ཐུགས་སྒྲུབ་ཡང་སྙིང་འདུས་པའི་དབང་རྒྱས་འབྲིང་རྣམས་ཀྱི་དབང་བཤད་མདོར་བསྡུས་ལུང་གི་ཕྲེང་བ།
ཐུགས་སྒྲུབ་ཡང་སྙིང་འདུས་པའི་དབང་རྒྱས་འབྲིང་རྣམས་ཀྱི་དབང་བཤད་མདོར་བསྡུས་ལུང་གི་ཕྲེང་བའོ།།
འོ་ན་ད་ལམ་ཁྱེད་རྣམས་ལ་ཐུགས་སྒྲུབ་གུ་རུ་ཞི་བའི་དབང་བསྐུར་བ་ཡིན་ཏེ༔ དེ་ལ་ཐོག་མར་ལོ་རྒྱུས་ཤིག་མ་བཤད་ན་དབང་གི་ས་བཅད་མི་ཚང་༔ རྒྱས་པར་ནི་བརྗོད་ཀྱིས་མི་ལང་་བསྡུས་པ་མདོ་རྒྱུད་ཀྱི་རྩ་ཚིག་ཙམ་ཞུ་ན༔ རྒྱུད་ཀྱི་རྒྱལ་པོ་པད་སྡོང་བརྩེགས་པ་ལས༔ འདི་ལ་དབང་སྤྱོད་རིགས་ཀྱི་བུ༔ སྐྱེ་འཆིས་མི་གོས་རྡོ་རྗེའི་སྐུ༔ གཉིས་མེད་མཚོ་དབུས་འདབ་རྒྱས་ལས༔ ལེགས་བྱུང་སྤྲུལ་སྐུ་དམ་པ་འབྱུང་༔ རྒྱལ་བ་རྣམས་ཀྱི་ཕྲིན་ལས་བདག༔ སྣ་ཚོགས་སྤྱོད་པ་རླབས་པོ་ཆེ༔ གདུལ་བྱའི་མོས་བློ་ཐ་དད་ལ༔ རྣམ་པ་བཞི་ཡི་དོན་བྱེད་
འགྱུར༔ ཞེས་དང་༔ སྐུ་རྒྱུད་ཤེལ་གྱི་རི་བོ་ལས༔ དྲི་མེད་མཚོ་གླིང་གེ་སར་རྒྱས་པའི་སྟེང་༔ མངལ་གྱིས་མ་གོས་པདྨ་བཛྲ་རྩལ༔ བདེ་བའི་རོ་འབྱིན་ལྷ་ལྕམ་མནྡཱ་ར༔ ཐབས་ཤེས་བདེ་སྟོང་གར་གྱི་དབང་ཕྱུག་མཆོག༔ རྒྱལ་བ་ཀུན་གྱི་ཐུགས་བཅུད་བསྡུས་པ་སྟེ། དེ་ཡི་རྩལ་ལས་རྣམ་འགྱུར་དུ་མར་སྣང་༔ ཞེས་དང་༔ བུདྡྷ་ཐོད་ཕྲེང་རྩལ་དང་དེ་ཡི་ཡུམ༔ ཌཱཀི་རྣམ་པར་རོལ་པ་སྟེ༔ དེ་ཡི་ཆོ་འཕྲུལ་འགྱེད་པའི་འཁོར་གྱི་ཚོགས༔ བཛྲ་ཐོད་ཕྲེང་རཏྣ་ཐོད་ཕྲེང་རྩལ༔ པདྨ་ཐོད་ཕྲེང་ཀརྨ་ཐོད་ཕྲེང་རྩལ༔ ཅེས་དང་༔ པད་མ་འབྱུང་གནས་བློ་
ལྡན་མཆོག་སྲེད་དང་༔ ཉི་མ་འོད་ཟེར་སེངྒེ་སྒྲ་སྒྲོག་དང་༔ པདྨ་སཾ་བྷ་པདྨ་རྒྱལ་པོ་སྟེ༔ ཤཱཀྱ་སེངྒེ་རྡོ་རྗེ་གྲོ་བོ་ལོད༔ ཅེས་དང་༔ ཐུགས་རྗེ་ཆེན་པོ་གསང་བ་འདུས་པའི་རྒྱུད་ལས༔ ང་སྤྲུལ་ཀོ་ཤའི་མཚོ་གླིང་དུ༔ པདྨ་ལས་འཁྲུངས་སྤྲུལ་པའི་སྐུ༔ ཚེ་ལ་དབང་བའི་རིག་འཛིན་ལ༔ བཀའ་ཡི་བབ་དང་བཅས་ཏེ་གནང་༔ ཨོ་རྒྱན་རྒྱ་གར་ཤར་ནུབ་ཏུ༔ དེ་ཡིས་བསྟན་པ་དར་བར་བྱེད༔ ཅེས་གསུངས་སོ༔ གཞན་ཡང་གུ་རུ་སྐུ་གསུམ་གྱི་རྒྱུད༔ སུམ་བརྒྱ་བདུན་ཅུ་རྩ་བཞི༔ དེ་བསྡུས་པ་ཐུགས་རྒྱུད་ནམ་མཁའི་ཀློང་ཡངས་སོགས་རྒྱུད་ལྡ༔ དེ་རྣམས་ཆོས་སྐུ་སྣང་བ་མཐའ་ཡས་ཀྱིས་གསུངས་པ་ཡིན་ལ༔ ཧེ་རུ་ཀ་འདུས་པའི་རྒྱུད་ལས་ཀྱང་༔ ཨེ་མ་ཧོ༔ སྐུ་དང་གསུང་དང་ཐུགས་ཀྱི་རྒྱུད་ཡོན་ཏན་ཕྲིན་ལས་གཟི་བརྗིད་དྲེགས༔ སྟོབས་ཀྱི་རྒྱུད་རྣམས་ཡོངས་བསྡུས་པ༔ པདྨའི་སྙིང་པོ་ལས་སྤྲུལ་ནས༔ ཨོ་རྒྱན་ཐོར་ཅོག་རྒྱས་སྲས་སུ༔ ལྷ་ཡིས་རབ་བསྐུལ་དེས་སྡད་འགྱུར༔ ཅེས་དང་༔ དཔལ་བཀའ་འདུས་གསང་བའི་རྒྱུད་ལས་ཀྱང་༔ སྤྱི་དཔལ་ཆེན་པོ་ང་དང་གཉིས་སུ་མེད༔ གུ་རུ་མཚོ་སྐྱེས་རྡོ་རྗེ་ཞེས་བྱ་བ༔ ད་ལྟ་ང་དང་ཚུལ་
མཐུན་པ་ཞིག་འབྱུང་༔ དེ་ཡི་བཀའ་འདུས་སྤྱི་ཏིའི་ཐེག་པ་འདི༔ ཟ་ཧོར་ཡུལ་གྱི་ཕོ་བྲང་ཆེན་པོ་རུ༔ རྒྱལ་པོ་གཙུག་ལག་འཛིན་ལ་སོགས་པ་ལ༔ ཆོས་འདི་རྒྱ་ཆེན་རབ་ཏུ་སྟོན་པར་འགྱུར༔ ཅེས་གསུངས་པ་དང་༔ ཆེ་མཆོག་གིས་གསུངས་པའི་མ་ནིང་ལས་རྒྱུད་ལས༔ ནམ་ཞིག་ལས་ཅན་རྡོ་རྗེ་ཐོད་ཕྲེང་རྩལ༔ སྤྱན་རས་གཟིགས་སྤྲུལ་དེ་ལ་བཀའ་འདི་གཏོད༔ རིག་འཛིན་རོལ་པའི་རྩ་རྒྱུད་ལ་སོགས་པ་ནས༔ ཀུན་ཏུ་བཟང་པོ་ཧེ་རུ་ཀའི་སྐུར་བཞེངས་ནས་གསུངས་པ་ཡིན་ནོ༔ ཐུགས་སྒྲུབ་འདི་ཡི་སྒྲུབ་ཆེན་སོགས་ཕལ་ཆེར༔ ཨོ་རྒྱན་ཉིད་ཀྱིས་ཀྱང་རིག་འཛིན་རོལ་པའི་རྩ་རྒྱུད་ལ་བརྟེན་ནས་མཛད་པ་ཡིན་གསུངས༔ རྩ་རྒྱུད་མན་ངག་གི་ཏན་ཏྲ་ལས་ཀྱང་༔ ང་ཉིད་འདས་པའི་དུས་ཤེས་ན༔ ལོ་ནི་གཉིས་བརྒྱ་ལྔ་བཅུ་ན༔ དགའ་རབ་རྡོ་རྗེ་ཞེས་བྱ་འབྱུང་༔ པདྨ་འབྱུང་གནས་མ་བྱུང་བར༔ ཁྱོད་ཀྱིས་ཐུབ་པའི་རྒྱལ་ཚབ་གྱིས༔ དེ་ནས་ང་ཡི་རྒྱལ་ཚབ་ཉིད་པདྨ་འབྱུང་གནས་ཞེས་བྱ་བ༔ སྐྱེ་ཤི་མེད་པའི་སྤྲུལ་སྐུ་འབྱུང་༔ སངས་རྒྱས་ཐམས་ཅད་འདུས་པའི་དཔལ༔ ཐུབ་པའི་རྒྱལ་ཚབ་དོན་གསུམ་པ༔ སངས་རྒྱས་ཀུན་གྱི་སྲས་
གཅིག་པོ༔ བཀའ་མདོ་ལུང་གསུམ་ཆོས་ཀྱི་མཛོད༔ ང་ཡི་བསྟན་མཇུག་དེས་སྐྱོང་ངོ་༔ ང་ཡི་ཞབས་ཀྱིས་མ་བཅགས་པའི༔ འཛམ་གླིང་བོད་ཁམས་གླིང་བཞི་སོགས༔ སྤྲུལ་སྐུ་དེ་ཡིས་ཞབས་ཀྱིས་བཅགས༔ སངས་རྒྱས་བསྟན་པའི་ཉི་མ་གདལ༔ ང་ཡི་ཆོས་རྣམས་ཀུན་གྱི་ལུང་༔ མན་ངག་སྐྱེས་བུ་དེ་ཡིས་སྟོན༔ ང་ཡི་ཆོས་སྲིད་བསྟན་པ་ཡིས༔ མ་ཁྱབ་བོད་ཁམས་མུན་རུབ་ཏུ༔ དམ་ཆོས་སྒྲོན་མེ་སྤྲུལ་སྐུས་སྦར༔ ཐུབ་པའི་བསྟན་པ་བོད་ཡུལ་དུ༔ ཨོ་རྒྱན་པདྨ་ཞེས་བྱ་བ༔ ཀུན་ཏུ་བཟང་པོའི་ངོ་བོ་ཉིད༔ རྡོ་རྗེ་འཆང་ཆེན་སྤྲུལ་བའི་སྐུ༔ རིགས་ལྔའི་སངས་རྒྱས་འདུས་པའི་དཔལ༔ རིགས་གསུམ་མགོན་པོའི་རང་བཞིན་ཏེ་སྣང་བ་མཐའ་ཡས་སྤྲུལ་པའི་སྐུ༔ ཐུགས་རྗེ་ཆེན་པོ་མངོན་སུམ་ཉིད༔ བདག་ཅག་ཐུབ་པ་དྲུག་གི་སྐུ༔ གཅིག་ཏུ་སྤྲུལ་པའི་སྲས་གཅིག་པོ༔ མ་འོངས་སེམས་ཅད་མགོན་གཅིག་ཡིན༔ སངས་རྒྱས་སྟོང་གི་གདུང་གཅིག་པོ༔ དུས་གསུམ་སངས་རྒྱས་སྤྱི་འདུས་དཔལ༔ བདེ་གཤེགས་ཐམས་ཅད་སྐུ་གསུམ་རྫོགས༔ སངས་རྒྱས་ཀུན་གྱི་རང་བཞིན་ཏེ༔ ལོ་ནི་བཞི་གསུམ་བཅུ་གཉིས་ན༔ དྷ་ན་ཀོ་ཤའི་མཚོ་ལས་
འཁྲུངས༔ དེ་དུས་ཐུབ་པའི་བསྟན་པ་དར༔ རྒྱལ་ཚབ་དགའ་རབ་གུང་གཤེགས་ཚེ༔ ཐུགས་མཛོད་མན་ངག་འདི་ལ་གཏོད༔ བསྟན་པའི་བདག་པོ་ཁྱེད་དབང་བསྐུར༔ བོད་ཁམས་ཆོས་ཀྱི་བསྟན་པ་སྐྱོང་༔ གདུག་པ་སྲིན་གྱི་ཁ་གནོན་མཛད༔ ཅེས་ཐུབ་པ་ཆེན་པོས་ལུང་བསྟན་ཏོ༔ འཇམ་དཔལ་རྩ་རྒྱུད་ཤིན་ཏུ་རྒྱས་པ་ལས། ང་ནི་མི་གནས་འདས་འོག་ཏུ༔ ལོ་ནི་བཞི་གཉིས་ལོན་པ་ན༔ སྔོན་གྱི་ལས་ཀྱིས་རབ་བསྐུལ་ནས༔ ཨོ་རྒྱན་ཡུལ་དང་སིང་ག་ལར༔ མངལ་སྐྱེས་སྤང་བའི་རྫུས་སྐྱེས་གཉིས༔ པདྨ་འབྱུང་གནས་རྫུ་འཕྲུལ་ལྡན༔ འཕགས་པ་ལྷ་ཡིས་རྒོལ་ངན་འཇོམས༔ བཀའ་སྲོལ་དག་ལ་མཁས་པ་འབྱུང་༔ ཞེས་གསུངས་པ་དང་༔ འཇམ་དཔལ་སྐྱ་འཕྲུལ་དྲྭ་བ་ལས་ཀྱང་༔ དཔལ་ལྡན་སངས་རྒྱས་པདྨ་སྐྱེས༔ ཀུན་མཁྱེན་ཡེ་ཤེས་མཛོད་འཛིན་པ༔ རྒྱལ་པོ་སྒྱུ་འཕྲུལ་སྣ་ཚོགས་འཆང་༔ ཆེ་བའི་སངས་རྒྱས་རིག་སྔགས་རྒྱལ༔ ཞེས་དང་༔ གཞན་ཡང་སངས་རྒྱས་ཐོད་པ་ཞེས་བྱ་བའི་རྒྱུད་ཆེན་པོ་བཞུགས་པ་ནི༔ ཨོ་རྒྱན་གྱི་རྒྱུད་ཡིན་ཏེ༔ སངས་རྒྱས་ཐོད་པ་དང་༔ པདྨ་ཐོད་ཕྲེང་རྩལ༔ ཐོད་
པ་རྩལ་ཆེན་དང་༔ རིག་འཛིན་ཐོད་རྩལ་རྣམས་དོན་གཅིག་སྟེ༔ ཨོ་རྒྱན་གྱི་གསང་མཚན་ཡིན་པར་དགོངས་འདུས་ནས་གསུངས་སོ༔ གཞན་ཡང་སྒྲོན་མ་རལ་པ་གྱེན་བརྗེས་ཅན་གྱི་རྒྱུད་གླེགས་བམ་ཤིན་ཏུ་ཆེ་བ་ལས༔ པདྨ་དཀར་པོས་བརྒྱན་པ་ལ་སོགས་པ་རིག་འཛིན་གྱི་རྒྱལ་པོ་བཅོ་བརྒྱད་འཁོར་སྟོང་ཕྲག་བཅོ་བརྒྱད་མཐུ་ཆེན་དང་ལྡན་ཞིང་བུད་མེད་རྣམས་དང་ལྷན་ཅིག་ཏུ་བརྩེ་བར་བྱེད་པ༔ ཞེས་དང་༔ དེའི་སྙིང་པོ་ནི༔ ཨོ་པདྨ་བཛྲ་ཧཱུྃ༔ ཞེས་གསུངས་པ་ཡང་ཨོ་རྒྱན་ཉིད་ཡིན་ནོ༔ དེ་དག་ནི་རྒྱུད་ཀྱི་ལུང་ཡིན་ལ། མདོ་ཡི་ལུང་ནི༔ དབུས་འགྱུར་ཚལ་ལུང་བསྟན་པའི་མདོ་ལས༔ ང་ནི་མྱ་ངན་འདས་འོག་ཏུ༔ ལོ་ནི་བཞི་གསུམ་ལོན་པའི་ཚེ༔ ཨོ་རྒྱན་ཡུལ་གྱི་ནུབ་བྱང་མཚམས༔ དྲི་མེད་ཀོ་ཤའི་མཚོ་གླིང་དུ༔ ཀུན་བས་ལྷག་པའི་སྐྱེས་བུ་འབྱོན༔ ཁྱེད་རྣམས་མྱ་ངན་མོ་བྱེད་དང་༔ སྨན་མཆོག་ནང་ནས་རྣམ་རྒྱལ་ལྟར༔ མཐའ་ཡས་དབང་པོ་པདྨ་འབྱུང་༔ ཁྱེད་རྣམས་མྱ་ངན་མ་བྱེད་ཅིག༔ སྐར་ཚོགས་ནང་ནས་ཉི་ཟླ་ལྟར༔ མཐའ་ཡས་དབང་པོ་པདྨ་འབྱུང་༔ ཁྱེད་རྣམས་མྱ་ངན་ཅི་ཕྱིར་བྱེད༔ ནོར་བུའི་ནང་ནས་ཡིད་བཞིན་ལྟར༔
མཐའ་ཡས་དབང་པོ་པདྨ་འབྱུང་༔ འཇིག་རྟེན་མུན་པ་དེས་སེལ་འགྱུར༔ ཡང་མྱ་ངན་འདས་མདོ་ཤིན་ཏུ་རྒྱས་པ་ལས༔ ཉེ་གནས་ཀ་ཏ་ཡ་ན་དང་༔ ཙུན་དང་༔ མ་འགགས་པ་དང་༔ ཀུན་དགའ་བོ་རྣམས་ལ་བཀའ་སྩལ་པ༔ ང་ནི་ཡོངས་སུ་མྱ་ངན་ལས་འདའོ༔ ཁྱེད་རྣམས་མྱ་ངན་མ་བྱེད་ཅིག མདངས་ལྡན་དྲི་མེད་མཚོ་གླིང་དུ༔ ང་བས་ལྷག་པའི་སྐྱེས་བུ་འབྱུང་༔ ཁྱེད་རྣམས་ངུ་བར་མ་བྱེད་ཅིག ཅེས་དང་༔ དུས་འཁོར་དང་འཇམ་དཔལ་རྩ་རྒྱུད་སོགས་ལས༔ པདྨའི་མྱུ་གུ་ཞེས་སོགས་གསུངས་པ་ཡང་ཨོ་རྒྱན་ཉིད་དོ༔ དེ་ལྟར་ལུང་བསྟན་པའི་སྤྲུལ་སྐུ་དེའི་རྣམ་ཐར་ནི་མཐའ་ཡས་ལ༔ དེ་དག་གི་དོན་བསྡུས་ན༔ དྷ་ན་ཀོ་ཤའི་མཚོ་གླིང་དུ་མེ་ཏོག་པདྨ་ལས་འཁྲུངས་པས༔ མཚན་པདྨ་འབྱུང་གནས་དང་༔ མཚོ་སྐྱེས་རྡོ་རྗེར་གྲགས༔ ཨོ་རྒྱན་ཡུལ་དུ་རྒྱལ་སྲིད་སྐྱོང་བས༔ རྒྱལ་པོ་ཐོར་ཅོག་ཅན་དང་པདྨ་རྒྱལ་པོར་གྲགས༔ བསིལ་བ་ཚལ་དུ་བརྟུལ་ཞུགས་ཀྱི་སྤྱོད་པས་བདུད་དམག་བྱེ་བ་ཁྲག་ཁྲིག་བཏུལ་ཞིང་བཀའ་སྲུང་ཐམས་ཅད་དམ་ལ་བཏགས་པས༔ ནཱ་ག་ཀླུ་འདུལ་དང་ཤནྟ་རཀྵི་ཏར་གྲགས༔ རིག་པའི་
གནས་ལྔ་ལ་མཁས་པས་པཎྜི་ཏ་ཡན་ལག་མེད་པའི་རྡོ་རྗེ་དང་པདྨ་སཾ་བྷ་བར་གྲགས༔ སྟག་བཅིབས་ནས་ནམ་མཁའ་ལ་བྱོན་པ་དང་༔ ཉི་ཟླ་བརྟོད་ལ་མནན་པ་སོགས་རྫུ་འཕྲུལ་དུ་མ་མཛད་པས་གྲུབ་ཆེན་པདྨ་བཛྲ་དུ་གྲགས༔ རྒྱ་ནག་ལི་ཡུལ་ཞང་ཞུང་སོགས་སུ་ལོ་སུམ་སྟོང་འགྲོ་དོན་མཛད་རྗེས༔ བོད་དུ་ཕེབས་ནས་ལོ་བརྒྱ་དང་བཅུ་གཅིག་བཞུགས་ནས་བསྟན་པ་དར་རྒྱས་སུ་མཛད་ནས༔ དེ་ནས་ལྷོ་ནུབ་རྔ་ཡབ་གླིང་དུ་སྲིན་པོའི་ཁ་གནོན་དུ་བྱོན་པ་ཡིན་ནོ༔ གྲུབ་ཆེན་བརྒྱད་ཅུའི་བསྟོད་པའི་རྒྱ་གཞུང་ལས༔ དགེ་སློང་ལུས་ཀྱི་ཕྱག་རྒྱ་བརྟེན༔ ལྷོ་ནུབ་སྲིན་པོའི་ཁ་གནོན་མཛད༔ པྲ་ཝཱ་ཀ་ར་ཞེས་བྱ་བའི༔ བླ་མ་དེ་ལ་ཕྱག་འཚལ་ལོ༔ ཞེས་གསུངས་ཏེ༔ རྒྱ་གར་སྐད་དུ༔ པྲ་ཝཱ་ཀ་ར༔ བོད་སྐད་དུ༔ པདྨ་འབྱུང་གནས་ཡིན་ནོ༔ གུ་རུ་ཉིད་ཀྱི་གསུང་རཏྣའི་གཏེར་ཁ་ནས་བྱུང་བ་རྣམས་ཀྱི་དོན་བཤད་ན༔ སྨོན་ལམ་ཀུན་རྫོབ་གདུལ་བྱའི་ངོར༔ སྲིན་ཡུལ་བཞུགས་པ་བདེན་མོད་ཀྱི༔ ཐུགས་རྗེའི་བྱིན་རླབས་རྒྱུན་ཆད་མེད༔ སུ་མོས་རྩ་ན་ང་ཉིད་འདུག དེ་བས་མང་དུ་ཅི་བཤད་ཀྱང་༔ ཚིག་གི་སྦྱིན་རོ་ཡིན་མོད་ཀྱི༔ དོན་གྱི་བློ་སྙིང་ང་ལ་ཁོལ༔ ཆེ་
རེག་ཆེ་དང་ཆུང་རེག་ཆུང་༔ རང་གི་མོས་གུས་དང་བསྟུན་པའི༔ བྱིན་རླབས་འཇུག་པར་ཐེ་ཚོམ་མེད༔ ཨེ་མ༔ བདག་འདྲ་རིག་འཛིན་པདྨ་འབྱུང་གནས་ཀྱིས༔ ཐུགས་བཅུད་ཟབ་མོ་གཏེར་ཁ་ཇི་སྙེད་སྦས༔ ཐུགས་སྒྲུབ་བརྒྱ་དང་རྩ་བརྒྱད་སྦས་མོད་ཀྱང་༔ ཀུན་གྱི་བཅུད་བསྡུས་ཡང་སྙིང་འདི་ཁོ་ན༔ བོད་ཡུལ་ས་འོག་ཀུན་གྱི་གཏེར་གཅིག་མ༔ པདྨ་ང་ཡི་ཐུགས་བཅུད་མིན་རེ་ཀན༔ ཞེས་དང་༔ བདག་འདྲ་པདྨ་འབྱུང་གནས་ཀྱིས༔ གཏེར་ཁ་བྱེ་བ་ལ་སོགས་སྦས༔ བཅུད་ནས་བཅུད་ཀྱི་སྙིང་པོར་དྲིལ༔ ཐུགས་སྒྲུབ་ཡང་སྙིང་འདུས་པ་འདི༔ ས་འོག་ཀུན་གྱི་གཏེར་གཅིག་མ༔ འདི་ཉིད་ཁོ་ན་མིན་རེ་ཀན༔ ཞེས་གསུངས་སོ༔ ཐུགས་སྒྲུབ་རྒྱ་ཐེམ་ལས༔ ཡང་གསང་སྙིང་པོ་འདི་ལ་སུས་སྤྱོད་པ༔ དངོས་གྲུབ་དུས་ལ་འདའ་བར་མི་སྲིད་ཀྱི༔ འདི་ཉིད་བྲི་འཆང་གུས་པས་མཆོད་པ་དང་༔ ལན་གཅིག་ཙམ་ཞིག་བཀའ་ཤོག་མཐོང་ན་ཡང་༔ པདྨ་ང་ཡི་སྨོན་ལམ་མཐུ་བཙན་པས༔ ངན་སོང་གནས་ནས་སྐྱེ་སྒོ་ངེས་པར་གཅོད༔ དབང་ཐོབ་ཙམ་ཡང་ང་ཡི་དྲུང་དུ་སྐྱེ༔ ཉམས་སུ་ལེན་རྣམས་ཚེ་གཅིག་སངས་རྒྱས་ཡིན༔ དེ་
ཕྱིར་འདི་དང་སུ་འཕྲད་སྐལ་བ་བཟང་༔ ཚུལ་བཞིན་སྤྱོད་པས་རང་གཞན་བདེ་ལ་བཀོད༔ མི་ལུས་དོན་ལྡན་ཡིན་ནོ་རིགས་ཀྱི་བུ༔ འདི་ཡི་རྗེས་འཇུག་སུ་དང་སུས་བསྒྲུབ་ཀྱང་༔ རྔ་ཡབ་གནས་ནས་རྔ་ཡབ་པདྨ་ཡིས༔ རྒྱུན་ཆད་མེད་པར་ཐུགས་རྗེས་མི་འཛིན་རེ༔ ཐེ་ཚོམ་མེད་པར་དམ་ཚིག་གཙང་བར་གཅེས༔ གསོལ་བ་ཐོབ་གཅིག་རྗེས་འཇུག་རིགས་ལྡན་རྣམས༔ བུ་ལ་གདུང་བའི་མ་ལྟར་བདག་གི་སྐྱབས༔ ཉམས་དང་རྨི་ལམ་དངོས་ཀྱི་ཚུལ་དུ་ཡང་༔ ཚུལ་བཞིན་བསྒྲུབས་ན་སྒྲུབ་པའི་བུ་དང་མཇལ༔ ངོ་སྤྱོད་དབང་བསྐུར་ཆོས་བཤད་ལུང་ཡང་སྟོན༔ བསླུས་ན་པད་འབྱུང་ཞན་ནོ་རྗེས་འཇུག་རྣམས༔ ཞེས་དང་༔ ཨེ་མ་ཧོ༔ བདག་འདྲ་པདྨ་འབྱུང་གནས་ང་༔ རང་གི་སྒྲུབ་པ་རང་གིས་བརྩམས༔ སུ་འཕྲད་བདེ་ཆེན་ཞིང་དུ་སྦྱོར༔ ཀུན་གྱི་བཅུད་བསྡུས་ཡང་གཏེར་འདི༔ གཉལ་སྨད་དགེ་རིའི་བྲག་ལ་སྦས༔ ཞེས་གསུངས་ནས་གཏེར་དུ་སྦས་པ༔ རྗེ་འབངས་ལང་གྲོ་དཀོན་མཆོག་འབྱུང་གནས་ཀྱི་སྐྱེ་བ༔ གཏེར་སྟོན་རཏྣ་གླིང་པས་གཏེར་ནས་བཏོན༔ གཏེར་འགའ་ཞིག་ཁྲོམ་གཏེར་མཛད་པས་ཐམས་ཅད་ཡིད་ཆེས༔ ཀརྨ་པ་
ཆོས་གྲགས་རྒྱ་མཚོ༔ འབྲུག་པ་རྒྱལ་དབང་ཆོས་རྗེ༔ སྣེལ་གདོང་གོང་མ་ཆེན་པོ་ལ་སོགས་པ༔ དེ་དུས་མཁས་གྲུབ་རྒྱལ་པོ་མི་ཆེན་ཀུན་གྱིས༔ གཏེར་ཆོས་ཀྱི་དབང་ལུང་ཞུས་པས༔ ཐམས་ཅད་ཐེ་ཚོམ་ཆོད༔ རཏྣ་གླིང་པ་ལ་རྟེན་འབྲེལ་མི་འགྲིགས་པ་དང་བར་ཆད་གཅིག་ཀྱང་མ་བྱུང་བས༔ གཏེར་ཆོས་བཀྲ་ཤིས༔ སློབ་མ་ལས་ཀྱང་ཡང་སློབ་རྗེས་སློབ་ཀྱི་དུས་སུ་བསྟན་པ་མཐའ་རྒྱས་སུ་འགྲོ༔ ཞེས་ལུང་བསྟན་པས༔ བསྟན་པ་རྒྱུན་རིང་ཞིང་བྱིན་རླབས་ཀྱི་བཀའ་མི་ཡལ་བ་ཡིན་ནོ༔ རྩ་རྒྱུད་མན་ངག་གི་ཏན་ཏྲ་ལས༔ བཛྲ་གུ་རུ་གསུངས་ནས༔ བླ་མ་གསང་བ་འདུས་པའི་སྔགས༔ སྟོང་ཕྲག་བཟླས་པས་བྱིན་རླབས་འབྱུང་༔ ཞེས་དང་༔ པདྨ་བཀའ་ཐང་ལས༔ འདི་རིགས་དྲུག་འདུལ་བའི་གུ་རུ་དྲུག་གི་སྙིང་པོ་ཡིན་པས༔ རིགས་དྲུག་གི་སྡུག་བསྔལ་ཞི་ཞིང་སྒྲིབ་པ་སྦྱང་ཚུལ་རྒྱ་ཆེར་གསུངས༔ རྩ་རྒྱུད་མན་ངག་གི་ཏན་ཏྲ་ལས༔ སྒྲུབ་སྔགས་ཐོད་ཕྲེང་རྩལ་གསུངས་ནས༔ བཟླས་པས་མཆོག་ཐུན་དངོས་གྲུབ་ཐོབ༔ འབྱུང་པོ་དྲེགས་པ་རྒྱལ་ཞིང་འབྲོས༔ ལྷ་སྲིན་སྡེ་བརྒྱད་བྲན་དུ་འཁོལ༔ མཁའ་འགྲོ་ཆོས་སྐྱོང་སྤྲིན་ལྟར་
འདུ༔ ཞེས་དང་༔ བླ་མ་གསང་བ་འདུས་པའི་རྩ་གཞུང་ལས༔ དེ་བཟླས་སྣང་སྲིད་གཡོབར་འགྱུར༔ དུས་གསུམ་རྒྱལ་བ་གཅིག་ཏུ་སྡུད༔ བླ་མ་ཀུན་དང་འདུ་འབྲལ་མེད་འབྱུང་པོ་དྲེགས་པ་བརྒྱལ་ཞིང་འབྲོས༔ མཁའ་འགྲོ་ཆོས་སྐྱོང་སྤྲིན་ལྟར་འདུ༔ ཞེས་དང་གཞུང་དེ་ཉིད་ལས༔ ཤམ་བུའི་སྔགས་དེ་བཏགས་གྱུར་ན༔ དཔའ་བོ་ཕོ་ཚོགས་མོ་ཚོགས་རྣམས༔ རང་དབང་མེད་པར་མདུན་དུ་བྱོན༔ ལུང་སྟོན་ཆོས་འཆད་ལེགས་ཉེས་སྨྲ༔ བསྟོད་ཅིང་གསོལ་འདེབས་བསྒོ་བ་ཉན༔ ལྷ་འདྲེ་མི་གསུམ་དབང་དུ་སྡུད༔ བསམ་པ་ཀུན་འགྲུབ་ཐེ་ཚོམ་མེད༔ རྟེན་འབྲེལ་ལས་ཚོགས་ཀུན་འགྲུབ་འགྱུར༔ ཞེས་དང་༔ དེ་ལྟར་བསྙེན་སྒྲུབ་ལས་གསུམ་ལ་འབད་པའི་རྟགས་དང་ཡོན་ཏན་ནི༔ གཞུང་དེ་ཉིད་ལས་བདག་ལུས་བདེ་བའི་དངོས་གྲུབ་འབྱུང་༔ ལུས་ཀྱི་རྫུ་འཕྲུལ་སྟོན་པར་ནུས༔ ཌཱཀྐི་དབང་དུ་འདུས་པའི་རྟགས༔ བུད་མེད་རིགས་གྱུར་ཀུན་ཀྱང་འདུ༔ དཔའ་བོ་དབང་དུ་འདུས་པའི་རྟོགས༔ སྔགས་བཙུན་སྐྱེ་བོ་ཀུན་ཀྱང་འདུ༔ དཔའ་བོ་དཔའ་མོ་དབང་འདུས་བས༔ རབ་དངོས་འབྲིང་ཉམས་ཐ་མ་ཡང་༔ རྨི་ལམ་ཙམ་དུ་མཁའ་འགྲོ་
རྣམས༔ ལུང་སྟོན་ཆོས་འཆད་ལེགས་ཉེས་སྨྲ༔ ལྷ་འདྲེ་མི་གསུམ་དབང་དུ་འདུ༔ རིགས་གང་དབང་དུ་འདུས་པའི་སར༔ གདུལ་བྱ་རྒྱ་མཚོ་མ་ལུས་འབྱུང་༔ ངག་ལ་ནུས་པ་ཐོགས་མེད་འབྱུང༔ མ་བསླབ་ཆོས་སྒོ་སྨྲ་བར་ནུས༔ དམོད་པ་བཙན་ཞིང་སྨོན་ལམ་འགྲུབ༔ ཉིད་ལ་དག་སྣང་དཔག་མེད་འཆར༔ བླ་མ་ཌཀིའི་གནས་ཆེན་མཐོང་༔ མངོན་ཤེས་ཕྲ་མོ་མང་པོ་འབྱུང་༔ ཁྱད་པར་རྟག་ཏུ་བླ་མ་ཡི༔ དག་སྣང་དཔག་མེད་འཆར་བ་དང་༔ ཆོས་སྒོ་དཔག་མེད་གསུངས་པ་དང་༔ སྣང་བ་ཐམས་ཅད་བླ་མར་འཆར༔ སྣང་སྲིད་ཀུན་གྱི་ཆོས་རྣམས་སྟོན༔ དངོས་སུ་བསམ་པ་ཡིད་བཞིན་འགྲུབ༔ ཅེས་གསུངས་སོ༔ འཆི་དུས་རྟགས་འབྱུང་ཚུལ་ཡང་༔ པད་སྡོང་བརྩེགས་པའི་རྒྱུད་ལས༔ གདོས་བཅས་ཉིད་དང་བྲལ་བའི་ཚེ༔ རྡུལ་བྲལ་མཁའ་དང་འོད་ཟེར་འཇའ༔ ཡིག་འབྲུ་སྐུ་གདུང་རིང་བསྲེལ་སོགས༔ སྐུ་གསུམ་ཐོབ་རྟགས་མང་འབྱུང་འགྱུར༔ འབད་པ་དོན་ཡོད་གཅིག་ཆོག་ཉིད༔ འདི་ནི་དུས་གསུམ་རྒྱལ་བའི་བཀའ༔ ལ་ལའི་རྣ་བའི་དབང་པོ་རུ༔ ལན་གཅིག་ཐོས་ཀྱང་དོན་ཆེན་འགྲུབ༔ ཅེས་གསུངས་པ་དང་༔
རབ་ཕུང་པོ་ལྷག་མེད་ཚེ་འདིར་སངས་རྒྱ༔ འབྲིང་འཆི་བ་ཆོས་སྐུར་སངས་རྒྱ༔ ཐ་མ་ཡང་བར་དོར་འཚང་རྒྱ༔ སྤྲུལ་པ་ཡང་སྤྲུལ་དཔག་ཏུ་མེད་པས༔ སྟོང་སྤྱི་ཕུད་ཀྱི་འཇིག་རྟེན་ཁྱབ་པར༔ སེམས་ཅན་གྱི་འགྲོ་དོན་བྱེད་པར་བཤད་དེ༔ སྐུ་རྒྱུད་ཤེལ་གྱི་རི་བོ་ལས༔ གཞིར་སྣང་དག་པ་ཆོས་ཀྱི་དབྱིངས༔ ལྷག་མེད་ཉིད་དུ་མྱ་ངན་འདས༔ སྒྲ་དང་འོད་དུ་བཅས་ནས་ཀྱང་༔ སྐུ་གསུམ་ཞིང་དུ་མངོན་བྱུང་བ༔ འདུལ་བྱ་རྣམས་ལ་ལྷག་པར་བཅས༔ སྐུ་གདུང་རིང་བསྲེལ་བཞག་ནས་ཀྱང་༔ གཞན་ཕན་ཐབས་ཀྱིས་འགྲོ་བ་རྣམས༔ རིམ་གྱིས་འདྲེན་པར་དེས་བྱེད་དོ༔ ཡང་ཐ་བར་དོ་ཉིད་དུ་ཡང་༔ རང་སྣང་ཡེ་ཤེས་ལྷ་དང་འཕྲད༔ རང་ངོ་ཤེས་ན་རྣམ་པར་གྲོལ༔ དེ་ཡང་རྒྱུ་འབྲས་དེ་ཡི་ཡིན། སྤྲུལ་པ་ལས་ཀྱང་སྤྲུལ་པའི་སྐུ༔ སྐུ་དང་མཚན་དཔེས་རབ་སྨྲས་ཤིང་༔ ལས་དག་ཞིང་ལ་རབ་སྣང་པས༔ བྱང་ཆུབ་མངོན་དུ་དེ་འགྱུར་ཞིང་༔ དེ་སོང་ས་དང་ཡང་དག་ལྡན༔ སྤྱི་ཕུད་ཉིད་དུ་སྣང་བར་བྱེད༔ འདི་ཕྱིའི་དོན་ལ་ཡིད་བཞིན་གྱི་ནོར་བུ་ལྟ་བུའི་དབང་ཞུ་བའི་ཕྱིར་མཎྜལ་ཕུལ༔ ཞེས་པ་དབོན་པོ་བླ་མ་རྒྱལ་མཚན་གྱིས་བསྐུལ་ནས༔ གཡང་ཆེན་ལུག་གི་
པོ༔ སྒྲ་རྒྱལ་བ་འབྲུག་གི་ཟླ་བ༔ འབྲུག་གི་ཉི་མའི་སྔ་དྲོ་ལ༔ མངྒ་ལཾ༔ ༧ རཱ་ག་ཨ་སྱས་བསྒྲིགས་པའི་ཡི་གེ་པ་པདྨ་ཐབས་མཁས་སོ༔ འདི་ལ་ཉེས་འགལ་མཆིས་ན་ལྷ་ལ་བཤགས་ཤིང་༔ དགེ་བས་གསང་སྔགས་བསྟན་པ་ཕྱོགས་བཅུར་ཁྱབ་ཅིང་རྒྱས་པར་གྱུར་ཅིག༔ ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།