ཐུགས་སྒྲུབ་ཡང་སྙིང་འདུས་པའི་ལས་བྱང་མང་ཉུང་གཉིས་ཉམས་སུ་ལེན་པའི་ཟིན་བྲིས་མདོར་བསྡུས།
ཐུགས་སྒྲུབ་ཡང་སྙིང་འདུས་པའི་ལས་བྱང་མང་ཉུང་གཉིས་ཉམས་སུ་ལེན་པའི་ཟིན་བྲིས་མདོར་བསྡུས་བཞུགས་སོ༔
ན་མོ་གུ་རུ་དྷ་ཀི་ནི་ཡེ༔ རྩ་བ་གསུམ་ལ་གུས་པས་ཕྱག་འཚལ་ལོ༔ གུ་རུའི་ཐུགས་བཅུད་ས་འོག་གཏེར་གཅིག་མ༔ ལུང་ཐོབ་ཙམ་གྱིས་གནས་ངན་སྐྱེ་བ་གཅོད༔ ཉམས་སུ་ལེན་རྣམས་ཚེ་གཅིག་སངས་རྒྱས་གསུངས༔ དེ་ཕྱིར་ཐུགས་སྒྲུབ་ཟིན་བྲིས་ཅུང་ཟད་བྲི༔ ཆོས་བདག་སྲུང་མས་བཀའ་ཡི་གནང་བ་སྩོལ༔ ཤེས་རབ་འབྱོར་བ་འཁོར་གཡོག་འཛོམ་པ་ན༔ སྒྲུབ་ཆེན་བྱས་ན་ཨོ་རྒྱན་དགོངས་པ་རྫོགས༔ ཤེས་རབ་ལྡན་པས་རང་དོན་ཉམས་ལེན་ནི༔ སྐུ་གསུམ་སྒྲུབ་པ་ལས་ལྷག་ཡོད་མ་ཡིན༔ ཤེས་རབ་དམན་དང་སྒྲུབ་ཆས་མི་འཛོམ་རྣམས༔ ཀུན་དྲིལ་ཡིད་བཞིན་ནོར་
བུ་བསྒྲུབས་པས་འཐུས༔ སྤྲོས་བཅས་མི་འདོད་སྒྲུབ་པ་འདོད་པ་ལ༔ འབྲུ་གསུམ་སྒྲུབ་པ་རིགས་གཉིས་གང་རུང་བྱ༔ དེ་དག་ཀུན་གྱི་གེགས་སེལ་ངར་འདོན་ནི༔ གུ་རུ་དྲག་མཐིང་ཧཱུཾ་སྒྲུབ་ཞོར་ལ་འབྱུང་༔ རྗེས་འཛོམ་ནུས་པར་ལྡན་པའི་གང་ཟག་གིས༔ ལྷ་མཉེས་རང་གཞན་ཀུན་ལ་ཕན་པའི་ཕྱིར༔ བདུད་རྩི་སྨན་གྱི་སྒྲུབ་པ་གཞུང་བཞིན་བྱ༔ དམ་ཚིག་ཉམས་ཆག་སྐྱོན་གྱིས་གོས་པ་ན༔ ཡང་དག་ཐུགས་ཀྱི་སྒྲུབ་པ་བྱས་པས་སེལ༔ དུས་མིན་ཚེ་ཡི་བར་ཆད་འབྱུང་དོགས་ན༔ ཚེ་སྒྲུབ་གསང་བ་བཀའ་རྒྱའི་སྒོམ་བཟླས་བྱ༔ རྫོགས་རིམ་གྲོལ་ལམ་ཉམས་སུ་ལེན་པ་
ལ༔ སྔོན་འགྲོ་ཆོས་སྤྱོད་ལམ་རིམ་ཆེན་མོ་དང་༔ དངོས་གཞི་གསང་ཁྲིད་རིགས་ལྔ་ཉམས་སུ་ལོངས༔ གཏུམ་མོ་བསྒོམ་སྟེ་འཁྲུལ་འཁོར་ཉེར་ལྔ་བྱ༔ རབ་བྱུང་བསྙེན་རྫོགས་ལ་སོགས་མ་ཞུས་ཤིང་༔ གཏུམ་མོ་རྩ་རླུང་ནུས་པ་ཐོན་པ་ན༔ ཕྱག་རྒྱ་བརྟེན་ཐབས་བཞིན་དུ་མུ་དྲ་བཙལ༔ ཟུང་འཇུག་གསང་བའི་ཐེམ་སྐས་ཆགས་ལམ་སྦྱང་༔ ལུས་སྟོབས་རྒྱས་ཤིང་ཐིག་ལེ་འཕེལ་བའི་ཕྱིར༔ རྟག་ངུ་ལ་སོགས་བཅུད་ལེན་སྐོར་རྣམས་བྱ་ལོ་མང་ལུས་རྒུད་འཆི་ལ་ཉེ་བ་ན༔ ཚེ་ལམ་ལྡན་པའི་དྷ་ཀི་མཚན་ལྡན་བཙལ༔ གསང་བ་བཀའ་རྒྱ་མ་ལྟར་ལུས་སྟོབས་བསྐྱེད༔ དེ་དག་གེགས་དང་གོལ་ས་བྱུང་བ་ན༔ གེགས་སེལ་བཀའ་རྒྱ་མ་ལྟར་གེགས་སེལ་བྱ༔ ལྟ་སྒོམ་སྤྱོད་གསུམ་སྤྱི་ཡི་རྣམ་བཞག་རྣམས༔ ལང་གྲོའི་ཞུས་ལན་ལྟར་དུ་ཉམས་སུ་བླངས༔ ཁྱད་པར་རཏྟའི་སྙན་བརྒྱུད་སྙིང་ལ་འཆང་༔ བསྐང་གསོ་གླིང་བཞི་སྲིད་པའི་སྤྱི་མདོས་དང་༔ མཁའ་འགྲོའི་གཏོར་ཟློག་སུན་ཟློག་ལ་སོགས་པ༔ རང་གཞན་དོན་དུ་སྐབས་དང་སྦྱར་བར་བྱ༔ རབ་གནས་བདུན་ཚིགས་སྦྱིན་སྲེག་དེ་དང་འདྲ༔ ཞི་རྒྱས་རླུང་འཁོར་སཱཙྪ་ལ་སོགས་པ༔ རང་གཞན་དོན་དུ་གང་འགྱུར་བྱ་བ་ཡིན༔ འབྱོར་
པ་ལོངས་སྤྱོད་སྤེལ་བར་འདོད་པ་རྣམས༔ ཡེ་ཤེས་གྲགས་དང་ཐོད་སྒྲུབ་ཉམས་སུ་བླངས༔ བྱད་ཁ་དྲོད་གཏོང་ལ་སོགས་གནོད་པ་ན༔ མཁའ་འགྲོའི་ཡང་ཟློག་ཟ་ཡིག་བཏགས་དང་ཟ༔ གཞན་ཡང་བར་ཆད་རྐྱེན་སོགས་གང་ཟློག་ཀྱང་༔ མཁའ་འགྲོའི་གཏོར་ཟློག་ཁ་སྦྱོར་བདུན་མ་གཉིས༔ མ་བུ་སྤྱོད་ཤེས་གནམ་ལྕགས་ཐོག་དང་འདྲ། བསྙེན་སྒྲུབ་རྟགས་ཐོན་རྫས་རྣམས་འཛོམས་པ་ན༔ ལས་ཚོགས་བཅོ་ལྔ་གང་སྒྲུབ་འགྲུབ་མོད་ཀྱི༔ ནུས་པར་མི་ལྡན་རྫས་རྣམས་མི་ཚང་དང་༔ ཕྱག་ལེན་མི་ཤེས་རང་མགོ་རང་སྐོར་ཡིན༔ དྲག་པོའི་རླུང་འཁོར་འགོང་ཆོག་ལ་སོགས་པ༔ རང་ཉིད་དམྱལ་བར་ལྟུང་ཕྱིར་ལག་མི་བླང་༔ འོན་ཀྱང་ཚེ་གཅིག་ཐུགས་སྒྲུབ་ཉམས་བླངས་ཤིང་༔ རྒྱུན་དུ་མ་ནིང་གསོལ་མཆོད་རེམ་པ་ན༔ མ་བསྐུལ་པ་ཡང་བརྣག་པའི་དགྲ་བགེགས་བསྒྲལ༔ རང་ལ་མི་སྒྲིབ་དགྲ་ཡང་བསྒྲལ་བར་འགྱུར༔ སློབ་མ་ལ་སོགས་རྗེས་སུ་འཛིན་པ་ན༔ དབང་བསྐུར་རྒྱས་བསྡུས་གསུམ་པོ་སྐབས་དང་བསྟུན༔ བསྡུས་པ་གཏོར་དབང་མཛད་ཆོས་རྐྱང་པ་ནི༔ སྒྲུབ་པ་བྱེད་མཁན་ཡིན་ན་གོ་མི་ཀེག༔ རྫོགས་རིམ་སྐོར་རྣམས་ཉམས་སུ་ལེན་པ་ལ༔ མཆོག་
དབང་སྐོར་གསུམ་བསྐུར་བ་གལ་ཆེའོ༔ ཚེ་སྒྲུབ་རྡོར་ཕྲེང་དཔལ་མགོན་མ་ནིང་གཉིས༔ པོད་ཆུང་གུད་དུ་སོ་སོར་ཡོད་མོད་ཀྱང་༔ ཐུགས་སྒྲུབ་ཆ་ལག་ཡིན་པ་ཤེས་པར་བྱ༔ ཀུན་དྲིལ་ཡིད་བཞིན་ནོར་བུའི་སྒྲུབ་པ་དང་༔ སྙན་བརྒྱུད་ཡིད་བཞིན་ནོར་བུ་གཉིས་པོ་ནི༔ ཞི་དྲག་ཐུན་མོང་ཡིན་པ་ཤེས་པར་བྱ༔ མཁའ་རིའི་སྒྲུབ་པ་ནོར་སྒྲུབ་བཅས་པ་ནི༔ ཐུགས་སྒྲུབ་ཐུགས་རྗེ་ཆེན་པོའི་ཐུན་མོང་ཡིན༔ ཞིང་སྐྱོང་སེང་གདོང་སྒྲུབ་པའི་སྐོར་རྣམས་ཀྱང་༔ སྐུ་གསུམ་སྒྲུབ་པའི་སྒེར་གྱི་སྲུང་མ་ཡིན༔ སྒྲུབ་ཆེན་མང་པོ་འཚོགས་ནས་སྔགས་རྒྱུན་བྱེད༔ དེ་ཚེ་ཚོམ་བུ་འབུམ་སྒྲུབ་ཅེས་བྱའོ༔ གང་ཟག་གཅིག་གིས་སྒྲུབ་པ་བྱེད་པ་ན༔ སྔགས་རྒྱུན་མེད་ཀྱང་དཔའ་བོ་གཅིག་སྒྲུབ་ཟེར༔ སྒྲུབ་ཆེན་སྐུ་གསུམ་སྒྲུབ་པ་གབ་སྤྱད་ལ༔ སྐུ་གསུམ་སྒྲུབ་ཆེན་ལྟར་སྒྲུབ་ཤིན་ཏུ་ཟབ༔ སྒྲུབ་ཆེན་མི་སབ་སྐུ་གསུམ་རང་གཞུང་དང་༔ སྤྲ་ཁྲིད་ལས་བྱང་གསུམ་པོ་གབ་སྤྱད་པ༔ སྐུ་གསུམ་སྒྲུབ་ཁྲིད་ལྟར་དུ་སྒྲུབ་པ་ཡིན༔ ལས་བྱང་མི་དགོས་ཆོས་སྤྱོད་ལམ་རིམ་དང་༔ སྐུ་གསུམ་སྒྲུབ་པའི་དམིགས་རིམ་གབ་སྤྲད་པ༔ སྐུ་གསུམ་ཁྲིད་རིམ་ལྟར་དུ་ཉམས་ལེན་ཡིན༔ དེ་ཡིས་ཐུགས་སྒྲུབ་པོ་ཏིའི་སྤྱི་ཆིང་ཚང་༔ དེ་
ཡི་སྒྲུབ་ཐབས་རྣམ་གྲངས་མང་ན་ཡང་༔ དེང་སང་སྔགས་འཆང་གསར་བུ་ཕལ་ཆེར་གྱིས༔ ཉམས་སུ་མི་ལེན་དཔེ་ཆ་དད་རྟེན་ཙམ༔ ལས་བྱང་བློར་བཟུང་འདོན་མཁན་ཤིན་ཏུ་མང་༔ དེ་ལྟར་ལས་བྱང་ལ་བརྟེན་སྒྲུབ་པའི་ཐབས༔ དེ་ཡང་ཚིག་གི་ན་ཡམ་བཤད་པའི་སྐོར༔ འབྲུ་འགྲེལ་གསལ་ཕྱིར་འདི་རུ་བཤད་མི་དགོས༔ དང་པོ་དབང་ནི་ཐོབ་པ་གལ་ཆེ་སྟེ༔ དབང་མ་ཐོབ་པར་སྒྲུབ་པ་སྔགས་ལོག་ཡིན༔ དགོན་དང་རི་ཁྲོད་ཁང་པ་སྦྲ་གུར་སོགས༔ རང་ཉིད་གང་མོས་གནས་སུ་བསྒྲུབ་བྱ་སྟེ༔ ས་སྟེགས་སྒོ་ཁྲི་མཆོད་གཞི་གང་འཛོམ་སྟེ༔ འཛོམ་ན་དཀྱིལ་ཐང་བཏིང་བར་བྱ་བ་སྟེ༔ མ་འཛོམ་འབྲུ་ཡི་ཚོམ་བུ་ལྷ་གྲངས་བཀོད༔ པད་འབྱུང་རྟ་མགྲིན་བརྩེགས་མར་ཡོད་པ་ལ༔ ཚོམ་བུ་གཞན་ལས་སུམ་ལོག་ཆེ་བ་བྱ༔ དེ་དབུས་ཡོད་ན་བུམ་པ་སྤྱི་ལྟར་བཤམས༔ དེ་ཡི་སྟེང་ངམ་ཡང་ན་མདུན་ཡང་རུང་། སྒྲུབ་གཏོར་རིན་ཆེན་འབར་བ་ལེགས་པར་བཤམ༔ བུམ་པ་མེད་ན་གཏོར་མ་དབུས་དེར་བཤམ༔ ཡོད་ན་ཨོ་རྒྱན་ཞལ་ཐང་སྐུ་འདྲ་སོགས༔ དཀྱིལ་འཁོར་ནུབ་ནས་ཚུར་ལ་ཞལ་གཟིགས་བཤམ༔ མེད་ན་གཏོར་མའི་རྩེ་ལ་ཙཀ་ལི་འཛུགས༔
རྒྱན་སྐུ་དང་ཐུགས་སྒྲུབ་པོ་ཏིའམ༔ ཐུགས་སྒྲུབ་གཏེར་གཞུང་དཔེ་ཆ་རེ་ཟུང་དང་༔ ཤེལ་དང་རྡོ་རྗེ་རྩེ་ལྔ་ལ་སོགས་པ༔ ཡོད་ན་སྐུ་གསུང་ཐུགས་རྟེན་ཡིན་པས་བཤམས༔ དེ་དག་མེད་ཀྱང་ཐབས་ནི་ཆག་པ་མེད༔ བུམ་པའམ་གཏོར་མའི་གཡས་སུ་བདུད་རྩི་དང་༔ གཡོན་དུ་རིཀ་གཉིས་ནི་བཤམ་པར་བྱ༔ ཕུགས་གཏོར་ལོགས་སུ་གཏོར་སྒམ་བྱས་ཀྱང་རུང་༔ དཀྱིལ་འཁོར་སྟེང་དེར་བཤམ་ན་ལེགས་པ་སྟེ༔ ཤར་དུ་བླ་མ་ལྷོ་རུ་ཡི་དམ་དང་༔ ནུབ་ཏུ་མཁའ་འགྲོ་བྱང་དུ་ཆོས་སྐྱོང་བཤམ༔ མཚམས་བཞིར་ཆོས་སྐྱོང་དང་ནི་ནོར་ལྷ་སོགས༔ ཕུགས་གཏོར་གང་ཡོད་དེ་རུ་བཤམ་པར་བྱ༔ དེ་རྒྱབ་མཆོད་པ་སྣ་བདུན་བསྐོར་བཤམ་བྱ༔ ཤར་དུ་མཆོད་ཡོན་ཤར་ལྷོར་ཞབས་བསིལ་དང་༔ ལྷོ་རུ་མེ་ཏོག་ལྷོ་ནུབ་བདུག་སྤོས་དང་༔ ནུབ་ཏུ་མར་མེ་ནུབ་བྱང་དྲི་ཆབ་དང་༔ བྱང་དུ་ཞལ་ཟས་བྱང་ཤར་ཏིང་ཤག་གམ་མེད་ན་མཚམས་འཛིན་མེ་ཏོག་ནས་བཤམ་མོ༔ སྔོན་འགྲོ་དཀར་བགེགས་ཚོགས་དང་གཏོར་འབུལ་དང་༔ མཐེབ་སྐྱུ་ལ་སོགས་མཆོད་གཏོར་བཟང་དུ་བཤམ༔ དཀྱིལ་འཁོར་བཤམ་པའི་མཆོད་པ་མི་བརྗེ་ཞིང་༔ ཡོན་ཆབ་ལ་སོགས་སྐམ་ན་ཁ་གསོ་བྱ༔ མདུན་དུ་ཉིན་
བཞིན་བརྗེ་རྒྱུའི་མཆོད་པ་བཤམ༔ རིན་ཆེན་འབར་བ་དང་པོ་བྲན་པ་ནས༔ གསོ་བྲན་མི་དགོས་སྒྲུབ་རྟེན་ལྷ་བསྐྱེད་ཡིན༔ ཕུགས་གཏོར་རྣམས་ནི་ནམ་འདོད་གསོ་བྲན་བྱ༔ དཀར་བགེགས་དང་པོའི་ཉིན་པར་རྒྱས་པར་བཏང་༔ དེ་ནས་རྒྱུན་དུ་གཏོང་བར་མི་དགོས་སོ༔ ཚོགས་དང་བསྐང་བ་ཆད་མདོ་གཏོར་འབུལ་རྣམས༔ དང་པོ་ནུབ་དང་ཡར་མར་ཚེས་བཅུ་དང་༔ དགུ་གཏོར་གྲོལ་ནུབ་མ་གཏོགས་མི་དགོས་སོ༔ མལ་སྟན་དང་པོ་བཏིང་ནས་བསྒུལ་མི་རུང་༔ ཁའང་ལྷོ་ནུབ་ཨོ་རྒྱན་བཞུགས་ངོས་གྱུ༔ དཀྱིལ་འཁོར་མཆོད་པ་མདུན་ནམ་གཡས་སུ་བཤམ༔ སྒོ་རྩར་ཐོ་བརྩེགས་དེ་ལ་དཀར་གཏོར་འབུལ༔ གནས་བདག་དེ་ལ་བསྔོ་ཞིང་བཅོལ་གཏམ་ནི༔ སྒྲུབ་པ་འདི་ཉིད་མཐའ་རུ་མ་ཐོན་བར༔ བར་ཆད་མ་གཏོང་སྡོང་གྲོགས་གྱིས་ཞེས་བརྗོད༔ རང་ཉིད་ཁྲུས་བྱས་མལ་གོས་སྤོས་ཀྱིས་བདུག༔ མཚམས་གཡོག་གཅིག་ཀྱང་མི་གཏུགས་རྟགས་གསལ་ཏེ༔ མི་གཏུགས་ཀ་མེད་ཡོད་ན་མདུན་དེར་བཞག༔ རྗེས་ནས་གཏུགས་དགོས་ཡོད་ན་ཤོག་བུ་ལ༔ མིང་བྲིས་རྡེའུ་བསྟམ་ལ་མི་དེ་བསམ༔ དེ་ནས་བགེགས་གཏོར་བཏང་ལ་མཚམས་བཅད་དེ༔ སྒྲུབ་ཁང་ཐུན་
བྲབ་གུ་གུལ་དུད་པས་བདུག༔ དེ་ནས་སྲུང་བའི་འཁོར་ལོ་དྲག་ཏུ་བསྒོམ༔ མི་དང་ངོ་མི་གཏུགས་ཤིང་ངག་མི་བསྲེ༔ རྒྱུན་དུ་ངག་བཅད་ཐུབ་ན་མཆོག་ཡིན་ཏེ༔ ཕྱེད་ངག་ཅེས་པ་རླངས་པ་མ་ཤོར་བར་ཁ་བཙུམས་ངག་གཏམ་སྨྲ་བ་བསླབ་ན་གོ༔ མི་གཏོང་ཀ་མེད་ཡོད་ན་ཐུན་མཚམས་གཏོང་༔ གལ་ཏེ་མཚམས་གཡོག་ངག་གཏམ་མི་གོ་ན༔ གཞན་ལ་ངག་མི་བསྲེ་བའི་མཚམས་གཡོག་ནི༔ གཅིག་པུ་དེ་ལ་ངག་ནི་མི་གཅོད་པར༔ གསང་བ་སྤྱི་རྒྱུད་སོགས་ནས་བཤད་དང་མཚུངས༔ མཚམས་གཡོག་དམེ་ཡུགས་ནལ་གསུམ་ལ་སོགས་པ༔ གྲིབ་ཆེན་མི་རུང་གཙང་བ་གལ་ཆེའོ༔ སྒྲུབ་གཡོག་མཚན་ཉིད་རྒྱུད་སྡེ་རྣམས་ནས་བཤད༔ འབྱོར་པ་ཡོད་ན་སྒྲུབ་ཚེ་མཆོད་གཏོར་གཟབ༔ མེད་ན་ཅི་འབྱོར་དམིགས་རྟེན་ཙམ་གྱིས་ཆོག ཚོགས་འཁོར་མ་བྱས་པ་ཡི་ཤ་ཆང་སྤངས༔ གཙོང་བུ་སྒྲོག་པ་ཟ་བར་མི་བྱ་སྟེ༔ ལྕེ་ཡང་མི་ཟ་མེ་ལ་ཕུ་མི་བྱ༔ སྐ་སེན་མི་བྲེག་ལུས་ལ་ཁྲུས་མི་བྱ༔ སྟན་དྲོད་མ་ཡལ་མེ་ཉི་སྤངས་ན་ལེགས༔ གཟུངས་ཆུ་མ་ཡིན་ཆུ་ཡིས་ཁ་མི་བཤལ༔ དེ་ནས་ཐུན་ནི་དྲུག་གམ་བཞི་བྱ་སྟེ༔ བསྐྱེད་རིམ་མི་བརྟན་པ་ནི་ཐུན་དྲུག་བྱ༔ ཐོ་རངས་སྔ་དྲོ་ཉིན་ཕྱེད་དགོང་མོ་
དང་༔ སྲོད་དང་ནམ་ཕྱེད་དྲུག་ལ་ལས་བྱང་བཏང་༔ ཅུང་ཙམ་བརྟན་ན་ཐུན་བཞི་བྱ་བ་སྟེ༔ སྔ་དྲོ་ཉིན་གུང་དགོང་མོ་མཚན་ཐུན་བཞི༔ བསྐྱེད་རིམ་རབ་ཏུ་བརྟེན་ན་ཐུན་གསུམ་སྟེ༔ སྔ་དྲོ་དགོང་མོ་མཚན་དང་གསུམ་ཡིན་ནོ༔ བསྐྱེད་རིམ་བརྟན་ཅིང་སྔགས་གྲངས་མང་འདོད་ན༔ ཉིན་ཐུན་མཚན་ཐུན་གཉིས་ཀྱིས་ཆོག་པ་སྟེ༔ འདི་ནི་མ་ཧཱ་ཡོ་གའི་ལུགས་ཡིན་པས༔ སྒྲུབ་ཚེ་ལས་བྱང་ཐུན་གཉིས་མེད་ཐབས་མེད༔ ལས་བྱང་རྒྱས་བསྡུས་གཉིས་པོ་གང་འདོད་ཆོག བསྡུས་པ་བྱེད་ན་མངོན་རྟོགས་སབ་དགོས་སོ༔ རྒྱས་བསྡུས་འདོན་རེས་བྱས་ན་ཤིན་ཏུ་ལེགས༔ དེ་ཡིས་མཚམས་སྒྲུབ་བྱེད་ལུགས་སྤྱི་ཙམ་ཚང་༔ མཚམས་སྒྲུབ་མ་ཡིན་རྒྱུན་ཁྱེར་ཉམས་ལེན་ན༔ ལས་བྱང་རྒྱས་བསྡུས་གཉིས་པོ་གང་རེད་གཅིག༔ ཞག་གཅིག་ནང་དུ་ཚར་གཅིག་མ་ཚིག་པར༔ དེ་ཡི་རྒྱུན་དུ་དམིགས་རིམ་བསྒོམ་ཞིང་བཟླ༔ དེ་ནས་ལས་བྱང་འདོན་ཚེ་སྒོམ་རིམ་ནི༔ གཞུང་དུ་གསལ་ཕྱིར་འདི་རུ་ཡི་གེར་འཇིགས༔ འོན་ཀྱང་མདོར་བསྡུས་ཙམ་ཞིག་བརྗོད་པ་ནི༔ སྐྱབས་འགྲོ་སེམས་བསྐྱེད་དཀར་བགེགས་རང་གཞུང་ངམ༔ གསང་སྔགས་སྤྱི་གཞུང་གང་རུང་བྱས་པས་འཐུས༔ དེ་ནས་
རང་ཉིད་སྐད་ཅིག་དྲན་རྫོགས་སུ༔ རྟ་མགྲིན་ལྗང་གུ་གྲི་གུག་ཐོད་ཁྲག་འཛིན༔ རྟ་སྐད་ལྷང་ལྷང་འཚེར་བ་ཅིག་ཏུ་བསྒོམ༔ བགེགས་ལ་བཀའ་བསྒོའི་ཚིག་རྣམས་བརྗོད་པར་བྱ༔ དེ་ཡིས་བགེགས་རྣམས་ཐམས་ཅད་དེངས་པར་བསམ༔ བཀའ་ལ་མི་ཉན་མི་འགྲོ་འདུག་གྱུར་ན༔ རང་དབང་མེད་པར་དྲག་པོས་བསད་པའི་ཕྱིར༔ རང་གི་སྐུ་ལས་སྤྲུལ་པ་རང་འདྲ་བའི༔ ཁྲོ་ཆུང་ནམ་མཁའ་ས་གཞི་ཁྱབ་པར་འཕྲོས༔ བགེགས་རྣམས་བྱ་སྤུ་རླུང་གིས་གཏོར་བ་བཞིན༔ ཕྱི་རོལ་རྒྱ་མཚོའི་ཕ་རོལ་བསླད་པར་དམིགས༔ ཁྲོ་ཆུང་ཚུར་འདུས་སྲུང་བའི་གུར་ཁང་ནི༔ སྟེང་འོག་ཐམས་ཅད་རྡོ་རྗེའི་གུར་ས་གཞི༔ འཁོར་ལོ་རལ་གྲི་རྒྱ་གྲམ་ཕུར་པ་དང་༔ མེ་རིའི་གུར་ཁང་སྲ་ཞིང་བརྟན་པར་དམིགས༔ དེ་ནས་ལས་བྱང་རྒྱས་བསྡུས་གཉིས་པོ་ཡི༔ སོ་སོའི་གཞུང་བཞིན་གྱེར་བསྒོམ་སྦྲག་པར་བྱ༔ ལས་ཀྱང་ཆེ་བར་ཏིང་འཛིན་རྣམ་གསུམ་སྟེ༔ དེ་བཞིན་ཉིད་ཀྱི་ཏིང་འཛིན་སེམས་ངོར་ལྟ༔ ཀུན་སྣང་ཏིང་ངེ་འཛིན་ལ་སྙིང་རྗེ་བསྒོམ༔ རྒྱུ་ཡི་ཏིང་འཛིན་སྟོང་ཉིད་སྙིང་རྗེའི་ངང་༔ རང་སེམས་རྡོ་རྗེ་གྷིཡིས་མཚན་པ་ལས༔ ཨེ་ཡཾ་ར་སུཾ་ཀེ་རཾ་ཧཱུྃ་འཕྲོས་པས༔ འབྱུང་བ་རིམ་བརྩེགས་གཞལ་ཡས་ཁང་བསྐྱེད་བྱ༔ ལས་
བྱང་བསྡུས་པར་དེ་རྣམས་མ་གསུངས་ཕྱིར༔ སྣོད་བཅུད་རྣམ་དག་གཞལ་ཡས་དྲན་རྫོགས་བསྐྱེད༔ རྒྱས་བསྡུས་མཚུངས་པར་གྲུ་བཞི་སྒོ་བཞི་སྟེ༔ རྟ་བབས་ཆོས་འཁོར་གདུགས་དང་བཅས་པ་བཞི༔ དབུས་ནི་ཕྱུར་བུར་མཆོད་རྟེན་ཁོག་སྟོང་འདྲ༔ ཕྱི་རོལ་པད་འདབ་དེ་འོག་དམའ་བའི་སར༔ དུར་ཁྲོད་བརྒྱད་པོ་མཚོ་རྣམས་སྤང་ཐང་བརྒྱད༔ མེ་དང་རི་དང་ཤིང་དང་མཆོད་རྟེན་དང་༔ ཕྱོགས་སྐྱོང་ཞིང་སྐྱོང་གྲུབ་ཐོབ་བརྒྱད་བརྒྱད་དེ༔ ཕྱི་རིམ་རྡོ་རྗེའི་རྭ་བ་ཟླུམ་པོ་ནི༔ དགོན་པའི་མཐའ་ཡི་ལྕགས་རི་ལྟ་བུའོ༔ དེ་རྒྱབ་མེ་དཔུང་ཁ་དོག་ལྔ་ཡི་ཕྲེང་༔ མེ་རི་རྡོ་རྭ་ཧད་པོའི་གུར་གྱི་ཚུལ༔ བདག་མདུན་གཙོ་ནི་གང་ཆེའི་ཁྱད་པར་ཏེ༔ སྒྲུབ་དུས་དཀྱིལ་འཁོར་ཡོད་ན་མདུན་བསྐྱེད་གཙོ༔ རྒྱུན་ཁྱེར་དཀྱིལ་འཁོར་མེད་དུས་བདག་བསྐྱེད་གཙོ༔ གཙོ་བོ་གང་བྱེད་རྡོ་རྗེའི་རྭ་བ་ཡི༔ ནང་དུ་ཚུད་པའི་རྡོ་རྗེའི་གུར་ཕུབ་སྟེ༔ མེ་རི་བར་མཚམས་མེད་པ་སྒོ་ང་བཞིན༔ གུར་གྱི་ལོགས་སུ་རྡོ་རྗེའི་མདའ་ཡི་དྲ༔ གུར་ནང་སྟེང་དུ་རྡོ་རྗེའི་བླ་བྲེ་བྲེས༔ དེ་ནང་བདག་མདུན་བུམ་པའི་དཀྱིལ་འཁོར་ཀུན༔ སྒྲུབ་དུས་མདུན་བསྐྱེད་དཀྱིལ་འཁོར་གཙོ་བོ་སྟེ༔ ཤར་སྒོའི་གཡོན་ཟུར་
བདག་བསྐྱེད་དཀྱིལ་འཁོར་བསྒོམ༔ དེ་ཡི་རྡོ་ར་མེ་རི་སྟེང་ཧད་པོ༔ ཤར་སྒོའི་གཡས་ཟུར་བུམ་ནང་དཀྱིལ་འཁོར་གཅིག༔ གསུམ་ཀ་མཚུངས་པར་དཀྱིལ་འཁོར་དབུས་སུ་ནི༔ སྣ་ཚོགས་པདྨ་འདབ་མ་བཅུ་དྲུག་པ་དེ་སྟེང་རིན་ཆེན་ཟུར་བརྒྱད་ནོར་བུའི་མཚན༔ དེ་སྟེང་པདྨ་འདབ་བརྒྱད་བརྡལ་བའོ༔ དེ་སྟེང་པདྨ་འདབ་བཞི་དབུས་དང་ལྔ༔ དབུས་དང་འདབ་མ་རེ་རེའི་སྟེང་དུ་ཡང་༔ པདྨ་ཉི་ཟླ་བརྩེགས་པའི་གདན་རེ་བསྒོམ༔ དེ་ཡི་དབུས་སུ་བདུད་བཞི་བསྣོལ་བའི་གདན༔ ལྷ་བུའི་བདུད་དཀར་ཕུང་པོའི་བདུད་ནི་སེར༔ ཉོན་མོངས་བདུད་དམར་འཆི་བདག་བདུད་ནི་ནག༔ དེ་སྟེང་རང་སེམས་དང་པོ་བསྒོམ་པ་ཡི༔ རྡོ་རྗེ་ཧཱུྃབཅས་བབ་པ་འོད་དུ་ཞུ༔ རང་ཉིད་དབང་ཆེན་ཡབ་ཡུམ་གཞུང་ལྟར་བསྒོམ༔ རྟ་མགྲིན་སྤྱི་བོར་པདྨ་ཉི་ཟླའི་གདན༔ ཨོ་རྒྱན་སྤྲུལ་སྐུ་གཞུང་ལྟར་བསྒོམ་པ་སྟེ༔ བསྙེན་དུས་ཆོས་སྐུར་མི་སྒྱུར་སྤྲུལ་སྐུར་བཞག༔ སྒྲུབ་པའི་དུས་སུ་ཆོས་སྐུར་སྒྱུར་བ་ཡིན༔ ཚེ་སྒྲུབ་འདོན་ན་དེ་ཉིད་ལོངས་སྐུར་སྒྱུར༔ དེ་ནས་སྐུ་ལྔ་མཚན་བརྒྱད་བསྒོམ་པའི་ཚུལ༔ གཏེར་ཁ་གཞན་གྱི་ལུགས་དང་རང་ལུགས་གཉིས༔ གུ་རུ་ཆོས་དབང་ལ་སོགས་གཞན་གྱི་ལུགས༔ སྐུ་ལྔ་
མཚན་བརྒྱད་ལ་སོགས་རྟ་མགྲིན་གྱི༔ དབུ་གཙུག་པད་འདབ་རྣམས་ལ་བསྒོམ་པ་སྟེ༔ རྟ་མགྲིན་འཁོར་ལ་སྐུ་ལྔ་མཚན་བརྒྱད་མེད༔ རང་ལུགས་རཏཱའི་ལུགས་ལ་དེ་ལྟར་མིན༔ རྟ་མགྲིན་དབུ་གཙུག་ཨོ་རྒྱན་རྐྱང་པ་སྟེ༔ རྟ་མགྲིན་ཐུགས་ཀར་བུདྡྷ་ཐོད་ཕྲེང་རྩལ༔ རྟ་མགྲིན་ཕྱོགས་བཞིར་ཐོད་ཕྲེང་རིགས་བཞི་དང་༔ དེ་རྒྱབ་རིན་ཆེན་ཟུར་བརྒྱད་འདབ་བརྒྱད་སྟེང་༔ གུ་རུ་མཚན་བརྒྱད་བསྒོམ་ཚུལ་མངོན་རྟོགས་ལྟར༔ དེ་ཡི་ཕྱི་རིམ་འདབ་མ་བཅུ་དྲུག་ལ༔ མཁའ་འགྲོ་སྡེ་བཞི་ཡབ་བཞི་ཡུམ་བཞི་བརྒྱད༔ གིང་ཆེན་སྡེ་བཞི་ཡབ་བཞི་ཡུམ་བཞི་བརྒྱད༔ ཡབ་རྣམས་ཐོར་ཚུགས་ཡུམ་རྣམས་དབུ་སྐྲ་གྲོལ༔ ཡབ་རྣམས་གཡས་བརྐྱང་ཡུམ་རྣམས་གཡོན་བརྐྱང་སྟེ༔ རུས་རྒྱན་ལ་སོགས་དུར་ཁྲོད་ཆས་རྣམས་རྫོགས༔ རང་རྟགས་གྲི་གུག་ཐོད་ཁྲག་ཁ་ཊཾ་བསྣམས༔ ཤར་སྒོར་ལྭ་གདོང་དཀར་མོ་ལྕགས་ཀྱུ་གཡས༔ ལྷོ་སྒོར་ཕག་གདོང་སེར་མོ་ཞགས་པ་གཡས༔ ནུབ་སྒོར་ཁྱི་གདོང་དམར་མོ་ལྕགས་སྒྲོག་གཡས༔ བྱང་སྒོར་འུག་གདོང་ལྗང་མོ་དྲིལ་བུ་གཡས༔ ཀུན་ཀྱང་ཕྱག་གཡོན་སྡིགས་མཛུབ་མཛད་པའོ༔ ཕྱི་རོལ་དུར་ཁྲོད་གནས་བརྒྱད་ནང་དུ་ཡང་༔ བསྐང་བའི་
ནང་ལྟར་དུར་ཁྲོད་མཁའ་འགྲོ་བརྒྱད༔ ཤར་ཕྱོགས་གཏུམ་དྲག་དུར་ཁྲོད་ན༔ མི་ཕྱེད་རྡོ་རྗེ་མཁའ་འགྲོ་མ༔ ལྷོ་ཕྱོགས་གད་རྒྱངས་དུར་ཁྲོད་ན༔ རིན་ཆེན་མཁའ་འགྲོ་གཟི་བརྗིད་ཅན༔ ནུབ་ཕྱོགས་པད་འཁྱིལ་དུར་ཁྲོད་ན༔ དྲི་མེད་པདྨ་མཁའ་འགྲོ་མ༔ བྱང་ཕྱོགས་ཀཱི་ལའི་དུར་ཁྲོད་ན༔ ལས་ཀྱི་མཁའ་འགྲོ་བདེ་བ་ཅན༔ ཤར་ལྷོ་རབ་འཇིགས་དུར་ཁྲོད་ན༔ དམ་ཚིག་མཁའ་འགྲོ་དམིགས་པ་ཅན༔ ལྷོ་ནུབ་གཏུམ་པོའི་དུར་ཁྲོད་ན༔ སྣ་ཚོགས་མཁའ་འགྲོ་མི་ཐུབ་མ༔ ནུབ་བྱང་རབ་རྒྱུའི་དུར་ཁྲོད་ན༔ ཐམས་ཅད་མཁའ་འགྲོ་ཀུན་རྒྱུ་མ༔ བྱང་ཤར་དྲག་ཤུལ་དུར་ཁྲོད་ན༔ རྒྱུད་འཛིན་འཇིག་རྟེན་མཁའ་འགྲོ་མ༔ རང་རང་འཁོར་ཡང་འབུམ་ཕྲག་རེ་རེས་བསྐོར༔ དེ་ནས་ལས་བྱང་མང་བའི་ནང་ན་ནི༔ ཕྱི་རིམ་བར་ཁྱམས་འཁོར་ཡུག་ལ༔ བདག་སྐྱོབ་ལྷ་དང་རིག་འཛིན་ཚོགས༔ མཁའ་འགྲོ་ཆོས་སྐྱོང་དམ་ཅན་རྣམས༔ དེ་བཞིན་ལས་བྱང་ཉུང་བའི་ནང་ན་ཡང་༔ བླ་མ་ཡི་དམ་མཁའ་འགྲོ་དམ་ཅན་དང་༔ ཕྱོགས་བཅུའི་བྱང་སེམས་རྒྱལ་བ་སྲས་བཅས་རྣམས༔ མ་འདྲེས་རང་གསལ་གཙོ་དང་འཁོར་དུ་བཅས༔ སྒྱུ་མ་ཆུ་ཟླ་མེ་ལོང་བཞིན་དུ་བསྐྱེད༔ ཅེས་གསུངས་
དེ་དོན་ཚིག་ཉུང་དོན་ཆེ་བ༔ དེང་སང་ཕལ་གྱིས་རྟོགས་པར་མ་གྱུར་པས༔ ལས་བྱང་རེ་རེ་མཐའ་རུ་མ་རྫོགས་བར༔ ལས་བྱང་གཞན་ཞིག་གཏོང་ཐབས་མ་རྙེད་ནས༔ ལས་བྱང་སྔོན་མའི་ཚོགས་དང་གཏོར་འབུལ་རྣམས༔ བསྡུ་ཆོག་ཚར་ཏེ་སླར་ཡང་གཞན་མགོ་བཙུགས༔ དེ་འདྲ་བྱས་ན་ལས་བྱང་ཆག་མེད་ཡང་༔ སྒྲུབ་པ་ཆེན་པོ་བྱེད་ཐབས་མེད་པར་འགྱུར༔ དེ་ལྟར་མ་ཡིན་དཀྱིལ་འཁོར་གཅིག་གིས་ཁོག༔ ལས་བྱང་མང་པོ་བཅུག་ནས་འདོན་ཆོག་སྟེ༔ དེ་དོན་ཨོ་རྒྱན་ཆེན་པོའི་ཞལ་ནས་ཀྱང་༔ རྒྱལ་བ་གཅིག་གི་དཀྱིལ་འཁོར་དུ༔ རྒྱལ་བ་ཀུན་གྱི་ལས་གཞུང་བསྲངས༔ བདེ་གཤེགས་གཅིག་བསྒྲུབ་ཀུན་གྱི་ངང་༔ གསུངས་པའི་གནད་ཀྱི་མན་ངག་ནི༔ མདུན་བསྐྱེད་ཤར་དང་ཤར་ལྷོ་བྱང་ཤར་གྱི་ཕྱི་ཡི་ཁྱམས་ནས་ནུབ་ཏུ་ཞལ་གཟིགས་ནས༔ བདག་བསྐྱེད་མང་པོ་གྲལ་འགྲིགས་བཞིན་དུ་བསྒོམ༔ མདུན་བསྐྱེད་དཀྱིལ་འཁོར་དེ་ཡི་ནུབ་ཕྱོགས་དང་༔ ལྷོ་ནུབ་ནུབ་བྱང་ཕྱོགས་ནས་ཚུར་གཟིགས་པའི༔ མདུན་བསྐྱེད་དཀྱིལ་འཁོར་མང་པོ་གྲལ་འགྲིགས་བསྒོམ༔ མདུན་བསྐྱེད་དེ་དག་བར་མཚམས་རྣམས་སུ་ཡང་༔ གཏོར་མགྲོན་ཆོས་སྐྱོང་ནོར་ལྷ་ཐམས་ཅད་
བསྒོམ༔ རྩ་བ་སྒྲུབ་པའི་དཀྱིལ་འཁོར་ཆེན་པོ་ལ༔ རྒྱུན་ཁྱེར་ཆག་མེད་ལས་བྱང་དཀྱིལ་འཁོར་ཀུན༔ གུར་ཆེན་ཅོག་པུས་བསྐོར་བ་ལྟ་བུ་ཡིན༔ བདག་བསྐྱེད་དཀྱིལ་འཁོར་མང་པོ་ཡོད་ན་ཡང་༔ ཐམས་ཅད་བདག་ཉིད་ཡིན་པར་བསམ་པས་ཆོག༔ དེ་དོན་ཀུན་རིག་ལ་སོགས་བདག་བསྐྱེད་སྐབས༔ གཙོ་བོ་ཐམས་ཅད་བདག་ཉིད་ཡིན་བསྒོམ་གསུངས༔ དེ་བཞིན་བཀའ་བརྒྱད་དགོངས་འདུས་སྐབས་སུ་ཡང་གཙོ་བོ་དགུ་ཀ་བདག་ཉིད་ཡིན་བསྒོམ་གསུངས༔ བདག་བསྐྱེད་མང་པོ་རུང་བ་དེ་ཡིས་ཤེས༔ འོན་ཀྱང་སོ་སོའི་སྔགས་ནི་བཟླ་བའི་ཚེ༔ སོ་སོའི་ལྷ་ཡི་ང་རྒྱལ་བཟུང་བ་ཡིན༔ དེ་ནས་སོ་སོའི་གནས་གསུམ་ཡིག་འབྲུ་གསུམ༔ ཁྱད་པར་ཐུགས་ཀར་ཐུགས་སྲོག་ཧྲུལ་སོགས༔ གཞུང་དུ་མི་གསལ་ན་ཡང་ཡིད་ཀྱིས་བསྒོམ༔ དེ་ནས་སྤྱན་འདྲེན་མཆོད་བསྟོད་ལ་སོགས་པ༔ གཞུང་དུ་གསལ་ཕྱིར་རྒྱས་པར་བཀྲོལ་མི་དགོས༔ འོན་ཀྱང་ཐུགས་ལས་སྤྲུལ་པའི་མཆོད་པ་ཡི༔ ལྷ་མོ་གྲངས་མེད་ནམ་མཁའ་ཁྱབ་པར་འཕྲོས༔ བདག་མདུན་སོ་སོར་མཆོད་བསྟོད་འབུལ་བར་བསམ༔ དེ་ནས་བསྟོད་པ་ཡན་ཆད་གཞུང་ལྟར་རོ༔ སྨན་མཆོད་སྐབས་སུ་མཚན་ནས་བརྗོད་པ་དང་༔
གཏོར་མའི་སྐབས་སུ་གཏོར་བསྔོས་བཅུག་སྲོལ་ཡོད༔ མ་བཅུག་ན་ཡང་གམ་གཙང་ལེགས་པ་ཡིན༔ ཅི་ཕྱིར་གཞུང་འདིར་སྣོན་དང་འཕྲི་བ་འཕང་༔ རྡོ་རྗེའི་གསུང་འདི་བཅོས་སླད་མེད་པ་ཟབ༔ སྒྲུབ་པ་ཡིན་ན་ཐུན་སྐབས་འགའ་རེ་ལ༔ རིག་འཛིན་བྱིན་འབེབས་བཏོན་པས་བྱིན་རླབས་ཆེ༔ དེ་ཚེ་རོལ་མོ་དབྱངས་དང་སྤོས་དུད་བྱ༔ དགོང་མོའི་ཐུན་མཚམས་ཧཱུྃ་སྒྲུབ་དམིགས་པ་བཟུང་༔ ཧཱུྃ་གི་དབྱངས་སྒྲོགས་འཆམས་པས་གེགས་སེལ་མཆོག དེ་ནས་དང་པོ་བསྙེན་པའི་དམིགས་པ་ནི༔ རང་ཉིད་རྟ་མགྲིན་གསལ་བའི་ཐུགས་ཀ་རུ༔ བུདྡྷ་ཐོད་ཕྲེང་ཐུགས་ཀར་ཉི་མའི་སྟེང་༔ ཧཱུྃཡིག་དམར་པོ་འགྲེང་སྟེ་གནས་པའི་མཐར༔ ཨོཾ་བཛྲ་ཀྲོ་དྷ་ཧྱ་གྷི་ཝ་ཧུ་ལུ་ཧུ་ལུ་ཧཱུྃ་ཕཊ༔ ཅེས་པའི་སྔགས་ཕྲེང་གཡས་སུ་འཁོར་བར་བསམ༔ སྤྱི་གཙུག་ཨོ་རྒྱན་སྤྲུལ་སྐུའི་ཐུགས་ཀ་རུ༔ ཟླ་སྟེང་ཧཱུྃཡིག་དཀར་པོའི་མཐའ་མ་རུ༔ བཛྲ་གུ་རུའི་སྔགས་ཀྱི་ཕྲེང་བ་ནི༔ དཀར་དམར་མདངས་ལྡན་གཡས་སུ་འཁོར་བར་བསམ༔ བཛྲ་གུ་རུ་གསོལ་འདེབས་ཚུལ་དུ་བཟླས༔ གུ་རུའི་ཐུགས་ཀའི་སྔགས་ཕྲེང་འོད་ཟེར་ནི༔ ཁ་དོག་སྣ་ཚོགས་ནམ་མཁའ་ཁྱབ་པར་འཕྲོས༔ ནམ་མཁའི་མཐར་ཐུག་
ཞིང་ཁམས་རབ་འབྱམས་ཀྱི༔ བླ་མ་རིག་འཛིན་གྲུབ་ཐོབ་རྒྱ་མཚོ་དང་༔ ཡི་དམ་རྒྱུད་སྡེའི་ལྷ་ཚོགས་ཐམས་ཅད་དང་༔ དཔའ་བོ་མཁའ་འགྲོ་ཡེ་ཤེས་ཆོས་སྐྱོང་རྣམས༔ ཁ་བ་བུ་ཡུག་བཞིན་དུ་སྤྱན་དྲངས་ཏེ༔ སྤྱི་བོའི་གུ་རུའི་སྐུ་ལ་སིབ་སིབ་ཐིམ༔ ཁྱད་པར་སྲིན་ཡུལ་ཟངས་མདོག་དཔལ་རི་ནས༔ ཨོ་རྒྱན་རིག་འཛིན་མཁའ་འགྲོའི་ཚོགས་དང་བཅས༔ འཇའ་འོད་སྤོས་དུད་རོལ་མོའི་སྒྲ་དང་བཅས༔ བར་སྣང་ལམ་ནས་སྤྱན་དྲངས་དབྱེར་མེད་བསྟིམ༔ བག་དྲོ་བྱིན་ཆགས་སྣང་བ་འགྱུར་བ་དང་༔ ངེས་པར་སྤྱི་བོར་ཨོ་རྒྱན་ཕེབས་སྙམ་པའི་ངེས་ཤེས་མ་སྐྱེས་བར་དུ་བཟླས་པ་བྱ༔ དེ་ཚེ་གུ་རུའི་དཔྲལ་བའི་ཨོ་ཡིག་ལས༔ ཐིག་ལེ་དཀར་པོ་ཨོ་ཡིག་གིས་མཚན་པ༔ བར་མ་ཆད་པ་གཅིག་རྗེས་གཉིས་རྗེས་འཕྲོས༔ རང་གི་དཔྲལ་བའི་གནས་སུ་ཐིམ་པ་ཡིས༔ ལུས་ཀྱི་སྒྲིབ་དག་སྐུ་ཡི་བྱིན་རླབས་ཞུགས་འགྱུར་མེད་སྐུ་ཡི་དངོས་གྲུབ་ཐོབ་པར་བསྒོམ༔ གུ་རུའི་མགྲིན་པའི་ཨཱཡིག་དམར་པོ་ལས་འོད་ཀྱི་ཐིག་ལེ་དམར་པོ་ཨཱུས་མཚན་པ༔ རིམ་པར་འཕྲོས་ནས་རང་གི་མགྲིན་པར་ཐིམ༔ ངག་གི་སྒྲིབ་དག་གསུང་གི་བྱིན་རླབས་ཞུགས༔ འགག་མེད་གསུང་གི་དངོས་གྲུབ་ཐོབ་པར་
བསྒོམ༔ གུ་རུའི་ཐུགས་ཀའི་ཧཱུཾ་ཡིག་སྔོན་པོ་ལས༔ ཐིག་ལེ་སྔོན་པོ་ཧཱུྃ་གིས་མཚན་པ་འཕྲོས༔ རང་གི་སྙིང་གར་རིམ་བཞིན་ཐིམ་པ་ཡིས༔ སེམས་ཀྱི་སྒྲིབ་དག་ཐུགས་ཀྱི་བྱིན་རླབས་ཞུགས༔ འཁྲུལ་མེད་ཐུགས་ཀྱི་དངོས་གྲུབ་ཐོབ་པར་བསྒོམ༔ ལྟེ་བ་ཕྱག་ཞབས་ལ་སོགས་དམིགས་པ་ནི༔ སྐུ་གསུམ་སྒྲུབ་པའི་དུས་ཡིན་འདིར་མ་གསུངས༔ དེ་ལྟར་དམིགས་པ་དེ་བཞིན་རྩེ་གཅིག་ཏུ༔ བསྒོམ་ཞིང་བཛྲ་གུ་རུའི་བཟླས་པ་ནི༔ མི་ཆེ་མི་ཆུང་བུང་བའི་སྐད་ཙམ་བྱ༔ ཨོཾ་ཨཱཿཧཱུྃ་ནི་རྒྱལ་བའི་སྐུ་གསུང་ཐུགས༔ བཛྲ་གུ་རུ་རྡོ་རྗེ་སློབ་དཔོན་ཏེ༔ པདྨ་ཞེས་པ་ཨོ་རྒྱན་མཚན་ཡིན་ལ༔ སིདྡྷི་ཧཱུཾ་ནི་དངོས་གྲུབ་སྩོལ་ཞེས་སོ༔ དེ་ནས་རིགས་དྲུག་འདུལ་བའི་གུ་རུ་དྲུག གཅིག་ཏུ་བསྡུས་པའི་སྙིང་པོ་ཡིན་པའི་ཕྱིར༔ འདི་བཟླས་རིགས་དྲུག་སྐྱེ་སྒོ་གཅོད་པའི་ཚུལ༔ པདྨ་བཀའ་ཐང་སོགས་ལས་གསུངས་པ་ཡིན༔ ཡིག་འབྲུ་བཅུ་གསུམ་སྔགས་ཀྱི་ཕྲེང་བ་འདི༔ ཕྱི་ལྟར་གསོལ་བ་འདེབས་པའི་སྙིང་པོ་ཡིན༔ བསྙེན་དུས་བླ་མ་སྤྱི་བོར་བསྒོམ་པ་འདི༔ གསོལ་འདེབས་ཚུལ་དུ་བཟླས་ཞེས་གསུངས་པ་ཡི༔ དོན་གྱི་རྩ་བ་དམིགས་པ་དེ་ལ་འདུས༔ མདུན་གྱི་དཀྱིལ་འཁོར་
བུམ་པ་ལ་སོགས་ལྷ༔ མཆོད་ཡུལ་ཙམ་ཡིན་སྔགས་ཕྲེང་བསྒོམ་མི་དགོས༔ དགོས་པ་སྐུ་གསུམ་ཀུན་དྲིལ་སྐབས་སུ་ཡིན༔ མཚམས་ལ་བདུན་གསུམ་ཙམ་ལ་འདུག་པ་ན༔ བསྙེན་པ་འདི་ལ་ཞག་བདུན་ཙམ་ཞིག་བྱ༔ མདོར་ན་མཚམས་ལ་རིང་ཐུང་ཅི་འདུག་གི༔ བསྙེན་པ་རུ་གཅིག་སྒྲུབ་པ་རུ་གཉིས་ཡིན༔ དེ་གཉིས་ཀྱི་ནི་བཅུ་ཆ་ལས་སྦྱོར་ཡིན༔ རྒྱུན་ཁྱེར་ཡིན་ན་བསྙེན་པ་ཕྲེང་སྐོར་གཅིག སྒྲུབ་པ་ཕྲེང་སྐོར་གཉིས་བྱ་ལས་སྦྱོར་སྔགས༔ ཚར་གྲངས་སུམ་ཅུ་ཙམ་ཞིག་འདོན་པའོ༔ དེ་ཡི་རིམ་པ་མཉུག་གི་རིང་ཐུང་ནི༔ རང་གི་རིག་པས་དཔག་སྟེ་བྱ་ཆོག་གོ༔ དེ་ལྟར་བསྙེན་པ་རྫོགས་ནས་སྒྲུབ་པ་ནི༔ ཐུན་སོགས་འདོན་ལུགས་གོང་དང་འདྲ་བ་ལས༔ མངོན་རྟོགས་སྐབས་སུ་སྤྱི་བོའི་ཨོ་རྒྱན་དེ༔ སྤྲུལ་སྐུ་ཆོས་སྐུར་བསྒྱུར་བ་ལས་བྱང་ལྟར༔ དེ་ཡི་སྤྱི་བོར་ཟླ་བའི་དཀྱིལ་འཁོར་སྟེང་༔ ཧཱུྃ་ཡིག་ཐ་མར་ཐོད་ཕྲེང་སྔགས་གཡས་འཁོར༔ དེ་ནས་བསྙེན་པའི་སྐབས་བར་ལས་བྱང་ལྟར༔ བསྙེན་པའི་སྐབས་སུ་སྤྱི་བོའི་ཆོས་སྐུ་དེ༔ རང་ཉིད་རྟ་མགྲིན་སྤྱི་བོའི་ཚངས་བུག་ནས༔ མར་ཞུགས་ཐུགས་ཀའི་བུདྡྷ་ཐོད་ཕྲེང་༔ ཚངས་བུག་ནས་ཞུགས་བུདྡྷའི་ཐུགས་ཀ་རུ༔ རང་གི་སྙིང་དེ་
མེ་ཏོག་དམར་པོ་ནི༔ ཁ་ནི་གྱེན་བསྟན་བྱེ་ལ་ཁད་པ་དེ༔ ཁ་བྱེ་དེ་ཡི་ཟེའུ་འབྲུའི་སྟེང་ཉིད་དུ༔ བླ་མ་གསང་འདུས་ཡབ་ཡུམ་བཞུགས་པར་བསྒོམ༔ བདག་བསྐྱེད་མདུན་བསྐྱེད་གཙོ་འཁོར་ཐམས་ཅད་ཀྱིས༔ རང་གི་སྙིང་དབུས་བླ་མ་གསང་འདུས་ལ༔ མཆོད་བསྟོད་ཚུལ་དུ་ཛབ་དབྱངས་འུར་དི་རེ༔ སྔགས་སྒྲས་སྟོང་གསུམ་འཇིག་རྟེན་གཡོ་བར་ནུས༔ དེ་ཡིས་རྐྱེན་བྱས་གསང་འདུས་ཐུགས་རྒྱུད་བསྐུལ༔ སྔགས་ཕྲེང་མཐིང་ཁ་གཡས་སུ་དྲག་ཏུ་འཁོར༔ དེ་ལས་འོད་ཟེར་ཕྱོགས་བཅུ་ཀུན་ཏུ་འཕྲོས༔ ཕྱོགས་བཅུའི་སངས་རྒྱས་བྱང་ཆུབ་སེམས་དཔའ་དང་༔ བླ་མ་ཡི་དམ་དཔའ་བོ་མཁའ་འགྲོའི་ཚོགས༔ རང་དབང་མེད་པར་འོད་ཟེར་དེར་བསྡུས་ཏེ༔ དཔེར་ན་ཁབ་ལེན་རྡོ་ཡིས་ལྕགས་ཕྱེ་བཞིན༔ སིབ་སིབ་བསྡུས་ནས་སྙིང་གའི་བླ་མར་ཐིམ༔ ཁྱད་པར་སྲིན་ཡུལ་ཟངས་མདོག་དཔལ་རི་ནས༔ ཨོ་རྒྱན་སྐུ་ལྔ་མཚན་བརྒྱད་རྗེ་འབངས་ཚོགས༔ དཔག་མེད་སྤྱན་དྲངས་སྙིང་གའི་བླ་མར་ཐིམ༔ བདག་དང་དབྱེར་མེད་སེམས་རྒྱུད་བྱིན་རླབས་ཤིང་༔ མཆོག་དང་ཐུན་མོང་དངོས་གྲུབ་ཐོབ་པར་བསྒོམ༔ ཐོད་ཕྲེང་རྩལ་གྱི་སྔགས་ལ་བསྙེན་པ་བྱ༔ ཨོ་ནི་ཆོས་སྐུ་ལོངས་སྐུ་
སྤྲུལ་པའི་སྐུ༔ ངོ་བོ་ཉིད་སྐུ་བདེ་བ་ཆེན་པོའི་སྐུ༔ ལོངས་སྐུ་ཐོད་ཕྲེང་རིགས་ལྔའི་སྙིང་པོ་ཚང་༔ ཨཱནི་གསུང་དབྱངས་ཡན་ལག་དྲུག་ཅུ་སྟེ༔ གསུང་གི་དབང་ཕྱུག་སྣང་བ་མཐའ་ཡས་ཡིན༔ ཆོས་དབྱིངས་མེ་ལོང་མཉམ་ཉིད་སོར་རྟོག་དང་༔ བྱ་གྲུབ་ཡེ་ཤེས་ལྔ་ནི་ཧཱུཾ་ལ་ཚང་༔ ཁྲོ་བོ་ཀུན་གྱི་ཐུགས་ཀྱི་ས་བོན་ཏེ༔ སངས་རྒྱས་ཀུན་གྱི་ཐུགས་ཀྱི་སྤྲུལ་པ་སྟེ་སྤྲུལ་སྐུ་པདྨ་འབྱུང་གནས་ཐུགས་སྲོག་སོགས༔ བཛྲ་སྲ་བརྟན་མི་ཤིགས་རྡོ་རྗེའི་སྐུ༔ གུ་རུ་པདྨ་ཨོ་རྒྱན་ཉིད་ཀྱི་མཚན༔ དེ་དག་རྒྱ་གར་ལེགས་སྦྱར་སྐད་དང་མཚུངས༔ ཐོད་ཕྲེང་རྩལ་ནི་བོད་སྐད་ཡིན་པ་སྟེ༔ ཨོ་རྒྱན་ཆེན་པོའི་གསང་བའི་མཚན་ཡིན་ནོ༔ གསར་མའི་རྒྱུད་སྡེ་སངས་རྒྱས་ཐོད་པ་དང་༔ དགོངས་འདུས་དཀྱིལ་འཁོར་ཐོད་པ་རྩལ་ཆེན་དང་བཀའ་བརྒྱད་དཀྱིལ་འཁོར་རིག་འཛིན་ཐོད་པ་རྩལ༔ འདི་ཡི་ཐོད་ཕྲེང་རྩལ་རྣམས་དོན་གཅིག་གོ༔ ཨོ་རྒྱན་མཚན་གྱི་རྣམ་གྲངས་ཡིན་ཞེས་བྱ༔ བཛྲ་ས་མ་ཡ་ཛཞེས་བྱ་བ༔ རྡོ་རྗེའི་དམ་ཚིག་ཅེས་ནི་བྱ་བའོ་སིདྡྷི་ཕ་ལ་དངོས་གྲུབ་བཟང་པོ་སྟེ༔ ཧཱུྃ་ཨཱསྩོལ་དང་ཆོས་སྐུར་རྒྱས་ཐོབ་ཡིན༔ དེ་ཉིད་བཟླས་པའི་ཕན་ཡོན་ཨོ་རྒྱན་གསུངས༔ དེ་བཟླས་སྣང་སྲིད་གཡོ་བར་
འགྱུར༔ དུས་གསུམ་རྒྱལ་བ་གཅིག་ཏུ་སྡུད༔ བླ་མ་ཀུན་དང་འདུ་འབྲལ་མེད༔ འབྱུང་པོ་དྲི་ཟ་བརྒྱལ་ཞིང་འབྲོས༔ མཁའ་འགྲོ་ཆོས་སྐྱོང་སྤྲིན་ལྟར་འདུ༔ གསུངས་པའི་བཀའ་ལ་ངེས་ཤེས་བསྐྱེད༔ སྔགས་སྒྲ་བུང་བའི་སྐད་ཙམ་སྟེ༔ སྐབས་སུ་ཛབ་དབྱངས་བྱ་ཞིང་འཆམ༔ གང་ཤར་ཉམས་ཀྱི་སྣ་མི་གསལ༔ བག་དྲོ་བྱིན་འཐིབས་ཉམས་འབར་ཚེ༔ སྨྱོ་སྤྱོད་གཅེར་རྒྱུག་བྱ་ཞིང་འཁྲབ༔ སྣང་བ་ཝར་མ་ཝུར་མར་བསྐྱེད༔ ཉམས་ལ་གང་ཤར་བྱུང་རྒྱལ་བཏང་༔ དེ་ཡིས་བྱིན་འབེབས་དངོས་གྲུབ་ཐོབ༔ ཉམས་རྟོགས་བོགས་སྐྱེད་ཆེན་པོ་འབྱུང་༔ རབ་ནི་བདུན་འབུམ་ཉི་ཁྲི་སྟེ༔ ཐ་མ་འབུམ་ཕྲག་གསུམ་གྱིས་འགྲུབ༔ ཉི་ཤུ་གཅིག་ཙམ་ཞག་བདུན་ན༔ འདི་ལ་ཞག་པོ་བདུན་གཉིས་ཏེ། ཟླ་གཅིག་འདུག་ན་བདུན་གསུམ་ཙམ༔ དེ་ཡིས་གྲུབ་པ་ཐོབ་པ་ཡིན༔ དེ་ཡིས་བསྙེན་དང་སྒྲུབ་པའི་ཚེ༔ རྟགས་ནི་རྒྱས་པར་རྟགས་ཡིག་བཞིན༔ རབ་དངོས་འབྲིང་ཉམས་ཐ་མ་ཡང་༔ རྨི་ལམ་རྟགས་མཚན་འབྱུང་བར་གསུངས༔ དངོས་སུ་ཞལ་མཐོང་གསུང་ཐོས་སོགས༔ དུས་ཀྱི་སྟབས་ཀྱིས་འབྱུང་དཀའ་ཡང་༔ དངོས་སུ་མར་མེ་འཛིན་པ་དང་༔ གཏོར་
མ་ཡོན་ཆབ་འཛིན་པ་དང་༔ བདུད་རྩི་ཁོལ་དང་འཕྱུར་བ་དང་༔ བུམ་པ་ཁོལ་དང་རླངས་པ་འཐུལ༔ རོལ་མོའི་སྒྲ་ཐོས་དྲི་བཟང་འཐུལ༔ སྔགས་སྒྲ་ཐོས་དང་ཡིག་འབྲུ་མཐོང་ཉམས་དགའ་བྱིན་ཆགས་རིག་པ་དྭངས༔ དད་པ་དག་སྣང་མོས་གུས་སྐྱེས༔ བྱམས་དང་སྙིང་རྗེ་འཆི་བ་དྲན༔ ཉམས་རྟོགས་བོགས་ཐོན་དངོས་སུ་འབྱུང་༔ གཞན་ཡང་སྒྲུབ་གནས་འཇའ་ཟུག་དང་༔ རང་ཐདེ་བར་སྣང་འཇའ་སྤྲིན་འཁྲིགས༔ བསྐྱེད་རིམ་གསལ་ཞིང་ཡིད་ཡུལ་དུ༔ ཨོ་རྒྱན་དངོས་སུ་མཇལ་སྙམ་བྱེད་༔ ཉམས་ཞེས་བྱ་བ་དངོས་མིན་ཅིང་༔ གཉིད་པ་མ་ཡིན་བར་སྐབས་དེར༔ ལྷ་ཞལ་མཐོང་དང་ལུང་སྟོན་དང་༔ མཁའ་འགྲོའི་ཚོགས་ཀྱིས་དངོས་གྲུབ་སྟེར༔ རྨི་ལམ་ཉི་ཟླ་ཤར་བ་དང་༔ ཁྲུས་བྱེད་ནམ་མཁར་འཕུར་བ་དང་༔ དམར་པོ་ཁོ་ན་མ་ཡིན་པའི༔ མེ་ཏོག་ཐང་ལ་ཕྱིན་པ་དང་༔ མེ་ཏོག་ཆར་པ་འབབ་པ་དང་༔ རུས་རྒྱན་གྱོན་དང་རྡོ་དྲིལ་ཐོགས༔ ཞིང་ཁམས་སམ་ནི་གནས་རི་མཐོང་༔ རང་གི་བླ་མའམ་གྲུབ་ཆེན་གྱིས༔ དབང་བསྐུར་ཆོས་གསུངས་ལུང་བསྟན་པ༔ དེ་སོགས་ཡ་མཚན་རྨིས་རྟགས་འབྱུང་༔ བྱིན་རླབས་ཞུགས་པའི་རྟགས་ཡིན་ཀྱང་༔ ཧ་ཅང་དགའ་ཚོར་བྱ་མི་
རུང་༔ དགའ་བྲོད་བདུད་ཀྱིས་འཁྱེར་ཉན་ཡོད༔ རྨི་ལམ་རྩུབ་ཅིང་ཅི་ངན་ཡང་༔ རྣམ་རྟོག་ཐེ་ཚོམ་བྱ་མི་རུང་༔ ལྟ་བའི་གདེང་བསྐྱེད་བཏང་སྙོམས་བཞག༔ ནད་སོགས་རྐྱེན་ངན་བྱུང་ན་ཡང་༔ ལྷ་ལ་ལོག་ལྟ་མི་བྱ་སྟེ༔ སྣོད་བཀྲུས་དྲི་མ་ལངས་བ་ལྟར༔ སྒྲིབ་པ་དག་པའི་སློང་ཡིན་ཕྱིར༔ སྡིག་སྒྲིབ་དག་པའི་དགའ་བ་སྒོམ༔ དམ་སེལ་ཅུང་ཟད་ཡིན་དོགས་ན༔ ཐུན་མཚམས་ཞི་བའི་བསྐང་བ་འདོན༔ བར་ཆད་མི་འཇུག་གནད་ཟབ་ལ༔ སྒྲུབ་ཚེ་མ་ནིང་ལས་བྱང་དང་༔ ཞིང་སྐྱོང་མཁའ་རི་གཉིས་པོ་ལ༔ རྒྱུན་དུ་གཏོར་བསྔོས་བྱ་བ་གཅེས༔ སྒྲུབ་པའི་གཉེར་འདི་ཁོ་ལ་ཡོད༔ དེ་ཡི་བར་ཆད་སེལ་བ་ལ༔ ཁོང་གསུམ་བསྐོས་ནས་བཞག་ཕྱིར་རོ༔ ཁྱད་པར་མ་ནིང་གལ་ཆེའོ༔ དེ་དག་ཞག་རེ་ཚར་རེའི་ཆོག ཐུན་རྣམས་ཀུན་ལ་མི་དགོས་སོ༔ གཞན་ཡང་ཐུགས་དམ་ཆག་མེད་ཀྱི༔ ལས་བྱང་ཐུགས་དམ་གང་ཡོད་རྣམས༔ ཐུན་མཚམས་ཞིག་ལ་འདོན་པར་བྱ༔ གློ་བུར་དུས་མིན་ཤ་ཆང་སོགས༔ བྱུང་ན་ཚོགས་འཁོར་བྱས་ལ་རོལ༔ དེ་ནི་སྒྲུབ་པའི་རིམ་པའོ༔ ༈ དེ་ལྟར་བསྙེན་སྒྲུབ་གཉིས་པོ་ལ༔ གྲངས་བསྙེན་ནམ་ནི་དུས་ཐེམ་ནས༔ ལས་
སྦྱོར་ཐུན་བཟུང་གོང་འདྲ་ལས༔ མངོན་རྟོགས་སྐབས་སུ་རྟ་མགྲིན་གྱི༔ སྤྱི་བོར་སྤྲུལ་སྐུ་བསྒོམ་པ་དང་༔ དེ་ཉིད་ཆོས་སྐུར་བསྒྱུར་བའང་འདྲ༔ བསྙེན་པའི་སྐབས་སུ་ཕྱིན་པ་དང་༔ ཆོས་སྐུ་རྟ་མགྲིན་ཐུགས་ཀར་ཞུགས༔ སྒྲུབ་དུས་དམིགས་པ་དེ་བྱས་ལ༔ ཐོད་ཕྲེང་རྩལ་ལ་ཕྲེང་བསྐོར་བསྙེན༔ དེ་ནས་ཐུགས་ཀའི་བླ་མ་དང་༔ བུདྡྷ་ཐོད་ཕྲེང་གཉིས་ཀ་ནི༔ འོད་དུ་ཞུ་ནས་རང་ཉིད་ནི༔ རྟ་མགྲིན་གསལ་དང་དབྱེར་མེད་གྱུར༔ རང་ཉིད་རྟ་མགྲིན་སྐུ་ཡི་ནང་༔ སྐུ་ཡི་གནས་བཞིར་ལྷ་བཞི་བསྒོམ༔ རྩ་ཡི་འཁོར་ལོ་མ་གསུངས་པས༔ རྩ་འཁོར་བསྒོམ་ནི་མི་དགོས་སོ༔ སྤྱི་བོ་ཀླད་པ་དུང་ཁང་ན་རྡོ་རྗེ་མཁའ་འགྲོ་ཡབ་ཡུམ་དཀར༔ མགྲིན་པ་ལོངས་སྤྱོད་གནས་སུ་ནི༔ རིན་ཆེན་མཁའ་འགྲོ་ཡབ་ཡུམ་སེར༔ སྙིང་ག་ཆོས་ཀྱི་འཁོར་ལོའི་དབུས༔ པདྨ་མཁའ་འགྲོ་ཡབ་ཡུམ་དམར༔ ལྟེ་བ་སྤྲུལ་པའི་འཁོར་ལོའི་དབུས༔ ལས་ཀྱི་མཁའ་འགྲོ་ཡབ་ཡུམ་ལྗང་༔ སངས་རྒྱས་མཁའ་འགྲོ་ཡབ་ཡུམ་མེད༔ རྟ་ཕག་གཉིས་ཀྱིས་གོ་ཆོད་ཡིན༔ ཡབ་ཡུམ་བརྒྱད་ཀ་མཚུངས་པ་རུ༔ རྡོ་རྗེ་རིན་ཆེན་པདྨ་དང་༔ རྒྱ་གྲམ་མཚན་པའི་གྲི་གུག་གཡས༔ གཡོན་རྣམས་ཐོད་
ཁྲག་དང་བཅས་འཁྱུད༔ ཡབ་རྣམས་གཡས་བསྐུམ་གཡོན་བརྐྱང་དང་༔ ཡུམ་རྣམས་གཡས་བརྐྱང་གཡོན་བསྐུམ་འཁྱུད༔ དུར་ཁྲོད་ཆས་དང་རུས་པའི་རྒྱན༔ ཡབ་རྣམས་ཐུགས་ཀར་ཟླ་བ་དང་༔ ཡུམ་རྣམས་ཐུགས་ཀར་ཉི་མའི་སྟེང་༔ རང་རང་ས་བོན་འགྲེང་སྟེ་གནས༔ རྡོ་རྗེ་དཔའ་བོའི་ཐུགས་ཀར་ར༔ རྡོ་རྗེ་མཁའ་འགྲོའི་ཐུགས་ཀར་རིན་ཆེན་དཔའ་བོའི་ཐུགས་ཀར་པ༔ རིན་ཆེན་མཁའ་འགྲོའི་ཐུགས་ཀར་རི༔ པདྨ་དཔའ་བོའི་ཐུགས་ཀར་ཧཱུྃ༔ པདྨ་མཁའ་འགྲོའི་ཐུགས་ཀར་ནི༔ ལས་ཀྱི་དཔའ་བོའི་ཐུགས་ཀར་ཡ༔ ལས་ཀྱི་མཁའ་འགྲོའི་ཐུགས་ཀར་ས༔ དེ་དག་རང་རང་མདོག་དང་མཚུངས༔ བསྐྱེད་རིམ་ཧ་ཅང་མི་གསལ་ན༔ ས་བོན་རྐྱང་པ་བསྒོམས་པས་ཆོག༔ ཐུགས་ཀར་པདྨ་དཔའ་བོ་ཡི༔ དབུ་གཙུག་པདྨ་ཉི་ཟླའི་སྟེང་༔ རྟ་མགྲིན་ས་བོན་ཧྲིདམར་པོ༔ འོད་འཕྲོས་གཟི་བརྗིད་ལྡན་པར་བསྒོམ་ཡུམ་ནི་ཕག་མོའི་ཐུགས་ཀ་རུ༔ ཉི་སྟེང་མ་ཡིག་བཀྲག་མདངས་ཅན༔ དེ་ཙམ་གྱིས་ཀྱང་ཆོག་པ་སྟེ༔ རྒྱས་པར་སྤྲོ་ན་རྟ་མགྲིན་གྱི༔ ཧྲི༔ ཡིག་མཐའ་རུ་རྟ་མགྲིན་སྔགས༔ ཕག་མོའི་ཐུགས་ཀར་མ་ཡིག་མཐར༔ ཨོཾ་བཛྲ་བྷ་རཱ་ཧི་སརྦ་བུདྡྷ་
ཌཱཀི་ནི་ཧཱུྃ་ཕཊ༔ རྡོ་རྗེ་གིང་ཆེན་ཐུགས་ཀ་རུ༔ ཨོཾ་བཛྲ་དཔའ་བོ་ཧཱུཾ་རྡོ་རྗེ་མཁའ་འགྲོའི་ཐུགས་ཀ་རུ༔ ཨོཾ་བཛྲ་ཌཱཀི་ནཱི་ཧཱུྃ་ཛ༔ རཏྣ་གིང་ཆེན་ཐུགས་ཀ་རུ༔ ཨོཾ་རཏྣ་དཔའ་བོ་ཧཱུཾ་ཛ༔ རིན་ཆེན་མཁའ་འགྲོའི་ཐུགས་ཀ་རུ༔ ཨོཾ་རཏྣ་ཊཱ་ཀི་ནཱི་ཧཱུྃ་ཛ༔ པདྨ་གིང་ཆེན་ཐུགས་ཀ་རུ༔ ཨོཾ་པདྨ་དཔའ་བོ་ཧཱུྃ་ཛ༔ པདྨ་མཁའ་འགྲོའི་ཐུགས་ཀ་རུ༔ ཨོཾ་པདྨ་ཊཱ་ཀི་ནཱི་ཧཱུྃ་ཛ༔ ལས་ཀྱི་གིང་ཆེན་ཐུགས་ཀ་རུ༔ ཨོཾ་ཀརྨ་དཔའ་བོ་ཧཱུྃ་ཛ༔ ལས་ཀྱི་མཁའ་འགྲོའི་ཐུགས་ཀ་རུ༔ ཨོཾ་ཀརྨ་ཊཱ་ཀི་ནི་ཧཱུྃ་ཛ༔ སོ་སོའི་ཐུགས་སྲོག་མཐའ་རུ་བསྐོར༔ ཡབ་རྣམས་སྔགས་ཕྲེང་གཡས་སུ་འཁོར༔ ཡུམ་རྣམས་སྔགས་ཕྲེང་གཡོན་དུ་འཁོར༔ སྔགས་ཕྲེང་མདོག་ཀྱང་སྐུ་མདོག་མཚུངས༔ བདག་ཉིད་དབང་ཆེན་ལུས་ལྷར་བཅས༔ འཁོར་གྱི་ཐོད་ཕྲེང་སྡེ་བཞི་དང་༔ མཚན་བརྒྱད་གིང་ཆེན་བཅུ་དྲུག་སོགས༔ བདག་མདུན་ལྷ་ཚོགས་ཐམས་ཅད་ཀྱིས༔ རིམ་བུའི་ཚུལ་དུ་སྔགས་བཟླས་པས༔ སྔགས་སྒྲ་འབྲུག་ལྟར་འུར་ཆེན་སྒྲོག༔ དེ་ཡིས་རྐྱེན་བྱས་ཐུགས་རྒྱུད་བསྐུལ༔ ཕྱོགས་བཅུའི་རྒྱལ་བ་ཐམས་ཅད་དང་༔ མཁའ་འགྲོ་ཆོས་སྐྱོང་དམ་ཅན་དང་༔ ལྷ་འདྲེ་མི་གསུམ་སྣང་སྲིད་རྣམས༔ ཤ་རུལ་སྦྲང་མ་འདུས་པ་
བཞིན༔ ཐམས་ཅད་བདག་ལ་འདུས་པར་བསྒོམ༔ དེ་ནས་སྔགས་བཟླས་མན་ངག་དང་༔ ཐོད་ཕྲེང་རྩལ་དང་སྦྲེལ་བཟླས་ན༔ སྟོབས་ནི་ཆེ་སྟེ་རྣོ་མྱུར་མེད༔ མ་སྦྲེལ་རྐྱང་པར་བཟླས་པ་ན༔ རྣོ་མྱུར་ཆེ་སྟེ་བཀྲ་མི་ཤིས༔ དེ་ཕྱིར་ཕྲེང་སྐོར་རེ་རེའི་མགོར༔ ཐོད་ཕྲེང་རྩལ་ནི་རེ་རེ་སྦྱར༔ ཧྲཱིཿཙམ་ཧ་རི་ནི་སའི་སྔགས་བཟླས་ཏེ༔ ཧཱུྃནི་དབང་ཆེན་རྟ་མགྲིན་ཡིན༔ མ་ནི་རྡོ་རྗེ་ཕག་མོ་སྟེ༔ ཧ་རི་ནི་ས་མཁའ་འགྲོ་བཞི༔ ར་ཙ་ཧྲཱིཿཡ་དཔའ་བོ་བཞི༔ ཙིཏྟ་དེ་རྣམས་སྲོག་ཡིན་ཏེ༔ ཧྲི་ཧྲི་གནད་ནས་སྤྱན་འདྲེན་པ༔ ཛཛཁུག་ཅིག་བསྡུས་ཤིག་ཡིན༔ ནམ་ལངས་ནས་ནི་ཉི་དྲོས་བར༔ སྤྱི་བོའི་དཔའ་བོ་ཡབ་ཡུམ་ལ༔ དམིགས་པ་གཏད་དེ་སྔགས་བཟླས་པས༔ ཐུགས་ཀའི་ས་བོན་སྔགས་ཕྲེང་ལས༔ འོད་ཟེར་དཀར་པོ་འཕྲོས་པ་ཡིས༔ བདག་གི་ལུས་ཀྱི་ནང་ཀུན་གང་༔ ནད་གདོན་སྡིག་སྒྲིབ་ཐམས་ཅད་ཞི༔ ཕྱིར་འཕྲོས་ཟླ་བའི་འོད་ཕོག་བཞིན༔ འོད་ཟེར་དཀར་པོས་འཇིག་རྟེན་གང་༔ འགྲོ་བ་ཀུན་གྱི་སྡིག་སྒྲིབ་དག བསྲུང་བྱའི་ནད་གདོན་ཐམས་ཅད་ནི༔ བ་མོར་ཉི་ཟེར་ཕོག་ལྟར་བསྒོམ༔ ཕྲེང་སྐོར་རེ་རེའི་མཇུག་ཏུ་ནི༔ ནད་གདོན་སྡིག་སྒྲིབ་སརྦ་
ཤཱིནྟཾ་ཀུ་རུ་ཡེ་སྭཱ་ཧཱཿ ཞེས་པའི་ཤམ་བུ་རེ་རེ་བཏགས༔ ཉི་དྲོས་ནས་ནི་ཕྱེད་ཡོལ་བར༔ མགྲིན་པའི་དཔའ་བོ་ཡབ་ཡུམ་གྱི༔ སྔགས་འཁོར་དམིགས་པ་གཏད་ལ་བཟླས༔ དེ་ལས་འོད་ཟེར་གསེར་མདོག་འཕྲོས༔ བདག་གི་ལུས་ཀུན་གང་བ་ཡིས༔ ཚེ་བསོད་ཡེ་ཤེས་ཡོན་ཏན་རྒྱས༔ ཕྱིར་འཕྲོས་ཉི་མའི་འོད་བཞིན་ཕོག༔ འོད་ཟེར་སེར་པོས་འཇིག་རྟེན་གང་༔ འགྲོ་བ་ཀུན་གྱི་ཡེ་ཤེས་རྒྱས༔ བདག་དང་བསྲུང་བྱའི་བསོད་ནམས་དང་༔ སྟོབས་དང་འབྱོར་པ་རྒྱས་པར་བསྒོམ༔ ཚེ་བསོད་དཔལ་འབྱོར་པུཏྟིཾ་ཀུ་རུ་ཡེ་སྭཱ་ཧཱ༔ ཞེས་པའི་ཤམ་བུ་རེ་རེ་སྦྱར༔ དགོང་ཀ་ནས་ནི་མུན་རུབ་བར༔ སྙིང་གའི་དཔའ་བོ་ཡབ་ཡུམ་ལ༔ དམིགས་པ་གཏད་ལ་སྔགས་བཟླས་པས༔ འོད་ཟེར་དམར་པོས་བདག་ལུས་གང་༔ ། རླུང་སེམས་སྣང་བ་དབང་དུ་འདུས༔ ཕྱིར་འཕྲོས་འོད་ཟེར་དམར་པོ་ནི༔ གློག་ཞགས་ལྟ་བུ་ཕྱོགས་བཅུར་འཕྲོས༔ འདོད་པའི་དངོས་གྲུབ་ཐམས་ཅད་ནི༔ རང་དབང་མེད་པར་དབང་བསྡུས་ནས༔ རང་ལ་ཐིམ་པས་དངོས་གྲུབ་ཐོབ༔ སརྦ་ལོ་ཀ་པཱ་ཤཾ་ཀུ་རུ་ཡེ་སྭཱ་ཧཱ༔ ཞེས་པའི་ཤམ་བུ་རེ་རེ་སྦྱར༔ མུན་རུབ་ནས་ནི་མ་གཉིད་བར༔ ལྟེ་བའི་ཡབ་ཡུམ་
དམིགས་པ་གཏད༔ འོད་ཟེར་ལྗང་ནག་བདག་ལུས་གང་༔ བདུད་བཞི་ཉོན་མོངས་ཚར་བཅད་གྱུར༔ ཕྱིར་འཕྲོས་འོད་ཟེར་ལྗང་ནག་ནི༔ ཤིན་ཏུ་ཚ་བའི་རེག་བྱ་ཅན༔ བདག་དང་བསྲུང་བྱ་ཐམས་ཅད་ལ༔ གནོད་པའི་དགྲ་བགེགས་ལོག་འདྲེན་ཀུན༔ བྱ་སྒྲོ་མེ་ལ་སྲེག་བཞིན་བསྒོམ༔ གནོད་བྱེད་མཱ་ར་ཡ་ཧཱུྃ་ཕཊ༔ ཅེས་པའི་ཤམ་བུ་བཏགས་པར་བྱ༔ དེ་ལྟར་སྔགས་ཀྱི་གྲངས་ཀ་ནི༔ བསྙེན་སྒྲུབ་གཉིས་པོ་ཅི་སོགས་གི༔ ཅི་ཆའི་ཆ་གཅིག་ཚད་ཡིན་ཏེ༔ དེ་བས་མང་ན་བསྙེན་སྒྲུབ་ཉམས༔ ཉུང་ན་ཕྲིན་ལས་མི་འགྲུབ་བོ༔ དུས་ཀྱི་བསྙེན་པའི་དབང་བྱས་ན༔ བསྙེན་པ་ཞག་བདུན་སྒྲུབ་པ་ནི༔ ཞག་པོ་བདུན་གཉིས་བྱས་ནས་ཀྱང་༔ ལས་སྦྱོར་ཞག་པོ་གཉིས་བཟླ་ཞིང་༔ དེ་ཡི་ཕྱིར་ཉིན་སྔ་དྲོ་ལ༔ ལས་སྦྱོར་ཅུང་ཙམ་བཟླས་བྱས་ཏེ༔ ཚོགས་བྱས་བསྐང་གསོ་ཚར་མང་འདོན༔ དེ་ནས་ཚེ་གཏོར་བཤམས་བྱས་ལ༔ ལས་བྱང་མང་བའི་ཚེ་འགུགས་བྱ༔ ཚེ་ཡི་བསྙེན་པ་སྟོང་ཙམ་བཟླ༔ དེ་ནས་དངོས་གྲུབ་ལེན་ཆོག་ནི༔ ཡོད་ན་བུམ་པ་གཏོར་མ་གཉིས༔ ལག་པ་གཉིས་ཀས་མཉམ་དུ་བཟུང་༔ མེད་ན་སྒྲུབ་གཏོར་ཁོ་ན་བཟུང་༔ མདུན་གྱི་ལྷ་
ཚོགས་ཐམས་ཅད་ཀྱི༔ དཔྲལ་མགྲིན་ཐུགས་ཀ་ལྟེ་བ་རུ༔ སྐུ་ཡི་ཆ་ནི་ཐམས་ཅད་ནས༔ ཨོ་དཀར་ཨཱཿདམར་ཧཱུཾ་མཐིང་ག ཧིལྗང་འོད་ཟེར་སྣ་ཚོགས་ནི༔ འཕྲོས་ནས་རང་ལ་ཐིམ་པ་ཡིས༔ དབང་དང་དངོས་གྲུབ་ཐོབ་པར་བསྒོམ༔ དངོས་གྲུབ་ལེན་ཆོག་དབྱངས་དང་བཅས༔ སྔགས་བརྗོད་རང་གི་གནས་བཞིར་གཏུགས༔ སྒྲུབ་གཏོར་ཅུང་ཟད་དངོས་གྲུབ་བྱ༔ བུམ་ཆུ་བཏུང་དང་ཁྲུས་བྱའོ༔ དེ་ནས་ཆེད་མདོ་བརྟན་སྐྱོང་དང་༔ བསྡུ་ཆོག་བཀྲ་ཤིས་ལ་སོགས་བྱ༔ ལས་བྱང་མཇུག་དེ་རྫོགས་པས་འཐུས༔ དེ་ནུབ་གནས་སྲུང་གར་མི་འགྲོ༔ དཀྱིལ་འཁོར་མཆོད་གཏོར་རྣམས་ནི་བསྡུ༔ དེ་ནས་ལས་བྱང་ལ་བརྟེན་པ༔ གུ་རུ་ཞི་བའི་སྒྲུབ་པ་ཚང་༔ སྒྲུབ་པ་མིན་པའི་རྒྱུན་ཁྱེར་ལ༔ བསྙེན་སྒྲུབ་ལས་སྦྱོར་གསུམ་ཀ་ཡང་༔ གོང་གི་དམིགས་པ་དེ་རྣམས་བྱ༔ ཉིན་རེ་བཞིན་དུ་བསྙེན་སྒྲུབ་དང་༔ ལས་སྦྱོར་གསུམ་ཀ་ཚང་བར་བྱ༔ སྔགས་ནི་མང་ཉུང་དལ་ཁོམ་བསྟུན༔ ད་ནངས་ལས་བྱུང་བཏང་ནས་ཀྱང༔ ཁ་ཅིག་འདུག་རྒྱུ་མ་བྱུང་ཡང་༔ འགྲོ་འདུག་བྱེད་ཅིང་བསྙེན་སྒྲུབ་རུང་༔ དེ་ཡང་བདེ་མཆོག་རྒྱུད་ལས་བཤད༔ དེ་ཡི་མན་ངག་ཟབ་གནད་ལ༔ མདུན་བསྐྱེད་
བསྒོམ་པར་མི་བྱ་ཞིང་༔ བདག་བསྐྱེད་ཁོ་ན་བསྒོམས་བྱས་ལ༔ གཏོར་བསྔོས་བྱེད་པའི་སྐབས་དེ་རུ༔ རང་གི་ཐུགས་ཀའི་འོད་ཟེར་གྱིས༔ གཏོར་མགྲོན་ལྷ་རྣམས་སྤྱན་དྲངས་ལ༔ གཏོར་མ་གསོལ་བའི་རྗེས་དེ་རུ༔ གཏོར་མགྲོན་ཡེ་ཤེས་རང་ལ་བསྟིམ༔ འཇིག་རྟེན་པ་རྣམས་རང་གནས་སུ༔ སོང་བར་བསྒོམ་པ་ཁོ་ནས་ཆོག༔ དེ་ནས་བདག་བསྐྱེད་ཏིང་འཛིན་དང་༔ འགྲོ་འདུག་སྤྱོད་ལམ་ཀུན་ཏུ་བཟླས༔ ནུབ་མོ་ཉལ་བའི་ཚེ་ན་ཡང་༔ རྡོ་ར་མེ་རི་སྲུང་འཁོར་ནི༔ བསྡུ་བར་མི་བྱེད་དེ་གར་བཞག༔ དེ་མིན་གཞལ་ཡས་འཁོར་གྱི་ལྷ༔ བདག་ཐིམ་བདག་ཉིད་ཐུགས་ཀ་ཡི༔ ཧྲིར་ཐིམ་དེ་ཡང་མི་དམིགས་པ༔ སྟོང་ཉིད་ཉམས་ལེན་ངང་ལ་ཉལ༔ འོད་གསལ་བཟུང་བའི་དམིགས་པའམ་ཡིན༔ མཚམས་སྒྲུབ་དུས་སམ་རྒྱུན་ཁྱེར་དུས༔ ལྟ་སྒོམ་སྤྱོད་གསུམ་བྱ་ལུགས་ནི༔ ཨོ་ཆོས་སྐུ་མི་འགྱུར་རྡོ་རྗེ་ཡི༔ པདྨ་རྒྱལ་པོས་འདི་སྐད་སྨྲས༔ དང་པོ་ཆོས་རྣམས་དམིགས་མེད་ཅིང་༔ སྨྲ་བརྗོད་བྲལ་བ་རྫོགས་པ་ཆེ༔ བློ་འདས་ཆོས་སྐུ་མི་འགྱུར་བའི༔ དེ་བཞིན་ཉིད་ཅེས་གསུངས་པའི་དོན༔ ལྟ་བའི་མཐར་ཐུག་ཡིན་པའོ༔ སྣང་སྲིད་འཁོར་འདས་ཐམས་ཅད་
ཀུན༔ སངས་རྒྱས་ཐུགས་དང་སེམས་ཅན་སེམས༔ རང་དང་གཞན་དང་གྲུབ་པའི་མཐ༢༔ འཁྲུལ་དང་མ་འཁྲུལ་བཟང་དང་ངན༔ ཐམས་ཅད་དབྱེར་མེད་རོ་གཅིག་སྟེ༔ འདི་ཡིན་འདི་མིན་སྨྲ་བརྗོད་བྲལ༔ དེ་ཉིད་ཉམས་སུ་ལེན་པའི་ཚུལ༔ རང་གི་སེམས་ལ་ཚུར་བལྟས་པས༔ བཟུང་བའི་ཡུལ་དང་འཛིན་པའི་སེམས༔ དབྱེར་མེད་ངོ་བོ་སྟོང་པར་མཐོང་༔ སྣང་བ་མཐའ་ཡས་དགོངས་པ་ཡིན༔ ཅི་ཡང་མེད་པའི་སྟོང་པ་ཉིད༔ མ་འགགས་རང་གསལ་ཅི་ཡང་འཆར༔ དེ་ཡང་ངག་ཏུ་བརྗོད་མི་ཤེས༔ ཐུགས་རྗེ་ཆེན་པོའི་དགོངས་པ་ཡིན༔ དྲན་པའི་རྣམ་རྟོག་སྣ་ཚོགས་འདི༔ གང་ཤར་ངོ་བོར་བལྟས་པའི་ཚེ༔ རང་གྲོལ་ཆུ་དང་ཆུ་རླབས་བཞིན༔ སེམས་ལས་བྱུང་ཞིང་སེམས་ལ་ཐིམ༔ པདྨ་འབྱུང་གནས་དགོངས་པ་ཡིན༔ སེམས་ཀྱི་ངོ་བོ་སྟོང་པ་དང་༔ རང་བཞིན་གསལ་རིག་རྗེན་པ་དང་༔ འགགས་མེད་ཅི་ཡང་འཕྲོ་བ་གསུམ༔ དོན་ལ་བླ་མ་སྐུ་གསུམ་སྟེ༔ གཞན་དུ་མ་ཚོར་རང་སེམས་ལྟོས༔ དེ་ལ་རྒྱུན་དུ་གོམས་འཇུག་པ༔ སྒོམ་ཡིན་ཉམས་ལེན་སྐྱོང་བའང་ཡིན༔ དེ་ཡི་ངང་ལ་སྡིག་སྤངས་ཤིང་༔ དགེ་བ་བསྙེན་སྒྲུབ་ཚོགས་བསགས་འབད༔ དེ་
ལ་སྤྱོད་པ་ཞེས་བྱ་འོ༔ རང་སེམས་བླ་མ་སྐུ་གསུམ་ལ༔ བརྟན་པ་ཐོབ་ཅིང་གདེང་ལྡན་ན༔ འབྲས་བུ་དེ་ཉིད་ཡིན་པ་འོ༔ གལ་ཏེ་འབྲས་བུ་ཐོབ་ན་ཡང་༔ སྲིད་པ་བར་དོའི་གནས་སྐབས་ནས༔ རབ་ཏུ་སྣང་བ་མཐའ་ཡས་ཞིང་༔ སྐྱེས་ནས་ཕྱིར་མི་ལྡོག་པ་ཐོབ༔ འབྲིང་དུ་རྔ་ཡབ་གླིང་དུ་སྐྱེ༔ ཨོ་རྒྱན་ཆེན་པོས་རྗེས་སུ་བཟུང་༔ ཐ་མ་མི་ལུས་ཆོས་ལྡན་དུ༔ སྐྱེ་བ་གསུམ་མམ་བདུན་རྒྱུད་ནས༔ ཆོས་འདི་ཉམས་ལེན་གྲོལ་བར་འགྱུར༔ དེ་རྟགས་འདི་ཉིད་ཉམས་ལེན་མཁན༔ འདས་ནས་གདུང་སོགས་བཞུས་པ་ན། འཇའ་འོད་རིང་བསྲེལ་སྐུ་གཟུགས་དང་༔ ཡིག་འབྲུ་ཕྱག་མཚན་ལ་སོགས་པ༔ སྣ་གཅིག་མི་འབྱུང་མི་སྲིད་དེ༔ ཚུལ་བཞིན་ཉམས་སུ་མ་བླངས་དང་༔ དམ་ཚིག་ཉམས་པ་མ་གཏོགས་སོ༔ གོང་གི་ལས་སྦྱོར་སྔགས་དེ་ཡི༔ ཕན་ཡོན་ཨོ་རྒྱན་ཆེན་པོས་གསུངས༔ དཔའ་བོ་ཕོ་ཚོགས་མོ་ཚོགས་རྣམས༔ རང་དབང་མེད་པར་མདུན་དུ་འོང་༔ ལུང་སྟོན་ཆོས་འཆད་ལེགས་ཉེས་སྨ༔ བསྟོད་ཅིང་གསོལ་འདེབས་བསྒོ་བ་ཉན༔ ལྷ་འདྲེ་མི་གསུམ་དབང་དུ་སྡུད༔ བསམ་པ་ཀུན་འགྲུབ་ཐེ་ཚོམ་མེད༔ རྟེན་འབྲེལ་ལེགས་ཚོགས་ཀུན་འགྲུབ་
འགྱུར༔ ཐུགས་སྒྲུབ་འདི་ཡི་བསྙེན་སྒྲུབ་ལ༔ ཚན་ཆེན་ཐུགས་དམ་བྱས་པ་ན༔ དེ་ཡི་ཕན་ཡོན་ཨོ་རྒྱན་གསུངས༔ ལུས་ལ་བདེ་བའི་དངོས་གྲུབ་འབྱུང་༔ ལུས་ཀྱི་རྫུ་འཕྲུལ་སྟོན་པར་ནུས༔ ཌཱ་ཀི་དབང་དུ་འདུ་བའི་རྟགས༔ བུད་མེད་རིགས་གྱུར་ཀུན་ཀྱང་འདུ༔ དཔའ་བོ་དབང་དུ་འདུ་བའི་རྟགས༔ སྔགས་བཙུན་སྐྱེ་བོ་ཐམས་ཅད་འདུ༔ སྣང་བ་ཐམས་ཅད་བླ་མར་འཆར༔ སྣང་སྲིད་ཀུན་གྱི་ཆོས་རྣམས་སྟོན༔ བསམ་པ་ཐམས་ཅད་ཡིད་བཞིན་འགྲུབ་རབ་དངོས་འབྲིང་ཉམས་ཐ་མ་ཡང་༔ ལུང་སྟོན་ཆོས་འཆད་ལེགས་ཉེས་སྨྲ༔ ལྷ་འདྲེ་མི་གསུམ་དབང་དུ་འདུ༔ རིགས་གང་དབང་དུ་འདུ་བའི་སར༔ གདུལ་བྱ་རྒྱ་མཚོ་མ་ལུས་འབྱུང་༔ ངག་ལ་ནུས་པ་ཐོགས་མེད་འབྱུང་༔ མ་བསླབ་ཆོས་སྒོ་སྨྲ་བར་ནུས༔ དམོད་པ་བཙན་ཞིང་སྨོན་ལམ་འགྲུབ༔ ཡིད་ལ་དག་སྣང་དཔག་མེད་འཆར༔ བླ་མ་ཡི་དམ་དྷཱ་ཀི་ཡི༔ ཞལ་མཐོང་མངོན་ཤེས་ཕྲ་མོ་འབྱུང་༔ ཁྱད་པར་རྟག་ཏུ་བླ་མ་དང་༔ འདུ་འབྲལ་མེད་པའི་སྣང་བ་འཆར༔ ཆོས་སྒོ་དཔག་མེད་གསུང་བར་འགྱུར༔ འོན་ཀྱང་དོན་ལ་གནས་པ་གཅེས༔ གསུངས་ཕྱིར་དེ་འདྲ་བྱུང་སྲིད་ནའང་༔ དགའ་ཚོར་
རློམ་སེམས་མི་བྱ་ཞིང་༔ ཉམས་ལེན་ངོ་བོ་ལྟ་བ་གཅེས༔ འདི་དང་ཕྱི་མ་བར་དོ་རུ༔ ཨོ་རྒྱན་ཁྱེད་ཤེས་བློ་སྙིང་གཏད༔ གཏོར་བསྔོས་མ་ཆག་ཚེས་བཅུར་གཟབ༔ དེ་ནས་སྔགས་འཆང་གསར་བུ་ཡིས༔ ལས་བྱང་ཁོ་ན་ལ་བརྟེན་ནས༔ བསྙེན་སྒྲུབ་རྒྱུན་ཁྱེར་ཉམས་ལེན་ཚུལ༔ པདྨ་མཐར་ཕྱིན་གྱིས་བསྐུལ་ངོར༔ རཱ་ག་ཨ་སྱས་ཐུན་མཚམས་འགར༔ སྨྲས་པ་ཞུ་མཁན་ཉིད་ཀྱིས་བྲིས༔ མ་འོངས་གསར་བུ་མང་པོ་ལ༔ ཕན་ཐོགས་རྒྱ་ཆེར་འབྱུང་བར་ཤོག༔ མཐོང་ཐོས་དྲན་རེག་ཉམས་ལེན་མཁན༔ བསྐྱེད་རྫོགས་བརྟན་ཐོབ་བདེ་ཆེན་ཞིང་༔ པདྨ་ལས་འཁྲུངས་སྣང་མཐའ་མཇལ༔ བྱང་ཆུབ་ལུང་བསྟན་ས་བཅུ་ཐོབ༔ རྫོགས་པའི་སངས་རྒྱས་ཐོབ་པར་ཤོག༔ སརྦ་མངྒ་ལཾ།། ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།