ཏཻ་ལོ་པའི་རྣམ་ཐར།
ན་མོ་པྲཛྷ་བྷ་དྲ་ཡེ། གང་གི་འཁོར་ལོས་སྒྱུར་བའི་དཔལ་འབྱོར་རབ་སྤངས་ནས། །དཀའ་བ་སྤྱད་དང་བདུད་ཀྱི་སྡེ་བཅོམ་རྫོགས་སངས་རྒྱས། །དེ་བཞིན་སངས་རྒྱས་སྟོང་སོགས་རབ་ཏུ་སྤྲུལ་མཛད་ནས། །འགྲོ་བ་དྲུག་པོ་ཐར་པའི་ལམ་བསྟན་གང་འདུལ་སྐུ་རུ་སྤྲུལ། །དེ་དག་ལ་སོགས་མཐའ་ཡས་མཛད་པ་བརྗོད་མི་ལོངས། །ཁྱད་པར་རྒྱ་གར་ཤར་ཕྱོགས་བྷ་ག་ལར། །ཛྷ་གྷོ་ར་ཞེས་བྱ་བའི་གྲོང་ཁྱེར་དུ། །ཡབ་ནི་བྲམ་ཟེ་རབ་ཏུ་གསལ་བ་དང་། །ཡུམ་ནི་ལྷ་མོ་གསལ་ལྡན་མ་ཞེས་པའི། །སྲས་སུ་འཁྲུངས་ཚེ་འོད་ཀྱིས་ཕྱོགས་ཀུན་ཁྱབ། །དེ་ཕྱིར་གསལ་བའི་འོད་ཅེས་མིང་དུ་བཏགས། །དེ་ཚེ་འོད་ཟེར་དེ་ཡིས་རབ་བསྐུལ་ནས། །བྲམ་ཟེ་མཁས་པ་ལེགས་སྦྱིན་འཁོར་དང་བཅས། །དེ་རུ་ལྷག་ནས་ཁྱེའུ་ཡི་མཚན་གདགས། །དེ་ཚེ་སྐད་ཅིག་སྐུ་ཡི་འགྱུར་བ་ནི། །གྲངས་མེད་བསྟན་ཅིང་མཚན་བརྒྱན་གཟི་འབར་བས། །བྲམ་ཟེའི་གུས་བཏུད་བསྔགས་པ་རྒྱ་ཆེར་བརྗོད། །དེ་ནས་མ་མ་རྣམས་ཀྱིས་བསྐྱེད་བསྲིངས་པས། །ཕལ་པའི་ཟླ་སྐྱེད་འདི་ཡི་ཞག་སྐྱེད་ཆེ། །ལོ་གཅིག་ལོན་ཚེ་ཕོ་བྲང་དབུས་ཉིད་དུ། །ཡུམ་དང་ལྷན་ཅིག་ཉིད་དུ་གནས་པའི་ཚེ། །བུད་མེད་
མི་སྡུག་མཚན་མང་ལྡན་པ་ཞིག །གཅེས་པར་བརྐྱང་ཡང་ངེས་པར་འཆི་འགྱུར་ཞིང་། །སྲིད་པ་གསུམ་ན་མི་འཆིའི་གནས་མེད་ཅེས། །མི་སྙན་འཛེར་བག་སྐད་དུ་སྨྲ་བར་ཐོས། །ཡུམ་ཉིད་སྐྲག་ནས་གང་ཕན་དྲིས་པ་ཡིས། །སྲས་ཀྱིས་ནགས་ཁྲོད་མ་ཧེ་འཚོ་འཚུག་ཟེར། །དེ་ནས་གྲོགས་མེད་དབེན་པའི་ནགས་ཁྲོད་ན། །པ་ཤའི་ཤིང་ལ་རྒྱབ་བརྟེན་ཡི་གེ་འབྲི། །མ་ཧེའི་ཁྱུ་ནི་འཚོ་ཞིང་གནས་པའི་ཚེ། །སྔར་གྱི་བུད་མེད་རྒན་མོ་དེ་བྱུང་ནས། །ཡུལ་དང་ཡབ་ཡུམ་གཉིས་ཀྱི་མིང་གང་ཡིན། །ཡི་གེ་མ་ཧེ་སོགས་ཀྱི་ཅི་བྱེད་ཟེར། །ཡུལ་ནི་ཛྷ་གྷོ་ར་སོགས་ཡིན་ཚུལ་གསུངས། །དེ་ཚེ་བུད་མེད་ཁྲོས་ཤིང་དེ་མིན་ཟེར། །འོ་ན་ཁྱོད་ཀྱིས་གང་ཡིན་སྨོས་གསུངས་པས། །ཡུལ་ནི་ཨོ་རྒྱན་ཡབ་ནི་འཁོར་ལོ་སྡོམ། །ཡུམ་ནི་ཕག་མོ་སྲིང་མོ་ང་ཡིན་ཏེ། །ཁྱོད་ནི་རིགས་ཀུན་ཁྱབ་བདག་རྡོ་རྗེ་འཆང་། །ཞེས་སོགས་དོན་གྱི་ངོ་སྤྱོད་ཟབ་མོ་མཛད། །དེ་མ་ཐག་ཏུ་སྲས་ཀྱི་རང་རིག་ཡེ་ཤེས་རྟོགས། །བུད་མེད་དེ་ཡང་རབ་མཛེས་གཟུགས་བསྟན་ཏེ། །བསྔགས་པ་བརྗོད་ནས་མི་སྣང་བ་རུ་གྱུར། །ཁྱེའུ་གསལ་འོད་ཏིང་འཛིན་རྒྱལ་པོར་མི་གཡོ་བཞིན། །སྐུ་ཡི་བཀོད་པ་དུ་མས་གཅིག་ཆར་དུ། །ཀླུ་སྒྲུབ་
ཨར་དེ་ཝ་ཟླ་བ་གྲགས། །མ་ཏངྒི་དང་ལོ་ཧི་ཊིདི་པ། །དཱ་རི་ཀ་པ་སུ་ཁ་ད་རི་དང་། །ལྷོ་བྷི་བྷི་ན་ས་དང་ལྭ་བ་པ། །ཨིནྡྲ་བྷུ་ཏི་སྐལ་པ་བཟང་མོ་དང་། །ཐང་ལོ་ཤིང་ལོ་ཀཎྜ་རེ་པ་ལ། །གདམས་ངག་མཐའ་དག་ནོད་པའི་ཚུལ་མཛད་ཅིང་། །མ་ཧེའི་ཁྱུ་རྣམས་དེད་ནས་རྡོ་རྗེའི་གླུ། །ཏེ་ཏེ་ལ་སོགས་ལེན་ཅིང་ཕོ་བྲང་བྱོན། །དེ་ཚེ་གླུ་ཡི་རིགས་བྱེད་མཁས་པ་ཞེས། །མི་རྣམས་ཀུན་གྱིས་ཏེ་ལོ་པ་ཞེས་བཏགས། །དེ་ནས་ཡབ་ཡུམ་གཉིས་ལ་གནང་བ་ཞུས། །ནུབ་ཕྱོགས་ཨོ་རྒྱན་ཡུལ་དུ་བྱོན་པའི་ཚེ། །གཏིང་དཔག་དཀའ་བའི་འོག་ཆེན་ཆུས་ཁེངས་པ། །རིན་ཆེན་ལས་གྲུབ་ལྕགས་རི་རིམ་བདུན་ལ། །ཤེལ་དང་ནོར་བུའི་ཟམ་དག་སྤྲུལ་ནས་བྱོན། །དེ་ནང་དུར་ཁྲོད་འཇིགས་ཤིང་ཡ་ང་བ། །རོ་ལངས་ལྕེ་སྤྱང་ཤ་ཟའི་ཚོགས་ཀྱིས་གང་། །དེ་དབུས་རིན་ཆེན་ལས་གྲུབ་གཞལ་ཡས་ཁང་། །སྒོ་ལ་བྱ་རོག་འུག་པ་ཕག་ཁྱི་ཡིས། །གདོང་ཅན་མཁའ་འགྲོ་ཟིལ་གྱིས་མནན་ཏེ་བྱོན། །དེ་བཞིན་བར་སྒོའི་སྲུང་མ་ཡང་། །ཟིལ་གྱིས་མནན་ཅིང་བསྟོད་བསྔགས་བཀུར་སྟི་བྱས། །དྲི་བ་དྲིས་ལན་གླུ་ཡིས་ཚིམས་པར་བྱས། །ཕོ་བྲང་དབུས་སུ་རྡོ་རྗེ་རྣལ་འབྱོར་མ། །
མཁའ་འགྲོ་རྒྱ་མཚོ་དབུས་སུ་འགྱིང་བའི་མདུན། །གར་གྱི་རོལ་པས་གནས་པར་མཛད་པ་ལ། །ཌཱ་ཀི་འགའ་ཞིག་ཐེ་ཚོམ་འདི་སྐད་སྨྲས། །རྒྱལ་ཀུན་ཡུམ་གྱུར་རྡོ་རྗེ་ཕག་མོ་ལ། །མི་གུས་ཚུལ་འདི་ཅི་ཕྱིར་གཞོམ་མི་བྱེད། །དེ་ཚེ་ཌཱ་ཀི་གཞན་དག་འདི་སྐད་དོ། །རྡོ་ཡི་ཆར་པ་བར་མེད་བབ་ན་ཡང་། །འདི་ཡི་བ་སྤུའི་རྩེ་མོ་གཡོ་མི་ནུས། །མཁའ་དང་ས་ཆུ་མེ་ལ་ཐོགས་མེད་ཅིང་། །དངོས་པོ་ཀུན་བདག་རྣལ་འབྱོར་དབང་ཕྱུག་ཁྱོད་སུ་ཞིག་ཡིན། །དེ་སྐད་དྲིས་པས་སླར་ཡང་ལན་གསུངས་པ། །བདག་ནི་རྒྱལ་བ་ཀུན་ལས་སྔར་བྱུང་སྟེ། །ཀུན་གྱི་མཐར་གནས་ཀུན་གྱི་ངོ་བོ་ཉིད། །སྐྱེ་བོ་རྣམས་ཀྱིས་ཏེ་ལོ་པ་ཞེས་བརྗོད། །བདག་གིས་ཤེས་ཀྱང་གཞན་ལ་ཕན་པའི་ཕྱིར། །མཁའ་འགྲོས་ལུང་བསྟན་དམ་ཆོས་ལེན་དུ་འོངས། །ཞེས་གསུངས་ཞུ་བ་དྲིས་ལན་མཛད་པ་ཡིས། །མཐའ་དག་བདེ་གཤེགས་ཀུན་གྱི་ངོ་བོ་ཁྱོད། །རྒྱལ་བས་ལུང་བསྟན་ཏིང་འཛིན་ཀུན་གྱི་གཙོ། །ཞེས་སོགས་མཁའ་འགྲོ་རྣམས་ཀྱིས་བསྟོད་བསྔགས་བརྗོད། །དེ་ནས་གཙོ་མོ་རྡོ་རྗེ་ཕག་མོ་དང་། །བརྡ་དང་བརྡ་ཡི་ལན་ནི་དུ་མ་མཛད། །གཙོ་མོ་དགྱེས་པས་བསྟོད་པའི་ཚིག་གསུངས་པ། །ཁྱོད་ནི་ཧེ་རུ་ཀ་དཔལ་
བཅོམ་ལྡན་འདས། །ཡི་གེ་མེད་པའི་མན་ངག་རྣམས་དང་རྒྱུད་སྡེའི་ཚིག །འཁོར་ལོས་གཙོ་མོའི་བདག་ལ་རབ་གཏད་གྲངས་མེད་པ། །དེང་འདིར་རྒྱལ་བ་ཀུན་གྱིས་ཁྱོད་ལ་རབ་སྦྱིན་ཏེ། །བདག་ལ་གར་མཛོད་རང་གི་ཡེ་ཤེས་རང་ལ་གནས་པར་མཛོད། །ཅེས་གསུངས་ཡེ་ཤེས་རོལ་པ་མཆོག་ལ་ཞུགས་པར་མཛད། །དེ་ཚེ་རྡོ་རྗེའི་གླུ་ཡིས་རབ་བསྐུལ་ནས། །བསམ་གྱིས་མི་ཁྱབ་དཔའ་བོ་ཌཱ་ཀི་འདུས། །དབང་བར་དབང་བསྐུར་མཆོད་ནས་མི་སྣང་གྱུར། །དེ་ནས་ཌ་ཀི་བྱེ་བས་མཆོད་སྦྱིན་དུ། །འཇའ་གུར་མེ་ཏོག་ཆར་དང་རོལ་མོས་སྒྲས། །དཔའ་བོ་ཌཱ་ཀིས་གླུ་དབྱངས་དུ་མ་དང་། །འཇིག་རྟེན་སྐྱོང་བ་ཀུན་གྱིས་ཕྱག་འཚལ་ཞིང་། །བདེ་མཆོག་རྩ་རྒྱུད་དབུ་རྒྱན་ཚུལ་དུ་བཅིངས། །ནམ་མཁའ་ལམ་ནས་འཕུར་ཏེ་བྱོན་པའི་ཚེ། །བྲག་ཆ་ལྟ་བུར་གཟུགས་མེད་གླུ་དབྱངས་ཀྱིས། །ལུས་མེད་མཁའ་འགྲོའི་ཆོས་བདུན་གསལ་བར་གསན། །དེ་ནས་རྒྱ་གར་ཡུལ་གྱི་ལྷོ་ཡི་ཕྱོགས། །འཇིགས་བྱེད་བཞད་པའི་དུར་ཁྲོད་ཆེན་པོ་ན། །ཤིང་ལོ་སྤྱིལ་བུ་རབ་ཏུ་མཛེས་པའི་ནང་། །གྲུབ་ཆེན་མ་ཏཾ་ཀི་ཡི་ལུང་བསྟན་ཏེ། །ཟ་ཧོར་ཡུལ་གྱི་གྲོང་ཁྱེར་ཆེན་པོའི་དབུས། །སྨད་
འཚོང་དྷ་རི་མ་ཞེས་བྱ་བ་ཡོད། །དེ་ཡི་གཡོག་གྱིས་རྟོགས་པ་སྐྱོངས་ཤིག་གསུངས། །ལོ་གྲངས་བཅུ་གཉིས་བར་དུ་ཏིལ་བརྡུངས་ཤིང་། །ཁྱོ་པོ་བསུ་སྐྱེལ་ལ་སོགས་གྲོགས་མཛད་པས། །གཞན་དག་མེ་ཡིས་ཕུང་པོ་མཐོང་བ་དང་། །གསེར་གྱི་ཁ་དོག་མཚན་དང་དཔེ་བྱད་འབར། །འོད་ཀྱི་དཀྱིལ་འཁོར་དབུས་སུ་ནམ་མཁའ་ལ། །མངོན་པར་འཕགས་པ་མཐོང་ནས་ཐམས་ཅད་དད། །འགའ་ཞིག་མེ་ཡི་ཕུང་པོ་འབར་བ་ལ། །སྒྲོན་མེ་བཅུ་བཞི་དག་གིས་བསྐོར་བ་མཐོང་། །དེ་ནས་ཡུལ་དེའི་རྒྱལ་བློན་ཐམས་ཅད་ལ། །དྷ་རི་མ་ཉིད་འཁོར་བཅས་དེར་འདུས་ནས། །ཀུན་གྱིས་ཕྱག་འཚལ་བསྟོད་པ་བྱེད་པར་གྱུར། །དེ་ཚེ་འགའ་ཞིག་འདི་ནི་དགྲ་བཅོམ་ཟེར། །འགའ་ཞིག་མེ་དཔུང་སྒྲོན་མེས་བསྐོར་རོ་ཟེར། །འགའ་ཞིག་འདི་ནི་རིག་འཛིན་གྲུབ་པ་ཟེར། །གང་ཡིན་དྷ་རི་མ་ཡིས་ཉིད་ལ་ཞུས། །དེ་ཚེ་ཏེ་ལོ་པ་ཡིས་འདི་སྐད་གསུངས། །ཕྱོགས་བཅུའི་ཕྱོགས་དང་ནང་གི་ཕྱོགས་བཞི་ན། །ཌ་ཀི་བཅུ་ཡིས་གཙོ་མོ་བདག་དང་རོལ། །བདག་གིས་སྣ་ཚོགས་སྣང་ཞིང་ངོ་བོ་གཅིག །ཅེས་གསུངས་དྷ་རི་མ་ཡི་མཁའ་འགྲོའི་ཚོགས། །དངོས་སུ་མཐོང་ནས་རྩེ་གཅིག་དད་པ་ཐོབ།
སྔོན་ཆད་མ་ཤེས་གཡོག་བཀོལ་བཤགས་པ་བྱས། །དེ་ཚེ་ཏེ་ལོས་རྡོ་རྗེའི་མགུར་བཞེངས་པས། །སྐད་ཅིག་དེ་ལ་དྷ་རི་མ་གྲོལ་ཏེ། །ཡེ་ཤེས་ཌཱ་ཀི་གཙོ་དང་དབྱེར་མེད་གྱུར། །དེ་ཚེ་རྒྱལ་པོ་ལ་སོགས་ཐམས་ཅད་ཀྱིས། །རྩེ་གཅིག་གུས་པས་ཞུ་བ་ཞུས་པ་ལས། །ཏ་ལ་བདུན་སྲིད་ཙམ་གྱི་ནམ་མཁའ་ལ། །ཌཱ་ཀི་བྱེ་བའི་འཁོར་གྱིས་མཆོད་བཞིན་དུ། །ཏེ་ལོས་རྡོ་རྗེའི་མགུར་ནི་བཞེངས་པ་ཡིས། །ཡུལ་དེས་སྐྱེ་བོ་ཐམས་ཅད་སྐད་ཅིག་ལ། །ངེས་པའི་དོན་རྟོགས་ཐམས་ཅད་མཁའ་སྤྱོད་གཤེགས། །གྲོང་ཁྱེར་ཆེན་པོ་དེ་ཡང་སྟོང་པར་གྱུར། །དེ་ནས་གཞན་ཡང་གྲོང་ཁྱེར་ཆེན་པོའི་དབུས། །ལང་ཚོ་ཕུན་སུམ་ཚོགས་པའི་སྨད་འཚོང་མའི། །ཁྱིམ་དུ་བྱོན་ནས་ཆང་རྣམས་ཕོས་ནས་གཤེགས། །སུས་བྱས་མ་ཤེས་མྱ་ངན་བྱེད་བཞིན་དུ། །སླར་ཡང་སྣང་མར་ཆུ་བླུག་ཆང་སྒྲུབ་པ། །སླར་ཡང་བྱོན་ནས་ཆང་གསོལ་ས་ལ་ཕོས། །དེ་ཚེ་བཟུང་ནས་བརྡུངས་ཏེ་རོ་ལྟར་བྱས། །གྲངས་མེད་ཕྱིར་འཕངས་རྒྱང་རིང་བོར་བཞག་ནས། །སླར་ཡང་འབྲས་བསྐྱིལ་ཆང་མང་རབ་ཏུ་བཙོས། །བཙོང་མར་རན་དུས་སྔ་ལྟར་འོང་ནས་ཀྱང་། །ཆང་རྣམས་འཐུང་ཞིང་ཕོས་ནས་མེད་པར་
བྱས། །དེ་ཚེ་ཆང་འཚོང་མི་བདག་བུ་དང་བཅས། །རབ་ཁྲོས་མཚོན་གྱིས་ཏེ་ལོ་དུར་བུར་བརྒྱར། །གཏུབ་ནས་དུར་ཁྲོད་གནས་སུ་བོར་བར་གྱུར། །དེ་མ་ཐག་ཏུ་ཏེ་ལོ་ཁྱིམ་དེར་ཕེབས་། །དེ་ཚེ་ཆང་ཚོང་མ་ནི་ཆང་མེད་ཀྱིས། །མྱ་ངན་དྲག་པོ་བྱེད་ཅིང་འདུག་པ་ལ། །འཁོར་བ་སྙིང་པོ་མེད་པའི་ཆོས་གསུངས་ནས། །སླར་ཡང་ཆང་རྣམས་སྔར་ལྟར་ཡོད་པར་མཛད། །དེ་ནས་ཆང་ཚོང་མ་དད་ཕྱག་འཚལ་བསྐུལ། །དེ་ཚེ་ཏེ་ལོ་ནམ་མཁར་འཇའ་གུར་བཞུགས། །རྡོ་རྗེའི་མགུར་གསུངས་སྐད་ཅིག་དེ་ཉིད་ལ། །ཆང་ཚོང་མ་དེ་སྐྱིལ་ཀྲུང་བྱས་བཞིན་དུ། །ནམ་མཁར་ལྡིང་ཞིང་ལག་པས་གར་ཐབས་བསྒྱུར། །དེ་ཚེ་ཆང་ཚོང་མ་ཡི་བདག་པོ་ལ། །བུ་དང་གཡོག་འཁོར་ཆང་ཉོའི་སྐྱེ་བོའི་ཚོགས། །འབུམ་ཕྲག་དུ་མས་དད་ཅིང་གསོལ་བཏབ་པས། །སྐད་ཅིག་དེ་ལ་ཐམས་ཅད་མཁའ་སྤྱོད་ཐོབ། །དེ་ནས་ཤན་པའི་གྲོང་ཁྱེར་ཆེན་པོ་ན། །ཉིན་རེའང་སེམས་ཅན་བྱེ་བ་ཕྲག་མང་གསོད། །ཤན་པའི་གཙོ་བོའི་ཤ་རྣམས་བཙོ་ཞིང་གནས། །དེ་ཚེ་ཏེ་ལོ་པ་ཡིས་རྫུ་འཕྲུལ་བསྟན། །ཤན་པའི་གཙོ་བོའི་བུ་དེ་བོར་གྱུར་ནས། །ཕྱོགས་རྣམས་ཀུན་ཏུ་བཙལ་ཡང་མ་རྙེད་ནས། །སླར་ཡང་ཁྱིམ་དུ་འོང་
ནས་ངལ་བསོས་ཏེ། །ཤ་རྣམས་བཙོ་བའི་སྣོད་དེ་ཁ་ཕྱེས་པས། །རང་གི་བུ་དེ་མངོན་སུམ་བཙོས་མཐོང་ནས། །ཀྱེ་མ། བདག་ནི་བུ་ལ་ཤར་འཁྲུལ་ནས། །དུམ་བུར་གཏིབ་ཅིང་བཙོས་སོ་ཞེས། །ཤན་པ་མོ་དང་ཤན་པའི་འཁོར། །ཀུན་གྱིས་བསྐོར་ཞིང་ངུ་སྒྲས་ཁྱབ། །དེ་ཚེ་ནམ་མཁའི་དབྱིངས་ནས་ཏེ་ལོ་ཡིས། །ཞལ་བསྟན་བུ་ཡང་མདུན་དུ་ཡོད་པར་མཛད། །ཐམས་ཅད་རྨི་ལམ་མཚུངས་ཞེས་མགུར་གསུངས་པས། །དེ་མ་ཐག་ཏུ་ཤན་པས་གྲུབ་པ་ཐོབ། །ནམ་མཁར་འཕགས་ནས་ཕྱག་འཚལ་བསྐོར་བ་བྱས། །དེ་དག་མཐོང་བས་ཤན་པའི་ཚོགས་རྣམས་དང་། །ཡུལ་གྱི་བྱོལ་སོང་རི་དྭགས་ཡན་ཆད་ཀུན། །སྐད་ཅིག་ཉིད་ལ་རིག་འཛིན་ས་ཐོབ་བོ། །དེ་ནས་སྔགས་པའི་གྲོང་ཁྱེར་ཆེན་པོ་ནི། །རིག་སྔགས་འཆང་བ་དཔེ་མེད་ནུས་ལྡན་པ། །ནུས་པའི་ང་རྒྱལ་ཤིན་ཏུ་འབར་བའི་མདུན། །ཏེ་ལོས་ཐ་མལ་སྐྱེ་བོའི་གཟུགས་སྤྲུལ་ནས། །སྔགས་པ་དེ་ལ་འགྲན་བཙུགས་ཡིད་དཀྲུགས་པས། །སྔགས་པ་ཁྲོས་ཏེ་གསུམ་མམ་ལྔའམ་ནི། །རིང་ཡང་ཞག་བདུན་ཚུན་དུ་བསད་དོ་ཟེར། །མེ་ལྕེ་འབར་བས་ཕུར་བུས་ལིང་ག་གཟིར། །སྔགས་ཀྱི་ནུས་པ་མེ་རི་རབ་འབར་
བས། །ཡུངས་ཀར་ཐུན་གྱིས་དྲག་ཏུ་བྲབ་ཅིང་གནས། །སྲུང་བ་བརྒྱ་ཡིས་རང་འཁོར་སྲུང་གྱུར་ཀྱང་། །ཞག་གཅིག་སོང་ནས་ལྟས་ངན་ཁྲི་ཕྲག་བབ། །ཞག་གཉིས་ལོན་ནས་བུ་སྐྱེས་ཁྲག་སྐྱུག་གུམ། །དེ་བཞིན་ཉེ་འབྲེལ་འཁོར་གཡོག་ཐམས་ཅད་ནི། །ལ་ལ་ཐོག་ཕོག་ལ་ལ་རྦབ་ཏུ་ཤི། །ལ་ལ་ནད་དང་ལ་ལ་དོན་མེད་ཤི། །ལ་ལ་རང་གིས་རང་ཉིད་བསད་གྱུར་ནས། །སྔགས་པ་ཁོ་རང་མ་གཏོགས་ཐམས་ཅད་ཤི། །སྔགས་པ་ཡི་ཆད་རྫས་གཏོར་ཕུར་པ་བཙག །ཧོམ་བཤིག་ཕྲེང་བ་བསྲེགས་ནས་སྨྲེ་སྔགས་འདོན། །སྐུ་འབལ་བྲང་བརྡུང་མཆི་མ་ཆར་དུ་འབེབས། །མི་རྣམས་རོ་ལ་ལྟ་ཞིང་སྐྱག་པ་སྐྱེས། །དེ་ཚེ་ཏེ་ལོས་དངོས་སུ་ཞལ་བསྟན་ཏོ། །དགྲ་གཉེན་ཁྱད་པར་མེད་པའི་མགུར་གསུངས་ནས། །སེ་གོལ་གཏོགས་པས་ཐམས་ཅད་སྔར་ལྟར་སོས། །དེ་ནས་སྔགས་པ་དད་སྟེ་ཕྱག་འཚལ་ནས། །ཏེ་ལོས་ཚིགས་བཅད་གསུངས་པས་སྔགས་པ་གྲོལ། །མཆོག་གི་དངོས་གྲུབ་ཐོབ་སྟེ་མཁའ་ལ་འཕག །དེར་འཁོད་སྐྱེ་བོ་ཐམས་ཅད་གྲུབ་པ་ཐོབ། །ཡུལ་དེར་ཕལ་པའི་སྐྱེ་བོ་མེད་པར་གྱུར། །དེ་ནས་རྒྱལ་པོ་ལ་སོགས་མང་པོ་དང་། །ཤིན་ཏུ་མཁས་པའི་དཔང་པོ་དུ་མ་བཞག་
རང་རང་སློབ་མའི་ཚོགས་ཀྱིས་རབ་བསྐོར་བའི། །ཕྱི་ནང་པཎྜི་ཏ་གཉིས་རྩོད་སར་བྱོན། །གཅིག་གིས་ཡོད་པའི་མཐའ་བཟུང་རྩོད་པར་བྱེད། །གཅིག་གིས་མེད་པའི་མཐའ་བཟུང་རྩོད་པ་ལ། །ཡོད་མེད་སྨྲ་བ་ཀུན་རྫོབ་བདེན་རྫུན་ཏེ། །དམ་པའི་དོན་དུ་རང་བཞིན་མ་གྲུབ་གསུངས། །དེ་ལ་ཆད་པར་སྨྲ་བ་ཁྲོས་པར་གྱུར། །དེ་ཚེ་ཏེ་ལོས་པཎྜི་ཏ་དེ་ནི། །རྫུ་འཕྲུལ་སྟོབས་ཀྱིས་དམྱལ་བའི་གནས་སུ་ཁྲིད། །དམྱལ་བའི་སྡུག་བསྔལ་རྣམས་ཀྱང་གསལ་བར་བསྟན། །ལྷ་ཡུལ་ཁྲིད་ནས་ལྷ་ཡི་བདེ་སྐྱིད་བསྟན། །དེ་ནས་པཎྜི་ཏ་དེ་ངེས་ཤེས་སྐྱེས། །ཕྱོགས་དེར་གནས་པའི་སྐྱེ་བོ་ཐམས་ཅད་ཀྱང་། །ཡང་དག་དམ་པའི་ལམ་ལ་བཞག་པར་མཛད། །དེ་ནས་མུ་སྟེགས་རྫུ་འཕྲུལ་ཆེན་པོ་ཅན། །ཀུན་གྱིས་བཀུར་ཞིང་ང་རྒྱལ་ལྡན་པ་ཡིས། །དྲུང་དུ་ཏེ་ལོ་བྱོན་ནས་དོ་བསྔོས་པས། །རྒྱལ་པོ་ལ་སོགས་ཀུན་གྱི་དཔང་བཞག་ནས། །སྒྲ་ཚད་ལ་སོགས་གཞུང་ལུགས་གླེང་པ་ན། །མུ་སྟེགས་པ་ཡིས་ཚིག་གཅིག་སྨྲ་མ་ནུས། །ཁོ་ཡིས་ནམ་མཁར་དཀྱིལ་འཁོར་བཀོད་པ་ལ། །དེ་ལས་རབ་ཏུ་གསལ་ཞིང་བཀྲ་བ་ཡི། །ཏེ་ལོའི་དཀྱིལ་འཁོར་བཀོད་པས་ཟིལ་གྱིས་མནན། །ཁོ་ཁྲོས་
ཁ་ནས་མེ་འབར་སྲེག་པར་བརྩམས། །དེ་ཚེ་དེ་བས་ལྷག་ཅིང་འཇིགས་རུང་བའི། །མེ་ལྕེས་གོས་དང་སྐུ་ཡང་བསྲེགས་མཛད་པས། །ཁོ་ཉིད་དད་དེ་ཕྱག་འཚལ་གསོལ་བ་བཏབ། །གདམས་ངག་གསུངས་པས་དོན་རྟོགས་གར་བྱས་ཤིང་། །ཡུལ་དེས་སྐྱེ་བོ་ཐམས་ཅད་སྐད་ཅིག་གྲོལ། །དེ་ནས་གླུ་མཁན་ཤིན་ཏུ་མཁས་པ་ཞིག །སྐྱེ་བོ་དུ་མ་གླུ་ལ་ཉན་ཞིང་སྣང་། །དེ་དྲུང་བྱོན་ནས་གླུ་དབྱངས་འདྲེན་མཛད་དེ། །ལྷ་ཡི་གླུ་དང་ཀླུ་དང་དྲི་ཟའི་གླུ། །མིའམ་ཅི་དང་ཚངས་པའི་གླུ་ལ་སོགས། །གླུ་ཡི་བྱེ་བྲག་བྱེ་བ་དུ་མ་གསུངས། །དེ་ནས་གླུ་མཁན་དད་ཅིང་ཕྱག་འཚལ་ནས། །གདམས་ངག་གསུངས་པས་གླུ་མཁན་ལ་སོགས་པ། །སྐྱེ་བོ་དེ་དག་སྐད་ཅིག་ཉིད་ལ་གྲོལ། །དེ་ནས་སྒྱུ་མ་མཁན་གྱི་དམག་ཆེན་སྤྲུལ། །རྒྱལ་པོ་གཅིག་ལ་འཐབ་པར་བརྩམས་པའི་ཚེ། །རྒྱལ་པོ་ཤིན་ཏུ་སྐྲག་ནས་སྡུག་བསྔལ་གྱུར། །དེ་ཚེ་རྒན་མོ་མི་སྡུག་མཚན་ལྡན་ཞིག །རྒྱལ་པོའི་དྲུང་དུ་བྱུང་ནས་འདི་སྐད་ཟེར། །དམག་འདི་སུས་ཀྱང་ཐུབ་པར་མི་འགྱུར་ཏེ། །ང་ཡི་མིང་པོ་གཅིག་པུས་ཐུབ་གྱུར་ཏེ། །མེ་ནི་ཆུང་དུས་ནགས་ཚལ་སྲེག་དང་མཚུངས། །ང་ཡི་མིང་པོ་དུར་ཁྲོད་ཕ་ཀི་ན། །ཤིང་སྡོང་རྩེ་ལ་རྫུ་འཕྲུལ་
སྟོན་ཅིང་ཡོད། །ཟེར་བས་ཏེ་ལོ་རྒྱལ་པོས་སྤྱན་དྲངས་སོ། །དེ་ནས་སྤྲུལ་པའི་དམག་ཚོགས་མང་པོ་ཡིས། །སྒྱུ་མའི་དམག་དང་ཐམས་ཅད་བཅོམ་བྱས་ནས། །གདམས་ངག་བསྟན་པས་སྒྱུ་མ་མཁན་ཡང་གྲོལ། །རྒྱལ་པོ་ལ་སོགས་དེ་དག་ཐམས་ཅད་ཀུན། །རིག་པ་འཛིན་པའི་ས་ལ་བཀོད་པར་མཛད། །དེ་ནས་མ་ལ་ཤིན་ཏུ་གུས་པ་ཡི། །རྒྱལ་པོ་གཅིག་གི་མ་ན་ཤི་ལ་ཐུག །དེ་ཚེ་མ་ཡི་ཁ་ཆེམས་ཚིག་སྨྲས་པ། །བུ་ཁྱོད་ང་ལ་དྲིན་ལན་བསབ་ན་ནི། །བྲམ་ཟེ་དང་ནི་དགེ་འདུན་ང་མི་དད། །སྔགས་པ་རྣམས་ལ་ཚོགས་འཁོར་གྱིས་ཤིག་ཟེར། །དེ་ནས་སྔགས་པ་ཀུན་འདུས་ཚོགས་འཁོར་བཤམས། །རྣལ་འབྱོར་ནུས་ལྡན་གཅིག་ནི་ཁྲི་སྟེང་འཁོད། །དེ་ཚེ་རྒན་མོ་མི་སྡུག་གཟུགས་ཅན་ཞིག །བྱུང་ནས་ཁྱོད་ཀྱི་ཚོགས་དཔོན་མི་འོང་གི །བདག་གི་མིང་པོ་བོས་འོང་མི་སྣང་གྱུར། །དེ་ནས་ཏེ་ལོ་དེར་ཕེབས་ཁྲི་ལ་བཞུགས། །དེ་ནས་སྔགས་པས་ནམ་མཁར་དཀྱིལ་འཁོར་བཀོད། །ཏེ་ལོས་དེ་བས་ལྷག་པ་ནམ་མཁར་བཀོད། །སྔགས་པས་ཚོགས་རྫས་མི་རོ་མང་པོ་བཀུག །ཏེ་ལོས་སྤྲུལ་པའི་ལྕགས་སྤྱང་བྱེ་བ་ཡིས། །མི་རོ་གསར་རྙིང་དཔག་མེད་ཁྱེར་ནས་འོང་། །
མཆོད་པའི་བྱེ་བྲག་དཔག་ཏུ་མེད་པ་དང་། །མཆོད་པའི་ལྷ་མོ་འབུམ་ཕྲག་དུ་མ་བསྟན། །དེ་ནས་སྔགས་པས་བར་སྣང་སྐྱིལ་ཀྲུང་བཅས། །རྫུ་འཕྲུལ་ཕྲ་མ་འགའ་ཞིག་བསྟན་པ་ན་། །ཏེ་ལོས་ཉི་ཟླའི་སྟེང་དུ་གར་མཛད་ཅིང་། །ཁྱུང་དང་སེང་གེ་གཡུ་འབྲུག་ཞོན་པ་དང་། །སྐུ་ཡི་བཀོད་པ་བྱེ་བ་སྐད་ཅིག་ལ། །འོག་མིན་བར་གྱི་ནམ་མཁར་འགྲོ་བ་དང་། །སྐད་ཅིག་འཇིག་རྟེན་གྲངས་མེད་ཆགས་འཇིགས་དང་། །བ་སྤུའི་བུ་ག་རེར་ཡང་རྒྱལ་བ་ཡི། །དཀྱིལ་འཁོར་བྱེ་བ་བསམ་ལས་འདས་པར་བསྟན། །དེ་ནས་སྔགས་པས་ཕྱག་འཚལ་ཞབས་ལ་གཏུགས། །གདམས་ངག་གསུངས་པས་སྔགས་པ་གཙོར་བྱས་པའི། །དེ་མཐོང་སྐྱེ་བོ་ཐམས་ཅད་མཁའ་སྤྱོད་ཐོབ། །དེ་དང་དུས་མཚུངས་དགེ་སློང་ཏིལ་འཚོང་མའི། །སྲས་སུ་གྱུར་པས་རྫུ་འཕྲུལ་བསྟན་པ་ནི། །དགེ་སློང་གནས་བརྟན་ཀུན་གྱིས་བཀུར་བ་དེ། །གཙུག་ལག་ཁང་དུ་བཞུགས་ནས་ཡོད་ཙམ་ན། །སྲིང་མོ་དགེ་སློང་མ་ནི་ཏིལ་འཚོང་མས། །ཁྱེའུ་ལྷ་ཕྲུག་འདྲ་ཞིག་ཁྱེར་བྱུང་ནས། །འདི་ཉིད་གསོས་ཟེར་དགེ་སློང་དེ་ལ་གཏད། །དགེ་སློང་མ་དེ་སྐད་ཅིག་རྫུ་འཕྲུལ་གྱིས། །དེ་ཝི་ཀོ་ཏྲིའི་ཡུལ་དུ་གཤེགས་པར་
གྱུར། །ཁྱེའུ་དེ་ནི་གཞན་ལས་སྐྱེད་ཆེ་ཞིང་། །ཡི་གེ་ཀློག་ལ་མཁས་པར་གྱུར་པའི་ཚེ། །བྱི་རུའི་མདོག་ཅན་བུད་མེད་འོད་འབར་བ། །དར་དང་རིན་ཆེན་རྒྱན་ལྡན་བུད་མད་གཅག །བུ་ཁྱོད་བླ་མེད་ས་ལ་འགྲོ་འདོད་ན། །སྨྱོན་པའི་སྤྱོད་པ་གྱིས་གསུངས་མི་སྣང་གྱུར། །དེ་ནས་ཁྱེའུས་གླེགས་བམ་ཀུན་གཏོར་བས། །སྨྱོ་བར་མཐོང་ནས་ཁྱེའུ་ལྕགས་སུ་བཅུག །དེ་ནས་སྔར་གྱི་བུད་མེད་དེ་འོང་ནས། །གདམས་པ་བསྟན་ནས་ལོ་དྲུག་ལྕགས་འོག་བསྒྲུབ། །དེ་ནི་སྨྱོ་སང་སྨྲས་ནས་ལྕགས་བཀྲོལ་ཙ། །སེམས་ཅན་ཆ་ག་བྱེ་བ་དུ་མ་ནི། །བསད་ཅིང་མགོ་ལུས་ཕུང་པོར་སྤུངས་བྱེད་ཅིང་། །ཡང་ནི་འཚོགས་པའི་གྲལ་འབྱོན་འཚོ་བ་གསོལ། །དེ་ཚེ་ཀུན་གྱིས་འབར་ཤར་བྱས་པའི་ཚེ། །སེ་གོལ་གཏོགས་པས་བསད་ཚད་སོས་ཏེ་འཕུར། །དེ་མཐོང་སྐྱེ་བོ་ཐམས་ཅད་མཁའ་སྤྱོད་སོང་། །དེ་ནས་ཏེ་ལོ་རྒྱལ་པོའི་ཕོ་བྲང་དུ། །དགེ་སློང་ཞི་དུལ་ལྡན་པར་སྤྲུལ་ནས་བྱོན། །རྒྱལ་པོ་དད་ནས་རིགས་རུས་ཡབ་ཡུམ་དྲིས། །བདག་ལ་ཕ་མ་རིགས་རུས་མཁན་སློབ་མེད། །རང་བྱུང་དགེ་སློང་སྨྲ་བརྗོད་བྲལ་ལོ་གསུངས། །དེ་ཚེ་ཏེ་ལོ་སངས་རྒྱས་ཞེས་བྱར་གྲགས། །སྤྲུལ་པས་
འཇིག་རྟེན་མ་ལུས་ཁྱབ་མཛད་དེ། །བྲམ་ཟེའི་མདུན་ན་བྲམ་ཟེ་མཁས་པ་མཆོག །ཚངས་པ་རྣམས་ལ་དད་དཔོན་མཁས་པ་སྟེ། །གླུ་ལ་དགའ་བའི་མདུན་ན་གླུ་མཁན་ནོ། །དེ་བཞིན་སྐྱེས་པ་བུད་མེད་མགར་བ་དང་། །མཆོག་དམན་བར་མ་གང་ལ་གང་འདུལ་གཟུགས། །ལྷ་ཀླུ་གནོད་སྦྱིན་དྲི་ཟ་མིའམ་ཅི། །ས་ཆུ་མེ་རླུང་དུ་མའི་གཟུགས་སུ་སྤྲུལ། །དེ་ཚོ་སོ་སོས་ཇི་ལྟར་མཐོང་བ་ལྟར། །ཏེ་ལོ་པ་འདིས་འདི་ལྟར་སྤྲུལ་ལོ་ཞེས། །གཏམ་ངན་རྣམ་པ་སྣ་ཚོགས་སོ་སོར་གླེང་། །དེ་ནས་རྒྱལ་པོ་སེང་གེ་ཟླ་བ་ཡིས། །ཚོགས་འཁོར་བཤམས་པའི་དྲུང་དུ་ཏེ་ལོ་པ། །ལ་ལས་དགྱེས་རྡོར་ལ་ལས་བདེ་མཆོག་དང་། །ལ་ལས་གསང་འདུས་ལ་ལས་དགྲ་ནག་དང་། །ལ་ལས་མ་ཧཱ་མཱ་ཡཱ་ལ་སོགས་པ། །དཀྱིལ་འཁོར་སྣ་ཚོགས་བསམ་མི་ཁྱབ་པར་མཐོང་། །རྒྱལ་པོས་ཏེ་ལོ་ཁྱེད་ཀྱི་སྐུ་གཅིག་ལ། །རྒྱལ་བ་དུ་མའི་སྐུར་མཐོང་ཅི་ཡིན་ཞུས། །དེ་ཚེ་ཏེ་ལོ་ཆེན་པོས་བཀའ་བསྩལ་པ། །རྒྱལ་པོ་བདག་ལུས་ཀྱི་ཡི་རྡོ་རྗེ་ལ། །ངག་ནི་མ་ཧཱ་མཱ་ཡཱ་སྟེ། །བདག་སེམས་འཁོར་ལོ་བདེ་མཆོག་ཉིད། །དབང་པོ་གསང་བ་འདུས་པ་ཉིད། །ཡན་ལག་དགྲ་རྒྱུད་ནག་པོ་སྟེ། །ཉིང་ལག་རྡོ་རྗེ་འཇིགས་
བྱེད་དོ། །བ་སྤུ་རྣམས་ནི་སངས་རྒྱས་ཚོགས། །མཐའ་ཡས་མ་ཚང་མེད་པའོ། །བདག་ནི་བདེ་གཤེགས་ཐམས་ཅད་ཀྱི། །ངོ་བོ་ཉིད་དུ་གྲུབ་པ་སྟེ། །ཅི་ཕྱིར་ཁྱོད་ནི་གཅིག་ཁོ་ནར། །མཐོང་རྡོར་ངེས་པར་རྣམ་པར་འཛིན། །ཞེས་གསུངས་རྒྱལ་པོ་ལ་སོགས་ཐམས་ཅད་གྲོལ། །ཇི་ལྟར་ཡུལ་གྲུ་ཆེན་པོ་བཅུ་གཉིས་ཀྱི། །སྐྱེ་བོ་ཐམས་ཅད་མཁའ་སྤྱོད་གནས་སུ་བཀོད། །གཞན་ཡང་མཛད་སྤྱོད་བསམ་གྱིས་མི་ཁྱབ་བོ། །བླ་མ་བརྒྱུད་པ་བར་མེད་བྱོན་པ་ལས། །བྱུང་བའི་ཏེ་ལོའི་རྣམ་ཐར་རྒྱས་དང་བསྡུས། །སྡེབ་སྦྱོར་མཛེས་དང་མི་མཛེས་དུ་མ་ལས། །བསྟན་ནས་རྣལ་འབྱོར་མཁའ་སྤྱོད་དབང་པོ་ཡིས། །མཛད་པའི་རྣམ་ཐར་ཆེན་པོའི་དོན་བསྡུས་ནས། །ཚིགས་སུ་བཅད་དེ་རཱ་གའི་མིང་གིས་བྲིས། །འདི་བྲིས་སྡེབ་སྦྱོར་ཉམས་སོགས་ཉེས་མཆིས་ན། །ཏེ་ལོ་སངས་རྒྱས་ཌཱ་ཀིའི་ཚོགས་ལ་བཤགས། །དགེ་བས་བདག་དང་བདག་རྗེས་འཇུག་པ་དང་། །འདི་ཉིད་མཐོང་ཐོས་དྲན་པའི་འགྲོ་བ་ཀུན། །ཏེ་ལོའི་རྗེས་བཟུང་སྐད་ཅིག་ཙམ་ཉིད་ལ། །འོད་གསལ་ཕྱག་རྒྱ་ཆེན་པོ་མངོན་གྱུར་ཤོག །སརྦ་མངྒ་ལཾ།།