བླ་མ་སྐུ་གསུམ་སྒྲུབ་པའི་ཟིན་བྲིས་རིན་ཆེན་ཤོག་འདྲ་ལས༔ བླ་མ་སྤྲུལ་སྐུའི་ཟིན་བྲིས།
བླ་མ་སྐུ་གསུམ་སྒྲུབ་པའི་ཟིན་བྲིས་རིན་ཆེན་ཤོག་འདྲ་ལས༔ བླ་མ་སྤྲུལ་སྐུའི་ཟིན་བྲིས་བཞུགས་སོ༔
སྐུ་གསུམ་སྒྲུབ་པའི་ཟིན་བྲིས་རིན་ཆེན་ཤོག་འདྲ་ལས༔ བླ་མ་སྤྲུལ་སྐུར་སྒྲུབ་པའི་ཟིན་བྲིས་ནི༔ སྟ་གོན་གོང་ལྟར་ཚར་ནས༔ འདི་སྒྲུབ་ཆེན་གྱིས་ཁོག་ཕུབ་ནས༔ ཆོས་སྤྱོད་ལམ་རིམ་ཐམས་ཅད་ཁ་སབ་མི་དགོས༔ སྐྱབས་འགྲོ་སེམས་བསྐྱེད་ཆོས་སྤྱོད་ལམ་རིམ་ནང་གི་དེ་ད་ནངས་བྱ༔ དེ་ནས་ལས་བྱང་མང་ཉུང་གཉིས་འདོན་རེས་བྱེད་དམ༔ གཉིས་པོ་གང་རུང་ཞིག་གཏོན་ཀྱང་རུང་སྟེ༔ ཉུང་བ་ལ་མང་བའི་མངོན་རྟོགས་སབ་དུས༔ དེ་ཉིད་གནས་འགྱུར་དྲན་རྫོགས་སུ་ཟེར་བ་དེ་མི་བརྗོད༔ སྤྲུལ་སྐུ་གནས་མི་འགྱུར་བར་བཞུགས༔ དེ་ཡང་ཆོ་ག་ཚར་གཅིག་གིས་བདག་
མདུན་གཉིས་ཀ་དུས་གཅིག་བསྐྱེད༔ བསྐྱེད་ལུགས་ཀྱི་གནད་ལ་སྒྲུབ་ཆེན་འདི་མདུན་བསྐྱེད་གཙོ་ཆེ་བའི་ཕྱིར༔ མདུན་བསྐྱེད་ཀྱི་དཀྱིལ་འཁོར་རྡོ་རྗེའི་རྭ་བ་དེ་སྟོང་གསུམ་ལས་ཆེ་ཞིང་ཡངས་བ༔ འོག་རྡོ་རྗེའི་ས་གཞི༔ བར་རྡོ་རྗེའི་དྲྭ་བ་རྭ་བ༔ སྟེང་རྡོ་རྗེའི་གུར༔ དེ་རྒྱབ་འཁོར་ལོའི་གུར༔ དེ་རྒྱབ་རལ་གྲི༔ དེ་རྒྱབ་རྒྱ་གྲམ༔ དེ་རྒྱབ་ཕུར་པའི་གུར༔ དེའི་བར་མཚམས་ཐམས་ཅད་ཁྲོ་བོ་འཆོལ་པ་སྐུ་ཆུང་ལ་ཡན་ལག་རགས་པ༔ དེ་རྒྱབ་མེ་ཁ་དོག་ལྔ་སྟེང་འོག་བར་མཚམས་མེད་པ་སྒོ་ང་ལྟར་སྲུབ་མེད་པར་འབར་བར་བསྒོམ༔ དེའི་དབུས་སུ་འབྱུང་བ་རིམ་
བརྩེགས་སྟེང་དུ་དུར་ཁྲོད་བརྒྱད་ཀྱིས་བསྐོར་བའི་དབུས་སུ༔ མདུན་བསྐྱེད་ཀྱི་དཀྱིལ་འཁོར་བསྒོམས་ལ༔ མདུན་བསྐྱེད་ཀྱི་དལ་གྱི་ཤར་སྒོའི་དྲུང་དུ་དུར་ཁྲོད་པད་རིའི་ནང་དེར༔ བདག་བསྐྱེད་ཀྱི་དཀྱིལ་འཁོར་བསྒོམ་སྟེ༔ བདག་བསྐྱེད་ཀྱི་དལ་གྱི་མཐའ་རྡོ་རྗེའི་ར་བ་ནི་རྩིག་པའི་ལྕགས་རི་ལྟ་བུ༔ དེ་རྒྱབ་མེ་རི་དང་མེ་དཔུང་གི་ཕྲེང་བས་བསྐོར་བས་དཀར་སེར་དམར་ལྗང་བསྒྲིགས་པ་ལྟར་བསྒོམས་ནས༔ བདག་མདུན་གཙོ་བོའི་ལྷ་གཉིས་པོ་ཕན་ཚུན་དུ་གཟིགས་ཤིང་༔ རྡོ་རྭ་མེ་རིས་བར་མ་ཆོད་པ་ཞིག་བསྒོམ༔ ཐུགས་ཀར་བུདྡྷ་ཐོད་ཕྲེང་རྩལ་ཞེས་པ་ནས༔ རྟ་མགྲིན་གྱི་ཐུགས་ཀར་ཡིན༔ ཕྱོགས་བཞི་ཐོད་ཕྲེང་རྩལ་བཞི་ཡང་རྟ་མགྲིན་གྱི་ཕྱོགས་བཞིར་ཡིན་ནོ༔ ཕྱི་རོལ་བར་ཁྱམས་ཁོར་ཡུག་ལ་ཞེས་པ་ནི་ཤར་སྒོའི་བར་ཁྱམས་ལ་བདག་བསྐྱེད་ཀྱི་དཀྱིལ་འཁོར་ཡོད་པ་དེ་ལྟར༔ ཕྱོགས་གཞན་གསུམ་དང་མཚམས་དང་བཞིའི་བར་ཁྱམས་རྣམས་སུ༔ དྲག་པོ་རྟ་མགྲིན་གཤིན་རྗེ་གཤེད་བཀའ་བརྒྱད་ཐུགས་རྗེ་ཆེན་པོ་སོགས་རང་གི་ཡི་དམ་རྒྱུན་དུ་གཏོར་མ་བསྔོ་བ་རྣམས་ཡིན༔ མ་ནིང་མཁའ་རི་སོགས་བཀའ་སྲུང་རྣམས་ཀྱང་བསྒོམ་མོ༔ དེ་ལྟར་གཞན་ཐམས་ཅད་མོས་པ་ཙམ་དུ་བསྒོམ་ལ་
རང་རྟ་མགྲིན་དང་མདུན་བསྐྱེད་རྟ་མགྲིན་གཉིས་ཀའི་སྤྱི་བོར་སྤྲུལ་སྐུ་རེ་ཡོད་མོད་ཀྱང་༔ མདུན་བསྐྱེད་གཙོ་ཆེ་བས་མདུན་བསྐྱེད་ཀྱི་དབུ་གཙུག་གི་སྤྲུལ་སྐུ་དང་སྐུ་འབག་དབྱེར་མེད་ལ་དམིགས་པ་གཏད་ལ༔ བདག་རྟ་མགྲིན་དུ་གསལ་བའི་ཐུགས་ཀ་ནས་འོད་ཟེར་དཀར་དམར་ལྕགས་ཀྱུ་ལྟ་བུར་འཕྲོས་ནས་ལྷོ་ནུབ་རྔ་ཡབ་པདྨ་འོད་ཀྱི་གཞལ་ཡས་ནས་གུ་རུ་པདྨའི་ཐུགས་དམ་གྱི་རྒྱུད་བསྐུལ་བླ་མ་སྤྲུལ་སྐུའི་ཆ་ལུགས་འཁོར་རིག་འཛིན་དྷ་ཀི་རྣམས་དང་བཅས་པ་བྱོན་ནས༔ བདག་མདུན་གྱི་ལྷ་སོ་སོ་ལ་སོ་སོར་ཐིམ་ཞིང་༔ ཁྱད་པར་སྐུ་འབག་དང་དབྱེར་མེད་པའི་སྤྲུལ་སྐུ་ལ་ཐིམ་པར་བསྒོམས་ལ༔ ལས་བྱང་གི་སྤྱན་འདྲེན་རོལ་མོ་དང་བཅས་ཏེ་བྱའོ༔ གཞན་ཐམས་ཅད་ལས་བྱང་ལྟར་ལས༔ ཕྱག་འཚལ་བ་དང་མཆོད་པ་དང་བསྟོད་པ་དུས་རང་གི་ཐུགས་ཀ་ནས་མཆོད་པའི་ལྷ་མོ་གྲངས་མེད་པ་སྤྲོས་ལ༔ དེ་རྣམས་ཀྱིས་ཕྱག་འཚལ་བ་དང་མཆོད་པ་ཕུལ་བ་དང་བསྟོད་པ་བྱེད་པར་བསྒོམས་ལ་དངོས་སུ་རང་གིས་འདོན་ནོ༔ སྨན་གཏོར་གཉིས་བདུད་རྩིའི་རྒྱ་མཚོ༔ རཀྟ་ཁྲག་གི་རྒྱ་མཚོ་ལས་མཆོད་པའི་ལྷ་མོ་རྣམས་ཀྱིས་བྷནྡས་བཅུས་ཏེ་དཀྱིལ་འཁོར་གྱི་ལྷ་སོ་སོ་ལ་སོ་སོར་དྲངས་པར་བསྒོམ་
མོ༔ མཆོད་བསྟོད་ཚར་ནས་སྤྲུལ་པའི་མཆོད་ལྷ་རྣམས་རང་གི་ཐུགས་ཀར་བསྡུའོ༔ གཟུགས་སྒྲ་དྲི་རོ་རེག་བྱའི་ལྷ་མོ་རྣམས་ལྷ་སོ་སོའི་དབང་པོ་ལྔ་ལ་ཐིམ་པས་ཚིམ༔ སྐུ་གསུང་ཐུགས་ཡོན་ཏན་ཕྲིན་ལས་ཀྱི་རིག་མ་རྣམས་ལྷ་སོ་སོའི་ཡུམ་ལ་ཐིམ་པས་ཟག་མེད་ཀྱི་བདེ་བས་ཐུགས་དགྱེས་པར་བསྒོམ་ཡང་ལེགས༔ སྨན་རཀ་གཏོར་གསུམ་གྱི་ལྷ་མོ་རྣམས་རང་རང་གི་རླངས་པ་ལས་སྤྲོས་ཀྱང་རུང་ལ༔ རླངས་པ་ལས་སྤྲོས་ན་རང་ལ་མི་བསྡུའོ༔ ལས་བྱང་མང་བ་འདོན་ན་འཛབ་དགོངས་མན་ཆད་སྐྱུར༔ ཉུང་བ་ལ་སྨོན་ལམ་མན་ཆད་སྐྱུར༔ དེ་ཡང་ལས་བྱང་དུས་བཞིར་གཏོང་ངོ་༔ དེ་ནས་འཛབ་དགོངས་དམིགས་པ་ནི༔ མདུན་གྱི་དཀྱིལ་འཁོར་གྱི་དབུས་སུ་རྟ་ཕག་ཡབ་ཡུམ་གྱི་སྤྱི་བོར་སྐུ་འབག་དང་དབྱེར་མེད་པའི་ཨོ་རྒྱན་པདྨ་སྤྲུལ་སྐུའི་ཆ་ལུགས་ཅན་ཆོས་གོས་གསུམ་དང་ལྡན་པ་ཟ་འོག་གི་བེར་ཆེན་གསོལ་བ༔ སྟག་ལྤགས་ཀྱི་གོང་ལག༔ མུ་ཏིག་གི་ཆུན་འཕྱང་༔ ནོར་བུའི་མགུལ་རྒྱན༔ གསེར་གྱི་སྙན་ཆ༔ ཤ་བའི་སྙན་ཞུ་ལ་རྩེ་རྒྱལ་དང་དར་སྣ་མེ་ལོང་གསེར་གྱི་ཉི་ཟླས་བརྒྱན་པ༔ ཕྱག་གཡས་གསེར་གྱི་རྡོ་རྗེ་རྩེ་ལྔ་པ་གཡོན་བྷནྡྷ་འམ་དྲིལ་བུ་བསྣམས་པ་ཁཊ་ཐོད་མཁར་མཆན་དུ་
བཅུག་པ༔ པད་སྡོང་དང་ཉི་ཟླའི་གདན་ལ་བཞུགས་པ༔ དཀར་དམར་འཛུམ་པའི་མདངས་དང་ལྡན་པ༔ གུ་རུ་དངོས་སུ་གསལ་བའི་དཔྲལ་བར་ཨོ་སོགས་ནས་ཡིད་ཀྱིས་བཟླས་སོ་ཞེས་པའི་བར་སྒྲུབ་གཞུང་ལྟར་བྱ་སྟེ༔ དམིགས་པ་དེ་དག་འདོན་མི་དགོས་བསྒོམས་པས་ཆོག༔ བསྙེན་པ་བྱ་ཞིང་དམིགས་པ་ཅི་ཟིན་བྱའོ༔ དེ་ཡང་རླུང་བཟུང་བའི་ཐོག་མར་སྣ་བུག་གཡས་བཀག་གཡོན་ནས་གསུམ༔ གཡོན་བཀག་གཡས་ནས་གསུམ༔ སྣ་བུག་གཉིས་ཀ་ནས་གསུམ་སྟེ་དང་པོ་དལ་བུས༔ དེ་ནས་ཤུགས་དྲག་པོས་ལྷག་མ་མ་ལུས་པར་རླུང་རོ་བུས༔ དེ་ནས་རླུང་འབྱིན་འཇུག་གནས་གསུམ་དང་དམིགས་པ་སྤྱད་དེ༔ རླུང་དེལ་ལ་རིང་བར་རྔུབ་པའི་ཚེ༔ མདུན་བསྐྱེད་སྤྲུལ་སྐུ་གུ་རུའི་དཔྲལ་བའི་ཨོ་ལས་འོད་ཟེར་དཀར་པོ་སྐུའི་རང་བཞིན་གྲངས་མེད་པ་བྱུང་ནས་རང་གི་དཔྲལ་བར་ཐིམ་པས༔ ལུས་འཆི་མེད་བདུད་རྩིས་གང་སྟེ་འཆི་མེད་ཚེའི་རང་བཞིན་སྐུའི་དངོས་གྲུབ་ཐོབ་པར་བསྒོམ༔ རླུང་མཆིལ་མ་མིད་པ་དང་མཉམ་དུ་ལྟེ་འོག་ཏུ་གཅུན༔ སྟེང་རླུང་མནན་ནས་གསུས་པ་བརྒྱང་༔ འོག་སྒོ་བསྡམས་ལ་ཅུང་ཟད་འཐེན༔ ཡང་ན་འོག་སྒོའི་ཞབས་སུ་ཕྱིང་པའམ་གོས་དུམ་
རྡོག་རྡོག་བཞག་པས་འོག་རླུང་རང་ཤུགས་ཀྱིས་ཟིན༔ རླུང་བཟུང་ཚེ་ལྕེ་མཆུ་སྦྱར་ནས་བསྡམས་ཏེ་ཡིད་ཀྱིས་བཛྲ་གུ་རུ་ཅི་ནུས་ཕྲེང་བ་བཅད་ཅིང་བཟླས༔ རླུང་མི་ཐུབ་སྙམ་ཙ་ན་རྔུབ་ཆུང་བྱས་ལ་ཡང་མནན༔ དེ་འདྲ་བ་ལན་གཉིས་གསུམ་བྱེད་ནས་མ་ཐུབ་ན་རང་གི་ཉམས་ཆག་སྡིག་པ་དང་སྒྲིབ་པ་ཐམས་ཅད་དུ་བ་རླུང་གིས་དེད་པ་ལྟར་རླུང་མཉམ་དུ་ཕྱིར་ཐོན་པས་སངས་ཀྱིས་དག༔ ལུས་ཀྱི་ནང་ཐམས་ཅད་སྟོང་སང་ངེ་སོང་བར་བསྒོམ༔ རླུང་དང་པོ་དལ་གྱིས་ཕྱིན་ནས་ཤུགས་དང་བཅས་པས་ལྷག་མ་མ་ལུས་པ་སངས་ཀྱིས་བུས་དེས་རིགས་འགྲེས་ཏེ༔ ཨཱ་ཧཱུཾ་ཧྲཱིཿསོགས་དམིགས་སྐོར་ལྔ་ཀ་ལ་དེ་ལྟར་བྱའོ༔ དེ་ཡང་རང་རྟ་མགྲིན་གྱི་སྐུ་ཕྱི་དར་དམར་གྱི་གུར་ཕུབ་པ་ལྟ་བུ་ལ་ནང་སྟོང་པ་ཕྲུ་མ་ཕུས་བཏབ་པ་ལྟ་བུར་ཐུགས་ཀར་བུདྡྷ་ཐོད་ཕྲེང་རྩལ་སྣང་ལ་རང་བཞིན་མེད་པར་བཞུགས་པ་རང་གི་ལུས་ཀྱིས་གར་ཁྱབ་ཐམས་ཅད་རྩ་དབུ་མའི་རང་བཞིན་གྱིས་ཁྱབ་ནས་ཡོད་པར་སྒོམ་པ་གལ་ཆེའོ༔ སྤྲུལ་སྐུར་སྒྲུབ་པ་འདི་ཕྱི་སྒྲུབ་དང་བསྐྱེད་པ་མ་ཧཱ་ཡོ་ག་ལྟར་སྒྲུབ་པ་ཡིན་པས༔ ཕྱི་སྣོད་ཀྱི་འཇིག་རྟེན༔ ནང་རྡུལ་ཚོན་གྱི་དཀྱིལ་འཁོརགསང་བ་ཡིད་ཀྱིས་བསྒོམ་པའི་དཀྱིལ་འཁོར༔ གཞན་རྔ་ཡབ་པདྨ་འོད་
ཀྱི་གཞལ་ཡས་རྣམས་དབྱེར་མེད་དང་རྒྱལ་བ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་ཀྱི་ངོ་བོ་ཐོད་ཕྲེང་རྩལ་རིགས་ལྔ༔ རྣམ་ཐར་བརྒྱད་ཀྱི་ངོ་བོ་མཚན་བརྒྱད༔ སྟོང་ཉིད་བཅུ་དྲུག་གི་ངོ་བོ་གིང་ཡབ་ཡུམ་བཅུ་དྲུག༔ ཚད་མེད་བཞིའི་ངོ་བོ་སྒོ་མ་བཞི༔ ཐབས་ཤེས་ཀྱི་ངོ་བོ་རྟ་ཕག་གཉིས༔ དེ་ཐམས་ཅད་ཀུན་འདུས་བླ་མ་སྤྲུལ་སྐུ༔ ནང་བཅུད་ཀྱི་སེམས་ཅན་ཐམས་ཅད་ཁ་དོག་ལྔའི་དབྱེ་བས་ཕོ་ཐམས་ཅད་ཐོད་ཕྲེང་རྩལ་རིགས་ལྔ༔ མོ་ཐམས་ཅད་ཆ་ཀི་ལྔ་ཡ་ངོ་བོར་ཡེ་ནས་རྣམ་པར་དག་པའོ་སྙམ་དུ་གོ་བ་བསྐྱེད་པར་བྱའོ༔ དེའི་དོན་དབང་རྒྱས་པའི་མཇུག་ནས་དོན་ལ་ཕྱི་ནང་སྣོད་བཅུད་ཐམས་ཅད་ཡི་དམ་ལྷའི་ངོ་བོར་མ་གྱུར་པ་མེད་གསུངས་པའི་དོན་ཏེ་དེ་ལྟར་ཡེ་ནས་ཡིན་པ་ལ་ཡིན་པར་ངོ་ཤེས་པར་བྱས་ལ༔ སྣོད་ཀྱི་འཇིག་རྟེན་གཞལ་ཡས་ཁང་དང་༔ བཅུད་ཀྱི་སེམས་ཅན་དཀྱིལ་འཁོར་གྱི་ལྷ་ཚོགས་སུ་གསལ་འདེབས་པར་བྱའོ༔ བསྙེན་པ་འདི་དག་དམིགས་པ་གསལ་བས་བདུན་གསུམ་ཙམ་བྱའོ༔ ཐ་མ་ནི་ཞག་གྲངས་བདུན་དང་སྔགས་གྲངས་འབུམ་ཕྲག་གཅིག་གིས་ཀྱང་ཆོག་གོ༔ ཚོགས་རྒྱུན་དུ་ཡོད་ན་རབ༔ མེད་ན་བསྙེན་སྒྲུབ་མཚམས་འདིར་གཅིག་
བྱའོ༔ ནུབ་ཉལ་ཁ་མདུན་བསྐྱེད་དེ་བཞུགས་བཅུག་ལ༔ བདག་བསྐྱེད་གཞལ་ཡས་ཁང་བཞག་ལ་འཁོར་གྱི་ལྷ་ཐམས་ཅད་རང་ལ་ཐིམ༔ རང་གི་ཐིག་ལེ་སྲན་མ་ཙམ་དེ་ཡང་མི་དམིགས་པ་སྟོང་ཉིད་ངང་ལ་ཉལ༔ ཕྱིར་ནངས་སྐྱབས་སེམས་སོགས་སྔར་ལྟར་བྱའོ༔ ༈ དེ་ནས་སྒྲུབ་པའི་འདོན་ལུགས་ནི༔ ད་ནངས་སྐྱབས་འགྲོ་སེམས་བསྐྱེད་གཞུང་ལྟར་བྱ་སེམས་བསྐྱེད་མཇུག་ཏུ་སེམས་ཅན་ཐམས་ཅད་བདེ་བ་དང་བདེ་བའི་རྒྱུ་དང་ཞེས་སོགས་ཚད་མེད་བཞི་སྤྱི་ལྟར་བསྒོམ༔ དེ་ནས་ལས་བྱང་གཉིས་ལས་གང་རུང་ལྷ་བསྐྱེད་བར་འདོན༔ ཕོ་བྲང་གཞལ་ཡས་དཀྱིལ་འཁོར་དབུས་ཞེས་པ་ལ༔ ཕྱི་ནང་དག་པ་ཡེ་ཤེས་འོད་ལྔའི་དཀྱིལ༔ པདྨའི་སྡོང་པོ་འདབ་མ་དམར་པོ་སྟོང་ལྡན་གྱི་སྟེང་དུ༔ པདྨའི་ཕྲེང་བ་ཉི་མ་ཟླ་བའི་སྟེང་དུ་ཧྲིདམར་པོ་ལས་འོད་ཟེར་འཕྲོས་པས་འཕགས་པ་མཆོད་སེམས་ཅན་གྱི་དོན་བྱས་སྡིག་སྒྲིབ་སྦྱང་ཚུར་འདུས་ཡོངས་སུ་གྱུར་པ་ལས༔ བདག་ཉིད་དབང་ཆེན་ཡབ་ཡུམ་སྐུ༔ ཞལ་གཅིག་ཕྱག་གཉིས་སྐུ་མདོག་དམར༔ དབུ་གཙུག་རྟ་ཞལ་ཕག་གདོང་མཚན༔ གཡས་གཡོན་གྲི་གུག་ཐོད་ཁྲག་བསྣམས༔ ཞབ་གཉིས་བརྐྱང་བསྐུམ་འཁྲིལ་སྦྱོར་ཚུལ༔ དུར་ཁྲོད་
ཆས་བརྒྱད་མེ་ཀློང་བཞུགས༔ བདག་ཉིད་རྟ་མགྲིན་ཡབ་ཡུམ་དུ་བསྐྱེད་པའི་སྤྱི་གཙུག་ཉི་ཟླ་པདྨའི་སྟེང་དུ༔ ཨོ་རྒྱན་པདྨ་པཎྜི་ཏ་སྤྲུལ་སྐུའི་ཆ་ལུགས་ཆོས་གོས་གསུམ་དང་ལྡན་པ༔ ཟ་འོག་གི་བེར་ཆེན་གསོལ་པ༔ སྟག་ལྤགས་ཀྱི་གོང་ལག༔ མུ་ཏིག་གི་ཆུན་འཕྱང་༔ ནོར་བུའི་མགུལ་རྒྱན༔ གསེར་གྱི་སྙན་མ༔ ཤ་བའི་སྙན་ཞུ་རྩེ་རྒྱལ༔ དར་སྣ་མེ་ལོང་གསེར་གྱི་ཉི་ཟླས་བརྒྱན་པ༔ ཕྱག་གཡས་གསེར་གྱི་རྡོ་རྗེ་རྩེ་ལྔ༔ གཡོན་བྷནའམ་དྲིལ་བུ་བསྣམས་པ༔ ཁ་ཊཾ་ཐོད་མཁར་མཆན་ཁུང་དུ་བཅུག་པ༔ པད་སྡོང་ཉི་ཟླའི་གདན་ལ་བཞུགས་པ༔ དཀར་དམར་འཛུམ་པའི་མདངས་དང་ལྡན་པ༔ རང་གི་རྩ་བའི་བླ་མ་དང་དབྱེར་མེད་པ་དེ་ལ་བཀའ་བརྒྱུད་རྒྱལ་བ་རྒྱ་མཚོ་ཡི་དམ་མཁའ་འགྲོ་ཆོས་སྐྱོང་དམ་ཅན་རྒྱ་མཚོའི་ཚོགས་རྣམས་ཀྱིས་བསྐོར་བའོ༔ ཕྱོགས་བཞིའི་པདྨ་འདབ་བཞིའི་སྟེང་༔ ཞེས་སོགས་ནས་ཕྲིན་ལས་སྒྲུབ་ཅིང་བར་ཆད་སེལ༔ ཞེས་པའི་བར་གཞུང་ལྟར༔ དེ་ནས་ལས་བྱང་འདོན་ལུགས་གོང་དང་འདྲ༔ ཡེ་ཤེས་སྤྱན་འདྲེན་དམིགས་པ་ཡང་བསྙེན་དུས་གོང་དང་འདྲ༔ དེ་ནས་བསྒྲུབ་པའི་དམིགས་པ་ནི༔ རང་གི་སྤྱི་བོའི་བླ་མ་སྤྲུལ་སྐུ་ལ་དད་འདུན་རྩེ་
གཅིག་པས༔ རྗེ་བླ་མ་སངས་རྒྱས་ཆོས་ཀྱི་སྐུ་ལ་གསོལ་བ་འདེབས་སོ༔ ཞེས་སོགས་སྒྲུབ་གཞུང་གི་གསོལ་འདེབས་ཚར་གསུམ་མམ་ལྔ་བདུན་སོགས་རྒྱང་འབོད་ཀྱི་ཚུལ་དུ་བྱ༔ དེ་ནས་རང་གི་སྤྱི་བོར་གུ་རུ་སྤྲུལ་པའི་སྐུ་དངོས་སུ་གསལ་བའི་དཔྲལ་བར་ཟླ་བའི་སྟེང་དུ་ཨོཾ་དཀར་པོ་སྐུའི་རང་བཞིན༔ མགྲིན་པར་པདྨའི་དཀྱིལ་འཁོར་དུ་གསུང་གི་རང་བཞིན་ཨཱཐདམར་པོ༔ ཐུགས་ཀར་ཉི་མའི་དཀྱིལ་འཁོར་གྱི་སྟེང་དུ་ཐུགས་ཀྱི་རང་བཞིན་ཧཱུྃ་མཐིང་ག ལྟེ་བར་བསྐྱེད་བྱེད་རྩ་ཡི་འཁོར་ལོའི་དབུས་སུ་ཧྲིལྗང་གུ༔ ཕྲིན་ལས་བཞི་ཡོངས་སུ་རྫོགས་པའི་ངོ་བོར་བསམ༔ གུ་རུའི་དཔྲལ་བའི་ཨོ་ལས༔ ཨོཾ་དཀར་པོ་སྐུའི་རང་བཞིན་དཔག་ཏུ་མེད་པ་བྱུང་ནས༔ རང་གི་དཔྲལ་བར་ཐིམ་པས༔ བླ་མའི་སྐུའི་བྱིན་རླབས་ཞུགས༔ བུམ་པའི་དབང་ཐོབ༔ ལུས་ཀྱི་སྡིག་སྒྲིབ་དག་ནས་རྡོ་རྗེ་ཚེའི་དངོས་གྲུབ་ཐོབ༔ གུ་རུའི་མགྲིན་པའི་ཨཱལས་ཨཱ༔ དམར་པོ་གསུང་གི་རང་བཞིན་དཔག་ཏུ་མེད་པ་བྱུང་༔ རང་གི་མགྲིན་པར་ཐིམ་བྱང་སེམས་དཀར་དམར་གྱི་རང་བཞིན་གྱིས་རྩ་ཁམས་ཐམས་ཅད་གང་༔ བླ་མའི་གསུང་གི་བྱིན་རླབས་ཞུགས་གསང་བའི་དབང་ཐོབ་ངག་གི་སྒྲིབ་པ་དག་ནས་རྡོ་རྗེའི་གསུང་གི་དངོས་
གྲུབ་ཐོབ༔ གུ་རུའི་ཐུགས་ཀའི་ཧཱུྃ་ལས་ཧཱུྃ་མཐིང་ཀ་གྲངས་མེད་པ་བྱུང་ནས་རང་གི་སྙིང་གར་ཐིམ༔ སྤྲོས་བྲལ་གྱི་རྟོགས་པ་ཤར་ཏེ་སྐུ་གསུང་ཐུགས་ཀྱི་བྱིན་རླབས་ཐོབ་ཤེས་རབ་ཡེ་ཤེས་ཀྱི་དབང་ཐོབ་ཡིད་སྒྲིབ་དག་ནས་རྡོ་རྗེའི་ཐུགས་ཀྱི་དངོས་གྲུབ་ཐོབ༔ བླ་མའི་ལྟེ་བར་ཧྲིལས་ཧྲཱིཿ༔ ལྗང་གུ་གྲངས་མེད་པ་བྱུང་ཞིང་༔ རང་གི་ལྟེ་བར་ཐིམ་པས་སྐུ་གསུང་ཐུགས་ཡོངས་རྫོགས་ཀྱི་བྱིན་རླབས་ཐོབ༔ ཚིག་དབང་རིན་པོ་ཆེ་ཐོབ༔ ལུས་ངག་ཡིད་གསུམ་གྱི་སྒྲིབ་པ་དག་ནས་སྐུ་གསུང་ཐུགས་དབྱེར་མེད་རྡོ་རྗེའི་དངོས་གྲུབ་ཐོབ༔ གུ་རུའི་ཕྱག་ཞབས་བཞིའི་ཡིག་འབྲུ་བརྒྱད་ལས་འོད་ཟེར་དཔག་ཏུ་མེད་པ་བྱུང་༔ རང་གི་ཡན་ལག་བཞི་ལ་ཐིམ་པས་མཆོག་ཐུན་མོང་ཕྲིན་ལས་རྣམ་བཞིའི་དངོས་གྲུབ་ཐོབ༔ རིག་པའི་རྩལ་དབང་ཐོབ༔ མདོར་ན་བྱིན་རླབས་དང་དངོས་གྲུབ་ཀྱི་དབྱིག་ཆེན་པོ་ཐོབ༔ དམིགས་པ་དེ་དག་ངག་ཏུ་བརྗོད་མི་དགོས་ཏེ༔ དང་པོ་གསོལ་འདེབས་ཚར་གཅིག་གིས་བསྙེན་གསན་ཕབ་ནས་གསོལ་འདེབས་གཉིས་གསུམ་རྗེས་མ་རྣམས་བྱེད་ཚེ་དམིགས་པ་དེ་དག་བྱེད་རྒྱུ་ཡིན་ཏེ༔ གསོལ་འདེབས་ཀྱི་ཚིག་ལ་ཡང་དམིགས་པ་དེ་དག་དོན་ལ་ཡང་ཚང་བར་ཡོད་དོ༔ དེ་ནས་
དངོས་གཞི་སྒྲུབ་པའི་དམིགས་པ་དངོས་འདི་འཛབ་དགོངས་སོགས་ལ་ལྟོས་མ་དགོས་པར་ཅུང་ཟད་གབ་སྦས་སུ་ཡོད་པས་སྒྲུབ་གཞུང་དུ་མི་གསལ་བས༔ རྗེ་མཁར་དྲུང་པས་ཀྱང་གསལ་བར་མཛད་མོད་ཀྱིས༔ དེ་ལ་སྒྲུབ་པའི་དམིགས་པ་དངོས་འདི་བུམ་སྒྲུབ་ཡིན་པས་བུམ་པ་གཙོ་ཆེ༔ དེ་ལ་སྤྱིར་བུམ་པ་ཤར་སྒོའི་འགྲམ་དུ་བཞག་པའི་རིགས་ཐམས་ཅད་མདུན་བསྐྱེད་དང་བུམ་བསྐྱེད་སོ་སོར་བསྒོམ་པ་ཡིན༔ དེ་ནས་བྱ་སྤྱོད་ཀྱི་རྒྱུད་ཕལ་ཆེར་ལ་བུམ་ལྷ་མི་བསྒོམ་པར་མདུན་བསྐྱེད་ཀྱི་སྐུའམ༔ ཕྱག་ནས་བདུད་རྩི་བབས་པས་བུམ་པ་གང་བར་བསྒོམ་པ་དང་༔ བུམ་པའི་ནང་དུ་ས་བོན་སྔགས་ཕྲེང་འཁོར་བ་ལས་བདུད་རྩི་བྱུང་ནས་བུམ་པ་བང་བར་བསྒོམས་པའི་ལུགས་མང་ན་ཡང་རྙིང་མའི་ཚེ་སྒྲུབ་རིགས་འགའ་རེ་ལ་མདུན་བསྐྱེད་ཀྱི་དཀྱིལ་འཁོར་དབུས་ཀྱི་བུམ་པར་ཚེ་བཅུད་བསྡུ་བ་ཡང་ཡོད་དེ༔ རྙིང་མའི་ལུགས་དཀྱིལ་འཁོར་གྱི་དབུས་སུ་བུམ་པ་བཞག་ནས་མདུན་བསྐྱེད་དབྱེར་མེད་བསྒོམ་པ་ཡིན༔ དེ་ལ་འདིའི་བསྙེན་པ་ཚེ་མདུན་བསྐྱེད་དེ་གཙོ་ཆེ་བས་བུམ་པ་མི་དམིགས་པ་རྟ་མགྲིན་དང་དབྱེར་མེད༔ སྐུ་འབག་སྤྲུལ་སྐུར་བསྒོམ་པ་ཡིན་ལ༔ སྒྲུབ་པ་དངོས་གཞིའི་སྐབས་འདིར་བུམ་བསྐྱེད་གཙོ་
བོ་ཡིན་བུམ་པ་དང་མདུན་བསྐྱེད་གཞལ་ཡས་ཁང་དབྱེར་མེད་པའི་ནང་དུ་དངོས་གྲུབ་ཀྱི་རྒྱ་མཚོ་འཁྱིལ་བའི་དབུས༔ པདྨའི་སྡོང་པོ་ཆེན་པོ་འདབ་མ་སྟོང་ལྡན་གྱི་སྟེང་དུ་ཕྱི་འདབ་མ་བཅུ་དྲུག་ལ་གིང་བཅུ་དྲུག༔ དེ་སྟེང་འདབ་མ་བརྒྱད་ལ་མཚན་བརྒྱད༔ དེ་སྟེང་འདབ་མ་བཞི་ལ་ཐོད་ཕྲེང་རྩལ་རིགས་བཞི༔ པདྨའི་ལྟེ་བར་རྟ་མགྲིན་ཡབ་ཡུམ་ཐུགས་ཀར་བུདྡྷ་ཐོད་ཕྲེང་རྩལ༔ དབུ་གཙུག་བླ་མ་སྤྲུལ་སྐུ་སྟེ་སྒྲུབ་པའི་སྐབས་སུ་ལྷ་བསྐྱེད་དུས་ནས་དེ་ལྟར་བསྒོམས་ལ༔ གསོལ་འདེབས་དབང་བཞི་བླངས་ཚར་ནས༔ རང་དང་མདུན་བསྐྱེད་རྟ་མགྲིན་གཉིས་ཀའི་དབུ་གཙུག་ནས་བླ་མ་སྤྲུལ་སྐུ་དེ་མར་ཚངས་བུག་གི་ལམ་ནས་བྱོན་པས་སྙིང་གར་རང་བུདྡྷ་ཐོད་ཕྲེང་རྩལ་དང་དབྱེར་མེད་དུ་འདྲེས་ནས༔ སྙིང་པདྨ་འདབ་བརྒྱད་ཁ་ཅུང་ཟད་བྱེ་བའི་དབུས་སུ་བླ་མ་གསང་འདུས་རྡོ་རྗེ་འཆང་ཡབ་ཡུམ་གྱི་སྐུར་ལམ་གྱིས་གྱུར་པར་བསྒོམ༔ དེ་ལྟར་བདག་མདུན་གཉིས་ཀ་རྟ་མགྲིན་དུ་གསལ་བའི་ཐུགས་ཀར་བུདྡྷ་ཐོད་ཕྲེང་རྩལ་ལ་བླ་མ་གསང་འདུས་ཡབ་ཡུམ་གསལ་བར་བསྒོམ་པའི་གསང་འདུས་རྡོ་རྗེ་འཆང་གི་དཔྲལ་བར་ཟླ་བའི་སྟེང་དུ་ཨོཾ་དཀར་པོ་སྐུའི་རང་བཞིན༔ མགྲིན་པར་པདྨ་དམར་པོའི་དཀྱིལ་དུ་
གསུང་གི་རང་བཞིན་ཨཱདམར་པོ༔ ཐུགས་ཀར་ཉི་མའི་དཀྱིལ་འཁོར་གྱི་དབུས་སུ་ཐུགས་ཀྱི་རང་བཞིན་ཧཱུྃ་མཐིང་ག༔ ལྟེ་བར་བསྐྱེད་བྱེད་རྩའི་འཁོར་ལོའི་དཀྱིལ་དུ་ཧྲཱིཿ༔ ལྗང་གུ་ཕྲིན་ལས་ཡོངས་སུ་རྫོགས་པའི་ངོ་བོར་བསམ༔ ཕྱག་ཞབས་བཞི་ལ་ཧ་རི་ནི་ས་ར་ཙ་ཧྲི་ཡ་བཞི་པོ་གཉིས་གཉིས་བསམ་མོ༔ དེ་ནས་རང་རྟ་མགྲིན་གྱི་ཐུགས་ཀ་ནས་རང་དང་དབྱེར་མེད་པའི་བླ་མ་གསང་འདུས་ཀྱི་དཔྲལ་བའི་ཨོ་ལས་ཨོཾ་དཀར་པོ་གྲངས་མེད་པ་སྐུ་ཡི་རང་བཞིན་དཔག་ཏུ་མེད་པ་འཕྲོས་ནས་མདུན་གྱི་གསང་འདུས་ཀྱི་དཔྲལ་བར་ཐིམ་པས༔ མདུན་གྱི་གསང་འདུས་ཀྱི་དཔྲལ་བའི་ཨོ་ལས་འོད་ཟེར་དཀར་པོ་དཔག་ཏུ་མེད་པ་འཕྲོས༔ ཕྱོགས་བཅུའི་རྒྱལ་བ་སྲས་བཅས་ཡི་དམ་མཁའ་འགྲོ་ཐམས་ཅད་མཆོད༔ དེ་ཐམས་ཅད་ཀྱི་སྐུ་ཡི་དངོས་གྲུབ་ཨོཾ་ཡིག་དཀར་པོ་གྲངས་མེད་པའི་རྣམ་པར་སྤྱན་དྲངས་ནས་མདུན་གྱི་གསང་འདུས་ཀྱི་དཔྲལ་བའི་ཨོ་ལ་ཐིམ་པས་སྐུ་ལས་བདུད་རྩིས་རྒྱུན་བབས་པས་བུམ་པ་སྐུའི་དངོས་གྲུབ་ཀྱི་རྒྱ་མཚོས་གང་༔ སངས་རྒྱས་ཐམས་ཅད་ཀྱི་སྐུའི་དངོས་གྲུབ་ཀྱི་བཅུད་དྭངས་མ་ཐམས་ཅད་བསྡུས༔ མདུན་གྱི་གསང་འདུས་ཀྱི་དཔྲལ་བའི་ཨོ་ལས་ཨོཾ་དཀར་པོ་སྐུའི་རང་བཞིན་དཔག་ཏུ་མེད་པ་
བྱུང་ནས་རང་རྟ་མགྲིན་གྱི་ཐུགས་ཀའི་རང་དང་གསང་འདུས་དབྱེར་མེད་པའི་དཔྲལ་བར་ཐིམ་པས་ཕྱོགས་བཅུའི་རྒྱལ་བ་ཐམས་ཅད་ཀྱི་སྐུའི་བྱིན་རླབས་ཐོབ༔ དེ་བཞིན་དུ་རང་བླ་མ་གསང་འདུས་ཡབ་ཡུམ་གྱི་མགྲིན་པའི་དམར་པོ་ལས་འོད་ཟེར་དམར་པོ་ཨཱཡི་རང་བཞིན་གྲངས་མེད་པ་འཕྲོས་ནས་མདུན་གྱི་གསང་འདུས་ཀྱི་མགྲིན་པར་ཐིམ་པས༔ མདུན་བསྐྱེད་ཀྱི་གསང་འདུས་ཀྱི་མགྲིན་པའི་ཨཱཋལས་འོད་ཟེར་དམར་པོ་དཔག་ཏུ་མེད་པ་འཕྲོས་ཕྱོགས་བཅུའི་རྒྱལ་བ་སྲས་བཅས་ཡི་དམ་མཁའ་འགྲོ་ཆོས་སྐྱོང་ཐམས་ཅད་མཆོད༔ དེ་ཐམས་ཅད་ཀྱི་གསུང་གི་དངོས་གྲུབ་ཨཱདམར་པོ་གྲངས་མེད་པ་འཕྲོས་མདུན་བསྐྱེད་གསང་འདུས་ཀྱི་མགྲིན་པའི་ཨཱལ་ཐིམ་པས༔ སྐུ་ལས་བདུད་རྩིའི་རྒྱུན་བབས་པས་བུམ་པ་གསུང་གི་དངོས་གྲུབ་ཀྱི་རྒྱ་མཚོས་གང་༔ སངས་རྒྱས་ཐམས་ཅད་ཀྱི་གསུང་གི་དངོས་གྲུབ་ཀྱི་བཅུད་དྭངས་མ་ཐམས་ཅད་བསྡུས༔ མདུན་གྱི་གསང་འདུས་ཀྱི་མགྲིན་པའི་ཨཱལས་ཨཱ༔ དམར་པོ་གསུང་གི་རང་བཞིན་དཔག་ཏུ་མེད་པར་བྱུང་ནས་རིང་རྟ་མགྲིན་གྱི་ཐུགས་ཀའི་རང་དང་དབྱེར་མེད་གསང་འདུས་ཀྱི་མགྲིན་པར་ཐིམ་པས་ཕྱོགས་བཅུའི་རྒྱལ་བ་ཐམས་ཅད་ཀྱི་གསུང་གི་བྱིན་རླབས་ཐོབ༔
ཡང་རྟ་མགྲིན་གྱི་སྙིང་ག་ནས་རང་དང་དབྱེར་མེད་པའི་བླ་མ་གསང་འདུས་ཀྱི་ཐུགས་ཀའི་ཧཱུྃ་ལས་ཧཱུྃ་མཐིང་ཀ་གྲངས་མེད་པ་ཐུགས་ཀྱི་རང་བཞིན་དཔག་ཏུ་མེད་པ་བྱུང་ནས་མདུན་བསྐྱེད་ཀྱི་གསང་འདུས་ཀྱི་ཐུགས་ཀར་ཐིམ་པས༔ མདུན་གྱི་གསང་འདུས་ཀྱི་ཐུགས་ཀའི་ཧཱུཾ་ལས་འོད་ཟེར་མཐིང་ཀ་དཔག་ཏུ་མེད་པ་འཕྲོས་ཕྱོགས་བཅུའིརྒྱལ་བ་སྲས་བཅས་ཡི་དམ་ཆོས་སྐྱོང་ཐམས་ཅད་མཆོད༔ དེ་ཐམས་ཅད་ཀྱི་ཐུགས་ཀྱི་དངོས་གྲུབ་ཧཱུྃ་ཡིག་མཐིང་ག་གྲངས་མེད་པའི་རྣམ་པར་སྤྱན་དྲངས་ནས་མདུན་གྱི་གསང་འདུས་ཀྱི་ཐུགས་ཀའི་ཧཱུྃ་ལ་ཐིམ་པས་སྐུ་ལས་བདུད་རྩིའི་རྒྱུན་བབས་པས་བུམ་པ་ཐུགས་ཀྱི་དངོས་གྲུབ་རྒྱ་མཚོས་གང་སངས་རྒྱས་ཐམས་ཅད་ཀྱི་ཐུགས་ཀྱི་དངོས་གྲུབ་བཅུད་དྭངས་མ་བསྡུས་ནས༔ མདུན་གྱི་གསང་འདུས་ཀྱི་ཐུགས་ཀའི་ཧཱུྃ་ལས་ཧཱུྃ་མཐིང་ཀ་ཐུགས་ཀྱི་རང་བཞིན་དཔག་ཏུ་མེད་པ་བྱུང་ནས༔ རང་རྟ་མགྲིན་གྱི་ཐུགས་ཀའི་ཧཱུཾ་དང་དབྱེར་མེད་གསང་འདུས་ཀྱི་ཐུགས་ཀར་ཐིམ་པས་ཕྱོགས་བཅུའི་རྒྱལ་བ་ཐམས་ཅད་ཐུགས་ཀྱི་བྱིན་རླབས་ཐོབ༔ ཡང་རང་དང་བླ་མ་གསང་འདུས་ཀྱི་ལྟེ་བའི་ཧྲི་ལྗང་གུ་ལས་འོད་ཟེར་ལྗང་གུའི་རང་བཞིན་གྲངས་མེད་པ་འཕྲོས་བྱུང་ནས་མདུན་གྱི་གསང་འདུས་ཀྱི་ལྟེ་བར་
ཐིམ་པས་མདུན་གྱི་གསང་འདུས་ཀྱི་ལྟེ་བའི་ཧྲིལས་འོད་ཟེར་ལྗང་གུ་དཔག་ཏུ་མེད་པ་འཕྲོས་ཕྱོགས་བཅུའི་རྒྱལ་བ་སྲས་བཅས་ཡི་དམ་མཁའ་འགྲོ་ཆོས་སྐྱོང་ཐམས་ཅད་མཆོད༔ དེ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་ཀྱི་དངོས་གྲུབ་ཧྲཱིཿལྗང་གུ་གྲངས་མེད་པའི་རྣམ་པར་སྤྱན་དྲངས་ནས་མདུན་གྱི་གསང་འདུས་ཀྱི་ལྟེ་བའི་ཧྲུལ་ཐིམ་པས༔ སྐུ་ལས་བདུད་རྩིའི་རྒྱུན་བབས་པས་བུམ་པ་སྐུ་གསུང་ཐུགས་ཡོངས་རྫོགས་ཀྱི་དངོས་གྲུབ་རྒྱ་མཚོས་གང་༔ སངས་རྒྱས་ཐམས་ཅད་ཀྱི་སྐུ་གསུང་ཐུགས་ཡོངས་རྫོགས་ཀྱི་དངོས་གྲུབ་ཀྱི་བཅུད་དྭངས་མ་ཐམས་ཅད་བསྡུས་མདུན་གྱི་གསང་འདུས་ཀྱི་ལྟེ་བའི་ཧིལས་ཧྲཱིཿལྗང་གུ་སྐུ་གསུམ་ཡོངས་རྫོགས་ཀྱི་རང་བཞིན་དཔག་ཏུ་མེད་པ་བྱུང་ནས་རང་རྟ་མགྲིན་གྱི་ཐུགས་ཀའི་རང་དང་དབྱེར་མེད་གསང་འདུས་ཀྱི་ལྟེ་བར་ཐིམ་པས་ཕྱོགས་བཅུའི་རྒྱལ་བ་ཐམས་ཅད་ཀྱི་སྐུ་གསུང་ཐུགས་ཡོངས་རྫོགས་ཀྱི་དངོས་གྲུབ་ཐོབ༔ ཡང་རྟ་མགྲིན་གྱི་ཐུགས་ཀའི་རང་དང་དབྱེར་མེད་པ་བླ་མ་གསང་འདུས་ཀྱི་ཕྱག་ཞབས་བཞིའི་ཡིག་འབྲུ་བརྒྱད་ལས་འོད་ཟེར་ཁ་དོག་སྣ་ཚོགས་དཔག་ཏུ་མེད་པ་བྱུང་༔ མདུན་གྱི་རྟ་མགྲིན་གྱི་ཐུགས་ཀའི་བླ་མ་གསང་འདུས་ཀྱི་ཕྱག་ཞབས་བཞི་ལ་
ཐིམ་པས༔ མདུན་གྱི་གསང་འདུས་ཀྱི་ཕྱག་ཞབས་ཡི་གེ་བརྒྱད་ལས་འོད་ཟེར་ཁ་དོག་དཔག་ཏུ་མེད་པ་འཕྲོས་ཕྱོགས་བཅུའི་དཔའ་བོ་ཌཱཀི་ཆོས་སྐྱོང་ཐམས་ཅད་མཆོད༔ དེ་ཐམས་ཅད་ཀྱིས་མཆོག་ཐུན་མོང་ཕྲིན་ལས་རྣམ་བཞིའི་དངོས་གྲུབ་འོད་ཟེར་ཁ་དོག་སྣ་ཚོགས་ཀྱི་རྣམ་པར་སྤྱན་དྲངས༔ མདུན་གྱི་བླ་མ་གསང་འདུས་ཀྱི་ཕྱག་ཞབས་བཞི་ལ་ཐིམ་པས་སྐུ་ལས་བདུད་རྩིའི་རྒྱུན་བབས་པས་བུམ་པ་མཆོག་ཐུན་མོང་ཕྲིན་ལས་རྣམ་བཞིའི་དངོས་གྲུབ་ཀྱི་རྒྱ་མཚོས་གང་༔ དཔའ་བོ་ཌཱཀྐི་ཆོས་སྐྱོང་ཐམས་ཅད་མཆོག་ཐུན་མོང་ཕྲིན་ལས་རྣམ་བཞིའི་དངོས་གྲུབ་ཀྱི་བཅུད་དྭངས་མ་ཐམས་ཅད་བསྡུས་ནས་མདུན་གྱི་གསང་འདུས་ཀྱི་ཕྱག་ཞབས་ཀྱི་ཡི་གེ་བརྒྱད་ལས་འོད་ཟེར་ཁ་དོག་སྣ་ཚོགས་དཔག་ཏུ་མེད་པ་བྱུང་ནས༔ རང་གི་ཡན་ལག་བཞི་ལ་ཐིམ་པས༔ མཆོག་ཐུན་མོང་ཕྲིན་ལས་རྣམ་བཞིའི་དངོས་གྲུབ་ཐོབ༔ མདོར་ན་བྱིན་རླབས་དང་དངོས་གྲུབ་ཀྱི་དབྱིག་ཆེན་པོ་ཐོབ་པར་བསྒོམ༔ དེ་ལྟ་བུའི་དམིགས་པ་མ་ཡེངས་པར་སྒྲུབ་པའི་སྙིང་པོ་སྔགས་ཐོད་ཕྲེང་རྩལ་ལ་ཟླ་བ་གཅིག་བཟླའོ༔ ཡང་ན་བདུན་གསུམ་ཡང་རུང་༔ གྲངས་བདུན་འབུམ་མམ་བྱེ་བའམ་སུམ་འབུམ་གྱིས་ཀྱང་ཆོག་གོ༔ སྐབས་སུ་གསོལ་
འདེབས་ནི་གཞུང་ཉིད་དང་༔ སྤྲོ་ན་སྐུ་གསུམ་གསོལ་འདེབས་དང་༔ ཀུན་དྲིལ་ཡིད་བཞིན་ནོར་བུའི་གསོལ་འདེབས་རུང་༔ དེ་ནས་གནད་ནས་བསྐུལ་བ་ནི༔ ཧཱུྃ་མ་གཡེལ་མ་འཕང་རིག་འཛིན་རྣམས༔ སོགས་ལས་བྱང་གི་སྐབས་སུ་དབྱངས་དང་བཅས་པས་བསྐུལ་པ་བྱ༔ འདི་ལ་གཏོར་མ་ཡང་འབུལ་སྲོལ་ཡོད༔ ཐུན་མཚམས་དམིགས་མེད་ངང་ལ་བཞག་ཅེས་པ་ནི༔ རབ་རྟོགས་པ་མཐོ་ན་སྟོང་ཉིད་རྟོགས་པའི་རྩི་དང་མ་བྲལ་བར་གོང་གི་དམིགས་རིམ་རྣམས་བསྒོམ་ཞིང་སྔགས་བཟླས༔ དེ་ཙམ་མི་ནུས་ན་དམིགས་པ་རྣམས་ཚར་རེ་བསྒོམ་རྗེས་མི་དམིགས་སྟོང་ཉིད་ངང་ལ་བཞག་ཅིང་བཟླ༔ ཡང་དམིགས་པ་ཚར་རེ་བྱ་ཞིང་སྤེལ་མ་འབད་པ་འབྲིང་༔ ཐ་མས་ཐུན་རེ་ལ་དམིགས་པ་ཐམས་ཅད་ཚར་རེ་ལས་མི་ཐུབ༔ ཐུན་མཚམས་ལ་དམིགས་མེད་སྟོང་ཉིད་ཡུད་ཙམ་རེ་བསྒོམ་མོ༔ ལངས་འདུག་སོགས་བྱེད་ཞོར་ལ་འཆམ་སྟབས་ལག་པས་པད་ཀོར་རྐང་པས་བྲོ་ངག་དབྱངས་དང་བཅས་སྔགས་ཐོད་ཕྲེང་རྩལ་དང་འཛབ་དབྱངས་བྱའོ༔ དེའི་ཚེ་བདག་མདུན་གྱི་དཀྱིལ་འཁོར་ལྷ་ཚོགས་ཐམས་ཅད་དང་འགྲོ་བ་རིགས་དྲུག་ཐམས་ཅད་དཀྱིལ་འཁོར་གྱི་ལྷ་ཚོགས་སུ་གསལ་བས་འཛབ་
བསྙེན་གྱི་སྔགས་འུ་རུ་རུ་འདོན་པར་བསྒོམ་མོ༔ སྐབས་སུ་ཉིན་རེ་ཐུན་རེ་ཙམ་རང་ཉིད་དང་དཀྱིལ་འཁོར་འགྲམ་དུ་བཤམས་པའི་ཕུར་པ་དབྱེར་མེད་ཧཱུྃ་སྒྲུབ་ནས་གསུངས་པའི་དྲག་པོ་མཐིང་ནག་གཉིས་སྐད་ཅིག་གནས་འགྱུར་དུ་བསྒོམ༔ དེ་ཡང་ལྷ་ཕུར་ཚང་བ་ཡོད་ན་སྐུ་ལྔ་མཚན་བརྒྱད་ཐམས་ཅད་མཐིང་ནག་ཏུ་བསྒོམ༔ ཕུར་པ་གཅིག་ལས་མེད་ན་རང་ཉིད་གཙོ་རྐྱང་མཚམས་གཅོད་ཀྱི་ཕུར་པ་བཅུ་དང་དབྱེར་མེད་ཁྲོ་བོ་བཅུ་རྣམས་སྐད་ཅིག་ལ་གསལ་བཏབ་བོ༔ ཧཱུྃ་བདུན་གསུམ་ཉེར་གཅིག་ཙམ་དྲག་ཏུ་བརྗོད་ནས༔ ལྷ་གཙོ་འཁོར་མི་དམིགས་པར་བྱ༔ ཁྲོ་བཅུས་ཕྱོགས་བཅུའི་བགེགས་བསྲུང་བར་བསམ་མོ༔ དེ་ལྟར་སྒྲུབ་པ་དུས་རྟགས་གྲངས་གསུམ་ཐེམས་ནས༔ ༈ ལས་སྦྱོར་འདོན་ལུགས་ནི༔ ལས་བྱང་འདོན་ལུགས་དང་བླ་མ་སྤྲུལ་སྐུ་སྤྱི་བོར་བསྒོམས་ནས་དབང་བཞི་ལེན་ལུགས་སྒྲུབ་པའི་དུས་དང་འདྲ༔ དབང་བླང་ཚར་ནས་སྤྱི་བོའི་བླ་མ་བདག་མདུན་གཉིས་ཀ་དེ་མར་རྟ་མགྲིན་གྱི་ཐུགས་ཀར་བྱོན་ནས་སྙིང་གར་བུདྡྷ་ཐོད་ཕྲེང་རྩལ་དང་དབྱེར་མེད་དུ་འདྲེས་པས་རང་དང་མདུན་བསྐྱེད་གཉིས་ཀའི་གཙོ་བོ་དེ་སྐད་ཅིག་ལ་གནས་འགྱུར་ནས༔ མདུན་གྱི་གཙོ་བོ་དང་བདག་ཉིད་རྡོ་རྗེ་ཐོད་ཕྲེང་
རྩལ༔ སྐུ་མདོག་དཀར་པོ་དར་དཀར་གྱི་ན་བཟའ་གསོལ་བ༔ དབུ་ལ་རིན་ཆེན་སྲོག་ཞུ་གསོལ་བ༔ ལོངས་སྐུའི་རྒྱན་ཅན༔ ཕྱག་གཡས་རྡོ་རྗེ་དང་༔ གཡོན་བུམ་པའམ་དྲིལ་བུ་འཛིན་པ༔ དེའི་སྤྱི་བོར་ཨོཾ་དཀར་པོ༔ མགྲིན་པ་ཨཱདམར་པོ༔ ཐུགས་ཀར་ཧཱུྃ་མཐིང་ག༔ ལྟེ་བར་ཧྲཱིཿལྗང་གུ༔ སྙིང་གར་ཟླ་བའི་གདན་ལ་ཧཱུྃ་མཐིང་ཀ་དཀར་བའི་མདངས་ཅན་གྱི་མཐའ་མར༔ ཨོ་བཛྲ་གུ་རུ་སརྦ་སིདྡྷི་ཧཱུྃ༔ ཤཱནྟཾ་ཀུ་རུ་ཡེ་སྭཱ་ཧཱ༔ ཞེས་པས་བསྐོར་བར་བསྐྱེད་ལ༔ བདག་གི་འཁོར་ལོ་བཞིའི་ཡིག་འབྲུ་སྔགས་ཕྲེང་དཀར་པོ་ལས་འོད་ཟེར་ཕྱོགས་བཅུར་འཕྲོས་པས་ནད་གདོན་བགེགས་དང་བར་ཆད་ཞི་བར་བསྒོམ༔ དེ་ཡང་སྡིག་སྒྲིབ་ཞི་བ་དང་༔ ཉམས་ཆག་ཞི་བ་དང་༔ བྱང་ཆུབ་སྒྲུབ་པའི་བར་ཆད་ཞི་བ་དང་༔ བསྟན་པ་སྤྱིའམ་རང་རང་གི་བླ་མ་མཆེད་གྲོགས༔ རང་ཉིད་ཀྱི་སློབ་མ་བརྒྱུད་འཛིན་སོགས་ཀྱི་བར་ཆད་ཞི་བ་དང་༔ རྒྱལ་པོའི་ཆད་པ་དང་༔ མེ་ཆུ་དུག་མཚོན་དགྲ་ཇག་ཆོམ་རྐུན་ཡམས་ནད་རིམས་ནད་ལ་སོགས་མདོར་ན་གནོད་པ་དང་༔ བཀྲ་མི་ཤིས་པའི་བྱེ་བྲག་ཐམས་ཅད་ཞི་བར་བསྒོམ༔ ཁྱད་པར་དུ་གལ་ཆེ་བའི་འཇིགས་སྐྲག་གང་ཡོད་དེ་ཞི་བར་
བསྒོམ་སྟེ་ཞག་གསུམ་ལྔ་བདུན་སོགས་གྲངས་འབུམ་ཕྲག་གཅིག་བསྒྲུབས་ནས་ཞི་བའི་སྦྱིན་སྲེག་ཐུགས་སྒྲུབ་ཀྱིས་བྱ་སྟེ༔ རྟོགས་བར་ཆད་ཞི་བའི་རྨིས་ལྟས་འབྱུང་བ་རིག་པས་ཤེས་པར་བྱའོ༔ དེས་རིག་འགྲེས་ཏེ་དབང་བཞི་བླངས་ནས་རང་ལ་བསྟིམ་མ་ཐག་ལྷོའི་རཏྣ་ཐོད་ཕྲེང་རྩལ་དུ་གནས་འགྱུར༔ གཙོ་བོ་གཉིས་རཏྣ་ཐོད་ཕྲེང་རྩལ་དུ་གྱུར་ཏེ་རྒྱན་ཆ་ལུགས་ཡིག་འབྲུ་འོད་ཟེར་སོགས་གཞུང་དུ་གསལ་ལྟར་ལས་ཚེ་བསོད་དཔལ་འབྱོར་ཉམས་དང་རྟོགས་པ་གདུལ་བྱ་འགྲོ་དོན༔ སངས་རྒྱས་ཀྱི་བསྟན་པ་སྤྱི་དང་བྱེ་བྲག་ཆོས་འདིའི་བསྟན་པ་དང་རང་གི་བླ་མ་དང་མཆེད་གྲོགས་སློབ་བརྒྱུད་ཀྱི་བསྟན་པ༔ འབྲུ་དང་ནོར་ཕྱུགས་ཟས་གོས་ལ་སོགས་རང་གང་འདོད་རྒྱས་པར་དམིགས་སོ༔ དུས་གྲངས་གོང་ལྟར་ལས་རྒྱས་པའི་སྦྱིན་སྲེག་འགྲུབ་པ་མཆོག་གོ༔ ༈ དེ་བཞིན་དུ་དབང་བླངས་ནས་རང་ལ་ཐིམ་མ་ཐག་ཏུ་ནུབ་ཀྱི་པདྨ་ཐོད་ཕྲེང་རྩལ་དུ་གནས་འགྱུར་རང་དང་མདུན་གྱི་གཙོ་བོ་པདྨ་ཐོད་ཕྲེང་རྩལ་དུ་གནས་འགྱུར་ཡིག་འབྲུ་འོད་ཟེར་འཕྲོས་སྔགས་ཕྲེང་གཞུང་དུ་གསལ་ལྟར་ལས༔ རྒྱལ་བློན་ཡུལ་ཁམས་ཟས་ནོར་ལོངས་སྤྱོད་སོགས་སྣང་བ་རླུང་སེམས་སྣང་སྲིད་ལྷ་འདྲེ་སོགས་གང་འདོད་ཐམས་ཅད་འོད་ཟེར་
དམར་པོ་ལྕགས་ཀྱུ་ལྟ་བུས་བཀུག་ནས་འོད་དམར་པོར་ཞུ་ནས་རང་ལ་བསྟིམ་པར་བྱ་ཞིང་དུས་གྲངས་ཐེམ་པ་དང་དབང་གི་སྦྱིན་སྲེག་བྱའོ༔ ༈ དྲག་པོ་ལ་ཡང་གསོལ་བ་བཏབ༔ དབང་བཞི་བླངས་ནས་རང་ལ་ཐིམ་མ་ཐག་བྱང་གི་ཀརྨ་ཐོད་ཕྲེང་རྩལ་དུ་བུདྡྷ་ཐོད་ཕྲེང་རྩལ་གནས་འགྱུར་ནས་བདག་མདུན་གྱི་གཙོ་བོ་གཉིས་ཀརྨ་ཐོད་ཕྲེང་རྩལ་ཡིག་འབྲུ་སྔགས་ཕྲེང་འོད་ཟེར་གཞུང་ལྟར༔ བདུད་བཞི་དང་བསྟན་པ་སྤྱི་དང་བྱེ་བྲག་རང་གི་བར་ཆེད་དགྲ་བགེགས་ཐམས་ཅད་ཚར་བཅད་པར་བསམ༔ དུས་གྲངས་ཐེམས་ནས་དྲག་པོའི་སྦྱིན་སྲེག་བྱའོ༔ ༈ ལས་སྦྱོར་གྱི་སྐབས་སུ་ཉམས་རྟོགས་པའི་གདེང་བསྐྱེད་བྱུང་རྒྱལ་དུ་བཏང་༔ བསྐྱེད་རིམ་གྱི་ང་རྒྱལ་ཆེན་པོ་བྱས་ལ༔ གང་ལ་ཡང་འགྲུབ་མི་འགྲུབ་ཀྱི་ཐེ་ཚོམ་ཁུ་འཕྲིགས་མེད་པར༔ རང་ཉིད་སྣང་སྲིད་ཀྱི་བདག་པོ་པདྨ་འབྱུང་གནས་དངོས་སུ་ང་རྒྱལ་བསྐྱེད་པར་གལ་ཆེ་སྟེ༔ ལས་སྦྱོར་དུས་སུ་རང་ཉིད་དང་བླ་མ་ཡི་དམ་དབྱེར་མེད་པར༔ རང་ཉིད་ཐམས་ཅད་ཀུན་གྱི་གཙོ༔ བདག་ཉིད་ཆེན་པོ་རང་གསལ་གདབ༔ ཅེས་གསུངས་སོ༔ དེ་ཡང་སྦྱིན་སྲེག་བཞི་པོ་མ་ཐུབ་ན་ཧ་ཅང་མི་རུང་བ་ནི་མིན་པ༔ འགྲུབ་ན་ཤིན་ཏུ་ཟབ་ཅིང་དངོས་
གྲུབ་མྱུར་བའི་གནད་ཡོད་དོ༔ སྦྱིན་སྲེག་གི་ལྷ་བསྐྱེད་ལུགས་ཀྱང་དང་པོ་སྒྲུབ་པའི་དུས་ལྟར་བསྐྱེད་ནས་སྤྱི་བོའི་སྤྲུལ་སྐུ་ལ་བསྲེག་རྫས་བདུན་རེ་ཙམ་འབུལ་ནས་བུདྡྷཱ་ཐོད་ཕྲེང་རྩལ་དང་རྟ་མགྲིན་ལ་ཡང་ལྔའམ་བདུན་ཙམ་ཕུལ༔ དེ་ནས་སྤྲུལ་སྐུ་མར་བསྟིམས་ལ༔ གཙོ་བོ་འཕོ་བའི་རིགས་པས་བུདྡྷ་ཐོད་ཕྲེང་རྩལ་དང་ཕྱོགས་བཞི་པོ་གང་ཡིན་དབུས་ཀྱི་གཙོ་བོ་ལས་གང་སྒྲུབ་ཀྱི་ཐོད་ཕྲེང་རྩལ་དུ་སྒྱུར་ནས༔ ཡམ་ཤིང་ལ༔ བཛྲ་གུ་རུ་སརྦ་སིདྡྷི་ཧཱུྃ༔ ཨོཾ་བྷོ་དྷི་བྲིཀཱ་ཡེ་སྭཱ་ཧཱ༔ གཟི་བརྗིད་ཕུན་སུམ་ཚོགས་པ་ལ་བར་དུ་གཅོད་པ་ཐམས་ཅད་ཤཱནྟིཾ་ཀུ་རུ་ཡེ་སྭཱ་ཧཱ༔ ཞེས་པ་ལྟ་བུ་གཞན་ཐམས་ཅད་རིགས་འགྲེས་ཤིང་༔ འཁོར་ཐམས་ཅད་ལ་རྒྱས་པར་སོ་སོར་བདུན་རེ་འབུལ༔ བསྡུ་ན་སྔགས་ཐོད་ཕྲེང་རྩལ་ལ་ས་པཱ་རི་ཝཱ་ར་སྦྱར་ནས། སྐུ་ལྔ་མཚན་བརྒྱད་ཧྲི་མ་ཧ་རི་ནི་སའི་ལས་སྔགས་ཀྱིས་དཔའ་བོ་ཌཱཀི་སྤྱི་ལ་འབུལ་ལོ༔ མེ་ལྷའི་འོད་ཟེར་གོང་གི་དམིགས་པ་དང་འདྲ་བར་བསྒོམས་པས་ཕྲིན་ལས་སོ་སོར་འགྲུབ་པར་བསམ་སྐབས་སུ་དཀྱིལ་འཁོར་ལ་སྐོར་བ་བྱེད་དམ་བྱེད་པ་མེད་ན་འཆམ་སྟབས་བྱ་ཞིང་ཕྲིན་ལས་བཞིའི་སྔགས་འཛབ་དབྱངས་སུ་གྱེར་རོ༔ སྐབས་སུ་དུས་ཚོད་བཟང་དུས་སམ༔ བྱིན་
མི་ཆགས་ཉམས་རྟོགས་མི་གསལ་ན་ལས་བྱང་འདོན་དུས་ལས་བྱང་ཆེ་བའི་བྱིན་འབེབས་སྐབས་སུ་དང་ཆུང་བའི་མཚམས་གཅོད་རྗེས་དེར་སྤོས་དུད་དབྱངས་རོལ་མོ་དང་བཅས་རིག་འཛིན་བྱིན་འབེབས་འདོན༔ རྨིས་ལྟས་ངན་པ་དང་ལུས་སེམས་མི་བདེ་བའི་རྩུབ་ཆ་བྱུང་ན་བྲུབ་ཁུང་ལིངྒ་དེ་ལ་དམ་སྲི་ཉུལ་ལེ་བཀུག་གཞུག་བྱ༔ ཕུར་པ་འདྲིལ་ཞིང་སྡང་མིག་ལྟ་སྟངས་གཟིར་ཞིང་༔ ཀུན་ཐུབ་རྒྱལ་མོའི་བསྐུལ་པ་འདོན་ལ༔ གྷ་ཏའི་སྔགས་བརྗོད་ཅིང་ལིངྒ་ཕུར་པས་བརྡུང་ངོ་༔ རྟགས་ཁྱད་པར་ཅན་བྱུང་དུས་སྒྲུབ་ཆེན་གཞུང་གི་དངོས་གྲུབ་བླང་ཆོག་བྱས་ལ་དངོས་གྲུབ་བླང་ངོ་༔ དགོང་མོ་རྒྱུན་དུ་མ་ནིང་དང་མཁའ་རི་ལ་གཏོར་མ་བསྔོ་ཞིང་བར་ཆད་མ་བཏང་ཞེས་བཀའ་བསྒོའོ༔ གཞི་བདག་ལ་ཡང་དེ་བཞིན་བྱ་སྒྲིབ་ཚེ་རྩོལ་མེད་དུ་ཚོགས་འཁོར་ཀྱི་རྫས་བཟང་པོ་འཛོམ་བྱུང་བའམ༔ ཚེས་བཅུ་ལ་སོགས་ཚོགས་འཁོར་རྒྱས་པར་བྱ་སྟེ༔ དེ་དུས་ཆང་བཟང་པོ་འཛོམ་ན་ལག་མཆོད་བྱའོ༔ ཉེར་ལྔ་མར་ངོའི་ཚེས་བཅུ་ལ་ཡང་ཚོགས་དང་བསྐང་གསོལ་བྱའོ༔ ཉེར་དགུ་ཐམས་ཅད་ལ་མ་ནིང་བསྐང་གསོལ་བྱའོ༔ གློ་བུར་དུ་དཀྱིལ་འཁོར་ཞལ་ཁེབས་འབྱེད་དགོས་སམ་འབྱེད་འདོད་པ་
བྱུང་ན་མོས་གུས་དྲག་པོ་བྱེད་ལ་གཞལ་ཡས་ཁང་བསྟོད་འདོན༔ ལར་སྐུ་གསུམ་སྒྲུབ་པའི་སྐབས་འདིར་གཞན་ཐུགས་དམ་ཚིག་མེད་ཀྱི་རིགས་གང་ཡོད་ཐུན་གཅིག་ལ་བསྡུས་ནས་སྔ་ཐུན་ཕྱི་ཐུན་གཅིག་ལ་ཚང་བར་བྱ༔ ཆག་མེད་མིན་པའི་ཡི་དམ་ཆོས་སྐྱོང་ཐམས་ཅད་སྔགས་བསྔོས་ཀྱི་གཏོར་བསྔོས་ཙམ་ལ་བསྡུ༔ དེ་མིན་ཐུན་ཐམས་ཅད་དུ་སྒྲུབ་པ་འདི་རང་ལ་གཅིག་དྲིལ་དུ་བྱའོ༔ དུས་མཆོད་མ་ཆག་པར་བྱེད་པའི་རིགས་གང་ཡོད་ཀྱང་དེའི་ཚོགས་གཏོར་འབུལ་སོགས་ཁོག་ཐམས་ཅད་ཐུགས་སྒྲུབ་ཀྱི་ཁོག་ཕུབ་པ་ལ་སྒྲུབ་པ་དང་༔ མི་འགལ་ཞིང་དུས་མཆོད་སོ་སོ་ཡང་མ་ཆག་པའི་ཐབས་ལ་མཁས་པར་བྱའོ༔ བཟང་ངན་གྱི་རྟགས་ཅི་བྱུང་ཡང་རྟགས་ཡིག་ལྟར་ངོ་ཤེས་པར་བྱས་ལ༔ བཟང་ངེས་པ་ལ་དངོས་གྲུབ་བླང་༔ ངན་ངེས་པ་ལ་དམ་སྲི་དང་ཉུལ་ལེ་བརྡུང་༔ དེ་ཡང་བཟང་པོ་ལ་དགའ་བྲོད་དང་ངན་པ་ལ་སྐྲག་སྔངས་མེད་པར་དོན་ཐམས་ཅད་རང་སེམས་ལས་གཞན་མ་གྲུབ་པའི་གདིང་དང་ལྡན་པའི་ངང་ནས་གནས་སྐབས་སུ་རྟེན་འབྲེལ་སྒྱུ་མ་ཙམ་དུ་སྒྱུ་མ་མཁན་གྱིས་སྒྱུ་མ་བཀོད་པ་ལྟར༔ རང་ཉིད་ཀྱི་རྟེན་འབྲེལ་ལེགས་ཚོགས་ཅི་ཡང་བསྒྲིག་ཤེས་པར་བྱའོ༔ རྗེས་ཀྱི་བྱ་ཚུལ་སྒྲུབ་ཆེན་དང་ཕྲ་
ཁྲིད་ལྟར་བྱའོ༔ སྤྲུལ་སྐུར་སྒྲུབ་པའི་ཟིན་བྲིས་འདི་ཡང་མཐར་ཕྱིན་ཡང་དག་སོགས་ལ་འཕྲལ་དུ་མཁོ་ཕྱིར་དང་༔ མ་འོངས་རྣལ་འབྱོར་པ་འགའ་ལ་ཕན་ཕྱིར༔ ཨ་རཱ་གས་ཤིང་ཕོ་རྟ་ལོ་རྒྱལ་ཟླ་རྒྱབ་མའི་ཉེར་གསུམ་ལ་རྫོགས་པར་བཀོད་པ་ཉེས་པ་གང་མཆིས་བཤགས་ཤིང་༔ དགེ་བས་སེམས་ཅན་ཐམས་ཅད་ཨོ་རྒྱན་རིན་པོ་ཆེའི་གོ་འཕང་ཐོབ་པར་གྱུར་ཅིག༔ མངྒ་ལཾ༔ ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།