ངོམ་པ་ལྡོང་ཚང་གི་ལོ་རྒྱུས་མདོར་བསྡུས་དངུལ་དཀར་གསལ་བའི་མེ་ལོང་།
ངོམ་པ་ལྡོང་ཚང་གི་ལོ་རྒྱུས་མདོར་བསྡུས་དངུལ་དཀར་གསལ་བའི་མེ་ལོང་བཞུགས་སོ།།
ན་མོ་ལོ་ཀི་ཤྭ་ར་ཡེ། འཕགས་པ་འཇིག་རྟེན་དབང་ཕྱུག་ལ་ཕྱག་འཚལ་ལོ། །འདིར་འོད་གསལ་ལྷའི་གདུང་རྒྱུད་ངོམ་པ་ལྷ་གདོང་དཀར་པོའི་ལོ་རྒྱུས་ཅུང་ཟད་བཤད་ན། དེ་ཡང་གཞི་དང་མེ་ཏོག་གིས་བརྒྱན་པའི་ཞིང་ཁམས་ཞེས་བྱ་བའི་འཇིག་རྟེན་གྱི་ཁམས་བསམ་གྱིས་མི་ཁྱབ་པ་གཅིག་ཡོད་དེ། དེ་ཡང་སྟོང་གསུམ་འཇིག་རྟེན་གྱི་ཁམས་སུ་མིང་བཏགས་པ་གཅིག་ཡོད་པ་ལས། སྟོང་བར་མའི་འཇིག་རྟེན་ཁམས་ཀྱི་རྒྱལ་པོ་དབང་བསྒྱུར་གྱི་གཞལ་མེད་ཁང་ན། སྤྱན་རས་གཟིགས་ལོངས་སྤྱོད་རྫོགས་པའི་སྐུ་རྣམ་པར་སྣང་མཛད་གངས་ཅན་མཚོ་ཞེས་བྱ་བའི་སངས་རྒྱས་གཅིག་
བཞུགས་ཏེ། སངས་རྒྱས་དེའི་བ་སྤུའི་བུ་ག་རེ་རེ་ན་ཡང་། འཇིག་རྟེན་གྱི་ཁམས་རེ་རེ་ཡོད། དེའི་ཕྱག་མཐིལ་ལྷུང་བཟེད་ནང་ན་སྤོས་ཆུའི་རྒྱ་མཚོ་ལས་མེ་ཏོག་པདྨའི་སྡོང་པོ་ཅིག་སྐྱེས་པ་ལས། མེ་ཏོག་ཉི་ཤུ་རྩ་ལྔ་བརྩེགས་མར་ཡོད་པའི་མེ་ཏོག་རེ་རེའི་སྟེང་ན་ཡང་འཇིག་རྟེན་གྱི་ཁམས་དཔག་ཏུ་མེད་པ་ཡོད། མེ་ཏོག་བཅུ་གསུམ་པའི་སྟེང་ན་ཡང་འཇིག་རྟེན་གྱི་ཁམས་འདི་ཡོད་པས། འཇིག་རྟེན་འདི་སངས་རྒྱས་དེའི་ཐུགས་ཐད་ཙམ་དུ་ཡོད་པས། འདི་ན་དགེ་སྡིག་ཅི་བྱས་ཀྱང་འགྱུར་ཆེ་བ་ཡིན། མེ་ཏོག་དེའི་ཟེ་འབྲུ་རེ་རེ་ལ་ཡང་འཇིག་རྟེན་གྱི་ཁམས་རེ་རེ་ལ་ཡང་འཇིག་
རྟེན་ཁམས་རེ་རེ་ཡོད་པ་ལས། འདི་ནི་ཟེའུ་འབྲུ་དབུས་མའི་སྟེང་ན་ཡོད་ཅིང་། འཇིག་རྟེན་འདིའི་ཆགས་ལུགས་ནི། མེ་ཏོག་གི་ཟེའུ་འབྲུ་སྟོང་པ་གཅིག་ན། ནམ་མཁའ་སྟོང་པ་ལས་རླུང་གི་དཀྱིལ་འཁོར་ཆགས། དེའི་སྟེང་དུ་ཆར་བབས་པས་ཆུའི་དཀྱིལ་འཁོར་ཆགས། ཆུའི་སྲིབ་མའི་ཚུལ་དུ་གསེར་གྱི་ས་གཞི་རི་རབ་གླིང་བཞི་གླིང་ཕྲན་བརྒྱད་མཐའ་མ་ལྕགས་རི་གཅིག་གིས་བསྐོར་རོ། །དེ་འདྲ་སྟོང་ལ་སྟོང་དང་པོ། དེ་སྟོང་ལ་སྟོང་གཉིས་པ། དེ་སྟོང་ལ་སྟོང་གསུམ་པ་སྟེ་གླིང་བཞི་བྱེ་བ་ཕྲག་བརྒྱ་ཡོད། རི་རབ་ཀྱི་བང་རིམ་ལ་རྒྱལ་ཆེན་བཞི་པའི་ལྷ་དང་། རི་རབ་རྩེ་ལ་སུམ་ཅུ་རྩ་གསུམ་པའི་ལྷ་རྣམས་ཡོད། འཐབ་བྲལ་ཡན་ཆད་ས་ལ་མ་བརྟེན་པར་བར་སྣང་ལ་ལྷའི་གནས་ཐམས་ཅད་ཡོད། རི་རབ་ཁོང་གསེང་ན་ལྷ་མ་ཡིན། རྒྱ་མཚོའི་ནང་ན་ཀླུ་དང་དུད་འགྲོ། རྒྱ་གར་གྱི་འོག་ན་ཚ་དམྱལ་བརྒྱད། བོད་ཀྱི་འོག་ན་གྲངས་དམྱལ་བརྒྱད་ཡོད། རྒྱ་གར་གྱི་གྲོང་ཁྱེར་སེར་སྐྱའི་འོག་ན་ཡི་དྭགས་ཀྱི་ཡུལ་ཡོད། ཉི་མ་ནི་མེ་ཤེལ་དང་ཟླ་བ་སྐར་མ་རྣམས་ཆུ་ཤེལ་ལས་གྲུབ་བོ། །དེ་ཡང་ཕྱི་པ་མུ་སྟེགས་པའི་ལུགས་ལ་ནི། འཇིག་རྟེན་འདི་ཐམས་ཅད་ལྷ་དབང་ཕྱུག་ཆེན་པོས་བྱས་པ་
ཡིན་ཟེར། མུ་སྟེགས་པ་ལ་ལས་ཚངས་པས་བྱས་ཟེར། ལ་ལས་ཁྱབ་མཇུག་གིས་བྱས་ཟེར། ལ་ལས་ཕྱའི་བྱས་ཟེར། ངེད་རང་ནང་པའི་ལུགས་ལ་སེམས་ཅན་སྤྱི་མཐུན་གྱི་ལས་ལས་གྲུབ་པ་ཡིན་གསུངས། དེ་ཡང་འཛམ་བུའི་གླིང་འདིར་དང་པོ་མི་རྣམས་སྲིད་ཚུལ་ཡང་། མུ་སྟེགས་པའི་ལུགས་ལ་ནི་ལྷ་ཚངས་བའི་དཔུང་པ་གཉིས་དང་བླ་གཉིས་ལས་མི་བུ་རིགས་བཞི་བྱུང་བས་ཚངས་པ་ལ་འཇིག་རྟེན་གྱི་དམྱེས་པོ་ཟེར། གདོལ་བའི་རིགས་ནི་ཚངས་པའི་ལུས་ལས་མ་ཆད། གང་ནས་བྱུང་ཆ་མེད་པས་རིགས་ངན་པ་ཟེར། བོན་ལུགས་མིའི་འགྲོ་བ་དར་ལུགས་ལ་སྒོ་ང་ལས་བྱུང་སྟེ། དུང་སྒོང་ལས་སྟེང་གི་ལྷ། ལྕགས་སྒོང་ལས་འདྲེ་སྲིན། བསེ་སྒོང་ཁྲ་བོའི་ནང་ནས་སྨོན་མི་སྣུམ་ལུམ་བྱུང་། དེས་ཡིད་ཀྱིས་སྨོན་ལམ་བཏབ་པས་ཁ་མིག་རྐང་ལག་ཐམས་ཅད་དོད་ནས། དེའི་རྒྱུད་ལས་མི་རྣམས་འབྱུང་ཟེར། ནང་པ་སངས་རྒྱས་པའི་ལུགས་ལ་རྒྱ་གར་གྱི་མི་རྣམས་དང་པོ་བརྫུས་སྐྱེས་སུ་བྱུང་སྟེ། ལྷ་དང་འདྲ་བར་ལུས་ལ་འོད་ཡོད་པས་ནམ་མཁའ་ལ་འགྲོ་བ་ཡོད་པ་ལས། སའི་བཅུད་དང་ས་ཡི་ཞག་ཟོས་པས་འོད་མེད་ཅིང་ནམ་མཁའ་ལ་འགྲོ་མ་ནུས། དེའི་ཚེ་ཉི་ཟླ་ཡང་
སྲིད། དེ་ནས་མ་རྨོས་པའི་ལོ་ཏོག་བྱུང་བ་ཟོས་པས། ཕོ་མོའི་དབང་པོ་ཡང་དོད་ནས་ཁྱིམ་ཐབས་དར། དེ་དུས་ནམ་མཁའ་ནས་ལྷ་གཅིག་མི་ཡུལ་དུ་བབ་ནས་བྱུང་བས་མིའི་ཟས་ཟོས་པས་འཕུར་མ་ཤེས་ནས་མི་ཡུལ་དུ་ལུས། དེའི་རྒྱུད་ལས་འོད་གསལ་ལྷའི་རྒྱུད་བྱུང་། གནམ་གདོང་ས་ལ་བབ་པ་ཟེར། ལྷ་གདོང་དཀར་པོ་ཡང་ཟེར་རོ། །དེ་ནས་མ་རྨོས་ལོ་ཏོག་ཟད་ནས་ཞིང་རྨོ་རྐོ་དར། དེ་ནས་ཞིང་ནས་སྙེ་མ་བརྐུས་པས་འཁྲུག་པ་དར། དེ་ནས་དེ་མི་འབྱུང་བའི་ཕྱིར་དུ་ཐམས་ཅད་གྲོས་བྱས་ནས་འོད་གསལ་ལྷའི་བུ་གཟུགས་བཟང་བ། །སྟོབས་ཆེ་བ་སེམས་རྒྱུད་དྲང་བ་གཅིག་ཐམས་ཅད་ཀྱིས་རྒྱལ་པོར་བསྐོས་པས་མང་པོས་བཀུར་བའི་རྒྱལ་པོ་ཞེས་བྱའོ། །དེའི་རྒྱལ་རབས་ལྔ་ནི་བསྐལ་པ་དང་པོའི་རྒྱལ་པོ་ལྔ་ཞེས་བྱའོ། །དེ་ནས་རྒྱལ་པོ་ང་ལས་ནུ་ཞེས་བྱ་བ་གླིང་བཞི་ལ་དབང་བ་བྱུང་། དེ་ནས་གླིང་གསུམ་ལ་དབང་བ་དང་། གླིང་གཉིས་དབང་བ་དང་། གླིང་གཅིག་དབང་བའི་རྒྱལ་པོ་ལྔ་བྱུང་བ་ནི་འཁོར་ལོས་སྒྱུར་བའི་རྒྱལ་པོ་ལྔ་ཟེར། དེ་ནས་རྒྱལ་པོ་མཆོག་སྦྱིན་དུས་སངས་རྒྱས་འཁོར་བ་འཇིག་བྱོན་ཏེ་མི་རྣམས་ལོ་བཞི་ཁྲི་ཐུབ་བོ། །དེ་ནས་རྒྱལ་རབས་སུམ་བརྒྱ་པ་རྒྱལ་པོ་ཀུན་
ནས་འོད་དང་སྲས་ཙནྡའི་སྐབས་སུ་སངས་རྒྱས་གསེར་ཐུབ་བྱོན་ཏེ་ཚེ་ལོ་སུམ་ཁྲིའོ། །དེ་ནས་རྒྱལ་རབས་སུམ་བརྒྱ་ན་རྒྱལ་པོ་རཏྣ་ཆེན་པོ་དང་རྒྱལ་བུ་ཀྲི་ཀྲིའི་དུས་འོད་སྲུང་བྱན་ཏེ་མི་རྣམས་ཚེ་ལོ་ཉི་ཁྲིའོ། །གཞན་ཡང་རྒྱ་གར་གྱི་ཡུལ་སོ་སོར་མང་བཀུར་རྒྱལ་པོ། དེའི་བུ་ཚའི་རྒྱུད་ལ་ལྷ་ཆེན་པོ་ཟེར་བའི་རྒྱལ་པོ་བརྒྱད་ཁྲི་བཞི་སྟོང་བྱུང་། གཞན་ཡང་མང་བཀུར་དེའི་རྒྱུད་པ་ལ་ཡུལ་ལྔ་འཛིན་གྱི་རྒྱལ་པོ་ལྔ་སྟོང་བྱུང་། གཞན་ཡང་མང་བཀུར། དེའི་བུ་རྒྱུད་ལ་ཡུལ་ཐོད་པ་ཅན་གྱི་རྒྱལ་པོ་དགུ་སྟོང་བྱུང་། མང་བཀུར་དེའི་རྒྱལ་རྒྱུད་ལས་ཀླུ་དབྱངས་ཞེས་བྱ་བའི་རྒྱལ་པོ་ཁྲི་ཚོ་བྱུང་། མང་པོས་བཀུར་བ། དེའི་བུ་རྒྱུད་ལ་མ་ག་ཏའི་རྒྱལ་པོ་ཁྲི་ཚོ་བྱུང་། མང་བཀུར་དེའི་རྒྱུད་ལ་ཏ་མི་ལའི་རྒྱལ་པོ་ཁྲི་ལྔ་སྟོང་བྱུང་། །མང་བཀུར་དེའི་བུ་རྒྱུད་ལ་རྒྱལ་བུ་རམ་ཤིང་སྐྱེས་བྱུང་། དེའི་བུ་རྒྱུད་ལ་བུ་རམ་ཤིང་པའི་རྒྱལ་པོ་སྟོང་དང་བརྒྱ་ལྷག་བྱུང་སྟེ། འདས་པའི་སངས་རྒྱས་འཁོར་བ་འཇིག་དང་། གསེར་ཐུབ་འོད་སྲུང་གསུམ་གྱི་སྟོན་པའི་བསྙེན་བཀུར་དང་། བསྟན་པའི་སྦྱིན་བདག་ནི་མང་བཀུར་རྒྱལ་པོའི་བུ་རྒྱུད་དེ་རྣམས་ཀྱིས་མཛད་པ་ཡིན་ནོ། །དེ་ནས་ཚེ་ལོ་བརྒྱ་པའི་དུས་འདིར་བུ་
རམ་ཤིང་པའི་རྒྱལ་པོ་ཟས་གཙང་མའི་སྲས་ལ་ཤཱཀྱ་ཐུབ་པ་འཁྲུངས་ཏེ། ཤཱཀྱའི་རིགས་ཐམས་ཅད་རབ་ཏུ་བྱུང་ནས་སྲས་སྒྲ་གཅན་ཟིན་དང་ཤཱཀྱའི་རྒྱལ་པོ་བཟང་ལྡན་ཡང་རབ་ཏུ་བྱུང་ནས་མང་བཀུར་རྒྱལ་པོའི་རྒྱལ་རྒྱུད་ཤཱཀྱའི་རིགས་ཐམས་ཅད་རྫོགས་པར་བཤད་དེ། དེ་ནི་ཡུལ་དབུས་དེར་ཤཱཀྱ་ཆེན་པོའི་རབ་རྫོགས་པ་ལ་གསུངས་པ་ཡིན་གྱི། མང་བཀུར་རྒྱལ་པོའི་རྒྱུད་དང་ཤཱཀྱའི་རིགས་གཅིག་ཀྱང་མ་ལུས་པ་ནི་མིན་ཏེ། ཤཱཀྱ་རི་བྲག་པ་དང་ཤཱཀྱ་ཆུང་བ་ལི་ཙ་བྱའི་རྒྱུད་ཡོད་དེ། ཤཱཀྱའི་རྒྱལ་རིགས་གཅིག་ཤམ་བྷ་ལ་ན་བྱོན་པ་ཤམ་བྷ་ལའི་རྒྱལ་པོ་གྱུར་ནས། གྲོང་ཁྱེར་བྱེ་བ་ཕྲག་དགུ་བཅུ་མངའ་འོག་ཏུ་འདུས་ཏེ། དེའི་བུ་རྒྱུད་ལ་རིགས་ལྡན་ཉི་ཤུ་རྩ་ལྔ་ཆོས་རྒྱས་སུམ་ཅུ་སོ་གཉིས་བྱུང་ནས་དུས་འཁོར་གྱི་བསྟན་པ་དར་བར་མཛད། ད་ལྟར་ཡང་རྒྱལ་རྒྱུད་ཡོད་པར་བཤད་པ་ལྟ་བུ་སྟེ། བོད་རྒྱལ་པོ་ཡང་མང་བཀུར་རྒྱལ་པོའི་གདུང་རིགས་ཡིན་པའི་ཕྱིར་རོ། །དེ་ནས་བོད་དུ་མི་འབྱུང་ཚུལ་ནི། བོན་ལུགས་མིའུ་འགྲམ་ཆགས་ལྟར་ན་སྨོན་མི་སྣུམ་གྱི་བུ་ལ་རྒྱལ་བུ་མཐིང་གེ་བྱུང་། མི་མཆོག་རྒྱལ་བུ་མཐིང་གེའི་བུ་ལ་རྒྱ་བོད་ཧོར་གསུམ་བྱུང་ཟེར། སྙན་ངག་པའི་ལུགས་ལ་ཤམ་བྷ་ལའི་ཡུལ་དགྲ་ངན་དཔུང་
ཚོགས་བཅུ་གཉིས་ཞེས་པ་ཀླ་ཀློའི་དམག་བྱུང་ནས་ཤམ་བྷའི་རྒྱལ་པོ་གཡུལ་ཕམ་པས། མི་སྟོང་ཕྲག་གཅིག་བུད་མེད་དུ་བརྫུས་ནས་བོད་དུ་བྲོས་པའི་རྒྱུད་ལ་བོད་ཀྱི་མི་རྣམས་བྱུང་ཟེར། རྒྱལ་རབས་དང་མ་ཎི་བཀའ་འབུམ་སོགས་ཆོས་ཀྱི་ལུགས་ལ། སྤྲེའུ་བྱང་ཆུབ་སེམས་དཔའ་དང་བྲག་སྲིན་མོའི་བུ་རྒྱུད་ལ་བོད་འདི་བྱུང་བར་གསུངས་ཏེ། གང་ལྟར་ཡང་བོད་དཔོན་མེད་གཡོག་མེད་དུ་ཡོད་པའི་དུས། རྒྱ་གར་གྱི་ཡུལ་ནས་མང་པོས་བཀུར་བའི་རྒྱལ་པོའི་རྒྱུད་ཤཱཀྱ་ལི་ཙ་བྱའི་རིགས་དང་ཤཱཀྱ་རི་བྲག་པའི་རིགས། རྒྱ་གར་གྱི་རྒྱལ་པོ་མང་དུ་བྱུང་ཞིང་། ཤཱཀྱ་ལི་ཙ་བྱའི་རིགས་རྒྱལ་པོ་དམག་བརྒྱ་པ་བྱ་བ་ལ་སྲས་བྱ་མིག་ལྟར་ཡར་ལ་སྡེབ། སྙན་ཞལ་རིང་བ་ཕྱག་སོར་དྲ་བས་འབྲེལ་བ་ཞིག་བྱུང་། དེ་དོན་ལ་བྱང་ཆུབ་སེམས་དཔའ་ནམ་མཁའི་སྙིང་པོའི་སྤྲུལ་པ་བོད་ཀྱི་རྒྱལ་པོ་བྱ་བའི་ཕྱིར་སྤྱན་རས་གཟིགས་ཀྱི་ཐུགས་རྗེས་བསྐུལ་བ་ཡིན་ཡང་། གནས་སྐབས་བྲམ་ཟེ་མཚན་མཁན་ལ་བསྟེན་པས། འདི་བུ་མོའི་ཆ་ལུགས་བྱས་ནས་ཡུལ་ཐག་རིང་དུ་བསྐྱལ་དགོས། དེ་མ་བྱས་ན་ཡབ་རྒྱལ་པོ་སྐུ་ཚེ་ཐུང་ཟེར་བས། སྲས་དེ་བུ་མོའི་ཆས་བཀོན་བོད་དུ་བསྐྱལ་པས། ཁོང་འོད་གསལ་ལྷའི་
རྒྱུད་ཡིན་པས་ལྷའི་རྨུ་ཐག་སྤྱི་བོ་ནས་འོད་ཟེར་དཀར་པོ་རྟ་རྔ་ཙམ་ཞིག་སྟེང་ལྷ་ཡུལ་ན་ཟུག་ནས་ཡོད་པ་དེ་ལ་འཇུས་ནས་དབུས་ལྷ་རིའི་རྩེར་བྱོན་ནས་གཟིགས་པས། ཡར་ལུང་ས་བཟང་བར་གཟིགས་ནས་ཡར་ལུང་དུ་བྱོན་པས། རྫི་བོ་རྣམས་དང་ཕྲད་ནས་ཁྱེད་ག་ནས་ཡིན་ཟེར་བས། སྐད་མ་གོ་ནས་གནམ་ལ་མཛུབ་གུ་བཙུགས། སུ་ཡིན་ཟེར་བར་གོ་ནས་བཙན་པོ་ཡིན་གསུངས། དེར་འདི་གནམ་ནས་བྱོན་པའི་བཙད་པོ་ངོ་མཚར་ཅན་རེད་པས་ངེད་རང་རྣམས་ཀྱི་རྒྱལ་པོ་བྱེད་དགོས་ཟེར་ནས། གཉའ་བའི་སྟེང་དུ་ཤིང་གི་ཁྲི་བཅིང་བ་ལ་བཞག་ནས་གདན་དྲངས་ཏེ་བོད་ཀྱི་རྒྱལ་པོ་ལ་སྔ་བ་གཉའ་ཁྲི་བཙད་པོ་ཟེར་བ་དེ་བྱུང་། འདི་ལ་བཤད་ལུགས་མང་ན་ཡང་འཇམ་དཔལ་རྩ་རྒྱུད་དུ་སྲོང་བཙན་སྒམ་པོ་ལི་ཙ་བྱའི་རིགས་སུ་ལུང་བསྟན་ཏོ། །དེའི་རྒྱུད་པ་གདུང་རབས་བདུན་གྱི་བར་དུ་སྲས་རྟ་ཁ་ཐུབ་ནས་ཡབ་ཀྱིས་ཞལ་ཆེམས་བཞག་སྟེ་སྐུ་གདུང་མ་བཞག་པར་ནམ་མཁའ་ལ་འཇའ་ལྟར་ཡལ་བ་བྱུང་། །དེ་ནས་རྒྱལ་རབས་བརྒྱད་ན་རྒྱལ་པོ་གྲི་གུམ་བཙད་པོ་ལ་སྲས་གསུམ་ཡོད་པའི་གཉིས་དེ་ཀོང་པོ་དང་ཉང་པོར་བཞུགས་ནས་རྗེ་བོ་མཛད། དེ་གཉིས་ཀྱི་མཚན་ནི་ཤ་ཁྲི་རྒྱལ་པོ་དང་། ཉ་ཁྲི་རྒྱལ་པོ་
ཞེས་བྱ་བ་ཡིན་པར་བཤད། དེའི་རྒྱལ་རྒྱུད་ད་ལྟའི་བར་དུ་ཡོད་དོ། །དེ་ནས་གྲི་གུམ་བཙན་པོ་ནས་རྒྱལ་རབས་མང་ཞིག་དད་པ་ནས་བྱང་ཆུབ་སེམས་དཔའ་ཀུན་ཏུ་བཟང་པོའི་སྤྲུལ་པ། རྒྱལ་པོ་ཐོ་ཐོ་རི་སྙན་ཤལ་བྱ་བ་བྱུང་སྟེ། དེའི་ཕོ་བྲང་ནང་གི་རྩེ་ན་མདོ་སྡེ་ཟ་མ་ཏོག་དང་ཚ་ཚའི་བརྐོར་ཕོར་དང་ཤེལ་གྱི་མཆོད་རྟེན་རྣམས་བབ་ཅིང་། འཇའ་འོད་དང་མེ་ཏོག་གི་ཆར་བབ། རྒྱལ་རབས་ལྔ་ནས་འདིའི་དོན་ཤེས་པ་གཅིག་འབྱུང་ཟེར་བའི་ལུང་བསྟན་བྱུང་ནས་དམ་པ་ཆོས་ཀྱི་དབུ་བརྙེས་སོ། །དེ་ནས་རྒྱལ་རབས་ལྔ་ནས་སྤྱན་རས་གཟིགས་ཀྱི་སྤྲུལ་པ་རྒྱལ་པོ་སྲོང་བཙན་སྒམ་པོ་བྱོན་ཏེ། སྒྲོལ་མ་དཀར་སྔོན་གཉིས་ཀྱི་སྤྲུལ་པ་རྒྱ་བཟའ་དང་བལ་བཟའ་བཙུན་མོར་བླངས་པས། རྒྱ་བཟའི་རྫོངས་ལ་ཇོ་བོ་ཤཱཀྱ་མུ་ནེ་དང་ས་དཔྱད་དང་རྩིས་སྨན་དཔྱད་ཇ་དར་རྣམས་བྱུང་། བལ་བཟའི་རྫོངས་ལ་ཇོ་བོ་མི་བསྐྱོད་རྡོ་རྗེ་ཙནྡན་སྒྲོལ་མ་རང་བྱོན་བཻཌཱུརླའི་ལྷུང་བཟེད་ནོར་བུ་སྟག་ཤ་དྷེ་ཝ་རྣམས་བྱུང་། ལྷ་ས་ཡེར་པ་ཁྲ་འབྲུག་སོགས་གཙུག་ལག་ཁང་བརྒྱ་དང་རྩ་བརྒྱད་བཞེངས། ཐོན་མི་སཾ་བྷོ་ཊ་རྒྱ་གར་དུ་བཏང་ནས་བོད་དུ་ཡི་གེ་ཡོད་པར་མཛད་དེ་དམ་པའི་ཆོས་ཀྱི་སྲོལ་བཏོད། དེ་ནས་
རྒྱལ་རབས་ལྔ་ནས་འཇམ་དབྱངས་ཀྱི་སྤྲུལ་པ་རྒྱལ་པོ་ཁྲི་སྲོང་ལྡེའུ་བཙན་བྱོན་ཏེ། ཨོ་རྒྱན་གྱི་མཁས་པ་པདྨ་འབྱུང་གནས། རྒྱ་གར་གྱི་མཁས་པ་བི་མ་མི་ཏྲ། ཟ་ཧོར་གྱི་མཁས་པ་བྷོ་དྷི་སཏྭ། རྒྱ་ནག་གི་མཁས་པ་དུ་ཧར་ནག་པོ་སོགས་པཎྜི་ཏ་རྒྱང་རིང་གདན་དྲངས། བསམ་ཡས་ལ་སོགས་གཙུག་ལག་ཁང་ཆེན་པོ་བརྒྱ་དང་རྩ་བརྒྱད། ཕྲན་བུ་སྟོང་དང་རྩ་གཉིས་བཞེངས། མདོ་སྔགས་ཀྱི་ཆོས་ཐམས་ཅད་བོད་དུ་བསྒྱུར་བས། རྗེ་འབངས་ཉི་ཤུ་རྩ་ལྔ་སོགས་གྲུབ་པ་ཐོབ་པ་དཔག་ཏུ་མེད་པ་བྱུང་བས། དམ་པའི་ཆོས་ཀྱི་གཞུང་བསྲང་བ་ཡིན་ནོ། །དེ་ནས་རྒྱལ་རབས་གསུམ་ནས་ཕྱག་རྡོར་གྱི་སྤྲུལ་པ་རྒྱལ་པོ་ཁྲི་རལ་པ་ཅན་བྱོན་ཏེ། འཛམ་གླིང་སུམ་གཉིས་མངའ་ཞབས་སུ་བཙུད། འུ་ཤང་རྡོའི་ལྷ་ཁང་བཞེངས། པཎྜི་ཏ་ཛི་ན་མི་ཏྲ་སོགས་མང་པོ་གདན་དྲངས། བཙུན་པ་ཐམས་ཅད་ལ་བཀུར་སྟི་ཆེན་པོ་མཛད་དེ་དམ་པའི་ཆོས་དར་རྒྱས་སུ་མཛད་དོ། །དེ་ནས་རྒྱལ་པོ་གླང་དར་མ་ཞེས་བདུད་ཀྱི་སྤྲུལ་པ་གཅིག་བྱུང་ནས་ཆོས་བསྣུབ་ཅིང་རབ་ཏུ་བྱུང་བ་རྣམས་ལ་ཆད་པ་སྣ་ཚོགས་བཅད་པས། ཕྱག་རྡོར་གྱི་སྤྲུལ་པ་ལྷ་ལུང་དཔལ་གྱི་རྡོ་རྗེས་རྒྱལ་པོ་སྡིག་ཅན་དེ་བསྒྲལ་ཏོ། །དེ་ནས་ཆོས་
བསྣུབས་པའི་ཉེས་པ་དང་བློན་པོས་སྨོན་ལམ་ལོག་པར་བཏབ་པའི་ནུས་པས་རྒྱལ་པོའི་གདན་ས་འཁྲུགས་ནས་རྒྱལ་པོའི་སྲས་འོད་སྲུང་དང་། རྒྱལ་པོའི་སྲས་མིན་ཀྱང་བཙུན་མོ་དབང་ཆེ་བས་སྲས་ཡིན་པར་བྱས་པའི་ཡུམ་བརྟན་ཟེར་བའི་སྲས་གཅིག་བྱུང་སྟེ་མ་འཆམས། འོད་སྲུང་གི་མངའ་རིའི་སྐོར་གསུམ་དབང་། ཡུམ་བརྟན་གྱིས་དབུས་གཙང་རུ་བཞི་དབང་བར་བྱུང་། དེ་རྒྱུད་ཁམས་དབུས་ཀུན་ཏུ་འཕེལ་ཏེ་རུས་མིང་ཇོ་བོ་ཟེར་རོ། །འོད་སྲུང་གི་གདུང་རྒྱུད་མངའ་རིས་དང་ལ་སྟོད་བྱང་འཕེན་ཡུལ་དུ་ཆད། འདི་སྐབས་སུ་རྒྱལ་རྒྱུད་ཁ་བཞིར་གྱེས། དེ་ཡང་བོན་ནམ་མཁའ་དཔལ་ཡོན་འདྲེན་ཁ་བྱ་བར་སྐྱེས་ནས་བོད་ཀྱི་ལྷ་འདྲེ་ཐམས་ཅད་བསྡུས་ནས། ང་བོད་རྒྱལ་ཁྲི་རལ་གྱིས་ཉེས་མེད་པ་ལ་རྔན་གསོད་བྱས་པ་ཡིན་པས། བོད་ཀྱི་རྒྱལ་པོའི་རྒྱུད་འདི་མེད་པ་གཅིག་བྱེད་དགོས་ཟེར་ནས། དེར་བོད་ཀྱི་ལྷ་བཞིས་ཞུ་བ་བྱས་ནས་རྒྱལ་རྒྱུད་ཚན་བཞི་ལུས་པ་སྟེ། གངས་དཀར་ཏི་སེ་ལྷ་ཡིས་ཞུ་བ་བྱས། །སྟོད་ཀྱི་ཕྱོགས་སུ་རྒྱལ་བློན་ཚན་གཅིག་ཆགས། །ཞེས་པ་ནི་མངའ་རིས་གུ་གེ་རྒྱལ་པོ་དང་དེ་ལས་འཕྲོས་པ་བླ་མ་ལྷ་བཙུན་ཚང་ཡིན་ནོ། །ཀོང་བཙུན་དེ་མོ་ལྷ་ཡིས་ཞུ་བ་
བྱས་། །ཀོང་པོའི་ཕྱོགས་སུ་རྒྱལ་བློན་ཚན་གཅིག་ཆགས། །ཞེས་པ་ནི་ཀོང་པོ་སྟོང་ཤོང་རྒྱལ་པོ་སྐྱེས་ས་ཨ་བོ་ཚང་སྟེ།། འདི་ཚང་ལ་ཞྭ་དམར་དཀོན་མཆོག་ཡན་ལག་ཀྱང་འཁྲུངས་སོ། །ཡར་ལྷ་ཤམ་པོ་ལྷ་ཡིས་ཞུ་བ་བྱས། །དབུས་ཀྱི་ཕྱོགས་སུ་རྒྱལ་བློན་ཚན་གཅིག་ཆགས། །ཞེས་པ་ནི། བསམ་ཡས་རྒྱལ་རྒྱུད་དང་དེ་ལས་འཕྲོས་པ་ཡར་ལུང་ཆོས་རྒྱལ་ཕོ་བྲང་བ་གཉིས་ཡིན་ཏེ། བསམ་ཡས་རྒྱལ་རྒྱུད་ནི་མངའ་རིས་རིག་འཛིན་ཆེན་པོ་དང་འགྲས་ནས། གཏོར་མ་འཕངས་བས་རྒྱལ་རྒྱུད་ཆད་དོ། །ཐང་ལྷ་ཡར་བཞུད་ལྷ་ཡིས་ཞུ་བ་བྱས། །བྱང་གི་ཕྱོགས་སུ་རྒྱལ་བློན་ཚན་གཅིག་ཆགས། །ཟེར་བ་འདི་ལས་འཕྲོས་པ། ངོམ་པ་ལྡོང་ཚང་ལ་སྟོད་བྱང་པ། སྡེ་ཕ་ལྷ་ཕུ་བ། རྒྱ་མཚོ་བ་རྣམས་ཡིན་ནོ། །དེ་ཡང་མངའ་རིས་གདུང་རྒྱུད་དེ་ལ་ལྷ་བླ་མ་བྱང་ཆུབ་འོད་སྐུ་མཆེད་གཉིས་འཁྲུངས་ཏེ། ལོ་ཙཱ་བ་རིན་ཆེན་བཟང་པོ་ལ་སོགས་ལོ་ཙཱ་བ་མང་པོ་རྒྱ་གར་དུ་བརྫངས། ཇོ་བོ་ཆེན་པོ་ཨ་ཏི་ཤ་གདན་དྲངས་ཏེ་ཆོས་གསར་མ་ཞེས་བྱ་བ་འདི་དར་བར་མཛད་པས་བཀའ་དྲིན་ཤིན་ཏུ་ཆེའོ། །དེ་ནས་བྱང་འཕེན་ཡུལ་ཕྱོགས་སུ་བཞུགས་པའི་རྒྱལ་རྒྱུད་དེའི་ཞལ་ངོ་གཉིས་ཁམས་ཕྱོགས་སུ་བྱོན་
པ། གཅིག་ཙོང་ཁ་དང་གཅིག་སྐྱོ་ན་ངོམ་སྨད་ནས་བཟུང་སྟེ། དེའི་རྒྱུད་ལ་ཙོང་ཁ་རྒྱལ་པོ་དང་གདོང་སྤོམ་ར་བྱུང་སྟེ། དེ་ཡང་གདུང་རབས་བརྩི་ན་མངའ་བདག་ཁྲི་རལ། གླང་དར། འོད་སྲུང་། དཔལ་འཁོར་བཙན། བཀྲ་ཤིས་བརྩེགས། འོད་ལྡེ། འོད་ལྡེའི་ཚ་བོའི་སྲས་ལ་སྤྱག་བཙན་འཁྲུངས་ཏེ་གདོང་རིགས་ཀྱི་ཕོ་ལྷ་ཡིན་ནོ། །འོད་ལྡེའི་སྲས་བཞིའི་ནང་ནས་ཁྲི་ལྡེ། ཁྲི་ལྡེ་ལ་སྲས་གསུམ་གྱི་གཅིག་དབུས་ན་བཞུགས་པ་སྤྱན་སྔ་དོན་ཆེན་པ་ཞེས་བྱའོ། །གཅིག་ཤར་ཙོང་ཁ་ན་བྱོན་པ་ཙོང་ཁ་རྒྱལ་པོ་ཞེས་བྱ་སྟེ་རྒྱལ་རྒྱུད་བྱུང་ངོ་། །གཅིག་སྐྱོ་ན་ངོམ་སྨད་ན་བཞུགས་པ་ངོམ་པ་ལྷ་སྡོང་དཀར་པོ་ཞེས་བྱ་སྟེ་དེ་ཡང་བཀའ་འབུམ་ན། དཔལ་རྩལ་སྟོབས་དང་ལྡན་པ་སྟེ། །སྐྱོ་རུ་རླུང་སྒང་རི་མོ་ན། །གདོང་ཕ་ལ་བུ་སྐྱེས་སྤོམ་རའི་གདོང་། ཞེས་ཟེར་བ་བྱུང་། དེ་ནས་མི་རབས་མང་ཅིག་སོང་ནས་བན་ཁྲོམ་གདོང་། དབལ་མོ་ལྕམ་ཟེར་བ་བྱུང་། དབལ་མོ་ལྕམ་ཚོང་ཞེས་བྱ་བར་ཡོངས་གྲགས་སོ། །བན་ཁྲོ་ལྡོང་གི་སྲས་དཀོན་མཆོག་འབར། དེའི་སྲས་དབོན་རྒན་དཀོན་མཆོག་འབུམ་སྟེ། དེ་ཡན་ངོམ་ཐམས་ཅད་དབང་བ་ནི་མིན་ཀྱང་དཔོན་རྒྱུད་མ་ཆད་ཅིང་
མངའ་ཐང་ལོངས་སྤྱོད་རྒྱ་ཆེན་པོ་དང་ལྡན་པ་ཡིན་ནོ། །དེའི་སྲས་དབོན་རྒན་སྦྱིན་པ་ཡིན་ཏེ། དབུལ་ཕོངས་རྣམས་ལ་སྦྱིན་པ་བཏང་བ་དང་། རྒྱས་འབྲིང་རྣམ་གསུམ་བཞེངས་པ་སོགས་བྱ་བ་ཆོས་ལ་བྱས་པས། གདོང་སྦྱིན་པ་ཆོས་ཀྱི་བལ་དུར་ཟེར་བ་བྱུང་། ཕྱིས་རང་བྱུང་རྡོ་རྗེ་ལ་བསྙེན་པར་རྫོགས་ནས་མཚན་ཡོན་ཏན་འབྱུང་གནས་སུ་བཏགས། དེ་ལ་སྲས་གསུམ་ཡོད་པའི་ཆུང་བ་གཉིས་ཀྱི་རྒྱུད་དབུས་ན་ཡོད་དེ། ལ་ཕྱི་ནམ་མཁའ་རྒྱལ་མཚན་ཟེར་བའི་གྲུབ་ཐོབ་ཆེན་པོ་གཅིག་ཀྱང་བྱུང་ངོ་། །མངའ་རིས་རྒྱལ་པོ་དང་སྟོད་ཧོར་རྒྱལ་པོ་གཉིས་ཀའི་ལས་ཀ་བཟུང་བའི་དུ་ཝན་ཞལ་དཀོན་མཆོག་བཟང་པོ་ཟེར་བ་གཅིག་ཀྱང་བྱུང་སྟེ་ཇོ་བོ་ལ་གསེར་ཀོང་བཙུགས། སྲས་ཆེ་བ་ནི་གདོང་དྲག་ནག་སྟེ། གདོང་སྦྱིན་པའི་བུ་ལ་དྲག་ནག་བྱུང་། དེ་འདྲ་བྱུང་ན་རེ་རེའི་ཆོག །ཟེར་ཏེ་མཚན་དྲུག་པ་རྒྱལ་མཚན་ཡིན་ཏོ། །ས་སྐྱ་ཆོས་རྒྱལ་འཕགས་པའི་དྲུང་སྐོར་མཛད་ནས་རྒྱ་ནག་ཏུ་བྱོན། རྒྱ་ནག་རྒྱལ་པོའི་ཐུགས་ལ་ཤིན་ཏུ་འཕྲོད་པ་བྱུང་ནས་བཀའ་གྲོས་དྲི་ས་མཛད་པ་བྱུང་སྟེ། དེ་དུས་བོད་དབུས་ཙོང་ཁམས་སུ་རྒྱ་ནག་གིས་དབང་བསྒྱུར་དུས་ཡིན་པས། དབུས་ཙོང་ཁམས་སོགས་ཀྱི་སྡེ་ཤིང་སྒོ་ཅན་
ཁྲི་སྐོར་བཅུ་ས་སྐྱ་བ་ཆོས་འཕགས་ལ་རྒྱལ་པོས་དབང་ཡོན་དུ་ཕུལ། དེ་དུས་མདོ་ཁམས་སྒང་དྲུག་གི་སྤྱི་དཔོན་ལ་གོ་འཇོ་བསྐོས། དབུས་གཙང་རུ་བཞིའི་སྤྱི་དཔོན་ལ་སྣེའུ་གདོང་གོང་མ་ཆེན་པོས་བསྐོས། སྤྱིར་དུ་བཅུ་ལ་བཅུ་དཔོན་དང་བརྒྱ་ལ་བརྒྱ་དཔོན། སྟོང་ལ་སྟོང་དཔོན། ཁྲི་ལ་ཁྲི་དཔོན་བསྐོས་ཏེ། དེ་དུས་ལྡོང་དྲག་པ་རྒྱལ་མཚན་ལ་རྒྱ་ནག་གི་རྒྱལ་པོས། དུ་ཝན་ཞལ་གྱི་ལས་ཀ་གནང་། ལས་ཆེན་ཤེལ་གྱི་ཐམ་ཁ། ལས་གོས་གོས་ཆེན་ནག་པོའི་འདུང་མ་དགུ་བརྩེགས་གནང་བས། ལྡོང་དྲག་ནག་ཏུ་མིང་ཐོགས་། སྣེའུ་གདོང་གོང་མ་ཆེན་པོའི་དཔོན་ཆེན་བྱང་ཆུབ་རྒྱལ་མཚན་དང་། དཔོན་ཆེན་བེ་རོ་ཙ་འབུམ་རྣམས་ཀྱིས་ནང་སོ་ཕྱག་མཛོད་པ་དྲག་ནག་གིས་མཛད། ཁམས་སུ་གོ་འཇོ་དཔོན་ཆེན་གྱི་བློན་ཆེན་དྲག་ནག་གིས་མཛད། སྐྱོ་ངོམ་ཐམས་ཅད་དང་ཚ་བ་སྒང་སྤོ་འབོར་སོགས་མདོ་ཁམས་སྒང་གི་སྤྱི་དཔོན་དུ་རྒྱ་ནག་རྒྱལ་པོས་བསྐོས་པ་ཡིན་ཏེ། མཆོག་གྱུར་དྲག་པ་རྒྱལ་མཚན་ཞེས། དཔལ་ལྡན་བླ་མའི་ཆོས་ཞལ་བསྟན། །མི་དབང་རྒྱལ་པོའི་གསེར་ཞལ་མཐོང་། །ཡིད་ཆགས་བག་ཕེབས་མཛའ་བོ་ལྟར། །ལེགས་ཉེས་གཞིག་པའི་དྲི་བ་
མཛད་། །མདོ་ཁམས་མི་དཔོན་བསྐོ་ཕབ་ལ། །དབང་བྱས་དེ་ནི་རྒྱལ་པོ་བཞིན། །ཅེས་གསུངས་སོ། །དྲག་ནག་གིས་གན་ཤོག་ལ་གསེར་རྐྱང་པའི་བཀའ་འགྱུར་ཚར་གཅིག་བཞེངས་པའི་ཕྱེད་ཙམ་གླིང་ཡུལ་འདན་ན་ཡོད། ཕྱེད་ཙམ་རི་བོ་ཆེའི་ལྷ་ཁང་ན་བཞུགས། ཇོ་བོ་ལ་གསེར་ཀོང་བཙུགས་སོ། །དྲག་ནག་བུ་དགུ་ཕ་དང་བཅུ་ཟེར་ནས། སྲས་པོ་དྲུང་ལྔ་བསུས་བུ་སོགས་དགུ་ཙམ་ཡོད་པ་ལ། སོ་སོར་ས་བསྒོས་བྱས་འགའ་རེ་དབུས་ཕྱོགས་དང་གོ་འཇོའི་ཕྱོགས་སུ་ཡོད་ཅིང་། བུ་ཆུང་གཅིག་གིས་རྒྱུད་ལ་བྲག་དམར་ཤོག་ལྔར་དྲག་པ་དང་དེ་ལས་འཕྲོས་པ། སྐྱག་ཟླ་ཨ་ནུ། དབག་ཕྱོགས་ཨ་ནུ། འབག་ར་ཨ་ནུ་སོགས་བྱུང་སྟེ། འདི་སྐབས་སུ་ངོམ་པའི་དབོན་མོ་གདོང་ཟ་སངས་རྒྱས་འབུམ་མེ་བྱ་བ། རི་བོ་ཆེ་བས་བསུས་པ་ལ། རྗེ་རཏཱ་ཀ་ར་འཁྲུངས་པས། ངོམ་པ་དང་ཞང་དབོན་འོང་བ་དེ་ལྟར་ཡིན། དྲག་ནག་གི་གདན་ས་ན་རྒྱལ་བ་བཟང་པོ་བསྐོས་ཏེ། ནང་སོ་མཛད་པས། ནང་སོ་རྒྱལ་བ་བཟང་དྲག་ཅིང་། །ལྷ་རྣམས་དབུས་ན་རྒྱལ་བྱིན་བཞིན། །ཀུན་གྱིས་འགྲན་ཟླ་དང་བྲལ་བ། །རྒྱལ་བ་བཟང་པོ་ཀུན་ཏུ་དྲག །ཅེས་གསུངས་སོ། །ནང་སོ་རྒྱལ་བ་བཟང་པོ་བ་
མངའ་ཐང་ཆེ་ཞིང་ཕྱུག་དྲགས་པས། གཞི་སྟོང་སོགས་ཕྱི་དགྲ་མང་པོ་སྡང་སྟེ། དམག་བརྒྱབས་ནས་བཅོམ་པ་ལ། སླར་རྒྱལ་བ་བཟང་པོས་དགྲ་ཐམས་ཅད་བཏུལ་ནས་མིང་མི་གྲགས་པར་བྱས་ཏེ། སྒམ་པོ་པས། པདྨས་དམ་བཏགས་ལྷ་འདྲེ་བཞིན། །མ་ལུས་དགྲ་ལས་རྣམ་རྒྱལ་ཞིང་། །བསྟན་བྱ་གང་ལ་རབ་བཟང་བས། །ལྷ་རྣམས་ཀུན་གྱིས་དེ་ཡི་མིང་། །དོན་མཐུན་རྒྱལ་བ་བཟང་པོ་ཞེས། །ཞེས་གསུངས། རྒྱལ་བ་བཟང་པོས་གསེར་རྐྱང་པའི་རྒྱས་འབྲིང་རྣམ་གསུམ་ཚར་གཉིས་ཀྱིས་གཙོས་པའི་གསེར་དངུལ་གྱིས་བཀའ་འགྱུར་པོ་ཏི་བརྒྱ་བཞེངས། ཇོ་བོ་ལ་གསེར་ཀོང་བཙུགས། རྒྱལ་བ་བཟང་པོ་ལ་སྲས་གཉིས་ཡོད་པའི་ཆེ་བ་བཙུན་པ་སྔར་ནས་འདས། ཆུང་བ་མཁའ་སྤྱོད་པ་ཡིན་ཏེ། དེ་ཡང་ཨོ་རྒྱན་རིན་པོ་ཆེའི་བཀའ་མ་འོངས་ལུང་བསྟན་ལས། སྐྱེས་མཐའི་འཕགས་པ་འོད་གསལ་དོན་ལ་འབྱོངས། །ངོམ་པ་བྱ་བྲལ་ངོམ་གྱི་ཕྱོགས་སུ་འབྱུང་། །ཞེས་དང་། ཁམས་ཀྱི་ཕྱོགས་སུ་རྒྱལ་མཚན་མཐའ་ཅན་ཏེ། །རྒྱལ་ཕྲན་ཆོས་དང་མཐུན་པ་དུ་མ་འབྱུང་། །སངས་རྒྱས་བསྟན་ལ་ཕན་པ་དུ་མ་འབྱུང་། །ཞེས་ས་བཅུའི་སེམས་དཔར་ལུང་བསྟན་པ་དང་།
ཆེ་ཚང་སངས་རྒྱས་ཡེ་ཤེས་ཀྱི་ཞལ་ནས་མཁའ་སྤྱོད་པ་འདི་ཨོ་རྒྱན་པདྨའི་སྤྲུལ་པ་ཡིན་གསུངས། དེ་བཞིན་གཤེགས་པ་དང་མཁན་ཆེན་མགོན་བློན་པས། མཁའ་སྤྱོད་པ་འདི་དཔལ་ཆེན་རྒ་ལོའི་སྐྱེ་མཐའ་ཡིན་གསུངས་ཏེ། མཁའ་སྤྱོད་པ་ཉིད་ཀྱིས་ཀྱང་སྐྱེ་བ་ཉི་ཤུ་རྩ་ལྔ་དྲན། འཁྲུངས་དུས་ནས་བལྟས་བཟང་པོ་བྱུང་ཞིང་། །དགོང་ལོ་བཞི་ནས་ལས་མགོན་བྱ་རོག་གདོང་ཅན་གྱིས་དངོས་སུ་རྩེད་མོ་རྩེ་རོགས་མཛད། གཞོན་ནུ་ནས་ཞལ་གཟིགས། མངོན་ཤེས་གྲུབ་རྟགས་མང་དུ་བསྟན། ཡབ་ཀྱི་བཀའ་མ་ཆོག་པར་བཙུན་མོ་བཞི་བླངས་བའི་རང་བཟའ་ལ་ལྡོང་རིན་ཆེན་རྒྱལ་མཚན་འཁྲུངས། ཟུར་མང་ཆོས་དཔལ་བཟང་པོའི་དབོན་མོ་མེ་ཉག་བཟའ་ལ་དྲུང་སྒམ་པོ་པ་འཁྲུངས། གཡུ་ཡི་འབུམ་གཅིག །གསེར་དངུལ་གྱིས་རྒྱས་འབྲིང་རྣམ་གསུམ་གྱིས་གཙོས་པའི་བཀའ་འགྱུར་པོ་ཏི་བརྒྱ་བཞེངས། ཁྲོམ་ཁྲི་ཚོ་གསུམ་ལ་ནས་ཞོ་རེ། ཐུད་རྒྱ་རེ། དར་ཁ་རེ། ཟན་ཞོ་ཐག་རེའི་འགྱེད། བླ་མ་དགོན་སྡེ་རྣམས་ལ་འབུལ་བ། དབུས་སུ་རི་བཤུ་ཇོ་བོ་ལ་གསེར་རྐང་གཅིག་དངུལ་རྐང་གཉིས་བཙུགས་གསེར་ཆབ་གསོལ། བལ་ཡུལ་འཕགས་པ་ཤིང་ཀུན་ལ་གདུགས་བཀྱག །དེ་ནས་རབ་ཏུ་བྱུང་
སྟེ། ཀརྨ་པ་དེ་བཞིན་གཤེགས་པ། ཞྭ་དམར་ཆོས་དཔལ་ཡེ་ཤེས། གཏེར་སྟོན་རཏྣ་གླིང་པ། འབྲི་ཁུང་བ་ཆོས་ཀྱི་རྒྱལ་པོ། སྟག་ལུང་ཡར་ཐང་གི་རཏྣ་ཀ་ར་དང་། ས་སྐྱ་བའི་རོང་སྟོན་ཆོས་རྗེ། རྗེ་བློ་བཟང་གྲགས་པ་ལ་སོགས་པ་ཕྱོགས་རིས་མེད་པའི་བླ་མ་བརྒྱ་དང་སུམ་ཅུ་ལ་ཆོས་དང་དབང་ལུང་ཞུས། འགྲམ་རྒྱས་བྲག་དཀར། ཙཱ་རི་ཀམ་པོ་གནས་ནང་སོགས་སུ་སྒྲུབ་པ་མཛད། རི་བོ་ཆེ་པ་རྫ་ངོམ་ཐམས་ཅད་དུ་ཡོལ་ལོག་ནི་ས་གདོན་གཏེར་ལྷ་ཁང་སྲེག་དུས་མགོན་པོའི་སྐུ་ལས་ཁྲག་འབབ། དམག་དཔོན་བཞི་ཡུན་མ་འགོར་བར་ཤི་བས་མཐུའི་གྲགས་པ་ཐོབ། སླར་དམག་བྱས་ནས་རི་བོ་ཆེ་པ་རྔད་པ་རྫ་པ་གླིང་ཚང་ཐམས་ཅད་བཏུལ། རི་བོ་ཆེ་ཕ་འཛུམ། གཞན་ཕལ་ཆེར་ཞབས་སུ་བཙུད། །གཞན་ཡང་ཡི་དམ་ཆོས་སྐྱོང་མང་པོ་ཞལ་གཟིགས། མགོན་པོ་ཕྱག་བཞི་པས་མི་རབས་བཅུ་གསུམ་དུ་གཏོར་མ་མཐེབ་སྐྱ་ཙམ་མ་བྱིན་ཡང་བསྟན་པ་བསྲུང་བར་ཞལ་གྱིས་བཞེས། དམ་ཅན་རྡོ་རྗེ་ལེགས་པས་གཏོར་མ་བྱིན་ན། མི་རབས་བཅུ་གསུམ་དུ་བསྟན་པ་བསྲུང་བར་ཁས་བླང་དམ་བཅས། ཇོ་བོ་ལྷ་གཡང་དཀར་པོ་ལ་སོགས་པའི་གཞི་བདག་མང་པོ་དམ་ལ་
བཏགས་། བསྟན་པ་སྲུང་བར་ཁས་བླང་སྲོག་སྙིང་ཕུལ། རྨ་ཀུང་ལུང་གནས་སྒོ་ཕྱེས། ཐོག་རྒྱུག་པ་དང་། རྡོ་རྗེ་དྲིལ་བུ་ནམ་མཁའ་ལ་བཞག་པ་དང་། རྔ་རྟེན་མེད་བར་སྣང་ལ་བཞག་ནས་བརྡུང་བ་དང་། ནམ་མཁའ་ལ་འཕུར་ནས་འདིང་སྐོར་མཛད་པ་དང་། རྡོ་ལ་ཕྱག་རྗེས་དང་ཞབས་རྗེས་མང་པོ་བཞག་པ་དང་། གཏོར་མ་འཕང་བ་རྡོ་ལ་ཕྱེད་ཙམ་ཟུག་པ་དང་། དབབ་ལ་སྡིགས་མཛུབ་གཏད་པས་བཟློག་པ་དང་། གློག་ཡུན་རིང་དུ་བཟུང་བས་ཉི་མ་ཤར་བ་ལྟར་མཛད་པ་དང་། རླུང་ཕྱག་སོར་རྩེ་ནས་ཐོན་པ་དང་། གསང་རྡོར་གྱི་ཆུ་དང་འོ་མ་ཕྱེ་བ་དང་། དབྱིས་མཚུར་བ་ཕྱག་གིས་དཀྲུགས་པས་མི་ཚིག་པ་དང་། སྦྱིན་སྲེག་དུས་ཐབ་ཀྱི་དབུས་སུ་མདའ་དར་བཙུགས་པ་མི་ཚིག་པ་དང་། སྐུ་ལུས་མི་མཐོང་བ་དང་། །སྐུ་ལུས་མེ་དཔུང་དང་ཆུ་དང་མཆོད་རྟེན་དང་རླུང་རྣམས་སུ་སྤྲུལ་བསྒྱུར་མཛད་པ་དང་། གྲུབ་ཆུ་འདོན་པ་དང་། ཕྱག་ནས་ནམ་མཁའ་ལ་ཆགས་པ་དང་། རྟེན་གསུམ་ལ་འགྱུར་བ་དང་། རྡོ་དང་དཀའ་བ་ལ་ཟུག་པ་སོགས་གྲུབ་རྟགས་དཔག་ཏུ་མེད་པ་དངོས་སུ་བསྟན། དགེ་འདུན་གྱི་སྡེ་བཙུགས། གཙུག་ལག་ཁང་བཞེངས། དགེ་ཟམ་བཙུགས་པས་ཟམ་ཤིང་
རྣམས་རང་རྒྱུག་བྱས། རྒྱ་ནག་ཏུ་ལན་གཉིས་བྱོན་པའི་དང་པོ། ཀརྨ་པ་དེ་བཞིན་གཤེགས་པའི་བླ་མཆན་མཛད་ནས་བྱོན་ཏེ། རྒྱལ་པོས་ཐུག་འདོགས་དང་གནང་སྦྱིན་རྒྱ་ཆེན་པོ་མཛད། ངོམ་པ་ལ་དགོས་པ་བྱུང་ན་རྒྱ་ནག་རྒྱལ་པོའི་དམག་འོང་ཆད་ཀྱིས་འཇ་སའི་བཀའ་ཤོག་རྒྱ་ཡིག་ལ་རྒྱ་སྐད་བོད་ཡིག་ལ་བོད་སྐད་བྲིས་པའི་ཐམ་ཡི་གེ་གནང་། །རྒྱལ་མོ་འདས་པའི་ཆོ་ག་མཛད། རྒྱལ་བུར་དབང་བསྐུར། རྒྱབ་རིས་རྒྱ་ནག་ལ་བྱོན་དུས་རྒྱ་ནག་རྒྱལ་པོ་ལ་དབང་མང་པོ་བསྐུར། རྒྱལ་བུ་ཁྲི་ཁ་ནས་བཏོན། ལས་ཀ་དང་གསེར་དངུལ་ཇ་དར་རིན་པོ་ཆེའི་རིགས་ཅི་ཕུལ་ཀྱང་མ་བཞེས་ནས། གསེར་ཤོག་ཁྲི་ཕྲག་ཕྱེད་གཉིས་ཕུལ་བ་བླང་ནས་ངོམ་ན་ལྷ་ཁང་ལ་བཏང་རྒྱུ་བསྐུར་རྒྱལ་བུ་ལ་བསྙུང་གཞི་ཐུ་མོ་གཅིག་ཡོད་པ་བསལ་བ་དང་། རྒྱ་འདྲེ་དམ་བཏགས་པ་དང་། ཆོས་གར་གསུང་དུ་མེ་ཏོག་གི་ཆར་འབབ་པ་དང་། ནམ་མཁའ་ལ་བྱོན་པ་སོགས་མཛད་པས་རྒྱ་ནག་ཐམས་ཅད་ཤིན་ཏུ་དད་པར་གྱུར་། དེ་ནས་གླང་ཆེན་འགྱིང་རིའི་རྩེ་ནས་སྐུ་ལུས་མ་བཞག་པར་དག་པ་མཁའ་སྤྱོད་ཀྱི་ཞིང་ཁམས་བདེ་བ་ཅན་དུ་འཕུར་ནས་བྱོན་ཏེ། མྱ་ངན་ལས་མི་འདའ་བ། སྐྱེ་འཆི་མེད་པ་རྡོ་
རྗེའི་སྐུ་ཐོབ་ནས་ད་ལྟ་ཡང་དངོས་སུ་བཞུགས་ནས་ཡོད་པས། དད་པ་ཅན་གྱིས་གསོལ་བ་བཏབ་ན་ད་རུང་ཡང་དངོས་སུ་མཇལ་རྒྱུ་ཡོད་པར་བཤད་དོ། །མཁའ་སྤྱོད་པའི་སྲས་ཆེ་བ་སྒམ་པོ་པ་ཆོས་ཀྱི་རྒྱལ་མཚན་ནི། སྤྱན་སྔ་སྟག་ཐོད་པའི་སྐྱེ་བ་ཡིན་ཏེ། ལོ་བརྒྱད་ནས་མི་དཔོན་མཛད། ལོ་བཅུ་གཅིག་ནས་དགྲ་ཕམ་པར་བྱས། ལོ་ཉེར་གཉིས་བར་དུ་རྒྱལ་ས་བཟུང་སྟེ། དཔལ་གཡེར་མདོ་ཁམ་སྒང་གསུམ་དུ་དྲགས་པ་གཅིག་བྱས། ཁྲབ་ཆེན་བརྒྱ་རེའི་ནང་ན་རྐང་ཤད་ཆེ་བར་དྲག །མདའི་ཡང་ཁྲབ་གཉིས་སྤྲུག་ལ་མི་འདུག་པ་ཙམ་ཤེས། གསེར་དངུལ་གྱིས་བཀའ་འགྱུར་ཆ་གཉིས། བསྟན་འགྱུར་ཆ་གཅིག །གསེར་དངུལ་སྤུ་མའི་འབུམ་ཆ་བཅོ་བརྒྱད་བཞེངས། མཁའ་སྤྱོད་པའི་སྐུ་ཚད་གསེར་སྐུ་ཁྲི་རྒྱབ་ཡོལ་དང་བཅས་པ་བཞེངས། ཇོ་བོ་ལ་གསེར་རྐང་ཅིག་བཙུགས། བལ་ཡུལ་འཕགས་པ་ཤིང་ཀུན་ལ་གདུགས་བཀྱག །དབུས་གཙང་ཁམས་གསུམ་དུ་རི་བཤུ་སོགས་མཛད། སངས་རྒྱས་བྱ་བྲལ་བ་འཁྲུངས་གཏིང་རབ་ཏུ་བྱུང་སྟེ། ཀརྨ་པ་དེ་བཞིན་གཤེགས་པ་དང་། ཁོང་རང་གི་ཁུ་བོ་གྲུབ་ཆེན་ལ་ཕྱི་ནམ་མཁའ་རྒྱལ་མཚན་དང་། ཡབ་མཁའ་སྤྱོད་པ་སོགས་ལ་ཁྲིད་དང་དབང་
ལུང་ཞུས་པས། འཆད་རྩོད་རྩོམ་གསུམ་ལ་ཐོག་པ་མེད་པའི་མཁས་པ་ཆེན་པོར་འགྱུར། དྭགས་ལྷ་སྒམ་པོར་ལོ་དྲུག །ཀརྨར་ལོ་དྲུག །ལྷ་སྟེང་དུ་ལོ་བཞི། །དྭགས་པོ་དག་འཕྲང་ཙཱ་རི་གསར་རྙིང་སོགས་སུ་ལོ་རེ་སྟེ། སྤྱིར་ལོ་ཉི་ཤུ་ལ་སྐུ་མཚམས་མཛད་པས། མཉམ་མེད་དྭགས་པོ་དང་། ཀརྨ་པཀི་སོགས་བཀའ་བརྒྱུད་ཀྱི་བླ་མ་རྣམས་དང་དངོས་སུ་མཇལ་ནས་ཆོས་གསན། རྨི་ལམ་བཟུང་ནས་བདེ་བ་ཅན་དང་སངས་རྒྱས་ཀྱི་ཞིང་ཁམས་མང་པོར་བྱོན་ནས། སངས་རྒྱས་མང་པོ་ལ་ཆོས་ཞུས། ཡི་དམ་ལྷ་ཚོགས་མང་པོ་ཞལ་གཟིགས། རྩྭ་རིའི་གནས་གསར་པ་གཅིག་གིས་གནས་སྒོ་ཕྱེས། དྲིལ་བུའི་རྩེ་ལ་རྡོ་རྗེའི་ལྟེ་བར་བསྐོར་བའི་རྫུ་འཕྲུལ་བསྟན། རྩྭ་རིའི་གངས་ལ་དགུན་ལོ་སར་སྒང་ལ་དཔོན་སློབ་བཅུ་གསུམ་གྱིས་རས་བུད་ཆུ་རས་མཛད། ངོམ་དུ་དགྲའི་དམག་ཆེན་པོ་བྱུང་དུས་མགོན་པོ་ལ་གཏོར་མ་ཕུལ་ནས་བསྐུལ་པ་མཛད་པས། དགུན་དགུ་གཏོར་ནང་དེ་ཉིད་རང་ནས་འབྲུག་ཆེན་པོ་དྲག་སྟེ། ཆར་པ་དང་གངས་སྡིབ་ཆེན་པོ་བབ་པས་དམག་ཐམས་ཅད་རང་ལོགས་སུ་བྲོས། ཆིབས་རྟ་དྲིལ་རྣམས་ལ་ཇག་པ་ཚད་པས། དོམ་ནག་པོ་ཁ་ནས་མེ་ལྕེ་འབར་
བ་བྱུང་ནས་རྟ་དྲེལ་རྣམས་འཚོ་བ་མཐོང་ནས་ཇག་པ་རྣམས་བྲོས་ཏེ། དོམ་དེ་གནོད་སྦྱིན་ཁྱེ་ཏྲ་པཱ་ལའི་སྤྲུལ་པ་ཡིན་ནོ། །རྨི་ལམ་དུ་མགོན་པོ་ཕྱག་དྲུག་པ་དཀར་སེར་དམར་ལྗང་ལྔ་ཞལ་གཟིགས་གཉིད་སད་ནས་ཀྱང་དངོས་སུ་མཇལ་སྟེ། མགོན་པོ་ཕྱག་དྲུག་པའི་བཀའ་བབ། སྣང་སེམས་གཅིག་ཏུ་འདྲེས་པ་རོ་གཅིག་ཆེན་མོ་མངོན་དུ་གྱུར། དེ་ནས་ཁྲོམ་ཁྲི་དཔོན་དང་གླིང་ཁྲི་དཔོན་རྣམས་ཀྱིས་གདན་དྲངས་ནས་སྨར་ཁམས་བུ་འབོར། ཏྲེ་ལྕགས་འགུ་ལོག་རྣམས་ཀྱི་མི་སྡེ་ལྷ་སྡེ་ཐམས་ཅད་ཀྱིས་ཆོས་ཞུས། འབུལ་ནོར་བསམ་གྱིས་མི་ཁྱབ་པ་བྱུང་བ་རྣམས་སྡེ་འཁྲུག་བསྡུམས་པ་དགོན་སྡེ་རྙིང་པ་གསོ་བ། རྒྱ་མི་ཉོ་མི་ཚོང་གི་བྲན་བསླུ་བ་དང་། ཧོར་ལྕགས་ནང་དུ་དགའ་བདེ་ལྷུན་གྲུབ་གྱི་དགོན་གསར་དུ་བཏབ། གཙུག་ལག་ཁང་ཆེན་པོ་བཞེངས། དགེ་འདུན་ཁྲི་ཚོ་ཙམ་ལ་ཁྲིད་མང་དུ་བཙུགས། མི་ནག་པ་དཔག་ཏུ་མེད་པ་ལ་ཡང་ཆོས་གསུངས། རྒྱ་ནག་ཏོང་ཀུན་རྒྱལ་པོས་རྒྱ་འབུལ་ལན་བཞི་བྱས་པའི་དང་པོ་ལ་ཇི་སུམ་བརྒྱ། གཉིས་པ་ལ་ཇ་དར་མང་པོ། གསུམ་པ་ལ་དར་ཆེན་ཡུག་སུམ་བརྒྱ་བྱུང་བ་བུ་འབོར་དགོན་ཚེ་བཅུ་གསུམ་གྱིས་ལྷ་ཁང་དང་འཚོགས་ཁང་གི་གནམ་རྒྱན་ལ་ཕུལ། །
རྒྱབ་རས་རྟ་འབུལ་བྱས་དུས་ལས་གོས་བྱི་བ་ནག་པོའི་ཐུལ་བ། ལས་ཞྭ་ཞྭ་ནག་ཁྱུང་གཤོག་གསེར་མདོངས་ཅན་ལ་ནོར་བུ་པདྨ་རཱ་གའི་འཕྲུ་བཙུགས། ལས་ཆེན་གསེར་གྱི་ཐམ་ཁ་ནོར་བུའི་ལུང་ཐག་ཅན། ལིང་ཚེ་བཞི་པ། བཀའ་འགྱུར་པར་མ་ཟིན་ཏ་ཧུའི་སྐུ་འཆིང་སྲིས་བཅོ་བརྒྱད་སླེབ་པ། ནང་དུ་དར་ཆེན་དང་ཟ་འོག་སྦྲག་མ་རེ་ཕྱི་ན་རྒྱ་ཕྱིང་དམར་པོའི་ཤུབས་རེ། སྒམ་དམར་ལ་གསེར་གྱི་གཟེ་ལྕགས་རེ། དེ་རྒྱབ་སྒམ་ནག་ལ་ལྕགས་ཀྱི་གཟེ་ལྕགས་ཡོད་པའི་པོ་ཏི་བརྒྱ་དང་བཞི་བྱུང་བ། ད་ལྟ་འགའ་བདེ་ལྷུན་གྲུབ་དགོན་ན་བཞུགས། གཞན་ཡང་སྒ་ཤུབས་གདན་དམར་མཇལ་ས་འཇའ་ལྕེ་སོགས། རྒྱ་ནག་གི་ལས་ཀ་ཐམས་ཅད་བླངས། དེ་ནས་ངོམ་ནས་ལྷོ་ན་ཀརྨ་པ་མཐོང་བ་དོན་ལྡན་མཇལ་དུ་བྱོན། ལྷོའི་མི་སྡེ་ལྷ་སྡེ་ཐམས་ཅད་ལ་ཆོས་གསུང་རི་བོ་ཆེ་ན་ཆོས་རྗེ་མི་གཡོ་མགོན་པོའི་ཁྲི་ཟུར་གཡས་པ་མཛད། རི་བོ་ཆེའི་མཁན་སློབ་དང་རྒྱས་རྡོར་བ་ཐམས་ཅད་ཀྱིས་སྒམ་པོ་ལ་ཆོས་ཞུས་པས། རྟོགས་པ་འཁྲུངས་པ་མང་དུ་བྱུང་། དེ་ནས་ངོམ་དུ་བྱོན་ངོམ་བླ་ཆེ་ཆུང་སོགས་སློབ་མ་ཡང་མང་དུ་བྱུང་། ས་སྒང་དུ་ཡབ་ཀྱི་གདན་ས་ལ་བཞུགས་ས་ལ་བྱོན་ནས།
ཀརྨ་པའི་སྒར་རེད་དོམ་སྒམ་པོའི་སྒར་རེད་ལྟོས་ཤོག་ཟེར་བ་ཙམ་གྱིས་སྒར་ཆེན་ཡོད་སྐད། དེ་ནས་ས་སྒང་གི་གདན་ས་ལ་བཞུགས་ནས་ཡུན་མི་རིང་བར་ཞིང་བརྗེས་ཏེ། གདུང་བཞུས་དུས་ནམ་མཁའ་གཡའ་དག་པ་ལ་འཇའ་ཚོན་ཁ་དོག་སྣ་ཚོགས་ཀྱིས་གང་བ་དང་། མེ་ཏོག་གི་ཆར་བབ། རིང་བསྲེལ་ཁ་དོག་མི་འདྲ་བ་ཉིས་བརྒྱ་ཙམ། ཆེ་ཆུང་ཐུབ་པའི་རིང་བསྲེལ་ཙམ་བྱོན་ནོ། །ཐུགས་རྩོམ་པོ་ཏི་དྲུག །མགུར་འབུམ་པོ་ཏི་དྲུག་སྟེ། བཀའ་འབུམ་པོ་ཏི་བཅུ་གཉིས་ཡོད་དོ། །སྒམ་པོའི་སྲས་ནི་བྱ་བྲལ་ཀུན་དགའ་བཀྲ་ཤིས་ཡིན་ཏེ། གཞོན་ནུའི་དུས་ནས་ཕྱག་བཞི་པ་དང་། ལས་མགོན་བྱ་རོག་གདོང་ཅན་རྣམས་ཀྱི་ལྷ་རྟགས་གསལ་པོ་ཡོད་ཅིང་། ཁྱུ་མོ་རྟ་བརྒྱ་མ་ཁབ་ཏུ་བཞེས་པ་ལས། སྲས་ལྷ་རྒོད་རྒྱལ་འཁྲུངས། ནོར་མ་བ་བུ་མོ་གཅིག་ཡོད་པ་ལ་སྲས་གཅིག་བྱུང་བ་ནི་གདོང་མགོན་པོ་རྒྱལ་ཡིན་ནོ། །བྱ་བྲལ་བ་འདི་ནི་ལོངས་སྤྱོད་ཤིན་ཏུ་ཕྱུག་པས་སྦྲ་ཁང་དང་གནས་གཞི་མང་དུ་ཡོད་ཅིང་། རྟ་བཞག་ས་ལ་རྟ་ཁོང་དང་། ལུག་བཞག་ས་ལ་ལུག་ར། མཛོ་བཞག་ས་ལ་མཛོ་ར་ཞེས་པ་ས་ཆ་ལ་མིང་ཐོག་པ་བྱུང་། དགོང་སྟོད་རྫོང་རུ་རྫོང་གཉིས་བརྩིགས། ས་སྒང་དུ་བསྐལ་
བཟང་གི་བཀོད་པ་སངས་རྒྱས་སྟོང་སྐུ་གསེར་མ་བཞེངས། དུས་གསུམ་སངས་རྒྱས་ཀྱི་སྐུ་ལྷ་ཁང་གི་རྩིག་དང་མཉམ་པ་བཞེངས་ནས་རི་བོ་ཆེའི་ལྷ་ཁང་དུ་བཞག །བུ་འབོར་དགོན་ཚེ་བཅུ་གསུམ་གྱི་དགེ་བཤེས་བཟང་བ་སུམ་བརྒྱ་གདན་དྲངས་ནས་ཞག་བཅུར་ཆོས་འཁོར་བཙུགས་པའི་སྦྱིན་བདག་མཛད། དབུས་ཚང་ལ་རི་བཤུ་དང་། སེ་འབྲས་གསང་གསུམ་རི་བོ་དགའ་ལྡན་རྣམས་ལ། མང་ཛ་རྒུན་འགྱེད་དར་འགྱེད། དགའ་ལྡན་ཆོས་རྗེ་ལ་གསེར་གྱིས་མཎྜལ་ཕུལ། ཇོ་བོ་རིན་པོ་ཆེའི་དབུ་ལ་གསེར་ཞོ་ཉིས་བརྒྱ་ལ་བརྡུང་བའི་རྒྱལ་མཚན་གྱི་རྩེར། དངུལ་སྲང་སུམ་ཅུ་ལས་བྱས་པའི་ནོར་བུའི་ཏོག་ཡོད་པ། ལྟེ་བ་ལ་གསེར་གྱི་པདྨ་འདབ་བརྒྱ་ལོགས་ལ་སངས་རྒྱས་ཀྱི་སྐུ་བརྒྱ་ཆུ་ཚང་བ་གཅིག་ཕུལ། དེ་ཡང་ཨོ་རྒྱན་རིན་པོ་ཆེའི་ལུང་བསྟན་ལས། པདྨའི་གྲོ་ལ་ཕྱག་ཚང་སྐྱེས་བུ་ཁྱོད། །ཀུན་དགའི་མིང་ཅན་ཁམས་ཀྱི་ངོམ་དུ་འབྱུང་། །ཞེས་གསུངས་པས་བྱ་བྲལ་བ་ཀུན་དགའ་བཀྲ་ཤིས་འདི་ནི་ཨོ་རྒྱན་རིན་པོ་ཆེའི་གསོལ་དཔོན་གྱི་སྐྱེ་མཐའ་ཡིན་པར་མངོན་ནོ། དེ་ནས་བྱ་བྲལ་བ་རབ་ཏུ་བྱུང་སྟེ་གསུང་རབ་ལ་སྦྱངས་བས། མདོ་སྔགས་ཐམས་ཅད་ལ་ཤིན་ཏུ་མཁས་པར་གྱུར། ཡབ་
སྒམ་པོ་ལ་ཆོས་ཞུས་པས་དུ་མ་རོ་གཅིག་གི་རྟོགས་པ་འཁྲུངས། སྐུ་མཚམས་མཛད་པས་སངས་རྒྱས་དང་བྱང་ཆུབ་སེམས་དཔའ་མང་པོ་ཞལ་གཟིགས། ཏེ་ལོ་ནཱ་རོ་མར་པ་མི་ལ་དྭགས་པོ། དུས་གསུམ་མཁྱེན་པ། ཀརྨ་པཀྱི་རང་བྱུང་རྡོ་རྗེ། དེ་བཞིན་གཤེགས་པ། མཁའ་སྤྱོད་པ་ནམ་མཁའ་རྒྱལ་མཚན་རྣམས་ཞལ་གཟིགས་ནས། འོད་གསལ་ཕྱག་རྒྱ་ཆེན་པོའི་ངོ་སྤྲོད་གནང་། བེར་ནག་ཅན་དང་ཕྱག་བཞི་པ་དང་། ཕྱག་དྲུག་པ་དང་། གུར་གྱི་མགོན་པོ་དང་དཔལ་ལྡན་ལྷ་མོ་རྣམས་ཞལ་གཟིགས། དམ་ཅན་རྡོ་རྗེ་ལེགས་པ་སྒྲུབ་པས་དངོས་སུ་འགྲུབ་ནས། རིགས་རྒྱུད་འཕེལ་བའི་དངོས་གྲུབ་ཕུལ། གཅིག་ཤེས་ཀུན་ལ་མཁས་པའི་མཁྱེན་པ་རྒྱས། བྱང་ཆུབ་ཀྱི་སེམས་གཉིས་ཐུགས་ལ་འཁྲུངས། བསླབ་པ་གསུམ་གྱི་རྒྱན་དང་ལྡན་པས། མཁན་བཙུན་བཟང་གསུམ་འཛོམ་པའི་དྲུང་པ་བྱ་བྲལ་བ་ཀུན་དགའ་བཀྲ་ཤིས་ཞེས་ཡོངས་སུ་གྲགས་ཏེ། རི་བོ་ཆེ་པའི་ཆོས་རྗེ་མགོན་པོ་ཡེ་ཤེས་ཀྱིས་ཁྲི་ཟུར་གཡས་པ་མཛད་ནས། རི་བོ་ཆེའི་སྒོམ་གྲྭ་ལ་གཏེ་ཁལ་བརྒྱད་ཅུ་ཕུལ་བ་དང་། ལོ་རེ་བཞིན་རི་བོ་ཆེ་ན་མགོན་པོའི་མདོས་ཆེན་བཅུ་སོགས་བཅས་ནས། ལྷ་རྟ་ལྷ་གཡག་རྩེན་ནི་རྒྱུན་
པ་སོགས་མཛད། ཕྱིས་འདས་དུས་ཀྱང་ཐུགས་ལྗགས་རིང་བསྲེལ་འཇའ་མེ་ཏོག་སོགས་བྱུང་སྟེ། བླ་རབས་གསུམ་པོ་དེ་ལ་དྲུང་གོང་འོག་གསུམ་ཟེར་ཏེ། འགྲན་ཟླ་དང་བྲལ་བའི་མཁས་གྲུབ་ཆེན་པོ་ཡིན་ནོ། །བྱ་བྲལ་ཁམས་ཤས་ཝ་ཟེར་བ་ཡིན། དབུ་སྐྲ་ཁམ་པ་སྤྱན་ལ་སྐྱ་ཤེལ་གཅིག་ཡོད་པས། དེ་སྐད་ཟེར་རོ། །བྱ་བྲལ་བའི་སྲས་ཆེ་བ་ལྷ་རྒོད་རྒྱལ་ནི་དཔལ་རྩལ་སྟོབས་དང་ལྡན་ཏེ། དམག་རིག་གིས་དགྲ་སྡེ་ཐམས་ཅད་བཅོམ་པ་དང་། རྨོའི་ཉིན་མཁར། རྨོ་མདའི་ཐང་མཁར། གནས་མདོའི་རྫོང་། སྐྱག་རྡོའི་མཁར་དང་བཞིའི་རྨིང་ཉིན་གཅིག་བཞག །དེ་ཉིན་ནུ་བོ་མགོན་པོ་རྒྱལ་གྱིས་སོ་ཐོག་རྫོང་དབི་རྫོང་གཉིས་རྨིང་བཞག་སྟེ། རྫོང་དྲུག་ཉིན་གཅིག་ལ་རྨིང་བཞག །ལྷ་རྒོད་རྒྱལ་གྱིས་གསེར་དངུལ་གྱི་རྒྱས་འབྲིང་རྣམས་གསུམ་པོ་ཏི་བཅོ་བརྒྱད་བཞེངས། རྫོང་གསུམ་གྱི་རྩེར་ལྷ་ཁང་གསུམ་བཀའ་བརྒྱུད་གསེར་ཕྲེང་གི་འདག་སྐུ་བཞེངས། བོད་མགོན་པོ་གཉིས་ཀྱི་གསེར་ཐང་བཞེངས། རྗེ་མོས་སྒྲོན་མ་ཉི་ཤུ་རྩ་གཅིག་གསེར་ཐང་བཞེངས། ངོམ་ཆུ་ལ་ཟམ་བཙུགས། ཚ་བ་དགོན་གི་ལུག་ཕུད། སྤྱིས་ཟའི་ཚ་ཕུད། ཚ་མ་རྫོང་ཁའི་དངུལ་
ཕུད། ཚ་སྒ་ཚོང་ཕུད་ལ་དབང་བས་མི་ཆོས་ཀྱི་གྲགས་པ་ཆེ་ཞིང་། དཔོན་འབྲོག་ཞིང་བ་དང་། དཔོན་མཚལ་ཟ་བ་དང་། དཔོན་དབྱིབས་རང་ཝ། རྡོ་ཡ་བ་དང་བཞི། ལྷ་རྒོད་རྒྱལ་གྱི་བློན་པོ་བཞི་ཡིན་ནོ། །སྟག་ལུང་དབོན་མོ་སོགས་རྗེ་མོ་མང་དུ་ཡོད་ཀྱང་སྔ་ཐོག་སྲས་པོ་མ་བྱུང་ནས། ཡོར་ནས་རྒྱས་པ་འབུམ་ཟེར་བ་ཅིག་བསུས་སུ་བཞག །དེ་རྗེས་རོང་བཟའ་མ་ལ་མི་དཔོན་དབང་ཕྱུག་རྒྱལ་མཚན་བཞུགས། ལྷ་རྒོད་རྒྱལ་ནི་གར་འབྱོན་ཡང་ཁྲབ་ཆེན་སུམ་ཅུ་ཙམ་གོ་བསྟར་ནས་འབྱོན། སྐུ་རིམ་མགོན་ཁང་བ་ཨ་མྱེ་ཁྲོ་བོ་མགོན་པོ་ཞེས་བྱ་བ་ཡེ་ཤེས་ཀྱི་མགོན་པོ་རྒྱུན་དུ་ཞལ་གཟིགས་ཤིང་། མགོན་པོའི་ཚོགས་བྱེད་དུས་སྡེ་ཕས་ཚོགས་བཀྱག་སྟེ། ཡོན་མཆོད་གཉིས་ཀས་མཐོང་བར་ནམ་མཁའ་ནས་ཡེ་ཤེས་མགོན་པོས་གྲི་གུག་གཡུགས་པ་དངོས་སུ་མཐོང་བ་ཡོད་དེ་ལོ་བཅུ་གསུམ་མཚམས་མཛད་ནས་བེར་མགོན་གཉིས་བསྒྲུབས་པས་གཞི་བདག་རྒན་མོའི་གཟུགས་ཀྱིས་མཚམས་ཁུང་ལ་རྒྱུན་དུ་འོ་མ་འདྲེན་པ་དང་རྫས་ལ་བསྟན་པ་གཟེ་ཐད་ཀྱིས་རི་བསྙིལ་བར་གྲགས། དེའི་མཆོད་ཞིང་ལ་ད་ལྟའང་སྔགས་ཞིང་ཟེར། ཀརྨ་པ་ཆོས་གྲགས་རྒྱ་མཚོ་དང་སྤར་འོད་ཟེར་བླ་མ་སོགས་གདན་
དྲངས་ནས་འབུལ་བཞག་དང་། ལྷ་ཁང་མཁར་རྣམས་རབ་གནས་མཛད། རྗེ་མི་བསྐྱོད་རྡོ་རྗེ་གློ་ལ་ན་འཁྲུངས་པ་ལ་རྟ་དང་འགབ་ལུ་ཅིག་ཕུལ་རྒྱུ་བསྐུར་ནས་སྲས་མོས་མཇལ་བས། དེ་ཉིན་མེ་ཏོག་གི་ཆར་བབ། སྲས་བྱ་བྲལ་བས་ནཱ་རོ་ཆོས་དྲུག་ཞུས་ནས། རླུང་བཟུང་འཁྲུལ་འཁོར་མཛད་དུས་མཁར་གྱི་སྲོག་རྫོང་འདར་ཅུམ་ཅུམ་བྱེད་ཅིང་བསྒོམས་པས། ཉམས་དང་རྟོགས་པ་བཟང་པོ་འཁྲུངས་ནས་དགོང་ལོ་ཡང་བརྒྱད་ཅུ་གྱ་གཉིས་ཙམ་ཐུབ། འདས་གདུང་བཞུས་པས། ཐུགས་ལྗགས་སྤྱན་གསུམ་རིང་བསྲེལ་སིལ་བུ་ཡུངས་ཀར་ཙམ་དཔག་ཏུ་མེད་པ་སྔོན་པོ་སེར་པོ་སོགས་བྱོན་ནས། ལྷ་རྒོད་རྒྱལ་གྱིས་བསུས་བུ་རྒྱ་འབུམ་སྐྱེ་སྟོད་ན་ཕོག །ཆོས་སྐྱོང་རྒྱལ་དང་ཨ་ནུ་མགོན་འགྲོགས་གཉིས་གཅིག་ཡིན་ནོ། །ཤེས་ཁ་འཁྱིམ་ནས་རྒྱུད་ཆད་པ་མ་ཁ་རྣམས་ཕལ་ཆེར་ཆབ་མདོ་གླིང་སྟོད་དང་ཞྭ་ཁམས་པ་ལ་ཕུལ། ལྷ་རྒོད་རྒྱལ་གྱི་སྲས་དབང་ཕྱུག་རྒྱལ་མཚན་གྱིས། གསེར་དངུལ་གྱི་མདོ་སྐལ་གཉིས་གསེར་འོད་རྣམས་བཞེངས། རྡོ་རྗེ་ཕྲེང་བའི་དཀྱིལ་ཐང་ཚང་མ་བཞེངས། གཡོག་པོ་གཅིག་རྒྱུན་དུ་འདམ་པ་བསྣག་མི་བཞག་ནས་ཁོང་རང་དཔོན་རྗེ་གཉིས་དུས་རྒྱུན་དུ་ཚ་ཚ་ལ་
ཐུགས་དམ་མཛད་པས། མཁར་གྱི་རྩག་འོག་མ་ཕལ་ཆེར་ཚ་ཚས་གང་བར་མཛད། ལྷ་ཁང་རྣམས་ལ་མར་མེ་ཡོན་ཆབ་དང་། བླ་མ་བཤེས་ཁྱམ་པ་ཚང་ཟེར་བའི་རྙིང་མ་བ་སྤ་སྐྱ་དགོན་པ་དང་བཅས་པའི་ཡོན་བདག་དང་དགོན་བདག་མཛད། རྒྱུན་དུ་ཡང་ཐུགས་དམ་མཛད་ཅིང་སྐུ་ཚེ་མཐར་ཕྱིན་ནས་འདས་དུས། ཐུགས་ལྗགས་སྤྱན་གསུམ་འབྲེལ་མ་དང་རིང་བསྲེལ་སོགས་བྱོན་ནོ། །དབང་ཕྱུག་རྒྱལ་མཚན་གྱིས། རྗེ་མོ་དཀར་ཟ་དང་། ནག་རོང་མ་དང་མགོན་སྒྲོན་མ་སོགས་མང་དུ་བསུས་ཀྱང་། སྔ་ཐོག་སྲས་མེད་ནས། གསེར་འོད་བཞེངས་པ་སོགས་བྱས་པས། ཐོན་བུ་ཆེ་བ་ཆོས་སྐྱོང་རྒྱལ། བུ་དྲུང་རྗེ་མོ་དཀར་ཟའི་སྲས་མགོན་པོ་རྒྱལ་དང་མགོན་པོ་དབང་ཕྱུག་གཉིས་ཏེ་གསུམ་བྱུང་། ཆོས་སྐྱོང་རྒྱལ་གྱི་རྩེ་སྟོད་རི་བོ་ཆེ་པའི་ཨ་ཁུ་ཚ་བོ་མཛད་པས། མིང་ཨ་ཁུ་ཚ་བོ་ཐོགས། སྲས་མང་དུ་བྱུང་ཡང་མ་སོས་སྲས་མོ་ལ་དབོན་མོ་ཐུགས་ཁུར་མ་བྱུང་ཨ་ཁུ་ཚ་བོའི་མ་ཁ་ཇོ་བོ་རྗེའི་ཐུགས་དང་བཅས་པ་གླིང་སྟོད་པ་ལ་ཕུལ། སྲས་མོས་ཐུགས་འབུལ་རྒྱུ་ཁུར་ནས་སོང་བས། དབོན་མོ་ཐུགས་ཁུར་མར་མིང་ཐོགས་ཡང་ཟེར། བུ་འབྲིང་བ་མགོན་པོ་དབང་ཕྱུག་ནི། གྲུབ་མཐའ་ཕྱོགས་
མཐའ་ཕྱོགས་གཅིག་ཏུ་གླེགས་བམ་གྲུ་བཞི་ཆུང་བ་གཅིག་བྱས་ཏེ། དེ་མཆན་ཤལ་དུ་བྱས་ནས་དེ་ཁོ་ན་འདོན་པ་ལ་ཐུགས་དམ་མཛད། སྐུ་ཚེ་མཐར་ཕྱིན་ཏེ་འདས་དུས། ཐུགས་ལྗགས་སྤྱན་གསུམ། སྙན་རྣམས་བྱོན། དབུ་ཐོད་ཅིག་་མ་ཚིག་པར་ཡར་བར་ཡི་གེ་ཧཱུྃ་ཡིག་གསལ་པོར་བྱོན་ནོ། །མགོན་པོ་དབང་ཕྱུག་གི་སྲས་ཨ་ནུ་བཀྲ་ཤིས་དབང་ཕྱུག་ཡིན་ནོ། །ལྷ་རིས་མཁས་པས་ཨ་ནུ་ལྷ་བཟོར་མིང་ཐོགས། ས་རིས་དང་ནག་རྩིས་དང་སྒྲ་མཚམས་སྦྱོར་ལྔ་པ་དང་། ཡིག་རིས་སོགས་ཡོན་ཏན་མང་དུ་མཁྱེན། བོ་དོང་བའི་བླ་མ་རྩང་པ་བསོད་ནམས་གྲགས་པ་དང་། རི་བོ་ཆེའི་བླ་མ་ཚེ་སྲོག་པ་དབང་ཕྱུག་དང་། བྱང་བདག་བཀྲ་ཤིས་སྟོབས་རྒྱལ་སོགས་བསྟེན་ནས། བཀའ་གསར་རྙིང་གི་སྔགས་ཆོས་མང་པོ་ལ་མཁས་པར་མཛད། སྐུ་གསུམ་སྒྲུབ་པ་ཟླ་བ་དྲུག་དང་དྲག་པོའི་གསང་སྒྲུབ་ཟླ་བ་དྲུག་དང་། ཕྱག་བཞི་པའི་བསྙེན་པ་ཟླ་བ་གསུམ་ལ་ལན་གསུམ་སོགས་བསྙེན་སྒྲུབ་དཔག་ཏུ་མེད་པ་མཛད། སྣང་བ་མཐའ་ཡས་ཐུགས་རྗེ་ཤཱཀྱ་ཐུབ་པ་རྣམས་རྨི་ལམ་དུ་ཞལ་གཟིགས། མཁའ་སྤྱོད་པ་རྨི་ལམ་དུ་མཇལ་ནས། མཁའ་སྤྱོད་དུ་ཨེ་འགྲོ་གསུངས་པས། ད་ལྟ་མི་འགྲོ་
ཤི་དུས་འོང་ཞུས་པ་སོགས་དག་སྣང་མང་པོ་དང་། ཆིབས་པ་རྐུ་མས་ཁྱེར་བ་ལ་དྲེགས་པའི་འཁོར་ལོ་བསྐོར་བས། སྤྲེའུས་མེ་འབུད་པ་དང་། ཁྱིམ་དུ་རྫ་ཕོར་རྒྱུག་པ་དང་། རྟ་ལ་མེ་འབར་བ་དང་། ཐོག་བརྒྱབས་ནས་བུད་མེད་གཅིག་དང་དུད་འགྲོ་འགའ་རེ་བསད་པ་བྱུང་བས། རྐུ་མས་རྟ་ཚུར་ཕུལ། མར་ཐུད་རྒྱབ་གཅིག་ཕུལ་ནས་དབང་ཞུས་བཀའ་བསྒོ་དང་རལ་པ་ལ་ཕྱག་མདུད་བརྒྱབ་ཀྱང་མ་ཕན་པར། དེ་ཚང་གཏན་བརླག་ལ་སོང་བས་མཐུ་ཆེ་བའི་གྲགས་པ་ཐོབ། ཡང་དཔོན་རིགས་གཅིག་གི་བུ་མོ་ཁོང་ལ་གཏད་ཆད་བྱས་ནས་མ་བྱིན་པ་ལ། དྲེགས་པ་བསྐོར་བས་བུ་མོ་དེས་བུད་མེད་བྱི་རུ་ཁོ་ནས་བརྒྱན་པ་གཅིག་གི་ང་ཤོག་ནས་ཡིད་ལ་མ་ཟིན་པ་ཡང་བྱུང་སྟེ། ཆུ་འབོགས་པས་ཆུས་ཁྱེར་ནས་ཤི་བ་དང་། དཔོན་རིགས་གཅིག་དང་འགྲས་པ་ལས་སྦྱོར་བྱས་པས། དེའི་དང་པོ་བུ་ཤི་དེ་ནས་ཁོ་རང་དམར་བཤལ་གྱིས་ཤི་དེ་ནས་བུ་མོ་ཤི་བ་དང་། རྐུན་མས་གཏོར་སྒམ་ལ་གྲི་ཚག་བྱས་པ་ལ་ལས་སྦྱོར་བྱས་པས་མྱུར་དུ་ཤི་བ་དང་། དྲེགས་པའི་ཆུ་འཁོར་བསྐོར་བས་རྫས་ཚོ་བྱིསྦ་གཅིག་གིས་ཁྱེར་བས་དེ་ཧུར་ཐུམ་དུ་ཤི་བ་དང་། གཞན་ཡང་འགྲས་ཚོལ་བ་མང་དུ་བྱུང་བ་ཐམས་ཅད་གཏན་
བརླག་ཏུ་སོང་བ་དང་རྫས་ལ་བརྟེན་ནས་རྨོ་ན་རི་བསྙིལ་བ་དང་གྲུབ་ཆུ་བསྟན་པར་ཡང་གྲགས། ཁོ་རང་ལྷ་རྒོད་རྒྱལ་གྱི་སྐྱེ་བ་ཡིན་པས་ང་མཁར་འདི་ལ་བད་ཁ་གྱིས་དང་ང་དགའ། ལྷ་རྒོད་རྒྱལ་གྱི་དམག་ཇག་མང་པོ་བྱས་ནས་སྡེ་བཅོམ་པའི་རྣམ་སྨིན་གྱིས་ང་ནོར་དབུལ་བ་ཡིན་པ་འདྲ་གསུངས། ཞི་ཁྲོ་དང་དབང་ལུང་ཡང་འགའ་རེ་མཛད། དེའི་སློབ་མ་ཁོ་རང་གི་ཚ་བོ་པདྨ་དབང་དྲག །བླ་མ་ཞིག་པོ་ཟེར་བའི་འཁྲུལ་ཞིག་པ། སྡོམ་པ་དམ་ཚིག་གཙང་ཞིང་བསྙེན་སྒྲུབ་དཔག་ཏུ་མེད་པ་ཐོན་པས་དབང་བསྐུར་བ་སོགས་འགྲོ་དོན་ཅུང་ཟད་ནུས་པ་ཅིག་བྱུང་བ་དང་། སྐྱོ་སྡེ་བ་ཚེ་རིང་འབུམ་གྱིས་དབང་ལུང་གདམས་ངག་ཐམས་ཅད་ཞུས་ནས་རྩ་བའི་བླ་མར་འཛིན་ཏེ། སྐུ་ཚེའི་སྨད་ལ་བཀུར་ཏི་ཞབས་ཏོག་ཕུན་སུམ་ཚོགས་པར་མཛད། དེ་མོ་སྐུ་སྐྱེ་ལྷ་དབང་ཕྱོགས་ལས་རྣམ་རྒྱལ་ལ་བྱང་བདག་པོས་ལུང་བསྟན་ནས། གཉེར་པ་དང་གྲྭ་པ་སུས་ཀྱང་མ་ཚོར་བར་ལྐོག་ཏུ་ལྷ་ཆེན་དབང་ཕྱུག་ཆེན་པོའི་དགྲ་མནན་སྐོར་གྱི་དབང་ལུང་རྣམས་ཞུས་ནས། ལྐོག་ཏུ་དར་ཡུག་གཉིས་གནང་། ཐུགས་རྩོམ་སྐོར་ལ་པོད་ཆུང་གཅིག་ཡོད། ཞལ་ཐང་མང་དུ་བཞེངས། ཟངས་མདོག་དཔལ་རིར་ཐེ་ཚོམ་
མེད་པར་འགྲོ་གསུངས་ནས་དགོང་ལོ་བརྒྱད་ཅུ་གྱ་གཉིས་པ་ལ་ཟངས་མདོག་དཔལ་རིའི་སྨོན་ལམ་དང་བདེ་བ་ཅན་གྱི་སྨོན་ལམ་བརྩམས་ནས། ལེའུ་བདུན་མ་ཐོན་གསུངས་ནས་བཏོན་པས། ཙིཏྟ་ཨོ་རྒྱན་ཡུལ་དུ་ཕེབས་པ་དང་། །རྟེན་འབྲེལ་ཁྱད་པར་ཅན་ལ་གསོལ་བ་འདེབས། །ཟེར་བའི་ཚིག་འཕྲོད་དང་དུས་མཉམ་འདས། ཞག་བདུན་གསུམ་ལ་ཐུགས་དམ་ལ་བཞག །གདུང་བཞུས་པས་ཀུན་ཏུ་བཟང་པོའི་སྐུ་ཨོ་རྒྱན་པདྨའི་སྐུ་ཨ་ཡིག་རིང་བསྲེལ་ཞུན་ཐིག་མང་པོ། ཐུགས་ལྗགས་སྤྱན་གསུམ་གདུང་ཤ་རི་རམ་མང་པོ་བྱོན། ཨ་ནུ་ལྷ་བཟོ་ལ་སྲས་གསུམ་ཡོད་པའི་ཆེ་བ་ཀརྨ་བདེ་གཤེགས་ནི་ཐུགས་དམ་མེད་ཀྱང་སྒོམ་པ་བྱེད་པ་ལ་གདུང་རྒྱུད་ཀྱི་གནད་ཀྱི་འགྲིམ་ཞིང་ཕན་ཐོགས་ཆེ་ཟེར། འབྲིང་བ་དོན་གྲུབ་རྒྱལ་ནི་སྡེ་བ་ཚེ་རིང་ཡབ་སྲས་ཀྱི་ཆག་ཕྱིར་འབྲང་། ཆུང་བ་ཀརྨ་མི་མཆོག་ནི་འཁྲུངས་དུས་ཀྱང་འཇའ་ཡི་ཀ་བ་ཟུག །ཡབ་ཀྱིས་ཀྱང་འདི་ལ་བླ་མ་ཅིག་འོང་གསུངས་ལྟར། བླ་མ་ཀརྨ་རིན་ཆེན་ལ་དབང་ལུང་གདམས་ངག་མང་དུ་ཞུས་རྙིང་མའི་སྐོར་དང་ཕ་ཆོས་ཡབ་དང་ཨ་ནུ་པད་དབང་ལ་ཡང་མང་དུ་ཞུས་ནས། ཞྭ་དམར་བ་ལ་བསྙེན་པར་རྫོགས། ཡང་རིར་གྲངས་བཅས་ཤིང་བླ་
མ་ཀརྨ་རིན་ཆེན་གྱི་གདན་ས་ཟུན་པར་བཞུགས་ནས་མཚམས་སྒྲུབ་དང་འགྲོ་དོན་འཕེལ་ལོ། །མགོན་པོ་རྒྱལ་མཚན་ཡན་ཆད་ཀྱི་དབོན་མོ་རྣམས་ཀྱང་ཕག་མོའི་ཆོ་ག་དང་ཚོགས་དང་། སྒྲོན་མ་ལ་ཐུགས་དམ་བྱེད་པས་འཆི་དུས་རྟེན་རིང་བསྲེལ་འབྱོན་པ་ཤ་སྟག་བྱུང་ཟེར། དབང་ཕྱུག་རྒྱལ་མཚན་གྱི་སྲས་ཆུང་བ་ནི་མགོན་པོ་རྒྱལ་མཚན་ཡིན་ཏེ། བྱ་བཏང་ཀུན་དགའ་དཔལ་འབྱོར་དང་། རེ་ནེ་ཆོས་རྗེ་གིང་རི་ནང་སོ་དང་། སི་ཏུ་བསོད་ནམས་རྣམ་རྒྱལ་དང་། བླ་མ་དགོངས་འདུས་པ་སོགས་ལ་དབང་བཀའ་ལུང་ཞུས་ནས་དུས་རྒྱུན་དུ་ཕག་མོ་བེར་ནག་ཅན་འཁོར་ལྔ་བདེ་མགོན་འགུ་རུ་ཞི་དྲག །གཤིན་རྗེ་ཁྲོ་ཆུ་སོགས་ལ་ཐུགས་དམ་རྔ་བརྡུང་རྒྱུན་མ་ཆད་པར་མཛད། ཕག་མོ་ལ་བསྙེན་པ་ས་ཡ་གཅིག་མཛད་པས་རྨི་ལམ་ན་ཕག་ནག་པོ་སྤུ་རྩེ་ན་ཚྭ་ཚྭ་འཐུལ་བ་ཞིག་ཁོང་གར་འགྲོའི་རྗེས་སུ་འགྲོ་བ་དང་། ཁྲོ་ཆུའི་བསྙེན་པ་ས་ཡ་གཅིག་མཛད་པས་རྨི་ལམ་ཁོང་རང་གཤིན་རྗེ་ཁྲོ་ཆུར་དངོས་སུ་གྱུར་ནས་འཕུར་ཏེ་དབུས་ཀྱི་རི་བོ་མཆོག་རབ་ལ་བསྐོར་བ་གསུམ་བྱས་ཏེ། ས་ལ་བབ་དུས་སྐུ་པདྨ་ཕུར་པ་དེས་དགྲ་བགེགས་བསྒྲལ་དགོས་བསམ་ནས་བབ་པས་གཉིད་པ་དང་། ཇོ་བོ་རྗེའི་
ཐུགས་མཆན་ཤལ་མཛད་ནས་ཆབ་མདོར་བྱོན་དུས། གཡོ་རྫོང་དུ་ཞག་མལ་བྱས་ཏེ། དེ་ནུབ་སྦྲུལ་ནག་བསམ་གྱིས་མི་ཁྱབ་པས་མིག་ནས་ཚྭ་ཚྭ་ཐུལ་བ་གཅིག་གིས་ཕ་ཟད་ནས་དངོས་སུ་གཅུད་བརྒྱབ་ནས་བྱུང་བས། འགུ་རུ་དྲག་པོ་ཁྱུང་གི་དབུ་རྒྱན་པའི་བསྐྱེད་རིམ་བྱས་པས། དེ་མ་ཐག་སྦྲུལ་དེ་མེད་སོང་། དེ་མ་ཐག་ས་གཞི་ཐམས་ཅད་རྒྱ་མཚོ་ནག་ལྟེམ་མེ་བ་ཞིག་རེད་ནི་ཐལ། དེ་མ་ཐག་དར་ཅིག་དང་སྐད་དོ་ཆག །དར་དེ་ཁག་ཁག་ཟེར་ནས་ནམ་མཁའི་དབྱིངས་སུ་བཀྱགས་པས་དར་དཀར་པོ་གདུགས་དྲིལ་བུའི་གཡེར་ཁ་སི་ལི་ལི་ཁྲོལ་བ་གཅིག་རེད་ནས་ཐལ། འོག་རྒྱ་མཚོའི་དེའི་ནང་ནས་ཉ་བོ་ཆེའི་མགོ་ཆེ་ཆུང་ཁང་པ་ཙམ། མདོག་སེར་པོ་མིག་ཁྲོ་བོའི་སྤྱན་འདྲ་བ་དང་། གདོང་པ་ལུག་འདྲ་བ། སྣ་དང་རྣ་བ་མི་ཡི་སྣ་དང་རྣ་བ་ལ། གསེར་གྱི་རྣ་ལོང་ཆེན་པོ་བརྒྱབ་པ་གཅིག་གིས་ཡར་ཁོང་ལ་བལྟས་ནི་གདའ། དེའི་འཁོར་དུ་ཆབ་མདོའི་དུས་ཆེན་ཁ་དང་འདྲ་བའི་མི་དང་བུད་མེད་དཔག་ཏུ་མེད་པས་བྱི་རུ་རྒྱན་མོ་ལག་པ། གཡུ་སྤོས་ཤེལ་དར་ཕྲུག་རིས་གསུམ་ཁྱེར་བ། སྤྲིན་གྱི་ཕུང་པོ་ལྟ་བུ་ཡར་མཚོ་ནང་ནས་པུ་རུ་རུ་བྱུང་། ཆང་གསོལ་འཕྲོ་ཡོད་པ་ཉ་བོ་ཆེ་ལ་བླུད་པས་ཁྲོག་ཁྲོག་འཐུང་
དོ་བས། གནས་ཚང་ལ་ཆང་ཁྱེར་ཤོག་གསུངས་ནས་ཆང་མང་པོ་དེ་ལ་བླུད་པས། བུ་ཚ་དང་གནས་ཚང་ཚོས་ཨ་ནུ་ཐུགས་ལ་མ་ཟུན་པར་རེད་བསམས་ནས། ཆང་ཁུར་ཤོག་བྱས་དུས་ཆུ་ཁུར་ནི་འོང་། དེ་ནས་སྐད་ཅིག་ལ་དེ་རྣམས་མི་སྣང་བར་གྱུར་ཏེ། དང་པོ་ཆོ་འཕྲུལ་བསྟན། རྗེས་མ་ཇོ་བོ་རྗེའི་ཐུགས་ལ་དགེ་བསྙེན་གྱི་མཆོད་པ་བྱེད་པ་ཡིན་པར་འདུག་གསུངས། གཞན་ཡང་རྔ་དང་རྔ་གཡོག་ལ་མེ་འབར་བ་དང་། ཕྱག་ཕྲེང་ལ་ཚྭ་ཚྭ་འཕྲོ་བ་དང་། དུས་རྒྱུན་དུ་ཕོ་རོག་གིས་གཏོར་མ་ལེན་པ་དང་། དམ་ཅན་གྱི་སྤྲུལ་པ་བུ་ཆུང་དང་། ར་སྐྱེས་དང་མི་གཞོན་སོགས། རང་བཞིན་མང་པོར་ཕལ་ཆེར་དངོས་སུ་མཐོང་བ་དང་། ཕོ་རོག་གིས་དམར་གཏོར་ཁྱེར་ནས་རྒྱང་རིང་དུ་སོང་སྟེ། དགྲ་ཉལ་ནི་ཡོད་པའི་བྲང་དཀྱིལ་ལ་བརྒྱབ་པས་ནད་ཁག་བཙང་ནས་ཤི་སྟེ་རྗེས་མེད་དུ་སོང་བ་དང་། ཆོས་རྗེ་མ་ཆེན་ཟེར་བའི་དྲང་སྲོང་ལོག་ཏྲི་པ་ལའི་ཟློག་པ་ལ་ཤིན་ཏུ་མཁས་པ་གཅིག་དང་འགྲས་ནས་མཐུ་འདྲེན་བྱུང་བས། ཁོའི་སྤྱན་ཡ་ཨ་ཏ་དོམ་མགོ་ཟེར་བའི་དཔའ་རྒོད་སྐྱེན་གསུམ་འཛོམ་པ་འཁོར་ཁྲབ་ཆེན་སུམ་ཅུ་ཙམ་ཡོད་པ་ལ། དང་པོ་ཤ་ཁྱི་གཅིག་གིས་ཁོའི་ཡ་དེ་བཅད་ནས་
ཟོས། དེ་ནས་ཁོ་གྲིར་ཤི་བའི་སྙིང་དང་མགོ་ལག་ཕྲག་པ་སོགས་བླངས་ནས་ཆོས་སྐྱོང་ལ་མཆོད་པ་བྱས། ཕྱིས་ཆོས་རྗེ་གཅེར་བུར་བུད་ནས་མུ་གེས་ཤི། ཡང་མགོན་ཁང་ཤོ་མ་བྱ་བའི་དུད་ཕྱུག་དར་ཅན་ཅིག་དང་འགྲས་པས། ཁྱིམ་ལ་ལྷོག་ཚང་བཅས་གཏན་བརླག་རྗེས་མེད་དུ་སོང་། གཞན་ཡང་འགྲས་ཚོལ་བ་མང་དུ་བྱུང་བ་ཐམས་ཅད་གཏན་བརླག་རྗེས་མེད་ཁོ་ན་དང་། ཇེ་ངན་དུ་སོང་བ་བྱུང་བས་མཐུ་ཆེ་བའི་གྲགས་པ་ཐོབ། མགོན་སྐུ་མི་ཚད་གསེར་དངུལ་གྱིས་མདོ་བཅུ་སྦྱོང་རྒྱུད་རྣམས་བཞེངས། བསྙེན་པ་དུང་ཕྱུར་ཕྱེད་གཉིས་ལྷག་ཙམ་ཐོན་ནས། བརྒྱད་ཅུ་གྱ་གཉིས་ལ་མདོང་མི་སྔོན་པོ་ཤ་ཆེ་ཞིང་རལ་པ་སྤྱི་བོར་བཅིངས་ནས། རས་དཀར་པོའི་སྣམ་བུ་གྱོན་པ་གཅིག་གིས་ང་ཁང་པ་རྙིང་པ་ཞིག་ལ་ཁད་གཅིག་གིས་སྟེང་ན་འདུག་པ། རྩེན་གྱིས་པང་ནས་ཁང་པ་གསར་པ་བཟོས་མ་ཐག་གཅིག་གི་སྟེང་དུ་བཞག་པ་རྨིས། མི་དེ་ཆོས་སྐྱོང་རེད་ང་ད་ལོ་འཆི་གསུང་སྟེ་རིང་པོ་མ་ཐོག་པར་འདས་གདུང་ཚུར་པང་བས་ཕྱག་ཕྲེང་དེ་ཤུད་ནས་བྱུང་སྟེ། སྔགས་པ་ཟེར་བ་ཕྲེང་བ་དང་མ་བྲལ་བ་འདི་འདྲ་ཅི་ལ་དགོས་རྒྱུ་རེད། ཅེས་བླ་མ་སོགས་ཐམས་ཅད་ངེས་ཤེས་སྐྱེས། གདུང་བཞུས་པས་ཐུགས་
ལྗགས་སྤྱན་གསུམ་གཤིན་རྗེ་ཁྲོ་ཆུའི་སྐུ་རྣམས་བྱོན་ནོ། །མགོན་པོ་རྒྱལ་མཚན་ལ་མཁན་ཟའི་སྲས་བཞི་ཡོད་པས་པདྨ་ལྷུན་གྲུབ་ནི་འཇིག་རྟེན་བོད་ཀྱི་སྐྱེས་ལྷག་འོང་བ་ཡོད་ཟེར་བ་བྱུང་ན་ཡང་། གཞོན་ནུ་ནས་ཆུས་ཁྱེར། གསོལ་དཔོན་དགེ་འདུན་ནི་ཆབ་མདོ་ཆོས་རྗེའི་མི་གཡོ་རྙིང་པོའི་གསོལ་དཔོན་དང་གཉེར་གཉིས་ག་མཛད། ཆོས་འཇིག་རྟེན་གཉིས་ག་ལ་སྐྱེས་ལྷག་ཡོད་ན་གཞོན་ནུ་ནས་ས་སྒང་བའི་ཆུས་ཁུལ་དཔོན་གཡོག་གཉིས་སྒོམ་ངོ་འཕྲོད་དུས་འདས། དགེ་ཚུལ་ཡིན་པ་མཐར་ཐོན་ཅིང་གདུང་བཞུས་པས་དབུ་བུམ་ཧྲིལ་དང་རིང་བསྲེལ་མང་དུ་བྱོན། ཨ་ནུ་ཀུན་དགའ་ནི་ཆབ་མདོ་ཆོས་རྗེ་ཤེས་རབ་སྙིང་པོའི་གསོལ་དཔོན་ཅུང་ཟད་མཛད། འདག་སྐུ་དང་གསེར་སྐུ་བཞེངས་ཤེས་པས་འདག་སྐུ་མང་པོ་དང་། མཁའ་སྤྱོད་པའི་སྐུ་དང་ཕྱག་བཞི་པའི་གསེར་སྐུ་སོགས་བཞེངས་འདི་ཡང་བྱེས་ལམ་ལ་འདས་པ་གདུང་བཞུ་རྒྱུ་མ་བྱུང་། ཨ་ནུ་བཙན་ཕྱུག་ནི་མཚན་བརྗོད་དང་། རྟ་མགྲིན་གྱི་བསྙེན་པ་ལ་ཐུགས་དམ་མཛད་དེ་ཞེ་དགུ་ལ་འདས་ཏེ་གདུང་མ་བཞུས། པདྨ་ལྷུན་གྲུབ་གྱི་བུ་ཚེ་དབང་རྣམ་རྒྱལ་ཡིན་ཏེ། འདི་གདུང་རྒྱུད་འཆུགས་པ་ཡིན་ཡང་ཟེར། ཀུན་དགའི་བུ་འཕགས་པ་
དོན་འགྲུབ་ཡིན། བཙན་ཕྱུག་གི་བུ་ཨ་ནུ་པདྨ་དབང་དྲག་ཡིན་ཏེ། ཆུང་ངུ་ན་ཡོན་ཏན་སྣ་ཚོགས་བསླབ་སྟེ། རྩིས་དང་ས་དཔྱད་རི་མོ་འབུར་སྐུ་སྔགས་ཆོས་ལ་མཁས་པར་སྦྱངས། ཞལ་ཐང་བདུན་བརྒྱད་དང་མཁར་སྐུ་བཞི་ཨོ་རྒྱན་གྱི་ལྡེར་སོ་བཞེངས། འབྲུག་པ་ཀརྨ་བསྟན་འཕེལ་དང་། འགུ་རུ་ཀུན་དགའ་བསྟན་འཛིན། བྱང་བདག་པོ་བཀྲ་ཤིས་སྟོབས་རྒྱལ་དང་། ཁུ་བུ་དབང་ཕྱུག་རྒྱལ་པོ་དང་། རཏྣ་སངས་རྒྱས་ཕུན་ཚོགས་དང་། རི་པ་བཀྲ་ཤིས་དཔལ་འབྱོར་དང་། གླིང་ཡུལ་གདན་ས་བ་དང་། དེ་སོགས་བླ་མ་མང་པོ་བསྟེན་ཏེ། །གསར་རྙིང་གི་སྔགས་ཆོས་མང་དུ་མཁྱེན་ཏེ། སྐུ་གསུམ་སྒྲུབ་པ་ལན་གསུམ་མཛད་པས་རྨི་ལམ་དུ་ཨོ་རྒྱན་སྐུ་མདོག་དཀར་པོ་ཅན་ཞལ་གཟིགས་པའི་ཕྱག་ནས་བདུད་རྩི་གནང་བ་དང་། ཡང་ཨོ་རྒྱན་སྐུ་ལ་ན་བཟའ་ཁ་དོག་སྣ་ཚོགས་པའི་སྤྲིན་རིས་ཅན་མནབ་པ་ཞལ་གཟིགས་པ་དང་། དངོས་སུ་རྡོ་རྗེ་ཕག་མོའི་ཙིཏྟ་བར་གསུམ་ཡུན་རིང་བ་ཞལ་གཟིགས་པ་དང་། གུ་རུ་དྲག་པོའི་སྒྲུབ་པ་ལོ་གཅིག་མཛད་པས། རྨི་ལམ་དུ་འདྲེ་མོ་བྱུང་མལ་འགུ་རུ་དྲག་པོའི་བསྐྱེད་རིམ་མཛད་པས་དངོས་ལྟ་བུར་གྱུར་ཏེ། ཕྱག་གཡས་གྲི་གུག་བརྒྱབས་པས་འདྲེ་མོ་དེའི་གོས་
གྱི་སྒབ་མ་ཧྲུག་གིས་བཅད་པ་དང་། མཚམས་གྲོལ་ནས་དགུན་དགུ་གཏོར་གྱི་ཚེས་བཅུ་ལ་ཚོགས་མཛད་དུས། སྲུག་རློན་པ་སྡེར་གང་ཙམ་དངོས་སུ་གཞི་ཐོག་ཏུ་སྤུང་ནི་འདུག་པ་དེར་ཡོད་པ་རྣམས་ཀྱིས་དངོས་སུ་ཟ་རྒྱུ་ཡོད་པ་བྱུང་བ་དང་། མཚམས་ཁུང་དུ་མཁའ་འགྲོས་དངོས་སུ་འབྲས་མར་ཁུ་ཡང་ཟེར། གྲོ་མ་མར་ཁུ་དྲངས་བ་དངོས་སུ་གསོལ་རྒྱུ་ཡོད་པ་བྱུང་། དེ་དུས་གཞན་གྱིས་བྱུང་བ་མཐོང་བ་ལ་མཚམས་ཁང་དུ་བྱ་རྒོད་གཅིག་བབ་པ་མཐོང་ཟེར། མདོས་ཟློག་བསྐང་གསུམ་ཞི་ཁྲོ་སོགས་ཀྱིས་འགྲོ་དོན་ཤིན་ཏུ་ཆེ་བ་བྱུང་། གཞན་ཡང་རྡོ་རྗེ་ལེགས་པ་བུ་ཆུང་མཛེས་པར་སྤྲུལ་ནས་དངོས་སུ་བྱུང་བས་ཁྱོད་ག་ནས་ཡིན་བྱས་པས་ང་ས་སྒང་ནས་ཡིན་ཟེར་བ་དང་། སྐྱེ་མདར་ལྷ་རིས་བསླབ་ཏུ་བྱོན་ནས་ཚུར་ལམ་ལམ་ནས་སྐྱག་བསམ་དུས། མགར་བ་རྟ་སྔོན་ཅན་སྔ་ཤ་དང་ཕྱི་ཤ་ལ་སྟག་ཤུན་དང་གཟིག་ཤུན་གྱི་ཁུལ་མོ་གཉིས་བརྟག་པ་ཞིག་བྱུང་ནས། ང་ཁྱོད་བསུ་བ་ལ་ཡིན་ཟེར་བ་ཉམས་གྱི་སྐབས་སུ་བྱུང་བས་ཕྱིར་ནངས་གནས་མདོ་ནས་བསུ་མི་བྱུང་བ་དང་། ནུབ་གཅིག་རྨི་ལམ་ན་མགར་བ་གཅིག་གིས་སྐེ་ལ་ཞགས་པ་བརྒྱབས་ནས་ཁྲིད། མགར་བ་ཤ་མདོག་ནག་ཅིང་ཡན་ལག་རགས་
པ་ཅིག་གིས་ཐོ་བ་ལ་ཇ་སྤོབ་རྩེ་ཚད་ཙམ་ཕྱར་ནས་འདིར་སྒྲ་དང་བཅས་པས། མི་དེ་བརྡུང་ཞིང་ཁྲིད་བྱུང་ནས་མེ་ཆེན་མོ་བང་བ་ཙམ་ཞིག་འདུག་པའི་ནང་དུ་མི་དེ་འཕངས་བས་གསུར་གཞོབ་ཁ་ཆེ་ལེ་བསྲེགས་པ་རྨིས་གསུངས་པས། འགྲས་ཆེ་བའི་དགྲ་གཅིག་ཡོད་པ་ལོ་མ་འགོར་བར་ཁ་ཕུང་དུ་སོང་བ་དང་། འཇམ་དཔལ་དམར་ཆུང་སྒྲུབ་དུས་བྲུབ་ཁུང་དུ་ཁྲག་ལྷོ་དངོས་སུ་ཕྱིན་པ་དང་། རྔ་དང་རྔ་ལྕག་ལ་མེ་ལན་མང་འབར་བ་དང་། མཆིལ་མ་ཁོལ་བ་དང་། མགོན་ཆུ་བསྐོལ་དུས་ཇོ་ཟོར་འཕང་བ་མདའ་བརྒྱང་ལྷག་ཙམ་སོང་བ་དང་། ནད་པ་དང་སྲིའུ་མང་པོ་སོས་ཏེ། ལོ་རེ་ལ་ཡང་སྲིའུ་དུ་སོས་རྨི་ལམ་དུ་གསལ་པོར་འོང་བ་དང་། བཀའ་གཏད་ཙམ་བྱས་པས་ཁ་ཡོ་བ་མིག་བཟུར་བ་སོགས་གཟའ་གདོན་འཕྲལ་དུ་ཞི། རྫས་དང་གདམས་ངག་ཆེར་མི་དགོས་པར་སྔགས་དང་བཀའ་བསྒོ་ཙམ་གྱིས་སེར་བ་ཐུབ་པ་བྱུང་། ཕྱིས་ཆེར་ལུང་དྲུང་པ་ཀུན་དགའ་རྣམ་རྒྱལ་ལ་རབ་ཏུ་བྱུང་སྟེ། དུས་རྒྱུན་དུ་གདན་གཅིག་ཆབ་ལེན་ལྷམ་ཕུད་སོགས་མཐའ་འཁྱོངས་བ་དང་། རྒྱུན་དུ་ཕྱག་རྒྱ་ཆེན་པོའི་ཉམས་ལེན་དང་། ཆོས་སྤྱོད་བག་ཆགས་རང་གྲོལ་དང་གུ་རུ་དྲག་པོ་སོགས་ཆག་མེད། གཏོར་མ་བརྒྱ་རྩ་
སོགས། ལུས་ངག་དགེ་སྦྱོར་ཁོ་ནས་དུས་འདའ་བར་མཛད། དགོང་ལོ་རེ་བདུན་པ་ལ། ཚེ་རིང་ན་བཟང་སྟེ་འབྱམས་ན་ཞེན། ཁྱེད་ཐམས་ཅད་འཛོམ་དུས་འདིར་ང་ཤི་ན་དགའ། ཨོ་རྒྱན་རིན་པོ་ཆེའི། ཁྱེད་རྣམས་ཕོ་བྲོ་བཟང་དུས་འདིར། ང་ཡང་ཨོ་རྒྱན་ཡུལ་དུ་འགྲོ་གསུང་པ་དང་འདྲ། ང་ནི་ཟངས་མདོག་དཔལ་རིར་ཨོ་རྒྱན་གྱི་དྲུང་དུ་འགྲོ་བ་ལ་ཐེ་ཚོམ་མེད། ཁྱེད་ཚོས་བསྔོ་བ་བྱེད་ལུགས་ཀྱང་དེ་ལྟར་གྱིས་གསུངས་ནས་འདས། ཞག་བདུན་དུ་ཐུགས་དམ་ལ་བཞུགས་པས། ནང་རྟགས་ཕུང་པོ་བཀྲག་མདངས་བཟང་། །ཁྲིམས་གཙང་ཕུང་པོ་གཙང་བ་ཡིན། ཞེས་གསུངས་པ་ལྟར་ཕུང་པོ་ཤིན་ཏུ་གཙང་ཞིང་བཀྲག་མདངས་མ་ཡལ་བ་དང་། གདུང་བཞུས་པས་འགའ་ཞིག་གིས་ཉི་ཟླ་སྐར་གསུམ་ནམ་མཁའ་ལ་དུས་གཅིག་འཛོམ་པ་དང་མེ་ཏོག་གི་ཆར་ལྷོ་ནུབ་ངོས་ནས་ལན་གཉིས་འབབ་པ་དང་། སྤུར་ཁང་ཐམས་ཅད་ལ་འཇའ་ཟུག་པ་མཐོང་འདུག །བདག་གིས་མཐོང་བ་ལ་ནི། ནམ་མཁའ་ལ་སྤྲིན་འཇའ་ལས་གྲུབ་པའི་རྒྱལ་མཚན་དཔལ་བེའུ་གསེར་ཉེ་དུང་དཀར་འཁོར་ལོ་ནོར་བུ་རྣམས་རིམ་པར་འདོད་པ་དང་། ཐུགས་ལྗགས་སྤྱན་གསུམ་རིང་བསྲེལ་སྨུག་པོ་གཉིས་
ཕྱག་བཞི་པའི་སྐུ་ཤིན་ཏུ་གསལ་བ་གཅིག་ཞིང་སྐྱོང་གི་སྐུ། ཨ་ཡིག་སྔོན་པོ་གཉིས་ཧཱུྃ་ཡིག་ནག་པོ་གཅིག །འཁོར་ལོ་རྩིབས་བརྒྱད་དཀར་པོ་གཅིག །ཤ་རི་རམ་འཁྱུད་གང་ཙམ་ཆུ་ཤེལ་ལྟ་བུ་ཕྱི་ནང་མི་སྒྲིབ་པ་གཅིག །སོར་མཛུབ་ཀྱི་རྩེ་ཙམ་གྱི་དུང་དཀར་གཡས་འཁྱིལ། རྒྱུ་རུས་ཚིག་རྙི་མོ་ལས་གྲུབ་པ། བཟོས་ཀྱང་ཐོན་དཀའ་བ་ངོ་མཚར་བ་ཆེ་གཅིག་བྱོན་ཏེ། དེ་དུས་མཐོང་ཚད་དད་པ་དང་ངེས་ཤེས་སྐྱེས་ནས། འདི་ང་ལ་བྱིན་ཟེར་ནས་ཨུ་ཡུལ་བྱེད་པ་བྱུང་། སྔགས་འཆང་པདྨ་དབང་དྲག་འདི་ནི་སྦས་པའི་རྣལ་འབྱོར་ཆེན་པོ་སྟེ། ཁོང་གི་དབང་ལུང་དང་ཡོན་ཏན་བསླབ་པའི་སློབ་མ་ནི། བླ་མ་ཀརྨ་མི་མཆོག་དང་། ཆུ་བར་གྱི་སྒྲུབ་སྡེ་ལ་བཞུགས་པའི་དགེ་སློང་རི་བོ་ཆེ་པ་ཟེར་བའི་པདྨ་འཕེལ་དང་། རིགས་དང་ཆོས་གཉིས་ཀས་སྐྱོང་བ་བདག་ཀརྨ་ཆགས་མེད་དང་ཆོས་དབང་ཀུན་བཟང་སྤུན་གཉིས་དང་། ཆོས་ཀྱི་འབྲེལ་བ་ཡོད་ཙམ་སྐོར། རབ་འབྱམས་པ་དང་། བླ་མ་ལྔ། རིན་ཆེན། ཚེ་དབང་བཀྲ་ཤིས། གུ་རུ་དབང་། མགོན་བརྟན། པདྨ་བཀྲ་ཤིས། ཀརྨ་བདེ་མཆོག་སྟེ། སྔགས་ཆོས་རྔ་རྡུང་བྱེད་པ་དྲུག་ཙམ་བྱུང་། ཁོང་གི་སློབ་བརྒྱུད་ལས་འཕེལ་བའི་རྔ་
བརྡུང་མཁན་ནི། ཤིན་ཏུ་མང་དུ་འཕེལ་ལོ། །ཨ་ནུ་ཆོས་དབང་གི་སྲས། བུ་དྲུང་ནི་རིན་ཆེན་རྒྱལ་དང་། ཐོན་བུ་ཨ་ནུ་རྡོ་རྗེ་ཡིན། ཨ་ནུ་རིན་རྒྱལ་ནི་ཆུང་དུས་ནས་ཡི་གེ་གཤར་གཟབ་གཉིས་ཀར་འབྲི་ཀློག་ཤིན་ཏུ་མཁས། ཡབ་ཀྱི་སྔགས་ཆོས་ཐམས་ཅད་ཤེས། གསོ་རིག་ལ་སྦྱོང་བས་མཁས་པར་གྲགས་ཤིང་ཕན་ཐོགས་ཆེ་བ་བྱུང་། སློབ་མ་ཡང་ལྷ་རྗེ་མཚོ་སྐྱེས་བྱུང་། གསོ་རིག་གི་པོ་ཏི་གསུམ་ཙམ་དང་མཁའ་སྤྱོད་པའི་བཀའ་འབུམ་དམ་ཅན་གྱི་ལྡེར་སོ་བཞེངས། འབྲུག་པ་ཀརྨ་བསྟན་འཕེལ་ལ་ཁྲིད་མང་དུ་ཞུས་པས་ཉམས་ལེན་གྱི་གོ་བ་བཟང་པོ་སྐྱེས་ནས། སློབ་མའི་གྲར་བརྩིས་ནས་ཞལ་གདམས་གནང་བ་བཀའ་འབུམ་དུ་ཚུད་ཡོད། གུ་རུ་ཞི་དྲག་ཚེ་དཔག་མེད་གསང་བ་འདུས་པ། སྒྲོན་དཀར་རྣམས་ཀྱི་བསྙེན་པ་ཐུགས་དམ་ཡང་རྒྱུན་དུ་བྱས། ཁོང་ཞེ་བདུན་ལ་འདས་པའི་རྨིས་ལྟས་གསལ་པོ་གཅིག་བྱུང་བས། ཚེ་སྒྲུབ་བསྙེན་པ་བྱེད་བཅུག་པས་ལོ་གསུམ་ཚེ་བསྲིང་བ་འདྲ་སྟེ། ལྔ་བཅུ་ཐམ་པ་ལ་འདས་པའི་བདུན་ཚིགས་པོ་ལ་དགུན་ཡིན་ཀྱང་སྤུར་གྱི་ཐད་ཀྱི་ནམ་མཁའ་ལ་འཇའ་ཚོན་ཁ་དོག་སྣ་ཚོགས་ཅན་འཁྱིལ་ཞིང་བཏགས་གྲོལ་རྒྱུད་ནས་གསུང་པ་ལྟར་འཇའ་དེ་
མཐོང་ཚད་སེམས་སྐྱོ་ཤས་སྐྱེ་བ་དང་། གདུང་བཞུས་ཉིན་ཡང་སྤྲིན་འཇའ་དང་རུས་པ་ལ་གསལ་བྱེད་ཀྱི་ཡིག་འབྲུ་འགའ་རེ་དང་ཤ་རི་རམ་ཡ་ཟུང་གདའ། མ་འདས་དུས་སོ་གཅིག་བུད་པ་ལ་རིང་བསྲེལ་ཞུན་ཐིག་གསལ་པོ་གཅིག་བྱོན་པ་སྐུང་ཞིང་ཡོད་པས་གར་སོང་མ་ཤེས། ཁོང་ལ་འཇའ་དང་རིང་བསྲེལ་འོང་བསམ་པའི་ཐུགས་རྗེ་དགེ་སྦྱོར་ནི་མེད་པར་འདི་ཡན་ཆད་མཁའ་སྤྱོད་པའི་གདུང་རྒྱུད་མ་འཆུགས་པ་དང་འདྲ་བསམ་མོ། །དེ་ཡང་མཁའ་སྤྱོད་པའི་ཞལ་ཆེམས་ལ། ང་ལ་དགེ་སྡིག་རི་ལུ་གཉིས་ཡོད་གསུངས་ནས། གདུང་རྒྱུད་ལ་ལྷ་རྒྱུད་དང་སྡིག་རྒྱུད་གཉིས་འོང་བར་ལུང་བསྟན་པའི་དགེ་བའི་རི་ལུ་ལ་གདུང་རྒྱུད་གཅིག་དང་། ལྷ་རྒྱུད་གཉིས་བྱུང་། གདུང་རྒྱུད་ནི་སྐྱོ་ངོམ་གྱི་སྡེ་པ་གཉིས་ཡིན་ཏེ་རྒྱལ་རྒྱུད་ཡིན་པས་རྒྱལ་སར་དབང་། ལྷ་རྒྱུད་ནི་གནས་མདོ་པ་ཡིན་ཏེ། ད་ལྟ་ཡན་ཆད་དུ་ལྷ་རྒྱུད་མ་ཆད་པ་ཡིན། སྡིག་པའི་རི་ལུ་ནི་ལྡོང་མགོན་པོ་རྒྱལ་གྱི་བུ་ཚ་རྒྱུད་ལ་འགའ་རེ་བྱུང་གདའ་བ་དེ་ཡང་ཚེ་འདི་ལ་དགེ་སྦྱོར་འགའ་མེད་ཀྱང་ཤི་དུས་འཇའ་རིང་བསྲེལ་འོང་བའི་དོན་ནི། ངེད་རང་མི་ཐམས་ཅད་ཀྱི་ཤ་དང་ཁྲག་དང་པགས་པ་ནི་མའི་བྱང་སེམས་དམར་པོ་ལས་གྲུབ། རུས་པ་དང་རྐང་
དང་སླ་བ་དང་སོ་དང་སེན་མོ་ཀླད་པ་དང་གཞུང་པ་དང་བྱང་སེམས་ནི། ཕ་ཡི་བྱང་སེམས་དཀར་པོ་ལས་གྲུབ་པ་ཡིན། གདུང་རྒྱུད་མ་འཆུགས་ན། དེའི་རུས་པ་སོ་དང་སེན་མོ་རྣམས་མཁའ་སྤྱོད་པའི་བྱང་སེམས་ལས་གྲུབ་པའི་རྟེན་རིང་བསྲེལ་འབྱོན་ཏེ་ཕ་རུས་དཀར་པོ་ཟེར་བ་དེ་ཡིན་ནོ། །རིང་བསྲེལ་བྱོན་པ་ཡང་ཕྱི་མ་མི་ཕན་བསམ་ན་མཁའ་སྤྱོད་པས་བདེ་བ་ཅན་དུ་འདྲེན། སྡིག་པ་མེད་ཅིང་ཆོས་མང་དུ་བྱས་ན་མཁའ་སྤྱོད་པ་ལ་གསོལ་བ་སྙིང་ནས་བཏབ་ན་ཚེ་འཕོས་མ་ཐག་བདེ་བ་ཅན་དུ་འདྲེན་པར་བཤད། སྡིག་པ་ཆེ་ན་དམྱལ་བར་སྐྱེ་ནས་ལོ་འབུམ་ཕྲག་མང་པོར་བཙོ་སྲེག་བྱེད་དེ། སྡིག་པ་ཟད་ནས་ཡང་མཁའ་སྤྱོད་པས་བདེ་བ་ཅན་དུ་འདྲེན་ཏེ། གདུང་རྒྱུད་དུ་སྐྱེས་པ་དེ་མཁའ་སྤྱོད་པ་ལ་འབྲེལ་པ་ཐོགས་པ་ཡིན་ཏེ། མཁའ་སྤྱོད་པའི་དམྱེས་པོ་ཡིན་ཏེ། མི་རྒྱུད་དེ་དབོན་ཡིན་ཏེ་དམྱེས་དབོན་གྱི་འབྲེལ་པ་ཐོག་པ་ཡིན་ནོ། དེའི་དོན་ནི་མཁའ་སྤྱོད་པའི་ཞལ་ཆེམས་ལས། འབྲེལ་ཚད་དོན་དང་ལྡན་པ་ཡིན། །ཞེས་ལན་གསུམ་གསུངས་པ་དང་། གླང་ཆེན་འགྱིང་རི་རྩེར་ཀུན་ཏུ་བཟང་པོའི་ཞལ་ནས། རིགས་ཀྱི་བུ་ཕྱོགས་བཅུའི་རྒྱལ་བ་སྲས་དང་བཅས་པ་མཆོད་ཅིག་
གསུངས་། དེ་རྩར་མཆོད་དགོས་བསམ་པས། མཆོད་པ་བྱེད་ཚུལ་ཀུན་ཏུ་བཟང་པོས་ལུང་བསྟན་པ་དང་། སྐད་ཅིག་ཉིད་ལ་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་མདུན་དུ་མཁའ་སྤྱོད་པ་རེ་རེ་སྤྲུལ་ནས། ཕྱི་ནང་གསང་བ་དེ་ཁོ་ན་ཉིད་ཀྱི་མཆོད་པ་བསམ་གྱིས་མི་ཁྱབ་པ་ཆ་ཚང་བ་རེ་རེ་སྤྲུལ་ནས་མཆོད་པས། སངས་རྒྱས་དེ་ཐམས་ཅད་མགྲིན་གཅིག་ཏུ་རིགས་ཀྱི་བུ་ཁྱོད་ཀྱིས་བྱང་ཆུབ་སེམས་དཔའ་མཆོག་ཏུ་སེམས་བསྐྱེད་པ་ལེགས་སོ་ལེགས་སོ། །ཁྱེད་དང་གང་འབྲེལ་བའི་སེམས་ཅན་ཐམས་ཅད་ཡུན་མི་རིང་བ་བདེ་བ་ཅན་དུ་སྐྱེ་བར་འགྱུར་རོ། །ཞེས་ལུང་བསྟན་ཐོབ་པའི་ཕྱིར་རོ། །གདུང་རྒྱུད་མ་འཆུགས་པ་ཡིན་ན་མགོན་པོ་ཕྱག་བཞི་པ་དང་། ཕྱག་དྲུག་པ་དང་། ལས་མགོན་བྱ་རོག་གདོང་རྣམས་ཀྱིས་སྲུང་སྐྱོབ་བྱེད་ཅིང་། གསོལ་མཆོད་ཐེངས་ན་སྐྱེས་བུ་ཆེན་པོའི་ཕྲིན་ལས་སྒྲུབ་པ་དང་། ཇོ་བོ་ལྷ་གཡང་དཀར་པོ། ཀླུ་རྒྱལ་བྱིསྦའི་གཟུགས་ཅན་སོགས་མཁའ་སྤྱོད་པས་དམ་ལ་བཏགས་པའི་གཞི་བདག་རྣམས་ཀྱིས་སྡོང་གྲོགས་བྱེད་པའི་ཕྱིར། ཡོན་ཏན་ཅུང་ཟད་ཅིག་ཤེས་ན་ཡང་འགྲིམ་ཞིང་མི་ལ་ཕན་ཐོགས། སྔགས་ཆོས་རྔ་བརྡུང་བྱས་ན་མཐུ་མ་སྒྲུབ་
ཀྱང་ཞོར་ལ་འོང་། ངག་ནུས་ཆེ་བ་ཡིན་ཏེ། ཆོས་སྐྱོང་རྣམས་ཀྱིས་ཁས་ལེན་དམ་བཅའ་ཡོད་པའི་ཕྱིར་རོ། །གདུང་རྒྱུད་འཆུགས་ན་ནི་ཕ་མར་ཐོབ་ཅིང་ལྷ་སྲུང་འཁོར་བར་དཀའ་སྟེ། ལྷ་ལ་མངོན་ཤེས་ཀྱི་སྤྱན་དང་ལྡན་པའི་ཕྱིར་རོ། དེ་ཡང་བོད་ན་གདུང་རྒྱུད་དྲགས་ཆེ་བ་འབྲི་སྟག་གཉིས། ཀརྨ་པཀྵིའི་གདུང་རྒྱུད། ཞྭ་དམར་བའི་དབོན་རྒྱུད་སྡེ་པ་ཡང་པ་ཅན་པ། འབྲི་ཁུང་བ་ལས་འཕྲོས་པ་ཕག་མོ་ཞབས་དྲུང་རྣམས་ནི། གྲུབ་ཐོབ་དེ་རྣམས་དངོས་ཀྱི་གདུང་རྒྱུད་ཡིན། མཆོད་པའི་གདུང་རྒྱུད་ཡིན་ནོ། །ས་སྐྱ་བ་དང་རྩེ་ཐང་བ་དང་འབྲུག་པ་དང་རྔོག་པ་དང་། རྙིང་མའི་གཏེར་སྟོན་རྣམས་དང་། མཁའ་སྤྱོད་པའི་གདུང་རྒྱུད་འདི་རྣམས་ནི་གྲུབ་ཐོབ་ཁོང་རང་དངོས་ཀྱི་སྲས་རྒྱུད་ཡིན་པས་བྱིན་རླབས་ཆེའོ། །དེ་ཡང་མཁའ་སྤྱོད་པའི་ཞལ་ཆེམས་ལས། ང་ལ་དགེ་སྡིག་གི་རི་ལུ་གཉིས་ཡོད་གསུངས་པ་དང་། ལྕེ་སྣེར་འོད་ཟེར་སྣ་ཚོགས་འཕྲོས་ནས། དཀར་པོ་དང་ནག་པོའི་འོད་ཟེར་མང་པོ་བྱེད་པ་ཅིག་ཡོད་སྒམ་པོ་ལ་ཕུལ་གསུང་པ་སྒམ་པོ་པའི་རྒྱུད་ལ་མང་དུ་འཕེལ་ནས། དཀར་པོ་དགེ་བ་དང་། ནག་པོ་སྡིག་པ་བྱེད་པ་ལུང་བསྟན་པ་ཡིན་པར་མངོན་ལ། སྤྱན་གྱི་འགྱུར་
ལྡོག །ཕྱག་གི་རྣམ་འགྱུར་སྐད་ཅིག་ཙམ་ཡང་བརྟག་སྒོ་མེད་པ་གཅིག་ཡོད་པ། ཁམས་ཤིལ་བྱིན་གསུང་པ་ནི་བྱ་བྲལ་བའི་རྒྱུད་རྣམས་བྱ་བརླག་མང་ཞིང་སྐུ་སྤྱོད་འཚུབ་པོ་འོང་བར་ལུང་བསྟན་པར་མངོན་ནོ། །དེ་ལྟར་གསུངས་པའི་ལུང་བསྟན་དང་མཐུན་པར་དྲུང་བྱ་བྲལ་ཁམས་ཤིལ་བའི་སྲས་ཆུང་བ་མགོན་པོ་རྒྱལ་ནི། དཔའ་རྒོད་སྐྱེན་གསུམ་འཛོམ་ཞིང་བཙན་དྲག་ཆེ་སྟེ། དམག་ཇག་ཁོ་ན་མཛད་པས། ཡུལ་གཞན་གྱི་བུད་མེད་རྣམས་ནོར་ཕྱུགས་ལ་དམོ་མོ་བྱེད་དུས། ནོར་མ་བའི་བུའི་ཁ་ན་རྒྱོབ་ཟེར་བ་བྱུང་། བོ་ཐོག་རྫོང་དང་དབི་རྫོང་བརྩིག་དུས་ཀྱང་སྐུ་མཆེད་མ་འཆམས་ནས། གོ་བཏར་ཞིང་རྫོ་ང་བརྩིག་དགོས་པ་བྱུང་སྟེ། ལྷ་རྒོད་རྒྱལ་གྱིས་ཁྱོད་གཡོག་མོའི་བུ་ཡིན་པས་ཕལ་མི་ཐོབ་ཟེར་ནས་བཙད་པས་ཀྱང་། བྱ་བྲལ་བས་ངའི་གདུང་རྒྱུད་གསེར་དང་འདྲ། གཏུམ་ས་དར་དང་རེ་བ་གར་བཏུམ་ཡང་གསེར་ཡིན་གསུངས་ནས་ཕྱེད་ཙམ་མགོན་པོ་རྒྱལ་ལ་ཤོར། ནོར་བུ་སྟག་འོག་རིང་བསྲེལ་ཕ་རས་པདྨ་ལྡེམ་ལྡེམ། རལ་གྲི་སྡིག་པ་སྲེ་ལེབ། དུང་ཡུ་མ། མཁའ་སྤྱོད་པ་ལ་འཁོར་ལོ་བདེ་མཆོག་གི་ཚད་དྲང་ཁ་གནང་བར་དྲག་པའི་ཤེལ་དཀར་དེ་རྣམས་མགོན་པོ་རྒྱལ་གྱིས་ཐོབ། ལྷ་
རྒོད་རྒྱལ་གྱིས་ནོར་བུ་གནམ་ཆགས་པའི་དུམ་བུ། སྒམ་པོ་པའི་ཞྭ་ནག་ཁྱུང་གཤོག་གསེར་མདོངས་སྒམ་པོ་པའི་སྐུ་བསྲུང་རས་ཐུག་མ་རྣམས་ཐོབ། གསེར་གྱི་ཐམ་ཀ་མ་དུམ་ནས་བགོ་ཤོམ་བྱས་པས་མགོན་པོ་རྒྱལ་གྱིས་བློ་བཏོན་ནས་འདི་བགོས་ན་གཉིས་མེད་ཡིན། དེ་བས་སྤྱི་ཁ་ནས་ཆོས་བཞེངས་གསུངས་པ་ཞལ་འཆམ་ནས། གསེར་ཐམ་ཕྱི་ཤུན་གསེར་དེ་ལ་མདོ་བསྐལ་གཉིས། ནང་སྙིང་དངུལ་ལ་རྒྱས་འབྲིང་རྣམ་གསུམ་དབིའི་རྐག་ནག་ནས་གྲོ་བའི་སྡོང་པོ་གཅིག་ལ་འབུམ་ཆ་གཅིག་གི་གླེགས་ཤིང་འདང་བ་ཡང་རྙེད་པས་དངོས་གྲུབ་ཡ་མཚན་དུ་གྲགས། གཞན་ཡང་མགོན་པོ་རྒྱལ་ཉིད་ཀྱིས་དགྱེས་རྡོར་ལྷ་སྐུའི་གསེར་སྐུ། རྒྱུད་སྡེ་བཞིའི་གསེར་ཐང་ཆེན་པོ་གཅིག་བཞེངས། རྗེ་མོས་སྒྲོན་མ་ཉེར་གཅིག་གི་གསེར་ཐང་ཆེན་པོ་གཅིག་བཞེངས་སོ། །དེ་ནས་སྐུ་མཆེད་གཉིས་བླ་མས་གཏམ་རྒྱལ་གྱི་རྩེ་ན་དགྲ་བླའི་སྤུ་མཁར་བརྩིག་ས་ལ་བྱོན་དུས། ངེད་རང་གཉིས་རྟ་སུས་མགྱོགས་དབི་རིའི་རྩེ་དེ་ཐོབ་པ་བྱེད་གསུངས་ནས་བརྒྱུག་པས་མགོན་པོ་རྒྱལ་མགྱོགས་ནས། རིའི་རྩེ་ན་གསས་མཁར་བརྩིགས། ལྷ་རྒོད་རྒྱལ་གྱིས་དེར་བརྩིགས་པས་དེའི་རྟེན་འབྲེལ་གྱིས་ངོམ་སྟོད་པ་དར་
རྒྱས་ཆེ་ཞིང་གནས་མདོ་བ་རྒུད་པ་ཡིན་ཟེར་ཏེ། ཕྱིས་རྒྱ་ར་བ་ཕེབས་ནས་ནང་བཟང་བའི་རྟེན་འབྲེལ་སོགས་ལ་དགོངས་ནས་གསས་མཁར་ཕྱོགས་གཅིག་ཏུ་བྱས་པ་ཡིན་ནོ། །སྡོང་མགོན་པོ་རྒྱལ་ལ་སྲས་གསུམ་སྟེ། དཔོན་ཨ་བསོད་པ། མི་དཔོན་ཀརྨ་ཝ། མགོན་པོ་ལྷུན་གྲུབ་དང་གསུམ། མི་དཔོན་ཀརྨ་ཝ་ནི་ཚེ་སྟོད་གདན་ས་རབས་ཀྱི་དཔོན་སྐྱ་མཛད་པས་མི་དཔོན་ཀརྨ་བ་ཟེར། འདིའི་རིང་ལ་དབུས་ནས་གུ་རུ་ཆོས་དབང་གི་གདུང་རྒྱུད་སྒར་པ་གཅིག་བྱོན་པའི་ཕྱག་ནས། སངས་རྒྱས་འོད་སྲུང་གི་ཚེམས་དུང་བསམ་ཡས་མཆིམས་ཕུའི་གཏོར་མ་ངོ་མཚར་ཅན་གཅིག་འབུལ་གནང་བྱས་པ་ད་ལྟ་ཡང་ཡོད་པ་འདི་ཡིན། མི་དཔོན་ཀརྨ་ཝའི་སྲས་ལ་སྡེ་པ་ཁྲོམ་ལོད་ཨ་ནུ་ཨ་རྒྱས། ཨ་ནུ་བླ་མ་སྔོ་བྷ་བ་རྣམས་བྱུང་། ཨ་ནུ་བླ་མ་སྔོ་བྷ་བ་ནི་ཆོས་ལུགས་ཀརྨ་བཀའ་བརྒྱུད་ཡིན་ཏེ། རྒྱལ་མོ་ཞོ་ཁྲོམ་གྱིས་མགུལ་དུ་རི་ཁྲོད་དང་མཚམས་སྒྲུབ་མཛད་ཅིང་། གདན་ས་བར་པ་དང་ཐུགས་ཡུན་ཤིན་ཏུ་མཐུན་པས་གདན་ས་བར་པའི་རྫིས་ཕ་མཉམ་དུ་བང་རིམ་ན་ཡང་ཤོག་རེ་བཞུགས་ཆོས་རྣམ་པར་དག་པ་མཐར་ཐོན་པ་ཅིག་བྱུང་སྟེ། ཁོང་བླ་མ་ཡི་ཐོབ་སྐལ་ནི་དབིའི་འདམ་ཡིན་པས། སྟོན་སེར་བ་
བྱུང་དུས་ངའི་བའི་འདམ་ན་མ་འགྲོགས་གསུངས་པས་ཆོག་པ་ཡིན་ཟེར། ཨ་ནུ་ཨ་རྒྱས་ནི་དེ་དུས་སྐབས་ཀྱི་ངོམ་སྟོད་སྤྱིའི་དབང་བཟུང་དེས་ཆོག་པ་མི་བརྒྱ་ཁ་གཅིག་འདྲ་བ་ཡོད་དེ། ཆབ་མདོའི་གླིང་སྟོད་ནུབ་གླིང་འཁྲུག་ནས་ངོམ་པ་དང་སྐྱོང་ཡུལ་བ་ཐུག་དུས་ཀྱང་སྐྱོང་ཡུལ་བ་དམག་མང་ནས་དམིགས་ཚད་མ་ཚུགས་ནས། ངོམ་པ་ཤག་ཤོམ་བྱས་དུས་ཡང་ཨ་རྒྱས་ཀྱིས་ཐག་བཅད་ནས་རུག་པས། ངོམ་པ་ཆུས་རྒྱལ་བ་ཡིན་ཟེར། རྟ་མགྲིན་ནག་པོ་དང་བདེ་མགོན་སོགས་ལ་དུང་གཉིས་ལྷག་ཐོན། མགོན་པོའི་རྒྱུད་པོ་ཏི་གཅིག །བཀའ་རྒྱུད་གསེར་ཕྲེང་ཞལ་ཐང་འགའ་རེ་བཞེངས། ཐོས་པ་ཆེ་ཞིང་ཉམས་ལེན་བཟང་བས་འདས་དུས་ཐུགས་དམ་ཡུན་རིང་དུ་ཟིན། དབུ་བུམ་རིལ་བྱོན་ཟེར། ཨ་རྒྱས་ཀྱི་སྲས་པོ་བསོད་ནམས་རྒྱས་ཁྲོ་བོ། ཆོས་བཀྲ་པདྨ་རྒྱས་འབྱུང་། བསོད་ནམས་རྒྱས་ཀྱི་སྲས་པོ། རྟ་མགྲིན་རྒྱལ། གུ་རུ་རྒྱལ། བེ་རི་གསུམ་ཡིན། བེ་རི་ནི་སྡིག་པ་ལ་མ་འབག་ཅིང་ཡིག་དྲུག་དུང་ཐོན་ནས་འདས་དུས་ཀྱང་འཕོ་བ་ཐེབ་པའི་སྟག་ནམ་མཁའ་ལ་འཇའ་ཚོན་གྱི་གུར་ཅུང་ཟད་གསལ་བ་ཞིག་འདས་མ་ཐག་ཏུ་བྱུང་། རྟ་མགྲིན་རྒྱལ་ནི་རཏྣ་སངས་རྒྱས་ཕུན་
ཚོགས་དང་ཀརྨ་བསྟན་འཕེལ་སོགས་བླ་མ་མང་པོ་བསྟེན། གུ་རུ་ཞི་དྲག་རྟ་མགྲིན་ཕུར་པ་ཚེ་སྒྲུབ་ཞལ་བཞི་པ་སོགས་ལ་བསྙེན་པ་ཐུགས་དམ་རྔ་བརྡུང་མ་ཆད་པར་མཛད་པས། ཁོང་དང་འགྲས་པ་ཕལ་ཆེར་བརླགས་ཤིང་འདས་དུས་ཀྱང་ཐུགས་དམ་བརྟན་པོ་ཟིན། གདུང་བཞུས་པས་རིང་བསྲེལ་ཡུངས་ཀར་ལྟ་བུ་ངོ་མཚར་ཅན་གཉིས་དང་ཤ་རི་རམ་བྱོན་ནོ། །གུ་རུ་རྒྱས་ནི་མནའ་གཞུང་ཆེད་ལ་བརྩེན་ཞིང་དཔའ་བརླིང་ཆེ་བས། སྡེ་ཆེ་བཞི་ཐམས་ཅད་ཀྱི་རྩི་འཇོགས་དངའཇིག་རྟེན་ངོས་ཀྱི་གྲགས་པ་ཆེ་ཞིང་། ངོམ་སྟོད་ཐའི་སྤྱི་དཔོན་ལྟ་བུ་ཡིན། དབིའི་མདའི་མཁར་གསར་དུ་བརྡུང་། རྣ་བ་ཐོས་པ་ཆེ། གདུང་རྒྱུད་ཡིན་རྟགས་དམ་ཅན་གྱིས་སྡོང་གྲོགས་རྟགས་གསལ་པོ་ཡོད། གུ་རུ་རྒྱས་ཀྱི་སྲས་པོ་ཚེ་དབང་རྡོ་རྗེ། རྟ་མགྲིན་རྒྱལ་གྱི་སྲས་པོ་ཚེ་ཟུང་ལྷ་སྲུང་ཨ་མགོན་གསུམ་ཡིན་ནོ། །བེ་རིའི་ཐོན་བུ་སྐྱ་རྡོག་ཡིན། བུ་དྲུང་ནི་མེད་དོ། །སྡེ་པ་ཁྲོམ་མདོ་ནི་རྙིང་མ་དང་བདེ་མགོན་ལ་ཐུགས་དམ་མཛད། ཐུགས་སྒྲུབ་ཀྱི་པོ་ཏི་གཅིག་བཞེངས། རྒྱུན་དུ་རྔ་བརྡུང་སོགས་མཛད་པས་མཐུའི་གྲགས་པ་ཐོབ་ཅིང་བེར་མགོན་གཉིས་དང་དམ་ཅན་གྱི་ལྷ་རྟགས་གསལ་པོ་ཡོད་དོ། ཁྲོམ་ལོད་ལ་སྲས་མེད་
པས་། ཨ་རྒྱས་ཀྱི་ཁྲོ་བོ་བཞག །ཁྲོ་བོའི་བུ་ལ་ཚེ་དབང་རྣམ་རྒྱལ། ཆོས་སྐྱོང་བཀྲ་ཤིས་དང་གཉིས། ཚེ་དབང་རྣམ་རྒྱལ་ནི་དཔའ་རྒོད་འཛོམས་པ་དང་འཇིག་རྟེན་དངོས་ཀྱི་བཙན་དྲག་ཆེ་བས། དེ་དུས་ཀྱི་ངོམ་སྟོད་པའི་སྤྱི་དཔོན་འདྲ་བ་བྱུང་ཟེར། ཚེ་དབང་རྣམ་རྒྱལ་སྲས་པོ་མགོན་ལུ་གཉིས་ཡིན། བུ་ཆེ་འོག་གཅིག་དང་ཆུང་བ་སྤུ་ལུ་གཞོན་ནུ་ནས་འདས། ཆོས་སྐྱོང་བཀྲ་ཤིས་ཚེ་སྟོད་གདན་ས་བར་བའི་དཔོན་སྐྱ་དེས་ཆོག་པ་བྱུང་། ཚེ་སྨད་སྔགས་ཆོས་རྔ་བརྡུངས་བྱས་པས་ཐམས་ཅད་དགེ་སྦྱོར་ཆེར་མེད་ཀྱང་ལྷ་རྒྱུད་རེད་པས་འབྲིམ་ཁ་ཚ་ཞིང་ཕན་ཐོགས་ཆེ་བ་བྱུང་ཟེར། ཆོས་སྐྱོང་བཀྲ་ཤིས་ཀྱི་སྲས་པོ་ཐོབ་ལེབ་བན་སྡིས་གཉིས་ཡིན། ཐོབ་ལེབ་ཆབ་མདོ་ན་བཞུགས། བན་སྡེས་བུ། བཀྲ་ཤིས་འབུམ། ཨོ་རྒྱན། ཨ་འབུམ། ཚེ་འབུམ། ཚེ་དབང་འབུམ་རྣམས་ཡིན། ཨ་བསོ་པའི་སྲས་པོ་ས་མདོ་དཔོན་ཡིན། རི་བོ་ཆེའི་དཔོན་སྐྱ་མཛད་ཅིང་བཙན་གྲགས་ཆེ་བ་བྱུང་ཟེར། ས་མདོ་དཔོན་ལ་བུ་མེད། མི་དཔོན་མགོན་པོ་ལྷུན་གྲུབ་ནི་དཔའ་རྒོད་འཛོམ་ཞིང་མདའ་ཤིན་ཏུ་སྐྱེན་པ་གཅིག་བྱུང་སྟེ། འདིས་རི་དྭགས་བསད་པས། དེའི་མི་རྒྱུད་ལ་འཇིགས་པ་གཅིག་
བྱུང་སྟེ། མཁའ་སྤྱོད་པའི་ལུང་བསྟན་སྡིག་པའི་རི་ལུ་དེ་ཡིན་པར་མངོན་ནོ། །མགོན་པོ་ལྷུན་གྲུབ་ཀྱི་སྲས་ལ། སྡེ་པ་ར་ལུ་དང་ཁེ་ཚ་དཔོན་ཡང་ཟེར་ཨ་ཁུ་ཚ་བོ་ཡང་ཟེར་བ་དེ་དང་། ར་ལུའི་སྲས་པོ་དཔོན་ཁྲོ་བ་ནི། ལོ་རེ་རེ་བཞིན་གཏམ་རྒྱལ་མཆོད་བསྟོད་ལ་བློ་ཕུགས་གཏད། རྒྱུན་དུ་ཕྱག་བཞི་པ་ལ་གསོལ་འདེབས་བྱེད་པས། རི་དྭགས་དང་སྡིག་པ་ཆེ་ན་ཡང་གདུང་རྒྱུད་རེད་པས་མགོན་པོ་དང་དམ་ཅན་གྱི་ལྷ་རྟགས་དག་སྣང་འོང་བ་ཡིན་ཟེར། དཔོན་ཁྲོའི་སྲས་པོ་གཅོད་པ་ཀརྨ་གཉིས་ཀརྨ་དཔའ་རླུང་ཆེ་བར་ཡོད་ཀྱང་སྔར་ནས་འདས། ཀརྨའི་སྲས་པོ་ལྷུན་གྲུབ། ལྷུན་གྲུབ་སྲས་པོ་དྲུང་ནི་ཚེ་དབང་དོན་གྲུབ་ཐོན་བུ་ཚེ་རིང་གཉིས་ཡིན། གཅོད་པ་ནི་ཀརྨ་བསྟན་འཕེལ་དང་། ཚེར་ལུང་བ་ལ་ཁྲིད་ཞུས་པས་ཉམས་རྟོགས་སྐྱེས་ཡིག་དྲུག་དུང་གཉིས་ཟིན་ཙམ་ཐོན་པས་དུང་སོ་སྐྱེས། མཚན་ཆུང་ཡང་གུ་དྲག་ལ་ཁ་ཐོན་མཛད་ཅིང་ཆོས་སྣང་ཆེ་དམ་ཅན་གྱི་ལྷ་རྟགས་ཡོད། གཅོད་པའི་སྲས་པོ་དོན་གྲུབ་སྔར་ནས་འདས། གསེར་འོད་རྒྱུས། གྲྭ་རྔ་འབུམ། རྣམ་སྲས་མགོན་པོ། མགོན་པོ་རྒྱལ། དབང་ལུ་འབུམ་དང་དྲུག་ཡིན། ཨ་ནུ་ཡོན་བདག་གི་བུ་ལ་གསེར་འོད་རྒྱས་ཟེར་བ་གཅིག་
བྱུང་། དེའི་སྲས་ལ་ཤེས་རབ་ལྷུན་གྲུབ་དང་ཇ་ལུ་འབུམ་ལུ་རིན་ཆེན་ལྷུན་གྲུབ་ནོར་བུ་དང་ལྔ། ཤེས་རབ་ལྷུན་གྲུབ་ཚེ་སྟོད་སྤྱི་པོ་ཡེ་གང་ན་ཀ་ནམ་སྡེ་ཕའི་དཔོན་གཉེར་གོ་ཆོད་བྱུང་། ཇ་ལུ་ནི་ཚེ་སྨད་ལ་འབྲུག་པའི་རྟོགས་ལྡན་མཛད་ནས་རི་ཁྲོད་བཟུང་། དེ་བཞི་པོ་ལ་རྒྱུད་མེད། ནོར་བུའི་བུ་ཀླུ་རྒྱལ་དང་དཀར་ཚེ་གཉིས་ཡིན་ནོ། །ཁོ་ཚ་དཔོན་ནི་རི་བོ་ཆེ་ཕའི་དཔོན་སྐྱ་མཛད་པ་མིང་ཐོགས་བུ་དྲུང་ནི་མེད་བསུས་བུ་ལ་ཆོས་སྐྱོང་རྒྱལ་བྱུང་སྟེ། ལྕེ་དིག་པས་ཨ་ནུ་ཁ་དིག་ཟེར། དང་པོ་བུ་རྩིས་མེད་ཅིང་ཨ་ནུའི་མིང་ཆེར་མ་ཐོག་པ་ལ། །གཡུལ་ངོ་གཅིག་ན་མི་དཔོན་གཅིག་བསད་པས་དཔའ་རྒོད་ཆེ་བའི་གཡེར་ཐོབ་ནས། ངོམ་པ་སྤྱིའི་གྲོས་ཁོག་ནས་ཨ་ནུའི་གྲར་བཙུད་ནས་ཕ་ཞིང་མཚོན་ཙམ་བྱིན་པས། བསོད་ནམས་དང་དབང་ཐང་ཇེ་ཆེར་སོང་ནས་པོ་དོག་གིས་རྫོང་ས་ཞིང་དང་བཅས་པ་ཉོས། དངུལ་འབུམ་རྒྱས་འབྲིང་བཞེངས། ཡིག་དྲུག་དུང་བཏོན་པ་སོགས། ཆོས་འཇིག་རྟེན་གཉིས་ཁ་ལ་དབང་ཐང་ཆེ་བར་བྱུང་། དེའི་སྲས་པོ་མདོ་རྒྱུས། པད་རྒྱས། དམར་མགོན། སྔོ་མ། ཅོད་ལུ། ལོར་ཝོར་དང་དྲུག་བྱུང་། མདོ་རྒྱས་ནི་སྨན་དཔྱད་ལ་ཤིན་ཏུ་མཁས་པས།
སློབ་མ་ཡང་རིན་ཆེན་སོགས་འགའ་རེ་བྱུང་། བུ་ནི་མེད་པས་ལོངས་སྤྱོད་གནས་ཆེན་པ་འདྲ་བ་ཡོད་པ་ཕལ་ཆེར་ཆོས་ཕྱོགས་ལ་བཏང་། པད་རྒྱས་ནི་འཇིག་རྟེན་གྱི་དཔའ་རྒོད་བློ་རྩལ་ཆེ། རོ་ལོའི་མཁར་གསར་དུ་བརྡུང་། བླ་མ་ཡང་མང་དུ་བསྟེན་ཡིག་དྲུག་དུང་ལྷག་ཙམ་བཏོན། འདོན་མི་རྒྱུན་དུ་བཞག་པ་སོགས་ཆོས་འཇིག་རྟེན་གཉིས་ཀའི་བློ་རྒྱ་ཆེ། པད་རྒྱས་སྲས་པོ་གཉིས་ཏེ། གྲྭ་རྔ་ནི་སྨན་དཔྱད་མཁས་ཤིང་ས་རིས་སྔགས་ཆོས་སོགས་ཤེས་པས། བེ་རི་རྒྱལ་པོ་སྐུ་མཆེད་ཀྱི་བླ་སྨན་ཡང་མཛད། གཞོན་ནུ་ནས་འདས། ཚེ་རིང་འབུམ་ནི་ལུགས་གཉིས་ཀྱི་ཤེས་རྒྱ་ཡོད་ཅིང་། རྗེ་ཞྭ་དམར་བ་དང་འབྲུག་པ་སོགས་མང་པོ་ལ་ཁྲིད་ཞུས་པས། ཉམས་རྟོགས་བཟང་པོ་འཁྲུངས་ཡིག་དྲུག་དུང་ཕྱུར་མང་པོ་ཐོན་ནོ། །ཚེ་རིང་འབུམ་གྱི་བུ་ནི། མགོན་པོ་ཚེ་བརྟན། མགོན་སྲུང་། ཡ་མ་ཐར་གསུམ་ཡིན་ནོ། །མགོན་པོ་ཚེ་བརྟན་གྱི་སྲས་ལ་གཏེར་སྟོན་མི་འགྱུར་རྡོ་རྗེ་འཁྲུངས་ཏེ། གནམ་ཆོས་པོ་ཏི་བཅུ་གསུམ། དགོངས་གཏེར་སོགས་བཀའ་བབ་ཅིང་། ཨ་ནུ་པད་དབང་གི་སྲས་ཀརྨ་ཆགས་མེད་དང་། འདི་པ་དཔོན་སློབ་གཉིས། མཁའ་སྤྱོད་པའི་གདུང་རྒྱུད་ཀུན་གྱི་ནང་ནས་
འགྲན་ཟླ་མེད་དེ་བསྟན་པ་དང་ཆོས་རྒྱུད་ཀྱི་བོད་ལྗོངས་ཀུན་ཏུ་ཁྱབ་ཅིང་ནུབ་པ་མེད་པའི་འགྲོ་དོན་ཕྲིན་ལས་ཆེའོ། །ཨ་ནུ་ཁ་དིག་འདི་གདུང་རྒྱུད་ཡིན་མིན་ཟེར་བ་བྱུང་གདའ་སྟེ་པོ་དོང་པ་འདི་ཚང་ལ་དམ་ཅན་འཁོར་བའི་ངེས་ཤེས་གདའ་བ་དང་། ཨ་ནུ་པད་རྒྱས་ཆང་གིས་བཟི་ནས་རྟ་ནས་བྲུལ་དུས་དམ་ཅན་བུ་ཆུང་གཅིག་ཏུ་སྤྲུལ་ནས་རྟ་བཟུང་ནས་དངོས་སུ་རྟ་ཁ་བྱས་རབ་གདའ་བས། གདུང་རྒྱུད་ཡིན་ངེས་རེད་ཅེས་ཨ་ནུ་པད་དབང་གིས་གསུངས་པ་ཐོས། བྲག་དམར་བ་ནི་མཁའ་སྤྱོད་པའི་གདུང་རྒྱུད་ནི་མིན་ཏེ། སྡོང་གྲོགས་ནག་གི་བུ་རྣམས་ས་བགོས་བྱས་དུས། བུ་ཆུང་བ་གཅིག་གིས་ང་ཁྱི་ཤ་ཁུལ་ཐ་རེ་བ་གཅིག་ན་འདུག་འོད་ཟེར་ནི་བྲག་དམར་བསྡམ། དེའི་རྒྱུད་པ་སྒམ་པོ་བ་དང་དུས་མཉམ་གནམ་སྐྱབས། བྱ་བྲལ་བ་དང་དུས་མཉམ་གནམ་སྐྱབས་བུ་དྲུག་ཟེར་བའི་དཔའ་རྒོད་སྐྱེན་གསུམ་འཛོམ་པ་བྱུང་ནས། ས་སྒང་གདན་ས་བ་དང་ངོམ་སྟོད་བྱ་བྲལ་བ་གཉིས་ཀའི་དགྲ་བརྡུང་གི་ཐོ་བ་བྱེད་པ་བྱུང་། དེ་ནས་བྲག་དམར་ཤོག་ལྔ་ཟེར་བའི་ཕ་སྡེ་ཆེན་པོ་འཕེལ་ཏེ། བྲག་དམར་ཨ་ནུ་རང་བཞིན་ཟེར་བ་བྱུང་། དེ་ནས་ནང་འཛིན་གིས་འགའ་རེ་འཐོར། འགའ་རེས་མནའ་ཟོས་
པས་མི་རྒྱུད་མང་པོ་ཡན་ཆད་ནས་ཉུང་དུ་སོང་། དུས་ཕྱིས་འབྱུང་ལ་ཨ་ནུ་གསེར་འོད་རྒྱས་ཟེར་བའི་དཔའ་རྒོད་སྐྱེན་གཅིག་བྱུང་སྟེ་སིདྷུ་མི་འཁྲུགས་གོ་ཆའི་དྲུང་སྐོར་ཡང་བྱས། དེ་དུས་ནང་ཆེན་པའི་དམག་བྱུང་བ་ལ་ཆུས་ཉེས་མི་གཅིག་གིས་བཏང་ནས། དཔའ་གཡེར་ཆེན་པོ་ཐོབ་སྟེ། ཕྱིས་ཨ་ནུ་དེ་བྲག་དཀར་འཛོང་གི་བཙན་ལ་སྐྱེས་ནས་བུ་ཚ་རྒྱུད་ཀྱི་ཁ་འཛིན་བྱེད་པ་ཡོད་ཅེས། སི་ཏུ་མི་འཁྲུགས་གོ་ཆས་གསུངས་སྐད། སྔར་ངོམ་སྟོད་པའི་སྡེ་པ་རྣམས་གདན་དམར་དང་སྐད་ཆ་དཀར་ཡོལ་ཁུར་ནས་འབྱོན་ནས་མར་གྱུ་བྱེད། བྲག་དམར་བ་ལ་ལས་ཀའི་ཐོབ་མེད་ཅིང་གཤགས་དྲལ་ཡོད་པས། ཁ་དགྲ་བྱས་ནས་ཁྱེད་བྲག་དམར་བའི་ལས་ཀའི་སྐད་ཆ་དཀར་ཡོལ་གདན་ཡོད་ཟེར་བས། ལྕགས་སྡེར་གཅིག་འབེན་ལ་བཙུགས་ནས། སྟན་ཐོག་ནས་གཞུ་ཕྱེད་འཐེན་གཅིག་བྱས་ཏེ་བརྒྱབས་པས། མདའ་ལྕགས་སྡེར་མ་སྒྲོ་བཅང་གཅིག་བྱས་ནས། ངའི་ལས་ཀ་སྐད་ཆ་འདི་ཡིན་ཟེར། དྲག་ནས་འབར་གྱི་མི་ཚུགས་ནི་བརྩི་རྒྱུད་མེད་ཀྱང་། ཕོ་རྒོད་རྒྱུད་དང་། མདའ་སྐྱེན་རྒྱུད་དང་། ནོར་ཕྱུགས་རྒྱུད་ནི་མ་ཆད་པ་བྱུང་གདའོ། །བརྡའ་དབྱིག་ཨ་ནུ་ནི་རུས་པ་གླིང་ཚང་ཡིན་པ་དང་། གཞན་རྔ་ཟོར་
ཨ་ནུ་ཟེར་བ་སོགས་ཨ་ནུའི་རིགས་འཐོར་ཡན་མང་པོ་གདའ་བ་ནི་ངོམ་པ་དང་རུས་མི་གཅིག །གདོང་རིགས་ནི་ཡིན་ནོ། །ཟོ་ཇིས་གྱི་ལྡོང་ཚང་དང་ལྡོང་བུ་རྣམས་ནི་སྨུག་པོ་སྡོང་ཡིན་ཏེ། ལྷ་གདོང་དཀར་པོ་ཡིན་པས། རུས་ཆེན་སྡོང་ཡིན་ཀྱང་ངོམ་པ་དང་རུས་མི་གཅིག་གོ། ༄༅། །དེ་ཡང་ངོམ་རྗེ་རྒྱལ་པོ་ཞེས་བྱ་བ་ངོམ་ཡུལ་གྱི་སྤྱི་རྗེ་མཁའ་སྤྱོད་པའི་ཁྲི་དམར་དང་རྒྱལ་ས་ལ་དབང་བསྒྱུར་བ་ནི། སྐྱེ་ངོམ་གྱི་སྡེ་ཕ་རྣམས་ཡིན་ཏེ་དེ་ཡང་ཨོ་རྒྱན་རིན་པོ་ཆེའི་བཀའ་མ་འོངས་ལུང་བསྟན་ལས། ཁམས་ཀྱི་ཕྱོགས་སུ་རྒྱལ་མཚན་མཐའ་ཅན་ཏེ། །རྒྱལ་ཕྲན་ཆོས་དང་མཐུན་པ་དུ་མ་འབྱུང་། །སངས་རྒྱས་བསྟན་ལ་ཕན་པ་དུ་མ་འབྱུང་། །ཞེས་ལུང་བསྟན་པ་ནི། མཁའ་སྤྱོད་པ་ནམ་མཁའ་རྒྱལ་མཚན་དང་། སྲས་སྒམ་པོ་པ་ཆོས་ཀྱི་རྒྱལ་མཚན་དང་། སྡོང་རིན་ཆེན་རྒྱལ་མཚན་སྐུ་མཆེད་གཉིས་དང་། ཚ་བོ་གདན་ས་ཝ་ཤཱཀྱ་རྒྱལ་མཚན་མྱོས་དབོན་བཞི་པོ་ནི། རྒྱལ་མཚན་མཐའ་ཅན་ཡིན་ལ། རྒྱལ་ཕྲན་ཆོས་དང་མཐུན་པ་དུ་མ་འབྱུང་གསུང་པ་ནི། དུས་ད་ལྟའི་བར་དུ་ཡབ་མྱེས་ཀྱི་རྣམ་ཐར་སྲིད་ཆོས་དང་མཐུན་པར་བསྐྱང་བའི་སྡེ་པ་རིམ་པར་བྱོན་པ་ཐམས་ཅད་
ཡིན་པར་མངོན་ནོ། །སངས་རྒྱས་བསྟན་ལ་ཕན་པ་དུ་མ་འབྱུང་གསུང་པ་ནི། མཁའ་སྤྱོད་པ་ཡབ་སྲས་རྣམ་རྒྱལ་དགོན་དང་དགའ་བདེ་ལྷུན་གྲུབ་དགོན་སོགས་ཀྱི་དགེ་འདུན་གྱི་སྡེ་བཙུགས་གཙུག་ལག་ཁང་བཞེངས། རྒྱ་ནག་རྒྱལ་པོ་ལ་དབང་བསྐུར་མཁའ་སྤྱོད་པའི་རིགས་རྒྱུད་ཆོས་བརྒྱུད་བྱ་བྲལ་བ་དང་ངོམ་བླ་ཆེ་ཆུང་སོགས་ཆོས་བྱེད་པ་ཡང་མང་དུ་བྱུང་ཞིང་། གུ་རུ་ཞོམ་གྱི་དགོན། ཏིང་འཛིན་རྩེའི་སྒྲུབ་སྡེ། སྤ་སྐྱའི་དགོན། ཉ་ཁམས། རྨོ་མདའ། བྲག་ཐོག །ཆུ་མཁར། གཡོ་མདའ་སོགས་སུ་ལུང་ཕྱོགས་རིས་མེད་པའི་དགོན་ཆེ་ཆུང་མང་དུ་བཏབ། བུམ་སྒྲུབ་དང་སྐུ་གསུང་ཐུགས་རྟེན་མང་དུ་བཞེངས་པ་རྣམས་ཡིན་པར་མཁྱེན་ནོ། །དེ་ལ་མཁའ་སྤྱོད་པའི་སྲས་རིན་ཆེན་རྒྱལ་ནི་མཁའ་སྤྱོད་པའི་ཞལ་ཆེམས་ལས་ཞལ་འདི་ལ་མ་གཅིག །ལུས་འདི་ལ་རེ་བ་གཅིག །ཕྱག་འདི་ལ་ཕྲེང་བ་གཅིག་དང་གསུམ་ཡོད་པ། ཕ་སྡེ་བརྡུང་བའི་ཐོ་བ་གཞན་སུ་ལ་ཞེན་ཡང་ང་ལ་ནི་བཟང་དུ་གྱུར་པ་དང་། བཞག་ར་ལྷ་རྩེ་རིན་ཆེན་རྒྱལ་མཚན་ལ་ཕུལ། ང་དགེ་སྦྱོར་འདི་བྱུང་ནས་མཁའ་སྤྱོད་དུ་འགྲོ་བ་འདི་ཁྱོད་ཀྱི་དྲིན་ཡིན་གསུང་པ་ལྟར། རིན་ཆེན་རྒྱལ་མཚན་འདི་ནི་མེ་ཉག་གཞི་
བདག་གཞག་ར་ལྷ་རྩེའི་སྤྲུལ་པ་ཡིན་ཏེ། དཔའ་བོའི་རྟགས་མ་ཆུང་དུས་ནས་བླངས། རྣ་གཞུང་གཞུངས་བཟང་བ་རྩོད་ལ་བརྩོན་པས། དཔལ་རྩལ་སྟོབས་དང་ལྡན་ཏེ་། ནང་གི་ཕ་སྡེ་ནི་ཚ་བོ་བྱ་བྲལ་བ་དང་ཕ་སྤུན་བྲག་དམར་བ་སོགས། ཕྱིའི་ཕ་སྡེ་ནི་གཞི་སྡོང་གནམ་འོག་མཐོ་བར་ཡོད་པ་ཐམས་ཅད་ཟིལ་གྱིས་གནོན་ནས་མགོ་བཀྱག་དབང་མེད་པས་ཕ་སྡེ་བརྡུང་བའི་ཐོ་བ། ཧ་ཅང་བཙན་དྲག་ཆེ་བས་དམག་དང་ཁྲིམས་གཅོད་མང་པོ་མཛད་པས། དེ་ལ་མཁའ་སྤྱོད་པའི་སྙན་གྱིས་མ་ཚུགས་པ་ལྟ་བུ་བྱུང་ནས། མཁའ་སྤྱོད་པ་ཡུལ་མི་གཅིག་པ་དགུ་ལ་རྣ་ཡོལ་འདྲ་བར་འབྱོན་དགོས་བྱུང་བས། འོ་བརྒྱལ་བྱུང་སྟེ་ལུས་ལ་རེ་བ་མཁའ་སྤྱོད་པ་རི་ཁྲོད་གར་བྱོན་དུ་ཞལ་ལ་ཕན་པའི་སྒྲུབ་བརྒྱགས་བཀུར་ནས་ཕན་ཐོགས་པས། ཞལ་ལ་མ་གཅིག་དེས་ཐུགས་དམ་འཕེལ་བས་ཕྱག་ན་ཕྲེང་བ་གཅིག །སྔར་ངོམ་པ་དང་འགྲས་པའི་དགྲ་མང་པོ་ཡོད་པ་ཐམས་ཅད་རིན་ཆེན་རྒྱལ་མཚན་གྱིས་དམག་ཁོ་ན་མཛད་ནས་བཏུལ། གོ་འཇོ་རྒྱལ་པོ་ལ་སྔར་དཔོན་ཁུར་དགོས་པ་ཡང་རིན་ཆེན་རྒྱལ་མཚན་གྱི་ངོར་ལངསྟེ་་ཡ་བོ་བཟུང་། ཕྱི་ཡི་དགྲ་གཞི་ཐམས་ཅད་བཏུལ་བ་བདུད་ལྟ་བུ་ཞིག་ཚར་
བས། མཁའ་སྤྱོད་པ་ཡང་འཇིག་རྟེན་ངོས་ལ་ཐུགས་འཕྲེང་མ་དགོས་པར་བྱ་བཏང་མཐར་ཕྱིན། སྒྲུབ་པ་རྩེ་གཅིག་མཛད་ཆོག་པ་བྱུང་བས། གཞན་སུ་ལ་ངན་ཡང་མཁའ་སྤྱོད་པ་ལ་བཟང་རེད་ནས། མཁའ་སྤྱོད་པ་མཁའ་སྤྱོད་དུ་འབྱོན་པ་རིན་ཆེན་རྒྱལ་མཚན་དྲིན་ཆེན་བ་གསུངས་པ་ཡིན་ནོ། །རིན་ཆེན་རྒྱལ་མཚན་ནི་དཔའ་རླངས་ཆེ་ཞིང་དཀོན་མཆོག་ལ་དད་པ་ཡང་ཆེ་བས། དངུལ་གྱིས་བཀའ་འགྱུར་རོ་ཅོག་ཚར་གཅིག་སྐྱ་ཆོས་ཀྱི་བསྟན་འགྱུར་ཚར་གཅིག་བཞེངས་སོ། །གཡོ་སྟོད་སོགས་སུ་རྫོང་འགའ་རེ་ཡང་བརྡུང་ཟེར། གཡོ་སྟོད་དུ་ཨ་མྱེ་རྨུ་ཟོམ་འོག །འདག་པའི་སྒོ་མཁར་གཉིས་རེད་ཅིང་རྨུག་ཟོམ་མགོའི་རྫོང་ཨ་མྱེ་མཆེད་པས་སྒོ་མཁར་བརྡུང་བ་རེད། སྡོང་རིན་ཆེན་རྒྱལ་མཚན་འདི་བཞག་ར་ལྷ་རྩེའི་བརྫུན་བུ་ཡིན་ཟེར་བ་མི་བདེན་ཏེ། འདི་མཁའ་སྤྱོད་པའི་སྲས་ཡིན་པའི་ཕྱིར་རོ། །རིན་ཆེན་རྒྱལ་མཚན་འདི་ནི་གཉན་ཆེན་པོ་ཐང་ལྷ་ཡར་བཞུད། མེ་ཉག་ཡུལ་ནས་ཡར་དབུས་སུ་བཞུད་དུས། ནུ་བོ་གཅིག་ཡོད་པ་བཞིག་ཨེ་བྲ་སྨྲས་པ་དང་། བཞག་བྲ་ནས་བཞག་པས་བཞག་ར་ལྷ་རྩེ་ཟེར་བ་དང་། ལོ་ཡ་མེ་ཉག་རབ་སྒང་ན་བཞུགས། ལོ་ཡ་དབུས་སུ་མཆེད་པོའི་རྩར་བྱོན་པས།
དབུས་ནས་འཕེན་ཡུལ་དུ་སོང་ན་བཞག་ར་ལྷ་རྩེ་དངོས་སུ་འབབ་དུས་སྐད་གཅིག་ཁམས་སྐད་བྱེད། རྒྱ་ཛ་ཁམས་པའི་འབབ་ཟེར་ནས་ཁ་ནས་ཇ་ཐེབ་རེ་ཙམ་དངོས་སུ་འདོན་ནས་སྦྱིན། ལེགས་ཉེས་ཅི་འོང་ཐམས་ཅད་བཤད་པ་ཤིན་ཏུ་ཐིག །བཙུན་པ་རྣམས་ལ་ཁ་དད་ཆོས་བཤད་བྱེད་ར་ཡོད་པ་སྟེ། རིན་ཆེན་རྒྱལ་མཚན་ནི་དེའི་སྤྲུལ་པ་ཡིན་པར་གསུངས་པས། སྐྱོང་ངོམ་སྡེ་པ་རྣམས་ལ་བཞག་ར་ལྷ་རྩེའི་ཁ་འཛིན་བྱེད་པ་ཡིན་ནོ། །རིན་ཆེན་རྒྱལ་མཚན་ལ་སྲས་གཉིས་ཡོད་པའི་ཆེ་བ་ནི་ཤཱཀྱ་རྒྱལ་མཚན་ཡིན། དཀོན་མཆོག་ལ་དད་པ་ཆེ་བ་ཆོས་སྤྱོད་བཅུ་ལ་བརྩོན་པ་གཅིག་བྱུང་སྟེ། རབ་ཏུ་བྱུང་ནས་མཁའ་སྤྱོད་པའི་གདན་ས་མཛད་པས་བླ་མ་གདན་ས་བ་ཟེར། ལྷ་ཁང་དང་མགོན་ཁང་གི་ལྷ་བཞེངས་འཕྲོ་རྣམས་བཞེངས་ནས། དབུས་སུ་འབུལ་སྐྱེལ་ལ་བྱོན་ཚེ་གཉེར་པ་གཅིག་བཞག་ནས་ལྷ་ཁང་ཕྱི་མ་དེ་བཞེངས་བཅུག །གདན་ས་བ་དབུས་སུ་ཕེབས་ནས་ཇོ་བོ་རིན་པོ་ཆེ་ལ་གསེར་རྐང་གཅིག་བཙུགས། དགོན་སྡེ་རྣམས་ལ་རི་བཤུ། དབུས་ན་བཀའ་འགྱུར་སྐྱ་བོ་གཅིག་བཞེངས་ནས་གདན་དྲངས་པ་ས་སྒང་དུ་བཞུགས། བླ་མ་རྣམས་ལ་འབུལ་བ་མཛད། བལ་ཡུལ་
འཕགས་པ་ཤིན་ཀུན་ལ་གདུགས་བཀྱག །དེ་ནས་ཀརྨ་པ་མཐོང་བ་དོན་ལྡན་གྱི་སྒར་དུ་བྱོན་ནས། སྔར་མཁའ་སྤྱོད་པ་དུས་སྐུ་སྐྱེའི་བདག་པོ་སོགས་བྱས་པས་རེ་ཆེ་བས། སྐུ་འཁྲིས་དྲུང་སྐོར་ལ་བཞུགས་བསམ་པ་ལས་སྡེ་དཔོན་རིགས་ཀྱི་གྲར་མ་ཚུད་པས། ང་ལ་ཁམས་སུ་ཆུ་ཁུག་གཅིག་ན་དགོན་ཆུང་ཐེབ་ཙེ་ཙམ་ཡོད་པ་གྲུབ་མཐའ་གཞན་གཅིག་ལ་མི་བསྒྱུར་གསུངས་ནས་དབུ་བསྙུང་མཛད་ནས་བྱོན། དེ་སྐབས་གྲིབ་སྐྱོན་གཅིག་བྱུང་ནས་ཞལ་ཡོ་བ་དེ་སུས་ཀྱང་མ་ཕན་པས། རྗེའི་སློབ་མ་གུ་རུ་རྒྱལ་མཚན་བཟང་པོ་སྙན་གྲགས་ཆེ་ནས་མཇལ་དུ་སོང་བས་། སྐུ་རྩེད་མཛད་པ་ལྟར་ཕྱག་གིས་གདན་ས་བའི་ཞལ་ཡོ་བ་བསྲངས་ནས། དཔོན་པོ་འདི་འདྲ་གྱིས་ལ་བཞུགས་གསུངས་པས་ཞལ་ལྟར་གྱིས་དྲང་བས་དད་པ་ཚད་མེད་པ་སྐྱེས་ནས། ད་འདི་ལྟར་ང་ལ་དགོན་པ་གཅིག་ཡོད་པས་ཁྱེད་འབྱོན་དགོས་ཞུས་པས། ཧ་ཧ་ཁམས་ཕྲུག་ཧམ་པ་མ་ཆེ། ང་འགྲོ་རྒྱུ་གར་ཡོད། ངའི་སློབ་མ་ང་དང་འདྲ་བ་ཞིག་ཡོད་པ་བཏང་གསུངས་ནས། བཀའ་གདམས་ཁུ་རྔོག་འབྲོམ་གསུམ་གྱི་ནང་ནས་དཔལ་གསང་བའི་བདག་པོ་ཕྱག་ན་རྡོ་རྗེའི་སྤྲུལ་པ། ཁུ་བརྩོན་འགྲུས་གཡུང་དྲུང་གི་གདུང་རིགས་དྲི་མ་མེད་
པས་བླ་བརྒྱུད་བར་མ་ཆད་དུ་བྱོན་ཅིང་། སྡེ་སྣོད་གསུམ་དང་རྒྱུད་སྡེ་བཞི་ལ་མཁས་པ་ཁུ་སྟོན་བསོད་ནམས་གྲགས་པ་གདན་འདྲེན་ཞུས་པས་ཁུ་སྟོན་གྱིས། ངའི་དབོན་པ་ཡང་ཁྲིད་ནས་ངའི་མི་རབས་མི་འདྲ་རྒྱུད་དགེ་བཤེས་མ་བྱུང་ན་མ་གཏོགས་དགོན་སྡེའི་ཆོས་རྗེ་ལ་བསྐོས་པའི་ཡི་གེའི་ཐེལ་ཚེ་བྱེད་ན་ང་འགྲོ། དེ་མ་རེད་ན་མི་འགྲོ་གསུངས། དེའི་ཆོད་དོན་བྱས་ནས་བྱོན་ཏེ་གདན་ས་ལ་ཁུ་སྟོན་བསྐོས་ནས་ཆོས་ལུགས་ཀྱང་རིམ་པར་བསྒྱུར་བཅུག །གདན་ས་བས་གདུང་རྒྱུད་མཛད་ནས་རི་བོ་ཆེ་བའི་དབོན་མོ་ཐུགས་རྗེ་སྒྲོན་བསུས་པས་སྲས་མོ་གཅིག་འཁྲུངས། མཚོ་ཆེན་བསྐྱེད་པ་དང་གཟེ་ཐང་ཆུང་མ་ལ་བསྒྱུར་བ་མཛད། མཁའ་སྤྱོད་པའི་ཞལ་ཆེམས་ལ། ཕྱི་འཇམ་ལ་ནང་རྩུབ་པ་དྲོད་པ་ཞོས་བཀང་བ་གཅིག་ཡོད་པས། བླ་མ་གདན་ས་བ་ལ་བྱིན་གསུངས་ནས་ལུང་བསྟན་པ་ཐོག་ཏུ་བབ་སྟེ། སྒེ་རུ་རྣམས་ལ་ཡང་སྡུད་པ་བཅོ་བརྒྱད་ལ་སོགས་སྔར་མེད་པའི་ཁྲལ་གསར་དུ་བཙུགས་སོ། །དེ་དུས་ལྷ་རྒོད་རྒྱལ་གྱི་སྒམ་པོ་བ་དྭགས་ལྷ་སྒམ་པོའི་མཁན་པོ་བཞུགས་པ་གདན་འདྲེན་མང་དུ་བཏང་ཡང་གདན་མ་དྲོངས་ནས། བང་ཆེན་ཕར་ཆེར་རྒྱུག་པ་ཡང་མ་རྙེད་ནས། ལྷ་རྒོད་
རྒྱལ་སྤྲང་པོར་བརྫུས་ནས་སོང་སྟེ་ང་ལ་གསེར་མང་པོ་འབུལ་རྒྱུ་ཡོད་པས་མཇལ་ཆུགས་སྨྲས་པས་མཇལ་ཁ་བྱུང་། དེ་ནས་སྒམ་པོ་བ་གདན་དྲངས་ནས་རྨོ་ཉིན་མཁར་དུ་བཞུགས། འདི་ན་དགོན་པ་གཅིག་འདེབས་དགོས་ཞུས་པས། གདན་ས་བས་དགོན་བསྒྱུར་བ་ལ་ཅུང་ཟད་མ་མཉེས་ནས། ནག་ཁུང་ནང་འདི་ན་ཅི་འདུག །ང་རང་གི་ཕ་མས་ན་འདུག་གསུང་ནས་ས་སྒང་ན་བྱོན་ནས་གཟེ་ཐང་ན་སྒར་ཆེན་བརྒྱབས་པས། ཁུ་སྟོན་པའི་གྲྭ་པ་རྣམས་ཀྱིས་ཨ་ཨ་རི་བྱེའུ་འོང་ནས་ཁྱིམ་བྱེའུ་ཕུད་རྒྱུ་རེད་ཟེར་བས། ཁུ་སྟོན་པས་པའི་ཁྱིམ་ན་བུ་འོང་བ་ཞིག་དང་ཨེ་འདྲ། ངེད་རང་ཚང་འོག་གི་ཁང་པ་འདི་ན་སྤྲོ་གསུངས་ནས་སྤོས་པས། གྲྭ་གང་བ་ཟེར་བ་འདི་བྱུང་། གདན་ས་ན་སྒམ་པོ་ཟླ་གཅིག་ཙམ་ལས་བཞུགས་ལོང་མ་བྱུང་བར་ཞིང་རྗེས་། དེ་ནས་གདན་ས་བས་ཁྱེད་རང་ངོམ་སྟོད་པ་ཡིན་པས་ཡར་ཁྱེར་ལ་སོང་གསུངས་ནས་གདུང་འབུམ་ས་སྒང་དུ་བཞེངས་མ་བཅུག་ནས་ཉ་ཁམ་དུ་བཞེངས། དེ་ནས་ལྷ་རྒོད་རྒྱལ་གྱིས་ན་རེ། དྲུང་མཁའ་སྤྱོད་པའི་མལ་ལ་དུད་ཁ་སྟོང་ཕྲག་གཅིག །གཏེ་ཁལ་སྟོང་དང་བདུན་བརྒྱ་ཚོ་གསུམ་ཡོད་པ་ལས། ཡབ་སྲས་གསུམ་བགོས་བྱས་ནས། ཚོ་གཅིག་སྒམ་པོ་
པས་ཐོབ། ཚོ་གཅིག་རིན་ཆེན་རྒྱལ་མཚན་གྱིས་ཐོབ། ཚོ་གཅིག་མཁའ་སྤྱོད་པས་ཐོབ་པ་ཡིན་ནོ། །མཁའ་སྤྱོད་པའི་གདན་ས་འདི་བླ་མས་བཟུང་དགོས། སྡེ་ཕ་བྱེད་བླ་མེད་པ་ལ། ཁྱེད་གདན་ས་བ་ལ་བླ་མ་མ་བྱུང་བ་ནས་ངེད་རང་གཉིས་པོ་འདྲ་འདྲ་ཡིན་པས། མཁའ་སྤྱོད་པའི་མལ་འདི་བགོ་དགོས་ཟེར་ནས་བཙད་པས། གདན་ས་བའི་རྗེ་མོ་ཐུགས་རྗེ་སྒྲོན་ཁ་དུམ་དུ་བསུས་ནས། དེ་དུས་རི་བོ་ཆེ་པ་ཆུས་ཆེ་བར་ཡོད་པས། ལྷ་རྒོད་རྒྱལ་གྱིས་དབོན་པོ་ཐོབ་ནས་དབོན་མོ་ལ་རི་བོ་ཆེའི་ས་ཕྱོགས་འོང་བསམས་ཀྱང་མ་ཕྱོགས་ནས། བུད་མེད་ཚོས་ཅི་བྱེད་གར་འགྲོ་མ་ཏིག །མོ་རང་ཞང་དབོན་བྱེ་འཛུར་མེད་ཟེར་ནས། རི་བོ་ཆེ་པས་གདན་ས་བརླགས་པས། གདན་ས་བའི་སྐལ་བ་ཡང་མ་ལོན། ཁ་དུམ་བསུ་མི་ལྷ་རྒོད་རྒྱལ་གྱི་བློན་ཆེན་སྒོ་ཡ་བ་ཡིན་པས་གདན་ས་བས་བཟུང་ནས་མིག་ཕྱུང་སྟེ་ཁྲིམས་བཅད། ལྷ་རྒོད་རྒྱལ་དབིག་ཕུ་མདར་ལྟོ་བ་ན་སྟེ། འབྱོན་ཞོལ་བེ་སྟོད་སྨད་ཆགས་དཀའ་བ་བྱུང་ནས། དེའི་གོ་གིབ་ལ་གདན་ས་བས་ཐོད་མགོའི་རྫོང་བརྡུངས་ནས་ཕྱིར་བྱོན་པས། ཐོག་གཅིག་གདན་ས་བ་ལ་བརྒྱབ་ནས་ཆིབས་པའི་ཁོག་སྨད་བཅད་ཁོང་རང་མ་
འདས་ཀྱང་ཞབས་ཞ། མི་ཀུན་ཐོད་མགོའི་རྩེ་འཕྲེང་རེད་ཟེར་བས། ང་ལ་ལྷ་འདྲེས་རྩེ་འཕྲེ་མི་ཐུབ་ངེས་མཁའ་སྤྱོད་པ་རྒྱ་ནག་ཏུ་བྱོན་དུས་རྟ་མ་བསྐུར་བའི་དོན་ཡིན་གསུངས་ནས། དེ་ཕྱིས་སྡེ་པ་རྣམས་ཞབས་མི་བདེ་བ་བྱུང་ཟེར། མཁའ་སྤྱོད་པའི་ཞལ་ཆེམས་ལུང་བསྟན་ལས། ཁྱེད་གདན་ས་བས་བླ་མ་དབུ་མ་པའི་ཞབས་ཏོག་དང་བླ་དགེ་རྣམས་ཀྱི་ཐུགས་ཡེ་མི་གཅོད་པ་དང་། རྟེན་གསུམ་གྱི་ཞབས་ཏོག་ལ་འབད། ངས་སྟོང་ཉིད་རྟོགས་པ་ལྟར་མར་མེ་ལ་སྟོང་ཉིད་བསྒོམ་མ་བཅོལ། ལར་ང་ལ་རེ་བའི་མི་རྣམས་མི་སྡུག་པ་དང་། དུས་མཆོད་འདི་མ་ཆད་པ་ཁྱོད་གདན་ས་བ་ལ་རེ་བ་ཡིན་ཏེ། མ་ཎི་པདྨེ་ཨེ་མི་བཏོན། ཁྱོད་གདན་ས་བས་སྒམ་པོ་པའི་ཡེ་མི་ཅོད་དང་། ཁྱོད་རང་ལ་དགའ་བ་ཡིན་གསུང་པ་རྣམས་ཐོག་ཏུ་བབ་སྟེ། ལྷ་ཁང་གི་མར་མེ་དང་རས་བུད་རྣམས་ཆད། དེ་དུས་རྡེ་ཁ་ཨ་ཁྱུང་སོགས་ངོམ་པའི་སྤྱི་བློན་གདན་ས་བ་དང་ལྷ་རྒོད་རྒྱལ་གཉིས་བཀའ་གྲོས་ལ་ཐེ་བ་འགའ་ཡོད་པ་ལ་ཡིད་མ་ཆེས་ནས་གདན་ས་བའི་གཟིམ་ཆུང་རྣམས་སྒོ་རྒྱབ་ནས་བཞུགས་དགོས་པ་བྱུང་། དེ་དུས་གདན་ས་བ་རོབ་ཀྱི་ཆུ་གཟིམ་མཛད་ནི་སྙེ་མེད་པ་ཡོད་པའི་སྟེང་དུ། ལྷ་རྒོད་རྒྱལ་ཁྲབ་ཅན་བཞི་བཅུ་ཙམ་
ཚ་བ་སྒང་དུ་ལུག་གཏེ་བསྡུ་བར་བྱོན་བ་དང་ཐུག །གདན་ས་བས་ང་ལ་ལྟོས་པ་མ་བྱེད་བྲོས་གསུངས་པས་ནང་འདུག་ཐམས་ཅད་བྲོས་ནས་ཁོ་རང་བྲོས་ཁ་ན་ཆུ་ཉེས་ནང་དུ་ལུས། གསོད་པར་ཐེ་ཚོམ་མེད་དགོངས་པ་ལ། ལྷ་རྒོད་རྒྱལ་གྱིས་ནང་འདུག་ཚོས་སྐྱག་ཞ་ཡ་ཐ་ན་རྒྱོབ་རྒྱོབ་ཟེར་བས། ལྷ་རྒོད་རྒྱལ་གྱིས་ཁྱེད་ཚོས་ཁ་མ་བརྡར། དཔོན་པོ་ལ་སྐྱ་འདོགས་གྱིས་ཟེར་ནས་བྱོན་སོང་བས། འོ་ན་རྒྱུན་དུ་མ་ཐུབ་པའི་དགྲ་དེ་དེ་རིང་བཀུག་ནི་གདའ་བ་མི་གསོད་ནི་ཅི་ཡིན་ཟེར་བས། ངེད་གཉིས་རྒྱུན་དུ་ཆེ་བཙད་པ་ཡིན། དམེ་བྱེད་རྒྱུ་མིན་གསུངས། དེར་གདན་ས་བ་ཡིད་ཆེས་ནས་ངེད་ཉི་མ་དེ་རིང་ཕྱིན་ཆད་ནས་མི་འདི་དང་མཐུན་ལེ་གཅིག་མི་བྱེད་རེ་གསུངས་ནས་དབུ་བསྙུང་མཛད། ཕྱིས་དབིས་ཕུད་མདས་སྟག་ལུང་དབོན་མོ་ལ་བྱིན་ནས་ཁ་མཆུ་དུམ་པར་མཛད། གདན་ས་བ་ལ་སྲས་ནི་མེད་དེ། ས་སྒང་སྡེ་པ་ལ་ནི་བླ་མ་གདན་ཐུབ་པའདི་དྲིན་ཆེའོ། །རིན་ཆེན་རྒྱལ་མཚན་གྱི་སྲས་ཆུང་བ་ནི། ནམ་མཁའ་འོད་ཟེར་སྡེ་སྣོད་གསུམ་དང་རྒྱུད་སྡེ་མཐའ་དག་ལ་མཁས་འཕགས་པའི་ནོར་བདུན་དང་ལྡན་པར་གྲགས་ཏེ། ཡབ་དང་སྒམ་པོ་བའི་གདན་ས་བ་རྣམས་ཀྱི་ཞབས་ཏོག་
སྐུ་རིམ་བསྙེན་བཀུར་མཛད། མཚན་ནི་རིན་ཆེན་འོད་ཟེར་ཡང་ཟེར། ནམ་མཁའ་འོད་ཟེར་དང་གཅིག་ཡིན་ནོ། །རིན་ཆེན་འོད་ཟེར་ལ་སྲས་གསུམ་བྱུང་སྟེ། དྲག་བསོད་པ་དང་། རྭ་ལོད་དང་། གཅོད་རྒྱལ་པ་དང་སྐུ་མཆེད་གསུམ་བྱུང་སྟེ། སྐྱོ་ངོམ་གཉིས་ཀར་ཁྱད་མེད་མཛད་པ་ཡིན་ཟེར། དྲག་བསོད་རྭ་ལོ་གཉིས་ལ་སྲས་མེད། གཅོད་རྒྱལ་བའི་སྲས་མི་དཔོན་ཁྱི་སྤྱང་མ་ཡིན་ནོ། །སྲས་པོ་མ་སོས་ནས་མིང་ངན་བཏགས་ན་སོས་ཟེར་ནས་ཁྱི་སྤྱང་མ་བཏགས། སྡོང་འོབ་ལེ་འགོས་མི་དཔོན་དགྲོངས་ཤོམ་བྱས་པས་མ་ཡུམ་ཨ་དབང་མས་ཕུག་བྱས་ནས་སྡོང་མ་དྲི་བས་འོབ་ལེ་འོག་ཚང་གི་མི་བདུན་ཙམ་བསད་སྡིག་བཤགས་ལ་བྲག་ཐོག་ཏུ་བུམ་སྒྲུབ་དང་དངུལ་གྱི་འདུལ་ལུང་འབུམ་ཆ་གཅིག་བཞེངས། འདི་སྐབས་སུ་མི་བསྐྱོད་རྡོ་རྗེ་གློ་ལ་ན་སྐུ་འཁྲུངས་ནས། སྐུ་ན་ཕྲ་མོ་དུས་གཞི་བདག་དེས། སང་ཉིན་ངོམ་པ་ཁྱི་སྤྱང་མ་འོང་བར་ཡོད་ཟེར་བས། ཕྱིར་ནངས་སྡེ་པ་མཇལ་དུ་སོང་བ་དང་འགྲིག །ཕྱིས་ས་སྒང་དུ་གདན་དྲངས་བས་རྭ་ཁྱུ་རྣམས་ཀྱིས་སེར་ཕྲེང་གི་ཚུལ་དུ་བསུ་བ་བྱེད་པ་དང་། དམ་ཅན་གྱིས་མི་མ་ཡིན་འདུལ་རོགས་བྱེད་པ་དང་། བེར་ནག་ཅན་དང་ཕྱག་བཞི་པ་ཡང་
ཡང་ཞལ་གཟིགས་པ་སོགས་རྟེན་འབྲེལ་བཟང་པོ་བྱུང་ཞིང་། ལྷ་ཁང་འཚམས་རྣམས་ཕྱག་ནས་མཛད། ཁྱི་སྤྲང་མ་ཡང་སྐྱོ་ངོམ་གཉིས་ཀའི་བདག་པོ་མཛད་ཟེར། ཁྱི་སྤང་མ་ལ་སྲས་གཉིས་ཏེ། སྲས་དྲུང་ནི་དོན་འགྲུབ་རྣམ་རྒྱལ། ཐོན་བུ་སྡེ་པ་གཟུང་སྐྱབས་དང་གཉིས་ཏེ། དེ་ཡང་མཁའ་སྤྱོད་པས་ས་ཕུ་ནག་གིས་འབུལ་ཞིབ་ལ་གྲིའུ་ལོ་དུས་ངའི་སྤྲུལ་པ་གཅིག་འོང་གསུངས་པ་དང་། ཚར་ཏུ་ཞིབ་མོ་འདི་ཚོ་ལ་ཏིས་ཡུ་ལོ་དུས་སྤྲུལ་གཅིག་འོང་གསུང་ཟེར་བའི་ཁ་ངག་ཡོད་པ་དང་དུས་མཚུངས་བས། དོན་འགྲུབ་རྣམ་རྒྱལ་ནི་མཁའ་སྤྱོད་པའི་སྤྲུལ་པ་ཡིན་ཟེར་བ་ཡང་བྱུང་སྟེ། ཆུང་དུས་ར་བཤས་ནས་ཁྱི་ལ་བཀལ་བས་དྲུང་པ་ར་ཁྱི་ཡང་ཟེར་སྐད། འདི་པས་གསེར་གྱི་རྒྱས་འབྲིང་རྣམ་གསུམ་བཞེངས། བཀའ་གསར་རྙིང་གི་སྔགས་ཆོས་མང་དུ་མཁྱེན་ནས་རྔ་བརྡུང་དང་ཐུགས་དམ་མཛད་ཟེར། དམ་ཅན་གྱི་སྐུ་བཞེངས་བས་དམ་ཅན་དངོས་དང་འདྲ་བའི་བཀའ་གཉེན་པོ་བྱུང་སྟེ་འགྲིམ་པ་གཅིག་གིས་གཞུ་གཅིག་སྐུ་དེའི་རྩར་ལུས་པ་ཞག་འགའ་རེ་སོང་ནས་བླངས་བས་བུ་ཆུང་ར་ཆིབས་པ་ནུབ་གཅིག་ལན་གསུམ་དང་པོ་རྨི་ལམ་རྒྱབ་རས་མངོན་སུམ་དུ་བྱུང་ནས་གཞུ་སྤྱོད་ཟེར་ནས་
འགྲམ་ལྕག་རྒྱབ་པས་གཞུ་ཕྱིར་བསྐྱལ། གཞན་ནང་རྟགས་ཆོ་འཕྲུལ་མང་དུ་བྱུང་ཟེར་བ་དང་། ས་ཕུའི་ནགས་ལ་མེ་མཆེད་ཚེ་རྟ་མགྲིན་གྱི་ཏིང་ངེ་འཛིན་གྱིས་མེ་བསད། བཀའ་ཐང་མཁའ་སྤྱོད་པའི་རྣམ་པར་ཁྲོ་ཆུ་སོགས་ཆོས་སྐྱོང་གྲྭ་ཚར་སོགས་ཞལ་ཐང་མང་པོ་དང་། བཀའ་གདམས་བུ་ཆོས། བཀའ་འབུམ་སོགས་པོད་ཡན་མང་པོ་བཞེངས། སྡེ་པ་འདི་དང་གནས་མདོའི་ཨ་ནུའི་མགོན་པོ་རྒྱལ་མཚན་གྱི་ཚེ་སྟོད་གཉིས་དུས་མཉམ་སྟེ། འདི་ཡན་ཆད་ལ་སྐྱོ་ངོམ་ཀྱི་སྡེ་པ་གཉིས་གནས་མདོ་སྡེ་པ་དང་གསུམ། ངོམ་སྟོད་སྨད་བར་གསུམ་གྱི་སྡེ་པ་གསུམ་ཡིན་པས་ཁྲི་མཉམ་དུ་བརྩིགས་ནས་མར་གྱུ་བྱེད། སྡེ་པའི་སྲས་པོ་ཨ་ནུ་གཟུང་སྐྱབས་སོགས་ཁྲི་ཁ་ནས་ཕུད་པ་རྣམས་དང་། ངོམ་སྟོད་པའི་ཨ་ནུ་གཞན་ཐམས་ཅད་གཤགས་དྲས་བྱེད་པའི་སྲོལ་ཡོད་ཟེར། དོན་འགྲུབ་རྣམ་རྒྱལ་ཡང་གཞོན་ནུ་ནས་འདས། དེའི་སྲས་གཉིས་ཡོད་པའི་སྡེ་པ་རིན་ཆེན་སྐྱོ་ན་བཞུགས་ཏེ། ཟུར་མང་ནས་འཁྱར་བའི་བླ་མ་སྐུ་རིམ་པ་ཟེར་བ་རྙིང་མ་ལ་མཁས་ཤིང་ནུས་པ་ཐོན་པ་གཅིག་ལ་གཤིན་རྗེ་ཁྲོ་ཆུ་ཞུས་ནས་ཡུན་རིང་དུ་བསྒྲུབས་པས་རྟགས་ཐོན་པ་བྱུང་། གཅོད་པ་ལྷུན་གྲུབ་ས་སྒང་ན་བཞུགས་ཏེ་རི་བོ་ཆེ་པའི་
མཁར་དྲུང་ལ་རྙིང་མ་ཞུས་ནས་འདུས་པ་སྐོརདྲུག་ཕལ་ཆེར་གྱི་པོ་ཏི་བྲིས་ཤོག་ཚད་མེད་པ་བཞེངས། ཕུར་སྒྲུབ་བཙུགས་དགོངས་ནས་ཕུར་པ་མང་པོ་བཞེངས། དེར་སྐྱོ་ཕ་དང་སྐུ་མཆེད་མཐུ་འདྲེན་བྱེད་པ་ཡང་བྱུང་བས་གཅོད་པ་ལྷུན་གྲུབ་གཞོན་ནུ་ནས་འདས་དེ་ནས་སྡེ་ཕ་ཁྱི་སྤྱང་མས་མོ་དྲངས་ནས་ངོ་དམར་མ་ཟེར་བ་གཅིག་ལ་སྲས་ཐོན་པ། ཨ་ནུ་གཟུང་སྐྱབས་ཡིན་ཡིག་དྲུག་དུང་ཕྱུར་གཅིག་ཞལ་ཐོན་མཛད་པས་དེ་ཁྲི་ཁ་ན་བསྐོས། སྐྱོ་ན་སྡེ་པ་རིན་ཆེན་ཡང་རྙིང་མའི་བསྙེན་སྒྲུབ་མང་པོ་མཛད་པས་ནུས་པ་ཐོན། སྲས་ནི་མེད་འདི་སྐབས་གྲུལ་ངོམ་ཐུག་པས་ངོམ་པ་ཆུས་རྒྱལ་ཟེར་འདི་སྐབས་སྐྱོ་ན་ཕ་ཉེས་ཐོས་ཟེར་བ་གཅིག་བྱུང་གདའ་བ་བསུས་བུ་གཅིག་ཡིན་པ་འདྲའོ། །སྡེ་པ་གཟུང་སྐྱབས་ཆོས་རྒྱལ་ཡིན་གོང་མའི་རྣམ་ཐར་ཐུགས་རྒྱུད་བཟང་ཞིང་ཡིག་དྲུག་ཁོ་ན་ཐུགས་དམ་མཛད་པས་སྤྱན་རས་གཟིགས་ཀྱི་སྤྲུལ་པ་རེད་ཟེར་བ་བྱུང་། དེ་ཡང་མཁའ་སྤྱོད་པའི་ལུང་འདྲེན་ཞལ་ཆེམས་ལས། ཁྱོད་གདོང་ཚང་གི་དེར་ཡོད་པ་རྣམས་ཀྱི་སྒོམ་སྡེ་ནང་ཆེན་པའི་རོགས་དན་གྱིས་དང་བཀྲ་ཤིས་དང་བདེ་ལེགས་འབྱུང་། དེ་མ་བྱས་པ་ལ་སྣང་སྲིད་ལྷ་འདྲེས་ཆད་པ་གཅོད་པ་ཡིན་གསུངས་པ་ཐོག་ཏུ་
བབ་སྟེ། སྒོམ་ངོམ་འཁྲུག་པས་ངོམ་པ་ཕམ་ནས་སྡེ་པ་བཟུང་། གནས་མདོའི་ཨ་ནུ་དགེ་འདུན་བསད། དེ་ནས་དབོན་མོ་བྱིན་ནས་ཁ་མཆུ་དཀར་འཇགས་བྱས་ཏེ། དེ་དུས་ཡང་སྡེ་པ་གཟུང་སྐྱབས་ཡིག་དྲུག་སོགས་ཐམས་ཅད་ལ་བརྩོན་འགྲུས་ཆེ་བ་ནས། ནང་ཆེན་པ་དཔོན་རྣམས་ཀྱང་འདི་ཐུགས་རྗེ་ཆེན་པོའི་སྤྲུལ་པ་ཡིན་ཟེར་བ་བདེན་ནོ་གསུངས་ནས་ཕྱག་ཕྲེང་ལ་བྱིན་རླབས་ཞུ་བ་སོགས་བྱས་ཟེར། སྡེ་པ་གཟུང་སྐྱབས་སྲས་ཀླུ་སྐྱབས་ཡིན། སྡེ་པ་ཀླུ་སྐྱབས་ལ་སྲས་ལྔ་ཡོད་དེ། ཀུན་དགའ་རྣམ་རྒྱལ། ནང་པོ་ཤེས་རབ་རྣམ་རྒྱལ། དབང་ཕྱུག་རྒྱལ། ཀརྨ་བསྟན་འཛིན། ཚེ་རིང་འབུམ་ལྔའོ། །ཀུན་དགའ་རྣམ་རྒྱལ་དང་ཚེ་རིང་འབུམ་གཉིས་ཀ་སྐྱོ་ན་བཞུགས། གནས་བཅུ་གསེར་ཐང་གཅིག་བཞེངས། དེ་ནས་ཤེས་རབ་རྣམ་རྒྱལ་གྱིས་ཆོས་རྗེ་མཛད་པའི་དོན་ནི། ཁུ་སྟོན་པའི་གདུང་རྒྱུད་ལ་བླ་རབས་མང་དུ་བྱུང་བའི་བཞུགས་པ་ལས་ཆོས་རྗེ་མ་ཆེན་ཟེར་བ་གཅིག་བྱུང་ནས། ས་སྒང་དང་རྨོ་མདའ་གཉིས་ཀའི་ཆོས་རྗེ་མཛད་ཅིང་། འཇིག་རྟེན་ངོས་ཀྱི་བཙན་དྲག་དང་སྟོབས་འབྱོར་ཆེན་པོ་ཡོད་སྐབས་སུ། གཟིམ་ཁང་གི་ཕུག་ཞིག་ན་དམ་ཅན་གྱི་ལོགས་རིས་མཁའ་སྤྱོད་པའི་ཕྱག་ནས་
ཅན་གཅིག་ཡོད་པ་ལ། འདི་བཀའ་སྲུང་ཡིན་པ་ལ་ཕྱིར་གྱུ་ཐོབ་མེད་གསུངས་ནས། སྐུ་དེ་བསྣོག་ནས་ཡར་གྱུ་ལ་བྲིས་པས། གཉེར་པ་དེ་ལ་ཆོ་འཕྲུལ་ཆེན་པོ་བྱུང་། །ཁྱད་པར་དུ་སྲན་མའི་ཕུང་པོ་གཅིག་ཡོད་པ་ཀྱི་ལི་ལི་འཁོར་ཞིང་ཁ་དྲག་ནས། ང་འདུག་མི་བཅུག་སྟེ་ལྟོས་ཨེ་ཁོ་ཟེར་བ་བྱུང་ཟེར། དེ་ནས་ཆོས་རྗེའི་ཐུགས་ལ་གདོན་ཞུགས་ནས། ཆང་མི་གཙང་སྤྱོད་སོགས་བརྟེན་པ་ལ་འགལ་ཚབས་གང་ཆེ་ཆེ་མཛད་པས་སྡེ་དགོན་པས་ཕུད་པ་ལ་ཁོང་ལ་ཧོར་འདྲ་ཧྲག་པོ་ཁྲབ་ཆེན་སུམ་ཅུ་ཙམ་ཡོད་པས། གནས་མདོ་བ་འདི་ས་སྒང་སྡེ་ཕ་དང་ཕ་ངོས་ནས་སྤུན་ཡིན། རྗེ་མོ་མཁན་བཟའ་གཉིས་ཡང་བུ་མོ་སྤུན་རེད་པས་བསྔོ་དོན་ཡིན་ཟེར་ནས། གནས་མདོ་བའི་མཁར་བླང་ཨ་ནུའི་བཟུང་། ངོམ་པའི་དམག་གིས་ཀྱང་མ་ཐུབ་ནས་རྒྱུ་ནང་ཟོག་ཐམས་ཅད་ཤོར། ངོམ་པའི་སྡེ་སྣེ་མང་དུ་བཅོམ་པ་སོགས་དགྲ་གཡེར་ཆེ་བས་བླངས་སུ་བསྐོས་ཀྱང་བཞུགས་མ་ཕོད་པས། ནང་པོ་ཤེས་རབ་རྣམ་རྒྱལ་དེ། ཆབ་མདོ་ཆོས་རྗེ་ཤེས་རབ་དབང་པོ་ལ་རབ་ཏུ་བྱུང་ནས་ཆོས་རྗེ་མཛད། འདི་ཕ་ནི་ཤེས་རབ་ཆེ་ཞིང་མདོག་བཟང་བ། ལུགས་གཉིས་ཀྱི་མཁྱེན་རྒྱ་ཆེ་བ་སྟེ། ལྷོ་སྤོ་ཏི་མ་ལ་བྱོན་ནས་སློབ་
གཉེར་ཅུང་ཟད་མཛད། སངས་རྒྱས་སྟོང་སྐུ་གསེར་འབྱམས་དང་གནས་བཅུ་སོགས་ཀྱང་བཞེངས། ཆབ་མདོ་བ་ནང་འཁྲུག་དུས་གླིང་སྟོད་པའི་རྒྱལ་ཚབ་མཛད་ནས། སྐྱོང་ཡུལ་བ་དང་གཡུལ་འཁྲུག་དུས་ཀྱང་དམག་སྣ་འདྲེན་སྔོན་པོ་རྒྱུག་པ་དང་དངོས་སུ་མཐོང་བ་བྱུང་ནས་ཆུས་རྒྱལ་བ་དང་། གཡོ་མདའི་གདན་ས་ཡང་མཛད་པས་དམ་ཅན་འཁོར་བ་སོགས་བྱུང་ཟེར། ཆོས་ལུགས་དོགས་པའི་སྟབས་ཀྱིས་དགེ་ལུགས་ཡིན་ན་ཡང་། མཁའ་སྤྱོད་པའི་གསུང་དང་མ་འགལ་བར་རྒྱལ་བ་ཡབ་སྲས་ཀར་ཟུར་སོགས་ལ་འབུལ་ཞབས་དད་འདུན། །མངའ་འོག་གི་ཀར་ལུགས་རི་ཕུག་པ་རྣམས་ལ་ཡང་མགོ་འདོན་བདག་བསྐྱེད་བཟང་དུ་མཛད། སྐྱེ་བ་དྲན་རབ་སོགས་བརྩམས་པ་མང་པོ་མཛད་པ་ཕྱིས་ནས་སྙིང་པོ་མེད་གསུངས་ནས་མེ་ལ་བསྲེགས་ཟེར། དབུས་ན་དབུལ་སྐྱེས་ལན་གཅིག་མཛད་པའི་རྒྱབ་རས་ན་ལྷ་ས་ན་ཞིང་བརྗེས་ཏེ། འདས་རྟགས་བཟང་པོ་བྱུང་བས་ཁམས་ལ་བླ་མ་བཟང་པོ་འདི་འདྲ་ཡོད་ཟེར་ནས་དད་པ་བྱེད་པ་བྱུང་ཟེར། ཀརྨ་བསྟན་འཛིན་ནི། ཆུང་ངུ་ནས་དད་པ་ཤེས་རབ་ཕུན་སུམ་ཚོགས་པ་སྟེ། ཕྱག་བྲིས་དང་ལྷ་རིས་དང་ཐུགས་རྩོམ་སོགས་མཁས་པར་གྱུར། རྗེ་ཞྭ་དམར་
བ་ཆོས་ཀྱི་དབང་ཕྱུག་ལ་བསྙེན་པར་རྫོགས། དབང་ལུང་གསན་བཀོན་འཇའ་གནང་། ཅོག་འདྲི་གྲྭ་སར་ཟླ་ཤས་ཙམ་ཞིག་བཞུགས་ནས། རྒྱུན་དུ་བཞུགས་འདོད་ཀྱང་བཞུགས་དབང་མ་བྱུང་བས་སྤྱན་ཆབ་བསིལ་བར་མཛད་པ་ཙམ་གྱི་ངེས་འབྱུང་དང་དད་གུས་ཡོད། ཆོས་སྤྱོད་རབ་གསལ་ཕལ་བ་རྒྱུན་དུ་ཞལ་འདོད་མཛད་པ་དང་། གཏོར་མ་བརྒྱ་རྩ་དང་སྒྲོན་དཀར་ཡི་དམ་དུ་མཛད་ནས་བསྙེན་པ་དང་། རྣམ་སྲས་སེར་ཆེན་ཆོས་སྐྱོང་གི་གཙོ་བོར་མཛད་ནས་བསྙེན་པ་དང་། གཞན་ཡང་ཕག་མོ་དང་མགོན་པོ་མཚལ་མ་དམ་ཅན་གསོལ་ཁ་རྣམས་དུས་སུ་མཛད་པ་དང་། ལྷ་ཁང་ཁ་སྟེང་འོག་གི་མཆོད་བཀྱག་སོགས་བཀོད་པ་རྣམས་ཕལ་ཆེར་གསར་དུ་མཛད་པ་དང་། ལྷ་ཁང་དུ་ཀརྨ་པ་རབ་བརྒྱད་ཀྱི་སྐུ་ཆེ་ཞིང་ལེགས་པ་དང་ཇོ་ནང་ཡབ་སྲས་ན་རིམ་ཐམས་ཅད་ཀྱི་སྐུ་འདྲ། ཚོམས་ན་མཁའ་སྤྱོད་པའི་སྐུ་ཚབ་རྣམས་བཞེངས། ཁོང་སྐྱེ་བ་སྔ་མ་དྭགས་པོ་ན་སྤྲུལ་བ་གཅིག་ཏུ་སྐྱེས་དུས་སངས་རྒྱས་ཀྱི་སྙན་ལ་བུག་པ་མ་བཏོད་པས་སྙན་འོན་པ་ཡིན་གསུངས་པ་སོགས་སྐྱེ་བ་དྲན་རབས་སོགས་བརྩམ་ཆོས་འགའ་རེ་ཡང་མཛད། གནས་བཅུ་མཁའ་སྤྱོད་པའི་རྣམ་ཐར་སྐྱེས་རབས་དང་
བཅས་པའི་བཀོད་པ་ཕྱག་བྲིས་མཛད་པ་སོགས་ཞལ་ཐང་དུ་བཞེངས་པ་དང་། རྒྱལ་བ་ཡབ་སྲས་ལ་འབུལ་ཞབས་མངའ་འོག་གི་གྲྭ་རིགས་རྣམས་ལ་བདག་རྐྱེན། ཕ་སྡེ་དང་བློན་རིགས་རྣམས་ལ་སྐྱོན་དར་དམ་ཚིག་དང་སྡོམ་པའི་གཅེས་སྤྲས་སོགས་ལུགས་གཉིས་ཀ་ལ་རང་ཚོད་ཟིན་པ་བྱུང་ངོ་། །སྡེ་ཕ་ཚེ་རིང་འབུམ་ནི་ཨ་ནུ་ལྷ་བཟོ་དང་ཀརྨ་རིན་ཆེན་སོགས་ལ་དབང་ལུང་མན་ངག་མང་དུ་ཞུས། ལས་བྱང་གི་དྲྭ་ཐང་དང་སྔགས་ཆོས་པོ་ཏི་འགའ་རེ་བཞེངས། རྔ་བརྡུང་དང་ཐུགས་དམ་མཛད་དེ། ཆར་འབོད་དང་འཁོར་ལོ་བསྐོར་བ་སོགས་དྲག་ལས་འགའ་ཡང་མཛད་པས་ཅུང་ཟད་མེ་ལོང་ཟེར་བ་ཡང་བྱུང་ཟེར། དབང་ཕྱུག་རྒྱལ་ནི་སྐུ་ན་གཞོན་ནུ་ནས་བསྙུང་གཞི་དྲག་པོ་གཅིག་གིས་ཟིན་ནས་ཡུན་རིང་མནར་ཏེ་སྐུ་ཚེ་མ་བསྟན་ཟེར། བདེ་མཆོག་ལྷ་ལྔ་ལ་ཐུགས་དམ་གཙོ་བོ་མཛད་པ་རེ་དབང་ཕྱུག་རྒྱལ་གྱི་མགོན་པོ་རྒྱལ་ཡིན་ཏེ། ཡི་གེ་བྲི་ཀློག་དང་ཐུགས་རྩོམ་རི་མོ་ལེགས་པོ་དགོངས། རྗེ་ཞྭ་དམར་དྲུག་པ་དང་། སི་ཏུ་ཆོས་ཀྱི་རྒྱལ་མཚན་རྣམས་ཀྱི་ཁྲི་འདོན་བསྐོ་འཇགས་དབང་ལུང་གནང་ནས། ཀརྨ་བསྟན་སྐྱོང་དུ་མཚན་གསོལ་གཏོར་མ་བརྒྱ་རྩ་དང་འབྱུང་འདུལ་གྱི་བསྙེན་པ་ཐུགས་དམ་མཛད། ཕག
མོ་མགོན་པོ་མཚལ་མ་དམ་ཅན་གསོལ་ཁ་སོགས་དུས་སུ་མཛད། ཕྱིས་མགོན་ཁང་ཞིག་གསོས་ཡང་མཛད། རྒྱལ་བ་ཡབ་སྲས་ལ་འགྱུར་མེད་ཀྱི་དད་པ་ཐོབ་ཅིང་། མངའ་འོག་གི་གྲྭ་རིས་རྣམས་ལ་ཡང་མགོ་འདོན་བདག་རྐྱེན་མཛད། དུས་ཀྱི་འཕོ་འཆུགས་གནམ་ས་ཡོ་ལོག་སྣ་ཚོགས་བྱུང་དུས་ཀྱང་བཞུགས་མཁས་པས་མངའ་འོག་རྣམས་བདེ་བར་བྱུང་། དགུང་ལོ་རེ་གསུམ་ལ་གནམ་ལུག་དང་གནམ་རྟ་ས་ལ་བབ་པ་སོགས་བལྟས་ཆེན་པོ་དང་བཅས་ཏེ་འདས་པའི་གདུང་བཞུས་པས་འཇའ་དང་མེ་ཏོག་མང་དུ་བྱུང་ཞིང་། ཐུགས་ལྗགས་སྤྱན་གསུམ་བྱོན། སྡེ་པ་འདི་ལ་དང་པོར་ཟུར་མང་གར་དབང་སྤྲུལ་སྐུའི་ལྕམ་སྲིང་རྗེ་མོར་བསུས་པས། སི་ཏུ་ཆོས་ཀྱི་རྒྱལ་མཚན་གྱི་ཨ་ནུ་ཨ་ཏ་རྒྱལ་ལ་དེ་མ་ལེགས། དེ་ལ་བསོད་ནམས་མི་འོང་གསུང་ཟེར་བ་སྟེང་དུ་བབ་སྟེ་སྲས་མ་བྱུང་། མཁའ་སྤྱོད་པའི་ཞལ་ཆེམས་ལས། ཁྱོད་གདོང་ཚང་གི་དེར་ཡོད་པ་རྣམས་ཀྱིས་སྒོམ་སྡེ་ནང་ཆེན་པའི་རོགས་དན་གྱིས་དང་བཀྲ་ཤིས་བདེ་ལེགས་འབྱུང་། ཞེས་གསུངས་པའི་ལུང་བསྟན་ཐོག་ཏུ་བབ་སྟེ། ངོམ་པའི་དབོན་མོ་ནང་ཆེན་པ་ཀུན་དགའ་རྒྱལ་པོ་ལ་བྱིན་པས། སྲས་བློ་གྲོས་རྒྱལ་པོ་དང་ཀརྨ་
རབ་བསྟན་གཉིས་བྱུང་སྟེ། སྔར་གྱི་ནང་ཆེན་པའི་རྒྱལ་རབས་གོང་མ་རྣམས་ལས་ཀྱང་ལྷག་པའི་སྟོབས་དང་མངའ་ཐང་བར་སྐབས་སུ་བྱུང་བས་ངོམ་པ་གདོང་ཚང་བཟང་བར་གྲགས་ཤིང་སྐབས་སུ་སྐྱེ་ངོམ་རྣམས་ལ་ཡང་དྲིན་ཆེན་བར་བྱུང་། དེ་ནས་ནང་ཆེན་པའི་ཚ་མོ་གསེར་ཡིག་བཟའ་འདི་བླངས་བས། སྲས་བསོད་ནམས་རྣམ་རྒྱལ་དང་། གྲ་རྔ་རྒྱལ་པོ་གཉིས་འཁྲུངས་པ་ཡིན་ནོ། །སྡེ་ཕ་ཚེ་རིང་འབུམ་གྱི་སྲས་ནི་གཅོད་པ་རྣམ་རྒྱལ་ཡིན་ནོ། །མཁའ་སྤྱོད་པ་ལ་ཕྱག་བཞི་པ་དང་དམ་ཅན་གཉིས་ཀྱིས་མི་རབས་བཅུ་གསུམ་དུ་བསྟན་པ་བསྲུང་བར་ཁས་བླང་བའི་ཕྱིར། མི་རབས་བཅུ་གསུམ་གྱི་བར་དུ་གདན་ས་འདི་ཡི་སྡེ་ཚུགས་མི་འཁྱོལ་ཞིང་། འཕོ་འཆུགས་མི་འོང་བ་ཡིན་ཞེས་ཟེར་བའི་ངག་རྒྱུན་ཐོས་སོ། །དེ་ལ་མི་རབས་སོང་ཚུལ་ནི། མཁའ་སྤྱོད་པ་ནམ་མཁའ་རྒྱལ་མཚན་དང་གཅིག །སྡོང་རིན་ཆེན་རྒྱལ་མཚན་དང་གཉིས། རིན་ཆེན་འོད་ཟེར་དང་གསུམ། དྲུང་གཅོད་རྒྱལ་བ་དང་བཞི། མི་དཔོན་ཁྱི་སྤྱང་མ་དང་ལྔ་། སྡེ་ཕ་གཟུང་སྐྱབས་དང་དྲུག །སྡེ་ཕ་ཀླུ་སྐྱབས་དང་བདུན། སྡེ་ཕ་དབང་ཕྱུག་རྒྱལ་དང་བརྒྱད། སྡེ་ཕ་མགོན་པོ་རྒྱལ་དང་དགུ། བསོད་ནམས་རྣམ་རྒྱལ་དང་
བཅུའོ། །སྐྱོ་ཕ་ནི་གོང་ལྟར་ལས། ཀླུ་སྐྱབས་ནས། ཚེ་རིང་འབུམ་དང་བརྒྱད། གཅོད་པ་རྣམས་དང་དགུ་ཡིན་ནོ། །དེ་ནི་གདུང་རབས་ཡིན་ལ། ཁྲི་རབས་ནི། མཁའ་སྤྱད་པ་ནམ་མཁའ་རྒྱལ་མཚན། གདན་ས་བ་ཤཱཀྱ་རྒྱལ་མཚན། དྲག་བསོད་ནམས་སྐུ་མཆེད་གསུམ། ཁྱི་སྤྲང་མ། དོན་འགྲུབ་རྣམ་རྒྱལ། གཅོད་པ་ལྷུན་གྲུབ། གཟུང་སྐྱབས། ཀླུ་སྐྱབས། དབང་ཕྱུག་རྒྱས། ཀརྨ་བསྟན་འཛིན། མགོན་པོ་རྒྱལ། བསོད་ནམས་རྣམ་རྒྱལ་རྣམས་སོ། །སྐྱོ་ཕའི་གདན་རབས་ནི། མཁའ་སྤྱོད་པ། རིན་ཆེན་རྒྱལ་མཚན། རིན་ཆེན་འོད་ཟེར། རྭ་ལོད་པ་སྐུ་མཆེད་གསུམ། ཁྱི་སྤྱང་མ། གཟུང་སྐྱབས། སྡེ་ཕ་རིན་ཆེན། ཉན་ཐོས། ཀླུ་སྐྱབས། ཀུན་དགའ་རྣམ་རྒྱལ། ཚེ་རིང་འབུམ། གཅོད་པ་རྣམ་རྒྱལ་རྣམས་སོ། །གནས་མདོ་བའི་མི་རབས་ནི། མཁའ་སྤྱོད་པ་ནམ་མཁའ་རྒྱལ་མཚན། སྒམ་པོ་པ་ཆོས་ཀྱི་རྒྱལ་མཚན། བྱ་བྲལ་བ་ཀུན་དགའ་བཀྲ་ཤིས། གདོང་ལྷ་རྒོད་རྒྱལ། སྡེ་ཕ་དབང་ཕྱུག་རྒྱལ་མཚན། ཨ་ནུ་མགོན་པོ་རྒྱལ་མཚན། ཨ་ནུ་བཙན་ཕྱུག །པདྨ་དབང་གྲགས་རིན་ཆེན་རྒྱལ། པདྨ་བཀྲ་ཤིས་དང་སྤྱན་
ཡིན་ནོ། །ཡང་དབང་ཕྱུག་རྒྱལ་ནས། མགོན་པོ་དབང་ཕྱུག །ཨ་ནུ་ལྷ་བཟོ། ཀརྨ་མི་མཆོག་སྐུ་རྣམས། ངོམ་སྟོད་ཀྱི་མི་ཚུགས་ནི། མཁའ་སྤྱོད་པ། སྒམ་པོ་པ། བྱ་བྲལ་བ། གདོང་མགོན་པོ་རྒྱལ། མི་དཔོན་ཀརྨ་བ། ཨ་ནུ་ཨ་རྒྱས། བསོད་ནམས་རྒྱས། འགུ་རུ་རྒྱས། ཚེ་དབང་རྡོ་རྗེ། ཡང་བསོད་ནམས་རྒྱས་ནས། རྟ་མགྲིན་རྒྱས། ཨ་མགོན་སྐུ་མཆེད་དེ། ཡང་མི་དཔོན་ཀརྨ་བ་ཕན་གོང་དང་འདྲ། ཨ་རྒྱས། ཁྲོ་བོ། ཚེ་དབང་རྣམ་རྒྱལ། མགོན་ལུ་སྐུ་མཆེད་དོ། །ཡང་ཁྲོ་བོ་ནས། ཆོས་སྐྱོང་བཀྲ་ཤིས།། བན་དྷིས། ཨོ་རྒྱན་སྐུ་མཆེད་དོ། །ཡང་གདོང་མགོན་པོ་རྒྱལ་ཡན་གོང་ལྟར་ལས། མགོན་པོ་ལྷུན་གྲུབ། ར་ལུ། དཔོན་ཁྲོ། གཅོད་པ། གསེར་འོད་རྒྱས་སྐུ་མཆེད་དོ། །ཡང་དཔོན་ཁྲོ་ནས། ཀརྨ་ལྷུན་གྲུབ། ཚེ་དབང་དོན་འགྲུབ་སྐུ་མཆེད་དོ། །ཡང་སྡོང་པོ་རྒྱལ་ནས། མགོན་པོ་ལྷུན་གྲུབ། ཁོ་ཚ་དཔོན། ཁ་དིག །པད་རྒྱལ། ཚེ་རིང་འབུམ་། མགོན་པོ་ཚེ་བསྟན་སྐུ་མཆེད་དོ། །ཡང་ཁ་དིག་ནས། གཅོད་ལུ། རྣམ་སྲས་སྐུ་མཆེད་དོ། །ཡང་མགོན་པོ་རྒྱལ། མགོན་པོ་ལྷུན་གྲུབ་ཡོན་བདག་གསེར་འོད་རྒྱལ།
ནོར་བུ། དཀར་ཚེ་སྤྱན་ནོ། །དེ་ལྟར་མཁའ་སྤྱོད་པ་མན་ཆད་ལ། ད་ལྟ་མི་རབས་དགུའམ་བཅུ་རེ་ཙམ་སོང་གདའ་ཞིང་། མགོན་པོ་ཕྱག་བཞི་པ་དང་། དམ་ཅན་རྡོ་རྗེ་ལགས་པས་མི་རབས་བཅུ་གསུམ་དུ་བསྟན་པ་བསྲུང་བར་ཁས་བླང་བ་ཡིན་ནོ། །དེ་ལྟར་གདུང་རྒྱུད་མང་སྟེ། སྐྱོ་པ་ངོམ་སྟོད་གཉིས་ཀྱང་གདུང་རྒྱུད་ཡིན་ཀྱང་གདན་ས་མིན། གནས་ས་ནི་ས་སྒང་སྡེ་པ་ཡིན་པས་ཐོབ་ཆ་ཆེ་སྟེ། སྐྱོ་ངོམ་སྟོད་སྨད་བར་གསུམ་གྱི་སྤྱི་རྗེ་དབུས་རྨོག་ཡིན་ནོ། །ད་ནི་ལྷ་གདོང་དཀར་པོ་འོད་གསལ་ལྷའི་གདུང་རྒྱུད་འདི་ལ་ཐེ་ཚོམ་བསལ་བ་ནི། བསྟོད་མི་ཤེས་ཀྱིས་བསྟོད་འདོད་བྱེད་པ་འགའ་ཞིག་ན་རེ། ངོམ་པ་འདི་དང་པོ་རྒྱ་ནག་ནས་ཡར་བྱོན་པ་ཡིན་ཏེ། རྒྱ་ནག་རྒྱལ་པོའི་བློན་པོ་བུ་ཆུང་ཆུང་གཅིག་ལ་ལས་ཀ་གནང་ནས་མདོ་ཁམས་ཀྱི་དཔོན་དུ་བསྐོས་ནས་བྱོན་ཏེ། རྒྱ་ནག་སྐད་ལ་བུ་ཆུང་ཆུང་ཨ་ནུ་ཟེར་བ་ཡིན་པས་དེའི་མིང་འཇགས་མ་ཡིན་ཟེར། དེ་ནི་མི་བདེན་ཏེ་རྒྱ་ན་ཕ་སྤུན་ཡོད་རབ་མི་གདའ་ལ། དབུས་ན་ཕ་སྤུན་ཡོད་ནི། མཁའ་སྤྱོད་པ་བྱོན་དུས་ཕ་སྤུན་རྣམས་ལ་རང་བྱས་རབ་དང་། སྒམ་པོ་བའི་ཡང་ཞུ་བོ་གྲུབ་ཐོབ་ལ་ཕྱི་ནམ་མཁའ་རྒྱལ་མཚན་ཟེར་བ་དབུས་
ན་བཞུགས་པ་ལ་ཁྲིད་ཞུས་དྭགས་ལ་སྒམ་པོ་ན་གཟིམས་ཁང་གཅིག་མཛད་ནས་ལོ་དྲུག་མཚམས་ལ་བཞུགས་རབ་རྣམ་ཐར་ནང་ན་གསལ་ཕྱིར་རོ། །ཡང་སྨད་མི་ཤེས་པའི་སྨད་པ་བྱེད་པ་འགའ་རེའི་ངོམ་པ་ལྷ་གདོང་དཀར་པོ་མིན། ཡས་སྡོང་ཁ་ནག་ཡིན་ཏེ། དབུས་ཀྱི་རྒྱལ་པོ་སྣེའུ་གདོང་གོང་མ་ཆེན་པོ་ལ་མོ་ངན་པ་ཞིག་བྱུང་ནས། རྒྱལ་པོའི་སྲས་པོ་གཅིག་གླད་ལ་འཕང་ན་ཕན། དེ་མིན་ན་རྒྱལ་པོ་འདས་ཟེར། རྒྱལ་པོའི་བུ་བླུན་པོ་རྒྱལ་ས་ནི་མ་ནོན་པ་རྩིས་ཆུང་བ་གཅིག་ཡོད་པ་ལ། ཡབ་རྒྱལ་པོའི་ཞྭ་གོས་ལྷམ་གསུམ་བཀོན། རྟ་དྲེལ་དང་རྒྱུ་མང་པོ་བྱིན་ནས་ཡས་ལ་བརྫངས་ནས་ཁམས་སུ་འཁྱམས་པའི་རྒྱུད་ལ་སྡོང་སྤོམ་ར་བྱུང་ཟེར་རོ། །དེ་ནི་མི་བདེན་པའི་རྒྱུ་མཚན་གསུམ་ཡོད་དེ། རུས་མི་གཅིག་པ་དང་། དུས་མི་མཚུངས་བ་དང་། གླུད་ཚུར་མི་ལེན་པ་དང་གསུམ་མོ། །དང་པོ་ནི། སྣེའུ་གདོང་གོང་མ་ཆེན་པོ་ནི་འོད་གསལ་ལྷའི་གདུང་རྒྱུད་ཡིན་ཀྱང་། བོད་ཆོས་རྒྱལ་གྱི་གདུང་རྒྱུད་མིན་ཏེ། ཨོ་རྒྱན་གྱི་སློབ་མ་གླང་ཆེན་དཔལ་གྱི་སེང་གེའི་གདུང་རྒྱུད་ཡིན་ཏེ། རུས་མི་གཅིག་རུས་གླང་ཡིན་ཏེ། ཨོ་རྒྱན་དུས་ནས་གླང་དཔལ་གྱི་སེང་གེས། ལྷ་སྲིན་ཐམས་ཅད་བྲན་དུ་ཁོལ་
ནས་དམ་ལ་བཏགས་ནས། སྲིན་པོའི་བུ་མོ་གཅིག་ཆུང་མར་བླང་བ་ལས་སྲས་གླིང་སྲིན་ཚ་འདྲེ་ཁོལ་བྱ་བ་འཁྲུངས་ཏེ། སྲིན་པོའི་ཚ་བོ་ཡིན་ལྷ་འདྲེ་ཐམས་ཅད་བྲན་དུ་ཁོལ་བ་བྱུང་། དེ་ནས་བཟུང་སྟེ་བླ་བརྒྱུད་དང་སྔགས་བརྒྱུད་མ་ཆད་པར་བྱུང་བ་ལ། དེའི་གདུང་རིགས་འབྲི་ཁུང་འཇིག་རྟེན་གསུམ་མཾགོན་གྱི་གདན་ས་མཛད་པའི་སྤྱན་སྔ་སྟག་འབྱུང་བ་ཟེར་བ་བྱུང་སྟེ། དེ་ལ་སློབ་མ་དགེ་འདུན་པ་ཁྲི་ཚོ་བཅོ་བརྒྱད་རེ་འཚོགས་པ་བྱུང་། བླ་མ་དེས་མགོན་པོ་ཕྱག་བཞི་པ་འགྲུབ་ནས། དེའི་སྒོ་ནས་དབང་སྡུད་མཛད་པའི་ནུས་པས། །ཁོང་གི་དབོན་པོ་དེས་ས་སྐྱ་ཆོས་རྒྱལ་འཕགས་པའི་གཉེར་པ་བྱུང་བ་ལ་རྒྱ་ནག་རྒྱལ་པོས་ལས་ཀ་འཁོར་མོ་གནང་ནས། བོད་ཤིང་སྒོ་ཅན་གྱི་དཔོན་དུ་བསྐོས་པ་ཡིན་ལ། ངོམ་པ་གདོང་ཚང་ན་དྲག་ནག་ཡན་གྱི་མི་རབས་མང་པོས་ངོམ་ནས་ས་བཟུང་བའི་ཕྱིར། དུས་མི་མཚུངས་སོ། །གདོང་དྲག་ནག་གི་སྣེའུ་གདོང་གོང་མ་ཆེན་པོའི་གཉེར་ཆེན་མཛད་པས། གླུད་འཕངས་བས་དེས་གཉེར་པ་བྱེད་བཅུག་མི་སྲིད་པ་དང་མཁའ་སྤྱོད་པ་ཡང་སྣེའུ་གདོང་གོང་མས་གདན་དྲངས་འབུལ་བ་ཞབས་ཏོག་བྱས། མཚན་རྒྱ་ཆོས་རྗེ་གསོལ་ནས་བླ་མར་ཁུར་བའི་ལོ་
རྒྱུས་རྣམ་ཐར་ན་གསལ་བས། སྣེའུ་གདོང་གོང་མ་ཆེན་པོ་ལ་བླ་མས་ཐབས་མི་ཆགས་པ་ལ་གླད་ལ་འཕང་བ་ཡིན་ན་བླ་མར་ཁུར་མི་སྲིད་པའི་ཕྱིར། ཡང་དྲག་ནག་གིས་འགྲོ་མགོན་ཆོས་འཕགས་ཀྱི་སྒར་པའི་ལྕགས་འགུ་ཁུར་ནས་དྲག་པ་འགོས་པས་དྲག་ནག་ཡིན་ཟེར་བ་མི་བདེན་ཏེ། དྲག་ནག་གི་ཡབ་དང་སྤུན་རྣམས་མདོ་དབུས་ཁམས་གསུམ་དུ་གྲགས་པའི་མི་ཆེན་པོ་དང་རྒྱལ་རྒྱུད་ཡིན་པས་དེ་མི་སྲིད་པའི་ཕྱིར་རོ། །བོད་ཆོས་རྒྱལ་གྱི་གདུང་རྒྱུད་གཅིག་འདི་ན་འཁྱར་བའི་དོན་ཅི་ཡིན་ཞེ་ན། དེ་ཡང་སྤྱིར་མང་བཀུར་རྒྱལ་པོའི་རྒྱལ་རྒྱུད་འདི། འཛམ་བུ་གླིང་གི་ཆོས་ཀྱི་རྒྱལ་པོ་འབྱུང་བའི་ས་བོན་དང་འདྲ་སྟེ། རྒྱ་གར་ཤར་ནུབ་ལྷོ་བྱང་ཐམས་ཅད་དུ་ཆོས་རྒྱལ་ཁྲི་ཕྲག་མང་པོ་འབྱུང་བ་དང་། ཤམ་བྷ་ལར་འཁྱར་བ་ཤམ་བྷ་ལའི་ཆོས་རྒྱལ་རྣམས། བོད་དུ་འཁྱར་བ་ལ་བོད་ཆོས་རྒྱལ། དེ་ནས་ཉང་རྐང་དུ་འཁྱར་བས་དེའི་རྒྱལ་པོ་རྣམས་བྱུང་གདའ་བས་ཁམས་སུ་འཁྱར་མི་ལོ་བའི་དོན་ཅི་ཡོད། དེ་འཁྱར་བའི་རྒྱུ་མཚན་ནི་སྔོན་རྒྱལ་པོ་ཁྲི་སྲོང་ལྡེའུ་བཙན་གྱིས་མཁན་པོ་བྷོ་དྷི་སཏྭ་གདན་དྲངས་ནས་མཇལ་འཕྲད་བྱས་དུས། རྒྱལ་པོའི་སྐུ་ཆིངས་མ་བཅིང་བར་མཇལ་ནས། མཁན་པོའི་ཞལ་ནས་རྒྱལ་
པོ་ཁྱོད་ཀྱི་དབུ་ལ་ལྭ་ཐོད་གདའ་བས་སྟོད་དུ་རྒྱལ་ཁྲིམས་ཞྭ་ཙམ་ཞིག་ཆགས། ཞབས་ལྷམ་མནབ་ནི་གདའ་བས་སྨད་དུ་རྒྱལ་ཁྲིམས་ལྷམ་ཙམ་ཞིག་ཆགས། སྐེད་པ་ལ་སྐུ་ཆིངས་མི་གདའ་བས་བར་འདི་ན་རྒྱལ་ཁྲིམས་མྱུར་དུ་ཞིག་པར་འདུག་གསུང་པ་དང་། ཨོ་རྒྱན་ལུང་བསྟན་ལས་ཀྱང་། ལོ་བརྒྱའི་བར་དུ་ཆོས་ཁྲིམས་རྒྱལ་ཁྲིམས་མེད། །རྗེ་མེད་འབངས་མེད་བོད་ཁམས་མཚོ་ལྟར་འཁྲུག །རྒྱལ་ཁྲིམས་དར་གྱི་གཞི་སྟོན་མ་ཆགས་པས། །མང་ཚན་ཉུང་ཚན་ལྟོགས་སྲིད་ཕྱུག་སྲིད་ཅེས། །སྡེ་ཚན་བཞིར་གྱེས་ཉིན་མཚན་གསོད་ཅིང་གཅོད། །ཅེས་ལུང་བསྟན་པའི་ཐོག་ཏུ་བབ་སྟེ། སྟོད་དུ་རྒྱལ་ཁྲིམས་ཞྭ་ཙམ་ཆགས་པ་མངའ་རིས་གུ་གེ་རྒྱལ་པོ། སྨད་དུ་རྒྱལ་ཁྲིམས་ལྷམ་ཙམ་ཆགས་པ་ཀོང་པོ་སྟོད་ཤོང་རྒྱལ་པོ་བྱུང་། བར་དབུས་གཙང་རུ་བཞི་ན་ལོ་བརྒྱའི་བར་དུ་དཔོན་མེད་གཡོག་མེད་བྱུང་སྟེ། ལྟོགས་སྲིད་ཟེར་ནས་དབུལ་པོ་ཚོས་ཆུས་གཅིག་བྱས། ཕྱུག་སྲིད་ཟེར་ནས་ཕྱུག་པོ་ཚོས་ཆུས་གཅིག་བྱས། མོང་སྲིད་ཟེར་ནས་མི་ངོ་མང་བ་ཆུས་གཅིག་བྱས། ཉུང་སྲིད་ཟེར་ནས་མི་ངོ་ཉུང་བ་ཚོས་ཆུས་གཅིག་བྱས་ཏེ། གསོད་གཅོད་རྐུ་འཕྲོག་དམག་ཇག་བྱེད་རེས་དར་ནས་
དབུས་གཙང་ན་རྒྱལ་རྒྱུད་མང་པོ་ཡོད་ཀྱང་ཁྲིམས་ནོན་ནས་བཞུགས་པ་མ་བྱུང་སྟེ། དབུས་རུ་བྱང་གི་རྒྱལ་རྒྱུད་གཅིག་ཁམས་སུ་བྱོན་ནས་གཅིག་ཤར་ཙོང་ཁ་ན་བྱོན་པས་ཙོང་ཁ་རྒྱལ་པོ་བྱུང་། གཅིག་ངོམ་སྨད་སྐྱོ་གཉིས་ནས་བཟུང་བའི་རྒྱུད་ལ་གདོང་སྤོམ་ར་བྱུང་བར་མངོན་ཏེ། དྲག་ནག་དང་མཁའ་སྤྱོད་པ་རྣམས་ཀྱི་ཕ་སྤུན་ཚོ་ཡང་དབུས་རུ་བྱང་གི་འདམ་ལྕོག་རྩེ་ལ་ཕྱི་ནང་ན་ཡོད་པའི་ལོ་རྒྱུས་གདའ་བ་དང་། དབུས་དང་ངོམ་གཉིས་ཀ་གནས་གཉིས་མཛད་པ་ཡིན་པས། གདོང་སྦྱིན་པའི་བུ་ལ་སངས་རྒྱས་དཔལ་ཆེ་ཆུང་གཉིས་དབུས་ན་བཞུགས་རབ་རྣམ་ཐར་ན་གསལ་ཞིང་། སང་ཆུང་གི་སྲས་ལ་ལ་ཕྱི་ནམ་མཁའ་རྒྱལ་མཚན་འཁྲུངས། སང་ཆེན་གྱི་སྲས་དཀོན་མཆོག་བཟང་པོས་སྟོད་ཧོར་གྱི་རྒྱལ་པོ་དང་མངའ་རིས་གུ་གེ་རྒྱལ་པོ་དང་གཉིས་ཀས་བློན་ཆེན་བྱས་ནས། དུ་ཝན་ཞལ་གྱི་ལས་ཀ་བླངས། རྒྱལ་བ་བཟང་པོ་ཡན་ཆད་མདོ་དབུས་ཁམས་གསུམ་ན་གྲགས་སོ། །ཞེས་རྣམ་ཐར་ནང་ན་གསལ་ལོ། །དེ་ལྟར་ངོམ་སྟོད་སྨད་བར་གསུམ་གྱི་ཨ་ནུ་ཞལ་ངོ་རྣམས་ཕ་རུས་ལ་ཁྱད་མེད་ལྷ་གདོང་དཀར་པོ་ཡིན་འོད་གསལ་ལྷའི་གདུང་ཡིན། རྒྱ་གར་རྒྱལ་པོའི་རྒྱལ་རྒྱུད་ཡིན། བོད་རྒྱལ་པོའི་རྒྱལ་རྒྱུད་
ཡིན། མཁའ་སྤྱོད་པའི་གདུང་རྒྱུད་ཡིན་པ་ལ་འདྲ། མ་འོག་ནི་གནས་མདོ་བ་མཐོ་སྟེ། སྐྱོ་ངོམ་ཀྱི་སྡེ་པ་རྣམས་ཀྱང་མོ་དྲོང་གི་ཤར་མ་ངོ་དམར་ལ་ཐོན་པའི་སྟོད་འོག་གི་རྒྱུད་ཡིན། ངོམ་སྟོད་པ་ཐམས་ཅད་ནི་ནོར་མ་ཝ་ལས་ཐོན་པའི་རྟོལ་གོག་གི་རྒྱུད་ཡིན་ནོ། །དེ་ཡང་མ་འོག་བཤད་ན། མཁའ་སྤྱོད་པའི་མ་ཡུམ་ནི་ཇ་བཟའ་ཆོས་ཀྱི་སྒྲོན་མ་ཡིན་ཏེ། རྣམ་ཐར་ལས། བྱད་གཟུགས་ལང་ཚོ་ཕུན་སུམ་ཚོགས། །ཡན་ལག་མཆོག་མཛེས་ལྷ་མོ་ལྟར། །གཟུགས་བཟང་གྲགས་པས་ཕྱོགས་ཀུན་ཁྱབ། །སྐྱེ་བོའི་ཡིད་ཀྱི་ལྕགས་ཀྱུ་བཞིན། །ཅེས་གསུངས་སོ། །སྒམ་པོ་པའི་མ་ཡུམ་ནི་ཟུར་མང་ཆོས་དཔལ་བཟང་པོའི་དབོན་མོ། །མེ་ཉག་བཟའ་ཤེལ་སྒྲོལ་མ་སྟེ་བཙུན་མོ་རིན་ཆེན་ལྟར་བུད་མེད་ཀྱི་ཡོན་ཏན་ཐམས་ཅད་དང་ལྡན་པ་སྟེ། མཛེས་སྒེག་ལྡེམ་འཁྱུག་སྒྱུ་རྩལ་ཀུན་ལ་མཁས། །བློ་ཞིབ་ཚུལ་དམ་བྱ་བ་ཀུན་དང་ལྡན། །བག་ཡོད་ཁྲིམས་ལྡན་བཞིན་དུ་དགེ་ལ་དད། །ཅེས་སོགས་ཡོན་ཏན་མང་པོ་ཡོད་པར་གསུངས་སོ། །བྱ་བྲལ་བའི་མ་ཡུམ་གྱི་མིང་མི་གསལ་ཡང་། རིགས་རུས་ལང་ཚོ་ཡོན་ཏན་ཕུན་སུམ་ཚོགས་པ་གཅིག་གོ །ལྷ་རྒོད་རྒྱལ་གྱི་མ་ཡུམ་ནི། རིན་ལ་
རྟ་བརྒྱ་བྱིན་པས་ཁྱུ་མོ་རྟ་བརྒྱ་མ་ཟེར་ཏེ། གོས་ཆེན་ཟབ་ཆེན་སོགས་ཀྱི་སྤྱམ་ཆེ་སོགས་བཙུན་མོ་རིན་ཆེན་ལྟ་བུ་ཡོད་ཟེར། དབང་ཕྱུག་རྒྱལ་མཚན་གྱི་མ་ཡུལ་ནི་རོང་པོ་བཟའ། ཁྲ་ལུ་མ་མགོན་པོ་རྒྱལ་མཚན་གྱི་མ་ཡུམ་ནི་གདན་ས་བར་པ། སི་ཏུའི་དབོན་མོ་དཀར་བཟའ་སྟེ་འདི་ལ་ཐུགས་ལྗགས་སྤྱན་གསུམ་བྱོན། བཙན་ཕྱུག་སྐུ་མཆེད་ཀྱི་མ་ནི། ལྷ་རྒོད་རྒྱལ་གྱི་ནང་བློན་གསེར་ཡོབ་གཡས་པ། བེ་ཁྲོ་སྒོ་ཡ་བའི་བུ་མོ་རྗེ་མོ་སྐས་མོ་སྟེ། འདི་སྐབས་སུ་སྒོ་ཡ་བ་ལ་གནས་པོ་རིན་ཆེན་ནམ་མཁའ་ཟེར་བ་བྱུང་ནས་བཀའ་འགྱུར་བཞེངས། རེ་ནེ་སྐྱབས་ཟེར་བའི་སྔགས་པ་རྙིང་མར་མཁས་ཤིང་ཨོ་རྒྱན་དང་མགོན་པོ་མ་ནིང་ཞལ་མཐོང་པས་འགྲས་ཚད་བརླག་ནུས་པ་གཅིག་དང་གནས་པོ་འགའ་རེ་བྱུང་སྟེ། བཙན་དྲག་ཆེ་ནས་ངོམ་སྟོད་སྨད་པ་ཡང་ཡང་སྒོ་བ་ལ་སྐྲག་ནས་ངོ་ཅི་ཟིན་གྱིས་དྲིབ་ལ་འདུག་དགོས་པ་བྱུང་ཟེར། འཕགས་པ་དོན་འགྲུབ་ཀྱི་མ་དང་། ས་སྒང་སྡེ་པ་མགོན་པོ་རྒྱལ་གྱི་ཡུམ་གཉིས་ཀ་མཁན་སྟོད་དཔོན་གྱི་བུ་མོ་མཁན་བཟའ་ཡིན་པས། ཕ་སྤུན་མ་སྤུན་གཉིས་རེད་འདུག་པས་ཉེ་ཆེ་བ་ཡིན་ནོ། །ཕ་གཡག་མཉམ་མ་འབྲི་མཉམ་ཡིན་ཟེར་བ་བྱུང་། རིན་ཆེན་རྒྱལ་གྱི་མ་ནི་བེ་ཁྲོ་
བཀྲ་ཤིས་དྲག་གི་མི་རྒྱུད་པདྨ་བཀྲ་ཤིས་ཀྱི་མ་ནི་མདོ་བོ་ཆོས་སེང་གེའི་རྒྱུད་ཡིན་ཏེ། ད་ལྟ་མངའ་ཐང་ཆུང་ན་ཡང་ངོམ་པའི་བློན་གསེར་ཡོབ་ཅན་བཅོ་བརྒྱད་ཀྱི་གྲ་ཚར་ལ་ཐེ་བའི་མི་རྒྱུད་ནི་ཡིན་པར་གདའོ། །འོ་ན་གདུང་རྒྱུད་རྩ་བ་དེ་བས་རྟོལ་རྒོག་ཚོ་དེ་སྟོབས་ཆེ་བ་ཅི་ཡིན་ཞེ་ན། དེ་ནི་བོད་རྒྱལ་པོའི་རྟེན་འབྲེལ་འཆུགས་པ་ཡིན་པར་བཤད་དོ། རྒྱལ་པོ་གླང་དར་འདས་ནས་བཙུན་མོ་ཆུང་བ་ལ་སྲས་གཅིག་འཁྲུངས་རྒྱུ་ཡོད་པ་ལ། བཙུན་མོ་ཆེ་བ་དབང་ཆེ་སྟེ་མོ་ལ་ཡང་སྲས་འཁྲུངས་རྒྱུ་ཡོད་པར་བུ་མོ་གཅིག་སྐྱེས། ཆུང་བའི་བུ་དེ་རྐུ་ནི་ཕྲོག་བསམས་པས། ཆུང་བས་འཕྲིགས་ནས་ཉིན་མཚན་མེད་པར་མར་མེ་བྱས། མར་མེའི་འོད་ལ་སྲུང་བས་འོད་སྲུང་བཏགས་ནས་སྲུང་མི་མང་པོ་བཞག་པས་མ་ཐོབ་ནས། སྤྲང་པོའི་བུ་ཟླ་བ་བརྒྱད་ལོན་པ་གཅིག་བརྐུས་ནས་བུ་མོ་དེའི་མལ་དུ་བཞག་པས། ལྷ་ས་མ་རེད་འདྲེ་ས་རེད། བུ་ལ་བུ་མོ་ནོར་ས་རེད་ཟེར་བ་བྱུང་། བློན་པོ་རིགས་པ་ཅན་གཅིག་གིས་འཕྲིགས་ནས། བུ་སྐྱེས་མ་ཐག་སོ་སྐྱེ་བ་མེད་དེ། ཡུམ་དབང་ཆེ་བས་ཡུམ་གྱི་གསུང་དེ་བརྟན་ཆུག་ཟེར་བས། ཡུམ་བརྟན་བཏགས་བུ་དེ་གཉིས་རྒྱལ་ས་མ་དུམ་ནས། ཡུམ་བརྟན་
གྱིས་ལྷ་ས་བཟུང་། འོད་སྲུང་གིས་བསམ་ཡས་བཟུང་ནས་ལོ་བཅུ་གཉིས་ལ་འཁྲུག་པ་བྱས་པས་འོད་སྲུང་ཕམ་སྟེ་མངའ་རིས་ལ་བྱོན། ཡུམ་བརྟན་གྱིས་དབུས་གཙང་རུ་བཞིའི་རྒྱལ་ས་དེ་ཐོབ་། ཕྱིས་ནས་རྒྱལ་བོད་འཁྲུག །དེ་ནས་འོད་སྲུང་ཕྱིར་བྲོས། དེ་ལྟར་སྤྱང་ཕྲུག་མའི་དབང་གིས་རྒྱལ་ས་ན་བཞག་པས་རྟེན་འབྲེལ་འཆུགས་ནས། དེ་ཕྱིན་ཆད་བོད་ལ་མི་རྒྱུད་གཙང་མ་དེ་ལས་རྩོག་ཕྲུག་དེ་སྟོབས་དང་དར་རྒྱས་ཆེ་བ་བྱུང་བ་ཡིན་ཟེར་རོ། །འོ་ན་བོད་ཆོས་རྒྱལ་གྱི་རྒྱུད་ཡིན་ཟེར་བ་རྣམ་ཐར་ན་མི་གསལ་བ་འདི་གང་ནས་ཐོས་ཞེ་ན། འདི་ནི་སྔར་ནས་གདུང་རྒྱུད་སླད་མེད་ཡོད་པར་འདུག་པ་བདག་གིས་ཐོས་ལུགས་ནི། ཨ་ནུ་སྔགས་འཆང་པདྨ་དབང་དྲག་དེས་ཡོན་བདག་རྣམས་ཀྱི་ས་ན། བཙན་རྒོད་རོལ་པ་སྐྱ་བདུན་གྱི་གསོལ་ཁ་དེ་ཚར་རེ་འདོན་སྲོལ་གདའ། ང་ཆུང་ངུ་ཡིན་ཀྱང་། བཙན་རྒོད་རོལ་པ་སྐྱ་བདུན་ནི་གུ་རུ་ཞི་དྲག་གི་བཀའ་སྲུང་འདྲ་ནི་མ་རེད། གཏེར་ཁ་ཡང་མི་གཅིག་གོ །འདིའི་སྒྲུབ་ཐབས་ཀྱང་གར་མི་གདའ་བས་འདོན་ཏེ་ཅི་བྱེད་ཞུས་པས། འདི་ཨོ་རྒྱན་པདྨས་རྒྱལ་པོ་ཁྲི་སྲོང་ལྡེའུ་བཙན་གྱི་གདུང་རྒྱུད་ཐམས་ཅད་ཀྱི་དགྲ་བླ་ལ་བསྐོས་པ་ཡིན་ཡུད་གུ་ཁྲི་སྲོང་ལྡེའུ་བཙན་གྱི་
གདུང་རྒྱུད་ཡིན། བཙན་གསོལ་འདིའི་ནང་ན། ཁྲི་སྲོང་ལྡེའུ་བཙན་རྗེ་རིགས་དང་། །རྣལ་འབྱོར་དམ་ལྡན་བརྒྱུད་པར་བཅས། །དམ་ཚིག་གཅིག་ཏུ་བསྒྲུབ་པ་ལ། །སྐུ་ལ་བསྡོ་བའི་རིགས་རྒྱུད་ཆོད། །ལོག་པའི་སྡེ་དཔུང་ཆམ་ལ་ཕོབ། །ཟེར་བ་གདའ་ལེ་ཁར་གསུང་ཞིང་ལེའུ་བདུན་མ་འདོན་དུས་ཀྱང་། ཆོས་རྒྱལ་གདུང་རྒྱུད་མཐའ་རུ་མ་གཏོང་བར། །ཡིད་གཉིས་ཐེ་ཚོམ་མེད་པར་གསོལ་བ་འདེབས། །ང་ཡི་ཐུགས་རྗེས་འཕོ་འགྱུར་མེད་པར་གཟིགས། །ཟེར་བའི་སྐབས་སུ་ཆོས་རྒྱལ་གྱི་གདུང་རྒྱུད་ཡིན་བསམ་པའི་ཡུས་ཀྱིས་མངོན་མངོན་ནས་སྤྱན་ཆབ་འདོན་ཅིང་ངུ་སྐད་འདོན་པ་ཡང་མང་དུ་མཐོང་ངོ་། །འོ་ན་བོད་རྒྱལ་པོའི་གདུང་རིགས་ཡིན་པས་ཅི་ཕན་ན། རིགས་གསུམ་མགོན་པོའི་གདུང་རྒྱུད་ཡིན་པས་བྱིན་རླབས་ཆེ། ཨོ་རྒྱན་གྱི་ཐུགས་རྗེས་རྒྱུན་དུ་གཟིགས་བོད་ཀྱི་མགུར་ལྷ་བཅུ་གསུམ་དང་བོད་ཁམས་བསྟན་མ་བཅུ་གཉིས་ཀྱིས་སྡོང་གྲོགས་བྱེད་པ་ཡིན་ནོ། །འོ་ན་རྒྱ་གར་རྒྱལ་པོའི་རྒྱུད་ཡིན་ན་བོད་ཀྱི་མི་ལ་མི་ཐེ། བོད་མིའུ་རུས་དྲུག་ཏུ་མི་ཐེ་བས་ལྡོང་ཡང་མིན། མིའུ་འགྲམ་ཆགས་དང་མི་མཐུན་ཟེར་ན། སྐྱོན་མེད་དེ་བོད་ཀྱི་རྒྱལ་པོ་དེ་བོད་ལ་མི་ཐེ་ན་
སུ་ཐེ་ལུས་ཀྱི་གཙོ་བོ་མགོ་བོ་ཡིན། མིའུ་འགྲམ་ཆགས་ནས་རྒྱ་དཀར་ནག་གི་རྒྱལ་པོ་བོད་རྒྱལ་པོ་དང་གསུམ་ག་གདོང་ཡིན་པར་བཤད། དཀར་པོ་གདོང་ལ་རྒྱལ་བཞི་ཡོད། དཀར་པོ་གདོང་གི་རྒྱལ་བཞི་དེ། །རྒྱ་གར་རྒྱལ་པོའི་གདོང་ཅིག་ཡིན། །རྒྱ་གར་ཆོས་ཀྱི་འབྱུང་གནས་དེ། །གདོང་དམ་པ་ཆོས་ཀྱི་རྒྱལ་མཚན་བཟུང་། །རྒྱ་ནག་རྒྱལ་པོའི་གདོང་གཅིག་ཡིན་། །རྒྱ་ནག་ཏི་ཤའི་ཁྲིམས་ར་དེ། །གདོང་ཡོ་ན་སེ་ཆེན་རྒྱལ་པོས་བཟུང་། །དབུས་ཇོ་བོའི་གསེར་ཁང་གོང་མ་དེ། །གདོང་ཟིན་ན་རྡོ་རྗེ་རྒྱལ་མཚན་བཟུང་། །ལྷ་ཁྱུང་མགོ་དགུང་དང་མཉམ་མི་དེ། །གདོང་ཟིན་ནུ་རྡོ་རྗེ་རྒྱལ་མཚན་ཡིན། །ཞེས་གསུངས་པ་དང་དོན་མཐུན་ཏེ། རྒྱ་གར་ཆོས་ཀྱི་རྒྱལ་པོ་དང་། རྒྱ་ནག་ཁྲིམས་ཀྱི་རྒྱལ་པོ་དང་། ཧོར་སེ་ཆེན་རྒྱལ་པོ་དང་། གེ་སར་དམག་གི་རྒྱལ་པོ་དང་། མོན་གིང་རི་རྒྱལ་པོ། ཤམ་བྷ་ལ་རིགས་ལྡན་གྱི་རྒྱལ་པོ་ཐམས་ཅད་གདོང་ཡིན་པས། དཀར་པོ་གདོང་གི་རྒྱལ་རྒྱུད་ཡོད་ཟེར་བ་དེའི་དོན་ཡིན་ནོ། །དེ་ཡང་མཁའ་སྤྱོད་པའི་འཁྲུངས་ཡུལ་ངོམ་གྱི་ས་ཆ་འདི་ཡང་། རྒྱ་གར་རྡོ་རྗེ་གདན་གྱི་བྱང་ཕྱོགས། ཐུགས་རྗེ་ཆེན་པོ་སྤྱན་རས་གཟིགས་ཀྱི་ཞིང་ཁམས། །
བོད་ཁ་བ་ཅན་གྱི་ཡུལ། མདོ་ཁམས་གླིང་ཁྲི་བར་མ། མདོ་ཁམས་སྒང་དྲུག་གི་ནང་ནས་ས་བཟང་བ། ཡུལ་ལ་རྨ་གཡང་ཆགས་པ། ངོམ་སྔོན་མོ་ནས་ཕྱུག་གི་ཡུལ་དཔལ་འཁོར་ལོ་བདེ་མཆོག་གསུང་གི་གནས་འོག་མིན་ཀརྨའི་ལྷོ་ཕྱོགས། འདོད་དགུ་འབྱུང་བའི་ཚོང་དུས་ཀྱི་ཉེ་ལོག །ཡོན་ཏན་ཕུན་སུམ་ཚོགས་པ་སྟེ། དྲུང་ཆེན་སྒམ་པོ་པའི་ཞལ་ནས་ཡུལ་བཟང་པོ་སོ་སོ་ཀུན་ལ་ཡོད། །ཡོན་ཏན་དུ་མ་དང་ལྡན་པས། །འདི་ཡི་སྐྱོན་རྣམས་རྦད་མི་དགོས། །གཞན་ལ་ངོམ་དུ་རུང་བས་ངོམ། །ཞེས་སོགས་རྒྱ་ཆེར་གསུངས་པ་དང་། སྔར་གྱི་ངག་རྒྱུན་ལས་འབྱུང་བ་གོ་བདེ་བར་བཀོད་ན་འདི་སྐད་བྱ་སྟེ། ངོམ་ཞེས་ཟེར་བའི་བརྟན་ཚིག་ནི། ཕུ་ན་རྒྱལ་ཆེན་བཅོ་བརྒྱད་ཡོད། །ཡུལ་ལྷ་བཟང་པོ་ངོམ་དུ་རུང་། །ལྷ་གཞན་ལ་མི་སྨོན་ལྷ་ཡིས་ངོམ། །མདའ་ན་མདའ་ཆེན་བཅོ་བརྒྱད་ཡོད། །གནས་གཞི་བཟང་པོ་ངོམ་དུ་རུང་། །ཡུལ་གཞན་ལ་མི་སྨོན་ཡུལ་གྱིས་ངོམ། །ཕུ་ན་རྩྭ་ཁ་བཟང་པོ་ཡོད། །འབྲོག་པ་བཟང་པོ་ངོམ་དུ་རུང་། །ཕྱུགས་བེའུ་ལུག་རྣམས་ཀྱང་རྩྭ་ཡིས་ངོམ། །མདའ་ན་ཆུ་མ་བཟང་པོ་ཡོད། །ཞིང་ས་བཟང་པོ་ངོམ་དུ་རུང་། །ཚོང་པ་རྣམས་
ཀྱང་ནས་ཀྱིས་ངོམ། །བར་ན་ས་འགགས་བཙན་པོ་ཡོད། །མཐའ་དམག་བྱུང་དུས་ངོམ་དུ་རུང་། །ཝུར་ཞོག་པ་ཚོ་རྫོང་གི་ངོམ། །དེ་ཕྱིར་ངོམ་ཞེས་བྱ་བ་ཡིན། །ཅེས་བྱའོ། །དེ་ལ་ཡུལ་བཟང་པོ་ངོམ་དུ་རུང་བ་ནི། ལྷ་བཟང་པོ་ངོམ་དུ་རུང་བ་ཡོད་ལུགས་ནི། དྲུང་ཆེན་མཁའ་སྤྱོད་པ་དེ་ཉིད་ཀྱིས་དམ་ཅན་རྡོ་རྗེ་ལེགས་པ་མགར་བ་དམར་པོའི་ཆ་ལུགས་ཅན། ངོམ་པའི་སྡེ་འདིས་གར་ཁྱབ་ཚད་དམ་ཅན་དེའི་སྐུ་ལུས་ཁྱབ་པ་གཅིག་ཞལ་གཟིགས་དུས། ངོམ་པའི་ས་ཆ་འདི་མི་སྡེ་དང་བཅས་པ་འདི་སྲུང་ཞིང་སྐྱོབ་པའི་བཀའ་གཏད་དམ་པོ་མཛད་པས། ངོམ་པ་སྤྱི་ལ་མགོན་པའི་ཕྱིར། ངོམ་པའི་གདུང་རྒྱུད་མིན་ཀྱང་དུད་ཆེ་འབྲིང་ཕལ་ཆེར་ལ་དམ་ཅན་འཁོར་ཟེར་བ་ཡོད་ཅིང་། སྡེ་ཁག་སོགས་ཐག་རིང་དུ་སོང་ན་ནི་ངོམ་ནས་ཡིན་ཚད་ལ་དམ་ཅན་འཁྲི་ཟེར་ནས་གསོལ་ཁ་དང་མགྱོགས་སོགས་བྱེད་དགོས་པ་ཡིན་ཟེར་རོ། །ཡུལ་ལྷ་བཟང་པོ་ངོམ་དུ་རུང་བ་ནི། ཕུ་ན་རྒྱལ་ཆེན་བཅོ་བརྒྱད་ཡོད་པའི་ནང་ནས། སྟོབས་དང་ལྡན་པའི་རྒྱལ་ཆེན་བཞི་ཡོད་དེ། ངོམ་རྒྱལ་མཚོ་བཀྲ་དང་། ཀླུ་རྒྱལ་པོ་ཏོ། ཀླུ་རྒྱལ་གཙུག་ན་རིན་ཆེན། རྫོ་རྒྱལ་རི་ཏི་དང་བཞིའོ། །དེ་ཡང་ངོམ་རྒྱལ་ནི་རྣམ་སྲས་
དམར་པོའི་དཀྱིལ་འཁོར་གྱི་ལྷོ་ནུབ་ཀྱི་གྲར་བཞུགས་པའི་གདོན་སྦྱིན་གྱི་རྒྱལ་པོ་རྣ་བོ་ཆེ་དང་། བེག་རྩེའི་འཁོར་ལྷོ་ཕྱོགས་ཀྱི་ཤན་པ་གྲི་ཐོགས་དང་། གནོད་སྦྱིན་ཤན་པ་དམར་ནག་གི་འཁོར་ལྷོ་ཕྱོགས་ཀྱི་གཤིན་རྗེ་གཟིག་མགོ་ཅན། བལ་བོད་མཚམས་སུ་གནས་གཞི་གཅིག་ཡོད་པས། ཨོ་རྒྱན་དང་པོ་ཕེབས་དུས་དམ་ལ་བཏགས་མེ་ཏོག་ཆག་གང་ཕུལ་ནས་སེམས་བསྐྱེད། སྲོག་སྙིང་ཕུལ་ཏེ་བསྟན་པ་བསྲུང་བར་ཁས་བླངས་ཏེ་མིང་དགེ་བསྙེན་རྡོ་རྗེའི་མཚན་ཅན་དུ་བཏགས་པ་དང་། དབུས་སུ་རིའི་རྒྱབ་རི་ལ་གནས་གཞི་གཅིག་ཡོད་པས་མིང་དགེ་བསྙེན་རྡོ་རྗེ་དཔའ་བསྟན་ཞེས་བྱ་བ་དང་། ངོམ་དུ་བཞུགས་དུས་ངོམ་རྒྱལ་མཚོ་བཀྲ་ཞེས་བྱ་སྟེ། ཨོ་རྒྱན་གྱིས་གཏེར་སྒོ་གསལ་བར་ཡོད། ལྷའི་དགེ་བསྙེན་བརྒྱ་དང་ཉི་ཤུའི་གྲྭ་ཚར་གྱི་གཅིག་ཡིན་པས་སྟོབས་དང་ལྡན་ལ་ངོམ་དུ་རུང་བའོ། །ཀླུ་རྒྱལ་སྤོ་ཏི་ནི་ཨོ་རྒྱན་རིན་པོ་ཆེ་དང་ཆེ་ཚང་སངས་རྒྱས་ཡེ་ཤེས་སོགས་ཀྱིས་དམ་ལ་བཏགས་ཏེ། སྒྲུབ་ཐབས་ཀྱང་ཡོད་པར་གྲགས་ཤིང་ཝ་ཕུ་ན་ཨོ་རྒྱན་གྱིས་གཏེར་སྦས་གཏེར་གྱི་སྲུང་མར་བསྐོས་ཏེ། དམ་ཅན་དངོས་ཡིན་ཟེར་བ་འདུག་ཀྱང་མཆེད་ཟླ་སུམ་བརྒྱ་དྲུག་ཅུའི་གཅིག་ཡིན་པར་
མངོན་པར་སྟོབས་དང་ལྡན་ཅིང་ངོམ་དུ་རུང་། དེའི་མདུན་གྱི་ཆུ་མིག་ན་ཀླུ་རྒྱལ་གཙུག་ན་རིན་ཆེན་གནས་པར་གསུངས་ཏེ། འདི་ནི་བྱ་ཁྱུང་གི་རྒྱལ་པོ་ག་རུ་ཊས་ཀྱང་མ་ཐུབ་ནས་ཤོར་བའི་ཀླུའི་རྒྱལ་པོ་ཤིན་ཏུ་སྟོབས་ལྡན་ཡིན་པས། ཡུལ་ལ་རྨ་གཡང་ཆགས་ཤིང་ལོངས་སྤྱོད་ཕྱུག་སྟེ། འདི་ནི་ཀླུའི་རྒྱལ་པོ་ནོར་དྲང་སྤེལ་མཛད་ཅེས་བྱ་བ་ཡིན་པར་བཤད་པའི་ཕྱིར་རོ། །ཇོ་རྒྱལ་རེ་ཏི་ནི་རྨ་རྒྱལ་སྤོམ་རའི་སྲས་ཡིན་པར་གྲགས་ཤིང་། བཀའ་བརྒྱད་ཀྱི་བཀའ་སྲུང་དྲེགས་པའི་སྡེ་དཔོན་སུམ་ཅུའི་ནང་ནས། མ་སང་གཡག་སྤང་སྐྱེས་གཅིག་ཡིན་པར་མངོན་ཏེ། ཉང་ལུགས་ཀྱི་བཀའ་བརྒྱད་ཀྱི་སྡེ་དཔོན་སུམ་ཅུའི་གསོལ་ཁ་ཆེན་པོ་ནས་བཤད་པའི་སྐུའི་ཆ་ལུགས་དང་། སངས་རྒྱས་ཡེ་ཤེས་ཀྱི་ཇོ་རྒྱལ་ཞལ་གཟིགས་དུས་ཀྱི་སྐུ་དང་ཆ་ལུགས་མཐུན་པའི་ཕྱིར་རོ། །དེ་ཡང་པདྨ་བཀའ་ཐང་དང་། དེ་ནས་ཁམས་ཀྱི་སེང་གེ་བྲག་ཏུ་བྱོན། ཞེས་སོགས་གསུངས་པ་ནི། བླ་མ་མགར་དམ་པས་བྲག་དམར་ཕུའི་བྲག་སེང་གེ་སྤྱན་གསུམ་འདི་ཡིན་པ་འདྲ་གསུངས་ཟེར་ཏེ་འདི་ཡིན་ཤས་ཆུང་སྟེ་སྔར་ནས་ཡིན་ཟེར་བ་མ་ཐོས་ལ། ས་སྟོད་པ་རྣམས་ཀྱིས་རྫ་སྟོད་སྤྱི་འབྱམས་ན་ཨོ་རྒྱན་གྱི་གནས་ཡོད། དེའི་
གཡས་ན་བྲག་སེང་གེ་གནམ་དུ་མཆོང་འདྲ་ལ་གཏེར་ཁ་ཡོད་པས་དེ་ཡིན་པར་བྱེད། ངེད་རང་ས་སྨད་པ་ཚོས་ནི་ཟླ་ངོམ་གྱི་ཆུ་འདུས་ཤིན་ཏུ་གཉེན་པ་ཆབ་མདོའི་སེང་གེ་རྫོང་འདི་ཡིན་ཟེར་ཏེ། དཔེར་ན་རྒྱ་གར་ཤར་ཕྱོགས་དང་བོད་གཉིས་ཀ་ལ་ཙཱ་རི་རེ་ཡོད་པ་དང་། གོ་བོ་ཕུག་ཡང་ཆེ་ཆུང་གཉིས་གདའ་བ་ལྟར་གཉིས་ག་མིན་པའི་ངེས་པ་མེད། དེ་ཡང་ཨོ་རྒྱན་རིན་པོ་ཆེ་བོད་དུ་མ་ཕེབས་པའི་སྔོན་ཙམ་དུ་ཁམས་ཕྱོགས་ཀྱི་ལྷ་འདྲེ་ཐམས་ཅད་དམ་ལ་བཏགས་པར་དགོངས་ནས། རྒྱ་གར་ནས་རྫུ་འཕྲུལ་གྱིས་ཆབ་མདོའི་སེང་གེ་རྫོང་དུ་བྱོན་པས། མ་སང་གཡའ་སྤང་སྐྱེ་གཅིག་ཅེས་བྱ་བ་ཇོ་རྒྱལ་རི་ཏི་འདི་ཉིད། མི་རྒན་མགོ་ལ་སྤུ་ཞྭ་གྱོན་པ་འཇིགས་སུ་རུང་བར་སྤྲུལ་ནས། ལག་པ་གཉིས་གངས་ཏི་སེའི་རྩེར་དང་མཚོ་མ་ཕམ་ལ་སྙབ། རྐང་པ་ཁམས་ཀྱི་དབྱེར་མོ་ཐང་དུ་བརྐྱངས་ཏེ། ཁམས་ཕྱོགས་ལྷ་འདྲེ་མི་མ་ཡིན་བྱེ་བ་དུང་ཕྱུར་མང་པོ་དམག་ཏུ་བསྡུས་ནས་སློབ་དཔོན་ལ་མཚོན་ཆའི་ཆར་ཆེན་པོ་ཕབ་བོ། །དེར་སློབ་དཔོན་ཐུགས་ཁྲོས་ཏེ། གུ་རུ་དྲག་པོ་རིགས་ལྔར་སྐུ་བཞེངས་ཏེ་ཁམས་ཕྱོགས་ཀྱི་ལྷ་འདྲེ་ཐམས་ཅད་དུས་གཅིག་ཏུ་དམ་ལ་བཏགས། སེང་གེ་རྫོང་དུ་གཏེར་ཁ་མང་དུ་
སྦས་སོ། །དེའི་ཕྱིར་ཛོ་རྒྱལ་འདི་ནི་ཨོ་རྒྱན་གྱི་གཏེར་སྲུང་ཡིན་པས། འདི་ནི་ཡུལ་ལྷ་བཟང་པོ་ངོམ་དུ་རུང་བའོ། །མདའ་ནི་མདའ་ཆེན་བཅོ་བརྒྱད་ལ་ཕལ་མཚོ་རེ་རེ་ཡོད་པའི་ནང་ནས། ཀླུའི་དགེ་བསྙེན་ཆེན་པོ་ལྕམ་རལ་གྱི་ཕོ་བྲང་གསུམ་སྟེ། སྐུའི་གནས་གཞི་སྡེ་བཟེ་མཚོ་དམར་ནག །གསུང་གི་གནས་གཞི་དབྱིས་དོ་མཚོ་ནག །ཐུགས་ཀྱི་གནས་གཞི་གཡོ་རྫོང་མཚོ་ནག་དང་གསུམ་ཡིན་ཟེར། དེ་ཡང་གྲུབ་ཆེན་ཀརྨ་པཀྲིས་ཞལ་ནས། དགེ་བསྙེན་ཆེན་པོ་འདི་ཀླུའི་རྒྱལ་པོ་དུང་སྐྱོང་གི་བུ་ཡིན་པར་འདུག །དབུས་གཙང་ཁམས་གསུམ་ཁོའི་འཁོར་དང་སྤྲུལ་པས་ཁྱབ་པར་འདུག་གསུང་པ་ལྟར་ཁམས་ཕྱོགས་སུ་ཆུ་ཆེན་བཅོ་བརྒྱད་ལ་དབང་ཞིང་སྤྲུལ་པ་ཉ་བོ་ཆེར་སྟོན་པས་ནག་མདོང་ཟེར། དབུས་ཚང་ན་གནས་གཞི་བརྒྱ་ལ་མིང་བརྒྱ་སྟེ། སྐྱི་ཤོད་དུ་གཉེར་མཁར་ནག །བྱང་དུ་གཉན་ཆེན་ཐང་ལྷ། ལྷོ་བྲག་ཏུ་དགེ་བསྙེན་སྨྱོ་ཁ། ནེ་རིང་སེང་གེ་རྫོང་གསུམ་དུ་བདུད་ཟུ་ར་རྭ་སྐྱེས། སྒོང་འགུལ་ལྷོ་རྒྱས་དུ་བདུད་ཕོ་ཟླ་བའི་མདོག་ཅན། མོན་ཁ་རིང་མོར་བདུད་པོ་སྤྲུག་མེད། ཕོ་མོ་རྫོང་རིང་ཕྱོགས་སུ་ཀླུ་བདུད་མགོ་དགུ། ལྷོ་སྟོད་དབུ་རིར་སྐུ་ལྷ་མཁར་ནག །མཚུར་ཕུ་དང་སོག་ཟམ་དུ་
རྡོ་རྗེ་རྒྱལ་པོ་ཞེས་བྱ་སྟེ། ཡུལ་འདིའི་དགེ་བསྙེན་ཡང་དེའི་སྤྲུལ་པ་ཡིན་ཅིང་། འདི་ནི་གུ་རུ་དྲག་པོ་དང་རྟ་མགྲིན་གསང་འདུས་སོགས་ཀྱི་བཀའ་སྲུང་ཨོ་རྒྱན་ཆེན་པོའི་ལས་མཁན་ཡིན་པས། ལྷ་བཟང་པོ་ངོམ་དུ་རུང་བ་ཡིན་ནོ། །འདིའི་ཡུམ་མཚོ་སྨན་འདི་ནི། རྡོ་རྗེ་ཕུར་པའི་བཀའ་སྲུང་བསྲེའི་ལྷ་མོ་མཆེད་བཞིའི་བཀའ་གཉེན་ཚ་བའི་མ་མོ་བཅུ་གཉིས་ཀྱི་ནང་ནས། ཀླུ་མོ་སྦྲུལ་གྱི་མགོ་ཅན་ཡིན་ཏེ། ཨོ་རྒྱན་རིན་པོ་ཆེའི་མཛད་པ་རྡོ་རྗེ་ཕུར་པའི་དབལ་མདོས་ལས། གནས་ནི་ངོམ་གྱི་མཚོ་ལ་གནས། །མོ་ཡི་ལུས་ལ་སྦྲུལ་གྱི་མགོ །ཞེས་སོགས་གསལ་བར་གསུངས་ཏེ་འདི་ནི་མཚོ་མི་རྡུབ་རྟ་རྔུབ་ཕྲུན་བདུན་གྱི་གཅིག་ཡིན་ཟེར་རོ། །དེ་ལྟར་འདི་བསྲེའི་ལྷ་མོའི་གཡོག་མོ་ཡིན་པས་རྩེ་ཆེ་ཞིང་ལོངས་སྤྱོད་སྤེལ་བའི་དངོས་གྲུབ་སྟེར་ནུས་ཏེ། ལྷ་བཟང་པོ་ངོམ་དུ་རུང་བ་ཡིན། དེ་ལྟར་ན་དམ་ཅན་ངོམ་རྒྱལ་ཀླུ་རྒྱལ་གཙུག་ན་རིན་ཆེན། རི་ཏི་དགེ་བསྙེན་ལྕམ་དྲལ་དང་བདུན་པོ་འདི་ནི་ངོམ་པ་སྤྱིའི་ཟོ་དོར་ཡིན་ཀྱང་། འཛམ་གླིང་ཐམས་ཅད་ལ་དབང་བསྒྱུར་བའི་སྟོབས་པོ་ཆེ་ཡིན་པས། ལྷ་བཟང་པོ་ངོམ་དུ་རུང་བ་ཡིན་ནོ། །དྲུང་ཆེན་མཁའ་སྤྱོད་པའི་གདན་ས། ངོམ་རྣམ་
རྒྱལ་སྒང་སྒེར་གྱི་བཀའ་སྲུང་གཉིས་ཡོད་དེ། མཁའ་སྤྱོད་པས་ཟམ་བཙུགས་པ་སོགས་མཛད་དུས། འགུ་ཞབས་དང་ཟམ་སོའི་བྲག་དང་མཚོ་ལ་གནས་པའི་ཀླུ་དེ།། བྱིསྦ་མཛེས་ཤིང་ཡིད་དུ་འོང་བ་གཅིག་ཏུ་སྤྲུལ་ནས་ཆོས་ཞུས། སྐྱབས་གསུམ་འཛིན་པའི་དགེ་བསྙེན་གྱི་སྡོམ་པ་བླངས་བས་ཀླུ་བྱིསྦ་གཟུགས་ཅན་ཡང་ཟེར། ཁོའི་སྤྲུལ་པ་བྱིསྦ་སྦྲུལ་གྱི་མཇུག་མ་ཅན་དུ་འབྱུང་བས་ཀླུ་བྱིསྦའི་གཟུགས་ཅན་ཡང་ཟེར། སྔོན་ཨོ་རྒྱན་རིན་པོ་ཆེ་དང་ཕྱིས་སྤྲུལ་སྐུ་དོན་ལྡན་དང་མཁའ་སྤྱོད་པས་དམ་ལ་བཏགས་པའི་དགེ་བསྙེན་ཡིན་པས། དགེ་བསྙེན་ཆེན་པོ་ཡང་ཟེར། གསང་མཚན་གནས་པོ་འགའ་ཡ་དྷ་ར་ཞེས་བྱ་བ་ཡིན་པར་གསུངས་ཏེ། འདི་ནི་གདན་སའི་སྲུང་མ་ཡིན་ཅིང་མཁའ་སྤྱོད་པའི་དམ་ཚིག་ལ་ཤིན་ཏུ་གནས་པས། སྔར་ནང་སོའི་གཟིམ་ཁང་ནས་མཆོད་རྟེན་གཅིག་སྤྲོ་དགོངས་ནས་བཤིགས་པས་སྦྲུལ་ནག་གཅིག་དངོས་སུ་བྱུང་ནས་ལས་མི་རྣམས་འབྲོས་དགོས་པ་བྱུང་བ་དང་། དེ་རྗེས་ཆོས་རྗེ་ཞིག་གི་སྔོན་གྱི་ཕྱག་ནས་ཡོད་པའི་ཞ་ལ་གཞན་གྱིས་ཐུགས་མ་ཕོད་པ་རང་གིས་སྟ་རེ་བརྒྱབ་པས་དེ་མ་ཐག་གྲིབ་ཕོག་ནས་འདས་པ་དང་། སྤྲུལ་སྐུ་དེ་མོ་ཝ་ཕེབས་དུས་ཀྱང་སྐུ་པང་ན་སྦྲུལ་དངོས་སུ་བྱུང་
བའི་གཟིགས་སྣང་བྱུང་ཞིང་། མཁའ་སྤྱོད་པའི་སྒྲུབ་ཁང་ཡིན་པའི་ཕྱིར་སྒོང་མཁར་ཡང་གཉེན་ཅིང་བཤུ་འགེབ་བཤིག་སློག་ནམ་བྱས་སྡེ་པ་བསྲུང་བ་སོགས་བྱུང་བ་ཀླུའི་རྩེ་ཕྲེང་ཆེ་བའི་དོན་ཡིན་ཟེར། རྣམ་རྒྱལ་སྒང་གི་གཙུག་ལག་ཁང་གི་སྲུང་མ་ས་ག་རྒྱལ་པོ་ནི་སྒམ་པོ་པས་རྒྱའི་ཡོན་དང་སྔར་ལས་ཟོག་ཁྱེར་བའི་རྗེས་ནས་འོང་བ་ཡིན་ཟེར་བ་ནི་མི་བདེན་ཏེ། སྒམ་པོ་པས་རྒྱའི་ལས་ཀ་བླང་དུས་ནས་མཁའ་སྤྱོད་པ་མི་བཞུགས་པའི་ཕྱིར་རོ། །འདི་ནི་མཁའ་སྤྱོད་པ་རྒྱ་ནག་ན་སྔོན་རས་བྱོན་དུས་རྒྱལ་པོས་གནང་བའི་ཐུབ་པའི་སྐུ་རྒྱ་ནག་མ་བྱིན་རླབས་ཅན་སྐུ་ཚད་ཆེན་པོ་ཡོད་པ་གཅིག་གདན་དྲངས་བས། ལྷ་དེའི་དཀོར་བདག་ས་ག་རྒྱལ་པོ་ཟེར་བའི་རྒྱ་འདྲེ་བཙུན་གཟུགས་ཌཱ་དྲིལ་ཐོགས་པ་གཅིག་རྗེས་སུ་འབྲང་སྟེ། ས་སྒང་ན་ལྷ་བཟོ་ཞིག་གིས་ཐུབ་པའི་འདག་སྐུ་གཅིག་བཞེངས་ཤིང་ཡོད་པ་ལ་བར་ཆད་བྱས་ནས་ལྷ་བཟོ་ཤི་ནས་ས་གདན་བཟོ་ལུང་མ་བྱུང་བ་ཐུབ་པ་མདའ་རུ་མར་གྲགས། དེ་ནས་གསེར་སྐུ་དེ་མཛོནུབ་མདའི་བྲག་དམར་དེ་ལ་གཏེར་དུ་སྦས་པས། བྲག་དེ་ཡང་གཉེན་པས་ཕྱིས་རི་དྭགས་བྱེད་མཁན་མང་པོ་ཤི་ཟེར། ད་རུང་ཡང་ཐུབ་པ་མདའ་རུ་མ་ལ་འཁོར་ནས་མཐོང་
སྣང་མང་པོ་བྱུང་བས། མཁའ་སྤྱོད་པ་ལ་རྒྱ་འདྲེ་འདི་ཕུད་དགོས་ཞུས་པས། འདི་ཕུད་ན་ངས་ཕུད་ཐུབ་སྟེ་འདི་གཞན་ན་མཐར་དགོན་འདི་ཡི་བཀའ་སྲུང་ཞིག་སྲུང་བར་གདའ་གསུངས་ནས་དམ་ལ་བཏགས་ནས་ལྷ་ཁང་གི་སྲུང་མར་བསྐོས་པས། དུས་ཕྱིས་ཀྱང་ལྷ་ཁང་ནས་ཌཱ་དྲིལ་གྱི་སྒྲ་གྲག་པ་དང་། ལྷ་ཁང་ནས་རྟེན་ཆ་ཕར་ལེན་ཚུར་ལེན་བྱས་ན་ཡང་རྩེ་ཕྲེ་འོང་བ་དང་། ནད་པ་སོགས་ལ་ཡང་ས་སྒང་ནས་འོང་བ་འགྲིམ་སྣ་ཆེ་བ་འདིའི་དོན་ཡིན་ཟེར་ཏེ། ལྷ་ཀླུ་འདི་གཉིས་ནི་ས་སྒང་ཁོ་ནའི་སྲུང་མ་ཡིན་ཏེ། ཧ་ཅང་སྟོབས་ཆེན་མིན་ཡང་རྩེ་ཕྲེ་ཆེའོ། །དེ་ནས་ངོམ་པའི་རྟ་བཤད་ཡུལ་ལྷའི་ལོ་རྒྱུས་བཤད་ནས། ཨ་ནུ་ཟེར་བ་ནི། རྒྱ་ནག་གི་བྱིསྦའི་མིང་ཡིན་ཟེར་བ་ནི་མི་བདེན་ཏེ། རྒྱ་ནག་ནས་ཡར་འོང་ཟེར་བ་མི་བདེན་པའི་ཕྱིར་རོ། །རྒྱ་ནག་ལས་ཀའི་མིང་ལ། གུག་ཤྲཱི་དང་། སི་ཏུ་དང་། དུ་ཝན་ཞོལ་དང་ཟེར་བ་སོགས་མང་དོ་བས། འདི་རྒྱ་ནག་གི་ལས་ཀའི་མིང་ཡིན་ཏེ། ངོམ་པ་དང་རུས་མི་གཅིག་པའི་ཨ་ནུ་མང་སྟེ། རྒྱ་ནག་གི་ལས་ཀ་ཡོད་པའི་སྟོང་དཔོན་དང་། གླིང་ཚང་རྣམས་ལ་ཡང་ཨ་ནུ་ཟེར་བའི་ཕྱིར་རོ། །ངོམ་པ་ནི་རྒྱལ་རིགས་ཆེ་ཞིང་མཐོ་བ་ཤིང་ས་ལ་ལྟ་བུ་ཡིན་
པས་སུས་ཀྱང་འགྲན་ཟླ་མེད་ལ། དེ་མཚན་ནས་ས་ཕྱོགས་ངོམ་འདིའི་ཆེ་བ་ནི། མཐའ་ནི་མཐའ་རང་སྡོང་གསུམ་དང་གླིང་ཚང་རྣམས་ཡིན་ཏེ། བོན་པོ་མཐུ་ནུས་དང་ལྡན་པ་རྐང་ཡ་ཞ་བ་གཅིག་ཡོད་པས་བོང་བུ་རྣ་ཡ་མེད་པ་གཅིག་ཞོན་ཏེ་རྒྱ་ནག་ཏུ་བྱོན་ནས། རྒྱ་ནག་རྒྱལ་པོའི་མཛེ་ནད་བསལ་བས་ལུང་ལས་བཀའ་གནང་ནས་སྟོང་དཔོན་དུ་བསྐོས། དེའི་མི་རྒྱུད་ཀྱིས་བྱམས་སེམས་པའི་སྦྱིན་བདག་བྱས། དགོན་པ་ཕུལ་ནས་ཆབ་མདོ་དགོན་བཏབ་པས། ཆབ་མདོའི་དགོན་བདག་སྡེ་དགོན་གྱི་ཐོབ་ཆ་ཡོད་ཅིང་། ངོམ་པའི་བློན་པོ་ནི་མང་སྟེ་སྔར་ནས་བཟུང་དུས་ཕྱིས་དབོན་མོ་མཁན་བཟའ་གཉིས་ཡར་བསུས་པ་དང་། སེ་ཐོག་དབོན་མོ་ཕྱིར་བྱིན་པའི་སི་གྱི་ཤོར་དབོན་ཡིན་ནོ། །དེ་ནས་གླིང་ཚང་ཆེ་སྟེ་ངོམ་པ་ལ་གཏེ་ཁྲལ་མི་དགོས་ཀྱང་དྲག་ནག་གི་ཕྱི་བློན་ཡིན། གླིང་ཁྲི་དཔོན་གྱི་ལས་ཀ་ཐམ་ཁ་ཐེལ་དམར་པོ་ཡོད་པས་སྡེ་པ་ཐམ་ཁ་ཝ་ཟེར། འདིའི་ཞལ་ངོ་གཅིག་མཁའ་སྤྱོད་པའི་ཉེ་གནས་མཛད་པས་གླིང་བླ་མ་ཟེར། ཕྱིས་གླིང་ཚང་བུ་སྤུན་གསུམ་གྱི་ཟས་ཁོག་གཉིས་རི་བོ་ཆེའི་ཞབས་སུ་སོང་། མི་རྒྱུད་རྡག་དབྱིག་ཨ་ནུ་ཡིན་ནོ། །དེ་ནས་གདོང་ཚང་ཆེ་སྟེ། ས་བཟུང་ལ་སྔ་བ་
སྐྱོ་གདོང་གླང་གསུམ་ཟེར་ཏེ། འདི་གསུམ་སྔར་ནས་ས་བཟུང་སྔ་ཞིང་། སྨུག་པོ་ལྡོང་དང་ཡི་གེ་ཨ། མ་བསྟོད་གོང་ནས་ཆེ་ལེ་ཡིན་ཟེར་ཏེ་དུས་ཡང་ཆེ་གདོང་མི་བོ་ཆེ། བླ་མ་རིན་པོ་ཆེ་སངས་རྒྱས་དབོན་ལ། རི་རི་བོ་ཆེ་དང་། གནས་སྡོང་ཐང་ཕོ་ཆེ་དང་། འབུལ་བ་རྟ་ཕོ་ཆེ་ཕུལ་ནས། རི་བོ་ཆེའི་དགོན་བཏབ་པའི་སྦྱིན་བདག་ཡིན་པས་ཐོབ་ཆེ་ཞིང་། གདོང་ཚང་འདི་ངོམ་པའི་བློན་གསེར་ཡོབ་ཅན་ཡིན་ཟེར། འདིའི་མི་རྒྱུད་སྨད་དུ་ཡོད་པ་གདོང་པ་དྲ་བ་ཡིན་ཏེ་རུས་གཅིག་གོ །དེ་མཆན་ནས་རང་སོ་ཆེ་སྟེ། རང་སོ་དཀར་པོ་འཁྲུ་ཅིག་ཡིན་ཟེར་ནས་རུས་ཡང་ཆེ་ཟེར་ཏེ། དང་པོ་ཚ་བ་སྒང་ནས་འཁྱར་བ་ཕོ་ལྷ་ཚ་བའི་རྡོ་རྗེ་གཡུ་སྒྲོན་མ་ཡིན་ཏེ། དུས་ཕྱིས་བར་དུ་གསོལ་མཆོད་ཡང་བྱེད་དར། རང་སོ་ཚུར་ལོ་རང་ཆེན་དཔོན་ངོས་འདི་ཡིན་ནོ། །མཁའ་སྤྱོད་པའི་བློན་གསེར་ཡོབ་ཅན། རང་སོ་ཨ་སྤོས་ཀྱི་རྒྱུད་ཡིན་ཟེར། རང་སོ་ཕར་ལོ་མ་ཀོ་ཆེ་བ་ཚང་ནི་ངོམ་པའི་བློན་པོ་མིན་ཏེ། གྲུབ་ཐོབ་ཇོ་རི་ཏི་ཝ་ཟེར་བ་སེང་ལྡེང་གི་ཕྲེང་བ་ཆེན་པོ་ལག་པས་མི་ཐེན་པ་ལྕམ་ན་བཏགས་ཏེ་བསྒྲངས། དབུ་སྐྲ་རལ་པའི་ཐོར་ཅོག་དང་ན་བཟའ་དཀར་པོ་ཅན་གཅིག་བཞུགས་པ། ཛོ་རི་ཏི་ན་
ཤིང་གི་བང་བ་བྱས་ཏེ་ཡུན་རིང་སྒྲུབ་པ་མཛད་པས་ཡི་དམ་སྒྲོན་མ་སྤྲུལ་རྒྱུན་མ་བྱས་པ་དང་མི་དང་མི་གཏམ་པ་ལྟ་བུ་ཡོད་པས། དེ་ནུབ་སྒྲོལ་མས་ཆོས་གང་གསུངས་ཐམས་ཅད་ཕྱིར་ནངས་ཁྲོམ་ལ་བཤད་ཆོག་པ་ཡོད་ཅིང་། ཆོས་སྐྱོང་བྲག་ལྷ་མགོན་པོ་བྲན་དུ་ཁོལ་བ་གྲུབ་ཐོབ་ཆེན་པོ་ཅིག་བྱུང་། དེའི་བླ་རབས་ཁོང་འདྲ་བ་ལྔ་ཙམ་བྱུང་སྟེ། འདི་ཚང་གི་དབོན་མོ་རང་བཟའ་ཁྲ་ལུ་མ་རྒོད་རྒྱལ་གྱིས་བསུས་པས་མི་དབང་ཕྱུག་རྒྱལ་མཚན་འཁྲུངས་བ་དང་། དེ་སྔོན་ལ་མཁའ་སྤྱོད་པས་འདི་ཚང་གི་དབོན་མོ་ཆེ་ཆུང་གཉིས་བསུས་པའི་ཆུང་བ་ལ། གདོང་རིན་ཆེན་རྒྱལ་མཚན་འཁྲུངས་བ་ནས་བཟུང་སྟེ། ད་ལྟ་དབིའི་ཕ་དབོན་མོ་བྱིས་པའི་བར་གྱིས་ཞིང་དབོན་གྱི་ཐོབ་ཡོད་ཟེར། དེ་མཆན་ནས་གསེར་ཡིག་པ་ཆེ་སྟེ། ཨོ་རྒྱན་ལུང་བསྟན་ལས། ཧོར་གྱི་ཁྲིམས་དར་རབ་ལུང་བསྟན་སྐབས་སུ། །གསེར་ཡིག་དངུལ་ཡིག་ཁ་བྱང་བཏབ་ནས་འགྲོ། །ཞེས་པ་ལྟར། རྒྱ་ནག་ཧོར་དུས་སྐབས་སུ་རྒྱ་ནག་རྒྱལ་པོའི་རྒྱས་ས་ཧོར་སེ་ཆེན་རྒྱལ་པོས་བཟུང་དུས། དབུས་ན་སྣེའུ་གདོང་གོང་མ། ཁམས་ན་གོ་འཇོ་དཔོན་ཆེན་གྱིས་རྒྱ་ནག་རྒྱལ་པོ་ལ་ཡར་ཞུ་ཡིག །ཕྱིར་བཀའ་ཤོག་རྣམས་ཡར་སྐྱེལ་
མར་སྐྱེལ་བྱེད་པ་ལ། གསེར་ཡིག་པ་དངུལ་ཡིག་པ་ཟེར་བ་བྱུང་སྟེ་འདི་ཚོ་ལ་ཡང་ལས་ཀ་ཆུང་རི་ཡོད་ཟེར་ཏེ། དེའི་རྒྱུད་དཔོན་འབྲོག་ཞིང་པ་ཡིན་ཏེ། སྒམ་པོ་པའི་བློན་པོ་ཡིན་ཀྱང་ས་དེར་ཁོ་རང་དབང་ཆེ་བས་དུང་ཟླ་བ་དྲག་པའི་ཡོན་བདག་བྱས་ནས་ཞྭ་ཁམ་དགོན་བཏབ། སྒམ་པོ་པ་དེར་ཕེབས་ནས་རས་མདུད་བསྒྲོལ་ནས་ཕྱག་ཕུལ་བས་འབྲོག་ཞིང་བའི་བུད་མེད་ཚོས་ཨ་ཟད་ཡུ་གུའི་དཔོན་གྱི་ཕྱག་ཕུལ་དགོས་པ་ཡང་ཡོད་ལེ་རེད་ཟེར་ཟེར། དེ་ནས་གྲུལ་ཚ་ཆེ་སྟེ་ངོམ་སྨད་ཕྱོགས་ས་བཟུང་སྔ་སྟེ། མིའུ་འགྲམ་ཆགས་ནས། ཟླ་ངོམ་འདུས་མདོ་རི་ཐོས་བཟུང་། །རི་ཐོ་དཀར་པོ་འབྲུ་གཅིག་ཡིན། །ཟླ་ངོམ་མི་འགྱུར་གནས་པ་ཡིན། །ཅེས་ཟེར་བ་ཡོད་ཅིང་འདི་ལ་ངོམ་པའི་ཕྱི་བློན་ཐོབ་ཡོད་ཀྱང་རེས་འགའ་བློན་པོ་བྱས་རེས་འགའ་དགྲ་ཡ་བྱས་ཟེར་ཏེ། སྒོམ་ངོམ་ཐུག་དུས་ཀྱང་སྡེ་ཕ་ཀླུ་སྐྱབས་ཀྱི་ཆིབས་ཁ་ལ་གྲུལ་ཚ་ཡོད་པས། སྔོན་དུ་གྲུལ་ངོམ་ཐུག་པའི་ཞེ་བཞག་བྱས་ནས། སྡེ་པ་དབང་མེད་དུ་ནང་ཆེན་པའི་དམག་ནང་དུ་རྟ་ཁ་ཁྲིད་ནས་ནང་བཙོང་ཟེར་བ་བྱུང་གདའ། དེ་ནས་བེ་ཁྲོ་ཆེ་སྟེ་རུས་པ་འབྲུ་ཡིན་པས་འགྲུ་རྭ་ཅོ་ཅན་ལ་བཅོ་བརྒྱད་བྱས་པས་བཅོ་བརྒྱད་ལ་སྐུ་མཁར་བཅོ་བརྒྱད་ཡོད། །
བདུད་ལ་ཕ་ཤ་བླངས་བ་སོགས་དཔའ་རྒྱུད་ཡོད་པར་བཤད་ལ། འགྲུ་མི་འགྱུར་ཐར་པའི་གནས་བརྒྱད་ལ། །ཤས་ཁོག་ལུང་དམར་ངོ་ཁྲ་ཡིས་བཟུང་། །ངོ་ཁྲོ་དཀར་པོ་འགྲུ་གཅིག་ཡིན། །ཤེས་ཁོག་མི་འགྱུར་གནས་གཅིག་ཡིན། །ཅེས་གསུངས་ལ། ངོ་ཁྲོ་དམ་ཅན་དམར་པོ་ཟེར་བའི་བྱས་པ་གཏིང་མ་ཅན་ཡང་བྱུང་ཟེར། ཡང་ཤེས་ཁོག་ནས་ཤ་བ་དེད་ནས་འོང་ཟེར་བ་ནི་བསྟན་མེད་དེ། ཟླ་གཅིག་ཙམ་གྱི་ལམ་དུ་ཤ་བ་དེད་པ་ཡང་མི་སྲིད་པའི་ཕྱིར་རོ། །དེ་ནས་ངོ་ཁྲོའི་མི་རིགས་སྤུན་མང་པོ་ཡོད་ཀྱང་རྒྱུ་མེད་པ་གཅིག་ཤེས་ཀོག་ལུང་དམར་ནག་འཁྱར་ནས་བསིལ་པོ་བཟོ་ཤེས་པ་གཙང་ཞིང་འོང་བ་ནུབ་ཏུ་ས་བཟུང་། བེ་རོང་ནང་དུ་ཤིང་བེ་གཅིག་སྐྱེས་ནི་གདའ་བས་རུས་པ་ངོ་ཁྲོ་ཡིན་པས་བེ་ཁྲོ་ཐོགས། དེ་རྗེས་ནུ་བོ་གཅིག་རྒྱབ་ནས་འོང་བ་བེ་ཐུ་བ། དེ་རྗེས་ནུ་བོ་གཅིག་རྒྱབ་ནས་འོང་བ་ངོམ་མ་ཕྱིན་པར་སྟོང་དཔོན་ཆུ་བར་ཁོག་ན་ལུས་པའི་རྒྱུད་ལ་ཡང་པ་སྡེ་གཅིག་རེད་ནི་ཡོད་ཟེར། དེ་ནས་མི་རབས་མང་པོ་ཞིག་སོང་ནས་གདན་ས་པའི་དུས་ཙམ་ལ་བེ་ཁྲོ་བཀྲ་ཤིས་དྲག་ཟེར་བའི་མི་དྲག་པོ་གཅིག་ཚར་ནས། བློན་གསེར་ཡོབ་ཅན་གཅིག་ཡིན་ཏེ། འདི་རྒྱུད་ལ་འཕེལ་སྟོབས་ཆེན་
པོ་བྱུང་། བེ་ཁྲོ་འདི་ཡང་ངོམ་པ་བས་ནི་ས་བཟུང་སྔ་སྟེ། མཁའ་སྤྱོད་པ་བྱ་བཏང་མཛད་ནས་ནིས་ཇིས་ནས་བྱོན་དུས་བེ་ནུབ་འབྱོན་མ་བཅུག་པས་རྡོ་ནས་བེ་རོང་ནང་དུ་བྱོན་ནས་བཞུགས་དུས། དབྱི་ཤུན་ཤ་ལག་དར་ཁ་ཕུལ་བས། དར་པོ་འོང་ལུང་བསྟན་ཏེ། ཤ་ལག་གི་མངའ་ཞབས་སུ་ཚུད་པའི་རྟེན་འབྲེལ་བྱུང་ཟེར་ཏེ། མཁའ་སྤྱོད་པ་ཡོན་ལ་བློ་ཆེན་ཚོ་ཡང་མགོ་བསྒྲུས་ཙམ་ལས་ལྟེ་ནག་ཁྲོས་ནག་མི་དགོས་པ་ལས། མཁའ་སྤྱོད་པའི་ཞལ་ཆེམས་ལུང་བསྟན་ལས་རིན་ཆེན་རྒྱལ་མཚན་ལ་ཕ་སྡེ་རྡུང་བའི་ཐོ་བ་གསུངས་པ་དང་། གདན་ས་བ་ལ་ཕྱི་འཇམ་ནང་རྩུབ་གསུང་པ་དང་། བྱ་བྲལ་བ་ལ་སྤྱན་གྱི་འགྱུར་ལྡོག་ཕྱག་གི་རྣམ་འགྱུར་སྐད་ཅིག་ཀྱང་བརྟག་སྒོ་མེད་གསུངས་པ་དང་། །རྐུ་རྫུན་ཁྲོ་གསུམ་མཐོ་ནས་མ་ནུས་པའི་སེམས་ཅན་འགའ་ཞིག་སྨྲེ་སྔགས་དང་སྡུག་བསྔལ་མྱོང་བ་ཞིག་ཡོད་པ་གླིང་བློས་མགོ་བྱས་གཉོམ་ཆུང་རྣམས་ལ་བྱིན་གསུངས་པའི་ལུང་བསྟན་དུས་ལ་བབ་སྟེ། རིན་ཆེན་རྒྱལ་མཚན་གྱིས་མི་ཚེ་དམག་ལ་བསྐྱལ་ཞིང་གདན་ས་བས་ཀྱང་ལྟེ་ནག་ཁྲོས་ནག་དང་སྡུད་པ་བཅོ་བརྒྱད་གསར་དུ་བཙུགས་པ་དང་། འཚམས་བརྡུང་བ་ཆུ་ཁྲིད་པ་དང་། བྱ་བྲལ་བ་ཡབ་སྲས་ཚོ་ཡང་རྫོང་
བརྒྱད་བརྡུང་བ་ཟམ་བཙུགས་པ་དམག་ཇག་མང་པོ་བྱས་པ་དང་། གླིང་ཚང་བ་སྤུན་གསུམ་ཡང་དམག་ཇག་ནང་འཐབ་བྱས་ཏེ་ངོམ་གྱི་ས་ཆའི་སྡེ་ཐམས་ཅད་ལ་གཏེ་ཁྲུལ་དམག་ཁྲལ་རུ་གར་སོང་འོ་བརྒྱལ་ཆེན་པོ་བསྐུར་ནས། གདུང་རྒྱུད་ཚོ་ལ་དྲིན་པོ་གཞན་ནི་གདའ་བས་ཕ་མྱེས་དེ་ཚོ་ལ་བཤག་རྫོངས་རེ་རེ་དྲན་དགོས་པར་གདའ་ལགས་སོ། །དེ་སྐོར་བེ་ཁྲོ་སྟོད་ཐ་སྒོ་ཡ་བས་ལྷ་རྒོད་རྒྱལ་གྱི་ནང་བློན། སྨད་ཐས་གདན་ས་བའི་ནང་བློན་བྱས། འདིའི་མི་རྒྱུད་ལ་རིན་ཆེན་ནམ་མཁའ་དང་པདྨ་རྒྱལ་གཉིས་ཀྱིས་བཀའ་འགྱུར་གཉིས་བཞེངས་པ་དང་། མཁས་བཙུན་འཛོམས་པའི་བླ་མ་ཡང་བྱང་ངམ་རིང་དུ་གྲྭ་སྐོར་མཛད་མཁན་ཡ་ཟུང་སོགས་བླ་མ་མང་པོ་དང་རྟ་མགྲིན་ཀ་ལ་མེ་དཔུང་དངོས་སུ་འགྲུབ་པ་དང་གཤིན་རྗེ་ཚེ་བདག་དུང་ཐོན་པ་སོགས་ནུས་པ་ཅན་དང་། གནས་ཆེ་སར་ལྷ་བྲི་རྟེན་བཞེངས་རི་བཤུ་སོགས་བསྟན་པའི་ཞབས་ཏོག་བྱེད་པ་མང་དུ་བྱུང་ཞིང་། ད་ལྟ་ཡང་བློན་རིགས་ཐམས་ཅད་ཀྱི་ནང་ནས་དར་རྒྱས་མངའ་ཐང་ཆེ་ཤོས་ལ་ཡོད་དོ། །ངོམ་གྱི་སྦྱང་སྐྱལ་རྟ་ལ་བརྟགས་ནས་ཆུ་ལ་བརྒྱབ་ཕན་ཡང་ཟེར། རྒྱལ་ཤེས་ཟེར་ཏེ་མཁའ་སྤྱོད་པའི་ཆག་ཕྱིར་སླེབ་ཟེར། ངོམ་སྟོད་ཐ་རྡོ་ཕ་
ཨ་ཆུང་ནི། ངོམ་སྨད་ཐས་མཁའ་སྤྱོད་པའི་ནང་བློན་བྱས་ཏེ། ས་སྒང་ན་རི་བོ་ཆེ་པའི་དམག་བྱུང་དུས། མཁའ་སྤྱོད་པ་ཆུ་ལ་འཕུར་བར་གྲགས་ཤིང་། གཞན་སུ་ཡང་ག་ཕྱི་ལ་མ་སླེབ་པ་ལ་ངོམ་སྟོད་སྨད་གཉིས་ཀའི་སྤྱི་བློན་ཡིན། དེའི་རྒྱུས་རྡོ་སྟོད་སྨད་གསུམ་དུ་གྱེས་པའི། རྡོ་བར་རྡོ་རྗེའི་བྲག་སྟེང་གི་རྫས་བཀུར་ནས་གནས་རྗེད་བྱེད་སྟག་བརྒྱད་དཔོན་ཚང་ཡིན་ཟེར་། མགོན་ཁང་བ་ནི་སྐྱོང་ཡུལ་ཕྱོགས་ནས་ཡར་འཁྱར་རུས་ཉེ་ང་ཡིན། སྔགས་པ་ཤིན་ཏུ་ནུས་ལྡན་བྱུང་ནས་མཁའ་སྤྱོད་པ་ཡབ་སྲས་ཀྱི་སྐུ་རིམ་བསྐང་གསོ་སྲུང་ཁ་མཐུ་གཏོར་བཞེས་པ་ལ་བསྐོས་པ་ཡིན་ཏེ། མཁའ་སྤྱོད་པའི་ཞལ་ཆེམས་ལས། དར་རྒྱས་སྤྱན་འདི་ཁྱེད་གདན་ས་བ་ལ་མཁོ་བ་ཡིན། ཞེས་གསུངས་པ་ལྟར་མི་རབས་མང་པོའི་བར་དུ་སྔགས་པ་ནུས་པ་ཅན་བྱུང་ནས་སྡེ་པའི་སྐུ་དྲུང་མགོན་ཁང་བ་མཛད་པས་མགོན་ཁང་བ་ཟེར་རོ། །གཞན་ནང་སྟག་ཚ་ཐར་པ་སྤོས། རག་ཤིང་དུང་དཀར་སྦ་རུ། དཔོན་དབྱིས་རང་ནང་པ། སྤང་བུ་གོས་ཁུར་བ། མཚལ་ཟ་བ། རྨེ་རུ་དབས་འགར། མདོའོ་ཆོས་སེང་། མདོའོ་ལ་ཕར་མདོའོ་ཚུར་མདོ་གཉིས། དེ་ལ་སོགས་པ་མཁའ་སྤྱོད་པའི་བློན་གསེར་ཡོབ་ཅན་བཅོ་བརྒྱད་
ཡོད་དེ། ད་ལྟ་ནི་ཕལ་ཆེར་གཅིག་གི་རྒྱུད་མི་གདའོ། །དེ་ཡང་འགའ་རེ་དབུས་ཀྱི་དཔོན་ཚོ་ལ་དར་བའི་གསེར་གྱི་སྐ་ག་ཆེན་པོ་ཡིན་ཟེར། གསེར་གྱི་ཡོབ་ཆེན་ཡིན་ཡང་ཟེར་གསེར་གྱིས་རྟ་སྒར་ཤན་པ་ཡིན་ཟེར་ཏེ་དེ་ཚོ་མིན། དེ་དུས་ལས་ཀའི་ཐོབ་ཡོད་ན་མ་གཏོགས་ཡོབ་ལྡན་འཕེན་དབང་མེད་པས། བློན་པོའི་ཐོབ་ལ་ཡོབ་དན་གསེར་མ་འཕོར་བ་བཅོ་བརྒྱད་ཡོད་ཟེར་རོ། །བློན་པོ་བཅོ་བརྒྱད་ཀྱི་བུ་བཅོ་བརྒྱད་ཀརྨ་པ་ལ་ཕུལ་རབ་རྣམ་ཐར་ན་གསལ་ལོ། །ཞལ་ཆེམས་ལས། ནག་མཐོང་གི་མཛོ་མོ་གདམ་གཅིག །ཡོད་པ་གདོང་ཚང་གི་དཔོན་རྣམས་ལ་ཕུལ་གསུང་པ་ནི་ངོམ་པའི་དཔོན་ཐམས་ཅད་ཕར་ངོ་ཚུར་ལྕེ་བྱེད་པའི་ལུང་བསྟན་ཡིན་ཟེར་རོ། །ལུང་པ་ཕུ་རྒྱས་རེ་རེ་ན། །ཨ་མའི་བུ་རྒྱས་རེ་རེ་ཡོད། །ཡོ་མའི་ཁྱུ་རྒྱས་རེ་རེ་བསྐྱང་། །བྱས་པ་གཏང་མ་རེ་རེ་ཡོད། །ཆི་ཞྭ་ཁར་བརྩིས་ན་ཡོད་ཆེ། །ཟེར་བ་ལྟར་གཞང་ནང་ངོམ་པའི་བློན་པོ་སྔ་ཕྱི་བར་གསུམ་དུ་མང་པོ་བྱུང་བ་ནི་བྲིར་ལོགས་ལ། དེ་ལས་ཆུང་བ་རྣམས་ནི་རྨོང་གི་རིགས་ཏེ་ཡི་གེ་མི་ལང་ངོ་། །དེ་ཡང་རྟ་དཔོན་རྒྱུད་ལ་རྟ་བ་མཚན། གཞང་ནང་སྐྱེ་ཚོང་། གླིང་ཚང་། སྟག་པོ་བུར་ལྕགས། ཉེ་
འདང་། སྒོ། ཞང་ཞུང་སྡོང་སྐྱིད་སོགས་རྣམས་གསེར་ཡོབ་ཅན་མིན་ཏེ། འདི་ཚོ་ལ་ཡང་སྐབས་སྐབས་སུ་མི་དྲག་པོ་ཚར་ནས་ངོམ་ལ་བློན་པོ་བྱེད་པ་ནི་འགའ་རེ་བྱུང་གདའོ། །རུས་འདི་རྣམས་ཡུལ་གཞན་དུ་ཆེ་བར་རྩི་བ་འགའ་རེ་ཡོད་ཀྱི། ངོམ་འདི་ན་ནི་ཐོབ་ཆ་ཆེན་པོ་ཡོད་པའི་ལོ་རྒྱུས་མི་སྣང་ངོ་། །དེ་ཡང་ཞལ་ཆེམས་ནས། ཕ་མྱེས་ཀྱི་རུས་བཟང་སྟག་དྲུད་ཤུལ་ཐང་ཤུལ་ཙམ་ཞིག་ཡོད་པ་གཡོ་རྫོང་གི་མཚོ་ནང་དུ་འཕོང་གསུང་པ་ནི་མཁའ་སྤྱོད་པའི་ཆོས་ལུགས་དགོན་པ་ཡང་བློ་འགྱུར་ནས་ཆོས་རྒྱུད་དབང་ལུང་སོགས་ཀྱི་རྒྱུད་ཡུན་རིང་མི་གནས་ཏེ་ཆད་པའི་ལུང་བསྟན་པར་མངོན་ནོ། །ཚོགས་དཔོན་པས་དབུ་མཛད་རྣམས་ཀྱང་ཆགས་སྡང་མ་མཛད། དགེ་སྦྱོར་ལ་བརྩོན་པར་ཞུ་གསུངས་པ་ནི་དགོན་པ་ཆགས་སྡང་ཆེ་བ་གཅིག་འོང་དོགས་པ་ཐུགས་ལ་ཤར་ཚོད་དུ་གདའོ། །ངའི་ཞྭ་གོས་ཀྱི་བྱིན་རླབས་ཀྱིས། འབྲེལ་ཚད་དོན་དང་ལྡན་པ་ཡིན་གསུངས་པས། ཨ་འགེ་དུག་པོ་དང་སྒོམ་ཐག་སོགས་ཀྱིས་བྱིན་རླབས་ཐོབ་ན། ཚེ་འདིའི་རྐྱེན་སེལ་ཕྱི་མའི་ལམ་སྣ་འདྲེན་པ་ཡིན་ཏེ། ཆུས་ཟམ་པ་རྫོག་པར་ཉེ་བ་ན་ཨ་འགེ་དུག་པོ་གདན་དྲངས་ནས་ཆུའི་གནོད་པ་ཟློག་པ་ལན་མང་དུ་བྱུང་ཟེར་ཏེ་ན་བཟས་
གྲུབ་རྟགས་འཇོག་པ་ནི་མཁའ་སྤྱོད་པ་ཙམ་ཡིན་ནོ། །སྔར་མཁའ་སྤྱོད་པ་ལ་དེ་བཞིན་གཤེགས་པས་དབུ་ཐོག་ཏུ་ཕྱག་བཞག་ནས་ཁྱེད་ཀྱི་བུ་ཚའི་རྒྱུད་ཐམས་ཅད་ཀྱིས་། ཕྱག་བཞི་པ་དང་བེར་ནག་ཅན་གྱི་སྔགས་རྒྱུན་ཚུགས་དང་བཀྲ་ཤིས་དང་བདེ་ལེགས་འབྱུང་གསུངས་པ་ལ་བརྟེན་ནས་ས་སྒང་དུ་མགོན་ཁང་བཙུགས། ལྷ་རྒོད་རྒྱལ་གྱིས་ཀྱང་གནས་མདོ་ཕྱག་བཞི་པ་དང་བེར་ནག་ཅན་གྱི་སྔགས་རྒྱུན་ཚུགས་དང་བཀྲ་ཤིས་དང་བདེ་ལེགས་འབྱུང་གསུངས་པ་ལ་བརྟེན་ནས་ས་སྒང་དུ་མགོན་ཁང་བཙུགས། ལྷ་རྒོད་རྒྱལ་གྱིས་ཀྱང་གནས་མདོ་ནང་ན་མགོན་ཁང་བཙུགས་ཟེར་བ་དང་། མཁའ་སྤྱོད་པ་ཉིད་ཀྱི་ཞལ་ཆེམས་ལས། ཤཱཀྱ་རྒྱལ་པོ་ཆོས་རྗེའི་དྲུང་དུ་སོང་ལ། གོང་དུ་འབྱོན་པར་རེད་ན། ཕྱག་བཞི་པ་དང་བེར་ནག་ཅན་གཉིས་ཀྱི་སྔགས་རྒྱུན་ཚུགས་ལ་བྱོན་དང་བཀྲ་ཤིས་པ་ཡིན་གསུངས་པ་འདི་ཀརྨ་པ་དོན་ལྡན་ཞབས་དང་། ཆོས་རྗེ་སྒམ་པོ་ལ་སོགས་སྤྱིའི་ཞལ་ཆེམས་ལྟ་བུ་ཡིན། ཀརྨ་པ་ཁོ་ན་ཡིན་པ་གདུང་རྒྱུད་སྤྱོད་ལྡན་རྣམས་ཀྱིས་ལྷ་འདི་གཉིས་སྔར་ཡང་ཐུགས་དམ་བྱས་བཀྲ་ཤིས་པའི་འཕགས་ལམ་ཡོད། གསར་སྐྱེས་རྣམས་ཀྱང་བསྟེན་ན་བཀྲ་ཤིས་པའི་རྟེན་འབྲེལ་བཟང་པོ་ཡོད་དེ། བསྒོམ་པ་དེ་འདྲ་གྱིས་དང་བཀྲ་ཤིས་པར་འགྱུར་བ་ཡིན་ཞེས་གསུངས་སོ། །འོ་ན་འདི་ལྟ་བུའི་གཏམ་རྒྱུད་ལོ་རྒྱུས་སྔར་མ་ཐོས་པ། འདི་ལྟ་བུ་ཁྱོད་ཀྱིས་རང་བཟོ་ཡིན་པས་ཡིད་
ཆེས་མེད་དོ་སྙམ་ན་དེ་ལྟར་མ་ཡིན། རྒྱལ་སྲས་ཞི་བ་ལྷའི་ཞལ་ནས། སྔོན་ཆད་མ་བྱུང་བ་ཡང་འདིར་བརྗོད་མེད། །སྡེབ་སྦྱོར་མཁས་པ་ཡང་བདག་ལ་ཡོད་མིན་ཏེ། །ཞེས་གསུངས་པ་ལྟར་རང་བཟོ་མ་ཡིན། ཕྱག་ན་རྡོ་རྗེས་དབང་བསྐུར་བའི་རྒྱུད་དང་། མདོ་སྡེ་འཇིག་རྟེན་བཞག་པ་དང་། རྟ་མགྲིན་རྣམས་བཀོད་མདོ་དང་། ཟ་མ་ཏོག་བཀོད་པ་དང་། ཆོས་མངོན་པ་མཛོད་དང་། རྒྱལ་པོ་བཀའ་ཆེམས་དང་། རྒྱལ་རབ་གསལ་མེ་དང་། པདྨ་བཀའ་ཐང་དང་། བོད་ཆོས་འབྱུང་དང་། ཆོས་འབྱུང་རིགས་མི་འདྲ་བ་མང་པོ་དང་། མིའུ་འགྲམ་ཆགས་ཆེ་ཆུང་དང་། མཁའ་སྤྱོད་པའི་རྣམ་ཐར་གོ་བདེ་གཏམ་ཐབས་དང་། བཀའ་འབུམ་ཞལ་ཆེམས་དང་བཅས་པ་དང་། ཨོ་རྒྱན་རིན་པོ་ཆེའི་བཀའ་མ་འོངས་ལུང་བསྟན་ཚན་འགའ་རེ་དང། དྲུང་གོང་འོག་གསུམ་གྱི་རྣམ་ཐར་བྱ་བྲལ་བས་མཛད་པ་དད་པའི་གསེར་ཕྲེང་དང་། སྔར་ནས་ཡོད་པའི་གསུང་རྒྱུན་ཁུངས་བཙུན་པའི་སླད་མེད་མང་པོ་སྟེ། དེ་རྣམས་ཀྱི་དོན་བསྡུས་ཏེ་ཚིག་ཉུང་ལ་དོན་གསལ་བར་བཀོད་པའོ། །འོ་ན་བརྩམས་ཆོས་ལ་སྡེབ་སྦྱོར་དང་སྐབས་སུ་སྙན་ངག་གིས་བརྒྱན་དགོས་པ་ཡང་མི་གདའ་བས། ཐ་ན་ཡི་གེའི་སྒྲ་
དང་ཐོབ་ཆ་ཙམ་ཡང་མི་གདའ་བས་མཁས་པས་མཐོང་ན་ངོ་ཚ་བའི་གནས་སོ་ཞེ་ན། སྙན་ངག་དང་ཡིག་སྐད་བྱས་ན་ཕལ་པས་མི་གོ་བས། སྙན་ངག་ལྟ་ཅི་སྨོས་ཡིག་སྐད་ཡང་མེད་པར་ངེད་རང་ངོམ་པའི་སྐད་དུ་བྲིས་པས། ཤེས་རབ་ཆུང་བ་རྣམས་ཀྱིས་གོ་བདེ་བཤད་བདེའི་ཕྱིར་བྱས་པ་ཡིན་ཏེ། པཎྜི་ཏས། མཁས་རྣམས་དགའ་བའི་སྡེབ་སྦྱོར་ན། །བླུན་པོ་རྣམས་ཀྱི་གོ་དཀའ་བས། །ཚིག་གི་སྦྱོར་བ་སྤངས་ནས་ནི། །ཀུན་གྱིས་གོ་བར་བྱ་ཕྱིར་བརྗོད། །ཅེས་གསུངས་པ་ལྟ་བུའོ། །འོ་ན་འདི་བྲིས་འདོན་བྱེད་པ་ལ་དགོས་པ་ཅི་ཡོད། མཁའ་སྤྱོད་པ་ལ་དད་པ་སྐྱེ། ཆོས་འཇིག་རྟེན་གྱི་ཐོབ་ཆ་ཤེས། ཕ་བཟང་པོ་དེ་འདྲའི་བུ་རྒྱུད་ཡིན་པས་སྤྱོད་པ་ངན་པ་མི་རྒྱུད་བསམ་པའི་བསམ་པ་སྐྱེ། ལྷ་རྒྱུད་བསྙག་དགོས་བསམས་ནས་ཐུགས་དམ་བྱེད་པས་ལམ་སྣ་ཟིན། ཕ་ལྷ་ཡོད་པར་ཤེས་ནས་གསོལ་མཆོད་བྱེད་པས་བཀྲ་ཤིས་བདེ་ལེགས་འབྱུང་བའི་གནད་ཡོད་དོ། །ཨེ་མ་ཧོཿ སྙིགས་དུས་བྱ་བྲལ་རཱ་གའི་མིང་ཅན་བདག །རྩེ་གཅིག་སྒྲུབ་ལ་ནན་ཏན་བྱེད་པའི་དུས། །རབ་རིབ་རྨི་ལམ་འཁྲུལ་པའི་སྣང་བ་ལ། །མཁའ་སྤྱོད་གྲུབ་ཆེན་ནམ་མཁའ་རྒྱལ་མཚན་ཏེ། །ཤིན་ཏུ་
གསལ་བར་མངོན་སུམ་་་་་་་ ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།