གཏེར་སྲུང་འབར་བ་སྤུན་བདུན་གྱི་མཆོད་བྱང་བསྡུས་པ།
གཏེར་སྲུང་འབར་བ་སྤུན་བདུན་གྱི་མཆོད་བྱང་བསྡུས་པ་ནི། ཧྲཱིཿ ལྗོན་ཤིང་བྲག་རིའི་གཏམས་པའི་ཕོ་བྲང་ནས། །སངས་རྒྱས་བསྟན་པ་སྲུང་བའི་མཐུ་རྩལ་ཅན། །བཙན་རྒོད་འབར་བ་མ་རུངས་མཆེད་སྡེ་བདུན། །དམ་ཚིག་དབང་གིས་གནས་འདིར་གཤེགས་སུ་གསོལ། །སྲུང་མ་ཀླུ་བཙན་འབར་བ་སྤུན་བདུན་ལ། །འཁོར་དུ་བཙན་རྒོད་སུམ་བརྒྱ་དྲུག་ཅུས་བསྐོར། །དཔལ་གྱི་བཀའ་ཉན་དགེ་བསྙེན་མཆེད་བདུན་ལ། །དཀོར་བདག་ཆེན་པོ་སྐྱེས་བུ་སྟོང་སྡེས་བསྐོར། །ནོར་སྐྱོང་རྒྱལ་པོ་གནོད་སྦྱིན་མཆེད་བདུན་ལ། །དངོས་གྲུབ་གཏེར་བདག་བྱེ་བ་ས་ཡས་བསྐོར། །ཀུན་ཀྱང་དཔལ་གྱི་བཀའ་ཉན་མཐུ་རྩལ་ཅན། །སྤྲུལ་པ་ཡང་སྤྲུལ་འཁོར་དང་བཅས་པ་རྣམས། །སྔོན་ཚེ་སློབ་དཔོན་པདྨའི་སྤྱན་སྔ་རུ། །ཁས་བླངས་དམ་བཅས་བཞིན་དུ་ད་ཚུར་བྱོན། ནཱ་ག་ཙན་ཏྲི་ས་མ་ཡ་ཛ༔ ཛཧཱུྃ་བཾ་ཧོ༔ ཧཱུྃ༔ སངས་རྒྱས་བསྟན་པ་སྲུང་བའི་མཐུ་རྩལ་ཅན། །བཙན་རྒོད་དགེ་བསྙེན་གནོད་སྦྱིན་འཁོར་བཅས་ལ། །དཀར་གསུམ་མངར་གསུམ་ཤ་ཁྲག་ལ་སོགས་པ། །རང་རང་དགྱེས་པའི་རྫས་མཆོད་གཏོར་མ་འབུལ། །ཐུགས་དམ་གཉན་པོ་བསྐང་ཕྱིར་
བཞེས་སུ་གསོལ། །གཟུགས་སྒྲ་དྲི་རོ་རེག་བྱ་ལ་སོགས་པ། །ཕྱི་ནང་གསང་བ་བཀོད་པའི་མཆོད་པ་འབུལ། །ཤ་ཁྲག་དམར་གྱིས་བརྒྱན་པའི་གཏོར་ཆེན་པོ། །དམ་རྫས་བདུད་རྩིར་བྱིན་གྱིས་བརླབས་པ་འདི། །འབར་བ་སྤུན་བདུན་འཁོར་དང་བཅས་ལ་འབུལ། །སྤྲུལ་པོ་ཡང་སྤྲུལ་ཚོགས་རྣམས་དགྱེས་པར་རོལ། །ཞི་རྒྱས་དབང་དང་དྲག་པོ་ལ་སོགས་པའི། །ཕྲིན་ལས་རྣམ་བཞི་མ་ལུས་འགྲུབ་པར་མཛོད། །ཨོཾ་ནཱ་ག་ཙན་ཏྲི་ཙ་ར་ར་ཏྲི་གིང་ཀ་ར་ཡཀཱ་ཡཀྵ་སྭཱ་མ་ཡ་ཧཱུྃ་ཕཊ༔ མ་ཧཱ་མཱི་ས་ལ་ཁཱ་ཧི། རཀྟ་ལ་ཁཱ་ཧི། ཙིཏྟ་ལ་ཁཱ་ཧི། ཀཾ་ནི་རི་ཏི་ལ་ཁཱ་ཧི། མ་ཧཱ་བ་ལིཾ་ཏ་ལ་ཁཱ་ཧི། མ་ཧཱ་ག་ན་པཱུ་ཙ་ལ་ཁ་ཁ་ཁཱ་ཧི་ཁཱ་ཧི། ཧཱུྃ༔ མཆོད་དོ་བསྟོད་དོ་སྲུང་མའི་ཚོགས། །བཙན་རྒོད་འབར་བ་མཐུ་རྩལ་ཅན། །སྤྲུལ་པ་ཀླུ་བཙན་རྒྱུག་པའི་ཚེ། །དགྲ་དང་བགེགས་ཀྱི་སྲོག་རྩ་གཅོད། །དགེ་བསྙེན་ཆེན་པོར་སྤྲུལ་རྩ་ན། །མ་རུངས་འཇིགས་པའི་ཆོ་འཕྲུལ་སྟོན། །གནོད་སྦྱིན་ཆེན་པོར་སྤྲུལ་པའི་ཚེ། །སྒྲུབ་པ་པོ་ལ་དངོས་གྲུབ་སྟེར། །མི་བརྫུ་དགུ་བརྫུ་སྟོབས་པོ་ཆེ། །སངས་རྒྱས་བསྟན་པའི་བྱ་ར་བ། །རིན་ཆེན་གཏེར་གྱི་སྲུང་མ་མཆོག །རྫུ་
འཕུལ་ཅན་ལ་བདག་བསྟོད་དོ། །རང་རང་དགྱེས་པའི་མཆོད་གཏོར་འབུལ། །ཐུགས་དམ་གཉན་པོ་དེས་བསྐངས་ལ། །སྔར་བྱས་ལས་ཀྱི་གཏང་རག་དང་། །ཕྱིས་བྱེད་ལས་ཀྱི་གཉེར་ཟས་མཛོད། །སྡང་བའི་དགྲ་བོ་རྩད་ནས་ཆོད། །གནོད་བྱེད་བགེགས་ཀྱི་དམག་དཔུང་ཤིག །དགྲ་བགེགས་མ་ལུས་ཆམ་ལ་ཕོབ། །ཉིན་གསུམ་ཉིན་གྱི་བྱ་ར་དང་། །མཚན་གསུམ་མཚན་གྱི་མེལ་ཚེ་གྱིས། །བདག་ལ་སྡང་བའི་དགྲ་བྱུང་ན། །གཉེན་འདུན་ཡིན་ཀྱང་མྱུར་དུ་སྒྲོལ། །སྔོན་གྱི་དམ་ཚིག་རྗེས་དགོངས་ལ། །བཅོལ་བའི་ཕྲིན་ལས་འགྲུབ་པར་མཛོད། །ཕྱི་ནང་གསང་གསུམ་གྱི་དྲིལ་སྒྲུབ་སྔགས་ནི། ཨོཾ་ནཱ་ག་ཙན་ཏྲི་ཙ་ར་རཱ་ཏྲི་གིང་ཀ་ར༔ ཡཀཱ་ཡཀྵ་ས་མ་ཡ་ཧཱུྃ་ཕཊ༔ ཅེས་བཟླའོ། །ཞེས་པ་སྔར་ཉིན་དགོངས་འདུས་རྒྱུན་ཁྱེར་བྲིས་ནུབ་བཀའ་སྲུང་རྣམས་དགའ་བའི་རྟགས་ཤིག་བྱུང་ནས་ཕྱིར་ཉིན་འདི་བྲིས་པ་རཱ་ག་ཨ་སྱས་སོ། །མངྒ་ལཾ།།