ཞི་ཁྲོ་བརྒྱ་མཆོད་ན་རཀ་དོང་སྤྲུགས་ཀྱི་བསྐང་ཆོག་ཉམས་ཆག་རང་གྲོལ་གྱི་ལོ་རྒྱུས་མདོར་བསྡུས་པ་ཐོས་པས་ཡིད་འཕྲོག་ལྷའི་རྔ་ཆེན།
ཞི་ཁྲོ་བརྒྱ་མཆོད་ན་རཀ་དོང་སྤྲུགས་ཀྱི་བསྐང་ཆོག་ཉམས་ཆག་རང་གྲོལ་གྱི་ལོ་རྒྱུས་མདོར་བསྡུས་པ་ཐོས་པས་ཡིད་འཕྲོག་ལྷའི་རྔ་ཆེན་ཞེས་བྱ་བ་བཞུགས་སོ། །
འོ་ན་ཁྱེད་འདིར་འདུས་ཤིང་འཚོགས་པ་རྣམས་ཐུགས་གཞན་དུ་མ་ཡེངས་པར་གསན་པར་འཚལ། ཞི་ཁྲོ་ན་རཀ་དོང་སྤྲུགས་ཀྱི་བསྐང་བཤགས་ཉམས་ཆག་རང་གྲོལ་འདི་ཡི་སྐབས་སུ་བྲམ་ཟེ་དུང་ཕྲེང་ཅན་གྱི་ལོ་རྒྱུས་དང་། ན་རཀ་དོང་སྤྲུགས་ཀྱི་ལོ་རྒྱུས་མ་བཤད་ན་ཆོ་གའི་ཡན་ལག་ཉམས་ཤིང་ཕྱག་ལེན་འཆུགས་པའི་སྐྱོན་དུ་འགྱུར་བས། ལོ་རྒྱུས་ཅུང་ཟད་ཅིག་ཞུ་ན། གནས་འོག་མིན་ཆོས་དབྱིངས་ཀྱི་ཕོ་བྲང་ན་བཅོམ་ལྡན་འདས་ཆོས་སྐུ་ཀུན་ཏུ་བཟང་པོ་ཉིད་གཞི་གདོད་མའི་གནས་སུ་མངོན་པར་རྫོགས་པར་སངས་རྒྱས་སོ། །དེའི་སྣང་ཆ་ལས་འོག་མིན་འཐུག་པོ་བཀོད་པའི་ཞིང་
ཁམས་སུ་ལོངས་སྐུ་རྣམ་སྣང་གངས་ཅན་མཚོ་རིགས་ལྔའི་སངས་རྒྱས་སུ་མངོན་པར་སྣང་ངོ་། །དེའི་སྤྲུལ་པ་ནི་རིམ་པ་བཞིན་དུ་རྡོ་རྗེ་ལོངས་སྤྱོད་རྫོགས་སྐུ་དང་། སྟོན་པ་ཁྱེའུ་སྣང་བ་དམ་པ་དང་། སྟོན་པ་ཁྱེའུ་འོད་མི་འཁྲུགས་པ་དང་། སྟོན་པ་འཇིགས་པ་སྐྱོབས་པ་དང་། སྟོན་པ་གཞོན་ནུ་རོལ་པ་དང་། སྟོན་པ་རྡོ་རྗེ་འཆང་དང་། སྟོན་པ་གཞོན་ནུ་དཔའ་བོ་སྟོབས་ལྡན་དང་། སྟོན་པ་དྲང་སྲོང་ཁྲོས་པའི་རྒྱལ་པོ་དང་། །སྟོན་པ་གསེར་འོད་དམ་པ་དང་། སྟོན་པ་བརྩེ་བའི་རོལ་པའི་བློ་གྲོས་དང་། སྟོན་པ་འོད་སྲུང་བགྲེས་པོ་དང་། སྟོན་པ་མངོན་རྫོགས་རྒྱལ་པོ་
དང་། སྟོན་པ་བཅོམ་ལྡན་འདས་ཤཱཀྱ་ཐུབ་པ་རྣམས་སུ་སྤྲུལ་ནས་ཆོས་སྒོ་དཔག་ཏུ་མེད་པ་དང་། །ཁྱད་པར་དུ་རྫོགས་པ་ཆེན་པོའི་རྒྱུད་སྡེ་འབུམ་ཕྲག་དྲུག་ཅུ་རྩ་བཞི་གསུངས་པ་ཐམས་ཅད་ཀྱིས་བཅུད་བསྡུས་པ་ནི། ཞི་ཁྲོ་དགོངས་པ་རང་གྲོལ་འདི་ཉིད་ཡིན་ལ། མ་འོངས་པ་ན་ཡང་སྟོན་པ་བྱམས་པ་མགོན་པོ་ནས་བཟུང་སྟེ་སངས་རྒྱས་མོས་པའི་བར་གྱི་བསྐལ་བཟང་གི་སངས་རྒྱས་དེ་དག་ཐམས་ཅད་ཀྱང་སྟོན་པ་ཀུན་ཏུ་བཟང་པོ་ཉིད་ཀྱི་སྤྲུལ་པ་ཡིན་ནོ། །ཁྱད་པར་ན་རཀ་དོང་སྤྲུགས་ཀྱི་ལོ་རྒྱུས་ནི། སྔོན་མི་མཇེད་འཇིག་རྟེན་གྱི་ཁམས་འདི་ན་བྲམ་ཟེ་དུང་གི་ཕྲེང་བ་ཅན་ཞེས་བྱ་བ་རིག་པའི་གནས་ལྔ་ལ་མཁས་པ། སྔོན་གྱི་རྒྱལ་བ་ལ་བསྙེན་བཀུར་བྱས་པ་བྱང་ཆུབ་སེམས་དཔའི་རིགས་ཅན་ཞིག་དུར་ཁྲོད་ན་བསྒྲུབ་པ་མཛད་ཅིང་བཞུགས་པ་ལ། ཡུལ་ཁམས་དེའི་རྒྱལ་པོའི་བུ་གཅིག་སློབ་མར་བྱས་ཏེ། སྒྲ་དང་ཚད་མ་དང་། བཟོ་རིགས་དང་། གསོ་དཔྱད་དང་། ནང་རིག་པ་སོགས་རིག་པའི་གནས་ལྔ་དང་། སྙན་ངག་དང་སྡེབ་སྦྱོར་དང་ཚིག་རྒྱན་ལ་སོགས་པ་རིག་པའི་གནས་བཅོ་བརྒྱད་ལ་མཁས་པར་གྱུར་ཏོ། །དེར་རྒྱལ་པོའི་བུ་དེ་ཡི་བསམ་པ་ལ། སློབ་དཔོན་འདི་མེད་ན་རང་བས་མཁས་པ་
འཛམ་བུ་གླིང་ན་མེད་པ་གཅིག་འོང་སྙམ་ནས། སློབ་དཔོན་ལ་འབྲས་ཆང་གིས་མྱོས་སུ་བཅུག་ནས་ལུས་ལ་རུས་སྦལ་གྱི་ཁྲག་བྱུགས་ཏེ་ཆུ་བུར་དང་རྨ་མཛེ་འོང་བར་བྱས། །བུད་མེད་མང་པོར་བརྫི་བསྣག་བྱེད་དུ་བཅུག །མིག་ཁབ་ཀྱིས་བཙག །ལྕེ་ལྕགས་ཀྱུས་དྲངས། སྐྱིད་པ་ཡང་བཅད་དེ་བཞག་གོ །དེར་བྲམ་ཟེ་འབྲས་ཆང་གིས་མྱོས་པ་སང་ནས་སློབ་མས་ཕྲག་དོག་བྱས་པར་ཤེས་ནས། སློབ་མ་ལ་ཡིད་ཀྱིས་དམོད་པ་བོར་ནས་ཚེའི་དུས་བྱས་སོ། །དེ་ནས་རྒྱལ་པོའི་བུ་ལ་སྲས་གཅིག་ཡོད་པ་ཡི་མགོ་ལ་ལྕགས་ཀྱི་འཛེར་པ་གཅིག་སྐྱེས་ཏེ་ཐབས་གང་གིས་ཀྱང་མ་ཕན་ཏེ། རྒྱལ་པོའི་བུ་རིག་གནས་མཁན་དེ་ཉིད་ཀྱིས་ལྕེས་ལྡག་པས་ཕན་པར་སྣང་ནས། འཛེར་པ་ལྡག་པས་འཛེར་པར་ཕན་པ་དང་མཉམ་དུ་ལྕེ་ཆད་ནས་ཤི་སྟེ། སེམས་ཅན་ལུས་སྲུལ་པོ་གཅེར་བུ་ཅན་ཞེས་བྱ་བ་ནད་སྣ་ཚོགས་དང་ལུས་ལ་ཤ་ཟ་བ་སྟོང་གིས་ཚང་བཅའ་བ་འགྲོ་བ་རིགས་དྲུག་གི་སྡུག་བསྔལ་དུས་གཅིག་ལ་མྱོང་བ་གཅིག་ཏུ་སྐྱེས་སོ། །དེ་ནས་བྱང་ཆུབ་སེམས་དཔའ་ཕྱག་ན་རྡོ་རྗེ་དང་རྡོ་རྗེ་སེམས་དཔའ་གཉིས་ཀྱིས་ཕྱོགས་བཅུའི་སངས་རྒྱས་ཐམས་ཅད་ལ་སེམས་ཅན་ལུས་སྲུལ་པོ་དེ་ངན་སོང་ལས་ཐར་ཐབས་
གསུང་དུ་གསོལ་ཞུས་པས། ཕྱོགས་བཅུའི་སངས་རྒྱས་ཐམས་ཅད་ཀྱི་ཞལ་ནས། སྡིག་སྒྲིབ་ཐམས་ཅད་སློབ་དཔོན་གྱི་གདམས་ངག་ལ་བརྟེན་ནས་སྦྱངས་དགོས་པ། སློབ་མས་སློབ་དཔོན་བསད་པའི་སྡིག་སྒྲིབ་དག་པའི་ཐབས་མེད་གསུངས། དེར་བྱང་ཆུབ་སེམས་དཔའ་གཉིས་སྙིང་རྗེའི་དབང་གི་རེ་ཞིག་བརྒྱལ་ལོ། །བརྒྱལ་སངས་ནས་སངས་རྒྱས་ཐམས་ཅད་ཀྱི་སྤྱི་མེས་དཔལ་ཀུན་ཏུ་བཟང་པོ་ལ་ཞུས་པས། ཀུན་ཏུ་བཟང་པོས་བཀའ་སྩལ་པ། ཞི་ཁྲོའི་དཀྱིལ་འཁོར་གྱི་ལྷ་ཚོགས་ཀྱི་མཚན་ནས་བརྗོད་ལ་ཕྱག་འཚོལ་ཞིག །ཅེས་པ་ལ་སོགས་པ་ན་རཀ་དོང་སྤྲུགས་ཀྱི་རྒྱུད་ཆེན་པོ་དགོངས་པའི་རྗེས་སུ་གནང་ངོ་། །དེ་ནས་བྱང་ཆུབ་སེམས་དཔའ་གཉིས་ལུས་སྲུལ་པོའི་དྲུང་དུ་བྱོན་ནས་ཞི་ཁྲོའི་དཀྱིལ་འཁོར་དུ་བཅུག་ཅིང་། རང་སྣང་ཞི་ཁྲོའི་ལྷ་ཚོགས་ཀྱི་མཚན་རྣ་བར་བསྒྲིག་ཅིང་ཕྱག་འཚལ་དུ་བཅུག་ནས་ངན་སོང་ལས་ཐར་ནས། དག་པ་མཁའ་སྤྱོད་ཀྱི་གནས་སུ་ཕྱག་རྒྱ་ཆེན་པོ་ལ་སོགས་པ་རིག་འཛིན་ལྔ་ཡི་གོ་འཕང་ཐོབ། གཞན་ཡང་དམྱལ་བ་དང་ཡི་དྭགས་དང་དུད་འགྲོ་དང་ལྷ་མ་ཡིན་རྣམས་ཀྱི་སྡུག་བསྔལ་ཐམས་ཅད་དོང་ནས་སྤྲུགས་ཏེ་སྟོངས་པར་གྱུར་ཏོ། །ལྷ་དང་མི་ཡི་འཇིག་རྟེན་དོང་ནས་
སྤྲུགས་ཏེ་སྐྱེ་བ་གཅིག་གིས་ཐོགས་པའི་བྱང་ཆུབ་སེམས་དཔའ་དང་འདྲ་བར་གྱུར་ཏོ། །དེ་ནས་ཡང་སྟོན་པ་ཀུན་ཏུ་བཟང་པོ་ལ་འཁོར་རིགས་ལྔའི་སངས་རྒྱས་དང་རྣལ་འབྱོར་ཕོ་མོ་དཔག་ཏུ་མེད་པས་དམ་ཚིག་ཆག་ཉམས་སྦྱངས་བའི་ཐབས་གསུངས་པར་ཞུས་པས། ཞི་ཁྲོ་གསང་བའི་དཔང་ཀོང་ཕྱག་རྒྱ་པ་ཞེས་བྱ་བ་གསུངས་སོ། །དེ་ནས་ཡང་རི་བོ་མ་ལ་ཡ་གནམ་ལྕགས་འབར་བའི་རྩེ་མོ་ནས། དཔལ་ཕྱག་ན་རྡོ་རྗེ་ལ་འཁོར་དཔག་ཏུ་མེད་པ་དང་བཅས་ཏེ་བཞུགས་པའི་ཚེ་རིག་འཛིན་གྱི་རྒྱལ་པོ་ཀུན་ཛ་རས། དམ་ཚིག་ཉམས་ཆག་བཤགས་པའི་ཐབས་ཞུས་པས། ལྟ་བའི་ཀློང་བཤགས་རུ་ཏྲའི་སྨེ་བཤགས་ལ་སོགས་པའི་དྲི་མེད་རྒྱལ་པོའི་བཤགས་པའི་རྒྱུད་གསུངས་སོ། །དེ་ལ་སོགས་པའི་རྒྱུད་མན་ངག་གོང་མས་བརྒྱུད་པའི་རིམ་པ་ནི། ཀུན་ཏུ་བཟང་པོས་རྡོ་རྗེ་འཆང་ལ། རྡོ་རྗེ་འཆང་གིས་རྡོ་རྗེ་སེམས་དཔའ་ལ་དགོངས་པས་བྱིན་གྱིས་རླབས་པའི་རྒྱལ་བ་དགོངས་པའི་བརྒྱུད་པ་ཞེས་བྱའོ། །དེ་ནས་རྒྱ་གར་ནུབ་ཕྱོགས་རྒྱལ་པོ་ཨུ་པ་ར་ཛའི་སྲས་རོ་ལངས་བདེ་བ་ཞེས་བྱ་བ་གཅིག་འཁྲུངས་ཏེ་དགུང་ལོ་གཅིག་ནས་སངས་རྒྱས་ཀྱི་ཆོས་མང་པོ་ཐུགས་ལ་འཁྲུངས། དགུང་ལོ་བདུན་ན་
པཎྜི་ཏ་ལྔ་བརྒྱ་དང་ཆོས་ཀྱི་རྩོད་པ་བྱས་པས་ཁོང་རྒྱལ་ནས། པཎྜི་ཏ་ཐམས་ཅད་དད་ནས་ཞབས་སྤྱི་བོར་བླངས། ཡབ་རྒྱལ་པོ་དགའ་བས་དགའ་རབ་རྡོ་རྗེར་བཏགས། རི་བོ་ཉི་མ་སྣང་མཛད་དུ་ལོ་སུམ་ཅུ་སོ་གཅིག་ལ་ཏིང་ངེ་འཛིན་ལ་མཉམ་པར་གཞག་པས། རྡོ་རྗེ་སེམས་དཔའ་ནམ་མཁར་བྱོན་ནས་རྫོགས་པ་ཆེན་པོའི་རྒྱུད་མན་ངག་ཐམས་ཅད་གནང་སྟེ་མཁས་པར་གྱུར་ནས། ནམ་མཁའ་ལ་གཤེགས་པ་སོགས་རྫུ་འཕྲུལ་མང་པོས་མུ་སྟེགས་ཀྱི་རྒྱལ་པོ་བཏུལ་བ་སོགས་སངས་རྒྱས་གཉིས་པ་ལྟ་བུར་གྱུར་ཏོ། །དེ་ནས་རྒྱ་ནག་གི་ཡུལ་དུ་མཁས་པ་བྲི་སེང་ཧ་ཞེས་བྱ་བ་ལ་སྤྱན་རས་གཟིགས་ཀྱིས་ལུང་བསྟན་པ་ལྟར་རྫུ་འཕྲུལ་གྱིས་རྒྱ་གར་དུ་བྱོན་ནས། དགའ་རབ་རྡོ་རྗེ་དང་མཇལ་ནས་རྒྱུད་དང་མན་ངག་ཐམས་ཅད་གནང་ངོ་། །དེ་ནས་ཤྲཱི་སེང་ཧ་དུར་ཁྲོད་སོ་ས་གླིང་དུ་བཞུགས་པ། དྲུང་དུ་སློབ་དཔོན་པདྨ་འབྱུང་གནས་དང་། པཎ་ཆེན་བི་མ་ལ་མི་ཏྲ་དང་། པཎྜི་ཏ་རྒྱལ་བ་ཡེ་ཤེས་མདོ་ཞེས་བྱ་བ་དང་གསུམ་ལ་གནང་སྟེ། དེ་དག་ནི་རིག་འཛིན་བརྡ་ཡི་བརྒྱུད་པའོ། །དེ་ནས་ཨོ་རྒྱན་ཆེན་པོ་བོད་དུ་བྱོན་ནས་མཁའ་འགྲོ་ཡེ་ཤེས་མཚོ་རྒྱལ་དང་ལོ་ཙཱ་བ་ཀླུའི་རྒྱལ་མཚན་སོགས་ལ་འདིའི་དབང་ལུང་
གདམས་ངག་དང་བཅས་པ་གནང་ངོ་། །ཡེ་ཤེས་མཚོ་རྒྱལ་ལ་ཧེ་རུ་ཀས་ལུང་བསྟན་པ་ལྟར། སྡིག་བློན་ཤ་སྟ་འདྲེན་པའི་ཕྱིར་དམྱལ་བའི་ཡུལ་དུ་བྱོན་པས་ས་གཞི་མེ་འབར་བའི་ལྕགས་སྲེག་གི་ཁང་པ་སྒོ་མེད་པ་གཅིག་འདུག་པའི་ནང་ན་སྡིག་བློན་ཤ་སྟ་ཡོད་ཟེར་བས། གཤིན་རྗེ་ཆོས་ཀྱི་རྒྱལ་པོ་ལ་ཞུས་པ། སྡིག་བློན་ཤ་སྟའི་མལ་དུ་ང་ཞོག །ཤ་སྟ་བཏང་བར་ཞུ་ཞུས་པས། སེམས་ཅན་རང་གིས་བྱས་པའི་ལས་རང་ལ་མ་གཏོགས་གང་ལ་ཡང་མི་སྨིན། ཁྱོད་ཁོའི་མལ་དུ་བསྡད་ཀྱང་སྡུག་བསྔལ་མི་ཡོང་། སླར་ཁོ་རང་ལ་སྡུག་བསྔལ་ཆེར་འགྲོ་གསུངས། འོ་ན་གང་གིས་ཕན་ལགས་ཞུས་པས། ཞི་ཁྲོ་སྤྲུལ་པའི་ཆོ་ག་ཤེས་ན་ཁོ་རང་ལ་ཕན་སྟོབས་ཆེ་གསུངས། དེ་ནས་ལྷ་ལྕམ་ཡེ་ཤེས་མཚོ་རྒྱལ་མས་ལྕགས་སྲེག་ཁང་པའི་སྒོ་དྲུང་དུ་ཞི་ཁྲོ་སྤྲུལ་པའི་དཀྱིལ་འཁོར་ཞལ་ཕྱེས་པས། ཚ་ངར་དང་ལྡན་པའི་མེའི་ས་གཞི་དང་མཚོན་ཆ་རྣམས་ཀྱང་དངོས་མེད་དུ་བརླགས་ནས། བསིལ་དྲོད་ཁོད་སྙོམ་ཞིང་ལུས་ངག་ཡིད་གསུམ་བདེ་བ་དང་ལྡན་པར་གྱུར་ཏོ། །ལྕགས་སྲེག་གི་ཁང་པ་དེ་ཡང་ཞིག་ནས་གཤིན་རྗེ་རྣམས་ཞི་བའི་འཛུམ་བསྟན་ཏེ། བཅོམ་ལྡན་འདས་ཞི་ཁྲོ་རབ་འབྱམས་དང་
ལྷ་ལྕམ་ལ་ཕྱག་འཚལ་ལོ། །སྡིག་བློན་ཤ་སྟ་ལ་སོགས་པ་འབུམ་ཚོ་བཅུ་གཅིག་དྲངས་སོ། །ན་རཀ་གནས་དེ་དོང་ནས་སྤྲུགས་སོ། །དེ་ནས་ཨོ་རྒྱན་རིན་པོ་ཆེ་དང་མཁའ་འགྲོ་ཡེ་ཤེས་མཚོ་རྒྱལ་གྱིས་དྲི་མེད་བཤགས་རྒྱུད་དང་ན་རཀ་དོང་སྤྲུགས་ཀྱི་རྒྱུད་དང་ལྟ་བ་ཀློང་ཡང་གི་རྒྱུད་དང་། མན་ངག་སྙིང་དགོངས་ཀྱི་རྒྱུད་དང་། སྒྱུ་འཕྲུལ་གསང་བའི་སྙིང་པོ་ལ་སོགས་པ་རྫོགས་པ་ཆེན་པོའི་རྒྱུད་སྡེ་འབུམ་ཕྲག་དྲུག་ཅུ་རྩ་བཞི་ཐམས་ཅད་ཀྱིས་བཅུད་ཕྱུངས་ཏེ། ཟབ་ཆོས་ཞི་ཁྲོ་དགོངས་པ་རང་གྲོལ་འདི་ཉིད་ལེགས་པར་བསྡེབས་ནས། ལས་ཀྱི་དཔའ་བོ་ཀརྨའི་མིང་ཅན་གཅིག །འགྲོ་དོན་རླབས་ཆེན་སྤྱོད་གྱུར་ཅིག །ཅེས་སྨོན་ལམ་བཏབ་ནས་གཏེར་དུ་སྦས་སོ། །དེ་ཡང་སྤྱི་དོན་ཡོན་ཏན་གསལ་བ་ལས། ཟབ་ཆོས་ཞི་ཁྲོ་དགོངས་པ་རང་གྲོལ་འདི། །སྤེལ་བར་འཕོངས་ནས་རིན་ཆེན་གཏེར་དུ་སྦས། །ཨེ་མ་འདི་ཉིད་འདོན་པའི་སྐལ་ལྡན་རིགས་ཀྱི་བུ། །མདོག་དཀར་གཟུགས་རིང་སྨྲ་མེད་ཁྲོ་བོའི་དབྱིབས། །རེས་འགའ་ངམ་ནག་གླེན་པ་ལྟ་བུ་ལ། །རེས་འགའི་གཏད་མེད་བྱིས་པའི་རྣམ་པ་ཅན། །མ་དང་མཁའ་འགྲོ་འདུ་བའི་རིགས་ཀྱི་བུ། །དད་པའི་སྟོབས་ཆེ་ཤེས་རབ་རིག་པ་རྣོ། །མི་
སེམས་མི་འཛིན་དཔའ་བོའི་ཚུལ་འཛིན་པ། །འབྲུག་གམ་སྦྲུལ་གྱི་ལོ་པ་ལས་ཀྱི་མིང་ཅན་འབྱུང་། །འདི་ཉིད་ལོ་ཙཱ་ཀླུ་ཡི་རྒྱལ་མཚན་ཞེས། །འདི་དང་འཕྲད་ཀྱིས་ཆོས་ལ་ཟོང་མ་བྱེད། །མཐོང་ཐོས་འབྲེལ་པས་སྐྱེ་བ་མཐའ་ཅན་ཡིན། །དེ་ལ་འདུན་བྱེད་སློབ་བུ་བཅུ་གཅིག་འབྱུང་། །ཞེས་གསུངས་པ་ལྟར། གྲུབ་ཆེན་ཉི་ཟླ་སངས་རྒྱས་ཀྱི་སྲས་པོ་ལོ་ཙཱ་བ་ཀླུའི་རྒྱལ་མཚན་གྱི་སྐྱེ་བ་གཏེར་སྟོན་ཀརྨ་གླིང་པས་དྭགས་ལྷ་སྒམ་པོའི་རྒྱབ་རི་རི་ལྷ་བྲན་གར་བྱེད་པ་འདྲ་བ་ནས་གཏེར་ནས་བཏོན་པའོ། །དེ་ཉིད་ཀྱིས་ཐུགས་སྲས་ཉི་ཟླ་ཆོས་རྗེ་ལ་གནང་། དེས་འགྲོ་མགོན་སཱུརྱ་རསྨི་ལ། དེ་ཡན་ཆད་དབང་བཞི་གཅིག་བརྒྱུད་དུ་མཛད་དོ། །དེ་ནས་ཞི་ཁྲོ་འདིའི་བཀའ་བབས་ཆོས་ཀྱི་རྒྱལ་མཚན་ལ་གནང་ཞིང་། དེ་ཉིད་ཀྱི་རྒྱ་ཆེར་སྤེལ་ནས་དར་བར་མཛད་དེ། བརྒྱུད་པ་གསུམ་གྱི་བར་དུ་ཆིག་བརྒྱུད་གྱིས། བརྒྱུད་པ་གསུམ་ནས་འགྲོ་དོན་རྒྱ་ཆེན་པོར་འབྱུང་། ཞེས་ལུང་བསྟན་ཡོད་པ་དང་མཐུན་ཞིང་། འདི་ཡན་ཆད་ཨོ་རྒྱན་རིན་པོ་ཆེའི་ལུང་བསྟན་པའི་སྐྱེས་བུ་ཤ་སྟག་ཡིན་ནོ། །དེ་ནས་སྤྲུལ་སྐུ་ཐུགས་རྗེའི་འོད་ཟེར། འཁྲུལ་ཞིག་བུདྡྷ་མངྒ། རིག་འཛིན་ཀུན་དགའ་གྲགས་
པ། གར་དབང་ཀུན་དགའ་བསྟན་འཛིན། སྦས་པའི་རྣལ་འབྱོར་ཨ་མོ་གྷའི་མཚན་གྱི་བར་དུ་བརྒྱུད་དེ། བརྒྱུད་པའི་བླ་མ་དེ་རྣམས་ཀྱང་དངོས་སུ་ལུང་གིས་མ་ཟིན་ན་ཡང་། ཤུགས་ཀྱིས་ལུང་གིས་ཟིན་པའི་ལས་ལྡན་ཁོ་ན་ཡིན་ཏེ། མ་གཅིག་ཡེ་ཤེས་མཚོ་རྒྱལ་གྱི་གསུངས་ལས། སྙིགས་དུས་གཏེར་ལ་མོས་པའི་སྐལ་ལྡན་རྣམས། །དེང་སང་གུ་རུའི་ཞལ་མཐོང་སྨོན་ལམ་བཏབ། །ཐམས་ཅད་ལས་ཅན་ཡིན་པས་དགའ་བ་སྒོམས། །ཁོ་མོའི་ཚིག་འདི་རིན་ཆེན་གསེར་བས་དཀོན། །སྤྱིར་ཞི་ཁྲོ་ན་རཀ་དོང་སྤྲུགས་ཀྱི་ཆོ་ག་འདི་ལ་ཕྱག་ལེན་མི་འདྲ་བ་མང་དུ་བྱུང་བའི་ནང་ནས། ཀཿཐོག་ལུགས་དང་བཀའ་བབས་ལུགས་དང་ཟུར་མང་ལུགས། བཀའ་བབས་ལུགས་གསུམ་དུ་གྲགས་ཆེ་བ་ལས། འདི་ནི་བཀའ་བབས་ཆོས་ཀྱི་རྒྱལ་མཚན་པའི་ཕྱག་བཞེས་མ་འཆུགས་པ་ཡིན་པ་ལས་བཀའ་བབས་ཆོས་ཀྱི་རྒྱལ་མཚན་ནི་ལྷ་ལྕམ་གང་འབུམ་གྱི་སྐྱེ་བ་ཡིན་ཅིང་འདིའི་ཞི་ཁྲོའི་ཆོས་སྐོར་ཐམས་ཅད་ཀྱི་གབ་འཁྲུགས་བསལ་ཏེ་ཕྱག་ལེན་གཏན་ལ་ཕབ་ནས། འགྲོ་དོན་དང་བསྟན་པ་མཐའ་རྒྱས་སུ་གྱུར་པའི་ལུང་བསྟན་ཡོད་པ་ཡིན་ནོ། །འོ་ན་ཞི་ཁྲོ་ན་རཀ་དོང་སྤྲུགས་ཀྱི་ཆོ་ག་འདི་ལ་ཕན་ཡོན་དང་དགོས་ཆེད་ཇི་
ལྟ་བུ་ཡོད་ཅེ་ན། ན་རཀ་དོང་སྤྲུགས་ཀྱི་རྒྱུད་ལས། ཞི་བའི་ལྷ་ཚོགས་བུདྡྷ་བཞི་བཅུ་ཞེ་གཉིས་ཀྱི་མཚན་ནས་བརྗོད་པས་མཚམས་མེད་པ་ལྔ་དང་སྡིག་སྒྲིབ་ཐམས་ཅད་བྱང་བར་འགྱུར་རོ། །ཁྲག་འཐུང་གི་ལྷ་ཚོགས་སུམ་ཅུའི་མཚན་བརྗོད་ཅིང་། ཕྱག་འཚལ་བས་མཚམས་མེད་པ་ལྔ་དང་སྡིག་པ་ལྕི་བ་རྣམས་བྱང་བར་འགྱུར་རོ། །ཞེས་རྡོ་རྗེ་སེམས་དཔའི་ཞལ་ནས་གསུངས་སོ། །དཔལ་སྒྱུ་འཕྲུལ་གསང་བ་འདུས་པའི་རྒྱུད་ཀྱི་ན་རཀ་དོང་སྤྲུགས་ཀྱི་ལེའུ་ཉེར་གསུམ་པ་ལས། གང་གིས་རྒྱལ་བ་ཞི་ཁྲོ་ཡི། །དཀྱིལ་འཁོར་མཚན་ཐོས་ཕྱག་འཚལ་ན། །ཉམས་ཆག་མ་ལུས་ཀུན་བྱང་ན། །མཚམས་མེད་ལྔ་ལ་སྨོས་ཅི་དགོས། །ན་རཀ་གནས་ཀྱང་དོང་སྤྲུགས་ཏེ། །རིག་འཛིན་རྒྱལ་བའི་ཞིང་དུ་གྲགས། །ཞེས་གསུངས་སོ། །སྒྱུ་འཕྲུལ་ཞི་ཁྲོའི་ལྷ་ཚོགས་འདི་རྣམས་ཀྱི་མཚན་རྣམས་རྣ་བར་ལན་གཅིག་ཐོས་པས་ཀྱང་ངན་སོང་གི་སྐྱེ་སྒོ་ཆོད་པར་བཤད། དཔལ་ཀུན་ཏུ་བཟང་པོའི་གསུངས་ཞི་ཁྲོ་གསང་བའི་དཔང་ཀོང་ལས། གལ་ཏེ་རྣལ་འབྱོར་པ་གང་ཞིག་གིས། དཀྱིལ་འཁོར་གྱི་ལྷ་དེ་རྣམས་ཀྱི་མཚན་རྣ་བས་ལན་གཅིག་ཐོས་པ་ཙམ་གྱིས་ཀྱང་ན་རཀ་ཆེན་པོར་མི་ལྟུང་ངོ་། །
ཞེས་གསུངས་སོ། །ལྷ་འདི་རྣམས་ལ་ཕྱག་འཚལ་ན་སོ་སོར་ཐར་པའི་སྡོམ་པ་འདུལ་ཁྲིམས་ཉམས་པ་དང་། བྱང་ཆུབ་སེམས་དཔའི་སྡོམ་པ་སེམས་བསྐྱེད་ཉམས་པ་དང་། གསང་སྔགས་ཀྱི་སྡོམ་པ་དམ་ཚིག་ཆིག་པ་དང་། ཉམས་པ་ཐམས་ཅད་བྱང་ཞིང་དག་ནས་སོར་ཆུད་པར་བཤད། བཅོམ་ལྡན་འདས་དཔལ་ཀུན་ཏུ་བཟང་པོའི་བཀའ་ཕྱག་རྒྱ་པ་ལས། རང་བཞིན་སྒྱུ་འཕྲུལ་ལྷ་རྣམས་ལ། །གང་ཞིག་གུས་པས་ཕྱག་འཚལ་ན། །ཉམས་ཆག་ཀུན་ཀྱང་བྱང་བར་འགྱུར། །དམ་ཚིག་བསྐངས་ནས་དངོས་གྲུབ་ཐོབ། །ཅེས་གསུངས་སོ། །གཞན་ཡང་འཇིག་རྟེན་མིའི་ཁྲིམས་དང་འགལ་བའི་ལས་མནའ་ཟོས་པའི་སྡིག་པ་ཡང་དཀྱིལ་འཁོར་འདི་ཡི་མདུན་དུ་བཤགས་ན་དག་སྟེ། རྒྱུད་ལས། འཇིག་རྟེན་པའི་ཁྲིམས་དང་མནའ་ལ་སོགས་པ་དང་འགལ་བའི་ལས་བགྱིས་པ་ཐམས་ཅད་མཐོལ་ཞིང་བཤགས་སོ། །ཞེས་གསུངས་སོ། །གཞན་ཡང་ཞི་ཁྲོའི་དཀྱིལ་འཁོར་གྱི་ལྷ་རྣམས་ལ་ཕྱག་འཚལ་ན། ཕ་བསད་པ་དང་། མ་བསད་པ་དང་། རྡོ་རྗེ་སློབ་དཔོན་བསད་པ་དང་། དགྲ་བཅོམ་པ་བསད་པ་དང་། རྒྱལ་བའི་སྐུ་ལ་ངན་སེམས་ཀྱིས་ཁྲག་ཕྱུང་བ་དང་ལྔ་སྟེ། ཤི་མ་ཐག་ཏུ་སྐྱེ་བ་གཞན་
གྱིས་བར་མཚམས་མི་ཆོད། བར་དོ་ཡང་བགྲོད་ལོང་མེད་པར་དམྱལ་བ་མནར་མེད་པར་འགྲོ་ངེས་པའི་སྡིག་པ་དེ་ལྔ་ཡང་དག་ནས། རིག་འཛིན་རྒྱལ་བའི་ཞིང་ཁམས་།སུ་སྐྱེས་ན་སྡིག་པ་གཞན་རྣམས་དག་པར་སྨོས་ཅི་དགོས་ཏེ། ཚེ་འདས་ཀྱི་དོན་དུ་ཡིན་ན་ཡང་ན་རཀ་རིགས་དྲུག་གི་གནས་དོང་ནས་སྤྲུགས་ཏེ། རིག་འཛིན་རྒྱལ་བའི་ཞིང་ཁམས་སུ་སྐྱེ་བར་ཐེ་ཚོམ་མེད་དེ། སྟོན་པ་ཀུན་ཏུ་བཟང་པོས་བཀའ་སྩལ་པ། གང་གིས་སྒྱུ་འཕྲུལ་ཞི་ཁྲོ་ཡི། །དཀྱིལ་འཁོར་ལྷ་ལ་ཕྱག་འཚལ་ན། །ཉམས་ཆག་ཀུན་ཀྱང་བྱང་གྱུར་ཏེ། །མཚམས་མེད་ལྔ་ཡི་སྡིག་ཀྱང་བྱུང་། །ན་རཀ་གནས་ཀྱང་དོང་སྤྲུགས་ཏེ། །རིག་འཛིན་རྒྱལ་བའི་ཞིང་དུ་གྲགས། །ཞེས་ཞི་ཁྲོ་དཔང་ཀོང་ལས་གསུངས་སོ། །དེར་མ་ཟད་ཞི་ཁྲོའི་དཀྱིལ་འཁོར་གྱི་ལྷ་འདི་རྣམས་ཀྱི་མཚན་ཐོས་པ་ཙམ་གྱིས། རྩ་བའི་ལྟུང་བ་བཅུ་བཞི། སྦོམ་པོ་བརྒྱད། ཡན་ལག་ཉི་ཤུ་རྩ་ལྔ། རྒྱས་པར་ས་ཡ་འབུམ་སྡེ། རྩ་བ་སྐུ་གསུང་ཐུགས་ཀྱི་དམ་ཚིག་ལ་ཆག་ཉམས་ཅི་ཡོད་པ་ཐམས་ཅད་བྱང་ཞིང་དག་ནས་སོར་ཆུད་པར་གསུངས་ཏེ། དྲི་མེད་རྒྱལ་པོ་བཤགས་པའི་རྒྱུད་ལས། དེ་ནས་དཀྱིལ་འཁོར་གྱི་ལྷ་རྣམས་ཀྱི་
མཚན་། རྣལ་འབྱོར་ཕོ་མོ་རྣམས་ཀྱིས་ཐོས་པ་ཙམ་གྱིས་རྩ་བ་དང་ཡན་ལག་གི་དམ་ཚིག་ཆག་ཉམས་ཐམས་ཅད་བསྐངས་ཏེ། དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་དང་ཡོན་ཏན་དང་ཕྲིན་ལས་བསམ་གྱིས་མི་ཁྱབ་པ་དང་ལྡན་པར་གྱུར་ཏེ། ཡི་གེ་འཁོར་ལོ་ཚོགས་ཆེན་གྱི་ས་ལ་ལྷུན་གྱིས་གྲུབ་པར་འགྱུར་རོ། །ཞེས་ཕྱག་ན་རྡོ་རྗེའི་ཞལ་ནས་གསུངས་སོ། །ཨོ་རྒྱན་རིན་པོ་ཆེ་པདྨ་འབྱུང་གནས་ཀྱི་ཞལ་ནས། འདི་ནི་ཐོས་གྲོལ་ཆེན་མོ་ཞེས་བྱ་བ་ཡིན་པས། མཚམས་མེད་པ་ལྔ་བསགས་པའི་རྣ་ལམ་དུ་ཐོས་ན་ངེས་པར་གྲོལ་བར་འགྱུར་རོ། །དེའི་ཕྱིར་ཁྲོམ་ཆེན་པོའི་ནང་དུ་ཡང་བཀླགས་པར་བྱའོ། །སྤེལ་བར་བྱའོ། །ད་ལྟ་ལན་གཅིག་ཚོར་བས་དོན་མ་རྟོགས་ཀྱང་། །བར་དོར་རིག་པ་དགུ་འགྱུར་གྱིས་གསལ་དུ་འགྲོ་བས། དེའི་དུས་སུ་ཚིག་གཅིག་ཀྱང་མི་བརྗེད་པར་དྲན་པར་འགྱུར་རོ། །དེའི་ཕྱིར་ན་གསོན་པོའི་དུས་སུ་ཀུན་གྱིས་རྣ་བར་བསྒྲགས་པར་བྱའོ། །ནད་པ་ཐམས་ཅད་ཀྱི་སྔས་སུ་བཀླགས་པར་བྱའོ། །ཤི་བའི་རོ་ཐམས་ཅད་ཀྱི་སྔས་སུ་བཀླགས་པར་བྱའོ། །ཤི་བའི་རོ་ཐམས་ཅད་ཀྱི་རྩར་བཀླགས་པར་བྱའོ། །རྒྱ་ཆེར་སྤེལ་བར་བྱའོ། །འདི་དང་འཕྲད་
པ་ནི་སྐལ་བ་ཤིན་ཏུ་བཟང་བ་ཡིན་ནོ། །ཚོགས་བསགས་ཤིང་སྒྲིབ་པ་བྱང་བ་རྣམས་མ་གཏོགས་པ་འདི་དང་འཕྲད་པར་དཀའོ། །གལ་ཏེ་འཕྲད་ཀྱང་བློར་ཤོང་བར་དཀའོ། །འདི་ཐོས་ནས་ལོག་ལྟ་མ་སྐྱེས་པ་ཁོ་ནས་ཀྱང་གྲོལ་བར་ནུས་སོ། །དེའི་ཕྱིར་འདི་ལ་ཤིན་ཏུ་གཅེས་སྤྲས་སུ་བྱའོ། །འདི་ནི་ཆོས་ཐམས་ཅད་ཀྱི་བཅུད་ཡིན་ནོ། །ཞེས་གསུངས་སོ། །ཡང་ཞི་ཁྲོའི་ལྷ་ཚོགས་འདི་རྣམས་ཀྱི་སྐུ་གཟུགས་འདི་རྣམས་མཇལ་བ་དང་། མཆོད་པ་དང་མར་མེ་སོགས་ཀྱིས་འབྲེལ་བ་བཞག་ན། བར་དོར་ངོ་འཕྲོད་ནས་གྲོལ་བར་གསུངས་ཏེ། ཆོས་ཉིད་བར་དོའི་གསོལ་འདེབས་ཐོས་གྲོལ་ཆེན་མོ་ལས། དེ་ཡང་མི་ཡུལ་དུ་ཁྲག་འཐུང་གི་སྐུ་འདི་རྣམས་མངོན་རྟོགས་བསྒོམ་པ་དང་། མཆོད་བསྟོད་བྱས་པ་དང་། །ཐ་ན་སྐུ་གཟུགས་རིས་སུ་བྲིས་པ་དང་། འབུར་དུ་དོད་པ་སོགས་ཁོ་ནས་ཀྱང་འདིར་སྐུ་གཟུགས་ཤར་བ་དང་ངོ་ཤེས་ནས་གྲོལ་བ་ཐོབ་པའི་གནད་ཀྱང་དེ་ལྟར་ཡིན་ནོ། །ཞེས་གསུངས་སོ་།ཡང་ཨོ་རྒྱན་རིན་པོ་ཆེ་ཡི་ཞལ་ནས། འདི་ནི་སྒོམ་བསྒྲུབ་བྱ་མི་དགོས་པའི་ཆོས། བལྟས་པས་གྲོལ་བ། ཐོས་པས་གྲོལ་བ། བཀླགས་པས་གྲོལ་བའི་གདམས་ངག་ཟབ་
མོའོ། །སྡིག་པོ་ཆེ་གསེང་ལམ་ལ་ཁྲིད་པའི་གདམས་པ་ཟབ་བོ། །དུས་གསུམ་སངས་རྒྱས་ཀྱིས་བཙལ་ཡང་འདི་ལས་ལྷག་པའི་ཆོས་རྙེད་མི་སྲིད་དོ། །ཞེས་གསུངས་སོ། །གསང་སྔགས་ཀྱི་ཆོས་གཞན་རྣམས་ཁྲོམ་ཆོས་མི་རུང་ཡང་། ཞི་ཁྲོ་འདི་ནི་ཐོས་གྲོལ་དང་མཐོང་གྲོལ་ཡིན་པས། ཁྲོམ་ཆེན་པོའི་དཀྱིལ་དུ་བཀླགས་པར་བྱའོ། །གསུངས་པ་ཡིན་ནོ། །འདི་ནི་ཞི་ཁྲོའི་བརྒྱ་མཆོད་ཅེས་བྱ་སྟེ་ཕྱི་ཡི་མཆོད་པ་ལྔ་དང་ནང་གི་མཆོད་པ་གསུམ་ལ་བརྒྱ་རྩ་བརྒྱད་ཚར་མང་པོ་ཡོད་དེ། དང་པོ་ནང་འདི་ན་བདུད་རྩི་སྨན་མཆོད་དངོས་དང་གཟུགས་བརྙན་བརྒྱ་རྩ་བརྒྱད་ཡོད་པའི་དོན་དང་ཕན་ཡོན་ནི། བདེར་གཤེགས་དྲེགས་པ་ཀུན་སྒྲོལ་གྱི་རྒྱུད་ལས། རྒྱལ་བ་རྒྱ་མཚོ་མཉེས་བྱེད་པའི། །བདུད་རྩི་སྨན་གྱི་མཆོད་པ་བྱ། །ལྷ་རྣམས་མཉེས་པར་བྱེད་པ་ཡིས། །བར་ཆད་བགེགས་ཚོགས་ཞི་བ་དང་། །ཐུགས་དམ་གཉན་པོ་བསྐང་བ་དང་། །འདོད་པའི་དོན་ཀུན་བསྒྲུབ་པའི་ཕྱིར། །བདུད་རྩི་སྨན་གྱི་མཆོད་པ་བྱ་།ཞེས་གསུངས་པའི་དོན་ཡིན། དེའི་ཕྱི་ལ་དྲག་པོའི་གཏོར་མ་བརྒྱ་རྩ་བརྒྱད་ཡོད་པ་དང་། །ནང་གི་ཟུར་བཞིར་དྲག་པོའི་གཏོར་ཆེན་བཞི་ཡོད་པ་ནི། ཁྲག་འཐུང་ཁྲོ་བོའི་ལྷ་
ཚོགས་ལ་ཕུལ་བས་ཡོན་མཆོད་རྣམས་ཀྱི་བར་ཆད་སེལ་བ་ཡིན་ཏེ། ཨོ་རྒྱན་རིན་པོ་ཆེས། རྣལ་འབྱོར་གཏོར་མར་བརྩོན་པ་ན། །དེ་ལ་བར་ཆད་སུ་ཡིས་ནུས། །རྣལ་འབྱོར་གཏོར་མར་མི་བརྩོན་ན། །དེ་ཡི་བར་ཆད་སུ་ཡིས་སེལ། །ཅེས་གསུངས་སོ། །དེའི་ཕྱི་ལ་རཀྟའི་མཆོད་པའི་གཟུགས་བརྒྱ་རྩ་བརྒྱད་དང་། ནང་དུ་དངོས་སུ་བཤམས་པ་ནི། རྒྱུད་དེ་ཉིད་ལས། དུས་གསུམ་བདེ་བར་གཤེགས་པ་ཐམས་ཅད་ཀྱི། །སྐུ་གསུང་ཐུགས་ཀྱི་དངོས་གྲུབ་བསྒྲུབ་པ་དང་། །ཁམས་གསུམ་མ་ལུས་དབང་དུ་སྡུད་པ་དང་། །སྲིད་གསུམ་མ་ལུས་ཟིལ་གྱིས་གནོན་པའི་ཕྱིར། །ཁམས་གསུམ་རཀྟ་གཏོར་མ་འབུལ་བ་ནི། །ཞེས་པདྨ་ཧེ་རུ་ཀས་གསུངས་པའི་དོན་ནོ། །དེའི་ཕྱིར་ལྷ་བཤོས་བརྒྱ་དང་རྩ་བརྒྱད་དང་ནང་དུ་ཕྲིན་ལས་བཞིའི་གཏོར་ཆེན་དང་མཆོད་པའི་ལྷ་མོ་བཅུ་དྲུག་གི་ངོ་བོ་ལྷ་བཤོས་བཅུ་དྲུག་བཤམས་པ་ནི་བར་ཆད་སེལ་ཞིང་ཚོགས་རྫོགས་པའི་དོན་དུ་ཡིན་ཏེ། ལག་ལེན་གསལ་བའི་སྒྲོན་མེ་ལས། གཏོར་མ་གཏོང་བའི་དགོས་པ་ནི་བགེགས་སེལ་བའོ། །དོན་གྱིས་བགེགས་ཆོས་སྐུ་མི་རྟོགས་པ་དང་། རྟགས་ཀྱིས་བགེགས་རྒྱུ་བསོད་ནམས་ལ་བར་དུ་གཅོད་པ་
དང་། མཚོན་པའི་བགེགས་འཇིག་རྟེན་གྱི་ཚེ་དང་བསོད་ནམས་ལ་བར་དུ་གཅོད་པ་དང་གསུམ་པོ་དེ། དོན་རྟགས་མཚོན་པའི་གཏོར་མ་བཏང་བས་ལེ་ལོ་ཞེས་དང་། གཏོར་མའི་འབྲས་བུ་ནི་དོན་རྟོགས་མཚོན་པའི་གཏོར་མ་གསུམ་བཏང་བས། ཆོས་སྐུ་ལོངས་སྐུ་སྤྲུལ་སྐུ་གསུམ་ཐོབ། ཞེས་ཨོ་རྒྱན་རིན་པོ་ཆེས་གསུངས། དེའི་རྒྱབ་ཏུ་མེ་ཏོག་གི་གཟུགས་བརྒྱ་རྩ་བརྒྱད་བཤམས་པའི་ཕན་ཡོན་ནི། སྙིང་རྗེ་པདྨ་དཀར་པོའི་མདོ་ལས། ཀུན་དགའ་བོ་གལ་ཏེ་སེམས་ཅན་མྱ་ངན་ལས་འདའ་བའི་བསྐལ་པ་མེད་པ་ཞིག་གིས་སངས་རྒྱས་ལ་དམིགས་ནས་ཐ་ན་མེ་ཏོག་གཅིག་ནམ་མཁའ་ལ་འཐོར་ན་ཡང་། ཀུན་དགའ་བོ་དགེ་བའི་རྩ་བ་དེ་ཡང་མྱ་ངན་ལས་འདས་པའི་འབྲས་བུ་ཡིན་ཏེ། མྱ་ངན་ལས་འདས་པའི་ཀླས་པ་དང་། མྱ་ངན་ལས་འདས་པའི་མཐས་གཏུག་པར་ང་སྨྲའོ། །ཞེས་གསུངས་སོ། །ཡང་མེ་ཏོག་བརྒྱ་རྩབརྒྱད་བསྒྲིགས་པ་མེ་ཏོག་གི་ཕྲེང་བ་ཡང་ཡིན་ཏེ། སྤྱན་རས་གཟིགས་ཀྱི་མདོ་ལས། །མཆོད་རྟེན་ཕྲེང་བ་ཕུལ་བྱེད་པ། །དེ་ཡིས་འཁོར་ལོས་སྒྱུར་རྒྱལ་འགྱུར། །བརྒྱ་བྱིན་ལས་ཀྱི་དབང་ཕྱུག་འགྱུར། །ཞེས་གསུངས་སོ། །དེའི་ཕྱི་རིམ་དུ་བདུག་སྤོས་བརྒྱ་རྩ་བརྒྱད་
ཀྱིས་གཟུགས་དང་དངོས་སུ་འབུལ་ཏེ། དེ་ཡི་ཕན་ཡོན་ནི། འཕགས་པ་སྤྱན་རས་གཟིགས་ཀྱི་མདོ་ལས། རྒྱལ་བའི་མཆོད་རྟེན་སྤོས་བྱུག་ཕུལ་བྱས་ན། །དྲི་མི་ཞིམ་དང་མི་གཅང་སྨད་པ་རྣམས། །རྟག་ཏུ་སྤངས་ཤིང་ཚུལ་ཁྲིམས་ཕུང་པོར་གནས། །དེ་ཡིས་རྟག་ཏུ་ཚངས་སྤྱོད་མཆོག་འདི་སྤྱོད། །ཅེས་དང་། རྒྱལ་བའི་མཆོད་རྟེན་སྤོས་བྱུག་ཕུལ་བྱས་ན། །དེ་ཡི་ངན་སོང་གནས་རྣམས་མ་ལུས་སྤངས། །དེ་བཞིན་གཤེགས་དང་ཉེ་བར་འཐོབ་པར་འགྱུར། །ཅེས་གསུངས་སོ། །དེའི་རྒྱབ་ཏུ་དྲི་ཆབ་ཀྱི་གཟུགས་བརྒྱ་རྩ་བརྒྱད་དང་དངོས་སུ་ཡང་བཤམས་པའི་ཕན་ཡོན་ནི། མདོ་སྡེ་ལས། གང་གི་སྤོས་ཆུ་ཡུངས་འབྲུ་ཙམ་བླངས་ཏེ། །བཅོམ་ལྡན་མཆོད་རྟེན་དག་ལ་བདུག་བྱེད་པ། །དེ་ཡི་ཕན་ཡོན་བརྗོད་ན་སེམས་དང་ཞིང་། །རྡུལ་དང་དྲི་མ་སྤངས་ལ་མཉན་པར་གྱིས། །དེ་ཡི་བསོད་ནམས་ལྡན་ཞིང་ཕྱོགས་ཀུན་རྒྱུ། །ནད་མེད་འགྱུར་ཞིང་བློ་ལྡན་བག་ཡོད་ལྡན། །སྤྱོད་པ་རྣམ་པ་སྤྱོད་ཅིང་མྱ་ངན་དུལ། །སྐྱེ་བོ་མང་པོ་དགའ་ཞིང་ཡིད་དུ་འོང་། །རྒྱལ་སྲིད་ཐོབ་ནས་རྒྱལ་བ་ཀུན་མཆོག་འགྱུར། །མཐུ་ཆེན་རབ་མཁས་འཁོར་ལོས་སྒྱུར་རྒྱལ་འགྱུར། །གསེར་
གྱིས་མདོག་ལྡན་མཚན་གྱི་གོ་ཆ་ཅན། །འཇིག་རྟེན་ཀུན་ན་ཡིད་འོང་དྲི་ལྡན་འཐོབ། །ཅེས་གསུངས་སོ། །དེའི་རྒྱབ་ཏུ་ཚོགས་ཆུང་བརྒྱ་རྩ་བརྒྱད་བཤམས་པས་ཚོགས་བརྒྱ་ཞོར་ལ་འགྲུབ་ཅིང་། མདུན་དུ་ཚོགས་ཆེན་བཤམས་པས་ཚོགས་ཆེན་ཞོར་ལ་འགྲུབ་སྟེ། །དེ་ཡི་ཕན་ཡོན་ནི། འཁོར་ལོ་སྡོམ་པའི་རྒྱུད་ལས། ཨེ་མ་ཧོ་ཡེ་ཤེས་ཆེན་པོ་ཉིད། །ཚོགས་ཆེན་འབར་བས་ཉོན་མོངས་བསྲེག །ཅེས་དང་། གཤིན་རྗེ་དགྲ་ནག་གི་རྒྱུད་ལས། བསོད་ནམས་མཐར་ཐུག་ཚོགས་ཀྱི་འཁོར། །མ་བྱུང་འབྱུང་བར་མི་འགྱུར་རོ། །ཞེས་གསུངས་པས་རྒྱུ་བསོད་ནམས་ཀྱི་ཚོགས་རྫོགས་པར་བྱེད་པའི་ཐབས་ཀྱི་མཐར་ཐུག་པ། ཚོགས་ཀྱི་འཁོར་ལོ་འདི་ལྟ་བུ་ནི་འདས་པའི་སངས་རྒྱས་འཁོར་བ་འཇིག་གསེར་ཐུབ་འོད་སྲུང་རྣམས་ཀྱི་བསྟན་པ་ལ་ཡང་མ་བྱུང་། མ་འོངས་པའི་སངས་རྒྱས་བྱམས་པ་ནས་སྣང་མཛད་ཀྱི་བར་དུ་ཡང་མི་འབྱུང་། ད་ལྟར་ཤཱཀྱའི་བསྟན་པ་ལ་ངེད་རང་རྣམས་ཀྱིས་ཚོགས་ཀྱི་འཁོར་ལོ་ལ་ལོངས་སྤྱོད་ཆོག་པ་འདིར་རང་རེ་ཚེ་བསོད་ནམས་བསགས་པ་ཡིན་ཏེ། ཌོམྦི་ཧེ་རུ་ཀའི་ཞལ་ནས། ཨེ་མ་ཧོ་རྣལ་འབྱོར་པ་རྣམས། རྩོད་པའི་དུས་སུ་བྱུང་བར་གྱུར་ཀྱང་། ཚེ་གཅིག་ཕྱག་
རྒྱ་ཆེན་པོ་མཆོག་གི་དངོས་གྲུབ་ཐོབ་པར་བྱེད་པ་ཐམས་ཅད་ཀྱི་མཆོག་ཏུ་གྱུར་པ་ཚོགས་ཀྱི་འཁོར་ལོ་དམ་པ་འདི་དག་ལོངས་སྤྱོད་དུ་ཡོད་པ་དག་ནི། ཐུན་མོང་མ་ཡིན་པའི་བསོད་ནམས་ཀྱི་མཐུ་ལས་གྲུབ་པ་སྟེ། རྡོ་རྗེ་འཛིན་པ་རྣམ་དག་ཏུ་གྱིས་ཤིག །ཅེས་གསུངས་སོ། །རྗེ་མར་པ་ལོ་ཙཱའི་ཞལ་ནས་ཀྱང་། སྤྱིར་ཚོགས་ཀྱི་འཁོར་ལོ་བསྐོར་བ་དེ། །སྨིན་ལམ་དབང་བཞི་བསྐུར་ཙམ་ནས། །ཚོགས་ཀྱི་འཁོར་ལོ་དགོས་པ་ཡིན། །མཁའ་འགྲོའི་བྱིན་རླབས་ཞུ་ཙམ་ན། །ཚོགས་ཀྱི་འཁོར་ལོ་དགོས་པ་ཡིན། །རྒྱུད་སྡེའི་ཉན་བཤད་བྱེད་ཙ་ན། །ཚོགས་ཀྱི་འཁོར་ལོ་དགོས་པ་ཡིན། །ཟབ་མོའི་གདམས་ངག་ཞུ་ཙ་ན། །ཚོགས་ཀྱི་འཁོར་ལོ་དགོས་པ་ཡིན། །ཉམས་དང་རྟོགས་པ་སྤེལ་འདོད་ན། །ཚོགས་ཀྱི་འཁོར་ལོ་དགོས་པ་ཡིན། །ཕྱི་ནང་གི་བར་ཆད་སེལ་ཙ་ན། །ཚོགས་ཀྱི་འཁོར་ལོ་དགོས་པ་ཡིན། །ཕྲིན་ལས་རྣམ་བཞི་བསྒྲུབ་ཙ་ན། །ཚོགས་ཀྱི་འཁོར་ལོ་དགོས་པ་ཡིན། །ཅེས་གསུངས་པ་ལྟ་བུ་ཡིན་ཏེ། བསོད་ནམས་ཀྱི་ཚོགས་རྫོགས་པས་ཚོགས། སྡིག་པ་དང་སྒྲིབ་པ་ཐམས་ཅད་གཅོད་པས་འཁོར་ལོ་ཞེས་བྱ་བ་ཡིན་ནོ། །གཞན་ཡང་དམ་ཚིག་ཆག་
ཉམས་བསྐང་བ་ལ་ཡང་ཚོགས་ཀྱི་འཁོར་ལོ་འདི་ཟབ་སྟེ། བསྐང་རྒྱུད་ལས། བཅོམ་ལྡན་འདས་ཀྱིས་བཀའ་སྩལ་པ། ཉམས་པ་རྣམས་ནི་ཚོགས་ཀྱིས་བསྐང་། །ཞེས་གསུངས་སོ། །དེ་ཡི་རྒྱབ་ཏུ་ཐབས་ཤེས་མཚོན་པའི་ཤ་ཟན་བརྒྱ་རྩ་བརྒྱད་ནི་གསང་བའི་མཆོད་པ་ཡིན་ཅིང་། ནང་དུ་འབྲས་བུ་ཡི་ཕུང་པོ་བཀོད་པ་ཡང་མེ་ཏོག་བཀྲམ་པའི་མཚོན་བྱེད་མཆོད་པའི་ཡན་ལག་ཡིན་ཏེ། དེའི་ཕན་ཡོན་ནི། སྤྱིར་མཆོད་པའི་ཕན་ཡོན་ཏེ། སྤྱན་རས་གཟིགས་ཀྱི་མདོ་ལས། སངས་རྒྱས་དམ་པ་སྦྱིན་གནས་མཚུངས་མེད་གྱུར་པ་ལ། །སྤྱོད་པ་དམ་པ་བསྐྱེད་ནས་ཁྱད་པར་བརྙེས་གྱུར་པ། །མི་ཡི་ཁྱུ་མཆོག་དེ་ལ་འདིར་ནི་མཆོད་བྱས་ན། །རྣམ་པར་སྨིན་པས་དམ་པ་མཚུངས་མེད་རང་བཞིན་འགྱུར། །མི་ཡི་ནང་ནས་ཤི་འཕོས་ནས། །སུམ་ཅུ་གསུམ་དུ་འགྲོ་བར་གྱུར། །དེར་ནི་རིན་ཆེན་སྣ་ཚོགས་ཀྱི། །གཞལ་མེད་ཁང་པ་ཐོབ་པར་འགྱུར། །ཞེས་གསུངས་སོ། །དེ་ཡང་ཆོ་ག་འདི་ཡི་དོན་དུ་མར་མེ་བླུགས་ཟེར་བའི་དོན། མར་མེ་མཚན་ཐུབ་གཅིག་ཟུར་བཞིར་མར་མེ་ཆེ་བ་བཞི། ཕྱི་རིམ་དུ་མར་མེ་བརྒྱ་དང་རྩ་བརྒྱད། ཀུན་འདུས་མར་མེ་བརྒྱ་རྩ་བརྒྱད་ཡོད་པས། མར་མེའི་
ཕན་ཡོན། སངས་རྒྱས་ཀྱི་ཞིང་བྱེ་བ་ཁྲག་ཁྲིག་བརྒྱ་སྟོང་ཡུངས་ཀར་གྱི་འབྲས་བུ་དག་གིས་ཕྱུར་བུར་གང་བ་ནི་བགྲང་བར་ནུས་ཀྱི། དཀྱིལ་འཁོར་ལྷ་ལ་མར་མེ་གཅིག་ཕུལ་བའི་བསོད་ནམས་ནི་བགྲང་བར་མི་ནུས། གཞན་ཡང་མར་མེ་གཅིག་ཕུལ་བའི་བསོད་ནམས་ནི་ལུས་མདོག་ངན་པར་མི་སྐྱེ། ཤ་རྒྱས་ཤིང་སྟོབས་དང་ལྡན་པ་ལུས་ལ་འོད་ཡོད་ཅིང་། འཇིག་རྟེན་གྱི་ཁམས་གར་འདོད་པར་རྫུ་འཕྲུལ་གྱིས་བགྲོད་ནུས་པར་འགྱུར་བ་སྟེ། དེ་ཡི་བསོད་ནམས་ཀྱི་དཔེ་ནི་ཅི་འདྲ་ན། མི་མཇེད་འཇིག་རྟེན་གྱི་ཞིང་འདི་སྲིད་པའི་རྩེ་མོའི་བར་དུ་འཛམ་བུ་ཆུ་བོའི་གསེར་གྱིས་ཕྱུར་བུར་བཀང་བ་དང་འདྲ་བར་བསོད་ནམས་དེ་ཟད་མི་ནུས་པར་གསུངས་ཏེ། འཕགས་པ་སྤྱན་རས་གཟིགས་ཀྱི་མདོ་ལས། སངས་རྒྱས་མཚན་ལ་མར་མེ་གཅིག་ཕུལ་ན། །འདི་ནས་བཟུང་སྟེ་སྲིད་པའི་རྩེ་མོའི་བར། །སངས་རྒྱས་ཞིང་ནི་འཛམ་གླིང་གསེར་གྱིས་གང་། །དེ་འདྲའི་དཔལ་དེ་ཟད་པར་བྱ་མི་ནུས། །བཅོམ་ལྡན་མཆོད་རྟེན་མར་མེ་ཕུལ་བྱས་ན། །དེ་ཡི་ལུས་ནི་མདོག་ངན་ཡོངས་མི་འགྱུར། །གཟུགས་མཆོག་སྲ་ཞིང་ལག་པ་གཟུ་བ་འདྲ། །སྣང་བ་ཐོབ་ནས་འཇིག་རྟེན་ཀུན་ཏུ་རྒྱུ། །གལ་
ཏེ་ཁྲག་ཁྲིག་བརྒྱ་སྟོང་སངས་རྒྱས་ཞིང་། །ཡུངས་འབྲུ་དག་གིས་ཕྱུར་བུར་གང་གྱུར་པ། །བགྲང་བ་དང་ནི་གཞལ་ཞིང་བརྗོད་པར་ནུས། །བདེ་གཤེགས་མར་མེ་གཅིག་ཕུལ་དེ་ལྟར་ཡིན། །ཞེས་གསུངས་སོ། །རྔ་དང་དུང་དང་ཌཱ་དྲིལ་གླིང་བུ་སོགས། །རོལ་མོའི་མཆོད་པ་བྱེད་པའི་ཕན་ཡོན་ནི། མདོ་སྡེ་དེ་ཉིད་ལས། རོལ་མོ་སྒྲ་ཡིས་མི་མཆོག་མཆོད་བྱས་ན། །མྱ་ངན་མེད་ཅིང་དབང་ལྡན་རྒྱལ་པོ་འོང་། །མི་ཡི་འཇིག་རྟེན་ཡིད་འོང་སྒྲ་ལྡན་འགྱུར། །དེ་སྒྲ་ཡན་ལག་ཚང་ཞིང་དག་པར་འོང་། །བཅོམ་ལྡན་མཆོད་རྟེན་རོལ་མོའི་སྒྲ་བྱས་ན། །ཤེས་བཞིན་ལྡན་ཞིང་མིག་ནི་རྣམ་དག་འགྱུར། །རྣ་བ་རྣམ་པར་དག་ཅིང་སེམས་ཀྱང་རྣམ་པར་དག །སྣ་ཡི་དབང་པོ་མཆོག་དང་ལྡན་པར་འགྱུར། །དེ་ཡི་ལྕེ་ནི་རབ་མཛེས་ལྟ་ན་སྡུག །ཐོག་མར་རབ་མཉེས་མཛེས་ཤིང་སྒྲ་ཡིད་འོང་། །དཔེར་ན་ལྷ་ཡི་རིན་ཆེན་ནོར་བུ་འདྲ། །སྒྲ་སྐད་ཡག་པ་བྱེ་བ་དཔག་མེད་འབྱིན། །བཅོམ་ལྡན་མཆོད་རྟེན་རོལ་མོའི་སྒྲ་བྱས་ན། །ནམ་ཡང་སྦྲུལ་དུ་མི་འགྱུར་ལྕེ་མེད་མིན། །ཞར་བ་སྐུར་པོ་ཡ་ཡོ་ཅན་མི་འགྱུར། །ལུས་ནི་ཁྱད་པར་འཕགས་ཤིང་ཤིན་ཏུ་མཛེས། །བཅོམ་ལྡན་མཆོད་རྟེན་རོལ་མོའི་སྒྲ་
བྱས་ན། །ལྷ་འམ་ཀླུ་འམ་མི་འམ་ལྟོ་འཕྱེ་ཆེ། །སུ་ཡང་དེ་ལ་མ་དད་སྐྱེ་མི་འགྱུར། །དབུགས་འབྱིན་ཐོབ་ནས་འཇིག་རྟེན་ཀུན་ཏུ་རྒྱུ། །ཞེས་གསུངས་སོ། །བདུད་བཞིའི་གཡུལ་ལས་རྒྱལ་བའི་རྟེན་འབྲེལ་དུ་ཟུར་བཞིར་རྒྱལ་མཚན་བཞི་བཙུགས་པའི་ཕན་ཡོན་ནི། མདོ་སྡེ་དེ་ཉིད་ལས། རྡུལ་བྲལ་ཉོན་མོངས་བསལ་ལ་རྒྱལ་མཚན་ཕུལ། །རིང་པོར་མི་ཐོག་ནོར་མང་རྙེད་པར་འགྱུར། །ཤེས་རབ་མཐའ་ཡས་མཛོད་ནི་མང་ལྡན་འོང་། །སེམས་ཆུང་མི་འགྱུར་དམན་པའི་སེམས་མི་འགྱུར། །དེ་ནི་གཞན་ལ་གནོད་པའི་སེམས་མི་སྐྱེ། །སེམས་ནི་རབ་དང་རྟག་ཏུ་བག་ཡོད་ལྡན། །དེ་ལ་མེ་དང་དུག་དང་མཚོན་མི་ཚུགས། །སྐྱེ་བོའི་ཚོགས་ཆེན་རྣམས་ཀྱིས་བལྟ་བར་འགྱུར། །ཅེས་གསུངས་སོ། །ཕོ་བྲང་འདི་ཡི་གོང་ཤམ་དར་དང་གོས་ཆེན་གྱིས་བྱས་པའང་མཛེས་ཆོས་ཙམ་མ་ཡིན་ཏེ། དེའི་དགོས་པ་ཡང་མདོ་སྡེ་ཆེན་པོ་དེ་ཉིད་ལས། འཇིག་རྟེན་མགོན་པོ་སྐྱོབ་པ་ལ། །དར་གྱིས་དབུལ་བ་ཕུལ་བྱས་ན། །ལྷ་ཡི་དག་དང་མི་རྣམས་ཀྱི། །དོན་རྣམས་ཐམས་ཅད་འགྲུབ་པར་འགྱུར། །ཅེས་དང་། གང་ཞིག་གོས་ཀྱིས་བཅོམ་ལྡན་མཆོད་རྟེན་དང་། །འདྲེན་པ་
མཚུངས་མེད་རྣམས་ལ་མཆོད་བྱེད་པ། །དེང་འདིར་མཚུངས་པ་མེད་པའི་ལུས་ཐོབ་སྟེ། །སུམ་ཅུ་རྩ་གཉིས་མཚན་གྱི་མེ་ཏོག་རྒྱས། །ཞེས་གསུངས་སོ། །ཚོན་སྐུད་དྲྭ་བ་འདི་ཡང་རྙིང་མའི་དཀྱིལ་འཁོར་ཆེན་པོ་ཐམས་ཅད་ཀྱི་ཕྱག་ལེན་ལ་ཡོད་ཅིང་། བར་དོར་འོད་ལྔའི་དྲྭ་བ་དང་གུར་ཁྱིམ་གྱི་ནང་ནས་ཞི་ཁྲོའི་ལྷ་ཚོགས་འཆར་བ་ངོ་འཕྲོད་པའི་ཆེད་ཡིན་ནོ། །གོང་དུ་རྩ་བ་གསུམ་གྱི་གཏོར་མ་ལྷ་གྲངས་བཤམས་པ་ནི། ཨོ་རྒྱན་རིན་པོ་ཆེ་ཡི་ཞལ་ནས། རྒྱལ་བ་གཅིག་གི་དཀྱིལ་འཁོར་དུ། །རྒྱལ་བ་ཀུན་གྱི་ཕྲིན་ལས་བྱ། །རྒྱལ་བ་གཅིག་སྒྲུབ་ཀུན་གྱི་ངང་། །འགྲོ་འདུལ་སྤྲོས་པ་ལ་དགའ་ན། །རྒྱལ་བ་ཀུན་གྱི་ལས་གཞུང་བསྲང་། །ཞེས་གསུངས་པའི་དོན་ཡིན། ངེད་རྣམས་ཀྱི་དབུ་རྒྱན་དང་མ་རལ་དང་པད་ཞྭ་སོགས་རྒྱན་ཆས་སྨྲས་པ་འདི་ཡང་སྣང་ཤེས་དང་མཛེས་མཛེས་ཙམ་མ་ཡིན་ཏེ། བཅོམ་ལྡན་འདས་འབར་བའི་རྒྱལ་པོ་གཞན་གྱིས་མི་ཐུབ་པ་དཔལ་ཧེ་རུ་ཀའི་གོ་འཕང་འགྲུབ་པའི་དགོས་པ་ཡོད་དེ། སྒྱུ་འཕྲུལ་དྲ་བ་རྩ་བའི་རྒྱུད་གསང་བ་སྙིང་པོ་ལས། རྒྱན་དང་བགོ་བའི་ཕྱག་རྒྱ་ཡིས། །འབར་བའི་རྒྱལ་པོ་ཐུབ་མེད་འགྲུབ། །ཅེས་གསུངས་སོ། །ཕྱི་མཆོད་རྣམས་དང་སྨན་རཀ་
གཏོར་གསུམ་མར་མེའི་མདངས་བསྐང་གྱེར་ཞིང་སྐོར་བ་བྱེད་པའི་ཕན་ཡོན་ནི། འཕགས་པ་སྤྱན་རས་གཟིགས་ཀྱི་མདོ་ལས། འཇིག་རྟེན་མགོན་གྱི་མཆོད་རྟེན་ལ། །མི་གང་བསྐོར་བ་བྱས་པ་ཡིས། །བསྔགས་པ་བསྐལ་པ་བྱེ་བར་ཡང་། །བརྗོད་པས་ཟད་པར་བྱ་མི་ནུས། །ཞེས་དང་། མཆོད་རྟེན་བསྐོར་བ་བྱས་ན་ནི། །བརྩོན་འགྲུས་བརྟན་ཞིང་མཐུ་བརྟན་ལ། །བརྟན་ཞིང་རྣམ་པར་གནོན་བརྟན་དང་། །དེ་ནས་མྱུར་དུ་མཁས་པར་འགྱུར། །ཅེས་གསུངས་སོ། །འོ་ན་དཀྱིལ་འཁོར་འདི་བདེ་གཤེགས་མཆོད་རྟེན་མིན་ནོ་སྙམ་ན་ཤིན་ཏུ་ཡིན་ཏེ། བདེ་བར་གཤེགས་པ་བཅོམ་ལྡན་འདས་བུདྡྷ་བཞི་བཅུ་ཞེ་གཉིས་དང་བཅོམ་ལྡན་འདས་དཔལ་ཧེ་རུ་ཀ་དྲག་པོའི་ལྷ་ཚོགས། ལྔ་བཅུ་རྩ་བརྒྱད་ཀྱི་དཀྱིལ་འཁོར་རྟེན་བརྟེན་པ་དང་བཅས་པ། རྒྱལ་བ་དགོངས་བརྒྱུད་རིག་འཛིན་བརྡ་བརྒྱུད་གང་ཟག་སྙན་བརྒྱུད་བླ་མ་དང་མཁའ་སྤྱོད་དག་པ་རིག་འཛིན་དཔའ་བོ་མཁའ་འགྲོ་ཐམས་ཅད་ཀྱི་སྐུ་གཟུགས་དངོས་སུ་བཤམས། ཡིད་ཀྱིས་དམིགས་པས་དད་པས་སྤྱན་དྲངས་བའི་དཀྱིལ་འཁོར་ཆེན་པོ་འདི་ནི། མཆོད་པའི་རྟེན་མཆོག་ཏུ་གྱུར་པ་ཡིད་ཀྱིས་ཤེས་པར་བྱའོ། །གཞན་ཡང་དཀོན་
མཆོག་གསུམ་པོ་དངོས་སུ་བཞུགས་པ་དང་དངོས་སུ་མི་བཞུགས་པ་ལ་ཡིད་ཀྱིས་དམིགས་ནས་མཆོད་པ་ཡང་བསོད་ནམས་མཉམ་པར་གསུངས་ཏེ། མདོ་སྡེ་རྒྱན་ལས། སངས་རྒྱས་རྣམས་ལ་གོས་ལ་སོགས། །མངོན་སུམ་མངོན་སུམ་ཡིན་པར་མཆོད། །ཅེས་གསུངས་སོ། །སྨན་རཀ་གཏོར་གསུམ་མདངས་བསྐང་དང་བཅས་པའི་ཚིག་མཚམས་སུ་ཨོ་ཨཱཧཱུཾ་སྦྱར་བ་ཡང་ཚིག་སླད་མ་ཡིན་ཏེ། སྐུ་གསུང་ཐུགས་ཀྱི་ཉམས་ཆག་བསྐང་བ་དང་། བླ་མ་ཡི་དམ་སྤྲིན་ལྟར་འདུ་བ་སོགས་དགོས་ཆེད་དུ་མ་ཡོད་པ་ཡིན་ཏེ། སྤྲུལ་སྐུ་དགའ་རབ་རྡོ་རྗེའི་ཞལ་ནས། ཡི་གེ་འབྲུ་གསུམ་པོ་འདི་སྔགས་སུ་བཟླས་ན་གསང་སྔགས་ཕྱི་ནང་གི་དཀྱིལ་འཁོར་ཐམས་ཅད་འགྲུབ་པར་འགྱུར་རོ། །འདི་དབྱངས་སུ་བཟླས་ན་བླ་མ་ཡི་དམ་སྤྲིན་ལྟར་འདུ། མཁའ་འགྲོ་ཆོས་སྐྱོང་དངོས་སུ་འདུ་ཞིང་ཕྲིན་ལས་ཐམས་ཅད་ཐོགས་པ་མེད་པར་འགྱུར་རོ། །ཞེས་གསུངས་སོ། །སློབ་དཔོན་པདྨའི་ཞལ་ནས། ཨེ་མ་ཧོ། སྐུ་གསུང་ཐུགས་དང་ཡོན་ཏན་ཕྲིན་ལས་ཀྱི་ཞི་ཁྲོའི་ལྷ་ཐམས་ཅད་ཀྱི་ངོ་བོ་རྡོ་རྗེ་སློབ་དཔོན་ལ་རྫོགས་པས། དེ་ཡིག་འབྲུ་གསུམ་གྱིས་འགྲུབ་པ་འདི་ཁོ་ནའོ། །ཞེས་གསུངས་སོ། །སྔགས་གླུ་ཡི་དབྱངས་སུ་
གྱེར་ཞིང་གཡས་སྐོར་གཡོན་སྐོར་སྟངས་སྟབས་བྲོ་ཡི་རྣམ་པ་བྱེད་པ་འདི་ཡང་། ཕལ་པའི་གླུ་དང་བྲོ་དང་། རྩེད་མོའི་ཕྱིར་མ་ཡིན་ཏེ། གསང་སྔགས་བརྟུལ་ཞུགས་སྤྱོད་པའི་གླུ་དང་བྲོ་གར་བྱས་པས། རི་བྲག་ལ་ཐོགས་པ་མེད་པ་དང་། ནམ་མཁར་འཕུར་བ་དང་ཆོས་ཀྱི་དངོས་གྲུབ་ཐོབ་པའི་ཕན་ཡོན་བཤད་དེ། རྒྱུད་གསང་བ་སྙིང་པོ་ལས། །བྲོ་གར་འདུ་འཕྲོའི་ཕྱག་རྒྱ་ཡིས། །འཛུལ་ལམ་ནམ་མཁར་འགྲོ་བར་འགྱུར། །གླུ་ཚིག་སྒྲ་ཡི་ཕྱག་རྒྱ་ཡིས། །ཆོས་ཀྱི་དངོས་གྲུབ་ཐོབ་པར་འགྱུར། །ཅེས་གསུངས་པ་དང་། དེར་མ་ཟད་གསང་སྔགས་བརྟུལ་ཞུགས་སྤྱོད་པའི་བྲོ་བརྡུངས་བས་གཉེན་པོ་ཡིན་ཡང་ས་འདྲེ་ས་སྲིན་ཐམས་ཅད་འདུལ་བ་དང་། བགེགས་དང་འབྱུང་པོ་ཞུགས་པ་ཐམས་ཅད་ཕྱིར་འབྲོས་སོ། །ལྷ་འདྲེ་འཁྲུག་པ་ཐམས་ཅད་ཞི། ཕྲིན་ལས་རྣམ་བཞི་འགྲུབ་པའི་དགོས་ཆེད་ཡོད་དོ། །བདེ་གཤེགས་འདུས་པའི་དྲེགས་པ་ཀུན་སྒྲོལ་གྱི་རྒྱུད་ལས། གསང་བའི་བདག་པོས་འདི་སྐད་ཅེས་གསོལ་ཏོ། །ཀྱེ་མ་བཅོམ་ལྡན་ཐུགས་རྗེ་ཅན། །རྣལ་འབྱོར་ལྟ་སྤྱོད་གདེང་ལྡན་ཏེ། །བརྟུལ་ཞུགས་སྤྱོད་པའི་བྲོ་དང་གླུ། །གསང་མཛད་ཆེན་པོ་བསྟན་དུ་གསོལ། །
བཅོམ་ལྡན་འདས་ཀྱིས་བཀའ་སྩལ་པ། །མ་རུངས་འབྱུང་པོ་འདུལ་བ་དང་། དགེ་འདུན་སྡེ་འཇིག་སྔགས་པ་དགྲས་འཇིག་གང་། །གཙུག་ལག་ཁང་ལ་བགེགས་ཆེན་ཞུགས་པ་དང་། །འཇིག་རྟེན་ལྷ་འདྲེ་འཁྲུག་ནས་མ་རུངས་དང་། །གདུག་པའི་དགྲ་བགེགས་མ་ལུས་བསྒྲལ་བའི་ཕྱིར། །བརྟུལ་ཞུགས་སྤྱོད་པ་འདི་ལྟར་བགྱི། །ཞེས་པ་ནས། དགྲ་བགེགས་ཐལ་བར་བརླག་པའི་བྲོ། །བདུད་དཔུང་ཕྱེ་མར་བརླག་པའི་བྲོ། །རྒྱུ་དྲུག་གནས་སུ་གཅོད་པའི་བྲོ། །ཁམས་གསུམ་དབང་དུ་སྡུད་པའི་བྲོ། །སྟོང་གསུམ་ཟིལ་གྱིས་གནོན་པའི་བྲོ། །གདུག་པ་གཏན་ནས་བརླག་པའི་བྲོ། །ཞེས་པའི་བར་རྒྱས་པར་གསུངས་པས་ཐ་མལ་པའི་གླུ་དང་བྲོ་དང་འདྲ་བར་མ་ཡིན་ཏེ། དོན་ཆེན་པོ་དང་ལྡན་པ་ཡིན་ནོ། །སྐབས་སྐབས་སུ་འབག་འཆམས་བྱེད་པ་འདི་ཡང་མཚར་འདོད་དང་བྱིས་པ་བསྡིག་པའི་རྩེད་མོ་མ་ཡིན་ཏེ། ད་ལྟ་ཁྲག་འཐུང་ཁྲོ་བོའི་འབག་མཐོང་པས། བར་དོར་ཞི་ཁྲོའི་ལྷ་ངོ་སྤྱོད་པའི་ཕན་ཡོན་ཡོད་དེ། ཆོས་ཉིད་བར་དོའི་ངོ་སྤྲོད་མཐོང་བ་རང་གྲོལ་ལས། བཅོ་བརྒྱད་ཁྲོ་འབོག་ཆེན་པོའི་ངོ་སྤྲོད་ཀྱིས། །ཁྲག་འཐུང་ཁྲོ་བོའི་ལྷ་ཚོགས་ངོ་སྤྱོད་བྱ། །ཞེས་གསུངས་སོ། །
ཁྲོམ་བསྡུས་ནས་ཡིག་དྲུག་འདོན་པ་འདི་ཡང་རང་གར་ཇོ་རྒྱུན་བྱེད་པ་དང་མི་འདྲ་སྟེ། ཞི་ཁྲོ་ལ་ཡིག་དྲུག་རྒྱུན་པའི་དོན་ནི་གུ་རུ་ཆོས་ཀྱི་དབང་ཕྱུག་དེ་ཉིད་རྨང་ལམ་དག་པའི་སྣང་བ་ལ། ཟངས་མདོག་དཔལ་རིར་བྱོན་དུས། ཨོ་རྒྱན་རིན་པོ་ཆེས་ཞི་ཁྲོ་གསང་བ་ཡོངས་རྫོགས་ཀྱི་སྒྲུབ་ཆེན་མཛད་ཅིང་འདུག་པ་ལ། ཡང་ཐུགས་རྗེ་ཆེན་པོའི་དཀྱིལ་འཁོར་གཅིག་ཀྱང་བཞེངས་ནས། སློབ་དཔོན་དཔལ་དབྱངས་ཀྱིས། ཐུགས་རྗེ་ཆེན་པོ་ཁོ་ནའི་ལས་བྱང་སྐྱོངས་ཀྱིས་འདུག །དེ་ཅི་ལགས་ཞུས་པས། གུ་རུའི་ཞལ་ནས་སྲིན་པོ་སྡིག་ཤས་ཆེ་བས་སྒྲིབ་སྦྱོང་ཐུགས་རྗེ་ཆེན་པོ་དང་སྤེལ་མ་ཡིན། ཁྱེད་བོད་ལ་སྒྲིབ་པ་ཆུང་རྒྱུ་མེད་པས་འདི་ལྟར་མཛོད་གསུངས་པ་དང་། རཏྣ་གླིང་པ་ཟངས་མདོག་དཔལ་རིར་དག་པའི་སྣང་བ་ལ་བྱོན་དུས། ཨོ་རྒྱན་རིན་པོ་ཆེས་སྒྲུབ་ཆེན་གྱི་དཀྱིལ་འཁོར་སོགས་དཀྱིལ་འཁོར་མང་པོ་ཞལ་ཕྱེས་ནས་སྣང་བ་ལ། ཇོ་མོ་རྣམས་ནི་གཙོ་བོ་མ་ཎི་རང་ལ་འཁྲབས་ཤིང་འདུག །ཅེས་གསུངས་པས། འདིར་ཡང་གཙོ་བོ་སྒྲིབ་སྦྱོང་ཡིན་པས་ཞི་ཁྲོ་དང་ཐུགས་རྗེ་ཆེན་པོ་སྤེལ་བ་ཡིན་ཅིང་། ཞི་ཁྲོའི་ཆོས་སྐོར་པོད་གཞུང་ཕལ་ཆེར་ཡང་ཞི་ཁྲོ་དགོངས་པ་རང་གྲོལ་དང་། །
ཐུགས་རྗེ་ཆེན་པོ་པདྨ་ཞི་ཁྲོ་གཉིས་ཀའི་ཆོས་ཐུན་མོང་བ་ཡིན་པ་དང་། དཀྱིལ་འཁོར་འདི་ཡི་ནང་ན་ཡང་ཐུགས་རྗེ་ཆེན་པོ་སྤྱན་རས་གཟིགས་ཀྱི་ལྷ་ཚོགས་རྣམས་བཞུགས་པས་འབྲེལ་ཆེ་བ་ཡིན་ནོ། །ཡིག་དྲུག་འདོན་པའི་ཕན་ཡོན་ཡང་ཟ་མ་ཏོག་བཀོད་པའི་མདོ་ལས། རིགས་ཀྱི་བུ་འདི་ལྟ་སྟེ། དཔེར་ན་ངས་རྡུལ་ཕྲ་རབ་ཀྱི་ཚད་ནི་བགྲང་བར་ནུས་ཀྱི། རིགས་ཀྱི་བུ་ཡི་གེ་དྲུག་པའི་རིག་སྔགས་ཆེན་མོ་ལན་གཅིག་བཟླས་པའི་བསོད་ནམས་ཀྱི་ཕུང་པོ་བགྲང་བར་མི་ནུས་སོ། །ཞེས་གསུངས་པ་དང་། རིགས་ཀྱི་བུ། འདི་ལྟ་སྟེ་དཔེར་ན། གླིང་ཆེན་པོ་བཞི་ན་གནས་པའི་སྐྱེས་པ་དང་། བུད་མེད། ཁྱེའུ་དང་། བུ་མོ་དེ་དག་ཐམས་ཅད་བྱང་ཆུབ་སེམས་དཔའི་ས་བདུན་པ་ལ་གནས་པར་འགྱུར་རོ། །བྱང་ཆུབ་སེམས་དཔའི་བསོད་ནམས་ཀྱི་ཕུང་པོ་དེ་བས། ཡི་གེ་དྲུག་པའི་རིག་སྔགས་ཆེན་མོ་ལན་གཅིག་བཟླས་པའི་བསོད་ནམས་ཀྱི་ཕུང་པོ་ནི་ཤིན་ཏུ་ཆེའོ། །ཞེས་གསུངས་པ་དང་། ཐུགས་རྗེ་ཆེན་པོ་པདྨ་རྒྱལ་པོའི་རྒྱུད་ལས། ཨོཾ་མ་ཎི་པདྨེ་ཧཱུཾ། ཐེབ་གཅིག་མོས་པས་བརྗོད་པ་ནི། །སེམས་ཅན་དམྱལ་བའི་ནད་ལས་ཐར། །ཐེབ་གཉིས་བརྗོད་པས་ཡི་དྭགས་ཀྱི། །འགྲོ་བའི་སྒོ་ཡང་
འགག་པར་འགྱུར། །གསུམ་བརྗོད་ངན་འགྲོ་བའི་འགག །ཅེས་གསུངས་པ་དང་། བཀའ་ཐང་ཚིག་ལྷུག་མ་ལས། ཨོཾ་མ་ཎི་པདྨེ་ཧཱུྃ། ཅེས་ཡི་གེ་དྲུག་པ་འདི་འཕགས་པ་སྤྱན་རས་གཟིགས་དབང་ཕྱུག་གི་སྙིང་པོ་ཡིན་པས། ཞག་རེར་བརྒྱ་རེ་བཟླས་ན་ངན་སོང་དུ་མི་སྐྱེ་བར་ཕྱི་མ་མི་ལུས་ཐོབ་ནས་འཕགས་པ་སྤྱན་རས་གཟིགས་ཀྱི་ཞལ་མཇལ་བར་འགྱུར་རོ། །ལན་ཉི་ཤུ་རྩ་གཅིག་རེ་རྟག་ཏུ་བཟླས་བརྗོད་བྱས་ན་གཞུངེས་པར་འགྱུར་རོ། །དབྱངས་སྙན་པར་འགྱུར་རོ། །ཆོས་ཐམས་ཅད་ཀྱི་དོན་ལ་མཁས་པར་འགྱུར་རོ། །ཞག་རེ་ལ་ལན་བདུན་བདུན་བཟླས་བརྗོད་བྱས་ན་སྡིག་པ་ཐམས་ཅད་ཟད་པར་འགྱུར་རོ། །སྒྲིབ་པ་ཐམས་ཅད་དག་པར་འགྱུར་རོ། །ཚེ་རབས་གང་དང་གང་དུ་སྐྱེས་ཀྱང་འཕགས་པ་སྤྱན་རས་གཟིགས་དབང་ཕྱུག་དང་མི་འབྲལ་བར་འགྱུར་རོ། །རྟག་ཏུ་བཟླས་བརྗོད་བྱས་ན་སྐྱེ་བ་འདི་ཉིད་ལ་སངས་རྒྱས་པར་འགྱུར་རོ། །ཞེས་གསུངས་སོ། །ཨོ་རྒྱན་པདྨ་འབྱུང་གནས་ལྷོ་ནུབ་སྲིན་པོའི་ཁ་གནོན་ལ་བྱོན་ཁར། བོད་ལ་ཞལ་ཆེམས་བཞག་པ་ལས་ཀྱང་། ཕྱི་རབས་ཀྱི་རྗེ་འབངས་ཐམས་ཅད་ཐུགས་རྗེ་ཆེན་པོ་ཟུངས་ཤིག །ཡི་གེ་དྲུག་པ་ཟློས་
ཤིག །ངན་སོང་དུ་མི་འགྲོ་བའི་དགོས་པ་ཡོད་དེ། བོད་ཁ་བ་ཅན་གྱི་ལྷ་སྐལ་ཡིན་པས་དད་གུས་མོས་པས་གསོལ་བ་ཐོབ་ཅིག །བྱིན་རླབས་དངོས་སུ་འབྱུང་ངོ་། ཡིད་གཉིས་ཐེ་ཚོམ་མ་བྱེད་ཅིག །ཆོས་འདི་ལས་ཟབ་པ་ནི་དུས་གསུམ་སངས་རྒྱས་རྣམས་ཀྱིས་ཀྱང་མ་གསུངས་ཏེ། སློབ་དཔོན་པདྨ་འབྱུང་གནས་བདག་གིས་ཀྱང་མ་གསུངས་མི་ཤེས་སོ། །ད་ལྟ་བཞུགས་དང་སླད་ནས་འབྱོན་པ་རྣམས་ཀྱིས་གསུང་བར་མི་འགྱུར་བས། བོད་ཀྱི་རྗེ་འབངས་ཐམས་ཅད་ཐུགས་ལ་དེ་ལྟར་ཞོག །ཅེས་གསུངས་སོ། ཁྱད་པར་དུ་ཐམས་ཅད་འཚོགས་ནས་ཡི་གེ་དྲུག་པ་འདོན་པ་འདི་རིམ་གྲོ་རྣམས་ཀྱི་མཆོག་ཀྱང་ཡིན་ཏེ། ཨོ་རྒྱན་རིན་པོ་ཆེ་ཡི་ཞལ་ནས། ཁྱད་པར་ནད་ཡམས་མུ་གེ་འཁྲུག་རྩོད་དང་། །ཆག་ཆེན་ཉམས་ང་རྨིས་ལྟས་མཚན་མ་ངན། །ལོ་ཀག་ཟླ་ཀག་མོ་རྩིས་མཚན་མ་ངན། །ཡིག་བདུན་འཛབ་ཀྱིས་ལུང་པ་ཆོས་སྒྲས་བཀང་། །གཞན་ལ་མ་རེ་བློ་སེམས་གཅིག་ཏུ་དྲིལ། །དེ་ཚེ་བར་ཆད་ཞི་ནས་ལྟས་བཟང་འགྱུར།་།མཆོག་དང་ཐུན་མོང་དངོས་གྲུབ་གང་བཏབ་འགྲུབ། །ཅེས་གསུངས་སོ། །འོ་ན་ཐུགས་རྗེ་ཆེན་པོ་དང་ཞི་ཁྲོ་སྦྲེལ་བའི་ཚུལ་གྱིས་ཡིག་དྲུག་རྒྱུན་པ་ནི། ཞི་ཁྲོའི་
དཀྱིལ་འཁོར་འཛབ་བསྙེན་མ་ཡིན་པས་ཡིག་དྲུག་བསྐུལ་འདོན་མི་རུང་ངམ་སྙམ་ན་རུང་སྟེ། དུས་རེ་ཤིག་གི་ཚེ་ན་གྲུབ་ཆེན་ཀརྨ་པཀྵིའི་མདུན་དུ། གསང་བ་ཡེ་ཤེས་ཀྱི་མཁའ་འགྲོ་འཁོར་མཁའ་འགྲོ་བརྒྱ་རྩ་དང་བཅས་པས་གར་མཛད་ཅིང་བྱོན་ནས་ཁྱོད་ཀྱིས་མ་ཎི་པདྨེ་བགྲངས་མི་ཤེས་གསུངས། འོ་ན་ཇི་ལྟར་བཟླ་ཞུས་པས། མཁའ་འགྲོ་མ་བཞིས་མགྲིན་གཅིག་ཏུ་བསྡེབས་ནས་དབྱངས་སུ་གྱེར་ཞིང་འདུག །ད་ཕྱིན་ཆད་འདི་ལྟར་དབྱངས་སུ་བླངས་ན་གང་ཐོས་བྱིན་གྱིས་བརླབས་ཤིང་འགྲོ་དོན་ཤིན་ཏུ་ཆེ་བ་ཡིན་གསུངས། དེ་ཕྱིན་ཆད་ཡིག་དྲུག་བསྐྱལ་འདོན་དར་བ་ཡིན་ཏེ། འདི་མཁའ་འགྲོས་ལུང་བསྟན་ཡིན་པས་བྱིན་བརླབས་ཆེ་བ་ཡིན་ནོ། །ཁྲོམ་ལ་ཆང་དང་ཐུག་པ་སོགས་སྦྱིན་པ་འདི་ཡང་། རང་གར་དགེ་ཧུབ་དང་ཆང་ཚུལ་བྱེད་པ་བས་ཞི་ཁྲོའི་དཀྱིལ་འཁོར་གྱི་དྲུང་དུ་བྱེད་པ་འགྱུར་ཤིན་ཏུ་ཆེ་སྟེ། ཡིད་བཞིན་ནོར་བུ་རིན་ཆེན་འབྱུང་ལྡན་དང་། དཔལ་ཆེན་བདུད་རྩི་འཁྱིལ་བའི་གོ་འཕང་ཐོབ་པའི་ཕན་ཡོན་ཡོད་དོ། །སྒྱུ་འཕྲུལ་ཞི་ཁྲོའི་རྒྱུད་གསང་བ་སྙིང་པོ་ལས། བཟའ་དང་བཏུང་བའི་ཕྱག་རྒྱ་ཡིས། །ཡིད་བཞིན་སྐུ་དང་བདུད་རྩི་འགྲུབ། །ཅེས་གཾསུངས་སོ། །
གཞན་ཡང་སྦྱིན་པའི་ཕན་ཡོན་ནི། ཐར་རྒྱན་ལས། སྦྱིན་པའི་འབྲས་བུས་མཐར་ཐུག་དང་། །གནས་སྐབས་གཉིས་སུ་ཤེས་པར་བྱའོ། །དེ་ལ་མཐར་ཐུག་ནི་བླ་ན་མེད་པའི་བྱང་ཆུབ་ཐོབ་སྟེ། ཞེས་པ་དང་། གནས་སྐབས་སུ་ཟང་ཟིང་གི་སྦྱིན་པ་བཏང་བས་མི་འདོད་ཀྱང་རང་ལ་ལོངས་སྤྱོད་ཕུན་སུམ་ཚོགས་པར་འགྱུར་རོ། །ཞེས་གསུངས། གཞན་ཡང་ཟས་ཀྱི་སྦྱིན་པས་ཡི་དྭགས་ཀྱི་སྐྱེ་སྒོ་ཆོད་པ་དང་། དབུལ་པོར་མི་སྐྱེ་ཞིང་སྟོབས་ཆེན་རྣམས་སུ་སྐྱེས་ཏེ། བྱང་ཆུབ་སེམས་དཔའི་ས་ལས། ཟས་སྦྱིན་པ་ནི་སྟོབས་ཆེན་འགྱུར། །ཅེས་གསུངས་པ་དང་།། འཕགས་པ་སྡུད་པ་ལས། བྱང་ཆུབ་སེམས་དཔའི་སྦྱིན་པས་ཡི་དྭགས་འགྲོ་བ་གཅོད། །དབུལ་བ་དང་ནི་དེ་བཞིན་ཉོན་མོངས་ཐམས་ཅད་གཅོད། །སྤྱོད་ཚེ་ལོངས་སྤྱོད་མཐའ་ཡས་རྒྱས་པ་ཐོབ་པར་འགྱུར། །སྦྱིན་ལས་སྡུག་བསྔལ་གྱུར་བའི་སེམས་ཅན་ཡོངས་སྨིན་བྱེད། །ཅེས་གསུངས་སོ། །བླ་མེད་ཐེག་ཆེན་སྙིང་པོ་བཅོམ་ལྡན་འདས་ཞི་ཁྲོ་རབ་འབྱམས་ཀྱི་དཀྱིལ་འཁོར་འདི་ལ། འབྲེལ་པ་ཁ་འདེབས། ཕྱག་བསྐོར་བ། དད་པ་དག་སྣང་བྱེད་པ་ཐམས་ཅད་ཀྱང་ཕན་ཡོན་དཔག་ཏུ་མེད་དེ། ཨུ་རྒྱན་རིན་པོ་ཆེའི་ཞལ་
ནས་། བླ་མེད་ཐེག་ཆེན་སྙིང་པོའི་དོན་རྣམས་དང་། །གང་འབྲེལ་ཐམས་ཅད་སངས་རྒྱས་འགྲུབ་པའི་ཕྱིར། །འདི་གྲོལ་འདི་མ་གྲོལ་གྱི་རྣམ་དབྱེ་བྲལ། །འབྲེལ་ཚད་དོན་དང་ལྡན་ཞེས་དེ་ལ་བརྗོད། །ཅེས་གསུངས་སོ། དེ་ལྟར་ཞི་ཁྲོའི་བསྐང་བཤགས་འདི་ནི་ཕན་ཡོན་གང་ཆེ་ཆེའི་ཆོས་ཐམས་ཅད་གཅིག་ཏུ་བསྡུས་པ་ལྟ་བུ། ཆོས་སྐུ་ཀུན་ཏུ་བཟང་པོའི་དགོངས་པ། བཅོམ་ལྡན་འདས་རྡོ་རྗེ་སེམས་དཔའི་བཀའ། དཔལ་ཕྱག་ན་རྡོ་རྗེའི་གསུང་། རིག་འཛིན་དགའ་རབ་རྡོ་རྗེའི་མན་ངག །ཨོ་རྒྱན་པདྨ་འབྱུང་གནས་ཀྱི་ཕྱག་བཞེས་༔ མཁའ་འགྲོ་ཡེ་ཤེས་མཚོ་རྒྱལ་གྱི་ཐུགས་དམ་མ་འཆུགས་པ་ཡིན་པས། དཀྱིལ་འཁོར་འདི་ལྟ་བུའི་དྲུང་དུ་ཁྱེད་རྣམས་ཀྱིས་དགེ་བ་ཁས་ལེན་རེ་མཛད་པར་ཞུ། ཞེས་བྱ་བ་འདི་ནི་དོན་གཉེར་ཅན་འགའ་ཞིག་གིས་བསྐུལ་བ་ལ་བརྟེན་ནས་བཀའ་རྫོགས་པ་ཆེན་པོའི་རྒྱུད་གཞུང་རྣམས་ལ་མོས་པ་ལམ་དུ་བྱེད་པའི་རྣལ་འབྱོར་པ་༧ ཀརྨ་ཨ་རཱ་གས་སྦྱར་བའོ། །འདི་བྲིས་ཉེས་པ་གང་མཆིས་མཐོལ་བཤགས་ཤིང་། །དེ་བས་ལོ་རྒྱུས་འདི་ཉིད་སུས་ཐོབ་པ། །ཚེ་འདིར་དགེ་བའི་ཕྱོགས་ལ་བློ་འགྱུར་ཞིང་། །འདི་ནས་ཚེ་འཕོས་ནུབ་ཕྱོགས་བདེ་ཆེན་དུ། །པདྨ་མཆོག་ལ་བརྫུས་ཏེ་སྐྱེ་བར་ཤོག །མངྒ་ལཾ། །བཀྲ་ཤིས། བྷ་ཝནྟུ།།