ཚེ་སྒྲུབ་གསང་བ་འདུས་པའི་ཚོགས་མཆོད་བདུད་རྩིའི་སྤྲིན་ཕུང་།
ཚེ་སྒྲུབ་གསང་བ་འདུས་པའི་ཚོགས་མཆོད་བདུད་རྩིའི་སྤྲིན་ཕུང་ཞེས་བྱ་བ་བཞུགས་སོ། །
ན་མོ་གུ་རུ་ཨཱ་ཡུཛྙཱ་ན་ཡེ། །གསང་བ་འདུས་པའི་ཚོགས་མཆོད་བྱ་བར་འདོད་ན། །ཅི་འབྱོར་ཚོགས་བཤམས་ཚེ་ཆོག་གཞུང་བསྲང་ལ། །དེ་ནས་གྱེར་སྒོམ་སྦྲག་ལ་འདི་སྐད་དོ།། དྷཱི༔ བདག་ཉིད་ཚེ་དཔག་མེད་མགོན་གྱི། །ཐུགས་ལས་ཡིག་འབྲུ་རིམ་བཞིན་འཕྲོས། །རཾ་ཡིག་ལས་མེ་བྱུང་དངོས་འཛིན་བསྲེག །ཡཾ་ཡིག་ལས་རླུང་བྱུང་བག་ཆགས་གཏོར། །ཁཾ་ཡིག་ལས་ཆུ་བྱུང་གཉིས་འཛིན་བཀྲུས། །ཨོ་ཡིག་གིས་རྣམ་པར་རྟོག་པ་སྦྱངས། །ཨཱཡིག་གིས་དྲི་མེད་བདུད་རྩིར་བསྒྱུར། །ཧཱུྃ་ཡིག་གིས་སྣང་སྲིད་མཆོད་པས་བསྐང་། །ཧྲཱིཿཡིག་གིས་མཆོད་ལྷ་དཔག་མེད་
སྤྲུལ། །རཾ་ཡཾ་ཁཾ་ཨོཾ་ཨཱཧཱུཾ། ཧྲཱིཿ དཔལ་ཀུན་ཏུ་བཟང་མོའི་ཡུམ་གྱི་ཀློང་། །དོན་ཅིར་ཡང་འཆར་བ་སྒྱུ་མའི་འཕྲུལ། །སྣོད་མཚན་ལྡན་གྱི་རྡོ་རྗེཀ་པཱ་ལ། །ཚད་རྒྱ་ཁྱོན་ཆོས་ཀྱི་དབྱིངས་དང་མཉམ། །བཅུད་ཟག་མེད་ལོངས་སྤྱོད་ཟད་མི་ཤེས། །ཁ་དོག་དང་དྲི་རོ་ཕུན་སུམ་ཚོགས། །དོན་འགྱུར་མེད་བདེ་ཆེན་བསྐྱེད་པར་གྱུར། །ཧ་ཧོ་ཧྲཱིཿ དཔལ་སྐྱབས་གསུམ་ཀུན་འདུས་པདྨ་འབྱུང་། །དགའ་རབ་དང་ཤྲཱི་སེང་ཧཱུྃ་ཀཱ་ར། །བི་མ་ལ་ནམ་སྙིང་རཏྣ་གླིང་། །འཁོར་ཚེ་ཡི་རིག་འཛིན་ཉི་ལི་ལི། །སྐུ་མཛེས་པའི་རྒྱན་ཆ་ཁྲོ་ལོ་ལོ། །གསུང་འཛབ་
དབྱངས་འབྲུག་སྒྲ་འུ་རུ་རུ། །ཐུགས་དགྱེས་པའི་བྲོ་གར་ལིངས་སེ་ལིང་། །ཁྱེད་འདིར་གཤེགས་དམ་རྫས་བྱིན་གྱིས་རློབས། །བཅུད་ཚོགས་ཀྱི་མཆོད་པ་དགྱེས་པར་རོལ། །དོན་ཚེ་ཡི་དངོས་གྲུབ་གནང་ནས་ཀྱང་། །རྗེ་ཁྱེད་དང་མཉམ་པར་བྱིན་གྱིས་རློབས། །དཔལ་ཚེ་དཔག་མེད་མགོན་ཡུམ་དང་བཅས། །རིགས་བཞིའི་ཚེ་བདག་ཡུམ་དང་བཅས་། །ལཱ་སྱ་སོགས་ཀྱི་སྒོ་མ་བཞི། །མགྱོགས་མ་དང་སྒོ་མ་ཆེན་མོ་བཞི། །འཁོར་རྒྱུད་སྡེའི་ལྷ་ཚོགས་ཉི་ལི་ལི། །སྐུ་མཛེས་པའི་རྒྱན་ཆ་ཁྲོ་ལོ་ལོ། །གསུང་འཛབ་དབྱངས་འབྲུག་སྒྲ་འུ་རུ་རུ། །ཐུགས་དགྱེས་པའི་བྲོ་གར་ལིངས་སེ་ལིང་། །ཁྱེད་འདིར་གཤེགས་དམ་རྫས་བྱིན་གྱིས་རློབས། །བཅུད་ཚོགས་ཀྱི་མཆོད་པ་དགྱེས་པར་རོལ། །དོན་ཚེ་ཡི་དངོས་གྲུབ་གནང་ནས་ཀྱང་། །ལྷ་ཁྱེད་དང་མཉམ་པར་བྱིན་གྱིས་རློབས། །མ་གསང་བ་ཡེ་ཤེས་མནྡཱ་ར། །བདེ་ཆེན་རྒྱ་མཚོ་དང་ཞི་བ་འཚོ། །དབྱིངས་ཕྱུག་རྒྱ་མཚོ་དང་བདེ་ལྡན་མ། །མཚོ་རྒྱལ་དང་ཤེལ་དཀར་རྡོ་རྗེ་མཚོ། །འཁོར་གནས་གསུམ་མཁའ་འགྲོ་ཉི་ལི་ལི། །སྐུ་མཛེས་པའི་རྒྱན་ཆ་ཁྲོ་ལོ་ལོ། །གསུང་འཛབ་དབྱངས་འབྲུག་སྒྲ་འུ་
རུ་རུ། །ཐུགས་དགྱེས་པའི་བྲོ་གར་ལིངས་སེ་ལིང་། །ཁྱེད་འདིར་གཤེགས་དམ་རྫས་བྱིན་གྱིས་རློབས། །བཅུད་ཚོགས་ཀྱི་མཆོད་པ་དགྱེས་པར་རོལ། །དོན་ཚེ་ཡི་དངོས་གྲུབ་གནང་ནས་ཀྱང་། །ཡུམ་ཁྱེད་དང་མཉམ་པར་བྱིན་གྱིས་རློབས། །མགོན་མ་ནིང་སྲོག་བདག་དཔལ་འབར་མ། །དཔལ་སེང་གདོང་ཡབ་ཡུམ་རྣམ་ཐོས་སྲས། །སྔགས་སྲུང་མ་རྡོར་ལེགས་སྨྱོ་ཁ་བ། །གཏེར་སྲུང་མ་མཁའ་རི་མིང་དང་སྲིང་། །འཁོར་དམ་ཅན་རྒྱ་མཚོ་ཉི་ལི་ལི། །སྐུ་མཛེས་པའི་རྒྱན་ཆ་ཁྲོ་ལོ་ལོ། །གསུང་འཛབ་དབྱངས་འབྲུག་སྒྲ་འུ་རུ་རུ། །ཐུགས་དགྱེས་པའི་བྲོ་གར་ལིངས་སེ་ལིང་། །ཁྱེད་འདིར་གཤེགས་དམ་རྫས་བྱིན་གྱིས་རློབས། །བཅུད་ཚོགས་ཀྱི་མཆོད་པ་དགྱེས་པར་རོལ། །དོན་ཆེ་ཡི་དངོས་གྲུབ་གནང་ནས་ཀྱང་། །མགོན་ཁྱེད་དང་མཉམ་པར་བྱིན་གྱིས་རློབས། །རྗེ་སྣང་སྲིད་ཀུན་ལ་དབང་བསྒྱུར་མཁན། །སྐུ་སྐྱེ་འཆི་མེད་པ་རྡོ་རྗེའི་སྐུ་། །དཔལ་ཨོ་རྒྱན་རིག་འཛིན་ཚེ་དཔག་མེད། །ཚེ་དབང་གི་རིག་འཛིན་རྒྱ་མཚོ་ལ། །མི་བདག་གི་ལུས་དང་ལོངས་སྤྱོད་བཅས། །བླ་མེད་ཀྱི་ཚོགས་འཁོར་མཆོད་པའི་
སྤྲིན། །འཛད་མེད་ཀྱི་ལོངས་སྤྱོད་ནམ་མཁའི་མཛོད། །ཟག་མེད་ཀྱི་བདུད་རྩིར་བསྒྱུར་ཏེ་འབུལ། །ཚེ་བསོད་ཀྱི་དཀྱིལ་འཁོར་རབ་རྒྱས་ཤིང་། །བར་ཆད་ཀྱི་རྐྱེན་ལས་རབ་གྲོལ་ནས། །ལུས་འཆི་མེད་ཚེ་ཡི་རིག་འཛིན་མཆོག །དུས་ད་ལྟ་ཉིད་ནས་བསྩལ་བར་ཞུ། །གཞི་གདོད་ནས་མངོན་པར་བྱང་ཆུབ་ཀྱང་། །ལམ་ཐུགས་བསྐྱེད་སྨོན་ལམ་རླབས་ཆེན་མཐུས། །དུས་ད་ལྟ་རིག་འཛིན་ཚེ་ཡི་ལྷ། །ཐེག་དགུ་ཡི་ལྷ་ཚོགས་རྒྱ་མཚོ་ལ། །མི་བདག་གི་ལུས་དང་ལོངས་སྤྱོད་བཅས། །བླ་མེད་ཀྱི་ཚོགས་འཁོར་མཆོད་པའི་སྤྲིན། །འཛད་མེད་ཀྱི་ལོངས་སྤྱོད་ནམ་མཁའི་མཛོད། །ཟག་མེད་ཀྱི་བདུད་རྩིར་བསྒྱུར་ཏེ་འབུལ། །ཚེ་བསོད་ཀྱི་དཀྱིལ་འཁོར་རབ་རྒྱས་ཤིང་། །བར་ཆད་ཀྱི་རྐྱེན་ལས་རབ་གྲོལ་ནས། །ལུས་འཆི་མེད་ཚེ་ཡི་རིག་འཛིན་མཆོག །དུས་ད་ལྟ་ཉིད་ནས་བསྩལ་བར་ཞུ། །དཔལ་འཕགས་བཞི་སྐྱེད་བྱེད་རྒྱལ་བའི་ཡུམ། །གོས་དཀར་མོ་ལོངས་སྐུ་ཡུམ་ཆེན་ལྔ། །དེའི་སྤྲུལ་སྐུ་ཡུམ་མཆོག་མནྡཱ་ར། །ཚེ་དབང་གི་མཁའ་འགྲོ་རྒྱ་མཚོ་ལ། །མི་བདག་གི་ལུས་དང་ལོངས་སྤྱོད་བཅས། །བླ་མེད་ཀྱི་ཚོགས་འཁོར་མཆོད་པའི་སྤྲིན། །
འཛད་མེད་ཀྱི་ལོངས་སྤྱོད་ནམ་མཁའི་མཛོད། །ཟག་མེད་ཀྱི་བདུད་རྩིར་བསྒྱུར་ཏེ་འབུལ། །ཚེ་བསོད་ཀྱི་དཀྱིལ་འཁོར་རབ་རྒྱས་ཤིང་། །བར་ཆད་ཀྱི་རྐྱེན་ལས་རབ་གྲོལ་ནས། །ལུས་འཆི་མེད་ཚེ་ཡི་རིག་འཛིན་མཆོག །དུས་ད་ལྟ་ཉིད་ནས་བསྩལ་བར་ཞུ། །ཡེ་ཤེས་དང་ལས་ལས་གྲུབ་པ་ཡི། །རིག་འཛིན་གྱི་རྒྱལ་བས་བཀའ་བསྒོས་བཞིན། །རང་ཉིད་ཀྱིས་ཁས་བླངས་དམ་བཅས་པའི། །གསང་འདུས་ཀྱི་བཀའ་སྲུང་དམ་ཚིག་ཅན། །ཆོས་སྐྱོང་བའི་སྲུང་མ་དམ་ཅན་རྣམས། །མི་བདག་གི་ལུས་དང་ལོངས་སྤྱོད་བཅས། །བླ་མེད་ཀྱི་ཚོགས་འཁོར་མཆོད་པའི་སྤྲིན། །འཛད་མེད་ཀྱི་ལོངས་སྤྱོད་ནམ་མཁའི་མཛོད། །ཟག་མེད་ཀྱི་བདུད་རྩིར་བསྒྱུར་ཏེ་འབུལ། །ཚེ་བསོད་ཀྱི་དཀྱིལ་འཁོར་རབ་རྒྱས་ཤིང་། །བར་ཆད་ཀྱི་རྐྱེན་ལས་རབ་གྲོལ་ནས། །ལུས་འཆི་མེད་ཚེ་ཡི་རིག་འཛིན་མཆོག །དུས་ད་ལྟ་ཉིད་ནས་བསྩལ་བར་ཞུ། །དེ་ནས་ཚོགས་ཕུད་འབུལ་བ་ནི། རྗེ་ཨོ་རྒྱན་གུ་རུ་རིག་འཛིན་མཆོག །དཔལ་གསང་འདུས་ཚེ་ཡི་ལྷ་ཚོགས་རྣམས། །ཞལ་ཟས་ཀྱི་ཚོགས་ཕུད་ཡར་བཞེས་ལ། །འཆི་མེད་ཀྱི་དངོས་གྲུབ་དུས་འདིར་
སྩོལ། །ཨོཾ་གུ་རུ་ཨཱ་ཡུ་སིདྡྷི་ཧཱུཾ་ཧྲཱིཿ་ཨ་མཱ་ར་ཎི་ཛཱི་ཝན་ཏི་ཡེ་སྭཱ་ཧཱ། ཨི་དམ་བྷ་ལི་ཏ་ག་ཎ་ཙཀྲ་ཁཱ་ཧི་ཁཱ་ཧི།་བར་པ་བསྐང་བཤགས་ནི། བསྐང་རྫས་རྣམས་ཀུན་ཏུ་བཟང་པོའི་མཆོད་སྤྲིན་དུ་གྱུར། ཨོཾ་བཛྲ་སྤ་ར་ཎ་ཁཾ། ཧྲཱིཿ བདེ་ཆེན་དབྱིངས་བཞུགས་རིགས་ཀྱི་བདག །གསང་འདུས་ཡབ་ཡུམ་ཐུགས་དམ་བསྐང་། །ཕུང་པོ་ལྔ་པོ་གནས་དག་པའི། །ཚེ་བདག་རིགས་ལྔའི་ཐུགས་དམ་བསྐང་། །འབྱུང་བ་ལྔ་པོ་གནས་དག་པའི། །ཚེ་བདག་ཡུམ་ལྔའི་ཐུགས་དམ་བསྐང་། །ཕྱོགས་བཞིའི་ཕྱོགས་ནས་ཚེ་འགུགས་པའི། །ལྷ་མོ་བཞི་ཡི་ཐུགས་དམ་བསྐང་། །རིགས་བཞིའི་ཚེ་རྣམས་འགུགས་བྱེད་མ། །མགྱོགས་མ་བཞི་ཡི་ཐུགས་དམ་བསྐང་། །གདོན་ཆེན་བཞིའི་ལག་ནས་ཚེ་འགུགས་མ། །སྒོ་མ་བཞིའི་ཐུགས་དམ་བསྐང་། །མ་ར་ཏི་ཀར་འཆི་མེད་གྲུབ། །པད་འབྱུང་ཡབ་ཡུམ་ཐུགས་དམ་བསྐང་། །དོན་ཏིག་འགྲམ་དུ་འཆི་མེད་གྲུབ། །དགའ་རབ་ཡབ་ཡུམ་ཐུགས་དམ་བསྐང་། །སོ་ས་གླིང་དུ་འཆི་མེད་གྲུབ། །ཤཱི་སེང་ཡབ་ཡུམ་ཐུགས་དམ་བསྐང་། །བྱ་ཁྱུང་ཕུག་ཏུ་འཆི་མེད་གྲུབ། །ཧཱུཾ་ཀར་ཡབ་ཡུམ་ཐུགས་དམ་བསྐང་། །
ལྷུན་གྲུབ་གཏེར་དུ་འཆི་མེད་གྲུབ། །བི་མ་ཡབ་ཡུམ་ཐུགས་དམ་བསྐང་། །མཁར་ཆུའི་གནས་སུ་འཆི་མེད་གྲུབ། །ནམ་སྙིང་ཡབ་ཡུམ་ཐུགས་དམ་བསྐང་། །ཚེ་ལ་དབང་ཐོབ་སྒྲེས་རྒུད་བྲལ། །མཁར་ཆེན་བཟའ་ཡི་ཐུགས་དམ་བསྐང་། །དུས་མིན་འཆི་བཟློག་ཚེ་མཐར་ཕྱིན། །རཏྣ་གླིང་པའི་ཐུགས་དམ་བསྐང་། །བརྒྱ་དང་བཅུ་བཞུགས་བསྟན་པ་སྐྱོང་། །ཚེ་དབང་གྲགས་པའི་ཐུགས་དམ་བསྐང་། །སྨིན་གྲོལ་གདམས་པས་འགྲོ་བ་འདྲེན། །རྩ་བརྒྱུད་བླ་མའི་ཐུགས་དམ་བསྐང་། །ཨོ་རྒྱན་བཀའ་ཡི་བྱ་ར་བ།་།མ་ནིང་ལྕམ་དྲལ་ཐུགས་དམ་བསྐང་། །སྒྲུབ་ལ་དངོས་གྲུབ་སྟེར་བའི་མགོན། །རྒྱལ་ཆེན་རྣམ་སྲས་ཐུགས་དམ་བསྐང་། །གནས་ཆེན་གནས་ཕྲན་ཀུན་གྱི་བདག ། ཞིང་སྐྱོང་ཡབ་ཡུམ་ཐུགས་དམ་བསྐང་། །གསང་འདུས་བརྒྱུད་པའི་སྲུང་མ་སྟེ། །ཨེ་ཀ་ཙ་ཏིའི་ཐུགས་དམ་བསྐང་། །ཁྱད་པར་བཀའ་ཡི་སྲུང་མ་སྟེ། །རྡོ་རྗེ་ལེགས་པའི་ཐུགས་དམ་བསྐང་། །སྒྲུབ་པའི་སྟོངས་གྲོགས་མཛད་པ་ཡི། །དགེ་བསྙེན་སྨྱོ་ཁའི་ཐུགས་དམ་བསྐང་། །ཟབ་གཏེར་བཀའ་ཡི་སོ་པ་སྟེ། །མཁའ་རི་ལྕམ་དྲལ་ཐུགས་དམ་བསྐང་། །
ཧཱུྃ༔ ཐུགས་དམ་བསྐང་བའི་དམ་རྫས་ནི། །བྷ་ལིང་གཏོར་མས་ཐུགས་དམ་བསྐང་། །བདུད་རྩི་སྨན་གྱིས་ཐུགས་དམ་བསྐང་། །རཀྟ་དམར་གྱིས་ཐུགས་དམ་བསྐང་། །ཛ་གད་ཚོགས་ཀྱིས་ཐུགས་དམ་བསྐང་། །ཞལ་ཟས་ཚོགས་ཀྱིས་ཐུགས་དམ་བསྐང་། །ཕྱི་མཆོད་ལྔ་ཡིས་ཐུགས་དམ་བསྐང་། །འདོད་ཡོན་ལྔ་ཡིས་ཐུགས་དམ་བསྐང་། །རིག་མ་ལྔ་ཡིས་ཐུགས་དམ་བསྐང་། །ལྟ་སྤྱོད་དག་པས་ཐུགས་དམ་བསྐང་། །སྙིང་པོ་འཛབ་ཀྱིས་ཐུགས་དམ་བསྐང་། །ཐུགས་དམ་བསྐངས་བའི་བྱིན་རླབས་ཀྱིས། །དུས་དང་དུས་མིན་འཆི་བ་ཟློག །འཆི་མེད་ཚེ་ཡི་དངོས་གྲུབ་སྩོལ། །བཅོལ་བའི་ཕྲིན་ལས་འགྲུབ་པར་མཛོད། །བཤགས་པ་བྱ་བ་ནི། ཐོག་མེད་དུས་ནས་ད་ལྟའི་བར། །སྲོག་བཅད་ཁ་ཟས་འཕྲོག་པ་དང་། །དམ་ཚིག་སེལ་དང་ཉམས་ཆག་སོགས། །ཚེ་ཐུང་བསད་པའི་ལས་སྒྲིབ་རྣམས། །རབ་ཏུ་འགྱོད་པའི་སེམས་ཀྱིས་ནི། །ཞལ་ཟས་ཚོགས་འབུལ་བསྐང་ཞིང་བཤགས། །མི་སྒྲིབ་ཚངས་པའི་དངོས་གྲུབ་སྩོལ། །ཨོཾ་ས་མ་ཡ། ཨཱས་མ་ཡ། ཧཱུཾ་ས་མ་ཡ། ཨོཾ་གུ་རུ་ཨཱ་ཡུསིདྡྷི་ཧཱུཾ་ཧྲཱིཿ ཨ་མཱ་ར་ཎི་ཛཱི་ཝན་ཏི་ཡེ་སྭཱ་ཧཱ། ཨོཾ་བཛྲ་སཏྭ་
ས་མ་ཡ། སོགས། སཏྭ་ཨཱཿ དེ་ནས་བསྒྲལ་བ་ནི། ཧཱུྃ། གསང་འདུས་བཀའ་སྲུང་ཕོ་ཉའི་ཚོགས། །ཚེ་སྲོག་ལ་གནོད་དགྲ་དང་བགེགས། །ལྕགས་ཀྱུས་ཟུངས་ལ་ཕུར་པས་ཐོབ། །རྣམ་ཤེས་བདེ་ཆེན་ཞིང་དུ་སྤོར། །ཤ་ཁྲག་ཕུང་པོ་ཚོགས་སུ་རོལ། །ཞལ་དུ་བསྟབ་བོ་ཁ་རཾ་ཁཱ་ཧི། སརྦ་དྷརྨ་པཱ་ལ་དགྲ་བགེགས་རྨི་ཏྲི་ཤ་ཧཱུཾ་མཱ་ར་ཡ་ཁཱ་ཧི༔ ཚོགས་དྲངས་ཏེ་རོལ། ཧཱུྃ༔ སྣང་སྲིད་སྔགས་ཀྱི་རོལ་པ་ལ། །མ་དག་རྟོག་པ་མི་དམིགས་པས། །གཞི་གདོད་ནས་རྣམ་དག་གི་མཆོད་པ་ཆེར། །ཁྱོད་རོལ་ཅིག་གྷ་ཎ་ཙཀྲ་ཧོ༔ ཞེས་དྲངས། ཧྲཱི༔ མི་བདག་ལུས་གསང་འདུས་ཚེ་ཡི་བདག །སྐུ་གནས་ལྔར་ཚེ་བདག་ཡབ་ཡུམ་ལྔ། །རྩ་འཁོར་ལོ་འཁོར་ཕྲན་ཌཱ་ཀིས་གཏམས། །གནས་ལྟེ་བའི་མེ་ཉིད་རང་བྱུང་མེ། །ཁ་དབང་གི་ཐབ་ཁུང་ལྕེ་ནི་མེ། །ལག་དགང་གཟར་སྦྱར་བས་བཟའ་བཏུང་རྣམས། །དཔལ་གསང་འདུས་ལྷ་ལ་སྲེག་བླུགས་འབུལ། །དོན་ཚོགས་རྫོགས་འཆི་མེད་འགྲུབ་པར་ཤོག །ཨོཾ་གུ་རུ་ཨཱ་ཡུ་སིདྡྷི་ཧཱུྃ། ག་ཎ་ཙཀྲ་པཱུ་ཛ་ཧོ༔ ཞེས་ཚིམ་པར་རོལ་ཏེ་ལྷག་མ་བཤམས། ཨོཾ་ཨ་ཀཱ་རོས་བྱིན་གྱིས་བརླབས་ལ། ཧཱུྃ༔ གསང་བ་ཡེ་ཤེས་
ཌཀྐིའི་འཁོར། །གནས་ཉེར་བཞིའི་ཕོ་ཉ་འཇིགས་ཆེན་པོ། །སྔོན་ལས་ལ་གྲུབ་པའི་ཤ་ཟ་མོ། །སྐུ་དཀར་སེར་དམར་ལྗང་སྔོ་དང་ཁྲ། །ལུས་མེ་འབར་གློག་འོད་ཁྱུགས་སེ་ཁྱུག །ངག་བརྡ་སྐད་བཤུག་གླུ་དི་རི་རི། །ཡིད་གསང་སྔགས་བསྟན་ལ་དུངས་སེ་དུང་། །ལས་ཁམས་གསུམ་ཉུལ་མ་ཤ་ར་ར། །མཐོ་དགུང་སྔོན་དབྱིངས་ནས་བྱ་ར་བྱེད། །མི་བསྟན་དགྲའི་སྟེང་དུ་ཐོག་ལྟར་འབེབས། །བར་དུར་ཁྲོད་གཉན་ས་ཀུན་ཏུ་རྒྱུག །སྡང་དགྲ་བོ་བསྒྲལ་ཕྱིར་ཚོགས་ལ་རོལ། །འོག་རྒྱ་མཚོའི་ཀློང་ནས་གྱེན་དུ་འཕྱུར། །དམ་ཉམས་པ་བསྒྲལ་ནས་ཁྲག་ལ་འཐུང་། །ནད་བཞི་བརྒྱ་རྩ་བཞི་ཀུན་གྱི་བདག །གདོན་སྟོང་ཕྲག་བརྒྱད་ཅུས་འཁོར་དུ་བསྐོར། །ཕོ་འཕྱོར་པོ་ཀུན་གྱི་བླ་ཡིད་ཁྱེར། །མོ་འཕྱོར་མོ་ཀུན་གྱི་བཀྲག་མདངས་ལེན། །སྒོམ་ཉམས་ལེན་མཁན་གྱི་དྲོད་ཚད་ཉུལ། །གནས་སྔགས་འཆང་ཀུན་གྱི་ཚོགས་ཁང་འགྲིམ། །ཟས་ཤ་ཁྲག་དྲི་ཚོར་བཟོད་བླག་མེད། །ཁྱེད་སྲིང་རྣམས་དགྱེས་པའི་ལྷག་གཏོར་འབུལ། །མི་བདག་གི་དུས་མིན་འཆི་བ་ཟློག །རྐྱེན་དལ་ཁ་རིམས་ཁ་དགྲ་ལ་སྒྱུར། །ཨོཾ་ཨུཙྪིཥྛ་བྷ་ལི་ཏ་བྷཀྵ་སྭཱ་ཧཱ། ཞེས་ལྷག་གཏོར་
པ། དམར་གཏོར་ལ་ཚེ་ཡི་བར་ཆད་ཐམས་ཅད་བཀུག་གཞུག་བྱས་ལ་བདུད་རྩིར་བསམ། ཐོག་མ་བར་དང་ཐ་མའི་བསྐལ་པ་ལ། །བདེ་ཆེན་ཞིང་དང་འཕགས་ཡུལ་གངས་ཅན་དུ། །སྣང་བ་མཐའ་ཡས་པདྨ་འབྱུང་གནས་ཀྱི། །རྒྱུད་སྲུང་རིག་འཛིན་སྒྲུབ་དང་གཏེར་སྦས་ཚེ། །ཌཀྐི་ཆོས་སྐྱོང་དམ་ཅན་ཐམས་ཅད་ཀྱིས། །སྲོག་སྙིང་ཕུལ་ནས་བཀའ་བསྒོས་དམ་བཞག་ཚེ། །སྒྲུབ་པའི་བར་ཆད་སེལ་བར་མ་ཆད་དམ། །རྣལ་འབྱོར་ཚེ་སྲོག་བསྲིང་བར་མ་ཆད་དམ། །རྐྱེན་ངན་བར་ཆད་སེལ་བར་མ་ཆད་དམ། །དམ་རྫས་བརྒྱན་པའི་གཏོར་མ་འདི་བཞེས་ལ། །ཐུགས་དམ་རྒྱུད་བསྐུལ་བཅོལ་བའི་ཕྲིན་ལས་མཛོད། །ཁྱད་པར་གསང་འདུས་བཀའ་ཡི་སྲུང་མ་སྟེ། །ཨེ་ཀ་ཙ་ཊི་རྡོར་ལེགས་སྨྱོ་ཁ་དང་། །མཁའ་རི་ལྕམ་དྲལ་འཁོར་དང་བཅས་པ་རྣམས། །འདིར་གཤེགས་དམ་རྫས་བཀའ་ཡི་གཏོར་མ་བཞེས། །བདག་ནི་གསང་འདུས་སྒྲུབ་པའི་དམ་ཚིག་ཅན། །སྔོན་ཚེ་སློབ་དཔོན་པདྨ་འབྱུང་གནས་ཀྱིས། །ཇི་ལྟར་བཀའ་བསྒོས་དམ་ཚིག་དྲན་མཛོད་ལ། །འགལ་རྐྱེན་སོལ་ལ་མཐུན་རྐྱེན་བསམ་པ་སྒྲུབས། །རྣལ་འབྱོར་བཅོལ་བའི་ཕྲིན་ལས་
འགྲུབ་པར་མཛོད། །ཅེས་ཕུལ་ནས་གཏོར་སྣོད་བདུད་རྩིས་བཤལ་ལ་བྲན་ནས། ཧྲཱི༔ ཚེ་དབང་རིག་འཛིན་པདྨ་ཐོད་ཕྲེང་གིས། །དམ་ལ་བཏགས་པའི་མ་སྲིང་བརྟན་མའི་ཚོགས། །མཚར་སྡུག་ཡིད་འཕྲོག་རྒྱན་དང་ན་བཟའ་ཅན། །རེ་རེའི་འཁོར་ཚོགས་འབུམ་ཕྲག་དུ་མར་བཅས། །བོད་ཡུལ་མཐའ་དབུས་ཀུན་ལ་བཞུགས་པ་རྣམས། །འདིར་གཤེགས་དམ་རྫས་བཤལ་ཆུའི་མཆོད་པ་བཞེས། །དུས་མིན་འཆི་བའི་རྐྱེན་རྣམས་བཟློག་པ་དང་། །བསམ་པ་བསྒྲུབས་ལ་རེ་བ་ཐམས་ཅད་སྐོངས། །རྣལ་འབྱོར་བཅོལ་བའི་ཕྲིན་ལས་འགྲུབ་པར་མཛོད། །ཨོཾ་མ་མ་ཧྲིང་ཧྲིང་བྷ་ལིཾ་ཏ་ཁཱ་ཧི་ཁཱ་ཧི། ཞེས་མཆོད། གཏོར་གཞོང་ཁ་སྦུབ་ལ། ཧྲཱི༔ གསང་འདུས་ཚེ་ཡི་ལྷ་ཚོགས་རྣམས། །དབུ་རྒྱན་ཐོར་ཚུགས་ལྡེམས་སེ་ལྡེམ། །ཕྱག་རྒྱ་གར་སྟབས་ཤིགས་སེ་ཤིག །འཛབ་དབྱངས་འབྲུག་སྒྲ་འུ་རུ་རུ། །བགེགས་དང་བར་ཆད་འཆི་བདག་བདུད། །རི་རབ་ཆེན་པོའི་འོག་ཏུ་མནན། །ཚེ་ཡི་ལྷ་ཚོགས་བྲོ་ར་བཅས། །ཟླུམ་པོར་བྲོ་བརྡུང་བར་ཆད་ཞི། །གྲུ་བཞིར་བྲོ་བརྡུང་ཚེ་བསོད་རྒྱས། །ཟླ་གམ་བྲོ་བརྡུང་ཚེ་དབང་རྒྱས། །གྲུ་གསུམ་བྲོ་བརྡུང་ཚེ་བདུད་ཟློག །ཚེ་ལ་གནོད་པའི་
དགྲ་དང་བགེགས། །ནམ་ཡང་ལྡང་བར་མ་བྱེད་ཅིག །ཨོཾ་ལཾ་ཧཱུཾ་ལཾ་སྭཱ་ལཾ་ཧྲིལཾ་ཨཱལཾ་ཛཱ་ལ་སམྦྷ་ཡ་ནན། ཞེས་མནན་ནོ། །རྡོ་རྗེའི་ཚིག་འདི་ཡིས་བཀྲ་ཤི་ས་བརྗོད་པ་ནི། །ཧྲཱིཿ ནམ་མཁའ་ཇི་སྲིད་འཆི་བ་མེད། །པདྨ་འབྱུང་གནས་བཀྲ་ཤིས་ཤོག །འཇའ་ལུས་རྡོ་རྗེའི་སྐུ་བརྙེས་པ། །རིག་འཛིན་རྣམས་ཀྱི་བཀྲ་ཤིས་ཤོག །དུས་མིན་འཆི་བ་འཇོམས་མཛད་པ། །གསང་འདུས་ཡབ་ཡུམ་བཀྲ་ཤིས་ཤོག །ཕུང་ཁམས་སྐྱེ་མཆེད་དག་པའི་དངོས། །ཚེ་ཡི་ལྷ་ཚོགས་བཀྲ་ཤིས་ཤོག །སྒྲུབ་པའི་བར་ཆད་སེལ་མཛད་པའི། །བཀའ་སྲུང་རྣམས་ཀྱི་བཀྲ་ཤིས་ཤོག །ཅེས་མེ་ཏོག་གཏོར། ཚེ་སྒྲུབ་གསང་འདུས་ཆོ་ག་ཡི། །མ་ཚང་ཁ་བསྐང་ལྷན་ཐབས་འདི། །བདག་འདྲ་རཱ་གའི་མིང་ཅན་གྱིས། །འབྲུག་ལོ་སྣོན་ཟླའི་ཚེས་བཅུའི་ཉིན། །རང་དང་གཞན་ལ་ཕན་ཕྱིར་བཀོད། །འདི་ལ་འགལ་འཁྲུལ་ཉེས་པའི་ཚོགས། །ཚེ་ཡི་ལྷ་ཚོགས་རྣམས་ལ་བཤགས། །དགེ་བས་ཚེ་ཡི་རིག་འཛིན་བརྙེས། །འཆི་བ་མེད་པ་རྡོ་རྗེའི་སྐུ། །ཚེ་འདི་ཉིད་ལ་འགྲུབ་ཕྱིར་བསྔོ། མངྒ་ལཾ།། །།