དབང་གི་སྟ་གོན།
སོ་ཤིང་ཚོམ་བུའི་སྟེང་དུ་དོར་བ་ན༔ རྗེས་ཟློས། ཧོ༔ བླ་མ་ཡི་དམ་མཁའ་འགྲོ་དང་༔ སངས་རྒྱས་བྱང་ཆུབ་སེམས་དཔའ་དང་༔ ཞི་ཁྲོ་རིགས་ལྔ་ཐམས་ཅད་དགོངས། བདག་གིས་རིགས་ལྔ་དངོས་གྲུབ་ལྗ༔ གང་ཐོབ་མི་ཐོབ་བསྟན་དུ་གསོལ༔ བཛྲ་ཧ་ས་ཧ༔ སྲུང་སྐུད་ལ་རྩ་སྔགས་ཤམ་དུ༔ བཛྲ་རཀྵ་རཀྟ་ཧཱུྃ༔ ཧཱུྃ༔ ལུས་ཀྱི་བར་ཆད་བསྲུང་བའི་ཕྱིར༔ སྲུང་སྐུད་རྡོ་རྗེའི་མདུད་པ་ཅན༔ རྒྱལ་བ་ཞི་ཁྲོའི་ཕོ་བྲང་ཡིན༔ རྡོ་རྗེའི་གོ་ཆ་འདི་བསྒོས་པས༔ བསྒྲུབ་ལ་བར་ཆད་ཐམས་ཅད་བསྲུངས༔ རྩ་སྔགས་ཤམ་བུར༔ བཛྲ་རཀྟ་རཀྟ་ཧཱུྃ༔ ཀུ་ཤ་བུམ་ཆུས་བསང་། སྭ་བྷ་ཝས་སྦྱངས། འབྲུ་གསུམ་གྱིས་བྱིན་བརླབས་ནས༔ ཧཱུྃ༔ སྔོན་ཡང་སྟོན་པ་བཅོམ་ལྡན་འདས༔ རྩྭ་མཆོག་ལ་ནི་སྟན་བྱས་ནས༔ བདུད་བཏུལ་ཆོས་ཀྱི་འཁོར་ལོ་བསྐོར༔ བྱང་ཆུབ་རྡོ་རྗེའི་སྐུ་བརྙེས་ལྟར༔ ཁྱོད་ཀྱང་རྟེན་འབྲེལ་ལ་གནས་མཛོད༔ བཛྲ་ཏིཀྵ་ཐཾ༔ ཅེས་སྦྱིན་ནོ༔ སློབ་བུས། ཧཱུྃ༔ བླ་མ་ཡི་དམ་མཁའ་འགྲོ་དང་༔ ཆོས་སྐྱོང་སྲུང་མ་ཐམས་ཅད་ཀྱིས༔ བདག་ལ་དགེ་དང་མི་དགེ་རྣམས༔ རྨི་ལམ་དུ་ནི་གསལ་བར་སྟོན༔ མེ་ཏོག་གཏད༔ ཅེས་སྨོན་ལམ་བོར་ཏེ་བཟང་ངན་བརྟག༔ ༈
ཡེ་ཤེས་དབབ་པ་ནི༔ བླ་མས༔ འོ་བུ་རྣམས་ཡར་ལངས༔ ལག་པ་སྙིང་གར་ཐལ་མོ་སྦྱར་མིག་བཙུམ་ལ༔ སྐད་ཅིག་གིས་ཁྱེད་རང་རྡོ་རྗེ་ཕག་མོ་མཐིང་ནག་བཅུ་དྲུག་གི་ན་ཚོད་ཙམ༔ ཞལ་གཅིག་ཕྱག་གཉིས་ཅང་ཏེའུ་དང་དྲིལ་བུ་བསྣམས་པ༔ རྒྱན་ཆ་ལུགས་ཡོངས་སུ་རྫོགས་པ༔ གར་ཐབས་ཁྱུག་ཁྱུག་མཛད་པ་ཞིག་བསྒོམ༔ མདུན་གྱི་ནམ་མཁར་རྩ་བ་གསུམ་གྱི་ལྷ་ཚོགས་རྣམས་དང་༔ ཁྱད་པར་ཞི་ཁྲོའི་ལྷ་ཚོགས་དཔག་ཏུ་མེད་པ་རྣམས་བྱོན་ནས༔ ཁྱེད་རང་ལ་སིབ་སིབ་ཐིམ་པར་སྒོམས་ཤིག༔ ཨོཾ་ཨཱཿཧཱུྃ་གུ་རུ་དྷེ་ཝ་ཌཱཀྐི་ནཱི་སིདྡྷི་ཕ་ལ་ཧཱུྃ༔ ཅེས་དང་བྷོ་དྷི་ཙིཏྟ་འདི་འཛབ་བཟླས༔ དེ་ནས་མེ་ཏོག་ཕུལ་ལ་གསང་མཚན་བཏགས་སོ༔