ཤུད་བུ་དཔལ་གྱི་སེང་གེའི་རྣམ་པར་ཐར་པ་རིན་པོ་ཆེའི་གཏེར་མཛོད།
༄༅། །ཤུད་བུ་དཔལ་གྱི་སེང་གེའི་རྣམ་པར་ཐར་པ་རིན་པོ་ཆེའི་གཏེར་མཛོད་བཞུགས་སོ།།
༄༅། །རྗེ་ན་མོ་གུ་རུ་རིན་པོ་ཆེ་ཡེ། ཤུད་བུ་དཔལ་གྱི་སེང་གེའི་རྣམ་པར་ཐར་པ་རིན་པོ་ཆེའི་གཏེར་མཛོད་ནི། དང་པོ་རུས་པ་ཤུད་བུ་བྱ་བའི་རིགས་ལ། བློན་པོ་ཤུད་བུ་མགོན་པོ་བརྟེན་དང་། ཡུམ་གཡུང་སྐྱིད་རུས་པ་སྤྱི་ཡི་རིགས་ཡིན་པ་ལ་དུས་བཟང་ཚེས་བཅུའི་ཉི་མ་རྩེ་ཤར་དུས་འཁྲུངས་རྒྱུའི་དེ་ནུབ་ཡུམ་གཡུང་སྐྱིད་མ་ཡི་རྣལ་ལམ་དུ་ཚིགས་བཅད་འདི་རྣམས་གྲགས་སོ། །ཨེ་མ་ཧོ་ངོ་མཚར་ཆེ། །ཨེ་མ་ཧོ་ངོ་མཚར་རྨད་དུ་བྱུང་། །ཤུད་བུའི་རིགས་ཀྱི་དཔལ་དུ་འཁྲུངས། །ཡ་ང་འཇིགས་མེད་སེང་གེ་འདྲ། །སངས་རྒྱས་ཀུན་སྲས་སྒྲ་བོ་ཆེ། །དེ་སྐད་ཤ་ཟ་མཁའ་
༄༅། །འགྲོའི་སྐད། །ཤ་མ་ཡ་ཧོ་མ་ལ་ཀ །ཤ་མ་ཡ་ཧོ་མ་རི་ཀ་ཏ། །ར་མ་ར་གི་ས་ཏི་མི་རུ་ཧ་ཡེ། །ཤ་ཏ་ཀུ་མ་མ་ཧཱ་ཡ་མ། །བུ་ཏ་ས་ར་ཐ་ལི་ན་ནི་ལ་ཀ །ཅེས་ཟེར་བ་ཡང་ཕྱིར་ནངས་ནས་བརྗེད་དེ། མདངས་ངས། དཔལ་དང་སེང་གེ་དང་ཏི་མི་དང་མ་ཧཱ་ཟེར་བ་འགའ་ཐོས། །ཞེས་སྨྲས་སོ། །དེ་ནས་མིང་འདག་པ། འགའ་ལ་མིང་ཅི་བཏགས་དྲིས་པས་འདི་སྐད་ཅེས་གསུངས་སོ། །ཨེ་མ་ཧོ་ངོ་མཚར་ཆེ། ཤ་ཟ་མཁའ་འགྲོའི་སྐད་དུ། ཏི་མི་ད་པ་ལ། མ་ཧཱ་སེང་གེ་ཡིན། དེས་ན་དཔལ་གྱི་སེང་གེ་ཐོགས། ཞེས་གསུངས་སོ། །དེ་ནས་དཔལ་གྱི་སེང་གེ་བྱ་བའི་
བློན་པོ་བཞི་ཡོད་པས་ནོར་རོ། །སྨྲས་པས། འོ་ན་དེའི་མགོར་གཡུང་དྲུང་ཐོགས། ཞེས་གསུངས་སོ། །དེ་ནས་གཡུང་དྲུང་དཔལ་གྱི་སེང་གེ་ཞེས་གྲགས་སོ། །གཡུང་དྲུང་དཔལ་གྱི་སེང་གེ་དེས་ལོ་བཞི་ལོན་ཙ་ན། ཨ་མ་ངའི་མིང་སུ་ཞེས་བྱ། ཡབ་ཅི་ཞེས་བྱ། རུས་པ་ཅི་ཞེས་བྱ། མ་ཁྱོད་ཀྱི་མིང་ཅི་ཞེས་བྱ། གསོ་བའི་སློབ་དཔོན་ཅི་ཞེས་བྱ། མིང་འདོགས་པ་གང་ཞེས་བྱ། དེ་རྣམས་རྩ་བ་ནས་རྩེ་མོའི་བར་མ་ཁྱེད་ཀྱིས་གསུང་དུ་གསོལ། ཞེས་ཞུས་པས། བུ་རིག་པ་ཅན། ཁྱོད་མིང་ནི་གཡུང་དྲུང་དཔལ་གྱི་སེང་གེ་ཞེས་བྱ། ཡབ་ནི་མགོན་པོ་བརྟེན་ཞེས་བྱ། རུས་པ་ཤུད་བུ་ཞེས་བྱ། མ་ནི་གཡུང་སྐྱིད་ཅེས་བྱ། གསོ་བའི་སློབ་དཔོན་འོད་རབ་ཏུ་རྒྱས་པ་ཞེས་བྱ། མིང་འདོགས་པ། གཡུང་དྲུང་དཔལ་དགེ་ཞེས་བྱ། ཞེས་ཞུས་པས། འོ་ན་ཁྱོད་ཀྱི་རུས་པ་གང་ཞེས་བྱ། ཡུལ་གྱི་རྒྱལ་པོ་གང་ཞེས་བྱ། རྟགས་མཚན་གང་བྱུང་ང་དུས་ཚོད་ནམ་སྐྱེས། ཚེས་གྲངས་གང་དུ་སྐྱེས། །ལྷུམས་སུ་ནམ་ཞུགས། ཞེས་པས། བུ་རིག་པ་ཅན། ངའི་རུས་པ་ནི་སྤུ་ཞེས་བྱ། ཡུལ་གྱི་རྒྱལ་པོ་མེའི་ཨག་ཙོམ་ཞེས་བྱ། རྟགས་མཚན་རྨི་ལམ་བཟང་པོ་བྱུང་། ཡང་ང་སྒྲིབ་
པ་ཆེ་ནས་བརྗེད། དུས་ཚོད་ཉི་མ་ཤར་དུས་སྐྱེས། ཚེས་གྲངས་ཚེས་བཅུ་ལ་སྐྱེས། ལྷུམས་སུ་ཚེས་བཅོ་ལྔ་ལ་ཞུགས། ཞེས་ཞུས་པས། ཨ་མ་ཁྱོད་ལ་མི་བདེན་ནོ། །རྒྱལ་པོ་ཁྲི་སྲོང་ལྡེའུ་བཙན་ཡིན། །ཧེ་ཧེ་ལྷུམས་སུ་དུས་ཚོད་གང་ལ་ཞུགས། ཟླ་བ་གང་ཡིན། སྐྱེས་དུས་ཟླ་བ་གང་ཡིན་ཞུས་པས། ལྷུམས་སུ་དུས་ཚོད་ཐོ་རངས་ཞུགས། ཟླ་བ་བྱི་བ་ཡིན། སྐྱེས་དུས་སྤྲེལ་ཟླ་ཡིན། ཞེས་ཞུས་སོ། །དེ་ནས་ལོ་ལྔ་རྒྱལ་གྱི་ཟླ་ཚེས་གསུམ་ལ། ཨ་མ་ཨ་མ་དེ་རིང་མི་གཅིག་གི་ཤ་འབབ་གཅིག་ཁྱེར་ནི་འོང་ལེ་ཡོད་མ་ཟ་ཨང་། ཞེས་གསུངས། དེ་ཉིན་མིའི་ཤ་འབབ་ཁྱེར་བྱུང་སྟེ་མ་ཟོས་པས། ཕྱིས་དེ་རྒྱུ་ནད་ཀྱིས་ཤི་བའི་ཤ་ཡིན་པ་ཐོས། དེ་ནས་བཟུང་སྟེ་མངོན་ཤེས་ཐོབ། ཡང་བོན་པོ་འགའ་བྱུང་ནས་ཁྲུས་བྱེད་སྨྲས་པས་མ་བཅུག་དུས། བོན་པོས་བྱིས་སྦ་ཁྱོད་ལ་འདི་རེ་ཨང་སྨྲས་པས། བུ་དེས་ཧ་ཧ། ང་ལ་མི་འདེར་ཁྱོད་ལ་འདེར། །ལོ་གཅིག་ལོ་ཡི་ལོ་སྟོད་ན། །བུམ་ལྟོའི་ནམ་མཁའ་མཚོན་གྱིས་གཤག །བོན་མགོ་ཆེ་ཁྱོད་ལ་འདེ་རེ་ཨང་། །ལོ་གསུམ་ལོ་ཡི་ལོ་སྨད་ན། །དཀྱིལ་གྱི་མེ་ཏོག་མཐའ་རུ་བུད། །བོན་དཔོན་འདོད་ཅན་ལ་
འདེ་རེ་ཨང་། །ལོ་ལྔ་ལོ་ཡི་ལོ་སྐེད་ན། །ཁ་འཛིན་གྱི་འཇའ་མོ་འོད་དུ་ཡལ། །བོན་བརྟེན་འདོད་ཅན་ལ་འདེ་རེ་ཨད། །ལོ་བདུན་ལོ་ཡི་ལོ་འགོ་ན། །མཛེས་འདོད་ཀྱི་ཁྱུ་གཅིག་གཤིན་རྗེས་འཁྱེར། །བོན་འདོད་ཆགས་ཅན་ལ་འདེ་རེ་ཨང་། །ལོ་དགུ་ལོ་ཡི་ལོ་མཇུག་ན། །མི་ཀུན་གྱིས་རྣ་བ་ཕར་ལ་བསྟེབ། །བོན་གཏི་མུག་ཅན་ལ་འདེ་རེ་ཨང་། །བཅུ་གཅིག་ལོ་ཡི་ལོ་སྐེད་ན། །གྲི་མདུང་ཚོ་གཡག་རྒོད་འཕགས་པ་འདྲ། །བོན་ཞེ་སྡང་ཅན་ལ་འདེ་རེ་ཨང་། །བཅུ་གསུམ་ལོ་ཡི་ལོ་མཚམས་ན། །མི་ཐུབ་པའི་སེང་གེས་ང་རོ་བྱ། །བོན་ཕྲག་དོག་ཅན་ལ་འདེ་རེ་ཨང་། །བཅོ་ལྔ་ལོ་ཡི་ལོ་མགོ་ན། །བཟང་མཛེས་ཀྱི་དཔོན་པོ་གཅེར་བུར་འགྲོ། །བོན་འདོད་སྲེད་ཅན་ལ་འདེ་རེ་ཨང་། །བཅུ་བདུན་ལོ་ཡི་ལོ་སྨད་ན། །ཕྱུག་པོའི་གཡང་ལ་དྲི་ཟས་བཏབ། །བོན་སེར་སྣ་ཅན་ལ་འདེ་རེ་ཨང་། །བཅུ་བདུན་ལོ་ཡི་ལོ་སྐེད་ན། །མགོ་གཉིས་ཀྱི་མགོ་བོ་ཕྱོགས་བཞིར་གྱེས། །བོན་བཟང་འདོད་ཅན་ལ་འདེ་རེ་ཨང་། །ཉེར་གཅིག་ལོ་ཡི་ལོ་མཚམས་ན། །ཟིལ་ནོན་ཆོས་ཀྱི་བསྟན་པ་དར། །བོན་ང་རྒྱལ་ཅན་ལ་འདེ་རེ་ཨང་། །ཞེས་གསུངས་སོ། །བུམ་ལྟོ་ཟེར་བའི་བོན་པོ་
ཀུན་གྱི་དཔོན་གཅིག་ཡོད་པ་མགོ་ཟླའི་བཅུ་ལ་དེར་འོང་བས། ཡང་དེ་འདྲ་སྨྲས་པ། ཁོ་ཁྲོས་ནས་ཞག་བདུན་མནོལ་བསྒྲུབས་ནས་མནོལ་རྫས་བྱིན་པས་མངོན་ཤེས་མེད་སོང་། དེ་ནས་ལོ་ཡོལ་ཙ་བློན་པོ་མགོན་པོ་བརྟེན་གྱིས་གསན་ནས་གྲི་བརྒྱབ་སྟེ་བསད། ལོ་གསུམ་ཙམ་རེད་ཙ་བོན་པདྨ་དཀར་པོ་བྱ་བའི་དེ་གོང་གི་དཔོན་གཅིག་ཡོད་པས་རྒྱལ་པོའི་བཙུན་མོ་ལ་སྤྱོད་པས་ཕུད་དོ། །དེ་ནས་ལོ་ལྔ་རེད་ཙ་བློན་པོ་དགེ་བྱང་ཟེར་བ་བོན་བློན་ཡིན་པས་བོན་པོའི་ཁ་འཛིན་བྱེད་ནས་བོན་ཡོང་དུ་བཅུག་མཁན་ཞིག་ཡོད་པ་ཤི། ལོ་བདུན་ལོན་ཙ་ན་ནད་ངན་བྱུང་ནས་བོན་མོ་བརྒྱ་ཙམ་ཤི། དེ་ནས་བློན་པོའི་གྲལ་བསྡད་པས། ཡབ་མགོན་པོ་བརྟེན་ནི་བློན་པོ་ཐམས་ཅད་ཀྱི་མཆོག་ཡིན་དེ་མཚན་བློན་པོ་འོད་ལུ་ཞེས་བྱ་བའི་གྲི་རྐུས་པས། བློན་པོའི་གྲ་ནས་ཕུད་ནས་འོན་ལུང་དུ་བཞག །ཡབ་ཀྱི་སྡེ་ལ་ངའི་བུ་ཅི་ལ་ཕུད་དྲིས་པས། བཤད་མ་ཕོད་པར་མི་ཤེས་བོན་པོ་ཚོས་ཕུད་སྨྲས་ཟིན་ཟེར་རོ། །དེ་ནས་བློན་པོ་བོན་པོ་ལ་མ་དགའ་ནས་བློན་པོས་བོན་པོ་ངན་རབ་ཀྱི་མོ་ལྷ་བཏང་བས། སྡེ་ཐམས་ཅད་བོན་པོ་ལ་དད་པ་ལོག་ནས་བཀུར་སྟི་མ་བྱུང་སྟེ་ངོ་ལོག །དེ་ནས་གཡུང་དྲུང་དཔལ་གྱི་
སེང་གེ་ཁྲིམས་སང་ནས་བློན་པོར་ཚུད་པས། སྔར་གྱི་སྙིང་ནད་བྱས་ཏེ་བོན་པོ་གྲག་པ་གཅིག་གིས་གསོ་གཤག་པས། དེ་དང་སྔར་ནས་མ་དགའ་བས། བོན་པོ་ཀུན་གྱིས་བློན་པོའི་གྲ་ནས་ཕུད་དེ་བལ་ཡུལ་དུ་སྤྲུགས་སོ། །དེ་ཕུད་པ་ཁྲི་སྲོང་ལྡེའུ་བཙན་རྒྱལ་པོ་དང་པོར་འཁོད་པས་གསན། དེ་བློན་པོ་ཆེན་པོ་མགོན་པོ་བརྟེན་གྱིས་སྲས་ཡིན་ཕུད་མི་རུང་གསུངས་ཚུར་བོས། དེ་ནས་བོན་པོ་ཐམས་ཅད་གྲོས་བྱས་ནས་ཁྲི་སྲོང་ལ་ནི་འདི་སྤྲུགས་དགོས་ཞུས་ཀྱང་མ་གསན། དེར་བོན་པོ་གཅིག་གིས་རྒྱལ་པོའི་གཡུའི་ནེ་ཙོ་སྨྲ་ཤེས་བརྐུས་ནས་མ་རྙེད་པར། །བོན་པོ་གཅིག་ན་རེ། དེ་ངས་མཐོང་ངོ་། གཡུང་དྲུང་དཔལ་གྱི་སེང་གེས་བརྐུས་སོ། ཞེས་ཞུས་པས། ཡང་རྒྱལ་པོས་རྒྱ་ནག་ཡུལ་དུ་སྤྲུགས་སོ། །དེར་སྤྲུགས་པའི་རྩ་བ་བོན་པོས་བྱས་པ་ཡབ་བློན་པོ་མགོན་པོ་བརྟེན་གྱིས་གསན་ནས་དམག་བྱས་ཏེ་བོན་པོ་དེ་དང་བརྩད། བོན་པོ་ལ་ཡང་སྡེ་ཡོད་པས་གཡུལ་གཏུགས་པས་བོན་པོ་ཕལ་ཆེར་བསད། དེ་ནས་གཡུང་དྲུང་དཔལ་སེང་སྤྲང་ཆས་སུ་ཡར་དབུས་སུ་འོང་ངོ་། །དེར་སུས་ཀྱང་ངོ་མ་ཤེས་པར་སྤྱང་ཞི་དུལ་ཅན་ཟེར་ནས་ཀུན་གྱིས་སྤྱང་ཟས་ལེགས་པར་བྱིན་ནོ། །དེ་ནས་ངོ་ཤེས་པ་ཞིག་བྱུང་སྟེ་
འདི་ལ་མ་བྱིན། གཡུང་དྲུང་དཔལ་སེང་རེད་ཟེར་རོ། །དེ་ཅི་ཡིན་ཟེར་བས་འདི་རྒྱལ་པོས་སྤྲུགས་པ་ཡིན། འདི་ལ་ལེགས་པོ་བྱས་ན་ཆད་པ་འོང་ཟེར། དེར་ཡང་མ་ཉན་ཅིང་བྱིན་ནོ། །དེ་ནས་ཡབ་བློན་རྒན་སར་ཕྱིན་པས། རྒྱལ་པོ་ལ་བཀའ་ཞུས་ནས་ཡབ་འདས་ལ་ཁད་དང་མཇལ། དེ་ནས་ཁྲི་སྲོང་ལྡེའུ་བཙན་ཡང་བོན་ལ་ཧ་ཀྱང་མི་དགྱེས་པར་གྱུར། བོན་པོ་རྣམས་དང་རྒྱལ་པོ་ཧུས་མི་གཅིག་པར་སོང་། དེར་བོད་ཀྱི་རྒྱལ་ཕྲན་ཞིག་ལ་བོན་པོས་དབང་ཆེ་བྱས་པས། རྒྱལ་ཕྲན་དེས་དམག་སྟོང་དམག་གཉིས་ཙམ་བསྡུས་ནས་བོན་པོ་ལ་བརྒྱབ་བོ། །དེར་བོན་པོ་ཤིན་ཏུ་ཕམ་མོ། །དེའི་མངའ་ཞབས་བོན་པོ་རྣམས་དེ་ལ་ཁྲལ་འཇལ་བར་གྱུར་ཏོ། །དེ་རྒྱལ་པོ་ཁྲི་སྲོང་ལ་ཞུས་ཀྱང་བོན་པོ་ལ་མ་གསན། དེ་ནས་བོན་པོ་ཐམས་ཅད་ཀྱིས་དཔོན་བཟང་མཛེས་བྱ་བ་ལ། ཁྲི་སྲོང་གི་བློན་པོ་ཐུགས་ཟིན་ཞིག་གིས་བུ་གསོ་བཅུག་པ་མ་སོས་ཏེ་ཐར་ཁན་སྟོན་ནུབ་ཤི། དེ་ནས་བོན་པོ་དེ་རྒྱལ་པོས་སྤྲུགས། དེ་ཕྱིར་སོང་བ་ཇག་པས་བླངས་ཏེ་གཅེར་བུར་ཕུད་དེ་བཀྱིག་བརྡུངས་བྱས་སོ། །དེ་ནས་འཁྱམ་དུ་སོང་སྟེ་དེ་ནི་ནེ་ཙོ་རྐུ་མཁན་དེའོ། །བོན་པོ་དེ་རྣམས་ཕྱུག་པོ་ཡིན་པ་ལ་
དགས་བཏབ་ནས་རྒྱུ་མེད་པར་ཕུད་དོ། །དེ་ནས་བོན་སྐུ་ཚེ་དབང་རིག་འཛིན་དང་བོན་པོ་བྱེད་འདོད་བྱ་བ་གཉིས་མ་དུམ་སྟེ་བྱེ་སོ་སོར་བྱས་པ་དང་དྲན་པ་ནམ་མཁའ་ཡབ་སྲས་གཉིས་བྱེད་འདོད་ཡབ་སྲས་གཉིས་དང་བཞི་ནང་མ་འཆམ་ཁ་བཞིར་གྱེས་སོ། །དེ་ནས་ཨོ་རྒྱན་རྒྱ་གར་དུ་གདན་འདྲེན་སྔ་མ་བཏང་བས་བལ་པོར་ཕེབས། དེ་དུས་བློན་པོ་གཅིག་དང་མ་དུམ་པས་གཡུང་དྲུང་དཔལ་སེང་སྤྲུགས་སོ། །དེར་ཁོ་བོ་ཨོ་རྒྱན་དྲུང་དུ་འགྲོ་སྟེ་ཁྱོད་ལ་ཡང་བཀའ་ཆད་འོང་སྨྲས་པས། ཁྱོད་སྔོན་ལ་ལན་གསུམ་ཕུད་དུས་བཀའ་ཆད་མ་བྱུང་། བཀའ་ཆད་ཅིའི་ཕྱིར་འོང་ཟེར་བས་མགུར་འདི་གསུངས། རྗེ་ན་མོ་གུ་རུ། བཀའ་ཆད་ཁྱོད་ལ་མི་འོང་སུ་ལ་འོང་། །ང་དེ་སྔ་ལན་གསུམ་ཕུད་པའི་དུས། །ཁྱོད་ཀྱི་བཀའ་ཆད་མ་བྱུང་ཟེར། །འོན་ལུང་ནང་དུ་སྤྲུགས་པའི་དུས། །དེ་ཡི་བཀའ་ཆད་བོན་པོ་ལ། །མི་ཀུན་གྱི་མ་ཉན་ངོ་ལོག་བྱས། །ང་དང་པོ་ལོ་ལྔ་ལོན་པའི་དུས། །དེ་དང་མཐུན་པའི་ལུང་བསྟན་བྱས། །དེ་ནས་ལན་གཉིས་སྤྲུགས་པའི་དུས། །བོན་པོ་རྣམས་དང་འཁྲུག་པ་བྱས། །ང་དང་པོ་ལོ་ལྔ་ལོན་པའི་དུས། །དེ་དང་མཐུན་པའི་ལུང་བསྟན་བྱས། །སྡེ་ཆུང་གཅིག་གིས་དམག་བྱས་
རྗེ་ན་མོ་གུ་རུ། བཀའཚད་ལ་ཡང་བཀའ་ཆད་འོང་སྨྲས་པས། མ་ཚང་བས་བལ་པོར་ཕེབས། ང་ནང་དུ་སྤྲུགས་པའི་བར་གསུངས། ནས། །སྡེ་བོན་པོ་སྤྱི་ཡི་དཔོན་དུ་གྱུར། །ང་དང་པོ་ལོ་ལྔ་ལོན་པའི་དུས། །དེ་དང་མཐུན་པའི་ལུང་བསྟན་བྱས། །བོན་བཟང་མཛེས་གཅེར་བུར་མཐའ་རུ་འཁྱམས། །ང་དང་པོ་ལོ་ལྔ་ལོན་པའི་དུས། །དེ་དང་མཐུན་པའི་ལུང་བསྟན་བྱས། །ཞེས་སྨྲས་ཨོ་རྒྱན་མཇལ་དུ་སོང་ངོ་། །དེར་བལ་ཡུལ་དུ་ཨོ་རྒྱན་དང་མཇལ་ལོ། །ཚེ་དཔག་དབང་ལུང་ཐོབ། དེ་ནས་སྐྲུན་ལ་ཚུར་འོང་རྒྱལ་པོ་ལ་ཡང་མ་སྒྲུག་གོ །དེ་ནས་རྒྱལ་པོ་འཁོར་བཅས་ཨོ་རྒྱན་བསུར་འོང་བ་དང་ལམ་དུ་ཐུག་སྟེ། ཨ་རོག་མངའ་བདག་རྒྱལ་པོ། ང་ཁྱི་ལ་སྟག་ཚར་བ་ཡིན་ང་ལ་ཕྱག་འཚོལ་སྨྲས་པས། ཁྱོད་ཁྱིའམ་ཝ་ལ་སྟག་ཚར་ཡང་ང་འཛམ་གླིང་རྒྱལ་པོས་ཕྱག་མི་འཚལ་གསུངས། དེ་ནས་ཨོ་རྒྱན་དྲུང་དུ་ཡར་སོང་བས། ཨོ་རྒྱན་དང་རྒྱལ་པོ་མཇལ་ལ་ཁད་དུ་རྒྱལ་པོའི་དྲུང་དུ་སོང་ནས་ཨོ་རྒྱན་ལ་བསུ་བ་རྒྱ་ཆེན་པོ་དང་ཕྱག་འཚོལ་སྨྲས་སོ། །དེ་ནས་ཨོ་རྒྱན་ལས་ལྷག་པ་འཇིག་རྟེན་ན་མེད་ན་ཅིའི་ཕྱིར་རྒྱལ་པོས་ཕྱག་མི་འཚལ་སྨྲས་པས། ང་ལ་ཡང་ཨོ་རྒྱན་གྱི་ཐུགས་རྗེ་འདི་ལྟར་བྱུང་ཞེས་ནམ་མཁའ་ལ་སྐྱིལ་ཀྲུང་བཅས་ཏེ། རི་རྩེ་སྐྱིལ་ཀྲུང་གིས་ཁྱབ་པར་བྱས་སོ། །ཕྱིས་བི་མ་ལའི་ཉེར་གནས་ཀྱང་
བྱས་པས། མ་མོའི་དབང་ལུང་གནང་། བི་མ་ལས་བྱང་ཆུབ་ཆེན་པོ་ལ་ཕྱག་མ་འཚལ་ནས་རྒྱལ་པོ་མ་མཉེས་དུས། ང་ནི་བི་མའི་སློབ་མ་ཡིན་པས་ལྟོས་སྨྲས་ནས་འདོམ་དོ་ཙམ་ནམ་མཁའ་ལ་བཞུགས་སོ། །དེ་ནས་གཡུང་དྲུང་དཔལ་སེང་ཟླ་བ་གསུམ་ཙམ་མཚམས་བསྡམས་ཏེ་སྒྲུབ་པ་མཛད། དེ་ནས་བོན་པོ་བསྣུབས་ནས། བི་མ་ལས་ཁྱོད་ལ་མིང་འདི་སུས་བཏགས་རུས་ཅི་ཡིན་གསུངས་པས་རྒྱུ་མཚན་ཞུས་པ་ན། ང་གཡུང་དྲུང་དེ་བོན་པོས་བཏགས་འདུག་པས་ཆོད། རུས་ཤུད་བུ་ཡིན་པས་ཤུད་བུ་དཔལ་གྱི་སེང་གེ་ཐོགས་གསུངས། དེ་ནས་རྒྱལ་པོའི་ཚ་མོ་གཅིག་ལ་སྲས་གཅིག་ཐོན། དེ་སུའི་ཡིན་མ་ཤེས་དུས་མོ་མ་དང་རྩིས་མཁན་འགས་འདི་གཡུང་དྲུང་དཔལ་སེང་གི་རེད་སྨྲས་པས། རྒྱལ་པོས་བཀའ་བཀྱོན་གནང་ཛ། ང་གཡུང་དྲུང་དཔལ་སེང་མིན། ང་ཤུད་བུ་དཔལ་སེང་ཡིན་གསུངས། དེ་ནས་རྒྱལ་པོས་བཀའ་བཀྱོན་སོང་ངོ་། །ཡང་སྦྱ་བ་མ་བྱ་བའི་འཆོལ་མ་ཞིག་ཡོད་པ་ཁྲིད་ནས་གཞུ་སྙི་མོ་བྱོན། ཕྱིར་ནངས་སྙེབ་པས་ཁོང་རང་གཞུ་བསླང་བའི་གཞུ་མཆོག་སྟེང་དུ་སྐྱིལ་ཀྲུང་བཅས་འཆེས་མོས་གཞུ་འཐེན་ནས་མདའ་གཅིག་འཕང་པ་མདའ་དེ་ཕ་བོང་ལ་བརྒྱབས་ནས་སྒྲོའོ་ཆར་
ཐང་བྱས། དེར་སྲས་མོ་གཅིག་ཡོད་ཛ་མུ་གེ་བྱུང་ནས་སྤང་སོང་ཛ་འཆས་མོ་བསྐྱར་སྲས་མོ་ཁྲིད་ནས་མཚན་ལ་རྒྱལ་པོའི་ཕོ་བྲང་དུ་གཤེགས་ཏེ་བཞུགས་པས་སུས་ཁྲིམས་མེད་པས་ཤུད་བུ་ཁྲིམས་ཐར་ཞེས་བཏགས། དེ་ནས་འཆས་མོ་དེ་མུ་གེས་ཤི་བ་ཐོས་པས་ད་ཁྱོད་ཀྱི་དྲོངས་དང་སྨྲས་ནས་བཅོལ་གཏམ་བྱས་པས་མོ་ངས་སྔར་ཡང་དྲངས་ཚོད་གཅིག་ཡོད། །ད་ཡང་ངས་འདྲེན། ད་ལྟོས་ཟེར་ནས་བལྟས་པས། ཀུན་གྱིས་མཐོང་བར་འཇའ་དཀར་པོའི་རྒྱུད་ལ་གོས་དཀར་པོ་གྱོན་ནས་ཡར་འགྲོ་བ་མཐོང་། དེ་ནས་ཡུམ་དེར་དགེ་དང་འདིར་དགེ་གཉིས་བསུས། དེར་དགེ་ལ་སྲས་གཅིག་ཡོད་ཛ། ཡང་འབིལ་མཚོ་བྱ་བ་ལ་སྲས་གཅིག་ཐོན་པས་དེར་དགེས་འཛིངས་ནས་ལྟག་པའི་བདུད་སྒོར་རྡོ་བ་སོ་གསུམ་པ་གཅིག་བརྒྱབས་པས་ཆུང་མ་འདིར་དགེས་ཆུང་མ་དེར་དགེ་ལ་གྲི་ཆུང་ཕྱུང་ནས་བསྡིག །དེར་ཤུད་བུ་དཔལ་སེང་གིས། ད་ནི་སེམས་ཅན་ཡིན་པས་སྡིག་པ་ལ་འཛེམ་པ་ཡིན། དེ་མིན་ན་ངས་ཁྱོད་ཐུབ་སྟེང་ལ་སྡིག་པ་ཡོད་པ་དེ་ཁྱོད་ཀྱི་ཨི་ཤེས་ཞེས་གསུངས། དེ་ནས་འདིར་དགེས་བལྟས་པས་རྨ་དེའི་ནང་དུ་ལྷ་ཚོགས་དཔག་ཏུ་མེད་པ་མཐོང་། དེ་ནས་འདིར་དགེ་ལའང་སྲས་པོ་གཅིག་
འཁྲུངས། དེ་གཉིས་བསུས་ནས་ལོ་གསུམ་རེད་ཛ། དེ་ནས་ཆེན་ཆུང་དང་རྩོད་པས་འཛིང་འཛིང་ཛ་འཛིར་བསྡོ་དེར་དགེ་མེད་སོང་། འདིར་དགེ་དང་བརྩད་ནས་བརྗེ་བྱེད་དུ་བི་མ་ལའི་དྲུང་དུ་སོང་ནས་ཞུས་པས་ཁྱོས་འཛིངས་མོ་བྱས་ནི་འོང་བས་བན་དེ་མི་བྱེད་གསུངས། རྗེ་ན་མོ་གུ་རུ་བི་མ་ལ། །ང་སྐྱོ་བ་སྙིང་ནས་སྐྱེས་པ་ཡིན། །གསུངས་ཤིང་ཡོང་བཟློ་བི་མ་ལས་ཅི་ཡིན་འདྲ་བན་དེ་བྱེད་རྒྱུ་མེད་ཕྱིར་གཤེགས་གསུངས་པས་མ་བྱས། དེ་ནས་མ་མོ་བསྒྲུབས་པས་ཞག་གཉིས་སོང་ཛ་རྒྱལ་པོས་སྐད་པས་མཚམས་ཧར་འདོན་བྱས་ནས་འོང་བས་འདིར་དགེ་ཤི། དེ་ནས་རྒྱལ་པོ་ལ་ཚེ་ཆུ་འཐུང་མ་བཙུག་དུས། ཨོ་རྒྱན་གྱིས་རྒྱལ་སྲིད་ཀྱི་བཞེད་པ་མེད། ཁག་ཁུར་དེ་ལས་རྒྱལ་པོ་སྐུ་ཚེ་རིང་བས་གཙོ། ཞེས་གསུངས་སོ། །ཀླུ་དཔལ་གྱི་མཁར་བས་གཉའ་བ་ནས་ལན་གསུམ་བརྡུངས། འདི་གང་དུ་མ་འགྲོ་ཟེར། རྒྱལ་པོས་གསོལ་མ་ཕོད་པས་ཚེ་ཆུ་ཚེ་རིལ་ཐམས་ཅད་གཏེར་དུ་སྦས། སྨོན་ལམ་བཏབ་དེ་ནས་ཡང་རྒྱལ་པོ་འགྱོད་ནས། ད་ཡང་ང་ཡི་ཚེ་བསྲིང་དགོས་ཞུས་པས། རྟེན་འབྲེལ་མ་འགྲིགས་དེ་མིན་ན་སྔོན་དུ་ཚེ་ཆུ་དེ་བཏུང་ན་ལོ་སྟོང་ཚོ་གསུམ་ཐུབ་སྟེ་མ་བཏུང་བས་ད་ལོ་དྲུག་ལས་
བསྲིང་རྒྱུ་མེད་གསུངས་པས། དེ་ཙམ་ཡིན་ལོ་སྟོང་ཚོ་གསུམ་ཐུབ་པས་ངས་ཇུས་ནི་མི་དབང་དེ་ལས་དྲུག་དགའ་སྨྲས། མ་ལེགས་ལོ་གསུམ་ལས་བསྲིང་ཐབས་མེད་གསུངས་པས། དེར་ཀླུ་དཔལ་གྱིས་ཁྱོད་ཀྱིས་བྱས་ཟེར་ནས་དཔལ་སེང་མདའ་དེད་བྱས། དེ་ནས་དཔལ་སེང་གེས་རྡོ་རྗེ་ཕུར་པ་ཨོ་རྒྱན་ལ་ཞུས་ནས་བསྒྲུབས་དུས་ཕུར་པ་འཁོར་བཅས་ནམ་མཁའ་ལ་འཕག །སྒྲོ་བའི་ནང་དུ་བཞུགས་ཀྱང་སྒྲོ་བ་དང་བཅས་པ་ལན་གསུམ་ནམ་མཁའ་ལ་འཕར། དེ་ནས་ཕུར་པ་དེ་གཙང་པོ་ལ་བཏབ་པས་ཞག་བདུན་ཡར་བབ། དེ་ནས་རྟ་རྒྱུག་མ་བྱེད། ཨོ་རྒྱན་གྱིས་གསུང་དུས་མཚན་ལ་རྒྱུག་རྒྱུ་བྱས་པས་དཔལ་སེང་གེ །ཨོ་རྒྱན་ལ་མངོན་ཤེས་ཡོད་པ་ནི་ཐག་ཆོད་དོ། །དེས་ན་ཉིན་མཚན་ནམ་རྒྱུག་འདྲ་བ་མ་རྒྱུག་སྨྲས་པས། ཀླུ་དཔལ་བོད་ཀྱི་ལོ་གསར་དུས་རྟ་མ་རྒྱུག་ན་རྒྱལ་པོ་འདས་སམ་སྡུག་བསྔལ་བྱུང་རྟགས་ཡིན་པས་ཁ་ལྟས་ངན་པ་ཟེར་ནས་རྡོ་བ་ཆང་ཚུད་རེ་བྲང་དཀྱིལ་དུ་བརྒྱབས་པས། ངས་དེ་སྨྲས་པས་རྒྱལ་པོ་མི་འདའ་སྟེ་རྒྱུག་ན་འདའ་དོགས་པ་ཡིན། ཅེས་སྨྲས་ཏེ་མགུར་འདི་བཞེངས་སོ། །རྗེ་ཨོ་རྒྱན་རྗེ་ལ་གསོལ་བ་འདེབས། །ང་བློན་པོའི་གྲལ་ལ་བསྡད་པས་
ལེན། །ང་དང་པོ་བློན་པོར་བསྡད་པའི་དུས། །འོན་ལུང་ནང་གི་བར་དུ་ཕུད། །དེ་ནས་བློན་པོར་བསྡད་པའི་དུས། །བལ་པོའི་ཡུལ་གྱི་བར་དུ་ཕུད། །ཡང་མ་གམ་བློན་པོར་བསྡད་པའི་དུས། །རྒྱ་ནག་ཁྱི་ཡི་ཡུལ་བར་ཕུད། །ཡང་མ་གམ་བློན་པོར་བསྡད་པའི་དུས། །རྒྱ་གར་བལ་པོའི་མཚམས་སུ་ཕུད། །ཆོག་གོ་ཆོག་གོ་འཇར་པོ་འཇར། །ཡང་གཅིག་བློན་པོའི་གྲལ་བསྡད་དུས། །གཉའ་བ་མཁར་བས་ལན་གསུམ་བརྡུང་། །གོང་དུ་མ་འགྲོ་ཟེར་བས་འཚིང་། །ཡང་མ་གམ་བློན་པོར་བསྡད་པའི་དུས། །ཉེས་མེད་མདའ་མོས་བརྒྱབ་གྲབས་བྱས། །ཡང་མ་གམ་བློན་པོར་བསྡད་པའི་དུས། །ཆང་ཚུད་རྡོ་བ་གཉིས་ཀྱིས་ནི། །གཅིག་བརྒྱབ་གཅིག་བརྒྱབ་བྲང་རུས་བཅག །ད་ཆོག་ད་ཆོག་ད་མི་འདུག །ད་ཆོག་ད་ཆོག་འདིར་མི་འདུག །ཆོག་གོ་ཆོག་གོ་འཇར་པོ་འཇར། །བློན་པོའི་གྲལ་ན་མ་ཕྱིན་དགོས་ལེ་རེད། །ད་ཕྱིན་ཆད་བློན་པོར་མ་སྐྱེ་ཅིག །ཅེས་གསུངས་ནས་བྱོན་པས། ཀླུ་དཔལ་གྱིས་ད་ཁྱོད་ཀྱིས་ཆུ་དེ་ལ་འདི་གཏོར་ཚེ་ཆོད་ཐལ་ན་ནི་ཁྱོད་བློན་པོའི་གྲལ་ན་འདུག་མི་དགོས། འདི་གཏོར་ཚེ་མ་ཆོད་ན་ནི་བློན་པོའི་གྲལ་ན་འདུག་དགོས་ཟེར་ནས། ཆང་སྐྱོགས་དོ་
དལ་བུས་ཚག་ནང་ནས་གཏོར་རྒྱུ་བྱས་སོ། །དེ་ནས་དབྱིག་པ་གཅིག་གཙང་པོ་ལ་བརྒྱབས་པས་དེ་མ་ཐག་གཙང་པོ་ཆད་དེ་ཕར་ཀར་ཐར། དེ་མ་ཐག་གཙང་པོ་སྔར་ལྟར་འབྲེལ་ལོ། །དེ་ནས་རབ་ཏུ་བྱུང་འདོད་ནས་བི་མ་ལའི་དྲུང་དུ་སོང་ངོ་། །དེར་བི་མས་མ་གནང་ངོ་། །དེ་ནས་དུས་ཤིང་ཕྱིར་འོང་ནས་རྒྱལ་པོའི་དྲུང་དུ་འགྲོ་བསམས་པས་ཀླུ་དཔལ་སོགས་ཀྱིས་འོང་མ་བཅུག །ཁྱོད་དང་པོ་བློན་པོའི་གྲལ་ནས་མི་ཐར་ཐར་བྱས། ་ཡང་ཡར་ཅི་ལ་འོང་ཟེར། དེ་ནས་ངུས་ཤིང་སྤྲང་པོ་ཁྱུ་གཅིག་གི་གྲལ་བསྡད་པས། བི་མ་ལས་རྒྱལ་པོ་ལ་གསུངས་པ། འདི་བློན་པོའི་གྲལ་ཚུད་དང་ལེགས། སྤྲང་པོའི་གྲལ་བཞག་ན་བཀའ་ཆད་འོང་གསུངས། དེ་ནས་ཡང་བློན་པོའི་གྲལ་བཙུད་དོ། །རྒྱལ་པོ་རྟ་རྒྱུག་པས་འདས་སོ། །བློན་པོ་བྱས་ནས་དབང་ཆེར་བྱས་པས། ཀླུ་དཔལ་གྱིས་འདི་སྤྲང་པོའི་གྲལ་ནས་བཏོན་ཛ། ཡང་དབང་ཆེ་བྱེད་ནི་ཟེར་བཤུལ་ཏིང་དུ་རྡོ་བ་གཅིག་བརྒྱབ་བོ། །དེ་ནས་རྒྱལ་པོ་འདས་རྗེས་སྲས་མུ་ནེ་བཙད་པོ་རྒྱལ་སྲིད་དུ་དབང་བསྐུར་བ་མ་ཡར་གྱིས་དུག་དྲངས་ནས་འདས། བསམ་ཡས་གཉའ་བྲག་དམར་པོའི་གདང་སྣ་གཉན་ས་དེ་ནས་མགུར་འདི་གསུངས། །
ཀྱེ་མ་ད་ནི་བསྐལ་པ་སྙིགས། །མ་ཡི་བུ་ལ་དུག་བྱིན་ནས། །རྒྱལ་པོའི་རྒྱལ་རྒྱུད་རྩད་ནས་བཅད། །འདི་འདྲ་སྲིད་པར་འོང་ངམ་སོམ། །ལྷ་འདྲེ་ཁྱོད་ཀྱིས་ཤན་ཕྱེས་ཤིག །ཅེས་སྨྲས་པས་བཙུན་མོས་ཐོས་ཏེ་གནོང་ལ་ཕོག་ནས་ཤུད་བུ་ཆུ་ལ་འཕེན་པར་བྱས་ཏེ། ཆུའི་མདའ་དེར་མི་བཅུ་གསུམ་གྱིས་ལག་ལ་ལྕགས་ཀྱུ་རལ་གྲི་མདུང་རིང་ཐུང་བཟུང་ནས་དགུག་བཅུག ། དེ་ནས་ཆུ་ལ་འཕངས་བས། ཤུད་བུས་འོ་དོད་བྱས་ཏེ། ཆུ་བོ་མདའ་ན་མ་འབབ་ཕུ་ན་བོབ། །དཔལ་སེང་དག་ལ་བདེན་པ་ཡོད་དམ་མེད། །ཅེས་སྨྲས་པས་ཆུ་བོ་གྱེན་དུ་བབ་བོ། །དེར་དགུག་མི་རྣམས་ཆུ་གྱེན་ལ་བབ་ནས་ཐལ་བ་དེས་ཅི་བྱས་སམ་ཟེར། ལ་ལས་མིག་འཁྲུལ་བ་ཡིན་དགུག་ཟེར། དེར་དཔལ་སེང་ཟམ་འོག་གཅིག་ཏུ་ཡར་ཆུས་ཁྱེར་བ་ཟམ་ལ་འཇུས་ནས་སྟེང་དུ་ཐར་ཏེ། ཟམ་ཤིང་གཅིག་ལ་གོས་ཕྱི་མ་རྣམས་དཀྲིས་ཏེ་ཆུར་འཕངས། ད་ནི་ཆུ་བོ་ཐུར་དུ་བོབ་སྨྲས་པས་དེ་ལྟར་གྱུར་ཏེ་སོང་། དགུག་མི་རྣམས་ཀྱིས་རོ་ཡིན་སྙམ་ནས་མཚོན་ཆ་རྣམས་བརྒྱབས། ལ་ལས་མ་རེད་ཟེར། བློན་པོ་འོད་ལྡན་བྱ་བས་ལྕགས་ཀྱུ་བརྒྱབས་པས་ཤིང་གིས་དྲུད་ནས་ཆུས་ཁྱེར་རོ། །དེ་ནས་བསམ་ཡས་སུ་བྱོན་པས་
བཙུན་མོ་ན་རེ། འདི་མ་སོད་སྟེང་མ་ངའི་འོད་ལྡན་ཆུས་ཁྱེར་ཟེར་ནས་འཐབ་ཏུ་བྱུང་བས། ཞབས་ཕྱེད་སྐྱིལ་གཅིག་བྱས་ནམ་མཁར་འཕག་སྟེ་ཡུན་རིང་བཞུགས་སོ། །དེ་ནས་བཙུན་མོའི་ཆད་པ་སང་ངོ་། །དེ་ནས་གཞན་གྲོང་གཅིག་ཏུ་གུ་རུ་མ་བ་ལ་སྲས་གཅིག་འཁྲུངས། དེ་དཔལ་སེང་གེ་ཡིན་པར་ཐག་ཆོད་པ་དང་། བི་མ་ལ་ཕེབས་འོང་ནས། ངས་ལན་གཉིས་བན་དེ་མ་བྱས་པ་དེ་འོང་བར་ཤེས་པ་ཡིན། ད་ཨོ་རྒྱན་གྱི་དྲུང་དུ་རབ་ཏུ་བྱུང་ཞིག་གསུངས་པས། ཨོ་རྒྱན་གྱི་དྲུང་དུ་རབ་བྱུང་ཞུས་སོ། །སྤྱིར་བི་མ་ལ་ཨོ་རྒྱན་སོགས་ལ་དབང་དང་གདམས་པ་ནི་སྔ་ཕྱི་བར་གསུམ་དུ་དཔག་ཏུ་མེད་པ་ཞུས་སོ། །ཁྱད་པར་རྡོ་རྗེ་ཕུར་པའི་བཀའ་བབ་པ་ལགས་སོ། །བཻ་རོ་ཙཱ་ན་ལ་ཡང་ཆོས་འབྲེལ་མང་དུ་ཞུས་སོ། །དེ་ནས་རབ་ཏུ་བྱུང་ན་ཡང་ཨོ་རྒྱན་བྱོན་རྗེས། སད་ན་ལེགས་ཀྱི་ཡབ་དོད་བློ་ཕུག་འདྲི་བའི་ནང་བློན་ལོ་བཞི་ཙམ་མཛད་དེ། དེ་ནས་དགུང་ལོ་བདུན་ཅུ་དོན་དགུའི་སྟེང་དུ་བསམ་ཡས་ཉིད་དུ་མྱ་ངན་ལས་འདས་ཏེ། གདུང་བཞུས་པ་ལ་འཇའ་ཚོན་སྣ་ཚོགས་ཟུགས་ཤིང་དེའི་རྒྱུད་ན་ལྷའི་སྐུ་མང་པོ་བཞུགས་པ་ཀུན་གྱིས་མཐོང་། རིང་བསྲེལ་བཅུ་དང་ཧིཡིག་དཀར་པོ་བྱོན་
ནོ། །དེ་ནས་ཁོང་དངོས་ནི་ཟངས་མདོག་དཔལ་རིར་འཇའ་ལུས་རིག་འཛིན་ཚུལ་དུ་བཞུགས་ཏེ། སྤྲུལ་པ་སྐྱེས་རྒྱུད་ཀྱི་ཕྲེང་བ་ནི་ལོགས་སུ་རྒྱས་པར་ཡོད་པ་ལྟར་རོ། །རྒྱལ་པོའི་ཚ་མོ་ལ་འཁྲུངས་པའི་སྲས་ནི་སྦས་ཚུལ་ཐ་མལ་པའི་ཚུལ་ལ། སྤུ་བ་མའི་བུ་མོ་ནི་རབ་བྱུང་བཙུན་མ་གཙང་མ་གཅིག་བྱུང་ངོ་། །འདིར་དགེའི་སྲས་རབ་ཏུ་བྱུང་སྟེ་དགེ་སློང་རྣམ་པར་དག་གོ དེ་གསུམ་ལ་ནི་རྒྱུད་མེད་དོ། །དེར་དགེའི་སྲས་ལ་སྲས་སྔགས་པ་གཅིག་བྱུང་། དེ་ལ་སྲས་གཉིས་ཀྱི་གཅིག་རབ་ཏུ་བྱུང་སྟེ་དགེ་སློང་གཅིག་ཁྱིམ་པ་སྟེ། དེའི་སྲས་ལ་བླ་མ་བཟང་པོ་གཅིག་བྱུང་སྟེ། ཨོ་རྒྱན་རབ་བརྟེན་ནོ། །དེ་ཕྱིན་རྒྱུད་མེད་དོ། །དེ་ཐམས་ཅད་འདས་དུས་འཇའ་རིང་བསྲེལ་ལ་སོགས་ངོ་མཚར་བའི་ལྟས་བྱུང་ངོ་། །ཞེས་པ་འདི་ཤུད་བུ་དཔལ་སེང་གི་རྣམ་ཐར་མཐོང་མ་མྱོང་ཞུས་པས། །དེ་ང་རང་གསལ་གསུངས་ནས་སྤྲུལ་སྐུ་མི་འགྱུར་རྡོ་རྗེས་དགུང་ལོ་བཅུ་གསུམ་དུས་ཐུགས་ཐོགས་ནས་བྲི་བར་མཛད་པའོ། །མངྒ་ལཾ།། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།