ཐུགས་སྒྲུབ་རྒྱུན་བསྙེན་བྱ་ཐབས་ཟིན་བྲིས་བསྡུས་པ་ཨ་རཱ་གས་མཛད་པ།
ཐུགས་སྒྲུབ་རྒྱུན་བསྙེན་བྱ་ཐབས་ཟིན་བྲིས་བསྡུས་པ་ཨ་རཱ་གས་མཛད་པ་བཞུགས་པའི་དབུ་ཕྱོགས་ལགས་སོ། །ན་མོ་པྲ་ཝ་ཀ་ར་ཡེ༔ ཐུགས་སྒྲུབ་རྒྱུན་བསྙེན་དམིགས་རིམ་བསྡུས་པ་ནི༔ ལྷ་བསྐྱེད་སྐབས་སུ་བདག་བསྐྱེད་མངོན་རྟོགས་དུས༔ མདུན་གྱི་གཏོར་མའི་རྩེ་ལ་དཀྱིལ་འཁོར་བསྐྱེད༔ སྤྱན་འདྲེན་མཆོད་བསྟོད་དུས་གཅིག་ཉིད་དུ་བྱ་འཛབ་དགོངས་དུས་སུ་གཞུང་གི་ཚིག་རིས་ལྟར༔ དང་པོ་རང་ཉིད་རྟ་མགྲིན་ཡབ་ཡུམ་གྱི༔ སྤྱི་གཙུག་བླ་མ་ཨོ་རྒྱན་སྤྲུལ་སྐུ་ལ༔ གསོལ་འདེབས་ཚུལ་དུ་བཛྲ་གུ་རུ་བཟླ༔ དེ་ཚེ་སྤྲུལ་སྐུའི་དཔྲལ་མགྲིན་ཐུགས་ཀ་དང་༔ ལྟེ་བ་བཞི་ནས་འོད་ཟེར་དཀར་དམར་མཐིང་༔ ལྗང་གུ་ཐིག་ལེའི་རྣམ་པ་ལྟ་བུ་ལ༔ ཨོ་དཀར་ཨཱདམར་ཧཱུཾ་མཐིང་ཧྲཱིཿལྗང་གིས༔ མཚན་པ་གྲངས་མེད་བར་མ་ཆོད་པ་རུ༔ རང་གི་དཔྲལ་མགྲིན་ཐུགས་ཀ་ལྟེ་བར་ཐིམ༔ སྒྲིབ་པ་བཞི་དག་དབང་བཞི་ཐོབ་པ་དང་༔ སྐུ་བཞི་འགྲུབ་པའི་སྐལ་པ་ཅན་དུ་བྱས༔ དེ་ལྟར་བསྒོམ་ཞིང་ཕྲེང་སྐོར་བསྙེན་པ་ཡིན༔ དེ་ནས་སྤྱི་བོའི་ཨོ་རྒྱན་དབུ་མ་ཡི༔ ལམ་ནས་བྱོན་ནས་རང་གི་སྙིང་གར་སླེབ༔ རང་སྙིང་པདྨ་དམར་པོ་འདབ་བརྒྱད་པ༔ གྱེན་དུ་ཁ་བྱེའི་ཟེའུ་འབྲུར་
ཞུགས་མ་ཐག༔ ཨོ་རྒྱན་བླ་མ་ཆོས་སྐུ་ཡབ་ཡུམ་གྱུར༔ ཐུགས་ཀར་ཟླ་སྟེང་ཧཱུཾ་མཐར་སྔགས་ཀྱིས་བསྐོར༔ དེ་ལས་འོད་ཟེར་ཕྱོགས་བཅུར་འཕྲོས་པ་ཡིས༔ རྒྱལ་བ་སྲས་བཅས་ཀུན་ལ་མཆོད་པ་ཕུལ༔ ཐམས་ཅད་འོད་ཟེར་རྣམ་པར་ཚུར་འདུས་ཏེ༔ སྙིང་གར་ཐིམ་པར་བསྒོམ་ཞིང་རྩ་སྔགས་བཟླས༔ ཐོད་ཕྲེང་རྩལ་ལ་ཕྲེང་སྐོར་བཟླ་བ་ཡིན༔ དེ་ནས་བླ་མ་འོད་ཞུ་རང་ལ་ཐིམ༔ རང་དང་ཨོ་རྒྱན་དབྱེར་མེད་ང་རྒྱལ་བསྐྱེད༔ རང་ཉིད་རྟ་མགྲིན་ཡབ་ཀྱི་སྤྱི་བོའི་ནང་༔ རྡོ་རྗེ་ཌཀྐི་ཡབ་ཡུམ་སྐུ་མདོག་དཀར༔ མགྲིན་པར་རིན་ཆེན་ཌཱཀི་ཡ༔ བ་ཡུམ་སེར༔ སྙིང་གར་པདྨ་ཊཱཀྐི་ཡབ་ཡུམ་དམར༔ ལྟེ་བར་ལས་ཀྱི་ཌཱཀྐི་ཡབ་ཡུམ་ལྗང་༔ དེ་དག་བཞི་ལ་ཡབ་ཡུམ་སོ་སོ་ཡི༔ ཡབ་བཞིའི་ཐུགས་ཀར་ར་ཙ་ཧྲཱིཿཡ་བཞི༔ ཡུམ་བཞིའི་ཐུགས་ཀར་ཧ་རི་ནི་ས་བཞི༔ རྟ་མགྲིན་ཡབ་ཡུམ་ཐུགས་སྲོག་ཧཱུྃ༔དང་མ༔ ཌཀྐི་ཡབ་ཡུམ་བཞི་ཡི་ཐུགས་ཀ་ནས༔ རང་མདོག་འོད་ཟེར་དཀར་སེར་དམར་ལྗང་འཕྲོས་ཞི་རྒྱས་དབང་དྲག་ཕྲིན་ལས་བཞི་འགྲུབ་བསྒོམ༔ ཧྲཱིཿམ་ཧཱ་རིའི་སྔགས་དེ་ཉེར་གཅིག་བཟླ༔ དེ་ནས་ཡེ་ཤེས་གཤེགས་སོགས་མི་དགོས་ཏེ༔ མདུན་བསྐྱེད་བཞུགས་ཤིང་བདག་བསྐྱེད་སྟོང་
པར་བསྡུ༔ དེ་ལྟར་རྒྱུན་ཁྱེར་བྱས་ནས་རྒྱུན་བསྙེན་བྱ༔ ཞི་ཁྲོ་སྐྱབས་ཀྱིས་བསྐུལ་ནས་༧ རཱ་གས་སྨྲས༔ བཀྲ་ཤིས་དགེ། །། ༧ ཁམས་སྟོད་སྒོམ་སྡེ་ནང་ཆེན་འབང་སྒང་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།