ཨོ་རྒྱན་པའི་རྣམ་ཐར།
ན་མོ་གུ་རུ། ལྭ་བ་ཨིནྡྲ་བྷུ་ཏི་བིརཱུ་པ། །རས་ཆུང་སོགས་དང་དབྱེར་མེད་ཨོ་རྒྱན་པ། །ལ་སྟོད་ལྷོ་རུ་སྔགས་འཆང་རིགས་སུ་འཁྲུངས། །རྩེད་མོ་ཐམས་ཅད་སྒོམ་དང་ཆོས་བཤད་ཚུལ། །ཞག་པོ་ལྔ་དྲུག་ཏིང་འཛིན་ཁོ་ནར་འབྱམས། །དགུང་ལོ་བདུན་ལ་ཡབ་ཆོས་མ་ཕུལ་གསན། །བོ་དང་རིན་ཆེན་རྩེ་པ་རྒོད་ཚང་བ། །པཀཱི་སོགས་ལ་གདམས་པ་དུ་མ་གསན། །ཏི་སེར་ཕྱི་ནང་གཞན་གསུམ་དབྱེར་མེད་རྟོགས། །ཉིན་རེ་ཉི་མ་བདུན་བདུན་ལམ་བཅད་ཅིང་། །ཛ་ལན་དྷ་ར་མེ་ཏྲི་ས་ར་ཧ། །ཀླུ་སྒྲུབ་ཕུག་ཏུ་གྲུབ་ཐོབ་གཅིག་དང་མཇལ། །དེ་ནས་ཉིན་རེ་ཟླ་བ་ཕྱེད་ལམ་བཅད། །མུ་སྟེགས་སོགས་པའི་འཚེ་བ་ཟིལ་གྱིས་གནན། །ཨོ་ལོ་སར་པ་ཏ་ཞེས་བྱ་བའི་རིགས། །མཁའ་འགྲོ་དཔག་མེད་གྲུབ་ཐོབ་མང་དུ་གཟིགས། །རྒྱལ་པོ་ཨིནྡྲ་བྷུ་ཏིར་གྱུར་པ་དྲན། །ཕག་མོ་དངོས་མཇལ་རྡོ་རྗེའི་བསྙེན་སྒྲུབ་གནང་། །རྒྱུད་སྡེའི་དོན་རྟོགས་རྩ་མདུད་ཐམས་ཅད་གྲོལ། །ཀ་མ་དྷ་ཀོའི་གངས་ལ་བདེ་མཆོག་གི །ཨིནྡྲ་བྷཱུ་ཏིས་བཞེངས་པའི་གཙུག་ལག་ཏུ། །གནས་གསུམ་མཁའ་འགྲོ་འདུ་བས་ཆོས་རྣམས་གསུངས། །གཏུམ་དྲག་ར་མེ་ཤ་རི་ཁ་ཆེ་དང་། །ན་ག་ར་དང་ཝ་ཧི་
ཏྲ་ཕུར་བྱོན། །པཎ་ཆེན་བྷཱུ་མི་ཤི་ལར་ཆོས་ཀྱང་ཞུས། །ཉི་ཤུ་རྩ་བཞི་ཡུལ་གྱི་ཡུལ་དགུ་གཟིགས། །བལ་ཡུལ་ཐད་ལ་ཕྱག་བཞི་པ་ཡིས་བསུས། །བྱང་ཆུབ་ཤིང་ལ་རྐྱང་ཕྱག་འཚལ་བའི་ཚེ། །རླུང་སེམས་དབུ་མར་ཚུད་ནས་ཡོན་ཏན་སྐྱེས། །ཚོགས་ཀྱི་བདག་པོས་ཕྱག་འཚལ་སྲོག་སྙིང་ཕུལ། །དབང་བསྐུར་ཚེ་ན་བུམ་པ་ནམ་མཁའ་བཞག །རྒྱལ་ཟླར་གར་གྱི་མཆོད་པ་བྱས་པའི་ཚེ། །པཀྵིའི་དབུ་ཞྭ་ན་བཟའ་ནག་པོ་ཅན། །གཟི་བརྗིད་མེ་ལྟར་འབར་ཞིང་བར་སྣང་བྱོན། །ཞྭ་ནག་གནང་བྱུང་དེ་ཚེ་དྲུང་སྐོར་ཀུན། །དེ་ཟིལ་མ་བཟོད་བརྒྱལ་བ་ལྟ་བུར་གྱུར། །ཆོས་དབང་སྲས་པོ་ཚེ་ཆུ་གཏེར་སྟོན་ཕུལ། །སེ་ཆེན་རྒྱལ་པོས་གདན་དྲངས་རྒྱ་ནག་བྱོན། །ཀྱི་རང་འཕགས་པའི་དྲུང་དུ་ཤ་བ་རི། །མཇལ་ནས་ལུང་བསྟན་ཏིང་འཛིན་དབང་བསྐུར་ཐོབ། །གཅེས་ཕྲུག་བརྒྱད་ཅུ་ལ་སོགས་པའི། །དཔག་མེད་གདུལ་བྱ་སྨིན་པར་མཛད། །བྱ་ལོ་ཁྲུམས་ཟླའི་ཉི་ཤུ་ལ་གཤེགས་ཤིང་། །རིང་བསྲེལ་སྐུ་གདུང་དཔག་མེད་གྱུར། །གྲུབ་ཆེན་དེ་ལ་གསོལ་བ་འདེབས། །བླ་མ་སྣེ་མདོ་བས་མཛད་པ་དང་། །བླ་མ་བསོད་ནམས་འོད་ཟེར་བས་མཛད་པ་དང་། །ལམ་ཡིག་ཆེ་ཆུང་རྣམ་ཐར་ཆེན་མོ་
སོགས་ལས་མཁའ་སྤྱོད་པས་བསྡུས་པ་ལས་ཆེར་ཨ་རཱ་གས་བསྡུས་པའོ། །མངྒ་ལཾ།། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།