ཟབ་ཆོས་ཞི་ཁྲོ་དགོངས་པ་རང་གྲོལ་ལས་དབང་བཞི་འཕྲད་ཚད་རང་གྲོལ་གྱི་མགྱོགས་དབང་སྐུར་བའི་ཕྱག་ལེན།
ཟབ་ཆོས་ཞི་ཁྲོ་དགོངས་པ་རང་གྲོལ་ལས། དབང་བཞི་འཕྲད་ཚད་རང་གྲོལ་གྱི་མགྱོགས་དབང་སྐུར་བའི་ཕྱག་ལེན་བསྒྲིགས་ཆོག་ཏུ་བཀོད་པ་བཞུགས།
རྒྱལ་བ་ཞི་ཁྲོའི་ལྷ་ལ་ཕྱག་འཚལ་ལོ། །འདིར་ཞི་ཁྲོའི་སྒྲུབ་ཆེན་ནམ། ན་རཀ་བཤགས་བསྐང་ལས་བྱང་ཚོར་བ་རང་གྲོལ་སོགས་རྒྱས་བསྡུས་གང་རུང་ལ་བརྟེན་པའི་དབང་རྫས་སོགས་འདུ་བྱས་ལ་མཐོང་བ་བརྒྱུད་པའི་ཕྱག་ལེན་ལྟར་ཚོགས་པར་བྱས་ལ། རྒྱས་པར་ན་སྟ་གོན་རྣམས་བུམ་དབང་ཆེན་མོ་ལྟར་བྱ་དགོས་ལ། བསྡུས་པར་ན་ལས་བྱང་རྒྱས་བསྡུས་གང་རུང་སྔོན་དུ་སོང་ནས། སློབ་མ་རྣམས་མདུན་དུ་འཁོད། ཁྲུས་བྱ། མེ་ཏོག་བཀྲམ་བསྡུ། བགེགས་ལ་གཏོར་མ་སྦྱིན་པ་ནི། ཨ་ཀཱ་རོ་སོགས། འདོད་པའི་ཡོན་ཏན་ལྔར་བྱིན་བརླབས། དེ་བཞིན་གཤེགས་པ་བཞིའི་མཚན་བརྗོད། མཆོད་སྦྱིན་གྱི་གླུད་གཏོར་རྒྱ་ཆེན་པོ་འདི་བསྔོ་ཞིང་སྦྱིན་པའི་གནས་ནི། འདིར་འདུས་ཤིང་
འཚོགས་པ་ཐམས་ཅད་ཀྱི་ཚེ་རབས་ཐོག་མེད་ནས་ལན་ཆགས་པའི་མགྲོན་རྣམས་དང་། ཁྱད་པར་དུ་བདག་ཅག་གི་དབང་ཟབ་མོ་བསྐུར་བ་ལ་བར་དུ་གཅོད་པར་བྱེད་པའི་གནོད་བྱེད་གདོན་བགེགས་འབྱུང་པོ་རྣམས་ལ་སྦྱིན་ནོ༔ བསྔོའོ་ཚིམ་པར་གྱིས་ལ་བདག་ཅག་དཔོན་སློབ་དགོན་སྡེ་གྲྭ་ཚང་ཡོན་མཆོད་མི་ནོར་འཁོར་དང་བཅས་པ་རྣམས་ལ་གནོད་ཅིང་འཚེ་བར་མ་བྱེད་ལ་སོ་སོ་རང་རང་གནས་སུ་བྱེར་ཞིག་དེངས་ཤིག ། སརྦ་བིགྷཾ་ཨུཙྪཱ་ཏ་ཡ་གརྫ་གརྫ་ཧཱུྃ་ཕཊ༔ གཏོར་མ་ཕྱིར་དོར་མེ་ཆུ་ཡི་ཐུན་བརྡེག །ཡུངས་ཀར་བྲབ་གུ་གུལ་བདུག །བཀའ་བསྒོ་མཚམས་བཅད་བསྲུང་བའི་གུར་ཁང་དང་ལྡན་
པར་བྱའོ། །དེ་ནས་མཎྜལ་ཕུལ་ནས། གསོལ་བ་འདེབས་པ་འདི་ཡི་རྗེས་ཟློས་མཛོད། ཨེ་མ་མགོན་པོ་ཐུགས་རྗེ་ཅན༔ རིགས་དྲུག་གནས་སུ་ལྟུང་བ་ཡི༔ སྐྱབས་བྲལ་མགོན་མེད་སེམས་ཅན་ལ༔ ཐུགས་རྗེའི་ལྕགས་ཀྱུས་བཟུང་དུ་གསོལ༔ ལན་གསུམ་གྱི་རྗེས་སུ། དབང་གི་ལོ་རྒྱུས་རྒྱས་བསྡུས་གསུམ་གང་རིགས་ལ་འཇུག་གོ །བསྡུས་པར་ན། འོ་ན་ད་ལམ་ཁྱེད་རང་རྣམས་ཐོབ་དཀའ་བའི་མི་ལུས་རིན་ཆེན་འདི་ཐོབ་པའི་དུས་འདིར་ཚུལ་བཞིན་དུ་ཉམས་སུ་ལེན་མ་ནུས་ན་ཡང་། ལན་གཅིག་ཐོས་པ་ཙམ་གྱིས་ཀྱང་བར་དོའི་འཇིགས་སྐྲག་ཐམས་ཅད་ལས་གྲོལ་ནུས་པའི་ཆོས་ཟབ་མོ་བར་དོ་ཐོས་གྲོལ་ཆེན་མོའི་དབང་བསྐུར་རྒྱས་པ་འཕྲད་ཚད་རང་གྲོལ། འབྲིང་པོ་འགྲོ་དྲུག་རང་གྲོལ། བསྡུས་པ་གཏོར་དབང་རེག་པ་དོན་ལྡན་ནམ། ཞེས་བྱ་བ་ཞུ་བས་ཆོག་པ་ཡིན་པས་འདི་སྐལ་པ་ཤིན་ཏུ་བཟང་བ་ཡིན། དེ་ཡང་སྔོན་རྒྱལ་པོའི་བུ་ཞིག་གིས་ཕྲག་དོག་བྱས་ནས་རང་གི་སློབ་དཔོན་བྲམ་ཟེ་དུང་གི་ཕྲེང་བ་ཅན་ཞེས་བྱ་བ་རིག་པའི་གནས་ལྔ་ལ་མཁས་པ་དེ་ཆད་པ་དུ་མ་བཅད་ནས་བསད་པས། དེའི་རྣམ་སྨིན་གྱིས་རྒྱལ་པོ་ཡི་བུ་དེ་ཉིད་སེམས་ཅན་ལུས་སྲུལ་པོ་ཅན་ཞེས་བྱ་བ་འགྲོ་བ་རིགས་དྲུག་གི་སྡུག་བསྔལ་
དུས་གཅིག་ལ་མྱོང་བ་ཞིག་ཏུ་སྐྱེས་པའི་ཚེ། དེ་ཐར་བའི་ཐབས་ལ་བཅོམ་ལྡན་འདས་ཀུན་ཏུ་བཟང་པོས་ཞི་ཁྲོ་ན་རཀ་དོང་སྤྲུགས་ཀྱི་རྒྱུད་གསུངས་ཤིང་སེམས་ཅན་དེ་ཡི་རྣ་བར་ཁྲོ་བོའི་མཚན་སྔགས་དང་གསང་སྔགས་བསྒྲིག་ཅིང་དབང་བསྐུར་ན་ཐར་གསུངས་ནས། བྱང་ཆུབ་སེམས་དཔའ་ཕྱག་ན་རྡོ་རྗེ་སོགས་ཀྱིས་དེ་ལྟར་མཛད་པས། སེམས་ཅན་དེ་དམྱལ་བ་ནས་ཐར་ཏེ་ལྷ་ཡི་གནས་སུ་རིག་འཛིན་མི་ཡི་ཐོད་པ་ཅན་ཞེས་བྱ་བར་སྐྱེས་སོ། །དེ་ནས་ཆོས་འདི་ཡི་བརྒྱུད་ཚུལ་ནི༔ ཆོས་སྐུ་ཀུན་ཏུ་བཟང་པོ༔ དྲུག་པ་རྡོ་རྗེ་འཆང་ཆེན༔ དེས་སྟོན་པ་རྡོ་རྗེ་སེམས་དཔའ་ལ་དགོངས་པས་བྱིན་གྱིས་བརླབས་པས༔ རྒྱལ་བ་དགོངས་པའི་བརྒྱུད་པ་ཞེས་བྱའོ༔ དེས་རྒྱ་གར་གྱི་རིག་འཛིན་དགའ་རབ་རྡོ་རྗེ༔ དེས་རྒྱ་ནག་གི་རིག་འཛིན་ཤྲཱི་སེང་ཧ༔ དེས་ཨོ་རྒྱན་ཡུལ་གྱི་རིག་འཛིན་པདྨ་འབྱུང་གནས་ལ་བརྡའ་ཡི་སྒོ་ནས་བསྟན་པས་རིག་འཛིན་བརྡའ་ཡི་བརྒྱུད་པ་ཞེས་བྱའོ༔ དེ་ནས་ཨོ་རྒྱན་རིན་པོ་ཆེ་བོད་དུ་བྱོན་ནས༔ ལོ་ཙཱ་བ་ཀླུ་ཡི་རྒྱལ་མཚན་ལ་སོགས་པ་རྗེ་འབངས་རྣམས་ལ་ཆོས་འདི་སྙན་བརྒྱུད་དུ་གནང་ངོ་༔ དེ་ཡི་ཚེ་སྡིག་བློན་ཤ་ཏ་ཞེས་བྱ་བས་
མཁའ་འགྲོ་ཡེ་ཤེས་མཚོ་རྒྱལ་ཆོས་བྲོས་ལ་བྱོན་ནས༔ གནས་ལ་མ་སོང་བ་ལ་ཆད་པ་མང་པོ་བཅད་པའི་རྣམ་སྨིན་གྱིས་བློན་པོ་དམྱལ་བ་ཆེན་པོ་མནར་མེད་དུ་སྐྱེས་པའི་ཚེ༔ དེ་འདྲེན་པའི་ཕྱིར་ཡེ་ཤེས་མཚོ་རྒྱལ་དམྱལ་བར་བྱོན་པས་ཇི་ལྟར་བྱས་ཀྱང་བློན་པོ་འདྲེན་མ་ཐུབ་པས༔ ཇི་ལྟར་བྱས་ན་ཐར་བའི་ཐབས་ཡོད༔ ཅེས་གཤིན་རྗེའི་ལས་མཁན་ལ་དྲིས་པས་ཞི་ཁྲོའི་དཀྱིལ་འཁོར་ཞལ་ཕྱེས་ན་ཐར༔ གཞན་ཇི་ལྟར་བྱས་ཀྱང་ཐར་ཐབས་མེད་ཟེར་བ་ལ་བརྟེན་ནས༔ ལྷ་ལྕམ་གྱིས་ཞི་ཁྲོའི་དཀྱིལ་འཁོར་ཞལ་ཕྱེས་པ་ཙམ་གྱིས་ལྕགས་སྲེག་གི་ཁང་པ་ཡང་ཞིག༔ ལྕགས་སྲེགས་ཀྱི་ས་གཞི་ཡང་སིལ་བུར་གྱུར་ནས༔ བདུད་བློན་ཤ་ཏས་གཙོར་བྱས་པའི་འབུམ་ཚོ་ལྔ་དྲངས་སོ༔ དེ་ལྟར་ཆོས་འདི་ཤིན་ཏུ་ཟབ་པས༔ ནུབ་ཀྱིས་དོགས་ནས་ཞི་ཁྲོའི་དཔང་ཀོང་སོགས་བཀའ་མ་ཡང་དར་བར་མཛད༔ གཏེར་ཁ་ཡང་མང་དུ་སྦས་སོ༔ འདི་ནི་ལོ་ཙཱ་བ་ཀླུ་ཡི་རྒྱལ་མཚན་གྱི་སྤྲུལ་པ་གྲུབ་ཐོབ་ཀརྨ་གླིང་པས་དྭགས་ལྷ་སྒམ་པོའི་རྒྱབ་རི་ནས་གཏེར་ནས་བཏོན་ཏེ་མི་རབས་གསུམ་དུ་གཅིག་བརྒྱུད་སྙན་བརྒྱུད་དུ་མཛད༔ དེ་ནས་ཨོ་རྒྱན་རིན་པོ་ཆེས་ལུང་བསྟན་པ་ལྟར་བཀའ་
བབས་ཆོས་ཀྱི་རྒྱལ་མཚན་གྱིས་ཐམས་ཅད་ལ་རྒྱ་ཆེར་སྤེལ་བ་ཡིན་པས༔ གང་ཟག་སྙན་ཁུང་བརྒྱུད་པ་ཞེས་བྱའོ༔ གཏེར་བཏོན་ནས་ད་ལྟའི་བར་བརྒྱུད་པ་བཅུ་གཅིག་པ་ཡིན་ལ་མཐར་ཞི་ཁྲོའི་ཆོས་འདི་བྱང་ཕྱོགས་སུ་དར་ཞིང་རྒྱས་པར་ལུང་བསྟན་ཅིང་༔ དེ་ཡང་ཨོ་རྒྱན་རིན་པོ་ཆེའི་ཆོས་ཉིད་རྡོ་རྗེའི་གསུང་ལས༔ ཐོས་གྲོལ་འདི་ནི་མ་བསྒོམ་པར་སངས་རྒྱས་པའི་ཆོས༔ ཐོས་པ་ཙམ་གྱིས་གྲོལ་བ་ཐོབ་པའི་ཆོས༔ ཐོས་གྲོལ་ཆེན་མོ༔ སྡིག་པོ་ཆེ་གསེང་ལམ་ལ་ཁྲིད་པའི་ཆོས༔ སྐད་ཅིག་གཅིག་གིས་བྱེ་བྲག་ཕྱེད་པའི་ཆོས༔ སྐད་ཅིག་གཅིག་གིས་རྫོགས་སངས་རྒྱས་པའི་ཆོས་ཟབ་མོ་ཡིན་ཏེ༔ ཆོས་འདིས་སླེབ་པའི་སེམས་ཅན་ངན་སོང་དུ་འགྲོ་བར་མི་སྲིད་དོ༔ མཚམས་མེད་པ་ལྔ་བྱས་པའི་མི་ཡི་རྣ་ལམ་དུ་ཐོས་ན་ཡང་ངེས་པར་གྲོལ་བར་འགྱུར་རོ༔ འཆི་ཁར་སངས་རྒྱས་པའི་མན་ངག་དུས་གསུམ་གྱི་སངས་རྒྱས་ཀྱི་བཀའ་སྩལ་ཡང་འདི་ལས་ལྷག་པའི་ཆོས་རྙེད་པ་མི་སྲིད་དོ༔ ཞེས་གསུངས་སོ༔ དེ་ལྟ་བུའི་སྐབས་སུ་འདིར་སློབ་མ་རྗེས་སུ་འཛིན་པར་བབས་པས༔ མཎྜལ༔ དེ་ལྟ་བུའི་དབང་ཟབ་མོ་ཞུ་བའི་དོན་དུ་གསོལ་བ་འདེབས་པ་
འདི་ཡི་རྗེས་ཟློས་མཛོད༔ ཨེ་མ་མགོན་པོ་ཐུགས་རྗེ་ཅན༔ བདག་སོགས་འགྲོ་བ་མ་ལུས་པ༔ ལོག་པའི་ལམ་དུ་ཞུགས་པ་རྣམས༔ བདེ་ཆེན་ཐར་བའི་ལམ་སྟོན་འཚལ། ལན་གསུམ༔ སློབ་དཔོན་གྱིས་འདི་སྐད་དོ༔ ཨེ་མ་འདིར་འདུས་སྐལ་ལྡན་ལས་ཅན་རྣམས༔ སྔོན་ཚད་མ་རིག་རྨོངས་པའི་ལས་དབང་གིས༔ དུག་གསུམ་གྱིས་བཅིངས་ངན་སོང་གསུམ་དུ་མནར༔ དེང་ནས་བརྩམས་ཏེ་རྒྱལ་བའི་ཐུགས་རྗེ་ཡི༔ ཕོ་ཉས་བཟུང་ནས་དཀྱིལ་འཁོར་གྲལ་དུ་འཁོད༔ དོན་འབྲས་འདོད་ཕྱིར་དད་པའི་ཤུགས་བསྐྱེད་ལ༔ སྐུ་གསུམ་ཞིང་ཁམས་ཕོ་བྲང་འདིར་ཤོག་ཅིག༔ བླ་མེད་དོན་གྱི་སྙིང་པོ་སྦྱིན་པར་བྱ༔ ༈ མདུན་གྱི་ནམ་མཁར་དཀོན་མཆོག་གསུམ་དང་རྩ་གསུམ་ཞི་ཁྲོ་རབ་འབྱམས་ཀྱི་ལྷ་ཚོགས་མངོན་སུམ་དུ་བཞུགས་པའི་དྲུང་དུ་སྐྱབས་སུ་འགྲོ་བ་ཞུ་སྙམ་པས་རྗེས་ཟློས་མཛོད༔ ཨེ་མ་ཕྱོགས་བཅུའི་སངས་རྒྱས་བྱང་སེམས་དང་༔ བླ་མ་ཡི་དམ་མཁའ་འགྲོ་དང་༔ རྐང་གཉིས་གཙོ་བོ་སངས་རྒྱས་དང་༔ ཞི་བ་ཆགས་བྲལ་དམ་པའི་ཆོས༔ ཚོགས་མཆོག་འཕགས་པའི་དགེ་འདུན་ལ༔ བདག་ནི་གུས་པས་སྐྱབས་སུ་མཆི༔ གསུམ་དང་༔ ཀུན་བཟང་ཞི་
ཁྲོའི་ལྷ་ཚོགས་དང་༔ དམ་པ་རིགས་བརྒྱའི་ལྷ་ཚོགས་ལ༔ དེང་བཟུང་བླ་མེད་བྱང་ཆུབ་བར༔ གུས་པས་སྐྱབས་སུ་ཉེ་བར་མཆི༔ གསུམ། དེས་སྡོམ་པ་ཐམས་ཅད་གྱི་གཞི་རྟེན་སྐྱབས་སུ་འགྲོ་བའི་སྡོམ་པ་ལེགས་པར་ཐོབ་པ་དེས་བསླབ་བྱ་རྣམས་ལ་ཡང་བསླབ་པར་བྱས་ན་ཕན་ཡོན་དཔག་ཏུ་མེད་པར་གསུངས་སོ༔ ད་སྔགས་ཀྱི་ཐེག་པ་ལ་ཞུགས་པ་ལ་ཐེག་ཆེན་གྱི་སེམས་བསྐྱེད་པ་གལ་ཆེ་བས་འདི་ཡི་རྗེས་ཟློས་མཛོད༔ བླ་མ་ཀུན་བཟང་དགོངས་སུ་གསོལ༔ དེང་བཟུང་བྱང་ཆུབ་མ་ཐོབ་བར༔ འགྲོ་དྲུག་སེམས་ཅན་ཐམས་ཅད་ལ༔ མ་དང་བུ་ཡི་འདུ་ཤེས་ཀྱིས༔ མ་སྒྲལ་བ་རྣམས་བསྒྲལ་བ་དང་༔ མ་གྲོལ་བ་རྣམས་དགྲོལ་བ་དང་༔ དབུགས་མ་ཕྱུང་རྣམས་དབུགས་དབྱུང་ཕྱིར༔ བྱང་ཆུབ་མཆོག་ཏུ་སེམས་བསྐྱེད་དོ༔ གསུམ། དེ་དག་གིས་སེམས་བསྐྱེད་པ་སྔར་མ་ཐོབ་པ་ཡིན་ན་ཐོབ༔ ཐོབ་པ་གོང་དུ་འཕེལ་ཞིང་ཉམས་པ་སོར་ཆུད་པ་ཡིན་ནོ༔ བསྡུས་པའི་སྐབས་སློབ་མ་ལྷ་བསྐྱེད་ལ་འཇུག་གོ །ཡང་རིགས་ལྔའི་སྡོམ་པ་བཟུང་བའི་དོན་དུ་རྗེས་ཟློས་མཛོད༔ ཧོ༔ དཀོན་མཆོག་གསུམ་ཡང་མི་གཏོང་བསྒྲུབ༔ རྡོ་རྗེ་རིགས་ཀྱི་དམ་ཚིག་ཏུ༔
རྡོ་རྗེ་དྲིལ་བུའི་ཕྱག་རྒྱ་ཡང་༔ བྱང་ཆུབ་སེམས་ནི་སྤང་མི་བྱ༔ རིན་ཆེན་རིགས་ཀྱི་དམ་ཚིག་ཏུ༔ སྦྱིན་པ་རྣམ་བཞི་རྟག་ཏུ་སྦྱིན༔ པདྨ་རིགས་ཀྱི་དམ་ཚིག་ཏུ༔ ཐེག་པ་གསུམ་དང་ཆོས་རྣམས་བཤད༔ ལས་ཀྱི་རིགས་ཀྱི་དམ་ཚིག་ཏུ༔ འགྲོ་བའི་དོན་ལ་བརྩོན་པར་བྱ༔ དེ་བཞིན་རིགས་ཀྱི་དམ་ཚིག་ཏུ༔ དཀྱིལ་འཁོར་གསུམ་དང་འབྲལ་མི་བྱ༔ རྩ་བ་ཡན་ལག་དམ་ཚིག་ནི༔ མ་ལུས་བདག་གིས་ཡོངས་སུ་བཟུང་༔ ལན་གསུམ། དེ་ནས་དམ་ཚིག་རྡོ་རྗེ་མགོར་བཞག་ལ། ཧོ༔ འདི་ནི་རྡོ་རྗེའི་དམ་ཚིག་ཡིན༔ སྐུ་ཡི་དམ་ཚིག་ལུས་ཀྱིས་བསྲུང་༔ ཉམས་ན་ན་རཀ་དམྱལ་བར་ལྟུང་༔ བསྲུངས་ན་སྤྲུལ་སྐུའི་འགྲོ་དོན་འབྱུང་༔ གསུང་གི་དམ་ཚིག་ངག་གིས་བསྲུང་༔ ཉམས་ན་བྱོལ་སོང་གནས་སུ་སྐྱེ༔ བསྲུང་ན་ཆོས་སྐུ་གཉིས་ལྡན་ཐོབ༔ དམ་ཚིག་འབོག་པར་བྱའོ༔ དེ་ནས་དངོས་གྲུབ་པྲ་བརྟག་སོ་ཤིང་དོར་བ་འཁྱོར་ཆུ་བླུད་པ་དཔུང་སྐུད་གདབ་པ་རྨི་ལམ་བརྟག་པ་ཀུ་ཤ་གཏད་པ་འཛབ་དབྱངས་སྒྲོག་པ་དཀྱིལ་འཁོར་ཆེན་མོའི་སྟ་གོན་སྐབས་ཐོབ་སོགས་སྦྱར་བ་སྤྲོ་ན་བྱའོ༔ དེ་ནས་དཀྱིལ་འཁོར་དུ་འཇུག་པའི་ཡོན་དུ་མཎྜལ་ཕུལ༔ ས་གཞི་སྤོས་ཆུས་སོགས་རས་སྔོན་པོས་བཅིངས་ཏེ༔ ཨོཾ་ཙཀྵ་བྷནྡྲ་ཝ་ར་མ་ན་ཡ་
ཧཱུྃ༔ མེ་ཏོག་གཏད་ལ། ཨ་ཁཾ་བཱི་ར་ཧཱུྃ༔ དེ་ནས་སློབ་མ་ལྷར་བསྐྱེད་པ་ལ་རྒྱས་པར་ན་ཚོར་བ་རང་གྲོལ་ལྟར་སྤྱན་འདྲེན་ཡན་ཆོད་དང་༔ བསྡུས་པར་ན༔ ཨོ་བཛྲ་ཨ་མྲྀ་ཏ་སོགས། སྲ་བྷུ་ཝས་སྦྱངས། སྟོང་པ་ཉིད་དུ་གྱུར༔ སྟོང་པའི་ངང་ལས་པཾ་ལས་པདྨ་མ་ལས་ཉི་མ་ཨ་ལས་ཟླ་བའི་དཀྱིལ་འཁོར་གྱི་སྟེང་དུ་བླ་མ་ཀུན་ཏུ་བཟང་པོ་སྐུ་མདོག་མཐིང་ཀ་ཞལ་གཅིག་ཕྱག་གཉིས་མཉམ་གཞག་མཛད་པ་དེའི་པང་དུ་ཡུམ་ཀུན་ཏུ་བཟང་མོ་སྐུ་མདོག་དཀར་མོ་ཞལ་གཅིག་ཕྱག་གཉིས་ཀྱིས་རྡོ་རྗེ་དང་དྲིལ་བུ་བསྣམས་པས་ཡབ་ལ་འཁྱུད་པ་གཉིས་ཀ་དར་དང་རིན་པོ་ཆེའི་རྒྱན་གྱིས་བརྒྱན་པའི་དཔྲལ་བར་ཨོ་མགྲིན་པར་ཨཱཿཐུགས་ཀར་ཧཱུཾ་གིས་མཚན་པ་ལས་འོད་ཟེར་འཕྲོས་པས་ཤར་ཕྱོགས་མངོན་པར་དགའ་བ༔ ལྷོ་ཕྱོགས་དཔལ་དང་ལྡན་པ༔ ནུབ་བདེ་བ་ཅན༔ བྱང་ཕྱོགས་ལས་རབ་རྫོགས་པ༔ དབུས་འོག་མིན་ཆོས་ཀྱི་དབྱིངས་ཀྱི་ཕོ་བྲང་ནས༔ ཆོས་སྐུ་ཀུན་ཏུ་བཟང་པོ་ལ་གཞན་ཡང་བླ་མ་ཡི་དམ་དཔའ་བོ་མཁའ་འགྲོ་ཆོས་སྐྱོང་སྲུང་མའི་ཚོགས་དང་བཅས་པས་བསྐོར་བ་སྤྱན་དྲངས་ནས་ཁྱེད་རང་རྣམས་ཀྱི་ལུས་ངག་ཡིད་གསུམ་ལ་གཉིས་སུ་མེད་པར་གྱུར་པའི་མོས་པ་མཛོད་
ཅིག༔ ཨོ་གུ་རུ་དྷེ་ཝ་ཌཱཀྐི་ནི་ཛྙཱ་ན་ཨཱ་བེ་ཤ་ཡ་ཨ་ཨཱཿ སྤོས་དང་རོལ་མོ་འབུལ་ལ་བྱིན་དབབ་པར་བྱའོ༔ དེ་ལྟར་དབབ་པའི་ཡེ་ཤེས་པ་དེ་ཉིད་མི་ཉམས་ཤིང་བརྟན་པར་བྱ་བའི་ཆེད་དུ་ཏིཥྛ་བཛྲ༔ མེ་ཏོག་དཀྱིལ་འཁོར་དུ་འབུལ་བསྡུས་པར་ན༔ པྲ་ཝེ་ཤ་ཡ་ཕཊ་པྲ་ཏིཙྪ་ཧོ༔ ཀྱེ་པདྨ་དྲི་མེད་ཅེས་བྱ་བའི་དེ་བཞིན་གཤེགས་པའོ༔ མིག་དར་བསལ་ལ༔ ཨོཾ་བཛྲ་ཛྷཱ་ན་ཙཀྟ་པྲ་ཝེ་ཤ་ཡ་ཕཊ༔ དཀྱིལ་འཁོར་བཟང་པོ་འདི་ལ་ལྟོས༔ ལུས་ངག་ཡིད་ཀྱི་དད་པ་བསྐྱེད༔ རྡོ་རྗེ་སེམས་དཔའི་རིགས་སུ་སྐྱེས༔ སྔགས་དང་ཕྱག་རྒྱས་བྱིན་གྱིས་རློབས༔ དངོས་གྲུབ་ཐམས་ཅད་ཁྱོད་ཀྱིས་ཐོབ༔ དམ་ཚིག་སྔགས་ལ་བརྩོན་པར་གྱིས༔ ༈ དེ་ནས་དཀྱིལ་འཁོར་མཐོང་བ་རང་གྲོལ་བཤད་པའི་ཡོན་དུ་མཎྜལ་ཕུལ༔ ད་དཀྱིལ་འཁོར་ལ་བརྟེན་ནས་དཀྱིལ་འཁོར་གྱི་ལྷ་ངོ་བསྟན་པ་ལ་ཕྱི་རོལ་དུ་སྣ་ཚོགས་ཀྱི་མེ་རི་སོགས་དང་། གཏོར་དབང་ལ༔ ད་གཏོར་མ་ལ་བརྟེན་ནས་དབང་བཞི་རྫོགས་པར་བསྐུར་བ་ཡིན་པས་གཏོར་མ་འདི་ལྟ་བུ་མ་ཡིན་པར༔ ཕྱི་རོལ་དུ་སྣ་ཚོགས་ཀྱི་མེ་རི་དང་རྡོ་རྗེའི་ར་བ་པདྨ་སྣ་ཚོགས་ཀྱི་ར་བ༔ དེའི་ནང་རབ་འཇིགས་དུར་ཁྲོད་ཆེན་པོ་བརྒྱད་ཀྱིས་བསྐོར་བའི་དབུས་སུ༔ ནང་རིན་པོ་
དེའི་གཞལ་ཡས་ཁང་གྲུ་བཞི་སྒོ་བཞི་རྟ་བབས་དང་ལྡན་པའི་དབུས་སུ་པཾ་ལས་པདྨ་མ་ལས་ཉི་མ་ཨ་ལས་ཟླ་བའི་སྟེང་དུ་བླ་མ་ཀུན་ཏུ་བཟང་པོ་ཡབ་ཡུམ༔ མདུན་དུ་བུདྡྷཱ་ཧེ་རུ་ཀ་ཡབ་ཡུམ༔ གཡས་སུ་རྣམ་སྣང་ཡབ་ཡུམ༔ རྒྱབ་ཏུ་ཆེ་མཆོག་ཡབ་ཡུམ༔ གཡོན་དུ་རྣམ་པར་སྨིན་པའི་རིག་འཛིན་ཡབ་ཡུམ༔ དེའི་ཕྱི་རོལ་པད་འདབ་བརྒྱད་ལ༔ ཤར་དུ་རྡོ་རྗེ་སེམས་དཔའ་ཡབ་ཡུམ༔ ལྷོར་རིན་ཆེན་འབྱུང་ལྡན་ཡབ་ཡུམ༔ ནུབ་ཏུ་སྣང་བོ་མཐའ་ཡས་ཡབ་ཡུམ༔ བྱང་དུ་དོན་ཡོད་གྲུབ་པ་ཡབ་ཡུམ༔ ཤར་ལྷོར་བཛྲ་ཧེ་རུ་ཀ་ཡབ་ཡུམ༔ ལྷོ་ནུབ་ཏུ་རཏྣ་ཧེ་རུ་ཀ་ཡབ་ཡུམ་༔ ནུབ་བྱང་དུ་པདྨ་ཧེ་རུ་ཀ་ཡབ་ཡུམ༔ བྱང་ཤར་དུ་ཀརྨ་ཧེ་རུ་ཀ་ཡབ་ཡུམ༔ དེའི་ཕྱི་རོལ་དུ་པད་འདབ་བཅུ་དྲུག་ལ་སའི་སྙིང་པོ་ལ་སོགས་པའི་བྱང་ཆུབ་སེམས་དཔའ་བརྒྱད༔ ལ་སྱ་མ་ལ་སོགས་པའི་སེམས་མ་ཆེན་མོ་བརྒྱད་དང་བཅུ་དྲུག་བཞུགས་པ༔ དེའི་ཕྱི་རོལ་པད་འདབ་བཅུ་ལ་ཐུབ་ཆེན་དྲུག་རིག་འཛིན་ཡབ་ཡུམ་བརྒྱད་བཞུགས་པ༔ དེའི་ཕྱི་རིམ་རྩིབས་བཅུ་དྲུག་ལ༔ ཀོའུ་རི་ལ་སོགས་མ་མོ་བརྒྱད༔ སེང་ཧ་ལ་སོགས་ཕྲ་མེན་མ་བརྒྱད་དང་བཅུ་དྲུག་བཞུགས་
པ༔ དེའི་ཕྱོགས་བཞིའི་སྒོ་བཞིའི་གཡས་སུ་སྒོ་བ་ཡབ་ཡུམ་བརྒྱད༔ སྒོ་བཞིའི་གཡོན་དུ་རྟ་གདོང་མ་བཞི་བཞུགས་པ༔ དཀྱིལ་འཁོར་ཕྱི་ཡི་འཁོར་ཡུག་ལ་དབང་ཕྱུག་མ་ཉི་ཤུ་རྩ་བརྒྱད་ལ་སོགས་པའི་ཆོས་སྐྱོང་སྲུང་མའི་ཚོགས་དང་བཅས་པ་བསམ་གྱིས་མི་ཁྱབ་པས་བསྐོར་ནས་བཞུགས་པ༔ སྟེང་དུ་བརྒྱུད་པའི་བླ་མ་རིག་འཛིན་དཔའ་བོ་ཌཱཀྐིའི་ཚོགས་ཐམས་ཅད་སྤྲིན་འཁྲིགས་པ་ལྟར་བཞུགས་པ༔ ཞི་བའི་ལྷ་ཚོགས་ཐམས་ཅད་མཚན་བཟང་པོ་སུམ་ཅུ་རྩ་གཉིས་དང་དཔེ་བྱད་བཟང་པོ་བརྒྱད་ཅུ་དང་དར་དང་རིན་པོ་ཆེའི་རྒྱན་ཐམས་ཅད་ཀྱིས་བརྒྱན་པ༔ ཐུབ་པ་དྲུག་ནི་སྤྲུལ་སྐུའི་ཆ་ལུགས་ཅན༔ ཆོས་གོས་གསུམ་གྱིས་བཀླུབས་པ༔ ཞི་ཁྲོའི་ལྷ་ཚོགས་ཐམས་ཅད་གར་གྱི་ཉམས་དགུ་དང་ལྡན་ཞིང་དུར་ཁྲོད་ཀྱི་ཆས་བརྒྱད་དང་དཔལ་གྱི་ཆས་བཅུས་བརྒྱན་པ༔ བསྐལ་པའི་མེ་དཔུང་འབར་བའི་ཀློང་ནས་ཧ་ཧ་ཧཱུཾ་ཧཱུཾ་ཕཊ་ཀྱི་སྒྲ་འབྲུག་ལྟར་སྒྲོགས་པས་སྟོང་གསུམ་གཡོ་བར་བྱེད་པ་གསལ་ཐོབ༔ དེ་དག་ནི་ཕྱི་ལྟར་ན་ཞི་བའི་ལྷ་ཚོགས་བཞི་བཅུ་རྩ་གཉིས༔ ནང་ལྟར་ན་ཁྲག་འཐུང་གི་ལྷ་ཚོགས་ལྔ་བཅུ་རྩ་བརྒྱད༔ གསང་བ་ལྟར་ན་མཁའ་འགྲོ་སྡེ་ལྔ༔ ཡང་གསང་ལྟར་ན་ལྷུན་
གྲུབ་རྫོགས་ལྡན་གྱི་ལྷ་ཚོགས༔ བླ་མེད་ལྟར་ན་རིག་པ་ཐིག་ལེ་ཉག་གཅིག་གི་སྐུ༔ ངོ་བོ་འགྱུར་བ་མེད་པ་ཆོས་སྐུ༔ རང་བཞིན་རང་གིས་གསལ་བ་ལོངས་སྐུ་།ཐུགས་རྗེ་རང་གྲོལ་དུ་ཡོད་པ་སྤྲུལ་སྐུ༔ ལྟ་སྒོམ་སྤྱོད་གསུམ་དུ་གསལ་བ་ཟུང་འཇུག་གི་སྐུ་ཡི་དཀྱིལ་འཁོར་འདིར་རང་ངོ་འཕྲོད༔ འདིར་ཆུད་ནས་དབང་སྐུར་ཐོབ་ན་ད་ལྟ་ཤི་ཡང་སངས་རྒྱས་པ་ཡིན་ངེས་པའི་མོས་འདུན་དྲག་པོས་སྤྲོ་བ་བསྐྱེད་ལ་འཁོར་བ་སྡུག་བསྔལ་གྱི་རྒྱ་མཚོ་ཆེན་པོ་ལས་གྲོལ་ནས་ཞིང་ཁམས་རྣམ་པར་དག་ནས་སངས་རྒྱས་ནས་འཁོར་བ་མ་སྟོངས་ཀྱི་བར་དུ་འགྲོ་བ་སེམས་ཅན་ཐམས་ཅད་ཀྱི་དོན་ཐོགས་པ་མེད་པར་འབད་མེད་དུ་འབྱུང་བར་འགྱུར་རོ༔ དེ་ནས་དངོས་གཞིའི་དབང་ལ༔ འོ་རིགས་ཀྱི་བུ་ཁྱེད་རྣམས་ལ་རིགས་དྲུག་གི་ཐུབ་པ་དྲུག་གི་ཕྱག་མཚན་དྲུག་དང་དཀྱིལ་འཁོར་གྱི་ཤར་ནུབ་དབུས་བྱང་ལྷོ་ཡི་བུམ་པ་དཀར་དམར་མཐིང་ལྗང་སེར་པོའི་ནང་དུ་སྨན་ལྔ་དང་༔ དྲི་ལྔ་དང་༔ འབྲུ་ལྔ་དང་༔ སྙིང་པོ་ལྔ་དང་༔ རིན་པོ་ཆེ་ལྔས་གང་བའི་བུམ་པ་ལ་ཕྱི་གཞལ་ཡས་ཁང་གི་ནང་དུ་རིགས་ལྔ་དང་རྒྱལ་བ་ཞི་ཁྲོའི་ལྷ་ཚོགས་ཀྱང་སྤུང་ངེ་ཐེབས་སེ་བཞུགས་པས་ཁྱོད་ལ་དབང་རྣམས་
རིམ་གྱིས་བསྐུར་བ་ཙམ་གྱིས་ཉོན་མོངས་པ་དྲུག་གི་སྒོ་ནས་བསགས་པའི་སྡིག་པ་དང་སྒྲིབ་པ་མ་ལུས་པ་བྱང་ཞིང་དག་ནས་རིགས་དྲུག་ཏུ་སྐྱེ་བའི་སྒོ་བཅད་དེ་དུག་ལྔ་དང་སེར་སྣ་དང་དྲུག་གི་ཉེས་པ་ལས་གྲོལ་ནས༔ ཤར་ཕྱོགས་མངོན་པར་དགའ་བ༔ ནུབ་བདེ་བ་ཅན༔ དབུས་འཐུག་པོ་བཀོད༔ བྱང་ལས་རབ་རྫོགས་པ༔ ལྷོ་ཕྱོགས་དཔལ་ལྡན་ཞིང་དུ་སྐྱེ་བའི་སྒོ་ཕྱེས་ནས༔ ཞིང་ཁམས་ལྔ་རིམ་གྱིས་མཇལ་ནས་རིགས་ལྔའི་དབང་རྣམས་རིམ་གྱིས་ཐོབ་པ་ཡིན་སྙམ་དུ་མོས་པ་དུང་དུང་མཛོད་ལ༔ དེ་ནས་ཐོག་མར་ན་རཀ་དམྱལ་བའི་གནས་ནས་སྤར་ཞིང་རིག་འཛིན་གྱི་གྲལ་དུ་འཁོད་པར་བྱ་བའི་ཕྱིར་གསོལ་བ་འདེབས་པ་འདི་ཡི་རྗེས་ཟློས་མཛོད༔ ཨེ་མ་མགོན་པོ་ཐུགས་རྗེ་ཅན༔ བདག་སོགས་འཁོར་བའི་སྡུག་བསྔལ་ལས༔ སྐྱབས་ཕྱིར་བརྩེ་བས་རབ་བཟུང་ནས་དབང་དང་བྱིན་རླབས་བསྩལ་དུ་གསོལ༔ ལན་གསུམ༔ མེ་ཆུ་གཏད་ལ༔ ཧཱུྃ༔ ཚ་གྲང་སྐྱོབས་མཛད་མེ་ཆུ་བསིལ་དྲོད་ལྡན༔ སྐལ་ལྡན་རིགས་ཀྱི་བུ་ལ་དབང་བསྐུར་པས༔ དམྱལ་བ་ཚ་གྲང་སྡུག་བསྔལ་ལས་གྲོལ་ནས༔ ན་ར་ཀ་ཡི་སྡུག་བསྔལ་བྲལ་བར་ཤོག༔ དུ་ད་ཧ་ད་ཧ་སརྦ་ན་
ར་ཀ་ག་ཏེ་ཧེ་ཏུཾ་ཧཱུྃ་ཕཊ༔ ཤར་བུམ་གྱིས་དབང་བསྐུར༔ ཧཱུྃ༔ ཀུན་བཟང་ཡབ་ཡུམ་བུམ་པ་ན༔ རྒྱལ་བ་ཞི་ཁྲོའི་ལྷ་ཚོགས་བཞུགས༔ སྐལ་ལྡན་ཁྱོད་ལ་དབང་བསྐུར་བས༔ དམྱལ་བའི་སྐྱེ་སྒོ་བཅད་ནས་ནི༔ ན་རཀ་སྡུག་བསྔལ་བྲལ་བར་ཤོག༔ ཧཱུྃ་བཛྲ་སཏཱ་སོགས་ཨོ་བཛྲ་ཨ་བྷི་ཥིཉྩ་ཨཱཿ བུམ་ཆུ་བླུད༔ ཤར་སྒོ་ཕྱེས་ལ༔ རྡོ་རྗེ་གཏད་ལ༔ ཧཱུྃ༔ ཤར་ཕྱོགས་རིག་པ་རང་གསལ་གྱི༔ མེ་ལོང་ལྟ་བུའི་སྒོ་ཕྱེས་ཤིག༔ བྷཾ་པྲ་ཝེ་ཤ་ཡ་ཕཊ༔ ཧཱུྃ༔ ཤར་ནས་བཀྲ་ཤིས་གང་ལགས་པ༔ རྡོ་རྗེ་སེམས་དཔའི་བཀྲ་ཤིས་ལྷ༔ ཞི་བ་འགྲུབ་པའི་བཀྲ་ཤིས་དེ༔ འདིར་ཚོགས་རྣམས་ལ་བཀྲ་ཤིས་ཤོག༔ མེ་ཏོག་རོལ་མོ་བྱ༔ གཉིས་པ་ཡི་དྭགས་གནས་ནས་སྤར་བའི་དོན་དུ་གསོལ་བ་འདེབས་པ་འདི་ཡི་རྗེས་ཟློས་མཛོད༔ ཀྱེ་མ་ཀྱེ་ཧུད་མགོན་པོ་ཡིས༔ ཐུགས་རྗེས་བཟུང་ལ་བདག་སྐྱོབས་ཤོག༔ བདག་ལུས་སྒྲོལ་ལ་བདེ་ལ་འཁོད༔ མགོན་པོས་མྱུར་དུ་བསྐྱབ་ཏུ་གསོལ༔ ལན་གསུམ༔ སྒྲོམ་བུ་གཏད་ལ༔ རིན་ཆེན་སྒྲོམ་གྱི་བུམ་པ་ན༔ རྒྱལ་བ་ཞི་ཁྲོའི་ལྷ་ཚོགས་བཞུགས༔ སྐལ་ལྡན་ཁྱོད་ལ་དབང་བསྐུར་བས༔ སྲེ་ཏ་ཀ་ཡི་སྡུག་བསྔལ་བྲལ་
བར་ཤོག༔ སྲེ་པ་ཙ་པ་ཙ་སརྦ་པྲ་ཏ་ཀ་ག་ཏེ་ཧེ་ཏུཾ་ཧཱུྃ་ཕཊ༔ ནུབ་ཀྱི་བུམ་པས་དབང་བསྐུར༔ ཧཱུྃ༔ བདུད་རྩི་དྲི་ལྔའི་བུམ་པ་འདིར༔ བདེ་གཤེགས་གསུང་གི་ལྷ་ཚོགས་བཞུགས༔ སྐལ་ལྡན་ཁྱོད་ལ་དབང་བསྐུར་བས༔ ཡི་དྭགས་སྐྱེ་སྒོ་བཅད་ནས་ནི༔ བདེ་བ་ཅན་དུ་སྐྱེ་བར་ཤོག༔ ཨོཾ་པདྨ་སཏཱ་སོགས། ཨཱཿཔདྨ་ཨ་བྷི་ཥིཉྩ་ཨཱཿ བུམ་ཆུ་བླུད༔ ནུབ་སྒོ་ཕྱེས་ནས་པདྨ་གཏད༔ ཧཱུྃ༔ ནུབ་ཕྱོགས་མ་འདྲེས་གསལ་བ་ཡི༔ སོར་རྟོག་ཡེ་ཤེས་སྒོ་ཕྱེས་ཤིག༔ བྷཾ་པྲ་ཝེ་ཤ་ཡ་ཕཊ༔ ཧཱུྃ༔ ནུབ་ནས་བཀྲ་ཤིས་གང་ལགས་པ༔ སྣང་བ་མཐའ་ཡས་བཀྲ་ཤིས་ལྷ༔ དབང་སྡུད་འགྲུབ་པའི་བཀྲ་ཤིས་དེ༔ འདིར་ཚོགས་རྣམས་ལ་བཀྲ་ཤིསཾ་ཤོག༔ མེ་ཏོག་རོལ་མོ་བྱ༔ གསུམ་པ་དུད་འགྲོའི་གནས་ནས་སྤར་བའི་དོན་དུ་གསོལ་བ་འདེབས་པ་འདི་ཡི་རྗེས་ཟློས་མཛོདི༔ ཀྱེ་མ་ཀྱེ་ཧུད་བདག་འདྲ་སོགས༔ ལས་ཀྱི་རྣམ་སྨིན་རང་ལ་སྨིན༔ མགོན་པོ་ཐུགས་རྗེ་ཆེན་པོ་ཡིས༔ གནས་ངན་འདི་ལས་བདག་སྒྲོལ་ཅིག༔ ལན་གསུམ༔ པུ་ཏི་གཏད་ལ༔ ཨ། ཤེས་རབ་རིག་པའི་པུཏི་འདི༔ དུས་གསུམ་རྒྱལ་བ་ཞི་ཁྲོའི་ལྷ༔ སྐལ་ལྡན་ཁྱོད་ལ་དབང་བསྐུར་བས༔ ཏིརླ་ཀ་ཡི་
སྡུག་བསྔལ་བྲལ་བར་ཤོག༔ སུ་མ་ཐ་མ་ཐ་སརྦ་ཏིརྱ་ཀ་ག་ཏེ་ཧེ་ཏུཾ་ཧཱུྃ་ཕཊ༔ དབུས་བུམ་ཐོགས་ལ༔ ཧཱུྃ༔ རིན་ཆེན་འབྲུ་ལྔའི་བུམ་པ་འདིར༔ བདེ་གཤེགས་སྐུ་ཡི་ལྷ་ཚོགས་བཞུགས༔ སྐལ་ལྡན་ཁྱོད་ལ་དབང་བསྐུར་བས༔ དུད་འགྲོའི་སྐྱེ་སྒོ་བཅད་ནས་ནི༔ འཐུག་པོ་བཀོད་ཞིང་སྐྱེ་བར་ཤོག༔ ཨོཾ་བུདྡྷ་སཏཱ་སོགས། ཨོཾ་བུདྡྷ་ཨབྷི་ཥིཉྩ་ཨཿ དབུས་སྒོ་ཕྱེས་ལ་འཁོར་ལོ་གཏད༔ ཧཱུྃ༔ ལྷུན་གྲུབ་གཞལ་ཡས་ཆེན་པོ་ཡི༔ ཆོས་དབྱིངས་ཡེ་ཤེས་སྒོ་ཕྱེས་ཤིག་བྷཾ་པྲ་ཝེ་ཤ་ཡ་ཕཊ༔ ཧཱུྃ༔ དབུས་ནས་བཀྲ་ཤིས་གང་ལགས་པ༔ རྣམ་པར་སྣང་མཛད་བཀྲ་ཤིས་ལྷ༔ ལྷུན་གྱིས་གྲུབ་པའི་བཀྲ་ཤིས་དེ༔ འདིར་ཚོགས་རྣམས་ལ་བཀྲ་ཤིས་ཤོག༔ མེ་ཏོག་རོལ་མོ་བྱ༔ བཞི་པ་ལྷ་མིན་གནས་ནས་སྤར་བའི་དོན་དུ་གསོལ་བ་འདེབས་པ་འདི་ཡི་རྗེས་ཟློས་མཛོད༔ ཀྱེ་མ་བདག་འདྲའི་སེམས་ཅན་ལ༔ སྔོན་གྱི་ལས་ངན་དབང་གྱུར་པས༔ ཀྱེ་མ་ཀྱེ་ཧུད་མགོན་པོ་ཡིས་བདག་ལུས་ངན་པ་བསྒྲལ་དུ་གསོལ༔ ལན་གསུམ༔ གོ་མཚོན་གཏད་ལ༔ ཧཱཿ ཤེས་རབ་དོན་མཚོན་རལ་གྲི་དང་༔ བདུད་ཀྱི་མཚོན་སྲུང་གོ་ཆ་འདི༔ དུས་གསུམ་རྒྱལ་བའི་
སྦྱོར་སྒྲོལ་ཏེ༔ ཞི་ཁྲོ་རྒྱལ་བའི་ཕྱག་མཚན་ཏེ༔ སྐལ་ལྡན་ཁྱོད་ལ་དབང་བསྐུར་བས༔ ཧེ་ས་ཀ་ཡི་སྡུག་བསྔལ་བྲལ་བར་ཤོག༔ ཏྲི་སརྦ་དུ་ལ་སརྦ་ཀརྨ་པྲ་ཝེ་ཤ་ཡ་ཕཊ༔ བྱང་བུམ་ཐོགས་ལ༔ ཧཱུྃ༔ སྙིང་པོ་ལྔ་ཡི་བུམ་པ་འདིར༔ བདེ་གཤེགས་ཕྲིན་ལས་ལྷ་ཚོགས་བཞུགས༔ སྐལ་ལྡན་ཁྱོད་ལ་དབང་བསྐུར་བས༔ ལྷ་མིན་སྐྱེ་སྒོ་བཅད་ནས་ནི༔ ལས་རབ་ཞིང་དུ་སྐྱེ་བར་ཤོག༔ ཧ་ཀརྨ་ས་ཏཱ་སོགས་ཧ་ཀརྨ་ཨ་བྷི་ཥིཉྩ་ཨཱཿ བྱང་སྒོ་ཕྱེས་ལ་རྒྱ་གྲམ་གཏད༔ ཧཱུྃ༔ བྱང་ཕྱོགས་ལས་རབ་གྲུབ་པ་ཡི༔ ནན་ཏན་ཡེ་ཤེས་སྒོ་ཕྱེས་ཤིག་བྷཾ་པྲ་ཝེ་ཤ་ཡ་ཕཊ༔ ཧཱུྃ༔ བྱང་ནས་བཀྲ་ཤིས་གང་ལགས་པ༔ དོན་ཡོད་གྲུབ་པའི་བཀྲ་ཤིས་ལྷ༔ དགྲ་བགེགས་ཚར་གཅོད་བཀྲ་ཤིས་དེ༔ འདིར་ཚོགས་རྣམས་ལ་བཀྲ་ཤིས་ཤོག༔ མེ་ཏོག་རོལ་མོ་བྱ༔ ལྔ་པ་ལྷ་ཡི་གནས་ནས་སྤར་བའི་དོན་དུ་གསོལ་བ་འདེབས་པ་འདི་ཡི་རྗེས་ཟློས་མཛོད༔ ཀྱེ་མ་ཀྱེ་ཧུད་ཐུགས་རྗེ་ཅན༔ བདག་འདྲ་རྨོངས་པའི་འཛིན་པ་ཅནི༔ དམ་ཚིག་རྩ་བ་ཉམས་པའི་སྐྱོན༔ ངན་སོང་མཐོ་རིས་གནས་ནས་འཁོར༔ མི་འཆབ་མཐོལ་བཤགས་མེ་ཏོག་བཞེས༔ དབང་བསྐུར་ལྷ་ཡི་གནས་སུ་དྲོངས༔
ལན་གསུམ༔ པི་ཝཾ་གཏད་ལ༔ སྭཱ༔ ལོངས་སྤྱོད་བདུད་ཀྱི་གཡེངས་འཇོམ་པའི༔ པི་ཝཾ་སྙན་པའི་དོན་བྱེད་འདིས༔ སྐལ་ལྡན་ཁྱོད་ལ་དབང་བསྐུར་བས༔ སྐྱེ་བ་གཅིག་གིས་ལས་རྫོགས་ཤོག༔ ཨོཾ་སརྦ་ཏ་ཐཱ་ག་བདུ་ཁང་ཙིར་ཙིན་ཧཱུྃ་ཕཊ༔ ལྷོ་བུམ་ཐོགས་ལ༔ ཧཱུྃ༔ རིན་ཆེན་སྣ་ལྔའི་བུམ་པ་འདིར༔ བདེ་གཤེགས་ཡོན་ཏན་ལྷ་ཚོགས་བཞུགས༔ སྐལ་ལྡན་ཁྱོད་ལ་དབང་བསྐུར་བས༔ ལྷ་ཡི་སྐྱེ་སྒོ་བཅད་ནས་ནི༔ དཔལ་ལྡན་ཞིང་དུ་སྐྱེ་བར་ཤོག༔ སཱ་རཏྣ་སཏཱ་སོགས། སཱ་རཏྣ་ཨ་བྷི་ཥིཉྩ་ཨཱཿ ལྷོ་སྒོ་ཕྱེས་ལ་རིན་ཆེན་གཏད་ལ༔ ཧཱུྃ༔ ལྷོ་ཕྱོགས་དགོངས་པ་མཉམ་ཉིད་ཀྱི་ཡེ་ཤེས་ཆེན་པོའི་སྒོ་ཕྱེས་ཤིག༔ བྷཾ་པྲ་ཝེ་ཤ་ཡ་ཕཊ༔ ཧཱུྃ༔ ལྷོ་ནས་བཀྲ་ཤིས་གང་ལགས་པ༔ རིན་ཆེན་འབྱུང་ལྡན་བཀྲ་ཤིས་ལྷ༔ ཡོན་ཏན་འགྲུབ་པའི་བཀྲ་ཤིས་དེ༔ འདིར་ཚོགས་རྣམས་ལ་བཀྲ་ཤིས་ཤོག༔ མེ་ཏོག་རོལ་མོ་བྱ༔ དྲུག་པ་མི་ཡི་གནས་ནས་སྤར་བའི་དོན་དུ་གསོལ་བ་འདེབས་པ་འདི་ཡི་རྗེས་ཟློས་མཛོད༔ ཀྱེ་མ་བླ་མ་རྡོ་རྗེ་འཛིན༔ བདག་ཅག་རིགས་དྲུག་གནས་སུ་འཁྱམས༔ དམ་ཚིག་ཉམས་ཆག་དཔག་མེད་བསགས༔ འགྲོ་མགོན་ཐུགས་
རྗེ་ཅན་ཁྱོད་ཀྱིས༔ ཉམས་ཆག་བསྐང་ལ་དངོས་གྲུབ་སྩོལ༔ དབང་མཆོག་རྣམས་ཀུན་དུས་འདིར་སྩོལ༔ ལན་གསུམ༔ སྤར་བུ་གསེག་ཤང་གཏད་ལ༔ ཧཱུྃ༔ རིན་ཆེན་སྤར་བུ་ལྷུང་བཟེད་ན༔ རྒྱལ་བ་ཞི་ཁྲོའི་ལྷ་ཚོགས་བཞུགས༔ གསེག་ཤང་དྲང་སྲོང་སྒྲ་སྒྲོགས་པ༔ ཐུགས་རྟགས་ཞི་ཁྲོ་ལྷ་ཡི་རྟགས༔ སྐལ་ལྡན་ཁྱོད་ལ་དབང་བསྐུར་བས༔ ཨ་ཝ་དྷུ་ཏིའི་དབང་ཐོབ་ཤོག༔ ཨོྃ་ཚིནྡྷ་ཚིནྡྷ་སརྦ་ཨ་ཝ་ར་ཎ་ནི་ཧཱུྃ་ཕཊ༔ དབུས་བུམ་ཐོགས་ལ༔ ཧཱུྃ༔ རིན་ཆེན་བུམ་པ་གཞལ་ཡས་ཁང་༔ རྒྱལ་བ་ཞི་ཁྲོའི་ལྷ་ཚོགས་བཞུགས༔ རིགས་ཀྱི་བུ་ལ་དབང་བསྐུར་བས༔ ལྷ་དབང་ལུས་ལ་ཐོབ་པར་ཤོག༔ ཧཱུྃ་བཛྲ་ཨ་བྷི་ཥིཉྩ་ཨཱཿ ཨོཾ་བུདྡྷ་ཨ་བྷི་ཥིཉྩ་ཨཱཿ སྭ་རཏྣ་ཨ་བྷི་ཥིཉྩ་ཨཱཿ ཨོཾ་པདྨ་ཨ་བྷི་ཥིཉྩ་ཨཱ་ཧཱ་ཀརྨ་ཨ་བྷི་ཥིཉྩ་ཨཱཿ དེ་ནས་ཐུན་མོང་རིག་པའི་དབང་བསྡུས་པ་ནི༔ དབང་ཤིན་ཏུ་བསྡུས་པ་སོགས་ལ་ཡང་འདིས་ཆོག་པ་ལས༔ བུམ་པ་ཐོགས་ལ༔ ཧཱུྃ༔ བུམ་པ་འདི་ནི་གཞལ་ཡས་ཁང་༔ ནང་ན་ཞི་ཁྲོའི་ལྷ་ཚོགས་བཞུགས༔ ཕྱི་ནང་གསང་བའི་དཀྱིལ་འཁོར་ནས༔ སྐུ་གསུང་ཐུགས་ཀྱི་དབང་བསྐུར་བས༔ ཕྱི་ནང་གསང་བའི་དབང་མཆོག་རྣམས༔ སྐལ་ལྡན་རྣམས་ལ་བབ་
ནས་ཀྱང་༔ ཕུང་ཁམས་ལྷ་དང་ལྷ་མོར་གྱུར༔ བསྐྱེད་རིམ་ལྷ་དབང་ཐོབ་པར་ཤོག༔ ཨོཾ་ཨཱཧཱུྃ་སརྦ་ཏ་ཐཱ་ག་ཏ་ཨོཾ་ཨཱཧཱུྃ་ཧཱི༔ པུ་ཏི་ཐོགས་ལ༔ ཨཱུ༔ ཤེས་རབ་རིག་པའི་པུ་ཏི་འདི༔ དུས་གསུམ་རྒྱལ་བ་ཞི་ཁྲོའི་གསུང་༔ སྐལ་ལྡན་ཁྱོད་ལ་དབང་བསྐུར་བས༔ གསུང་དབང་ཡོངས་རྫོགས་ཐོབ་པར་ཤོག་སྙིང་པོའི་མཐར༔ ཝཀ་ཨ་བྷི་ཥིཉྩ་རིགས་ལྔའི་ཕྱག་མཚན་ཐོགས་ལ༔ ཧཱུྃ༔ རྡོ་རྗེ་འཁོར་ལོ་རིན་པོ་ཆེ༔ པདྨ་རྒྱ་གྲམ་ཐུགས་ཀྱི་རྟགས༔ རིགས་ཀྱི་བུ་ལ་དབང་བསྐུར་བས༔ འཁོར་ལོ་ལྔ་ཡི་དབང་ཐོབ་ཤོག༔ བཛྲ་ཙཀྲ་རཏྣ་པདྨ་ཁངྒ་ཨ་བྷི་ཥིཉྩ་ཨཱམེ་ཆུ་དབུ་རྒྱན་རྡོར་དྲིལ་ཐོགས་ལ༔ ཧཱུྃ༔ ཞེ་སྡང་མེ་གསོད་ཆུ་ཡི་དབང་༔ ང་རྒྱལ་རི་བསྙིལ་དབུ་རྒྱན་དབང་༔ འདོད་ཆགས་དུག་འཇོམས་རྡོ་རྗེའི་དབང་༔ ཕྲག་དོག་ཞེན་ཁྲོལ་དྲིལ་བུའི་དབང་༔ གཏི་མུག་མུན་སེལ་མིང་གི་དབང་༔ བུ་ཁྱོད་རྣམས་ལ་དབང་བསྐུར་བས༔ ཧཱུྃ་བཛྲ་ཨ་དན་ཛྷཱ་ན་ཨ་བྷི་ཥིཉྩ་མིཾ༔ སཱ་རཏ་ས་མ་ཏ་ཛྷཱ་ན་ཨབྷི་ཥིཉྩ་མཱི༔ ཨོཾ་པདྨ་པྲ་ཏུ་བཀྐི་ཛྷཱ་ན་ཨ་བྷི་ཥིཉྩ་མཱི༔ ཧྭ་ཀརྨ་ཀྲི་ཏུ་ནུཊྛ་ཛྷཱ་ན་ཨ་བྷི་ཥིཉྩ་མཱི༔ ཨོཾ་བུདྡྷ་ཤུ་ནྱ་ཏཱ་ཛྙཱ་ན་ཨ་བྷི་ཥིཉྩ་མཱི༔ སྐལ་ལྡན་
རིགས་ཀྱི་བུ་རྣམས་ལ་ཐུབ་དྲུག་གི་ཕྱག་མཚན་རིགས་ལྔའི་བུམ་དབང་ལྔ་དང་ཐུན་མོང་རིག་པའི་དབང་རྣམས་ཡོངས་སུ་རྫོགས་པར་བསྐུར་བས༔ ཉོན་དྲུག་གི་སྒོ་ནས་བསགས་པའི་སྡིག་སྒྲིབ་ཀྱི་ཕུང་པོ་གཏན་ནས་དག་ནས་དུག་ལྔའི་ཉེས་པ་ལས་གྲོལ༔ སྒྲིབ་པ་ལྔ་དག༔ ཡེ་ཤེས་ལྔ་དང་སྐུ་ལྔ་ལྷུན་གྱིས་གྲུབ་ཅིང་ཞིང་ཁམས་ལྔ་མཐོང་བ་ལ་དབང་བསྒྱུར་བས༔ འགྲོ་བ་སེམས་ཅན་ཐམས་ཅད་ཀྱི་དོན་ཐོགས་པ་མེད་པར་འབད་མེད་ལྷུན་གྲུབ་ཏུ་འབྱུང་བར་གྱུར་ཅིག༔ དེ་ནས་ཞི་ཁྲོའི་ལྷ་དབང་ཆེན་མོ་བསྐུར་བའི་དོན་དུ་གསོལ་བ་འདེབས་པ་འདི་ཡི་རྗེས་ཟློས་མཛོད༔ ཀྱེ་ཧོ༔ བླ་མ་རྡོ་རྗེ་འཛིན་པ་ཆེ༔ བདག་ཅག་སྐལ་ལྡན་བུ་རྣམས་ལ༔ རྒྱལ་བ་ཞི་ཁྲོ་རབ་འབྱམས་ཀྱི༔ ལྷ་དབང་ཡོངས་རྫོགས་བསྐུར་དུ་གསོལ༔ ལན་གསུམ༔ རྒྱས་པར་འཕྲད་ཚད་རང་གྲོལ་ལྟར་དམ་པ་རིགས་བརྒྱ་རེ་རེ་ནས་སྐུ་དབང་བསྐུར༔ ངོ་སྤྲད་རྣམས་རྒྱས་པར་བྱ༔ འབྲིང་འགྲོ་དྲུག་རང་གྲོལ་ལ་གཙོ་འཁོར་སྤྱི་བསྡུས་ལྟར་དང་མགྱོགས་དབང་ལ་གཞུང་དབང་བསྐུར་ལ་ངོ་སྤྲོད་མ་བྱས་པས་ཆོག་གོ༔ ཀུན་བཟང་ཡབ་ཡུམ་སྐུ་ཐོགས་ལ༔ ཧཱུྃ༔ སྐལ་ལྡན་རིགས་ཀྱི་བུ་རྣམས་ལ༔ ཀུན་བཟང་ཡབ་ཡུམ་དབང་བསྐུར་བས༔ ཡིད་ཆོས་རྣམ་པར་
དག་པ་ཡི༔ ཆོས་སྐུ་རབ་འབྱམས་དབང་ཐོབ་ཤོག༔ ཡིག་འབྲུ་བཅུ་དྲུག་རྡོ་རྗེའི་སྒྲ་བརྗོད༔ དྷརྨ་ཀཱ་ཡ་ཨ་བྷིཥིཉྩ་ཨོཾ་ཨཱཿཧཱུྃ་ཧི་སྨོན་ལམ་ནི༔ སྐལ་ལྡན་རིགས་ཀྱི་བུ་རྣམས་ལ་ཀུན་བཟང་ཡབ་ཡུམ་གཉིས་ཀྱི་དབང་བསྐུར་བས་ཡིད་ཆོས་ཀྱི་ཁམས་རྣམ་པར་དག་ནས་ཆོས་སྐུ་རབ་འབྱམས་ཀྱི་དབང་དམ་པ་ཐོབ་པར་གྱུར་ཅིག༔ རིགས་ལྔའི་སྐུ་ཐོགས་ལ༔ ཧཱུྃ༔ སྐལ་ལྡན་རིགས་ཀྱི་བུ་རྣམས་ལ༔ རིགས་ལྔ་ཡབ་ལྔའི་དབང་བསྐུར་བས༔ ཕུང་པོ་ལྔ་པོ་གནས་དག་ནས༔ ལོངས་སྐུ་རིབ་འབྱམ་དབང་ཐོབ་ཤོག༔ ཨོཾ་ཧཱུྃ་སྭཱ་ཨཱ་ཧ་སཾ་བྷོ་ཀཱ་ཡ༔ ཨ་བྷི་ཥིཉྩ་ཨཱཿ སྐལ་ལྡན་རྣམས་ལ་རྒྱལ་བ་རིགས་ལྔའི་དབང་བསྐུར་བས་ཕུང་པོ་ལྔ་པོ་གནས་སུ་དག་ནས་ལོངས་སྐུ་རབ་འབྱམས་ཀྱི་དབང་དམ་པ་ཐོབ་པར་གྱུར་ཅིག༔་ཡུམ་ལྔ་ཐོགས་ལ༔ ཧཱུྃ༔ སྐལ་ལྡན་རིགས་ཀྱི་བུ་རྣམས་ལ༔ བདེ་གཤེགས་ཡུམ་ལྔའི་དབང་བསྐུར་བས༔ ཡུམ་ལྔ་མ་སྤང་གནས་སུ་དག༔ རིགས་ལྔ་ཡུམ་ལྔའི་དབང་ཐོབ་ཤོག༔ ཚྭ་ལཱ་མཱ་པཱ་ཏཱཾ༔ ཨ་བྷི་ཥིཉྩ་མཱི༔ སྐལ་ལྡན་རྣམས་ལ་ཡུམ་ལྔའི་དབང་བསྐུར་བས་འབྱུང་བ་ལྔ་པོ་གནས་སུ་དག་ནས༔ རྒྱལ་བ་ཐམས་ཅད་བསྐྱེད་པའི་དབང་དམ་པར་
ཐོབ་པར་གྱུར་ཅིག༔ སེམས་དཔའ་བརྒྱད་ཐོགས་ལ༔ ཧཱུྃ༔ སྐལ་ལྡན་རིགས་ཀྱི་བུ་རྣམས་ལ༔ སེམས་དཔའ་བརྒྱད་ཀྱི་དབང་བསྐུར་བས༔ ཚོགས་བརྒྱད་མ་སྤང་གནས་དག་ནས༔ སེམས་དཔའ་རབ་འབྱམས་དབང་ཐོབ་ཤོག༔ ཀྱི་ཧུཾ་ཧཱུྃ་ཏྲཾ་ཧྲིམཾ་བྷཱི་ཛི༔ བྷོ་དྷི་སཏྭ་ཨ་བྷི་ཥིཉྩ་མཱི༔ སྐལ་ལྡན་རྣམས་ལ་སེམས་དཔའ་བརྒྱད་ཀྱི་དབང་བསྐུར་བས༔ རྣམ་ཤེས་ཚོགས་བརྒྱད་མ་སྤང་གནས་སུ་དག་ནས་བྱང་ཆུབ་སེམས་དཔའི་ཚུལ་གྱིས་འགྲོ་བའི་དོན་རྒྱ་ཆེན་པོ་བྱེད་པའི་དབང་དམ་པ་ཐོབ་པར་གྱུར་ཅིག༔ སེམས་མ་བརྒྱད་ཀྱི་སྐུ་ཐོགས་ལ༔ ཧཱུྃ༔ སྐལ་ལྡན་རིགས་ཀྱི་བུ་རྣམས་ལ༔ སེམས་མ་བརྒྱད་ཀྱི་དབང་བསྐུར་བས༔ ཡུལ་བརྒྱད་མ་སྤང་གནས་དག་ནས༔ སེམས་མ་རབ་འབྱམས་དབང་ཐོབ་ཤོག༔ ཧཱུྃ་ཧཱུྃ་ཧཱུྃ་ཛ༔ཧིཔཾ་ཧོ་ཨཱཿ ཨ་བྷི་ཥིཉྩ་མཱི༔ སྐལ་ལྡན་རྣམས་ལ་སེམས་མ་བརྒྱད་ཀྱི་དབང་བསྐུར་བས་ཡུལ་བརྒྱད་མ་སྤང་གནས་སུ་དག་ནས་བྱང་ཆུབ་སེམས་མའི་ཚུལ་གྱིས་འགྲོ་བའི་དོན་བྱེད་པའི་དབང་དམ་པ་ཐོབ་པར་གྱུར་ཅིག༔ ཐུབ་པ་དྲུག་ཐོགས་ལ༔ ཧཱུྃ༔ སྐལ་ལྡན་རིགས་ཀྱི་བུ་རྣམས་ལ༔ ཐུབ་ཆེན་དྲུག་གི་དབང་བསྐུར་བས༔ ཉོན་མོངས་དྲུག་པོ་
གནས་དག་ནས༔ སྤྲུལ་སྐུ་རབ་འབྱམས་དབང་ཐོབ་ཤོག༔ ཀྱེ་བྲེ་ཧཱུྃ་ཁཾ་ཧཱུཾ་ཡེ༔ ནིརྨ་ཀཱ་ཡ་ཨ་བྷི་ཥིཉྩ་མཱི༔ སྐལ་ལྡན་རྣམས་ལ་སྤྲུལ་སྐུ་ཐུབ་པ་དྲུག་གི་དབང་བསྐུར་བས་དུག་ལྔ་དང་སེར་སྣ་གནས་སུ་དག་ནས་སྤྲུལ་སྐུ་རབ་འབྱམས་རིགས་དྲུག་འདུལ་བའི་དབང་དམ་པ་ཐོབ་པར་གྱུར་ཅིག༔ སྒོ་བ་བཞི་ཐོགས༔ ཧཱུྃ༔ སྐལ་ལྡན་རིགས་ཀྱི་བུ་རྣམས་ལ༔ སྒོ་བ་བཞི་ཡི་དབང་བསྐུར་བས༔ རྟག་ཆད་མུ་བཞི་གནས་དག་ནས༔ ཕྲིན་ལས་རབ་འབྱམས་དབང་ཐོབ་ཤོག༔ ཧཱུྃ་ཧཱུྃ་ཧཱུྃ་ཧཱུྃ་ཤཱིནཾ་པུཊྚི་པ་ཤཾ་མཱ་ར་ཡ་ཨ་བྷི་ཥིཉྩ་མིཾ༔ སྐལ་ལྡན་རྣམས་ལ་སྒོ་བ་བཞི་ཡི་དབང་བསྐུར་བས་རྟག་ཆད་མུ་བཞི་གནས་སུ་དག་ནས་ཕྲིན་ལས་རྣམ་པ་བཞིས་འགྲོ་བའི་དོན་ཐོགས་པ་མེད་པར་བྱེད་པའི་དབང་དམ་པ་ཐོབ་པར་གྱུར༔ སྒོ་མ་བཞི་ཐོགས་ལ༔ ཧཱུྃ༔ སྐལ་ལྡན་རིགས་ཀྱི་བུ་རྣམས་ལ༔ སྒོ་མ་བཞི་ཡི་དབང་བསྐུར་བས༔ སྐྱེ་གནས་བཞི་པོ་གནས་དག་ནས༔ ཕྲིན་ལས་བཞི་ཡི་དབང་ཐོབ་ཤོག༔ ཛཧཱུྃ་བཾ་ཧོ༔ བཛྲ་ཨཾ་ཀུ་ཤ་ཛ༔ པཱ་ཤ་སྤོ་ཊ་གནྡྷེ་ཨ་བྷི་ཥིཉྩམཱི༔ སྐལ་ལྡན་རྣམས་ལ་སྒོ་མ་བཞི་ཡི་དབང་བསྐུར་བས་སྐྱེ་བ་རྣམ་བཞིའི་སྒོ་བཅད་དེ་ཚད་མེད་རྣམ་
བཞི་རྒྱུད་ལ་སྐྱེས་ནས་ཕྲིན་ལས་བཞིས་སེམས་ཅན་གྱི་དོན་ཐོགས་པ་མེད་པར་བྱེད་པའི་དབང་དམ་པ་ཐོབ་པར་གྱུར་ཅིག༔ དེ་ནས་ཁྲོ་བོའི་ལྷ་ཚོགས་རྣམས་ཀྱི་དབང་བསྐུར་བ་ནི༔ ཆེ་མཆོག་ཡབ་ཡུམ་ཐོགས་ལ༔ ཧཱུྃ༔ སྐལ་ལྡན་རིགས་ཀྱི་བུ་རྣམས་ལ༔ ཆེ་མཆོག་ཡབ་ཡུམ་དབང་བསྐུར་བས༔ ཉོན་མོངས་མ་སྤང་གནས་དག་ནས༔ ཁྲག་འཐུང་རབ་འབྱམས་དབང་ཐོབ་ཤོག༔ སྙིང་པོ་འབྲུ་བརྒྱད་བརྗོད༔ མ་ཧཱ་ཤྲཱི་ཧེ་རུ་ཀ༔ མ་ཧཱ་ཀྲོ་ཏི་ཤྭ་རི་ཧཱུྃ་ཧཱུྃ༔ ཨ་བྷི་ཥིཉྩ་ཧཱུྃ༔ སྐལ་ལྡན་རྣམས་ལ་ཆེ་མཆོག་ཡབ་ཡུམ་གཉིས་ཀྱི་དབང་བསྐུར་བས་ཉོན་མོངས་མ་སྤང་རང་སར་དག་ནས་ཁྲག་འཐུང་ཆེ་མཆོག་ཧེ་རུ་ཀ་ཡབ་ཡུམ་གྱི་གོ་འཕང་ཐོབ་ནས་ལོག་པར་ལྟ་བ་རྣམས་འདུལ་བའི་དབང་དམ་པ་ཐོབ་པར་གྱུར་ཅིག༔ ཁྲོ་ཆེན་ལྔ་ཐོགས་ལ༔ ཧཱུྃ༔ སྐལ་ལྡན་རིགས་ཀྱི་བུ་རྣམས་ལ༔ ཁྲག་འཐུང་ཡབ་ལྔའི་དབང་བསྐུར་བས༔ དུག་ལྔ་མ་སྤང་གནས་དག་ནས༔ ཁྲག་འཐུང་ཡབ་ལྔའི་དབང་ཐོབ་ཤོག༔ ཧཱུྃ་ཧཱུྃ་ཧཱུྃ་ཧཱུྃ་ཧཱུྃ༔ བཛྲ་རཏྣ་པདྨ་ཀརྨ་བུདྡྷ་ཨ་བྷི་ཥིཉྩ་ཧཱུྃ༔ སྐལ་ལྡན་རྣམས་ལ་ཁྲག་འཐུང་ཡབ་ལྔའི་དབང་བསྐུར་བས་དུག་ལྔ་མ་སྤང་གནས་སུ་དག་ནས་ཧེ་རུ་ཀ་སྐུ་ལྔའི་དབང་དང་དངོས་གྲུབ་
དམ་པ་ཐོབ་པར་གྱུར་ཅིག༔ ཀྲོ་དྷི་ཡུམ་ལྔ་ཐོགས་ལ༔ ཧཱུྃ༔ སྐལ་ལྡན་རིགས་ཀྱི་བུ་རྣམས་ལ༔ དབྱིངས་ཕྱུག་ཡུམ་ལྔའི་དབང་བསྐུར་བས༔ ཡུལ་ལྔའི་རྟོག་པ་རང་གྲོལ་ནས༔ ཀྲོ་དྷི་ཡུམ་ལྔའི་དབང་ཐོབ་ཤོག༔ ཧཱུྃ་ཧཱུྃ་ཧཱུྃ་ཧཱུྃ་ཧཱུྃ༔ ཀྲོ་དྷི་ཤྭ་རི་པཉྩ་ཨ་བྷི་ཥིཉྩ་ཧཱུྃ༔ སྐལ་ལྡན་རྣམས་ལ་དབྱིངས་ཕྱུག་ཡུམ་ལྔའི་དབང་བསྐུར་བས་ཁམས་ལྔའི་རྟོག་པ་རང་སར་གྲོལ་ནས་ཀྲོ་དྷི་ཡུམ་ལྔའི་དབང་དང་དངོས་གྲུབ་དམ་པ་ཐོབ་པར་གྱུར་ཅིག༔ ཀོའུ་རི་བརྒྱད་ཐོགས་ལ༔ ཧཱུྃ༔ སྐལ་ལྡན་རིགས་ཀྱི་བུ་རྣམས་ལ༔ ཀོའུ་རི་བརྒྱད་ཀྱི་དབང་བསྐུར་བས༔ ཚོགས་བརྒྱུད་མ་སྤུངས་གནས་དག་ནས༔ མ་མོ་རབ་འབྱམས་དབང་ཐོབ་ཤོག༔ ཧ་ཧ་ཧ་ཧ་ཧ་ཧ་ཧ་ཧ༔ ཨ་བྷི་ཥིཉྩ་ཧཱུྃ༔ སྐལ་ལྡན་རྣམས་ལ་མ་མོ་གོ་རི་མ་བརྒྱད་ཀྱི་དབང་བསྐུར་བས༔ ཚོགས་བརྒྱད་ཀྱི་རྟོག་པ་མ་སྤང་གནས་སུ་དག་ནས་མཁའ་འགྲོ་མ་མོ་རབ་འབྱམས་དབང་དུ་འདུས་པའི་དབང་དམ་པ་ཐོབ་པར་གྱུར་ཅིག༔ སིང་ཧ་མ་བརྒྱད་ཐོགས་ལ༔ ཧཱུྃ༔ སྐལ་ལྡན་རིགས་ཀྱི་བུ་རྣམས་ལ༔ སེང་ཧ་བརྒྱད་ཀྱི་དབང་བསྐུར་བས༔ ཡུལ་བརྒྱད་མ་སྤང་གནས་དག་ནས༔ ཕྲ་མེན་རབ་འབྱམས་དབང་ཐོབ་
ཤོག༔ ཧེ་ཧེ་ཧེ་ཧེ༔ ཧེ་ཧེ་ཧེ་ཧེ༔ ཨ་བྷི་ཥིཉྩ་ཧཱུྃ༔ སྐལ་ལྡན་རྣམས་ལ་སིང་ཧ་ཕྲ་མེན་བརྒྱད་ཀྱི་དབང་བསྐུར་བས་ཡུལ་བརྒྱད་མ་སྤང་གནས་སུ་དག་ནས་ཕྲ་མེན་རབ་འབྱམས་དབང་དུ་འདུས་པའི་དབང་དམ་པ་ཐོབ་པར་གྱུར་ཅིག༔ རྟ་གདོང་མ་བཞི་ཐོགས་ལ༔ ཧཱུྃ༔ སྐལ་ལྡན་རིགས་ཀྱི་བུ་རྣམས་ལ༔ སྒོ་མ་བཞི་ཡི་དབང་བསྐུར་བས༔ སྐྱེ་གནས་བཞི་པོ་གནས་དག་ནས༔ ཕྲིན་ལས་བཞི་ཡི་དབང་ཐོབ་ཤོག་ཛཧཱུྃ་བཾ་ཧོ༔ ཨ་བྷི་ཥིཉྩ་ཧཱུྃ༔ སྐལ་ལྡན་རྣམས་ལ་རྟ་གདོང་སྒོ་མ་བཞིའི་དབང་བསྐུར་བས་སྐྱེ་གནས་བཞི་པོ་གནས་སུ་དག་ནས་ཕྲིན་ལས་སྒོ་མ་བཞིས་སེམས་ཅན་གྱི་དོན་ཐོགས་པ་མེད་པར་བྱེད་པའི་དབང་དམ་པ་ཐོབ་པར་གྱུར་ཅིག༔ དབང་ཕྱུག་ཉེར་བརྒྱད་ཐོགས་ལ༔ ཧཱུྃ༔ སྐལ་ལྡན་རིགས་ཀྱི་བུ་རྣམས་ལ༔ དབང་ཕྱུག་ཉེར་བརྒྱད་དབང་བསྐུར་བས༔ ཉོན་མོངས་རྟོག་ཚོགས་གནས་དག་ནས༔ མ་མོ་རབ་འབྱམས་དབང་ཐོབ་ཤོག༔ བྷོ༔ ཉེར་བརྒྱད་བརྗོད༔ ཨ་བྷི་ཥིཉྩ་ཧཱུྃ༔ སྐལ་ལྡན་རྣམས་ལ་དབང་ཕྱུག་མ་ཉེར་བརྒྱད་ཀྱི་དབང་བསྐུར་བས་ཉོན་མོངས་པའི་རྟོག་ཚོགས་ཐམས་ཅད་མ་སྤང་གནས་སུ་དག་ནས་མ་མོ་དང་དམ་ཅན་གྱི་སྲོག་ལ་དབང་དམ་
པ་ཐོབ་པར་གྱུར་ཅིག༔ རྡོར་སེམས་སྐུའམ་རིགས་བརྒྱའི་སྐུ་ཐམས་ཅད་ཐོགས་ལ༔ ཧཱུྃ༔ རིགས་གཅིག་རྡོ་རྗེ་སེམས་དཔའ་ཡི༔ སྐུ་ལ་དམ་པ་རིགས་བརྒྱ་རྫོགས༔ སྐལ་ལྡན་ཁྱོད་ལ་དབང་བསྐུར་བས༔ ཞི་ཁྲོའི་ལྷ་དབང་ཡོངས་རྫོགས་ནས༔ ལོངས་སྐུའི་ཞིང་དུ་གྲོལ་བར་ཤོག༔ སརྦ་ཤིནྟཾ་ཀྲོ་དྷ་ཨོཾ་ཨཱཧཱུྃ༔ ཨ་བྷི་ཥིཉྩ་ཧཱུྃ༔ བདུད་རྩི་ཐོགས་ལ་ཧཱུྃ༔ ཐོད་པ་མཚན་ལྡན་ཀ་པ་ལ༔ ཡེ་ཤེས་བདུད་རྩི་ལྔ་ལྡན་བཅུད༔ སྐལ་ལྡན་བུ་ཡི་ངག་ལ་བླུད༔ རྩ་གསུམ་འཁོར་ལོ་བཞི་ལྡན་པས༔ ཐིག་ལེ་རང་དབང་ཐོབ་པ་དང་༔ ཐོགས་མེད་བདེ་ཆེན་མཐར་ཕྱིན་ཤོག༔ བྷོ་དྷི་ཙིཏྟ་ཨ་མྲྀ་ཏ་ཨ་བྷི་ཥིཉྩ་ཨོཾ༔ ཧཱུྃ༔ ཁྱོད་རྣམས་རྟ་ཕག་ཡབ་ཡུམ་བསྒོམ༔ དབབ་བཟུང་འདྲེན་བཀྲམ་ཚོད་སྦྱར་ལ༔ དགའ་བ་བཞི་པོའི་ངོ་བོ་བཟུང་༔ ཤེས་རབ་ཤེས་དབང་ཐོབ་པར་ཤོག༔ པྲ་ཛྙཱ་ཛྷཱ་ན་ཨ་བྷི་ཥིཉྩམཾ༔ ཤེལ་རྡོ་ཐོགས་ལ༔ ཧཱུྃ༔ རྨ་བྱ་ལུག་རྒྱུད་མིག་ཏུ་ཕྱར༔ དཀྱིལ་འཁོར་ལྷ་ཚོགས་སྣང་བ་གཏད༔ ཤེལ་མིག་སྦྱར་བ་འདི་ལ་ལྟོས༔ འོད་ལྔ་ཡེ་ཤེས་རྣམ་ལྔ་སྟེ༔ སྣང་སྲིད་སེམས་སུ་མ་གྱུར་མེད༔ ཀ་དག་ཚིག་དབང་ཐོབ་པར་ཤོག༔ དྷརྨ་ཀཱ་ཡ་ཨ་
བྷི་ཥིཉྩ་མཱཾ༔ ༈ དེ་ནས་རྒྱལ་སྲིད་སྣ་བདུན་བཀྲ་ཤིས་རྟགས་བརྒྱད་བཅས་རྒྱས་བསྡུས་སྐབས་ཐོབ་དང་སྦྱར་ལ་ངོ་སྤྲོད་རྗེས་རིམ་བྱ་བ་རྣམས་རིམ་པར་བྱའོ༔ ༈ བསྡུས་པ་གཏོར་དབང་སྐབས་གོང་གི་ད་གཏོར་མ་ལ་བརྟེན་ནས་དབང་བཞི་རྫོགས་པར་བསྐུར་བ་ཡིན་པས་གཏོར་མ་འདི་ལྟ་བུ་སོགས་ནས། འབད་མེད་ལྷུན་གྲུབ་ཏུ་འབྱུང་བར་གྱུར༔ ད་དངོས་གཞིའི་གཏོར་དབང་བསྐུར་བའི་དོན་དུ་གསོལ་བ་འདེབས་པ་འདི་ཡི་རྗེས་ཟློས་མཛོད༔ ཨེ་མ་མགོན་པོ་ཐུགས་རྗེ་ཅན༔ བདག་སོགས་འཁོར་བའི་སྡུག་བསྔལ་ལས༔ སྐྱབས་ཕྱིར་བརྩེ་བས་རབ་བཟུང་ནས་དབང་དང་བྱིན་རླབས་བསྩལ་དུ་གསོལ༔ ལན་གསུམ༔ ཡང་ལྷ་ཚོགས་ཐམས་ཅད་ཀྱི་སྐུ་ཡི་དཔྲལ་བ་ནས་འོད་ཟེར་དཀར་པོ་འཕྲོས་པ་ཁྱེད་རང་རྣམས་ཀྱི་ལུས་ལ་ཐིམ་པས་ལུས་ཀྱི་སྒོ་ནས་བསགས་པའི་སྡིག་པ་དང་སྒྲིབ་པ་མ་ལུས་པ་བྱང་ཞིང་དག་ནས་སྐུ་བུམ་པའི་དབང་ཐོབ་སྙམ་པའི་མོས་པ་མཛོད༔ བུམ་པས་དབང་བསྐུར་ལ༔ ཧཱུྃ༔ བླ་མ་ཀུན་བཟང་ཡབ་ཡུམ་དང་༔ བཅོམ་ལྡན་ཞི་ཁྲོ་རབ་འབྱམས་ཀྱིས༔ སྐལ་ལྡན་རིགས་ཀྱི་བུ་རྣམས་ལ༔ འགྱུར་མེད་སྐུ་ཡི་དབང་བསྐུར་བས༔ བུམ་པའི་དབང་མཆོག་ཐོབ་ནས་ཀྱང་༔ རིག་
འཛིན་གྲལ་དུ་འཁོད་པར་ཤོག༔ ཨོཾ་ཨཱཧཱུྃ་བོ་དྷི་ཙིཏྟ་སོགས། ཀཱ་ཡ་ཨ་བྷི་ཥིཉྩ་ཧཱུྃ༔ སྐལ་ལྡན་རིགས་ཀྱི་བུ་རྣམས་ལ༔ སྐུ་བུམ་པས་དབང་བསྐུར་བས་ལུས་ཀྱི་སྒོ་ནས་བསགས་པའི་སྡིག་པ་དང་སྒྲིབ་པ་མ་ལུས་པ་བྱང་ཞིང་དག་ནས་ལུས་སྤྲུལ་པའི་སྐུ་ཐོབ་ནས་འགྲོ་བ་དཔག་ཏུ་མེད་པའི་དོན་འབད་མེད་ལྷུན་གྲུབ་ཏུ་འབྱུང་བར་གྱུར་ཅིག༔ ཨོྃ༔ སྟོང་ཞིང་བདག་མེད་ཀ་དག་ལྷུན་གྱིས་གྲུབ༔ ཀུན་ཏུ་བཟང་པོའི་བཀྲ་ཤིས་གང་ལགས་པ༔ དམ་པ་དེས་ཀྱང་དེང་འདིར་བདེ་ལེགས་ཤོག༔ མེ་ཏོག་འཐོར་སྐུ་དབང་ངོ་༔ ཡང་ལྷ་ཚོགས་རྣམས་ཀྱི་མགྲིན་པ་ནས་འོད་ཟེར་འཕྲོས་པ་ཁྱེད་རང་རྣམས་ཀྱི་མགྲིན་པར་ཐིམ་པས་ངག་གི་སྒོ་ནས་བསགས་པའི་སྡིག་པ་དང་སྒྲིབ་པ་མ་ལུས་པ་བྱང་ཞིང་དག་ནས་གསུང་གསང་བའི་དབང་ཐོབ་སྙམ་པའི་མོས་པ་མཛོད༔ བདུད་རྩིའི་གསུང་དབང་བསྐུར་ནས་བླུད༔ ཧཱུྃ༔ བླ་མ་ཀུན་བཟང་ཡབ་ཡུམ་དང་༔ བཅོམ་ལྡན་ཞི་ཁྲོ་རབ་འབྱམས་ཀྱིས༔ སྐལ་ལྡན་རིགས་ཀྱི་བུ་རྣམས་ལ༔ འགགས་མེད་གསུང་གི་དབང་བསྐུར་བས༔ གསང་བའི་དབང་མཆོག་ཐོབ་ནས་ཀྱང་༔ རིག་འཛིན་གྲལ་དུ་འཁོད་པར་ཤོག༔ སྙིང་པོའི་མཐར༔ ཝཱཀ་
ཨ་བྷི་ཥིཉྩ་ཧཱུྃ༔ སྐལ་ལྡན་རིགས་ཀྱི་བུ་རྣམས་ལ་གསུང་གསང་བའི་དབང་བསྐུར་བས་ངག་གི་སྒོ་ནས་བསགས་པའི་སྡིག་པ་དང་སྒྲིབ་པ་མ་ལུས་པ་བྱང་ཞིང་དག་ནས་ངག་ལོངས་སྤྱོད་རྫོགས་པའི་སྐུ་ཐོབ་ནས་འགྲོ་བའི་དོན་དཔག་ཏུ་མེད་པའི་དོན་འབད་མེད་ལྷུན་གྲུབ་ཏུ་འབྱུང་བར་གྱུར་ཅིག༔ ཨཱ་གསལ་འཚེར་ལྷུན་སྡུག་གཟི་བརྗིད་འོད་ཟེར་འབར༔ རིགས་ལྔ་ཡབ་ཡུམ་བཀྲ་ཤིས་གང་ལགས་པ༔ དམ་པ་དེས་ཀྱང་དེང་འདིར་བདེ་ལེགས་ཤོག༔ མེ་ཏོག་དོར༔ གསུང་དབང་ངོ་༔ ཡང་ལྷ་ཚོགས་རྣམས་ཀྱི་ཐུགས་ཀ་ནས་འོད་ཟེར་འཕྲོས་པས་ཁྱེད་རང་གི་སྙིང་གར་ཐིམ་པས་སེམས་ཀྱི་སྒོ་ནས་བསགས་པའི་སྡིག་པ་དང་སྒྲིབ་པ་མ་ལུས་པ་བྱང་ཞིང་དག་ནས་ཐུགས་ཤེས་རབ་ཡེ་ཤེས་ཀྱི་དབང་ཐོབ་སྙམ་པའི་མོས་པ་མཛོད་ཅིག༔ མེ་ལོང་ཤེལ་རྡོ་ཐོགས་ལ༔ ཧཱུྃ༔ བླ་མ་ཀུན་བཟང་ཡབ་ཡུམ་དང་༔ བཅོམ་ལྡན་ཞི་ཁྲོ་རབ་འབྱམས་ཀྱིས༔ སྐལ་ལྡན་རིགས་ཀྱི་བུ་རྣམས་ལ༔ འཁྲུལ་མེད་ཐུགས་ཀྱི་དབང་བསྐུར་བས༔ ཤེར་རབ་ཡེ་ཤེས་དབང་མཆོག་ཐོབ་ནས་ཀྱང་༔ རིག་འཛིན་གྲལ་དུ་འཁོད་པར་ཤོག༔ སྙིང་པོའི་མཐར༔ ཙིཏྟ་ཨ་བྷི་ཥིཉྩ་ཨཱཿ སྐལ་ལྡན་རིགས་ཀྱི་བུ་
རྣམས་ལ་ཐུགས་ཤེས་རབ་ཡེ་ཤེས་ཀྱི་དབང་བསྐུར་བས་སེམས་ཀྱི་སྒོ་ནས་བསགས་པའི་སྡིག་པ་དང་སྒྲིབ་པ་མ་ལུས་པ་བྱང་ཞིང་དག་ནས་སེམས་ཆོས་སྐུ་ཐོབ་ནས་འགྲོ་བ་དཔག་ཏུ་མེད་པའི་དོན་འབད་མེད་ལྷུན་གྲུབ་ཏུ་འབྱུང་བར་གྱུར་ཅིག༔ ཧཱུྃ༔ ཐུགས་རྗེའི་རྒྱུན་གྱིས་རིགས་དྲུག་གནས་ནས་འདྲེན༔ སྤྲུལ་སྐུ་ཐུབ་དྲུག་བཀྲ་ཤིས་གང་ལགས་པ༔ དམ་པ་དེས་ཀྱང་དེང་འདིར་བདེ་ལེགས་ཤོག༔ མེ་ཏོག་དོར་ཐུགས་དབང་ངོ་༔ ཡང་ལྷ་ཚོགས་དེ་དག་རྣམས་ཀྱི་སྐུ་གསུང་ཐུགས་ལས་འོད་ཟེར་དཀར་དམར་མཐིང་གསུམ་འཕྲོས་པས་ཁྱེད་རང་རྣམས་ཀྱི་ལུས་ངག་ཡིད་གསུམ་ལ་ཐིམ་པས་ལུས་ངག་ཡིད་གསུམ་གྱི་སྒོ་ནས་བསགས་པའི་སྡིག་པ་དང་སྒྲིབ་པ་ལས་ཀྱི་ས་བོན་དང་བཅས་པ་བྱང་ཞིང་དག་ནས་ཚིག་དབང་རིན་པོ་ཆེ་ཐོབ་སྙམ་པའི་མོས་པ་མཛོད་ཅིག༔ ཞི་ཁྲོའི་པོ་ཏིའི་དབང་བསྐུར༔ ཧཱུྃ༔ བླ་མ་ཀུན་བཟང་ཡབ་ཡུམ་དང་༔ བཅོམ་ལྡན་ཞི་ཁྲོ་རབ་འབྱམས་ཀྱིས༔ སྐལ་ལྡན་རིགས་ཀྱི་བུ་རྣམས་ལ༔ སྐུ་གསུང་ཐུགས་ཀྱི་དབང་བསྐུར་བས༔ ཚིག་གི་དབང་མཆོག་ཐོབ་ནས་ཀྱང་༔ རིག་འཛིན་གྲལ་དུ་འཁོད་པར་ཤོག༔ སྙིང་པོའི་མཐར༔ ཀཱ་ཡ་ཝཀཱ་
ཙིཏྟ་དྷ་དྷཱ་ཏུ་ཨ་བྷི་ཥིཉྩ་ཧཱུྃ༔ སྐལ་ལྡན་རིགས་ཀྱི་བུ་རྣམས་ལ་དབང་བཞི་ཡོངས་སུ་རྫོགས་པར་བསྐུར་བས་ལུས་ངག་ཡིད་གསུམ་གྱི་སྒོ་ནས་བསགས་པའི་སྡིག་པ་དང་སྒྲིབ་པ་མ་ལུས་པ་བྱང་ཞིང་དག་ནས་སྐུ་གསུམ་དབྱེར་མེད་ངོ་བོ་ཉིད་ཀྱི་སྐུ་ཐོབ་ནས་ཕྲིན་ལས་རྣམ་པ་བཞིས་འགྲོ་བ་དཔག་ཏུ་མེད་པའི་དོན་འབད་མེད་ལྷུན་གྲུབ་ཏུ་འབྱུང་བར་གྱུར་ཅིག༔ ཧྲཱིཿ སྟོང་ཉིད་སྙིང་རྗེས་འཁོར་བཞི་འགྲོ་བ་སྐྱོབ༔ སེམས་དཔའ་སེམས་མའི་བཀྲ་ཤིས་གང་ལགས་པ༔ དམ་པ་དེས་ཀྱང་བཀྲ་ཤིས་བདེ་ལེགས་ཤོག༔ མེ་ཏོག་དོར༔ སྐུ་གསུམ་དབང་ངོ༔ དེ་ནས་གཏོར་མ་འདི་ཉིད་བཅོམ་ལྡན་འདས་ཞི་ཁྲོ་རབ་འབྱམས་ཀྱི་ལྷ་ཚོགས་བརྒྱུད་པའི་བླ་མ་རིག་འཛིན་དཔའ་བོ་ཌཱཀྐིའི་ཚོགས་དང་བཅས་པ་དེ་རྣམས་ཁྱེད་རང་རྣམས་ཀྱི་སྤྱི་བོར་བྱོན་ནས་སྐུ་གསུང་ཐུགས་ཡོན་ཏན་ཕྲིན་ལས་ཀྱི་སྒོ་ནས་དབང་བསྐུར་ཞིང་བྱིན་གྱིས་བརླབས་ནས་འོད་དུ་ཞུ་ནས་ཁྱེད་རང་གི་ལུས་ལ་གདོད་མ་ནས་བཞུགས་པའི་ཞི་ཁྲོའི་ལྷ་ཚོགས་དང་དབྱེར་མེད་དུ་ཐིམ་པས་ཤེས་བྱའི་སྒྲིབ་པ་ཕྲ་མོ་ཡན་ཆད་དག་ནས་རིག་པའི་རྩལ་དབང་དང་བཅས་པ་ཐོབ༔ བར་དོ་ཐམས་ཅད་ལས་གྲོལ་ནས་བདེ་བ་ཆེན་པོའི་སྐུ་ཐོབ་པའི་
མོས་པ་མཛོད་ཅིག༔ གཏོར་མ་ཐོགས་ལ༔ ཨོཾ་ཨཱཿཧཱུྃ་ཧྲི༔ སྐྱེ་མེད་དབྱིངས་ཀྱི་གཏོར་གཞོང་དུ༔ མོ་བྲིས་དཀྱིལ་འཁོར་གཏོར་ཆེན་བཤམས༔ རིག་རྩལ་ཐོགས་མེད་གཏོར་རྒྱན་སྤྲས༔ བླ་མ་རྒྱལ་བ་ཞི་ཁྲོ་དང་༔ ཌཱཀྐི་དམ་ཅན་ཐམས་ཅད་ཀྱི༔ དབང་མཆོག་ཁྱོད་ལ་སྦྱིན་པར་བྱ༔ དབང་མཆོག་འདི་ཐོབ་བྱིན་རླབས་ཀྱིས༔ སྐྱེ་གནས་བར་དོ་འདི་ཀ་རུ༔ སྣང་བཞི་གདོད་མར་ཕྱིན་པར་ཤོག༔ འཆི་ཁའི་སྡུག་བསྔལ་བར་དོ་རུ༔ སྐུ་གསུམ་དབྱིངས་སུ་འཕོ་བར་ཤོག༔ ཆོས་ཉིད་ཞི་ཁྲོའི་བར་དོ་རུ༔ རང་སྣང་ལྷུན་གྲུབ་སངས་རྒྱས་ཤོག༔ སྲིད་པ་ལས་ཀྱི་བར་དོ་རུ༔ སྤྲུལ་སྐུའི་ཞིང་དུ་བརྫུས་སྐྱེས་ནས༔ སྐུ་བཞི་ལྷུན་གྲུབ་སངས་རྒྱས་ཏེ་བདག་གཞན་དོན་གཉིས་མཐར་ཕྱིན་ཤོག༔ ཆོས་སྐུ་ཀུན་ཏུ་བཟང་པོ་ཡབ་ཡུམ༔ ལོངས་སྐུ་རྒྱལ་བ་རིགས་ལྔ༔ སྤྲུལ་སྐུ་རྡོ་རྗེ་སེམས་དཔའ༔ རིག་འཛིན་དགའ་རབ་རྡོ་རྗེ༔ མཁས་པ་ཤྲཱི་སེང་ཧཱཿ སློབ་དཔོན་པདྨ་འབྱུང་གནས༔ མཁའ་འགྲོ་ཡེ་ཤེས་མཚོ་རྒྱལ༔ གཏེར་སྟོན་ཀརྨ་གླིང་པ༔ ཐུགས་སྲས་ཉི་ཟླ་ཆོས་རྗེ༔ བཀའ་བབ་ཉི་ཟླ་འོད་ཟེར༔ ནམ་མཁའ་ཆོས་ཀྱི་རྒྱ་
མཚོ༔ སྤྲུལ་སྐུ་ཐུགས་རྗེའི་འོད་ཟེར༔ འཁྲུལ་ཞིག་བྷུདྡྷ་མངྒ༔ རིག་འཛིན་ཀུན་དགའ་གྲགས་པ༔ གར་དབང་ཀུན་དགའ་བསྟན་འཛིན༔ སྔགས་འཆང་པདྨ་དབང་གྲགས༔ མཁས་གྲུབ་ཀརྨ་ཆགས་མེད༔ ཐུགས་སྲས་པདྨ་ཀུན་དགའ༔ མཆོག་སྤྲུལ་ཕྲིན་ལས་དབང་འབྱུང་། ཀུན་མཁྱེན་ཤེས་རབ་གྲགས་པ། ཀརྨ་ཐུབ་བསྟན་རབ་འཕེལ། ཁྱབ་བདག་བསྟན་འཛིན་ཕྲིན་ལས། ཁ་སྤྲུལ་སྨོན་ལམ་ཡོངས་གྲུབ། མཚུངས་མེད་གསང་སྔགས་བསྟན་འཛིན། སངས་སྤྲུལ་ཀརྨ་སངས་རྒྱས༔ མཆན༔ དྲིན་ཆེན་རྩ་བའི་བླ་མ༔ ཞི་བ་བཞི་བཅུ་རྩ་གཉིས༔ འབར་བ་ཁྲག་འཐུང་ལྔ་བཅུ༔ དག་པ་རིག་འཛིན་ལྷ་ཚོགས༔ བཀའ་སྲུང་དམ་ཅན་རྒྱ་མཚོའི་ལྷ་ཚོགས་འཁོར་དང་བཅས་པ་རྣམས་ཀྱིས་སྐལ་ལྡན་རིགས་ཀྱི་བུ་འདི་རྣམས་ལ་སྐུ་གསུང་ཐུགས་ཡོན་ཏན་ཕྲིན་ལས་ཀྱི་སྒོ་ནས་དབང་བསྐུར་ཞིང་བྱིན་གྱིས་བརླབ་པར་མཛད་དུ་གསོལ༔ ཉོན་མོངས་པ་དུག་ལྔས་ཀུན་ནས་བསླང་བའི་སྡིག་པ་དང་སྒྲིབ་པ་ལས་ཀྱི་ས་བོན་ཕྲ་མོ་དང་བཅས་པ་བྱང་ཞིང་དག་ནས་འབྲས་བུ་བདེ་བ་ཆེན་པོ་འཕོ་འགྱུར་མེད་པའི་སྐུ་ཐོབ་པར་མཛད་དུ་གསོལ༔ ཚེ་འདི་ཡི་ནད་གདོན་བར་ཆད་ཐམས་ཅད་ཞི་བར་མཛད་དུ་གསོལ༔ ཉམས་དང་
རྟོགས་པ་འཕེལ་བར་མཛད་དུ་གསོལ༔ འཆི་བ་ཆོས་སྐུར་སངས་རྒྱས་པར་མཛད་དུ་གསོལ༔ རིགས་དྲུག་སྐྱེ་སྒོ་ཆོད་པར་མཛད་དུ་གསོལ༔ བར་དོ་ལོངས་སྤྱོད་རྫོགས་སྐུར་སངས་རྒྱས་པར་མཛད་དུ་གསོལ༔ སྐྱེ་བ་སྤྲུལ་པའི་སྐུར་སངས་རྒྱས་པར་མཛད་དུ་གསོལ༔ སྙིང་པོ་མཐའ་དག་བརྗོད་ལ་གཏོར་དབང་བསྐུར་རོ༔ ཛ༔ ཕྲིན་ལས་རྣམ་བཞིས་གདུལ་བྱའི་རེ་བ་བསྐང་༔ སྒོ་བ་སྒོ་མའི་བཀྲ་ཤིས་གང་ལགས་པ༔ དམ་པ་དེས་ཀྱང་དེང་འདིར་བདེ་ལེགས་ཤོག༔ རྒྱལ་སྲིད་སྣ་བདུན་ཐོགས་ལ༔ ཧོ༔ སྐལ་ལྡན་རིགས་ཀྱི་བུ་རྣམས་ལ༔ རྒྱལ་སྲིད་སྣ་བདུན་དབང་བསྐུར་བས༔ བདེ་ལེགས་ཕུན་སུམ་ཚོགས་པ་དང་༔ འཕགས་པའི་ནོར་བདུན་ལྡན་ནས་ཀྱང་༔ གཞན་དོན་དཔག་མེད་འགྲུབ་པར་ཤོག༔ ཨོཾ་སྭ་སྟི་རཏྟ་ཨ་བྷི་ཥིཉྩ་མཱི༔ བཀྲ་ཤིས་རྟགས་བརྒྱད་ཐོགས་ལ༔ ཧོཿ སྐལ་ལྡན་རིགས་ཀྱི་བུ་རྣམས་ལ༔ བཀྲ་ཤིས་རྟགས་བརྒྱད་དབང་བསྐུར་བས༔ རྒྱལ་བུ་རྒྱལ་སར་ཐོབ་ནས་ཀྱང་༔ རྒྱལ་འབངས་མངའ་འོག་ཚུད་པ་ལྟར༔ དབང་བཞི་ཡོངས་རྫོགས་ཐོབ་ནས་ཀྱང་༔ གཞན་དོན་དཔག་མེད་དབང་ཐོབ་ཤོག༔ ཨཥཱ་མངྒ་ལཾ་ཧེ་ཏུ་ཨ་བྷི་ཥིཉྩ་
ཧཱུྃ༔ ཧཱུྃ༔ སྣ་ཚོགས་ཐབས་ཀྱིས་ལོག་འདྲེན་རུ་ཏྲ་འདུལ༔ ཁྲག་འཐུང་ལྔ་བཅུའི་བཀྲ་ཤིས་གང་ལགས་པ༔ དམ་པ་དེས་ཀྱང་དེང་འདི་བདེ་ལེགས་ཤོག༔ མེ་ཏོག་དོར༔ འོ་ཁྱེད་རང་རྣམས་ཀྱི་སྙིང་ག་ཆོས་ཀྱི་འཁོར་ལོ་ན་ཞི་བ་བཞི་བཅུ་རྩ་གཉིས་བཞུགས་སོ༔་མགྲིན་པ་ལོངས་སྤྱོད་ཀྱི་འཁོར་ལོ་ན་དག་པ་རིག་འཛིན་གྱི་ལྷ་ཚོགས་བཞུགས་སོ༔ སྤྱི་བོ་བདེ་ཆེན་ཀྱི་འཁོར་ལོ་ན་ཁྲག་འཐུང་ཁྲོ་བོའི་ལྷ་ཚོགས་ལྔ་བཅུ་རྩ་བརྒྱད་བཞུགས་སོ༔ གཞན་ཡང་རྩ་ཐམས་ཅད་ནི་དཔའ་བོ་དང་རླུང་ཐམས་ཅད་ནི་དཔའ་མོའི་རང་བཞིན་དུ་གནས་སོ༔ ཐིག་ལེ་དཀར་ཆ་རཀྟ་དམར་ཆ་ཐམས་ཅད་ལོངས་སྐུ་ཞི་ཁྲོ་རབ་འབྱམས་ཀྱི་ཚུལ་དུ་གནས་སོ༔ བ་སྤུ་བྱེ་བ་ས་ཡ་ནི་མཁའ་འགྲོ་མ་བྱེ་བ་ས་ཡའི་རང་བཞིན་དུ་གནས་སོ༔ དེས་ན་རང་གི་ལུས་འདི་ཉིད་རྒྱལ་བ་ཞི་ཁྲོ་རབ་འབྱམས་ཀྱི་དཀྱིལ་འཁོར་གྱི་རང་བཞིན་ཡིན་པས༔ འདི་བསད་པ་དང་༔ བརྡུང་བ་དང་༔ དཀའ་ཐུབ་ལ་སོགས་པ་རྒུད་དུ་མ་བཅུག་པར་བཟའ་བཏུང་ཐམས་ཅད་ཚོགས་འཁོར་གྱི་ཚུལ་དུ་མཆོད་ཅིག༔ རྒྱན་དང་གོས་ཀྱི་རྣམ་པ་མཛེས་ཤིང་ཡིད་དུ་འོང་བ་རྣམས་ཀྱང་ཞེན་པ་མེད་པའི་ཚུལ་གྱིས་མཆོད་པ་རྒྱུན་མི་
འཆད་པར་གྱིས་ཤིག༔ དེ་ནས་རང་ཉིད་འཆི་བའི་ཚེ་ན་ཞི་ཁྲོའི་ལྷ་ཚོགས་ཐམས་ཅད་རང་གི་ལུས་ནས་ཐོན་ཏེ༔ ནམ་མཁའ་བར་སྣང་གང་བར་བར་དོར་འཆར་བར་འགྱུར་རོ༔ དེའི་དུས་སུ་སྒྲ་འོད་ཟེར་གསུམ་ལ་མ་འཇིགས་མ་སྐག་མ་དངངས་བར་ད་ལྟ་དབང་བསྐུར་བའི་ཡི་དམ་གྱི་ལྷ་འདི་རྣམས་ཡིན་པས་ངོ་ཤེས་པར་གྱིས་ཤིག༔ དེ་ལྟར་ངོ་འགྱུར་རོ༔ དེའི་དུས་སུ་སྒྲ་འོད་ཟེར་གསུམ་ལ་མ་འཇིགས་མ་སྐྲག་མ་དངངས་བབར་ད་ལྟ་དབང་བསྐུར་བའི་ཡི་དམ་གྱི་ལྷ་འདི་རྣམས་ཡིན་པས་ངོ་ཤེས་པར་གྱིས་ཤིག༔ དེ་ལྟར་ངོ་ཤེས་པ་དང་གྲོལ་བ་དུས་མཉམ་དུ་འོང་བས༔ བར་དོའི་འཇིགས་སྐྲག་ལས་གྲོལ་ནས་དག་པའི་ཞིང་དུ་སྐྱེ་བའི་གནད་ཟབ་མོ་ཡོད་ཅིང་ངོ་ཤེས་པ་ཁོ་ནས་ཆོག་གོ༔ དེ་ལྟར་དཀྱིལ་འཁོར་གྱི་དབང་བསྐུར་བའི་བྱིན་རླབས་ལ་བརྟེན་ནས་ཞེས་དང་གཏོར་དབེང་ལ། དེ་ལྟར་གཏོར་མའི་བརྡའི་དབང་བསྐུར་བའི་བྱིན་རླབས་ལ་བརྟེན་ནས་འཁོར་བ་སྡུག་བསྔལ་གྱི་རྒྱ་མཚོ་ཆེན་པོ་ལས་སྒྲོལ་ནས་རིག་འཛིན་གྱི་གོ་འཕང་མྱུར་དུ་ཐོབ་པའི་རྟེན་འབྲེལ་ཟབ་མོ་ཡོད་ཅིང་དེ་དག་རྡོ་རྗེ་སློབ་དཔོན་གྱི་མཐུ་གནད་ཟབ་མོ་ཡིན་པས་བཀའ་དྲིན་དྲན་པའི་ཕྱིར་འདི་ཡི་རྗེས་ཟློས་མཛོད༔ ཨེ་མ་རྒྱལ་བའི་གདུང་འཚོབ་བཀའ་དྲིན་ཆེན་པོའི་དཔལ༔ བདག་སོགས་འགྲོ་ལ་ཐུགས་རྗེས་ཉེར་བཟུང་ནས༔ གཅོང་རོང་ཟབ་མོའི་ནང་དུ་གཏོང་བ་ལ༔
བཀའ་གསང་ཟབ་མོའི་གཞུང་ལ་བརྟེན་ནས་ནི༔ ཕྲིན་ལས་རྨད་པོ་ཆེ་ཡིས་དྲངས་བྱས་ཏེ༔ ཉོན་མོངས་རྟོག་སྒྲིབ་དྲི་མ་ཀུན་བྱང་ནས༔ ཐར་པའི་ལམ་མཆོག་བླ་ན་མེད་པའི་ཞིང་༔ ཀུན་བཟང་ཀློང་དུ་བསྐྱལ་བ་བཀའ་དྲིན་ཆེ༔ དེ་ལྟར་རྒྱལ་བ་ཞི་ཁྲོ་རབ་འབྱམས་ཀྱི་དཀྱིལ་འཁོར་གཏོར་མའི་དབང་སྐུར་ཟབ་མོ་ཐོབ་པས་རྩ་བ་དང་ཡན་ལག་གི་དམ་ཚིག་ཚུལ་བཞིན་དུ་བསྲུང་སྙམ་པས་འདི་ཡི་རྗེས་ཟློས་མཛོད༔ གཙོ་བོའི་ཇི་ལྟར་བཀའ་སྩལ་པ༔ དེ་དག་ཐམས་ཅད་བདག་གིས་བགྱི༔ སོགས་མཎྜལ་ཕུལ༔ རྗེས་རིམ་སྤྱི་ལྟར་རོ༔ རྗེས་ཀྱི་ལས་རིམ་རྒྱས་བསྡུས་སྐབས་དང་བསྟུན་ལ་རྗེས་ཆོག་སོགས་དེ་ལྟར་བྱའོ༔ མི་དམིགས་པར་བཞག་པ་ཁོ་ནས་ཆོག་གོ༔ འཕྲོས་དོན་གཏོར་དབང་ནི་གཏེར་གཞུང་ནས་ཉུང་དུ་མི་གསལ་བ་གཅིག་ཁ་འཕང་བར་མཛད་འདུག༔ དེ་ལྟར་གཏོར་དབང་ཡོངས་གྲགས་འདི་ནི་ཆོས་ཀྱི་རྒྱལ་པོས་མཛད་པ་ཡིན་ཅིང་ལྷ་བསྐྱེད་ལུགས་མང་འདུག་པ་ལས་གཏེར་གཞུང་དུ་རྒྱས་བསྡུས་ཡང་རབ་ལ་ཕྱག་ལེན་གབ་སྦས་འདུག་པ་ཁྱེར་བདེ་བར་བྱས་པ་འདི་ནི་ཆོས་དབང་ཀུན་བཟང་གིས་བསྐུལ་བ་ལྟར༔ རྣལ་འབྱོར་ཨ་རཱ་གས་ཚིག་མི་བདེ་བ་ཅུང་ཟད་འདུག་པ་འདོན་བདེ་བར་བསྒྲིགས་ཆགས་སུ་རྒྱས་བསྡུས་སྐབས་ཐོབ་ཏུ་ཕན་པའི་བློས་གྲོ་ཞུན་ཟླ་བའི་ཡར་ཚེས་གསུམ་ནས་རྫོགས་པར་སྦྱར་བའོ༔ བཀྲ་ཤིས་ཤོག༔