ཟབ་ཆོས་ཞི་ཁྲོ་དགོངས་པ་རང་གྲོལ་ལས། ཆོ་ག་གཅིག་ལ་དཀྱིལ་འཁོར་བཞི་བཅུ་ཞེ་གཉིས་སུ་འགྱུར་ཚུལ་གྱི་ཞལ་གདམས།
ཟབ་ཆོས་ཞི་ཁྲོ་དགོངས་པ་རང་གྲོལ་ལས། ཆོ་ག་གཅིག་ལ་དཀྱིལ་འཁོར་བཞི་བཅུ་ཞེ་གཉིས་སུ་འགྱུར་ཚུལ་གྱི་ཞལ་གདམས་ཡོད་དོ།།
ཀུན་བཟང་ཞི་ཁྲོའི་ལྷ་ལ་ཕྱག་འཚལ་ནས། །གནད་ཀྱི་མན་ངག་རྒྱ་ཆེན་འདི་དགྲོལ་གྱིས། །དབང་ཕྱུག་ཉེར་བརྒྱད་དམ་ཅན་སྡེ་བདུན་གྱིས། །བཀའ་ཡི་གནང་བ་སྩོལ་ལ་སྟོངས་གྲོགས་མཛོད། །གསར་མའི་རྡོར་ཕྲེང་ཕ་རྒྱུད་གསང་འདུས་དང་། །རྙིང་མའི་ཞི་ཁྲོའི་རྒྱུད་གཞུང་ཐམས་ཅད་ནས། །གཙོ་བོ་འཕོ་བའི་གདམས་པ་ཞེས་བྱ་བ། །རྒྱ་ཆེར་གསུངས་ཤིང་ཡོངས་སུ་གྲགས་ན་ཡང་། །ཞལ་ཤེས་མེད་པ་རྣམས་ཀྱིས་དོན་མ་རྟོགས། །ཞི་ཁྲོའི་དབང་བསྐུར་རྒྱས་པ་ཐོབ་ཕྱི་ནས། །བསྐྱེད་པ་མ་ཧཱ་ཡོ་གའི་རྒྱུད་ཀྱི་ལུགས། །ཞི་ཁྲོའི་ལས་བྱང་རྒྱས་བསྡུས་གང་འདོད་
ཀྱི། །མངོན་རྟོགས་གཙོ་བོ་འཕོ་བའི་དམིགས་པ་ཡི། །དཀྱིལ་འཁོར་ཉི་ཤུ་རྩ་གཅིག་འབྱུང་བ་རྣམས། །ལས་བྱང་འབྲིང་པོའི་ནང་དུ་བཅུག་རྒྱུ་ཡིན། །འབྲིང་བར་མངོན་རྟོགས་མེད་པ་དེ་ཡི་དོན། །ཡང་ན་ལས་བྱང་རྒྱས་བསྡུས་གཉིས་པོ་ཡི། །མངོན་རྟོགས་དཀྲུགས་ནས་གཞུང་ལྟར་བཏོན་ཀྱང་རུང་། །བཅའ་ཚོགས་ལས་བྱང་འདོན་ཚུལ་སྤྱི་དང་མཐུན། །མངོན་རྟོགས་དཀྲུགས་དང་གཙོ་བོའི་སྔགས་ཀྱིས་བསྒྱུར། །དང་པོ་ལས་བྱང་གཏེར་གཞུང་ཡོད་ལྟར་འདོན། །ཀུན་བཟང་ཡབ་ཡུམ་ཐུགས་ཀར་ཟླ་བའི་སྟེང་། །ཡབ་ཀྱི་ཐུགས་ཀར་ཧཱུཾ་མཐར་
སྔགས་གཡས་འཁོར། །ཡུམ་གྱི་ཐུགས་ཀར་ཨ་ཡིག་སྔགས་གཡོན་བསྐོར། །དེ་ལྟར་བསྒོམས་ཤིང་བསྙེན་པ་བྱེད་པའི་སྐབས། །སྔགས་ལས་འོད་ཟེར་ཕྱོགས་བཅུར་འཕྲོས་པ་ཡིས། །རྒྱལ་བ་ཀུན་མཆོད་ཐུགས་ཀྱི་ཡེ་ཤེས་བསྡུས། །འོད་ཟེར་མཐིང་གའི་རྣམ་པར་བདག་ལ་ཐིམ། །འོད་ཀྱིས་སེམས་ཅན་ཀུན་གྱི་མ་རིག་བསལ། །རང་རིག་ཆོས་སྐུ་ཡེ་ཤེས་དོན་རྟོགས་བསྒོམས། །བདག་མདུན་བུམ་པའི་ལྷ་ཚོགས་ཐམས་ཅད་ཀྱིས། །སྔགས་སྒྲ་འུར་འུར་དིར་དིར་སྒྲོག་པར་བསམ། །ཧཱུྃ་བཛྲ་ཙིཏྟ་ཨཱཿ བཛྲ་ས་མནྟ་བྷ་དྲ་ཨོ། ཞེས་པ་དེ་ལ་ཅི་ནུས་བསྙེན་པ་འབད། །རྒྱས་པར་སྤྲོ་ན་བཏགས་གྲོལ་དབུར་ཡོད་པའི། །ཨེ་མ་ཀི་རི་ཀི་རི་ལ་སོགས་པའི། །ཡབ་ཡུམ་དགོངས་པ་ཚར་ནི་བདུན་ཙམ་བརྗོད། །བསྡུ་ན་བཏགས་གྲོལ་འབྲུ་དྲུག་ཕྲེང་སྐོར་བཟླས།་།དེ་རྗེས་བོ་དྷི་ཙིཏྟ་ཅུང་ཟད་བརྗོད། །དེ་ནི་ཀུན་བཟང་ཞི་ཁྲོའི་སྒྲུབ་པ་སྟེ། །ཉམས་རྟོགས་འཕེལ་བྱེད་ཆོས་སྐུའི་སྒྲུབ་པ་ཡིན། །ཨྠྀི། ༡ དེ་ནས་ཞི་ཁྲོ་ལོངས་སྐུའི་སྒྲུབ་པ་ནི། །ཡང་ནི་མངོན་རྟོགས་བཅོས་མེད་གཏེར་གཞུང་ལྟར། །རང་རང་ཐུགས་ཀར་རང་རང་ས་བོན་མཐར། །རང་རང་སོ་སོའི་སྔགས་ཀྱིས་བསྐོར་
བར་བསྒོམས། །ཡབ་རྣམས་གཡས་བསྐོར་ཡུམ་རྣམས་གཡོན་དུ་འཁོར། །ཞི་བར་ཟླ་གདན་ཁྲོ་བོར་ཉི་གདན་བསྒོམས། །བདག་མདུན་བུམ་པའི་ལྷ་ཚོགས་ཐམས་ཅད་ཀྱིས། །བཟླ་བྱའི་སྔགས་འདི་འུར་འུར་དིར་དིར་སྒྲོག །འོད་འཕྲོས་རྒྱལ་བ་ཀུན་མཆོད་བྱིན་རླབས་བསྡུས། །སེམས་ཅན་ཀུན་གྱི་སྒྲིབ་པ་སྦྱངས་བར་བསྒོམས། །བོ་དྷི་ཙིཏྟ་ཁོ་ན་བསྙེན་པ་བྱ། །ཞི་ཁྲོ་དམ་པ་རིགས་བརྒྱའི་སྤྱི་བསྒྲུབ་ཡིན།། །ཨྠྀི། ༢ ཡང་ན་མངོན་རྟོགས་སྔོན་དང་འདྲ་བ་ལས། །རྣམ་སྣང་ཞབས་ནི་སེམས་དཔའི་སྐྱིལ་ཀྲུང་བཞུགས་།རྣམ་སྣང་ཐུགས་ཀར་ཟླ་སྟེང་ཨོཾ་གྱི་མཐར། །བུདྡྷཱ་རིགས་ཀྱི་ཡིག་བརྒྱ་གཡས་སུ་འཁོར། །དེ་ལས་འོད་ཟེར་ཕྱོགས་བཅུར་འཕྲོས་པ་ཡིས། །སངས་རྒྱས་བདེ་གཤེགས་རིགས་ཀུན་ཐམས་ཅད་མཆོད། །སྐུ་ཡི་བྱིན་རླབས་ཚུར་འདུས་བདག་མདུན་ཐིམ། །སླར་ཡང་འོད་འཕྲོས་འགྲོ་བའི་གཏི་མུག་སྦྱངས། །ཁྱད་པར་དུད་འགྲོའི་འཇིག་རྟེན་སྒྲིབ་སྦྱངས་ནས། །འགྲོ་ཀུན་རྣམ་སྣང་སྐུར་གྱུར་སྔགས་སྒྲ་སྒྲོག །ཨོ་བུདྡྷ་སཏཱ་ས་མ་ཡ། །ཞེས་སོགས་བདེ་གཤེགས་རིགས་ཀྱི་ཡིག་བརྒྱ་བཟླས། །ཡིག་བརྒྱ་མི་ཤེས་ཁྲོམ་ཚོགས་སོགས་ཡོད་
ན། །ཨོ་བུདྡྷ་སཏྭ་ཧཱུཾ། ཞེས་པ་དེ་ཉིད་འདོན་དུ་བཅུག །གཏི་མུག་སྒོ་ནས་སྡིག་སྒྲིབ་ཆེར་བསགས་ནས། །དཀྱིལ་འཁོར་འདི་ཉིད་བསྒོམ་བཟླས་བྱས་པས་དག །དུད་འགྲོའི་ན་རཀ་དོང་སྤྲུགས་ཆོ་ག་ཡིན། ༣ ཡང་ན་མངོན་རྟོགས་གཞུང་དང་འདྲ་བ་ལས། །རྣམ་སྣང་ཞབས་གཉིས་སྐྱིལ་ཀྲུང་བཞུགས་པ་ཡི། །ཐུགས་ཀར་ཟླ་སྟེང་ཨོ་ཡིག་དཀར་པོའི་མཐར། །སྔགས་ཕྲེང་དཀར་པོ་གཡས་སུ་འཁོར་བ་དང་། །ཡུམ་གྱི་ཐུགས་ཀར་མཾ༔ཡིག་སྔགས་གཡོན་འཁོར། །དེ་ལས་འོད་ཟེར་དཀར་པོ་ཕྱོགས་བཅུར་འཕྲོས། །སངས་རྒྱས་ཀུན་གྱི་སྐུ་ལ་མཉེས་མཆོད་འབུལ། །འགྱུར་མེད་སྐུ་ཡི་དངོས་གྲུབ་བདག་ལ་བསྡུ། །འོད་འཕྲོས་སེམས་ཅན་ཀུན་གྱི་ལུས་སྒྲིབ་སྦྱངས། །ཀུན་ཀྱང་སྐུ་མཆོག་རྣམ་སྣང་གོ་འཕང་ཐོབ། །ལྷ་ཚོགས་ཀུན་གྱིས་སྔགས་སྒྲ་སྒྲོགས་པར་བསྒོམ། །ༀ་ཛི་ན་ཛིཀ྄། ལཾ་ཏེ་ཤྭ་ར་ཏི་ནཱཾ། དེ་ལྟར་བསྒྲུབས་པས་སྐུ་ཡི་དངོས་གྲུབ་ཐོབ། །དེ་ནི་ཞི་ཁྲོ་སྐུ་ཡི་བསྒྲུབ་པ་ཡིན།། །ཨྠྀི། ༤ ཡང་ནི་མངོན་རྟོགས་གཏེར་གཞུང་བསླད་མེད་ལ། །ལས་བྱང་ཉུང་བར་བྱེད་ན་ཆེ་མཆོག་སབ། །ཆེ་མཆོག་ཐུགས་ཀར་ཉི་སྟེང་ཧཱུྃ་ཡིག་མཐར། །ཡབ་
ཀྱི་སྔགས་ནི་གཡས་སུ་འཁོར་བར་བསམ། །ཡུམ་གྱི་ཐུགས་ཀར་ཧཱུཾ་མཐར་སྔགས་གཡོན་འཁོར། །དེ་ལས་འོད་ཟེར་སྨུག་ནག་སྟེང་དུ་འཕྲོས། །སྟེང་ཕྱོགས་དུར་ཁྲོད་མེ་རི་འབར་བ་ནས། །ཆེ་མཆོག་ཁྲག་འཐུང་དྲུག་ཅུ་ཐམ་པའི་ལྷ། །སྐུ་དང་སྔགས་ཕྲེང་ཕྱག་མཚན་སྣ་ཚོགས་པ། །ཆར་བཞིན་བབས་ནས་བདག་མདུན་བུམ་པར་བསྟིམ། །ཨོ་མ་ཧཱ་ཀྲོ་དྷ་ཤྲཱི་ཧེ་རུ་ཀ་ཧཱུྃ་ཕཊ༔ མ་ཧཱ་ཀྲོ་ཏི་ཤྭ་རི་ཧཱུཾ། ཞེས་པ་ཅི་ནུས་བསྙེན་པ་བྱས་པའི་རྗེས། །བོ་དྷི་ཙིཏྟ་ཅུང་ཟད་བཟླ་བ་ནི། །ཆེ་མཆོག་ཞི་ཁྲོའི་དཀྱིལ་འཁོར་བསྒྲུབ་པ་ཡིན།། ཨྠྀི། ༥ ཡང་ན་མངོན་རྟོགས་གཏེར་གཞུང་སྔོན་ལྟར་ལས། །གཙོ་བོ་བུདྡྷ་ཁྲག་འཐུང་ང་རྒྱལ་བཟུང་། །ཡབ་ཡུམ་ཐུགས་ཀར་ཧཱུྃ་ཡིག་རང་མདོག་མཐར། །སྔགས་ཕྲེང་གཡས་དང་གཡོན་དུ་འཁོར་བར་བསམ། །ཡབ་ཀྱི་སྔགས་ལས་སྔགས་ཕྲེང་གཅིག་འཕྲོས་ཏེ། །བཟླ་བྱའི་སྔགས་ཕྲེང་ཡབ་ཀྱི་ཞལ་ནས་ཐོན། །ཡུམ་གྱི་ཞལ་ཞུགས་སྐུ་ཡི་དབྱིབས་བརྒྱུད་ནས། །རྡོ་རྗེའི་སྦུབས་ནས་ཡབ་ཀྱི་ཐུགས་ཀར་ཐིམ། །དེ་ལྟར་མགལ་མེའི་འཁོར་ལོ་ལྟར་འཁོར་བས། །ཡབ་ཡུམ་སྦྱོར་མཚམས་རང་འདྲ་དཔག་མེད་སྤྲོས། །རྒྱལ་བ་ཀུན་ལ་སྐུ་
ཡིས་མཉེས་མཆོད་ཕུལ། །འགྲོ་བའི་ལུས་སྒྲིབ་གཏི་མུག་ཐམས་ཅད་བསྲེགས། །སྐུ་ཡི་བྱིན་རླབས་འགྲོ་བའི་གཟི་བརྗིད་བསྡུས། །ཡུམ་གྱི་ཐུགས་ཀར་ཐིམ་པས་འོད་དུ་ཞུ། །བྷ་གར་འཁྱིལ་བས་རྡོ་རྗེའི་སྦུབས་ནས་དྲངས། །རང་ལ་ཐིམ་པས་བཀྲག་མདངས་མཐུ་སྟོབས་རྒྱས། །བདག་མདུན་ལྷ་ཚོགས་ཀུན་གྱིས་སྔགས་སྒྲ་སྒྲོག །ཨོཾ་བུདྡྷ་ཀྲོ་ཏ་མ་ཧཱ་ཤྲཱི་ཧེ་རུ་ཀ་ཧཱུྃ་ཕཊ༔ བུདྡྷ་ཀྲོ་ཏི་ཤྭ་རི་སྟེ། ཞེས་པ་ཅི་ནུས་བཟླས་རྗེས་བོ་དྷི་བཟླས། །ཞི་ཁྲོ་བུདྡྷ་ཁྲག་འཐུང་བསྒྲུབ་པ་ཡིན།། །ཨྠྀི། ༦ ཡང་ནི་མངོན་རྟོགས་གཏེར་གཞུང་ཡོད་ཚུགས་ལ། །ཞི་བའི་ཐུགས་ཀར་ཟླ་སྟེང་ས་བོན་མཐར། །རང་རང་སྙིང་པོས་གཡས་སུ་ཡབ་སྔགས་འཁོར། །ཡུམ་རྣམས་གཡོན་འཁོར་ཁྲོ་བོ་རྣམས་ཀྱི་ནི། །ཐུགས་ཀར་སྔགས་ཕྲེང་དེ་ལྟར་འཁོར་བ་ལས། །འོད་ཟེར་ཁ་དོག་སྣ་ཚོགས་ཕྱོགས་བཅུར་འཕྲོས། །ཕྱོགས་བཅུའི་རྒྱལ་བ་ཞི་ཁྲོ་རབ་འབྱམས་མཆོད། །དེ་རྣམས་སྐུ་ལས་དམ་པ་རིགས་བརྒྱའི་སྐུ། །གསུང་ལས་བཏགས་གྲོལ་སྔགས་ཕྲེང་གསེར་གྱི་མདོག །ཐུགས་ལས་མཆོད་རྟེན་རིང་བསྲེལ་ཁ་དོག་ལྔ། །འཇའ་འོད་ཐིག་ལེ་ཐིག་ཕྲན་དང་བཅས་པ། །ཆར་བཞིན་བབས་ནས་རང་ལ་སིབ་
སིམ་ཐིམ། །སླར་ཡང་འོད་འཕྲོས་འགྲོ་དྲུག་སྒྲིབ་པ་སྦྱངས། །ཀུན་ཀྱང་ཀ་དག་ཀློང་དུ་གྲོལ་བར་བསྒོམ། །བཏགས་གྲོལ་ཕུང་པོ་རང་གྲོལ་དེ་ཉིད་ཀྱི། །ཡབ་ཡུམ་དགོངས་པ་ཉི་ཤུ་རྩ་གཅིག་རེ། །རིགས་ལྔ་ཡབ་ཡུམ་ལྔ་ལ་བརྒྱ་ཕྲག་རེ། །གཞན་རྣམས་སྔགས་ལ་ཚར་ནི་བདུན་བདུན་རེ། །སྒྲུབ་པ་བྱེད་ན་ཐུན་རེར་དེ་ཙམ་སྟེ། །ཞག་རེ་ལའང་ཐུན་ནི་བཞི་འམ་གསུམ། །ཞག་ནི་བདུན་ནམ་བཅུ་བཞི་ཉེར་གཅིག་བསྒྲུབ། །རྒྱུན་ཁྱེར་བྱེད་ན་བཏགས་གྲོལ་ཚང་མ་དེ། །ཚར་ནི་གསུམ་ལྔ་བདུན་སོགས་ཅི་ལྕོགས་བཟླས་། །བཏགས་གྲོལ་བྲིས་པ་ཡོད་ན་ཕུ་བཏབ་སྔགས། །བཏགས་གྲོལ་རབ་གནས་བྱེད་པའི་དུས་སུ་ཡང་། །དཀྱིལ་འཁོར་དབུས་སུ་བཏགས་གྲོལ་བཞག་བྱས་ལ། །རྗེས་ནས་མདུན་བསྐྱེད་ལྷ་རྣམས་བཏགས་གྲོལ་བསྟིམ། །དེ་ནི་ཞི་ཁྲོ་བཏགས་གྲོལ་བསྒྲུབ་པ་ཡིན།། ཨྠྀི། ༧ ཡང་ནི་མངོན་རྟོགས་སྔོན་བཞིན་གོང་ལྟར་ལས། །རང་ཉིད་གཙོ་བོ་ཀུན་བཟང་ང་རྒྱལ་བཟུང་། །དང་པོ་བོ་དྷི་ཙིཏྟ་ཅུང་ཟད་བཟླ། །དེ་ནས་བདག་མདུན་བུམ་པའི་ལྷ་ཚོགས་ཀྱི། །འོག་ཕྱོགས་བཞུགས་པའི་ཆོས་རྒྱལ་ཐུགས་ཀ་རུ། །ཟླ་སྟེང་ཨེ་ཡིག་
མཐིང་ནག་མཐའ་སྐོར་དུ། །སྔགས་ཕྲེང་གཡས་བསྐོར་འོད་ཟེར་མཐིང་ནག་འཕྲོས། །བདག་དང་འབྲེལ་ཐོགས་གསོན་པོ་ཐམས་ཅད་ཀྱི། །རྐང་མཐིལ་གཡས་གཡོན་ཚ་དམྱལ་གྲང་དམྱལ་དུ། །སྐྱེ་བའི་ས་བོན་དུཡིག་ནག་པོ་དེ། །བ་མོར་ཉི་ཟེར་ཕོག་ལྟར་བཅོམ་པར་བྱས། །སླར་ཡང་འོད་ཟེར་དམྱལ་བའི་གནས་སུ་འཕྲོས། །ཚ་དམྱལ་བརྒྱད་པོ་བསིལ་ཞིང་གྲང་བས་བཅོམ། །གྲང་དམྱལ་བརྒྱད་པོ་དྲོད་ཕེབས་བདེ་བར་ལྡན། །སྡུག་བསྔལ་ཀུན་བྲལ་མངོན་དགའི་ཞིང་ལྟར་གྱུར། །ཨོཾ་མུ་ནེ་ཡེ་སྭཱ་ཧཱ། ཞེས་པ་དེ་ལ་ཅི་ཙམ་ནུས་པ་བཟླ་། བདག་ཉིད་ཀུན་བཟང་ཐུགས་ལས་འོད་འཕྲོས་པས། །ཁ་འབར་ཐུགས་ཀར་ཟླ་སྟེང་ཧཱུྃཡིག་མཐར། །སྔགས་ཕྲེང་འཁོར་ལས་འོད་ཟེར་དམར་པོ་འཕྲོས། །བདག་སོགས་དམིགས་ཡུལ་རྣམས་ཀྱི་གསང་བར་ཕོག །ཡི་དྭགས་ས་བོན་པྲ་ཡིག་དམར་པོ་བཅོམ། །སླར་ཡང་འོད་ཟེར་ཡི་དྭགས་ཡུལ་དུ་འཕྲོས། །བཟའ་བཏུང་ཟས་གོས་ལ་སོགས་ཆར་ཆེན་བབ། །དཔལ་ལྡན་ཞིང་ལྟར་ལོངས་སྤྱོད་ཕུན་ཚོགས་གྱུར། །ཨོཾ་མུ་ནེ་ཧཱུཾ་སྭཱ་ཧཱ། །རང་ཉིད་ཀུན་བཟང་ཐུགས་ལས་འོད་ཟེར་འཕྲོས། །བདག་མདུན་སེང་གེ་རབ་བརྟན་སྐུ་
ལ་ཕོག །ཐུགས་ཀར་ཟླ་སྟེང་ཀྱི་མཐར་སྔགས་ཕྲེང་འཁོར། །དེ་ལས་འོད་ཟེར་སྨུག་ནག་འཕྲོས་པ་ཡིས། །བདག་སོགས་ལྟེ་བར་དུད་འགྲོའི་ས་བོན་ནི། །ཡི་གེ་ཏྲཿཡིག་དུད་ཀ་བཅོམ་པར་བྱས། །སླར་ཡང་འོད་འཕྲོས་དུད་འགྲོ་ཀུན་ལ་ཕོག །གཏི་མུག་བཅོམ་པས་ཤེས་རབ་ཕུན་སུམ་ཚོགས། །འཐུག་པོ་བཀོད་ལྟར་དག་པའི་ཞིང་དུ་བསྒྱུར། །ཨོཾ་མུ་ནེ་ཀྵ་སྭཱ་ཧཱ། བདག་ཉིད་ཀུན་བཟང་ཐུགས་ལས་འོད་ཟེར་འཕྲོས། །ཤཱཀ་ཐུབ་ཐུགས་ཀར་ཟླ་སྟེང་ཧཱུྃ་གི་མཐར། །སྔགས་ཕྲེང་འཁོར་ལས་འོད་ཟེར་གསེར་མདོག་འཕྲོས། །སྟོང་གསུམ་གླིང་བཞིའི་མི་རྣམས་ཀུན་ལ་ཕོག །ཁྲེལ་འཕོངས་སྐྱེ་འཆི་བཅོམ་ནས་བདེ་བར་བཀོད། །ཨོཾ་མུ་ནེ་ཏུཾ་སྭཱ་ཧཱ། ཀྲྀ་ཡིག་སྦྱོངས་བར་མི་བསྒོམ་ཚེ་ལ་གནོད། །བདག་ཉིད་ཀུན་བཟང་ཐུགས་ལས་འོད་ཟེར་འཕྲོས། །ལྷ་མིན་ཐུབ་པའི་སྐུ་ལ་ཕོག་པ་ཡིས། །ཐུགས་ཀར་བྲི་མཐར་སྔགས་ཕྲེང་གཡོན་དུ་འཁོར། །དེ་ལས་འོད་ཟེར་ལྗང་གུ་འཕྲོས་པ་ཡིས། །བདག་སོགས་མགྲིན་པར་ལྷ་མིན་ས་བོན་ནི། །སུ་ཡིག་དམར་པོ་ཡོད་པས་དངོས་མེད་བཅོམ། །སླར་ཡང་འོད་འཕྲོས་ལྷ་མིན་གནས་སུ་ཕོག །ཕྲག་དོག་འཐབ་རྩོད་ཞི་
ནས་བྱང་སེམས་ལྡན། །ལས་རབ་ཞིང་ལྟར་བདེ་སྐྱིད་ལྡན་པར་གྱུར། །ཨོཾ་མུ་ནེ་བྲེ་སྭཱ་ཧཱ། བདག་ཉིད་ཀུན་བཟང་ཐུགས་ཀྱི་འོད་ཟེར་གྱིས། །བདག་མདུན་ལྷ་ཡི་ཐུབ་པ་བསྐུལ་བྱས་ཏེ། །ཐུགས་ཀར་ཀྲི་མཐར་སྔགས་ཕྲེང་གཡས་སུ་འཁོར། །དེ་ལས་འོད་འཕྲོས་བདག་དང་དམིགས་ཡུལ་གྱི། །སྤྱི་གཙུག་ཨ་དཀར་ལྷ་ཡི་ས་བོན་བཅོམ། །སླར་ཡང་འོད་ཟེར་དཀར་པོ་སྟེང་དུ་འཕྲོས། །ཕམ་ལྟུང་ལྷ་ཡི་སྡུག་བསྔལ་ཀུན་སྦྱངས་ནས། །དཔལ་དང་ལྡན་པའི་ཞིང་ཁམས་ལྟ་བུར་གྱུར། །ཨོཾ་མུ་ནེ་ཀྲེ་སྭཱ་ཧཱ། ཞེ་སྡང་ཤས་ཆེ་དམྱལ་བའི་རྒྱུ་ཡིན་ཏེ། །འདོད་ཆགས་སེར་སྣ་ཡི་དྭགས་སྐྱེ་བའི་རྒྱུ། །མི་ཤེས་བླུན་རྨོངས་སྐུར་འདེབས་དུད་འགྲོའི་རྒྱུ། །དགེ་བ་འདོད་ཆགས་སེར་སྣ་འདྲེས་པའི་མི། །དགེ་བ་ཕྲག་དོག་འདྲེས་པ་ལྷ་མ་ཡིན། །དགེ་བ་ཆེར་བྱས་ང་རྒྱལ་འདྲེས་པ་ལྷ། །དེ་དག་རང་གི་རྒྱུད་ལ་ལེགས་པར་བརྟག །སོ་སོའི་སྐྱེ་སྒོ་གཅོད་པ་ཐུབ་པའི་སྔགས། །དེ་ནི་ཅི་མང་གཞན་རྣམས་ཅུང་ཟད་བཟླ་། །དེ་ནས་བཏགས་གྲོལ་འབྲུ་དྲུག་ཅུང་ཟད་བཟླ། །དེ་ནི་ཞི་ཁྲོ་སྤྲུལ་སྐུའི་བསྒྲུབ་པ་སྟེ། །གསོན་པོ་རྣམས་ཀྱི་སྐྱེ་སྒོ་གཅོད་ཐབས་དང་། །གཤིན་པོ་ཡིན་ན་རིགས་དྲུག་གནས་
སྦྱོང་ཟབ། །གར་སྐྱེ་ཤེས་ན་དེ་ཡི་སྔགས་དམིགས་འབད།། །ཨྠྀི། ༨ དེ་ནས་ལས་བྱང་ལ་སོགས་གཞུང་ལྟར་ལས། །རྣམ་པར་སྣང་མཛད་བུདྨ་ཁྲག་འཐུང་གཉིས། །ཤར་དུ་བསྒོམ་ཞིང་རྣམ་པར་སྣང་མཛད་ལ། །རྡོ་རྗེ་རིགས་ཀྱི་སེམས་དཔའ་སེམས་མས་བསྐོར། །རྡོར་སེམས་བཛྲ་ཁྲག་འཐུང་དབུས་སུ་བསྒོམ། །རྡོར་སེམས་རྣམ་སྣང་གཉིས་པོ་གོ་བརྗེ་བ། །རྫོགས་ཆེན་རྒྱུད་གཞུང་ཕལ་ཆེར་རྣམས་ནས་གསུངས། །ལྷ་ཚོགས་དམ་པ་རིགས་བརྒྱའི་ཐུགས་ཀ་རུ། །རང་རང་ས་བོན་རང་རང་སྔགས་ཀྱིས་བསྐོར། །འཁོར་ནི་མི་དགོས་སྔགས་ཕྲེང་བཀོད་པ་ཡིན། །དཀྱིལ་འཁོར་གཙོ་བོ་རྡོར་སེམས་ཐུགས་ཀ་རུ། །ཧཱུྃ་ཡིག་དཀར་ལ་སྔོ་མདངས་ཆགས་པའི་མཐར། །ཡིག་བརྒྱ་མུ་ཏིག་མདོག་འདྲ་གཡས་སུ་འཁོར། །བདག་མདུན་ལྷ་ཚོགས་ཀུན་གྱིས་ཡིག་བརྒྱ་སྒྲོག །བདག་བསྐྱེད་ཐུགས་ཀའི་འོད་ཟེར་མདུན་བསྐྱེད་བསྐུལ། །མདུན་བསྐྱེད་སྐུ་ལས་འོད་ཟེར་ཉི་ཟེར་འདྲ། །རེ་རེའི་རྩེ་ལ་རྡོ་རྗེ་སེམས་དཔའ་རེ། །ཐུགས་ཀར་ཟླ་སྟེང་སྔགས་ཕྲེང་དང་བཅས་པ། །སྦྱིན་བདག་ཚེ་འདས་ལ་སོགས་དམིགས་ཡུལ་ནི། །རེ་རེའི་སྤྱི་བོར་རྡོར་སེམས་ཡབ་ཡུམ་རེ། །
སྦྱོར་མཚམས་བྱང་སེམས་བདུད་རྩིའི་རྒྱུན་བབས་པས། །ཚངས་བུག་ནས་ཞུགས་ལུས་ཀྱི་ཕྱི་ནང་བཀྲུས། །སྡིག་སྒྲིབ་ཀུན་དག་ཤེལ་སྒོང་ལྟ་བུར་གྱུར། །ཡི་གེ་བརྒྱ་པ་ཅི་ནུས་བཟླས་པའི་རྗེས། །བོ་དྷི་ཙིཏྟ་ཅུང་ཟད་བཟླ་བར་བྱ། །ཞི་ཁྲོ་ན་རཀ་དོང་སྤྲུགས་དཀྱིལ་འཁོར་ཡིན། །ཚེ་འདས་དོན་ནམ་གསོན་པོའི་སྒྲིབ་སྦྱོངས་ལ། །ཞི་ཁྲོ་བླུགས་ཚེ་འདི་ཉིད་བྱ་བ་གཅེས་།་།དབང་བསྐུར་གནས་སྤར་འགྲོ་དྲུག་རང་གྲོལ་ལ། །རིགས་དྲུག་གནས་འདྲེན་དུས་སུ་འདི་ཡིན་ཏེ། །རྒྱས་པར་གྲུབ་ན་རྒྱུད་ནས་གསུངས་པ་ལྟར། །རིགས་དྲུག་ཡིག་བརྒྱ་དྲུག་ཀྱང་ཅི་འགྲུབ་བཟླ། །ཡིག་བརྒྱ་ལྔ་པོ་གཅིག་བསྡུས་ཡིག་བརྒྱ་ནི། །ཨོཾ་ཨཱཧཱུྃ་སྭཱ་ཧཱ། ཨོཾ་བཛྲ་སཏྭ་ས་མ་ཡ། ཞེས་སོགས་བཟླ་བ་གཅིག་བསྡུས་ཡིག་བརྒྱ་ཡིན། །དེ་དོན་ན་རཀ་དོང་སྤྲུགས་རྒྱུད་ན་གསལ། །གསར་རྙིང་ཡིག་བརྒྱ་ཅུང་ཟད་མི་འདྲ་སྟེ། །ཧྲི་ད་ཡ་འབྱར་རྙིང་མའི་ཡིག་བརྒྱ་སྟེ། །ཡིག་བརྒྱ་རིགས་དྲུག་དེ་ཡི་ལུགས་སུ་དགོངས།་།རྩ་བའི་ཡིག་བརྒྱ་གསར་མ་དང་མཚུངས་ཆོག། །ཨྠྀི། ༩ ཡང་ན་གཙོ་བོ་རྡོར་སེམས་ཐུགས་ཀ་རུ། །ཟླ་སྟེང་ཧཱུཾ་མཐིང་ཐ་མར་སྔགས་གཡས་འཁོར། །ཡུམ་གྱི་ཐུགས་ཀར་ཚུ་
མཐར་སྔགས་གཡོན་འཁོར། །དེ་ལས་འོད་ཟེར་མཐིང་ནག་ཕྱོགས་བཅུར་འཕྲོས། །བདེ་གཤེགས་ཀུན་གྱི་ཐུགས་ལ་མཆོད་པ་འབུལ། །ཐུགས་ཀྱི་བྱིན་རླབས་།དངོས་གྲུབ་ཚུར་འདུས་བསྟིམ། །འོད་འཕྲོས་སེམས་ཅན་ཀུན་གྱི་ཡིད་སྒྲིབ་སྦྱོངས། །རྡོ་རྗེ་སེམས་དཔའི་གོ་འཕང་ལ་བཀོད་བསྒོམ། །ཧཱུྃ་བཛྲ་དྷིཀ྄ ཧུཾ་དྷ་ཏུ་ཤྭ་རི་ཧཱུྃ། ཅི་ནུས་བཟླས་རྗེས་བྷོ་དྷི་ཅུང་ཟད་བཟླས། །དེ་ནི་ཞི་ཁྲོ་ཐུགས་ཀྱི་དཀྱིལ་འཁོར་ཡིན།།་།ཨྠྀི། ༡༠ ཡང་ནི་མངོན་རྟོགས་གོང་དང་འདྲ་བ་ལ། །རྡོར་སེམས་ཞབས་ནི་སེམས་དཔའི་སྐྱིལ་ཀྲུང་ཅན། །ཐུགས་ཀའི་སྔགས་ཕྲེང་འོད་ཟེར་འཕྲོས་པ་ཡིས། །བདག་དང་འགྲོ་བའི་ཞེ་སྡང་སྒྲིབ་པ་བཅོམ། །འོད་ཟེར་མཐིང་ག་དམྱལ་བའི་གནས་སུ་འཕྲོས། །དམྱལ་བའི་འཇིག་རྟེན་མངོན་དགའི་ཞིང་དུ་བསྒྱུར། །དམྱལ་བའི་སེམས་ཅན་རྡོར་སེམས་ཡབ་ཡུམ་བསྒྱུར། །ཀུན་ཀྱང་སྔགས་བཟླས་དམྱལ་བ་དོང་ནས་སྤྲུགས། །ཧཱུྃ་བཛྲ་སཏཱ་ས་མ་ཡ། །ཞེས་སོགས་རྡོ་རྗེ་རིགས་ཀྱི་ཡིག་བརྒྱ་བཟླ། །ཞི་ཁྲོ་སོགས་ཡིག་བརྒྱ་བཟླ་མི་ཤེས་པ་ལ། ཨོཾ་བཛྲ་སཏྭ་ཧཱུཾ། ཞེས་འདོན་དུ་བཅུག །དམྱལ་བའི་ན་རཀ་དོང་སྤྲུགས་ཞི་ཁྲོ་ཡིན།། །
སྤྱི། ༡༡ དཀྱིལ་འཁོར་གཙོ་བོ་བཛྲ་ཧེ་རུ་ཀ །ཡབ་ཡུམ་ཐུགས་ཀར་པད་ཟླ་ཉི་མའི་སྟེང་། །ཡབ་ཀྱི་ཐུགས་ཀར་ཧཱུཾ་ནི་ལོག་པ་སྟེ།་།ཡུམ་གྱི་ཐུགས་ཀར་ཧཱུྃ་དང་དེ་གཉིས་ཀྱི། །ཧ་གཉིས་ཁ་སྤྲོད་ཞལ་སྦྱོར་ཚུལ་དུ་བསྒོམ། །ཡབ་ཀྱི་ཐུགས་ཀར་ཧཱུཾ་མཐར་སྔགས་གཡས་འཁོར། །ཡུམ་གྱི་ཐུགས་ཀར་ཧཱུཾ་མཐར་སྔགས་གཡོན་འཁོར། །དེ་གཉིས་དྲག་ཏུ་འཁོར་བའི་འོད་ཟེར་ལས། །ཡབ་ཡུམ་སྔགས་རྣམས་འབྲེལ་བའི་སྔགས་ཕྲེང་བྱུང་། །བདག་བསྐྱེད་རྐྱང་པར་ཡབ་ཡུམ་ཞལ་དུ་འཁོར། །མདུན་བསྐྱེད་ཡོད་ན་བདག་གི་ཞལ་ནས་ཐོན། །མདུན་གྱི་ཞལ་ཞུགས་སྐུ་ཡི་དབྱིབས་བརྒྱུད་ནས། །སྦྱོར་མཚམས་ནས་ཐོན་རང་གི་སྦྱོར་མཚམས་ནས། །ཡར་ཞུགས་ཐུགས་ཀའི་སྔགས་ཐིམ་དངོས་གྲུབ་ཐོབ། །ཕར་ལ་མཆོད་པ་ཚུར་ལ་དངོས་གྲུབ་ཚུལ། །བར་དུ་འཁོར་ཚེ་སྔགས་ཀྱི་འོད་ཟེར་གྱིས། །རྒྱལ་བ་ཀུན་མཆོད་ཐུགས་ཀྱི་རྒྱུད་བསྐུལ་ནས། །སྐུ་དང་སྔགས་ཕྲེང་ཕྱག་མཚན་ཆར་བཞིན་བབ། །འོད་ཞུ་རང་ལ་ཐིམ་པས་དངོས་གྲུབ་ཐོབ། །སྔགས་ཀྱི་འོད་ཟེར་མེ་དཔུང་ཚྭ་ཚྭ་འཕྲོས། །བདུད་བགེགས་གནོད་བྱེད་གཞོབ་ཏུ་བསྲེག་པར་བསྒོམ། །དམིགས་པ་འདི་ནི་
འོག་མ་ཀུན་ལ་འགྲེ། །སྔགས་ཕྲེང་ཁ་དོག་ལྷ་ཡི་ཁ་དོག་ཡིན། །བདག་བསྐྱེད་རྐྱང་པའི་སྔགས་འཁོར་བསྒོམ་པའི་ཚེ། །སྔགས་ཕྲེང་ཡབ་ཀྱི་ཞལ་ནས་ཡུམ་ཞལ་ཞུགས། །སྐུ་ཡི་དབྱིབས་བརྒྱུད་ཡུམ་གྱི་བྷ་ག་ནས། །རྡོ་རྗེའི་སྦུབ་ནས་ཡར་ལ་ཐུགས་ཀར་ཐིམ། །དེ་ལྟར་བསྒོམས་པས་ཐིག་ལེ་མི་ཉམས་ཤིང་། །ཐིག་ལེ་རང་དབང་ཐོབ་ནས་ཉམས་རྟོགས་འཕེལ། །སྔགས་ཕྲེང་ཡུམ་གྱི་ཞལ་ནས་ཡབ་ཞལ་ཞུགས། །སྐུ་ཡི་དབྱིབས་བརྒྱུད་རྡོ་རྗེའི་སྦུབ་ནས་ཐོན། །ཡུམ་གྱི་བྷ་ག་ནས་ཞུགས་སྐུ་ལུས་བརྒྱུད། །ཡུམ་གྱི་ཞལ་ནས་ཚུར་ལ་ཞུགས་བསྒོམས་པས། །རླུང་ལ་དབང་ཐོབ་རླུང་གི་གེགས་སྐྱོན་སེལ། །སྔགས་ཀྱི་འཁོར་ལུགས་དམིགས་པའི་འཕྲོ་འདུ་དེ། །ཆེ་མཆོག་ཁྲག་འཐུང་དྲུག་པོ་མཚུངས་པ་ཡིན། །ཨོཾ་བཛྲ་ཀྲོ་ཏ་མ་ཧཱ་ཤྲཱི་ཧེ་རུ་ཀ་ཧཱུྃ་ཕཊ༔ བཛྲ་ཀྲོ་ཏི་ཤྭ་རི་ཧཱུཾ། ཞེས་པ་དེ་ལ་ཅི་ནུས་འབད་བྱ་ཞིང་། །བོ་དྷི་ཙིཏྟ་ཅུང་ཟད་བཟླ་བར་བྱ། །དེ་ནི་ཡང་དག་ཐུགས་ཀྱི་བསྒྲུབ་པ་སྟེ། །ཞི་ཁྲོ་རྡོ་རྗེ་ཁྲག་འཐུང་དཀྱིལ་འཁོར་ཡིན།། །ཨྠྀི། ༡༢ ཡང་ནི་གཏེར་གཞུང་ལས་བྱང་ནས་བྱུང་བའི། །རྡོར་སེམས་བཛྲ་ཁྲག་འཐུང་ཤར་དུ་བཀོད། །རྣམ་སྣང་
བུདྡྷ་ཁྲག་འཐུང་ལྷོ་རུ་བཀོད། །རིན་ཆེན་སེམས་དཔའ་སེམས་མ་རྣམ་སྣང་བཀོད། །རིན་འབྱུང་རཏྣ་ཁྲག་འཐུང་དབུས་སུ་བཞུགས། །གཙོ་བོ་རིན་འབྱུང་ཐུགས་ཀར་ཟླ་བའི་སྟེང་། །སཱ་ཡིག་སེར་པོ་སྔགས་ཕྲེང་གཡས་སུ་འཁོར། །ཡུམ་གྱི་ཐུགས་ཀར་མཾ་ཡིག་སྔགས་གཡོན་བསྐོར། །དེ་ལས་འོད་ཟེར་གསེར་མདོག་ཕྱོགས་བཅུར་འཕྲོས། །སངས་རྒྱན་ཀུན་གྱི་ཡོན་ཏན་མཉེས་མཆོད་འབུལ། །ཡོན་ཏན་དངོས་གྲུབ་བྱིན་བརླབས་ཚུར་འདུས་ཐིམ། །སེམས་ཅན་ཀུན་གྱི་ང་རྒྱལ་སྒྲིབ་པ་སྦྱངས། །བདག་མདུན་ལྷ་ཚོགས་ཀུན་གྱིས་སྔགས་སྒྲ་སྒྲོག །སཱ་རཏྣ་དྷིཀ྄ །མཾ་མོ་ཧཱ་ར་ཏི་སིཾ། ཅི་ནུས་བཟླས་རྗེས་བོ་དྷི་ཅུང་ཟད་བཟླ། །དེ་ནི་ཞི་ཁྲོ་ཡོན་ཏན་དཀྱིལ་འཁོར་ཡིན།། །ཨྠྀི། ༡༣ ཡང་ནི་མངོན་རྟོགས་གོང་དང་མཐུན་པ་ལས། །རིན་ཆེན་འབྱུང་ལྡན་སེམས་དཔའི་སྐྱིལ་ཀྲུང་བསྒོམ། །ཐུགས་ཀར་བཟླ་བྱའི་སྔགས་ནི་གཡས་སུ་འཁོར། །དེ་ལས་འོད་ཟེར་སེར་པོའམ་སྣ་ཚོགས་འཕྲོས། །ང་རྒྱལ་སྒོ་ནས་བསགས་པའི་སྡིག་སྒྲིབ་སྦྱངས། །འོད་ཟེར་ལྷ་དང་མི་རྣམས་ཀུན་ལ་ཕོག །ཕམ་ལྟུང་སྐྱེ་འཆི་འགྱུར་བའི་སྡུག་བསྔལ་སྦྱངས། །དཔལ་ལྡན་ཞིང་ལྟར་བདེ་སྐྱིད་ལྡན་པར་
བསྒོམ་། །མདུན་བསྐྱེད་ཐུགས་ལས་རིན་ཆེན་སེམས་དཔའ་སྤྲོས། །དམིགས་ཡུལ་རྣམས་ཀྱི་སྤྱི་བོར་རེ་རེ་བཞུགས། །སྦྱོར་མཚམས་བདུད་རྩིའི་རྒྱུན་བབ་སྡིག་།སྒྲིབ་སྦྱངས། །སྭཱ་རཏྣ་སཏཱ་ས་མཱ་ཡ། ཞེས་སོགས་རིན་ཆེན་རིགས་ཀྱི་ཡིག་བརྒྱ་བཟླས། ཨོཾ་རཏྣ་སཏྭ་ཧཱུཾ། ཁྲོམ་པ་ཡོད་ན་དེ་ཉིད་བཟླས་སུ་བཅུག །ལྷ་དང་མི་ཡི་ན་རཀ་དོང་སྤྲུགས་ཡིན།། །ཨྠྀི། ༡༤ དཀྱིལ་འཁོར་དབུས་ཀྱི་རཏྣ་ཧེ་རུ་ཀ །ཡབ་ཡུམ་ཐུགས་ཀར་ཧཱུཾ་ཡིག་སེར་པོའི་མཐར། །སྔགས་ཕྲེང་འཁོར་དང་འོད་ཟེར་སྤྲོ་བསྡུ་བྱ། །ཨོ་རཏྣ་ཀྲོ་ཏ་མ་ཧཱ་ཤྲཱི་ཧེ་རུ་ཀ་ཧཱུྃ་ཕཊ༔ རཏྣ་ཀྲོ་ཏི་ཤྭ་རི་སྟེ། ཅི་ནུས་བཟླས་རྗེས་བོ་དྷི་ཅུང་ཟད་བཟླ། །ཞི་ཁྲོ་རཏྣ་ཁྲག་འཐུང་དཀྱིལ་འཁོར་ཡིན། །ཨྠྀི། ༡༥ རྣམ་སྣང་བུདྡྷ་ཁྲག་འཐུང་ནུབ་ཏུ་བསྒོམ། །རྣམ་སྣང་སེམས་དཔའ་སེམས་མ་མང་པོས་བསྐོར། །སྣང་མཐའ་པདྨ་ཁྲག་འཐུང་དབུས་སུ་བསྒོམ། །སྣང་མཐའ་ཡབ་ཡུམ་ཐུགས་ཀར་ཟླ་བའི་སྟེང་། །ཡབ་ལ་ཨཱདང་ཡུམ་ལ་པཾགྱི་མཐར། །ཡབ་སྔགས་གཡས་དང་ཡུམ་སྔགས་གཡོན་དུ་འཁོར། །དེ་ལས་འོད་ཟེར་དམར་པོ་ཕྱོགས་བཅུར་འཕྲོས། །སངས་རྒྱས་ཀུན་གྱི་
གསུང་ལ་མཉེས་མཆོད་འབུལ། །སེམས་ཅན་ཀུན་གྱི་འདོད་ཆགས་ངག་སྒྲིབ་སྦྱངས། །གསུང་གི་བྱིན་བརླབས་དངོས་གྲུབ་ཚུར་བསྡུས་བསྟིམ། །ཨོཾ་ཨ་རོ་ལིཀ །པྱོ་རཱ་ག་ར་ཏི་ནྟཾ༔ ཅི་ནུས་བཟླས་རྗེས་བོ་དྷི་ཅུང་ཟད་བཟླ། །དེ་ནི་ཞི་ཁྲོ་གསུང་གི་དཀྱིལ་འཁོར་ཡིན། །ཨྠྀི། ༡༦ སྣང་བ་མཐའ་ཡས་སེམས་དཔའི་སྐྱིལ་ཀྲུང་བསྒོམ། །ཐུགས་ཀར་བཟླ་བྱའི་སྔགས་ཕྲེང་གཡས་སུ་འཁོར། །དེ་ལས་འོད་ཟེར་འཕྲོས་པའི་རྩེ་མོ་རེར། །པདྨ་སེམས་དཔའ་ཡབ་ཡུམ་རེ་རེ་སྟེ། །ཚེ་འདས་ལ་སོགས་དམིགས་ཡུལ་སྤྱི་བོར་བཞུགས། །སྦྱོར་མཚམས་བྱང་སེམས་བདུད་རྩིའི་རྒྱུན་བབ་པས། །འདོད་ཆགས་སེར་སྣའི་སྒྲིབ་པ་ཐམས་ཅད་སྦྱངས། །འོད་ཟེར་ཡི་དྭགས་ཡུལ་དུ་འཕྲོས་པ་ཡིས། །དགོས་འདོད་ཕུན་ཚོགས་བདེ་ཆེན་ཞིང་ལྟར་བསྒྱུར། །བུམ་ལྷའི་སྐུ་ལས་བདུད་རྩིའི་རྒྱུན་བབ་བསྒོམ། །ཨཱཔདྨ་སཏཱ་ས་མཱ་ཡ། ཞེས་སོགས་པདྨ་རིགས་ཀྱི་ཡིག་བརྒྱ་བཟླ། །ཨོཾ་པདྨ་སཏྭ་ཧཱུཾ། དེ་ནི་ཡི་དྭགས་ན་རཀ་དོང་སྤྲུགས་ཡིན། ཨྠྀི། ༡༧ གཙོ་བོ་པདྨ་ཁྲག་འཐུང་ཡབ་ཡུམ་གྱི། །ཐུགས་ཀར་ཧཱུཾ་མཐར་སྔགས་ཀྱིས་བསྐོར་བ་ལས། །སྔགས་འཁོར་འོད་ཟེར་སྤྲོ་བསྡུ་གོང་
དང་མཚུངས། །ཨོཾ་པདྨ་ཀྲོ་ཏ་མ་ཧཱ་ཤྲཱི་ཧེ་རུ་ཀ་ཧཱུྃ་ཕཊ༔ པདྨ་ཀྲོ་ཏི་ཤྭ་རི་ཧཱུཾ། ཅི་ནུས་བཟླས་རྗེས་བོ་དྷི་ཅུང་ཟད་བཟླ། །ཞི་ཁྲོ་པདྨ་ཁྲག་འཐུང་དཀྱིལ་འཁོར་ཡིན།། །ཨྠྀི། ༡༨ དེ་ནས་པདྨ་ཁྲག་འཐུང་རང་མལ་བཞུགས། །རྣམ་སྣང་བུདྡྷ་བྱང་བཞུགས་སེམས་དཔས་བསྐོར། །དོན་གྲུབ་ཀརྨ་ཁྲག་འཐུང་དབུས་སུ་བཞུགས། །ཡབ་ཀྱི་ཐུགས་ཀར་ཧ་ལྗང་སྔགས་གཡས་བསྐོར། །ཡུམ་གྱི་ཐུགས་ཀར་ཏཾ་ལྗང་སྔགས་གཡོན་བསྐོར། །དེ་ལས་འོད་ཟེར་ལྗང་གུ་ཕྱོགས་བཅུར་འཕྲོས། །རྒྱལ་བ་ཀུན་གྱི་ཕྲིན་ལས་མཉེས་མཆོད་འབུལ། །ཕྲིན་ལས་འགྲོ་འདུལ་དངོས་གྲུབ་ཚུར་འདུས་བསྟིམ། །འགྲོ་བ་ཀུན་གྱི་ཕྲག་དོག་སྒྲིབ་པ་སྦྱངས། །དོན་ཡོད་གྲུབ་པའི་གོ་འཕང་ལ་བཞག་གྱུར། །ཧ་པྲཛྙཱ་དྷིཀ། །ཏཾ་བཛྲ་ར་ཏི་སྟེ། ཅི་ནུས་བཟླས་རྗེས་བོ་དྷི་ཅུང་ཟད་བཟླ། །དེ་ནས་ཞི་ཁྲོའི་ཕྲིན་ལས་དཀྱིལ་འཁོར་ཡིན། །ཨྠྀི། ༡༩ དོན་གྲུབ་ཞབས་ནི་སེམས་སྐྱིལ་བཞུགས་པར་བསྒོམ་། །ཐུགས་ཀར་བཟླ་བྱའི་སྔགས་ཕྲེང་གཡས་སུ་འཁོར། །འོད་འཕྲོས་བུམ་ལྷའི་སྐུ་ལས་བདུད་རྩི་བབ། །མདུན་བསྐྱེད་ཐུགས་ལས་སྤྲུལ་པའི་འོད་ཟེར་རྩེར། །ཀརྨ་སེམས་
དཔའ་ཡབ་ཡུམ་སྔགས་ཕྲེང་བཅས། །ཚེ་འདས་ལ་སོགས་དམིགས་བྱའི་སྤྱི་བོར་བཞུགས། །སྦྱོར་མཚམས་བྱང་སེམས་རྒྱུན་བབ་ཕྲག་དོག་སྦྱངས། །སླར་ཡང་འོད་འཕྲོས་ལྷ་མིན་འཇིག་རྟེན་ཁམས། །འཐབ་རྩོད་སྦྱངས་ནས་ལས་རབ་ཞིང་དུ་བསྒྱུར། །ཧ་ཀརྨ་སཏཱ་ས་མཱ་ཡ། ཞེས་སོགས་ཀརྨ་རིགས་ཀྱི་ཡིག་བརྒྱ་བཟླ། །ཨོ་ཀརྨ་སཏྭ་ཧཱུཾ། དེ་ནི་ལྷ་མིན་ན་རཀ་དོང་སྤྲུགས་ཡིན། །ཚེ་འདས་སམ་ནི་གསོན་པོ་གང་ཡིན་ཏེ། །དུག་ལྔའི་སྒྲིབ་པ་གང་ཡིན་བརྟགས་བྱས་ལ། །དོང་སྤྲུགས་ལྔ་པོ་གང་དགོས་སྦྱར་ལ་བྱ། །སྤྱི་ཁྱབ་ཡོངས་ལ་དོང་སྤྲུགས་ཆེན་མོ་བྱ། །ཨྠྀི། ༢༠ ཀརྨ་ཁྲག་འཐུང་ཡབ་ཡུམ་ཐུགས་ཀ་རུ། །ཧཱུྃ་ཧཱུྃ་མཐའ་ལ་སྔགས་ཕྲེང་གཡས་སུ་འཁོར། །སྤྲོ་བསྡུ་སྔགས་ཕྲེང་དམིགས་པ་གོང་ལྟར་བྱ། །ཨོ་ཀརྨ་ཀྲོ་ཏ་མ་ཧཱ་ཤྲཱི་ཧེ་རུ་ཀ་ཧཱུྃ་ཕཊ༔ ཀརྨ་ཀྲོ་ཏི་ཤྭ་རི་ཧཱུྃ། ཅི་ནུས་བཟླས་རྗེས་བོ་དྷི་ཅུང་ཟད་བཟླ། །ཞི་ཁྲོ་ཀརྨ་ཁྲག་འཐུང་དཀྱིལ་འཁོར་ཡིན། ༢༡ དེ་ལྟར་བསྐྱེད་པ་མ་ཧཱ་ཡོ་གའི་ལུགས། །རྡུལ་ཚོན་རས་བྲིས་ཚོམ་བུ་གང་ཡིན་ལ། །བརྟེན་ནས་ཞི་ཁྲོ་སྤྱི་ལྟར་བསྒྲུབ་པའི་ཚུལ། །ལས་བྱང་གསུམ་པོ་གང་རུང་ཁོག་ཕུབ་ནས། །མཆོད་གཏོར་བཤམས་
ནས་གྱེར་སྒོམ་བྱེད་པ་ཡིན། །ཨ་ནུ་ཡོ་གའི་རྒྱུད་ཀྱི་དགོངས་པ་ལྟར། །ལུས་དཀྱིལ་རིགས་གསུམ་ཞི་ཁྲོའི་ནང་སྒྲུབ་སྟེ། །ཟིན་བྲིས་གསལ་བར་ལོགས་སུ་བཀོད་ལྟར་རོ། །ཨ་ཏི་ཡོ་གའི་རྒྱུད་ཀྱི་དགོངས་པ་ལྟར། །སྤྲོས་མེད་སེམས་ཀྱི་དཀྱིལ་འཁོར་གསང་སྒྲུབ་སྟེ། །མཆོད་གཏོར་མི་དགོས་ལས་བྱང་འདོན་མི་དགོས། །དྲན་རྫོགས་ཉིད་དུ་དཀྱིལ་འཁོར་སོ་སོར་བསྒོམས། །གོང་ལྟར་སོ་སོའི་བསྙེན་པ་བྱེད་པ་སྟེ། །གོང་དུ་བཤད་པའི་དཀྱིལ་འཁོར་ཉེར་གཅིག་པོ། །སྐད་ཅིག་དྲན་རྫོགས་དམ་ཡེ་དབྱེར་མེད་བསྒོམ། །དེ་ཡང་ཉམས་ལེན་རྩི་དང་མ་བྲལ་བ། །བསྙེན་པ་གོང་བས་ཐོས་ཙམ་ཤུབ་བུར་བཟླ། །དེ་ནི་གསང་བ་སེམས་ཀྱི་དཀྱིལ་འཁོར་ཉེར་གཅིག་གོ །འདི་དག་གཞུང་ལས་དོན་གྱིས་གསལ་བ་དང་། །གཙོ་བོ་འཕོ་བའི་རིག་པ་ཞེས་བྱ་བ། །གསར་རྙིང་ཀུན་ལ་ཉི་ཟླ་ལྟར་གྲགས་ཀྱང་། །རྨོངས་པ་ཕལ་གྱིས་དེ་དོན་རྟོགས་དཀའ་བས། །ཞི་ཁྲོ་འདི་ཉིད་དར་ཆ་ཆེ་བའི་ཕྱིར། །མ་འོངས་འགྲོ་ལ་ཕན་པའི་སེམས་བསྐྱེད་ཀྱིས། །དུས་མཐའི་སྔགས་འཆང་རཱ་ག་ཨ་སྱ་ཡིས། །གབ་ཅིང་གབ་པའི་རྒྱུད་དོན་མན་ངག་བཀྲོལ། །མ་འོངས་ཞི་ཁྲོའི་ཆོས་ལ་
མོས་པ་རྣམས། །བཀའ་དྲིན་བཞག་པ་ཆེན་པོ་བྱས་ཡོད་དོ། །འོན་ཀྱང་གསང་སྔགས་ཤིན་ཏུ་གཉན་པའི་ཕྱིར། །སྦ་འོས་གསལ་བར་བཀོད་པའི་ཉེས་མཆིས་ན། །བཀའ་ཡི་སྲུང་མ་དབང་ཕྱུག་ཉེར་བརྒྱད་དང་། །མ་ནིང་སྡེ་བདུན་འཁོར་དང་བཅས་ལ་བཤགས། །ཆོས་འདིས་འགྲོ་དོན་རྒྱ་ཆེན་འབྱུང་བ་ཡི། །གཉེར་ཁ་གཏད་དོ་འཕེལ་ཞིང་རྒྱས་པར་མཛོད། །འདི་བྲིས་དགེ་བས་བདག་ལ་འབྲེལ་ཐོགས་རྣམས། །རིགས་དྲུག་འཁོར་བའི་སྐྱེ་སྒོ་ཆོད་གྱུར་ནས། །བདེ་ཆེན་དག་པའི་ཞིང་དུ་སྐྱེ་བར་ཤོག །ཡི་གེའི་མཁན་པོ་པདྨ་མཐར་ཕྱིན་གྱིས། །འདིར་འབད་གུས་པས་བྲིས་པའི་བསོད་ནམས་ཀྱིས། །ཞི་ཁྲོའི་བཀའ་བབ་བསྟན་པ་འཛིན་གྱུར་ཅིག །མངྒ་ལཾ།། །།༧ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།