བླ་མ་དགོངས་པ་འདུས་པ་ལས་བྱིན་རླབས་གཏོར་མའི་བརྡ་དབང་དང་རྩ་བ་གསུམ་གྱི་དབང་དོན་བསྡུས་པ།
བླ་མ་དགོངས་པ་འདུས་པ་ལས་བྱིན་རླབས་གཏོར་མའི་བརྡ་དབང་དང་རྩ་བ་གསུམ་གྱི་དབང་དོན་བསྡུས་པ་བཞུགས་སོ༔
ཟུག།ཊསྭ༔ ན་མོ་གུ་རུ་དྷེ་ཝ་དྷཱ་ཀི་ནཱི་ཧཱུྃ༔ བྱིན་རླབས་བདུད་རྩིའི་སྤྲིན་ཆར་ལས༔ སློབ་མ་སྨིན་ཅིང་གྲོལ་བ་ཡི༔ གདམས་པ་རྣམ་དག་མང་བཤད་ཀྱི༔ བསྡུས་ཏེ་གཏོར་མའི་བརྡ་དབང་བསྐུར༔ འདིར་གཏོར་མ་ལ་བརྟེན་ཏེ༔ བྱིན་རླབས་ཙམ་བརྡ་ཡི་དབང་སྐུར་བར་བྱེད་པ་ལ་བརྒྱད༔ སློབ་དཔོན་ཇི་ལྟ་བུས་སློབ་མ་ཅི་འདྲ་ལ༔ ཚུལ་ཇི་ལྟར་ལ་མ་བསྐུར་ན་ཅི་ཉེས་བསྐུར་ན་ཡོན་ཏན་ཅི་ཡོད་པ་དང་ལྔ་ལས༔ སློབ་དཔོན་ནི་དཀྱིལ་འཁོར་ལ་བརྟན་པ་ཐོབ་ཅིང་༔ སྟོང་ཉིད་སྙིང་རྗེའི་རྩལ་འབྱོངས་པ༔ འབྲིང་ཡི་དམ་ལྷའི་བསྙེན་པ་ཐེམས་ཤིང་རང་འདོད་ཀྱི་དྲི་མས་མ་གོས་པ༔ ཐ་མ་ཡང་ཆོ་ག་ལག་ལེན་གྱི་རིམ་པ་མཁས་ཤིང་༔ གཟུ་ལུམ་རལ་ཆོད་བབ་ཆོལ་མི་བྱེད་པའི་སློབ་དཔོན་བྱམས་སེམས་དང་ལྡན་
པའོ༔ སློབ་མ་ཅི་ལྟ་བུ་ལ་བསྐུར་ན༔ བློ་ཡངས་ཤིང་དད་པ་བརྩོན་འགྲུས་དམ་ཚིག་གཏོང་ཕོད་སྙིང་རུས་གོ་ཆ་ཆེ་བ་ཚུལ་བདུན་དང་ལྡན་པ་སྟེ༔ འབྲིང་དད་པ་ཆེ་བ་དམ་ཚིག་ལ་གནས་པ༔ གཏོང་ཕོད་ཆེ་བའི་སྐྱེས་བུ༔ ཐ་མ་ཡང་རྡོ་རྗེ་སློབ་དཔོན་གྱི་བཀའ་དྲིན་ཁྱད་དུ་མི་གསོད་པའི་སློབ་མའོ༔ ཚུལ་ཇི་ལྟར་བསྐུར་བ་ནི༔ སྔོན་འགྲོ་དངོས་གཞི་རྗེས་གསུམ་གྱི་སྐྱ་བར་ནས་བསྟན་ཏེ༔ བསྐུར་བར་བྱ་ཞིང་༔ དང་པོ་ནི་དུས་ཁྱད་པར་ཅན་ཉ་སྟོང་བརྒྱད་གསུམ་ལ་སོགས་པའི་ཚེས་བཅུའི་སྐབས་ལ་བབ་པའི་ཚེ༔ ཡིད་དང་མཐུན་པའི་གནས་ཁང་ལ་སོགས་པ་ཚོགས་རྫོགས་པའི་སྤྱན་གཟིགས་ཅི་ཡང་བཀྲམ༔ དེ་ནས་སའམ་ཤིང་སྟེགས་ཀྱི་སྟེགས་བུ་རྒྱ་ཁྱོན་ཇི་ལྟར་རིགས་པ་བཅས་པའི་སྟེང་དུ༔ དཀྱིལ་འཁོར་འདབ་བརྒྱད་བྲིས་ན་ལེགས། མ་གྲུབ་
ཀྱང་འབྲུའི་ཚོམ་བུ་དགུ་སོགས་བཀོད་པའི་དབུས་སུ༔ འབྲུ་ཕྱེ་གཙང་མར་སྣ་ཚོགས་སྤྱོད་སྦྱར་བདུད་རྩི་ཆང་གིས་སྦྲུས་པའི་དཔལ་ཤོས་རིན་ཆེན་ཟུར་བརྒྱད་འདབ་བརྒྱད་ལྡན་པ་ལ། དཀར་ཐིག་དམར་གུར་འདོད་ཡོན་ཟས་སྣ། དར་གྱི་ཕོ་ལོང་རིན་པོ་ཆེའི་སྡོམ་ཚར་གྱི་བརྒྱན་པ་བཤམས་པའི་ཕྱོགས་མཚམས་བརྒྱད་ལ་ཡང་བླ་མ་ཡི་དམ་ཌཀྐི་ལ་སོགས་པའི་གཏོར་མ་ཇི་ལྟར་རིགས་པ་དང་། ཕྱི་ནང་གི་མཆོད་པ་སྨན་རཀ་གི་བདུད་རྩི་རྣམས་རིམ་པ་ལྟར་སྤྱི་དང་མཐུན་པར་བཤམ། དེ་ནས་རྡོ་རྗེ་སློབ་དཔོན་གདན་ལ་གནས་པས་སྐྱབས་འགྲོ་སེམས་བསྐྱེད་ནས་བཟུང་སྟེ༔ སྔོན་དུ་འགྲོ་བའི་མཆོད་བསྟོད་རྒྱས་པར་བྱ་ཞིང་རྩ་གསུམ་གྱི་དཀྱིལ་འཁོར་རྒྱས་བསྡུས་གང་རིགས་རྫོགས་པར་བསྐྱེད་དེ་བཟླས་པ་བྱ༔ རྡོ་རྗེ་རྒྱལ་ཐེབ་ལ་སོགས་པས་རྒྱས་པ་ཕྲིན་ལས་ཀྱི་གཞུང་བསྲང་སྟེ༔ ཚོགས་ལས་ཡན་ཆད་འགྲུབ་པར་བྱ་ཞིང་༔ ཁྱད་པར་དུ་དཔལ་གྱི་གཏོར་མ་རྩ་བ་གསུམ་གྱི་ལྷ་ཚོགས་དམ་ཚིག་པ་བསྐྱེད་ཅིང་། ཡེ་ཤེས་པ་སྤྱན་དྲངས་ལ་བསྟིམ༔ ཨོཾ་ཨཱ༔ ཧཱུྃ་ཧྲིབཛྲ་གུ་རུ་དྷེ་ཝ་དྷཱ་ཀི་ནི་ཛྙཱ་ན་སརྔ་མ་ཧུ་བྷ་ལི་ཏ་སརྦ་སིདྡྷི་ཕ་ལ་ཧཱུྃ་ཨཱ༔ ཞེས་པའི་འཛབ་བརྒྱ་ཕྲག་ཅི་འགྲུབ་བཟླས་པ་བྱའོ༔ སྤྲོས་པ་ལ་དགའ་ན་གཞན་ནས་འབྱུང་བའི་འཛབ་བསྐུལ་འཛབ་བསྟོད་ལ་སོགས་པ་འཛབ་ཀྱི་ཆོ་ག་ཡང་བྱའོ༔ དེ་དག་ནི་སྔོན་དུ་འགྲོ་བའི་རིམ་པའོ༔ གཉིས་པ་དངོས་གཞིའི༔ སྒྲིབ་པ་སྦྱང་བ་ནི༔ གཟུངས་སྔགས་བཟླས་པའི་ཆུས་སློབ་མ་རྣམས་ལ་ཁྲུས་བྱས་ཏེ༔ ནང་དུ་འཁོད་ལ་གུ་གུལ་གྱི་དུད་པས་བདུག༔ ཏིལ་
དང་ཡུངས་ཀར་ལ་སོགས་པས་བྲབ་ཅིང་དྲག་སྔགས་ཀྱིས་བགེགས་བསྐྲད༔ རོལ་མོ་བསྒྲག སློབ་དཔོན་གྱིས་བསྲུང་བའི་འཁོར་ལོ་བསྒོམ་པར་བྱའོ༔ སློབ་མ་རྣམས་རྡོར་སེམས་བསྐྱེད་རིམ་ལ་གནས་པས་ཡི་གེ་བརྒྱ་པ་བཟླས་ཤིང་རྒྱུད་སྦྱོང་སོང་༔ དེ་ནས་མཎྜལ་འབུལ་ཏེ་ཕྱག་འཚལ་ནས༔ མགྲིན་གཅིག་ཏུ་འདི་སྐད་གསོལ་བ་གདབ༔ ཧཱུྃ༔ བྱིན་རླབས་རྩ་བ་བཀའ་བརྒྱུད་བླ་མ་རྣམས་ལ་གསོལ་བ་འདེབས་སོ༔ དངོས་གྲུབ་རྩ་བ་ཡི་དམ་ལྷ་ཚོགས་ལ་གསོལ་བ་འདེབས་སོ༔ ཕྲིན་ལས་རྩ་བ་མཁའ་འགྲོའི་ཚོགས་ལ་གསོལ་བ་འདེབས་སོ༔ བླ་མས་བྱིན་གྱིས་བརླབ་ཅིང་སྨིན་པར་མཛད་དུ་གསོལ། ཡི་དམ་ལྷའི་བྱིན་གྱིས་བརླབ་ཅིང་གྲོལ་བར་མཛད་དུ་གསོལ༔ མཁའ་འགྲོས་བྱིན་གྱིས་བརླབ་ཅིང་བར་ཆད་བསལ་དུ་གསོལ༔ ཅེས་དད་པའི་ཤུགས་བསྐྱེད་དེ་གསོལ་བ་གདབ༔ དེ་ནས་རྡོ་རྗེ་སློབ་དཔོན་རུས་པའི་རྒྱན་ལ་སོགས་པ་ཆེས་དང་ལྡན་པས་ལྷའི་ང་རྒྱལ་བསྐྱེད་དེ༔ སློབ་མ་རྣམས་ཀྱང་སྐད་ཅིག་གིས་ཕོ་ཐམས་ཅད་རྟ་མགྲིན་སྐུ་མདོག་དམར་པོ༔ ཞལ་གཅིག་ཕྱག་གཉིས་ཁྲོ་ཞིང་གཏུམ་པ་ཁྲོ་བོའི་ཆ་ལུགས་དུ་མ་དང་ལྡན་ཞིང་སྤྱི་བོར་རྟ་མགོ་ལྗང་ཞུར་དབང་སྐད་སྒྲོག་པ༔ ཕྱག་གཉིས་གཡས་གཡོན་གྲི་གུག་ཐོད་ཁྲག་འཛིན་ཅིང་དཔའ་བོ་དབང་ཆེན་རོལ་
པའི་གར་སྟབས་མཛད་པ་ཙམ་གྱིས་སྣང་སྲིད་ཀྱི་སྐྱེ་འགྲོ་ཕོ་མོ་ཐམས་ཅད་ཀྱང་དཔལ་རྟ་མགྲིན་དུ་གྱུར་ནས་འདུས་ཏེ་གར་ཤིག་ཤིག༔ ཞལ་ནས་དྲག་པོའི་ཧཱུཾ་སྒྲ་ཏི་རི་རི་སྒྲོག་པར་བསྒོམ༔ མོ་ཐམས་ཅད་ཡུམ་རྡོ་རྗེ་ཕག་མོ་མཐིང་ནག་ཞལ་གཅིག་ཕྱག་གཉིས་གཅེར་བུ་རལ་པ་ཅན༔ ཁྲོ་མོའི་ཆ་ལུགས་དང་ལྡན་པ་ལས་ཀྱང་༔ སྤྱི་གཙུག་ཏུ་ཕག་ཞལ་ནག་མོ་ངུར་སྒྲ་སྒྲོག་པ༔ ཕྱག་གཉིས་གཡས་གཡོན་གྲི་གུག་ཐོད་ཁྲག་འཛིན་ཅིང་དཔའ་མོའི་སྟང་སྟབས་ཀྱིས་གར་མཛད་པ་ཙམ་གྱིས༔ སྣང་སྲིད་སྐྱེ་འགྲོ་ཕོ་མོ་ཐམས་ཅད་ཀྱང་ཡུམ་རྡོ་རྗེ་ཕག་མོར་གྱུར་ནས་འདུས་ཏེ༔ སྐུས་གར་སྟབས་མཛད་གསུང་གི་གད་རྒྱངས་དང་ཕཊ་སྒྲ་སྒྲོག་པར་བསམ༔ སླར་རྡོ་རྗེ་སློབ་དཔོན་ཨོ་རྒྱན་པདྨ་ཐོད་ཕྲེང་རྩལ་སྤྲུལ་སྐུའི་ཆ་ལུགས་ཅན་དུ་གསལ་བའི་ཐུགས་ཀ་ནས་ཧྲིདམར་པོ་ལས་འོད་ཟེར་དམར་པོ་ལྕགས་ཀྱུའི་རྣམ་པ་ཅན་དཔག་ཏུ་མེད་པ་འཕྲོས་པས༔ ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་བླ་མ་ཡི་དམ་མཁའ་འགྲོ༔ དཔའ་བོ་དཔའ་མོ་དམ་ཅན་སྲུང་མ་དང་བཅས་པ་ཐམས་ཅད་ལ་ཕོག་པས་ཐུགས་དམ་གྱི་རྒྱུད་བསྐུལ་ནས་སྤྱན་དྲངས༔ སློབ་མ་རྣམས་ལ་སིབ་སིབ་
ཐིམ་པར་བསམ༔ རང་གིས་ཀྱང་བསྒོམ་དུ་བཅུག་ལ༔ ཧཱུྃ་ཧྲཱིཿ བཞེངས་ཤིག་རྩ་བ་གསུམ་བཞེངས་ཤིག༔ རང་རང་གནས་ནས་སྐུ་བསྐྱོད་འཚལ༔ ཨོ་སྐུ་ཡི་བྱིན་གྱིས་བརླབ་ཏུ་གསོལ༔ ལུས་ལ་གཟི་བརྗིད་བསྐྱེད་དུ་གསོལ༔ ལུས་ཀྱི་སྒྲིབ་པ་སྦྱང་དུ་གསོལ༔ ལྷ་དབང་ལུས་ལ་བསྐུར་དུ་གསོལ༔ སྐུ་མི་འགྱུར་ཚེ་ཡི་དངོས་གྲུབ་སྩོལ༔ ཨཱགསུང་གི་བྱིན་གྱིས་བརླབ་ཏུ་གསོལ༔ ངག་གི་སྒྲིབ་པ་སྦྱང་དུ་གསོལ༔ སྔགས་དབང་ངག་ལ་བསྐུར་དུ་གསོལ༔ གསུང་སྙིང་པོ་ལུང་གི་དངོས་གྲུབ་སྩོལ༔ ཧཱུཾ་ཐུགས་ཀྱི་བྱིན་གྱིས་བརླབ་ཏུ་གསོལ༔ སེམས་ཀྱི་སྒྲིབ་པ་སྦྱང་དུ་གསོལ༔ ཆོས་དབང་སེམས་ལ་བསྐུར་དུ་གསོལ༔ ཐུགས་སྐྱེ་མེད་རྡོ་རྗེའི་དངོས་གྲུབ་སྩོལ༔ སྐུ་གསུང་ཐུགས་ཀྱི་བྱིན་གྱིས་རློབས༔ ཡེ་ཤེས་ལྔ་ཡི་དབང་བསྐུར་ཅིག༔ རྒྱུད་འཛིན་བུ་ལ་བྱིན་གྱིས་རློབས༔ དབང་རྣམས་རྫོགས་པར་བསྐུར་དུ་གསོལ༔ ཅེས་གསོལ་བ་གདབ༔ རོལ་མོ་སྒྲོག༔ སྤོས་བསྲེག སློབ་དཔོན་གྱིས་མེ་ཏོག་འཐོར༔ དམིགས་པ་སྤར༔ གཟི་ཟིན་བསྐྱེད༔ ཐམས་ཅད་ཀྱང་རིག་པའི་ངར་བསྐྱེད་ཅིང་དམིགས་པ་མ་ཡེངས་བར་བཟུང་༔ འཛབ་དབྱངས༔ ཧཱུྃ་ཕཊ༔ དྲག་པོའི་སྒྲ་རྣམས་བྱའོ༔ རྟོག་པ་སྣ་མི་སྐྱིལ་
བར་ཁ་ཡན་དུ་བཏང་ན་བྱིན་རླབས་ཆེ་བར་འགྱུར་བ་གནད་ཡིན་ནོ༔ ཕེབས་ནས་སློབ་དཔོན་གྱིས༔ ཏིཥྛ་བཛྲ་ཛྷཱ་ན་ས་མ་ཡ་སྟོ་ཧོ༔ ཡ་ཏ་སུ་ཁཾ༔ ཞེས་པས་ཡེ་ཤེས་པ་བསྟིམ་པའི་དམིགས་པ་བྱའོ༔ སློབ་མ་རྣམས་ཀྱིས་སེམས་དུས་གསུམ་རྟོག་པའི་རྗེས་ཕྱིར་མི་འབྲང་བར༔ རང་མལ་དུ་ལྷོད་དེ་ཀློད་ལ་དར་ཅིག་བཅས་བཅོས་མེད་པར་བཞག་གོ༔ དེ་ནས་དབང་བསྐུར་བར་བྱ་སྟེ༔ གཏོར་མ་སློབ་མའི་སྤྱི་བོར་བཞག་ཅིང་༔ གཏོར་མ་དེ་ཉིད་ཐ་དད་མེད་པར་པདྨ་འབྱུང་གནས་ཞེས་དུས་གསུམ་གྱི་བླ་མ་ཐམས་ཅད་འདུས་པའི་ངོ་བོ་སྤྲུལ་སྐུའི་ཆ་ལུགས་ཅན༔ དཀར་ལ་དམར་མདངས་ཆགས་པ་ཞལ་གཅིག་ཕྱག་གཉིས་གཡས་གསེར་གྱི་རྡོ་རྗེ་དང་གཡོན་ཀ་པཱ་ལ་བསྣམས་པ༔ སྐུ་ལ་ན་བཟའ་ཟབ་བེར་དང་༔ སྣམ་སྦྱར་ཆོས་གོས༔ དབུ་ལ་པད་ཞུ་དར་སྣ་ལྔ༔ མེ་ལོང་འཕྲུལ་གྱིས་བརྒྱན་པ་མནབས་ཤིང་གཞོན་ཞིང་མཛེས་པའི་ཆ་ལུགས་དུ་མས་སྤྲས་ཏེ༔ གཟི་བརྗིད་ཀྱི་ཉམས་དང་ལྡན་པར་བཞུགས་པ་ལ༔ ཕྱོགས་བཅུའི་རྒྱལ་སྲས་རྣམས་དང་༔ དུས་གསུམ་གྱི་སྐུ་གསུམ་བླ་མའི་ཚོགས་ཀྱིས་བསྐོར་བར་དམིགས་པའི་སྐུ་གསུང་ཐུགས་ལས་འོད་ཟེར་དཀར་དམར་མཐིང་ག་འཕྲོས་ཤིང་ལུས་ངག་ཡིད་གསུམ་ལ་ཕོག་
པས༔ དེ་དག་གི་སྡིག་སྒྲིབ་ཉམས་ཆག་ཐམས་ཅད་སང་སང་དག་ནས་ལུས་བདེ་བ་དང་ལྡན༔ ལྷ་དབང་ལུས་ལ་ཐོབ༔ ངག་ནུས་པ་དང་ལྡན༔ སྔགས་དབང་། ངག་ལ་ཐོབ༔ སེམས་བདེ་བ་དང་ལྡན༔ ཆོས་དབང་སེམས་ལ་ཐོབ༔ ལུས་ངག་ཡིད་གསུམ་སྨིན་ཅིང་གྲོལ་ཏེ༔ དུག་གསུམ་ངང་གིས་ཞི༔ སྐུ་གསུམ་ལྷུན་གྱིས་གྲུབ་པར་དཔོན་སློབ་ཀུན་གྱིས་བསམས་ལ༔ ཧཱུྃ་ཧཱུྃ༔ ཆོས་སྐུ་སྐྱེ་མེད་ངང་ལས་མ་གཡོས་ཀྱང་༔ ལོངས་སྐུ་གསལ་ལ་མ་འདྲེས་གུ་རུའི་སྐུ༔ སྤྲུལ་སྐུ་སྣ་ཚོགས་ཐབས་ཀྱིས་འགྲོ་བ་འདུལ༔ སྐུ་གསུམ་མ་འདྲེས་གསལ་ཅིང་ཡོངས་སུ་རྫོགས༔ སྔོན་ཚེ་པད་འབྱུང་ཁྱེད་དང་སྨོན་ལམ་གཅིག༔ ད་ལྟ་བདག་དང་སློབ་མའི་སྟོང་གཟུགས་གཅིག སྲོག་གི་ཕྱིར་ཡང་མི་གཏོང་བསྒྲུབ་ལགས་སོ༔ དེ་ཕྱིར་ཁྱེད་ཀྱི་མཁྱེན་བརྩེའི་ཡེ་ཤེས་ཀྱིས༔ སྐལ་ལྡན་སྐྱེས་མཆོག་རིགས་ཀྱི་བུ་རྣམས་ལ༔ སྐུ་གསུང་ཐུགས་ཀྱི་བྱིན་གྱིས་བརླབ་ཏུ་གསོལ༔ ཡེ་ཤེས་དབང་ཆེན་རབ་འབྱམས་ཡོངས་རྫོགས་ཤོག༔ ཨོཾ་ཨཱཿཧཱུྃ་ཧཱུྃ༔ བཛྲ་གུ་རུ་པདྨ་ཐོང་ཕྲེལ་རྩལ་བཛྲ་ས་མཱ་ཡ་ཛ༔ སརྦ་སིདྡྷི་ཕ་ལ་ཧཱུྃ་ཨཱ༔ ཨོཾ་གུ་རུ་དྷརྨ་ཀཱ་ཡ༔ ཀཱ་ཡ་སིདྡྷི་ཨ་བྷི་
ཥིཉྩ་ཨོཾ༔ གུ་རུ་ནིརྨ་ཀཱ་ཡ༔ ཝཱཀ་སིདྡྷི་ཨ་བྷི་ཥིཉྩ་ཨཱ༔ གུ་རུ་སམྦྷོ་ཀཱ་ཡ༔ ཙིཏྟ་སིདྡྷི་ཨ་བྷི་ཥིཉྩ་ཧཱུྃ༔ ཞེས་བསྐུར༔ འགྲིམ་ཚེ་འཛབ་དབྱངས་བྱ༔ གཏོར་མ་མགྲིན་པར་གཏད་དེ༔ གཏོར་མ་དེ་ཉིད་དང་གཉིས་སུ་མེད་པརཿ་ཡི་དམ་ཐམས་ཅད་འདུས་པའི་ངོ་བོ་དཔལ་རྟ་མགྲིན་རྒྱན་ཆ་ལུགས་དང་ལྡན་པར་བསྐྱེད་ལ༔ དཔལ་རྟ་མགྲིན་སྐུ་མདོག་དམར་པོ་ཞལ་གཅིག་ཕྱག་གཉིས་ཁྲོ་ཞིང་གཏུམ་པ༔ ཁྲོ་བོའི་ཆ་ལུགས་དུ་མ་དང་ལྡན་ཞིང་སྤྱི་བོར་རྟ་མགོ་ལྗང་ཞུར་དབང་སྐད་སྒྲོག་པ༔ ཕྱག་གཉིས་གཡས་གཡོན་གྲི་གུག་ཐོད་ཁྲག་འཛིན་ཅིང་༔ དཔའ་བོ་དབང་ཆེན་རོལ་པས་གར་སྟབས་མཛད་པ་ཡི་དམ་ཞི་ཁྲོ་རབ་འབྱམས་རྒྱལ་བའི་དཀྱིལ་འཁོར་གྱི་ཚོགས་དཔག་ཏུ་མེད་པས་བསྐོར་བ་རྣམས་ཀྱི༔ སྐུ་གསུང་ཐུགས་ལས་འོད་ཟེར་དཀར་དམར་མཐིང་ག་འཕྲོས་པ་ཙམ་གྱིས། ལུས་ངག་ཡིད་གསུམ་དང་ཁྱད་པར་སྙིང་གར་ཕོག་པས༔ སྐུ་གསུང་ཐུགས་ཡོན་ཏན་ཕྲིན་ལས་དངོས་གྲུབ་བསྩལ་ནས༔ སེམས་ཀྱི་འདོད་དགུ་འགྲུབ་པར་བསམ་ཞིང་༔ ཧཱུྃ་ཧཱུྃ༔ བདེ་མཆོག་བདེ་སྤྱོད་ནམ་མཁའི་ཀློང་ཡངས་ནས་ཡི་དམ་དཀྱིལ་འཁོར་ལྷ་ཚོགས་ཐུགས་རྗེ་ཅན༔ རྒྱལ་བ་ཞི་ཁྲོ་ཡབ་ཡུམ་འཁོར་
བཅས་ཀྱིས༔ སྐུ་གསུང་ཐུགས་དང་མཉམ་སྦྱོར་དངོས་གྲུབ་སྩོལ༔ ཕྲིན་ལས་རྣམ་བཞི་ལྷུན་གྱིས་གྲུབ་པའི་དཔལ༔ བུམ་བཟང་དཔག་བསམ་ཡིད་བཞིན་ནོར་བུའི་ཚུལ༔ དེང་འདིར་སྐལ་ལྡན་རྣམས་ལ་བསྩལ་དུ་གསོལ༔ སྐུ་གསུང་ཐུགས་མཆོག་ཡོན་ཏན་ཕྲིན་ལས་ཀྱི༔ བྱིན་རླབས་དབང་ཆེན་རབ་འབྱམས་བསྐུར་ནས་ཀྱང་༔ བླ་མེད་མཆོག་གི་དངོས་གྲུབ་བསྩལ་དུ་གསོལ༔ ཐུན་མོང་ཡིད་བཞིན་དངོས་གྲུབ་བསྩལ་དུ་གསོལ༔ གཉིས་མེད་ཡོངས་རྫོགས་དངོས་གྲུབ་བསྩལ་དུ་གསོལ༔ མགྲིན་པར་གཏུགས་ཨོཾ་ཧཱུྃ་ཧཱུྃ་ཧཱུྃཨཱ༔ བཛྲ་མ་ཧཱ་ཀྲོ་ཏ་ཤནྟི་ཀ༔ ཀཱ་ཡ་སིདྡྷི་ཨོྃ༔ ཝཱཀ་སིདྡྷི་ཨཱ༔ ཙིཏྟ་སིདྡྷི་ཧཱུྃ༔ སརྦ་སིདྡྷི་ཧཱུྃ༔ སརྦ་དྷེ་ཝ་སིདྡྷི་ཨ་བྷི་ཥིཉྩ་མཱི༔ ཞེས་པས་བསྐུར༔ གཏོར་མ་སྙིང་ག་དང་ལྟེ་བ༔ གསང་གནས་དང་ལག་པར་གཏད་ལ༔ གཏོར་མ་དེ་དང་དབྱེར་མེད་པར་དྷ་ཀིའི་ཐམས་ཅད་འདུས་པའི་ངོ་བོ་ཡུམ་རྡོ་རྗེ་ཕག་མོ་རྒྱན་ཆ་ལུགས་དང་ལྡན་པ་ལ་ཕག་མོ་མཐིང་ནག་ཞལ་གཅིག་ཕྱག་གཉིས་གཅེར་བུ་རལ་པ་ཅན༔ ཁྲོ་མོའི་ཆ་ལུགས་དང་ལྡན་པ་ལས་ཀྱང་སྤྱི་བོའི་གཙུག་ཏུ་ཕག་ཞལ་ནག་པོའི་ངུར་སྒྲ་སྒྲོག་པ༔ ཕྱག་གཉིས་གཡས་གཡོན་གྲི་གུག་ཐོད་
ཁྲག་འཛིན་ཅིང་དཔའ་མོའི་སྟང་སྟབས་ཀྱིས་གར་མཛད་པ༔ རྡོ་རྗེ་རིན་ཆེན་པདྨ་ལས་ཀྱི་ཌཱཀི་མ་ལ་སོགས་མདོར་ན་འཇིག་རྟེན་དང་༔ འཇིག་རྟེན་ལས་འདས་པ༔ མཁའ་འགྲོ་དམ་ཅན་དཔའ་བོ་དང་དཔའ་མོ་དང་བཅས་པ་བསམ་གྱིས་མི་ཁྱབ་པས་བསྐོར་བ་ཐམས་ཅད་ཀྱིས་བྱིན་གྱིས་བརླབས༔ ཕྲིན་ལས་བསྒྲུབ༔ བར་ཆད་བསལ༔ འདོད་དགུ་སྦྱིན་པར་དམིགས་ལ་ཧཱུྃ་ཧྲཱིཿ གཏོར་སྣོད་བྷནྡྷ་གཞལ་ཡས་ཆོས་ཀྱི་དབྱིངས༔ གཏོར་མ་འདོད་ཡོན་རྣམ་ལྔ་ཡེ་ཤེས་ལྔ༔ དྷ་ཀིའི་སྐུ་མཆོག་བདེ་ཆེན་འདུ་འབྲལ་མེད༔ རྣམ་དག་བདུད་རྩི་བླ་མ་མཆོད་པའི་རྫ་ས༔ གཉིས་མེད་དབྱིངས་སུ་དམ་ཚིག་མཉམ་པོར་བསྲེ༔ མ་མོ་དྷཱ་ཀི་དབང་དུ་སྡུད་པ་དང་༔ ཕྲིན་ལས་རྣམ་བཞིས་འགྲོ་བ་འདུལ་སླད་དུ༔ སྤྲུལ་པ་མང་པོ་ལས་ལ་འགྱེད་པའི་ཕྱིར༔ དབང་རྣམས་ཡོངས་སུ་རྫོགས་པ་ཐོབ་པར་ཤོག༔ སྙིང་ག་མགྲིན་པ་གསང་གནས་ལག་པ་བཞིར་བཞག༔ ཧྲཱིཿམ་ཧ་རི་ནི་ས༔ ར་ཙ་ཧྲི་ཡ༔ སརྦ་ཀརྨ་ཨ་བྷི་ཥིཉྩ་ཧཱུྃ༔ སརྦ་སིདྡྷི་ཀཱ་ཡ་ཝཱཀ་ཙིཏྟ་ཀརྨ་སརྦ་སིདྡྷི་ཧཱུྃ༔ ཞེས་བསྐུར་ཞིང་༔ དེ་ལྟར་རྩ་བ་གསུམ་གྱི་གཏོར་མའི་བྱིན་བརླབས་གྲུབ་ནས༔ སླར་དཀར་རྒྱན་ལ་འབྲུ་གསུམ་སོགས་སྔགས་
ཀྱིས་ངར་གླུད་ལ་སྤྱི་བོར་རྒྱས་གདབ༔ ཀ་པཱ་ལའི་བདུད་རྩི་ལྕེ་ཐོག་ཏུ་བླུག༔ རྡོ་རྗེ་དྲིལ་བུས་སྙིང་གར་རྒྱས་གདབ༔ བླ་མ་སྤྱི་བོར༔ ཡི་དམ་མགྲིན་པ༔ ཌཱཀི་སྙིང་གར་བསྟིམ་ཞིང་༔ ཨོཾ་ཨཱཿཧཱུྃ༔ བླ་མ་རྣམས་ཀྱི་བྱིན་རླབས་རྒྱ༔ ལུས་ལ་བདེ་བ་བསྐྱེད་དུ་གསོལ༔ ཡི་དམ་ལྷ་ཡི་དངོས་གྲུབ་རྒྱ༔ ངག་ལ་ནུས་པ་བསྐྱེད་དུ་གསོལ༔ དྷ་ཀིའི་ཚོགས་ཀྱི་ཕྲིན་ལས་རྒྱ༔ སེམས་ཀྱི་འདོད་དགུ་བསྒྲུབ་ཏུ་གསོལ༔ སྒྲུབ་མཆོག་མོས་པའི་བུ་རྣམས་ལ༔ བྱིན་གྱིས་བརླབ་པར་མཛད་ནས་ཀྱང་༔ དངོས་གྲུབ་བདུད་རྩིའི་ཆར་ཆེན་ཕོབ༔ ཕྲིན་ལས་དགོས་འདོད་རེ་བ་སྐོངས༔ ཞེས་པ་རྣམས་ཀྱིས༔ དངོས་གཞི་དབང་བྱིན་རླབས་རྒྱས་འདེབས་དང་བཅས་པ་གྲུབ་ནས༔ གསུམ་པ་རྗེས་ཀྱི་ལས་རིམ་རྟོགས་པ་བརྗོད་ཅིང་དངོས་གྲུབ་བླངས་ནས་ཤིས་པ་བརྗོད་པ་ལས༔ རྟོགས་བརྗོད་རྣམ་གྲངས་མང་དུ་བཤད་ཀྱང་༔ འདིར་བརྡ་དཔེས་མཚོན་པ་ནི༔ བཞིར་འདུས་པ་ཡང་འདི་སྐད་དུ༔ གཏོར་མ་ལ་ཡང་མཚོན་བྱེད་དང་༔ བྱིན་རླབས་དབང་དུ་འདུས་པ་བླ་མ་འམ༔ ཡི་དམ་དྷ་ཀི་ལ་སོགས་དང་༔ དེ་བཞིན་དངོས་གྲུབ་འདོད་པའམ༔ བདུད་རྩིར་དམིགས་ལ་གང་འདོད་
འབྱུང་༔ བགེགས་ཀྱི་སྦྱོར་བ་བཤིགས་པའི་ཚེ༔ རྣོ་ངར་ལྡན་པའི་མཚོན་ཆར་དམིགས༔ མཆོག་དང་ཐུན་མོང་བསྐང་ཚེ་ནི༔ འདོད་ཡོན་ལོངས་སྤྱོད་མཆོད་པའི་སྤྲིན། བསྐང་བའི་དམ་རྫ་ས་དག་ཏུ་དམིགས༔ དེ་སོགས་རྣམ་བཞི་མོས་པས་མཚོན༔ གང་སྦྱོར་ལའང་ལས་ཀྱི་སྦྱོར་བ་ཤེས༔ ཞེས་པའི་ལུགས་དང་མཐུན་པར༔ གཏོར་མ་དེ་ཉིད་བྱིན་རླབས་དབང་གི་སྐབས་སུ༔ བླ་མ་ཡི་དམ་དྷཱ་ཀི་ལ་སོགས་པའི་ངོ་བོར་དམིགས་ཏེ༔ དད་པའི་ཤུགས་བསྐྱེད་དེ་ཞུ༔ སློབ་དཔོན་གྱིས་ཀྱང་དེའི་ཚུལ་ཅན་བསྐུར་ན༔ བསྐུར་ཐོབ་ཀྱི་ཡོན་ཏན་འབྱུང་བར་འགྱུར་རོ༔ དངོས་གྲུབ་ཏུ་རོལ་བའི་ཚེ༔ གཏོར་མ་ལ་བསྐྱེད་པའི་ལྷ་ཡེ་ཤེས་པ་གཤེགས༔ དམ་ཚིག་པ་འོད་དུ་ཞུ་ནས་ཟག་པ་མེད་པའི་བདུད་རྩི་ཆེན་པོར་དམིགས་ཏེ༔ གུས་པས་རོལ་ཅིང་སྤྱོད་ན་དངོས་གྲུབ་རྣམ་གཉིས་འགྲུབ་པར་འགྱུར་རོ༔ དགྲ་བགེགས་གདུག་པ་ཅན་ལ་ཟོར་དུ་འཕེན་པའི་ཚེ་ན༔ གཏོར་མ་མདའ་མདུང་དྲག་པོའི་མཚོན་གྱི་ཆར་པར་དམིགས་ཏེ་འཕང་ན་ཚར་ཆོད་པར་འགྱུར་རོ༔ མཆོད་ཅིང་ཐུགས་དམ་བསྐང་བའི་དུས་སུ༔ མཆོད་རྫས་དང་བསྐོང་རྫས་ལ་སོགས་པར་དམིགས་ཤིང་ཕུལ་ན་དགྱེས་པ་བསྐང་བར་འགྱུར་རོ༔ གཏོར་ལུང་བཀའ་རྒྱ་མ་ལས་ཀྱང་༔ བྱིན་རླབས་གཏོར་མ་ལྟར་མོས་ཤིང་༔
དབང་ལ་དབང་རྫས་ཉིད་དུ་སྟེ༔ དངོས་གྲུབ་བླང་བའི་གཏོར་མ་ནི༔ གང་འདོད་དངོས་གྲུབ་རྗེས་སུ་དམིགས༔ དེ་སོགས་གང་འདོད་སོ་སོ་ཡི༔ གཏོར་མ་རྣམས་ལ་དེ་ལྟར་དམིགས༔ རྣལ་འབྱོར་འདོད་གསོལ་རིམ་པར་སྦྱར༔ ཞེས་འབྱུང་བ་རྣམས་ཀྱིས་ཤེས་པར་བྱའོ༔ དངོས་གྲུབ་བླང་བ་ནི༔ གཤེགས་ཤིང་འཕང་བར་འོས་པ་རྣམས་ལས་གཞུང་མཐུན་པར་བཤགས་སྦྱང་ལ་སོགས་པ་བྱས་ཤིང་༔ དངོས་གྲུབ་བླང་བར་འོས་པ་རྣམས་ལྷ་དབྱིངས་སུ་བཏེག་ལ་གཏོར་མ་མེ་རླུང་འབྲུ་གསུམ་གྱི་སྦྱོར་བས་བཞུ་བཏུལ་བྱིན་གྱིས་བརླབ་ཅིང་སྨན་རཀ་སྦྲེང་བས༔ རྩ་སྔགས་ལ་ཁཱ་ཧི་ཤམ་བུ་ཅན་གྱིས་འབུལ༔ བསྟོད་པ་དང་འདོད་གསོལ་ལ་སོགས་སྤྱི་དང་མཐུན་པར་བྱས་ཏེ༔ ལྷ་ཚོགས་དགྱེས་པའི་ཞལ་ཆུ་བདུད་རྩིའི་རྒྱུན་ཅི་འདོད་འབྱུང་བར་དམིགས་ལ༔ ཨོཾ་ཨཱ༔ ཧཱུྃ་ཧཱུྃ༔ བཛྲ་གུ་རུ་དྷེ་བ་དྷ་ཀི་ནི་ཀཱ་ཡ་ཝཱཀ་ཙིཏྟ་སརྦ་སིདྡྷི་ཕ་ལ་ཧཱུྃ་ཨཱཿ ཞེས་པའི་འཛབ་ཀྱིས༔ དངོས་གྲུབ་བླང་དེས་དངོས་གྲུབ་ནར་མར་འབྱུང་བར་འགྱུར་རོ༔ ཤིས་པ་བརྗོད་པ་ལ་སོགས་པའི་རྗེས་ནི་སྤྱི་དང་མཐུན་པར་གང་འོས་རིགས་པར་སྦྱར་རོ༔ སཱ་མཱ་ཡ༔ གཏོར་མའི་དབང་མ་བསྐུར་ན་ཅི་ཉེས་ན༔ འདི་སྐད་དུ༔ དབང་བཞི་ཡོངས་རྫོགས་བསྐུར་ནས་ནི༔ མཐའ་བརྟེན་གཏོར་དབང་མ་རྫོགས་ན༔ དེ་ཡང་ཆ་ལག་ཉམས་པ་
སྟེ༔ ཐུན་མོང་དངོས་གྲུབ་ལས་འགྱང་འགྱུར༔ ཞེས་འབྱུང་བས་དབང་བཞི་ཡོངས་སུ་རྫོགས་པར་བསྐུར་ནས༔ གཏོར་དབང་མཐའ་བརྟེན་མ་བསྐུར་ན༔ ཆོ་གའི་ཆ་ལག་མ་ཚང་བར་འབྱུང་བར་འགྱུར་བ་དང་༔ ཐུན་མོང་གི་དངོས་གྲུབ་དང་༔ ལས་འགྱང་བའི་སྐྱོན་ཡོད་པས་དངོས་གྲུབ་མྱུར་དུ་འདོད་པ་དེ་བས་ཀྱང་གནད་ཆེ་བས༔ དེ་ལ་སོགས་པ་གཏོར་དབང་མ་བསྐུར་ན༔ ཉེས་པའི་རྣམ་གྲངས་མང་བར་གསུངས་སོ༔ བསྐུར་བའི་ཡོན་ཏན་ནི༔ ནོ་པེ་ཀ་ལས༔ གཏོར་མ་ནི་ལས་ཐམས་ཅད་པའོ༔ གཏོར་མ་ནི་དངོས་གྲུབ་ཀྱི་མཚོའོ༔ གཏོར་མ་ནི་ཚོགས་ཐམས་ཅད་ཡོངས་སུ་རྫོགས་པའི་རྩ་བའོ༔ གཏོར་མ་ནི་བྱིན་རླབས་ཐམས་ཅད་ཀྱི་འབྱུང་རྐྱེན་ནོ༔ གཏོར་མའི་དབང་ཐམས་ཅད་ཀྱི་མཆོག་གོ༔ ཞེས་པ་ལ་སོགས་པ་ལུང་མང་ཞིང་༔ སྤྱིར་སྨིན་གྲོལ་གཉིས་ལས༔ སྨིན་བྱེད་ཀྱི་དབང་གི་ལས་ཐམས་ཅད་གཏོར་མ་ལ་ཐུག་ཅིང་༔ སྣ་ཡང་གཏོར་མས་འདྲེན། མཇུག་ཀྱང་གཏོར་མས་སྡུད་ཅིང་༔ ཁྱད་པར་དུ་དབང་དང་བྱིན་རླབས་རྗེས་གནང་ཐམས་ཅད་ཀྱི་རྗེས་གཏོར་མ་ལ་བརྟེན་ནས་བསྐུར་བའི་ཕྱིར་ན་ཡོན་ཏན་གྱི་རྣམ་གྲངས་མང་དུ་
གསུངས་པས༔ སྨིན་བྱེད་དབང་གི་བྱེ་བྲག་ཐམས་ཅད་ཀྱི་རྩ་བ༔ གཏོར་མའི་བརྡ་དབང་གནད་ཆེ་བས་རྣམ་གྲངས་གུད་དུ་ཕྱེས་པའོ༔ སྐལ་ལྡན་ལས་ཅན་གཅིག་དང་འཕྲད་པར་ཤོག༔ སཱ་མཱ་ཡཱ་རྒྱ་རྒྱ་རྒྱ༔ སྦས་རྒྱ༔ གཏད་རྒྱ༔ གཏེར་རྒྱ༔ དྷ་ཐིམ༔ འདིར་བཀྲ་ཤིས་ནི་མེ་ཏོག་ཕྲེང་མཛེས་ཀྱི་མཇུག་གི་དེ་སྦྱར་བ་ཕྱག་ལེན་ནོ༔ གཙོ་བོས་ཇི་ལྟར་བཀའ་སྩལ་སོགས་དང་༔ མཎྜལ་བྱའོ༔ ཞེས་རཱ་ག་ཨ་སྱས་གོང་འོག་གི་འཁྲུགས་ཅུང་ཟད་བསྡེབས་པ་སྟེ་བཅོས་སླད་མེད་དོ༔ མངྒ་ལཾ༔ ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།