མཁའ་རིའི་གསོལ་འདེབས།
མདུན་དུ་མཁའ་རི་སྐུ་མདོག་དཀར། །བེར་དཀར་ཤེལ་ཁྲབ་རྨོག་ཞུ་གསོལ། །སྦ་ལྕག་རལ་གྲི་ཐུན་དོང་བསྣམས། །འཕྲུལ་གྱི་རྟ་དཀར་ཆིབས་པའི་གཡོན། །ལྷ་མོ་ཤེལ་བཟའ་རིན་ཆེན་བརྒྱན། །རབ་མཛེས་མཛོ་མོ་འཕུར་ཤེས་ཆིབས། །འཁོར་ནི་ཞུབ་ཆེན་འབུམ་དང་བཅས། །ཐུགས་རྗེའི་འོད་ཀྱིས་སྤྱན་དྲངས་གྱུར། །ཧཱུཾ། འདི་ནས་ཉི་མ་ནུབ་ཀྱི་ཕྱོགས། །སིང་ག་ལ་ཡི་ཡུལ་གྱི་རྒྱུད། །འཕགས་ཡུལ་དེ་ཝི་ཀོ་ཏྲའི་གནས། །ལྷོ་བྲག་གྲུབ་པའི་གནས་བདག་སྟེ། །དྲག་པོའི་མཚོ་ཆེན་དུག་སྦྲུལ་གཟུགས། །ཨོ་རྒྱན་ཆེན་པོའི་ཕྱག་རྗེས་གསལ། །གངས་དཀར་ཤེལ་འདྲ་གནམ་དུ་བསྙེགས། །དེ་ནང་ཤེལ་མཁར་གཞལ་ཡས་སུ། །བཞུགས་པའི་དགེ་བསྙེན་ཆེན་པོ་ནི། །ཤེའུ་མཁའ་རི་དམ་ཚིག་ཅན། །ལྕམ་དྲལ་འཁོར་དང་བཅས་པ་རྣམས། །མ་ཐོགས་མྱུར་དུ་གནས་འདིར་བྱོན། །སྒྲུབ་ཅིང་མཆོད་པའི་གནས་འདིར་བྱོན། །བསྟན་པ་བསྲུང་ཕྱིར་བཞུགས་སུ་གསོལ། །བཛྲ་ས་མ་ཡ་ཛ༔ ཛཿཧཱུྃ་བཾ་ཧོ༔ ཧཱུྃ། མཁའ་རི་ལྕམ་དྲལ་འཁོར་བཅས་ལ། །གཡག་ལུག་དཀར་པོ་རྒྱན་ལྡན་པ། །གཡུ་ཤུག་སྨྱུག་རྒོད་བལ་ཚོན་བརྒྱན། །
མདའ་རྒོད་དར་དཀར་མེ་ལོང་སྤྱས། །སྦ་ལྕག་དར་སྣ་རིན་ཆེན་བརྒྱན། །གཡག་དཀར་ཐོད་པ་སྐུ་གཟུགས་བཅས། །དར་པན་མཛོ་མོ་དཀར་མོ་སོགས། །མཐུན་རྗེས་དུ་མས་ཐུགས་དམ་བསྐང་། །གཞན་ཡང་མཆོད་པའི་དམ་རྫས་ནི། །བཤོས་བུ་མཁར་ཐབས་བཤོས་ཕྲན་བཅས། །ཟན་གཡག་བསང་ལུག་མར་གྱིས་བརྒྱན། །སྨན་ལེབ་འབྲང་རྒྱས་གསུར་དང་སྤྲོས། །ཆོས་སྨན་བདུད་རྩི་ཕུད་རྒོད་སོགས། །དངོས་འབྱོར་ཡིད་སྤྲུལ་མཆོད་སྤྲིན་འབུལ། །འཁོར་དང་བཅས་པས་བཞེས་ནས་ཀྱང་། ཐམས་ཅད་མཉེས་ཤིང་ཚིམས་གྱུར་ཅིག །ཨོཾ་བཛྲ་ཏྲིག་ན་ཏྲིག་པ༔ ཏྲིག་སྨན་རུ་རུ་ཙ་ཙ་ཛ༔ མ་ཧཱ་བྷ་ལིང་ཏ་ཛྷི་ར་ས་མ་ཡ། པུ་ཙ་རུ་པ་བྷ་ཧུ་ཏ་ཕ་ལ་ང་། །ཤྲཱི་ཧ་ན་ཧཱུཾ་ཁཱ་ཧི་ཁཱ་ཧི། ཧཱུྃ། །སྲུང་མ་མཁའ་རི་ལྕམ་དྲལ་དམ་ཚིག་ཅན། །སྔོན་ཚེ་ཆེ་མཆོག་པདྨ་ཐོད་ཕྲེང་རྩལ། །སྲོག་སྙིང་ཕུལ་ནས་བཟློག་མེད་དད་པ་ཐོབ། །དབང་བསྐུར་དམ་ཚིག་བདུད་རྩི་ལྕེ་ལ་བཞག །བོད་ཡུལ་ཞིང་སྐྱོང་གཏེར་སྲུང་ཆེན་པོར་བསྐོས། །རྫུ་འཕྲུལ་སྟོབས་ཀྱིས་ཟངས་མདོག་དཔལ་རིའི་རྩེར། །རྒྱུན་དུ་གཤེགས་ཤིང་པདྨའི་བཀའ་སྡོད་བྱེད། །དམ་ཚིག་
དབང་གིས་རིག་འཛིན་པདྨ་འབྱུང་། །རྟག་ཏུ་འབྲལ་མེད་ཁྱོད་ཀྱི་སྤྱི་གཙུག་རྒྱན། །བདག་ནི་བཟོད་མེད་གདུང་ཤུགས་དྲག་པོ་ཡི། །ཨོ་རྒྱན་རྗེ་ལ་རྩེ་གཅིག་གསོལ་འདེབས་ན། །སྔོན་གྱི་དམ་བཅའ་ཐུགས་དམ་བརྩེར་དགོངས་ལ། །བདག་ལ་ཨོ་རྒྱན་པདྨ་སྤྱད་དུ་གསོལ། །དམ་ཚིག་འདི་བཞེས་བཅོལ་བའི་ཕྲིན་ལས་མཛོད། །ཅེས་དང་། སྤྲོ་ན་གཞུང་ལས་བསྟོད་བསྐུལ་གཉིས་པོ་གང་རུང་ཡང་བྱའོ། །ཞེས་པ་པདྨ་རིག་འཛིན་གྱིས་བསྐུལ་བ་ལྟར་བསྟན་པ། ཨ་རཱ་གས་བྲིས་པའོ། །འདི་བྲིས་ཉེས་པ་དགེ་བསྙེན་ཉིད་ལ་བཤགས། །དགེ་བས་པདྨ་འབྱུང་གནས་ཞལ་མཐོང་ཤོག །སརྦ་མངྒ་ལཾ།། །། ༧ ཁམས་སྟོད་སྒོམ་སྡེ་ནང་ཆེན་འབང་སྒང་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།