བཏགས་གྲོལ་གྱི་མན་ངག་ཞལ་ཤེས་བཏགས་ཚད་རང་གྲོལ།
བཏགས་གྲོལ་གྱི་མན་ངག་ཞལ་ཤེས་བཏགས་ཚད་རང་གྲོལ་ཞེས་བྱ་བ་བཞུགས་སོ།
རྒྱལ་བ་ཀུན་གྱི་སྤྱི་མེས་ཀུན་ཏུ་བཟང་། །དང་པོའི་སངས་རྒྱས་དེ་ལ་ཕྱག་འཚལ་ནས། །ཆོས་རྣམས་ཀུན་གྱི་ས་བོན་བཏགས་གྲོལ་རྒྱུད། །ཉམས་ལེན་མི་དགོས་བཏགས་པས་གྲོལ་བའི་ཐབས། །དེ་ཡི་མན་ངག་ཞལ་ཤེས་འདིར་བཀོད་བྱ། །ཆོས་བདག་སྲུང་མས་བཀའ་ཡིས་གནང་བ་སྩོལ། །ཞི་ཁྲོ་གསང་འདུས་ཡང་སྙིང་འདུས་པ་དང་། །ཆེ་རྒྱུད་རྡོར་ཕྲེང་ཀློང་གསལ་ལ་སོགས་པ། །བཏགས་གྲོལ་རྒྱས་བསྡུས་རྣམས་གྲངས་མང་བ་དང་། །སྔགས་ལ་འདྲ་མིན་ཞུ་དག་མ་བཏུས་ཀྱང་། །ཡབ་ཡུམ་དགོངས་པ་ཞེན་བཟློག་ཉེར་ལྔ་དང་། །ཁྲོ་
ཆེན་བཞི་ཡི་སྙིང་པོ་རྩ་བ་ཡིན། །སྔགས་ལ་འདྲ་མིན་གཏེར་ཁ་སོ་སོའི་ལུགས། །ཞུ་དག་མི་ཉན་ཀློང་གསལ་རྒྱུད་ནས་གསུངས། །དེ་ལ་ཙཀྲ་མ་དང་གླེགས་བམ་གཉིས། །ཙཀྲ་མ་ནི་རིག་འཛིན་རྣམས་ཀྱིས་མཛད། །བྲི་ཚུལ་སོ་སོའི་གཞུང་དུ་གསལ་ལྟར་ལགས། །གླེགས་བམ་མ་ནི་རྒྱུད་ཀྱི་དགོངས་པ་ཟབ། །འབྲི་མཁན་རབ་ནི་རྫོགས་ཆེན་རྣལ་འབྱོར་པ། །འབྲིང་ནི་དབང་ཐོབ་དམ་ཚིག་མ་ཉམས་པ། །ཐ་མ་འབྲི་མཁན་དམ་ཉམས་མིན་པས་རུང་། །བྲི་གཞི་རབ་ནི་མཐིང་ཤོག་སྲབ་ལ་མཁྲེགས། །འབྲིང་ནི་ཤོག་ནག་ཐ་མ་ཤོག་
སྐྱེས་རུང་། །སྣག་ཚ་སྟོན་པའི་ཁ་དོག་རིན་ཆེན་ཏེ། །སྔགས་ཀྱི་སྟོན་པ་རྒྱལ་བ་རིགས་ལྔའི་མདོག །བེཌུར་གསེར་ཟངས་གཡུ་དང་དུང་ཡང་རུང་། །རབ་ནི་ཐུབ་པའི་སྐུ་མདོག་གསེར་ནི་མཆོག །འབྲིང་དངུལ་མཚལ་དང་ཐ་མ་རྒྱ་སྣག་ལ། །ཆོས་སྨན་བདུད་རྩི་རིལ་བུ་བསྲེས་པས་རུང་། །བཏགས་གྲོལ་མང་པོ་ཕྱོགས་གཅིག་བཏགས་པ་ན། །ཤོག་ཚད་རྩེ་སོར་བརྒྱུད་ཀྱི་ཚད་རུང་སྟེ། །མཁའ་འགྲོ་སྙིང་ཐིག་ལ་སོགས་འགའ་ནས་གསལ། །མང་ཞིག་བཏགས་ན་ཁུག་སོར་བཞི་ཡི་ཚད། །གཅིག་ཙམ་ཡིན་ན་རྩེ་སོར་བཞི་ཡི་ཚད། །དེ་དག་ཞིང་དང་དཀྱུས་མཉམ་གྲུ་བཞིར་བཏགས། །གྲུ་བཞི་དེ་ལ་ཚོན་ནི་ཁ་དོག་ལྔ། །གྲུ་བཞི་ཉིད་དུ་རི་མོ་འཇའ་འདྲ་འཐེན། །དེ་ནང་ལིང་ཚེ་རེ་རེའི་ནང་དུ་ནི། །ཡབ་ཡུམ་དགོངས་པ་ནས་བཟུང་བཏགས་གྲོལ་གྱི། །སྔགས་རྣམས་བགོ་ནས་རིམ་པར་འབྲི་བ་སྟེ། །གཅིག་ནས་ནང་དུ་སྔགས་རྣམས་མི་རྫོགས་པས། །དེ་འཕྲོས་དེ་མཆན་ལིང་ཙེའི་ནང་དུ་བྲི། །སྔགས་རྣམས་ཐམས་ཅད་བྲི་བ་མ་གཏོགས་པ། །བོད་སྐད་ཚིག་ནི་གཅིག་ཀྱང་བྲི་སྲོལ་མེད། །ཞི་ཁྲོའི་མཇུག་ཏུ་ལས་བཞིའི་འདོད་གསོལ་བྲི། །
འདི་འཆང་བ་པོ་དམ་པ་རིགས་བརྒྱ་འམ། །ཐུགས་རྗེ་ཆེན་པོ་འམ་ཚེ་དཔག་མེད་པའམ། ཀུན་ཏུ་བཟང་པོ་སོགས་མཚན་བསྒྱུར། ལྷ་ཚོགས་དབྱེར་མེད་དུ་།སངས་རྒྱས་པར་གྱུར་ཅིག །ཞེས་པ་དེ་ནི་བཏགས་གྲོལ་མཇུག་ཏུ་བྲིས། །པོད་བོང་ཆེའམ་ཤོག་གུ་དཀོན་པ་ན། །ལོགས་གཅིག་ཞི་ཁྲོ་ལོགས་གཅིག་གསང་འདུས་བྲི། །མགོ་མཇུག་བསྣོལ་བ་འདྲ་སྟེ་སྐྱོན་མེད་དོ། །ཡིག་མགོ་ཐམས་ཅད་ཕྱོགས་གཅིག་བསྟན་པས་འཐུས། །བཏགས་གྲོལ་གཅིག་ལ་མགོ་མ་སྟོང་པ་ཡིན། །སྔགས་མཇུག་ཕྱི་ན་ཁྲི་བར་མི་རུང་ངོ་། །མགོ་མཇུག་མ་ནོར་ཕྱི་ནང་ཁྱད་པར་མེད། །བྲི་ཚར་ཞག་མང་བར་ནི་མཆོད་པར་བཤམས། །བཏགས་གྲོལ་འབྲུ་དྲུག་སྔགས་ཀྱིས་ཕུ་སུ་བྱ། །ས་རྗེན་མི་བཞག་མི་ལག་མང་མི་འགྲིམ། །མེ་ཁར་མི་ཁྱེར་རླུང་ཁར་གཡུག་མི་བྱ། །ཞུ་དག་བྱེད་ན་ཡིད་འདོན་རུང་མོད་ཀྱི། །དེ་ཉིད་ཀློག་པར་བྱ་བ་མ་ཡིན་ནོ། །རབ་གནས་རབ་ནི་སོ་སོའི་དཀྱིལ་འཁོར་གྱི། །དབུས་སུ་མཉྫིའི་སྟེང་དུ་རིན་ཆེན་སྣོད། །འབྲུས་བཀང་ནང་དུ་བཏགས་གྲོལ་དེ་ཉིད་བཞག །མདུན་བསྐྱེད་རྟེན་བྱ་སོ་སོའི་ལས་བྱང་བཏགས། །ཚོགས་
དང་མཆོད་གཏོར་ལ་སོགས་བཟང་དུ་འབུལ། །སོ་སོའི་བསྙེན་པ་ཅི་འགྲུབ་བྱས་པའི་རྗེས། །བཏགས་གྲོལ་བརྒྱའམ་ཉེར་གཅིག་བདུན་སོགས་འདོན། །དེ་ཡི་བཏགས་གྲོལ་ཉིད་ལ་ཕུ་ཡིས་བཏབ། །རྟེན་འབྲེལ་སྙིང་པོ་བརྒྱའམ་ཉེར་གཅིག་གིས། །ཕུ་བཏབ་མེ་ཏོག་འཐོར་ཞིང་བཀྲ་ཤིས་བརྗོད། །བླ་མ་འཛོམས་ན་བཏགས་གྲོལ་དབང་བསྐུར་ཞུ། །མ་འཛོམ་མདུན་བསྐྱེད་བླ་མ་དབྱེར་མེད་དམིགས། །བཏགས་གྲོལ་དབང་ཚིག་གཞུང་ལྟར་རང་གིས་བླངས། །རབ་གནས་འབྲིང་དུ་རྟོག་པ་མཐོན་པོ་ཡི། །བླ་མ་མཇལ་དུས་ཕྱག་ནས་ཞལ་ཕུ་ཞུ། །བཏགས་གྲོལ་འབྲུ་དྲུག་སྟོང་ངམ་ཁྲི་ཡིས་སྲེགས། །རབ་གནས་བསྡུས་པ་རྟེན་འབྲེལ་མེ་ཏོག་འཐོར། །དམ་པ་རིགས་བརྒྱ་ཡིད་ཀྱིས་སྤྱན་དྲངས་བསྟིམ། །ན་བཟའ་རབ་ནི་དར་སྣ་ལྔ་ཡིས་བཏུམ། །བྱིན་རླབས་རྟེན་ནི་གང་རྙེད་ནང་དུ་བཏུམ། །འབྲིང་ནི་མན་རྩེ་དུམ་བུ་གཅིག་གིས་གཏུམ། །ཐ་མ་དར་སྣས་སྐུད་པ་ཁ་དོག་ལྔས། །རྒྱ་གྲམ་ཉིད་དུ་བཅིངས་པས་འཐུས་པ་ཡིན། །རབ་ནི་ཟངས་སམ་ལྕགས་ཀྱི་གའུར་བཅུག །འབྲིང་ནི་བསེ་ཡིས་གཡོགས་པར་བྱ་བ་ཡིན། །ཐ་མ་རྔ་ཤུན་ལ་
སོགས་མཁྲིགས་པོས་གཡོགས། །དེ་རྒྱབ་ལྷས་གེ་ལ་སོགས་གང་རུང་གི །མདོར་ན་ཡིག་འབྲུ་མི་ཉམས་ཐབས་གཅིག་བྱ། །དམ་ཚིག་རབ་གནས་དུས་མིན་།ལུས་མི་འབྲལ། །བཏགས་གྲོལ་བཏགས་པ་ཀུན་གྱིས་ཤེས་ནའང་། །གསང་སྔགས་གསང་བའི་དམ་ཚིག་རྟེན་འབྲེལ་དུ། །བཏགས་གྲོལ་ཡོད་ཅེས་མི་སྨྲ་མིར་མི་སྟོན། །སྒྲུབ་པའམ་ནི་ཚེས་བཅུ་ལ་སོགས་དུས། །དཀྱིལ་འཁོར་དབུས་བཤམས་མདུན་བསྐྱེད་དེ་ལ་བསྟིམ། །འཆི་ཁ་མི་འབྲལ་རོ་དང་འབྲལ་མི་བྱ། །ཕུང་པོ་བསྲེག་ན་བཏགས་གྲོལ་ཚར་གཅིག་བཀླགས། །དུམ་བུ་གསུམ་བྱས་དཔྲལ་མགྲིན་སྙིང་ག་རུ། །མར་ཁུ་སོགས་ཀྱིས་ཡིག་འབྲུ་ཤ་བསྟན་སྦྱར། །དོང་དུ་སྦ་ནའང་དེ་ལྟར་བྱ་བ་ཡིན། །རི་ལ་བསྐྱལ་ན་ཕུང་པོ་གན་རྐྱལ་གྱི། །མེ་རུ་སྦར་བས་སྙིང་གར་འཁོར་ལོ་བསྲེགས། །ཐལ་བ་དེ་ནས་དཔྲལ་མགྲིན་སྙིང་གར་བྱུག །དེ་ལྟར་བྱས་པས་གཞུང་ནས་བཤད་པ་ལྟར། །ནམ་མཁའ་གཡའ་དག་འཇའ་ཟུག་འཇའ་སྤྲིན་འཁྲིགས། །མེ་ཏོག་ཆར་འབེབས་རླུང་དང་སེར་བུ་མེད། །རིང་བསྲེལ་སྐུ་གཟུགས་ཡིག་འབྲུ་ལ་སོགས་པ། །སྣ་གཅིག་མི་འབྱུང་སྲིད་པར་མི་
འགྱུར་ཏེ། །མ་བྱུང་ན་ནི་ཁོ་ཉིད་བཏགས་གྲོལ་ལ། །ངེས་ཤེས་མེད་པར་ཐེ་ཚོམ་ཤོར་བའི་རྟགས། །ཐེ་ཚོམ་མེད་པར་ཉམས་ལེན་བཟང་བའི་རིགས། །བཟང་རྟགས་མེད་པར་གནམ་གཡུལ་ངན་པ་ནི། །དེ་ཉིན་སྡིག་ཅན་གྲིབ་ཅན་གཞན་འགའ་ཞིག །ཤིའོམ་བསྲེག་པའི་གྲིབ་ནི་ཡིན་པར་བཤད། །འདི་ཉིད་བཏགས་པས་གྲོལ་བ་བདེན་མི་བདེན། །སྙམས་པའི་ཐེ་ཚོམ་མེད་པ་གལ་ཆེའོ། །ཤོར་ལུང་སྔགས་འཆང་སྤྱན་གསུམ་ལྡན་པ་དེས། །བསྐུལ་ཕྱིར་ལུག་ལོ་སྨིན་དྲུག་ཟླ་བ་ཡི། །བཅུ་གསུམ་ཉིན་གུང་ཐུན་གྱི་མཚམས་ཉིད་དུ། །༧རཱ་ག་ཨ་སྱས་ཇི་ལྟར་སྨྲས་པ་དེ། །མུ་པའི་དགེ་བཤེས་པདྨ་དད་པས་བྲིས། །འགལ་འཁྲུལ་མཆིས་ན་མཁྱེན་ལྡན་རྣམས་ལ་བཤགས། །དགེ་བས་འགྲོ་དོན་རླབས་ཆེན་འབྱུང་བར་ཤོག །འདི་ནི་མ་སྦས་ཀུན་ལ་བསྟན་པར་གྱིས། །སརྦ་མངྒ་ལཾ།། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།