སྤྱོད་བག་ཆགས་རང་གྲོལ་གྱི་དོན་བསྡུས་རང་གྲོལ་སྙིང་པོ།
སྤྱོད་བག་ཆགས་རང་གྲོལ་གྱི་དོན་བསྡུས་རང་གྲོལ་སྙིང་པོ་ནི༔ ཨོཾ་ཨཱཧཱུྃ༔ རང་ཉིད་སྐད་ཅིག་རྡོ་རྗེ་སེམས་དཔའ་ཡི༔ ཙིཏྟ་རིན་ཆེན་སྙིང་གི་གཞལ་ཡས་སུ༔ སངས་རྒྱས་ཞི་བ་བཞི་བཅུ་རྩ་གཉིས་ལ༔ ཕྱག་འཚལ་མཆོད་འབུལ་སྐྱབས་མཆི་གསོལ་བ་འདེབས༔ བར་དོ་འཇིགས་པའི་འཕྲང་ལས་བསྒྲལ་དུ་གསོལ༔ མགྲིན་པ་ལོངས་སྤྱོད་འཁོར་ལོའི་གཞལ་ཡས་སུ༔ རིག་འཛིན་དཔའ་བོ་མཁའ་འགྲོའི་ལྷ་ཚོགས་ལ༔ ཕྱག་འཚལ་མཆོད་འབུལ་སྐྱབས་མཆི་གསོལ་བ་འདེབས༔ བར་དོ་འཇིགས་པའི་འཕྲང་ལས་བསྒྲལ་དུ་གསོལ༔ ཀླད་པ་དུང་ཁང་འབར་བའི་གཞལ་ཡས་སུ༔ ཁྲག་འཐུང་འབར་བ་ལྔ་བཅུ་རྩ་བརྒྱད་ལ༔ ཕྱག་འཚལ་མཆོད་འབུལ་སྐྱབས་མཆི་གསོལ་བ་འདེབས༔ བར་དོ་འཇིགས་པའི་འཕྲང་ལས་བསྒྲལ་དུ་གསོལ༔ ཞི་བ་སངས་རྒྱས་བཞི་བཅུ་གཉིས༔ གཅིག་ཏུ་དྲིལ་བའི་དགོངས་པ་འདིས༔ རྟོག་ཚོགས་ཕུང་པོ་ཀ་དག་ཏུ༔ ཡེ་ཤེས་ཆེན་པོའི་ཀློང་དུ་གྲོལ༔ ཡིག་འབྲུ་བཅུ་དྲུག་རྡོ་རྗེའི་སྒྲ༔ འཇའ་འོད་རིང་བསྲེལ་དཔག་མེད་འབྱུང་༔ ཨོཾ་ཨཱཧཱུྃ༔ བོ་དྷི་ཙིཏྟ་མ་ཧཱ་སུ་ཁ་ཛྙཱ་ན་དྷཱ་ཏུ་ཨཱཿ ཨོཾ་རུ་ལུ་རུ་ལུ་
ཧཱུྃ་བྷོ་ཧཱུྃ༔ ཁྲག་འཐུང་དྲུག་ཅུ་ཐམ་པ་ཡི༔ གཅིག་ཏུ་དྲིལ་བའི་སྙིང་པོ་འདིས༔ ཉོན་མོངས་རྟོག་པ་ཀ་དག་ཏུ༔ ཡེ་ཤེས་ཆེན་པོའི་ཀློང་དུ་གྲོལ༔ རུ་ལུ་འབྲུ་བརྒྱད་རྡོ་རྗེའི་སྒྲ༔ མེ་འོད་དཀར་གསལ་གཡོ་མེད་གནས༔ འཿཨཿཧཿཤཿསཿམ༔ སྐྱེ་འགགས་མེད་པའི་དགོངས་པ་འདི༔ འབྲུ་དྲུག་རིགས་དྲུག་ཀློང་ནས་གྲོལ༔ རང་བྱུང་ཐིག་ལེ་དྲུག་པའོ༔ རིང་བསྲེལ་ཕྲ་ཞིང་མང་བ་དང་༔ འཇའ་འོད་སྣ་ཚོགས་འབྱུང་བར་འགྱུར༔ རཱ་ག་ཨ་སྱས་རྒྱུད་ནས་བསྡུས༔ འདི་ལ་འབྲེལ་ཐོགས་སེམས་ཅན་རྣམས༔ ཐོག་མའི་མགོན་པོ་དབྱེར་མེད་ཤོག༔