སྤྲུལ་སྐུ་མི་འགྱུར་རྡོ་རྗེ་སྔོན་རྒྱལ་བུ་དོན་གྲུབ་ཏུ་སྐྱེས་པའི་རབས།
༄༅། །སྤྲུལ་སྐུ་མི་འགྱུར་རྡོ་རྗེ་སྔོན་རྒྱལ་བུ་དོན་གྲུབ་ཏུ་སྐྱེས་པའི་རབས་བཞུགས་སོ།། ༈ སྔོན་ཚེ་བསྐལ་པ་དཔག་མེད་གོང་རོལ་དུ། །བསྐལ་པའི་མིང་ནི་བཟང་པོར་སྤྱོད་ཅེས་བྱ། །སངས་རྒྱས་སྣང་མཛད་ཅེས་བྱའི་བསྟན་པ་སྟེ། །གྲོང་ཁྱེར་བྷ་ར་ཎ་ཞེས་བྱ་བ་རུ། །རྒྱལ་པོ་ཆེན་པོ་ཤིང་རྟ་འདྲེན་པ་དང་། །ཀུན་དགའ་བཟང་མོ་ཡབ་ཡུམ་གཉིས་ཀྱི་སྲས། །བདག་ནི་རྒྱལ་བུ་དོན་གྲུབ་ཅེས་བྱར་གྱུར། །སྦྱིན་ལ་དགའ་ཞིང་བརྩོན་འགྲུས་རབ་ཏུ་ཆེ། །སྙིང་རྗེ་ཆེ་ཞིང་ཚུལ་ཁྲིམས་དམ་ཚིག་ལྡན། །དེ་ནས་སྲས་ཀྱིས་ཡབ་ལ་འདི་སྐད་ཞུས། །བདག་ནི་སངས་རྒྱས་ཅི་འགྲུབ་མ་གཏོགས་མེད། །ཁྱེད་ནི་ཆོས་ཀྱི་རྒྱལ་པོ་ཆེན་པོ་སྟེ། །བདག་ལ་སྦྱིན་པ་བཏང་རྒྱུའི་ནོར་སྩོལ་ཅིག །ཆོས་མཆོག་སྒྲུབ་པའི་གྲོགས་ནི་མཛད་དུ་གསོལ། །ཞུས་པས་དེ་ལྟར་བྱེད་པར་ཁས་བླངས་སོ། །སྲས་ཀྱི་སྦྱིན་པའི་ཁང་པ་གཞན་དུ་བརྩིགས། །མི་སྡེ་མང་དུ་བསྡུས་ཏེ་སྦྱིན་པ་བཏང་། །དེ་དུས་རྒྱལ་ཕྲན་ཆོས་དང་མཐུན་པ་ཞིག །འདི་སྐད་ཡུལ་ནི་བྷ་ར་ཎ་ཞེས་པར། །རྒྱལ་བུས་སྦྱིན་པ་རྒྱ་ཆེན་བཏང་བ་ལ། །དེ་ལ་འབུལ་བ་བྱེད་པར་དེ་ཆས་སོ། །བློན་པོས་ལག་པ་བཅད་པའི་སྤྲང་པོ་
ཁྲིད། །དེ་དུས་མུ་སྟེགས་རྒྱལ་པོ་ཤིག་ལྡན་གྱིས། །སྤྲང་པོ་གཅིག་ཀྱང་སྦྱིན་པ་ལེན་དུ་བཏང་། །དེ་ནི་ཆོས་ལ་མི་དགའ་ཕྲག་དོག་ཆེ། །དེ་ཡི་བྲན་དེས་གཡོག་ལ་ལོ་དྲུག་ཙམ། །འདུག་པར་ཁས་བླངས་ནས་ནི་དེར་བསྡད་དོ། ༈ །དེ་ནས་གོང་གི་རྒྱལ་ཕྲན་དེ་མཇལ་ཏེ། །ཞབས་ལ་ཕྱག་འཚལ་འདུད་དེ་འདི་སྐད་ཞུས། །ཀྱེ་མ་ཀྱེ་མ་བདག་ཅག་བསོད་ནམས་ལྡན། །འཛམ་གླིང་ཆོས་ཀྱིས་ཁེངས་མཛད་བསྐལ་བཞུགས་གསོལ། །བཀའ་དྲིན་དྲན་བཞིན་བདག་ཅག་ཐུགས་རྗེས་ཟུང་། །ཁྱེད་ནི་སངས་རྒྱས་དངོས་བས་འགྲོ་དོན་མཛོད། །ཅེས་ཞུས་འབུལ་བ་རྣམས་ནི་དེར་ཕུལ་ལོ། །དེ་ཡི་བློན་པོས་བྱ་བྲལ་ལག་ཟླུམ་ལ། །ཕྱག་སློང་བཅུག་པས་སྦྱིན་པར་ཆས་པ་ན། །ཆོས་ཀྱི་རྒྱལ་པོ་དེ་ཡིས་འདི་སྐད་ཞུས། །ཀྱེ་མ་འགྲོ་བའི་མགོན་པོ་ཐུགས་རྗེ་ཅན། །བདག་ནི་སྦྱིན་པ་བཏང་བར་མི་འཚལ་གྱིས། །གཞན་གྱི་སྦྱིན་པ་ཅི་དགོས་བཏང་བར་མཛོད། །སྦྱིན་པ་བཏང་ན་སྲོག་བཅད་སྡིག་པ་འོང་། །ཕྱག་ནི་སྦྱིན་པར་བཏང་ན་བདག་ཅག་ནི། །བསད་པ་དང་ནི་ཁྱད་པར་མེད་པར་གྱུར། །ཞེས་ཞུས་ནོར་བུའི་ཚོགས་སྦྱིན་དེ་བརྫང་ངོ་། །དེ་ནས་རྒྱལ་པོ་དེ་ཡང་རང་གནས་གཤེགས། །
དེ་ནས་གོང་གི་སྤྲང་པོའི་འདི་སྐད་དུ། །ཟླ་བ་བཞི་ཙམ་སོང་ཞིང་གཡོག་ཀྱང་འགྲུབ། །སྦྱིན་པ་བྱིན་དང་བདག་ནི་ད་འགྲོ་ཞུས། །རྒྱལ་བུ་དེས་ཀྱང་དེ་ལ་འདི་སྐད་གསུངས། །ཀྱེ་མ་ཁྱོད་ཀྱི་བྲན་དང་ཕོ་ཉ་བྱས། །ཅི་དགའི་ལོངས་སྤྱོད་དག་ལ་སྤྱོད་ཅིག་དང་། །བདག་གིས་བྱང་ཆུབ་སེམས་བསྐྱེད་སྲི་བ་མེད། །ཅེས་གསུངས་བྲམ་ཟེ་དེ་ཡིས་འདི་ལྟར་ཞུས། །ཁྱོད་ལ་རྒྱལ་པོ་ཤིང་རྟ་འདྲེན་པ་ཡི། །ནོར་བུ་འདོད་པ་ཀུན་འབྱུང་ཕོག་འདུག་པས། །ངེས་པར་སྦྱིན་པ་བཏང་ན་དེ་སློང་ཟེར། །ཡང་ནི་རྒྱལ་པོ་དེ་ཡིས་འདི་སྙམ་སེམས། །འདི་ནི་སྦྱིན་པ་ཟད་མེད་བྱ་བ་དང་། །གཞན་ལ་མི་སྦྱིན་ཁས་ལེན་ཡོད་པས་ན། །སྦྱིན་དུ་མི་གཏུབ་སྙམ་སྟེ་འདི་སྐད་གསུངས། །བདག་ལ་སྦྱིན་པ་སློང་བ་རབ་ཏུ་དགའ། །འོན་ཀྱང་རྒྱལ་པོར་མི་སྦྱིན་ཁས་བླངས་པས། །དེ་མིན་ཁྱོད་ལ་ཅི་དགོས་སྟེར་གྱིས་སོང་། །དེ་སྐད་གསུངས་པས་བྲམ་ཟེ་དེ་ན་རེ། །སྦྱིན་པ་ཅི་དགོས་སྟེར་བར་ཁས་བླངས་ན། །ནོར་བུ་མ་བྱིན་དམ་ཚིག་མི་འགལ་ལམ། །ཡབ་དང་དམ་ཚིག་མ་ཉམས་ཉེས་མི་འབྱུང་། །ཁྱོད་ཀྱིས་རྩིས་ཆེ་བ་དེ་མ་བཏང་ན། །དེ་མ་གཏོགས་པས་སྦྱིན་པ་ཅི་ལྟ་བའི། །སྦྱིན་པར་
མི་འགྱུར་ཟེར་བས་རྒྱལ་པོ་ཡིས། །འོ་ན་ཁྱོད་ལ་བདག་གིས་སྦྱིན་པ་སྟེར། །ཁྱོད་ཀྱིས་གཞན་ལ་སྨྲ་བར་མི་བྱེད་ཅིག །ཅེས་གསུངས་ནས་ནི་ནོར་བུ་དེ་བྱིན་ནོ། །དེ་ནས་བློན་པོ་ཤིན་ཏུ་མཛེས་པ་ཡིས། །དེ་སྐད་ཐོས་ནས་ཡབ་ལ་འདི་སྐད་ཞུས། །ཀྱེ་མ་རྒྱལ་པོ་ཆེན་པོ་ཤིང་རྟ་འདྲེན། །ཁྱོད་ཀྱི་སྲས་པོ་དོན་གྲུབ་ཅེས་བྱ་དེས། །ནོར་བུ་འདོད་པ་ཀུན་གྲུབ་གཞན་ལ་བྱིན། །དེས་ན་གསོད་པའི་ལས་ལས་འོས་ཅི་ཡོད། །ཅེས་ཞུས་རྒྱལ་པོ་ཆེན་པོས་འདི་སྐད་གསུངས། །བདག་ལ་སྲས་པོ་ཆོས་དང་མཐུན་པ་ཞིག །ཡོད་པ་དེ་ཡི་ལས་ནི་ཅི་བྱས་ཀྱང་། །བདག་ནི་མིག་ལོག་ཙམ་ཡང་བྱར་མི་བཏུབ། །ཅེས་གསུངས་པས་ཡུམ་ཀུན་དགའ་བཟང་མོ་ལ་ཞུས་པས། འོ་ན་རྒྱལ་བུ་ཡིན་ཡང་ཉེས་ན་ཆད་པ་བཅད་དགོས་ཀྱི། དེ་མ་བཅད་ན་རྒྱལ་སྲིད་སྟོང་གིས་དེ་ལྟར་ཞུས་ཤིག །ཅེས་བཟླས་སོ། །དེ་ལྟར་ཤིན་ཏུ་མཛེས་པས་ཡབ་རྒྱལ་པོ་ལ་ཞུས་པས། སྲས་ཆེ་བ་ཕུད་ནས་སུས་རྒྱལ་སྲིད་བཟུང་བ་ཡིན། དེས་ན་བཙུན་མོ་གཅིག་བསུས་ཏེ་དེ་ཕྱིན་ཆད་སྦྱིན་པ་ཚོད་ལྟས་བཏང་དུ་མི་སྟེར་ཏེ་རྒྱུ་སྲི་བ་ལ་འཇོག་གོ །དེ་ལྟར་ཡུམ་ལ་ཞུས་པས། ནོར་བུ་མེད་ནས་ལྟས་ངན་སྲིའམ་ཅི། །བདག་ཕམ་
གཞན་རྒྱལ་བྱེད་པའི་བདུད་རྒྱལ་ནི། །མྱུར་དུ་བསད་དམ་མེད་པར་མ་བྱས་ན། །སྡེ་རྣམས་བཀྲ་ཤིས་མེད་པ་ཅི་ལ་བཟོད། །དེས་ན་མྱུར་དུ་བདུད་དེ་མེད་པར་མཛོད། །ཅེས་ཟེར་དེ་བཏང་ངོ་། །དེ་ནས་ཡབ་རྒྱལ་པོས་ཁྱོད་སོང་ལ་བློན་པོ་རྣམས་སྡུས་ཤིག །དེ་ནས་བློན་པོ་རྣམས་འཚོགས་ནས་བགྲོས་པ། ་རྒྱལ་པོས་སྲས་སམ་རྒྱལ་པོ་རང་ལགས་ཀྱང་། ཉེས་བྱས་ན་ནི་མྱུར་དུ་ཆད་པ་གཅོད། བྱ་བ་ཡིན་པས་ཆད་པ་ཅིས་ཀྱང་བཅད་འཚལ་ཞེས་སོགས། དེ་ནས་འོ་ན་ཅི་ལྟ་བུ་ཞིག་བཅད་ཅེས་གསུངས་སོ། །ལ་ལས་དེ་སོད་ཅིག །ལ་ལས་དེ་བསྐྱུག་ཅིག །ལ་ལས་དེ་ཟངས་ཁ་སྦྱོར་གྱི་ནང་དུ་ཚོས་ཤིག །ལ་ལས་དེ་མུན་ཁང་དུ་ཆུགས་ཤིག །ལ་ལས་དེ་དུར་ཁྲོད་ཀྱིས་སྟག་ལ་ཟན་དུ་གྱིས་ཤིག ཤིན་ཏུ་མཛེས་པས་གསོ་ཐིག་གིས་མགྲིན་པ་ཆིངས་ལ་མྱུར་དུ་སོད་ཅིག །ཅེས་སོ། །དེ་ནས་རྒྱལ་བུ་འདིར་ཁྲིད་ཤོག་ཅིག་དང་གསུངས་ནས་སྡེ་ཐམས་ཅད་བསྡུས་ནས་སྟོན་མོ་བྱ་ཉིན་རྒྱལ་པོས་ཁྲོམ་ནང་དུ་འདི་སྐད་དུ། ཀུནྡའི་མདོག་མཚུངས་ཤིན་ཏུ་མཛེས་པའི་ལུས་ཅན་ལྷ་ཡི་སྲས། །མ་ལྟར་འགྲོ་རྣམས་ཀུན་ལ་ཤིན་ཏུ་བྱམས་པའི་ཐུགས་རྗེ་དང་ལྡན། །ཆོས་དང་
མཐུན་པས་ཆོས་ཀྱི་རྒྱལ་པོ་འདྲ་བའི་རྒྱལ་བུ་དེ། །དེ་རིང་བདག་དང་འབྲལ་བ་འདི་ནི་ལྟས་ངན་ཅི་གོ་ཡིན། །འདི་དང་འབྲལ་ཁ་བདག་རང་མི་འཆི་བ་འདི་ཅི་གོ་ཡིན། །ཅེས་སྨྲས་ཏེ་ངུས་སོ། །དེ་ནས་དེ་རྣམས་ཀྱིས་ད་ཅི་གོ་རེད། དེ་རིང་རྒྱལ་བུ་ཆོས་དང་མཐུན་པ་དེ་ལ་བར་ཆད་གཅིག་རེད་ཟེར་ནས་ཐམས་ཅད་ས་འགྲེའོ། །དེ་ནས་རྒྱལ་བུས་ཕྱག་ནས་བཟུང་སྟེ། ཀྱེ་མ་ཁྱོད་ནི་མིག་འབྲས་དངོས་འདྲ་ཡང་། །ཉེས་པར་གྱུར་པས་ཁྱོད་ནི་བདེ་བར་སོང་། །ཞེས་གསུངས་དུས་ནས་གླང་པོ་ཆེ་དང་རྟ་དང་ནོར་དང་གསེར་དངུལ་རྣམས་བརྫངས་སོ། །དེ་ནས་དེ་ཡུམ་གྱིས་ཐོས་ནས་རྒྱལ་བུ་དེ་འདིར་ཁྲིད་ཤོག་ཅིག་གསུངས་སོ། །དེ་ནས་དེར་ཁྲིད་འོང་བ་དང་། ཡུམ་གྱིས་འདི་སྐད་དུ། ཁྱོད་བདུད་ཀྱི་རྒྱལ་པོ་ལགས་པས། འདི་ནས་ལོ་སུམ་ཅུ་སོ་དགུ་ལ་བདུད་རི་མངོན་སུམ་ཟ་བའི་དྲུང་དུ་སོང་ཞིག་ཅེས་ཟེར་ཏེ་རྐང་ལག་ལྕགས་སུ་བཅུག་དབྱིག་པ་དང་ཐོ་བ་སོགས་ཀྱིས་བརྡུངས། རྒྱལ་པོས་བརྫངས་བ་ཐམས་ཅད་ཀྱང་བླངས། དེ་ནས་བསྐྱུག་པར་ཆད་པ་དང་། ཐམས་ཅད་ལ་ལ་ཆུ་ལ་མཆོངས། ལ་ལ་བྲག་ལ་མཆོངས། ལ་ལ་གཉའ་བ་བཅིང་སྟེ་ཕལ་ཆེར་ཤིའོ། །མ་ཤི་བ་ཐམས་ཅད་
ཀྱང་བརྒྱལ་བར་གྱུར་ཏོ། །དེ་ནས་བློན་པོ་ཤིན་ཏུ་མཛེས་པས་ཡུམ་ལ་འདི་སྐད་དོ། །རྒྱལ་བུ་འདིས་ནི་ནོར་བུ་གཞན་ལ་བྱིན་པས་ད་རུང་ཚད་པ་ཆོད་ཅེས་ཞུས་སོ། །འོ་ན་ཟླ་བ་གཅིག་མུན་ཁང་དུ་ཚུད་ལ་ཆུ་ཐོབ་ལ་འབྱར་ཆུག་ཅེས་སོ། །དེ་ནས་འདི་ལྟར་བྱས་ཏེ་ཟླ་བ་གཅིག་ལ་བཞག་པ་ལ་ལྷའི་བུ་མོ་རྣམས་ཀྱིས་ཟས་བྱིན་ཞིང་གོས་བཀོན་ནོ། །དེ་ནས་བཏོན་ཏེ་བསྐྱུགས་ནས་ལོ་སྐོར་ཉེར་དྲུག་འདས་པ་དང་། རྒྱལ་པོས་གདན་འདྲེན་དུ་བཏང་། བློན་པོ་ཟླ་འོད་སླེབས་པ་དང་བདུད་རི་ན་མ་ཕྱིན་ནས་ལམ་དུ་གནས་པ་ལ་དེ་ནས་གདན་འདྲེན་པ་རྣམས་ལ་འདི་སྐད་དུ་བཟླས་སོ། །བདག་ནི་མ་ཡི་བཀའ་བཅག་མི་འཚལ་གྱི། བདག་ནི་ལོ་སྐོར་སུམ་ཅུ་སོ་དགུར་འདུག །ཅེས་སྤྲེངས་སོ། །དེ་ནས་བང་ཆེན་པ་རྣམས་ཕྱིར་ལོགས་པ་དང་། རྒྱལ་བུ་སོང་བས་ཆུ་ཆེན་གཅིག་གིས་ཁར་ཕྱིན་པས་གྲུ་པ་གཅིག་གིས་ཁྱོད་སུ་ཡིན་གང་ནས་འོང་གང་དུ་འགྲོ་བ་ཡིན་ཞེས་ཟེར་རོ། །དེ་ནས་དེར་ནོར་བུ་ལེན་མཁན་གྱི་མི་དེ་ཕྱིན་ཡོད་པས། རྒྱལ་བུས་ང་ནི་ཁོ་ལ་ནོར་བུ་སྦྱིན་པ་བཏང་མཁན་དེ་ཡིན་གསུངས་པས། མི་དེས་རྫུ་ན་མ་ང་ལ་ནོར་བུ་བྱིན་མ་མྱོང་སྟེ་རྡུང་ཞིག་ཅེས་སོ། །དེ་ནས་གྲུ་པ་
དེ་ལ་ང་ཆུ་ཕར་ཁར་བརྒལ་དུ་གསོལ། ཞེས་གསུངས་པས་གྲུ་པས་ཁྱོད་ངས་མི་བརྒལ་ལར་ཁྱོད་རྫུན་མ་ཇོ་བརྫུ་མཁན་གཅིག་རེད་ཡུལ་འདིར་མ་བསྡོད་ཅིག་ཟེར་རོ། །དེ་མ་ཐག་ལྷའི་བུ་དང་བུ་མོ་རྣམས་ཀྱིས་དར་ཟབ་ཀྱི་ཟམ་བཙུག་སྟེ་ཕ་རིར་བསྐྱལ་བས་གྲུ་པ་དེས་ཆུ་འདི་ཡང་ཐོགས་མེད་དུ་ཐར་སོང་བས་འདི་ཡུལ་ཁམས་མེད་པར་བྱེད་མཁན་གཅིག་རེད་པས་འགྲོ་ནས་རྡུང་བའམ་བསད་དུ་འོང་ཟེར་བས། མི་ཐམས་ཅད་ཀྱིས་དེ་བདེན་ཟེར་ཏེ་འོང་ནས་བརྡུང་བརྡུང་སྟེ་ལུས་སེམས་མ་བྲལ་བ་ཙམ་དུ་བྱས་ཏེ་སོང་། དེ་ནས་བང་ཆེན་པ་རྣམས་ལོག་སྟེ་ཕྱིན་པ་དང་གཞན་རྣམས་ཀྱིས་དེ་ལྟར་བཤད་པས། །མི་དེ་རྣམས་བརླག་གོ །དེ་ནས་ཡབ་རྒྱལ་པོའི་ཕྲིན་རྣམས་ཞུས་པས། །འོ་ན་ད་འགྲོ་སྟེ་ཁྱེད་རྣམས་ཀྱི་ཕྲེང་མི་སྨྲ་བ་བཟླས་ནི་གསང་ངོ་། །དེ་ནས་འབྱོན་པར་ཆས་པས་ན། བྱ་རི་དྭགས་བཙན་ཐམས་ཅད་ས་ཐག་རིང་པོར་བསྐྱལ་ཏེ་ངུས་སོ། །དེ་ནས་ཚུར་ཕྱིན་པ་དང་ཡུམ་གྱིས་ཐོས་ནས་དེར་ཡོང་ནས་མུན་ཁང་དུ་ཟླ་བ་གཉིས་སུ་ཆུག་ཅིག །ཡང་ན་གཅན་གཟན་ཁྲལ་སྡུད་ཀྱི་སྔོན་དུ་སྐྱོལ་ཞིག་ཅེས་བྱས་སོ། །དེ་ནས་རྒྱལ་པོས་མུན་ཁང་དུ་བཙུད་དོ། །ཞེས་གསུངས་ནས་ཁོང་རང་མཚམས་སུ་བསྡད་
ནས། མཚམས་ཁང་ལ་ཆོད་བྱས་ཏེ་ཁོང་རང་ཅན་དུ་སྒྲིས་ཁུང་གཅིག་བཞག་ནས་འདི་སྐད་དུ། ང་ན་བ་ལ་བརྟེན་ནས་ཟས་སྐལ་གཉིས་ཟ་དགོས་པ་གཅིག་རེད་ཡོད་གསུངས་ནས་ཟས་ཐམས་ཅད་སྐལ་གཉིས་བླངས་ནས་སྐལ་གཅིག་སྲས་ལ་བྱིན་སྐལ་གཅིག་ཁོང་རང་གིས་ཟོས་སོ། །དེ་ནས་བློན་པོ་རྣམས་བགྲོས་ཏེ་ཡུམ་འདི་མེད་ན་བཟང་བར་མཆིས། ཆོས་རྒྱལ་དེ་ཡང་བསྐྱུགས། ད་ཡང་མུན་ཁང་དུ་བཙུད། ད་བཟོད་རྒྱལ་པོ་ཡང་བསད་འོང་ཟེར་ནས་དུག་བླུད་དེ་བསད་དོ། །དེ་ནས་རྒྱལ་བུ་ཡང་མུན་ཁང་ནས་བཏོན། རྒྱལ་པོ་ཡང་མཚམས་གྲོལ་བ་དང་། བློན་པོ་ཟླ་འོད་ཀྱིས་གསུངས་འདི་སྐད་དུ་རྒྱལ་བུ་ལ་ཞུས་སོ། །ལས་ངན་སྡིག་ཅན་གྱི་མ་ཡུམ་དེ་ནི་བདག་ཅིག་གིས་བསད་ནས་ཡོད་དོ། །ཞེས་ཞུས་སོ། །དེ་ནས་རྒྱལ་བུ་དེས། ཀྱེ་མ་མ་ནི་སེམས་ཅན་བསྐྱེད་པའི་མ། །མ་དེ་མེད་ན་བདག་གིས་ལུས་སེམས་སུ་ལ་བསྐྱེད། །ཀྱེ་མ་ཀྱེ་མ་གསུངས་ཤིང་ཐུགས་ནད་མཛད་དོ། །ཡབ་ཀྱིས་དེ་བསད་པ་ལེགས་སོ་ཞེས་གསུངས་སོ། །དེ་ནས་རྒྱལ་པོ་ཡང་ཡུན་རིང་པོར་མ་ཐོགས་པར་འདས་སོ། །དེ་ནས་རྒྱལ་བུས་སྐྱིལ་མོ་ཀྲུང་གིས་ནམ་མཁར་འགྲོའོ། །ཞེས་
གསུངས་པ་ན་བློན་པོ་འགའ་ཞིག་གིས་དེ་ལྟར་མི་འབྱོན་པར་ཞེས་ཞུས་པས། དཔལ་རྣམ་པར་སྣང་མཛད་ཀྱི་སྐུ་ཡི་མདུན་དུ་ལུས་མར་མེར་ཕུལ་བས། རོ་མེད་པར་རིང་བསྲེལ་བྲེ་གང་ཡོད་པ་བློན་པོ་རྣམས་ཀྱིས་བགོས་པས་མི་རེ་ལ་བྲེ་གང་རེ་ཐོབ་བོ། །དེའི་ཚེ་དེའི་དུས་ན་ཡང་རྒྱལ་པོ་ཤིང་རྟ་འདྲེན་དེ་ནི་ད་ལྟ་སྒྲུབ་བརྒྱུད་བསྟན་པ་རྣམ་རྒྱལ་ཡིན་ནོ། །རྒྱལ་ཕྲན་དང་དེའི་བློན་པོ་དང་། སྤྲང་པོ་ལག་རྡུམ་གསུམ་ནི་གཅུང་གཉིས་དང་ཡ་མའོ། །ནོར་བུ་སྦྱིན་པ་ལེན་མིའི་རྒྱལ་པོ་དང་། མི་དེ་ནི་སྐྱེ་དང་རྟ་ཡི་མིང་ཅན་ཡིན་ནོ། །བློན་པོ་ཤིན་ཏུ་མཛེས་པ་ནི་ད་ལྟ་ཙཱ་ཡི་མིང་ཅན་ཡིན། བློན་པོ་ཟླ་འོད་ནི་ད་ལྟ་བྷིཀྵ་ཙན་དན་སིན་དྷ་ཡིན་ནོ། །གྲུ་པ་དེ་ནི་དབར་ཟོའི་ལཀྵ་ཁ་ར་ཎའོ། །མ་ཀུན་དགའ་བཟང་མོ་ནི་དུད་འགྲོའི་སྐྱེ་བ་ལྔ་བླངས་རྗེས་སུམ་ཅུ་རྩ་གསུམ་གྱི་ལྷའི་བུར་རྒྱལ་བུ་ཉིད་ཀྱིས་དྲངས་པ་ཡིན་ནོ། །ཞེས་སྐྱེས་རབས་འདི་ཉིད་སྤྲུལ་སྐུ་དགུང་ལོ་བཅུ་བཞི་ཐ་སྐར་ཟླ་བའི་ཚེས་བདུན་དགོང་མོ་གློ་བུར་དུ་དྲན་ཏེ་ཡི་གེར་བཀོད་པའོ། །མངྒ་ལཾ།། །། ༄༅། །སངས་རྒྱས་ཀུན་འདུས་པདྨ་འབྱུང་གནས་དང་། །དབྱེར་མེད་མི་འགྱུར་རྡོ་རྗེའི་ཞབས་ལ་འདུད། །སྔོན་ཚེ་བསྐལ་པ་མང་
པོའི་གོང་རོལ་དུ། །བསྐལ་པ་འོད་བཀྲམ་སངས་རྒྱས་མཚན་ལེགས་བསྟན། །ཡབ་ནི་རྒྱལ་པོ་མེ་ཡི་ཨག་ཙོམ་དང་། །ཡུམ་ནི་ལྷ་བཙུན་གོས་དཀར་མོ་ཡི་བུ། །མཛེས་པར་སྐྱེས་ཚེ་སྒྱུ་མའི་དམག་གིས་བསྐོར། །མི་གཅིག་གིས་ནི་ལུང་བསྟན་པ་ཡི་སྲིང་མོ་ཡིས། །དམག་འདི་བཟློག་ཟེར་དེ་ཉིད་བོས་ནས་ནི། །དབྱིག་པ་སར་བརྡབ་སྒྱུ་མའི་སྤྲུལ་དམག་ཞིག །རྒྱལ་པོ་ཤིང་རྩར་ཉི་མ་འདས་བཞུགས་པ། །སླར་ཡང་སྒྱུ་མའི་དམག་གིས་བསྐོར་བ་ལ། །མི་གཞན་ཞིག་གིས་བྱེ་ཚན་ཆར་ཕབ་ནས། །སྒྱུ་མའི་དམག་དང་སྒྱུ་མ་མཁན་ཉིད་བསྲེགས། །དེ་ནས་ཕར་བྱོན་རིགས་བཞིའི་མཁའ་འགྲོ་མཇལ། །ཕུག་རོན་བདུན་གྱིས་མགྲོན་བུ་ལ་སོགས་གཏད། །བླ་མ་ལ་ཕུལ་ཆོས་ཞུས་ངེད་ལ་ཤོད། །ངེད་ཅག་འཆི་བར་འགྱུར་ཞེས་ཟེར་བ་ལ། །བླ་མ་སུ་ཡིན་དྲིས་པས་བྲག་ཀ་ན། །མི་སྐམ་ཁྱི་འབུ་ཁོལ་ལ་ཞེ་སྡང་ཆེ། །མཇལ་བས་བླ་མ་རེད་སྙམ་མགྲོན་བུ་ཕུལ། །དེ་མ་ཐག་ཏུ་ཏིང་འཛིན་སྒོམ་ཡང་སྐྱེས། །རྒྱལ་པོའི་རྒྱལ་ཚབ་རིན་པོ་ཆེ། གཞན་ལ་ཆོས་བཤད་གྲུབ་པ་ཐོབ། །ནམ་མཁར་འཕུར་སོགས་རྫུ་འཕྲུལ་སྟོན་པར་འགྱུར། །རྒྱལ་བུ་ཉིད་ཀྱང་གྲུབ་པ་ཐོབ་ནས་
འཕུར། །བྲག་ཕུག་ནང་བཞུགས་ལྷ་ནི་ཚེ་འཕོས་པ། །ཆུ་སྲིན་བུར་སྐྱེས་སྐྱེ་བ་ལྔ་བརྒྱ་ལ། །དེ་འདྲའི་ལུས་ལེན་དགོས་པ་བསད་པ་ཡིས། །སྐྱེ་སྒོ་ཆོད་དེ་མི་ལུས་ཆོས་ལྡན་ཐོབ། །དེ་ནི་ད་ལྟ་རིན་ཆེན་མིང་ཅན་ནོ། །གྲུབ་ཐོབ་རྒྱལ་བུས་ཞབས་རྗེས་འཇོག་པ་དང་། །འཕུར་དང་རྫུ་འཕྲུལ་དཔག་མེད་སྟོན་པར་གྱུར། །སེམས་ཅན་དཔག་མེད་བདེ་ལ་འཁོད་པར་གྱུར། །ཕུག་རོན་བདུན་དེ་གཅིག་གིས་སྤྲུལ་པ་སྟེ། །ད་ལྟ་ཡོངས་འཛིན་རཱ་གའི་མཚན་ཅན་ནོ། །མི་སྐམ་ཁྱི་འབུ་ཁོལ་བ་སྤྱན་རས་གཟིགས། །དེ་ཡི་གྲོགས་དེ་ཨོ་རྒྱན་པདྨའོ། །སྒྱུ་མ་མཁན་ཉིད་ཀུ་ཀུ་ར་ཙའོ། །ལུང་སྟོན་མཛད་མི་རྣམས་ནི་སྤྲུལ་པའོ། །ཞེས་པ་ཁྲུམས་སྟོད་རི་བོང་འཛིན་པ་ཉིད་ཡོངས་སུ་རྒྱས་པའི་ནུབ་མོ་འབུམ་རྫོང་གི་གནས་སྒོར་སྐྱེ་བ་དྲན་ཚུལ་སྤྲུལ་སྐུའི་གསུངས་ཞེས་སྐད་གནང་དྲུང་ཡིག་པ་དེས་བཀོད། བཀྲ་ཤིས།། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།