གསང་སྔགས་སྔ་འགྱུར་རྙིང་མའི་བླ་མ་གྲུབ་ཐོབ་རྣམས་དང་ཡི་དམ་ཆོས་སྐྱོང་ལ་གསོལ་བ་འདེབས་པ་བྱིན་རླབས་ཆར་རྒྱུན།
གསང་སྔགས་སྔ་འགྱུར་རྙིང་མའི་བླ་མ་གྲུབ་ཐོབ་རྣམས་དང་ཡི་དམ་ཆོས་སྐྱོང་ལ་གསོལ་བ་འདེབས་པ་བྱིན་རླབས་ཆར་རྒྱུན་བཞུགས་སོ།།
ཡོངས་གྲགས་ལ་རྗེ་འབངས་ཉེར་ལྔ། རྗེ་ཉིད་དང་ལ་ལར་ཉེར་བདུན་ཡིན་གསུངས་སོ། །ན་མོ་གུ་རུ་དེ་ཝ་ཌཱ་ཀི་ནཱི་ཧཱུྃ། དད་པ་ལན་གཅིག་སྐྱེས་པའི་བསོད་ནམས་ཀྱིས། །བྱང་ཆུབ་ལམ་ལས་ཕྱིར་མི་ལྡོག་མཛད་པ། །ཆོས་སྐུ་སྣང་བ་མཐའ་ཡས་ཚེ་དཔག་མེད། །གསོལ་བ་འདེབས་སོ་ཚེ་ཡི་དངོས་གྲུབ་སྩོལ། །སངས་རྒྱས་གངྒའི་བྱེ་སྙེད་ཕྱག་འཚལ་བས། །ཁྱེད་ལ་ཕྱག་གཅིག་འཚལ་བ་བསོད་ནམས་ཆེ། །ལོངས་སྐུ་ཐུགས་རྗེ་ཆེན་པོ་སྤྱན་རས་གཟིགས། །གསོལ་བ་འདེབས་སོ་རིགས་དྲུག་སྐྱེ་སྒོ་ཆོད། །དུས་ངན་སྙིགས་མར་ལྷ་གཞན་ཐུགས་རྗེ་རྡུགས། །ཁྱེད་ནི་ཐུགས་
རྗེའི་སྟོབས་ཆེ་བྱིན་རླབས་མྱུར། །སྤྲུལ་སྐུ་འཆི་མེད་པདྨ་འབྱུང་གནས་ལ། །གསོལ་བ་འདེབས་སོ་རྐྱེན་ངན་བར་ཆད་ཟློག །འཇམ་དཔལ་འགྲུབ་པས་ཉི་ཟླ་གདན་དུ་བཏིང་། །སྐུ་ཡི་རིག་འཛིན་སངས་རྒྱས་ཡེ་ཤེས་ལ། །གསོལ་བ་འདེབས་སོ་དུས་མིན་འཆི་བ་ཟློག །ལུས་ལ་བདེ་དྲོད་འབར་བར་བྱིན་གྱིས་རློབས། །རྟ་མགྲིན་འགྲུབ་པས་རྟ་སྐད་འཛམ་གླིང་ཁྱབ། །གསུང་གི་རིག་འཛིན་རྒྱལ་བ་མཆོག་དབྱངས་ལ། །གསོལ་བ་འདེབས་སོ་ཚེ་ཡི་དངོས་གྲུབ་སྩོལ། །ངག་ལ་ནུས་པ་འབར་བར་བྱིན་གྱིས་རློབས། །ཡང་དག་འགྲུབ་པས་ཉི་ཟླ་གདན་ལ་
བཏིང་། །ཐུགས་ཀྱི་རིག་འཛིན་ནམ་མཁའི་སྙིང་པོ་ལ། །གསོལ་བ་འདེབས་སོ་མཆོག་གི་དངོས་གྲུབ་སྩོལ། །སེམས་ལ་རྟོགས་པ་འཆར་བར་བྱིན་གྱིས་རློབས། །ཆེ་མཆོག་འགྲུབ་པས་བྲག་ལས་བདུད་རྩི་བཏོན། །ཡོན་ཏན་རིག་འཛིན་གཉགས་ཆེན་ཛྷཱ་ན་ལ། །གསོལ་བ་འདེབས་སོ་ནད་མེད་དངོས་གྲུབ་སྩོལ། །ལུས་སེམས་བདེ་སྐྱིད་ལྡན་པར་བྱིན་གྱིས་རློབས། །ཕུར་པ་འགྲུབ་པས་བསད་པའི་མི་རོ་བསླངས། །ཕྲིན་ལས་རིག་འཛིན་ཡེ་ཤེས་མཚོ་རྒྱལ་ལ། །གསོལ་བ་འདེབས་སོ་བདེ་སྟོང་དངོས་གྲུབ་སྩོལ། །སྟོང་ཉིད་ཕྱག་ཆེན་རྟོགས་པར་བྱིན་གྱིས་རློབས། །བླ་མེད་འགྲུབ་པས་མ་སྲིང་བྲན་དུ་ཁོལ། །མ་མོའི་རིག་འཛིན་དཔལ་གྱི་ཡེ་ཤེས་ལ། །གསོལ་བ་འདེབས་སོ་རིགས་རྒྱུད་དངོས་གྲུབ་སྩོལ་། །ཡམས་ནད་རིམས་ནད་ཞི་བར་བྱིན་གྱིས་རློབས། །གསང་བདག་འགྲུབ་པས་དྲེགས་པ་ཕོ་ཉར་འགྱེད། །མཆོད་བསྟོད་རིག་འཛིན་དཔལ་གྱི་སེང་གེ་ལ། །གསོལ་བ་འདེབས་སོ་དཔལ་འབྱོར་དངོས་གྲུབ་སྩོལ། །སྡེ་བརྒྱད་གནོད་པ་ཞི་བར་བྱིན་གྱིས་རློབས། །སྟོབས་ལྡན་འགྲུབ་པས་ཡེ་ཤེས་སྤྱན་དང་ལྡན། །དྲག་སྔགས་རིག་འཛིན་བེ་རོ་ཙཱ་ན་
ལ། །གསོལ་བ་འདེབས་སོ་ནུས་མཐུའི་དངོས་གྲུབ་སྩོལ། །བྱེད་ཁ་དྲོད་གཏོང་ཞི་བར་བྱིན་གྱིས་རློབས། །བཀའ་བརྒྱུད་འགྲུབ་པས་ས་བརྒྱད་མི་གཡོ་ཐོབ་། །ལྷུན་གྲུབ་རིག་འཛིན་ཁྲི་སྲོང་ལྡེའུ་བཙན་ལ། །གསོལ་བ་འདེབས་སོ་དབང་དང་དངོས་གྲུབ་སྩོལ། །སྣང་སྲིད་ཟིལ་གྱིས་གནོན་པར་བྱིན་གྱིས་རློབས། །བར་སྣང་ཁམས་སུ་ཐོགས་མེད་རླུང་ལྟར་རྒྱུག །རྡོ་རྗེ་རྣམ་འཇོམས་ཞབས་ལ་གསོལ་བ་འདེབས། །དག་པ་མཁའ་སྤྱོད་ཞིང་ཀུན་ཐོགས་མེད་བགྲོད། །ཡེ་ཤེས་དབྱངས་ཆེན་ཞབས་ལ་གསོལ་བ་འདེབས། །སྟག་མོ་ཅེ་སྤྱང་ཕྱག་གིས་ལུག་ལྟར་འཛིན། །སོག་པོ་ལྷ་དཔལ་ཞབས་ལ་གསོལ་བ་འདེབས། །ནམ་མཁའི་དབྱིངས་སུ་ཐོགས་མེད་བྱ་ལྟར་ལྡིང་། །སྣ་ནམ་ཡེ་ཤེས་ཞབས་ལ་གསོལ་བ་འདེབས། །རྟོགས་པ་མཆོག་ཐོབ་གསེར་གྱི་རྡོ་རྗེར་སྤྲུལ། །གཡུ་སྒྲ་སྙིང་པོའི་ཞབས་ལ་གསོལ་བ་འདེབས། །ཕུར་པ་ཚད་ཙམ་དགྲ་བགེགས་སྐད་ཅིག་བསྒྲལ། །དཔལ་གྱི་དབང་ཕྱུག་ཞབས་ལ་གསོལ་བ་འདེབས། །སྡིགས་མཛུབ་མཛད་པས་གཙང་པོ་གྱེན་དུ་ཟློག །ཤུད་བུ་དཔལ་སེང་ཞབས་ལ་གསོལ་བ་འདེབས། །
མར་མེ་གཅིག་གིས་ཡུལ་ཁམས་གསལ་བར་མཛད། །ལྡན་མ་རྩེ་མང་ཞབས་ལ་གསོལ་བ་འདེབས། །གཞན་རྒྱུད་ཅི་བསམ་ཐམས་ཅད་ས་ལེར་མཁྱེན། །སྐ་བ་དཔལ་བརྩེགས་ཞབས་ལ་གསོལ་བ་འདེབས། །གདུག་པའི་རོ་ལངས་བཏུལ་ནས་གསེར་དུ་བསྒྱུར། །རྒྱལ་བའི་བློ་གྲོས་ཞབས་ལ་གསོལ་བ་འདེབས། །རྫུ་འཕྲུལ་ནམ་མཁའི་བྱ་རྣམས་འཛིན་མཛད་པ། །ཁྱེའུ་ཆུང་ལོ་ཙཱའི་ཞབས་ལ་གསོལ་བ་འདེབས། །འབྲོང་གཡག་དར་མ་བཀུག་ནས་མི་ལྟར་བཟུང་། །དྲན་པ་ནམ་མཁའི་ཞབས་ལ་གསོལ་བ་འདེབས། །ཆུ་ལ་ཐོགས་མེད་ཉ་ལྟར་འཁྱུག་ཅིང་ལྡིང་། །འོ་བྲན་དབང་ཕྱུག་ཞབས་ལ་གསོལ་བ་འདེབས། །ཕ་བོང་འདམ་ལྟར་བསྣག་ཅིང་ཟན་ལྟར་གསོལ། །རྨ་ཐོག་རིན་ཆེན་ཞབས་ལ་གསོལ་བ་འདེབས། །སྡིགས་མཛུབ་མཛད་པས་ཐོག་རྒོད་མདའ་ལྟར་འཕེན། །ལང་གྲོ་དཀོན་མཆོག་ཞབས་ལ་གསོལ་བ་འདེབས། །རི་དང་བྲག་ལ་ཐོགས་མེད་རླུང་ལྟར་རྒྱུག །དཔལ་གྱི་རྡོ་རྗེའི་ཞབས་ལ་གསོལ་བ་འདེབས། །ནམ་མཁའི་དབྱིངས་སུ་རྡོ་རྗེའི་སྐྱིལ་ཀྲུང་བཞུགས། །རྒྱལ་བ་བྱང་ཆུབ་ཞབས་ལ་གསོལ་བ་འདེབས། །ཆོས་ཀྱི་སྤྱན་ཐོབ་
གསུང་རབ་བོད་དུ་བསྒྱུར། །ཀླུ་ཡི་རྒྱལ་མཚན་ཞབས་ལ་གསོལ་བ་འདེབས། །ཀླུ་ཡི་དབང་པོ་ལ་སོགས་རབ་བྱུང་ཚོགས། །ཚུལ་ཁྲིམས་རྣམ་དག་བྱེ་བ་འབུམ་ཕྲག་ལ། །གསོལ་བ་འདེབས་སོ་བསྟན་པ་དར་མཛད་གསོལ། །ཤཱཀྱ་པྲ་བྷ་ལ་སོགས་ལོ་ཙཱ་བ། །སྒྲ་བསྒྱུར་མཁས་པ་བརྒྱ་དང་རྩ་བརྒྱད་ལ། །གསོལ་བ་འདེབས་སོ་ཤེས་རབ་རྩ་ཁ་ཕྱེས། །ཏིང་འཛིན་བཟང་པོ་ལ་སོགས་རྫོགས་ཆེན་པ། །འཇའ་ལུས་མཁའ་སྤྱོད་འགྲུབ་པ་ཁྲི་ཕྲག་ལ། །གསོལ་བ་འདེབས་སོ་ཐར་པའི་ལམ་སྣ་དྲོངས། །གྱིམ་ཤང་ནག་པོ་ལ་སོགས་སྔགས་པའི་ཚོགས། །བསྐྱེད་རྫོགས་ཟུང་འཇུག་འབུམ་ཚོ་བཅོ་བརྒྱད་ལ། །གསོལ་བ་འདེབས་སོ་བར་ཆད་རྐྱེན་ངན་ཟློག །ཤེལ་དཀར་རྡོ་རྗེ་མཚོ་སོགས་མཁའ་འགྲོ་མ། །འཇའ་ལུས་འགྲུབ་པ་ཉི་ཤུ་རྩ་ལྔ་ལ། །གསོལ་བ་འདེབས་སོ་མཁའ་འགྲོའི་སུན་མ་ཟློག །དཔལ་དབྱངས་ལ་སོགས་བསྟན་པ་སྲུང་ནུས་པའི། །གྲུབ་ཐོབ་སྔགས་འཆང་བརྒྱད་ཅུ་རྩ་ལྔ་ལ། །གསོལ་བ་འདེབས་སོ་སྲུང་སྐྱོབ་བྱིན་གྱིས་རློབས། །རྒྱལ་བ་དགོངས་འདུས་རྩ་གསུམ་ལྷ་ཚོགས་ལ། །གསོལ་བ་འདེབས་སོ་བྱིན་རླབས་
དངོས་གྲུབ་སྩོལ། །ཞི་ཁྲོ་ཡོངས་རྫོགས་བཀའ་བརྒྱད་ལྷ་ཚོགས་ལ། །གསོལ་བ་འདེབས་སོ་སྲུང་སྐྱོབ་དངོས་གྲུབ་སྩོལ། །བདུད་འདུལ་རྡོ་རྗེ་ཕུར་པའི་ལྷ་ཚོགས་ལ། །།གསོལ་བ་འདེབས་སོ་བར་ཆད་ཐམས་ཅད་སོལ། །རིག་འཛིན་ཁྲོས་པ་གུར་དྲག་ལྷ་ཚོགས་ལ། །གསོལ་བ་འདེབས་སོ་སྡེ་བརྒྱད་གནོད་པ་ཟློག །དཔལ་མགོན་མ་ནིང་དམ་ཅན་རྒྱ་མཚོ་ལ། །གསོལ་བ་འདེབས་སོ་བསྟན་པའི་རྒྱལ་མཚན་ཚུགས། །འཛམ་ལྷ་རིགས་ལྔ་ནོར་རྒྱུན་མཆེད་ལྔ་ལ། །གསོལ་བ་འདེབས་སོ་དངོས་གྲུབ་ཆར་ལྟར་ཕོབ། །བླ་མ་སྐུ་གསུམ་རྗེ་འབངས་ཉི་ཤུ་བདུན། །རིག་འཛིན་རྒྱ་མཚོ་ཡི་དམ་ཆོས་སྐྱོང་ལ། །སྙིང་ནས་གསོལ་བ་འདེབས་སོ་ཐུགས་རྗེས་གཟིགས། །དེ་ལྟར་གསོལ་བ་བཏབ་པའི་བྱིན་རླབས་ཀྱིས་། །འཆི་མེད་ཚེ་ཡི་དངོས་གྲུབ་བསྩལ་དུ་གསོལ། །ནད་མེད་བདེ་བའི་དངོས་གྲུབ་བསྩལ་དུ་གསོལ། །དཔལ་དང་འབྱོར་པའི་དངོས་གྲུབ་བསྩལ་དུ་གསོལ། །ཉམས་དང་རྟོགས་པའི་དངོས་གྲུབ་བསྩལ་དུ་གསོལ། །ཕྱག་རྒྱ་ཆེན་པོའི་དངོས་གྲུབ་བསྩལ་དུ་གསོལ། །ནམ་ཞིག་དུས་ལ་བབ་སྟེ་འཆི་བའི་དུས། །བར་དོ་འཇིགས་པའི་འཕྲང་ནས་ཐུགས་
རྗེས་ཟུངས། །རིགས་དྲུག་འཁོར་བའི་སྐྱེ་སྒོ་ངན་པ་ཁོག །རིག་འཛིན་དཔའ་བོ་མཁའ་འགྲོས་མདུན་ནས་སུས། །ནུབ་ཕྱོགས་བདེ་བ་ཅན་གྱི་ཞིང་དུ་དྲོངས། །ཞིང་དེར་པདྨའི་སྒྲུབ་ལས་བརྫུས་སྐྱེས་ནས། །ཆོས་སྐུ་སྣང་བ་མཐའ་ཡས་ཞལ་མཐོང་སྟེ། །ལུས་རྟེན་དེ་ལ་ས་བཅུ་རབ་བགྲོད་ནས། །སྤྲུལ་པས་ཕྱོགས་བཅུའི་འགྲོ་བ་འདྲེན་པ་ལ། །སྤྱན་རས་གཟིགས་དང་དབྱེར་མེད་གཅིག་པར་ཤོག །ཅེས་པ་འདི་དགེ་རྒྱལ་དཔོན་སྐུ་མཆེད་ཀྱི་སྤྱན་སྔ་དེར་སླེབས་དུས། རྗེ་འབངས་ཉེར་ལྔའི་གསོལ་འདེབས་ཞིག་དགོས་གསུངས་པ་ཡིད་ལ་བཀོད་པས། དང་པོ་དེ་ཕྱོགས་སུ་དབོན་པོ་བླ་མ་རྒྱལ་མཚན་པ་ལྡོམ་བུ་ལ་བྱོན་པར་ཤར་ནས། འཕྲལ་དུ་དགེ་སློང་རཱ་ག་ཨ་སྱས་རྟ་ལོ་རྒྱལ་ཟླ་བའི་ཡར་ཚེས་ལྔའི་ཐུན་སྐབས་ཤིག་ཏུ་བྲིས་པས། འདི་འཕེལ་ཞིང་འགྲོ་དོན་རྒྱ་ཆེན་པོར་གྱུར་ཅིག །སརྦ་མངྒ་ལཾ།། །།གླེགས་བམ་འདི་ཉིད་བཞེངས་པ་དང་། །འཆང་དང་ཀློག་པའི་དགེ་བའི་མཐུས། །བདག་ཅག་མཆེད་གཉིས་འཁོར་བཅས་དང་། །འཚོ་བ་སྦྱོར་བའི་ཡོན་བདག་རྣམས། །ཚེ་འདིར་བཀྲ་ཤིས་ཚེ་རིང་ཞིང་། །བདེ་སྐྱིད་ཕུན་སུམ་ཚོགས་པ་དང་། །ནམ་ཞིག་འདི་ནས་འཕོས་མ་ཐག །བདེ་བ་ཅན་དུ་སྐྱེ་ཕྱིར་བསྔོ། །ཞེས་པ་༧ ཨ་རཱ་གས་སོ།། །།