གཏེར་ཁ་གསར་རྙིང་གང་ལ་ཡང་སྦྱར་རུང་བའི་ཞི་ཁྲོའི་དབང་བསྐུར་ཚང་མ་ངན་སོང་རང་གྲོལ།
གཏེར་ཁ་གསར་རྙིང་གང་ལ་ཡང་སྦྱར་རུང་བའི་ཞི་ཁྲོའི་དབང་བསྐུར་ཚང་མ་ངན་སོང་རང་གྲོལ་ཞེས་བྱ་བ་བཞུགས་སོ།། གནམ་ཆོས་དང་བཀའ་མ་དང་།
གུ་རུ་དེ་ཝ་ཌཱཀི་ནི་ཧཱུྃ། ཞི་ཁྲོའི་མགྱོགས་དབང་ནི། རབ་ཞི་ཁྲོ་བླུགས་ཞོར། འབྲིང་རྗེས་གནང་གི་ཆས་རྣམས་སྤྱི་ལྟར་དང་ཚོམ་བུ་བཀོད། ལས་བྱང་ཉུང་བ་ཚར་གཅིག་འདོན་པས་དབང་བསྙེན་བྱ། ཤིན་ཏུ་བསྡུ་ན་དྲན་རྫོགས་སུ་བསྒོམ་པ་བསམ་གཏན་ཆོ་ག་ལྟར་བསྒྲུབ་ལ་དབང་བསྙེན་བྱའོ། །དེ་ནས་སློབ་མ་རྣམས་འདུས། ཆབ་དང་མེ་ཏོག་བཀྱེ། །སྤྲོ་ན་འདིར་བགེགས་གཏོར་བཏང་། ལས་བྱང་ལྟར་མཚམས་བཅད་དོ། །དེ་མ་གྲུབ་ཀྱང་རུང་ངོ་། །མཎྜལ་ཕུལ་ནས། འོ་ན་ད་ལམ་ཁྱེད་རྣམས་ལ་ཞི་ཁྲོ་དམ་པ་རིགས་བརྒྱའི་དབང་མདོར་བསྡུས་ཞིག་བསྐུར་བ་ཡིན་ཏེ། ལོ་རྒྱུས་ནི། སངས་རྒྱས་ཐམས་ཅད་ཀྱི་སྔོན་དུ་སངས་རྒྱས་པ་དང་པོའི་ཀུན་ཏུ་བཟང་
པོས། རྫོགས་པ་ཆེན་པོའི་རྒྱུད་འབུམ་ཕྲག་དྲུག་ཅུ་རྩ་བཞི་གསུངས་པའི་སྙིང་པོ་ནི་ཞི་ཁྲོ་འདི་ཡིན་པས་ཁྱད་པར་དུ་སྔོན་བྲམ་ཟེ་དུང་གི་ཕྲེང་བ་ཅན་ཞེས་བྱ་བ་རིག་པའི་གནས་ལྔ་ལ་མཁས་པ་གཅིག་ཡོད་པ་ལ། རྒྱལ་པོའི་བུ་གཅིག་གིས་སློབ་མ་བྱས་པས་མཁས་པར་གྱུར་པ་དང་། སློབ་དཔོན་འདི་མེད་ན་ང་རང་ལས་མཁས་པ་གཞན་ན་མེད་པ་ཅིག་འོང་བསམས་ནས། སློབ་དཔོན་དེ་བསད་ཐབས་ངན་པ་སྣ་ཚོགས་ཀྱིས་བསད་པས། རྒྱལ་བུ་དེ་ཤི་མ་ཐག་ཏུ་མནར་མེད་པའི་དམྱལ་བར་ལྟུང་སྟེ། འགྲོ་བ་རིགས་དྲུག་གི་སྡུག་བསྔལ་དུས་གཅིག་ལ་མྱོང་བར་
གྱུར་ཏོ། །དེར་ཕྱག་ན་རྡོ་རྗེ་དང་། རྡོ་རྗེ་སེམས་དཔའ་གཉིས་ཀྱིས། ཀུན་ཏུ་བཟང་པོ་དང་། རྡོ་རྗེ་འཆང་ལ། དམ་ཚིག་ཉམས་པ་རྣམས་ངན་སོང་ལས་ཐར་བའི་ཐབས་ཞུས་པས། ཞི་ཁྲོ་ན་རཀ་དོང་སྤྲུགས་ཀྱི་རྒྱུད་བཀས་གནང་ནས། བྱང་ཆུབ་སེམས་དཔའ་གཉིས་དམྱལ་བར་བྱོན་ནས་དབང་བསྐུར་བ་དང་། ཞི་ཁྲོའི་མཚན་རྣ་བར་བསྒྲག་ཅིང་ཕྱག་འཚལ་དུ་བཅུག་པས་ངན་སོང་ལས་ཐར་ཏེ། ལྷའི་གནས་སུ་རིག་འཛིན་མིའི་ཐོད་པ་ཅན་ཞེས་བྱ་བར་སྐྱེས་སོ། །རིམ་པར་ས་བཅུ་ཐོབ་བོ། །དེ་ནས་བོད་དུ་མཁའ་འགྲོ་ཡེ་ཤེས་མཚོ་རྒྱལ་གནས་ལ་མ་སོང་ཆོས་བྲོས་ལ་བྱོན་པས། ཡབ་རྒྱལ་པོའི་བློན་པོ་བདུད་བློན་ཤ་ཏ་བྱ་བས། ཡེ་ཤེས་མཚོ་རྒྱལ་ལ་ཆད་པ་མང་པོ་བཅད་པས། བློན་པོ་མནར་མེད་པའི་དམྱལ་བར་སྐྱེས་སོ། །དེ་འདྲེན་པའི་ཕྱིར་ཡེ་ཤེས་མཚོ་རྒྱལ་དམྱལ་བར་བྱོན་པས། ལྕགས་སྲེག་ཁང་པའི་སྒོ་ཡང་ཕྱེ་མ་ཐུབ། འདི་ལ་ཅིའི་ཕན་ལས་མཁན་ལ་དྲིས་པས། །ཞི་ཁྲོའི་ཆོ་ག་བྱས་ན་མ་གཏོགས་ཐར་ཐབས་མེད་ཟེར། དེར་ཞི་ཁྲོའི་ཆོ་ག་ཚར་གཅིག་མཛད་པས། ལྕགས་སྲེག་གི་ཁང་པ་རང་ཞིག་ལ་སོང་ནས་བློན་པོ་སོགས་འབུམ་ཚོ་ལྔ་དྲངས་
སོ། །དེ་ནས་ཞི་ཁྲོ་བཀའ་མ་དང་། ཞི་ཁྲོ་སྤང་ཀོང་། ན་རཀ་དོང་སྤྲུགས། དྲི་མེད་བཤགས་རྒྱུད་སོགས་དང་། རིག་འཛིན་རྒོད་ལྡེམ། སངས་རྒྱས་གླིང་པ་ཀརྨ་གླིང་པ། འཇའ་ཚོན་སྙིང་པོ་སོགས་ཀྱི་གཏེར་མ་དང་། མི་འགྱུར་རྡོ་རྗེའི་གནམ་ཆོས་སོགས་ཞི་ཁྲོ་རྒྱས་བསྡུས་མང་དུ་དར་རོ། །དེའི་ཕན་ཡོན་ནི་ཤིན་ཏུ་འདག་དཀའ་བའི་མཚམས་མེད་པ་ལྔ་དང་། སྡོམ་པ་ཤོར་བ་དང་དམ་ཚིག་ཆག་ཉམས་དང་། མནའ་ཟོས་པ་སོགས་ཞི་ཁྲོའི་ཆོ་ག་དང་དབང་ཐོབ་ན་དག་པར་བཤད་དེ། སྒྱུ་འཕྲུལ་གསང་བ་སྙིང་པོའི་རྒྱུད་ལས། གང་གིས་རྒྱལ་བ་ཞི་ཁྲོ་ཡི། །དཀྱིལ་འཁོར་མཚན་ཐོས་ཕྱག་འཚལ་ན། །ཉམས་ཆག་མ་ལུས་ཀུན་བྱང་ན། །མཚམས་མེད་ལྔ་ལ་སྨོས་ཅི་དགོས་། །ན་རཀ་གནས་ཀྱང་དོང་སྤྲུགས་ཏེ། །རིག་འཛིན་རྒྱལ་བའི་ཞིང་དུ་གྲགས། །ཞེས་གསུངས་པ་དང་། དྲི་མེད་བཤགས་རྒྱུད་ལས། གལ་ཏེ་རྣལ་འབྱོར་ཕོ་མོ་གང་ཞིག་གིས་དཀྱིལ་འཁོར་གྱི་ལྷ་དེ་དག་གི་མཚན་ལན་གཅིག་ཐོས་པ་ཙམ་གྱིས་དམྱལ་བ་ཆེན་པོར་མི་ལྟུང་ངོ་། །དེ་བས་གུས་པས་ཕྱག་འཚལ་ལོ། །རང་བཞིན་སྒྱུ་འཕྲུལ་དཀྱིལ་
འཁོར་ལ། །གང་གིས་གུས་པས་ཕྱག་འཚལ་ན། །ཉམས་ཆག་ཀུན་ཀྱང་བྱང་བར་འགྱུར། །དམ་ཚིག་བསྐངས་ནས་དངོས་གྲུབ་ཐོབ། །ཅེས་གསུངས་པ་དང་། འགྲོ་དྲུག་དོང་སྤྲུགས་ལས་ཀྱི་སྤྱི་ཁྲུས་འགྱོད་ཚངས་རྒྱལ་པོའི་བཤགས་པའི་རྒྱུད་ལས། ཞི་བའི་ལྷ་ཚོགས་བུདྡྷ་བཞི་བཅུ་ཞེ་གཉིས་ཀྱི་མཚན་ནས་བརྗོད་པས་མཚམས་མེད་པ་ལྔ་དང་སྡིག་སྒྲིབ་ཐམས་ཅད་བྱང་བར་འགྱུར་རོ། །ཁྲག་འཐུང་གི་ལྷ་དྲུག་ཅུའི་མཚན་ནས་བརྗོད་ཅིང་ཕྱག་འཚལ་བས་མཚམས་མེད་པ་ལྔ་དང་སྡིག་པ་ལྕི་བ་ཐམས་ཅད་བྱང་བར་འགྱུར་རོ། །ཞེས་གསུངས་པ་དང་། ཨོ་རྒྱན་རིན་པོ་ཆེའི་ཞལ་ནས། འདི་དང་འཕྲད་པར་དཀའོ། །སྐལ་བ་ཤིན་ཏུ་བཟང་བ་ཡིན་ནོ། །ཚོགས་བསགས་ཤིང་སྒྲིབ་པ་བྱང་བ་རྣམས་མ་གཏོགས་འདི་དང་ཕྲད་པར་དཀའོ། །གལ་ཏེ་འཕྲད་ན་ཡང་བློར་ཤོང་བ་དཀའོ། །འདི་ཐོས་ནས་ལོག་ལྟ་མ་སྐྱེས་པ་ཁོ་ནས་ཀྱང་གྲོལ་བར་ནུས་སོ།། །དེའི་ཕྱིར་འདི་ལ་ཤིན་ཏུ་གཅེས་སྤྲས་སུ་བྱའོ། །འདི་ནི་ཆོས་ཐམས་ཅད་ཀྱི་བཅུད་ཡིན་ནོ། །བར་དོའི་གདམས་པ་ཐོས་པ་ཙམ་གྱིས་གྲོལ་བ། བལྟས་པ་ཙམ་གྱིས་གྲོལ་བ། ཐོས་གྲོལ་ཆེན་མོ་ཞེས་བྱ་བ་མ་བསྒོམ་
པར་སངས་རྒྱས་པའི་ཆོས། ཐོས་པ་ཙམ་གྱིས་གྲོལ་བའི་ཆོས། སྡིག་པོ་ཆེ་གསེང་ལམ་དུ་ཁྲིད་པའི་ཆོས། སྐད་ཅིག་གཅིག་གིས་རྫོགས་སངས་རྒྱས་པའི་ཆོས་ཟབ་།མོ་ཡིན་ཏེ། འདིས་སླེབས་པའི་སེམས་ཅན་ངན་སོང་དུ་སོང་བ་མི་སྲིད་དོ། །ཞེས་གསུངས་སོ། །མཐོང་བ་དང་ཐོས་པ་ཙམ་གྱིས་ཕན་ཡོན་དེ་ལྟར་ན་འདིའི་དཀྱིལ་འཁོར་དུ་འཇུག་ཅིང་དབང་ཟབ་མོ་ཐོབ་ན་ཕན་ཡོན་བརྗོད་པར་ག་ལ་ལོངས། དེ་ལྟ་བུའི་དབང་བསྐུར་བ་ལ་སློབ་དཔོན་གྱི་བྱ་བ་དབང་སྒྲུབ་སྔོན་དུ་སོང་བ་ཡིན་པས་སློབ་མའི་བྱ་བ་མཎྜལ་ཞིག་ཕུལ། དེ་ནས་གསོལ་བ་འདེབས་པ་འདིའི་རྗེས་ཟློས་མཛོད། ཨེ་མ་མགོན་པོ་ཐུགས་རྗེ་ཅན། །རིགས་དྲུག་གནས་སུ་ལྟུང་བ་ཡི། །སྐྱབས་བྲལ་མགོན་མེད་སེམས་ཅན་ལ། །ཐུགས་རྗེའི་ལྕགས་ཀྱུས་བཟུང་དུ་གསོལ། །ཞེས་གསུམ་མམ་ཚིག་རྗེས་མ་ལན་གསུམ་བྱའོ། །ད་དཀྱིལ་འཁོར་དུ་འཇུག་པའི་ཕྱིར་འདིའི་རྗེས་ཟློས་མཛོད། ཨེ་མ་མགོན་པོ་ཐུགས་རྗེ་ཅན། །བདག་སོགས་འགྲོ་བ་མ་ལུས་པ། །ལོག་པའི་ལམ་དུ་ཞུགས་པ་རྣམས། །བདེ་ཆེན་ཐར་བའི་ལམ་བསྟན་འཚལ། །གསུམ་མམ་གཅིག་བྱ། དེ་ནས་སློབ་དཔོན་གྱིས། ཨེ་
མ་འདིར་འདུས་སྐལ་ལྡན་ལས་ཅན་རྣམས། །སྔོན་ཆད་མ་རིག་རྨོངས་པའི་ལས་དབང་གིས། །དུག་གསུམ་གྱིས་བཅིངས་ངན་སོང་གསུམ་དུ་མནར། །དེང་ནས་བཟུང་སྟེ་རྒྱལ་བའི་ཐུགས་རྗེ་ཡི། །ཕོ་ཉས་བཟུང་སྟེ་དཀྱིལ་འཁོར་གྲལ་དུ་འཁོད། །དོན་འབྲས་འདོད་ཕྱིར་དད་པའི་ཤུགས་བསྐྱེད་ལ། །སྐུ་གསུམ་ཕོ་བྲང་ཞིང་ཁམས་འདིར་ཤོག་ཅིག །བླ་མེད་དོན་གྱི་སྙིང་པོ་སྦྱིན་པར་བྱའོ། །གཅིག་གིས་ཆོག་གོ །ད་སྐྱབས་སུ་འགྲོ་བ་འདིའི་རྗེས་ཟློས་མཛོད། ཨེ་མ་ཕྱོགས་བཅུའི་སངས་རྒྱས་བྱང་ཆུབ་སེམས་དཔའ་དང་། །བླ་མ་ཡི་དམ་མཁའ་འགྲོ་དགོངས་སུ་གསོལ། །རྐང་གཉིས་གཙོ་བོ་སྟོན་པ་སངས་རྒྱས་དང་། །ཞི་བ་ཆགས་བྲལ་དམ་པའི་ཆོས། །ཚོགས་མཆོག་འཕགས་པའི་དགེ་འདུན་ལ། །བདག་ནི་གུས་པས་སྐྱབས་སུ་མཆི། །ཀུན་བཟང་ཞི་ཁྲོའི་ལྷ་ཚོགས་དང་། །དམ་པ་རིགས་བརྒྱའི་ལྷ་ཚོགས་ལ། །དེང་བཟུང་བླ་མེད་བྱང་ཆུབ་བར། །གུས་པས་སྐྱབས་སུ་ཉེ་བར་མཆི། །གསུམ་མམ་ཚིག་རྗེས་མ་གསུམ་བྱའོ། །ད་ནི་སོ་སོར་ཐར་པའི་དོན་བསྡུས་པ་གཞན་ལ་གནོད་པ་གཞི་དང་བཅས་པ་སྤངས་སྙམ་པས་རྗེས་ཟློས་མཛོད། ཧོ༔ བླ་མ་
ཀུན་བཟང་སྤྱན་སྔ་རུ། །ལུས་ངག་ཡིད་ཀྱིས་གཞན་རྣམས་ལ། །གནོད་པ་ལས་བཟློག་དགེ་བ་སྒྲུབས། །དགེ་བསྙེན་དགེ་ཚུལ་དགེ་སློང་སོགས། །སོ་སོར་།ཐར་པའི་སྡོམ་པ་ལ། །རྒྱུན་དུ་གནས་ཤིང་དགའ་བར་བསྒོམ། །སྡོམ་པ་ཡོངས་སུ་བཟུང་བར་བགྱི། །གཅིག་གམ་གསུམ། ད་བྱང་ཆུབ་མཆོག་ཏུ་སེམས་བསྐྱེད་པའི་རྗེས་ཟློས་མཛོད་། ཧོ༔ བླ་མ་ཀུན་བཟང་དགོངས་སུ་གསོལ། །འདི་བཟུང་བྱང་ཆུབ་མ་ཐོབ་པར། །འགྲོ་དྲུག་སེམས་ཅན་ཐམས་ཅད་ལ། །མ་དང་བུ་ཡི་འདུ་ཤེས་ཀྱིས། །མ་སྒྲལ་བ་རྣམས་བསྒྲལ་བ་དང་། །མ་གྲོལ་བ་རྣམས་དགྲོལ་བ་དང་། །དབུགས་མ་དབྱུང་རྣམས་དབུགས་དབྱུང་ཕྱིར། །སྨོན་པ་བྱང་ཆུབ་སེམས་བསྐྱེད་དོ། །བླ་མེད་འཇུག་པའི་བྱང་ཆུབ་སེམས། །དེ་བཞིན་བདག་གིས་བསྐྱེད་པར་བགྱི། །ཕར་ཕྱིན་དྲུག་ལ་བསླབ་ཅིང་བསྒྲུབ། །འགྲོ་ཀུན་མྱ་ངན་འདས་ལ་འགོད། །གསུམ་མམ་ཚིག་རྗེས་མ་གསུམ། ༈ ། ད་སྔགས་ཀྱི་སྡོམ་པ་བླང་བ་འདིའི་རྗེས་ཟློས་མཛོད། དཀོན་མཆོག་གསུམ་ནི་མི་སྤང་ངོ་། །རྡོ་རྗེ་རིགས་ཀྱི་དམ་ཚིག་ཏུ། །རྡོ་རྗེ་དྲིལ་བུའི་ཕྱག་རྒྱ་དང་། །བྱང་ཆུབ་སེམས་
ནི་སྤང་མི་བྱ། །རིན་ཆེན་རིགས་ཀྱི་དམ་ཚིག་ཏུ། །སྦྱིན་པ་རྣམ་བཞི་རྟག་ཏུ་སྦྱིན། །པདྨ་རིགས་ཀྱི་དམ་ཚིག་ཏུ། །ཐེག་པ་གསུམ་དང་ཆོས་རྣམས་བཤད། །ལས་ཀྱི་རིགས་ཀྱི་དམ་ཚིག་ཏུ། །འགྲོ་བའི་དོན་ལ་བརྩོན་པར་བྱ། །རྩ་བ་ཡན་ལག་དམ་ཚིག་ཀུན། །མ་ལུས་བདག་གིས་ཡོངས་སུ་བཟུང་། །ཚིག་རྗེས་མ་གསུམ། མིག་དར་དམར་པོས་གཡོགས་ཤིང་ལག་ཏུ་མེ་ཏོག་གི་ཕྲེང་བ་བྱིན་པར་སྒོམས་ཤིག༔ ཨོ་ཨ་ཁཾ་བཱི་ར་ཧཱུཾ། ཞེས་མིག་དར་བྱིན་མེ་ཏོག་གཏད་དེ། མང་ན་མིག་དར་གཅིག་ལ་བཀབ་པས་འཐུས། ཨོཾ་བཛྲ་ཤྲཱི་ཧེ་རུ་ཀ་ཨུ་ཙ་ཏ་ཡ་ཕཊ། སྐད་ཅིག་གིས་སློབ་མའི་ཆ་འཛིན་རྡོ་རྗེ་སེམས་དཔའ་དཀར་པོ་རྡོ་རྗེ་དང་དྲིལ་བུ་འཛིན་པ་ལུས་ལྷ་ཞི་ཁྲོའི་ལྷ་ཚོགས་མེ་ལོང་གི་གཟུགས་བརྙན་ལྟར་གསལ་བ། ཐུགས་དབུས་ཟླ་སྟེང་ཧཱུྃ་ལ་ཡི་གེ་བརྒྱ་པས་བསྐོར་བ་ལས་འོད་ཟེར་འཕྲོས། འོག་མིན་གྱི་གནས་ནས་དམ་པ་རིགས་བརྒྱའི་ལྷ་ཚོགས་ཆར་བབ་པ་ལྟར་བྱོན་ནས་ལུས་ལྷ་སོ་སོ་ལ་ཐིམ་པར་སྒོམས་ཤིག །སྤོས་དང་རོལ་མོ་དབྱངས་དང་བཅས། ཧཱུྃ༔ བྱིན་ཆེན་ངོ་མཚར་མཆོག་གི་གནས། །ལྷུན་གྲུབ་དབྱིངས་ཀྱི་དཀྱིལ་འཁོར་ནས། །སྐུ་གསུང་ཐུགས་ཡོན་ཕྲིན་ལས་འདུས། །ཞི་ཁྲོའི་ལྷ་
ཚོགས་བྱིན་ཕོབ་ཅིག །བྱིན་ཆེན་ངོ་མཚར་ཁྱད་པར་གནས། །དཔལ་ཆེན་ཧེ་རུ་ཀ་ཡི་གནས་བཅུ་ནས། །ལེགས་ཉེས་སྟངས་འཛིན་དམ་ཚིག་རྗེས་གཅོད་པའི། །ཀེའུ་སེང་དབང་ཕྱུག་བྱིན་ཕོབ་ཅིག །བོ་དྷི་ཙིཏྟ་དང་། བཛྲ་ཨ་ཝེ་ཤ་ཡ་ཨ་ཨཱཿ དམིགས་པ་མ་གསལ་བར་དུ་དྲག་ཏུ་བརྗོད། རྡོ་རྗེ་སྤྱི་བོར་བཞག་ཚུལ་བྱ། ཏིཥྛ་བཛྲ། ད་སྒོ་སྲུང་ལ་གསོལ་བ་འདེབས་པ་འདིའི་རྗེས་ཟློས་མཛོད། ཧཱུྃ༔ དཀྱིལ་འཁོར་ཆེན་པོའི་ཕྱོགས་བཞིའི་སྒོ། །ཉོན་སྒྲིབ་བཞི་པོས་བཅད་ལགས་ན། །སྒོ་སྲུང་ཁྲོ་བོ་ཆེན་པོ་བཞི། །སྒོ་མ་ལྷ་མོ་ཕྱག་རྒྱ་བཞི། །ཐབས་ཤེས་ཕྱག་རྒྱ་རྣམ་བཞི་ཡིས། །ཡེ་ཤེས་བཞི་ཡི་སྒོ་བཞི་ཕྱེས། །བདག་ཅག་དད་པས་འཇུག་པར་བགྱི། །ཀུན་བཟང་ཞི་ཁྲོའི་ལྷ་ཚོགས་ལ། །གུས་པའི་ཡིད་ཀྱིས་ཕྱག་འཚལ་ལོ། །ཡི་དམ་ལྷ་དང་མཇལ་བར་ཤོག །པྲ་ཝེ་ཤ་ཡ་ཕཊ༔ གཅིག་བརྗོད། སྒོ་སྲུང་རྣམས་ཀྱིས་སྒོ་ཕྱེས་ནས་དཀྱིལ་འཁོར་ནང་དུ་ཁྲིད་པས་མེ་ཏོག་འབུལ་བའི་མོས་པས་རྗེས་ཟློས་མཛོད། བདག་ཅག་རིག་པའི་མེ་ཏོག་འདི། །ཡི་དམ་ཞི་ཁྲོའི་ལྷ་ལ་འབུལ། །སྔོན་ནས་ལས་འཕྲོ་གང་ཡོད་པའི། །ཡི་དམ་ལྷ་ལ་འབབ་པར་
ཤོག །པྲ་ཏི་ཛ་ཧོ༔ མེ་ཏོག་གམ་ནས་འབྲུ་དཀྱིལ་འཁོར་ལ་གཏོར་བཅུག །ཇི་ལྟར་མིག་མཁན་རྒྱལ་པོ་ཡིས། །མ་རིག་ལིང་ཐོག་གསལ་བ་ལྟར། །དེ་བཞིན་ཁྱོད་ཀྱི་མ་རིག་པའི། །ཉོན་མོངས་དྲུག་གིས་སྒྲིབ་པ་ཡི། །མ་རིག་ལིང་ཐོག་བསལ་བར་བྱ། །ཙཀ་པྲ་ཝེ་ཤ་ཡ་ཕཊ༔ མིག་དར་བསལ། ཡང་ན་རྡོ་རྗེས་ཕྱེ་ཚུལ་བྱ་སྟེ། ད་བཅོམ་ལྡན་འདས་དམ་པ་རིགས་བརྒྱའི་དཀྱིལ་འཁོར་རྟེན་བརྟེན་པ་དང་བཅས་པ་ཞལ་མངོན་སུམ་དུ་མཐོང་བའི་མོས་པ་མཛོད་ཅིག །དེ་ནས་འདིའི་རྗེས་ཟློས་མཛོད། ཨེ་མ་མགོན་པོ་ཐུགས་རྗེ་ཅན། །བདག་སོགས་འཁོར་བའི་སྡུག་བསྔལ་ལས། །སྐྱབས་ཕྱིར་བརྩེ་བས་རྗེས་བཟུང་ནས། །དབང་དང་བྱིན་རླབས་སྩལ་དུ་གསོལ། །ལན་གསུམ། །ད་བུམ་པ་འདིའི་ནང་ན་ཀུན་ཏུ་བཟང་པོ་དང་། རྡོ་རྗེ་སེམས་དཔའ་རིགས་ལྔའམ་རྒྱལ་བ་རིགས་ལྔའི་ལྷ་ཚོགས་བཞུགས་པའི་སྐུ་ལས་བདུད་རྩིའི་རྒྱུན་བབ། ཚངས་བུག་ནས་ཞུགས། ཉོན་མོངས་དྲུག་གི་སྒྲིབ་པ་དག །རིགས་དྲུག་གི་སྐྱེ་སྒོ་ཆོད་པར་སྒོམས་ཤིག །རྒྱས་པར་བུམ་པ་ལན་དྲུག་མགོ་བོའི་གནས་ལྔ་དབུས་རྣམས་སུ་བཞག་རྒྱུ་སྟེ། འདིར་བུམ་པ་ཐོགས་ལ་བཞག་ཚུལ་རེ་བྱས་ལ་ལན་གཅིག་འགྲིམ་པས་འཐུས་སོ། ཧཱུྃ༔ ཀུན་
བཟང་ཡབ་ཡུམ་བུམ་པ་ན། །རྒྱལ་བ་ཞི་ཁྲོའི་ལྷ་ཚོགས་བཞུགས། །སྐལ་ལྡན་ཁྱོད་ལ་དབང་བསྐུར་བས། །དམྱལ་བའི་སྐྱེ་སྒོ་བཅད་ནས་ནི། །ན་རཀ་སྡུག་།བསྔལ་བྲལ་བར་ཤོག །ཧཱུྃ་བཛྲ་སཏཱ་ས་མ་ཡ། རྒྱས་པར་ཡིག་བརྒྱ་ཚང་མ་བསྡུ་ན་འདིས་ཆོག །ཧཱུྃ་བཛྲ་ཨ་བྷི་ཥིཉྩ་ཨཱཿ ཧཱུྃ༔ བདུད་རྩི་དྲི་ལྔའི་བུམ་པ་ན། །བདེ་གཤེགས་གསུང་གི་ལྷ་ཚོགས་བཞུགས། །སྐལ་ལྡན་བུ་ལ་དབང་བསྐུར་བས། །ཡི་དྭགས་སྐྱེ་སྒོ་བཅད་ནས་ནི། །བདེ་བ་ཅན་དུ་སྐྱེ་བར་ཤོག །ཨོཾ་པདྨ་སཏྭ་ས་མ་ཡ༴ ཨོཾ་པདྨ་ཨ་བྷི་ཥིཉྩ་ཨཱཿ ཧཱུྃ༔ རིན་ཆེན་འབྲུ་ལྔའི་བུམ་པ་ན། །བདེ་གཤེགས་སྐུ་ཡི་ལྷ་ཚོགས་བཞུགས། །སྐལ་ལྡན་བུ་ལ་དབང་བསྐུར་བས། །དུད་འགྲོའི་སྐྱེ་སྒོ་བཅད་ནས་ནི། །མངོན་དགའི་ཞིང་དུ་སྐྱེ་བར་ཤོག །ཨོཾ་བུདྡྷ་སཏྭ་ས་མ་ཡ༔ ཨོཾ་བུདྡྷ་ཨ་བྷིཥིཉྩ་ཨཱཿ ཧཱུྃ༔ སྙིང་པོ་ལྔ་ཡི་བུམ་པ་ན། །བདེ་གཤེགས་ཕྲིན་ལས་ལྷ་ཚོགས་བཞུགས། །སྐལ་ལྡན་བུ་ལ་དབང་བསྐུར་བས། །ལྷ་མིན་སྐྱེ་སྒོ་བཅད་ནས་ནི། །ལས་རབ་ཞིང་དུ་སྐྱེ་བར་ཤོག །ཧ་ཀརྨ་སཏྭ་ས་མ་ཡ༴ ཀརྨ་ཨ་བྷི་ཥིཉྩ་ཨཱཿ ཧཱུྃ༔ རིན་ཆེན་འབྲུ་ལྔའི་བུམ་པ་འདིར། །
བདེ་གཤེགས་ཡོན་ཏན་ལྷ་ཚོགས་བཞུགས། །སྐལ་ལྡན་བུ་ལ་དབང་བསྐུར་བས། །ལྷ་ཡི་སྐྱེ་སྒོ་བཅད་ནས་ནི། །དཔལ་ལྡན་ཞིང་དུ་སྐྱེ་བར་ཤོག །སཱ་རཏྣ་སཏྭ་ས་མ་ཡ། སཿརཏྟ་ཨ་བྷི་ཥིཉྩ་ཨཱཿ ཧཱུྃ༔ རིན་ཆེན་བུམ་པ་གཞལ་ཡས་ཁང་། །རྒྱལ་བ་ཞི་ཁྲོའི་ལྷ་ཚོགས་བཞུགས། །རིགས་ཀྱི་བུ་ལ་དབང་བསྐུར་བས། །ལྷ་དབང་ལུས་ལ་ཐོབ་པར་ཤོག །བོ་དྷི༴ ཨོ་རུ་ལུ༴ ཨོཾ་བཛྲ་བུདྡྷཱ་རཏྣ་པདྨ་ཀརྨ་ཨ་བྷི་ཥིཉྩ་ཨཱཿ སྐབས་འདིར་བོ་དྷི་བསྐུལ་ཞིང་བུམ་པ་འགྲིམས་པར་བྱའོ། །དེས་ནི་སྐུ་བུམ་པའི་དབང་དྲུག་ཐོབ་པས་ཉོན་མོངས་པ་དྲུག་གི་སྒྲིབ་པ་སྦྱང་བ་ཡིན། མདུན་གྱི་ནམ་མཁར་རྒྱལ་བ་ཞི་ཁྲོའི་ལྷ་ཚོགས་སྡིག་པ་བཤགས་པའི་དཔང་པོར་བཞུགས་པའི་དྲུང་དུ་ཁྱེད་རང་རྣམས་རྡོ་རྗེ་སེམས་དཔར་གསལ་བའི་ཐུགས་ཀར་ཧཱུྃ་ལ་ཡི་གེ་བརྒྱ་པས་བསྐོར་བ་ལས་བདུད་རྩིའི་རྒྱུན་བབ་པས་ལུས་ཐམས་ཅད་གང་སྡིག་སྒྲིབ་ཐམས་ཅད་ནག་ནུ་རུ་རུ་རྐང་མཐིལ་དང་འོག་སྒོ་ནས་ཐོན་ཏེ་ས་རིམ་པ་དགུའི་འོག་ཏུ་སོང་བར་བསྒོམ་ལ། ཤེས་པ་རྣམས་ཀྱི་རིགས་ལྔའི་ཡིག་བརྒྱ་ཐོན། མི་ཤེས་པ་ཚོས་འདིའི་རྗེས་ཟློས་བུར་འདོན་ཞིག་མཛོད། ཨོཾ་བཛྲ་སཏྭ་ཧཱུཾ། ཨོཾ་བུདྡྷ་སཏྭ་ཧཱུཾ། ཨོཾ་རཏྣ་སཏྭ་ཧཱུྃ། ཨོཾ་པདྨ་
སཏྭ་ཧཱུཾ། ཨོཾ་ཀརྨ་སཏྭ་ཧཱུཾ། རེ་རེ་ལ་བདུན་ལས་མི་ཉུང་བ་བྱའོ། །དེ་ནས་བཤགས་ཚིག་འདིའི་རྗེས་ཟློས་མཛོད། ཐོག་མ་མེད་ནས་ད་ལྟའི་བར། །མི་དགེ་བཅུ་དང་མཚམས་མེད་ལྔ། །སེམས་ནི་ཉོན་མོངས་དབང་གྱུར་པས། །སྡིག་པ་ཐམས་ཅད་བཤགས་པར་བགྱི། །ཚིག་རྗེས་མ་གསུམ། དེས་ངག་གི་སྒོ་ནས་རིགས་དྲུག་གི་སྐྱེ་སྒོ་ཆོད་པ་ཡིན། ད་ནི་རྒྱུད་སྡེ་དྲུག་པོ་ཐུན་མོང་བ་རིག་པའི་དབང་ལྔ་བསྐུར་བ་ཡིན་ཏེ། བུམ་པ་ཐོགས་ལ། ཧཱུྃ༔ སྐུ་གསུམ་དམ་ཚིག་ལས་བྱུང་ཞིང་། །ཉོན་མོངས་ཞེ་སྡང་འཇོམས་མཛད་པ། །ལྷ་ཡི་བདུད་རྩི་དག་པ་ཡི། །མི་བསྐྱོད་ཆུ་རྒྱུན་དབང་བསྐུར་རོ། །ཧཱུཾ་བཛྲ་ཨཱ་དདྷ་ཛྷཱ་ཏ་ཛྷཱ་ན་ཨ་བྷི་ཥིཉྩམཾ། ཞེས་བུམ་པ་ཉུང་ན་འགྲིམ། མང་ན་སྟོན་ཙམ་བྱ། ཧཱུྃ༔ སངས་རྒྱས་ཀུན་གྱི་རྒྱལ་སྲིད་དབང་། །ང་རྒྱལ་རྟོག་པ་རྣམ་པར་འཇོམས། །ཆགས་མེད་སྦྱིན་པའི་དབུ་རྒྱན་འདིས། །རྫོགས་སངས་རྒྱས་སུ་དབང་བསྐུར་རོ། །སཱ་རཏྣ་ས་མནྟ༔ ཛྷཱ་ན་རཏཱ་སྭ་བྷ་ཝ་ཨ་བྷི་ཥིཉྩ་མཱི༔ མགོ་ལ་བསྐོན་ཚུལ་བྱ། ཧཱུྃ༔ སངས་རྒྱས་ཀུན་གྱི་རྡོ་རྗེའི་དབང་། །མི་ཕྱེད་རྡོ་རྗེ་གསང་བ་ཡིས། །འདོད་ཆགས་རྟོག་པ་རྣམ་པར་འཇོམས། །རྡོ་རྗེ་ཆོས་
ཀྱི་དབང་བསྐུར་རོ། །ཨོཾ་པདྨ་པྲཏུ་བེཀྐཱ་ཎ་ཨ་བྷི་ཥིཉྩ་མཱི། རྡོ་རྗེ་སྤྱི་བོ་དང་ལག་ཏུ་བཞག་ཚུལ་བྱ། ཧཱུྃ༔ ཐབས་དང་ཤེས་རབ་ལྡན་པ་ཡི། །འགྲོ་དོན་མཉམ་མེད་དྲིལ་བུ་འདིས། །ཕྲག་དོག་རྟོག་པ་རྣམ་པར་འཇོམས། །གཉིས་སུ་མེད་པར་དབང་བསྐུར་རོ། །ཧ་ཀྲྀ་ཏྱཱ་ནུཥཱ་ཛྷ་ན་ས་ཏི༔ ཀརྨ་ཨབྷི་ཥིཉྩ་མཾ༔ དྲིལ་བུ་བསིལ་ཞིང་ལག་ཏུ་གཏད་ཚུལ་བྱ། རྣམ་སྣང་གི་སྐུ་བསྟན་ལ། སྐྱེས་པ་རྣམས་རྡོ་རྗེ་སེམས་དཔའ་འམ། བུད་མེད་རྣམས་རྡོ་རྗེ་སྙེམ་མ་གསང་མཚན་ཡིན་པས་དྲན་པར་གྱིས།་ཧཱུཾ། རྡོ་རྗེའི་མིང་གིས་དབང་བསྐུར་བས། །གཏི་མུག་རྟོག་པ་རྣམ་པར་འཇོམས། །ཅིས་ཀྱང་མི་ཆོད་མི་ཤིགས་པའི། །རྡོ་རྗེ་མིང་དུ་རབ་ཏུ་གྲགས། །ཨོ་ཏྲ་ཙ་ཀྲ་མ་ཏུ༔ ཨ་མི་ཛྙཱ་ན་ཨ་བྷི་ཥིཉྩམཾ༔ དེ་ནས་བུམ་པ་དབུ་རྒྱན་དུ་བཅུག་པ་སྤྱི་བོར་འགྲིམ། རྡོར་དྲིལ་སྦྲེལ་བ་གཡོན་དུ་འཛིན་པ་ལ། རེག་ཙམ་བཅུག །མཆོད་གཡོག་པས་བུམ་ཆུ་བཀྱེའོ། ད་ཐུབ་པ་དྲུག་གི་ཕྱག་མཚན་འདི་རྣམས་ཀྱིས་དབང་བསྐུར་བས། རིགས་དྲུག་གི་སྐྱེ་སྒོ་ཆོད། རིགས་ལྔའི་ཕྱག་མཚན་འདིས་དབང་བསྐུར་བས། ཞི་ཁྲོའི་ཐུགས་ཀྱི་དབང་ཐོབ་པར་སྒོམས་ཤིག །ཧཱུྃ། ཚ་གྲང་སྐྱོབ་བྱེད་མེ་ཆུ་བསིལ་དྲོད་ལྡན། །སྐལ་ལྡན་རིགས་ཀྱི་བུ་ལ་དབང་
བསྐུར་བས། །དམྱལ་བའི་སྐྱེ་སྒོ་ཆོད་ནས་ནི། །ན་རཀ་སྡུག་བསྔལ་བྲལ་བར་ཤོག །དུད་ཧ་ད་ཧ་སརྦ་ན་ར་ཀ་ག་ཏེ་ཧེ་ཏུཾ་ཧཱུྃ་ཕཊ༔ ཨཱཿ རིན་ཆེན་སྒྲོམ་བུའི་བུམ་པ་ན། །རྒྱལ་བ་ཞི་ཁྲོའི་ལྷ་ཚོགས་བཞུགས། སྐལ་ལྡན་བུ་ལ་དབང་བསྐུར་བས། །སྲེ་ཏ་ཀ་ཡི་སྡུག་བསྔལ་བྲལ་བར་ཤོག །པྲཔ་ཙ་པ་ཙ་སརྦ་པྲ་ཏ་ཀ་ག་ཏེ་ཧེ་ཏུཾ་ཧཱུཾ་ཕཊ༔ ཨོཾ༔ ཤེས་རབ་རིག་པའི་པོ་ཏི་འདི། །དུས་གསུམ་རྒྱལ་བ་ཞི་ཁྲོའི་གསུང་། །སྐལ་ལྡན་ཁྱོད་ལ་དབང་བསྐུར་བས། །ཧེ་རུ་ཀ་ཡི་སྡུག་བསྔལ་བྲལ་བར་ཤོག །སུ་མ་ཐ་མ་ཐ་སརྦ་ཏིར་ཀ་ག་ཏེ་ཧེ་དུན་ཧཱུྃ་ཕཊ༔ ཧཿ ཤེས་རབ་དོན་མཚོན་རལ་གྲི་དང་། །བདུད་ཀྱི་མཚོན་སྲུང་གོ་ཆ་འདི། །དུས་གསུམ་རྒྱལ་བའི་སྦྱོར་སྒྲོལ་ཏེ། །ཞི་ཁྲོ་རྒྱལ་བའི་ཕྱག་མཚན་འདིས། །སྐལ་ལྡན་བུ་ལ་དབང་བསྐུར་བས། །ཧེ་ས་ཀ་ཡི་སྡུག་བསྔལ་བྲལ་བར་ཤོག །ཏྲེ་དུ་ལ་སརྦ་ཀརྨ་པྲ་ཝེ་ཤ་ཡ་ཧཱུྃ་ཕཊ༔ སྭཿ ལོངས་སྤྱོད་བདུད་ཀྱི་གཡེངས་འཇོམས་པའི། །པི་ཝཾ་སྙན་པའི་དོན་མཛད་འདིས། །དེ་རིང་ཁྱོད་ལ་དབང་བསྐུར་བས། །སྐྱེ་བ་གཅིག་གིས་ལས་རྫོགས་ཤོག །ཨ་སརྦ་ཏ་ཐཱ་ག་ཏ་བྷི་དན་ཁངྒ་ཚིན་
ཚིནྡྷ་ཧཱུྃ་ཕཊ༔ ཧཱུྃ༔ རིན་ཆེན་པར་བུའི་ལྷུང་བཟེད་ནང་། །རྒྱལ་བ་ཞི་ཁྲོའི་ལྷ་ཚོགས་བཞུགས། །གསེག་ཤང་དྲང་སྲོང་སྒྲ་སྒྲོག་འདིས། །ཐུགས་རྟགས་ཞི་ཁྲོའི་ལྷ་ཡི་རྟགས། །རིགས་ཀྱི་བུ་ལ་དབང་བསྐུར་བས། །ཨ་ཝ་དྷུ་ཏིའི་དབང་ཐོབ་ཤོག །ཨོཾ་མུ་ནེ་ཨ་བྷི་ཥིཉྩ་ཧཱུཾ་ཧཱུཾ། རྡོ་རྗེ་འཁོར་ལོ་རིན་པོ་ཆེ། །པདྨ་རྒྱ་གྲམ་ཐུགས་ཀྱི་རྟགས། །༧རིགས་ཀྱི་བུ་ལ་དབང་བསྐུར་བས། །འཁོར་ལོ་ལྔ་ཡི་དབང་ཐོབ་ཤོག །བཛྲ་ཙཀྲ་རཏྣ་པདྨ་ཁངྒ་ཨ་བྷི་ཥིཉྩ་ཨཱཿ ཞེས་ཕྱག་མཚན་རྣམས་དུས་གཅིག་འགྲིམ་སྟེ། བོ་དྷི་འདོན་ཞིང་སྤྱི་བོ་དང་ལག་ཏུ་བཞག །ད་ནི་མདུན་བསྐྱེད་ཞི་ཁྲོའི་ལྷ་ཚོགས་ཐམས་ཅད་ཀྱི་སྐུ་ལས་ལྷ་སོ་སོའི་སྐུ་འཕྲོས་ཏེ། ཁྱེད་རང་རྣམས་ཀྱི་ལུས་ལ་ཡེ་ནས་བཞུགས་པའི་ལྷ་ཚོགས་ལ་ཐིམ་པར་སྒོམས་ཤིག ། ཧཱུྃ༔ སྐལ་ལྡན་རིགས་ཀྱི་བུ་རྣམས་ལ། །ཀུན་བཟང་ཡབ་ཡུམ་དབང་བསྐུར་བས། །ཡིད་ཆོས་རྣམ་པར་དག་པ་ཡི། །ཆོས་སྐུ་རབ་འབྱམས་དབང་ཐོབ་ཤོག །ཨོཾ་ཨཱཧཱུྃ་བོ་དྷི་ཙིཏྟ་མ་ཧཱ་སུ་ཁ་ཛྙཱ་ན་དྷ་ཏུ་ཨཱཿ ཀཱ་ཡ་ཨ་བྷི་ཥིཉྩ་ཨོཾ་ཨཱཧཱུྃ་ཧཱི༔ ཉུང་ན་སྤྱི་བོར་རྡོ་རྗེ་དང་བཅས་མང་ན་ཁྲོམ་ལ་བསྟན་ནས། ཧཱུྃ། སྐལ་ལྡན་རིགས་ཀྱི་བུ་རྣམས་ལ། །ཆེ་མཆོག་ཡབ་ཡུམ་
དབང་བསྐུར་བས། །ཉོན་མོངས་མ་སྤངས་གནས་དག་ནས། །ཁྲག་འཐུང་རབ་འབྱམས་དབང་ཐོབ་ཤོག །ཨོཾ་རུ་ལུ་རུ་ལུ་ཧཱུྃ་བྷོ་ཧཱུྃ༔ ཀཱ་ཡ་ཨཱ་བྷི་ཥིཉྩ་ཨོཾ་ཨཱཿཧཱུྃ་ཞེས་སྤྱི་བར་བཞག་པའམ་ཁྲོམ་ལ་སྟོན། དེ་ནས་ཙཀ་ལི་གཉིས་གཏོར་མར་བཙུགས་ནས་བཟུང་སྟེ། ཨོ་ཨཱཎཱཧཱུྃ་ཧཱུྃ༔ སྐྱེ་མེད་དབྱིངས་ཀྱི་གཏོར་གཞོང་དུ། །མ་བྲིས་དཀྱིལ་འཁོར་གཏོར་ཆེན་བཤམས། །རིག་རྩལ་ཐོགས་མེད་གཏོར་རྒྱན་སྤྲས། །བླ་མ་རྒྱལ་བ་ཞི་ཁྲོ་དང་། །ཌཱ་ཀི་དམ་ཅན་ཐམས་ཅད་ཀྱི། །དབང་མཆོག་ཁྱོད་ལ་སྦྱིན་པར་བྱ། །དབང་མཆོག་འདི་ཐོབ་བྱིན་རླབས་ཀྱིས། །སྐྱེ་གནས་བར་དོ་འདི་ཉིད་དུ། །སྣང་བཞི་གདོད་མར་ཕྱིན་པར་ཤོག །འཆི་ཁ་སྡུག་བསྔལ་བར་དོ་རུ། །སྐུ་གསུམ་དབྱིངས་སུ་འཕོ་བར་ཤོག །།ཆོས་ཉིད་ཞི་ཁྲོའི་བར་དོ་རུ། །རང་སྣང་ལྷུན་གྲུབ་སངས་རྒྱས་ཤོག །སྲིད་པ་ལས་ཀྱི་བར་དོ་རུ། །སྤྲུལ་སྐུའི་ཞིང་དུ་རྫུས་སྐྱེས་ཏེ། །སྐུ་བཞི་ལྷུན་གྲུབ་སངས་རྒྱས་ནས། །བདག་གཞན་དོན་གཉིས་མཐར་ཕྱིན་ཤོག །ཆོས་སྐུ་ཀུན་ཏུ་བཟང་པོ། དྲུག་པ་རྡོ་རྗེ་འཆང་ཆེན། །སྟོན་པ་རྡོ་རྗེ་སེམས་དཔའ། རིག་འཛིན་དགའ་རབ་རྡོ་རྗེ། གུ་རུ་ཤྲཱི་སེང་ཧ། །
འཆི་མེད་པདྨ་འབྱུང་གནས། མཁའ་འགྲོ་ཡེ་ཤེས་མཚོ་རྒྱལ། རྗེ་འབངས་ཉི་ཤུ་རྩ་བདུན། གཏེར་སྟོན་བརྒྱ་དང་རྩ་བརྒྱད། ལ་སོགས་པ་རིག་འཛིན་བརྒྱུད་པའི་བླ་མ་དམ་པ་རྣམས་དང་། ཞི་བ་བཞི་བཅུ་རྩ་གཉིས། །འབར་བ་ཁྲག་འཐུང་ལྔ་བཅུ། དག་པ་རིག་འཛིན་ལྷ་ཚོགས། བཀའ་སྲུང་དམ་ཅན་རྒྱ་མཚོ་རྣམས་ཀྱིས་བྱིན་གྱིས་རློབས་ཤིག ། སྐུ་གསུང་ཐུགས་ཀྱི་དབང་བསྐུར་དུ་གསོལ། ཉམས་ཆག་སྡིག་སྒྲིབ་ཐམས་ཅད་དག་པར་མཛད་དུ་གསོལ། ནད་གདོན་བར་ཆད་ཐམས་ཅད་ཞི་བར་མཛད་དུ་གསོལ། ཉམས་དང་རྟོགས་པ་འཕེལ་བར་མཛད་དུ་གསོལ། འཆི་ཁ་ཆོས་ཀྱི་སྐུར་སངས་རྒྱས་པར་མཛད་དུ་གསོལ། །རིགས་དྲུག་གི་སྐྱེ་སྒོ་ཆོད་པར་མཛད་དུ་གསོལ། བར་དོ་ལོངས་སྤྱོད་རྫོགས་པའི་སྐུར་འཚང་རྒྱ་བར་མཛད་དུ་གསོལ། སྐྱེ་བ་སྤྲུལ་པའི་སྐུར་འཚང་རྒྱ་བར་མཛད་དུ་གསོལ། བོ་དྷི་ཙིཏྟ་བརྗོད་ཅིང་གཏོར་མ་འགྲིམ་མོ། །འདིར་སྤྲོ་ན་ལས་བྱང་ཆུང་བའི་བཀྲ་ཤིས་བརྗོད། བསྡུ་ན་མི་དགོས་སོ། །འོ་དེས་ཞི་ཁྲོའི་དབང་བསྐུར་འགྲོ་དྲུག་རང་གྲོལ་གྱི་དོན་བསྡུས་ངན་སོང་རང་གྲོལ་ཞེས་བྱ་བ་ཐོབ་པ་ཡིན་པས། རང་གི་སྙིང་ག་ན་ཞི་བའི་ལྷ་ཚོགས། མགྲིན་པ་ན་རིག་
འཛིན་ལྷ་ཚོགས། ཀླད་པ་ན་ཁྲག་འཐུང་གི་ལྷ་ཚོགས། ལུས་ལྷའི་ཚུལ་དུ་བཞུགས་པ་ཡིན་པས་ཟས་གོས་ཀྱང་དེ་རྣམས་མཆོད་པའི་ཚུལ་དུ་སྤྱོད་ཅིག །རང་འཆི་བའི་ཚེ་ཞི་ཁྲོའི་ལྷ་ཚོགས་རང་གི་ལུས་ལས་ཐོན་ནས། ནམ་མཁའ་བར་སྣང་གང་བར་འཆར་རོ། །དེའི་དུས་སུ་སྒྲ་འོད་ཟེར་གསུམ་ལ་མ་སྐྲག་མ་སྔངས་པར། ད་ལྟར་དབང་བསྐུར་བའི་ཡི་དམ་གྱི་ལྷ་ཡིན་པ་ངོ་ཤེས་པར་གྱིས་ཤིག །ངོ་ཤེས་པ་དང་གྲོལ་བ་དུས་མཉམ་དུ་འོང་ངོ་། །དེ་ལྟར་རིགས་དྲུག་སྐྱེ་སྒོ་ཆོད་པའི་དབང་ཟབ་མོ་ཐོབ་ནས། དུས་རྒྱུན་དུ་རང་ལུས་རྡོ་རྗེ་སེམས་དཔའི་སྐུ་ལ་ཞི་ཁྲོའི་ལྷ་ཚང་བ་ཞིག་ཏུ་སྒོམས་ཤིག །རིགས་དྲུག་གི་སྐྱེ་སྒོ་ཆོད་པའི་སྔགས་འདི་བཟླས་ན། སྡིག་ཆེན་ཡིན་ཀྱང་ངན་སོང་དུ་མི་འགྲོ་བ་ཀུན་ཏུ་བཟང་པོས་གསུངས་པས། ད་ལྟ་རྗེས་ཟློས་ལན་གསུམ་དང་། འུར་འདོན་གྱིས་ལ། རྒྱུན་དུ་ཡང་ཐོན་ཅིག །འཨཤཿསཿམསཿ དེ་ནས་སྔགས་འདི་དང་། བག་ཆགས་རང་གྲོལ་བར་དོ་རྩ་ཚིག་སོགས་ཁས་ལེན་འོང་བར་གདའ་ན་བྱའོ། །དེ་ལྟར་དབང་ཐོབ་པས་ཞི་ཁྲོ་དམ་པ་རིགས་བརྒྱ་ཡི་དམ་དུ་བཟུང་བའི་མོས་པས་རྗེས་ཟློས་མཛོད། གཙོ་བོས་ཇི་ལྟར་བཀའ་བསྩལ་པ་
སོགས། འདི་ནི་ཀརྨ་གླིང་པའི་གཏེར་ཁ་ཞི་ཁྲོའི་དབང་འབྲིང་པོའི་དོན་བསྡུས་མགྱོགས་དབང་དུ་བསྡུས་པ་ཡིན་ཀྱང་། ཞི་ཁྲོ་བཀའ་མ་དང་། གཏེར་ཁ་གསར་རྙིང་གནམ་ཆོས་སོགས་ལ་སྦྱར་ཆོག་ཅིང་། དབང་ཚང་མ་ཡིན་པས་ཕན་ཡོན་ཤིན་ཏུ་ཆེ་བ། བླ་མ་ངག་དབང་དོན་གྲུབ་ཀྱིས་བསྐུལ་ནས་སྔགས་འཆང་རཱ་ག་ཨ་སྱས་བསྒྲིགས་པ་ལ། ཉེས་འགལ་མཆིས་ནི་བཀའ་སྲུང་རྣམས་ལ་བཤགས་ཤིང་དགེ་བས་འབྲེལ་ཚད་བར་དོའི་འཇིགས་སྐྲག་ལས་གྲོལ་ནས་བདེ་བ་ཅན་དུ་སྐྱེ་བའི་རྒྱུར་གྱུར་ཅིག །མངྒ་ལཾ།། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།