ནཱ་རོ་པའི་རྣམ་ཐར།
ན་མོ་གུ་རུ་ཛྙཱ་ན་སིདྡྷིཡེ། རྡོ་རྗེ་ཐེག་པའི་ལམ་མཆོག་འདི་ཉིད་ནི། །བླ་མའི་སྐྱེ་བོ་རབ་ཏུ་མགུ་བ་ཙམ། །ཁོ་ན་བྱས་པས་ལེགས་པར་འགྲུབ་པ་སྟེ། །དེ་ཚུལ་ཅུང་ཟད་བསྡུས་ཏེ་འདིར་བཤད་དོ། །རྒྱ་གར་ཤར་ཕྱོགས་བྷ་གྷ་ལ་ཡི་ཡུལ། །ཤྲཱི་ནཱ་ག་རའི་གྲོང་ཁྱེར་འཛམ་བུ་ཡི། །རྒྱལ་པོ་དགེ་བའི་གོ་ཆ་ཞེས་བྱ་དང་། །བཙུན་མོ་དཔལ་གྱི་བློ་གྲོས་ཞེས་བྱ་ལ། །སྲས་མོ་དཔལ་གྱི་ཡེ་ཤེས་བྱ་བ་ཡོད། །སྲས་ནི་མེད་པས་སྲིད་བསྒྱུར་ཐབས་ལ་འབད། །དེ་ཚེ་སྲས་ཆགས་རིམ་གྲོ་བརྒྱ་རྩ་བརྒྱད། །རྒྱལ་དང་བཅོ་ལྔ་འཛོམ་ཚེ་སྲས་བལྟམས་པས། །མེ་ཏོག་ཆར་བབ་དགེ་མཚན་དུ་མ་བྱུང་། །དེ་ཚེ་བྲམ་ཟེ་མཚན་མཁན་གྱིས་སྨྲས་པ། །སྔོན་ཚེ་རྒྱལ་བུ་དོན་གྲུབ་མཚན་རྟགས་རྣམས། །འདི་ལ་ཚང་ཞེས་བསྔགས་པ་རྒྱ་ཆེར་བརྗོད། །དཔལ་ཀུན་ཏུ་དགེ་བ་ཞེས་བྱ་མིང་དུ་བཏགས། །དེ་ནས་སྐྱེད་བསྲིང་དར་ལས་བབ་པ་ན། །འཁོར་བ་སྙིང་པོ་མེད་པའི་མགུར་བཞེངས་ནས། །རབ་ཏུ་བྱུང་བར་ཡབ་ལ་ཞུས་པ་ཡི། །ཡབ་ཀྱིས་བཤོལ་བཏབ་རྒྱལ་སྲིད་སྐྱོང་དགོས་ཟེར། །རྒྱལ་སྲིད་སྙིང་པོ་མེད་པའི་མགུར་བཞེངས་ནས། །ཁ་ཆེར་བྱོན་ཏེ་གཏན་ཁྲིམས་ལྔ་པོ་བླངས། །རིག་
པའི་གནས་ཀུན་ཤིན་ཏུ་བྱང་གྱུར་ཏེ། །པཎྜི་ཏ་པ་ནམ་མཁའི་སྙིང་པོར་གྲགས། །དེ་ནས་པཎྜི་ཏ་ཡི་འཁོར་གྱིས་བསྐོར། །རང་གི་ཡུལ་དུ་བྱོན་པས་ཡབ་ཀྱང་མཉེས། །དེ་ནས་ཡབ་ཀྱི་བཀའ་ནན་མ་ཆོག་ནས། །བྲམ་ཟེའུ་བུ་མོ་དྲི་མེད་མ་ཞེས་པ། །རིགས་རུས་ལང་ཚོའི་ཁྱད་འཕགས་ཁབ་ཏུ་བཞེས། །དེ་ནས་ཡབ་ཀྱི་བཞེད་པ་འགྲུབ་པ་དང་། །འཁོར་བ་སྙིང་པོ་མེད་ཚུལ་རྒྱས་པར་ནི། །བཙུན་མོ་དེ་ལ་གསུངས་ཤིང་ཁོ་བོ་ནི། །རབ་ཏུ་བྱུང་འདོད་དེ་ལ་ཇི་ལྟར་བྱ། །གསུངས་པས་བཙུན་མོ་དམ་པས་འདི་སྐད་ཞུས། །སྔོན་གྱི་བསོད་ནམས་མཐུ་ཡིས་ཁྱེད་དང་མཇལ། །ཁྱེད་མིན་གཞན་ལ་ཡིད་སེམས་མི་གཡོ་ཡང་། །ཁྱེད་བཞེད་དམ་ཆོས་བར་ཆད་མི་བགྱིད་པས། །ཁྱེད་ཀྱིས་བདག་ལ་མི་དགྱེས་ཚུལ་མཛོད་དང་། །བདག་ཀྱང་སྤྱོད་ལམ་ངན་པར་བསྒྱུར་བར་བྱ། །ཞེས་སྨྲས་མོས་ཀྱང་གླུ་གར་དཔག་མེད་བྱས། །དེ་ཚེ་རྒྱལ་བློན་ཐམས་ཅད་མོ་ལ་འབར། །མོ་ཡང་ཕ་ཡུལ་ལོག་ནས་རབ་ཏུ་བྱུང་། །དེ་ནས་རྒྱལ་བུ་དགའ་བའི་ཚལ་དུ་བྱོན། །མཁན་པོ་སངས་རྒྱས་སྐྱོང་ལ་སློབ་དཔོན་ནི། །ཡེ་ཤེས་འོད་ལ་དགེ་ཚུལ་སྡོམ་པ་བླངས། །སངས་རྒྱས་ཡེ་ཤེས་ཞེས་བྱ་མཚན་དུ་
བཏགས། །དེ་ནས་ཁ་ཆེར་བྱོན་ནས་བསྙེན་པར་རྫོགས། །ཆོས་ཀྱི་རྒྱལ་མཚན་ཞེས་བྱར་མཚན་དུ་བཏགས། །དེ་ནས་པུ་ལ་ཝ་རིར་བཤད་སྒྲུབ་མཛད། །གནས་བརྟན་བསྟན་པ་འཛིན་པ་ཞེས་སུ་གྲགས། །དེ་ཚེ་ནཱ་ལེནྡ་ཡི་བྱང་སྒོ་ཡི། །སྒོ་སྲུང་པཎ་ཆེན་འདས་པའི་གདན་སར་བཀོས། །ཕྱི་ནང་པཎྜི་ཏ་རྣམས་གཡས་གཡོན་སྒྲིགས། །དང་པོ་ནང་པའི་པཎྜི་ཏ་རྣམས་དང་། །བགྲོ་གླེང་མཛད་པས་གནས་བརྟན་ཁོ་ན་རྒྱལ། །ཀུན་གྱིས་ཕྱག་འཚལ་ཞབས་པད་སྤྱི་བོར་བླངས། །དེ་ནས་ཕྱི་པའི་པཎྜི་ཏ་རྣམས་དང་། །བརྩད་པས་ཐམས་ཅད་བཅོམ་སྟེ་ནང་པར་བཙུད། །འདི་ནི་ཕྱི་ནང་ཀུན་ལ་འཇིགས་མེད་ཅེས། །དཔལ་ལྡན་འཇིགས་མེད་གྲགས་པར་མཚན་དུ་ཐོགས། །དེ་ནས་སེམས་བསྐྱེད་དབང་བསྐུར་དང་། །ཆོས་བཤད་བྱ་བ་རྒྱུན་དུ་མཛད་དུ་བཞུགས། །རེ་ཞིག་དཔེ་ལ་གཟིགས་ཤིང་བཞུགས་ཙམ་ན། །རྒན་མོ་མི་སྡུག་དུ་མའི་མཚན་ལྡན་ཞིག །ཁྱོད་ཀྱི་དཔེ་ལྟ་དོན་ནམ་ཚིག་ཤེས་ཟེར། །ཚིག་ཤེས་སྨ་ཚེ་དགའ་བའི་རྣམ་འགྱུར་སྟོན། །དོན་ཤེས་སྨྲ་ཚེ་བུད་མེད་ཤིན་ཏུ་ཁྲོས། །འོ་ན་ང་ལས་དོན་ལ་མཁས་པ་སུ། །གསུངས་པས་ང་ཡི་མིང་པོ་དོན་ལ་
མཁས་།གསོལ་བ་ཐོབ་ཅིང་སོང་དང་རྙེད་ཟེར་ནས། །ན་ཆུང་མཛེས་པའི་གཟུགས་བསྟན་མི་སྣང་གྱུར། །དེ་ནས་འཁོར་བ་སྙིང་པོ་མེད་པའི་ཚུལ། །མགུར་གསུངས་བླ་མ་ཚོལ་དུ་ཆས་པའི་ཚེ། །ཤར་སྒོའི་པཎ་ཆེན་རཏྣ་ཨ་ཀ་ར། །ལྷོ་ཕྱོགས་ངག་གི་དབང་ཕྱུག་གྲགས་པ་དང་། །ནུབ་ཀྱི་ཤེས་རབ་འབྱུང་གནས་སྦས་པ་དང་། །ནཱ་ལེནྡྲ་ཡི་དགེ་འདུན་ཐམས་ཅད་ཀྱིས། །ཕྱག་འཚལ་ཞུ་ཕུལ་བཞུགས་པར་གསོལ་བ་བཏབ། །དེ་ཚེ་སྐྱེ་བོ་གཞན་དག་འདི་སྐད་གླེང་། །སེང་གེ་ཁྲི་གནོན་དུ་མའི་འཁོར་ལྡན་པས། །རིན་ཆེན་འབྱུང་གནས་ཞི་བ་ལ་སོགས་པ། །པཎ་ཆེན་དུ་མས་ཕྱག་འཚལ་ཞབས་བཏུད་པའི། པཎ་ཆེན་འདི་འདྲ་འབྱུང་བར་དཀའ་བ་སྟེ། །འདི་འདྲས་བླ་མ་ཚོལ་བ་ཅི་ཡིན་ཟེར། །ཞུས་པ་མ་གསན་ཀྱེ་རྡོར་ལ་བསྟེན་ནས། །བླ་མ་ཚོལ་དགོངས་རིང་ཞིག་བྱོན་པ་ན། །ནམ་མཁའ་དག་ལས་ལུང་བསྟན་སྒྲ་བྱུང་བ། །བདེ་མཆོག་སྒོ་ནས་ཚོལ་དང་རྙེད་ཅེས་ཟེར། །དེ་ནས་དུར་ཁྲོད་ཆེན་པོ་ནཱ་ག་རར། །སྤྱིལ་པོ་བྱས་ནས་ཡིག་བདུན་འབུམ་ཕྲག་བཟླས། །ས་གཡོས་འཇའ་འོད་རོལ་མོ་དྲི་བཟང་ཁྱབ། །ཤར་ཕྱོགས་ཏེ་ལོ་བཞུགས་པོར་ཚོལ་ཞིག་གྲགས། །དེ་ནས་ཤར་ཕྱོགས་
ཀུན་ཏུ་སོང་སོང་ཡང་། །མ་རྙེད་ཡི་མུག་ལུང་བསྟན་ཐེ་ཚོམ་སྐྱེས། །དེ་ཚེ་ནམ་མཁའ་ལས་ནི་སྒྲ་གྲག་པ། །བརྩོན་པས་རྙེད་འགྱུར་ལེ་ལོས་མིན་ཞེས་ཐོས། །སླར་ཡང་སོང་བས་བྲག་རིང་འགག་དོགས་པར། །མཛེ་མོ་གཅིག་གིས་ལམ་འགགས་བཀག་ནས་འདུག །སྐྱུག་བྲོ་སྣ་བཀག་གོས་མཐའ་འགོང་སྟེ་བྱོན། །མཛེ་མོ་མི་སྣང་མཁའ་ལ་སྒྲ་གྲག་པ། །རྣམ་རྟོག་བཅིངས་པས་བླ་མ་རྙེད་དཀའ་ཟེར། །བླ་མའི་སྤྲུལ་པ་འདུག་ཀྱང་མ་ཤེས་འགྱོད། །དེ་ནས་གསོལ་བ་འདེབས་ཤིང་སོང་སོང་བས། །ལམ་སྲང་དོགས་པར་ཁྱི་མོ་འབུས་གཡོགས་ཀྱང་། །ཞེ་སྡང་དབང་གིས་གཞན་ལ་ཟུག་པ་མཐོང་། །སེམས་ཅན་མ་དག་པ་སྙམ་འགོང་སྟེ་སོང་། །ཁྱི་མོ་མི་སྣང་གཟུགས་མེད་སྒྲ་གྲག་པ། །ཐམས་ཅད་གདོད་ནས་རྣམ་པར་དག་པ་ལ། །བཟང་ངན་འཛིན་པས་བླ་མ་མི་རྙེད་ཟེར། །ད་ནི་ཕྱིན་ཆད་སུ་དང་འཕྲད་ན་ཡང་། །བླ་མ་དྲི་བར་བྱ་སྙམ་བྱོན་པ་ལ། །མི་གཅིག་འཕྲད་པར་ཏེ་ལོ་མཐོང་ངམ་དྲིས། །མི་དེས་འདི་ནས་ཅུང་ཟད་འདས་པ་ན། །བླ་མ་དེ་ནི་བྱ་མིན་བརྩོན་པར་ཡོད། །ཟེར་བ་ཐོས་ནས་སོང་བས་མི་གཅིག་གིས། །མི་གཅིག་བསད་ཕྱིར་བརྡུངས་ཤིང་འདུག་
པ་ལ། །ཏེ་ལོ་མཐོང་ངམ་དྲིས་པས་མི་དེ་ཡིས། །མི་འདིས་མགོ་བོ་ཆོད་དང་བསྟན་ནོ་ཟེར། །ཁོ་བོ་པཎྜི་ཏ་ཡིན་མི་རུང་སྨྲས། །དེ་ཉིད་མི་སྣང་གཟུགས་མེད་སྒྲ་སྐད་ལ། །ཤེས་རབ་མཚོན་གྱིས་བདག་འཛིན་མགོ་བོ་ནི། །བཅད་པར་མ་བྱས་བླ་མ་མི་རྙེད་ཟེར། །སྤྲུལ་པར་མ་ཤེས་སྙམ་ནས་འགྱོད་ཅིང་ཟེར། །མི་གཅིག་མི་བསད་རྒྱུ་མ་འདྲེན་ཅིང་འདུག །ཏེ་ལོ་ཨེ་མཐོང་དྲིས་པས་མི་དེ་ཡིས། །རྒྱུ་མ་འདོན་རོགས་གྱིས་དང་བསྟན་ནོ་ཟེར། །བདག་ནི་དགེ་སློང་ཡིན་པས་མི་རུང་སྨྲས། །དེ་ཡི་མོད་ལ་དེ་ཉིད་མི་སྣང་ནས། །འཁོར་བའི་རྒྱུན་ཐག་བཅད་པར་མ་བྱས་ན། །བླ་མ་མི་རྙེད་ཟེར་བའི་སྐད་ཅིག་གྲག །དེ་ནས་སོང་བའི་ཆུ་ཆེན་གཅིག་གི་འགྲམ། །མི་གཅིག་མི་ཡི་ནང་ཆ་བཀྲུ་ཞིང་འདུག །ཏེ་ལོ་ཨེ་མཐོང་དྲིས་པས་མི་དེ་ཡིས། །དང་པོ་ནང་ཆ་བཀྲུ་རོགས་གྱིས་དང་ཟེར། །སྐྱུག་བྲོ་བདག་གིས་བཀྲུ་བར་མི་འདོད་སྨྲས། །ཉོན་མོངས་མི་བཀྲུ་བླ་མ་མི་རྙེད་ཅེས། །སྒྲ་གྲག་དེ་ཉིད་དུ་ནི་མི་སྣང་གྱུར། །ཀྱེ་མ་བླ་མའི་སྤྲུལ་པ་མང་འཕྲད་ཀྱང་། །མ་ཤེས་ན་ཡང་ད་རུང་བཙལ་སྙམ་སོང་། །གྲོང་ཁྱེར་རྒྱ་ཆེན་མཛེས་པའི་དབུས་ཉིད་དུ། །ཆོས་ལྡན་རྒྱལ་པོ་གཅིག་གི་དྲུང་དུ་
ཕྱིན། །ང་ནི་ནཱ་ལེནྡྲ་ཡི་པཎྜིཏ། །བླ་མ་ཏེ་ལོ་བཙལ་བས་མ་རྙེད་ངལ། །རྒྱལ་པོ་ཁྱོད་ཀྱིས་བདག་ལ་བསྟན་འཚལ་ཞུས། །རྒྱལ་པོས་ཏེ་ལོ་མི་མཐོང་དགོས་པ་མེད་། །ང་ཡི་བུ་མོ་ལོངས་སྤྱོད་མཐའ་ཡས་ཅན། །ཁྱོད་ལ་འབུལ་བས་རེ་ཤིག་ངལ་བསོས་ཟེར། །དེ་ལྟར་བྱས་པས་ཁྱེའུ་གཅིག་ཀྱང་བྱུང་། །སྐྱིད་པོར་ཡོད་ཚེ་ངན་སྤྱོད་མཁན་གཅིག་གིས། །རྒྱལ་པོའི་བུ་མོ་བྱིསྦ་གཉིས་བཅས་བསད། །རྒྱལ་པོས་ཀྱང་ནི་ལེ་དད་བཀའ་བཀྱོན་བྱས། །ཁོ་བོས་བླ་མ་དམ་པ་ཚོལ་བསམས་པས། །རྒྱལ་པོས་ང་བསླས་ཆོས་ཀྱི་བར་ཆད་བྱས། །ད་ནི་རྒྱལ་པོ་དང་ནི་བསད་མཁན་བཅས། །དྲག་སྔགས་མཐུ་ཡིས་བསྒྲལ་བར་བྱ་དགོས་སྙམ། །བསྒྲུབ་པའི་ཁང་བུར་མཚམས་བསྡམས་སྔགས་བཟླས་པས། །དུག་གསུམ་སྤྱད་པས་བླ་མ་རྙེད་མི་འགྱུར། །ཁྱོད་ནི་སྒྱུ་མས་བསླུས་ཞེས་སྒྲ་གྲག་སྟེ། །རྒྱལ་པོ་ཡུལ་ཁམས་བཅས་པ་མི་སྣང་ངོ་། །དེ་ནས་ཡང་ནས་སོང་བའི་ལམ་ཁ་ན། །རྔོན་པས་རི་དྭགས་དེད་ནས་བྱུང་བ་ལ། །ཏེ་ལོ་དྲིས་པས་གསོད་རོགས་གྱིས་དང་ཟེར། །དགེ་སློང་ཡིན་སྙམ་མོད་ལ་དེ་མི་སྣང་། །གཟུགས་འཛིན་རི་དྭགས་བསད་པར་མ་བྱས་ན། །བླ་མ་མི་
རྙེད་དགེ་འདུན་བསོད་སྙོམས་སློང་། །ཞེས་པའི་སྒྲ་གྲག་དེ་ནས་པཎྜི་ཏ། །དགེ་འདུན་འདུ་བའི་གནས་སུ་བྱོན་པ་ལ། །དགེ་འདུན་རྣམས་ཀྱིས་འདི་སྐད་ཅེས་ནི་གསོལ། །ཁྱེད་ནི་ཅུང་ཟད་ཕར་ལ་བྱོན་ཤིག་དང་། །པཎ་ཆེན་ཁྱེད་ལ་བསུ་བ་བྱ་དགོས་ཟེར། །བདག་ལ་བཀུར་སྟི་བྱས་ཀྱང་དགའ་བ་མེད། །བླ་མ་ཏེ་ལོ་ཨེ་མཐོང་དྲིས་པ་ལ། །མུ་ཏོ་བ་ཡི་ཏེ་ལོ་བྱ་བ་ཞིག །འདུག་ཟེར་གཅིག་གིས་བསྟན་དུ་སོང་ཙ་ན། །ལམ་མདོར་སྤྲང་རྒན་མི་སྡུག་འདོར་བ་དང་། །བསླང་སྣོད་ཆག་པོར་སྤྲང་ཟས་ཟ་བར་མཐོང་། །ཕྱག་འཚལ་བསྐོར་བ་བྱས་པས་དགེ་འདུན་རྣམས། །པཎྜི་ཏ་འདི་སྐྱོ་བ་ཡིན་ནམ་ཟེར། །སྤྲང་པོ་དེ་ཡིས་ཤིག་ནི་སྤར་བ་གང་། །ཁོང་ལ་གཏད་ནས་མེ་ལ་བསྲེགས་ཤིག་ཟེར། །ཅུང་ཟད་ཐེ་ཚོམ་གྱུར་པས་འཇའ་ལྟར་ཡལ། །རྣམ་རྟོག་མ་བསྲེགས་བླ་མ་ག་ལ་རྙེད། །རྒྱ་མཚོའི་འགྲམ་དུ་ཉ་གསོད་འགྲོའོ་ཞེས། །སྒྲ་ཞིག་གྲག་པས་རྒྱ་མཚོའི་འགྲམ་དུ་སོང་། །བཙུན་རྒན་གཅིག་དང་བཙུན་མ་རྒན་མོ་གཉིས། །ཞིང་རྨོ་དེ་ཡི་བུ་དང་བུ་མོ་རྣམས། །ཉེ་རྣམས་གཅོད་ཅིང་འདུག་པ་གཅིག་དང་འཕྲད། །ཏེ་ལོ་དྲིས་པས་ཏེ་ལོ་ངས་མི་ཤེས། །དང་པོ་ཁྱིམ་དུ་བྱོན་ལ་དྲོ་
གསོལ་ཟེར། །ཉ་བདུན་གསོན་པོར་སྡེར་དུ་དྲངས་བྱུང་བས། པཎྜི་ཏ་ཡིན་མི་རུང་སྙམ་མ་ཐག །དེ་དག་མི་སྣང་སྒྲ་སྐད་འདི་བྱུང་ངོ་། །རྣམ་པར་རྟོག་པས་བླ་མ་།རྙེད་པར་དཀའ། །ད་ནི་ཕ་མ་གསོད་དུ་འགྲོའོ་ཟེར། །དེ་ནས་འོང་བས་མི་གཅིག་ལས་ངན་བྱེད། །ཕ་ནི་གསལ་ཤིང་ལ་བསྐྱོན་མ་དེ་ནི། །ཁྲི་མུན་དོང་དུ་བཅུག་པ་དེ་དང་འཕྲད། །ཏེ་ལོ་དྲིས་པས་དེ་ནི་ངས་ཤེས་ཏེ། །དང་པོ་ཕ་མ་གསོད་རོགས་གྱིས་དང་ཟེར། །མི་རུང་བསམ་ཚེ་ཐམས་ཅད་མི་སྣང་གྱུར། །གཟུང་འཛིན་ཆགས་སྡང་ཕ་མ་མ་བསད་ནས། །བླ་མ་མི་རྙེད་ད་ནི་ལྟད་མོར་འགྲོ། །ཟེར་བ་ཐོས་ནས་ཡང་ནི་སོང་སོང་བས། །མིག་གཅིག་པ་ཡི་ཡུལ་དུ་མི་མང་འདུས། །འོན་པས་སྒྲ་ཉན་དམུས་ལོང་ལྟད་མོ་ལྟ། །ལྐུགས་པས་གཏམ་སྨྲ་རོ་ལངས་གར་བྱེད་མཐོང་། །ངོ་མཚར་སྙམ་ནས་བལྟས་པས་ནམ་མཁའ་ནས། །མི་གཅིག་དུ་མ་རོ་གཅིག་སྟེ། །ཞེས་སོགས་ངོ་སྤྲོད་སྒྲ་གྲག་མི་སྣང་གྱུར། །དེ་ནས་ཡུན་རིང་བཙལ་ཡང་མ་རྙེད་ངལ། །ད་ནི་ལུས་འདིའི་བླ་མ་མི་རྙེད་པས། །ལུས་འདི་བོར་ནས་སྨོན་ལམ་བཏབ་བོ་སྙམ། །མ་འོངས་བླ་མ་མཇལ་བའི་སྨོན་ལམ་བཏབ། །མཆི་
མ་འདོན་ཞིང་མགྲིན་པར་སྤུ་གྲི་ཚད། །བྲེག་ལ་ཁད་དུ་མཁའ་ལས་སྒྲ་གྲག་པ། །བསད་པས་བླ་མ་མི་རྙེད་དེ། །ཁྱོད་འདོད་སྡིག་ཅན་ང་ཉིད་དོ། །ཞེས་གསུངས་འཇའ་དང་འོད་ཀྱི་གུར་ཁང་དབུས། །རྣལ་འབྱོར་མཐིང་ནག་དབུ་སྐྲ་སྤྱི་བོར་བཅིངས། །སྐྱབས་སྦྱིན་ཕྱག་རྒྱ་མཛད་པ་དངོས་སུ་མཇལ། །དད་པས་ཕྱག་འཚལ་ཐུགས་རྗེས་གཟིགས་ཤིག་ཞུས། །ད་ནི་གསང་སྔགས་སྣོད་དུ་གྱུར་ཞེས་གསུངས། །ཁྱོད་དང་བདག་གཉིས་རྟག་ཏུ་འབྲལ་མེད་ཀྱང་། །སྡིག་པས་སྒྲིབ་སྟེ་ཇི་བཞིན་མ་མཐོང་གསུངས། །དེ་ནས་ཏེ་ལོ་བྱོན་སོང་རྗེས་བཞིན་རྒྱུག་།ཐང་སྐྱིལ་གཅིག་ཏུ་སྔར་ལྟར་མཛད་ཅིང་གདའ། །ཕྱག་འཚལ་མཎྜལ་ཕུལ་ནས་ཞུས་པ་ནི། །བདག་ནི་རྒྱལ་པོ་དགེ་བའི་གོ་ཆའི་བུ། །རབ་ཏུ་བྱུང་བས་མཁས་པ་ཆེན་པོར་གྲགས། །ཁྱོད་ཉིད་ཚོལ་ཕྱིར་དཀའ་བ་དུ་མ་སྤྱད། །ད་ནི་དམ་ཆོས་བདུད་རྩི་སྩོལ་ཞུས་པས། །དང་པོ་ཁྱོད་ལ་དབང་བསྐུར་བྱ་དགོས་པས། །མྱུར་བར་མེ་དང་རས་ཡུག་ཁྱེར་ཤོག་གསུངས། །མེ་དང་རས་ཡུག་བཙལ་ནས་ཕྱག་ཏུ་བཏང་། །རས་ཡུག་སྟེང་དུ་མེ་བཞག་ཐལ་བར་སོང་། །གོ་འམ་གསུངས་པས་རང་རྒྱུད་དྲི་མ་མེད། །དབང་དོན་མེས་བསྲེགས་
གཉིས་མེད་ཡེ་ཤེས་སུ། །ཕྱིན་པར་གོ་ཞུས་ཅི་ཡང་མི་གསུང་བཞུད། །རྗེས་སུ་སོང་སོང་ཐང་སྐྱིལ་གཅིག་ཏུ་བཞུགས། །ཕྱག་འཚལ་གདམས་པ་གནང་བར་ཞུས་པ་ལ། །མེ་ཤེལ་འོད་འབར་གཅིག་བསྟན་གོ་འམ་གསུངས། །གདོད་ནས་དྲི་མེད་ལྟ་བུའི་སེམས། །བླ་མའི་ངོ་སྤྲོད་མཆོག་གིས་གོ་ལགས་ཞུས། །ཅི་ཡང་མི་གསུང་བཞུད་པའི་ཕྱི་ལ་འབྲངས། །སྔར་ལྟར་བཞུགས་འདུག་ཕྱག་འཚལ་མཎྜལ་ཕུལ། །རྒྱ་མདུད་བསྟན་ཏེ་བཀྲོལ་ནས་གོ་འམ་གསུངས། །འཆིང་བྱེད་འཁོར་བ་རང་གྲོལ་གྱི། །ཡེ་ཤེས་སུ་གོ་དེ་ནི་ཡིན་ལགས་སམ། །ཞུས་པས་ཅི་ཡང་མི་གསུངས་བྱོན་སོང་བས། །ཕྱི་ལ་འབྲངས་པས་བཞུགས་འདུག་ཕྱག་བསྐོར་བྱས། །ནོར་བུའི་ཕྱག་རྒྱ་བསྟན་ནས་གོ་འམ་གསུངས། །བླ་མ་ཡིད་བཞིན་ནོར་བུའི་མཆོག་དེ་ལ། །བསྟེན་ནས་དགོས་འདོད་འབྱུང་ངོ་དེ་ལགས་སམ། །ཞུས་པས་མི་གསུངས་བཞུད་པས་ཕྱི་ལ་འབྲངས། །བཞུགས་པ་མཇལ་ནས་མཎྜལ་ཕྱག་བསྐོར་བྱས། །སྤྱན་ནི་གང་དུའང་མི་འགྱུར་པར་གཟིགས་ནས། །གོ་འམ་གསུང་ཚེ་རྗེ་བཙུན་བླ་མ་ལ། །མོས་གུས་རྩེ་གཅིག་བསྒོམ་ན་ཡོན་ཏན་འབྱུང་། །ཞེས་པར་གོ་ལགས་ཞུས་པས་མི་
གསུང་བཞུད། །ཕྱི་བཞིན་འབྲངས་པས་སྔར་བཞིན་བཞུགས་པར་མཇལ། །མཎྜལ་ཕུལ་ནས་གདམས་ངག་གནོངས་ཞུས་པས། །ཆུ་ཕོར་གང་གསོལ་དེ་དོན་གོའམ་གསུངས། །བླ་མའི་ཞལ་གདམས་དད་པས་འཐུང་དགོས་གོ །མི་གསུངས་བཞུད་པའི་ཕྱིར་འབྲངས་སྔར་ལྟར་མཇལ། །ཕྱག་འཚལ་མཎྜལ་ཕུལ་ནས་གདམས་པ་ཞུས། །སྣོད་མང་ཆུ་ཡིས་བཀང་སྟེ་གོ་འམ་གསུངས། །སྣ་ཚོགས་ཆོས་ཀུན་ཡེ་ཤེས་རོ་གཅིག་གོ །བླ་མ་གཤེགས་པའི་ཕྱིར་འབྲངས་སྔར་ལྟར་མཇལ། །ཆོས་འབྱུང་ཕྱག་རྒྱ་བསྟན་ཏེ་གོའམ་གསུངས། །རྣམ་པར་ཆོས་ཀུན་འབྱུང་བའི་གནས། །བསྟན་ན་མཆོག་གྲུབ་གོ་ལགས་ཞུས། །མི་གསུང་བཞུད་པའི་རྗེས་སུ་འབྲངས། །ཕྱག་འཚལ་གདམས་པ་ཞུས་པ་ལས། །ཐིག་ལེ་གཅིག་བསྟན་གོའམ་གསུངས་། །ཐིག་ལེ་ཉག་གཅིག་ཆོས་སྐུ་ནི། །རང་ལ་གནས་པའི་རྩལ་སྦྱངས་དགོས། །གོ་ཞུས་ཅི་ཡང་མི་གསུངས་བཞུད། །རྗེས་སུ་རྒྱུག་པས་སྔར་བཞིན་མཇལ། །ཕྱག་འཚལ་མཎྜལ་གདམས་པ་ཞུས། །རྒྱ་མདུད་གཅིག་བསྡམས་གོའམ་གསུངས། །མི་ཕྱེད་ཁ་སྦྱོར་གསང་བའི་གནད། །མི་འབྲལ་བརྟན་པོར་བསྒྲུབ་དགོས་གོ །ཞུས་པའི་ལན་མེད་བྱོན་ནས་
སོང་། །རྗེས་སུ་རྒྱུག་པོས་མཇལ་བའི་ཚེ། །མཎྜལ་ཕྱག་ཕུལ་གདམས་པ་ཞུས། །ཅི་ཡང་མི་གསུང་ཡུད་ཙམ་བཞུགས། །གོ་འམ་གསུངས་པས་འདི་སྐད་ཞུས། །ལྷན་སྐྱེས་ཡེ་ཤེས་སྨྲ་བརྗོད་བྲལ། །སོ་སོ་རང་གིས་རྟོགས་དགོས་གོ །ཅི་ཡང་མི་གསུང་གཞན་དུ་བྱོན། །རྗེས་སུ་འབྲངས་པས་སྔར་ལྟར་མཇལ། །ཕྱག་འཚལ་གདམས་པ་གནང་བར་ཞུས། །ཤིང་ཐོག་གཅིག་གནང་གོ་འམ་གསུངས། །ཆོས་སྐུ་དཔག་བསམ་ཤིང་ཆེན་ལ། །རོ་མཆོག་བདུད་རྩིར་སྨིན་པར་གོ །དེ་ཚེ་ཅུང་ཟད་འཛུམ་མཛད་བརྡ་དོན་གསུངས། །བཅུ་གཉིས་བརྡ་ཤེས་སྣོད་དང་ཆེ་ལྡན་ཏེ། །བལྟ་བྱ་ལྟ་བྱེད་ཡོད་ན་མི་གྲོལ་བས། །ལྟར་མེད་དོན་ལ་ལྟོས་ཤིག་གྲོལ་འགྱུར་གསུངས། །བླ་མའི་དྲིན་གྱིས་རང་སེམས་ནོར་བུ་རྙེད། །ཐོབ་མེད་དོན་ཐོབ་བདག་ཉིད་ཚིམས་ཞུས་པས། །མན་ངག་དོན་ལ་ཆགས་ཀྱང་བསླུས་གསུངས་གཞན་དུ་གཤེགས། །ཕྱི་བཞིན་སོང་བས་མཇལ་ནས་མཎྜལ་ཕུལ། །མོད་ལ་བཞེངས་ཏེ་ཨོ་ཏན་ཏྲ་བྷ་ཝ་རི་འམ། །གཙུག་ལག་ཐོག་རྩག་བཅུ་གསུམ་རྩེར་བྱོན་ནས། །སློབ་དཔོན་གསུངས་བཞིན་བྱས་ན་སྐད་ཅིག་གྲོལ་འགྱུར་ཕྱིར། །སློབ་མ་ཡོད་ན་
འདི་ནས་མཆོང་དགོས་གསུངས། །ནཱ་རོ་མཆོངས་པས་རྐང་རུས་ལྟོ་བར་ཟུག །ཚིག་རྣམས་འཐོར་ཞིང་ནང་ཁྲོལ་ཕྱི་རུ་བྱུང་། །མགོ་ཆག་ཀླད་པ་འཐོར་ཡང་སྲོག་མ་ཆད། །སེམས་ནི་འགྱོད་མེད་བློ་ཁ་རྫོགས་ཤིང་གནས། །བླ་མ་བྱོན་ནས་ཅི་ཉེས་གསུངས་པ་ལ། །བདག་ནི་འདི་ནས་འཆི་འཕོས་གྱུར་ན་ཡང་། །ཁྱེད་དང་མི་འབྲལ་ཤོག་ཅེས་སྨོན་ལམ་ཞུས། །ལུས་ངན་ཞིག་ཀྱང་བཟོད་ཕྱིར་ཌཱཀིའི་གསུངས། །རང་རྒྱུད་སེམས་ཀྱི་མེ་ལོང་ལྟོས་ཤོག་གསུངས། །བླ་མའི་ཕྱག་གིས་བྱུགས་པས་སྔར་ལྟར་སོས། །དེ་ནས་ལོ་གཅིག་བར་དུ་ཕྱིར་འབྲངས་ནས། །མཎྜལ་ཕུལ་ནས་གདམས་ངག་གནོངས་ཞུས་པས། །ཕྱོགས་ཀུན་མེ་ཡིས་བསྐོར་བའི་དབུས་སུ་བཞག །ཤིང་མང་སྤུངས་ནས་ཇེ་ཉེར་ཡུན་རིང་བསྲེགས། །པགས་པ་ཤ་རྣམས་ཚིག་ནས་གཞོབ་ཏུ་གྱུར། །རྒྱུད་པ་ཆུ་རྒྱུས་རྣམས་ཀྱང་ཚིག་ནས་ཆད་། །ཁྲག་དང་ཆུ་སེར་རླངས་པ་རྣམས་ཀྱང་སྐམ། །ཚིག་བཞི་མ་འཐོར་སྲོག་ནི་མ་ཆད་ཙམ། །སེམས་ནི་འགྱུར་མེད་དད་པས་བློ་སེམས་དགའ། །དེ་ཚེ་ནམ་མཁའི་ལྷས་ཀྱང་མ་བཟོད་ནས། །འདི་འདྲ་ཅི་ཕྱིར་བྱེད་ཅེས་ཚིག་ཏུ་བརྗོད། །རྒྱུ་མཚན་བཤད་པས་ལྷས་ཀྱང་བསྟོད་པར་བྱས། །
ལུས་ངན་ཚིག་ཀྱང་བཟོད་ཀྱིས་ནཱ་རོ་པ། །ཐུན་མོང་སེམས་ཀྱི་མེ་ལོང་ལྟོས་གསུངས་ནས། །ཕྱག་གིས་བྱུགས་པས་སྔར་ལས་ལེགས་པོར་སོང་། །ཡང་ནི་ལོ་གཅིག་བར་དུ་རྗེས་སུ་འབྲངས། །མཎྜལ་ཕུལ་ནས་གདམས་ངག་གནོངས་ཞུས་པས། །འདམ་རྫ་བ་ཤིན་ཏུ་དོགས་པའི་འོབས་གཅིག་ལ། །འདི་ནས་ལུས་ཀྱི་ཟམ་པ་གྱིས་དང་གསུངས། །ཟམ་པ་བྱས་པའི་སྟེང་དུ་ཡུན་རིང་བཞུགས། །ཤུགས་ཀྱིས་འདབ་རྫབ་ནང་དུ་འཕངས་ནས་གཤེགས། །འདམ་རྫབ་ནང་དུ་ལུས་ནུབ་སྲིན་བུའི་ཚོགས། །དུ་མས་ལུས་ཕུག་ཁྲག་རྣག་ཐམས་ཅད་འཇིབ། །རིང་ཞིག་ལོན་ནས་ཏེ་ལོ་བྱོན་བྱུང་ནས། །ལུས་ངན་སྲིན་བུའི་བཤིགས་ཀྱང་བཟོད་ཀྱིས་ནཱ་རོ་པ། །དམ་ཚིག་ཡིད་བཞིན་ནོར་བུ་འཆང་གསུངས་ནས། །ཕྱག་གིས་བྱུགས་ནས་ལུས་ནི་སྔར་བཞིན་སོས། །དེ་ནས་ལོ་གཅིག་བླ་མའི་རྗེས་སུ་འབྲངས། །མཎྜལ་ཕུལ་ནས་གདམས་ངག་ཞུས་པ་ཡིས། །སྨྱུག་ཐུར་མང་པོ་སོ་བཏོན་ངར་བླུད་ནས། །མདུན་རྒྱབ་གཡས་གཡོན་ཀུན་ནས་ཟང་ཐལ་ཕུག །ལུས་ནི་སྨུག་ཕུང་ལྟ་བུར་ཟིང་ཟིང་བྱས། །ལུས་ཀྱང་ཁྲག་གིས་ཟག་ནས་དམར་པོར་གྱུར། །བླ་མའི་ཕྱག་གིས་དངོས་
སུ་བཙུགས་པ་ཡིས། །བསམ་པ་འགྲུབ་སྙམ་དགའ་བ་རྒྱ་ཆེན་གྱིས། །དེ་ཚེ་ལྷ་མོ་གཅིག་ཀྱང་ཡི་མུག་ནས། །ཏེ་ལོ་པ་ལ་སྐུར་པ་འདེབས་པར་གྱུར། །གཏུམ་མོའི་གནད་ཀྱི་གདམས་པ་བསྒོམ་གསུངས་ནས། །ཕྱག་གིས་བྱུགས་པས་སྔར་བས་ལེགས་པར་སོས། །དེ་ནས་ལོ་གཅིག་བར་དུ་ཕྱི་བཞིན་འབྲངས། །མཎྜལ་ཕུལ་ནས་གདམས་པ་གནོངས་ཞུས་པས། །འོ་ན་རྒྱལ་པོའི་བཙུན་མོ་ཁྲིད་ཤོག་གསུངས། །རྒྱལ་པོའི་བཙུན་མོ་འཁོར་ཚོགས་འབུམ་ཕྲག་གིས། །བསྐོར་ནས་འདུག་པར་ནཱ་རོས་ཁྲིད་བརྩམས་པས། །ན་རོ་བརྡུངས་ནས་ཤི་བར་ག་ནས་བསྒྱུར། །ཡུན་རིང་བརྒྱལ་ནས་དྲན་པ་རྙེད་པ་ལ། །བླ་མའི་བཀའ་སྒྲུབ་ཤི་བ་ལེགས་སོ་སྙམ། །བླ་མས་བདེ་ཆེན་ཁ་སྦྱོར་ལྟོས་གསུངས་ནས། །ཕྱག་གིས་བྱུགས་པས་སྐད་ཅིག་སྔར་བཞིན་སོས། །དེ་ནས་ལོ་གཅིག་བར་དུ་རྗེས་སུ་འབྲངས། །ཕྱག་འཚལ་གདམས་ངག་བསྟན་པར་ཞུས་པ་ན། །འོ་ན་བློན་པོའི་ཆུང་མ་ཁྲིད་ཤོག་གསུངས། །བློན་པོའི་ཆུང་མ་བཟུང་ནས་ཁྲིད་པ་ཡིས། །བློན་པོ་འཁོར་བཅས་ཁྲོས་ནས་ནཱ་རོ་བཟུང་། །རྐང་ལག་བཞི་བཅག་སྐྱོགས་ཀྱི་ནང་དུ་བཅུག །རྒྱང་རིང་འཕངས་པས་
བྲག་གི་ངོས་ལ་ཕོག །རུས་བཞི་རྣམས་ཞིག་ཆུ་རུས་ཐམས་ཅད་ཆད། །མ་ཤི་ཙམ་དུ་ཡོད་དུས་བླ་མ་བྱོན། །འཕོ་བའི་འཁྲུལ་འཁོར་ལྟོས་གསུངས་ཕྱག་གིས་རེག །སྔར་བཞིན་སོས་ནས་ལོ་གཅིག་ཆག་ཕྱིར་འབྲངས། །གདམས་ངག་ཆོས་ཤིག་གནོང་བར་ཞུས་པ་ཡིས། །རྒྱུ་ལམ་བཞི་མདོར་བག་མ་འགྲོ་བ་ཡི། །མེ་ཏོག་ཕྲེང་བ་བཀོན་ལ་ཁྲིད་ཤོག་གསུངས་། །དེ་ལྟར་བྱས་པ་བཙལ་ཚེ་སྙེ་བོ་ཡིས། །རབ་ཏུ་བརྡུངས་ནས་རོ་བཞིན་གྱུར་པ་ན། །དེ་ནས་ཤི་སོང་ཟེར་ནས་བསྒྱུར་ཏེ་སོང་། །ཡུན་རིང་བརྒྱལ་ནས་དྲན་པ་ཅུང་ཟད་རྙེད། །བདག་ནི་རྒྱལ་སྲིད་སྤངས་ནས་པཎ་ཆེན་གྱུར། །བླ་མ་རྙེད་ནས་གདམས་པ་ཅུང་ཟད་ཐོབ། །འོན་ཀྱང་ཡང་དག་བདེན་པ་མ་མཐོང་བས། །ཕལ་པའི་སྐྱེ་བོའི་བརྡུང་སྟེ་ཉམས་ཐག་སྙམ། །ཡུན་རིང་ངུ་ཞིང་ཡོད་རྩར་བླ་མ་བྱོན། །ཡང་དག་ཡེ་ཤེས་ལྟོས་གསུངས་ཕྱག་གིས་རེག །དེ་མ་ཐག་ཏུ་མཆོག་གི་ལུས་སུ་གྱུར། །དེ་ནས་ལོ་གཅིག་བླ་མའི་ཆག་ཕྱིར་འབྲངས། །མཎྜལ་ཕུལ་ནས་གདམས་ངག་དབང་ཞུས་པས། །མི་གཅིག་འགྲོ་ཞིང་འདུག་པ་ཟུངས་ཤིག་གསུངས། །ནཱ་རོ་བརྒྱུགས་པས་ཇེ་མགྱོགས་མ་ཟིན་ནས། །ཤིན་ཏུ་
ཐང་ཆད་དྲན་མེད་བརྒྱལ་བ་ལས། །ཅུང་ཟད་དྲན་པ་རྙེད་ཀྱང་འགུལ་མ་ནུས། །བླ་མ་བྱོན་པ་འདི་ལ་ཁྱོད་ཉལ་ན། །འགྲོ་དྲུག་སྡུག་བསྔལ་རྣམས་ལ་ཇི་ལྟར་བྱ། །རྨི་ལམ་གདམས་ངག་ལྟོས་གསུངས་ལུས་སེམས་བདེ། །དེ་ནས་བླ་མའི་རྗེས་སུ་ལོ་གཅིག་སོང་། །ཕྱག་འཚལ་གདམས་ངག་གནོངས་ཞེས་གསོལ་བཏབ་པས། །འོ་ན་མཎྜལ་གྱིས་གསུངས་ཆུ་མ་རྙེད། །རང་གིས་ཁྲག་ཕྱུང་ས་ལ་མཎྜལ་བྱས། །སོར་ཚིག་རྣ་བ་སྣ་བཅད་ཚོམ་བུ་བཀོད། །ཡན་ལག་ཉིང་ལག་རྣམས་ཀྱང་བཅད་ནས་བཀོད། །ཕྱག་གིས་བྱུགས་པས་སྔར་ལྟར་བདེ་བར་སོས། །གསང་ཆེན་བར་དོའི་གདམས་ངག་བཀའ་བསྩལ་ཏོ། །དེ་ནས་བླ་མའི་རྗེས་སུ་ལོ་གཅིག་སོང་། །མཎྜལ་ཕྱག་འཚལ་གདམས་ངག་གསོལ་བཏབ་པས། །སྟོན་མོ་ས་ནས་བཟའ་བཏུང་སློང་ཤོག་གསུངས། །གང་རྙེད་ཕུལ་བས་ད་རུང་ཁྱེར་ཤོག་གསུངས། །དེ་ནས་མ་བྱིན་པ་ལ་འཕྲོག་ནས་ཁྱེར། །ཀུན་གྱིས་ནཱ་རོ་བཟུང་ནས་ཆུ་རུ་འཕངས། །ཆུ་ལས་ཐོན་ནས་ཏེ་ལོའི་དྲུང་དུ་སླེབས། །ད་རུང་སོང་ལ་ཕྲོགས་ཤོག་དེད་བྱུང་ན། །བུམ་པ་ལི་གྲི་མེ་ལོང་རལ་གྲི་རྣམས། །ཟུར་ལ་སྐྱུར་ཞིང་བྲོས་ལ་ཤོག་ཅིག་གསུངས། །དེ་ནས་
བཟའ་བཏུང་ཁྱེར་བས་ཀུན་གྱིས་དེད། །སླེབ་ལ་ཁད་དུ་བུམ་པའི་ཆུ་འཕོས་པས། །ཆུ་ཡི་འོབས་གྱུར་དེས་ཀྱང་མ་གཏན་དེད། །ཐག་པ་བསྒྱུར་བས་ཆུར་གྱུར་མ་གཏན་དེད། །མེ་ལོང་བསྒྱུར་བས་མཚོ་གྱུར་བསྐོར་ནས་དེད། །རལ་གྲི་གཡུགས་པས་ལྕགས་ཀྱི་བསྐྱིལ་པོར་གྱུར། །དེ་ནས་སོལ་བ་དཔུང་ནས་མེ་བརྒྱབས་པས། །འདུག་པར་མ་ཚུགས་ཕྱི་རུ་བུད་པ་ན། །ཤིན་ཏུ་བརྡུངས་ནས་རོ་བཞིན་བྱས་ཏེ་སོང་། །བླ་མ་མཆོད་ཕྱིར་ཤི་བ་དོན་དང་ལྡན། །བསམས་ཤིང་ཡོད་ཚེ་བླ་མ་ཏེ་ལོ་བྱོན། །དམ་ཆོས་བདུད་རྩི་གནང་བས་ལུས་སེམས་བདེ། །ཡང་ནི་ལོ་གཅིག་བླ་མའི་ཆག་ཕྱིར་འབྲངས། །མཎྜལ་ཕྱག་འཚལ་གདམས་ངག་གནོངས་ཞུས་པས། །བྲང་ལ་རྡོག་སྟེ་ངོ་ལ་ཆགས་ལྷམ་བརྒྱབ། །ཇི་ལྟར་བཤད་ཀྱང་གོ་མེད་གསུངས་ནས་གཤེགས། །ཞག་མང་བརྒྱལ་སོང་དེ་ནས་དྲན་པ་རྙེད། །དད་པ་ཆེར་སྐྱེས་དེ་ཚེ་བླ་མ་བྱོན། །འཁོར་བ་གདོད་ནས་ཡེ་ཤེས་ལྷུན་གྱིས་གྲུབ། །ཏེ་ལོ་ང་ལ་ཅི་ཡང་བསྟན་དུ་མེད། །རང་གིས་རང་ཉིད་མཚོན་ཏེ་ཤེས་པར་གྱིས། །ཞེས་གསུངས་མོད་ལ་ནཱ་རོས་རྟོགས་པ་རྙེད། །སླར་ཡང་བླ་མའི་ཕྱི་བཞིན་ལོ་གཅིག་སོང་། །མཎྜལ་
ཕྱག་འཚལ་གདམས་པ་གནོང་ཞུས་པས། །འོ་ན་ཤེས་རབ་མ་ཞིག་ཚོལ་ཅིག་གསུངས། །མཚན་ལྡན་དྲི་མེད་མ་ཞེས་ཕྱག་རྒྱར་བཙལ། །ད་ནི་དེ་ཉིད་ང་ལ་ཕུལ་ཅིག་གསུངས། །ཕུལ་ནས་ཤེས་རབ་མ་དེས་ཕྱི་མིག་བལྟས། །ད་ནི་མོ་ཉིད་འདི་ལ་ཆགས་འདུག་པས། །ཁྱོད་ཀྱི་རྡོ་རྗེ་མེད་པར་བྱ་དགོས་གསུངས། །སྨྱུག་ཐུར་རྣོན་པོ་རྡོ་རྗེའི་སྦུགས་སུ་བཙུགས། །ནཱ་རོའི་གསང་གནས་རྡོ་ཡི་བར་དུ་བརྡུངས། །ཏེ་ལོས་བརྗོད་མེད་ཕྱག་ཆེན་དོན་བསྟན་པས། །ན་རོས་ཇི་བཞིན་རྟོགས་པས་གར་བྱས་སོ། །ད་ནི་བཀའ་དྲིན་ཅན་གྱི་བླ་མ་ལ། །དངོས་པོ་བཙལ་ནས་འབུལ་བ་བྱ་དགོས་སྙམ། །ནན་ཏན་བཙལ་བས་མུ་ཏིག་བྱི་རུ་སོགས། །མང་པོ་རྙེད་ནས་བླ་མར་འབུལ་དུ་སོང་། །བླ་མ་རིན་ཆེན་རི་བོ་ཆེན་པོའི་སྟེང་། །གཞལ་ཡས་ཁང་དབུས་ཌཱ་ཀིའི་མཆོད་ཅིང་འདུག །མུ་ཏིག་བྱི་རུ་འཕང་མེད་སྐུ་ལ་གཏོར། །བླ་མས་ཐོད་པ་བདུད་རྩིས་གང་བ་གནང་། །ད་ནི་བླ་མ་ཁྱེད་ཀྱི་ཐུགས་དགྱེས་ནི། །འཆད་ཉན་རྒྱ་ཆེན་ཡུན་དུ་བྱ་བ་འམ། །སྤྱིལ་པོར་རྩེ་གཅིག་བསྒྲུབ་པ་བྱ་འམ་ཞུས། །དེ་དག་གིས་ཀྱང་གྲོལ་བར་མི་འགྱུར་ཏེ། །ལྷན་སྐྱེས་ཡེ་ཤེས་ཁོ་ནས་གྲོལ་ལོ་གསུངས། །དེ་
ནས་བླ་མར་ཞུས་ནས་བཀའ་གནང་ནས། །ནཱ་རོ་རྒྱལ་པོའི་ཁབ་ཀྱི་གྲོང་ཁྱེར་བྱོན། །བཻཌཱུརྱ་ཞེས་བརྗོད་ཅིང་ཕྱིན་པ་ན། །བྲམ་ཟེ་གཅིག་གིས་སྤུ་གྲི་ཟས་སུ་བྱིན། །གསོལ་བས་སྤུ་གྲི་མར་ལྟར་ཞུ་ཞིང་གསོལ། །ཚིགས་བཅད་གསུངས་པས་བྲམ་ཟེ་སྐད་ཅིག་གྲོལ། །ནམ་མཁར་འཕག་ནས་གར་བྱེད་ཆེད་དུ་བརྗོད། །དེ་རུ་ཐམས་ཅད་འདུས་ནས་ལྟད་མོ་བྱེད། །དེ་ནས་གྲུབ་ཐོབ་ཡིན་མིན་བརྟག་པའི་ཕྱིར། །གླང་ཆེན་སྨྱོན་པ་ནཱ་རོའི་སྟེང་དུ་རྦད། །ཧཱུྃ་ཞེས་སྡིགས་མཛུབ་གཏད་པས་གླང་ཆེན་འགྱེལ། །གླང་པོའི་རོ་ཆེན་རུལ་བས་གྲོང་ཁྱེར་སྡུག །གྲོང་ཁྱེར་རྣམས་ཀྱིས་ནཱ་རོ་པ་ལ་ཞུས། །དགོངས་པ་གཏད་པས་གླང་པོ་དེ་ལངས་ནས། །དེ་ནས་དཔག་ཚད་ཙམ་གྱིས་ཕ་རོལ་བའི། །རྒྱལ་པོ་སེངྒེ་ཟླ་བ་རབ་ཏུ་དད་། །སྲས་མོ་ལྷ་གཅིག་ཡེ་ཤེས་སྒྲོན་མ་ཡང་། །ཕྱག་རྒྱུར་ཕུལ་ནས་མཆོད་གནས་བྱེད་པར་ཞུས། །ཡོ་བྱད་ཀུན་གྱིས་བསྙེན་བཀུར་བྱེད་པའི་ཚེ། །ཁྱི་དང་རྔོན་པ་མང་བསྡུས་རི་དྭགས་བཤོར། །དེ་ལྟར་མ་མཛད་ཞུས་པས་དེ་བསྐྱུར་ནས། །བྱ་དང་ཆུ་གནས་སེམས་ཅན་དཔག་མེད་བསད། །ཁྲག་གིས་བརྫིང་བསྐྱིལ་ཤ་རུས་རྩིག་པ་བྱས། །དེ་ནས་མཚན་མོ་
རྒྱལ་པོའི་ཕོ་བྲང་རྒྱབ། །བཙུན་མོ་དང་བཅས་ཐག་པས་དམ་དུ་བསྡམས། །ཉེས་བསྒྲགས་མཚོན་གྱིས་བསྡིགས་ཤིང་ཡབ་ཡུམ་གཉིས། །ཙནྡན་མེ་ཆེན་ནང་དུ་བསྲེགས་བྱས་ནས། །ནངས་པར་ཐོ་རངས་བལྟས་པས་མེ་དཔུང་དབུས། །འཇའ་གུར་ནང་དུ་ཡབ་ཡུམ་རྒྱན་གྱིས་བརྒྱན། །གར་སྟབས་མཛད་ཅིང་བཞུགས་མཐོང་ངོ་མཚར་སྐྱེས། །རྒྱལ་པོ་ལ་སོགས་ཀུན་འདུས་སྔགས་པ་བརྗོད། །རབ་འགྱོད་བཤགས་པ་ཕུལ་བས་འདི་སྐད་དུ། །དགེ་སྡིག་ལས་འདས་རང་རིག་ཡེ་ཤེས་བལྟོས། །ཞེས་གསུངས་སྐད་ཅིག་དེ་ལ་ཐམས་ཅད་གྲོལ། །མཁའ་ལ་འཕུར་ཞིང་སོ་སོས་ཆེད་དུ་བརྗོད། །དེ་ནས་ཆུ་བོ་གངྒའི་བྱེ་མ་ལ། །རྩེད་མོ་བྱེད་ཅིང་བཞུགས་ཚེ་ནམ་མཁའ་ལ། །ཏེ་ལོ་བྱོན་ནས་ཕྱག་ཆེན་གདམས་ངག་གསུངས། །ངེས་དོན་རྟོགས་པ་མཐར་ཐུག་དེ་རུ་སྐྱེས། །བྱང་ཕྱོགས་པཱུ་ལ་ཧ་རིའི་དགོན་པ་རུ། །གདུལ་བྱར་སོང་མཛོད་ཅེས་གསུངས་ནཱ་རོ་པས། །སླར་ཡང་བྱང་སྒོ་བསྲུང་བའི་པཎ་ཆེན་མཛད། །སྐལ་ལྡན་མཐའ་ཡས་སྔགས་ཀྱི་སྨིན་གྲོལ་མཛད། །འཆི་མེད་འཇའ་ལུས་རྡོ་རྗེའི་སྐུར་གྱུར་རྟོགས། །བདེན་གཉིས་མཐའ་དང་བྲལ་བའི་ནཱ་རོ་པ། །རིག་པའི་གནས་ལྔ་
དག་ལ་མཁས་གྱུར་ཏེ། །དེ་བཞིན་གཤེགས་པས་སྤྲུལ་སྐུ་ཁྱེད་ལུང་བསྟན། །ཁྱོད་ཀྱི་བླ་མ་ཐམས་ཅད་མཁྱེན་པ་ཡིན། །ནཱ་རོ་པ་ཞེས་གྲགས་པའི་རྣལ་འབྱོར་པས་། །བཅོམ་ལྡན་ཤཱཀྱ་ཐུབ་པའི་བསྟན་པ་ལ། །མྱ་ངན་མི་འདའ་སྐུ་ཡིས་འགྲོ་དོན་མཛད། །འདི་ནི་རྒྱལ་བ་ཉིད་ཀྱི་རྣམ་པར་འཕྲུལ། །ཞེས་པའི་དོན་གྱིས་ཐམས་ཅད་གསལ་བའོ། །ནཱ་རོའི་རྣམ་ཐར་རྒྱ་མཚོའི་ཆུ་ཐིགས་ཙམ། །དད་པའི་བློ་ཡིས་རཱ་གའི་མིང་གིས་བཀོད། །དགེ་བས་འགྲོ་ཀུན་ཚེ་གཅིག་སངས་རྒྱས་ཤོག །སརྦ་མངྒ་ལོ།། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།
ན་མོ་གུ་རུ་དྷམ་མ་ཏི་ཡེ། བྱང་སེམས་བློ་གྲོས་རིན་ཆེན་རྣམ་པར་འཕྲུལ། །ཧེ་རུ་ཀ་དངོས་ལོ་ཙྪ་ཆེན་པོ་ནི། །བོད་ཡུལ་ལྷོ་ཕྱོགས་ལྷོ་བྲག་ཆུ་ཅན་དུ། །མར་པ་དབང་ཕྱུག་འོད་ཟེར་ཞེས་བྱ་དང་། །རྒྱལ་མོ་འོད་ཟེར་ཞེས་བྱའི་སྲས་སུ་འཁྲུངས། །ཞབས་ལ་འཁོར་ལོའི་མཚན་དང་ལྡན་པ་སོགས། །མཐོང་ནས་ཡིད་འཕྲོག་བློ་རྣོ་བློ་གྲོས་བཏགས་། །རྩེ་མོའི་ཚེ་ཡང་དགོན་དང་དབེན་ཁང་དང་། །གསུང་རབ་རྩིགས་པ་དཀྱིལ་འཁོར་གཏོར་མ་དང་། །ཆོས་བཤད་སྒོམ་སོགས་རྩེ་མོའི་ཚུལ་དུ་མཛད། །བཅུ་གཉིས་ལོ་ལ་རྙིང་མའི་སློབ་དཔོན་བསྟེན། །འབྲི་ཀློག་ལ་སོགས་ཡོན་ཏན་མང་དུ་མཁྱེན། །དེ་ནས་ཅུང་ཟད་སྐུ་སྤྱོད་རྩུབ་པ་ཡིས། །ཡུལ་མི་ཀུན་གྱིས་འབར་བས་སྐྱོ་བ་སྐྱེས། །རྒྱ་གར་ཡུལ་དུ་འགྲོ་དགོས་གསུངས་པ་ཡིས། །གསེར་ཡང་ཅུང་ཟད་ཡབ་ཡུམ་གཉིས་ཀྱིས་བརྫང་། །གཉོས་ལོ་དང་འགྲོགས་བལ་པོའི་བར་དུ་བྱོན། །རྒྱ་བལ་འཁྲུག་པས་ཡུན་རིང་བལ་པོར་ལུས། །ཕལ་སྐད་དང་ནི་སྒྲ་ཡང་ལེགས་པར་མཁྱེན། །ནཱ་རོའི་མཚན་ཐོས་བཟོད་མེད་དད་པ་སྐྱེས། །སན་དྷ་པ་དང་སྤྱི་ཐེར་བ་གཉིས་ལ། །ཀྱེ་རྡོར་གསན་ཞིང་དབང་ཀུན་འགའ་རེ་
ཐོབ་། །དེ་ནས་ཆེས་ཀ་ཚོལ་ཕྱིར་བོད་དུ་བྱོན། །འབྲོག་མི་ལོ་ཙྪའི་དྲུང་དུ་བྱོན་པ་ལ། །ཆོས་སྒོ་དོགས་ཤིང་དབང་ཡོན་དཀའ་འདུག་པས། །འབུལ་སྡུད་ཚོང་སོགས་གང་དྲག་བྱས་པ་ཡིས། །གསེར་སྲང་ལྔ་བཅུ་ཙམ་རྙེད་བལ་པོར་བྱོན། །ལོ་གསུམ་བཞུགས་ནས་ཚད་པར་གོམས་སུ་བཅུག །བླ་མ་གཉིས་ལ་གདན་བཞི་དུད་སོལ་གསན། །དེ་ནས་རྒྱ་གར་ཡུལ་དུ་བྱོན་ནས་ཀྱང་། །བི་ཀྲ་མ་ལ་ཤི་ལའི་གཙུག་ལག་ཏུ། །པཎྜི་ཏ་རྣམས་སུ་བཟང་དྲིས་པ་ཡིས། །ནཱ་རོ་པ་ལ་འགྲན་ཟླ་མེད་ཟེར་བས། །ནཱ་རོ་པཎ་ཆེན་ཚོལ་དུ་སོང་བ་ན། །ཡེ་ཤེས་སྙིང་པོ་ཀུ་ས་ལི་སོགས་མཇལ། །ཀྲི་ཡའི་མ་རྒྱུད་གདམས་སྐོར་འགའ་ཞིག་གསན། །ལོ་ལྔ་སོང་བས་བརྒྱག་ཆད་བལ་པོར་བྱོན། །གོང་གི་སློབ་མ་རྣམས་ཀྱིས་གསེར་བསྐུར་འཕྲོད་། །རྒྱ་གར་བྱོན་ནས་སྔོན་གྱི་བླ་མ་རྣམས། །གསེར་གྱི་མཎྜལ་ཕུལ་བས་བླ་མ་མཉེས། །ཚོང་པ་འགའ་དང་སྦྲག་སྟེ་བཏང་བ་ཡིས། །ནཱ་ལེནྡྲ་ཡི་གཙུག་ལག་ཁང་དུ་བྱོན། །དེ་དུས་སྒོ་སྲུངོ་པཎ་ཆེན་རྣམ་པ་བཞི། །ཤར་ཕྱོགས་རཏྲ་ཨ་ཀར་ཤནྟི་པ། །ལྷོ་ཕྱོགས་ངག་གི་དབང་ཕྱུག་གྲགས་པ་དང་། །ནུབ་ཕྱོགས་ཤེས་རབ་འབྱུང་གནས་སྦས་པ་དང་། །བྱང་
གི་སྒོ་སྲུང་པཎ་ཆེན་ནཱ་རོ་པ། །དབུས་ན་སློབ་དཔོན་ཆེན་པོ་བསོད་སྙོམས་པ། །བར་ཆད་སེལ་བའི་དབང་ནི་བསྐུར་བ་ཡིས། །ཨ་ཙརྱ་བྷ་ལིང་ནག་པོ་ཞེས་བྱ་དང་། །གནས་བརྟན་ཇོ་བོ་པཎ་ཆེན་ཨ་ཏི་ཤས། །བཅུ་དགུ་བཞེས་པ་དེ་ལ་བསྙེན་རྫོགས་ནས། །བསོད་སྙོམས་པ་ཡི་ཉེ་གནས་མཛད་ཅིང་སྣང་། །དེ་ནས་མར་པ་ཕྱོགས་བཞི་དབུས་ལྔ་རུ། །སོང་ནས་པཎ་ཆེན་སུ་ཆེ་དྲིས་པ་ཡིས། །ཐམས་ཅད་ཁ་ཐུན་ནཱ་རོ་འགྲན་མེད་ཟེར། །དེ་ནས་པུ་ལ་ཧ་རའི་དགོན་པར་མཇལ། །གསེར་གྱི་མཎྜལ་ཕྱག་དང་བསྐོར་བ་བྱས། །བདེ་དགྱེས་ཇོ་བོ་ལྷན་ཅིག་སྐྱེས་མ་དང་། །མ་ཧཱ་མུ་ཏྲ་ཨ་ཐུང་གདམས་ངག་གནང་། །ཐུན་མཚམས་དགྱེས་རྡོར་རྒྱུད་ལ་སློབ་གཉེར་བྱས། །ལོ་གཉིས་ལོན་ནས་བརྒྱག་ཆད་བསྒྲུབ་བྱོན་པས། །གཉོས་ལོ་དང་འཕྲད་བགྲོ་གླེང་མར་པ་རྒྱལ། །གཉོས་ལོ་ན་རེ་བདེ་དགྱེས་བོད་ལའང་ཡོད། །མ་ཧཱ་མ་ཡའི་གདམས་ངག་དགོས་སོ་ཟེར། །ནཱ་རོའི་དྲུང་དུ་མ་ཧཱ་མ་ཡ་ཞུས། །ཀུ་ཀུ་རི་པའི་དྲུང་དུ་འགྲོ་དགོས་གསུངས། །སོ་ས་གླིང་ནས་རྣལ་འབྱོར་པ་གསུམ་བཀུག །ཁྱེད་གསུམ་ཁོ་ཡིས་བར་ཆད་སྲུངས་ཤིག་གསུངས། །གཅིག་གི་སྲིན་མོ་
གཅིག་གི་དུག་དང་ནི། །གཅིག་གི་མི་མིན་གནོད་པ་བསྲུང་ངོ་ཟེར། །ཟླ་ཕྱེད་བར་དུ་དུག་མཚོ་འབོག་ཅིང་སོང་། །ཕར་ཁར་ཕྱིན་ནས་གསོལ་བ་བཏབ་ཅིང་བཙལ། །སྤྲང་རྒན་འདྲ་བ་ཅིག་ནི་འདུག་པ་ལ། །ཕྱག་འཚལ་མཎྜལ་ཕུལ་ནས་གདམས་པ་ཞུས། །བྱིན་རླབས་མཛད་པས་ཚུལ་ལམ་མར་པ་ཡང་། །བྱ་བཞིན་འཕུར་ནས་པུ་ལ་ཧ་རིར་བྱོན། །ལམ་གྱི་ལོ་རྒྱུས་ནཱ་རོས་ཚུར་ལ་གསུངས། །སླར་ཡང་མ་ཧཱ་མ་ཡ་ཚར་གཅིག་གནང་། །དེ་ནས་གཉོས་ལོ་དང་འཕྲད་རྐྱེན་བྱས་ནས། །ནཱ་རོ་པ་ལ་གསང་འདུས་ཞུས་པ་ཡིས། །ཁ་ཆེའི་པཎ་ཆེན་ཨ་ཀར་སིདྡྷི་དང་། །མཉམ་དུ་དབང་དང་རྒྱུད་འགྲེལ་གདམས་ངག་གནང་། །དེ་ནས་མེ་ཏྲི་པ་ཡི་མདུན་དུ་བྱོན། །མཁའ་སྤྱོད་མ་དང་ཕྱག་ཆེན་གདམས་པ་གནང་། །དེ་ནས་དུ་ཁེ་ཏྲ་ཡི་གྲོང་ཁྱེར་བྱོན། །ཡེ་ཤེས་སྙིང་པོར་གསང་འདུས་སྒྱུ་ལུས་དང་། །འོད་གསལ་རིམ་ལྔའི་གདམས་པ་དུ་མ་གསན། །དེ་ནས་བོད་དུ་བྱོན་དགོངས་བལ་པོར་བྱོན། །དཔེ་རྣམ་ཆུར་ཤོར་སླར་ཡང་རྒྱ་གར་བྱོན། །ནཱ་རོ་མེ་ཏྲིའི་མཇལ་ཞིང་ནཱ་རོ་པས། །བསྲེ་འཕོ་གནད་ཀྱི་གདམས་པ་ལ་སོགས་གནང་། །ནཱ་རོས་ལུང་བསྟན་དུག་མཚོའི་ཕར་འགྲམ་དུ་། །རྩྭ་སྤྱིལ་
ནང་དུ་ཌཱ་ཀི་མ་གཅིག་ལ། །གདན་བཞིའི་དབང་རྒྱུད་གདམས་ངག་བཅས་པ་ཞུས། །དེ་ལྟར་མར་པ་ལོ་ཙྪ་རྒྱ་གར་དུ། །སྔ་དུས་ལོ་ལྔ་ཕྱི་རས་ལོ་བདུན་བཞུགས། །གྲུབ་ཐོབ་ཆེན་པོ་བླ་མ་དགུ་དང་མཇལ། །ཚོགས་འཁོར་བསྐོར་ཞིང་ནཱ་རོས་ཞལ་ད་དང་། །ཁྱོད་ནི་ཏེ་ལོས་ལུང་བསྟན་བུ་ཡིན་པས། །བོད་དུ་སོང་ལ་འགྲོ་དོན་གྱིས་ཤིག་གསུངས་། །དེ་ནས་བལ་པོར་ཕེབས་དུས་གཉོས་ལོ་ཡིས། །མར་པའི་ཕྱག་དཔེ་ཕལ་ཆེར་ཆུ་ལ་བསྐུར། །ཐུགས་མུག་བལ་བོད་མཚམས་སུ་བཞུགས་པའི་ཚེ། །རྣལ་ལམ་ས་ར་ཧ་མཇལ་གདམས་པ་ཐོབ། །ཆོས་ཀྱི་སྤྲོས་པ་ཆོད་ནས་བོད་དུ་བྱོན། །ལ་སྟོད་གྱེར་ཕུར་གློག་སྐྱ་ཇོ་སྲས་ཀྱིས། །གདན་དྲངས་ཟླ་ཕྱེད་བཀུར་སྟི་ཆོས་གྲྭ་བཙུགས། །ཚོགས་འཁོར་ས་རུ་རྨི་ལམ་མགུར་དུ་བཞེངས། །དེ་ནས་ལྷོ་བྲག་ཏུ་བྱོན་རྗེ་བོ་ཡིས། །གྲོ་བོ་ལུང་ནི་འབུལ་བར་ཁས་བླངས་སོ། །རྔོག་པས་གཞུང་དུ་གདན་དྲངས་ཀྱེ་རྡོར་ཞུས། །དེ་ནས་མར་པ་མགོ་ཡག་ཅེས་བྱ་བའི། །བྱང་དུ་གདན་དྲངས་འབུལ་སྡུད་བྱེད་པའི་སར། །ལུག་གུར་གྲོང་འཇུག་མཛད་པས་ཐམས་ཅད་དད། །གཡག་གཅིག་ས་གཉན་གཅིག་ཏུ་ཤི་ནས་ལུས། །དེ་ལ་
གྲོང་འཇུག་མཛད་ནས་བཤས་པ་ཡིས། །ཐམས་ཅད་དད་ནས་གསེར་ཡང་མང་དུ་རྙེད། །དེ་ཚེ་རྣལ་ལམ་བུ་མོ་རྒྱན་ལྡན་བཞི། །གནས་གསུམ་མཁའ་འགྲོས་བསྐོར་ཞིང་མགྲིན་གཅིག་ཏུ། །ནཱ་རོ་ཆོས་ཀྱི་དབྱིངས་ཡལ་འགྲོ་འམ་ཟེར། །ཐམས་ཅད་གསེར་བྱས་སྲང་ནི་ཕྱེད་སུམ་བརྒྱ། །བསྣམས་ནས་བལ་ཡུལ་བྱོན་པས་སན་ཏ་པས། །ནཱ་རོ་ན་ཉིང་སྤྱོད་པར་གཤེགས་སོ་གསུངས། །ང་ནི་བླ་མ་མི་མཇལ་ལོག་ཐབས་མེད། །གསུངས་ནས་ཤིང་ཀུན་མཆོད་ཅིང་གསོལ་བ་བཏབ། །རྒྱ་གར་བྱོན་པས་རྟེན་སྐལ་ཤོག་ཀ་ལི། །ཀྱེ་རྡོར་ཐང་ཀ་འདུག་པ་ཕྱག་ཏུ་འཕྲོད། །ནཱ་རོ་སྤྱོད་པར་གཤེགས་པའི་ལོ་རྒྱུས་ཐོས། །མེ་ཏྲི་པ་དང་ཞི་བ་བཟང་པོ་དང་། །སོ་ས་གླིང་གི་རྣལ་འབྱོར་མ་དང་ནི། །སྦས་པའི་རྣལ་འབྱོར་མ་དྲུག་རྣལ་འབྱོར་ལྔ། །ཤེས་རབ་སེངྒེ་རི་རི་ཀ་པོ་རི། །དེ་སོགས་དྲུང་དུ་ཟླ་བ་རེ་རེ་ལ། །ཚོགས་ཀྱི་རྒྱུན་བཙུགས་གསོལ་བཏབ་རྟགས་པ་ཞུས། །ཀུན་གྱིས་ནཱ་རོ་པ་དང་མཇལ་ལུང་བསྟན། །རྟེན་རྣམས་མཆོད་ཅིང་གསོལ་བ་འདེབས་པ་དང་། །ནགས་ཚལ་དུར་ཁྲོད་ཀུན་ཏུ་ཉུག་པ་ལས། །རིགས་ངན་རྒྱལ་པོས་བཟུང་ནས་བླ་མཆོད་ཞུས། །མགུར་མ་བཞེངས་
པས་འབྲས་ཕུལ་གྲོ་བསྐུར་བཏང་། །ཙནྡན་སྡོང་པོའི་སྟེང་ན་འཇའ་གུར་སྣང་། །ཀྱེ་རྡོར་དཀྱིལ་འཁོར་སྔགས་འཕྲེང་བཅས་པ་མཇལ། །དོ་ནུབ་རྨི་ལམ་ཡུལ་དུ་ནཱ་རོ་མཇལ། །རྣལ་སད་རྨི་ལམ་འཁྲུལ་པས་འཆིང་ཞེས་གྲགས། །དེ་ནས་ཚོལ་བས་གྲོགས་རྣམས་སྐྱིད་ལུགས་ཚེ། །ནམ་མཁའ་ལས་ནི་བརྩོན་འགྲུས་གྱིས་ཞེས་ཐོས། །དེ་ནས་ཙནྡན་ནགས་མཐར་བྱིས་པ་ལ། །དྲིས་པས་རྩི་ཡ་ཀིར་བཞུད་ཅེས་ཟེར། །ཤེལ་གྱི་ཕ་ཝང་ནཱ་རོའི་ཞབས་བརྗེས་མཇལ། །རྗེས་ལ་ངོས་བཟུང་དོན་མེད་ཕྱམ་པར་འགྱུར། །ཞེས་པའི་སྒྲ་གྲག་གྲོགས་གཉིས་ཁྱིམ་དུ་ལོག །དེ་ནས་མར་པ་གཅིག་པུས་བཙལ་བ་ལས། །མདུན་གྱི་ནམ་མཁར་འཇའ་ཚོན་རྣམ་པའི་སྐུ། །དབུ་སྐྲ་སྤྱི་བོར་བཅིངས་པ་གཅིག་བྱུང་ཐེ་ཚོམ་སྐྱེས། །དེ་མ་ཐག་ཡལ་མཁའ་ལས་སྒྲ་གྲག་པ། །ཐེ་ཚོམ་རྩེ་གཉིས་དོན་མེད་མི་འགྲུབ་ཟེར། །དེ་ནས་བཙལ་བས་སྔར་ལས་གསལ་བ་ཡི། །འཇའ་ཚོན་སྐུ་མཇལ་དད་པ་སྐྱེས་པ་ཡལ། ཞེན་ཆགས་གིས་ནི་མི་མཐོང་ཞེས་སྒྲ་གྲག །དེ་ནས་ཙནྡན་སྡོང་པོའི་ནགས་ཁྲོད་ན། །གཟི་བརྗིད་འོད་ཟེར་འཕྲོ་བའི་སྐུ་ཅིག་མཇལ། །བརྒྱུགས་པས་ཇེ་རིང་ཇེ་རིང་འཇའ་ལྟར་
ཡལ། །ངལ་ཞིང་དུབ་ཚེ་མཁའ་ལས་སྒྲ་གྲག་པ། །འགྲོ་འོང་མེད་པར་མ་ཤེས་མི་སླེབས་གསུངས། །དེ་ནས་གྲོང་རལ་གཅིག་ཏུ་ནཱ་རོ་མཇལ། །ཐོད་པར་ཀླད་ཁྲག་རྩིབ་ཐུར་གསོལ་ཞིང་འདུག །གསོལ་འཕྲོ་གནང་ནས་བླ་མ་འཇའ་ལྟར་ཡལ། །དེ་ཉིད་གསོལ་བས་བདེ་སྟོང་ཟག་མེད་ཤར། །དེ་ནས་རི་བོ་གསེར་གླིང་ནགས་ཁྲོད་དུ། །ནཱ་རོ་པཎ་ཆེན་སྨུག་ནག་གཟི་མདངས་ལྡན། །ཐོད་པ་ཁ་ཊཾ་བསྣམས་ནས་གར་བྱེད་མཇལ། །ཕྱག་འཚལ་སྐོར་བ་བྱས་ནས་གསེར་སྲང་བརྒྱ་རྩ་ཕུལ། །བླ་མ་དཀོན་མཆོག་མཆོད་གསུངས་ནགས་གསེབ་གཏོར་། །འཕངས་སེམས་སྐྱེས་པས་སྙིམ་པར་མ་གོད་གནང་། །ངོ་མཚར་སྐྱེས་ནས་བླ་མའི་སྐུ་ལ་གཏོར། །ནཱ་རོའི་ཞབས་ཀྱིས་སར་རེག་གསེར་དུ་བསྒྱུར། །སླར་ཡང་གསེར་གྱི་མཎྜལ་ཕུལ་ཙ་ན། །ཞེན་བཅས་མཎྜལ་ཆོས་བརྒྱད་སྒྲོགས་ཡིན་གསུངས། །བླ་མ་འཇའ་ལྟར་ཡལ་བས་མར་པ་ཡིས། །སྔར་གྱི་གསེར་རྣམས་མ་གོད་འདུག་པ་དང་། །བླ་མས་ཞབས་ཀྱིས་རེག་པའི་ས་རྡོ་རྣམས། །གསེར་དུ་བསྒྱུར་བས་གསེར་འགའ་བསྣམས་ནས་བྱོན། །དེ་ནས་ཞག་བདུན་ཚོགས་རྒྱུན་བྱས་ནས་ཀྱང་། །སླར་ཡང་དུར་ཁྲོད་ནགས་ཚལ་ཀུན་
ཏུ་བཙལ། །རི་བོ་གསེར་གྱི་དགོན་པའི་ནགས་ཁྲོད་ན། །བར་སྣང་ཌ་མ་རུ་ཡི་སྒྲ་གྲག་པས། །ནཱ་རོ་པཎ་ཆེན་མཐིང་ནག་གཟི་བརྗིད་ལྡན། །རས་ནག་ཨང་རག་སྟེང་དུ་རུས་རྒྱན་མནབས། །དབུ་སྐྲ་ཐོར་ཅོག་དར་དམར་ཅོད་པན་བཅིངས། །ཌ་མ་རུ་དང་ཐོད་པ་བདུད་རྩི་བསྣམས། །གཡས་བརྐྱང་གཡོན་བསྐུམས་གར་གྱི་མཁའ་ལ་བྱོན། །ངུས་ཤིང་གསོལ་བ་བཏབ་པས་ས་ལ་བྱོན། །མར་པ་ཁྲིད་ནས་པུ་ལ་ཧ་རིར་བྱོན། །ལམ་དུ་ཌཱ་ཀི་འཇིགས་གཟུགས་མང་པོ་ཡིས། །མར་པ་ལ་ནི་བར་ཆད་བརྩམས་པ་ལས། །སྣོད་ལྡན་བདུད་ཀྱི་བར་ཆད་རྣམས་སོལ་ཅིག །རྗེ་བཙུན་གསུང་མ་ཐག་ཏུ་ཏེ་ལོ་པ། །ཁྲོ་རྒྱལ་འཇིགས་པའི་གཟུགས་ཀྱི་མཚོན་ཆ་ཐོགས། །སྔགས་སྒྲ་འབྲུག་ལྟར་སྒྲོག་ཅིང་མེ་དཔུང་འབར་། །ཌཱ་ཀི་རྣམས་ནི་སྔངས་སྐྲག་བརྒྱལ་ཞིང་འགྱེལ། །བདག་ཅག་གནོད་པ་བྱེད་པ་མ་ལགས་ཏེ། །རྣལ་འབྱོར་དྲོད་ཚད་ཉུལ་བ་ཡིན་ནོ་ཟེར། །སྐད་ཅིག་ཙམ་དུ་པུ་ལ་ཧ་རིར་ཕེབས་། །རྩྭ་ཡི་སྤྱིལ་པོ་གཅིག་ཏུ་བཞུགས་པ་ལ། །ཚོགས་ཀྱི་ཡོ་བྱད་བསམ་ལས་འདས་པ་དང་། །ཤེལ་གྱི་མཆོད་རྟེན་ལྷན་ཅིག་སྐྱེས་མའི་སྐུ། །དེ་སོགས་བཀོད་པ་ངོ་མཚར་རང་
བྱུང་གྲུབ། །ཙནྡན་སྡོང་པོ་འོད་དང་སྒྲ་བྱུང་སྟེ། །དེ་ནང་དགྱེས་རྡོར་ལྷ་དགུ་མངོན་སུམ་བྱོན། །འཇིག་རྟེན་ཐམས་ཅད་འོད་ཀྱིས་གང་བར་གྱུར། །ནཱ་རོའི་ཐུགས་ལ་ལྷན་ཅིག་སྐྱེས་མ་བྱོན། །བུམ་དབང་བསྐུར་ཞིང་དེ་ཡི་ཐུགས་ཀ་ནས། །ཨཉྫའི་སྔགས་ཕྲེང་མར་པའི་ཐུགས་ཀར་ཐིམ། །སླར་ཡང་ཡིད་བཞིན་ནོར་བུའི་དབང་ཐོབ་པས། །སྐུ་ལུས་མེད་པ་ལྟ་བུའི་ཉམས་མྱོང་སྐྱེས། །སྣོད་བཅུད་ལྷ་དང་ལྷ་མོའི་དཀྱིལ་འཁོར་གཟིགས། །བླ་མ་ཡབ་ཡུམ་བྱང་སེམས་དབང་བསྐུར་བས། །རྩ་མདུད་གྲོལ་ནས་སྟོང་ཉམས་མཁའ་ལྟར་སྐྱེས། །ཚོགས་འཁོར་བསྐོར་ཞིང་ཞལ་ད་ལུང་བསྟན་གནང་། །མཆེད་གྲོགས་འགའ་ཞིག་བརྡས་བཀུག་ཚོགས་ལ་རོལ། །ཚད་མེད་དགའ་བས་རྟོགས་འབུལ་མགུར་དུ་བཞེངས། །ནཱ་རོ་དགྱེས་ནས་རཱ་གའི་ཕྲེང་བ་གནང་། །ཁྱོད་དང་ང་གཉིས་ངོ་བོ་དབྱེར་མེད་ཀྱང་། །རྣམ་སྨིན་ཞིག་དུས་མཁའ་འགྲོའི་སུན་མ་འབྱུང་། །རྒྱ་གར་ཤར་ཕྱོགས་བྲམ་ཟེའི་རིགས་སུ་སྐྱེས། །དཔལ་གྱི་རི་ལ་བདག་དང་མཇལ་བར་གྱུར། །སྐྱེ་བ་དེ་ཡི་ཕྱི་མ་རྫོགས་སངས་རྒྱས། །འབད་རྩོལ་བྲལ་བའི་ཕྲིན་ལས་རྒྱ་ཆེན་འབྱུང་། །ཞེས་གསུངས་བོད་དུ་རྒྱལ་ཚབ་བསྐོས་མཛད་
ནས། །སྒྲ་སྙན་རོལ་མོ་དྲི་ཞིམ་ངད་པ་ལྡང་། །འཇའ་འོད་མཆོད་སྤྲིན་ནམ་མཁའ་གང་བའི་དབུས། །སེང་ཁྲི་པད་ཟླའི་སྟེང་དུ་ནཱ་རོ་བཞུགས། །དཔའ་བོ་ཌཱཀི་དཔག་མེད་མཆོད་བཞིན་དུ། །ནམ་མཁར་ཇེ་མཐོ་མཁའ་སྤྱོད་གནས་སུ་གཤེགས། །འཇིག་རྟེན་མཁའ་འགྲོས་ཚོགས་སོགས་མཆོད་རྫས་ཁྱེར། །གྲོགས་མཆེད་རྣམས་ཀྱང་མི་སྣང་ཅིག་པུར་ལུས། །ཐུགས་སྐྱོ་སེང་ལྡེང་ནགས་གསེབ་སྐྱོ་བསངས་བྱོན། །ནཱ་རོ་བྱོན་ནས་ཆོས་དྲུག་མགུར་དུ་བཞེངས། །དེ་ནས་མེ་ཏྲིའི་དྲུང་བྱོན་གདམས་ངག་ཞུས། །གསེར་གྱི་སོར་གདུབ་རྡོ་དྲིལ་བརྫང་བར་མཛད། །དེ་ནས་བླ་མ་མཆེད་གྲོགས་རྡོ་རྗེ་སྤྱན། །ཐམས་ཅད་མཇལ་ཞིང་ཕྱག་འཚལ་བརྫང་བ་དང་། །སྐྱེལ་བསུ་མཛད་ཅིང་སྨོན་ལམ་རྣམ་དག་བཏབ། །རྡོ་རྗེ་གདན་སོགས་རྟེན་མཆོད་སྨོན་ལམ་བཏབ། །སྲིན་པོའི་རོ་ནི་གདོང་གྲུ་གསུམ་ཡོད་སར། །གྲོང་མཇུག་མཛད་པས་གྲུབ་ཐོབ་ཆེན་པོར་གྲགས། །གྲོགས་མཆེད་བརྒྱད་ཀྱིས་ཨ་སྨྲའི་ཚལ་དུ་བསྐྱལ། །ལམ་གླུ་བླངས་ནས་ནཱ་ལེནྡྲ་རུ་བྱོན། །ཚོགས་མཆོད་གྲལ་དུ་ཁ་ཆེ་པཎ་ཆེན་གྱིས། །ནཱ་རོ་མེ་ཏྲིའི་དགོངས་པ་གང་ཟབ་གསུང་། །དྲིས་པའི་ལན་དུ་བཞེད་
ལུགས་མགུར་དུ་བཞེངས། །པཎ་ཆེན་དེས་ཀྱང་མཐུན་འགྱུར་མགུར་གསུངས་སོ། །འབྱོན་ཁར་ཚོགས་གྲལ་གཅིག་ཏུ་གླུ་ལོང་ཟེར། །ཁར་སང་བཅུ་བཞིར་དུར་ཁྲོད་སོ་ས་གླིང་། །བླ་མ་བདེ་མཆོག་དངོས་གྱུར་སྐུ་ལུས་ལ། །གསང་སྔགས་ལྷ་ཚོགས་མ་ལུས་གསལ་བར་མཐོང་། །སྟག་ཤམ་ནང་དུ་ནག་པོ་ཕྱག་བཞི་པ། །ཞེས་སོགས་མཐོང་ཚུལ་ལྟ་བའི་གླུ་བླངས་པས་། །རྫུ་འཕྲུལ་ཐོབ་པ་བཞི་བཅུ་རྣལ་འབྱོར་བཞི། །པཎ་ཆེན་བཞི་བཅུ་དད་ནས་བསྟོད་བསྔགས་མཛད། །དེ་ལྟར་རྒྱ་གར་ཡུལ་དུ་ལན་གསུམ་བྱོན། །སྔ་རས་ལོ་ལྔ་བར་རས་ལོ་བདུན་ཏེ། །རྒྱབ་རིས་ལོ་དྲུག་ཟླ་བ་ལྔ་བསྒོམས་པས། །བཅུ་དགུ་བཞུགས་པས་གདམས་ངག་དཔག་མེད་གསན། །ཐུགས་ཡིད་གཅིག་འདྲེས་ཡི་དམ་དུ་མ་གཟིགས། །ཌཱ་ཀི་རྣམས་ཀྱིས་གདམས་ངག་གསང་ཚིག་བསྟན། །དེ་ནས་བོད་དུ་འབྱོན་དགོངས་བལ་པོར་ཕེབས། །ནཱ་རོ་མཇལ་ཞིང་གདམས་ངག་ཐོབ་ཟེར་བའི། །སྙན་གྲགས་ཁྱབ་པས་གར་བྱོན་ཀུན་གྱིས་བཀུར་། །བུམ་ཐང་པ་ཡིས་སྤྱན་དྲངས་ཚོགས་འཁོར་སར། །ནཱ་རོ་མཇལ་ལུགས་མགུར་གསུངས་ཁོང་རྣམས་མཉེས། །དེ་ནས་དུར་ཁྲོད་ར་མ་འདོ་ལི་རུ། །ཚོགས་འཁོར་བྱེད་སར་
མར་པ་སྤྱན་དྲངས་བྱོན། །ཁོང་རྣམས་མཚན་མོ་དེ་རུ་འཇིགས་ཟེར་ནས། །མྱུར་དུ་ཚོགས་བྱེད་འགྲོ་གྲབས་བྱེད་འདུག་པས། །མར་པ་མ་མགུ་བླ་མའི་རྣམ་ཐར་དྲན་། །སྤྱན་ཆབ་བསིལ་ཞིང་རྒྱ་གར་འགྲོ་དགོངས་ཚེ། །རྣལ་ལམ་མེ་ཏྲི་པ་དང་ཌཀི་མས། །བོད་ཀྱི་ཡུལ་དུ་སོང་གསུངས་ལུང་བསྟན་མཛད། །དེ་ནས་མི་མཉམ་རྡོ་རྗེའི་ཚོགས་གྲལ་བྱོན། །མེ་ཏྲི་མཇལ་ལུགས་མགུར་གསུངས་ཐམས་ཅད་དད། །དེ་ནས་བལ་པོའི་བླ་མ་པཎ་ཊི་ཏར། །རལ་གཅིག་མ་སོགས་སྒྲུབ་ཐབས་འགའ་ཞུས་ཚེ། །རྨི་ལམ་མེ་ཏྲི་པ་བྱོན་གདམས་པ་གནང་། །དེ་ནས་ལ་སྟོད་བྱོན་ནས་མགུར་བཞེངས་པས། །དེ་ཚེ་མར་པ་ལོ་ཙྪ་ཞེས་བྱ་བ། །ནཱ་རོ་མི་ཏྲིའི་ཐུགས་སྲས་གྲུབ་ཐོབ་གཅིག །རྒྱུད་དང་གདམས་པ་དཔག་མེད་དང་བཅས་ནས། །བོད་དུ་བྱོན་ཞེས་རྒྱ་བལ་གྲགས་པས་ཁྱབ། །མང་ཡུལ་མགོ་ཡག་བསུ་རུ་འོང་བས་མཇལ། །མང་ཡུལ་སྟོན་པ་རྒྱལ་དང་ཟུར་བན་གྱིས། །རིག་མ་གཅིག་ཕུལ་དབང་དང་གདམས་པ་ཞུས། །ཉང་སྟོད་མེ་སྟོན་ཚོན་པས་བསྙེན་བཀུར་བྱས། །ཉང་སྟོད་ཟླ་གཅིག་བར་དུ་ཆོས་བཙུགས་བཞུགས། །ནཱ་རོ་མཇལ་ལུགས་མགུར་བཞེངས་མགོ་ཡག་
ལ། །ནཱ་རོའི་ཕྱག་ཕྲེང་མེ་ཏྲིའི་སོར་གདུབ་གནང་། །དེ་ནས་ལ་ཡག་ཏུ་བྱོན་ཆོས་གྲྭ་བཙུགས། །གདམས་ངག་ཐོབ་ཚུལ་མགུར་བཞེངས་ཐམས་ཅད་དད། །དེ་ནས་གྲོ་བོ་ལུང་ཕེབས་ཀུན་གྱིས་བཀུར། །ཚང་སར་སྔགས་པ་ཅིག་དང་ཆོས་གཏམ་བྱས། །སྔགས་པ་ཕམ་ནས་མཐུ་སྡིག་བྱས་པ་ཡིས། །ཞག་པོ་འགའ་ནས་སྔགས་པ་རྦབ་ནས་ཤི། །རྒྱུད་འགྲེལ་མཁས་དང་མཐུ་ཡིས་གྲགས་པ་ཐོབ། །གདུལ་བྱ་མང་འདུས་ཆོས་ཀྱི་འཁོར་ལོ་བསྐོར། །རྔོག་པས་གཞུང་དུ་གདན་དྲངས་ཆོས་ཀྱང་གསུངས། །མཚུར་སྟོན་དབང་ངེས་དོལ་དུ་སྤྱན་དྲངས་ནས། །ཆོས་ཕྱིར་དཀའ་བ་སྤྱད་ལུགས་མགུར་དུ་བཞེངས། །ཀྱེ་རྡོར་ཉིད་ཀྱི་སྤྲུལ་པ་ཡིན་པའི་ཕྱིར། །བདག་མེད་མ་སོགས་ཇོ་མོ་དགུ་བཞེས་ཏེ། །ད་ལྟ་ཉིད་དུ་ཚོགས་གཏོར་ཤོམ་ཅིག་གསུངས། །ཆང་ཕུད་ཀ་ལི་གང་དང་ཉ་ཁོག་གཅིག །དེ་ལས་ཚོགས་རྫ་ས་གཞན་ནི་མེད་པ་ལ། །ནམ་མཁར་ཆང་གིས་རྒྱུན་བབེ་སྣོད་རྣམས་ཁེངས། །གཞན་ཡང་བཟའ་བཏུང་རོ་མཆོག་བརྒྱ་ལྡན་པ། །སྔོན་ཆད་མཐོང་ཐོས་མེད་པ་དཔག་མེད་པ། །སྤོས་དྲིས་ངད་ལྡན་རོལ་མོའི་སྒྲ་རྣམས་གྲག །མེ་ཏོག་མར་མེའི་ཕྲེང་བས་བར་སྣང་ཁྱབ། །དེ་ཚེ་རྗེ་བཙུན་ཀྱེ་
ཡི་རྡོ་རྗེར་གྱུར། །དེ་ཡི་འོད་ཀྱིས་རེག་པས་ཇོ་མོ་རྣམས་ལྷ་མོར་གྱུར། །ཕྱོགས་བཅུའི་དཔའ་བོ་དཔའ་མོ་དཔག་མེད་བསྡུས། །ཚོགས་འཁོར་མཛད་ནས་ཐ་མར་སྐུ་རུ་བསྒྱུར་། །དེ་ནས་མི་ལས་མཇལ་ཏེ་སྲས་མཁར་བརྩིགས། །ཇོ་མོའི་ལུག་ཤ་སོག་པ་ཆང་དམ་གང་། །བྱིན་པ་མར་པར་དྲངས་པས་སུས་བྱུང་གསུངས། །འདི་ནི་མཁའ་འགྲོའི་དངོས་གྲུབ་ཡིན་འདུག་གསུངས། །ཕྱེད་དེ་མི་ལ་ལ་གནང་དེ་ཕྱིན་ཆད། །ཇོ་མོས་གནང་བའི་བཟའ་བཏུང་ཐམས་ཅད་ནི། །བདུད་རྩི་རོ་མཆོག་བརྒྱ་དང་ལྡན་པར་མྱོང་། །མི་ལའི་བརྒྱུད་པའི་ལུང་བསྟན་འགའ་ཡང་གསུངས། །དེ་ཚེ་མར་པའི་གྲགས་པས་ཕྱོགས་ཀུན་ཁྱབ། །མེས་སྟོན་ཚོན་པོས་འབུལ་ཆེན་ལན་གསུམ་བྱས། །ད་ལྟ་སངས་རྒྱས་མར་པ་ལོ་ཙྪ་ཞེས་། །དབུས་གཙང་གྲགས་པས་ཁྱབ་པ་ཅི་ཡིན་ཞུས། །ཁོ་བོ་བོད་ལས་ལྷག་པར་རྒྱ་གར་དང་། །བལ་པོ་ནའང་སྙན་གྲགས་ཆེའོ་གསུངས། །དེ་ཚེ་སློབ་མ་ཆེ་དགུས་ཚོགས་འཁོར་བཤམས་། །དེར་འདུས་ཐམས་ཅད་ལུས་སེམས་བདེ་བས་གང་། །ཉམས་རྟོགས་ཉིན་མཚན་འཁོར་ཡུག་ཉིད་དུ་གྱུར། །རྔོག་པས་འབུལ་ཆེན་སྤངས་དག་ལན་གསུམ་མཛད། །
མཚུར་སྟོན་དབང་ངེས་པོ་ཏི་བརྒྱ་རྩ་ཕུལ། །མཐུ་ཡིས་ཞབས་རྟོགས་བྱས་པས་གདམས་པ་གནང་། །ཟླ་གཅིག་ཙམ་དུ་སྐུ་ནི་མང་པོར་སྤྲུལ། །ཇོ་མོ་དགུ་པོ་སོ་སོར་རེ་རེ་བཞིན། འབྲལ་མེད་བཞུགས་ནས་ཁྲིད་ཀ་སོ་སོར་གནང་། །དེ་བཞིན་སློབ་མ་སོ་སོའི་མཚམས་ཁུང་དུ། །སོ་སོར་བཞུགས་ནས་ཁྲིད་ཀ་གནང་བ་དང་། །ལུང་པའི་མདའ་རུ་ཁྲོམ་པར་ཆོས་གསུངས་པ། །དེ་དག་དུས་གཅིག་ཁོ་ནར་བསྟན་པར་མཛད། །དེ་བཞིན་དགྱེས་རྡོར་བདེ་མཆོག་གསང་འདུས་དང་། །མ་ཡ་ལ་སོགས་ཞི་ཁྲོ་དུ་མ་དང་། །རེས་འགའ་རྒྱ་གར་རྣལ་འབྱོར་རུས་རྒྱན་ཅན། །བཙུན་མོའི་མཐའ་བསྟན་མཁའ་འགྲོས་བསྐོར་བ་བསྟན། །དེ་དང་དུས་མཚུངས་ཕྱི་རུ་ཕྲུ་གློག་དང་། །མཁར་ལས་ཞལ་ད་ཁྲིད་ཀ་རྒྱུན་བཤད་དང་། །བྱིས་པའི་གསེབ་ཏུ་རྩེད་མོ་རྩེ་བ་དང་། །བུ་མོ་རྣམས་དང་ལྷན་ཅིག་གླུ་གར་དང་། །རི་ཁྲོད་རྣམས་སུ་སྐྱོ་བསངས་མཛད་པ་རྣམས། །དུས་གཅིག་ཉིད་དུ་སོ་སོར་སྟོན་པར་མཛད། །དེ་ལྟར་འོང་བའི་དོན་དེ་ཅི་ཡིན་ཞུས། །སློབ་མ་ཀུན་འཚོགས་ཚོགས་འཁོར་ཤོམ་དང་གསུངས། །ཆང་ཕང་ཉང་ང་གཅིག་ལས་མེད་པ་ལ། །ཚོགས་ཀི་ཡོ་བང་དཔག་མེད་ལྷུན་གྲུབ་
བྱུང་། །དེ་ཚེ་ལ་ལས་བླ་མ་ཀྱེ་རྡོར་མཐོང་། །ལ་ལས་གསང་འདུས་ལ་ལས་བདེ་མཆོག་མཐོང་། །ལ་ལས་མ་ཧཱ་མཱ་ཡཱ་ལ་སོགས་མཐོང་། །གཅིག་ལ་གཅིག་སྟོན་དད་མོས་བསམ་མི་ཁྱབ། །ལྷ་ཚོགས་དེ་རྣམས་གདམས་པ་ང་ལ་ཡོད། །ཆོ་འཕྲུལ་དེ་འདྲ་འོང་ནི་ཐང་ངོ་གསུངས། །དེ་ཚེ་སྲས་ཀྱང་མིང་སྲིང་བརྒྱད་ཙམ་བལྟམས། །སྲས་ཀྱི་མཆོག་གྱུར་ཇོ་སྲས་མདོ་སྡེ་ནི། །ཡོན་ཏན་ཕུན་སུམ་ཚོགས་པར་བཞུགས་པ་ལས། །ཆིབས་པས་བསྡབས་ནས་དབུ་ཡང་ཚལ་པར་གས། །ཕུག་རོན་གཅིག་ལ་གྲོང་འཇུག་འཕོ་བ་མཛད། །རྒྱ་གར་ཡུལ་བྱོན་ཏི་ཕུ་པ་རུ་གྲགས། །སྲས་ཀྱི་གདུང་སྦྱངས་འཇའ་འོད་ས་གཡོས་སོགས། །ངོ་མཚར་ལྟས་བྱུང་ཡབ་ཀྱང་མྱ་ངན་མཛད། །སློབ་མ་རྣམས་ཀྱི་འབུལ་བས་མྱ་ངན་བསངས། །ཕུག་རོན་ཤ་བ་འབྲི་དང་ལུ་གུ་ལ། །གྲོང་འཇུག་མང་དུ་མཛད་པས་ཐམས་ཅད་དད། །སློབ་མ་རྣམས་ལ་གདམས་ངག་རྫོགས་པར་གནང་། །སོ་སོར་ལུང་བསྟན་ཞལ་ད་རྒྱས་པར་མཛད། །དགུང་ལོ་བརྒྱད་ཅུ་རྟ་ཟླའི་ཚེས་གསུམ་ལ། །གྲྭ་སློབ་ཀུན་བསྡུས་ཁོ་བོ་འགྲོ་དགོས་གསུངས། །ནཱ་རོ་མཁའ་འགྲོ་དཔག་མེད་སུན་མས་བསྐོར། །མཎྜལ་མཆོད་
པ་ཚོགས་ཤོམ་གསོལ་བ་ཐོབ། །སངས་རྒྱས་བྱང་སེམས་ཡི་དམ་མཁའ་འགྲོ་དང་། །ཆོས་སྐྱོང་སྲུང་མ་སྤྲིན་དཔུང་གཏིབས་ལྟར་བྱོན། །དེ་དག་ཁོ་བོ་ཉིད་དང་དབྱེར་མེད་འདུག །ཏེ་ལོ་ནཱ་རོ་ཁོ་བོ་རང་ཡིན་གསུངས། །ཇོ་མོ་འོད་དུ་ཞུ་ནས་ཐུགས་ཀར་ཐིམ། །དབུ་གཙུག་རུས་པ་ཟུར་གསུམ་དབུ་སྐར་བཅས། །འོད་དང་ཚག་སྒྲར་བཅས་པས་འདོམ་གང་འཕར། །འོད་ཀྱི་གོང་བུ་ཟླ་བ་ལྟ་བུ་ཞིག །མདའ་འཕང་བཞིན་སོང་ལྷོ་བྲག་འཇའ་འོད་གང་། །མེ་ཏོག་ཆར་པ་དཔག་ཏུ་མེད་བཅས་པས། །ཞག་པོ་སོ་བདུན་བར་དུ་རྒྱུན་མ་ཆད། །རིང་བསྲེལ་ལ་སོགས་རྟེན་ཡང་མང་དུ་བྱོན། །དེ་ཡིས་ཐུགས་སྲས་སློབ་མ་བྱོན་ཚུལ་ནི། །རྒྱུ་ལུས་བཀའ་བབས་དོལ་པ་གག་སྟོན་དང་། །འཕོ་བའི་བཀའ་བབ་དྲི་ཡི་མོ་ཆུང་བ། །རིམ་ལྔའི་བཀའ་བབས་ཆུང་གང་དཔལ་ལོ་དང་། །གཞུང་བཤད་བཀའ་བབས་དགེ་བཤེས་ཁེ་གད་བཞི། །ཞབས་ཏོག་གིས་མཉེས་མེས་སྟོན་ཚོན་པོ་དང་། །ཤེས་རབ་མེས་མཉེས་རྔོག་སྟོན་ཆོས་རྡོར་དང་། །མཐུ་ཡིས་མཉེས་པ་མཚུར་སྟོན་དབང་ངེ་དང་། །དད་གུས་མཉེས་པར་མི་ལ་རས་པ་བཞི། །རྔོག་སྐྱ་འབྱུང་རྒྱལ་མར་པ་མགོ་ཡག་སོགས། །སློབ་མའི་ཚོགས་
ཀྱང་དཔག་ཏུ་མེད་པ་བྱོན། །འདི་བྲིས་དགེ་བས་བདག་སོགས་འགྲོ་བ་ཀུན། །གསང་སྔགས་རྒྱུད་སྡེ་བཞི་ལ་མངའ་བརྙེས་ཤོག །ཅེས་པ་རཱ་ག་ཨ་སྱས་བྲིས་སོ། །༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།