བཀའ་རྫོགས་པ་ཆེན་པོ་ཡང་ཟབ་དཀོན་མཆོག་སྤྱི་འདུས་ཕྲིན་ལས་རང་གཞུང་ལས་བསྒྲིགས་ཅན།
བཀའ་རྫོགས་པ་ཆེན་པོ་ཡང་ཟབ་དཀོན་མཆོག་སྤྱི་འདུས་ཕྲིན་ལས་རང་གཞུང་ལས་བསྒྲིགས་ཅན་བཞུགས་སོ།།
ཧྲཱིཿ མ་བཅོས་ལྷུན་གྲུབ་ཀ་དག་རང་མདངས་ལས། །ཅི་ཡང་ཤར་བའི་རིག་རྩལ་སྒྱུ་འཕྲུལ་ནི། །གསང་སྔགས་རྙིང་མའི་བསྟན་འཛིན་བང་རི་བ། །ཨོ་རྒྱན་ལས་འཕྲོ་གླིང་པར་གསོལ་བ་འདེབས། །དང་པོ་མདོ་རྒྱུད་མན་ངག་ལེགས་པར་སྦྱངས། །བར་དུ་བསྐྱེད་རྫོགས་དབྱེར་མེད་སྒྲུབ་པ་བཙུགས། །ཡང་དག་དོན་གྱི་རབ་འབྱམས་བང་རི་བ། །རིག་འཛིན་འཇའ་ཚོན་སྙིང་པོར་གསོལ་བ་འདེབས། རྒྱལ་དབང་པདྨའི་ཡང་སྤྲུལ་དགེ་སྦྱོང་ཚུལ། །བསྐལ་དུས་སྙིགས་མའི་འགྲོ་བའི་དཔལ་དུ་ཤར། །བདག་འཛིན་རུ་ཏྲ་འཇོམས་པའི་བང་རི་བ། །
སྔགས་འཆང་ཧཱུྃ་ནག་མེ་འབར་ལ་གསོལ་བ་འདེབས། །དེ་ལྟར་གསོལ་བ་བཏབ་པའི་བྱིན་རླབས་ཀྱིས། །གནས་སྐབས་མཐར་ཐུག་དངོས་གྲུབ་ཆར་འབེབས་ཤིང་། །མཁྱེན་བརྩེ་ནུས་ལྡན་འཇའ་ལུས་འོད་ཕུང་གྱུར། །བདག་གཞན་དཀྱིལ་འཁོར་གཅིག་ཏུ་འགྲུབ་པར་ཤོག །ཅེས་རིག་འཛིན་འཇའ་ཚོན་སྙིང་པོའི་གསོལ་འདེབས་འདི་ལ་ཉིན་རེ་ཚར་དྲུག་གམ་ལྔའམ་གསུམ་མམ་ཚར་རེ་མ་བཅད་པར་ཉིན་རེ་འདོན་ན་ངན་སོང་གསུམ་དུ་མི་འགྲོ། ཀོང་པོའི་གཙང་སྦུག་ཏུ་རིག་འཛིན་འཇའ་ཚོན་སྙིང་པོས་སྦྱར་བའོ།། ༄༅། པདྨ་འོད་འབར་གྱི་སྔོན་འགྲོ་བསྡུས་པ་བཞུགས་སོ། །ན་མོ་བདག་དང་འགྲོ་དྲུག་སེམས་ཅན་མ་ལུས་
པ། །བླ་མ་སངས་རྒྱས་ཆོས་དང་དགེ་འདུན་ཏེ། །བསླུ་མེད་དཀོན་མཆོག་གསུམ་ལ་སྐྱབས་སུ་མཆི། །རྩ་བརྒྱུད་བླ་མ་ཡི་དམ་དཀྱིལ་འཁོར་ལྷ། །མཁའ་འགྲོ་ཆོས་སྐྱོང་རྣམས་ལ་སྐྱབས་སུ་མཆི། །གདོད་ནས་རྣམ་དག་བདེ་ཆེན་ཀུན་ཏུ་བཟང་། །རང་སེམས་ཆོས་ཀྱི་སྐུ་ལ་སྐྱབས་སུ་མཆི། །ཡེ་ནས་རང་སེམས་ཆོས་སྐུ་ཡིན་པ་ལ། །དེ་ལྟར་མ་རྟོགས་སེམས་ཅན་སྙིང་རེ་རྗེ། །དེ་རྣམས་སངས་རྒྱས་ས་ལ་འགོད་པའི་ཕྱིར་། །བླ་མེད་བྱང་ཆུབ་མཆོག་ཏུ་སེམས་བསྐྱེད་དོ། །འགྲོ་དྲུག་སེམས་ཅན་བདེ་དང་ལྡན་གྱུར་ཅིག །དུས་རྣམས་རྟག་ཏུ་སྡུག་བསྔལ་མེད་པར་ཤོག །བདེ་སྐྱིད་ཕུན་སུམ་ཚོགས་དང་མི་འབྲལ་ཞིང་། །ཉེ་རིང་ཆགས་སྡང་རྟོག་པ་མེད་གྱུར་ཅིག །ལྕོག་རྡོག་བྲན་ལ། བྷཾ་ལས་རིན་ཆེན་སྣོད་དུ་གཏོར་མ་ནི། །དཀར་གསུམ་མངར་གསུམ་བདུད་རྩིའི་རྒྱ་མཚོར་གྱུར། །ཨོཾ་ཨཱཿཧཱུྃ་གིས་ཟག་མེད་བདུད་རྩིར་གྱུར། །ཡུལ་འདིར་གནས་པའི་གནས་བདག་གཞི་བདག་རྣམས། །དཀར་གསུམ་ཕུད་ཀྱི་གཏོར་མ་འདི་བཞེས་ལ། །བདག་གིས་བསྐྱེད་རྫོགས་སྒོམ་བཟླས་བྱེད་པ་ལ། །ཀོ་ལོང་རུ་ང་ཕྲག་དོག་མ་མཛད་པར། །བདག་གི་མཐུན་རྐྱེན་རོགས་དན་
མཛད་དུ་གསོལ། །བགེགས་དང་ལོག་འདྲེན་དམ་སྲི་འབྱུང་པོ་རྣམས། །གཏོར་མའི་ལྷག་རོལ་ཆངས་བུ་འདི་ཁྱེར་ལ། །གནས་འདིར་མ་འདུག་མྱུར་བར་གཞན་དུ་དེངས། །རང་གི་ལུས་ལ་གནོད་པའི་དཔེ་ལོངས་ལ། །སེམས་ཅན་གཞན་ལ་གནོད་པ་མ་བྱེད་ཅིག །ཨོཾ་བྷུ་མི་པ་ཏི། བྷ་ལིང་ཏ་ཁཱ་ཧི་ཁཱ་ཧི། སརྦ་བྷུ་ཏ་གཙྪ། ཅེས་ཕྱི་རོལ་ཕུལ། ཨོཾ་ཨ་མྲྀ་ཏེ་ཧཱུྃ་ཕཊ༔ ཨོཾ་སྭ་བྷ་ཝ་སོགས། རླུང་མེ་ཐོད་སྐྱེད་སྟེང་དུ་ཀ་པཱ་ལར། །བདུད་རྩི་གཏོར་མ་ཤ་ལྔ་བདུད་རྩི་ལྔ། །ཁོལ་ཞིང་ཞུ་བ་ཟག་མེད་བདུད་རྩིའི་མཚོ་། །རྒྱུད་དྲུག་འཁོར་བ་སྟོང་ཕྱིར་རཀྟའི་མཚོ། ཕྱི་ནང་གསང་བའི་མཆོད་སྤྲིན་དཔག་མེད་པ། །ཟག་མེད་ཀུན་བཟང་མཆོད་སྤྲིན་ལྟ་བུར་གྱུར། །ཨོ་པཉྩ་ཨ་མྲྀ་ཏ། མ་ཧཱ་བ་ལི་ཏ། མ་ཧཱ་རཀྟ་སརྦ་པཱུ་ཙ་ཨཱཧཱུྃ། སྔོན་འགྲོ་འདི་མཚམས་དུས་དང་པོ་གལ་ཆེ། དེ་ནས་མ་བྱས་ཀྱང་ཆོག །ནངས་རེ་གཏོར་མ་རེ་ཕུལ་ན་ཡང་བཟང་། མཚམས་བྱེད་ན་སྒོ་རྩར་ཐོ་དཀར་པོ་བརྩེགས། མཚམས་གྲོལ་དུས་བསྐྱེལ། སྔོན་འགྲོ་འབུལ་ས་ཕྱོགས་གཙང་སའམ། རང་གི་ལོ་བདུད་སྟེང་དུ་ཕུལ། གླང་གི་ལོ་བདུད་ནི་ལྷོ་ནུབ་ཡིན་པས་རྒྱུན་དུ་ཕུལ་ཆོག །ཅེས་བླ་མ་སྲུང་གི་དོན་དུ། ཨ་རཱ་གས་སོ།། །།སྲུང་འཁོར་ནི། ཧཱུྃ༔
བདག་ཉིད་འགྱུར་མེད་ཡེ་ནས་རྡོ་རྗེའི་སྐུ༔ ཕྱི་ནང་སྣོད་བཅུད་གཞལ་ཡས་སྐྱེ་འགྲོ་ལྷ༔ ཕྱོགས་དང་ཕྱོགས་མཚམས་འཇའ་འོད་མཚོན་ཆས་གཏམས༔ རྡོ་རྗེའི་ས་རིས་བསྐོར༔ ཨོཾ་བཛྲ་རཀྟ་ཛྭ་ལ་རཾ༔ སྐྱབས་སེམས་ནི། ཨོཾ་ཨཱཿཧཱུྃ༔ སྐྱབས་གནས་དམ་པ་རྣམས་ལ་སྐྱབས་སུ་མཆི༔ རྒྱུད་དྲུག་འཁོར་བར་འཁྱམས་པའི་ཕ་མ་རྣམས༔ བཟོད་མེད་གདུང་བས་སངས་རྒྱས་ཐོབ་བྱའི་ཕྱིར༔ ཀུན་ཀྱང་བྱང་ཆུབ་མཆོག་ཏུ་སེམས་བསྐྱེད་དོ༔ ལན་གསུམ། ཨོཾ་ཨཱཿཧཱུྃ༔ ཆོས་རྣམས་ཐམས་ཅད་སྐུ་གསུམ་རང་བཞིན་ལ༔ གཉིས་མེད་ཀློང་ཡངས་ཆེན་པོར་ཕྱག་འཚལ་ལོ༔ མ་བཅོས་མཐའ་བྲལ་མཉམ་པ་ཉིད་ཀྱིས་མཆོད༔ རང་སེམས་སངས་རྒྱས་མ་རྟོགས་མཐོལ་ལོ་བཤགས༔ གནས་ལུགས་རང་རིག་ངང་དུ་ཡི་རང་ངོ་༔ འཛིན་མེད་ཁྱབ་བརྡལ་རོལ་པའི་ཆོས་འཁོར་བསྐོར༔ འཁོར་འདས་དབྱེར་མེད་བཞུགས་པར་གསོལ་བ་འདེབས༔ ཆོས་དབྱིངས་ལྷུན་གྲུབ་ཆེན་པོར་བསྔོ་བར་བྱ༔ ཟུང་འཇུག་ཀུན་ཁྱབ་བདེ་ཆེན་མཆོག་ཐོབ་ཤོག༔ ཅེས་ཡན་ལག་བདུན་པ་དང་།། མཆོད་པ་བྱིན་རླབས་ནི། རཾ་ཡཾ་ཁཾ༔ ཨོཾ་ཨཱཿཧཱུྃ༔ རང་གི་གནས་གསུམ་ཡིག་འབྲུ་གསུམ་གྱིས་
མཚན༔ དེ་ལས་ཟེར་མ་ཕྱོགས་བཅུར་རབ་འཕྲོས་པས༔ མཆོད་རྫས་དངོས་འཛིན་རྣམ་རྟོག་བར་ཆགས་དང་ཉེས་སྐྱོན་བསྲེགས་གཏོར་སྦྱངས་བཀྲུས་བདུད་རྩིར་གྱུར༔ སྨན་རཀ་གཏོར་མཆོད་འོད་ཕུང་ལྡེམས་སེ་ལྡེམ༔ བླ་མེད་མཆོད་པ་དཔག་ཡས་བསམ་མི་ཁྱབ༔ ཨོཾ་ཧཱུཾ་ཏུཾ་ཧཱིསཿ དང་པོ་ཕྱི་ཞི་བ་ལྟར་སྒྲུབ་པ་ལ་ཏིང་ངེ་འཛིན་རྣམ་པ་གསུམ་ནི༔ ཨོཾ་ཨཱཿཧཱུྃ༔ འདི་ལྟར་སྣང་སྲིད་གཉིས་བསྡུས་ཆོས་རྣམས་ཀུན༔ ཡེ་ནས་སྟོང་ཞིང་ནམ་མཁའ་ལྟ་བུ་ལ༔ གཟུང་འཛིན་སྤང་བླང་བྱ་བྱེད་མཐའ་ལས་འདས༔ པདྨ་སཾ་བྷ་བདག་ནི་དེ་ལྟར་སྨྲ༔ དྷརྨཱ་དྷ་ཏུ་སྭ་བྷཱ་ཝ་ཨཱཧཱུྃ༔ ཧཱུྃ༔ བདག་ཉིད་ཐ་མལ་རང་སེམས་བཟོ་མེད་འདི༔ དཀོན་མཆོག་སྤྱི་འདུས་པདྨ་འོད་འབར་སྐུ་དཀར་གསལ་མདངས་ལྔ་མཛེས་འཛུམ་རྒྱན་གྱིས་སྤྲས༔ རྡོ་རྗེ་ཐོད་པ་ཚེ་བུམ་རིན་ཆེན་བརྒྱན༔ པད་ཞྭ་རྒོད་ལྡེམ་ཁ་ཊཾ་གཡོན་ན་འཁྲིལ༔ ཕོད་ཀ་ཆོས་གོས་ཟ་འོག་བེར་ཕྱམ་ཅན༔ མཚན་དཔེས་རབ་བརྒྱན་འོད་ཀྱི་དཀྱིལ་འཁོར་མཛེས༔ མཉམ་ཉིད་བདེ་ཆེན་འཁྱིལ་པའི་སྐྱིལ་ཀྲུང་བཞུགས༔ འོད་ཀྱི་ལུས་ལ་ཡེ་ཤེས་སྙིང་པོ་ཅན༔ གསལ་སྟོང་ཐུགས་རྗེའི་འོད་ཟེར་
ཀུན་ལ་སྙོམས༔ མཁའ་འགྲོ་འཇའ་སྤྲིན་རྣམ་མང་འཁྲིགས་པའི་དབུས༔ སྐུ་ཡི་སྤྲུལ་པས་ཞིང་ཁམས་ཡོངས་ལ་ཁྱབ༔ ནམ་མཁའི་ལུས་ཅན་གར་ཡང་ཐོགས་པ་མེད༔ བདེ་གཤེགས་ཀུན་གྱི་བཀོད་པ་སྐུ་ལ་རྫོགས༔ ཀུན་ཀྱང་རྒྱལ་བའི་དཀྱིལ་འཁོར་ཟང་ཐལ་ལ༔ བགེགས་དང་བར་ཆད་ཞེས་བྱའི་མིང་ཡང་མེད༔ སྣང་སྟོང་སྒྱུ་མ་ཙམ་དུ་གསལ་བར་བསྐྱེད༔ དེ་ལྟར་དུ་གསལ་བའི་སྤྱི་བོར་ཨོཾ༔ མགྲིན་པར་ཨཱཿ ཐུགས་ཀར་ཧཱུྃ་དེ་ལས་འོད་ཟེར་འཕྲོས་པས་ཟངས་མདོག་དཔལ་གྱི་རི་བོ་པདྨ་འོད་ཀྱི་གཞལ་ཡས་ནས༔ ཨོ་རྒྱན་གྱི་གུ་རུ་པདྨ་འབྱུང་གནས་ལ༔ འཁོར་རྒྱལ་བ་རབ་འབྱམས་ཀྱིས་བསྐོར་བ་ཏིལ་གྱི་གོང་བུ་ཁ་བྱེ་བ་ལྟར་དཔག་ཏུ་མེད་པ་སྤྱན་དྲངས༔ ཡེ་ཤེས་པ་སྤྱན་འདྲེན་པ་ནི༔ ཧཱུྃ༔ སྔོན་གྱི་བསྐལ་པའི་དང་པོ་ལ༔ ཨོ་རྒྱན་ཡུལ་གྱི་ནུབ་བྱང་མཚམས༔ པདྨ་གེ་སར་སྡོང་པོ་ལ༔ ཡ་མཚན་མཆོག་གི་དངོས་གྲུབ་བརྙེས༔ པདྨ་འབྱུང་གནས་ཞེས་སུ་གྲགས༔ འཁོར་དུ་མཁའ་འགྲོ་མང་པོས་བསྐོར༔ ཁྱེད་ཀྱི་རྗེས་སུ་བདག་སྒྲུབ་ཀྱིས༔ བྱིན་གྱིསཾ་བརླབ་ཕྱིར་གཤེགས་སུ་གསོལ༔ གནས་མཆོག་འདི་རུ་བྱིན་ཕོབ་ལ༔ སྒྲུབ་མཆོག་བདག་ལ་
དབང་བཞི་བསྐུར༔ བགེགས་དང་ལོག་འདྲེན་བར་ཆད་སོལ༔ མཆོག་དང་ཐུན་མོང་དངོས་གྲུབ་སྩོལ༔ ཨོཾ་ཨཱཿཧཱུྃ་བཛྲ་གུ་རུ་པདྨ་ཐོད་ཕྲེང་རྩལ་བཛྲ་ས་མ་ཡ་ཛ༔ སིདྡྷི་ཕ་ལ་ཧཱུྃ་ཨཱ༔ དམ་ཡེ་གཉིས་མེད་དུ་གྱུར་པ་ལ་ཕྱག་འཚལ་བ་ནི༔ ན་མོ༔ སྐྱེ་འགགས་འགྱུར་མེད་ཕྲིན་ལས་རྫོགས༔ རང་བྱུང་ཐུགས་རྗེས་འགྲོ་རྣམས་སྒྲོལ༔ ཡིད་བཞིན་དངོས་གྲུབ་ཆར་འབེབས་པའི༔ པདྨ་འོད་འབར་སྐུ་ལ་ཕྱག་འཚལ་ལོ༔ མཆོད་པ་འབུལ་བ་ནི༔ ཨོཾ་ཨཱཧཱུྃ༔ མཆོད་འོས་ཕྱི་ནང་སྣོད་བཅུད་ཀུན༔ བློ་ཡིས་སྤྲུལ་ལམ་ལྷུན་གྱིས་གྲུབ༔ ཏིང་འཛིན་མཉམ་ཉིད་ཆེན་པོ་རུ༔ དཀོན་མཆོག་སྤྱི་འདུས་རྒྱལ་བར་འབུལ༔ གཞན་ཡང་མཆོད་རྫས་བྱེ་བྲག་ནི༔ མཛེས་པའི་མེ་ཏོག་དབུ་ལ་འབུལ༔ དྲི་ཞིམ་བདུག་སྤོས་ཤངས་ལ་འབུལ༔ སྣང་གསལ་མར་མེ་སྤྱན་ལ་འབུལ༔ མཆོད་ཡོན་དྲི་ཆབ་སྐུ་ལ་འབུལ༔ རོ་ལྡན་ཞལ་ཟས་ལྗགས་ལ་འབུལ༔ སྙན་པའི་རོལ་མོ་ཐུགས་ལ་འབུལ༔ ཕྱག་རྒྱ་གར་གྱི་མཆོད་པ་འབུལ༔ བསྟོད་དབྱངས་གླུ་ཡི་མཆོད་པ་འབུལ༔ འདོད་ཡོན་མ་སྤངས་ཕྱི་མཆོད་འབུལ༔ ཉོན་མོངས་མ་སྤངས་ནང་མཆོད་འབུལ༔ འདུ་
འབྲལ་མེད་པའི་གསང་མཆོད་འབུལ༔ རྩ་བརྒྱད་སྟོང་སྦྱར་སྨན་མཆོད་འབུལ༔ དུག་ལྔ་བསྒྲལ་བའི་རཀྟ་འབུལ༔ བ་ལི་གཏོར་མའི་མཆོད་པ་འབུལ་དམ་རྫས་བདུད་རྩིའི་མཆོད་པ་འབུལ༔ བླང་དོར་མེད་པའི་མཆོད་པ་འབུལ༔ ཨོ་བཛྲ་ཨརྒྱུ་པཱདཾ་པུཊྚེ་དྷུ་པེ་ཨ་ལོ་ཀེ་གནྡྷེ་ནེ་ཝིདྱ་ཤརྡ་པྲ་ཏིཙྪ་ཨཱཿཧཱུྃ། མ་ཧཱ་པཉྩ་རཀྟ་བ་ལིཾ་ཏ་ཁཱ་ཧི༔ བསྟོད་པ་ནི། ཧཱུྃ༔ རྒྱལ་བ་ཐམས་ཅད་ཡེ་ཤེས་ཀློང་དུ་གཅིག༔ ཆོས་ཉིད་དོན་ལ་ཆ་ལུགས་མི་མངའ་ཡོང་༔་ཐབས་མཁས་གང་འདུལ་སོ་སོའི་སྐུར་སྟོན་པ༔ ཐུགས་རྗེས་སྤྲུལ་བསྒྱུར་འགྱེད་ལ་ཕྱག་འཚལ་བསྟོད༔ བདེ་གཤེགས་ཀུན་འདུས་གཞོན་ནུ་ལོ་བརྒྱད་ཚུལ༔ འགྲོ་བ་ཡོངས་ཀྱི་སྐྱབས་མགོན་པདྨ་འབྱུང་༔ འགྱུར་མེད་སྐུ་མདོག་གངས་ལ་ཉི་ཤར་ལྟར༔ དམར་མདངས་ཅུང་ཟད་འཚེར་ལ་ཕྱག་འཚལ་བསྟོད༔་ཐབས་ཤེས་དབྱེར་མེད་རྡོ་རྗེ་ཐོད་པ་དང་༔ ཟུང་འཇུག་ཚེ་དང་ཡེ་ཤེས་བུམ་པ་འཛིན༔ དུས་གསུམ་རྩད་གཅོད་ཁ་ཊཾ་ཡུམ་གྱི་ཚུལ༔ ཁྲོ་འཛུམ་འགྲོ་འདུལ་མཛད་ལ་ཕྱག་འཚལ་བསྟོད༔ ཆོས་གོས་དམར་པོ་གསེར་གྱི་ཧ་རིས་ཅན༔ ཤེའུའི་སྙན་ཞུ་རྒོད་ལྡེམ་དར་སྣ་འཕྱང་༔ པདྨའི་གདན་ལ་མཚན་དང་
དཔེ་བྱད་འབར་༔ ཕྱི་ནང་ཡོན་ཏན་རྫོགས་ལ་ཕྱག་འཚལ་བསྟོད༔ སྐུ་དང་ཞིང་ཁམས་ཡེ་ནས་འདུ་འབྲལ་མེད༔ ཕྱོགས་བཅུ་ཀུན་ཀྱང་རྒྱལ་བའི་ཆོ་འཕྲུལ་ལས༔ ཆེ་ཆུང་མ་ངེས་སྐུ་གསུམ་ངང་དུ་བཞུགས༔ སྤྲུལ་པའི་གློག་སྟོང་འཁྱུག་ལ་ཕྱག་འཚལ་བསྟོད༔ གཟི་བརྗིད་ཉི་མ་འབུམ་གྱི་འོད་ཟེར་གྱིས༔ ཚེ་ཡི་དངོས་གྲུབ་རང་བཞིན་གནས་ནས་འགུགས༔ དགོས་འདོད་རེ་སྐོང་ཡིད་བཞིན་མཆོག་གི་ངང་༔ འཆི་མེད་རྡོ་རྗེའི་སྐུ་ལ་ཕྱག་འཚལ་བསྟོད༔ དེ་ལྟར་མཆོད་དང་བསྟོད་བྱ་མི་དམིགས་ཀྱང་༔ གློ་བུར་དྲི་མའི་རྣམ་རྟོག་བསལ་ཕྱིར་དུ༔ ཐབས་ཤེས་དབྱེར་མེད་ཆུ་ལ་ཆུ་བཞག་ཚུལ༔ གཉིས་མེད་རོལ་པ་ཆེན་པོར་ཕྱག་འཚལ་བསྟོད༔ གཉིས་པ་བསྙེན་དམིགས་ནི༔ ཧཱུྃ༔ བདག་ཉིད་པདྨ་འོད་འབར་ཐུགས་ཀ་རུ༔ གསེར་གྱི་རྡོ་རྗེ་རྩེ་ལྔའི་ལྟེ་བར་ཧྲཱིཿ མཐའ་མར་བཛྲ་གུ་རུའི་སྔགས་ཕྲེང་ནི༔ གཡོན་དུ་བཀོད་ནས་གཡས་སུ་འཁོར་བ་ལས༔ འོད་ཀྱིས་པདྨ་འོད་ཞིང་ལ་སོགས་པའི༔ ཕྱོགས་བཅུའི་ཞིང་ནས་དཀོན་མཆོག་རྩ་གསུམ་རྣམས༔ གུ་རུ་པདྨ་འོད་འབར་རྣམ་པ་རུ༔ ཆར་ལྟར་བབས་ནས་བདག་ལ་ཐིམ་པ་ཡིས༔ དབང་
དང་བྱིན་རླབས་དངོས་གྲུབ་ཐམས་ཅད་ཐོབ༔ སླར་ཡང་འོད་འཕྲོས་སེམས་ཅན་ཀུན་ལ་ཕོག༔ སྡིག་སྒྲིབ་ཀུན་དག་གུ་རུའི་སྐུར་གྱུར་ནས༔ ཀུན་གྱིས་སྔགས་སྒྲ་འུར་འུར་སྒྲོག་པར་གྱུར༔ ཨོཾ་ཨཱཧཱུྃ་བཛྲ་གུ་རུ་པདྨ་སིདྡྷི་ཧཱུྃ༔ ཐོང་ཕྲེང་རྩལ་དང་བཛྲ་གུ་རུ་ཅི་ནུས་བཟླའོ༔ དེའི་ཡན་ལག་ཏུ་ཚེ་སྒྲུབ་ཉམས་སུ་ལེན་པར་སྤྲོ་ན། བདག་མདུན་སྐད་ཅིག་གིས་རིག་འཛིན་ཚེ་དཔག་མེད་པདྨ་འོད་འབར་དུ་གསལ་བར་གྱུར༔ ཧཱུྃ༔ དུས་གསུམ་སངས་རྒྱས་ཀུན་གྱི་ངོ་བོ་ཉིད༔ འགྲོ་རྣམས་མ་ལུས་སྒྲོལ་བའི་དེད་དཔོན་མཆོག༔ ཨོ་རྒྱན་པདྨ་རིག་འཛིན་ཚེ་དཔག་མེད༔ བདག་གི་ལུས་ངག་ཡིད་གསུམ་བྱིན་རློབས་ལ༔ འཆི་མེད་ཚེ་ཡི་དངོས་གྲུབ་བསྩལ་དུ་གསོལ༔ གསོལ་བ་འདེབས་པ་ལན་གསུམ་བྱ། བདག་མདུན་གྱི་ཐུགས་ཀར་པདྨ་དཀར་པོ་འདབ་མ་བརྒྱད་པའི་ཟེའུ་འབྲུར་ཕ་ལམ་གྱི་རྡོ་རྗེ་རྩེ་ལྔ་པའི་ལྟེ་བར་ཉི་ཟླའི་གའུ་ཁ་སྦྱོར་གྱི་དབུས་སུ་ཧྲཱིཿ དཀར་པོ་ཧཱུྃ་དང་ཨཱས་མཚན་པ། དེའི་མཐར་སྔགས་ཕྲེང་འོད་ལྔའི་མདངས་དང་ལྡན་པ་གཡས་སྐོར་དུ་འཁོར་བ་དང་། གནས་ལྔར་ཕྱག་མཚན་ལྔར་ཡིག་འབྲུ་ལྔས་མཚན་པ་ལས་འོད་ཟེར་སྤྲོ་བསྡུས་ཕྱི་ནང་སྣོད་བཅུད་ཐམས་ཅད་ལྷ་སྔགས་སུ་གསལ་
བའི་གཟི་བརྗིད་ཀྱིས་སངས་རྒྱས་བྱང་སེམས་རྩ་བ་གསུམ་དང་ཆོས་སྐྱོང་སྲུང་མ་ཐམས་ཅད་ཀྱི་ཚེ་ཡི་བྱིན་རླབས་དང་། འབྱུང་བའི་བཅུད་ཀྱི་དྭངས་མ་ཐམས་ཅད་དང་དྲང་སྲོང་རིག་འཛིན་ཚེ་ལ་དབང་བ་ཐམས་ཅད་ཀྱི་ཐུགས་རྗེ་བྱིན་རླབས། མདོར་ན་སེམས་ཅན་བསོད་ནམས་ཅན་དཀར་པོ་དགེ་བའི་ལས་སྒྲུབ་ཅིང་དབང་ཆེ་བ་རྩལ་དྲག་པ་འཁོར་མང་བ་ཡོན་ཏན་ཆེ་བ་སྟོབས་དང་སྙན་གྲགས་ལྡན་པ་གདུལ་བྱ་ཕྲིན་ལས་ཅན་རྣམས་ཀྱི་ཚེ་དང་བསོད་ནམས་ཐམས་ཅད་ཡི་གེ་དྲིའི་རྣམ་པ་དང་འོད་ཟེར་ཁ་དོག་སྣ་ཚོགས་ཀྱི་ལི་ལི་བདག་མདུན་བུམ་པའི་ལྷ་ལ་ཐིམ་པར་གྱུར༔ ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཨཱཡུ་ཥེ་ཧཱུྃ་ཧཱུྃ་ཛ༔ ཞེས་ཚེ་བསྙེན་གང་འགྲུབ་བཟླ༔ མཐར་སྨོན་ལམ་གདབ་པ་ནི། ནད་རིགས་བཞི་བརྒྱ་རྩ་བཞི་དང་༔ རྐྱེན་ངན་ཉི་ཁྲི་ཆིག་སྟོང་དང་༔ ཡེ་འདྲོག་སུམ་བརྒྱ་དྲུག་ཅུ་དང་༔ བགེགས་རིགས་སྟོང་ཕྲག་བརྒྱད་ཅུ་སོགས༔ ཚེ་ཡི་བར་ཆད་མི་མཐུན་ཕྱོགས༔ ཐམས་ཅད་བྱང་ཞིང་དག་གྱུར་ཅིག༔ ཚེ་འགུགས་ནི་མདའ་དར་གཡབ་ལ། ཧཱུྃ༔ ཕྱི་ནི་བུམ་པ་ནང་ནི་བདུད་རྩིས་གང་༔ གསང་བའི་དོན་ནི་པདྨ་ཚེ་དཔག་མེད༔ གནས་ལྔར་ཕྱག་མཚན་ལྔ་དང་ཡིག་
འབྲུ་ལྔ༔ འོད་ཟེར་དཔག་ཡས་ནམ་མཁའ་གང་བར་འཕྲོས༔ ཧཱུྃ༔ ཤར་ཕྱོགས་དྲི་ཟའི་ལག་ནས་ལྕགས་ཀྱུས་ཁུག༔ ལྷོ་ཕྱོགས་གཤིན་རྗེའི་ལག་ནས་ཞགས་པས་ཁུག༔ ནུབ་ཕྱོགས་ཀླུ་བདུད་ལག་ནས་ལྕགས་སྒྲོག་ཁུག༔ བྱང་ཕྱོགས་གནོད་སྦྱིན་ལག་ནས་དྲིལ་བུས་ཁུག༔ སྟེང་ཕྱོགས་ཚངས་པ་བརྒྱ་བྱིན་ལག་ནས་ཁུག༔ འོག་ཕྱོགས་དགའ་བོ་འཇོག་པོའི་ལག་ནས་ཁུག༔ ཚེ་སྲོག་ཆད་པ་མཐུད་ལ་ཡར་བ་ཁུག༔ གས་པ་སྦྱོར་ལ་ཉམས་པ་ཐམས་ཅད་གསོས༔ འོད་ཟེར་དཀར་ལ་འཚེར་ཞིང་སྣུམ་ལ་འདྲིལ༔ སྤྱི་བོའི་གཙུག་ནས་ལུས་ལ་སིབ་སིབ་ཐིམ༔ འོད་འབར་འཆི་མེད་ཚེ་ཡི་དབང་ཐོབ་ཤོག༔ ཨོཾ་ཨཱཿཧཱུྃ༔ བཛྲ་གུ་རུ་པདྨ་སིདྡྷི་ཨཱཡུ་ཥ་ཧཱུཾ་ནི་ཛ༔ འདིར་རྒྱུན་བཟླས་ལྟ་བུ་ལ་མདུན་རྟེན་ཚེ་རྫ་ས་དམིགས་བསལ་བཤམས་པ་མེད་ཀྱང་གངས་བྲག་ནགས་རི་ཉི་ཟླ་གཟའ་སྐར་མཚོ་སོགས་ལ་དམིགས་པའི་རྟེན་བྱ་བ་རྡོ་རྗེའི་གསུང་གི་ངེས་དོན་ཡིན་ནོ། །དེ་ནས་བཞི་པ་གསང་བ་གུ་རུ་དྲག་པོ་སྒྲུབ་པ་ནི༔ རང་ཉིད་པདྨ་འོད་འབར་གནས་འགྱུར་ནས༔ གུ་རུ་དྲག་པོ་དམར་ནག་ཞལ་གཅིག་པ༔ ཁྲོ་གཏུམ་ཕྱག་གཉིས་རྡོ་རྗེ་སྡིག་པ་བསྣམས༔ ཁྲོ་ཆས་ཡོངས་རྫོགས་ཞབས་གཉིས་འདོར་སྟབས་ཀྱིས༔ པད་ཉི་དགྲ་
བགེགས་བསྣོལ་བའི་ཁྲི་ལ་འགྱིང་༔ སྤྱི་བོར་འཇའ་ཚོན་སྣ་ལྔའི་གུར་ཁྱིམ་དབུས༔ པདྨ་འོད་འབར་རིགས་བདག་ཚུལ་དུ་གསལ༔ སྤྱན་འདྲེན་ནི། ཧཱུྃ༔ ཆོས་སྐུ་ཞི་བའི་ངང་ལས་མ་གཡོས་ཀྱང་༔ གཟུགས་སྐུ་པདྨ་འོད་འབར་སྐད་ཅིག་ལ༔ རྔམ་བརྗིད་ཁྲོས་པའི་ངར་སྐད་ཕྱོགས་བཅུར་སྒྲོག༔ སྤྲུལ་པ་ཡང་སྤྲུལ་དཔག་ཡས་འཇིགས་ཚུལ་སྟོན༔ ཆེ་མཆོག་དམར་ནག་མེ་ཡི་ཕྲེང་བ་ཅན༔ དེང་འདིར་རྣལ་འབྱོར་བདག་གི་གྲོགས་ལ་བྱོན༔ ཛ༔ ཆོས་ཀྱི་དབྱིངས་ནས་སྒྱུ་མའི་སྐུར་བཞེངས་པ༔ དུག་གསུམ་འབར་བའི་ཁྲོ་གཏུམ་འཇིགས་གཟུགས་ཅན༔ དྲེགས་པ་སྡེ་བརྒྱད་འདུལ་ཕྱིར་གཤེགས་སུ་གསོལ༔ རྒྱལ་བསེན་དམ་སྲི་འདུལ་ཕྱིར་གཤེགས་སུ་གསོལ༔ གཉན་ལྷོག་སྨྱོ་འབོག་འདུལ་ཕྱིར་གཤེགས་སུ་གསོལ༔ མཐའ་ཡི་དམག་དཔུང་བཟློག་ཕྱིར་གཤེགས་སུ་གསོལ༔ སྣང་སྲིད་བྲན་དུ་བཀོལ་ཕྱིར་གཤེགས་སུ་གསོལ༔ དབང་དང་དངོས་གྲུབ་སྩོལ་ཕྱིར་གཤེགས་སུ་གསོལ༔ མཆོད་པ་ནི༔ ཧཱུྃ༔ སྲིད་གསུམ་ཡེ་ནས་གཏོར་གཞོང་དུ༔ སྣང་སྲིད་ཐམས་ཅད་གཏོར་མར་སྦྱར༔ འཁོར་འདས་ཡོངས་སྒྲོལ་ཆེན་པོའི་ཚོགས༔ དབང་
དྲག་འབར་བ་ཁྱེད་ལ་འབུལ༔ སྟོང་གསུམ་སྟོང་གི་གཏོར་གཞོང་དུ༔ རི་རབ་འབར་བའི་དཔལ་བཤོས་བཙུགས༔ སྐྱེ་འགྲོ་སེམས་ཅན་གྲངས་ལས་འདས༔ དབང་དྲག་འབར་བ་ཁྱེད་ལ་འབུལ༔ བྷནྡྷ་འབར་བའི་གཏོར་གཞོང་དུ༔ དགྲ་བགེགས་ཤ་ཁྲག་ཐོད་ཚིལ་སྤུངས༔ ཞག་དང་རླངས་པ་ཆི་ལི་ལི༔ དབང་དྲག་འབར་བའི་ཐུགས་དམ་བསྐང་༔ བདུད་རྩི་གཏོར་ཆེན་རཀྟའི་མཚོ༔ སྦྱོར་སྒྲོལ་ཏིང་འཛིན་ཚོགས་མཆོད་དང་༔ ཕྱི་ནང་གསང་བའི་མཆོད་སྤྲིན་གཏིབས༔ དབང་དྲག་འབར་བའི་ཐུགས་དམ་བསྐང་༔ བསྟོད་པ་ནི༔ ཧཱུྃ༔ བདེ་ཆེན་རང་བཞིན་ཁྲོས་པའི་དཀྱིལ་འཁོར་ནས༔ དཀོན་མཆོག་སྤྱི་འདུས་དམར་ནག་འབར་བའི་སྐུ༔ ཟུར་ཞལ་གཡོན་གཟིགས་ཞབས་གཉིས་འདོར་ཐབས་བསྒྲད༔ ཞལ་གདངས་ལྗགས་འདྲིལ་རྣོ་དཀར་མཆེ་བར་གཙིགས༔ དགྲ་བགེགས་ཤ་ཁྲག་རུས་པ་ཀྲུམ་ཀྲུམ་གསོལ༔ སྤྱན་གསུམ་དམར་ཟླུམ་སྡང་མིག་ཕྱོགས་བཅུར་འཁྱིལ༔ དྲེགས་པ་ཕོ་མོ་འདར་ཞིང་སྔངས་བར་བྱེད༔ ཤངས་ནས་རླུང་འཚུབ་འབྲུག་སྒྲ་ལྡིར་བ་ཡིས༔ ཁམས་གསུམ་དབང་སྡུད་སྲིད་གསུམ་ཟིལ་གྱིས་གནོན༔ རལ་པ་ཁམ་ནག་མཁའི་
དབྱིངས་སུ་སྒྲེང་༔ ཁྲོ་ཆུང་མང་པོས་དགྲ་བགེགས་ཐལ་བར་བརླག༔ ཕྱག་གཡས་གསེར་གྱི་རྡོ་རྗེས་མཐའ་དམག་བཟློག༔ གཡོན་པས་ལྕགས་སྡིག་ནག་པོའི་སྤྲུལ་པ་འགྱེད༔ ཀླུ་རྣམས་འདུལ་ཕྱིར་སྦྲུལ་རིགས་ལྔ་ཡིས་བརྒྱན༔ འཁོར་བ་སྟོང་མཛད་མགོ་ཕྲེང་ལྔ་བཅུས་བརྒྱན༔ གླང་ཆེན་ཀོ་རློན་སྟོབས་བཅུ་ལྷུན་གྱིས་རྫོགས༔ སྟག་ཤམ་ང་རྒྱལ་དྲེགས་པ་དབང་དུ་སྡུད༔ རིན་ཆེན་རུས་རྒྱན་མཁའ་འགྲོ་རོལ་དུ་ཁྲིད༔ བ་སྤུའི་རྩེ་ནས་ཁྲོ་ཆུང་ཚྭ་ཚྭ་འཕྲོ༔ མེ་དུད་ཟེར་གྱིས་སྲིད་གསུམ་སྐར་ལྟར་འཁྲུགས༔ གུ་རུ་དྲག་པོའི་སྐུ་ལ་ཕྱག་འཚལ་བསྟོད༔ དབང་དྲག་འབར་བའི་ཐུགས་དམ་དུས་ལ་བབ༔ རྣལ་འབྱོར་བདག་གི་སྔོན་གྱི་དམ་ཚིག་གིས༔ ལྷ་མཆོག་ཁྱེད་ལ་གདུང་བས་འབོད་ལགས་ན། ཁྱེད་ཀྱི་ཐུགས་དམ་གནད་ནས་ད་བསྐུལ་ཅིག༔ གདུག་པའི་དགྲ་བགེགས་འདུལ་བའི་དུས་ལ་བབ༔ ནག་པོ་ཀླུ་གཉན་འདུལ་བའི་དུས་ལ་བབ༔ དྲེགས་པ་གཟའ་རྒོད་འདུལ་བའི་དུས་ལ་བབ༔ སྡེ་བརྒྱད་ལྷ་སྲིན་འདུལ་བའི་དུས་ལ་བབ༔ པེ་ཧར་སྲོག་བདག་འདུལ་བའི་དུས་ལ་བབ༔ མཐའ་ཡི་དམག་དཔུང་བཟློག་པའི་དུས་ལ་
བབ༔ མི་ནད་ཕྱུགས་ནད་བཟློག་པའི་དུས་ལ་བབ༔ རྣལ་འབྱོར་བཅོལ་བའི་ཕྲིན་ལས་འགྲུབ་པར་མཛོད༔་རང་ཉིད་ཐུགས་ཀར་ཉི་མའི་སྟེང་༔ ཧཱུྃ་ཡིག་བྱི་རུའི་མདོག་ཅན་མཐར༔ རྩ་སྔགས་བཅུ་དྲུག་གཡོན་དུ་བཀོད༔་གཡས་སུ་དྲག་ཏུ་འཁོར་བ་ལས༔ འོད་ཟེར་དཔག་མེད་འཕྲོས་པ་ཡིས༔ ཁྲོ་བོ་ཀུན་གྱི་མཐུ་སྟོབས་དང་༔ ལྷ་སྲིན་དྲེགས་པའི་སྟོབས་ནུས་རྣམས༔ འོད་ཟེར་ཚུལ་བསྡུས་རང་ལ་ཐིམ༔ ཨོཾ་ཨཱཙྪཧཱུྃ་ཨརྩིག་ནིརྩིག་ན་མོ་བྷ་ག་ཝ་ཏེ་ཧཱུྃ་ཧཱུྃ་ཕཊ༔ ཅེས་ཕྲེང་སྐོར་བཟླས་སོ།། མཐར་སྡེ་བརྒྱད་ཤམ་བུ་ནི། ཨ་ཡ་མ་དུ་རུ་ཙ་ཤ་ན་ས་མ་ཡ་ཧཱུྃ་ཧཱུྃ་ཕཊ་ཕཊ་བྷྱོ་སྦྱོ་ཟློག་ཟློག་བྷྱོ་བཟློག་ཅིག༔ བཅུ་ཆ་བཟླའོ། །ལྔ་པ་ཡང་གསང་ཕྲིན་ལས་སྒྲུབ་པ་ནི། རང་ཉིད་གུ་རུ་དྲག་པོ་གནས་འགྱུར་ནས། །མཁའ་འགྲོ་སེང་གདོང་སེང་ཞལ་ཟླ་ལྟར་དཀར། །ནམ་མཁའི་མདོག་ཅན་གྲི་གུག་ཐོད་ཁྲག་བསྣམས། །གཅེར་བུ་རུས་པའི་རྒྱན་དྲུག་དག་གིས་བརྒྱན། །གཡོན་བརྐྱང་པད་ཉི་བམ་རོའི་གདན་ལ་འགྱིང་། །གཡོན་གྱི་གྲུ་མོར་ཁ་ཊཾ་ག་བརྟེན་ཅིང་། །སྤྱི་བོར་འཇའ་ཚོན་སྣ་ལྔའི་གུར་ཁྱིམ་དབུས། །རིགས་བདག་ཚུལ་དུ་པདྨ་འོད་འབར་གསལ། །ཐུགས་ཀར་ཡེ་ཤེས་
སེམས་དཔའི་ཚུལ་དུ་ནི། །པད་ཉིའི་གདན་ལ་གུ་རུ་དྲག་པོ་གསལ།། སྤྱན་འདྲེན་ནི། ཧཱུྃ་བྷྱོ༔ མ་སྐྱེས་རྫོགས་པ་ཆོས་ཀྱི་དབྱིངས་ཉིད་ལས༔ སྐྱེ་བའི་ཆོ་འཕྲུལ་འབར་བའི་སྐུར་སྟོན་པ༔ འགྲོ་བའི་དོན་མཛད་ཡེ་ཤེས་མཁའ་འགྲོ་མ༔ ནམ་མཁའི་མདོག་ཅན་དབུ་ནི་སེང་གེའི་གདོང་༔ གཅེར་བུ་ལོངས་སྤྱོད་རྫོགས་པའི་སྐུ་མངའ་བ༔ ཕྱག་གཡས་གྲི་གུག་གཡོན་པས་ཐོད་ཁྲག་འཛིན༔ དུག་ལྔ་གཅོད་ཅིང་སྐྱེ་མེད་དབྱིངས་སུ་རོལ༔ རྩེ་གསུམ་མཆན་དུ་བཟུང་ནས་དུག་གསུམ་སྒྲོལ༔ རུས་རྒྱན་མེ་ལོང་རྒྱན་གྱིས་ཌཱ་ཀི་དབང་དུ་སྡུད༔ ཡེ་ཤེས་མེ་རིས་མ་རིག་མུན་པ་འཇོམས༔ གཡས་བསྐུམ་གཡོན་བརྐྱང་ཐབས་ཤེས་དབྱེར་མེད་ངང་༔ པདྨ་ཉི་ཟླ་བམ་རོའི་གདན་ལ་བཞུགས༔ རང་བཞིན་གནས་ནས་སྤྱན་འདྲེན་གཤེགས་སུ་གསོལ༔ བྷྱོ༔ སྐུ་གསུང་ཐུགས་སྤྲུལ་མཁའ་འགྲོའི་ཚོགས༔ ཕྲིན་ལས་སྤྲུལ་པ་མ་མོའི་ཚོགས༔ ཀུན་ཀྱང་ཡང་སྤྲུལ་བསམ་མི་ཁྱབ༔ གུས་པའི་ཡིད་ཀྱིས་ཕྱག་འཚལ་ལོ༔ ན་མོ་ལྕང་ལོ་བཅས་པའི་བྷནྡྷ་རུ༔ དམར་གཏོར་ཁྲག་དང་ཞག་གིས་བརྒྱན༔ ཤ་སྣ་སྙིང་སྣའི་རྒྱལ་མཚན་བཙུགས༔ མཁའ་
འགྲོ་འཁོར་བཅས་ཐུགས་དམ་བསྐང་༔ རཀྟའི་རྦ་ཀློང་ཕྱ་ར་ར༔ འོ་མཚོ་དཀར་དྭངས་ཀྱི་ལི་ལི༔ ཞག་གི་རྒྱ་མཚོ་མེ་རེ་རེ༔ ཞུན་ཆེན་གསུར་དུད་ཆི་ལི་ལི༔ རྔ་དུང་རོ་མོ་དེ་རི་རི༔ རྐང་གླིང་ཐོད་རྔ་ཁྲོ་ལོ་ལོ༔ དགྲ་བོའི་ཤ་ཁྲག་དམར་ཉི་ལི་ལི༔ མཁའ་འགྲོ་འཁོར་བཅས་ཐུགས་དམ་བསྐང་༔ དམ་ཉམས་དགྲ་བགེགས་མྱུར་དུ་སྒོལ༔ ཌཱ་ཀི་ནཱི་སེང་ཧ་མུ་ཁ་ཨགྷཾ་པཱདྱ་པུངྒེ་དྷུ་པེ་ཨཱ་ལོ་ཀེ་གནྡྷེ་ནི་ཝིདྱ་ཤརྡ་པྲ་ཏིཙྪ་ཨཱཿཧཱུྃ༔ མ་ཧ་མཱ་ས་ཙིཏྟ་རཀྟ་གོ་རོ་ཙ་ན་བ་སུ་ཏ་བ་ལིཾ་ཏ་ཁཱ་ཧི༔ ཐུགས་ཀར་ཉི་མའི་དཀྱིལ་འཁོར་རྒྱས་པའི་སྟེང་། །ཧཱུྃ་ཡིག་མཐིང་ཀའི་མཐའ་མར་སྔགས་ཕྲེང་ནི། །གཡས་སུ་བཀོད་དེ་གཡོན་དུ་འཁོར་བ་ཡི། །འོད་ཀྱི་ཕྱོགས་བཅུའི་ཞིང་དང་རྩ་གསུམ་རྣམས། །སེང་གདོང་མཁའ་འགྲོའི་སྐུར་གྱུར་ཆར་ལྟར་བབ། །བདག་ལ་ཐིམ་པས་མཐུ་སྟོབས་ཕུན་ཚོགས་གྱུར། །ཨཀཿསཿམརཤདརཿསཿམཿརཿཡཿཕཊ༔ ཕྲེང་སྐོར་ལྔ་བཟླས། དུས་གཉན་ལྟ་བུར༔ མཁའ་འགྲོ་མ་སེང་གེའི་གདོང་པ་ཅན་སོགས། ཐལ་མོ་ལན་གསུམ་རྡེབ། ཁྲོ་མོ་འབར་བའི་ཚོགས་རྣམས་སོགས་ནས་བཤད་སྒྲུབ་བསྟན་པ་རྒྱས་པར་མཛོད། །བར་བརྗོད། ༈ དེ་ནས་ཚོགས་མཆོད་ནི། དང་
པོ་ཚོགས་ལ་སྤྱན་འདྲེན་པ་འདི་སྐད་དོ། ཧཱུྃ༔ བདག་ཉིད་ལྷ་ཡི་ཐུགས་ཀ་ནས༔ ཡི་གེ་རཾ་ཡཾ་ཁཾ་གསུམ་འཕྲོས༔ དངོས་འཛིན་རྣམ་རྟོག་བག་ཆགས་ཀུན༔ བསྲེགས་གཏོར་བཀྲུས་ནས་བདུད་རྩིར་གྱུར༔ ཨོཾ་ཨཱཿཧཱུྃ༔ སླར་ཡང་སྙིང་པོ་འབྲུ་གསུམ་འཕྲོས༔ འདོད་ཡོན་ཟག་མེད་སྣང་སྲིད་གང་༔ ཨོཾ་ཨཱཧཱུྃ༔ རང་བཞིན་སྐུ་གསུམ་ཞིང་ཁམས་ནས་༔ བླ་མ་ཡི་དམ་མཁའ་འགྲོ་དང་༔ ཆོས་སྐྱོང་དམ་ཅན་གཏེར་བདག་རྣམས༔ ཚོགས་ལ་སྤྱན་འདྲེན་གཤེགས་སུ་གསོལ༔ ཧྲཱིཿ ནུབ་ཕྱོགས་བདེ་བ་ཅན་གྱི་ཞིང་ཁམས་ནས༔ ཆོས་སྐུ་སྣང་བ་མཐའ་ཡས་ལ༔ ཆོས་སྐུ་རྒྱ་མཚོའི་ཚོགས་ཀྱིས་བསྐོར༔ ཚོགས་ལ་སྤྱན་འདྲེན་གཤེགས་སུ་གསོལ༔ ཤར་ཕྱོགས་པོ་ཏ་ལ་ཡི་ཕོ་བྲང་ནས༔ ལོངས་སྐུ་ཐུགས་རྗེ་ཆེན་པོ་ལ༔ ལོངས་སྐུ་རྒྱ་མཚོའི་ཚོགས་ཀྱིས་བསྐོར༔ ཚོགས་ལ་སྤྱན་འདྲེན་གཤེགས་སུ་གསོལ༔ ལྷོ་ནུབ་པདྨ་འོད་ཀྱི་གཞལ་ཡས་ནས༔ སྤྲུལ་སྐུ་པདྨ་འབྱུང་གནས་ལ༔ སྤྲུལ་སྐུ་རྒྱ་མཚོའི་ཚོགས་ཀྱིས་བསྐོར༔ ཚོགས་ལ་སྤྱན་འདྲེན་གཤེགས་སུ་གསོལ༔ གནས་མཆོག་གསང་སྔགས་འོད་འབར་ཕོ་བྲང་ནས༔ རིག་འཛིན་འཇའ་ཚོན་སྙིང་པོ་
ལ༔ ཆོས་བདག་རྒྱ་མཚོའི་ཚོགས་ཀྱིས་བསྐོར༔ ཚོགས་ལ་སྤྱན་འདྲེན་གཤེགས་སུ་གསོལ༔ ངོམ་ཡུལ་དཔལ་རིའི་སྒྲུབ་གནས་ནས༔ མཚུངས་མེད་ཀརྨ་ཆགས་མེད་ལ༔ བརྒྱུད་པའི་བླ་མའི་ཚོགས་ཀྱིས་བསྐོར༔ ཚོགས་ལ་སྤྱན་འདྲེན་གཤེགས་སུ་གསོལ༔ སྤྱི་གཙུག་ཉི་ཟླ་པདྨའི་གདན་སྟེང་དུ༔ དྲིན་ཆེན་རྩ་བའི་བླ་མ་ལོ༔ རྩ་བརྒྱུད་བླ་མའི་ཚོགས་ཀྱིས་བསྐོར༔ ཚོགས་ལ་སྤྱན་འདྲེན་གཤེགས་སུ་གསོལ༔ གཞུང་ལྟར་ན། གུ་རུ་པདྨ་འབྱུང་གནས་ལ༔ འཁོར་དུ་དཔའ་བོ་མཁའ་འགྲོས་བསྐོར༔ དབུ་སྐྲ་ཐོར་ཚུགས་ལྡེམས་སེ་ལྡེམ༔ རིན་ཆེན་རྒྱན་ཆ་སི་ལི་ལི༔ གླུ་ལེན་གར་སྟབས་ཁྱུགས་སེ་ཁྱུག༔ ནམ་མཁའ་བར་སྣང་ས་གཞི་གང་༔ གནས་ཁང་འདི་ལ་བྱིན་ཅིག་ཕོབ༔ ཚོགས་གཏོར་འདི་ལ་བཅུད་ཅིག་ཕོབ༔ དུར་ཁྲོད་གནས་མཆོག་ཉམས་རེ་དགལ༔ རྣལ་འབྱོར་ཕོ་མོ་དམ་ཚིག་གཙང་༔ ཚོགས་དང་མཆོད་རྫས་དང་རེ་སྤྲོ༔ ལྷུན་གྲུབ་འོད་ཁྱིམ་བཀྲག་མདངས་མཛེས༔ འདི་ནས་ཚོགས་ཕུད་འབུལ་ཨོཾ་ཨཱཿཧཱུྃ༔ ཚོགས་མཆོད་འོད་ཕུང་འབར་བ་འདི་མཆོད་འོས་སྐྱེས་མཆོག་རྣམས་ལ་འབུལ༔ ཉམས་ཆག་འགལ་འཁྲུལ་ཐམས་ཅད་
བཤགས༔ གཉིས་འཛིན་འཁྲུལ་སྣང་རུ་ཏྲ་འདི༔ ཞལ་དུ་བསྟབ་བོ་ཁ་རཾ་ཁཱ་ཧི༔ ཨོཾ་ཨཱཿཧཱུྃ༔ གུ་རུ་དྷེ་ཝ་ཌཱ་ཀི་ནཱི་ཀཾ་ནི་རི་ཏི་ག་ན་ཙཀྲ་པཱུ་ཛ་ཁཱ་ཧི༔ པདྨ་འོད་འབར་ཚོགས་ལ་སྦྱར་རྒྱུའི་སུན་ཟློག་ནི།ཧྲཱིཿམཁའ་འགྲོའི་དབང་ཕྱུག་པདྨ་འོད་འབར་སྐུ༔ ཌཀྐི་རྒྱ་མཚོའི་འཁོར་ཚོགས་སྤྲིན་ལྟར་གཏིབས༔ ཞལ་ཟས་ཚོགས་ཀྱི་མཆོད་པ་འདི་བཞེས་ལ༔ མ་ཚོགས་མཁའ་འགྲོ་ཡོངས་ཀྱི་སུན་མ་ཟློག༔ ཞི་བའི་ལས་མཛད་རྡོ་རྗེ་ཐོད་ཕྲེང་རྩལ༔ རྡོ་རྗེ་མཁའ་འགྲོ་འབུམ་གྱི་འཁོར་དང་བཅས༔ ཞལ་ཟས་ཚོགས་ཀྱི་མཆོད་འདི་བཞེས་ལ༔ ཤར་ཕྱོགས་རྡོ་རྗེ་མཁའ་འགྲོའི་སུན་མ་ཟློག༔ རྒྱས་པའི་ལས་མཛད་རཏྣ་ཐོད་ཕྲེང་རྩལ༔ རིན་ཆེན་མཁའ་འགྲོ་འབུམ་གྱི་འཁོར་དང་བཅས༔ ཞལ་ཟས་ཚོགས་ཀྱི་མཆོད་པ་འདི་བཞེས་ལ༔ ལྷོ་ཕྱོགས་རིན་ཆེན་མཁའ་འགྲོའི་སུན་མ་ཟློག༔ དབང་གི་ལས་མཛད་པདྨ་ཐོད་ཕྲེང་རྩལ༔ པདྨ་མཁའ་འགྲོ་འབུམ་གྱི་འཁོར་དང་བཅས༔ ཞལ་ཟས་ཚོགས་ཀྱི་མཆོད་པ་འདི་བཞེས་ལ༔ ནུབ་ཕྱོགས་པདྨ་མཁའ་འགྲོའི་སུན་མ་ཟློག༔ དྲག་པོའི་ལས་མཛད་ཀརྨ་ཐོད་ཕྲེང་རྩལ༔ ལས་ཀྱི་མཁའ་འགྲོ་འབུམ་གྱི་འཁོར་དང་
བཅས༔ ཞལ་ཟས་ཚོགས་ཀྱི་མཆོད་པ་འདི་བཞེས་ལ༔ བྱང་ཕྱོགས་ལས་ཀྱི་མཁའ་འགྲོའི་སུན་མ་ཟློག༔ རིག་འཛིན་དཔའ་བོ་ཡོངས་རྗེ་པདྨ་འབྱུང་༔ གིང་ཆེན་དཔའ་བོ་འབུམ་གྱི་འཁོར་དང་བཅས༔ ཞལ་ཟས་ཚོགས་ཀྱི་མཆོད་པ་འདི་བཞེས་ལ་རིག་འཛིན་དཔའ་བོ་ཡོངས་ཀྱི་སུན་མ་ཟློག༔ མ་མོ་ཡོངས་ཀྱི་དེད་དཔོན་པདྨ་འབྱུང་༔ སྣང་སྲིད་མ་མོ་འབུམ་གྱི་འཁོར་དང་བཅས༔ ཞལ་ཟས་ཚོགས་ཀྱི་མཆོད་པ་འདི་བཞེས་ལ༔ སྣང་སྲིད་མ་མོ་ཡོངས་ཀྱི་སུན་མ་ཟློག༔ བརྟན་མ་ཡོངས་ཀྱི་སྤྱི་རྗེ་པདྨ་འབྱུང་༔ བརྟན་སྐྱོང་སྨན་ཕྲན་མང་པོའི་འཁོར་དང་བཅས༔ ཞལ་ཟས་ཚོགས་ཀྱི་མཆོད་པ་འདི་བཞེས་ལ༔ བརྟན་མ་བཅུ་གཉིས་རྣམས་ཀྱི་སུན་མ་ཟློག༔ སྣང་སྲིད་དྲེགས་པ་ཀུན་འདུལ་པདྨོ་འབྱུང་༔ སྡེ་དཔོན་སྡེ་བརྒྱད་ཡུལ་ལྷའི་བྲན་དང་བཅས༔ ཞལ་ཟས་ཚོགས་ཀྱི་མཆོད་པ་འདི་བཞེས་ལ༔ ལྷ་སྲིན་སྡེ་བརྒྱད་རྣམས་ཀྱི་སུན་མ་ཟློག༔ ཆེ་མཆོག་པདྨའི་བཀའ་ལས་མ་འདའ་བར༔ ཚེ་དང་སྲོག་གི་བར་ཆད་ད་ཟློག་ཅིག༔ རྣལ་འབྱོར་བདག་དང་བསྲུང་བྱ་འཁོར་བཅས་རྣམས༔ ཨོ་རྒྱན་ཚེ་དཔག་མེད་ལ་སྐྱབས་གསོལ་གྱིས༔ ཐུགས་རྗེ་
མ་ཆུང་སྔོན་གྱི་དམ་བཅའ་དགོངས༔ དུས་མིན་འཆི་བའི་རྐྱེན་རྣམས་བཟློག་ནས་ཀྱང་༔ ཚེ་དང་སྒྲུབ་པ་མཐའ་རུ་ཕྱིན་པ་དང་༔ བྱང་ཆུབ་སྒྲུབ་ལ་བར་ཆད་མེད་པར་མཛོད༔ དམ་ལྡན་བདག་ནི་རྡོ་རྗེའི་དམ་ཚིག་ཅན༔ ལུས་རྟེན་འདི་ལ་སངས་རྒྱས་མ་ཐོབ་པར༔ སྐྱེ་འཆི་འཕོ་འགྱུར་མེད་པར་དམ་བཅའ་འོ༔ ཡེ་ཤེས་ལས་དང་འཇིག་རྟེན་སར་གནས་པའི༔ མ་མོ་འཁའ་འགྲོ་ལྷ་སྲིན་ཐམས་ཅད་ཀྱང་༔ བདག་གིས་བྱང་ཆུབ་བསྒྲུབ་ལ་གེགས་མ་བྱེད༔ གལ་ཏེ་བྱང་ཆུབ་སྒྲུབ་ལ་གེགས་བྱེད་པ༔ ལྕང་ལོ་ཅན་དུ་ཁྲོ་བོའི་ཆད་པས་བསྡིགས༔ དམ་ཚིག་ཉམས་ནས་རྡོ་རྗེ་དམྱལ་བར་ལྟུང་༔ དེ་བས་དུས་མིན་འཆི་བའི་རྐྱེན་སོལ་ལ༔ སྒྲུབ་མཆོག་རྣལ་འབྱོར་སྐུ་ཚེ་བསྲིང་བར་མཛོད༔ ཨོ་དྷཱ་ཀི་ནཱི་ས་ར་ན་མུ་ཁུ་ས་དུ་ན་ཟློག༔ ཅེས་བརྗོད་ཨོ་རྒྱན་རིག་འཛིན་དོན་དུ་ཨ་རཱ་གས་འཕྲལ་དུ་བྲིས་པ་མངྒ་ལཾ༔ པདྨ་འོད་འབར་གྱི་གཏོར་བསྔོས་བསྡུས་པ་བཞུགས་སོ།། རླུང་མེ་ཐོད་སྐྱེད་སྟེང་དུ་ཀ་པཱ་ལ། །ཡངས་ཤིང་རྒྱ་ཆེ་སྟོང་གསུམ་མཉམ་པའི་ནང་། །གཏོར་མ་ཟག་མེད་བདུད་རྩིའི་རྒྱ་མཚོ་ལས། །རླངས་པ་མཆོད་པའི་ལྷ་མོ་དཔག་མེད་སྤྲོས། །ཐམས་ཅད་ཕྱག་ན་བྷནྡྲ་
རེ་རེ་བསྣམས། །བདུད་རྩིའི་རྒྱ་མཚོ་བཅུས་ཤིང་ལྷ་ལ་མཆོད། །ལྷ་ཚོགས་ཐམས་ཅད་མཉེས་ཤིང་ཚིམ་པར་གྱུར། །ཨོཾ་སརྦ་གུ་རུ་ཨི་དཾ་བྷ་ལིཾ་ཏ་ཁ་ཁ་ཁཱ་ཧི། །ༀ་གུ་རུ་ཨ་ཡུསིདྡྷི་ཧཱུྃ་ཧི༔ ཨ་མཱ་ར་ཎི་ཛཱི་ཝན་ཏི་ཡེ་སྭཱ་ཧཱ། ཨི་དམ༔ ཨོཾ་ཨཱཧཱུྃ་ཧི༔ ཨོཾ་མ་ཎི་པདྨེ་ཧཱུྃ༔ ཨི་དཾ༴ ཨོཾ་ཨཱཧཱུྃ་བཛྲ་གུ་རུ་པདྨ་སིདྡྷི་ཧཱུྃ༔ ཨི་དམ༔ ཨོཾ་ཨཱཧཱུྃ་ཨརྩིག་ནིརྩིག་ན་མོ་བྷ་ག་ཝ་ཏེ་ཧཱུྃ་ཧཱུྃ་ཕཊ༔ ཨི་དམ༴ ཨོཾ་ཤྲཱི་བཛྲ་ཌཱ་ཀི་ནཱི་སེང་ཧ་མུ་ཁ་ཨི་དམ༔ ཨོཾ་བཛྲ་ཀ་ཝུ་ཝ་མ་ཧཱ་ཀཱ་ལ་ཡ་ཧཱུྃ་ཕཊ༔ ཨི་དམ༔ ཨོཾ་ཛམ་བྷ་ལ་ཛ་ལནྡྲ་ཡེ། ཨི་དམ་ཧི༔ སྣང་བ་མཐའ་ཡས་ཐུགས་རྗེ་ཆེན་པོ་དང་། །པདྨ་འབྱུང་གནས་རྗེ་འབངས་ཉེར་ལྔ་ལ། །རྣམ་དག་དམ་རྫས་བདུད་རྩིའི་གཏོར་མ་འབུལ། །གྲུབ་ཆེན་བརྒྱད་ཅུ་གཏེར་སྟོན་བརྒྱ་རྩ་བརྒྱད། །རྒྱ་བོད་རིག་འཛིན་གྲུབ་ཐོབ་ཐམས་ཅད་ལ། །རྣམ་དག་དམ་རྫས་བདུད་རྩིའི་གཏོར་མ་འབུལ། །རྡོ་རྗེ་འཆང་ཆེན་ཏེ་ལོ་ནཱ་རོ་དང་། །མར་མི་དྭགས་པོ་ཕག་གྲུ་ཐང་པ་དང་། །སངས་རྒྱས་དབོན་པོ་ཨོ་རྒྱན་མགོན་པོ་དང་། །དྲིན་ཆེན་ཆོས་རྗེ་བཀྲ་ཤིས་དཔལ་གྲུབ་ལ། །རྣམ་དག་དམ་རྫས་བདུད་རྩིའི་གཏོར་མ་འབུལ། །གཞན་
ཡང་དབང་ལུང་མན་ངག་ཐོབ་པ་ཡི། །དྲིན་ཆེན་རྩ་བརྒྱུད་བླ་མ་ཐམས་ཅད་ལ། །རྣམ་དག་དམ་རྫས་བདུད་རྩིའི་གཏོར་མ་འབུལ། །བླ་མ་སྐུ་གསུམ་སྐུ་ལྔ་མཚན་བརྒྱད་དང་། །ཞི་བ་པདྨ་འོད་འབར་ལྷ་ཚོགས་ལ། །རྣམ་དག་དམ་རྫས་བདུད་རྩིའི་གཏོར་མ་འབུལ། །ཡི་དམ་ཚེ་དཔག་མེད་དང་སྤྱན་རས་གཟིགས། །གུ་རུ་དྲག་པོའི་ལྷ་ཚོགས་ཐམས་ཅད་ལ། །རྣམ་དག་དམ་རྫས་བདུད་རྩིའི་གཏོར་མ་འབུལ། །།སེང་གདོང་ཌཱ་ཀི་མཁའ་འགྲོ་བྱེ་བ་འབུམ། །བསྟན་སྲུང་ཕྱག་བཞི་པ་དང་ཛཾ་བྷ་ལྷ། །མཁའ་འགྲོ་ཆོས་སྐྱོང་ནོར་ལྷ་ཐམས་ཅད་ལ། །རྣམ་དག་དམ་རྫ་ས་བདུད་རྩིའི་གཏོར་མ་འབུལ། །བདག་ཅག་མི་ནོར་འཁོར་དང་བཅས་པ་ལ། །ཐུགས་རྗེས་གཟིགས་ལ་བསྲུང་ཞིང་སྐྱབས་པ་དང་། །མཆོག་དང་ཐུན་མོང་དངོས་གྲུབ་བསྩལ་དུ་གསོལ། །བླ་མ་གསུང་གི་གཏོར་བསྔོས་ཨ་རཱ་གས་བྲིས་པའོ། །ཡང་ཟབ་དཀོན་མཆོག་སྤྱི་འདུས་ཀྱི་བསྐང་བའི་ཆོ་ག་ལྟ་སྒོམ་ལྡན་པས་འདི་སྐད་དོ།། ཨོ་ཨཱཧཱུྃ༔ ཨོཾ་བཛྲ་ཨ་མྲྀ་ཏ་ཀུཎྜ་ལཱི་ཧ་ན་ཧ་ན་ཧཱུྃ་ཕཊ༔ ཨོཾ་སྭ་བྷ་ཝ་ཤུདྡྷསརྦ་དྷརྨཱ་སྭ་བྷ་ཝ་ཤུདྡྷོཉཧཾ༔ སྟོང་པའི་ངང་ལས་ཡཾ་ལས་རླུང་༔ རཾ་ལས་མེ༔ ཀཾ་ལས་ཐོད་པའི་སྐྱེད་
པུ་གསུམ་གྱི་སྟེང་དུ༔ ཀ་པཱ་ལ་ཡངས་ཤིང་རྒྱ་ཆེ་བའི་ནང་དུ༔ བསྐང་བའི་རྫས༔ མཆོད་པའི་རྫས༔ རྟེན་པའི་རྫས༔་བསྒྲུབ་པའི་རྫས༔ ནམ་མཁའ་ལ་སྤྲིན་བཞིན་གཏིབས་པ༔ བར་སྣང་ལ་ཆར་བཞིན་དུ་བབས་པ༔ ས་གཞི་ལ་གཅལ་དུ་བཀྲམ་པ༔ འཕགས་པ་ཀུན་ཏུ་བཟང་པོའི་མཆོད་པའི་སྤྲིན་ཕུང་དུ་གྱུར་པ་འདི་དག་བཀའ་བརྒྱུད་བླ་མ༔ ཡི་དམ་ལྷ་ཚོགས༔ དཔའ་བོ་མཁའ་འགྲོ༔ ཆོས་སྐྱོང་སྲུང་མ་རྣམས་ཀྱི་བསྐལ་པ་དང་བསྐལ་པའི་བར་དུ༔ ཐུགས་དམ་གཉན་པོ་ཡོངས་སུ་བསྐང་བར་གྱུར་ཅིག་ཞིང་ཁམས་ཐམས་ཅད་ཡོངས་སུ་གང་བར་གྱུར་ཅིག༔ མངའ་རིས་ཐམས་ཅད་རྒྱས་པར་གྱུར་ཅིག༔ དེ་དག་གི་ཐུགས་རྗེ་དང་བྱིན་རླབས་ལ་བརྟེན་ནས་བདག་སོགས་སེམས་ཅན་ཐམས་ཅད་ཀྱི༔ རྒྱུ་ཚོགས་གཉིས་རྫོགས༔ ལམ་སྒྲིབ་གཉིས་བྱང་ནས༔ སངས་རྒྱས་ཀྱི་གོ་འཕང་རིན་པོ་ཆེ་ཐོབ་པར་གྱུར་ཅིག༔ ཨོཾ་ཨཱཿཧཱུྃ༔ ཞེས་ལན་གསུམ་བརྗོད། ཅེས་པ་འདི་རྙིང་མའི་བསྐང་བ་ཐམས་ཅད་ལ་བྱིན་རླབས་ཆོག་པའི་རྒྱུར། རཱ་ག་ཨ་སྱས་རྒྱལ་སྟག་ཟླ་བའི་ཡར་ཚེས་བཅུ་ལ་བྲིས་པའོ།། རྩ་བ་གསུམ་ལ་ཕྱག་འཚལ་ལོ༔ རྣལ་འབྱོར་པ་གང་ཞིག་ཚོགས་གཉིས་མཆོག་ཏུ་གྱུར་པ་ལ་ཞི་ཁྲོ་བཀའ་བརྒྱད་ཀྱི་
སྒྲུབ་པའམ༔ བསྙེན་སྒྲུབ་དབང་དུས་ཚོགས་མཆོད་བགྱིས་སྐབས་སུ༔ ཚོགས་གཏོར་ཅི་འབྱོར་སྟོབས་བསྐྱེད་ལ་བཤམས་ཤིང་སྐབས་སུ་བབ་པ་དང་༔ བསང་སྦྱང་སྤེལ་བ་བྱིན་རླབས་རྣམས་ཆོ་ག་གཞན་ནས་འབྱུང་བ་ལྟར་བྱས་ལ༔ བསྐང་བའི་ཆོ་ག་ཤིན་ཏུ་རྒྱས་པའམ༔ སྤྲོས་པ་ཉུང་ལ་དགའ་བ་རྣམས་ཀྱིས་འདི་ཙམ་ཞིག་ལྟ་སྒོམ་དང་ལྡན་པས་གྱེར་རོ༔ དཀོན་སྤྱིའི་རྒྱལ་བ་སྤྱི་བསྐང་བཞུགས་སོ། ཧྲཱི༔ མ་བཅོས་སྤྲོས་བྲལ་གནས་ལུགས་མངོན་གྱུར་པའི༔ རྒྱལ་བ་དགོངས་པ་བརྒྱུད་པའི་ཐུགས་དམ་བསྐང་༔ ཏིང་འཛིན་མཆོག་བརྙེས་བརྡ་ཡི་བརྒྱུད་པ་སྟེ༔ རིག་འཛིན་རིག་པ་བརྒྱུད་པའི་ཐུགས་དམ་བསྐང་༔ བཀའ་ལུང་ལྷག་ཆད་མེད་པའི་དཀྱིལ་འཁོར་ནས༔ སྙན་ཁུང་བརྒྱུད་པའི་བླ་མའི་ཐུགས་དམ་བསྐང་༔ བཀའ་བརྒྱུད་གཏེར་དུ་སྦས་པའི་བྱ་ར་མཛད༔ མཁའ་འགྲོ་གཏད་རྒྱ་བརྒྱུད་པའི་ཐུགས་དམ་བསྐང་༔ མ་འོངས་ལས་འཕྲོ་ལྡན་པ་ལུང་དུ་བསྟན༔ སྨོན་ལམ་དབང་བསྐུར་བརྒྱུད་པའི་ཐུགས་དམ་བསྐང་༔ ཤེས་བྱ་ཐམས་ཅད་རྣམ་པ་ཀུན་མཁྱེན་པའི༔ དུས་གསུམ་སངས་རྒྱས་རྣམས་ཀྱི་ཐུགས་དམ་བསྐང་༔ འགྲོ་ཀུན་ཞི་བདེའི་གནས་སུ་འདྲེན་མཛད་པའི༔ གསུང་རབ་དམ་ཆོས་རྣམས་ཀྱི་ཐུགས་དམ་བསྐང་༔ ས་
དང་ལམ་ལ་གནས་ནས་བསྟན་པ་སྐྱོང་༔ འཕགས་པའི་དགེ་འདུན་རྣམས་ཀྱི་ཐུགས་དམ་བསྐང་༔ ལྟ་སྒོམ་མཁྱེན་པ་མཆོག་ལ་མངའ་བརྙེས་པའི༔ སྐྱེས་མཆོག་བླ་མ་རྣམས་ཀྱི་ཐུགས་དམ་བསྐང་༔ དངོས་གྲུབ་ཐོགས་པ་མེད་པར་སྩོལ་མཛད་པའི༔ ཡི་དམ་ལྷ་ཚོགས་རྣམས་ཀྱི་ཐུགས་དམ་བསྐང་༔ ཕྱི་དང་ནང་གི་བར་ཆད་ཀུན་སེལ་བའི༔ མཁའ་འགྲོ་དམ་ཅན་རྣམས་ཀྱི་ཐུགས་དམ་བསྐང་༔ མ་སྐྱེས་གདོད་ནས་རང་བཞིན་རྣམ་པར་དག༔ སྐྱེ་མེད་མངོན་འགྱུར་ཆོས་སྐུའི་ཐུགས་དམ་བསྐང་༔ དུག་ལྔ་ཡེ་ཤེས་ལྔ་ཡི་ངོ་བོར་སྨིན༔ ཞི་ཁྲོ་ལོངས་སྤྱོད་རྫོགས་སྐུའི་ཐུགས་དམ་བསྐང་༔ རང་སྣང་མ་འགགས་གཞན་སྣང་དེར་སྟོན་པའི༔ སྤྲུལ་སྐུའི་འགྲོ་དོན་མཛད་པའི་ཐུགས་དམ་བསྐང་༔ རྒྱས་པར་འདོད་ན། ཧི༔ ཞི་བ་ལྷུན་གྱིས་གྲུབ་པའི་དཀྱིལ་འཁོར་ནས༔ བཞི་བཅུ་རྩ་གཉིས་རྒྱལ་བའི་ཐུགས་དམ་བསྐང་༔ ཁྲག་འཐུང་རོལ་པའི་དུར་ཁྲོད་ཆེན་པོ་ནས༔ ལྔ་བཅུ་རྩ་བརྒྱད་ཁྲོ་བོའི་ཐུགས་དམ་བསྐང་༔ བཀའ་བརྒྱད་ལྟར་བྱེད་ན། ཧཱུྃ༔ སྐུ་མཆོག་འགྱུར་བ་མེད་པའི་དཀྱིལ་འཁོར་ནས༔ འཇམ་དཔལ་སྐུ་ཡི་ལྷ་ཚོགས་ཐུགས་དམ་བསྐང་༔ གསུང་མཆོག་
འགགས་པ་མེད་པའི་དཀྱིལ་འཁོར་ནས༔ པདྨ་གསུང་གི་ལྷ་ཚོགས་ཐུགས་དམ་བསྐང་༔ ཐུགས་མཆོག་གཡོ་བ་མེད་པའི་དཀྱིལ་འཁོར་ནས༔ ཡང་དག་ཐུགས་ཀྱི་ལྷ་ཚོགས་ཐུགས་དམ་བསྐང་༔ ཡོན་ཏན་ལྷུན་གྱིས་གྲུབ་པའི་དཀྱིལ་འཁོར་ནས༔ བདུད་རྩི་ཡོན་ཏན་ལྷ་ཚོགས་ཐུགས་དམ་བསྐང་༔ ཕྲིན་ལས་དྲག་པོས་བསྒྲལ་བའི་དཀྱིལ་འཁོར་ནས༔ ཕུར་པ་ཕྲིན་ལས་ལྷ་ཚོགས་ཐུགས་དམ་བསྐང་༔ ཤ་ཁྲག་རྒྱ་མཚོར་འཁྱིལ་བའི་དཀྱིལ་འཁོར་ནས༔ མ་མོ་རྦོད་གཏོང་ལྷ་ཚོགས་ཐུགས་དམ་བསྐང་༔ ཐུགས་རྗེའི་གདུང་འཚོབ་སྐུ་ཡི་དཀྱིལ་འཁོར་ནས༔ རིག་འཛིན་སློབ་དཔོན་ལྷ་ཚོགས་ཐུགས་དམ་བསྐང༔ དམ་རྫས་རྫ་ལྟར་ལྷགས་པའི་དཀྱིལ་འཁོར་ནས་འཇིག་རྟེན་མཆོད་བསྟོད་ལྷ་ཚོགས་ཐུགས་དམ་བསྐང་༔ དགྲ་བགེགས་གདུག་པ་འདུལ་བའི་དཀྱིལ་འཁོར་ནས༔ དམོད་པ་དྲག་སྔགས་ལྷ་ཚོགས་ཐུགས་དམ་བསྐང་༔ བསྡུ་ན་འདི་མན་ཆད་ཀྱིས་འཐུས། ཧྲཱིཿ དུས་གསུམ་སངས་རྒྱས་ཀུན་གྱི་ངོ་བོ་ཉིད༔ བླ་མེད་དཀོན་མཆོག་སྤྱི་འདུས་ཐུགས་དམ་བསྐང་༔ ལྷ་སྲིན་སྡེ་བརྒྱད་འདུལ་བའི་དཀྱིལ་འཁོར་ནས༔ གུ་རུ་དྲག་པོའི་ལྷ་
ཚོགས་ཐུགས་དམ་བསྐང་༔ ཨ་ཏི་བླ་མེད་བཀའ་ཡི་བྱ་ར་མ༔ མཁའ་འགྲོ་སེང་གེའི་གདོང་ཅན་ཐུགས་དམ་བསྐང་༔ སངས་རྒྱས་ཀུན་གྱི་བསྟན་པ་སྲུང་མཛད་པ༔ ཆོས་སྐྱོང་མ་མགོན་ལྕམ་དྲལ་ཐུགས་དམ་བསྐང་༔ དཔལ་གྱི་སྤྱན་སྔར་རང་རྟགས་སྲོག་སྙིང་ཕུལ༔ དམ་ཅན་རྒྱ་མཚོ་ཡོངས་ཀྱི་ཐུགས་དམ་བསྐང་༔ སྒྲུབ་པ་པོ་ལ་དངོས་གྲུབ་ཆར་འབེབས་པའི༔ རྒྱལ་ཆེན་རྣམ་ཐོས་སྲས་ཀྱི་ཐུགས་དམ་བསྐང་༔་སྟོང་ཁམས་འདི་ལ་དྲག་རྩལ་ལྡན་པ་ཡི༔ གཟའ་བདུད་རཱ་ཧུ་ལ་ཡི་ཐུགས་དམ་བསྐང་༔ གསང་སྔགས་རྒྱུད་སྡེ་ཀུན་གྱི་གཉེར་ཁ་གཏད༔ དམ་ཅན་རྡོ་རྗེ་ལེགས་པའི་ཐུགས་དམ་བསྐང་༔ ཨོ་རྒྱན་པདྨས་བཀའ་ཡི་གཉེར་དུ་བསྐོས༔ གཏེར་བདག་གཏེར་སྲུང་རྣམས་ཀྱི་ཐུགས་དམ་བསྐང་༔ ཚུལ་བཞིན་སྒྲུབ་པ་བྱེད་པའི་གྲོགས་མཛད་མ༔ གཞི་བདག་གཞིའི་སྲུང་རྣམས་ཀྱི་ཐུགས་དམ་བསྐང་༔ ཧཱུྃ༔ གཞན་ཡང་ཐུགས་དམ་བསྐང་བའི་དམ་རྫས་ནི༔ རྩ་བརྒྱད་སྟོང་ལ་སྦྱར་བའི་བདུད་རྩི་དང་༔ པདྨ་ཚྭ་སར་སྦྱར་བའི་རཀྟ་དང་༔ ཁྱད་པར་རྨད་དུ་བྱུང་བའི་གཏོར་མ་དང་༔ ཚོགས་ཀྱི་ཡོ་བྱད་ལོངས་སྤྱོད་རྒྱ་ཆེན་འདིས་ཁྱེད་རྣམས་ཐུགས་དམ་
གཉན་པོ་བསྐང་གྱུར་ཅིག༔ ཁྱེད་རྣམས་ཐུགས་དམ་གཉན་པོ་བསྐངས་གྱུར་ནས༔ བདག་གི་གཡར་དམ་གཉན་པོ་སོར་སྩོལ་ཅིག༔ བསྐང་གྱུར་དབང་དང་དངོས་གྲུབ་བསྩལ་དུ་གསོལ༔ ཧཱུྃ༔ བསྐང་དུ་མེད་དེ་སྐྱེ་མེད་ངང་དུ་བསྐང་༔ མཆོད་དུ་མེད་དེ་གཉིས་མེད་རོལ་པས་མཆོད༔ སྦྱོར་དུ་མེད་དེ་ཟུང་འཇུག་ཆེན་པོར་སྦྱོར༔ སྒྲོལ་དུ་མེད་དེ་མཉམ་ཉིད་དབྱིངས་སུ་བསྒྲལ༔ ཡེ་སྦྱོར་ཡེ་སྒོལ་ཆེན་པོའི་ཐུགས་དམ་བསྐང་༔ ཚོགས་བཤགས་ནི། ཧོ༔ དཀོན་མཆོག་སྤྱི་འདུས་དགོངས་སུ་གསོལ༔ པདྨ་འོད་འབར་ལ་ཕྱག་འཚལ༔ རྒྱལ་བའི་བཀའ་དང་བླ་མའི་ལུང་༔ ཇི་བཞིན་མ་སྤྱད་སློབ་དཔོན་སྨད༔ རྡོ་རྗེའི་མཆེད་དང་ལྕམ་དྲལ་ལ༔ ལྟ་ལོག་གནོད་སེམས་ངན་དུ་སྨྲས༔ སྡིག་བཙོག་གནོད་པ་དངོས་སུ་བགྱིས༔ ལྷ་དང་དཀྱིལ་འཁོར་ཉམས་མ་གསལ༔ ཛབ་བཟླས་མ་དག་ཟུར་ཆག་གཡེལ༔ གསང་བར་འོས་དང་གཉེར་གཏད་སྨྲས༔ གསང་བཅུ་བསྒྲགས་ཤིང་བླ་མ་བསླུས༔ རྩ་བའི་དམ་ཉམས་མཐོལ་ཞིང་བཤགས༔ གཞན་ཡང་སྤྱད་བྱའི་དམ་ཚིག་ལྔ༔ མི་སྤང་ལྔ་དང་དངས་ལེན་ལྔ༔ ཤེས་བྱ་ལྔ་དང་བསྒྲུབ་བྱ་
ལྔ༔ ཡན་ལག་དམ་ཉམས་མཐོལ་ཞིང་བཤགས༔ བསྙེན་སྒྲུབ་ཏིང་འཛིན་དམ་གཡེལ་ཞིང་༔ ཉ་ཤི་དུས་དྲུག་དུས་མཆོད་ཆག༔ ལེ་ལོ་གསོག་འཇོག་ཚོགས་སྤྱད་བྱས་ཕུད་ལྷག་ཉམས་ཤིང་ཁ་ཚར་ཤོར༔ ཚོར་དང་མ་ཚོར་རྐྱེན་དབང་གིས༔ སྒོ་གསུམ་བག་མེད་དམ་འགལ་བཤགས༔ དམ་ཚིག་ཉམས་དང་ཚོགས་འདྲེས་དང་༔ བསྐངས་ཤིང་ཆོས་བཤད་འགྲོགས་ལ་སོགས༔ ཉམས་ཆག་སྐྱོན་གྱིས་གོས་པ་རྣམས༔ འགྱོད་པས་བཤགས་སོ་དག་གྱུར་ཅིག༔ ཡིད་ཀྱི་དམ་ཉམས་ལྟ་བས་བཤགས༔ དེ་ཡང་ཀུན་གཞི་བྱང་ཆུབ་སེམས༔ ཡིན་པ་མེད་པའི་ལྟ་བ་རྟོགས༔ མིན་པ་མེད་པས་སྒོམ་ཉམས་ལན༔ ཡིན་མིན་མེད་པའི་སྤྱོད་པ་རྟོགས༔ རེ་དོགས་མེད་པར་བྱང་ཆུབ་ནས༔ རྩ་བ་ཡན་ལག་ཐམས་ཅད་ཀྱི༔ ཉམས་ཆག་མ་བྱུང་མ་སྐྱེས་པ༔ བཤག་བྱ་བཤགས་བྱེད་གཉིས་མེད་གྲོལ༔ ཨོཾ་བཛྲ་སཏྭ་མ་ཡ༔ སོགས་ནས་སཏཱ་ཨཱ༔ འདིའི་ཚིག་རྐང་དང་པོ་གཉིས་གསུང་རྒྱུན་དང་འཕྲོས་གསང་བ་ཡོངས་རྫོགས་ཀྱི་རྒྱུད་ཚིག་གོ། བདག་ཅག་གིས་ཚེ་འཁོར་བ་ཐོག་མ་མེད་པ་ནས་བསགས་པའི་ལས་ངན་པའི་སྡིག་པ་དང་སྒྲིབ་པ་ཐམས་ཅད་བྱང་ཞིང་དག་ནས་ཀུན་བཟང་
ཡངས་པ་ཆེན་པོའི་ཀློང་དུ་ཁ་བསྐང་ཞིང་བདེ་ཆེན་ཆོས་ཉིད་ཀྱི་དབྱིངས་སུ་སོར་ཆུད་པར་གྱུར་ཅིག༔ བསྐང་བ་གཞན་དང་ན་རཀ་ལ་སོགས་ཟུང་བཞིའི་བཤགས་པ་རྣམས་འདིར་བྱའོ། །གནམ་ཕུད་འཐོར་ལ། ཨོཾ་ཨཱཿཧཱུྃ༔ བླ་མ་རྒྱ་མཚོ་ཚོགས་ལ་རོལ༔ ཡི་དམ་རྒྱ་མཚོ་ཚོགས་ལ་རོལ༔ མཁའ་འགྲོ་རྒྱ་མཚོ་ཚོགས་ལ་རོལ༔ ཆོས་སྐྱོང་སྲུང་མ་ཚོགས་ལ་རོལ༔ ནོར་ལྷ་གཏེར་བདག་ཚོགས་ལ་རོལ༔ སྣང་སྲིད་ལྷ་འདྲེ་ཚོགས་ལ་རོལ༔ ཡུལ་ལྷ་གཞི་བདག་ཚོགས་ལ་རོལ༔ རིགས་དྲུག་ཕ་མ་ཚོགས་ལ་རོལ༔ ལན་ཆགས་བགེགས་རིགས་ཚོགས་ལ་རོལ༔ ལ་ལ་ཕྱི་ཡི་ཚོགས་ལ་རོལ༔ ལ་ལ་ནང་གི་ཚོགས་ལ་རོལ༔ ལ་ལ་གསང་བའི་ཚོགས་ལ་རོལ༔ དེ་ཁོ་ན་ཉིད་ཀྱི་ཚོགས་བདེ་བ་ཆེན་པོ་ལ་རོལ༔ ག་ཎ་ཙཀྲ་པཱུ་ཛ་ཁཱ་ཧི༔ དེ་ནས་རྡོ་རྗེ་སློབ་དཔོན་སོགས་ལ་རིམ་པ་བཞིན་ཚོགས་དྲངས་བ་ནི། ཀྱེ་རྡོ་རྗེ་སློབ་དཔོན་སོགས་ལེན་པ་པོས། ཧོ་སྣང་བའི་ཆོས་ལ་སོགས་ལས་རྡོར་གྱིས། ཧོ༔ ཚོགས་ཀྱི་མཆོད་པ་རྒྱན་དུ་རོལ༔ ཞེས་སྟོབ་ལེན་པ་པོས། ཨ་ལ་ལ་ཧོ༔ ཞེས་བླངས་ལ་ནང་གི་སྲེག་བླུགས་ཀྱིས་རོལ༔ ལྷག་མ་ནི། ཨོཾ་ཨཱཿཧཱུྃ༔ ལྷག་ལ་དབང་བ་དྲེགས་པའི་ཚོགས༔ སྤྲིན་ལྟར་གཏིགས་ཤིང་
ཧབ་ཤ་རྒྱུག༔ ཤ་ཁྲག་བརྒྱན་པའི་ཚོགས་ལྷག་བཞེས༔ སྔོན་གྱི་དམ་ཚིག་ཇི་བཞིན་དུ༔ བསྟན་དགྲ་དམ་ཉམས་ཟས་སུ་ཟོ༔ རྟགས་དང་མཚན་མ་མྱུར་དུ་སྟོན༔ སྒྲུབ་པའི་བར་ཆད་བཟློག་པ་དང་༔ ཕྲིན་ལས་ཐོགས་མེད་འགྲུབ་པར་མཛོད༔ ཨུཙྪིཥྛ་བ་ལི་ཏ་ཁཱ་ཧི༔ དེ་ནས་དཀར་གཏོར་སོགས་གཏོར་འབུལ་རྣམས་རིམ་བཞིན་བཤམས་ལ། དཀོན་མཆོག་སྤྱི་འདུས་ཀྱི་གཏེར་སྲུང་ལ་གཏོར་འབུལ་ནི། ཧཱུྃ༔ ཤར་ཕྱོགས་ཀོང་པོ་ཞེས་བྱ་བ། །བདུད་དང་སྲིན་པོ་གནས་པའི་ཡུལ། །བྲག་རི་རྡོ་རྗེ་གནམ་བསླང་འདྲ། །ཧམ་འཕྲང་ཞེས་བྱའི་མཚོ་གཉན་ནི། །མཐོང་དང་བལྟ་བར་མི་བཟོད་པ། །ཤིན་ཏུ་འཇིགས་པའི་གནས་མཆོག་ནས། །གཏེར་སྲུང་ཀླུ་བདུད་མཚོ་སྨན་གཉིས། །འདིར་གཤེགས་བརྒྱན་པའི་གཏོར་མ་བཞེས། །སློབ་དཔོན་པདྨའི་བཀའ་བཞིན་དུ། །ཡང་ཟབ་སྒྲུབ་པའི་རྣལ་འབྱོར་གྱི། །འགལ་རྐྱེན་སོལ་ལ་མཐུན་རྐྱེན་སྒྲུབས། །སྒྲུབ་པའི་བར་ཆད་ཞི་བ་དང་། །བསམ་པ་འགྲུབ་པའི་སྡོང་གྲོགས་མཛོད། །ཨོཾ་ནཱ་ག་རུ་ཏྲ་ནཱ་ག་ནི་བྷ་ལིཾ་ཏ་ཁ་ཁ་ཁཱ་ཧི་ཁཱ་ཧི། ཞེས་བསྔོས་ནས། ནཱ་ག་རུ་ཏྲ་ནཱ་ག་ནི་གཙྪ། ཞེས་གཤེགས་སུ་གསོལ། ཞེས་རྣལ་འབྱོར་པ་ཨོ་རྒྱན་རིག་འཛིན་གྱིས་བསྐུལ་
ཕྱིར། ༧ ཨ་རཱ་གས་འཕྲལ་དུ་བྲིས་པའོ། །གུ་རུ་དྲག་པོའི་བསྐུལ་ནི། ན་མོ༔ དཀོན་མཆོག་གསུམ་དང་རྩ་བ་གསུམ་གྱི་བདེན་པས་གནོད་ཅིང་འཚེ་བར་བྱེད་པའི་དགྲ་བགེགས་ཐམས་ཅད་གཏོར་མ་འདིའི་ནང་དུ་ཁུག་ཅིག༔ ཛཧཱུྃ་བཾ་ཧོ༔ དགྲ་བགེགས་ཀྱི་ཤ་ཁྲག་བདུད་རྩིའི་རང་བཞིན་དུ་གྱུར༔ ཨོཾ་ཨཱཧཱུྃ༔ སརྦ་དྷརྨཱ་པ་ལ་དགྲ་བགེགས་ཀྱི་ཤ་ཁྲག་ལ་ཁཱ་ཧི༔ ཧཱུྃ༔ ལྷོ་ནུབ་སྲིན་པོའི་གྲོང་ཁྱེར་ནས༔ དམར་ནག་མེ་ཕྲེང་འཁོར་དང་བཅས༔ འདིར་གཤེགས་བརྒྱན་པའི་གཏོར་མ་བཞེས༔ གནོད་བྱེད་དགྲ་བགེགས་བཟློག་ཏུ་གསོལ༔ རབ་འབར་འཁྲིགས་པའི་དུར་ཁྲོད་ནས༔ སེང་གདོང་ལྷ་མོ་འཁོར་དང་བཅས༔ འདིར་གཤེགས་བརྒྱན་པའི་གཏོར་མ་བཞེས༔ གནོད་བྱེད་དགྲ་བགེགས་བཟློག་ཏུ་གསོལ༔ བསིལ་བ་ཚལ་གྱི་དུར་ཁྲོད་ནས༔ བྱ་རོག་མཚན་ཅན་འཁོར་དང་བཅས༔ འདིར་གཤེགས་བརྒྱན་པའི་གཏོར་མ་བཞེས༔ གནོད་བྱེད་དགྲ་བགེགས་བཟློག་ཏུ་གསོལ༔ བཀའ་དང་དམ་ཚིག་གཞལ་ཡས་ནས༔ ཕྱི་ནང་གསང་བའི་སྡེ་བརྒྱད་ཚོགས༔ འདིར་གཤེགས་བརྒྱན་པའི་གཏོར་མ་བཞེས༔ གནོད་བྱེད་དགྲ་བགེགས་བཟློག་ཏུ་
གསོལ༔ ཧཱུྃ། དམར་ནག་ཟུར་གསུམ་འབར་བའི་དཀྱིལ་འཁོར་ནས། །ལས་ཀྱི་དབང་དྲག་སྲིན་པོའི་གཟུགས་ཅན་གྱི། །སྐུ་ལས་མེ་འོད་མཚོན་ཆ་ཡ་ལ་ལ། །ཁྲོ་ཚོགས་རབ་འཇིགས་གཡས་ནས་ཧཱུྃ་སྒྲ་ལྡིར། །མཁའ་འགྲོ་རབ་འཇིགས་གཡོན་ནས་ཕཊསྒྲ་སྒྲོག །ཕྱོགས་དང་ཕྱོགས་མཚམས་ལྕགས་སྡིག་ཟིང་ཟིང་འགུལ། །ལྷ་སྲིན་སྡེ་བརྒྱད་བྲན་བཞིན་རོལ་དུ་ཁྲིད། །གནོད་བྱེད་མ་ལུས་ཧབ་ཧབ་ཟས་སུ་ཟོ། །ཧོར་སོགས་འཇིགས་པའི་དམག་དཔུང་མྱུར་དུ་ཟློག །རང་རང་གནས་སུ་བྱང་ཆུབ་སྒྲུབ་པ་ཡི། །ཕྲིན་ལས་དུས་ལ་བབ་བོ་ས་མ་ཡ། །དྲག་པོའི་ལས་དང་འབྲེལ་བའི་བསྐུལ་དགོས་ན་སྐབས་འདིར་སྦྱར་བར་བྱ་སྟེ་གཞན་དུ་ཤེས་སོ། །སེང་གདོང་མའི་བསྐུལ་ནི༔ ཧཱུྃ༔ ང་ནི་དབང་དྲག་ཆེ་མཆོག་བདག༔ བྷྱོ་བཞེངས་ཤིག་བཞེངས་ཤིག་དབྱིངས་ནས་བཞེངས༔ ཁྲག་མཚོ་ཁོལ་མའི་དབུས་ནས་བཞེངས༔ སྲུང་མ་འཁོར་དུ་རོལ་ཞིང་བཞེངས༔ བདག་ལ་གནོད་པའི་དགྲ་བོ་འདི༔ བླ་མ་དམ་པའི་སྐུ་ལ་བསྡོས༔ སངས་རྒྱས་བསྟན་པའི་རྨིང་རྡོ་བཤིག༔ དཀོན་མཆོག་གསུམ་གྱི་དབུ་འཕང་སྨད༔ ཆོས་མཛད་ཡོངས་ལ་བརྙས་སུ་བཅུག༔ དགེ་བ་བཅུ་ཡི་བསོད་
ནམས་བཅག༔ མི་དགེ་བཅུ་པོ་དང་དུ་བླངས༔ རྣལ་འབྱོར་བདག་ལ་བསྡོས་སུ་བཙུགས༔ སྔགས་སྲུང་ཁྱེད་ལ་མཐུ་མེད་ཟེར༔ བསྐུལ་ལོ་མཁའ་འགྲོ་ལས་ལ་བསྐུལ༔ འདི་ལ་ཁྱེད་ཀྱི་མཐུ་མེད་ན༔ ཁྲག་འཐུང་ཆེན་པོའི་བཀའ་ཡང་བཅག༔ ཁྱོད་ཀྱང་དམ་ཚིག་ཉམས་པ་སྟེ༔ རྣལ་འབྱོར་ཡི་ཡང་མི་ཆད་དམ༔ རྒྱུ་འབྲས་བདེན་པས་མི་བསླུ་འམ༔ དགྲ་བོ་ཚེ་ཟད་དུས་ཐེབས་ན༔ ཁྱོད་ཀྱི་མཐུ་རྩལ་ཅི་ཞིག་བྱ༔ གློ་བུར་ཧུར་ཐུམ་དུས་ལ་བབ༔ སྲོག་རྩ་ཆོད་ལ་སྙིང་ཁྲག་འཐུང་༔ ལོ་དང་ཟླ་བར་བཞག་ཐབས་མེད༔ བསད་རྟགས་དོན་སྙིང་ད་ལྟ་ལོངས༔ དུས་ལ་བབ་བོ་ས་མ་ཡ༔ ཆད་མདོ་ནི། ཧཱུྃ༔ སྔོན་ཚེ་བར་དང་ཐ་མའི་བསྐལ་པ་ལ༔ སོགས། བརྟན་སྐྱོང་ནི། ཁྱད་པར་སློབ་དཔོན་པདྨའི་བཀའ་སྒྲུབ་པ༔ སོགས། ཆེད་བརྟན་དང་། བརྒྱན་པའི་གཏོར་མ་འདི་བཞེས༔ བགེགས་རིགས་སྟོང་ཕྲག་བརྒྱད་ཅུ་ཟློག༔ ཡེ་འདྲོག་སུམ་བརྒྱ་དྲུག་ཅུ་ཟློག༔ ལྟས་ངན་བརྒྱད་ཅུ་རྩ་གཅིག་ཟློག༔ ནད་རིགས་བཞི་བརྒྱ་རྩ་བཞི་ཟློག༔ རྐྱེན་ངན་ཉི་ཁྲི་ཆིག་སྟོང་ཟློག༔ གློ་བུར་དགུ་བཅུ་རྩ་གཅིག་ཟློག༔ དུས་མིན་འཆི་བ་རྣམ་བརྒྱད་
ཟློག༔ དགྲ་སྣ་དམག་སྣ་ཇག་སྣ་ཟློག༔ མི་ཡི་ན་ཚ་ཐམས་ཅད་ཟློག༔ ནོར་གྱི་གོད་ཀ་ཐམས་ཅད་ཟློག༔ ཞིང་གི་བཙའ་སད་སེར་གསུམ་ཟློག༔ བཟློག་པའི་རྒྱལ་པོས་བཟློག་ཏུ་གསོལ༔ བསྒྱུར་བའི་རྒྱལ་པོས་བསྒྱུར་དུ་གསོལ༔ བཟློག་བསྒྱུར་ཕྲིན་ལས་དུས་ལ་བབ༔ དུས་ལ་བབ་བོ་ས་མ་ཡ༔ བཅོལ་བའི་ཕྲིན་ལས་དུས་ལ་བབ༔ དུས་ལ་བབ་བོ་ས་མ་ཡ༔ དྷོ་བློ་ཟློག་ཟློག༔ ཨཀཿསཿམཿརཿཙཤདརསམར༅ཡཕཊ༔ ཨོཾ་ཨཱཿ ཧཱུྃ་ཨརྩིག་སོགས། ཨཡམཐདུརུཙཤནསམ༔ བློ་བློ་ཟློག་ཟློག༔ བློ་ཟློག་ཅིག༔ ཅེས་ཕུལ་ལོ།། ཧཱུྃ༔ ང་ནི་དབང་དྲག་ཆེ་མཆོག་བདག༔ གནོད་བྱེད་འབྱུང་པོ་དམ་སྲི་རྣམས༔ གཏོར་གཞོང་རི་རབ་འོག་ཏུ་མནན༔ དྲག་པོ་ཡབ་ཡུམ་བྲོ་ར་བཙུགས༔ བྱམས་མགོན་བསྟན་པ་མ་བྱུང་བར༔ སྟེང་གི་ཕྱོགས་སུ་མ་ལྡངས་ཤིག༔ ཨོ་ལཾ་ཨཱལཾ་ཧཱུཾ་ལཾ་སམྦྷ་ཡ་ནན༔ ཨ་རཱ་གས་སོ།། ༈ ཆད་མདོ་བྱ་བ་ནི། གཏོར་མ་ལ་དགྲ་བགེགས་བཀུག་བསྟིམ་བྱས་ཏེ་བདུད་རྩིར་དམིགས་ལ། ཧཱུྃ༔ སྔོན་ཚེ་བར་དང་ཐ་མའི་བསྐལ་པ་ལ༔ སྙིགས་མ་རྩོད་ལྡན་དུས་དང་ལྷ་མིའི་གནས༔ ཀུན་བཟང་སྣང་བ་མཐའ་ཡས་པདྨ་འབྱུང་༔
རྒྱུད་གསུང་གཏེར་དུ་སྦས་དང་བཏོན་པའི་ཚེ༔ སྣང་སྲིད་སོ་སོའི་ཁས་བླངས་དམ་བཅས་བཞིན༔ མཆོད་གཏོར་བཞེས་ལ་ཕྲིན་ལས་འགྲུབ་པར་མཛོད༔ འགོང་པོ་སྤུན་དགུ་རྒྱ་འདྲེའི་གནོད་པ་དང་༔ ཧོར་སོག་འཇིགས་པའི་དམག་དཔུང་བཟློག་ཏུ་གསོལ༔ བཤལ་ཆུས་བརྟན་མ་སྐྱོང་བ་ནི། ཁྱད་པར་སློབ་དཔོན་པདྨའི་བཀའ་སྒྲུབ་པ༔ བོད་ཁམས་སྐྱོང་བའི་བརྟན་མ་ཆེན་མོ་ནི༔ བདུད་མོ་བཞི་དང་གནོད་སྦྱིན་སྨན་མོ་བཞི༔ འཁོར་དང་ལྷབ་ལྷུབ་སིལ་སྙན་དགྲ་དང་བཅས༔ འདིར་གཤེགས་བཀའ་ཡི་གཏོར་མའི་བཤལ་ཆུ་བཞེས༔ བོད་ཁམས་དཀར་པོའི་ཆོས་ལ་འགོད་པ་དང་༔ ཡང་ཟབ་བསྟན་པ་ཕྱོགས་བཅུར་རྒྱས་པ་དང་༔ མཐོང་ཐོས་དྲན་རེག་སྨིན་ཅིང་གྲོལ་བར་མཛོད༔ དཀྱུས་ལ་ཕྱག་ལེན་དུ་མི་མཛད་ཀྱང་དྲག་ལས་སོགས་ཀྱི་མཇུག་ཏུ་རྟ་བྲོ་བྱ་བ་ནི། གཏོར་གཞོང་སྒྲུབ་ལ་འགུགས་གཞུག་ནི། ན་མོ། དཀོན་མཆོག་གསུམ་དང་རྩ་བ་གསུམ་གྱི་བདེན་པས༔ གནོད་བྱེད་དམ་སྲི་སྒབ་འདྲེ་ཐམས་ཅད་གཏོར་གཞོང་རི་རབ་འབར་བའི་འོག་ཏུ་ཁུག་ཅིག༔ ཛཿཧཱུྃ་བཾ་ཧོ༔ གཏོར་བྲོ་ནི། ཧཱུྃ། སྟོང་གསུམ་སྟོང་གི་འཇིག་རྟེན་ན། །ཞིང་བཅུ་བསྒྲལ་བའི་གདན་སྟེང་
དུ། །དབང་དྲག་ལྷ་ཚོགས་བྲོ་བརྡུང་བས། །དགྲ་ནི་ཐལ་བར་བརླག་པའི་བྲོ། །བགེགས་ནི་ཕྱེ་མར་འཐག་པའི་བློ། །རྣལ་འབྱོར་དམ་སྲི་འདུལ་བའི་བྲོ། །བར་ཆད་མེད་པར་བརྡུང་བར་བྱ། །ཨོཾ་སུམྦྷ་ནི་སོགས༔ ཧཱུྃ་བཞིའི་སྔགས་མཐར། ཧཱུཾ་ཧཱུཾ་ལཾ་ལཾ། ༀ་ལཾ་ཨཱལཾ་ཧཱུཾ་ལཾ་སམྦྷ་ཡ་ནན། དེ་ནས་གཏོར་གཞོང་ཁ་ཡར་བཏེག་ལ། སརྦ་སིདྡྷི་ཕ་ལ་ཨ་ལ་ལ་ཧོ། མདུན་བསྐྱེད་ལ་རྗེས་གཏང་རག་མཆོད་པ་དང་བསྟོད་པར་འདོད་ན། མཆོད་པ་ཁ་གསོས་ལ། མཆོད་པ་ནི། ཨོཾ་ཨཱཿཧཱུྃ༔ མཆོད་འོས་ཕྱི་ནང་སྣོད་བཅུད་ཀུན༔ བློ་ཡིས་སྤྲུལ་ལམ་ལྷུན་གྱིས་གྲུབ༔ ཏིང་འཛིན་མཉམ་ཉིད་ཆེན་པོ་རུ༔ དཀོན་མཆོག་སྤྱི་འདུས་རྒྱལ་བར་འབུལ་ཨོཾ་བཛྲ་ཨགྷཾ་པཱཏྱཾ་པུཊྚེ་དྷུ་པེ་ཨཱ་ལོ་ཀེ་གནྡྷེ་ནེ་ཝིདྱ་ཤརྡ་མ་ཧཱ་པཉྩ་ཨ་མྲྀ་ཏ་རཀྟ་བ་ལིཾ་ཏ་ཁཱ་ཧི༔ བསྟོད་པ་ནི༔ཧྲཱིཿརྒྱལ་བ་ཐམས་ཅད་ཡེ་ཤེས་ཀློང་དུ་གཅིག༔ ཆོས་ཉིད་དོན་ལ་ཆ་ལུགས་མི་མངའ་ཡང་༔ ཐབས་མཁས་གང་འདུལ་སོ་སོའི་སྐུར་སྟོན་པ༔ ཐུགས་རྗེས་སྤྲུལ་བསྒྱུར་འགྱེད་ལ་ཕྱག་འཚལ་བསྟོད༔ དངོས་གྲུབ་བླངས་བ་ནི། ཨེ་མ་ཧོ༔ བདག་གཞན་བླ་མེད་ཚོགས་མཆོད་འདི་དག་གིས༔ སྡིག་སྒྲིབ་ཉམས་ཆག་མ་ལུས་ཀུན་བྱང་ནས༔ ཚེ་འདི་
ཉིད་ལ་རིག་འཛིན་མཆོག་གྲུབ་ཅིང་༔ བྱིན་རླབས་རྩལ་དབང་གཟི་བྱིན་ནུས་མཐུ་ལྡན༔ སྐུ་གསུང་ཐུགས་ཀྱི་དངོས་གྲུབ་བསྩལ་དུ་གསོལ༔ ཀཱ་ཡ་ཝཱཀ་ཙིཏྟ་སིདྡྷི་ཧཱུྃ༔ ནོངས་བཤགས་བཟོད་གསོལ་ནི།། མ་འབྱོར་པ་དང་ཉམས་པ་དང་༔ .སོགས་ཡིག་བརྒྱ་དབྱངས་གསལ་བརྟན་བཞུགས་སྤྱི་ལྟར་བྱའོ། །རྗེས་བསྔོ་སྨོན་ནི། ཨོཾ་ཨཱཿཧཱུྃ༔ སྐྱབས་མེད་མགོན་མེད་སྐྱེ་འགྲོ་འདི་དག་ཀུན༔ འཁོར་བའི་འཁྲུལ་འཁོར་ཀུན་གྱི་གཞི་རྟེན་ལ༔ རྟེན་འབྲེལ་བཅུ་གཉིས་ཤིང་རྟ་ལྟ་བུ་ཡི༔ འཕང་ལོ་འདྲ་བ་མྱུར་དུ་ཞིག་གྱུར་ཅིག༔ བླ་མེད་རྫོགས་པའི་བྱང་ཆུབ་མྱུར་ཐོབ་ཤོག༔ ཤིས་བརྗོད་ནི། ཨེ་མ་ཧོ༔ ཤེས་བྱའི་དོན་ལ་མ་རྨོངས་པའི༔ བླ་མ་དམ་པའི་བཀྲ་ཤིས་ཤོག༔ གང་ལ་བསམ་པ་དེ་ཡིས་འགྲུབ༔ ཡི་དམ་ལྷ་ཡི་བཀྲ་ཤིས་ཤོག༔ སྐུ་གསུང་ཐུགས་ཀྱི་བྷ་ག་ལ༔ ཕྱག་རྒྱ་ཆེན་པོའི་བཀྲ་ཤིས་ཤོག༔ མདུན་བསྐྱེད་ཡེ་ཤེས་པ་རྟེན་ལ་བཞུགས་པ་དང་། གཤེགས་གསོལ་ནི། ལྷ་རྣམས་ནོངས་པ་གང་མཆིས་བཟོད་པར་གསོལ། །རང་གནས་གཤེགས་སམ་རྟེན་ལ་ཅི་བདེར་བཞུགས། །འཇིག་རྟེན་འཇིག་རྟེན་འདས་པའི་དགེ་ལེགས་ཚོགས། །གོང་ནས་གོང་དུ་འཕེལ་བའི་བཀྲ་ཤིས་
ཤོག །དཀྱིལ་འཁོར་གཞལ་ཡས་འདིར་ཡང་བཀྲ་ཤིས་ཤིང་། །ཉིན་ཡང་བཀྲ་ཤིས་དཔལ་འབར་ཏ་ལ་ལ། །མཚན་ཡང་བཀྲ་ཤིས་དཔལ་འབར་ཀྱི་ལི་ལི། །ཉིན་མཚན་རྟག་ཏུ་བཀྲ་ཤིས་བདེ་ལེགས་ཤོག །མངྒ་ལཾ་སིདྡྷི་ཛ་ཡ་ཨ་ལ་ལ་ཧོ༔ བསྐྱེད་རིམ་བསྡུ་ལྡང་རྫོགས་རིམ་ནི། ཨོཾ་ཨཱཿཧཱུྃ༔ སྣོད་བཅུད་སྣང་སྲིད་ཐམས་ཅད་ཀུན༔ རྒྱུ་ལུས་གཞལ་ཡས་ཁང་དུ་བསྡུ༔ དེ་ཡང་ཡས་མར་འོད་དུ་ཞུ༔ སྔགས་ཕྲེང་གསེར་གྱི་རྡོ་རྗེར་བསྡུ༔ དེ་ཡང་འཇའ་འམ་ཆུ་བུར་ལྟར༔ དམིགས་མེད་རྒྱ་ཡན་ལྷུག་པར་བཞག༔ རང་བཞིན་དབྱིངས་རིག་མ་བུ་འདྲེས༔ གདོད་མའི་ཀུན་བཟང་མཇལ་བར་གྱུར༔ མྱང་བན་ཏིང་འཛིན་བཟང་པོའི་སྐྱེས་མཐའ་རིག་འཛིན་འཇའ་ཚོན་སྙིང་པོས་བྲག་ལུང་ཧོ་འཕྲང་མཚོ་ནས་གདན་དྲངས་པའོ། །རྒྱུན་སྤྱོད་ནི། །ཨོཾ་ཨཱཧཱུྃ༔ བཛྲ་གུ་རུ་པདྨ་སིདྡྷི་ཧཱུྃ༔་གཟུགས་སྣང་ཐམས་ཅད་གསལ་སྟོང་ལྷ་ཡི་སྐུ༔ སྒྲ་གྲག་ཐམས་ཅད་བརྗོད་བྲལ་སྔགས་ཀྱི་སྒྲ༔ དྲན་རྟོག་ཐམས་ཅད་རང་གྲོལ་ངོས་བཟུང་བྲལ༔ དམིགས་མེད་ཁྱབ་བརྡལ་ལྷུན་གྲུབ་ཆེན་པོར་ཤོག༔ ཅེས་བརྗོད་ལ་ཁྱེར་སོ་གསུམ་གྱིས་མཐའ་བརྒྱན་པར་བྱའོ། །ཞེས་དཀོན་མཆོག་སྤྱི་འདུས་ལས་བསྒྲིགས་འདི་ཡང་ཨོ་རྒྱན་རིག་འཛིན་སོགས་ཀྱིས་ཚེས་
བཅུ་བྱེད་དུས་༧རཱ་ག་ཨ་སྱས་བསྒྲིགས་པའོ། །བསྙེན་དམིགས་གསུམ་དང་དྲག་སེང་བསྐྱེད་ཆོག་ཨ་རཱ་གའི་ཟིན་བྲིས་ལྟར་ཚིགས་སུ་བཅད་པ་ཉིད་དོ། ༈་།དཀོན་སྤྱིའི་བཀྲ་ཤིས་ནི། བཀྲ་ཤིས་ཉི་མས་སྟོང་ཁམས་གདལ་བ་ལ༔ འདོད་དགུ་དཔལ་འབར་ཡོན་ཏན་རྫོགས་པའི་གཙོ༔ ཆོས་སྐུ་སྣང་བ་མཐའ་ཡས་བཀྲ་ཤིས་གང་༔ བཀྲ་ཤིས་དེས་ཀྱང་དེང་འདིར་བདེ་ལེགས་ཤོག༔ བཀྲ་ཤིས་ཟླ་བ་ནམ་མཁའི་དབྱིངས་ཁྱབ་པས༔ ལུས་ཅན་ཀུན་གྱི་རེ་བ་རྫོགས་མཛད་པའི༔ ལོངས་སྐུ་ཐུགས་རྗེ་ཆེན་པོའི་བཀྲ་ཤིས་གང་༔ བཀྲ་ཤིས་དེས་ཀྱང་དེང་འདིར་བདེ་ལེགས་ཤོག༔ བཀྲ་ཤིས་སྐར་ཚོགས་འབུམ་ཕྲག་ཡངས་པ་ལ༔ གང་ལ་གང་འདུལ་དེ་ལ་དེར་སྟོན་པའི༔ སྤྲུལ་སྐུ་པདྨ་འབྱུང་གནས་བཀྲ་ཤིས་གང་༔ བཀྲ་ཤིས་དེས་ཀྱང་དེང་འདིར་བདེ་ལེགས་ཤོག༔ བཀྲ་ཤིས་རི་རབ་གླིང་བཞིའི་བསྐོར་བ་ལ༔ ཕྱོགས་བཅུ་ཀུན་ཏུ་འཇའ་ཚོན་སྤྲིན་ཕུང་འཁྲིགས༔ མཁའ་འགྲོ་ཡེ་ཤེས་མཚོ་རྒྱལ་བཀྲ་ཤིས་གང་༔ བཀྲ་ཤིས་དེས་ཀྱང་དེང་འདིར་བདེ་ལེགས་ཤོག༔ བཀྲ་ཤིས་ཆར་འབེབས་སྙན་པའི་འབྲུག་སྒྲ་སྒྲོག༔ གདུལ་བྱའི་ལོ་ཏོག་མེ་ཏོག་འབྲས་བུ་སྨིན༔ མྱང་བན་ཏིང་འཛིན་
བཟང་པོའི་བཀྲ་ཤིས་གང་༔ བཀྲ་ཤིས་དེས་ཀྱང་དེང་འདིར་བདེ་ལེགས་ཤོག༔ བཀྲ་ཤིས་གངས་ཅན་ཀོང་ཡུལ་ཤར་ཕྱོགས་སུ༔ ལྷ་སྲིན་བཏུལ་ཞིང་ཟབ་གཏེར་བསྟན་པ་རྒྱས༔ གཏེར་སྟོན་སྤྲུལ་པའི་སྐྱེས་མཆོག་བཀྲ་ཤིས་གང་༔ བཀྲ་ཤིས་དེས་ཀྱང་དེང་འདིར་བདེ་ལེགས་ཤོག༔ བཀྲ་ཤིས་གངས་ཅན་རི་བོ་ཤིན་རུ༔ བི་མའི་རྣམ་འཕྲུལ་གདམས་པའི་མཛོད་འཆང་བ༔ འཛམ་གླིང་ནོར་བུ་བརྒྱན་པའི་བཀྲ་ཤིས་གང་༔ བཀྲ་ཤིས་དེས་ཀྱང་དེང་འདིར་བདེ་ལེགས་ཤོག༔ བཀྲ་ཤིས་ཐུབ་བསྟན་ཐེག་མཆོག་ཁང་བཟང་རྩིར༔ རྣམ་མང་རོལ་གར་སྒྲུབ་པའི་རྒྱལ་མཚན་བསྒྲེང་༔ སྐྱབས་མཆོག་སྣ་ཚོགས་རང་གྲོལ་བཀྲ་ཤིས་གང་༔ བཀྲ་ཤིས་དེས་ཀྱང་དེང་འདིར་བདེ་ལེགས་ཤོག༔ བཀྲ་ཤིས་སྒྲུབ་བརྒྱུད་ཀླུ་དབང་གདེངས་ཀའི་རྩེར༔ བསོད་ནམས་ཡེ་ཤེས་རིན་ཆེན་དཔལ་འབར་བ༔ ཁྱབ་བདག་བཟང་པོ་རྡོ་རྗེའི་བཀྲ་ཤིས་གང་༔ བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །སྒམ་པོའི་པར་བུ་ལས་ཀྱང་བཤུས། བཀྲ་ཤིས་གང་ཞིག་ངོམ་ཡུལ་དཔལ་རིའི་རྩེར༔ བཀའ་གཏེར་མདོ་རྒྱུད་མན་ངག་མཛོད་འཆང་བ༔་མཁས་གྲུབ་ཀརྨ་ཆགས་མེད་བཀྲ་ཤིས་
གང་༔ བཀྲ་ཤིས་དེས་ཀྱང་དེང་འདིར་བདེ་ལེགས་ཤོག༔ བཀྲ་ཤིས་གང་ཞིག་རིགས་བརྒྱའི་ཁྱབ་བདག་ཆེ༔ སྨིན་གྲོལ་གདམས་པའི་བུམ་བཟང་འཛིན་མཁས་པ༔ དྲིན་ཆེན་རྩ་བའི་བླ་མའི་བཀྲ་ཤིས་གང་༔ བཀྲ་ཤིས་དེས་ཀྱང་དེང་འདིར་བདེ་ལེགས་ཤོག༔ བཀྲ་ཤིས་གང་ཞིག་ཐེག་དགུ་རྒྱུད་སྡེ་བཞིས༔ མཆོག་ཐུན་དངོས་གྲུབ་ཆར་ལྟར་འབེབས་མཛད་པ༔ ཡི་དམ་དཀྱིལ་འཁོར་ལྷ་ཡི་བཀྲ་ཤིས་གང་༔ བཀྲ་ཤིས་དེས་ཀྱང་དེང་འདིར་བདེ་ལེགས་ཤོག༔ བཀྲ་ཤིས་གང་ཞིག་གནས་ཡུལ་ཀུན་གྱི་བདག༔ རྩ་ཐིག་རླུང་གསུམ་རྟེན་འབྲེལ་འཆར་བའི་སྒོ༔ དམ་ལྡན་བརྩེ་སྐྱོང་མཁའ་འགྲོའི་བཀྲ་ཤིས་གང་༔ བཀྲ་ཤིས་དེས་ཀྱང་དེང་འདིར་བདེ་ལེགས་ཤོག༔ བཀྲ་ཤིས་གང་ཞིག་ཕྲིན་ལས་སྒྲུབ་པའི་དཔལ༔ དྲག་རྩལ་ཐོགས་མེད་དགྲ་བགེགས་ཚར་གཅོད་པ༔ བསྟན་པ་གཉེར་སྐྱོང་ཆོས་སྐྱོང་བཀྲ་ཤིས་གང་༔ བཀྲ་ཤིས་དེས་ཀྱང་དེང་འདིར་བདེ་ལེགས་ཤོག༔ བཀྲ་ཤིས་གང་ཞིག་འདོད་དགུའི་གཏེར་འཆང་བ༔ ཡིད་བཞིན་རེ་བསྐང་དབང་གི་རྒྱལ་པོ་ལྟར༔ འབད་མེད་ལྷུན་གྲུབ་ནོར་ལྷའི་བཀྲ་ཤིས་གང་༔ བཀྲ་ཤིས་
དེས་ཀྱང་དེང་འདིར་བདེ་ལེགས་ཤོག༔ བཀྲ་ཤིས་གང་ཞིག་ནོར་འཛིན་ཁྱོན་ཡངས་པར༔ བསྟན་པ་སྐྱོང་ཞིང་འགྲོ་ལ་བདེ་སྐྱིད་སྤེལ༔ དམ་ཚིག་རྗེས་གཅོད་ལེགས་ཉེས་སྟངས་འཛིན་པ༔ དཀར་ཕྱོགས་གཞི་བདག་གཏེར་སྲུང་བཀྲ་ཤིས་གང་༔ བཀྲ་ཤིས་དེས་ཀྱང་དེང་འདིར་བདེ་ལེགས་ཤོག༔ བཀྲ་ཤིས་གང་ཞིག་སྨོན་ལམ་རྟེན་འབྲེལ་ཀུན༔ སྨིན་གྲོལ་ལམ་གྱི་དམ་ཚིག་གཅིག་འབྲེལ་བ༔ མཆེད་ལྕམ་མི་འབྲལ་འགྲོགས་པའི་བཀྲ་ཤིས་གང་༔ བཀྲ་ཤིས་དེས་ཀྱང་དེང་འདིར་བདེ་ལེགས་ཤོག༔ བཀྲ་ཤིས་གང་ཞིག་མི་ཤིགས་རྡོ་རྗེའི་ཚེ༔ མི་འགྱུར་གཡུང་དྲུང་མི་ནུབ་རྒྱལ་མཚན་ལྟར༔ རྟག་བརྟན་འཆི་མེད་ཚེ་ཡི་བཀྲ་ཤིས་གང་༔ བཀྲ་ཤིས་དེས་ཀྱང་དེང་འདིར་བདེ་ལེགས་ཤོག༔ བཀྲ་ཤིས་གང་ཞིག་བསོད་ནམས་དཔག་བསམ་ཤིང་༔ དཔལ་འབྱོར་མངའ་ཐང་འབྲས་བུ་རབ་སྨིན་པ༔ ཕུན་ཚོགས་ལོ་འདབ་རྒྱས་པའི་བཀྲ་ཤིས་གང་༔ བཀྲ་ཤིས་དེས་ཀྱང་དེང་འདིར་བདེ་ལེགས་ཤོག༔ བཀྲ་ཤིས་གང་ཞིག་སྒྲུབ་པའི་གནས་མཆོག་འདིར༔ བསྟན་པ་དར་རྒྱས་ཕུན་སུམ་ཚོགས་པ་ཡི༔ བསམ་དོན་ལྷུན་གྱིས་གྲུབ་པའི་བཀྲ་ཤིས་གང་༔ བཀྲ་
ཤིས་དེས་ཀྱང་དེང་འདིར་བདེ་ལེགས་ཤོག༔ བཀྲ་ཤིས་ཀྱི་ཁ་བཀང་༔ ཡང་ཚོགས་མཆོད་བརྒྱ་རྩའི་སྐབས་ཉམས་ལ་ཤར་ནས་བྱུང་རྒྱལ་དུ་ཚེས་བཅུ་དགེ་བར་རྒྱལ་ཁམས་ཤ་ས་རྡ་རས་བྲིས་པ་དགེ༔ ༈ གླེགས་བམ་འདི་ཉིད་བཞེངས་པ་དང་། །འཆང་དང་ཀློག་པའི་དགེ་བའི་མཐུས། །བདག་ཅག་མཆེད་གཉིས་འཁོར་བཅས་དང་། །འཚོ་བ་སྦྱོར་བའི་ཡོན་བདག་རྣམས། །ཚེ་འདིར་བཀྲ་ཤིས་ཚེ་རིང་ཞིང་། །བདེ་སྐྱིད་ཕུན་སུམ་ཚོགས་པ་དང་། །ནམ་ཞིག་འདི་ནས་འཕོས་མ་ཐག །བདེ་བ་ཅན་དུ་སྐྱེ་ཕྱིར་བསྔོ། །ཞེས་པ་༧ཨ་རཱ་གས་སོ།། ༧ ཁམས་སྟོད་སྒོམ་སྡེ་ནང་ཆེན་འབང་སྒང་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།