རྒྱུད་འདེབས་ཐོག་མའི་མགོན་པོ་ཞེས་པ།
ཐོག་མའི་མགོན་པོ་ཆོས་སྐུ་ཀུན་ཏུ་བཟང་། །དྲུག་པའི་བདག་ཉིད་རྒྱལ་བ་རྡོ་རྗེ་འཆང་། །འདྲེན་པའི་གཙོ་བོ་ཐུགས་མཆོག་རྡོར་སེམས་ཞབས། །རྒྱལ་བ་དགོངས་བརྒྱུད་བླ་མར་གསོལ་བ་འདེབས། །བར་དོ་དབྱིངས་སུ་གྲོལ་བར་བྱིན་གྱིས་རློབས། །སྤྲུལ་པའི་སྐུ་མཆོག་དགའ་རབ་རྡོ་རྗེ་དང་། །རྒྱལ་བའི་སྲས་མཆོག་གུ་རུ་ཤྲཱི་སེང་། རྡོ་རྗེའི་སྐུ་བརྙེས་པདྨ་འབྱུང་གནས་ཞབས། །རིག་འཛིན་བརྡ་བརྒྱུད་བླ་མར་གསོལ་བ་འདེབས། །བར་དོ་དབྱིངས་སུ་གྲོལ་བར་བྱིན་གྱིས་རློབས། །ཟབ་གཏེར་མངའ་བདག་ཀརྨ་གླིང་པ་དང་། །ཐུགས་ཀྱི་སྲས་མཆོག་ཆོས་རྗེ་གླིང་པ་དང་། །སྙིགས་དུས་འགྲོ་མགོན་སུརྱ་ཙནྡའི་ཞབས། །གང་ཟག་སྙན་བརྒྱུད་བླ་མར་གསོལ་བ་འདེབས་། །བར་དོ་དབྱིངས་སུ་གྲོལ་བར་བྱིན་གྱིས་རློབས། །ཕྲིན་ལས་བཀའ་བབས་ནམ་མཁའ་རྒྱ་མཚོ་དང་། །ཐུགས་རྗེའི་བཀའ་བབས་བསོད་ནམས་འོད་ཟེར་དང་། །སྨོན་ལམ་བཀའ་བབས་པུཎྱ་ཤྲཱིའི་ཞབས། །བཀའ་བབས་བརྒྱུད་པའི་བླ་མར་གསོལ་བ་འདེབས། །བར་དོ་དབྱིངས་སུ་གྲོལ་བར་བྱིན་གྱིས་རློབས། །འབྲེལ་ཚད་དོན་ལྡན་རྩ་
བརྒྱུད་བླ་མ་དང་། །སྣང་སྟོང་དབྱེར་མེད་ཡི་དམ་ཞི་ཁྲོ་དང་། །མཁའ་འགྲོ་ཆོས་སྐྱོང་དམ་ཅན་རྒྱ་མཚོའི་ཚོགས། །ཟབ་ཆོས་དགོངས་པ་རང་གྲོལ་ལ་གསོལ་བ་འདེབས། །བར་དོ་དབྱིངས་སུ་གྲོལ་བར་བྱིན་གྱིས་རློབས། །སྐྱེ་གནས་བར་དོ་ཀུན་གཞི་རང་གྲོལ་དང་། །རྨི་ལམ་བར་དོ་འཁྲུལ་པ་རང་གྲོལ་དང་། །བསམ་གཏན་བར་དོ་རིག་པ་རང་གྲོལ་ནས་།བར་དོ་དབྱིངས་སུ་གྲོལ་བར་བྱིན་གྱིས་རློབས།་།འཆི་ཁ་བར་དོ་འཕོ་བ་རང་གྲོལ་དང་། །ཆོས་ཉིད་བར་དོ་མཐོང་བ་རང་གྲོལ་དང་། །སྲིད་པ་བར་དོ་འགྲོ་དྲུག་རང་གྲོལ་ནས། །བར་དོ་དབྱིངས་སུ་གྲོལ་བར་བྱིན་གྱིས་རློབས། །ཐུན་མོང་མ་ཡིན་ཁྱད་པར་ཐེག་དགུའི་མཛོད།་།ཡང་ཟབ་རྡོ་རྗེ་ཐེག་པའི་ཡང་བཅུད་ལས། །ཡང་སྙིང་བསྡུས་ནས་འགྲོ་དྲུག་མི་རྣམས་ཀུན། །བར་དོ་དབྱིངས་སུ་གྲོལ་བར་བྱིན་གྱིས་རློབས། །ཡ་ཀི་སྟོང་སྡེ་བཙན་པོ་མན་ཆད་ནས། །མ་ཀི་ཉམ་ཆུང་བདག་ཉིད་ཡན་ཆད་ལ། །ནམ་ཞིག་ཚེ་ཡི་སྣང་བ་ནུབ་པའི་ཚེ། །བར་དོ་དབྱིངས་སུ་གྲོལ་བར་བྱིན་གྱིས་རློབས། །སྒྲ་འོད་ཟེར་གསུམ་བདག་ལ་དུས་གཅིག་འཆར། །སྒྱུ་ལུས་ཕུང་པོ་གཏད་མེད་མཁའ་ལ་ཡལ། །
རིག་པ་ཡེ་ཤེས་ཌཱཀྐིའི་སྦུབས་སུ་ཚུད། །བར་དོ་དབྱིངས་སུ་གྲོལ་བར་བྱིན་གྱིས་རློབས། །བར་དོ་བར་མཚམས་མེད་པ་ཀུན་བཟང་ཀློང་། །འགྲོ་དྲུག་རང་གྲོལ་ཆོས་སྐུའི་ཞིང་ཁམས་སུ། །གདོད་མའི་རང་སྣང་རྒྱལ་ས་ཟིན་པར་ཤོག །བར་དོ་དབྱིངས་སུ་གྲོལ་བར་བྱིན་གྱིས་རློབས། །ཞེས་པ་འདི་ཨ་རཱ་གས་སོ། །དགེའོ།། ༧ཁམས་སྟོད་སྒོམ་སྡེ་ནང་ཆེན་འབང་སྒང་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།