ་ཆོས་ཀྱི་དབང་ཕྱུག་གིས་གཏེར་ཐོན་ཕྲལ་མཁའ་རིའི་ཞུས་ལེན་དེ་ཀུན་ལ་སྤེལ་བ་ན། ཧོར་རྣ་བས་ཐོས་སར་མེད་པ་ལ་ཧོར་དམག་གིས་བོད་འཇོམས་ཟེར་བ་དང་། ཁོ་ཁྱིམ་པ་ཕ་ཇོ་ཞིག་ལ་སློབ་མ་གདུགས་ཐོགས་པ་སྟོང་ཕྲག་འདུ་ཟེར་བ་ག་ལ་བདེན། ནད་མུག་མཚོན་གསུམ་དར་ཟེར་བ་ཁ་ལྟས་ཀྱང་ངན། སྔར་འདིས་རྫུན་ལབ་མི་ཤེས་པ་ཞིག་ཡིན་ཏེ། གཏེར་ཨང་དེ་ཐོན་ནས་རྫུན་ལབ་ཅེས་ཀུན་གྱིས་འབར་ནས་བྱུང་བས་ཐུགས་སྐྱོ་ནས། གཏེར་ཆོས་རྣམས་གཏེར་དུ་སྦ་དགོངས་ནས་སྦ་མ་རིག་མཛད་ནུབ་རྨི་ལམ་དུ་བུ་མོ་གཉིས་ཀྱིས་རྟ་དཀར་པོ་གཤོག་པ་ཅན་ཞིག་ཁྲིད་བྱུང་བ་ལ་ཆིབས་ཏེ། ཟངས་མདོག་དཔལ་རིར་ཕེབས་པས། ཨུ་རྒྱན་རིན་པོ་ཆེས་ཞག་ཉེར་གཅིག་ཏུ་དབང་ལུང་གདམས་པ་ཕྱག་ལེན་དབྱངས་དང་བཅས་པ་གནང་བའི་སྣང་བ་བྱུང་། བུ་ཁྱོད་སེམས་བསྐྱེད་མ་བཏང་ཞིག །ད་སྟེ་ལོ་བདུན་ལོན་པ་ན། །ནུབ་བྱང་མཚམས་ནས་འགྲོ་དོན་འབྱུང་། །ཞེས་སོགས་ཞལ་གདམས་ལུང་བསྟན་སྙན་བརྒྱུད་མང་དུ་བྱུང་བ། རྨང་ལམ་རྟ་དཀར་མའི་སྐོར་དང་། རྨང་ལམ་དུ་བལ་ཡུལ་ཡང་ལེ་ཤོད་དུ་ཕེབས་
ནས། ཨུ་རྒྱན་རིན་པོ་ཆེས་བཀའ་བརྒྱད་ཀྱི་དབང་ལུང་གདམས་པ་གནང་བ། སྙན་བརྒྱུད་ཡང་ལེ་ཤོད་མར་གྲགས་པ་དང་། རཏྣ་གླིང་པ་རྨང་ལམ་དུ་མཁའ་འགྲོ་བཞིས་དར་དཀར་པོའི་དོ་ལི་བཏེག་སྟེ་ནམ་མཁར་ཁྱེར་ནས། གཙང་གི་ཕུང་པོ་རི་བོ་ཆེའི་རྩེར་བབ་པ་ན་རི་དེའི་རྩེར་ཨུ་རྒྱན་པཎྜི་ཏ་སྨུག་ནག་ཆོས་གོས་གསུམ་དང་ལྡན་པ། མདུན་དུ་གསེར་གྱི་མཆོད་རྟེན་རྩེར་མོ་ཤེལ་ཁྲུ་གང་ཡོད་པ། བུད་མེད་མཛེས་སྡུག་འོད་དང་ལྡན་པ་ལྔས་བསྐོར་བ་བྱེད་པ་མཇལ་ཏེ། སྙན་བརྒྱུད་ཀྱི་ངོ་སྤྲོད་གདམས་པ་འགའ་གནང་ནས་འཇའ་ལྟར་ཡལ། དེ་ནས་རྣལ་འབྱོར་པ་ཌཱ་རུ་དང་བྷནྡྷ་བསྣམས་ཤིང་ཁ་ཊྭཱྃ་མཆན་དུ་བཅུགས་ནས་ཞབས་རོལ་སྟབས་ཀྱིས་བཞུགས་པ་གཅིག་ལ་རྣལ་འབྱོར་མའི་ཚོགས་ཀྱིས་བསྐོར་ནས་འཛབ་དབྱངས་དི་རི་འདུག་པ་གཅིག་གི་མདུན་དུ་བསླེབས་པས། སྙན་བརྒྱུད་ཞལ་གདམས་མང་དུ་གནང་ནས། ང་ནི་རྒྱལ་བ་ཐམས་ཅད་སྟེ། ངོ་བོ་ཆོས་ཀྱི་དབང་ཕྱུག་ཡིན་གསུངས་ནས། གུ་རུ་ཆོས་དབང་གི་སྐུར་གྱུར་ནས་བྱིན་བརླབས་མཛད་ནས་ནམ་མཁའ་ལ་གཤེགས་སོ། །དེ་ནས་ཟངས་མདོག་དཔལ་རིར་ཕེབས་ཏེ། ཞག་ཉེར་གཅིག་བར་དུ་དབང་ལུང་ཕྱག་ཁྲིད་
ཞིབ་རྒྱས་སུ་གནང་བའི་སྣང་བ་བྱུང་སྟེ། དེ་དག་གི་བར་སྐབས་སུ་ཨུ་རྒྱན་རིན་པོ་ཆེ་དང་མཚོ་རྒྱལ་རྗེ་འབངས་རྣམས་ཀྱིས་གསུངས་པའི་རྨང་ལམ་གནམ་ཆོས་ཀྱི་སྐོར་མང་དུ་བྱུང་བ་ཡི་གེར་བཀོད་པ་སྙན་བརྒྱུད་དག་སྣང་གི་སྐོར་ཞེས་བྱ་སྟེ། དེས་དོན་ངོ་སྤྲོད་ལ་ནི་གཏེར་གཞུང་ལས་ཀྱང་དེ་དག་ཁ་གསལ་ཞིང་ཟབ་པར་སྣང་ངོ་། །ཡང་རཏྣ་གླིང་པ་བསམ་འགྲུབ་བདེ་ཆེན་གྱི་ལྷ་ཁང་དུ་ཕེབས་དུས་གཞན་རྐྱེན་གཅིག་ལ་བརྟེན་ནས་ང་རྒྱལ་ཅུང་ཟད་སྐྱེས་ནུབ། རྨང་ལམ་དུ་རྣལ་འབྱོར་པ་དཀར་པོ་ཌཱ་མ་རུ་ཁྲོལ་བ་གཅིག་ལ། བུད་མེད་མང་པོས་ཚོགས་རྫས་ཐོགས་ནས་སྐོར་བ་བྱེད་པ་མཇལ། ཁྱོད་གཏེར་སྟོན་ཁོ་བོ་འདྲ་བ་གཅིག་མིན་ནམ། ཚོགས་གྲལ་འདིར་ཤོག་གསུངས་ནས། །ཞལ་གདམས་སྙན་བརྒྱུད་མང་དུ་གནང་ནས་ནུབ་ཕྱོགས་ཀྱི་ནམ་མཁའ་ནས་གཤེགས་སོ། །དེ་བཞིན་དུ་སྔོན་གྱི་གཏེར་སྟོན་ཐམས་ཅད་རྨང་ལམ་ཐོབ་པའི་གནམ་ཆོས་སྙན་བརྒྱུད་མང་དུ་ཡོད་དོ། །རྗེ་ཞྭ་དམར་མཁའ་སྤྱོད་དབང་པོའི་འགལ་བ་མཐའ་དག་རྣམ་པར་འཇོམས་པ་ཞེས་བྱ་བ་རྨི་ལམ་གྱི་རྟོགས་པ་ལས། འདི་ལྟར་རང་གི་སེམས་རྡོ་རྗེ་སྙིང་པོ་མཆོག་ཏུ་རྣམ་པར་དག་པ་རྡོ་རྗེ་བླ་མ་སངས་རྒྱས་ཀུན་གྱི་ངོ་བོ་ཉིད། གཞོན་
ནུར་གྱུར་པའི་ཚུལ་གྱིས་བཞུགས་པ་མངོན་པར་བཀོད་པའི་མདུན་དུ། རིན་པོ་ཆེའི་མེ་ཏོག་གི་སྙིམ་པ་སྙིང་གར་བཀོད་པའི་ལྷའི་ལུས་ཀྱི་བཏུད་དེ་མངོན་པར་གནས་པ་གསོལ་བ་བཏབ་པའོ། །ཞེས་ལྟ་སྒོམ་སྤྱོད་འབྲས་སོགས་ཟབ་ཆོས་ཀྱི་གནད་འགག་ཐམས་ཅད་ཞུས་ལེན་གྱི་ཚུལ་དུ་གསུངས་ནས། དེ་ནས་རང་གི་སེམས་ཀྱི་སྤྲུལ་པའི་འཇུག་པ་ཡང་དག་པར་བསྡུས་ཏེ། རྣམ་པར་མི་རྟོག་པས་ཀུན་ཏུ་གནས་པ་ལ་སྤྱོད་ཅིང་། མ་ལུས་པའི་ཆོས་རྣམས་ཀྱི་རང་གི་ངོ་བོ་ལ། རང་གི་ངང་གི་མངོན་པར་བལྟ་ཞིང་རྩེའོ། །ཞེས་རྨི་ལམ་གྱི་གནམ་ཆོས་ཟབ་ལ་རྒྱ་ཆེ་བ་ཡི་གེར་བཀོད་ཅིང་པར་དུའང་འཁོད་དོ། །རྗེ་མི་བསྐྱོད་ཞབས་ཀྱིས་རྨང་ལམ་དུ་བྲག་རི་ཆུང་ངུ་ཞིག་གིས་སྟེང་ན་རྡོ་རྗེ་རྣལ་འབྱོར་མ་ལྷའི་བུ་མོ་ཡིད་དུ་འོང་བའི་ཚུལ་དུ་མཇལ་བས། སྒྲོལ་དཀར་དང་ཨུ་རྒྱན་ཕག་མོ་གསུམ་གྱི་སྦྲག་བསྒྲུབ་ཀྱི་ཚེ་སྒྲུབ་ཟབ་མོ་དེའི་དབང་དང་བཅས་པ་གནང་བ་ཡི་གེར་བཀོད་པ་ལ། ཕག་མོ་ཟབ་རྒྱ་མར་གྲགས་ཏེ། ཟབ་ཆོས་བླ་ན་མེད་པར་བརྩིའོ། །ཡང་རིག་འཛིན་འཇའ་ཚོན་སྙིང་པོའི་སྙན་བརྒྱུད་ཧཱུྃ་ནག་སྙིང་ཐིག་གི་རྒྱབ་ཆོས་ནི། རིག་འཛིན་འཇའ་ཚོན་སྙིང་པོའི་རྨི་ལམ་དུ་རྔ་ཡབ་གླིང་ནས་སློབ་
དཔོན་ཆེན་པོའི་གསུངས་ཇི་ལྟར་བར་ཞུས་ཏེ། སྣང་གསལ་མར་མེའི་མདངས་ལ་བསྟན་ནས་བྲིས་པའོ། །ཞེས་སོ། །འོ་ན་སྔོན་མ་གྲགས་པའི་གནམ་ཆོས་རྨི་ལམ་དུ་བྱུང་བ་རྣམས་ནི་བརྒྱུད་པའི་ཕུག་དེ་རང་ལས་འོས་མེད་མོད། སྔོན་གྲགས་ཤིང་དར་བའི་ཆོས་རྨི་ལམ་དུ་ཐོབ་པས་ཐོབ་གོ་ཆོད་དམ་ཞེ་ན། མཚན་ཉིད་པའི་དགེ་བཤེས་འགའ་རེའི་ཞལ་རྒྱུན་ལ། ས་ཐོབ་པའི་གང་ཟག་ཡིན་ན་རྨི་ལམ་དུ་ཐོབ་པ་དེ་དངོས་སུ་ཐོབ་པ་དང་ཁྱད་མེད། སོ་སོའི་སྐྱེ་བོའི་གང་ཟག་གི་རྨི་ལམ་དུ་ཐོབ་པ་རང་གི་ཉམས་ལེན་ཨེ་རུང་ཙམ་ཡིན། གཞན་ལ་སྤེལ་མི་གཏུབ་ཅེས་ཟེར་བ་ཐོས་ལ། དེ་ལྟར་སྔར་གྱི་དབང་ལུང་གི་རྒྱུན་ཡང་ཐོབ་པ་ལ། ཕྱིས་དངོས་ཉམས་རྨི་ལམ་དུ་ཐོབ་པ་དེ་འདྲ་བ་ལ། བརྒྱུད་པ་ཉེ་བརྒྱུད་རིང་བརྒྱུད་གཉིས་ལྡན་དུ་བགྲང་བ་ནི་གྲུབ་མཐའ་ཀུན་ལ་ཡོངས་སུ་གྲགས་མོད། རྗེ་ཀརྨ་པ་ཆེན་པོ་དེ་བཞིན་གཤེགས་པའི་དྲུང་དུ། དྲུང་སྒམ་པོ་པ་ཆོས་ཀྱི་རྒྱལ་མཚན་པས་ཞུས་པའི་ཞུས་ལེན་དུ། རྨི་ལམ་དུ་དྲུང་ནས་དབང་བསྐུར་བདུན་བརྒྱད་ཙམ་ཐོབ། ད་རུང་ཡང་ཞུར་གཏུབ་པར་འདུག་པ། དེ་ཚོས་གོ་ཨི་ཆོད་ལགས། བླ་མ་ཁུ་བོ་ལ་ཕྱི་ནམ་མཁའ་རྒྱལ་མཚན་མས་ནི་དངོས་སུ་དབང་
བསྐུར་བ་དང་ཁྱད་མེད་གསུངས་པ་དེ་ལྟར་ལགས་སམ་ཞུས་པས། དེ་ཁོང་གིས་ཟེར་བ་ལྟར་ཡིན་པས། ངེས་ཤེས་ལེགས་པོ་གྱིས་དང་དངོས་སུ་ཐོབ་པ་ལས་དགའ་གསུངས། ཞེས་འབྱུང་བས་ངེས་ཤེས་ཆེན་པོ་ཐེ་ཚོམ་མེད་ན་སྤེལ་ཡང་གཏུབ་བམ་སྙམ་མོ། །འདི་ཟུར་གྱི་འཕྲོས་ཡིན་གྱི། གཏེར་སྟོན་རྣམས་ས་ཐོབ་སུ་ངེས་པས་སྨོས་མ་དགོས་སོ། །བདག་གིས་ཞབས་དྲུང་བཀྲ་ཤིས་དཔལ་གྲུབ་ཀྱི་དྲུང་དུ། རང་གི་འདོད་པའི་དབང་ལུང་རྨི་ལམ་དུ་ཐོབ་པས་གོ་ཆོད་དམ་མི་ཆོད་ཀྱི་ཞུ་ཡིག་ཕུལ་བའི་ལན་དུ། རྨི་ལམ་མངོན་སུམ་ཞེས་སུ་མི་བདེན་བདེན། །སོ་སོར་སྨྲ་མོད་རྨི་ལམ་ཇི་ལྟར་བས། །མངོན་སུམ་བདེན་པའི་ཀུན་རྫོབ་ཆོས་མེད་ན། །ཕྲད་པ་རྨི་ལམ་དེ་ཀས་འགྲུབ་ངེས་པས། །བདེན་བདེན་རྟག་རྟག་གཞན་ཞིག་འདོད་མི་འཚལ། །ཞེས་གསུངས་འདུག་གོ །བོད་ཡོངས་རྫོགས་དགེ་བའི་བཤེས་གཉེན་ཆོས་ཀྱི་སྤྱན་ཅན་ཡིན་པས་གསུངས་པ་ལྟར་ངེས་སོ་སྙམ་མོ། །འདི་འདིར་བཀོད་པ་ཡང་འོག་ནས་འཆད་པའི་རཏྣ་གཏེར་ཆོས་མཐའ་དག་མི་འགྱུར་རྡོ་རྗེས་རཏྣ་གླིང་པ་ཉིད་ལས་རྨང་ལམ་དུ་ཐོབ་པའི་གོ་ཆོད་ཡིན་ནོ། །དེ་ལྟར་རྨི་ལམ་དུ་གནམ་ཆོས་གསར་
པ་དང་རྙིང་པ་སྔར་གྱི་ཆོས་རྨི་ལམ་དུ་ཐོབ་པ་ཡོད་ཚུལ། མདོ་རྒྱུད་མན་ངག་གི་ལུང་ཁུངས། སྔོན་གྱི་རིག་འཛིན་གོང་མའི་རྣམ་ཐར་གྱི་ཐེ་ཚོམ་བཅད་པ་དེ་སོང་ནས། ད་ལྟ་སྤྲུལ་སྐུ་མི་འགྱུར་རྡོ་རྗེ་ལ་རྨང་ལམ་དུ་གནམ་ཆོས་གསར་པ་བྱུང་ཚུལ་དང་། སྔོན་གྱི་གཏེར་ཆོས་རྙིང་པའི་བཀའ་བབ་གསར་དུ་བྱུང་ཚུལ་ནི། སྤྲུལ་སྐུ་དགུང་ལོ་བཅུའི་ལོ་མཇུག་ཙམ་དུ་བདག་དང་མཇལ་ཏེ། གསང་སྔགས་རྙིང་མའི་དབང་ལུང་རྣམས་རིམ་པར་ཕུལ་ཞིང་། སྐུ་མཚམས་མཉམ་དུ་བསྡམས་ནས་ཚེ་སྒྲུབ་གསང་བ་འདུས་པ་དང་། ཐུགས་རྗེ་ཆེན་པོ་ཡང་གསང་བླ་མེད་ཀྱི་ཕྱི་སྒྲུབ་རྒྱལ་བ་རྒྱ་མཚོ་དང་། བླ་མ་ཀུན་དྲིལ་ཡིད་བཞིན་ནོར་བུ། འབྲུ་གསུམ་རྒྱལ་བ་སྤྱི་སྒྲུབ། བླ་མ་སྐུ་གསུམ་གྱི་སྒྲུབ་པ་ལ་སོགས་པ་ནས་བརྩམས་ཏེ་གསང་སྔགས་རྙིང་མ་ཁོ་ནའི་སྒྲུབ་པ་མཉམ་དུ་མཛད་པས། དགུང་ལོ་བཅུ་གཅིག་པ་ལུག་གི་ལོ་འབྲུག་ཟླ་བའི་ནང་ནས་བཟུང་སྟེ། གནམ་ཆོས་ཐུགས་གཏེར་སྙན་བརྒྱུད་ཀྱི་སྐོར་རྣམས་ཐོན་པར་གྱུར་ཏེ། ནུབ་གཅིག་རྨི་ལམ་དུ་བཅོམ་ལྡན་འདས་ཆོས་སྐུ་ཀུན་ཏུ་བཟང་པོ་མཇལ་ནས། དབང་རྫས་རྣམས་ཕྱག་རྒྱ་མཛད་ནས་དབང་བསྐུར་བ་ཚེ་དབང་བདུད་རྩི་གེགས་སེལ། པདྨ་ཐོད་ཕྲེང་རྩལ་
དམར་པོ་དབུ་རྒྱན་དང་དར་དམར་གྱིས་བེར་གསོལ་བ། ཕྱག་གཡས་ཌཱ་རུ་དང་གཡོན་པདྨ་འཛིན་པ་གཅིག་གིས་སྤྱན་རས་གཟིགས་རྣོ་བཀྲ་ཞེས་བྱ་བའི་སྒྲུབ་ཐབས་གསུངས། ཡེ་ཤེས་མཚོ་རྒྱལ་ཐ་མལ་པའི་བུད་མེད་ཉིད་ཀྱི་མ་ཡུམ་འདྲ་བ་ཞིག་ཏུ་སྤྲུལ་ནས་རྨི་ལམ་བརྟག་པའི་གདམས་པ་གསུངས། ཨུ་རྒྱན་སྐུ་ཡོངས་སུ་རྫོགས་པ་གཅིག་གིས་ཙཀ་ལི་ལ་བརྟེན་ནས་བར་ཆད་སེལ་ཐབས་གསུངས། ཨུ་རྒྱན་ཡི་གེ་གསར་པའི་ཀ་དཔེ་གནང་། སྲིན་པོའི་ཡི་གེ་དང་། ཡང་ཨུ་རྒྱན་ཡི་གེ་གཅིག་གནང་། ཡང་ཨུ་རྒྱན་རིན་པོ་ཆེས་ལྷ་མཆོག་དམ་པའི་ཚེ་སྒྲུབ་གསུངས། ཁ་སར་པཱ་ཎིའི་སྒོ་ནས་འཇིགས་པ་ཐམས་ཅད་སོ་སོར་སེལ་བའི་གཟུངས་ཤིག་གསུངས། ལྷ་མཆོག་དམ་པ་ཞེས་སྔར་མ་གྲགས་པ་གཅིག་གི་སྒྲུབ་ཐབས་གསུངས། གྲུབ་ཆེན་ས་ར་ཧ་དམར་སྨུག་ཕྱག་གཡས་རྒྱ་མཚལ་གྱི་རྐང་བུ་དང་གཡོན་དར་འཛིན་པ། དར་དཀར་གྱི་ཨཾ་རག་ཅན། ཨག་ཚོམ་སེ་ཞིང་ཐོར་ཅོག་ཅན་གཅིག་གིས། རྒྱ་ཡིག་གསར་པ་གཅིག་གནང་། ཐུགས་རྗེ་ཆེན་པོ་རྒྱལ་བ་རྒྱ་མཚོས་མི་རྟག་པའི་དཔེ་བརྒྱད་ངོ་སྤྲོད་དཔེའུ་རིས་གནང་། རྡོ་རྗེ་གྲོ་ལོད་སྟག་ཆིབས་པ་ཞིག་གིས་ཌ་མ་རུ་ལ་བྲི་
རྒྱུའི་འཁོར་ལོ་གནང་། རྣམ་སྲས་དམར་པོ་སེང་གེ་ལ་ཆིབས་པ་གཅིག་གིས་རྣམ་སྲས་དམར་པོའི་སྒྲུབ་ཐབས་གསུངས། དམ་ཅན་མགར་དམར་ལ་ཐོད་དམར་པོ་ཅན། ཕྱག་ན་རྡོ་རྗེ་དང་བྷནྡྷའི་ནང་དུ་ཙིཏྟ་བཟུང་བ། དར་དམར་པོའི་བེར་ཅན་ར་སྐྱེས་ཁམ་པ་ལ་ཞོན་པ་གཅིག་གིས། རྟེན་འབྲེལ་བརྟག་པ་དོན་གསལ་ཤོག་ཁྲ་བྱ་བ་གཅིག་ལུང་བསྟན། གནོད་སྦྱིན་ཤན་པ་དམར་ནག་གིས་ཤ་བ་པར་བུ་ཞེས་པ་ནད་པའི་རིམ་གྲོ་སྔར་མ་གྲགས་པ་གཅིག་དང་མཚོན་སྲུང་འཁོར་ལོ་ཁོ་རང་ཉིད་ཀྱིས་མཆོད་ཐབས་རྒྱས་པ་ཞིག་ཕུལ། གནོད་སྦྱིན་ཐེག་རྩེའི་ཐོག་སྲུང་འཁོར་ལོ་དང་། ཆར་འགོད་གདམས་པ་ཕུལ། དེ་ལ་སོགས་པ་རྣམ་གྲངས་མང་རབས་གཅིག་རྨི་ལམ་དུ་བྱུང་བའི་གནམ་ཆོས་ཏེ། དེ་ཐམས་ཅད་རིམ་པར་ཡི་གེར་བཀོད་དེ། སོ་སོའི་དུས་ཚོད་ཚེས་གྲངས་དང་བཅས་པ་དཔེ་སོ་སོའི་མཇུག་ཏུ་བྲིས་ཡོད་ལ། ཐམས་ཅད་བསྡོམས་པས་རྨི་ལམ་བྱུང་བ་ལ་པོད་ཆུང་མ་ལང་ཙམ་སྟེ་ཧ་ཅང་ཚན་མི་ཆེའོ། །དེའང་གུ་རུ་ཆོས་དབང་གི་རྨང་ལམ་རྟ་དཀར་མའི་སྐབས་སུ་རྨི་ལམ་ལྟར་བྲིས་ན་ཧ་ཅང་ཉོབ་འགྲོ་བར་འདུག་པས་དོན་བསྡུས་ཏེ་བྲིས་གསུངས་ཀྱང་། སྤྲུལ་སྐུ་འདིའི་རྨི་ལམ་དུ་བྱུང་བའི་གནམ་
ཆོས་ཐམས་ཅད་ནི། དྲི་བ་ལ་ཐུགས་བསམ་བཏང་མི་དགོས། ཉོབ་པ་རྨི་ལམ་འཁྲུལ་པའི་ཞད་ཀྱིས་དོན་བསྡུས་ཏེ་བྲི་དགོས་སོགས་གཏན་ནས་མེད། བྲི་མ་ཚར་བར་དུ་མི་བརྗེད་པའི་གཟུངས་ཐོབ་པས་བརྗེད་པ་མེད། རྒྱ་ཡིག་ལ་སོགས་པ་ཡང་རྨི་ལམ་དུ་ཡི་གེའི་དཔེ་བསྟན་པ་དེ་བྲིས་པ་ན་བོད་ཡིག་བྲི་བ་དང་འདྲ་བར་ཐོགས་པར་མི་སྣང་། ཚིག་ཟུར་ལེགས་ཉེས་སོགས་བཅོས་ཤོམ་བྱས་ན་ཡང་དེ་འདྲ་མ་གསུངས་དེ་མི་རུང་གསུངས་སོ། །དེ་ནས་རྨི་ལམ་དུ་བྱུང་བ་རྣམས་ཀྱང་མངོན་སུམ་དང་འདྲ་བས་ངོ་མཚར་ཆེ་བའོ། །ཡང་གཏེར་ཆོས་རྙིང་མའི་བཀའ་བབ་གསར་དུ་བྱུང་ཚུལ་ནི། རཏྣ་གླིང་པའི་བཀའ་འབུམ་ཞིག་འབུལ་མི་བྱུང་བ་གཟིགས་པས་རྐྱེན་བྱས་ཏེ། ང་རཏྣའི་ཆོས་བདག་ཡིན་པ་ལ། རཏྣ་གླིང་པ་དང་མ་མཇལ་ཨང་གསུངས་ཤིང་ཉིན་གཅིག་ཉིན་རིང་བཤུམས། ད་ཨུ་རྒྱན་དང་མཇལ་བ་ལས་རཏྣ་གླིང་པ་ཅི་ལྷག་ཞུས་ཀྱང་མ་ཕན། དེ་ནས་པདྨ་བཀའ་ཐང་དང་ཨུ་རྒྱན་གྱི་སྐུ་ཞིག་ལ་བསྐོར་བ་མཛད་ཅིང་། རཏྣའི་བཀའ་འབུམ་དེ་རྒྱབ་ཏུ་ཁུར་ནས་ཉིན་རིང་གཅིག་ལ་བསྐོར་བ་མཛད་དོ། །དེ་ནུབ་རྨི་ལམ་དུ་རཏྣ་གླིང་པ་པད་ཞྭ་ཅན། གཡོན་དུ་ཡུམ་གཅིག་ཀྱང་ཡོད་པ་ཞིག་
མཇལ་ཏེ། རཏྟའི་གཏེར་ཁ་ནས་བྱུང་ཚད་ཐམས་ཅད་ཀྱི་དབང་ལུང་གནང་། ཡུམ་དེ་ལ་བསྟེན་ནས་གསང་བ་དང་ཤེས་རབ་ཡེ་ཤེས་ཀྱི་དབང་ཡང་དངོས་སུ་གནང་ཞིང་ངོ་སྤྲད། ཕྱིར་ནངས་ཉི་མ་ཤར་ཙམ་ལ་རཏྣ་གླིང་པ་དངོས་སུ་ཞལ་གཟིགས་ཏེ་རཏྣ་ཉིད་ཀྱི་བླ་སྒྲུབ་ཕྱི་ནང་གསང་གསུམ་སྔར་མ་གྲགས་པ་གནང་ནས་ཡི་གེར་བཀོད་དོ། །དེ་ནས་རཏྣའི་ཆོས་ཐམས་ཅད་ཉེ་བརྒྱུད་རཏྣ་གླིང་པ་ནས་མི་འགྱུར་རྡོ་རྗེ་ལ་བརྒྱུད་ཆོག་པའི་ཕྱིར། གཏོར་དབང་པོད་དབང་སོགས་སླར་སྤྲུལ་སྐུ་ལ་ཞུས་ནས་བརྒྱུད་པ་གཉིས་ལྡན་དུ་བྱེད་པའོ། །དེ་ལ་སྔོན་བྱོན་གྱི་གྲུབ་ཆེན་དེ་དག་གིས་རྨི་ལམ་དུ་བྱུང་བའི་གནམ་ཆོས་ལ་ཡང་འགྲོ་དོན་དང་ཁྱབ་རྒྱ་ཆེན་པོ་བྱུང་འདུག་ཀྱང་། དེང་སང་དུས་སྙིགས་བསྟན་པ་ན་བབ་པས། གཏེར་སྟོན་ཡིན་ཟེར་བ་ཙམ་གྱིས་རྨི་ལམ་དུ་བྱུང་བའི་གནམ་ཆོས་ཙམ་ལ་བྱིན་རླབས་དང་འགྲོ་དོན་ཆེར་མི་འོངས་སམ་སྙམ་ན། དེ་ལ་དུས་ཕྱིས་རིག་འཛིན་འཇའ་ཚོན་པ་དང་རྩེ་ལེ་སྤྲུལ་སྐུ་སོགས་ཀྱི་བུ་ཆེན། གཏེར་སྟོན་ནམ་མཁའ་འཇིགས་མེད་ཅེས་པའི་རྟོགས་ལྡན་ཆགས་ལམ་གཙོ་བོར་སྟོན་པ་དེས། སའི་གཏེར་ནི་གཅིག་ཀྱང་མ་བཏོན་ཏེ། འབྲས་མོ་ལྗོངས་ཀྱི་གནས་སྒོ་སྔོན་ནས་གཞན་གྱིས་
ཕྱེས་པའི་ནང་ནས། བྲག་དཀར་བཀྲ་ཤིས་ལྡིང་སོགས་ངོས་འཛིན་དང་ཞལ་གཟིགས་ཀྱི་གནས་ཡིག་གསར་དུ་བཀོད་པ་ཙམ་ལས། གཞན་གནས་སྒོ་གསར་འབྱེད་མ་མཛད་མོད་ཀྱི། རྨི་ལམ་དུ་ཐོད་ཕྲེང་སྡེ་ལྔ་ཞལ་མཇལ་ནས་དབང་བསྐུར། རྡོ་རྗེ་ཕག་མོའི་ཕྱག་ན་སེང་ལྡེང་གི་ཌཱ་མ་རུ་བཀལ་པའི་སྒྲ་ལས་ཆོས་ཀྱི་སྒྲ་བྱུང་བ་ཡི་གེར་བཀོད་པ་ལ། རིག་འཛིན་སྲོག་སྒྲུབ་ཏུ་གྲགས་པའི་རྨི་ལམ་དུ་བྱུང་བ་གཙོ་ཆེའི་གླེགས་བམ་ཆེ་བ་ཞིག་བྱུང་བ། ས་སྐྱ་ཨ་མི་ལགས། འབྲས་སྤུངས་ཐམས་ཅད་མཁྱེན་པ། ཞབས་དྲུང་རྡོ་རྗེ་བྲག་པའི་སྤྲུལ་སྐུ། ་སྤུ་བོ་སྦྲ་ཁ་སྤྲུལ་སྐུ་སོགས་ཀྱི་ཐུགས་དམ་གཙོ་བོར་མཛད་པ་ཡིན་ཞེས་ཐོས་ལ། རྨི་ལམ་གྱི་གནམ་ཆོས་དེའི་གཏུམ་མོའི་ཁྲིད་སྐྱོང་བས། རས་རྐྱང་ཐུབ་པ་སྟོང་ཕྲག་ཙམ་བྱུང་ཟེར་ཡང་། དེང་སང་གཙང་དབུས་དག་ཀོང་འབྲས་མོ་ལྗོངས་སོགས་ན་རས་རྐྱང་ཐུབ་པའི་རྟོགས་ལྡན་བཟང་པོ་མང་དུ་ཡོད་པར་སྣང་བ། རས་རྐྱང་ཐུབ་པ་ཕལ་ཆེར་བ་ནི་ཁོང་གི་གཏུམ་མོའི་ཁྲིད་ཐོབ་ནས་རས་རྐྱང་བྱས་པ་ཁོ་ནར་སྣང་ཞིང་། ཁྲིད་དེ་ལ་བརྟེན་ནས་རས་རྐྱང་བ་ལྔ་བརྒྱ་ཙམ་ནི་ངེས་བར་བྱུང་གདའ་འོ། །གཞན་ཡང་གསང་སྔགས་གསར་རྙིང་གི་ཆོས་ཐོབ་རྒྱ་དང་
ཁྲིད་དབང་ལུང་རྒྱ་མཚོ་ལྟ་བུ་ཐོབ་པའི་རྟོགས་ལྡན་འགའ་ཞིག་ཀྱང་། གཞན་ཐམས་ཅད་ཐོབ་ཆོས་ཙམ་དུ་བཞག་ནས། ཐུགས་དམ་གྱི་རྩ་བ་རྨི་ལམ་དུ་བྱུང་བའི་གནམ་ཆོས་རིག་འཛིན་སྲོག་སྒྲུབ་བྱེད་ཅིང་གདའ། དེ་ནས་དེང་སང་བྱུང་བའི་རྨི་ལམ་གྱི་གནམ་ཆོས་ལ་ཡང་བྱིན་རླབས་དང་འགྲོ་དོན་མི་འབྱུང་སྙམ་དུ་མི་བྱ་སྟེ། བསྟན་པ་དང་སེམས་ཅན་ལ་ཕན་པ་ཞིག་མེད་ན་ཨུ་རྒྱན་རིན་པོ་ཆེས་རྨི་ལམ་དུ་ཡང་ཅི་ལ་གསུངས། དེས་རྨི་ལམ་དུ་བྱུང་ཚུལ་མདོ་ཙམ་སོང་ནས། ༈ ད་ནི་ཉམས་ཀྱི་སྣང་བར་གནམ་ཆོས་བྱུང་ཚུལ་བཤད་པ་ལ་ཡང་། ཉམས་ཀྱི་སྣང་བ་ངོས་འཛིན་པ། དེ་འབྱུང་བའི་ལུང་ཁུངས་བཤད་པ། སྔོན་གྱི་རིག་འཛིན་གོང་མའི་ཉམས་ལ་བྱུང་ཚུལ་རྣམ་ཐར་བཤད་པ། ད་ལྟ་སྤྲུལ་སྐུ་མི་འགྱུར་རྡོ་རྗེ་ལ་བྱུང་ཚུལ་ལོ་རྒྱུས་བཤད་པ་དང་བཞིའོ། །དེ་ལ་ཉམས་ཀྱི་སྣང་བ་དེ་གང་ཞེ་ན། རྗེ་མཁའ་སྤྱོད་དབང་པོ་དྲི་མེད་དཔལ་ཡེ་ཤེས་ཀྱི་གསུངས་ལས། ཁོ་བོ་ཅག་སྔོན་སྨོན་ལམ་གྱི་མཐུས་སྐྱེ་བ་བརྒྱུད་མར་ཉམས་ཀྱི་ཡེ་ཤེས་མཐུ་ལྡན་དུ་ཉེ་བར་སྒྲུབ་པ་བྱེད་པས། འདིར་ཡང་མངོན་ཉམས་ཐོས་ཉམས་ཤེས་ཉམས་ཐོད་རྒལ་ཤིན་ཏུ་བརྟག་པ་དཔྱད་པར་དཀའ་བ་དག་འཆར་ཞིང་། དེར་སྣ་
ཚོགས་པའི་བརྗོད་པ་ཡང་རང་ཤུགས་རང་འབྱུང་སྟེ། བརྗོད་པར་མི་འོས་པའི་ཚིག་དང་མཐོང་སྣང་གི་བཀོད་པ་ཟབ་དོན་གྱི་གླེང་མོ་དག་དབང་མེད་དུ་ཐོན་པར་གྱུར་ཏེ། ཞེས་གསུངས་པ་ལྟར། སྤྱིར་ཉམས་སྣང་ལ་མི་གཅིག་པའི་དབྱེ་བ་དུ་མ་ཡོད་པར་སྣང་སྟེ། རྣལ་འབྱོར་ཉམས་ལ་ཅི་ཡང་འཆར། །ཞེས་པ་ལྟར། རྗེ་མི་ལས་ཁམས་འདུས་པ་ཉམས་ཀྱི་སྣང་བ་ལས། །ངོ་མཚར་ལྟད་མོ་ཅིར་ཡང་སྣང་། །ཞེས་གསུངས་པས་ཚེ་རིང་མའི་ཆོ་འཕྲུལ་དེ་དག་ཁམས་འདུས་པ་ཉམས་ཡིན་པར་གསུངས་པ་དང་། རྫོགས་ཆེན་གྱི་ཁྲིད་རྣམས། སེམས་ལ་བདེ་གསལ་མི་རྟོགས་པ་ལ་སོགས་ཉམས་གང་སྐྱེས་ཐམས་ཅད་ཤེས་ཉམས་ཡིན་པས་མི་བརྟན་འགྱུར་ནས་འགྲོ། ཐོད་རྒ་ལ་མིག་གིས་མཐོང་བ་དེ་སྣང་ཉམས་ཡིན་པས་བརྟན་ཞེས། དེ་གཉིས་ཀ་ཉམས་ཡིན་པར་གསུངས་པ་དང་། མཚན་ཉིད་པའི་དགེ་བཤེས་དག་གིས་ཞལ་རྒྱུན་ལ། ཡིད་ཡུལ་དུ་མངོན་སུམ་ལྟ་བུར་ལྷ་གསལ་པོར་དྲན་ནས། མི་ལྟ་བུ་ཡང་དངོས་སུ་ཐུག་པ་འདྲ་ཞིག་འབྱུང་བ་དེ། རྟོག་ངོར་ཞེས་བྱ་སྟེ། རྣམ་པར་རྟོག་པའི་ངོར་དྲན་པ་ཡིན་པས། དེ་ལྟ་བུ་ཡིད་ཡུལ་དུ་ལྷ་ལ་སོགས་གསལ་པོར་དྲན་ཡང་ཞལ་
མཐོང་གི་གོ་མི་ཆོད་དེ། དཔེར་ན་སྔར་ཤི་བའི་ཕ་མ་ཡིད་ཡུལ་དྲན་ན་ངོ་དབྱིབས་ལ་སོགས་མངོན་སུམ་ལྟར་གསལ་ཡང་། ཕ་མ་དག་ཐུག་པ་མིན་པ་དང་འདྲ་ཞེས་ཟེར་ཀྱང་། ཆོས་དབང་ལུགས་ཀྱི་བཀའ་བརྒྱད་སྒྲུབ་ཆེན་ལས། ཉམས་སུ་ལྷ་གསལ་བ། མཁའ་འགྲོས་ལུང་སྟོན་པ་ཞེས་དང་། གྲུབ་ཆེན་ཀརྨ་པས་ཆོས་སྐྱོང་ཞལ་གྱི་དཀྱིལ་འཁོར་གནམ་ས་ཁེབས་པ་ཙམ་ཡིད་ཡུལ་གསལ་བས་ཞེས་ཡིད་ཡུལ་དུ་གསལ་བ་ཡང་དོན་དང་ལྡན་པར་གསུངས་མོད། འོན་ཀྱང་འདིར་སྤྲུལ་སྐུ་མི་འགྱུར་རྡོ་རྗེ་ལ་ཉམས་ཀྱི་སྐབས་སུ་གནམ་ཆོས་བྱུང་བ་ནི། ཤེས་ཉམས་དང་སྣང་ཉམས་དང་ཁམས་འདུས་ཀྱི་ཉམས་དང་རྟོགས་ངོར་སོགས་མ་ཡིན་ཏེ། མ་གཅིག་གཅོད་ཀྱི་རྣམ་བཤད་ལས། ཡང་ན་ཉམས་སུ་ཤར་ཏེ་ཉམས་ཞེས་པ་ནི། གཉིད་པ་ཡང་མ་ཡིན་ཅིང་མ་གཉིད་དངོས་ཀྱང་མ་ཡིན་ལ། ཚོགས་དྲུག་གི་སྣང་བ་གསལ་ཞིང་དྭངས་ལ་རིག་པ་ཤིན་ཏུ་དྲུང་པའི་ངང་ལ་ད་ལྟར་གྱི་སྣང་བ་ཡུལ་མཚན་ཉིད་པ་ཅི་ལྟ་བ་བཞིན་མ་ཡིན་པ་ཅུང་ཟད་འགྱུར་ཞིང་གཞན་ཞིག་ཡིད་ལམ་དུ་འཆར་ཚེ། ཆོ་འཕྲུལ་གྱི་བྱེ་བྲག་གང་བྱུང་བ་དེ་ལ་ཉམས་སྣང་ཟེར་བ་ཡིན་ནོ། །ཞེས་གསུངས་པ་དང་མཐུན་པར་བྱུང་བ་ལགས་སོ། །
འོ་ན་ཉམས་ཀྱི་སྣང་བ་དེ་ལྟ་བུ་ལ་གནམ་ཆོས་འབྱུང་བར་གང་ན་བཤད་ཅེ་ན། བླ་མ་སྤྲུལ་སྐུ་སྒྲུབ་པའི་གཞུང་ལས། གཞན་ཡང་ཉམས་དང་རྨི་ལམ་དངོས། །བླ་མ་ཡི་དམ་མཁའ་འགྲོ་དང་། །ཁྱད་པར་ཨུ་རྒྱན་པདྨ་བདག །མོས་གུས་དབང་པོའི་གོ་རིམ་བཞིན། །སྣང་ཚུལ་གསུམ་དུ་མཇལ་ནས་ཀྱང་། །འདི་བསྒྲུབ་རྗེས་འཇུག་མི་བསླུ་བས། །འགྲུབ་རྟགས་འཕྲལ་དུ་འབྱུང་བར་ངེས། །ཞེས་དང་། ཐུགས་རྗེ་ཆེན་པོ་གསང་འདུས་སྒྲུབ་ཆེན་ལས། དེ་ཚེ་སྒྲུབ་པའི་རྟགས་ཀྱི་རིམ་པ་ཡང་། །དངོས་སམ་ཉམས་སམ་རྨི་ལམ་དུ། བཀའ་བརྒྱུད་ཀྱི་བླ་མ་རྣམས་དང་མཇལ་བ། ལྷ་དང་མཁའ་འགྲོས་ཆོས་འཆད་ལུང་སྟོན་པ། །ཞེས་དང་། བླ་མ་དགོངས་འདུས་ཡང་གསང་རྩ་བའི་ཐུགས་སྒྲུབ་གསལ་བྱེད་ཐུགས་ཀྱི་ནོར་བུ་ལས། བླ་མ་ཡི་དམ་ཌཀྐི་ལ་སོགས་པ་མངོན་དུ་མཇལ་ཞིང་ཆོས་འཆད། བརྡའ་དབང་བསྐུར་བ་ལ་སོགས་པ་བྱིན་རླབས་ཀྱི་ལྟས་དཔག་ཏུ་མེད་པ། རོབ་མངོན་སུམ་འབྲིང་ཉམས་སྣང་ཐ་མ་རྨི་ལམ་དུ་འོང་། ཞེས་དང་། དྲག་པོ་བདེར་འདུས་སྒྲུབ་གཞུང་ལས། རབ་དངོས་འབྲིང་ཉམས་ཐ་མ་རྨི་ལམ་ན། །སློབ་དཔོན་པདྨ་འབྱུང་གནས་མཇལ་བ་
དང་། །ཞེས་དང་རཏྣ་ལུགས་ཀྱི་དྲག་པོའི་རྟགས་ཡིག་ལས། བླ་མ་ཡི་དམ་མཁའ་འགྲོ་ཆོས་སྐྱོང་གང་དང་གང་བསྒྲུབས་ཀྱང་། རྣལ་འབྱོར་བ་རབ་འབྲིང་ཐ་གསུམ་དང་སྦྱར་ཏེ། རབ་ལ་ཨུ་རྒྱན་དངོས་དང་མཇལ་བ་དང་། འབྲིང་ཉམས་ཐ་མ་རྨི་ལམ་དུ་འབྱུང་སྟེ། ཞེས་གསུངས་སོ། །དེ་ཡང་ཉམས་ཀྱི་དག་སྣང་ལ་གནམ་ཆོས་དབང་ལུང་གི་རྒྱུན་རིག་འཛིན་གོང་མ་ལས་བྱུང་བའི་རྣམ་ཐར་ནི། རྗེ་དུས་གསུམ་མཁྱེན་པ་སྐུ་དངོས་གནས་ནང་ལ་བཞུགས་སྐབས་ཉམས་ཀྱི་སྣང་བར་རྒྱ་གར་གྱི་དུར་ཁྲོད་ཞིག་ཏུ་བྱོན་པ་ན། ཨིནྡྲ་བྷུ་ཏི་ནག་པོ་པ་སོགས་གྲུབ་ཆེན་བཞི་ལས་སྔར་མ་གྲགས་པའི་ཕག་མོ་ཞལ་བཞི་མ། ཕྱག་ཆེན་གང་སིང་མ་སོགས་ཁྱད་ཆོས་ཀྱི་གདམས་པ་བཞི་གསན་པ་དང་། གྲུབ་ཆེན་ཀརྨ་པཀྵིའི་གྲི་གུག་བརྩེགས་པའི་རྒྱུད་ཀྱི་མཚམས་སྦྱོར་དུ། རྡོ་རྗེ་འཆང་ཆེན་ལེགས་དགྱེས་མ། རྡོ་རྗེ་འཛིན་དང་མ་ཧཱ་ཀཱ་ལ་རྣལ་འབྱོར་རཏུ་སོགས་ནས། སྔགས་འཆང་རང་བྱུང་རྡོ་རྗེ་ཀརྨ་སིདྷ་ཡན་ཆད་དུ། དཔལ་ལྡན་ནག་པོ་ཆེན་པོ་ཡི། །རྒྱུད་ལུང་མན་ངག་སྲོག་སྙིང་སོགས། །བླ་མ་ཡི་དམ་མཁའ་འགྲོ་མ་མགོན་ཚོགས། །དག་སྣང་གཅིག་ལ་གཅིག་ཞུས་ཏེ། །གང་ཟག་ཆིག་བརྒྱུད་མ་མཆིས་
ཤིང་། །ཕྲིན་ལས་ཚོགས་ལ་དབང་བསྒྱུར་ཐེ་ཚོམ་མེད། །ཅེས་གསུངས་པ་དང་། རྗེ་མཁའ་སྤྱོད་དབང་པོའི་རྣམ་ཐར་ལས། བརྒྱུད་པའི་ཁྲིད་ཀ་ནཱ་རོ་ཆོས་དྲུག་དང་། ཀ་དཔེ་ཚིགས་བཅད་ཚིག་ལྷུག་ཞལ་གདམས་དང་། །མཁར་ཁར་མ་དང་གེགས་སེལ་རྣམ་ལྔ་དང་། །དེ་ལ་སོགས་ཏེ་ནཱ་རོ་ཆོས་དྲུག་གི །ཆ་ལགས་མ་ལུས་ཡོངས་སུ་རྫོགས་པ་དང་། དཔལ་ལྡན་ཉིད་ལ་དྭགས་པོ་རིན་པོ་ཆེ། །དུས་གསུམ་མཁྱེན་དང་མཐའ་རྩ་བ་ལ་སོགས། །དེ་དག་རྣམས་ཀྱི་གསུང་སྒྲོས་རྒྱ་མཚོ་དང་། །གཞན་ཡང་རྫོགས་རིམ་མཐའ་དག་མ་ལུས་དང་། །ཕ་རྒྱུད་མ་རྒྱུད་ཐབས་ཤེས་གཉིས་མེད་རྒྱུད། །བསྐྱེད་པའི་རིམ་པ་སྣ་ཚོགས་མ་ལུས་ཀྱིས། །དབང་དང་སྒྲུབ་ཐབས་མ་ལུས་ཐམས་ཅད་དེ། །བཀའ་ཡི་དགོངས་དོན་ཇི་སྙེད་ཡོད་པ་དང་། །བདེན་གཉིས་སྲོལ་དང་བྱམས་ཆོས་ཚད་འདུལ་སོགས། །བསྟན་བཅོས་ཇི་སྙེད་ཡོད་པ་ཐམས་ཅད་དེ། །བཀའ་བསྟན་གཉིས་སུ་དྲིལ་བ་འདི་དག་རྣམས། །དངོས་དང་རྨི་ལམ་དག་པའི་སྣང་བ་ལས། །ངེས་པར་ཐོབ་ཅིང་འདི་དག་རྣམ་དབྱེ་བ། །རྒྱས་པར་ཐོབ་ཡིག་ནང་དུ་གསལ་འགྱུར་བས། །ཞེས་གསུངས་པས་དངོས་
ཉམས་རྨི་ལམ་དུ་ཐོབ་པ་ཡང་ཐོབ་གོ་བཅད་ནས་ཐོབ་ལུགས་དང་བཅས་པ་ཐོབ་ཡིག་བཀོད་ཡོད་པར་སྣང་། དྲུང་རམ་པ་མཁའ་སྤྱོད་པ་རྨ་རྐུང་ལུང་ན་བཞུགས་སྐབས་ཐོ་རས་ཤིག་ས་ར་ཧ་གཟིགས་ནས་ཕྱག་རྒྱ་ཆེན་པོའི་ངོ་སྤྲོད་མགུར་དུ་གསུངས་པ་ཡི་གེར་བཀོད་པ་དང་། རྒྱ་ནག་ཏུ་སའི་སྙིང་པོའི་གནས་ཞིག་འདུག་པ་མཇལ་བས། ཕ་བོང་གྲུ་བཞི་གཉིས་བརྩེགས་གཅིག་ལས་ཅི་མི་སྣང་། གནས་འདབ་དེ་ལ་ཞག་འགའ་ཙམ་བཞུགས་པས། ན་བུན་ནང་ནས་བུ་མོ་མང་པོས་མེ་ཏོག་ཐུ་ཞིང་སའི་སྙིང་པོ་ལ་ཆོས་ཞུར་འགྲོ་བ་ཡིན་ཟེར། རྗེས་སུ་རྒྱུགས་པས་ཁར་སང་གི་ཕ་བོང་དེར་སེང་ཁྲིར་གྱུར་པའི་སྟེང་ནས་བྱང་ཆུབ་སེམས་དཔའ་སའི་སྙིང་པོ་བཞུགས་ནས་ཕྱག་ཆེན་གྱི་ཁྲིད་གསུངས་པ་ཐོས་ནས་ཡི་གེར་བཀོད་པ་བཀའ་འབུམ་དུ་ཡོད་པ་ཡང་དག་སྣང་གི་ཉམས་ཡིན་གྱི། རྗེས་ནས་བྱོན་པས་ཕ་བོང་དེ་ལས་ཅི་མི་སྣང་སྐད། དུས་ཕྱིས་གཏེར་སྟོན་ནམ་མཁའ་འཇིགས་མེད་ཉམས་སྣང་ལ་བི་མ་ལ་ཨ་ཙ་ར་སྔོན་པོ་འཇིགས་པའི་གཟུགས་སུ་མཇལ་ནས་གསུངས་པའི་བར་ཆད་སེལ་བའི་གསོལ་འདེབས་དང་། ཉམས་སྣང་ལ་རིག་འཛིན་རྣམས་ཀྱི་ཚོགས་གྲལ་དུ་ཕྱིན་ནས་ཐོས་པའི་བསྐང་བ་ལེགས་པོ་གཅིག་ཡོད་
པས་ཡུན་རིང་མ་བྲིས་པས་བརྗེད། ཐར་ཐོར་དྲན་པ་ལ་བརྗེད་པ་བརྩམས་ནས་བྲིས་པ་གཅིག་ཀྱང་སྣང་ངོ་། །དེ་ནས་གོང་གི་ལུང་རྣམས་དང་མཐུན་པར་སྤྲུལ་སྐུ་མི་འགྱུར་རྡོ་རྗེས་ཡང་རྩ་བ་གསུམ་གྱི་སྒྲུབ་པ་རྣམས་མཛད་སྐབས་ཉམས་ཀྱི་སྐབས་ལ་མཇལ་ཞིང་གནམ་ཆོས་འགའ་ཞིག་གསར་དུ་བྱུང་བ་སྟེ། ཉམས་ཀྱི་སྐབས་ལ་ལོངས་སྐུ་ཐུགས་རྗེ་ཆེན་པོ་ཞལ་གཟིགས་ཏེ་དབང་བཞི་རྒྱས་པར་བསྐུར་བ་དང་། སྣང་བ་མཐའ་ཡས་དམར་པོ་ལོངས་སྐུའི་ཆ་ལུགས་ཕྱག་བཞི་པ། དང་པོས་མཉམ་བཞག་དང་འོག་མ་གཉིས་རྡོ་རྗེ་དང་མེ་ལོང་འཛིན་པ་གཅིག་གི་སྒྲུབ་ཐབས་རྒྱ་མཚོ་གསར་པ་དབང་དང་སྒྲུབ་ཐབས་བཞི་བཅུ་ཙམ་ཡོད་པ་གཅིག་གནང་མགོ་མཇུག་གི་རྒྱ་ཡིག་རྣམས་འདི་ལྟར་བྲིས་ཞེས་ཡི་གེ་བསྟན། གཏོར་མ་རྣམས་ཀྱི་གཟུགས་ཀྱང་འདི་ལྟར་གྱིས་ཞེས་བསྟན་ཏོ། །ཕྱག་ན་རྡོ་རྗེ་མཐིང་ནག་ཞལ་གཅིག་ཕྱག་གཉིས་རྒྱན་ཆ་ལུགས་སྤྱི་དང་མཐུན་པ་ཞིག་གིས་དུག་མཚོན་ནད་གསུམ་བཟློག་པའི་མདོས་བསྟན༔ སྲོག་བདུད་རྒྱན་ཆ་ལུགས་གཞུང་ལྟར་གཅིག་གིས་མགོན་པོ་མ་ནིང་གི་སྒྲུབ་ཐབས་ཉུང་ངུ་བཀའ་རྒྱ་ཅན་གསུངས། སངས་རྒྱས་སྣང་བ་མཐའ་ཡས་དམར་པོ་ཆོས་གོས་མཉམ་
གཞག་ཅན་གཅིག་གིས་ཚེ་སྒྲུབ་ནོར་གྱི་རབ་མདའ། ལྷ་འདྲེ་དགྲ་ལ་ཟད་ཐབས་དང་བཞི་གནང་སྟེ། གཅིག་བརྗེད་ནས་ཡི་གེར་མ་འཁོད་དོ། །རྗེ་མཁའ་སྤྱོད་དབང་པོས་མངོན་ཉམས་ཐོས་ཉམས་ཤེས་ཉམས་ཐོད་རྒལ་ཤིན་ཏུ་བརྟག་པ་དང་། སྤྱད་པར་དཀའ་བ་དག་འཆར་གསུངས་པ་ལྟར། སྤྲུལ་སྐུ་མི་འགྱུར་རྡོ་རྗེ་དགུང་ལོ་བཅུ་གཉིས་དབོ་ཟླའི་ཡར་ཚེས་བརྒྱད་ལ། སྤྲུལ་སྐུ་ཉིད་ཀྱི་ཐུགས་ཀྱི་དཀྱིལ་ན་དྷེ་ཧུ་པ་ཞེས་པ་སྔར་མ་གྲགས་པའི་ལྷ་གཅིག་སྣང་། དེས་གསུངས་ཤིང་དེའི་མདུན་དེར་དགེ་སློང་ཞིག་འདུག་པས་ཉན་པའི་ཚུལ་དུ་དྷེ་ཧུ་པའི་རྒྱུད་གསུངས་པ་གཟིགས་ནས་ཡི་གེར་བཀོད་དོ། །དེ་ལྟར་ཉམས་ཀྱི་སྣང་བ་ལ་བྱུང་བའི་གནམ་ཆོས་ཀྱི་སྐོར་ཡང་རྣམ་གྲངས་མང་རབ་འདུག་པས་རྒྱས་པར་བྲི་མ་ཐུབ་ཀྱང་། ཚེས་གྲངས་དུས་ཚོད་དང་སུས་གསུང་སོགས་སོ་སོའི་མཇུག་ཏུ་གསལ་མོད་ཀྱིས། ཧ་ཅང་ཚན་ནི་མི་ཆེ་པོད་ཆུང་གཅིག་ཁ་མི་ལོང་ཙམ་ཡོད་དོ། །འོ་ན་ཉམས་ཀྱི་སྣང་བ་ནི་འཁྲུལ་པའི་ཟ་ཟིར་འདུག་ན། དེ་ལས་བྱུང་བའི་དོན་དེ་ལ་ངེས་ཆ་ཡོད་དམ་ཞེ་ན། རྗེ་ཆོས་ཀྱི་དབང་ཕྱུག་ཋ་བ་ཁར་བདེ་ཆེན་སྟེང་དུ་སྐུ་མཚམས་ལ་བཞུགས་སྐབས། ང་མདངས་སུམ་ཉམས་ཀྱི་སྣང་བ་ལ། །
རྗེ་གྲུབ་ཐོབ་སངས་རྒྱས་མཉན་པ་དེ། །དར་དཀར་པོའི་དོ་ལིར་བཞུགས་པ་ཞིག །མ་དྷཱཀྐི་གཉིས་ཀྱིས་བཏེག་པ་ཞིག །ཕྱག་ཆོས་འཆད་མཛད་ཅིང་བྱོན་ནས་ཀྱང་། །ཞེས་རྗེ་དབང་ཕྱུག་རྡོ་རྗེ་ཞིང་བརྗེ་བ་དང་། རྗེ་ཉིད་ལ་བར་ཆད་ཡོད་ཚུལ། དེ་སེལ་བའི་ཐབས། ལ་སོགས་པ་དང་ལུང་བསྟན་རྒྱས་པར་གསུངས་ནས། ནམ་མཁའ་ལ་གར་མཛད་ནས་མི་སྣང་བར་གྱུར་པ་དང་། དེའི་ལུང་བསྟན་རྣམས་ཡི་གེར་བཀོད་པ་ཕྱིས་དེ་ཇི་ལྟ་བར་བྱུང་འདུག་གོ །ཡང་གཏེར་སྟོན་ནམ་མཁའ་འཇིགས་མེད་ཀྱིས་ཉམས་སྣང་ལ་བུད་མེད་གཅིག་གིས་ཤོག་དྲིལ་གཅིག་གཏད་པ་གཟིགས་པའི་སྣང་བ་བྱུང་ནས་ཐུགས་ལ་ཟིན། དེ་ཡི་གེར་བཀོད་པས་གཏེར་སྟོན་གྱི་སྐུ་ཚེའི་ཚད་དང་། དེ་ལ་བར་ཆད་ཡོད་པ་དེའི་དམ་ཚིག་འཛེམ་བྱ། རིག་འཛིན་སྲོག་སྒྲུབ་ཀྱི་ཕན་ཡོན་སོགས་ཡིན་པར་འདུག་པས། ཕྱིས་སྐུ་ཚེའི་ཚད་སོགས་ཐམས་ཅད་ཇི་ལྟ་བར་བྱུང་ཞིང་དཔེ་དེ་ཡང་རིག་འཛིན་སྲོག་སྒྲུབ་ཀྱི་པོད་གཞུང་དུ་བཞུགས་སོ། །དེ་ནི་ཉམས་སྣང་ལས་བྱུང་བའི་གནམ་ཆོས་ཉམས་སུ་བླངས་ན་བདེན་པའི་འབྲས་བུ་ཡོད་ཚུལ་ལོ། །ཡང་རྗེ་འབྲི་ཁུང་རིན་ཆེན་ཕུན་ཚོགས་དེ་ཏི་སྒྲོའི་ཚོགས་ཁང་དུ་སྐུ་
མཚམས་དུས། ཚེས་བཅུའི་ནུབ་འཁྲུལ་པའི་ཉམས་སུ། མདུན་དུ་བུད་མེད་ལྔ་བྱུང་སྟེ། དེ་ནུབ་གུ་རུ་རིན་པོ་ཆེ་དཔོན་སློབ་ཚོགས་འཁོར་མཛད་ཅིང་ཡོད་པས་འདོང་ཞེས་ཟེར་བས་རྔ་ཡབ་གླིང་དུ་ཕེབས་ཤིང་ཨུ་རྒྱན་དང་མཇལ། དགོངས་པ་ཡང་ཟབ་ཀྱི་དབང་ལུང་རྣམས་གནང་དུས། ནམ་མཁའ་ནས་དགོངས་པ་ཡང་ཟབ་ཀྱི་གདམས་སྐོར་ཕྲན་བུ་དང་བཅས་པའི་ཆོས་སྒྲ་ཡང་རྒྱུན་མི་འཆད་པར་གྲགས་སོ། །ཚུར་རྐང་གིས་ཕྱིན་པའི་སྣང་བས་ཚོགས་ཁང་ན་བསླེབས་པས་ཐང་ཆད་པས་རྐང་པ་ན་བ་ཡིན་རྒྱུའི་ཉམས་ཤིག་ལ་བརྟེན་ནས་རྐང་ནད་བསྙུང་བ་དེ་སྒྲིབ་པ་དག་པའི་རྟགས་སུ་འདུག །དེ་ལྟར་ནམ་མཁའི་ནས་སྒྲ་གྲག་པའི་གདམས་སྐོར་ཕྲན་བུ། གཏེར་གཞུང་ན་མེད་པ་ཡང་འགའ་ཞིག་ཡོད་པ་འདྲ་ཞིང་། དེ་དུས་ཨུ་རྒྱན་མདུན་དུ་གདུང་རྒྱུད་ཞལ་ངོ་ལྔ་ལས་མི་འབྱུང་བའི་རྟེན་འབྲེལ་བརྡའི་ལུང་བསྟན་ཞིག་བྱུང་འདུག་པ་ཡང་ད་ལྟ་དངོས་སུ་བྱུང་ཐལ་ལོ། ༈ །དེ་ནས་གསུམ་པ་སྤྲུལ་སྐུ་མི་འགྱུར་རྡོ་རྗེ་ལ་དངོས་སུ་གནམ་ཆོས་རྣམས་བྱུང་ལུགས་བཤད་པ་ལ་ཡང་། རྩ་གསུམ་གྱི་ལྷ་ཚོགས་རྣམས་དངོས་སུ་ཞལ་གཟིགས་ནས་དབང་ལུང་གདམས་པ་གསར་པ་རྣམས་གནང་ཚུལ། །སྤྲུལ་པའི་ཡི་གེར་བྱུང་
བ་ལ་བཤུས་ཚུལ། ཆོས་ཀྱི་སྒྲ་གྲག་པ་ལས་བྲིས་ཚུལ། ཆོས་སྐྱོང་འཇིག་རྟེན་པ་རྣམས་ཀྱི་སྲོག་སྙིང་ཕུལ་བའི་ཚུལ་དུ་རང་རང་གི་སྒྲུབ་ཐབས་ཕུལ་ཚུལ། ངོ་མཚར་དམ་རྫ་ས་དངོས་སུ་གནང་ཚུལ། སྔར་གྱི་ཟབ་ཆོས་རྙིང་པའི་བཀའ་བབ་ཚུལ། དཀྱིལ་འཁོར་གསར་པའི་ཐོག་མར་ཞལ་ཕྱེས་དབང་བསྐུར་དུས་དམ་ཅན་ལྷ་སྲིན་རྣམས་ཀྱིས་སྲོག་སྙིང་ཕུལ་བའི་ཚད་མདོ། གཏེར་བསྒྲུབས་བྱས་ཚུལ་དང་། དེ་ལྟར་ས་བཅད་བརྒྱད་དོ། །དེ་བརྒྱད་སྤྱིའི་དོན་ལ་ཡང་མདོ་རྒྱུད་མན་ངག་གི་ལུང་། རིག་འཛིན་གོང་མའི་རྣམ་ཐར། ད་ལྟ་བྱུང་ཚུལ་ལོ། །དེ་ལྟར་གནམ་ཆོས་དངོས་སུ་བྱུང་བའི་མདོའི་ལུང་ནི། པདྨ་དཀར་པོའི་མདོ་ལས་རྒྱ་ཆེར་གསུངས་པའི་དོན་ཚིག་ཅུང་ཟད་བསྡུས་ཏེ་བཤད་ན། བཅོམ་ལྡན་འདས་ཤཱཀྱ་ཐུབ་པ་བསྐལ་པ་གྲངས་མེད་པ་ནས་མངོན་པར་རྫོགས་པར་སངས་རྒྱས་ནས་མྱ་ངན་ལས་འདའ་བ་མེད་ཅིང་། བསྐལ་པ་བྱེ་བ་སྟོང་དུ་བྱ་རྒོད་ཕུང་པོ་འདི་ལ་མི་འཕོ་བར་བཞུགས་བཞིན་དུ། ཞིང་གཞན་ནས་ཡང་བཞུགས་པ་བྱེ་བ་དག་ཏུ་བཞུགས་པ་སྟེ། འཇིག་རྟེན་གྱི་ཁམས་འདིའི་སེམས་ཅན་གྱི་འཇིག་རྟེན་གྱི་ཁམས་འདི་བསྐལ་པའི་མེས་བསྲེག་པར་མཐོང་བའི་
ཚེ་ཡང་། སེམས་ཅན་ལས་དག་པའི་སྣང་ངོར་སངས་རྒྱས་ཀྱི་ཞིང་འདི་ཞིང་ཁམས་རྣམ་པར་དག་པ་མངོན་དགའ་ལྟ་བུར་རྟག་ཏུ་གནས་ཀྱང་གཞན་དག་གིས་བསྲེག་པར་མཐོང་དཀོན་མཆོག་གི་སྒྲ་མི་ཐོས་པར་མཐོང་བ་ཡང་སྡིག་པའི་འབྲས་བུ་སོགས། ནམ་ཞིག་སེམས་ཅན་དགེ་བའི་ལས་ཅན་སྐྱེས་མ་ཐག་ཏུ་སྟོན་པས་ཆོས་འཆད་པར་མཐོང་སྟེ། དེ་ལ་ཆོས་གསུངས་པ་ཡང་མེད་དོ། །ངས་ནི་སེམས་ཅན་ཀུན་ཀྱང་བྱིན་གྱིས་བརླབས། ལོག་པའི་བློ་ཅན་གྱིས་ང་འདི་ན་འདུག་པ་ཡང་མི་མཐོང་ངོ་། །ཞེས་སོགས་དང་། སྔོན་སྟོན་པ་བྱང་ཆུབ་སེམས་དཔའ་རྟག་ཏུ་མཉེས་སུ་གྱུར་པ་ན། སུས་ཀྱང་མ་སྨྲས་པར་བར་སྣང་གི་སྒྲ་ལས་ཐོས་པས་མངོན་པར་ཤེས་པ་དྲུག་ཐོབ་ནས་སེམས་ཅན་དཔག་ཏུ་མེད་པའི་དོན་མཛད་པའི་སྔོན་བྱུང་གི་ལོ་རྒྱུས་ཀྱང་གསུངས་སོ། །དེ་ནས་མདོ་སྡེའི་ལུང་འདི་ནི་སེམས་ཅན་ལས་དག་པ་ལ་ནམ་ཡང་སངས་རྒྱས་བཅོམ་ལྡན་འདས་སོགས་ཡི་དམ་གྱི་ལྷ་མཇལ་ཞིང་ཆོས་གསུངས་པ་དང་། ཆོས་ཀྱི་སྒྲ་གྲག་པ་ཡང་དོན་དང་ལྡན་པར་བསྟན་ཏོ། །ཆོས་ཡང་དག་པར་སྡུད་པའི་མདོ་ལས། བྱང་ཆུབ་སེམས་དཔའ་བསམ་པ་ཕུན་སུམ་ཚོགས་པ་ལ་ལ་ནི་སངས་རྒྱས་མི་བཞུགས་ན་ཡང་
ནམ་མཁའི་དཀྱིལ་དང་རྩིག་པ་དང་ཤིང་རྣམས་ལས་ཆོས་འབྱུང་ངོ་། །ཞེས་ནམ་མཁའ་ཞེས་པས་གནམ་ཆོས་འབྱུང་བར་བསྟན་ཅིང་། དེའི་རྒྱུ་མཚན་ཅི་ཞེ་ན། དམ་ཆོས་ཐར་པ་རིན་པོ་ཆེའི་རྒྱན་ལས། དགེ་བའི་བཤེས་གཉེན་གྱི་དབྱེ་བ་ནི་བཞི་སྟེ། དགེ་བའི་བཤེས་གཉེན་སོ་སོའི་སྐྱེ་བོ་དང་། དགེ་བའི་བཤེས་གཉེན་ས་ཆེན་པོ་ལ་གནས་པའི་བྱང་ཆུབ་སེམས་དཔའ་དང་། དགེ་བའི་བཤེས་གཉེན་སངས་རྒྱས་སྤྲུལ་པའི་སྐུ་དང་། དགེ་བའི་བཤེས་གཉེན་ལོངས་སྤྱོད་རྫོགས་པའི་སྐུའོ། །དེ་དག་ཀྱང་རང་གི་གནས་སྐབས་དང་སྦྱར་ཏེ། རང་ལས་དང་པོ་པའི་དུས་སུ་སངས་རྒྱས་དང་། ས་ཆེན་པོ་ལ་གནས་པའི་བྱང་ཆུབ་སེམས་དཔའ་རྣམས་ལ་བསྟན་པའི་ནུས་པ་མེད་པས། དགེ་བའི་བཤེས་གཉེན་སོ་སོའི་སྐྱེ་བོ་ལ་བསྟེན་པའོ། །རང་ལས་ཀྱི་སྒྲིབ་པ་ཕལ་ཆེར་དག་ཙ་ན། དགེ་བའི་བཤེས་གཉེན་ས་ཆེན་པོ་ལ་གནས་པའི་བྱང་ཆུབ་སེམས་དཔའ་ལ་བསྟེན་ནུས་པའོ། །རང་ཚོགས་ལམ་ཆེན་པོ་ཡན་ཆད་ལ་གནས་ཙ་ན་དགེ་བའི་བཤེས་གཉེན་སངས་རྒྱས་སྤྲུལ་པའི་སྐུ་ལ་བསྟེན་པར་ནུས་པའོ། །རང་ས་ཆེན་པོ་ལ་གནས་ཙ་ན། དགེ་བའི་བཤེས་གཉེན་ལོངས་སྤྱོད་རྫོགས་པའི་སྐུ་
བསྟེན་པར་ནུས་པའོ། །ཞེས་གསུངས་པས། སྤྲུལ་སྐུ་མི་འགྱུར་རྡོ་རྗེ་ནི་ས་ཆེན་པོ་ལ་གནས་པའི་སེམས་དཔའ་ཡིན་པའི་གནད་ཀྱིས། དགེ་བའི་བཤེས་གཉེན་ལོངས་སྤྱོད་རྫོགས་པའི་སྐུ་རྩ་བ་གསུམ་གྱི་ལྷ་ཚོགས་ལས་དབང་ལུང་ཁྲིད་གསུམ་དངོས་སུ་ཞུ་ནུས་པའོ། །འོ་ན་སྤྲུལ་སྐུ་འདི་ས་ཆེན་པོ་ལ་གནས་པ་ཅི་ཤེས་ཞེ་ན། སྤྲུལ་སྐུ་འདི་འཁྲུལ་ཞིག་དབང་དྲག་རྒྱ་མཚོའི་སྐྱེ་བ་ཡིན་པར་ཐེ་ཚོམ་མ་མཆིས་ཤིང་། དབང་དྲག་རྒྱ་མཚོ་དེ་ས་བཅུའི་སེམས་དཔའ་ཡིན་པ་སྟེ། ཀོང་པོ་ལྕགས་སྡེ་གྲུབ་ཐོབ་པའི་གཏེར་ཡིག་ལས། དབང་དྲག་རྒྱ་མཚོ་ས་བཅུའི་སེམས་དཔའ་ཡིན་ཚུལ། དེའི་སྐུ་གདུང་ཧྲིལ་བོར་འདན་གླང་ཐང་སྒྲོན་མའི་གཞུག་ན་བཅུག་ཅིང་མཆོད་རྟེན་བྱས་ཏེ་མཆོད་ན་མཐའ་དམག་མི་འབྱུང་བའི་ལུང་བྱང་གསལ་པོར་ཡོད་པར་སྣང་ལ། རིག་འཛིན་བདུད་འདུལ་རྡོ་རྗེའི་གཏེར་ཁ་བསྟན་པ་སྤྱི་ལུང་ལ་ཡང་། དབང་དྲག་རྒྱ་མཚོ་ས་བཅུའི་སེམས་དཔར་ལུང་བསྟན་གསལ་པོར་སྣང་ངོ་། །འོ་ན་སྒྲུབ་པའི་ཡི་དམ་གྱི་ལྷ་ཨུ་རྒྱན་རིན་པོ་ཆེ་ལྟ་བུ་རེ་རེ་ཙམ་མཇལ་ཞིང་ཆོས་ཞུ་བ་ནི་སྲིད་ཀྱི། སྔར་གྲགས་པ་དང་མ་གྲགས་པའི་ལྷ་ཚོགས་མུ་མེད་པ་གཅིག་མཇལ་ནས་སོ་སོའི་དབང་ལུང་སྒྲུབ་ཐབས་ཞུས་ཟེར་
བ་འཐད་དམ་སྙམ་ན། ཐར་རྒྱན་ལ་སོགས་པ་གཞན་ཡང་དབུ་ཕལ་ས་ལམ་གྱི་བཤད་པ་རྒྱས་པ་རྣམས་ནས། ས་དང་པོ་ཐོབ་པའི་བྱང་ཆུབ་སེམས་དཔའ་སྐད་ཅིག་ཐང་གཅིག་ཡུད་ཙམ་ལ་སངས་རྒྱས་བརྒྱ་མཐོང་བ་དང་། ས་གཉིས་པས་སྟོང་མཐོང་བ་དང་། ས་གསུམ་པས་ཁྲི་མཐོང་བ་དང་། ས་བཞི་པས་འབུམ་མཐོང་བ་དང་། ལྔ་པས་ས་ཡ་མཐོང་བ་དང་། དྲུག་པས་བྱེ་ཆེན་མཐོང་བ་དང་། བདུན་པས་དུང་ཕྱུར་ལ་སོགས་པ་བཅུ་འགྱུར་དུ་སངས་རྒྱས་མཐོང་གྲངས་མང་བར་གསུངས་ཤིང་། དེ་དག་གི་དོན་མདོ་སྡེ་ས་བཅུ་པ་ལས། རབ་ཏུ་དགའ་བའི་ས་འདི་ལ་མཐོང་བ་རྒྱ་ཆེན་པོ་དང་། སྨོན་ལམ་གྱི་སྟོབས་ཀྱིས་སངས་རྒྱས་མང་པོ་སྣང་བར་འགྱུར་རོ། །སངས་རྒྱས་བརྒྱ་ཕྲག་མང་པོ་དང་། སངས་རྒྱས་སྟོང་ཕྲག་མང་པོ་དང་། དེ་བཞིན་དུ་སྦྱར་ཏེ། སངས་རྒྱས་བྱེ་བ་ཁྲག་ཁྲིག་འབུམ་ཕྲག་མང་པོ་སྣང་བར་འགྱུར་རོ། །དེ་དག་མཐོང་ནས་ལྷག་པའི་བསམ་པ་ཆེན་པོས་མཆོད་པ་བྱེད་དེ། བསྟི་སྟང་བྱེད་དོ། །དེ་བཞིན་དུ་སྦྱར་ཏེ་དེའི་དགེ་འདུན་ལ་ཡང་རི་མོར་བྱེད་དོ། །དགེ་བའི་རྩ་བ་དེ་དག་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་བསྔོ་བར་བྱེད་
དོ། །སངས་རྒྱས་དེ་དག་ལ་ཆོས་ཉན་པ་དང་། ལེན་པ་དང་འཛིན་པར་བྱེད་དོ། །ཆོས་དག་ཀྱང་ནན་ཏན་གྱིས་སྒྲུབ་པར་བྱེད་དོ། །བསྡུ་བའི་དངོས་པོ་བཞིས་ཀྱང་སེམས་ཅན་རྣམས་ཡོངས་སུ་སྨིན་པར་བྱེད་དོ། །ཞེས་གསུངས་པ་དང་མཐུན་པར་སྤྲུལ་སྐུ་འདིས་སངས་རྒྱས་སྣང་བ་མཐའ་ཡས་ལ་སོགས་པ་དཔག་ཏུ་མེད་པ་ཞལ་མཐོང་། དེ་དག་ལས་ཆོས་ཉན་པ་དང་དབང་ལེན་པར་མཛད། དེ་དག་བློ་ལ་འཛིན་པར་མཛད་ནས་ཡི་གེར་བཀོད། དང་པོ་གཏེར་སྒྲུབ་དང་རྗེས་ནས་ཀྱང་དེ་དག་གི་སྒྲུབ་པ་གཙོ་བོར་མཛད། ཇི་ལྟར་འབྱོར་བའི་བསྡུ་བའི་དངོས་པོ་བཞིས་སྣོད་ལྡན་རྣམས་སྨིན་གྲོལ་ལ་བཀོད། རང་གཞན་གྱི་དགེ་བ་བྱང་ཆུབ་ཏུ་བསྔོ་བ་ཡང་རྒྱུན་དུ་ཆག་མེད་མཛད་དོ། །འོ་ན་སྤྲུལ་སྐུ་འདི་ས་གནས་ཀྱི་སེམས་དཔའ་ཆེན་པོ་ཡིན་ན། ཀུན་གྱིས་མཐོང་བར་ལུས་སྤྲུལ་བསྒྱུར་སྐད་ཅིག་རེ་ལ་སྤྲུལ་བ་བརྒྱ་འགྱེད་པ་དང་། འཇིག་རྟེན་གྱི་ཁམས་བརྒྱ་གཡོ་ནུས་པ་སོགས། རྫུ་འཕྲུལ་རྣམས་མ་མཐོང་བའི་ཕྱིར་མི་འཐད་ཅེ་ན། རྗེ་མཁའ་སྤྱོད་དབང་པོས་ཉིད་ཀྱིས་ཞལ་གཟིགས་ཀྱི་རྣམ་ཐར་བཀོད་པའི་མཇུག་ནས། དེ་ལ་ཕྱོགས་འདིར་རྩོད་པ་དག །འདི་ནི་ཤིན་ཏུ་རྫུན་ཏེ། དེ་ལྟ་བུའི་
མཐོང་ངོ་ཤེས་པ་དག་ཡོད་ན་གྲུབ་པའི་མཚན་མ་ཅི་ཡང་རུང་བ་དག་འབྱུང་བར་རིག་པ་ལས། ཅུང་ཟད་ཀྱང་མི་སྣང་ངོ་། །ཞེས་སྨྲ་ཞིང་སེམས་པར་བྱེད་པ་ལ་རབ་ཏུ་རྒོལ་བས་གཡེང་བར་བྱེད་དོ། །ཞེས་གྲུབ་པའི་མཚན་མ་དང་རྟགས་ཡོད་ཀྱང་མི་མཐོང་བ་དང་། མེད་ཀྱང་མཐོང་བ་སོགས་དུ་མའི་ཕྱིར། གྲུབ་རྟགས་དང་ལྡན་པ་ནི་མཆོག་ལ། མི་ལྡན་པ་ནི་མ་ཡིན་ནོ་ཞེས་བརྗོད་པར་མི་རུང་། ཞེས་གསུངས་པ་ལྟར། སྤྲུལ་སྐུ་འདི་ཁོ་ན་ལ་མ་ལྟོས། སྐྱེས་བུ་དམ་པ་ཐམས་ཅད་ལ་མཚུངས་ཏེ། དེའི་ཡོན་ཏན་དང་རྫུ་འཕྲུལ་གྱི་བཀོད་པ་སོགས་མཐོང་བར་བྱེད་པ་ལ། མཐོང་བ་པོ་དེ་ལས་དག་པ་ཞིག་དགོས། ལས་དག་པ་དང་མ་དག་པ་མཉམ་དུ་འཚོགས་ན་ཡང་། མཐོང་མི་མཐོང་སོ་སོར་ངེས་ཏེ། སྔོན་སྤྲུལ་སྐུ་ཐུབ་པ་ཆེན་པོ་དངོས་སུ་བཞུགས་དུས་ཀྱང་། མཚན་དཔེ་བྱད་ཡོངས་སུ་རྫོགས་པ་ནི་མ་དག་པས་མི་མཐོང་སྟེ། མངོན་རྟོགས་རྒྱན་ལས། མཚན་ནི་སུམ་ཅུ་རྩ་གཉིས་དང་། །དཔེ་བྱད་བཟང་པོ་བརྒྱད་ཅུ་ནི། །ཐུབ་པའི་ལོངས་སྤྱོད་རྫོགས་སྐུར་བཞེད། །ཅེས་གསུངས་པ་ལོངས་སྐུ་ནི་སོ་སོའི་སྐྱེ་བོས་མི་མཐོང་བར་གསུངས་པའོ། །ཉེ་གནས་ལེགས་པའི་
ཀརྨས་ལོ་བཅུ་གཉིས་ཉེ་གནས་བྱས། མདོ་སྡེ་བཅུ་གཉིས་བློར་ཟིན་ཀྱང་། བཅུ་གཉི་ས་བར་དུ་ཁྱོད་ཀྱི་གཡོག་པོ་བྱས། །ཁྱོད་ལ་ཡོན་ཏན་ཏིལ་ཙམ་ངས་མ་མཐོང་། །ཞེས་སྨྲས་པ་དང་། རྒྱལ་བ་བྱམས་པ་དགེ་སློང་མ་ཕམ་པར་འགྱུར་པ་ལ། གཞན་དག་གིས་ཡོན་ཏན་ཅི་ཡང་མེད་པར་མཐོང་བ་དང་། བློན་ཆེན་ཀླུ་གོང་གིས་ཨུ་རྒྱན་རིན་པོ་ཆེ་ལ་དབང་ཞུས་ནས། ཐ་མ་ཨ་ཙར་འདོད་པ་ཅན་དུ་མཐོང་ནས། རྒྱལ་སྲིད་འཕྲོག་པའི་དོགས་པ་སྐྱེས་པ་དང་། རྗེ་མར་པ་ལོ་ཙཱ་ལ་ཕ་སྤུན་རྣམས་ཀྱིས། མར་པ་ལོ་ཙཱ་ཁོ། ཁ་ཆང་དྲི་ཕ་ལེ་འདམ་གསེབ་དྲི་ཆི་ལེ་སངས་རྒྱའམ་ཟེར་བ་དང་། རྗེ་རང་བྱུང་མཚོ་སྐྱེས་རྡོ་རྗེ་སྡིག་ཅན་ཞིག་གིས་མཇལ་བ་ན། ཅི་ལྟར་བྱས་ཀྱང་སྐུ་མ་མཐོང་བ་དང་། རྒན་མོ་གཅིག་གིས་ཤ་ཁོག་ཏུ་མཐོང་བ་དང་། ལས་དག་པས་ཐུགས་རྗེ་ཆེན་པོ་བཅུ་གཅིག་ཞལ་དུ་མཐོང་བ་དང་། དཔའ་བོ་ཆོས་དབང་ལྷུན་གྲུབ་དང་པོ་མཇལ་དུས་བདེ་མཆོག་ཞལ་བཞི་པར་མཐོང་ནས་ཕྱོགས་བཞི་ཁ་ནས་ཕྱག་འཚལ་བ་དང་། སློབ་དཔོན་ཐོགས་མེད་ཀྱིས་བྱམས་པ་ཕྲག་ལ་ཁུར་ནས་གྲོང་ཁྱེར་ལ་བསྟན་པས་སུས་ཀྱང་མ་མཐོང་། རྒན་མོ་གཅིག་གིས་ཁྱི་རོ་རུལ་པར་མཐོང་བ་ལྟ་བུ་
སྟེ། དཔེར་ན་ད་ལྟ་བོད་ན་ཐུགས་རྗེ་ཆེན་པོའི་སྤྲུལ་པ་དངོས་ཡིན་པར་ངེས་པ་དང་ས་ཆེན་པོ་ལ་བཞུགས་པའི་སེམས་དཔའ་ཡིན་པར་ངེས་ལ། སྔོན་གྱི་ལུང་བསྟན་དང་རང་གི་དྲན་ཚུལ་དང་། བླ་མ་གོང་མ་རྣམས་ཀྱིས་ངོས་འཛིན་མཛད་པའི་སྤྲུལ་པའི་སྐུ་དུ་མ་གཅིག་བཞུགས་ཤིང་། དེ་དག་ལ་ཐེ་ཚོམ་ཡང་མེད་མོད་ཀྱི། སྔར་གྱི་གྲུབ་ཆེན་རྣམས་ཀྱི་རྟགས་དང་རྫུ་འཕྲུལ་ལྟ་བུ་ལྟ་ཞིག །ཕྲན་ཚེགས་ཙམ་ཡང་དངོས་སུ་ཐམས་ཅད་ཀྱིས་མཐུན་སྣང་གྲུབ་པར་མི་སྣང་བ་ནི། ཁོང་རྣམས་དེ་ལྟ་བུ་མིན་པའི་ཞན་དུ་སོང་བ་ག་ལ་ཡིན། སྙིགས་མའི་དུས་ལ་བབ་པས། སེམས་ཅན་གྱི་སྙིགས་མ་སྒྲིབ་པ་འཐུགས་པ་ཁོ་ནས་འཇིག་རྟེན་གང་བས། སུས་ཀྱང་རྟགས་དང་ཡོན་ཏན་མི་མཐོང་བར་ངེས་སོ། །འོ་ན་སྤྲུལ་སྐུ་གཞན་ལ་མི་འབྱུང་བའི་ཞལ་གཟིགས་གྲངས་ལས་འདས་པ་ཡང་མང་གྲགས། ཆོས་སྔར་མ་གྲགས་པ་ཡང་མང་དུ་བྱུང་བ་འདི། བདུད་ཀྱིས་བསླུ་བ་དང་ལྷ་མིན་ལྷ་རུ་བརྫུ་བ་རྒྱལ་འགོང་གི་ཆོ་འཕྲུལ་ཡིན་དོགས་ཞེ་ན་དེ་མིན་པ་རྒྱུ་མཚན་འདྲ་མིན་ཤན་འབྱེད་གཏེར་ལོགས་སུན་འབྱིན་རྒྱས་པར་ལོགས་སུ་བཀོད་པ་ལས་ཤེས་སོ། །དེ་ལྟར་མདོ་ནས་གནམ་ཆོས་འབྱུང་བར་
གསུངས་ཚུལ་རྒྱུ་མཚན་དང་བཅས་པ་སོང་ནས། རྒྱུད་ལས་གསུངས་པ་ནི། རིན་ཆེན་སྤུང་པའི་རྒྱུད་ལས། རྒྱུད་དོན་གབ་པའི་གཏེར་སྒོ་ཕྱེ། །ནམ་མཁའི་མཛོད་གཏེར་ཉིད་ལོངས་སྤྱོད། །ཅེས་གསུངས་པས། ནམ་མཁའ་དང་གནམ་གཉིས་དོན་གཅིག་པས་གནམ་གཏེར་བསྟན་ཏོ། །རིན་ཆེན་རྩར་གྱི་རྒྱུད་ལས། ཕྱི་ནང་གྲགས་པའི་ང་ལ་ཀུན། །ཆོས་ཀྱི་དབྱིངས་ཀྱི་གཏེར་ནས་འབྱུང་། །ལྷ་སྔགས་ཆོ་ག་ལས་ཚོགས་དང་། །ཐམས་ཅད་ཐམས་ཅད་དེ་བཞིན་འབྱུང་། །ཞེས་གསུངས་སོ། །ད་ལ་དང་དཀྱིལ་འཁོར་གཉིས་དོན་གཅིག་པར་བརྡ་གསར་རྙིང་གི་ཁྱད་ཡིན་ལ། ཆོས་ཀྱི་དབྱིངས་དང་ནམ་མཁའ་དོན་གཅིག་པར་ཆོས་དབྱིངས་བསྟོད་འགྲེལ་རྒྱས་པ་རྣམས་ལས་གསུངས་ཤིང་། གནམ་དང་ནམ་མཁའ་གཅིག་པ་ཀུན་གྱིས་ཤེས་སོ། །དེས་ན་རྒྱུད་ཚིག་དེས་གནམ་ཆོས་ལས་དཀྱིལ་འཁོར་དང་ལྷ་སྔགས་ལས་ཚོགས་དབང་ཆོག་ཐམས་ཅད་འབྱུང་བར་གསལ་བར་བསྟན་ཏོ། །ལུང་སྐོར་དགུ་པའི་ལེའུ་བརྒྱད་པ་ནས། ཆོས་ཀྱི་དབྱིངས་ཀྱི་གབ་གཏེར་འབྱུང་། །སྐུ་གསུམ་བསྟན་པ་དར་ཞིང་རྒྱས། །ཞེས་པའི་ཚིག་དང་པོས་གོང་ལྟར་གནམ་ཆོས་བསྟན། ཚིག་ཕྱི་མས་གནམ་ཆོས་ཀྱི་
འགྲོ་དོན་འབྱུང་ཚུལ་བསྟན་ཏེ། ཆོས་སྐུའི་བསྟན་པ་ཡོ་ག་གསུམ། ལོངས་སྐུའི་བསྟན་པ་ཀྲི་ཡོག་སྡེ་གསུམ། སྤྲུལ་སྐུའི་བསྟན་པ་སྡེ་སྣོད་གསུམ་སྟེ། ཐེག་པ་དགུ་པ་གནམ་ཆོས་ལ་བརྟེན་ནས་དར་བར་གསུངས་པའོ། །རིག་པའི་རྒྱལ་པོའི་རྒྱུད་ལས། དུས་གསུམ་རྒྱལ་བའི་ཐུགས་གཏེར་ཡིན། །རྫ་ཤིང་སྣོད་ལ་ཡང་མ་བསྟེན། །ཞེས་གསུངས་པས་ས་ལས་མ་བརྟེན་པའི་གནམ་ཆོས་བསྟན་ཏོ། །དེས་མདོ་རྒྱུད་ཀྱི་ལུང་བཤད་ནས། །མན་ངག་གི་སྒྲུབ་ཐབས་རྣམས་ནས་གནམ་ཆོས་ཐུགས་གཏེར་འདི་ལྟར་འབྱུང་བར་གསུངས་པའི་ལུང་ནི། མི་ཏྲའི་གསང་སྒྲུབ་ལས། ལྷ་ཞལ་མཐོང་ཞིང་ལུང་སྟོན་པ་ལ་སོགས་འབྱུང་ངོ་། །ཞེས་དང་། ཉང་ལུགས་བཀའ་བརྒྱད་སྒྲུབ་ཆེན་ལས། རབ་ནི་སྒྲུབ་པའི་དུས་ན་དཔལ་ཆེན་པོ་འཁོར་དང་བཅས་པའི་ཞལ་མཐོང་བ་དང་། དམ་ཅན་མཁའ་འགྲོས་ལུང་སྟོན་པ་དང་། བླ་མ་དང་མཁན་པོའི་ཆ་བྱད་ཀྱི་ཆོས་སྟོན་པ་འོང་ངོ་། །ཞེས་དང་། བླ་མ་དགོངས་འདུས་རྩ་བའི་སྒྲུབ་པ་ནོར་བུ་པདྨའི་ཕྲེང་བ་ལས། ལྷ་འགྲུབ་པའི་རྟགས་འདི་ལ་གསུམ། ངེས་པར་འགྲུབ་པ་མཆོག་གི་ལྟས་དང་། ཞེས་པའི་འཕྲོས་ལ། ཡེ་ཤེས་ཀྱི་ལྷ་
མངོན་སུམ་དུ་མཚན་དང་དཔེ་བྱད་ཀྱིས་སྤྲས་པས་ཞལ་སྟོན། ཆོས་གསུངས་ལུང་སྟོན་སྔགས་སྒྲ་སྒྲོག །ཅེས་དང་། དགོངས་འདུས་བརྡ་རྟགས་ལས། རབ་རྣལ་འབྱོར་པ་སྒྲིབ་པ་ཤས་ཆུང་ཞིང་། དད་བརྩོན་གདུང་ཤུགས་ཅན། སྒྲུབ་པ་ཉམས་ལེན་རྩེ་གཅིག་ཏུ་འབད་པས། སྔོན་གྱི་ལས་བཟང་པོའི་འཕྲོ་ཡོད་པ་རྣམས་ལ། མངོན་སུམ་དུ་བླ་མ་ཡི་དམ་མཁའ་འགྲོའི་ཞལ་སྟོན་ཅིང་། ཆོས་འཆད་དབང་བསྐུར་བྱིན་རློབས་ལུང་སྟོན། ཞེས་དང་། དྲག་པོ་བདེར་འདུས་ཀྱི་གཞུང་རྟགས་ཡིག་ཏུ། རབ་ནི་ཞལ་མཐོང་དབང་བསྐུར་བྱིན་གྱིས་རློབས། །ཐོད་རྔ་རྐང་དུང་སྒྲ་སྒྲོག་ལུང་བསྟན་འབྱུང་། །ཞེས་དང་། ཐུགས་སྒྲུབ་བླ་མ་ལོངས་སྐུའི་སྒྲུབ་གཞུང་ལས། འགྲུབ་པའི་རྟགས་ནི་ཞལ་མཇལ་ལུང་སྟོན། ཞེས་དང་། ཐུགས་སྒྲུབ་རྟགས་ཡིག་ལས། ཞལ་མཐོང་ལུང་སྟོན་དག་སྣང་འཆར། །ཞེས་དང་། མར་པའི་ཞལ་གདམས་བཅོ་ལྔ་ལས། འགྲུབ་པའི་རྟགས་མཁའ་འགྲོ་མ་རྣམས་ཀྱིས་ཆོས་གསུངས་པ་དང་། ལུང་སྟོན་པ་དང་སྐུ་མཐོང་བ། ཞེས་གསུངས་པ་དང་། རཏྣ་ལུགས་ཀྱི་ཕྱག་རྡོར་ཐུགས་ཀྱི་སྒྲུབ་པར། ཞལ་མཇལ་བ་དང་། ལུང་སྟོན་པ་སོགས་འབྱུང་། །
ཞེས་དང་། དྲག་པོའི་གསང་སྒྲུབ་ལས། ཞལ་མཇལ་དབང་བསྐུར་ལུང་སྟོན་པ་ལ་སོགས་འབྱུང་སྟེ། གྲུབ་རྟགས་མཆོག་ཏུ་ཤེས་པར་བྱའོ། །ཞེས་དང་། དྲག་པོ་ཡང་གསང་སྒྲུབ་པར། བླ་མ་ཡི་དམ་མཁའ་འགྲོའི་ཞལ་མཐོང་། ཆོས་གསུངས་རྟོགས་པ་འཆར། དག་སྣང་དཔག་ཏུ་མེད་པ་འཆར་ཞེས་གསུངས་སོ། །འོ་ན་འདི་དག་སྒྲུབ་པའི་རྟགས་ཡིག་ཏུ་འདུག་པ་གནམ་ཆོས་ཐུགས་ཀྱི་གཏེར་ཁ་འབྱུང་བའི་ཁ་བྱང་མ་ཡིན་ནོ་སྙམ་ན། འདིར་བཤད་པ་དང་མཐུན་པར་སྤྲུལ་སྐུ་མི་འགྱུར་རྡོ་རྗེས་རྩ་བ་གསུམ་གྱི་བསྙེན་སྒྲུབ་མཛད་སྐབས་དེའི་འགྲུབ་རྟགས་ཞལ་མཐོང་དབང་བསྐུར་ཆོས་བཤད་པ་རྣམས་བྱུང་བ་ཡིན་གྱི། ཐ་མལ་ཕྲག་ལྷ་ཞན་པ་རྣམས་རི་ཁར་གཉིད་ལོག་པ་ན། མི་མ་ཡིན་དང་སྨན་རིགས་ཀྱིས་རྒྱུད་རློམས་ནས། མདོ་རྒྱུད་དང་མཐུན་པའི་ཤོ་ལོ་ཀ་གཅིག་མེད་པར། བཤད་རྒྱུ་ཟད་མེད་པ་དང་། ལྷ་མཐོང་འདྲེ་མཐོང་དང་། དོན་གྱི་རྩ་བ་ལ་མོ་འདེབས་པ་ལས་མེད་པ་ཚོ་དང་འདྲ་བ་ག་ལ་ཡིན། འོ་ན་གནམ་ཆོས་ཟེར་བ་དེང་སང་བར་མ་ཐོས་སོ་སྙམ་ན། དེ་ནི་རང་ཉིད་ཐོས་པ་ཆུང་བའི་མཚང་ཆེན་པོ་འདོམས་ཁྲོད་ལ་བསྟེན་པས་ལོད་པ་ཡིན་པར་ཤེས་པར་བྱོས་
ཤིག །དེའི་རྒྱུ་མཚན་ཅི་ཞེ་ན། དེ་སྤྲུལ་སྐུ་ཤཱཀྱ་ཐུབ་པས་སྡེ་སྣོད་གསུམ་གྱི་ཆོས་ཀྱི་འཁོར་ལོ་བསྐོར་ནས་སྐུ་མྱ་ངན་ལ་འདའ་ཁར། རྒྱུ་ལ་མོས་པའི་རྒྱུ་ཆོས་ཀྱིས། །འཁོར་ལོ་རབ་ཏུ་བསྐོར་བྱས་ནས། །རྡོ་རྗེ་ཐེག་པའི་ཉེ་ལམ་ཞིག །མ་འོངས་དུས་སུ་འབྱུང་བར་འགྱུར། །ཞེས་དང་། ཕྱག་ན་རྡོ་རྗེ་མགོན་པོས་བཤད། །ཅེས་ལུང་བསྟན་པ་ཙམ་ལས་གདུལ་བྱ་སོ་སོའི་སྐྱེ་བོའི་སྣང་ངོར་གསང་སྔགས་མ་གསུངས། གསང་སྔགས་ལས་ཐེག་ཆེན་ཡང་མ་གསུངས་ནས། ས་གནས་ཀྱི་སེམས་དཔའ་དང་དཔའ་བོ་ཌཱཀྐི་སོགས་ལ་ཐེག་ཆེན་དང་གསང་སྔགས་གསུངས་པ་ཕལ་པས་མ་མཐོང་ངོ་། །དེའི་ཕྱིར་ཕྱིས་ཀླུ་སྒྲུབ་སོགས་ཀྱི་ཐེག་ཆེན་དར་བ་ན་ཉན་ཐོས་སན་དྷ་པ་སོགས་ཀྱིས། འདི་ནི་སངས་རྒྱས་ཀྱིས་མ་གསུངས་ཏེ། སངས་རྒྱས་ཀྱིས་ཆོས་ཀྱི་འཁོར་ལོ་བསྐོར་ནས། སྐུ་མྱ་ངན་ལས་མ་འདའ་བར་ཞབས་འབྲིང་མཛད་པའི་དགྲ་བཅོམ་པ་རྣམས་ཀྱིས་ཀྱང་མ་ཐོས་སོ། འདི་ནི་ཀླུ་སྒྲུབ་ཀྱིས་རང་བཟོ་ཡིན་ནོ། །ཀླུ་སྒྲུབ་ནི་བདུད་ཀྱི་སྤྲུལ་པར་ངེས་སོ། །ཞེས་སྐུར་པ་བཏབ་པས། ཕྱིས་སློབ་དཔོན་ཐོགས་མེད་ཀྱིས་དགའ་ལྡན་དུ་བྱམས་པ་ལ་དྲིས་པས། བྱམས་པས་ཐེག་ཆེན་བཀའ་ཡིན་
པའི་སྒྲུབ་བྱེད་བྱམས་ཆོས་ལས་གསུངས་དགོས་བྱུང་བ་ལགས་སོ། །དེས་ན་གནམ་ཆོས་དང་ས་གཏེར་མིན་པའི་ཐེག་ཆེན་གྱི་མདོ་དང་གསང་སྔགས་ཀྱི་རྒྱུད་གཅིག་ཀྱང་དེ་དུས་རྒྱ་གར་ཡུལ་དབུས་དེར་མེད་པའོ། །ཀླུ་སྒྲུབ་ཀྱིས་འཇམ་དབྱངས་ཞལ་གཟིགས་ནས་སེམས་བསྐྱེད་དང་དབུ་མ་གསན་པ་གནམ་ཆོས་སོ། །སློབ་དཔོན་ཐོགས་མེད་ཀྱིས་བྱམས་པ་བསྒྲུབས་ནས་ཞལ་གཟིགས་ནས་བྱམས་ཆོས་སྡེ་ལྔ་ཞུས་པ་གནམ་ཆོས་སོ། །དེ་ལྟར་ཤིང་རྟའི་སྲོལ་ཆེན་པོ་གཉིས་ཐེག་ཆེན་ཆོས་ཀྱི་གྲོལ་ཕུག་ཆེན་པོ་སྟེ། དེ་གཉིས་ཀ་གནམ་ཆོས་ཡིན་གྱི། བྱམས་པ་འཇམ་དབྱངས་མི་བཞིན་ཀུན་གྱིས་མཐོང་བར་རྒྱ་གར་དུ་དེ་དུས་བཞུགས་པ་ནི་མ་ལགས་ཏེ། བྱམས་པ་བསྟེན་པས་སུས་ཀྱང་མ་མཐོང་བས་གསལ་ལོ། །གསང་སྔགས་གནམ་ཆོས་ཀྱི་ཕུག་ནི་སློབ་དཔོན་དགའ་རབ་རྡོ་རྗེ་ལགས་ཏེ། ཁོང་བྱིས་སྦ་ལོ་བདུན་པའི་སྐབས་སུ་རྡོ་རྗེ་སེམས་དཔའ་ཞལ་གཟིགས་ནས། ཡུན་སྐད་ཅིག་ཙམ་ཡང་རྫོགས་པ་ཆེན་པོའི་རྒྱུད་འབུམ་ཕྲག་དྲུག་ཅུར་གསུངས་པ་བློར་ཆུད། བྱིས་སྦ་དེ་པཎྜི་ཏ་བདུན་བརྒྱ་དང་རྩོད་པས་ཀྱང་མ་ཐུབ་པས་སངས་རྒྱས་འཇིག་རྟེན་དུ་བྱོན་ནོ་ཞེས། པཎྜི་ཏ་ཀུན་གྱིས་ཕྱག་
འཚལ་ཞིང་ཞབས་སྤྱི་བོར་བླངས། དེ་ནས་ལོ་བཅུ་གཉིས་ཀྱི་བར་དུ་གནམ་ཆོས་ཡི་གེར་བཀོད་པ་རྫོགས་ཆེན་གྱི་རྒྱུད་ཐམས་ཅད་དོ། །ཨོ་རྒྱན་རིན་པོ་ཆེ་བྲག་ཕུག་མ་ར་ཏི་ཀར་བཞུགས་སྐབས་སངས་རྒྱས་སྣང་བ་མཐའ་ཡས་ཞལ་གཟིགས་པ་ལ། ཐུགས་རྗེ་ཆེན་པོ་ལྟ་བ་ཡང་ཐོག་དང་ཡང་རྩེའི་རྒྱུད་གཉིས་ཞུས་ལེན་གྱི་ཚུལ་དུ་ཞུས་པ་གནམ་ཆོས་སོ། །རྒྱ་གར་ཤར་ཕྱོགས་ཝཱ་རཱ་ཎ་སཱིའི་རྒྱལ་པོ་བློ་གྲོས་ཀྱི་སྲས། རྒྱལ་བུ་མི་ཏྲ་བྱ་བ་མཆེད་ཡ་རྣམས་ཀྱིས་ཕྲག་དོག་བྱས་པས་རབ་ཏུ་བྱུང་བསམ་ཡང་ཡབ་ཡུམ་གྱིས་མ་གནང་ངོ་། །ཡབ་ཡུམ་གཉིས་ཀྱི་བཀའ་བཅག་པ་བཤགས་པའི་ཕྱིར་ཡབ་ཡུམ་གྱི་ཆགས་ལྷམ་དུམ་རེ་ཐོར་གཙུག་ཏུ་བཅུགས། བློན་པོའི་ཆས་སུ་ཞུགས་ཏེ་གསེར་གྱི་སྦ་ལྕག་གཅིག་ཁྱེར་ནས་རྡོ་རྗེ་གདན་དུ་འབྱོན་དགོངས་ནས་བྲོས་སོ། །ཐག་རིང་ས་ནས་ཆུ་བོ་གངྒཱ་མཐོང་བའི་འགྲམ་ན། བུད་མེད་གཅེར་བུ་ཁ་ཊ་ཐོགས་པ་གཅིག་གིས་རེས་མང་པོར་སྤྲུལ་རེས་གཅིག་འདུས་པར་སྟོན་པར་མཐོང་། རྩར་ཕྱིན་ནས་འདི་ལྷ་ཡིན་ནམ་འདྲེ་ཡིན་སྙམ་ནས་སྐག་ཅིང་ཐེ་ཚོམ་པ་ལ། བདག་མཁའ་འགྲོ་མ་ཨེ་ཀ་ཙ་ཏི་བྱ་བ་ཡིན། ཁྱོད་བྱིན་གྱིས་བརླབ་ཅིང་ལུང་སྟོན་དུ་འོང་བ་ཡིན་པས། ཁྱོད་ཀྱི་ཡི་
དམ་གྱི་ལྷ་ནི་ཐུགས་རྗེ་ཆེན་པོ་ཡིན། སྒྲུབ་པའི་གནས་ནི་སྒྲོལ་མའི་རི་ཁ་སར་པཱ་ཎིའི་སྐུ་རང་བྱུང་གི་རྩ་རུ་སྒྲུབ་པ་གྱིས་ཤིག །གདུལ་བྱ་ནི་རྒྱ་གར་ཤར་ནུབ་གཉིས་ན་ཡོད་དོ། །བྱང་ཁ་བ་ཅན་ན་ཡང་འགའ་ཞིག་ཡོད་དོ། །གསུངས་ནས་མི་སྣང་བར་སོང་ངོ་། །དེ་ནས་རྡོ་རྗེ་གདན་དུ་བྱོན་ནས་སྒྲོལ་མའི་སྐུ་ལ་གསོལ་བ་བཏབ་ཅིང་ཡོད་ཛ། ཉིན་གཅིག་སྒྲོལ་མའི་སྐུ་དེའི་ཐུགས་ཀ་ནས་སྔར་གྱི་བུད་མེད་དེས་རུས་པའི་རྒྱན་གསོལ། ཌཱ་རུ་དང་ཐོད་ཁྲག་ཐོགས་ནས་བྱུང་སྟེ། ཐོད་ཁྲག་དེ་སྤྱི་བོར་བཞག་ནས་བརྡ་དབང་བསྐུར། ཐུགས་རྗེ་ཆེན་པོའི་གསང་སྒྲུབ་གནང་ནས། བར་ཆད་འབྱུང་ན་འདི་སྐོལ། ཁ་སར་པཱ་ཎིའི་རི་ལ་བསྒྲུབས་པ་གྱིས་གསུང་ནས་སྒྲོལ་མའི་སྐུ་འདྲ་ལ་ཐིམ་མོ། །དེ་ནས་ཁ་སར་པཱ་ཎིར་ལོ་དྲུག་བསྒྲུབས་པས། དང་པོ་ཐུགས་རྗེ་ཆེན་པོ་བཅུ་གཅིག་ཞལ་སངས་རྒྱས་སྟོང་གིས་བསྐོར་བ་ཞལ་གཟིགས། དེ་ནས་གསང་སྒྲུབ་ལྷ་བཅོ་ལྔ་ཞལ་གཟིགས། ཐུགས་རྗེ་ཆེན་པོའི་སྒྲུབ་ཐབས་བརྒྱ་རྩ་བརྒྱད་གནང་ནས་གྲུབ་པ་ཐོབ་བོ། །མཚན་ནི་མི་ཏྲ་ཛཱ་ཀིར་གྲགས་ཏེ་རབ་ཏུ་བྱུང་བ་དང་བླ་མ་བསྟེན་པ་སོགས་མ་མཛད། དེ་རྒྱབ་དུར་ཁྲོད་སོ་ས་གླིང་དུ་སྒྲུབ་པ་མཛད་
པས་ཐུགས་དམ་ལྷ་དྲུག་ཞལ་གཟིགས་ནས་སོ་སོའི་སྒྲུབ་ཐབས་དྲུག་དབང་དྲུག །ཁྲིད་དྲུག་གནང་། བྲག་མགོན་གྱི་བསྟན་པ་བསྲུང་བར་ཁས་བླངས་དབང་དང་སྒྲུབ་ཐབས་ཕུལ་ལོ། །དེ་ལྟར་མི་ཏྲ་གསང་སྒྲུབ། མི་ཏྲ་བརྒྱ་རྩ། མི་ཏྲ་ཁྲིད་དྲུག་ཐམས་ཅད་གནམ་ཆོས་ཡིན་གྱི། དེ་ཡན་ལ་མེད་དོ། །རྗེ་བཙུན་ཏེ་ལོ་སངས་རྒྱས་དེ་ཡང་སྐུ་ཕྲ་མོ་ལ་མ་ཧེ་འཚོ་སྐབས་སྐུ་དངོས་མ་ཧེ་འཚོ་ཞིང་། དག་པའི་སྣང་བར་འོག་མིན་དུ་རྡོ་རྗེ་འཆང་དང་ལྕང་ལོ་ཅན་དུ་ཕྱག་ན་རྡོ་རྗེ་དང་། བྱ་རྒོད་སྤུང་རིལ་ཐུབ་པ་ཆེན་པོ་ལས་ཆོས་གསན་ཏེ། དག་སྣང་རྡོ་རྗེ་འཆང་དང་མཇལ་ཞེས་བརྒྱུད་པ་རྡོ་རྗེ་འཆང་ནས་ཏེ་ལོར་འདེད་ལ། ཨོ་རྒྱན་ཡུལ་དུ་བྱོན་པས་དུར་ཁྲོད་ཀྱི་ཞིང་སྐྱོང་དང་མཁའ་འགྲོའི་ཚོགས་དབུས་ན་རྡོ་རྗེ་ཕག་མོ་ལ་སྙན་བརྒྱུད་ཞུས་པ་ཡང་ཁོང་རང་གིས་དག་སྣང་སྟེ། ཞིང་སྐྱོང་དང་མཁའ་འགྲོ་མ་རྣམས་རྒྱ་ནག་རྒྱལ་པོའི་ཕོ་བྲང་ལྟར་དངོས་སུ་དེར་ཡོད་པ་མ་ལགས་ཏེ། དཔེར་ན་གངས་ཏི་སེའི་རྩེར་བདེ་མཆོག་གི་དཀྱིལ་འཁོར། རྐེད་པ་ལ་དགྲ་བཅོམ་ཡན་ལག་འབྱུང་འཁོར་སྟོང་གཅིག་བརྒྱ། རྩི་བར་དབང་ཕྱུག་ཆེན་པོ་ཡབ་ཡུམ། མཚོ་མ་ཕམ་དུ་དཔལ་ལྡན་ལྷ་མོ་ཇོ་བོ་སྔགས་བདག་རྣམས་ཀྱི་ཕོ་བྲང་
བཀོད་པ་དཔག་ཏུ་མེད་པ་ཡོད་ཚུལ་མདོ་རྒྱུད་རྣམས་ནས་བཤད་ཀྱང་། ཐ་མལ་པས་མི་མཐོང་བ་དང་འདྲའོ། །དེས་ན་སྙན་བརྒྱུད་ནོར་བུ་སྐོར་གསུམ་ཡང་གནམ་ཆོས་ཏེ། དེ་ཡན་ལ་མེད་ཅིང་ཏེ་ལོ་པ་ཡང་ཨོ་རྒྱན་སྲིན་ཡུལ་དུ་བྱོན་རྗེས་བྱོན་པར་སྣང་ངོ་། །ཡང་བྲམ་ཟེ་ཛ་ལེན་དྷ་ར་དེ་སྒྲ་གཞོན་ནུ་འཁོར་བ་ལ་སྐྱོ་ནས། དུར་ཁྲོད་ཤིང་གཅིག་གི་དྲུང་ན་འདུག་པ་ན། ནམ་མཁའ་ནས་རིགས་ཀྱི་བུ་ཁྱོད་ཡིད་ལ་བྱེད་པ་གྱིས་ཤིག་ཟེར་བའི་སྒྲ་བྱུང་། ནམ་མཁའ་ལ་བལྟས་ནས་གསོལ་བ་བཏབ་པས་མཁའ་འགྲོ་མ་དངོས་སུ་མཇལ་ནས། དགྱེས་རྡོར་གྱི་དབང་བསྐུར་གདམས་པ་བསྟན་ཏོ། །དེ་ནས་ལོ་བདུན་བསྒོམས་པས་གྲུབ་པ་ཐོབ། སེམས་ཅན་དཔག་ཏུ་མེད་པའི་དོན་མཛད། འཁོར་སུམ་བརྒྱ་དང་བཅས་པ་ལུས་མ་སྤང་མཁའ་སྤྱོད་དུ་གཤེགས་སོ། །རྡོ་རྗེ་ཕག་མོས་བྱིན་གྱིས་བརླབས། །རྒྱུད་སྡེ་བཞི་ཡི་དགོངས་པ་རྟོགས། །ཛ་ལེན་དྷ་ར་ཞེས་བྱ་བའི། །བླ་མ་དེ་ལ་ཕྱག་འཚལ་ལོ། །ཞེས་གྲུབ་ཆེན་བརྒྱད་ཅུའི་གཅིག་ཡིན་ནོ། །དེའི་དབང་གདམས་ངག་ཀྱང་གནམ་ཆོས་སོ། །ཡང་གྲུབ་ཆེན་ཤ་བ་རི་པ་དེ་དུར་ཁྲོད་བསིལ་བ་ཚལ་ན་བཞུགས་སྐབས་མགོན་པོ་ཕྱག་དྲུག་པ་
ཞལ་གཟིགས་ནས། རིགས་ཀྱི་བུ་ངའི་སྒྲུབ་ཐབས་འདི་ཟུངས་ཤིག་གསུངས་ནས། བླ་མ་མགོན་པོ་དབྱེར་མེད་ཀྱི་སྒྲུབ་པ་གནང་སྟེ། ཤ་ཝ་རི་པའི་ལུགས་ཞལ་གཅིག་ཕྱག་དྲུག་པ་འདི་གནམ་ཆོས་སོ། །ཤོ་ཝ་རི་འཇའ་ལས་སུས་མཇལ་དུ་མེད་པ་མེ་ཏྲི་པས་མཇལ་ནས་ཕྱག་ཆེན་ཞུས་པས་གྲུབ་པ་ཐོབ་པའང་གནམ་ཆོས་སོ། །ཀླུ་སྒྲུབ་ལ་ནམ་གྲུ་མས་རྣ་བ་ནས་བཟུང་སྟེ་གླིང་བཞི་བསྐོར་བ་འདྲེ་རྟ་ལ་བསྐྱོན་པ་སོགས་ཆོ་འཕྲུལ་བསྟན་དུས་གུར་མགོན་ཞལ་གཟིགས་ནས། ད་རུང་བར་ཆད་བྱེད་དོགས་ཡོད་གསུངས་ནས་གུར་གྱི་སྒྲུབ་ཐབས་གསུམ་གནང་བར་འཆད་པས། གུར་མགོན་ཡང་གནམ་ཆོས་སོ། །ཌྷོམ་བྷི་ཧེ་རུ་ཀ་དུར་ཁྲོད་ན་བཞུགས་སྐབས་བེར་ནག་ཅན་ཞལ་གཟིགས་ནས་སྒྲུབ་ཐབས་རྣམས་གནང་བར་བཤད་པས། དེ་ཡང་གནམ་ཆོས་ཏེ། ཁྱོད་ཀྱི་སྒྲུབ་ཐབས་གང་ཡོད་དྲིས་པས་མཆོད་རྟེན་གྱི་བང་རིམ་ན་ཡོད་ཟེར་བས། རྒྱུད་རྣམས་སླར་ས་གཏེར་བཏོན་ནོ། །དེ་བཞིན་དུ་བོད་ཀྱི་རིག་འཛིན་རྣམས་ལ་ཡང་གནམ་ཆོས་བྱུང་བ་མང་སྟེ། བྱང་སེམས་ཟླ་བ་རྒྱལ་མཚན་གྱིས་རྟ་མགྲིན་ཞལ་གཟིགས་ནས་གནང་བ་རྟ་མགྲིན་ཀཱ་ལ་མེ་སྤུང་དང་། མར་པ་རྒྱབ་རིས་ནཱ་རོ་མཇལ་དུ་བྱོན་ཛ་ལམ་
དུ་ཇོ་བོ་རྗེ་ཚུར་བྱོན་པ་དང་མཇལ། ནཱ་རོ་པ་ན་ཉིང་ནས་སྤྱོད་པ་ལ་གཤེགས་མཇལ་དུ་མེད། བོད་དུ་འགྲོ་ལ་ངའི་ལོ་ཙཱ་བསྒྱུར་གསུངས། མ་དག་པའི་སྣང་ངོར། ནཱ་རོ་འདས་གདུང་བཞུས་པར་རིང་བསྲེལ་མ་ག་དྷའི་ཁལ་གཅིག་བྱོན། དག་པའི་སྣང་བར་འཇའ་ལུས་མཁའ་སྤྱོད་དུ་གཤེགས་ཚར་ཟིན་ཀྱང་། མར་པས་ཚོགས་འཁོར་མང་པོ་དང་གསོལ་བ་བཏབ་ཅིང་བཙལ་བས་མཇལ་ནས། སྙན་བརྒྱུད་སྐོར་གསུམ་གནང་བའང་གནམ་ཆོས་སོ། །མཁས་གྲུབ་ཁྱུང་པོ་རྣལ་འབྱོར་བ་དེས་མཁའ་འགྲོ་ནི་གུ་མ་འཇའ་ལུས་ཐ་མལ་སུས་ཀྱང་མཇལ་དུ་མེད་པ་ལ་དད་པས་བཙལ་བས། དང་པོ་ནམ་མཁར་མཇལ་ཏེ་འཇའ་ལྟར་ཡལ། དེ་ནས་ཚང་ཚིང་འཁྲིགས་པའི་དུར་ཁྲོད་དུ་མཇལ་ཏེ། སྨུག་ནག་གཟི་བརྗིད་འབར་བ་རུས་པའི་རྒྱན་དྲུག་གསོལ་ཞིང་ཁ་ཊྭཱྃ་དང་ཐོད་པ་བདུད་རྩི་བསྣམས་པ་ཞིག་གིས། བདེ་མཆོག་ཕྱག་དྲུག་པ་སོགས་ཀྱི་དབང་དང་། ནི་གུ་ཆོས་དྲུག་གསུངས། བོད་དུ་བྱོན་པས་སློབ་མ་ཁྲི་ཕྲག་མང་པོ་འདུས། བདུན་ཅུ་ལུས་མ་བཞག་མཁའ་སྤྱོད་དུ་གཤེགས། ཉིད་དགུང་ལོ་ཕྱེད་ཉིས་བརྒྱ་བཞུགས་ནས་མཁའ་སྤྱོད་དུ་གཤེགས་ཏེ། ཤངས་པའི་ཆོས་ཕུག་གནམ་ཆོས་
སོ། །ས་སྐྱ་ཀུན་དགའ་སྙིང་པོས་ཟླ་བ་དྲུག་འཇམ་དབྱངས་སྒྲུབ་པས་ཞལ་གཟིགས་ནས། ཚེ་འདི་ལ་ཞེན་ན་ཆོས་པ་མིན། །ཞེས་སོགས་ཤོ་ལོ་ཀ་གཅིག་གསུངས་པ་ལས། དེའི་འབྲེལ་པ་ཞེན་པ་བཞི་བྲལ་གྱི་ཁྲིད་མཛད། ལམ་འབྲས་རྙིང་པའི་དབང་ལུང་རྒྱུན་ཙམ་ལས་མེད་པར། བིར་ཝ་པ་ཞལ་གཟིགས་ནས་རྒྱས་པར་གནང་བ་ཡི་གེར་བཀོད་པ་པོ་ཏི་ཉི་ཤུ་རྩ་ལྔ་ཙམ་ཡོད་པར་སྣང་བ་གནམ་ཆོས་སོ། །རྟོགས་ལྡན་སངས་རྒྱས་མགོན་པོས་སེང་གདོང་མ་ཞལ་གཟིགས་ཤིང་ཨོ་རྒྱན་གྱིས་གནང་བའི་སེང་གདོང་མ་བོ་དོང་ལུགས་པོ་ཏི་ཆེ་བ་གཉིས་ཡོད་པ་གནམ་ཆོས་སོ། །གཙང་པ་རྒྱ་རས་ཀྱིས་སངས་རྒྱས་རབ་བདུན་ཞལ་གཟིགས་ནས་གསུངས་པ་རྟེན་འབྲེལ་ཁོ་བོ་ལུགས་དང་། འབྲུག་པ་ཆོས་ཀྱི་གྲགས་པས་རས་ཆུང་པ་ཟླ་བ་དྲུག །འབྲལ་མེད་དུ་གཟིགས་ནས་གནང་བ་མེ་ཏྲི་སྙན་བརྒྱུད་དང་། མི་འཁྲུགས་པ་ཞལ་གཟིགས་ནས་གནང་བ་མི་འཁྲུགས་པ་ཉེ་བརྒྱུད་དང་། པཎྜི་ཏ་ནགས་རིན་ཆེན་གྱིས་བལ་པོར་ཨོ་རྒྱན་ཞལ་གཟིགས་ནས་གནང་བའི་པདྨ་སྙིང་ཐིག་དང་། རང་བྱུང་རྡོ་རྗེས་ཨོ་རྒྱན་ཞལ་གཟིགས་ནས་གནང་བ་མཁའ་འགྲོ་སྙིང་ཐིག་ཤོག་སྐྱ་མ་དང་། རྩ་གསུམ་དྲིལ་སྒྲུབ་རྣམས་
ནི་ས་གཏེར་མ་ལགས། སྔར་ཡོད་པ་མ་ལགས། གནམ་ཆོས་ཁོ་ན་ཡིན་པའོ། །མངའ་བདག་ཉང་གིས་དམ་པའི་རྟེན་འབྲེལ་སྐུ་འདྲའི་དྲུང་དུ་སྒྲུབ་པ་མཛད་པས། དམ་པ་ཞལ་གཟིགས་ནས་ཞི་བྱེད་ལུགས་གསུམ་ཀ་གནང་བས་བརྒྱུད་པ་ཉེ་བརྒྱུད་བྱུང་ལགས་སོ། །མཐོང་བ་དོན་ལྡན་ལ་རྔ་ཡབ་ནས་ཨོ་རྒྱན་གྱི་གྲུབ་ཐོབ་ལྭ་བ་པ་ཕོ་ཉར་མངགས་ནས་གནང་བའི་ཚེ་སྒྲུབ་ཚེ་དབང་དང་། རྗེ་དེ་བཞིན་གཤེགས་པས་མི་ཏྲ་ཛཱ་ཀི་མཇལ་ནས་ཁྲིད་དྲུག་གསན། ཆོས་གྲགས་རྒྱ་མཚོ། མི་བསྐྱོད་ཞབས་རྣམས་དང་ཡང་མཇལ་ནས་ཁྲིད་དྲུག་གི་བརྒྱུད་པ་ཉེ་བརྒྱུད་བྱུང་སྟེ། མི་ཏྲ་ཛཱ་ཀི་ལོ་རེ་བོད་དུ་ལན་རེ་འབྱོན་ཀྱང་། ཚེས་བཅུ་ལ་ཨོ་རྒྱན་འབྱོན་པ་ལྟར། འཇའ་ལུས་ཡིན་པས་ཕལ་པས་མཐོང་བ་མེད་དོ། །འབྲི་ཁུང་ཞབས་དྲུང་དཀོན་མཆོག་རིན་ཆེན་ལ་གནམ་ཆོས་པོད་ཆུང་གཅིག་ཙམ་བྱུང་བ། ཞབས་དྲུང་ཆོས་ཀྱི་གྲགས་པ་དང་། རྡོ་རྗེ་བྲག་པས་གསན་ནས་ཐུགས་དམ་མཛད། ལྷོ་པ་རིན་པོ་ཆེས་ཀྱང་ཅུང་ཟད་གསན་གསུངས། འཇའ་ཚོན་སྙིང་པོ་ལས་གཏེར་མིན་ཨོ་རྒྱན་གྱི་དངོས་སུ་གསུངས་པའི་སྙན་བརྒྱུད་ཧཱུྃ་ནག་སྙིང་ཐིག་ཅེས་གཅིག་བརྒྱུད་བཀའ་རྒྱ་ཅན་བྱུང་བ་རྣམས་ནི་གནམ་
ཆོས་ཐུགས་གཏེར་སྔར་བྱུང་ཚུལ་ཡིན་ནོ། །ད་འོ་ན་ད་ལྟ་སྤྲུལ་སྐུ་འདི་ལ་བྱུང་ཚུལ་ཇི་ལྟར་ཞེ་ན། སྐུ་མཚམས་ཀྱི་ངང་ནས་སྒྲུབ་པ་བྱེད་སྐབས་སྤྲུལ་སྐུས་ཨོ་རྒྱན་ཆེན་པོ་ཞལ་གཟིགས་ནས་དབང་བཞི་རྒྱས་པར་གནང་། དེ་ནས་ཉིན་རེ་ལན་རེ་ལན་གཉིས་ཙམ་མ་ཆག་པར་ཨོ་རྒྱན་ཉིད་ལྷ་སོ་སོའི་སྐུར་བསྟན་ནས། སོ་སོའི་དབང་སྒྲུབ་ཐབས་ལས་ཚོགས་ཐམས་ཅད་རིམ་པར་གནང་། དེའི་དབུ་ཞབས་སུ་བྲི་རྒྱུའི་རྒྱ་ཡིག་གི་དཔེ་བསྟན། རྒྱ་ཡིག་རྣམས་ཕྱག་བྲིས་མཛད་ནས། དེ་འབྲོང་ལ་སྤྱོད་ནས་བྲི་བ་ལས། ལན་གཅིག་གསུངས་ནས་གསུང་ཝིག་རྒྱུ་མི་སྣང་བས། བྲི་ཐོན་རིམ་གྱིས་ཚིག་རེ་རེ་ནས། སྨོད་པ་དེ་ལ་ཡིག་དྲུག་འདོན་པ་ལྟར་ཐོགས་པ་མེད། དེ་ཞུ་དག་གཅིག་མ་ཚར་བར་ཞག་སོང་ཡང་མི་བརྗེད། ཞུ་དག་ཚར་ནས་གཅིག་ཀྱང་ཐུགས་ལ་མི་སྣང་། འོན་ཀྱང་ཐུགས་འཁྲུག་པའི་རྐྱེན་བྱུང་ནས་བརྗེད་པར་འགྱུར་བར་སྣང་སྟེ། ཡབ་བསྙུངས་ནས་དེར་འབྱོན་དགོས་བྱུང་ཞག་གསུམ་ཙམ་ཐོག་པས། ལས་ཚོགས་དང་གཟུངས་འགའ་ཞིག་བྲི་འཕྲོ་བརྗེད་ནས་བྲི་མ་ཐུབ། ཡབ་འདས་ནས་ཞག་འགའ་ངེད་དཔོན་སློབ་གཉིས་ཀས་ཕྱིར་ལྡོག་བྱེད་སྐབས། ཕྱིར་ལྡོག་གསུངས་བརྡོ་ལ་མི་གསུངས་
བར་ཡེངས་ནས་བཞུགས་འདུག །ཐུགས་བསམ་ཅི་ཡང་མི་འདུག་བྱིས་པའི་ཞད་སྙམ་ནས། ཨ་ཡབ་འདས་པའི་སྲས་ཡིན་མོད། སྙིང་མི་རྗེ་བ་ཨེ་ཡིན་དམིགས་པ་གཏོད་ཞུས་པས། ཅི་མི་གསུངས་པར་ཕྱིར་ལྡོག་མཛད་ཚར་ནས། ད་ནས་ང་ལ་དེ་འདྲ་མ་ཟེར། ད་ལམ་ང་ལ་ཨོ་རྒྱན་རིན་པོ་ཆེས་དབང་རྒྱས་པ་ཞིག་གནང་ཞིང་ཡོད་པ་ཡིན་ཏེ། ཁྱེད་ཀྱི་བཀའ་བཀྱོན་གྱིས་སེམས་མ་དགའ་བས་བརྗེད་གསུངས་བྲི་རྒྱུ་མ་རྙེད། ནུབ་གཅིག་ད་ལྟ་མགོན་པོ་མ་ནིང་གིས་ངའི་ལུས་འདི་ཟ་བའི་ཚུལ་བྱས་པའི་སྒྲ་ལས་མགོན་པོའི་སྒྲུབ་ཐབས་ཤིག་བྱུང་བ་བྲིའམ་གསུངས། ཨ་ག་ཁྱེད་ཟ་བའི་སྒྲ་ལས་བྱུང་བའི་སྒྲུབ་ཐབས་ངས་མི་འདོད་སྨྲས་ནས་མ་བྲིས། འོ་ན་ཕར་གཏད་དགོས་གསུངས་ནས། འདི་མི་དགོས་ཟེར་ཕར་ལོང་གསུངས་པའི་བོད་པ་གཅིག་མཛད་པས་བརྗེད་སོང་། དེ་དགོངས་ཟ་བའི་ཚུལ་དེ་བར་ཆད་བསལ་བ་ཡིན་པར་མི་ཤེས་པར། འཁོར་བའི་འཁྲུལ་པ་འདི་སྐྱོན་རེ་ཆེ་ཟེར་བ་སོགས། བདག་ལ་ཐུགས་ཁྲེལ་བའི་ལུང་བསྟན་ལྡེབ་གཅིག་ཙམ་བྱུང་། ད་འོ་ན་རྟེན་འབྲེལ་ལེགས་པོ་སྒྲིག་ཤེས་དཀའ་དོ་བས། དེ་འདྲ་མ་ལེགས་པ་གང་བྱུང་ཡང་སྐྱོན་མེད་པའི་གདམས་པ་ཨོ་
གྱོན་ལ་ཞུས། ་ཞེས་ཞུས་པས་བསྐང་བ་ཤོ་ལོ་ཀ་གཅིག་དང་། བཤགས་པ་ཤོ་ལོ་ཀ་གཅིག་བྱུང་བ་བདག་གིས་རྒྱུན་དུ་ཐུགས་དམ་བྱས་སོ། །དེ་ནས་དགུང་ལོ་དུ་ཡི་དུས། ལོ་གང་ལ། ཟླ་བ་གང་ལ། ཚེས་གྲངས་དུ་ལོ། དུས་ཚོད་ནམ་གྱི་དུས། གསུང་བ་པོའི་སྐུ་མདོག་ཆ་ལུགས་ཅི་ལྟ་བུའི་གསུང་བ་རྣམས། ཆོས་སོ་སོའི་མཇུག་ཏུ་བྲིས་ཡོད་པས་འདིར་ཡི་གེས་འཇིགས། ཆོས་ཚན་ཞིག་བར་ཡང་བྲི་མི་ནུས་ལ། གལ་ཆེའི་ཧྲག་བསྡུས་གཅིག་བཤད་ན། ཚེ་དཔག་མེད་ཀྱི་རྒྱུད་འོད་ཟེར་རྔ་ཆེན། དབང་རྒྱས་འབྲིང་བསྡུས་གསུམ། སྒྲུབ་ཐབས་ཕྱི་ནང་གསང་གསུམ། བཀའ་སྲུང་བཀའ་གཏད་སྒྲུབ་ཐབས། ལས་ཚོགས་དང་བཅས། ཐུགས་རྗེ་ཆེན་པོ་ལྷ་གཅིག་ལྷ་ལྔ་ལྷ་དགུ་ལྷ་མང་། ལུས་དཀྱིལ་རྣམས་ཀྱི་དབང་སྒྲུབ་ཐབས་ལས་ཚོགས་བཀའ་སྲུང་དང་བཅས་པ། ལྷ་དགུའི་རྒྱུད་བུ་ཆུང་སོགས། གུ་རུ་ཞི་བའི་སྒྲུབ་སྐོར་དབང་བཀའ་སྲུང་ལས་ཚོགས། མ་ནིང་རིགས་ཐམས་ཅད་པའི་སྒྲུབ་སྐོར་དབང་ལས་ཚོགས། ཛཾ་ལྷ་རིགས་དགུའི་སྒྲུབ་སྐོར་དབང་ལས་ཚོགས། གུར་དྲག་གི་རྒྱུད་དབང་སྒྲུབ་སྐོར་ལས་ཚོགས་དང་བཅས་པ། སྒྲོལ་མ་དཀར་སྔོན་གྱི་དབང་སྒྲུབ་ཐབས་
རྒྱུད་ལས་ཚོགས། ཐུབ་པ་གནས་བཅུའི་དབང་རྒྱས་པ་སྒྲུབ་སྐོར་ལས་ཚོགས། སྨན་ལྷ་དང་ཆོས་བསྒྲགས་རྒྱ་མཚོའི་སྒྲུབ་སྐོར་ཞང་བློན་སྒྲུབ་སྐོར་སོགས་ཕྲན་དུ་མ་ཞིག་འཇམ་དབྱངས་ཕྱག་རྟགས་སྤྲ་མ་ཞེས་བྱ་བ་དང་ཐུགས་རྗེ་ཆེན་པོ་རྣོ་བཀྲ་དང་འོད་དཀར་ཅན་རྣམས་ཀྱི་སྐོར་དཔག་ཏུ་མེད་དོ། །སྔར་མ་གྲགས་པ་ལ་མིང་གི་མངོན་བརྗོད་ཅེས་པའི་རྒྱུད་བུ་ཆུང་གཅིག་ལ་བརྟེན་པའི་སྒྲུབ་ཐབས་བརྒྱ་རྩ་གསར་པ། དབང་རྒྱུད་ཀྱི་བདག་པོ་ཞེས་བྱ་བའི་རྒྱུད་བཞི། རྟོགས་བརྗོད་བཞི། སྒྲུབ་ཐབས་བཞི། ལས་ཚོགས་མཐའ་ཡས་པ། ཁྲོ་བོ་རོ་ཟ་ཞེས་བྱ་བའི་ལོ་རྒྱུས་རྒྱུད་བུ་ཆུང་དང་སྒྲུབ་ཐབས་ལས་ཚོགས་མཐའ་ཡས་པ། ཡེ་ཤེས་འཇིགས་བྱེད་ཅེས་བྱ་བའི་དབང་སྒྲུབ་ཐབས་ལས་ཚོགས། ལས་ཧུར་དྲག་མོ་ཞེས་བྱ་བའི་རྒྱུད་ཆེན་པོ་དང་སྒྲུབ་ཐབས་ལས་ཚོགས་དང་བཅས་པ། ཨུ་པ་ར་ཙ་ཞེས་པའི་རྒྱུད་བུ་ཆུང་ལས་ཚོགས་སྒྲུབ་ཐབས་ཏེ། དེ་དག་ནི་སྔོན་ས་སྟེང་དུ་མིང་ཙམ་མ་གྲགས་ཡིད་ལ་ཡང་དྲན་མི་གཏུབ་པས་གཏེར་སར་ཡིན་པའི་གནད་ངོ་མཚར་ཤིན་ཏུ་ཆེ་བའོ། །གཞན་ཡང་སྔོན་མ་གྲགས་པའི་མགོན་པོ་མདུང་འཛིན་ནོར་དབང་། དུས་ངན་སྙིགས་མ་ལ་ཕན་པ་རྡོ་
རྗེ་རྒོད་ལ་སོགས་པའི་ལྷ་བྲན་ལྔ། ནད་ལས་རྒྱལ་ལ་སོགས་རྒྱལ་བྱེད་ལྷ་ལྔ་དང་། སྔར་གྲགས་པ་གནོད་སྦྱིན་ཤན་པའི་རྒྱུད་སྒྲུབ་ཐབས་ཕྱི་ནང་གསང་གསུམ། ནཱ་ག་རིཀ་ཁྱུང་དམར་ལ་སོགས་པ་རེ་རེ་ནས་བྲིར་མི་ལོང་པ་དང་། བདག་གི་ཆོས་སྐལ་དུ་སྔགས་པའི་རྩ་བ་བཅུ་གཉིས་ལ་སོགས་མང་དུ་བྱོན་པའོ། །དེ་དག་ནི་ཉམས་དང་རྨི་ལམ་སོགས་མ་ཡིན་པར་མངོན་སུམ་ཞལ་གཟིགས་པས། དབང་བསྐུར་སྒྲུབ་ཐབས་གསུངས་པ་བཀོད་པའོ། །དེ་ཡང་གཏེར་སྟོན་ནམ་མཁའ་འཇིགས་མེད་ཀྱི་ཕྱག་ཏུ་སྤྲུལ་པའི་ཡི་གེ་གཞན་ཕལ་པས་མི་མཐོང་བ་ཞིག་བྱུང་༔ དེ་མེ་མོ་ལུག་ནས་བཟུང་སྟེ་ལོ་བཅུ་གཉིས་བར་གྱི་ལུང་བསྟན། མཐའ་དམག་སྟོད་སྨད་ནས་གཡོ་བ་རྣམས་བཟློག་ཐབས་ཀྱི་རིམ་གྲོ་དགོས་ཚུལ་ཡིན་པར་འདུག་པ་ཡི་གེར་བཀོད་སྐབས་འགྲིམ་པ་གྲིབ་ཆེན་ཞིག་མདུན་དུ་བྱུང་བས་ཡི་གེ་ནམ་མཁར་སོང་ནས་འཕྲོ་བྲི་རྒྱུ་མ་རྙེད་པར་སྣང་སྟེ། དེའི་མཇུག་ཏུ། འདི་དག་ལ་སོགས་ལོ་སྐོར་གཅིག་ཉིད་ཀྱི། །ལུང་བསྟན་གསལ་ཡང་མེ་བྱ་ཡན་ཆོད་འདི། །ནམ་ལངས་དུས་ནས་ཉི་ཤར་ཚུན་ལ་བྲིས། །དེ་ནས་དཀོན་མཆོག་དར་པོའི་འདོན་ཀྱང་སླེབ། །ཤམ་དེ་མི་མངོན་ནམ་མཁའི་དབྱིངས་ལ་
སོང་། །བདེན་བདེན་འདྲ་ན་བོད་ཡུལ་ཐམས་ཅད་ཀྱིས། །བདེ་ཐབས་ལྷ་སྲིན་འཚོགས་པའི་བྲིན་གླུ་ཡིན། །མི་བདེན་གྱུར་ནས་བཏང་སྙོམས་ཡལ་དུ་ཆུག །ཁེ་གྱོང་ཡིན་པ་བློ་བདེ་བདག་ལ་མེད། །ཅེས་གསུངས་ཏེ།། གཏེར་སྟོན་ནམ་མཁའ་འཇིགས་མེད་དང་ཐམས་ཅད་མཁྱེན་པ་མཇལ། སྤྱོད་ཁ་སྐུ་སྐྱེའི་རྒྱུད་ནས་གནམ་ཆོས་རིག་འཛིན་སྲོག་སྒྲུབ་ཞུས་ནས་ཐུགས་དམ་མཛད་ཅིང་། ལུང་བསྟན་དེ་ལ་ཇི་སྐད་གསུངས་བཞིན་གྱི་བཅོས་ཁ་རིམ་གྲོ་སོགས་བཟློག་ཐབས་ཐམས་ཅད་རྩེ་གཅིག་ཏུ་མཛད་ཅིང་། སྔགས་པ་ནུས་པ་ཆེ་བར་གྲགས་པ་ཐམས་ཅད་དང་། རྡོ་རྗེ་བྲག་པའི་སྐུ་སྐྱེ་སོགས་ལའང་བྱེད་དུ་བཅུག་པས། དེ་སྔ་ཕན་བོད་དུ་མཐའ་དམག་མ་གཡོས་ཤིང་། ཞིག་པོ་སོགས་གཏེར་རྙིང་གི་ལུང་བྱང་དུ་འབོ་བར་བཤད་ཀྱང་མ་བྱུང་བ། ལུང་བསྟན་དེའི་ནུས་པ་ཡིན་ཞེས་ཟེར་བ་ཐོས་ཏེ་བདེན་པར་འདུག་གོ །དེས་སྤྲུལ་པའི་ཡི་གེ་གཞན་གྱིས་མི་མཐོང་པའང་སྲོལ་ཡོད་པའི་འཕྲོས་བཤད་ནས། མི་འགྱུར་རྡོ་རྗེ་ལ་བྱུང་ཚུལ་ནི། གྲྭ་སློབ་རྣམས་ལ་རིམས་ངན་གཅིག་བྱུང་སྟེ་མང་དུ་ན། གྲྭ་པ་གཅིག་ཤི། སྤྲུལ་སྐུ་བསྙུང་དོགས་པའི་སེམས་ཁྲལ་ཡོད་སྐབས། ཤོག་བུ་
གཅིག་ལ་ཕྱག་རྩེད་འདྲ་བ་ཡི་གེ་བྲི་བ་ལྟར་མཛད་དོ། །ད་རིམས་ངན་འདིའི་ནང་ནས་ཐུགས་དམ་ལོ་མ་ཅན་གྱི་བསྙེན་པ་འདི་མ་ཡེངས་མཛོད། ང་ནི་སྐྱག་རྩེད་མོ་དང་ཨ། ཞུས་པས་ཅི་མི་གསུངས། རྒྱང་ཙམ་ནས་ད་ཅི་ལོ་མ་གྱོན་མས་རིམས་ངན་འདི་བཟློག་པའི་མདོས་རྒྱས་པ་ཞིག་གི་དཔེ་ང་ལ་གཏད་བྱུང་བ་བྲི་བསམ་ཛ། ཁྱོད་ཀྱིས་དེ་སྐད་ཟེར་བས་ང་མ་དགའ། ད་དཔེ་ཆ་ཡང་མེད་སོང་གསུངས། ད་ངས་བཤགས་པ་བྱེད་ད་དུང་ཨེ་མི་འོང་བྱུང་ན་བྲིས་ཞུས་པས། རྒྱང་ཙམ་ནས་ཡང་གནང་བྱུང་སྟེ། ད་ཅི་དེ་ཙམ་གྱི་རྒྱས་པ་མི་གདའ་གསུངས། ང་ལ་བསྟན་ཀྱང་མ་མཐོང་། ཤོག་བུ་དཀར་པོ་ལ་ཡིག་འབྲུ་སྔོན་པོ་ཅན་རེད་གསུངས། དཔེ་རིས་དཀའ་མོ་གདའ་བ་བྲི་མ་ཚར་བས་མ་ཕྱི་ཞག་གཅིག་བཞག །ཞུ་དག་བྱས་ནས་མ་དཔེ་དེས་ང་ལ་བྱིན་བརླབས་བྱས་ཀྱང་ངས་ནི་མ་མཐོང་། དཔེ་ཆ་ལྷ་མོ་ཉིད་ཀྱིས་བསྣམས་ནས་བྱོན་ནོ། །དེ་ནས་མདོས་ཆུང་དེ་བཙས་པས་རིམས་དེ་ཆད། ས་ཕྱོགས་དེར་དེ་ལོ་རིམས་ནད་ཀྱིས་མི་མང་དུ་ཤི་ནས་བསྔོ་ཞུས་རྒྱུན་མི་ཆད་པ་འདྲ་བ་འོང་ཞིང་ཡོད་པ་ཡང་ཇེ་འཇམ་ལ་སོང་ངོ་། །གཞན་ཡང་དགེ་བསྙེན་མཁའ་རིའི་སྒྲུབ་ཐབས་ཤོག་དྲིལ་དམར་པོ་སོགས་
སྤྲུལ་པའི་ཡེ་གེ་ལས་བཤུས་པ་འགའ་ཟུང་ཙམ་སྟེ་མང་པོ་ནི་མེད་དོ། །དེ་ནས་ངོ་མཚར་དམ་རྫ་ས་གནང་ཚུལ་ནི། སྔོན་བྱུང་གི་རྣམ་ཐར། མངའ་བདག་ཉང་གི་ལྕགས་ཕུར་བྲག་ཏུ་མཁའ་འགྲོའི་བསྒྲུབས་པ་མཛད་དུས། ཌཀྐི་གཉིས་ཀྱིས་འབྲས་ཆང་བ་མན་གྱི་རྭ་ཅོ་གང་དང་། སྐྱེ་བདུན་གྱི་ག་ཆོང་ཀ་པཱ་ལའི་གང་དྲངས་བ། ཉེ་གནས་ལ་ཅུང་ཟད་གནང་བས་བདེ་སྟོང་གི་ཉམས་སྐྱེས། ཕྱག་རྒྱ་མོ་ལ་གནང་བས་མངོན་ཤེས་ཕྲའུ་ཤར་རོ། །གྲུབ་ཆེན་ཀརྨ་པ་རྡོའི་ལྷ་ཁང་དུ་བཅུག་ནས་རྒྱལ་པོས་སྲུང་མི་རྣམས་ལ་སྲུང་བཅོལ་དུས། མཁའ་འགྲོ་སྡེ་བཞིས་ཧ་ཧ་ལའི་དུར་ཁྲོད་ནས། བྲམ་ཟེའི་བུ་མོའི་ཤ་བླངས་ནས་བདུད་རྩིར་བྱིན་གྱིས་བརླབས་ནས་ཕུལ་བ་དང་། རྗེ་མི་བསྐྱོད་ཞབས་འདན་དུ་བཞུགས་དུས་མི་ཏྲ་ཛཱ་ཀི་དང་མཇལ་གསུང་གླེང་མང་དུ་བྱུང་། རྫུ་འཕྲུལ་དུ་མ་བསྟན་ནས་བྱིན་རླབས་ཀྱི་དམ་རྫས་ཀྱང་གནང་ཞེས་པ་ལྟར། གུ་རུ་པདྨ་རྒྱལ་པོ་ཞལ་གཟིགས་སྒྲུབ་ཐབས་གཅིག་བརྒྱུད་མ་གནང་། ཡང་ཕུ་ཤ་རི་རམ་ཞེས་བྱ་བའི་རིལ་བུ་དང་པོ་ལྔ་གནང་བ་དངོས་སུ་གཅིག་ལས་མི་འདུག །སྒྲུབ་པ་དུས་བདུན་ཕྲག་གཅིག་གནང་དངོས་སུ་གཅིག་ལས་མི་འདུག་སྟེ། རིལ་
བུ་སྨུག་པོ་བདུད་རྩི་རིལ་བུ་སོགས་ཡིན་ན་བཅུ་བསྡོམས་རིལ་བུ་ཙམ་འདུག་པ་དང་། ཡང་ཨོ་རྒྱན་གྱིས་གནང་བ་ཡིན་གསུངས་པའི་བུད་དྷ་རིལ་བུ་དང་བྲམ་ཤུ་རིལ་བུ་བྱ་བ་ཞིབ་པོ་རེ་མང་རེ་འདུག །ཁ་དོག་སྨུག་པོར་འདུག་སྟེ། དེ་གཉིས་ནམ་གནང་ཇི་ལྟར་གནང་ནི་མ་གསུངས་པས་ནན་གྱིས་མ་ཞུས། དེ་རྣམས་ཕན་ཡོན་ལ་སྐྱེ་བདུན་དང་མཚུངས་པར་སྣང་བས། དེ་དག་གི་རུ་རྩི་བྱས་གཞུང་ལྟར་བསྒྲུབས་ནས་མང་དུ་སྤེལ་ཏེ། གནམ་ཆོས་ཉམས་སུ་ལེན་ངེས་རྣམས་ལ་བླ་རྡོ་ལྟར་གཅེས་པར་གོ་ནས་ཅུང་ཟད་བྱིན། གནམ་ཆོས་ལུགས་ཀྱི་བུམ་སྒྲུབ་ཀྱི་རུ་རྩིས་གཙོ་བོ་བྱས་ཏེ་ཀུན་ལ་སྤེལ་བས་འགྲོ་དོན་ཆེན་པོ་འགྲུབ་བོ། །ཡང་ཆོས་ཀྱི་སྒྲ་ཐོས་ཚུལ་ནི། ཕྱག་ན་རྡོ་རྗེ་མཐའ་ཡས་ཞེས་པའི་སྒྲུབ་ཐབས་ཨ་ཏི་ཡོ་ག་ལྟར་སྒྲུབ་པ་གཅིག །སྤྲུལ་སྐུ་རང་གིས་ཐུགས་དམ་བྱེད་དགོས་རྒྱུ་གཅིག་གཟུགས་མེད་པར་རྣ་བ་ན་སྒྲ་ཐོས་པ་ཡི་གེར་བཀོད་དོ། །དེ་ལ་སོགས་པ་གཟུགས་མེད་པའི་ཆོས་སྒྲ་ཐོས་པ་འགའ་ཟུང་གཅིག་གོ །ཡང་ཐུགས་རྗེ་ཆེན་པོ་སྔོན་པོ་ཞལ་གསུམ་ཕྱག་དྲུག་པ་གཅིག་ཞལ་གཟིགས་པའི་ཕྱག་མཐིལ་ཏིང་ཤག་བསྣམས་པ་སྤྲུལ་སྐུ་ཉིད་ཀྱི་དབུ་ལ་བརྡབས་པས། ཐུགས་རྗེ་ཆེན་པོ་རྒྱལ་བ་རྒྱ་
མཚོའི་དབང་ཤིན་ཏུ་རྒྱས་པ་ཞིག་ཏིང་ཤག་གི་སྒྲ་ལས་བྱུང་བ་མང་གྲགས་པས་ཉི་མ་ལྔ་དྲུག་བྲི་ཐུབ་ཙམ་བྱུང་ངོ་། །འཇིག་རྟེན་པའི་བཀའ་སྲུང་ཐམས་ཅད་ནི་རང་རང་གི་གཟུགས་དངོས་སུ་བསྟན་ནས་རང་གི་སྒྲུབ་ཐབས་དངོས་སུ་སྨྲས་པ་ཡི་གེར་བཀོད་པ་ཤ་སྟག་ཡིན་ནོ། །དེ་ནས་སྔར་གྱི་ཆོས་རྙིང་པའི་བཀའ་བབ་ཚུལ་ནི། གནམ་ཆོས་བྱུང་ནས་ལོ་གསུམ་འགྲོ་ལ་ཁད་ཙམ་ན། སྤྲུལ་སྐུའི་ཞལ་ནས་ད་ལོ་གསུམ་སོང་ན་གནམ་ཆོས་རྫོགས་རྒྱུ་ཡིན། རྫོགས་ནས་རེ་རེ་ཨེ་སྲིད་ཙམ་ལས་མི་འབྱུང་། ཞལ་གཟིགས་ཀྱང་བརྒྱ་རེ་འགའ་ལས་མི་ཡོངས། གནམ་ཆོས་མ་རྫོགས་བར་ཆོས་གང་ཞུ་འདོད་པ་དེ་གསོལ་བ་བཏབ་ན་ཞུ་ཆོག་པ་ཡིན་པས། ཁྱོད་རང་གང་འདོད་པའི་ཆོས་ཤིག་དོམ་ཞིག །དེ་ནས་རྫོགས་པས་ཞུ་ས་མེད་དོ་གསུངས། དེ་ནས་བདག་གིས་ལེགས་པར་བསམས་པས། གནམ་ཆོས་གསར་པ་ནི་ཆོག་བྱུང་། རྙིང་མའི་ཡང་རཏྟའི་བཀའ་བབ་ནི་བྱུང་། རྙིང་མ་གཞན་མང་པོ་ཞུས་ན་གཏེར་གསར་པ་འོང་རྒྱུའི་རྟེན་འབྲེལ་ལ་ཨེ་གནོད། གསར་མའི་ཆོས་བདག་ཁོང་མིན་པས་མི་འོས། མི་ཏྲ་ཛཱ་ཀི་ནི་ཨོ་རྒྱན་གྱི་བླ་མ་རེད། མི་ཏྲའི་གསང་སྒྲུབ་སེམས་ཉིད་ངལ་གསོ་
རྣམས་སངས་རྒྱས་གླིང་པའི་གཏེར་ནས་ཀྱང་བྱོན་པས་རྙིང་མར་ཡང་ཐེའོ། །མི་ཏྲ་ཁྲིད་དྲུག་ལ་བརྒྱུད་པ་ཉེ་བརྒྱུད་ཡང་འབྱུང་བའི་སྲོལ་གདལ། ཁོང་ཨོ་རྒྱན་དང་འདྲ་འཇའ་ལུས་ཡིན་པས་གསོལ་བ་བཏབ་ན་མཇལ་འོས། ད་མི་ཏྲ་ཛཱ་ཀི་ལ་ཐུགས་རྩེ་གཅིག་པས་གསོལ་བ་ཐོབ་ལ། ཞལ་གཟིགས་བྱུང་ན་ཁྲིད་དྲུག་དང་གསང་སྒྲུབ་སེམས་ཉིད་ངལ་གསོ་རྣམས་གནང་བ་ཨེ་འཐད་ཞུས་ཞེས་སྨྲས་སོ། །དེ་ནས་ཡུན་རིང་གསོལ་བ་བཏབ་སོང་། ངས་ཀྱང་གསོལ་འདེབས་མཎྜལ་ཕུལ་བས། མི་ཏྲ་ཞལ་གཟིགས་ནས་མི་ཏྲའི་བླ་སྒྲུབ་གསར་པ་གཅིག་གནང་། མི་ཏྲའི་འདྲ་སྐུ་ཡང་བྲི་བར་མཛད་ནས། ད་འོང་བ་ཡོད་ཀྱིས་སང་ཙམ་ལ་ཚོགས་འཁོར་ཤོམས། སོ་སོའི་དཀྱིལ་འཁོར་དབང་ཆས་བསྒྲིགས། དཔེ་རྣམས་མ་བསྲེ་སོ་སོར་ཞོག་གསུངས། དེ་ནས་མི་ཏྲ་བྱོན་ནས། མི་ཏྲ་དཀར་སེར་དམར་ལྗང་སྐུ་ཤིན་ཏུ་མང་བར་སྤྲུལ་ཏེ། ལ་ལས་སོ་སོའི་དབང་། ལ་ལས་སྒྲུབ་ཐབས་སོ་སོའི་ལུང་། ལ་ལས་ཁྲིད་སོ་སོའི་ལུང་གནང་སྟེ། ཁྲིད་དྲུག་དབང་དྲུག་སྒྲུབ་ཐབས་དྲུག་བཀའ་སྲུང་དང་བཅས་པ། གསང་སྒྲུབ་ལས་ཚོགས་དང་བཅས་པ། སེམས་ཉིད་ངལ་གསོ་དང་བཅས་པ་གནང་ནས་སྤྲུལ་
པ་རྣམས་གཅིག་ལ་གཅིག་ཐིམ་ནས། ཞལ་གདམས་བཀའ་རྒྱ་ལུང་བསྟན་དང་བཅས་པ། མང་དུ་སྤེལ་ནས་བཀའ་རྒྱ་བཀྲོལ་ལུགས་དང་བཅས་པ་གསུངས་ནས་མི་སྣང་བར་གཤེགས་སོ། །དེ་ནས་དེ་དག་གི་གཏེར་བསྒྲུབ་བྱས་ལུགས་ནི། དང་པོ་སྔར་གནམ་ཆོས་བྱུང་སྐབས་སྒྲུབ་ཁང་གི་ཕྱོགས་མཚམས་སུ་འཁོར་ལོ་དང་ཙཀ་ལི་བཀྲམ་ནས་སྔགས་ཞིག་ལ་ཞག་འགའ་བསྙེན་དགོས་པ་དང་། གུ་རུ་མཚན་བརྒྱད་གོ་མཚོན་ཅན་གྱི་ཙཀ་ལི་ཚོན་རྫོགས་སུ་བཞེངས་པ་རྒྱབ་ཡིག་སྔགས་བཅས་སྒྲུབ་རྟེན་དུ་བྱས་ཏེ། དེའི་ལས་བྱང་སྔགས་དང་བཅས་པ་བདུན་གཉིས་ཙམ་བསྒྲུབས་ནས། བསྒྲུབས་ཚར་ནས་སྒྲུབ་རྟེན་གཏེར་དུ་སྦས། སྒྲུབ་ཡིག་མི་སྣང་བར་བྱེད་དགོས་པ་དང་། དཀྱིལ་ཙམ་ལ་བློ་ལྡན་མཆོག་སྲེད་སྒྲུབ་པ་སྤྲུལ་སྐུ་ཉིད་མ་གཏོགས་སྒྲུབ་རོགས་མི་ཚུད་པ་དང་། བླ་མ་རྡོ་རྗེ་ཆེན་པོ་ཞེས་ཨོ་རྒྱན་ཞལ་གསུམ་ཕྱག་དྲུག་གི་སྒྲུབ་པ་ངེད་གཉིས་ཀས་བསྒྲུབ་དགོས་པ་དང་། ཕྱག་རྡོར་མཐའ་ཡས་ཀྱི་སྒྲུབ་པ་སྤྲུལ་སྐུ་ཉིད་ཁོ་ནས་དགོས་པ། བློ་ལྡན་མཆོག་སྲེད་ཀྱི་སྒྲུབ་པ་ཞིག་བདག་གཏེར་གཡོག་པས་སྒྲུབ་དགོས་སོགས། རྟེན་འབྲེལ་སྣ་ཚོགས་བསྒྲིགས་དགོས་དོ་བ་ཐམས་ཅད་བདག་
བརྩོན་འགྲུས་ཆེ་བའི་སྟབས་ཁོ་ནས་ཐམས་ཅད་འགྲུབ། གཞན་སུས་ཀྱང་འཁྱོང་བ་མི་འདུག་གོ་ཨང་། ངའི་བརྩོན་འགྲུས་དང་དཀའ་ལས་དེ་ཨོ་རྒྱན་རིན་པོ་ཆེས་མཁྱེན། གཞན་ཡང་གལ་ཆེ་རིམ་སྒྲུབ་ཐབས་བྱུང་རིམ་ནས་ངེད་གཉིས་ཀས་བསྒྲུབས། གལ་ཆུང་བ་འགའ་རེ་སྤྲུལ་སྐུ་ད་ངས་མི་འཁྱོང་ཁྱོད་ཀྱི་གྱིས་དང་འདྲ་གསུངས་པས་ངས་བྱས། གལ་ཆེ་རིམ་སྒྲུབ་པ་ཞག་མ་བདུན་ཙམ་ཐེམ་པར་བྱས། བཀའ་སྲུང་འཇིག་རྟེན་པ་ནི་མ་བསྒྲུབས། གཏོར་མ་རེ་འབུལ་ཙམ་བྱས། གལ་ཆེ་བའི་རྫོགས་ཆེན་གྱི་ཁྲིད་དེ་ཐུགས་རྗེ་ཆེན་པོ་ཁྲིད་ཀྱི་ཚུལ་དུ་ཞག་གསུམ་རེའི་སོ་ཙམ་ལ་དམིགས་ཐུན་རེ་རེ་གནང་དོ་བས། ཡི་གེར་བཀོད་ཞོར་ཞུས་ནས་ཐུན་རེ་བསྒོམས་ཏེ་ཁྲིད་གོ་ཆོད་པར་བྱས། གཏུམ་མོ་དེ་ཡང་ཅུང་རེ་བསྒོམས་པས་ཀྱང་དྲོད་དངོས་སུ་འཕྲལ་དུ་སྐྱེ་བར་བྱུང་བས་ངེས་ཤེས་ཐོབ་བོ། །དེ་ནས་གནམ་ཆོས་ཡོངས་སུ་རྫོགས་ནས་ཞལ་གཟིགས་ཀྱང་མ་བྱུང་བ་དང་། རཏྣའི་གཏེར་འབྱུང་ནས་གསུངས་པ་ལྟར་གནམ་ཆོས་ཀྱི་དཔེ་ཚང་མ་དར་རས་སུ་སྒྲིལ་ཏེ་སྒམ་དུ་བཅུག་ནས། བསྐོར་བ་བརྒྱ་རྩ་ཕྱག་བརྒྱ་རྩ་མཎྜལ་བརྒྱ་རྩ་དང་། བསྐང་བ་ཉུང་འདུས་བརྒྱ་རྩ། ཚོགས་འཁོར་རྒྱས་པ་སོགས་རབ་གནས་
མངའ་འབུལ་བྱས་སོ། །བདག་གི་ནི་བྱུང་རིམ་ནས་ཞུས་ཤིང་མཉམ་དུ་སྒྲུབ་མེད། གཟའ་སྐར་བཟང་བ་ལ་པདྨ་རིག་འཛིན་སོགས་ངེད་གསུམ་ཙམ་ལ་ཐུགས་རྗེ་ཆེན་པོའི་དཀྱིལ་འཁོར་གསར་པ་ཞིག་ཞལ་ཕྱེས་ནས་ཆོས་སྒོ་ཐོག་མར་ཕྱེས་ནས་དབང་གནང་སྐབས། དབང་ཚར་མ་ཐག་སྤྲུལ་སྐུ་ཐུགས་ཡེང་བ་འདྲ་ཞིག་ལ་སྤྱན་ཟིམ་མེ་ཡུན་རིང་བཞུགས། དབང་ཞུ་བ་གྲོལ་ནས་སྐུ་བསྙུང་ངམ་ཅི་ཡང་མི་གསུང་བར་ཐོམ་མེ་ཞུས་པས། ད་ལྟ་བྲག་སྟེང་ཞིག་ཏུ་གདའ་སྙམ་པ་ལ་མ་ནིང་དང་གཏེར་མགོན་དམ་ཅན་ལྷ་འདྲེ་བསམ་ལས་འདས་པ་ཚོགས་ནས་ང་ལ་བལྟ་ཞིང་དགོད་དོ། །ང་ལ་འཕྱའམ་སྨྲས་པས། འཕྱ་བ་མ་ཡིན་དགའ་བ་ཡིན།། སངས་རྒྱས་བསྟན་པ་དར་བས་དགའ། ཞེས་སོགས་ལེགས་སོ་དང་། ཡབ་འདས་པའི་སེམས་གསོ་འདྲ་བའི་ཚིགས་བཅད་སྨྲས། སོ་སོའི་སྲོག་སྙིང་ཐམས་ཅད་དུས་གཅིག་ལ་ཕུལ་གནམ་ཆོས་ཀྱི་བསྟན་པ་བསྲུང་བར་ཁས་བླངས་ནས་མི་སྣང་བར་སོང་གསུངས། སྲོག་སྔགས་ཐམས་ཅད་ཐུགས་ལ་འདུག་ནའང་། མང་གྲགས་པས་བྲི་མོས་མ་བྱུང་། སྔར་ནས་ཡོངས་གྲགས་རྣམས་སྔར་དང་འདྲ་དོ་བསམ་བྲིས། ལྷ་འདྲེ་ངོ་མི་ཤེས་པ་མང་པོས་སྲོག་
སྔགས་བྲིས་ཀྱང་སུ་ཡིན་མི་ཤེས། ཉེ་སྐོར་གྱི་གཞི་བདག་ངོ་ཤེས་པ་རྣམས་ཀྱི་སྲོག་སྔགས་ཡི་གེར་བཀོད་དོ། །དེ་ཕྱིར་སྤྲུལ་སྐུ་ཉིད་དང་བདག་གཉིས་ཀྱི་ནི་ཐུགས་དམ་རྒྱུན་དུ་གནམ་ཆོས། སྣ་ཁ་འགའ་ཟུང་ཆག་མེད་དང་། མཚམས་དུས་ཕལ་ཆེར་གནམ་ཆོས་ཉམས་ལེན་བྱེད་པའོ། །འོ་ན་དེ་ཡན་གྱི་གནམ་ཆོས་ལ་ཚན་ཅི་ཙམ་ཞེ་ན་ཐམས་ཅད་བསྡོམས་པས་པོད་ཆུང་བཅུ་གསུམ་བྱུང་ངོ་། །འོ་ན་ཞལ་གཟིགས་དག་སྣང་གི་ཆོས་ལ་སྙན་བརྒྱུད་དུ་སྔར་ནས་གྲགས་འདུག །གནམ་ཆོས་དང་གཏེར་དུ་མིང་བཏགས་པ་ཅི་ཞེ་ན། དེ་ནི་གནམ་ཆོས་གཞུང་ལས། གནམ་ཆོས་ཐུགས་གཏེར་སྙན་བརྒྱུད་ཟེར། །ཆེ་ཆུང་མེད་པར་ཆོས་ཚན་རེ། །གཏེར་ཁ་རེ་ལ་གཏོགས་པའོ། །ཞེས་གསུངས་སོ། །དེ་ལྟར་གནམ་ཆོས་བརྒྱ་རྩའི་གཏེར་འབྱུང་ལེགས་པར་བཤད་ཟིན་ཏོ། ༈ །ན་མོ་གུ་རུ་པདྨ་དྷེ་ཝ་དྷཱ་ཀི་ནཱི་ཙིཏྟ་སིདྡྷི་ཕ་ལ་ཧཱུྃ། སྤྲུལ་སྐུ་མི་འགྱུར་རྡོ་རྗེས་དགོངས་གཏེར་ཐུགས་ཀྱི་ཀློང་རྡོལ་ཇི་ལྟར་བྱུང་བའི་གཏེར་འབྱུང་ལ་ཡང་། མདོ་རྒྱུད་ཀྱི་ལུང་། སྔོན་གྱི་རྣམ་ཐར། ད་ལྟ་བྱུང་ཚུལ་ལོ། །དང་པོ་ནི་ཆོས་ཡང་དག་པར་སྡུད་པའི་མདོ་ལས། བྱང་ཆུབ་སེམས་དཔའི་བསམ་པ་དག་
པ་ལ་ལ་ནི། རང་གི་ཡིད་ཀྱི་སྤྱོད་པ་ཉིད་ལ་གདམས་ངག་རྗེས་སུ་བསྟན་པ་ཐམས་ཅད་འབྱུང་ངོ་། །ཞེས་པའི་མདོ་ཚིག་འདིས་གསལ་ལོ། །གཞན་ཡང་མདོ་ལས། །དོན་ལ་ངེས་པའི་གདེང་རྙེད་ནས། །སེམས་ལ་ཆོས་གཏེར་འབུམ་ཕྲག་རྡོལ། །ཞེས་གསུངས་སོ། །དེར་མ་ཟད་མདོ་དང་རྒྱུད་ཐམས་ཅད་དགོངས་གཏེར་ཁོ་ན་ཡིན་ཏེ། མདོ་ལས། བཅོམ་ལྡན་འདས་ཀྱིས་བཀའ་བསྩལ་པ། འཇམ་དཔལ་འབྱུང་བ་ཆེན་པོ་བཞིན་ནམ་མཁའི་གཏེར་ནས་འབྱུང་གི །དེ་བཞིན་དུ་ཆོས་ཐམས་ཅད་རྒྱལ་བའི་ཐུགས་གཏེར་ལས་འབྱུང་བས་གཏེར་གྱི་དོན་ལ་ལོངས་སྤྱོད་ཤེས་པར་བྱོས་ཤིག །ཅེས་གསུངས་སོ། །ཐུགས་རྒྱུད་བྱིན་གྱིས་བརླབས་པས་དགོངས་གཏེར་ཐུགས་ཀྱི་ཀློང་ནས་རྡོལ་བའི་མདོ་ལུང་ནི། ཆུ་ཀླུང་རོལ་པའི་མདོ་ལས། ང་ཡི་བསྟན་པའི་ཆོས་ཀྱི་གཞུང་། །ཐུགས་ནས་ཐུགས་ཀྱི་གཏེར་དུ་སྦོས། །ཞེས་གསུངས་སོ། །དགོངས་གཏེར་ཐུགས་ཀྱི་དཀྱིལ་འཁོར་དུ་མངའ་བ་ནི་ཁྱད་པར་དུ་འཕགས་པ་སྟེ། ཡེ་ཤེས་གསང་བའི་རྒྱུད་ལས། སུ་ཞིག་ཐུགས་ཀྱི་དཀྱིལ་འཁོར་དུ། །གཏེར་དང་ལྡན་ནི་ཁྱད་པར་ཆེ། །ཞེས་གསུངས་སོ། །དགོངས་གཏེར་ལ་ཆོས་
སྒོ་དཔག་ཏུ་མེད་པ་འབྱུང་བའི་ལུང་། ལུང་སྐོར་དགུ་པའི་ལེའུ་བརྒྱད་པ་ལས། བདེར་གཤེགས་རྒྱལ་བའི་དགོངས་གཏེར་འབྱུང་། །ཆོས་སྒོ་མཐའ་ཡས་བསྟན་པ་རྒྱས། །ཞེས་གསུངས་སོ། །དེ་བཞིན་དུ་གསང་བ་སྙིང་པོའི་རྒྱུད་ལས། ཁོག་ནས་གབ་པ་དོན་འབྱིན་པ། །སྟོན་པ་རྡོ་རྗེའི་ཐུགས་ལ་གནས། །ཞེས་གསུངས་སོ། །འོ་ན་དགོངས་གཏེར་ལ་ལུང་ལེན་པ་ནི་འཐད་ཀྱི། དབང་ནི་སུས་བསྐུར་བ་མེད་པས་མི་འཐད་དོ་ཞེ་ན། གཏེར་ལུང་ཆེན་པོ་ལས། ཆོས་སྐུ་ཀུན་ཏུ་བཟང་པོ་ལ། །བླ་མ་བྱ་བ་ཡོད་མིན་ཏེ། །དབང་སྐུར་ཆོས་བཤད་བྱེད་མཁན་མེད།། །རང་རིག་ཆོས་སྐུའི་གཏེར་རྙེད་པ། །དུས་གསུམ་རྒྱལ་བའི་དབང་ལུང་ཐོབ། །བརྒྱུད་པ་འཛིན་པར་རྟོགས་པ་ཡིན། །ཞེས་དང་། རྒྱལ་བའི་གཏེར་ལུང་ལས། རྒྱལ་བ་དགོངས་པ་གཉིས་ཀྱི་ཚུལ། །དགོངས་པ་བབ་པ་དབང་གི་མཆོག །ཅེས་དང་། གང་གི་བྱིན་རླབས་ཞུགས་པ་དེ། །དབང་གི་དམ་པ་མཆོག་ཏུ་དབང་། །ཞེས་གསུངས་སོ། །འོ་ན་དགོངས་གཏེར་འདི་དག་མདོ་རྒྱུད་བསྟན་བཅོས་གང་གི་ནང་དུ་གཏོགས་ཞེ་ན། འདི་ནི་ངེས་པར་རྒྱུད་ཀྱི་གྲངས་སུ་གཏོགས་པ་ཡིན་ཏེ། རྗེ་མི་བསྐྱོད་ཞབས་
ཀྱིས་བསྩལ་བའི་བསྟན་ཆོས་དྲང་པོའི་ས་བོན་ཞེས་བྱ་བ་ལས་འདི་སྐད་གསུངས། གསང་སྔགས་རྙིང་མའི་རྒྱུད་རྣམས་བོད་ཀྱི་ཕ་ཇོ་ཅི་རིགས་ཀྱི་བརྩམས་པས་རྒྱུད་རྣམ་དག་མ་ཡིན་ནོ། །ཞེས་པ་འདི་ཁྱེད་ཅག་ཏུ་མ་ཟད། གངས་ཅན་གྱི་ཁྲོད་འདིར་དེ་སྐད་ཟེར་བ་ཤིན་ཏུ་མང་བར་གདའ་ནའང་། དེ་ལྟར་མཐའ་གཅིག་ཏུ་སྨྲ་བར་མི་ནུས་ཏེ། འཛམ་བུའི་གླིང་འདིའི་ཏི་སེ་དང་། དེ་ཝི་ཀོ་ཏྲ་ལྟ་བུའི་གནས་ཆེན་པོ་སོ་བདུན་སོགས་དམིགས་བསལ་བ་རྣམས་དང་། དུས་ཀྱི་འཁོར་ལོ་ལས་གླིང་བཞི་གླིང་ཕྲན་སོགས་འདོད་ཁམས་ཀྱི་གནས་ཕལ་ཆེར་གནས་ཆེན་དུ་བྱས་ནས། དེ་དག་ཏུ་རང་བཞིན་གྱི་དཔའ་བོ་དང་རྣལ་འབྱོར་མ། ས་ལ་གནས་པ་ཐ་མལ་པའི་གཟུགས་སུ་བསྒྱུར་ཏེ། སྐལ་པ་དང་ལྡན་པ་རྣམས་ལ་དབང་བསྐུར་ཞིང་བྱིན་གྱིས་བརླབས་ནས། རྒྱུད་འཆད་པ་ལ་སོགས་པ་ཡོད་པར་གསུངས་པ་རྣམས་ཀྱང་། བཅོམ་ལྡན་འདས་ཀྱི་རྒྱུད་དུ་འཇོགས་པ་ལྟ་བུ་འདིར། རང་བཞིན་གྱི་གྲུབ་པའི་དཔའ་བོ་དང་རྣལ་འབྱོར་མ། བོད་ཀྱི་ཕ་ཇོ་སྤང་སྨད་ཀྱི་ཚུལ་བཟུང་བ་ལ། སངས་རྒྱས་ཀྱི་བྱིན་གྱིས་བརླབས་ཏེ་རྒྱུད་གསུངས་པ་ལ་ཡང་བཀག་པ་མེད་པས། དེ་ལྟ་བུའི་རྒྱུད་ལ་རྒྱུད་
མ་ཡིན་པར་སུ་ཞིག་གིས་བསྒྲུབ་པར་ནུས། དཔེར་ན་བཀའ་གདམས་ཀྱི་ལོ་རྒྱུས་སུ། ཇོ་བོ་ཡེར་པ་ན་བཞུགས་པའི་ཚེ། ཁྱིམ་བདག་ཕོ་མོ་མང་པོ་མཇལ་དུ་བྱུང་བའི་ཁྲོད་ན། བཙས་མ་ཐག་པའི་བུ་མོ་སྨྲ་མི་ཤེས་པ་ཞིག་དང་། ཇོ་བོས་སཾ་སྐྲྀ་ཏའི་གསུང་གླེང་མང་དུ་མཛད་པས། འབྲོམ་སྟོན་པས་ཇི་ལྟར་ལགས་ཞེས་ཞུས་པས། བཅོམ་ལྡན་འདས་ཀྱི་རྒྱུད་འདོན་པར་མཆི་གསུངས། འབྲོམ་གྱིས་བུ་མོ་ལ་འཕྲོས་བྱས་པས། ཅང་མི་ཟེར་བ་ལ། ཇོ་བོས་འདི་རང་བཞིན་གྱི་རྣལ་འབྱོར་མའི་རིགས་སུ་གདོའ་གསུངས། ནག་ཚོས། བུ་མོའི་ཇོ་བོ་ངོ་ཤེས་པས། འབྲོམ་ངོ་མི་ཤེས་པ་ཅི་ལགས་ཞུས་པས།། རྣལ་འབྱོར་པས་རྣལ་འབྱོར་པ་ཕན་ཚུན་ངོ་ཤེས་ཀྱིས། རྣལ་འབྱོར་མིན་པས་ག་ལ་ཤེས་གསུངས་པ་ལྟ་བུ་སྟེ། དེ་ལྟར་ན་རང་བཞིན་གྱི་གྲུབ་པའི་དཔའ་བོ་དང་རྣལ་འབྱོར་མས་རྒྱུད་འཆད་པ་ན་ཡང་། དཔའ་བོ་དང་རྣལ་འབྱོར་མ་དག་དང་སྐལ་བ་མཉམ་པའི་རྣལ་འབྱོར་ཅན་དག་གིས་ཤེས་ནུས་ཀྱི། དེ་ལས་སྐལ་བ་མི་མཉམ་པའི། རྟོག་གེ་པ་ཚིག་འབྲུ་ཙམ་ལ་མངོན་པའི་ང་རྒྱལ་བྱེད་པ་དག་གིས་ག་ལ་ཤེས། ཞེས་གསུངས་པའི་ཕྱིར་དགོངས་གཏེར་རྣམས་རྒྱུད་དུ་ངེས་སོ། །
འོ་ན་སྤྲུལ་སྐུ་མི་འགྱུར་རྡོ་རྗེའི་རྒྱུད་འཆད་ནུས་པའི་རང་བཞིན་གྱི་རྣལ་འབྱོར་པ་ཡིན་པ་ཅིའི་ཕྱིར་ཞེ་ན། བཀའ་ཐང་སྡེ་ལྔ་ལས། ཤཱཀྱའི་ཞིང་ཁམས་མདོ་ཁམས་ཞེས་པ་ན། །གསང་སྔགས་ཐེག་ཆེན་སྤྱོད་པའི་རྣལ་འབྱོར་པ། །སྔགས་ཀྱི་བདག་པོ་རྡོ་རྗེ་གྲགས་པ་འབྱུང་། །དེ་ནས་འཕོས་ནས་སྤྱོད་པ་བརླབས་ཆེན་མཛད། །སྟོང་གསུམ་འཇིག་རྟེན་འདི་ཡི་བྱང་ཕྱོགས་སུ། །ཞིང་ཁམས་རྣམ་དག་ཙནྡན་ནགས་ཞེས་པར། །དེ་བཞིན་གཤེགས་པ་སྐྱེས་བུ་ཁ་ལོ་སྒྱུར། །བླ་མེད་སྟོན་པ་སུམ་སྟོང་འདུས་པ་སྐྱོང་། །རྒྱལ་བ་ཡེ་ཤེས་ཀུན་བཟང་ཞེས་པ་འབྱུང་། །ཞེས་ལུང་བསྟན་པ་སྟེ། མ་འོངས་པའི་སངས་རྒྱས་རྒྱལ་བ་ཡེ་ཤེས་ཀུན་ཏུ་བཟང་། ད་ལྟ་མི་འགྱུར་རྡོ་རྗེ། འཁྲུངས་ས་ཡང་མདོ་ཁམས་ཟལ་མོ་སྒང་གི་ཉེ་ལོགས། གསང་སྔགས་རྫོགས་པ་ཆེན་པོའི་རྣལ་འབྱོར་པ། གསང་སྔགས་རིག་སྔགས་ཀུན་གྱི་བདག་པོ་དཔལ་ཕྱག་ན་རྡོ་རྗེའི་སྤྲུལ་པའི་ཆའམ། བྱིན་གྱིས་བརླབས་པ་ཡིན་པས། །དགོངས་གཏེར་སྔར་ས་སྟེང་དུ་མ་གྲགས་པའི་གསང་སྔགས་དང་རིག་སྔགས་གཟུངས་སྔགས་དབང་ལུང་མན་ངག་མང་པོའི་དགོངས་གཏེར་ཐུགས་ཀྱི་ཀློང་ནས་བརྡོལ་བ་ལགས་སོ། །འོ་ན་
དེ་ལྟ་བུའི་དགོངས་གཏེར་རྒྱ་བོད་རིག་འཛིན་སུ་ལ་བྱུང་ཞེ་ན། དང་པོ་བྲམ་ཟེ་ས་ར་ཧ་ལ་རྡོ་རྗེ་ཕག་མོས་བྱིན་གྱིས་བརླབས། ཕྱག་ན་རྡོ་རྗེས་དབང་བསྐུར། བྱང་ཆུབ་སེམས་དཔའ་བློ་གྲོས་རིན་ཆེན་ནམ་བདེ་བའི་མགོན་པོར་ཡེ་ཤེས་ངོ་སྤྱད་པ་ལ་བསྟེན་ནས། དོ་ཧ་སྐོར་གསུམ་དགོངས་གཏེར་བརྡོལ་ཏེ་དོ་ཧ་སྐོར་གསུམ་མདོ་རྒྱུད་ལ་བརྟེན་པའི་བསྟན་བཅོས་མ་ཡིན་ཏེ། དོ་ཧའི་གཞུང་ལས། འདི་ལྟར་རྟོགས་ནས་མདའ་བསྣུན་གླུ་ལེན་ཏེ། །མདོ་དང་རྒྱུད་ན་གཅིག་ཀྱང་མ་མཐོང་ངོ་། །ཞེས་གསུངས་སོ། །བོད་དུ་ཀློང་ཆེན་རབ་འབྱམས་པ་བི་མ་ལ་དང་། རེ་མ་ཏིའི་བྱིན་གྱིས་བརླབས་པས། དགོངས་གཏེར་བརྡོལ་བ་ཡི་གེར་བཀོད་པ་རིན་ཆེན་ཤོག་འདྲ་ཞེས་པ་ཚན་ཆེན་ཡོད་པར་སྣང་སྟེ། འགའ་རེ་མཐོང་བ་བསྟན་བཅོས་དང་ས་གཏེར་གང་ཡང་མ་ལགས། དྲི་མེད་འོད་ཟེར་གྱིས་བྲིས་ཟེར་བ་འདུག །མཛོད་བདུན་ནི་དགོངས་གཏེར་ཡིན་པར་གྲགས་ཀྱང་མ་ཡིན་ཏེ། རྒྱུད་བཅུ་བདུན་གྱི་རྒྱས་བཤད་བརྩམས་ཆོས་སུ་སྣང་། བི་མ་ལའི་སྙིང་ཐིག་དབང་ལུང་རྒྱུན་སྔར་གྱི་དེ་རེད་ཀྱང་དེའི་ཁྲིད་སྐོར་སོགས་ཕལ་ཆེར་དགོངས་གཏེར་དུ་འདུག །ཁོང་རང་གི་བརྩམས་ཆོས་དང་དགོངས་གཏེར་ཐམས་
ཅད་གླེགས་བམ་མང་པོ་ཡོད་པ། སྒྲུབ་གནས་གངས་རི་ཐོད་དཀར་གྱི་སྒྲུབ་ཕུག་ཏུ་བཞག་ནས་མ་གཟའ་དམ་གསུམ་ལ་གཉེར་གཏད་པས། ད་ལྟ་ཡང་ཀུན་གྱི་ལྟ་བ་དང་བྲི་དབང་ནི་ཡོད། ཁྱེར་དབང་མེད་པར་དེ་ལྟ་ཡང་ཡོད་སྐད། ཁོང་གིས་ལྷ་ལྕམ་པདྨ་གསལ་གྱི་རྒྱན་ཆ་གཏེར་ནས་སྟོན་པ་ཡང་ཕར་སྦས། གཞན་ས་གཏེར་དང་གནས་སྒོ་དང་གནམ་ཆོས་གང་ཡང་མ་བཏོན་མོད་ཀྱི། གཏེར་སྟོན་དྲི་མེད་སྡེ་ལྔའི་གྲར་བརྩི། པདྨ་བཀའ་ཐང་འགའ་ཞིག་ནས་གཏེར་སྟོན་ཡིན་པར་ལུང་བསྟན། ད་ལྟ་རྫོགས་ཆེན་པ་ཕལ་ཆེར་གཏེར་གཞུང་ལས་ཀྱང་ཁོང་གི་གསུང་རྩིས་སུ་བྱེད། སྦ་ཁ་སྤྲུལ་སྐུས་ལོ་གསུམ་ཙམ་རྫོགས་ཆེན་གྱི་ཁྲིད་ཞུས་ཀྱང་། བོགས་ཐོན་པ་དང་རྟགས་རྟེན་འབྲེལ་ཀློང་ཆེན་པའི་དགོངས་གཏེར་བི་མའི་བླ་སྒྲུབ་དེ་ལས་ལྷག་མ་བྱུང་གསུངས་སྐད་དོ། །རྗེ་མི་བསྐྱོད་རྡོ་རྗེས་བདེ་མཆོག་ཏུ་བསྒོམ་པའི་རྩ་གསུམ་དུ་གདན་ས་གསུམ་གྱི་དགོན་པར་བསྒོམས། དེ་གསུམ་གྱི་དབུས་སུ་དུས་མཁྱེན་པཀྴི་སངས་རྒྱས་མཉན་པ་གསུམ་བསྒོམ་པའི་སྒྲུབ་ཐབས་དང་། ཕྱག་བཞི་པའི་ཕྱག་དང་པོ་གཉིས་ཀྱིས་དུས་གསུམ་གྱི་སངས་རྒྱས་ཀྱིས་མཚོན་པའི་མཆོད་རྟེན་སྤྱི་བོར་ཁུར་བ་སོགས་སྒྲུབ་
ཐབས་ཟབ་ཆོས་མང་དུ་བཀའ་འབུམ་དུ་བཀོད་པར་མཛད། གཞན་ཡང་གུ་རུ་མཚན་བརྒྱད། ཞང་སྐུ་བརྒྱད། ཀརྨ་པ་རབ་བརྒྱད་དབྱེར་མེད་བསྒྲུབ་པ་དང་། སངས་རྒྱས་མཉན་པ་གཅེར་བུ་སྤུན་གསུམ་གླང་ཆེན་གྱི་ཀོ་རློན་གསོལ་ཞིང་མི་རྩིབ་ཀྱིས་བྷནྡཱའི་ཀླད་པ་དཀྲུག་ཅིང་གསོལ་བའི་བླ་སྒྲུབ་སོགས་དེ་དག །མདོ་རྒྱུད་ནས་ག་ལ་གསུངས། ལུང་བསྟན་ཟེར་བ་ནི་མི་སྣང་ན་དགོངས་གཏེར་དུ་ངེས་སོ། །སྔོན་མངའ་བདག་ཉང་གི་དམིགས་ཉོབ་མར་གྲགས་པའི་སྔགས་དང་ལས་ཚོགས་མཐའ་ཡས་པ་དང་། པདྨ་གླིང་པ་བསྙུང་དུས་མཛད་པའི་གདོན་ཁྲོལ་སོགས་གདམས་པ་ཕྲན་བུ་དེ་དག་ཀྱང་། ས་གཏེར་ནས་མ་བྱུང་བརྩམས་ཆོས་མ་ལགས་དགོངས་གཏེར་རོ། །འཇའ་ཚོན་སྙིང་པོས་ལར་ཁོ་བོ་དང་ཤོག་སེར་གཉིས་ལས་ཁྱད་ཆེན་པོ་ཡོད་པ་མིན། བ་དང་འོ་མ་ལྟ་བུ་ཡིན་གསུངས་པས། ས་ཆོས་གནམ་ཆོས་དགོངས་གཏེར་གསུམ་དོན་ལ་ཁྱད་མེད་པའོ། །དེ་ལྟར་སྔོན་གྱི་ལོ་རྒྱུས་སོང་ནས། ད་མི་འགྱུར་རྡོ་རྗེ་ལ་ཇི་ལྟར་བྱུང་བ་ནི། བདག་ན་དུས་སོགས་རྟེན་འབྲེལ་འགའ་རེ་མཛད་པས་ཕན་ཀྱང་རང་ཁ་ཡིན་སྙམ། པདྨ་བཀའ་ཐང་སྡེ་ལྔའི་ལྷ་འདྲེ་བཀའ་ཐང་ནས། དུས་སྙིགས་མ་ལ་ལྷ་སྲིན་
སྡེ་བརྒྱད་ཁེངས་ལོག་འབྱུང་ཚུལ་དང་དེས་སེམས་ཅན་ལ་ནད་མུག་མཚོན་གསུམ་འབྱུང་ཚུལ་གསལ་བར་ལུང་བསྟན་འདུག་ཅིང་། དེ་ཡི་བཅོས་ཐབས་ཀྱི་བཅའ་ཚོགས་བརྡ་ཙམ་གཅིག་ལས་མི་གསལ་ལོ། །གཏེར་ཁ་རྣམས་ནས་བྱུང་རབས་ཀྱང་མ་ཐོས། འདི་བཅོས་ཐབས་ཤིག་གལ་ཆེ་བར་གདའ་ཞུས་བས། དེ་ང་ལ་ཡོད་གསུངས་ནས། སྡེ་བརྒྱད་སོ་སོའི་བཅོས་མདོས་ཆུང་བརྒྱད། སྤྱིའི་བཅོས་མདོས་ཆེན་གཅིག་དང་དགུ་བྲི་བར་མཛད། འདི་སུས་གསུངས་ཞུས་པ་སུས་མ་གསུངས་ཀྱང་ང་རང་གི་ཡིད་ལ་གསལ་ལོ་གསུངས། གཞན་ཡང་དབང་ཕྱུག་མདུང་འཛིན་གཡུ་སྒྲོན་མ་སོགས་ལས་ཚོགས་མང་དུ་བཀོད། ད་འདིའི་མུར་གདམས་ངག་ཟད་མེད་བྲི་རྒྱུ་ཡོད་དེ་མི་ཁོམས་གསུངས། སྐུ་མཚམས་ཡང་གྲོལ་ནས་གཞན་རྐྱེན་ལ་བསྟེན་ནས་ཞང་པོའི་ཡུལ་དུ་ཐེགས། འདི་སྐབས་ནས་ས་གཏེར་གྱི་ཡ་གྱལ་གནས་སྒོ་ཕྱེས་རབས་ནི་ཕྱིའི་རྣམ་ཐར་ལས་གསལ་ལོ། །དེ་ནས་བདག་དང་ཡང་ལོ་རེ་ལན་གཅིག་གཉིས་ཞག་འགའ་ཟུང་ལས་མཉམ་དུ་བཞུགས་རྒྱུ་མ་བྱུང་། །ཅུང་ཟད་ནམ་མཇལ་གདམས་ངག་གི་འཕྲོ་ཞུས། དྲུང་ཡིག་པ་ཡང་དག་ལ་ཁྱེད་ཆོས་བདག་ཀྱང་ཡིན་པས་ཞུ་རུང་།
འདི་འཕྲོ་ཅི་འདུག་ཐམས་ཅད་ཞུ་བ་གལ་ཆེ་ཞེས་ལན་མང་སྨྲས་ཀྱང་། འགའ་ཟུང་ལས་མང་དུ་མ་འཁོད་འདུག །ངས་ནི་ཞུ་ཡང་མ་སྤོབས་ཟེར། བསྐང་གསོ་བ་ཞི་གནས་ཀྱིས་ཀྱང་འགའ་ཞིག་ཞུས་ནས་བཀོད་གདའ། དེ་ནས་སྤྲུལ་སྐུ་དགུང་ལོ་བཅུ་བདུན་པ་ལ་སྐུ་མཚམས་ལོ་གསུམ་བཞུགས་པའི་དམ་བཅའ་མཛད་སོང་། སྟོབས་ཆེན་གླང་གི་ལོ་ཆོ་འཕྲུལ་ཆེན་པོའི་དམར་པོའི་ཕྱོགས་ལ། སྤྲུལ་སྐུ་དགུང་སྐག་ཡིན་པའི་ཕྱིར་བདག་མཚམས་ཁང་དུ་སོང་ནས། བརྟན་བཞུགས་ཚེ་དབང་བརྒྱ་རྩ་འབུལ་བ་སོགས་སྐུ་རིམ་ཞག་འགའ་བྱས་སྐབས། ཉེར་མཁོའི་གདམས་ངག་འགའ་ཞུས་པས་ཡིད་ཚིམ། ཆོས་ཚང་མ་ཡོད་པར་མ་ཤེས་པས་གདམས་པ་ལས་ཚོགས་ཀྱིས་འདོད་པ་ཚིམས། ད་ཐུགས་སུན་ད་ནས་མི་ཞུ་སྙམ་པ། དེ་ནུབ་བདག་གི་ཉམས་དང་རྨི་ལམ་འདྲེས་པ་ལ། སྤྲུལ་སྐུ་སྤྱི་འབྱམས་སུ་མ་ཕེབས་གོང་འདིར་ཞུ་བའི་སྐབས་ཡིན་པས་ཞུས་ཤིག །ཟེར་བའི་ལུང་བསྟན་གྱི་སྒྲ་ཞིག་གྲག་གོ །དེར་བདག་གིས་བསམ་པ་ལ་དེ་སྔ་ཡང་། སྐྱེ་བ་དྲན་པའི་རིམ་པ། ལྷ་འདྲེས་སྲོག་སྙིང་ཕུལ་པའི་རིམ་པ། ཡི་དམ་ཞལ་གཟིགས་རིམ་པ། གནམ་ཆོས་རིམ་པ་བྱུང་ཞིང་། དེ་དག་རྫོགས་ནས་
མི་སྣང་བ་ལྟར། ད་རུང་ཡང་དགོངས་གཏེར་གྱི་རིམ་པ་གཅིག་ཡོད་ཟིན། ས་གཏེར་ཐོན་ཁ་ནས་དེ་མེད་པ་འདྲ་སྙམ་ནས། ཕྱིར་ནངས་དེ་སྔ་དགོངས་གཏེར་ཐམས་ཅད་ལས་ཚོགས་གདམས་ངག་འདྲ་བ་ལས་ཆོས་ཆ་ཚང་མ་བྱུང་། ད་ནི་དབང་སྒྲུབ་ཐབས་ཟུང་འབྲེལ་ཡོད་པའི་དགོངས་གཏེར་ཡོད་ན་གནང་དགོས་ཞུས་པས། རྡོ་རྗེ་གྲོ་ལོད། གུར་དྲག་མཐིང་ནག །བྱམས་པ། འོད་ཟེར་ཅན། ཁྱུང་ཁྲ། ཕྱག་རྡོར་ཨུ་ཙ་མ། བཀའ་བརྒྱད་ལུས་དཀྱིལ། ཁྲོས་མ་ལྷ་ལྔ། ཕྱག་བཞི་པ་བྱ་རོག་ཞོན་པ་སོགས་ཡི་གེར་ཕབ་ནས་དབང་ལུང་གནང་། བདག་རི་ཁྲོད་དུ་འོང་ནས་དེ་ཐམས་ཅད་རྒྱུན་བསྙེན་འདྲ་ཞིག་བྱས་པས། དངོས་ཉམས་རྨི་ལམ་དུ་འཚུབ་དང་སློང་ཆེན་པོ་བྱུང་བས། ཨེ་མ་བརྩམ་ཆོས་ཀྱི་སྒྲུབ་ཐབས་རྒྱ་མཚོ་ལྟ་བུ་ལ་ངས་ལྷ་དུ་མའི་རྒྱུན་བསྙེན་བྱེད་མྱོང་སྟེ། བཟང་ངན་གྱི་རྟགས་ཞད་ཙམ་ཡང་མི་འོང་དོ་བ་ལ། དགོངས་གཏེར་འདི་གཏེར་གསར་པ་ཤིན་ཏུ་གཉན་པར་འདུག་སྙམ་པ་བྱུང་ནས། ཚོགས་འཁོར་མང་པོ་དང་གསོལ་ཁ་མཆོད་པ་གཟབ། ད་གཡེར་ཆུང་གི་རྒྱུན་བསྙེན་མི་རུང་བར་གདའ། སོ་སོ་གལ་ཆེ་རིམ་གྱི་གཏེར་བསྒྲུབ་ཞག་ལྔ་བདུན་རེ་
དགོས་སྙམ་ནི་བྱེད་ཅིང་ཡོད་ཅིང་། ཅུང་ཟད་རེས་ཀྱང་རྨི་རྟགས་གསལ་བར་སྣང་ངོ་། །དེ་མུས་ཀྱི་པོ་ཏི་དུ་བྱུང་ཡང་ཡི་གེར་བཀོད་དགོས་ཞེས་ཞུས་པ་ཡིན་ཀྱང་། ཟད་ནི་མེད་གསུངས་ནའང་ཅི་ཙམ་ཡི་གེར་འབེབས་ཐུབ་ནི་མ་ངེས་པས་མཚན་ཅི་ཙམ་མི་ཤེས། སྔར་ཕབ་ཚད་ཕྱོགས་གཅིག་བྲིས་ནས་པོད་ཆུང་གཅིག་ཁ་ལོངས་སམ་སྙམ་མོ། །སྐུ་ཞབས་པ་འགའི་གདམས་པའི་རིགས་ལ་གཏེར་རྙིང་དང་གནམ་ཆོས་གང་ལས་ཀྱང་དགོངས་གཏེར་འདི་རྣ་བར་འདུག་ཅེས་རྒྱུ་མཚན་མང་པོ་བཤད་རྒྱུ་སྣང་ངོ་། །དེས་དགོངས་གཏེར་གྱི་གཏེར་འབྱུང་བཤད་ཟིན་ཏོ། །དེ་ལྟར་གནམ་ཆོས་དགོངས་གཏེར་གྱི་ཆེ་བ་ཕན་ཡོན་སོགས་ནི་ལྷ་སོ་སོའི་དབང་བཤད་སྐབས་སུ་བཀོད་ཅིང་། གཏེར་སྤྱིའི་དབྱེ་བ། བཀའ་གཏེར་ཟུང་འཇུག་གི་བཤད་པ༔ ཁྱད་པར་གཏེར་གྱི་ཡོན་ཏན། དེ་ལ་རྩོད་པ་སྤང་བ་སོགས་ནི། ཕལ་ཆེར་ས་གཏེར་ལ་འབྲེལ་ཆེ་བས་འདིར་མ་བཀོད་ཀྱང་། བདག་གི་ལུས་འདི་ཉིད་ཀྱི་ས་འདིའི་མུས་པ་མཐུད་ནས། སྤྲུལ་སྐུ་མི་འགྱུར་རྡོ་རྗེས་ས་གཏེར་ཐོན་དུས་བདག་གི་ལག་གིས་བྲི་ཆོག་པའི་རྟེན་འབྲེལ་བྱེད་པ་ཡིན་པས། དེ་འགྲུབ་ཅིང་བར་ཆད་མེད་པར་ཨོ་རྒྱན་རིན་པོ་ཆེ་མཁྱེན་
ནོ། །གནམ་ཆོས་ལས་གྲུབ་མཐའ་གཞན་ལ་མི་འཇུག་པ་དང་། འདུལ་ཁྲིམས་སྡོམ་པ་མི་ཞུ་བ་དང་། མ་ཇོ་ཌཱ་ཀི་རྟེན་འབྲེལ་འགྲིགས་ན་ས་གཏེར་བརྒྱ་རྩ་ཐོན། དེ་ཚོ་འཆུགས་ན་མི་ཐོན་སྐུ་ཚེའི་བར་ཆད་དུ་འགྱུར་བར་གསུངས་མོད་ཀྱི། གཏེར་རྙིང་ཐམས་ཅད་ནས་ཁམས་ཕྱོགས་གཏེར་ཁ་བརྒྱ་ལ་དབང་བར་ལུང་བསྟན་པ་དང་། བདུད་འདུལ་རྡོ་རྗེས་ཀྱང་ཁག་ཁུར་ས་གཏེར་ཐོན་ངེས་གསུངས་པའི་ཕྱིར་རོ། །འདི་མགོ་བཙུགས་ཚེ་ལྡེབ་མ་དུ་འོང་སྙམ་ཙ་ཉམས་སྣང་ལ་བདུན་ཅུ་འོང་ཟེར་བའི་སྒྲ་གྲག །ཕྱིས་དེ་ལྟར་བྱུང་བས། ང་རྩོམ་མི་ཞན་ཡང་མཁའ་འགྲོ་ཆོས་སྐྱོང་གིས་གཟིགས་པ་ལ་ཡོད་སྣང་སྙམ་མོ། །སྤྲུལ་སྐུ་མི་འགྱུར་རྡོ་རྗེས་ས་གཏེར་ཇི་ལྟར་བཏོན་པའི་གཏེར་འབྱུང་ཆེན་མོ་བྲི་བའི་རྟེན་འབྲེལ་རེ་ཞིག་བསྐྱུངས་པར་གྱུར་ཏོ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།