བརྒྱ་ཕྱག་འོག་ཡིག་ཆུང་།
བརྒྱ་ཕྱག་འོག་ཡིག་ཆུང་མཚམས་སུ། ཡང་ཁྱེད་ཁྲོམ་པ་ཚོ་ཡུད་ཙམ་གསན་པར་ཞུ༔ སྤྱིར་ཞི་ཁྲོ་འདི་ཕན་ཡོན་གང་ཆེ་ཆེའི་ཆོས་ཐམས་ཅད་འདི་ལ་ཚང་༔ མར་མེ་བརྒྱ་རྩ་ཚང་བའི༔ མར་མེ་བརྒྱ་རྩ་བལྟམས་པ་དང་འདྲ༔ ཚོགས་བརྒྱ་རྩ་ཡོད༔ ལྷ་ཡང་བརྒྱ་རྩ་ཡོད་པས་ཚོགས་བརྒྱ་ཚང་༔ མཆོད་པ་སྣ་ཁ་སྟོང་ཕྲག་གཅིག་ཡོད་པས༔ སྟོང་མཆོད་ཚང་༔ ཚོགས་ཆེན་དང་ཇོ་ཧུབ་ཡོད་པས༔ ཚོགས་ཆེན་དང་དགེ་ཧུབ་ཚང་༔ ཇོ་རྒྱུན་ཡོད་པས་ཡིག་དྲུག་ཞོར་ལ་འགྲོ༔ བསྐང་བ་ཡིན་པས་རིམ་གྲོ་ཡང་ཞོར་ལ་འོང་བ་ཡིན། འདས་ལོག་ཀུ་སུ་ལུ་པས་ཆོས་ཀྱི་རྒྱལ་པོ་ལ་ཕན་ཡོན་གང་ཆེ་ཞུས་པ་ལ་ཡང་༔ ཞི་ཁྲོ་དང་ཡིག་དྲུག་ཕན་ཡོན་ཆེ་གསུངས་པར་གདལ༔ ཁྱད་པར་དུ་འགྲོ་མགོན་སཱུརྱ་ཙནྡའི་མཆེད་ཡ༔ རྡོ་རྗེ་རྒྱལ་མཚན་ཞེས་བྱ་བ་གཞོན་ནུ་ཤི་ནས༔ ནུ་བོ་གར་སྐྱེས་འདྲ་ཕྱིར་རྨི་ལམ་བཟུང་བས༔ མཆེད་ཡ་བར་དོ་ན་འཁྱམས་པ་དང་འཕྲད༔ ཁོང་རྣམ་གཉིས་གླེང་ལང་མང་དུ་བྱུང་སྟེ༔ ཁོ་ན་རེ༔ ངེད་རང་གི་ས་ཕྱོགས་ཀྱི་མི་རྣམས་ཕལ་ཆེར་བར་དོ་ཐོས་གྲོལ་སྤྱོད་པས་གཞན་ཚོ་བས་སྐྱིད་དོ༔ ན་རཀ་བསྐང་བཤགས་འདི་ང་ལ་ཕན་པར་སྣང་
བས༔ འབད་འབུང་ཐོན་ཟེར་བའི་ལོ་རྒྱུས་རྒྱས་པ་ཡོད་དོ༔ ད་ལམ་སྐབས་སུ་བབས་པས༔ ན་རཀ་དོང་སྤྲུགས་རྒྱུད་ལས༔ ལུས་ཀྱི་སྒོ་ནས་ཀྱང་ཕྱག་འཚལ༔ ངག་གི་སྒོ་ནས་ཀྱང་ཕྱག་འཚལ་ཞིང་༔ དཀྱིལ་འཁོར་གྱི་ལྷ་ཚོགས་རྣམས་ཀྱི་མཚན་ཐོན་ཅིག༔ ཅེས་གསུངས་པའི་དོན༔ བརྒྱ་ཕྱག་སྡིག་སྒྲིབ་རང་གྲོལ་འཚལ་བ་ཡིན་པས༔ མདུན་གྱི་ནམ་མཁར་དཀྱིལ་འཁོར་འདི་དང་ཐ་དད་མེད་པའི་ཞི་བའི་ལྷ་ཚོགས་བུདྡྷ་བཞི་བཅུ་རྩ་གཉིས༔ ཁྲག་འཐུང་ཧེ་རུ་ཀ་དྲག་པོའི་ལྷ་ཚོགས་སུམ་ཅུ་ཐམ་པ༔ ཐུབ་པ་དྲུག་ཐུགས་རྗེ་དྲག་པོར་ཁྲོས་ནས༔ རིགས་དྲུག་གི་གནས་ནས་སངས་རྒྱས་ཀྱི་ཞིང་དུ་རང་དབང་མེད་པར་འཕེན་པའི་ཁྲོ་བོ་སྤོར་བྱེད་ཆེན་པོ་བརྒྱད༔ བཀའི་སྲུང་མ་ཞིང་སྐྱོང་ཤ་ཟའི་མཁའ་འགྲོ་མ༔ དབང་ཕྱུག་ཉི་ཤུ་རྩ་བརྒྱད་དང་བཅས་པ༔ མངོན་སུམ་དུ་བཞུགས་པའི་མོས་པ་མཛོད་ལ༔ དེ་རྣམས་ཀྱི་དྲུང་དུ་ཚེ་འདས་ཀྱིས་ཐོག་དྲངས་སེམས་ཅན་ཐམས་ཅད་ཀྱི་དོན་དུ༔ རང་གི་ལུས་གཅིག་ལ་བྱེ་བ་དུང་ཕྱུར་སྤྲུལ་ཏེ༔ ཕྱག་འཚལ་བའི་མོས་པ་གྱིས་ལ༔ དམ་པ་རིགས་བརྒྱའི་སྐུ་མདོག་དང་ཆ་ལུགས་ངེད་ཀྱིས་བརྗོད་ཚེ༔ ཁྱེད་རང་རྣམས་ཀྱི་ཡིད་
ཡུལ་དུ་གསལ་ཐོབ༔ ཚིག་མཇུག་ཏུ་མཚན་བརྗོད་ཆེད་མཉམ་དུ་རྗེས་ཟློས་གྱིས་ལ༔ ཕྱག་འཚོལ་ཞེས༔ མགོ་བོ་འདུད་པ་དང་བཅས་ཕྱག་འཚོལ་ཅིག༔ བརྒྱ་ཕྱག་མཇུག་ཏུ༔ བརྡ་ཡིག འོ་དེས་ལུས་ཀྱི་སྒོ་ནས་བཤགས་པ་ཡིན༔ ད་ངག་གི་སྒོ་ནས་བཤགས་པ་ནི༔ རྒྱུད་གསང་བ་འདུས་པ་ལས༔ སྔགས་བཟླས་སྐྱོན་མཐོལ་ངག་ཉམས་བཤགས༔ རྡོ་རྗེ་སེམས་དཔའ་གཙུག་ཏུ་དམིགས༔ ལས་གྲིབ་ཉམས་གྲིབ་དག་བྱེད་པའི༔ འཁོར་བ་དོང་སྤྲུགས་ཡང་སྙིང་བཟླས༔ ཞེས་གསུངས་པས༔ ཚེ་ལས་འདས་པ་རྗེས་ཐོག་དྲངས༔ རང་ཅག་སེམས་ཅན་ཐམས་ཅད་ཀྱི་སྤྱི་བོར་རྡོ་རྗེ་སེམས་དཔའ་དཀར་པོ་རྡོ་རྗེ་དང་དྲིལ་བུ་འཛིན་པ་ཞིག་བསྒོམ༔ དེའི་སྐུ་ལུས་བདུད་རྩིའི་རྒྱུན་བབས་པས་སྡིག་སྒྲིབ་ཐམས་ཅད་ནག་ནུ་རུ་རུ་དག་ནས་ལུས་ཤེལ་སྒོང་ལྟར་གྱུར་པར་བསྒོམས་ལ༔ རྡོ་རྗེ་སེམས་དཔའི་ཡང་སྙིང་འབྲུ་དྲུག་པ་འདི་ལ་འུར་འདོན་ཞིག་མཛོད༔ ཨོཾ་བཛྲ་སཏྭ་ཧཱུྃ༔ ཅེས་ཕྲེང་སྐོར་ཙམ་སོང་ནས་འུར་རྒྱག༔ ད་འདིའི་རྗེས་ཟློས་མཛོད༔ བདག་སོགས་སམ་ཚེ་འདས༔ ལུས་ཀྱི་ལས་ནི་རྣམ་པ་གསུམ༔ ངག་གི་རྣམ་པ་བཞི་དག་དང་༔ གང་ཡང་ཡིད་ཀྱི་
རྣམ་གསུམ་པོ༔ མི་དགེ་བཅུ་པོ་སོ་སོར་བཤགས༔ ཞེས་གསུམ་མམ་གཅིག་བྱའོ༔ དེ་ལྟར་གསོལ་བ་བཏབ་པས༔ རྡོ་རྗེ་སེམས་དཔའི་ཞལ་ནས་ཁྱོད་རྣམས་ཀྱི་སྡིག་སྒྲིབ་དག་པར་ཡོད་དོ༔ ཞེས་གསུང་བྱོན་ནས༔ རྡོ་རྗེ་སེམས་དཔའ་འོད་དུ་ཞུ་ནས་རང་ལ་ཐིམ་པར་སྒོམས་ཤིག༔ དེས་ངག་གི་སྒོ་ནས་བསགས་པའི་སྡིག་སྒྲིབ་དག་པ་ཡིན་ནོ༔ འོ་ཡིད་ཀྱི་སྒོ་ནས་བཤགས་པ་ནི༔ རྒྱུད་གསང་བ་འདུས་པ་ན་རཀ་དོང་སྤྲུགས་ལེ་འུ་ནས༔ ཡིད་ཀྱི་དམ་ཉམས་ལྟ་བས་བཤགས༔ དེ་ཡང་ཀུན་གཞི་བྱང་ཆུབ་སེམས༔ ཞེས་སོགས་དང་༔ དྲི་མེད་རྒྱལ་པོ་བཤགས་པའི་རྒྱུད་ལས༔ ཨོཾ༔ ཆོས་ཉིད་དུས་གསུམ་སྤྲོས་པ་མེད་པ་ལ༔ འཛིན་རྟོག་མེད་པའི་རང་རིག་ཡེ་ཤེས་ཀྱིས༔ དབྱིངས་དང་ཡེ་ཤེས་གཉིས་སུ་མེད་པ་ལ༔ ཡུལ་དང་དབང་པོ་གཉིས་སུ་མེད་པར་བཤགས༔ ཞེས་གསུངས་པའི་དོན༔ ཞི་ཁྲོ་རིག་པ་གཅེར་མཐོང་ངོ་སྤྲོད་ལས༔ ཨེ་མ་ཧོ༔་སེམས་ཞེས་བྱ་བའི་རིག་རིག་ཏུར་ཏུར་པོ༔ ཡོད་ནི་གཅིག་ཀྱང་ཡོད་པ་མ་ཡིན་ལ༔ འབྱུང་ནི་འཁོར་འདས་བདེ་སྡུག་སྣ་ཚོགས་འབྱུང་༔ ཞེས་དང་༔ རང་གིས་རང་ལ་གཅེར་གྱིས་བལྟས་པའི་ཚེ༔ བལྟས་
པས་མཐོང་རྒྱུ་མེད་པའི་ས་ལེ་བ༔ རིག་པ་མངོན་སུམ་རྗེན་པར་ཧྲིག་གེ་བ༔ གྲུབ་པ་མེད་པའི་སྟོང་དང་སང་ངེ་བ༔ གསལ་སྟོང་གཉིས་སུ་མེད་པར་ཡེ་རེ་བ༔ ཞེས་གསུངས་པ་ལྟར་མཉམ་པར་ཞོག༔ དེ་ལྟར་མི་ཤེས་པ་རྣམས་ཀྱིས་དམ་པ་རིགས་བརྒྱའི་སྙིང་པོ་ལ་འུར་འདོན་ཞིག་མཛོད༔ ཨོཾ་ཨཱཿ ཧཱུྃ༔ བྷོ་དྷི་ཙིཏྟ་མ་ཧཱ་སུ་ཁ་ཛྙཱ་ན་དྷ་ཏུ་ཨཱཿ ཨོཾ་རུ་ལུ་རུ་ལུ་ཧཱུྃ་བྷོ་ཧཱུྃ༔ དེ་ནས་ཡིག་དྲུག་བསྐུལ་བཅུག་ཅེས་ཨ་རཱ་གས་འཕྲལ་དུ་སྦྱར་བའོ༔ བཀྲ་ཤིས་པར་ཤོག༔ བདག་གི་སྤྱི་གཙུག་སོགས༔ ཡིག་བརྒྱ་བཟླ༔ བདག་སོགས་ལུས་ཀྱི་ལས་ནི་སོགས་བརྗོད།།