ཞི་ཁྲོ་ན་རཀ་དོང་སྤྲུགས་ཀྱི་འདོན་འགྲིགས།
ཞི་ཁྲོ་ན་རཀ་དོང་སྤྲུགས་ཀྱི་འདོན་འགྲིགས་བཞུགས་པའི་དབུ་ཕྱོགས་ལགས།།
ཀུན་བཟང་ཞི་ཁྲོའི་ལྷ་ལ་ཕྱག་འཚལ་ལོ། །ཞི་ཁྲོའི་བཅའ་ཚོགས་མཐོང་བ་བརྒྱུད་པ་ལྟར། །འདོན་ལུགས་ཕྱག་ལེན་མི་འདྲ་སྣ་ཚོགས་ཏེ། །ཞི་ཁྲོའི་རང་གཞུང་བཀའ་བབས་ཀྱིས་མཛད་ལུགས། །སྐྱབས་སེམས་དཀར་བགེགས་ལ་སོགས་སོང་བའི་རྗེས། །ལས་བྱང་རྒྱས་བསྡུས་གང་འདོད་ཚང་བར་འདོན། །སྐབས་དེར་བོ་དྷི་ཙིཏྟ་ཅི་ནུས་བསྙེན། །དེ་ནས་ལོ་རྒྱུས་བཤད་ཅིང་བརྒྱ་ཕྱག་འཚལ། །རྡོར་སེམས་སྒོམ་བཟླས་ཡིག་བརྒྱ་འུར་འདོན་བྱ། །དེ་ནས་ཀློང་བཤགས་ཚང་བར་བཏོན་པའི་རྗེས། །མཆོད་པ་བཀྱགས་ཤིང་འཛབ་བྲོ་ལ་སོགས་བྱ། །དེ་ནས་
ཚོགས་བྱས་དབུས་ནས་བེ་རོ་སོགས། །ཚིགས་བཅད་དེ་ཉིད་འདོན་ཞིང་ཚོགས་བཀྱགས་ལ། །དེ་ནས་ཚོགས་ཚར་ཚོགས་ཕུད་གཏོར་མར་བྲན། །རང་གིས་གཏོར་བསྔོས་རྒྱས་བསྡུས་གང་ཡོད་འདོན། །བར་པ་བཤགས་པ་བསྐང་བ་གསོས་བྱས་ལ། །རྣམ་ཤེས་ཕུང་པོ་ལ་སོགས་བསྐང་བ་འདོན། །དེ་ནས་བསྒྲལ་ལས་བསྟབ་པ་གཞུང་ལྟར་བྱ། །མར་མེ་སྦར་ལ་མར་མེའི་སྨོན་ལམ་གྱེར།་།དེ་ནས་ཚོགས་ལ་རོལ་ཏེ་ལྷག་མ་བསྔོ། །སྐབས་འདིར་དབང་དང་ཕྱིར་ལྡོག་དགོས་ན་བྱ། །དེ་ནས་གཞི་བདག་དཀར་གཏོར་བསྔོས་བྱས་ལ། །དམར་གཏོར་བྲན་ལ་དགུག་
གཞུག་ཅུང་ཟད་རྗེས། །ལས་བྱང་བསྐུལ་དང་དེ་རྗེས་སྡེ་བདུན་བསྐུལ། །དེ་རྗེས་ཆད་མདོ་བརྟན་སྐྱོང་བྲན་ལ་འབུལ། །རྟ་བྲོ་རྗེས་ཆོག་ལ་སོགས་གཞུང་ལྟར་རོ། །དེ་ནི་བཀའ་བབས་ལུགས་ཀྱི་ཕྱག་ལེན་ཡིན། །གུ་རུ་ཀུན་དགའ་བསྟན་འཛིན་ཕྱག་ལེན་དང་། །གོང་མ་རྣམས་ཀྱི་མིག་ལྟོས་ལྟར་བྱེད་ན། །དང་པོ་གུ་རུ་ཞི་བ་འདོན་པར་བྱེད། །ཞི་ཁྲོའི་ལས་བྱང་རྗེས་ནས་གུར་དྲག་སོགས། །རང་གིས་གཏོར་མགྲོན་ལས་བྱང་ཤེས་ཚད་འདོན། །ཆོས་བཤད་བྱས་ལ་བརྒྱ་ཕྱག་ཕུལ་བའི་རྗེས། །ཡི་གེ་ཤེས་ཚད་རྣམས་ཀྱིས་སོ་སོ་རུ། །ཀློང་བཤགས་སངས་རྒྱས་སྟོང་གི་མཚན་འབུམ་དང་། །དགོངས་འདུས་ཕྱག་འཚལ་ཁ་བཀང་བརྒྱ་པའང་འདོན། །བག་ཆགས་རང་གྲོལ་བར་དོའི་རྩ་ཚིག་དང་། །ཞི་དྲག་ལ་སོགས་བསྐང་བ་གང་ཡོད་དང་། །བསྐང་འབུམ་བཤགས་འབུམ་དྲི་མེད་བཤགས་རྒྱུད་སོགས། །ཡི་གེ་ཤེས་ཚད་རྣམས་ལ་འདོན་བཅུག་གོ །མར་མེ་བལྟམས་ནས་མར་མེའི་སྨོན་ལམ་གྱེར། །བསྔོ་བ་བྱས་ནས་དེ་རྗེས་ཚོགས་བྱ་སྟེ། །ཚོགས་དང་ལྷག་མ་ལ་སོགས་བཏོན་ཚར་རྗེས། །ཚོགས་ནི་མི་སྤེལ་གཏོར་འབུལ་བྱ་བའི་སྐབས། །དམར་གཏོར་གཉིས་ནི་མཉམ་དུ་བྲན་
བྱས་ལ། །གཅིག་ལ་རང་གི་ཆོས་སྐྱོང་ཡོད་ཚད་ཀྱི། །གཏོར་འབུལ་བསྐུལ་ཐུང་ཐམས་ཅད་དེ་ལ་འདོན། །གཅིག་ལ་ཞི་ཁྲོའི་གཞུང་གི་བསྐུལ་པ་དང་། །ཚད་མདོ་བརྟན་སྐྱོང་ལ་སོགས་འདོན་བྱ་སྟེ། །གཞི་བདག་དཀར་གཏོར་དང་བཅས་གཏོར་མ་གསུམ། །མེ་རི་བཙུགས་ལ་མཆོད་གཡོག་པ་ཡིས་བཀྱགས། །བཟློག་ཐུང་བཏོན་ལ་གསུམ་པོ་དུས་གཅིག་ཕུལ། །དེ་རྗེས་ཚོགས་སྤེལ་ཚོགས་ལ་རོལ་བའི་རྗེས། །རྟ་བྲོ་མན་ཆད་རྗེས་ཆོག་ལས་བྱང་ལྟར། །དེ་ནི་ཉ་འུད་དགོན་པའི་འདོན་ལུགས་སོ།། ༈ འབྲོག་པ་ལ་སོགས་ཉིན་སྐོར་མགྱོགས་དགོས་ན། །སྐྱབས་སེམས་དཀར་བགེགས་ལས་བྱུང་ཚར་བའི་རྗེས། །མར་མེ་སྦྱར་ལ་མར་མེའི་སྨོན་ལམ་འདོན། །དེ་ནས་བསྐང་བ་འདོན་ལ་བརྒྱ་ཕྱག་འཚལ་། །དེ་ནས་བསྐང་བ་བཀྱགས་ལ་ཚོགས་བྱའོ། །ཚོགས་དང་བསྐང་བའི་མཚམས་སུ་བྱང་བུ་དང་། །དབང་བསྐུར་ལ་སོགས་གང་དགོས་སྦྱར་བར་རུང་། །སྔོན་དུ་རྒྱལ་བ་རྒྱ་མཚོ་བཏོན་ན་ནི། །རྙིང་མའི་སྔོན་འགྲོ་དེ་དག་མི་དགོས་སོ། །ལས་བྱང་མགོ་རུ་རྩ་གསུམ་མཆོད་ཕྲེང་ངམ། །པདྨ་འོད་འབར་གང་རུང་བཏོན་ན་ལེགས།་།ལས་བྱང་སྨན་མཆོད་
སྐབས་སུ་སྨན་མཆོད་དང་། །གཏོར་བསྔོས་སྐབས་དེར་ལྷ་ཚོགས་ཐམས་ཅད་ཀྱི། །སྔགས་ལ་ཁཱ་ཧི་སྦྱར་བ་ཀཿཐོག་ལུགས།། ༈ རང་ལུགས་སྨན་མཆོད་བདུད་རྩི་བཀྱགས་པའི་མཇུག །གཏོར་བསྔོས་ལས་བྱང་ཚར་བའི་སྐབས་ཤིག་ཏུ། །རང་གི་རྒྱུན་ཁྱེར་གཏོར་བསྔོས་གང་དགོས་བྱ། །མདོར་ན་སྐྱབས་སེམས་སྔོན་འགྲོ་དཀར་བགེགས་དང་། །ལས་བྱང་བསྟོད་པ་ཡན་ནི་མགོ་ཡིན་ལ། །གཏོར་འབུལ་རྟ་བྲོ་རྗེས་ཆོག་མཇུག་ཡིན་ཏེ། །མགོ་མཇུག་དེ་གཉིས་གོ་རིམ་ངེས་པ་ཡིན། །དེ་གཉིས་བར་དུ་བརྒྱ་ཕྱག་ཀློང་བཤགས་དང་། །བསྐང་བ་བཀྱག་དང་བསྐང་བ་ཚོགས་ལས་དང་། །དབང་དང་ཕྱིར་ལྡོག་རྣམས་ལ་གོ་རིམ་མེད། །སྐབས་སུ་གང་བབ་ཅི་བདེ་བྱས་པས་ཆོག །བླ་མ་འོད་གསལ་ཞེས་བྱས་བསྐུལ་བྱས་ནས། །རཱ་ག་ཨ་སྱས་འཕྲལ་དུ་སྨྲས་པ་ལྟར། །པདྨ་ཐབས་མཁས་ཞེས་བྱས་མགྱོགས་པར་བྲིས།། མངྒ་ལཾ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།