ཚེས་བཅུའི་གསོལ་འདེབས་བླ་མའི་བྱིན་འབེབས།
ཚེས་བཅུའི་གསོལ་འདེབས་བླ་མའི་བྱིན་འབེབས་ཞེས་བྱ་བ་བཞུགས་སོ༔
གུ་རུ་པདྨ་སིདྡྷི་ཧཱུྃ་ཧྲཱི༔ རྒྱལ་བ་ཀུན་གྱི་བྱིན་རླབས་གཅིག་བསྡུས༔ འགྲོ་བ་སེམས་ཅན་ཡོངས་ཀྱི་སྐྱབས་གནས༔ བླ་མེད་བླ་མ་གུ་རུ་པདྨ༔ གསོལ་བ་འདེབས་སོ་བྱིན་གྱིས་རློབས་ཤིག་གུ་རུ་པདྨ་སིདྡྷི་ཧཱུྃ་ཧཱུྃ༔ སྤེའུ་ཟླ་བའི་ཚེས་བཅུའི་དུས་ན༔ པདྨ་གེ་སར་སྟེང་དུ་འཁྲུངས་ཤིང་༔ མཚན་ཡང་གུ་རུ་པདྨ་འབྱུང་གནས༔ གསོལ་བ་འདེབས་སོ་བྱིན་གྱིས་རློབས་ཤིག༔ གུ་རུ་པདྨ་སིདྡྷི་ཧཱུཾ་ཧྲཱིཿ ནད་དང་སྡུག་བསྔལ་བར་ཆད་ཀུན་ཞི༔ ཚེ་དང་བསོད་ནམས་ཡོན་ཏན་འཕེལ་ལ༔ གདོན་བགེགས་འབྱུང་པོ་ཐམས་ཅད་ཞི་ཞིང་༔ གུ་རུའི་ཞལ་ཡང་མཇལ་
བར་མཛོད་ཅིག༔ གུ་རུ་པདྨ་སིདྡྷི་ཧཱུཾ་ཧྲཱིཿ སྟག་གི་ཟླ་བའི་ཚེས་བཅུའི་དུས་སུ༔ ཟ་ཧོར་རྒྱལ་སྲིད་ཆོས་ཀྱིས་སྐྱོང་ཞིང་༔ མཚན་ཡང་གུ་རུ་པདྨ་རྒྱལ་པོ༔ གསོལ་བ་འདེབས་སོ་བྱིན་གྱིས་རློབས་ཤིག༔ གུ་རུ་པདྨ་སིདྡྷི་ཧཱུཾ་ཧྲཱིཿ་སྟོབས་ཆེན་ནད་མེད་ན་བར་ཉེར་འཚེ༔ མིག་གསལ་ཡིད་བདེ་ཤེས་རབ་ཆེ་ཞིང་༔ དུས་རྣམས་རྟག་ཏུ་བདག་སོགས་འགྲོ་བ༔ མ་ཧཱ་གུ་རུས་འབྲལ་མེད་སྐྱོངས་ཤིག༔ གསོལ་བ་འདེབས་སོ་བྱིན་གྱིས་རློབས་ཤིག༔ གུ་རུ་པདྨ་སིདྡྷི་ཧཱུཾ་ཧྲཱིཿ ཡོས་ཀྱི་ཟླ་བའི་ཚེས་བཅུའི་དུས་ན༔ བསིལ་བ་ཚལ་དུ་བརྟུལ་ཞུགས་སྤྱོད་པ༔ མཚན་ཡང་
གུ་རུ་ཐོད་ཕྲེང་རྩལ་ལ༔ གསོལ་བ་འདེབས་སོ་བྱིན་གྱིས་རློབས་ཤིག༔ གུ་རུ་པདྨ་སིདྡྷི་ཧཱུྃ་ཧཱུྃ༔ ལོངས་སྤྱོད་སྤེལ་ཞིང་འགྲོ་བ་དབང་བསྡུས་མཐུན་རྐྱེན་སྒྲུབ་ཅིང་གནོད་རྐྱེན་ལས་སྲུང་༔ རྨི་ལམ་བཟང་ཞིང་དངོས་གྲུབ་ཀུན་སྟེར༔ ལེགས་འཕྲད་ཉེས་དང་བྲལ་བར་མཛོད་ཅིག༔ གུ་རུ་པདྨ་སིདྡྷི་ཧཱུྃ་ཧྲཱིཿ འབྲུག་གི་ཟླ་བའི་ཚེས་བཅུའི་དུས་ན༔ ཀུན་དགའ་བོ་ལ་རབ་ཏུ་བྱུང་ཞིང་༔ མཚན་ཡང་གུ་རུ་ཤཱཀྱ་སེངྒེ༔ གསོལ་བ་འདེབས་སོ་བྱིན་གྱིས་རློབས་ཤིག༔ གུ་རུ་པདྨ་སིདྡྷི་ཧཱུྃ་ཧཱུྃ༔ འཇིག་རྟེན་ཀུན་ཏུ་སྙན་གྲགས་ཐོབ་ཅིང་བདུད་དང་མ་མོ་གཟའ་དང་གནོད་སྦྱིན༔ རྒྱལ་པོ་ཐེའུ་རང་འགོང་པོ་གཤིན་རྗེ༔ བཙན་དང་གསོན་འདྲེའི་གནོད་པ་ཟློག་ཅིག གསོལ་བ་འདེབས་སོ་བྱིན་གྱིས་རློབས་ཤིག གུ་རུ་པདྨ་སིདྡྷི་ཧཱུྃ་ཧྲཱིཿ སྦྲུལ་གྱི་ཟླ་བའི་ཚེས་བཅུའི་དུས་ན༔ ཟ་ཧོར་མེས་བསྲེགས་སྐུ་ལ་མ་གནོད༔ མཚན་ཡང་གུ་རུ་ཉི་མ་འོད་ཟེར༔ གསོལ་བ་འདེབས་སོ་བྱིན་གྱིས་རློབས་ཤིག༔ གུ་རུ་པདྨ་སིདྡྷི་ཧཱུྃ་ཧྲཱིཿ ཕྱོགས་བཅུར་གང་དུ་འགྲོ་ཡང་དོན་འགྲུབ༔ བཀྲ་མི་ཤིས་པ་མ་ལུས་ཞི་ཞིང་༔ གང་དུ་འགྲོ་བའི་ས་ཕྱོགས་དེ་རུ༔ བཀྲ་ཤིས་བདེ་ལེགས་
འཕེལ་བར་མཛོད་ཅིག༔ གུ་རུ་པདྨ་སིདྡྷི་ཧཱུྃ་ཧི༔ རྟ་ཡི་ཟླ་བའི་ཚེས་བཅུའི་དུས་ན༔ ཨོ་རྒྱན་ཡུལ་དུ་མེས་བསྲེགས་མ་གནོད༔ མཚན་ཡང་གུ་རུ་པདྨ་བཛྲ༔ གསོལ་བ་འདེབས་སོ་བྱིན་གྱིས་རློབས་ཤིག༔ གུ་རུ་པདྨ་སིདྡྷི་ཧཱུྃ་ཧི༔ ལྷ་བདུད་ཀླུ་དང་ས་བདག་སྟོབས་ཆེན༔ མ་རུངས་རྣམས་ཀྱི་གནོད་པ་ཞི་ནས༔ ཆོས་སྐྱོང་རྣམས་ཀྱིས་སྦ་ཞིང་སྲུང་ལ༔ འགོ་བའི་ལྷ་ཡིས་སྲུང་སྐྱོབ་མཛོད་ཅིག༔ གུ་རུ་པདྨ་སིདྡྷི་ཧཱུྃ་ཧཱུྃ༔ ལུག་གི་ཟླ་བའི་ཚེས་བཅུའི་དུས་ན༔ མུ་སྟེགས་བཏུལ་ཞིང་ཆོས་འཁོར་བསྐོར་ནས༔ མཚན་ཡང་གུ་རུ་སེངྒེ་སྒྲ་སྒྲོགས༔ གསོལ་བ་འདེབས་སོ་བྱིན་གྱིས་རློབས་ཤིག༔ གུ་རུ་པདྨ་སིདྡྷི་ཧཱུཾ་ཧྲཱིཿ ནད་གདོན་བར་ཆད་མ་ལུས་ཞི་ཞིང་༔ ཚེ་དང་བསོད་ནམས་ཡོན་ཏན་འཕེལ་ལ༔ རླུང་སེམས་སྣང་སྲིད་དབང་དུ་བསྡུས་ཤིག༔ བདུད་བཞི་གཡུལ་ལས་རྒྱལ་བར་མཛོད་ཅིག༔ གུ་རུ་པདྨ་སིདྡྷི་ཧཱུྃ་ཧཱུྃ༔ བྱ་ཡི་ཟླ་བའི་ཚེས་བཅུའི་དུས་ན༔ ཆུ་བོ་གང་གཱའི་སྟེང་དུ་བྲོ་མཛད༔ མཚན་ཡང་གུ་རུ་ནམ་མཁའ་ལྡིང་ལ༔ གསོལ་བ་འདེབས་སོ་བྱིན་གྱིས་རློབས་ཤིག༔ གུ་རུ་པདྨ་སིདྡྷི་ཧཱུྃ་ཧི༔ བསམ་པའི་དོན་དང་བང་མཛོད་འབྲུ་འཕེལ་
སེམས་བདེ་ངག་གི་ནུས་པ་དང་ལྡན༔ འཁོར་ཡང་ནད་མེད་གཅོང་ནད་རྣམས་བྱང་༔ ཏིང་འཛིན་བཟང་པོ་སྐྱེ་བར་མཛོད་ཅིག༔ གུ་རུ་པདྨ་སིདྡྷི་ཧཱུཾ་ཧྲཱིཿ ཁྱི་ཡི་ཟླ་བའི་ཚེས་བཅུའི་དུས་ན༔ མུ་སྟེགས་ངན་སེམས་དུག་བཏང་མ་གནོད༔ མཚན་ཡང་གུ་རུ་མཚོ་སྐྱེས་རྡོ་རྗེ་གསོལ་བ་འདེབས་སོ་བྱིན་གྱིས་རློབས་ཤིག༔ གུ་རུ་པདྨ་སིདྡྷི་ཧཱུཾ་ཧྲཱིཿ ལོ་སྐག་ཟླ་སྐག་ཞག་སྐག་ཟ་སྐག དུས་ངན་ཕྱོགས་ངན་རྨི་ལམ་ངན་པ༔ ནད་དང་གནོད་པ་ཆོས་ཀྱི་བར་ཆད༔ རླུང་རྟ་རྒུད་པ་རྣམས་ལས་སྐྱོབས་ཤིག༔ གསོལ་བ་འདེབས་སོ་བྱིན་གྱིས་རློབས་ཤིག༔ གུ་རུ་པདྨ་སིདྡྷི་ཧཱུྃ་ཧཱུྃ༔ ཕག་གི་ཟླ་བའི་ཚེས་བཅུའི་དུས་ན༔ བལ་པོའི་ལྷ་འདྲེ་དམ་ལ་བཏགས་ནས༔ མཚན་ཡང་གུ་རུ་པདྨ་བཛ྄༔ གསོལ་བ་འདེབས་སོ་བྱིན་གྱིས་རློབས་ཤིག༔ གུ་རུ་པདྨ་སིདྡྷི་ཧཱུྃ་ཧི༔ གཤིན་རྗེའི་འཁོར་ལོ་མ་མོའི་དལ་ཡམས༔ འབྱུང་པོའི་རིམས་ནད་གཤའ་སེར་ཁང་སེར༔ ལྟས་ངན་ཡེ་འདྲོགས་དུས་མིན་འཆི་བ༔ གློ་བུར་བརྒྱད་ཅུ་རྩ་གཉིས་ཟློག་ཅིག༔ གུ་རུ་པདྨ་སིདྡྷི་ཧཱུྃ་ཧཱུྃ༔ བྱི་བ་ཟླ་བའི་ཚེས་བཅུའི་དུས་ན༔ བདུད་དང་ལྷ་འདྲེ་ངན་པ་བཏུལ་ཏེ༔ མཚན་ཡང་གུ་རུ་པདྨ་འབྱུང་
གནསཿ༔ གསོལ་བ་འདེབ་སོ་བྱིན་གྱིས་རློབས་ཤིག༔ གུ་རུ་པདྨ་སིདྡྷི་ཧཱུྃ་ཧྲཱིཿ སྡོམ་ཁྲིམས་ཉམས་དང་དམ་ཚིག་ཉམས་པ༔ བདེ་གཤེགས་སྐུ་ལ་སྐུར་པ་བཏབ་པ༔ རྫུན་དང་ཕྲ་མ་ངག་འཁྱལ་ལ་སོགས༔ མི་དགེའི་ཉམས་གྲིབ་དག་པར་མཛོད་ཅིག༔ གུ་རུ་པདྨ་སིདྡྷི་ཧཱུྃ་ཧཱུྃ༔ གླང་གི་ཟླ་བའི་ཚེས་བཅུའི་དུས་ན༔ བོད་ཡུལ་གཏེར་ཁ་བྱེ་བ་སྦས་ཤིང་༔ མཚན་ཡང་གུ་རུ་རྡོ་རྗེ་གྲོ་ལོད༔ གསོལ་བ་འདེབས་སོ་བྱིན་གྱིས་རློབས་ཤིག༔ གུ་རུ་པདྨ་སིདྡྷི་ཧཱུྃ་ཧཱུྃ༔ བདག་སོགས་འདི་ནས་འཕོས་མ་ཐག་ཏུ༔ གུ་རུའི་དྲུང་ངམ་བདེ་བ་ཅན་དུ༔ ངེས་པར་སྐྱེས་ནས་སྤྲུལ་པའི་སྐུ་ཡིས༔ འགྲོ་དོན་དཔག་མེད་འབྱུང་བར་ཤོག་ཅིག༔ གུ་རུ་པདྨ་སིདྡྷི་ཧཱུྃ་ཧཱུྃ༔ ཞེས་པ་འདི་ཚེས་བཅུ་མཆོད་པ་ཞིག་ལ་གནས་པའི་ཚེ༔ ཐུན་མཚམས་སུ་དགེ་སློང་རཱ་ག་ཨ་སྱས་སྦྱར་བའོ༔ བཀྲ་ཤིས།། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།